𑁨. 𑀤𑀼𑀢𑀺𑀬𑀅𑀦𑀺𑀬𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁪𑁫𑁨. ‘‘𑀦 𑀮𑀪𑀢𑀺 𑀫𑀸𑀢𑀼𑀕𑀸𑀫𑁂𑀦 𑀲𑀤𑁆𑀥𑀺𑀁 𑀏𑀓𑁄 𑀏𑀓𑀸𑀬…𑀧𑁂… 𑀦𑀺𑀲𑀚𑁆𑀚𑀁 𑀓𑀧𑁆𑀧𑁂𑀢𑀼’’𑀦𑁆𑀢𑀺 𑀅𑀯𑀢𑁆𑀯𑀸 ‘‘𑀧𑀝𑀺𑀓𑁆𑀔𑀺𑀢𑁆𑀢𑀁 𑀫𑀸𑀢𑀼𑀕𑀸𑀫𑁂𑀦𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀢𑁆𑀢𑀸 ‘‘𑀏𑀓𑁄’’𑀢𑀺 𑀧𑀘𑁆𑀘𑀢𑁆𑀢𑀧𑀤𑀁 𑀧𑀝𑀺𑀓𑁆𑀔𑀺𑀢𑁆𑀢𑀧𑀤𑁂𑀦 𑀦 𑀲𑀫𑁂𑀢𑀺, ‘‘𑀏𑀓𑀲𑁆𑀲𑀸’’𑀢𑀺 𑀯𑀢𑁆𑀢𑀩𑁆𑀩𑁄𑀢𑀺 𑀲𑀸𑀥𑁂𑀦𑁆𑀢𑁄 𑀆𑀳 ‘‘𑀇𑀢𑀭𑀣𑀸 𑀳𑀻’’𑀢𑀺𑀆𑀤𑀺.

𑁪𑁫𑁩. 𑀧𑀭𑀺𑀯𑁂𑀡𑀗𑁆𑀕𑀡𑀸𑀤𑀻𑀢𑀺 𑀧𑀭𑀺𑀯𑁂𑀡𑀲𑁆𑀲 𑀫𑀸𑀴𑀓𑀁. 𑀆𑀤𑀺-𑀲𑀤𑁆𑀤𑁂𑀦 𑀧𑀸𑀓𑀸𑀭𑀸𑀤𑀺𑀧𑀭𑀺𑀓𑁆𑀔𑀺𑀢𑁆𑀢𑀁 𑀘𑁂𑀢𑀺𑀬𑀫𑀸𑀴𑀓𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀅𑀦𑁆𑀢𑁄𑀕𑀥𑀦𑁆𑀢𑀺 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀝𑁆𑀞𑀸𑀦𑁂 𑀏𑀯 𑀧𑀭𑀺𑀬𑀸𑀧𑀦𑁆𑀦𑀁. 𑀇𑀥 𑀇𑀢𑁆𑀣𑀻𑀧𑀺 𑀅𑀦𑀸𑀧𑀢𑁆𑀢𑀺𑀁 𑀓𑀭𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀲𑁆𑀫𑀸 𑀧𑀦 𑀇𑀢𑁆𑀣𑀻 𑀇𑀥𑁂𑀯 𑀅𑀦𑀸𑀧𑀢𑁆𑀢𑀺𑀁 𑀓𑀭𑁄𑀢𑀺, 𑀦 𑀧𑀼𑀭𑀺𑀫𑀲𑀺𑀓𑁆𑀔𑀸𑀧𑀤𑁂𑀢𑀺? 𑀇𑀫𑀲𑁆𑀲 𑀲𑀺𑀓𑁆𑀔𑀸𑀧𑀤𑀲𑁆𑀲 𑀫𑁂𑀣𑀼𑀦𑀁 𑀯𑀺𑀦𑀸 𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀸𑀬 𑀯𑀲𑁂𑀦 𑀆𑀕𑀢𑀢𑁆𑀢𑀸. 𑀫𑁂𑀣𑀼𑀦𑀫𑁂𑀯 𑀳𑀺 𑀇𑀢𑁆𑀣𑀺𑀬𑁄 𑀅𑀜𑁆𑀜𑀫𑀜𑁆𑀜𑀁 𑀧𑀝𑀺𑀘𑁆𑀙𑀸𑀤𑁂𑀦𑁆𑀢𑀺 𑀫𑀳𑀸𑀯𑀦𑁂 𑀤𑁆𑀯𑀸𑀭𑀁 𑀯𑀺𑀯𑀭𑀺𑀢𑁆𑀯𑀸 𑀦𑀺𑀤𑁆𑀤𑀽𑀧𑀕𑀢𑀫𑁆𑀳𑀺 𑀪𑀺𑀓𑁆𑀔𑀼𑀫𑁆𑀳𑀺 𑀯𑀺𑀬. 𑀤𑀼𑀝𑁆𑀞𑀼𑀮𑁆𑀮𑀁 𑀧𑀦 𑀦 𑀧𑀝𑀺𑀘𑁆𑀙𑀸𑀤𑁂𑀦𑁆𑀢𑀺, 𑀢𑁂𑀦𑁂𑀯 𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀸𑀲𑀺𑀓𑁆𑀔𑀸𑀧𑀤𑁂 ‘‘𑀬𑀸 𑀢𑀸 𑀇𑀢𑁆𑀣𑀺𑀬𑁄 𑀳𑀺𑀭𑀺𑀫𑀦𑀸, 𑀢𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀪𑀺𑀓𑁆𑀔𑀽 𑀉𑀚𑁆𑀛𑀸𑀧𑁂𑀲𑀼’’𑀦𑁆𑀢𑀺 (𑀧𑀸𑀭𑀸. 𑁨𑁮𑁩) 𑀯𑀼𑀢𑁆𑀢𑀁, 𑀢𑀲𑁆𑀫𑀸 ‘‘𑀇𑀢𑁆𑀣𑀻𑀧𑀺 𑀅𑀦𑀸𑀧𑀢𑁆𑀢𑀺𑀁 𑀓𑀭𑁄𑀢𑀻’’𑀢𑀺 𑀯𑀼𑀢𑁆𑀢𑀁, ‘‘𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀝𑁆𑀞𑀸𑀦𑀢𑁆𑀢𑀸’’𑀢𑀺𑀧𑀺 𑀓𑀸𑀭𑀡𑀁 𑀯𑀤𑀦𑁆𑀢𑀺.

𑀓𑀸𑀬𑁂𑀦𑀸𑀧𑀺 𑀤𑀼𑀝𑁆𑀞𑀼𑀮𑁆𑀮𑁄𑀪𑀸𑀲𑀲𑀫𑁆𑀪𑀯𑀢𑁄 𑀇𑀫𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂 𑀘𑀓𑁆𑀔𑀼𑀲𑁆𑀲 𑀭𑀳𑁄, 𑀲𑁄𑀢𑀲𑁆𑀲 𑀭𑀳𑁄 𑀘 𑀅𑀥𑀺𑀧𑁆𑀧𑁂𑀢𑁄𑀢𑀺 𑀆𑀳 ‘‘𑀅𑀦𑀦𑁆𑀥𑁄 𑀅𑀩𑀥𑀺𑀭𑁄’’𑀢𑀺𑀆𑀤𑀺. 𑀓𑁂𑀘𑀺 𑀧𑀦 𑀯𑀺𑀪𑀗𑁆𑀕𑁂 ‘‘𑀦𑀸𑀮𑀁 𑀓𑀫𑁆𑀫𑀦𑀺𑀬𑀦𑁆𑀢𑀺 𑀦 𑀲𑀓𑁆𑀓𑀸 𑀳𑁄𑀢𑀺 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀺𑀢𑀼’𑀦𑁆𑀢𑀺 (𑀧𑀸𑀭𑀸. 𑁪𑁫𑁪) 𑀏𑀢𑁆𑀢𑀓𑀫𑁂𑀯 𑀯𑀢𑁆𑀯𑀸 ‘𑀦 𑀲𑀓𑁆𑀓𑀸 𑀳𑁄𑀢𑀺 𑀓𑀸𑀬𑀲𑀁𑀲𑀕𑁆𑀕𑀁 𑀲𑀫𑀸𑀧𑀚𑁆𑀚𑀺𑀢𑀼’𑀦𑁆𑀢𑀺 𑀅𑀯𑀼𑀢𑁆𑀢𑀢𑁆𑀢𑀸 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑁂𑀧𑀺 𑀞𑀸𑀦𑁂 𑀭𑀳𑁄 𑀅𑀜𑁆𑀜𑁂𑀲𑀁 𑀅𑀪𑀸𑀯𑀁 𑀤𑀺𑀲𑁆𑀯𑀸 𑀏𑀓𑀸𑀬 𑀇𑀢𑁆𑀣𑀺𑀬𑀸 𑀓𑀸𑀬𑀲𑀁𑀲𑀕𑁆𑀕𑁄𑀧𑀺 𑀲𑀓𑁆𑀓𑀸 𑀆𑀧𑀚𑁆𑀚𑀺𑀢𑀼𑀦𑁆𑀢𑀺 𑀅𑀦𑁆𑀢𑁄𑀤𑁆𑀯𑀸𑀤𑀲𑀳𑀢𑁆𑀣𑁂 𑀲𑀯𑀦𑀽𑀧𑀘𑀸𑀭𑁂 𑀞𑀺𑀢𑁄 𑀅𑀩𑀥𑀺𑀭𑁄𑀧𑀺 𑀅𑀦𑁆𑀥𑁄 𑀓𑀸𑀬𑀲𑀁𑀲𑀕𑁆𑀕𑀲𑁆𑀲𑀸𑀧𑀺 𑀲𑀩𑁆𑀪𑀸𑀯𑀸𑀪𑀸𑀯𑀁 𑀦 𑀚𑀸𑀦𑀸𑀢𑀻𑀢𑀺 𑀓𑀸𑀬𑁂𑀦 𑀤𑀼𑀝𑁆𑀞𑀼𑀮𑁆𑀮𑁄𑀪𑀸𑀲𑀦𑀲𑀩𑁆𑀪𑀸𑀯𑀁 𑀅𑀫𑀦𑀲𑀺𑀓𑀢𑁆𑀯𑀸𑀧𑀺 𑀓𑀸𑀬𑀲𑀁𑀲𑀕𑁆𑀕𑀸𑀧𑀢𑁆𑀢𑀺𑀬𑀸𑀧𑀺 𑀧𑀭𑀺𑀳𑀸𑀭𑀸𑀬 𑀅𑀦𑀦𑁆𑀥𑁄 𑀅𑀩𑀥𑀺𑀭𑁄𑀢𑀺𑀆𑀤𑀺 𑀯𑀼𑀢𑁆𑀢’’𑀦𑁆𑀢𑀺 𑀯𑀤𑀦𑁆𑀢𑀺. 𑀬𑀁 𑀧𑀦 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 ‘‘𑀓𑀸𑀬𑀲𑀁𑀲𑀕𑁆𑀕𑀯𑀲𑁂𑀦 𑀅𑀦𑀦𑁆𑀥𑁄 𑀯𑀼𑀢𑁆𑀢𑁄’’𑀢𑀺 (𑀲𑀸𑀭𑀢𑁆𑀣. 𑀝𑀻. 𑁨.𑁪𑁫𑁩) 𑀯𑀼𑀢𑁆𑀢𑀁, 𑀢𑀁 𑀧𑀦 𑀓𑀸𑀬𑁂𑀦 𑀤𑀼𑀝𑁆𑀞𑀼𑀮𑁆𑀮𑁄𑀪𑀸𑀲𑀦𑀲𑀫𑁆𑀪𑀯𑀁 𑀅𑀫𑀦𑀲𑀺𑀓𑀢𑁆𑀯𑀸 𑀯𑀼𑀢𑁆𑀢𑀁, 𑀓𑀸𑀬𑀲𑀁𑀲𑀕𑁆𑀕𑀯𑀲𑁂𑀦𑀸𑀧𑀻𑀢𑀺 𑀕𑀳𑁂𑀢𑀩𑁆𑀩𑀁. 𑀢𑁂𑀦𑁂𑀯 ‘‘𑀇𑀫𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂 𑀲𑁄𑀢𑀲𑁆𑀲 𑀭𑀳𑁄 𑀏𑀯 𑀅𑀥𑀺𑀧𑁆𑀧𑁂𑀢𑁄…𑀧𑁂… 𑀓𑁂𑀦𑀘𑀺 𑀧𑀦 ‘𑀤𑁆𑀯𑁂𑀧𑀺 𑀭𑀳𑀸 𑀇𑀥 𑀅𑀥𑀺𑀧𑁆𑀧𑁂𑀢𑀸’𑀢𑀺 𑀯𑀼𑀢𑁆𑀢𑀁, 𑀢𑀁 𑀦 𑀕𑀳𑁂𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁. 𑀬𑀁 𑀧𑀦 𑀘𑀓𑁆𑀔𑀼𑀲𑁆𑀲 𑀭𑀳𑀸𑀪𑀸𑀯𑀲𑀸𑀥𑀦𑀢𑁆𑀣𑀁 ‘‘𑀦 𑀳𑀺 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑁂 𑀑𑀓𑀸𑀲𑁂 𑀘𑀓𑁆𑀔𑀼𑀲𑁆𑀲 𑀭𑀳𑁄 𑀲𑀫𑁆𑀪𑀯𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀢𑀁 𑀦 𑀬𑀼𑀢𑁆𑀢𑀁 𑀅𑀢𑀺𑀤𑀽𑀭𑀢𑀭𑁂 𑀞𑀺𑀢𑀲𑁆𑀲 𑀓𑀸𑀬𑁂𑀦 𑀑𑀪𑀸𑀲𑀦𑀫𑁆𑀧𑀺 𑀳𑀢𑁆𑀣𑀕𑁆𑀕𑀸𑀳𑀸𑀤𑀻𑀦𑀺𑀧𑀺 𑀲𑀮𑁆𑀮𑀓𑁆𑀔𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸. 𑀢𑁂𑀦𑁂𑀯 𑀧𑀸𑀴𑀺𑀬𑀁 ‘‘𑀘𑀓𑁆𑀔𑀼𑀲𑁆𑀲 𑀭𑀳𑁄’’𑀢𑀺 𑀯𑀼𑀢𑁆𑀢𑀁, 𑀅𑀝𑁆𑀞𑀓𑀣𑀸𑀬𑀁 𑀅𑀧𑁆𑀧𑀝𑀺𑀓𑁆𑀔𑀺𑀢𑁆𑀢𑀁. 𑀦 𑀓𑁂𑀯𑀮𑀜𑁆𑀘 𑀅𑀧𑁆𑀧𑀝𑀺𑀓𑁆𑀔𑀺𑀢𑁆𑀢𑀁, 𑀅𑀣 𑀔𑁄 ‘‘𑀅𑀦𑀦𑁆𑀥𑁄 𑀩𑀥𑀺𑀭𑁄𑀢𑀺 𑀘 𑀅𑀦𑁆𑀥𑁄 𑀯𑀸 𑀅𑀩𑀥𑀺𑀭𑁄𑀧𑀺 𑀦 𑀓𑀭𑁄𑀢𑀻’’𑀢𑀺 𑀘 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀤𑁆𑀯𑁂𑀧𑀺 𑀭𑀳𑀸 𑀇𑀥 𑀕𑀳𑁂𑀢𑀩𑁆𑀩𑀸. ‘‘𑀅𑀦𑁆𑀢𑁄𑀤𑁆𑀯𑀸𑀤𑀲𑀳𑀢𑁆𑀣𑁂’’𑀢𑀺𑀇𑀫𑀺𑀦𑀸 𑀲𑁄𑀢𑀲𑁆𑀲 𑀭𑀳𑁄 𑀤𑁆𑀯𑀸𑀤𑀲𑀳𑀢𑁆𑀣𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑁄𑀢𑀺 𑀇𑀤𑀁 𑀤𑀲𑁆𑀲𑁂𑀢𑀺. 𑀘𑀓𑁆𑀔𑀼𑀲𑁆𑀲 𑀭𑀳𑁄 𑀧𑀦 𑀬𑀢𑁆𑀣 𑀞𑀺𑀢𑀲𑁆𑀲 𑀓𑀸𑀬𑀯𑀺𑀓𑀸𑀭𑀸𑀤𑀬𑁄 𑀦 𑀧𑀜𑁆𑀜𑀸𑀬𑀦𑁆𑀢𑀺, 𑀢𑁂𑀦 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑀩𑁆𑀩𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀩𑀥𑀺𑀭𑁄 𑀧𑀦 𑀘𑀓𑁆𑀔𑀼𑀫𑀸𑀧𑀻𑀢𑀺 𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀸𑀲𑀗𑁆𑀖𑀸𑀤𑀺𑀲𑁂𑀲𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀤𑀼𑀝𑁆𑀞𑀼𑀮𑁆𑀮𑀸𑀧𑀢𑁆𑀢𑀺 𑀯𑀼𑀢𑁆𑀢𑀸𑀢𑀺 𑀧𑀼𑀭𑀺𑀫𑀲𑀺𑀓𑁆𑀔𑀸𑀧𑀤𑁂 𑀯𑀼𑀢𑁆𑀢𑁂𑀳𑀺 𑀅𑀥𑀺𑀓𑀯𑀲𑁂𑀦 𑀤𑀼𑀝𑁆𑀞𑀼𑀮𑁆𑀮𑀸𑀧𑀢𑁆𑀢𑀺 𑀘 𑀯𑀼𑀢𑁆𑀢𑀸𑀢𑀺 𑀏𑀯𑀫𑀢𑁆𑀣𑁄 𑀕𑀳𑁂𑀢𑀩𑁆𑀩𑁄, 𑀦 𑀧𑀦 𑀤𑀼𑀝𑁆𑀞𑀼𑀮𑁆𑀮𑀸𑀧𑀢𑁆𑀢𑀺 𑀏𑀯𑀸𑀢𑀺 𑀓𑀸𑀬𑀲𑀁𑀲𑀕𑁆𑀕𑀲𑁆𑀲𑀸𑀧𑀺 𑀇𑀥 𑀕𑀳𑁂𑀢𑀩𑁆𑀩𑀢𑁄. 𑀢𑁂𑀦𑁂𑀯 ‘‘𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀜𑁆𑀘 𑀧𑀭𑀺𑀳𑀸𑀧𑁂𑀢𑁆𑀯𑀸’’𑀢𑀺 𑀏𑀢𑁆𑀢𑀓𑀫𑁂𑀯 𑀯𑀼𑀢𑁆𑀢𑀁, 𑀇𑀢𑀭𑀣𑀸 ‘‘𑀓𑀸𑀬𑀲𑀁𑀲𑀕𑁆𑀕𑀜𑁆𑀘𑀸’’𑀢𑀺 𑀯𑀢𑁆𑀢𑀩𑁆𑀩𑀁 𑀪𑀯𑁂𑀬𑁆𑀬.

𑀢𑀺𑀲𑀫𑀼𑀝𑁆𑀞𑀸𑀦𑀦𑁆𑀢𑀺𑀆𑀤𑀺 𑀧𑀦 𑀧𑀼𑀭𑀺𑀫𑀲𑀺𑀓𑁆𑀔𑀸𑀧𑀤𑁂 𑀆𑀕𑀢𑁂𑀳𑀺 𑀅𑀥𑀺𑀓𑀲𑁆𑀲 𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀸𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲 𑀯𑀲𑁂𑀦 𑀯𑀼𑀢𑁆𑀢𑀁 𑀓𑀸𑀬𑀲𑀁𑀲𑀕𑁆𑀕𑀸𑀤𑀻𑀦𑀫𑁆𑀧𑀺 𑀧𑀼𑀭𑀺𑀫𑀲𑀺𑀓𑁆𑀔𑀸𑀧𑀤𑁂 𑀏𑀯 𑀯𑀼𑀢𑁆𑀢𑀢𑁆𑀢𑀸, 𑀇𑀥 𑀧𑀦 𑀦 𑀯𑀼𑀢𑁆𑀢𑀦𑁆𑀢𑀺𑀧𑀺 𑀯𑀤𑀦𑁆𑀢𑀺, 𑀯𑀻𑀫𑀁𑀲𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑀁.

𑀤𑀼𑀢𑀺𑀬𑀅𑀦𑀺𑀬𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀝𑁆𑀞𑀺𑀢𑁄 𑀅𑀦𑀺𑀬𑀢𑀯𑀡𑁆𑀡𑀦𑀸𑀦𑀬𑁄.