𑁨𑁦. 𑀧𑀝𑀺𑀕𑁆𑀕𑀳𑀡𑀯𑀺𑀦𑀺𑀘𑁆𑀙𑀬𑀓𑀣𑀸

𑁧𑁦𑁪. 𑀏𑀯𑀁 𑀓𑀧𑁆𑀧𑀺𑀬𑀪𑀽𑀫𑀺𑀯𑀺𑀦𑀺𑀘𑁆𑀙𑀬𑀁 𑀓𑀣𑁂𑀢𑁆𑀯𑀸 𑀇𑀤𑀸𑀦𑀺 𑀧𑀝𑀺𑀕𑁆𑀕𑀳𑀡𑀯𑀺𑀦𑀺𑀘𑁆𑀙𑀬𑀁 𑀓𑀣𑁂𑀢𑀼𑀁 ‘‘𑀔𑀸𑀤𑀦𑀻𑀬𑀸𑀤𑀺𑀧𑀝𑀺𑀕𑁆𑀕𑀸𑀳𑁄’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀔𑀸𑀤𑀺𑀬𑀢𑁂𑀢𑀺 𑀔𑀸𑀤𑀦𑀻𑀬𑀁, 𑀞𑀧𑁂𑀢𑁆𑀯𑀸 𑀧𑀜𑁆𑀘 𑀪𑁄𑀚𑀦𑀸𑀦𑀺 𑀲𑀩𑁆𑀩𑀲𑁆𑀲 𑀅𑀚𑁆𑀛𑁄𑀳𑀭𑀺𑀢𑀩𑁆𑀩𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀆𑀤𑀺𑀲𑀤𑁆𑀤𑁂𑀦 𑀪𑁄𑀚𑀦𑀻𑀬𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀧𑀝𑀺𑀕𑁆𑀕𑀳𑀡𑀁 𑀲𑀫𑁆𑀧𑀝𑀺𑀘𑁆𑀙𑀦𑀁 𑀧𑀝𑀺𑀕𑁆𑀕𑀸𑀳𑁄, 𑀔𑀸𑀤𑀦𑀻𑀬𑀸𑀤𑀻𑀦𑀁 𑀧𑀝𑀺𑀕𑁆𑀕𑀸𑀳𑁄 𑀔𑀸𑀤𑀦𑀻𑀬𑀸𑀤𑀺𑀧𑀝𑀺𑀕𑁆𑀕𑀸𑀳𑁄. 𑀢𑁂𑀦𑀸𑀳 ‘‘𑀅𑀚𑁆𑀛𑁄𑀳𑀭𑀺𑀢𑀩𑁆𑀩𑀲𑁆𑀲 𑀬𑀲𑁆𑀲 𑀓𑀲𑁆𑀲𑀘𑀺 𑀔𑀸𑀤𑀦𑀻𑀬𑀲𑁆𑀲 𑀯𑀸 𑀪𑁄𑀚𑀦𑀻𑀬𑀲𑁆𑀲 𑀯𑀸 𑀧𑀝𑀺𑀕𑁆𑀕𑀳𑀡’’𑀦𑁆𑀢𑀺. 𑀧𑀜𑁆𑀘𑀲𑀼 𑀅𑀗𑁆𑀕𑁂𑀲𑀼 𑀉𑀘𑁆𑀘𑀸𑀭𑀡𑀫𑀢𑁆𑀢𑀦𑁆𑀢𑀺 𑀉𑀓𑁆𑀔𑀺𑀧𑀦𑀫𑀢𑁆𑀢𑀁, 𑀇𑀫𑀺𑀦𑀸 𑀧𑀝𑀺𑀕𑁆𑀕𑀳𑀺𑀢𑀩𑁆𑀩𑀪𑀸𑀭𑀲𑁆𑀲 𑀧𑀫𑀸𑀡𑀁 𑀤𑀲𑁆𑀲𑁂𑀢𑀺. 𑀢𑁂𑀦𑁂𑀯 𑀢𑀸𑀤𑀺𑀲𑁂𑀦 𑀧𑀼𑀭𑀺𑀲𑁂𑀦 𑀅𑀦𑀼𑀓𑁆𑀔𑀺𑀧𑀦𑀻𑀬𑀯𑀢𑁆𑀣𑀼𑀲𑁆𑀫𑀺𑀁 𑀧𑀝𑀺𑀕𑁆𑀕𑀳𑀡𑀁 𑀦 𑀭𑀼𑀳𑀢𑀻𑀢𑀺 𑀤𑀻𑀧𑁂𑀢𑀺. ‘‘𑀳𑀢𑁆𑀣𑀧𑀸𑀲𑁄’’𑀢𑀺 𑀇𑀫𑀺𑀦𑀸 𑀆𑀲𑀦𑁆𑀦𑀪𑀸𑀯𑀁. 𑀢𑁂𑀦𑁂𑀯 𑀘 𑀤𑀽𑀭𑁂 𑀞𑀢𑁆𑀯𑀸 𑀅𑀪𑀺𑀳𑀭𑀦𑁆𑀢𑀲𑁆𑀲 𑀧𑀝𑀺𑀕𑁆𑀕𑀳𑀡𑀁 𑀦 𑀭𑀼𑀳𑀢𑀻𑀢𑀺 𑀤𑀻𑀧𑁂𑀢𑀺. 𑀅𑀪𑀺𑀳𑀸𑀭𑁄𑀢𑀺 𑀧𑀭𑀺𑀡𑀸𑀫𑀺𑀢𑀪𑀸𑀯𑁄, 𑀢𑁂𑀦 𑀘 𑀢𑀢𑁆𑀭𑀝𑁆𑀞𑀓𑀸𑀤𑀻𑀲𑀼 𑀦 𑀭𑀼𑀳𑀢𑀻𑀢𑀺 𑀤𑀻𑀧𑁂𑀢𑀺. ‘‘𑀤𑁂𑀯𑁄 𑀯𑀸’’𑀢𑀺𑀆𑀤𑀺𑀦𑀸 𑀤𑀸𑀬𑀓𑀢𑁄 𑀧𑀬𑁄𑀕𑀢𑁆𑀢𑀬𑀁 𑀤𑀲𑁆𑀲𑁂𑀢𑀺. ‘‘𑀢𑀜𑁆𑀘𑁂’’𑀢𑀺𑀆𑀤𑀺𑀦𑀸 𑀧𑀝𑀺𑀕𑁆𑀕𑀸𑀳𑀓𑀢𑁄 𑀧𑀬𑁄𑀕𑀤𑁆𑀯𑀬𑀁 𑀤𑀲𑁆𑀲𑁂𑀢𑀺.

𑀇𑀤𑀸𑀦𑀺 𑀢𑁂𑀲𑀼 𑀧𑀜𑁆𑀘𑀲𑀼 𑀅𑀗𑁆𑀕𑁂𑀲𑀼 𑀳𑀢𑁆𑀣𑀧𑀸𑀲𑀲𑁆𑀲 𑀤𑀼𑀭𑀸𑀚𑀸𑀦𑀢𑀸𑀬 𑀢𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀢𑀢𑁆𑀣𑀺’’𑀘𑁆𑀘𑀸𑀤𑀺. 𑀢𑀢𑁆𑀣 𑀅𑀟𑁆𑀠𑀢𑁂𑀬𑁆𑀬𑀳𑀢𑁆𑀣𑁄 𑀳𑀢𑁆𑀣𑀧𑀸𑀲𑁄 𑀦𑀸𑀫𑀸𑀢𑀺 𑀬𑁄𑀚𑀦𑀸. ‘‘𑀢𑀲𑁆𑀲 𑀑𑀭𑀺𑀫𑀦𑁆𑀢𑁂𑀦𑀸’’𑀢𑀺 𑀇𑀫𑀺𑀦𑀸 𑀆𑀓𑀸𑀲𑁂 𑀉𑀚𑀼𑀁 𑀞𑀢𑁆𑀯𑀸 𑀧𑀭𑁂𑀦 𑀉𑀓𑁆𑀔𑀺𑀢𑁆𑀢𑀁 𑀕𑀡𑁆𑀳𑀦𑁆𑀢𑀲𑁆𑀲𑀸𑀧𑀺 𑀆𑀲𑀦𑁆𑀦𑀗𑁆𑀕𑀪𑀽𑀢𑀧𑀸𑀤𑀢𑀮𑀢𑁄 𑀧𑀝𑁆𑀞𑀸𑀬 𑀳𑀢𑁆𑀣𑀧𑀸𑀲𑁄 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑀩𑁆𑀩𑁄, 𑀦 𑀲𑀻𑀲𑀢𑁄 𑀧𑀝𑁆𑀞𑀸𑀬𑀸𑀢𑀺 𑀤𑀲𑁆𑀲𑁂𑀢𑀺. 𑀢𑀢𑁆𑀣 ‘‘𑀑𑀭𑀺𑀫𑀦𑁆𑀢𑁂𑀦𑀸’’𑀢𑀺 𑀇𑀫𑀲𑁆𑀲 𑀳𑁂𑀝𑁆𑀞𑀺𑀫𑀦𑁆𑀢𑁂𑀦𑀸𑀢𑀺 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄.

𑀏𑀢𑁆𑀣 𑀘 𑀧𑀯𑀸𑀭𑀡𑀲𑀺𑀓𑁆𑀔𑀸𑀧𑀤𑀝𑁆𑀞𑀓𑀣𑀸𑀬𑀁 (𑀧𑀸𑀘𑀺. 𑀅𑀝𑁆𑀞. 𑁨𑁩𑁮-𑁨𑁩𑁯) ‘‘𑀲𑀘𑁂 𑀧𑀦 𑀪𑀺𑀓𑁆𑀔𑀼 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺, 𑀆𑀲𑀦𑁆𑀦𑀲𑁆𑀲 𑀧𑀘𑁆𑀙𑀺𑀫𑀦𑁆𑀢𑀢𑁄 𑀧𑀝𑁆𑀞𑀸𑀬𑀸’’𑀢𑀺𑀆𑀤𑀺𑀦𑀸 𑀧𑀝𑀺𑀕𑁆𑀕𑀸𑀳𑀓𑀸𑀦𑀁 𑀆𑀲𑀦𑁆𑀦𑀗𑁆𑀕𑀲𑁆𑀲 𑀧𑀸𑀭𑀺𑀫𑀦𑁆𑀢𑀢𑁄 𑀧𑀝𑁆𑀞𑀸𑀬 𑀧𑀭𑀺𑀘𑁆𑀙𑁂𑀤𑀲𑁆𑀲 𑀤𑀲𑁆𑀲𑀺𑀢𑀢𑁆𑀢𑀸 𑀇𑀥𑀸𑀧𑀺 𑀆𑀓𑀸𑀲𑁂 𑀞𑀺𑀢𑀲𑁆𑀲 𑀧𑀝𑀺𑀕𑁆𑀕𑀸𑀳𑀓𑀲𑁆𑀲 𑀆𑀲𑀦𑁆𑀦𑀗𑁆𑀕𑀪𑀽𑀢𑀧𑀸𑀤𑀢𑀮𑀲𑁆𑀲 𑀧𑀸𑀭𑀺𑀫𑀦𑁆𑀢𑀪𑀽𑀢𑀢𑁄 𑀧𑀡𑁆𑀳𑀺𑀧𑀭𑀺𑀬𑀦𑁆𑀢𑀲𑁆𑀲 𑀳𑁂𑀝𑁆𑀞𑀺𑀫𑀢𑀮𑀢𑁄 𑀧𑀝𑁆𑀞𑀸𑀬, 𑀤𑀸𑀬𑀓𑀲𑁆𑀲 𑀧𑀦 𑀑𑀭𑀺𑀫𑀦𑁆𑀢𑀪𑀽𑀢𑀢𑁄 𑀧𑀸𑀤𑀗𑁆𑀕𑀼𑀮𑀲𑁆𑀲 𑀳𑁂𑀝𑁆𑀞𑀺𑀫𑀧𑀭𑀺𑀬𑀦𑁆𑀢𑀢𑁄 𑀧𑀝𑁆𑀞𑀸𑀬 𑀳𑀢𑁆𑀣𑀧𑀸𑀲𑁄 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑀩𑁆𑀩𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀇𑀫𑀺𑀦𑀸𑀯 𑀦𑀬𑁂𑀦 𑀪𑀽𑀫𑀺𑀬𑀁 𑀦𑀺𑀧𑀚𑁆𑀚𑀺𑀢𑁆𑀯𑀸 𑀉𑀲𑁆𑀲𑀻𑀲𑀓𑁂 𑀦𑀺𑀲𑀺𑀦𑁆𑀦𑀲𑁆𑀲 𑀳𑀢𑁆𑀣𑀢𑁄 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀲𑁆𑀲𑀸𑀧𑀺 𑀆𑀲𑀦𑁆𑀦𑀲𑀻𑀲𑀗𑁆𑀕𑀲𑁆𑀲 𑀧𑀸𑀭𑀺𑀫𑀦𑁆𑀢𑀪𑀽𑀢𑀢𑁄 𑀕𑀻𑀯𑀦𑁆𑀢𑀢𑁄 𑀧𑀝𑁆𑀞𑀸𑀬𑁂𑀯 𑀳𑀢𑁆𑀣𑀧𑀸𑀲𑁄 𑀫𑀺𑀦𑀺𑀢𑀩𑁆𑀩𑁄, 𑀦 𑀧𑀸𑀤𑀢𑀮𑀢𑁄 𑀧𑀝𑁆𑀞𑀸𑀬. 𑀏𑀯𑀁 𑀦𑀺𑀧𑀚𑁆𑀚𑀺𑀢𑁆𑀯𑀸 𑀤𑀸𑀦𑁂𑀧𑀺 𑀬𑀣𑀸𑀦𑀼𑀭𑀽𑀧𑀁 𑀯𑁂𑀤𑀺𑀢𑀩𑁆𑀩𑀁. ‘‘𑀬𑀁 𑀆𑀲𑀦𑁆𑀦𑀢𑀭𑀁 𑀅𑀗𑁆𑀕’’𑀦𑁆𑀢𑀺 (𑀧𑀸𑀘𑀺. 𑀅𑀝𑁆𑀞. 𑁨𑁩𑁮-𑁨𑁩𑁯) 𑀳𑀺 𑀯𑀼𑀢𑁆𑀢𑀁. 𑀅𑀓𑀮𑁆𑀮𑀓𑁄𑀢𑀺 𑀕𑀺𑀮𑀸𑀦𑁄 𑀲𑀳𑀢𑁆𑀣𑀸 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀫𑀼𑀔𑁂𑀦 𑀧𑀝𑀺𑀕𑁆𑀕𑀡𑁆𑀳𑀸𑀢𑀺. 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑀧𑀸𑀘𑀺𑀢𑁆𑀢𑀺𑀬 𑁨.𑁨𑁬𑁫) 𑀧𑀦 ‘‘𑀅𑀓𑀮𑁆𑀮𑀓𑁄𑀢𑀺 𑀕𑀺𑀮𑀸𑀦𑁄 𑀕𑀳𑁂𑀢𑀼𑀁 𑀯𑀸’’𑀢𑀺 𑀏𑀢𑁆𑀢𑀓𑀫𑁂𑀯 𑀯𑀼𑀢𑁆𑀢𑀁, 𑀏𑀢𑁂𑀦 𑀅𑀓𑀮𑁆𑀮𑀓𑁄𑀢𑀺 𑀕𑀺𑀮𑀸𑀦𑁄 𑀯𑀸 𑀅𑀣 𑀯𑀸 𑀕𑀳𑁂𑀢𑀼𑀁 𑀅𑀓𑀮𑁆𑀮𑀓𑁄 𑀅𑀲𑀫𑀢𑁆𑀣𑁄𑀢𑀺 𑀅𑀢𑁆𑀣𑁄 𑀤𑀲𑁆𑀲𑀺𑀢𑁄. 𑀢𑁂𑀦𑀸𑀳 ‘‘𑀲𑀘𑁂𑀧𑀺 𑀦𑀢𑁆𑀣𑀼𑀓𑀭𑀡𑀺𑀬𑀁 𑀤𑀻𑀬𑀫𑀸𑀦𑀁 𑀦𑀸𑀲𑀸𑀧𑀼𑀝𑁂𑀦 𑀅𑀓𑀮𑁆𑀮𑀓𑁄 𑀯𑀸 𑀫𑀼𑀔𑁂𑀦 𑀧𑀝𑀺𑀕𑁆𑀕𑀡𑁆𑀳𑀸𑀢𑀻’’𑀢𑀺.

𑁧𑁦𑁫. 𑀏𑀓𑀤𑁂𑀲𑁂𑀦𑀸𑀧𑀻𑀢𑀺 𑀅𑀗𑁆𑀕𑀼𑀮𑀺𑀬𑀸 𑀨𑀼𑀝𑁆𑀞𑀫𑀢𑁆𑀢𑁂𑀦.

𑀢𑀜𑁆𑀘𑁂 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀲𑀩𑁆𑀩𑀁 𑀧𑀝𑀺𑀕𑁆𑀕𑀳𑀺𑀢𑀫𑁂𑀯𑀸𑀢𑀺 𑀯𑁂𑀡𑀼𑀓𑁄𑀝𑀺𑀬𑀁 𑀩𑀦𑁆𑀥𑀺𑀢𑁆𑀯𑀸 𑀞𑀧𑀺𑀢𑀢𑁆𑀢𑀸. 𑀲𑀘𑁂 𑀪𑀽𑀫𑀺𑀬𑀁 𑀞𑀺𑀢𑀫𑁂𑀯 𑀖𑀝𑀁 𑀤𑀸𑀬𑀓𑁂𑀦 𑀳𑀢𑁆𑀣𑀧𑀸𑀲𑁂 𑀞𑀢𑁆𑀯𑀸 ‘‘𑀖𑀝𑀁 𑀤𑀲𑁆𑀲𑀸𑀫𑀻’’𑀢𑀺 𑀤𑀺𑀦𑁆𑀦𑀁 𑀯𑁂𑀡𑀼𑀓𑁄𑀝𑀺𑀬𑀸 𑀕𑀳𑀡𑀯𑀲𑁂𑀦 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀉𑀪𑀬𑀓𑁄𑀝𑀺𑀩𑀤𑁆𑀥𑀁 𑀲𑀩𑁆𑀩𑀫𑁆𑀧𑀺 𑀧𑀝𑀺𑀕𑁆𑀕𑀳𑀺𑀢𑀫𑁂𑀯 𑀳𑁄𑀢𑀺. 𑀪𑀺𑀓𑁆𑀔𑀼𑀲𑁆𑀲 𑀳𑀢𑁆𑀣𑁂 𑀅𑀧𑀻𑀴𑁂𑀢𑁆𑀯𑀸 𑀧𑀓𑀢𑀺𑀬𑀸 𑀧𑀻𑀴𑀺𑀬𑀫𑀸𑀦𑀁 𑀉𑀘𑁆𑀙𑀼𑀭𑀲𑀁 𑀲𑀦𑁆𑀥𑀸𑀬 ‘‘𑀕𑀡𑁆𑀳𑀣𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 ‘‘𑀅𑀪𑀺𑀳𑀸𑀭𑁄 𑀦 𑀧𑀜𑁆𑀜𑀸𑀬𑀢𑀻’’𑀢𑀺 𑀯𑀼𑀢𑁆𑀢𑀁, 𑀳𑀢𑁆𑀣𑀧𑀸𑀲𑁂 𑀞𑀺𑀢𑀲𑁆𑀲 𑀧𑀦 𑀪𑀺𑀓𑁆𑀔𑀼𑀲𑁆𑀲 𑀅𑀢𑁆𑀣𑀸𑀬 𑀧𑀻𑀴𑀺𑀬𑀫𑀸𑀦𑀁 𑀉𑀘𑁆𑀙𑀼𑀢𑁄 𑀧𑀕𑁆𑀖𑀭𑀦𑁆𑀢𑀁 𑀭𑀲𑀁 𑀕𑀡𑁆𑀳𑀺𑀢𑀼𑀁 𑀯𑀝𑁆𑀝𑀢𑀺. 𑀤𑁄𑀡𑀺𑀓𑀸𑀬 𑀲𑀬𑀁 𑀧𑀕𑁆𑀖𑀭𑀦𑁆𑀢𑀁 𑀉𑀘𑁆𑀙𑀼𑀭𑀲𑀁 𑀫𑀚𑁆𑀛𑁂 𑀆𑀯𑀭𑀺𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑀺𑀢𑀫𑁆𑀧𑀺 𑀕𑀡𑁆𑀳𑀺𑀢𑀼𑀁 𑀯𑀝𑁆𑀝𑀢𑀺. 𑀧𑀝𑀺𑀕𑁆𑀕𑀳𑀡𑀲𑀜𑁆𑀜𑀸𑀬𑀸𑀢𑀺 ‘‘𑀫𑀜𑁆𑀘𑀸𑀤𑀺𑀦𑀸 𑀧𑀝𑀺𑀕𑁆𑀕𑀳𑁂𑀲𑁆𑀲𑀸𑀫𑀻’’𑀢𑀺 𑀉𑀧𑁆𑀧𑀸𑀤𑀺𑀢𑀲𑀜𑁆𑀜𑀸𑀬, 𑀇𑀫𑀺𑀦𑀸 ‘‘𑀧𑀝𑀺𑀕𑁆𑀕𑀡𑁆𑀳𑀸𑀫𑀻’’𑀢𑀺 𑀯𑀸𑀘𑀸𑀬 𑀯𑀢𑁆𑀢𑀩𑁆𑀩𑀓𑀺𑀘𑁆𑀘𑀁 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀺.

𑀬𑀢𑁆𑀣 𑀓𑀢𑁆𑀣𑀘𑀺 𑀅𑀝𑁆𑀞𑀓𑀣𑀸𑀲𑀼, 𑀧𑀤𑁂𑀲𑁂𑀲𑀼 𑀯𑀸. 𑀅𑀲𑀁𑀳𑀸𑀭𑀺𑀫𑁂 𑀨𑀮𑀓𑁂𑀢𑀺 𑀣𑀸𑀫𑀫𑀚𑁆𑀛𑀺𑀫𑁂𑀦 𑀅𑀲𑀁𑀳𑀸𑀭𑀺𑀬𑁂. ‘‘𑀢𑀺𑀦𑁆𑀢𑀺𑀡𑀺𑀓𑀸𑀤𑀺𑀧𑀡𑁆𑀡𑁂𑀲𑀽𑀢𑀺 𑀯𑀘𑀦𑀢𑁄 𑀲𑀸𑀔𑀸𑀲𑀼 𑀧𑀝𑀺𑀕𑁆𑀕𑀳𑀡𑀁 𑀭𑀼𑀳𑀢𑀻𑀢𑀺 𑀤𑀝𑁆𑀞𑀩𑁆𑀩’’𑀦𑁆𑀢𑀺 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 (𑀲𑀸𑀭𑀢𑁆𑀣. 𑀝𑀻. 𑀧𑀸𑀘𑀺𑀢𑁆𑀢𑀺𑀬 𑁩.𑁨𑁬𑁫) 𑀯𑀼𑀢𑁆𑀢𑀁. 𑀧𑁄𑀭𑀸𑀡𑀝𑀻𑀓𑀸𑀬𑀫𑁆𑀧𑀺 𑀢𑀣𑁂𑀯 𑀯𑀼𑀢𑁆𑀢𑀁, 𑀢𑀤𑁂𑀢𑀁 𑀯𑀺𑀘𑀸𑀭𑁂𑀢𑀩𑁆𑀩𑀁. 𑀅𑀝𑁆𑀞𑀓𑀣𑀸𑀬𑀜𑁆𑀳𑀺 ‘‘𑀪𑀽𑀫𑀺𑀬𑀁 𑀅𑀢𑁆𑀣𑀢𑁂𑀲𑀼 𑀲𑀼𑀔𑀼𑀫𑁂𑀲𑀼 𑀢𑀺𑀦𑁆𑀢𑀺𑀡𑀺𑀓𑀸𑀤𑀺𑀧𑀡𑁆𑀡𑁂𑀲𑀼 𑀧𑀝𑀺𑀕𑁆𑀕𑀳𑀡𑀁 𑀦 𑀭𑀼𑀳𑀢𑀻’’𑀢𑀺 𑀯𑀼𑀢𑁆𑀢𑀁. 𑀢𑀁 𑀢𑀺𑀦𑁆𑀢𑀺𑀡𑀺𑀓𑀸𑀤𑀺𑀧𑀡𑁆𑀡𑀸𑀦𑀁 𑀲𑀼𑀔𑀼𑀫𑀢𑁆𑀢𑀸 𑀢𑀢𑁆𑀣 𑀞𑀧𑀺𑀢𑀆𑀫𑀺𑀲𑀲𑁆𑀲 𑀅𑀲𑀡𑁆𑀞𑀳𑀦𑀢𑁄 𑀪𑀽𑀫𑀺𑀬𑀁 𑀞𑀧𑀺𑀢𑀲𑀤𑀺𑀲𑀢𑁆𑀢𑀸 ‘‘𑀦 𑀭𑀼𑀳𑀢𑀻’’𑀢𑀺 𑀯𑀼𑀢𑁆𑀢𑀁, 𑀢𑀺𑀦𑁆𑀢𑀺𑀡𑀺𑀓𑀸𑀤𑀺𑀲𑀸𑀔𑀸𑀲𑀼 𑀞𑀧𑀺𑀢𑁂𑀧𑀺 𑀏𑀯𑀫𑁂𑀯 𑀲𑀺𑀬𑀸, 𑀢𑀲𑁆𑀫𑀸 ‘‘𑀲𑀸𑀔𑀸𑀲𑀼 𑀧𑀝𑀺𑀕𑁆𑀕𑀳𑀡𑀁 𑀭𑀼𑀳𑀢𑀻’’𑀢𑀺 𑀯𑀘𑀦𑀁 𑀅𑀬𑀼𑀢𑁆𑀢𑀁 𑀯𑀺𑀬 𑀤𑀺𑀲𑁆𑀲𑀢𑀺. 𑀅𑀝𑁆𑀞𑀓𑀣𑀸𑀬𑀁 ‘‘𑀦 𑀭𑀼𑀳𑀢𑀻’’𑀢𑀺 𑀓𑀺𑀭𑀺𑀬𑀸𑀧𑀤𑀲𑁆𑀲 ‘‘𑀓𑀲𑁆𑀫𑀸’’𑀢𑀺 𑀳𑁂𑀢𑀼𑀧𑀭𑀺𑀬𑁂𑀲𑀦𑁂 𑀲𑀢𑀺 𑀦 𑀅𑀜𑁆𑀜𑀁 𑀧𑀭𑀺𑀬𑁂𑀲𑀺𑀢𑀩𑁆𑀩𑀁, ‘‘𑀲𑀼𑀔𑀼𑀫𑁂𑀲𑀽’’𑀢𑀺 𑀯𑀼𑀢𑁆𑀢𑀁 𑀯𑀺𑀲𑁂𑀲𑀦𑀧𑀤𑀁𑀬𑁂𑀯 𑀳𑁂𑀢𑀼𑀫𑀦𑁆𑀢𑀯𑀺𑀲𑁂𑀲𑀦𑀁 𑀪𑀯𑀢𑀺, 𑀢𑀲𑁆𑀫𑀸 𑀢𑀺𑀦𑁆𑀢𑀺𑀡𑀺𑀓𑀧𑀡𑁆𑀡𑀸𑀤𑀻𑀲𑀼 𑀧𑀝𑀺𑀕𑁆𑀕𑀳𑀡𑀁 𑀦 𑀭𑀼𑀳𑀢𑀺, 𑀓𑀲𑁆𑀫𑀸? 𑀢𑁂𑀲𑀁 𑀲𑀼𑀔𑀼𑀫𑀢𑁆𑀢𑀸. 𑀅𑀜𑁆𑀜𑁂𑀲𑀼 𑀧𑀦 𑀧𑀤𑀼𑀫𑀺𑀦𑀻𑀧𑀡𑁆𑀡𑀸𑀤𑀻𑀲𑀼 𑀭𑀼𑀳𑀢𑀺, 𑀓𑀲𑁆𑀫𑀸? 𑀢𑁂𑀲𑀁 𑀑𑀴𑀸𑀭𑀺𑀓𑀢𑁆𑀢𑀸𑀢𑀺 𑀳𑁂𑀢𑀼𑀨𑀮𑀲𑀫𑁆𑀩𑀦𑁆𑀥𑁄 𑀇𑀘𑁆𑀙𑀺𑀢𑀩𑁆𑀩𑁄𑀢𑀺 𑀤𑀺𑀲𑁆𑀲𑀢𑀺, 𑀢𑀲𑁆𑀫𑀸 ‘‘𑀢𑀤𑁂𑀢𑀁 𑀯𑀺𑀘𑀸𑀭𑁂𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑀅𑀝𑁆𑀞𑀓𑀣𑀸𑀬𑀁 ‘‘𑀦 𑀳𑀺 𑀢𑀸𑀦𑀺 𑀲𑀦𑁆𑀥𑀸𑀭𑁂𑀢𑀼𑀁 𑀲𑀫𑀢𑁆𑀣𑀸𑀦𑀻𑀢𑀺 𑀫𑀳𑀦𑁆𑀢𑁂𑀲𑀼 𑀧𑀦 𑀧𑀤𑀼𑀫𑀺𑀦𑀻𑀧𑀡𑁆𑀡𑀸𑀤𑀻𑀲𑀼 𑀭𑀼𑀳𑀢𑀻’’𑀢𑀺.

𑁧𑁦𑁬. 𑀧𑀼𑀜𑁆𑀙𑀺𑀢𑁆𑀯𑀸 𑀧𑀝𑀺𑀕𑁆𑀕𑀳𑁂𑀢𑁆𑀯𑀸𑀢𑀺 𑀧𑀼𑀜𑁆𑀙𑀺𑀢𑁂𑀧𑀺 𑀭𑀚𑀦𑀘𑀼𑀡𑁆𑀡𑀸𑀲𑀗𑁆𑀓𑀸𑀬 𑀲𑀢𑀺 𑀧𑀝𑀺𑀕𑁆𑀕𑀳𑀡𑀢𑁆𑀣𑀸𑀬 𑀯𑀼𑀢𑁆𑀢𑀁, 𑀦𑀸𑀲𑀢𑀺. 𑀢𑀁 𑀧𑀦𑀸𑀢𑀺 𑀧𑀢𑀺𑀢𑀭𑀚𑀁 𑀅𑀧𑁆𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀉𑀧𑀭𑀺 𑀕𑀳𑀺𑀢𑀧𑀺𑀡𑁆𑀟𑀧𑀸𑀢𑀁. 𑀅𑀦𑀸𑀧𑀢𑁆𑀢𑀻𑀢𑀺 𑀤𑀼𑀭𑀽𑀧𑀘𑀺𑀡𑁆𑀡𑀸𑀤𑀺𑀤𑁄𑀲𑁄 𑀦𑀢𑁆𑀣𑀺. 𑀧𑀼𑀩𑁆𑀩𑀸𑀪𑁄𑀕𑀲𑁆𑀲 𑀅𑀦𑀼𑀭𑀽𑀧𑀯𑀲𑁂𑀦 ‘‘𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀤𑀢𑁆𑀯𑀸…𑀧𑁂… 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀁. 𑀬𑀲𑁆𑀫𑀸 𑀧𑀦 𑀢𑀁 ‘‘𑀅𑀜𑁆𑀜𑀲𑁆𑀲 𑀤𑀲𑁆𑀲𑀸𑀫𑀻’’𑀢𑀺 𑀘𑀺𑀢𑁆𑀢𑀼𑀧𑁆𑀧𑀸𑀤𑀫𑀢𑁆𑀢𑁂𑀦 𑀧𑀭𑀲𑀦𑁆𑀢𑀓𑀁 𑀦 𑀳𑁄𑀢𑀺, 𑀢𑀲𑁆𑀫𑀸 𑀢𑀲𑁆𑀲 𑀅𑀤𑀢𑁆𑀯𑀸𑀧𑀺 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺. ‘‘𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀤𑀲𑁆𑀲𑀸𑀫𑀻’’𑀢𑀺𑀆𑀤𑀺𑀧𑀺 𑀯𑀺𑀦𑀬𑀤𑀼𑀓𑁆𑀓𑀝𑀲𑁆𑀲 𑀧𑀭𑀺𑀳𑀸𑀭𑀸𑀬 𑀯𑀼𑀢𑁆𑀢𑀁, 𑀢𑀣𑀸 𑀅𑀓𑀢𑁆𑀯𑀸 𑀕𑀳𑀺𑀢𑁂𑀧𑀺 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀢𑁄 𑀅𑀦𑀸𑀧𑀢𑁆𑀢𑀺𑀬𑁂𑀯. 𑀪𑀺𑀓𑁆𑀔𑀼𑀲𑁆𑀲 𑀤𑁂𑀢𑀻𑀢𑀺 𑀅𑀜𑁆𑀜𑀲𑁆𑀲 𑀪𑀺𑀓𑁆𑀔𑀼𑀲𑁆𑀲 𑀤𑁂𑀢𑀺. 𑀓𑀜𑁆𑀚𑀺𑀓𑀦𑁆𑀢𑀺 𑀔𑀻𑀭𑀭𑀲𑀸𑀤𑀺𑀁 𑀬𑀁 𑀓𑀺𑀜𑁆𑀘𑀺 𑀤𑁆𑀭𑀯𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀳𑀢𑁆𑀣𑀢𑁄 𑀫𑁄𑀘𑁂𑀢𑁆𑀯𑀸 𑀧𑀼𑀦 𑀕𑀡𑁆𑀳𑀸𑀢𑀺, 𑀉𑀕𑁆𑀕𑀳𑀺𑀢𑀓𑀁 𑀳𑁄𑀢𑀻𑀢𑀺 𑀆𑀳 ‘‘𑀳𑀢𑁆𑀣𑀢𑁄 𑀅𑀫𑁄𑀘𑁂𑀦𑁆𑀢𑁂𑀦𑁂𑀯𑀸’’𑀢𑀺. 𑀆𑀮𑀼𑀴𑁂𑀦𑁆𑀢𑀸𑀦𑀦𑁆𑀢𑀺 𑀆𑀮𑁄𑀴𑁂𑀦𑁆𑀢𑀸𑀦𑀁, 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀆𑀳𑀭𑀺𑀢𑁆𑀯𑀸 𑀪𑀽𑀫𑀺𑀬𑀁 𑀞𑀧𑀺𑀢𑀢𑁆𑀢𑀸 𑀅𑀪𑀺𑀳𑀸𑀭𑁄 𑀦𑀢𑁆𑀣𑀻𑀢𑀺 𑀆𑀳 ‘‘𑀧𑀢𑁆𑀢𑁄 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑁄’’𑀢𑀺.

𑁧𑁦𑁭. 𑀧𑀞𑀫𑀢𑀭𑀁 𑀉𑀴𑀼𑀗𑁆𑀓𑀢𑁄 𑀣𑁂𑀯𑀸 𑀧𑀢𑁆𑀢𑁂 𑀧𑀢𑀦𑁆𑀢𑀻𑀢𑀺 𑀏𑀢𑁆𑀣 ‘‘𑀬𑀣𑀸 𑀧𑀞𑀫𑀢𑀭𑀁 𑀧𑀢𑀺𑀢𑀣𑁂𑀯𑁂 𑀤𑁄𑀲𑁄 𑀦𑀢𑁆𑀣𑀺, 𑀢𑀣𑀸 𑀆𑀓𑀺𑀭𑀺𑀢𑁆𑀯𑀸 𑀅𑀧𑀦𑁂𑀦𑁆𑀢𑀸𑀦𑀁 𑀧𑀘𑁆𑀙𑀸 𑀧𑀢𑀺𑀢𑀣𑁂𑀯𑁂𑀧𑀺 𑀅𑀪𑀺𑀳𑀝𑀢𑁆𑀢𑀸 𑀦𑁂𑀯𑀢𑁆𑀣𑀺 𑀤𑁄𑀲𑁄’’𑀢𑀺 𑀯𑀤𑀦𑁆𑀢𑀺. 𑀘𑀭𑀼𑀓𑁂𑀦𑀸𑀢𑀺 𑀔𑀼𑀤𑁆𑀤𑀓𑀪𑀸𑀚𑀦𑁂𑀦. ‘‘𑀅𑀪𑀺𑀳𑀝𑀢𑁆𑀢𑀸𑀢𑀺 𑀤𑀻𑀬𑀫𑀸𑀦𑀓𑁆𑀔𑀡𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀤𑀢𑁆𑀯𑀸 𑀅𑀧𑀦𑀬𑀦𑀓𑀸𑀮𑁂 𑀧𑀦 𑀙𑀸𑀭𑀺𑀓𑀸 𑀯𑀸 𑀩𑀺𑀦𑁆𑀤𑀽𑀦𑀺 𑀯𑀸 𑀧𑀢𑀦𑁆𑀢𑀺, 𑀧𑀼𑀦 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀁 𑀅𑀪𑀺𑀳𑀸𑀭𑀲𑁆𑀲 𑀯𑀺𑀕𑀢𑀢𑁆𑀢𑀸’’𑀢𑀺 𑀯𑀤𑀦𑁆𑀢𑀺, 𑀢𑀁 𑀬𑀣𑀸 𑀦 𑀧𑀢𑀢𑀺, 𑀢𑀣𑀸 𑀅𑀧𑀦𑁂𑀲𑁆𑀲𑀸𑀫𑀻𑀢𑀺 𑀧𑀝𑀺𑀳𑀭𑀦𑁆𑀢𑁂 𑀬𑀼𑀚𑁆𑀚𑀢𑀺, 𑀧𑀓𑀢𑀺𑀲𑀜𑁆𑀜𑀸𑀬 𑀅𑀧𑀦𑁂𑀦𑁆𑀢𑁂 𑀅𑀪𑀺𑀳𑀸𑀭𑁄 𑀦 𑀙𑀺𑀚𑁆𑀚𑀢𑀺, 𑀲𑀼𑀧𑀢𑀺𑀢𑀁. 𑀧𑀝𑀺𑀕𑁆𑀕𑀳𑀺𑀢𑀫𑁂𑀯 𑀳𑀺 𑀢𑀁 𑀳𑁄𑀢𑀺. 𑀫𑀼𑀔𑀯𑀝𑁆𑀝𑀺𑀬𑀸𑀧𑀺 𑀕𑀳𑁂𑀢𑀼𑀁 𑀯𑀝𑁆𑀝𑀢𑀻𑀢𑀺 𑀅𑀪𑀺𑀳𑀭𑀺𑀬𑀫𑀸𑀦𑀲𑁆𑀲 𑀧𑀢𑁆𑀢𑀲𑁆𑀲 𑀫𑀼𑀔𑀯𑀝𑁆𑀝𑀺𑀬𑀸 𑀉𑀧𑀭𑀺𑀪𑀸𑀕𑁂 𑀳𑀢𑁆𑀣𑀁 𑀧𑀲𑀸𑀭𑁂𑀢𑁆𑀯𑀸 𑀨𑀼𑀲𑀺𑀢𑀼𑀁 𑀯𑀝𑁆𑀝𑀢𑀺. 𑀧𑀸𑀤𑁂𑀦 𑀧𑁂𑀮𑁆𑀮𑁂𑀢𑁆𑀯𑀸𑀢𑀺 𑀧𑀸𑀤𑁂𑀦 ‘‘𑀧𑀝𑀺𑀕𑁆𑀕𑀳𑁂𑀲𑁆𑀲𑀸𑀫𑀻’’𑀢𑀺 𑀲𑀜𑁆𑀜𑀸𑀬 𑀅𑀓𑁆𑀓𑀫𑀺𑀢𑁆𑀯𑀸. 𑀓𑁂𑀘𑀻𑀢𑀺 𑀅𑀪𑀬𑀕𑀺𑀭𑀺𑀯𑀸𑀲𑀺𑀦𑁄. 𑀯𑀘𑀦𑀫𑀢𑁆𑀢𑀫𑁂𑀯𑀸𑀢𑀺 𑀧𑀝𑀺𑀩𑀤𑁆𑀥𑀁 𑀧𑀝𑀺𑀩𑀤𑁆𑀥𑀧𑀝𑀺𑀩𑀤𑁆𑀥𑀦𑁆𑀢𑀺 𑀲𑀤𑁆𑀤𑀫𑀢𑁆𑀢𑀫𑁂𑀯 𑀦𑀸𑀦𑀁, 𑀓𑀸𑀬𑀧𑀝𑀺𑀩𑀤𑁆𑀥𑀫𑁂𑀯 𑀳𑁄𑀢𑀺, 𑀢𑀲𑁆𑀫𑀸 𑀢𑁂𑀲𑀁 𑀯𑀘𑀦𑀁 𑀦 𑀕𑀳𑁂𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀲 𑀦𑀬𑁄𑀢𑀺 ‘‘𑀧𑀝𑀺𑀩𑀤𑁆𑀥𑀧𑀝𑀺𑀩𑀤𑁆𑀥𑀫𑁆𑀧𑀺 𑀓𑀸𑀬𑀧𑀝𑀺𑀩𑀤𑁆𑀥𑀫𑁂𑀯𑀸’’𑀢𑀺 𑀅𑀬𑀁 𑀦𑀬𑁄. 𑀢𑀣𑀸 𑀘 𑀢𑀢𑁆𑀣 𑀓𑀸𑀬𑀧𑀝𑀺𑀩𑀤𑁆𑀥𑁂 𑀢𑀧𑁆𑀧𑀝𑀺𑀩𑀤𑁆𑀥𑁂 𑀘 𑀣𑀼𑀮𑁆𑀮𑀘𑁆𑀘𑀬𑀫𑁂𑀯 𑀯𑀼𑀢𑁆𑀢𑀁.

𑀢𑁂𑀦 𑀆𑀳𑀭𑀸𑀧𑁂𑀢𑀼𑀦𑁆𑀢𑀺 𑀬𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀦𑁆𑀢𑀺𑀓𑀁 𑀕𑀢𑀁, 𑀢𑀁 ‘‘𑀇𑀥 𑀦𑀁 𑀆𑀦𑁂𑀳𑀻’’𑀢𑀺 𑀆𑀡𑀸𑀧𑁂𑀢𑁆𑀯𑀸 𑀢𑁂𑀦 𑀆𑀳𑀭𑀸𑀧𑁂𑀢𑀼𑀁 𑀇𑀢𑀭𑀲𑁆𑀲 𑀯𑀝𑁆𑀝𑀢𑀻𑀢𑀺 𑀅𑀢𑁆𑀣𑁄. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀫𑀽𑀮𑀝𑁆𑀞𑀲𑁆𑀲𑁂𑀯 𑀧𑀭𑀺𑀪𑁄𑀕𑁄 𑀅𑀦𑀼𑀜𑁆𑀜𑀸𑀢𑁄, 𑀢𑀲𑁆𑀫𑀸. 𑀢𑀁 𑀤𑀺𑀯𑀲𑀁 𑀳𑀢𑁆𑀣𑁂𑀦 𑀕𑀳𑁂𑀢𑁆𑀯𑀸 𑀤𑀼𑀢𑀺𑀬𑀤𑀺𑀯𑀲𑁂 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑀲𑁆𑀲 𑀉𑀕𑁆𑀕𑀳𑀺𑀢𑀓𑀧𑀝𑀺𑀕𑁆𑀕𑀳𑀺𑀢𑀁 𑀳𑁄𑀢𑀻𑀢𑀺 𑀆𑀳 ‘‘𑀅𑀦𑀸𑀫𑀲𑀺𑀢𑁆𑀯𑀸’’𑀢𑀺. 𑀅𑀧𑁆𑀧𑀝𑀺𑀕𑁆𑀕𑀳𑀺𑀢𑀢𑁆𑀢𑀸 ‘‘𑀲𑀦𑁆𑀦𑀺𑀥𑀺𑀧𑀘𑁆𑀘𑀬𑀸 𑀅𑀦𑀸𑀧𑀢𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀅𑀧𑁆𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑀲𑁆𑀲 𑀅𑀤𑀺𑀦𑁆𑀦𑀫𑀼𑀔𑀤𑁆𑀯𑀸𑀭𑀸𑀧𑀢𑁆𑀢𑀺 𑀳𑁄𑀢𑀻𑀢𑀺 𑀆𑀳 ‘‘𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀧𑀦 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩’’𑀦𑁆𑀢𑀺. ‘‘𑀦 𑀢𑀢𑁄 𑀧𑀭𑀦𑁆𑀢𑀺 𑀢𑀤𑀳𑁂𑀯 𑀲𑀸𑀫𑀁 𑀅𑀧𑁆𑀧𑀝𑀺𑀕𑁆𑀕𑀳𑀺𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀢𑀤𑀳𑁂𑀯 𑀧𑀝𑀺𑀕𑁆𑀕𑀳𑀺𑀢𑀁 𑀧𑀦 𑀧𑀼𑀦𑀤𑀺𑀯𑀲𑀸𑀤𑀻𑀲𑀼 𑀅𑀧𑁆𑀧𑀝𑀺𑀕𑁆𑀕𑀳𑁂𑀢𑁆𑀯𑀸𑀧𑀺 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀤𑀦𑁆𑀢𑀺.

𑁧𑁦𑁮. 𑀔𑀻𑀬𑀦𑁆𑀢𑀻𑀢𑀺 𑀔𑀬𑀁 𑀕𑀘𑁆𑀙𑀦𑁆𑀢𑀺, 𑀢𑁂𑀲𑀁 𑀘𑀼𑀡𑁆𑀡𑁂𑀳𑀺 𑀣𑀼𑀮𑁆𑀮𑀘𑁆𑀘𑀬𑀅𑀧𑁆𑀧𑀝𑀺𑀕𑁆𑀕𑀳𑀡𑀸𑀧𑀢𑁆𑀢𑀺𑀬𑁄 𑀦 𑀳𑁄𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀢𑁆𑀣𑀓𑁂𑀦𑀸𑀢𑀺 𑀧𑀝𑀺𑀕𑁆𑀕𑀳𑀺𑀢𑀲𑀢𑁆𑀣𑀓𑁂𑀦. 𑀦𑀯𑀲𑀫𑀼𑀝𑁆𑀞𑀺𑀢𑀦𑁆𑀢𑀺 𑀏𑀢𑁂𑀦𑁂𑀯 𑀉𑀘𑁆𑀙𑀼𑀆𑀤𑀻𑀲𑀼 𑀅𑀪𑀺𑀦𑀯𑀮𑀕𑁆𑀕𑀢𑁆𑀢𑀸 𑀅𑀩𑁆𑀩𑁄𑀳𑀸𑀭𑀺𑀓𑀁 𑀦 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀏𑀲𑁂𑀯 𑀦𑀬𑁄𑀢𑀺 𑀲𑀦𑁆𑀦𑀺𑀥𑀺𑀤𑁄𑀲𑀸𑀤𑀺𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀢𑁂𑀦𑀸𑀳 ‘‘𑀦 𑀳𑀻’’𑀢𑀺𑀆𑀤𑀺. 𑀓𑀲𑁆𑀫𑀸 𑀧𑀦𑁂𑀢𑁆𑀣 𑀉𑀕𑁆𑀕𑀳𑀺𑀢𑀧𑀘𑁆𑀘𑀬𑀸, 𑀲𑀦𑁆𑀦𑀺𑀥𑀺𑀧𑀘𑁆𑀘𑀬𑀸 𑀯𑀸 𑀤𑁄𑀲𑁄 𑀦 𑀲𑀺𑀬𑀸𑀢𑀺 𑀆𑀳 ‘‘𑀦 𑀳𑀺 𑀢𑀁 𑀧𑀭𑀺𑀪𑁄𑀕𑀢𑁆𑀣𑀸𑀬 𑀧𑀭𑀺𑀳𑀭𑀦𑁆𑀢𑀻’’𑀢𑀺. 𑀇𑀫𑀺𑀦𑀸 𑀘 𑀩𑀸𑀳𑀺𑀭𑀧𑀭𑀺𑀪𑁄𑀕𑀢𑁆𑀣𑀁 𑀲𑀸𑀫𑀁 𑀕𑀳𑁂𑀢𑁆𑀯𑀸 𑀯𑀸 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀦 𑀤𑀺𑀦𑁆𑀦𑀁 𑀯𑀸 𑀧𑀭𑀺𑀳𑀭𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀤𑀻𑀧𑁂𑀢𑀺, 𑀢𑀲𑁆𑀫𑀸 𑀧𑀢𑁆𑀢𑀲𑀫𑁆𑀫𑀓𑁆𑀔𑀦𑀸𑀤𑀺𑀅𑀢𑁆𑀣𑀁 𑀲𑀸𑀫𑀁 𑀕𑀳𑁂𑀢𑁆𑀯𑀸 𑀧𑀭𑀺𑀳𑀭𑀺𑀢𑀢𑁂𑀮𑀸𑀤𑀺𑀁 𑀲𑀘𑁂 𑀧𑀭𑀺𑀪𑀼𑀜𑁆𑀚𑀺𑀢𑀼𑀓𑀸𑀫𑁄 𑀳𑁄𑀢𑀺, 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀅𑀩𑁆𑀪𑀦𑁆𑀢𑀭𑀧𑀭𑀺𑀪𑁄𑀕𑀢𑁆𑀣𑀁 𑀧𑀦 𑀲𑀸𑀫𑀁 𑀕𑀳𑀺𑀢𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑀲𑁆𑀲 𑀉𑀕𑁆𑀕𑀳𑀺𑀢𑀧𑀝𑀺𑀕𑁆𑀕𑀳𑀡𑀁 𑀳𑁄𑀢𑀺, 𑀅𑀧𑁆𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑀲𑁆𑀲 𑀅𑀤𑀺𑀦𑁆𑀦𑀫𑀼𑀔𑀤𑁆𑀯𑀸𑀭𑀸𑀧𑀢𑁆𑀢𑀺 𑀳𑁄𑀢𑀺. 𑀅𑀩𑁆𑀪𑀦𑁆𑀢𑀭𑀧𑀭𑀺𑀪𑁄𑀕𑀢𑁆𑀣𑀫𑁂𑀯 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀦 𑀤𑀺𑀦𑁆𑀦𑀁 𑀕𑀳𑁂𑀢𑁆𑀯𑀸 𑀧𑀭𑀺𑀳𑀭𑀦𑁆𑀢𑀲𑁆𑀲 𑀲𑀺𑀗𑁆𑀕𑀻𑀮𑁄𑀡𑀓𑀧𑁆𑀧𑁄 𑀯𑀺𑀬 𑀲𑀦𑁆𑀦𑀺𑀥𑀺𑀧𑀘𑁆𑀘𑀬𑀸 𑀆𑀧𑀢𑁆𑀢𑀺 𑀳𑁄𑀢𑀺. 𑀓𑁂𑀘𑀺 𑀧𑀦 ‘‘𑀣𑀸𑀫𑀫𑀚𑁆𑀛𑀺𑀫𑀲𑁆𑀲 𑀧𑀼𑀭𑀺𑀲𑀲𑁆𑀲 𑀉𑀘𑁆𑀘𑀸𑀭𑀡𑀫𑀢𑁆𑀢𑀁 𑀳𑁄𑀢𑀻𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀧𑀜𑁆𑀘𑀗𑁆𑀕𑀲𑀫𑁆𑀧𑀢𑁆𑀢𑀺𑀬𑀸 𑀧𑀝𑀺𑀕𑁆𑀕𑀳𑀡𑀲𑁆𑀲 𑀭𑀼𑀳𑀡𑀢𑁄 𑀩𑀸𑀳𑀺𑀭𑀧𑀭𑀺𑀪𑁄𑀕𑀢𑁆𑀣𑀫𑁆𑀧𑀺 𑀲𑀘𑁂 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀳𑀺 𑀤𑀺𑀦𑁆𑀦𑀁 𑀕𑀡𑁆𑀳𑀸𑀢𑀺, 𑀧𑀝𑀺𑀕𑁆𑀕𑀳𑀺𑀢𑀫𑁂𑀯𑀸’’𑀢𑀺 𑀯𑀤𑀦𑁆𑀢𑀺. 𑀏𑀯𑀁 𑀲𑀢𑀺 𑀇𑀥 𑀩𑀸𑀳𑀺𑀭𑀧𑀭𑀺𑀪𑁄𑀕𑀢𑁆𑀣𑀁 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀦 𑀤𑀺𑀦𑁆𑀦𑀁 𑀕𑀳𑁂𑀢𑁆𑀯𑀸 𑀧𑀭𑀺𑀳𑀭𑀦𑁆𑀢𑀲𑁆𑀲 𑀲𑀦𑁆𑀦𑀺𑀥𑀺𑀧𑀘𑁆𑀘𑀬𑀸 𑀆𑀧𑀢𑁆𑀢𑀺 𑀯𑀢𑁆𑀢𑀩𑁆𑀩𑀸 𑀲𑀺𑀬𑀸. ‘‘𑀦 𑀳𑀺 𑀢𑀁 𑀧𑀭𑀺𑀪𑁄𑀕𑀢𑁆𑀣𑀸𑀬 𑀧𑀭𑀺𑀳𑀭𑀦𑁆𑀢𑀻’’𑀢𑀺 𑀘 𑀦 𑀯𑀢𑁆𑀢𑀩𑁆𑀩𑀁, 𑀢𑀲𑁆𑀫𑀸 𑀩𑀸𑀳𑀺𑀭𑀧𑀭𑀺𑀪𑁄𑀕𑀢𑁆𑀣𑀁 𑀕𑀳𑀺𑀢𑀁 𑀧𑀝𑀺𑀕𑁆𑀕𑀳𑀺𑀢𑀁 𑀦𑀸𑀫 𑀦 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀬𑀤𑀺 𑀏𑀯𑀁 𑀧𑀜𑁆𑀘𑀲𑀼 𑀧𑀝𑀺𑀕𑁆𑀕𑀳𑀡𑀗𑁆𑀕𑁂𑀲𑀼 ‘‘𑀧𑀭𑀺𑀪𑁄𑀕𑀢𑁆𑀣𑀸𑀬𑀸’’𑀢𑀺 𑀯𑀺𑀲𑁂𑀲𑀦𑀁 𑀯𑀢𑁆𑀢𑀩𑁆𑀩𑀦𑁆𑀢𑀺? 𑀦 𑀯𑀢𑁆𑀢𑀩𑁆𑀩𑀁. 𑀧𑀝𑀺𑀕𑁆𑀕𑀳𑀡𑀜𑁆𑀳𑀺 𑀧𑀭𑀺𑀪𑁄𑀕𑀢𑁆𑀣𑀫𑁂𑀯 𑀳𑁄𑀢𑀻𑀢𑀺 ‘‘𑀧𑀭𑀺𑀪𑁄𑀕𑀢𑁆𑀣𑀸𑀬𑀸’’𑀢𑀺 𑀯𑀺𑀲𑀼𑀁 𑀅𑀯𑀢𑁆𑀯𑀸 ‘‘𑀢𑀜𑁆𑀘𑁂 𑀪𑀺𑀓𑁆𑀔𑀼 𑀓𑀸𑀬𑁂𑀦 𑀯𑀸 𑀓𑀸𑀬𑀧𑀝𑀺𑀩𑀤𑁆𑀥𑁂𑀦 𑀯𑀸 𑀧𑀝𑀺𑀕𑁆𑀕𑀡𑁆𑀳𑀸𑀢𑀻’’𑀢𑀺 𑀏𑀢𑁆𑀢𑀓𑀫𑁂𑀯 𑀯𑀼𑀢𑁆𑀢𑀁. 𑀅𑀧𑀭𑁂 𑀧𑀦 ‘‘𑀲𑀢𑀺𑀧𑀺 𑀧𑀝𑀺𑀕𑁆𑀕𑀳𑀡𑁂 ‘𑀦 𑀳𑀺 𑀢𑀁 𑀧𑀭𑀺𑀪𑁄𑀕𑀢𑁆𑀣𑀸𑀬 𑀧𑀭𑀺𑀳𑀭𑀦𑁆𑀢𑀻’𑀢𑀺 𑀇𑀥 𑀅𑀧𑀭𑀺𑀪𑁄𑀕𑀢𑁆𑀣𑀸𑀬 𑀧𑀭𑀺𑀳𑀭𑀡𑁂 𑀅𑀦𑀸𑀧𑀢𑁆𑀢𑀺 𑀯𑀼𑀢𑁆𑀢𑀸’’𑀢𑀺 𑀯𑀤𑀦𑁆𑀢𑀺. 𑀢𑁂𑀦 𑀘 𑀧𑀝𑀺𑀕𑁆𑀕𑀳𑀡𑀗𑁆𑀕𑁂𑀲𑀼 𑀧𑀜𑁆𑀘𑀲𑀼 𑀲𑀫𑀺𑀤𑁆𑀥𑁂𑀲𑀼 𑀅𑀚𑁆𑀛𑁄𑀳𑀭𑀺𑀢𑀼𑀓𑀸𑀫𑀢𑀸𑀬 𑀕𑀳𑀺𑀢𑀫𑁂𑀯 𑀧𑀝𑀺𑀕𑁆𑀕𑀳𑀺𑀢𑀁 𑀦𑀸𑀫 𑀳𑁄𑀢𑀺 𑀅𑀚𑁆𑀛𑁄𑀳𑀭𑀺𑀢𑀩𑁆𑀩𑁂𑀲𑀼𑀬𑁂𑀯 𑀧𑀝𑀺𑀕𑁆𑀕𑀳𑀡𑀲𑁆𑀲 𑀅𑀦𑀼𑀜𑁆𑀜𑀸𑀢𑀢𑁆𑀢𑀸𑀢𑀺 𑀤𑀲𑁆𑀲𑁂𑀢𑀺. 𑀢𑀣𑀸 𑀩𑀸𑀳𑀺𑀭𑀧𑀭𑀺𑀪𑁄𑀕𑀢𑁆𑀣𑀸𑀬 𑀕𑀳𑁂𑀢𑁆𑀯𑀸 𑀞𑀧𑀺𑀢𑀢𑁂𑀮𑀸𑀤𑀺𑀁 𑀅𑀚𑁆𑀛𑁄𑀳𑀭𑀺𑀢𑀼𑀓𑀸𑀫𑀢𑀸𑀬 𑀲𑀢𑀺 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀉𑀤𑀼𑀓𑁆𑀔𑀮𑀫𑀼𑀲𑀮𑀸𑀤𑀻𑀦𑀺 𑀔𑀻𑀬𑀦𑁆𑀢𑀻𑀢𑀺 𑀏𑀢𑁆𑀣 𑀉𑀤𑀼𑀓𑁆𑀔𑀮𑀫𑀼𑀲𑀮𑀸𑀦𑀁 𑀔𑀬𑁂𑀦 𑀧𑀺𑀲𑀺𑀢𑀓𑁄𑀝𑁆𑀝𑀺𑀢𑀪𑁂𑀲𑀚𑁆𑀚𑁂𑀲𑀼 𑀲𑀘𑁂 𑀆𑀕𑀦𑁆𑀢𑀼𑀓𑀯𑀡𑁆𑀡𑁄 𑀧𑀜𑁆𑀜𑀸𑀬𑀢𑀺, 𑀦 𑀯𑀝𑁆𑀝𑀢𑀺. 𑀲𑀼𑀤𑁆𑀥𑀁 𑀉𑀤𑀓𑀁 𑀳𑁄𑀢𑀻𑀢𑀺 𑀭𑀼𑀓𑁆𑀔𑀲𑀸𑀔𑀸𑀤𑀻𑀳𑀺 𑀕𑀴𑀺𑀢𑁆𑀯𑀸 𑀧𑀢𑀦𑀉𑀤𑀓𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑁧𑁦𑁯. 𑀧𑀢𑁆𑀢𑁄 𑀯𑀸𑀲𑁆𑀲 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑁄𑀢𑀺 𑀏𑀢𑁆𑀣𑀸𑀧𑀺 𑀧𑀢𑁆𑀢𑀕𑀢𑀁 𑀙𑀼𑀧𑀺𑀢𑁆𑀯𑀸 𑀤𑁂𑀦𑁆𑀢𑀲𑁆𑀲 𑀳𑀢𑁆𑀣𑁂 𑀮𑀕𑁆𑀕𑁂𑀦 𑀆𑀫𑀺𑀲𑁂𑀦 𑀤𑁄𑀲𑀸𑀪𑀸𑀯𑀢𑁆𑀣𑀁 𑀧𑀢𑁆𑀢𑀧𑀝𑀺𑀕𑁆𑀕𑀳𑀡𑀦𑁆𑀢𑀺 𑀅𑀩𑁆𑀪𑀦𑁆𑀢𑀭𑀧𑀭𑀺𑀪𑁄𑀕𑀢𑁆𑀣𑀫𑁂𑀯 𑀧𑀢𑁆𑀢𑀧𑀝𑀺𑀕𑁆𑀕𑀳𑀡𑀁 𑀯𑁂𑀤𑀺𑀢𑀩𑁆𑀩𑀁. 𑀬𑀁 𑀲𑀸𑀫𑀡𑁂𑀭𑀲𑁆𑀲 𑀧𑀢𑁆𑀢𑁂 𑀧𑀢𑀢𑀺…𑀧𑁂… 𑀧𑀝𑀺𑀕𑁆𑀕𑀳𑀡𑀁 𑀦 𑀯𑀺𑀚𑀳𑀢𑀻𑀢𑀺 𑀏𑀢𑁆𑀣 𑀧𑀼𑀦𑀧𑁆𑀧𑀼𑀦𑀁 𑀕𑀡𑁆𑀳𑀦𑁆𑀢𑀲𑁆𑀲 𑀅𑀢𑁆𑀢𑀦𑁄 𑀧𑀢𑁆𑀢𑁂 𑀧𑀓𑁆𑀔𑀺𑀢𑁆𑀢𑀫𑁂𑀯 𑀅𑀢𑁆𑀢𑀦𑁄 𑀲𑀦𑁆𑀢𑀓𑀦𑁆𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀓𑀭𑀡𑀢𑁄 𑀳𑀢𑁆𑀣𑀕𑀢𑀁 𑀧𑀝𑀺𑀕𑁆𑀕𑀳𑀡𑀁 𑀦 𑀯𑀺𑀚𑀳𑀢𑀺. 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀤𑀺𑀦𑁆𑀦𑀁 𑀧𑀦 𑀕𑀡𑁆𑀳𑀦𑁆𑀢𑀲𑁆𑀲 𑀕𑀳𑀡𑀲𑀫𑀬𑁂𑀬𑁂𑀯 𑀅𑀢𑁆𑀢𑀦𑁄 𑀲𑀦𑁆𑀢𑀓𑀦𑁆𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀲𑁆𑀲 𑀓𑀢𑀢𑁆𑀢𑀸 𑀳𑀢𑁆𑀣𑀕𑀢𑀁 𑀧𑀝𑀺𑀕𑁆𑀕𑀳𑀡𑀁 𑀯𑀺𑀚𑀳𑀢𑀺. 𑀓𑁂𑀲𑀜𑁆𑀘𑀺 𑀅𑀢𑁆𑀣𑀸𑀬 𑀪𑀢𑁆𑀢𑀁 𑀧𑀓𑁆𑀔𑀺𑀧𑀢𑀻𑀢𑀺 𑀏𑀢𑁆𑀣 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀅𑀢𑁆𑀣𑀸𑀬 𑀧𑀓𑁆𑀔𑀺𑀧𑀦𑁆𑀢𑁂𑀧𑀺 𑀆𑀕𑀦𑁆𑀢𑁆𑀯𑀸 𑀕𑀡𑁆𑀳𑀺𑀲𑁆𑀲𑀢𑀻𑀢𑀺 𑀲𑀬𑀫𑁂𑀯 𑀧𑀓𑁆𑀔𑀺𑀧𑀺𑀢𑁆𑀯𑀸 𑀞𑀧𑀦𑀢𑁄 𑀧𑀝𑀺𑀕𑁆𑀕𑀳𑀡𑀁 𑀦 𑀯𑀺𑀚𑀳𑀢𑀺. 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀳𑀢𑁆𑀣𑁂 𑀧𑀓𑁆𑀔𑀺𑀢𑁆𑀢𑀁 𑀧𑀦 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀦𑁂𑀯 𑀞𑀧𑀺𑀢𑀁 𑀦𑀸𑀫 𑀳𑁄𑀢𑀻𑀢𑀺 𑀧𑀝𑀺𑀕𑁆𑀕𑀳𑀡𑀁 𑀯𑀺𑀚𑀳𑀢𑀺 𑀧𑀭𑀺𑀘𑁆𑀘𑀢𑁆𑀢𑀪𑀸𑀯𑀢𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀸𑀫𑀡𑁂𑀭…𑀧𑁂… 𑀧𑀭𑀺𑀘𑁆𑀘𑀢𑁆𑀢𑀢𑁆𑀢𑀸’’𑀢𑀺. 𑀓𑁂𑀲𑀜𑁆𑀘𑀻𑀢𑀺𑀆𑀤𑀻𑀲𑀼 𑀅𑀦𑀼𑀧𑀲𑀫𑁆𑀧𑀦𑁆𑀦𑀸𑀦𑀁 𑀅𑀢𑁆𑀣𑀸𑀬 𑀓𑀢𑁆𑀣𑀘𑀺 𑀞𑀧𑀺𑀬𑀫𑀸𑀦𑀫𑁆𑀧𑀺 𑀳𑀢𑁆𑀣𑀢𑁄 𑀫𑀼𑀢𑁆𑀢𑀫𑀢𑁆𑀢𑁂 𑀏𑀯 𑀧𑀝𑀺𑀕𑁆𑀕𑀳𑀡𑀁 𑀦 𑀯𑀺𑀚𑀳𑀢𑀺, 𑀅𑀣 𑀔𑁄 𑀪𑀸𑀚𑀦𑁂 𑀧𑀢𑀺𑀢𑀫𑁂𑀯 𑀧𑀝𑀺𑀕𑁆𑀕𑀳𑀡𑀁 𑀯𑀺𑀚𑀳𑀢𑀺. 𑀪𑀸𑀚𑀦𑀜𑁆𑀘 𑀪𑀺𑀓𑁆𑀔𑀼𑀦𑀸 𑀧𑀼𑀦𑀤𑀺𑀯𑀲𑀢𑁆𑀣𑀸𑀬 𑀅𑀧𑁂𑀓𑁆𑀔𑀺𑀢𑀫𑁂𑀯𑀸𑀢𑀺 𑀢𑀕𑁆𑀕𑀢𑀫𑁆𑀧𑀺 𑀆𑀫𑀺𑀲𑀁 𑀤𑀼𑀤𑁆𑀥𑁄𑀢𑀧𑀢𑁆𑀢𑀕𑀢𑀁 𑀯𑀺𑀬 𑀧𑀝𑀺𑀕𑁆𑀕𑀳𑀡𑀁 𑀯𑀺𑀚𑀳𑀢𑀻𑀢𑀺 𑀲𑀗𑁆𑀓𑀸𑀬 ‘‘𑀲𑀸𑀫𑀡𑁂𑀭𑀲𑁆𑀲 𑀳𑀢𑁆𑀣𑁂 𑀧𑀓𑁆𑀔𑀺𑀧𑀺𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀈𑀤𑀺𑀲𑁂𑀲𑀼 𑀳𑀺 𑀬𑀼𑀢𑁆𑀢𑀺 𑀦 𑀕𑀯𑁂𑀲𑀺𑀢𑀩𑁆𑀩𑀸, 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀁.

𑁧𑁧𑁦. 𑀧𑀢𑁆𑀢𑀕𑀢𑀸 𑀬𑀸𑀕𑀽𑀢𑀺 𑀇𑀫𑀺𑀦𑀸 𑀧𑀢𑁆𑀢𑀫𑀼𑀔𑀯𑀝𑁆𑀝𑀺𑀬𑀸 𑀨𑀼𑀝𑁆𑀞𑁂𑀧𑀺 𑀓𑀼𑀝𑁂 𑀬𑀸𑀕𑀼 𑀧𑀝𑀺𑀕𑁆𑀕𑀳𑀺𑀢𑀸, 𑀉𑀕𑁆𑀕𑀳𑀺𑀢𑀸 𑀯𑀸 𑀦 𑀳𑁄𑀢𑀺 𑀪𑀺𑀓𑁆𑀔𑀼𑀦𑁄 𑀅𑀦𑀺𑀘𑁆𑀙𑀸𑀬 𑀨𑀼𑀝𑁆𑀞𑀢𑁆𑀢𑀸𑀢𑀺 𑀤𑀲𑁆𑀲𑁂𑀢𑀺. 𑀆𑀭𑁄𑀧𑁂𑀢𑀻𑀢𑀺 𑀳𑀢𑁆𑀣𑀁 𑀨𑀼𑀲𑀸𑀧𑁂𑀢𑀺. 𑀧𑀝𑀺𑀕𑁆𑀕𑀳𑀡𑀽𑀧𑀕𑀁 𑀪𑀸𑀭𑀁 𑀦𑀸𑀫 𑀣𑀸𑀫𑀫𑀚𑁆𑀛𑀺𑀫𑀲𑁆𑀲 𑀧𑀼𑀭𑀺𑀲𑀲𑁆𑀲 𑀉𑀓𑁆𑀔𑁂𑀧𑀸𑀭𑀳𑀁. 𑀓𑀺𑀜𑁆𑀘𑀸𑀧𑀺 𑀅𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸𑀯 𑀅𑀜𑁆𑀜𑁂𑀦 𑀳𑀢𑁆𑀣𑁂𑀦 𑀧𑀺𑀤𑀳𑀦𑁆𑀢𑀲𑁆𑀲 𑀤𑁄𑀲𑁄 𑀦𑀢𑁆𑀣𑀺, 𑀢𑀣𑀸𑀧𑀺 𑀦 𑀧𑀺𑀤𑀳𑀺𑀢𑀩𑁆𑀩𑀦𑁆𑀢𑀺 𑀅𑀝𑁆𑀞𑀓𑀣𑀸𑀧𑀫𑀸𑀡𑁂𑀦𑁂𑀯 𑀕𑀳𑁂𑀢𑀩𑁆𑀩𑀁. 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑀧𑀸𑀘𑀺𑀢𑁆𑀢𑀺𑀬 𑁨.𑁨𑁬𑁫) 𑀧𑀦 ‘‘𑀦 𑀧𑀺𑀤𑀳𑀺𑀢𑀩𑁆𑀩𑀦𑁆𑀢𑀺 𑀳𑀢𑁆𑀣𑀢𑁄 𑀫𑀼𑀢𑁆𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀳𑀢𑁆𑀣𑀕𑀢𑀁 𑀧𑀦 𑀇𑀢𑀭𑁂𑀦 𑀳𑀢𑁆𑀣𑁂𑀦 𑀧𑀺𑀤𑀳𑀢𑁄, 𑀳𑀢𑁆𑀣𑀢𑁄 𑀫𑀼𑀢𑁆𑀢𑀫𑁆𑀧𑀺 𑀯𑀸 𑀅𑀨𑀼𑀲𑀺𑀢𑁆𑀯𑀸 𑀉𑀧𑀭𑀺 𑀧𑀺𑀥𑀸𑀦𑀁 𑀧𑀸𑀢𑁂𑀦𑁆𑀢𑀲𑁆𑀲 𑀦 𑀤𑁄𑀲𑁄’’𑀢𑀺 𑀯𑀼𑀢𑁆𑀢𑀁.

𑁧𑁧𑁧. 𑀧𑀝𑀺𑀕𑁆𑀕𑀡𑁆𑀳𑀸𑀢𑀻𑀢𑀺 𑀙𑀸𑀬𑀢𑁆𑀣𑀸𑀬 𑀉𑀧𑀭𑀺 𑀥𑀸𑀭𑀺𑀬𑀫𑀸𑀦𑀸 𑀫𑀳𑀸𑀲𑀸𑀔𑀸 𑀬𑁂𑀦 𑀓𑁂𑀦𑀘𑀺 𑀙𑀺𑀚𑁆𑀚𑁂𑀬𑁆𑀬, 𑀢𑀢𑁆𑀣 𑀮𑀕𑁆𑀕𑀭𑀚𑀁 𑀫𑀼𑀔𑁂 𑀧𑀸𑀢𑁂𑀬𑁆𑀬 𑀯𑀸𑀢𑀺 𑀓𑀧𑁆𑀧𑀺𑀬𑀁 𑀓𑀸𑀭𑀸𑀧𑁂𑀢𑁆𑀯𑀸 𑀧𑀝𑀺𑀕𑁆𑀕𑀡𑁆𑀳𑀸𑀢𑀺.

𑀫𑀘𑁆𑀙𑀺𑀓𑀯𑀸𑀭𑀡𑀢𑁆𑀣𑀦𑁆𑀢𑀺 𑀏𑀢𑁆𑀣 ‘‘𑀲𑀘𑁂𑀧𑀺 𑀲𑀸𑀔𑀸𑀬 𑀮𑀕𑁆𑀕𑀭𑀚𑀁 𑀧𑀢𑁆𑀢𑁂 𑀧𑀢𑀢𑀺, 𑀲𑀼𑀔𑁂𑀦 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀲𑀓𑁆𑀓𑀸𑀢𑀺 𑀲𑀸𑀔𑀸𑀬 𑀧𑀝𑀺𑀕𑁆𑀕𑀳𑀺𑀢𑀢𑁆𑀢𑀸 𑀅𑀩𑁆𑀪𑀦𑁆𑀢𑀭𑀧𑀭𑀺𑀪𑁄𑀕𑀢𑁆𑀣𑀫𑁂𑀯𑀺𑀥 𑀧𑀝𑀺𑀕𑁆𑀕𑀳𑀡𑀦𑁆𑀢𑀺 𑀫𑀽𑀮𑀧𑀝𑀺𑀕𑁆𑀕𑀳𑀡𑀫𑁂𑀯 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀁. 𑀅𑀧𑀭𑁂 𑀧𑀦 ‘‘𑀫𑀘𑁆𑀙𑀺𑀓𑀯𑀸𑀭𑀡𑀢𑁆𑀣𑀦𑁆𑀢𑀺 𑀯𑀘𑀦𑀫𑀢𑁆𑀢𑀁 𑀕𑀳𑁂𑀢𑁆𑀯𑀸 𑀩𑀸𑀳𑀺𑀭𑀧𑀭𑀺𑀪𑁄𑀕𑀢𑁆𑀣𑀁 𑀕𑀳𑀺𑀢’’𑀦𑁆𑀢𑀺 𑀯𑀤𑀦𑁆𑀢𑀺. 𑀓𑀼𑀡𑁆𑀟𑀓𑁂𑀢𑀺 𑀫𑀳𑀸𑀖𑀝𑁂. 𑀢𑀲𑁆𑀫𑀺𑀫𑁆𑀧𑀻𑀢𑀺 𑀘𑀸𑀝𑀺𑀖𑀝𑁂𑀧𑀺. 𑀅𑀦𑀼𑀧𑀲𑀫𑁆𑀧𑀦𑁆𑀦𑀁 𑀕𑀸𑀳𑀸𑀧𑁂𑀢𑁆𑀯𑀸𑀢𑀺 𑀢𑀫𑁂𑀯 𑀅𑀚𑁆𑀛𑁄𑀳𑀭𑀡𑀻𑀬𑀁 𑀪𑀡𑁆𑀟𑀁 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀦 𑀕𑀸𑀳𑀸𑀧𑁂𑀢𑁆𑀯𑀸.

𑀣𑁂𑀭𑀲𑁆𑀲 𑀧𑀢𑁆𑀢𑀁 𑀤𑀼𑀢𑀺𑀬𑀢𑁆𑀣𑁂𑀭𑀲𑁆𑀲𑀸𑀢𑀺 ‘‘𑀣𑁂𑀭𑀲𑁆𑀲 𑀧𑀢𑁆𑀢𑀁 𑀫𑀬𑁆𑀳𑀁 𑀤𑁂𑀣𑀸’’𑀢𑀺 𑀢𑁂𑀦 𑀅𑀢𑁆𑀢𑀦𑁄 𑀧𑀭𑀺𑀘𑁆𑀘𑀚𑀸𑀧𑁂𑀢𑁆𑀯𑀸 𑀤𑀼𑀢𑀺𑀬𑀢𑁆𑀣𑁂𑀭𑀲𑁆𑀲 𑀤𑁂𑀢𑀺. 𑀢𑀼𑀬𑁆𑀳𑀁 𑀬𑀸𑀕𑀼𑀁 𑀫𑀬𑁆𑀳𑀁 𑀤𑁂𑀳𑀻𑀢𑀺 𑀏𑀢𑁆𑀣 𑀏𑀯𑀁 𑀯𑀢𑁆𑀯𑀸 𑀲𑀸𑀫𑀡𑁂𑀭𑀲𑁆𑀲 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀅𑀢𑁆𑀢𑀦𑁄𑀧𑀺 𑀧𑀢𑁆𑀢𑀁 𑀢𑀲𑁆𑀲 𑀤𑁂𑀢𑀺. 𑀏𑀢𑁆𑀣 𑀧𑀦𑀸𑀢𑀺 ‘‘𑀧𑀡𑁆𑀟𑀺𑀢𑁄 𑀲𑀸𑀫𑀡𑁂𑀭𑁄’’𑀢𑀺𑀆𑀤𑀺𑀧𑀢𑁆𑀢𑀧𑀭𑀺𑀯𑀢𑁆𑀢𑀦𑀓𑀣𑀸𑀬𑀁. 𑀓𑀸𑀭𑀡𑀁 𑀉𑀧𑀧𑀭𑀺𑀓𑁆𑀔𑀺𑀢𑀩𑁆𑀩𑀦𑁆𑀢𑀺 𑀬𑀣𑀸 𑀫𑀸𑀢𑀼𑀆𑀤𑀻𑀦𑀁 𑀢𑁂𑀮𑀸𑀤𑀻𑀦𑀺 𑀳𑀭𑀦𑁆𑀢𑁄 𑀢𑀣𑀸𑀭𑀽𑀧𑁂 𑀓𑀺𑀘𑁆𑀘𑁂 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀦 𑀅𑀧𑀭𑀺𑀯𑀢𑁆𑀢𑁂𑀢𑁆𑀯𑀸𑀯 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀮𑀪𑀢𑀺, 𑀏𑀯𑀫𑀺𑀥 𑀧𑀢𑁆𑀢𑀧𑀭𑀺𑀯𑀢𑁆𑀢𑀦𑀁 𑀅𑀓𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀓𑀲𑁆𑀫𑀸 𑀦 𑀮𑀪𑀢𑀻𑀢𑀺 𑀓𑀸𑀭𑀡𑀁 𑀯𑀻𑀫𑀁𑀲𑀺𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀧𑀦 ‘‘𑀲𑀸𑀫𑀡𑁂𑀭𑁂𑀳𑀺 𑀕𑀳𑀺𑀢𑀢𑀡𑁆𑀟𑀼𑀮𑁂𑀲𑀼 𑀧𑀭𑀺𑀓𑁆𑀔𑀻𑀡𑁂𑀲𑀼 𑀅𑀯𑀲𑁆𑀲𑀁 𑀅𑀫𑁆𑀳𑀸𑀓𑀁 𑀲𑀸𑀫𑀡𑁂𑀭𑀸 𑀲𑀗𑁆𑀕𑀳𑀁 𑀓𑀭𑁄𑀦𑁆𑀢𑀻𑀢𑀺 𑀘𑀺𑀢𑁆𑀢𑀼𑀧𑁆𑀧𑀢𑁆𑀢𑀺 𑀲𑀫𑁆𑀪𑀯𑀢𑀺, 𑀢𑀲𑁆𑀫𑀸 𑀢𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸𑀯 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁. 𑀫𑀸𑀢𑀸𑀧𑀺𑀢𑀽𑀦𑀁 𑀅𑀢𑁆𑀣𑀸𑀬 𑀧𑀦 𑀙𑀸𑀬𑀢𑁆𑀣𑀸𑀬 𑀯𑀸 𑀕𑀳𑀡𑁂 𑀧𑀭𑀺𑀪𑁄𑀕𑀸𑀲𑀸 𑀦𑀢𑁆𑀣𑀺, 𑀢𑀲𑁆𑀫𑀸 𑀢𑀁 𑀯𑀝𑁆𑀝𑀢𑀻’’𑀢𑀺 𑀓𑀸𑀭𑀡𑀁 𑀯𑀤𑀦𑁆𑀢𑀺. 𑀢𑁂𑀦𑁂𑀯 𑀆𑀘𑀭𑀺𑀬𑀩𑀼𑀤𑁆𑀥𑀤𑀢𑁆𑀢𑀢𑁆𑀣𑁂𑀭𑁂𑀦𑀧𑀺 𑀯𑀼𑀢𑁆𑀢𑀁 𑁋

‘‘𑀫𑀸𑀢𑀸𑀧𑀺𑀢𑀽𑀦𑀫𑀢𑁆𑀣𑀸𑀬, 𑀢𑁂𑀮𑀸𑀤𑀺𑀁 𑀳𑀭𑀢𑁄𑀧𑀺 𑀘;

𑀲𑀸𑀔𑀁 𑀙𑀸𑀬𑀸𑀤𑀺𑀅𑀢𑁆𑀣𑀸𑀬, 𑀇𑀫𑀲𑁆𑀲 𑀦 𑀯𑀺𑀲𑁂𑀲𑀢𑀸.

‘‘𑀢𑀲𑁆𑀫𑀸 𑀳𑀺𑀲𑁆𑀲 𑀯𑀺𑀲𑁂𑀲𑀲𑁆𑀲, 𑀘𑀺𑀦𑁆𑀢𑁂𑀢𑀩𑁆𑀩𑀁 𑀢𑀼 𑀓𑀸𑀭𑀡𑀁;

𑀢𑀲𑁆𑀲 𑀲𑀸𑀮𑀬𑀪𑀸𑀯𑀁 𑀢𑀼, 𑀯𑀺𑀲𑁂𑀲𑀁 𑀢𑀓𑁆𑀓𑀬𑀸𑀫𑀳’’𑀦𑁆𑀢𑀺.

𑀇𑀤𑀫𑁂𑀯𑁂𑀢𑁆𑀣 𑀬𑀼𑀢𑁆𑀢𑀢𑀭𑀁 𑀅𑀯𑀲𑁆𑀲𑀁 𑀢𑀣𑀸𑀯𑀺𑀥𑀯𑀺𑀢𑀓𑁆𑀓𑀼𑀧𑁆𑀧𑀢𑁆𑀢𑀺𑀬𑀸 𑀲𑀫𑁆𑀪𑀯𑀢𑁄. 𑀦 𑀳𑀺 𑀲𑀓𑁆𑀓𑀸 𑀏𑀢𑁆𑀣 𑀯𑀺𑀢𑀓𑁆𑀓𑀁 𑀲𑁄𑀥𑁂𑀢𑀼𑀦𑁆𑀢𑀺. 𑀫𑀸𑀢𑀸𑀤𑀻𑀦𑀁 𑀅𑀢𑁆𑀣𑀸𑀬 𑀳𑀭𑀡𑁂 𑀧𑀦 𑀦𑀸𑀯𑀲𑁆𑀲𑀁 𑀢𑀣𑀸𑀯𑀺𑀥𑀯𑀺𑀢𑀓𑁆𑀓𑀼𑀧𑁆𑀧𑀢𑁆𑀢𑀻𑀢𑀺 𑀲𑀓𑁆𑀓𑀸 𑀯𑀺𑀢𑀓𑁆𑀓𑀁 𑀲𑁄𑀥𑁂𑀢𑀼𑀁. 𑀬𑀢𑁆𑀣 𑀳𑀺 𑀯𑀺𑀢𑀓𑁆𑀓𑀁 𑀲𑁄𑀥𑁂𑀢𑀼𑀁 𑀲𑀓𑁆𑀓𑀸, 𑀢𑀢𑁆𑀣 𑀦𑁂𑀯𑀢𑁆𑀣𑀺 𑀤𑁄𑀲𑁄. 𑀢𑁂𑀦𑁂𑀯 𑀯𑀓𑁆𑀔𑀢𑀺 ‘‘𑀲𑀘𑁂 𑀧𑀦 𑀲𑀓𑁆𑀓𑁄𑀢𑀺 𑀯𑀺𑀢𑀓𑁆𑀓𑀁 𑀲𑁄𑀥𑁂𑀢𑀼𑀁, 𑀢𑀢𑁄 𑀮𑀤𑁆𑀥𑀁 𑀔𑀸𑀤𑀺𑀢𑀼𑀫𑁆𑀧𑀺 𑀯𑀝𑁆𑀝𑀢𑀻’’𑀢𑀺. 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑀧𑀸𑀘𑀺𑀢𑁆𑀢𑀺𑀬 𑁨.𑁨𑁬𑁫) 𑀧𑀦 ‘‘𑀏𑀢𑁆𑀣 𑀧𑀦𑀸𑀢𑀺 𑀧𑀢𑁆𑀢𑀧𑀭𑀺𑀯𑀢𑁆𑀢𑀦𑁂. 𑀓𑀸𑀭𑀡𑀦𑁆𑀢𑀺 𑀏𑀢𑁆𑀣 𑀬𑀣𑀸 𑀲𑀸𑀫𑀡𑁂𑀭𑀸 𑀇𑀢𑁄 𑀅𑀫𑁆𑀳𑀸𑀓𑀫𑁆𑀧𑀺 𑀤𑁂𑀦𑁆𑀢𑀻𑀢𑀺 𑀯𑀺𑀢𑀓𑁆𑀓𑁄 𑀉𑀧𑁆𑀧𑀚𑁆𑀚𑀢𑀺, 𑀦 𑀢𑀣𑀸 𑀅𑀜𑁆𑀜𑀢𑁆𑀣𑀸𑀢𑀺 𑀓𑀸𑀭𑀡𑀁 𑀯𑀤𑀦𑁆𑀢𑀺, 𑀢𑀜𑁆𑀘 𑀬𑀼𑀢𑁆𑀢𑀁. 𑀬𑀲𑁆𑀲 𑀧𑀦 𑀢𑀸𑀤𑀺𑀲𑁄 𑀯𑀺𑀢𑀓𑁆𑀓𑁄 𑀦𑀢𑁆𑀣𑀺, 𑀢𑁂𑀦 𑀅𑀧𑀭𑀺𑀯𑀢𑁆𑀢𑁂𑀢𑁆𑀯𑀸𑀧𑀺 𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀁.

𑁧𑁧𑁨. 𑀦𑀺𑀘𑁆𑀘𑀸𑀮𑁂𑀢𑀼𑀦𑁆𑀢𑀺 𑀘𑀸𑀮𑁂𑀢𑁆𑀯𑀸 𑀧𑀸𑀲𑀸𑀡𑀲𑀓𑁆𑀔𑀭𑀸𑀤𑀺𑀅𑀧𑀦𑀬𑀦𑀁 𑀓𑀸𑀢𑀼𑀁. 𑀉𑀤𑁆𑀥𑀦𑀁 𑀆𑀭𑁄𑀧𑁂𑀢𑀩𑁆𑀩𑀦𑁆𑀢𑀺 𑀅𑀦𑀕𑁆𑀕𑀺𑀓𑀁 𑀉𑀤𑁆𑀥𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀉𑀤𑁆𑀥𑀦𑁂 𑀧𑀘𑁆𑀘𑀫𑀸𑀦𑀲𑁆𑀲 𑀆𑀮𑀼𑀴𑀦𑁂 𑀉𑀧𑀭𑀺 𑀅𑀧𑀓𑁆𑀓𑀢𑀡𑁆𑀟𑀼𑀮𑀸 𑀳𑁂𑀝𑁆𑀞𑀸 𑀧𑀯𑀺𑀲𑀺𑀢𑁆𑀯𑀸 𑀧𑀘𑁆𑀘𑀦𑁆𑀢𑀻𑀢𑀺 𑀆𑀳 ‘‘𑀲𑀸𑀫𑀁𑀧𑀸𑀓𑀜𑁆𑀘𑁂𑀯 𑀳𑁄𑀢𑀻’’𑀢𑀺.

𑁧𑁧𑁩. 𑀆𑀥𑀸𑀭𑀓𑁂 𑀧𑀢𑁆𑀢𑁄 𑀞𑀧𑀺𑀢𑁄𑀢𑀺 𑀅𑀧𑁆𑀧𑀝𑀺𑀕𑁆𑀕𑀳𑀺𑀢𑀸𑀫𑀺𑀲𑁄 𑀧𑀢𑁆𑀢𑁄 𑀧𑀼𑀦 𑀧𑀝𑀺𑀕𑁆𑀕𑀳𑀡𑀢𑁆𑀣𑀸𑀬 𑀞𑀧𑀺𑀢𑁄. 𑀘𑀸𑀮𑁂𑀢𑀻𑀢𑀺 𑀯𑀺𑀦𑀸 𑀓𑀸𑀭𑀡𑀁 𑀘𑀸𑀮𑁂𑀢𑀺, 𑀲𑀢𑀺𑀧𑀺 𑀓𑀸𑀭𑀡𑁂 𑀪𑀺𑀓𑁆𑀔𑀽𑀦𑀁 𑀧𑀭𑀺𑀪𑁄𑀕𑀸𑀭𑀳𑀁 𑀘𑀸𑀮𑁂𑀢𑀼𑀁 𑀦 𑀯𑀝𑁆𑀝𑀢𑀺. 𑀓𑀺𑀜𑁆𑀘𑀸𑀧𑀺 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀅𑀫𑀦𑀼𑀲𑁆𑀲𑀺𑀓𑀸𑀩𑀸𑀥𑁂 𑀆𑀫𑀓𑀫𑀁𑀲𑀁 𑀆𑀫𑀓𑀮𑁄𑀳𑀺𑀢’’𑀦𑁆𑀢𑀺 (𑀫𑀳𑀸𑀯. 𑁨𑁬𑁪) 𑀢𑀸𑀤𑀺𑀲𑁂 𑀆𑀩𑀸𑀥𑁂 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀆𑀫𑀓𑀫𑀁𑀲𑀧𑀝𑀺𑀕𑁆𑀕𑀳𑀡𑀁 𑀅𑀦𑀼𑀜𑁆𑀜𑀸𑀢𑀁, ‘‘𑀆𑀫𑀓𑀫𑀁𑀲𑀧𑀝𑀺𑀕𑁆𑀕𑀳𑀡𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀻’’𑀢𑀺 (𑀤𑀻. 𑀦𑀺. 𑁧.𑁧𑁦, 𑁧𑁯𑁪) 𑀘 𑀲𑀸𑀫𑀜𑁆𑀜𑀢𑁄 𑀧𑀝𑀺𑀓𑁆𑀔𑀺𑀢𑁆𑀢𑀁, 𑀢𑀣𑀸𑀧𑀺 𑀅𑀢𑁆𑀢𑀦𑁄, 𑀅𑀜𑁆𑀜𑀲𑁆𑀲 𑀯𑀸 𑀪𑀺𑀓𑁆𑀔𑀼𑀦𑁄 𑀅𑀢𑁆𑀣𑀸𑀬 𑀅𑀕𑁆𑀕𑀳𑀺𑀢𑀢𑁆𑀢𑀸 ‘‘𑀲𑀻𑀳𑀯𑀺𑀖𑀸𑀲𑀸𑀤𑀺𑀁…𑀧𑁂… 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀁. 𑀲𑀓𑁆𑀓𑁄𑀢𑀺 𑀯𑀺𑀢𑀓𑁆𑀓𑀁 𑀲𑁄𑀥𑁂𑀢𑀼𑀦𑁆𑀢𑀺 ‘‘𑀫𑀬𑁆𑀳𑀫𑁆𑀧𑀺 𑀤𑁂𑀢𑀻’’𑀢𑀺 𑀯𑀺𑀢𑀓𑁆𑀓𑀲𑁆𑀲 𑀅𑀦𑀼𑀧𑁆𑀧𑀦𑁆𑀦𑀪𑀸𑀯𑀁 𑀲𑀮𑁆𑀮𑀓𑁆𑀔𑁂𑀢𑀼𑀁 𑀲𑀓𑁆𑀓𑁄𑀢𑀺, ‘‘𑀲𑀸𑀫𑀡𑁂𑀭𑀲𑁆𑀲 𑀤𑀲𑁆𑀲𑀸𑀫𑀻’’𑀢𑀺 𑀲𑀼𑀤𑁆𑀥𑀘𑀺𑀢𑁆𑀢𑁂𑀦 𑀫𑀬𑀸 𑀕𑀳𑀺𑀢𑀦𑁆𑀢𑀺 𑀯𑀸 𑀲𑀮𑁆𑀮𑀓𑁆𑀔𑁂𑀢𑀼𑀁 𑀲𑀓𑁆𑀓𑁄𑀢𑀺. 𑀲𑀘𑁂 𑀧𑀦 𑀫𑀽𑀮𑁂𑀧𑀺 𑀧𑀝𑀺𑀕𑁆𑀕𑀳𑀺𑀢𑀁 𑀳𑁄𑀢𑀻𑀢𑀺 𑀏𑀢𑁆𑀣 ‘‘𑀕𑀳𑁂𑀢𑁆𑀯𑀸 𑀕𑀢𑁂 𑀫𑀬𑁆𑀳𑀫𑁆𑀧𑀺 𑀤𑀤𑁂𑀬𑁆𑀬𑀼𑀦𑁆𑀢𑀺 𑀲𑀜𑁆𑀜𑀸𑀬 𑀲𑀘𑁂 𑀧𑀝𑀺𑀕𑁆𑀕𑀳𑀺𑀢𑀁 𑀳𑁄𑀢𑀻’’𑀢𑀺 𑀯𑀤𑀦𑁆𑀢𑀺.

𑁧𑁧𑁪. 𑀓𑁄𑀝𑁆𑀞𑀸𑀲𑁂 𑀓𑀭𑁄𑀢𑀻𑀢𑀺 ‘‘𑀪𑀺𑀓𑁆𑀔𑀽 𑀲𑀸𑀫𑀡𑁂𑀭𑀸 𑀘 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀅𑀪𑀺𑀭𑀼𑀘𑀺𑀢𑀁 𑀓𑁄𑀝𑁆𑀞𑀸𑀲𑀁 𑀕𑀡𑁆𑀳𑀦𑁆𑀢𑀽’’𑀢𑀺 𑀲𑀩𑁆𑀩𑁂𑀲𑀁 𑀲𑀫𑀓𑁂 𑀓𑁄𑀝𑁆𑀞𑀸𑀲𑁂 𑀓𑀭𑁄𑀢𑀺. 𑀕𑀳𑀺𑀢𑀸𑀯𑀲𑁂𑀲𑀦𑁆𑀢𑀺 𑀲𑀸𑀫𑀡𑁂𑀭𑁂𑀳𑀺 𑀕𑀳𑀺𑀢𑀓𑁄𑀝𑁆𑀞𑀸𑀲𑀢𑁄 𑀅𑀯𑀲𑁂𑀲𑀁. 𑀕𑀡𑁆𑀳𑀺𑀢𑁆𑀯𑀸𑀢𑀺 ‘‘𑀫𑀬𑁆𑀳𑀁 𑀇𑀤𑀁 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀕𑀳𑁂𑀢𑁆𑀯𑀸. 𑀇𑀥 𑀕𑀳𑀺𑀢𑀸𑀯𑀲𑁂𑀲𑀁 𑀦𑀸𑀫 𑀢𑁂𑀦 𑀕𑀡𑁆𑀳𑀺𑀢𑁆𑀯𑀸 𑀧𑀼𑀦 𑀞𑀧𑀺𑀢𑀁.

𑀧𑀝𑀺𑀕𑁆𑀕𑀳𑁂𑀢𑁆𑀯𑀸𑀢𑀺 𑀢𑀤𑀳𑀼 𑀧𑀝𑀺𑀕𑁆𑀕𑀳𑁂𑀢𑁆𑀯𑀸. 𑀢𑁂𑀦𑁂𑀯 ‘‘𑀬𑀸𑀯𑀓𑀸𑀮𑀺𑀓𑁂𑀦 𑀬𑀸𑀯𑀚𑀻𑀯𑀺𑀓𑀲𑀁𑀲𑀕𑁆𑀕𑁂 𑀤𑁄𑀲𑁄 𑀦𑀢𑁆𑀣𑀻’’𑀢𑀺 𑀯𑀼𑀢𑁆𑀢𑀁. 𑀲𑀘𑁂 𑀧𑀦 𑀧𑀼𑀭𑀺𑀫𑀤𑀺𑀯𑀲𑁂 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀞𑀧𑀺𑀢𑀸 𑀳𑁄𑀢𑀺, 𑀲𑀸𑀫𑀺𑀲𑁂𑀦 𑀫𑀼𑀔𑁂𑀦 𑀢𑀲𑁆𑀲𑀸 𑀯𑀝𑁆𑀝𑀺𑀬𑀸 𑀥𑀽𑀫𑀁 𑀧𑀺𑀯𑀺𑀢𑀼𑀁 𑀦 𑀯𑀝𑁆𑀝𑀢𑀺. 𑀲𑀫𑀼𑀤𑁆𑀤𑁄𑀤𑀓𑁂𑀦𑀸𑀢𑀺 𑀅𑀧𑁆𑀧𑀝𑀺𑀕𑁆𑀕𑀳𑀺𑀢𑀲𑀫𑀼𑀤𑁆𑀤𑁄𑀤𑀓𑁂𑀦.

𑀳𑀺𑀫𑀓𑀭𑀓𑀸 𑀦𑀸𑀫 𑀓𑀤𑀸𑀘𑀺 𑀯𑀲𑁆𑀲𑁄𑀤𑀓𑁂𑀦 𑀲𑀳 𑀧𑀢𑀦𑀓𑀸 𑀧𑀸𑀲𑀸𑀡𑀮𑁂𑀔𑀸 𑀯𑀺𑀬 𑀖𑀦𑀻𑀪𑀽𑀢𑀸 𑀉𑀤𑀓𑀯𑀺𑀲𑁂𑀲𑀸, 𑀢𑁂𑀲𑀼 𑀧𑀝𑀺𑀕𑁆𑀕𑀳𑀡𑀓𑀺𑀘𑁆𑀘𑀁 𑀦𑀢𑁆𑀣𑀺. 𑀢𑁂𑀦𑀸𑀳 ‘‘𑀉𑀤𑀓𑀕𑀢𑀺𑀓𑀸 𑀏𑀯𑀸’’𑀢𑀺. 𑀬𑀲𑁆𑀫𑀸 𑀓𑀢𑀓𑀝𑁆𑀞𑀺 𑀉𑀤𑀓𑀁 𑀧𑀲𑀸𑀤𑁂𑀢𑁆𑀯𑀸 𑀯𑀺𑀲𑀼𑀁 𑀢𑀺𑀝𑁆𑀞𑀢𑀺, 𑀢𑀲𑁆𑀫𑀸 ‘‘𑀅𑀩𑁆𑀩𑁄𑀳𑀸𑀭𑀺𑀓’’𑀦𑁆𑀢𑀺 𑀯𑀼𑀢𑁆𑀢𑀁. 𑀇𑀫𑀺𑀦𑀸 𑀅𑀧𑁆𑀧𑀝𑀺𑀕𑁆𑀕𑀳𑀺𑀢𑀸𑀧𑀢𑁆𑀢𑀻𑀳𑀺 𑀅𑀩𑁆𑀩𑁄𑀳𑀸𑀭𑀺𑀓𑀁, 𑀯𑀺𑀓𑀸𑀮𑀪𑁄𑀚𑀦𑀸𑀧𑀢𑁆𑀢𑀻𑀳𑀺𑀧𑀺 𑀅𑀩𑁆𑀩𑁄𑀳𑀸𑀭𑀺𑀓𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀮𑀕𑁆𑀕𑀢𑀻𑀢𑀺 𑀲𑀼𑀓𑁆𑀔𑁂 𑀫𑀼𑀔𑁂 𑀘 𑀳𑀢𑁆𑀣𑁂 𑀘 𑀫𑀢𑁆𑀢𑀺𑀓𑀸𑀯𑀡𑁆𑀡𑀁 𑀤𑀲𑁆𑀲𑁂𑀦𑁆𑀢𑀁 𑀮𑀕𑁆𑀕𑀢𑀺. 𑀩𑀳𑀮𑀦𑁆𑀢𑀺 𑀳𑀢𑁆𑀣𑀫𑀼𑀔𑁂𑀲𑀼 𑀅𑀮𑀕𑁆𑀕𑀦𑀓𑀫𑁆𑀧𑀺 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀁.

𑀯𑀸𑀲𑀫𑀢𑁆𑀢𑀦𑁆𑀢𑀺 𑀭𑁂𑀡𑀼𑀔𑀻𑀭𑀸𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀧𑀸𑀦𑀻𑀬𑀁 𑀕𑀳𑁂𑀢𑁆𑀯𑀸𑀢𑀺 𑀅𑀢𑁆𑀢𑀦𑁄𑀬𑁂𑀯 𑀅𑀢𑁆𑀣𑀸𑀬 𑀕𑀳𑁂𑀢𑁆𑀯𑀸. 𑀲𑀘𑁂 𑀧𑀦 𑀧𑀻𑀢𑀸𑀯𑀲𑁂𑀲𑀓𑀁 𑀢𑀢𑁆𑀣𑁂𑀯 𑀆𑀓𑀺𑀭𑀺𑀲𑁆𑀲𑀸𑀫𑀻𑀢𑀺 𑀕𑀡𑁆𑀳𑀸𑀢𑀺, 𑀧𑀼𑀦 𑀧𑀝𑀺𑀕𑁆𑀕𑀳𑀡𑀓𑀺𑀘𑁆𑀘𑀁 𑀦𑀢𑁆𑀣𑀺. 𑀆𑀓𑀺𑀭𑀢𑀺, 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀦𑁆𑀢𑀺 𑀧𑀼𑀧𑁆𑀨𑀭𑀲𑀲𑁆𑀲 𑀧𑀜𑁆𑀜𑀸𑀬𑀦𑀢𑁄 𑀯𑀼𑀢𑁆𑀢𑀁. 𑀯𑀺𑀓𑁆𑀔𑀫𑁆𑀪𑁂𑀢𑁆𑀯𑀸𑀢𑀺 𑀯𑀺𑀬𑀽𑀳𑀺𑀢𑁆𑀯𑀸, 𑀅𑀧𑀦𑁂𑀢𑁆𑀯𑀸𑀢𑀺 𑀅𑀢𑁆𑀣𑁄.

𑁧𑁧𑁫. 𑀫𑀳𑀸𑀪𑀽𑀢𑁂𑀲𑀽𑀢𑀺 𑀧𑀸𑀡𑀲𑀭𑀻𑀭𑀲𑀦𑁆𑀦𑀺𑀲𑁆𑀲𑀺𑀢𑁂𑀲𑀼 𑀧𑀣𑀯𑀻𑀆𑀤𑀺𑀫𑀳𑀸𑀪𑀽𑀢𑁂𑀲𑀼. 𑀲𑀩𑁆𑀩𑀁 𑀯𑀝𑁆𑀝𑀢𑀻𑀢𑀺 𑀅𑀢𑁆𑀢𑀦𑁄 𑀧𑀭𑁂𑀲𑀜𑁆𑀘 𑀲𑀭𑀻𑀭𑀲𑀦𑁆𑀦𑀺𑀲𑁆𑀲𑀺𑀢𑀁 𑀲𑀩𑁆𑀩𑀁 𑀯𑀝𑁆𑀝𑀢𑀺, 𑀅𑀓𑀧𑁆𑀧𑀺𑀬𑀫𑀁𑀲𑀸𑀦𑀼𑀮𑁄𑀫𑀢𑀸𑀬 𑀣𑀼𑀮𑁆𑀮𑀘𑁆𑀘𑀬𑀸𑀤𑀺𑀁 𑀦 𑀚𑀦𑁂𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀢𑀢𑀻𑀢𑀺 𑀅𑀢𑁆𑀢𑀦𑁄 𑀲𑀭𑀻𑀭𑀢𑁄 𑀙𑀺𑀚𑁆𑀚𑀺𑀢𑁆𑀯𑀸 𑀧𑀢𑀢𑀺. ‘‘𑀭𑀼𑀓𑁆𑀔𑀢𑁄 𑀙𑀺𑀦𑁆𑀤𑀺𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀫𑀢𑁆𑀢𑀺𑀓𑀢𑁆𑀣𑀸𑀬 𑀧𑀣𑀯𑀺𑀁 𑀔𑀡𑀺𑀢𑀼𑀁, 𑀅𑀜𑁆𑀜𑀫𑁆𑀧𑀺 𑀬𑀁 𑀓𑀺𑀜𑁆𑀘𑀺 𑀫𑀽𑀮𑀧𑀡𑁆𑀡𑀸𑀤𑀺𑀯𑀺𑀲𑀪𑁂𑀲𑀚𑁆𑀚𑀁 𑀙𑀺𑀦𑁆𑀤𑀺𑀢𑁆𑀯𑀸 𑀙𑀸𑀭𑀺𑀓𑀁 𑀅𑀓𑀢𑁆𑀯𑀸𑀧𑀺 𑀅𑀧𑁆𑀧𑀝𑀺𑀕𑁆𑀕𑀳𑀺𑀢𑀫𑁆𑀧𑀺 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.

𑀇𑀢𑀺 𑀯𑀺𑀦𑀬𑀲𑀗𑁆𑀕𑀳𑀲𑀁𑀯𑀡𑁆𑀡𑀦𑀸𑀪𑀽𑀢𑁂 𑀯𑀺𑀦𑀬𑀸𑀮𑀗𑁆𑀓𑀸𑀭𑁂

𑀧𑀝𑀺𑀕𑁆𑀕𑀳𑀡𑀯𑀺𑀦𑀺𑀘𑁆𑀙𑀬𑀓𑀣𑀸𑀮𑀗𑁆𑀓𑀸𑀭𑁄 𑀦𑀸𑀫

𑀯𑀻𑀲𑀢𑀺𑀫𑁄 𑀧𑀭𑀺𑀘𑁆𑀙𑁂𑀤𑁄.