𑁫. 𑀲𑀜𑁆𑀘𑀭𑀺𑀢𑁆𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁨𑁯𑁬. 𑀧𑀜𑁆𑀘𑀫𑁂 𑀧𑀡𑁆𑀟𑀺𑀘𑁆𑀘𑁂𑀦𑀸𑀢𑀺 𑀲𑀪𑀸𑀯𑀜𑀸𑀡𑁂𑀦. 𑀕𑀢𑀺𑀫𑀦𑁆𑀢𑀸𑀢𑀺 𑀲𑀪𑀸𑀯𑀜𑀸𑀡𑀕𑀢𑀺𑀬𑀼𑀢𑁆𑀢𑀸. 𑀯𑁂𑀬𑁆𑀬𑀢𑁆𑀢𑀺𑀬𑁂𑀦𑀸𑀢𑀺 𑀇𑀢𑁆𑀣𑀺𑀓𑀢𑁆𑀢𑀩𑁆𑀩𑁂𑀲𑀼 𑀲𑀺𑀓𑁆𑀔𑀺𑀢𑀜𑀸𑀡𑁂𑀦. 𑀫𑁂𑀥𑀸𑀬𑀸𑀢𑀺 𑀅𑀲𑀺𑀓𑁆𑀔𑀺𑀢𑁂𑀲𑀼𑀧𑀺 𑀢𑀁𑀇𑀢𑁆𑀣𑀺𑀓𑀢𑁆𑀢𑀩𑁆𑀩𑁂𑀲𑀼 𑀞𑀸𑀦𑀼𑀧𑁆𑀧𑀢𑁆𑀢𑀺𑀬𑀸 𑀧𑀜𑁆𑀜𑀸𑀬. 𑀙𑁂𑀓𑀸𑀢𑀺 𑀓𑀸𑀬𑁂𑀦 𑀧𑀘𑀦𑀸𑀤𑀺𑀓𑀼𑀲𑀮𑀸.

𑀆𑀯𑀳𑀦𑀁 𑀆𑀯𑀸𑀳𑁄, 𑀤𑀸𑀭𑀺𑀓𑀸𑀬 𑀕𑀳𑀡𑀁. 𑀯𑀺𑀥𑀺𑀦𑀸 𑀧𑀭𑀓𑀼𑀮𑁂 𑀯𑀳𑀦𑀁 𑀧𑁂𑀲𑀦𑀁 𑀯𑀺𑀯𑀸𑀳𑁄, 𑀤𑀸𑀭𑀺𑀓𑀸𑀬 𑀤𑀸𑀦𑀁.

𑁨𑁯𑁭. 𑀭𑀦𑁆𑀥𑀸𑀧𑀦𑀁 𑀪𑀢𑁆𑀢𑀧𑀘𑀸𑀧𑀦𑀁. 𑀩𑁆𑀬𑀜𑁆𑀚𑀦𑀸𑀤𑀺𑀲𑀫𑁆𑀧𑀸𑀤𑀦𑀁 𑀧𑀘𑀸𑀧𑀦𑀁. 𑀦 𑀉𑀧𑀸𑀳𑀝𑀦𑁆𑀢𑀺 𑀦 𑀤𑀺𑀦𑁆𑀦𑀁. 𑀓𑀬𑁄 𑀦𑀸𑀫 𑀕𑀳𑀡𑀁. 𑀯𑀺𑀓𑁆𑀓𑀬𑁄 𑀦𑀸𑀫 𑀤𑀸𑀦𑀁. 𑀢𑀤𑀼𑀪𑀬𑀁 𑀲𑀗𑁆𑀕𑀳𑁂𑀢𑁆𑀯𑀸 ‘‘𑀯𑁄𑀳𑀸𑀭𑁄’’𑀢𑀺 𑀯𑀼𑀢𑁆𑀢𑀁.

𑁩𑁦𑁦. ‘‘𑀅𑀩𑁆𑀪𑀼𑀢𑀁 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺 𑀇𑀫𑀺𑀦𑀸 𑀤𑀼𑀓𑁆𑀓𑀝𑀁 𑀳𑁄𑀢𑀻𑀢𑀺 𑀤𑀻𑀧𑁂𑀢𑀺. ‘‘𑀧𑀭𑀸𑀚𑀺𑀢𑁂𑀦 𑀤𑀸𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 𑀅𑀤𑁂𑀦𑁆𑀢𑁄 𑀥𑀼𑀭𑀦𑀺𑀓𑁆𑀔𑁂𑀧𑁂𑀦 𑀓𑀸𑀭𑁂𑀢𑀩𑁆𑀩𑁄. 𑀅𑀘𑀺𑀭𑀓𑀸𑀮𑁂 𑀅𑀥𑀺𑀓𑀸𑀭𑁄 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀅𑀘𑀺𑀭𑀓𑀸𑀮𑀸𑀥𑀺𑀓𑀸𑀭𑀺𑀓𑀁, 𑀲𑀜𑁆𑀘𑀭𑀺𑀢𑁆𑀢𑀁. ‘‘𑀅𑀘𑀺𑀭𑀓𑀸𑀮𑀸𑀘𑀸𑀭𑀺𑀓’’𑀦𑁆𑀢𑀺 𑀯𑀸 𑀧𑀸𑀞𑁄. 𑀅𑀘𑀺𑀭𑀓𑀸𑀮𑁂 𑀆𑀘𑀸𑀭𑁄 𑀅𑀚𑁆𑀛𑀸𑀘𑀸𑀭𑁄 𑀏𑀢𑀲𑁆𑀲𑀸𑀢𑀺 𑀬𑁄𑀚𑀦𑀸.

𑁩𑁦𑁧. 𑀓𑀺𑀜𑁆𑀘𑀸𑀧𑀺 𑀏𑀳𑀺𑀪𑀺𑀓𑁆𑀔𑀼𑀆𑀤𑀺𑀓𑀸𑀧𑀺 𑀲𑀜𑁆𑀘𑀭𑀺𑀢𑁆𑀢𑀸𑀤𑀺𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀦𑁆𑀢𑀺, 𑀢𑁂𑀲𑀁 𑀧𑀦 𑀅𑀲𑀩𑁆𑀩𑀓𑀸𑀮𑀺𑀓𑀢𑁆𑀢𑀸, 𑀅𑀧𑁆𑀧𑀓𑀢𑁆𑀢𑀸 𑀘 𑀇𑀥𑀸𑀧𑀺 𑀜𑀢𑁆𑀢𑀺𑀘𑀢𑀼𑀢𑁆𑀣𑁂𑀦𑁂𑀯 𑀓𑀫𑁆𑀫𑁂𑀦 𑀉𑀧𑀲𑀫𑁆𑀧𑀦𑁆𑀦𑀁 𑀲𑀦𑁆𑀥𑀸𑀬 ‘‘𑀬𑁆𑀯𑀸𑀬’’𑀦𑁆𑀢𑀺𑀆𑀤𑀺𑀧𑀤𑀪𑀸𑀚𑀦𑀫𑀸𑀳. 𑀲𑀜𑁆𑀘𑀭𑀡𑀁 𑀲𑀜𑁆𑀘𑀭𑁄, 𑀲𑁄 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀲𑀜𑁆𑀘𑀭𑀻, 𑀢𑀲𑁆𑀲 𑀪𑀸𑀯𑁄 𑀲𑀜𑁆𑀘𑀭𑀺𑀢𑁆𑀢𑀁. 𑀢𑁂𑀦𑀸𑀳 ‘‘𑀲𑀜𑁆𑀘𑀭𑀡𑀪𑀸𑀯’’𑀦𑁆𑀢𑀺. 𑀲𑀜𑁆𑀘𑀭𑀢𑀻𑀢𑀺 𑀲𑀜𑁆𑀘𑀭𑀡𑁄, 𑀧𑀼𑀕𑁆𑀕𑀮𑁄, 𑀢𑀲𑁆𑀲 𑀪𑀸𑀯𑁄 𑀲𑀜𑁆𑀘𑀭𑀡𑀪𑀸𑀯𑁄, 𑀢𑀁 𑀇𑀢𑁆𑀣𑀺𑀧𑀼𑀭𑀺𑀲𑀸𑀦𑀁 𑀅𑀦𑁆𑀢𑀭𑁂 𑀲𑀜𑁆𑀘𑀭𑀡𑀪𑀸𑀯𑀦𑁆𑀢𑀺 𑀅𑀢𑁆𑀣𑁄.

𑀚𑀸𑀬𑀸𑀪𑀸𑀯𑁂𑀢𑀺 𑀪𑀭𑀺𑀬𑀪𑀸𑀯𑀸𑀬. 𑀚𑀸𑀭𑀪𑀸𑀯𑁂𑀢𑀺 𑀲𑀸𑀫𑀺𑀪𑀸𑀯𑀸𑀬, 𑀢𑀁𑀦𑀺𑀫𑀺𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀦𑀺𑀫𑀺𑀢𑁆𑀢𑀢𑁆𑀣𑁂 𑀳𑀺 𑀏𑀢𑀁 𑀪𑀼𑀫𑁆𑀫𑀯𑀘𑀦𑀁. 𑀓𑀺𑀜𑁆𑀘𑀸𑀧𑀺 ‘‘𑀚𑀸𑀭𑀢𑁆𑀢𑀦𑁂’’𑀢𑀺 𑀧𑀤𑀲𑁆𑀲 𑀧𑀤𑀪𑀸𑀚𑀦𑁂 ‘‘𑀚𑀸𑀭𑀻 𑀪𑀯𑀺𑀲𑁆𑀲𑀲𑀻’’𑀢𑀺 (𑀧𑀸𑀭𑀸. 𑁩𑁦𑁨) 𑀇𑀢𑁆𑀣𑀺𑀮𑀺𑀗𑁆𑀕𑀯𑀲𑁂𑀦 𑀧𑀤𑀪𑀸𑀚𑀦𑀁 𑀯𑀼𑀢𑁆𑀢𑀁, ‘‘𑀲𑀜𑁆𑀘𑀭𑀺𑀢𑁆𑀢𑀁 𑀲𑀫𑀸𑀧𑀚𑁆𑀚𑁂𑀬𑁆𑀬𑀸’’𑀢𑀺 𑀧𑀤𑀲𑁆𑀲 𑀧𑀦 𑀦𑀺𑀤𑁆𑀤𑁂𑀲𑁂 ‘‘𑀇𑀢𑁆𑀣𑀺𑀬𑀸 𑀯𑀸 𑀧𑀳𑀺𑀢𑁄 𑀧𑀼𑀭𑀺𑀲𑀲𑁆𑀲 𑀲𑀦𑁆𑀢𑀺𑀓𑁂 𑀕𑀘𑁆𑀙𑀢𑀺, 𑀧𑀼𑀭𑀺𑀲𑁂𑀦 𑀯𑀸 𑀧𑀳𑀺𑀢𑁄 𑀇𑀢𑁆𑀣𑀺𑀬𑀸 𑀲𑀦𑁆𑀢𑀺𑀓𑁂 𑀕𑀘𑁆𑀙𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀧𑀼𑀭𑀺𑀲𑀲𑁆𑀲𑀸𑀧𑀺 𑀲𑀦𑁆𑀢𑀺𑀓𑁂 𑀯𑀢𑁆𑀢𑀩𑁆𑀩𑀸𑀓𑀸𑀭𑀁 𑀤𑀲𑁆𑀲𑁂𑀢𑀼𑀁 ‘‘𑀚𑀸𑀭𑀢𑁆𑀢𑀦𑁂’’𑀢𑀺 𑀦𑀺𑀤𑁆𑀤𑁂𑀲𑀲𑁆𑀲 𑀇𑀢𑁆𑀣𑀺𑀧𑀼𑀭𑀺𑀲𑀲𑀸𑀥𑀸𑀭𑀡𑀢𑁆𑀢𑀸 ‘‘𑀇𑀢𑁆𑀣𑀺𑀬𑀸 𑀫𑀢𑀺𑀁 𑀧𑀼𑀭𑀺𑀲𑀲𑁆𑀲 𑀆𑀭𑁄𑀘𑁂𑀦𑁆𑀢𑁄 𑀚𑀸𑀭𑀢𑁆𑀢𑀦𑁂 𑀆𑀭𑁄𑀘𑁂𑀢𑀻’’𑀢𑀺 𑀯𑀼𑀢𑁆𑀢𑀁. 𑀧𑀸𑀴𑀺𑀬𑀁 𑀧𑀦 𑀧𑀼𑀭𑀺𑀲𑀲𑁆𑀲 𑀫𑀢𑀺𑀁 𑀇𑀢𑁆𑀣𑀺𑀬𑀸 𑀆𑀭𑁄𑀘𑀦𑀯𑀲𑁂𑀦𑁂𑀯 𑀧𑀤𑀤𑁆𑀯𑀬𑁂𑀧𑀺 𑀬𑁄𑀚𑀦𑀸 𑀓𑀢𑀸, 𑀢𑀤𑀦𑀼𑀲𑀸𑀭𑁂𑀦 𑀇𑀢𑁆𑀣𑀺𑀬𑀸 𑀫𑀢𑀺𑀁 𑀧𑀼𑀭𑀺𑀲𑀲𑁆𑀲 𑀆𑀭𑁄𑀘𑀦𑀸𑀓𑀸𑀭𑁄𑀧𑀺 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀦𑁆𑀢𑀺.

𑀇𑀤𑀸𑀦𑀺 𑀧𑀸𑀴𑀺𑀬𑀁 𑀯𑀼𑀢𑁆𑀢𑀦𑀬𑁂𑀦𑀸𑀧𑀺 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀧𑀺𑀘𑀸’’𑀢𑀺𑀆𑀤𑀺𑀫𑀸𑀳. ‘‘𑀧𑀢𑀺 𑀪𑀯𑀺𑀲𑁆𑀲𑀲𑀻’’𑀢𑀺 𑀇𑀤𑀁 𑀚𑀸𑀬𑀸𑀲𑀤𑁆𑀤𑀲𑁆𑀲 𑀇𑀢𑁆𑀣𑀺𑀮𑀺𑀗𑁆𑀕𑀦𑀺𑀬𑀫𑀢𑁄 𑀧𑀼𑀭𑀺𑀲𑀧𑀭𑀺𑀬𑀸𑀬𑁂𑀦 𑀯𑀼𑀢𑁆𑀢𑀁, 𑀦𑀺𑀩𑀤𑁆𑀥𑀲𑀸𑀫𑀺𑀓𑁄 𑀪𑀯𑀺𑀲𑁆𑀲𑀲𑀻𑀢𑀺 𑀅𑀢𑁆𑀣𑁄. 𑀚𑀸𑀭𑁄 𑀪𑀯𑀺𑀲𑁆𑀲𑀲𑀻𑀢𑀺 𑀫𑀺𑀘𑁆𑀙𑀸𑀘𑀸𑀭𑀪𑀸𑀯𑁂𑀦 𑀉𑀧𑀕𑀘𑁆𑀙𑀦𑀓𑁄 𑀪𑀯𑀺𑀲𑁆𑀲𑀲𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁩𑁦𑁩. 𑀲𑁂𑀭𑀺𑀯𑀺𑀳𑀸𑀭𑀦𑁆𑀢𑀺 𑀲𑀘𑁆𑀙𑀦𑁆𑀤𑀘𑀸𑀭𑀁. 𑀅𑀢𑁆𑀢𑀦𑁄 𑀯𑀲𑀦𑁆𑀢𑀺 𑀅𑀢𑁆𑀢𑀦𑁄 𑀆𑀡𑀁. 𑀕𑁄𑀢𑁆𑀢𑀯𑀦𑁆𑀢𑁂𑀲𑀼 𑀕𑁄𑀢𑁆𑀢-𑀲𑀤𑁆𑀤𑁄, 𑀥𑀫𑁆𑀫𑀘𑀸𑀭𑀻𑀲𑀼 𑀘 𑀥𑀫𑁆𑀫-𑀲𑀤𑁆𑀤𑁄 𑀯𑀢𑁆𑀢𑀢𑀻𑀢𑀺 𑀆𑀳 ‘‘𑀲𑀕𑁄𑀢𑁆𑀢𑁂𑀳𑀻’’𑀢𑀺𑀆𑀤𑀺. 𑀢𑀢𑁆𑀣 𑀲𑀕𑁄𑀢𑁆𑀢𑁂𑀳𑀻𑀢𑀺 𑀲𑀫𑀸𑀦𑀕𑁄𑀢𑁆𑀢𑁂𑀳𑀺. 𑀲𑀳𑀥𑀫𑁆𑀫𑀺𑀓𑁂𑀳𑀻𑀢𑀺 𑀏𑀓𑀲𑁆𑀲 𑀲𑀢𑁆𑀣𑀼 𑀲𑀸𑀲𑀦𑁂 𑀲𑀳𑀘𑀭𑀺𑀢𑀩𑁆𑀩𑀥𑀫𑁆𑀫𑁂𑀳𑀺, 𑀲𑀫𑀸𑀦𑀓𑀼𑀮𑀥𑀫𑁆𑀫𑁂𑀳𑀺 𑀯𑀸. 𑀢𑁂𑀦𑁂𑀯𑀸𑀳 ‘‘𑀏𑀓𑀁 𑀲𑀢𑁆𑀣𑀸𑀭’’𑀦𑁆𑀢𑀺𑀆𑀤𑀺. 𑀏𑀓𑀕𑀡𑀧𑀭𑀺𑀬𑀸𑀧𑀦𑁆𑀦𑁂𑀳𑀻𑀢𑀺 𑀫𑀸𑀮𑀸𑀓𑀸𑀭𑀸𑀤𑀺𑀏𑀓𑀕𑀡𑀧𑀭𑀺𑀬𑀸𑀧𑀦𑁆𑀦𑁂𑀳𑀺.

𑀲𑀲𑁆𑀲𑀸𑀫𑀺𑀓𑀸 𑀲𑀸𑀭𑀓𑁆𑀔𑀸. 𑀬𑀲𑁆𑀲𑀸 𑀕𑀫𑀦𑁂 𑀭𑀜𑁆𑀜𑀸 𑀤𑀡𑁆𑀟𑁄 𑀞𑀧𑀺𑀢𑁄, 𑀲𑀸 𑀲𑀧𑀭𑀺𑀤𑀡𑁆𑀟𑀸. 𑀧𑀘𑁆𑀙𑀺𑀫𑀸𑀦𑀁 𑀤𑁆𑀯𑀺𑀦𑁆𑀦𑀦𑁆𑀢𑀺 𑀲𑀸𑀭𑀓𑁆𑀔𑀲𑀧𑀭𑀺𑀤𑀡𑁆𑀟𑀸𑀦𑀁. 𑀫𑀺𑀘𑁆𑀙𑀸𑀘𑀸𑀭𑁄 𑀳𑁄𑀢𑀻𑀢𑀺 𑀢𑀸𑀲𑀼 𑀕𑀢𑀧𑀼𑀭𑀺𑀲𑀸𑀦𑀁 𑀯𑀺𑀬 𑀢𑀸𑀲𑀫𑁆𑀧𑀺 𑀫𑀺𑀘𑁆𑀙𑀸𑀘𑀸𑀭𑁄 𑀳𑁄𑀢𑀺 𑀲𑀲𑁆𑀲𑀸𑀫𑀺𑀓𑀪𑀸𑀯𑀢𑁄. 𑀦 𑀇𑀢𑀭𑀸𑀲𑀦𑁆𑀢𑀺 𑀫𑀸𑀢𑀼𑀭𑀓𑁆𑀔𑀺𑀢𑀸𑀤𑀻𑀦𑀁 𑀅𑀝𑁆𑀞𑀦𑁆𑀦𑀁 𑀫𑀺𑀘𑁆𑀙𑀸𑀘𑀸𑀭𑁄 𑀦𑀢𑁆𑀣𑀺 𑀅𑀲𑁆𑀲𑀸𑀫𑀺𑀓𑀢𑁆𑀢𑀸, 𑀢𑀸𑀲𑀼 𑀕𑀢𑀸𑀦𑀁 𑀧𑀼𑀭𑀺𑀲𑀸𑀦𑀫𑁂𑀯 𑀫𑀺𑀘𑁆𑀙𑀸𑀘𑀸𑀭𑁄 𑀳𑁄𑀢𑀺 𑀫𑀸𑀢𑀸𑀤𑀻𑀳𑀺 𑀭𑀓𑁆𑀔𑀺𑀢𑀢𑁆𑀢𑀸. 𑀧𑀼𑀭𑀺𑀲𑀸 𑀳𑀺 𑀧𑀭𑁂𑀳𑀺 𑀬𑁂𑀳𑀺 𑀓𑁂𑀳𑀺𑀘𑀺 𑀕𑁄𑀧𑀺𑀢𑀁 𑀇𑀢𑁆𑀣𑀺𑀁 𑀕𑀦𑁆𑀢𑀼𑀁 𑀦 𑀮𑀪𑀦𑁆𑀢𑀺, 𑀇𑀢𑁆𑀣𑀺𑀬𑁄 𑀧𑀦 𑀓𑁂𑀦𑀘𑀺 𑀧𑀼𑀭𑀺𑀲𑁂𑀦 𑀪𑀭𑀺𑀬𑀸𑀪𑀸𑀯𑁂𑀦 𑀕𑀳𑀺𑀢𑀸𑀯 𑀧𑀼𑀭𑀺𑀲𑀦𑁆𑀢𑀭𑀁 𑀕𑀦𑁆𑀢𑀼𑀁 𑀦 𑀮𑀪𑀦𑁆𑀢𑀺, 𑀦 𑀇𑀢𑀭𑀸 𑀅𑀢𑁆𑀢𑀦𑁄 𑀨𑀲𑁆𑀲𑀲𑁆𑀲 𑀲𑀬𑀁 𑀲𑀸𑀫𑀺𑀓𑀢𑁆𑀢𑀸. 𑀦 𑀳𑀺 𑀫𑀸𑀢𑀸𑀤𑀬𑁄 𑀲𑀬𑀁 𑀢𑀸𑀲𑀁 𑀨𑀲𑁆𑀲𑀸𑀦𑀼𑀪𑀯𑀦𑀢𑁆𑀣𑀁 𑀢𑀸 𑀭𑀓𑁆𑀔𑀦𑁆𑀢𑀺, 𑀓𑁂𑀯𑀮𑀁 𑀧𑀼𑀭𑀺𑀲𑀕𑀫𑀦𑀫𑁂𑀯 𑀢𑀸𑀲𑀁 𑀯𑀸𑀭𑁂𑀦𑁆𑀢𑀺. 𑀢𑀲𑁆𑀫𑀸 𑀓𑁂𑀦𑀘𑀺 𑀅𑀧𑀭𑀺𑀕𑁆𑀕𑀳𑀺𑀢𑀨𑀲𑁆𑀲𑀢𑁆𑀢𑀸, 𑀅𑀢𑁆𑀢𑀦𑁄 𑀨𑀲𑁆𑀲𑀢𑁆𑀢𑀸 𑀘 𑀇𑀢𑁆𑀣𑀻𑀦𑀁 𑀦 𑀫𑀺𑀘𑁆𑀙𑀸𑀘𑀸𑀭𑁄, 𑀧𑀼𑀭𑀺𑀲𑀸𑀦𑀁 𑀧𑀦 𑀧𑀭𑁂𑀳𑀺 𑀯𑀸𑀭𑀺𑀢𑁂 𑀅𑀢𑁆𑀢𑀦𑁄 𑀅𑀲𑀦𑁆𑀢𑀓𑀝𑁆𑀞𑀸𑀦𑁂 𑀧𑀯𑀺𑀝𑁆𑀞𑀢𑁆𑀢𑀸 𑀫𑀺𑀘𑁆𑀙𑀸𑀘𑀸𑀭𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀪𑁄𑀕𑁂𑀦𑀸𑀢𑀺 𑀪𑁄𑀕𑀳𑁂𑀢𑀼. 𑀉𑀤𑀧𑀢𑁆𑀢𑀁 𑀆𑀫𑀲𑀺𑀢𑁆𑀯𑀸 𑀕𑀳𑀺𑀢𑀸 𑀑𑀤𑀧𑀢𑁆𑀢𑀓𑀺𑀦𑀻. 𑀥𑀚-𑀲𑀤𑁆𑀤𑁂𑀦 𑀲𑁂𑀦𑀸 𑀏𑀯 𑀉𑀧𑀮𑀓𑁆𑀔𑀺𑀢𑀸𑀢𑀺 𑀆𑀳 ‘‘𑀉𑀲𑁆𑀲𑀺𑀢𑀤𑁆𑀥𑀚𑀸𑀬𑀸’’𑀢𑀺𑀆𑀤𑀺.

𑁩𑁦𑁫. 𑀩𑀳𑀺𑀤𑁆𑀥𑀸 𑀯𑀺𑀫𑀝𑁆𑀞𑀦𑁆𑀢𑀺 𑀅𑀜𑁆𑀜𑀢𑁆𑀣 𑀆𑀭𑁄𑀘𑀺𑀢𑀁. 𑀢𑀁 𑀓𑀺𑀭𑀺𑀬𑀁 𑀲𑀫𑁆𑀧𑀸𑀤𑁂𑀲𑁆𑀲𑀢𑀻𑀢𑀺 𑀢𑀲𑁆𑀲𑀸 𑀆𑀭𑁄𑀘𑁂𑀢𑁆𑀯𑀸 𑀢𑀁 𑀓𑀺𑀘𑁆𑀘𑀁 𑀲𑀫𑁆𑀧𑀸𑀤𑁂𑀢𑀼 𑀯𑀸 𑀫𑀸 𑀯𑀸, 𑀢𑀁 𑀓𑀺𑀭𑀺𑀬𑀁 𑀲𑀫𑁆𑀧𑀸𑀤𑀦𑁂 𑀲𑀸𑀫𑀢𑁆𑀣𑀺𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀤𑀸𑀭𑀓𑀁, 𑀤𑀸𑀭𑀺𑀓𑀜𑁆𑀘 𑀅𑀚𑀸𑀦𑀸𑀧𑁂𑀢𑁆𑀯𑀸 𑀫𑀸𑀢𑀸𑀧𑀺𑀢𑀼𑀆𑀤𑀻𑀳𑀺 𑀫𑀸𑀢𑀸𑀧𑀺𑀢𑀼𑀆𑀤𑀻𑀦𑀜𑁆𑀜𑁂𑀯 𑀲𑀦𑁆𑀢𑀺𑀓𑀁 𑀲𑀸𑀲𑀦𑁂 𑀧𑁂𑀲𑀺𑀢𑁂𑀧𑀺 𑀧𑀝𑀺𑀕𑁆𑀕𑀡𑁆𑀳𑀦𑀯𑀻𑀫𑀁𑀲𑀦𑀧𑀘𑁆𑀘𑀸𑀳𑀭𑀡𑀲𑀗𑁆𑀔𑀸𑀢𑀸𑀬 𑀢𑀺𑀯𑀗𑁆𑀕𑀲𑀫𑁆𑀧𑀢𑁆𑀢𑀺𑀬𑀸 𑀲𑀗𑁆𑀖𑀸𑀤𑀺𑀲𑁂𑀲𑁄 𑀳𑁄𑀢𑀺 𑀏𑀯𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀬𑀁 𑀉𑀤𑁆𑀤𑀺𑀲𑁆𑀲 𑀲𑀸𑀲𑀦𑀁 𑀧𑁂𑀲𑀺𑀢𑀁, 𑀢𑀁 𑀏𑀯 𑀲𑀦𑁆𑀥𑀸𑀬 𑀢𑀲𑁆𑀲𑀸 𑀫𑀸𑀢𑀼𑀆𑀤𑀻𑀦𑀁 𑀆𑀭𑁄𑀘𑀺𑀢𑁂𑀧𑀺 𑀔𑁂𑀢𑁆𑀢𑀫𑁂𑀯 𑀑𑀢𑀺𑀡𑁆𑀡𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀩𑀼𑀤𑁆𑀥𑀁 𑀧𑀘𑁆𑀘𑀓𑁆𑀔𑀸𑀫𑀻’’𑀢𑀺𑀆𑀤𑀺 𑀉𑀤𑀸𑀳𑀝𑀁, 𑀇𑀤𑀜𑁆𑀘 𑀯𑀘𑀦𑀩𑁆𑀬𑀢𑁆𑀢𑀬𑀳𑁂𑀢𑀼𑀩𑁆𑀬𑀢𑁆𑀢𑀬𑀸𑀦𑀁 𑀪𑁂𑀤𑁂𑀧𑀺 𑀩𑁆𑀬𑀢𑁆𑀢𑀬𑀲𑀸𑀫𑀜𑁆𑀜𑀢𑁄 𑀉𑀤𑀸𑀳𑀝𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀫𑁆𑀧𑀺 𑀉𑀤𑀸𑀳𑀭𑀡𑀤𑁄𑀲𑀁 𑀧𑀭𑀺𑀳𑀭𑀺𑀢𑁆𑀯𑀸 𑀲𑀼𑀢𑁆𑀢𑀸𑀦𑀼𑀮𑁄𑀫𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀁 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀇𑀫𑀺𑀦𑀸 𑀲𑀫𑁂𑀢𑀻𑀢𑀺 𑀏𑀢𑁆𑀣𑀸𑀬𑀫𑀥𑀺𑀧𑁆𑀧𑀸𑀬𑁄 𑁋 𑀬𑀣𑀸 𑀲𑀬𑀁 𑀅𑀦𑀸𑀭𑁄𑀘𑁂𑀢𑁆𑀯𑀸 𑀅𑀜𑁆𑀜𑁂𑀲𑀁 𑀅𑀦𑁆𑀢𑁂𑀯𑀸𑀲𑀺𑀓𑀸𑀤𑀻𑀦𑀁 𑀯𑀢𑁆𑀯𑀸 𑀯𑀻𑀫𑀁𑀲𑀸𑀧𑁂𑀢𑁆𑀯𑀸 𑀧𑀘𑁆𑀘𑀸𑀳𑀭𑀦𑁆𑀢𑀲𑁆𑀲 𑀦𑀢𑁆𑀣𑀺 𑀯𑀺𑀲𑀗𑁆𑀓𑁂𑀢𑁄, 𑀏𑀯𑀁 𑀢𑀲𑁆𑀲𑀸 𑀲𑀬𑀁 𑀅𑀦𑀸𑀭𑁄𑀘𑁂𑀢𑁆𑀯𑀸 𑀆𑀭𑁄𑀘𑀦𑀢𑁆𑀣𑀁 𑀫𑀸𑀢𑀼𑀆𑀤𑀻𑀦𑀁 𑀯𑀤𑀦𑁆𑀢𑀲𑁆𑀲𑀸𑀧𑀺 𑀫𑀸𑀢𑀼𑀆𑀤𑀬𑁄 𑀢𑀁 𑀓𑀺𑀭𑀺𑀬𑀁 𑀲𑀫𑁆𑀧𑀸𑀤𑁂𑀦𑁆𑀢𑀼 𑀯𑀸 𑀫𑀸 𑀯𑀸. 𑀬𑀤𑀺 𑀳𑀺 𑀢𑁂𑀲𑀁 𑀫𑀸𑀢𑀼𑀆𑀤𑀻𑀦𑀁 𑀢𑀼𑀡𑁆𑀳𑀻𑀪𑀽𑀢𑀪𑀸𑀯𑀫𑁆𑀧𑀺 𑀧𑀘𑁆𑀘𑀸𑀳𑀭𑀢𑀺, 𑀯𑀺𑀲𑀗𑁆𑀓𑁂𑀢𑁄 𑀦𑀢𑁆𑀣𑀻𑀢𑀺.

𑀖𑀭𑀓𑀺𑀘𑁆𑀘𑀁 𑀦𑁂𑀢𑀻𑀢𑀺 𑀖𑀭𑀡𑀻. 𑀅𑀜𑁆𑀜𑀢𑀭𑀁 𑀯𑀤𑀦𑁆𑀢𑀲𑁆𑀲 𑀯𑀺𑀲𑀗𑁆𑀓𑁂𑀢𑀁 𑀅𑀤𑀺𑀦𑁆𑀦𑀸𑀤𑀸𑀦𑀸𑀤𑀻𑀲𑀼 𑀆𑀡𑀢𑁆𑀢𑀺𑀬𑀁 𑀯𑀢𑁆𑀣𑀼𑀲𑀗𑁆𑀓𑁂𑀢𑁄 𑀯𑀺𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀫𑀽𑀮𑀝𑁆𑀞𑀸𑀦𑀜𑁆𑀘 𑀯𑀲𑁂𑀦𑀸𑀢𑀺 𑀏𑀢𑁆𑀣 𑀧𑀼𑀭𑀺𑀲𑀲𑁆𑀲 𑀫𑀸𑀢𑀼𑀆𑀤𑀬𑁄 𑀲𑀸𑀲𑀦𑀧𑁂𑀲𑀦𑁂 𑀫𑀽𑀮𑀪𑀽𑀢𑀢𑁆𑀢𑀸 ‘‘𑀫𑀽𑀮𑀝𑁆𑀞𑀸’’𑀢𑀺 𑀯𑀼𑀢𑁆𑀢𑀸.

𑁩𑁨𑁨. 𑀧𑀸𑀴𑀺𑀬𑀁 𑀫𑀸𑀢𑀼𑀭𑀓𑁆𑀔𑀺𑀢𑀸𑀬 𑀫𑀸𑀢𑀸 𑀪𑀺𑀓𑁆𑀔𑀼𑀁 𑀧𑀳𑀺𑀡𑀢𑀻𑀢𑀺 𑀏𑀢𑁆𑀣 𑀅𑀢𑁆𑀢𑀦𑁄 𑀯𑀸 𑀥𑀻𑀢𑀼 𑀲𑀦𑁆𑀢𑀺𑀓𑀁 ‘‘𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀭𑀺𑀬𑀸 𑀳𑁄𑀢𑀽’’𑀢𑀺 𑀪𑀺𑀓𑁆𑀔𑀼𑀁 𑀧𑀳𑀺𑀡𑀢𑀺, 𑀧𑀼𑀭𑀺𑀲𑀲𑁆𑀲 𑀯𑀸 𑀢𑀲𑁆𑀲 𑀜𑀸𑀢𑀓𑀸𑀦𑀁 𑀯𑀸 𑀲𑀦𑁆𑀢𑀺𑀓𑀁 ‘‘𑀫𑀫 𑀥𑀻𑀢𑀸 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀭𑀺𑀬𑀸 𑀳𑁄𑀢𑀽’’𑀢𑀺 𑀧𑀳𑀺𑀡𑀢𑀻𑀢𑀺 𑀕𑀳𑁂𑀢𑀩𑁆𑀩𑀁. 𑀏𑀲𑁂𑀯 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑀢𑁆𑀢𑀸𑀢𑀺 𑀧𑀞𑀫𑀲𑀗𑁆𑀖𑀸𑀤𑀺𑀲𑁂𑀲𑁂 𑀯𑀼𑀢𑁆𑀢𑀦𑀬𑀢𑁆𑀢𑀸.

𑁩𑁩𑁮. 𑀅𑀦𑁆𑀢𑁂 𑀏𑀓𑁂𑀦𑀸𑀢𑀺 𑀏𑀓𑁂𑀦 𑀧𑀤𑁂𑀦. 𑀏𑀢𑁆𑀢𑁄𑀯 𑀧𑀓𑁆𑀓𑀫𑀢𑀻𑀢𑀺 𑀅𑀧𑀘𑁆𑀘𑀸𑀳𑀭𑀺𑀢𑁆𑀯𑀸 𑀢𑀢𑁄𑀯 𑀧𑀓𑁆𑀓𑀫𑀢𑀺. ‘‘𑀅𑀦𑀪𑀺𑀦𑀦𑁆𑀤𑀺𑀢𑁆𑀯𑀸’’𑀢𑀺 𑀇𑀤𑀁 𑀢𑀣𑀸 𑀧𑀝𑀺𑀧𑀚𑁆𑀚𑀫𑀸𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀲𑀢𑀺𑀧𑀺 𑀅𑀪𑀺𑀦𑀦𑁆𑀤𑀦𑁂 𑀲𑀸𑀲𑀦𑀁 𑀅𑀦𑀸𑀭𑁄𑀘𑁂𑀦𑁆𑀢𑁄 𑀧𑀦 𑀦 𑀯𑀻𑀫𑀁𑀲𑀢𑀺 𑀦𑀸𑀫. 𑀢𑀢𑀺𑀬𑀧𑀤𑁂 𑀯𑀼𑀢𑁆𑀢𑀦𑀬𑁂𑀦𑀸𑀢𑀺 ‘‘𑀲𑁄 𑀢𑀲𑁆𑀲𑀸 𑀯𑀘𑀦𑀁 𑀅𑀦𑀪𑀺𑀦𑀦𑁆𑀤𑀺𑀢𑁆𑀯𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀦𑀬𑁂𑀦. 𑀧𑀸𑀴𑀺𑀬𑀁 𑀅𑀦𑁆𑀢𑁂𑀯𑀸𑀲𑀺𑀁 𑀯𑀻𑀫𑀁𑀲𑀸𑀧𑁂𑀢𑁆𑀯𑀸𑀢𑀺 ‘‘𑀅𑀬𑀁 𑀢𑁂𑀲𑀁 𑀯𑀢𑁆𑀢𑀼𑀁 𑀲𑀫𑀢𑁆𑀣𑁄’’𑀢𑀺 𑀅𑀦𑁆𑀢𑁂𑀯𑀸𑀲𑀺𑀦𑀸 𑀯𑀻𑀫𑀁𑀲𑀸𑀧𑁂𑀢𑁆𑀯𑀸. 𑀲𑀘𑁂 𑀧𑀦 𑀲𑁄 𑀅𑀦𑁆𑀢𑁂𑀯𑀸𑀲𑀺𑀓𑁄 𑀢𑀁 𑀯𑀘𑀦𑀁 𑀆𑀤𑀺𑀬𑀺𑀢𑁆𑀯𑀸 𑀢𑀼𑀡𑁆𑀳𑀻 𑀳𑁄𑀢𑀺, 𑀢𑀲𑁆𑀲𑀸𑀧𑀺 𑀢𑀁 𑀧𑀯𑀢𑁆𑀢𑀺𑀁 𑀧𑀘𑁆𑀘𑀸𑀳𑀭𑀦𑁆𑀢𑀲𑁆𑀲 𑀆𑀘𑀭𑀺𑀬𑀲𑁆𑀲 𑀲𑀗𑁆𑀖𑀸𑀤𑀺𑀲𑁂𑀲𑁄𑀯 𑀫𑀸𑀢𑀼𑀆𑀤𑀻𑀲𑀼 𑀢𑀼𑀡𑁆𑀳𑀻𑀪𑀽𑀢𑁂𑀲𑀼 𑀢𑁂𑀲𑀁 𑀢𑀼𑀡𑁆𑀳𑀺𑀪𑀸𑀯𑀁 𑀧𑀘𑁆𑀘𑀸𑀳𑀭𑀦𑁆𑀢𑀲𑁆𑀲 𑀯𑀺𑀬𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀧𑀸𑀴𑀺𑀬𑀁 𑀘𑀢𑀼𑀢𑁆𑀣𑀯𑀸𑀭𑁂 𑀅𑀲𑀢𑀺𑀧𑀺 𑀕𑀘𑁆𑀙𑀦𑁆𑀢𑁄 𑀲𑀫𑁆𑀧𑀸𑀤𑁂𑀢𑀺, 𑀆𑀕𑀘𑁆𑀙𑀦𑁆𑀢𑁄 𑀯𑀺𑀲𑀁𑀯𑀸𑀤𑁂𑀢𑀺 𑀅𑀦𑀸𑀧𑀢𑁆𑀢𑀻𑀢𑀺 𑀅𑀢𑁆𑀣𑀢𑁄 𑀆𑀧𑀦𑁆𑀦𑀫𑁂𑀯𑀸𑀢𑀺𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀘𑀢𑀼𑀢𑁆𑀣𑁂 𑀅𑀦𑀸𑀧𑀢𑁆𑀢𑀻’’𑀢𑀺.

𑁩𑁪𑁦. 𑀓𑀸𑀭𑀼𑀓𑀸𑀦𑀦𑁆𑀢𑀺 𑀯𑀟𑁆𑀠𑀓𑀻𑀆𑀤𑀻𑀦𑀁 𑀢𑀘𑁆𑀙𑀓𑀅𑀬𑁄𑀓𑀸𑀭𑀢𑀦𑁆𑀢𑀯𑀸𑀬𑀭𑀚𑀓𑀦𑁆𑀳𑀸𑀧𑀺𑀢𑀓𑀸 𑀧𑀜𑁆𑀘 𑀓𑀸𑀭𑀯𑁄 ‘‘𑀓𑀸𑀭𑀼𑀓𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀏𑀯𑀭𑀽𑀧𑁂𑀦…𑀧𑁂… 𑀅𑀦𑀸𑀧𑀢𑁆𑀢𑀻𑀢𑀺 𑀢𑀸𑀤𑀺𑀲𑀁 𑀕𑀺𑀳𑀺𑀯𑁂𑀬𑁆𑀬𑀸𑀯𑀘𑁆𑀘𑀫𑁆𑀧𑀺 𑀦 𑀳𑁄𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁.

𑀓𑀸𑀬𑀢𑁄 𑀲𑀫𑀼𑀝𑁆𑀞𑀸𑀢𑀻𑀢𑀺 𑀧𑀡𑁆𑀡𑀢𑁆𑀢𑀺𑀁 𑀯𑀸 𑀅𑀮𑀁𑀯𑀘𑀦𑀻𑀬𑀪𑀸𑀯𑀁 𑀯𑀸 𑀢𑀤𑀼𑀪𑀬𑀁 𑀯𑀸 𑀅𑀚𑀸𑀦𑀦𑁆𑀢𑀲𑁆𑀲 𑀓𑀸𑀬𑀢𑁄 𑀲𑀫𑀼𑀝𑁆𑀞𑀸𑀢𑀺. 𑀏𑀲 𑀦𑀬𑁄 𑀇𑀢𑀭𑀤𑁆𑀯𑀬𑁂𑀧𑀺. 𑀅𑀮𑀁𑀯𑀘𑀦𑀻𑀬𑀸 𑀳𑁄𑀦𑁆𑀢𑀻𑀢𑀺 𑀇𑀢𑁆𑀣𑀻 𑀯𑀸 𑀧𑀼𑀭𑀺𑀲𑁄 𑀯𑀸 𑀉𑀪𑁄𑀧𑀺 𑀯𑀸 𑀚𑀸𑀬𑀸𑀪𑀸𑀯𑁂, 𑀲𑀸𑀫𑀺𑀓𑀪𑀸𑀯𑁂 𑀘 𑀦𑀺𑀓𑁆𑀔𑀺𑀢𑁆𑀢𑀙𑀦𑁆𑀤𑀢𑀸𑀬 𑀅𑀘𑁆𑀘𑀦𑁆𑀢𑀯𑀺𑀬𑀼𑀢𑁆𑀢𑀢𑁆𑀢𑀸 𑀧𑀼𑀦 𑀅𑀜𑁆𑀜𑀫𑀜𑁆𑀜𑀁 𑀲𑀫𑀸𑀕𑀫𑀢𑁆𑀣𑀁 ‘‘𑀫𑀸 𑀏𑀯𑀁 𑀅𑀓𑀭𑀺𑀢𑁆𑀣𑀸’’𑀢𑀺𑀆𑀤𑀺𑀦𑀸 𑀯𑀘𑀦𑀻𑀬𑀢𑀸𑀬 𑀯𑀢𑁆𑀢𑀩𑁆𑀩𑀢𑀸𑀬 𑀅𑀮𑀁 𑀅𑀭𑀳𑀸𑀢𑀺 𑀅𑀮𑀁𑀯𑀘𑀦𑀻𑀬𑀸, 𑀅𑀮𑀁 𑀯𑀸 𑀓𑀢𑁆𑀢𑀼𑀁 𑀅𑀭𑀳𑀁 𑀲𑀦𑁆𑀥𑀸𑀦𑀯𑀘𑀦𑀫𑁂𑀢𑁂𑀲𑀼 𑀇𑀢𑁆𑀣𑀺𑀧𑀼𑀭𑀺𑀲𑁂𑀲𑀽𑀢𑀺 𑀅𑀮𑀁𑀯𑀘𑀦𑀻𑀬𑀸, 𑀲𑀦𑁆𑀥𑀸𑀦𑀓𑀸𑀭𑀲𑁆𑀲 𑀯𑀘𑀦𑀁 𑀯𑀺𑀦𑀸 𑀅𑀲𑀗𑁆𑀕𑀘𑁆𑀙𑀦𑀓𑀸 𑀧𑀭𑀺𑀘𑁆𑀘𑀢𑁆𑀢𑀸𑀬𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀧𑀡𑁆𑀡𑀢𑁆𑀢𑀺𑀁 𑀧𑀦 𑀚𑀸𑀦𑀺𑀢𑁆𑀯𑀸𑀢𑀺 𑀏𑀢𑁆𑀣 𑀅𑀮𑀁𑀯𑀘𑀦𑀻𑀬𑀪𑀸𑀯𑀁 𑀯𑀸𑀢𑀺 𑀯𑀢𑁆𑀢𑀩𑁆𑀩𑀁. 𑀢𑁂𑀦𑁂𑀯 𑀫𑀸𑀢𑀺𑀓𑀸𑀝𑁆𑀞𑀓𑀣𑀸𑀬𑀜𑁆𑀘 ‘‘𑀢𑀤𑀼𑀪𑀬𑀁 𑀧𑀦 𑀚𑀸𑀦𑀺𑀢𑁆𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀪𑀺𑀓𑁆𑀔𑀼𑀁 𑀅𑀚𑀸𑀦𑀸𑀧𑁂𑀢𑁆𑀯𑀸 𑀅𑀢𑁆𑀢𑀦𑁄 𑀅𑀥𑀺𑀧𑁆𑀧𑀸𑀬𑀁 𑀧𑀡𑁆𑀡𑁂 𑀮𑀺𑀔𑀺𑀢𑁆𑀯𑀸 ‘‘𑀇𑀫𑀁 𑀧𑀡𑁆𑀡𑀁 𑀅𑀲𑀼𑀓𑀲𑁆𑀲 𑀤𑁂𑀳𑀻’’𑀢𑀺 𑀤𑀺𑀦𑁆𑀦𑀁 𑀳𑀭𑀦𑁆𑀢𑀲𑁆𑀲 𑀲𑀜𑁆𑀘𑀭𑀺𑀢𑁆𑀢𑀁 𑀦 𑀳𑁄𑀢𑀺. 𑀧𑀡𑁆𑀡𑀢𑁆𑀢𑀺𑀅𑀮𑀁𑀯𑀘𑀦𑀻𑀬𑀪𑀸𑀯𑀅𑀚𑀸𑀦𑀦𑀯𑀲𑁂𑀦𑁂𑀯 𑀳𑀺 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀅𑀘𑀺𑀢𑁆𑀢𑀓𑀁, 𑀦 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀲𑀜𑁆𑀘𑀭𑀡𑀪𑀸𑀯𑀫𑁆𑀧𑀺 𑀅𑀚𑀸𑀦𑀦𑀯𑀲𑁂𑀦, 𑀧𑀸𑀴𑀺𑀬𑀜𑁆𑀘 𑀅𑀝𑁆𑀞𑀓𑀣𑀸𑀬𑀜𑁆𑀘 𑀆𑀭𑁄𑀘𑀦𑀫𑁂𑀯 𑀤𑀲𑁆𑀲𑀺𑀢𑀁. 𑀢𑀲𑁆𑀫𑀸 𑀲𑀦𑁆𑀤𑀲𑁆𑀲𑀦𑀢𑁆𑀣𑀁 𑀜𑀢𑁆𑀯𑀸 𑀧𑀡𑁆𑀡𑀲𑀦𑁆𑀤𑀲𑁆𑀲𑀦𑀯𑀲𑁂𑀦𑀸𑀧𑀺 𑀓𑀸𑀬𑁂𑀦 𑀯𑀸 𑀯𑀸𑀘𑀸𑀬 𑀯𑀸 𑀆𑀭𑁄𑀘𑁂𑀦𑁆𑀢𑀲𑁆𑀲𑁂𑀯 𑀆𑀧𑀢𑁆𑀢𑀺 𑀳𑁄𑀢𑀻𑀢𑀺 𑀕𑀳𑁂𑀢𑀩𑁆𑀩𑀁.

𑁩𑁪𑁧. 𑀬𑀣𑀸 𑀬𑀣𑀸 𑀬𑁂𑀲𑀼 𑀬𑁂𑀲𑀼 𑀚𑀦𑀧𑀤𑁂𑀲𑀽𑀢𑀺 𑀧𑀭𑀺𑀘𑁆𑀘𑀢𑁆𑀢𑀪𑀸𑀯𑀧𑁆𑀧𑀓𑀸𑀲𑀦𑀢𑁆𑀣𑀁 𑀓𑀢𑁆𑀢𑀩𑁆𑀩𑀁 𑀧𑀡𑁆𑀡𑀤𑀸𑀦𑀜𑀸𑀢𑀺𑀚𑀦𑀺𑀲𑁆𑀲𑀭𑀸𑀤𑀺𑀚𑀸𑀦𑀸𑀧𑀦𑀸𑀤𑀺𑀢𑀁𑀢𑀁𑀤𑁂𑀲𑀦𑀺𑀬𑀢𑀁 𑀧𑀓𑀸𑀭𑀁 𑀤𑀲𑁆𑀲𑁂𑀢𑀺, 𑀇𑀤𑀜𑁆𑀘 𑀦𑀺𑀩𑀤𑁆𑀥𑀪𑀭𑀺𑀬𑀸𑀪𑀸𑀯𑁂𑀦 𑀕𑀳𑀺𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀅𑀢𑁆𑀢𑀦𑁄 𑀭𑀼𑀘𑀺𑀬𑀸 𑀲𑀗𑁆𑀕𑀢𑀸𑀦𑀁 𑀧𑀦 𑀇𑀢𑁆𑀣𑀻𑀦𑀁, 𑀫𑀼𑀳𑀼𑀢𑁆𑀢𑀺𑀓𑀸𑀬 𑀘 𑀧𑀼𑀭𑀺𑀲𑁂 𑀘𑀺𑀢𑁆𑀢𑀲𑁆𑀲 𑀯𑀺𑀭𑀚𑁆𑀚𑀦𑀫𑁂𑀯 𑀅𑀮𑀁𑀯𑀘𑀦𑀻𑀬𑀪𑀸𑀯𑁂 𑀓𑀸𑀭𑀡𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀤𑀼𑀝𑁆𑀞𑀼𑀮𑁆𑀮𑀸𑀤𑀻𑀲𑀼𑀧𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀅𑀢𑁆𑀢𑀓𑀸𑀫𑀲𑀜𑁆𑀘𑀭𑀺𑀢𑁆𑀢𑀸𑀦𑀺 𑀲𑀗𑁆𑀕𑀡𑁆𑀳𑀸𑀢𑀺, 𑀏𑀢𑁆𑀣 𑀧𑀦 𑀧𑀸𑀴𑀺𑀬𑀁 𑀓𑀺𑀜𑁆𑀘𑀸𑀧𑀺 ‘‘𑀇𑀢𑁆𑀣𑀻 𑀦𑀸𑀫 𑀫𑀦𑀼𑀲𑁆𑀲𑀺𑀢𑁆𑀣𑀻 𑀦 𑀬𑀓𑁆𑀔𑀻’’𑀢𑀺𑀆𑀤𑀺𑀦𑀸 𑀫𑀦𑀼𑀲𑁆𑀲𑀺𑀢𑁆𑀣𑀺𑀧𑀼𑀭𑀺𑀲𑀸 𑀦 𑀤𑀲𑁆𑀲𑀺𑀢𑀸, 𑀢𑀣𑀸𑀧𑀺 ‘‘𑀤𑀲 𑀇𑀢𑁆𑀣𑀺𑀬𑁄 𑀫𑀸𑀢𑀼𑀭𑀓𑁆𑀔𑀺𑀢𑀸’’𑀢𑀺𑀆𑀤𑀺𑀦𑀸 𑀫𑀦𑀼𑀲𑁆𑀲𑀺𑀢𑁆𑀣𑀻𑀦𑀜𑁆𑀜𑁂𑀯 𑀤𑀲𑁆𑀲𑀺𑀢𑀢𑁆𑀢𑀸 𑀧𑀼𑀭𑀺𑀲𑀸𑀦𑀫𑁆𑀧𑀺 𑀢𑀤𑀦𑀼𑀕𑀼𑀡𑀸𑀦𑀫𑁂𑀯 𑀕𑀳𑁂𑀢𑀩𑁆𑀩𑀢𑁄 𑀫𑀦𑀼𑀲𑁆𑀲𑀚𑀸𑀢𑀺𑀓𑀸𑀯 𑀇𑀢𑁆𑀣𑀺𑀧𑀼𑀭𑀺𑀲𑀸 𑀇𑀥𑀸𑀥𑀺𑀧𑁆𑀧𑁂𑀢𑀸. 𑀢𑀲𑁆𑀫𑀸 𑀬𑁂𑀲𑀼 𑀲𑀜𑁆𑀘𑀭𑀺𑀢𑁆𑀢𑀁 𑀲𑀫𑀸𑀧𑀚𑁆𑀚𑀢𑀺, 𑀢𑁂𑀲𑀁 𑀫𑀦𑀼𑀲𑁆𑀲𑀚𑀸𑀢𑀺𑀓𑀢𑀸, 𑀦 𑀦𑀸𑀮𑀁𑀯𑀘𑀦𑀻𑀬𑀢𑀸, 𑀧𑀝𑀺𑀕𑁆𑀕𑀡𑁆𑀳𑀦, 𑀯𑀻𑀫𑀁𑀲𑀦, 𑀧𑀘𑁆𑀘𑀸𑀳𑀭𑀡𑀸𑀦𑀻𑀢𑀺 𑀇𑀫𑀸𑀦𑁂𑀢𑁆𑀣 𑀧𑀜𑁆𑀘 𑀅𑀗𑁆𑀕𑀸𑀦𑀺.

𑀲𑀜𑁆𑀘𑀭𑀺𑀢𑁆𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.