𑁪. 𑀦𑀺𑀲𑁆𑀲𑀕𑁆𑀕𑀺𑀬𑀓𑀡𑁆𑀟𑁄

𑁧. 𑀘𑀻𑀯𑀭𑀯𑀕𑁆𑀕𑁄

𑁧. 𑀧𑀞𑀫𑀓𑀣𑀺𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁪𑁫𑁯. 𑀲𑀫𑀺𑀢𑀸𑀯𑀺𑀦𑀸𑀢𑀺 𑀲𑀫𑀺𑀢𑀧𑀸𑀧𑁂𑀦. 𑀕𑁄𑀢𑀫𑀓𑀘𑁂𑀢𑀺𑀬𑀁 𑀦𑀸𑀫 𑀕𑁄𑀢𑀫𑀬𑀓𑁆𑀔𑀲𑁆𑀲 𑀘𑁂𑀢𑀺𑀬𑀝𑁆𑀞𑀸𑀦𑁂 𑀓𑀢𑀯𑀺𑀳𑀸𑀭𑁄 𑀯𑀼𑀘𑁆𑀘𑀢𑀺.

𑁪𑁬𑁧. 𑀦𑀯𑀫𑀁 𑀯𑀸 𑀤𑀲𑀫𑀁 𑀯𑀸𑀢𑀺 𑀪𑀼𑀫𑁆𑀫𑀢𑁆𑀣𑁂 𑀉𑀧𑀬𑁄𑀕𑀯𑀘𑀦𑀁. 𑀲𑀘𑁂 𑀪𑀯𑁂𑀬𑁆𑀬𑀸𑀢𑀺 𑀲𑀘𑁂 𑀓𑀲𑁆𑀲𑀘𑀺 𑀓𑀗𑁆𑀔𑀸 𑀪𑀯𑁂𑀬𑁆𑀬. 𑀯𑀼𑀢𑁆𑀢𑀲𑀤𑀺𑀲𑀦𑁆𑀢𑀺 𑀤𑀲𑀫𑀁 𑀯𑀸𑀢𑀺 𑀯𑀼𑀢𑁆𑀢𑀲𑀤𑀺𑀲𑀁 𑀧𑀭𑀺𑀘𑁆𑀙𑁂𑀤𑀲𑀤𑀺𑀲𑀁, ‘‘𑀯𑀼𑀢𑁆𑀢𑀲𑀤𑀺𑀲𑀫𑁂𑀯𑀸’’𑀢𑀺𑀧𑀺 𑀮𑀺𑀔𑀦𑁆𑀢𑀺. 𑀥𑀸𑀭𑁂𑀢𑀼𑀦𑁆𑀢𑀺 𑀏𑀢𑁆𑀣 𑀆𑀳𑀸𑀢𑀺 𑀧𑀸𑀞𑀲𑁂𑀲𑁄 𑀤𑀝𑁆𑀞𑀩𑁆𑀩𑁄.

𑁪𑁬𑁩. 𑀲𑀽𑀘𑀺𑀬𑀸 𑀧𑀝𑀺𑀲𑀸𑀫𑀦𑀦𑁆𑀢𑀺 𑀲𑀽𑀘𑀺𑀖𑀭𑁂 𑀲𑀁𑀕𑁄𑀧𑀦𑀁, 𑀇𑀤𑀜𑁆𑀘 𑀲𑀽𑀘𑀺𑀓𑀫𑁆𑀫𑀲𑁆𑀲 𑀲𑀩𑁆𑀩𑀲𑁆𑀲 𑀧𑀭𑀺𑀦𑀺𑀝𑁆𑀞𑀺𑀢𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀏𑀢𑀦𑁆𑀢𑀺 𑀦𑀝𑁆𑀞𑀘𑀻𑀯𑀭𑀁. 𑀏𑀢𑁂𑀲𑀫𑁆𑀧𑀻𑀢𑀺 𑀦𑀝𑁆𑀞𑀘𑀻𑀯𑀭𑀸𑀤𑀻𑀦𑀺 𑀧𑀭𑀸𑀫𑀲𑀢𑀺, 𑀢𑁂𑀦 𑀘𑀻𑀯𑀭𑀧𑀮𑀺𑀩𑁄𑀥𑀸𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀤𑀼𑀢𑀺𑀬𑀲𑁆𑀲 𑀧𑀮𑀺𑀩𑁄𑀥𑀲𑁆𑀲𑀸𑀢𑀺 𑀆𑀯𑀸𑀲𑀧𑀮𑀺𑀩𑁄𑀥𑀲𑁆𑀲. 𑀏𑀢𑁆𑀣 𑀘 𑀦𑀺𑀝𑁆𑀞𑀺𑀢𑀘𑀻𑀯𑀭𑀲𑁆𑀫𑀺𑀁, 𑀉𑀩𑁆𑀪𑀢𑀲𑁆𑀫𑀺𑀁 𑀓𑀣𑀺𑀦𑁂𑀢𑀺 𑀤𑁆𑀯𑀻𑀳𑀺 𑀧𑀤𑁂𑀳𑀺 𑀤𑁆𑀯𑀺𑀦𑁆𑀦𑀁 𑀧𑀮𑀺𑀩𑁄𑀥𑀸𑀦𑀁 𑀅𑀪𑀸𑀯𑀤𑀲𑁆𑀲𑀦𑁂𑀦 𑀅𑀢𑁆𑀣𑀢𑀓𑀣𑀺𑀦𑀲𑁆𑀲 𑀧𑀜𑁆𑀘𑀫𑀸𑀲𑀩𑁆𑀪𑀦𑁆𑀢𑀭𑁂 𑀬𑀸𑀯 𑀘𑀻𑀯𑀭𑀧𑀮𑀺𑀩𑁄𑀥𑀆𑀯𑀸𑀲𑀧𑀮𑀺𑀩𑁄𑀥𑁂𑀲𑀼 𑀅𑀜𑁆𑀜𑀢𑀭𑀁 𑀦 𑀉𑀧𑀘𑁆𑀙𑀺𑀚𑁆𑀚𑀢𑀺, 𑀢𑀸𑀯 𑀅𑀢𑀺𑀭𑁂𑀓𑀘𑀻𑀯𑀭𑀁 𑀥𑀸𑀭𑁂𑀢𑀼𑀁 𑀯𑀝𑁆𑀝𑀢𑀻𑀢𑀺 𑀤𑀻𑀧𑁂𑀢𑀺. 𑀧𑀓𑁆𑀓𑀫𑀦𑀁 𑀅𑀦𑁆𑀢𑁄 𑀅𑀲𑁆𑀲𑀸𑀢𑀺 𑀧𑀓𑁆𑀓𑀫𑀦𑀦𑁆𑀢𑀺𑀓𑀸, 𑀏𑀯𑀁 𑀲𑁂𑀲𑀸𑀧𑀺 𑀯𑁂𑀤𑀺𑀢𑀩𑁆𑀩𑀸. 𑀯𑀺𑀢𑁆𑀣𑀸𑀭𑁄 𑀧𑀦𑁂𑀢𑁆𑀣 𑀆𑀕𑀢𑀝𑁆𑀞𑀸𑀦𑁂 𑀆𑀯𑀺 𑀪𑀯𑀺𑀲𑁆𑀲𑀢𑀺.

𑀤𑀲𑀸𑀳𑀧𑀭𑀫𑀁 𑀓𑀸𑀮𑀦𑁆𑀢𑀺 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑀯𑀘𑀦𑀁. 𑀇𑀤𑀜𑁆𑀳𑀺 𑀯𑀼𑀢𑁆𑀢𑀁 𑀳𑁄𑀢𑀺…𑀧𑁂… 𑀤𑀲𑀸𑀳𑀧𑀭𑀫𑀪𑀸𑀯𑁄𑀢𑀺 𑀇𑀤𑀁 𑀤𑀲𑀸𑀳𑀧𑀭𑀫𑀢𑀸𑀧𑀤𑀲𑁆𑀲 𑀅𑀢𑁆𑀣𑀫𑀢𑁆𑀢𑀤𑀲𑁆𑀲𑀦𑀁, 𑀤𑀲𑀸𑀳𑀧𑀭𑀫𑀪𑀸𑀯𑁄𑀢𑀺 𑀇𑀤𑀜𑁆𑀳𑀺 𑀯𑀼𑀢𑁆𑀢𑀁 𑀳𑁄𑀢𑀻𑀢𑀺 𑀏𑀯𑀫𑁂𑀢𑁆𑀣 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀅𑀬𑀫𑀢𑁆𑀣𑁄𑀢𑀺𑀆𑀤𑀺 𑀤𑀲𑀸𑀳𑀧𑀭𑀫𑀧𑀤𑀲𑁆𑀲𑁂𑀯 𑀅𑀥𑀺𑀧𑁆𑀧𑁂𑀢𑀢𑁆𑀣𑀤𑀲𑁆𑀲𑀦𑀯𑀲𑁂𑀦 𑀯𑀼𑀢𑁆𑀢𑀁. 𑀢𑀢𑁆𑀣 𑀏𑀢𑁆𑀢𑀓𑁄 𑀓𑀸𑀮𑁄𑀢𑀺 ‘‘𑀤𑀲𑀸𑀳𑀧𑀭𑀫𑀢𑀸’’𑀢𑀺 𑀯𑀼𑀢𑁆𑀢𑁄 𑀬𑁄 𑀓𑀸𑀮𑁄, 𑀲𑁄 𑀏𑀢𑁆𑀢𑀓𑁄 𑀓𑀸𑀮𑁄𑀢𑀺 𑀅𑀢𑁆𑀣𑁄.

𑀔𑁄𑀫𑀦𑁆𑀢𑀺 𑀔𑁄𑀫𑀲𑀼𑀢𑁆𑀢𑁂𑀳𑀺 𑀯𑀸𑀬𑀺𑀢𑀁 𑀔𑁄𑀫𑀧𑀝𑀘𑀻𑀯𑀭𑀁, 𑀢𑀁 𑀯𑀸𑀓𑀫𑀬𑀦𑁆𑀢𑀺 𑀯𑀤𑀦𑁆𑀢𑀺. 𑀓𑀧𑁆𑀧𑀸𑀲𑀲𑀼𑀢𑁆𑀢𑁂𑀳𑀺 𑀯𑀸𑀬𑀺𑀢𑀁 𑀓𑀧𑁆𑀧𑀸𑀲𑀺𑀓𑀁, 𑀏𑀯𑀁 𑀲𑁂𑀲𑀸𑀦𑀺𑀧𑀺. 𑀓𑀫𑁆𑀩𑀮𑀦𑁆𑀢𑀺 𑀏𑀴𑀓𑀸𑀤𑀻𑀦𑀁 𑀮𑁄𑀫𑀫𑀬𑀲𑀼𑀢𑁆𑀢𑁂𑀦 𑀯𑀸𑀬𑀺𑀢𑀧𑀝𑀁. 𑀪𑀗𑁆𑀕𑀦𑁆𑀢𑀺 𑀔𑁄𑀫𑀲𑀼𑀢𑁆𑀢𑀸𑀤𑀻𑀦𑀺 𑀲𑀩𑁆𑀩𑀸𑀦𑀺, 𑀏𑀓𑀘𑁆𑀘𑀸𑀦𑀺 𑀯𑀸 𑀫𑀺𑀲𑁆𑀲𑁂𑀢𑁆𑀯𑀸 𑀯𑀸𑀬𑀺𑀢𑀁 𑀘𑀻𑀯𑀭𑀁. 𑀪𑀗𑁆𑀕𑀫𑁆𑀧𑀺 𑀯𑀸𑀓𑀫𑀬𑀫𑁂𑀯𑀸𑀢𑀺 𑀓𑁂𑀘𑀺. 𑀤𑀼𑀓𑀽𑀮𑀁 𑀧𑀢𑁆𑀢𑀼𑀡𑁆𑀡𑀁 𑀲𑁄𑀫𑀸𑀭𑀧𑀝𑀁 𑀘𑀻𑀦𑀧𑀝𑀁 𑀇𑀤𑁆𑀥𑀺𑀚𑀁 𑀤𑁂𑀯𑀤𑀺𑀦𑁆𑀦𑀦𑁆𑀢𑀺 𑀇𑀫𑀸𑀦𑀺 𑀧𑀦 𑀙 𑀘𑀻𑀯𑀭𑀸𑀦𑀺 𑀏𑀢𑁂𑀲𑀜𑁆𑀜𑁂𑀯 𑀅𑀦𑀼𑀮𑁄𑀫𑀸𑀦𑀻𑀢𑀺 𑀯𑀺𑀲𑀼𑀁 𑀦 𑀯𑀼𑀢𑁆𑀢𑀸𑀦𑀺. 𑀤𑀼𑀓𑀽𑀮𑀜𑁆𑀳𑀺 𑀲𑀸𑀡𑀲𑁆𑀲 𑀅𑀦𑀼𑀮𑁄𑀫𑀁 𑀯𑀸𑀓𑀫𑀬𑀢𑁆𑀢𑀸. ‘‘𑀧𑀢𑁆𑀢𑀼𑀡𑁆𑀡𑀁 𑀓𑁄𑀲𑁂𑀬𑁆𑀬𑀯𑀺𑀲𑁂𑀲𑁄’’𑀢𑀺 𑀅𑀪𑀺𑀥𑀸𑀦𑀓𑁄𑀲𑁂 𑀯𑀼𑀢𑁆𑀢𑀁. 𑀲𑁄𑀫𑀸𑀭𑀤𑁂𑀲𑁂, 𑀘𑀻𑀦𑀤𑁂𑀲𑁂 𑀘 𑀚𑀸𑀢𑀯𑀢𑁆𑀣𑀸𑀦𑀺 𑀲𑁄𑀫𑀸𑀭𑀘𑀻𑀦𑀧𑀝𑀸𑀦𑀺. 𑀧𑀢𑁆𑀢𑀼𑀡𑁆𑀡𑀸𑀤𑀻𑀦𑀺 𑀢𑀻𑀡𑀺 𑀓𑁄𑀲𑁂𑀬𑁆𑀬𑀲𑁆𑀲 𑀅𑀦𑀼𑀮𑁄𑀫𑀸𑀦𑀺 𑀧𑀸𑀡𑀓𑁂𑀳𑀺 𑀓𑀢𑀲𑀼𑀢𑁆𑀢𑀫𑀬𑀢𑁆𑀢𑀸. 𑀇𑀤𑁆𑀥𑀺𑀚𑀦𑁆𑀢𑀺 𑀏𑀳𑀺𑀪𑀺𑀓𑁆𑀔𑀽𑀦𑀁 𑀧𑀼𑀜𑁆𑀜𑀺𑀤𑁆𑀥𑀺𑀬𑀸 𑀦𑀺𑀩𑁆𑀩𑀢𑁆𑀢𑀘𑀻𑀯𑀭𑀁. 𑀓𑀧𑁆𑀧𑀭𑀼𑀓𑁆𑀔𑁂 𑀦𑀺𑀩𑁆𑀩𑀢𑁆𑀢𑀁, 𑀤𑁂𑀯𑀤𑀺𑀦𑁆𑀦𑀜𑁆𑀘 𑀔𑁄𑀫𑀸𑀤𑀻𑀦𑀁 𑀅𑀜𑁆𑀜𑀢𑀭𑀁 𑀳𑁄𑀢𑀻𑀢𑀺 𑀢𑁂𑀲𑀁 𑀲𑀩𑁆𑀩𑁂𑀲𑀁 𑀅𑀦𑀼𑀮𑁄𑀫𑀸𑀦𑀺. 𑀫𑀦𑀼𑀲𑁆𑀲𑀸𑀦𑀁 𑀧𑀓𑀢𑀺𑀯𑀺𑀤𑀢𑁆𑀣𑀺𑀁 𑀲𑀦𑁆𑀥𑀸𑀬 ‘‘𑀤𑁆𑀯𑁂 𑀯𑀺𑀤𑀢𑁆𑀣𑀺𑀬𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀇𑀫𑀺𑀦𑀸 𑀤𑀻𑀖𑀢𑁄 𑀯𑀟𑁆𑀠𑀓𑀻𑀳𑀢𑁆𑀣𑀧𑁆𑀧𑀫𑀸𑀡𑀁 𑀯𑀺𑀢𑁆𑀣𑀸𑀭𑀢𑁄 𑀢𑀢𑁄 𑀉𑀧𑀟𑁆𑀠𑀧𑁆𑀧𑀫𑀸𑀡𑀁 𑀯𑀺𑀓𑀧𑁆𑀧𑀦𑀼𑀧𑀕𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀢𑀣𑀸 𑀳𑀺 ‘‘𑀲𑀼𑀕𑀢𑀯𑀺𑀤𑀢𑁆𑀣𑀺 𑀦𑀸𑀫 𑀇𑀤𑀸𑀦𑀺 𑀫𑀚𑁆𑀛𑀺𑀫𑀲𑁆𑀲 𑀧𑀼𑀭𑀺𑀲𑀲𑁆𑀲 𑀢𑀺𑀲𑁆𑀲𑁄 𑀯𑀺𑀤𑀢𑁆𑀣𑀺𑀬𑁄, 𑀯𑀟𑁆𑀠𑀓𑀻𑀳𑀢𑁆𑀣𑁂𑀦 𑀤𑀺𑀬𑀟𑁆𑀠𑁄 𑀳𑀢𑁆𑀣𑁄 𑀳𑁄𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁩𑁪𑁮-𑁩𑁪𑁯) 𑀓𑀼𑀝𑀺𑀓𑀸𑀭𑀲𑀺𑀓𑁆𑀔𑀸𑀧𑀤𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀲𑀼𑀕𑀢𑀗𑁆𑀕𑀼𑀮𑁂𑀦 𑀤𑁆𑀯𑀸𑀤𑀲𑀗𑁆𑀕𑀼𑀮𑀸 𑀲𑀼𑀕𑀢𑀯𑀺𑀤𑀢𑁆𑀣𑀺 𑀯𑀟𑁆𑀠𑀓𑀻𑀳𑀢𑁆𑀣𑁂𑀦 𑀤𑀺𑀬𑀟𑁆𑀠𑁄 𑀳𑀢𑁆𑀣𑁄𑀢𑀺 𑀲𑀺𑀤𑁆𑀥𑀁. 𑀏𑀯𑀜𑁆𑀘 𑀓𑀢𑁆𑀯𑀸 ‘‘𑀲𑀼𑀕𑀢𑀗𑁆𑀕𑀼𑀮𑁂𑀦 𑀅𑀝𑁆𑀞𑀗𑁆𑀕𑀼𑀮𑀁 𑀯𑀟𑁆𑀠𑀓𑀻𑀳𑀢𑁆𑀣𑀧𑁆𑀧𑀫𑀸𑀡’’𑀦𑁆𑀢𑀺 𑀆𑀕𑀢𑀝𑁆𑀞𑀸𑀦𑁂𑀳𑀺 𑀘 𑀲𑀫𑁂𑀢𑀺.

𑀢𑀁 𑀅𑀢𑀺𑀓𑁆𑀓𑀸𑀫𑀬𑀢𑁄𑀢𑀺 𑀏𑀢𑁆𑀣 𑀢𑀦𑁆𑀢𑀺 𑀘𑀻𑀯𑀭𑀁, 𑀓𑀸𑀮𑀁 𑀯𑀸 𑀧𑀭𑀸𑀫𑀲𑀢𑀺. 𑀢𑀲𑁆𑀲 𑀬𑁄 𑀅𑀭𑀼𑀡𑁄𑀢𑀺 𑀘𑀻𑀯𑀭𑀼𑀧𑁆𑀧𑀸𑀤𑀤𑀺𑀯𑀲𑀲𑁆𑀲 𑀬𑁄 𑀅𑀢𑀺𑀓𑁆𑀓𑀦𑁆𑀢𑁄 𑀅𑀭𑀼𑀡𑁄. 𑀘𑀻𑀯𑀭𑀼𑀧𑁆𑀧𑀸𑀤𑀤𑀺𑀯𑀲𑁂𑀦 𑀲𑀤𑁆𑀥𑀺𑀦𑁆𑀢𑀺 𑀘𑀻𑀯𑀭𑀼𑀧𑁆𑀧𑀸𑀤𑀤𑀺𑀯𑀲𑀲𑁆𑀲 𑀆𑀤𑀺𑀪𑀽𑀢𑁂𑀦 𑀅𑀢𑀺𑀓𑁆𑀓𑀦𑁆𑀢𑀅𑀭𑀼𑀡𑁂𑀦 𑀲𑀤𑁆𑀥𑀺𑀦𑁆𑀢𑀺 𑀅𑀢𑁆𑀣𑁄, 𑀇𑀤𑀜𑁆𑀘 𑀪𑀕𑀯𑀢𑀸 ‘‘𑀤𑀲𑀸𑀳𑀧𑀭𑀫’’𑀦𑁆𑀢𑀺 𑀯𑀢𑁆𑀯𑀸 𑀧𑀼𑀦 ‘‘𑀏𑀓𑀸𑀤𑀲𑁂 𑀅𑀭𑀼𑀡𑀼𑀕𑁆𑀕𑀫𑀦𑁂’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀧𑀼𑀩𑁆𑀩𑀸𑀧𑀭𑀲𑀁𑀲𑀦𑁆𑀤𑀦𑀢𑁆𑀣𑀁 𑀲𑀤𑁆𑀤𑀢𑁄 𑀕𑀫𑁆𑀫𑀫𑀸𑀦𑀫𑁆𑀧𑀺 ‘‘𑀘𑀻𑀯𑀭𑀼𑀧𑁆𑀧𑀸𑀤𑀤𑀺𑀯𑀲𑁂𑀦 𑀲𑀤𑁆𑀥𑀺’’𑀦𑁆𑀢𑀺 𑀏𑀯𑀁 𑀯𑀼𑀢𑁆𑀢𑀁. ‘‘𑀤𑀲𑀫𑁂 𑀅𑀭𑀼𑀡𑁂’’𑀢𑀺 𑀯𑀼𑀢𑁆𑀢𑁂 𑀏𑀯 𑀳𑀺 𑀤𑀲𑀸𑀳𑀧𑀭𑀫𑁂𑀦 𑀲𑀤𑁆𑀥𑀺𑀁 𑀲𑀫𑁂𑀢𑀺. 𑀤𑀺𑀯𑀲𑀧𑀭𑀺𑀬𑁄𑀲𑀸𑀦𑀲𑁆𑀲 𑀅𑀯𑀥𑀺𑀪𑀽𑀢𑀅𑀦𑀸𑀕𑀢𑀸𑀭𑀼𑀡𑀯𑀲𑁂𑀦 𑀳𑀺 𑀤𑀺𑀯𑀲𑀁 𑀅𑀢𑀺𑀓𑁆𑀓𑀦𑁆𑀢𑀁 𑀦𑀸𑀫 𑀳𑁄𑀢𑀺, 𑀦 𑀧𑀦 𑀤𑀺𑀯𑀲𑀲𑁆𑀲 𑀆𑀤𑀺𑀪𑀽𑀢𑀸𑀭𑀼𑀡𑀯𑀲𑁂𑀦 𑀧𑀭𑀺𑀯𑀸𑀲𑀸𑀤𑀻𑀲𑀼 𑀢𑀣𑀸 𑀅𑀕𑁆𑀕𑀳𑀡𑀢𑁄, 𑀇𑀥 𑀧𑀦 𑀪𑀕𑀯𑀢𑀸 𑀤𑀺𑀯𑀲𑀲𑁆𑀲 𑀆𑀤𑀺𑀅𑀦𑁆𑀢𑀧𑀭𑀺𑀘𑁆𑀙𑁂𑀤𑀤𑀲𑁆𑀲𑀦𑀯𑀲𑁂𑀦 ‘‘𑀏𑀓𑀸𑀤𑀲𑁂 𑀅𑀭𑀼𑀡𑀼𑀕𑁆𑀕𑀫𑀦𑁂’’𑀢𑀺 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀅𑀝𑁆𑀞𑀓𑀣𑀸𑀬𑀁 𑀤𑀺𑀯𑀲𑀲𑁆𑀲 𑀆𑀤𑀺𑀪𑀽𑀢𑀁 𑀢𑀁𑀤𑀺𑀯𑀲𑀦𑀺𑀲𑁆𑀲𑀺𑀢𑀫𑁆𑀧𑀺 𑀅𑀭𑀼𑀡𑀁 𑀕𑀳𑁂𑀢𑁆𑀯𑀸 ‘‘𑀏𑀓𑀸𑀤𑀲𑁂 𑀅𑀭𑀼𑀡𑀼𑀕𑁆𑀕𑀫𑀦𑁂 𑀦𑀺𑀲𑁆𑀲𑀕𑁆𑀕𑀺𑀬𑀁 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁. 𑀅𑀭𑀼𑀡𑁄𑀢𑀺 𑀘𑁂𑀢𑁆𑀣 𑀲𑀽𑀭𑀺𑀬𑀼𑀕𑁆𑀕𑀫𑀦𑀲𑁆𑀲 𑀧𑀼𑀭𑁂𑀘𑀭𑁄 𑀯𑀟𑁆𑀠𑀦𑀖𑀦𑀭𑀢𑁆𑀢𑁄 𑀧𑀪𑀸𑀯𑀺𑀲𑁂𑀲𑁄𑀢𑀺 𑀤𑀝𑁆𑀞𑀩𑁆𑀩𑁄.

𑀯𑀘𑀦𑀻𑀬𑁄𑀢𑀺 𑀲𑀗𑁆𑀖𑀸𑀧𑁂𑀓𑁆𑀔𑁄. 𑀯𑀘𑀦𑀪𑁂𑀤𑁄𑀢𑀺 ‘‘𑀜𑀢𑁆𑀢𑀺𑀬𑀁 𑀤𑁆𑀯𑁂 𑀆𑀧𑀢𑁆𑀢𑀺𑀬𑁄 𑀲𑀭𑀢𑀻’’𑀢𑀺𑀆𑀤𑀺𑀦𑀸 𑀯𑀢𑁆𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁪𑁬𑁮. ‘‘𑀦 𑀇𑀥 𑀲𑀜𑁆𑀜𑀸 𑀭𑀓𑁆𑀔𑀢𑀻’’𑀢𑀺 𑀇𑀤𑀁 𑀯𑁂𑀫𑀢𑀺𑀓𑀜𑁆𑀘 𑀅𑀦𑀢𑀺𑀓𑁆𑀓𑀦𑁆𑀢𑀲𑀜𑁆𑀜𑀜𑁆𑀘 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀬𑁄𑀧𑀺 𑀏𑀯𑀁𑀲𑀜𑁆𑀜𑀻 𑀢𑀲𑁆𑀲𑀧𑀻𑀢𑀺 𑀬𑁄 𑀅𑀦𑀢𑀺𑀓𑁆𑀓𑀦𑁆𑀢𑀲𑀜𑁆𑀜𑀻, 𑀯𑁂𑀫𑀢𑀺𑀓𑁄 𑀯𑀸, 𑀢𑀲𑁆𑀲𑀧𑀻𑀢𑀺 𑀅𑀢𑁆𑀣𑁄. 𑀅𑀦𑀝𑁆𑀞𑀢𑁄 𑀅𑀯𑀺𑀮𑀼𑀢𑁆𑀢𑀲𑁆𑀲 𑀯𑀺𑀲𑁂𑀲𑀫𑀸𑀳 ‘‘𑀧𑀲𑀬𑁆𑀳𑀸𑀯𑀳𑀸𑀭𑀯𑀲𑁂𑀦𑀸’’𑀢𑀺. 𑀣𑁂𑀬𑁆𑀬𑀸𑀯𑀳𑀸𑀭𑀯𑀲𑁂𑀦 𑀕𑀳𑀺𑀢𑀫𑁆𑀧𑀺 𑀇𑀥 𑀦𑀝𑁆𑀞𑀁.

𑀅𑀦𑀸𑀧𑀢𑁆𑀢𑀺 𑀅𑀜𑁆𑀜𑁂𑀦 𑀓𑀢𑀁 𑀧𑀝𑀺𑀮𑀪𑀺𑀢𑁆𑀯𑀸𑀢𑀺𑀆𑀤𑀺 𑀦𑀺𑀲𑀻𑀤𑀦𑀲𑀦𑁆𑀣𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀬𑁂𑀦 𑀳𑀺 𑀧𑀼𑀭𑀸𑀡𑀲𑀦𑁆𑀣𑀢𑀲𑁆𑀲 𑀲𑀸𑀫𑀦𑁆𑀢𑀸 𑀲𑀼𑀕𑀢𑀯𑀺𑀤𑀢𑁆𑀣𑀺𑀁 𑀅𑀦𑀸𑀤𑀺𑀬𑀺𑀢𑁆𑀯𑀸 𑀦𑀯𑀁 𑀦𑀺𑀲𑀻𑀤𑀦𑀲𑀦𑁆𑀣𑀢𑀁 𑀓𑀢𑀁, 𑀢𑀲𑁆𑀲 𑀢𑀁 𑀦𑀺𑀲𑁆𑀲𑀕𑁆𑀕𑀺𑀬𑀫𑁆𑀧𑀺 𑀢𑀢𑁄 𑀅𑀜𑁆𑀜𑀲𑁆𑀲 𑀧𑀝𑀺𑀮𑀪𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺𑀓𑀭𑀦𑁆𑀢𑀺 𑀲𑀺𑀚𑁆𑀛𑀦𑀢𑁄 𑀅𑀬𑀫𑀢𑁆𑀣𑁄 𑀲𑀩𑁆𑀩𑀦𑀺𑀲𑁆𑀲𑀕𑁆𑀕𑀺𑀬𑁂𑀲𑀼𑀧𑀺 𑀲𑀺𑀚𑁆𑀛𑀢𑀺.

𑁪𑁬𑁯. 𑀢𑀺𑀘𑀻𑀯𑀭𑀁 𑀅𑀥𑀺𑀝𑁆𑀞𑀸𑀢𑀼𑀦𑁆𑀢𑀺 𑀲𑀗𑁆𑀖𑀸𑀝𑀺𑀆𑀤𑀺𑀦𑀸𑀫𑁂𑀦 𑀅𑀥𑀺𑀝𑁆𑀞𑀸𑀢𑀼𑀁. ‘‘𑀦 𑀯𑀺𑀓𑀧𑁆𑀧𑁂𑀢𑀼’’𑀦𑁆𑀢𑀺 𑀇𑀫𑀺𑀦𑀸 𑀦𑀸𑀫𑁂𑀦 𑀦 𑀯𑀺𑀓𑀧𑁆𑀧𑁂𑀢𑀼𑀁, 𑀏𑀢𑁂𑀦 𑀯𑀺𑀓𑀧𑁆𑀧𑀺𑀢𑀢𑀺𑀘𑀻𑀯𑀭𑁄 𑀢𑁂𑀘𑀻𑀯𑀭𑀺𑀓𑁄 𑀦 𑀳𑁄𑀢𑀺. 𑀢𑀲𑁆𑀲 𑀢𑀲𑁆𑀫𑀺𑀁 𑀅𑀥𑀺𑀝𑁆𑀞𑀺𑀢𑀢𑀺𑀘𑀻𑀯𑀭𑁂 𑀯𑀺𑀬 𑀅𑀯𑀺𑀧𑁆𑀧𑀯𑀸𑀲𑀸𑀤𑀺𑀦𑀸 𑀓𑀢𑁆𑀢𑀩𑁆𑀩𑀯𑀺𑀥𑀺 𑀦 𑀓𑀸𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀢𑀺, 𑀦 𑀧𑀦 𑀯𑀺𑀓𑀧𑁆𑀧𑀦𑁂 𑀤𑁄𑀲𑁄𑀢𑀺. 𑀢𑀢𑁄 𑀧𑀭𑀦𑁆𑀢𑀺 𑀘𑀢𑀼𑀫𑀸𑀲𑀢𑁄 𑀧𑀭𑀁 𑀯𑀺𑀓𑀧𑁆𑀧𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀅𑀦𑀼𑀜𑁆𑀜𑀸𑀢𑀦𑁆𑀢𑀺 𑀓𑁂𑀘𑀺 𑀯𑀤𑀦𑁆𑀢𑀺, 𑀅𑀜𑁆𑀜𑁂 𑀧𑀦 ‘‘𑀯𑀺𑀓𑀧𑁆𑀧𑁂𑀢𑁆𑀯𑀸 𑀬𑀸𑀯 𑀆𑀕𑀸𑀫𑀺𑀯𑀲𑁆𑀲𑀸𑀦𑀁, 𑀢𑀸𑀯 𑀞𑀧𑁂𑀢𑀼𑀫𑁂𑀯 𑀯𑀝𑁆𑀝𑀢𑀻’’𑀢𑀺 𑀯𑀤𑀦𑁆𑀢𑀺, 𑀅𑀧𑀭𑁂 𑀧𑀦 ‘‘𑀯𑀺𑀓𑀧𑁆𑀧𑀦𑁂 𑀦 𑀤𑁄𑀲𑁄, 𑀢𑀣𑀸 𑀯𑀺𑀓𑀧𑁆𑀧𑀺𑀢𑀁 𑀧𑀭𑀺𑀓𑁆𑀔𑀸𑀭𑀸𑀤𑀺𑀦𑀸𑀫𑁂𑀦 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩’’𑀦𑁆𑀢𑀺 𑀯𑀤𑀦𑁆𑀢𑀺.

𑀫𑀼𑀝𑁆𑀞𑀺𑀧𑀜𑁆𑀘𑀓𑀦𑁆𑀢𑀺 𑀫𑀼𑀝𑁆𑀞𑀺𑀬𑀸 𑀉𑀧𑀮𑀓𑁆𑀔𑀺𑀢𑀁 𑀧𑀜𑁆𑀘𑀓𑀁, 𑀘𑀢𑀼𑀳𑀢𑁆𑀣𑁂 𑀫𑀺𑀦𑀺𑀢𑁆𑀯𑀸 𑀧𑀜𑁆𑀘𑀫𑀁 𑀳𑀢𑁆𑀣𑀁 𑀫𑀼𑀝𑁆𑀞𑀺𑀁 𑀓𑀢𑁆𑀯𑀸 𑀫𑀺𑀦𑀺𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀓𑁂𑀘𑀺 𑀧𑀦 ‘‘𑀫𑀼𑀝𑁆𑀞𑀺𑀳𑀢𑁆𑀣𑀸𑀦𑀁 𑀧𑀜𑁆𑀘𑀓𑀁 𑀫𑀼𑀝𑁆𑀞𑀺𑀧𑀜𑁆𑀘𑀓𑀁, 𑀢𑀲𑁆𑀫𑀸 𑀧𑀜𑁆𑀘𑀧𑀺 𑀳𑀢𑁆𑀣𑁂 𑀫𑀼𑀝𑁆𑀞𑀺𑀁 𑀓𑀢𑁆𑀯𑀸𑀯 𑀫𑀺𑀦𑀺𑀢𑀩𑁆𑀩𑀸’’𑀢𑀺 𑀯𑀤𑀦𑁆𑀢𑀺. 𑀫𑀼𑀝𑁆𑀞𑀺𑀢𑁆𑀢𑀺𑀓𑀦𑁆𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀤𑁆𑀯𑀺𑀳𑀢𑁆𑀣𑁂𑀦 𑀅𑀦𑁆𑀢𑀭𑀯𑀸𑀲𑀓𑁂𑀦 𑀢𑀺𑀫𑀡𑁆𑀟𑀮𑀁 𑀧𑀝𑀺𑀘𑁆𑀙𑀸𑀤𑁂𑀢𑀼𑀁 𑀲𑀓𑁆𑀓𑀸𑀢𑀺 𑀆𑀳 ‘‘𑀧𑀸𑀭𑀼𑀧𑀦𑁂𑀦𑀸’’𑀢𑀺𑀆𑀤𑀺. 𑀅𑀢𑀺𑀭𑁂𑀓𑀦𑁆𑀢𑀺 𑀲𑀼𑀕𑀢𑀘𑀻𑀯𑀭𑀧𑁆𑀧𑀫𑀸𑀡𑀢𑁄 𑀅𑀥𑀺𑀓𑀁. 𑀊𑀦𑀓𑀦𑁆𑀢𑀺 𑀫𑀼𑀝𑁆𑀞𑀺𑀧𑀜𑁆𑀘𑀓𑀸𑀤𑀺𑀢𑁄 𑀊𑀦𑀓𑀁, 𑀢𑁂𑀦 𑀘 𑀢𑁂𑀲𑀼 𑀢𑀺𑀘𑀻𑀯𑀭𑀸𑀥𑀺𑀝𑁆𑀞𑀸𑀦𑀁 𑀦 𑀭𑀼𑀳𑀢𑀻𑀢𑀺 𑀤𑀲𑁆𑀲𑁂𑀢𑀺.

𑀇𑀫𑀁 𑀲𑀗𑁆𑀖𑀸𑀝𑀺𑀁 𑀧𑀘𑁆𑀘𑀼𑀤𑁆𑀥𑀭𑀸𑀫𑀻𑀢𑀺 𑀇𑀫𑀁 𑀲𑀗𑁆𑀖𑀸𑀝𑀺𑀅𑀥𑀺𑀝𑁆𑀞𑀸𑀦𑀁 𑀉𑀓𑁆𑀔𑀺𑀧𑀸𑀫𑀺 𑀧𑀭𑀺𑀘𑁆𑀘𑀚𑀸𑀫𑀻𑀢𑀺 𑀅𑀢𑁆𑀣𑁄. 𑀓𑀸𑀬𑀯𑀺𑀓𑀸𑀭𑀁 𑀓𑀭𑁄𑀦𑁆𑀢𑁂𑀦𑀸𑀢𑀺 𑀳𑀢𑁆𑀣𑁂𑀦 𑀘𑀻𑀯𑀭𑀁 𑀧𑀭𑀸𑀫𑀲𑀦𑁆𑀢𑁂𑀦, 𑀘𑀸𑀮𑁂𑀦𑁆𑀢𑁂𑀦 𑀯𑀸. 𑀯𑀸𑀘𑀸𑀬 𑀅𑀥𑀺𑀝𑁆𑀞𑀸𑀢𑀩𑁆𑀩𑀸𑀢𑀺 𑀏𑀢𑁆𑀣 𑀓𑀸𑀬𑁂𑀦𑀧𑀺 𑀘𑀸𑀮𑁂𑀢𑁆𑀯𑀸 𑀯𑀸𑀘𑀫𑁆𑀧𑀺 𑀪𑀺𑀦𑁆𑀤𑀺𑀢𑁆𑀯𑀸 𑀓𑀸𑀬𑀯𑀸𑀘𑀸𑀳𑀺 𑀅𑀥𑀺𑀝𑁆𑀞𑀸𑀦𑀫𑁆𑀧𑀺 𑀲𑀗𑁆𑀕𑀳𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁 ‘‘𑀓𑀸𑀬𑁂𑀦 𑀅𑀨𑀼𑀲𑀺𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸. 𑀤𑀼𑀯𑀺𑀥𑀦𑁆𑀢𑀺 𑀅𑀳𑀢𑁆𑀣𑀧𑀸𑀲𑀳𑀢𑁆𑀣𑀧𑀸𑀲𑀯𑀲𑁂𑀦 𑀤𑀼𑀯𑀺𑀥𑀁. 𑀢𑀢𑁆𑀣 𑀳𑀢𑁆𑀣𑀧𑀸𑀲𑁄 𑀦𑀸𑀫 𑀅𑀟𑁆𑀠𑀢𑁂𑀬𑁆𑀬𑀳𑀢𑁆𑀣𑁄 𑀯𑀼𑀘𑁆𑀘𑀢𑀺. 𑀤𑁆𑀯𑀸𑀤𑀲𑀳𑀢𑁆𑀣𑀦𑁆𑀢𑀺 𑀓𑁂𑀘𑀺 𑀯𑀤𑀦𑁆𑀢𑀺, 𑀢𑀁 𑀇𑀥 𑀦 𑀲𑀫𑁂𑀢𑀺. ‘‘𑀲𑀸𑀫𑀦𑁆𑀢𑀯𑀺𑀳𑀸𑀭𑁂’’𑀢𑀺 𑀇𑀤𑀁 𑀞𑀧𑀺𑀢𑀝𑁆𑀞𑀸𑀦𑀲𑀮𑁆𑀮𑀓𑁆𑀔𑀡𑀬𑁄𑀕𑁆𑀕𑁂 𑀞𑀺𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑀢𑁄 𑀤𑀽𑀭𑁂 𑀞𑀺𑀢𑀫𑁆𑀧𑀺 𑀞𑀧𑀺𑀢𑀝𑁆𑀞𑀸𑀦𑀁 𑀲𑀮𑁆𑀮𑀓𑁆𑀔𑁂𑀦𑁆𑀢𑁂𑀦 𑀅𑀥𑀺𑀝𑁆𑀞𑀸𑀢𑀩𑁆𑀩𑀫𑁂𑀯. 𑀢𑀢𑁆𑀣𑀧𑀺 𑀘𑀻𑀯𑀭𑀲𑁆𑀲 𑀞𑀧𑀺𑀢𑀪𑀸𑀯𑀲𑀮𑁆𑀮𑀓𑁆𑀔𑀡𑀫𑁂𑀯 𑀧𑀫𑀸𑀡𑀁. 𑀦 𑀳𑀺 𑀲𑀓𑁆𑀓𑀸 𑀲𑀩𑁆𑀩𑀣𑀸 𑀞𑀸𑀦𑀁 𑀲𑀮𑁆𑀮𑀓𑁆𑀔𑁂𑀢𑀼𑀁. 𑀏𑀓𑀲𑁆𑀫𑀺𑀁 𑀯𑀺𑀳𑀸𑀭𑁂 𑀞𑀧𑁂𑀢𑁆𑀯𑀸 𑀢𑀢𑁄 𑀅𑀜𑁆𑀜𑀲𑁆𑀫𑀺𑀁 𑀞𑀧𑀺𑀢𑀦𑁆𑀢𑀺 𑀅𑀥𑀺𑀝𑁆𑀞𑀸𑀢𑀼𑀁 𑀦 𑀯𑀝𑁆𑀝𑀢𑀺. 𑀓𑁂𑀘𑀺 𑀧𑀦 ‘‘𑀢𑀣𑀸𑀧𑀺 𑀅𑀥𑀺𑀝𑁆𑀞𑀺𑀢𑁂 𑀦 𑀤𑁄𑀲𑁄’’𑀢𑀺 𑀯𑀤𑀦𑁆𑀢𑀺, 𑀢𑀁 𑀅𑀝𑁆𑀞𑀓𑀣𑀸𑀬 𑀦 𑀲𑀫𑁂𑀢𑀺, 𑀯𑀻𑀫𑀁𑀲𑀺𑀢𑀩𑁆𑀩𑀁. 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀞𑀧𑀺𑀢𑀯𑀢𑁆𑀣𑁂𑀳𑀻𑀢𑀺 𑀧𑀭𑀺𑀓𑁆𑀔𑀸𑀭𑀘𑁄𑀴𑀦𑀸𑀫𑁂𑀦 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀞𑀧𑀺𑀢𑀯𑀢𑁆𑀣𑁂𑀳𑀺, 𑀢𑁂𑀦𑁂𑀯 ‘‘𑀇𑀫𑀁 𑀧𑀘𑁆𑀘𑀼𑀤𑁆𑀥𑀭𑀸𑀫𑀻’’𑀢𑀺 𑀧𑀭𑀺𑀓𑁆𑀔𑀸𑀭𑀘𑁄𑀴𑀲𑁆𑀲 𑀧𑀘𑁆𑀘𑀼𑀤𑁆𑀥𑀸𑀭𑀁 𑀤𑀲𑁆𑀲𑁂𑀢𑀺. 𑀏𑀢𑁂𑀦 𑀘 𑀢𑁂𑀘𑀻𑀯𑀭𑀥𑀼𑀢𑀗𑁆𑀕𑀁 𑀧𑀭𑀺𑀳𑀭𑀦𑁆𑀢𑁂𑀦 𑀧𑀁𑀲𑀼𑀓𑀽𑀮𑀸𑀤𑀺𑀯𑀲𑁂𑀦 𑀮𑀤𑁆𑀥𑀁 𑀯𑀢𑁆𑀣𑀁 𑀤𑀲𑀸𑀳𑀩𑁆𑀪𑀦𑁆𑀢𑀭𑁂 𑀓𑀢𑁆𑀯𑀸 𑀭𑀚𑀺𑀢𑁆𑀯𑀸 𑀧𑀸𑀭𑀼𑀧𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁂𑀦 𑀧𑀭𑀺𑀓𑁆𑀔𑀸𑀭𑀘𑁄𑀴𑀯𑀲𑁂𑀦 𑀅𑀥𑀺𑀝𑁆𑀞𑀳𑀺𑀢𑁆𑀯𑀸𑀯 𑀤𑀲𑀸𑀳𑀁 𑀅𑀢𑀺𑀓𑁆𑀓𑀫𑁂𑀢𑀩𑁆𑀩𑀁, 𑀇𑀢𑀭𑀣𑀸 𑀦𑀺𑀲𑁆𑀲𑀕𑁆𑀕𑀺𑀬𑀁 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀢𑁂𑀦𑁂𑀯 ‘‘𑀭𑀚𑀺𑀢𑀓𑀸𑀮𑀢𑁄 𑀧𑀦 𑀧𑀝𑁆𑀞𑀸𑀬 𑀦𑀺𑀓𑁆𑀔𑀺𑀧𑀺𑀢𑀼𑀁 𑀦 𑀯𑀝𑁆𑀝𑀢𑀺, 𑀥𑀼𑀢𑀗𑁆𑀕𑀘𑁄𑀭𑁄 𑀦𑀸𑀫 𑀳𑁄𑀢𑀻’’𑀢𑀺 (𑀯𑀺𑀲𑀼𑀤𑁆𑀥𑀺. 𑁧.𑁨𑁫) 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀯𑀼𑀢𑁆𑀢𑀁. ‘‘𑀧𑀼𑀦 𑀅𑀥𑀺𑀝𑁆𑀞𑀸𑀢𑀩𑁆𑀩𑀸𑀦𑀻’’𑀢𑀺 𑀇𑀤𑀜𑁆𑀘 𑀲𑀗𑁆𑀖𑀸𑀝𑀺𑀆𑀤𑀺𑀢𑀺𑀘𑀻𑀯𑀭𑀦𑀸𑀫𑁂𑀦 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀼𑀓𑀸𑀫𑀲𑁆𑀲 𑀯𑀲𑁂𑀦 𑀯𑀼𑀢𑁆𑀢𑀁, 𑀇𑀢𑀭𑀲𑁆𑀲 𑀧𑀦 𑀧𑀼𑀭𑀺𑀫𑀸𑀥𑀺𑀝𑁆𑀞𑀸𑀦𑀫𑁂𑀯 𑀅𑀮𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. ‘‘𑀧𑀼𑀦 𑀅𑀥𑀺𑀝𑁆𑀞𑀸𑀢𑀩𑁆𑀩’’𑀦𑁆𑀢𑀺 𑀇𑀫𑀺𑀦𑀸 𑀓𑀧𑁆𑀧𑀩𑀺𑀦𑁆𑀤𑀼𑀧𑀺 𑀤𑀸𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀺.

𑀩𑀤𑁆𑀥𑀲𑀻𑀫𑀸𑀬𑀁 𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸𑀲𑀫𑁆𑀫𑀼𑀢𑀺𑀲𑀫𑁆𑀪𑀯𑀢𑁄 𑀦 𑀢𑀢𑁆𑀣 𑀤𑀼𑀧𑁆𑀧𑀭𑀺𑀳𑀸𑀭𑀢𑀸𑀢𑀺 𑀆𑀳 ‘‘𑀅𑀩𑀤𑁆𑀥𑀲𑀻𑀫𑀸𑀬𑀁 𑀤𑀼𑀧𑁆𑀧𑀭𑀺𑀳𑀸𑀭’’𑀦𑁆𑀢𑀺.

𑀅𑀢𑀺𑀭𑀺𑀢𑁆𑀢𑀧𑁆𑀧𑀫𑀸𑀡𑀸𑀬 𑀙𑁂𑀤𑀦𑀓𑀁 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀆𑀳 ‘‘𑀅𑀦𑀢𑀺𑀭𑀺𑀢𑁆𑀢𑀧𑁆𑀧𑀫𑀸𑀡𑀸’’𑀢𑀺. 𑀢𑀢𑁄 𑀧𑀭𑀁 𑀧𑀘𑁆𑀘𑀼𑀤𑁆𑀥𑀭𑀺𑀢𑁆𑀯𑀸 𑀯𑀺𑀓𑀧𑁆𑀧𑁂𑀢𑀩𑁆𑀩𑀸𑀢𑀺 𑀯𑀲𑁆𑀲𑀺𑀓𑀫𑀸𑀲𑀢𑁄 𑀧𑀭𑀁 𑀅𑀥𑀺𑀝𑁆𑀞𑀸𑀦𑀁 𑀧𑀘𑁆𑀘𑀼𑀤𑁆𑀥𑀭𑀺𑀢𑁆𑀯𑀸 𑀯𑀺𑀓𑀧𑁆𑀧𑁂𑀢𑀩𑁆𑀩𑀸, 𑀇𑀫𑀺𑀦𑀸 𑀘𑀢𑀼𑀦𑁆𑀦𑀁 𑀯𑀲𑁆𑀲𑀺𑀓𑀫𑀸𑀲𑀸𑀦𑀁 𑀉𑀧𑀭𑀺 𑀅𑀥𑀺𑀝𑁆𑀞𑀸𑀦𑀁 𑀢𑀺𑀝𑁆𑀞𑀢𑀻𑀢𑀺 𑀯𑀺𑀜𑁆𑀜𑀸𑀬𑀢𑀺 𑀢𑀢𑁄 𑀧𑀘𑁆𑀘𑀼𑀤𑁆𑀥𑀭𑀸𑀬𑁄𑀕𑀸. 𑀬𑀜𑁆𑀘 𑀫𑀸𑀢𑀺𑀓𑀸𑀝𑁆𑀞𑀓𑀣𑀸𑀬𑀁 ‘‘𑀯𑀲𑁆𑀲𑀺𑀓𑀲𑀸𑀝𑀺𑀓𑀸 𑀯𑀲𑁆𑀲𑀸𑀦𑀫𑀸𑀲𑀸𑀢𑀺𑀓𑁆𑀓𑀫𑁂𑀦𑀸𑀧𑀺, 𑀓𑀡𑁆𑀟𑀼𑀧𑀝𑀺𑀘𑁆𑀙𑀸𑀤𑀺 𑀆𑀩𑀸𑀥𑀯𑀽𑀧𑀲𑀫𑁂𑀦𑀸𑀧𑀺 𑀅𑀥𑀺𑀝𑁆𑀞𑀸𑀦𑀁 𑀯𑀺𑀚𑀳𑀢𑀻’’𑀢𑀺 (𑀓𑀗𑁆𑀔𑀸. 𑀅𑀝𑁆𑀞. 𑀓𑀣𑀺𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸) 𑀯𑀼𑀢𑁆𑀢𑀁, 𑀢𑀁 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬𑀁 𑀦𑀢𑁆𑀣𑀺. 𑀧𑀭𑀺𑀯𑀸𑀭𑀝𑁆𑀞𑀓𑀣𑀸𑀬𑀜𑁆𑀘 ‘‘𑀅𑀢𑁆𑀣𑀸𑀧𑀢𑁆𑀢𑀺 𑀳𑁂𑀫𑀦𑁆𑀢𑁂 𑀆𑀧𑀚𑁆𑀚𑀢𑀺, 𑀦𑁄 𑀕𑀺𑀫𑁆𑀳𑁂’’𑀢𑀺 𑀏𑀢𑁆𑀣 𑀇𑀤𑀁 𑀯𑀼𑀢𑁆𑀢𑀁 ‘‘𑀓𑀢𑁆𑀢𑀺𑀓𑀧𑀼𑀡𑁆𑀡𑀫𑀸𑀲𑀺𑀬𑀸 𑀧𑀘𑁆𑀙𑀺𑀫𑁂 𑀧𑀸𑀝𑀺𑀧𑀤𑀤𑀺𑀯𑀲𑁂 𑀯𑀺𑀓𑀧𑁆𑀧𑁂𑀢𑁆𑀯𑀸 𑀞𑀧𑀺𑀢𑀁 𑀯𑀲𑁆𑀲𑀺𑀓𑀲𑀸𑀝𑀺𑀓𑀁 𑀦𑀺𑀯𑀸𑀲𑁂𑀦𑁆𑀢𑁄 𑀳𑁂𑀫𑀦𑁆𑀢𑁂 𑀆𑀧𑀚𑁆𑀚𑀢𑀺, 𑀓𑀼𑀭𑀼𑀦𑁆𑀤𑀺𑀬𑀁 𑀧𑀦 ‘𑀓𑀢𑁆𑀢𑀺𑀓𑀧𑀼𑀡𑁆𑀡𑀫𑀤𑀺𑀯𑀲𑁂 𑀅𑀧𑀘𑁆𑀘𑀼𑀤𑁆𑀥𑀭𑀺𑀢𑁆𑀯𑀸 𑀳𑁂𑀫𑀦𑁆𑀢𑁂 𑀆𑀧𑀚𑁆𑀚𑀢𑀻’𑀢𑀺 𑀯𑀼𑀢𑁆𑀢𑀁, 𑀢𑀫𑁆𑀧𑀺 𑀲𑀼𑀯𑀼𑀢𑁆𑀢𑀁, ‘𑀘𑀢𑀼𑀫𑀸𑀲𑀁 𑀅𑀥𑀺𑀝𑁆𑀞𑀸𑀢𑀼𑀁 𑀢𑀢𑁄 𑀧𑀭𑀁 𑀯𑀺𑀓𑀧𑁆𑀧𑁂𑀢𑀼’𑀦𑁆𑀢𑀺 𑀳𑀺 𑀯𑀼𑀢𑁆𑀢’’𑀦𑁆𑀢𑀺 (𑀧𑀭𑀺. 𑀅𑀝𑁆𑀞. 𑁩𑁨𑁩). 𑀢𑀢𑁆𑀣 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀦𑀺𑀯𑀸𑀲𑀦𑀧𑀘𑁆𑀘𑀬𑀸 𑀤𑀼𑀓𑁆𑀓𑀝𑀁 𑀯𑀼𑀢𑁆𑀢𑀁, 𑀓𑀼𑀭𑀼𑀦𑁆𑀤𑀝𑁆𑀞𑀓𑀣𑀸𑀬𑀁 𑀧𑀦 𑀅𑀧𑀘𑁆𑀘𑀼𑀤𑁆𑀥𑀸𑀭𑀧𑀘𑁆𑀘𑀬𑀸, 𑀢𑀲𑁆𑀫𑀸 𑀓𑀼𑀭𑀼𑀦𑁆𑀤𑀺𑀬𑀁 𑀯𑀼𑀢𑁆𑀢𑀦𑀬𑁂𑀦𑀸𑀧𑀺 𑀯𑀲𑁆𑀲𑀺𑀓𑀲𑀸𑀝𑀺𑀓𑀸 𑀯𑀲𑁆𑀲𑀸𑀦𑀫𑀸𑀲𑀸𑀢𑀺𑀓𑁆𑀓𑀫𑁂𑀧𑀺 𑀅𑀥𑀺𑀝𑁆𑀞𑀸𑀦𑀁 𑀦 𑀯𑀺𑀚𑀳𑀢𑀻𑀢𑀺 𑀧𑀜𑁆𑀜𑀸𑀬𑀢𑀺. 𑀅𑀥𑀺𑀝𑁆𑀞𑀸𑀦𑀯𑀺𑀚𑀳𑀦𑁂𑀲𑀼 𑀘 𑀯𑀲𑁆𑀲𑀸𑀦𑀫𑀸𑀲𑀆𑀩𑀸𑀥𑀸𑀦𑀁 𑀯𑀺𑀕𑀫𑁂𑀦 𑀯𑀺𑀚𑀳𑀦𑀁 𑀫𑀸𑀢𑀺𑀓𑀸𑀝𑁆𑀞𑀓𑀣𑀸𑀬𑀫𑁆𑀧𑀺 𑀦 𑀉𑀤𑁆𑀥𑀝𑀁, 𑀢𑀲𑁆𑀫𑀸 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬𑀁 𑀆𑀕𑀢𑀦𑀬𑁂𑀦 𑀬𑀸𑀯 𑀧𑀘𑁆𑀘𑀼𑀤𑁆𑀥𑀸𑀭𑀸 𑀅𑀥𑀺𑀝𑁆𑀞𑀸𑀦𑀁 𑀢𑀺𑀝𑁆𑀞𑀢𑀻𑀢𑀺 𑀕𑀳𑁂𑀢𑀩𑁆𑀩𑀁. 𑀦𑀳𑀸𑀦𑀢𑁆𑀣𑀸𑀬 𑀅𑀦𑀼𑀜𑁆𑀜𑀸𑀢𑀢𑁆𑀢𑀸 ‘‘𑀯𑀡𑁆𑀡𑀪𑁂𑀤𑀫𑀢𑁆𑀢𑀭𑀢𑁆𑀢𑀸𑀧𑀺 𑀘𑁂𑀲𑀸 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀁. ‘‘𑀤𑁆𑀯𑁂 𑀧𑀦 𑀦 𑀯𑀝𑁆𑀝𑀦𑁆𑀢𑀻’’𑀢𑀺 𑀇𑀫𑀺𑀦𑀸 𑀲𑀗𑁆𑀖𑀸𑀝𑀺𑀆𑀤𑀻𑀲𑀼 𑀯𑀺𑀬 𑀤𑀼𑀢𑀺𑀬𑁂 𑀅𑀥𑀺𑀝𑁆𑀞𑀸𑀦𑀁 𑀦 𑀭𑀼𑀳𑀢𑀺, 𑀅𑀢𑀺𑀭𑁂𑀓𑀘𑀻𑀯𑀭𑀁 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀫𑀳𑀸𑀧𑀘𑁆𑀘𑀭𑀺𑀬𑀁 𑀘𑀻𑀯𑀭𑀯𑀲𑁂𑀦 𑀧𑀭𑀺𑀪𑁄𑀕𑀓𑀺𑀘𑁆𑀘𑀲𑁆𑀲 𑀅𑀪𑀸𑀯𑀁 𑀲𑀦𑁆𑀥𑀸𑀬 𑀅𑀦𑀸𑀧𑀢𑁆𑀢𑀺 𑀯𑀼𑀢𑁆𑀢𑀸 𑀲𑁂𑀦𑀸𑀲𑀦𑀧𑀭𑀺𑀓𑁆𑀔𑀸𑀭𑀢𑁆𑀣𑀸𑀬 𑀤𑀺𑀦𑁆𑀦𑀧𑀘𑁆𑀘𑀢𑁆𑀣𑀭𑀡𑁂 𑀯𑀺𑀬. 𑀬𑀁 𑀧𑀦 ‘‘𑀧𑀘𑁆𑀘𑀢𑁆𑀣𑀭𑀡𑀫𑁆𑀧𑀺 𑀅𑀥𑀺𑀝𑁆𑀞𑀸𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀁 𑀲𑁂𑀦𑀸𑀲𑀦𑀢𑁆𑀣𑀸𑀬𑁂𑀯𑀸𑀢𑀺 𑀦𑀺𑀬𑀫𑀺𑀢𑀁 𑀦 𑀳𑁄𑀢𑀺 𑀦𑀯𑀲𑀼 𑀘𑀻𑀯𑀭𑁂𑀲𑀼 𑀕𑀳𑀺𑀢𑀢𑁆𑀢𑀸, 𑀢𑀲𑁆𑀫𑀸 𑀅𑀢𑁆𑀢𑀦𑁄 𑀦𑀸𑀫𑁂𑀦 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀦𑀺𑀤𑀳𑀺𑀢𑁆𑀯𑀸 𑀧𑀭𑀺𑀓𑁆𑀔𑀸𑀭𑀘𑁄𑀴𑀁 𑀯𑀺𑀬 𑀬𑀣𑀸 𑀢𑀣𑀸 𑀯𑀺𑀦𑀺𑀬𑀼𑀚𑁆𑀚𑀺𑀢𑀩𑁆𑀩𑀫𑁂𑀯𑀸𑀢𑀺 𑀕𑀳𑁂𑀢𑀩𑁆𑀩𑀁. 𑀧𑀸𑀯𑀸𑀭𑁄 𑀓𑁄𑀚𑀯𑁄𑀢𑀺 𑀇𑀫𑁂𑀲𑀫𑁆𑀧𑀺 𑀧𑀘𑁆𑀘𑀢𑁆𑀣𑀭𑀡𑀸𑀤𑀻𑀦𑀁 𑀮𑁄𑀓𑁂𑀧𑀺 𑀯𑁄𑀳𑀭𑀡𑀢𑁄 𑀲𑁂𑀦𑀸𑀲𑀦𑀧𑀭𑀺𑀓𑁆𑀔𑀸𑀭𑀢𑁆𑀣𑀸𑀬 𑀤𑀺𑀦𑁆𑀦𑀧𑀘𑁆𑀘𑀢𑁆𑀣𑀭𑀡𑀢𑁄 𑀯𑀺𑀲𑀼𑀁 𑀕𑀳𑀡𑀁 𑀓𑀢𑀁.

‘‘𑀳𑀻𑀦𑀸𑀬𑀸𑀯𑀢𑁆𑀢𑀦𑁂𑀦𑀸’’𑀢𑀺 𑀇𑀤𑀁 𑀅𑀦𑁆𑀢𑀺𑀫𑀯𑀢𑁆𑀣𑀼𑀁 𑀅𑀚𑁆𑀛𑀸𑀧𑀚𑁆𑀚𑀺𑀢𑁆𑀯𑀸 𑀪𑀺𑀓𑁆𑀔𑀼𑀧𑀝𑀺𑀜𑁆𑀜𑀸𑀬 𑀞𑀺𑀢𑀲𑁆𑀲 𑀘𑁂𑀯 𑀢𑀺𑀢𑁆𑀣𑀺𑀬𑀧𑀓𑁆𑀓𑀦𑁆𑀢𑀲𑁆𑀲 𑀘 𑀪𑀺𑀓𑁆𑀔𑀼𑀦𑀺𑀬𑀸 𑀘 𑀪𑀺𑀓𑁆𑀔𑀼𑀦𑀺𑀪𑀸𑀯𑁂 𑀦𑀺𑀭𑀧𑁂𑀓𑁆𑀔𑀢𑀸𑀬 𑀕𑀺𑀳𑀺𑀮𑀺𑀗𑁆𑀕𑀢𑀺𑀢𑁆𑀣𑀺𑀬𑀮𑀺𑀗𑁆𑀕𑀕𑁆𑀕𑀳𑀡𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀲𑀺𑀓𑁆𑀔𑀁 𑀅𑀧𑀘𑁆𑀘𑀓𑁆𑀔𑀸𑀬 𑀕𑀺𑀳𑀺𑀪𑀸𑀯𑀽𑀧𑀕𑀫𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀓𑁂𑀘𑀺 𑀯𑀤𑀦𑁆𑀢𑀺, 𑀢𑀁 𑀦 𑀬𑀼𑀢𑁆𑀢𑀁 𑀢𑀤𑀸𑀧𑀺𑀲𑁆𑀲 𑀉𑀧𑀲𑀫𑁆𑀧𑀦𑁆𑀦𑀢𑁆𑀢𑀸, 𑀘𑀻𑀯𑀭𑀲𑁆𑀲 𑀘 𑀢𑀲𑁆𑀲 𑀲𑀦𑁆𑀢𑀓𑀢𑁆𑀢𑀸𑀯𑀺𑀚𑀳𑀦𑀢𑁄. 𑀧𑀫𑀸𑀡𑀘𑀻𑀯𑀭𑀲𑁆𑀲𑀸𑀢𑀺 𑀧𑀘𑁆𑀙𑀺𑀫𑀧𑁆𑀧𑀫𑀸𑀡𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀤𑁆𑀯𑁂 𑀘𑀻𑀯𑀭𑀸𑀦𑀺 𑀧𑀸𑀭𑀼𑀧𑀦𑁆𑀢𑀲𑁆𑀲𑀸𑀢𑀺 𑀕𑀸𑀫𑀧𑁆𑀧𑀯𑁂𑀲𑁂 𑀤𑀺𑀕𑀼𑀡𑀁 𑀓𑀢𑁆𑀯𑀸 𑀲𑀗𑁆𑀖𑀸𑀝𑀺𑀬𑁄 𑀧𑀸𑀭𑀼𑀧𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. ‘‘𑀏𑀲 𑀦𑀬𑁄’’𑀢𑀺 𑀇𑀫𑀺𑀦𑀸 𑀧𑀫𑀸𑀡𑀬𑀼𑀢𑁆𑀢𑁂𑀲𑀼 𑀬𑀢𑁆𑀣 𑀓𑀢𑁆𑀣𑀘𑀺 𑀙𑀺𑀤𑁆𑀤𑀁 𑀅𑀥𑀺𑀝𑁆𑀞𑀸𑀦𑀁 𑀯𑀺𑀚𑀳𑀢𑀻𑀢𑀺𑀆𑀤𑀺𑀅𑀢𑁆𑀣𑀁 𑀲𑀗𑁆𑀕𑀡𑁆𑀳𑀸𑀢𑀺.

𑀅𑀜𑁆𑀜𑀁 𑀧𑀘𑁆𑀙𑀺𑀫𑀧𑁆𑀧𑀫𑀸𑀡𑀁 𑀦𑀸𑀫 𑀦𑀢𑁆𑀣𑀻𑀢𑀺 𑀲𑀼𑀢𑁆𑀢𑁂 𑀆𑀕𑀢𑀁 𑀦𑀢𑁆𑀣𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀇𑀤𑀸𑀦𑀺 𑀢𑀫𑁂𑀯 𑀯𑀺𑀪𑀸𑀯𑁂𑀢𑀼𑀁 ‘‘𑀬𑀜𑁆𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀢𑀁 𑀦 𑀲𑀫𑁂𑀢𑀺, 𑀲𑀗𑁆𑀖𑀸𑀝𑀺𑀆𑀤𑀻𑀦𑀁 𑀫𑀼𑀝𑁆𑀞𑀺𑀧𑀜𑁆𑀘𑀓𑀸𑀤𑀺𑀳𑁂𑀝𑁆𑀞𑀺𑀫𑀧𑁆𑀧𑀫𑀸𑀡𑀲𑁆𑀲 𑀲𑀼𑀢𑁆𑀢𑁂 𑀅𑀦𑀸𑀕𑀢𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀫𑀳𑀦𑁆𑀢𑀁 𑀯𑀸 𑀔𑀼𑀤𑁆𑀤𑀓𑀁 𑀓𑀭𑁄𑀢𑀻𑀢𑀺 𑀏𑀢𑁆𑀣 𑀅𑀢𑀺𑀫𑀳𑀦𑁆𑀢𑀁 𑀘𑀻𑀯𑀭𑀁 𑀫𑀼𑀝𑁆𑀞𑀺𑀧𑀜𑁆𑀘𑀓𑀸𑀤𑀺𑀧𑀘𑁆𑀙𑀺𑀫𑀧𑁆𑀧𑀫𑀸𑀡𑀬𑀼𑀢𑁆𑀢𑀁 𑀓𑀢𑁆𑀯𑀸 𑀲𑀫𑀦𑁆𑀢𑀢𑁄 𑀙𑀺𑀦𑁆𑀤𑀦𑁂𑀦𑀸𑀧𑀺 𑀯𑀺𑀘𑁆𑀙𑀺𑀦𑁆𑀤𑀦𑀓𑀸𑀮𑁂 𑀙𑀺𑀚𑁆𑀚𑀫𑀸𑀦𑀝𑁆𑀞𑀸𑀦𑀁 𑀙𑀺𑀤𑁆𑀤𑀲𑀗𑁆𑀔𑁆𑀬𑀁 𑀦 𑀕𑀘𑁆𑀙𑀢𑀺 𑀅𑀥𑀺𑀝𑁆𑀞𑀸𑀦𑀁 𑀦 𑀯𑀺𑀚𑀳𑀢𑀺 𑀏𑀯𑀸𑀢𑀺 𑀲𑀺𑀚𑁆𑀛𑀢𑀺, ‘‘𑀖𑀝𑁂𑀢𑁆𑀯𑀸 𑀙𑀺𑀦𑁆𑀤𑀢𑀺, 𑀦 𑀪𑀺𑀚𑁆𑀚𑀢𑀻’’𑀢𑀺 𑀯𑀘𑀦𑁂𑀦 𑀘 𑀲𑀫𑁂𑀢𑀺. 𑀧𑀭𑀺𑀓𑁆𑀔𑀸𑀭𑀘𑁄𑀴𑀁 𑀧𑀦 𑀯𑀺𑀓𑀧𑁆𑀧𑀦𑀼𑀧𑀕𑀧𑀘𑁆𑀙𑀺𑀫𑀧𑁆𑀧𑀫𑀸𑀡𑀢𑁄 𑀊𑀦𑀁 𑀓𑀢𑁆𑀯𑀸 𑀙𑀺𑀦𑁆𑀦𑀁 𑀅𑀥𑀺𑀝𑁆𑀞𑀸𑀦𑀁 𑀯𑀺𑀚𑀳𑀢𑀺 𑀅𑀥𑀺𑀝𑁆𑀞𑀸𑀦𑀲𑁆𑀲 𑀅𑀦𑀺𑀲𑁆𑀲𑀬𑀢𑁆𑀢𑀸. 𑀢𑀸𑀦𑀺 𑀧𑀼𑀦 𑀩𑀤𑁆𑀥𑀸𑀦𑀺 𑀖𑀝𑀺𑀢𑀸𑀦𑀺 𑀅𑀥𑀺𑀝𑁆𑀞𑀸𑀢𑀩𑁆𑀩𑀫𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀓𑁂𑀘𑀺 𑀧𑀦 ‘‘𑀯𑀲𑁆𑀲𑀺𑀓𑀲𑀸𑀝𑀺𑀓𑀘𑀻𑀯𑀭𑁂 𑀤𑁆𑀯𑀺𑀥𑀸 𑀙𑀺𑀦𑁆𑀦𑁂 𑀬𑀤𑀺𑀧𑀺 𑀏𑀓𑁂𑀓𑀁 𑀔𑀡𑁆𑀟𑀁 𑀧𑀘𑁆𑀙𑀺𑀫𑀧𑀘𑁆𑀙𑀺𑀫𑀧𑁆𑀧𑀫𑀸𑀡𑀁 𑀧𑀳𑁄𑀢𑀺, 𑀏𑀓𑀲𑁆𑀫𑀺𑀁𑀬𑁂𑀯 𑀔𑀡𑁆𑀟𑁂 𑀅𑀥𑀺𑀝𑁆𑀞𑀸𑀦𑀁 𑀢𑀺𑀝𑁆𑀞𑀢𑀺, 𑀦 𑀇𑀢𑀭𑁂, ‘‘𑀤𑁆𑀯𑁂 𑀧𑀦 𑀦 𑀯𑀝𑁆𑀝𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸. 𑀦𑀺𑀲𑀻𑀤𑀦𑀓𑀡𑁆𑀟𑀼𑀧𑁆𑀧𑀝𑀺𑀘𑁆𑀙𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄𑀢𑀺 𑀯𑀤𑀦𑁆𑀢𑀺.

𑀲𑀫𑁆𑀫𑀼𑀔𑁂 𑀧𑀯𑀢𑁆𑀢𑀸 𑀲𑀫𑁆𑀫𑀼𑀔𑀸𑀢𑀺 𑀧𑀘𑁆𑀘𑀢𑁆𑀢𑀯𑀘𑀦𑀁, 𑀢𑀜𑁆𑀘 𑀯𑀺𑀓𑀧𑁆𑀧𑀦𑀯𑀺𑀲𑁂𑀲𑀦𑀁, 𑀢𑀲𑁆𑀫𑀸 ‘‘𑀲𑀫𑁆𑀫𑀼𑀔𑁂’’𑀢𑀺 𑀪𑀼𑀫𑁆𑀫𑀢𑁆𑀣𑁂 𑀦𑀺𑀲𑁆𑀲𑀓𑁆𑀓𑀯𑀘𑀦𑀁 𑀓𑀢𑁆𑀯𑀸𑀧𑀺 𑀅𑀢𑁆𑀣𑀁 𑀯𑀤𑀦𑁆𑀢𑀺, 𑀅𑀪𑀺𑀫𑀼𑀔𑁂𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀲𑀫𑁆𑀫𑀼𑀔𑁂𑀦 𑀅𑀢𑁆𑀢𑀦𑁄 𑀯𑀸𑀘𑀸𑀬 𑀏𑀯 𑀯𑀺𑀓𑀧𑁆𑀧𑀦𑀸 𑀲𑀫𑁆𑀫𑀼𑀔𑀸𑀯𑀺𑀓𑀧𑁆𑀧𑀦𑀸. 𑀧𑀭𑀫𑁆𑀫𑀼𑀔𑁂𑀦 𑀯𑀺𑀓𑀧𑁆𑀧𑀦𑀸 𑀧𑀭𑀫𑁆𑀫𑀼𑀔𑀸𑀯𑀺𑀓𑀧𑁆𑀧𑀦𑀸𑀢𑀺 𑀓𑀭𑀡𑀢𑁆𑀣𑁂𑀦𑀸𑀧𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄, 𑀅𑀬𑀫𑁂𑀯 𑀧𑀸𑀴𑀺𑀬𑀸 𑀲𑀫𑁂𑀢𑀺. 𑀲𑀦𑁆𑀦𑀺𑀳𑀺𑀢𑀸𑀲𑀦𑁆𑀦𑀺𑀳𑀺𑀢𑀪𑀸𑀯𑀦𑁆𑀢𑀺 𑀆𑀲𑀦𑁆𑀦𑀤𑀽𑀭𑀪𑀸𑀯𑀁. 𑀏𑀢𑁆𑀢𑀸𑀯𑀢𑀸 𑀦𑀺𑀥𑁂𑀢𑀼𑀁 𑀯𑀝𑁆𑀝𑀢𑀻𑀢𑀺 𑀏𑀢𑁆𑀢𑀓𑁂𑀦𑁂𑀯 𑀯𑀺𑀓𑀧𑁆𑀧𑀦𑀸𑀓𑀺𑀘𑁆𑀘𑀲𑁆𑀲 𑀦𑀺𑀝𑁆𑀞𑀺𑀢𑀢𑁆𑀢𑀸, 𑀅𑀢𑀺𑀭𑁂𑀓𑀘𑀻𑀯𑀭𑀁 𑀦 𑀳𑁄𑀢𑀻𑀢𑀺 𑀤𑀲𑀸𑀳𑀸𑀢𑀺𑀓𑁆𑀓𑀫𑁂 𑀦 𑀦𑀺𑀲𑁆𑀲𑀕𑁆𑀕𑀺𑀬𑀁 𑀚𑀦𑁂𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀭𑀺𑀪𑀼𑀜𑁆𑀚𑀺𑀢𑀼𑀁…𑀧𑁂… 𑀦 𑀯𑀝𑁆𑀝𑀢𑀻𑀢𑀺 𑀲𑀬𑀁 𑀅𑀧𑀘𑁆𑀘𑀼𑀤𑁆𑀥𑀭𑀡𑀁 𑀧𑀭𑀺𑀪𑀼𑀜𑁆𑀚𑀦𑁂 𑀧𑀸𑀘𑀺𑀢𑁆𑀢𑀺𑀬𑀁, 𑀅𑀥𑀺𑀝𑁆𑀞𑀸𑀦𑁂 𑀧𑀭𑁂𑀲𑀁 𑀯𑀺𑀲𑁆𑀲𑀚𑁆𑀚𑀦𑁂 𑀤𑀼𑀓𑁆𑀓𑀝𑀜𑁆𑀘 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑀧𑀭𑀺𑀪𑁄𑀕𑀸𑀤𑀬𑁄𑀧𑀺 𑀯𑀝𑁆𑀝𑀦𑁆𑀢𑀻𑀢𑀺 𑀧𑀭𑀺𑀪𑁄𑀕𑀯𑀺𑀲𑁆𑀲𑀚𑁆𑀚𑀦𑀅𑀥𑀺𑀝𑁆𑀞𑀸𑀦𑀸𑀦𑀺𑀧𑀺. 𑀅𑀧𑀺-𑀲𑀤𑁆𑀤𑁂𑀦 𑀦𑀺𑀥𑁂𑀢𑀼𑀫𑁆𑀧𑀺 𑀯𑀝𑁆𑀝𑀢𑀻𑀢𑀺 𑀅𑀢𑁆𑀣𑁄, 𑀏𑀢𑁂𑀦 𑀘 𑀧𑀘𑁆𑀘𑀼𑀤𑁆𑀥𑀸𑀭𑁂𑀧𑀺 𑀓𑀢𑁂 𑀘𑀻𑀯𑀭𑀫𑁆𑀧𑀺 𑀯𑀺𑀓𑀧𑁆𑀧𑀺𑀢𑀘𑀻𑀯𑀭𑀫𑁂𑀯 𑀳𑁄𑀢𑀺, 𑀦 𑀅𑀢𑀺𑀭𑁂𑀓𑀘𑀻𑀯𑀭𑀁. 𑀢𑀁 𑀧𑀦 𑀢𑀺𑀘𑀻𑀯𑀭𑀸𑀤𑀺𑀦𑀸𑀫𑁂𑀦 𑀅𑀥𑀺𑀝𑁆𑀞𑀸𑀢𑀼𑀓𑀸𑀫𑁂𑀦 𑀅𑀥𑀺𑀝𑁆𑀞𑀳𑀺𑀢𑀩𑁆𑀩𑀁, 𑀇𑀢𑀭𑁂𑀦 𑀯𑀺𑀓𑀧𑁆𑀧𑀺𑀢𑀘𑀻𑀯𑀭𑀫𑁂𑀯 𑀓𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀓𑁂𑀘𑀺 𑀧𑀦 ‘‘𑀬𑀁 𑀯𑀺𑀓𑀧𑁆𑀧𑀺𑀢𑀘𑀻𑀯𑀭𑀁, 𑀢𑀁 𑀬𑀸𑀯 𑀅𑀧𑀭𑀺𑀪𑁄𑀕𑀓𑀸𑀮𑀸 𑀅𑀧𑀘𑁆𑀘𑀼𑀤𑁆𑀥𑀭𑀸𑀧𑁂𑀢𑁆𑀯𑀸𑀯 𑀦𑀺𑀤𑀳𑀺𑀢𑀩𑁆𑀩𑀁, 𑀧𑀭𑀺𑀪𑁄𑀕𑀓𑀸𑀮𑁂 𑀧𑀦 𑀲𑀫𑁆𑀧𑀢𑁆𑀢𑁂 𑀧𑀘𑁆𑀘𑀼𑀤𑁆𑀥𑀭𑀸𑀧𑁂𑀢𑁆𑀯𑀸 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁. 𑀬𑀤𑀺 𑀳𑀺 𑀢𑀢𑁄 𑀧𑀼𑀭𑁂𑀧𑀺 𑀧𑀘𑁆𑀘𑀼𑀤𑁆𑀥𑀭𑀸𑀧𑁂𑀬𑁆𑀬, 𑀧𑀘𑁆𑀘𑀼𑀤𑁆𑀥𑀸𑀭𑁂𑀦𑁂𑀯 𑀯𑀺𑀓𑀧𑁆𑀧𑀦𑀸𑀬 𑀯𑀺𑀕𑀢𑀢𑁆𑀢𑀸 𑀅𑀢𑀺𑀭𑁂𑀓𑀘𑀻𑀯𑀭𑀁 𑀦𑀸𑀫 𑀳𑁄𑀢𑀺, 𑀤𑀲𑀸𑀳𑀸𑀢𑀺𑀓𑁆𑀓𑀫𑁂 𑀘 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀁. 𑀢𑀲𑁆𑀫𑀸 𑀬𑀁 𑀅𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸𑀯 𑀞𑀧𑁂𑀢𑀩𑁆𑀩𑀁, 𑀢𑀤𑁂𑀯 𑀯𑀺𑀓𑀧𑁆𑀧𑁂𑀢𑀩𑁆𑀩𑀁, 𑀧𑀘𑁆𑀘𑀼𑀤𑁆𑀥𑀸𑀭𑁂 𑀘 𑀓𑀢𑁂 𑀅𑀦𑁆𑀢𑁄𑀤𑀲𑀸𑀳𑁂𑀬𑁂𑀯 𑀅𑀥𑀺𑀝𑁆𑀞𑀸𑀢𑀩𑁆𑀩𑀁. 𑀬𑀜𑁆𑀘 𑀅𑀝𑁆𑀞𑀓𑀣𑀸𑀬𑀁 ‘𑀢𑀢𑁄 𑀧𑀪𑀼𑀢𑀺 𑀧𑀭𑀺𑀪𑁄𑀕𑀸𑀤𑀬𑁄𑀧𑀺 𑀯𑀝𑁆𑀝𑀦𑁆𑀢𑀻’𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀢𑀁 𑀧𑀸𑀴𑀺𑀬𑀸 𑀯𑀺𑀭𑀼𑀚𑁆𑀛𑀢𑀻’’𑀢𑀺 𑀯𑀤𑀦𑁆𑀢𑀺, 𑀢𑀁 𑀢𑁂𑀲𑀁 𑀫𑀢𑀺𑀫𑀢𑁆𑀢𑀫𑁂𑀯. 𑀧𑀸𑀴𑀺𑀬𑀜𑁆𑀳𑀺 ‘‘𑀅𑀦𑁆𑀢𑁄𑀤𑀲𑀸𑀳𑀁 𑀅𑀥𑀺𑀝𑁆𑀞𑁂𑀢𑀺, 𑀯𑀺𑀓𑀧𑁆𑀧𑁂𑀢𑀻’’𑀢𑀺 (𑀧𑀸𑀭𑀸. 𑁪𑁬𑁯) 𑀘 ‘‘𑀲𑀸𑀫𑀁 𑀘𑀻𑀯𑀭𑀁 𑀯𑀺𑀓𑀧𑁆𑀧𑁂𑀢𑁆𑀯𑀸 𑀅𑀧𑀘𑁆𑀘𑀼𑀤𑁆𑀥𑀸𑀭𑀡𑀁 𑀧𑀭𑀺𑀪𑀼𑀜𑁆𑀚𑁂𑀬𑁆𑀬 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 (𑀧𑀸𑀘𑀺. 𑁩𑁭𑁩) 𑀘 ‘‘𑀅𑀦𑀸𑀧𑀢𑁆𑀢𑀺 𑀲𑁄 𑀯𑀸 𑀤𑁂𑀢𑀺, 𑀢𑀲𑁆𑀲 𑀯𑀸 𑀯𑀺𑀲𑁆𑀲𑀸𑀲𑀦𑁆𑀢𑁄 𑀧𑀭𑀺𑀪𑀼𑀜𑁆𑀚𑀢𑀻’’𑀢𑀺 (𑀧𑀸𑀘𑀺. 𑁩𑁭𑁪) 𑀘 𑀲𑀸𑀫𑀜𑁆𑀜𑀢𑁄 𑀯𑀼𑀢𑁆𑀢𑀢𑁆𑀢𑀸, 𑀅𑀝𑁆𑀞𑀓𑀣𑀸𑀬𑀜𑁆𑀘 ‘‘𑀇𑀫𑀁 𑀘𑀻𑀯𑀭𑀁 𑀯𑀸 𑀯𑀺𑀓𑀧𑁆𑀧𑀦𑀁 𑀯𑀸 𑀧𑀘𑁆𑀘𑀼𑀤𑁆𑀥𑀭𑀸𑀫𑀻’’𑀢𑀺𑀆𑀤𑀺𑀦𑀸 𑀧𑀘𑁆𑀘𑀼𑀤𑁆𑀥𑀸𑀭𑀁 𑀅𑀤𑀲𑁆𑀲𑁂𑀢𑁆𑀯𑀸 ‘‘𑀫𑀬𑁆𑀳𑀁 𑀲𑀦𑁆𑀢𑀓𑀁 𑀧𑀭𑀺𑀪𑀼𑀜𑁆𑀚 𑀯𑀸 𑀯𑀺𑀲𑁆𑀲𑀚𑁆𑀚𑁂𑀳𑀺 𑀯𑀸’’𑀢𑀺 𑀏𑀯𑀁 𑀅𑀢𑁆𑀢𑀦𑁄 𑀲𑀦𑁆𑀢𑀓𑀢𑁆𑀢𑀁 𑀅𑀫𑁄𑀘𑁂𑀢𑁆𑀯𑀸𑀯 𑀧𑀭𑀺𑀪𑁄𑀕𑀸𑀤𑀺𑀯𑀲𑁂𑀦𑁂𑀯 𑀧𑀘𑁆𑀘𑀼𑀤𑁆𑀥𑀸𑀭𑀲𑁆𑀲 𑀯𑀼𑀢𑁆𑀢𑀢𑁆𑀢𑀸, ‘‘𑀢𑀢𑁄 𑀧𑀪𑀼𑀢𑀺 𑀧𑀭𑀺𑀪𑁄𑀕𑀸𑀤𑀬𑁄𑀧𑀺 𑀯𑀝𑁆𑀝𑀦𑁆𑀢𑀻’’𑀢𑀺 𑀅𑀥𑀺𑀝𑁆𑀞𑀸𑀦𑀁 𑀯𑀺𑀦𑀸𑀧𑀺 𑀯𑀺𑀲𑀼𑀁 𑀧𑀭𑀺𑀪𑁄𑀕𑀲𑁆𑀲, 𑀦𑀺𑀤𑀳𑀦𑀲𑁆𑀲 𑀘 𑀯𑀼𑀢𑁆𑀢𑀢𑁆𑀢𑀸 𑀯𑀺𑀓𑀧𑁆𑀧𑀦𑀸𑀦𑀦𑁆𑀢𑀭𑀫𑁂𑀯 𑀧𑀘𑁆𑀘𑀼𑀤𑁆𑀥𑀭𑀸𑀧𑁂𑀢𑁆𑀯𑀸 𑀅𑀦𑀥𑀺𑀝𑁆𑀞𑀳𑀺𑀢𑁆𑀯𑀸 𑀏𑀯 𑀢𑀺𑀘𑀻𑀯𑀭𑀯𑀺𑀭𑀳𑀺𑀢𑀁 𑀯𑀺𑀓𑀧𑁆𑀧𑀦𑀸𑀭𑀳𑀁 𑀘𑀻𑀯𑀭𑀁 𑀧𑀭𑀺𑀪𑀼𑀜𑁆𑀚𑀺𑀢𑀼𑀁, 𑀦𑀺𑀤𑀳𑀺𑀢𑀼𑀜𑁆𑀘 𑀇𑀤𑀁 𑀧𑀸𑀝𑁂𑀓𑁆𑀓𑀁 𑀯𑀺𑀦𑀬𑀓𑀫𑁆𑀫𑀦𑁆𑀢𑀺 𑀔𑀸𑀬𑀢𑀺. 𑀅𑀧𑀺𑀘 𑀩𑀳𑀽𑀦𑀁 𑀧𑀢𑁆𑀢𑀸𑀦𑀁 𑀯𑀺𑀓𑀧𑁆𑀧𑁂𑀢𑀼𑀁, 𑀧𑀘𑁆𑀘𑀼𑀤𑁆𑀥𑀸𑀭𑁂𑀢𑀼𑀜𑁆𑀘 𑀯𑀼𑀢𑁆𑀢𑀢𑁆𑀢𑀸 𑀧𑀘𑁆𑀘𑀼𑀤𑁆𑀥𑀸𑀭𑁂𑀦 𑀢𑁂𑀲𑀁 𑀅𑀢𑀺𑀭𑁂𑀓𑀧𑀢𑁆𑀢𑀢𑀸 𑀤𑀲𑁆𑀲𑀺𑀢𑀸𑀢𑀺 𑀲𑀺𑀚𑁆𑀛𑀢𑀺 𑀢𑁂𑀲𑀼 𑀏𑀓𑀲𑁆𑀲𑁂𑀯 𑀅𑀥𑀺𑀝𑁆𑀞𑀸𑀢𑀩𑁆𑀩𑀢𑁄. 𑀢𑀲𑁆𑀫𑀸 𑀅𑀝𑁆𑀞𑀓𑀣𑀸𑀬𑀁 𑀆𑀕𑀢𑀦𑀬𑁂𑀦𑁂𑀯 𑀕𑀳𑁂𑀢𑀩𑁆𑀩𑀁.

𑀧𑀜𑁆𑀜𑀢𑁆𑀢𑀺𑀓𑁄𑀯𑀺𑀤𑁄 𑀦 𑀳𑁄𑀢𑀻𑀢𑀺 𑀏𑀯𑀁 𑀯𑀺𑀓𑀧𑁆𑀧𑀺𑀢𑁂 ‘‘𑀅𑀦𑀦𑁆𑀢𑀭𑀫𑁂𑀯 𑀏𑀯𑀁 𑀧𑀘𑁆𑀘𑀼𑀤𑁆𑀥𑀭𑀺𑀢𑀩𑁆𑀩’’𑀦𑁆𑀢𑀺 𑀯𑀺𑀦𑀬𑀓𑀫𑁆𑀫𑀁 𑀦 𑀚𑀸𑀦𑀸𑀢𑀺. 𑀢𑁂𑀦𑀸𑀳 ‘‘𑀦 𑀚𑀸𑀦𑀸𑀢𑀺 𑀧𑀘𑁆𑀘𑀼𑀤𑁆𑀥𑀭𑀺𑀢𑀼’’𑀦𑁆𑀢𑀺, 𑀇𑀫𑀺𑀦𑀸𑀧𑀺 𑀘𑁂𑀢𑀁 𑀯𑁂𑀤𑀺𑀢𑀩𑁆𑀩𑀁 ‘‘𑀯𑀺𑀓𑀧𑁆𑀧𑀦𑀸𑀦𑀦𑁆𑀢𑀭𑀫𑁂𑀯 𑀧𑀘𑁆𑀘𑀼𑀤𑁆𑀥𑀸𑀭𑁄 𑀓𑀸𑀢𑀩𑁆𑀩𑁄’’𑀢𑀺.

𑀅𑀯𑀺𑀲𑁂𑀲𑁂𑀦 𑀯𑀼𑀢𑁆𑀢𑀯𑀘𑀦𑀦𑁆𑀢𑀺 𑀢𑀺𑀘𑀻𑀯𑀭𑀸𑀤𑀻𑀦𑀁 𑀲𑀸𑀥𑀸𑀭𑀡𑀯𑀘𑀦𑁂𑀦 𑀯𑀼𑀢𑁆𑀢𑀯𑀘𑀦𑀁. 𑀬𑀁 𑀧𑀦𑁂𑀢𑁆𑀣 ‘‘𑀯𑀺𑀭𑀼𑀤𑁆𑀥𑀁 𑀯𑀺𑀬 𑀤𑀺𑀲𑁆𑀲𑀢𑀻’’𑀢𑀺 𑀯𑀢𑁆𑀯𑀸 𑀢𑀁 𑀯𑀺𑀭𑁄𑀥𑀸𑀲𑀗𑁆𑀓𑀁 𑀦𑀺𑀯𑀢𑁆𑀢𑁂𑀢𑀼𑀁 ‘‘𑀢𑀺𑀘𑀻𑀯𑀭𑀲𑀗𑁆𑀔𑁂𑀧𑁂𑀦…𑀧𑁂… 𑀯𑀺𑀓𑀧𑁆𑀧𑀦𑀸𑀬 𑀑𑀓𑀸𑀲𑁄 𑀤𑀺𑀦𑁆𑀦𑁄 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁, 𑀢𑀁 ‘‘𑀅𑀥𑀺𑀝𑁆𑀞𑁂𑀢𑀺 𑀯𑀺𑀓𑀧𑁆𑀧𑁂𑀢𑀻’’𑀢𑀺 𑀲𑀸𑀫𑀜𑁆𑀜𑀢𑁄 𑀯𑀼𑀢𑁆𑀢𑁂𑀧𑀺 𑀢𑀺𑀘𑀻𑀯𑀭𑀫𑁆𑀧𑀺 𑀯𑀺𑀓𑀧𑁆𑀧𑁂𑀢𑀻𑀢𑀺 𑀅𑀬𑀫𑀢𑁆𑀣𑁄 𑀦 𑀲𑀺𑀚𑁆𑀛𑀢𑀺, ‘‘𑀢𑀺𑀘𑀻𑀯𑀭𑀁 𑀅𑀥𑀺𑀝𑁆𑀞𑀸𑀢𑀼𑀁 𑀦 𑀯𑀺𑀓𑀧𑁆𑀧𑁂𑀢𑀼’’𑀦𑁆𑀢𑀺 (𑀫𑀳𑀸𑀯. 𑁩𑁫𑁮) 𑀯𑀺𑀲𑁂𑀲𑁂𑀢𑁆𑀯𑀸 𑀯𑀼𑀢𑁆𑀢𑀢𑁆𑀢𑀸. 𑀬𑀁 𑀧𑀦 𑀅𑀥𑀺𑀝𑁆𑀞𑀸𑀢𑀩𑁆𑀩𑀁, 𑀢𑀁 𑀅𑀥𑀺𑀝𑁆𑀞𑀸𑀢𑀺. 𑀬𑀁 𑀢𑀺𑀘𑀻𑀯𑀭𑀯𑀺𑀭𑀳𑀺𑀢𑀁, 𑀢𑀁 𑀯𑀺𑀓𑀧𑁆𑀧𑁂𑀢𑀩𑁆𑀩𑀁, 𑀢𑀁 𑀯𑀺𑀓𑀧𑁆𑀧𑁂𑀢𑀻𑀢𑀺 𑀏𑀯𑀫𑀢𑁆𑀣𑁄 𑀲𑀺𑀚𑁆𑀛𑀢𑀻𑀢𑀺. 𑀢𑀲𑁆𑀫𑀸 𑀏𑀢𑁆𑀣 𑀧𑀼𑀩𑁆𑀩𑀸𑀧𑀭𑀯𑀺𑀭𑁄𑀥𑁄 𑀦 𑀤𑀺𑀲𑁆𑀲𑀢𑀺 𑀲𑀸𑀫𑀜𑁆𑀜𑀯𑀘𑀦𑀲𑁆𑀲 𑀯𑀼𑀢𑁆𑀢𑀸𑀯𑀲𑁂𑀲𑁂𑀬𑁂𑀯 𑀅𑀯𑀢𑀺𑀝𑁆𑀞𑀦𑀢𑁄. 𑀬𑀁 𑀧𑀦𑁂𑀢𑁆𑀣 𑀢𑀺𑀘𑀻𑀯𑀭𑀲𑁆𑀲𑀸𑀧𑀺 𑀯𑀺𑀓𑀧𑁆𑀧𑀦𑀯𑀺𑀥𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀺𑀘𑀻𑀯𑀭𑀁 𑀢𑀺𑀘𑀻𑀯𑀭𑀲𑀗𑁆𑀔𑁂𑀧𑁂𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑀺𑀘𑀻𑀯𑀭𑀲𑀗𑁆𑀔𑁂𑀧𑁂𑀦 𑀧𑀭𑀺𑀳𑀭𑀺𑀬𑀫𑀸𑀦𑁂𑀲𑀼 𑀏𑀓𑀫𑁆𑀧𑀺 𑀧𑀘𑁆𑀘𑀼𑀤𑁆𑀥𑀭𑀺𑀢𑁆𑀯𑀸 𑀯𑀺𑀓𑀧𑁆𑀧𑁂𑀢𑀼𑀁 𑀦 𑀯𑀝𑁆𑀝𑀢𑀺, 𑀢𑀺𑀘𑀻𑀯𑀭𑀢𑁄 𑀧𑀦 𑀏𑀓𑀁 𑀯𑀸 𑀲𑀓𑀮𑀫𑁂𑀯 𑀯𑀸 𑀅𑀧𑀦𑁂𑀢𑁆𑀯𑀸 𑀅𑀧𑀭𑀁 𑀢𑀺𑀘𑀻𑀯𑀭𑀁 𑀢𑀺𑀘𑀻𑀯𑀭𑀲𑀗𑁆𑀔𑁂𑀧𑁂𑀦 𑀧𑀭𑀺𑀳𑀭𑀺𑀢𑀼𑀓𑀸𑀫𑀲𑁆𑀲 𑀯𑀸 𑀢𑀺𑀘𑀻𑀯𑀭𑀸𑀥𑀺𑀝𑁆𑀞𑀸𑀦𑀁 𑀫𑀼𑀜𑁆𑀘𑀺𑀢𑁆𑀯𑀸 𑀧𑀭𑀺𑀓𑁆𑀔𑀸𑀭𑀘𑁄𑀴𑀯𑀲𑁂𑀦𑁂𑀯 𑀲𑀩𑁆𑀩𑀘𑀻𑀯𑀭𑀁 𑀧𑀭𑀺𑀪𑀼𑀜𑁆𑀚𑀺𑀢𑀼𑀓𑀸𑀫𑀲𑁆𑀲 𑀯𑀸 𑀧𑀼𑀭𑀺𑀫𑀁 𑀅𑀥𑀺𑀝𑁆𑀞𑀺𑀢𑀘𑀻𑀯𑀭𑀁 𑀧𑀘𑁆𑀘𑀼𑀤𑁆𑀥𑀭𑀺𑀢𑁆𑀯𑀸 𑀯𑀺𑀓𑀧𑁆𑀧𑁂𑀢𑀼𑀁 𑀯𑀝𑁆𑀝𑀢𑀻𑀢𑀺 𑀏𑀯𑀫𑀥𑀺𑀧𑁆𑀧𑀸𑀬𑁂𑀦 ‘‘𑀢𑀺𑀘𑀻𑀯𑀭𑁂 𑀏𑀓𑁂𑀦 𑀘𑀻𑀯𑀭𑁂𑀦 𑀯𑀺𑀧𑁆𑀧𑀯𑀲𑀺𑀢𑀼𑀓𑀸𑀫𑁄 𑀳𑁄𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁 𑀲𑀺𑀬𑀸, 𑀇𑀘𑁆𑀘𑁂𑀢𑀁 𑀧𑀸𑀴𑀺𑀬𑀸 𑀲𑀤𑁆𑀥𑀺𑀁 𑀲𑀫𑁂𑀢𑀺. 𑀅𑀣 𑀧𑀼𑀦𑀧𑀺 𑀢𑀤𑁂𑀯 𑀢𑀺𑀘𑀻𑀯𑀭𑀸𑀥𑀺𑀝𑁆𑀞𑀸𑀦𑁂𑀦 𑀅𑀥𑀺𑀝𑁆𑀞𑀸𑀢𑀼𑀓𑀸𑀫𑁄 𑀳𑀼𑀢𑁆𑀯𑀸 𑀯𑀺𑀧𑁆𑀧𑀯𑀸𑀲𑀲𑀼𑀔𑀢𑁆𑀣𑀁 𑀧𑀘𑁆𑀘𑀼𑀤𑁆𑀥𑀭𑀺𑀢𑁆𑀯𑀸 𑀯𑀺𑀓𑀧𑁆𑀧𑁂𑀢𑀻𑀢𑀺 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦 𑀯𑀼𑀢𑁆𑀢𑀁 𑀲𑀺𑀬𑀸, 𑀢𑀁 ‘‘𑀢𑀺𑀘𑀻𑀯𑀭𑀁 𑀅𑀥𑀺𑀝𑁆𑀞𑀸𑀢𑀼𑀁 𑀦 𑀯𑀺𑀓𑀧𑁆𑀧𑁂𑀢𑀼’’𑀦𑁆𑀢𑀺 (𑀫𑀳𑀸𑀯. 𑁩𑁫𑁮) 𑀇𑀫𑀺𑀦𑀸 𑀯𑀘𑀦𑁂𑀦 𑀦 𑀲𑀫𑁂𑀢𑀺. 𑀬𑀤𑀺 𑀳𑀺 𑀲𑁂𑀲𑀘𑀻𑀯𑀭𑀸𑀦𑀺 𑀯𑀺𑀬 𑀢𑀺𑀘𑀻𑀯𑀭𑀫𑁆𑀧𑀺 𑀧𑀘𑁆𑀘𑀼𑀤𑁆𑀥𑀭𑀺𑀢𑁆𑀯𑀸 𑀯𑀺𑀓𑀧𑁆𑀧𑁂𑀢𑀩𑁆𑀩𑀁 𑀲𑀺𑀬𑀸, ‘‘𑀢𑀺𑀘𑀻𑀯𑀭𑀁 𑀅𑀥𑀺𑀝𑁆𑀞𑀸𑀢𑀼𑀁 𑀦 𑀯𑀺𑀓𑀧𑁆𑀧𑁂𑀢𑀼’’𑀦𑁆𑀢𑀺 𑀇𑀤𑀁 𑀯𑀘𑀦𑀫𑁂𑀯 𑀦𑀺𑀭𑀢𑁆𑀣𑀓𑀁 𑀲𑀺𑀬𑀸 𑀲𑁂𑀲𑀘𑀻𑀯𑀭𑁂𑀳𑀺 𑀢𑀺𑀘𑀻𑀯𑀭𑀲𑁆𑀲 𑀯𑀺𑀲𑁂𑀲𑀸𑀪𑀸𑀯𑀸. 𑀢𑀲𑁆𑀫𑀸 ‘‘𑀯𑀺𑀓𑀧𑁆𑀧𑁂𑀢𑀻’’𑀢𑀺 𑀇𑀤𑀁 𑀢𑀺𑀘𑀻𑀯𑀭𑀯𑀺𑀭𑀳𑀺𑀢𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑀺𑀘𑀻𑀯𑀭𑀁 𑀧𑀦 𑀯𑀺𑀓𑀧𑁆𑀧𑁂𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀯𑀺𑀜𑁆𑀜𑀸𑀬𑀢𑀺, 𑀢𑁂𑀦𑁂𑀯 𑀤𑀼𑀢𑀺𑀬𑀓𑀣𑀺𑀦𑀲𑀺𑀓𑁆𑀔𑀸𑀧𑀤𑀲𑁆𑀲 𑀅𑀦𑀸𑀧𑀢𑁆𑀢𑀺𑀯𑀸𑀭𑁂 ‘‘𑀯𑀺𑀓𑀧𑁆𑀧𑁂𑀢𑀻’’𑀢𑀺 𑀇𑀤𑀁 𑀦 𑀯𑀼𑀢𑁆𑀢𑀁, 𑀯𑀻𑀫𑀁𑀲𑀺𑀢𑁆𑀯𑀸 𑀬𑀣𑀸 𑀧𑀸𑀴𑀺𑀬𑀸 𑀲𑀤𑁆𑀥𑀺𑀁 𑀦 𑀯𑀺𑀭𑀼𑀚𑁆𑀛𑀢𑀺, 𑀢𑀣𑀸 𑀏𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑀕𑀳𑁂𑀢𑀩𑁆𑀩𑁄.

𑀢𑀼𑀬𑁆𑀳𑀁 𑀤𑁂𑀫𑀻𑀢𑀺𑀆𑀤𑀻𑀲𑀼 𑀧𑀭𑀺𑀘𑁆𑀘𑀢𑁆𑀢𑀢𑁆𑀢𑀸 𑀫𑀦𑀲𑀸 𑀅𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑁂𑀧𑀺 𑀲𑀫𑁆𑀧𑀤𑀸𑀦𑀪𑀽𑀢𑀲𑁆𑀲𑁂𑀯 𑀲𑀦𑁆𑀢𑀓𑀁 𑀳𑁄𑀢𑀺, 𑀲𑁄 𑀇𑀘𑁆𑀙𑀺𑀢𑀓𑁆𑀔𑀡𑁂 𑀕𑀳𑁂𑀢𑀼𑀁 𑀮𑀪𑀢𑀺. 𑀇𑀢𑁆𑀣𑀦𑁆𑀦𑀸𑀫𑀲𑁆𑀲𑀸𑀢𑀺 𑀧𑀭𑀫𑁆𑀫𑀼𑀔𑁂 𑀞𑀺𑀢𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀬𑀲𑁆𑀲 𑀧𑀦 𑀭𑀼𑀘𑁆𑀘𑀢𑀻𑀢𑀺𑀆𑀤𑀺 𑀉𑀪𑁄𑀳𑀺𑀧𑀺 𑀧𑀭𑀺𑀘𑁆𑀘𑀢𑁆𑀢𑀢𑀸𑀬 𑀅𑀲𑁆𑀲𑀸𑀫𑀺𑀓𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

‘‘𑀢𑀁 𑀦 𑀬𑀼𑀚𑁆𑀚𑀢𑀻’’𑀢𑀺 𑀇𑀤𑀁 𑀅𑀦𑁆𑀢𑁄𑀤𑀲𑀸𑀳𑁂 𑀏𑀯 𑀯𑀺𑀲𑁆𑀲𑀸𑀲𑀕𑁆𑀕𑀳𑀡𑀁 𑀲𑀦𑁆𑀥𑀸𑀬 𑀅𑀦𑀸𑀧𑀢𑁆𑀢𑀺𑀯𑀸𑀭𑀲𑁆𑀲 𑀆𑀕𑀢𑀢𑁆𑀢𑀸, 𑀇𑀥 𑀦𑀺𑀲𑁆𑀲𑀕𑁆𑀕𑀺𑀬𑀘𑀻𑀯𑀭𑀲𑁆𑀲 𑀓𑀧𑁆𑀧𑀺𑀬𑀪𑀸𑀯𑀓𑀭𑀡𑀢𑁆𑀣𑀁 𑀮𑁂𑀲𑁂𑀦 𑀕𑀳𑀺𑀢𑀢𑁆𑀢𑀸 𑀘 𑀯𑀼𑀢𑁆𑀢𑀁, 𑀓𑁂𑀘𑀺 𑀧𑀦 ‘‘𑀧𑀭𑁂𑀳𑀺 𑀲𑀪𑀸𑀕𑁂𑀦 𑀅𑀘𑁆𑀙𑀺𑀦𑁆𑀦𑁂, 𑀯𑀺𑀲𑁆𑀲𑀸𑀲𑀕𑁆𑀕𑀳𑀺𑀢𑁂 𑀘 𑀧𑀼𑀦 𑀮𑀤𑁆𑀥𑁂 𑀤𑁄𑀲𑁄 𑀦 𑀤𑀺𑀲𑁆𑀲𑀢𑀻’’𑀢𑀺 𑀯𑀤𑀦𑁆𑀢𑀺. 𑀅𑀦𑀥𑀺𑀝𑁆𑀞𑀸𑀦𑁂𑀦𑀸𑀢𑀺 𑀓𑀸𑀬𑀯𑀸𑀘𑀸𑀳𑀺 𑀓𑀢𑁆𑀢𑀩𑁆𑀩𑀲𑁆𑀲 𑀅𑀓𑀭𑀡𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀘𑀻𑀯𑀭𑀲𑁆𑀲 𑀅𑀢𑁆𑀢𑀦𑁄 𑀲𑀦𑁆𑀢𑀓𑀢𑀸, 𑀚𑀸𑀢𑀺𑀧𑀫𑀸𑀡𑀬𑀼𑀢𑁆𑀢𑀢𑀸, 𑀙𑀺𑀦𑁆𑀦𑀧𑀮𑀺𑀩𑁄𑀥𑀪𑀸𑀯𑁄, 𑀅𑀢𑀺𑀭𑁂𑀓𑀘𑀻𑀯𑀭𑀢𑀸, 𑀤𑀲𑀸𑀳𑀸𑀢𑀺𑀓𑁆𑀓𑀫𑁄𑀢𑀺 𑀇𑀫𑀸𑀦𑁂𑀢𑁆𑀣 𑀧𑀜𑁆𑀘 𑀅𑀗𑁆𑀕𑀸𑀦𑀺.

𑀧𑀞𑀫𑀓𑀣𑀺𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀉𑀤𑁄𑀲𑀺𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁪𑁭𑁩. 𑀤𑀼𑀢𑀺𑀬𑁂 𑀅𑀯𑀺𑀧𑁆𑀧𑀯𑀸𑀲𑁂𑀢𑀺 𑀅𑀯𑀺𑀧𑁆𑀧𑀯𑀸𑀲𑁂 𑀦𑀺𑀧𑁆𑀨𑀸𑀤𑁂𑀢𑀩𑁆𑀩𑁂, 𑀯𑀺𑀧𑁆𑀧𑀯𑀸𑀲𑀤𑁄𑀲𑀸𑀪𑀸𑀯𑁂 𑀲𑀸𑀥𑁂𑀢𑀩𑁆𑀩𑁂 𑀓𑀢𑁆𑀢𑀩𑁆𑀩𑀸 𑀲𑀫𑁆𑀫𑀼𑀢𑀻𑀢𑀺 𑀅𑀢𑁆𑀣𑁄.

𑁪𑁭𑁫. 𑀧𑀝𑀺𑀲𑀺𑀤𑁆𑀥𑀧𑀭𑀺𑀬𑀸𑀧𑀦𑁆𑀦𑁂𑀦𑀸𑀢𑀺 𑀯𑀺𑀧𑁆𑀧𑀯𑀲𑀺𑀢𑀼𑀁 𑀧𑀝𑀺𑀲𑀺𑀤𑁆𑀥𑁂𑀲𑀼 𑀢𑀻𑀲𑀼 𑀘𑀻𑀯𑀭𑁂𑀲𑀼 𑀅𑀦𑁆𑀢𑁄𑀕𑀥𑁂𑀦, 𑀏𑀓𑁂𑀦 𑀘 𑀅𑀯𑀬𑀯𑁂 𑀲𑀫𑀼𑀤𑀸𑀬𑁄𑀧𑀘𑀸𑀭𑀁 𑀤𑀲𑁆𑀲𑁂𑀢𑀺.

𑁪𑁭𑁮-𑁯. 𑀏𑀢𑁆𑀢𑀸𑀯𑀢𑀸𑀢𑀺 ‘‘𑀧𑀭𑀺𑀓𑁆𑀔𑀺𑀢𑁆𑀢𑁄’’𑀢𑀺 𑀇𑀫𑀺𑀦𑀸. ‘‘𑀲𑀪𑀸𑀬𑁂𑀢𑀺 𑀮𑀺𑀗𑁆𑀕𑀩𑁆𑀬𑀢𑁆𑀢𑀬𑁂𑀦 𑀲𑀪𑀸 𑀯𑀼𑀢𑁆𑀢𑀸’’𑀢𑀺 𑀯𑀢𑁆𑀯𑀸 𑀧𑀼𑀦 𑀲𑀬𑀫𑁆𑀧𑀺 ‘‘𑀲𑀪𑀸𑀬𑁂’’𑀢𑀺 𑀇𑀫𑀺𑀦𑀸 𑀯𑁄𑀳𑀭𑀦𑁆𑀢𑁄 𑀲𑀪𑀸-𑀲𑀤𑁆𑀤𑀲𑁆𑀲 𑀧𑀭𑀺𑀬𑀸𑀬𑁄 𑀲𑀪𑀸𑀬-𑀲𑀤𑁆𑀤𑁄 𑀦𑀧𑀼𑀁𑀲𑀓𑀮𑀺𑀗𑁆𑀕𑀬𑀼𑀢𑁆𑀢𑁄 𑀅𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀺. ‘‘𑀲𑀪𑀸𑀬𑀦𑁆𑀢𑀺 𑀮𑀺𑀗𑁆𑀕𑀩𑁆𑀬𑀢𑁆𑀢𑀬𑁂𑀦 𑀲𑀪𑀸 𑀯𑀼𑀢𑁆𑀢𑀸’’𑀢𑀺 𑀯𑀸 𑀧𑀸𑀞𑁄. 𑀮𑀺𑀗𑁆𑀕𑀩𑁆𑀬𑀢𑁆𑀢𑀬𑁂𑀦 𑀲𑀪𑀸𑀢𑀺 𑀘 𑀮𑀺𑀗𑁆𑀕𑀦𑁆𑀢𑀭𑀬𑀼𑀢𑁆𑀢𑁄 𑀲𑀪𑀸𑀲𑀤𑁆𑀤𑀧𑀭𑀺𑀬𑀸𑀬𑁄 𑀲𑀪𑀸𑀬𑀲𑀤𑁆𑀤𑁄𑀢𑀺 𑀅𑀢𑁆𑀣𑁄.

𑀲𑀪𑀸𑀬𑀁 𑀕𑀘𑁆𑀙𑀢𑀻𑀢𑀺 𑀲𑀪𑀁 𑀕𑀘𑁆𑀙𑀢𑀺. 𑀯𑀲𑀺𑀢𑀩𑁆𑀩𑀁 𑀦𑀢𑁆𑀣𑀻𑀢𑀺 𑀘𑀻𑀯𑀭𑀳𑀢𑁆𑀣𑀧𑀸𑀲𑁂𑀬𑁂𑀯 𑀯𑀲𑀺𑀢𑀩𑁆𑀩𑀁 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀢𑀲𑁆𑀲𑀸𑀢𑀺 𑀯𑀻𑀣𑀺𑀬𑀸. 𑀲𑀪𑀸𑀬𑀲𑁆𑀲 𑀘 𑀤𑁆𑀯𑀸𑀭𑀲𑁆𑀲 𑀘 𑀳𑀢𑁆𑀣𑀧𑀸𑀲𑀸 𑀦 𑀯𑀺𑀚𑀳𑀺𑀢𑀩𑁆𑀩𑀦𑁆𑀢𑀺 𑀏𑀢𑁆𑀣 𑀲𑀪𑀸𑀬𑀤𑁆𑀯𑀸𑀭𑀸𑀦𑀫𑀦𑁆𑀢𑀭𑁂 𑀯𑀻𑀣𑀺 𑀕𑁂𑀳𑀸𑀧𑀺 𑀕𑀳𑀺𑀢𑀸 𑀏𑀯 𑀳𑁄𑀦𑁆𑀢𑀺 𑀆𑀤𑀺𑀧𑀭𑀺𑀬𑁄𑀲𑀸𑀦𑀸𑀦𑀁 𑀕𑀳𑀺𑀢𑀢𑁆𑀢𑀸. 𑀏𑀢𑁆𑀣 𑀘 𑀤𑁆𑀯𑀸𑀭𑀯𑀻𑀣𑀺𑀖𑀭𑁂𑀲𑀼 𑀯𑀲𑀦𑁆𑀢𑁂𑀦 𑀕𑀸𑀫𑀧𑁆𑀧𑀯𑁂𑀲𑀦𑀲𑀳𑀲𑁂𑀬𑁆𑀬𑀸𑀤𑀺𑀤𑁄𑀲𑀁 𑀧𑀭𑀺𑀳𑀭𑀺𑀢𑁆𑀯𑀸 𑀲𑀼𑀧𑀝𑀺𑀘𑁆𑀙𑀦𑁆𑀦𑀢𑀸𑀤𑀺𑀬𑀼𑀢𑁆𑀢𑁂𑀦𑁂𑀯 𑀪𑀯𑀺𑀢𑀩𑁆𑀩𑀁, 𑀲𑀪𑀸 𑀧𑀦 𑀬𑀤𑀺 𑀲𑀩𑁆𑀩𑁂𑀲𑀁 𑀯𑀲𑀦𑀢𑁆𑀣𑀸𑀬 𑀲𑀸𑀮𑀸𑀲𑀤𑀺𑀲𑀸 𑀓𑀢𑀸, 𑀅𑀦𑁆𑀢𑀭𑀸𑀭𑀸𑀫𑁂 𑀯𑀺𑀬 𑀬𑀣𑀸𑀲𑀼𑀔𑀁 𑀯𑀲𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀧𑀭𑀺𑀓𑁆𑀔𑀺𑀢𑁆𑀢𑀢𑀸𑀬 𑀘 𑀏𑀓𑀽𑀧𑀘𑀸𑀭𑀢𑀁, 𑀅𑀧𑀭𑀺𑀓𑁆𑀔𑀺𑀢𑁆𑀢𑀢𑀸𑀬 𑀦𑀸𑀦𑀽𑀧𑀘𑀸𑀭𑀢𑀜𑁆𑀘 𑀦𑀺𑀯𑁂𑀲𑀦𑀸𑀤𑀻𑀲𑀼𑀧𑀺 𑀅𑀢𑀺𑀤𑀺𑀲𑀦𑁆𑀢𑁄 𑀆𑀳 ‘‘𑀏𑀢𑁂𑀦𑁂𑀯𑀽𑀧𑀸𑀬𑁂𑀦𑀸’’𑀢𑀺𑀆𑀤𑀺. 𑀦𑀺𑀯𑁂𑀲𑀦𑀸𑀤𑀻𑀦𑀺 𑀩𑀳𑀺𑀕𑀸𑀫𑀢𑁄 𑀲𑀦𑁆𑀦𑀺𑀯𑀺𑀝𑁆𑀞𑀸𑀦𑀺 𑀕𑀳𑀺𑀢𑀸𑀦𑀺 𑀅𑀦𑁆𑀢𑁄𑀕𑀸𑀫𑁂 𑀞𑀺𑀢𑀸𑀦𑀁 𑀕𑀸𑀫𑀕𑁆𑀕𑀳𑀡𑁂𑀦𑁂𑀯 𑀕𑀳𑀺𑀢𑀢𑁆𑀢𑀸. 𑀲𑀩𑁆𑀩𑀢𑁆𑀣𑀸𑀢𑀺 𑀕𑀸𑀫𑀦𑀺𑀕𑀫𑀦𑀺𑀯𑁂𑀲𑀦𑀸𑀤𑀻𑀲𑀼 𑀧𑀦𑁆𑀦𑀭𑀲𑀲𑀼. 𑀧𑀭𑀺𑀓𑁆𑀔𑁂𑀧𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀅𑀧𑀭𑀺𑀓𑁆𑀔𑁂𑀧𑀲𑁆𑀲𑁂𑀯 𑀕𑀳𑀡𑀁, 𑀦 𑀏𑀓𑀓𑀼𑀮𑀸𑀤𑀻𑀦𑀫𑁆𑀧𑀺 𑀢𑁂𑀲𑀁 𑀏𑀓𑀽𑀧𑀘𑀸𑀭𑀢𑀸𑀦𑀸𑀦𑀽𑀧𑀘𑀸𑀭𑀢𑀸𑀦𑀺𑀫𑀺𑀢𑁆𑀢𑀢𑀸𑀪𑀸𑀯𑀸. 𑀏𑀢𑁆𑀣 𑀘 𑀲𑀢𑁆𑀣𑀲𑁆𑀲 𑀓𑀢𑀺𑀧𑀸𑀳𑀁 𑀓𑀢𑁆𑀣𑀘𑀺 𑀦𑀺𑀯𑀺𑀝𑁆𑀞𑀲𑁆𑀲𑁂𑀯 𑀧𑀭𑀺𑀓𑁆𑀔𑁂𑀧𑁄 𑀳𑁄𑀢𑀺, 𑀦 𑀕𑀘𑁆𑀙𑀦𑁆𑀢𑀲𑁆𑀲.

𑁪𑁮𑁨-𑁭. 𑀕𑀸𑀫𑀢𑁄 𑀩𑀳𑀺 𑀇𑀲𑁆𑀲𑀭𑀸𑀦𑀁 𑀲𑀫𑀼𑀤𑁆𑀤𑀢𑀻𑀭𑀸𑀤𑀻𑀲𑀼 𑀓𑀢𑀪𑀡𑁆𑀟𑀲𑀸𑀮𑀸 𑀉𑀤𑁄𑀲𑀺𑀢𑁄𑀢𑀺 𑀆𑀳 ‘‘𑀬𑀸𑀦𑀸𑀤𑀻𑀦’’𑀦𑁆𑀢𑀺𑀆𑀤𑀺. 𑀫𑀼𑀡𑁆𑀟𑀘𑁆𑀙𑀤𑀦𑀧𑀸𑀲𑀸𑀤𑁄𑀢𑀺 𑀦𑀸𑀢𑀺𑀉𑀘𑁆𑀘𑁄 𑀘𑀦𑁆𑀤𑀺𑀓𑀗𑁆𑀕𑀡𑀬𑀼𑀢𑁆𑀢𑁄 𑀲𑀺𑀔𑀭𑀓𑀽𑀝𑀫𑀸𑀮𑀸𑀤𑀺𑀯𑀺𑀭𑀳𑀺𑀢𑁄 𑀧𑀸𑀲𑀸𑀤𑁄.

𑁪𑁮𑁯. 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸𑀢𑀺 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸. 𑀦𑀤𑀻𑀧𑀭𑀺𑀳𑀸𑀭𑁄𑀢𑀺 𑀯𑀺𑀲𑀼𑀁𑀕𑀸𑀫𑀸𑀤𑀻𑀦𑀁 𑀯𑀺𑀬 𑀦𑀤𑀻𑀧𑀭𑀺𑀳𑀸𑀭𑀲𑁆𑀲 𑀅𑀯𑀼𑀢𑁆𑀢𑀢𑁆𑀢𑀸 𑀘𑀻𑀯𑀭𑀳𑀢𑁆𑀣𑀧𑀸𑀲𑁄 𑀏𑀯𑀸𑀢𑀺 𑀯𑀤𑀦𑁆𑀢𑀺, 𑀅𑀜𑁆𑀜𑁂 𑀧𑀦 ‘‘𑀇𑀫𑀺𑀦𑀸 𑀅𑀝𑁆𑀞𑀓𑀣𑀸𑀯𑀘𑀦𑁂𑀦 𑀦𑀤𑀻𑀧𑀭𑀺𑀳𑀸𑀭𑁄𑀧𑀺 𑀯𑀺𑀲𑀼𑀁 𑀲𑀺𑀤𑁆𑀥𑁄, 𑀦𑀤𑀺𑀬𑀸 𑀳𑀢𑁆𑀣𑀧𑀸𑀲𑁄 𑀦 𑀯𑀺𑀚𑀳𑀺𑀢𑀩𑁆𑀩𑁄’’𑀢𑀺 𑀯𑀤𑀦𑁆𑀢𑀺. 𑀯𑀺𑀳𑀸𑀭𑀲𑀻𑀫𑀦𑁆𑀢𑀺 𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀁 𑀲𑀦𑁆𑀥𑀸𑀬𑀸𑀳. 𑀏𑀢𑁆𑀣 𑀘 𑀯𑀺𑀳𑀸𑀭𑀲𑁆𑀲 𑀦𑀸𑀦𑀸𑀓𑀼𑀮𑀲𑀦𑁆𑀢𑀓𑀪𑀸𑀯𑁂𑀧𑀺 𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸𑀧𑀭𑀺𑀘𑁆𑀙𑁂𑀤𑀩𑁆𑀪𑀦𑁆𑀢𑀭𑁂 𑀲𑀩𑁆𑀩𑀢𑁆𑀣 𑀘𑀻𑀯𑀭𑀅𑀯𑀺𑀧𑁆𑀧𑀯𑀸𑀲𑀲𑀫𑁆𑀪𑀯𑀢𑁄 𑀢𑀲𑁆𑀲𑀸 𑀧𑀥𑀸𑀦𑀢𑁆𑀢𑀸 𑀢𑀢𑁆𑀣 𑀲𑀢𑁆𑀣𑀧𑀭𑀺𑀳𑀸𑀭𑁄 𑀦 𑀮𑀩𑁆𑀪𑀢𑀻𑀢𑀺 ‘‘𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀯𑀲𑀺𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁. ‘‘𑀲𑀢𑁆𑀣𑀲𑀫𑀻𑀧𑁂’’𑀢𑀺 𑀇𑀤𑀁 𑀬𑀣𑀸𑀯𑀼𑀢𑁆𑀢𑀁 𑀅𑀩𑁆𑀪𑀦𑁆𑀢𑀭𑀧𑀭𑀺𑀘𑁆𑀙𑁂𑀤𑀯𑀲𑁂𑀦 𑀯𑀼𑀢𑁆𑀢𑀁. 𑀧𑀸𑀴𑀺𑀬𑀁 𑀦𑀸𑀦𑀸𑀓𑀼𑀮𑀲𑁆𑀲 𑀲𑀢𑁆𑀣𑁄 𑀳𑁄𑀢𑀺, 𑀲𑀢𑁆𑀣𑁂 𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀳𑀢𑁆𑀣𑀧𑀸𑀲𑀸 𑀦 𑀯𑀺𑀚𑀳𑀺𑀢𑀩𑁆𑀩𑀦𑁆𑀢𑀺 𑀏𑀢𑁆𑀣 𑀲𑀢𑁆𑀣𑀳𑀢𑁆𑀣𑀧𑀸𑀲𑁄 𑀕𑀳𑀺𑀢𑁄.

𑁪𑁯𑁦. 𑀏𑀓𑀓𑀼𑀮𑀲𑁆𑀲 𑀔𑁂𑀢𑁆𑀢𑁂𑀢𑀺 𑀅𑀧𑀭𑀺𑀓𑁆𑀔𑀺𑀢𑁆𑀢𑀁 𑀲𑀦𑁆𑀥𑀸𑀬 𑀯𑀤𑀢𑀺.

𑁪𑁯𑁧-𑁪. 𑀯𑀺𑀳𑀸𑀭𑁄 𑀦𑀸𑀫 𑀉𑀧𑀘𑀸𑀭𑀲𑀻𑀫𑀸. 𑀢𑀢𑁆𑀣 𑀬𑀲𑁆𑀫𑀺𑀁 𑀯𑀺𑀳𑀸𑀭𑁂𑀢𑀺 𑀢𑀲𑁆𑀲 𑀅𑀦𑁆𑀢𑁄𑀧𑀭𑀺𑀯𑁂𑀡𑀸𑀤𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀏𑀓𑀓𑀼𑀮𑀸𑀤𑀺𑀲𑀦𑁆𑀢𑀓𑀢𑀸 𑀘𑁂𑀢𑁆𑀣 𑀓𑀸𑀭𑀸𑀧𑀓𑀸𑀦𑀁 𑀯𑀲𑁂𑀦. 𑀙𑀸𑀬𑀸𑀬 𑀨𑀼𑀝𑁆𑀞𑁄𑀓𑀸𑀲𑀲𑁆𑀲𑀸𑀢𑀺 𑀉𑀚𑀼𑀓𑀁 𑀅𑀯𑀓𑁆𑀔𑀺𑀢𑁆𑀢𑀮𑁂𑀟𑁆𑀟𑀼𑀧𑀸𑀢𑀩𑁆𑀪𑀦𑁆𑀢𑀭𑀁 𑀲𑀦𑁆𑀥𑀸𑀬 𑀯𑀤𑀢𑀺.

𑀅𑀕𑀫𑀦𑀧𑀣𑁂𑀢𑀺 𑀢𑀤𑀳𑁂𑀯 𑀕𑀦𑁆𑀢𑁆𑀯𑀸 𑀦𑀺𑀯𑀢𑁆𑀢𑁂𑀢𑀼𑀁 𑀦 𑀲𑀓𑁆𑀓𑀼𑀡𑁂𑀬𑁆𑀬𑀓𑁂 𑀲𑀫𑀼𑀤𑁆𑀤𑀫𑀚𑁆𑀛𑁂 𑀬𑁂 𑀤𑀻𑀧𑀓𑀸, 𑀢𑁂𑀲𑀽𑀢𑀺 𑀬𑁄𑀚𑀦𑀸. 𑀇𑀢𑀭𑀲𑁆𑀫𑀺𑀦𑁆𑀢𑀺 𑀧𑀼𑀭𑀢𑁆𑀣𑀺𑀫𑀤𑀺𑀲𑀸𑀬 𑀘𑀻𑀯𑀭𑁂. ‘‘𑀉𑀧𑁄𑀲𑀣𑀓𑀸𑀮𑁂…𑀧𑁂… 𑀯𑀟𑁆𑀠𑀢𑀻’’𑀢𑀺 𑀇𑀫𑀺𑀦𑀸 𑀘𑀻𑀯𑀭𑀯𑀺𑀧𑁆𑀧𑀯𑀸𑀲𑀲𑀢𑁆𑀢𑀩𑁆𑀪𑀦𑁆𑀢𑀭𑀢𑁄 𑀲𑀫𑀸𑀦𑀲𑀁𑀯𑀸𑀲𑀸𑀬 𑀲𑀢𑁆𑀢𑀩𑁆𑀪𑀦𑁆𑀢𑀭𑀲𑀻𑀫𑀸𑀬 𑀅𑀘𑁆𑀘𑀦𑁆𑀢𑀯𑀺𑀲𑀤𑀺𑀲𑀢𑀁 𑀤𑀲𑁆𑀲𑁂𑀢𑀺. 𑀢𑀣𑀸 𑀳𑀺 𑀩𑀳𑀽𑀲𑀼 𑀪𑀺𑀓𑁆𑀔𑀽𑀲𑀼 𑀏𑀓𑀢𑁄 𑀦𑀺𑀲𑀻𑀤𑀺𑀢𑁆𑀯𑀸 𑀲𑀫𑀦𑁆𑀢𑀸 𑀲𑀢𑁆𑀢𑀩𑁆𑀪𑀦𑁆𑀢𑀭𑀧𑀭𑀺𑀘𑁆𑀙𑁂𑀤𑁂𑀲𑀼 𑀬𑀣𑀸𑀲𑀓𑀁 𑀘𑀻𑀯𑀭𑀁 𑀞𑀧𑁂𑀢𑁆𑀯𑀸 𑀧𑀭𑀺𑀳𑀭𑀦𑁆𑀢𑁂𑀲𑀼 𑀏𑀓𑁂𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀺𑀲𑀺𑀦𑁆𑀦𑁄𑀓𑀸𑀲𑀢𑁄 𑀧𑀝𑁆𑀞𑀸𑀬 𑀧𑀘𑁆𑀘𑁂𑀓𑀁 𑀲𑀢𑁆𑀢𑀩𑁆𑀪𑀦𑁆𑀢𑀭𑀲𑁆𑀲 𑀧𑀭𑀺𑀘𑁆𑀙𑁂𑀤𑁄 𑀅𑀜𑁆𑀜𑀫𑀜𑁆𑀜𑀯𑀺𑀲𑀤𑀺𑀲𑁄 𑀅𑀦𑁂𑀓𑀯𑀺𑀥𑁄 𑀳𑁄𑀢𑀺, 𑀦 𑀏𑀓𑁄 𑀧𑀭𑀺𑀲𑀧𑀭𑀺𑀬𑀦𑁆𑀢𑀢𑁄 𑀧𑀝𑁆𑀞𑀸𑀬 𑀅𑀦𑀺𑀫𑀺𑀢𑀩𑁆𑀩𑀢𑁆𑀢𑀸. 𑀢𑁂𑀦𑁂𑀯 𑀢𑀢𑁆𑀣 𑀧𑀭𑀺𑀲𑀯𑀲𑁂𑀦 𑀯𑀼𑀟𑁆𑀠𑀺, 𑀳𑀸𑀦𑀺 𑀯𑀸 𑀦 𑀳𑁄𑀢𑀺, 𑀦 𑀏𑀯𑀁 𑀲𑀢𑁆𑀢𑀩𑁆𑀪𑀦𑁆𑀢𑀭𑀲𑀻𑀫𑀸𑀬. 𑀲𑀸 𑀳𑀺 𑀬𑁄𑀚𑀦𑀺𑀓𑀸𑀬𑀧𑀺 𑀧𑀭𑀺𑀲𑀧𑀭𑀺𑀬𑀦𑁆𑀢𑀢𑁄𑀯 𑀧𑀝𑁆𑀞𑀸𑀬 𑀲𑀫𑀦𑁆𑀢𑀸 𑀲𑀢𑁆𑀢𑀩𑁆𑀪𑀦𑁆𑀢𑀭𑀧𑀅𑀘𑁆𑀙𑀺𑀦𑁆𑀦𑀸 𑀏𑀓𑀸𑀯 𑀳𑁄𑀢𑀺. 𑀢𑁂𑀦𑁂𑀯 𑀲𑀸 𑀧𑀭𑀺𑀲𑀯𑀲𑁂𑀦 𑀯𑀟𑁆𑀠𑀢𑀺, 𑀳𑀸𑀬𑀢𑀺 𑀘, 𑀢𑀲𑁆𑀫𑀸 𑀅𑀜𑁆𑀜𑀸𑀯 𑀲𑀢𑁆𑀢𑀩𑁆𑀪𑀦𑁆𑀢𑀭𑀲𑀻𑀫𑀸 𑀅𑀜𑁆𑀜𑁄 𑀲𑀢𑁆𑀢𑀩𑁆𑀪𑀦𑁆𑀢𑀭𑀢𑁄 𑀧𑀭𑀺𑀘𑁆𑀙𑀺𑀦𑁆𑀦𑁄 𑀘𑀻𑀯𑀭𑀯𑀺𑀧𑁆𑀧𑀯𑀸𑀲𑀧𑀭𑀺𑀳𑀸𑀭𑁄 𑀅𑀩𑁆𑀪𑁄𑀓𑀸𑀲𑁄𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀬𑀜𑁆𑀘𑁂𑀢𑁆𑀣 𑀯𑀢𑁆𑀢𑀩𑁆𑀩𑀁, 𑀢𑀁 𑀔𑀦𑁆𑀥𑀓𑁂 𑀲𑀻𑀫𑀸𑀓𑀣𑀸𑀬𑀫𑁂𑀯 (𑀫𑀳𑀸𑀯. 𑁧𑁪𑁩) 𑀯𑀓𑁆𑀔𑀸𑀫.

𑁪𑁯𑁫. 𑀦𑀤𑀺𑀁 𑀑𑀢𑀭𑀢𑀻𑀢𑀺 𑀳𑀢𑁆𑀣𑀧𑀸𑀲𑀁 𑀫𑀼𑀜𑁆𑀘𑀺𑀢𑁆𑀯𑀸 𑀑𑀢𑀭𑀢𑀺. 𑀩𑀳𑀺𑀕𑀸𑀫𑁂 𑀞𑀧𑁂𑀢𑁆𑀯𑀸𑀢𑀺 𑀅𑀧𑀸𑀭𑀼𑀧𑀺𑀢𑀩𑁆𑀩𑀢𑀸𑀬 𑀯𑀼𑀢𑁆𑀢𑀁. 𑀯𑀺𑀦𑀬𑀓𑀫𑁆𑀫𑀁 𑀓𑀸𑀢𑀩𑁆𑀩𑀦𑁆𑀢𑀺 𑀉𑀢𑁆𑀢𑀭𑀸𑀲𑀗𑁆𑀕𑁂 𑀘 𑀩𑀳𑀺𑀕𑀸𑀫𑁂 𑀞𑀧𑀺𑀢𑀲𑀗𑁆𑀖𑀸𑀝𑀺𑀬𑀜𑁆𑀘 𑀧𑀞𑀫𑀁 𑀯𑀺𑀦𑀬𑀓𑀫𑁆𑀫𑀁 𑀓𑀢𑁆𑀯𑀸 𑀧𑀘𑁆𑀙𑀸 𑀉𑀢𑁆𑀢𑀭𑀸𑀲𑀗𑁆𑀕𑀁 𑀦𑀺𑀯𑀸𑀲𑁂𑀢𑁆𑀯𑀸 𑀅𑀦𑁆𑀢𑀭𑀯𑀸𑀲𑀓𑁂 𑀓𑀸𑀢𑀩𑁆𑀩𑀁. 𑀏𑀢𑁆𑀣 𑀘 𑀩𑀳𑀺𑀕𑀸𑀫𑁂 𑀞𑀧𑀺𑀢𑀲𑁆𑀲𑀸𑀧𑀺 𑀯𑀺𑀦𑀬𑀓𑀫𑁆𑀫𑀯𑀘𑀦𑀢𑁄 𑀧𑀭𑀫𑁆𑀫𑀼𑀔𑀸𑀧𑀺 𑀞𑀺𑀢𑀁 𑀯𑀺𑀲𑁆𑀲𑀚𑁆𑀚𑀺𑀢𑀼𑀁, 𑀦𑀺𑀲𑁆𑀲𑀝𑁆𑀞𑀁 𑀤𑀸𑀢𑀼𑀜𑁆𑀘 𑀯𑀝𑁆𑀝𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀤𑀳𑀭𑀸𑀦𑀁 𑀕𑀫𑀦𑁂 𑀲𑀉𑀲𑁆𑀲𑀸𑀳𑀢𑁆𑀢𑀸 ‘‘𑀦𑀺𑀲𑁆𑀲𑀬𑁄 𑀧𑀦 𑀦 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀻’’𑀢𑀺 𑀯𑀼𑀢𑁆𑀢𑀁. 𑀫𑀼𑀳𑀼𑀢𑁆𑀢𑀁…𑀧𑁂… 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀻𑀢𑀺 𑀲𑀉𑀲𑁆𑀲𑀸𑀳𑀢𑁆𑀢𑁂 𑀕𑀫𑀦𑀲𑁆𑀲 𑀉𑀧𑀘𑁆𑀙𑀺𑀦𑁆𑀦𑀢𑁆𑀢𑀸 𑀯𑀼𑀢𑁆𑀢𑀁. 𑀢𑁂𑀲𑀁 𑀧𑀦 𑀧𑀼𑀭𑀸𑀭𑀼𑀡𑀸𑀯 𑀉𑀝𑁆𑀞𑀳𑀺𑀢𑁆𑀯𑀸 𑀲𑀉𑀲𑁆𑀲𑀸𑀳𑁂𑀦 𑀕𑀘𑁆𑀙𑀦𑁆𑀢𑀸𑀦𑀁 𑀅𑀭𑀼𑀡𑁂 𑀅𑀦𑁆𑀢𑀭𑀸 𑀉𑀝𑁆𑀞𑀺𑀢𑁂𑀧𑀺 𑀦 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺 ‘‘𑀬𑀸𑀯 𑀅𑀭𑀼𑀡𑀼𑀕𑁆𑀕𑀫𑀦𑀸 𑀲𑀬𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸. 𑀢𑁂𑀦𑁂𑀯 ‘‘𑀕𑀸𑀫𑀁 𑀧𑀯𑀺𑀲𑀺𑀢𑁆𑀯𑀸…𑀧𑁂… 𑀦 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀻’’𑀢𑀺 𑀯𑀼𑀢𑁆𑀢𑀁. 𑀅𑀜𑁆𑀜𑀫𑀜𑁆𑀜𑀲𑁆𑀲 𑀯𑀘𑀦𑀁 𑀅𑀕𑁆𑀕𑀳𑁂𑀢𑁆𑀯𑀸𑀢𑀺𑀆𑀤𑀺𑀫𑁆𑀳𑀺 𑀲𑀉𑀲𑁆𑀲𑀸𑀳𑀢𑁆𑀢𑀸 𑀕𑀫𑀦𑀓𑁆𑀔𑀡𑁂 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺 𑀦 𑀯𑀼𑀢𑁆𑀢𑀸. 𑀥𑁂𑀦𑀼𑀪𑀬𑁂𑀦𑀸𑀢𑀺 𑀢𑀭𑀼𑀡𑀯𑀘𑁆𑀙𑀕𑀸𑀯𑀻𑀦𑀁 𑀅𑀪𑀺𑀥𑀸𑀯𑀺𑀢𑁆𑀯𑀸 𑀲𑀺𑀗𑁆𑀕𑁂𑀦 𑀧𑀳𑀭𑀡𑀪𑀬𑁂𑀦. 𑀦𑀺𑀲𑁆𑀲𑀬𑁄 𑀘 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀻𑀢𑀺 𑀏𑀢𑁆𑀣 𑀥𑁂𑀦𑀼𑀪𑀬𑀸𑀤𑀻𑀳𑀺 𑀞𑀺𑀢𑀸𑀦𑀁 𑀬𑀸𑀯 𑀪𑀬𑀯𑀽𑀧𑀲𑀫𑀸 𑀞𑀸𑀢𑀩𑁆𑀩𑀢𑁄 ‘‘𑀅𑀦𑁆𑀢𑁄𑀅𑀭𑀼𑀡𑁂𑀬𑁂𑀯 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀦𑀺𑀬𑀫𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸 𑀯𑀼𑀢𑁆𑀢𑀁. 𑀬𑀢𑁆𑀣 𑀧𑀦 𑀏𑀯𑀁 𑀦𑀺𑀬𑀫𑁂𑀢𑀼𑀁 𑀲𑀓𑁆𑀓𑀸, 𑀢𑀢𑁆𑀣 𑀅𑀦𑁆𑀢𑀭𑀸𑀭𑀼𑀡𑁂 𑀉𑀕𑁆𑀕𑀢𑁂𑀧𑀺 𑀦𑀺𑀲𑁆𑀲𑀬𑁄 𑀦 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺 𑀪𑁂𑀲𑀚𑁆𑀚𑀢𑁆𑀣𑀸𑀬 𑀕𑀸𑀫𑀧𑁆𑀧𑀯𑀺𑀝𑁆𑀞𑀤𑀳𑀭𑀸𑀦𑀁 𑀯𑀺𑀬. 𑀅𑀦𑁆𑀢𑁄𑀲𑀻𑀫𑀸𑀬𑀁 𑀕𑀸𑀫𑀦𑁆𑀢𑀺 𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸𑀲𑀫𑁆𑀫𑀼𑀢𑀺𑀢𑁄 𑀧𑀘𑁆𑀙𑀸 𑀧𑀢𑀺𑀝𑁆𑀞𑀸𑀧𑀺𑀢𑀕𑀸𑀫𑀁 𑀲𑀦𑁆𑀥𑀸𑀬 𑀯𑀤𑀢𑀺 𑀕𑀸𑀫𑀜𑁆𑀘 𑀕𑀸𑀫𑀽𑀧𑀘𑀸𑀭𑀜𑁆𑀘 𑀞𑀧𑁂𑀢𑁆𑀯𑀸 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑀢𑁄. 𑀧𑀯𑀺𑀝𑁆𑀞𑀸𑀦𑀦𑁆𑀢𑀺 𑀆𑀘𑀭𑀺𑀬𑀦𑁆𑀢𑁂𑀯𑀸𑀲𑀺𑀓𑀸𑀦𑀁 𑀯𑀺𑀲𑀼𑀁 𑀯𑀺𑀲𑀼𑀁 𑀕𑀢𑀸𑀦𑀁 𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀢𑁆𑀢𑀸 𑀦𑁂𑀯 𑀘𑀻𑀯𑀭𑀸𑀦𑀺 𑀦𑀺𑀲𑁆𑀲𑀕𑁆𑀕𑀺𑀬𑀸𑀦𑀺 𑀳𑁄𑀦𑁆𑀢𑀺, 𑀲𑀉𑀲𑁆𑀲𑀸𑀳𑀢𑀸𑀬 𑀦𑀺𑀲𑁆𑀲𑀬𑁄 𑀦 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺. 𑀅𑀦𑁆𑀢𑀭𑀸𑀫𑀕𑁆𑀕𑁂𑀢𑀺 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀆𑀕𑀘𑁆𑀙𑀦𑁆𑀢𑀸𑀦𑀁 𑀅𑀦𑁆𑀢𑀭𑀸𑀫𑀕𑁆𑀕𑁂.

‘‘𑀇𑀥 𑀅𑀧𑀘𑁆𑀘𑀼𑀤𑁆𑀥𑀭𑀡’’𑀦𑁆𑀢𑀺 𑀇𑀫𑀺𑀦𑀸 𑀅𑀥𑀺𑀝𑁆𑀞𑀸𑀦𑀯𑀺𑀓𑀧𑁆𑀧𑀦𑀸𑀦𑀺 𑀯𑀺𑀬 𑀧𑀘𑁆𑀘𑀼𑀤𑁆𑀥𑀭𑀡𑀫𑁆𑀧𑀺 𑀓𑀸𑀬𑁂𑀦 𑀯𑀸 𑀯𑀸𑀘𑀸𑀬 𑀯𑀸 𑀓𑀢𑁆𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀓𑀸𑀬𑀯𑀸𑀘𑀸𑀳𑀺 𑀓𑀢𑁆𑀢𑀩𑁆𑀩𑀲𑁆𑀲 𑀅𑀓𑀭𑀡𑀢𑁄𑀢𑀺 𑀇𑀤𑀁 𑀓𑀸𑀬𑀯𑀸𑀘𑀸𑀲𑀫𑀼𑀝𑁆𑀞𑀸𑀦𑀁 𑀯𑀼𑀢𑁆𑀢𑀁. 𑀅𑀥𑀺𑀝𑁆𑀞𑀺𑀢𑀢𑀺𑀘𑀻𑀯𑀭𑀢𑀸, 𑀅𑀦𑀢𑁆𑀣𑀢𑀓𑀣𑀺𑀦𑀢𑀸, 𑀅𑀮𑀤𑁆𑀥𑀲𑀫𑁆𑀫𑀼𑀢𑀺𑀢𑀸, 𑀭𑀢𑁆𑀢𑀺𑀯𑀺𑀧𑁆𑀧𑀯𑀸𑀲𑁄𑀢𑀺 𑀇𑀫𑀸𑀦𑁂𑀢𑁆𑀣 𑀘𑀢𑁆𑀢𑀸𑀭𑀺 𑀅𑀗𑁆𑀕𑀸𑀦𑀺.

𑀉𑀤𑁄𑀲𑀺𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀢𑀢𑀺𑀬𑀓𑀣𑀺𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁪𑁯𑁭. 𑀢𑀢𑀺𑀬𑁂 𑀧𑀸𑀴𑀺𑀬𑀁 𑀘𑀻𑀯𑀭𑀧𑀘𑁆𑀘𑀸𑀲𑀸 𑀦𑀺𑀓𑁆𑀔𑀺𑀧𑀺𑀢𑀼𑀦𑁆𑀢𑀺 𑀘𑀻𑀯𑀭𑀧𑀘𑁆𑀘𑀸𑀲𑀸𑀬 𑀲𑀢𑀺𑀬𑀸 𑀦𑀺𑀓𑁆𑀔𑀺𑀧𑀺𑀢𑀼𑀦𑁆𑀢𑀺 𑀅𑀢𑁆𑀣𑁄. 𑀦𑀺𑀝𑁆𑀞𑀺𑀢𑀘𑀻𑀯𑀭𑀲𑁆𑀫𑀺𑀁 𑀪𑀺𑀓𑁆𑀔𑀼𑀦𑀸𑀢𑀺 𑀏𑀢𑁆𑀣 𑀤𑀼𑀢𑀺𑀬𑀓𑀣𑀺𑀦𑁂 𑀯𑀺𑀬 𑀲𑀸𑀫𑀺𑀯𑀲𑁂𑀦𑁂𑀯 𑀓𑀭𑀡𑀯𑀘𑀦𑀲𑁆𑀲 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑁪𑁯𑁯-𑁫𑁦𑁦. 𑀢𑀼𑀬𑁆𑀳𑀁 𑀤𑀫𑁆𑀫𑀻𑀢𑀺 𑀤𑀺𑀦𑁆𑀦𑀦𑁆𑀢𑀺 ‘‘𑀢𑀼𑀬𑁆𑀳𑀁, 𑀪𑀦𑁆𑀢𑁂, 𑀅𑀓𑀸𑀮𑀘𑀻𑀯𑀭𑀁 𑀤𑀫𑁆𑀫𑀻’’𑀢𑀺 𑀏𑀯𑀁 𑀤𑀺𑀦𑁆𑀦𑀁, 𑀏𑀢𑀫𑁆𑀧𑀺 𑀓𑀸𑀮𑁂 𑀆𑀤𑀺𑀲𑁆𑀲 𑀤𑀺𑀦𑁆𑀦𑀁 𑀦𑀸𑀫 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀇𑀤𑀁 𑀧𑀦 𑀅𑀝𑁆𑀞𑀓𑀣𑀸𑀯𑀘𑀦𑀁, 𑀧𑀸𑀴𑀺𑀬𑀁 ‘‘𑀓𑀸𑀮𑁂𑀧𑀺 𑀆𑀤𑀺𑀲𑁆𑀲 𑀤𑀺𑀦𑁆𑀦’’𑀦𑁆𑀢𑀺 𑀇𑀤𑀜𑁆𑀘 ‘‘𑀅𑀓𑀸𑀮𑀘𑀻𑀯𑀭’’𑀦𑁆𑀢𑀺 𑀯𑀘𑀦𑀲𑀸𑀫𑀜𑁆𑀜𑀢𑁄 𑀮𑀩𑁆𑀪𑀫𑀸𑀦𑀁 𑀲𑀩𑁆𑀩𑀫𑁆𑀧𑀺 𑀤𑀲𑁆𑀲𑁂𑀢𑀼𑀁 𑀅𑀢𑁆𑀣𑀼𑀤𑁆𑀥𑀸𑀭𑀯𑀲𑁂𑀦 𑀯𑀼𑀢𑁆𑀢𑀁 𑀧𑀞𑀫𑀅𑀦𑀺𑀬𑀢𑁂 𑀲𑁄𑀢𑀲𑁆𑀲 𑀭𑀳𑁄 𑀯𑀺𑀬. 𑀲𑀗𑁆𑀖𑀲𑁆𑀲 𑀳𑀺 𑀓𑀸𑀮𑁂𑀧𑀺 𑀆𑀤𑀺𑀲𑁆𑀲 𑀤𑀺𑀦𑁆𑀦𑀁 𑀅𑀓𑀸𑀮𑁂 𑀉𑀧𑁆𑀧𑀦𑁆𑀦𑀘𑀻𑀯𑀭𑀁 𑀯𑀺𑀬 𑀲𑀫𑁆𑀫𑀼𑀔𑀻𑀪𑀽𑀢𑁂𑀳𑀺 𑀯𑀼𑀢𑁆𑀣𑀯𑀲𑁆𑀲𑁂𑀳𑀺, 𑀅𑀯𑀼𑀢𑁆𑀣𑀯𑀲𑁆𑀲𑁂𑀳𑀺 𑀘 𑀲𑀩𑁆𑀩𑁂𑀳𑀺𑀧𑀺 𑀪𑀸𑀚𑁂𑀢𑀩𑁆𑀩𑀢𑀸𑀲𑀸𑀫𑀜𑁆𑀜𑁂𑀦 𑀅𑀓𑀸𑀮𑀘𑀻𑀯𑀭𑀁 𑀦𑀸𑀫 𑀳𑁄𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 𑀅𑀢𑁆𑀣𑀼𑀤𑁆𑀥𑀸𑀭𑀯𑀲𑁂𑀦 𑀧𑀸𑀴𑀺𑀬𑀁 ‘‘𑀓𑀸𑀮𑁂𑀧𑀺 𑀆𑀤𑀺𑀲𑁆𑀲 𑀤𑀺𑀦𑁆𑀦’’𑀦𑁆𑀢𑀺 𑀯𑀼𑀢𑁆𑀢𑀁, 𑀦 𑀧𑀦 ‘‘𑀢𑀢𑁄 𑀪𑀸𑀚𑁂𑀢𑁆𑀯𑀸 𑀮𑀤𑁆𑀥𑀘𑀻𑀯𑀭𑀫𑁆𑀧𑀺 𑀅𑀓𑀸𑀮𑁂 𑀮𑀤𑁆𑀥𑀘𑀻𑀯𑀭𑀫𑁆𑀧𑀺 𑀯𑀼𑀢𑁆𑀣𑀯𑀲𑁆𑀲𑀸𑀦𑀁 𑀏𑀓𑀫𑀸𑀲𑀧𑀭𑀺𑀳𑀸𑀭𑀁, 𑀧𑀜𑁆𑀘𑀫𑀸𑀲𑀧𑀭𑀺𑀳𑀸𑀭𑀁 𑀯𑀸 𑀦 𑀮𑀪𑀢𑀺, 𑀧𑀘𑁆𑀘𑀸𑀲𑀸𑀘𑀻𑀯𑀭𑁂 𑀅𑀲𑀢𑀺 𑀤𑀲𑀸𑀳𑀧𑀭𑀺𑀳𑀸𑀭𑀫𑁂𑀯 𑀮𑀪𑀢𑀻’’𑀢𑀺 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁, 𑀅𑀝𑁆𑀞𑀓𑀣𑀸𑀬𑀫𑁆𑀧𑀺 ‘‘𑀆𑀤𑀺𑀲𑁆𑀲 𑀤𑀺𑀦𑁆𑀦’’𑀦𑁆𑀢𑀺 𑀯𑀘𑀦𑀲𑀸𑀫𑀜𑁆𑀜𑀢𑁄 𑀮𑀩𑁆𑀪𑀫𑀸𑀦𑀁 𑀲𑀩𑁆𑀩𑀁 𑀅𑀢𑁆𑀣𑀼𑀤𑁆𑀥𑀸𑀭𑀯𑀲𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀏𑀓𑀧𑀼𑀕𑁆𑀕𑀮𑀲𑁆𑀲 𑀯𑀸 𑀇𑀤𑀁 𑀢𑀼𑀬𑁆𑀳𑀁 𑀤𑀫𑁆𑀫𑀻𑀢𑀺 𑀤𑀺𑀦𑁆𑀦’’𑀦𑁆𑀢𑀺 𑀯𑀼𑀢𑁆𑀢𑀁, 𑀦 𑀧𑀦 𑀢𑀣𑀸𑀮𑀤𑁆𑀥𑀁 𑀯𑀸 𑀅𑀓𑀸𑀮𑁂 𑀮𑀤𑁆𑀥𑀁 𑀯𑀸 𑀅𑀦𑀢𑁆𑀣𑀢𑀓𑀣𑀺𑀦𑀸𑀦𑀁 𑀤𑀲𑀸𑀳𑀩𑁆𑀪𑀦𑁆𑀢𑀭𑁂 𑀅𑀥𑀺𑀝𑁆𑀞𑀸𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀼𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁 𑀇𑀢𑀭𑀣𑀸 𑀧𑀸𑀴𑀺𑀅𑀝𑁆𑀞𑀓𑀣𑀸𑀳𑀺 𑀯𑀺𑀭𑀼𑀚𑁆𑀛𑀦𑀢𑁄. 𑀢𑀣𑀸 𑀳𑀺 𑀅𑀘𑁆𑀘𑁂𑀓𑀘𑀻𑀯𑀭𑀲𑀺𑀓𑁆𑀔𑀸𑀧𑀤𑁂 𑀅𑀓𑀸𑀮𑁂 𑀉𑀧𑁆𑀧𑀦𑁆𑀦𑀫𑁆𑀧𑀺 𑀅𑀘𑁆𑀘𑁂𑀓𑀘𑀻𑀯𑀭𑀁 ‘‘𑀬𑀸𑀯𑀘𑀻𑀯𑀭𑀓𑀸𑀮𑀲𑀫𑀬𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩’’𑀦𑁆𑀢𑀺 (𑀧𑀸𑀭𑀸. 𑁬𑁪𑁮) 𑀯𑀼𑀢𑁆𑀢𑀁, 𑀢𑀲𑁆𑀲 𑀅𑀝𑁆𑀞𑀓𑀣𑀸𑀬𑀜𑁆𑀘 ‘‘𑀧𑀯𑀸𑀭𑀡𑀫𑀸𑀲𑀲𑁆𑀲 𑀚𑀼𑀡𑁆𑀳𑀧𑀓𑁆𑀔𑀧𑀜𑁆𑀘𑀫𑀺𑀬𑀁 𑀉𑀧𑁆𑀧𑀦𑁆𑀦𑀲𑁆𑀲 𑀅𑀘𑁆𑀘𑁂𑀓𑀘𑀻𑀯𑀭𑀲𑁆𑀲 𑀅𑀦𑀢𑁆𑀣𑀢𑁂 𑀓𑀣𑀺𑀦𑁂 𑀏𑀓𑀸𑀤𑀲𑀤𑀺𑀯𑀲𑀸𑀥𑀺𑀓𑁄 𑀫𑀸𑀲𑁄, 𑀅𑀢𑁆𑀣𑀢𑁂 𑀓𑀣𑀺𑀦𑁂 𑀏𑀓𑀸𑀤𑀲𑀤𑀺𑀯𑀲𑀸𑀥𑀺𑀓𑀸 𑀧𑀜𑁆𑀘 𑀫𑀸𑀲𑀸 𑀘 𑀧𑀭𑀺𑀳𑀸𑀭𑁄 𑀯𑀼𑀢𑁆𑀢𑁄, 𑀢𑀫𑁂𑀯 𑀧𑀭𑀺𑀳𑀸𑀭𑀁 𑀲𑀦𑁆𑀥𑀸𑀬 ‘𑀙𑀝𑁆𑀞𑀺𑀢𑁄 𑀧𑀝𑁆𑀞𑀸𑀬 𑀧𑀦 𑀉𑀧𑁆𑀧𑀦𑁆𑀦𑀁 𑀅𑀦𑀘𑁆𑀘𑁂𑀓𑀘𑀻𑀯𑀭𑀫𑁆𑀧𑀺 𑀧𑀘𑁆𑀘𑀼𑀤𑁆𑀥𑀭𑀺𑀢𑁆𑀯𑀸 𑀞𑀧𑀺𑀢𑀘𑀻𑀯𑀭𑀫𑁆𑀧𑀺 𑀏𑀢𑀁 𑀧𑀭𑀺𑀳𑀸𑀭𑀁 𑀮𑀪𑀢𑀺𑀬𑁂𑀯𑀸’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁬𑁪𑁬-𑁬𑁪𑁯) 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀓𑀸𑀮𑁂𑀧𑀺 𑀅𑀓𑀸𑀮𑁂𑀧𑀺 𑀘 𑀬𑀣𑀸𑀢𑀣𑀸 𑀮𑀤𑁆𑀥𑀁 𑀅𑀢𑀺𑀭𑁂𑀓𑀘𑀻𑀯𑀭𑀁 𑀯𑀼𑀢𑁆𑀣𑀯𑀲𑁆𑀲𑀸𑀦𑀁 𑀏𑀓𑀫𑀸𑀲𑀁, 𑀧𑀜𑁆𑀘𑀫𑀸𑀲𑀁 𑀯𑀸 𑀬𑀣𑀸𑀭𑀳𑀁 𑀧𑀭𑀺𑀳𑀸𑀭𑀁 𑀮𑀪𑀢𑀺 𑀏𑀯𑀸𑀢𑀺 𑀕𑀳𑁂𑀢𑀩𑁆𑀩𑀁.

𑀏𑀯𑀁 𑀧𑀦 𑀅𑀯𑀢𑁆𑀯𑀸 𑀧𑀤𑀪𑀸𑀚𑀦𑀁 𑀯𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣 𑀏𑀯𑀦𑁆𑀢𑀺 𑀬𑀁 𑀅𑀝𑁆𑀞𑀓𑀣𑀸𑀬𑀁 ‘‘𑀢𑀢𑁄 𑀘𑁂 𑀉𑀢𑁆𑀢𑀭𑀻’’𑀢𑀺 𑀇𑀫𑀲𑁆𑀲 𑀫𑀸𑀲𑀧𑀭𑀫𑀢𑁄 𑀉𑀢𑁆𑀢𑀭𑀻𑀢𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄, 𑀢𑀁 𑀧𑀭𑀸𑀫𑀲𑀢𑀺. 𑀧𑀤𑀪𑀸𑀚𑀦𑀺𑀬𑀁 𑀏𑀯𑀫𑀢𑁆𑀣𑀁 𑀅𑀯𑀢𑁆𑀯𑀸 𑀅𑀜𑁆𑀜𑀣𑀸 𑀅𑀢𑁆𑀣𑁄 𑀯𑀼𑀢𑁆𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀸𑀯 𑀉𑀧𑁆𑀧𑀦𑁆𑀦𑀁 𑀧𑀘𑁆𑀘𑀸𑀲𑀸𑀘𑀻𑀯𑀭𑀦𑁆𑀢𑀺 𑀧𑀘𑁆𑀘𑀢𑁆𑀢𑀯𑀘𑀦𑀁. ‘‘𑀫𑀽𑀮𑀘𑀻𑀯𑀭’’𑀦𑁆𑀢𑀺 𑀇𑀤𑀁 𑀉𑀧𑀬𑁄𑀕𑀯𑀘𑀦𑀁. 𑀅𑀢𑁆𑀢𑀦𑁄 𑀕𑀢𑀺𑀓𑀁 𑀓𑀭𑁄𑀢𑀻𑀢𑀺 𑀅𑀦𑀦𑁆𑀢𑀭𑀸 𑀤𑀼𑀢𑀺𑀬𑀤𑀺𑀯𑀲𑀸𑀤𑀻𑀲𑀼 𑀉𑀧𑁆𑀧𑀦𑁆𑀦𑀁 𑀧𑀘𑁆𑀘𑀸𑀲𑀸𑀘𑀻𑀯𑀭𑀁 𑀫𑀸𑀲𑀧𑀭𑀫𑀁 𑀫𑀽𑀮𑀘𑀻𑀯𑀭𑀁 𑀞𑀧𑁂𑀢𑀼𑀁 𑀅𑀤𑀢𑁆𑀯𑀸 𑀅𑀢𑁆𑀢𑀦𑁄 𑀤𑀲𑀸𑀳𑀧𑀭𑀫𑀢𑀸𑀬 𑀏𑀯 𑀧𑀢𑀺𑀝𑁆𑀞𑀸𑀧𑁂𑀢𑀻𑀢𑀺 𑀅𑀢𑁆𑀢𑀦𑁄 𑀕𑀢𑀺𑀓𑀁 𑀓𑀭𑁄𑀢𑀻𑀢𑀺. 𑀢𑀢𑁄 𑀉𑀤𑁆𑀥𑀁 𑀫𑀽𑀮𑀘𑀻𑀯𑀭𑀦𑁆𑀢𑀺 𑀏𑀢𑁆𑀣 𑀧𑀦 𑀫𑀽𑀮𑀘𑀻𑀯𑀭𑀦𑁆𑀢𑀺 𑀧𑀘𑁆𑀘𑀢𑁆𑀢𑀯𑀘𑀦𑀁. 𑀢𑀜𑁆𑀳𑀺 𑀯𑀻𑀲𑀢𑀺𑀫𑀤𑀺𑀯𑀲𑀢𑁄 𑀉𑀤𑁆𑀥𑀁 𑀤𑁆𑀯𑀸𑀯𑀻𑀲𑀢𑀺𑀫𑀤𑀺𑀯𑀲𑀸𑀤𑀻𑀲𑀼 𑀉𑀧𑁆𑀧𑀦𑁆𑀦𑀁 𑀧𑀘𑁆𑀘𑀸𑀲𑀸𑀘𑀻𑀯𑀭𑀁 𑀅𑀢𑁆𑀢𑀦𑀸 𑀲𑀤𑁆𑀥𑀺𑀁 𑀏𑀓𑀢𑁄 𑀲𑀺𑀩𑁆𑀩𑁂𑀢𑁆𑀯𑀸 𑀖𑀝𑀺𑀢𑀁 𑀤𑀲𑀸𑀳𑀧𑀭𑀫𑀁 𑀕𑀦𑁆𑀢𑀼𑀁 𑀅𑀤𑀢𑁆𑀯𑀸 𑀦𑀯𑀸𑀳𑀧𑀭𑀫𑀢𑀸𑀤𑀺𑀯𑀲𑁂𑀦 𑀅𑀢𑁆𑀢𑀦𑁄 𑀕𑀢𑀺𑀓𑀁 𑀓𑀭𑁄𑀢𑀺, 𑀏𑀓𑀢𑁄 𑀅𑀲𑀺𑀩𑁆𑀩𑁂𑀢𑁆𑀯𑀸 𑀯𑀺𑀲𑀼𑀁 𑀞𑀧𑀺𑀢𑀁 𑀧𑀦 𑀧𑀘𑁆𑀘𑀸𑀲𑀸𑀘𑀻𑀯𑀭𑀁 𑀤𑀲𑀸𑀳𑀧𑀭𑀫𑀫𑁂𑀯.

𑀧𑀸𑀴𑀺𑀬𑀁 𑀤𑀲𑀸𑀳𑀸𑀢𑀺 𑀤𑀲𑀸𑀳𑁂𑀦. 𑀏𑀓𑀸𑀤𑀲𑁂 𑀉𑀧𑁆𑀧𑀦𑁆𑀦𑁂𑀢𑀺𑀆𑀤𑀻𑀲𑀼 𑀏𑀓𑀸𑀤𑀲𑀸𑀳𑁂 𑀉𑀧𑁆𑀧𑀦𑁆𑀦𑁂𑀢𑀺𑀆𑀤𑀺𑀦𑀸 𑀅𑀢𑁆𑀣𑁄, 𑀅𑀬𑀫𑁂𑀯 𑀯𑀸 𑀧𑀸𑀞𑁄 𑀕𑀳𑁂𑀢𑀩𑁆𑀩𑁄. 𑀏𑀓𑀯𑀻𑀲𑁂 𑀉𑀧𑁆𑀧𑀦𑁆𑀦𑁂…𑀧𑁂… 𑀦𑀯𑀸𑀳𑀸 𑀓𑀸𑀭𑁂𑀢𑀩𑁆𑀩𑀦𑁆𑀢𑀺𑀆𑀤𑀺 𑀧𑀘𑁆𑀘𑀸𑀲𑀸𑀘𑀻𑀯𑀭𑀲𑁆𑀲 𑀉𑀧𑁆𑀧𑀦𑁆𑀦𑀤𑀺𑀯𑀲𑀁 𑀞𑀧𑁂𑀢𑁆𑀯𑀸 𑀯𑀼𑀢𑁆𑀢𑀁. 𑀢𑁂𑀦𑁂𑀯 ‘‘𑀢𑀺𑀁𑀲𑁂…𑀧𑁂… 𑀢𑀤𑀳𑁂𑀯 𑀅𑀥𑀺𑀝𑁆𑀞𑀸𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁. ‘‘𑀅𑀜𑁆𑀜𑀁 𑀧𑀘𑁆𑀘𑀸𑀲𑀸𑀘𑀻𑀯𑀭𑀁…𑀧𑁂… 𑀓𑀸𑀭𑁂𑀢𑀩𑁆𑀩’’𑀦𑁆𑀢𑀺 𑀇𑀤𑀁 𑀲𑀢𑀺𑀬𑀸 𑀏𑀯 𑀧𑀘𑁆𑀘𑀸𑀲𑀸𑀬 𑀯𑀼𑀢𑁆𑀢𑀁. 𑀲𑀘𑁂 𑀧𑀦 ‘‘𑀇𑀢𑁄 𑀧𑀝𑁆𑀞𑀸𑀬 𑀘𑀻𑀯𑀭𑀁 𑀦 𑀮𑀪𑀺𑀲𑁆𑀲𑀸𑀫𑀻’’𑀢𑀺 𑀇𑀘𑁆𑀙𑀺𑀢𑀝𑁆𑀞𑀸𑀦𑀢𑁄 𑀧𑀘𑁆𑀘𑀸𑀲𑀸𑀬 𑀉𑀧𑀘𑁆𑀙𑀺𑀦𑁆𑀦𑀸𑀬 𑀅𑀜𑁆𑀜𑀢𑁆𑀣𑀸𑀧𑀺 𑀬𑁂𑀦 𑀓𑁂𑀦𑀘𑀺 𑀉𑀧𑀸𑀬𑁂𑀦 𑀧𑀘𑁆𑀘𑀸𑀲𑀁 𑀉𑀧𑁆𑀧𑀸𑀤𑁂𑀢𑀺, 𑀫𑀽𑀮𑀘𑀻𑀯𑀭𑀁 𑀦 𑀅𑀥𑀺𑀝𑁆𑀞𑀸𑀢𑀩𑁆𑀩𑀁, 𑀲𑀩𑁆𑀩𑀣𑀸 𑀧𑀘𑁆𑀘𑀸𑀲𑀸𑀬 𑀉𑀧𑀘𑁆𑀙𑀺𑀦𑁆𑀦𑀸𑀬 𑀤𑀲𑀸𑀳𑀸𑀢𑀺𑀓𑁆𑀓𑀦𑁆𑀢𑀁 𑀫𑀽𑀮𑀘𑀻𑀯𑀭𑀁 𑀢𑀤𑀳𑁂𑀯 𑀅𑀥𑀺𑀝𑁆𑀞𑀸𑀢𑀩𑁆𑀩𑀁. 𑀧𑀘𑁆𑀘𑀸𑀲𑀸𑀘𑀻𑀯𑀭𑀫𑁆𑀧𑀺 𑀧𑀭𑀺𑀓𑁆𑀔𑀸𑀭𑀘𑁄𑀴𑀁 𑀅𑀥𑀺𑀝𑁆𑀞𑀸𑀢𑀩𑁆𑀩𑀦𑁆𑀢𑀺 𑀧𑀞𑀫𑀢𑀭𑀁 𑀉𑀧𑁆𑀧𑀦𑁆𑀦𑀁 𑀯𑀺𑀲𑀪𑀸𑀕𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀅𑀜𑁆𑀜𑀫𑀜𑁆𑀜𑀦𑁆𑀢𑀺 𑀅𑀜𑁆𑀜𑀁 𑀅𑀜𑁆𑀜𑀁, 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀅𑀗𑁆𑀕𑀁 𑀧𑀦𑁂𑀢𑁆𑀣 𑀧𑀞𑀫𑀓𑀣𑀺𑀦𑁂 𑀯𑀼𑀢𑁆𑀢𑀲𑀤𑀺𑀲𑀫𑁂𑀯. 𑀓𑁂𑀯𑀮𑀜𑁆𑀳𑀺 𑀢𑀢𑁆𑀣 𑀤𑀲𑀸𑀳𑀸𑀢𑀺𑀓𑁆𑀓𑀫𑁄, 𑀇𑀥 𑀫𑀸𑀲𑀸𑀢𑀺𑀓𑁆𑀓𑀫𑁄𑀢𑀺 𑀅𑀬𑀁 𑀯𑀺𑀲𑁂𑀲𑁄.

𑀢𑀢𑀺𑀬𑀓𑀣𑀺𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀧𑀼𑀭𑀸𑀡𑀘𑀻𑀯𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁫𑁦𑁩-𑁫. 𑀘𑀢𑀼𑀢𑁆𑀣𑁂 𑀧𑀸𑀴𑀺𑀬𑀁 𑀪𑀢𑁆𑀢𑀯𑀺𑀲𑁆𑀲𑀕𑁆𑀕𑀦𑁆𑀢𑀺 𑀪𑀢𑁆𑀢𑀲𑁆𑀲 𑀉𑀤𑀭𑁂 𑀯𑀺𑀲𑁆𑀲𑀚𑁆𑀚𑀦𑀁, 𑀧𑀯𑁂𑀲𑀦𑀁 𑀅𑀚𑁆𑀛𑁄𑀳𑀭𑀡𑀁 𑀪𑀢𑁆𑀢𑀓𑀺𑀘𑁆𑀘𑀦𑁆𑀢𑀺 𑀅𑀢𑁆𑀣𑁄, 𑀪𑁄𑀚𑀦𑀧𑀭𑀺𑀬𑁄𑀲𑀸𑀦𑁂𑀦 𑀪𑀢𑁆𑀢𑀲𑁆𑀲 𑀯𑀺𑀲𑁆𑀲𑀚𑁆𑀚𑀦𑀦𑁆𑀢𑀺𑀧𑀺 𑀯𑀤𑀦𑁆𑀢𑀺. 𑀢𑀢𑁆𑀣 𑀦𑀸𑀫 𑀢𑁆𑀯𑀦𑁆𑀢𑀺 𑀲𑁄 𑀦𑀸𑀫 𑀢𑁆𑀯𑀁, 𑀢𑀸𑀬 𑀦𑀸𑀫 𑀢𑁆𑀯𑀦𑁆𑀢𑀺 𑀯𑀸 𑀅𑀢𑁆𑀣𑁄. 𑀧𑀺𑀢𑀸 𑀘 𑀫𑀸𑀢𑀸 𑀘 𑀧𑀺𑀢𑀭𑁄, 𑀧𑀺𑀢𑀽𑀦𑀁 𑀧𑀺𑀢𑀸 𑀘 𑀫𑀸𑀢𑀸 𑀘 𑀧𑀺𑀢𑀸𑀫𑀳𑀸, 𑀢𑁂 𑀏𑀯 𑀬𑀼𑀕𑀴𑀝𑁆𑀞𑁂𑀦 𑀬𑀼𑀕𑁄, 𑀢𑀲𑁆𑀫𑀸 𑀬𑀸𑀯 𑀲𑀢𑁆𑀢𑀫𑀸 𑀧𑀺𑀢𑀸𑀫𑀳𑀬𑀼𑀕𑀸 𑀧𑀺𑀢𑀸𑀫𑀳𑀸𑀯𑀝𑁆𑀝𑀸𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀏𑀯𑀜𑁆𑀳𑀺 𑀧𑀺𑀢𑀸𑀫𑀳𑀕𑁆𑀕𑀳𑀡𑁂𑀦 𑀫𑀸𑀢𑀸𑀫𑀳𑁄 𑀘 𑀧𑀺𑀢𑀸𑀫𑀳𑀻 𑀫𑀸𑀢𑀸𑀫𑀳𑀻 𑀘 𑀕𑀳𑀺𑀢𑀸𑀯 𑀳𑁄𑀦𑁆𑀢𑀺. 𑀲𑀢𑁆𑀢𑀫𑀬𑀼𑀕𑀢𑁄 𑀧𑀭𑀁 ‘‘𑀅𑀜𑁆𑀜𑀸𑀢𑀓𑀸’’𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀬𑀸𑀢𑀺 𑀪𑀺𑀓𑁆𑀔𑀼𑀦𑀻. 𑀧𑀺𑀢𑀼 𑀫𑀸𑀢𑀸 𑀧𑀺𑀢𑀸𑀫𑀳𑀻, 𑀫𑀸𑀢𑀼 𑀧𑀺𑀢𑀸 𑀫𑀸𑀢𑀸𑀫𑀳𑁄.

𑀧𑀬𑁄𑀕𑁂 𑀧𑀬𑁄𑀕𑁂 𑀪𑀺𑀓𑁆𑀔𑀼𑀲𑁆𑀲 𑀤𑀼𑀓𑁆𑀓𑀝𑀦𑁆𑀢𑀺 ‘‘𑀥𑁄𑀯𑀸’’𑀢𑀺 𑀆𑀡𑀸𑀧𑀦𑀯𑀸𑀘𑀸𑀬 𑀏𑀓𑀸𑀬 𑀏𑀯 𑀢𑀤𑀦𑀼𑀕𑀼𑀡𑀲𑁆𑀲 𑀲𑀩𑁆𑀩𑀲𑁆𑀲𑀸𑀧𑀺 𑀧𑀬𑁄𑀕𑀲𑁆𑀲 𑀆𑀡𑀢𑁆𑀢𑀢𑁆𑀢𑀸 𑀯𑀼𑀢𑁆𑀢𑀁.

𑁫𑁦𑁬. 𑀢𑀤𑀯𑀺𑀦𑀸𑀪𑀸𑀯𑀢𑁄 𑀥𑁄𑀯𑀦𑀲𑁆𑀲 ‘‘𑀓𑀸𑀬𑀯𑀺𑀓𑀸𑀭𑀁 𑀓𑀢𑁆𑀯𑀸’’𑀢𑀺 𑀘 ‘‘𑀅𑀦𑁆𑀢𑁄𑀤𑁆𑀯𑀸𑀤𑀲𑀳𑀢𑁆𑀣𑁂’’𑀢𑀺 𑀘 𑀯𑀼𑀢𑁆𑀢𑀢𑁆𑀢𑀸 𑀓𑀸𑀬𑁂𑀦 𑀥𑁄𑀯𑀸𑀧𑁂𑀢𑀼𑀓𑀸𑀫𑀢𑀁 𑀅𑀧𑁆𑀧𑀓𑀸𑀲𑁂𑀢𑁆𑀯𑀸 𑀤𑀸𑀦𑀔𑀺𑀧𑀦𑀧𑁂𑀲𑀦𑀸𑀤𑀺𑀁 𑀓𑀭𑁄𑀦𑁆𑀢𑀲𑁆𑀲 𑀘 𑀤𑁆𑀯𑀸𑀤𑀲𑀳𑀢𑁆𑀣𑀁 𑀉𑀧𑀘𑀸𑀭𑀁 𑀫𑀼𑀜𑁆𑀘𑀺𑀢𑁆𑀯𑀸 𑀩𑀳𑀺 𑀞𑀢𑁆𑀯𑀸 𑀓𑀸𑀬𑀯𑀸𑀘𑀸𑀳𑀺 𑀆𑀡𑀸𑀧𑁂𑀢𑁆𑀯𑀸 𑀔𑀺𑀧𑀦𑀧𑁂𑀲𑀦𑀸𑀤𑀺𑀁 𑀓𑀭𑁄𑀦𑁆𑀢𑀲𑁆𑀲 𑀘 𑀅𑀦𑀸𑀧𑀢𑁆𑀢𑀺 𑀏𑀯.

𑀏𑀓𑁂𑀦 𑀯𑀢𑁆𑀣𑀼𑀦𑀸𑀢𑀺 𑀧𑀞𑀫𑀓𑀢𑁂𑀦. 𑀧𑀜𑁆𑀘𑀲𑀢𑀸𑀦𑀺 𑀧𑀫𑀸𑀡𑀁 𑀏𑀢𑀸𑀲𑀦𑁆𑀢𑀺 𑀧𑀜𑁆𑀘𑀲𑀢𑀸. 𑀪𑀺𑀓𑁆𑀔𑀼𑀪𑀸𑀯𑀢𑁄 𑀧𑀭𑀺𑀯𑀢𑁆𑀢𑀮𑀺𑀗𑁆𑀕𑀸𑀧𑀺 𑀪𑀺𑀓𑁆𑀔𑀼𑀦𑀻 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑁂 𑀏𑀓𑀢𑁄𑀉𑀧𑀲𑀫𑁆𑀧𑀦𑁆𑀦𑀸 𑀏𑀯.

𑁫𑁦𑁭. 𑀢𑀸𑀯𑀓𑀸𑀮𑀺𑀓𑀁 𑀕𑀳𑁂𑀢𑁆𑀯𑀸𑀢𑀺 𑀅𑀢𑁆𑀢𑀦𑀸 𑀓𑀢𑀺𑀧𑀸𑀳𑀁 𑀧𑀸𑀭𑀼𑀧𑀦𑀸𑀤𑀺𑀅𑀢𑁆𑀣𑀸𑀬 𑀢𑀸𑀯𑀓𑀸𑀮𑀺𑀓𑀁 𑀬𑀸𑀘𑀺𑀢𑁆𑀯𑀸. 𑀧𑀼𑀭𑀸𑀡𑀘𑀻𑀯𑀭𑀢𑀸, 𑀉𑀧𑀘𑀸𑀭𑁂 𑀞𑀢𑁆𑀯𑀸 𑀅𑀜𑁆𑀜𑀸𑀢𑀺𑀓𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀆𑀡𑀸𑀧𑀦𑀁, 𑀢𑀲𑁆𑀲𑀸 𑀥𑁄𑀯𑀸𑀧𑀦𑀸𑀤𑀻𑀦𑀺 𑀘𑀸𑀢𑀺 𑀇𑀫𑀸𑀦𑁂𑀢𑁆𑀣 𑀢𑀻𑀡𑀺 𑀅𑀗𑁆𑀕𑀸𑀦𑀺.

𑀧𑀼𑀭𑀸𑀡𑀘𑀻𑀯𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀘𑀻𑀯𑀭𑀧𑀝𑀺𑀕𑁆𑀕𑀳𑀡𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁫𑁦𑁮. 𑀧𑀜𑁆𑀘𑀫𑁂 𑀅𑀧𑀜𑁆𑀜𑀢𑁆𑀢𑁂 𑀲𑀺𑀓𑁆𑀔𑀸𑀧𑀤𑁂𑀢𑀺 𑀕𑀡𑀫𑁆𑀳𑀸 𑀑𑀳𑀻𑀬𑀦𑀲𑀺𑀓𑁆𑀔𑀸𑀧𑀤𑁂 (𑀧𑀸𑀘𑀺. 𑁬𑁯𑁧-𑁬𑁯𑁨) 𑀅𑀧𑀜𑁆𑀜𑀢𑁆𑀢𑁂. 𑀓𑁄𑀝𑁆𑀞𑀸𑀲𑀲𑀫𑁆𑀧𑀢𑁆𑀢𑀻𑀢𑀺 𑀓𑁂𑀲𑀸𑀤𑀺𑀧𑀜𑁆𑀘𑀓𑁄𑀝𑁆𑀞𑀸𑀲𑀸𑀦𑀁 𑀓𑀮𑁆𑀬𑀸𑀡𑀢𑀸. 𑀳𑀢𑁆𑀣𑀢𑀮𑁂𑀬𑁂𑀯 𑀤𑀲𑁆𑀲𑁂𑀢𑁆𑀯𑀸𑀢𑀺 𑀳𑀢𑁆𑀣𑀢𑀮𑀢𑁄 𑀲𑁂𑀲𑀓𑀸𑀬𑀲𑁆𑀲 𑀅𑀤𑀲𑁆𑀲𑀦𑀁 𑀤𑀻𑀧𑁂𑀢𑀺.

𑁫𑁧𑁦. 𑀯𑀺𑀳𑀢𑁆𑀣𑀢𑀸𑀬𑀸𑀢𑀺 𑀯𑀺𑀳𑀢𑀢𑀸𑀬, 𑀅𑀫𑀺𑀲𑁆𑀲𑀺𑀢𑀢𑀸𑀬 𑀅𑀧𑀝𑀺𑀲𑀭𑀡𑀢𑀸𑀬𑀸𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀲𑀫𑀪𑀺𑀢𑀼𑀦𑁆𑀦𑀢𑁆𑀢𑀸’’𑀢𑀺, 𑀩𑁆𑀬𑀥𑀺𑀢𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀧𑀭𑀺𑀯𑀢𑁆𑀢𑁂𑀢𑀩𑁆𑀩𑀁 𑀧𑀭𑀺𑀯𑀢𑁆𑀢𑀁, 𑀢𑀤𑁂𑀯 𑀧𑀸𑀭𑀺𑀯𑀢𑁆𑀢𑀓𑀁, 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀤𑀺𑀬𑁆𑀬𑀫𑀸𑀦𑀦𑁆𑀢𑀺 𑀅𑀢𑁆𑀣𑁄.

𑀧𑀼𑀭𑀺𑀫𑀲𑀺𑀓𑁆𑀔𑀸𑀧𑀤𑁂 𑀯𑀺𑀬 𑀇𑀥 𑀤𑁆𑀯𑀸𑀤𑀲𑀳𑀢𑁆𑀣𑁄 𑀉𑀧𑀘𑀸𑀭𑀦𑀺𑀬𑀫𑁄 𑀦𑀢𑁆𑀣𑀻𑀢𑀺 𑀆𑀳 ‘‘𑀉𑀧𑀘𑀸𑀭𑀁 𑀫𑀼𑀜𑁆𑀘𑀺𑀢𑁆𑀯𑀸’’𑀢𑀺. 𑀅𑀜𑁆𑀜𑀢𑁆𑀭 𑀧𑀸𑀭𑀺𑀯𑀢𑁆𑀢𑀓𑀸𑀢𑀺 𑀬𑀁 𑀅𑀦𑁆𑀢𑀫𑀲𑁄 𑀳𑀭𑀻𑀝𑀓𑀔𑀡𑁆𑀟𑀫𑁆𑀧𑀺 𑀤𑀢𑁆𑀯𑀸 𑀯𑀸 ‘‘𑀤𑀲𑁆𑀲𑀸𑀫𑀻’’𑀢𑀺 𑀆𑀪𑁄𑀕𑀁 𑀓𑀢𑁆𑀯𑀸 𑀯𑀸 𑀧𑀭𑀺𑀯𑀢𑁆𑀢𑀓𑀁 𑀕𑀡𑁆𑀳𑀸𑀢𑀺, 𑀢𑀁 𑀞𑀧𑁂𑀢𑁆𑀯𑀸. ‘‘𑀢𑀁 𑀅𑀘𑀺𑀢𑁆𑀢𑀓𑀪𑀸𑀯𑁂𑀦 𑀦 𑀲𑀫𑁂𑀢𑀻’’𑀢𑀺 𑀇𑀫𑀺𑀦𑀸 𑀜𑀸𑀢𑀺𑀪𑀸𑀯𑀸𑀚𑀸𑀦𑀦𑀸𑀤𑀻𑀲𑀼 𑀯𑀺𑀬 𑀪𑀺𑀓𑁆𑀔𑀼𑀦𑀻𑀪𑀸𑀯𑀸𑀚𑀸𑀦𑀦𑀸𑀤𑀺𑀯𑀲𑁂𑀦𑀸𑀧𑀺 𑀅𑀘𑀺𑀢𑁆𑀢𑀓𑀢𑀁 𑀧𑀓𑀸𑀲𑁂𑀢𑀺.

𑁫𑁧𑁩-𑁪. 𑀢𑀺𑀓𑀜𑁆𑀘 𑀢𑀁 𑀧𑀸𑀘𑀺𑀢𑁆𑀢𑀺𑀬𑀜𑁆𑀘𑀸𑀢𑀺 𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑀁, 𑀧𑀸𑀘𑀺𑀢𑁆𑀢𑀺𑀬𑀢𑀺𑀓𑀦𑁆𑀢𑀺 𑀅𑀢𑁆𑀣𑁄. 𑀧𑀢𑁆𑀢𑀢𑁆𑀣𑀯𑀺𑀓𑀸𑀤𑀻𑀢𑀺 𑀅𑀦𑀥𑀺𑀝𑁆𑀞𑀸𑀦𑀼𑀧𑀕𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀓𑁄 𑀧𑀦 𑀯𑀸𑀤𑁄 𑀧𑀢𑁆𑀢𑀢𑁆𑀣𑀯𑀺𑀓𑀸𑀤𑀻𑀲𑀽𑀢𑀺 𑀫𑀳𑀢𑀺𑀬𑀸𑀧𑀺 𑀢𑀸𑀯 𑀪𑀺𑀲𑀺𑀘𑁆𑀙𑀯𑀺𑀬𑀸 𑀅𑀦𑀥𑀺𑀝𑁆𑀞𑀸𑀦𑀼𑀧𑀕𑀢𑁆𑀢𑀸 𑀅𑀦𑀸𑀧𑀢𑁆𑀢𑀺, 𑀯𑀺𑀓𑀧𑁆𑀧𑀦𑀼𑀧𑀕𑀧𑀘𑁆𑀙𑀺𑀫𑀧𑁆𑀧𑀫𑀸𑀡𑀯𑀺𑀭𑀳𑀺𑀢𑀢𑀸𑀬 𑀅𑀦𑀥𑀺𑀝𑁆𑀞𑀸𑀢𑀩𑁆𑀩𑁂𑀲𑀼 𑀓𑀺𑀫𑁂𑀯 𑀯𑀢𑁆𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀧𑀢𑁆𑀢𑀢𑁆𑀣𑀯𑀺𑀓𑀸𑀤𑀻𑀦𑀺 𑀧𑀦 𑀯𑀺𑀓𑀧𑁆𑀧𑀦𑀼𑀧𑀕𑀧𑀘𑁆𑀙𑀺𑀫𑀸𑀦𑀺 𑀕𑀡𑁆𑀳𑀺𑀢𑀼𑀁 𑀦 𑀯𑀝𑁆𑀝𑀢𑀺 𑀏𑀯. 𑀧𑀝𑀺𑀕𑁆𑀕𑀳𑀡𑀁 𑀓𑀺𑀭𑀺𑀬𑀸, 𑀅𑀧𑀭𑀺𑀯𑀢𑁆𑀢𑀦𑀁 𑀅𑀓𑀺𑀭𑀺𑀬𑀸. 𑀯𑀺𑀓𑀧𑁆𑀧𑀦𑀼𑀧𑀕𑀘𑀻𑀯𑀭𑀢𑀸, 𑀧𑀸𑀭𑀺𑀯𑀢𑁆𑀢𑀓𑀸𑀪𑀸𑀯𑁄, 𑀅𑀜𑁆𑀜𑀸𑀢𑀺𑀓𑀸𑀬 𑀳𑀢𑁆𑀣𑀢𑁄 𑀕𑀳𑀡𑀦𑁆𑀢𑀺 𑀇𑀫𑀸𑀦𑁂𑀢𑁆𑀣 𑀢𑀻𑀡𑀺 𑀅𑀗𑁆𑀕𑀸𑀦𑀺.

𑀘𑀻𑀯𑀭𑀧𑀝𑀺𑀕𑁆𑀕𑀳𑀡𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀅𑀜𑁆𑀜𑀸𑀢𑀓𑀯𑀺𑀜𑁆𑀜𑀢𑁆𑀢𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁫𑁧𑁫. 𑀙𑀝𑁆𑀞𑁂 𑀧𑀝𑀼 𑀏𑀯 𑀧𑀝𑁆𑀝𑁄. 𑀧𑀸𑀴𑀺𑀬𑀁 𑀥𑀫𑁆𑀫𑀦𑀺𑀫𑀦𑁆𑀢𑀦𑀸𑀢𑀺 𑀲𑀫𑀡𑁂𑀲𑀼 𑀯𑀢𑁆𑀢𑀩𑁆𑀩𑀸𑀘𑀸𑀭𑀥𑀫𑁆𑀫𑀫𑀢𑁆𑀢𑀯𑀲𑁂𑀦 𑀦𑀺𑀫𑀦𑁆𑀢𑀦𑀸, 𑀤𑀸𑀢𑀼𑀓𑀸𑀫𑀢𑀸𑀬 𑀓𑀢𑀦𑀺𑀫𑀦𑁆𑀢𑀦𑀸 𑀦 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀢𑁂𑀦𑁂𑀯 ‘‘𑀯𑀺𑀜𑁆𑀜𑀸𑀧𑁂𑀲𑁆𑀲𑀢𑀻’’𑀢𑀺 𑀯𑀼𑀢𑁆𑀢𑀁. 𑀅𑀜𑁆𑀜𑀸𑀢𑀓𑀅𑀧𑁆𑀧𑀯𑀸𑀭𑀺𑀢𑀢𑁄 𑀳𑀺 𑀯𑀺𑀜𑁆𑀜𑀢𑁆𑀢𑀺 𑀦𑀸𑀫 𑀳𑁄𑀢𑀺.

𑁫𑁧𑁭. ‘‘𑀢𑀺𑀡𑁂𑀦 𑀯𑀸 𑀧𑀡𑁆𑀡𑁂𑀦 𑀯𑀸 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀆𑀕𑀦𑁆𑀢𑀩𑁆𑀩’’𑀦𑁆𑀢𑀺 𑀇𑀫𑀺𑀦𑀸 𑀪𑀽𑀢𑀕𑀸𑀫𑀯𑀺𑀓𑁄𑀧𑀦𑀁 𑀅𑀦𑀼𑀜𑁆𑀜𑀸𑀢𑀦𑁆𑀢𑀺 𑀆𑀳 ‘‘𑀦𑁂𑀯 𑀪𑀽𑀢𑀕𑀸𑀫𑀧𑀸𑀢𑀩𑁆𑀬𑀢𑀸𑀬𑀸’’𑀢𑀺𑀆𑀤𑀺. 𑀧𑀞𑀫𑀁 𑀲𑀼𑀤𑁆𑀥𑀘𑀺𑀢𑁆𑀢𑁂𑀦 𑀮𑀺𑀗𑁆𑀕𑀁 𑀕𑀳𑁂𑀢𑁆𑀯𑀸 𑀧𑀘𑁆𑀙𑀸 𑀮𑀤𑁆𑀥𑀺𑀁 𑀕𑀡𑁆𑀳𑀦𑁆𑀢𑁄𑀧𑀺 𑀢𑀺𑀢𑁆𑀣𑀺𑀬𑀧𑀓𑁆𑀓𑀦𑁆𑀢𑀓𑁄 𑀏𑀯𑀸𑀢𑀺 𑀆𑀳 ‘‘𑀦𑀺𑀯𑀸𑀲𑁂𑀢𑁆𑀯𑀸𑀧𑀺 𑀮𑀤𑁆𑀥𑀺 𑀦 𑀕𑀳𑁂𑀢𑀩𑁆𑀩𑀸’’𑀢𑀺.

𑀬𑀁 𑀆𑀯𑀸𑀲𑀁 𑀧𑀞𑀫𑀁 𑀉𑀧𑀕𑀘𑁆𑀙𑀢𑀻𑀢𑀺 𑀏𑀢𑁆𑀣𑀸𑀧𑀺 𑀯𑀺𑀳𑀸𑀭𑀘𑀻𑀯𑀭𑀸𑀤𑀺𑀅𑀢𑁆𑀣𑀸𑀬 𑀧𑀯𑀺𑀲𑀦𑁆𑀢𑁂𑀦𑀧𑀺 𑀢𑀺𑀡𑀸𑀤𑀻𑀳𑀺 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸𑀯 𑀕𑀦𑁆𑀢𑀩𑁆𑀩𑀁, 𑀦 𑀢𑁆𑀯𑁂𑀯 𑀦𑀕𑁆𑀕𑁂𑀦 𑀆𑀕𑀦𑁆𑀢𑀩𑁆𑀩𑀦𑁆𑀢𑀺 𑀲𑀸𑀫𑀜𑁆𑀜𑀢𑁄 𑀤𑀼𑀓𑁆𑀓𑀝𑀲𑁆𑀲 𑀯𑀼𑀢𑁆𑀢𑀢𑁆𑀢𑀸. 𑀘𑀺𑀫𑀺𑀮𑀺𑀓𑀸𑀳𑀻𑀢𑀺 𑀧𑀝𑀧𑀺𑀮𑁄𑀢𑀺𑀓𑀸𑀳𑀺. 𑀧𑀭𑀺𑀪𑁄𑀕𑁂𑀦𑁂𑀯𑀸𑀢𑀺 𑀅𑀜𑁆𑀜𑀁 𑀘𑀻𑀯𑀭𑀁 𑀅𑀮𑀪𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀦𑁂𑀦. 𑀧𑀭𑀺𑀪𑁄𑀕𑀚𑀺𑀡𑁆𑀡𑀦𑁆𑀢𑀺 𑀬𑀣𑀸 𑀢𑀁 𑀘𑀻𑀯𑀭𑀁 𑀧𑀭𑀺𑀪𑀼𑀜𑁆𑀚𑀺𑀬𑀫𑀸𑀦𑀁 𑀑𑀪𑀕𑁆𑀕𑀯𑀺𑀪𑀕𑁆𑀕𑀢𑀸𑀬 𑀅𑀲𑀸𑀭𑀼𑀧𑁆𑀧𑀁 𑀳𑁄𑀢𑀺, 𑀏𑀯𑀁 𑀚𑀺𑀡𑁆𑀡𑀁.

𑁫𑁨𑁧. 𑀅𑀜𑁆𑀜𑀲𑁆𑀲𑀢𑁆𑀣𑀸𑀬𑀸𑀢𑀺 𑀏𑀢𑁆𑀣𑀸𑀧𑀺 ‘‘𑀜𑀸𑀢𑀓𑀸𑀦𑀁 𑀧𑀯𑀸𑀭𑀺𑀢𑀸𑀦’’𑀦𑁆𑀢𑀺 𑀇𑀤𑀁 𑀅𑀦𑀼𑀯𑀢𑁆𑀢𑀢𑀺 𑀏𑀯𑀸𑀢𑀺 𑀆𑀳 ‘‘𑀅𑀢𑁆𑀢𑀦𑁄 𑀜𑀸𑀢𑀓𑀧𑀯𑀸𑀭𑀺𑀢𑁂’’𑀢𑀺𑀆𑀤𑀺. 𑀇𑀥 𑀧𑀦 𑀅𑀜𑁆𑀜𑀲𑁆𑀲 𑀅𑀘𑁆𑀙𑀺𑀦𑁆𑀦𑀦𑀝𑁆𑀞𑀘𑀻𑀯𑀭𑀲𑁆𑀲 𑀅𑀢𑁆𑀣𑀸𑀬 𑀅𑀜𑁆𑀜𑀸𑀢𑀓𑀅𑀧𑁆𑀧𑀯𑀸𑀭𑀺𑀢𑁂 𑀯𑀺𑀜𑁆𑀜𑀸𑀧𑁂𑀦𑁆𑀢𑀲𑁆𑀲 𑀦𑀺𑀲𑁆𑀲𑀕𑁆𑀕𑀺𑀬𑁂𑀦 𑀅𑀦𑀸𑀧𑀢𑁆𑀢𑀻𑀢𑀺 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄, 𑀇𑀢𑀭𑀣𑀸 ‘‘𑀜𑀸𑀢𑀓𑀸𑀦𑀁 𑀧𑀯𑀸𑀭𑀺𑀢𑀸𑀦’’𑀦𑁆𑀢𑀺 𑀇𑀫𑀺𑀦𑀸 𑀯𑀺𑀲𑁂𑀲𑁄 𑀦 𑀪𑀯𑁂𑀬𑁆𑀬. 𑀢𑁂𑀦𑁂𑀯 𑀅𑀦𑀦𑁆𑀢𑀭𑀲𑀺𑀓𑁆𑀔𑀸𑀧𑀤𑁂 𑀯𑀓𑁆𑀔𑀢𑀺 ‘‘𑀅𑀝𑁆𑀞𑀓𑀣𑀸𑀲𑀼 𑀧𑀦 𑀜𑀸𑀢𑀓𑀧𑀭𑀺𑀯𑀸𑀢𑀝𑁆𑀞𑀸𑀦𑁂…𑀧𑁂… 𑀧𑀫𑀸𑀡𑀫𑁂𑀯 𑀯𑀝𑁆𑀝𑀢𑀻𑀢𑀺 𑀯𑀼𑀢𑁆𑀢𑀁, 𑀢𑀁 𑀧𑀸𑀴𑀺𑀬𑀸 𑀦 𑀲𑀫𑁂𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁫𑁨𑁬) 𑀘 ‘‘𑀬𑀲𑁆𑀫𑀸 𑀧𑀦𑀺𑀤𑀁 𑀲𑀺𑀓𑁆𑀔𑀸𑀧𑀤𑀁 𑀅𑀜𑁆𑀜𑀲𑁆𑀲𑀢𑁆𑀣𑀸𑀬 𑀯𑀺𑀜𑁆𑀜𑀸𑀧𑀦𑀯𑀢𑁆𑀣𑀼𑀲𑁆𑀫𑀺𑀁𑀬𑁂𑀯 𑀧𑀜𑁆𑀜𑀢𑁆𑀢𑀁, 𑀢𑀲𑁆𑀫𑀸 𑀇𑀥 ‘𑀅𑀜𑁆𑀜𑀲𑁆𑀲𑀢𑁆𑀣𑀸𑀬𑀸’𑀢𑀺 𑀦 𑀯𑀼𑀢𑁆𑀢’’𑀦𑁆𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁫𑁨𑁬) 𑀘. 𑀯𑀺𑀓𑀧𑁆𑀧𑀦𑀼𑀧𑀕𑀘𑀻𑀯𑀭𑀢𑀸, 𑀲𑀫𑀬𑀸𑀪𑀸𑀯𑁄, 𑀅𑀜𑁆𑀜𑀸𑀢𑀓𑀯𑀺𑀜𑁆𑀜𑀢𑁆𑀢𑀺, 𑀢𑀸𑀬 𑀧𑀝𑀺𑀮𑀸𑀪𑁄𑀢𑀺 𑀇𑀫𑀸𑀦𑁂𑀢𑁆𑀣 𑀘𑀢𑁆𑀢𑀸𑀭𑀺 𑀅𑀗𑁆𑀕𑀸𑀦𑀺.

𑀅𑀜𑁆𑀜𑀸𑀢𑀓𑀯𑀺𑀜𑁆𑀜𑀢𑁆𑀢𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀢𑀢𑀼𑀢𑁆𑀢𑀭𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁫𑁨𑁨-𑁫𑁨𑁪. 𑀲𑀢𑁆𑀢𑀫𑁂 𑀧𑀸𑀴𑀺𑀬𑀁 𑀧𑀕𑁆𑀕𑀸𑀳𑀺𑀓𑀲𑀸𑀮𑀦𑁆𑀢𑀺 𑀤𑀼𑀲𑁆𑀲𑀸𑀧𑀡𑀁. 𑀢𑀜𑁆𑀳𑀺 𑀯𑀸𑀡𑀺𑀚𑀓𑁂𑀳𑀺 𑀤𑀼𑀲𑁆𑀲𑀸𑀦𑀺 𑀧𑀕𑁆𑀕𑀳𑁂𑀢𑁆𑀯𑀸 𑀤𑀲𑁆𑀲𑀦𑀝𑁆𑀞𑀸𑀦𑀢𑀸𑀬 ‘‘𑀧𑀕𑁆𑀕𑀸𑀳𑀺𑀓𑀲𑀸𑀮𑀸’’𑀢𑀺 𑀯𑀼𑀘𑁆𑀘𑀢𑀺. 𑀅𑀲𑁆𑀲 𑀘𑀻𑀯𑀭𑀲𑁆𑀲𑀸𑀢𑀺 𑀲𑀸𑀤𑀺𑀢𑀩𑁆𑀩𑀘𑀻𑀯𑀭𑀲𑁆𑀲. ‘‘𑀢𑀺𑀘𑀻𑀯𑀭𑀺𑀓𑁂𑀦𑀸’’𑀢𑀺 𑀇𑀫𑀺𑀦𑀸 𑀅𑀘𑁆𑀙𑀺𑀦𑁆𑀦𑀢𑀺𑀘𑀻𑀯𑀭𑀢𑁄 𑀅𑀜𑁆𑀜𑀲𑁆𑀲 𑀯𑀺𑀳𑀸𑀭𑀸𑀤𑀻𑀲𑀼 𑀦𑀺𑀳𑀺𑀢𑀲𑁆𑀲 𑀘𑀻𑀯𑀭𑀲𑁆𑀲 𑀅𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀬𑀤𑀺 𑀪𑀯𑁂𑀬𑁆𑀬, 𑀯𑀺𑀜𑁆𑀜𑀸𑀧𑁂𑀢𑀼𑀁 𑀦 𑀯𑀝𑁆𑀝𑁂𑀬𑁆𑀬. 𑀢𑀸𑀯𑀓𑀸𑀮𑀺𑀓𑀁 𑀦𑀺𑀯𑀸𑀲𑁂𑀢𑁆𑀯𑀸 𑀅𑀢𑁆𑀢𑀦𑁄 𑀘𑀻𑀯𑀭𑀁 𑀕𑀸𑀳𑁂𑀢𑀩𑁆𑀩𑀁, 𑀢𑀸𑀯𑀓𑀸𑀮𑀺𑀓𑀫𑁆𑀧𑀺 𑀅𑀮𑀪𑀦𑁆𑀢𑀲𑁆𑀲 𑀪𑀽𑀢𑀕𑀸𑀫𑀯𑀺𑀓𑁄𑀧𑀦𑀁 𑀓𑀢𑁆𑀯𑀸 𑀢𑀺𑀡𑀧𑀡𑁆𑀡𑁂𑀳𑀺 𑀙𑀤𑀦𑀁 𑀯𑀺𑀬 𑀯𑀺𑀜𑁆𑀜𑀸𑀧𑀦𑀫𑁆𑀧𑀺 𑀯𑀝𑁆𑀝𑀢𑀺 𑀏𑀯. 𑀅𑀜𑁆𑀜𑁂𑀦𑀸𑀢𑀺 𑀅𑀘𑁆𑀙𑀺𑀦𑁆𑀦𑀅𑀲𑀩𑁆𑀩𑀘𑀻𑀯𑀭𑁂𑀦. 𑀤𑁆𑀯𑁂 𑀦𑀝𑁆𑀞𑀸𑀦𑀻𑀢𑀺 𑀅𑀥𑀺𑀓𑀸𑀭𑀢𑁄 𑀯𑀼𑀢𑁆𑀢𑀁 ‘‘𑀤𑁆𑀯𑁂 𑀲𑀸𑀤𑀺𑀢𑀩𑁆𑀩𑀸𑀦𑀻’’𑀢𑀺.

𑁫𑁨𑁬. 𑀧𑀸𑀴𑀺𑀬𑀸 𑀦 𑀲𑀫𑁂𑀢𑀻𑀢𑀺 ‘‘𑀅𑀦𑀸𑀧𑀢𑁆𑀢𑀺 𑀜𑀸𑀢𑀓𑀸𑀦𑀁 𑀧𑀯𑀸𑀭𑀺𑀢𑀸𑀦’’𑀦𑁆𑀢𑀺 𑀇𑀫𑀸𑀬 𑀧𑀸𑀴𑀺𑀬𑀸 𑀦 𑀲𑀫𑁂𑀢𑀺 𑀢𑀢𑀼𑀢𑁆𑀢𑀭𑀺𑀯𑀺𑀜𑁆𑀜𑀸𑀧𑀦𑀆𑀧𑀢𑁆𑀢𑀺𑀧𑁆𑀧𑀲𑀗𑁆𑀕𑁂 𑀏𑀯 𑀯𑀼𑀢𑁆𑀢𑀢𑁆𑀢𑀸. ‘‘𑀅𑀜𑁆𑀜𑀲𑁆𑀲𑀢𑁆𑀣𑀸𑀬𑀸𑀢𑀺 𑀦 𑀯𑀼𑀢𑁆𑀢’’𑀦𑁆𑀢𑀺 𑀇𑀤𑀁 𑀅𑀜𑁆𑀜𑀲𑁆𑀲𑀢𑁆𑀣𑀸𑀬 𑀢𑀢𑀼𑀢𑁆𑀢𑀭𑀺 𑀯𑀺𑀜𑁆𑀜𑀸𑀧𑀦𑁂 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀁 𑀳𑁄𑀢𑀻𑀢𑀺 𑀇𑀫𑀫𑀢𑁆𑀣𑀁 𑀤𑀻𑀧𑁂𑀢𑀺, 𑀢𑀜𑁆𑀘 𑀧𑀸𑀘𑀺𑀢𑁆𑀢𑀺𑀬𑀁 𑀬𑁂𑀲𑀁 𑀅𑀢𑁆𑀣𑀸𑀬 𑀯𑀺𑀜𑁆𑀜𑀸𑀧𑁂𑀢𑀺, 𑀢𑁂𑀲𑀁 𑀯𑀸 𑀲𑀺𑀬𑀸, 𑀯𑀺𑀜𑁆𑀜𑀸𑀧𑀓𑀲𑁆𑀲𑁂𑀯 𑀯𑀸, 𑀦 𑀢𑀸𑀯 𑀢𑁂𑀲𑀁 𑀢𑁂𑀳𑀺 𑀅𑀯𑀺𑀜𑁆𑀜𑀸𑀧𑀺𑀢𑀢𑁆𑀢𑀸, 𑀦𑀸𑀧𑀺 𑀯𑀺𑀜𑁆𑀜𑀸𑀧𑀓𑀲𑁆𑀲 𑀅𑀢𑁆𑀢𑀸𑀦𑀁 𑀉𑀤𑁆𑀤𑀺𑀲𑁆𑀲 𑀅𑀯𑀺𑀜𑁆𑀜𑀸𑀧𑀺𑀢𑀢𑁆𑀢𑀸. 𑀢𑀲𑁆𑀫𑀸 𑀅𑀜𑁆𑀜𑀲𑁆𑀲𑀢𑁆𑀣𑀸𑀬 𑀯𑀺𑀜𑁆𑀜𑀸𑀧𑁂𑀦𑁆𑀢𑀲𑁆𑀲𑀸𑀧𑀺 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀁 𑀦 𑀤𑀺𑀲𑁆𑀲𑀢𑀺. 𑀧𑀸𑀴𑀺𑀬𑀁 𑀧𑀦 𑀇𑀫𑀲𑁆𑀲 𑀲𑀺𑀓𑁆𑀔𑀸𑀧𑀤𑀲𑁆𑀲 𑀅𑀢𑁆𑀢𑀦𑁄 𑀲𑀸𑀤𑀺𑀬𑀦𑀧𑀝𑀺𑀩𑀤𑁆𑀥𑀢𑀸𑀯𑀲𑁂𑀦 𑀧𑀯𑀢𑁆𑀢𑀢𑁆𑀢𑀸 ‘‘𑀅𑀜𑁆𑀜𑀲𑁆𑀲𑀢𑁆𑀣𑀸𑀬𑀸’’𑀢𑀺 𑀅𑀦𑀸𑀧𑀢𑁆𑀢𑀺𑀯𑀸𑀭𑁂 𑀦 𑀯𑀼𑀢𑁆𑀢𑀦𑁆𑀢𑀺 𑀯𑀤𑀦𑁆𑀢𑀺, 𑀢𑀜𑁆𑀘 𑀬𑀼𑀢𑁆𑀢𑀁 𑀯𑀺𑀬 𑀤𑀺𑀲𑁆𑀲𑀢𑀺, 𑀯𑀻𑀫𑀁𑀲𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑀁. 𑀢𑀢𑀼𑀢𑁆𑀢𑀭𑀺𑀘𑀻𑀯𑀭𑀢𑀸, 𑀅𑀘𑁆𑀙𑀺𑀦𑁆𑀦𑀸𑀤𑀺𑀓𑀸𑀭𑀡𑀢𑀸, 𑀅𑀜𑁆𑀜𑀸𑀢𑀓𑀯𑀺𑀜𑁆𑀜𑀢𑁆𑀢𑀺, 𑀢𑀸𑀬 𑀘 𑀧𑀝𑀺𑀮𑀸𑀪𑁄𑀢𑀺 𑀇𑀫𑀸𑀦𑁂𑀢𑁆𑀣 𑀘𑀢𑁆𑀢𑀸𑀭𑀺 𑀅𑀗𑁆𑀕𑀸𑀦𑀺.

𑀢𑀢𑀼𑀢𑁆𑀢𑀭𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀧𑀞𑀫𑀉𑀧𑀓𑁆𑀔𑀝𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁫𑁨𑁮-𑁫𑁩𑁧. 𑀅𑀝𑁆𑀞𑀫𑁂 𑀬𑁄 𑀓𑀢𑁆𑀢𑀸𑀢𑀺 𑀤𑀸𑀬𑀓𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀧𑀝𑁄 𑀏𑀯 𑀧𑀝𑀓𑁄. ‘‘𑀅𑀧𑁆𑀧𑀕𑁆𑀖𑀁 𑀘𑁂𑀢𑀸𑀧𑁂𑀢𑀻’’𑀢𑀺 𑀇𑀤𑀁 𑀦𑀺𑀲𑁆𑀲𑀕𑁆𑀕𑀺𑀬𑀧𑀸𑀘𑀺𑀢𑁆𑀢𑀺𑀬𑀸 𑀅𑀦𑀸𑀧𑀢𑁆𑀢𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀯𑀺𑀜𑁆𑀜𑀢𑁆𑀢𑀺𑀧𑀘𑁆𑀘𑀬𑀸 𑀧𑀦 𑀤𑀼𑀓𑁆𑀓𑀝𑀫𑁂𑀯. ‘‘𑀧𑀼𑀩𑁆𑀩𑁂 𑀅𑀧𑁆𑀧𑀯𑀸𑀭𑀺𑀢𑁄’’𑀢𑀺 𑀳𑀺 𑀲𑀼𑀢𑁆𑀢𑁂 𑀯𑀺𑀜𑁆𑀜𑀢𑁆𑀢𑀺𑀓𑀸𑀭𑀡𑀁 𑀯𑀼𑀢𑁆𑀢𑀁. 𑀫𑀸𑀢𑀺𑀓𑀸𑀝𑁆𑀞𑀓𑀣𑀸𑀬𑀫𑁆𑀧𑀺 ‘‘𑀘𑀻𑀯𑀭𑁂 𑀪𑀺𑀬𑁆𑀬𑁄𑀓𑀫𑁆𑀬𑀢𑀸, 𑀅𑀜𑁆𑀜𑀸𑀢𑀓𑀯𑀺𑀜𑁆𑀜𑀢𑁆𑀢𑀺, 𑀢𑀸𑀬 𑀘 𑀧𑀝𑀺𑀮𑀸𑀪𑁄𑀢𑀺 𑀇𑀫𑀸𑀦𑁂𑀢𑁆𑀣 𑀢𑀻𑀡𑀺 𑀅𑀗𑁆𑀕𑀸𑀦𑀻’’𑀢𑀺 (𑀓𑀗𑁆𑀔𑀸. 𑀅𑀝𑁆𑀞. 𑀉𑀧𑀓𑁆𑀔𑀝𑀲𑀺𑀓𑁆𑀔𑀸𑀧𑀤) 𑀅𑀜𑁆𑀜𑀸𑀢𑀓𑀯𑀺𑀜𑁆𑀜𑀢𑁆𑀢𑀺𑀢𑀸 𑀧𑀓𑀸𑀲𑀺𑀢𑀸, 𑀓𑁂𑀘𑀺 𑀧𑀦 ‘‘𑀤𑀸𑀬𑀓𑁂𑀦 𑀤𑀸𑀢𑀼𑀓𑀸𑀫𑁄𑀫𑁆𑀳𑀻𑀢𑀺 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑁂 𑀅𑀯𑀼𑀢𑁆𑀢𑁂𑀧𑀺 𑀬𑀤𑀕𑁆𑀖𑀦𑀓𑀁 𑀲𑁄 𑀤𑀸𑀢𑀼𑀓𑀸𑀫𑁄, 𑀢𑀤𑀕𑁆𑀖𑀦𑀓𑀁 𑀆𑀳𑀭𑀸𑀧𑁂𑀢𑀼𑀁 𑀯𑀝𑁆𑀝𑀢𑀺 𑀏𑀯𑀸’’𑀢𑀺 𑀯𑀤𑀦𑁆𑀢𑀺, 𑀢𑀁 𑀭𑀸𑀚𑀲𑀺𑀓𑁆𑀔𑀸𑀧𑀤𑀝𑁆𑀞𑀓𑀣𑀸𑀬𑀧𑀺 𑀦 𑀲𑀫𑁂𑀢𑀺, 𑀤𑀽𑀢𑁂𑀦 𑀯𑀸 𑀤𑀸𑀬𑀓𑁂𑀦 𑀯𑀸 ‘‘𑀆𑀬𑀲𑁆𑀫𑀦𑁆𑀢𑀁 𑀉𑀤𑁆𑀤𑀺𑀲𑁆𑀲 𑀘𑀻𑀯𑀭𑀘𑁂𑀢𑀸𑀧𑀦𑁆𑀦𑀁 𑀆𑀪𑀢’’𑀦𑁆𑀢𑀺 𑀆𑀭𑁄𑀘𑀺𑀢𑁂𑀧𑀺 𑀫𑀼𑀔𑀯𑁂𑀯𑀝𑀺𑀬𑀓𑀧𑁆𑀧𑀺𑀬𑀓𑀸𑀭𑀓𑀸𑀤𑀻𑀦𑀁 𑀲𑀦𑁆𑀢𑀺𑀓𑀸 𑀆𑀳𑀭𑀸𑀧𑀦𑀲𑁆𑀲 𑀢𑀢𑁆𑀣 𑀧𑀝𑀺𑀓𑁆𑀔𑀺𑀢𑁆𑀢𑀢𑁆𑀢𑀸. 𑀯𑀼𑀢𑁆𑀢𑀜𑁆𑀳𑀺 𑀢𑀢𑁆𑀣 ‘‘𑀇𑀫𑁂 𑀤𑁆𑀯𑁂 𑀅𑀦𑀺𑀤𑁆𑀤𑀺𑀝𑁆𑀞𑀓𑀧𑁆𑀧𑀺𑀬𑀓𑀸𑀭𑀓𑀸 𑀦𑀸𑀫, 𑀏𑀢𑁂𑀲𑀼 𑀅𑀜𑁆𑀜𑀸𑀢𑀓𑀅𑀧𑁆𑀧𑀯𑀸𑀭𑀺𑀢𑁂𑀲𑀼 𑀯𑀺𑀬 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀁…𑀧𑁂… 𑀦 𑀓𑀺𑀜𑁆𑀘𑀺 𑀯𑀢𑁆𑀢𑀩𑁆𑀩𑀸. 𑀤𑁂𑀲𑀦𑀸𑀫𑀢𑁆𑀢𑀫𑁂𑀯 𑀘𑁂𑀢𑀁 ‘𑀤𑀽𑀢𑁂𑀦 𑀘𑀻𑀯𑀭𑀘𑁂𑀢𑀸𑀧𑀦𑁆𑀦𑀁 𑀧𑀳𑀺𑀡𑁂𑀬𑁆𑀬𑀸’𑀢𑀺 𑀲𑀬𑀁 𑀆𑀳𑀭𑀺𑀢𑁆𑀯𑀸𑀧𑀺 𑀧𑀺𑀡𑁆𑀟𑀧𑀸𑀢𑀸𑀤𑀻𑀦𑀁 𑀅𑀢𑁆𑀣𑀸𑀬 𑀤𑀤𑀦𑁆𑀢𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄’’𑀢𑀺. 𑀫𑀼𑀔𑀯𑁂𑀯𑀝𑀺𑀬𑀓𑀧𑁆𑀧𑀺𑀬𑀓𑀸𑀭𑀓𑀸𑀤𑀬𑁄 𑀳𑀺 𑀤𑀸𑀬𑀓𑁂𑀦 𑀧𑀭𑀺𑀘𑁆𑀘𑀢𑁆𑀢𑁂𑀧𑀺 𑀯𑀢𑁆𑀣𑀼𑀫𑁆𑀳𑀺 ‘‘𑀅𑀲𑀼𑀓𑀲𑁆𑀲 𑀲𑀦𑁆𑀢𑀺𑀓𑁂 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀸𑀤𑀺𑀁 𑀕𑀡𑁆𑀳𑀣𑀸’’𑀢𑀺 𑀅𑀦𑀺𑀤𑁆𑀤𑀺𑀝𑁆𑀞𑀢𑁆𑀢𑀸 𑀏𑀯 ‘‘𑀦 𑀓𑀺𑀜𑁆𑀘𑀺 𑀯𑀢𑁆𑀢𑀩𑁆𑀩𑀸’’𑀢𑀺 𑀯𑀼𑀢𑁆𑀢𑀁, 𑀦 𑀧𑀦 𑀢𑀲𑁆𑀲 𑀯𑀢𑁆𑀣𑀼𑀦𑁄 𑀫𑀼𑀔𑀯𑁂𑀯𑀝𑀺𑀬𑀸𑀤𑀻𑀦𑀁 𑀲𑀦𑁆𑀢𑀓𑀢𑁆𑀢𑀸, 𑀢𑀲𑁆𑀫𑀸 𑀇𑀥𑀸𑀧𑀺 𑀤𑀸𑀬𑀓𑁂𑀦 𑀯𑀸 𑀤𑀽𑀢𑁂𑀦 𑀯𑀸 ‘‘𑀬𑀁 𑀇𑀘𑁆𑀙𑀣, 𑀢𑀁 𑀯𑀤𑀣𑀸’’𑀢𑀺 𑀅𑀧𑁆𑀧𑀯𑀸𑀭𑀺𑀢𑀲𑁆𑀲 𑀯𑀤𑀢𑁄 𑀤𑀼𑀓𑁆𑀓𑀝𑀫𑁂𑀯. 𑀅𑀕𑁆𑀖𑀯𑀟𑁆𑀠𑀦𑀓𑀦𑁆𑀢𑀺 𑀘𑀻𑀯𑀭𑁂 𑀅𑀕𑁆𑀖𑀯𑀟𑁆𑀠𑀦𑀓𑀁 𑀦𑀺𑀲𑁆𑀲𑀸𑀬 𑀧𑀯𑀢𑁆𑀢𑀁 𑀇𑀤𑀁 𑀲𑀺𑀓𑁆𑀔𑀸𑀧𑀤𑀁, 𑀦 𑀧𑀺𑀡𑁆𑀟𑀧𑀸𑀢𑀸𑀤𑀻𑀲𑀼 𑀢𑁂𑀲𑀼 𑀅𑀕𑁆𑀖𑀯𑀟𑁆𑀠𑀦𑀲𑁆𑀲 𑀤𑀼𑀓𑁆𑀓𑀝𑀫𑀢𑁆𑀢𑀢𑁆𑀢𑀸, 𑀧𑀡𑀻𑀢𑀧𑀺𑀡𑁆𑀟𑀧𑀸𑀢𑁂 𑀲𑀼𑀤𑁆𑀥𑀺𑀓𑀧𑀸𑀘𑀺𑀢𑁆𑀢𑀺𑀬𑀢𑁆𑀢𑀸 𑀘𑀸𑀢𑀺 𑀕𑀳𑁂𑀢𑀩𑁆𑀩𑀁. 𑀢𑁂𑀦𑁂𑀯 ‘‘𑀘𑀻𑀯𑀭𑁂 𑀪𑀺𑀬𑁆𑀬𑁄𑀓𑀫𑁆𑀬𑀢𑀸’’𑀢𑀺 𑀅𑀗𑁆𑀕𑀁 𑀯𑀼𑀢𑁆𑀢𑀁.

𑀧𑀞𑀫𑀉𑀧𑀓𑁆𑀔𑀝𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀤𑀼𑀢𑀺𑀬𑀉𑀧𑀓𑁆𑀔𑀝𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁫𑁩𑁩. 𑀦𑀯𑀫𑁂 𑀧𑀸𑀴𑀺𑀬𑀁 𑀧𑀘𑁆𑀘𑁂𑀓𑀘𑀻𑀯𑀭𑀘𑁂𑀢𑀸𑀧𑀦𑁆𑀦𑀸𑀢𑀺 𑀧𑀘𑁆𑀘𑁂𑀓𑀁 𑀦𑀺𑀬𑀫𑁂𑀢𑁆𑀯𑀸 𑀘𑀻𑀯𑀭𑀘𑁂𑀢𑀸𑀧𑀦𑁆𑀦𑀸, 𑀏𑀓𑁂𑀓𑁂𑀦 𑀯𑀺𑀲𑀼𑀁 𑀯𑀺𑀲𑀼𑀁 𑀦𑀺𑀬𑀫𑀺𑀢𑀸 𑀘𑀻𑀯𑀭𑀘𑁂𑀢𑀸𑀧𑀦𑁆𑀦𑀸𑀢𑀺 𑀅𑀢𑁆𑀣𑁄. 𑀉𑀪𑁄𑀯 𑀲𑀦𑁆𑀢𑀸 𑀏𑀓𑁂𑀦𑀸𑀢𑀺 𑀉𑀪𑁄 𑀏𑀓𑀢𑁄𑀯 𑀲𑀦𑁆𑀢𑀸, 𑀉𑀪𑁄 𑀏𑀓𑀢𑁄 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑁄.

𑀤𑀼𑀢𑀺𑀬𑀉𑀧𑀓𑁆𑀔𑀝𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀭𑀸𑀚𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁫𑁩𑁭. 𑀤𑀲𑀫𑁂 ‘‘𑀅𑀚𑁆𑀚𑀡𑁆𑀳𑁄’’𑀢𑀺 ‘‘𑀅𑀚𑁆𑀚 𑀦𑁄’’𑀢𑀺 𑀯𑀢𑁆𑀢𑀩𑁆𑀩𑁂 𑀳-𑀓𑀸𑀭𑀸𑀕𑀫𑀁, 𑀦-𑀓𑀸𑀭𑀲𑁆𑀲 𑀘 𑀡-𑀓𑀸𑀭𑀁 𑀓𑀢𑁆𑀯𑀸 𑀯𑀼𑀢𑁆𑀢𑁄𑀢𑀺 𑀆𑀳 ‘‘𑀅𑀚𑁆𑀚 𑀏𑀓𑀤𑀺𑀯𑀲𑀁 𑀅𑀫𑁆𑀳𑀸𑀓’’𑀦𑁆𑀢𑀺.

𑁫𑁩𑁮-𑁯. 𑀬𑀁 𑀯𑀼𑀢𑁆𑀢𑀁 𑀫𑀸𑀢𑀺𑀓𑀸𑀝𑁆𑀞𑀓𑀣𑀸𑀬𑀁 (𑀓𑀗𑁆𑀔𑀸. 𑀅𑀝𑁆𑀞. 𑀭𑀸𑀚𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸) ‘‘𑀇𑀫𑀺𑀦𑀸 𑀘𑀻𑀯𑀭𑀘𑁂𑀢𑀸𑀧𑀦𑁆𑀦𑁂𑀦 𑀘𑀻𑀯𑀭𑀁 𑀘𑁂𑀢𑀸𑀧𑁂𑀢𑁆𑀯𑀸 𑀇𑀢𑁆𑀣𑀦𑁆𑀦𑀸𑀫𑀁 𑀪𑀺𑀓𑁆𑀔𑀼𑀁 𑀘𑀻𑀯𑀭𑁂𑀦 𑀅𑀘𑁆𑀙𑀸𑀤𑁂𑀳𑀻𑀢𑀺 𑀇𑀤𑀁 𑀆𑀕𑀫𑀦𑀲𑀼𑀤𑁆𑀥𑀺𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁, 𑀲𑀘𑁂 𑀳𑀺 ‘𑀇𑀤𑀁 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑁂𑀳𑀻’𑀢𑀺 𑀧𑁂𑀲𑁂𑀬𑁆𑀬, 𑀆𑀕𑀫𑀦𑀲𑁆𑀲 𑀅𑀲𑀼𑀤𑁆𑀥𑀢𑁆𑀢𑀸 𑀅𑀓𑀧𑁆𑀧𑀺𑀬𑀯𑀢𑁆𑀣𑀼𑀁 𑀆𑀭𑀩𑁆𑀪 𑀪𑀺𑀓𑁆𑀔𑀼𑀦𑀸 𑀓𑀧𑁆𑀧𑀺𑀬𑀓𑀸𑀭𑀓𑁄𑀧𑀺 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑁄 𑀦 𑀪𑀯𑁂𑀬𑁆𑀬𑀸’’𑀢𑀺, 𑀢𑀁 𑀦𑀺𑀲𑁆𑀲𑀕𑁆𑀕𑀺𑀬𑀯𑀢𑁆𑀣𑀼𑀤𑀼𑀓𑁆𑀓𑀝𑀯𑀢𑁆𑀣𑀼𑀪𑀽𑀢𑀁 𑀅𑀓𑀧𑁆𑀧𑀺𑀬𑀘𑀻𑀯𑀭𑀘𑁂𑀢𑀸𑀧𑀦𑁆𑀦𑀁 ‘‘𑀅𑀲𑀼𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑁂𑀳𑀻’’𑀢𑀺 𑀏𑀯𑀁 𑀆𑀕𑀫𑀦𑀲𑀼𑀤𑁆𑀥𑀺𑀬𑀸 𑀅𑀲𑀢𑀺, 𑀲𑀺𑀓𑁆𑀔𑀸𑀧𑀤𑁂 𑀆𑀕𑀢𑀦𑀬𑁂𑀦 𑀤𑀽𑀢𑀯𑀘𑀦𑁂 𑀘 𑀅𑀲𑀼𑀤𑁆𑀥𑁂 𑀲𑀩𑁆𑀩𑀣𑀸 𑀧𑀝𑀺𑀓𑁆𑀔𑁂𑀧𑁄 𑀏𑀯 𑀓𑀸𑀢𑀼𑀁 𑀯𑀝𑁆𑀝𑀢𑀺, 𑀦 𑀧𑀦 ‘‘𑀘𑀻𑀯𑀭𑀜𑁆𑀘 𑀔𑁄 𑀫𑀬𑀁 𑀧𑀝𑀺𑀕𑁆𑀕𑀡𑁆𑀳𑀸𑀫𑀸’’𑀢𑀺 𑀯𑀢𑁆𑀢𑀼𑀁, 𑀢𑀤𑀦𑀼𑀲𑀸𑀭𑁂𑀦 𑀦 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑀜𑁆𑀘 𑀦𑀺𑀤𑁆𑀤𑀺𑀲𑀺𑀢𑀼𑀁 𑀆𑀕𑀫𑀦𑀤𑀽𑀢𑀯𑀘𑀦𑀸𑀦𑀁 𑀉𑀪𑀺𑀦𑁆𑀦𑀁 𑀅𑀲𑀼𑀤𑁆𑀥𑀢𑁆𑀢𑀸. 𑀧𑀸𑀴𑀺𑀬𑀁 𑀆𑀕𑀢𑀦𑀬𑁂𑀦 𑀧𑀦 𑀆𑀕𑀫𑀦𑀲𑀼𑀤𑁆𑀥𑀺𑀬𑀸 𑀲𑀢𑀺 𑀤𑀽𑀢𑀯𑀘𑀦𑁂 𑀅𑀲𑀼𑀤𑁆𑀥𑁂𑀧𑀺 𑀲𑀺𑀓𑁆𑀔𑀸𑀧𑀤𑁂 𑀆𑀕𑀢𑀦𑀬𑁂𑀦 𑀲𑀩𑁆𑀩𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀢𑁂𑀦 𑀘 𑀬𑀣𑀸 𑀤𑀽𑀢𑀯𑀘𑀦𑀸𑀲𑀼𑀤𑁆𑀥𑀺𑀬𑀫𑁆𑀧𑀺 𑀆𑀕𑀫𑀦𑁂 𑀲𑀼𑀤𑁆𑀥𑁂 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑀫𑁆𑀧𑀺 𑀦𑀺𑀤𑁆𑀤𑀺𑀲𑀺𑀢𑀼𑀁 𑀯𑀝𑁆𑀝𑀢𑀺, 𑀏𑀯𑀁 𑀆𑀕𑀫𑀦𑀸𑀲𑀼𑀤𑁆𑀥𑀺𑀬𑀫𑁆𑀧𑀺 𑀤𑀽𑀢𑀯𑀘𑀦𑁂 𑀲𑀼𑀤𑁆𑀥𑁂 𑀯𑀝𑁆𑀝𑀢𑀺 𑀏𑀯𑀸𑀢𑀺 𑀅𑀬𑀫𑀢𑁆𑀣𑁄 𑀅𑀢𑁆𑀣𑀢𑁄 𑀲𑀺𑀤𑁆𑀥𑁄𑀯 𑀳𑁄𑀢𑀺, 𑀉𑀪𑀬𑀲𑀼𑀤𑁆𑀥𑀺𑀬𑀁 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀻𑀢𑀺 𑀉𑀪𑀬𑀸𑀲𑀼𑀤𑁆𑀥𑀺𑀧𑀓𑁆𑀔𑀫𑁂𑀯 𑀲𑀦𑁆𑀥𑀸𑀬 𑀫𑀸𑀢𑀺𑀓𑀸𑀝𑁆𑀞𑀓𑀣𑀸𑀬𑀁 (𑀓𑀗𑁆𑀔𑀸. 𑀅𑀝𑁆𑀞. 𑀭𑀸𑀚𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸) ‘‘𑀓𑀧𑁆𑀧𑀺𑀬𑀓𑀸𑀭𑀓𑁄𑀧𑀺 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑁄 𑀦 𑀪𑀯𑁂𑀬𑁆𑀬𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀬𑀁 𑀧𑀦𑁂𑀢𑁆𑀣 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 (𑀲𑀸𑀭𑀢𑁆𑀣. 𑀝𑀻. 𑁨.𑁫𑁩𑁭-𑁫𑁩𑁯) ‘‘𑀆𑀕𑀫𑀦𑀲𑁆𑀲 𑀲𑀼𑀤𑁆𑀥𑀺𑀬𑀸 𑀯𑀸 𑀅𑀲𑀼𑀤𑁆𑀥𑀺𑀬𑀸 𑀯𑀸 𑀯𑀺𑀲𑁂𑀲𑀧𑁆𑀧𑀬𑁄𑀚𑀦𑀁 𑀦 𑀤𑀺𑀲𑁆𑀲𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀢𑀁 𑀫𑀸𑀢𑀺𑀓𑀸𑀝𑁆𑀞𑀓𑀣𑀸𑀯𑀘𑀦𑀲𑁆𑀲 𑀅𑀥𑀺𑀧𑁆𑀧𑀸𑀬𑀁 𑀅𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀯𑀼𑀢𑁆𑀢𑀁 𑀬𑀣𑀸𑀯𑀼𑀢𑁆𑀢𑀦𑀬𑁂𑀦 𑀆𑀕𑀫𑀦𑀲𑀼𑀤𑁆𑀥𑀺𑀆𑀤𑀺𑀦𑀸 𑀲𑀧𑁆𑀧𑀬𑁄𑀚𑀦𑀢𑁆𑀢𑀸. 𑀬𑁄 𑀧𑀦𑁂𑀢𑁆𑀣 ‘‘𑀫𑀽𑀮𑀲𑀸𑀫𑀺𑀓𑁂𑀦 𑀓𑀧𑁆𑀧𑀺𑀬𑀯𑁄𑀳𑀸𑀭𑀯𑀲𑁂𑀦, 𑀧𑁂𑀲𑀺𑀢𑀲𑁆𑀲 𑀤𑀽𑀢𑀲𑁆𑀲 𑀅𑀓𑀧𑁆𑀧𑀺𑀬𑀯𑁄𑀳𑀸𑀭𑀯𑀲𑁂𑀦 𑀘 𑀯𑀤𑀢𑁄𑀧𑀺 𑀓𑀧𑁆𑀧𑀺𑀬𑀓𑀸𑀭𑀓𑁄 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑁄 𑀪𑀯𑁂𑀬𑁆𑀬𑀸’’𑀢𑀺 𑀅𑀦𑀺𑀝𑁆𑀞𑀧𑁆𑀧𑀲𑀗𑁆𑀕𑁄 𑀯𑀼𑀢𑁆𑀢𑁄, 𑀲𑁄 𑀅𑀦𑀺𑀝𑁆𑀞𑀧𑁆𑀧𑀲𑀗𑁆𑀕𑁄 𑀏𑀯 𑀦 𑀳𑁄𑀢𑀺 𑀅𑀪𑀺𑀫𑀢𑀢𑁆𑀢𑀸. 𑀢𑀣𑀸 𑀳𑀺 𑀲𑀺𑀓𑁆𑀔𑀸𑀧𑀤𑁂 𑀏𑀯 ‘‘𑀧𑀝𑀺𑀕𑁆𑀕𑀡𑁆𑀳𑀸𑀢𑀼 𑀆𑀬𑀲𑁆𑀫𑀸 𑀘𑀻𑀯𑀭𑀘𑁂𑀢𑀸𑀧𑀦𑁆𑀦’’𑀦𑁆𑀢𑀺 𑀅𑀓𑀧𑁆𑀧𑀺𑀬𑀯𑁄𑀳𑀸𑀭𑁂𑀦 𑀯𑀤𑀢𑁄 𑀤𑀽𑀢𑀲𑁆𑀲 𑀓𑀧𑁆𑀧𑀺𑀬𑁂𑀦 𑀓𑀫𑁆𑀫𑁂𑀦 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑁄 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑁄 𑀯𑀼𑀢𑁆𑀢𑁄 𑀆𑀕𑀫𑀦𑀲𑁆𑀲 𑀲𑀼𑀤𑁆𑀥𑀢𑁆𑀢𑀸, 𑀆𑀕𑀫𑀦𑀲𑁆𑀲𑀸𑀧𑀺 𑀅𑀲𑀼𑀤𑁆𑀥𑀺𑀬𑀁 𑀧𑀦 𑀓𑀧𑁆𑀧𑀺𑀬𑁂𑀦𑀸𑀧𑀺 𑀓𑀫𑁆𑀫𑁂𑀦 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑁄 𑀦 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑁄𑀢𑀺 𑀅𑀢𑁆𑀣𑁂𑀯 𑀆𑀕𑀫𑀦𑀲𑁆𑀲 𑀲𑀼𑀤𑁆𑀥𑀺𑀅𑀲𑀼𑀤𑁆𑀥𑀻𑀲𑀼 𑀧𑀬𑁄𑀚𑀦𑀁. 𑀓𑀣𑀁 𑀧𑀦 𑀤𑀽𑀢𑀯𑀘𑀦𑁂𑀦 𑀆𑀕𑀫𑀦𑀲𑀼𑀤𑁆𑀥𑀺 𑀯𑀺𑀜𑁆𑀜𑀸𑀬𑀢𑀻𑀢𑀺? 𑀦𑀸𑀬𑀁 𑀪𑀸𑀭𑁄. 𑀤𑀽𑀢𑁂𑀦 𑀳𑀺 𑀅𑀓𑀧𑁆𑀧𑀺𑀬𑀯𑁄𑀳𑀸𑀭𑁂𑀦𑁂𑀯 𑀯𑀼𑀢𑁆𑀢𑁂 𑀏𑀯 𑀆𑀕𑀫𑀦𑀲𑀼𑀤𑁆𑀥𑀺 𑀕𑀯𑁂𑀲𑀺𑀢𑀩𑁆𑀩𑀸, 𑀦 𑀇𑀢𑀭𑀣𑀸, 𑀢𑀢𑁆𑀣 𑀘 𑀢𑀲𑁆𑀲 𑀯𑀘𑀦𑀓𑁆𑀓𑀫𑁂𑀦 𑀧𑀼𑀘𑁆𑀙𑀺𑀢𑁆𑀯𑀸 𑀘 𑀬𑀼𑀢𑁆𑀢𑀺𑀆𑀤𑀻𑀳𑀺 𑀘 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀁. 𑀇𑀥𑀸𑀧𑀺 𑀳𑀺 𑀲𑀺𑀓𑁆𑀔𑀸𑀧𑀤𑁂 ‘‘𑀘𑀻𑀯𑀭𑀘𑁂𑀢𑀸𑀧𑀦𑁆𑀦𑀁 𑀆𑀪𑀢’’𑀦𑁆𑀢𑀺 𑀤𑀽𑀢𑀯𑀘𑀦𑁂𑀦𑁂𑀯 𑀘𑀻𑀯𑀭𑀁 𑀓𑀺𑀡𑀺𑀢𑁆𑀯𑀸 𑀤𑀸𑀢𑀼𑀁 𑀧𑁂𑀲𑀺𑀢𑀪𑀸𑀯𑁄 𑀯𑀺𑀜𑁆𑀜𑀸𑀬𑀢𑀺. 𑀬𑀤𑀺 𑀳𑀺 𑀲𑀩𑁆𑀩𑀣𑀸 𑀆𑀕𑀫𑀦𑀲𑀼𑀤𑁆𑀥𑀺 𑀦 𑀯𑀺𑀜𑁆𑀜𑀸𑀬𑀢𑀺, 𑀧𑀝𑀺𑀓𑁆𑀔𑁂𑀧𑁄 𑀏𑀯 𑀓𑀢𑁆𑀢𑀩𑁆𑀩𑁄𑀢𑀺.

𑀧𑀸𑀴𑀺𑀬𑀜𑁆𑀘 ‘‘𑀘𑀻𑀯𑀭𑀜𑁆𑀘 𑀔𑁄 𑀫𑀬𑀁 𑀧𑀝𑀺𑀕𑁆𑀕𑀡𑁆𑀳𑀸𑀫𑀸’’𑀢𑀺𑀆𑀤𑀺 𑀤𑀽𑀢𑀯𑀘𑀦𑀲𑁆𑀲 𑀅𑀓𑀧𑁆𑀧𑀺𑀬𑀢𑁆𑀢𑁂𑀧𑀺 𑀆𑀕𑀫𑀦𑀲𑀼𑀤𑁆𑀥𑀺𑀬𑀸 𑀲𑀢𑀺 𑀧𑀝𑀺𑀧𑀚𑁆𑀚𑀦𑀯𑀺𑀥𑀺𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. ‘‘𑀏𑀲𑁄 𑀔𑁄…𑀧𑁂… 𑀦 𑀯𑀢𑁆𑀢𑀩𑁆𑀩𑁄 ‘𑀢𑀲𑁆𑀲 𑀤𑁂𑀳𑀻’’’𑀢𑀺𑀆𑀤𑀺 𑀅𑀓𑀧𑁆𑀧𑀺𑀬𑀯𑀢𑁆𑀣𑀼𑀲𑀸𑀤𑀺𑀬𑀦𑀧𑀭𑀺𑀫𑁄𑀘𑀦𑀢𑁆𑀣𑀁 𑀯𑀼𑀢𑁆𑀢𑀁. ‘‘𑀲𑀜𑁆𑀜𑀢𑁆𑀢𑁄’’𑀢𑀺𑀆𑀤𑀺 ‘‘𑀏𑀯𑀁 𑀤𑀽𑀢𑁂𑀦 𑀧𑀼𑀦 𑀯𑀼𑀢𑁆𑀢𑁂 𑀏𑀯 𑀘𑁄𑀤𑁂𑀢𑀼𑀁 𑀯𑀝𑁆𑀝𑀢𑀺, 𑀦 𑀇𑀢𑀭𑀣𑀸’’𑀢𑀺 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. ‘‘𑀦 𑀯𑀢𑁆𑀢𑀩𑁆𑀩𑁄 ‘𑀤𑁂𑀳𑀺 𑀫𑁂 𑀘𑀻𑀯𑀭𑀁…𑀧𑁂… 𑀘𑁂𑀢𑀸𑀧𑁂𑀳𑀺 𑀫𑁂 𑀘𑀻𑀯𑀭’’’𑀦𑁆𑀢𑀺 𑀇𑀤𑀁 𑀤𑀽𑀢𑁂𑀦𑀸𑀪𑀢𑀭𑀽𑀧𑀺𑀬𑀁 𑀧𑀝𑀺𑀕𑁆𑀕𑀳𑁂𑀢𑀼𑀁 𑀅𑀢𑁆𑀢𑀦𑀸 𑀦𑀺𑀤𑁆𑀤𑀺𑀝𑁆𑀞𑀓𑀧𑁆𑀧𑀺𑀬𑀓𑀸𑀭𑀓𑀢𑁆𑀢𑀸𑀯 ‘‘𑀤𑁂𑀳𑀺 𑀫𑁂 𑀘𑀻𑀯𑀭𑀁…𑀧𑁂… 𑀘𑁂𑀢𑀸𑀧𑁂𑀳𑀺 𑀫𑁂 𑀘𑀻𑀯𑀭’’𑀦𑁆𑀢𑀺 𑀯𑀤𑀦𑁆𑀢𑁄 𑀭𑀽𑀧𑀺𑀬𑀲𑁆𑀲 𑀧𑀓𑀢𑀢𑁆𑀢𑀸 𑀢𑁂𑀦 𑀭𑀽𑀧𑀺𑀬𑁂𑀦 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 ‘‘𑀤𑁂𑀳𑀺 𑀘𑁂𑀢𑀸𑀧𑁂𑀳𑀻’’𑀢𑀺 𑀭𑀽𑀧𑀺𑀬𑀲𑀁𑀯𑁄𑀳𑀸𑀭𑀁 𑀲𑀫𑀸𑀧𑀚𑁆𑀚𑀦𑁆𑀢𑁄 𑀦𑀸𑀫 𑀳𑁄𑀢𑀻𑀢𑀺 𑀢𑀁 𑀤𑁄𑀲𑀁 𑀤𑀽𑀭𑀢𑁄 𑀧𑀭𑀺𑀯𑀚𑁆𑀚𑁂𑀢𑀼𑀁 𑀯𑀼𑀢𑁆𑀢𑀁 𑀭𑀽𑀧𑀺𑀬𑀧𑀝𑀺𑀕𑁆𑀕𑀳𑀡𑁂𑀦 𑀲𑀗𑁆𑀖𑀫𑀚𑁆𑀛𑁂 𑀦𑀺𑀲𑁆𑀲𑀝𑁆𑀞𑀭𑀽𑀧𑀺𑀬𑁂 𑀯𑀺𑀬. 𑀯𑀼𑀢𑁆𑀢𑀜𑁆𑀳𑀺 𑀢𑀢𑁆𑀣 ‘‘𑀦 𑀯𑀢𑁆𑀢𑀩𑁆𑀩𑁄 𑀇𑀫𑀁 𑀯𑀸 𑀇𑀫𑀁 𑀯𑀸 𑀆𑀳𑀭𑀸’’𑀢𑀺. 𑀢𑀲𑁆𑀫𑀸 𑀦 𑀇𑀤𑀁 𑀯𑀺𑀜𑁆𑀜𑀢𑁆𑀢𑀺𑀤𑁄𑀲𑀁 𑀧𑀭𑀺𑀯𑀚𑁆𑀚𑁂𑀢𑀼𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁, ‘‘𑀅𑀢𑁆𑀣𑁄 𑀫𑁂, 𑀆𑀯𑀼𑀲𑁄, 𑀘𑀻𑀯𑀭𑁂𑀦𑀸’’𑀢𑀺𑀧𑀺 𑀅𑀯𑀢𑁆𑀢𑀩𑁆𑀩𑀢𑀸𑀧𑀲𑀗𑁆𑀕𑀢𑁄, 𑀢𑁂𑀦𑁂𑀯 𑀤𑀽𑀢𑀦𑀺𑀤𑁆𑀤𑀺𑀝𑁆𑀞𑁂𑀲𑀼 𑀭𑀽𑀧𑀺𑀬𑀲𑀁𑀯𑁄𑀳𑀸𑀭𑀲𑀗𑁆𑀓𑀸𑀪𑀸𑀯𑀢𑁄 𑀅𑀜𑁆𑀜𑀁 𑀓𑀧𑁆𑀧𑀺𑀬𑀓𑀸𑀭𑀓𑀁 𑀞𑀧𑁂𑀢𑁆𑀯𑀸𑀧𑀺 𑀆𑀳𑀭𑀸𑀧𑁂𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣𑀸𑀧𑀺 ‘‘𑀤𑀽𑀢𑁂𑀦 𑀞𑀧𑀺𑀢𑀭𑀽𑀧𑀺𑀬𑁂𑀦 𑀘𑁂𑀢𑀸𑀧𑁂𑀢𑁆𑀯𑀸 𑀘𑀻𑀯𑀭𑀁 𑀆𑀳𑀭𑀸𑀧𑁂𑀳𑀻’’𑀢𑀺 𑀅𑀯𑀢𑁆𑀯𑀸 𑀓𑁂𑀯𑀮𑀁 ‘‘𑀘𑀻𑀯𑀭𑀁 𑀆𑀳𑀭𑀸𑀧𑁂𑀳𑀻’’𑀢𑀺 𑀏𑀯𑀁 𑀆𑀳𑀭𑀸𑀧𑁂𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄 𑀕𑀳𑁂𑀢𑀩𑁆𑀩𑁄. 𑀞𑀸𑀦𑀁 𑀪𑀜𑁆𑀚𑀢𑀻𑀢𑀺 𑀏𑀢𑁆𑀣 𑀞𑀸𑀦𑀦𑁆𑀢𑀺 𑀞𑀺𑀢𑀺𑀬𑀸 𑀘 𑀓𑀸𑀭𑀡𑀲𑁆𑀲 𑀘 𑀦𑀸𑀫𑀁, 𑀢𑀲𑁆𑀫𑀸 𑀆𑀲𑀦𑁂 𑀦𑀺𑀲𑀻𑀤𑀦𑁂𑀦 𑀞𑀸𑀦𑀫𑁆𑀧𑀺 𑀓𑀼𑀧𑁆𑀧𑀢𑀺, 𑀆𑀕𑀢𑀓𑀸𑀭𑀡𑀫𑁆𑀧𑀺 𑀢𑁂𑀲𑀁 𑀦 𑀯𑀺𑀜𑁆𑀜𑀸𑀬𑀢𑀺. 𑀞𑀺𑀢𑀁 𑀧𑀦 𑀅𑀓𑁄𑀧𑁂𑀢𑁆𑀯𑀸 𑀆𑀫𑀺𑀲𑀧𑀝𑀺𑀕𑁆𑀕𑀳𑀡𑀸𑀤𑀻𑀲𑀼 𑀆𑀕𑀢𑀓𑀸𑀭𑀡𑀫𑁂𑀯 𑀪𑀜𑁆𑀚𑀢𑀺, 𑀦 𑀞𑀸𑀦𑀁. 𑀢𑁂𑀦𑀸𑀳 ‘‘𑀆𑀕𑀢𑀓𑀸𑀭𑀡𑀁 𑀪𑀜𑁆𑀚𑀢𑀻’’𑀢𑀺. 𑀓𑁂𑀘𑀺 𑀧𑀦 ‘‘𑀆𑀫𑀺𑀲𑀧𑀝𑀺𑀕𑁆𑀕𑀳𑀡𑀸𑀤𑀺𑀦𑀸 𑀞𑀸𑀦𑀫𑁆𑀧𑀺 𑀪𑀜𑁆𑀚𑀢𑀻’’𑀢𑀺 𑀯𑀤𑀦𑁆𑀢𑀺, 𑀢𑀁 𑀅𑀝𑁆𑀞𑀓𑀣𑀸𑀬 𑀦 𑀲𑀫𑁂𑀢𑀺.

𑀬𑀢𑀲𑁆𑀲 𑀘𑀻𑀯𑀭𑀘𑁂𑀢𑀸𑀧𑀦𑁆𑀦𑀦𑁆𑀢𑀺𑀆𑀤𑀺 𑀬𑁂𑀦 𑀅𑀢𑁆𑀢𑀦𑀸 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑁄 𑀦𑀺𑀤𑁆𑀤𑀺𑀝𑁆𑀞𑁄, 𑀘𑀻𑀯𑀭𑀜𑁆𑀘 𑀅𑀦𑀺𑀧𑁆𑀨𑀸𑀤𑀺𑀢𑀁, 𑀢𑀲𑁆𑀲 𑀓𑀢𑁆𑀢𑀩𑁆𑀩𑀯𑀺𑀥𑀺𑀤𑀲𑁆𑀲𑀦𑀁. 𑀏𑀯𑀁 𑀪𑀺𑀓𑁆𑀔𑀼𑀦𑀸 𑀯𑀢𑁆𑀣𑀼𑀲𑀸𑀫𑀺𑀓𑀸𑀦𑀁 𑀯𑀼𑀢𑁆𑀢𑁂 𑀢𑁂 𑀘𑁄𑀤𑁂𑀢𑁆𑀯𑀸 𑀤𑁂𑀦𑁆𑀢𑀺, 𑀯𑀝𑁆𑀝𑀢𑀺 ‘‘𑀲𑀸𑀫𑀺𑀓𑀸 𑀘𑁄𑀤𑁂𑀢𑁆𑀯𑀸 𑀤𑁂𑀦𑁆𑀢𑀻’’𑀢𑀺 𑀅𑀦𑀸𑀧𑀢𑁆𑀢𑀺𑀬𑀁 𑀯𑀼𑀢𑁆𑀢𑀢𑁆𑀢𑀸. 𑀢𑁂𑀦 𑀘 𑀬𑁄 𑀲𑀬𑀁 𑀅𑀘𑁄𑀤𑁂𑀢𑁆𑀯𑀸 𑀉𑀧𑀸𑀲𑀓𑀸𑀤𑀻𑀳𑀺 𑀧𑀭𑀺𑀬𑀸𑀬𑁂𑀦 𑀯𑀢𑁆𑀯𑀸 𑀘𑁄𑀤𑀸𑀧𑁂𑀢𑀺, 𑀢𑁂𑀲𑀼 𑀲𑀢𑁆𑀢𑀓𑁆𑀔𑀢𑁆𑀢𑀼𑀫𑁆𑀧𑀺 𑀘𑁄𑀤𑁂𑀢𑁆𑀯𑀸 𑀘𑀻𑀯𑀭𑀁 𑀤𑀸𑀧𑁂𑀦𑁆𑀢𑁂𑀲𑀼 𑀢𑀲𑁆𑀲 𑀅𑀦𑀸𑀧𑀢𑁆𑀢𑀺 𑀲𑀺𑀤𑁆𑀥𑀸 𑀳𑁄𑀢𑀺 𑀲𑀺𑀓𑁆𑀔𑀸𑀧𑀤𑀲𑁆𑀲 𑀅𑀦𑀸𑀡𑀢𑁆𑀢𑀺𑀓𑀢𑁆𑀢𑀸.

𑀓𑁂𑀦𑀘𑀺 𑀅𑀦𑀺𑀤𑁆𑀤𑀺𑀝𑁆𑀞𑁄 𑀅𑀢𑁆𑀢𑀦𑁄 𑀫𑀼𑀔𑁂𑀦𑁂𑀯 𑀩𑁆𑀬𑀸𑀯𑀝𑀪𑀸𑀯𑀁 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑀢𑁆𑀢𑀁 𑀧𑀢𑁆𑀢𑁄 𑀫𑀼𑀔𑀯𑁂𑀯𑀝𑀺𑀓𑁄. ‘‘𑀅𑀯𑀺𑀘𑀸𑀭𑁂𑀢𑀼𑀓𑀸𑀫𑀢𑀸𑀬𑀸’’𑀢𑀺 𑀇𑀫𑀺𑀦𑀸 𑀯𑀺𑀚𑁆𑀚𑀫𑀸𑀦𑀫𑁆𑀧𑀺 𑀤𑀸𑀢𑀼𑀁 𑀅𑀦𑀺𑀘𑁆𑀙𑀦𑁆𑀢𑀸 𑀅𑀭𑀺𑀬𑀸𑀧𑀺 𑀯𑀜𑁆𑀘𑀦𑀸𑀥𑀺𑀧𑁆𑀧𑀸𑀬𑀁 𑀯𑀺𑀦𑀸 𑀯𑁄𑀳𑀸𑀭𑀢𑁄 𑀦𑀢𑁆𑀣𑀻𑀢𑀺 𑀯𑀤𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀪𑁂𑀲𑀚𑁆𑀚𑀓𑁆𑀔𑀦𑁆𑀥𑀓𑁂 𑀫𑁂𑀡𑁆𑀟𑀓𑀲𑁂𑀝𑁆𑀞𑀺𑀯𑀢𑁆𑀣𑀼𑀫𑁆𑀳𑀺 (𑀫𑀳𑀸𑀯. 𑁨𑁯𑁯) 𑀯𑀼𑀢𑁆𑀢𑀁 ‘‘𑀲𑀦𑁆𑀢𑀺, 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀺𑀯𑀘𑀦𑀫𑁂𑀯 (𑀫𑀳𑀸𑀯. 𑁨𑁯𑁯) 𑀫𑁂𑀡𑁆𑀟𑀓𑀲𑀺𑀓𑁆𑀔𑀸𑀧𑀤𑀁 𑀦𑀸𑀫. 𑀓𑀧𑁆𑀧𑀺𑀬𑀓𑀸𑀭𑀓𑀸𑀦𑀁 𑀳𑀢𑁆𑀣𑁂𑀢𑀺 𑀤𑀽𑀢𑁂𑀦 𑀦𑀺𑀤𑁆𑀤𑀺𑀝𑁆𑀞𑀓𑀧𑁆𑀧𑀺𑀬𑀓𑀸𑀭𑀓𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀦 𑀧𑀦 𑀪𑀺𑀓𑁆𑀔𑀼𑀦𑀸 𑀦𑀺𑀤𑁆𑀤𑀺𑀝𑁆𑀞𑁂, 𑀅𑀦𑀺𑀤𑁆𑀤𑀺𑀝𑁆𑀞𑁂 𑀯𑀸𑀢𑀺. 𑀢𑁂𑀦𑀸𑀳 ‘‘𑀏𑀢𑁆𑀣 𑀘 𑀘𑁄𑀤𑀦𑀸𑀬 𑀧𑀫𑀸𑀡𑀁 𑀦𑀢𑁆𑀣𑀻’’𑀢𑀺𑀆𑀤𑀺.

𑀲𑀬𑀁 𑀆𑀳𑀭𑀺𑀢𑁆𑀯𑀸 𑀤𑀤𑀦𑁆𑀢𑁂𑀲𑀽𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀧𑀺𑀡𑁆𑀟𑀧𑀸𑀢𑀸𑀤𑀻𑀦𑀁 𑀅𑀢𑁆𑀣𑀸𑀬𑀸’’𑀢𑀺 𑀇𑀫𑀺𑀦𑀸 𑀘𑀻𑀯𑀭𑀢𑁆𑀣𑀸𑀬𑁂𑀯 𑀦 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. ‘‘𑀏𑀲𑁂𑀯 𑀦𑀬𑁄’’𑀢𑀺 𑀇𑀫𑀺𑀦𑀸 𑀯𑀢𑁆𑀣𑀼𑀲𑀸𑀫𑀺𑀦𑀸 𑀦𑀺𑀤𑁆𑀤𑀺𑀝𑁆𑀞𑀓𑀧𑁆𑀧𑀺𑀬𑀓𑀸𑀭𑀓𑀪𑁂𑀤𑁂𑀲𑀼𑀧𑀺 𑀧𑀺𑀡𑁆𑀟𑀧𑀸𑀢𑀸𑀤𑀻𑀦𑀫𑁆𑀧𑀺 𑀅𑀢𑁆𑀣𑀸𑀬 𑀤𑀺𑀦𑁆𑀦𑁂 𑀘 𑀞𑀸𑀦𑀘𑁄𑀤𑀦𑀸𑀤𑀺 𑀲𑀩𑁆𑀩𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀓𑀸𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀺.

‘‘𑀲𑀗𑁆𑀖𑀁 𑀯𑀸…𑀧𑁂… 𑀅𑀦𑀸𑀫𑀲𑀺𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 ‘‘𑀲𑀗𑁆𑀖𑀲𑁆𑀲 𑀯𑀺𑀳𑀸𑀭𑀢𑁆𑀣𑀸𑀬 𑀤𑁂𑀫𑀸’’𑀢𑀺𑀆𑀤𑀺𑀦𑀸 𑀆𑀫𑀲𑀺𑀢𑁆𑀯𑀸 𑀯𑀤𑀦𑁆𑀢𑁂𑀲𑀼 𑀧𑀝𑀺𑀓𑁆𑀔𑀺𑀧𑀺𑀢𑀩𑁆𑀩𑀫𑁂𑀯. ‘‘𑀲𑀗𑁆𑀖𑁄 𑀲𑀫𑁆𑀧𑀝𑀺𑀘𑁆𑀙𑀢𑀻’’𑀢𑀺 𑀇𑀤𑀁 𑀉𑀓𑁆𑀓𑀝𑁆𑀞𑀯𑀲𑁂𑀦 𑀯𑀼𑀢𑁆𑀢𑀁, 𑀕𑀡𑀸𑀤𑀻𑀲𑀼𑀧𑀺 𑀲𑀗𑁆𑀖𑀲𑁆𑀲𑀢𑁆𑀣𑀸𑀬 𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑁂𑀲𑀼𑀧𑀺 𑀧𑀝𑀺𑀕𑁆𑀕𑀳𑀡𑁂𑀧𑀺 𑀧𑀭𑀺𑀪𑁄𑀕𑁂𑀧𑀺 𑀤𑀼𑀓𑁆𑀓𑀝𑀫𑁂𑀯. 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 ‘‘𑀧𑀝𑀺𑀕𑁆𑀕𑀳𑀡𑁂 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 (𑀲𑀸𑀭𑀢𑁆𑀣. 𑀝𑀻. 𑁨.𑁫𑁩𑁭-𑁫𑁩𑁯) 𑀯𑀼𑀢𑁆𑀢𑀁, 𑀢𑀁 𑀦 𑀬𑀼𑀢𑁆𑀢𑀁 𑀲𑀗𑁆𑀖𑀘𑁂𑀢𑀺𑀬𑀸𑀤𑀻𑀦𑀁 𑀅𑀢𑁆𑀣𑀸𑀬 𑀤𑀼𑀓𑁆𑀓𑀝𑀲𑁆𑀲 𑀯𑀼𑀢𑁆𑀢𑀢𑁆𑀢𑀸. 𑀘𑁄𑀤𑁂𑀢𑀻𑀢𑀺 𑀢𑀲𑁆𑀲 𑀤𑁄𑀲𑀸𑀪𑀸𑀯𑀁 𑀜𑀢𑁆𑀯𑀸𑀧𑀺 𑀓𑁄𑀥𑁂𑀦 𑀯𑀸 𑀮𑁄𑀪𑁂𑀦 𑀯𑀸 𑀪𑀡𑁆𑀟𑀤𑁂𑀬𑁆𑀬𑀦𑁆𑀢𑀺 𑀘𑁄𑀤𑁂𑀢𑀺. 𑀲𑁄 𑀏𑀯 𑀳𑀺 𑀫𑀼𑀲𑀸𑀯𑀸𑀤𑀸𑀤𑀺𑀧𑀘𑁆𑀘𑀬𑀸 𑀧𑀸𑀘𑀺𑀢𑁆𑀢𑀺𑀬𑀤𑀼𑀓𑁆𑀓𑀝𑀸𑀤𑀺𑀆𑀧𑀢𑁆𑀢𑀻𑀳𑀺 𑀲𑀸𑀧𑀢𑁆𑀢𑀺𑀓𑁄 𑀳𑁄𑀢𑀺, 𑀕𑀻𑀯𑀸𑀢𑀺𑀲𑀜𑁆𑀜𑀸𑀬 𑀧𑀦 𑀯𑀢𑁆𑀯𑀸 𑀦𑀺𑀤𑁆𑀤𑁄𑀲𑀪𑀸𑀯𑀁 𑀜𑀢𑁆𑀯𑀸 𑀯𑀺𑀭𑀫𑀦𑁆𑀢𑀲𑁆𑀲 𑀦𑀢𑁆𑀣𑀺 𑀆𑀧𑀢𑁆𑀢𑀺.

𑀢𑀴𑀸𑀓𑀁 𑀔𑁂𑀢𑁆𑀢𑁂 𑀧𑀯𑀺𑀝𑁆𑀞𑀢𑁆𑀢𑀸 ‘‘𑀦 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁. 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑁂 𑀲𑀗𑁆𑀖𑁄 𑀧𑀭𑀺𑀪𑀼𑀜𑁆𑀚𑀢𑀽𑀢𑀺 𑀤𑁂𑀢𑀺, 𑀯𑀝𑁆𑀝𑀢𑀻𑀢𑀺 𑀏𑀢𑁆𑀣 ‘‘𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘𑀢𑀼𑀧𑀘𑁆𑀘𑀬𑀧𑀭𑀺𑀪𑁄𑀕𑀢𑁆𑀣𑀸𑀬 𑀢𑀴𑀸𑀓𑀁 𑀤𑀫𑁆𑀫𑀻’’𑀢𑀺 𑀯𑀸 ‘‘𑀪𑀺𑀓𑁆𑀔𑀼𑀲𑀗𑁆𑀖𑁄 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑁂 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀢𑀴𑀸𑀓𑀁 𑀤𑀫𑁆𑀫𑀻’’𑀢𑀺 𑀯𑀸 ‘‘𑀇𑀢𑁄 𑀢𑀴𑀸𑀓𑀢𑁄 𑀉𑀧𑁆𑀧𑀦𑁆𑀦𑁂 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑁂 𑀤𑀫𑁆𑀫𑀻’’𑀢𑀺 𑀯𑀸 𑀯𑀢𑁆𑀢𑀼𑀫𑁆𑀧𑀺 𑀯𑀝𑁆𑀝𑀢𑀺, 𑀇𑀤𑀜𑁆𑀘 𑀲𑀗𑁆𑀖𑀲𑁆𑀲 𑀧𑀭𑀺𑀪𑁄𑀕𑀢𑁆𑀣𑀸𑀬 𑀤𑀺𑀬𑁆𑀬𑀫𑀸𑀦𑀜𑁆𑀜𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀧𑀼𑀕𑁆𑀕𑀮𑀲𑁆𑀲 𑀧𑀦 𑀏𑀯𑀫𑁆𑀧𑀺 𑀤𑀺𑀦𑁆𑀦𑀁 𑀢𑀴𑀸𑀓𑀔𑁂𑀢𑁆𑀢𑀸𑀤𑀺 𑀦 𑀯𑀝𑁆𑀝𑀢𑀺. 𑀲𑀼𑀤𑁆𑀥𑀘𑀺𑀢𑁆𑀢𑀲𑁆𑀲 𑀧𑀦 𑀉𑀤𑀓𑀧𑀭𑀺𑀪𑁄𑀕𑀢𑁆𑀣𑀁 𑀓𑀽𑀧𑀧𑁄𑀓𑁆𑀔𑀭𑀡𑀻𑀆𑀤𑀬𑁄 𑀯𑀝𑁆𑀝𑀦𑁆𑀢𑀺. ‘‘𑀲𑀗𑁆𑀖𑀲𑁆𑀲 𑀢𑀴𑀸𑀓𑀁 𑀅𑀢𑁆𑀣𑀺, 𑀢𑀁 𑀓𑀣’’𑀦𑁆𑀢𑀺 𑀳𑀺 𑀆𑀤𑀺𑀦𑀸 𑀲𑀩𑁆𑀩𑀢𑁆𑀣 𑀲𑀗𑁆𑀖𑀯𑀲𑁂𑀦𑁂𑀯 𑀯𑀼𑀢𑁆𑀢𑀁. 𑀳𑀢𑁆𑀣𑁂𑀢𑀺 𑀯𑀲𑁂.

‘‘𑀞𑀧𑁂𑀣𑀸𑀢𑀺 𑀯𑀼𑀢𑁆𑀢𑁂’’𑀢𑀺 𑀇𑀤𑀁 𑀲𑀸𑀫𑀻𑀘𑀺𑀯𑀲𑁂𑀦 𑀯𑀼𑀢𑁆𑀢𑀁, 𑀅𑀯𑀼𑀢𑁆𑀢𑁂𑀧𑀺 𑀞𑀧𑁂𑀦𑁆𑀢𑀲𑁆𑀲 𑀤𑁄𑀲𑁄 𑀦𑀢𑁆𑀣𑀺. 𑀢𑁂𑀦𑀸𑀳 ‘‘𑀉𑀤𑀓𑀁 𑀯𑀸𑀭𑁂𑀢𑀼𑀁 𑀮𑀩𑁆𑀪𑀢𑀻’’𑀢𑀺. 𑀲𑀲𑁆𑀲𑀓𑀸𑀮𑁂𑀧𑀺 𑀢𑀸𑀲𑁂𑀢𑁆𑀯𑀸 𑀫𑀼𑀜𑁆𑀘𑀺𑀢𑀼𑀁 𑀯𑀝𑁆𑀝𑀢𑀺, 𑀅𑀫𑀼𑀜𑁆𑀘𑀢𑁄 𑀧𑀦 𑀪𑀡𑁆𑀟𑀤𑁂𑀬𑁆𑀬𑀁. 𑀧𑀼𑀦 𑀤𑁂𑀢𑀻𑀢𑀺 𑀅𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀧𑀼𑀦 𑀤𑁂𑀢𑀺, 𑀏𑀯𑀫𑁆𑀧𑀺 𑀯𑀝𑁆𑀝𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀫𑀺𑀦𑀸 ‘‘𑀬𑁂𑀦 𑀓𑁂𑀦𑀘𑀺 𑀇𑀲𑁆𑀲𑀭𑁂𑀦 ‘𑀧𑀭𑀺𑀘𑁆𑀘𑀢𑁆𑀢𑀫𑀺𑀤𑀁 𑀪𑀺𑀓𑁆𑀔𑀽𑀳𑀺, 𑀅𑀲𑁆𑀲𑀸𑀫𑀺𑀓’𑀦𑁆𑀢𑀺𑀲𑀜𑁆𑀜𑀸𑀬 𑀅𑀢𑁆𑀢𑀦𑀸 𑀕𑀳𑁂𑀢𑁆𑀯𑀸 𑀤𑀺𑀦𑁆𑀦𑀁 𑀯𑀝𑁆𑀝𑀢𑀻’’𑀢𑀺 𑀤𑀲𑁆𑀲𑁂𑀢𑀺. 𑀓𑀧𑁆𑀧𑀺𑀬𑀯𑁄𑀳𑀸𑀭𑁂𑀧𑀺 𑀯𑀺𑀦𑀺𑀘𑁆𑀙𑀬𑀁 𑀯𑀓𑁆𑀔𑀸𑀫𑀸𑀢𑀺 𑀧𑀸𑀞𑀲𑁂𑀲𑁄.

𑀉𑀤𑀓𑀯𑀲𑁂𑀦𑀸𑀢𑀺 𑀉𑀤𑀓𑀧𑀭𑀺𑀪𑁄𑀕𑀢𑁆𑀣𑀁. ‘‘𑀲𑀼𑀤𑁆𑀥𑀘𑀺𑀢𑁆𑀢𑀸𑀦’’𑀦𑁆𑀢𑀺 𑀇𑀤𑀁 𑀲𑀳𑀢𑁆𑀣𑁂𑀦 𑀘 𑀅𑀓𑀧𑁆𑀧𑀺𑀬𑀯𑁄𑀳𑀸𑀭𑁂𑀦 𑀘 𑀓𑀭𑁄𑀦𑁆𑀢𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀲𑀲𑁆𑀲𑀲𑀫𑁆𑀧𑀸𑀤𑀦𑀢𑁆𑀣𑀦𑁆𑀢𑀺 𑀏𑀯𑀁 𑀅𑀲𑀼𑀤𑁆𑀥𑀘𑀺𑀢𑁆𑀢𑀸𑀦𑀫𑁆𑀧𑀺 𑀧𑀦 𑀲𑀬𑀁 𑀅𑀓𑀢𑁆𑀯𑀸 𑀓𑀧𑁆𑀧𑀺𑀬𑀯𑁄𑀳𑀸𑀭𑁂𑀦 𑀆𑀡𑀸𑀧𑁂𑀢𑀼𑀁 𑀯𑀝𑁆𑀝𑀢𑀺 𑀏𑀯. ‘‘𑀓𑀧𑁆𑀧𑀺𑀬𑀓𑀸𑀭𑀓𑀁 𑀞𑀧𑁂𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺 𑀇𑀤𑀁 𑀲𑀳𑀢𑁆𑀣𑀸𑀤𑀺𑀦𑀸 𑀓𑀢𑀢𑀴𑀸𑀓𑀢𑁆𑀢𑀸 ‘‘𑀅𑀲𑀸𑀭𑀼𑀧𑁆𑀧’’𑀦𑁆𑀢𑀺 𑀯𑀼𑀢𑁆𑀢𑀁, 𑀞𑀧𑁂𑀦𑁆𑀢𑀲𑁆𑀲, 𑀧𑀦 𑀢𑀁 𑀧𑀘𑁆𑀘𑀬𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑀲𑁆𑀲𑀧𑀺 𑀯𑀸 𑀲𑀗𑁆𑀖𑀲𑁆𑀲 𑀆𑀧𑀢𑁆𑀢𑀺 𑀦 𑀯𑀺𑀜𑁆𑀜𑀸𑀬𑀢𑀺, 𑀅𑀝𑁆𑀞𑀓𑀣𑀸𑀧𑀫𑀸𑀡𑁂𑀦 𑀯𑀸 𑀏𑀢𑁆𑀣 𑀆𑀧𑀢𑁆𑀢𑀺 𑀕𑀳𑁂𑀢𑀩𑁆𑀩𑀸. 𑀮𑀚𑁆𑀚𑀺𑀪𑀺𑀓𑁆𑀔𑀼𑀦𑀸𑀢𑀺 𑀮𑀚𑁆𑀚𑀺𑀦𑀸𑀧𑀺, 𑀧𑀕𑁂𑀯 𑀅𑀮𑀚𑁆𑀚𑀺𑀦𑀸 𑀫𑀢𑁆𑀢𑀺𑀓𑀼𑀤𑁆𑀥𑀭𑀡𑀸𑀤𑀻𑀲𑀼 𑀓𑀸𑀭𑀸𑀧𑀺𑀢𑁂𑀲𑀽𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦𑀯𑀲𑀲𑁆𑀲𑁂𑀢𑀺 𑀅𑀓𑀢𑀧𑀼𑀩𑁆𑀩𑁂 𑀓𑁂𑀤𑀸𑀭𑁂. ‘‘𑀓𑀳𑀸𑀧𑀡𑁂’’𑀢𑀺 𑀇𑀫𑀺𑀦𑀸 𑀥𑀜𑁆𑀜𑀼𑀝𑁆𑀞𑀸𑀧𑀦𑁂 𑀢𑀲𑁆𑀲𑁂𑀯 𑀅𑀓𑀧𑁆𑀧𑀺𑀬𑀦𑁆𑀢𑀺 𑀤𑀲𑁆𑀲𑁂𑀢𑀺, 𑀥𑀜𑁆𑀜𑀼𑀝𑁆𑀞𑀸𑀧𑀦𑁂 𑀘𑀲𑁆𑀲 𑀧𑀬𑁄𑀕𑁂𑀧𑀺 𑀤𑀼𑀓𑁆𑀓𑀝𑀫𑁂𑀯, 𑀦 𑀓𑀳𑀸𑀧𑀡𑀼𑀝𑁆𑀞𑀸𑀧𑀦𑁂 𑀯𑀺𑀬.

‘‘𑀓𑀲𑀣 𑀯𑀧𑀣𑀸’’𑀢𑀺 𑀯𑀘𑀦𑁂 𑀲𑀩𑁆𑀩𑁂𑀲𑀫𑁆𑀧𑀺 𑀅𑀓𑀧𑁆𑀧𑀺𑀬𑀁 𑀲𑀺𑀬𑀸𑀢𑀺 𑀆𑀳 ‘‘𑀅𑀯𑀢𑁆𑀯𑀸’’𑀢𑀺. 𑀏𑀢𑁆𑀢𑀓𑁄 𑀦𑀸𑀫 𑀪𑀸𑀕𑁄𑀢𑀺 𑀏𑀢𑁆𑀣 𑀏𑀢𑁆𑀢𑀓𑁄 𑀓𑀳𑀸𑀧𑀡𑁄𑀢𑀺 𑀇𑀤𑀫𑁆𑀧𑀺 𑀲𑀦𑁆𑀥𑀸𑀬 𑀯𑀤𑀢𑀺. 𑀢𑀣𑀸 𑀯𑀼𑀢𑁆𑀢𑁂𑀧𑀺 𑀳𑀺 𑀢𑀤𑀸 𑀓𑀳𑀸𑀧𑀡𑀸𑀦𑀁 𑀅𑀯𑀺𑀚𑁆𑀚𑀫𑀸𑀦𑀢𑁆𑀢𑀸 𑀆𑀬𑀢𑀺𑀁 𑀉𑀧𑁆𑀧𑀦𑁆𑀦𑀁 𑀅𑀜𑁆𑀜𑁂𑀲𑀁 𑀯𑀝𑁆𑀝𑀢𑀺 𑀏𑀯. 𑀢𑁂𑀦𑀸𑀳 ‘‘𑀢𑀲𑁆𑀲𑁂𑀯 𑀢𑀁 𑀅𑀓𑀧𑁆𑀧𑀺𑀬’’𑀦𑁆𑀢𑀺. 𑀢𑀲𑁆𑀲 𑀧𑀦 𑀲𑀩𑁆𑀩𑀧𑀬𑁄𑀕𑁂𑀲𑀼, 𑀧𑀭𑀺𑀪𑁄𑀕𑁂𑀲𑀼𑀧𑀺 𑀤𑀼𑀓𑁆𑀓𑀝𑀁. 𑀓𑁂𑀘𑀺 𑀧𑀦 ‘‘𑀥𑀜𑁆𑀜𑀧𑀭𑀺𑀪𑁄𑀕𑁂 𑀏𑀯 𑀆𑀧𑀢𑁆𑀢𑀺, 𑀦 𑀧𑀼𑀩𑁆𑀩𑀧𑀬𑁄𑀕𑁂’’𑀢𑀺 𑀯𑀤𑀦𑁆𑀢𑀺, 𑀢𑀁 𑀦 𑀬𑀼𑀢𑁆𑀢𑀁, 𑀬𑁂𑀦 𑀫𑀺𑀦𑀦𑀭𑀓𑁆𑀔𑀡𑀸𑀤𑀺𑀧𑀬𑁄𑀕𑁂𑀦 𑀧𑀘𑁆𑀙𑀸 𑀥𑀜𑁆𑀜𑀧𑀭𑀺𑀪𑁄𑀕𑁂 𑀆𑀧𑀢𑁆𑀢𑀺 𑀳𑁄𑀢𑀺, 𑀢𑀲𑁆𑀲 𑀧𑀬𑁄𑀕𑀲𑁆𑀲 𑀓𑀭𑀡𑁂 𑀅𑀦𑀸𑀧𑀢𑁆𑀢𑀺𑀬𑀸 𑀅𑀬𑀼𑀢𑁆𑀢𑀢𑁆𑀢𑀸. 𑀧𑀭𑀺𑀬𑀸𑀬𑀓𑀣𑀸𑀬 𑀧𑀦 𑀲𑀩𑁆𑀩𑀢𑁆𑀣 𑀅𑀦𑀸𑀧𑀢𑁆𑀢𑀺. 𑀢𑁂𑀦𑁂𑀯 ‘‘𑀏𑀢𑁆𑀢𑀓𑁂𑀳𑀺 𑀯𑀻𑀳𑀻𑀳𑀺 𑀇𑀤𑀜𑁆𑀘𑀺𑀤𑀜𑁆𑀘 𑀆𑀳𑀭𑀣𑀸’’𑀢𑀺 𑀦𑀺𑀬𑀫𑀯𑀘𑀦𑁂 𑀅𑀓𑀧𑁆𑀧𑀺𑀬𑀁 𑀯𑀼𑀢𑁆𑀢𑀁, 𑀓𑀳𑀸𑀧𑀡𑀯𑀺𑀘𑀸𑀭𑀡𑁂𑀧𑀺 𑀏𑀲𑁂𑀯 𑀦𑀬𑁄. 𑀯𑀢𑁆𑀣𑀼 𑀘 𑀏𑀯𑀭𑀽𑀧𑀁 𑀦𑀸𑀫 𑀲𑀁𑀯𑀺𑀚𑁆𑀚𑀢𑀺, 𑀓𑀧𑁆𑀧𑀺𑀬𑀓𑀸𑀭𑀓𑁄 𑀦𑀢𑁆𑀣𑀻𑀢𑀺 𑀯𑀢𑁆𑀢𑀩𑁆𑀩𑀦𑁆𑀢𑀺𑀆𑀤𑀺𑀯𑀘𑀦𑀜𑁆𑀘𑁂𑀢𑁆𑀣 𑀲𑀸𑀥𑀓𑀁.

𑀯𑀦𑀁 𑀤𑀫𑁆𑀫𑀺…𑀧𑁂… 𑀯𑀝𑁆𑀝𑀢𑀻𑀢𑀺 𑀏𑀢𑁆𑀣 𑀦𑀺𑀯𑀸𑀲𑀝𑁆𑀞𑀸𑀦𑀢𑁆𑀢𑀸 𑀧𑀼𑀕𑁆𑀕𑀮𑀲𑁆𑀲𑀸𑀧𑀺 𑀲𑀼𑀤𑁆𑀥𑀘𑀺𑀢𑁆𑀢𑁂𑀦 𑀕𑀳𑁂𑀢𑀼𑀁 𑀯𑀝𑁆𑀝𑀢𑀺. 𑀲𑀻𑀫𑀁 𑀤𑁂𑀫𑀸𑀢𑀺 𑀯𑀺𑀳𑀸𑀭𑀲𑀻𑀫𑀸𑀤𑀺𑀲𑀸𑀥𑀸𑀭𑀡𑀯𑀘𑀦𑁂𑀦 𑀯𑀼𑀢𑁆𑀢𑀢𑁆𑀢𑀸 ‘‘𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀁.

‘‘𑀯𑁂𑀬𑁆𑀬𑀸𑀯𑀘𑁆𑀘𑀓𑀭’’𑀦𑁆𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑁂𑀧𑀺 𑀧𑀼𑀕𑁆𑀕𑀮𑀲𑁆𑀲𑀧𑀺 𑀤𑀸𑀲𑀁 𑀕𑀳𑁂𑀢𑀼𑀁 𑀯𑀝𑁆𑀝𑀢𑀺 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀆𑀭𑀸𑀫𑀺𑀓’’𑀦𑁆𑀢𑀺 (𑀧𑀸𑀭𑀸. 𑁬𑁧𑁯; 𑀫𑀳𑀸𑀯. 𑁨𑁭𑁦) 𑀯𑀺𑀲𑁂𑀲𑁂𑀢𑁆𑀯𑀸 𑀅𑀦𑀼𑀜𑁆𑀜𑀸𑀢𑀢𑁆𑀢𑀸, 𑀢𑀜𑁆𑀘 𑀔𑁄 𑀧𑀺𑀮𑀺𑀦𑁆𑀤𑀯𑀘𑁆𑀙𑁂𑀦 𑀕𑀳𑀺𑀢𑀧𑀭𑀺𑀪𑀼𑀢𑁆𑀢𑀓𑁆𑀓𑀫𑁂𑀦, 𑀦 𑀕𑀳𑀝𑁆𑀞𑀸𑀦𑀁 𑀤𑀸𑀲𑀧𑀭𑀺𑀪𑁄𑀕𑀓𑁆𑀓𑀫𑁂𑀦. 𑀔𑁂𑀢𑁆𑀢𑀸𑀤𑀬𑁄 𑀧𑀦 𑀲𑀩𑁆𑀩𑁂 𑀲𑀗𑁆𑀖𑀲𑁆𑀲𑁂𑀯 𑀯𑀝𑁆𑀝𑀦𑁆𑀢𑀺 𑀧𑀸𑀴𑀺𑀬𑀁 𑀧𑀼𑀕𑁆𑀕𑀮𑀺𑀓𑀯𑀲𑁂𑀦 𑀕𑀳𑁂𑀢𑀼𑀁 𑀅𑀦𑀦𑀼𑀜𑁆𑀜𑀸𑀢𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀯𑀺𑀳𑀸𑀭𑀲𑁆𑀲 𑀤𑁂𑀫𑀸𑀢𑀺 𑀲𑀗𑁆𑀖𑀺𑀓𑀯𑀺𑀳𑀸𑀭𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, ‘‘𑀔𑁂𑀢𑁆𑀢𑀯𑀢𑁆𑀣𑀼𑀧𑀝𑀺𑀕𑁆𑀕𑀳𑀡𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀻’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁧.𑁧𑁦, 𑁧𑁯𑁪) 𑀲𑀼𑀢𑁆𑀢𑀦𑁆𑀢𑁂𑀲𑀼 𑀆𑀕𑀢𑀧𑀝𑀺𑀓𑁆𑀔𑁂𑀧𑁄 𑀪𑀕𑀯𑀢𑀸 𑀆𑀧𑀢𑁆𑀢𑀺𑀬𑀸𑀧𑀺 𑀳𑁂𑀢𑀼𑀪𑀸𑀯𑁂𑀦 𑀓𑀢𑁄𑀢𑀺 𑀪𑀕𑀯𑀢𑁄 𑀅𑀥𑀺𑀧𑁆𑀧𑀸𑀬𑀁 𑀚𑀸𑀦𑀦𑁆𑀢𑁂𑀳𑀺 𑀲𑀗𑁆𑀕𑀻𑀢𑀺𑀫𑀳𑀸𑀣𑁂𑀭𑁂𑀳𑀺 𑀔𑁂𑀢𑁆𑀢𑀧𑀝𑀺𑀕𑁆𑀕𑀳𑀡𑀸𑀤𑀺𑀦𑀺𑀲𑁆𑀲𑀺𑀢𑁄 𑀅𑀬𑀁 𑀲𑀩𑁆𑀩𑁄𑀧𑀺 𑀧𑀸𑀴𑀺𑀫𑀼𑀢𑁆𑀢𑀯𑀺𑀦𑀺𑀘𑁆𑀙𑀬𑁄 𑀯𑀼𑀢𑁆𑀢𑁄𑀢𑀺 𑀕𑀳𑁂𑀢𑀩𑁆𑀩𑁄. 𑀓𑀧𑁆𑀧𑀺𑀬𑀓𑀸𑀭𑀓𑀲𑁆𑀲 𑀦𑀺𑀤𑁆𑀤𑀺𑀝𑁆𑀞𑀪𑀸𑀯𑁄, 𑀤𑀽𑀢𑁂𑀦 𑀅𑀧𑁆𑀧𑀺𑀢𑀢𑀸, 𑀢𑀢𑀼𑀢𑁆𑀢𑀭𑀺 𑀯𑀸𑀬𑀸𑀫𑁄, 𑀢𑁂𑀦 𑀧𑀝𑀺𑀮𑀸𑀪𑁄𑀢𑀺 𑀇𑀫𑀸𑀦𑁂𑀢𑁆𑀣 𑀘𑀢𑁆𑀢𑀸𑀭𑀺 𑀅𑀗𑁆𑀕𑀸𑀦𑀺.

𑀭𑀸𑀚𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀝𑁆𑀞𑀺𑀢𑁄 𑀘𑀻𑀯𑀭𑀯𑀕𑁆𑀕𑁄 𑀧𑀞𑀫𑁄.

𑁨. 𑀓𑁄𑀲𑀺𑀬𑀯𑀕𑁆𑀕𑁄

𑁧. 𑀓𑁄𑀲𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁫𑁪𑁨. 𑀤𑀼𑀢𑀺𑀬𑀲𑁆𑀲 𑀧𑀞𑀫𑁂 𑀧𑀸𑀴𑀺𑀬𑀁 𑀓𑁄𑀲𑀺𑀬𑀓𑀸𑀭𑀓𑁂𑀢𑀺 𑀓𑁄𑀲𑀓𑀸𑀭𑀓𑀧𑀸𑀡𑀸𑀦𑀁 𑀓𑁄𑀲𑀢𑁄 𑀦𑀺𑀩𑁆𑀩𑀢𑁆𑀢𑀢𑁆𑀢𑀸 𑀓𑁄𑀲𑀺𑀬𑁂𑀦 𑀲𑀼𑀢𑁆𑀢𑁂𑀦 𑀯𑀢𑁆𑀣𑀸𑀤𑀺𑀁 𑀓𑀭𑁄𑀦𑁆𑀢𑁂. 𑀲𑀗𑁆𑀖𑀸𑀢𑀦𑁆𑀢𑀺 𑀯𑀺𑀦𑀸𑀲𑀁.

𑁫𑁪𑁪. ‘‘𑀅𑀯𑀸𑀬𑀺𑀫’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 𑀯𑀸𑀬𑀺𑀢𑁆𑀯𑀸 𑀓𑀭𑀡𑁂 𑀅𑀦𑀸𑀧𑀢𑁆𑀢𑀺. 𑀫𑀺𑀲𑁆𑀲𑁂𑀢𑁆𑀯𑀸𑀢𑀺 𑀏𑀴𑀓𑀮𑁄𑀫𑁂𑀳𑀺 𑀫𑀺𑀲𑁆𑀲𑁂𑀢𑁆𑀯𑀸. 𑀧𑀝𑀺𑀮𑀸𑀪𑁂𑀦𑀸𑀢𑀺 𑀧𑀭𑀺𑀦𑀺𑀝𑁆𑀞𑀸𑀦𑁂𑀦 ‘‘𑀧𑀭𑀺𑀬𑁄𑀲𑀸𑀧𑁂𑀢𑀺, 𑀦𑀺𑀲𑁆𑀲𑀕𑁆𑀕𑀺𑀬’’𑀦𑁆𑀢𑀺 (𑀧𑀸𑀭𑀸. 𑁫𑁪𑁫) 𑀯𑀼𑀢𑁆𑀢𑀢𑁆𑀢𑀸, 𑀓𑁄𑀲𑀺𑀬𑀫𑀺𑀲𑁆𑀲𑀓𑀢𑀸, 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀲𑀦𑁆𑀣𑀢𑀲𑁆𑀲 𑀓𑀭𑀡𑀓𑀸𑀭𑀸𑀧𑀦𑀁, 𑀧𑀝𑀺𑀮𑀸𑀪𑁄 𑀘𑀸𑀢𑀺 𑀇𑀫𑀸𑀦𑁂𑀢𑁆𑀣 𑀢𑀻𑀡𑀺 𑀅𑀗𑁆𑀕𑀸𑀦𑀺.

𑀓𑁄𑀲𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫𑁪𑁭-𑁫𑁫𑁨. 𑀤𑀼𑀢𑀺𑀬𑀜𑁆𑀘 𑀢𑀢𑀺𑀬𑀜𑁆𑀘 𑀉𑀢𑁆𑀢𑀸𑀦𑀫𑁂𑀯. 𑀢𑀢𑁆𑀣 𑀧𑀦 𑀑𑀤𑀸𑀢𑀸𑀤𑀺𑀫𑀺𑀲𑁆𑀲𑀓𑀲𑀜𑁆𑀜𑀸𑀬 𑀲𑀼𑀤𑁆𑀥𑀓𑀸𑀴𑀓𑀸𑀦𑀜𑁆𑀜𑁂𑀯 𑀲𑀦𑁆𑀣𑀢𑀲𑁆𑀲 𑀓𑀭𑀡𑀯𑀲𑁂𑀦 𑀘𑁂𑀢𑁆𑀣 𑀤𑁆𑀯𑁂𑀪𑀸𑀕𑀢𑁄 𑀅𑀥𑀺𑀓𑁂𑀲𑀼 𑀲𑀼𑀤𑁆𑀥𑀓𑀸𑀴𑀓𑁂𑀲𑀼 𑀅𑀦𑀥𑀺𑀓𑀲𑀜𑁆𑀜𑀸𑀬 𑀲𑀦𑁆𑀣𑀢𑀲𑁆𑀲 𑀓𑀭𑀡𑀯𑀲𑁂𑀦 𑀘 𑀅𑀘𑀺𑀢𑁆𑀢𑀓𑀢𑀸 𑀯𑁂𑀤𑀺𑀢𑀩𑁆𑀩𑀸.

𑁪. 𑀙𑀩𑁆𑀩𑀲𑁆𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁫𑁫𑁭. 𑀘𑀢𑀼𑀢𑁆𑀣𑁂 𑀳𑀤 𑀓𑀭𑀻𑀲𑀼𑀲𑁆𑀲𑀕𑁆𑀕𑁂, 𑀫𑀺𑀳 𑀲𑁂𑀘𑀦𑁂𑀢𑀺 𑀥𑀸𑀢𑀼𑀅𑀢𑁆𑀣𑀁 𑀲𑀦𑁆𑀥𑀸𑀬𑀸𑀳 ‘‘𑀯𑀘𑁆𑀘𑀫𑁆𑀧𑀺 𑀧𑀲𑁆𑀲𑀸𑀯𑀫𑁆𑀧𑀺 𑀓𑀭𑁄𑀦𑁆𑀢𑀻’’𑀢𑀺. 𑀊𑀦𑀓𑀙𑀩𑁆𑀩𑀲𑁆𑀲𑁂𑀲𑀼 𑀅𑀢𑀺𑀭𑁂𑀓𑀙𑀩𑁆𑀩𑀲𑁆𑀲𑀲𑀗𑁆𑀓𑀺𑀢𑀸𑀤𑀺𑀯𑀲𑁂𑀦𑁂𑀢𑁆𑀣 𑀅𑀘𑀺𑀢𑁆𑀢𑀓𑀢𑀸 𑀯𑁂𑀤𑀺𑀢𑀩𑁆𑀩𑀸.

𑀙𑀩𑁆𑀩𑀲𑁆𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀦𑀺𑀲𑀻𑀤𑀦𑀲𑀦𑁆𑀣𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁫𑁬𑁫. 𑀧𑀜𑁆𑀘𑀫𑁂 𑀢𑀢𑁆𑀣 𑀲𑀦𑁆𑀤𑀺𑀲𑁆𑀲𑀺𑀲𑁆𑀲𑀢𑀻𑀢𑀺 𑀲𑀓𑀸𑀬 𑀓𑀢𑀺𑀓𑀸𑀬 𑀅𑀬𑀼𑀢𑁆𑀢𑀓𑀸𑀭𑀺𑀢𑀸𑀯𑀲𑁂𑀦 𑀯𑀺𑀜𑁆𑀜𑀽𑀳𑀺 𑀲𑀦𑁆𑀤𑀺𑀲𑁆𑀲𑀺𑀲𑁆𑀲𑀢𑀻𑀢𑀺 𑀅𑀢𑁆𑀣𑁄. 𑀅𑀭𑀜𑁆𑀜𑀓𑀗𑁆𑀕𑀸𑀤𑀻𑀦𑀺 𑀢𑀻𑀡𑀺 𑀧𑀸𑀴𑀺𑀬𑀁 𑀲𑁂𑀦𑀸𑀲𑀦𑀸𑀤𑀺𑀧𑀘𑁆𑀘𑀬𑀢𑁆𑀢𑀬𑀲𑁆𑀲 𑀆𑀤𑀺𑀅𑀗𑁆𑀕𑀯𑀲𑁂𑀦 𑀯𑀼𑀢𑁆𑀢𑀸𑀦𑀺, 𑀲𑁂𑀲𑀸𑀦𑀺𑀧𑀺 𑀢𑁂 𑀲𑀫𑀸𑀤𑀺𑀬𑀺𑀁𑀲𑀼 𑀏𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁫𑁬𑁬. 𑀧𑀺𑀳𑀬𑀦𑁆𑀢𑀸𑀢𑀺 𑀧𑀢𑁆𑀣𑀬𑀦𑁆𑀢𑀸. 𑀲𑀦𑁆𑀣𑀢𑀲𑁆𑀲 𑀅𑀯𑀸𑀬𑀺𑀫𑀢𑁆𑀢𑀸, 𑀲𑁂𑀦𑀸𑀲𑀦𑀧𑀭𑀺𑀓𑁆𑀔𑀸𑀭𑀢𑁆𑀢𑀸 𑀘 𑀘𑀻𑀯𑀭𑀢𑀸, 𑀅𑀥𑀺𑀝𑁆𑀞𑀸𑀢𑀩𑁆𑀩𑀢𑀸 𑀘 𑀦𑀢𑁆𑀣𑀻𑀢𑀺 𑀆𑀳 ‘‘𑀘𑀢𑀼𑀢𑁆𑀣𑀘𑀻𑀯𑀭𑀲𑀜𑁆𑀜𑀺𑀢𑀸𑀬𑀸’’𑀢𑀺, 𑀯𑀺𑀧𑀮𑁆𑀮𑀸𑀲𑀲𑀜𑁆𑀜𑀸𑀬𑀸𑀢𑀺 𑀅𑀢𑁆𑀣𑁄. 𑀓𑁂𑀘𑀺 𑀧𑀦 ‘‘𑀇𑀤𑀁 𑀦𑀺𑀲𑀻𑀤𑀦𑀲𑀦𑁆𑀣𑀢𑀁 𑀦𑀸𑀫 𑀦𑀯𑀲𑀼 𑀘𑀻𑀯𑀭𑁂𑀲𑀼 𑀦𑀺𑀲𑀻𑀤𑀦𑀘𑀻𑀯𑀭𑀫𑁂𑀯, 𑀦𑀸𑀜𑁆𑀜𑀁. 𑀦𑀺𑀲𑀻𑀤𑀦𑀲𑀺𑀓𑁆𑀔𑀸𑀧𑀤𑁂𑀧𑀺 (𑀧𑀸𑀘𑀺. 𑁫𑁩𑁧 𑀆𑀤𑀬𑁄) 𑀇𑀫𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂 𑀯𑀺𑀬 ‘𑀦𑀺𑀲𑀻𑀤𑀦𑀁 𑀦𑀸𑀫 𑀲𑀤𑀲𑀁 𑀯𑀼𑀘𑁆𑀘𑀢𑀻’𑀢𑀺 𑀘 𑀅𑀝𑁆𑀞𑀓𑀣𑀸𑀬𑀜𑁆𑀘𑀲𑁆𑀲 ‘𑀲𑀦𑁆𑀣𑀢𑀲𑀤𑀺𑀲𑀁 𑀲𑀦𑁆𑀣𑀭𑀺𑀢𑁆𑀯𑀸 𑀏𑀓𑀲𑁆𑀫𑀺𑀁 𑀅𑀦𑁆𑀢𑁂 𑀲𑀼𑀕𑀢𑀯𑀺𑀤𑀢𑁆𑀣𑀺𑀬𑀸 𑀯𑀺𑀤𑀢𑁆𑀣𑀺𑀫𑀢𑁆𑀢𑁂 𑀧𑀤𑁂𑀲𑁂 𑀤𑁆𑀯𑀻𑀲𑀼 𑀞𑀸𑀦𑁂𑀲𑀼 𑀨𑀸𑀮𑁂𑀢𑁆𑀯𑀸 𑀢𑀺𑀲𑁆𑀲𑁄 𑀤𑀲𑀸 𑀓𑀭𑀻𑀬𑀦𑁆𑀢𑀺, 𑀢𑀸𑀳𑀺 𑀤𑀲𑀸𑀳𑀺 𑀲𑀤𑀲𑀁 𑀦𑀸𑀫 𑀯𑀼𑀘𑁆𑀘𑀢𑀻’𑀢𑀺 (𑀧𑀸𑀘𑀺. 𑀅𑀝𑁆𑀞. 𑁫𑁩𑁧) 𑀘 𑀯𑀼𑀢𑁆𑀢𑀢𑁆𑀢𑀸’’𑀢𑀺 𑀯𑀤𑀦𑁆𑀢𑀺, 𑀢𑀁 𑀦 𑀬𑀼𑀢𑁆𑀢𑀁 𑀇𑀥 𑀧𑀫𑀸𑀡𑀦𑀺𑀬𑀫𑀲𑁆𑀲 𑀅𑀯𑀼𑀢𑁆𑀢𑀢𑁆𑀢𑀸, 𑀲𑀦𑁆𑀣𑀢𑀲𑁆𑀲 𑀘 𑀅𑀯𑀸𑀬𑀺𑀫𑀘𑀻𑀯𑀭𑀢𑁆𑀢𑀸, 𑀅𑀥𑀺𑀝𑁆𑀞𑀸𑀦𑀼𑀧𑀕𑀢𑁆𑀢𑀸𑀪𑀸𑀯𑀸 𑀅𑀝𑁆𑀞𑀓𑀣𑀸𑀬𑀁 𑀅𑀯𑀼𑀢𑁆𑀢𑀢𑁆𑀢𑀸 𑀘. 𑀦𑀺𑀲𑀻𑀤𑀦𑀘𑀻𑀯𑀭𑀁 𑀧𑀦 𑀙𑀦𑁆𑀦𑀁 𑀘𑀻𑀯𑀭𑀸𑀦𑀁 𑀔𑀡𑁆𑀟𑀧𑀺𑀮𑁄𑀢𑀺𑀓𑀸𑀦𑀺 𑀧𑀫𑀸𑀡𑀬𑀼𑀢𑁆𑀢𑀫𑁂𑀯 𑀲𑀦𑁆𑀣𑀭𑀺𑀢𑁆𑀯𑀸 𑀲𑀦𑁆𑀣𑀢𑀁 𑀯𑀺𑀬 𑀓𑀭𑁄𑀦𑁆𑀢𑀺. 𑀢𑁂𑀦𑁂𑀯 ‘‘𑀲𑀦𑁆𑀣𑀢𑀲𑀤𑀺𑀲’’𑀦𑁆𑀢𑀺 𑀲𑀤𑀺𑀲𑀕𑁆𑀕𑀳𑀡𑀁 𑀓𑀢𑀁, 𑀢𑀲𑁆𑀫𑀸 𑀢𑀤𑁂𑀯 𑀘𑀻𑀯𑀭𑀁 𑀅𑀥𑀺𑀝𑁆𑀞𑀸𑀦𑀼𑀧𑀕𑀜𑁆𑀘, 𑀦 𑀇𑀤𑀦𑁆𑀢𑀺 𑀕𑀳𑁂𑀢𑀩𑁆𑀩𑀁.

𑁫𑁬𑁭. 𑀲𑀼𑀕𑀢𑀯𑀺𑀤𑀢𑁆𑀣𑀺𑀓𑀁 𑀅𑀦𑀸𑀤𑀸𑀬 𑀆𑀤𑀺𑀬𑀦𑁆𑀢𑀺𑀲𑀜𑁆𑀜𑀸𑀬, 𑀲𑀼𑀕𑀢𑀯𑀺𑀤𑀢𑁆𑀣𑀺𑀊𑀦𑁂 𑀅𑀦𑀽𑀦𑀦𑁆𑀢𑀺𑀲𑀜𑁆𑀜𑀸𑀬 𑀘 𑀯𑀲𑁂𑀦𑁂𑀢𑁆𑀣 𑀅𑀘𑀺𑀢𑁆𑀢𑀓𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀯𑀺𑀢𑀸𑀦𑀸𑀤𑀻𑀦𑀜𑁆𑀜𑁂𑀯 𑀅𑀢𑁆𑀣𑀸𑀬 𑀓𑀭𑀡𑁂 𑀅𑀦𑀸𑀧𑀢𑁆𑀢𑀺𑀯𑀘𑀦𑀢𑁄 𑀦𑀺𑀧𑀚𑁆𑀚𑀦𑀢𑁆𑀣𑀸𑀬 𑀓𑀭𑁄𑀢𑁄𑀧𑀺 𑀆𑀧𑀢𑁆𑀢𑀺 𑀏𑀯. 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀓𑁄𑀲𑀺𑀬𑁂𑀲𑀼 𑀲𑀼𑀤𑁆𑀥𑀓𑀸𑀴𑀓𑀸𑀦𑀜𑁆𑀘 𑀯𑀢𑁆𑀣𑀽𑀦𑀁 𑀅𑀓𑀧𑁆𑀧𑀺𑀬𑀢𑁆𑀢𑀸 𑀯𑀼𑀢𑁆𑀢𑀁. 𑀢𑁂𑀦𑁂𑀯 𑀧𑀸𑀴𑀺𑀬𑀁 ‘‘𑀅𑀜𑁆𑀜𑁂𑀦 𑀓𑀢𑀁 𑀧𑀝𑀺𑀮𑀪𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀧𑀸𑀭𑀸. 𑁫𑁪𑁫, 𑁫𑁫𑁦) 𑀢𑀢𑁆𑀣 𑀢𑀢𑁆𑀣 𑀯𑀼𑀢𑁆𑀢𑀁, 𑀇𑀢𑀭𑁂𑀲𑀼 𑀧𑀦 𑀤𑁆𑀯𑀻𑀲𑀼 ‘‘𑀅𑀦𑀸𑀧𑀢𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀘𑀢𑀼𑀢𑁆𑀣𑁂 𑀅𑀜𑁆𑀜𑀲𑁆𑀲𑀢𑁆𑀣𑀸𑀬 𑀓𑀭𑀡𑁂𑀧𑀺 𑀅𑀦𑀸𑀧𑀢𑁆𑀢𑀺, 𑀧𑀜𑁆𑀘𑀫𑁂 𑀢𑀢𑁆𑀣 𑀤𑀼𑀓𑁆𑀓𑀝𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀦𑀺𑀲𑁆𑀲𑀝𑁆𑀞𑀤𑀸𑀦𑀯𑀘𑀦𑀢𑁄 𑀧𑀦 𑀕𑀳𑀡𑁂 𑀤𑁄𑀲𑁄 𑀦𑀢𑁆𑀣𑀺, 𑀧𑀭𑀺𑀪𑀼𑀜𑁆𑀚𑀦𑁂 𑀘 𑀯𑀺𑀚𑀝𑁂𑀢𑁆𑀯𑀸 𑀓𑀧𑁆𑀧𑀺𑀬𑀯𑀲𑁂𑀦 𑀓𑀢𑁂 𑀦 𑀤𑁄𑀲𑁄.

𑀦𑀺𑀲𑀻𑀤𑀦𑀲𑀦𑁆𑀣𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀏𑀴𑀓𑀮𑁄𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁫𑁭𑁨. 𑀙𑀝𑁆𑀞𑁂 𑀧𑀸𑀴𑀺𑀬𑀁 ‘‘𑀅𑀤𑁆𑀥𑀸𑀦𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑀲𑁆𑀲𑀸’’𑀢𑀺 𑀇𑀤𑀁 𑀯𑀢𑁆𑀣𑀼𑀯𑀲𑁂𑀦 𑀯𑀼𑀢𑁆𑀢𑀁. 𑀦𑀺𑀯𑀸𑀲𑀝𑁆𑀞𑀸𑀦𑁂 𑀮𑀤𑁆𑀥𑀸𑀦𑀺𑀧𑀺 𑀢𑀺𑀬𑁄𑀚𑀦𑀢𑁄 𑀧𑀭𑀁 𑀳𑀭𑀺𑀢𑀼𑀁 𑀦 𑀯𑀝𑁆𑀝𑀢𑀺 𑀏𑀯. 𑀅𑀲𑀦𑁆𑀢𑁂 𑀳𑀸𑀭𑀓𑁂𑀢𑀺 𑀅𑀦𑀼𑀭𑀽𑀧𑀢𑁄 𑀯𑀼𑀢𑁆𑀢𑀁. 𑀲𑀦𑁆𑀢𑁂𑀧𑀺 𑀳𑀸𑀭𑀓𑁂 𑀳𑀭𑀢𑁄 𑀦𑀢𑁆𑀣𑀺 𑀤𑁄𑀲𑁄. 𑀆𑀧𑀢𑁆𑀢𑀺𑀬𑁂𑀯𑀸𑀢𑀺 𑀅𑀦𑀸𑀡𑀢𑁆𑀢𑁂𑀦 𑀳𑀝𑀢𑁆𑀢𑀸. 𑀧𑀓𑁆𑀔𑀤𑁆𑀯𑀬𑀲𑁆𑀲𑀧𑀺 𑀓𑀸𑀭𑀡𑀫𑀸𑀳 ‘‘𑀲𑀉𑀲𑁆𑀲𑀸𑀳𑀢𑁆𑀢𑀸’’𑀢𑀺, 𑀅𑀦𑀼𑀧𑀭𑀢𑀕𑀫𑀦𑀺𑀘𑁆𑀙𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀲𑀼𑀤𑁆𑀥𑀘𑀺𑀢𑁆𑀢𑀧𑀓𑁆𑀔𑀲𑁆𑀲𑁂𑀯 𑀓𑀸𑀭𑀡𑀫𑀸𑀳 ‘‘𑀅𑀘𑀺𑀢𑁆𑀢𑀓𑀢𑁆𑀢𑀸’’𑀢𑀺. 𑀦 𑀲𑀫𑁂𑀢𑀻𑀢𑀺 ‘‘𑀅𑀦𑀸𑀧𑀢𑁆𑀢𑀺, 𑀅𑀜𑁆𑀜𑀁 𑀳𑀭𑀸𑀧𑁂𑀢𑀻’’𑀢𑀺 𑀏𑀢𑁆𑀢𑀓𑀲𑁆𑀲𑁂𑀯 𑀧𑀭𑀺𑀳𑀭𑀡𑁂 𑀯𑀼𑀢𑁆𑀢𑀢𑁆𑀢𑀸. 𑀅𑀕𑀘𑁆𑀙𑀦𑁆𑀢𑁂𑀢𑀺 𑀞𑀺𑀢𑁂. 𑀳𑁂𑀝𑁆𑀞𑀸𑀢𑀺 𑀪𑀽𑀫𑀺𑀬𑀸.

𑁫𑁭𑁫. 𑀢𑀁 𑀳𑀭𑀦𑁆𑀢𑀲𑁆𑀲𑀸𑀢𑀺 𑀧𑀞𑀫𑀁 𑀧𑀝𑀺𑀮𑀸𑀪𑀝𑁆𑀞𑀸𑀦𑀢𑁄 𑀧𑀝𑁆𑀞𑀸𑀬 𑀢𑀺𑀬𑁄𑀚𑀦𑀢𑁄 𑀉𑀤𑁆𑀥𑀁 𑀳𑀭𑀦𑁆𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀢𑀣𑀸 𑀳𑀭𑀦𑁆𑀢𑀲𑁆𑀲 𑀳𑀺 𑀘𑁄𑀭𑁂𑀳𑀺 𑀅𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀧𑀼𑀦 𑀤𑀺𑀦𑁆𑀦𑀝𑁆𑀞𑀸𑀦𑀢𑁄 𑀢𑀺𑀬𑁄𑀚𑀦𑀁 𑀳𑀭𑀺𑀢𑀼𑀁 𑀯𑀝𑁆𑀝𑀢𑀺. 𑀓𑁂𑀘𑀺 𑀧𑀦 ‘‘𑀫𑀸𑀢𑀺𑀓𑀸𑀝𑁆𑀞𑀓𑀣𑀸𑀬𑀁 𑀅𑀗𑁆𑀕𑁂𑀲𑀼 ‘𑀧𑀞𑀫𑀧𑁆𑀧𑀝𑀺𑀮𑀸𑀪𑁄’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀤𑀼𑀢𑀺𑀬𑀧𑀝𑀺𑀮𑀸𑀪𑀝𑁆𑀞𑀸𑀦𑀢𑁄 𑀢𑀺𑀬𑁄𑀚𑀦𑀸𑀢𑀺𑀓𑁆𑀓𑀫𑁂𑀧𑀺 𑀅𑀦𑀸𑀧𑀢𑁆𑀢𑀻’’𑀢𑀺 𑀯𑀤𑀦𑁆𑀢𑀺, 𑀢𑀁 𑀦 𑀬𑀼𑀢𑁆𑀢𑀁, 𑀤𑀼𑀢𑀺𑀬𑀧𑀝𑀺𑀮𑀸𑀪𑀲𑁆𑀲𑀸𑀧𑀺 𑀧𑀝𑀺𑀮𑀸𑀪𑀝𑁆𑀞𑀸𑀦𑁂 𑀧𑀯𑀺𑀲𑀦𑀢𑁄 𑀯𑀸𑀲𑀢𑁆𑀣𑀸𑀬 𑀕𑀫𑀦𑀝𑁆𑀞𑀸𑀦𑀢𑁄 𑀧𑀼𑀦 𑀕𑀫𑀦𑁂 𑀯𑀺𑀬. 𑀓𑀸𑀬𑀩𑀦𑁆𑀥𑀦𑀸𑀤𑀻𑀦𑀦𑁆𑀢𑀺 𑀤𑁆𑀯𑀺𑀧𑀝𑀮𑀓𑀸𑀬𑀩𑀦𑁆𑀥𑀦𑀸𑀤𑀻𑀦𑀁 𑀅𑀦𑁆𑀢𑀭𑁂 𑀧𑀓𑁆𑀔𑀺𑀢𑁆𑀢𑀁 𑀧𑀲𑀺𑀩𑁆𑀩𑀓𑁂 𑀧𑀓𑁆𑀔𑀺𑀢𑁆𑀢𑀲𑀤𑀺𑀲𑀁, 𑀦 𑀓𑀢𑀪𑀡𑁆𑀟𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀣𑀸 𑀦𑀺𑀥𑀸𑀦𑀫𑀼𑀔𑀦𑁆𑀢𑀺. 𑀅𑀓𑀢𑀪𑀡𑁆𑀟𑀢𑀸, 𑀧𑀞𑀫𑀧𑁆𑀧𑀝𑀺𑀮𑀸𑀪𑁄, 𑀢𑀺𑀬𑁄𑀚𑀦𑀸𑀢𑀺𑀓𑁆𑀓𑀫𑀦𑀁, 𑀆𑀳𑀭𑀡𑀧𑀘𑁆𑀘𑀸𑀳𑀭𑀡𑀁, 𑀅𑀯𑀸𑀲𑀸𑀥𑀺𑀧𑁆𑀧𑀸𑀬𑀢𑀸𑀢𑀺 𑀇𑀫𑀸𑀦𑁂𑀢𑁆𑀣 𑀧𑀜𑁆𑀘 𑀅𑀗𑁆𑀕𑀸𑀦𑀺.

𑀏𑀴𑀓𑀮𑁄𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀏𑀴𑀓𑀮𑁄𑀫𑀥𑁄𑀯𑀸𑀧𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁫𑁮𑁧. 𑀲𑀢𑁆𑀢𑀫𑁂 𑀧𑀸𑀴𑀺𑀬𑀁 𑀅𑀦𑀸𑀧𑀢𑁆𑀢𑀺𑀯𑀸𑀭𑁂 𑀅𑀧𑀭𑀺𑀪𑀼𑀢𑁆𑀢𑀁 𑀓𑀢𑀪𑀡𑁆𑀟𑀁 𑀥𑁄𑀯𑀸𑀧𑁂𑀢𑀻𑀢𑀺 𑀏𑀢𑁆𑀣 𑀧𑀭𑀺𑀪𑀼𑀢𑁆𑀢𑀲𑁆𑀲 𑀓𑀫𑁆𑀩𑀮𑀸𑀤𑀺𑀓𑀢𑀪𑀡𑁆𑀟𑀲𑁆𑀲 𑀥𑁄𑀯𑀸𑀧𑀦𑀁 𑀧𑀼𑀭𑀸𑀡𑀘𑀻𑀯𑀭𑀥𑁄𑀯𑀸𑀧𑀦𑀲𑀺𑀓𑁆𑀔𑀸𑀧𑀤𑁂𑀦 𑀆𑀧𑀢𑁆𑀢𑀺𑀓𑀭𑀦𑁆𑀢𑀺 𑀢𑀦𑁆𑀦𑀺𑀯𑀢𑁆𑀢𑀦𑀢𑁆𑀣𑀁 ‘‘𑀅𑀧𑀭𑀺𑀪𑀼𑀢𑁆𑀢𑀁 𑀓𑀢𑀪𑀡𑁆𑀟’’𑀦𑁆𑀢𑀺 𑀯𑀼𑀢𑁆𑀢𑀁. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑀏𑀴𑀓𑀮𑁄𑀫𑀥𑁄𑀯𑀸𑀧𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀭𑀽𑀧𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁫𑁮𑁩-𑁪. 𑀅𑀝𑁆𑀞𑀫𑁂 𑀲𑀼𑀯𑀡𑁆𑀡𑀫𑀬𑀓𑀳𑀸𑀧𑀡𑁂𑀦 𑀓𑀳𑀸𑀧𑀡𑁄𑀧𑀺 𑀭𑀚𑀢𑁂 𑀏𑀯 𑀲𑀗𑁆𑀕𑀬𑁆𑀳𑀢𑀻𑀢𑀺 𑀆𑀳 ‘‘𑀲𑁄𑀯𑀡𑁆𑀡𑀫𑀬𑁄 𑀯𑀸’’𑀢𑀺. 𑀭𑀽𑀧𑀺𑀬𑀫𑀬𑁄 𑀯𑀸𑀢𑀺 𑀭𑀚𑀢𑁂𑀦 𑀭𑀽𑀧𑀁 𑀲𑀫𑀼𑀝𑁆𑀞𑀧𑁂𑀢𑁆𑀯𑀸 𑀓𑀢𑀓𑀳𑀸𑀧𑀡𑁄. 𑀧𑀸𑀓𑀢𑀺𑀓𑁄 𑀦𑀸𑀫 𑀏𑀢𑀭𑀳𑀺 𑀧𑀓𑀢𑀺𑀓𑀳𑀸𑀧𑀡𑁄.

𑀇𑀘𑁆𑀘𑁂𑀢𑀁 𑀲𑀩𑁆𑀩𑀫𑁆𑀧𑀻𑀢𑀺 𑀲𑀺𑀓𑁆𑀔𑀸𑀧𑀤𑁂𑀦, 𑀯𑀺𑀪𑀗𑁆𑀕𑁂𑀦 𑀘 𑀯𑀼𑀢𑁆𑀢𑀁 𑀲𑀩𑁆𑀩𑀫𑁆𑀧𑀺 𑀦𑀺𑀤𑀲𑁆𑀲𑁂𑀢𑀺. 𑀢𑀲𑁆𑀲 𑀘𑀢𑀼𑀩𑁆𑀩𑀺𑀥𑀁 𑀦𑀺𑀲𑁆𑀲𑀕𑁆𑀕𑀺𑀬𑀯𑀢𑁆𑀣𑀽𑀢𑀺 𑀇𑀫𑀺𑀦𑀸𑀯 𑀲𑀫𑁆𑀩𑀦𑁆𑀥𑁄, 𑀦 𑀧𑀦 𑀅𑀦𑀦𑁆𑀢𑀭𑁂𑀦 ‘‘𑀭𑀚𑀢’’𑀦𑁆𑀢𑀺 𑀧𑀤𑁂𑀦. 𑀇𑀤𑀸𑀦𑀺 𑀢𑀁 𑀘𑀢𑀼𑀩𑁆𑀩𑀺𑀥𑀁 𑀦𑀺𑀲𑁆𑀲𑀕𑁆𑀕𑀺𑀬𑀯𑀢𑁆𑀣𑀼𑀁 𑀲𑀭𑀽𑀧𑀢𑁄 𑀤𑀲𑁆𑀲𑁂𑀦𑁆𑀢𑁄 ‘‘𑀭𑀚𑀢’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀳𑁂𑀝𑁆𑀞𑀸 𑀭𑀚𑀢𑀫𑀸𑀲𑀓𑁄𑀯 𑀯𑀼𑀢𑁆𑀢𑁄, 𑀦 𑀓𑁂𑀯𑀮𑀁 𑀭𑀚𑀢𑀁, 𑀢𑀣𑀸𑀧𑀺 𑀲𑀺𑀓𑁆𑀔𑀸𑀧𑀤𑁂 ‘‘𑀚𑀸𑀢𑀭𑀽𑀧𑀭𑀚𑀢’’𑀦𑁆𑀢𑀺 𑀧𑀤𑁂𑀦𑁂𑀯 𑀯𑀼𑀢𑁆𑀢𑀦𑁆𑀢𑀺 𑀢𑀫𑁆𑀧𑀺 𑀤𑀲𑁆𑀲𑁂𑀢𑀼𑀁 ‘‘𑀭𑀚𑀢’’𑀦𑁆𑀢𑀺 𑀇𑀤𑀁 𑀯𑀺𑀲𑀼𑀁 𑀯𑀼𑀢𑁆𑀢𑀁. 𑀧𑀤𑀪𑀸𑀚𑀦𑁂 𑀧𑀦 𑀫𑀸𑀢𑀺𑀓𑀸𑀧𑀤𑁂𑀦𑁂𑀯 𑀲𑀺𑀤𑁆𑀥𑀢𑁆𑀢𑀸 𑀢𑀁 𑀅𑀯𑀢𑁆𑀯𑀸 𑀢𑁂𑀦 𑀲𑀳 𑀲𑀗𑁆𑀕𑀬𑁆𑀳𑀫𑀸𑀦𑀫𑁂𑀯 𑀤𑀲𑁆𑀲𑁂𑀢𑀼𑀁 ‘‘𑀭𑀚𑀢𑀁 𑀦𑀸𑀫 𑀓𑀳𑀸𑀧𑀡𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀚𑀸𑀢𑀭𑀽𑀧𑀫𑀸𑀲𑀓𑁄𑀢𑀺 𑀲𑀼𑀯𑀡𑁆𑀡𑀫𑀬𑀓𑀳𑀸𑀧𑀡𑁄. 𑀯𑀼𑀢𑁆𑀢𑀧𑁆𑀧𑀪𑁂𑀤𑁄𑀢𑀺 ‘‘𑀭𑀽𑀧𑀺𑀬𑀫𑀬𑁄 𑀯𑀸 𑀧𑀸𑀓𑀢𑀺𑀓𑁄 𑀯𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀧𑁆𑀧𑀪𑁂𑀤𑁄. 𑀧𑀝𑁄𑀯 𑀧𑀝𑀓𑁄, 𑀯𑀢𑁆𑀣𑀁. 𑀤𑀼𑀓𑁆𑀓𑀝𑀫𑁂𑀯𑀸𑀢𑀺 𑀧𑀝𑀺𑀕𑁆𑀕𑀸𑀳𑀓𑀲𑁆𑀲𑁂𑀯 𑀧𑀝𑀺𑀕𑁆𑀕𑀳𑀡𑀧𑀘𑁆𑀘𑀬𑀸 𑀤𑀼𑀓𑁆𑀓𑀝𑀁, 𑀧𑀭𑀺𑀪𑁄𑀕𑁂 𑀧𑀦 𑀧𑀜𑁆𑀘𑀲𑀳𑀥𑀫𑁆𑀫𑀺𑀓𑁂𑀳𑀺 𑀧𑀝𑀺𑀕𑁆𑀕𑀳𑀺𑀢𑀸𑀦𑀁 𑀥𑀜𑁆𑀜𑀯𑀺𑀭𑀳𑀺𑀢𑀫𑀼𑀢𑁆𑀢𑀸𑀤𑀻𑀦𑀁 𑀓𑀸𑀭𑀡𑀸 𑀉𑀧𑁆𑀧𑀦𑁆𑀦𑀧𑀘𑁆𑀘𑀬𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑀸𑀦𑀁 𑀲𑀩𑁆𑀩𑁂𑀲𑀫𑁆𑀧𑀺 𑀤𑀼𑀓𑁆𑀓𑀝𑀫𑁂𑀯. 𑀓𑁂𑀘𑀺 𑀧𑀦 ‘‘𑀥𑀜𑁆𑀜𑀫𑁆𑀧𑀺 𑀧𑀜𑁆𑀘𑀲𑀳𑀥𑀫𑁆𑀫𑀺𑀓𑁂𑀳𑀺 𑀧𑀝𑀺𑀕𑁆𑀕𑀳𑀺𑀢𑀁 𑀫𑀼𑀢𑁆𑀢𑀸𑀤𑀺𑀔𑁂𑀢𑁆𑀢𑀸𑀤𑀺 𑀯𑀺𑀬 𑀲𑀩𑁆𑀩𑁂𑀲𑀫𑁆𑀧𑀺 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀦 𑀯𑀝𑁆𑀝𑀢𑀺, 𑀓𑁂𑀯𑀮𑀁 𑀲𑀗𑁆𑀖𑀺𑀓𑀪𑀽𑀫𑀺𑀬𑀁 𑀓𑀧𑁆𑀧𑀺𑀬𑀯𑁄𑀳𑀸𑀭𑁂𑀦 𑀘 𑀉𑀧𑁆𑀧𑀦𑁆𑀦𑀲𑁆𑀲 𑀥𑀜𑁆𑀜𑀲𑁆𑀲 𑀯𑀺𑀘𑀸𑀭𑀡𑀫𑁂𑀯 𑀲𑀦𑁆𑀥𑀸𑀬 ‘𑀢𑀲𑁆𑀲𑁂𑀯𑁂𑀢𑀁 𑀅𑀓𑀧𑁆𑀧𑀺𑀬’𑀦𑁆𑀢𑀺 𑀯𑀼𑀢𑁆𑀢’’𑀦𑁆𑀢𑀺 𑀯𑀤𑀦𑁆𑀢𑀺.

𑀏𑀓𑁄 𑀲𑀢𑀁 𑀯𑀸 𑀲𑀳𑀲𑁆𑀲𑀁 𑀯𑀸𑀢𑀺𑀆𑀤𑀺 𑀭𑀽𑀧𑀺𑀬𑁂 𑀳𑁂𑀝𑁆𑀞𑀺𑀫𑀓𑁄𑀝𑀺𑀬𑀸 𑀧𑀯𑀢𑁆𑀢𑀦𑀸𑀓𑀸𑀭𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁, 𑀦 𑀧𑀦 ‘‘𑀏𑀯𑀁 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀫𑁂𑀯𑀸’’𑀢𑀺 𑀤𑀲𑁆𑀲𑁂𑀢𑀼𑀁. ‘‘𑀇𑀥 𑀦𑀺𑀓𑁆𑀔𑀺𑀧𑀸𑀳𑀻’’𑀢𑀺 𑀯𑀼𑀢𑁆𑀢𑁂 𑀉𑀕𑁆𑀕𑀡𑁆𑀳𑀸𑀧𑀦𑀁 𑀳𑁄𑀢𑀻𑀢𑀺 𑀆𑀳 ‘‘𑀇𑀥 𑀦𑀺𑀓𑁆𑀔𑀺𑀧𑀸𑀳𑀻𑀢𑀺 𑀦 𑀯𑀢𑁆𑀢𑀩𑁆𑀩’’𑀦𑁆𑀢𑀺. 𑀓𑀧𑁆𑀧𑀺𑀬𑀜𑁆𑀘…𑀧𑁂… 𑀳𑁄𑀢𑀻𑀢𑀺 𑀬𑀲𑁆𑀫𑀸 𑀅𑀲𑀸𑀤𑀺𑀢𑀢𑁆𑀢𑀸 𑀢𑀢𑁄 𑀉𑀧𑁆𑀧𑀦𑁆𑀦𑀧𑀘𑁆𑀘𑀬𑀸 𑀯𑀝𑁆𑀝𑀦𑁆𑀢𑀺, 𑀢𑀲𑁆𑀫𑀸 𑀓𑀧𑁆𑀧𑀺𑀬𑀁 𑀦𑀺𑀲𑁆𑀲𑀸𑀬 𑀞𑀺𑀢𑀁. 𑀬𑀲𑁆𑀫𑀸 𑀧𑀦 𑀤𑀼𑀩𑁆𑀩𑀺𑀘𑀸𑀭𑀡𑀸𑀬 𑀲𑀢𑀺 𑀢𑀢𑁄 𑀉𑀧𑁆𑀧𑀦𑁆𑀦𑀫𑁆𑀧𑀺 𑀦 𑀓𑀧𑁆𑀧𑀢𑀺, 𑀢𑀲𑁆𑀫𑀸 𑀅𑀓𑀧𑁆𑀧𑀺𑀬𑀁 𑀦𑀺𑀲𑁆𑀲𑀸𑀬 𑀞𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

‘‘𑀦 𑀢𑁂𑀦 𑀓𑀺𑀜𑁆𑀘𑀺 𑀓𑀧𑁆𑀧𑀺𑀬𑀪𑀡𑁆𑀟𑀁 𑀘𑁂𑀢𑀸𑀧𑀺𑀢’’𑀦𑁆𑀢𑀺 𑀇𑀫𑀺𑀦𑀸 𑀘𑁂𑀢𑀸𑀧𑀺𑀢𑀁 𑀘𑁂, 𑀦𑀢𑁆𑀣𑀺 𑀧𑀭𑀺𑀪𑁄𑀕𑀽𑀧𑀸𑀬𑁄 𑀉𑀕𑁆𑀕𑀳𑁂𑀢𑁆𑀯𑀸 𑀅𑀦𑀺𑀲𑁆𑀲𑀝𑁆𑀞𑀭𑀽𑀧𑀺𑀬𑁂𑀦 𑀘𑁂𑀢𑀸𑀧𑀺𑀢𑀢𑁆𑀢𑀸. 𑀈𑀤𑀺𑀲𑀜𑁆𑀳𑀺 𑀲𑀗𑁆𑀖𑀫𑀚𑁆𑀛𑁂 𑀦𑀺𑀲𑁆𑀲𑀚𑁆𑀚𑀦𑀁 𑀓𑀢𑁆𑀯𑀸𑀯 𑀙𑀟𑁆𑀟𑁂𑀢𑁆𑀯𑀸 𑀧𑀸𑀘𑀺𑀢𑁆𑀢𑀺𑀬𑀁 𑀤𑁂𑀲𑁂𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀓𑁂𑀘𑀺 𑀧𑀦 ‘‘𑀬𑀲𑁆𑀫𑀸 𑀦𑀺𑀲𑁆𑀲𑀕𑁆𑀕𑀺𑀬𑀯𑀢𑁆𑀣𑀼𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸𑀧𑀺 𑀘𑁂𑀢𑀸𑀧𑀺𑀢𑀁 𑀓𑀧𑁆𑀧𑀺𑀬𑀪𑀡𑁆𑀟𑀁 𑀲𑀗𑁆𑀖𑁂 𑀦𑀺𑀲𑁆𑀲𑀝𑁆𑀞𑀁 𑀓𑀧𑁆𑀧𑀺𑀬𑀓𑀸𑀭𑀓𑁂𑀳𑀺 𑀦𑀺𑀲𑁆𑀲𑀝𑁆𑀞𑀭𑀽𑀧𑀺𑀬𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀆𑀦𑀻𑀢𑀓𑀧𑁆𑀧𑀺𑀬𑀪𑀡𑁆𑀟𑀲𑀤𑀺𑀲𑀁 𑀳𑁄𑀢𑀺, 𑀢𑀲𑁆𑀫𑀸 𑀯𑀺𑀦𑀸𑀯 𑀉𑀧𑀸𑀬𑀁 𑀪𑀸𑀚𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀤𑀦𑁆𑀢𑀺, 𑀢𑀁 𑀧𑀢𑁆𑀢𑀘𑀢𑀼𑀓𑁆𑀓𑀸𑀤𑀺𑀓𑀣𑀸𑀬 (𑀧𑀸𑀭𑀸. 𑀅𑀝𑁆𑀞. 𑁨.𑁫𑁮𑁯) 𑀦 𑀲𑀫𑁂𑀢𑀺. 𑀢𑀢𑁆𑀣 𑀭𑀽𑀧𑀺𑀬𑁂𑀦 𑀧𑀭𑀺𑀯𑀢𑁆𑀢𑀺𑀢𑀧𑀢𑁆𑀢𑀲𑁆𑀲 𑀅𑀧𑀭𑀺𑀪𑁄𑀕𑁄𑀯 𑀤𑀲𑁆𑀲𑀺𑀢𑁄, 𑀦 𑀦𑀺𑀲𑁆𑀲𑀚𑁆𑀚𑀦𑀯𑀺𑀥𑀸𑀦𑀦𑁆𑀢𑀺. 𑀉𑀧𑀦𑀺𑀓𑁆𑀔𑁂𑀧𑀁 𑀞𑀧𑁂𑀢𑁆𑀯𑀸𑀢𑀺 𑀓𑀧𑁆𑀧𑀺𑀬𑀓𑀸𑀭𑀓𑁂𑀳𑀺 𑀯𑀟𑁆𑀠𑀺𑀬𑀸 𑀧𑀬𑁄𑀚𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀅𑀓𑀧𑁆𑀧𑀺𑀬𑀦𑁆𑀢𑀺 𑀢𑁂𑀦 𑀯𑀢𑁆𑀣𑀼𑀦𑀸 𑀕𑀳𑀺𑀢𑀢𑁆𑀢𑀸 𑀯𑀼𑀢𑁆𑀢𑀁.

𑁫𑁮𑁫. ‘‘𑀧𑀢𑀺𑀢𑁄𑀓𑀸𑀲𑀁 𑀅𑀲𑀫𑀦𑁆𑀦𑀸𑀳𑀭𑀦𑁆𑀢𑁂𑀦𑀸’’𑀢𑀺 𑀇𑀤𑀁 𑀦𑀺𑀭𑀧𑁂𑀓𑁆𑀔𑀪𑀸𑀯𑀤𑀲𑁆𑀲𑀦𑀧𑀭𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀲𑀦𑁆𑀢𑀲𑀫𑁆𑀪𑀸𑀯𑀦𑀸𑀬𑀸𑀢𑀺 𑀧𑀭𑀺𑀬𑀸𑀬𑀸𑀤𑀺𑀦𑀸 𑀅𑀪𑀽𑀢𑀸𑀭𑁄𑀘𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀣𑁂𑀬𑁆𑀬𑀧𑀭𑀺𑀪𑁄𑀕𑁄𑀢𑀺 𑀧𑀘𑁆𑀘𑀬𑀲𑀸𑀫𑀺𑀦𑀸 𑀪𑀕𑀯𑀢𑀸 𑀅𑀦𑀦𑀼𑀜𑁆𑀜𑀸𑀢𑀢𑁆𑀢𑀸 𑀯𑀼𑀢𑁆𑀢𑀁. 𑀇𑀡𑀧𑀭𑀺𑀪𑁄𑀕𑁄𑀢𑀺 𑀪𑀕𑀯𑀢𑀸 𑀅𑀦𑀼𑀜𑁆𑀜𑀸𑀢𑀫𑁆𑀧𑀺 𑀓𑀢𑁆𑀢𑀩𑁆𑀩𑀁 𑀅𑀓𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀦𑀢𑁄 𑀯𑀼𑀢𑁆𑀢𑀁, 𑀢𑁂𑀦 𑀘 𑀧𑀘𑁆𑀘𑀬𑀲𑀦𑁆𑀦𑀺𑀲𑁆𑀲𑀺𑀢𑀲𑀻𑀮𑀁 𑀯𑀺𑀧𑀚𑁆𑀚𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀧𑀭𑀺𑀪𑁄𑀕𑁂 𑀧𑀭𑀺𑀪𑁄𑀕𑁂𑀢𑀺 𑀓𑀸𑀬𑀢𑁄 𑀫𑁄𑀘𑁂𑀢𑁆𑀯𑀸 𑀫𑁄𑀘𑁂𑀢𑁆𑀯𑀸 𑀧𑀭𑀺𑀪𑁄𑀕𑁂. 𑀧𑀘𑁆𑀙𑀺𑀫𑀬𑀸𑀫𑁂𑀲𑀼 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀦𑁆𑀢𑀺 𑀬𑁄𑀚𑀦𑀸. 𑀇𑀡𑀧𑀭𑀺𑀪𑁄𑀕𑀝𑁆𑀞𑀸𑀦𑁂 𑀢𑀺𑀝𑁆𑀞𑀢𑀻𑀢𑀺 𑀏𑀢𑁆𑀣 ‘‘𑀳𑀺𑀬𑁆𑀬𑁄 𑀬𑀁 𑀫𑀬𑀸 𑀘𑀻𑀯𑀭𑀁 𑀧𑀭𑀺𑀪𑀼𑀢𑁆𑀢’’𑀦𑁆𑀢𑀺𑀆𑀤𑀺𑀦𑀸𑀧𑀺 𑀅𑀢𑀻𑀢𑀧𑀘𑁆𑀘𑀯𑁂𑀓𑁆𑀔𑀡𑀸 𑀯𑀝𑁆𑀝𑀢𑀻𑀢𑀺 𑀯𑀤𑀦𑁆𑀢𑀺. 𑀧𑀭𑀺𑀪𑁄𑀕𑁂 𑀧𑀭𑀺𑀪𑁄𑀕𑁂𑀢𑀺 𑀉𑀤𑀓𑀧𑀢𑀦𑀝𑁆𑀞𑀸𑀦𑀢𑁄 𑀅𑀦𑁆𑀢𑁄𑀧𑀯𑁂𑀲𑀦𑁂𑀲𑀼, 𑀦𑀺𑀲𑀻𑀤𑀦𑀲𑀬𑀦𑁂𑀲𑀼 𑀘. 𑀲𑀢𑀺𑀧𑀘𑁆𑀘𑀬𑀢𑀸 𑀯𑀝𑁆𑀝𑀢𑀻𑀢𑀺 𑀧𑀘𑁆𑀘𑀯𑁂𑀓𑁆𑀔𑀡𑀲𑀢𑀺𑀬𑀸 𑀧𑀘𑁆𑀘𑀬𑀢𑁆𑀢𑀁 𑀮𑀤𑁆𑀥𑀼𑀁 𑀯𑀝𑁆𑀝𑀢𑀺. 𑀧𑀝𑀺𑀕𑁆𑀕𑀳𑀡𑁂 𑀘 𑀧𑀭𑀺𑀪𑁄𑀕𑁂 𑀘 𑀧𑀘𑁆𑀘𑀯𑁂𑀓𑁆𑀔𑀡𑀸𑀲𑀢𑀺 𑀅𑀯𑀲𑁆𑀲𑀁 𑀮𑀤𑁆𑀥𑀩𑁆𑀩𑀸𑀢𑀺 𑀤𑀲𑁆𑀲𑁂𑀢𑀺. 𑀢𑁂𑀦𑀸𑀳 ‘‘𑀲𑀢𑀺𑀁 𑀓𑀢𑁆𑀯𑀸’’𑀢𑀺𑀆𑀤𑀺. 𑀓𑁂𑀘𑀺 𑀧𑀦 ‘‘𑀲𑀢𑀺𑀧𑀘𑁆𑀘𑀬𑀢𑀸 𑀧𑀘𑁆𑀘𑀬𑁂 𑀲𑀢𑀺 𑀪𑁂𑀲𑀚𑁆𑀚𑀧𑀭𑀺𑀪𑁄𑀕𑀲𑁆𑀲 𑀓𑀸𑀭𑀡𑁂 𑀲𑀢𑀻’’𑀢𑀺 𑀏𑀯𑀫𑁆𑀧𑀺 𑀅𑀢𑁆𑀣𑀁 𑀯𑀤𑀦𑁆𑀢𑀺, 𑀢𑁂𑀲𑀫𑁆𑀧𑀺 𑀧𑀘𑁆𑀘𑀬𑁂 𑀲𑀢𑀻𑀢𑀺 𑀧𑀘𑁆𑀘𑀬𑀲𑀩𑁆𑀪𑀸𑀯𑀲𑀮𑁆𑀮𑀓𑁆𑀔𑀡𑁂 𑀲𑀢𑀻𑀢𑀺 𑀏𑀯𑀫𑀢𑁆𑀣𑁄 𑀕𑀳𑁂𑀢𑀩𑁆𑀩𑁄 𑀧𑀘𑁆𑀘𑀬𑀲𑀩𑁆𑀪𑀸𑀯𑀫𑀢𑁆𑀢𑁂𑀦 𑀲𑀻𑀮𑀲𑁆𑀲 𑀅𑀲𑀼𑀚𑁆𑀛𑀦𑀢𑁄. ‘‘𑀧𑀭𑀺𑀪𑁄𑀕𑁂 𑀅𑀓𑀭𑁄𑀦𑁆𑀢𑀲𑁆𑀲𑁂𑀯 𑀆𑀧𑀢𑁆𑀢𑀻’’𑀢𑀺 𑀇𑀫𑀺𑀦𑀸 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀻𑀮𑀲𑁆𑀲 𑀪𑁂𑀤𑁄 𑀤𑀲𑁆𑀲𑀺𑀢𑁄, 𑀦 𑀧𑀘𑁆𑀘𑀬𑀲𑀦𑁆𑀦𑀺𑀲𑁆𑀲𑁆𑀲𑀺𑀲𑀻𑀮𑀲𑁆𑀲, 𑀢𑀲𑁆𑀲 𑀅𑀢𑀻𑀢𑀧𑀘𑁆𑀘𑀯𑁂𑀓𑁆𑀔𑀡𑀸𑀬 𑀯𑀺𑀲𑀼𑀚𑁆𑀛𑀦𑀢𑁄. 𑀏𑀢𑀲𑁆𑀫𑀺𑀁, 𑀧𑀦 𑀲𑁂𑀲𑀧𑀘𑁆𑀘𑀬𑁂𑀲𑀼 𑀘 𑀇𑀡𑀧𑀭𑀺𑀪𑁄𑀕𑀸𑀤𑀺𑀯𑀘𑀦𑁂𑀦 𑀧𑀘𑁆𑀘𑀬𑀲𑀦𑁆𑀦𑀺𑀲𑁆𑀲𑀺𑀢𑀲𑀻𑀮𑀲𑁆𑀲𑁂𑀯 𑀪𑁂𑀤𑁄𑀢𑀺 𑀏𑀯𑀫𑀺𑀫𑁂𑀲𑀁 𑀦𑀸𑀦𑀸𑀓𑀭𑀡𑀁 𑀯𑁂𑀤𑀺𑀢𑀩𑁆𑀩𑀁.

𑀏𑀯𑀁 𑀧𑀘𑁆𑀘𑀬𑀲𑀦𑁆𑀦𑀺𑀲𑁆𑀲𑀺𑀢𑀲𑀻𑀮𑀲𑁆𑀲 𑀯𑀺𑀲𑀼𑀤𑁆𑀥𑀺𑀁 𑀤𑀲𑁆𑀲𑁂𑀢𑁆𑀯𑀸 𑀢𑁂𑀦𑁂𑀯 𑀧𑀲𑀗𑁆𑀕𑁂𑀦 𑀲𑀩𑁆𑀩𑀸𑀧𑀺 𑀯𑀺𑀲𑀼𑀤𑁆𑀥𑀺𑀬𑁄 𑀤𑀲𑁆𑀲𑁂𑀢𑀼𑀁 ‘‘𑀘𑀢𑀼𑀩𑁆𑀩𑀺𑀥𑀸 𑀳𑀺 𑀲𑀼𑀤𑁆𑀥𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀼𑀚𑁆𑀛𑀢𑀺 𑀤𑁂𑀲𑀦𑀸𑀤𑀻𑀳𑀺, 𑀲𑁄𑀥𑀻𑀬𑀢𑀻𑀢𑀺 𑀯𑀸 𑀲𑀼𑀤𑁆𑀥𑀺, 𑀘𑀢𑀼𑀩𑁆𑀩𑀺𑀥𑀲𑀻𑀮𑀁. 𑀢𑁂𑀦𑀸𑀳 ‘‘𑀤𑁂𑀲𑀦𑀸𑀬 𑀲𑀼𑀚𑁆𑀛𑀦𑀢𑁄’’𑀢𑀺𑀆𑀤𑀺. 𑀏𑀢𑁆𑀣 𑀤𑁂𑀲𑀦𑀸𑀕𑁆𑀕𑀳𑀡𑁂𑀦 𑀯𑀼𑀝𑁆𑀞𑀸𑀦𑀫𑁆𑀧𑀺 𑀙𑀺𑀦𑁆𑀦𑀫𑀽𑀮𑀸𑀦𑀁 𑀅𑀪𑀺𑀓𑁆𑀔𑀼𑀢𑀸𑀧𑀝𑀺𑀜𑁆𑀜𑀸𑀧𑀺 𑀲𑀗𑁆𑀕𑀳𑀺𑀢𑀸. 𑀙𑀺𑀦𑁆𑀦𑀫𑀽𑀮𑀸𑀦𑀫𑁆𑀧𑀺 𑀳𑀺 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀯𑀼𑀝𑁆𑀞𑀸𑀦𑁂𑀦 𑀳𑁂𑀝𑁆𑀞𑀸 𑀧𑀭𑀺𑀭𑀓𑁆𑀔𑀺𑀢𑀁 𑀪𑀺𑀓𑁆𑀔𑀼𑀲𑀻𑀮𑀁 𑀯𑀺𑀲𑀼𑀤𑁆𑀥𑀁 𑀦𑀸𑀫 𑀳𑁄𑀢𑀺, 𑀢𑁂𑀦 𑀢𑁂𑀲𑀁 𑀫𑀕𑁆𑀕𑀧𑀝𑀺𑀮𑀸𑀪𑁄𑀧𑀺 𑀲𑀫𑁆𑀧𑀚𑁆𑀚𑀢𑀺.

𑀤𑀸𑀢𑀩𑁆𑀩𑀝𑁆𑀞𑁂𑀦 𑀤𑀸𑀬𑀁, 𑀢𑀁 𑀆𑀤𑀺𑀬𑀦𑁆𑀢𑀻𑀢𑀺 𑀤𑀸𑀬𑀸𑀤𑀸. 𑀲𑀢𑁆𑀢𑀦𑁆𑀦𑀁 𑀲𑁂𑀓𑁆𑀔𑀸𑀦𑀦𑁆𑀢𑀺 𑀏𑀢𑁆𑀣 𑀓𑀮𑁆𑀬𑀸𑀡𑀧𑀼𑀣𑀼𑀚𑁆𑀚𑀦𑀸𑀧𑀺 𑀲𑀗𑁆𑀕𑀳𑀺𑀢𑀸 𑀢𑁂𑀲𑀁 𑀆𑀡𑀡𑁆𑀬𑀧𑀭𑀺𑀪𑁄𑀕𑀲𑁆𑀲 𑀤𑀸𑀬𑀚𑁆𑀚𑀧𑀭𑀺𑀪𑁄𑀕𑁂 𑀲𑀗𑁆𑀕𑀳𑀺𑀢𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀥𑀫𑁆𑀫𑀤𑀸𑀬𑀸𑀤𑀲𑀼𑀢𑁆𑀢𑀦𑁆𑀢𑀺 ‘‘𑀥𑀫𑁆𑀫𑀤𑀸𑀬𑀸𑀤𑀸 𑀫𑁂, 𑀪𑀺𑀓𑁆𑀔𑀯𑁂, 𑀪𑀯𑀣, 𑀫𑀸 𑀆𑀫𑀺𑀲𑀤𑀸𑀬𑀸𑀤𑀸’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁨𑁯) 𑀧𑀯𑀢𑁆𑀢𑀁 𑀲𑀼𑀢𑁆𑀢𑀁. 𑀢𑀢𑁆𑀣 𑀫𑀸 𑀫𑁂 𑀆𑀫𑀺𑀲𑀤𑀸𑀬𑀸𑀤𑀸𑀢𑀺 𑀏𑀯𑀁 𑀫𑁂-𑀲𑀤𑁆𑀤𑀁 𑀆𑀦𑁂𑀢𑁆𑀯𑀸 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀏𑀯𑀜𑁆𑀳𑀺 𑀢𑀣𑀸 𑀯𑀼𑀢𑁆𑀢𑀢𑁆𑀣𑀲𑀸𑀥𑀓𑀁 𑀳𑁄𑀢𑀺.

𑀮𑀚𑁆𑀚𑀺𑀦𑀸 𑀲𑀤𑁆𑀥𑀺𑀁 𑀧𑀭𑀺𑀪𑁄𑀕𑁄𑀢𑀺 𑀥𑀫𑁆𑀫𑀸𑀫𑀺𑀲𑀯𑀲𑁂𑀦 𑀫𑀺𑀲𑁆𑀲𑀪𑀸𑀯𑁄. 𑀅𑀮𑀚𑁆𑀚𑀺𑀦𑀸 𑀲𑀤𑁆𑀥𑀺𑀦𑁆𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. ‘‘𑀆𑀤𑀺𑀢𑁄 𑀧𑀝𑁆𑀞𑀸𑀬 𑀳𑀺 𑀅𑀮𑀚𑁆𑀚𑀻 𑀦𑀸𑀫 𑀦𑀢𑁆𑀣𑀻’’𑀢𑀺 𑀇𑀫𑀺𑀦𑀸 𑀤𑀺𑀝𑁆𑀞𑀤𑀺𑀝𑁆𑀞𑁂𑀲𑀼 𑀆𑀲𑀗𑁆𑀓𑀸 𑀦𑀸𑀫 𑀦 𑀓𑀸𑀢𑀩𑁆𑀩𑀸, 𑀤𑀺𑀝𑁆𑀞𑀲𑀼𑀢𑀸𑀤𑀺𑀓𑀸𑀭𑀡𑁂 𑀲𑀢𑀺 𑀏𑀯 𑀓𑀸𑀢𑀩𑁆𑀩𑀸𑀢𑀺 𑀤𑀲𑁆𑀲𑁂𑀢𑀺. 𑀅𑀢𑁆𑀢𑀦𑁄 𑀪𑀸𑀭𑀪𑀽𑀢𑀸 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸𑀤𑀬𑁄. 𑀲𑀘𑁂 𑀦 𑀑𑀭𑀫𑀢𑀻𑀢𑀺 𑀅𑀕𑀢𑀺𑀕𑀫𑀦𑁂𑀦 𑀥𑀫𑁆𑀫𑀸𑀫𑀺𑀲𑀧𑀭𑀺𑀪𑁄𑀕𑀢𑁄 𑀦 𑀑𑀭𑀫𑀢𑀺. ‘‘𑀆𑀧𑀢𑁆𑀢𑀺 𑀦𑀸𑀫 𑀦𑀢𑁆𑀣𑀻’’𑀢𑀺 𑀇𑀤𑀁 𑀅𑀮𑀚𑁆𑀚𑀻𑀦𑀁 𑀥𑀫𑁆𑀫𑁂𑀦 𑀉𑀧𑁆𑀧𑀦𑁆𑀦𑀧𑀘𑁆𑀘𑀬𑀁, 𑀥𑀫𑁆𑀫𑀓𑀫𑁆𑀫𑀜𑁆𑀘 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑁂𑀲𑀫𑁆𑀧𑀺 𑀳𑀺 𑀓𑀼𑀮𑀤𑀽𑀲𑀦𑀸𑀤𑀺𑀲𑀫𑀼𑀧𑁆𑀧𑀦𑁆𑀦𑀧𑀘𑁆𑀘𑀬𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑀸𑀦𑀁, 𑀯𑀕𑁆𑀕𑀓𑀫𑁆𑀫𑀸𑀤𑀺𑀁 𑀓𑀭𑁄𑀦𑁆𑀢𑀸𑀦𑀜𑁆𑀘 𑀆𑀧𑀢𑁆𑀢𑀺 𑀏𑀯.

‘‘𑀥𑀫𑁆𑀫𑀺𑀬𑀸𑀥𑀫𑁆𑀫𑀺𑀬𑀧𑀭𑀺𑀪𑁄𑀕𑁄 𑀧𑀘𑁆𑀘𑀬𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀳𑁂𑀝𑁆𑀞𑀸 𑀮𑀚𑁆𑀚𑀺𑀧𑀭𑀺𑀪𑁄𑀕𑁄 𑀧𑀘𑁆𑀘𑀬𑀯𑀲𑁂𑀦 𑀘 𑀏𑀓𑀓𑀫𑁆𑀫𑀸𑀤𑀺𑀯𑀲𑁂𑀦 𑀘 𑀯𑀼𑀢𑁆𑀢𑁄 𑀏𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑁂𑀦𑁂𑀯 𑀤𑀼𑀝𑁆𑀞𑀤𑁄𑀲𑀲𑀺𑀓𑁆𑀔𑀸𑀧𑀤𑀝𑁆𑀞𑀓𑀣𑀸𑀬𑀁 𑀘𑁄𑀤𑀓𑀘𑀼𑀤𑀺𑀢𑀓𑀪𑀸𑀯𑁂 𑀞𑀺𑀢𑀸 𑀤𑁆𑀯𑁂 𑀅𑀮𑀚𑁆𑀚𑀺𑀦𑁄 𑀥𑀫𑁆𑀫𑀧𑀭𑀺𑀪𑁄𑀕𑀫𑁆𑀧𑀺 𑀲𑀦𑁆𑀥𑀸𑀬 ‘‘𑀏𑀓𑀲𑀫𑁆𑀪𑁄𑀕𑀧𑀭𑀺𑀪𑁄𑀕𑀸 𑀳𑀼𑀢𑁆𑀯𑀸 𑀚𑀻𑀯𑀣𑀸’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁩𑁮𑁫-𑁩𑁮𑁬) 𑀯𑀼𑀢𑁆𑀢𑀸 𑀢𑁂𑀲𑀁 𑀅𑀜𑁆𑀜𑀫𑀜𑁆𑀜𑀁 𑀥𑀫𑁆𑀫𑀸𑀫𑀺𑀲𑀧𑀭𑀺𑀪𑁄𑀕𑁂 𑀯𑀺𑀭𑁄𑀥𑀸𑀪𑀸𑀯𑀸. 𑀮𑀚𑁆𑀚𑀻𑀦𑀫𑁂𑀯 𑀳𑀺 𑀅𑀮𑀚𑁆𑀚𑀺𑀦𑀸 𑀲𑀳 𑀢𑀤𑀼𑀪𑀬𑀧𑀭𑀺𑀪𑁄𑀕𑀸 𑀦 𑀯𑀝𑁆𑀝𑀦𑁆𑀢𑀻𑀢𑀺.

𑀥𑀫𑁆𑀫𑀧𑀭𑀺𑀪𑁄𑀕𑁄𑀢𑀺 ‘‘𑀏𑀓𑀓𑀫𑁆𑀫𑀁 𑀏𑀓𑀼𑀤𑁆𑀤𑁂𑀲𑁄’’𑀢𑀺𑀆𑀤𑀺𑀦𑀸 (𑀧𑀸𑀭𑀸. 𑁫𑁫, 𑁯𑁨, 𑁧𑁭𑁨) 𑀯𑀼𑀢𑁆𑀢𑀲𑀁𑀯𑀸𑀲𑁄 𑀘𑁂𑀯 𑀦𑀺𑀲𑁆𑀲𑀬𑀕𑁆𑀕𑀳𑀡𑀤𑀸𑀦𑀸𑀤𑀺𑀓𑁄 𑀲𑀩𑁆𑀩𑁄 𑀦𑀺𑀭𑀸𑀫𑀺𑀲𑀧𑀭𑀺𑀪𑁄𑀕𑁄 𑀘 𑀯𑁂𑀤𑀺𑀢𑀩𑁆𑀩𑁄. ‘‘𑀦 𑀲𑁄 𑀆𑀧𑀢𑁆𑀢𑀺𑀬𑀸 𑀓𑀸𑀭𑁂𑀢𑀩𑁆𑀩𑁄’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀮𑀚𑁆𑀚𑀺𑀦𑁄 𑀅𑀮𑀚𑁆𑀚𑀺𑀧𑀕𑁆𑀕𑀳𑁂 𑀆𑀧𑀢𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀇𑀢𑀭𑁄𑀧𑀻𑀢𑀺 𑀮𑀚𑁆𑀚𑀻𑀧𑀺. 𑀢𑀲𑁆𑀲𑀸𑀧𑀺 𑀅𑀢𑁆𑀢𑀸𑀦𑀁 𑀧𑀕𑁆𑀕𑀡𑁆𑀳𑀦𑁆𑀢𑀲𑁆𑀲 𑀅𑀮𑀚𑁆𑀚𑀺𑀦𑁄, 𑀇𑀫𑀺𑀦𑀸 𑀘 𑀮𑀚𑁆𑀚𑀺𑀦𑁄 𑀯𑀡𑁆𑀡𑀪𑀡𑀦𑀸𑀤𑀺𑀮𑀸𑀪𑀁 𑀧𑀝𑀺𑀘𑁆𑀘 𑀆𑀫𑀺𑀲𑀕𑀭𑀼𑀓𑀢𑀸𑀬 𑀯𑀸 𑀕𑁂𑀳𑀲𑀺𑀢𑀧𑁂𑀫𑁂𑀦 𑀯𑀸 𑀢𑀁 𑀅𑀮𑀚𑁆𑀚𑀺𑀁 𑀧𑀕𑁆𑀕𑀡𑁆𑀳𑀦𑁆𑀢𑁄 𑀮𑀚𑁆𑀚𑀻 𑀲𑀸𑀲𑀦𑀁 𑀅𑀦𑁆𑀢𑀭𑀥𑀸𑀧𑁂𑀢𑀺 𑀦𑀸𑀫𑀸𑀢𑀺 𑀤𑀲𑁆𑀲𑁂𑀢𑀺. 𑀏𑀯𑀁 𑀕𑀳𑀝𑁆𑀞𑀸𑀤𑀻𑀲𑀼 𑀉𑀧𑀢𑁆𑀣𑀫𑁆𑀪𑀺𑀢𑁄 𑀅𑀮𑀚𑁆𑀚𑀻 𑀩𑀮𑀁 𑀮𑀪𑀺𑀢𑁆𑀯𑀸 𑀧𑁂𑀲𑀮𑁂 𑀅𑀪𑀺𑀪𑀯𑀺𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀲𑀸𑀲𑀦𑀁 𑀉𑀤𑁆𑀥𑀫𑁆𑀫𑀁 𑀉𑀩𑁆𑀩𑀺𑀦𑀬𑀁 𑀓𑀭𑁄𑀢𑀻𑀢𑀺.

‘‘𑀥𑀫𑁆𑀫𑀧𑀭𑀺𑀪𑁄𑀕𑁄𑀧𑀺 𑀢𑀢𑁆𑀣 𑀯𑀝𑁆𑀝𑀢𑀻’’𑀢𑀺 𑀇𑀫𑀺𑀦𑀸 𑀆𑀫𑀺𑀲𑀧𑀭𑀺𑀪𑁄𑀕𑀢𑁄 𑀥𑀫𑁆𑀫𑀧𑀭𑀺𑀪𑁄𑀕𑁄𑀯 𑀕𑀭𑀼𑀓𑁄, 𑀢𑀲𑁆𑀫𑀸 𑀅𑀢𑀺𑀯𑀺𑀬 𑀅𑀮𑀚𑁆𑀚𑀺𑀯𑀺𑀯𑁂𑀓𑁂𑀦 𑀓𑀸𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀢𑀺. ‘‘𑀥𑀫𑁆𑀫𑀸𑀦𑀼𑀕𑁆𑀕𑀳𑁂𑀦 𑀉𑀕𑁆𑀕𑀡𑁆𑀳𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀅𑀮𑀚𑁆𑀚𑀼𑀲𑁆𑀲𑀦𑁆𑀦𑀢𑀸𑀬 𑀲𑀸𑀲𑀦𑁂 𑀑𑀲𑀓𑁆𑀓𑀦𑁆𑀢𑁂, 𑀮𑀚𑁆𑀚𑀻𑀲𑀼 𑀘 𑀅𑀧𑁆𑀧𑀳𑁄𑀦𑁆𑀢𑁂𑀲𑀼 𑀅𑀮𑀚𑁆𑀚𑀺𑀫𑁆𑀧𑀺 𑀧𑀓𑀢𑀢𑁆𑀢𑀁 𑀕𑀡𑀧𑀽𑀭𑀓𑀁 𑀕𑀳𑁂𑀢𑁆𑀯𑀸 𑀉𑀧𑀲𑀫𑁆𑀧𑀤𑀸𑀤𑀺𑀓𑀭𑀡𑁂𑀦 𑀘𑁂𑀯 𑀓𑁂𑀘𑀺 𑀅𑀮𑀚𑁆𑀚𑀺𑀦𑁄 𑀥𑀫𑁆𑀫𑀸𑀫𑀺𑀲𑀧𑀭𑀺𑀪𑁄𑀕𑁂𑀦 𑀲𑀗𑁆𑀕𑀳𑁂𑀢𑁆𑀯𑀸 𑀲𑁂𑀲𑀸𑀮𑀚𑁆𑀚𑀺𑀕𑀡𑀲𑁆𑀲 𑀦𑀺𑀕𑁆𑀕𑀳𑁂𑀦 𑀘 𑀲𑀸𑀲𑀦𑀁 𑀧𑀕𑁆𑀕𑀡𑁆𑀳𑀺𑀢𑀼𑀁 𑀯𑀝𑁆𑀝𑀢𑀺 𑀏𑀯.

𑀓𑁂𑀘𑀺 𑀧𑀦 ‘‘𑀓𑁄𑀝𑀺𑀬𑀁 𑀞𑀺𑀢𑁄 𑀕𑀦𑁆𑀣𑁄𑀢𑀺 𑀯𑀼𑀢𑁆𑀢𑀢𑁆𑀢𑀸 𑀕𑀦𑁆𑀣𑀧𑀭𑀺𑀬𑀸𑀧𑀼𑀡𑀦𑀫𑁂𑀯 𑀥𑀫𑁆𑀫𑀧𑀭𑀺𑀪𑁄𑀕𑁄, 𑀦 𑀏𑀓𑀓𑀫𑁆𑀫𑀸𑀤𑀺. 𑀢𑀲𑁆𑀫𑀸 𑀅𑀮𑀚𑁆𑀚𑀻𑀳𑀺𑀧𑀺 𑀲𑀤𑁆𑀥𑀺𑀁 𑀉𑀧𑁄𑀲𑀣𑀸𑀤𑀺𑀓𑀁 𑀓𑀫𑁆𑀫𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺, 𑀆𑀧𑀢𑁆𑀢𑀺 𑀦𑀢𑁆𑀣𑀻’’𑀢𑀺 𑀯𑀤𑀦𑁆𑀢𑀺, 𑀢𑀁 𑀦 𑀬𑀼𑀢𑁆𑀢𑀁, 𑀏𑀓𑀓𑀫𑁆𑀫𑀸𑀤𑀻𑀲𑀼 𑀩𑀳𑀽𑀲𑀼 𑀥𑀫𑁆𑀫𑀧𑀭𑀺𑀪𑁄𑀕𑁂𑀲𑀼 𑀅𑀮𑀚𑁆𑀚𑀺𑀦𑀸𑀧𑀺 𑀲𑀤𑁆𑀥𑀺𑀁 𑀓𑀢𑁆𑀢𑀩𑁆𑀩𑀸𑀯𑀢𑁆𑀣𑀸𑀬𑀼𑀢𑁆𑀢𑀁 𑀥𑀫𑁆𑀫𑀧𑀭𑀺𑀪𑁄𑀕𑀁 𑀤𑀲𑁆𑀲𑁂𑀢𑀼𑀁 𑀇𑀥 𑀦𑀺𑀤𑀲𑁆𑀲𑀦𑀯𑀲𑁂𑀦 𑀕𑀦𑁆𑀣𑀲𑁆𑀲𑁂𑀯 𑀲𑀫𑀼𑀤𑁆𑀥𑀝𑀢𑁆𑀢𑀸. 𑀦 𑀳𑀺 𑀏𑀓𑀓𑀫𑁆𑀫𑀸𑀤𑀺𑀓𑁄 𑀯𑀺𑀥𑀺 𑀥𑀫𑁆𑀫𑀧𑀭𑀺𑀪𑁄𑀕𑁄 𑀦 𑀳𑁄𑀢𑀻𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀁 𑀅𑀦𑀸𑀫𑀺𑀲𑀢𑁆𑀢𑀸 𑀥𑀫𑁆𑀫𑀸𑀫𑀺𑀲𑁂𑀲𑀼 𑀅𑀧𑀭𑀺𑀬𑀸𑀧𑀦𑁆𑀦𑀲𑁆𑀲 𑀓𑀲𑁆𑀲𑀘𑀺 𑀅𑀪𑀸𑀯𑀸. 𑀢𑁂𑀦𑁂𑀯 𑀅𑀝𑁆𑀞𑀲𑀸𑀮𑀺𑀦𑀺𑀬𑀁 𑀥𑀫𑁆𑀫𑀧𑀝𑀺𑀲𑀦𑁆𑀥𑀸𑀭𑀓𑀣𑀸𑀬𑀁 (𑀥. 𑀲. 𑀅𑀝𑁆𑀞. 𑁧𑁩𑁫𑁧)‘‘𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑁂𑀢𑀩𑁆𑀩𑀁, 𑀥𑀫𑁆𑀫𑁄 𑀯𑀸𑀘𑁂𑀢𑀩𑁆𑀩𑁄…𑀧𑁂… 𑀅𑀩𑁆𑀪𑀸𑀦𑀯𑀼𑀝𑁆𑀞𑀸𑀦𑀫𑀸𑀦𑀢𑁆𑀢𑀧𑀭𑀺𑀯𑀸𑀲𑀸 𑀤𑀸𑀢𑀩𑁆𑀩𑀸, 𑀧𑀩𑁆𑀩𑀚𑁆𑀚𑀸𑀭𑀳𑁄 𑀧𑀩𑁆𑀩𑀸𑀚𑁂𑀢𑀩𑁆𑀩𑁄, 𑀉𑀧𑀲𑀫𑁆𑀧𑀤𑀸𑀭𑀳𑁄 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄…𑀧𑁂… 𑀅𑀬𑀁 𑀥𑀫𑁆𑀫𑀧𑀝𑀺𑀲𑀦𑁆𑀥𑀸𑀭𑁄 𑀦𑀸𑀫𑀸’’𑀢𑀺 𑀏𑀯𑀁 𑀲𑀗𑁆𑀖𑀓𑀫𑁆𑀫𑀸𑀤𑀺𑀧𑀺 𑀥𑀫𑁆𑀫𑀓𑁄𑀝𑁆𑀞𑀸𑀲𑁂 𑀤𑀲𑁆𑀲𑀺𑀢𑀁. 𑀢𑁂𑀲𑀼 𑀧𑀦 𑀥𑀫𑁆𑀫𑀓𑁄𑀝𑁆𑀞𑀸𑀲𑁂𑀲𑀼 𑀬𑀁 𑀕𑀡𑀧𑀽𑀭𑀡𑀸𑀤𑀺𑀯𑀲𑁂𑀦 𑀅𑀮𑀚𑁆𑀚𑀺𑀦𑁄 𑀅𑀧𑁂𑀓𑁆𑀔𑀺𑀢𑁆𑀯𑀸 𑀉𑀧𑁄𑀲𑀣𑀸𑀤𑀺 𑀯𑀸 𑀢𑁂𑀲𑀁 𑀲𑀦𑁆𑀢𑀺𑀓𑀸 𑀥𑀫𑁆𑀫𑀼𑀕𑁆𑀕𑀳𑀡𑀦𑀺𑀲𑁆𑀲𑀬𑀕𑁆𑀕𑀳𑀡𑀸𑀤𑀺 𑀯𑀸 𑀓𑀭𑀻𑀬𑀢𑀺, 𑀢𑀁 𑀥𑀫𑁆𑀫𑁄 𑀘𑁂𑀯 𑀧𑀭𑀺𑀪𑁄𑀕𑁄 𑀘𑀸𑀢𑀺 𑀥𑀫𑁆𑀫𑀧𑀭𑀺𑀪𑁄𑀕𑁄𑀢𑀺 𑀯𑀼𑀘𑁆𑀘𑀢𑀺, 𑀏𑀢𑀁 𑀢𑀣𑀸𑀭𑀽𑀧𑀧𑀘𑁆𑀘𑀬𑀁 𑀯𑀺𑀦𑀸 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀺, 𑀓𑀭𑁄𑀦𑁆𑀢𑀲𑁆𑀲 𑀅𑀮𑀚𑁆𑀚𑀺𑀧𑀭𑀺𑀪𑁄𑀕𑁄 𑀘 𑀳𑁄𑀢𑀺 𑀤𑀼𑀓𑁆𑀓𑀝𑀜𑁆𑀘. 𑀬𑀁 𑀧𑀦 𑀅𑀮𑀚𑁆𑀚𑀺𑀲𑀢𑀁 𑀅𑀦𑀧𑁂𑀓𑁆𑀔𑀺𑀢𑁆𑀯𑀸 𑀢𑀚𑁆𑀚𑀦𑀻𑀬𑀸𑀤𑀺𑀦𑀺𑀕𑁆𑀕𑀳𑀓𑀫𑁆𑀫𑀁 𑀯𑀸 𑀧𑀭𑀺𑀯𑀸𑀲𑀸𑀤𑀺𑀉𑀧𑀓𑀸𑀭𑀓𑀫𑁆𑀫𑀁 𑀯𑀸 𑀉𑀕𑁆𑀕𑀳𑀧𑀭𑀺𑀧𑀼𑀘𑁆𑀙𑀸𑀤𑀸𑀦𑀸𑀤𑀺 𑀯𑀸 𑀓𑀭𑀻𑀬𑀢𑀺, 𑀢𑀁 𑀥𑀫𑁆𑀫𑁄 𑀏𑀯, 𑀦𑁄 𑀧𑀭𑀺𑀪𑁄𑀕𑁄. 𑀏𑀢𑀁 𑀅𑀦𑀼𑀭𑀽𑀧𑀸𑀦𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺, 𑀆𑀫𑀺𑀲𑀤𑀸𑀦𑀁 𑀯𑀺𑀬 𑀆𑀧𑀢𑁆𑀢𑀺 𑀦𑀢𑁆𑀣𑀺. 𑀦𑀺𑀲𑁆𑀲𑀬𑀤𑀸𑀦𑀫𑁆𑀧𑀺 𑀢𑁂𑀭𑀲𑀲𑀫𑁆𑀫𑀼𑀢𑀺𑀤𑀸𑀦𑀸𑀤𑀺 𑀘 𑀯𑀢𑁆𑀢𑀧𑀝𑀺𑀯𑀢𑁆𑀢𑀲𑀸𑀤𑀺𑀬𑀦𑀸𑀤𑀺𑀧𑀭𑀺𑀪𑁄𑀕𑀲𑁆𑀲𑀸𑀧𑀺 𑀳𑁂𑀢𑀼𑀢𑁆𑀢𑀸 𑀦 𑀯𑀝𑁆𑀝𑀢𑀺.

𑀬𑁄 𑀧𑀦 𑀫𑀳𑀸𑀅𑀮𑀚𑁆𑀚𑀻 𑀉𑀤𑁆𑀥𑀫𑁆𑀫𑀁 𑀉𑀩𑁆𑀩𑀺𑀦𑀬𑀁 𑀲𑀢𑁆𑀣𑀼 𑀲𑀸𑀲𑀦𑀁 𑀓𑀭𑁄𑀢𑀺, 𑀢𑀲𑁆𑀲 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸𑀤𑀻𑀦𑀁 𑀉𑀧𑀲𑀫𑁆𑀧𑀤𑀸𑀤𑀺𑀉𑀧𑀓𑀸𑀭𑀓𑀫𑁆𑀫𑀫𑁆𑀧𑀺 𑀉𑀕𑁆𑀕𑀳𑀧𑀭𑀺𑀧𑀼𑀘𑁆𑀙𑀸𑀤𑀸𑀦𑀸𑀤𑀺 𑀘 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀺, 𑀆𑀧𑀢𑁆𑀢𑀺 𑀏𑀯 𑀳𑁄𑀢𑀺, 𑀦𑀺𑀕𑁆𑀕𑀳𑀓𑀫𑁆𑀫𑀫𑁂𑀯 𑀓𑀸𑀢𑀩𑁆𑀩𑀁. 𑀢𑁂𑀦𑁂𑀯 𑀅𑀮𑀚𑁆𑀚𑀺𑀧𑀕𑁆𑀕𑀳𑁄𑀧𑀺 𑀧𑀝𑀺𑀓𑁆𑀔𑀺𑀢𑁆𑀢𑁄. 𑀥𑀫𑁆𑀫𑀸𑀫𑀺𑀲𑀧𑀭𑀺𑀪𑁄𑀕𑀯𑀺𑀯𑀚𑁆𑀚𑀦𑁂𑀦𑀸𑀧𑀺 𑀳𑀺 𑀤𑀼𑀫𑁆𑀫𑀗𑁆𑀓𑀽𑀦𑀁 𑀧𑀼𑀕𑁆𑀕𑀮𑀸𑀦𑀁 𑀦𑀺𑀕𑁆𑀕𑀳𑁄 𑀅𑀥𑀺𑀧𑁆𑀧𑁂𑀢𑁄, 𑀲𑁄 𑀘 𑀧𑁂𑀲𑀮𑀸𑀦𑀁 𑀨𑀸𑀲𑀼𑀯𑀺𑀳𑀸𑀭𑀲𑀤𑁆𑀥𑀫𑁆𑀫𑀝𑁆𑀞𑀺𑀢𑀺𑀯𑀺𑀦𑀬𑀸𑀦𑀼𑀕𑁆𑀕𑀳𑀸𑀤𑀺𑀅𑀢𑁆𑀣𑀸𑀬 𑀏𑀢𑀤𑀢𑁆𑀣𑀢𑁆𑀢𑀸 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀬𑀸. 𑀢𑀲𑁆𑀫𑀸 𑀬𑀁 𑀬𑀁 𑀤𑀼𑀫𑁆𑀫𑀗𑁆𑀓𑀽𑀦𑀁 𑀉𑀧𑀢𑁆𑀣𑀫𑁆𑀪𑀸𑀬 𑀧𑁂𑀲𑀮𑀸𑀦𑀁 𑀅𑀨𑀸𑀲𑀼𑀯𑀺𑀳𑀸𑀭𑀸𑀬 𑀲𑀤𑁆𑀥𑀫𑁆𑀫𑀧𑀭𑀺𑀳𑀸𑀦𑀸𑀤𑀺𑀅𑀢𑁆𑀣𑀸𑀬 𑀳𑁄𑀢𑀺, 𑀢𑀁 𑀲𑀩𑁆𑀩𑀫𑁆𑀧𑀺 𑀧𑀭𑀺𑀪𑁄𑀕𑁄 𑀯𑀸 𑀳𑁄𑀢𑀼 𑀅𑀧𑀭𑀺𑀪𑁄𑀕𑁄 𑀯𑀸 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀺, 𑀏𑀯𑀁 𑀓𑀭𑁄𑀦𑁆𑀢𑀸 𑀲𑀸𑀲𑀦𑀁 𑀅𑀦𑁆𑀢𑀭𑀥𑀸𑀧𑁂𑀦𑁆𑀢𑀺, 𑀆𑀧𑀢𑁆𑀢𑀺𑀜𑁆𑀘 𑀆𑀧𑀚𑁆𑀚𑀦𑁆𑀢𑀺. 𑀥𑀫𑁆𑀫𑀸𑀫𑀺𑀲𑀧𑀭𑀺𑀪𑁄𑀕𑁂𑀲𑀼 𑀘𑁂𑀢𑁆𑀣 𑀅𑀮𑀚𑁆𑀚𑀻𑀳𑀺 𑀏𑀓𑀓𑀫𑁆𑀫𑀸𑀤𑀺𑀥𑀫𑁆𑀫𑀧𑀭𑀺𑀪𑁄𑀕𑁄 𑀏𑀯 𑀧𑁂𑀲𑀮𑀸𑀦𑀁 𑀅𑀨𑀸𑀲𑀼𑀯𑀺𑀳𑀸𑀭𑀲𑀤𑁆𑀥𑀫𑁆𑀫𑀧𑀭𑀺𑀳𑀸𑀦𑀸𑀤𑀺𑀅𑀢𑁆𑀣𑀸𑀬 𑀳𑁄𑀢𑀺, 𑀦 𑀢𑀣𑀸 𑀆𑀫𑀺𑀲𑀧𑀭𑀺𑀪𑁄𑀕𑁄. 𑀦 𑀳𑀺 𑀅𑀮𑀚𑁆𑀚𑀻𑀦𑀁 𑀧𑀘𑁆𑀘𑀬𑀧𑀭𑀺𑀪𑁄𑀕𑀫𑀢𑁆𑀢𑁂𑀦 𑀧𑁂𑀲𑀮𑀸𑀦𑀁 𑀅𑀨𑀸𑀲𑀼𑀯𑀺𑀳𑀸𑀭𑀸𑀤𑀺 𑀳𑁄𑀢𑀺, 𑀬𑀣𑀸𑀯𑀼𑀢𑁆𑀢𑀥𑀫𑁆𑀫𑀧𑀭𑀺𑀪𑁄𑀕𑁂𑀦 𑀧𑀦 𑀳𑁄𑀢𑀺, 𑀢𑀧𑁆𑀧𑀭𑀺𑀯𑀚𑁆𑀚𑀦𑁂𑀦 𑀘 𑀨𑀸𑀲𑀼𑀯𑀺𑀳𑀸𑀭𑀸𑀤𑀬𑁄. 𑀢𑀣𑀸 𑀳𑀺 𑀓𑀢𑀲𑀺𑀓𑁆𑀔𑀸𑀧𑀤𑀯𑀻𑀢𑀺𑀓𑁆𑀓𑀫𑀸 𑀅𑀮𑀚𑁆𑀚𑀺𑀧𑀼𑀕𑁆𑀕𑀮𑀸 𑀉𑀧𑁄𑀲𑀣𑀸𑀤𑀻𑀲𑀼 𑀧𑀯𑀺𑀝𑁆𑀞𑀸 ‘‘𑀢𑀼𑀫𑁆𑀳𑁂 𑀓𑀸𑀬𑀤𑁆𑀯𑀸𑀭𑁂, 𑀯𑀘𑀻𑀤𑁆𑀯𑀸𑀭𑁂 𑀘 𑀯𑀻𑀢𑀺𑀓𑁆𑀓𑀫𑀁 𑀓𑀭𑁄𑀣𑀸’’𑀢𑀺𑀆𑀤𑀺𑀦𑀸 𑀪𑀺𑀓𑁆𑀔𑀽𑀳𑀺 𑀯𑀢𑁆𑀢𑀩𑁆𑀩𑀸 𑀳𑁄𑀦𑁆𑀢𑀺, 𑀬𑀣𑀸 𑀯𑀺𑀦𑀬𑀜𑁆𑀘 𑀅𑀢𑀺𑀝𑁆𑀞𑀦𑁆𑀢𑀸 𑀲𑀗𑁆𑀖𑀢𑁄 𑀩𑀳𑀺𑀓𑀭𑀡𑀸𑀤𑀺𑀯𑀲𑁂𑀦 𑀲𑀼𑀝𑁆𑀞𑀼 𑀦𑀺𑀕𑁆𑀕𑀳𑁂𑀢𑀩𑁆𑀩𑀸, 𑀢𑀣𑀸 𑀅𑀓𑀢𑁆𑀯𑀸 𑀢𑁂𑀳𑀺 𑀲𑀳 𑀲𑀁𑀯𑀲𑀦𑁆𑀢𑀸𑀧𑀺 𑀅𑀮𑀚𑁆𑀚𑀺𑀦𑁄𑀯 𑀳𑁄𑀦𑁆𑀢𑀺 ‘‘𑀏𑀓𑁄𑀧𑀺 𑀅𑀮𑀚𑁆𑀚𑀻 𑀅𑀮𑀚𑁆𑀚𑀺𑀲𑀢𑀫𑁆𑀧𑀺 𑀓𑀭𑁄𑀢𑀻’’𑀢𑀺𑀆𑀤𑀺𑀯𑀘𑀦𑀢𑁄 (𑀧𑀸𑀭𑀸. 𑀅𑀝𑁆𑀞. 𑁨.𑁫𑁮𑁫). 𑀬𑀤𑀺 𑀳𑀺 𑀢𑁂 𑀏𑀯𑀁 𑀦 𑀦𑀺𑀕𑁆𑀕𑀳𑀺𑀢𑀸 𑀲𑀺𑀬𑀼𑀁, 𑀲𑀗𑁆𑀖𑁂 𑀓𑀮𑀳𑀸𑀤𑀺𑀁 𑀯𑀟𑁆𑀠𑁂𑀢𑁆𑀯𑀸 𑀉𑀧𑁄𑀲𑀣𑀸𑀤𑀺𑀲𑀸𑀫𑀕𑁆𑀕𑀻𑀓𑀫𑁆𑀫𑀧𑀝𑀺𑀩𑀸𑀳𑀦𑀸𑀤𑀺𑀦𑀸 𑀧𑁂𑀲𑀮𑀸𑀦𑀁 𑀅𑀨𑀸𑀲𑀼𑀁 𑀓𑀢𑁆𑀯𑀸 𑀓𑀫𑁂𑀦 𑀢𑁂 𑀤𑁂𑀯𑀤𑀢𑁆𑀢𑀯𑀚𑁆𑀚𑀺𑀧𑀼𑀢𑁆𑀢𑀓𑀸𑀤𑀬𑁄 𑀯𑀺𑀬 𑀧𑀭𑀺𑀲𑀁 𑀯𑀟𑁆𑀠𑁂𑀢𑁆𑀯𑀸 𑀅𑀢𑁆𑀢𑀦𑁄 𑀯𑀺𑀧𑁆𑀧𑀝𑀺𑀧𑀢𑁆𑀢𑀺𑀁 𑀥𑀫𑁆𑀫𑀢𑁄 𑀯𑀺𑀦𑀬𑀢𑁄 𑀤𑀻𑀧𑁂𑀦𑁆𑀢𑀸 𑀲𑀗𑁆𑀖𑀪𑁂𑀤𑀸𑀤𑀺𑀫𑁆𑀧𑀺 𑀓𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀲𑀸𑀲𑀦𑀁 𑀅𑀦𑁆𑀢𑀭𑀥𑀸𑀧𑁂𑀬𑁆𑀬𑀼𑀁, 𑀢𑁂𑀲𑀼 𑀧𑀦 𑀲𑀗𑁆𑀖𑀢𑁄 𑀩𑀳𑀺𑀓𑀭𑀡𑀸𑀤𑀺𑀯𑀲𑁂𑀦 𑀦𑀺𑀕𑁆𑀕𑀳𑀺𑀢𑁂𑀲𑀼 𑀲𑀩𑁆𑀩𑁄𑀧𑀸𑀬𑀁 𑀉𑀧𑀤𑁆𑀤𑀯𑁄 𑀦 𑀳𑁄𑀢𑀺. 𑀯𑀼𑀢𑁆𑀢𑀜𑁆𑀳𑀺 𑁋

‘‘𑀤𑀼𑀲𑁆𑀲𑀻𑀮𑀧𑀼𑀕𑁆𑀕𑀮𑁂 𑀦𑀺𑀲𑁆𑀲𑀸𑀬 𑀉𑀧𑁄𑀲𑀣𑁄 𑀦 𑀢𑀺𑀝𑁆𑀞𑀢𑀺, 𑀧𑀯𑀸𑀭𑀡𑀸 𑀦 𑀢𑀺𑀝𑁆𑀞𑀢𑀺, 𑀲𑀗𑁆𑀖𑀓𑀫𑁆𑀫𑀸𑀦𑀺 𑀦𑀧𑁆𑀧𑀯𑀢𑁆𑀢𑀦𑁆𑀢𑀺, 𑀲𑀸𑀫𑀕𑁆𑀕𑀻 𑀦 𑀳𑁄𑀢𑀺…𑀧𑁂… 𑀤𑀼𑀲𑁆𑀲𑀻𑀮𑁂𑀲𑀼 𑀧𑀦 𑀦𑀺𑀕𑁆𑀕𑀳𑀺𑀢𑁂𑀲𑀼 𑀲𑀩𑁆𑀩𑁄𑀧𑀺 𑀅𑀬𑀁 𑀉𑀧𑀤𑁆𑀤𑀯𑁄 𑀦 𑀳𑁄𑀢𑀺, 𑀢𑀢𑁄 𑀧𑁂𑀲𑀮𑀸 𑀪𑀺𑀓𑁆𑀔𑀽 𑀨𑀸𑀲𑀼 𑀯𑀺𑀳𑀭𑀦𑁆𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁧.𑁩𑁯).

𑀢𑀲𑁆𑀫𑀸 𑀏𑀓𑀓𑀫𑁆𑀫𑀸𑀤𑀺𑀥𑀫𑁆𑀫𑀧𑀭𑀺𑀪𑁄𑀕𑁄𑀯 𑀆𑀫𑀺𑀲𑀧𑀭𑀺𑀪𑁄𑀕𑀢𑁄𑀧𑀺 𑀅𑀢𑀺𑀯𑀺𑀬 𑀅𑀮𑀚𑁆𑀚𑀺𑀯𑀺𑀯𑁂𑀓𑁂𑀦 𑀓𑀸𑀢𑀩𑁆𑀩𑁄, 𑀆𑀧𑀢𑁆𑀢𑀺𑀓𑀭𑁄 𑀘 𑀲𑀤𑁆𑀥𑀫𑁆𑀫𑀧𑀭𑀺𑀳𑀸𑀦𑀺𑀳𑁂𑀢𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀅𑀧𑀺𑀘 𑀉𑀧𑁄𑀲𑀣𑁄 𑀦 𑀢𑀺𑀝𑁆𑀞𑀢𑀺, 𑀧𑀯𑀸𑀭𑀡𑀸 𑀦 𑀢𑀺𑀝𑁆𑀞𑀢𑀺, 𑀲𑀗𑁆𑀖𑀓𑀫𑁆𑀫𑀸𑀦𑀺 𑀦𑀧𑁆𑀧𑀯𑀢𑁆𑀢𑀦𑁆𑀢𑀻𑀢𑀺 𑀏𑀯𑀁 𑀅𑀮𑀚𑁆𑀚𑀻𑀳𑀺 𑀲𑀤𑁆𑀥𑀺𑀁 𑀲𑀗𑁆𑀖𑀓𑀫𑁆𑀫𑀸𑀓𑀭𑀡𑀲𑁆𑀲 𑀅𑀝𑁆𑀞𑀓𑀣𑀸𑀬𑀁 𑀧𑀓𑀸𑀲𑀺𑀢𑀢𑁆𑀢𑀸𑀧𑀺 𑀘𑁂𑀢𑀁 𑀲𑀺𑀚𑁆𑀛𑀢𑀺, 𑀢𑀣𑀸 𑀧𑀭𑀺𑀯𑀢𑁆𑀢𑀮𑀺𑀗𑁆𑀕𑀲𑁆𑀲 𑀪𑀺𑀓𑁆𑀔𑀼𑀦𑁄 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑀁 𑀕𑀘𑁆𑀙𑀦𑁆𑀢𑀲𑁆𑀲 𑀧𑀝𑀺𑀧𑀢𑁆𑀢𑀺𑀓𑀣𑀸𑀬𑀁 ‘‘𑀆𑀭𑀸𑀥𑀺𑀓𑀸 𑀘 𑀳𑁄𑀦𑁆𑀢𑀺 𑀲𑀗𑁆𑀕𑀸𑀳𑀺𑀓𑀸 𑀮𑀚𑁆𑀚𑀺𑀦𑀺𑀬𑁄, 𑀢𑀸 𑀓𑁄𑀧𑁂𑀢𑁆𑀯𑀸 𑀅𑀜𑁆𑀜𑀢𑁆𑀣 𑀦 𑀕𑀦𑁆𑀢𑀩𑁆𑀩𑀁. 𑀕𑀘𑁆𑀙𑀢𑀺 𑀘𑁂, 𑀕𑀸𑀫𑀦𑁆𑀢𑀭𑀦𑀤𑀻𑀧𑀸𑀭𑀭𑀢𑁆𑀢𑀺𑀯𑀺𑀧𑁆𑀧𑀯𑀸𑀲𑀕𑀡𑀑𑀳𑀻𑀬𑀦𑀸𑀧𑀢𑁆𑀢𑀻𑀳𑀺 𑀦 𑀫𑀼𑀘𑁆𑀘𑀢𑀺…𑀧𑁂… 𑀅𑀮𑀚𑁆𑀚𑀺𑀦𑀺𑀬𑁄 𑀳𑁄𑀦𑁆𑀢𑀺, 𑀲𑀗𑁆𑀕𑀳𑀁 𑀧𑀦 𑀓𑀭𑁄𑀦𑁆𑀢𑀺, 𑀢𑀸𑀧𑀺 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀅𑀜𑁆𑀜𑀢𑁆𑀣 𑀕𑀦𑁆𑀢𑀼𑀁 𑀮𑀩𑁆𑀪𑀢𑀻’’𑀢𑀺 𑀏𑀯𑀁 𑀅𑀮𑀚𑁆𑀚𑀺𑀦𑀻𑀲𑀼 𑀤𑀼𑀢𑀺𑀬𑀺𑀓𑀸𑀕𑀳𑀡𑀸𑀤𑀻𑀲𑀼 𑀲𑀁𑀯𑀸𑀲𑀸𑀧𑀢𑁆𑀢𑀺𑀧𑀭𑀺𑀳𑀸𑀭𑀸𑀬 𑀦𑀤𑀻𑀧𑀸𑀭𑀕𑀫𑀦𑀸𑀤𑀺𑀕𑀭𑀼𑀓𑀸𑀧𑀢𑁆𑀢𑀺𑀝𑁆𑀞𑀸𑀦𑀸𑀦𑀁 𑀅𑀦𑀼𑀜𑁆𑀜𑀸𑀢𑀢𑁆𑀢𑀸 𑀢𑀢𑁄𑀧𑀺 𑀅𑀮𑀚𑁆𑀚𑀺𑀲𑀁𑀯𑀸𑀲𑀸𑀧𑀢𑁆𑀢𑀺 𑀏𑀯 𑀲𑀤𑁆𑀥𑀫𑁆𑀫𑀧𑀭𑀺𑀳𑀸𑀦𑀺𑀳𑁂𑀢𑀼𑀢𑁄 𑀕𑀭𑀼𑀓𑀢𑀭𑀸𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀦 𑀳𑀺 𑀮𑀳𑀼𑀓𑀸𑀧𑀢𑁆𑀢𑀺𑀝𑁆𑀞𑀸𑀦𑀁, 𑀅𑀦𑀸𑀧𑀢𑁆𑀢𑀺𑀝𑁆𑀞𑀸𑀦𑀁 𑀯𑀸 𑀧𑀭𑀺𑀳𑀭𑀺𑀢𑀼𑀁 𑀕𑀭𑀼𑀓𑀸𑀧𑀢𑁆𑀢𑀺𑀝𑁆𑀞𑀸𑀦𑀯𑀻𑀢𑀺𑀓𑁆𑀓𑀫𑀁 𑀆𑀘𑀭𑀺𑀬𑀸 𑀅𑀦𑀼𑀚𑀸𑀦𑀦𑁆𑀢𑀺, 𑀢𑀣𑀸 𑀅𑀲𑀁𑀯𑀸𑀲𑀧𑀤𑀲𑁆𑀲 𑀅𑀝𑁆𑀞𑀓𑀣𑀸𑀬𑀁 ‘‘𑀲𑀩𑁆𑀩𑁂𑀳𑀺𑀧𑀺 𑀮𑀚𑁆𑀚𑀺𑀧𑀼𑀕𑁆𑀕𑀮𑁂𑀳𑀺 𑀲𑀫𑀁 𑀲𑀺𑀓𑁆𑀔𑀺𑀢𑀩𑁆𑀩𑀪𑀸𑀯𑀢𑁄 𑀲𑀫𑀲𑀺𑀓𑁆𑀔𑀸𑀢𑀸 𑀦𑀸𑀫. 𑀏𑀢𑁆𑀣 𑀬𑀲𑁆𑀫𑀸 𑀲𑀩𑁆𑀩𑁂𑀧𑀺 𑀮𑀚𑁆𑀚𑀺𑀦𑁄 𑀏𑀢𑁂𑀲𑀼 𑀓𑀫𑁆𑀫𑀸𑀤𑀻𑀲𑀼 𑀲𑀳 𑀯𑀲𑀦𑁆𑀢𑀺, 𑀦 𑀏𑀓𑁄𑀧𑀺 𑀢𑀢𑁄 𑀩𑀳𑀺𑀤𑁆𑀥𑀸 𑀲𑀦𑁆𑀤𑀺𑀲𑁆𑀲𑀢𑀺, 𑀢𑀲𑁆𑀫𑀸 𑀢𑀸𑀦𑀺 𑀲𑀩𑁆𑀩𑀸𑀦𑀺𑀧𑀺 𑀕𑀳𑁂𑀢𑁆𑀯𑀸 𑀏𑀲𑁄 𑀲𑀁𑀯𑀸𑀲𑁄 𑀦𑀸𑀫𑀸’’𑀢𑀺 𑀏𑀯𑀁 𑀮𑀚𑁆𑀚𑀻𑀳𑁂𑀯 𑀏𑀓𑀓𑀫𑁆𑀫𑀸𑀤𑀺𑀲𑀁𑀯𑀸𑀲𑁄 𑀯𑀝𑁆𑀝𑀢𑀻𑀢𑀺 𑀧𑀓𑀸𑀲𑀺𑀢𑁄.

𑀬𑀤𑀺 𑀏𑀯𑀁, 𑀓𑀲𑁆𑀫𑀸 𑀅𑀲𑀁𑀯𑀸𑀲𑀺𑀓𑁂𑀲𑀼 𑀅𑀮𑀚𑁆𑀚𑀻 𑀦 𑀕𑀡𑀺𑀢𑁄𑀢𑀺? 𑀦𑀸𑀬𑀁 𑀯𑀺𑀭𑁄𑀥𑁄, 𑀬𑁂 𑀕𑀡𑀧𑀽𑀭𑀓𑁂 𑀓𑀢𑁆𑀯𑀸 𑀓𑀢𑀁 𑀓𑀫𑁆𑀫𑀁 𑀓𑀼𑀧𑁆𑀧𑀢𑀺, 𑀢𑁂𑀲𑀁 𑀧𑀸𑀭𑀸𑀚𑀺𑀓𑀸𑀤𑀺𑀅𑀧𑀓𑀢𑀢𑁆𑀢𑀸𑀦𑀜𑁆𑀜𑁂𑀯 𑀅𑀲𑀁𑀯𑀸𑀲𑀺𑀓𑀢𑁆𑀢𑁂 𑀕𑀳𑀺𑀢𑀢𑁆𑀢𑀸. 𑀅𑀮𑀚𑁆𑀚𑀺𑀦𑁄 𑀧𑀦 𑀧𑀓𑀢𑀢𑁆𑀢𑀪𑀽𑀢𑀸𑀧𑀺 𑀲𑀦𑁆𑀢𑀺, 𑀢𑁂 𑀘𑁂 𑀕𑀡𑀧𑀽𑀭𑀡𑀸 𑀳𑀼𑀢𑁆𑀯𑀸 𑀓𑀫𑁆𑀫𑀁 𑀲𑀸𑀥𑁂𑀦𑁆𑀢𑀺, 𑀓𑁂𑀯𑀮𑀁 𑀓𑀢𑁆𑀯𑀸 𑀅𑀕𑀢𑀺𑀕𑀫𑀦𑁂𑀦 𑀓𑀭𑁄𑀦𑁆𑀢𑀸𑀦𑀁 𑀆𑀧𑀢𑁆𑀢𑀺𑀓𑀭𑀸 𑀳𑁄𑀦𑁆𑀢𑀺 𑀲𑀪𑀸𑀕𑀸𑀧𑀢𑁆𑀢𑀺𑀆𑀧𑀦𑁆𑀦𑀸 𑀯𑀺𑀬 𑀅𑀜𑁆𑀜𑀫𑀜𑁆𑀜𑀁. 𑀬𑀲𑁆𑀫𑀸 𑀅𑀮𑀚𑁆𑀚𑀺𑀢𑀜𑁆𑀘 𑀮𑀚𑁆𑀚𑀺𑀢𑀜𑁆𑀘 𑀧𑀼𑀣𑀼𑀚𑁆𑀚𑀦𑀸𑀦𑀁 𑀘𑀺𑀢𑁆𑀢𑀓𑁆𑀔𑀡𑀧𑀝𑀺𑀩𑀤𑁆𑀥𑀁, 𑀦 𑀲𑀩𑁆𑀩𑀓𑀸𑀮𑀺𑀓𑀁. 𑀲𑀜𑁆𑀘𑀺𑀘𑁆𑀘 𑀳𑀺 𑀯𑀻𑀢𑀺𑀓𑁆𑀓𑀫𑀘𑀺𑀢𑁆𑀢𑁂 𑀉𑀧𑁆𑀧𑀦𑁆𑀦𑁂 𑀅𑀮𑀚𑁆𑀚𑀺𑀦𑁄 ‘‘𑀦 𑀧𑀼𑀦 𑀈𑀤𑀺𑀲𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀢𑁆𑀢𑁂𑀦 𑀮𑀚𑁆𑀚𑀺𑀦𑁄 𑀘 𑀳𑁄𑀦𑁆𑀢𑀺, 𑀢𑁂𑀲𑀼 𑀘 𑀬𑁂 𑀧𑁂𑀲𑀮𑁂𑀳𑀺 𑀑𑀯𑀤𑀺𑀬𑀫𑀸𑀦𑀸𑀧𑀺 𑀦 𑀑𑀭𑀫𑀦𑁆𑀢𑀺, 𑀧𑀼𑀦𑀧𑁆𑀧𑀼𑀦𑀁 𑀯𑀻𑀢𑀺𑀓𑁆𑀓𑀫𑀦𑁆𑀢𑀺, 𑀢𑁂 𑀏𑀯 𑀅𑀲𑀁𑀯𑀲𑀺𑀢𑀩𑁆𑀩𑀸, 𑀦 𑀇𑀢𑀭𑁂 𑀮𑀚𑁆𑀚𑀺𑀥𑀫𑁆𑀫𑁂 𑀑𑀓𑁆𑀓𑀦𑁆𑀢𑀢𑁆𑀢𑀸. 𑀢𑀲𑁆𑀫𑀸𑀧𑀺 𑀅𑀮𑀚𑁆𑀚𑀺𑀦𑁄 𑀅𑀲𑀁𑀯𑀸𑀲𑀺𑀓𑁂𑀲𑀼 𑀅𑀕𑀡𑁂𑀢𑁆𑀯𑀸 𑀢𑀧𑁆𑀧𑀭𑀺𑀯𑀚𑁆𑀚𑀦𑀢𑁆𑀣𑀁 𑀲𑁄𑀥𑁂𑀢𑁆𑀯𑀸𑀯 𑀉𑀧𑁄𑀲𑀣𑀸𑀤𑀺𑀓𑀭𑀡𑀁 𑀅𑀦𑀼𑀜𑁆𑀜𑀸𑀢𑀁. 𑀢𑀣𑀸 𑀳𑀺 ‘‘𑀧𑀸𑀭𑀺𑀲𑀼𑀤𑁆𑀥𑀺𑀁 𑀆𑀬𑀲𑁆𑀫𑀦𑁆𑀢𑁄 𑀆𑀭𑁄𑀘𑁂𑀣, 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀲𑁆𑀲𑀸𑀫𑀻’’𑀢𑀺𑀆𑀤𑀺𑀦𑀸 (𑀫𑀳𑀸𑀯. 𑁧𑁩𑁪) 𑀅𑀧𑀭𑀺𑀲𑀼𑀤𑁆𑀥𑀸𑀬 𑀧𑀭𑀺𑀲𑀸𑀬 𑀉𑀧𑁄𑀲𑀣𑀓𑀭𑀡𑀲𑁆𑀲 𑀅𑀬𑀼𑀢𑁆𑀢𑀢𑀸 𑀧𑀓𑀸𑀲𑀺𑀢𑀸, ‘‘𑀬𑀲𑁆𑀲 𑀲𑀺𑀬𑀸 𑀆𑀧𑀢𑁆𑀢𑀺 𑀲𑁄 𑀆𑀯𑀺𑀓𑀭𑁂𑀬𑁆𑀬…𑀧𑁂… 𑀨𑀸𑀲𑀼 𑀳𑁄𑀢𑀻’’𑀢𑀺 (𑀫𑀳𑀸𑀯. 𑁧𑁩𑁪) 𑀏𑀯𑀁 𑀅𑀮𑀚𑁆𑀚𑀺𑀫𑁆𑀧𑀺 𑀮𑀚𑁆𑀚𑀺𑀥𑀫𑁆𑀫𑁂 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀉𑀧𑁄𑀲𑀣𑀓𑀭𑀡𑀧𑁆𑀧𑀓𑀸𑀭𑁄 𑀘 𑀯𑀼𑀢𑁆𑀢𑁄, ‘‘𑀓𑀘𑁆𑀘𑀺𑀢𑁆𑀣 𑀧𑀭𑀺𑀲𑀼𑀤𑁆𑀥𑀸…𑀧𑁂… 𑀧𑀭𑀺𑀲𑀼𑀤𑁆𑀥𑁂𑀢𑁆𑀣𑀸𑀬𑀲𑁆𑀫𑀦𑁆𑀢𑁄’’𑀢𑀺 (𑀧𑀸𑀭𑀸. 𑁪𑁪𑁨, 𑁪𑁫𑁮, 𑁬𑁬𑁨; 𑀧𑀸𑀘𑀺. 𑁫𑁫𑁧, 𑁫𑁭𑁫, 𑁬𑁫𑁫) 𑀘 𑀧𑀸𑀭𑀺𑀲𑀼𑀤𑁆𑀥𑀺𑀉𑀧𑁄𑀲𑀣𑁂 ‘‘𑀧𑀭𑀺𑀲𑀼𑀤𑁆𑀥𑁄 𑀅𑀳𑀁 𑀪𑀦𑁆𑀢𑁂, 𑀧𑀭𑀺𑀲𑀼𑀤𑁆𑀥𑁄𑀢𑀺 𑀫𑀁 𑀥𑀸𑀭𑁂𑀣𑀸’’𑀢𑀺 (𑀫𑀳𑀸𑀯. 𑁧𑁬𑁮) 𑀘 𑀏𑀯𑀁 𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑀸𑀦𑀁 𑀧𑀭𑀺𑀲𑀼𑀤𑁆𑀥𑀢𑀸 𑀘 𑀧𑀓𑀸𑀲𑀺𑀢𑀸, 𑀯𑀘𑀦𑀫𑀢𑁆𑀢𑁂𑀦 𑀅𑀦𑁄𑀭𑀫𑀦𑁆𑀢𑀸𑀦𑀜𑁆𑀘 𑀉𑀧𑁄𑀲𑀣𑀧𑀯𑀆𑀭𑀡𑀝𑁆𑀞𑀧𑀦𑀯𑀺𑀥𑀺 𑀘 𑀯𑀼𑀢𑁆𑀢𑀸, 𑀲𑀩𑁆𑀩𑀣𑀸 𑀮𑀚𑁆𑀚𑀺𑀥𑀫𑁆𑀫𑀁 𑀅𑀦𑁄𑀓𑁆𑀓𑀫𑀦𑁆𑀢𑁂𑀳𑀺 𑀲𑀁𑀯𑀸𑀲𑀲𑁆𑀲 𑀅𑀬𑀼𑀢𑁆𑀢𑀢𑀸𑀬 𑀦𑀺𑀲𑁆𑀲𑀬𑀤𑀸𑀦𑀕𑁆𑀕𑀳𑀡𑀧𑀝𑀺𑀓𑁆𑀔𑁂𑀧𑁄, 𑀢𑀚𑁆𑀚𑀦𑀻𑀬𑀸𑀤𑀺𑀦𑀺𑀕𑁆𑀕𑀳𑀓𑀫𑁆𑀫𑀓𑀭𑀡𑀜𑁆𑀘 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀓𑀭𑀡𑁂𑀦 𑀲𑀸𑀦𑀼𑀯𑀢𑁆𑀢𑀓𑀧𑀭𑀺𑀲𑀲𑁆𑀲 𑀅𑀮𑀚𑁆𑀚𑀺𑀲𑁆𑀲 𑀅𑀲𑀁𑀯𑀸𑀲𑀺𑀓𑀢𑁆𑀢𑀧𑀸𑀧𑀦𑀯𑀺𑀥𑀺 𑀘 𑀯𑀼𑀢𑁆𑀢𑀸. 𑀢𑀲𑁆𑀫𑀸 𑀬𑀣𑀸𑀯𑀼𑀢𑁆𑀢𑁂𑀳𑀺 𑀲𑀼𑀢𑁆𑀢𑀦𑀬𑁂𑀳𑀺, 𑀅𑀝𑁆𑀞𑀓𑀣𑀸𑀯𑀘𑀦𑁂𑀳𑀺 𑀘 𑀧𑀓𑀢𑀢𑁆𑀢𑁂𑀳𑀺𑀧𑀺 𑀅𑀧𑀓𑀢𑀢𑁆𑀢𑁂𑀳𑀺𑀧𑀺 𑀲𑀩𑁆𑀩𑁂𑀳𑀺 𑀅𑀮𑀚𑁆𑀚𑀻𑀳𑀺 𑀏𑀓𑀓𑀫𑁆𑀫𑀸𑀤𑀺𑀲𑀁𑀯𑀸𑀲𑁄 𑀦 𑀯𑀝𑁆𑀝𑀢𑀺, 𑀓𑀭𑁄𑀦𑁆𑀢𑀸𑀦𑀁 𑀆𑀧𑀢𑁆𑀢𑀺 𑀏𑀯 𑀤𑀼𑀫𑁆𑀫𑀗𑁆𑀓𑀽𑀦𑀁 𑀧𑀼𑀕𑁆𑀕𑀮𑀸𑀦𑀁 𑀦𑀺𑀕𑁆𑀕𑀳𑀢𑁆𑀣𑀸𑀬𑁂𑀯 𑀲𑀩𑁆𑀩𑀲𑀺𑀓𑁆𑀔𑀸𑀧𑀤𑀸𑀦𑀁 𑀧𑀜𑁆𑀜𑀢𑁆𑀢𑀢𑁆𑀢𑀸𑀢𑀺 𑀦𑀺𑀝𑁆𑀞𑀫𑁂𑀢𑁆𑀣 𑀕𑀦𑁆𑀢𑀩𑁆𑀩𑀁. 𑀢𑁂𑀦𑁂𑀯 𑀤𑀼𑀢𑀺𑀬𑀲𑀗𑁆𑀕𑀻𑀢𑀺𑀬𑀁 𑀧𑀓𑀢𑀢𑁆𑀢𑀸𑀧𑀺 𑀅𑀮𑀚𑁆𑀚𑀺𑀦𑁄 𑀯𑀚𑁆𑀚𑀺𑀧𑀼𑀢𑁆𑀢𑀓𑀸 𑀬𑀲𑀢𑁆𑀣𑁂𑀭𑀸𑀤𑀻𑀳𑀺 𑀫𑀳𑀦𑁆𑀢𑁂𑀦 𑀯𑀸𑀬𑀸𑀫𑁂𑀦 𑀲𑀗𑁆𑀖𑀢𑁄 𑀯𑀺𑀬𑁄𑀚𑀺𑀢𑀸. 𑀦 𑀳𑀺 𑀢𑁂𑀲𑀼 𑀧𑀸𑀭𑀸𑀚𑀺𑀓𑀸𑀤𑀺𑀅𑀲𑀁𑀯𑀸𑀲𑀺𑀓𑀸 𑀅𑀢𑁆𑀣𑀺 𑀢𑁂𑀳𑀺 𑀤𑀻𑀧𑀺𑀢𑀸𑀦𑀁 𑀤𑀲𑀦𑁆𑀦𑀁 𑀯𑀢𑁆𑀣𑀽𑀦𑀁 (𑀘𑀽𑀴𑀯. 𑁪𑁫𑁨) 𑀮𑀳𑀼𑀓𑀸𑀧𑀢𑁆𑀢𑀺𑀯𑀺𑀲𑀬𑀢𑁆𑀢𑀸.

𑀢𑀲𑁆𑀲 𑀧𑀦 𑀲𑀦𑁆𑀢𑀺𑀓𑁂𑀢𑀺 𑀫𑀳𑀸𑀭𑀓𑁆𑀔𑀺𑀢𑀢𑁆𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂. 𑀔𑀭𑀧𑀢𑁆𑀢𑀦𑁆𑀢𑀺 𑀔𑀭𑀲𑀗𑁆𑀔𑀸𑀢𑀁 𑀲𑀼𑀯𑀡𑁆𑀡𑀧𑀢𑀺𑀭𑀽𑀧𑀓𑀁 𑀯𑀢𑁆𑀣𑀼. 𑀤𑀸𑀬𑀓𑁂𑀳𑀺 𑀅𑀲𑀢𑀺𑀬𑀸 𑀤𑀺𑀦𑁆𑀦𑀁 𑀭𑀽𑀧𑀺𑀬𑀁 𑀢𑁂𑀳𑀺 𑀧𑀼𑀦 𑀲𑀓𑀲𑀜𑁆𑀜𑀸𑀬 𑀕𑀡𑁆𑀳𑀦𑁆𑀢𑁂 𑀅𑀤𑀸𑀢𑀼𑀁, 𑀦𑀺𑀲𑁆𑀲𑀕𑁆𑀕𑀺𑀬𑀯𑀢𑁆𑀣𑀼𑀁 𑀕𑀡𑁆𑀳𑀸𑀳𑀻𑀢𑀺 𑀤𑀸𑀢𑀼𑀜𑁆𑀘 𑀦 𑀯𑀝𑁆𑀝𑀢𑀻𑀢𑀺 𑀆𑀳 ‘‘𑀢𑀯 𑀘𑁄𑀴𑀓𑀁 𑀧𑀲𑁆𑀲𑀸𑀳𑀻’’𑀢𑀺. 𑀏𑀯𑀁 𑀯𑀢𑁆𑀯𑀸𑀧𑀺 𑀧𑀦 𑀦𑀝𑁆𑀞𑀯𑀢𑁆𑀣𑀼𑀲𑁆𑀫𑀺𑀁 𑀯𑀺𑀬 𑀦𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑀸𑀪𑀸𑀯𑁂𑀧𑀺 𑀆𑀧𑀢𑁆𑀢𑀺 𑀤𑁂𑀲𑁂𑀢𑀩𑁆𑀩𑀸𑀯. 𑀅𑀲𑀢𑀺𑀬𑀸𑀧𑀺 𑀳𑀺 𑀢𑀁 𑀯𑀢𑁆𑀣𑀼𑀁 𑀯𑀢𑁆𑀣𑀸𑀤𑀺𑀦𑀸 𑀲𑀳𑀢𑁆𑀣𑁂𑀦 𑀕𑀳𑁂𑀢𑁆𑀯𑀸 ‘‘𑀇𑀤𑀁 𑀤𑁂𑀫𑀻’’𑀢𑀺 𑀤𑀺𑀦𑁆𑀦𑀁, 𑀢𑀤𑀸 𑀧𑀭𑀺𑀘𑁆𑀘𑀸𑀕𑀲𑀩𑁆𑀪𑀸𑀯𑀢𑁄 𑀤𑀸𑀦𑀫𑁂𑀯 𑀳𑁄𑀢𑀺 ‘‘𑀅𑀧𑁆𑀧𑀕𑁆𑀖𑀁 𑀤𑀲𑁆𑀲𑀸𑀫𑀻’’𑀢𑀺 𑀫𑀳𑀕𑁆𑀖𑀲𑁆𑀲 𑀤𑀸𑀦𑁂 𑀯𑀺𑀬. 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀲𑁆𑀲 𑀘 𑀅𑀲𑀢𑀺𑀬𑀸 𑀤𑀺𑀬𑁆𑀬𑀫𑀸𑀦𑀢𑁆𑀢𑁂 𑀜𑀸𑀢𑁂𑀧𑀺 𑀅𑀤𑀺𑀦𑁆𑀦𑀸𑀤𑀸𑀦𑀁 𑀦 𑀳𑁄𑀢𑀺 𑀤𑀸𑀬𑀓𑁂𑀳𑀺 𑀤𑀺𑀦𑁆𑀦𑀢𑁆𑀢𑀸, 𑀢𑀲𑁆𑀫𑀸 𑀭𑀽𑀧𑀺𑀬𑀁 𑀦𑀺𑀲𑁆𑀲𑀕𑁆𑀕𑀺𑀬𑀫𑁂𑀯 𑀳𑁄𑀢𑀺. 𑀓𑁂𑀘𑀺 𑀧𑀦 ‘‘𑀈𑀤𑀺𑀲𑀁 𑀦𑀸𑀫 𑀦 𑀳𑁄𑀢𑀺, 𑀢𑁂𑀦𑁂𑀯 𑀘𑁂𑀢𑁆𑀣 ‘𑀢𑀯 𑀘𑁄𑀴𑀓𑀁 𑀧𑀲𑁆𑀲𑀸’𑀢𑀺 𑀯𑀼𑀢𑁆𑀢’’𑀦𑁆𑀢𑀺 𑀯𑀤𑀦𑁆𑀢𑀺, 𑀢𑀁 𑀦𑁄 𑀦𑀓𑁆𑀔𑀫𑀢𑀺, 𑀯𑀻𑀫𑀁𑀲𑀺𑀢𑀩𑁆𑀩𑀁.

𑁫𑁮𑁬. 𑀏𑀓𑀧𑀭𑀺𑀘𑁆𑀙𑁂𑀤𑀸𑀦𑀻𑀢𑀺 𑀲𑀺𑀬𑀸 𑀓𑀺𑀭𑀺𑀬𑀢𑁆𑀢𑀁, 𑀲𑀺𑀬𑀸 𑀅𑀓𑀺𑀭𑀺𑀬𑀢𑁆𑀢𑀜𑁆𑀘 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀚𑀸𑀢𑀭𑀽𑀧𑀭𑀚𑀢𑀪𑀸𑀯𑁄, 𑀅𑀢𑁆𑀢𑀼𑀤𑁆𑀤𑁂𑀲𑀺𑀓𑀢𑀸, 𑀕𑀳𑀡𑀸𑀤𑀻𑀲𑀼 𑀅𑀜𑁆𑀜𑀢𑀭𑀪𑀸𑀯𑁄𑀢𑀺 𑀇𑀫𑀸𑀦𑁂𑀢𑁆𑀣 𑀢𑀻𑀡𑀺 𑀅𑀗𑁆𑀕𑀸𑀦𑀺.

𑀭𑀽𑀧𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀭𑀽𑀧𑀺𑀬𑀲𑀁𑀯𑁄𑀳𑀸𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁫𑁮𑁭. 𑀦𑀯𑀫𑁂 𑀚𑀸𑀢𑀭𑀽𑀧𑀸𑀤𑀺𑀘𑀢𑀼𑀩𑁆𑀩𑀺𑀥𑀦𑀺𑀲𑁆𑀲𑀕𑁆𑀕𑀺𑀬𑀯𑀢𑁆𑀣𑀼 𑀇𑀥 𑀭𑀽𑀧𑀺𑀬𑀕𑁆𑀕𑀳𑀡𑁂𑀦𑁂𑀯 𑀕𑀳𑀺𑀢𑀦𑁆𑀢𑀺 𑀆𑀳 ‘‘𑀚𑀸𑀢𑀭𑀽𑀧𑀭𑀚𑀢𑀧𑀭𑀺𑀯𑀢𑁆𑀢𑀦’’𑀦𑁆𑀢𑀺. 𑀧𑀝𑀺𑀕𑁆𑀕𑀳𑀺𑀢𑀧𑀭𑀺𑀯𑀢𑁆𑀢𑀦𑁂𑀢𑀺 𑀓𑀧𑁆𑀧𑀺𑀬𑀯𑁄𑀳𑀸𑀭𑁂𑀦, 𑀅𑀓𑀧𑁆𑀧𑀺𑀬𑀯𑁄𑀳𑀸𑀭𑁂𑀦 𑀯𑀸 𑀧𑀝𑀺𑀕𑁆𑀕𑀳𑀺𑀢𑀲𑁆𑀲 𑀭𑀽𑀧𑀺𑀬𑀲𑁆𑀲 𑀧𑀭𑀺𑀯𑀢𑁆𑀢𑀦𑁂.

𑁫𑁮𑁯. 𑀧𑀸𑀴𑀺𑀬𑀁 𑀖𑀦𑀓𑀢𑀦𑁆𑀢𑀺 𑀇𑀝𑁆𑀞𑀓𑀸𑀤𑀺. 𑀭𑀽𑀧𑀺𑀬𑀁 𑀦𑀸𑀫 𑀲𑀢𑁆𑀣𑀼𑀯𑀡𑁆𑀡𑁄𑀢𑀺𑀆𑀤𑀻𑀲𑀼 𑀓𑀺𑀜𑁆𑀘𑀸𑀧𑀺 𑀓𑁂𑀯𑀮𑀁 𑀭𑀚𑀢𑀁 𑀦 𑀕𑀳𑀺𑀢𑀁, 𑀢𑀣𑀸𑀧𑀺 𑀭𑀽𑀧𑀺𑀬𑀧𑀤𑁂𑀦𑁂𑀯 𑀢𑀁 𑀕𑀳𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀲𑀼𑀤𑁆𑀥𑁄 𑀭𑀽𑀧𑀺𑀬𑀲𑀁𑀯𑁄𑀳𑀸𑀭𑁄 𑀏𑀯 𑀯𑀼𑀢𑁆𑀢𑁄𑀢𑀺 𑀅𑀚𑁆𑀛𑀸𑀳𑀭𑀺𑀢𑀩𑁆𑀩𑀁. 𑀭𑀽𑀧𑀺𑀬𑁂 𑀭𑀽𑀧𑀺𑀬𑀲𑀜𑁆𑀜𑀻𑀢𑀺𑀆𑀤𑀺𑀫𑁆𑀳𑀺 𑀯𑀺𑀦𑀺𑀘𑁆𑀙𑀬𑀁 𑀯𑀓𑁆𑀔𑀸𑀫𑀸𑀢𑀺 𑀧𑀸𑀞𑀲𑁂𑀲𑁄.

𑁫𑁯𑁧. 𑀧𑀸𑀴𑀺𑀬𑀁 𑀭𑀽𑀧𑀺𑀬𑁂 𑀭𑀽𑀧𑀺𑀬𑀲𑀜𑁆𑀜𑀻𑀢𑀺 𑀅𑀢𑁆𑀢𑀦𑀸 𑀤𑀺𑀬𑁆𑀬𑀫𑀸𑀦𑀁 𑀲𑀓𑀲𑀦𑁆𑀢𑀓𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀭𑀽𑀧𑀺𑀬𑀁 𑀘𑁂𑀢𑀸𑀧𑁂𑀢𑀻𑀢𑀺 𑀧𑀭𑀲𑀦𑁆𑀢𑀓𑀁. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀢𑀢𑁆𑀣 𑀅𑀭𑀽𑀧𑀺𑀬-𑀲𑀤𑁆𑀤𑁂𑀦 𑀤𑀼𑀓𑁆𑀓𑀝𑀯𑀢𑁆𑀣𑀼𑀫𑁆𑀧𑀺 𑀲𑀗𑁆𑀕𑀡𑁆𑀳𑀸𑀢𑀺. 𑀧𑀘𑁆𑀙𑀺𑀫𑁂 𑀧𑀦 𑀢𑀺𑀓𑁂 ‘‘𑀅𑀭𑀽𑀧𑀺𑀬𑁂 𑀭𑀽𑀧𑀺𑀬𑀲𑀜𑁆𑀜𑀻 𑀅𑀭𑀽𑀧𑀺𑀬𑀁 𑀘𑁂𑀢𑀸𑀧𑁂𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 𑀇𑀫𑀺𑀦𑀸 𑀦𑀬𑁂𑀦 𑀲𑀩𑁆𑀩𑀢𑁆𑀣 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀇𑀫𑀲𑁆𑀫𑀺𑀜𑁆𑀘 𑀢𑀺𑀓𑁂 𑀅𑀭𑀽𑀧𑀺𑀬-𑀲𑀤𑁆𑀤𑁂𑀦 𑀓𑀧𑁆𑀧𑀺𑀬𑀯𑀢𑁆𑀣𑀼𑀬𑁂𑀯 𑀕𑀳𑀺𑀢𑀁, 𑀦 𑀫𑀼𑀢𑁆𑀢𑀸𑀤𑀺𑀤𑀼𑀓𑁆𑀓𑀝𑀯𑀢𑁆𑀣𑀼 𑀅𑀦𑁆𑀢𑁂 ‘‘𑀧𑀜𑁆𑀘𑀦𑁆𑀦𑀁 𑀲𑀳 𑀅𑀦𑀸𑀧𑀢𑁆𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸. 𑀓𑀺𑀜𑁆𑀘𑀸𑀧𑀺 𑀤𑀼𑀓𑁆𑀓𑀝𑀯𑀢𑁆𑀣𑀼 𑀦 𑀕𑀳𑀺𑀢𑀁, 𑀢𑀣𑀸𑀧𑀺 𑀤𑀼𑀓𑁆𑀓𑀝𑀯𑀢𑁆𑀣𑀼𑀦𑀸 𑀤𑀼𑀓𑁆𑀓𑀝𑀯𑀢𑁆𑀣𑀼𑀁, 𑀓𑀧𑁆𑀧𑀺𑀬𑀯𑀢𑁆𑀣𑀼𑀦𑀸 𑀤𑀼𑀓𑁆𑀓𑀝𑀯𑀢𑁆𑀣𑀼𑀜𑁆𑀘 𑀧𑀭𑀺𑀯𑀢𑁆𑀢𑀬𑀢𑁄 𑀤𑀼𑀓𑁆𑀓𑀝𑀁, 𑀦𑀬𑀢𑁄 𑀲𑀺𑀤𑁆𑀥𑀫𑁂𑀯 𑀳𑁄𑀢𑀺. 𑀢𑀜𑁆𑀘 𑀤𑀼𑀓𑁆𑀓𑀝𑀯𑀢𑁆𑀣𑀼𑀫𑁆𑀳𑀺 𑀢𑀣𑀲𑀜𑁆𑀜𑀸𑀬 𑀯𑀸 𑀅𑀢𑀣𑀲𑀜𑁆𑀜𑀸𑀬 𑀯𑀸 𑀯𑀺𑀫𑀢𑀺𑀬𑀸 𑀯𑀸 𑀧𑀭𑀺𑀯𑀢𑁆𑀢𑁂𑀦𑁆𑀢𑀲𑁆𑀲𑀧𑀺 𑀳𑁄𑀢𑀺𑀬𑁂𑀯 𑀅𑀘𑀺𑀢𑁆𑀢𑀓𑀢𑁆𑀢𑀸 𑀇𑀫𑀲𑁆𑀲 𑀲𑀺𑀓𑁆𑀔𑀸𑀧𑀤𑀲𑁆𑀲. 𑀧𑀜𑁆𑀘𑀦𑁆𑀦𑀁 𑀲𑀳𑀸𑀢𑀺 𑀧𑀜𑁆𑀘𑀳𑀺 𑀲𑀳𑀥𑀫𑁆𑀫𑀺𑀓𑁂𑀳𑀺 𑀲𑀳.

𑀇𑀤𑀸𑀦𑀺 ‘‘𑀦𑀺𑀲𑁆𑀲𑀕𑁆𑀕𑀺𑀬𑀯𑀢𑁆𑀣𑀼𑀦𑀸 𑀤𑀼𑀓𑁆𑀓𑀝𑀯𑀢𑁆𑀣𑀼𑀁 𑀯𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀲𑁆𑀲 𑀅𑀢𑁆𑀣𑀲𑁆𑀲 𑀧𑀸𑀴𑀺𑀬𑀁 𑀲𑀭𑀽𑀧𑁂𑀦 𑀅𑀦𑀸𑀕𑀢𑀢𑁆𑀢𑁂𑀧𑀺 𑀦𑀬𑀢𑁄 𑀮𑀩𑁆𑀪𑀫𑀸𑀦𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀬𑁄 𑀳𑀺 𑀅𑀬’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀏𑀢𑁆𑀣 𑀘 𑀬𑀲𑁆𑀫𑀸 𑀭𑀽𑀧𑀺𑀬𑁂𑀦 𑀧𑀭𑀺𑀯𑀢𑁆𑀢𑀺𑀢𑀁 𑀅𑀭𑀽𑀧𑀺𑀬𑀁 𑀦𑀺𑀲𑁆𑀲𑀝𑁆𑀞𑀫𑁆𑀧𑀺 𑀲𑀩𑁆𑀩𑁂𑀲𑀫𑁆𑀧𑀺 𑀅𑀓𑀧𑁆𑀧𑀺𑀬𑀢𑁆𑀢𑀸 𑀦𑀺𑀲𑁆𑀲𑀕𑁆𑀕𑀺𑀬𑀫𑁂𑀯 𑀦 𑀳𑁄𑀢𑀺 𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀲𑁆𑀲𑁂𑀯 𑀦𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑀢𑁄, 𑀓𑁂𑀯𑀮𑀁 𑀧𑀦 𑀇𑀤𑀁 𑀙𑀟𑁆𑀟𑁂𑀢𑁆𑀯𑀸 𑀧𑀸𑀘𑀺𑀢𑁆𑀢𑀺𑀬𑀫𑁂𑀯 𑀧𑀭𑀺𑀯𑀢𑁆𑀢𑀓𑁂𑀦 𑀤𑁂𑀲𑁂𑀢𑀩𑁆𑀩𑀁, 𑀢𑀲𑁆𑀫𑀸 ‘‘𑀭𑀽𑀧𑀺𑀬𑁂 𑀭𑀽𑀧𑀺𑀬𑀲𑀜𑁆𑀜𑀻 𑀅𑀭𑀽𑀧𑀺𑀬𑀁 𑀘𑁂𑀢𑀸𑀧𑁂𑀢𑀺, 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺𑀆𑀤𑀺 𑀢𑀺𑀓𑁄 𑀪𑀕𑀯𑀢𑀸 𑀦 𑀯𑀼𑀢𑁆𑀢𑁄, 𑀢𑀻𑀲𑀼𑀧𑀺 𑀧𑀤𑁂𑀲𑀼 𑀧𑀭𑀺𑀯𑀢𑁆𑀢𑀺𑀬𑀫𑀸𑀦𑀲𑁆𑀲 𑀅𑀭𑀽𑀧𑀺𑀬𑀢𑁆𑀢𑁂𑀦 𑀦𑀺𑀲𑁆𑀲𑀕𑁆𑀕𑀺𑀬𑀯𑀘𑀦𑀸𑀬𑁄𑀕𑀸 𑀭𑀽𑀧𑀺𑀬𑀲𑁆𑀲𑁂𑀯 𑀦𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑀢𑁄. 𑀭𑀽𑀧𑀺𑀬𑀲𑁆𑀲𑁂𑀯 𑀳𑀺 𑀦𑀺𑀲𑁆𑀲𑀝𑁆𑀞𑀲𑁆𑀲 𑀆𑀭𑀸𑀫𑀺𑀓𑀸𑀤𑀻𑀳𑀺 𑀧𑀝𑀺𑀧𑀚𑁆𑀚𑀦𑀯𑀺𑀥𑀺 𑀧𑀸𑀴𑀺𑀬𑀁 𑀤𑀲𑁆𑀲𑀺𑀢𑁄, 𑀦 𑀅𑀭𑀽𑀧𑀺𑀬𑀲𑁆𑀲. 𑀢𑀲𑁆𑀫𑀸 𑀧𑀸𑀘𑀺𑀢𑁆𑀢𑀺𑀬𑀫𑀢𑁆𑀢𑀲𑀫𑁆𑀪𑀯𑀤𑀲𑁆𑀲𑀦𑀢𑁆𑀣𑀫𑁂𑀯 𑀧𑀦𑁂𑀢𑁆𑀣 𑀅𑀝𑁆𑀞𑀓𑀣𑀸𑀬𑀁 ‘‘𑀅𑀯𑀼𑀢𑁆𑀢𑁄𑀧𑀺 𑀅𑀬𑀁…𑀧𑁂… 𑀢𑀺𑀓𑁄 𑀯𑁂𑀤𑀺𑀢𑀩𑁆𑀩𑁄’’𑀢𑀺 𑀯𑀼𑀢𑁆𑀢𑀁, 𑀦 𑀧𑀦 𑀢𑀲𑁆𑀲 𑀯𑀢𑁆𑀣𑀼𑀦𑁄 𑀦𑀺𑀲𑁆𑀲𑀕𑁆𑀕𑀺𑀬𑀢𑀸𑀤𑀲𑁆𑀲𑀦𑀢𑁆𑀣𑀁. 𑀢𑁂𑀦𑁂𑀯 𑀧𑀢𑁆𑀢𑀘𑀢𑀼𑀓𑁆𑀓𑁂 ‘‘𑀦 𑀲𑀓𑁆𑀓𑀸 𑀓𑁂𑀦𑀘𑀺 𑀉𑀧𑀸𑀬𑁂𑀦 𑀓𑀧𑁆𑀧𑀺𑀬𑀁 𑀓𑀸𑀢𑀼’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀬𑀁 𑀅𑀫𑁆𑀳𑀸𑀓𑀁 𑀔𑀦𑁆𑀢𑀺. 𑀅𑀢𑁆𑀢𑀦𑁄 𑀯𑀸 𑀳𑀻𑀢𑀺𑀆𑀤𑀺 𑀤𑀼𑀢𑀺𑀬𑀢𑀺𑀓𑀸𑀦𑀼𑀮𑁄𑀫𑁂𑀦𑁂𑀯 𑀢𑀢𑀺𑀬𑀢𑁆𑀢𑀺𑀓𑀲𑁆𑀲 𑀲𑀺𑀚𑁆𑀛𑀦𑀧𑁆𑀧𑀓𑀸𑀭𑀁 𑀲𑀫𑀢𑁆𑀣𑁂𑀢𑀼𑀁 𑀯𑀼𑀢𑁆𑀢𑀁. 𑀢𑀢𑁆𑀭𑀸𑀬𑀁 𑀅𑀥𑀺𑀧𑁆𑀧𑀸𑀬𑁄 𑁋 𑀬𑀲𑁆𑀫𑀸 𑀳𑀺 𑀬𑀣𑀸 𑀅𑀢𑁆𑀢𑀦𑁄 𑀅𑀭𑀽𑀧𑀺𑀬𑁂𑀦 𑀧𑀭𑀲𑁆𑀲 𑀭𑀽𑀧𑀺𑀬𑀁 𑀘𑁂𑀢𑀸𑀧𑁂𑀦𑁆𑀢𑀲𑁆𑀲 𑀏𑀓𑀲𑁆𑀫𑀺𑀁 𑀅𑀦𑁆𑀢𑁂 𑀭𑀽𑀧𑀺𑀬𑀲𑀫𑁆𑀪𑀯𑀢𑁄 ‘‘𑀭𑀽𑀧𑀺𑀬𑀲𑀁𑀯𑁄𑀳𑀸𑀭𑁄 𑀓𑀢𑁄 𑀏𑀯 𑀳𑁄𑀢𑀻’’𑀢𑀺 𑀤𑀼𑀢𑀺𑀬𑀢𑁆𑀢𑀺𑀓𑁄 𑀯𑀼𑀢𑁆𑀢𑁄, 𑀏𑀯𑀁 𑀅𑀢𑁆𑀢𑀦𑁄 𑀭𑀽𑀧𑀺𑀬𑁂𑀦 𑀧𑀭𑀲𑁆𑀲 𑀅𑀭𑀽𑀧𑀺𑀬𑀁 𑀘𑁂𑀢𑀸𑀧𑁂𑀦𑁆𑀢𑀲𑁆𑀲𑀸𑀧𑀺 𑀳𑁄𑀢𑀻𑀢𑀺 𑀢𑀢𑀺𑀬𑁄 𑀢𑀺𑀓𑁄 𑀯𑀢𑁆𑀢𑀩𑁆𑀩𑁄 𑀪𑀯𑁂𑀬𑁆𑀬, 𑀲𑁄 𑀧𑀦 𑀤𑀼𑀢𑀺𑀬𑀢𑁆𑀢𑀺𑀓𑁂𑀦𑁂𑀯 𑀏𑀓𑀢𑁄 𑀭𑀽𑀧𑀺𑀬𑀧𑀓𑁆𑀔𑀲𑀸𑀫𑀜𑁆𑀜𑁂𑀦 𑀲𑀺𑀚𑁆𑀛𑀢𑀻𑀢𑀺 𑀧𑀸𑀴𑀺𑀬𑀁 𑀦 𑀯𑀼𑀢𑁆𑀢𑁄𑀢𑀺. 𑀢𑀢𑁆𑀣 𑀏𑀓𑀦𑁆𑀢𑁂𑀦 𑀭𑀽𑀧𑀺𑀬𑀧𑀓𑁆𑀔𑁂𑀢𑀺 𑀏𑀓𑁂𑀦 𑀅𑀦𑁆𑀢𑁂𑀦 𑀭𑀽𑀧𑀺𑀬𑀧𑀓𑁆𑀔𑁂, ‘‘𑀏𑀓𑀢𑁄 𑀭𑀽𑀧𑀺𑀬𑀧𑀓𑁆𑀔𑁂’’𑀢𑀺 𑀯𑀸 𑀧𑀸𑀞𑁄.

𑀇𑀤𑀸𑀦𑀺 𑀤𑀼𑀢𑀺𑀬𑀢𑁆𑀢𑀺𑀓𑁂 𑀅𑀭𑀽𑀧𑀺𑀬𑀧𑀤𑀲𑁆𑀲 𑀅𑀢𑁆𑀣𑀪𑀽𑀢𑁂𑀲𑀼 𑀤𑀼𑀓𑁆𑀓𑀝𑀯𑀢𑁆𑀣𑀼𑀓𑀧𑁆𑀧𑀺𑀬𑀯𑀢𑁆𑀣𑀽𑀲𑀼 𑀤𑀼𑀓𑁆𑀓𑀝𑀯𑀢𑁆𑀣𑀼𑀦𑀸 𑀭𑀽𑀧𑀺𑀬𑀸𑀤𑀺𑀧𑀭𑀺𑀯𑀢𑁆𑀢𑀦𑁂 𑀆𑀧𑀢𑁆𑀢𑀺𑀪𑁂𑀤𑀁 𑀤𑀲𑁆𑀲𑁂𑀢𑀼𑀁 ‘‘𑀤𑀼𑀓𑁆𑀓𑀝𑀯𑀢𑁆𑀣𑀼𑀦𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀤𑀼𑀓𑁆𑀓𑀝𑀯𑀢𑁆𑀣𑀼𑀦𑀸 𑀤𑀼𑀓𑁆𑀓𑀝𑀯𑀢𑁆𑀣𑀼𑀦𑁆𑀢𑀺𑀆𑀤𑀺 𑀧𑀦 𑀤𑀼𑀓𑁆𑀓𑀝𑀯𑀢𑁆𑀣𑀼𑀦𑀸 𑀧𑀭𑀺𑀯𑀢𑁆𑀢𑀦𑀧𑁆𑀧𑀲𑀗𑁆𑀕𑁂 𑀧𑀸𑀴𑀺𑀬𑀁 𑀅𑀯𑀼𑀢𑁆𑀢𑀲𑁆𑀲𑀸𑀧𑀺 𑀅𑀢𑁆𑀣𑀲𑁆𑀲 𑀦𑀬𑀢𑁄 𑀮𑀩𑁆𑀪𑀫𑀸𑀦𑀢𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁. 𑀢𑀢𑁆𑀣 𑀇𑀫𑀺𑀦𑀸𑀢𑀺 𑀭𑀽𑀧𑀺𑀬𑀲𑀁𑀯𑁄𑀳𑀸𑀭𑀲𑀺𑀓𑁆𑀔𑀸𑀧𑀤𑁂𑀦, 𑀢𑁂𑀦 𑀘 𑀤𑀼𑀓𑁆𑀓𑀝𑀲𑁆𑀲 𑀅𑀘𑀺𑀢𑁆𑀢𑀓𑀢𑀫𑁆𑀧𑀺 𑀤𑀲𑁆𑀲𑁂𑀢𑀺. 𑀅𑀜𑁆𑀜𑀢𑁆𑀭 𑀲𑀳𑀥𑀫𑁆𑀫𑀺𑀓𑁂𑀳𑀻𑀢𑀺 ‘‘𑀧𑀜𑁆𑀘𑀦𑁆𑀦𑀁 𑀲𑀳 𑀅𑀦𑀸𑀧𑀢𑁆𑀢𑀻’’𑀢𑀺 𑀯𑀘𑀦𑀢𑁄 𑀯𑀼𑀢𑁆𑀢𑀁, 𑀢𑁂𑀦𑀸𑀧𑀺 𑀓𑀬𑀯𑀺𑀓𑁆𑀓𑀬𑀲𑀺𑀓𑁆𑀔𑀸𑀧𑀤𑀲𑁆𑀲 𑀓𑀧𑁆𑀧𑀺𑀬𑀯𑀢𑁆𑀣𑀼𑀦𑀺𑀲𑁆𑀲𑀺𑀢𑀢𑀁 𑀏𑀯 𑀲𑀸𑀥𑁂𑀢𑀺. 𑀇𑀫𑀁…𑀧𑁂… 𑀭𑀽𑀧𑀺𑀬𑀘𑁂𑀢𑀸𑀧𑀦𑀜𑁆𑀘 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀧𑀓𑀢𑁂𑀦 𑀲𑀫𑁆𑀩𑀦𑁆𑀥𑁄. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂. 𑀢𑀢𑁆𑀣𑀸𑀢𑀺 𑀓𑀬𑀯𑀺𑀓𑁆𑀓𑀬𑀲𑀺𑀓𑁆𑀔𑀸𑀧𑀤𑁂 (𑀧𑀸𑀭𑀸. 𑁫𑁯𑁩).

𑀏𑀯𑀁 𑀤𑀼𑀓𑁆𑀓𑀝𑀯𑀢𑁆𑀣𑀼𑀦𑀸 𑀭𑀽𑀧𑀺𑀬𑀸𑀤𑀺𑀧𑀭𑀺𑀯𑀢𑁆𑀢𑀦𑁂 𑀆𑀧𑀢𑁆𑀢𑀺𑀪𑁂𑀤𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀓𑀧𑁆𑀧𑀺𑀬𑀯𑀢𑁆𑀣𑀼𑀦𑀸𑀧𑀺 𑀤𑀲𑁆𑀲𑁂𑀢𑀼𑀁 ‘‘𑀓𑀧𑁆𑀧𑀺𑀬𑀯𑀢𑁆𑀣𑀼𑀦𑀸 𑀧𑀦𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀢𑁂𑀦𑁂𑀯𑀸𑀢𑀺 𑀓𑀧𑁆𑀧𑀺𑀬𑀯𑀢𑁆𑀣𑀼𑀦𑀸 𑀏𑀯. ‘‘𑀭𑀽𑀧𑀺𑀬𑀁 𑀉𑀕𑁆𑀕𑀡𑁆𑀳𑀺𑀢𑁆𑀯𑀸’’𑀢𑀺 𑀇𑀤𑀁 𑀉𑀓𑁆𑀓𑀝𑁆𑀞𑀯𑀲𑁂𑀦 𑀯𑀼𑀢𑁆𑀢𑀁. 𑀫𑀼𑀢𑁆𑀢𑀸𑀤𑀺𑀤𑀼𑀓𑁆𑀓𑀝𑀯𑀢𑁆𑀣𑀼𑀫𑁆𑀧𑀺 𑀉𑀕𑁆𑀕𑀳𑁂𑀢𑁆𑀯𑀸 𑀓𑀸𑀭𑀺𑀢𑀫𑁆𑀧𑀺 𑀧𑀜𑁆𑀘𑀦𑁆𑀦𑀫𑁆𑀧𑀺 𑀦 𑀯𑀝𑁆𑀝𑀢𑀺 𑀏𑀯. 𑀲𑀫𑀼𑀝𑁆𑀞𑀸𑀧𑁂𑀢𑀻𑀢𑀺 𑀲𑀬𑀁 𑀕𑀦𑁆𑀢𑁆𑀯𑀸, ‘‘𑀇𑀫𑀁 𑀓𑀳𑀸𑀧𑀡𑀸𑀤𑀺𑀁 𑀓𑀫𑁆𑀫𑀓𑀸𑀭𑀸𑀦𑀁 𑀤𑀢𑁆𑀯𑀸 𑀩𑀻𑀚𑀁 𑀲𑀫𑀼𑀝𑁆𑀞𑀸𑀧𑁂𑀳𑀻’’𑀢𑀺 𑀏𑀯𑀁 𑀅𑀜𑁆𑀜𑀁 𑀆𑀡𑀸𑀧𑁂𑀢𑁆𑀯𑀸 𑀯𑀸 𑀲𑀫𑀼𑀝𑁆𑀞𑀸𑀧𑁂𑀢𑀺. 𑀫𑀳𑀸𑀅𑀓𑀧𑁆𑀧𑀺𑀬𑁄𑀢𑀺 𑀅𑀢𑁆𑀢𑀦𑀸𑀯 𑀩𑀻𑀚𑀢𑁄 𑀧𑀝𑁆𑀞𑀸𑀬 𑀤𑀽𑀲𑀺𑀢𑀢𑁆𑀢𑀸 𑀅𑀜𑁆𑀜𑀲𑁆𑀲 𑀫𑀽𑀮𑀲𑀸𑀫𑀺𑀓𑀲𑁆𑀲 𑀅𑀪𑀸𑀯𑀢𑁄 𑀯𑀼𑀢𑁆𑀢𑀁. 𑀲𑁄 𑀳𑀺 𑀘𑁄𑀭𑁂𑀳𑀺 𑀅𑀘𑁆𑀙𑀺𑀦𑁆𑀦𑁄𑀧𑀺 𑀧𑀼𑀦 𑀮𑀤𑁆𑀥𑁄 𑀚𑀸𑀦𑀦𑁆𑀢𑀲𑁆𑀲 𑀓𑀲𑁆𑀲𑀘𑀺𑀧𑀺 𑀦 𑀯𑀝𑁆𑀝𑀢𑀺. 𑀬𑀤𑀺 𑀳𑀺 𑀯𑀝𑁆𑀝𑁂𑀬𑁆𑀬, 𑀢𑀴𑀸𑀓𑀸𑀤𑀻𑀲𑀼 𑀯𑀺𑀬 𑀅𑀘𑁆𑀙𑀺𑀦𑁆𑀦𑁄 𑀯𑀝𑁆𑀝𑀢𑀻𑀢𑀺 𑀆𑀘𑀭𑀺𑀬𑀸 𑀯𑀤𑁂𑀬𑁆𑀬𑀼𑀁. 𑀦 𑀲𑀓𑁆𑀓𑀸 𑀓𑁂𑀦𑀘𑀺 𑀉𑀧𑀸𑀬𑁂𑀦𑀸𑀢𑀺 𑀲𑀗𑁆𑀖𑁂 𑀦𑀺𑀲𑁆𑀲𑀚𑁆𑀚𑀦𑁂𑀦, 𑀘𑁄𑀭𑀸𑀤𑀺𑀅𑀘𑁆𑀙𑀺𑀦𑁆𑀤𑀦𑀸𑀤𑀺𑀦𑀸 𑀘 𑀓𑀧𑁆𑀧𑀺𑀬𑀁 𑀓𑀸𑀢𑀼𑀁 𑀦 𑀲𑀓𑁆𑀓𑀸, 𑀇𑀤𑀜𑁆𑀘 𑀢𑁂𑀦 𑀭𑀽𑀧𑁂𑀦 𑀞𑀺𑀢𑀁, 𑀢𑀫𑁆𑀫𑀽𑀮𑀺𑀓𑁂𑀦 𑀯𑀢𑁆𑀣𑀼𑀫𑀼𑀢𑁆𑀢𑀸𑀤𑀺𑀭𑀽𑀧𑁂𑀦 𑀞𑀺𑀢𑀜𑁆𑀘 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀤𑀼𑀓𑁆𑀓𑀝𑀯𑀢𑁆𑀣𑀼𑀫𑁆𑀧𑀺 𑀳𑀺 𑀢𑀫𑁆𑀫𑀽𑀮𑀺𑀓𑀓𑀧𑁆𑀧𑀺𑀬𑀯𑀢𑁆𑀣𑀼𑀜𑁆𑀘 𑀦 𑀲𑀓𑁆𑀓𑀸 𑀓𑁂𑀦𑀘𑀺 𑀉𑀧𑀸𑀬𑁂𑀦 𑀢𑁂𑀦 𑀭𑀽𑀧𑁂𑀦 𑀓𑀧𑁆𑀧𑀺𑀬𑀁 𑀓𑀸𑀢𑀼𑀁. 𑀬𑀤𑀺 𑀧𑀦 𑀲𑁄 𑀪𑀺𑀓𑁆𑀔𑀼 𑀢𑁂𑀦 𑀓𑀧𑁆𑀧𑀺𑀬𑀯𑀢𑁆𑀣𑀼𑀤𑀼𑀓𑁆𑀓𑀝𑀯𑀢𑁆𑀣𑀼𑀦𑀸 𑀧𑀼𑀦 𑀭𑀽𑀧𑀺𑀬𑀁 𑀘𑁂𑀢𑀸𑀧𑁂𑀬𑁆𑀬, 𑀢𑀁 𑀭𑀽𑀧𑀺𑀬𑀁 𑀦𑀺𑀲𑁆𑀲𑀚𑁆𑀚𑀸𑀧𑁂𑀢𑁆𑀯𑀸 𑀅𑀜𑁆𑀜𑁂𑀲𑀁 𑀓𑀧𑁆𑀧𑀺𑀬𑀁 𑀓𑀸𑀢𑀼𑀫𑁆𑀧𑀺 𑀲𑀓𑁆𑀓𑀸 𑀪𑀯𑁂𑀬𑁆𑀬𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀧𑀢𑁆𑀢𑀁 𑀓𑀺𑀡𑀸𑀢𑀻𑀢𑀺 𑀏𑀢𑁆𑀣 ‘‘𑀇𑀫𑀺𑀦𑀸 𑀓𑀳𑀸𑀧𑀡𑀸𑀤𑀺𑀦𑀸 𑀓𑀫𑁆𑀫𑀸𑀭𑀓𑀼𑀮𑀢𑁄 𑀧𑀢𑁆𑀢𑀁 𑀓𑀺𑀡𑀺𑀢𑁆𑀯𑀸 𑀏𑀳𑀻’’𑀢𑀺 𑀆𑀭𑀸𑀫𑀺𑀓𑀸𑀤𑀻𑀳𑀺 𑀓𑀺𑀡𑀸𑀧𑀦𑀫𑁆𑀧𑀺 𑀲𑀗𑁆𑀕𑀳𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑁂𑀦𑁂𑀯 𑀭𑀸𑀚𑀲𑀺𑀓𑁆𑀔𑀸𑀧𑀤𑀝𑁆𑀞𑀓𑀣𑀸𑀬𑀁 ‘‘𑀏𑀢𑁆𑀢𑀓𑁂𑀳𑀺 𑀓𑀳𑀸𑀧𑀡𑁂𑀳𑀺 𑀲𑀸𑀝𑀓𑁂 𑀆𑀳𑀭, 𑀏𑀢𑁆𑀢𑀓𑁂𑀳𑀺 𑀬𑀸𑀕𑀼𑀆𑀤𑀻𑀦𑀺 𑀲𑀫𑁆𑀧𑀸𑀤𑁂𑀳𑀻𑀢𑀺 𑀯𑀤𑀢𑀺, 𑀬𑀁 𑀢𑁂 𑀆𑀳𑀭𑀦𑁆𑀢𑀺, 𑀲𑀩𑁆𑀩𑁂𑀲𑀁 𑀅𑀓𑀧𑁆𑀧𑀺𑀬𑀁. 𑀓𑀲𑁆𑀫𑀸? 𑀓𑀳𑀸𑀧𑀡𑀸𑀦𑀁 𑀯𑀺𑀘𑀸𑀭𑀺𑀢𑀢𑁆𑀢𑀸’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁫𑁩𑁮-𑁫𑁩𑁯) 𑀯𑀼𑀢𑁆𑀢𑀁. 𑀇𑀫𑀺𑀦𑀸 𑀧𑀦 𑀯𑀘𑀦𑁂𑀦 𑀬𑀁 𑀫𑀸𑀢𑀺𑀓𑀸𑀝𑁆𑀞𑀓𑀣𑀸𑀬𑀁 𑀭𑀽𑀧𑀺𑀬𑀲𑀁𑀯𑁄𑀳𑀸𑀭𑀲𑀺𑀓𑁆𑀔𑀸𑀧𑀤𑀁 ‘‘𑀅𑀦𑀸𑀡𑀢𑁆𑀢𑀺𑀓’’𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀁 𑀦 𑀲𑀫𑁂𑀢𑀺. 𑀦 𑀓𑁂𑀯𑀮𑀜𑁆𑀘 𑀇𑀫𑀺𑀦𑀸, 𑀧𑀸𑀴𑀺𑀬𑀸𑀧𑀺 𑀢𑀁 𑀦 𑀲𑀫𑁂𑀢𑀺. 𑀧𑀸𑀴𑀺𑀬𑀜𑁆𑀳𑀺 𑀦𑀺𑀲𑁆𑀲𑀝𑁆𑀞𑀭𑀽𑀧𑀺𑀬𑁂𑀦 𑀆𑀭𑀸𑀫𑀺𑀓𑀸𑀤𑀻𑀳𑀺 𑀲𑀧𑁆𑀧𑀺𑀬𑀸𑀤𑀺𑀁 𑀧𑀭𑀺𑀯𑀢𑁆𑀢𑀸𑀧𑁂𑀢𑀼𑀁 ‘‘𑀲𑁄 𑀯𑀢𑁆𑀢𑀩𑁆𑀩𑁄 ‘𑀆𑀯𑀼𑀲𑁄, 𑀇𑀫𑀁 𑀚𑀸𑀦𑀸𑀳𑀻’𑀢𑀺. 𑀲𑀘𑁂 𑀲𑁄 𑀪𑀡𑀢𑀺 ‘𑀇𑀫𑀺𑀦𑀸 𑀓𑀺𑀁 𑀆𑀳𑀭𑀻𑀬𑀢𑀽’𑀢𑀺, 𑀦 𑀯𑀢𑁆𑀢𑀩𑁆𑀩𑁄 ‘𑀇𑀫𑀁 𑀯𑀸 𑀇𑀫𑀁 𑀯𑀸 𑀆𑀳𑀭𑀸’𑀢𑀺. 𑀓𑀧𑁆𑀧𑀺𑀬𑀁 𑀆𑀘𑀺𑀓𑁆𑀔𑀺𑀢𑀩𑁆𑀩𑀁 ‘𑀲𑀧𑁆𑀧𑀺 𑀯𑀸’’’𑀢𑀺𑀆𑀤𑀺𑀦𑀸 𑀭𑀽𑀧𑀺𑀬𑀲𑀁𑀯𑁄𑀳𑀸𑀭𑀁 𑀧𑀭𑀺𑀫𑁄𑀘𑁂𑀢𑁆𑀯𑀸𑀯 𑀯𑀼𑀢𑁆𑀢𑀁. ‘‘𑀇𑀫𑀺𑀦𑀸 𑀭𑀽𑀧𑀺𑀬𑁂𑀦 𑀓𑀺𑀁 𑀆𑀳𑀭𑀻𑀬𑀢𑀽’’𑀢𑀺 𑀧𑀼𑀘𑁆𑀙𑀦𑁆𑀢𑁄 ‘‘𑀇𑀫𑀁 𑀆𑀳𑀭𑀸’’𑀢𑀺 𑀯𑀼𑀢𑁆𑀢𑁂𑀧𑀺 𑀅𑀥𑀺𑀓𑀸𑀭𑀢𑁄 ‘‘𑀇𑀫𑀺𑀦𑀸 𑀭𑀽𑀧𑀺𑀬𑁂𑀦 𑀇𑀫𑀁 𑀆𑀳𑀭𑀸’’𑀢𑀺 𑀪𑀺𑀓𑁆𑀔𑀽𑀳𑀺 𑀆𑀡𑀢𑁆𑀢𑁄 𑀏𑀯 𑀳𑁄𑀢𑀻𑀢𑀺 𑀢𑀁 𑀭𑀽𑀧𑀺𑀬𑀲𑀁𑀯𑁄𑀳𑀸𑀭𑀁 𑀧𑀭𑀺𑀯𑀚𑁆𑀚𑁂𑀢𑀼𑀁 ‘‘𑀦 𑀯𑀢𑁆𑀢𑀩𑁆𑀩𑁄 ‘𑀇𑀫𑀁 𑀯𑀸 𑀇𑀫𑀁 𑀯𑀸 𑀆𑀳𑀭𑀸’’’𑀢𑀺 𑀧𑀝𑀺𑀓𑁆𑀔𑁂𑀧𑁄 𑀓𑀢𑁄, 𑀅𑀦𑀸𑀧𑀢𑁆𑀢𑀺𑀯𑀸𑀭𑁂𑀧𑀺 ‘‘𑀓𑀧𑁆𑀧𑀺𑀬𑀓𑀸𑀭𑀓𑀲𑁆𑀲 𑀆𑀘𑀺𑀓𑁆𑀔𑀢𑀻’’𑀢𑀺 𑀦 𑀯𑀼𑀢𑁆𑀢𑀁. 𑀓𑀬𑀯𑀺𑀓𑁆𑀓𑀬𑀲𑀺𑀓𑁆𑀔𑀸𑀧𑀤𑁂 (𑀧𑀸𑀭𑀸. 𑁫𑁯𑁫) 𑀧𑀦 𑀢𑀣𑀸 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀇𑀤𑀁 𑀲𑀸𑀡𑀢𑁆𑀢𑀺𑀓𑀁 𑀓𑀬𑀯𑀺𑀓𑁆𑀓𑀬𑀫𑁂𑀯 𑀅𑀦𑀸𑀡𑀢𑁆𑀢𑀺𑀓𑀦𑁆𑀢𑀺 𑀕𑀳𑁂𑀢𑀩𑁆𑀩𑀁.

𑀫𑀽𑀮𑀲𑁆𑀲 𑀅𑀦𑀺𑀲𑁆𑀲𑀝𑁆𑀞𑀢𑁆𑀢𑀸𑀢𑀺 𑀬𑁂𑀦 𑀉𑀕𑁆𑀕𑀳𑀺𑀢𑀫𑀽𑀮𑁂𑀦 𑀧𑀢𑁆𑀢𑁄 𑀓𑀻𑀢𑁄, 𑀢𑀲𑁆𑀲 𑀫𑀽𑀮𑀲𑁆𑀲 𑀲𑀗𑁆𑀖𑀫𑀚𑁆𑀛𑁂 𑀅𑀦𑀺𑀲𑁆𑀲𑀝𑁆𑀞𑀢𑁆𑀢𑀸, 𑀏𑀢𑁂𑀦 𑀭𑀽𑀧𑀺𑀬𑀫𑁂𑀯 𑀦𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑀁, 𑀦 𑀢𑀫𑁆𑀫𑀽𑀮𑀺𑀓𑀁 𑀅𑀭𑀽𑀧𑀺𑀬𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀬𑀤𑀺 𑀳𑀺 𑀢𑁂𑀦 𑀭𑀽𑀧𑀺𑀬𑁂𑀦 𑀅𑀜𑁆𑀜𑀁 𑀭𑀽𑀧𑀺𑀬𑀁 𑀘𑁂𑀢𑀸𑀧𑁂𑀬𑁆𑀬, 𑀢𑀁 𑀭𑀽𑀧𑀺𑀬𑀲𑀁𑀯𑁄𑀳𑀸𑀭𑀲𑀺𑀓𑁆𑀔𑀸𑀧𑀤𑁂 𑀆𑀕𑀢𑀦𑀬𑁂𑀦𑁂𑀯 𑀦𑀺𑀲𑁆𑀲𑀚𑁆𑀚𑀸𑀧𑁂𑀢𑁆𑀯𑀸 𑀲𑁂𑀲𑁂𑀳𑀺 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁 𑀪𑀯𑁂𑀬𑁆𑀬𑀸𑀢𑀺. ‘‘𑀫𑀽𑀮𑀲𑁆𑀲 𑀅𑀲𑀫𑁆𑀧𑀝𑀺𑀘𑁆𑀙𑀺𑀢𑀢𑁆𑀢𑀸’’𑀢𑀺 𑀇𑀫𑀺𑀦𑀸 𑀫𑀽𑀮𑀲𑁆𑀲 𑀕𑀺𑀳𑀺𑀲𑀦𑁆𑀢𑀓𑀢𑁆𑀢𑀁, 𑀢𑁂𑀦𑁂𑀯 𑀧𑀢𑁆𑀢𑀲𑁆𑀲 𑀭𑀽𑀧𑀺𑀬𑀲𑀁𑀯𑁄𑀳𑀸𑀭𑀸𑀦𑀼𑀧𑁆𑀧𑀦𑁆𑀦𑀢𑀜𑁆𑀘 𑀤𑀲𑁆𑀲𑁂𑀢𑀺. 𑀧𑀜𑁆𑀘𑀲𑀳𑀥𑀫𑁆𑀫𑀺𑀓𑀲𑀦𑁆𑀢𑀓𑁂𑀦𑁂𑀯 𑀳𑀺 𑀭𑀽𑀧𑀺𑀬𑀲𑀁𑀯𑁄𑀳𑀸𑀭𑀤𑁄𑀲𑁄. 𑀢𑀢𑁆𑀣 𑀘 𑀅𑀢𑁆𑀢𑀦𑁄 𑀲𑀦𑁆𑀢𑀓𑁂 𑀧𑀸𑀘𑀺𑀢𑁆𑀢𑀺𑀬𑀁, 𑀇𑀢𑀭𑀢𑁆𑀣 𑀤𑀼𑀓𑁆𑀓𑀝𑀁.

𑀦𑀺𑀲𑁆𑀲𑀚𑁆𑀚𑀻𑀢𑀺 𑀤𑀸𑀦𑀯𑀲𑁂𑀦 𑀯𑀼𑀢𑁆𑀢𑀁, 𑀦 𑀯𑀺𑀦𑀬𑀓𑀫𑁆𑀫𑀯𑀲𑁂𑀦. 𑀢𑁂𑀦𑁂𑀯 ‘‘𑀲𑀧𑁆𑀧𑀺𑀲𑁆𑀲 𑀧𑀽𑀭𑁂𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁. 𑀬𑀁 𑀅𑀢𑁆𑀢𑀦𑁄 𑀥𑀦𑁂𑀦 𑀧𑀭𑀺𑀯𑀢𑁆𑀢𑁂𑀢𑀺, 𑀢𑀲𑁆𑀲 𑀯𑀸 𑀥𑀦𑀲𑁆𑀲 𑀭𑀽𑀧𑀺𑀬𑀪𑀸𑀯𑁄, 𑀧𑀭𑀺𑀯𑀢𑁆𑀢𑀦𑀧𑀭𑀺𑀯𑀢𑁆𑀢𑀸𑀧𑀦𑁂𑀲𑀼 𑀅𑀜𑁆𑀜𑀢𑀭𑀪𑀸𑀯𑁄 𑀘𑀸𑀢𑀺 𑀇𑀫𑀸𑀦𑁂𑀢𑁆𑀣 𑀤𑁆𑀯𑁂 𑀅𑀗𑁆𑀕𑀸𑀦𑀺.

𑀭𑀽𑀧𑀺𑀬𑀲𑀁𑀯𑁄𑀳𑀸𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀓𑀬𑀯𑀺𑀓𑁆𑀓𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁫𑁯𑁩-𑁫. 𑀤𑀲𑀫𑁂 𑀧𑀸𑀴𑀺𑀬𑀁 𑀚𑀸𑀦𑀸𑀳𑀻𑀢𑀺 𑀇𑀤𑀸𑀦𑁂𑀯 𑀉𑀧𑀥𑀸𑀭𑁂𑀳𑀺, 𑀇𑀤𑀁 𑀧𑀘𑁆𑀙𑀸 𑀙𑀟𑁆𑀟𑁂𑀢𑀼𑀁 𑀦 𑀲𑀓𑁆𑀓𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀇𑀫𑀺𑀦𑀸𑀢𑀺 𑀪𑀺𑀓𑁆𑀔𑀼𑀦𑀸 𑀤𑀺𑀬𑁆𑀬𑀫𑀸𑀦𑀁 𑀯𑀼𑀢𑁆𑀢𑀁. 𑀇𑀫𑀦𑁆𑀢𑀺 𑀧𑀭𑁂𑀦 𑀧𑀝𑀺𑀤𑀺𑀬𑁆𑀬𑀫𑀸𑀦𑀁. 𑀲𑁂𑀲𑀜𑀸𑀢𑀓𑁂𑀲𑀼 𑀲𑀤𑁆𑀥𑀸𑀤𑁂𑀬𑁆𑀬𑀯𑀺𑀦𑀺𑀧𑀸𑀢𑀲𑀫𑁆𑀪𑀯𑀢𑁄 𑀢𑀤𑀪𑀸𑀯𑀝𑁆𑀞𑀸𑀦𑀫𑁆𑀧𑀺 𑀤𑀲𑁆𑀲𑁂𑀢𑀼𑀁 ‘‘𑀫𑀸𑀢𑀭𑀁 𑀧𑀦 𑀧𑀺𑀢𑀭𑀁 𑀯𑀸’’𑀢𑀺 𑀯𑀼𑀢𑁆𑀢𑀁. 𑀦 𑀲𑀓𑁆𑀓𑀸 𑀢𑀁 𑀧𑀝𑀺𑀓𑁆𑀔𑀺𑀧𑀺𑀢𑀼𑀦𑁆𑀢𑀺 𑀏𑀢𑁆𑀣 𑀬𑀣𑀸 𑀭𑀽𑀧𑀺𑀬𑀁 𑀪𑀢𑀓𑀸𑀦𑀁 𑀤𑀢𑁆𑀯𑀸 𑀅𑀲𑁆𑀲𑀸𑀫𑀺𑀓𑀪𑀽𑀫𑀺𑀬𑀁 𑀅𑀬𑁄𑀩𑀻𑀚𑀲𑀫𑀼𑀝𑁆𑀞𑀸𑀧𑀦𑁂 𑀪𑀢𑀺𑀬𑀸 𑀔𑀡𑀦𑁆𑀢𑀸𑀦𑀁 𑀲𑀦𑁆𑀢𑀺𑀓𑀸 𑀕𑀳𑀺𑀢𑀪𑀡𑁆𑀟𑀓𑀪𑀸𑀯𑁂𑀧𑀺 𑀧𑀸𑀘𑀺𑀢𑁆𑀢𑀺𑀬𑀁 𑀳𑁄𑀢𑀺, 𑀏𑀯𑀫𑀺𑀥𑀸𑀧𑀻𑀢𑀺 𑀓𑁂𑀘𑀺 𑀯𑀤𑀦𑁆𑀢𑀺, 𑀢𑀁 𑀦 𑀬𑀼𑀢𑁆𑀢𑀁. 𑀬𑀜𑁆𑀳𑀺 𑀅𑀲𑁆𑀲𑀸𑀫𑀺𑀓𑀪𑀽𑀫𑀺𑀁 𑀔𑀡𑀺𑀢𑁆𑀯𑀸 𑀲𑀫𑀼𑀝𑁆𑀞𑀸𑀧𑀺𑀢𑀁 𑀅𑀬𑁄𑀩𑀻𑀚𑀁, 𑀢𑀁 𑀪𑀢𑀓𑀸𑀦𑀁 𑀲𑀦𑁆𑀢𑀓𑀁 𑀦𑀸𑀫 𑀳𑁄𑀢𑀺, 𑀢𑀤𑀢𑁆𑀣𑀜𑁆𑀘 𑀢𑁂𑀲𑀁 𑀭𑀽𑀧𑀺𑀬𑀁 𑀤𑁂𑀦𑁆𑀢𑀲𑁆𑀲 𑀭𑀽𑀧𑀺𑀬𑀲𑀁𑀯𑁄𑀳𑀸𑀭𑁄𑀯 𑀳𑁄𑀢𑀺 𑀅𑀓𑀧𑁆𑀧𑀺𑀬𑀯𑁄𑀳𑀸𑀭𑁂𑀦 𑀭𑀚𑀦𑀘𑁆𑀙𑀮𑁆𑀮𑀺𑀆𑀤𑀻𑀦𑀁 𑀆𑀳𑀭𑀸𑀧𑀦𑁂 𑀓𑀬𑀯𑀺𑀓𑁆𑀓𑀬𑁄 𑀯𑀺𑀬, 𑀢𑀸𑀤𑀺𑀲𑀫𑁆𑀧𑀺 𑀧𑀭𑀪𑀡𑁆𑀟𑀁 𑀇𑀥 𑀯𑀢𑁆𑀣𑀥𑁄𑀯𑀦𑀸𑀤𑀻𑀲𑀼 𑀦𑀢𑁆𑀣𑀺, 𑀢𑀲𑁆𑀫𑀸 𑀅𑀝𑁆𑀞𑀓𑀣𑀸𑀧𑀫𑀸𑀡𑁂𑀦𑁂𑀯𑁂𑀢𑁆𑀣 𑀧𑀸𑀘𑀺𑀢𑁆𑀢𑀺𑀬𑀁 𑀕𑀳𑁂𑀢𑀩𑁆𑀩𑀁.

𑁫𑁯𑁭. 𑀧𑀼𑀜𑁆𑀜𑀁 𑀪𑀯𑀺𑀲𑁆𑀲𑀢𑀻𑀢𑀺 𑀤𑁂𑀢𑀻𑀢𑀺 𑀏𑀢𑁆𑀣 𑀲𑀘𑁂 𑀪𑀺𑀓𑁆𑀔𑀼 𑀅𑀢𑁆𑀢𑀦𑁄 𑀪𑀡𑁆𑀟𑀲𑁆𑀲 𑀅𑀧𑁆𑀧𑀕𑁆𑀖𑀢𑀁 𑀜𑀢𑁆𑀯𑀸𑀧𑀺 𑀅𑀓𑀣𑁂𑀢𑁆𑀯𑀸 ‘‘𑀇𑀤𑀸𑀦𑁂𑀯 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀕𑀡𑁆𑀳, 𑀫𑀸 𑀧𑀘𑁆𑀙𑀸 𑀯𑀺𑀧𑁆𑀧𑀝𑀺𑀲𑀸𑀭𑀻 𑀳𑁄𑀳𑀻’’𑀢𑀺 𑀯𑀤𑀢𑀺, 𑀇𑀢𑀭𑁄 𑀘 𑀅𑀢𑁆𑀢𑀦𑁄 𑀤𑀺𑀬𑁆𑀬𑀫𑀸𑀦𑀲𑁆𑀲 𑀫𑀳𑀕𑁆𑀖𑀢𑀁 𑀅𑀚𑀸𑀦𑀦𑁆𑀢𑁄 ‘‘𑀊𑀦𑀁 𑀯𑀸 𑀅𑀥𑀺𑀓𑀁 𑀯𑀸 𑀢𑀼𑀫𑁆𑀳𑀸𑀓𑀫𑁂𑀯𑀸’’𑀢𑀺 𑀤𑀢𑁆𑀯𑀸 𑀕𑀘𑁆𑀙𑀢𑀺, 𑀪𑀺𑀓𑁆𑀔𑀼𑀲𑁆𑀲 𑀅𑀦𑀸𑀧𑀢𑁆𑀢𑀺 𑀉𑀧𑀦𑀦𑁆𑀤𑀲𑁆𑀲 𑀯𑀺𑀬 𑀧𑀭𑀺𑀩𑁆𑀩𑀸𑀚𑀓𑀯𑀢𑁆𑀣𑀼𑀕𑁆𑀕𑀳𑀡𑁂. 𑀯𑀺𑀧𑁆𑀧𑀝𑀺𑀲𑀸𑀭𑀺𑀲𑁆𑀲 𑀧𑀼𑀦 𑀲𑀓𑀲𑀜𑁆𑀜𑀸𑀬 𑀆𑀕𑀢𑀲𑁆𑀲 𑀬𑀁 𑀅𑀥𑀺𑀓𑀁 𑀕𑀳𑀺𑀢𑀁, 𑀢𑀁 𑀤𑀸𑀢𑀩𑁆𑀩𑀁. 𑀬𑁂𑀦 𑀬𑀁 𑀧𑀭𑀺𑀯𑀢𑁆𑀢𑁂𑀢𑀺, 𑀢𑁂𑀲𑀁 𑀉𑀪𑀺𑀦𑁆𑀦𑀁 𑀓𑀧𑁆𑀧𑀺𑀬𑀯𑀢𑁆𑀣𑀼𑀢𑀸, 𑀅𑀲𑀳𑀥𑀫𑁆𑀫𑀺𑀓𑀢𑀸, 𑀓𑀬𑀯𑀺𑀓𑁆𑀓𑀬𑀸𑀧𑀚𑁆𑀚𑀦𑀜𑁆𑀘𑀸𑀢𑀺 𑀇𑀫𑀸𑀦𑁂𑀢𑁆𑀣 𑀢𑀻𑀡𑀺 𑀅𑀗𑁆𑀕𑀸𑀦𑀺.

𑀓𑀬𑀯𑀺𑀓𑁆𑀓𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀝𑁆𑀞𑀺𑀢𑁄 𑀓𑁄𑀲𑀺𑀬𑀯𑀕𑁆𑀕𑁄 𑀤𑀼𑀢𑀺𑀬𑁄.