𑁨𑁧. 𑀧𑀯𑀸𑀭𑀡𑀸𑀯𑀺𑀦𑀺𑀘𑁆𑀙𑀬𑀓𑀣𑀸

𑁧𑁧𑁬. 𑀏𑀯𑀁 𑀧𑀝𑀺𑀕𑁆𑀕𑀳𑀡𑀯𑀺𑀦𑀺𑀘𑁆𑀙𑀬𑀁 𑀓𑀣𑁂𑀢𑁆𑀯𑀸 𑀇𑀤𑀸𑀦𑀺 𑀧𑀯𑀸𑀭𑀡𑀸𑀯𑀺𑀦𑀺𑀘𑁆𑀙𑀬𑀁 𑀓𑀣𑁂𑀢𑀼𑀁 ‘‘𑀧𑀝𑀺𑀓𑁆𑀔𑁂𑀧𑀧𑀯𑀸𑀭𑀡𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀝𑀺𑀓𑁆𑀔𑀺𑀧𑀦𑀁 𑀧𑀝𑀺𑀓𑁆𑀔𑁂𑀧𑁄, 𑀅𑀲𑀫𑁆𑀧𑀝𑀺𑀘𑁆𑀙𑀦𑀦𑁆𑀢𑀺 𑀅𑀢𑁆𑀣𑁄. 𑀧𑀯𑀸𑀭𑀺𑀬𑀢𑁂 𑀧𑀯𑀸𑀭𑀡𑀸, 𑀧𑀝𑀺𑀲𑁂𑀥𑀦𑀦𑁆𑀢𑁆𑀬𑀢𑁆𑀣𑁄. 𑀧𑀝𑀺𑀓𑁆𑀔𑁂𑀧𑀲𑀗𑁆𑀔𑀸𑀢𑀸 𑀧𑀯𑀸𑀭𑀡𑀸 𑀧𑀝𑀺𑀓𑁆𑀔𑁂𑀧𑀧𑀯𑀸𑀭𑀡𑀸. 𑀅𑀣 𑀯𑀸 𑀧𑀝𑀺𑀓𑁆𑀔𑁂𑀧𑀯𑀲𑁂𑀦 𑀧𑀯𑀸𑀭𑀡𑀸 𑀧𑀝𑀺𑀓𑁆𑀔𑁂𑀧𑀧𑀯𑀸𑀭𑀡𑀸. 𑀧𑀜𑁆𑀘𑀦𑁆𑀦𑀁 𑀪𑁄𑀚𑀦𑀸𑀦𑀁 𑀅𑀜𑁆𑀜𑀢𑀭𑀁 𑀪𑀼𑀜𑁆𑀚𑀦𑁆𑀢𑀲𑁆𑀲 𑀅𑀜𑁆𑀜𑀲𑁆𑀫𑀺𑀁 𑀪𑁄𑀚𑀦𑁂 𑀅𑀪𑀺𑀳𑀝𑁂 𑀧𑀝𑀺𑀓𑁆𑀔𑁂𑀧𑀲𑀗𑁆𑀔𑀸𑀢𑀸 𑀧𑀯𑀸𑀭𑀡𑀸𑀢𑀺 𑀲𑀫𑁆𑀩𑀦𑁆𑀥𑁄.

𑁧𑁧𑁭. 𑀬𑀁 𑀅𑀲𑁆𑀦𑀸𑀢𑀻𑀢𑀺 𑀬𑀁 𑀪𑀼𑀜𑁆𑀚𑀢𑀺. 𑀅𑀫𑁆𑀩𑀺𑀮𑀧𑀸𑀬𑀸𑀲𑀸𑀤𑀻𑀲𑀽𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀔𑀻𑀭𑀧𑀸𑀬𑀸𑀲𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀢𑀢𑁆𑀣 𑀅𑀫𑁆𑀩𑀺𑀮𑀧𑀸𑀬𑀸𑀲𑀕𑁆𑀕𑀳𑀡𑁂𑀦 𑀢𑀓𑁆𑀓𑀸𑀤𑀺𑀅𑀫𑁆𑀩𑀺𑀮𑀲𑀁𑀬𑀼𑀢𑁆𑀢𑀸 𑀖𑀦𑀬𑀸𑀕𑀼 𑀯𑀼𑀢𑁆𑀢𑀸. 𑀔𑀻𑀭𑀧𑀸𑀬𑀸𑀲𑀕𑁆𑀕𑀳𑀡𑁂𑀦 𑀔𑀻𑀭𑀲𑀁𑀬𑀼𑀢𑁆𑀢𑀸 𑀬𑀸𑀕𑀼 𑀲𑀗𑁆𑀕𑀬𑁆𑀳𑀢𑀺. 𑀧𑀯𑀸𑀭𑀡𑀁 𑀚𑀦𑁂𑀢𑀻𑀢𑀺 𑀅𑀦𑀢𑀺𑀭𑀺𑀢𑁆𑀢𑀪𑁄𑀚𑀦𑀸𑀧𑀢𑁆𑀢𑀺𑀦𑀺𑀩𑀦𑁆𑀥𑀦𑀁 𑀧𑀝𑀺𑀓𑁆𑀔𑁂𑀧𑀁 𑀲𑀸𑀥𑁂𑀢𑀺. 𑀓𑀢𑁄𑀧𑀺 𑀧𑀝𑀺𑀓𑁆𑀔𑁂𑀧𑁄 𑀅𑀦𑀢𑀺𑀭𑀺𑀢𑁆𑀢𑀪𑁄𑀚𑀦𑀸𑀧𑀢𑁆𑀢𑀺𑀦𑀺𑀩𑀦𑁆𑀥𑀦𑁄 𑀦 𑀳𑁄𑀢𑀺, 𑀅𑀓𑀢𑀝𑁆𑀞𑀸𑀦𑁂𑀬𑁂𑀯 𑀢𑀺𑀝𑁆𑀞𑀢𑀻𑀢𑀺 𑀆𑀳 ‘‘𑀧𑀯𑀸𑀭𑀡𑀁 𑀦 𑀚𑀦𑁂𑀢𑀻’’𑀢𑀺.

‘‘𑀬𑀸𑀕𑀼-𑀲𑀤𑁆𑀤𑀲𑁆𑀲 𑀧𑀯𑀸𑀭𑀡𑀚𑀦𑀓𑀬𑀸𑀕𑀼𑀬𑀸𑀧𑀺 𑀲𑀸𑀥𑀸𑀭𑀡𑀢𑁆𑀢𑀸 ‘𑀬𑀸𑀕𑀼𑀁 𑀕𑀡𑁆𑀳𑀣𑀸’𑀢𑀺 𑀯𑀼𑀢𑁆𑀢𑁂𑀧𑀺 𑀧𑀯𑀸𑀭𑀡𑀸 𑀳𑁄𑀢𑀻𑀢𑀺 𑀧𑀯𑀸𑀭𑀡𑀁 𑀚𑀦𑁂𑀢𑀺𑀬𑁂𑀯𑀸𑀢𑀺 𑀯𑀼𑀢𑁆𑀢’’𑀦𑁆𑀢𑀺 𑀢𑀻𑀲𑀼𑀧𑀺 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀁. 𑀢𑀁 𑀧𑀭𑀢𑁄 𑀢𑀢𑁆𑀣𑁂𑀯 ‘‘𑀪𑀢𑁆𑀢𑀫𑀺𑀲𑁆𑀲𑀓𑀁 𑀬𑀸𑀕𑀼𑀁 𑀆𑀳𑀭𑀺𑀢𑁆𑀯𑀸’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑀓𑀸𑀭𑀡𑁂𑀦 𑀦 𑀲𑀫𑁂𑀢𑀺. 𑀯𑀼𑀢𑁆𑀢𑀜𑁆𑀳𑀺 𑀢𑀢𑁆𑀣 𑁋 𑀳𑁂𑀝𑁆𑀞𑀸 𑀅𑀬𑀸𑀕𑀼𑀓𑁂 𑀦𑀺𑀫𑀦𑁆𑀢𑀦𑁂 𑀉𑀤𑀓𑀓𑀜𑁆𑀚𑀺𑀓𑀔𑀻𑀭𑀸𑀤𑀻𑀳𑀺 𑀲𑀤𑁆𑀥𑀺𑀁 𑀫𑀤𑁆𑀤𑀺𑀢𑀁 𑀪𑀢𑁆𑀢𑀫𑁂𑀯 𑀲𑀦𑁆𑀥𑀸𑀬 ‘‘𑀬𑀸𑀕𑀼𑀁 𑀕𑀡𑁆𑀳𑀣𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀧𑀯𑀸𑀭𑀡𑀸 𑀳𑁄𑀢𑀺. ‘‘𑀪𑀢𑁆𑀢𑀫𑀺𑀲𑁆𑀲𑀓𑀁 𑀬𑀸𑀕𑀼𑀁 𑀆𑀳𑀭𑀺𑀢𑁆𑀯𑀸’’𑀢𑀺 𑀏𑀢𑁆𑀣 𑀧𑀦 𑀯𑀺𑀲𑀼𑀁 𑀬𑀸𑀕𑀼𑀬𑀸 𑀯𑀺𑀚𑁆𑀚𑀫𑀸𑀦𑀢𑁆𑀢𑀸 𑀧𑀯𑀸𑀭𑀡𑀸 𑀦 𑀳𑁄𑀢𑀻𑀢𑀺. 𑀢𑀲𑁆𑀫𑀸 𑀢𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 𑀔𑀻𑀭𑀸𑀤𑀻𑀳𑀺 𑀲𑀤𑁆𑀥𑀺𑀁 𑀫𑀤𑁆𑀤𑀺𑀢𑀁 𑀪𑀢𑁆𑀢𑀫𑁂𑀯 𑀲𑀦𑁆𑀥𑀸𑀬 ‘‘𑀬𑀸𑀕𑀼𑀁 𑀕𑀡𑁆𑀳𑀣𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀬𑀸𑀕𑀼𑀬𑀸𑀯 𑀢𑀢𑁆𑀣 𑀅𑀪𑀸𑀯𑀢𑁄 𑀧𑀯𑀸𑀭𑀡𑀸 𑀳𑁄𑀢𑀻𑀢𑀺 𑀏𑀯𑀫𑁂𑀢𑁆𑀣 𑀓𑀸𑀭𑀡𑀁 𑀯𑀢𑁆𑀢𑀩𑁆𑀩𑀁. 𑀏𑀯𑀜𑁆𑀳𑀺 𑀲𑀢𑀺 𑀧𑀭𑀢𑁄 ‘‘𑀬𑁂𑀦𑀸𑀧𑀼𑀘𑁆𑀙𑀺𑀢𑁄, 𑀢𑀲𑁆𑀲 𑀅𑀢𑁆𑀣𑀺𑀢𑀸𑀬𑀸’’𑀢𑀺 𑀅𑀝𑁆𑀞𑀓𑀣𑀸𑀬 𑀯𑀼𑀢𑁆𑀢𑀓𑀸𑀭𑀡𑁂𑀦𑀧𑀺 𑀲𑀁𑀲𑀦𑁆𑀤𑀢𑀺, 𑀅𑀜𑁆𑀜𑀣𑀸 𑀕𑀡𑁆𑀞𑀺𑀧𑀤𑁂𑀲𑀼𑀬𑁂𑀯 𑀧𑀼𑀩𑁆𑀩𑀸𑀧𑀭𑀯𑀺𑀭𑁄𑀥𑁄 𑀆𑀧𑀚𑁆𑀚𑀢𑀺, 𑀅𑀝𑁆𑀞𑀓𑀣𑀸𑀬 𑀘 𑀦 𑀲𑀫𑁂𑀢𑀻𑀢𑀺. 𑀲𑀘𑁂…𑀧𑁂… 𑀧𑀜𑁆𑀜𑀸𑀬𑀢𑀻𑀢𑀺 𑀇𑀫𑀺𑀦𑀸 𑀯𑀼𑀢𑁆𑀢𑀧𑁆𑀧𑀫𑀸𑀡𑀲𑁆𑀲 𑀫𑀘𑁆𑀙𑀫𑀁𑀲𑀔𑀡𑁆𑀟𑀲𑁆𑀲 𑀦𑀳𑀸𑀭𑀼𑀦𑁄 𑀯𑀸 𑀲𑀩𑁆𑀪𑀸𑀯𑀫𑀢𑁆𑀢𑀁 𑀤𑀲𑁆𑀲𑁂𑀢𑀺. 𑀢𑀸𑀳𑀻𑀢𑀺 𑀧𑀼𑀣𑀼𑀓𑀸𑀳𑀺.

𑀲𑀸𑀮𑀺𑀯𑀻𑀳𑀺𑀬𑀯𑁂𑀳𑀺 𑀓𑀢𑀲𑀢𑁆𑀢𑀽𑀢𑀺 𑀬𑁂𑀪𑀼𑀬𑁆𑀬𑀦𑀬𑁂𑀦 𑀯𑀼𑀢𑁆𑀢𑀁, 𑀲𑀢𑁆𑀢 𑀥𑀜𑁆𑀜𑀸𑀦𑀺 𑀧𑀦 𑀪𑀚𑁆𑀚𑀺𑀢𑁆𑀯𑀸 𑀓𑀢𑁄𑀧𑀺 𑀲𑀢𑁆𑀢𑀼𑀬𑁂𑀯. 𑀢𑁂𑀦𑁂𑀯𑀸𑀳 ‘‘𑀓𑀗𑁆𑀕𑀼𑀯𑀭𑀓…𑀧𑁂… 𑀲𑀢𑁆𑀢𑀼𑀲𑀗𑁆𑀕𑀳𑀫𑁂𑀯 𑀕𑀘𑁆𑀙𑀢𑀻’’𑀢𑀺. 𑀲𑀢𑁆𑀢𑀼𑀫𑁄𑀤𑀓𑁄𑀢𑀺 𑀲𑀢𑁆𑀢𑀼𑀬𑁄 𑀧𑀺𑀡𑁆𑀟𑁂𑀢𑁆𑀯𑀸 𑀓𑀢𑁄 𑀅𑀧𑀓𑁆𑀓𑁄 𑀲𑀢𑁆𑀢𑀼𑀕𑀼𑀴𑁄. 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑀧𑀸𑀘𑀺𑀢𑁆𑀢𑀺𑀬 𑁨.𑁨𑁩𑁮-𑁨𑁩𑁯) 𑀧𑀦 ‘‘𑀲𑀢𑁆𑀢𑀼𑀫𑁄𑀤𑀓𑁄𑀢𑀺 𑀲𑀢𑁆𑀢𑀼𑀁 𑀢𑁂𑀫𑁂𑀢𑁆𑀯𑀸 𑀓𑀢𑁄 𑀅𑀧𑀓𑁆𑀓𑁄, 𑀲𑀢𑁆𑀢𑀼𑀁 𑀧𑀦 𑀧𑀺𑀲𑀺𑀢𑁆𑀯𑀸 𑀧𑀺𑀝𑁆𑀞𑀁 𑀓𑀢𑁆𑀯𑀸 𑀢𑁂𑀫𑁂𑀢𑁆𑀯𑀸 𑀧𑀽𑀯𑀁 𑀓𑀢𑁆𑀯𑀸 𑀧𑀘𑀦𑁆𑀢𑀺, 𑀢𑀁 𑀦 𑀧𑀯𑀸𑀭𑁂𑀢𑀻’’𑀢𑀺 𑀯𑀼𑀢𑁆𑀢𑀁.

𑀧𑀜𑁆𑀘𑀦𑁆𑀦𑀁 𑀪𑁄𑀚𑀦𑀸𑀦𑀁 𑀅𑀜𑁆𑀜𑀢𑀭𑀯𑀲𑁂𑀦 𑀯𑀺𑀧𑁆𑀧𑀓𑀢𑀪𑁄𑀚𑀦𑀪𑀸𑀯𑀲𑁆𑀲 𑀉𑀧𑀘𑁆𑀙𑀺𑀦𑁆𑀦𑀢𑁆𑀢𑀸 ‘‘𑀫𑀼𑀔𑁂 𑀲𑀸𑀲𑀧𑀫𑀢𑁆𑀢𑀫𑁆𑀧𑀺…𑀧𑁂… 𑀦 𑀧𑀯𑀸𑀭𑁂𑀢𑀻’’𑀢𑀺 𑀯𑀼𑀢𑁆𑀢𑀁. ‘‘𑀅𑀓𑀧𑁆𑀧𑀺𑀬𑀫𑀁𑀲𑀁 𑀧𑀝𑀺𑀓𑁆𑀔𑀺𑀧𑀢𑀺, 𑀦 𑀧𑀯𑀸𑀭𑁂𑀢𑀻’’𑀢𑀺 𑀯𑀘𑀦𑀢𑁄 𑀲𑀘𑁂 𑀲𑀗𑁆𑀖𑀺𑀓𑀁 𑀮𑀸𑀪𑀁 𑀅𑀢𑁆𑀢𑀦𑁄 𑀅𑀧𑀸𑀧𑀼𑀡𑀦𑁆𑀢𑀁 𑀚𑀸𑀦𑀺𑀢𑁆𑀯𑀸 𑀯𑀸 𑀅𑀚𑀸𑀦𑀺𑀢𑁆𑀯𑀸 𑀯𑀸 𑀧𑀝𑀺𑀓𑁆𑀔𑀺𑀧𑀢𑀺, 𑀦 𑀧𑀯𑀸𑀭𑁂𑀢𑀺 𑀧𑀝𑀺𑀓𑁆𑀔𑀺𑀧𑀺𑀢𑀩𑁆𑀩𑀲𑁆𑀲𑁂𑀯 𑀧𑀝𑀺𑀓𑁆𑀔𑀺𑀢𑁆𑀢𑀢𑁆𑀢𑀸, 𑀅𑀮𑀚𑁆𑀚𑀺𑀲𑀦𑁆𑀢𑀓𑀁 𑀧𑀝𑀺𑀓𑁆𑀔𑀺𑀧𑀦𑁆𑀢𑁄𑀧𑀺 𑀦 𑀧𑀯𑀸𑀭𑁂𑀢𑀺. 𑀅𑀯𑀢𑁆𑀣𑀼𑀢𑀸𑀬𑀸𑀢𑀺 𑀅𑀦𑀢𑀺𑀭𑀺𑀢𑁆𑀢𑀸𑀧𑀢𑁆𑀢𑀺𑀲𑀸𑀥𑀺𑀓𑀸𑀬 𑀧𑀯𑀸𑀭𑀡𑀸𑀬 𑀅𑀯𑀢𑁆𑀣𑀼𑀪𑀸𑀯𑀢𑁄. 𑀏𑀢𑁂𑀦 𑀧𑀝𑀺𑀓𑁆𑀔𑀺𑀧𑀺𑀢𑀩𑁆𑀩𑀲𑁆𑀲𑁂𑀯 𑀧𑀝𑀺𑀓𑁆𑀔𑀺𑀢𑁆𑀢𑀪𑀸𑀯𑀁 𑀤𑀻𑀧𑁂𑀢𑀺. 𑀬𑀜𑁆𑀳𑀺 𑀧𑀝𑀺𑀓𑁆𑀔𑀺𑀧𑀺𑀢𑀩𑁆𑀩𑀁 𑀳𑁄𑀢𑀺, 𑀢𑀲𑁆𑀲 𑀧𑀝𑀺𑀓𑁆𑀔𑁂𑀧𑁄 𑀆𑀧𑀢𑁆𑀢𑀺𑀬𑀸 𑀅𑀗𑁆𑀕𑀁 𑀦 𑀳𑁄𑀢𑀻𑀢𑀺 𑀢𑀁 𑀧𑀯𑀸𑀭𑀡𑀸𑀬 𑀅𑀯𑀢𑁆𑀣𑀽𑀢𑀺 𑀯𑀼𑀘𑁆𑀘𑀢𑀺.

𑁧𑁧𑁮. 𑀆𑀲𑀦𑁆𑀦𑀢𑀭𑀁 𑀅𑀗𑁆𑀕𑀦𑁆𑀢𑀺 𑀳𑀢𑁆𑀣𑀧𑀸𑀲𑀢𑁄 𑀩𑀳𑀺 𑀞𑀢𑁆𑀯𑀸 𑀑𑀦𑀫𑀺𑀢𑁆𑀯𑀸 𑀤𑁂𑀦𑁆𑀢𑀲𑁆𑀲 𑀲𑀻𑀲𑀁 𑀆𑀲𑀦𑁆𑀦𑀢𑀭𑀁 𑀳𑁄𑀢𑀺, 𑀢𑀲𑁆𑀲 𑀑𑀭𑀺𑀫𑀦𑁆𑀢𑁂𑀦 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑀩𑁆𑀩𑀁.

𑀉𑀧𑀦𑀸𑀫𑁂𑀢𑀻𑀢𑀺 𑀇𑀫𑀺𑀦𑀸 𑀓𑀸𑀬𑀸𑀪𑀺𑀳𑀸𑀭𑀁 𑀤𑀲𑁆𑀲𑁂𑀢𑀺. 𑀅𑀧𑀦𑀸𑀫𑁂𑀢𑁆𑀯𑀸𑀢𑀺 𑀅𑀪𑀺𑀫𑀼𑀔𑀁 𑀳𑀭𑀺𑀢𑁆𑀯𑀸. 𑀇𑀤𑀁 𑀪𑀢𑁆𑀢𑀁 𑀕𑀡𑁆𑀳𑀸𑀢𑀺 𑀯𑀤𑀢𑀻𑀢𑀺 𑀓𑀺𑀜𑁆𑀘𑀺 𑀅𑀧𑀦𑀸𑀫𑁂𑀢𑁆𑀯𑀸 𑀯𑀤𑀢𑀺. 𑀓𑁂𑀯𑀮𑀁 𑀯𑀸𑀘𑀸𑀪𑀺𑀳𑀸𑀭𑀲𑁆𑀲 𑀅𑀦𑀥𑀺𑀧𑁆𑀧𑁂𑀢𑀢𑁆𑀢𑀸 𑀕𑀡𑁆𑀳𑀣𑀸𑀢𑀺 𑀕𑀳𑁂𑀢𑀼𑀁 𑀆𑀭𑀤𑁆𑀥𑀁. 𑀳𑀢𑁆𑀣𑀧𑀸𑀲𑀢𑁄 𑀩𑀳𑀺 𑀞𑀺𑀢𑀲𑁆𑀲 𑀲𑀢𑀺𑀧𑀺 𑀤𑀸𑀢𑀼𑀓𑀸𑀫𑀢𑀸𑀪𑀺𑀳𑀸𑀭𑁂 𑀧𑀝𑀺𑀓𑁆𑀔𑀺𑀧𑀦𑁆𑀢𑀲𑁆𑀲 𑀤𑀽𑀭𑀪𑀸𑀯𑁂𑀦𑁂𑀯 𑀧𑀯𑀸𑀭𑀡𑀸𑀬 𑀅𑀪𑀸𑀯𑀢𑁄 𑀣𑁂𑀭𑀲𑁆𑀲𑀧𑀺 𑀤𑀽𑀭𑀪𑀸𑀯𑀫𑀢𑁆𑀢𑀁 𑀕𑀳𑁂𑀢𑁆𑀯𑀸 𑀧𑀯𑀸𑀭𑀡𑀸𑀬 𑀅𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀣𑁂𑀭𑀲𑁆𑀲 𑀤𑀽𑀭𑀪𑀸𑀯𑀢𑁄’’𑀢𑀺𑀆𑀤𑀺𑀫𑀸𑀳, 𑀦 𑀧𑀦 𑀣𑁂𑀭𑀲𑁆𑀲 𑀅𑀪𑀺𑀳𑀸𑀭𑀲𑀫𑁆𑀪𑀯𑀢𑁄. 𑀲𑀘𑁂𑀧𑀺 𑀕𑀳𑁂𑀢𑁆𑀯𑀸 𑀕𑀢𑁄 𑀳𑀢𑁆𑀣𑀧𑀸𑀲𑁂 𑀞𑀺𑀢𑁄 𑀳𑁄𑀢𑀺, 𑀓𑀺𑀜𑁆𑀘𑀺 𑀧𑀦 𑀅𑀯𑀢𑁆𑀯𑀸 𑀆𑀥𑀸𑀭𑀝𑁆𑀞𑀸𑀦𑁂 𑀞𑀺𑀢𑀢𑁆𑀢𑀸 𑀅𑀪𑀺𑀳𑀸𑀭𑁄 𑀦𑀸𑀫 𑀦 𑀳𑁄𑀢𑀻𑀢𑀺 ‘‘𑀤𑀽𑀢𑀲𑁆𑀲 𑀘 𑀅𑀦𑀪𑀺𑀳𑀭𑀡𑀢𑁄’’𑀢𑀺 𑀯𑀼𑀢𑁆𑀢𑀁. ‘‘𑀕𑀳𑁂𑀢𑁆𑀯𑀸 𑀆𑀕𑀢𑁂𑀦 ‘𑀪𑀢𑁆𑀢𑀁 𑀕𑀡𑁆𑀳𑀣𑀸’𑀢𑀺 𑀯𑀼𑀢𑁆𑀢𑁂 𑀅𑀪𑀺𑀳𑀸𑀭𑁄 𑀦𑀸𑀫 𑀳𑁄𑀢𑀻𑀢𑀺 ‘𑀲𑀘𑁂 𑀧𑀦 𑀕𑀳𑁂𑀢𑁆𑀯𑀸 𑀆𑀕𑀢𑁄 𑀪𑀺𑀓𑁆𑀔𑀼…𑀧𑁂… 𑀧𑀯𑀸𑀭𑀡𑀸 𑀳𑁄𑀢𑀻’𑀢𑀺 𑀯𑀼𑀢𑁆𑀢’’𑀦𑁆𑀢𑀺 𑀢𑀻𑀲𑀼𑀧𑀺 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀁. 𑀓𑁂𑀘𑀺 𑀧𑀦 ‘‘𑀧𑀢𑁆𑀢𑀁 𑀓𑀺𑀜𑁆𑀘𑀺𑀧𑀺 𑀉𑀧𑀦𑀸𑀫𑁂𑀢𑁆𑀯𑀸 ‘𑀇𑀫𑀁 𑀪𑀢𑁆𑀢𑀁 𑀕𑀡𑁆𑀳𑀣𑀸’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀕𑀳𑁂𑀢𑀩𑁆𑀩’’𑀦𑁆𑀢𑀺 𑀯𑀤𑀦𑁆𑀢𑀺, 𑀢𑀁 𑀬𑀼𑀢𑁆𑀢𑀁 𑀯𑀺𑀬 𑀤𑀺𑀲𑁆𑀲𑀢𑀺 𑀯𑀸𑀘𑀸𑀪𑀺𑀳𑀸𑀭𑀲𑁆𑀲 𑀇𑀥 𑀅𑀦𑀥𑀺𑀧𑁆𑀧𑁂𑀢𑀢𑁆𑀢𑀸.

𑀧𑀭𑀺𑀯𑁂𑀲𑀦𑀸𑀬𑀸𑀢𑀺 𑀪𑀢𑁆𑀢𑀕𑁆𑀕𑁂. 𑀅𑀪𑀺𑀳𑀝𑀸𑀯 𑀳𑁄𑀢𑀻𑀢𑀺 𑀧𑀭𑀺𑀯𑁂𑀲𑀓𑁂𑀦𑁂𑀯 𑀅𑀪𑀺𑀳𑀝𑀸 𑀳𑁄𑀢𑀺. 𑀢𑀢𑁄 𑀤𑀸𑀢𑀼𑀓𑀸𑀫𑀢𑀸𑀬 𑀕𑀡𑁆𑀳𑀦𑁆𑀢𑀁 𑀧𑀝𑀺𑀓𑁆𑀔𑀺𑀧𑀦𑁆𑀢𑀲𑁆𑀲 𑀧𑀯𑀸𑀭𑀡𑀸 𑀳𑁄𑀢𑀻𑀢𑀺 𑀏𑀢𑁆𑀣 𑀅𑀕𑁆𑀕𑀡𑁆𑀳𑀦𑁆𑀢𑀫𑁆𑀧𑀺 𑀧𑀝𑀺𑀓𑁆𑀔𑀺𑀧𑀢𑁄 𑀧𑀯𑀸𑀭𑀡𑀸 𑀳𑁄𑀢𑀺𑀬𑁂𑀯. 𑀓𑀲𑁆𑀫𑀸? 𑀤𑀸𑀢𑀼𑀓𑀸𑀫𑀢𑀸𑀬 𑀅𑀪𑀺𑀳𑀝𑀢𑁆𑀢𑀸, ‘‘𑀢𑀲𑁆𑀫𑀸 𑀲𑀸 𑀅𑀪𑀺𑀳𑀝𑀸𑀯 𑀳𑁄𑀢𑀻’’𑀢𑀺 𑀳𑀺 𑀯𑀼𑀢𑁆𑀢𑀁. 𑀢𑁂𑀦𑁂𑀯 𑀢𑀻𑀲𑀼𑀧𑀺 𑀕𑀡𑁆𑀞𑀺𑀧𑀤𑁂𑀲𑀼 ‘‘𑀤𑀸𑀢𑀼𑀓𑀸𑀫𑀸𑀪𑀺𑀳𑀸𑀭𑁂 𑀲𑀢𑀺 𑀓𑁂𑀯𑀮𑀁 ‘𑀤𑀲𑁆𑀲𑀸𑀫𑀻’𑀢𑀺 𑀕𑀳𑀡𑀫𑁂𑀯 𑀅𑀪𑀺𑀳𑀸𑀭𑁄 𑀦 𑀳𑁄𑀢𑀺, ‘𑀤𑀲𑁆𑀲𑀸𑀫𑀻’𑀢𑀺 𑀕𑀡𑁆𑀳𑀦𑁆𑀢𑁂𑀧𑀺 𑀅𑀕𑀡𑁆𑀳𑀦𑁆𑀢𑁂𑀧𑀺 𑀤𑀸𑀢𑀼𑀓𑀸𑀫𑀢𑀸𑀪𑀺𑀳𑀸𑀭𑁄𑀯 𑀅𑀪𑀺𑀳𑀸𑀭𑁄 𑀳𑁄𑀢𑀺, 𑀢𑀲𑁆𑀫𑀸 𑀕𑀳𑀡𑀲𑀫𑀬𑁂 𑀯𑀸 𑀅𑀕𑁆𑀕𑀳𑀡𑀲𑀫𑀬𑁂 𑀯𑀸 𑀢𑀁 𑀧𑀝𑀺𑀓𑁆𑀔𑀺𑀧𑀢𑁄 𑀧𑀯𑀸𑀭𑀡𑀸 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁. 𑀇𑀤𑀸𑀦𑀺 𑀢𑀲𑁆𑀲 𑀅𑀲𑀢𑀺 𑀤𑀸𑀢𑀼𑀓𑀸𑀫𑀢𑀸𑀪𑀺𑀳𑀸𑀭𑁂 𑀕𑀳𑀡𑀲𑀫𑀬𑁂𑀧𑀺 𑀧𑀝𑀺𑀓𑁆𑀔𑀺𑀧𑀢𑁄 𑀧𑀯𑀸𑀭𑀡𑀸 𑀦 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀲𑀘𑁂 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀓𑀝𑀘𑁆𑀙𑀼𑀦𑀸 𑀅𑀦𑀼𑀓𑁆𑀔𑀺𑀢𑁆𑀢𑀫𑁆𑀧𑀺 𑀧𑀼𑀩𑁆𑀩𑁂 𑀏𑀯 𑀅𑀪𑀺𑀳𑀝𑀢𑁆𑀢𑀸 𑀧𑀯𑀸𑀭𑀡𑀸 𑀳𑁄𑀢𑀻𑀢𑀺 ‘‘𑀅𑀪𑀺𑀳𑀝𑀸𑀯 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁. 𑀉𑀤𑁆𑀥𑀝𑀫𑀢𑁆𑀢𑁂𑀢𑀺 𑀪𑀸𑀚𑀦𑀢𑁄 𑀯𑀺𑀬𑁄𑀚𑀺𑀢𑀫𑀢𑁆𑀢𑁂. 𑀤𑁆𑀯𑀺𑀦𑁆𑀦𑀁 𑀲𑀫𑀪𑀸𑀭𑁂𑀧𑀻𑀢𑀺 𑀧𑀭𑀺𑀯𑁂𑀲𑀓𑀲𑁆𑀲 𑀘 𑀅𑀜𑁆𑀜𑀲𑁆𑀲 𑀘 𑀪𑀢𑁆𑀢𑀧𑀘𑁆𑀙𑀺𑀪𑀸𑀭𑀕𑁆𑀕𑀳𑀡𑁂 𑀲𑀫𑁆𑀪𑀽𑀢𑁂𑀧𑀻𑀢𑀺 𑀅𑀢𑁆𑀣𑁄.

𑁧𑁧𑁯. 𑀭𑀲𑀁 𑀕𑀡𑁆𑀳𑀣𑀸𑀢𑀺 𑀏𑀢𑁆𑀣 𑀓𑁂𑀯𑀮𑀁 𑀫𑀁𑀲𑀭𑀲𑀲𑁆𑀲 𑀅𑀧𑀯𑀸𑀭𑀡𑀸𑀚𑀦𑀓𑀲𑁆𑀲 𑀦𑀸𑀫𑁂𑀦 𑀯𑀼𑀢𑁆𑀢𑀢𑁆𑀢𑀸 𑀧𑀝𑀺𑀓𑁆𑀔𑀺𑀧𑀢𑁄 𑀧𑀯𑀸𑀭𑀡𑀸 𑀦 𑀳𑁄𑀢𑀺. 𑀫𑀘𑁆𑀙𑀭𑀲𑀦𑁆𑀢𑀺𑀆𑀤𑀻𑀲𑀼 𑀫𑀘𑁆𑀙𑁄 𑀘 𑀭𑀲𑀜𑁆𑀘𑀸𑀢𑀺 𑀅𑀢𑁆𑀣𑀲𑀫𑁆𑀪𑀯𑀢𑁄, 𑀯𑀢𑁆𑀣𑀼𑀦𑁄𑀧𑀺 𑀢𑀸𑀤𑀺𑀲𑀢𑁆𑀢𑀸 𑀧𑀯𑀸𑀭𑀡𑀸 𑀳𑁄𑀢𑀺. ‘‘𑀇𑀤𑀁 𑀕𑀡𑁆𑀳𑀣𑀸’’𑀢𑀺𑀧𑀺 𑀅𑀯𑀢𑁆𑀯𑀸 𑀢𑀼𑀡𑁆𑀳𑀻𑀪𑀽𑀢𑁂𑀦 𑀅𑀪𑀺𑀳𑀝𑀁 𑀧𑀝𑀺𑀓𑁆𑀔𑀺𑀧𑀢𑁄𑀧𑀺 𑀳𑁄𑀢𑀺 𑀏𑀯.

𑀓𑀭𑀫𑁆𑀩𑀓𑁄𑀢𑀺 𑀫𑀺𑀲𑁆𑀲𑀓𑀸𑀥𑀺𑀯𑀘𑀦𑀫𑁂𑀢𑀁. 𑀬𑀜𑁆𑀳𑀺 𑀩𑀳𑀽𑀳𑀺 𑀫𑀺𑀲𑁆𑀲𑁂𑀢𑁆𑀯𑀸 𑀓𑀭𑁄𑀦𑁆𑀢𑀺, 𑀲𑁄 ‘‘𑀓𑀭𑀫𑁆𑀩𑀓𑁄’’𑀢𑀺 𑀯𑀼𑀘𑁆𑀘𑀢𑀺, 𑀲𑁄 𑀲𑀘𑁂𑀧𑀺 𑀫𑀁𑀲𑁂𑀦 𑀫𑀺𑀲𑁆𑀲𑁂𑀢𑁆𑀯𑀸 𑀓𑀢𑁄 𑀳𑁄𑀢𑀺, ‘‘𑀓𑀭𑀫𑁆𑀩𑀓𑀁 𑀕𑀡𑁆𑀳𑀣𑀸’’𑀢𑀺 𑀅𑀧𑀯𑀸𑀭𑀡𑀸𑀭𑀳𑀲𑁆𑀲 𑀦𑀸𑀫𑁂𑀦 𑀯𑀼𑀢𑁆𑀢𑀢𑁆𑀢𑀸 𑀧𑀝𑀺𑀓𑁆𑀔𑀺𑀧𑀢𑁄 𑀧𑀯𑀸𑀭𑀡𑀸 𑀦 𑀳𑁄𑀢𑀺. ‘‘𑀫𑀁𑀲𑀓𑀭𑀫𑁆𑀩𑀓𑀁 𑀕𑀡𑁆𑀳𑀣𑀸’’𑀢𑀺 𑀯𑀼𑀢𑁆𑀢𑁂 𑀧𑀦 ‘‘𑀫𑀁𑀲𑀫𑀺𑀲𑁆𑀲𑀓𑀁 𑀕𑀡𑁆𑀳𑀣𑀸’’𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀢𑀲𑁆𑀫𑀸 𑀧𑀯𑀸𑀭𑀡𑀸𑀯 𑀳𑁄𑀢𑀺.

𑁧𑁨𑁦. ‘‘𑀉𑀤𑁆𑀤𑀺𑀲𑁆𑀲𑀓𑀢’’𑀦𑁆𑀢𑀺 𑀫𑀜𑁆𑀜𑀫𑀸𑀦𑁄𑀢𑀺 𑀏𑀢𑁆𑀣 ‘‘𑀯𑀢𑁆𑀣𑀼𑀦𑁄 𑀓𑀧𑁆𑀧𑀺𑀬𑀢𑁆𑀢𑀸 𑀅𑀓𑀧𑁆𑀧𑀺𑀬𑀲𑀜𑁆𑀜𑀸𑀬 𑀧𑀝𑀺𑀓𑁆𑀔𑁂𑀧𑀢𑁄𑀧𑀺 𑀅𑀘𑀺𑀢𑁆𑀢𑀓𑀢𑁆𑀢𑀸 𑀇𑀫𑀲𑁆𑀲 𑀲𑀺𑀓𑁆𑀔𑀸𑀧𑀤𑀲𑁆𑀲 𑀧𑀯𑀸𑀭𑀡𑀸 𑀳𑁄𑀢𑀻’’𑀢𑀺 𑀯𑀤𑀦𑁆𑀢𑀺. ‘‘𑀳𑁂𑀝𑁆𑀞𑀸 𑀅𑀬𑀸𑀕𑀼𑀓𑁂 𑀦𑀺𑀫𑀦𑁆𑀢𑀦𑁂 𑀉𑀤𑀓𑀓𑀜𑁆𑀚𑀺𑀓𑀔𑀻𑀭𑀸𑀤𑀻𑀳𑀺 𑀲𑀤𑁆𑀥𑀺𑀁 𑀫𑀤𑁆𑀤𑀺𑀢𑀁 𑀪𑀢𑁆𑀢𑀫𑁂𑀯 𑀲𑀦𑁆𑀥𑀸𑀬 ‘𑀬𑀸𑀕𑀼𑀁 𑀕𑀡𑁆𑀳𑀣𑀸’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀧𑀯𑀸𑀭𑀡𑀸 𑀳𑁄𑀢𑀺, ‘𑀪𑀢𑁆𑀢𑀫𑀺𑀲𑁆𑀲𑀓𑀁 𑀬𑀸𑀕𑀼𑀁 𑀆𑀳𑀭𑀺𑀢𑁆𑀯𑀸’𑀢𑀺 𑀏𑀢𑁆𑀣 𑀧𑀦 𑀯𑀺𑀲𑀼𑀁 𑀬𑀸𑀕𑀼𑀬𑀸 𑀯𑀺𑀚𑁆𑀚𑀫𑀸𑀦𑀢𑁆𑀢𑀸 𑀧𑀯𑀸𑀭𑀡𑀸 𑀦 𑀳𑁄𑀢𑀻’’𑀢𑀺 𑀯𑀤𑀦𑁆𑀢𑀺. 𑀅𑀬𑀫𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄𑀢𑀺 ‘‘𑀬𑁂𑀦𑀸𑀧𑀼𑀘𑁆𑀙𑀺𑀢𑁄’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀓𑀸𑀭𑀡𑀁 𑀧𑀦𑁂𑀢𑁆𑀣 𑀤𑀼𑀤𑁆𑀤𑀲𑀦𑁆𑀢𑀺 𑀏𑀢𑁆𑀣 𑀏𑀓𑁂 𑀢𑀸𑀯 𑀯𑀤𑀦𑁆𑀢𑀺 ‘‘𑀬𑀲𑁆𑀫𑀸 𑀬𑀸𑀕𑀼𑀫𑀺𑀲𑁆𑀲𑀓𑀁 𑀦𑀸𑀫 𑀪𑀢𑁆𑀢𑀫𑁂𑀯 𑀦 𑀳𑁄𑀢𑀺, 𑀔𑀻𑀭𑀸𑀤𑀺𑀓𑀫𑁆𑀧𑀺 𑀳𑁄𑀢𑀺𑀬𑁂𑀯, 𑀢𑀲𑁆𑀫𑀸 𑀓𑀭𑀫𑁆𑀩𑀓𑁂 𑀯𑀺𑀬 𑀧𑀯𑀸𑀭𑀡𑀸𑀬 𑀦 𑀪𑀯𑀺𑀢𑀩𑁆𑀩𑀁, 𑀏𑀯𑀜𑁆𑀘 𑀲𑀢𑀺 ‘𑀬𑀸𑀕𑀼 𑀩𑀳𑀼𑀢𑀭𑀸 𑀯𑀸 𑀳𑁄𑀢𑀺 𑀲𑀫𑀲𑀫𑀸 𑀯𑀸, 𑀦 𑀧𑀯𑀸𑀭𑁂𑀢𑀺, 𑀬𑀸𑀕𑀼 𑀫𑀦𑁆𑀤𑀸, 𑀪𑀢𑁆𑀢𑀁 𑀩𑀳𑀼𑀢𑀭𑀁, 𑀧𑀯𑀸𑀭𑁂𑀢𑀻’𑀢𑀺 𑀏𑀢𑁆𑀣 𑀓𑀸𑀭𑀡𑀁 𑀤𑀼𑀤𑁆𑀤𑀲’’𑀦𑁆𑀢𑀺. 𑀓𑁂𑀘𑀺 𑀧𑀦 𑀯𑀤𑀦𑁆𑀢𑀺 ‘‘𑀬𑀸𑀕𑀼𑀫𑀺𑀲𑁆𑀲𑀓𑀁 𑀦𑀸𑀫 𑀪𑀢𑁆𑀢𑀁, 𑀢𑀲𑁆𑀫𑀸 𑀢𑀁 𑀧𑀝𑀺𑀓𑁆𑀔𑀺𑀧𑀢𑁄 𑀧𑀯𑀸𑀭𑀡𑀸𑀬 𑀏𑀯 𑀪𑀯𑀺𑀢𑀩𑁆𑀩𑀁, 𑀏𑀯𑀜𑁆𑀘 𑀲𑀢𑀺 ‘𑀇𑀥 𑀧𑀯𑀸𑀭𑀡𑀸 𑀳𑁄𑀢𑀺, 𑀦 𑀳𑁄𑀢𑀻’𑀢𑀺 𑀏𑀢𑁆𑀣 𑀓𑀸𑀭𑀡𑀁 𑀤𑀼𑀤𑁆𑀤𑀲’’𑀦𑁆𑀢𑀺.

𑀬𑀣𑀸 𑀘𑁂𑀢𑁆𑀣 𑀓𑀸𑀭𑀡𑀁 𑀤𑀼𑀤𑁆𑀤𑀲𑀁, 𑀏𑀯𑀁 𑀧𑀭𑀢𑁄 ‘‘𑀫𑀺𑀲𑁆𑀲𑀓𑀁 𑀕𑀡𑁆𑀳𑀣𑀸’’𑀢𑀺 𑀏𑀢𑁆𑀣𑀸𑀧𑀺 𑀓𑀸𑀭𑀡𑀁 𑀤𑀼𑀤𑁆𑀤𑀲𑀫𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀦 𑀳𑀺 𑀧𑀯𑀸𑀭𑀡𑀧𑁆𑀧𑀳𑁄𑀦𑀓𑀲𑁆𑀲 𑀅𑀧𑁆𑀧𑀩𑀳𑀼𑀪𑀸𑀯𑁄 𑀧𑀯𑀸𑀭𑀡𑀸𑀬 𑀪𑀸𑀯𑀸𑀪𑀸𑀯𑀦𑀺𑀫𑀺𑀢𑁆𑀢𑀁, 𑀓𑀺𑀜𑁆𑀘𑀭𑀳𑀺 𑀧𑀯𑀸𑀭𑀡𑀸𑀚𑀦𑀓𑀲𑁆𑀲 𑀦𑀸𑀫 𑀕𑀳𑀡𑀫𑁂𑀯𑁂𑀢𑁆𑀣 𑀧𑀫𑀸𑀡𑀁, 𑀢𑀲𑁆𑀫𑀸 ‘‘𑀇𑀤𑀜𑁆𑀘 𑀓𑀭𑀫𑁆𑀩𑀓𑁂𑀦 𑀦 𑀲𑀫𑀸𑀦𑁂𑀢𑀩𑁆𑀩’’𑀦𑁆𑀢𑀺𑀆𑀤𑀺𑀦𑀸 𑀬𑀫𑁆𑀧𑀺 𑀓𑀸𑀭𑀡𑀁 𑀯𑀼𑀢𑁆𑀢𑀁, 𑀢𑀫𑁆𑀧𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑁂𑀦 𑀲𑀁𑀲𑀦𑁆𑀤𑀺𑀬𑀫𑀸𑀦𑀁 𑀦 𑀲𑀫𑁂𑀢𑀺. 𑀬𑀤𑀺 𑀳𑀺 𑀫𑀺𑀲𑁆𑀲𑀓𑀦𑁆𑀢𑀺 𑀪𑀢𑁆𑀢𑀫𑀺𑀲𑁆𑀲𑀓𑁂𑀬𑁂𑀯 𑀭𑀼𑀴𑁆𑀳𑀁 𑀲𑀺𑀬𑀸, 𑀏𑀯𑀁 𑀲𑀢𑀺 𑀬𑀣𑀸 ‘‘𑀪𑀢𑁆𑀢𑀫𑀺𑀲𑁆𑀲𑀓𑀁 𑀕𑀡𑁆𑀳𑀣𑀸’’𑀢𑀺 𑀯𑀼𑀢𑁆𑀢𑁂 𑀪𑀢𑁆𑀢𑀁 𑀩𑀳𑀼𑀢𑀭𑀁 𑀯𑀸 𑀲𑀫𑀁 𑀯𑀸 𑀅𑀧𑁆𑀧𑀢𑀭𑀁 𑀯𑀸 𑀳𑁄𑀢𑀺, 𑀧𑀯𑀸𑀭𑁂𑀢𑀺𑀬𑁂𑀯, 𑀏𑀯𑀁 ‘‘𑀫𑀺𑀲𑁆𑀲𑀓𑀁 𑀕𑀡𑁆𑀳𑀣𑀸’’𑀢𑀺 𑀯𑀼𑀢𑁆𑀢𑁂𑀧𑀺 𑀅𑀧𑁆𑀧𑀢𑀭𑁂𑀧𑀺 𑀪𑀢𑁆𑀢𑁂 𑀧𑀯𑀸𑀭𑀡𑀸𑀬 𑀪𑀯𑀺𑀢𑀩𑁆𑀩𑀁 ‘‘𑀫𑀺𑀲𑁆𑀲𑀓’’𑀦𑁆𑀢𑀺 𑀪𑀢𑁆𑀢𑀫𑀺𑀲𑁆𑀲𑀓𑁂𑀬𑁂𑀯 𑀭𑀼𑀴𑁆𑀳𑀢𑁆𑀢𑀸. 𑀢𑀣𑀸 𑀳𑀺 ‘‘𑀫𑀺𑀲𑁆𑀲𑀓𑀦𑁆𑀢𑀺 𑀪𑀢𑁆𑀢𑀫𑀺𑀲𑁆𑀲𑀓𑁂𑀬𑁂𑀯 𑀭𑀼𑀴𑁆𑀳𑀯𑁄𑀳𑀸𑀭𑀢𑁆𑀢𑀸 𑀇𑀤𑀁 𑀧𑀦 𑀪𑀢𑁆𑀢𑀫𑀺𑀲𑁆𑀲𑀓𑀫𑁂𑀯𑀸𑀢𑀺 𑀯𑀼𑀢𑁆𑀢’’𑀦𑁆𑀢𑀺 𑀢𑀻𑀲𑀼𑀧𑀺 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀁. 𑀅𑀣 𑀫𑀺𑀲𑁆𑀲𑀓𑀦𑁆𑀢𑀺 𑀪𑀢𑁆𑀢𑀫𑀺𑀲𑁆𑀲𑀓𑁂 𑀭𑀼𑀴𑁆𑀳𑀁 𑀦 𑀳𑁄𑀢𑀺, 𑀫𑀺𑀲𑁆𑀲𑀓𑀪𑀢𑁆𑀢𑀁 𑀧𑀦 𑀲𑀦𑁆𑀥𑀸𑀬 ‘‘𑀫𑀺𑀲𑁆𑀲𑀓𑀁 𑀕𑀡𑁆𑀳𑀣𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺. 𑀏𑀯𑀫𑁆𑀧𑀺 𑀬𑀣𑀸 𑀅𑀬𑀸𑀕𑀼𑀓𑁂 𑀦𑀺𑀫𑀦𑁆𑀢𑀦𑁂 𑀔𑀻𑀭𑀸𑀤𑀻𑀳𑀺 𑀲𑀫𑁆𑀫𑀤𑁆𑀤𑀺𑀢𑀁 𑀪𑀢𑁆𑀢𑀫𑁂𑀯 𑀲𑀦𑁆𑀥𑀸𑀬 ‘‘𑀬𑀸𑀕𑀼𑀁 𑀕𑀡𑁆𑀳𑀣𑀸’’𑀢𑀺 𑀯𑀼𑀢𑁆𑀢𑁂 𑀧𑀯𑀸𑀭𑀡𑀸 𑀳𑁄𑀢𑀺, 𑀏𑀯𑀫𑀺𑀥𑀸𑀧𑀺 𑀫𑀺𑀲𑁆𑀲𑀓𑀪𑀢𑁆𑀢𑀫𑁂𑀯 𑀲𑀦𑁆𑀥𑀸𑀬 ‘‘𑀫𑀺𑀲𑁆𑀲𑀓𑀁 𑀕𑀡𑁆𑀳𑀣𑀸’’𑀢𑀺 𑀯𑀼𑀢𑁆𑀢𑁂 𑀪𑀢𑁆𑀢𑀁 𑀅𑀧𑁆𑀧𑀁 𑀯𑀸 𑀳𑁄𑀢𑀼, 𑀩𑀳𑀼 𑀯𑀸, 𑀧𑀯𑀸𑀭𑀡𑀸 𑀏𑀯 𑀲𑀺𑀬𑀸, 𑀢𑀲𑁆𑀫𑀸 𑀫𑀺𑀲𑁆𑀲𑀓𑀦𑁆𑀢𑀺 𑀪𑀢𑁆𑀢𑀫𑀺𑀲𑁆𑀲𑀓𑁂 𑀭𑀼𑀴𑁆𑀳𑀁 𑀯𑀸 𑀳𑁄𑀢𑀼, 𑀫𑀺𑀲𑁆𑀲𑀓𑀁 𑀲𑀦𑁆𑀥𑀸𑀬 𑀪𑀸𑀲𑀺𑀢𑀁 𑀯𑀸, 𑀉𑀪𑀬𑀣𑀸𑀧𑀺 𑀧𑀼𑀩𑁆𑀩𑁂𑀦𑀸𑀧𑀭𑀁 𑀦 𑀲𑀫𑁂𑀢𑀻𑀢𑀺 𑀓𑀺𑀫𑁂𑀢𑁆𑀣 𑀓𑀸𑀭𑀡𑀘𑀺𑀦𑁆𑀢𑀸𑀬. 𑀈𑀤𑀺𑀲𑁂𑀲𑀼 𑀧𑀦 𑀞𑀸𑀦𑁂𑀲𑀼 𑀅𑀝𑁆𑀞𑀓𑀣𑀸𑀧𑀫𑀸𑀡𑁂𑀦𑁂𑀯 𑀕𑀦𑁆𑀢𑀩𑁆𑀩𑀦𑁆𑀢𑀺 𑀅𑀬𑀁 𑀅𑀫𑁆𑀳𑀸𑀓𑀁 𑀔𑀦𑁆𑀢𑀺.

𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑀧𑀸𑀘𑀺𑀢𑁆𑀢𑀺𑀬 𑁨.𑁨𑁩𑁮-𑁨𑁩𑁯) 𑀧𑀦 ‘‘𑀉𑀤𑁆𑀤𑀺𑀲𑁆𑀲𑀓𑀢𑀦𑁆𑀢𑀺 𑀫𑀜𑁆𑀜𑀫𑀸𑀦𑁄𑀢𑀺 𑀏𑀢𑁆𑀣 𑀯𑀢𑁆𑀣𑀼𑀦𑁄 𑀓𑀧𑁆𑀧𑀺𑀬𑀢𑁆𑀢𑀸 ‘𑀧𑀯𑀸𑀭𑀺𑀢𑁄𑀯 𑀳𑁄𑀢𑀻’𑀢𑀺 𑀯𑀼𑀢𑁆𑀢𑀁. 𑀢𑀜𑁆𑀘𑁂 𑀉𑀤𑁆𑀤𑀺𑀲𑁆𑀲𑀓𑀢𑀫𑁂𑀯 𑀳𑁄𑀢𑀺, 𑀧𑀝𑀺𑀓𑁆𑀔𑁂𑀧𑁄 𑀦𑀢𑁆𑀣𑀺. 𑀅𑀬𑀫𑁂𑀢𑁆𑀣𑀸𑀥𑀺𑀧𑁆𑀧𑀸𑀬𑁄𑀢𑀺 ‘𑀬𑁂𑀦𑀸𑀧𑀼𑀘𑁆𑀙𑀺𑀢𑁄’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀓𑀸𑀭𑀡𑀁 𑀧𑀦𑁂𑀢𑁆𑀣 𑀤𑀼𑀤𑁆𑀤𑀲𑀦𑁆𑀢𑀺 𑀪𑀢𑁆𑀢𑀲𑁆𑀲 𑀩𑀳𑀼𑀢𑀭𑀪𑀸𑀯𑁂 𑀧𑀯𑀸𑀭𑀡𑀸𑀬 𑀲𑀫𑁆𑀪𑀯𑀓𑀸𑀭𑀡𑀁 𑀤𑀼𑀤𑁆𑀤𑀲𑀁, 𑀅𑀜𑁆𑀜𑀣𑀸 𑀓𑀭𑀫𑁆𑀩𑀓𑁂𑀧𑀺 𑀫𑀘𑁆𑀙𑀸𑀤𑀺𑀩𑀳𑀼𑀪𑀸𑀯𑁂 𑀧𑀯𑀸𑀭𑀡𑀸 𑀪𑀯𑁂𑀬𑁆𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑀣𑀸 𑀘𑁂𑀢𑁆𑀣 𑀓𑀸𑀭𑀡𑀁 𑀤𑀼𑀤𑁆𑀤𑀲𑀁, 𑀏𑀯𑀁 𑀧𑀭𑀢𑁄 ‘𑀫𑀺𑀲𑁆𑀲𑀓𑀁 𑀕𑀡𑁆𑀳𑀣𑀸’𑀢𑀺 𑀏𑀢𑁆𑀣𑀸𑀧𑀺 𑀓𑀸𑀭𑀡𑀁 𑀤𑀼𑀤𑁆𑀤𑀲𑀫𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀬𑀜𑁆𑀘 ‘𑀇𑀤𑀁 𑀧𑀦 𑀪𑀢𑁆𑀢𑀫𑀺𑀲𑁆𑀲𑀓𑀫𑁂𑀯𑀸’𑀢𑀺𑀆𑀤𑀺 𑀓𑀸𑀭𑀡𑀁 𑀯𑀼𑀢𑁆𑀢𑀁, 𑀢𑀫𑁆𑀧𑀺 ‘𑀅𑀧𑁆𑀧𑀢𑀭𑀁 𑀦 𑀧𑀯𑀸𑀭𑁂𑀢𑀻’𑀢𑀺 𑀯𑀘𑀦𑁂𑀦 𑀦 𑀲𑀫𑁂𑀢𑀻’’𑀢𑀺 𑀏𑀢𑁆𑀢𑀓𑀫𑁂𑀯 𑀯𑀼𑀢𑁆𑀢𑀁.

‘‘𑀯𑀺𑀲𑀼𑀁 𑀓𑀢𑁆𑀯𑀸 𑀤𑁂𑀢𑀻𑀢𑀺 𑀪𑀢𑁆𑀢𑀲𑁆𑀲 𑀉𑀧𑀭𑀺 𑀞𑀺𑀢𑀁 𑀭𑀲𑀸𑀤𑀺𑀁 𑀯𑀺𑀲𑀼𑀁 𑀕𑀳𑁂𑀢𑁆𑀯𑀸 𑀤𑁂𑀢𑀻’’𑀢𑀺 𑀢𑀻𑀲𑀼𑀧𑀺 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀁. 𑀓𑁂𑀳𑀺𑀘𑀺 𑀧𑀦 ‘‘𑀬𑀣𑀸 𑀪𑀢𑁆𑀢𑀲𑀺𑀢𑁆𑀣𑀁 𑀦 𑀧𑀢𑀢𑀺, 𑀢𑀣𑀸 𑀕𑀸𑀴𑁆𑀳𑀁 𑀳𑀢𑁆𑀣𑁂𑀦 𑀧𑀻𑀴𑁂𑀢𑁆𑀯𑀸 𑀧𑀭𑀺𑀲𑁆𑀲𑀸𑀯𑁂𑀢𑁆𑀯𑀸 𑀤𑁂𑀢𑀻’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣𑀸𑀧𑀺 𑀓𑀸𑀭𑀡𑀁 𑀦 𑀤𑀺𑀲𑁆𑀲𑀢𑀺. 𑀬𑀣𑀸 𑀳𑀺 𑀪𑀢𑁆𑀢𑀫𑀺𑀲𑁆𑀲𑀓𑀁 𑀬𑀸𑀕𑀼𑀁 𑀆𑀳𑀭𑀺𑀢𑁆𑀯𑀸 ‘‘𑀬𑀸𑀕𑀼𑀁 𑀕𑀡𑁆𑀳𑀣𑀸’’𑀢𑀺 𑀯𑀢𑁆𑀯𑀸 𑀬𑀸𑀕𑀼𑀫𑀺𑀲𑁆𑀲𑀓𑀁 𑀪𑀢𑁆𑀢𑀫𑁆𑀧𑀺 𑀤𑁂𑀦𑁆𑀢𑀁 𑀧𑀝𑀺𑀓𑁆𑀔𑀺𑀧𑀢𑁄 𑀧𑀯𑀸𑀭𑀡𑀸 𑀦 𑀳𑁄𑀢𑀺, 𑀏𑀯𑀫𑀺𑀥𑀸𑀧𑀺 𑀩𑀳𑀼𑀔𑀻𑀭𑀭𑀲𑀸𑀤𑀻𑀲𑀼 𑀪𑀢𑁆𑀢𑁂𑀲𑀼 ‘‘𑀔𑀻𑀭𑀁 𑀕𑀡𑁆𑀳𑀣𑀸’’𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀤𑀺𑀦𑁆𑀦𑀸𑀦𑀺 𑀔𑀻𑀭𑀸𑀤𑀻𑀦𑀺 𑀯𑀸 𑀤𑁂𑀢𑀼 𑀔𑀻𑀭𑀸𑀤𑀺𑀫𑀺𑀲𑁆𑀲𑀓𑀁 𑀪𑀢𑁆𑀢𑀁 𑀯𑀸, 𑀉𑀪𑀬𑀣𑀸𑀧𑀺 𑀧𑀯𑀸𑀭𑀡𑀸𑀬 𑀦 𑀪𑀯𑀺𑀢𑀩𑁆𑀩𑀁, 𑀢𑀲𑁆𑀫𑀸 ‘‘𑀯𑀺𑀲𑀼𑀁 𑀓𑀢𑁆𑀯𑀸 𑀤𑁂𑀢𑀻’’𑀢𑀺 𑀢𑁂𑀦𑀸𑀓𑀸𑀭𑁂𑀦 𑀤𑁂𑀦𑁆𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀦 𑀧𑀦 𑀪𑀢𑁆𑀢𑀫𑀺𑀲𑁆𑀲𑀓𑀁 𑀓𑀢𑁆𑀯𑀸 𑀤𑀻𑀬𑀫𑀸𑀦𑀁 𑀧𑀝𑀺𑀓𑁆𑀔𑀺𑀧𑀢𑁄 𑀧𑀯𑀸𑀭𑀡𑀸 𑀳𑁄𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀕𑀳𑁂𑀢𑀩𑁆𑀩𑀁. 𑀬𑀤𑀺 𑀧𑀦 𑀪𑀢𑁆𑀢𑀫𑀺𑀲𑁆𑀲𑀓𑀁 𑀓𑀢𑁆𑀯𑀸 𑀤𑀻𑀬𑀫𑀸𑀦𑁂 𑀧𑀯𑀸𑀭𑀡𑀸 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀅𑀝𑁆𑀞𑀓𑀣𑀸𑀬𑀁 ‘‘𑀯𑀺𑀲𑀼𑀁 𑀓𑀢𑁆𑀯𑀸 𑀤𑁂𑀢𑀻’’𑀢𑀺 𑀯𑀼𑀢𑁆𑀢𑀁, 𑀏𑀯𑀁 𑀲𑀢𑀺 𑀅𑀝𑁆𑀞𑀓𑀣𑀸𑀬𑁂𑀯𑁂𑀢𑁆𑀣 𑀧𑀫𑀸𑀡𑀦𑁆𑀢𑀺 𑀕𑀳𑁂𑀢𑀩𑁆𑀩𑀁, 𑀦 𑀧𑀦 𑀓𑀸𑀭𑀡𑀦𑁆𑀢𑀭𑀁 𑀕𑀯𑁂𑀲𑀺𑀢𑀩𑁆𑀩𑀁. 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑀧𑀸𑀘𑀺𑀢𑁆𑀢𑀺𑀬 𑁨.𑁨𑁩𑁮-𑁨𑁩𑁯) 𑀧𑀦 ‘‘𑀯𑀺𑀲𑀼𑀁 𑀓𑀢𑁆𑀯𑀸 𑀤𑁂𑀢𑀻𑀢𑀺 ‘𑀭𑀲𑀁 𑀕𑀡𑁆𑀳𑀣𑀸’𑀢𑀺𑀆𑀤𑀺𑀦𑀸 𑀯𑀸𑀘𑀸𑀬 𑀯𑀺𑀲𑀼𑀁 𑀓𑀢𑁆𑀯𑀸 𑀤𑁂𑀢𑀻𑀢𑀺 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄, 𑀦 𑀧𑀦 𑀓𑀸𑀬𑁂𑀦 𑀭𑀲𑀸𑀤𑀺𑀁 𑀯𑀺𑀬𑁄𑀚𑁂𑀢𑁆𑀯𑀸𑀢𑀺 𑀢𑀣𑀸 𑀅𑀯𑀺𑀬𑁄𑀚𑀺𑀢𑁂𑀧𑀺 𑀧𑀝𑀺𑀓𑁆𑀔𑀺𑀧𑀢𑁄 𑀧𑀯𑀸𑀭𑀡𑀸𑀬 𑀅𑀲𑀫𑁆𑀪𑀯𑀢𑁄 𑀅𑀧𑀯𑀸𑀭𑀡𑀸𑀧𑀳𑁄𑀦𑀓𑀲𑁆𑀲 𑀦𑀸𑀫𑁂𑀦 𑀯𑀼𑀢𑁆𑀢𑀢𑁆𑀢𑀸 𑀪𑀢𑁆𑀢𑀫𑀺𑀲𑁆𑀲𑀓𑀬𑀸𑀕𑀼𑀁 𑀆𑀳𑀭𑀺𑀢𑁆𑀯𑀸 ‘𑀬𑀸𑀕𑀼𑀁 𑀕𑀡𑁆𑀳𑀣𑀸’𑀢𑀺 𑀯𑀼𑀢𑁆𑀢𑀝𑁆𑀞𑀸𑀦𑀸𑀤𑀻𑀲𑀼 𑀯𑀺𑀬, 𑀅𑀜𑁆𑀜𑀣𑀸 𑀏𑀢𑁆𑀣 𑀬𑀣𑀸 𑀧𑀼𑀩𑁆𑀩𑀸𑀧𑀭𑀁 𑀦 𑀯𑀺𑀭𑀼𑀚𑁆𑀛𑀢𑀺, 𑀢𑀣𑀸 𑀅𑀥𑀺𑀧𑁆𑀧𑀸𑀬𑁄 𑀕𑀳𑁂𑀢𑀩𑁆𑀩𑁄’’𑀢𑀺 𑀯𑀼𑀢𑁆𑀢𑀁.

𑀦𑀸𑀯𑀸 𑀯𑀸 𑀲𑁂𑀢𑀼 𑀯𑀸𑀢𑀺𑀆𑀤𑀺𑀫𑁆𑀳𑀺 𑀦𑀸𑀯𑀸𑀤𑀺𑀅𑀪𑀺𑀭𑀼𑀳𑀦𑀸𑀤𑀺𑀓𑁆𑀔𑀡𑁂 𑀓𑀺𑀜𑁆𑀘𑀺 𑀞𑀢𑁆𑀯𑀸𑀧𑀺 𑀅𑀪𑀺𑀭𑀼𑀳𑀦𑀸𑀤𑀺𑀓𑀸𑀢𑀩𑁆𑀩𑀢𑁆𑀢𑁂𑀧𑀺 𑀕𑀫𑀦𑀢𑀧𑁆𑀧𑀭𑀢𑀸𑀬 𑀞𑀸𑀦𑀁 𑀦𑀸𑀫 𑀦 𑀳𑁄𑀢𑀺, 𑀚𑀦𑀲𑀫𑁆𑀫𑀤𑁆𑀤𑁂𑀦 𑀧𑀦 𑀅𑀦𑁄𑀓𑀸𑀲𑀸𑀤𑀺𑀪𑀸𑀯𑁂𑀦 𑀞𑀸𑀢𑀼𑀁 𑀦 𑀯𑀝𑁆𑀝𑀢𑀺. 𑀅𑀘𑀸𑀮𑁂𑀢𑁆𑀯𑀸𑀢𑀺 𑀯𑀼𑀢𑁆𑀢𑀝𑁆𑀞𑀸𑀦𑀢𑁄 𑀅𑀜𑁆𑀜𑀲𑁆𑀫𑀺𑀁 𑀧𑀻𑀞𑀧𑁆𑀧𑀤𑁂𑀲𑁂 𑀯𑀸 𑀉𑀤𑁆𑀥𑀁 𑀯𑀸 𑀅𑀧𑁂𑀮𑁆𑀮𑁂𑀢𑁆𑀯𑀸, 𑀢𑀲𑁆𑀫𑀺𑀁 𑀏𑀯 𑀧𑀦 𑀞𑀸𑀦𑁂 𑀧𑀭𑀺𑀯𑀢𑁆𑀢𑁂𑀢𑀼𑀁 𑀮𑀪𑀢𑀺. 𑀢𑁂𑀦𑀸𑀳 ‘‘𑀬𑁂𑀦 𑀧𑀲𑁆𑀲𑁂𑀦𑀸’’𑀢𑀺𑀆𑀤𑀺. 𑀲𑀘𑁂 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀺𑀦𑁆𑀦𑁄 𑀧𑀸𑀤𑁂 𑀅𑀫𑀼𑀜𑁆𑀘𑀺𑀢𑁆𑀯𑀸𑀧𑀺 𑀪𑀽𑀫𑀺𑀬𑀁 𑀦𑀺𑀲𑀻𑀤𑀢𑀺, 𑀇𑀭𑀺𑀬𑀸𑀧𑀣𑀁 𑀯𑀺𑀓𑁄𑀧𑁂𑀦𑁆𑀢𑁄 𑀦𑀸𑀫 𑀳𑁄𑀢𑀻𑀢𑀺 𑀉𑀓𑁆𑀓𑀼𑀝𑀺𑀓𑀸𑀲𑀦𑀁 𑀅𑀯𑀺𑀓𑁄𑀧𑁂𑀢𑁆𑀯𑀸 𑀲𑀼𑀔𑁂𑀦 𑀦𑀺𑀲𑀻𑀤𑀺𑀢𑀼𑀁 ‘‘𑀢𑀲𑁆𑀲 𑀧𑀦 𑀳𑁂𑀝𑁆𑀞𑀸…𑀧𑁂… 𑀦𑀺𑀲𑀻𑀤𑀦𑀓𑀁 𑀤𑀸𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁. ‘‘𑀆𑀲𑀦𑀁 𑀅𑀘𑀸𑀮𑁂𑀢𑁆𑀯𑀸𑀢𑀺 𑀧𑀻𑀞𑁂 𑀨𑀼𑀝𑁆𑀞𑁄𑀓𑀸𑀲𑀢𑁄 𑀆𑀦𑀺𑀲𑀤𑀫𑀁𑀲𑀁 𑀅𑀫𑁄𑀘𑁂𑀢𑁆𑀯𑀸 𑀅𑀦𑀼𑀝𑁆𑀞𑀳𑀺𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀤𑀺𑀦𑁆𑀦𑀸𑀤𑀸𑀦𑁂 𑀯𑀺𑀬 𑀞𑀸𑀦𑀸𑀘𑀸𑀯𑀦𑀁 𑀦 𑀕𑀳𑁂𑀢𑀩𑁆𑀩’’𑀦𑁆𑀢𑀺 𑀢𑀻𑀲𑀼𑀧𑀺 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀁.

𑁧𑁨𑁧. 𑀅𑀓𑀧𑁆𑀧𑀺𑀬𑀓𑀢𑀦𑁆𑀢𑀺 𑀏𑀢𑁆𑀣 𑀅𑀓𑀧𑁆𑀧𑀺𑀬𑀓𑀢𑀲𑁆𑀲𑁂𑀯 𑀅𑀦𑀢𑀺𑀭𑀺𑀢𑁆𑀢𑀪𑀸𑀯𑀢𑁄 𑀓𑀧𑁆𑀧𑀺𑀬𑀁 𑀅𑀓𑀸𑀭𑀸𑀧𑁂𑀢𑁆𑀯𑀸 𑀢𑀲𑁆𑀫𑀺𑀁 𑀧𑀢𑁆𑀢𑁂 𑀧𑀓𑁆𑀔𑀺𑀢𑁆𑀢𑀁 𑀫𑀽𑀮𑀨𑀮𑀸𑀤𑀺𑀬𑁂𑀯 𑀅𑀢𑀺𑀭𑀺𑀢𑁆𑀢𑀁 𑀦 𑀳𑁄𑀢𑀺, 𑀅𑀓𑀧𑁆𑀧𑀺𑀬𑀪𑁄𑀚𑀦𑀁 𑀯𑀸 𑀓𑀼𑀮𑀤𑀽𑀲𑀦𑀸𑀤𑀺𑀦𑀸 𑀉𑀧𑁆𑀧𑀦𑁆𑀦𑀁. 𑀲𑁂𑀲𑀁 𑀧𑀦 𑀧𑀢𑁆𑀢𑀧𑀭𑀺𑀬𑀸𑀧𑀦𑁆𑀦𑀁 𑀅𑀢𑀺𑀭𑀺𑀢𑁆𑀢𑀫𑁂𑀯 𑀳𑁄𑀢𑀺, 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺, 𑀢𑀁 𑀧𑀦 𑀫𑀽𑀮𑀨𑀮𑀸𑀤𑀺𑀁 𑀧𑀭𑀺𑀪𑀼𑀜𑁆𑀚𑀺𑀢𑀼𑀓𑀸𑀫𑁂𑀦 𑀢𑀢𑁄 𑀦𑀻𑀳𑀭𑀺𑀢𑁆𑀯𑀸 𑀓𑀧𑁆𑀧𑀺𑀬𑀁 𑀓𑀸𑀭𑀸𑀧𑁂𑀢𑁆𑀯𑀸 𑀅𑀜𑁆𑀜𑀲𑁆𑀫𑀺𑀁 𑀪𑀸𑀚𑀦𑁂 𑀞𑀧𑁂𑀢𑁆𑀯𑀸 𑀅𑀢𑀺𑀭𑀺𑀢𑁆𑀢𑀁 𑀓𑀸𑀭𑀸𑀧𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁.

𑁧𑁨𑁨. 𑀲𑁄 𑀧𑀼𑀦 𑀓𑀸𑀢𑀼𑀁 𑀦 𑀮𑀪𑀢𑀻𑀢𑀺 𑀢𑀲𑁆𑀫𑀺𑀁𑀬𑁂𑀯 𑀪𑀸𑀚𑀦𑁂 𑀓𑀭𑀺𑀬𑀫𑀸𑀦𑀁 𑀧𑀞𑀫𑀁 𑀓𑀢𑁂𑀦 𑀲𑀤𑁆𑀥𑀺𑀁 𑀓𑀢𑀁 𑀳𑁄𑀢𑀻𑀢𑀺 𑀧𑀼𑀦 𑀲𑁄𑀬𑁂𑀯 𑀓𑀸𑀢𑀼𑀁 𑀦 𑀮𑀪𑀢𑀺, 𑀅𑀜𑁆𑀜𑁄 𑀮𑀪𑀢𑀺. 𑀅𑀜𑁆𑀜𑀲𑁆𑀫𑀺𑀁 𑀧𑀦 𑀪𑀸𑀚𑀦𑁂 𑀢𑁂𑀦 𑀯𑀸 𑀅𑀜𑁆𑀜𑁂𑀦 𑀯𑀸 𑀓𑀸𑀢𑀼𑀁 𑀯𑀝𑁆𑀝𑀢𑀺. 𑀢𑁂𑀦𑀸𑀳 ‘‘𑀬𑁂𑀦 𑀅𑀓𑀢𑀁, 𑀢𑁂𑀦 𑀓𑀸𑀢𑀩𑁆𑀩𑀁, 𑀬𑀜𑁆𑀘 𑀅𑀓𑀢𑀁, 𑀢𑀁 𑀓𑀸𑀢𑀩𑁆𑀩’’𑀦𑁆𑀢𑀺. 𑀢𑁂𑀦𑀸𑀧𑀻𑀢𑀺 𑀏𑀢𑁆𑀣 𑀧𑀺-𑀲𑀤𑁆𑀤𑁄 𑀦 𑀓𑁂𑀯𑀮𑀁 𑀅𑀜𑁆𑀜𑁂𑀦𑁂𑀯𑀸𑀢𑀺 𑀇𑀫𑀫𑀢𑁆𑀣𑀁 𑀤𑀻𑀧𑁂𑀢𑀺. 𑀏𑀯𑀁 𑀓𑀢𑀦𑁆𑀢𑀺 𑀅𑀜𑁆𑀜𑀲𑁆𑀫𑀺𑀁 𑀪𑀸𑀚𑀦𑁂 𑀓𑀢𑀁.

𑀧𑁂𑀲𑁂𑀢𑁆𑀯𑀸𑀢𑀺 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀳𑀢𑁆𑀣𑁂 𑀧𑁂𑀲𑁂𑀢𑁆𑀯𑀸. 𑀇𑀫𑀲𑁆𑀲 𑀯𑀺𑀦𑀬𑀓𑀫𑁆𑀫𑀪𑀸𑀯𑀢𑁄 ‘‘𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀳𑀢𑁆𑀣𑁂 𑀞𑀺𑀢𑀁 𑀦 𑀓𑀸𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁.

𑀲𑀘𑁂 𑀧𑀦 𑀆𑀫𑀺𑀲𑀲𑀁𑀲𑀝𑁆𑀞𑀸𑀦𑀻𑀢𑀺 𑀏𑀢𑁆𑀣 𑀲𑀘𑁂 𑀫𑀼𑀔𑀕𑀢𑁂𑀦𑀸𑀧𑀺 𑀅𑀦𑀢𑀺𑀭𑀺𑀢𑁆𑀢𑁂𑀦 𑀆𑀫𑀺𑀲𑁂𑀦 𑀲𑀁𑀲𑀝𑁆𑀞𑀸𑀦𑀺 𑀳𑁄𑀦𑁆𑀢𑀺, 𑀧𑀸𑀘𑀺𑀢𑁆𑀢𑀺𑀬𑀫𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀁, 𑀢𑀲𑁆𑀫𑀸 𑀧𑀯𑀸𑀭𑀺𑀢𑁂𑀦 𑀪𑁄𑀚𑀦𑀁 𑀅𑀢𑀺𑀭𑀺𑀢𑁆𑀢𑀁 𑀓𑀸𑀭𑀸𑀧𑁂𑀢𑁆𑀯𑀸 𑀪𑀼𑀜𑁆𑀚𑀦𑁆𑀢𑁂𑀦𑀧𑀺 𑀬𑀣𑀸 𑀅𑀓𑀢𑁂𑀦 𑀫𑀺𑀲𑁆𑀲𑀁 𑀦 𑀳𑁄𑀢𑀺, 𑀏𑀯𑀁 𑀫𑀼𑀔𑀜𑁆𑀘 𑀳𑀢𑁆𑀣𑀜𑁆𑀘 𑀲𑀼𑀤𑁆𑀥𑀁 𑀓𑀢𑁆𑀯𑀸 𑀪𑀼𑀜𑁆𑀚𑀺𑀢𑀩𑁆𑀩𑀁. 𑀓𑀺𑀜𑁆𑀘𑀸𑀧𑀺 𑀅𑀧𑀯𑀸𑀭𑀺𑀢𑀲𑁆𑀲 𑀧𑀼𑀭𑁂𑀪𑀢𑁆𑀢𑀁 𑀬𑀸𑀫𑀓𑀸𑀮𑀺𑀓𑀸𑀤𑀻𑀦𑀺 𑀆𑀳𑀸𑀭𑀢𑁆𑀣𑀸𑀬 𑀧𑀭𑀺𑀪𑀼𑀜𑁆𑀚𑀢𑁄𑀧𑀺 𑀅𑀦𑀸𑀧𑀢𑁆𑀢𑀺, 𑀧𑀯𑀸𑀭𑀺𑀢𑀲𑁆𑀲 𑀧𑀦 𑀧𑀯𑀸𑀭𑀡𑀫𑀽𑀮𑀓𑀁 𑀤𑀼𑀓𑁆𑀓𑀝𑀁 𑀳𑁄𑀢𑀺𑀬𑁂𑀯𑀸𑀢𑀺 ‘‘𑀬𑀸𑀫𑀓𑀸𑀮𑀺𑀓𑀁…𑀧𑁂… 𑀅𑀚𑁆𑀛𑁄𑀳𑀸𑀭𑁂 𑀅𑀚𑁆𑀛𑁄𑀳𑀸𑀭𑁂 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 𑀧𑀸𑀴𑀺𑀬𑀁 (𑀧𑀸𑀘𑀺. 𑁨𑁪𑁦) 𑀯𑀼𑀢𑁆𑀢𑀁.

𑀇𑀢𑀺 𑀯𑀺𑀦𑀬𑀲𑀗𑁆𑀕𑀳𑀲𑀁𑀯𑀡𑁆𑀡𑀦𑀸𑀪𑀽𑀢𑁂 𑀯𑀺𑀦𑀬𑀸𑀮𑀗𑁆𑀓𑀸𑀭𑁂

𑀧𑀝𑀺𑀓𑁆𑀔𑁂𑀧𑀧𑀯𑀸𑀭𑀡𑀸𑀯𑀺𑀦𑀺𑀘𑁆𑀙𑀬𑀓𑀣𑀸𑀮𑀗𑁆𑀓𑀸𑀭𑁄 𑀦𑀸𑀫

𑀏𑀓𑀯𑀻𑀲𑀢𑀺𑀫𑁄 𑀧𑀭𑀺𑀘𑁆𑀙𑁂𑀤𑁄.