𑀲𑁂𑀤𑀫𑁄𑀘𑀦𑀕𑀸𑀣𑀸

𑀅𑀯𑀺𑀧𑁆𑀧𑀯𑀸𑀲𑀧𑀜𑁆𑀳𑀸𑀯𑀡𑁆𑀡𑀦𑀸

𑁪𑁭𑁯. 𑀲𑁂𑀤𑀫𑁄𑀘𑀦𑀕𑀸𑀣𑀸𑀲𑀼 𑀅𑀓𑀧𑁆𑀧𑀺𑀬𑀲𑀫𑁆𑀪𑁄𑀕𑁄𑀢𑀺 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀳𑀺 𑀲𑀤𑁆𑀥𑀺𑀁 𑀓𑀸𑀢𑀼𑀁 𑀧𑀝𑀺𑀓𑁆𑀔𑀺𑀢𑁆𑀢𑁄 𑀉𑀧𑁄𑀲𑀣𑀸𑀤𑀺𑀲𑀁𑀯𑀸𑀲𑁄 𑀏𑀯 𑀯𑀼𑀢𑁆𑀢𑁄. 𑀧𑀜𑁆𑀳𑀸 𑀫𑁂𑀲𑀸𑀢𑀺 𑀏𑀢𑁆𑀣 𑀫-𑀓𑀸𑀭𑁄 𑀧𑀤𑀲𑀦𑁆𑀥𑀺𑀓𑀭𑁄. 𑀏𑀲𑀸𑀢𑀺 𑀘 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑀯𑀲𑁂𑀦 𑀯𑀼𑀢𑁆𑀢𑀁, 𑀧𑀜𑁆𑀳𑁄 𑀏𑀲𑁄𑀢𑀺 𑀅𑀢𑁆𑀣𑁄. 𑀧𑀜𑁆𑀳-𑀲𑀤𑁆𑀤𑁄 𑀯𑀸 𑀤𑁆𑀯𑀺𑀮𑀺𑀗𑁆𑀕𑁄 𑀤𑀝𑁆𑀞𑀩𑁆𑀩𑁄. 𑀢𑁂𑀦𑀸𑀳 ‘‘𑀏𑀲𑀸 𑀧𑀜𑁆𑀳𑀸’’𑀢𑀺𑀆𑀤𑀺.

𑀕𑀭𑀼𑀪𑀡𑁆𑀟𑀁 𑀲𑀦𑁆𑀥𑀸𑀬𑀸𑀢𑀺 𑀕𑀭𑀼𑀪𑀡𑁆𑀟𑁂𑀦 𑀕𑀭𑀼𑀪𑀡𑁆𑀟𑀧𑀭𑀺𑀯𑀢𑁆𑀢𑀦𑀁 𑀲𑀦𑁆𑀥𑀸𑀬. 𑀤𑀲𑀸𑀢𑀺 𑀤𑀲 𑀅𑀯𑀦𑁆𑀤𑀺𑀬𑀧𑀼𑀕𑁆𑀕𑀮𑁂. 𑀏𑀓𑀸𑀤𑀲𑁂𑀢𑀺 𑀅𑀪𑀩𑁆𑀩𑀧𑀼𑀕𑁆𑀕𑀮𑁂. 𑀲𑀺𑀓𑁆𑀔𑀸𑀬 𑀅𑀲𑀸𑀥𑀸𑀭𑀡𑁄𑀢𑀺 𑀔𑀼𑀭𑀪𑀡𑁆𑀟𑀁 𑀥𑀸𑀭𑁂𑀢𑀼𑀁 𑀅𑀦𑀼𑀜𑁆𑀜𑀸𑀢𑀲𑀺𑀓𑁆𑀔𑀸𑀧𑀤𑁂𑀦 𑀪𑀺𑀓𑁆𑀔𑀽𑀳𑀺 𑀅𑀲𑀸𑀥𑀸𑀭𑀡𑀲𑀺𑀓𑁆𑀔𑀸𑀧𑀤𑁄𑀢𑀺 𑀅𑀢𑁆𑀣𑁄.

𑀉𑀩𑁆𑀪𑀓𑁆𑀔𑀓𑁂 𑀦 𑀯𑀤𑀸𑀫𑀻𑀢𑀺 𑀅𑀓𑁆𑀔𑀢𑁄 𑀉𑀤𑁆𑀥𑀁 𑀲𑀻𑀲𑁂 𑀞𑀺𑀢𑀫𑀼𑀔𑀫𑀕𑁆𑀕𑁂𑀧𑀺 𑀧𑀸𑀭𑀸𑀚𑀺𑀓𑀁 𑀲𑀦𑁆𑀥𑀸𑀬 𑀦 𑀯𑀤𑀸𑀫𑀺. 𑀅𑀥𑁄𑀦𑀸𑀪𑀺𑀦𑁆𑀢𑀺 𑀦𑀸𑀪𑀺𑀢𑁄 𑀳𑁂𑀝𑁆𑀞𑀸 𑀞𑀺𑀢𑀯𑀘𑁆𑀘𑀧𑀲𑁆𑀲𑀸𑀯𑀫𑀕𑁆𑀕𑁂𑀧𑀺 𑀯𑀺𑀯𑀚𑁆𑀚𑀺𑀬 𑀅𑀜𑁆𑀜𑀲𑁆𑀫𑀺𑀁 𑀲𑀭𑀻𑀭𑀧𑁆𑀧𑀤𑁂𑀲𑁂 𑀫𑁂𑀣𑀼𑀦𑀥𑀫𑁆𑀫𑀧𑀘𑁆𑀘𑀬𑀸 𑀓𑀣𑀁 𑀧𑀸𑀭𑀸𑀚𑀺𑀓𑁄 𑀲𑀺𑀬𑀸𑀢𑀺 𑀅𑀢𑁆𑀣𑁄.

𑀙𑁂𑀚𑁆𑀚𑀯𑀢𑁆𑀣𑀼𑀦𑁆𑀢𑀺 𑀧𑀸𑀭𑀸𑀚𑀺𑀓𑀁.

𑀅𑀯𑀺𑀧𑁆𑀧𑀯𑀸𑀲𑀧𑀜𑁆𑀳𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀸𑀭𑀸𑀚𑀺𑀓𑀸𑀤𑀺𑀧𑀜𑁆𑀳𑀸𑀯𑀡𑁆𑀡𑀦𑀸

𑁪𑁮𑁦. 𑀤𑀼𑀲𑁆𑀲𑀓𑀼𑀝𑀺𑀆𑀤𑀻𑀦𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀅𑀘𑁆𑀙𑀢𑀭𑀢𑀺𑀧𑀼𑀧𑀝𑁆𑀝𑀸𑀤𑀻𑀳𑀺, 𑀢𑀺𑀡𑀧𑀡𑁆𑀡𑀸𑀤𑀻𑀳𑀺 𑀘 𑀧𑀝𑀺𑀘𑁆𑀙𑀦𑁆𑀦𑀓𑀼𑀝𑀺𑀬𑁄 𑀲𑀗𑁆𑀕𑀡𑁆𑀳𑀸𑀢𑀺. 𑀢𑀸𑀤𑀺𑀲𑀸𑀬 𑀳𑀺 𑀓𑀼𑀝𑀺𑀬𑀸 𑀩𑀳𑀺 𑀞𑀢𑁆𑀯𑀸 𑀅𑀦𑁆𑀢𑁄 𑀞𑀺𑀢𑀸𑀬 𑀇𑀢𑁆𑀣𑀺𑀬𑀸 𑀫𑀕𑁆𑀕𑁂 𑀤𑀼𑀲𑁆𑀲𑀸𑀤𑀺𑀦𑀸 𑀲𑀦𑁆𑀣𑀢𑀁 𑀓𑀢𑁆𑀯𑀸 𑀧𑀯𑁂𑀲𑁂𑀦𑁆𑀢𑁄𑀧𑀺 𑀧𑀸𑀭𑀸𑀚𑀺𑀓𑁄 𑀲𑀺𑀬𑀸. 𑀮𑀺𑀗𑁆𑀕𑀧𑀭𑀺𑀯𑀢𑁆𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀸𑀢𑀺 𑀮𑀺𑀗𑁆𑀕𑁂 𑀧𑀭𑀺𑀯𑀢𑁆𑀢𑁂 𑀧𑀝𑀺𑀕𑁆𑀕𑀳𑀡𑀲𑁆𑀲 𑀯𑀺𑀚𑀳𑀦𑀢𑁄 𑀧𑀼𑀦 𑀅𑀧𑁆𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀦𑀸𑀧𑀢𑁆𑀢𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑀧𑀸𑀴𑀺𑀬𑀁 𑀪𑀺𑀓𑁆𑀔𑀽 𑀲𑀺𑀬𑀸 𑀯𑀻𑀲𑀢𑀺𑀬𑀸 𑀲𑀫𑀸𑀕𑀢𑀸𑀢𑀺 𑀯𑀻𑀲𑀢𑀺𑀬𑀸 𑀲𑀗𑁆𑀔𑀸𑀢𑀸𑀬 𑀪𑀺𑀓𑁆𑀔𑀽 𑀲𑀫𑀸𑀕𑀢𑀸, 𑀏𑀢𑁂𑀦 𑀲𑀩𑁆𑀩𑀓𑀫𑁆𑀫𑀸𑀭𑀳𑀢𑀁 𑀲𑀗𑁆𑀖𑀲𑁆𑀲 𑀤𑀲𑁆𑀲𑁂𑀢𑀺.

𑀦𑀺𑀯𑀢𑁆𑀣𑁄𑀢𑀺 𑀕𑀸𑀣𑀸𑀬 𑀅𑀦𑁆𑀢𑀭𑀯𑀸𑀲𑀓𑁂𑀦 𑀦𑀺𑀯𑀢𑁆𑀣𑁄 𑀉𑀢𑁆𑀢𑀭𑀸𑀲𑀗𑁆𑀕𑁂𑀦 𑀤𑀺𑀕𑀼𑀡𑀁 𑀓𑀢𑁆𑀯𑀸 𑀧𑀸𑀭𑀼𑀢𑀲𑀗𑁆𑀖𑀸𑀝𑀺𑀬𑁄. 𑀇𑀢𑀺 𑀢𑀸𑀦𑀺 𑀢𑀻𑀡𑀺𑀧𑀺 𑀘𑀻𑀯𑀭𑀸𑀦𑀺 𑀓𑀸𑀬𑁂 𑀕𑀢𑀸𑀦𑁂𑀯 𑀪𑀺𑀓𑁆𑀔𑀼𑀦𑀺𑀬𑀸 𑀩𑀺𑀦𑁆𑀤𑀼𑀫𑀢𑁆𑀢𑀁 𑀓𑀸𑀴𑀓𑀁 𑀉𑀤𑀓𑁂𑀦 𑀥𑁄𑀯𑀺𑀢𑀫𑀢𑁆𑀢𑁂 𑀦𑀺𑀲𑁆𑀲𑀕𑁆𑀕𑀺𑀬𑀸𑀦𑀺 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀇𑀢𑁆𑀣𑀺𑀁 𑀳𑀦𑁂𑀢𑀺 𑀕𑀸𑀣𑀸𑀬 𑀦 𑀫𑀸𑀢𑀼𑀪𑀽𑀢𑀁 𑀇𑀢𑁆𑀣𑀺𑀁 𑀳𑀦𑁂𑀬𑁆𑀬, 𑀦 𑀧𑀺𑀢𑀼𑀪𑀽𑀢𑀁 𑀧𑀼𑀭𑀺𑀲𑀁 𑀳𑀦𑁂𑀬𑁆𑀬. 𑀅𑀦𑀭𑀺𑀬𑀦𑁆𑀢𑀺 𑀢𑀜𑁆𑀘 𑀅𑀦𑀭𑀳𑀦𑁆𑀢𑀫𑁂𑀯 𑀳𑀦𑁂𑀬𑁆𑀬, 𑀏𑀢𑁂𑀦 𑀅𑀭𑀳𑀦𑁆𑀢𑀖𑀸𑀢𑀓𑁄𑀧𑀺 𑀦 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀅𑀦𑀦𑁆𑀢𑀭𑀁 𑀨𑀼𑀲𑁂𑀢𑀺 𑀆𑀦𑀦𑁆𑀢𑀭𑀺𑀬𑀁 𑀨𑀼𑀲𑀢𑀻𑀢𑀺 𑀅𑀢𑁆𑀣𑁄.

𑁪𑁮𑁧. 𑀲𑀼𑀧𑁆𑀧𑀢𑀺𑀝𑁆𑀞𑀺𑀢-𑀦𑀺𑀕𑁆𑀭𑁄𑀥𑀲𑀤𑀺𑀲𑀦𑁆𑀢𑀺 𑀬𑁄𑀚𑀦𑀯𑀺𑀢𑁆𑀣𑀢𑀁 𑀭𑀼𑀓𑁆𑀔𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑀲𑀢𑁆𑀢𑀭𑀲𑀓𑁂𑀲𑀽𑀢𑀺 𑀪𑀺𑀓𑁆𑀔𑀼𑀦𑀻𑀦𑀁 𑀧𑀜𑁆𑀜𑀢𑁆𑀢𑀲𑀢𑁆𑀢𑀭𑀲𑀲𑀗𑁆𑀖𑀸𑀤𑀺𑀲𑁂𑀲𑁂𑀲𑀼.

𑀧𑀸𑀭𑀸𑀚𑀺𑀓𑀸𑀤𑀺𑀧𑀜𑁆𑀳𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.