𑁬. 𑀓𑀼𑀝𑀺𑀓𑀸𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁩𑁪𑁨. 𑀙𑀝𑁆𑀞𑁂 𑀏𑀢𑁆𑀢𑀓𑁂𑀦𑀸𑀢𑀺 𑀏𑀢𑁆𑀢𑀓𑁂𑀦 𑀤𑀸𑀭𑀼𑀆𑀤𑀺𑀦𑀸. 𑀅𑀧𑀭𑀺𑀘𑁆𑀙𑀺𑀦𑁆𑀦𑀧𑁆𑀧𑀫𑀸𑀡𑀸𑀬𑁄𑀢𑀺 𑀅𑀧𑀭𑀺𑀘𑁆𑀙𑀺𑀦𑁆𑀦𑀤𑀸𑀭𑀼𑀆𑀤𑀺𑀧𑀫𑀸𑀡𑀸𑀬𑁄. 𑀫𑀽𑀮𑀘𑁆𑀙𑁂𑀚𑁆𑀚𑀸𑀬𑀸𑀢𑀺 𑀧𑀭𑀲𑀦𑁆𑀢𑀓𑀪𑀸𑀯𑀢𑁄 𑀫𑁄𑀘𑁂𑀢𑁆𑀯𑀸 𑀅𑀢𑁆𑀢𑀦𑁄 𑀏𑀯 𑀲𑀦𑁆𑀢𑀓𑀓𑀭𑀡𑀯𑀲𑁂𑀦𑀸𑀢𑀺 𑀅𑀢𑁆𑀣𑁄. 𑀏𑀯𑀁 𑀬𑀸𑀘𑀢𑁄 𑀅𑀜𑁆𑀜𑀸𑀢𑀓𑀯𑀺𑀜𑁆𑀜𑀢𑁆𑀢𑀺𑀤𑀼𑀓𑁆𑀓𑀝𑀜𑁆𑀘𑁂𑀯 𑀤𑀸𑀲𑀧𑀝𑀺𑀕𑁆𑀕𑀳𑀡𑀤𑀼𑀓𑁆𑀓𑀝𑀜𑁆𑀘 𑀳𑁄𑀢𑀺 ‘‘𑀤𑀸𑀲𑀺𑀤𑀸𑀲𑀧𑀝𑀺𑀕𑁆𑀕𑀳𑀡𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀻’’𑀢𑀺 (𑀤𑀻. 𑀦𑀺. 𑁧.𑁧𑁦, 𑁧𑁯𑁪) 𑀯𑀘𑀦𑀁 𑀦𑀺𑀲𑁆𑀲𑀸𑀬 𑀅𑀝𑁆𑀞𑀓𑀣𑀸𑀲𑀼 𑀧𑀝𑀺𑀓𑁆𑀔𑀺𑀢𑁆𑀢𑀢𑁆𑀢𑀸. 𑀲𑀓𑀓𑀫𑁆𑀫𑀦𑁆𑀢𑀺 𑀧𑀸𑀡𑀯𑀥𑀓𑀫𑁆𑀫𑀁. 𑀇𑀤𑀜𑁆𑀘 𑀧𑀸𑀡𑀸𑀢𑀺𑀧𑀸𑀢𑀤𑁄𑀲𑀧𑀭𑀺𑀳𑀸𑀭𑀸𑀬 𑀤𑀼𑀓𑁆𑀓𑀝𑀁 𑀯𑀼𑀢𑁆𑀢𑀁, 𑀦 𑀯𑀺𑀜𑁆𑀜𑀢𑁆𑀢𑀺𑀧𑀭𑀺𑀳𑀸𑀭𑀸𑀬. 𑀅𑀦𑀺𑀬𑀫𑁂𑀢𑁆𑀯𑀸𑀧𑀺 𑀦 𑀬𑀸𑀘𑀺𑀢𑀩𑁆𑀩𑀸𑀢𑀺 𑀲𑀸𑀫𑀻𑀘𑀺𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁, 𑀲𑀼𑀤𑁆𑀥𑀘𑀺𑀢𑁆𑀢𑁂𑀦 𑀧𑀦 𑀳𑀢𑁆𑀣𑀓𑀫𑁆𑀫𑀁 𑀬𑀸𑀘𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀦𑀸𑀫 𑀦𑀢𑁆𑀣𑀺. 𑀬𑀤𑀺𑀘𑁆𑀙𑀓𑀁 𑀓𑀸𑀭𑀸𑀧𑁂𑀢𑀼𑀁 𑀯𑀝𑁆𑀝𑀢𑀻𑀢𑀺 ‘‘𑀳𑀢𑁆𑀣𑀓𑀫𑁆𑀫𑀁 𑀬𑀸𑀘𑀸𑀫𑀺, 𑀤𑁂𑀣𑀸’’𑀢𑀺𑀆𑀤𑀺𑀦𑀸 𑀅𑀬𑀸𑀘𑀺𑀢𑁆𑀯𑀸𑀧𑀺 𑀯𑀝𑁆𑀝𑀢𑀺. 𑀲𑀓𑀺𑀘𑁆𑀘𑀧𑀲𑀼𑀢𑀫𑁆𑀧𑀺 𑀏𑀯𑀁 𑀓𑀸𑀭𑀸𑀧𑁂𑀦𑁆𑀢𑀲𑁆𑀲 𑀯𑀺𑀜𑁆𑀜𑀢𑁆𑀢𑀺 𑀦𑀢𑁆𑀣𑀺 𑀏𑀯, 𑀲𑀸𑀫𑀻𑀘𑀺𑀤𑀲𑁆𑀲𑀦𑀢𑁆𑀣𑀁 𑀧𑀦 𑀯𑀺𑀪𑀚𑀺𑀢𑁆𑀯𑀸 𑀯𑀼𑀢𑁆𑀢𑀁.

𑀲𑀩𑁆𑀩𑀓𑀧𑁆𑀧𑀺𑀬𑀪𑀸𑀯𑀤𑀻𑀧𑀦𑀢𑁆𑀣𑀦𑁆𑀢𑀺 𑀲𑀩𑁆𑀩𑀲𑁄 𑀓𑀧𑁆𑀧𑀺𑀬𑀪𑀸𑀯𑀤𑀻𑀧𑀦𑀢𑁆𑀣𑀁. 𑀫𑀽𑀮𑀁 𑀤𑁂𑀣𑀸𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀻𑀢𑀺 ‘‘𑀫𑀽𑀮𑀁 𑀤𑀲𑁆𑀲𑀸𑀫𑀸’’𑀢𑀺 𑀧𑀞𑀫𑀁 𑀯𑀼𑀢𑁆𑀢𑀢𑁆𑀢𑀸 𑀯𑀺𑀜𑁆𑀜𑀢𑁆𑀢𑀺 𑀯𑀸 𑀫𑀽𑀮𑀦𑁆𑀢𑀺 𑀯𑀘𑀦𑀲𑁆𑀲 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀯𑀢𑁆𑀣𑀼𑀲𑀸𑀫𑀜𑁆𑀜𑀯𑀘𑀦𑀢𑁆𑀢𑁂𑀧𑀺 𑀦𑀺𑀝𑁆𑀞𑀺𑀢𑀪𑀢𑀺𑀓𑀺𑀘𑁆𑀘𑀸𑀦𑀁 𑀤𑀸𑀧𑀦𑀢𑁄 𑀅𑀓𑀧𑁆𑀧𑀺𑀬𑀯𑀢𑁆𑀣𑀼𑀲𑀸𑀤𑀺𑀬𑀦𑀁 𑀯𑀸 𑀦 𑀳𑁄𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀅𑀦𑀚𑁆𑀛𑀸𑀯𑀼𑀢𑁆𑀣𑀓𑀦𑁆𑀢𑀺 𑀅𑀧𑀭𑀺𑀕𑁆𑀕𑀳𑀺𑀢𑀁.

𑀫𑀜𑁆𑀘…𑀧𑁂… 𑀘𑀻𑀯𑀭𑀸𑀤𑀻𑀦𑀺 𑀓𑀸𑀭𑀸𑀧𑁂𑀢𑀼𑀓𑀸𑀫𑁂𑀦𑀸𑀧𑀻𑀢𑀺𑀆𑀤𑀻𑀲𑀼 𑀘𑀻𑀯𑀭𑀁 𑀓𑀸𑀭𑀸𑀧𑁂𑀢𑀼𑀓𑀸𑀫𑀲𑁆𑀲 𑀅𑀜𑁆𑀜𑀸𑀢𑀓𑀅𑀧𑁆𑀧𑀯𑀸𑀭𑀺𑀢𑀢𑀦𑁆𑀢𑀯𑀸𑀬𑁂𑀳𑀺 𑀳𑀢𑁆𑀣𑀓𑀫𑁆𑀫𑀬𑀸𑀘𑀦𑀯𑀲𑁂𑀦 𑀯𑀸𑀬𑀸𑀧𑀦𑁂 𑀯𑀺𑀜𑁆𑀜𑀢𑁆𑀢𑀺𑀧𑀘𑁆𑀘𑀬𑀸 𑀤𑀼𑀓𑁆𑀓𑀝𑀸𑀪𑀸𑀯𑁂𑀧𑀺 𑀘𑀻𑀯𑀭𑀯𑀸𑀬𑀸𑀧𑀦𑀲𑀺𑀓𑁆𑀔𑀸𑀧𑀤𑁂𑀦 𑀬𑀣𑀸𑀭𑀳𑀁 𑀧𑀸𑀘𑀺𑀢𑁆𑀢𑀺𑀬𑀤𑀼𑀓𑁆𑀓𑀝𑀸𑀦𑀺 𑀳𑁄𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀓𑀧𑁆𑀧𑀺𑀬𑀓𑀳𑀸𑀧𑀡𑀸𑀤𑀺 𑀦 𑀤𑀸𑀢𑀩𑁆𑀩𑀦𑁆𑀢𑀺 𑀓𑀧𑁆𑀧𑀺𑀬𑀫𑀼𑀔𑁂𑀦 𑀮𑀤𑁆𑀥𑀫𑁆𑀧𑀺 𑀳𑀢𑁆𑀣𑀓𑀫𑁆𑀫𑀓𑀭𑀡𑀢𑁆𑀣𑀸𑀬 𑀇𑀫𑀲𑁆𑀲 𑀓𑀳𑀸𑀧𑀡𑀁 𑀤𑁂𑀳𑀻𑀢𑀺 𑀯𑀢𑁆𑀯𑀸 𑀤𑀸𑀦𑀁 𑀦 𑀯𑀝𑁆𑀝𑀢𑀻𑀢𑀺 𑀯𑀼𑀢𑁆𑀢𑀁. 𑀧𑀼𑀩𑁆𑀩𑁂 𑀓𑀢𑀓𑀫𑁆𑀫𑀲𑁆𑀲 𑀤𑀸𑀧𑀦𑁂 𑀓𑀺𑀜𑁆𑀘𑀸𑀧𑀺 𑀤𑁄𑀲𑁄 𑀦 𑀤𑀺𑀲𑁆𑀲𑀢𑀺, 𑀢𑀣𑀸𑀧𑀺 𑀅𑀲𑀸𑀭𑀼𑀧𑁆𑀧𑀫𑁂𑀯𑀸𑀢𑀺 𑀯𑀤𑀦𑁆𑀢𑀺. 𑀓𑀢𑀓𑀫𑁆𑀫𑀢𑁆𑀣𑀸𑀬𑀧𑀺 𑀓𑀸𑀢𑀩𑁆𑀩𑀓𑀫𑁆𑀫𑀢𑁆𑀣𑀸𑀬𑀧𑀺 𑀓𑀧𑁆𑀧𑀺𑀬𑀯𑁄𑀳𑀸𑀭𑁂𑀦 𑀧𑀭𑀺𑀬𑀸𑀬𑀢𑁄 𑀪𑀢𑀺𑀁 𑀤𑀸𑀧𑁂𑀦𑁆𑀢𑀲𑁆𑀲 𑀦𑀢𑁆𑀣𑀺 𑀤𑁄𑀲𑁄. 𑀯𑀢𑁆𑀢𑀦𑁆𑀢𑀺 𑀘𑀸𑀭𑀺𑀢𑁆𑀢𑀁, 𑀆𑀧𑀢𑁆𑀢𑀺 𑀦 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀓𑀧𑁆𑀧𑀺𑀬𑀁 𑀓𑀸𑀭𑀸𑀧𑁂𑀢𑁆𑀯𑀸 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀸𑀦𑀻𑀢𑀺 𑀲𑀸𑀔𑀸𑀬 𑀫𑀓𑁆𑀔𑀺𑀓𑀩𑀻𑀚𑀦𑁂𑀦 𑀧𑀡𑁆𑀡𑀸𑀤𑀺𑀘𑁆𑀙𑁂𑀤𑁂 𑀩𑀻𑀚𑀕𑀸𑀫𑀓𑁄𑀧𑀦𑀲𑁆𑀲 𑀘𑁂𑀯 𑀢𑀢𑁆𑀣 𑀮𑀕𑁆𑀕𑀭𑀚𑀸𑀤𑀺𑀅𑀧𑁆𑀧𑀝𑀺𑀕𑁆𑀕𑀳𑀺𑀢𑀲𑁆𑀲 𑀘 𑀧𑀭𑀺𑀳𑀸𑀭𑀢𑁆𑀣𑀸𑀬 𑀯𑀼𑀢𑁆𑀢𑀁. 𑀢𑀤𑀼𑀪𑀬𑀸𑀲𑀗𑁆𑀓𑀸𑀬 𑀅𑀲𑀢𑀺 𑀢𑀣𑀸 𑀅𑀓𑀭𑀡𑁂 𑀤𑁄𑀲𑁄 𑀦𑀢𑁆𑀣𑀺. 𑀦𑀤𑀻𑀬𑀸𑀤𑀻𑀲𑀼 𑀉𑀤𑀓𑀲𑁆𑀲 𑀅𑀧𑀭𑀺𑀕𑁆𑀕𑀳𑀺𑀢𑀢𑀸𑀬 ‘‘𑀆𑀳𑀭𑀸𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀁. ‘‘𑀦 𑀆𑀳𑀝𑀁 𑀧𑀭𑀺𑀪𑀼𑀜𑁆𑀚𑀺𑀢𑀼’’𑀦𑁆𑀢𑀺 𑀯𑀘𑀦𑀢𑁄 𑀯𑀺𑀜𑁆𑀜𑀢𑁆𑀢𑀺𑀬𑀸 𑀆𑀧𑀦𑁆𑀦𑀁 𑀤𑀼𑀓𑁆𑀓𑀝𑀁 𑀤𑁂𑀲𑁂𑀢𑁆𑀯𑀸𑀧𑀺 𑀢𑀁 𑀯𑀢𑁆𑀣𑀼𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑀲𑁆𑀲 𑀧𑀼𑀦 𑀧𑀭𑀺𑀪𑁄𑀕𑁂 𑀤𑀼𑀓𑁆𑀓𑀝𑀫𑁂𑀯, 𑀧𑀜𑁆𑀘𑀦𑁆𑀦𑀫𑁆𑀧𑀺 𑀲𑀳𑀥𑀫𑁆𑀫𑀺𑀓𑀸𑀦𑀁 𑀦 𑀯𑀝𑁆𑀝𑀢𑀺. ‘‘𑀅𑀮𑀚𑁆𑀚𑀻𑀳𑀺 𑀧𑀦 𑀪𑀺𑀓𑁆𑀔𑀽𑀳𑀺 𑀯𑀸 𑀲𑀸𑀫𑀡𑁂𑀭𑁂𑀳𑀺 𑀯𑀸 𑀳𑀢𑁆𑀣𑀓𑀫𑁆𑀫𑀁 𑀦 𑀓𑀸𑀭𑁂𑀢𑀩𑁆𑀩’’𑀦𑁆𑀢𑀺 𑀲𑀸𑀫𑀜𑁆𑀜𑀢𑁄 𑀯𑀼𑀢𑁆𑀢𑀢𑁆𑀢𑀸 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀬𑀁𑀓𑀺𑀜𑁆𑀘𑀺 𑀳𑀢𑁆𑀣𑀓𑀫𑁆𑀫𑀁 𑀓𑀸𑀭𑁂𑀢𑀼𑀁 𑀦 𑀯𑀝𑁆𑀝𑀢𑀺. 𑀬𑀁 𑀧𑀦 𑀅𑀮𑀚𑁆𑀚𑀻 𑀦𑀺𑀯𑀸𑀭𑀺𑀬𑀫𑀸𑀦𑁄𑀧𑀺 𑀩𑀻𑀚𑀦𑀸𑀤𑀺𑀁 𑀓𑀭𑁄𑀢𑀺, 𑀢𑀢𑁆𑀣 𑀤𑁄𑀲𑁄 𑀦𑀢𑁆𑀣𑀺. 𑀘𑁂𑀢𑀺𑀬𑀓𑀫𑁆𑀫𑀸𑀤𑀻𑀦𑀺 𑀧𑀦 𑀢𑁂𑀳𑀺 𑀓𑀸𑀭𑀸𑀧𑁂𑀢𑀼𑀁 𑀯𑀝𑁆𑀝𑀢𑀺. 𑀏𑀢𑁆𑀣 𑀘 ‘‘𑀅𑀮𑀚𑁆𑀚𑀻𑀳𑀺 𑀲𑀸𑀫𑀡𑁂𑀭𑁂𑀳𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 ‘‘𑀲𑀜𑁆𑀘𑀺𑀘𑁆𑀘 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀻’’𑀢𑀺𑀆𑀤𑀺 (𑀧𑀭𑀺. 𑁩𑁫𑁯) 𑀅𑀮𑀚𑁆𑀚𑀻𑀮𑀓𑁆𑀔𑀡𑀁 𑀉𑀓𑁆𑀓𑀝𑁆𑀞𑀯𑀲𑁂𑀦 𑀉𑀧𑀲𑀫𑁆𑀧𑀦𑁆𑀦𑁂 𑀧𑀝𑀺𑀘𑁆𑀘 𑀉𑀧𑀮𑀓𑁆𑀔𑀡𑀢𑁄 𑀯𑀼𑀢𑁆𑀢𑀦𑁆𑀢𑀺 𑀢𑀁𑀮𑀓𑁆𑀔𑀡𑀯𑀺𑀭𑀳𑀺𑀢𑀸𑀦𑀁 𑀲𑀸𑀫𑀡𑁂𑀭𑀸𑀤𑀻𑀦𑀁 𑀮𑀺𑀗𑁆𑀕𑀢𑁆𑀣𑁂𑀦𑀓𑀕𑁄𑀢𑁆𑀭𑀪𑀼𑀧𑀭𑀺𑀬𑁄𑀲𑀸𑀦𑀸𑀦𑀁 𑀪𑀺𑀓𑁆𑀔𑀼𑀧𑀝𑀺𑀜𑁆𑀜𑀸𑀦𑀁 𑀤𑀼𑀲𑁆𑀲𑀻𑀮𑀸𑀦𑀫𑁆𑀧𑀺 𑀲𑀸𑀥𑀸𑀭𑀡𑀯𑀲𑁂𑀦 𑀅𑀮𑀚𑁆𑀚𑀺𑀢𑀸𑀮𑀓𑁆𑀔𑀡𑀁 𑀬𑀣𑀸𑀯𑀺𑀳𑀺𑀢𑀧𑀝𑀺𑀧𑀢𑁆𑀢𑀺𑀬𑀁 𑀲𑀜𑁆𑀘𑀺𑀘𑁆𑀘 𑀅𑀢𑀺𑀝𑁆𑀞𑀦𑀫𑁂𑀯𑀸𑀢𑀺 𑀕𑀳𑁂𑀢𑀩𑁆𑀩𑀁.

𑀆𑀳𑀭𑀸𑀧𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀦𑁆𑀢𑀺 𑀯𑀺𑀜𑁆𑀜𑀢𑁆𑀢𑀺𑀓𑁆𑀔𑀡𑁂 𑀯𑀺𑀜𑁆𑀜𑀢𑁆𑀢𑀺𑀧𑀘𑁆𑀘𑀬𑀸, 𑀧𑀝𑀺𑀮𑀸𑀪𑀓𑁆𑀔𑀡𑁂 𑀕𑁄𑀡𑀸𑀦𑀁 𑀲𑀸𑀤𑀺𑀬𑀦𑀧𑀘𑁆𑀘𑀬𑀸 𑀘 𑀤𑀼𑀓𑁆𑀓𑀝𑀁. 𑀕𑁄𑀡𑀜𑁆𑀳𑀺 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀅𑀯𑀺𑀜𑁆𑀜𑀢𑁆𑀢𑀺𑀬𑀸 𑀮𑀤𑁆𑀥𑀫𑁆𑀧𑀺 𑀲𑀸𑀤𑀺𑀢𑀼𑀁 𑀦 𑀯𑀝𑁆𑀝𑀢𑀺 ‘‘𑀳𑀢𑁆𑀣𑀺𑀕𑀯𑀲𑁆𑀲𑀯𑀴𑀯𑀧𑀝𑀺𑀕𑁆𑀕𑀳𑀡𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀻’’𑀢𑀺 (𑀤𑀻. 𑀦𑀺. 𑁧.𑁧𑁦, 𑁧𑁯𑁪) 𑀯𑀼𑀢𑁆𑀢𑀢𑁆𑀢𑀸. 𑀢𑁂𑀦𑁂𑀯𑀸𑀳 ‘‘𑀜𑀸𑀢𑀺𑀧𑀯𑀸𑀭𑀺𑀢𑀝𑁆𑀞𑀸𑀦𑀢𑁄𑀧𑀺 𑀫𑀽𑀮𑀘𑁆𑀙𑁂𑀚𑁆𑀚𑀸𑀬 𑀬𑀸𑀘𑀺𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺. 𑀏𑀢𑁆𑀣 𑀘 𑀯𑀺𑀜𑁆𑀜𑀢𑁆𑀢𑀺𑀤𑀼𑀓𑁆𑀓𑀝𑀸𑀪𑀸𑀯𑁂𑀧𑀺 𑀅𑀓𑀧𑁆𑀧𑀺𑀬𑀯𑀢𑁆𑀣𑀼𑀬𑀸𑀘𑀦𑁂𑀧𑀺 𑀧𑀝𑀺𑀕𑁆𑀕𑀳𑀡𑁂𑀧𑀺 𑀤𑀼𑀓𑁆𑀓𑀝𑀫𑁂𑀯. 𑀭𑀓𑁆𑀔𑀺𑀢𑁆𑀯𑀸𑀢𑀺 𑀘𑁄𑀭𑀸𑀤𑀺𑀉𑀧𑀤𑁆𑀤𑀯𑀢𑁄 𑀭𑀓𑁆𑀔𑀺𑀢𑁆𑀯𑀸. 𑀚𑀕𑁆𑀕𑀺𑀢𑁆𑀯𑀸𑀢𑀺 𑀢𑀺𑀡𑀤𑀸𑀦𑀸𑀤𑀻𑀳𑀺 𑀧𑁄𑀲𑁂𑀢𑁆𑀯𑀸.

𑀜𑀸𑀢𑀺𑀧𑀯𑀸𑀭𑀺𑀢𑀝𑁆𑀞𑀸𑀦𑁂 𑀧𑀦 𑀯𑀝𑁆𑀝𑀢𑀻𑀢𑀺 𑀲𑀓𑀝𑀲𑁆𑀲 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑀢𑁆𑀢𑀸 𑀫𑀽𑀮𑀘𑁆𑀙𑁂𑀚𑁆𑀚𑀯𑀲𑁂𑀦 𑀬𑀸𑀘𑀺𑀢𑀼𑀁 𑀯𑀝𑁆𑀝𑀢𑀺. 𑀢𑀸𑀯𑀓𑀸𑀮𑀺𑀓𑀁 𑀯𑀝𑁆𑀝𑀢𑀻𑀢𑀺 𑀉𑀪𑀬𑀢𑁆𑀣𑀸𑀧𑀺 𑀯𑀝𑁆𑀝𑀢𑀻𑀢𑀺 𑀅𑀢𑁆𑀣𑁄. 𑀯𑀸𑀲𑀺𑀆𑀤𑀻𑀦𑀺 𑀧𑀼𑀕𑁆𑀕𑀮𑀺𑀓𑀸𑀦𑀺𑀧𑀺 𑀯𑀝𑁆𑀝𑀦𑁆𑀢𑀻𑀢𑀺 𑀆𑀳 ‘‘𑀏𑀲 𑀦𑀬𑁄 𑀯𑀸𑀲𑀻’’𑀢𑀺𑀆𑀤𑀺. 𑀯𑀮𑁆𑀮𑀺𑀆𑀤𑀻𑀲𑀼 𑀘 𑀧𑀭𑀧𑀭𑀺𑀕𑁆𑀕𑀳𑀺𑀢𑁂𑀲𑀼 𑀘 𑀏𑀲𑁂𑀯 𑀦𑀬𑁄𑀢𑀺 𑀬𑁄𑀚𑁂𑀢𑀩𑁆𑀩𑀁. ‘‘𑀕𑀭𑀼𑀪𑀡𑁆𑀟𑀧𑁆𑀧𑀳𑁄𑀦𑀓𑁂𑀲𑀼𑀬𑁂𑀯𑀸’’𑀢𑀺 𑀇𑀤𑀁 𑀯𑀺𑀜𑁆𑀜𑀢𑁆𑀢𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀅𑀤𑀺𑀦𑁆𑀦𑀸𑀤𑀸𑀦𑁂 𑀧𑀦 𑀢𑀺𑀡𑀲𑀮𑀸𑀓𑀁 𑀉𑀧𑀸𑀤𑀸𑀬 𑀧𑀭𑀧𑀭𑀺𑀕𑁆𑀕𑀳𑀺𑀢𑀁 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀕𑀡𑁆𑀳𑀢𑁄 𑀅𑀯𑀳𑀸𑀭𑁄 𑀏𑀯, 𑀪𑀡𑁆𑀟𑀕𑁆𑀖𑁂𑀦 𑀓𑀸𑀭𑁂𑀢𑀩𑁆𑀩𑁄. 𑀯𑀮𑁆𑀮𑀺𑀆𑀤𑀻𑀲𑀽𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑀧𑀸𑀴𑀺𑀆𑀕𑀢𑀸𑀦𑀁 (𑀧𑀸𑀭𑀸. 𑁩𑁪𑁯) 𑀯𑁂𑀴𑀼𑀆𑀤𑀻𑀦𑀁 𑀲𑀗𑁆𑀕𑀳𑁄. 𑀢𑀢𑁆𑀣 𑀬𑀲𑁆𑀫𑀺𑀁 𑀧𑀤𑁂𑀲𑁂 𑀳𑀭𑀺𑀢𑀸𑀮𑀚𑀸𑀢𑀺𑀳𑀺𑀗𑁆𑀕𑀼𑀮𑀸𑀤𑀺 𑀅𑀧𑁆𑀧𑀓𑀫𑁆𑀧𑀺 𑀫𑀳𑀕𑁆𑀖𑀁 𑀳𑁄𑀢𑀺, 𑀢𑀢𑁆𑀣 𑀢𑀁 𑀢𑀸𑀮𑀧𑀓𑁆𑀓𑀧𑀫𑀸𑀡𑀢𑁄 𑀊𑀦𑀫𑁆𑀧𑀺 𑀕𑀭𑀼𑀪𑀡𑁆𑀟𑀫𑁂𑀯, 𑀯𑀺𑀜𑁆𑀜𑀸𑀧𑁂𑀢𑀼𑀜𑁆𑀘 𑀦 𑀯𑀝𑁆𑀝𑀢𑀺.

𑀲𑀸𑀢𑀺 𑀯𑀺𑀜𑁆𑀜𑀢𑁆𑀢𑀺. 𑀧𑀭𑀺𑀓𑀣𑀸𑀤𑀻𑀲𑀼 ‘‘𑀲𑁂𑀦𑀸𑀲𑀦𑀁 𑀲𑀫𑁆𑀩𑀸𑀥’’𑀦𑁆𑀢𑀺𑀆𑀤𑀺𑀦𑀸 (𑀯𑀺𑀲𑀼𑀤𑁆𑀥𑀺. 𑁧.𑁧𑁯) 𑀧𑀭𑀺𑀬𑀸𑀬𑁂𑀦 𑀓𑀣𑀦𑀁 𑀧𑀭𑀺𑀓𑀣𑀸 𑀦𑀸𑀫. 𑀉𑀚𑀼𑀓𑀫𑁂𑀯 𑀅𑀓𑀣𑁂𑀢𑁆𑀯𑀸 ‘‘𑀪𑀺𑀓𑁆𑀔𑀽𑀦𑀁 𑀓𑀺𑀁 𑀧𑀸𑀲𑀸𑀤𑁄 𑀦 𑀯𑀝𑁆𑀝𑀢𑀻’’𑀢𑀺𑀆𑀤𑀺𑀦𑀸 (𑀯𑀺𑀲𑀼𑀤𑁆𑀥𑀺. 𑁧.𑁧𑁯) 𑀅𑀥𑀺𑀧𑁆𑀧𑀸𑀬𑁄 𑀬𑀣𑀸𑀯𑀺𑀪𑀽𑀢𑁄 𑀳𑁄𑀢𑀺, 𑀏𑀯𑀁 𑀪𑀸𑀲𑀦𑀁 𑀑𑀪𑀸𑀲𑁄 𑀦𑀸𑀫. 𑀲𑁂𑀦𑀸𑀲𑀦𑀸𑀤𑀺𑀅𑀢𑁆𑀣𑀁 𑀪𑀽𑀫𑀺𑀧𑀭𑀺𑀓𑀫𑁆𑀫𑀸𑀤𑀺𑀓𑀭𑀡𑀯𑀲𑁂𑀦 𑀧𑀘𑁆𑀘𑀬𑀼𑀧𑁆𑀧𑀸𑀤𑀸𑀬 𑀦𑀺𑀫𑀺𑀢𑁆𑀢𑀓𑀭𑀡𑀁 𑀦𑀺𑀫𑀺𑀢𑁆𑀢𑀓𑀫𑁆𑀫𑀁 𑀦𑀸𑀫. 𑀉𑀓𑁆𑀓𑀫𑀦𑁆𑀢𑀻𑀢𑀺 𑀅𑀧𑀕𑀘𑁆𑀙𑀦𑁆𑀢𑀺.

𑁩𑁪𑁪. 𑀫𑀡𑀺 𑀓𑀡𑁆𑀞𑁂 𑀅𑀲𑁆𑀲𑀸𑀢𑀺 𑀫𑀡𑀺𑀓𑀡𑁆𑀞𑁄. 𑀤𑁂𑀯𑀯𑀡𑁆𑀡𑀦𑁆𑀢𑀺 𑀤𑁂𑀯𑀢𑁆𑀢𑀪𑀸𑀯𑀁.

𑁩𑁪𑁫. 𑀧𑀸𑀴𑀺𑀬𑀁 𑀧𑀢𑁆𑀢𑁂𑀦 𑀫𑁂 𑀅𑀢𑁆𑀣𑁄𑀢𑀺 (𑀧𑀸𑀭𑀸. 𑁩𑁪𑁫) 𑀅𑀦𑀢𑁆𑀣𑀺𑀓𑀫𑁆𑀧𑀺 𑀧𑀢𑁆𑀢𑁂𑀦 𑀪𑀺𑀓𑁆𑀔𑀼𑀁 𑀏𑀯𑀁 𑀯𑀤𑀸𑀧𑁂𑀦𑁆𑀢𑁄 𑀪𑀕𑀯𑀸 𑀲𑁄𑀢𑁆𑀣𑀺𑀬𑀸 𑀫𑀦𑁆𑀢𑀧𑀤𑀯𑀲𑁂𑀦 𑀯𑀤𑀸𑀧𑁂𑀲𑀺. 𑀲𑁄𑀧𑀺 𑀪𑀺𑀓𑁆𑀔𑀼 𑀪𑀕𑀯𑀢𑀸 𑀆𑀡𑀢𑁆𑀢𑀯𑀘𑀦𑀁 𑀯𑀤𑁂𑀫𑀻𑀢𑀺 𑀅𑀯𑁄𑀘, 𑀢𑁂𑀦𑀲𑁆𑀲 𑀫𑀼𑀲𑀸 𑀦 𑀳𑁄𑀢𑀺. 𑀅𑀣 𑀯𑀸 ‘‘𑀧𑀢𑁆𑀢𑁂𑀦 𑀫𑁂 𑀅𑀢𑁆𑀣𑁄’’𑀢𑀺 𑀇𑀤𑀁 ‘‘𑀧𑀢𑁆𑀢𑀁 𑀤𑀤𑀦𑁆𑀢𑀽’’𑀢𑀺 𑀇𑀫𑀺𑀦𑀸 𑀲𑀫𑀸𑀦𑀢𑁆𑀣𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀲 𑀦𑀬𑁄 𑀫𑀡𑀺𑀦𑀸 𑀫𑁂 𑀅𑀢𑁆𑀣𑁄𑀢𑀺 𑀏𑀢𑁆𑀣𑀸𑀧𑀺. 𑀢𑀲𑁆𑀫𑀸 𑀅𑀜𑁆𑀜𑁂𑀲𑀫𑁆𑀧𑀺 𑀏𑀯𑀭𑀽𑀧𑀁 𑀓𑀣𑁂𑀦𑁆𑀢𑀲𑁆𑀲, 𑀓𑀣𑀸𑀧𑁂𑀦𑁆𑀢𑀲𑁆𑀲 𑀘 𑀯𑀘𑀦𑀤𑁄𑀲𑁄 𑀦𑀢𑁆𑀣𑀻𑀢𑀺 𑀕𑀳𑁂𑀢𑀩𑁆𑀩𑀁.

𑁩𑁪𑁯. 𑀉𑀤𑁆𑀥𑀁𑀫𑀼𑀔𑀁 𑀮𑀺𑀢𑁆𑀢𑀸 𑀉𑀮𑁆𑀮𑀺𑀢𑁆𑀢𑀸, 𑀙𑀤𑀦𑀲𑁆𑀲 𑀅𑀦𑁆𑀢𑁄 𑀮𑀺𑀫𑁆𑀧𑀦𑁆𑀢𑀸 𑀳𑀺 𑀬𑁂𑀪𑀼𑀬𑁆𑀬𑁂𑀦 𑀉𑀤𑁆𑀥𑀁𑀫𑀼𑀔𑀸 𑀮𑀺𑀫𑁆𑀧𑀦𑁆𑀢𑀺. 𑀢𑁂𑀦𑀸𑀳 ‘‘𑀅𑀦𑁆𑀢𑁄𑀮𑀺𑀢𑁆𑀢𑀸’’𑀢𑀺. 𑀅𑀥𑁄𑀫𑀼𑀔𑀁 𑀮𑀺𑀢𑁆𑀢𑀸 𑀅𑀯𑀮𑀺𑀢𑁆𑀢𑀸. 𑀩𑀳𑀺 𑀮𑀺𑀫𑁆𑀧𑀦𑁆𑀢𑀸 𑀳𑀺 𑀬𑁂𑀪𑀼𑀬𑁆𑀬𑁂𑀦 𑀅𑀥𑁄𑀫𑀼𑀔𑀸 𑀮𑀺𑀫𑁆𑀧𑀦𑁆𑀢𑀺. 𑀢𑁂𑀦𑀸𑀳 ‘‘𑀩𑀳𑀺𑀮𑀺𑀢𑁆𑀢𑀸’’𑀢𑀺.

𑀩𑁆𑀬𑀜𑁆𑀚𑀦𑀁 𑀯𑀺𑀮𑁄𑀫𑀺𑀢𑀁 𑀪𑀯𑁂𑀬𑁆𑀬𑀸𑀢𑀺 𑀬𑀲𑁆𑀫𑀸 ‘‘𑀓𑀸𑀭𑀬𑀫𑀸𑀦𑁂𑀦𑀸’’𑀢𑀺 𑀇𑀫𑀲𑁆𑀲 𑀳𑁂𑀢𑀼𑀓𑀢𑁆𑀢𑀼𑀯𑀘𑀦𑀲𑁆𑀲 ‘‘𑀓𑀭𑁄𑀦𑁆𑀢𑁂𑀦𑀸’’𑀢𑀺 𑀇𑀤𑀁 𑀲𑀼𑀤𑁆𑀥𑀓𑀢𑁆𑀢𑀼𑀯𑀘𑀦𑀁 𑀧𑀭𑀺𑀬𑀸𑀬𑀯𑀘𑀦𑀁 𑀦 𑀳𑁄𑀢𑀺, 𑀢𑀲𑁆𑀫𑀸 ‘‘𑀓𑀭𑁄𑀦𑁆𑀢𑁂𑀦 𑀯𑀸 𑀓𑀸𑀭𑀸𑀧𑁂𑀦𑁆𑀢𑁂𑀦 𑀯𑀸’’𑀢𑀺 𑀓𑀸𑀭𑀬𑀫𑀸𑀦𑁂𑀦𑀸𑀢𑀺 𑀩𑀳𑀼𑀉𑀤𑁆𑀤𑁂𑀲𑀧𑀤𑀸𑀦𑀼𑀕𑀼𑀡𑀁 𑀓𑀭𑀡𑀯𑀘𑀦𑁂𑀦𑁂𑀯 𑀧𑀤𑀢𑁆𑀣𑀁 𑀓𑀢𑁆𑀯𑀸 𑀦𑀺𑀤𑁆𑀤𑁂𑀲𑁂 𑀓𑀢𑁂 𑀩𑁆𑀬𑀜𑁆𑀚𑀦𑀁 𑀯𑀺𑀭𑀼𑀤𑁆𑀥𑀁 𑀪𑀯𑁂𑀬𑁆𑀬, 𑀢𑀣𑀸 𑀧𑀦 𑀧𑀤𑀢𑁆𑀣𑀯𑀲𑁂𑀦 𑀅𑀤𑀲𑁆𑀲𑁂𑀢𑁆𑀯𑀸 𑀲𑀸𑀫𑀢𑁆𑀣𑀺𑀬𑀢𑁄 𑀲𑀺𑀤𑁆𑀥𑀫𑁂𑀯𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 𑀧𑀘𑁆𑀘𑀢𑁆𑀢𑀯𑀲𑁂𑀦 ‘‘𑀓𑀭𑁄𑀦𑁆𑀢𑁄 𑀯𑀸 𑀓𑀸𑀭𑀸𑀧𑁂𑀦𑁆𑀢𑁄 𑀯𑀸’’𑀢𑀺 𑀧𑀤𑀪𑀸𑀚𑀦𑀁 𑀯𑀼𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑀸𑀳 ‘‘𑀅𑀢𑁆𑀣𑀫𑀢𑁆𑀢𑀫𑁂𑀯𑀸’’𑀢𑀺𑀆𑀤𑀺. 𑀧𑀤𑀢𑁆𑀣𑀢𑁄, 𑀲𑀸𑀫𑀢𑁆𑀣𑀺𑀬𑀢𑁄 𑀘 𑀮𑀩𑁆𑀪𑀫𑀸𑀦𑀁 𑀅𑀢𑁆𑀣𑀫𑀢𑁆𑀢𑀫𑁂𑀯𑀸𑀢𑀺 𑀅𑀢𑁆𑀣𑁄. 𑀬𑀜𑁆𑀳𑀺 𑀓𑀸𑀭𑀬𑀫𑀸𑀦𑁂𑀦 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀁, 𑀢𑀁 𑀓𑀭𑁄𑀦𑁆𑀢𑁂𑀦𑀸𑀧𑀺 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀫𑁂𑀯𑀸𑀢𑀺 𑀇𑀤𑀫𑁂𑀢𑁆𑀣 𑀲𑀸𑀫𑀢𑁆𑀣𑀺𑀬𑀁 𑀤𑀝𑁆𑀞𑀩𑁆𑀩𑀁.

𑀉𑀤𑁆𑀤𑁂𑀲𑁄𑀢𑀺 𑀲𑀸𑀫𑀺𑀪𑀸𑀯𑁂𑀦 𑀉𑀤𑁆𑀤𑀺𑀲𑀺𑀢𑀩𑁆𑀩𑁄. 𑀲𑁂𑀢𑀓𑀫𑁆𑀫𑀦𑁆𑀢𑀺 𑀲𑁂𑀢𑀯𑀡𑁆𑀡𑀓𑀭𑀡𑀢𑁆𑀣𑀁 𑀲𑁂𑀢𑀯𑀡𑁆𑀡𑀫𑀢𑁆𑀢𑀺𑀓𑀸𑀬 𑀯𑀸 𑀲𑀼𑀥𑀸𑀬 𑀯𑀸 𑀓𑀢𑀢𑀦𑀼𑀓𑀮𑁂𑀧𑁄, 𑀢𑁂𑀦 𑀧𑀦 𑀲𑀳 𑀫𑀺𑀦𑀺𑀬𑀫𑀸𑀦𑁂 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀁 𑀳𑁄𑀢𑀻𑀢𑀺 𑀲𑀗𑁆𑀓𑀸𑀦𑀺𑀯𑀸𑀭𑀡𑀢𑁆𑀣𑀁 𑀆𑀳 ‘‘𑀅𑀩𑁆𑀩𑁄𑀳𑀸𑀭𑀺𑀓’’𑀦𑁆𑀢𑀺. 𑀢𑁂𑀦 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀯𑁄𑀳𑀸𑀭𑀁 𑀦 𑀕𑀘𑁆𑀙𑀢𑀺 𑀓𑀼𑀝𑀺𑀬𑀸 𑀅𑀦𑀗𑁆𑀕𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀬𑀣𑀸𑀯𑀼𑀢𑁆𑀢𑀲𑁆𑀲 𑀅𑀢𑁆𑀣𑀲𑁆𑀲 𑀯𑀼𑀢𑁆𑀢𑀦𑀬𑀁 𑀤𑀲𑁆𑀲𑁂𑀦𑁆𑀢𑁂𑀦 ‘‘𑀯𑀼𑀢𑁆𑀢𑀜𑁆𑀳𑁂𑀢’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 ‘‘𑀆𑀬𑀸𑀫𑀢𑁄 𑀘 𑀯𑀺𑀢𑁆𑀣𑀸𑀭𑀢𑁄 𑀘𑀸’’𑀢𑀺 𑀅𑀯𑀢𑁆𑀯𑀸 ‘‘𑀆𑀬𑀸𑀫𑀢𑁄 𑀯𑀸 𑀯𑀺𑀢𑁆𑀣𑀸𑀭𑀢𑁄 𑀯𑀸’’𑀢𑀺 𑀯𑀺𑀓𑀧𑁆𑀧𑀢𑁆𑀣𑀲𑁆𑀲 𑀯𑀸-𑀲𑀤𑁆𑀤𑀲𑁆𑀲 𑀯𑀼𑀢𑁆𑀢𑀢𑁆𑀢𑀸 𑀏𑀓𑀢𑁄𑀪𑀸𑀕𑁂 𑀯𑀟𑁆𑀠𑀺𑀢𑁂𑀧𑀺 𑀆𑀧𑀢𑁆𑀢𑀻𑀢𑀺 𑀧𑀓𑀸𑀲𑀺𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀺𑀳𑀢𑁆𑀣𑀸𑀢𑀺 𑀧𑀓𑀢𑀺𑀳𑀢𑁆𑀣𑁂𑀦 𑀢𑀺𑀳𑀢𑁆𑀣𑀸, ‘‘𑀯𑀟𑁆𑀠𑀓𑀻𑀳𑀢𑁆𑀣𑁂𑀦𑀸’’𑀢𑀺𑀧𑀺 (𑀲𑀸𑀭𑀢𑁆𑀣. 𑀝𑀻. 𑁨.𑁩𑁪𑁮-𑁩𑁪𑁯) 𑀯𑀤𑀦𑁆𑀢𑀺, 𑀢𑀁 ‘‘𑀬𑀢𑁆𑀣…𑀧𑁂… 𑀅𑀬𑀁 𑀓𑀼𑀝𑀻𑀢𑀺 𑀲𑀗𑁆𑀔𑁆𑀬𑀁 𑀦 𑀕𑀘𑁆𑀙𑀢𑀻’’𑀢𑀺 𑀇𑀫𑀺𑀦𑀸 𑀯𑀺𑀭𑀼𑀚𑁆𑀛𑀢𑀺 𑀯𑀟𑁆𑀠𑀓𑀻𑀳𑀢𑁆𑀣𑁂𑀦 𑀢𑀺𑀳𑀢𑁆𑀣𑀸𑀬𑀧𑀺 𑀓𑀼𑀝𑀺𑀬𑀸 𑀧𑀫𑀸𑀡𑀬𑀼𑀢𑁆𑀢𑀲𑁆𑀲 𑀫𑀜𑁆𑀘𑀲𑁆𑀲 𑀲𑀼𑀔𑁂𑀦 𑀧𑀭𑀺𑀯𑀢𑁆𑀢𑀦𑀢𑁄. ‘‘𑀊𑀦𑀓𑀘𑀢𑀼𑀳𑀢𑁆𑀣𑀸 𑀯𑀸’’𑀢𑀺 𑀇𑀤𑀜𑁆𑀘 𑀧𑀘𑁆𑀙𑀺𑀫𑀧𑁆𑀧𑀫𑀸𑀡𑀬𑀼𑀢𑁆𑀢𑀲𑁆𑀲 𑀫𑀜𑁆𑀘𑀲𑁆𑀲 𑀅𑀧𑀭𑀺𑀯𑀢𑁆𑀢𑀦𑀸𑀭𑀳𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀬𑀤𑀺 𑀳𑀺 𑀧𑀓𑀢𑀺𑀳𑀢𑁆𑀣𑁂𑀦 𑀘𑀢𑀼𑀳𑀢𑁆𑀣𑀸𑀬𑀧𑀺 𑀓𑀼𑀝𑀺𑀬𑀸 𑀧𑀫𑀸𑀡𑀬𑀼𑀢𑁆𑀢𑁄 𑀫𑀜𑁆𑀘𑁄 𑀦 𑀧𑀭𑀺𑀯𑀢𑁆𑀢𑀢𑀺, 𑀲𑀸 𑀅𑀓𑀼𑀝𑀻𑀬𑁂𑀯, 𑀢𑀲𑁆𑀫𑀸 𑀫𑀜𑁆𑀘𑀧𑀭𑀺𑀯𑀢𑁆𑀢𑀦𑀫𑀢𑁆𑀢𑁂𑀦𑁂𑀯 𑀧𑀫𑀸𑀡𑀦𑁆𑀢𑀺 𑀕𑀳𑁂𑀢𑀩𑁆𑀩𑀁. 𑀧𑀫𑀸𑀡𑀬𑀼𑀢𑁆𑀢𑁄 𑀫𑀜𑁆𑀘𑁄𑀢𑀺 𑀲𑀩𑁆𑀩𑀧𑀘𑁆𑀙𑀺𑀫𑀧𑁆𑀧𑀫𑀸𑀡𑀬𑀼𑀢𑁆𑀢𑁄 𑀫𑀜𑁆𑀘𑁄. 𑀲𑁄 𑀳𑀺 𑀧𑀓𑀢𑀺𑀯𑀺𑀤𑀢𑁆𑀣𑀺𑀬𑀸 𑀦𑀯𑀯𑀺𑀤𑀢𑁆𑀣𑀺𑀓𑁄, 𑀅𑀝𑁆𑀞𑀯𑀺𑀤𑀢𑁆𑀣𑀺𑀓𑁄 𑀯𑀸 𑀳𑁄𑀢𑀺, 𑀢𑀢𑁄 𑀔𑀼𑀤𑁆𑀤𑀓𑁄 𑀫𑀜𑁆𑀘𑁄 𑀲𑀻𑀲𑀽𑀧𑀥𑀸𑀦𑀁 𑀞𑀧𑁂𑀢𑁆𑀯𑀸 𑀧𑀸𑀤𑀁 𑀧𑀲𑀸𑀭𑁂𑀢𑁆𑀯𑀸 𑀦𑀺𑀧𑀚𑁆𑀚𑀺𑀢𑀼𑀁 𑀦 𑀧𑀳𑁄𑀢𑀺. 𑀧𑀫𑀸𑀡𑀢𑁄 𑀊𑀦𑀢𑀭𑀫𑁆𑀧𑀻𑀢𑀺 𑀉𑀓𑁆𑀓𑀝𑁆𑀞𑀧𑁆𑀧𑀫𑀸𑀡𑀢𑁄 𑀊𑀦𑀢𑀭𑀫𑁆𑀧𑀺, 𑀇𑀤𑀜𑁆𑀘 𑀳𑁂𑀝𑁆𑀞𑀺𑀫𑀧𑁆𑀧𑀫𑀸𑀡𑀬𑀼𑀢𑁆𑀢𑀸𑀬𑀧𑀺 𑀯𑀢𑁆𑀣𑀼𑀤𑁂𑀲𑀦𑀸 𑀓𑀸𑀢𑀩𑁆𑀩𑀸, 𑀦 𑀯𑀸𑀢𑀺 𑀲𑀦𑁆𑀤𑁂𑀳𑀦𑀺𑀯𑀢𑁆𑀢𑀦𑀢𑁆𑀣𑀁 𑀯𑀼𑀢𑁆𑀢𑀁.

𑀓𑀮𑀮𑀮𑁂𑀧𑁄𑀢𑀺 𑀓𑁂𑀦𑀘𑀺 𑀲𑀺𑀮𑁂𑀲𑁂𑀦 𑀓𑀢𑀮𑁂𑀧𑁄, 𑀲𑁂𑀢𑀭𑀢𑁆𑀢𑀸𑀤𑀺𑀯𑀡𑁆𑀡𑀓𑀭𑀡𑀢𑁆𑀣𑀁 𑀓𑀢𑀢𑀫𑁆𑀩𑀫𑀢𑁆𑀢𑀺𑀓𑀸𑀤𑀺𑀓𑀮𑀮𑀮𑁂𑀧𑁄 𑀯𑀸. 𑀢𑁂𑀦𑀸𑀳 ‘‘𑀅𑀮𑁂𑀧𑁄 𑀏𑀯𑀸’’𑀢𑀺. 𑀢𑁂𑀦 𑀢𑀴𑀸𑀓𑀸𑀤𑀻𑀲𑀼 𑀖𑀦𑁂𑀦 𑀓𑀮𑀮𑁂𑀦 𑀓𑀢𑀩𑀳𑀮𑀮𑁂𑀧𑁄 𑀫𑀢𑁆𑀢𑀺𑀓𑀸𑀮𑁂𑀧𑀦𑁂 𑀏𑀯 𑀧𑀯𑀺𑀲𑀢𑀺 𑀮𑁂𑀧𑀯𑁄𑀳𑀸𑀭𑀕𑀫𑀦𑀢𑁄𑀢𑀺 𑀤𑀲𑁆𑀲𑁂𑀢𑀺. 𑀧𑀺𑀝𑁆𑀞𑀲𑀗𑁆𑀖𑀸𑀝𑁄 𑀦𑀸𑀫 𑀤𑁆𑀯𑀸𑀭𑀩𑀸𑀳𑀲𑀗𑁆𑀔𑀸𑀢𑁄 𑀘𑀢𑀼𑀭𑀲𑁆𑀲𑀤𑀸𑀭𑀼𑀲𑀗𑁆𑀖𑀸𑀝𑁄, 𑀬𑀢𑁆𑀣 𑀲𑀉𑀢𑁆𑀢𑀭𑀧𑀸𑀲𑀁 𑀓𑀯𑀸𑀝𑀁 𑀅𑀧𑀲𑁆𑀲𑀸𑀬 𑀤𑁆𑀯𑀸𑀭𑀁 𑀧𑀺𑀤𑀳𑀦𑁆𑀢𑀺.

𑀑𑀮𑁄𑀓𑁂𑀢𑁆𑀯𑀸𑀧𑀻𑀢𑀺 𑀅𑀧𑀮𑁄𑀓𑁂𑀢𑁆𑀯𑀸𑀧𑀺, 𑀅𑀧𑀮𑁄𑀓𑀦𑀓𑀫𑁆𑀫𑀯𑀲𑁂𑀦𑀸𑀧𑀻𑀢𑀺 𑀅𑀢𑁆𑀣𑁄, 𑀅𑀧𑀲𑀤𑁆𑀤𑀲𑁆𑀲𑀸𑀧𑀺 𑀑𑀆𑀤𑁂𑀲𑁄 𑀓𑀢𑁄𑀢𑀺 𑀤𑀝𑁆𑀞𑀩𑁆𑀩𑁄.

𑁩𑁫𑁩. 𑀦𑀺𑀩𑀤𑁆𑀥𑀕𑁄𑀘𑀭𑀝𑁆𑀞𑀸𑀦𑀫𑁆𑀧𑀻𑀢𑀺 𑀏𑀢𑁆𑀣 𑀕𑁄𑀘𑀭𑀸𑀬 𑀧𑀓𑁆𑀓𑀫𑀦𑁆𑀢𑀸𑀦𑀁 𑀳𑀢𑁆𑀣𑀻𑀦𑀁 𑀦𑀺𑀩𑀤𑁆𑀥𑀕𑀫𑀦𑀫𑀕𑁆𑀕𑁄𑀧𑀺 𑀲𑀗𑁆𑀕𑀬𑁆𑀳𑀢𑀺. 𑀏𑀢𑁂𑀲𑀦𑁆𑀢𑀺 𑀲𑀻𑀳𑀸𑀤𑀻𑀦𑀁. 𑀕𑁄𑀘𑀭𑀪𑀽𑀫𑀻𑀢𑀺 𑀆𑀫𑀺𑀲𑀕𑁆𑀕𑀳𑀡𑀝𑁆𑀞𑀸𑀦𑀁. 𑀦 𑀕𑀳𑀺𑀢𑀸𑀢𑀺 𑀧𑀝𑀺𑀓𑁆𑀔𑀺𑀧𑀺𑀢𑀩𑁆𑀩𑀪𑀸𑀯𑁂𑀦 𑀦 𑀕𑀳𑀺𑀢𑀸, 𑀦 𑀯𑀸𑀭𑀺𑀢𑀸𑀢𑀺 𑀅𑀢𑁆𑀣𑁄. 𑀲𑀻𑀳𑀸𑀤𑀻𑀦𑀜𑁆𑀳𑀺 𑀕𑁄𑀘𑀭𑀕𑁆𑀕𑀳𑀡𑀝𑁆𑀞𑀸𑀦𑀁 𑀳𑀢𑁆𑀣𑀻𑀦𑀁 𑀯𑀺𑀬 𑀦𑀺𑀩𑀤𑁆𑀥𑀁 𑀦 𑀳𑁄𑀢𑀺, 𑀬𑀢𑁆𑀣 𑀧𑀦 𑀕𑁄𑀫𑀳𑀺𑀁𑀲𑀸𑀤𑀺𑀧𑀸𑀡𑀓𑀸 𑀲𑀦𑁆𑀢𑀺, 𑀤𑀽𑀭𑀫𑁆𑀧𑀺 𑀢𑀁 𑀞𑀸𑀦𑀁 𑀲𑀻𑀖𑀁 𑀕𑀦𑁆𑀢𑁆𑀯𑀸 𑀕𑁄𑀘𑀭𑀁 𑀕𑀡𑁆𑀳𑀦𑁆𑀢𑀺. 𑀢𑀲𑁆𑀫𑀸 𑀢𑁂𑀲𑀁 𑀢𑀁 𑀦 𑀯𑀸𑀭𑀺𑀢𑀁, 𑀦𑀺𑀩𑀤𑁆𑀥𑀕𑀫𑀦𑀫𑀕𑁆𑀕𑁄𑀯 𑀯𑀸𑀭𑀺𑀢𑁄 𑀆𑀲𑀬𑀢𑁄 𑀕𑀫𑀦𑀫𑀕𑁆𑀕𑀲𑁆𑀲 𑀦𑀺𑀩𑀤𑁆𑀥𑀢𑁆𑀢𑀸. 𑀅𑀜𑁆𑀜𑁂𑀲𑀫𑁆𑀧𑀺 𑀯𑀸𑀴𑀸𑀦𑀦𑁆𑀢𑀺 𑀅𑀭𑀜𑁆𑀜𑀫𑀳𑀺𑀁𑀲𑀸𑀤𑀻𑀦𑀁. 𑀆𑀭𑁄𑀕𑁆𑀬𑀢𑁆𑀣𑀸𑀬𑀸𑀢𑀺 𑀦𑀺𑀭𑀼𑀧𑀤𑁆𑀤𑀯𑀸𑀬. 𑀲𑁂𑀲𑀸𑀦𑀻𑀢𑀺 𑀧𑀼𑀩𑁆𑀩𑀡𑁆𑀡𑀦𑀺𑀲𑁆𑀲𑀺𑀢𑀸𑀤𑀻𑀦𑀺 𑀲𑁄𑀴𑀲. 𑀢𑀸𑀦𑀺 𑀘 𑀚𑀦𑀲𑀫𑁆𑀫𑀤𑁆𑀤𑀫𑀳𑀸𑀲𑀫𑁆𑀫𑀤𑁆𑀤𑀓𑀼𑀝𑀺𑀯𑀺𑀮𑁄𑀧𑀲𑀭𑀻𑀭𑀧𑀻𑀴𑀸𑀤𑀺𑀉𑀧𑀤𑁆𑀤𑀯𑁂𑀳𑀺 𑀲𑀉𑀧𑀤𑁆𑀤𑀯𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀅𑀪𑀺𑀳𑀦𑀦𑁆𑀢𑀺 𑀏𑀢𑁆𑀣𑀸𑀢𑀺 𑀅𑀩𑁆𑀪𑀸𑀖𑀸𑀢𑀁. ‘‘𑀯𑁂𑀭𑀺𑀖𑀭’’𑀦𑁆𑀢𑀺 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀯𑀺𑀪𑀸𑀯𑁂𑀢𑀼𑀁 ‘‘𑀘𑁄𑀭𑀸𑀦𑀁 𑀫𑀸𑀭𑀡𑀢𑁆𑀣𑀸𑀬 𑀓𑀢’’𑀦𑁆𑀢𑀺 𑀯𑀼𑀢𑁆𑀢𑀁.

𑀥𑀫𑁆𑀫𑀕𑀦𑁆𑀥𑀺𑀓𑀸𑀢𑀺 𑀥𑀫𑁆𑀫𑁂𑀦 𑀤𑀡𑁆𑀟𑀦𑀻𑀢𑀺𑀬𑀸 𑀳𑀢𑁆𑀣𑀧𑀸𑀤𑀸𑀤𑀺𑀘𑁆𑀙𑀺𑀦𑁆𑀤𑀦𑀕𑀦𑁆𑀥𑀺𑀓𑀸. 𑀕𑀦𑁆𑀥𑀺𑀓𑀸𑀢𑀺 𑀘 𑀬𑀲𑁆𑀲 𑀉𑀧𑀭𑀺 𑀳𑀢𑁆𑀣𑀸𑀤𑀺𑀁 𑀞𑀧𑁂𑀢𑁆𑀯𑀸 𑀙𑀺𑀦𑁆𑀤𑀦𑁆𑀢𑀺, 𑀢𑀸𑀤𑀺𑀲𑀁 𑀤𑀸𑀭𑀼𑀔𑀡𑁆𑀟𑀨𑀮𑀓𑀸𑀢𑀺 𑀯𑀼𑀘𑁆𑀘𑀢𑀺, 𑀢𑁂𑀦 𑀘 𑀉𑀧𑀮𑀓𑁆𑀔𑀺𑀢𑀁 𑀞𑀸𑀦𑀁. 𑀧𑀸𑀴𑀺𑀬𑀁 𑀭𑀘𑁆𑀙𑀸𑀦𑀺𑀲𑁆𑀲𑀺𑀢𑀦𑁆𑀢𑀺 𑀭𑀣𑀺𑀓𑀸𑀦𑀺𑀲𑁆𑀲𑀺𑀢𑀁. 𑀘𑀘𑁆𑀘𑀭𑀦𑀺𑀲𑁆𑀲𑀺𑀢𑀦𑁆𑀢𑀺 𑀘𑀢𑀼𑀦𑁆𑀦𑀁 𑀭𑀣𑀺𑀓𑀸𑀦𑀁 𑀲𑀦𑁆𑀥𑀺𑀦𑀺𑀲𑁆𑀲𑀺𑀢𑀁. 𑀲𑀓𑀝𑁂𑀦𑀸𑀢𑀺 𑀇𑀝𑁆𑀞𑀓𑀲𑀼𑀥𑀸𑀤𑀺𑀪𑀡𑁆𑀟𑀸𑀳𑀭𑀡𑀲𑀓𑀝𑁂𑀦.

𑀧𑀸𑀘𑀺𑀦𑀦𑁆𑀢𑀺 𑀲𑁂𑀦𑀸𑀲𑀦𑀲𑁆𑀲 𑀪𑀽𑀫𑀺𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀢𑀮𑀸𑀯𑀲𑀸𑀦𑀁 𑀘𑀺𑀦𑀺𑀢𑀩𑁆𑀩𑀯𑀢𑁆𑀣𑀼𑀓𑀁 𑀅𑀥𑀺𑀝𑁆𑀞𑀸𑀦𑀁, 𑀬𑀲𑁆𑀲 𑀉𑀧𑀭𑀺 𑀪𑀺𑀢𑁆𑀢𑀺𑀣𑀫𑁆𑀪𑀸𑀤𑀻𑀦𑀺 𑀘 𑀧𑀢𑀺𑀝𑁆𑀞𑀧𑁂𑀦𑁆𑀢𑀺. 𑀢𑁂𑀦𑀸𑀳 ‘‘𑀢𑀢𑁄 𑀧𑀝𑁆𑀞𑀸𑀬𑀸’’𑀢𑀺𑀆𑀤𑀺. 𑀓𑀺𑀜𑁆𑀘𑀸𑀧𑀺 𑀇𑀥 𑀧𑀼𑀩𑁆𑀩𑀧𑀬𑁄𑀕𑀲𑀳𑀧𑀬𑁄𑀕𑀸𑀦𑀁 𑀅𑀤𑀺𑀦𑁆𑀦𑀸𑀤𑀸𑀦𑁂 𑀯𑀺𑀬 𑀯𑀺𑀲𑁂𑀲𑁄 𑀦𑀢𑁆𑀣𑀺, 𑀢𑀣𑀸𑀧𑀺 𑀢𑁂𑀲𑀁 𑀯𑀺𑀪𑀸𑀕𑁂𑀦 𑀤𑀲𑁆𑀲𑀦𑀁 𑀪𑀺𑀦𑁆𑀤𑀺𑀢𑁆𑀯𑀸 𑀯𑀸 𑀧𑀼𑀦 𑀓𑀸𑀢𑀩𑁆𑀩𑀸𑀢𑀺 𑀏𑀢𑁆𑀣 𑀓𑀼𑀝𑀺𑀬𑀸 𑀪𑁂𑀤𑁂𑀦 𑀧𑀭𑀺𑀘𑁆𑀙𑁂𑀤𑀤𑀲𑁆𑀲𑀦𑀢𑁆𑀣𑀁 𑀓𑀢𑀁. 𑀢𑀤𑀢𑁆𑀣𑀸𑀬𑀸𑀢𑀺 𑀢𑀘𑁆𑀙𑀦𑀢𑁆𑀣𑀸𑀬. 𑀏𑀯𑀁 𑀓𑀢𑀦𑁆𑀢𑀺 𑀅𑀤𑁂𑀲𑀺𑀢𑀯𑀢𑁆𑀣𑀼𑀓𑀁 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀁 𑀯𑀸 𑀓𑀢𑀁. 𑀧𑀡𑁆𑀡𑀲𑀸𑀮𑀦𑁆𑀢𑀺 𑀧𑀡𑁆𑀡𑀓𑀼𑀝𑀺𑀬𑀸 𑀢𑀺𑀡𑀧𑀡𑁆𑀡𑀘𑀼𑀡𑁆𑀡𑀲𑁆𑀲 𑀅𑀧𑀭𑀺𑀧𑀢𑀦𑀢𑁆𑀣𑀸𑀬 𑀅𑀦𑁆𑀢𑁄 𑀘 𑀩𑀳𑀺 𑀘 𑀮𑀺𑀫𑁆𑀧𑀦𑁆𑀢𑀺, 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀢𑁂𑀦𑁂𑀯 𑀯𑀓𑁆𑀔𑀢𑀺 ‘‘𑀧𑀡𑁆𑀡𑀲𑀸𑀮𑀁 𑀮𑀺𑀫𑁆𑀧𑀢𑀻’’𑀢𑀺.

𑀅𑀦𑁆𑀢𑁄𑀮𑁂𑀧𑁂𑀦𑁂𑀯 𑀦𑀺𑀝𑁆𑀞𑀸𑀧𑁂𑀢𑀼𑀓𑀸𑀫𑀁 𑀲𑀦𑁆𑀥𑀸𑀬 ‘‘𑀅𑀦𑁆𑀢𑁄𑀮𑁂𑀧𑁂 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀩𑀳𑀺𑀮𑁂𑀧𑁂 𑀯𑀸𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀢𑀲𑁆𑀫𑀺𑀦𑁆𑀢𑀺 𑀤𑁆𑀯𑀸𑀭𑀩𑀦𑁆𑀥𑁂 𑀯𑀸 𑀯𑀸𑀢𑀧𑀸𑀦𑁂 𑀯𑀸 𑀞𑀧𑀺𑀢𑁂𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀢𑀲𑁆𑀲𑁄𑀓𑀸𑀲𑀦𑁆𑀢𑀺 𑀢𑀲𑁆𑀲 𑀤𑁆𑀯𑀸𑀭𑀩𑀦𑁆𑀥𑀸𑀤𑀺𑀲𑁆𑀲 𑀑𑀓𑀸𑀲𑀪𑀽𑀢𑀁 𑀙𑀺𑀤𑁆𑀤𑀁. 𑀧𑀼𑀦 𑀯𑀟𑁆𑀠𑁂𑀢𑁆𑀯𑀸𑀢𑀺 𑀧𑀼𑀩𑁆𑀩𑁂 𑀞𑀧𑀺𑀢𑁄𑀓𑀸𑀲𑀁 𑀔𑀼𑀤𑁆𑀤𑀓𑀁 𑀘𑁂, 𑀢𑀁 𑀤𑁆𑀯𑀸𑀭𑀯𑀸𑀢𑀧𑀸𑀦𑀘𑁆𑀙𑀺𑀤𑁆𑀤𑀪𑁂𑀤𑀦𑁂𑀦 𑀧𑀼𑀦 𑀯𑀟𑁆𑀠𑁂𑀢𑁆𑀯𑀸. 𑀞𑀧𑀺𑀢𑁂𑀢𑀺 𑀤𑁆𑀯𑀸𑀭𑀩𑀦𑁆𑀥𑁂 𑀯𑀸 𑀕𑀯𑀓𑁆𑀔𑀲𑀗𑁆𑀖𑀸𑀝𑁂 𑀯𑀸 𑀆𑀦𑁂𑀢𑁆𑀯𑀸 𑀢𑀲𑁆𑀫𑀺𑀁 𑀯𑀟𑁆𑀠𑀺𑀢𑁂 𑀯𑀸 𑀅𑀯𑀟𑁆𑀠𑀺𑀢𑁂 𑀯𑀸 𑀙𑀺𑀤𑁆𑀤𑁂 𑀧𑀢𑀺𑀝𑁆𑀞𑀸𑀧𑀺𑀢𑁂. 𑀮𑁂𑀧𑁄 𑀦 𑀖𑀝𑀻𑀬𑀢𑀻𑀢𑀺 𑀲𑀫𑀦𑁆𑀢𑀢𑁄 𑀤𑀺𑀦𑁆𑀦𑁄 𑀮𑁂𑀧𑁄 𑀢𑀣𑀸 𑀞𑀧𑀺𑀢𑁂𑀦 𑀤𑁆𑀯𑀸𑀭𑀩𑀦𑁆𑀥𑀦𑁂𑀦 𑀯𑀸 𑀯𑀸𑀢𑀧𑀸𑀦𑁂𑀦 𑀯𑀸 𑀲𑀤𑁆𑀥𑀺𑀁 𑀦 𑀖𑀝𑀻𑀬𑀢𑀺, 𑀏𑀓𑀸𑀩𑀤𑁆𑀥𑀁 𑀦 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀦𑁆𑀢𑀺 𑀤𑁆𑀯𑀸𑀭𑀩𑀦𑁆𑀥𑀁 𑀯𑀸 𑀯𑀸𑀢𑀧𑀸𑀦𑀁 𑀯𑀸. 𑀧𑀞𑀫𑀫𑁂𑀯 𑀲𑀗𑁆𑀖𑀸𑀤𑀺𑀲𑁂𑀲𑁄𑀢𑀺 𑀢𑁂𑀲𑀁 𑀲𑀫𑀦𑁆𑀢𑀢𑁄 𑀧𑀼𑀩𑁆𑀩𑁂𑀯 𑀮𑁂𑀧𑀲𑁆𑀲 𑀖𑀝𑁂𑀢𑁆𑀯𑀸 𑀦𑀺𑀝𑁆𑀞𑀸𑀧𑀺𑀢𑀢𑁆𑀢𑀸 𑀤𑁆𑀯𑀸𑀭𑀩𑀦𑁆𑀥𑀯𑀸𑀢𑀧𑀸𑀦𑀸𑀦𑀁 𑀞𑀧𑀦𑀢𑁄 𑀧𑀼𑀩𑁆𑀩𑁂 𑀏𑀯 𑀲𑀗𑁆𑀖𑀸𑀤𑀺𑀲𑁂𑀲𑁄.

𑀮𑁂𑀧𑀖𑀝𑀦𑁂𑀦𑁂𑀯𑀸𑀢𑀺 𑀇𑀝𑁆𑀞𑀓𑀸𑀳𑀺 𑀓𑀢𑀯𑀸𑀢𑀧𑀸𑀦𑀸𑀤𑀻𑀦𑀺 𑀯𑀺𑀦𑀸 𑀲𑀫𑀦𑁆𑀢𑀸 𑀮𑁂𑀧𑀖𑀝𑀦𑁂𑀦𑁂𑀯 𑀆𑀧𑀢𑁆𑀢𑀺 𑀯𑀸𑀢𑀧𑀸𑀦𑀸𑀤𑀻𑀦𑀁 𑀅𑀮𑁂𑀧𑁄𑀓𑀸𑀲𑀢𑁆𑀢𑀸, 𑀇𑀝𑁆𑀞𑀓𑀸𑀳𑀺 𑀓𑀢𑀢𑁆𑀢𑀸 𑀯𑀸, 𑀯𑀸𑀢𑀧𑀸𑀦𑀸𑀤𑀻𑀲𑀼𑀧𑀺 𑀮𑁂𑀧𑀲𑁆𑀲 𑀪𑀺𑀢𑁆𑀢𑀺𑀮𑁂𑀧𑁂𑀦 𑀲𑀤𑁆𑀥𑀺𑀁 𑀖𑀝𑀦𑁂𑀦𑁂𑀯𑀸𑀢𑀺𑀧𑀺 𑀅𑀢𑁆𑀣𑀁 𑀯𑀤𑀦𑁆𑀢𑀺. 𑀢𑀢𑁆𑀣𑀸𑀢𑀺 𑀧𑀡𑁆𑀡𑀲𑀸𑀮𑀸𑀬𑀁. 𑀆𑀮𑁄𑀓𑀢𑁆𑀣𑀸𑀬 𑀅𑀝𑁆𑀞𑀗𑁆𑀕𑀼𑀮𑀫𑀢𑁆𑀢𑀁 𑀞𑀧𑁂𑀢𑁆𑀯𑀸 𑀮𑀺𑀫𑁆𑀧𑀢𑀻𑀢𑀺 𑀤𑀸𑀭𑀼𑀓𑀼𑀝𑁆𑀝𑀲𑁆𑀲 𑀤𑀸𑀭𑀽𑀦𑀫𑀦𑁆𑀢𑀭𑀸 𑀅𑀝𑁆𑀞𑀗𑁆𑀕𑀼𑀮𑀫𑀢𑁆𑀢𑀁 𑀯𑀺𑀯𑀭𑀁 𑀬𑀸𑀯 𑀮𑀺𑀫𑁆𑀧𑀢𑀺, 𑀢𑀸𑀯 𑀆𑀮𑁄𑀓𑀢𑁆𑀣𑀸𑀬 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀁 𑀲𑀓𑀼𑀝𑁆𑀝𑀘𑁆𑀙𑀤𑀦𑀁 𑀮𑀺𑀫𑁆𑀧𑀢𑀺, 𑀧𑀘𑁆𑀙𑀸 𑀏𑀢𑀁 𑀯𑀺𑀯𑀭𑀁 𑀮𑀺𑀫𑁆𑀧𑀺𑀲𑁆𑀲𑀸𑀫𑀻𑀢𑀺 𑀏𑀯𑀁 𑀞𑀧𑀦𑁂 𑀅𑀦𑀸𑀧𑀢𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀘𑁂 𑀧𑀦 𑀏𑀯𑀁 𑀅𑀓𑀢𑁆𑀯𑀸 𑀲𑀩𑁆𑀩𑀤𑀸𑀧𑀺 𑀆𑀮𑁄𑀓𑀢𑁆𑀣𑀸𑀬 𑀯𑀸𑀢𑀧𑀸𑀦𑀯𑀲𑁂𑀦 𑀞𑀧𑁂𑀢𑀺, 𑀯𑀸𑀢𑀧𑀸𑀦𑀤𑁆𑀯𑀸𑀭𑀲𑀗𑁆𑀖𑀸𑀝𑁂 𑀖𑀝𑀺𑀢𑁂 𑀮𑁂𑀧𑁄 𑀘 𑀖𑀝𑀻𑀬𑀢𑀺, 𑀧𑀞𑀫𑀫𑁂𑀯 𑀲𑀗𑁆𑀖𑀸𑀤𑀺𑀲𑁂𑀲𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀘𑁂’’𑀢𑀺𑀆𑀤𑀺. 𑀫𑀢𑁆𑀢𑀺𑀓𑀸𑀓𑀼𑀝𑁆𑀝𑀫𑁂𑀯 𑀫𑀢𑁆𑀢𑀺𑀓𑀸𑀮𑁂𑀧𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀻𑀢𑀺 𑀆𑀳 ‘‘𑀲𑀘𑁂 𑀫𑀢𑁆𑀢𑀺𑀓𑀸𑀬 𑀓𑀼𑀝𑁆𑀝𑀁 𑀓𑀭𑁄𑀢𑀺, 𑀙𑀤𑀦𑀮𑁂𑀧𑁂𑀦 𑀲𑀤𑁆𑀥𑀺𑀁 𑀖𑀝𑀦𑁂 𑀆𑀧𑀢𑁆𑀢𑀻’’𑀢𑀺. 𑀉𑀪𑀺𑀦𑁆𑀦𑀁 𑀅𑀦𑀸𑀧𑀢𑁆𑀢𑀻𑀢𑀺 𑀧𑀼𑀭𑀺𑀫𑀲𑁆𑀲 𑀮𑁂𑀧𑀲𑁆𑀲 𑀅𑀖𑀝𑀺𑀢𑀢𑁆𑀢𑀸 𑀤𑀼𑀢𑀺𑀬𑀲𑁆𑀲 𑀅𑀢𑁆𑀢𑀼𑀤𑁆𑀤𑁂𑀲𑀺𑀓𑀢𑀸𑀬 𑀅𑀲𑀫𑁆𑀪𑀯𑀢𑁄.

𑁩𑁫𑁪. 𑀆𑀧𑀢𑁆𑀢𑀺𑀪𑁂𑀤𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀢𑀢𑁆𑀣 ‘‘𑀲𑀸𑀭𑀫𑁆𑀪𑁂 𑀘 𑀅𑀧𑀭𑀺𑀓𑁆𑀓𑀫𑀦𑁂 𑀘 𑀤𑀼𑀓𑁆𑀓𑀝𑀁 𑀅𑀤𑁂𑀲𑀺𑀢𑀯𑀢𑁆𑀣𑀼𑀓𑀢𑀸𑀬, 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀢𑀸𑀬 𑀘 𑀲𑀗𑁆𑀖𑀸𑀤𑀺𑀲𑁂𑀲𑁄’’𑀢𑀺 𑀏𑀯𑀁 𑀆𑀧𑀢𑁆𑀢𑀺𑀬𑁂𑀯 𑀯𑀺𑀪𑀸𑀕𑀤𑀲𑁆𑀲𑀦𑀢𑁆𑀣𑀁.

𑁩𑁬𑁧. 𑀅𑀦𑀺𑀝𑁆𑀞𑀺𑀢𑁂 𑀓𑀼𑀝𑀺𑀓𑀫𑁆𑀫𑁂𑀢𑀺 𑀮𑁂𑀧𑀧𑀭𑀺𑀬𑁄𑀲𑀸𑀦𑁂 𑀓𑀼𑀝𑀺𑀓𑀫𑁆𑀫𑁂 𑀏𑀓𑀧𑀺𑀡𑁆𑀟𑀫𑀢𑁆𑀢𑁂𑀦𑀧𑀺 𑀅𑀦𑀺𑀝𑁆𑀞𑀺𑀢𑁂. ‘‘𑀅𑀜𑁆𑀜𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀯𑀸’’𑀢𑀺 𑀇𑀤𑀁 𑀫𑀽𑀮𑀝𑁆𑀞𑀲𑁆𑀲 𑀅𑀦𑀸𑀧𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀬𑁂𑀦 𑀧𑀦 𑀮𑀤𑁆𑀥𑀁, 𑀢𑀲𑁆𑀲𑀸𑀧𑀺 𑀢𑀁 𑀦𑀺𑀝𑁆𑀞𑀸𑀧𑁂𑀦𑁆𑀢𑀲𑁆𑀲 ‘‘𑀧𑀭𑁂𑀳𑀺 𑀯𑀺𑀧𑁆𑀧𑀓𑀢𑀁 𑀅𑀢𑁆𑀢𑀦𑀸 𑀧𑀭𑀺𑀬𑁄𑀲𑀸𑀧𑁂𑀢𑀺, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲𑀸’’𑀢𑀺𑀆𑀤𑀺𑀯𑀘𑀦𑀢𑁄 (𑀧𑀸𑀭𑀸. 𑁩𑁬𑁩) 𑀆𑀧𑀢𑁆𑀢𑀺𑀬𑁂𑀯. 𑀧𑀼𑀩𑁆𑀩𑁂 𑀓𑀢𑀓𑀫𑁆𑀫𑀫𑁆𑀧𑀺 𑀮𑀤𑁆𑀥𑀓𑀸𑀮𑀢𑁄 𑀧𑀝𑁆𑀞𑀸𑀬 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬𑁂𑀯 𑀓𑀢𑀁 𑀦𑀸𑀫 𑀳𑁄𑀢𑀺, 𑀢𑀲𑁆𑀫𑀸 𑀢𑁂𑀦𑀸𑀧𑀺 𑀲𑀗𑁆𑀖𑀲𑁆𑀲 𑀯𑀸 𑀲𑀸𑀫𑀡𑁂𑀭𑀸𑀤𑀻𑀦𑀁 𑀯𑀸 𑀤𑀢𑁆𑀯𑀸 𑀦𑀺𑀝𑁆𑀞𑀸𑀧𑁂𑀢𑀩𑁆𑀩𑀁. ‘‘𑀅𑀜𑁆𑀜𑀲𑁆𑀲 𑀯𑀸’’𑀢𑀺 𑀇𑀤𑀁 𑀅𑀦𑀼𑀧𑀲𑀫𑁆𑀧𑀦𑁆𑀦𑀁𑀬𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀕𑀳𑁂𑀢𑀩𑁆𑀩𑀁, 𑀓𑁂𑀘𑀺 𑀧𑀦 ‘‘𑀧𑀭𑀢𑁄 𑀮𑀤𑁆𑀥𑀸𑀬 𑀓𑀼𑀝𑀺𑀬𑀸 𑀦𑀺𑀝𑁆𑀞𑀸𑀧𑀦𑁂 𑀅𑀦𑀸𑀧𑀢𑁆𑀢𑀺𑀆𑀤𑀺𑀢𑁄 𑀧𑀝𑁆𑀞𑀸𑀬 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀅𑀓𑀢𑀢𑁆𑀢𑀸’’𑀢𑀺 𑀯𑀤𑀦𑁆𑀢𑀺. 𑀅𑀧𑀘𑀺𑀦𑀺𑀢𑀩𑁆𑀩𑀸𑀢𑀺 𑀬𑀸𑀯 𑀧𑀸𑀘𑀺𑀦𑀸 𑀯𑀺𑀤𑁆𑀥𑀁𑀲𑁂𑀢𑀩𑁆𑀩𑀸. 𑀪𑀽𑀫𑀺𑀲𑀫𑀁 𑀓𑀢𑁆𑀯𑀸𑀢𑀺 𑀧𑀸𑀘𑀺𑀦𑀢𑀮𑀸𑀯𑀲𑀸𑀦𑀁 𑀓𑀢𑁆𑀯𑀸.

𑁩𑁬𑁪. 𑀮𑁂𑀡𑀦𑁆𑀢𑀺 𑀧𑀩𑁆𑀩𑀢𑀮𑁂𑀡𑀁. 𑀦 𑀳𑁂𑀢𑁆𑀣 𑀮𑁂𑀧𑁄 𑀖𑀝𑀻𑀬𑀢𑀻𑀢𑀺 𑀙𑀤𑀦𑀮𑁂𑀧𑀲𑁆𑀲 𑀅𑀪𑀸𑀯𑀢𑁄 𑀯𑀼𑀢𑁆𑀢𑀁, 𑀯𑀺𑀲𑀼𑀁 𑀏𑀯 𑀯𑀸 𑀅𑀦𑀼𑀜𑁆𑀜𑀸𑀢𑀢𑁆𑀢𑀸. 𑀲𑀘𑁂 𑀮𑁂𑀡𑀲𑁆𑀲 𑀅𑀦𑁆𑀢𑁄 𑀉𑀧𑀭𑀺𑀪𑀸𑀕𑁂 𑀘𑀺𑀢𑁆𑀢𑀓𑀫𑁆𑀫𑀸𑀤𑀺𑀓𑀭𑀡𑀢𑁆𑀣𑀁 𑀮𑁂𑀧𑀁 𑀤𑁂𑀦𑁆𑀢𑀺, 𑀉𑀮𑁆𑀮𑀺𑀢𑁆𑀢𑀓𑀼𑀝𑀺𑀲𑀗𑁆𑀔𑁆𑀬𑀁 𑀦 𑀕𑀘𑁆𑀙𑀢𑀺, 𑀯𑀝𑁆𑀝𑀢𑀺 𑀏𑀯. 𑀇𑀝𑁆𑀞𑀓𑀸𑀤𑀻𑀳𑀺 𑀓𑀢𑀁 𑀘𑀢𑀼𑀭𑀲𑁆𑀲𑀓𑀽𑀝𑀸𑀕𑀸𑀭𑀲𑀡𑁆𑀞𑀸𑀦𑀁 𑀏𑀓𑀓𑀡𑁆𑀡𑀺𑀓𑀸𑀩𑀤𑁆𑀥𑀁 𑀦𑀸𑀢𑀺𑀉𑀘𑁆𑀘𑀁 𑀧𑀝𑀺𑀲𑁆𑀲𑀬𑀯𑀺𑀲𑁂𑀲𑀁 ‘‘𑀕𑀼𑀳𑀸’’𑀢𑀺 𑀯𑀤𑀦𑁆𑀢𑀺, 𑀢𑀸𑀤𑀺𑀲𑀁 𑀫𑀳𑀦𑁆𑀢𑀫𑁆𑀧𑀺 𑀉𑀮𑁆𑀮𑀺𑀢𑁆𑀢𑀸𑀯𑀮𑀺𑀢𑁆𑀢𑀁 𑀓𑀭𑁄𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀪𑀽𑀫𑀺𑀕𑀼𑀳𑀦𑁆𑀢𑀺 𑀉𑀫𑀗𑁆𑀕𑀕𑀼𑀳𑀁.

𑀅𑀝𑁆𑀞𑀓𑀣𑀸𑀲𑀽𑀢𑀺 𑀓𑀼𑀓𑁆𑀓𑀼𑀝𑀘𑁆𑀙𑀺𑀓𑀕𑁂𑀳𑀦𑁆𑀢𑀺𑀆𑀤𑀻𑀲𑀼 𑀅𑀝𑁆𑀞𑀓𑀣𑀸𑀲𑀼 𑀢𑀺𑀡𑀓𑀼𑀝𑀺𑀓𑀸 𑀓𑀼𑀓𑁆𑀓𑀼𑀝𑀘𑁆𑀙𑀺𑀓𑀕𑁂𑀳𑀦𑁆𑀢𑀺 𑀯𑀢𑁆𑀯𑀸 𑀧𑀼𑀦 𑀢𑀁 𑀯𑀺𑀯𑀭𑀦𑁆𑀢𑁂𑀳𑀺 𑀅𑀝𑁆𑀞𑀓𑀣𑀸𑀘𑀭𑀺𑀬𑁂𑀳𑀺 𑀙𑀤𑀦𑀁 𑀤𑀡𑁆𑀟𑀓𑁂𑀳𑀺…𑀧𑁂… 𑀯𑀼𑀢𑁆𑀢𑀸𑀢𑀺 𑀬𑁄𑀚𑀦𑀸 𑀤𑀝𑁆𑀞𑀩𑁆𑀩𑀸. 𑀢𑀢𑁆𑀣 𑀤𑀡𑁆𑀟𑀓𑁂𑀳𑀺 𑀚𑀸𑀮𑀩𑀤𑁆𑀥𑀁 𑀓𑀢𑁆𑀯𑀸𑀢𑀺 𑀤𑀻𑀖𑀢𑁄, 𑀢𑀺𑀭𑀺𑀬𑀢𑁄 𑀘 𑀞𑀧𑁂𑀢𑁆𑀯𑀸 𑀯𑀮𑁆𑀮𑀺𑀬𑀸𑀤𑀻𑀳𑀺 𑀩𑀤𑁆𑀥𑀤𑀡𑁆𑀟𑀓𑁂𑀳𑀺 𑀚𑀸𑀮𑀁 𑀯𑀺𑀬 𑀓𑀢𑁆𑀯𑀸. 𑀲𑁄 𑀘𑀸𑀢𑀺 𑀉𑀮𑁆𑀮𑀺𑀢𑁆𑀢𑀸𑀤𑀺𑀪𑀸𑀯𑁄. 𑀙𑀤𑀦𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑁄𑀢𑀺 𑀙𑀤𑀦𑀲𑁆𑀲 𑀅𑀦𑁆𑀢𑁄 𑀘 𑀩𑀳𑀺 𑀘 𑀮𑀺𑀫𑁆𑀧𑀦𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑁄. 𑀫𑀢𑁆𑀢𑀺𑀓𑀸𑀓𑀼𑀝𑁆𑀝𑁂 𑀪𑀺𑀢𑁆𑀢𑀺𑀮𑁂𑀧𑀁 𑀯𑀺𑀦𑀸𑀧𑀺 𑀪𑀺𑀢𑁆𑀢𑀺𑀬𑀸 𑀲𑀤𑁆𑀥𑀺𑀁 𑀙𑀤𑀦𑀮𑁂𑀧𑀲𑁆𑀲 𑀖𑀝𑀦𑀫𑀢𑁆𑀢𑁂𑀦𑀸𑀧𑀺 𑀆𑀧𑀢𑁆𑀢𑀺𑀲𑀫𑁆𑀪𑀯𑀢𑁄 𑀙𑀤𑀦𑀮𑁂𑀧𑁄𑀯 𑀧𑀥𑀸𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀓𑀺𑀜𑁆𑀘𑀸𑀧𑀺 𑀏𑀯𑀁, 𑀅𑀣 𑀔𑁄 ‘‘𑀉𑀧𑀘𑀺𑀓𑀸𑀫𑁄𑀘𑀦𑀢𑁆𑀣𑀫𑁂𑀯 𑀳𑁂𑀝𑁆𑀞𑀸 𑀧𑀸𑀲𑀸𑀡𑀓𑀼𑀝𑁆𑀝𑀁 𑀓𑀢𑁆𑀯𑀸 𑀢𑀁 𑀅𑀮𑀺𑀫𑁆𑀧𑀺𑀢𑁆𑀯𑀸 𑀉𑀧𑀭𑀺 𑀮𑀺𑀫𑁆𑀧𑀢𑀺, 𑀮𑁂𑀧𑁄 𑀦 𑀖𑀝𑀻𑀬𑀢𑀺 𑀦𑀸𑀫, 𑀅𑀦𑀸𑀧𑀢𑁆𑀢𑀺𑀬𑁂𑀯𑀸’’𑀢𑀺𑀆𑀤𑀺𑀯𑀘𑀦𑀢𑁄 𑀧𑀦 𑀙𑀤𑀦𑀮𑁂𑀧𑀖𑀝𑀦𑀢𑁆𑀣𑀁 𑀲𑀓𑀮𑀸𑀬𑀧𑀺 𑀪𑀺𑀢𑁆𑀢𑀺𑀬𑀸 𑀮𑁂𑀧𑁄 𑀅𑀯𑀲𑁆𑀲𑀁 𑀇𑀘𑁆𑀙𑀺𑀢𑀩𑁆𑀩𑁄𑀯 𑀢𑀲𑁆𑀲𑀸 𑀏𑀓𑀤𑁂𑀲𑀲𑁆𑀲 𑀅𑀮𑁂𑀧𑁂𑀧𑀺 𑀙𑀤𑀦𑀮𑁂𑀧𑀲𑁆𑀲 𑀅𑀖𑀝𑀦𑀢𑁄. 𑀢𑁂𑀦𑀸𑀳 ‘‘𑀮𑁂𑀧𑁄 𑀦 𑀖𑀝𑀻𑀬𑀢𑀻’’𑀢𑀺. 𑀏𑀢𑁆𑀣𑀸𑀢𑀺 𑀢𑀺𑀡𑀓𑀼𑀝𑀺𑀓𑀸𑀬𑀁. 𑀦 𑀓𑁂𑀯𑀮𑀜𑁆𑀘 𑀢𑀺𑀡𑀓𑀼𑀝𑀺𑀓𑀸𑀬𑀁 𑀏𑀯, 𑀮𑁂𑀡𑀕𑀼𑀳𑀸𑀤𑀻𑀲𑀼𑀧𑀺 𑀲𑀸𑀭𑀫𑁆𑀪𑀸𑀧𑀭𑀺𑀓𑁆𑀓𑀫𑀦𑀧𑀘𑁆𑀘𑀬𑀸𑀧𑀺 𑀅𑀦𑀸𑀧𑀢𑁆𑀢𑀺 𑀏𑀯, 𑀇𑀫𑀺𑀦𑀸 𑀧𑀦 𑀦𑀬𑁂𑀦 𑀅𑀜𑁆𑀜𑀲𑁆𑀲𑀢𑁆𑀣𑀸𑀬 𑀓𑀼𑀝𑀺𑀁 𑀓𑀭𑁄𑀦𑁆𑀢𑀲𑁆𑀲𑀸𑀧𑀺 𑀲𑀸𑀭𑀫𑁆𑀪𑀸𑀤𑀺𑀧𑀘𑁆𑀘𑀬𑀸𑀧𑀺 𑀅𑀦𑀸𑀧𑀢𑁆𑀢𑀺𑀪𑀸𑀯𑁄 𑀅𑀢𑁆𑀣𑀢𑁄 𑀤𑀲𑁆𑀲𑀺𑀢𑁄 𑀏𑀯 𑀳𑁄𑀢𑀻𑀢𑀺.

𑀢𑀢𑁆𑀣 𑀧𑀸𑀴𑀺𑀯𑀺𑀭𑁄𑀥𑀁 𑀧𑀭𑀺𑀳𑀭𑀺𑀢𑀼𑀁 ‘‘𑀬𑀁 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀬𑀜𑁆𑀳𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑁋 𑀅𑀜𑁆𑀜𑀲𑁆𑀲 𑀉𑀧𑀚𑁆𑀛𑀸𑀬𑀸𑀤𑀺𑀦𑁄 𑀅𑀢𑁆𑀣𑀸𑀬 𑀓𑀭𑁄𑀦𑁆𑀢𑀲𑁆𑀲 𑀲𑀸𑀭𑀫𑁆𑀪𑀸𑀤𑀺𑀧𑀘𑁆𑀘𑀬𑀸𑀧𑀺 𑀅𑀦𑀸𑀧𑀢𑁆𑀢𑀺 𑀏𑀯, 𑀬𑀁 𑀧𑀦 𑀧𑀸𑀴𑀺𑀬𑀁 ‘‘𑀆𑀧𑀢𑁆𑀢𑀺𑀓𑀸𑀭𑀼𑀓𑀸𑀦𑀁 𑀢𑀺𑀡𑁆𑀡𑀁 𑀤𑀼𑀓𑁆𑀓𑀝𑀸𑀦’’𑀦𑁆𑀢𑀺𑀆𑀤𑀺𑀯𑀘𑀦𑀁, 𑀢𑀁 𑀅𑀜𑁆𑀜𑀲𑁆𑀲𑀢𑁆𑀣𑀸𑀬 𑀓𑀭𑁄𑀦𑁆𑀢𑀲𑁆𑀲, 𑀦 𑀲𑀸𑀭𑀫𑁆𑀪𑀸𑀤𑀺𑀧𑀘𑁆𑀘𑀬𑀸 𑀆𑀧𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁, 𑀓𑀺𑀜𑁆𑀘𑀭𑀳𑀺 𑀬𑀣𑀸𑀲𑀫𑀸𑀤𑀺𑀝𑁆𑀞𑀸𑀬 𑀓𑀼𑀝𑀺𑀬𑀸 𑀅𑀓𑀭𑀡𑀧𑀘𑁆𑀘𑀬𑀸 𑀆𑀧𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀦𑁆𑀢𑀺. 𑀢𑀢𑁆𑀣 𑀬𑀣𑀸𑀲𑀫𑀸𑀤𑀺𑀝𑁆𑀞𑀸𑀬𑀸𑀢𑀺 ‘‘𑀪𑀺𑀓𑁆𑀔𑀼 𑀲𑀫𑀸𑀤𑀺𑀲𑀺𑀢𑁆𑀯𑀸 𑀧𑀓𑁆𑀓𑀫𑀢𑀺, ‘𑀓𑀼𑀝𑀺𑀁 𑀫𑁂 𑀓𑀭𑁄𑀣𑀸’𑀢𑀺 𑀲𑀫𑀸𑀤𑀺𑀲𑀢𑀺 𑀘, 𑀤𑁂𑀲𑀺𑀢𑀯𑀢𑁆𑀣𑀼𑀓𑀸 𑀘 𑀳𑁄𑀢𑀼 𑀅𑀦𑀸𑀭𑀫𑁆𑀪𑀸 𑀘 𑀲𑀧𑀭𑀺𑀓𑁆𑀓𑀫𑀦𑀸 𑀘𑀸’’𑀢𑀺 𑀏𑀯𑀁 𑀓𑀸𑀭𑀸𑀧𑀓𑁂𑀦 𑀆𑀡𑀢𑁆𑀢𑀺𑀓𑁆𑀓𑀫𑀁 𑀫𑀼𑀜𑁆𑀘𑀺𑀢𑁆𑀯𑀸 𑀓𑀭𑀡𑀧𑀘𑁆𑀘𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀓𑀢𑁆𑀣𑀘𑀺 𑀧𑀦 𑀧𑁄𑀢𑁆𑀣𑀓𑁂 ‘‘𑀓𑀼𑀝𑀺𑀮𑀓𑁆𑀔𑀡𑀧𑁆𑀧𑀢𑁆𑀢𑀫𑁆𑀧𑀺 𑀓𑀼𑀝𑀺𑀁 𑀅𑀜𑁆𑀜𑀲𑁆𑀲…𑀧𑁂… 𑀓𑀭𑁄𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀻’’𑀢𑀺 𑀇𑀫𑀲𑁆𑀲 𑀧𑀸𑀞𑀲𑁆𑀲 𑀅𑀦𑀦𑁆𑀢𑀭𑀁 ‘‘𑀬𑀁 𑀧𑀦 𑀆𑀧𑀢𑁆𑀢𑀺 𑀓𑀸𑀭𑀼𑀓𑀸𑀦’’𑀦𑁆𑀢𑀺𑀆𑀤𑀺𑀧𑀸𑀞𑁄 𑀤𑀺𑀲𑁆𑀲𑀢𑀺, 𑀲𑁄𑀯 𑀬𑀼𑀢𑁆𑀢𑀢𑀭𑁄. 𑀏𑀯𑀜𑁆𑀳𑀺 𑀲𑀢𑀺 𑀢𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑀧𑀸𑀓𑀝𑁄 𑀳𑁄𑀢𑀺.

𑀅𑀦𑀸𑀧𑀢𑁆𑀢𑀻𑀢𑀺 𑀯𑀢𑁆𑀯𑀸𑀢𑀺 𑀯𑀸𑀲𑀸𑀕𑀸𑀭𑀢𑁆𑀣𑀸𑀬 𑀏𑀯 𑀅𑀦𑀺𑀬𑀫𑀺𑀢𑀢𑁆𑀢𑀸 𑀅𑀦𑀸𑀧𑀢𑁆𑀢𑀻𑀢𑀺 𑀯𑀢𑁆𑀯𑀸. 𑀅𑀤𑁂𑀲𑀸𑀧𑁂𑀢𑁆𑀯𑀸 𑀓𑀭𑁄𑀢𑁄𑀢𑀺 𑀧𑀫𑀸𑀡𑀬𑀼𑀢𑁆𑀢𑀫𑁆𑀧𑀺 𑀓𑀭𑁄𑀢𑁄. 𑀅𑀘𑀺𑀢𑁆𑀢𑀓𑀦𑁆𑀢𑀺 𑀧𑀡𑁆𑀡𑀢𑁆𑀢𑀺𑀅𑀚𑀸𑀦𑀦𑀘𑀺𑀢𑁆𑀢𑁂𑀦 𑀅𑀘𑀺𑀢𑁆𑀢𑀓𑀁. 𑀉𑀮𑁆𑀮𑀺𑀢𑁆𑀢𑀸𑀤𑀻𑀦𑀁 𑀅𑀜𑁆𑀜𑀢𑀭𑀢𑀸, 𑀳𑁂𑀝𑁆𑀞𑀺𑀫𑀧𑁆𑀧𑀫𑀸𑀡𑀲𑀫𑁆𑀪𑀯𑁄, 𑀅𑀤𑁂𑀲𑀺𑀢𑀯𑀢𑁆𑀣𑀼𑀓𑀢𑀸, 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀢𑀸, 𑀅𑀢𑁆𑀢𑀼𑀤𑁆𑀤𑁂𑀲𑀺𑀓𑀢𑀸, 𑀯𑀸𑀲𑀸𑀕𑀸𑀭𑀢𑀸, 𑀮𑁂𑀧𑀖𑀝𑀦𑀸𑀢𑀺 𑀲𑀢𑁆𑀢 𑀯𑀸 𑀧𑀫𑀸𑀡𑀬𑀼𑀢𑁆𑀢𑀗𑁆𑀕𑀸𑀤𑀻𑀲𑀼 𑀙 𑀯𑀸 𑀅𑀗𑁆𑀕𑀸𑀦𑀺.

𑀓𑀼𑀝𑀺𑀓𑀸𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.