𑀅𑀥𑀺𑀓𑀭𑀡𑀪𑁂𑀤𑀁

𑀉𑀓𑁆𑀓𑁄𑀝𑀦𑀪𑁂𑀤𑀸𑀤𑀺𑀓𑀣𑀸𑀯𑀡𑁆𑀡𑀦𑀸

𑁩𑁪𑁧. ‘‘𑀅𑀮𑀁 𑀆𑀯𑀼𑀲𑁄’’𑀢𑀺 𑀅𑀢𑁆𑀢𑀧𑀘𑁆𑀘𑀢𑁆𑀣𑀺𑀓𑁂 𑀲𑀜𑁆𑀜𑀸𑀧𑁂𑀢𑁆𑀯𑀸𑀢𑀺 𑀧𑀢𑁆𑀢𑀘𑀻𑀯𑀭𑀸𑀤𑀺𑀅𑀢𑁆𑀣𑀸𑀬 𑀅𑀮𑀁 𑀪𑀡𑁆𑀟𑀦𑀸𑀤𑀺𑀓𑀭𑀡𑀦𑁆𑀢𑀺 𑀯𑀺𑀯𑀸𑀤𑀸𑀤𑀻𑀲𑀼 𑀤𑁄𑀲𑀤𑀲𑁆𑀲𑀦𑀫𑀢𑁆𑀢𑁂𑀦 𑀲𑀜𑁆𑀜𑀸𑀧𑁂𑀢𑁆𑀯𑀸 𑀅𑀜𑁆𑀜𑀫𑀜𑁆𑀜𑀁 𑀔𑀫𑀸𑀧𑁂𑀢𑁆𑀯𑀸 𑀯𑀽𑀧𑀲𑀫𑁂𑀦𑁆𑀢𑀺, 𑀦 𑀧𑀦 𑀅𑀜𑁆𑀜𑀫𑀜𑁆𑀜𑀁 𑀆𑀧𑀢𑁆𑀢𑀸𑀦𑀸𑀧𑀢𑁆𑀢𑀺𑀤𑀲𑁆𑀲𑀦𑀯𑀲𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑀸𑀳 ‘‘𑀧𑀸𑀴𑀺𑀫𑀼𑀢𑁆𑀢𑀓𑀯𑀺𑀦𑀺𑀘𑁆𑀙𑀬𑁂𑀦𑁂𑀯𑀸’’𑀢𑀺.

𑀯𑀺𑀲𑀫𑀸𑀦𑀺 𑀓𑀸𑀬𑀓𑀫𑁆𑀫𑀸𑀤𑀻𑀦𑀺 𑀦𑀺𑀲𑁆𑀲𑀺𑀢𑁄 𑀪𑀺𑀓𑁆𑀔𑀼 𑀯𑀺𑀲𑀫𑀦𑀺𑀲𑁆𑀲𑀺𑀢𑁄 𑀦𑀸𑀫, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀦𑀺𑀲𑁆𑀲𑀺𑀢𑁄 𑀕𑀳𑀦𑀦𑀺𑀲𑁆𑀲𑀺𑀢𑁄, 𑀩𑀮𑀯𑀦𑁆𑀢𑁂 𑀧𑀼𑀭𑀺𑀲𑁂 𑀦𑀺𑀲𑁆𑀲𑀺𑀢𑁄 𑀩𑀮𑀯𑀦𑀺𑀲𑁆𑀲𑀺𑀢𑁄 𑀦𑀸𑀫𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀏𑀓𑁄 𑀯𑀺𑀲𑀫𑀸𑀦𑀻’’𑀢𑀺𑀆𑀤𑀺𑀫𑀸𑀳.

𑀉𑀓𑁆𑀓𑁄𑀝𑀦𑀪𑁂𑀤𑀸𑀤𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀥𑀺𑀓𑀭𑀡𑀦𑀺𑀤𑀸𑀦𑀸𑀤𑀺𑀯𑀡𑁆𑀡𑀦𑀸

𑁩𑁪𑁨. 𑀆𑀧𑀢𑁆𑀢𑀺𑀁 𑀦𑀺𑀲𑁆𑀲𑀸𑀬 𑀉𑀧𑁆𑀧𑀚𑁆𑀚𑀦𑀓𑀆𑀧𑀢𑁆𑀢𑀺𑀯𑀲𑁂𑀦𑀸𑀢𑀺 𑀧𑀭𑁂𑀲𑀁, 𑀅𑀢𑁆𑀢𑀦𑁄 𑀘 𑀆𑀧𑀢𑁆𑀢𑀺𑀁 𑀧𑀝𑀺𑀘𑁆𑀙𑀸𑀤𑁂𑀦𑁆𑀢𑀸𑀦𑀁 𑀯𑀚𑁆𑀚𑀧𑀝𑀺𑀘𑁆𑀙𑀸𑀤𑀻𑀦𑀁 𑀧𑀸𑀭𑀸𑀚𑀺𑀓𑀸𑀤𑀺𑀆𑀧𑀢𑁆𑀢𑀺𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀦 𑀲𑀩𑁆𑀩𑀸𑀧𑀢𑁆𑀢𑀺𑀬𑁄. 𑀓𑀺𑀘𑁆𑀘𑀁 𑀦𑀺𑀲𑁆𑀲𑀸𑀬 𑀉𑀧𑁆𑀧𑀚𑁆𑀚𑀦𑀓𑀓𑀺𑀘𑁆𑀘𑀸𑀦𑀦𑁆𑀢𑀺 𑀉𑀓𑁆𑀔𑁂𑀧𑀦𑀻𑀬𑀸𑀤𑀺𑀓𑀫𑁆𑀫𑀁 𑀦𑀺𑀲𑁆𑀲𑀸𑀬 𑀉𑀧𑁆𑀧𑀚𑁆𑀚𑀦𑀓𑀸𑀦𑀁 𑀢𑀤𑀦𑀼𑀯𑀢𑁆𑀢𑀺𑀓𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀬𑀸𑀯𑀢𑀢𑀺𑀬𑀸𑀦𑀼𑀲𑁆𑀲𑀸𑀯𑀦𑀸𑀦𑀁 𑀓𑀺𑀘𑁆𑀘𑀸𑀦𑀁 𑀯𑀲𑁂𑀦, 𑀦 𑀲𑀩𑁆𑀩𑁂𑀲𑀁 𑀓𑀺𑀘𑁆𑀘𑀸𑀦𑀁 𑀯𑀲𑁂𑀦𑀸𑀢𑀺.

𑁩𑁪𑁪. 𑀧𑀸𑀴𑀺𑀬𑀁 ‘‘𑀓𑀢𑀺𑀳𑀺 𑀅𑀥𑀺𑀓𑀭𑀡𑁂𑀳𑀻’’𑀢𑀺 𑀧𑀼𑀘𑁆𑀙𑀸𑀬 ‘‘𑀏𑀓𑁂𑀦 𑀅𑀥𑀺𑀓𑀭𑀡𑁂𑀦 𑀓𑀺𑀘𑁆𑀘𑀸𑀥𑀺𑀓𑀭𑀡𑁂𑀦𑀸’’𑀢𑀺 𑀯𑀼𑀢𑁆𑀢𑀁. ‘‘𑀓𑀢𑀺𑀲𑀼 𑀞𑀸𑀦𑁂𑀲𑀽’’𑀢𑀺 𑀧𑀼𑀘𑁆𑀙𑀸𑀬 ‘‘𑀢𑀻𑀲𑀼 𑀞𑀸𑀦𑁂𑀲𑀼 𑀲𑀗𑁆𑀖𑀫𑀚𑁆𑀛𑁂, 𑀕𑀡𑀫𑀚𑁆𑀛𑁂, 𑀧𑀼𑀕𑁆𑀕𑀮𑀲𑁆𑀲 𑀲𑀦𑁆𑀢𑀺𑀓𑁂’’𑀢𑀺 𑀯𑀼𑀢𑁆𑀢𑀁. ‘‘𑀓𑀢𑀺𑀳𑀺 𑀲𑀫𑀣𑁂𑀳𑀻’’𑀢𑀺 𑀧𑀼𑀘𑁆𑀙𑀸𑀬 ‘‘𑀢𑀻𑀳𑀺 𑀲𑀫𑀣𑁂𑀳𑀻’’𑀢𑀺 𑀯𑀼𑀢𑁆𑀢𑀁. 𑀢𑀻𑀳𑀺𑀧𑀺 𑀏𑀢𑁂𑀳𑀺 𑀏𑀓𑁄 𑀯𑀽𑀧𑀲𑀫𑀦𑀧𑁆𑀧𑀓𑀸𑀭𑁄𑀯 𑀧𑀼𑀘𑁆𑀙𑀺𑀢𑁄, 𑀯𑀺𑀲𑁆𑀲𑀚𑁆𑀚𑀺𑀢𑁄 𑀘𑀸𑀢𑀺 𑀯𑁂𑀤𑀺𑀢𑀩𑁆𑀩𑁄.

𑁩𑁪𑁮. 𑀯𑀺𑀯𑀸𑀤𑀸𑀥𑀺𑀓𑀭𑀡𑀁 𑀳𑁄𑀢𑀺 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀦𑁆𑀢𑀺𑀆𑀤𑀻𑀲𑀼 𑀯𑀺𑀯𑀸𑀤𑀸𑀥𑀺𑀓𑀭𑀡𑀫𑁂𑀯 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀸𑀤𑀺𑀧𑀺 𑀳𑁄𑀢𑀻𑀢𑀺 𑀧𑀼𑀘𑁆𑀙𑀸𑀬 𑀯𑀺𑀯𑀸𑀤𑀸𑀥𑀺𑀓𑀭𑀡𑀁 𑀯𑀺𑀯𑀸𑀤𑀸𑀥𑀺𑀓𑀭𑀡𑀫𑁂𑀯 𑀳𑁄𑀢𑀺, 𑀅𑀦𑀼𑀯𑀸𑀤𑀸𑀤𑀬𑁄 𑀦 𑀳𑁄𑀢𑀻𑀢𑀺 𑀯𑀺𑀲𑁆𑀲𑀚𑁆𑀚𑀦𑀁.

𑀅𑀥𑀺𑀓𑀭𑀡𑀦𑀺𑀤𑀸𑀦𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀢𑁆𑀢𑀲𑀫𑀣𑀦𑀸𑀦𑀸𑀢𑁆𑀣𑀸𑀤𑀺𑀯𑀡𑁆𑀡𑀦𑀸

𑁩𑁫𑁪. 𑀅𑀥𑀺𑀓𑀭𑀡𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑁂 𑀧𑀸𑀴𑀺𑀬𑀁 𑀯𑀺𑀧𑀘𑁆𑀘𑀬𑀢𑀸𑀬 𑀯𑁄𑀳𑀸𑀭𑁄𑀢𑀺 𑀯𑀺𑀭𑀽𑀧𑀯𑀺𑀧𑀸𑀓𑀸𑀬 𑀅𑀜𑁆𑀜𑀫𑀜𑁆𑀜𑀁 𑀤𑀼𑀓𑁆𑀔𑀼𑀧𑁆𑀧𑀸𑀤𑀦𑀸𑀬 𑀓𑀸𑀬𑀯𑀘𑀻𑀯𑁄𑀳𑀸𑀭𑁄. 𑀫𑁂𑀥𑀕𑀦𑁆𑀢𑀺 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑁄 𑀓𑀮𑀳𑁄.

𑀅𑀦𑀼𑀲𑀫𑁆𑀧𑀯𑀗𑁆𑀓𑀢𑀸𑀢𑀺 𑀯𑀺𑀧𑀢𑁆𑀢𑀺𑀘𑁄𑀤𑀦𑀸𑀬 𑀅𑀦𑀼 𑀅𑀦𑀼 𑀲𑀁𑀬𑀼𑀚𑁆𑀚𑀦𑀯𑀲𑁂𑀦 𑀦𑀺𑀦𑁆𑀦𑀢𑀸.

𑀅𑀩𑁆𑀪𑀼𑀲𑁆𑀲𑀳𑀦𑀢𑀸𑀢𑀺 𑀅𑀢𑀺𑀯𑀺𑀬 𑀲𑀜𑁆𑀚𑀸𑀢𑀼𑀲𑁆𑀲𑀸𑀳𑀢𑀸. 𑀅𑀦𑀼𑀩𑀮𑀧𑁆𑀧𑀤𑀸𑀦𑀦𑁆𑀢𑀺 𑀘𑁄𑀤𑀓𑀸𑀦𑀫𑁆𑀧𑀺 𑀉𑀧𑀢𑁆𑀣𑀫𑁆𑀪𑀓𑀭𑀡𑀁. 𑀓𑀫𑁆𑀫𑀲𑀗𑁆𑀕𑀳𑀸𑀪𑀸𑀯𑁂𑀦𑀸𑀢𑀺 𑀲𑀗𑁆𑀖𑀲𑀫𑁆𑀫𑀼𑀔𑀢𑀸𑀤𑀺𑀫𑀢𑁆𑀢𑀲𑁆𑀲 𑀲𑀫𑁆𑀫𑀼𑀔𑀸𑀯𑀺𑀦𑀬𑀲𑁆𑀲 𑀲𑀗𑁆𑀖𑀸𑀤𑀻𑀳𑀺 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑁂𑀲𑀼 𑀲𑀗𑁆𑀕𑀳𑀸𑀪𑀸𑀯𑀸.

𑀲𑀢𑁆𑀢𑀲𑀫𑀣𑀦𑀸𑀦𑀸𑀢𑁆𑀣𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀥𑀺𑀓𑀭𑀡𑀪𑁂𑀤𑀯𑀡𑁆𑀡𑀦𑀸𑀦𑀬𑁄 𑀦𑀺𑀝𑁆𑀞𑀺𑀢𑁄.

𑀤𑀼𑀢𑀺𑀬𑀕𑀸𑀣𑀸𑀲𑀗𑁆𑀕𑀡𑀺𑀓𑀁

𑀘𑁄𑀤𑀦𑀸𑀤𑀺𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀸𑀯𑀡𑁆𑀡𑀦𑀸

𑁩𑁫𑁯. 𑀤𑀼𑀢𑀺𑀬𑀕𑀸𑀣𑀸𑀲𑀗𑁆𑀕𑀡𑀺𑀓𑀸𑀬 ‘‘𑀘𑁄𑀤𑀦𑀸 𑀓𑀺𑀫𑀢𑁆𑀣𑀸𑀬𑀸’’𑀢𑀺𑀆𑀤𑀺𑀓𑀸 𑀧𑀼𑀘𑁆𑀙𑀸 𑀉𑀧𑀸𑀮𑀺𑀢𑁆𑀣𑁂𑀭𑁂𑀦 𑀓𑀢𑀸. ‘‘𑀘𑁄𑀤𑀦𑀸 𑀲𑀸𑀭𑀡𑀢𑁆𑀣𑀸𑀬𑀸’’𑀢𑀺𑀆𑀤𑀺𑀯𑀺𑀲𑁆𑀲𑀚𑁆𑀚𑀦𑀁 𑀪𑀕𑀯𑀢𑀸 𑀯𑀼𑀢𑁆𑀢𑀁. 𑀉𑀧𑀸𑀮𑀺𑀢𑁆𑀣𑁂𑀭𑁄 𑀲𑀬𑀫𑁂𑀯 𑀧𑀼𑀘𑁆𑀙𑀺𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑀦𑀁 𑀅𑀓𑀸𑀲𑀻𑀢𑀺𑀧𑀺 𑀯𑀤𑀦𑁆𑀢𑀺.

𑀫𑀦𑁆𑀢𑀕𑁆𑀕𑀳𑀡𑀦𑁆𑀢𑀺 𑀢𑁂𑀲𑀁 𑀯𑀺𑀘𑀸𑀭𑀡𑀸𑀕𑀳𑀡𑀁, 𑀲𑀼𑀢𑁆𑀢𑀦𑁆𑀢𑀺𑀓𑀢𑁆𑀣𑁂𑀭𑀸𑀦𑀁, 𑀯𑀺𑀦𑀬𑀥𑀭𑀢𑁆𑀣𑁂𑀭𑀸𑀦𑀜𑁆𑀘 𑀅𑀥𑀺𑀧𑁆𑀧𑀸𑀬𑀕𑀳𑀡𑀦𑁆𑀢𑀺 𑀅𑀢𑁆𑀣𑁄. 𑀧𑀸𑀝𑁂𑀓𑁆𑀓𑀁 𑀯𑀺𑀦𑀺𑀘𑁆𑀙𑀬𑀲𑀦𑁆𑀦𑀺𑀝𑁆𑀞𑀸𑀧𑀦𑀢𑁆𑀣𑀦𑁆𑀢𑀺 𑀢𑁂𑀲𑀁 𑀧𑀘𑁆𑀘𑁂𑀓𑀁 𑀅𑀥𑀺𑀧𑁆𑀧𑀸𑀬𑀁 𑀜𑀢𑁆𑀯𑀸 𑀢𑁂𑀳𑀺 𑀲𑀫𑀼𑀝𑁆𑀞𑀸𑀧𑀺𑀢𑀦𑀬𑀫𑁆𑀧𑀺 𑀕𑀳𑁂𑀢𑁆𑀯𑀸 𑀯𑀺𑀦𑀺𑀘𑁆𑀙𑀬𑀧𑀭𑀺𑀬𑁄𑀲𑀸𑀧𑀦𑀢𑁆𑀣𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

‘‘𑀫𑀸 𑀔𑁄 𑀢𑀼𑀭𑀺𑀢𑁄 𑀅𑀪𑀡𑀻’’𑀢𑀺𑀆𑀤𑀺𑀦𑀸 𑀅𑀪𑀺𑀫𑀼𑀔𑁂 𑀞𑀺𑀢𑀁 𑀓𑀜𑁆𑀘𑀺 𑀅𑀦𑀼𑀯𑀺𑀚𑁆𑀚𑀓𑀁 𑀑𑀯𑀤𑀦𑁆𑀢𑁂𑀦 𑀯𑀺𑀬 𑀣𑁂𑀭𑁂𑀦 𑀅𑀦𑀼𑀯𑀺𑀚𑁆𑀚𑀓𑀯𑀢𑁆𑀢𑀁 𑀓𑀣𑀺𑀢𑀁.

𑀅𑀦𑀼𑀬𑀼𑀜𑁆𑀚𑀦𑀯𑀢𑁆𑀢𑀦𑁆𑀢𑀺 𑀅𑀦𑀼𑀬𑀼𑀚𑁆𑀚𑀦𑀓𑁆𑀓𑀫𑀁, 𑀢𑀁 𑀧𑀦 𑀬𑀲𑁆𑀫𑀸 𑀲𑀩𑁆𑀩𑀲𑀺𑀓𑁆𑀔𑀸𑀧𑀤𑀯𑀻𑀢𑀺𑀓𑁆𑀓𑀫𑀯𑀺𑀲𑀬𑁂𑀧𑀺 𑀢𑀁𑀢𑀁𑀲𑀺𑀓𑁆𑀔𑀸𑀧𑀤𑀸𑀦𑀼𑀮𑁄𑀫𑁂𑀦 𑀓𑀢𑁆𑀢𑀩𑁆𑀩𑀁, 𑀢𑀲𑁆𑀫𑀸 ‘‘𑀲𑀺𑀓𑁆𑀔𑀸𑀧𑀤𑀸𑀦𑀼𑀮𑁄𑀫𑀺𑀓’’𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀢𑁆𑀢𑀦𑁄 𑀕𑀢𑀺𑀁 𑀦𑀸𑀲𑁂𑀢𑀻𑀢𑀺 𑀅𑀢𑁆𑀢𑀦𑁄 𑀲𑀼𑀕𑀢𑀺𑀕𑀫𑀦𑀁 𑀯𑀺𑀦𑀸𑀲𑁂𑀢𑀺.

𑀅𑀦𑀼𑀲𑀦𑁆𑀥𑀺𑀢-𑀲𑀤𑁆𑀤𑁄 𑀪𑀸𑀯𑀲𑀸𑀥𑀦𑁄𑀢𑀺 𑀆𑀳 ‘‘𑀅𑀦𑀼𑀲𑀦𑁆𑀥𑀺𑀢𑀦𑁆𑀢𑀺 𑀓𑀣𑀸𑀦𑀼𑀲𑀦𑁆𑀥𑀻’’𑀢𑀺. 𑀯𑀢𑁆𑀢𑀸𑀦𑀼𑀲𑀦𑁆𑀥𑀺𑀢𑁂𑀦𑀸𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀯𑀢𑁆𑀢𑀸𑀦𑀼𑀲𑀦𑁆𑀥𑀺𑀢𑁂𑀦𑀸𑀢𑀺 𑀆𑀘𑀸𑀭𑀸𑀦𑀼𑀲𑀦𑁆𑀥𑀺𑀦𑀸, 𑀆𑀘𑀸𑀭𑁂𑀦 𑀲𑀤𑁆𑀥𑀺𑀁 𑀲𑀫𑁂𑀦𑁆𑀢𑀺𑀬𑀸 𑀧𑀝𑀺𑀜𑁆𑀜𑀸𑀬𑀸𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀬𑀸 𑀅𑀲𑁆𑀲 𑀯𑀢𑁆𑀢𑁂𑀦𑀸’’𑀢𑀺𑀆𑀤𑀺.

𑀧𑀸𑀴𑀺𑀬𑀁 𑀲𑀜𑁆𑀘𑀺𑀘𑁆𑀘 𑀆𑀧𑀢𑁆𑀢𑀺𑀦𑁆𑀢𑀺𑀆𑀤𑀺 𑀅𑀮𑀚𑁆𑀚𑀺𑀮𑀚𑁆𑀚𑀺𑀮𑀓𑁆𑀔𑀡𑀁 𑀪𑀺𑀓𑁆𑀔𑀼𑀪𑀺𑀓𑁆𑀔𑀼𑀦𑀻𑀦𑀁 𑀯𑀲𑁂𑀦 𑀯𑀼𑀢𑁆𑀢𑀁 𑀢𑁂𑀲𑀜𑁆𑀜𑁂𑀯 𑀲𑀩𑁆𑀩𑀧𑁆𑀧𑀓𑀸𑀭𑀢𑁄 𑀲𑀺𑀓𑁆𑀔𑀸𑀧𑀤𑀸𑀥𑀺𑀓𑀸𑀭𑀢𑁆𑀢𑀸. 𑀲𑀸𑀫𑀡𑁂𑀭𑀸𑀤𑀻𑀦𑀫𑁆𑀧𑀺 𑀲𑀸𑀥𑀸𑀭𑀡𑀯𑀲𑁂𑀦 𑀧𑀦 𑀲𑀜𑁆𑀘𑀺𑀘𑁆𑀘 𑀬𑀣𑀸𑀲𑀓𑀁 𑀲𑀺𑀓𑁆𑀔𑀸𑀧𑀤𑀯𑀻𑀢𑀺𑀓𑁆𑀓𑀫𑀦𑀸𑀤𑀺𑀓𑀁 𑀅𑀮𑀚𑁆𑀚𑀺𑀮𑀚𑁆𑀚𑀺𑀮𑀓𑁆𑀔𑀡𑀁 𑀯𑁂𑀤𑀺𑀢𑀩𑁆𑀩𑀁.

𑀓𑀣𑀸𑀦𑀼𑀲𑀦𑁆𑀥𑀺𑀯𑀘𑀦𑀦𑁆𑀢𑀺 𑀘𑀼𑀤𑀺𑀢𑀓𑀅𑀦𑀼𑀯𑀺𑀚𑁆𑀚𑀓𑀸𑀦𑀁 𑀓𑀣𑀸𑀬 𑀅𑀦𑀼𑀲𑀦𑁆𑀥𑀺𑀬𑀼𑀢𑁆𑀢𑀁 𑀯𑀘𑀦𑀁 𑀦 𑀚𑀸𑀦𑀸𑀢𑀺, 𑀢𑁂𑀳𑀺 𑀏𑀓𑀲𑁆𑀫𑀺𑀁 𑀓𑀸𑀭𑀡𑁂 𑀯𑀼𑀢𑁆𑀢𑁂 𑀲𑀬𑀁 𑀢𑀁 𑀅𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀅𑀢𑁆𑀢𑀦𑁄 𑀅𑀪𑀺𑀭𑀼𑀘𑀺𑀢𑀫𑁂𑀯 𑀅𑀲𑀫𑁆𑀩𑀦𑁆𑀥𑀺𑀢𑀢𑁆𑀣𑀦𑁆𑀢𑀺 𑀅𑀢𑁆𑀣𑁄. 𑀯𑀺𑀦𑀺𑀘𑁆𑀙𑀬𑀸𑀦𑀼𑀲𑀦𑁆𑀥𑀺𑀯𑀘𑀦𑀜𑁆𑀘𑀸𑀢𑀺 𑀅𑀦𑀼𑀯𑀺𑀚𑁆𑀚𑀓𑁂𑀦 𑀓𑀢𑀲𑁆𑀲 𑀆𑀧𑀢𑁆𑀢𑀸𑀦𑀸𑀧𑀢𑁆𑀢𑀺𑀯𑀺𑀦𑀺𑀘𑁆𑀙𑀬𑀲𑁆𑀲 𑀅𑀦𑀼𑀕𑀼𑀡𑀁, 𑀲𑀫𑁆𑀩𑀦𑁆𑀥𑀯𑀘𑀦𑀜𑁆𑀘.

𑀘𑁄𑀤𑀦𑀸𑀤𑀺𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.