𑀉𑀧𑀸𑀮𑀺𑀧𑀜𑁆𑀘𑀓𑀁

𑀦𑀧𑁆𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑀯𑀕𑁆𑀕𑀯𑀡𑁆𑀡𑀦𑀸

𑁪𑁨𑁧. 𑀲𑀫𑀕𑁆𑀕𑁂𑀳𑀺 𑀓𑀭𑀡𑀻𑀬𑀸𑀦𑀻𑀢𑀺 𑀯𑀺𑀯𑀸𑀤𑀸𑀥𑀺𑀓𑀭𑀡𑁂𑀳𑀺 𑀧𑀼𑀩𑁆𑀩𑁂 𑀅𑀲𑀫𑀕𑁆𑀕𑀸 𑀳𑀼𑀢𑁆𑀯𑀸 𑀧𑀘𑁆𑀙𑀸 𑀲𑀸𑀫𑀕𑁆𑀕𑀺𑀁 𑀉𑀧𑀕𑀢𑁂𑀳𑀺 𑀓𑀢𑁆𑀢𑀩𑁆𑀩𑀸𑀦𑀺. 𑀓𑀺𑀁 𑀧𑀦 𑀅𑀲𑀜𑁆𑀜𑀢𑀫𑀺𑀲𑁆𑀲𑀧𑀭𑀺𑀲𑀸𑀬 𑀲𑀤𑁆𑀥𑀺𑀁 𑀮𑀚𑁆𑀚𑀺𑀦𑁄 𑀲𑀸𑀫𑀕𑁆𑀕𑀺𑀁 𑀓𑀭𑁄𑀦𑁆𑀢𑀻𑀢𑀺 𑀆𑀳 ‘‘𑀉𑀧𑁄𑀲𑀣𑀧𑀯𑀸𑀭𑀡𑀸𑀤𑀻𑀲𑀼 𑀳𑀻’’𑀢𑀺𑀆𑀤𑀺. 𑀢𑀢𑁆𑀣 𑀞𑀺𑀢𑀸𑀲𑀽𑀢𑀺 𑀉𑀧𑁄𑀲𑀣𑀧𑀯𑀸𑀭𑀡𑀸𑀲𑀼 𑀅𑀧𑁆𑀧𑀯𑀢𑁆𑀢𑀻𑀲𑀼. 𑀉𑀧𑀢𑁆𑀣𑀫𑁆𑀪𑁄 𑀦 𑀤𑀸𑀢𑀩𑁆𑀩𑁄𑀢𑀺 𑀉𑀧𑀭𑀽𑀧𑀭𑀺 𑀅𑀧𑁆𑀧𑀯𑀢𑁆𑀢𑀦𑀢𑁆𑀣𑀸𑀬 𑀫𑀬𑀫𑁆𑀧𑀺 𑀉𑀧𑁄𑀲𑀣𑀁 𑀦 𑀓𑀭𑀺𑀲𑁆𑀲𑀸𑀫𑀸𑀢𑀺𑀆𑀤𑀺𑀦𑀸 𑀓𑀮𑀳𑀲𑁆𑀲 𑀉𑀧𑀢𑁆𑀣𑀫𑁆𑀪𑁄 𑀦 𑀤𑀸𑀢𑀩𑁆𑀩𑁄, 𑀥𑀫𑁆𑀫𑁂𑀦 𑀯𑀺𑀦𑀬𑁂𑀦 𑀲𑀸𑀫𑀕𑁆𑀕𑀺𑀁 𑀓𑀢𑁆𑀯𑀸 𑀲𑀫𑀕𑁆𑀕𑁂𑀳𑁂𑀯 𑀅𑀲𑀜𑁆𑀜𑀢𑀸 𑀪𑀺𑀓𑁆𑀔𑀽 𑀯𑀺𑀦𑁂𑀢𑀩𑁆𑀩𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑀸𑀳 ‘‘𑀲𑀘𑁂 𑀲𑀗𑁆𑀖𑁄 𑀅𑀘𑁆𑀘𑀬𑀁 𑀤𑁂𑀲𑀸𑀧𑁂𑀢𑁆𑀯𑀸’’𑀢𑀺𑀆𑀤𑀺. 𑀪𑀺𑀓𑁆𑀔𑀼𑀦𑁄 𑀦𑀓𑁆𑀔𑀫𑀢𑀻𑀢𑀺 𑀓𑁂𑀲𑀼𑀘𑀺 𑀧𑀼𑀕𑁆𑀕𑀮𑁂𑀲𑀼 𑀅𑀧𑁆𑀧𑀫𑀢𑁆𑀢𑀓𑀤𑁄𑀲𑀤𑀲𑁆𑀲𑀦𑁂𑀦 𑀦 𑀭𑀼𑀘𑁆𑀘𑀢𑀺. 𑀤𑀺𑀝𑁆𑀞𑀸𑀯𑀺𑀓𑀫𑁆𑀫𑀫𑁆𑀧𑀺 𑀓𑀢𑁆𑀯𑀸𑀢𑀺 ‘‘𑀦 𑀫𑁂𑀢𑀁 𑀔𑀫𑀢𑀻’’𑀢𑀺 𑀲𑀪𑀸𑀕𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀢𑁆𑀢𑀦𑁄 𑀤𑀺𑀝𑁆𑀞𑀺𑀁 𑀆𑀯𑀺𑀓𑀢𑁆𑀯𑀸. 𑀉𑀧𑁂𑀢𑀩𑁆𑀩𑀸𑀢𑀺 𑀲𑀸𑀲𑀦𑀳𑀸𑀦𑀺𑀬𑀸 𑀅𑀪𑀸𑀯𑀸 𑀲𑀸𑀫𑀕𑁆𑀕𑀺𑀁 𑀅𑀓𑁄𑀧𑁂𑀢𑁆𑀯𑀸 𑀓𑀸𑀬𑀲𑀸𑀫𑀕𑁆𑀕𑀻 𑀤𑀸𑀢𑀩𑁆𑀩𑀸, 𑀈𑀤𑀺𑀲𑁂 𑀞𑀸𑀦𑁂 𑀅𑀮𑀚𑁆𑀚𑀺𑀧𑀭𑀺𑀪𑁄𑀕𑁄 𑀆𑀧𑀢𑁆𑀢𑀺𑀓𑀭𑁄 𑀦 𑀳𑁄𑀢𑀺, 𑀯𑀝𑁆𑀝𑀢𑀺𑀬𑁂𑀯. 𑀬𑁂 𑀧𑀦 𑀲𑀸𑀲𑀦𑀯𑀺𑀦𑀸𑀲𑀸𑀬 𑀧𑀝𑀺𑀧𑀦𑁆𑀦𑀸, 𑀢𑁂𑀳𑀺 𑀲𑀳 𑀦 𑀯𑀢𑁆𑀢𑀢𑀺, 𑀆𑀧𑀢𑁆𑀢𑀺 𑀏𑀯 𑀳𑁄𑀢𑀺 𑀲𑀸𑀲𑀦𑀯𑀺𑀦𑀸𑀲𑁄 𑀘. 𑀢𑁂𑀦𑀸𑀳 ‘‘𑀬𑀢𑁆𑀭 𑀧𑀦 𑀉𑀤𑁆𑀥𑀫𑁆𑀫’’𑀦𑁆𑀢𑀺𑀆𑀤𑀺. ‘‘𑀤𑀺𑀝𑁆𑀞𑀸𑀯𑀺𑀓𑀫𑁆𑀫𑀁 𑀦 𑀯𑀝𑁆𑀝𑀢𑀻’’𑀢𑀺 𑀇𑀫𑀺𑀦𑀸 𑀤𑀺𑀝𑁆𑀞𑀺𑀬𑀸 𑀆𑀯𑀺𑀓𑀢𑀸𑀬𑀧𑀺 𑀆𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑀺.

𑁪𑁨𑁨. 𑀓𑀡𑁆𑀳𑀯𑀸𑀘𑁄𑀢𑀺 𑀭𑀸𑀕𑀤𑁄𑀲𑀸𑀤𑀻𑀳𑀺 𑀓𑀺𑀮𑀺𑀝𑁆𑀞𑀯𑀘𑀦𑁄. 𑀅𑀦𑀢𑁆𑀣𑀓𑀯𑀘𑀦𑀲𑁆𑀲 𑀤𑀻𑀧𑀦𑀁 𑀧𑀓𑀸𑀲𑀦𑀁 𑀅𑀲𑁆𑀲𑀸𑀢𑀺 𑀅𑀦𑀢𑁆𑀣𑀓𑀤𑀻𑀧𑀦𑁄. 𑀫𑀸𑀦𑀁 𑀦𑀺𑀲𑁆𑀲𑀸𑀬𑀸𑀢𑀺 𑀯𑀺𑀦𑀺𑀘𑁆𑀙𑀬𑀓𑀭𑀡𑀁 𑀢𑀯 𑀪𑀸𑀭𑁄𑀢𑀺 𑀲𑀗𑁆𑀖𑁂𑀦 𑀪𑀸𑀭𑁂 𑀅𑀓𑀢𑁂𑀧𑀺 ‘‘𑀅𑀳𑀫𑁂𑀯𑁂𑀢𑁆𑀣 𑀯𑁄𑀳𑀭𑀺𑀢𑀼𑀁 𑀅𑀭𑀳𑀭𑀽𑀧𑁄’’𑀢𑀺 𑀫𑀸𑀦𑀁 𑀦𑀺𑀲𑁆𑀲𑀸𑀬. 𑀬𑀣𑀸𑀤𑀺𑀝𑁆𑀞𑀺𑀬𑀸𑀢𑀺 𑀅𑀦𑀼𑀭𑀽𑀧𑀮𑀤𑁆𑀥𑀺𑀬𑀸. 𑀬𑀲𑁆𑀲 𑀳𑀺 𑀅𑀢𑁆𑀣𑀲𑁆𑀲 𑀬𑀸𑀤𑀺𑀲𑀻 𑀤𑀺𑀝𑁆𑀞𑀺 𑀅𑀦𑀼𑀭𑀽𑀧𑀸, 𑀢𑀁 𑀕𑀳𑁂𑀢𑁆𑀯𑀸 𑀦 𑀩𑁆𑀬𑀸𑀓𑀢𑀸𑀢𑀺 𑀅𑀢𑁆𑀣𑁄.𑀅𑀲𑁆𑀲 𑀅𑀢𑁆𑀢𑀦𑁄𑀢𑀺 𑀅𑀥𑀫𑁆𑀫𑀸𑀤𑀺𑀅𑀢𑁆𑀣𑀁 𑀲𑀦𑁆𑀥𑀸𑀬 𑀯𑀤𑀢𑀺, 𑀦 𑀧𑀼𑀕𑁆𑀕𑀮𑀁, 𑀅𑀲𑁆𑀲 𑀅𑀥𑀫𑁆𑀫𑀸𑀤𑀺𑀅𑀢𑁆𑀣𑀲𑀗𑁆𑀔𑀸𑀢𑀲𑁆𑀲 𑀅𑀢𑁆𑀢𑀦𑁄 𑀲𑀭𑀽𑀧𑀲𑁆𑀲 𑀬𑀸 𑀅𑀦𑀼𑀭𑀽𑀧𑀸 𑀤𑀺𑀝𑁆𑀞𑀻𑀢𑀺 𑀅𑀢𑁆𑀣𑁄. 𑀮𑀤𑁆𑀥𑀺𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸𑀢𑀺 𑀅𑀦𑀼𑀭𑀽𑀧𑀮𑀤𑁆𑀥𑀺𑀁 𑀙𑀟𑁆𑀟𑁂𑀢𑁆𑀯𑀸, 𑀅𑀕𑁆𑀕𑀳𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀅𑀥𑀫𑁆𑀫𑀸𑀤𑀻𑀲𑀼 𑀥𑀫𑁆𑀫𑀸𑀤𑀺𑀮𑀤𑁆𑀥𑀺𑀓𑁄 𑀳𑀼𑀢𑁆𑀯𑀸’’𑀢𑀺. 𑀅𑀣 𑀯𑀸 𑀅𑀢𑁆𑀢𑀦𑁄 𑀮𑀤𑁆𑀥𑀺𑀁 𑀦𑀺𑀕𑀽𑀳𑀺𑀢𑁆𑀯𑀸 𑀧𑀼𑀕𑁆𑀕𑀮𑀸𑀦𑀼𑀕𑀼𑀡𑀁 𑀢𑀣𑀸 𑀩𑁆𑀬𑀸𑀓𑀭𑁄𑀦𑁆𑀢𑁄 𑀦 𑀬𑀣𑀸𑀤𑀺𑀝𑁆𑀞𑀺𑀬𑀸 𑀩𑁆𑀬𑀸𑀓𑀢𑀸 𑀦𑀸𑀫. 𑀇𑀫𑀲𑁆𑀫𑀺𑀁 𑀧𑀓𑁆𑀔𑁂 𑀅𑀥𑀫𑁆𑀫𑀸𑀤𑀻𑀲𑀼 𑀥𑀫𑁆𑀫𑀸𑀤𑀺𑀮𑀤𑁆𑀥𑀺𑀓𑁄 𑀳𑀼𑀢𑁆𑀯𑀸𑀢𑀺 𑀏𑀢𑁆𑀣 𑀅𑀥𑀫𑁆𑀫𑀸𑀤𑀻𑀲𑀼 𑀥𑀫𑁆𑀫𑀸𑀤𑀺𑀮𑀤𑁆𑀥𑀺𑀓𑁄 𑀯𑀺𑀬 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄.

𑀦𑀧𑁆𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀯𑁄𑀳𑀸𑀭𑀯𑀕𑁆𑀕𑀸𑀤𑀺𑀯𑀡𑁆𑀡𑀦𑀸

𑁪𑁨𑁪. 𑀓𑀫𑁆𑀫𑀜𑀢𑁆𑀢𑀻𑀢𑀺 𑀓𑀫𑁆𑀫𑀪𑀽𑀢𑀸 𑀜𑀢𑁆𑀢𑀺. 𑀅𑀦𑀼𑀲𑁆𑀲𑀸𑀯𑀦𑀦𑀺𑀭𑀧𑁂𑀓𑁆𑀔𑀸 𑀜𑀢𑁆𑀢𑀺𑀓𑀫𑁆𑀫𑀪𑀽𑀢𑀸 𑀜𑀢𑁆𑀢𑀻𑀢𑀺 𑀅𑀢𑁆𑀣𑁄. 𑀓𑀫𑁆𑀫𑀧𑀸𑀤𑀜𑀢𑁆𑀢𑀺 𑀦𑀸𑀫 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀸𑀤𑀻𑀲𑀼 𑀅𑀦𑀼𑀲𑁆𑀲𑀸𑀯𑀦𑀓𑀫𑁆𑀫𑀲𑁆𑀲 𑀧𑀸𑀤𑀪𑀽𑀢𑀸 𑀅𑀥𑀺𑀝𑁆𑀞𑀸𑀦𑀪𑀽𑀢𑀸 𑀜𑀢𑁆𑀢𑀺. 𑀦𑀯𑀲𑀼 𑀞𑀸𑀦𑁂𑀲𑀽𑀢𑀺 𑀑𑀲𑀸𑀭𑀡𑀸𑀤𑀻𑀲𑀼 𑀦𑀯𑀲𑀼 𑀞𑀸𑀦𑁂𑀲𑀼. 𑀤𑁆𑀯𑀻𑀲𑀼 𑀞𑀸𑀦𑁂𑀲𑀽𑀢𑀺 𑀜𑀢𑁆𑀢𑀺𑀤𑀼𑀢𑀺𑀬𑀜𑀢𑁆𑀢𑀺𑀘𑀢𑀼𑀢𑁆𑀣𑀓𑀫𑁆𑀫𑁂𑀲𑀼.

𑀲𑀼𑀢𑁆𑀢𑀸𑀦𑀼𑀮𑁄𑀫𑀦𑁆𑀢𑀺 𑀉𑀪𑀢𑁄𑀯𑀺𑀪𑀗𑁆𑀕𑁂 𑀲𑀼𑀢𑁆𑀢𑀸𑀦𑀼𑀮𑁄𑀫𑀪𑀽𑀢𑁂 𑀫𑀳𑀸𑀧𑀤𑁂𑀲𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀯𑀺𑀦𑀬𑀸𑀦𑀼𑀮𑁄𑀫𑀦𑁆𑀢𑀺 𑀔𑀦𑁆𑀥𑀓𑀧𑀭𑀺𑀯𑀸𑀭𑀸𑀦𑀼𑀮𑁄𑀫𑀪𑀽𑀢𑁂 𑀫𑀳𑀸𑀧𑀤𑁂𑀲𑁂. 𑀲𑀼𑀢𑁆𑀢𑀦𑁆𑀢𑀺𑀓𑁂 𑀘𑀢𑁆𑀢𑀸𑀭𑁄 𑀫𑀳𑀸𑀧𑀤𑁂𑀲𑁂𑀢𑀺 𑀲𑀼𑀢𑁆𑀢𑀸𑀪𑀺𑀥𑀫𑁆𑀫𑀧𑀺𑀝𑀓𑁂𑀲𑀼 𑀅𑀦𑀼𑀜𑁆𑀜𑀸𑀢𑀧𑀝𑀺𑀓𑁆𑀔𑀺𑀢𑁆𑀢𑀲𑀼𑀢𑁆𑀢𑀸𑀦𑀼𑀮𑁄𑀫𑀯𑀲𑁂𑀦 𑀦𑀬𑀢𑁄 𑀕𑀳𑁂𑀢𑀩𑁆𑀩𑁂 𑀘𑀢𑁆𑀢𑀸𑀭𑁄 𑀅𑀢𑁆𑀣𑁂.

𑁪𑁨𑁫. 𑀤𑀺𑀝𑁆𑀞𑀻𑀦𑀁 𑀆𑀯𑀺𑀓𑀫𑁆𑀫𑀸𑀦𑀻𑀢𑀺 𑀆𑀧𑀢𑁆𑀢𑀺𑀮𑀤𑁆𑀥𑀻𑀦𑀁 𑀧𑀓𑀸𑀲𑀦𑀸𑀦𑀺, 𑀆𑀧𑀢𑁆𑀢𑀺𑀤𑁂𑀲𑀦𑀸𑀓𑀫𑁆𑀫𑀸𑀦𑀻𑀢𑀺 𑀅𑀢𑁆𑀣𑁄.

𑀬𑀣𑀸 𑀘𑀢𑀽𑀳𑀺 𑀧𑀜𑁆𑀘𑀳𑀺 𑀤𑀺𑀝𑁆𑀞𑀺 𑀆𑀯𑀺𑀓𑀢𑀸 𑀳𑁄𑀢𑀻𑀢𑀺 𑀬𑀣𑀸 𑀆𑀯𑀺𑀓𑀢𑁂 𑀘𑀢𑀽𑀳𑀺 𑀧𑀜𑁆𑀘𑀳𑀺 𑀏𑀓𑀻𑀪𑀽𑀢𑁂𑀳𑀺 𑀏𑀓𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀲𑀦𑁆𑀢𑀺𑀓𑁂 𑀆𑀧𑀢𑁆𑀢𑀺 𑀤𑁂𑀲𑀺𑀢𑀸 𑀦𑀸𑀫 𑀳𑁄𑀢𑀺, 𑀏𑀯𑀁 𑀤𑁂𑀲𑁂𑀢𑀻𑀢𑀺 𑀅𑀢𑁆𑀣𑁄. 𑀏𑀯𑀁 𑀤𑁂𑀲𑁂𑀦𑁆𑀢𑁄 𑀘 𑀅𑀢𑁆𑀢𑀦𑀸 𑀲𑀤𑁆𑀥𑀺𑀁 𑀢𑀬𑁄 𑀯𑀸 𑀘𑀢𑁆𑀢𑀸𑀭𑁄 𑀯𑀸 𑀪𑀺𑀓𑁆𑀔𑀽 𑀕𑀳𑁂𑀢𑁆𑀯𑀸 𑀏𑀓𑀲𑁆𑀲 𑀲𑀦𑁆𑀢𑀺𑀓𑁂 𑀤𑁂𑀲𑁂𑀢𑀺. 𑀏𑀯𑀁 𑀤𑁂𑀲𑁂𑀢𑀼𑀁 𑀦 𑀯𑀝𑁆𑀝𑀢𑀺. 𑀤𑁂𑀲𑀺𑀢𑀸 𑀘 𑀆𑀧𑀢𑁆𑀢𑀺 𑀦 𑀯𑀼𑀝𑁆𑀞𑀸𑀢𑀺, 𑀤𑁂𑀲𑀦𑀸𑀧𑀘𑁆𑀘𑀬𑀸 𑀤𑀼𑀓𑁆𑀓𑀝𑀜𑁆𑀘 𑀳𑁄𑀢𑀺. 𑀤𑁆𑀯𑀺𑀦𑁆𑀦𑀁 𑀢𑀺𑀡𑁆𑀡𑀁 𑀧𑀦 𑀏𑀓𑀢𑁄 𑀤𑁂𑀲𑁂𑀢𑀼𑀁 𑀯𑀝𑁆𑀝𑀢𑀺.

𑁪𑁪𑁪. 𑀅𑀤𑀲𑁆𑀲𑀦𑁂𑀦𑀸𑀢𑀺 𑀇𑀫𑀲𑁆𑀲 𑀅𑀓𑀧𑁆𑀧𑀺𑀬𑀁 𑀧𑀭𑀺𑀯𑀚𑁆𑀚𑁂𑀦𑁆𑀢𑀸𑀦𑀁 𑀯𑀺𑀦𑀬𑀥𑀭𑀸𑀦𑀁 𑀧𑀝𑀺𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂𑀦, 𑀢𑁂𑀲𑀁 𑀤𑀺𑀝𑁆𑀞𑀸𑀦𑀼𑀕𑀢𑀺𑀁 𑀅𑀦𑀸𑀧𑀚𑁆𑀚𑀦𑁂𑀦𑀸𑀢𑀺𑀧𑀺 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀅𑀓𑀧𑁆𑀧𑀺𑀬𑁂 𑀓𑀧𑁆𑀧𑀺𑀬𑀲𑀅𑀜𑀢𑀸𑀬𑀸𑀢𑀺 𑀭𑀚𑀢𑀸𑀤𑀺𑀅𑀓𑀧𑁆𑀧𑀺𑀬𑁂 𑀢𑀺𑀧𑀼𑀆𑀤𑀺𑀲𑀜𑁆𑀜𑀺𑀢𑀸𑀬. 𑀧𑀼𑀘𑁆𑀙𑀺𑀢𑁆𑀯𑀸 𑀯𑀸 𑀅𑀜𑁆𑀜𑁂𑀲𑀁 𑀯𑀸 𑀯𑀼𑀘𑁆𑀘𑀫𑀸𑀦𑀁 𑀅𑀲𑀼𑀡𑀦𑁆𑀢𑁄 𑀆𑀧𑀚𑁆𑀚𑀢𑀻𑀢𑀺 𑀏𑀢𑁆𑀣 𑀧𑀼𑀘𑁆𑀙𑀺𑀢𑁆𑀯𑀸 𑀅𑀲𑀼𑀡𑀦𑁆𑀢𑁄 𑀯𑀸 𑀧𑀼𑀘𑁆𑀙𑀺𑀬𑀫𑀸𑀦𑀁 𑀅𑀲𑀼𑀡𑀦𑁆𑀢𑁄 𑀯𑀸𑀢𑀺 𑀧𑀘𑁆𑀘𑁂𑀓𑀁 𑀬𑁄𑀚𑁂𑀢𑀩𑁆𑀩𑀁. 𑀏𑀓𑀭𑀢𑁆𑀢𑀸𑀢𑀺𑀓𑁆𑀓𑀫𑀸𑀤𑀺𑀯𑀲𑁂𑀦𑀸𑀢𑀺 𑀅𑀥𑀺𑀝𑁆𑀞𑀺𑀢𑀘𑀻𑀯𑀭𑁂𑀦 𑀯𑀺𑀧𑁆𑀧𑀯𑀲𑀺𑀢𑁆𑀯𑀸 𑀏𑀓𑀭𑀢𑁆𑀢𑀸𑀢𑀺𑀓𑁆𑀓𑀫𑁂𑀦 𑀧𑀸𑀘𑀺𑀢𑁆𑀢𑀺𑀬𑀁 𑀆𑀧𑀚𑁆𑀚𑀢𑀺. 𑀆𑀤𑀺-𑀲𑀤𑁆𑀤𑁂𑀦 𑀙𑀭𑀢𑁆𑀢𑀸𑀢𑀺𑀓𑁆𑀓𑀫𑀸𑀤𑀻𑀦𑀁 𑀲𑀗𑁆𑀕𑀳𑁄.

𑁪𑁫𑁦. 𑀅𑀦𑀢𑁆𑀣𑀁 𑀓𑀮𑀺𑀲𑀸𑀲𑀦𑀦𑁆𑀢𑀺 𑀅𑀦𑀢𑁆𑀣𑀸𑀯𑀳𑀁 𑀓𑁄𑀥𑀯𑀘𑀦𑀁 𑀆𑀭𑁄𑀧𑁂𑀦𑁆𑀢𑁄 𑀤𑁄𑀲𑀁 𑀆𑀭𑁄𑀧𑁂𑀦𑁆𑀢𑁄 𑀉𑀧𑀤𑁆𑀤𑀯𑀸𑀬 𑀧𑀭𑀺𑀲𑀓𑁆𑀓𑀢𑀻𑀢𑀺 𑀅𑀢𑁆𑀣𑁄.

𑁪𑁫𑁪. 𑀯𑁄𑀳𑀸𑀭𑀦𑀺𑀭𑀼𑀢𑁆𑀢𑀺𑀬𑀦𑁆𑀢𑀺 𑀢𑀲𑁆𑀲 𑀢𑀲𑁆𑀲 𑀅𑀢𑁆𑀣𑀲𑁆𑀲 𑀯𑀸𑀘𑀓𑀲𑀤𑁆𑀤𑁂 𑀧𑀪𑁂𑀤𑀕𑀢𑀜𑀸𑀡𑀧𑁆𑀧𑀢𑁆𑀢𑁄 𑀦 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑁪𑁫𑁫. 𑀧𑀭𑀺𑀫𑀡𑁆𑀟𑀮𑀩𑁆𑀬𑀜𑁆𑀚𑀦𑀸𑀭𑁄𑀧𑀦𑁂 𑀓𑀼𑀲𑀮𑁄 𑀦 𑀳𑁄𑀢𑀻𑀢𑀺 𑀧𑀭𑀺𑀫𑀡𑁆𑀟𑀮𑁂𑀦 𑀧𑀤𑀩𑁆𑀬𑀜𑁆𑀚𑀦𑁂𑀦 𑀯𑀢𑁆𑀣𑀼𑀁, 𑀧𑀭𑁂𑀳𑀺 𑀯𑀼𑀢𑁆𑀢𑀁 𑀚𑀸𑀦𑀺𑀢𑀼𑀜𑁆𑀘 𑀅𑀲𑀫𑀢𑁆𑀣𑁄𑀢𑀺 𑀅𑀢𑁆𑀣𑁄.

𑁪𑁫𑁮. 𑀅𑀦𑀼𑀲𑁆𑀲𑀸𑀯𑀦𑁂𑀦𑀸𑀢𑀺 𑀅𑀦𑀼 𑀅𑀦𑀼 𑀓𑀣𑀦𑁂𑀦. 𑀢𑁂𑀦𑀸𑀳 ‘‘𑀦𑀦𑀼 𑀢𑀼𑀫𑁆𑀳𑁂’’𑀢𑀺𑀆𑀤𑀺, 𑀬𑀁 𑀅𑀯𑁄𑀘𑀼𑀫𑁆𑀳, 𑀲𑁆𑀯𑀸𑀬𑀁 𑀧𑀓𑀸𑀲𑀺𑀢𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣 𑀬𑀦𑁆𑀢𑀺 𑀇𑀤𑀁 𑀬𑀲𑁆𑀫𑀸 𑀯𑀘𑀦𑀸𑀧𑁂𑀓𑁆𑀔𑀁 𑀦 𑀳𑁄𑀢𑀺, 𑀯𑀘𑀦𑀢𑁆𑀣𑀸𑀧𑁂𑀓𑁆𑀔𑀫𑁂𑀯, 𑀢𑀲𑁆𑀫𑀸 𑀢𑁂𑀦 𑀯𑀘𑀦𑁂𑀦 𑀦𑀸𑀦𑀸𑀓𑀭𑀡𑀸𑀪𑀸𑀯𑀁 𑀧𑀓𑀸𑀲𑀬𑀺𑀲𑁆𑀲𑀸𑀫𑀸𑀢𑀺 𑀬𑀫𑀢𑁆𑀣𑀁 𑀅𑀯𑁄𑀘𑀼𑀫𑁆𑀳𑀸𑀢𑀺 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀢𑁂𑀦𑁂𑀯 ‘‘𑀲𑁆𑀯𑀸𑀬’’𑀦𑁆𑀢𑀺 𑀧𑀼𑀮𑁆𑀮𑀺𑀗𑁆𑀕𑀯𑀲𑁂𑀦 𑀧𑀝𑀺𑀦𑀺𑀤𑁆𑀤𑁂𑀲𑁄 𑀓𑀢𑁄, 𑀢𑀲𑁆𑀲 𑀲𑁄 𑀅𑀬𑀁 𑀦𑀸𑀦𑀸𑀓𑀭𑀡𑀸𑀪𑀸𑀯𑁄𑀢𑀺 𑀅𑀢𑁆𑀣𑁄.

𑁪𑁬𑁭. 𑀫𑀜𑁆𑀘𑀧𑀤𑀸𑀤𑀻𑀲𑀼𑀧𑀺 𑀦𑀴𑀸𑀝𑀁 𑀧𑀝𑀺𑀳𑀜𑁆𑀜𑁂𑀬𑁆𑀬𑀸𑀢𑀺 𑀅𑀦𑁆𑀥𑀓𑀸𑀭𑁂 𑀘𑀫𑁆𑀫𑀔𑀡𑁆𑀟𑀁 𑀧𑀜𑁆𑀜𑀧𑁂𑀢𑁆𑀯𑀸 𑀯𑀦𑁆𑀤𑀺𑀢𑀼𑀁 𑀑𑀦𑀫𑀦𑁆𑀢𑀲𑁆𑀲 𑀦𑀴𑀸𑀝𑀁 𑀯𑀸 𑀅𑀓𑁆𑀔𑀺 𑀯𑀸 𑀫𑀜𑁆𑀘𑀸𑀤𑀻𑀲𑀼 𑀧𑀝𑀺𑀳𑀜𑁆𑀜𑀢𑀺. 𑀏𑀢𑁂𑀦 𑀯𑀦𑁆𑀤𑀢𑁄𑀧𑀺 𑀆𑀧𑀢𑁆𑀢𑀺𑀅𑀪𑀸𑀯𑀁 𑀯𑀢𑁆𑀯𑀸 𑀯𑀦𑁆𑀤𑀦𑀸𑀬 𑀲𑀩𑁆𑀩𑀣𑀸 𑀧𑀝𑀺𑀓𑁆𑀔𑁂𑀧𑀸𑀪𑀸𑀯𑀜𑁆𑀘 𑀤𑀻𑀧𑁂𑀢𑀺. 𑀏𑀯𑀁 𑀲𑀩𑁆𑀩𑀢𑁆𑀣 𑀲𑀼𑀢𑁆𑀢𑀦𑁆𑀢𑀭𑁂𑀳𑀺 𑀅𑀧𑁆𑀧𑀝𑀺𑀓𑁆𑀔𑀺𑀢𑁆𑀢𑁂𑀲𑀼. 𑀦𑀕𑁆𑀕𑀸𑀤𑀻𑀲𑀼 𑀧𑀦 𑀯𑀦𑁆𑀤𑀺𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺. 𑀏𑀓𑀢𑁄 𑀆𑀯𑀝𑁆𑀝𑁄𑀢𑀺 𑀏𑀓𑀲𑁆𑀫𑀺𑀁 𑀤𑁄𑀲𑀸𑀕𑀢𑀺𑀧𑀓𑁆𑀔𑁂 𑀧𑀭𑀺𑀯𑀢𑁆𑀢𑁄 𑀧𑀯𑀺𑀝𑁆𑀞𑁄𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀲𑀧𑀢𑁆𑀢𑀧𑀓𑁆𑀔𑁂 𑀞𑀺𑀢𑁄’’𑀢𑀺. 𑀯𑀦𑁆𑀤𑀺𑀬𑀫𑀸𑀦𑁄𑀢𑀺 𑀑𑀦𑀫𑀺𑀢𑁆𑀯𑀸 𑀯𑀦𑁆𑀤𑀺𑀬𑀫𑀸𑀦𑁄. 𑀯𑀦𑁆𑀤𑀺𑀢𑀩𑁆𑀩𑁂𑀲𑀼 𑀉𑀤𑁆𑀤𑁂𑀲𑀸𑀘𑀭𑀺𑀬𑁄, 𑀦𑀺𑀲𑁆𑀲𑀬𑀸𑀘𑀭𑀺𑀬𑁄 𑀘 𑀬𑀲𑁆𑀫𑀸 𑀦𑀯𑀓𑀸𑀧𑀺 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀢𑁂 𑀯𑀼𑀟𑁆𑀠𑀸 𑀏𑀯 𑀯𑀦𑁆𑀤𑀺𑀬𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑁪𑁭𑁦. 𑀧𑀼𑀩𑁆𑀩𑁂 𑀯𑀼𑀢𑁆𑀢𑀫𑁂𑀯𑀸𑀢𑀺 𑀲𑀳𑀲𑁂𑀬𑁆𑀬𑀸𑀤𑀺𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁. 𑀇𑀢𑀭𑀦𑁆𑀢𑀺 𑀲𑀘𑀺𑀢𑁆𑀢𑀓𑀁.

𑀯𑁄𑀳𑀸𑀭𑀯𑀕𑁆𑀕𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.