𑀘𑀽𑀴𑀲𑀗𑁆𑀕𑀸𑀫𑀁

𑀅𑀦𑀼𑀯𑀺𑀚𑁆𑀚𑀓𑀲𑁆𑀲 𑀧𑀝𑀺𑀧𑀢𑁆𑀢𑀺𑀯𑀡𑁆𑀡𑀦𑀸

𑁩𑁬𑁫. 𑀢𑀢𑁆𑀭 𑀳𑀻𑀢𑀺 𑀢𑀲𑁆𑀫𑀺𑀁 𑀲𑀦𑁆𑀦𑀺𑀧𑀸𑀢𑁂. 𑀅𑀢𑁆𑀢𑀧𑀘𑁆𑀘𑀢𑁆𑀣𑀺𑀓𑀸𑀢𑀺 𑀮𑀚𑁆𑀚𑀺𑀧𑁂𑀲𑀮𑀲𑁆𑀲 𑀘𑁄𑀤𑀓𑀧𑀸𑀧𑀕𑀭𑀳𑀻𑀧𑀼𑀕𑁆𑀕𑀮𑀲𑁆𑀲 𑀅𑀦𑀢𑁆𑀣𑀓𑀸𑀫𑀸 𑀯𑁂𑀭𑀻𑀧𑀼𑀕𑁆𑀕𑀮𑀸. 𑀲𑀸𑀲𑀦𑀧𑀘𑁆𑀘𑀢𑁆𑀣𑀺𑀓𑀸𑀢𑀺 𑀅𑀢𑁆𑀢𑀦𑁄 𑀅𑀦𑀸𑀘𑀸𑀭𑀸𑀦𑀼𑀕𑀼𑀡𑀁 𑀩𑀼𑀤𑁆𑀥𑀯𑀘𑀦𑀁 𑀧𑀓𑀸𑀲𑁂𑀦𑁆𑀢𑁄 𑀢𑀡𑁆𑀳𑀸𑀕𑀢𑀺𑀓𑀸, 𑀤𑀺𑀝𑁆𑀞𑀺𑀕𑀢𑀺𑀓𑀸 𑀘. 𑀅𑀚𑁆𑀛𑁄𑀕𑀸𑀳𑁂𑀢𑁆𑀯𑀸𑀢𑀺 𑀅𑀮𑀚𑁆𑀚𑀺𑀅𑀪𑀺𑀪𑀯𑀦𑀯𑀲𑁂𑀦 𑀲𑀗𑁆𑀖𑀫𑀚𑁆𑀛𑀁 𑀧𑀯𑀺𑀲𑀺𑀢𑁆𑀯𑀸. 𑀲𑁄 𑀲𑀗𑁆𑀕𑀸𑀫𑀸𑀯𑀘𑀭𑁄𑀢𑀺 𑀲𑁄 𑀘𑁄𑀤𑀓𑁄 𑀲𑀗𑁆𑀕𑀸𑀫𑀸𑀯𑀘𑀭𑁄 𑀦𑀸𑀫. 𑀤𑀺𑀝𑁆𑀞𑀲𑀼𑀢𑀫𑀼𑀢𑀫𑁆𑀧𑀺 𑀭𑀸𑀚𑀓𑀣𑀸𑀤𑀺𑀓𑀦𑁆𑀢𑀺 𑀤𑀺𑀝𑁆𑀞𑀲𑀼𑀢𑀯𑀲𑁂𑀦𑁂𑀯 𑀭𑀸𑀚𑀘𑁄𑀭𑀸𑀤𑀺𑀓𑀣𑀁, 𑀫𑀼𑀢𑀯𑀲𑁂𑀦𑀧𑀺 𑀅𑀦𑁆𑀦𑀸𑀤𑀺𑀓𑀣𑀜𑁆𑀘 𑀅𑀓𑀣𑁂𑀦𑁆𑀢𑁂𑀦𑀸𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀦𑀺𑀲𑁆𑀲𑀺𑀢𑀸 𑀯𑀸𑀢𑀺𑀆𑀤𑀻𑀲𑀼 𑀭𑀽𑀧𑀸𑀭𑀽𑀧𑀧𑀝𑀺𑀘𑁆𑀙𑁂𑀤𑀧𑀤𑁂𑀦 𑀲𑀓𑀮𑀅𑀪𑀺𑀥𑀫𑁆𑀫𑀢𑁆𑀣𑀧𑀺𑀝𑀓𑀢𑁆𑀢𑀁 𑀤𑀲𑁆𑀲𑁂𑀢𑀺. 𑀲𑀫𑀣𑀸𑀘𑀸𑀭𑀸𑀤𑀻𑀳𑀺 𑀧𑀝𑀺𑀲𑀁𑀬𑀼𑀢𑁆𑀢𑀦𑁆𑀢𑀺 𑀲𑀓𑀮𑀲𑀼𑀢𑁆𑀢𑀦𑁆𑀢𑀧𑀺𑀝𑀓𑀢𑁆𑀢𑀁. 𑀢𑀢𑁆𑀣 𑀲𑀫𑀣𑀸𑀘𑀸𑀭𑁄 𑀦𑀸𑀫 𑀲𑀫𑀣𑀪𑀸𑀯𑀦𑀸𑀓𑁆𑀓𑀫𑁄. 𑀢𑀣𑀸 𑀯𑀺𑀧𑀲𑁆𑀲𑀦𑀸𑀘𑀸𑀭𑁄. 𑀞𑀸𑀦𑀦𑀺𑀲𑀚𑁆𑀚𑀯𑀢𑁆𑀢𑀸𑀤𑀺𑀦𑀺𑀲𑁆𑀲𑀺𑀢𑀸𑀢𑀺 𑀲𑀗𑁆𑀖𑀫𑀚𑁆𑀛𑀸𑀤𑀻𑀲𑀼 𑀕𑀭𑀼𑀘𑀺𑀢𑁆𑀢𑀻𑀓𑀸𑀭𑀁 𑀧𑀘𑁆𑀘𑀼𑀧𑀝𑁆𑀞𑀧𑁂𑀢𑁆𑀯𑀸 𑀞𑀸𑀦𑀸𑀤𑀺𑀓𑁆𑀓𑀫𑀦𑀺𑀲𑁆𑀲𑀺𑀢𑀸 𑀘𑁂𑀯 𑀘𑀼𑀤𑁆𑀤𑀲𑀫𑀳𑀸𑀯𑀢𑁆𑀢𑀸𑀤𑀺𑀯𑀢𑁆𑀢𑀦𑀺𑀲𑁆𑀲𑀺𑀢𑀸 𑀘, 𑀆𑀤𑀺-𑀲𑀤𑁆𑀤𑁂𑀦 𑀅𑀧𑁆𑀧𑀺𑀘𑁆𑀙𑀢𑀸𑀤𑀺𑀦𑀺𑀲𑁆𑀲𑀺𑀢𑀸 𑀘𑀸𑀢𑀺 𑀅𑀢𑁆𑀣𑁄. 𑀧𑀜𑁆𑀳𑁂 𑀉𑀧𑁆𑀧𑀦𑁆𑀦𑁂𑀢𑀺 𑀓𑁂𑀦𑀘𑀺 𑀉𑀧𑁆𑀧𑀦𑁆𑀦𑁂 𑀧𑀜𑁆𑀳𑁂 𑀧𑀼𑀘𑁆𑀙𑀺𑀢𑁂. 𑀇𑀤𑀜𑁆𑀘 𑀉𑀧𑀮𑀓𑁆𑀔𑀡𑀫𑀢𑁆𑀢𑀁, 𑀬𑀁 𑀓𑀺𑀜𑁆𑀘𑀺 𑀉𑀧𑀝𑁆𑀞𑀺𑀢𑀁 𑀥𑀫𑁆𑀫𑀁 𑀪𑀸𑀲𑀲𑁆𑀲𑀽𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀓𑀼𑀮𑀧𑀤𑁂𑀲𑁄 𑀦𑀸𑀫 𑀔𑀢𑁆𑀢𑀺𑀬𑀸𑀤𑀺𑀚𑀸𑀢𑀺𑀬𑀫𑁆𑀧𑀺 𑀓𑀸𑀲𑀺𑀓𑀭𑀸𑀚𑀓𑀼𑀮𑀸𑀤𑀺𑀓𑀼𑀮𑀯𑀺𑀲𑁂𑀲𑁄. 𑀏𑀢𑀫𑁂𑀯𑀸𑀳 ‘‘𑀓𑀼𑀮𑀧𑀤𑁂𑀲𑁄 𑀔𑀢𑁆𑀢𑀺𑀬𑀓𑀼𑀮𑀸𑀤𑀺𑀯𑀲𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄’’𑀢𑀺. 𑀲𑀦𑁆𑀦𑀺𑀧𑀸𑀢𑀫𑀡𑁆𑀟𑀮𑁂𑀢𑀺 𑀅𑀢𑁆𑀢𑀦𑁄 𑀅𑀦𑀼𑀯𑀺𑀚𑁆𑀚𑀫𑀸𑀦𑀧𑁆𑀧𑀓𑀸𑀭𑀁 𑀲𑀗𑁆𑀖𑀲𑁆𑀲 𑀜𑀸𑀧𑀦𑀢𑁆𑀣𑀁 𑀉𑀝𑁆𑀞𑀸𑀬 𑀲𑀗𑁆𑀖𑀲𑀦𑁆𑀦𑀺𑀧𑀸𑀢𑀫𑀚𑁆𑀛𑁂 𑀇𑀢𑁄 𑀘𑀺𑀢𑁄 𑀘 𑀧𑀭𑁂𑀲𑀁 𑀫𑀼𑀔𑀁 𑀑𑀮𑁄𑀓𑁂𑀦𑁆𑀢𑁂𑀦 𑀦 𑀘𑀭𑀺𑀢𑀩𑁆𑀩𑀁. 𑀬𑀣𑀸𑀦𑀺𑀲𑀺𑀦𑁆𑀦𑁂𑀦𑁂𑀯 𑀥𑀫𑁆𑀫𑀯𑀺𑀦𑀬𑀸𑀦𑀼𑀕𑀼𑀡𑀁 𑀯𑀺𑀦𑀺𑀘𑁆𑀙𑀬𑀁 𑀬𑀣𑀸 𑀲𑀩𑁆𑀩𑁂 𑀲𑀼𑀡𑀦𑁆𑀢𑀺, 𑀢𑀣𑀸 𑀯𑀢𑁆𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄.

𑀧𑀸𑀴𑀺𑀬𑀁 𑀅𑀘𑀡𑁆𑀟𑀺𑀓𑀢𑁂𑀦𑀸𑀢𑀺 𑀅𑀓𑀢𑀘𑀡𑁆𑀟𑀪𑀸𑀯𑁂𑀦, 𑀅𑀨𑀭𑀼𑀲𑁂𑀦𑀸𑀢𑀺 𑀅𑀢𑁆𑀣𑁄. ‘‘𑀳𑀺𑀢𑀸𑀦𑀼𑀓𑀫𑁆𑀧𑀺𑀦𑀸’’𑀢𑀺 𑀏𑀢𑁂𑀦 𑀫𑁂𑀢𑁆𑀢𑀸𑀧𑀼𑀩𑁆𑀩𑀪𑀸𑀕𑁄 𑀯𑀼𑀢𑁆𑀢𑁄. ‘‘𑀓𑀸𑀭𑀼𑀡𑀺𑀓𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀇𑀫𑀺𑀦𑀸 𑀅𑀧𑁆𑀧𑀦𑀸𑀧𑁆𑀧𑀢𑁆𑀢𑀓𑀭𑀼𑀡𑀸 𑀯𑀼𑀢𑁆𑀢𑀸. ‘‘𑀳𑀺𑀢𑀧𑀭𑀺𑀲𑀓𑁆𑀓𑀺𑀦𑀸’’𑀢𑀺 𑀇𑀫𑀺𑀦𑀸 𑀓𑀭𑀼𑀡𑀸𑀧𑀼𑀩𑁆𑀩𑀪𑀸𑀕𑁄. 𑀢𑁂𑀦𑀸𑀳 ‘‘𑀓𑀭𑀼𑀡𑀸 𑀘 𑀓𑀭𑀼𑀡𑀸𑀧𑀼𑀩𑁆𑀩𑀪𑀸𑀕𑁄 𑀘 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄𑀢𑀺 𑀅𑀬𑀁 𑀧𑀤𑀤𑁆𑀯𑀬𑁂𑀧𑀺 𑀅𑀥𑀺𑀧𑁆𑀧𑀸𑀬𑁄’’𑀢𑀺. 𑀮𑀚𑁆𑀚𑀺𑀬𑀸𑀢𑀺 𑀮𑀚𑁆𑀚𑀺𑀦𑀻.

𑀅𑀦𑀼𑀬𑁄𑀕𑀯𑀢𑁆𑀢𑀁 𑀓𑀣𑀸𑀧𑁂𑀢𑁆𑀯𑀸𑀢𑀺 ‘‘𑀓𑀸𑀮𑁂𑀦 𑀯𑀓𑁆𑀔𑀸𑀫𑀻’’𑀢𑀺𑀆𑀤𑀺𑀦𑀸 (𑀧𑀭𑀺. 𑁩𑁬𑁨) 𑀯𑀼𑀢𑁆𑀢𑀯𑀢𑁆𑀢𑀁. 𑀅𑀦𑀼𑀬𑀼𑀜𑁆𑀚𑀦𑀸𑀘𑀸𑀭𑀓𑁆𑀓𑀫𑁂𑀦𑁂𑀯 𑀅𑀦𑀼𑀬𑀼𑀜𑁆𑀚𑀦𑀁 𑀅𑀦𑀼𑀬𑁄𑀕𑀯𑀢𑁆𑀢𑀁 𑀦𑀸𑀫, 𑀢𑀁 𑀓𑀣𑀸𑀧𑁂𑀢𑁆𑀯𑀸 𑀢𑁂𑀦𑁂𑀯 𑀓𑀫𑁂𑀦 𑀅𑀦𑀼𑀬𑀼𑀜𑁆𑀚𑀸𑀧𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀉𑀚𑀼𑀫𑀤𑁆𑀤𑀯𑁂𑀦𑀸𑀢𑀺 𑀏𑀢𑁆𑀣 𑀅𑀚𑁆𑀛𑀸𑀳𑀭𑀺𑀢𑀩𑁆𑀩𑀧𑀤𑀁 𑀤𑀲𑁆𑀲𑁂𑀢𑀺 ‘‘𑀉𑀧𑀘𑀭𑀺𑀢𑀩𑁆𑀩𑁄’’𑀢𑀺. ‘‘𑀥𑀫𑁆𑀫𑁂𑀲𑀼 𑀘 𑀧𑀼𑀕𑁆𑀕𑀮𑁂𑀲𑀼 𑀘𑀸’’𑀢𑀺 𑀇𑀤𑀁 ‘‘𑀫𑀚𑁆𑀛𑀢𑁆𑀢𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀧𑀓𑀢𑁂𑀦 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀥𑀫𑁆𑀫𑁂𑀲𑀼 𑀘 𑀧𑀼𑀕𑁆𑀕𑀮𑁂𑀲𑀼 𑀘…𑀧𑁂… 𑀫𑀚𑁆𑀛𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄’’𑀢𑀺. 𑀬𑀜𑁆𑀳𑀺 𑀬𑀢𑁆𑀣 𑀓𑀢𑁆𑀣𑀘𑀺 𑀓𑀢𑁆𑀢𑀩𑁆𑀩𑀁, 𑀢𑀁 𑀢𑀢𑁆𑀣 𑀅𑀢𑀺𑀓𑁆𑀓𑀫𑀦𑁆𑀢𑁄 𑀫𑀚𑁆𑀛𑀢𑁆𑀢𑁄 𑀦𑀸𑀫 𑀦 𑀳𑁄𑀢𑀺, 𑀥𑀫𑁆𑀫𑁂𑀲𑀼 𑀘 𑀕𑀸𑀭𑀯𑁄 𑀓𑀢𑁆𑀢𑀩𑁆𑀩𑁄. 𑀧𑀼𑀕𑁆𑀕𑀮𑁂𑀲𑀼 𑀧𑀦 𑀫𑁂𑀢𑁆𑀢𑀸𑀪𑀸𑀯𑁂𑀦 𑀧𑀓𑁆𑀔𑀧𑀸𑀢𑀕𑀸𑀭𑀯𑁄. 𑀢𑀲𑁆𑀫𑀸 𑀇𑀫𑀁 𑀯𑀺𑀥𑀺𑀁 𑀅𑀦𑀢𑀺𑀓𑁆𑀓𑀦𑁆𑀢𑁄𑀯 𑀢𑁂𑀲𑀼 𑀫𑀚𑁆𑀛𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑁩𑁬𑁬. 𑀲𑀁𑀲𑀦𑁆𑀤𑀦𑀢𑁆𑀣𑀦𑁆𑀢𑀺 𑀆𑀧𑀢𑁆𑀢𑀺 𑀯𑀸 𑀅𑀦𑀸𑀧𑀢𑁆𑀢𑀺 𑀯𑀸𑀢𑀺 𑀲𑀁𑀲𑀬𑁂 𑀚𑀸𑀢𑁂 𑀲𑀁𑀲𑀦𑁆𑀤𑀺𑀢𑁆𑀯𑀸 𑀦𑀺𑀘𑁆𑀙𑀬𑀓𑀭𑀡𑀢𑁆𑀣𑀁 𑀯𑀼𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀢𑁆𑀣𑀤𑀲𑁆𑀲𑀦𑀸𑀬𑀸𑀢𑀺 𑀲𑀸𑀥𑁂𑀢𑀩𑁆𑀩𑀲𑁆𑀲 𑀆𑀧𑀢𑁆𑀢𑀸𑀤𑀺𑀉𑀧𑀫𑁂𑀬𑁆𑀬𑀢𑁆𑀣𑀲𑁆𑀲 𑀘𑁄𑀤𑀓𑀘𑀼𑀤𑀺𑀢𑀓𑁂 𑀅𑀢𑁆𑀢𑀦𑁄 𑀧𑀝𑀺𑀜𑁆𑀜𑀸𑀬 𑀏𑀯 𑀲𑀭𑀽𑀧𑀯𑀺𑀪𑀸𑀯𑀦𑀢𑁆𑀣𑀁. 𑀅𑀢𑁆𑀣𑁄 𑀚𑀸𑀦𑀸𑀧𑀦𑀢𑁆𑀣𑀸𑀬𑀸𑀢𑀺 𑀏𑀯𑀁 𑀯𑀺𑀪𑀸𑀯𑀺𑀢𑁄 𑀅𑀢𑁆𑀣𑁄 𑀘𑁄𑀤𑀓𑀘𑀼𑀤𑀺𑀢𑀓𑀲𑀗𑁆𑀖𑀸𑀦𑀁 𑀜𑀸𑀧𑀦𑀢𑁆𑀣𑀸𑀬 𑀦𑀺𑀚𑁆𑀛𑀸𑀧𑀦𑀢𑁆𑀣𑀸𑀬, 𑀲𑀫𑁆𑀧𑀝𑀺𑀘𑁆𑀙𑀸𑀧𑀦𑀢𑁆𑀣𑀸𑀬𑀸𑀢𑀺 𑀅𑀢𑁆𑀣𑁄. 𑀧𑀼𑀕𑁆𑀕𑀮𑀲𑁆𑀲 𑀞𑀧𑀦𑀢𑁆𑀣𑀸𑀬𑀸𑀢𑀺 𑀘𑁄𑀤𑀓𑀘𑀼𑀤𑀺𑀢𑀓𑁂 𑀅𑀢𑁆𑀢𑀦𑁄 𑀧𑀝𑀺𑀜𑁆𑀜𑀸𑀬 𑀏𑀯 𑀆𑀧𑀢𑁆𑀢𑀺𑀬𑀁, 𑀅𑀦𑀸𑀧𑀢𑁆𑀢𑀺𑀬𑀁 𑀯𑀸 𑀧𑀢𑀺𑀝𑁆𑀞𑀸𑀧𑀦𑀢𑁆𑀣𑀸𑀬. 𑀲𑀸𑀭𑀡𑀢𑁆𑀣𑀸𑀬𑀸𑀢𑀺 𑀧𑀫𑀼𑀝𑁆𑀞𑀲𑀭𑀸𑀧𑀦𑀢𑁆𑀣𑀸𑀬. 𑀲𑀯𑀘𑀦𑀻𑀬𑀓𑀭𑀡𑀢𑁆𑀣𑀸𑀬𑀸𑀢𑀺 𑀤𑁄𑀲𑁂 𑀲𑀸𑀭𑀺𑀢𑁂𑀧𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀧𑀝𑀺𑀓𑀫𑁆𑀫𑀁 𑀅𑀓𑀭𑁄𑀦𑁆𑀢𑀲𑁆𑀲 𑀲𑀯𑀘𑀦𑀻𑀬𑀓𑀭𑀡𑀢𑁆𑀣𑀸𑀬. ‘‘𑀦 𑀢𑁂 𑀅𑀧𑀲𑀸𑀤𑁂𑀢𑀩𑁆𑀩𑀸’’𑀢𑀺 𑀇𑀤𑀁 𑀅𑀥𑀺𑀧𑁆𑀧𑁂𑀢𑀢𑁆𑀣𑀤𑀲𑁆𑀲𑀦𑀁. 𑀢𑀢𑁆𑀣 𑀅𑀯𑀺𑀲𑀁𑀯𑀸𑀤𑀓𑀝𑁆𑀞𑀸𑀦𑁂 𑀞𑀺𑀢𑀸 𑀏𑀯 𑀦 𑀅𑀧𑀲𑀸𑀤𑁂𑀢𑀩𑁆𑀩𑀸, 𑀦 𑀇𑀢𑀭𑁂𑀢𑀺 𑀤𑀝𑁆𑀞𑀩𑁆𑀩𑀁.

𑀅𑀧𑁆𑀧𑀘𑁆𑀘𑀬𑀧𑀭𑀺𑀦𑀺𑀩𑁆𑀩𑀸𑀦𑀢𑁆𑀣𑀸𑀬𑀸𑀢𑀺 𑀆𑀬𑀢𑀺𑀁 𑀧𑀝𑀺𑀲𑀦𑁆𑀥𑀺𑀬𑀸 𑀅𑀓𑀸𑀭𑀡𑀪𑀽𑀢𑀧𑀭𑀺𑀦𑀺𑀩𑁆𑀩𑀸𑀦𑀢𑁆𑀣𑀸𑀬. 𑀧𑀭𑀺𑀦𑀺𑀩𑁆𑀩𑀸𑀦𑀜𑁆𑀳𑀺 𑀦𑀸𑀫 𑀔𑀻𑀡𑀸𑀲𑀯𑀸𑀦𑀁 𑀲𑀩𑁆𑀩𑀧𑀘𑁆𑀙𑀺𑀫𑀸 𑀘𑀼𑀢𑀺𑀘𑀺𑀢𑁆𑀢𑀓𑀫𑁆𑀫𑀚𑀭𑀽𑀧𑀲𑀗𑁆𑀔𑀸𑀢𑀸 𑀔𑀦𑁆𑀥𑀸, 𑀢𑁂 𑀘 𑀲𑀩𑁆𑀩𑀸𑀓𑀸𑀭𑀢𑁄 𑀲𑀫𑀼𑀘𑁆𑀙𑀺𑀦𑁆𑀦𑀸𑀦𑀼𑀲𑀬𑀢𑀸𑀬 𑀧𑀼𑀦𑀩𑁆𑀪𑀯𑀸𑀬 𑀅𑀦𑀦𑁆𑀢𑀭𑀸𑀤𑀺𑀧𑀘𑁆𑀘𑀬𑀸 𑀦 𑀳𑁄𑀦𑁆𑀢𑀺 𑀅𑀜𑁆𑀜𑁂𑀳𑀺 𑀘 𑀢𑀡𑁆𑀳𑀸𑀤𑀺𑀧𑀘𑁆𑀘𑀬𑁂𑀳𑀺 𑀯𑀺𑀭𑀳𑀺𑀢𑀢𑁆𑀢𑀸. 𑀢𑀲𑁆𑀫𑀸 ‘‘𑀅𑀧𑁆𑀧𑀘𑁆𑀘𑀬𑀧𑀭𑀺𑀦𑀺𑀩𑁆𑀩𑀸𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀦𑁆𑀢𑀺 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀁. 𑀢𑁂𑀦𑁂𑀯𑀸𑀳 ‘‘𑀢𑀲𑁆𑀫𑀺’’𑀦𑁆𑀢𑀺. 𑀯𑀺𑀦𑀬𑀫𑀦𑁆𑀢𑀦𑀸𑀢𑀺 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑁄. 𑀲𑁄𑀢𑀸𑀯𑀥𑀸𑀦𑀦𑁆𑀢𑀺 𑀲𑁄𑀢𑀲𑁆𑀲 𑀑𑀤𑀳𑀦𑀁, 𑀲𑀯𑀦𑀦𑁆𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀬𑀁 𑀉𑀧𑁆𑀧𑀚𑁆𑀚𑀢𑀺 𑀜𑀸𑀡’’𑀦𑁆𑀢𑀺. 𑀬𑀣𑀸𑀯𑀼𑀢𑁆𑀢𑀸𑀬 𑀯𑀺𑀦𑀬𑀲𑀁𑀯𑀭𑀸𑀤𑀺𑀓𑀸𑀭𑀡𑀧𑀭𑀫𑁆𑀧𑀭𑀸𑀬 𑀯𑀺𑀫𑀼𑀢𑁆𑀢𑀺𑀬𑀸 𑀏𑀯 𑀧𑀥𑀸𑀦𑀢𑁆𑀢𑀸 𑀲𑀸 𑀧𑀼𑀦 𑀘𑀺𑀢𑁆𑀢𑀲𑁆𑀲 𑀯𑀺𑀫𑁄𑀓𑁆𑀔𑁄𑀢𑀺 𑀉𑀤𑁆𑀥𑀝𑁄𑀢𑀺 𑀆𑀳 ‘‘𑀅𑀭𑀳𑀢𑁆𑀢𑀨𑀮𑀲𑀗𑁆𑀔𑀸𑀢𑁄 𑀯𑀺𑀫𑁄𑀓𑁆𑀔𑁄’’𑀢𑀺. 𑀅𑀣 𑀯𑀸 𑀬𑁄 𑀬𑀁 𑀓𑀺𑀜𑁆𑀘𑀺 𑀥𑀫𑁆𑀫𑀁 𑀅𑀦𑀼𑀧𑀸𑀤𑀺𑀬𑀺𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀦𑀯𑀲𑁂𑀦 𑀘𑀺𑀢𑁆𑀢𑀲𑁆𑀲 𑀘𑀺𑀢𑁆𑀢𑀲𑀦𑁆𑀢𑀢𑀺𑀬𑀸, 𑀢𑀧𑁆𑀧𑀝𑀺𑀩𑀤𑁆𑀥𑀓𑀫𑁆𑀫𑀚𑀭𑀽𑀧𑀲𑀦𑁆𑀢𑀢𑀺𑀬𑀸 𑀘 𑀯𑀺𑀫𑁄𑀓𑁆𑀔𑁄 𑀯𑀺𑀫𑀼𑀘𑁆𑀘𑀦𑀁 𑀅𑀧𑀼𑀦𑀧𑁆𑀧𑀯𑀢𑁆𑀢𑀺𑀯𑀲𑁂𑀦 𑀯𑀺𑀕𑀫𑁄, 𑀏𑀢𑀤𑀢𑁆𑀣𑀸𑀬 𑀏𑀢𑀲𑁆𑀲 𑀯𑀺𑀕𑀫𑀲𑁆𑀲𑀢𑁆𑀣𑀸𑀬 𑀏𑀯𑀸𑀢𑀺 𑀏𑀯𑀁 𑀦𑀺𑀕𑀫𑀦𑀯𑀲𑁂𑀦𑀧𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑁩𑁬𑁭. 𑀅𑀦𑀼𑀬𑁄𑀕𑀯𑀢𑁆𑀢𑀕𑀸𑀣𑀸𑀲𑀼 𑀓𑀼𑀲𑀮𑁂𑀦 𑀩𑀼𑀤𑁆𑀥𑀺𑀫𑀢𑀸𑀢𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦. 𑀓𑀢𑀦𑁆𑀢𑀺 𑀦𑀺𑀩𑁆𑀩𑀢𑁆𑀢𑀺𑀢𑀁, 𑀧𑀓𑀸𑀲𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀢𑁂𑀦𑁂𑀯𑀸𑀢𑀺𑀆𑀤𑀻𑀲𑀼 𑀢𑁂𑀦𑁂𑀯 𑀓𑀢𑀸𑀓𑀢𑀲𑁆𑀲 𑀅𑀚𑀸𑀦𑀦𑁂𑀯 𑀧𑀼𑀩𑁆𑀩𑀸𑀧𑀭𑀁 𑀅𑀚𑀸𑀦𑀦𑀲𑁆𑀲, 𑀅𑀜𑁆𑀜𑀲𑁆𑀲𑀧𑀺 𑀪𑀺𑀓𑁆𑀔𑀼𑀦𑁄 𑀬𑀁 𑀓𑀢𑀸𑀓𑀢𑀁 𑀳𑁄𑀢𑀺, 𑀢𑀫𑁆𑀧𑀺 𑀦 𑀚𑀸𑀦𑀸𑀢𑀻𑀢𑀺 𑀅𑀢𑁆𑀣𑁄. 𑀅𑀢𑁆𑀢𑀦𑁄 𑀲𑀤𑀺𑀲𑀸𑀬𑀸𑀢𑀺 𑀬𑀣𑀸𑀯𑀼𑀢𑁆𑀢𑁂𑀳𑀺 𑀤𑁄𑀲𑁂𑀳𑀺 𑀬𑀼𑀢𑁆𑀢𑀢𑀸𑀬 𑀅𑀢𑁆𑀢𑀦𑀸 𑀲𑀤𑀺𑀲𑀸𑀬.

𑀅𑀦𑀼𑀯𑀺𑀚𑁆𑀚𑀓𑀲𑁆𑀲 𑀧𑀝𑀺𑀧𑀢𑁆𑀢𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.