𑀅𑀧𑀭𑀤𑀼𑀢𑀺𑀬𑀕𑀸𑀣𑀸𑀲𑀗𑁆𑀕𑀡𑀺𑀓𑀁

𑀓𑀸𑀬𑀺𑀓𑀸𑀤𑀺𑀆𑀧𑀢𑁆𑀢𑀺𑀯𑀡𑁆𑀡𑀦𑀸

𑁪𑁭𑁪. ‘‘𑀓𑀢𑀺 𑀆𑀧𑀢𑁆𑀢𑀺𑀬𑁄’’𑀢𑀺𑀆𑀤𑀺𑀦𑀸 𑀉𑀧𑀸𑀮𑀺𑀢𑁆𑀣𑁂𑀭𑁂𑀦 𑀯𑀺𑀦𑀬𑀲𑁆𑀲 𑀧𑀸𑀝𑀯𑀢𑁆𑀣𑀁 𑀲𑀬𑀫𑁂𑀯 𑀧𑀼𑀘𑁆𑀙𑀺𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑀦𑀁 𑀓𑀢𑀁. 𑀪𑀺𑀓𑁆𑀔𑀼𑀦𑀻𑀦𑀁𑀬𑁂𑀯…𑀧𑁂… 𑀅𑀝𑁆𑀞𑀯𑀢𑁆𑀣𑀼𑀓𑀸 𑀦𑀸𑀫𑀸𑀢𑀺 𑀪𑀺𑀓𑁆𑀔𑀼𑀦𑀻𑀦𑀁 𑀧𑀜𑁆𑀜𑀢𑁆𑀢𑀸 𑀏𑀓𑀸 𑀏𑀯 𑀆𑀧𑀢𑁆𑀢𑀺 𑀅𑀝𑁆𑀞𑀯𑀢𑁆𑀣𑀼𑀓𑀸 𑀦𑀸𑀫𑀸𑀢𑀺 𑀅𑀢𑁆𑀣𑁄.

𑁪𑁭𑁫. 𑀓𑀫𑁆𑀫𑀜𑁆𑀘 𑀓𑀫𑁆𑀫𑀧𑀸𑀤𑀓𑀸 𑀘𑀸𑀢𑀺 𑀏𑀢𑁆𑀣 𑀬𑀲𑁆𑀫𑀸 𑀜𑀢𑁆𑀢𑀺𑀓𑀫𑁆𑀫𑁂𑀲𑀼 𑀜𑀢𑁆𑀢𑀺 𑀲𑀬𑀫𑁂𑀯 𑀓𑀫𑁆𑀫𑀁 𑀳𑁄𑀢𑀺, 𑀜𑀢𑁆𑀢𑀺𑀤𑀼𑀢𑀺𑀬𑀜𑀢𑁆𑀢𑀺𑀘𑀢𑀼𑀢𑁆𑀣𑁂𑀲𑀼 𑀓𑀫𑁆𑀫𑁂𑀲𑀼 𑀅𑀦𑀼𑀲𑁆𑀲𑀸𑀯𑀦𑀲𑀗𑁆𑀔𑀸𑀢𑀲𑁆𑀲 𑀓𑀫𑁆𑀫𑀲𑁆𑀲 𑀜𑀢𑁆𑀢𑀺𑀧𑀸𑀤𑀓𑀪𑀸𑀯𑁂𑀦 𑀢𑀺𑀝𑁆𑀞𑀢𑀺, 𑀢𑀲𑁆𑀫𑀸 𑀇𑀫𑀸𑀦𑀺 𑀤𑁆𑀯𑁂 ‘‘𑀜𑀢𑁆𑀢𑀺𑀓𑀺𑀘𑁆𑀘𑀸𑀦𑀻’’𑀢𑀺 𑀯𑀼𑀢𑁆𑀢𑀸𑀦𑀺.

𑀧𑀸𑀘𑀺𑀢𑁆𑀢𑀺𑀬𑁂𑀦 𑀲𑀤𑁆𑀥𑀺𑀁 𑀤𑀼𑀓𑁆𑀓𑀝𑀸 𑀓𑀢𑀸𑀢𑀺 𑀤𑀲𑀲𑀼𑀧𑀺 𑀲𑀺𑀓𑁆𑀔𑀸𑀧𑀤𑁂𑀲𑀼 𑀏𑀓𑀢𑁄𑀉𑀧𑀲𑀫𑁆𑀧𑀦𑁆𑀦𑀸𑀬 𑀯𑀲𑁂𑀦 𑀯𑀼𑀢𑁆𑀢𑀤𑀼𑀓𑁆𑀓𑀝𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀧𑀞𑀫𑀲𑀺𑀓𑁆𑀔𑀸𑀧𑀤𑀫𑁆𑀳𑀻𑀢𑀺 𑀪𑀺𑀓𑁆𑀔𑀼𑀦𑁄𑀯𑀸𑀤𑀯𑀕𑁆𑀕𑀲𑁆𑀲 𑀧𑀞𑀫𑀲𑀺𑀓𑁆𑀔𑀸𑀧𑀤𑀯𑀺𑀪𑀗𑁆𑀕𑁂 (𑀧𑀸𑀘𑀺. 𑁧𑁪𑁪 𑀆𑀤𑀬𑁄). 𑀅𑀥𑀫𑁆𑀫𑀓𑀫𑁆𑀫𑁂𑀢𑀺 𑀪𑀺𑀓𑁆𑀔𑀼𑀦𑁄𑀯𑀸𑀤𑀓𑀲𑀫𑁆𑀫𑀼𑀢𑀺𑀓𑀫𑁆𑀫𑁂 𑀅𑀥𑀫𑁆𑀫𑀓𑀫𑁆𑀫𑁂 𑀚𑀸𑀢𑁂 𑀆𑀧𑀚𑁆𑀚𑀺𑀢𑀩𑁆𑀩𑀸 𑀤𑁆𑀯𑁂 𑀆𑀧𑀢𑁆𑀢𑀺𑀦𑀯𑀓𑀸, 𑀥𑀫𑁆𑀫𑀓𑀫𑁆𑀫𑁂 𑀤𑁆𑀯𑁂 𑀆𑀧𑀢𑁆𑀢𑀺𑀦𑀯𑀓𑀸𑀢𑀺 𑀘𑀢𑁆𑀢𑀸𑀭𑁄 𑀦𑀯𑀓𑀸 𑀯𑀼𑀢𑁆𑀢𑀸. 𑀆𑀫𑀓𑀥𑀜𑁆𑀜𑀁 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀪𑀼𑀜𑁆𑀚𑀦𑁆𑀢𑀺𑀬𑀸 𑀯𑀺𑀜𑁆𑀜𑀸𑀧𑀦𑀸𑀤𑀺𑀧𑀼𑀩𑁆𑀩𑀧𑀬𑁄𑀕𑁂 𑀤𑀼𑀓𑁆𑀓𑀝𑀁, 𑀅𑀚𑁆𑀛𑁄𑀳𑀸𑀭𑁂 𑀧𑀸𑀘𑀺𑀢𑁆𑀢𑀺𑀬𑀁. 𑀧𑀸𑀘𑀺𑀢𑁆𑀢𑀺𑀬𑁂𑀦 𑀲𑀤𑁆𑀥𑀺𑀁 𑀤𑀼𑀓𑁆𑀓𑀝𑀸 𑀓𑀢𑀸𑀬𑁂𑀯𑀸𑀢𑀺 𑀯𑀼𑀢𑁆𑀢𑀁.

𑀯𑀺𑀚𑀳𑀦𑁆𑀢𑀻 𑀢𑀺𑀝𑁆𑀞𑀢𑀻𑀢𑀺𑀆𑀤𑀻𑀲𑀼 𑀬𑀤𑀸 𑀪𑀺𑀓𑁆𑀔𑀼𑀦𑀺𑀬𑀸 𑀏𑀓𑁂𑀦 𑀧𑀸𑀤𑁂𑀦 𑀳𑀢𑁆𑀣𑀧𑀸𑀲𑀁 𑀯𑀺𑀚𑀳𑀺𑀢𑁆𑀯𑀸 𑀞𑀢𑁆𑀯𑀸 𑀓𑀺𑀜𑁆𑀘𑀺 𑀓𑀫𑁆𑀫𑀁 𑀓𑀢𑁆𑀯𑀸 𑀢𑀢𑁄 𑀅𑀧𑀭𑁂𑀦 𑀧𑀸𑀤𑁂𑀦 𑀯𑀺𑀚𑀳𑀺𑀢𑁆𑀯𑀸 𑀞𑀸𑀢𑀼𑀓𑀸𑀫𑀢𑀸 𑀉𑀧𑁆𑀧𑀚𑁆𑀚𑀢𑀺, 𑀢𑀤𑀸 𑀲𑀸 𑀬𑀣𑀸𑀓𑁆𑀓𑀫𑀁 ‘‘𑀯𑀺𑀚𑀳𑀦𑁆𑀢𑀻 𑀢𑀺𑀝𑁆𑀞𑀢𑀺, 𑀯𑀺𑀚𑀳𑀺𑀢𑁆𑀯𑀸 𑀢𑀺𑀝𑁆𑀞𑀢𑀻’’𑀢𑀺 𑀇𑀫𑀁 𑀯𑁄𑀳𑀸𑀭𑀁 𑀮𑀪𑀢𑀺. 𑀅𑀜𑁆𑀜𑀣𑀸 𑀳𑀺𑀲𑁆𑀲𑀸 𑀕𑀸𑀫𑀽𑀧𑀘𑀸𑀭𑀫𑁄𑀓𑁆𑀓𑀦𑁆𑀢𑀺𑀬𑀸 𑀯𑀺𑀲𑁂𑀲𑁄 𑀦 𑀲𑀺𑀬𑀸 𑀳𑀢𑁆𑀣𑀧𑀸𑀲𑀯𑀺𑀚𑀳𑀦𑀲𑁆𑀲𑀸𑀧𑀺 𑀕𑀫𑀦𑀢𑁆𑀢𑀸. 𑀦𑀺𑀲𑀻𑀤𑀢𑀺 𑀯𑀸 𑀦𑀺𑀧𑀚𑁆𑀚𑀢𑀺 𑀯𑀸𑀢𑀺 𑀏𑀢𑁆𑀣𑀸𑀧𑀺 𑀬𑀣𑀸𑀯𑀼𑀢𑁆𑀢𑀸𑀥𑀺𑀧𑁆𑀧𑀸𑀬𑁂𑀦 𑀅𑀤𑁆𑀥𑀸𑀲𑀦𑁂𑀦 𑀳𑀢𑁆𑀣𑀧𑀸𑀲𑀁 𑀯𑀺𑀚𑀳𑀦𑁆𑀢𑀻 𑀦𑀺𑀲𑀻𑀤𑀢𑀺, 𑀲𑀓𑀮𑁂𑀦 𑀯𑀸 𑀆𑀲𑀦𑁂𑀦 𑀯𑀺𑀚𑀳𑀺𑀢𑁆𑀯𑀸 𑀦𑀺𑀲𑀻𑀤𑀢𑀺, 𑀅𑀤𑁆𑀥𑀲𑀭𑀻𑀭𑁂𑀦 𑀯𑀺𑀚𑀳𑀦𑁆𑀢𑀻 𑀦𑀺𑀧𑀚𑁆𑀚𑀢𑀺, 𑀲𑀓𑀮𑁂𑀦 𑀲𑀭𑀻𑀭𑁂𑀦 𑀯𑀺𑀚𑀳𑀺𑀢𑁆𑀯𑀸 𑀦𑀺𑀧𑀚𑁆𑀚𑀢𑀻𑀢𑀺 𑀬𑁄𑀚𑁂𑀢𑀩𑁆𑀩𑀁.

𑀓𑀸𑀬𑀺𑀓𑀸𑀤𑀺𑀆𑀧𑀢𑁆𑀢𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀸𑀘𑀺𑀢𑁆𑀢𑀺𑀬𑀯𑀡𑁆𑀡𑀦𑀸

𑁪𑁭𑁬. 𑀲𑀩𑁆𑀩𑀸𑀦𑀺 𑀦𑀸𑀦𑀸𑀯𑀢𑁆𑀣𑀼𑀓𑀸𑀦𑀻𑀢𑀺 𑀲𑀧𑁆𑀧𑀺𑀦𑀯𑀦𑀻𑀢𑀸𑀤𑀻𑀦𑀁 𑀧𑀜𑁆𑀘𑀦𑁆𑀦𑀁 𑀯𑀢𑁆𑀣𑀽𑀦𑀁 𑀪𑁂𑀤𑁂𑀦 𑀧𑀸𑀘𑀺𑀢𑁆𑀢𑀺𑀬𑀸𑀦𑀺 𑀧𑀜𑁆𑀘 𑀦𑀸𑀦𑀸𑀯𑀢𑁆𑀣𑀼𑀓𑀸𑀦𑀺. 𑀏𑀲 𑀦𑀬𑁄 𑀧𑀡𑀻𑀢𑀪𑁄𑀚𑀦𑀯𑀺𑀲𑀬𑁂 𑀦𑀯 𑀧𑀸𑀘𑀺𑀢𑁆𑀢𑀺𑀬𑀸𑀦𑀻𑀢𑀺𑀆𑀤𑀻𑀲𑀼𑀧𑀺. 𑀏𑀢𑁂𑀦 𑀪𑁂𑀲𑀚𑁆𑀚𑀧𑀡𑀻𑀢𑀪𑁄𑀚𑀦𑀲𑀺𑀓𑁆𑀔𑀸𑀧𑀤𑀸𑀦𑀺 𑀏𑀓𑁂𑀓𑀲𑀺𑀓𑁆𑀔𑀸𑀧𑀤𑀯𑀲𑁂𑀦 𑀧𑀜𑁆𑀜𑀢𑁆𑀢𑀸𑀦𑀺𑀧𑀺 𑀯𑀢𑁆𑀣𑀼𑀪𑁂𑀤𑁂𑀦 𑀧𑀘𑁆𑀘𑁂𑀓𑀁 𑀧𑀜𑁆𑀘𑀲𑀺𑀓𑁆𑀔𑀸𑀧𑀤𑀦𑀯𑀲𑀺𑀓𑁆𑀔𑀸𑀧𑀤𑀲𑀤𑀺𑀲𑀸𑀦𑀺 𑀪𑀺𑀓𑁆𑀔𑀼𑀦𑀻𑀦𑀁 𑀧𑀸𑀝𑀺𑀤𑁂𑀲𑀦𑀻𑀬𑀸𑀧𑀢𑁆𑀢𑀺𑀬𑁄 𑀯𑀺𑀬𑀸𑀢𑀺 𑀤𑀲𑁆𑀲𑁂𑀢𑀺. 𑀢𑁂𑀦𑁂𑀯 ‘‘𑀦𑀸𑀦𑀸𑀯𑀢𑁆𑀣𑀼𑀓𑀸𑀦𑀻’’𑀢𑀺 𑀯𑀼𑀢𑁆𑀢𑀁. 𑀲𑀧𑁆𑀧𑀺𑀁 𑀏𑀯 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀅𑀦𑁂𑀓𑀪𑀸𑀚𑀦𑁂𑀲𑀼 𑀞𑀧𑁂𑀢𑁆𑀯𑀸 𑀲𑀢𑁆𑀢𑀸𑀳𑀁 𑀅𑀢𑀺𑀓𑁆𑀓𑀸𑀫𑁂𑀦𑁆𑀢𑀲𑁆𑀲 𑀪𑀸𑀚𑀦𑀕𑀡𑀦𑀸𑀬 𑀲𑀫𑁆𑀪𑀯𑀦𑁆𑀢𑀺𑀬𑁄 𑀩𑀳𑀼𑀓𑀸𑀧𑀺 𑀆𑀧𑀢𑁆𑀢𑀺𑀬𑁄 𑀏𑀓𑀯𑀢𑁆𑀣𑀼𑀓𑀸 𑀏𑀯 𑀳𑁄𑀦𑁆𑀢𑀺, 𑀏𑀯𑀁 𑀲𑀧𑁆𑀧𑀺𑀪𑁄𑀚𑀦𑀫𑁂𑀯 𑀩𑀳𑀽𑀲𑀼 𑀞𑀸𑀦𑁂𑀲𑀼 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀏𑀓𑀢𑁄 𑀯𑀸 𑀯𑀺𑀲𑀼𑀁 𑀯𑀺𑀲𑀼𑀫𑁂𑀯 𑀯𑀸 𑀪𑀼𑀜𑁆𑀚𑀦𑁆𑀢𑀲𑁆𑀲 𑀆𑀧𑀢𑁆𑀢𑀺𑀬𑁄 𑀏𑀓𑀯𑀢𑁆𑀣𑀼𑀓𑀸 𑀏𑀯𑀸𑀢𑀺 𑀤𑀝𑁆𑀞𑀩𑁆𑀩𑀸.

𑀧𑀸𑀴𑀺𑀬𑀁 𑀏𑀓𑀯𑀸𑀘𑀸𑀬 𑀤𑁂𑀲𑁂𑀬𑁆𑀬, 𑀯𑀼𑀢𑁆𑀢𑀸 𑀆𑀤𑀺𑀘𑁆𑀘𑀩𑀦𑁆𑀥𑀼𑀦𑀸𑀢𑀺 𑀏𑀢𑁆𑀣 ‘‘𑀤𑁂𑀲𑁂𑀬𑁆𑀬𑀸𑀢𑀺 𑀯𑀼𑀢𑁆𑀢𑀸’’𑀢𑀺 𑀇𑀢𑀺-𑀲𑀤𑁆𑀤𑀁 𑀅𑀚𑁆𑀛𑀸𑀳𑀭𑀺𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑀁. 𑀏𑀯𑀁 𑀲𑁂𑀲𑁂𑀲𑀼𑀧𑀺.

𑀪𑁂𑀤𑀸𑀦𑀼𑀯𑀢𑁆𑀢𑀓𑀸𑀦𑀦𑁆𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁄 𑀮𑀼𑀢𑁆𑀢𑀦𑀺𑀤𑁆𑀤𑀺𑀝𑁆𑀞𑁄. 𑀬𑀸𑀯𑀢𑀢𑀺𑀬𑀓𑀸 𑀘 𑀲𑀩𑁆𑀩𑁂 𑀉𑀪𑀢𑁄𑀯𑀺𑀪𑀗𑁆𑀕𑁂 𑀆𑀕𑀢𑀸, 𑀲𑀗𑁆𑀖𑀸𑀤𑀺𑀲𑁂𑀲𑀲𑀸𑀫𑀜𑁆𑀜𑁂𑀦 𑀏𑀓𑀁, 𑀧𑀸𑀘𑀺𑀢𑁆𑀢𑀺𑀬𑀲𑀸𑀫𑀜𑁆𑀜𑁂𑀦 𑀘 𑀏𑀓𑀁 𑀓𑀢𑁆𑀯𑀸 ‘‘𑀬𑀸𑀯𑀢𑀢𑀺𑀬𑀓𑁂 𑀢𑀺𑀲𑁆𑀲𑁄’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀢𑁆𑀣 𑀘 𑀜𑀢𑁆𑀢𑀺𑀬𑀸 𑀤𑀼𑀓𑁆𑀓𑀝𑀁, 𑀤𑁆𑀯𑀻𑀳𑀺 𑀓𑀫𑁆𑀫𑀯𑀸𑀘𑀸𑀳𑀺 𑀣𑀼𑀮𑁆𑀮𑀘𑁆𑀘𑀬𑀸𑀧𑀺 𑀲𑀦𑁆𑀢𑀺 𑀏𑀯. 𑀢𑀸𑀦𑀺 𑀫𑀸𑀢𑀺𑀓𑀸𑀬 𑀦 𑀆𑀕𑀢𑀸𑀦𑀺. 𑀫𑀸𑀢𑀺𑀓𑀸𑀕𑀢𑀯𑀲𑁂𑀦 𑀳𑁂𑀢𑁆𑀣 ‘‘𑀢𑀺𑀲𑁆𑀲𑁄’’𑀢𑀺 𑀯𑀼𑀢𑁆𑀢𑀁.

𑀲𑀗𑁆𑀖𑀸𑀤𑀻𑀳𑀻𑀢𑀺 𑀲𑀗𑁆𑀖𑀕𑀡𑀧𑀼𑀕𑁆𑀕𑀮𑁂𑀳𑀺 𑀓𑀸𑀭𑀡𑀪𑀽𑀢𑁂𑀳𑀺. 𑀅𑀩𑁆𑀪𑀼𑀡𑁆𑀳𑀲𑀻𑀮𑁄𑀢𑀺 𑀧𑀭𑀺𑀲𑀼𑀤𑁆𑀥𑀪𑀸𑀯𑀽𑀧𑀕𑀫𑀦𑁂𑀦 𑀅𑀪𑀺𑀦𑀯𑀼𑀧𑁆𑀧𑀦𑁆𑀦𑀲𑀻𑀮𑁄. 𑀅𑀪𑀺𑀦𑀯𑀼𑀧𑁆𑀧𑀦𑁆𑀦𑀜𑁆𑀳𑀺 ‘‘𑀅𑀩𑁆𑀪𑀼𑀡𑁆𑀳’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀧𑀭𑀺𑀲𑀼𑀤𑁆𑀥𑀲𑀻𑀮𑁄𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀧𑀸𑀓𑀢𑀺𑀓𑁄’’𑀢𑀺.

‘‘𑀓𑁄𑀲𑀫𑁆𑀩𑀓𑀓𑁆𑀔𑀦𑁆𑀥𑀓𑁂 𑀯𑀼𑀢𑁆𑀢𑀸𑀦𑀺𑀲𑀁𑀲𑁂’’𑀢𑀺 𑀇𑀤𑀁 𑀓𑁄𑀲𑀫𑁆𑀩𑀓𑀓𑁆𑀔𑀦𑁆𑀥𑀓𑁂 ‘‘𑀲𑀘𑁂 𑀫𑀁 𑀇𑀫𑁂 𑀪𑀺𑀓𑁆𑀔𑀽 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂 𑀉𑀓𑁆𑀔𑀺𑀧𑀺𑀲𑁆𑀲𑀦𑁆𑀢𑀺, 𑀦 𑀫𑀬𑀸 𑀲𑀤𑁆𑀥𑀺𑀁 𑀉𑀧𑁄𑀲𑀣𑀁 𑀓𑀭𑀺𑀲𑁆𑀲𑀦𑁆𑀢𑀻’’𑀢𑀺𑀆𑀤𑀺𑀦𑀸 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂 𑀆𑀤𑀻𑀦𑀯𑀁 𑀤𑀲𑁆𑀲𑁂𑀢𑁆𑀯𑀸 𑀧𑀭𑁂𑀲𑀫𑁆𑀧𑀺 𑀲𑀤𑁆𑀥𑀸𑀬 𑀆𑀧𑀢𑁆𑀢𑀺𑀤𑁂𑀲𑀦𑀸𑀯𑀺𑀥𑀸𑀦𑀫𑀼𑀔𑁂𑀦 𑀲𑀸𑀫𑀢𑁆𑀣𑀺𑀬𑀢𑁄 𑀧𑀓𑀸𑀲𑀺𑀢𑁄. 𑀏𑀓𑀢𑁄 𑀉𑀧𑁄𑀲𑀣𑀓𑀭𑀡, 𑀧𑀯𑀸𑀭𑀡𑀸𑀓𑀭𑀡, 𑀲𑀗𑁆𑀖𑀓𑀫𑁆𑀫𑀓𑀭𑀡, 𑀆𑀲𑀦𑁂𑀦𑀺𑀲𑀻𑀤𑀦, 𑀬𑀸𑀕𑀼𑀧𑀸𑀦𑁂𑀦𑀺𑀲𑀻𑀤𑀦, 𑀪𑀢𑁆𑀢𑀕𑁆𑀕𑁂𑀦𑀺𑀲𑀻𑀤𑀦, 𑀏𑀓𑀘𑁆𑀙𑀦𑁆𑀦𑁂𑀲𑀬𑀦, 𑀬𑀣𑀸𑀯𑀼𑀟𑁆𑀠𑀅𑀪𑀺𑀯𑀸𑀤𑀦𑀸𑀤𑀺𑀓𑀭𑀡𑀲𑀗𑁆𑀔𑀸𑀢𑁂 𑀅𑀝𑁆𑀞𑀸𑀦𑀺𑀲𑀁𑀲𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑀘𑀢𑀼𑀦𑁆𑀦𑀦𑁆𑀢𑀺 𑀯𑀺𑀦𑀬𑀧𑀺𑀝𑀓𑁂 𑀆𑀕𑀢𑀸𑀦𑀁 𑀯𑀲𑁂𑀦 𑀯𑀼𑀢𑁆𑀢𑀁. 𑀓𑀢𑀫𑀸 𑀧𑀦 𑀲𑀸𑀢𑀺 𑀲𑀸 𑀘𑀢𑀼𑀩𑁆𑀩𑀺𑀥𑀸 𑀅𑀘𑁆𑀘𑀬𑀤𑁂𑀲𑀦𑀸 𑀓𑀢𑀫𑀸𑀢𑀺 𑀅𑀢𑁆𑀣𑁄. 𑀅𑀪𑀺𑀫𑀸𑀭𑀸𑀦𑀦𑁆𑀢𑀺 𑀫𑀸𑀭𑀡𑀢𑁆𑀣𑀸𑀬 𑀧𑀬𑁄𑀚𑀺𑀢𑀥𑀦𑀼𑀕𑁆𑀕𑀳𑀸𑀦𑀁. 𑀉𑀧𑀝𑁆𑀞𑀸𑀬𑀺𑀓𑀸𑀬𑀸𑀢𑀺 𑀲𑀳𑀲𑁂𑀬𑁆𑀬𑀲𑀺𑀓𑁆𑀔𑀸𑀧𑀤𑀯𑀢𑁆𑀣𑀼𑀲𑁆𑀫𑀺𑀁 𑀆𑀕𑀢𑀸𑀬.

𑀅𑀝𑁆𑀞𑀦𑁆𑀦𑀁 𑀪𑀺𑀓𑁆𑀔𑀼𑀦𑀻𑀦𑀦𑁆𑀢𑀺 𑀣𑁂𑀭𑀸𑀲𑀦𑀢𑁄 𑀧𑀝𑁆𑀞𑀸𑀬 𑀅𑀝𑁆𑀞𑀳𑀺 𑀪𑀺𑀓𑁆𑀔𑀼𑀦𑀻𑀳𑀺 𑀇𑀢𑀭𑀸𑀬 𑀆𑀕𑀢𑀸𑀬 𑀯𑀼𑀟𑁆𑀠𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀆𑀲𑀦𑀁 𑀤𑀸𑀢𑀩𑁆𑀩𑀁. 𑀅𑀝𑁆𑀞𑀦𑁆𑀦𑀁 𑀧𑀦 𑀪𑀺𑀓𑁆𑀔𑀼𑀦𑀻𑀦𑀁 𑀦𑀯𑀓𑀸𑀬 𑀆𑀕𑀢𑀸𑀬 𑀅𑀤𑀸𑀢𑀼𑀫𑁆𑀧𑀺 𑀯𑀝𑁆𑀝𑀢𑀺. 𑀢𑀸𑀬 𑀧𑀦 𑀲𑀗𑁆𑀖𑀦𑀯𑀓𑀸𑀲𑀦𑁂 𑀮𑀤𑁆𑀥𑁄𑀓𑀸𑀲𑁂 𑀦𑀺𑀲𑀻𑀤𑀺𑀢𑀩𑁆𑀩𑀁. 𑀅𑀣 𑀯𑀸 𑀅𑀝𑁆𑀞𑀦𑁆𑀦𑀁 𑀯𑀼𑀟𑁆𑀠𑀸𑀦𑀁 𑀪𑀺𑀓𑁆𑀔𑀼𑀦𑀻𑀦𑀁 𑀇𑀢𑀭𑀸𑀬 𑀦𑀯𑀓𑀢𑀭𑀸𑀬 𑀆𑀲𑀦𑀁 𑀤𑀸𑀢𑀩𑁆𑀩𑀁. 𑀓𑀫𑁆𑀫𑀸𑀦𑀺 𑀦𑀯𑀸𑀢𑀺 𑀑𑀲𑀸𑀭𑀡𑀸𑀤𑀻𑀦𑀺 𑀦𑀯 𑀏𑀯.

𑀧𑀸𑀘𑀺𑀢𑁆𑀢𑀺𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀯𑀦𑁆𑀤𑀦𑀻𑀬𑀧𑀼𑀕𑁆𑀕𑀮𑀸𑀤𑀺𑀯𑀡𑁆𑀡𑀦𑀸

𑁪𑁭𑁭. 𑀤𑀲 𑀚𑀦𑀸𑀢𑀺 ‘‘𑀤𑀲 𑀇𑀫𑁂, 𑀪𑀺𑀓𑁆𑀔𑀯𑁂, 𑀅𑀯𑀦𑁆𑀤𑀺𑀬𑀸’’𑀢𑀺𑀆𑀤𑀺𑀦𑀸 (𑀧𑀭𑀺. 𑁩𑁩𑁦) 𑀯𑀼𑀢𑁆𑀢𑀸 𑀦𑀯𑀓𑀅𑀦𑀼𑀧𑀲𑀫𑁆𑀧𑀦𑁆𑀦𑀦𑀸𑀦𑀸𑀲𑀁𑀯𑀸𑀲𑀓𑀫𑀸𑀢𑀼𑀕𑀸𑀫𑀧𑀡𑁆𑀟𑀓𑀸 𑀧𑀜𑁆𑀘, 𑀧𑀸𑀭𑀺𑀯𑀸𑀲𑀺𑀓𑀸𑀤𑀬𑁄 𑀘 𑀧𑀜𑁆𑀘𑀸𑀢𑀺 𑀤𑀲 𑀚𑀦𑀸.

𑀤𑁆𑀯𑀸𑀤𑀲 𑀓𑀫𑁆𑀫𑀤𑁄𑀲𑀸𑀢𑀺 𑀤𑁄𑀲𑀬𑀼𑀢𑁆𑀢𑀓𑀫𑁆𑀫𑀸𑀦𑀺 𑀤𑁆𑀯𑀸𑀤𑀲𑀸𑀢𑀺 𑀅𑀢𑁆𑀣𑁄. 𑀓𑀫𑁆𑀫𑀲𑀫𑁆𑀧𑀢𑁆𑀢𑀺𑀬𑁄𑀢𑀺 𑀲𑀫𑁆𑀧𑀦𑁆𑀦𑀓𑀫𑁆𑀫𑀸𑀦𑀺, 𑀯𑀺𑀲𑀼𑀤𑁆𑀥𑀓𑀫𑁆𑀫𑀸𑀦𑀻𑀢𑀺 𑀅𑀢𑁆𑀣𑁄. 𑀏𑀢𑀤𑁂𑀯𑀸𑀢𑀺 𑀥𑀫𑁆𑀫𑁂𑀦 𑀲𑀫𑀕𑁆𑀕𑀫𑁂𑀯.

𑀅𑀦𑀦𑁆𑀢𑀁 𑀦𑀺𑀩𑁆𑀩𑀸𑀦𑀁 𑀅𑀚𑀺𑀦𑀺 𑀚𑀺𑀦𑀺𑀢𑁆𑀯𑀸 𑀧𑀝𑀺𑀮𑀪𑀢𑀻𑀢𑀺 𑀅𑀦𑀦𑁆𑀢𑀚𑀺𑀦𑁄𑀢𑀺 𑀆𑀳 ‘‘𑀧𑀭𑀺𑀬𑀦𑁆𑀢’’𑀇𑀘𑁆𑀘𑀸𑀤𑀺. 𑀲𑁆𑀯𑁂𑀯𑀸𑀢𑀺 𑀲𑁄 𑀏𑀯 𑀪𑀕𑀯𑀸.

‘‘𑀯𑀺𑀦𑀬𑀁 𑀧𑀝𑀺𑀚𑀸𑀦𑀦𑁆𑀢𑀲𑁆𑀲, 𑀯𑀺𑀦𑀬𑀸𑀦𑀺 𑀲𑀼𑀡𑁄𑀫 𑀢𑁂’’𑀢𑀺𑀆𑀤𑀺𑀦𑀸 𑀉𑀧𑀸𑀮𑀺𑀢𑁆𑀣𑁂𑀭𑁂𑀦𑁂𑀯 𑀏𑀓𑀁 𑀯𑀺𑀦𑀬𑀥𑀭𑀁 𑀲𑀫𑁆𑀫𑀼𑀔𑁂 𑀞𑀺𑀢𑀁 𑀧𑀼𑀘𑁆𑀙𑀦𑁆𑀢𑁂𑀦 𑀯𑀺𑀬 𑀧𑀼𑀘𑁆𑀙𑀺𑀢𑁆𑀯𑀸 𑀢𑁂𑀦 𑀯𑀺𑀲𑁆𑀲𑀚𑁆𑀚𑀺𑀢𑀁 𑀯𑀺𑀬 𑀯𑀺𑀲𑁆𑀲𑀚𑁆𑀚𑀦𑀁 𑀓𑀢𑀁. 𑀢𑀢𑁆𑀣 𑀯𑀺𑀦𑀬𑀁 𑀧𑀝𑀺𑀚𑀸𑀦𑀦𑁆𑀢𑀲𑁆𑀲𑀸𑀢𑀺 𑀯𑀺𑀦𑀬𑀁 𑀚𑀸𑀦𑀸𑀫𑀻𑀢𑀺 𑀧𑀝𑀺𑀚𑀸𑀦𑀦𑁆𑀢𑀲𑁆𑀲. 𑀯𑀺𑀦𑀬𑀸𑀦𑀻𑀢𑀺 𑀯𑀺𑀦𑀬𑁂 𑀢𑀬𑀸 𑀯𑀼𑀘𑁆𑀘𑀫𑀸𑀦𑁂 𑀲𑀼𑀡𑁄𑀫.

𑁪𑁭𑁮. 𑀧𑀸𑀴𑀺𑀬𑀁 𑀧𑀸𑀭𑀸𑀚𑀺𑀓𑀸𑀢𑀺𑀆𑀤𑀺 𑀉𑀪𑀢𑁄𑀯𑀺𑀪𑀗𑁆𑀕𑁂𑀲𑀼 𑀆𑀕𑀢𑁂𑀲𑀼 𑀅𑀕𑁆𑀕𑀳𑀺𑀢𑀕𑁆𑀕𑀳𑀡𑀯𑀲𑁂𑀦 𑀯𑀼𑀢𑁆𑀢𑀁.

𑀅𑀯𑀦𑁆𑀤𑀦𑀻𑀬𑀧𑀼𑀕𑁆𑀕𑀮𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.