𑁧𑁯. 𑀓𑀧𑁆𑀧𑀺𑀬𑀪𑀽𑀫𑀺𑀯𑀺𑀦𑀺𑀘𑁆𑀙𑀬𑀓𑀣𑀸

𑁧𑁦𑁧. 𑀏𑀯𑀁 𑀘𑀢𑀼𑀓𑀸𑀮𑀺𑀓𑀯𑀺𑀦𑀺𑀘𑁆𑀙𑀬𑀁 𑀓𑀣𑁂𑀢𑁆𑀯𑀸 𑀇𑀤𑀸𑀦𑀺 𑀓𑀧𑁆𑀧𑀺𑀬𑀓𑀼𑀝𑀺𑀯𑀺𑀦𑀺𑀘𑁆𑀙𑀬𑀁 𑀓𑀣𑁂𑀢𑀼𑀁 ‘‘𑀓𑀧𑁆𑀧𑀺𑀬𑀸 𑀘𑀢𑀼𑀪𑀽𑀫𑀺𑀬𑁄’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀓𑀧𑁆𑀧𑀦𑁆𑀢𑀻𑀢𑀺 𑀓𑀧𑁆𑀧𑀺𑀬𑀸, 𑀓𑀧𑁆𑀧 𑀲𑀸𑀫𑀢𑁆𑀣𑀺𑀬𑁂𑀢𑀺 𑀥𑀸𑀢𑀼. 𑀪𑀯𑀦𑁆𑀢𑀺 𑀏𑀢𑀸𑀲𑀼 𑀅𑀦𑁆𑀢𑁄𑀯𑀼𑀢𑁆𑀣𑀅𑀦𑁆𑀢𑁄𑀧𑀓𑁆𑀓𑀸𑀦𑀻𑀢𑀺 𑀪𑀽𑀫𑀺𑀬𑁄, 𑀘𑀢𑀲𑁆𑀲𑁄 𑀪𑀽𑀫𑀺𑀬𑁄 𑀘𑀢𑀼𑀪𑀽𑀫𑀺𑀬𑁄, 𑀘𑀢𑀲𑁆𑀲𑁄 𑀓𑀧𑁆𑀧𑀺𑀬𑀓𑀼𑀝𑀺𑀬𑁄𑀢𑀺 𑀅𑀢𑁆𑀣𑁄. 𑀓𑀢𑀫𑀸 𑀢𑀸𑀢𑀺 𑀆𑀳 ‘‘𑀉𑀲𑁆𑀲𑀸𑀯𑀦𑀦𑁆𑀢𑀺𑀓𑀸…𑀧𑁂… 𑀯𑁂𑀤𑀺𑀢𑀩𑁆𑀩𑀸’’𑀢𑀺. 𑀓𑀣𑀁 𑀯𑀺𑀜𑁆𑀜𑀸𑀬𑀢𑀺𑀘𑁆𑀘𑀸𑀳 ‘‘𑀅𑀦𑀼𑀚𑀸𑀦𑀸𑀫𑀺…𑀧𑁂… 𑀯𑀘𑀦𑀢𑁄’’𑀢𑀺. 𑀇𑀤𑀁 𑀪𑁂𑀲𑀚𑁆𑀚𑀓𑁆𑀔𑀦𑁆𑀥𑀓𑀧𑀸𑀴𑀺𑀁 (𑀫𑀳𑀸𑀯. 𑁨𑁯𑁫) 𑀲𑀦𑁆𑀥𑀸𑀬𑀸𑀳. 𑀢𑀢𑁆𑀣 𑀉𑀤𑁆𑀥𑀁 𑀲𑀸𑀯𑀦𑀸 𑀉𑀲𑁆𑀲𑀸𑀯𑀦𑀸, 𑀉𑀲𑁆𑀲𑀸𑀯𑀦𑀸 𑀅𑀦𑁆𑀢𑁄 𑀬𑀲𑁆𑀲𑀸 𑀓𑀧𑁆𑀧𑀺𑀬𑀪𑀽𑀫𑀺𑀬𑀸𑀢𑀺 𑀉𑀲𑁆𑀲𑀸𑀯𑀦𑀦𑁆𑀢𑀺𑀓𑀸. 𑀕𑀸𑀯𑁄 𑀦𑀺𑀲𑀻𑀤𑀦𑁆𑀢𑀺 𑀏𑀢𑁆𑀣𑀸𑀢𑀺 𑀕𑁄𑀦𑀺𑀲𑀸𑀤𑀺𑀓𑀸, 𑀕𑁄-𑀲𑀤𑁆𑀤𑀽𑀧𑀧𑀤 𑀦𑀺-𑀧𑀼𑀩𑁆𑀩𑀲𑀤 𑀯𑀺𑀲𑀭𑀡𑀕𑀢𑁆𑀬𑀸𑀯𑀲𑀸𑀦𑁂𑀲𑀽𑀢𑀺 𑀥𑀸𑀢𑀼. 𑀕𑀳𑀧𑀢𑀻𑀳𑀺 𑀤𑀺𑀦𑁆𑀦𑀸𑀢𑀺 𑀕𑀳𑀧𑀢𑀺, 𑀉𑀢𑁆𑀢𑀭𑀧𑀤𑀮𑁄𑀧𑀢𑀢𑀺𑀬𑀸𑀢𑀧𑁆𑀧𑀼𑀭𑀺𑀲𑁄𑀬𑀁. 𑀓𑀫𑁆𑀫𑀯𑀸𑀘𑀸𑀬 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑀸𑀢𑀺 𑀲𑀫𑁆𑀫𑀼𑀢𑀻𑀢𑀺 𑀏𑀯𑀫𑀺𑀫𑀸𑀲𑀁 𑀯𑀺𑀕𑁆𑀕𑀳𑁄 𑀓𑀸𑀢𑀩𑁆𑀩𑁄. 𑀢𑀢𑁆𑀣𑀸𑀢𑀺 𑀓𑀧𑁆𑀧𑀺𑀬𑀓𑀼𑀝𑀺𑀯𑀺𑀦𑀺𑀘𑁆𑀙𑀬𑁂. 𑀢𑀁 𑀧𑀦 𑀅𑀯𑀢𑁆𑀯𑀸𑀧𑀻𑀢𑀺 𑀅𑀦𑁆𑀥𑀓𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀦𑀬𑀁 𑀅𑀯𑀢𑁆𑀯𑀸𑀧𑀺. 𑀧𑀺-𑀲𑀤𑁆𑀤𑁂𑀦 𑀢𑀣𑀸𑀯𑀘𑀦𑀫𑁆𑀧𑀺 𑀅𑀦𑀼𑀚𑀸𑀦𑀸𑀢𑀺. 𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑀦𑀬𑁂𑀦 𑀯𑀼𑀢𑁆𑀢𑁂𑀢𑀺 𑀲𑁂𑀲𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑀦𑀬𑁂𑀦 ‘‘𑀓𑀧𑁆𑀧𑀺𑀬𑀓𑀼𑀝𑀺𑀁 𑀓𑀭𑁄𑀫𑀸’’𑀢𑀺 𑀯𑀸 ‘‘𑀓𑀧𑁆𑀧𑀺𑀬𑀓𑀼𑀝𑀻’’𑀢𑀺 𑀯𑀸 𑀯𑀼𑀢𑁆𑀢𑁂. 𑀲𑀸𑀥𑀸𑀭𑀡𑀮𑀓𑁆𑀔𑀡𑀦𑁆𑀢𑀺 𑀲𑀩𑁆𑀩𑀅𑀝𑁆𑀞𑀓𑀣𑀸𑀦𑀁 𑀲𑀸𑀥𑀸𑀭𑀡𑀁 𑀉𑀲𑁆𑀲𑀸𑀯𑀦𑀦𑁆𑀢𑀺𑀓𑀓𑀼𑀝𑀺𑀓𑀭𑀡𑀮𑀓𑁆𑀔𑀡𑀁. 𑀘𑀬𑀦𑁆𑀢𑀺 𑀅𑀥𑀺𑀝𑁆𑀞𑀸𑀦𑀁 𑀉𑀘𑁆𑀘𑀯𑀢𑁆𑀣𑀼𑀁. 𑀬𑀢𑁄 𑀧𑀝𑁆𑀞𑀸𑀬𑀸𑀢𑀺 𑀬𑀢𑁄 𑀇𑀝𑁆𑀞𑀓𑀢𑁄 𑀲𑀺𑀮𑀢𑁄 𑀫𑀢𑁆𑀢𑀺𑀓𑀸𑀧𑀺𑀡𑁆𑀟𑀢𑁄 𑀯𑀸 𑀧𑀝𑁆𑀞𑀸𑀬. 𑀧𑀞𑀫𑀺𑀝𑁆𑀞𑀓𑀸𑀤𑀻𑀦𑀁 𑀳𑁂𑀝𑁆𑀞𑀸 𑀦 𑀯𑀝𑁆𑀝𑀦𑁆𑀢𑀻𑀢𑀺 𑀧𑀞𑀫𑀺𑀝𑁆𑀞𑀓𑀸𑀤𑀻𑀦𑀁 𑀳𑁂𑀝𑁆𑀞𑀸𑀪𑀽𑀫𑀺𑀬𑀁 𑀧𑀢𑀺𑀝𑁆𑀞𑀸𑀧𑀺𑀬𑀫𑀸𑀦𑀸 𑀇𑀝𑁆𑀞𑀓𑀸𑀤𑀬𑁄 𑀪𑀽𑀫𑀺𑀕𑀢𑀺𑀓𑀢𑁆𑀢𑀸 ‘‘𑀓𑀧𑁆𑀧𑀺𑀬𑀓𑀼𑀝𑀺𑀁 𑀓𑀭𑁄𑀫𑀸’’𑀢𑀺 𑀯𑀢𑁆𑀯𑀸 𑀧𑀢𑀺𑀝𑁆𑀞𑀸𑀧𑁂𑀢𑀼𑀁 𑀦 𑀯𑀝𑁆𑀝𑀦𑁆𑀢𑀺. 𑀬𑀤𑀺 𑀏𑀯𑀁 𑀪𑀽𑀫𑀺𑀬𑀁 𑀦𑀺𑀔𑀡𑀺𑀢𑁆𑀯𑀸 𑀞𑀧𑀺𑀬𑀫𑀸𑀦𑀸 𑀣𑀫𑁆𑀪𑀸 𑀓𑀲𑁆𑀫𑀸 𑀢𑀣𑀸 𑀯𑀢𑁆𑀯𑀸 𑀧𑀢𑀺𑀝𑁆𑀞𑀸𑀧𑁂𑀢𑀼𑀁 𑀯𑀝𑁆𑀝𑀦𑁆𑀢𑀻𑀢𑀺 𑀆𑀳 ‘‘𑀣𑀫𑁆𑀪𑀸 𑀧𑀦…𑀧𑁂… 𑀯𑀝𑁆𑀝𑀦𑁆𑀢𑀻’’𑀢𑀺.

𑀲𑀗𑁆𑀖𑀲𑀦𑁆𑀢𑀓𑀫𑁂𑀯𑀸𑀢𑀺 𑀯𑀸𑀲𑀢𑁆𑀣𑀸𑀬 𑀓𑀢𑀁 𑀲𑀗𑁆𑀖𑀺𑀓𑀲𑁂𑀦𑀸𑀲𑀦𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀪𑀺𑀓𑁆𑀔𑀼𑀲𑀦𑁆𑀢𑀓𑀦𑁆𑀢𑀺 𑀯𑀸𑀲𑀢𑁆𑀣𑀸𑀬 𑀏𑀯 𑀓𑀢𑀁 𑀪𑀺𑀓𑁆𑀔𑀼𑀲𑁆𑀲 𑀧𑀼𑀕𑁆𑀕𑀮𑀺𑀓𑀲𑁂𑀦𑀸𑀲𑀦𑀁.

𑁧𑁦𑁨. 𑀫𑀼𑀔𑀲𑀦𑁆𑀦𑀺𑀥𑀻𑀢𑀺 𑀇𑀫𑀺𑀦𑀸 𑀅𑀦𑁆𑀢𑁄𑀯𑀼𑀢𑁆𑀣𑀤𑀼𑀓𑁆𑀓𑀝𑀫𑁂𑀯 𑀤𑀻𑀧𑁂𑀢𑀺.

𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑀫𑀳𑀸𑀯𑀕𑁆𑀕 𑁨.𑁨𑁯𑁫) 𑀧𑀦 𑀏𑀯𑀁 𑀯𑀼𑀢𑁆𑀢𑀁 𑁋 𑀢𑀁 𑀧𑀦 𑀅𑀯𑀢𑁆𑀯𑀸𑀧𑀻𑀢𑀺 𑀧𑀺-𑀲𑀤𑁆𑀤𑁂𑀦 𑀢𑀣𑀸𑀯𑀘𑀦𑀫𑁆𑀧𑀺 𑀅𑀦𑀼𑀚𑀸𑀦𑀸𑀢𑀺. 𑀅𑀝𑁆𑀞𑀓𑀣𑀸𑀲𑀽𑀢𑀺 𑀅𑀦𑁆𑀥𑀓𑀝𑁆𑀞𑀓𑀣𑀸𑀯𑀺𑀭𑀳𑀺𑀢𑀸𑀲𑀼 𑀲𑁂𑀲𑀝𑁆𑀞𑀓𑀣𑀸𑀲𑀼. 𑀲𑀸𑀥𑀸𑀭𑀡𑀮𑀓𑁆𑀔𑀡𑀦𑁆𑀢𑀺 𑀅𑀦𑁆𑀥𑀓𑀝𑁆𑀞𑀓𑀣𑀸𑀬 𑀲𑀳 𑀲𑀩𑁆𑀩𑀝𑁆𑀞𑀓𑀣𑀸𑀦𑀁 𑀲𑀫𑀸𑀦𑀁. 𑀘𑀬𑀦𑁆𑀢𑀺 𑀅𑀥𑀺𑀝𑁆𑀞𑀸𑀦𑀁 𑀉𑀘𑁆𑀘𑀯𑀢𑁆𑀣𑀼𑀁. 𑀬𑀢𑁄 𑀧𑀝𑁆𑀞𑀸𑀬𑀸𑀢𑀺 𑀬𑀢𑁄 𑀇𑀝𑁆𑀞𑀓𑀸𑀤𑀺𑀢𑁄 𑀧𑀝𑁆𑀞𑀸𑀬 𑀘𑀬𑀁 𑀆𑀤𑀺𑀁 𑀓𑀢𑁆𑀯𑀸 𑀪𑀺𑀢𑁆𑀢𑀺𑀁 𑀉𑀝𑁆𑀞𑀸𑀧𑁂𑀢𑀼𑀓𑀸𑀫𑀸𑀢𑀺 𑀅𑀢𑁆𑀣𑁄. ‘‘𑀣𑀫𑁆𑀪𑀸 𑀧𑀦 𑀉𑀧𑀭𑀺 𑀉𑀕𑁆𑀕𑀘𑁆𑀙𑀦𑁆𑀢𑀺, 𑀢𑀲𑁆𑀫𑀸 𑀯𑀝𑁆𑀝𑀦𑁆𑀢𑀻’’𑀢𑀺 𑀏𑀢𑁂𑀦 𑀇𑀝𑁆𑀞𑀓𑀧𑀸𑀲𑀸𑀡𑀸 𑀳𑁂𑀝𑁆𑀞𑀸 𑀧𑀢𑀺𑀝𑁆𑀞𑀸𑀧𑀺𑀬𑀫𑀸𑀦𑀸𑀧𑀺 𑀬𑀤𑀺 𑀘𑀬𑀢𑁄, 𑀪𑀽𑀫𑀺𑀢𑁄 𑀯𑀸 𑀏𑀓𑀗𑁆𑀕𑀼𑀮𑀫𑀢𑁆𑀢𑀫𑁆𑀧𑀺 𑀉𑀕𑁆𑀕𑀢𑀸 𑀢𑀺𑀝𑁆𑀞𑀦𑁆𑀢𑀺, 𑀯𑀝𑁆𑀝𑀦𑁆𑀢𑀻𑀢𑀺 𑀲𑀺𑀤𑁆𑀥𑀁 𑀳𑁄𑀢𑀺.

𑀆𑀭𑀸𑀫𑁄𑀢𑀺 𑀉𑀧𑀘𑀸𑀭𑀲𑀻𑀫𑀸𑀧𑀭𑀺𑀘𑁆𑀙𑀺𑀦𑁆𑀦𑁄 𑀲𑀓𑀮𑁄 𑀯𑀺𑀳𑀸𑀭𑁄. 𑀲𑁂𑀦𑀸𑀲𑀦𑀸𑀦𑀻𑀢𑀺 𑀯𑀺𑀳𑀸𑀭𑀲𑁆𑀲 𑀅𑀦𑁆𑀢𑁄 𑀢𑀺𑀡𑀓𑀼𑀝𑀺𑀆𑀤𑀺𑀓𑀸𑀦𑀺 𑀲𑀗𑁆𑀖𑀲𑁆𑀲 𑀦𑀺𑀯𑀸𑀲𑀕𑁂𑀳𑀸𑀦𑀺. 𑀯𑀺𑀳𑀸𑀭𑀕𑁄𑀦𑀺𑀲𑀸𑀤𑀺𑀓𑀸 𑀦𑀸𑀫𑀸𑀢𑀺 𑀲𑁂𑀦𑀸𑀲𑀦𑀕𑁄𑀦𑀺𑀲𑀸𑀤𑀺𑀓𑀸 𑀦𑀸𑀫. 𑀲𑁂𑀦𑀸𑀲𑀦𑀸𑀦𑀺 𑀳𑀺 𑀲𑀬𑀁 𑀧𑀭𑀺𑀓𑁆𑀔𑀺𑀢𑁆𑀢𑀸𑀦𑀺𑀧𑀺 𑀆𑀭𑀸𑀫𑀧𑀭𑀺𑀓𑁆𑀔𑁂𑀧𑀸𑀪𑀸𑀯𑁂𑀦 ‘‘𑀕𑁄𑀦𑀺𑀲𑀸𑀤𑀺𑀓𑀸’’𑀢𑀺 𑀯𑀼𑀢𑁆𑀢𑀸. ‘‘𑀉𑀧𑀟𑁆𑀠𑀧𑀭𑀺𑀓𑁆𑀔𑀺𑀢𑁆𑀢𑁄𑀧𑀻’’𑀢𑀺 𑀇𑀫𑀺𑀦𑀸 𑀢𑀢𑁄 𑀊𑀦𑀧𑀭𑀺𑀓𑁆𑀔𑀺𑀢𑁆𑀢𑁄 𑀬𑁂𑀪𑀼𑀬𑁆𑀬𑁂𑀦 𑀅𑀧𑀭𑀺𑀓𑁆𑀔𑀺𑀢𑁆𑀢𑁄 𑀦𑀸𑀫, 𑀢𑀲𑁆𑀫𑀸 𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑀗𑁆𑀔𑀫𑁂𑀯 𑀕𑀘𑁆𑀙𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀏𑀢𑁆𑀣𑀸𑀢𑀺 𑀉𑀧𑀟𑁆𑀠𑀸𑀤𑀺𑀧𑀭𑀺𑀓𑁆𑀔𑀺𑀢𑁆𑀢𑁂. 𑀓𑀧𑁆𑀧𑀺𑀬𑀓𑀼𑀝𑀺 𑀮𑀤𑁆𑀥𑀼𑀁 𑀯𑀝𑁆𑀝𑀢𑀻𑀢𑀺 𑀕𑁄𑀦𑀺𑀲𑀸𑀤𑀺𑀓𑀸𑀬 𑀅𑀪𑀸𑀯𑁂𑀦 𑀲𑁂𑀲𑀓𑀧𑁆𑀧𑀺𑀬𑀓𑀼𑀝𑀻𑀲𑀼 𑀢𑀻𑀲𑀼 𑀬𑀸 𑀓𑀸𑀘𑀺 𑀓𑀧𑁆𑀧𑀺𑀬𑀓𑀼𑀝𑀺 𑀓𑀸𑀢𑀩𑁆𑀩𑀸𑀢𑀺 𑀅𑀢𑁆𑀣𑁄.

𑀢𑁂𑀲𑀁 𑀕𑁂𑀳𑀸𑀦𑀻𑀢𑀺 𑀏𑀢𑁆𑀣 𑀪𑀺𑀓𑁆𑀔𑀽𑀦𑀁 𑀯𑀸𑀲𑀢𑁆𑀣𑀸𑀬 𑀓𑀢𑀫𑁆𑀧𑀺 𑀬𑀸𑀯 𑀦 𑀤𑁂𑀦𑁆𑀢𑀺, 𑀢𑀸𑀯 𑀢𑁂𑀲𑀁 𑀲𑀦𑁆𑀢𑀓𑀁𑀬𑁂𑀯 𑀪𑀯𑀺𑀲𑁆𑀲𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀯𑀺𑀳𑀸𑀭𑀁 𑀞𑀧𑁂𑀢𑁆𑀯𑀸𑀢𑀺 𑀉𑀧𑀲𑀫𑁆𑀧𑀦𑁆𑀦𑀸𑀦𑀁 𑀯𑀸𑀲𑀢𑁆𑀣𑀸𑀬 𑀓𑀢𑀁 𑀕𑁂𑀳𑀁 𑀞𑀧𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀕𑁂𑀳𑀦𑁆𑀢𑀺 𑀦𑀺𑀯𑀸𑀲𑀕𑁂𑀳𑀁. 𑀢𑀤𑀜𑁆𑀜𑀁 𑀧𑀦 𑀉𑀧𑁄𑀲𑀣𑀸𑀕𑀸𑀭𑀸𑀤𑀺 𑀲𑀩𑁆𑀩𑀁 𑀅𑀦𑀺𑀯𑀸𑀲𑀕𑁂𑀳𑀁 𑀘𑀢𑀼𑀓𑀧𑁆𑀧𑀺𑀬𑀪𑀽𑀫𑀺𑀯𑀺𑀫𑀼𑀢𑁆𑀢𑀸 𑀧𑀜𑁆𑀘𑀫𑀻 𑀓𑀧𑁆𑀧𑀺𑀬𑀪𑀽𑀫𑀺. 𑀲𑀗𑁆𑀖𑀲𑀦𑁆𑀢𑀓𑁂𑀧𑀺 𑀳𑀺 𑀏𑀢𑀸𑀤𑀺𑀲𑁂 𑀕𑁂𑀳𑁂 𑀲𑀼𑀝𑁆𑀞𑀼 𑀧𑀭𑀺𑀓𑁆𑀔𑀺𑀢𑁆𑀢𑀸𑀭𑀸𑀫𑀝𑁆𑀞𑁂𑀧𑀺 𑀅𑀩𑁆𑀪𑁄𑀓𑀸𑀲𑁂 𑀯𑀺𑀬 𑀅𑀦𑁆𑀢𑁄𑀯𑀼𑀢𑁆𑀣𑀸𑀤𑀺𑀤𑁄𑀲𑁄 𑀦𑀢𑁆𑀣𑀺. 𑀬𑁂𑀦 𑀓𑁂𑀦𑀘𑀺 𑀙𑀦𑁆𑀦𑁂 𑀧𑀭𑀺𑀘𑁆𑀙𑀦𑁆𑀦𑁂 𑀘 𑀲𑀳𑀲𑁂𑀬𑁆𑀬𑀧𑁆𑀧𑀳𑁄𑀦𑀓𑁂 𑀪𑀺𑀓𑁆𑀔𑀼𑀲𑁆𑀲, 𑀲𑀗𑁆𑀖𑀲𑁆𑀲 𑀯𑀸 𑀦𑀺𑀯𑀸𑀲𑀕𑁂𑀳𑁂 𑀅𑀦𑁆𑀢𑁄𑀯𑀼𑀢𑁆𑀣𑀸𑀤𑀺𑀤𑁄𑀲𑁄, 𑀦 𑀅𑀜𑁆𑀜𑀢𑁆𑀣. 𑀢𑁂𑀦𑀸𑀳 ‘‘𑀬𑀁 𑀧𑀦𑀸’’𑀢𑀺𑀆𑀤𑀺. 𑀢𑀢𑁆𑀣 ‘‘𑀲𑀗𑁆𑀖𑀺𑀓𑀁 𑀯𑀸 𑀧𑀼𑀕𑁆𑀕𑀮𑀺𑀓𑀁 𑀯𑀸’’𑀢𑀺 𑀇𑀤𑀁 𑀓𑀺𑀜𑁆𑀘𑀸𑀧𑀺 𑀪𑀺𑀓𑁆𑀔𑀼𑀪𑀺𑀓𑁆𑀔𑀼𑀦𑀻𑀦𑀁 𑀲𑀸𑀫𑀜𑁆𑀜𑀢𑁄 𑀯𑀼𑀢𑁆𑀢𑀁 𑀪𑀺𑀓𑁆𑀔𑀽𑀦𑀁 𑀧𑀦 𑀲𑀗𑁆𑀖𑀺𑀓𑀁 𑀧𑀼𑀕𑁆𑀕𑀮𑀺𑀓𑀜𑁆𑀘 𑀪𑀺𑀓𑁆𑀔𑀼𑀦𑀻𑀦𑀁, 𑀢𑀸𑀲𑀁 𑀲𑀗𑁆𑀖𑀺𑀓𑀁 𑀧𑀼𑀕𑁆𑀕𑀮𑀺𑀓𑀜𑁆𑀘 𑀪𑀺𑀓𑁆𑀔𑀽𑀦𑀁 𑀕𑀺𑀳𑀺𑀲𑀦𑁆𑀢𑀓𑀝𑁆𑀞𑀸𑀦𑁂 𑀢𑀺𑀝𑁆𑀞𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀫𑀼𑀔𑀲𑀦𑁆𑀦𑀺𑀥𑀻𑀢𑀺 𑀅𑀦𑁆𑀢𑁄𑀲𑀦𑁆𑀦𑀺𑀳𑀺𑀢𑀤𑁄𑀲𑁄 𑀳𑀺 𑀫𑀼𑀔𑀧𑁆𑀧𑀯𑁂𑀲𑀦𑀦𑀺𑀫𑀺𑀢𑁆𑀢𑀁 𑀆𑀧𑀢𑁆𑀢𑀺𑀁 𑀓𑀭𑁄𑀢𑀺, 𑀦𑀸𑀜𑁆𑀜𑀣𑀸, 𑀢𑀲𑁆𑀫𑀸 ‘‘𑀫𑀼𑀔𑀲𑀦𑁆𑀦𑀺𑀥𑀻’’𑀢𑀺 (𑀯𑀺. 𑀯𑀺. 𑀝𑀻. 𑀫𑀳𑀸𑀯𑀕𑁆𑀕 𑁨.𑁨𑁯𑁫) 𑀯𑀼𑀢𑁆𑀢𑁄𑀢𑀺.

𑀢𑀢𑁆𑀣 𑀢𑀢𑁆𑀣 𑀔𑀡𑁆𑀟𑀸 𑀳𑁄𑀦𑁆𑀢𑀻𑀢𑀺 𑀉𑀧𑀟𑁆𑀠𑀢𑁄 𑀅𑀥𑀺𑀓𑀁 𑀔𑀡𑁆𑀟𑀸 𑀳𑁄𑀦𑁆𑀢𑀺. 𑀲𑀩𑁆𑀩𑀲𑁆𑀫𑀺𑀁 𑀙𑀤𑀦𑁂 𑀯𑀺𑀦𑀝𑁆𑀞𑁂𑀢𑀺 𑀢𑀺𑀡𑀧𑀡𑁆𑀡𑀸𑀤𑀺𑀯𑀲𑁆𑀲𑀧𑀭𑀺𑀢𑁆𑀢𑀸𑀬𑀓𑁂 𑀙𑀤𑀦𑁂 𑀯𑀺𑀦𑀝𑁆𑀞𑁂. 𑀕𑁄𑀧𑀸𑀦𑀲𑀻𑀦𑀁 𑀧𑀦 𑀉𑀧𑀭𑀺 𑀯𑀮𑁆𑀮𑀻𑀳𑀺 𑀩𑀤𑁆𑀥𑀤𑀡𑁆𑀟𑁂𑀲𑀼 𑀞𑀺𑀢𑁂𑀲𑀼𑀧𑀺 𑀚𑀳𑀺𑀢𑀯𑀢𑁆𑀣𑀼𑀓𑀸 𑀳𑁄𑀦𑁆𑀢𑀺 𑀏𑀯. 𑀧𑀓𑁆𑀔𑀧𑀸𑀲𑀓𑀫𑀡𑁆𑀟𑀮𑀦𑁆𑀢𑀺 𑀏𑀓𑀲𑁆𑀫𑀺𑀁 𑀧𑀲𑁆𑀲𑁂 𑀢𑀺𑀡𑁆𑀡𑀁 𑀕𑁄𑀧𑀸𑀦𑀲𑀻𑀦𑀁 𑀉𑀧𑀭𑀺 𑀞𑀺𑀢𑀢𑀺𑀡𑀧𑀡𑁆𑀡𑀸𑀤𑀺𑀙𑀤𑀦𑀁 𑀯𑀼𑀘𑁆𑀘𑀢𑀺.

𑁧𑁦𑁩. ‘‘𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀤𑀢𑁆𑀯𑀸 𑀢𑀲𑁆𑀲𑀸’’𑀢𑀺𑀆𑀤𑀺𑀦𑀸 𑀅𑀓𑀧𑁆𑀧𑀺𑀬𑀓𑀼𑀝𑀺𑀬𑀁 𑀯𑀼𑀢𑁆𑀣𑀫𑁆𑀧𑀺 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀤𑀺𑀦𑁆𑀦𑁂 𑀓𑀧𑁆𑀧𑀺𑀬𑀁 𑀳𑁄𑀢𑀺, 𑀲𑀸𑀧𑁂𑀓𑁆𑀔𑀤𑀸𑀦𑀜𑁆𑀘𑁂𑀢𑁆𑀣 𑀯𑀝𑁆𑀝𑀢𑀺, 𑀧𑀝𑀺𑀕𑁆𑀕𑀳𑀡𑀁 𑀯𑀺𑀬 𑀦 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀅𑀦𑁆𑀢𑁄𑀧𑀓𑁆𑀓𑀲𑀸𑀫𑀁𑀧𑀓𑁆𑀓𑁂𑀲𑀼 𑀧𑀦 ‘‘𑀦, 𑀪𑀺𑀓𑁆𑀔𑀯𑁂, 𑀅𑀦𑁆𑀢𑁄𑀯𑀼𑀢𑁆𑀣𑀁 𑀅𑀦𑁆𑀢𑁄𑀧𑀓𑁆𑀓𑀁 𑀲𑀸𑀫𑀁𑀧𑀓𑁆𑀓𑀁 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁, 𑀬𑁄 𑀧𑀭𑀺𑀪𑀼𑀜𑁆𑀚𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀦𑁆𑀢𑁄 𑀘𑁂, 𑀪𑀺𑀓𑁆𑀔𑀯𑁂, 𑀯𑀼𑀢𑁆𑀣𑀁 𑀅𑀦𑁆𑀢𑁄𑀧𑀓𑁆𑀓𑀁 𑀲𑀸𑀫𑀁𑀧𑀓𑁆𑀓𑀁, 𑀢𑀜𑁆𑀘𑁂 𑀧𑀭𑀺𑀪𑀼𑀜𑁆𑀚𑁂𑀬𑁆𑀬, 𑀆𑀧𑀢𑁆𑀢𑀺 𑀢𑀺𑀡𑁆𑀡𑀁 𑀤𑀼𑀓𑁆𑀓𑀝𑀸𑀦𑀁. 𑀅𑀦𑁆𑀢𑁄 𑀘𑁂, 𑀪𑀺𑀓𑁆𑀔𑀯𑁂, 𑀯𑀼𑀢𑁆𑀣𑀁 𑀅𑀦𑁆𑀢𑁄𑀧𑀓𑁆𑀓𑀁 𑀅𑀜𑁆𑀜𑁂𑀳𑀺 𑀧𑀓𑁆𑀓𑀁, 𑀢𑀜𑁆𑀘𑁂 𑀧𑀭𑀺𑀪𑀼𑀜𑁆𑀚𑁂𑀬𑁆𑀬, 𑀆𑀧𑀢𑁆𑀢𑀺 𑀤𑁆𑀯𑀺𑀦𑁆𑀦𑀁 𑀤𑀼𑀓𑁆𑀓𑀝𑀸𑀦𑀁. 𑀅𑀦𑁆𑀢𑁄 𑀘𑁂, 𑀪𑀺𑀓𑁆𑀔𑀯𑁂, 𑀯𑀼𑀢𑁆𑀣𑀁 𑀩𑀳𑀺𑀧𑀓𑁆𑀓𑀁 𑀲𑀸𑀫𑀁𑀧𑀓𑁆𑀓𑀁, 𑀢𑀜𑁆𑀘𑁂 𑀧𑀭𑀺𑀪𑀼𑀜𑁆𑀚𑁂𑀬𑁆𑀬, 𑀆𑀧𑀢𑁆𑀢𑀺 𑀤𑁆𑀯𑀺𑀦𑁆𑀦𑀁 𑀤𑀼𑀓𑁆𑀓𑀝𑀸𑀦𑀁. 𑀩𑀳𑀺 𑀘𑁂, 𑀪𑀺𑀓𑁆𑀔𑀯𑁂, 𑀯𑀼𑀢𑁆𑀣𑀁 𑀅𑀦𑁆𑀢𑁄𑀧𑀓𑁆𑀓𑀁 𑀲𑀸𑀫𑀁𑀧𑀓𑁆𑀓𑀁, 𑀢𑀜𑁆𑀘𑁂 𑀧𑀭𑀺𑀪𑀼𑀜𑁆𑀚𑁂𑀬𑁆𑀬, 𑀆𑀧𑀢𑁆𑀢𑀺 𑀤𑁆𑀯𑀺𑀦𑁆𑀦𑀁 𑀤𑀼𑀓𑁆𑀓𑀝𑀸𑀦𑀁. 𑀅𑀦𑁆𑀢𑁄 𑀘𑁂, 𑀪𑀺𑀓𑁆𑀔𑀯𑁂, 𑀯𑀼𑀢𑁆𑀣𑀁 𑀩𑀳𑀺𑀧𑀓𑁆𑀓𑀁 𑀅𑀜𑁆𑀜𑁂𑀳𑀺 𑀧𑀓𑁆𑀓𑀁, 𑀢𑀜𑁆𑀘𑁂 𑀧𑀭𑀺𑀪𑀼𑀜𑁆𑀚𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀩𑀳𑀺 𑀘𑁂, 𑀪𑀺𑀓𑁆𑀔𑀯𑁂, 𑀯𑀼𑀢𑁆𑀣𑀁 𑀅𑀦𑁆𑀢𑁄𑀧𑀓𑁆𑀓𑀁 𑀅𑀜𑁆𑀜𑁂𑀳𑀺 𑀧𑀓𑁆𑀓𑀁, 𑀢𑀜𑁆𑀘𑁂 𑀧𑀭𑀺𑀪𑀼𑀜𑁆𑀚𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀩𑀳𑀺 𑀘𑁂, 𑀪𑀺𑀓𑁆𑀔𑀯𑁂, 𑀯𑀼𑀢𑁆𑀣𑀁 𑀩𑀳𑀺𑀧𑀓𑁆𑀓𑀁 𑀲𑀸𑀫𑀁𑀧𑀓𑁆𑀓𑀁, 𑀢𑀜𑁆𑀘𑁂 𑀧𑀭𑀺𑀪𑀼𑀜𑁆𑀚𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀩𑀳𑀺 𑀘𑁂, 𑀪𑀺𑀓𑁆𑀔𑀯𑁂, 𑀯𑀼𑀢𑁆𑀣𑀁 𑀩𑀳𑀺𑀧𑀓𑁆𑀓𑀁 𑀅𑀜𑁆𑀜𑁂𑀳𑀺 𑀧𑀓𑁆𑀓𑀁, 𑀢𑀜𑁆𑀘𑁂 𑀧𑀭𑀺𑀪𑀼𑀜𑁆𑀚𑁂𑀬𑁆𑀬, 𑀅𑀦𑀸𑀧𑀢𑁆𑀢𑀻’’𑀢𑀺 (𑀫𑀳𑀸𑀯. 𑁨𑁭𑁪) 𑀯𑀘𑀦𑀢𑁄 𑀏𑀓𑀁 𑀢𑀺𑀭𑀸𑀧𑀢𑁆𑀢𑀺𑀓𑀁, 𑀢𑀻𑀡𑀺 𑀤𑀼𑀭𑀸𑀧𑀢𑁆𑀢𑀺𑀓𑀸𑀦𑀺, 𑀢𑀻𑀡𑀺 𑀏𑀓𑀸𑀧𑀢𑁆𑀢𑀺𑀓𑀸𑀦𑀺, 𑀏𑀓𑀁 𑀅𑀦𑀸𑀧𑀢𑁆𑀢𑀺𑀓𑀦𑁆𑀢𑀺 𑀅𑀝𑁆𑀞 𑀳𑁄𑀦𑁆𑀢𑀺. 𑀢𑀢𑁆𑀣 𑀅𑀦𑁆𑀢𑁄𑀯𑀼𑀢𑁆𑀣𑀦𑁆𑀢𑀺 𑀅𑀓𑀧𑁆𑀧𑀺𑀬𑀓𑀼𑀝𑀺𑀬𑀁 𑀯𑀼𑀢𑁆𑀣𑀁. 𑀅𑀦𑁆𑀢𑁄𑀧𑀓𑁆𑀓𑁂𑀧𑀺 𑀏𑀲𑁂𑀯 𑀦𑀬𑁄. 𑀲𑀸𑀫𑀁𑀧𑀓𑁆𑀓𑀦𑁆𑀢𑀺 𑀬𑀁 𑀓𑀺𑀜𑁆𑀘𑀺 𑀆𑀫𑀺𑀲𑀁 𑀪𑀺𑀓𑁆𑀔𑀼𑀲𑁆𑀲 𑀧𑀘𑀺𑀢𑀼𑀁 𑀦 𑀯𑀝𑁆𑀝𑀢𑀺. 𑀢𑀢𑁆𑀣 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀫𑁂𑀯.

𑀇𑀢𑀺 𑀯𑀺𑀦𑀬𑀲𑀗𑁆𑀕𑀳𑀲𑀁𑀯𑀡𑁆𑀡𑀦𑀸𑀪𑀽𑀢𑁂 𑀯𑀺𑀦𑀬𑀸𑀮𑀗𑁆𑀓𑀸𑀭𑁂

𑀓𑀧𑁆𑀧𑀺𑀬𑀪𑀽𑀫𑀺𑀯𑀺𑀦𑀺𑀘𑁆𑀙𑀬𑀓𑀣𑀸𑀮𑀗𑁆𑀓𑀸𑀭𑁄 𑀦𑀸𑀫

𑀏𑀓𑀽𑀦𑀯𑀻𑀲𑀢𑀺𑀫𑁄 𑀧𑀭𑀺𑀘𑁆𑀙𑁂𑀤𑁄.