𑀫𑀳𑀸𑀲𑀗𑁆𑀕𑀸𑀫𑀁

𑀯𑁄𑀳𑀭𑀦𑁆𑀢𑁂𑀦 𑀚𑀸𑀦𑀺𑀢𑀩𑁆𑀩𑀸𑀤𑀺𑀯𑀡𑁆𑀡𑀦𑀸

𑁩𑁬𑁮-𑁩𑁭𑁪. 𑀫𑀳𑀸𑀲𑀗𑁆𑀕𑀸𑀫𑁂 𑀧𑀸𑀴𑀺𑀬𑀁 𑀲𑀗𑁆𑀕𑀸𑀫𑀸𑀯𑀘𑀭𑁂𑀦𑀸𑀢𑀺 𑀅𑀦𑀼𑀯𑀺𑀚𑁆𑀚𑀓𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀯𑀢𑁆𑀣𑀽𑀢𑀺 𑀫𑁂𑀣𑀼𑀦𑀸𑀤𑀺𑀯𑀻𑀢𑀺𑀓𑁆𑀓𑀫𑁄. 𑀦𑀺𑀤𑀸𑀦𑀦𑁆𑀢𑀺 𑀯𑁂𑀲𑀸𑀮𑀺𑀆𑀤𑀺𑀧𑀜𑁆𑀜𑀢𑁆𑀢𑀺𑀝𑁆𑀞𑀸𑀦𑀁. 𑀧𑀼𑀕𑁆𑀕𑀮𑁄 𑀅𑀓𑀸𑀭𑀓𑁄 𑀚𑀸𑀦𑀺𑀢𑀩𑁆𑀩𑁄𑀢𑀺 𑀏𑀢𑁆𑀣 𑀲𑀗𑁆𑀖𑁂 𑀯𑀸 𑀕𑀡𑁂 𑀯𑀸 𑀧𑀭𑀺𑀡𑀸𑀬𑀓𑀪𑀽𑀢𑁄 𑀧𑀼𑀕𑁆𑀕𑀮𑁄𑀢𑀺 𑀤𑀝𑁆𑀞𑀩𑁆𑀩𑀁.

𑁩𑁭𑁫. 𑀯𑀺𑀲𑁆𑀲𑀝𑁆𑀞𑀺𑀲𑀺𑀓𑁆𑀔𑀸𑀧𑀤𑀦𑁆𑀢𑀺 𑀦𑀻𑀮𑀸𑀤𑀺𑀤𑀲𑀦𑁆𑀦𑀁 𑀲𑀼𑀓𑁆𑀓𑀸𑀦𑀁 𑀫𑁄𑀘𑀦𑀯𑀲𑁂𑀦 𑀯𑀼𑀢𑁆𑀢𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀲𑀺𑀓𑁆𑀔𑀸𑀧𑀤𑀁. 𑀢𑀜𑁆𑀳𑀺 𑀢𑁂𑀮𑀸𑀤𑀺𑀫𑀦𑁆𑀤𑀯𑀡𑁆𑀡𑀸𑀦𑀁 𑀦𑀻𑀮𑀸𑀤𑀺𑀧𑀘𑀼𑀭𑀯𑀡𑁆𑀡𑀸𑀦𑀁 𑀯𑀲𑁂𑀦 ‘‘𑀯𑀡𑁆𑀡𑀸𑀯𑀡𑁆𑀡𑀸’’𑀢𑀺 𑀯𑀼𑀢𑁆𑀢𑀁. 𑀧𑀘𑀼𑀭𑀢𑁆𑀣𑁂 𑀳𑀺 𑀇𑀥 𑀅𑀯𑀡𑁆𑀡𑁄𑀢𑀺 𑀅-𑀓𑀸𑀭𑁄.

𑁩𑁭𑁯. 𑀬𑀸𑀯 𑀅𑀓𑀦𑀺𑀝𑁆𑀞𑀩𑁆𑀭𑀳𑁆𑀫𑀸𑀦𑁄 𑀤𑁆𑀯𑀺𑀥𑀸 𑀳𑁄𑀦𑁆𑀢𑀻𑀢𑀺 𑀏𑀢𑁆𑀣 𑀅𑀯𑀺𑀳𑀸𑀤𑀺𑀲𑀼𑀤𑁆𑀥𑀸𑀯𑀸𑀲𑀺𑀓𑀸 𑀅𑀜𑁆𑀜𑀪𑀽𑀫𑀻𑀲𑀼 𑀅𑀭𑀺𑀬𑀸 𑀥𑀫𑁆𑀫𑀯𑀸𑀤𑀻𑀧𑀓𑁆𑀔𑀁 𑀏𑀯 𑀪𑀚𑀦𑁆𑀢𑀺, 𑀇𑀢𑀭𑁂 𑀤𑀼𑀯𑀺𑀥𑀫𑁆𑀧𑀻𑀢𑀺 𑀤𑀝𑁆𑀞𑀩𑁆𑀩𑀁.

𑀯𑁄𑀳𑀭𑀦𑁆𑀢𑁂𑀦 𑀚𑀸𑀦𑀺𑀢𑀩𑁆𑀩𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.