𑁩. 𑀧𑀢𑁆𑀢𑀯𑀕𑁆𑀕𑁄

𑁧. 𑀧𑀢𑁆𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁬𑁦𑁨. 𑀢𑀢𑀺𑀬𑀯𑀕𑁆𑀕𑀲𑁆𑀲 𑀧𑀞𑀫𑁂 𑀅𑀟𑁆𑀠𑀢𑁂𑀭𑀲𑀧𑀮𑀸𑀢𑀺 𑀫𑀸𑀕𑀥𑀺𑀓𑀸𑀬 𑀫𑀸𑀦𑀢𑀼𑀮𑀸𑀬 𑀅𑀟𑁆𑀠𑀢𑁂𑀭𑀲𑀧𑀮𑀧𑀭𑀺𑀫𑀺𑀢𑀁 𑀉𑀤𑀓𑀁 𑀕𑀡𑁆𑀳𑀦𑁆𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀢𑀣𑀸 𑀧𑀭𑀺𑀫𑀺𑀢𑀁 𑀬𑀯𑀫𑀸𑀲𑀸𑀤𑀺𑀁 𑀕𑀡𑁆𑀳𑀦𑁆𑀢𑀺𑀁 𑀲𑀦𑁆𑀥𑀸𑀬𑀸𑀢𑀺 𑀓𑁂𑀘𑀺. 𑀆𑀘𑀭𑀺𑀬𑀥𑀫𑁆𑀫𑀧𑀸𑀮𑀢𑁆𑀣𑁂𑀭𑁂𑀦 𑀧𑀦 ‘‘𑀧𑀓𑀢𑀺𑀘𑀢𑀼𑀫𑀼𑀝𑁆𑀞𑀺𑀓𑀁 𑀓𑀼𑀟𑀼𑀯𑀁, 𑀘𑀢𑀼𑀓𑀼𑀟𑀼𑀯𑀁 𑀦𑀸𑀴𑀺, 𑀢𑀸𑀬 𑀦𑀸𑀴𑀺𑀬𑀸 𑀲𑁄𑀴𑀲 𑀦𑀸𑀴𑀺𑀬𑁄 𑀤𑁄𑀡𑀁, 𑀢𑀁 𑀧𑀦 𑀫𑀕𑀥𑀦𑀸𑀴𑀺𑀬𑀸 𑀤𑁆𑀯𑀸𑀤𑀲 𑀦𑀸𑀴𑀺𑀬𑁄 𑀳𑁄𑀦𑁆𑀢𑀻𑀢𑀺 𑀯𑀤𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀤𑀫𑀺𑀴𑀦𑀸𑀴𑀻𑀢𑀺 𑀧𑀼𑀭𑀸𑀡𑀦𑀸𑀴𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀲𑀸 𑀘 𑀘𑀢𑀼𑀫𑀼𑀝𑁆𑀞𑀺𑀓𑁂𑀳𑀺 𑀓𑀼𑀟𑀼𑀯𑁂𑀳𑀺 𑀅𑀝𑁆𑀞 𑀓𑀼𑀟𑀼𑀯𑀸, 𑀢𑀸𑀬 𑀦𑀸𑀴𑀺𑀬𑀸 𑀤𑁆𑀯𑁂 𑀦𑀸𑀴𑀺𑀬𑁄 𑀫𑀕𑀥𑀦𑀸𑀴𑀺𑀁 𑀕𑀡𑁆𑀳𑀸𑀢𑀺. 𑀧𑀼𑀭𑀸𑀡𑀸 𑀧𑀦 ‘‘𑀲𑀻𑀳𑀴𑀦𑀸𑀴𑀺 𑀢𑀺𑀲𑁆𑀲𑁄 𑀦𑀸𑀴𑀺𑀬𑁄 𑀕𑀡𑁆𑀳𑀸𑀢𑀻’’𑀢𑀺 𑀯𑀤𑀦𑁆𑀢𑀺, 𑀢𑁂𑀲𑀁 𑀫𑀢𑁂𑀦 𑀫𑀕𑀥𑀦𑀸𑀴𑀺 𑀇𑀤𑀸𑀦𑀺 𑀧𑀯𑀢𑁆𑀢𑀫𑀸𑀦𑀸𑀬 𑀘𑀢𑀼𑀓𑀼𑀟𑀼𑀯𑀸𑀬 𑀤𑀫𑀺𑀴𑀦𑀸𑀴𑀺𑀬𑀸 𑀘𑀢𑀼𑀦𑀸𑀴𑀺𑀓𑀸 𑀳𑁄𑀢𑀺, 𑀢𑀢𑁄 𑀫𑀕𑀥𑀦𑀸𑀴𑀺𑀢𑁄 𑀉𑀧𑀟𑁆𑀠𑀜𑁆𑀘 𑀧𑀼𑀭𑀸𑀡𑀤𑀫𑀺𑀴𑀦𑀸𑀴𑀺𑀲𑀗𑁆𑀔𑀸𑀢𑀁 𑀧𑀢𑁆𑀣𑀁 𑀦𑀸𑀫 𑀳𑁄𑀢𑀺, 𑀏𑀢𑁂𑀦 𑀘 ‘‘𑀑𑀫𑀓𑁄 𑀦𑀸𑀫 𑀧𑀢𑁆𑀢𑁄 𑀧𑀢𑁆𑀣𑁄𑀤𑀦𑀁 𑀕𑀡𑁆𑀳𑀸𑀢𑀻’’𑀢𑀺 𑀧𑀸𑀴𑀺𑀯𑀘𑀦𑀜𑁆𑀘 𑀲𑀫𑁂𑀢𑀺, 𑀮𑁄𑀓𑀺𑀬𑁂𑀳𑀺𑀧𑀺 𑁋

‘‘𑀮𑁄𑀓𑀺𑀬𑀁 𑀫𑀕𑀥𑀜𑁆𑀘𑁂𑀢𑀺, 𑀧𑀢𑁆𑀣𑀤𑁆𑀯𑀬𑀫𑀼𑀤𑀸𑀳𑀝𑀁;

𑀮𑁄𑀓𑀺𑀬𑀁 𑀲𑁄𑀴𑀲𑀧𑀮𑀁, 𑀫𑀸𑀕𑀥𑀁 𑀤𑀺𑀕𑀼𑀡𑀁 𑀫𑀢’’𑀦𑁆𑀢𑀺. 𑁋

𑀏𑀯𑀁 𑀮𑁄𑀓𑁂 𑀦𑀸𑀴𑀺𑀬𑀸 𑀫𑀕𑀥𑀦𑀸𑀴𑀺 𑀤𑀺𑀕𑀼𑀡𑀸𑀢𑀺 𑀤𑀲𑁆𑀲𑀺𑀢𑀸, 𑀏𑀯𑀜𑁆𑀘 𑀕𑀬𑁆𑀳𑀫𑀸𑀦𑁂 𑀑𑀫𑀓𑀧𑀢𑁆𑀢𑀲𑁆𑀲 𑀘 𑀬𑀸𑀧𑀦𑀫𑀢𑁆𑀢𑁄𑀤𑀦𑀕𑀸𑀳𑀺𑀓𑀸 𑀘 𑀲𑀺𑀤𑁆𑀥𑀸 𑀳𑁄𑀢𑀺. 𑀦 𑀳𑀺 𑀲𑀓𑁆𑀓𑀸 𑀅𑀝𑁆𑀞𑀓𑀼𑀟𑀼𑀯𑀢𑁄 𑀊𑀦𑁄𑀤𑀦𑀕𑀸𑀳𑀺𑀦𑀸 𑀧𑀢𑁆𑀢𑁂𑀦 𑀅𑀣𑀽𑀧𑀻𑀓𑀢𑀁 𑀧𑀺𑀡𑁆𑀟𑀧𑀸𑀢𑀁 𑀧𑀭𑀺𑀬𑁂𑀲𑀺𑀢𑁆𑀯𑀸 𑀬𑀸𑀧𑁂𑀢𑀼𑀁. 𑀢𑁂𑀦𑁂𑀯 𑀯𑁂𑀭𑀜𑁆𑀚𑀓𑀡𑁆𑀟𑀝𑁆𑀞𑀓𑀣𑀸𑀬𑀁 ‘‘𑀧𑀢𑁆𑀣𑁄 𑀦𑀸𑀫 𑀦𑀸𑀴𑀺𑀫𑀢𑁆𑀢𑀁 𑀳𑁄𑀢𑀺 𑀏𑀓𑀲𑁆𑀲 𑀧𑀼𑀭𑀺𑀲𑀲𑁆𑀲 𑀅𑀮𑀁 𑀬𑀸𑀧𑀦𑀸𑀬. 𑀯𑀼𑀢𑁆𑀢𑀫𑁆𑀧𑀺 𑀳𑁂𑀢𑀁 ‘𑀧𑀢𑁆𑀣𑁄𑀤𑀦𑁄 𑀦𑀸𑀮𑀫𑀬𑀁 𑀤𑀼𑀯𑀺𑀦𑁆𑀦’’’𑀦𑁆𑀢𑀺 (𑀚𑀸. 𑁨.𑁨𑁧.𑁧𑁯𑁨) 𑀯𑀼𑀢𑁆𑀢𑀁, ‘‘𑀏𑀓𑁂𑀓𑀲𑁆𑀲 𑀤𑁆𑀯𑀺𑀦𑁆𑀦𑀁 𑀢𑀺𑀡𑁆𑀡𑀁 𑀧𑀳𑁄𑀢𑀻’’𑀢𑀺 𑀘 𑀆𑀕𑀳𑀁, 𑀢𑀲𑁆𑀫𑀸 𑀇𑀥 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦𑁂𑀯 𑀕𑀳𑁂𑀢𑀩𑁆𑀩𑀁.

𑀆𑀮𑁄𑀧𑀲𑁆𑀲 𑀅𑀦𑀼𑀭𑀽𑀧𑀦𑁆𑀢𑀺 𑀏𑀢𑁆𑀣 ‘‘𑀩𑁆𑀬𑀜𑁆𑀚𑀦𑀲𑁆𑀲 𑀫𑀢𑁆𑀢𑀸 𑀦𑀸𑀫 𑀑𑀤𑀦𑀢𑁄 𑀘𑀢𑀼𑀢𑁆𑀣𑀪𑀸𑀕𑁄’’𑀢𑀺 (𑀫. 𑀦𑀺. 𑀅𑀝𑁆𑀞. 𑁨.𑁩𑁮𑁭) 𑀩𑁆𑀭𑀳𑁆𑀫𑀸𑀬𑀼𑀲𑀼𑀢𑁆𑀢𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀢𑁆𑀢𑀸 𑀆𑀮𑁄𑀧𑀲𑁆𑀲 𑀘𑀢𑀼𑀢𑁆𑀣𑀪𑀸𑀕𑀫𑁂𑀯 𑀩𑁆𑀬𑀜𑁆𑀚𑀦𑀁 𑀅𑀦𑀼𑀭𑀽𑀧𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀑𑀤𑀦𑀕𑀢𑀺𑀓𑀸𑀦𑁂𑀯𑀸𑀢𑀺 𑀑𑀤𑀦𑀲𑁆𑀲 𑀅𑀦𑁆𑀢𑁄 𑀏𑀯 𑀧𑀯𑀺𑀲𑀦𑀲𑀻𑀮𑀸𑀦𑀺 𑀲𑀺𑀬𑀼𑀁, 𑀅𑀢𑁆𑀢𑀦𑁄 𑀑𑀓𑀸𑀲𑀁 𑀦 𑀕𑀯𑁂𑀲𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀦𑀸𑀫𑀫𑀢𑁆𑀢𑁂𑀢𑀺 ‘‘𑀫𑀚𑁆𑀛𑀺𑀫𑁄 𑀧𑀢𑁆𑀢𑁄 𑀫𑀚𑁆𑀛𑀺𑀫𑁄𑀫𑀓𑁄’’𑀢𑀺𑀆𑀤𑀺𑀦𑀸𑀫𑀫𑀢𑁆𑀢𑁂.

𑁬𑁦𑁭-𑁮. 𑀏𑀯𑀁 𑀧𑀬𑁄𑀕𑁂 𑀧𑀬𑁄𑀕𑁂𑀢𑀺 𑀧𑀭𑀺𑀬𑁄𑀲𑀸𑀦𑀸𑀮𑁄𑀧𑀚𑁆𑀛𑁄𑀳𑀭𑀡𑀧𑀬𑁄𑀕𑁂 𑀧𑀬𑁄𑀕𑁂, 𑀆𑀮𑁄𑀧𑁂 𑀆𑀮𑁄𑀧𑁂𑀢𑀺 𑀅𑀢𑁆𑀣𑁄. 𑀓𑀢𑁆𑀯𑀸𑀢𑀺 𑀧𑀸𑀓𑀧𑀭𑀺𑀬𑁄𑀲𑀸𑀦𑀁 𑀓𑀢𑁆𑀯𑀸. 𑀧𑀘𑀺𑀢𑁆𑀯𑀸 𑀞𑀧𑁂𑀲𑁆𑀲𑀸𑀫𑀻𑀢𑀺 𑀓𑀸𑀴𑀯𑀡𑁆𑀡𑀧𑀸𑀓𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀙𑀺𑀤𑁆𑀤𑀦𑁆𑀢𑀺 𑀫𑀼𑀔𑀯𑀝𑁆𑀝𑀺𑀢𑁄 𑀤𑁆𑀯𑀗𑁆𑀕𑀼𑀮𑀲𑁆𑀲 𑀳𑁂𑀝𑁆𑀞𑀸𑀙𑀺𑀤𑁆𑀤𑀁 𑀯𑀼𑀢𑁆𑀢𑀁. 𑀲𑁂𑀲𑀁 𑀧𑀞𑀫𑀓𑀣𑀺𑀦𑁂 𑀯𑀼𑀢𑁆𑀢𑀦𑀬𑀫𑁂𑀯.

𑀧𑀢𑁆𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀊𑀦𑀧𑀜𑁆𑀘𑀩𑀦𑁆𑀥𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁬𑁦𑁯-𑁬𑁧𑁩. 𑀤𑀼𑀢𑀺𑀬𑁂 𑀧𑀸𑀴𑀺𑀬𑀁 𑀅𑀳𑀁 𑀧𑀢𑁆𑀢𑁂𑀦 𑀢𑁂 𑀪𑀺𑀓𑁆𑀔𑀽 𑀲𑀦𑁆𑀢𑀧𑁂𑀲𑁆𑀲𑀸𑀫𑀻𑀢𑀺 𑀲𑁂𑀲𑁄. ‘‘𑀅𑀧𑀢𑁆𑀢𑁄’’𑀢𑀺 𑀇𑀫𑀺𑀦𑀸 𑀅𑀥𑀺𑀝𑁆𑀞𑀸𑀦𑀯𑀺𑀚𑀳𑀦𑀫𑁆𑀧𑀺 𑀤𑀲𑁆𑀲𑁂𑀢𑀺. 𑀧𑀜𑁆𑀘𑀩𑀦𑁆𑀥𑀦𑁂𑀧𑀺 𑀧𑀢𑁆𑀢𑁂 𑀅𑀧𑀭𑀺𑀧𑀼𑀡𑁆𑀡𑀧𑀸𑀓𑁂 𑀧𑀢𑁆𑀢𑁂 𑀯𑀺𑀬 𑀅𑀥𑀺𑀝𑁆𑀞𑀸𑀦𑀁 𑀦 𑀭𑀼𑀳𑀢𑀺. ‘‘𑀢𑀺𑀧𑀼𑀧𑀝𑁆𑀝𑀓𑁂𑀦 𑀯𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀢𑀫𑁆𑀩𑀮𑁄𑀳𑀸𑀤𑀻𑀳𑀺 𑀓𑀧𑁆𑀧𑀺𑀬𑀮𑁄𑀳𑁂𑀳𑀺 𑀅𑀬𑁄𑀧𑀢𑁆𑀢𑀲𑁆𑀲 𑀙𑀺𑀤𑁆𑀤𑀁 𑀙𑀸𑀤𑁂𑀢𑀼𑀁 𑀯𑀝𑁆𑀝𑀢𑀺. 𑀢𑁂𑀦𑁂𑀯 ‘‘𑀮𑁄𑀳𑀫𑀡𑁆𑀟𑀮𑀓𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀇𑀫𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂 𑀅𑀓𑀸𑀴𑀯𑀡𑁆𑀡𑀫𑁆𑀧𑀺 𑀓𑀧𑁆𑀧𑀺𑀬𑀧𑀢𑁆𑀢𑀁 𑀯𑀺𑀜𑁆𑀜𑀸𑀧𑁂𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀏𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀥𑀺𑀝𑁆𑀞𑀸𑀦𑀼𑀧𑀕𑀧𑀢𑁆𑀢𑀲𑁆𑀲 𑀊𑀦𑀧𑀜𑁆𑀘𑀩𑀦𑁆𑀥𑀦𑀢𑀸, 𑀅𑀢𑁆𑀢𑀼𑀤𑁆𑀤𑁂𑀲𑀺𑀓𑀢𑀸, 𑀅𑀓𑀢𑀯𑀺𑀜𑁆𑀜𑀢𑁆𑀢𑀺, 𑀢𑀸𑀬 𑀘 𑀧𑀝𑀺𑀮𑀸𑀪𑁄𑀢𑀺 𑀇𑀫𑀸𑀦𑁂𑀢𑁆𑀣 𑀘𑀢𑁆𑀢𑀸𑀭𑀺 𑀅𑀗𑁆𑀕𑀸𑀦𑀺.

𑀊𑀦𑀧𑀜𑁆𑀘𑀩𑀦𑁆𑀥𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀪𑁂𑀲𑀚𑁆𑀚𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁬𑁧𑁮-𑁬𑁨𑁧. 𑀢𑀢𑀺𑀬𑁂 𑀧𑀸𑀴𑀺𑀬𑀁 𑀧𑀺𑀮𑀺𑀦𑁆𑀤𑀯𑀘𑁆𑀙𑀢𑁆𑀣𑁂𑀭𑁂𑀦 ‘‘𑀦 𑀔𑁄, 𑀫𑀳𑀸𑀭𑀸𑀚, 𑀪𑀕𑀯𑀢𑀸 𑀆𑀭𑀸𑀫𑀺𑀓𑁄 𑀅𑀦𑀼𑀜𑁆𑀜𑀸𑀢𑁄’’𑀢𑀺 𑀧𑀞𑀫𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀆𑀭𑀸𑀫𑀺𑀓’’𑀦𑁆𑀢𑀺 𑀧𑀼𑀕𑁆𑀕𑀮𑀸𑀦𑀫𑁆𑀧𑀺 𑀆𑀭𑀸𑀫𑀺𑀓𑀦𑀸𑀫𑁂𑀦 𑀤𑀸𑀲𑀕𑁆𑀕𑀳𑀡𑁂 𑀅𑀦𑀼𑀜𑁆𑀜𑀸𑀢𑁂 𑀏𑀯 𑀆𑀭𑀸𑀫𑀺𑀓𑀸𑀦𑀁 𑀕𑀳𑀺𑀢𑀢𑁆𑀢𑀸 𑀔𑁂𑀢𑁆𑀢𑀯𑀢𑁆𑀣𑀸𑀤𑀻𑀦𑀺 𑀓𑀧𑁆𑀧𑀺𑀬𑀯𑁄𑀳𑀸𑀭𑁂𑀦𑀧𑀺 𑀧𑀼𑀕𑁆𑀕𑀮𑀸𑀦𑀁 𑀕𑀳𑁂𑀢𑀼𑀁 𑀦 𑀯𑀝𑁆𑀝𑀢𑀺, 𑀢𑀣𑀸 𑀅𑀦𑀦𑀼𑀜𑁆𑀜𑀸𑀢𑀢𑁆𑀢𑀸𑀢𑀺 𑀯𑀺𑀜𑁆𑀜𑀸𑀬𑀢𑀺. ‘‘𑀔𑁂𑀢𑁆𑀢𑀯𑀢𑁆𑀣𑀼𑀧𑀝𑀺𑀕𑁆𑀕𑀳𑀡𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀻’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁧.𑁧𑁦, 𑁧𑁯𑁪) 𑀳𑀺 𑀧𑀝𑀺𑀓𑁆𑀔𑀺𑀢𑁆𑀢𑁂𑀲𑀼 𑀏𑀓𑀲𑁆𑀲𑁂𑀯 𑀧𑀼𑀕𑁆𑀕𑀮𑀺𑀓𑀯𑀲𑁂𑀦 𑀕𑀳𑀡𑁂 𑀅𑀦𑀼𑀜𑁆𑀜𑀸𑀢𑁂 𑀇𑀢𑀭𑀻𑀢𑀭𑀸𑀦𑀁 𑀢𑀣𑀸 𑀦 𑀕𑀳𑁂𑀢𑀩𑁆𑀩𑀢𑀸 𑀲𑀺𑀤𑁆𑀥𑀸𑀯 𑀳𑁄𑀢𑀺. 𑀬𑀜𑁆𑀘 𑀧𑀺𑀮𑀺𑀦𑁆𑀤𑀯𑀘𑁆𑀙𑀢𑁆𑀣𑁂𑀭𑁂𑀦 𑀤𑀸𑀬𑀓𑀓𑀼𑀮𑀲𑁆𑀲 𑀤𑀸𑀭𑀺𑀓𑀸𑀬 𑀲𑀼𑀯𑀡𑁆𑀡𑀫𑀸𑀮𑀸𑀯𑀲𑁂𑀦 𑀢𑀺𑀡𑀡𑁆𑀟𑀼𑀧𑀓𑀲𑁆𑀲 𑀦𑀺𑀫𑁆𑀫𑀸𑀦𑀁, 𑀢𑀁 ‘‘𑀅𑀦𑀸𑀧𑀢𑁆𑀢𑀺, 𑀪𑀺𑀓𑁆𑀔𑀯𑁂, 𑀇𑀤𑁆𑀥𑀺𑀫𑀲𑁆𑀲 𑀇𑀤𑁆𑀥𑀺𑀯𑀺𑀲𑀬𑁂’’𑀢𑀺 (𑀧𑀸𑀭𑀸. 𑁧𑁫𑁯) 𑀯𑀘𑀦𑀢𑁄 𑀓𑀼𑀮𑀲𑀗𑁆𑀕𑀳𑀸𑀤𑀺 𑀦 𑀳𑁄𑀢𑀻𑀢𑀺 𑀓𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁, 𑀓𑁂𑀘𑀺 𑀧𑀦 ‘‘𑀔𑀻𑀡𑀸𑀲𑀯𑀸𑀦𑀁 𑀮𑀸𑀪𑀺𑀘𑁆𑀙𑀸𑀬 𑀅𑀪𑀸𑀯𑀢𑁄 𑀓𑀼𑀮𑀲𑀗𑁆𑀕𑀳𑁂𑀧𑀺 𑀆𑀚𑀻𑀯𑀓𑁄𑀧𑁄 𑀦𑀢𑁆𑀣𑀻’’𑀢𑀺 𑀯𑀤𑀦𑁆𑀢𑀺, 𑀢𑀁 𑀦 𑀬𑀼𑀢𑁆𑀢𑀁 𑀔𑀻𑀡𑀸𑀲𑀯𑀸𑀦𑀫𑁆𑀧𑀺 𑀆𑀚𑀻𑀯𑀯𑀺𑀧𑀢𑁆𑀢𑀺𑀳𑁂𑀢𑀽𑀦𑀁 𑀧𑀺𑀡𑁆𑀟𑀧𑀸𑀢𑀸𑀤𑀻𑀦𑀁 𑀧𑀭𑀺𑀯𑀚𑁆𑀚𑁂𑀢𑀩𑁆𑀩𑀢𑁄. 𑀯𑀼𑀢𑁆𑀢𑀜𑁆𑀳𑀺 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑀸 ‘‘𑀦𑁂𑀯 𑀪𑀺𑀦𑁆𑀤𑁂𑀬𑁆𑀬𑀫𑀸𑀚𑀻𑀯𑀁, 𑀘𑀚𑀫𑀸𑀦𑁄𑀧𑀺 𑀚𑀻𑀯𑀺𑀢’’𑀦𑁆𑀢𑀺 (𑀫𑀺. 𑀧. 𑁬.𑁧.𑁫). 𑀪𑀕𑀯𑀢𑀸 𑀘 ‘‘𑀕𑀸𑀣𑀸𑀪𑀺𑀕𑀻𑀢𑀁 𑀫𑁂 𑀅𑀪𑁄𑀚𑀦𑀻𑀬’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁 (𑀲𑀼. 𑀦𑀺. 𑁮𑁧, 𑁪𑁮𑁪; 𑀫𑀺. 𑀧. 𑁪.𑁫.𑁯; 𑀲𑀁. 𑀦𑀺. 𑁧.𑁧𑁯𑁭).

𑁬𑁨𑁨. 𑀉𑀕𑁆𑀕𑀳𑀺𑀢𑀓𑀦𑁆𑀢𑀺 𑀧𑀭𑀺𑀪𑁄𑀕𑀢𑁆𑀣𑀸𑀬 𑀲𑀬𑀁 𑀕𑀳𑀺𑀢𑀁. 𑀲𑀬𑀁 𑀓𑀭𑁄𑀢𑀻𑀢𑀺 𑀧𑀘𑀺𑀢𑁆𑀯𑀸 𑀓𑀭𑁄𑀢𑀺. 𑀧𑀼𑀭𑁂𑀪𑀢𑁆𑀢𑀦𑁆𑀢𑀺 𑀢𑀤𑀳𑀼𑀧𑀼𑀭𑁂𑀪𑀢𑁆𑀢𑀫𑁂𑀯 𑀯𑀝𑁆𑀝𑀢𑀺 𑀲𑀯𑀢𑁆𑀣𑀼𑀓𑀧𑀝𑀺𑀕𑁆𑀕𑀳𑀺𑀢𑀢𑁆𑀢𑀸. 𑀲𑀬𑀁𑀓𑀢𑀦𑁆𑀢𑀺 𑀔𑀻𑀭𑀦𑀯𑀦𑀻𑀢𑀁 𑀧𑀘𑀺𑀢𑁆𑀯𑀸 𑀓𑀢𑀁. 𑀦𑀺𑀭𑀸𑀫𑀺𑀲𑀫𑁂𑀯𑀸𑀢𑀺 𑀢𑀤𑀳𑀼𑀧𑀼𑀭𑁂𑀪𑀢𑁆𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀅𑀚𑁆𑀚 𑀲𑀬𑀁𑀓𑀢𑀁 𑀦𑀺𑀭𑀸𑀫𑀺𑀲𑀫𑁂𑀯 𑀪𑀼𑀜𑁆𑀚𑀦𑁆𑀢𑀲𑁆𑀲 𑀓𑀲𑁆𑀫𑀸 𑀲𑀸𑀫𑀧𑀸𑀓𑁄 𑀦 𑀳𑁄𑀢𑀻𑀢𑀺 𑀆𑀳 ‘‘𑀦𑀯𑀦𑀻𑀢𑀁 𑀢𑀸𑀧𑁂𑀦𑁆𑀢𑀲𑁆𑀲𑀸’’𑀢𑀺𑀆𑀤𑀺. 𑀧𑀝𑀺𑀕𑁆𑀕𑀳𑀺𑀢𑁂𑀳𑀻𑀢𑀺 𑀔𑀻𑀭𑀤𑀥𑀻𑀦𑀺 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀉𑀕𑁆𑀕𑀳𑀺𑀢𑀓𑁂𑀳𑀺 𑀓𑀢𑀁 𑀅𑀩𑁆𑀪𑀜𑁆𑀚𑀦𑀸𑀤𑀻𑀲𑀼 𑀉𑀧𑀦𑁂𑀢𑀩𑁆𑀩𑀦𑁆𑀢𑀺 𑀬𑁄𑀚𑀦𑀸. 𑀏𑀲𑁂𑀯 𑀦𑀬𑁄𑀢𑀺 𑀦𑀺𑀲𑁆𑀲𑀕𑁆𑀕𑀺𑀬𑀸𑀧𑀢𑁆𑀢𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀅𑀓𑀧𑁆𑀧𑀺𑀬𑀫𑀁𑀲𑀲𑀧𑁆𑀧𑀺𑀫𑁆𑀳𑀻𑀢𑀺 𑀳𑀢𑁆𑀣𑀺𑀆𑀤𑀻𑀦𑀁 𑀲𑀧𑁆𑀧𑀺𑀫𑁆𑀳𑀺.

𑀏𑀢𑁆𑀣 𑀧𑀦𑀸𑀢𑀺 𑀦𑀯𑀦𑀻𑀢𑁂 𑀯𑀺𑀲𑁂𑀲𑁄 𑀅𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀥𑁄𑀢𑀁 𑀯𑀝𑁆𑀝𑀢𑀻𑀢𑀺 𑀥𑁄𑀢𑀫𑁂𑀯 𑀧𑀝𑀺𑀕𑁆𑀕𑀳𑀺𑀢𑀼𑀫𑁆𑀧𑀺 𑀦 𑀯𑀝𑁆𑀝𑀢𑀺, 𑀇𑀢𑀭𑀣𑀸 𑀲𑀯𑀢𑁆𑀣𑀼𑀓𑀧𑀝𑀺𑀕𑁆𑀕𑀳𑀺𑀢𑀁 𑀳𑁄𑀢𑀻𑀢𑀺 𑀣𑁂𑀭𑀸𑀦𑀁 𑀅𑀥𑀺𑀧𑁆𑀧𑀸𑀬𑁄.

𑀫𑀳𑀸𑀲𑀺𑀯𑀢𑁆𑀣𑁂𑀭𑀲𑁆𑀲 𑀧𑀦 𑀯𑀢𑁆𑀣𑀼𑀦𑁄 𑀯𑀺𑀬𑁄𑀚𑀺𑀢𑀢𑁆𑀢𑀸 𑀤𑀥𑀺𑀕𑀼𑀴𑀺𑀓𑀸𑀤𑀻𑀳𑀺 𑀬𑀼𑀢𑁆𑀢𑀢𑀸𑀫𑀢𑁆𑀢𑁂𑀦 𑀲𑀯𑀢𑁆𑀣𑀼𑀓𑀧𑀝𑀺𑀕𑁆𑀕𑀳𑀺𑀢𑀁 𑀦𑀸𑀫 𑀦 𑀳𑁄𑀢𑀺, 𑀢𑀲𑁆𑀫𑀸 𑀢𑀓𑁆𑀓𑀢𑁄 𑀉𑀤𑁆𑀥𑀝𑀫𑀢𑁆𑀢𑀫𑁂𑀯 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀥𑁄𑀯𑀺𑀢𑁆𑀯𑀸, 𑀧𑀘𑀺𑀢𑁆𑀯𑀸 𑀯𑀸 𑀦𑀺𑀭𑀸𑀫𑀺𑀲𑀫𑁂𑀯 𑀓𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀁𑀲𑀽𑀢𑀺 𑀅𑀥𑀺𑀧𑁆𑀧𑀸𑀬𑁄, 𑀦 𑀧𑀦 𑀤𑀥𑀺𑀕𑀼𑀴𑀺𑀓𑀸𑀤𑀻𑀳𑀺 𑀲𑀳 𑀯𑀺𑀓𑀸𑀮𑁂 𑀪𑀼𑀜𑁆𑀚𑀺𑀁𑀲𑀼. 𑀢𑁂𑀦𑀸𑀳 ‘‘𑀢𑀲𑁆𑀫𑀸 𑀦𑀯𑀦𑀻𑀢𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑁂𑀦…𑀧𑁂… 𑀲𑀯𑀢𑁆𑀣𑀼𑀓𑀧𑀝𑀺𑀕𑁆𑀕𑀳𑀺𑀢𑀁 𑀦𑀸𑀫 𑀦 𑀳𑁄𑀢𑀻’’𑀢𑀺. 𑀢𑀢𑁆𑀣 𑀅𑀥𑁄𑀢𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸𑀧𑀺 𑀢𑀁 𑀦𑀯𑀦𑀻𑀢𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑁂𑀦 𑀤𑀥𑀺𑀆𑀤𑀻𑀦𑀺 𑀅𑀧𑀦𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀔𑀬𑀁 𑀕𑀫𑀺𑀲𑁆𑀲𑀢𑀻𑀢𑀺 𑀦𑀺𑀭𑀸𑀫𑀺𑀲𑀁 𑀳𑁄𑀢𑀺, 𑀢𑀲𑁆𑀫𑀸 𑀯𑀺𑀓𑀸𑀮𑁂𑀧𑀺 𑀯𑀝𑁆𑀝𑀢𑀻𑀢𑀺 𑀅𑀢𑁆𑀣𑁄. 𑀏𑀢𑁆𑀢𑀸𑀯𑀢𑀸𑀢𑀺 𑀦𑀯𑀦𑀻𑀢𑁂 𑀮𑀕𑁆𑀕𑀫𑀢𑁆𑀢𑁂𑀦 𑀯𑀺𑀲𑀼𑀁 𑀤𑀥𑀺𑀆𑀤𑀺𑀯𑁄𑀳𑀸𑀭𑀁 𑀅𑀮𑀤𑁆𑀥𑁂𑀦 𑀅𑀧𑁆𑀧𑀫𑀢𑁆𑀢𑁂𑀦 𑀤𑀥𑀺𑀆𑀤𑀺𑀦𑀸𑀢𑀺 𑀅𑀢𑁆𑀣𑁄, 𑀏𑀢𑁂𑀦 𑀯𑀺𑀲𑀼𑀁 𑀧𑀝𑀺𑀕𑁆𑀕𑀳𑀺𑀢𑀤𑀥𑀺𑀆𑀤𑀻𑀳𑀺 𑀲𑀳 𑀧𑀓𑁆𑀓𑀁 𑀲𑀯𑀢𑁆𑀣𑀼𑀓𑀧𑀝𑀺𑀕𑁆𑀕𑀳𑀺𑀢𑀲𑀗𑁆𑀔𑁆𑀬𑀫𑁂𑀯 𑀕𑀘𑁆𑀙𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀢𑀲𑁆𑀫𑀺𑀫𑁆𑀧𑀻𑀢𑀺 𑀦𑀺𑀭𑀸𑀫𑀺𑀲𑀪𑀽𑀢𑁂𑀧𑀺. 𑀓𑀼𑀓𑁆𑀓𑀼𑀘𑁆𑀘𑀓𑀸𑀦𑀁 𑀧𑀦 𑀅𑀬𑀁 𑀅𑀥𑀺𑀧𑁆𑀧𑀸𑀬𑁄 𑁋 𑀧𑀝𑀺𑀕𑁆𑀕𑀳𑀡𑁂 𑀢𑀸𑀯 𑀤𑀥𑀺𑀆𑀤𑀻𑀳𑀺 𑀅𑀲𑀫𑁆𑀪𑀺𑀦𑁆𑀦𑀭𑀲𑀢𑁆𑀢𑀸 𑀪𑀢𑁆𑀢𑁂𑀦 𑀲𑀳𑀺𑀢𑁂𑀦 𑀕𑀼𑀴𑀧𑀺𑀡𑁆𑀟𑀸𑀤𑀺 𑀯𑀺𑀬 𑀲𑀯𑀢𑁆𑀣𑀼𑀓𑀧𑀝𑀺𑀕𑁆𑀕𑀳𑀺𑀢𑀁 𑀦𑀸𑀫 𑀦 𑀳𑁄𑀢𑀺, 𑀢𑀁 𑀧𑀦 𑀧𑀘𑀦𑁆𑀢𑁂𑀦 𑀥𑁄𑀯𑀺𑀢𑁆𑀯𑀸𑀯 𑀧𑀘𑀺𑀢𑀩𑁆𑀩𑀁, 𑀇𑀢𑀭𑀣𑀸 𑀧𑀘𑀦𑀓𑁆𑀔𑀡𑁂 𑀧𑀘𑁆𑀘𑀫𑀸𑀦𑀤𑀥𑀺𑀕𑀼𑀴𑀺𑀓𑀸𑀤𑀻𑀳𑀺 𑀲𑀫𑁆𑀪𑀺𑀦𑁆𑀦𑀭𑀲𑀢𑀸𑀬 𑀲𑀸𑀫𑀁𑀧𑀓𑁆𑀓𑀁 𑀚𑀸𑀢𑀁, 𑀢𑁂𑀲𑀼 𑀔𑀻𑀡𑁂𑀲𑀼 𑀲𑀸𑀫𑀁𑀧𑀓𑁆𑀓𑀫𑁂𑀯 𑀳𑁄𑀢𑀺, 𑀢𑀲𑁆𑀫𑀸 𑀦𑀺𑀭𑀸𑀫𑀺𑀲𑀫𑁂𑀯 𑀧𑀘𑀺𑀢𑀩𑁆𑀩𑀦𑁆𑀢𑀺. 𑀢𑁂𑀦𑁂𑀯 ‘‘𑀆𑀫𑀺𑀲𑁂𑀦 𑀲𑀳 𑀧𑀓𑁆𑀓𑀢𑁆𑀢𑀸’’𑀢𑀺 𑀓𑀸𑀭𑀡𑀁 𑀯𑀼𑀢𑁆𑀢𑀁.

𑀏𑀢𑁆𑀣 𑀘𑀸𑀬𑀁 𑀯𑀺𑀘𑀸𑀭𑀡𑀸 𑁋 𑀲𑀯𑀢𑁆𑀣𑀼𑀓𑀧𑀝𑀺𑀕𑁆𑀕𑀳𑀺𑀢𑀢𑁆𑀢𑀸𑀪𑀸𑀯𑁂 𑀆𑀫𑀺𑀲𑁂𑀦 𑀲𑀳 𑀪𑀺𑀓𑁆𑀔𑀼𑀦𑀸 𑀧𑀓𑁆𑀓𑀲𑁆𑀲 𑀲𑀬𑀁𑀧𑀸𑀓𑀤𑁄𑀲𑁄 𑀯𑀸 𑀧𑀭𑀺𑀲𑀗𑁆𑀓𑀻𑀬𑀢𑀺 𑀬𑀸𑀯𑀓𑀸𑀮𑀺𑀓𑀢𑀸 𑀯𑀸, 𑀢𑀢𑁆𑀣 𑀦 𑀢𑀸𑀯 𑀲𑀬𑀁𑀧𑀸𑀓𑀤𑁄𑀲𑁄 𑀏𑀢𑁆𑀣 𑀲𑀫𑁆𑀪𑀯𑀢𑀺 𑀲𑀢𑁆𑀢𑀸𑀳𑀓𑀸𑀮𑀺𑀓𑀢𑁆𑀢𑀸. 𑀬𑀜𑁆𑀳𑀺 𑀢𑀢𑁆𑀣 𑀤𑀥𑀺𑀆𑀤𑀺 𑀆𑀫𑀺𑀲𑀕𑀢𑀁, 𑀢𑀁 𑀧𑀭𑀺𑀓𑁆𑀔𑀻𑀡𑀦𑁆𑀢𑀺. 𑀅𑀣 𑀧𑀝𑀺𑀕𑁆𑀕𑀳𑀺𑀢𑀤𑀥𑀺𑀕𑀼𑀴𑀺𑀓𑀸𑀤𑀺𑀦𑀸 𑀲𑀳 𑀅𑀢𑁆𑀢𑀦𑀸 𑀧𑀓𑁆𑀓𑀢𑁆𑀢𑀸 𑀲𑀯𑀢𑁆𑀣𑀼𑀓𑀧𑀓𑁆𑀓𑀁 𑀯𑀺𑀬 𑀪𑀯𑁂𑀬𑁆𑀬𑀸𑀢𑀺 𑀧𑀭𑀺𑀲𑀗𑁆𑀓𑀻𑀬𑀢𑀺, 𑀢𑀤𑀸 𑀆𑀫𑀺𑀲𑁂𑀦 𑀲𑀳 𑀧𑀝𑀺𑀕𑁆𑀕𑀳𑀺𑀢𑀢𑁆𑀢𑀸𑀢𑀺 𑀓𑀸𑀭𑀡𑀁 𑀯𑀢𑁆𑀢𑀩𑁆𑀩𑀁, 𑀦 𑀧𑀦 𑀧𑀓𑁆𑀓𑀢𑁆𑀢𑀸𑀢𑀺. 𑀢𑀣𑀸 𑀘 𑀉𑀧𑀟𑁆𑀠𑀢𑁆𑀣𑁂𑀭𑀸𑀦𑀁 𑀫𑀢𑀫𑁂𑀯 𑀅𑀗𑁆𑀕𑀻 𑀓𑀢𑀁 𑀲𑀺𑀬𑀸. 𑀢𑀢𑁆𑀣 𑀘 𑀲𑀸𑀫𑀡𑁂𑀭𑀸𑀤𑀻𑀳𑀺 𑀧𑀓𑁆𑀓𑀫𑁆𑀧𑀺 𑀬𑀸𑀯𑀓𑀸𑀮𑀺𑀓𑀫𑁂𑀯 𑀲𑀺𑀬𑀸 𑀧𑀝𑀺𑀕𑁆𑀕𑀳𑀺𑀢𑀔𑀻𑀭𑀸𑀤𑀺𑀁 𑀧𑀘𑀺𑀢𑁆𑀯𑀸 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀳𑀺 𑀓𑀢𑀲𑀧𑁆𑀧𑀺𑀆𑀤𑀺 𑀯𑀺𑀬 𑀘, 𑀦 𑀘 𑀢𑀁 𑀬𑀼𑀢𑁆𑀢𑀁, 𑀪𑀺𑀓𑁆𑀔𑀸𑀘𑀸𑀭𑁂𑀦 𑀮𑀤𑁆𑀥𑀦𑀯𑀦𑀻𑀢𑀸𑀤𑀻𑀦𑀁 𑀢𑀓𑁆𑀓𑀸𑀤𑀺𑀆𑀫𑀺𑀲𑀲𑀁𑀲𑀕𑁆𑀕𑀲𑀫𑁆𑀪𑀯𑁂𑀦 𑀅𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀢𑀸𑀧𑀲𑀗𑁆𑀕𑀢𑁄. 𑀦 𑀳𑀺 𑀕𑀳𑀝𑁆𑀞𑀸 𑀥𑁄𑀯𑀺𑀢𑁆𑀯𑀸, 𑀲𑁄𑀥𑁂𑀢𑁆𑀯𑀸 𑀯𑀸 𑀧𑀢𑁆𑀢𑁂 𑀆𑀓𑀺𑀭𑀦𑁆𑀢𑀻𑀢𑀺 𑀦𑀺𑀬𑀫𑁄 𑀅𑀢𑁆𑀣𑀺, 𑀅𑀝𑁆𑀞𑀓𑀣𑀸𑀬𑀜𑁆𑀘 ‘‘𑀬𑀣𑀸 𑀢𑀢𑁆𑀣 𑀧𑀢𑀺𑀢𑀢𑀡𑁆𑀟𑀼𑀮𑀓𑀡𑀸𑀤𑀬𑁄 𑀦 𑀧𑀘𑁆𑀘𑀦𑁆𑀢𑀺, 𑀏𑀯𑀁…𑀧𑁂… 𑀧𑀼𑀦 𑀧𑀘𑀺𑀢𑁆𑀯𑀸 𑀤𑁂𑀢𑀺, 𑀧𑀼𑀭𑀺𑀫𑀦𑀬𑁂𑀦𑁂𑀯 𑀲𑀢𑁆𑀢𑀸𑀳𑀁 𑀯𑀝𑁆𑀝𑀢𑀻’’𑀢𑀺 𑀇𑀫𑀺𑀦𑀸 𑀯𑀘𑀦𑁂𑀦𑀧𑁂𑀢𑀁 𑀯𑀺𑀭𑀼𑀚𑁆𑀛𑀢𑀺, 𑀢𑀲𑁆𑀫𑀸 𑀇𑀥 𑀓𑀼𑀓𑁆𑀓𑀼𑀘𑁆𑀘𑀓𑀸𑀦𑀁 𑀓𑀼𑀓𑁆𑀓𑀼𑀘𑁆𑀘𑀼𑀧𑁆𑀧𑀢𑁆𑀢𑀺𑀬𑀸 𑀦𑀺𑀫𑀺𑀢𑁆𑀢𑀫𑁂𑀯 𑀦 𑀤𑀺𑀲𑁆𑀲𑀢𑀺. 𑀬𑀣𑀸 𑀘𑁂𑀢𑁆𑀣, 𑀏𑀯𑀁 ‘‘𑀮𑀚𑁆𑀚𑀻 𑀲𑀸𑀫𑀡𑁂𑀭𑁄 𑀬𑀣𑀸 𑀢𑀢𑁆𑀣 𑀧𑀢𑀺𑀢𑀢𑀡𑁆𑀟𑀼𑀮𑀓𑀡𑀸𑀤𑀬𑁄 𑀦 𑀧𑀘𑁆𑀘𑀦𑁆𑀢𑀺, 𑀏𑀯𑀁 𑀲𑀸𑀫𑀺𑀲𑀧𑀸𑀓𑀁 𑀫𑁄𑀘𑁂𑀦𑁆𑀢𑁄 𑀅𑀕𑁆𑀕𑀺𑀫𑁆𑀳𑀺 𑀯𑀺𑀮𑀻𑀬𑀸𑀧𑁂𑀢𑁆𑀯𑀸…𑀧𑁂… 𑀯𑀝𑁆𑀝𑀢𑀻’’𑀢𑀺 𑀯𑀘𑀦𑀲𑁆𑀲𑀸𑀧𑀺 𑀦𑀺𑀫𑀺𑀢𑁆𑀢𑀁 𑀦 𑀤𑀺𑀲𑁆𑀲𑀢𑀺. 𑀬𑀤𑀺 𑀳𑀺 𑀏𑀢𑀁 𑀬𑀸𑀯𑀓𑀸𑀮𑀺𑀓𑀲𑀁𑀲𑀕𑁆𑀕𑀧𑀭𑀺𑀳𑀸𑀭𑀸𑀬 𑀯𑀼𑀢𑁆𑀢𑀁 𑀲𑀺𑀬𑀸, 𑀅𑀢𑁆𑀢𑀦𑀸𑀧𑀺 𑀢𑀣𑀸 𑀓𑀸𑀢𑀩𑁆𑀩𑀁 𑀪𑀯𑁂𑀬𑁆𑀬. 𑀕𑀳𑀝𑁆𑀞𑁂𑀳𑀺 𑀤𑀺𑀦𑁆𑀦𑀲𑀧𑁆𑀧𑀺𑀆𑀤𑀻𑀲𑀼 𑀘 𑀆𑀫𑀺𑀲𑀲𑀁𑀲𑀕𑁆𑀕𑀲𑀗𑁆𑀓𑀸 𑀦 𑀯𑀺𑀕𑀘𑁆𑀙𑁂𑀬𑁆𑀬. 𑀦 𑀳𑀺 𑀕𑀳𑀝𑁆𑀞𑀸 𑀏𑀯𑀁 𑀯𑀺𑀮𑀻𑀬𑀸𑀧𑁂𑀢𑁆𑀯𑀸 𑀧𑀦 𑀢𑀡𑁆𑀟𑀼𑀮𑀸𑀤𑀺𑀁 𑀅𑀧𑀦𑁂𑀢𑁆𑀯𑀸 𑀧𑀼𑀦 𑀧𑀘𑀦𑁆𑀢𑀺, 𑀅𑀧𑀺𑀘 𑀪𑁂𑀲𑀚𑁆𑀚𑁂𑀳𑀺 𑀲𑀤𑁆𑀥𑀺𑀁 𑀔𑀻𑀭𑀸𑀤𑀺𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀬𑀣𑀸 𑀔𑀻𑀭𑀸𑀤𑀺 𑀔𑀬𑀁 𑀕𑀘𑁆𑀙𑀢𑀺, 𑀏𑀯𑀁 𑀧𑀭𑁂𑀳𑀺 𑀧𑀓𑁆𑀓𑀪𑁂𑀲𑀚𑁆𑀚𑀢𑁂𑀮𑀸𑀤𑀺𑀧𑀺 𑀬𑀸𑀯𑀓𑀸𑀮𑀺𑀓𑀫𑁂𑀯 𑀲𑀺𑀬𑀸, 𑀦 𑀘 𑀢𑀫𑁆𑀧𑀺 𑀬𑀼𑀢𑁆𑀢𑀁 𑀤𑀥𑀺𑀆𑀤𑀺𑀔𑀬𑀓𑀭𑀡𑀢𑁆𑀣𑀁 ‘‘𑀧𑀼𑀦 𑀧𑀘𑀺𑀢𑁆𑀯𑀸 𑀤𑁂𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸. 𑀢𑀲𑁆𑀫𑀸 𑀫𑀳𑀸𑀲𑀺𑀯𑀢𑁆𑀣𑁂𑀭𑀯𑀸𑀤𑁂 𑀓𑀼𑀓𑁆𑀓𑀼𑀘𑁆𑀘𑀁 𑀅𑀓𑀢𑁆𑀯𑀸 𑀅𑀥𑁄𑀢𑀫𑁆𑀧𑀺 𑀦𑀯𑀦𑀻𑀢𑀁 𑀢𑀤𑀳𑀼𑀧𑀺 𑀧𑀼𑀦𑀤𑀺𑀯𑀲𑀸𑀤𑀻𑀲𑀼𑀧𑀺 𑀧𑀘𑀺𑀢𑀼𑀁, 𑀢𑀡𑁆𑀟𑀼𑀮𑀸𑀤𑀺𑀫𑀺𑀲𑁆𑀲𑀁 𑀲𑀧𑁆𑀧𑀺𑀆𑀤𑀺𑀁 𑀅𑀢𑁆𑀢𑀦𑀸𑀧𑀺 𑀅𑀕𑁆𑀕𑀺𑀫𑁆𑀳𑀺 𑀯𑀺𑀮𑀻𑀬𑀸𑀧𑁂𑀢𑁆𑀯𑀸 𑀧𑀭𑀺𑀲𑁆𑀲𑀸𑀯𑁂𑀢𑁆𑀯𑀸 𑀧𑀼𑀦 𑀢𑀓𑁆𑀓𑀸𑀤𑀺𑀔𑀬𑀢𑁆𑀣𑀁 𑀧𑀘𑀺𑀢𑀼𑀜𑁆𑀘 𑀯𑀝𑁆𑀝𑀢𑀺.

𑀢𑀢𑁆𑀣 𑀯𑀺𑀚𑁆𑀚𑀫𑀸𑀦𑀲𑁆𑀲𑀧𑀺 𑀧𑀘𑁆𑀘𑀫𑀸𑀦𑀓𑁆𑀔𑀡𑁂 𑀲𑀫𑁆𑀪𑀺𑀦𑁆𑀦𑀭𑀲𑀲𑁆𑀲 𑀬𑀸𑀯𑀓𑀸𑀮𑀺𑀓𑀲𑁆𑀲 𑀅𑀩𑁆𑀩𑁄𑀳𑀸𑀭𑀺𑀓𑀢𑁆𑀢𑁂𑀦 𑀲𑀯𑀢𑁆𑀣𑀼𑀓𑀧𑀝𑀺𑀕𑁆𑀕𑀳𑀺𑀢𑀧𑀼𑀭𑁂𑀧𑀝𑀺𑀕𑁆𑀕𑀳𑀺𑀢𑀸𑀦𑀫𑁆𑀧𑀺 𑀅𑀩𑁆𑀩𑁄𑀳𑀸𑀭𑀺𑀓𑀢𑁄𑀢𑀺 𑀦𑀺𑀝𑁆𑀞𑀫𑁂𑀢𑁆𑀣 𑀕𑀦𑁆𑀢𑀩𑁆𑀩𑀦𑁆𑀢𑀺. 𑀢𑁂𑀦𑁂𑀯 ‘‘𑀏𑀢𑁆𑀢𑀸𑀯𑀢𑀸 𑀲𑀯𑀢𑁆𑀣𑀼𑀓𑀧𑀝𑀺𑀕𑁆𑀕𑀳𑀺𑀢𑀁 𑀦𑀸𑀫 𑀦 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁. 𑀯𑀺𑀲𑀼𑀁 𑀧𑀝𑀺𑀕𑁆𑀕𑀳𑀺𑀢𑁂𑀦 𑀧𑀦 𑀔𑀻𑀭𑀸𑀤𑀺𑀆𑀫𑀺𑀲𑁂𑀦 𑀦𑀯𑀦𑀻𑀢𑀸𑀤𑀺𑀁 𑀫𑀺𑀲𑁆𑀲𑁂𑀢𑁆𑀯𑀸 𑀪𑀺𑀓𑁆𑀔𑀼𑀦𑀸 𑀯𑀸 𑀅𑀜𑁆𑀜𑁂𑀳𑀺 𑀯𑀸 𑀧𑀓𑁆𑀓𑀢𑁂𑀮𑀸𑀤𑀺𑀪𑁂𑀲𑀚𑁆𑀚𑀁 𑀲𑀯𑀢𑁆𑀣𑀼𑀓𑀧𑀝𑀺𑀕𑁆𑀕𑀳𑀺𑀢𑀲𑀗𑁆𑀔𑁆𑀬𑀫𑁂𑀯 𑀕𑀘𑁆𑀙𑀢𑀺, 𑀢𑀢𑁆𑀣 𑀧𑀯𑀺𑀝𑁆𑀞𑀬𑀸𑀯𑀓𑀸𑀮𑀺𑀓𑀲𑁆𑀲 𑀅𑀩𑁆𑀩𑁄𑀳𑀸𑀭𑀺𑀓𑀢𑁆𑀢𑀸𑀪𑀸𑀯𑀸. 𑀬𑀁 𑀧𑀦 𑀧𑀼𑀭𑁂𑀧𑀭𑀺𑀕𑁆𑀕𑀳𑀺𑀢𑀪𑁂𑀲𑀚𑁆𑀚𑁂𑀳𑀺 𑀅𑀧𑁆𑀧𑀝𑀺𑀕𑁆𑀕𑀳𑀺𑀢𑀁 𑀔𑀻𑀭𑀸𑀤𑀺𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀧𑀓𑁆𑀓𑀢𑁂𑀮𑀸𑀤𑀺𑀓𑀁 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀳𑁂𑀯 𑀧𑀓𑁆𑀓𑀫𑁆𑀧𑀺 𑀲𑀯𑀢𑁆𑀣𑀼𑀓𑀧𑀝𑀺𑀕𑁆𑀕𑀳𑀺𑀢𑀫𑁆𑀧𑀺 𑀲𑀦𑁆𑀦𑀺𑀥𑀺𑀧𑀺 𑀦 𑀳𑁄𑀢𑀺, 𑀢𑀢𑁆𑀣 𑀧𑀓𑁆𑀔𑀺𑀢𑁆𑀢𑀔𑀻𑀭𑀸𑀤𑀺𑀓𑀲𑁆𑀲𑀧𑀺 𑀢𑀲𑁆𑀫𑀺𑀁 𑀔𑀡𑁂 𑀲𑀫𑁆𑀪𑀺𑀦𑁆𑀦𑀭𑀲𑀢𑀸𑀬 𑀧𑀼𑀭𑁂𑀧𑀝𑀺𑀕𑁆𑀕𑀳𑀺𑀢𑀢𑁆𑀢𑀸𑀧𑀢𑁆𑀢𑀺𑀢𑁄. 𑀲𑀘𑁂 𑀧𑀦 𑀅𑀧𑁆𑀧𑀝𑀺𑀕𑁆𑀕𑀳𑀺𑀢𑁂𑀳𑁂𑀯, 𑀅𑀜𑁆𑀜𑁂𑀳𑀺 𑀯𑀸 𑀧𑀓𑁆𑀓𑀢𑁂𑀮𑀸𑀤𑀻𑀲𑀼𑀧𑀺 𑀲𑀘𑁂 𑀆𑀫𑀺𑀲𑀭𑀲𑁄 𑀧𑀜𑁆𑀜𑀸𑀬𑀢𑀺, 𑀢𑀁 𑀬𑀸𑀯𑀓𑀸𑀮𑀺𑀓𑀫𑁂𑀯 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀉𑀕𑁆𑀕𑀳𑁂𑀢𑁆𑀯𑀸𑀢𑀺 𑀲𑀬𑀫𑁂𑀯 𑀕𑀳𑁂𑀢𑁆𑀯𑀸.

𑀧𑀭𑀺𑀲𑁆𑀲𑀸𑀯𑁂𑀢𑁆𑀯𑀸 𑀕𑀳𑀺𑀢𑀦𑁆𑀢𑀺 𑀢𑀡𑁆𑀟𑀼𑀮𑀸𑀤𑀺𑀯𑀺𑀕𑀫𑀢𑁆𑀣𑀁 𑀧𑀭𑀺𑀲𑁆𑀲𑀸𑀯𑁂𑀢𑁆𑀯𑀸, 𑀢𑀓𑁆𑀓𑀸𑀤𑀺𑀯𑀺𑀕𑀫𑀢𑁆𑀣𑀁 𑀧𑀼𑀦 𑀧𑀘𑀺𑀢𑁆𑀯𑀸 𑀕𑀳𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀞𑀧𑀺𑀢𑀪𑁂𑀲𑀚𑁆𑀚𑁂𑀳𑀻𑀢𑀺 𑀅𑀢𑀺𑀭𑁂𑀓𑀲𑀢𑁆𑀢𑀸𑀳𑀧𑀝𑀺𑀕𑁆𑀕𑀳𑀺𑀢𑁂𑀳𑀺, 𑀏𑀢𑁂𑀦 𑀢𑁂𑀳𑀺 𑀬𑀼𑀢𑁆𑀢𑀫𑁆𑀧𑀺 𑀲𑀧𑁆𑀧𑀺𑀆𑀤𑀺 𑀅𑀢𑀺𑀭𑁂𑀓𑀲𑀢𑁆𑀢𑀸𑀳𑀧𑀝𑀺𑀕𑁆𑀕𑀳𑀺𑀢𑀁 𑀦 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀯𑀤𑁆𑀤𑀮𑀺𑀲𑀫𑀬𑁂𑀢𑀺 𑀯𑀲𑁆𑀲𑀓𑀸𑀮𑀲𑀫𑀬𑁂, 𑀅𑀦𑀸𑀢𑀧𑀓𑀸𑀮𑁂𑀢𑀺 𑀅𑀢𑁆𑀣𑁄.

𑀦𑀺𑀩𑁆𑀩𑀝𑁆𑀝𑀺𑀢𑀢𑁆𑀢𑀸𑀢𑀺 𑀬𑀸𑀯𑀓𑀸𑀮𑀺𑀓𑀯𑀢𑁆𑀣𑀼𑀢𑁄 𑀯𑀺𑀯𑁂𑀘𑀺𑀢𑀢𑁆𑀢𑀸, 𑀏𑀢𑁂𑀦 𑀢𑁂𑀮𑁂 𑀲𑀪𑀸𑀯𑀢𑁄 𑀬𑀸𑀯𑀓𑀸𑀮𑀺𑀓𑀢𑁆𑀢𑀸𑀪𑀸𑀯𑀁, 𑀪𑀺𑀓𑁆𑀔𑀼𑀦𑁄 𑀲𑀯𑀢𑁆𑀣𑀼𑀓𑀧𑀝𑀺𑀕𑁆𑀕𑀳𑀡𑁂𑀦 𑀬𑀸𑀯𑀓𑀸𑀮𑀺𑀓𑀢𑁆𑀢𑀼𑀧𑀕𑀫𑀦𑀜𑁆𑀘 𑀤𑀲𑁆𑀲𑁂𑀢𑀺. 𑀉𑀪𑀬𑀫𑁆𑀧𑀻𑀢𑀺 𑀅𑀢𑁆𑀢𑀦𑀸, 𑀅𑀜𑁆𑀜𑁂𑀳𑀺 𑀘 𑀓𑀢𑀁.

𑁬𑁨𑁩. 𑀅𑀘𑁆𑀙𑀯𑀲𑀦𑁆𑀢𑀺 𑀤𑀼𑀓𑁆𑀓𑀝𑀯𑀢𑁆𑀣𑀽𑀦𑀜𑁆𑀜𑁂𑀯 𑀉𑀧𑀮𑀓𑁆𑀔𑀡𑀦𑁆𑀢𑀺 𑀆𑀳 ‘‘𑀞𑀧𑁂𑀢𑁆𑀯𑀸 𑀫𑀦𑀼𑀲𑁆𑀲𑀯𑀲’’𑀦𑁆𑀢𑀺. 𑀲𑀁𑀲𑀝𑁆𑀞𑀦𑁆𑀢𑀺 𑀧𑀭𑀺𑀲𑁆𑀲𑀸𑀯𑀺𑀢𑀁. 𑀢𑀺𑀡𑁆𑀡𑀁 𑀤𑀼𑀓𑁆𑀓𑀝𑀸𑀦𑀦𑁆𑀢𑀺 𑀅𑀚𑁆𑀛𑁄𑀳𑀸𑀭𑁂 𑀅𑀚𑁆𑀛𑁄𑀳𑀸𑀭𑁂 𑀢𑀻𑀡𑀺 𑀤𑀼𑀓𑁆𑀓𑀝𑀸𑀦𑀺 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀓𑀺𑀜𑁆𑀘𑀸𑀧𑀺 𑀧𑀭𑀺𑀪𑁄𑀕𑀢𑁆𑀣𑀸𑀬 𑀯𑀺𑀓𑀸𑀮𑁂 𑀧𑀝𑀺𑀕𑁆𑀕𑀳𑀡𑀧𑀘𑀦𑀧𑀭𑀺𑀲𑁆𑀲𑀸𑀯𑀦𑀸𑀤𑀻𑀲𑀼 𑀧𑀼𑀩𑁆𑀩𑀧𑀬𑁄𑀕𑁂𑀲𑀼 𑀧𑀸𑀴𑀺𑀬𑀁, 𑀅𑀝𑁆𑀞𑀓𑀣𑀸𑀬𑀜𑁆𑀘 𑀆𑀧𑀢𑁆𑀢𑀺 𑀦 𑀯𑀼𑀢𑁆𑀢𑀸, 𑀢𑀣𑀸𑀧𑀺 𑀏𑀢𑁆𑀣 𑀆𑀧𑀢𑁆𑀢𑀺𑀬𑀸 𑀏𑀯 𑀪𑀯𑀺𑀢𑀩𑁆𑀩𑀁 𑀧𑀝𑀺𑀓𑁆𑀔𑀺𑀢𑁆𑀢𑀲𑁆𑀲 𑀓𑀭𑀡𑀢𑁄 𑀆𑀳𑀸𑀭𑀢𑁆𑀣𑀸𑀬 𑀯𑀺𑀓𑀸𑀮𑁂 𑀬𑀸𑀫𑀓𑀸𑀮𑀺𑀓𑀸𑀤𑀻𑀦𑀁 𑀧𑀝𑀺𑀕𑁆𑀕𑀳𑀡𑁂 𑀯𑀺𑀬. 𑀬𑀲𑁆𑀫𑀸 𑀔𑀻𑀭𑀸𑀤𑀺𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀧𑀓𑁆𑀓𑀪𑁂𑀲𑀚𑁆𑀚𑀢𑁂𑀮𑁂 𑀓𑀲𑀝𑀁 𑀆𑀫𑀺𑀲𑀕𑀢𑀺𑀓𑀁, 𑀢𑁂𑀦 𑀲𑀳 𑀢𑁂𑀮𑀁 𑀧𑀝𑀺𑀕𑁆𑀕𑀳𑁂𑀢𑀼𑀁, 𑀧𑀘𑀺𑀢𑀼𑀁 𑀯𑀸 𑀪𑀺𑀓𑁆𑀔𑀼𑀦𑁄 𑀦 𑀯𑀝𑁆𑀝𑀢𑀺. 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀧𑀓𑁆𑀓𑀢𑁂𑀮𑀓𑀲𑀝𑁂 𑀯𑀺𑀬 𑀓𑀼𑀓𑁆𑀓𑀼𑀘𑁆𑀘𑀸𑀬𑀢𑀻’’𑀢𑀺. 𑀲𑀘𑁂 𑀯𑀲𑀸𑀬 𑀲𑀳 𑀧𑀓𑁆𑀓𑀢𑁆𑀢𑀸 𑀦 𑀯𑀝𑁆𑀝𑀢𑀺, 𑀇𑀤𑀁 𑀓𑀲𑁆𑀫𑀸 𑀦 𑀯𑀝𑁆𑀝𑀢𑀻𑀢𑀺 𑀧𑀼𑀘𑁆𑀙𑀦𑁆𑀢𑀸 ‘‘𑀪𑀦𑁆𑀢𑁂 …𑀧𑁂… 𑀯𑀝𑁆𑀝𑀢𑀻’’𑀢𑀺 𑀆𑀳𑀁𑀲𑀼. 𑀣𑁂𑀭𑁄 𑀅𑀢𑀺𑀓𑀼𑀓𑁆𑀓𑀼𑀘𑁆𑀘𑀢𑀸𑀬 𑀘 ‘‘𑀏𑀢𑀫𑁆𑀧𑀺, 𑀆𑀯𑀼𑀲𑁄, 𑀦 𑀯𑀝𑁆𑀝𑀢𑀻’’𑀢𑀺 𑀆𑀳. 𑀭𑁄𑀕𑀦𑀺𑀕𑁆𑀕𑀳𑀢𑁆𑀣𑀸𑀬 𑀏𑀯 𑀯𑀲𑀸𑀬 𑀅𑀦𑀼𑀜𑁆𑀜𑀸𑀢𑀢𑁆𑀢𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀧𑀘𑁆𑀙𑀸 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺.

‘‘𑀫𑀥𑀼𑀓𑀭𑀻𑀳𑀺 𑀦𑀸𑀫 𑀫𑀥𑀼𑀫𑀓𑁆𑀔𑀺𑀓𑀸𑀳𑀻’’𑀢𑀺 𑀇𑀤𑀁 𑀔𑀼𑀤𑁆𑀤𑀓𑀪𑀫𑀭𑀸𑀦𑀁 𑀤𑁆𑀯𑀺𑀦𑁆𑀦𑀁 𑀏𑀯 𑀯𑀺𑀲𑁂𑀲𑀦𑀦𑁆𑀢𑀺 𑀓𑁂𑀘𑀺 𑀯𑀤𑀦𑁆𑀢𑀺, 𑀅𑀜𑁆𑀜𑁂 𑀧𑀦 ‘‘𑀤𑀡𑁆𑀟𑀓𑁂𑀲𑀼 𑀫𑀥𑀼𑀓𑀸𑀭𑀺𑀓𑀸 𑀫𑀥𑀼𑀓𑀭𑀻𑀫𑀓𑁆𑀔𑀺𑀓𑀸 𑀦𑀸𑀫, 𑀢𑀸𑀳𑀺 𑀲𑀳 𑀢𑀺𑀲𑁆𑀲𑁄 𑀫𑀥𑀼𑀫𑀓𑁆𑀔𑀺𑀓𑀸𑀚𑀸𑀢𑀺𑀬𑁄’’𑀢𑀺 𑀯𑀤𑀦𑁆𑀢𑀺. 𑀪𑀫𑀭𑀫𑀓𑁆𑀔𑀺𑀓𑀸𑀢𑀺 𑀫𑀳𑀸𑀧𑀝𑀮𑀓𑀸𑀭𑀺𑀓𑀸. 𑀲𑀺𑀮𑁂𑀲𑀲𑀤𑀺𑀲𑀦𑁆𑀢𑀺 𑀲𑀼𑀓𑁆𑀔𑀢𑀸𑀬 𑀯𑀸 𑀧𑀓𑁆𑀓𑀢𑀸𑀬 𑀯𑀸 𑀖𑀦𑀻𑀪𑀽𑀢𑀁. 𑀇𑀢𑀭𑀦𑁆𑀢𑀺 𑀢𑀦𑀼𑀓𑀫𑀥𑀼.

𑀉𑀘𑁆𑀙𑀼𑀭𑀲𑀁 𑀉𑀧𑀸𑀤𑀸𑀬𑀸𑀢𑀺 𑀦𑀺𑀓𑁆𑀓𑀲𑀝𑀭𑀲𑀲𑁆𑀲𑀧𑀺 𑀲𑀢𑁆𑀢𑀸𑀳𑀓𑀸𑀮𑀺𑀓𑀢𑀁 𑀤𑀲𑁆𑀲𑁂𑀢𑀺 ‘‘𑀉𑀘𑁆𑀙𑀼𑀫𑁆𑀳𑀸 𑀦𑀺𑀩𑁆𑀩𑀢𑁆𑀢’’𑀦𑁆𑀢𑀺 𑀧𑀸𑀴𑀺𑀬𑀁 𑀲𑀸𑀫𑀜𑁆𑀜𑀢𑁄 𑀯𑀼𑀢𑁆𑀢𑀢𑁆𑀢𑀸. 𑀬𑀁 𑀧𑀦 𑀲𑀼𑀢𑁆𑀢𑀦𑁆𑀢𑀝𑁆𑀞𑀓𑀣𑀸𑀬𑀁 ‘‘𑀉𑀘𑁆𑀙𑀼 𑀘𑁂, 𑀬𑀸𑀯𑀓𑀸𑀮𑀺𑀓𑁄. 𑀉𑀘𑁆𑀙𑀼𑀭𑀲𑁄 𑀘𑁂, 𑀬𑀸𑀫𑀓𑀸𑀮𑀺𑀓𑁄. 𑀨𑀸𑀡𑀺𑀢𑀁 𑀘𑁂, 𑀲𑀢𑁆𑀢𑀸𑀳𑀓𑀸𑀮𑀺𑀓𑀁. 𑀢𑀘𑁄 𑀘𑁂, 𑀬𑀸𑀯𑀚𑀻𑀯𑀓𑁄’’𑀢𑀺 𑀯𑀼𑀢𑁆𑀢𑀁, 𑀢𑀁 𑀅𑀫𑁆𑀩𑀨𑀮𑀭𑀲𑀸𑀤𑀺𑀫𑀺𑀲𑁆𑀲𑀢𑀸𑀬 𑀬𑀸𑀫𑀓𑀸𑀮𑀺𑀓𑀢𑁆𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀕𑀳𑁂𑀢𑀩𑁆𑀩𑀁, 𑀅𑀯𑀺𑀦𑀬𑀯𑀘𑀦𑀢𑁆𑀢𑀸 𑀢𑀁 𑀅𑀧𑁆𑀧𑀫𑀸𑀡𑀦𑁆𑀢𑀺. 𑀢𑁂𑀦𑁂𑀯 ‘‘𑀧𑀼𑀭𑁂𑀪𑀢𑁆𑀢𑀁 𑀧𑀝𑀺𑀕𑁆𑀕𑀳𑀺𑀢𑁂𑀦 𑀅𑀧𑀭𑀺𑀲𑁆𑀲𑀸𑀯𑀺𑀢𑀉𑀘𑁆𑀙𑀼𑀭𑀲𑁂𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀦𑀺𑀭𑀸𑀫𑀺𑀲𑀫𑁂𑀯 𑀯𑀝𑁆𑀝𑀢𑀺 𑀢𑀢𑁆𑀣 𑀧𑀯𑀺𑀝𑁆𑀞𑀬𑀸𑀯𑀓𑀸𑀮𑀺𑀓𑀲𑁆𑀲 𑀅𑀩𑁆𑀩𑁄𑀳𑀸𑀭𑀺𑀓𑀢𑁆𑀢𑀸𑀢𑀺 𑀇𑀤𑀁 𑀕𑀼𑀴𑁂 𑀓𑀢𑁂 𑀢𑀢𑁆𑀣 𑀯𑀺𑀚𑁆𑀚𑀫𑀸𑀦𑀫𑁆𑀧𑀺 𑀓𑀲𑀝𑀁 𑀧𑀸𑀓𑁂𑀦 𑀲𑀼𑀓𑁆𑀔𑀢𑀸𑀬 𑀬𑀸𑀯𑀚𑀻𑀯𑀺𑀓𑀢𑁆𑀢𑀁 𑀪𑀚𑀢𑀻𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀲 𑀬𑀸𑀯𑀓𑀸𑀮𑀺𑀓𑀢𑁆𑀢𑁂 𑀳𑀺 𑀲𑀸𑀫𑀁𑀧𑀸𑀓𑁂𑀦 𑀧𑀼𑀭𑁂𑀪𑀢𑁆𑀢𑁂𑀧𑀺 𑀅𑀦𑀚𑁆𑀛𑁄𑀳𑀭𑀡𑀻𑀬𑀁 𑀲𑀺𑀬𑀸𑀢𑀺. ‘‘𑀲𑀯𑀢𑁆𑀣𑀼𑀓𑀧𑀝𑀺𑀕𑁆𑀕𑀳𑀺𑀢𑀢𑁆𑀢𑀸’’𑀢𑀺 𑀇𑀤𑀁 𑀉𑀘𑁆𑀙𑀼𑀭𑀲𑁂 𑀘𑀼𑀡𑁆𑀡𑀯𑀺𑀘𑀼𑀡𑁆𑀡𑀁 𑀳𑀼𑀢𑁆𑀯𑀸 𑀞𑀺𑀢𑀓𑀲𑀝𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀢𑁂𑀦 𑀘 𑀅𑀧𑀭𑀺𑀲𑁆𑀲𑀸𑀯𑀺𑀢𑁂𑀦 𑀅𑀧𑁆𑀧𑀝𑀺𑀕𑁆𑀕𑀳𑀺𑀢𑁂𑀦 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀳𑀺 𑀓𑀢𑀁 𑀲𑀢𑁆𑀢𑀸𑀳𑀁 𑀯𑀝𑁆𑀝𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀛𑀸𑀫𑀉𑀘𑁆𑀙𑀼𑀨𑀸𑀡𑀺𑀢𑀦𑁆𑀢𑀺 𑀅𑀕𑁆𑀕𑀺𑀫𑁆𑀳𑀺 𑀉𑀘𑁆𑀙𑀼𑀁 𑀢𑀸𑀧𑁂𑀢𑁆𑀯𑀸 𑀓𑀢𑀁. 𑀓𑁄𑀝𑁆𑀝𑀺𑀢𑀉𑀘𑁆𑀙𑀼𑀨𑀸𑀡𑀺𑀢𑀦𑁆𑀢𑀺 𑀔𑀼𑀤𑁆𑀤𑀸𑀦𑀼𑀔𑀼𑀤𑁆𑀤𑀓𑀁 𑀙𑀺𑀦𑁆𑀤𑀺𑀢𑁆𑀯𑀸 𑀓𑁄𑀝𑁆𑀝𑁂𑀢𑁆𑀯𑀸 𑀦𑀺𑀧𑁆𑀧𑀻𑀴𑁂𑀢𑁆𑀯𑀸 𑀧𑀓𑁆𑀓𑀁.

𑀢𑀁 𑀢𑀢𑁆𑀣 𑀯𑀺𑀚𑁆𑀚𑀫𑀸𑀦𑀫𑁆𑀧𑀺 𑀓𑀲𑀝𑀁 𑀧𑀓𑁆𑀓𑀓𑀸𑀮𑁂 𑀬𑀸𑀯𑀓𑀸𑀮𑀺𑀓𑀢𑁆𑀢𑀁 𑀯𑀺𑀚𑀳𑀢𑀻𑀢𑀺 𑀆𑀳 ‘‘𑀢𑀁 𑀬𑀼𑀢𑁆𑀢’’𑀦𑁆𑀢𑀺. 𑀲𑀻𑀢𑁄𑀤𑀓𑁂𑀦 𑀓𑀢𑀦𑁆𑀢𑀺 𑀫𑀥𑀼𑀓𑀧𑀼𑀧𑁆𑀨𑀸𑀦𑀺 𑀲𑀻𑀢𑁄𑀤𑀓𑁂𑀦 𑀫𑀤𑁆𑀤𑀺𑀢𑁆𑀯𑀸 𑀧𑀭𑀺𑀲𑁆𑀲𑀸𑀯𑁂𑀢𑁆𑀯𑀸 𑀧𑀘𑀺𑀢𑁆𑀯𑀸 𑀓𑀢𑀁, 𑀅𑀫𑀤𑁆𑀤𑀺𑀢𑁆𑀯𑀸 𑀓𑀢𑀦𑁆𑀢𑀺 𑀓𑁂𑀘𑀺, 𑀢𑀢𑁆𑀣 𑀓𑀸𑀭𑀡𑀁 𑀦 𑀤𑀺𑀲𑁆𑀲𑀢𑀺. 𑀔𑀻𑀭𑀚𑀮𑁆𑀮𑀺𑀓𑀦𑁆𑀢𑀺 𑀔𑀻𑀭𑀨𑁂𑀡𑀁. 𑀫𑀥𑀼𑀓𑀧𑀼𑀧𑁆𑀨𑀁 𑀧𑀦𑀸𑀢𑀺𑀆𑀤𑀺 𑀬𑀸𑀯𑀓𑀸𑀮𑀺𑀓𑀭𑀽𑀧𑁂𑀦 𑀞𑀺𑀢𑀲𑁆𑀲𑀧𑀺 𑀅𑀯𑀝𑁆𑀝𑀦𑀓𑀫𑁂𑀭𑀬𑀩𑀻𑀚𑀯𑀢𑁆𑀣𑀼𑀁 𑀤𑀲𑁆𑀲𑁂𑀢𑀼𑀁 𑀆𑀭𑀤𑁆𑀥𑀁.

𑀲𑀩𑁆𑀩𑀸𑀦𑀺𑀧𑀻𑀢𑀺 𑀲𑀧𑁆𑀧𑀺𑀆𑀤𑀻𑀦𑀺 𑀧𑀜𑁆𑀘𑀧𑀺. 𑀆𑀳𑀸𑀭𑀓𑀺𑀘𑁆𑀘𑀁 𑀓𑀭𑁄𑀦𑁆𑀢𑀸𑀦𑀺 𑀏𑀢𑀸𑀦𑀺 𑀓𑀲𑁆𑀫𑀸 𑀏𑀯𑀁 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀸𑀦𑀻𑀢𑀺 𑀘𑁄𑀤𑀦𑀸𑀧𑀭𑀺𑀳𑀸𑀭𑀸𑀬 𑀪𑁂𑀲𑀚𑁆𑀚𑁄𑀤𑀺𑀲𑁆𑀲𑀁 𑀤𑀲𑁆𑀲𑁂𑀦𑁆𑀢𑁂𑀦 𑀢𑀧𑁆𑀧𑀲𑀗𑁆𑀕𑁂𑀦 𑀲𑀩𑁆𑀩𑀸𑀦𑀺𑀧𑀺 𑀑𑀤𑀺𑀲𑁆𑀲𑀓𑀸𑀦𑀺 𑀏𑀓𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀲𑀢𑁆𑀢𑀯𑀺𑀥𑀁 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀧𑀓𑀢𑀺𑀪𑁂𑀲𑀚𑁆𑀚𑀢𑁆𑀢𑀸 𑀯𑀺𑀓𑀝𑀸𑀦𑀺 𑀯𑀺𑀭𑀽𑀧𑀸𑀦𑀺 𑀯𑀺𑀲𑀳𑀭𑀡𑀢𑁄 𑀫𑀳𑀸𑀯𑀺𑀲𑀬𑀢𑁆𑀢𑀸 𑀫𑀳𑀦𑁆𑀢𑀸𑀦𑀺 𑀘𑀸𑀢𑀺 𑀫𑀳𑀸𑀯𑀺𑀓𑀝𑀸𑀦𑀺. 𑀉𑀧𑀲𑀫𑁆𑀧𑀤𑀸𑀤𑀻𑀦𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀕𑀡𑀗𑁆𑀕𑀡𑀽𑀧𑀸𑀳𑀦𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺.

𑀅𑀥𑀺𑀝𑁆𑀞𑁂𑀢𑀻𑀢𑀺 𑀩𑀸𑀳𑀺𑀭𑀧𑀭𑀺𑀪𑁄𑀕𑀢𑁆𑀣𑀫𑁂𑀢𑀦𑁆𑀢𑀺 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀢𑀺, 𑀏𑀯𑀁 𑀧𑀭𑀺𑀪𑁄𑀕𑁂 𑀅𑀦𑀧𑁂𑀓𑁆𑀔𑀢𑀸𑀬 𑀧𑀝𑀺𑀕𑁆𑀕𑀳𑀡𑀁 𑀯𑀺𑀚𑀳𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀯𑀁 𑀅𑀜𑁆𑀜𑁂𑀲𑀼𑀧𑀺 𑀓𑀸𑀮𑀺𑀓𑁂𑀲𑀼 𑀅𑀦𑀚𑁆𑀛𑁄𑀳𑀭𑀺𑀢𑀼𑀓𑀸𑀫𑀢𑀸𑀬 𑀲𑀼𑀤𑁆𑀥𑀘𑀺𑀢𑁆𑀢𑁂𑀦 𑀩𑀸𑀳𑀺𑀭𑀧𑀭𑀺𑀪𑁄𑀕𑀢𑁆𑀣𑀸𑀬 𑀦𑀺𑀬𑀫𑁂𑀧𑀺 𑀧𑀝𑀺𑀕𑁆𑀕𑀳𑀡𑀁 𑀯𑀺𑀚𑀳𑀢𑀻𑀢𑀺 𑀇𑀤𑀫𑁆𑀧𑀺 𑀯𑀺𑀲𑀼𑀁 𑀏𑀓𑀁 𑀧𑀝𑀺𑀕𑁆𑀕𑀳𑀡𑀯𑀺𑀚𑀳𑀦𑀓𑀸𑀭𑀡𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑁬𑁨𑁫. 𑀲𑀘𑁂 𑀤𑁆𑀯𑀺𑀦𑁆𑀦𑀁…𑀧𑁂… 𑀦 𑀯𑀝𑁆𑀝𑀢𑀻𑀢𑀺 𑀏𑀢𑁆𑀣 𑀧𑀸𑀞𑁄 𑀕𑀴𑀺𑀢𑁄, 𑀏𑀯𑀁 𑀧𑀦𑁂𑀢𑁆𑀣 𑀧𑀸𑀞𑁄 𑀯𑁂𑀤𑀺𑀢𑀩𑁆𑀩𑁄 ‘‘𑀲𑀘𑁂 𑀤𑁆𑀯𑀺𑀦𑁆𑀦𑀁 𑀲𑀦𑁆𑀢𑀓𑀁 𑀏𑀓𑁂𑀦 𑀧𑀝𑀺𑀕𑁆𑀕𑀳𑀺𑀢𑀁 𑀅𑀯𑀺𑀪𑀢𑁆𑀢𑀁 𑀳𑁄𑀢𑀺, 𑀲𑀢𑁆𑀢𑀸𑀳𑀸𑀢𑀺𑀓𑁆𑀓𑀫𑁂 𑀤𑁆𑀯𑀺𑀦𑁆𑀦𑀫𑁆𑀧𑀺 𑀅𑀦𑀸𑀧𑀢𑁆𑀢𑀺, 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀧𑀦 𑀦 𑀯𑀝𑁆𑀝𑀢𑀻’’𑀢𑀺. 𑀅𑀜𑁆𑀜𑀣𑀸 𑀳𑀺 𑀲𑀤𑁆𑀤𑀧𑁆𑀧𑀬𑁄𑀕𑁄𑀧𑀺 𑀦 𑀲𑀗𑁆𑀕𑀳𑀁 𑀕𑀘𑁆𑀙𑀢𑀺. ‘‘𑀕𑀡𑁆𑀞𑀺𑀧𑀤𑁂𑀧𑀺 𑀘 𑀅𑀬𑀫𑁂𑀯 𑀧𑀸𑀞𑁄 𑀤𑀲𑁆𑀲𑀺𑀢𑁄’’𑀢𑀺 (𑀲𑀸𑀭𑀢𑁆𑀣. 𑀝𑀻. 𑁨.𑁬𑁨𑁫) 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 𑀯𑀼𑀢𑁆𑀢𑀁. 𑀤𑁆𑀯𑀺𑀦𑁆𑀦𑀫𑁆𑀧𑀺 𑀅𑀦𑀸𑀧𑀢𑁆𑀢𑀻𑀢𑀺 𑀅𑀯𑀺𑀪𑀢𑁆𑀢𑀢𑁆𑀢𑀸 𑀯𑀼𑀢𑁆𑀢𑀁. ‘‘𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀧𑀦 𑀦 𑀯𑀝𑁆𑀝𑀢𑀻’’𑀢𑀺 𑀇𑀤𑀁 ‘‘𑀲𑀢𑁆𑀢𑀸𑀳𑀧𑀭𑀫𑀁 𑀲𑀦𑁆𑀦𑀺𑀥𑀺𑀓𑀸𑀭𑀓𑀁 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩’’𑀦𑁆𑀢𑀺 𑀯𑀘𑀦𑀢𑁄 𑀯𑀼𑀢𑁆𑀢𑀁. ‘‘𑀬𑁂𑀦 𑀧𑀝𑀺𑀕𑁆𑀕𑀳𑀺𑀢𑀁, 𑀢𑁂𑀦 𑀯𑀺𑀲𑁆𑀲𑀚𑁆𑀚𑀺𑀢𑀢𑁆𑀢𑀸’’𑀢𑀺 𑀇𑀫𑀺𑀦𑀸 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀤𑀸𑀦𑀫𑁆𑀧𑀺 𑀲𑀦𑁆𑀥𑀸𑀬 ‘‘𑀯𑀺𑀲𑁆𑀲𑀚𑁆𑀚𑁂𑀢𑀻’’𑀢𑀺 𑀇𑀤𑀁 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀦𑀺𑀭𑀧𑁂𑀓𑁆𑀔𑀤𑀺𑀦𑁆𑀦𑀯𑀢𑁆𑀣𑀼𑀫𑁆𑀳𑀺 𑀧𑀝𑀺𑀕𑁆𑀕𑀳𑀡𑀲𑁆𑀲 𑀅𑀯𑀺𑀕𑀢𑀢𑁆𑀢𑁂𑀧𑀺 𑀲𑀓𑀲𑀦𑁆𑀢𑀓𑀢𑀸 𑀯𑀺𑀕𑀢𑀸𑀯 𑀳𑁄𑀢𑀺, 𑀢𑁂𑀦 𑀦𑀺𑀲𑁆𑀲𑀕𑁆𑀕𑀺𑀬𑀁 𑀦 𑀳𑁄𑀢𑀺. 𑀅𑀢𑁆𑀢𑀦𑀸𑀯 𑀧𑀝𑀺𑀕𑁆𑀕𑀳𑀺𑀢𑀢𑁆𑀢𑀁, 𑀲𑀓𑀲𑀦𑁆𑀢𑀓𑀢𑁆𑀢𑀜𑁆𑀘𑀸𑀢𑀺 𑀇𑀫𑁂𑀳𑀺 𑀤𑁆𑀯𑀻𑀳𑀺 𑀓𑀸𑀭𑀡𑁂𑀳𑀺 𑀦𑀺𑀲𑁆𑀲𑀕𑁆𑀕𑀺𑀬𑀁 𑀳𑁄𑀢𑀺, 𑀦 𑀏𑀓𑁂𑀦. 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀦𑀺𑀭𑀧𑁂𑀓𑁆𑀔𑀤𑀸𑀦𑁂 𑀧𑀦 𑀢𑀤𑀼𑀪𑀬𑀫𑁆𑀧𑀺 𑀯𑀺𑀚𑀳𑀢𑀺, 𑀧𑀭𑀺𑀪𑁄𑀕𑁄𑀧𑁂𑀢𑁆𑀣 𑀯𑀝𑁆𑀝𑀢𑀺, 𑀦 𑀲𑀸𑀧𑁂𑀓𑁆𑀔𑀤𑀸𑀦𑁂 𑀤𑀸𑀦𑀮𑀓𑁆𑀔𑀡𑀸𑀪𑀸𑀯𑀢𑁄. ‘‘𑀯𑀺𑀲𑁆𑀲𑀚𑁆𑀚𑁂𑀢𑀻’’𑀢𑀺 𑀏𑀢𑀲𑁆𑀫𑀺𑀜𑁆𑀘 𑀧𑀸𑀴𑀺𑀧𑀤𑁂 𑀓𑀲𑁆𑀲𑀘𑀺 𑀅𑀤𑀢𑁆𑀯𑀸 𑀅𑀦𑀧𑁂𑀓𑁆𑀔𑀢𑀸𑀬 𑀙𑀟𑁆𑀟𑀦𑀫𑁆𑀧𑀺 𑀲𑀗𑁆𑀕𑀳𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. ‘‘𑀅𑀦𑀧𑁂𑀓𑁆𑀔𑁄 𑀤𑀢𑁆𑀯𑀸’’𑀢𑀺 𑀇𑀤𑀜𑁆𑀘 𑀧𑀝𑀺𑀕𑁆𑀕𑀳𑀡𑀯𑀺𑀚𑀳𑀦𑀯𑀺𑀥𑀺𑀤𑀲𑁆𑀲𑀦𑀢𑁆𑀣𑀫𑁂𑀯 𑀯𑀼𑀢𑁆𑀢𑀁. 𑀧𑀝𑀺𑀕𑁆𑀕𑀳𑀡𑁂 𑀳𑀺 𑀯𑀺𑀚𑀳𑀺𑀢𑁂 𑀧𑀼𑀦 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀧𑀭𑀺𑀪𑁄𑀕𑁄 𑀲𑀬𑀫𑁂𑀯 𑀯𑀝𑁆𑀝𑀺𑀲𑁆𑀲𑀢𑀺, 𑀢𑀩𑁆𑀩𑀺𑀚𑀳𑀦𑀜𑁆𑀘 𑀯𑀢𑁆𑀣𑀼𑀦𑁄 𑀲𑀓𑀲𑀦𑁆𑀢𑀓𑀢𑀸𑀧𑀭𑀺𑀘𑁆𑀘𑀸𑀕𑁂𑀦 𑀳𑁄𑀢𑀻𑀢𑀺, 𑀏𑀢𑁂𑀦 𑀘 𑀯𑀢𑁆𑀣𑀼𑀫𑁆𑀳𑀺 𑀅𑀚𑁆𑀛𑁄𑀳𑀭𑀡𑀸𑀧𑁂𑀓𑁆𑀔𑀸𑀬 𑀲𑀢𑀺 𑀧𑀝𑀺𑀕𑁆𑀕𑀳𑀡𑀯𑀺𑀲𑁆𑀲𑀚𑁆𑀚𑀦𑀁 𑀦𑀸𑀫 𑀯𑀺𑀲𑀼𑀁 𑀦 𑀮𑀩𑁆𑀪𑀢𑀻𑀢𑀺 𑀲𑀺𑀚𑁆𑀛𑀢𑀺. 𑀇𑀢𑀭𑀣𑀸 𑀳𑀺 ‘‘𑀧𑀝𑀺𑀕𑁆𑀕𑀳𑀡𑁂 𑀅𑀦𑀧𑁂𑀓𑁆𑀔𑁄𑀯 𑀧𑀝𑀺𑀕𑁆𑀕𑀳𑀡𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀧𑀼𑀦 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀪𑀼𑀜𑁆𑀚𑀢𑀻’’𑀢𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸. ‘‘𑀅𑀧𑁆𑀧𑀝𑀺𑀕𑁆𑀕𑀳𑀺𑀢𑀢𑁆𑀢𑀸’’𑀢𑀺 𑀇𑀫𑀺𑀦𑀸 𑀏𑀓𑀲𑁆𑀲 𑀲𑀦𑁆𑀢𑀓𑀁 𑀅𑀜𑁆𑀜𑁂𑀦 𑀧𑀝𑀺𑀕𑁆𑀕𑀳𑀺𑀢𑀫𑁆𑀧𑀺 𑀦𑀺𑀲𑁆𑀲𑀕𑁆𑀕𑀺𑀬𑀁 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺.

𑀏𑀯𑀦𑁆𑀢𑀺 ‘‘𑀧𑀼𑀦 𑀕𑀳𑁂𑀲𑁆𑀲𑀸𑀫𑀻’’𑀢𑀺 𑀅𑀧𑁂𑀓𑁆𑀔𑀁 𑀅𑀓𑀢𑁆𑀯𑀸 𑀲𑀼𑀤𑁆𑀥𑀘𑀺𑀢𑁆𑀢𑁂𑀦 𑀧𑀭𑀺𑀘𑁆𑀘𑀢𑁆𑀢𑀢𑀁 𑀧𑀭𑀸𑀫𑀲𑀢𑀺. 𑀧𑀭𑀺𑀪𑀼𑀜𑁆𑀚𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀦𑀺𑀲𑁆𑀲𑀕𑁆𑀕𑀺𑀬𑀫𑀽𑀮𑀺𑀓𑀸𑀳𑀺 𑀧𑀸𑀘𑀺𑀢𑁆𑀢𑀺𑀬𑀸𑀤𑀺𑀆𑀧𑀢𑁆𑀢𑀻𑀳𑀺 𑀅𑀦𑀸𑀧𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀭𑀺𑀪𑁄𑀕𑁂 𑀅𑀦𑀸𑀧𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀏𑀢𑁆𑀣 𑀧𑀦 𑀦𑀺𑀲𑁆𑀲𑀝𑁆𑀞𑀧𑀝𑀺𑀮𑀤𑁆𑀥𑀲𑁆𑀲 𑀓𑀸𑀬𑀺𑀓𑀧𑀭𑀺𑀪𑁄𑀕𑀸𑀤𑀻𑀲𑀼 𑀬𑀸 𑀤𑀼𑀓𑁆𑀓𑀝𑀸𑀧𑀢𑁆𑀢𑀺 𑀯𑀼𑀢𑁆𑀢𑀸, 𑀢𑀸𑀬 𑀅𑀦𑀸𑀧𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀧𑁆𑀧𑀺𑀆𑀤𑀻𑀦𑀁 𑀧𑀝𑀺𑀕𑁆𑀕𑀳𑀺𑀢𑀪𑀸𑀯𑁄, 𑀅𑀢𑁆𑀢𑀦𑁄 𑀲𑀦𑁆𑀢𑀓𑀢𑀸, 𑀲𑀢𑁆𑀢𑀸𑀳𑀸𑀢𑀺𑀓𑁆𑀓𑀫𑁄𑀢𑀺 𑀇𑀫𑀸𑀦𑁂𑀢𑁆𑀣 𑀢𑀻𑀡𑀺 𑀅𑀗𑁆𑀕𑀸𑀦𑀺.

𑀪𑁂𑀲𑀚𑁆𑀚𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀯𑀲𑁆𑀲𑀺𑀓𑀲𑀸𑀝𑀺𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁬𑁨𑁮. 𑀘𑀢𑀼𑀢𑁆𑀣𑁂 𑀚𑁂𑀝𑁆𑀞𑀫𑀽𑀮𑀧𑀼𑀡𑁆𑀡𑀫𑀸𑀲𑀺𑀬𑀸…𑀧𑁂… 𑀓𑀭𑀡𑀓𑁆𑀔𑁂𑀢𑁆𑀢𑀜𑁆𑀘𑀸𑀢𑀺 𑀧𑀞𑀫𑀤𑁆𑀥𑀫𑀸𑀲𑀫𑁆𑀧𑀺 𑀓𑀭𑀡𑀓𑁆𑀔𑁂𑀢𑁆𑀢𑀁 𑀯𑀼𑀢𑁆𑀢𑀁. 𑀢𑀁 ‘‘𑀓𑀢𑁆𑀯𑀸 𑀦𑀺𑀯𑀸𑀲𑁂𑀢𑀩𑁆𑀩’’𑀦𑁆𑀢𑀺 𑀇𑀫𑀲𑁆𑀲 𑀧𑀼𑀭𑀺𑀫𑀤𑁆𑀥𑀫𑀸𑀲𑁂 𑀯𑀸 𑀧𑀘𑁆𑀙𑀺𑀫𑀤𑁆𑀥𑀫𑀸𑀲𑁂 𑀯𑀸 𑀓𑀢𑁆𑀯𑀸 𑀧𑀘𑁆𑀙𑀺𑀫𑀫𑀸𑀲𑁂𑀯 𑀦𑀺𑀯𑀸𑀲𑁂𑀢𑀩𑁆𑀩𑀦𑁆𑀢𑀺 𑀏𑀯𑀫𑀢𑁆𑀣𑀁 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀁 𑀦𑀺𑀯𑀸𑀲𑀦𑁂𑀬𑁂𑀯 𑀆𑀧𑀢𑁆𑀢𑀺𑀬𑀸 𑀯𑀼𑀢𑁆𑀢𑀢𑁆𑀢𑀸𑀢𑀺. 𑀬𑀁 𑀧𑀦 𑀫𑀸𑀢𑀺𑀓𑀸𑀝𑁆𑀞𑀓𑀣𑀸𑀬𑀁 ‘‘𑀕𑀺𑀫𑁆𑀳𑀸𑀦𑀁 𑀧𑀘𑁆𑀙𑀺𑀫𑁄 𑀫𑀸𑀲𑁄 𑀧𑀭𑀺𑀬𑁂𑀲𑀦𑀓𑁆𑀔𑁂𑀢𑁆𑀢𑀁, 𑀧𑀘𑁆𑀙𑀺𑀫𑁄 𑀅𑀤𑁆𑀥𑀫𑀸𑀲𑁄 𑀓𑀭𑀡𑀦𑀺𑀯𑀸𑀲𑀦𑀓𑁆𑀔𑁂𑀢𑁆𑀢𑀫𑁆𑀧𑀻’’𑀢𑀺 (𑀓𑀗𑁆𑀔𑀸. 𑀅𑀝𑁆𑀞. 𑀯𑀲𑁆𑀲𑀺𑀓𑀲𑀸𑀝𑀺𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸) 𑀯𑀼𑀢𑁆𑀢𑀁, 𑀢𑀁 𑀢𑀲𑁆𑀫𑀺𑀁𑀬𑁂𑀯 𑀅𑀤𑁆𑀥𑀫𑀸𑀲𑁂 𑀓𑀢𑁆𑀯𑀸 𑀦𑀺𑀯𑀸𑀲𑁂𑀢𑀩𑁆𑀩𑀦𑁆𑀢𑀺 𑀏𑀯𑀫𑀢𑁆𑀣𑀁 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀁. 𑀇𑀥 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀢𑁆𑀣𑁂 𑀕𑀳𑀺𑀢𑁂 𑀯𑀺𑀭𑁄𑀥𑁄 𑀦𑀢𑁆𑀣𑀺.

‘‘𑀯𑀢𑁆𑀢𑀪𑁂𑀤𑁂 𑀤𑀼𑀓𑁆𑀓𑀝’’𑀦𑁆𑀢𑀺 𑀇𑀤𑀁 𑀯𑀲𑁆𑀲𑀺𑀓𑀲𑀸𑀝𑀺𑀓𑀅𑀤𑀺𑀦𑁆𑀦𑀧𑀼𑀩𑁆𑀩𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀬𑁂 𑀫𑀦𑀼𑀲𑁆𑀲𑀸’’𑀢𑀺𑀆𑀤𑀺. 𑀧𑀓𑀢𑀺𑀬𑀸 𑀯𑀲𑁆𑀲𑀺𑀓𑀲𑀸𑀝𑀺𑀓𑀤𑀸𑀬𑀓𑀸 𑀦𑀸𑀫 𑀲𑀗𑁆𑀖𑀁 𑀯𑀸 𑀅𑀢𑁆𑀢𑀸𑀦𑀁 𑀯𑀸 𑀅𑀧𑁆𑀧𑀯𑀸𑀭𑁂𑀢𑁆𑀯𑀸𑀯 𑀅𑀦𑀼𑀲𑀁𑀯𑀘𑁆𑀙𑀭𑀁 𑀤𑀸𑀬𑀓𑀸.

𑁬𑁩𑁦. ‘‘𑀙 𑀫𑀸𑀲𑁂 𑀧𑀭𑀺𑀳𑀸𑀭𑀁 𑀮𑀪𑀢𑀻’’𑀢𑀺 𑀏𑀢𑁂𑀦 𑀅𑀦𑁆𑀢𑁄𑀯𑀲𑁆𑀲𑁂𑀧𑀺 𑀬𑀸𑀯 𑀯𑀲𑁆𑀲𑀸𑀦𑀲𑁆𑀲 𑀧𑀘𑁆𑀙𑀺𑀫𑀤𑀺𑀯𑀲𑀸 𑀅𑀓𑀢𑀸 𑀧𑀭𑀺𑀳𑀸𑀭𑀁 𑀮𑀪𑀢𑀻𑀢𑀺 𑀤𑀻𑀧𑀺𑀢𑀁 𑀳𑁄𑀢𑀺. 𑀏𑀓𑀫𑀸𑀲𑀦𑁆𑀢𑀺 𑀳𑁂𑀫𑀦𑁆𑀢𑀲𑁆𑀲 𑀧𑀘𑁆𑀙𑀺𑀫𑀼𑀧𑁄𑀲𑀣𑁂𑀦 𑀲𑀳 𑀕𑀡𑁂𑀢𑁆𑀯𑀸 𑀯𑀼𑀢𑁆𑀢𑀁. 𑀢𑀲𑁆𑀫𑀺𑀁 𑀉𑀧𑁄𑀲𑀣𑀤𑀺𑀯𑀲𑁂 𑀏𑀯 𑀳𑀺 𑀢𑀁 𑀫𑀽𑀮𑀘𑀻𑀯𑀭𑀁 𑀓𑀸𑀢𑀩𑁆𑀩𑀁, 𑀇𑀢𑀭𑀣𑀸 𑀳𑀺 𑀦𑀺𑀲𑁆𑀲𑀕𑁆𑀕𑀺𑀬𑀢𑁄. 𑀏𑀓𑀸𑀳𑀤𑁆𑀯𑀻𑀳𑀸𑀤𑀺𑀯𑀲𑁂𑀦…𑀧𑁂… 𑀮𑀤𑁆𑀥𑀸 𑀘𑁂𑀯 𑀦𑀺𑀝𑁆𑀞𑀺𑀢𑀸 𑀘𑀸𑀢𑀺 𑀏𑀢𑁆𑀣 𑀏𑀓𑀸𑀳𑀸𑀦𑀸𑀕𑀢𑀸𑀬 𑀯𑀲𑁆𑀲𑀽𑀧𑀦𑀸𑀬𑀺𑀓𑀸𑀬 𑀮𑀤𑁆𑀥𑀸 𑀘𑁂𑀯 𑀦𑀺𑀝𑁆𑀞𑀺𑀢𑀸 𑀘 𑀤𑁆𑀯𑀻𑀳𑀸𑀦𑀸𑀕𑀢𑀸𑀬…𑀧𑁂… 𑀤𑀲𑀸𑀳𑀸𑀦𑀸𑀕𑀢𑀸𑀬 𑀯𑀲𑁆𑀲𑀽𑀧𑀦𑀸𑀬𑀺𑀓𑀸𑀬 𑀮𑀤𑁆𑀥𑀸 𑀘𑁂𑀯 𑀦𑀺𑀝𑁆𑀞𑀺𑀢𑀸 𑀘, 𑀅𑀦𑁆𑀢𑁄𑀯𑀲𑁆𑀲𑁂 𑀯𑀸 𑀮𑀤𑁆𑀥𑀸 𑀘𑁂𑀯 𑀦𑀺𑀝𑁆𑀞𑀺𑀢𑀸 𑀘𑀸𑀢𑀺 𑀏𑀯𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀢𑀢𑁆𑀣 𑀆𑀲𑀴𑁆𑀳𑀻𑀫𑀸𑀲𑀲𑁆𑀲 𑀚𑀼𑀡𑁆𑀳𑀧𑀓𑁆𑀔𑀧𑀼𑀡𑁆𑀡𑀫𑀺𑀬𑀁 𑀮𑀤𑁆𑀥𑀸, 𑀢𑀤𑀳𑁂𑀯 𑀭𑀚𑀦𑀓𑀧𑁆𑀧𑀧𑀭𑀺𑀬𑁄𑀲𑀸𑀦𑁂𑀳𑀺 𑀦𑀺𑀝𑁆𑀞𑀺𑀢𑀸 𑀘 𑀯𑀲𑁆𑀲𑀺𑀓𑀲𑀸𑀝𑀺𑀓𑀸 ‘‘𑀏𑀓𑀸𑀳𑀸𑀦𑀸𑀕𑀢𑀸𑀬 𑀯𑀲𑁆𑀲𑀽𑀧𑀦𑀸𑀬𑀺𑀓𑀸𑀬 𑀮𑀤𑁆𑀥𑀸 𑀘𑁂𑀯 𑀦𑀺𑀝𑁆𑀞𑀺𑀢𑀸 𑀘𑀸’’𑀢𑀺 𑀯𑀼𑀘𑁆𑀘𑀢𑀺. 𑀏𑀢𑁂𑀦𑁂𑀯 𑀦𑀬𑁂𑀦 𑀚𑀼𑀡𑁆𑀳𑀧𑀓𑁆𑀔𑀲𑁆𑀲 𑀙𑀝𑁆𑀞𑀺𑀬𑀁 𑀮𑀤𑁆𑀥𑀸, 𑀦𑀺𑀝𑁆𑀞𑀺𑀢𑀸 𑀘 ‘‘𑀤𑀲𑀸𑀳𑀸𑀦𑀸𑀕𑀢𑀸𑀬 𑀯𑀲𑁆𑀲𑀽𑀧𑀦𑀸𑀬𑀺𑀓𑀸𑀬 𑀮𑀤𑁆𑀥𑀸 𑀘𑁂𑀯 𑀦𑀺𑀝𑁆𑀞𑀺𑀢𑀸 𑀘𑀸’’𑀢𑀺 𑀯𑀼𑀘𑁆𑀘𑀢𑀺. 𑀬𑀸𑀯 𑀧𑀞𑀫𑀓𑀢𑁆𑀢𑀺𑀓𑀢𑁂𑀫𑀸𑀲𑀺𑀧𑀼𑀡𑁆𑀡𑀫𑀸, 𑀢𑀸𑀯 𑀮𑀤𑁆𑀥𑀸, 𑀦𑀺𑀝𑁆𑀞𑀺𑀢𑀸 𑀘 ‘‘𑀅𑀦𑁆𑀢𑁄𑀯𑀲𑁆𑀲𑁂 𑀮𑀤𑁆𑀥𑀸 𑀘𑁂𑀯 𑀦𑀺𑀝𑁆𑀞𑀺𑀢𑀸 𑀘𑀸’’𑀢𑀺 𑀯𑀼𑀘𑁆𑀘𑀢𑀺. 𑀧𑀞𑀫𑀓𑀢𑁆𑀢𑀺𑀓𑀢𑁂𑀫𑀸𑀲𑀺𑀧𑀼𑀡𑁆𑀡𑀫𑀺𑀢𑁄 𑀧𑀭𑀁 𑀮𑀤𑁆𑀥𑀸 𑀘𑁂𑀯 𑀦𑀺𑀝𑁆𑀞𑀺𑀢𑀸 𑀘 𑀬𑀸𑀯 𑀘𑀻𑀯𑀭𑀓𑀸𑀮𑁄 𑀦𑀸𑀢𑀺𑀓𑁆𑀓𑀫𑀢𑀺, 𑀢𑀸𑀯 𑀅𑀦𑀥𑀺𑀝𑁆𑀞𑀳𑀺𑀢𑁆𑀯𑀸𑀧𑀺 𑀞𑀧𑁂𑀢𑀼𑀁 𑀯𑀝𑁆𑀝𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀏𑀢𑁆𑀣 𑀘 ‘‘𑀢𑀲𑁆𑀫𑀺𑀁𑀬𑁂𑀯 𑀅𑀦𑁆𑀢𑁄𑀤𑀲𑀸𑀳𑁂 𑀅𑀥𑀺𑀝𑁆𑀞𑀸𑀢𑀩𑁆𑀩𑀸’’𑀢𑀺 𑀅𑀯𑀺𑀲𑁂𑀲𑁂𑀦 𑀯𑀼𑀢𑁆𑀢𑁂𑀧𑀺 𑀯𑀲𑁆𑀲𑀸𑀦𑀢𑁄 𑀧𑀼𑀩𑁆𑀩𑁂 𑀏𑀓𑀸𑀳𑀤𑁆𑀯𑀻𑀳𑀸𑀤𑀺𑀯𑀲𑁂𑀦 𑀅𑀦𑀸𑀕𑀢𑀸𑀬 𑀯𑀲𑁆𑀲𑀽𑀧𑀦𑀸𑀬𑀺𑀓𑀸𑀬 𑀮𑀤𑁆𑀥𑀸 𑀢𑁂𑀳𑀺 𑀤𑀺𑀯𑀲𑁂𑀳𑀺 𑀤𑀲𑀸𑀳𑀁 𑀅𑀦𑀢𑀺𑀓𑁆𑀓𑀫𑀦𑁆𑀢𑁂𑀦 𑀯𑀲𑁆𑀲𑀽𑀧𑀦𑀸𑀬𑀺𑀓𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀅𑀥𑀺𑀝𑁆𑀞𑀸𑀦𑀓𑁆𑀔𑁂𑀢𑁆𑀢𑀁 𑀲𑀫𑁆𑀧𑀢𑁆𑀢𑀸 𑀏𑀯 𑀅𑀥𑀺𑀝𑁆𑀞𑀸𑀢𑀩𑁆𑀩𑀸, 𑀢𑀢𑁄 𑀧𑀦 𑀧𑀼𑀩𑁆𑀩𑁂 𑀤𑀲𑀸𑀳𑀸𑀢𑀺𑀓𑁆𑀓𑀫𑁂𑀦 𑀦𑀺𑀝𑁆𑀞𑀺𑀢𑀸𑀧𑀺 𑀦 𑀅𑀥𑀺𑀝𑁆𑀞𑀸𑀢𑀩𑁆𑀩𑀸 𑀅𑀥𑀺𑀝𑁆𑀞𑀸𑀦𑀲𑁆𑀲 𑀅𑀔𑁂𑀢𑁆𑀢𑀢𑁆𑀢𑀸. 𑀢𑀸𑀤𑀺𑀲𑀸 𑀧𑀦 𑀯𑀲𑁆𑀲𑀽𑀧𑀦𑀸𑀬𑀺𑀓𑀤𑀺𑀯𑀲𑁂 𑀏𑀯 𑀅𑀥𑀺𑀝𑁆𑀞𑀸𑀢𑀩𑁆𑀩𑀸, 𑀅𑀦𑀥𑀺𑀝𑁆𑀞𑀳𑀢𑁄 𑀅𑀭𑀼𑀡𑀼𑀕𑁆𑀕𑀫𑀦𑁂𑀦 𑀦𑀺𑀲𑁆𑀲𑀕𑁆𑀕𑀺𑀬𑀁 𑀳𑁄𑀢𑀺. 𑀬𑀤𑀺 𑀏𑀯𑀁 ‘‘𑀤𑀲𑀸𑀳𑀸𑀦𑀸𑀕𑀢𑀸𑀬𑀸’’𑀢𑀺 𑀇𑀫𑀺𑀦𑀸 𑀓𑀺𑀁 𑀧𑀬𑁄𑀚𑀦𑀦𑁆𑀢𑀺 𑀘𑁂? 𑀯𑀲𑁆𑀲𑀸𑀦𑀢𑁄 𑀧𑀼𑀩𑁆𑀩𑁂 𑀏𑀯 𑀤𑀲𑀸𑀳𑁂 𑀅𑀢𑀺𑀓𑁆𑀓𑀦𑁆𑀢𑁂 𑀦𑀺𑀝𑁆𑀞𑀺𑀢𑀸 𑀯𑀲𑁆𑀲𑀽𑀧𑀦𑀸𑀬𑀺𑀓𑀤𑀺𑀯𑀲𑁂 𑀏𑀯 𑀅𑀥𑀺𑀝𑁆𑀞𑀸𑀢𑀩𑁆𑀩𑀸𑀢𑀺 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀢𑁂𑀦𑁂𑀯𑀸𑀳 ‘‘𑀤𑀲𑀸𑀳𑀸𑀢𑀺𑀓𑁆𑀓𑀫𑁂 𑀦𑀺𑀝𑁆𑀞𑀺𑀢𑀸 𑀢𑀤𑀳𑁂𑀯 𑀅𑀥𑀺𑀝𑁆𑀞𑀸𑀢𑀩𑁆𑀩𑀸’’𑀢𑀺.

𑀤𑀲𑀸𑀳𑁂 𑀅𑀧𑁆𑀧𑀳𑁄𑀦𑁆𑀢𑁂 𑀘𑀻𑀯𑀭𑀓𑀸𑀮𑀁 𑀦𑀸𑀢𑀺𑀓𑁆𑀓𑀫𑁂𑀢𑀩𑁆𑀩𑀸𑀢𑀺 𑀢𑁂𑀫𑀸𑀲𑀩𑁆𑀪𑀦𑁆𑀢𑀭𑁂 𑀤𑀲𑀸𑀳𑁂 𑀅𑀧𑁆𑀧𑀳𑁄𑀦𑁆𑀢𑁂 𑀦𑀯𑀸𑀳𑀸𑀦𑀸𑀕𑀢𑀸𑀬 𑀓𑀢𑁆𑀢𑀺𑀓𑀢𑁂𑀫𑀸𑀲𑀺𑀧𑀼𑀡𑁆𑀡𑀫𑀸𑀬 𑀲𑀢𑁆𑀢𑀫𑀺𑀢𑁄 𑀧𑀝𑁆𑀞𑀸𑀬 𑀮𑀤𑁆𑀥𑀸, 𑀦𑀺𑀝𑁆𑀞𑀺𑀢𑀸 𑀘 𑀘𑀻𑀯𑀭𑀓𑀸𑀮𑀁 𑀦𑀸𑀢𑀺𑀓𑁆𑀓𑀫𑁂𑀢𑀩𑁆𑀩𑀸𑀢𑀺 𑀅𑀢𑁆𑀣𑁄. 𑀢𑀣𑀸 𑀳𑀺 ‘‘𑀫𑀸𑀲𑁄 𑀲𑁂𑀲𑁄 𑀕𑀺𑀫𑁆𑀳𑀸𑀦𑀦𑁆𑀢𑀺 𑀪𑀺𑀓𑁆𑀔𑀼𑀦𑀸 𑀯𑀲𑁆𑀲𑀺𑀓𑀲𑀸𑀝𑀺𑀓𑀘𑀻𑀯𑀭𑀁 𑀧𑀭𑀺𑀬𑁂𑀲𑀺𑀢𑀩𑁆𑀩’’𑀦𑁆𑀢𑀺 𑀧𑀭𑀺𑀬𑁂𑀲𑀦𑀓𑁆𑀔𑁂𑀢𑁆𑀢𑀁 𑀯𑀢𑁆𑀯𑀸 ‘‘𑀯𑀲𑁆𑀲𑀺𑀓𑀲𑀸𑀝𑀺𑀓𑀁 𑀯𑀲𑁆𑀲𑀸𑀦𑀁 𑀘𑀸𑀢𑀼𑀫𑀸𑀲𑀁 𑀅𑀥𑀺𑀝𑁆𑀞𑀸𑀢𑀼’’𑀦𑁆𑀢𑀺 (𑀫𑀳𑀸𑀯. 𑁩𑁫𑁮) 𑀯𑀼𑀢𑁆𑀢𑀢𑁆𑀢𑀸 𑀓𑀢𑀸𑀬𑀧𑀺 𑀅𑀓𑀢𑀸𑀬𑀧𑀺 𑀫𑀸𑀲𑀫𑀢𑁆𑀢𑀁 𑀅𑀦𑀥𑀺𑀝𑁆𑀞𑀸𑀢𑀩𑁆𑀩𑀢𑀸 𑀲𑀺𑀤𑁆𑀥𑀸. 𑀬𑀲𑁆𑀫𑀸 𑀘 𑀅𑀓𑀢𑀸 𑀯𑀲𑁆𑀲𑀺𑀓𑀲𑀸𑀝𑀺𑀓𑀲𑀗𑁆𑀔𑁆𑀬𑀁 𑀦 𑀕𑀘𑁆𑀙𑀢𑀺, 𑀅𑀓𑀭𑀡𑀜𑁆𑀘 𑀓𑁂𑀦𑀘𑀺 𑀯𑁂𑀓𑀮𑁆𑀮𑁂𑀦, 𑀦 𑀅𑀦𑀸𑀤𑀭𑁂𑀦, 𑀢𑀲𑁆𑀫𑀸 𑀘𑀸𑀢𑀼𑀫𑀸𑀲𑀁 𑀅𑀓𑀢𑀢𑁆𑀢𑀸 𑀏𑀯 𑀧𑀭𑀺𑀳𑀸𑀭𑀁 𑀮𑀪𑀢𑀺, 𑀓𑀢𑀸 𑀧𑀦 𑀅𑀥𑀺𑀝𑁆𑀞𑀸𑀦𑀓𑁆𑀔𑁂𑀢𑁆𑀢𑁂, 𑀅𑀓𑀢𑀸 𑀘 𑀘𑀻𑀯𑀭𑀓𑀸𑀮𑁂 𑀤𑀲𑀸𑀳𑀧𑀭𑀫𑀲𑀺𑀓𑁆𑀔𑀸𑀧𑀤𑁂𑀦𑁂𑀯 𑀧𑀭𑀺𑀳𑀸𑀭𑀁 𑀮𑀪𑀢𑀻𑀢𑀺 𑀅𑀬𑀫𑀢𑁆𑀣𑁄 𑀮𑀩𑁆𑀪𑀢𑀺. 𑀓𑀲𑁆𑀫𑀸𑀢𑀺 𑀅𑀢𑁆𑀢𑀦𑁄 𑀫𑀢𑀺𑀬𑀸 𑀓𑀸𑀭𑀡𑀧𑀼𑀘𑁆𑀙𑀸. 𑀢𑀲𑁆𑀫𑀸𑀢𑀺 𑀯𑀲𑁆𑀲𑀸𑀦𑁂𑀬𑁂𑀯 𑀯𑀲𑁆𑀲𑀺𑀓𑀲𑀸𑀝𑀺𑀓𑀸𑀬 𑀅𑀥𑀺𑀝𑁆𑀞𑀸𑀢𑀩𑁆𑀩𑀢𑀸𑀯𑀘𑀦𑀢𑁄. ‘‘𑀢𑀺𑀘𑀻𑀯𑀭𑀁 𑀅𑀥𑀺𑀝𑁆𑀞𑀸𑀢𑀼’’𑀦𑁆𑀢𑀺 𑀲𑀼𑀢𑁆𑀢𑀁 𑀧𑀦𑁂𑀢𑁆𑀣 𑀲𑁂𑀲𑀘𑀻𑀯𑀭𑀸𑀦𑀁 𑀏𑀯𑀁 𑀓𑀸𑀮𑀦𑀺𑀬𑀫𑀸𑀪𑀸𑀯𑀁 𑀲𑀸𑀥𑁂𑀢𑀼𑀁 𑀉𑀤𑁆𑀥𑀝𑀁. 𑀦 𑀳𑀺 𑀢𑁂𑀦𑁂𑀢𑁆𑀣 𑀅𑀜𑁆𑀜𑀁 𑀧𑀬𑁄𑀚𑀦𑀁 𑀅𑀢𑁆𑀣𑀺.

𑀓𑀤𑀸 𑀅𑀥𑀺𑀝𑁆𑀞𑀸𑀢𑀩𑁆𑀩𑀸𑀢𑀺𑀆𑀤𑀺𑀓𑀼𑀭𑀼𑀦𑁆𑀤𑀺𑀯𑀘𑀦𑁂𑀦𑀸𑀧𑀺 ‘‘𑀬𑀤𑀸 𑀯𑀸 𑀢𑀤𑀸 𑀯𑀸 𑀅𑀥𑀺𑀝𑁆𑀞𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀇𑀤𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀤𑀲𑀸𑀳𑀩𑁆𑀪𑀦𑁆𑀢𑀭𑁂 𑀏𑀯 𑀓𑀢𑀸𑀬 𑀅𑀥𑀺𑀝𑁆𑀞𑀸𑀢𑀩𑁆𑀩𑀢𑀁 𑀤𑀲𑁆𑀲𑁂𑀢𑀺.

𑀧𑀸𑀴𑀺𑀬𑀁 𑀅𑀘𑁆𑀙𑀺𑀦𑁆𑀦𑀘𑀻𑀯𑀭𑀲𑁆𑀲𑀸𑀢𑀺𑀆𑀤𑀻𑀲𑀼 𑀅𑀘𑁆𑀙𑀺𑀦𑁆𑀦𑀲𑁂𑀲𑀘𑀻𑀯𑀭𑀲𑁆𑀲 𑀦𑀝𑁆𑀞𑀲𑁂𑀲𑀘𑀻𑀯𑀭𑀲𑁆𑀲. 𑀏𑀢𑁂𑀲𑀜𑁆𑀳𑀺 𑀅𑀲𑀫𑀬𑁂 𑀧𑀭𑀺𑀬𑁂𑀲𑀦𑀦𑀺𑀯𑀸𑀲𑀦𑀸𑀧𑀢𑁆𑀢𑀺𑀬𑀸 𑀏𑀯 𑀅𑀦𑀸𑀧𑀢𑁆𑀢𑀺 𑀯𑀼𑀢𑁆𑀢𑀸. 𑀢𑁂𑀦𑁂𑀯 𑀫𑀸𑀢𑀺𑀓𑀸𑀝𑁆𑀞𑀓𑀣𑀸𑀬𑀁 ‘‘𑀅𑀘𑁆𑀙𑀺𑀦𑁆𑀦𑀘𑀻𑀯𑀭𑀲𑁆𑀲 𑀯𑀸 𑀦𑀝𑁆𑀞𑀘𑀻𑀯𑀭𑀲𑁆𑀲 𑀯𑀸 𑀅𑀦𑀺𑀯𑀢𑁆𑀣𑀁 𑀘𑁄𑀭𑀸 𑀳𑀭𑀦𑁆𑀢𑀻𑀢𑀺 𑀏𑀯𑀁 𑀆𑀧𑀤𑀸𑀲𑀼 𑀯𑀸 𑀦𑀺𑀯𑀸𑀲𑀬𑀢𑁄 𑀉𑀫𑁆𑀫𑀢𑁆𑀢𑀓𑀸𑀤𑀻𑀦𑀜𑁆𑀘 𑀅𑀦𑀸𑀧𑀢𑁆𑀢𑀻’’𑀢𑀺 (𑀓𑀗𑁆𑀔𑀸. 𑀅𑀝𑁆𑀞. 𑀯𑀲𑁆𑀲𑀺𑀓𑀲𑀸𑀝𑀺𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸) 𑀯𑀼𑀢𑁆𑀢𑀁, 𑀇𑀥 𑀧𑀦 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬𑀁 𑀅𑀬𑀁 𑀦𑀺𑀲𑁆𑀲𑀕𑁆𑀕𑀺𑀬𑀸 𑀅𑀦𑀸𑀧𑀢𑁆𑀢𑀺 𑀧𑀸𑀴𑀺𑀢𑁄 𑀲𑀬𑀫𑁂𑀯 𑀲𑀺𑀚𑁆𑀛𑀢𑀻𑀢𑀺 𑀇𑀫𑀁 𑀅𑀤𑀲𑁆𑀲𑁂𑀢𑁆𑀯𑀸 𑀅𑀲𑀺𑀚𑁆𑀛𑀫𑀸𑀦𑀁 𑀦𑀕𑁆𑀕𑀲𑁆𑀲 𑀦𑁆𑀳𑀸𑀬𑀢𑁄 𑀤𑀼𑀓𑁆𑀓𑀝𑀸𑀧𑀢𑁆𑀢𑀺𑀬𑀸 𑀏𑀯 𑀅𑀦𑀸𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀘𑁆𑀙𑀺𑀦𑁆𑀦𑀘𑀻𑀯𑀭𑀲𑁆𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀦𑁆𑀢𑀺 𑀕𑀳𑁂𑀢𑀩𑁆𑀩𑀁. 𑀦 𑀳𑀺 𑀏𑀲𑀸 𑀅𑀦𑀸𑀧𑀢𑁆𑀢𑀺 𑀅𑀯𑀼𑀢𑁆𑀢𑁂 𑀲𑀺𑀚𑁆𑀛𑀢𑀻𑀢𑀺. 𑀯𑀲𑁆𑀲𑀺𑀓𑀲𑀸𑀝𑀺𑀓𑀸𑀬 𑀅𑀢𑁆𑀢𑀼𑀤𑁆𑀤𑁂𑀲𑀺𑀓𑀢𑀸, 𑀅𑀲𑀫𑀬𑁂 𑀧𑀭𑀺𑀬𑁂𑀲𑀦𑀢𑀸, 𑀢𑀸𑀬 𑀘 𑀧𑀝𑀺𑀮𑀸𑀪𑁄𑀢𑀺 𑀇𑀫𑀸𑀦𑀺 𑀢𑀸𑀯 𑀧𑀭𑀺𑀬𑁂𑀲𑀦𑀸𑀧𑀢𑁆𑀢𑀺𑀬𑀸 𑀢𑀻𑀡𑀺 𑀅𑀗𑁆𑀕𑀸𑀦𑀺. 𑀦𑀺𑀯𑀸𑀲𑀦𑀸𑀧𑀢𑁆𑀢𑀺𑀬𑀸 𑀧𑀦 𑀲𑀘𑀻𑀯𑀭𑀢𑀸, 𑀆𑀧𑀤𑀸𑀪𑀸𑀯𑁄, 𑀯𑀲𑁆𑀲𑀺𑀓𑀲𑀸𑀝𑀺𑀓𑀸𑀬 𑀲𑀓𑀪𑀸𑀯𑁄, 𑀅𑀲𑀫𑀬𑁂 𑀦𑀺𑀯𑀸𑀲𑀦𑀦𑁆𑀢𑀺 𑀘𑀢𑁆𑀢𑀸𑀭𑀺 𑀅𑀗𑁆𑀕𑀸𑀦𑀺.

𑀯𑀲𑁆𑀲𑀺𑀓𑀲𑀸𑀝𑀺𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀘𑀻𑀯𑀭𑀅𑀘𑁆𑀙𑀺𑀦𑁆𑀤𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁬𑁩𑁧. 𑀧𑀜𑁆𑀘𑀫𑁂 𑀬𑀫𑁆𑀧𑀺…𑀧𑁂… 𑀅𑀘𑁆𑀙𑀺𑀦𑁆𑀤𑀻𑀢𑀺 𑀏𑀢𑁆𑀣 𑀬𑀁 𑀢𑁂 𑀅𑀳𑀁 𑀘𑀻𑀯𑀭𑀁 𑀅𑀤𑀸𑀲𑀺𑀁, 𑀢𑀁 ‘‘𑀫𑀬𑀸 𑀲𑀤𑁆𑀥𑀺𑀁 𑀧𑀓𑁆𑀓𑀫𑀺𑀲𑁆𑀲𑀢𑀻’’𑀢𑀺 𑀲𑀜𑁆𑀜𑀸𑀬 𑀅𑀤𑀸𑀲𑀺𑀁, 𑀦 𑀅𑀜𑁆𑀜𑀣𑀸𑀢𑀺 𑀓𑀼𑀧𑀺𑀢𑁄 𑀅𑀘𑁆𑀙𑀺𑀦𑁆𑀤𑀻𑀢𑀺 𑀏𑀯𑀁 𑀅𑀚𑁆𑀛𑀸𑀳𑀭𑀺𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑀁.

𑁬𑁩𑁩. 𑀏𑀓𑀁 𑀤𑀼𑀓𑁆𑀓𑀝𑀦𑁆𑀢𑀺 𑀬𑀤𑀺 𑀆𑀡𑀢𑁆𑀢𑁄 𑀅𑀯𑀲𑁆𑀲𑀁 𑀅𑀘𑁆𑀙𑀺𑀦𑁆𑀤𑀢𑀺, 𑀆𑀡𑀢𑁆𑀢𑀺𑀓𑁆𑀔𑀡𑁂 𑀧𑀸𑀘𑀺𑀢𑁆𑀢𑀺𑀬𑀫𑁂𑀯. 𑀬𑀤𑀺 𑀦 𑀅𑀘𑁆𑀙𑀺𑀦𑁆𑀤𑀢𑀺, 𑀢𑀤𑀸 𑀏𑀯 𑀤𑀼𑀓𑁆𑀓𑀝𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀓𑀯𑀸𑀘𑀸𑀬 𑀲𑀫𑁆𑀩𑀳𑀼𑀮𑀸 𑀆𑀧𑀢𑁆𑀢𑀺𑀬𑁄𑀢𑀺 𑀬𑀤𑀺 𑀆𑀡𑀢𑁆𑀢𑁄 𑀅𑀦𑀦𑁆𑀢𑀭𑀸𑀬𑁂𑀦 𑀅𑀘𑁆𑀙𑀺𑀦𑁆𑀤𑀢𑀺, 𑀆𑀡𑀢𑁆𑀢𑀺𑀓𑁆𑀔𑀡𑁂𑀬𑁂𑀯 𑀯𑀢𑁆𑀣𑀼𑀕𑀡𑀦𑀸𑀬 𑀧𑀸𑀘𑀺𑀢𑁆𑀢𑀺𑀬𑀆𑀧𑀢𑁆𑀢𑀺𑀬𑁄 𑀧𑀬𑁄𑀕𑀓𑀭𑀡𑀓𑁆𑀔𑀡𑁂𑀬𑁂𑀯 𑀆𑀧𑀢𑁆𑀢𑀺𑀬𑀸 𑀆𑀧𑀚𑁆𑀚𑀺𑀢𑀩𑁆𑀩𑀢𑁄, 𑀘𑀻𑀯𑀭𑀁 𑀧𑀦 𑀅𑀘𑁆𑀙𑀺𑀦𑁆𑀦𑁂𑀬𑁂𑀯 𑀦𑀺𑀲𑁆𑀲𑀕𑁆𑀕𑀺𑀬𑀁 𑀳𑁄𑀢𑀺. 𑀬𑀤𑀺 𑀲𑁄 𑀦 𑀅𑀘𑁆𑀙𑀺𑀦𑁆𑀤𑀢𑀺, 𑀆𑀡𑀢𑁆𑀢𑀺𑀓𑁆𑀔𑀡𑁂 𑀏𑀓𑀫𑁂𑀯 𑀤𑀼𑀓𑁆𑀓𑀝𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀯𑀁 𑀅𑀜𑁆𑀜𑀢𑁆𑀣𑀸𑀧𑀺 𑀈𑀤𑀺𑀲𑁂𑀲𑀼 𑀦𑀬𑁄 𑀜𑀸𑀢𑀩𑁆𑀩𑁄.

𑁬𑁩𑁫. 𑀉𑀧𑀚𑁆𑀛𑀁 𑀕𑀡𑁆𑀳𑀺𑀲𑁆𑀲𑀢𑀻𑀢𑀺 𑀲𑀸𑀫𑀡𑁂𑀭𑀲𑁆𑀲 𑀤𑀸𑀦𑀁 𑀤𑀻𑀧𑁂𑀢𑀺, 𑀢𑁂𑀦 𑀘 𑀲𑀸𑀫𑀡𑁂𑀭𑀓𑀸𑀮𑁂 𑀤𑀢𑁆𑀯𑀸 𑀉𑀧𑀲𑀫𑁆𑀧𑀦𑁆𑀦𑀓𑀸𑀮𑁂 𑀅𑀘𑁆𑀙𑀺𑀦𑁆𑀤𑀢𑁄𑀧𑀺 𑀧𑀸𑀘𑀺𑀢𑁆𑀢𑀺𑀬𑀁 𑀤𑀻𑀧𑁂𑀢𑀺. ‘‘𑀪𑀺𑀓𑁆𑀔𑀼𑀲𑁆𑀲 𑀲𑀸𑀫𑀁 𑀘𑀻𑀯𑀭𑀁 𑀤𑀢𑁆𑀯𑀸’’𑀢𑀺 𑀇𑀤𑀁 𑀉𑀓𑁆𑀓𑀝𑁆𑀞𑀯𑀲𑁂𑀦 𑀯𑀼𑀢𑁆𑀢𑀁. 𑀆𑀳𑀭𑀸𑀧𑁂𑀢𑀼𑀁 𑀧𑀦 𑀯𑀝𑁆𑀝𑀢𑀻𑀢𑀺 𑀓𑀫𑁆𑀫𑁂 𑀅𑀓𑀢𑁂 𑀪𑀢𑀺𑀲𑀤𑀺𑀲𑀢𑁆𑀢𑀸 𑀯𑀼𑀢𑁆𑀢𑀁. 𑀯𑀺𑀓𑀧𑁆𑀧𑀦𑀼𑀧𑀕𑀧𑀘𑁆𑀙𑀺𑀫𑀘𑀻𑀯𑀭𑀢𑀸, 𑀲𑀸𑀫𑀁 𑀤𑀺𑀦𑁆𑀦𑀢𑀸, 𑀲𑀓𑀲𑀜𑁆𑀜𑀺𑀢𑀸, 𑀉𑀧𑀲𑀫𑁆𑀧𑀦𑁆𑀦𑀢𑀸, 𑀓𑁄𑀥𑀯𑀲𑁂𑀦 𑀅𑀘𑁆𑀙𑀺𑀦𑁆𑀤𑀦𑀁 𑀯𑀸 𑀅𑀘𑁆𑀙𑀺𑀦𑁆𑀤𑀸𑀧𑀦𑀁 𑀯𑀸𑀢𑀺 𑀇𑀫𑀸𑀦𑁂𑀢𑁆𑀣 𑀧𑀜𑁆𑀘 𑀅𑀗𑁆𑀕𑀸𑀦𑀺.

𑀘𑀻𑀯𑀭𑀅𑀘𑁆𑀙𑀺𑀦𑁆𑀤𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀲𑀼𑀢𑁆𑀢𑀯𑀺𑀜𑁆𑀜𑀢𑁆𑀢𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁬𑁩𑁬. 𑀙𑀝𑁆𑀞𑁂 𑀯𑀻𑀢𑀯𑀻𑀢𑀝𑁆𑀞𑀸𑀦𑀁 𑀬𑀲𑁆𑀫𑀺𑀁 𑀘𑀢𑀼𑀭𑀲𑁆𑀲𑀤𑀸𑀭𑀼𑀫𑁆𑀳𑀺 𑀧𑀮𑀺𑀯𑁂𑀞𑁂𑀦𑁆𑀢𑀺, 𑀢𑀲𑁆𑀲 𑀢𑀼𑀭𑀻𑀢𑀺 𑀦𑀸𑀫𑀁. 𑀯𑀸𑀬𑀦𑁆𑀢𑀸 𑀢𑀺𑀭𑀺𑀬𑀁 𑀲𑀼𑀢𑁆𑀢𑀁 𑀧𑀯𑁂𑀲𑁂𑀢𑁆𑀯𑀸 𑀬𑁂𑀦 𑀆𑀓𑁄𑀝𑁂𑀦𑁆𑀢𑀸 𑀯𑀢𑁆𑀣𑁂 𑀖𑀦𑀪𑀸𑀯𑀁 𑀆𑀧𑀸𑀤𑁂𑀦𑁆𑀢𑀺, 𑀢𑀁 ‘‘𑀯𑁂𑀫’’𑀦𑁆𑀢𑀺 𑀯𑀼𑀘𑁆𑀘𑀢𑀺.

‘‘𑀇𑀢𑀭𑀲𑁆𑀫𑀺𑀁 𑀢𑀣𑁂𑀯 𑀤𑀼𑀓𑁆𑀓𑀝’’𑀦𑁆𑀢𑀺 𑀇𑀫𑀺𑀦𑀸 𑀯𑀸𑀬𑀺𑀢𑀼𑀁 𑀆𑀭𑀤𑁆𑀥𑀓𑀸𑀮𑀢𑁄 𑀧𑀝𑁆𑀞𑀸𑀬 𑀬𑀣𑀸𑀯𑀼𑀢𑁆𑀢𑀧𑀭𑀺𑀘𑁆𑀙𑁂𑀤𑀦𑀺𑀝𑁆𑀞𑀺𑀢𑁂𑀬𑁂𑀯 𑀤𑀼𑀓𑁆𑀓𑀝𑀫𑁆𑀧𑀺 𑀳𑁄𑀢𑀺, 𑀦 𑀢𑀢𑁄 𑀧𑀼𑀩𑁆𑀩𑁂 𑀯𑀸𑀬𑀦𑀧𑀬𑁄𑀕𑁂𑀲𑀽𑀢𑀺 𑀤𑀲𑁆𑀲𑁂𑀢𑀺.

𑀢𑀦𑁆𑀢𑁂 𑀞𑀺𑀢𑀁𑀬𑁂𑀯 𑀅𑀥𑀺𑀝𑁆𑀞𑀸𑀢𑀩𑁆𑀩𑀦𑁆𑀢𑀺 𑀏𑀢𑁆𑀣 𑀏𑀓𑀯𑀸𑀭𑀁 𑀅𑀥𑀺𑀝𑁆𑀞𑀺𑀢𑁂 𑀧𑀘𑁆𑀙𑀸 𑀯𑀻𑀢𑀁 𑀅𑀥𑀺𑀝𑁆𑀞𑀺𑀢𑀕𑀢𑀺𑀓𑀫𑁂𑀯 𑀳𑁄𑀢𑀺, 𑀧𑀼𑀦 𑀅𑀥𑀺𑀝𑁆𑀞𑀸𑀦𑀓𑀺𑀘𑁆𑀘𑀁 𑀦𑀢𑁆𑀣𑀺. 𑀲𑀘𑁂 𑀧𑀦 𑀅𑀦𑁆𑀢𑀭𑀦𑁆𑀢𑀭𑀸 𑀤𑀲𑀸 𑀞𑀧𑁂𑀢𑁆𑀯𑀸 𑀯𑀺𑀲𑀼𑀁 𑀯𑀺𑀲𑀼𑀁 𑀲𑀧𑀭𑀺𑀘𑁆𑀙𑁂𑀤𑀁 𑀯𑀻𑀢𑀁 𑀳𑁄𑀢𑀺, 𑀧𑀘𑁆𑀘𑁂𑀓𑀁 𑀅𑀥𑀺𑀝𑁆𑀞𑀸𑀢𑀩𑁆𑀩𑀫𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀢𑁆𑀣 𑀘 𑀓𑀧𑁆𑀧𑀺𑀬𑀲𑀼𑀢𑁆𑀢𑀁 𑀕𑀳𑁂𑀢𑁆𑀯𑀸 𑀅𑀜𑁆𑀜𑀸𑀢𑀓𑀅𑀧𑁆𑀧𑀯𑀸𑀭𑀺𑀢𑁂𑀦𑀸𑀧𑀺 𑀅𑀓𑀧𑁆𑀧𑀺𑀬𑀢𑀦𑁆𑀢𑀯𑀸𑀬𑁂𑀦 ‘‘𑀲𑀼𑀢𑁆𑀢𑀫𑀢𑁆𑀣𑀺, 𑀯𑀸𑀬𑀦𑁆𑀢𑁄 𑀦𑀢𑁆𑀣𑀻’’𑀢𑀺𑀆𑀤𑀺𑀧𑀭𑀺𑀬𑀸𑀬𑀫𑀼𑀔𑁂𑀦 𑀯𑀸𑀬𑀸𑀧𑁂𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀢𑁂𑀦𑁂𑀯 𑀫𑀸𑀢𑀺𑀓𑀸𑀝𑁆𑀞𑀓𑀣𑀸𑀬𑀁 (𑀓𑀗𑁆𑀔𑀸. 𑀅𑀝𑁆𑀞. 𑀲𑀼𑀢𑁆𑀢𑀯𑀺𑀜𑁆𑀜𑀢𑁆𑀢𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸) ‘‘𑀯𑀸𑀬𑀸𑀧𑁂𑀬𑁆𑀬𑀸’’𑀢𑀺 𑀧𑀤𑀲𑁆𑀲 ‘‘𑀘𑀻𑀯𑀭𑀁 𑀫𑁂, 𑀆𑀯𑀼𑀲𑁄, 𑀯𑀸𑀬𑀣𑀸𑀢𑀺 𑀅𑀓𑀧𑁆𑀧𑀺𑀬𑀯𑀺𑀜𑁆𑀜𑀢𑁆𑀢𑀺𑀬𑀸 𑀯𑀸𑀬𑀸𑀧𑁂𑀬𑁆𑀬𑀸’’𑀢𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄, 𑀏𑀯𑀁 𑀯𑀤𑀦𑁆𑀢𑁄 𑀅𑀓𑀧𑁆𑀧𑀺𑀬𑀢𑀦𑁆𑀢𑀯𑀸𑀬𑁂𑀦 𑀯𑀸𑀬𑀸𑀧𑁂𑀢𑀺 𑀦𑀸𑀫, 𑀦𑀸𑀜𑁆𑀜𑀣𑀸.

𑁬𑁪𑁦. 𑀅𑀦𑀸𑀧𑀢𑁆𑀢𑀺 𑀘𑀻𑀯𑀭𑀁 𑀲𑀺𑀩𑁆𑀩𑁂𑀢𑀼𑀦𑁆𑀢𑀺𑀆𑀤𑀻𑀲𑀼 𑀇𑀫𑀺𑀦𑀸 𑀲𑀺𑀓𑁆𑀔𑀸𑀧𑀤𑁂𑀦𑁂𑀯 𑀅𑀦𑀸𑀧𑀢𑁆𑀢𑀺, 𑀅𑀓𑀢𑀯𑀺𑀜𑁆𑀜𑀢𑁆𑀢𑀺𑀧𑀘𑁆𑀘𑀬𑀸 𑀧𑀦 𑀤𑀼𑀓𑁆𑀓𑀝𑀫𑁂𑀯𑀸𑀢𑀺 𑀯𑀤𑀦𑁆𑀢𑀺. 𑀅𑀓𑀧𑁆𑀧𑀺𑀬𑀲𑀼𑀢𑁆𑀢𑀢𑀸, 𑀅𑀢𑁆𑀢𑀼𑀤𑁆𑀤𑁂𑀲𑀺𑀓𑀢𑀸, 𑀅𑀓𑀧𑁆𑀧𑀺𑀬𑀢𑀦𑁆𑀢𑀯𑀸𑀬𑁂𑀦 𑀅𑀓𑀧𑁆𑀧𑀺𑀬𑀯𑀺𑀜𑁆𑀜𑀢𑁆𑀢𑀺𑀬𑀸 𑀯𑀸𑀬𑀸𑀧𑀦𑀦𑁆𑀢𑀺 𑀇𑀫𑀸𑀦𑁂𑀢𑁆𑀣 𑀢𑀻𑀡𑀺 𑀅𑀗𑁆𑀕𑀸𑀦𑀺.

𑀲𑀼𑀢𑁆𑀢𑀯𑀺𑀜𑁆𑀜𑀢𑁆𑀢𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀫𑀳𑀸𑀧𑁂𑀲𑀓𑀸𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁬𑁪𑁨. 𑀲𑀢𑁆𑀢𑀫𑁂 ‘‘𑀓𑀺𑀜𑁆𑀘𑀺𑀫𑀢𑁆𑀢𑀁 𑀅𑀦𑀼𑀧𑀤𑀚𑁆𑀚𑁂𑀬𑁆𑀬𑀸’’𑀢𑀺 𑀇𑀤𑀁 𑀧𑀬𑁄𑀕𑀪𑁂𑀤𑀤𑀲𑁆𑀲𑀦𑀁, 𑀤𑀸𑀦𑀁 𑀧𑀦𑁂𑀢𑁆𑀣 𑀅𑀗𑁆𑀕𑀁 𑀦 𑀳𑁄𑀢𑀺. 𑀢𑁂𑀦𑁂𑀯 𑀢𑀲𑁆𑀲 𑀯𑀺𑀪𑀗𑁆𑀕𑁂 ‘‘𑀅𑀦𑁆𑀢𑀫𑀲𑁄 𑀥𑀫𑁆𑀫𑀫𑁆𑀧𑀺 𑀪𑀡𑀢𑀻’’𑀢𑀺 𑀯𑀼𑀢𑁆𑀢𑀁. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯. 𑀅𑀜𑁆𑀜𑀸𑀢𑀓𑀅𑀧𑁆𑀧𑀯𑀸𑀭𑀺𑀢𑀸𑀦𑀁 𑀢𑀦𑁆𑀢𑀯𑀸𑀬𑁂 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀺𑀓𑀧𑁆𑀧𑀫𑀸𑀧𑀚𑁆𑀚𑀦𑀢𑀸, 𑀘𑀻𑀯𑀭𑀲𑁆𑀲 𑀅𑀢𑁆𑀢𑀼𑀤𑁆𑀤𑁂𑀲𑀺𑀓𑀢𑀸, 𑀢𑀲𑁆𑀲 𑀯𑀘𑀦𑁂𑀦 𑀲𑀼𑀢𑁆𑀢𑀯𑀟𑁆𑀠𑀦𑀁, 𑀘𑀻𑀯𑀭𑀧𑀝𑀺𑀮𑀸𑀪𑁄𑀢𑀺 𑀇𑀫𑀸𑀦𑁂𑀢𑁆𑀣 𑀘𑀢𑁆𑀢𑀸𑀭𑀺 𑀅𑀗𑁆𑀕𑀸𑀦𑀺.

𑀫𑀳𑀸𑀧𑁂𑀲𑀓𑀸𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀅𑀘𑁆𑀘𑁂𑀓𑀘𑀻𑀯𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁬𑁪𑁬. 𑀅𑀝𑁆𑀞𑀫𑁂 𑀙𑀝𑁆𑀞𑀺𑀬𑀁 𑀉𑀧𑁆𑀧𑀦𑁆𑀦𑀘𑀻𑀯𑀭𑀲𑁆𑀲 𑀏𑀓𑀸𑀤𑀲𑀫𑀸𑀭𑀼𑀡𑁄 𑀘𑀻𑀯𑀭𑀓𑀸𑀮𑁂 𑀉𑀝𑁆𑀞𑀸𑀢𑀻𑀢𑀺 𑀆𑀳 ‘‘𑀙𑀝𑁆𑀞𑀺𑀢𑁄 𑀧𑀝𑁆𑀞𑀸𑀬𑀸’’𑀢𑀺𑀆𑀤𑀺, 𑀢𑁂𑀦 𑀘 ‘‘𑀤𑀲𑀸𑀳𑀸𑀦𑀸𑀕𑀢’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 𑀧𑀜𑁆𑀘𑀫𑀺𑀢𑁄 𑀧𑀝𑁆𑀞𑀸𑀬 𑀧𑀼𑀡𑁆𑀡𑀫𑀺𑀢𑁄 𑀧𑀼𑀩𑁆𑀩𑁂 𑀤𑀲𑀲𑀼 𑀅𑀭𑀼𑀡𑁂𑀲𑀼 𑀉𑀝𑁆𑀞𑀺𑀢𑁂𑀲𑀼𑀧𑀺 𑀘𑀻𑀯𑀭𑀁 𑀦𑀺𑀲𑁆𑀲𑀕𑁆𑀕𑀺𑀬𑀁 𑀦 𑀳𑁄𑀢𑀺. 𑀧𑀼𑀡𑁆𑀡𑀫𑀺𑀬𑀸 𑀲𑀳 𑀏𑀓𑀸𑀤𑀲 𑀤𑀺𑀯𑀲𑀸 𑀮𑀩𑁆𑀪𑀦𑁆𑀢𑀻𑀢𑀺 𑀏𑀢𑁆𑀢𑀓𑀫𑁂𑀯 𑀇𑀫𑀺𑀦𑀸 𑀲𑀺𑀓𑁆𑀔𑀸𑀧𑀤𑁂𑀦 𑀮𑀤𑁆𑀥𑀁, 𑀙𑀝𑁆𑀞𑀺𑀢𑁄 𑀧𑀝𑁆𑀞𑀸𑀬 𑀉𑀧𑁆𑀧𑀦𑁆𑀦𑀁 𑀲𑀩𑁆𑀩𑀘𑀻𑀯𑀭𑀁 𑀧𑀞𑀫𑀓𑀣𑀺𑀦𑀲𑀺𑀓𑁆𑀔𑀸𑀧𑀤𑀯𑀲𑁂𑀦𑁂𑀯 𑀬𑀸𑀯 𑀘𑀻𑀯𑀭𑀓𑀸𑀮𑀁 𑀦𑀺𑀲𑁆𑀲𑀕𑁆𑀕𑀺𑀬𑀁 𑀦 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺.

𑁬𑁫𑁦. 𑀇𑀤𑀸𑀦𑀺 𑀧𑀞𑀫𑀓𑀣𑀺𑀦𑀸𑀤𑀺𑀲𑀺𑀓𑁆𑀔𑀸𑀧𑀤𑁂𑀳𑀺 𑀢𑀲𑁆𑀲 𑀢𑀲𑁆𑀲 𑀘𑀻𑀯𑀭𑀲𑁆𑀲 𑀮𑀩𑁆𑀪𑀫𑀸𑀦𑀁 𑀧𑀭𑀺𑀳𑀸𑀭𑀁 𑀇𑀥𑁂𑀯 𑀏𑀓𑀢𑁄 𑀲𑀫𑁆𑀧𑀺𑀡𑁆𑀟𑁂𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀢𑀺𑀭𑁂𑀓𑀘𑀻𑀯𑀭𑀲𑁆𑀲𑀸’’𑀢𑀺𑀆𑀤𑀺𑀫𑀸𑀳. ‘‘𑀅𑀦𑀢𑁆𑀣𑀢𑁂 𑀓𑀣𑀺𑀦𑁂 𑀏𑀓𑀸𑀤𑀲𑀤𑀺𑀯𑀲𑀸𑀥𑀺𑀓𑁄 𑀫𑀸𑀲𑁄, 𑀅𑀢𑁆𑀣𑀢𑁂 𑀓𑀣𑀺𑀦𑁂 𑀏𑀓𑀸𑀤𑀲𑀤𑀺𑀯𑀲𑀸𑀥𑀺𑀓𑀸 𑀧𑀜𑁆𑀘 𑀫𑀸𑀲𑀸’’𑀢𑀺 𑀅𑀬𑀫𑁂𑀯 𑀧𑀸𑀞𑁄 𑀧𑀸𑀴𑀺𑀬𑀸 𑀲𑀫𑁂𑀢𑀺. 𑀓𑁂𑀘𑀺 𑀧𑀦 ‘‘𑀤𑀲𑀤𑀺𑀯𑀲𑀸𑀥𑀺𑀓𑁄 𑀫𑀸𑀲𑁄, 𑀤𑀲𑀤𑀺𑀯𑀲𑀸𑀥𑀺𑀓𑀸 𑀧𑀜𑁆𑀘 𑀫𑀸𑀲𑀸𑀢𑀺 𑀧𑀸𑀞𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀯𑀤𑀦𑁆𑀢𑀺, 𑀢𑀁 𑀦 𑀬𑀼𑀢𑁆𑀢𑀁, 𑀅𑀜𑁆𑀜𑀣𑀸 ‘‘𑀦𑀯𑀸𑀳𑀸𑀦𑀸𑀕𑀢’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀢𑁄. 𑀬𑀁 𑀧𑀦𑁂𑀢𑁆𑀣 𑀫𑀸𑀢𑀺𑀓𑀸𑀝𑁆𑀞𑀓𑀣𑀸𑀬𑀜𑁆𑀘 ‘‘𑀓𑀸𑀫𑀜𑁆𑀘𑁂𑀲 ‘𑀤𑀲𑀸𑀳𑀧𑀭𑀫𑀁 𑀅𑀢𑀺𑀭𑁂𑀓𑀘𑀻𑀯𑀭𑀁 𑀥𑀸𑀭𑁂𑀢𑀩𑁆𑀩’𑀦𑁆𑀢𑀺 𑀇𑀫𑀺𑀦𑀸𑀯 𑀲𑀺𑀤𑁆𑀥𑁄, 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀯𑀲𑁂𑀦 𑀧𑀦 𑀅𑀧𑀼𑀩𑁆𑀩𑀁 𑀯𑀺𑀬 𑀅𑀢𑁆𑀣𑀁 𑀤𑀲𑁆𑀲𑁂𑀢𑁆𑀯𑀸 𑀲𑀺𑀓𑁆𑀔𑀸𑀧𑀤𑀁 𑀞𑀧𑀺𑀢’’𑀦𑁆𑀢𑀺 (𑀓𑀗𑁆𑀔𑀸. 𑀅𑀝𑁆𑀞. 𑀅𑀘𑁆𑀘𑁂𑀓𑀘𑀻𑀯𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸) 𑀮𑀺𑀔𑀦𑁆𑀢𑀺, 𑀢𑀁 𑀧𑀫𑀸𑀤𑀮𑀺𑀔𑀺𑀢𑀁 ‘‘𑀧𑀯𑀸𑀭𑀡𑀫𑀸𑀲𑀲𑁆𑀲 𑀚𑀼𑀡𑁆𑀳𑀧𑀓𑁆𑀔𑀧𑀜𑁆𑀘𑀫𑀺𑀢𑁄 𑀧𑀝𑁆𑀞𑀸𑀬 𑀉𑀧𑁆𑀧𑀦𑁆𑀦𑀲𑁆𑀲 𑀘𑀻𑀯𑀭𑀲𑁆𑀲 𑀦𑀺𑀥𑀸𑀦𑀓𑀸𑀮𑁄 𑀤𑀲𑁆𑀲𑀺𑀢𑁄 𑀳𑁄𑀢𑀻’’𑀢𑀺 (𑀓𑀗𑁆𑀔𑀸. 𑀅𑀝𑁆𑀞. 𑀅𑀘𑁆𑀘𑁂𑀓𑀘𑀻𑀯𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸) 𑀯𑀼𑀢𑁆𑀢𑀢𑁆𑀢𑀸. 𑀇𑀫𑀫𑁂𑀯 𑀘 𑀧𑀫𑀸𑀤𑀮𑀺𑀔𑀺𑀢𑀁 𑀕𑀳𑁂𑀢𑁆𑀯𑀸 𑀪𑀤𑀦𑁆𑀢𑀩𑀼𑀤𑁆𑀥𑀤𑀢𑁆𑀢𑀸𑀘𑀭𑀺𑀬𑁂𑀦 𑀘 ‘‘𑀧𑀭𑀺𑀳𑀸𑀭𑁂𑀓𑀫𑀸𑀲𑁄𑀯, 𑀤𑀲𑀸𑀳𑀧𑀭𑀫𑁄 𑀫𑀢𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀦𑁆𑀢𑀺 𑀕𑀳𑁂𑀢𑀩𑁆𑀩𑀁.

𑀅𑀘𑁆𑀘𑁂𑀓𑀘𑀻𑀯𑀭𑀲𑀤𑀺𑀲𑁂 𑀅𑀜𑁆𑀜𑀲𑁆𑀫𑀺𑀦𑁆𑀢𑀺 𑀧𑀼𑀩𑁆𑀩𑁂 𑀅𑀥𑀺𑀝𑁆𑀞𑀺𑀢𑁂 𑀉𑀧𑁆𑀧𑀦𑁆𑀦𑀓𑀸𑀮𑀸𑀓𑀸𑀭𑀸𑀤𑀺 𑀲𑀸𑀤𑀺𑀲𑁂𑀦 𑀅𑀘𑁆𑀘𑁂𑀓𑀘𑀻𑀯𑀭𑀲𑀤𑀺𑀲𑁂 𑀅𑀜𑁆𑀜𑀲𑁆𑀫𑀺𑀁 𑀘𑀻𑀯𑀭𑁂 𑀅𑀘𑁆𑀘𑁂𑀓𑀘𑀻𑀯𑀭𑀲𑀜𑁆𑀜𑀸𑀬 𑀘𑀻𑀯𑀭𑀓𑀸𑀮𑀁 𑀅𑀢𑀺𑀓𑁆𑀓𑀫𑁂𑀢𑀻𑀢𑀺 𑀅𑀢𑁆𑀣𑁄. 𑀢𑁂𑀦𑁂𑀯𑁂𑀢𑁆𑀣 𑀤𑀼𑀓𑁆𑀓𑀝𑀁, 𑀅𑀦𑀸𑀧𑀢𑁆𑀢𑀺 𑀘 𑀯𑀼𑀢𑁆𑀢𑀸, 𑀇𑀢𑀭𑀣𑀸 𑀢𑀻𑀲𑀼𑀧𑀺 𑀧𑀤𑁂𑀲𑀼 𑀧𑀸𑀘𑀺𑀢𑁆𑀢𑀺𑀬𑀲𑁆𑀲𑁂𑀯 𑀯𑀢𑁆𑀢𑀩𑁆𑀩𑀢𑁄. 𑀅𑀦𑀘𑁆𑀘𑁂𑀓𑀘𑀻𑀯𑀭𑀫𑁆𑀧𑀺 𑀳𑀺 𑀘𑀻𑀯𑀭𑀓𑀸𑀮𑀁 𑀅𑀢𑀺𑀓𑁆𑀓𑀫𑀬𑀢𑁄 𑀧𑀸𑀘𑀺𑀢𑁆𑀢𑀺𑀬𑀫𑁂𑀯 𑀅𑀘𑁆𑀘𑁂𑀓𑀘𑀻𑀯𑀭𑀢𑁆𑀢𑀺𑀓𑁂 𑀯𑀺𑀬𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀯𑀺𑀓𑀧𑁆𑀧𑀦𑀼𑀧𑀕𑀧𑀘𑁆𑀙𑀺𑀫𑀧𑁆𑀧𑀫𑀸𑀡𑀲𑁆𑀲 𑀅𑀘𑁆𑀘𑁂𑀓𑀘𑀻𑀯𑀭𑀲𑁆𑀲 𑀅𑀢𑁆𑀢𑀦𑁄 𑀲𑀦𑁆𑀢𑀓𑀢𑀸, 𑀤𑀲𑀸𑀳𑀸𑀦𑀸𑀕𑀢𑀸𑀬 𑀓𑀢𑁆𑀢𑀺𑀓𑀢𑁂𑀫𑀸𑀲𑀺𑀧𑀼𑀡𑁆𑀡𑀫𑀸𑀬 𑀉𑀧𑁆𑀧𑀦𑁆𑀦𑀪𑀸𑀯𑁄, 𑀅𑀦𑀥𑀺𑀝𑁆𑀞𑀺𑀢𑀅𑀯𑀺𑀓𑀧𑁆𑀧𑀺𑀢𑀢𑀸, 𑀘𑀻𑀯𑀭𑀓𑀸𑀮𑀸𑀢𑀺𑀓𑁆𑀓𑀫𑁄𑀢𑀺 𑀇𑀫𑀸𑀦𑁂𑀢𑁆𑀣 𑀘𑀢𑁆𑀢𑀸𑀭𑀺 𑀅𑀗𑁆𑀕𑀸𑀦𑀺.

𑀅𑀘𑁆𑀘𑁂𑀓𑀘𑀻𑀯𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀲𑀸𑀲𑀗𑁆𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁬𑁫𑁨-𑁩. 𑀦𑀯𑀫𑁂 𑀅𑀦𑁆𑀢𑀭𑀦𑁆𑀢𑀭𑀸 𑀖𑀭𑀫𑁂𑀢𑁆𑀣𑀸𑀢𑀺 𑀅𑀦𑁆𑀢𑀭𑀖𑀭𑀦𑁆𑀢𑀺 𑀕𑀸𑀫𑁄 𑀯𑀼𑀢𑁆𑀢𑁄𑀢𑀺 𑀆𑀳 ‘‘𑀅𑀦𑁆𑀢𑁄𑀕𑀸𑀫𑁂’’𑀢𑀺. ‘‘𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀻’’𑀢𑀺 (𑀯𑀺𑀪. 𑁬𑁨𑁪) 𑀇𑀫𑀲𑁆𑀲 𑀯𑀺𑀪𑀗𑁆𑀕𑁂 ‘‘𑀉𑀧𑀲𑀫𑁆𑀧𑀚𑁆𑀚’’𑀦𑁆𑀢𑀺 𑀲𑀸𑀦𑀼𑀲𑀸𑀭𑀁 𑀉𑀤𑁆𑀥𑀝𑀁. 𑀢𑀁 𑀲𑀦𑁆𑀥𑀸𑀬𑀸𑀳 ‘‘𑀉𑀧𑀲𑀫𑁆𑀧𑀚𑁆𑀚𑀦𑁆𑀢𑀺𑀆𑀤𑀻𑀲𑀼 𑀯𑀺𑀬𑀸’’𑀢𑀺. 𑀢𑀲𑁆𑀲𑀸𑀧𑀻𑀢𑀺 ‘‘𑀯𑀼𑀢𑁆𑀣𑀯𑀲𑁆𑀲𑀸𑀦’’𑀦𑁆𑀢𑀺 𑀯𑀺𑀪𑀗𑁆𑀕𑀧𑀤𑀲𑁆𑀲𑀧𑀺. 𑀯𑀼𑀢𑁆𑀣𑀯𑀲𑁆𑀲𑀸𑀦𑀦𑁆𑀢𑀺 𑀘 𑀦𑀺𑀤𑁆𑀥𑀸𑀭𑀡𑁂 𑀲𑀸𑀫𑀺𑀯𑀘𑀦𑀁, 𑀏𑀢𑁂𑀦 𑀘 𑀧𑀼𑀭𑀺𑀫𑀲𑀺𑀓𑁆𑀔𑀸𑀧𑀤𑁂 𑀅𑀦𑀢𑁆𑀣𑀢𑀓𑀣𑀺𑀦𑀸𑀦𑀁 𑀓𑀣𑀺𑀦𑀫𑀸𑀲𑁂𑀧𑀺 𑀅𑀲𑀫𑀸𑀤𑀸𑀦𑀘𑀸𑀭𑁄 𑀦 𑀮𑀩𑁆𑀪𑀢𑀻𑀢𑀺 𑀲𑀺𑀤𑁆𑀥𑀁 𑀳𑁄𑀢𑀺, 𑀇𑀢𑀭𑀣𑀸 𑀲𑀺𑀓𑁆𑀔𑀸𑀧𑀤𑀲𑁆𑀲𑁂𑀯 𑀦𑀺𑀭𑀢𑁆𑀣𑀓𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀧𑀭𑀺𑀓𑁆𑀔𑁂𑀧𑀸𑀭𑀳𑀝𑁆𑀞𑀸𑀦𑀢𑁄𑀢𑀺 𑀏𑀢𑁆𑀣 𑀕𑀸𑀫𑀧𑀭𑀺𑀬𑀦𑁆𑀢𑁂 𑀞𑀺𑀢𑀖𑀭𑀽𑀧𑀘𑀸𑀭𑀢𑁄 𑀧𑀝𑁆𑀞𑀸𑀬 𑀏𑀓𑁄 𑀮𑁂𑀟𑁆𑀟𑀼𑀧𑀸𑀢𑁄 𑀧𑀭𑀺𑀓𑁆𑀔𑁂𑀧𑀸𑀭𑀳𑀝𑁆𑀞𑀸𑀦𑀁 𑀦𑀸𑀫. 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂𑀧𑀺 ‘‘𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀧𑀞𑀫𑀮𑁂𑀟𑁆𑀟𑀼𑀧𑀸𑀢𑀢𑁄 𑀧𑀝𑁆𑀞𑀸𑀬𑀸’’𑀢𑀺 (𑀯𑀺𑀲𑀼𑀤𑁆𑀥𑀺. 𑁧.𑁩𑁧) 𑀯𑀼𑀢𑁆𑀢𑀁. 𑀢𑀦𑁆𑀢𑀺 𑀢𑀁 𑀧𑀞𑀫𑀲𑁂𑀦𑀸𑀲𑀦𑀸𑀤𑀺𑀁. 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬𑀁 𑀧𑀦 𑀯𑀺𑀳𑀸𑀭𑀲𑁆𑀲𑀧𑀺 𑀕𑀸𑀫𑀲𑁆𑀲𑁂𑀯 𑀉𑀧𑀘𑀸𑀭𑀁 𑀦𑀻𑀳𑀭𑀺𑀢𑁆𑀯𑀸 𑀉𑀪𑀺𑀦𑁆𑀦𑀁 𑀮𑁂𑀟𑁆𑀟𑀼𑀧𑀸𑀢𑀸𑀦𑀁 𑀅𑀦𑁆𑀢𑀭𑀸 𑀫𑀺𑀦𑀺𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑀁.

‘‘𑀓𑁄𑀲𑀫𑁆𑀩𑀺𑀬𑀁 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀕𑀺𑀮𑀸𑀦𑁄 𑀳𑁄𑀢𑀻’’𑀢𑀺 𑀆𑀕𑀢𑀢𑁆𑀢𑀸 ‘‘𑀓𑁄𑀲𑀫𑁆𑀩𑀓𑀲𑀫𑁆𑀫𑀼𑀢𑀺 𑀅𑀦𑀼𑀜𑁆𑀜𑀸𑀢𑀸’’𑀢𑀺 𑀯𑀼𑀢𑁆𑀢𑀁. ‘‘𑀅𑀬𑀜𑁆𑀘 𑀧𑀘𑁆𑀙𑀺𑀫𑀤𑀺𑀲𑀁 𑀕𑀢𑁄 𑀳𑁄𑀢𑀻’’𑀢𑀺 𑀇𑀫𑀺𑀦𑀸 𑀅𑀦𑁆𑀢𑀭𑀖𑀭𑁂 𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀢𑀲𑁆𑀫𑀺𑀁 𑀯𑀺𑀳𑀸𑀭𑁂 𑀯𑀲𑀦𑁆𑀢𑀲𑁆𑀲 𑀲𑀓𑀮𑀫𑁆𑀧𑀺 𑀘𑀻𑀯𑀭𑀫𑀸𑀲𑀁 𑀯𑀺𑀧𑁆𑀧𑀯𑀲𑀺𑀢𑀼𑀁 𑀯𑀝𑁆𑀝𑀢𑀺, 𑀢𑀢𑁄 𑀅𑀜𑁆𑀜𑀢𑁆𑀣 𑀕𑀫𑀦𑀓𑀺𑀘𑁆𑀘𑁂 𑀲𑀢𑀺 𑀯𑀺𑀳𑀸𑀭𑀢𑁄 𑀩𑀳𑀺 𑀙𑀸𑀭𑀢𑁆𑀢𑀁 𑀯𑀺𑀧𑁆𑀧𑀯𑀸𑀲𑁄 𑀅𑀦𑀼𑀜𑁆𑀜𑀸𑀢𑁄𑀢𑀺 𑀤𑀻𑀧𑁂𑀢𑀺. 𑀢𑁂𑀦𑀸𑀳 ‘‘𑀲𑁂𑀦𑀸𑀲𑀦𑀁 𑀆𑀕𑀦𑁆𑀢𑁆𑀯𑀸 𑀲𑀢𑁆𑀢𑀫𑀁 𑀅𑀭𑀼𑀡𑀁 𑀉𑀝𑁆𑀞𑀸𑀧𑁂𑀢𑀼’’𑀦𑁆𑀢𑀺𑀆𑀤𑀺. 𑀯𑀲𑀺𑀢𑁆𑀯𑀸𑀢𑀺 𑀅𑀭𑀼𑀡𑀁 𑀉𑀝𑁆𑀞𑀸𑀧𑁂𑀢𑁆𑀯𑀸. 𑀢𑀢𑁆𑀣𑁂𑀯𑀸𑀢𑀺 𑀢𑀲𑁆𑀫𑀺𑀜𑁆𑀜𑁂𑀯 𑀕𑀢𑀝𑁆𑀞𑀸𑀦𑁂. 𑀅𑀗𑁆𑀕𑀸𑀦𑀺 𑀧𑀦𑁂𑀢𑁆𑀣 𑀅𑀝𑁆𑀞𑀓𑀣𑀸𑀬𑀫𑁂𑀯 𑀯𑀼𑀢𑁆𑀢𑀸𑀦𑀺.

𑀲𑀸𑀲𑀗𑁆𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀧𑀭𑀺𑀡𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁬𑁬𑁦. 𑀤𑀲𑀫𑁂 𑀭𑁄𑀧𑀺𑀢𑀫𑀸𑀮𑀯𑀘𑁆𑀙𑀢𑁄𑀢𑀺 𑀓𑁂𑀦𑀘𑀺 𑀦𑀺𑀬𑀫𑁂𑀢𑁆𑀯𑀸 𑀭𑁄𑀧𑀺𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀅𑀦𑁄𑀘𑀺𑀢𑀁 𑀫𑀺𑀮𑀸𑀬𑀫𑀸𑀦𑀁 𑀑𑀘𑀺𑀦𑀺𑀢𑁆𑀯𑀸 𑀬𑀢𑁆𑀣 𑀓𑀢𑁆𑀣𑀘𑀺 𑀧𑀽𑀚𑁂𑀢𑀼𑀁 𑀯𑀝𑁆𑀝𑀢𑀺. 𑀞𑀺𑀢𑀁 𑀤𑀺𑀲𑁆𑀯𑀸𑀢𑀺 𑀲𑁂𑀲𑀓𑀁 𑀕𑀳𑁂𑀢𑁆𑀯𑀸 𑀞𑀺𑀢𑀁 𑀤𑀺𑀲𑁆𑀯𑀸. 𑀬𑀢𑁆𑀣 𑀇𑀘𑁆𑀙𑀣, 𑀢𑀢𑁆𑀣 𑀤𑁂𑀣𑀸𑀢𑀺 𑀏𑀢𑁆𑀣 𑀦𑀺𑀬𑀫𑁂𑀢𑁆𑀯𑀸 ‘‘𑀅𑀲𑀼𑀓𑀲𑁆𑀲 𑀤𑁂𑀳𑀻’’𑀢𑀺 𑀯𑀼𑀢𑁆𑀢𑁂𑀧𑀺 𑀤𑁄𑀲𑁄 𑀦𑀢𑁆𑀣𑀺 ‘‘𑀢𑀼𑀫𑁆𑀳𑀸𑀓𑀁 𑀭𑀼𑀘𑀺𑀬𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸. 𑀲𑀗𑁆𑀖𑁂 𑀧𑀭𑀺𑀡𑀢𑀪𑀸𑀯𑁄, 𑀢𑀁 𑀜𑀢𑁆𑀯𑀸 𑀅𑀢𑁆𑀢𑀦𑁄 𑀧𑀭𑀺𑀡𑀸𑀫𑀦𑀁, 𑀧𑀝𑀺𑀮𑀸𑀪𑁄𑀢𑀺 𑀇𑀫𑀸𑀦𑁂𑀢𑁆𑀣 𑀢𑀻𑀡𑀺 𑀅𑀗𑁆𑀕𑀸𑀦𑀺.

𑀧𑀭𑀺𑀡𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀝𑁆𑀞𑀺𑀢𑁄 𑀧𑀢𑁆𑀢𑀯𑀕𑁆𑀕𑁄 𑀢𑀢𑀺𑀬𑁄.

𑀇𑀢𑀺 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬 𑀯𑀺𑀦𑀬𑀝𑁆𑀞𑀓𑀣𑀸𑀬 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁

𑀢𑀺𑀁𑀲𑀓𑀯𑀡𑁆𑀡𑀦𑀸𑀦𑀬𑁄 𑀦𑀺𑀝𑁆𑀞𑀺𑀢𑁄.

𑀧𑀞𑀫𑁄 𑀪𑀸𑀕𑁄 𑀦𑀺𑀝𑁆𑀞𑀺𑀢𑁄.

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀯𑀺𑀦𑀬𑀧𑀺𑀝𑀓𑁂