𑀧𑀞𑀫𑀕𑀸𑀣𑀸𑀲𑀗𑁆𑀕𑀡𑀺𑀓𑀁

𑀲𑀢𑁆𑀢𑀦𑀕𑀭𑁂𑀲𑀼 𑀧𑀜𑁆𑀜𑀢𑁆𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁩𑁩𑁫. 𑀅𑀟𑁆𑀠𑀼𑀟𑁆𑀠𑀲𑀢𑀸𑀦𑀻𑀢𑀺 𑀧𑀜𑁆𑀜𑀸𑀲𑀸𑀥𑀺𑀓𑀸𑀦𑀺 𑀢𑀻𑀡𑀺 𑀲𑀢𑀸𑀦𑀺. 𑀯𑀺𑀕𑁆𑀕𑀳𑀧𑀤𑁂𑀦 𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑀁 𑀯𑀼𑀢𑁆𑀢𑀁.

𑀅𑀢𑀺𑀭𑁂𑀓𑀦𑁆𑀢𑀺 𑀧𑀞𑀫𑀓𑀣𑀺𑀦𑀁. 𑀓𑀸𑀴𑀓𑀦𑁆𑀢𑀺 𑀲𑀼𑀤𑁆𑀥𑀓𑀸𑀴𑀓𑀁. 𑀪𑀽𑀢𑀦𑁆𑀢𑀺 𑀪𑀽𑀢𑀸𑀭𑁄𑀘𑀦𑀁. 𑀪𑀺𑀓𑁆𑀔𑀼𑀦𑀻𑀲𑀼 𑀘 𑀅𑀓𑁆𑀓𑁄𑀲𑁄𑀢𑀺 ‘‘𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀪𑀺𑀓𑁆𑀔𑀼𑀁 𑀅𑀓𑁆𑀓𑁄𑀲𑁂𑀬𑁆𑀬𑀸’’𑀢𑀺 (𑀧𑀸𑀘𑀺. 𑁧𑁦𑁨𑁯) 𑀯𑀼𑀢𑁆𑀢𑀁 𑀲𑀺𑀓𑁆𑀔𑀸𑀧𑀤𑀁.

𑀤𑁆𑀯𑁂𑀧𑀺 𑀘 𑀪𑁂𑀤𑀸𑀢𑀺 𑀤𑁆𑀯𑁂 𑀲𑀗𑁆𑀖𑀪𑁂𑀤𑀲𑀺𑀓𑁆𑀔𑀸𑀧𑀤𑀸𑀦𑀺. 𑀅𑀦𑁆𑀢𑀭𑀯𑀸𑀲𑀓𑀦𑀸𑀫𑁂𑀦 𑀅𑀜𑁆𑀜𑀸𑀢𑀺𑀓𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀳𑀢𑁆𑀣𑀢𑁄 𑀘𑀻𑀯𑀭𑀧𑀝𑀺𑀕𑁆𑀕𑀳𑀡𑀁 𑀯𑀼𑀢𑁆𑀢𑀁. 𑀲𑀼𑀢𑁆𑀢𑀦𑁆𑀢𑀺 𑀲𑀼𑀢𑁆𑀢𑀁 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀯𑀸𑀬𑀸𑀧𑀦𑀁. 𑀯𑀺𑀓𑀸𑀮𑁂𑀢𑀺 𑀯𑀺𑀓𑀸𑀮𑀪𑁄𑀚𑀦𑀁. 𑀘𑀸𑀭𑀺𑀢𑁆𑀢𑀦𑁆𑀢𑀺 𑀧𑀼𑀭𑁂𑀪𑀢𑁆𑀢𑀁 𑀧𑀘𑁆𑀙𑀸𑀪𑀢𑁆𑀢𑀁 𑀘𑀸𑀭𑀺𑀢𑁆𑀢𑀁. 𑀦𑀳𑀸𑀦𑀦𑁆𑀢𑀺 𑀑𑀭𑁂𑀦𑀤𑁆𑀥𑀫𑀸𑀲𑀦𑀳𑀸𑀦𑀁.

𑀘𑀻𑀯𑀭𑀁 𑀤𑀢𑁆𑀯𑀸𑀢𑀺 𑀲𑀫𑀕𑁆𑀕𑁂𑀦 𑀲𑀗𑁆𑀖𑁂𑀦 𑀘𑀻𑀯𑀭𑀁 𑀤𑀢𑁆𑀯𑀸 𑀔𑀺𑀬𑁆𑀬𑀦𑀁. 𑀕𑀺𑀭𑀕𑁆𑀕𑀦𑁆𑀢𑀺 𑀦𑀘𑁆𑀘𑀕𑀻𑀢𑀁. 𑀘𑀭𑀺𑀬𑀸𑀢𑀺 𑀅𑀦𑁆𑀢𑁄𑀯𑀲𑁆𑀲𑀁 𑀘𑀸𑀭𑀺𑀓𑀘𑀭𑀡𑀁. 𑀢𑀢𑁆𑀣𑁂𑀯𑀸𑀢𑀺 𑀯𑀲𑁆𑀲𑀁𑀯𑀼𑀢𑁆𑀣𑀸𑀬 𑀘𑀸𑀭𑀺𑀓𑀁 𑀅𑀧𑀓𑁆𑀓𑀫𑀺𑀢𑁆𑀯𑀸 𑀢𑀢𑁆𑀣𑁂𑀯 𑀦𑀺𑀯𑀸𑀲𑀦𑀁 𑀧𑀝𑀺𑀘𑁆𑀘 𑀧𑀜𑁆𑀜𑀢𑁆𑀢𑀲𑀺𑀓𑁆𑀔𑀸𑀧𑀤𑀁. 𑀙𑀦𑁆𑀤𑀤𑀸𑀦𑁂𑀦𑀸𑀢𑀺 𑀧𑀸𑀭𑀺𑀯𑀸𑀲𑀺𑀓𑁂𑀦 𑀙𑀦𑁆𑀤𑀤𑀸𑀦𑁂𑀦.

𑀧𑀸𑀭𑀸𑀚𑀺𑀓𑀸𑀦𑀺 𑀘𑀢𑁆𑀢𑀸𑀭𑀻𑀢𑀺 𑀪𑀺𑀓𑁆𑀔𑀼𑀦𑀻𑀦𑀁 𑀅𑀲𑀸𑀥𑀸𑀭𑀡𑀸𑀦𑀺. 𑀲𑁄𑀴𑀲𑀸𑀢𑀺 𑀆𑀤𑀺𑀢𑁄 𑀧𑀜𑁆𑀘 𑀲𑀺𑀓𑁆𑀔𑀸𑀧𑀤𑀸𑀦𑀺, 𑀓𑀼𑀮𑀤𑀽𑀲𑀦𑀜𑁆𑀘𑀸𑀢𑀺 𑀙, 𑀪𑀺𑀓𑁆𑀔𑀼𑀦𑀻𑀦𑀁 𑀅𑀲𑀸𑀥𑀸𑀭𑀡𑀸𑀦𑀺 𑀤𑀲 𑀦𑀺𑀲𑁆𑀲𑀕𑁆𑀕𑀺𑀬𑀸𑀦𑀺.

𑀘𑀢𑀼𑀢𑁆𑀢𑀺𑀁𑀲𑀸𑀢𑀺 𑀧𑀞𑀫𑀓𑀣𑀺𑀦𑀲𑀼𑀤𑁆𑀥𑀓𑀸𑀴𑀓𑀘𑀻𑀯𑀭𑀧𑀝𑀺𑀕𑁆𑀕𑀳𑀡𑀭𑀽𑀧𑀺𑀬𑀘𑀻𑀯𑀭𑀯𑀸𑀬𑀸𑀧𑀦𑀓𑁄𑀲𑁂𑀬𑁆𑀬𑀫𑀺𑀲𑁆𑀲𑀓𑀏𑀴𑀓𑀮𑁄𑀫𑀥𑁄𑀯𑀸𑀧𑀦𑀤𑀼𑀢𑀺𑀬𑀧𑀢𑁆𑀢𑀯𑀚𑁆𑀚𑀺𑀢𑀸𑀦𑀺 𑀪𑀺𑀓𑁆𑀔𑀼𑀯𑀺𑀪𑀗𑁆𑀕𑁂 𑀤𑁆𑀯𑀸𑀯𑀻𑀲𑀢𑀺, 𑀪𑀺𑀓𑁆𑀔𑀼𑀦𑀻𑀦𑀁 𑀅𑀲𑀸𑀥𑀸𑀭𑀡𑀸𑀦𑀺 𑀤𑁆𑀯𑀸𑀤𑀲 𑀘𑀸𑀢𑀺 𑀘𑀢𑀼𑀢𑁆𑀢𑀺𑀁𑀲. 𑀙𑀧𑀜𑁆𑀜𑀸𑀲𑀲𑀢𑀦𑁆𑀢𑀺 𑀯𑁂𑀲𑀸𑀮𑀺𑀬𑀸𑀤𑀻𑀲𑀼 𑀧𑀜𑁆𑀜𑀢𑁆𑀢𑀸𑀦𑀺 𑀤𑁆𑀯𑀢𑁆𑀢𑀺𑀁𑀲𑀲𑀺𑀓𑁆𑀔𑀸𑀧𑀤𑀸𑀦𑀺 𑀞𑀧𑁂𑀢𑁆𑀯𑀸 𑀲𑁂𑀲𑀸 𑀙𑀧𑀜𑁆𑀜𑀸𑀲𑀲𑀢𑀁.

𑀤𑀲 𑀕𑀸𑀭𑀬𑁆𑀳𑀸𑀢𑀺 𑀯𑁄𑀲𑀸𑀲𑀅𑀧𑁆𑀧𑀝𑀺𑀲𑀁 𑀯𑀺𑀤𑀺𑀢𑀲𑀺𑀓𑁆𑀔𑀸𑀧𑀤𑀤𑁆𑀯𑀬𑀜𑁆𑀘 𑀞𑀧𑁂𑀢𑁆𑀯𑀸 𑀲𑁂𑀲𑀸𑀦𑀺 𑀤𑀲 𑀧𑀸𑀝𑀺𑀤𑁂𑀲𑀦𑀻𑀬𑀸𑀦𑀺. 𑀤𑁆𑀯𑁂 𑀲𑀢𑁆𑀢𑀢𑀺 𑀲𑁂𑀔𑀺𑀬𑀸𑀦𑀺 𑀲𑀼𑀭𑀼𑀲𑀼𑀭𑀼𑀓𑀸𑀭𑀓𑀲𑀸𑀫𑀺𑀲𑁂𑀦𑀳𑀢𑁆𑀣𑁂𑀦𑀧𑀸𑀦𑀻𑀬𑀣𑀸𑀮𑀓𑀧𑀝𑀺𑀕𑁆𑀕𑀳𑀡𑀲𑀲𑀺𑀢𑁆𑀣𑀓𑀧𑀢𑁆𑀢𑀥𑁄𑀯𑀦𑀸𑀦𑀺 𑀢𑀻𑀡𑀺 𑀞𑀧𑁂𑀢𑁆𑀯𑀸 𑀲𑁂𑀲𑀸𑀦𑀺 𑀲𑁂𑀔𑀺𑀬𑀸𑀦𑀺.

𑀲𑁂𑀬𑁆𑀬𑀸𑀢𑀺 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀦 𑀲𑀳𑀲𑁂𑀬𑁆𑀬𑀲𑀺𑀓𑁆𑀔𑀸𑀧𑀤𑀁. 𑀔𑀡𑀦𑁂𑀢𑀺 𑀧𑀣𑀯𑀻𑀔𑀡𑀦𑀁. 𑀕𑀘𑁆𑀙 𑀤𑁂𑀯𑀢𑁂𑀢𑀺 𑀪𑀽𑀢𑀕𑀸𑀫𑀲𑀺𑀓𑁆𑀔𑀸𑀧𑀤𑀁 𑀯𑀼𑀢𑁆𑀢𑀁. 𑀲𑀧𑁆𑀧𑀸𑀡𑀓𑀁 𑀲𑀺𑀜𑁆𑀘𑀦𑁆𑀢𑀺 𑀲𑀧𑁆𑀧𑀸𑀡𑁄𑀤𑀓𑀲𑀺𑀜𑁆𑀘𑀦𑀁. 𑀫𑀳𑀸𑀯𑀺𑀳𑀸𑀭𑁄𑀢𑀺 𑀫𑀳𑀮𑁆𑀮𑀓𑀯𑀺𑀳𑀸𑀭𑁄.

𑀅𑀜𑁆𑀜𑀦𑁆𑀢𑀺 𑀅𑀜𑁆𑀜𑀯𑀸𑀤𑀓𑀁. 𑀤𑁆𑀯𑀸𑀭𑀦𑁆𑀢𑀺 𑀬𑀸𑀯 𑀤𑁆𑀯𑀸𑀭𑀓𑁄𑀲𑀸 𑀅𑀕𑁆𑀕𑀴𑀝𑁆𑀞𑀧𑀦𑀁. 𑀲𑀳𑀥𑀫𑁆𑀫𑁄𑀢𑀺 𑀲𑀳𑀥𑀫𑁆𑀫𑀺𑀓𑀁 𑀯𑀼𑀘𑁆𑀘𑀫𑀸𑀦𑁄. 𑀧𑀬𑁄𑀧𑀸𑀦𑀦𑁆𑀢𑀺 𑀲𑀼𑀭𑀼𑀲𑀼𑀭𑀼𑀓𑀸𑀭𑀓𑀲𑀺𑀓𑁆𑀔𑀸𑀧𑀤𑀁.

𑀏𑀴𑀓𑀮𑁄𑀫𑁄𑀢𑀺 𑀏𑀴𑀓𑀮𑁄𑀫𑀥𑁄𑀯𑀸𑀧𑀦𑀁. 𑀧𑀢𑁆𑀢𑁄 𑀘𑀸𑀢𑀺 𑀤𑀼𑀢𑀺𑀬𑀧𑀢𑁆𑀢𑁄. 𑀑𑀯𑀸𑀤𑁄𑀢𑀺 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀑𑀯𑀸𑀤𑁄. 𑀪𑁂𑀲𑀚𑁆𑀚𑀦𑁆𑀢𑀺 𑀘𑀢𑀼𑀫𑀸𑀲𑀧𑀘𑁆𑀘𑀬𑀧𑀯𑀸𑀭𑀡𑀸𑀲𑀺𑀓𑁆𑀔𑀸𑀧𑀤𑀁. 𑀆𑀭𑀜𑁆𑀜𑀺𑀓𑁄𑀢𑀺 𑀘𑀢𑀼𑀢𑁆𑀣𑀧𑀸𑀝𑀺𑀤𑁂𑀲𑀦𑀻𑀬𑀁. 𑀑𑀯𑀸𑀤𑁄𑀢𑀺 𑀑𑀯𑀸𑀤𑀸𑀬 𑀯𑀸 𑀲𑀁𑀯𑀸𑀲𑀸𑀬 𑀯𑀸 𑀅𑀕𑀫𑀦𑀁.

𑁩𑁩𑁭. ‘‘𑀬𑁂 𑀘 𑀬𑀸𑀯𑀢𑀢𑀺𑀬𑀓𑀸’’𑀢𑀺 𑀧𑀜𑁆𑀳𑀲𑁆𑀲 ‘‘𑀇𑀫𑁂 𑀔𑁄 𑀬𑀸𑀯𑀢𑀢𑀺𑀬𑀓𑀸’’𑀢𑀺 𑀯𑀺𑀲𑁆𑀲𑀚𑁆𑀚𑀦𑀁 𑀯𑀢𑁆𑀯𑀸 𑀢𑀤𑀦𑀦𑁆𑀢𑀭𑀁 ‘‘𑀲𑀸𑀥𑀸𑀭𑀡𑀁 𑀅𑀲𑀸𑀥𑀸𑀭𑀡’’𑀦𑁆𑀢𑀺𑀆𑀤𑀺𑀧𑀜𑁆𑀳𑀸𑀦𑀁 𑀯𑀺𑀲𑁆𑀲𑀚𑁆𑀚𑀦𑁂 𑀯𑀢𑁆𑀢𑀩𑁆𑀩𑁂 𑀬𑀲𑁆𑀫𑀸 𑀢𑀁 𑀅𑀯𑀢𑁆𑀯𑀸 ‘‘𑀓𑀢𑀺 𑀙𑁂𑀤𑀦𑀓𑀸𑀦𑀻’’𑀢𑀺𑀆𑀤𑀺𑀓𑁂 𑀅𑀝𑁆𑀞 𑀧𑀜𑁆𑀳𑁂 𑀅𑀦𑁆𑀢𑀭𑀸 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀢𑁂𑀲𑀁 𑀅𑀦𑀦𑁆𑀢𑀭𑀸 ‘‘𑀯𑀻𑀲𑀁 𑀤𑁆𑀯𑁂 𑀲𑀢𑀸𑀦𑀺 𑀪𑀺𑀓𑁆𑀔𑀽𑀦𑀁…𑀧𑁂… 𑀙𑀘𑀢𑁆𑀢𑀸𑀭𑀻𑀲𑀸 𑀪𑀺𑀓𑁆𑀔𑀽𑀦𑀁, 𑀪𑀺𑀓𑁆𑀔𑀼𑀦𑀻𑀳𑀺 𑀅𑀲𑀸𑀥𑀸𑀭𑀡𑀸’’𑀢𑀺𑀆𑀤𑀺𑀦𑀸 𑀉𑀓𑁆𑀓𑀫𑁂𑀦𑁂𑀯 𑀲𑀸𑀥𑀸𑀭𑀡𑀸𑀤𑀺𑀧𑀜𑁆𑀳𑀸 𑀯𑀺𑀲𑁆𑀲𑀚𑁆𑀚𑀺𑀢𑀸, 𑀢𑀲𑁆𑀫𑀸 𑀢𑀁 𑀉𑀓𑁆𑀓𑀫𑀯𑀺𑀲𑁆𑀲𑀚𑁆𑀚𑀦𑀓𑀸𑀭𑀡𑀁 𑀤𑀲𑁆𑀲𑁂𑀢𑀼𑀁 ‘‘𑀬𑀲𑁆𑀫𑀸 𑀧𑀦 𑀬𑁂 𑀘 𑀬𑀸𑀯𑀢𑀢𑀺𑀬𑀓𑀸𑀢𑀺 𑀅𑀬𑀁 𑀧𑀜𑁆𑀳𑁄’’𑀢𑀺𑀆𑀤𑀺𑀫𑀸𑀳.

𑁩𑁩𑁮. 𑀥𑁄𑀯𑀦𑀜𑁆𑀘 𑀧𑀝𑀺𑀕𑁆𑀕𑀳𑁄𑀢𑀺𑀆𑀤𑀺𑀕𑀸𑀣𑀸 𑀅𑀝𑁆𑀞𑀓𑀣𑀸𑀘𑀭𑀺𑀬𑀸𑀦𑀁 𑀕𑀸𑀣𑀸𑀯. 𑀙𑀩𑁆𑀩𑀲𑁆𑀲𑀸𑀦𑀺 𑀦𑀺𑀲𑀻𑀤𑀦𑀦𑁆𑀢𑀺 𑀤𑁆𑀯𑁂 𑀲𑀺𑀓𑁆𑀔𑀸𑀧𑀤𑀸𑀦𑀺. 𑀤𑁆𑀯𑁂 𑀮𑁄𑀫𑀸𑀢𑀺 𑀢𑀺𑀬𑁄𑀚𑀦𑀸𑀢𑀺𑀓𑁆𑀓𑀫𑀥𑁄𑀯𑀸𑀧𑀦𑀯𑀲𑁂𑀦 𑀤𑁆𑀯𑁂 𑀏𑀴𑀓𑀮𑁄𑀫𑀲𑀺𑀓𑁆𑀔𑀸𑀧𑀤𑀸𑀦𑀺. 𑀯𑀲𑁆𑀲𑀺𑀓𑀸 𑀆𑀭𑀜𑁆𑀜𑀓𑁂𑀦 𑀘𑀸𑀢𑀺 𑀯𑀲𑁆𑀲𑀺𑀓𑀲𑀸𑀝𑀺𑀓𑀸 𑀧𑀭𑀺𑀬𑁂𑀲𑀦𑀅𑀭𑀜𑁆𑀜𑀓𑁂𑀲𑀼 𑀲𑁂𑀦𑀸𑀲𑀦𑁂𑀲𑀼 𑀯𑀺𑀳𑀭𑀡𑀲𑀺𑀓𑁆𑀔𑀸𑀧𑀤𑁂𑀦 𑀲𑀳.

𑀧𑀡𑀻𑀢𑀦𑁆𑀢𑀺 𑀧𑀡𑀻𑀢𑀪𑁄𑀚𑀦𑀯𑀺𑀜𑁆𑀜𑀸𑀧𑀦𑀁. 𑀊𑀦𑀦𑁆𑀢𑀺 𑀊𑀦𑀯𑀻𑀲𑀢𑀺𑀯𑀲𑁆𑀲𑀽𑀧𑀲𑀫𑁆𑀧𑀸𑀤𑀦𑀁. 𑀫𑀸𑀢𑀼𑀕𑀸𑀫𑁂𑀦 𑀲𑀤𑁆𑀥𑀺𑀦𑁆𑀢𑀺 𑀲𑀁𑀯𑀺𑀥𑀸𑀬 𑀕𑀫𑀦𑀁 𑀯𑀼𑀢𑁆𑀢𑀁. 𑀬𑀸 𑀲𑀺𑀓𑁆𑀔𑀸𑀢𑀺 𑀬𑀁 𑀲𑀺𑀓𑁆𑀔𑀸𑀧𑀤𑀁. 𑀦𑀺𑀲𑀻𑀤𑀦𑁂 𑀘 𑀬𑀸 𑀲𑀺𑀓𑁆𑀔𑀸𑀢𑀺 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀦𑀺𑀲𑀻𑀤𑀦𑀓𑀸𑀭𑀸𑀧𑀦𑁂 𑀬𑀁 𑀲𑀺𑀓𑁆𑀔𑀸𑀧𑀤𑀁. 𑀢𑀣𑀸 𑀯𑀲𑁆𑀲𑀺𑀓𑀸 𑀬𑀸 𑀘 𑀲𑀸𑀝𑀺𑀓𑀸𑀢𑀺 𑀏𑀢𑁆𑀣𑀸𑀧𑀺.

𑀧𑀸𑀴𑀺𑀬𑀁 𑀲𑀢𑀁 𑀲𑀢𑁆𑀢𑀢𑀺 𑀙𑀘𑁆𑀘𑁂𑀯𑀺𑀫𑁂 𑀳𑁄𑀦𑁆𑀢𑀺 𑀉𑀪𑀺𑀦𑁆𑀦𑀁 𑀅𑀲𑀸𑀥𑀸𑀭𑀡𑀸𑀢𑀺 𑀪𑀺𑀓𑁆𑀔𑀽𑀦𑀁 𑀪𑀺𑀓𑁆𑀔𑀼𑀦𑀻𑀳𑀺 𑀅𑀲𑀸𑀥𑀸𑀭𑀡𑀸 𑀙𑀘𑀢𑁆𑀢𑀸𑀭𑀻𑀲, 𑀪𑀺𑀓𑁆𑀔𑀼𑀦𑀻𑀦𑀁 𑀪𑀺𑀓𑁆𑀔𑀽𑀳𑀺 𑀅𑀲𑀸𑀥𑀸𑀭𑀡𑀸 𑀢𑀺𑀁𑀲𑀸𑀥𑀺𑀓𑀁 𑀲𑀢𑀜𑁆𑀘𑀸𑀢𑀺 𑀏𑀯𑀁 𑀉𑀪𑀺𑀦𑁆𑀦𑀁 𑀅𑀲𑀸𑀥𑀸𑀭𑀡𑀸 𑀘 𑀙𑀲𑀢𑁆𑀢𑀢𑀺𑀅𑀥𑀺𑀓𑀁 𑀲𑀢𑀁 𑀲𑀺𑀓𑁆𑀔𑀸𑀧𑀤𑀸𑀦𑀻𑀢𑀺 𑀅𑀢𑁆𑀣𑁄. 𑀲𑀢𑀁 𑀲𑀢𑁆𑀢𑀢𑀺 𑀘𑀢𑁆𑀢𑀸𑀭𑀻𑀢𑀺 𑀉𑀪𑀺𑀦𑁆𑀦𑀁 𑀲𑀸𑀥𑀸𑀭𑀡𑀲𑀺𑀓𑁆𑀔𑀸𑀦𑀁 𑀕𑀡𑀦𑀸 𑀘𑀢𑀼𑀲𑀢𑁆𑀢𑀢𑀺𑀅𑀥𑀺𑀓𑀁 𑀲𑀢𑀁 𑀲𑀺𑀓𑁆𑀔𑀸𑀧𑀤𑀸𑀦𑀻𑀢𑀺 𑀅𑀢𑁆𑀣𑁄.

𑀯𑀺𑀪𑀢𑁆𑀢𑀺𑀬𑁄𑀢𑀺 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸 𑀘𑁂𑀯 𑀉𑀧𑁄𑀲𑀣𑀧𑀯𑀸𑀭𑀡𑀸𑀤𑀬𑁄 𑀘 𑀅𑀥𑀺𑀧𑁆𑀧𑁂𑀢𑀸. 𑀢𑁂 𑀳𑀺 𑀧𑀸𑀭𑀸𑀚𑀺𑀓𑀸𑀤𑀺𑀪𑁂𑀤𑁂𑀦, 𑀪𑀺𑀓𑁆𑀔𑀼𑀉𑀧𑁄𑀲𑀣𑀸𑀤𑀺𑀪𑁂𑀤𑁂𑀦 𑀘 𑀯𑀺𑀪𑀚𑀻𑀬𑀦𑁆𑀢𑀺. 𑀢𑁂𑀦𑀸𑀳 ‘‘𑀯𑀺𑀪𑀢𑁆𑀢𑀺𑀬𑁄’’𑀢𑀺𑀆𑀤𑀺. 𑀢𑁂𑀲𑀦𑁆𑀢𑀺 𑀅𑀝𑁆𑀞𑀦𑁆𑀦𑀁 𑀧𑀸𑀭𑀸𑀚𑀺𑀓𑀸𑀤𑀻𑀦𑀁. 𑀤𑁆𑀯𑀻𑀳𑀻𑀢𑀺𑀆𑀤𑀺 𑀯𑀺𑀯𑀸𑀤𑀸𑀥𑀺𑀓𑀭𑀡𑀸𑀤𑀻𑀦𑀁 𑀲𑀫𑀣𑁂𑀳𑀺 𑀯𑀽𑀧𑀲𑀫𑀤𑀲𑁆𑀲𑀦𑀁.

𑀲𑀢𑁆𑀢𑀦𑀕𑀭𑁂𑀲𑀼 𑀧𑀜𑁆𑀜𑀢𑁆𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀸𑀭𑀸𑀚𑀺𑀓𑀸𑀤𑀺𑀆𑀧𑀢𑁆𑀢𑀺𑀯𑀡𑁆𑀡𑀦𑀸

𑁩𑁩𑁯. 𑀇𑀤𑀦𑁆𑀢𑀺 ‘‘𑀧𑀸𑀭𑀸𑀚𑀺𑀓𑀦𑁆𑀢𑀺 𑀬𑀁 𑀯𑀼𑀢𑁆𑀢’’𑀦𑁆𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀁 𑀯𑀘𑀦𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀇𑀤𑀜𑁆𑀳𑀺 𑀳𑁂𑀝𑁆𑀞𑀸 ‘‘𑀕𑀭𑀼𑀓 𑀮𑀳𑀼𑀓’’𑀦𑁆𑀢𑀺𑀆𑀤𑀺𑀦𑀸 𑀉𑀤𑁆𑀥𑀝𑀧𑀜𑁆𑀳𑁂𑀲𑀼 𑀅𑀦𑀸𑀕𑀢𑀫𑁆𑀧𑀺 ‘‘𑀲𑀩𑁆𑀩𑀸𑀦𑀺𑀧𑁂𑀢𑀸𑀦𑀺 𑀯𑀺𑀬𑀸𑀓𑀭𑁄𑀳𑀺, 𑀳𑀦𑁆𑀤 𑀯𑀸𑀓𑁆𑀬𑀁 𑀲𑀼𑀡𑁄𑀫 𑀢𑁂’’𑀢𑀺 𑀏𑀢𑁆𑀣 𑀬𑀣𑀸𑀯𑀼𑀢𑁆𑀢𑀸𑀦𑀺 𑀅𑀜𑁆𑀜𑀸𑀦𑀺𑀧𑀺 ‘‘𑀲𑀩𑁆𑀩𑀸𑀦𑀺𑀧𑁂𑀢𑀸𑀦𑀺 𑀯𑀺𑀬𑀸𑀓𑀭𑁄𑀳𑀺, 𑀳𑀦𑁆𑀤 𑀯𑀸𑀓𑁆𑀬𑀁 𑀲𑀼𑀡𑁄𑀫𑀸’’𑀢𑀺 𑀏𑀯𑀁 𑀕𑀳𑀺𑀢𑀫𑁂𑀯𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀫𑀺𑀦𑀸 𑀧𑀦 𑀆𑀬𑀸𑀘𑀦𑀯𑀘𑀦𑁂𑀦 𑀲𑀗𑁆𑀕𑀳𑀺𑀢𑀲𑁆𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀅𑀢𑀺𑀯𑀲𑁆𑀲𑀢𑀻𑀢𑀺 𑀑𑀯𑀲𑁆𑀲𑀢𑀺, 𑀯𑀲𑁆𑀲𑁄𑀤𑀓𑀁 𑀧𑀯𑀺𑀲𑀢𑀻𑀢𑀺 𑀅𑀢𑁆𑀣𑁄. 𑀥𑀫𑁆𑀫𑀸𑀦𑀦𑁆𑀢𑀺 𑀬𑀣𑀸 𑀘𑀢𑀼𑀧𑀘𑁆𑀘𑀬𑁂 𑀥𑀸𑀭𑀬𑀢𑀻𑀢𑀺 𑀥𑀫𑁆𑀫𑁄, 𑀢𑁂𑀲𑀁. 𑀢𑁂𑀦𑀸𑀳 ‘‘𑀲𑀗𑁆𑀔𑀢𑀥𑀫𑁆𑀫𑀸𑀦’’𑀦𑁆𑀢𑀺. 𑀕𑀸𑀣𑀸𑀲𑀗𑁆𑀕𑀡𑀺𑀓𑀦𑁆𑀢𑀺 𑀕𑀸𑀣𑀸𑀲𑀗𑁆𑀕𑀳𑁄, 𑀢𑁂 𑀢𑁂 𑀅𑀢𑁆𑀣𑀸 𑀕𑀸𑀣𑀸𑀳𑀺 𑀲𑀗𑁆𑀕𑀳𑁂𑀢𑁆𑀯𑀸 𑀕𑀡𑀻𑀬𑀦𑁆𑀢𑀺 𑀓𑀣𑀻𑀬𑀦𑁆𑀢𑀺 𑀏𑀢𑁆𑀣𑀸𑀢𑀺 𑀳𑀺 𑀕𑀸𑀣𑀸𑀲𑀗𑁆𑀕𑀡𑀺𑀓𑀁.

𑀧𑀸𑀭𑀸𑀚𑀺𑀓𑀸𑀤𑀺𑀆𑀧𑀢𑁆𑀢𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀞𑀫𑀕𑀸𑀣𑀸𑀲𑀗𑁆𑀕𑀡𑀺𑀓𑀯𑀡𑁆𑀡𑀦𑀸𑀦𑀬𑁄 𑀦𑀺𑀝𑁆𑀞𑀺𑀢𑁄.