𑀧𑀜𑁆𑀘𑀯𑀕𑁆𑀕𑁄

𑀓𑀫𑁆𑀫𑀯𑀕𑁆𑀕𑀯𑀡𑁆𑀡𑀦𑀸

𑁪𑁮𑁩. 𑀓𑀫𑁆𑀫𑀯𑀕𑁆𑀕𑁂 𑀞𑀧𑀺𑀢𑀉𑀧𑁄𑀲𑀣𑀧𑀯𑀸𑀭𑀡𑀸𑀦𑀁 𑀓𑀢𑁆𑀢𑀺𑀓𑀫𑀸𑀲𑁂 𑀲𑀸𑀫𑀕𑁆𑀕𑀺𑀬𑀸 𑀓𑀢𑀸𑀬 𑀲𑀸𑀫𑀕𑁆𑀕𑀻𑀧𑀯𑀸𑀭𑀡𑀁 𑀫𑀼𑀜𑁆𑀘𑀺𑀢𑁆𑀯𑀸 𑀉𑀧𑁄𑀲𑀣𑀁 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀆𑀳 ‘‘𑀞𑀧𑁂𑀢𑁆𑀯𑀸 𑀓𑀢𑁆𑀢𑀺𑀓𑀫𑀸𑀲’’𑀦𑁆𑀢𑀺. 𑀲𑀘𑁂 𑀧𑀦 𑀢𑁂𑀲𑀁 𑀦𑀸𑀦𑀸𑀲𑀻𑀫𑀸𑀲𑀼 𑀫𑀳𑀸𑀧𑀯𑀸𑀭𑀡𑀸𑀬 𑀯𑀺𑀲𑀼𑀁 𑀧𑀯𑀸𑀭𑀺𑀢𑀸𑀦𑀁 𑀓𑀢𑁆𑀢𑀺𑀓𑀫𑀸𑀲𑀩𑁆𑀪𑀦𑁆𑀢𑀭𑁂 𑀲𑀸𑀫𑀕𑁆𑀕𑀻 𑀳𑁄𑀢𑀺, 𑀲𑀸𑀫𑀕𑁆𑀕𑀻𑀉𑀧𑁄𑀲𑀣𑁄 𑀏𑀯 𑀢𑁂𑀳𑀺 𑀓𑀢𑁆𑀢𑀩𑁆𑀩𑁄, 𑀦 𑀧𑀯𑀸𑀭𑀡𑀸. 𑀏𑀓𑀲𑁆𑀫𑀺𑀁 𑀯𑀲𑁆𑀲𑁂 𑀓𑀢𑀧𑀯𑀸𑀭𑀡𑀸𑀦𑀁 𑀧𑀼𑀦 𑀧𑀯𑀸𑀭𑀡𑀸𑀬 𑀅𑀯𑀺𑀳𑀺𑀢𑀢𑁆𑀢𑀸. 𑀲𑀸𑀫𑀕𑁆𑀕𑀻𑀤𑀺𑀯𑀲𑁄𑀢𑀺 𑀅𑀦𑀼𑀧𑁄𑀲𑀣𑀤𑀺𑀯𑀲𑁂 𑀲𑀸𑀫𑀕𑁆𑀕𑀻𑀓𑀭𑀡𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀲𑀘𑁂 𑀧𑀦 𑀘𑀸𑀢𑀼𑀤𑁆𑀤𑀲𑀺𑀬𑀁, 𑀧𑀦𑁆𑀦𑀭𑀲𑀺𑀬𑀁 𑀯𑀸 𑀲𑀗𑁆𑀖𑁄 𑀲𑀸𑀫𑀕𑁆𑀕𑀺𑀁 𑀓𑀭𑁄𑀢𑀺, 𑀢𑀤𑀸 𑀲𑀸𑀫𑀕𑁆𑀕𑀻𑀉𑀧𑁄𑀲𑀣𑀤𑀺𑀯𑀲𑁄 𑀦 𑀳𑁄𑀢𑀺, 𑀘𑀸𑀢𑀼𑀤𑁆𑀤𑀲𑀻𑀧𑀦𑁆𑀦𑀭𑀲𑀻𑀉𑀧𑁄𑀲𑀣𑁄𑀯 𑀳𑁄𑀢𑀺. 𑀉𑀧𑀭𑀺 𑀧𑀯𑀸𑀭𑀡𑀸𑀬𑀧𑀺 𑀏𑀲𑁂𑀯 𑀦𑀬𑁄.

𑀧𑀘𑁆𑀘𑀼𑀓𑁆𑀓𑀟𑁆𑀠𑀺𑀢𑁆𑀯𑀸 𑀞𑀧𑀺𑀢𑀤𑀺𑀯𑀲𑁄𑀢𑀺 𑀪𑀡𑁆𑀟𑀦𑀓𑀸𑀭𑀓𑁂𑀳𑀺 𑀉𑀧𑀤𑁆𑀤𑀼𑀢𑀸 𑀯𑀸 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦 𑀧𑀯𑀸𑀭𑀡𑀸𑀲𑀗𑁆𑀕𑀳𑀁 𑀯𑀸 𑀓𑀢𑁆𑀯𑀸 𑀞𑀧𑀺𑀢𑁄 𑀓𑀸𑀴𑀧𑀓𑁆𑀔𑀘𑀸𑀢𑀼𑀤𑁆𑀤𑀲𑀻𑀤𑀺𑀯𑀲𑁄𑀯. 𑀤𑁆𑀯𑁂 𑀘 𑀧𑀼𑀡𑁆𑀡𑀫𑀸𑀲𑀺𑀬𑁄𑀢𑀺 𑀧𑀼𑀩𑁆𑀩-𑀓𑀢𑁆𑀢𑀺𑀓𑀧𑀼𑀡𑁆𑀡𑀫𑀸, 𑀧𑀘𑁆𑀙𑀺𑀫𑀓𑀢𑁆𑀢𑀺𑀓𑀧𑀼𑀡𑁆𑀡𑀫𑀸 𑀘𑀸𑀢𑀺 𑀤𑁆𑀯𑁂 𑀧𑀼𑀡𑁆𑀡𑀫𑀸𑀲𑀺𑀬𑁄. 𑀏𑀯𑀁 𑀘𑀢𑀼𑀩𑁆𑀩𑀺𑀥𑀫𑁆𑀧𑀻𑀢𑀺 𑀧𑀼𑀡𑁆𑀡𑀫𑀸𑀲𑀻𑀤𑁆𑀯𑀬𑁂𑀦 𑀲𑀤𑁆𑀥𑀺𑀁 𑀲𑀸𑀫𑀕𑁆𑀕𑀻𑀧𑀯𑀸𑀭𑀡𑀁, 𑀘𑀸𑀢𑀼𑀤𑁆𑀤𑀲𑀻𑀧𑀯𑀸𑀭𑀡𑀜𑁆𑀘 𑀲𑀫𑁆𑀧𑀺𑀡𑁆𑀟𑁂𑀢𑁆𑀯𑀸 𑀯𑀼𑀢𑁆𑀢𑀁. 𑀇𑀤𑀜𑁆𑀘 𑀧𑀓𑀢𑀺𑀘𑀸𑀭𑀺𑀢𑁆𑀢𑀯𑀲𑁂𑀦 𑀯𑀼𑀢𑁆𑀢𑀁. 𑀢𑀣𑀸𑀭𑀽𑀧𑀧𑀘𑁆𑀘𑀬𑁂 𑀧𑀦 𑀲𑀢𑀺 𑀉𑀪𑀺𑀦𑁆𑀦𑀁 𑀧𑀼𑀡𑁆𑀡𑀫𑀸𑀲𑀻𑀦𑀁 𑀧𑀼𑀭𑀺𑀫𑀸 𑀤𑁆𑀯𑁂 𑀘𑀸𑀢𑀼𑀤𑁆𑀤𑀲𑀺𑀬𑁄𑀧𑀺 𑀓𑀸𑀴𑀧𑀓𑁆𑀔𑀘𑀸𑀢𑀼𑀤𑁆𑀤𑀲𑀺𑀬𑀸 𑀅𑀦𑀦𑁆𑀢𑀭𑀸 𑀧𑀦𑁆𑀦𑀭𑀲𑀻𑀧𑀻𑀢𑀺 𑀇𑀫𑁂𑀧𑀺 𑀢𑀬𑁄 𑀤𑀺𑀯𑀲𑀸 𑀧𑀯𑀸𑀭𑀡𑀸𑀤𑀺𑀯𑀲𑀸 𑀏𑀯𑀸𑀢𑀺 𑀇𑀫𑀁 𑀲𑀢𑁆𑀢𑀯𑀺𑀥𑀫𑁆𑀧𑀺 𑀧𑀯𑀸𑀭𑀡𑀸𑀤𑀺𑀯𑀲𑀁 𑀞𑀧𑁂𑀢𑁆𑀯𑀸 𑀅𑀜𑁆𑀜𑀲𑁆𑀫𑀺𑀁 𑀤𑀺𑀯𑀲𑁂 𑀧𑀯𑀸𑀭𑁂𑀢𑀼𑀁 𑀦 𑀯𑀝𑁆𑀝𑀢𑀺.

𑁪𑁮𑁪. 𑀅𑀦𑀼𑀲𑁆𑀲𑀸𑀯𑀦𑀓𑀫𑁆𑀫𑀁 𑀓𑀢𑁆𑀯𑀸𑀢𑀺 𑀧𑀞𑀫𑀁 𑀅𑀦𑀼𑀲𑁆𑀲𑀸𑀯𑀦𑀁 𑀲𑀸𑀯𑁂𑀢𑁆𑀯𑀸 ‘‘𑀏𑀲𑀸 𑀜𑀢𑁆𑀢𑀻’’𑀢𑀺 𑀅𑀦𑀼𑀲𑁆𑀲𑀸𑀯𑀦𑀸𑀦𑀦𑁆𑀢𑀭𑀫𑁂𑀯 𑀲𑀓𑀮𑀁 𑀜𑀢𑁆𑀢𑀺𑀁 𑀯𑀢𑁆𑀯𑀸, 𑀧𑀭𑀺𑀬𑁄𑀲𑀸𑀦𑁂 ‘‘𑀏𑀲𑀸 𑀜𑀢𑁆𑀢𑀻’’𑀢𑀺 𑀯𑀢𑁆𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁪𑁮𑁫. 𑀬𑁆𑀯𑀸𑀬𑀦𑁆𑀢𑀺 𑀩𑁆𑀬𑀜𑁆𑀚𑀦𑀧𑁆𑀧𑀪𑁂𑀤𑁄 𑀅𑀥𑀺𑀧𑁆𑀧𑁂𑀢𑁄. 𑀤𑀲𑀥𑀸 𑀩𑁆𑀬𑀜𑁆𑀚𑀦𑀩𑀼𑀤𑁆𑀥𑀺𑀬𑀸 𑀧𑀪𑁂𑀤𑁄𑀢𑀺 𑀏𑀢𑁆𑀣 𑀤𑀲𑀥𑀸 𑀤𑀲𑀯𑀺𑀥𑁂𑀦 𑀩𑁆𑀬𑀜𑁆𑀚𑀦𑀸𑀦𑀁 𑀧𑀪𑁂𑀤𑁄𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀓𑁂𑀦𑀸𑀬𑀁 𑀧𑀪𑁂𑀤𑁄𑀢𑀺 𑀆𑀳 ‘‘𑀩𑁆𑀬𑀜𑁆𑀚𑀦𑀩𑀼𑀤𑁆𑀥𑀺𑀬𑀸’’𑀢𑀺. 𑀬𑀣𑀸𑀥𑀺𑀧𑁆𑀧𑁂𑀢𑀢𑁆𑀣𑀩𑁆𑀬𑀜𑁆𑀚𑀦𑀢𑁄 𑀩𑁆𑀬𑀜𑁆𑀚𑀦𑀲𑀗𑁆𑀔𑀸𑀢𑀸𑀦𑀁 𑀅𑀓𑁆𑀔𑀭𑀸𑀦𑀁 𑀚𑀦𑀺𑀓𑀸 𑀩𑀼𑀤𑁆𑀥𑀺 𑀩𑁆𑀬𑀜𑁆𑀚𑀦𑀩𑀼𑀤𑁆𑀥𑀺, 𑀢𑀸𑀬 𑀩𑁆𑀬𑀜𑁆𑀚𑀦𑀩𑀼𑀤𑁆𑀥𑀺𑀬𑀸, 𑀅𑀓𑁆𑀔𑀭𑀲𑀫𑀼𑀝𑁆𑀞𑀸𑀧𑀓𑀘𑀺𑀢𑁆𑀢𑀪𑁂𑀤𑁂𑀦𑁂𑀯𑀸𑀢𑀺 𑀅𑀢𑁆𑀣𑁄. 𑀬𑀁 𑀯𑀸 𑀲𑀁𑀬𑁄𑀕𑀧𑀭𑀁 𑀓𑀢𑁆𑀯𑀸 𑀯𑀼𑀘𑁆𑀘𑀢𑀺, 𑀇𑀤𑀫𑁆𑀧𑀺 𑀕𑀭𑀼𑀓𑀦𑁆𑀢𑀺 𑀬𑁄𑀚𑀦𑀸.

𑀢𑀢𑁆𑀣 𑀆𑀬𑀲𑁆𑀫𑀢𑁄𑀢𑀺𑀆𑀤𑀻𑀲𑀼 𑀬𑀸𑀦𑀺 𑀅𑀦𑀦𑁆𑀢𑀭𑀺𑀢𑀸𑀦𑀺 𑀲-𑀓𑀸𑀭𑀫-𑀓𑀸𑀭𑀸𑀤𑀺𑀩𑁆𑀬𑀜𑁆𑀚𑀦𑀸𑀦𑀺 ‘‘𑀲𑀁𑀬𑁄𑀕𑁄’’𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀲𑁄 𑀲𑀁𑀬𑁄𑀕𑁄 𑀧𑀭𑁄 𑀬𑀲𑁆𑀲 𑀅-𑀓𑀸𑀭𑀸𑀤𑀺𑀦𑁄, 𑀲𑁄 𑀲𑀁𑀬𑁄𑀕𑀧𑀭𑁄 𑀦𑀸𑀫. 𑀭𑀲𑁆𑀲𑀦𑁆𑀢𑀺 𑀅𑀓𑀸𑀭𑀸𑀤𑀺𑀩𑁆𑀬𑀜𑁆𑀚𑀦𑀭𑀳𑀺𑀢𑀁 𑀲𑀭𑀁. 𑀅𑀲𑀁𑀬𑁄𑀕𑀧𑀭𑀦𑁆𑀢𑀺 ‘‘𑀬𑀲𑁆𑀲 𑀦𑀓𑁆𑀔𑀫𑀢𑀻’’𑀢𑀺𑀆𑀤𑀻𑀲𑀼 𑀬-𑀓𑀸𑀭 𑀦-𑀓𑀸𑀭𑀸𑀤𑀺𑀩𑁆𑀬𑀜𑁆𑀚𑀦𑀲𑀳𑀺𑀢𑀲𑀭𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢-𑀓𑀸𑀭𑀲𑁆𑀲 𑀣-𑀓𑀸𑀭𑀁 𑀅𑀓𑀢𑁆𑀯𑀸 𑀯𑀕𑁆𑀕𑀦𑁆𑀢𑀭𑁂 𑀲𑀺𑀣𑀺𑀮𑀫𑁂𑀯 𑀓𑀢𑁆𑀯𑀸 ‘‘𑀲𑀼𑀡𑀸𑀝𑀼 𑀫𑁂’’𑀢𑀺𑀆𑀤𑀺𑀁 𑀯𑀤𑀦𑁆𑀢𑁄𑀧𑀺 𑀤𑀼𑀭𑀼𑀢𑁆𑀢𑀁 𑀓𑀭𑁄𑀢𑀺𑀬𑁂𑀯 𑀞𑀧𑁂𑀢𑁆𑀯𑀸 𑀅𑀦𑀼𑀭𑀽𑀧𑀁 𑀆𑀤𑁂𑀲𑀁. 𑀬𑀜𑁆𑀳𑀺 ‘‘𑀲𑀘𑁆𑀘𑀺𑀓𑀢𑁆𑀣𑀧𑀭𑀫𑀢𑁆𑀣𑁂𑀦𑀸’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀝𑁆𑀞𑁂𑀦𑀸’’𑀢𑀺 𑀘 ‘‘𑀅𑀢𑁆𑀣𑀓𑀣𑀸’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀅𑀝𑁆𑀞𑀓𑀣𑀸’’𑀢𑀺 𑀘 𑀢𑀢𑁆𑀣 𑀢𑀢𑁆𑀣 𑀯𑀼𑀘𑁆𑀘𑀢𑀺, 𑀢𑀸𑀤𑀺𑀲𑀁 𑀧𑀸𑀴𑀺𑀅𑀝𑁆𑀞𑀓𑀣𑀸𑀲𑀼 𑀤𑀺𑀝𑁆𑀞𑀧𑀬𑁄𑀕𑀁, 𑀢𑀤𑀦𑀼𑀭𑀽𑀧𑀜𑁆𑀘 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺, 𑀢𑀢𑁄 𑀅𑀜𑁆𑀜𑀁 𑀦 𑀯𑀝𑁆𑀝𑀢𑀺. 𑀢𑁂𑀦𑀸𑀳 ‘‘𑀅𑀦𑀼𑀓𑁆𑀓𑀫𑀸𑀕𑀢𑀁 𑀧𑀯𑁂𑀡𑀺𑀁 𑀅𑀯𑀺𑀦𑀸𑀲𑁂𑀦𑁆𑀢𑁂𑀦𑀸’’𑀢𑀺𑀆𑀤𑀺.

𑀤𑀻𑀖𑁂 𑀯𑀢𑁆𑀢𑀩𑁆𑀩𑁂 𑀭𑀲𑁆𑀲𑀦𑁆𑀢𑀺𑀆𑀤𑀻𑀲𑀼 ‘‘𑀪𑀺𑀓𑁆𑀔𑀽𑀦’’𑀦𑁆𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀪𑀺𑀓𑁆𑀔𑀼𑀦’’𑀦𑁆𑀢𑀺 𑀯𑀸 ‘‘𑀩𑀳𑀽𑀲𑀽’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀩𑀳𑀼𑀲𑀽’’𑀢𑀺 𑀯𑀸 ‘‘𑀦𑀓𑁆𑀔𑀫𑀢𑀻’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀦 𑀔𑀫𑀢𑀻’’𑀢𑀺 𑀯𑀸 ‘‘𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑁄’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀉𑀧𑀲𑀫𑁆𑀧𑀤𑀸𑀧𑁂𑀔𑁄’’𑀢𑀺 𑀯𑀸 𑀏𑀯𑀁 𑀅𑀦𑀼𑀭𑀽𑀧𑀝𑁆𑀞𑀸𑀦𑁂𑀲𑀼 𑀏𑀯 𑀤𑀻𑀖𑀭𑀲𑁆𑀲𑀸𑀤𑀺 𑀭𑀲𑁆𑀲𑀤𑀻𑀖𑀸𑀤𑀺𑀯𑀲𑁂𑀦 𑀧𑀭𑀺𑀯𑀢𑁆𑀢𑁂𑀢𑀼𑀁 𑀯𑀝𑁆𑀝𑀢𑀺, 𑀦 𑀧𑀦 ‘‘𑀦𑀸𑀕𑁄’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀦𑀕𑁄’’𑀢𑀺 𑀯𑀸 ‘‘𑀲𑀗𑁆𑀖𑁄’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀲𑀖𑁄’’𑀢𑀺 𑀯𑀸 ‘‘𑀢𑀺𑀲𑁆𑀲𑁄’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀢𑀺𑀲𑁄’’𑀢𑀺 𑀯𑀸 ‘‘𑀬𑀸𑀘𑀢𑀻’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀬𑀸𑀘𑀦𑁆𑀢𑀻’’𑀢𑀺 𑀯𑀸 𑀏𑀯𑀁 𑀅𑀦𑀦𑀼𑀭𑀽𑀧𑀝𑁆𑀞𑀸𑀦𑁂𑀲𑀼 𑀯𑀢𑁆𑀢𑀼𑀁. 𑀲𑀫𑁆𑀩𑀦𑁆𑀥𑀁, 𑀧𑀦 𑀯𑀯𑀢𑁆𑀣𑀸𑀦𑀜𑁆𑀘 𑀲𑀩𑁆𑀩𑀣𑀸𑀧𑀺 𑀯𑀝𑁆𑀝𑀢𑀻𑀢𑀺 𑀕𑀳𑁂𑀢𑀩𑁆𑀩𑀁.

𑁪𑁮𑁬. 𑀲𑁂𑀲𑀲𑀻𑀫𑀸𑀲𑀼𑀧𑀻𑀢𑀺 𑀅𑀢𑀺𑀫𑀳𑀢𑀻𑀆𑀤𑀻𑀲𑀼 𑀤𑀲𑀲𑀼𑀧𑀺.

𑁪𑁮𑁮. 𑀘𑀢𑀼𑀯𑀕𑁆𑀕𑀓𑀭𑀡𑁂𑀢𑀺 𑀘𑀢𑀼𑀯𑀕𑁆𑀕𑁂𑀦 𑀲𑀗𑁆𑀖𑁂𑀦 𑀓𑀢𑁆𑀢𑀩𑁆𑀩𑁂. 𑀅𑀦𑀺𑀲𑁆𑀲𑀸𑀭𑀺𑀢𑀸𑀢𑀺 𑀉𑀧𑁄𑀲𑀣𑀝𑁆𑀞𑀧𑀦𑀸𑀤𑀺𑀦𑀸 𑀯𑀸 𑀮𑀤𑁆𑀥𑀺𑀦𑀸𑀦𑀸𑀲𑀁𑀯𑀸𑀲𑀓𑀪𑀸𑀯𑁂𑀦 𑀯𑀸 𑀦 𑀩𑀳𑀺𑀓𑀢𑀸. 𑀅𑀝𑁆𑀞𑀓𑀣𑀸𑀬𑀜𑁆𑀳𑀺 ‘‘𑀅𑀧𑀓𑀢𑀢𑁆𑀢𑀲𑁆𑀲𑀸𑀢𑀺 𑀉𑀓𑁆𑀔𑀺𑀢𑁆𑀢𑀓𑀲𑁆𑀲 𑀯𑀸, 𑀬𑀲𑁆𑀲 𑀯𑀸 𑀉𑀧𑁄𑀲𑀣𑀧𑀯𑀸𑀭𑀡𑀸 𑀞𑀧𑀺𑀢𑀸 𑀳𑁄𑀦𑁆𑀢𑀻’’𑀢𑀺 (𑀧𑀭𑀺. 𑀅𑀝𑁆𑀞. 𑁪𑁨𑁫) 𑀯𑀼𑀢𑁆𑀢𑀢𑁆𑀢𑀸 𑀞𑀧𑀺𑀢𑀉𑀧𑁄𑀲𑀣𑀧𑀯𑀸𑀭𑀡𑁄 𑀪𑀺𑀓𑁆𑀔𑀼 𑀅𑀧𑀓𑀢𑀢𑁆𑀢𑁄 𑀏𑀯𑀸𑀢𑀺 𑀕𑀳𑁂𑀢𑀩𑁆𑀩𑀁. 𑀧𑀭𑀺𑀲𑀼𑀤𑁆𑀥𑀲𑀻𑀮𑀸𑀢𑀺 𑀧𑀸𑀭𑀸𑀚𑀺𑀓𑀁 𑀅𑀦𑀸𑀧𑀦𑁆𑀦𑀸 𑀅𑀥𑀺𑀧𑁆𑀧𑁂𑀢𑀸. 𑀧𑀭𑀺𑀯𑀸𑀲𑀸𑀤𑀺𑀓𑀫𑁆𑀫𑁂𑀲𑀼 𑀧𑀦 𑀕𑀭𑀼𑀓𑀝𑁆𑀞𑀸𑀧𑀺 𑀅𑀧𑀓𑀢𑀢𑁆𑀢𑀸 𑀏𑀯𑀸𑀢𑀺 𑀕𑀳𑁂𑀢𑀩𑁆𑀩𑀁. 𑀅𑀯𑀲𑁂𑀲𑀸…𑀧𑁂… 𑀙𑀦𑁆𑀤𑀸𑀭𑀳𑀸𑀯 𑀳𑁄𑀦𑁆𑀢𑀻𑀢𑀺 𑀲𑀗𑁆𑀖𑀢𑁄 𑀳𑀢𑁆𑀣𑀧𑀸𑀲𑀁 𑀯𑀺𑀚𑀳𑀺𑀢𑁆𑀯𑀸 𑀞𑀺𑀢𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀅𑀯𑀺𑀚𑀳𑀺𑀢𑁆𑀯𑀸 𑀞𑀺𑀢𑀸 𑀧𑀦 𑀙𑀦𑁆𑀤𑀸𑀭𑀳𑀸 𑀦 𑀳𑁄𑀦𑁆𑀢𑀺, 𑀢𑁂𑀧𑀺 𑀘𑀢𑀼𑀯𑀕𑁆𑀕𑀸𑀤𑀺𑀢𑁄 𑀅𑀥𑀺𑀓𑀸 𑀳𑀢𑁆𑀣𑀧𑀸𑀲𑀁 𑀯𑀺𑀚𑀳𑀺𑀢𑁆𑀯𑀸𑀯 𑀙𑀦𑁆𑀤𑀸𑀭𑀳𑀸 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀲𑀗𑁆𑀖𑀢𑁄 𑀳𑀢𑁆𑀣𑀧𑀸𑀲𑀁 𑀯𑀺𑀚𑀳𑀺𑀢𑁆𑀯𑀸 𑀞𑀺𑀢𑁂𑀦𑁂𑀯 𑀙𑀦𑁆𑀤𑁄 𑀯𑀸 𑀧𑀸𑀭𑀺𑀲𑀼𑀤𑁆𑀥𑀺 𑀯𑀸 𑀤𑀸𑀢𑀩𑁆𑀩𑀸.

𑀓𑀫𑁆𑀫𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀧𑀮𑁄𑀓𑀦𑀓𑀫𑁆𑀫𑀓𑀣𑀸𑀯𑀡𑁆𑀡𑀦𑀸

𑁪𑁯𑁬. 𑀏𑀢𑀭𑀳𑀺 𑀲𑀘𑁂𑀧𑀺 𑀲𑀸𑀫𑀡𑁂𑀭𑁄𑀢𑀺𑀆𑀤𑀻𑀲𑀼 𑀩𑀼𑀤𑁆𑀥𑀸𑀤𑀻𑀦𑀁 𑀅𑀯𑀡𑁆𑀡𑀪𑀸𑀲𑀦𑀫𑁆𑀧𑀺 𑀅𑀓𑀧𑁆𑀧𑀺𑀬𑀸𑀤𑀺𑀁 𑀓𑀧𑁆𑀧𑀺𑀬𑀸𑀤𑀺𑀪𑀸𑀯𑁂𑀦 𑀤𑀻𑀧𑀦𑀫𑁆𑀧𑀺 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺𑀬𑀜𑁆𑀜𑁂𑀯 𑀧𑀯𑀺𑀲𑀢𑀺. 𑀢𑁂𑀦𑁂𑀯 𑀯𑀓𑁆𑀔𑀢𑀺 ‘‘𑀢𑀁 𑀮𑀤𑁆𑀥𑀺𑀁 𑀦𑀺𑀲𑁆𑀲𑀚𑁆𑀚𑀸𑀧𑁂𑀢𑀩𑁆𑀩𑁄’’𑀢𑀺. 𑀪𑀺𑀓𑁆𑀔𑀽𑀦𑀫𑁆𑀧𑀺 𑀏𑀲𑁂𑀯 𑀦𑀬𑁄. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄𑀢𑀺 𑀩𑀼𑀤𑁆𑀥𑀯𑀘𑀦𑀸𑀥𑀺𑀧𑁆𑀧𑀸𑀬𑀁 𑀯𑀺𑀧𑀭𑀻𑀢𑀢𑁄 𑀕𑀡𑁆𑀳𑀦𑁆𑀢𑁄, 𑀲𑁄 𑀏𑀯 𑀅𑀦𑁆𑀢𑀕𑁆𑀕𑀸𑀳𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀲𑀫𑀦𑁆𑀦𑀸𑀕𑀢𑁄𑀢𑀺 𑀘 𑀯𑀼𑀢𑁆𑀢𑁄. 𑀓𑁂𑀘𑀺 𑀧𑀦 ‘‘𑀲𑀲𑁆𑀲𑀢𑀼𑀘𑁆𑀙𑁂𑀤𑀸𑀦𑀁 𑀅𑀜𑁆𑀜𑀢𑀭𑀤𑀺𑀝𑁆𑀞𑀺𑀬𑀸 𑀲𑀫𑀦𑁆𑀦𑀸𑀕𑀢𑁄’’𑀢𑀺 𑀯𑀤𑀦𑁆𑀢𑀺, 𑀢𑀁 𑀦 𑀬𑀼𑀢𑁆𑀢𑀁, 𑀲𑀲𑁆𑀲𑀢𑀼𑀘𑁆𑀙𑁂𑀤𑀕𑁆𑀕𑀸𑀳𑀲𑁆𑀲 𑀲𑀸𑀫𑀡𑁂𑀭𑀸𑀦𑀁 𑀮𑀺𑀗𑁆𑀕𑀦𑀸𑀲𑀦𑀸𑀬 𑀓𑀸𑀭𑀡𑀢𑁆𑀢𑁂𑀦 𑀳𑁂𑀝𑁆𑀞𑀸 𑀅𑀝𑁆𑀞𑀓𑀣𑀸𑀬𑀫𑁂𑀯 (𑀫𑀳𑀸𑀯. 𑀅𑀝𑁆𑀞. 𑁧𑁦𑁮) 𑀯𑀼𑀢𑁆𑀢𑀢𑁆𑀢𑀸, 𑀇𑀥 𑀘 𑀤𑀡𑁆𑀟𑀓𑀫𑁆𑀫𑀦𑀸𑀲𑀦𑀸𑀬 𑀏𑀯 𑀅𑀥𑀺𑀧𑁆𑀧𑁂𑀢𑀢𑁆𑀢𑀸.

𑀢𑀲𑁆𑀲𑀸𑀧𑀺 𑀤𑀸𑀢𑀩𑁆𑀩𑁄𑀢𑀺 𑀯𑀺𑀚𑁆𑀚𑀫𑀸𑀦𑀁 𑀫𑀼𑀔𑀭𑀸𑀤𑀺𑀪𑀸𑀯𑀁 𑀦𑀺𑀲𑁆𑀲𑀸𑀬 𑀅𑀧𑁆𑀧𑀝𑀺𑀧𑀼𑀘𑁆𑀙𑀺𑀢𑁆𑀯𑀸𑀧𑀺 𑀧𑀝𑀺𑀜𑁆𑀜𑀁 𑀅𑀕𑁆𑀕𑀳𑁂𑀢𑁆𑀯𑀸𑀧𑀺 𑀆𑀧𑀢𑁆𑀢𑀺𑀁 𑀅𑀦𑀸𑀭𑁄𑀧𑁂𑀢𑁆𑀯𑀸𑀧𑀺 𑀤𑁂𑀲𑀺𑀢𑀸𑀬𑀧𑀺 𑀆𑀧𑀢𑁆𑀢𑀺𑀬𑀸 𑀔𑀼𑀁𑀲𑀦𑀸𑀤𑀺𑀢𑁄 𑀅𑀦𑁄𑀭𑀫𑀦𑁆𑀢𑀲𑁆𑀲 𑀤𑀸𑀢𑀩𑁆𑀩𑁄𑀯. 𑀑𑀭𑀫𑀦𑁆𑀢𑀲𑁆𑀲 𑀧𑀦 𑀔𑀫𑀸𑀧𑁂𑀦𑁆𑀢𑀲𑁆𑀲 𑀦 𑀤𑀸𑀢𑀩𑁆𑀩𑁄.

𑀩𑁆𑀭𑀳𑁆𑀫𑀤𑀡𑁆𑀟𑀲𑁆𑀲 𑀤𑀸𑀦𑀦𑁆𑀢𑀺 𑀔𑀭𑀤𑀡𑁆𑀟𑀲𑁆𑀲 𑀉𑀓𑁆𑀓𑀝𑁆𑀞𑀤𑀡𑁆𑀟𑀲𑁆𑀲 𑀤𑀸𑀦𑀁. 𑀢𑀚𑁆𑀚𑀦𑀻𑀬𑀸𑀤𑀺𑀓𑀫𑁆𑀫𑁂 𑀳𑀺 𑀓𑀢𑁂 𑀑𑀯𑀸𑀤𑀸𑀦𑀼𑀲𑀸𑀲𑀦𑀺𑀧𑁆𑀧𑀤𑀸𑀦𑀧𑀝𑀺𑀓𑁆𑀔𑁂𑀧𑁄 𑀦𑀢𑁆𑀣𑀺. 𑀤𑀺𑀦𑁆𑀦𑀩𑁆𑀭𑀳𑁆𑀫𑀤𑀡𑁆𑀟𑁂 𑀧𑀦 𑀢𑀲𑁆𑀫𑀺𑀁 𑀲𑀤𑁆𑀥𑀺𑀁 𑀢𑀚𑁆𑀚𑀦𑀻𑀬𑀸𑀤𑀺𑀓𑀫𑁆𑀫𑀓𑀢𑁂𑀳𑀺 𑀧𑀝𑀺𑀓𑁆𑀔𑀺𑀢𑁆𑀢𑀫𑁆𑀧𑀺 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀺, ‘‘𑀦𑁂𑀯 𑀯𑀢𑁆𑀢𑀩𑁆𑀩𑁄’’𑀢𑀺𑀆𑀤𑀺𑀦𑀸 𑀆𑀮𑀸𑀧𑀲𑀮𑁆𑀮𑀸𑀧𑀸𑀤𑀺𑀫𑀢𑁆𑀢𑀲𑁆𑀲𑀸𑀧𑀺 𑀦𑀓𑀸𑀭𑁂𑀦 𑀧𑀝𑀺𑀓𑁆𑀔𑀺𑀢𑁆𑀢𑀢𑁆𑀢𑀸. 𑀢𑀜𑁆𑀳𑀺 𑀤𑀺𑀲𑁆𑀯𑀸 𑀪𑀺𑀓𑁆𑀔𑀽 𑀕𑀻𑀯𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀑𑀮𑁄𑀓𑀦𑀫𑀢𑁆𑀢𑀫𑁆𑀧𑀺 𑀦 𑀓𑀭𑁄𑀦𑁆𑀢𑀺, 𑀏𑀯𑀁 𑀯𑀺𑀯𑀚𑁆𑀚𑁂𑀢𑀩𑁆𑀩𑀁 𑀦𑀺𑀫𑁆𑀫𑀤𑀦𑀓𑀭𑀡𑀢𑁆𑀣𑀫𑁂𑀯 𑀢𑀲𑁆𑀲 𑀤𑀡𑁆𑀟𑀲𑁆𑀲 𑀅𑀦𑀼𑀜𑁆𑀜𑀸𑀢𑀢𑁆𑀢𑀸. 𑀢𑁂𑀦𑁂𑀯 𑀙𑀦𑁆𑀦𑀢𑁆𑀣𑁂𑀭𑁄𑀧𑀺 𑀉𑀓𑁆𑀔𑁂𑀧𑀦𑀻𑀬𑀸𑀤𑀺𑀓𑀫𑁆𑀫𑀓𑀢𑁄𑀧𑀺 𑀅𑀪𑀸𑀬𑀺𑀢𑁆𑀯𑀸 𑀩𑁆𑀭𑀳𑁆𑀫𑀤𑀡𑁆𑀟𑁂 𑀤𑀺𑀦𑁆𑀦𑁂 ‘‘𑀲𑀗𑁆𑀖𑁂𑀦𑀸𑀳𑀁 𑀲𑀩𑁆𑀩𑀣𑀸 𑀯𑀺𑀯𑀚𑁆𑀚𑀺𑀢𑁄’’𑀢𑀺 𑀫𑀼𑀘𑁆𑀙𑀺𑀢𑁄 𑀧𑀧𑀢𑀺. 𑀬𑁄 𑀧𑀦 𑀩𑁆𑀭𑀳𑁆𑀫𑀤𑀡𑁆𑀟𑀓𑀢𑁂𑀦 𑀲𑀤𑁆𑀥𑀺𑀁 𑀜𑀢𑁆𑀯𑀸 𑀲𑀁𑀲𑀝𑁆𑀞𑁄 𑀅𑀯𑀺𑀯𑀚𑁆𑀚𑁂𑀢𑁆𑀯𑀸 𑀯𑀺𑀳𑀭𑀢𑀺, 𑀢𑀲𑁆𑀲 𑀤𑀼𑀓𑁆𑀓𑀝𑀫𑁂𑀯𑀸𑀢𑀺 𑀕𑀳𑁂𑀢𑀩𑁆𑀩𑀁 𑀅𑀜𑁆𑀜𑀣𑀸 𑀩𑁆𑀭𑀳𑁆𑀫𑀤𑀡𑁆𑀟𑀯𑀺𑀥𑀸𑀦𑀲𑁆𑀲 𑀦𑀺𑀭𑀢𑁆𑀣𑀓𑀢𑀸𑀧𑀲𑀗𑁆𑀕𑀢𑁄. 𑀢𑁂𑀦𑀸𑀢𑀺 𑀩𑁆𑀭𑀳𑁆𑀫𑀤𑀡𑁆𑀟𑀓𑀢𑁂𑀦. 𑀬𑀣𑀸 𑀢𑀚𑁆𑀚𑀦𑀻𑀬𑀸𑀤𑀺𑀓𑀫𑁆𑀫𑀓𑀢𑁂𑀳𑀺, 𑀏𑀯𑀫𑁂𑀯 𑀢𑀢𑁄 𑀅𑀥𑀺𑀓𑀫𑁆𑀧𑀺 𑀲𑀗𑁆𑀖𑀁𑀆𑀭𑀸𑀥𑁂𑀦𑁆𑀢𑁂𑀦 𑀲𑀫𑁆𑀫𑀸𑀯𑀢𑁆𑀢𑀺𑀢𑀩𑁆𑀩𑀁. 𑀢𑀜𑁆𑀘 ‘‘𑀲𑁄𑀭𑀢𑁄 𑀦𑀺𑀯𑀸𑀢𑀯𑀼𑀢𑁆𑀢𑀻’’𑀢𑀺𑀆𑀤𑀺𑀦𑀸 𑀲𑀭𑀽𑀧𑀢𑁄 𑀤𑀲𑁆𑀲𑀺𑀢𑀫𑁂𑀯. 𑀢𑁂𑀦𑀸𑀳 ‘‘𑀲𑀫𑁆𑀫𑀸𑀯𑀢𑁆𑀢𑀺𑀢𑁆𑀯𑀸 𑀔𑀫𑀸𑀧𑁂𑀦𑁆𑀢𑀲𑁆𑀲 𑀩𑁆𑀭𑀳𑁆𑀫𑀤𑀡𑁆𑀟𑁄 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑁄’’𑀢𑀺.

𑀬𑀁 𑀢𑀁 𑀪𑀕𑀯𑀢𑀸 𑀅𑀯𑀦𑁆𑀤𑀺𑀬𑀓𑀫𑁆𑀫𑀁 𑀅𑀦𑀼𑀜𑁆𑀜𑀸𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑀡𑁆𑀟𑀓𑀫𑁆𑀫𑀁 𑀓𑀸𑀢𑀼’’𑀦𑁆𑀢𑀺 𑀲𑀸𑀫𑀜𑁆𑀜𑀢𑁄 𑀅𑀦𑀼𑀜𑁆𑀜𑀸𑀢𑀧𑁆𑀧𑀓𑀸𑀭𑀁 𑀤𑀲𑁆𑀲𑁂𑀢𑁆𑀯𑀸 𑀧𑀼𑀦 𑀯𑀺𑀲𑁂𑀲𑀢𑁄 𑀅𑀦𑀼𑀜𑁆𑀜𑀸𑀢𑀧𑁆𑀧𑀓𑀸𑀭𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀣 𑀔𑁄’’𑀢𑀺𑀆𑀤𑀺𑀧𑀸𑀴𑀺 𑀉𑀤𑁆𑀥𑀝𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀇𑀫𑀲𑁆𑀲 𑀅𑀧𑀮𑁄𑀓𑀦𑀓𑀫𑁆𑀫𑀲𑁆𑀲 𑀞𑀸𑀦𑀁 𑀳𑁄𑀢𑀻𑀢𑀺 𑀅𑀧𑀮𑁄𑀓𑀦𑀓𑀫𑁆𑀫𑀲𑁆𑀲 𑀲𑀸𑀫𑀜𑁆𑀜𑀲𑁆𑀲 𑀧𑀯𑀢𑁆𑀢𑀺𑀝𑁆𑀞𑀸𑀦𑀁 𑀳𑁄𑀢𑀻𑀢𑀺. 𑀯𑀺𑀲𑁂𑀲𑀩𑁆𑀬𑀢𑀺𑀭𑁂𑀓𑁂𑀦 𑀅𑀯𑀺𑀚𑁆𑀚𑀫𑀸𑀦𑀫𑁆𑀧𑀺 𑀢𑀤𑀜𑁆𑀜𑀢𑁆𑀣 𑀅𑀧𑁆𑀧𑀯𑀢𑁆𑀢𑀺𑀁 𑀤𑀲𑁆𑀲𑁂𑀢𑀼𑀁 𑀯𑀺𑀲𑁂𑀲𑀦𑀺𑀲𑁆𑀲𑀺𑀢𑀁 𑀯𑀺𑀬 𑀯𑁄𑀳𑀭𑀻𑀬𑀢𑀺. ‘‘𑀓𑀫𑁆𑀫𑀜𑁆𑀜𑁂𑀯 𑀮𑀓𑁆𑀔𑀡’’𑀦𑁆𑀢𑀺 𑀇𑀫𑀺𑀦𑀸 𑀑𑀲𑀸𑀭𑀡𑀸𑀤𑀺𑀯𑀲𑁂𑀦 𑀕𑀳𑀺𑀢𑀸𑀯𑀲𑁂𑀲𑀸𑀦𑀁 𑀲𑀩𑁆𑀩𑁂𑀲𑀁 𑀅𑀧𑀮𑁄𑀓𑀦𑀓𑀫𑁆𑀫𑀲𑁆𑀲 𑀲𑀸𑀫𑀜𑁆𑀜𑀮𑀓𑁆𑀔𑀡𑀯𑀲𑁂𑀦 𑀕𑀳𑀺𑀢𑀢𑁆𑀢𑀸 𑀓𑀫𑁆𑀫𑀜𑁆𑀜𑁂𑀯 𑀮𑀓𑁆𑀔𑀡𑀫𑀲𑁆𑀲𑀸𑀢𑀺 𑀓𑀫𑁆𑀫𑀮𑀓𑁆𑀔𑀡𑀦𑁆𑀢𑀺 𑀦𑀺𑀩𑁆𑀩𑀘𑀦𑀁 𑀤𑀲𑁆𑀲𑁂𑀢𑀺. 𑀇𑀤𑀜𑁆𑀘 𑀯𑀼𑀢𑁆𑀢𑀸𑀯𑀲𑁂𑀲𑀸𑀦𑀁 𑀓𑀫𑁆𑀫𑀸𑀦𑀁 𑀦𑀺𑀝𑁆𑀞𑀸𑀦𑀝𑁆𑀞𑀸𑀦𑀁, 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀥𑀫𑁆𑀫𑀸𑀬𑀢𑀦𑀸𑀦𑀺 𑀯𑀺𑀬 𑀯𑀼𑀢𑁆𑀢𑀸𑀯𑀲𑁂𑀲𑀔𑀦𑁆𑀥𑀸𑀬𑀢𑀦𑀸𑀦𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀢𑁂𑀦𑁂𑀯 𑀯𑀓𑁆𑀔𑀢𑀺 ‘‘𑀅𑀬𑀁 𑀧𑀦𑁂𑀢𑁆𑀣 𑀧𑀸𑀴𑀺𑀫𑀼𑀢𑁆𑀢𑀓𑁄𑀧𑀺 𑀓𑀫𑁆𑀫𑀮𑀓𑁆𑀔𑀡𑀯𑀺𑀦𑀺𑀘𑁆𑀙𑀬𑁄’’𑀢𑀺𑀆𑀤𑀺 (𑀧𑀭𑀺. 𑀅𑀝𑁆𑀞. 𑁪𑁯𑁫-𑁪𑁯𑁬). 𑀬𑀣𑀸 𑀘𑁂𑀢𑁆𑀣, 𑀏𑀯𑀁 𑀉𑀧𑀭𑀺 𑀜𑀢𑁆𑀢𑀺𑀓𑀫𑁆𑀫𑀸𑀤𑀻𑀲𑀼𑀧𑀺 𑀓𑀫𑁆𑀫𑀮𑀓𑁆𑀔𑀡𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀲𑁆𑀲 𑀓𑀭𑀡𑀦𑁆𑀢𑀺 𑀅𑀯𑀦𑁆𑀤𑀺𑀬𑀓𑀫𑁆𑀫𑀲𑁆𑀲 𑀓𑀭𑀡𑀯𑀺𑀥𑀸𑀦𑀁.

‘‘𑀦 𑀯𑀦𑁆𑀤𑀺𑀢𑀩𑁆𑀩𑁄’’𑀢𑀺 𑀇𑀫𑀺𑀦𑀸 𑀯𑀦𑁆𑀤𑀦𑁆𑀢𑀺𑀬𑀸 𑀤𑀼𑀓𑁆𑀓𑀝𑀦𑁆𑀢𑀺 𑀤𑀲𑁆𑀲𑁂𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀲𑀗𑁆𑀖𑁂𑀦 𑀓𑀢𑀁 𑀓𑀢𑀺𑀓𑀁 𑀜𑀢𑁆𑀯𑀸 𑀫𑀤𑁆𑀤𑀦𑀁 𑀯𑀺𑀬 𑀳𑀺 𑀲𑀗𑁆𑀖𑀲𑀫𑁆𑀫𑀼𑀢𑀺𑀁 𑀅𑀦𑀸𑀤𑀭𑁂𑀦 𑀅𑀢𑀺𑀓𑁆𑀓𑀫𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀏𑀯 𑀳𑁄𑀢𑀺.

𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲𑀸𑀧𑀺 𑀧𑀦𑁂𑀢𑀁 𑀮𑀩𑁆𑀪𑀢𑀺𑀬𑁂𑀯𑀸𑀢𑀺 𑀅𑀯𑀦𑁆𑀤𑀺𑀬𑀓𑀫𑁆𑀫𑀲𑁆𑀲 𑀉𑀧𑀮𑀓𑁆𑀔𑀡𑀫𑀢𑁆𑀢𑁂𑀦 𑀕𑀳𑀺𑀢𑀢𑁆𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲𑀸𑀧𑀺 𑀓𑀫𑁆𑀫𑀮𑀓𑁆𑀔𑀡𑀁 𑀮𑀩𑁆𑀪𑀢𑀺 𑀏𑀯.

𑀲𑀮𑀸𑀓𑀤𑀸𑀦𑀝𑁆𑀞𑀸𑀦𑀁 𑀲𑀮𑀸𑀓𑀕𑁆𑀕𑀁 𑀦𑀸𑀫. 𑀬𑀸𑀕𑀼𑀪𑀢𑁆𑀢𑀸𑀦𑀁 𑀪𑀸𑀚𑀦𑀝𑁆𑀞𑀸𑀦𑀸𑀦𑀺 𑀬𑀸𑀕𑀕𑁆𑀕𑀪𑀢𑁆𑀢𑀕𑁆𑀕𑀸𑀦𑀺 𑀦𑀸𑀫. 𑀏𑀢𑁂𑀲𑀼𑀧𑀺 𑀳𑀺 𑀞𑀸𑀦𑁂𑀲𑀼 𑀲𑀩𑁆𑀩𑁄 𑀲𑀗𑁆𑀖𑁄 𑀉𑀧𑁄𑀲𑀣𑁂 𑀯𑀺𑀬 𑀲𑀦𑁆𑀦𑀺𑀧𑀢𑀺𑀢𑁄, 𑀓𑀫𑁆𑀫𑀜𑁆𑀘 𑀯𑀕𑁆𑀕𑀓𑀫𑁆𑀫𑀁 𑀦 𑀳𑁄𑀢𑀺, ‘‘𑀫𑀬𑀫𑁂𑀢𑀁 𑀦 𑀚𑀸𑀦𑀺𑀫𑁆𑀳𑀸’’𑀢𑀺 𑀧𑀘𑁆𑀙𑀸 𑀔𑀺𑀬𑁆𑀬𑀦𑁆𑀢𑀸𑀧𑀺 𑀦 𑀳𑁄𑀦𑁆𑀢𑀺. 𑀔𑀡𑁆𑀟𑀲𑀻𑀫𑀸𑀬 𑀧𑀦 𑀓𑀢𑁂 𑀔𑀺𑀬𑁆𑀬𑀦𑁆𑀢𑀺. 𑀲𑀗𑁆𑀖𑀺𑀓𑀧𑀘𑁆𑀘𑀬𑀜𑁆𑀳𑀺 𑀅𑀘𑁆𑀙𑀺𑀦𑁆𑀦𑀘𑀻𑀯𑀭𑀸𑀤𑀻𑀦𑀁 𑀤𑀸𑀢𑀼𑀁 𑀅𑀧𑀮𑁄𑀓𑁂𑀦𑁆𑀢𑁂𑀳𑀺 𑀉𑀧𑀘𑀸𑀭𑀲𑀻𑀫𑀝𑁆𑀞𑀸𑀦𑀁 𑀲𑀩𑁆𑀩𑁂𑀲𑀁 𑀅𑀦𑀼𑀫𑀢𑀺𑀁 𑀕𑀳𑁂𑀢𑁆𑀯𑀸𑀯 𑀓𑀸𑀢𑀩𑁆𑀩𑀁. 𑀬𑁄 𑀧𑀦 𑀯𑀺𑀲𑀪𑀸𑀕𑀧𑀼𑀕𑁆𑀕𑀮𑁄 𑀥𑀫𑁆𑀫𑀺𑀓𑀁 𑀅𑀧𑀮𑁄𑀓𑀦𑀁 𑀧𑀝𑀺𑀩𑀸𑀳𑀢𑀺, 𑀢𑀁 𑀉𑀧𑀸𑀬𑁂𑀦 𑀩𑀳𑀺𑀉𑀧𑀘𑀸𑀭𑀲𑀻𑀫𑀸𑀕𑀢𑀁 𑀯𑀸 𑀓𑀢𑁆𑀯𑀸 𑀔𑀡𑁆𑀟𑀲𑀻𑀫𑀁 𑀯𑀸 𑀧𑀯𑀺𑀲𑀺𑀢𑁆𑀯𑀸 𑀓𑀸𑀢𑀼𑀁 𑀯𑀝𑁆𑀝𑀢𑀺.

𑀬𑀁 𑀲𑀦𑁆𑀥𑀸𑀬 ‘‘𑀅𑀧𑀮𑁄𑀓𑀦𑀓𑀫𑁆𑀫𑀁 𑀓𑀭𑁄𑀢𑀻’’𑀢𑀺 𑀲𑀸𑀫𑀜𑁆𑀜𑀢𑁄 𑀤𑀲𑁆𑀲𑁂𑀢𑀺, 𑀢𑀁 𑀅𑀧𑀮𑁄𑀓𑀦𑀓𑀫𑁆𑀫𑀁 𑀲𑀭𑀽𑀧𑀢𑁄 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀅𑀘𑁆𑀙𑀺𑀦𑁆𑀦𑀘𑀻𑀯𑀭𑀁’’𑀇𑀘𑁆𑀘𑀸𑀤𑀺. 𑀬𑀤𑀺 𑀅𑀧𑀮𑁄𑀓𑁂𑀢𑁆𑀯𑀸𑀯 𑀘𑀻𑀯𑀭𑀁 𑀤𑀸𑀢𑀩𑁆𑀩𑀁, 𑀓𑀺𑀁 𑀧𑀦 𑀅𑀧𑁆𑀧𑀫𑀢𑁆𑀢𑀓𑀯𑀺𑀲𑁆𑀲𑀚𑁆𑀚𑀓𑀲𑀫𑁆𑀫𑀼𑀢𑀺𑀬𑀸𑀢𑀺 𑀆𑀳 ‘‘𑀅𑀧𑁆𑀧𑀫𑀢𑁆𑀢𑀓𑀯𑀺𑀲𑁆𑀲𑀚𑁆𑀚𑀦𑀓𑁂𑀦 𑀧𑀦𑀸’’𑀢𑀺𑀆𑀤𑀺. 𑀦𑀸𑀴𑀺 𑀯𑀸 𑀉𑀧𑀟𑁆𑀠𑀦𑀸𑀴𑀺 𑀯𑀸𑀢𑀺 𑀤𑀺𑀯𑀲𑁂 𑀤𑀺𑀯𑀲𑁂 𑀅𑀧𑀮𑁄𑀓𑁂𑀢𑁆𑀯𑀸 𑀤𑀸𑀢𑀩𑁆𑀩𑀲𑁆𑀲 𑀧𑀫𑀸𑀡𑀤𑀲𑁆𑀲𑀦𑀁. 𑀢𑁂𑀦 𑀬𑀸𑀧𑀦𑀫𑀢𑁆𑀢𑀫𑁂𑀯 𑀅𑀧𑀮𑁄𑀓𑁂𑀢𑀩𑁆𑀩𑀁, 𑀦 𑀅𑀥𑀺𑀓𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀏𑀓𑀤𑀺𑀯𑀲𑀁𑀬𑁂𑀯 𑀯𑀸𑀢𑀺𑀆𑀤𑀺 𑀤𑀲𑀯𑀻𑀲𑀢𑀺𑀤𑀺𑀯𑀲𑀸𑀦𑀁 𑀏𑀓𑀲𑁆𑀫𑀺𑀁 𑀤𑀺𑀯𑀲𑁂𑀬𑁂𑀯 𑀤𑀸𑀢𑀩𑁆𑀩𑀧𑀭𑀺𑀘𑁆𑀙𑁂𑀤𑀤𑀲𑁆𑀲𑀦𑀁, 𑀢𑁂𑀦 𑀬𑀸𑀯 𑀚𑀻𑀯𑀦𑁆𑀢𑀺 𑀯𑀸 𑀬𑀸𑀯 𑀭𑁄𑀕𑀸 𑀯𑀼𑀝𑁆𑀞𑀳𑀢𑀻𑀢𑀺 𑀯𑀸 𑀏𑀯𑀁 𑀅𑀧𑀮𑁄𑀓𑁂𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀇𑀡𑀧𑀮𑀺𑀩𑁄𑀥𑀦𑁆𑀢𑀺 𑀇𑀡𑀯𑀢𑁆𑀣𑀼𑀁 𑀤𑀸𑀢𑀼𑀁 𑀯𑀝𑁆𑀝𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀜𑁆𑀘 𑀇𑀡𑀸𑀬𑀺𑀓𑁂𑀳𑀺 𑀧𑀮𑀺𑀩𑀼𑀤𑁆𑀥𑀲𑁆𑀲 𑀮𑀚𑁆𑀚𑀺𑀧𑁂𑀲𑀮𑀲𑁆𑀲 𑀲𑀸𑀲𑀦𑀼𑀧𑀓𑀸𑀭𑀓𑀲𑁆𑀲 𑀧𑀫𑀸𑀡𑀬𑀼𑀢𑁆𑀢𑀫𑁂𑀯 𑀓𑀧𑁆𑀧𑀺𑀬𑀪𑀡𑁆𑀟𑀁 𑀦𑀺𑀬𑀫𑁂𑀢𑁆𑀯𑀸 𑀅𑀧𑀮𑁄𑀓𑁂𑀢𑁆𑀯𑀸 𑀤𑀸𑀢𑀩𑁆𑀩𑀁, 𑀦 𑀧𑀦 𑀲𑀳𑀲𑁆𑀲𑀁 𑀯𑀸 𑀲𑀢𑀲𑀳𑀲𑁆𑀲𑀁 𑀯𑀸 𑀫𑀳𑀸𑀇𑀡𑀁. 𑀢𑀸𑀤𑀺𑀲𑀜𑁆𑀳𑀺 𑀪𑀺𑀓𑁆𑀔𑀸𑀘𑀭𑀺𑀬𑀯𑀢𑁆𑀢𑁂𑀦 𑀲𑀩𑁆𑀩𑁂𑀳𑀺 𑀪𑀺𑀓𑁆𑀔𑀽𑀳𑀺 𑀢𑀸𑀤𑀺𑀲𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀭𑀺𑀬𑁂𑀲𑀺𑀢𑁆𑀯𑀸 𑀤𑀸𑀢𑀩𑁆𑀩𑀁.

𑀉𑀧𑀦𑀺𑀓𑁆𑀔𑁂𑀧𑀢𑁄𑀢𑀺 𑀘𑁂𑀢𑀺𑀬𑀧𑀝𑀺𑀚𑀕𑁆𑀕𑀦𑀢𑁆𑀣𑀸𑀬 𑀯𑀟𑁆𑀠𑀺𑀬𑀸 𑀧𑀬𑁄𑀚𑁂𑀢𑁆𑀯𑀸 𑀓𑀧𑁆𑀧𑀺𑀬𑀓𑀸𑀭𑀓𑁂𑀳𑀺 𑀞𑀧𑀺𑀢𑀯𑀢𑁆𑀣𑀼𑀢𑁄. 𑀲𑀗𑁆𑀖𑀺𑀓𑁂𑀦𑀧𑀻𑀢𑀺 𑀦 𑀓𑁂𑀯𑀮𑀜𑁆𑀘 𑀢𑀢𑁆𑀭𑀼𑀧𑁆𑀧𑀸𑀤𑀢𑁄 𑀧𑀘𑁆𑀘𑀬𑀤𑀸𑀬𑀓𑁂𑀳𑀺 𑀘𑀢𑀼𑀧𑀘𑁆𑀘𑀬𑀢𑁆𑀣𑀸𑀬 𑀲𑀗𑁆𑀖𑀲𑁆𑀲 𑀤𑀺𑀦𑁆𑀦𑀯𑀢𑁆𑀣𑀼𑀦𑀸𑀧𑀻𑀢𑀺 𑀅𑀢𑁆𑀣𑁄.

𑀲𑀗𑁆𑀖𑀪𑀢𑁆𑀢𑀁 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀫𑀳𑀸𑀤𑀸𑀦𑀁 𑀤𑁂𑀦𑁆𑀢𑁂𑀳𑀺𑀧𑀺 𑀓𑀭𑀺𑀬𑀫𑀸𑀦𑀁 𑀲𑀗𑁆𑀖𑀪𑀢𑁆𑀢𑀁 𑀯𑀺𑀬 𑀓𑀸𑀭𑁂𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

‘‘𑀬𑀣𑀸𑀲𑀼𑀔𑀁 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀭𑀼𑀘𑁆𑀘𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀅𑀢𑁆𑀢𑀦𑁄 𑀧𑀭𑀺𑀪𑁄𑀕𑀧𑁆𑀧𑀳𑁄𑀦𑀓𑀁 𑀅𑀧𑁆𑀧𑀁 𑀯𑀸 𑀩𑀳𑀼𑀁 𑀯𑀸 𑀕𑀳𑁂𑀢𑀩𑁆𑀩𑀁, 𑀅𑀥𑀺𑀓𑀁 𑀧𑀦 𑀕𑀳𑁂𑀢𑀼𑀁 𑀦 𑀮𑀪𑀢𑀺. 𑀉𑀧𑁄𑀲𑀣𑀤𑀺𑀯𑀲𑁂𑀢𑀺 𑀦𑀺𑀤𑀲𑁆𑀲𑀦𑀫𑀢𑁆𑀢𑀁, 𑀬𑀲𑁆𑀫𑀺𑀁 𑀓𑀺𑀲𑁆𑀫𑀺𑀜𑁆𑀘𑀺 𑀤𑀺𑀯𑀲𑁂𑀧𑀺 𑀓𑀢𑀁 𑀲𑀼𑀓𑀢𑀫𑁂𑀯 𑀳𑁄𑀢𑀺. 𑀓𑀭𑁄𑀦𑁆𑀢𑁂𑀦 ‘‘𑀬𑀁 𑀇𑀫𑀲𑁆𑀫𑀺𑀁 𑀯𑀺𑀳𑀸𑀭𑁂 𑀅𑀦𑁆𑀢𑁄𑀲𑀻𑀫𑀸𑀬 𑀲𑀗𑁆𑀖𑀲𑀦𑁆𑀢𑀓𑀁…𑀧𑁂… 𑀬𑀣𑀸𑀲𑀼𑀔𑀁 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀫𑀬𑁆𑀳𑀁 𑀭𑀼𑀘𑁆𑀘𑀢𑀻’’𑀢𑀺 𑀏𑀯𑀁 𑀓𑀢𑀺𑀓𑀸 𑀓𑀸𑀢𑀩𑁆𑀩𑀸, 𑀢𑀣𑀸 𑀤𑁆𑀯𑀻𑀳𑀺 𑀢𑀻𑀳𑀺𑀧𑀺 ‘‘𑀆𑀬𑀲𑁆𑀫𑀦𑁆𑀢𑀸𑀦𑀁 𑀭𑀼𑀘𑁆𑀘𑀢𑀻’’𑀢𑀺 𑀯𑀘𑀦𑀫𑁂𑀯 𑀳𑁂𑀢𑁆𑀣 𑀯𑀺𑀲𑁂𑀲𑁄. 𑀢𑁂𑀲𑀫𑁆𑀧𑀻𑀢𑀺 𑀭𑀼𑀓𑁆𑀔𑀸𑀦𑀁. 𑀲𑀸 𑀏𑀯 𑀓𑀢𑀺𑀓𑀸𑀢𑀺 𑀯𑀺𑀲𑀼𑀁 𑀓𑀢𑀺𑀓𑀸 𑀦 𑀓𑀸𑀢𑀩𑁆𑀩𑀸𑀢𑀺 𑀅𑀢𑁆𑀣𑁄.

𑀢𑁂𑀲𑀦𑁆𑀢𑀺 𑀭𑀼𑀓𑁆𑀔𑀸𑀦𑀁. 𑀲𑀗𑁆𑀖𑁄 𑀲𑀸𑀫𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀼𑀭𑀺𑀫𑀯𑀺𑀳𑀸𑀭𑁂𑀢𑀺 𑀧𑀼𑀭𑀺𑀫𑁂 𑀬𑀣𑀸𑀲𑀼𑀔𑀁 𑀧𑀭𑀺𑀪𑁄𑀕𑀢𑁆𑀣𑀸𑀬 𑀓𑀢𑀓𑀢𑀺𑀓𑁂 𑀯𑀺𑀳𑀸𑀭𑁂. 𑀧𑀭𑀺𑀯𑁂𑀡𑀸𑀦𑀺 𑀓𑀢𑁆𑀯𑀸 𑀚𑀕𑁆𑀕𑀦𑁆𑀢𑀻𑀢𑀺 𑀬𑀢𑁆𑀣 𑀅𑀭𑀓𑁆𑀔𑀺𑀬𑀫𑀸𑀦𑁂 𑀨𑀮𑀸𑀨𑀮𑀸𑀦𑀺, 𑀭𑀼𑀓𑁆𑀔𑀸 𑀘 𑀯𑀺𑀦𑀲𑁆𑀲𑀦𑁆𑀢𑀺, 𑀢𑀸𑀤𑀺𑀲𑀁 𑀞𑀸𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀢𑀢𑁆𑀣 𑀲𑀗𑁆𑀖𑀲𑁆𑀲 𑀓𑀢𑀺𑀓𑀸 𑀦 𑀧𑀯𑀢𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑁂 𑀧𑀦 𑀭𑀼𑀓𑁆𑀔𑀸 𑀩𑀻𑀚𑀸𑀦𑀺 𑀭𑁄𑀧𑁂𑀢𑁆𑀯𑀸 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀧𑀝𑀺𑀚𑀕𑁆𑀕𑀺𑀢𑀸, 𑀢𑁂𑀧𑀺 𑀤𑀲𑀫𑀪𑀸𑀕𑀁 𑀤𑀢𑁆𑀯𑀸 𑀭𑁄𑀧𑀓𑁂𑀳𑁂𑀯 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀸. 𑀢𑁂𑀳𑀻𑀢𑀺 𑀚𑀕𑁆𑀕𑀓𑁂𑀳𑀺.

𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀯𑀺𑀳𑀸𑀭𑁂. 𑀫𑀽𑀮𑁂𑀢𑀺 𑀆𑀤𑀺𑀓𑀸𑀮𑁂, 𑀧𑀼𑀩𑁆𑀩𑁂𑀢𑀺 𑀅𑀢𑁆𑀣𑁄. 𑀤𑀻𑀖𑀸 𑀓𑀢𑀺𑀓𑀸𑀢𑀺 𑀅𑀧𑀭𑀺𑀘𑁆𑀙𑀺𑀦𑁆𑀦𑀓𑀸𑀮𑀸 𑀬𑀣𑀸𑀲𑀼𑀔𑀁 𑀧𑀭𑀺𑀪𑁄𑀕𑀢𑁆𑀣𑀸𑀬 𑀓𑀢𑀺𑀓𑀸. 𑀦𑀺𑀓𑁆𑀓𑀼𑀓𑁆𑀓𑀼𑀘𑁆𑀘𑁂𑀦𑀸𑀢𑀺 ‘‘𑀅𑀪𑀸𑀚𑀺𑀢𑀫𑀺𑀤’’𑀦𑁆𑀢𑀺 𑀓𑀼𑀓𑁆𑀓𑀼𑀘𑁆𑀘𑀁 𑀅𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀔𑀺𑀬𑁆𑀬𑀦𑀫𑀢𑁆𑀢𑀫𑁂𑀯𑁂𑀢𑀦𑁆𑀢𑀺 𑀢𑁂𑀦 𑀔𑀺𑀬𑁆𑀬𑀦𑁂𑀦 𑀩𑀳𑀼𑀁 𑀔𑀸𑀤𑀦𑁆𑀢𑀸𑀦𑀁 𑀤𑁄𑀲𑁄 𑀦𑀢𑁆𑀣𑀺 𑀅𑀢𑁆𑀢𑀦𑁄 𑀧𑀭𑀺𑀪𑁄𑀕𑀧𑁆𑀧𑀫𑀸𑀡𑀲𑁆𑀲𑁂𑀯 𑀕𑀳𑀺𑀢𑀢𑁆𑀢𑀸, 𑀔𑀺𑀬𑁆𑀬𑀦𑁆𑀢𑁂𑀧𑀺 𑀅𑀢𑁆𑀢𑀦𑁄 𑀧𑀳𑁄𑀦𑀓𑀁 𑀕𑀳𑁂𑀢𑁆𑀯𑀸 𑀔𑀸𑀤𑀺𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀕𑀡𑁆𑀳𑀣𑀸𑀢𑀺 𑀦 𑀯𑀢𑁆𑀢𑀩𑁆𑀩𑀸𑀢𑀺 𑀢𑀣𑀸𑀯𑀼𑀢𑁆𑀢𑁂 𑀢𑁂𑀦𑁂𑀯 𑀪𑀺𑀓𑁆𑀔𑀼𑀦𑀸 𑀤𑀺𑀦𑁆𑀦𑀁 𑀯𑀺𑀬 𑀫𑀜𑁆𑀜𑁂𑀬𑁆𑀬𑀼𑀁, 𑀢𑀁 𑀦𑀺𑀲𑁆𑀲𑀸𑀬 𑀫𑀺𑀘𑁆𑀙𑀸𑀚𑀻𑀯𑀲𑀫𑁆𑀪𑀯𑁄 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀅𑀦𑀼𑀯𑀺𑀘𑀭𑀺𑀢𑁆𑀯𑀸’’𑀢𑀺𑀆𑀤𑀺. 𑀉𑀧𑀟𑁆𑀠𑀪𑀸𑀕𑁄𑀢𑀺 𑀏𑀓𑀪𑀺𑀓𑁆𑀔𑀼𑀦𑁄 𑀧𑀝𑀺𑀯𑀻𑀲𑀢𑁄 𑀉𑀧𑀟𑁆𑀠𑀪𑀸𑀕𑁄. 𑀤𑁂𑀦𑁆𑀢𑁂𑀦 𑀘 ‘‘𑀏𑀢𑁆𑀢𑀓𑀁 𑀤𑀸𑀢𑀼𑀁 𑀲𑀗𑁆𑀖𑁄 𑀅𑀦𑀼𑀜𑁆𑀜𑀸𑀲𑀻’’𑀢𑀺 𑀏𑀯𑀁 𑀅𑀢𑁆𑀢𑀸𑀦𑀁 𑀧𑀭𑀺𑀫𑁄𑀘𑁂𑀢𑁆𑀯𑀸 𑀬𑀣𑀸 𑀢𑁂 𑀲𑀗𑁆𑀖𑁂 𑀏𑀯 𑀧𑀲𑀻𑀤𑀦𑁆𑀢𑀺, 𑀏𑀯𑀁 𑀯𑀢𑁆𑀯𑀸 𑀤𑀸𑀢𑀩𑁆𑀩𑀁.

𑀅𑀧𑀘𑁆𑀘𑀸𑀲𑀻𑀲𑀦𑁆𑀢𑁂𑀦𑀸𑀢𑀺 𑀕𑀺𑀮𑀸𑀦𑀕𑀫𑀺𑀓𑀺𑀲𑁆𑀲𑀭𑀸𑀤𑀻𑀦𑀁 𑀅𑀦𑀼𑀜𑁆𑀜𑀸𑀢𑀧𑀼𑀕𑁆𑀕𑀮𑀸𑀦𑀫𑁆𑀧𑀺 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀤𑁂𑀦𑁆𑀢𑁂𑀦 𑀅𑀧𑀘𑁆𑀘𑀸𑀲𑀻𑀲𑀦𑁆𑀢𑁂𑀦𑁂𑀯 𑀤𑀸𑀢𑀩𑁆𑀩𑀁, 𑀅𑀦𑀦𑀼𑀜𑁆𑀜𑀸𑀢𑀧𑀼𑀕𑁆𑀕𑀮𑀸𑀦𑀁 𑀧𑀦 𑀅𑀧𑀘𑁆𑀘𑀸𑀲𑀻𑀲𑀦𑁆𑀢𑁂𑀦𑀸𑀧𑀺 𑀤𑀸𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺. 𑀲𑀗𑁆𑀖𑀺𑀓𑀫𑁂𑀯 𑀬𑀣𑀸𑀓𑀢𑀺𑀢𑀸𑀬 𑀤𑀸𑀧𑁂𑀢𑀩𑁆𑀩𑀁. 𑀅𑀢𑁆𑀢𑀦𑁄 𑀲𑀦𑁆𑀢𑀓𑀫𑁆𑀧𑀺 𑀧𑀘𑁆𑀘𑀬𑀤𑀸𑀬𑀓𑀸𑀤𑀻 𑀲𑀬𑀫𑁂𑀯 𑀯𑀺𑀲𑁆𑀲𑀸𑀲𑁂𑀦 𑀕𑀡𑁆𑀳𑀦𑁆𑀢𑀺, 𑀦 𑀯𑀸𑀭𑁂𑀢𑀩𑁆𑀩𑀸, 𑀮𑀤𑁆𑀥𑀓𑀧𑁆𑀧𑀺𑀬𑀦𑁆𑀢𑀺 𑀢𑀼𑀡𑁆𑀳𑀻 𑀪𑀯𑀺𑀢𑀩𑁆𑀩𑀁. 𑀧𑀼𑀩𑁆𑀩𑁂 𑀯𑀼𑀢𑁆𑀢𑀫𑁂𑀯𑀸𑀢𑀺 ‘‘𑀓𑀼𑀤𑁆𑀥𑁄 𑀳𑀺 𑀲𑁄 𑀭𑀼𑀓𑁆𑀔𑁂𑀧𑀺 𑀙𑀺𑀦𑁆𑀤𑁂𑀬𑁆𑀬𑀸’’𑀢𑀺𑀆𑀤𑀺𑀦𑀸 𑀢𑀼𑀡𑁆𑀳𑀻𑀪𑀸𑀯𑁂 𑀓𑀸𑀭𑀡𑀁 𑀧𑀼𑀩𑁆𑀩𑁂 𑀯𑀼𑀢𑁆𑀢𑀫𑁂𑀯. 𑀢𑁂𑀳𑀺 𑀓𑀢𑀅𑀦𑀢𑁆𑀣𑀸𑀪𑀸𑀯𑁂𑀧𑀺 𑀓𑀸𑀭𑀼𑀜𑁆𑀜𑁂𑀦 𑀢𑀼𑀡𑁆𑀳𑀻 𑀪𑀯𑀺𑀢𑀼𑀁 𑀯𑀝𑁆𑀝𑀢𑀺, ‘‘𑀕𑀡𑁆𑀳𑀣𑀸’’𑀢𑀺𑀆𑀤𑀺 𑀧𑀦 𑀯𑀢𑁆𑀢𑀼𑀁 𑀦 𑀯𑀝𑁆𑀝𑀢𑀺.

𑀕𑀭𑀼𑀪𑀡𑁆𑀟𑀢𑁆𑀢𑀸…𑀧𑁂… 𑀦 𑀤𑀸𑀢𑀩𑁆𑀩𑀦𑁆𑀢𑀺 𑀚𑀻𑀯𑀭𑀼𑀓𑁆𑀔𑀸𑀦𑀁 𑀆𑀭𑀸𑀫𑀝𑁆𑀞𑀸𑀦𑀻𑀬𑀢𑁆𑀢𑀸, 𑀤𑀸𑀭𑀽𑀦𑀜𑁆𑀘 𑀕𑁂𑀳𑀲𑀫𑁆𑀪𑀸𑀭𑀸𑀦𑀼𑀧𑀕𑀢𑀢𑁆𑀢𑀸 ‘‘𑀲𑀩𑁆𑀩𑀁 𑀢𑁆𑀯𑀫𑁂𑀯 𑀕𑀡𑁆𑀳𑀸’’𑀢𑀺 𑀤𑀸𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀯𑀼𑀢𑁆𑀢𑀁. 𑀅𑀓𑀢𑀸𑀯𑀸𑀲𑀁 𑀯𑀸 𑀓𑀢𑁆𑀯𑀸𑀢𑀺 𑀧𑀼𑀩𑁆𑀩𑁂 𑀅𑀯𑀺𑀚𑁆𑀚𑀫𑀸𑀦𑀁 𑀲𑁂𑀦𑀸𑀲𑀦𑀁 𑀓𑀢𑁆𑀯𑀸 𑀚𑀕𑁆𑀕𑀺𑀢𑀓𑀸𑀮𑁂 𑀨𑀮𑀯𑀸𑀭𑁂 𑀲𑀫𑁆𑀧𑀢𑁆𑀢𑁂.

𑀅𑀧𑀮𑁄𑀓𑀦𑀓𑀫𑁆𑀫𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀢𑁆𑀣𑀯𑀲𑀯𑀕𑁆𑀕𑀸𑀤𑀺𑀯𑀡𑁆𑀡𑀦𑀸

𑁪𑁯𑁮. 𑀯𑀺𑀧𑀸𑀓𑀤𑀼𑀓𑁆𑀔𑀲𑀗𑁆𑀔𑀸𑀢𑀸𑀦𑀁 𑀲𑀫𑁆𑀧𑀭𑀸𑀬𑀺𑀓𑀯𑁂𑀭𑀸𑀦𑀦𑁆𑀢𑀺 𑀏𑀢𑁆𑀣 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀯𑁂𑀭𑁂𑀦 𑀦𑀺𑀩𑁆𑀩𑀢𑁆𑀢𑀢𑁆𑀢𑀸, 𑀯𑁂𑀭𑀧𑁆𑀧𑀢𑁆𑀢𑀺𑀬𑀸 𑀳𑁂𑀢𑀼𑀢𑁆𑀢𑀸 𑀘 ‘‘𑀯𑀺𑀧𑀸𑀓𑀤𑀼𑀓𑁆𑀔𑀯𑁂𑀤𑀦𑀸’’𑀢𑀺 𑀯𑀼𑀢𑁆𑀢𑀸. 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀧𑀜𑁆𑀘𑀯𑁂𑀭𑀯𑀺𑀦𑀺𑀫𑀼𑀢𑁆𑀢𑀸𑀦𑀫𑁆𑀧𑀺 𑀅𑀓𑀼𑀲𑀮𑀸𑀦𑀁 𑀯𑁂𑀭𑁂𑀳𑀺 𑀲𑀳 𑀏𑀓𑀢𑁄 𑀲𑀗𑁆𑀕𑀡𑁆𑀳𑀦𑀢𑁆𑀣𑀁 ‘‘𑀤𑀲𑀅𑀓𑀼𑀲𑀮𑀓𑀫𑁆𑀫𑀧𑀣𑀧𑁆𑀧𑀪𑁂𑀤𑀸𑀦’’𑀦𑁆𑀢𑀺 𑀧𑀼𑀦 𑀯𑀼𑀢𑁆𑀢𑀁.

𑁪𑁯𑁯-𑁫𑁦𑁦. 𑀢𑀁 𑀓𑀫𑁆𑀫𑀦𑁆𑀢𑀺 𑀢𑀚𑁆𑀚𑀦𑀻𑀬𑀸𑀤𑀺𑀓𑀫𑁆𑀫𑀫𑁂𑀯, 𑀲𑀢𑁆𑀢𑀸 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸 𑀧𑀜𑁆𑀜𑀢𑁆𑀢𑀁 𑀦𑀸𑀫𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀦𑁆𑀢𑀭𑀸 𑀓𑁂𑀦𑀘𑀺 𑀅𑀧𑀜𑁆𑀜𑀢𑁆𑀢𑁂 𑀲𑀺𑀓𑁆𑀔𑀸𑀧𑀤𑁂𑀢𑀺 𑀇𑀫𑀲𑁆𑀫𑀺𑀁 𑀓𑀧𑁆𑀧𑁂 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀅𑀫𑁆𑀳𑀸𑀓𑀁 𑀪𑀕𑀯𑀢𑁄 𑀅𑀪𑀺𑀲𑀫𑁆𑀩𑁄𑀥𑀺, 𑀢𑀸𑀯 𑀅𑀦𑁆𑀢𑀭𑀸𑀓𑀸𑀮𑁂 𑀓𑀓𑀼𑀲𑀦𑁆𑀥𑀸𑀤𑀺𑀁 𑀞𑀧𑁂𑀢𑁆𑀯𑀸 𑀓𑁂𑀦𑀘𑀺 𑀅𑀧𑀜𑁆𑀜𑀢𑁆𑀢𑁂 𑀲𑀺𑀓𑁆𑀔𑀸𑀧𑀤𑁂𑀢𑀺 𑀅𑀢𑁆𑀣𑁄. 𑀯𑀺𑀦𑀻𑀢𑀓𑀣𑀸 𑀲𑀺𑀓𑁆𑀔𑀸𑀧𑀤𑀦𑁆𑀢𑀺 𑀯𑀺𑀦𑀻𑀢𑀯𑀢𑁆𑀣𑀽𑀦𑀺 𑀏𑀯. 𑀢𑀸𑀦𑀺 𑀳𑀺 𑀢𑀁𑀢𑀁𑀲𑀺𑀓𑁆𑀔𑀸𑀓𑁄𑀝𑁆𑀞𑀸𑀲𑀸𑀦𑀁 𑀧𑀓𑀸𑀲𑀦𑀢𑁄 ‘‘𑀲𑀺𑀓𑁆𑀔𑀸𑀧𑀤’’𑀦𑁆𑀢𑀺 𑀘 𑀆𑀧𑀢𑁆𑀢𑀺𑀅𑀦𑀸𑀧𑀢𑁆𑀢𑀻𑀦𑀁 𑀅𑀦𑀼𑀧𑀜𑁆𑀜𑀸𑀧𑀦𑀢𑁄 ‘‘𑀅𑀦𑀼𑀧𑀜𑁆𑀜𑀢𑁆𑀢’’𑀦𑁆𑀢𑀺 𑀘 𑀯𑀼𑀘𑁆𑀘𑀦𑁆𑀢𑀺.

𑀅𑀢𑁆𑀣𑀯𑀲𑀯𑀕𑁆𑀕𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀗𑁆𑀕𑀳𑀯𑀕𑁆𑀕𑀯𑀡𑁆𑀡𑀦𑀸𑀦𑀬𑁄 𑀦𑀺𑀝𑁆𑀞𑀺𑀢𑁄.

𑀇𑀢𑀺 𑀫𑀳𑀸𑀯𑀕𑁆𑀕𑁄, 𑀧𑀜𑁆𑀜𑀢𑁆𑀢𑀺𑀯𑀕𑁆𑀕𑁄, 𑀲𑀗𑁆𑀕𑀳𑀯𑀕𑁆𑀕𑁄𑀢𑀺 𑀢𑀻𑀳𑀺 𑀫𑀳𑀸𑀯𑀕𑁆𑀕𑁂𑀳𑀺 𑀧𑀝𑀺𑀫𑀡𑁆𑀟𑀺𑀢𑁄 𑀧𑀭𑀺𑀯𑀸𑀭𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀇𑀢𑀺 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬 𑀯𑀺𑀦𑀬𑀝𑁆𑀞𑀓𑀣𑀸𑀬 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁

𑀧𑀭𑀺𑀯𑀸𑀭𑀯𑀡𑁆𑀡𑀦𑀸𑀦𑀬𑁄 𑀦𑀺𑀝𑁆𑀞𑀺𑀢𑁄.

𑀦𑀺𑀕𑀫𑀦𑀓𑀣𑀸𑀯𑀡𑁆𑀡𑀦𑀸

𑀅𑀯𑀲𑀸𑀦𑀕𑀸𑀣𑀸𑀲𑀼 𑀉𑀪𑀢𑁄𑀯𑀺𑀪𑀗𑁆𑀕-𑀔𑀦𑁆𑀥𑀓-𑀧𑀭𑀺𑀯𑀸𑀭𑁂𑀳𑀺 𑀯𑀺𑀪𑀢𑁆𑀢𑀢𑁆𑀢𑀸 𑀯𑀺𑀪𑀸𑀕𑀧𑀝𑀺𑀤𑁂𑀲𑀦𑀸 𑀬𑀲𑁆𑀫𑀺𑀁 𑀯𑀺𑀦𑀬𑀧𑀺𑀝𑀓𑁂. 𑀲𑁄 𑀉𑀪𑀢𑁄𑀯𑀺𑀪𑀗𑁆𑀕-𑀔𑀦𑁆𑀥𑀓-𑀧𑀭𑀺𑀯𑀸𑀭𑀯𑀺𑀪𑀢𑁆𑀢𑀤𑁂𑀲𑀦𑁄 𑀆𑀳𑀸𑀢𑀺 𑀬𑁄𑀚𑀦𑀸. 𑀢𑀲𑁆𑀲𑀸𑀢𑀺 𑀯𑀺𑀦𑀬𑀧𑀺𑀝𑀓𑀲𑁆𑀲.

𑀲𑀢𑁆𑀣𑀼 𑀫𑀳𑀸𑀩𑁄𑀥𑀻𑀢𑀺 𑀤𑀓𑁆𑀔𑀺𑀡𑀲𑀸𑀔𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀬𑀁 𑀧𑀥𑀸𑀦𑀖𑀭𑀁 𑀦𑀸𑀫 𑀧𑀭𑀺𑀯𑁂𑀡𑀁, 𑀢𑀢𑁆𑀣 𑀘𑀸𑀭𑀼𑀧𑀸𑀓𑀸𑀭𑁂𑀦 𑀲𑀜𑁆𑀘𑀺𑀢𑀁 𑀧𑀭𑀺𑀓𑁆𑀔𑀺𑀢𑁆𑀢𑀁 𑀬𑀁 𑀧𑀸𑀲𑀸𑀤𑀁 𑀓𑀸𑀭𑀬𑀺, 𑀢𑀢𑁆𑀭 𑀢𑀲𑁆𑀫𑀺𑀁 𑀫𑀳𑀸𑀦𑀺𑀕𑀫𑀲𑀸𑀫𑀺𑀦𑁄 𑀧𑀸𑀲𑀸𑀤𑁂 𑀯𑀲𑀢𑀸𑀢𑀺 𑀬𑁄𑀚𑁂𑀢𑀩𑁆𑀩𑀸.

𑀩𑀼𑀤𑁆𑀥𑀲𑀺𑀭𑀺𑀁 𑀉𑀤𑁆𑀤𑀺𑀲𑀺𑀢𑁆𑀯𑀸 𑀦𑀺𑀲𑁆𑀲𑀸𑀬, 𑀢𑀲𑁆𑀲 𑀯𑀸 𑀅𑀚𑁆𑀛𑁂𑀲𑀦𑀫𑁆𑀧𑀺 𑀧𑀝𑀺𑀘𑁆𑀘 𑀬𑀸 𑀇𑀤𑁆𑀥𑀸 𑀧𑀭𑀺𑀧𑀼𑀡𑁆𑀡𑀯𑀺𑀦𑀺𑀘𑁆𑀙𑀬𑀢𑀸𑀬 𑀲𑀫𑀺𑀤𑁆𑀥𑀸 𑀯𑀺𑀦𑀬𑀲𑀁𑀯𑀡𑁆𑀡𑀦𑀸 𑀆𑀭𑀤𑁆𑀥𑀸𑀢𑀺 𑀬𑁄𑀚𑀦𑀸.

𑀲𑀺𑀭𑀺𑀦𑀺𑀯𑀸𑀲𑀲𑁆𑀲𑀸𑀢𑀺 𑀲𑀺𑀭𑀺𑀬𑀸 𑀦𑀺𑀯𑀸𑀲𑀦𑀝𑁆𑀞𑀸𑀦𑀪𑀽𑀢𑀲𑁆𑀲 𑀲𑀺𑀭𑀺𑀧𑀸𑀮𑀦𑀸𑀫𑀓𑀲𑁆𑀲 𑀭𑀜𑁆𑀜𑁄. 𑀚𑀬𑀲𑀁𑀯𑀘𑁆𑀙𑀭𑁂𑀢𑀺 𑀯𑀺𑀚𑀬𑀬𑀼𑀢𑁆𑀢𑁂 𑀲𑀁𑀯𑀘𑁆𑀙𑀭𑁂. 𑀆𑀭𑀤𑁆𑀥𑀓𑀸𑀮𑀤𑀲𑁆𑀲𑀦𑀢𑁆𑀣𑀁 𑀧𑀼𑀦 ‘‘𑀚𑀬𑀲𑀁𑀯𑀘𑁆𑀙𑀭𑁂 𑀅𑀬𑀁 𑀆𑀭𑀤𑁆𑀥𑀸’’𑀢𑀺 𑀯𑀼𑀢𑁆𑀢𑀁.

𑀓𑀸𑀮𑁂 𑀯𑀲𑁆𑀲𑀦𑁆𑀢𑀺 𑀬𑀼𑀢𑁆𑀢𑀓𑀸𑀮𑁂 𑀯𑀲𑁆𑀲𑀦𑀲𑀻𑀮𑁄. 𑀤𑁂𑀯𑁄𑀢𑀺 𑀫𑁂𑀖𑁄.

𑀦𑀺𑀕𑀫𑀦𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀕𑀫𑀦𑀓𑀣𑀸

𑀏𑀢𑁆𑀢𑀸𑀯𑀢𑀸 𑀘 𑀆𑀭𑀤𑁆𑀥𑀸, 𑀯𑀺𑀦𑀬𑀝𑁆𑀞𑀓𑀣𑀸𑀬 𑀬𑀸;

𑀯𑀡𑁆𑀡𑀦𑀸 𑀦𑀸𑀢𑀺𑀯𑀺𑀢𑁆𑀣𑀺𑀡𑁆𑀡𑀸, 𑀧𑀭𑀺𑀧𑀼𑀡𑁆𑀡𑀯𑀺𑀦𑀺𑀘𑁆𑀙𑀬𑀸.

𑀧𑀜𑁆𑀜𑀸𑀲𑀪𑀸𑀡𑀯𑀸𑀭𑀸𑀬, 𑀢𑀦𑁆𑀢𑀺𑀬𑀸 𑀧𑀭𑀺𑀫𑀸𑀡𑀢𑁄;

𑀲𑀫𑀺𑀚𑁆𑀛𑀦𑀺𑀝𑁆𑀞𑀺𑀧𑀭𑀫𑀸, 𑀬𑀸 𑀯𑀺𑀫𑀢𑀺𑀯𑀺𑀦𑁄𑀤𑀦𑀻.

𑀅𑀦𑀦𑁆𑀢𑀭𑀸𑀬𑁂𑀦 𑀓𑀢𑀸, 𑀅𑀬𑀁 𑀦𑀺𑀝𑁆𑀞𑀫𑀼𑀧𑀸𑀕𑀢𑀸;

𑀬𑀁 𑀢𑀁 𑀦𑀺𑀝𑁆𑀞𑀁 𑀢𑀣𑀸 𑀲𑀩𑁆𑀩𑁂, 𑀧𑀸𑀡𑀺𑀦𑁄 𑀲𑀫𑀦𑁄𑀭𑀣𑀸.

𑀣𑁂𑀭𑁂𑀳𑀺 𑀯𑀺𑀦𑀬𑀜𑁆𑀜𑀽𑀳𑀺, 𑀲𑀼𑀘𑀺𑀲𑀮𑁆𑀮𑁂𑀔𑀯𑀼𑀢𑁆𑀢𑀺𑀳𑀺;

𑀅𑀯𑀺𑀲𑁆𑀲𑀢𑁆𑀣𑀸𑀢𑀺𑀯𑀺𑀢𑁆𑀣𑀺𑀡𑁆𑀡-𑀕𑀦𑁆𑀣𑀪𑀻𑀭𑀽 𑀳𑀺𑀧𑀢𑁆𑀣𑀺𑀢𑀁.

𑀓𑀭𑁄𑀦𑁆𑀢𑁂𑀦 𑀫𑀬𑀸 𑀏𑀯𑀁, 𑀯𑀺𑀦𑀬𑀅𑀢𑁆𑀣𑀯𑀡𑁆𑀡𑀦𑀁;

𑀬𑀁 𑀧𑀢𑁆𑀢𑀁 𑀓𑀼𑀲𑀮𑀁 𑀢𑁂𑀦, 𑀧𑀢𑁆𑀯𑀸 𑀲𑀫𑁆𑀩𑁄𑀥𑀺𑀫𑀼𑀢𑁆𑀢𑀫𑀁.

𑀯𑀺𑀦𑀬𑀢𑁆𑀣𑀁 𑀧𑀓𑀸𑀲𑁂𑀢𑁆𑀯𑀸, 𑀬𑁄 𑀲𑁄𑀧𑀸𑀬𑁂𑀦 𑀮𑀓𑁆𑀔𑀡𑀁;

𑀲𑁄𑀧𑀸𑀬𑀁 𑀯𑀺𑀫𑀢𑀺𑀘𑁆𑀙𑁂𑀤-𑀜𑀸𑀡𑀘𑀓𑁆𑀔𑀼𑀧𑀤𑀸𑀬𑀓𑀁.

𑀯𑀺𑀭𑀤𑁆𑀥𑀢𑁆𑀣𑀯𑀺𑀧𑀮𑁆𑀮𑀸𑀲-𑀕𑀦𑁆𑀣𑀯𑀺𑀢𑁆𑀣𑀸𑀭𑀳𑀸𑀦𑀺𑀬𑀸;

𑀯𑀺𑀲𑀼𑀤𑁆𑀥𑀺𑀁 𑀧𑀸𑀧𑀬𑀺𑀲𑁆𑀲𑀸𑀫𑀺, 𑀲𑀢𑁆𑀢𑁂 𑀲𑀁𑀲𑀸𑀭𑀤𑀼𑀓𑁆𑀔𑀢𑁄.

𑀮𑁄𑀓𑀺𑀬𑁂𑀳𑀺 𑀘 𑀪𑁄𑀕𑁂𑀳𑀺, 𑀕𑀼𑀡𑁂𑀳𑀺 𑀦𑀺𑀔𑀺𑀮𑀸 𑀧𑀚𑀸;

𑀲𑀩𑁆𑀩𑁂𑀳𑀺 𑀲𑀳𑀺𑀢𑀸 𑀳𑁄𑀦𑁆𑀢𑀼, 𑀭𑀢𑀸 𑀲𑀫𑁆𑀩𑀼𑀤𑁆𑀥𑀲𑀸𑀲𑀦𑁂𑀢𑀺.

𑀯𑀺𑀫𑀢𑀺𑀯𑀺𑀦𑁄𑀤𑀦𑀻𑀝𑀻𑀓𑀸 𑀦𑀺𑀝𑁆𑀞𑀺𑀢𑀸.