𑀓𑀣𑀺𑀦𑀪𑁂𑀤𑀁

𑀓𑀣𑀺𑀦𑀅𑀢𑁆𑀣𑀢𑀸𑀤𑀺𑀯𑀡𑁆𑀡𑀦𑀸

𑁪𑁦𑁪. 𑀓𑀣𑀺𑀦𑁂 𑀅𑀦𑀸𑀕𑀢𑀯𑀲𑁂𑀦𑀸𑀢𑀺 𑀉𑀤𑀓𑀸𑀳𑀭𑀡𑀸𑀤𑀺𑀧𑀬𑁄𑀕𑁂 𑀉𑀧𑁆𑀧𑀦𑁆𑀦𑁂 𑀧𑀘𑁆𑀙𑀸 𑀥𑁄𑀯𑀦𑀸𑀤𑀺𑀧𑀼𑀩𑁆𑀩𑀓𑀭𑀡𑀲𑁆𑀲 𑀉𑀧𑁆𑀧𑀢𑁆𑀢𑀺𑀢𑁄 𑀢𑀧𑁆𑀧𑀬𑁄𑀕𑀲𑁆𑀲 𑀅𑀦𑀸𑀕𑀢𑀯𑀲𑁂𑀦𑁂𑀯 𑀅𑀦𑀦𑁆𑀢𑀭𑀧𑀘𑁆𑀘𑀬𑁄. 𑀧𑀘𑁆𑀘𑀬𑀢𑁆𑀢𑀜𑁆𑀘𑀲𑁆𑀲 𑀓𑀸𑀭𑀺𑀬𑀪𑀽𑀢𑀲𑁆𑀲 𑀬𑀲𑁆𑀫𑀸 𑀦𑀺𑀧𑁆𑀨𑀸𑀤𑁂𑀢𑀩𑁆𑀩𑀢𑀁 𑀦𑀺𑀲𑁆𑀲𑀸𑀬 𑀧𑀘𑁆𑀘𑀬𑀸 𑀧𑀯𑀢𑁆𑀢𑀸, 𑀦 𑀯𑀺𑀦𑀸 𑀢𑁂𑀦, 𑀢𑀲𑁆𑀫𑀸 𑀢𑁂𑀦 𑀧𑀭𑀺𑀬𑀸𑀬𑁂𑀦 𑀯𑀼𑀢𑁆𑀢𑀁, 𑀦 𑀲𑀪𑀸𑀯𑀢𑁄 𑀲𑀩𑁆𑀩𑀢𑁆𑀣. 𑀢𑁂𑀦𑀸𑀳 ‘‘𑀧𑀬𑁄𑀕𑀲𑁆𑀲 𑀳𑀻’’𑀢𑀺𑀆𑀤𑀺. 𑀢𑀢𑁆𑀣 𑀧𑀬𑁄𑀕𑀲𑁆𑀲 𑀲𑀢𑁆𑀢𑀯𑀺𑀥𑀫𑁆𑀧𑀺 𑀧𑀼𑀩𑁆𑀩𑀓𑀭𑀡𑀁 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀸𑀭𑀡𑀫𑀸𑀳 ‘‘𑀬𑀲𑁆𑀫𑀸’’𑀢𑀺𑀆𑀤𑀺. 𑀧𑀼𑀩𑁆𑀩𑀓𑀭𑀡𑀲𑁆𑀲𑀢𑁆𑀣𑀸𑀬𑀸𑀢𑀺 𑀧𑀼𑀩𑁆𑀩𑀓𑀭𑀡𑀲𑁆𑀲 𑀦𑀺𑀧𑁆𑀨𑀸𑀤𑀦𑀢𑁆𑀣𑀸𑀬. 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁂𑀢𑀺 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑀲𑁆𑀲 𑀯𑀺𑀲𑀬𑁂. 𑀏𑀲𑀸𑀢𑀺 𑀧𑀬𑁄𑀕𑁄. 𑀥𑁄𑀯𑀦𑀸𑀤𑀺𑀥𑀫𑁆𑀫𑁂𑀲𑀼 𑀏𑀓𑀫𑁆𑀧𑀺 𑀅𑀢𑁆𑀢𑀦𑁄 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑀪𑀽𑀢𑀁 𑀥𑀫𑁆𑀫𑀁 𑀦 𑀮𑀪𑀢𑀺, 𑀅𑀢𑁆𑀢𑀦𑁄 𑀉𑀧𑁆𑀧𑀢𑁆𑀢𑀺𑀢𑁄 𑀧𑀼𑀭𑁂𑀚𑀸𑀢𑀲𑁆𑀲 𑀧𑀼𑀩𑁆𑀩𑀓𑀭𑀡𑀲𑁆𑀲 𑀅𑀪𑀸𑀯𑀸𑀢𑀺 𑀅𑀢𑁆𑀣𑁄. 𑀮𑀪𑀢𑀻𑀢𑀺 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑀁 𑀧𑀼𑀩𑁆𑀩𑀓𑀭𑀡𑀁 𑀮𑀪𑀢𑀺, 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑀧𑀸𑀴𑀺𑀬𑀁 𑀧𑀦𑁆𑀦𑀭𑀲 𑀥𑀫𑁆𑀫𑀸 𑀲𑀳𑀚𑀸𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑀺 𑀏𑀢𑁆𑀣 𑀧𑀼𑀩𑁆𑀩𑀓𑀭𑀡𑀲𑁆𑀲𑀸𑀢𑀺 𑀯𑀸 𑀧𑀬𑁄𑀕𑀲𑁆𑀲𑀸𑀢𑀺 𑀯𑀸 𑀅𑀜𑁆𑀜𑀲𑁆𑀲 𑀓𑀲𑁆𑀲𑀘𑀺 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀲𑁆𑀲 𑀅𑀧𑀭𑀸𑀫𑀝𑁆𑀞𑀢𑁆𑀢𑀸 𑀧𑀦𑁆𑀦𑀭𑀲 𑀥𑀫𑁆𑀫𑀸 𑀲𑀬𑀁 𑀅𑀜𑁆𑀜𑀫𑀜𑁆𑀜𑀲𑀳𑀚𑀸𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑀺 𑀏𑀯𑀫𑀢𑁆𑀣𑁄 𑀕𑀳𑁂𑀢𑀩𑁆𑀩𑁄, 𑀢𑁂𑀳𑀺 𑀲𑀳 𑀉𑀧𑁆𑀧𑀚𑁆𑀚𑀦𑀓𑀲𑁆𑀲 𑀅𑀜𑁆𑀜𑀲𑁆𑀲 𑀅𑀪𑀸𑀯𑀸. 𑀏𑀯𑀁 𑀉𑀧𑀭𑀺 𑀲𑀩𑁆𑀩𑀢𑁆𑀣. 𑀢𑁂𑀦𑀸𑀳 ‘‘𑀲𑀳𑀚𑀸𑀢𑀧𑀘𑁆𑀘𑀬𑀁 𑀧𑀦𑀸’’𑀢𑀺𑀆𑀤𑀺. 𑀫𑀸𑀢𑀺𑀓𑀸 𑀘 𑀧𑀮𑀺𑀩𑁄𑀥𑀸 𑀘𑀸𑀢𑀺 𑀏𑀢𑁆𑀣 𑀘-𑀲𑀤𑁆𑀤𑁂𑀦 𑀧𑀜𑁆𑀘𑀸𑀦𑀺𑀲𑀁𑀲𑀸𑀦𑀺 𑀕𑀳𑀺𑀢𑀸𑀦𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀯𑀁 𑀫𑀸𑀢𑀺𑀓𑀸𑀦𑀜𑁆𑀘 𑀧𑀮𑀺𑀩𑁄𑀥𑀸𑀦𑀜𑁆𑀘𑀸𑀢𑀺 𑀏𑀢𑁆𑀣𑀸𑀧𑀺. 𑀢𑁂𑀳𑀺𑀧𑀺 𑀅𑀢𑁆𑀣𑁄 𑀅𑀦𑀦𑁆𑀢𑀭𑀫𑁂𑀯 𑀫𑀸𑀢𑀺𑀓𑀸𑀤𑀻𑀳𑀺 𑀲𑀳 𑀚𑀸𑀬𑀦𑁆𑀢𑀺. 𑀢𑁂𑀦𑁂𑀯 ‘‘𑀧𑀦𑁆𑀦𑀭𑀲 𑀥𑀫𑁆𑀫𑀸 𑀲𑀳𑀚𑀸𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀯𑀼𑀢𑁆𑀢𑀸. 𑀆𑀲𑀸𑀢𑀺 𑀘𑀻𑀯𑀭𑀸𑀲𑀸. 𑀯𑀢𑁆𑀣𑀽𑀢𑀺 𑀆𑀲𑀸𑀬 𑀦𑀺𑀫𑀺𑀢𑁆𑀢𑀪𑀽𑀢𑀁 𑀅𑀦𑀼𑀧𑁆𑀧𑀦𑁆𑀦𑀘𑀻𑀯𑀭𑀁. ‘‘𑀤𑀲𑁆𑀲𑀸𑀫 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀳𑀺 𑀤𑀸𑀬𑀓𑁂𑀳𑀺 𑀧𑀝𑀺𑀜𑁆𑀜𑀸𑀢𑀘𑀻𑀯𑀭𑀁 𑀦𑀺𑀲𑁆𑀲𑀸𑀬 𑀅𑀦𑀦𑁆𑀢𑀭𑀁 𑀉𑀧𑁆𑀧𑀚𑁆𑀚𑀫𑀸𑀦𑀸 𑀘𑀻𑀯𑀭𑀸𑀲𑀸 𑀅𑀦𑀦𑁆𑀢𑀭𑀧𑀘𑁆𑀘𑀬𑀸𑀤𑀺𑀪𑀸𑀯𑁂𑀦 𑀯𑀼𑀢𑁆𑀢𑀸. 𑀆𑀲𑀸𑀦𑀜𑁆𑀘 𑀅𑀦𑀸𑀲𑀸𑀦𑀜𑁆𑀘𑀸𑀢𑀺 𑀮𑀩𑁆𑀪𑀫𑀸𑀦𑀓𑀘𑀻𑀯𑀭𑁂 𑀉𑀧𑁆𑀧𑀚𑁆𑀚𑀦𑀓𑀘𑀻𑀯𑀭𑀸𑀲𑀸𑀦𑀜𑁆𑀘𑁂𑀯 𑀅𑀮𑀩𑁆𑀪𑀫𑀸𑀦𑁂 𑀘𑀻𑀯𑀭𑁂 𑀉𑀧𑁆𑀧𑀚𑁆𑀚𑀦𑀓𑀅𑀦𑀸𑀲𑀸𑀦𑀜𑁆𑀘, 𑀆𑀲𑀸𑀦𑀁, 𑀢𑀩𑁆𑀩𑀺𑀕𑀫𑀸𑀦𑀜𑁆𑀘𑀸𑀢𑀺 𑀅𑀢𑁆𑀣𑁄. 𑀔𑀡𑁂 𑀔𑀡𑁂 𑀉𑀧𑁆𑀧𑀢𑁆𑀢𑀺𑀪𑁂𑀤𑀁 𑀲𑀦𑁆𑀥𑀸𑀬 ‘‘𑀆𑀲𑀸𑀦’’𑀦𑁆𑀢𑀺 𑀩𑀳𑀼𑀯𑀘𑀦𑀁 𑀓𑀢𑀁, 𑀆𑀲𑀸𑀬, 𑀅𑀦𑀸𑀲𑀸𑀬 𑀘𑀸𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀆𑀲𑀸 𑀘 𑀅𑀦𑀸𑀲𑀸 𑀘𑀸’’𑀢𑀺.

𑀓𑀣𑀺𑀦𑀅𑀢𑁆𑀣𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀼𑀩𑁆𑀩𑀓𑀭𑀡𑀦𑀺𑀤𑀸𑀦𑀸𑀤𑀺𑀯𑀺𑀪𑀸𑀕𑀯𑀡𑁆𑀡𑀦𑀸

𑁪𑁦𑁬-𑁭. 𑀙 𑀘𑀻𑀯𑀭𑀸𑀦𑀻𑀢𑀺 𑀔𑁄𑀫𑀸𑀤𑀻𑀲𑀼 𑀙𑀲𑀼 𑀅𑀜𑁆𑀜𑀢𑀭𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀯𑀲𑁂𑀦 𑀧𑀦 ‘‘𑀘𑀻𑀯𑀭𑀸𑀦𑀻’’𑀢𑀺 𑀩𑀳𑀼𑀯𑀘𑀦𑀁 𑀓𑀢𑀁. 𑀧𑀸𑀴𑀺𑀬𑀁 𑀧𑀦𑁂𑀢𑁆𑀣 𑀯𑀢𑁆𑀣𑀼, 𑀆𑀲𑀸 𑀘 𑀅𑀦𑀸𑀲𑀸 𑀘𑀸𑀢𑀺𑀆𑀤𑀻𑀲𑀼 𑀅𑀢𑁆𑀣𑀢𑁂 𑀓𑀣𑀺𑀦𑁂 𑀆𑀦𑀺𑀲𑀁𑀲𑀯𑀲𑁂𑀦 𑀉𑀧𑁆𑀧𑀚𑁆𑀚𑀦𑀓𑀧𑀘𑁆𑀘𑀸𑀲𑀸𑀘𑀻𑀯𑀭𑀁 ‘‘𑀯𑀢𑁆𑀣𑀽’’𑀢𑀺 𑀯𑀼𑀢𑁆𑀢𑀁. 𑀓𑀣𑀺𑀦𑀘𑀻𑀯𑀭𑀁 𑀳𑁂𑀢𑀼𑀧𑀘𑁆𑀘𑀬-𑀲𑀤𑁆𑀤𑁂𑀳𑀺 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁪𑁦𑁮. 𑀧𑀘𑁆𑀘𑀼𑀤𑁆𑀥𑀸𑀭𑁄 𑀢𑀻𑀳𑀺 𑀥𑀫𑁆𑀫𑁂𑀳𑀻𑀢𑀺𑀆𑀤𑀺 𑀓𑀣𑀺𑀦𑀢𑁆𑀣𑀸𑀭𑀢𑁆𑀣𑀸𑀬 𑀢𑀺𑀘𑀻𑀯𑀭𑀢𑁄 𑀅𑀜𑁆𑀜𑀁 𑀯𑀲𑁆𑀲𑀺𑀓𑀲𑀸𑀝𑀺𑀓𑀸𑀤𑀺𑀁 𑀧𑀘𑁆𑀘𑀼𑀤𑁆𑀥𑀭𑀺𑀢𑀼𑀁, 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀅𑀢𑁆𑀣𑀭𑀺𑀢𑀼𑀜𑁆𑀘 𑀦 𑀯𑀝𑁆𑀝𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. ‘‘𑀯𑀘𑀻𑀪𑁂𑀤𑁂𑀦𑀸’’𑀢𑀺 𑀏𑀢𑁂𑀦 𑀓𑁂𑀯𑀮𑀁 𑀓𑀸𑀬𑁂𑀦 𑀓𑀣𑀺𑀦𑀢𑁆𑀣𑀸𑀭𑁄 𑀦 𑀭𑀼𑀳𑀢𑀻𑀢𑀺 𑀤𑀲𑁆𑀲𑁂𑀢𑀺.

𑀧𑀼𑀩𑁆𑀩𑀓𑀭𑀡𑀦𑀺𑀤𑀸𑀦𑀸𑀤𑀺𑀯𑀺𑀪𑀸𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀓𑀣𑀺𑀦𑀸𑀤𑀺𑀚𑀸𑀦𑀺𑀢𑀩𑁆𑀩𑀯𑀺𑀪𑀸𑀕𑀯𑀡𑁆𑀡𑀦𑀸

𑁪𑁧𑁨. 𑀬𑁂𑀲𑀼 𑀭𑀽𑀧𑀸𑀤𑀺𑀥𑀫𑁆𑀫𑁂𑀲𑀽𑀢𑀺 ‘‘𑀧𑀼𑀭𑀺𑀫𑀯𑀲𑁆𑀲𑀁𑀯𑀼𑀢𑁆𑀣𑀸 𑀪𑀺𑀓𑁆𑀔𑀽, 𑀧𑀜𑁆𑀘𑀳𑀺 𑀅𑀦𑀽𑀦𑁄 𑀲𑀗𑁆𑀖𑁄, 𑀘𑀻𑀯𑀭𑀫𑀸𑀲𑁄, 𑀥𑀫𑁆𑀫𑁂𑀦 𑀲𑀫𑁂𑀦 𑀲𑀫𑀼𑀧𑁆𑀧𑀦𑁆𑀦𑀁 𑀘𑀻𑀯𑀭’’𑀦𑁆𑀢𑀺 𑀏𑀯𑀫𑀸𑀤𑀻𑀲𑀼 𑀬𑁂𑀲𑀼 𑀭𑀽𑀧𑀸𑀭𑀽𑀧𑀥𑀫𑁆𑀫𑁂𑀲𑀼. 𑀲𑀢𑀻𑀢𑀺 𑀲𑀦𑁆𑀢𑁂𑀲𑀼. 𑀫𑀺𑀲𑁆𑀲𑀻𑀪𑀸𑀯𑁄𑀢𑀺 𑀲𑀁𑀲𑀕𑁆𑀕𑀢𑀸 𑀲𑀫𑀽𑀳𑀧𑀜𑁆𑀜𑀢𑁆𑀢𑀺𑀫𑀢𑁆𑀢𑀁. 𑀢𑁂𑀦𑀸𑀳 ‘‘𑀦 𑀧𑀭𑀫𑀢𑁆𑀣𑀢𑁄 𑀏𑀓𑁄 𑀥𑀫𑁆𑀫𑁄 𑀅𑀢𑁆𑀣𑀻’’𑀢𑀺.

𑁪𑁧𑁬. 𑀏𑀓𑀢𑁄 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀓𑀣𑀺𑀦𑀼𑀤𑁆𑀥𑀸𑀭𑁂𑀦 𑀲𑀳 𑀉𑀧𑁆𑀧𑀚𑁆𑀚𑀫𑀸𑀦𑀸𑀭𑀳𑀸 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀓𑀣𑀺𑀦𑀢𑁆𑀣𑀸𑀭𑀢𑁄 𑀳𑀺 𑀧𑀪𑀼𑀢𑀺 𑀲𑀩𑁆𑀩𑁂 𑀓𑀣𑀺𑀦𑀼𑀤𑁆𑀥𑀸𑀭𑀸 𑀢𑀁 𑀢𑀁 𑀓𑀸𑀭𑀡𑀦𑁆𑀢𑀭𑀫𑀸𑀕𑀫𑁆𑀫 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀲𑁆𑀫𑀸 𑀲𑀩𑁆𑀩𑁂 𑀏𑀓𑀼𑀧𑁆𑀧𑀸𑀤𑀸 𑀦𑀸𑀫 𑀚𑀸𑀢𑀸. 𑀢𑁂𑀲𑀼 𑀅𑀦𑁆𑀢𑀭𑀼𑀩𑁆𑀪𑀸𑀭𑀲𑀳𑀼𑀩𑁆𑀪𑀸𑀭𑀸 𑀤𑁆𑀯𑁂 𑀏𑀯 𑀢𑀁 𑀯𑀺𑀳𑀸𑀭𑀁 𑀅𑀦𑀢𑁆𑀣𑀢𑀓𑀣𑀺𑀦𑀯𑀺𑀳𑀸𑀭𑀲𑀤𑀺𑀲𑀁 𑀓𑀭𑁄𑀦𑁆𑀢𑀸 𑀲𑀬𑀁 𑀲𑀓𑀮𑁂𑀦 𑀓𑀣𑀺𑀦𑀢𑁆𑀣𑀸𑀭𑁂𑀦 𑀲𑀳 𑀦𑀺𑀭𑀼𑀚𑁆𑀛𑀦𑁆𑀢𑀺 𑀉𑀤𑁆𑀥𑀸𑀭𑀪𑀸𑀯𑀁 𑀧𑀸𑀧𑀼𑀡𑀦𑁆𑀢𑀺. 𑀅𑀯𑀲𑁂𑀲𑀸 𑀧𑀦 𑀢𑀁 𑀢𑀁 𑀧𑀸𑀝𑀺𑀧𑀼𑀕𑁆𑀕𑀮𑀺𑀓𑀫𑁂𑀯 𑀓𑀣𑀺𑀦𑀢𑁆𑀣𑀸𑀭𑀁 𑀤𑁆𑀯𑀺𑀦𑁆𑀦𑀁 𑀧𑀮𑀺𑀩𑁄𑀥𑀸𑀦𑀁 𑀉𑀧𑀘𑁆𑀙𑀺𑀦𑁆𑀤𑀦𑀯𑀲𑁂𑀦 𑀦𑀺𑀭𑁄𑀥𑁂𑀦𑁆𑀢𑀸 𑀲𑀬𑀁 𑀉𑀤𑁆𑀥𑀸𑀭𑀪𑀸𑀯𑀁 𑀧𑀸𑀧𑀼𑀡𑀦𑁆𑀢𑀺, 𑀦 𑀲𑀓𑀮𑀁 𑀓𑀣𑀺𑀦𑀢𑁆𑀣𑀸𑀭𑀁. 𑀓𑀣𑀺𑀦𑀼𑀤𑁆𑀥𑀸𑀭𑀸𑀦𑀜𑁆𑀘 𑀦𑀺𑀭𑁄𑀥𑁄 𑀦𑀸𑀫 𑀢𑀁 𑀢𑀁 𑀓𑀸𑀭𑀡𑀫𑀸𑀕𑀫𑁆𑀫 𑀉𑀤𑁆𑀥𑀸𑀭𑀪𑀸𑀯𑀧𑁆𑀧𑀢𑁆𑀢𑀺, 𑀏𑀯𑀜𑁆𑀘 𑀉𑀧𑁆𑀧𑀢𑁆𑀢𑀺 𑀦𑀸𑀫 𑀓𑀣𑀺𑀦𑀼𑀤𑁆𑀥𑀸𑀭𑁄 𑀏𑀯. 𑀢𑁂𑀦𑀸𑀳 ‘‘𑀲𑀩𑁆𑀩𑁂𑀧𑀺 𑀅𑀢𑁆𑀣𑀸𑀭𑁂𑀦 𑀲𑀤𑁆𑀥𑀺𑀁 𑀏𑀓𑀢𑁄 𑀉𑀧𑁆𑀧𑀚𑁆𑀚𑀦𑁆𑀢𑀻’’𑀢𑀺𑀆𑀤𑀺. 𑀢𑀢𑁆𑀣 𑀧𑀼𑀭𑀺𑀫𑀸 𑀤𑁆𑀯𑁂𑀢𑀺 ‘‘𑀏𑀓𑀼𑀧𑁆𑀧𑀸𑀤𑀸 𑀏𑀓𑀦𑀺𑀭𑁄𑀥𑀸’’𑀢𑀺 𑀧𑀸𑀴𑀺𑀬𑀁 𑀧𑀞𑀫𑀁 𑀯𑀼𑀢𑁆𑀢𑀸 𑀅𑀦𑁆𑀢𑀭𑀼𑀩𑁆𑀪𑀸𑀭𑀲𑀳𑀼𑀩𑁆𑀪𑀸𑀭𑀸 𑀤𑁆𑀯𑁂. 𑀢𑁂𑀲𑀽𑀢𑀺 𑀧𑀓𑁆𑀓𑀫𑀦𑀦𑁆𑀢𑀺𑀓𑀸𑀤𑀻𑀲𑀼. 𑀉𑀤𑁆𑀥𑀸𑀭𑀪𑀸𑀯𑀁 𑀧𑀢𑁆𑀢𑁂𑀲𑀽𑀢𑀺 𑀉𑀤𑁆𑀥𑀸𑀭𑀪𑀸𑀯𑀧𑁆𑀧𑀢𑁆𑀢𑀺𑀲𑀗𑁆𑀔𑀸𑀢𑀦𑀺𑀭𑁄𑀥𑀁 𑀧𑀢𑁆𑀢𑁂𑀲𑀽𑀢𑀺 𑀅𑀢𑁆𑀣𑁄. 𑀅𑀢𑁆𑀣𑀸𑀭𑁄 𑀢𑀺𑀝𑁆𑀞𑀢𑀻𑀢𑀺 𑀓𑀢𑀘𑀻𑀯𑀭𑀁 𑀆𑀤𑀸𑀬 𑀧𑀓𑁆𑀓𑀦𑁆𑀢𑀸𑀤𑀺𑀧𑀼𑀕𑁆𑀕𑀮𑀁 𑀞𑀧𑁂𑀢𑁆𑀯𑀸 𑀢𑀤𑀯𑀲𑁂𑀲𑀸𑀦𑀁 𑀧𑀮𑀺𑀩𑁄𑀥𑀲𑀩𑁆𑀪𑀸𑀯𑀢𑁄 𑀓𑀣𑀺𑀦𑀢𑁆𑀣𑀸𑀭𑁄 𑀢𑀺𑀝𑁆𑀞𑀢𑀺.

𑀓𑀣𑀺𑀦𑀸𑀤𑀺𑀚𑀸𑀦𑀺𑀢𑀩𑁆𑀩𑀯𑀺𑀪𑀸𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀜𑁆𑀜𑀢𑁆𑀢𑀺𑀯𑀕𑁆𑀕𑀯𑀡𑁆𑀡𑀦𑀸𑀦𑀬𑁄 𑀦𑀺𑀝𑁆𑀞𑀺𑀢𑁄.

𑀲𑀗𑁆𑀕𑀳𑀯𑀕𑁆𑀕𑁄