𑁪. 𑀅𑀢𑁆𑀢𑀓𑀸𑀫𑀧𑀸𑀭𑀺𑀘𑀭𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁨𑁯𑁦. 𑀘𑀢𑀼𑀢𑁆𑀣𑁂 𑀧𑀭𑁂𑀳𑀺 𑀧𑀢𑁆𑀢𑁂 𑀧𑀸𑀢𑀺𑀬𑀫𑀸𑀦𑀸𑀦𑀁 𑀪𑀺𑀓𑁆𑀔𑀸𑀧𑀺𑀡𑁆𑀟𑀸𑀦𑀁 𑀧𑀸𑀢𑁄 𑀲𑀦𑁆𑀦𑀺𑀧𑀸𑀢𑁄𑀢𑀺 𑀧𑀺𑀡𑁆𑀟𑀧𑀸𑀢𑁄𑀢𑀺 𑀪𑀺𑀓𑁆𑀔𑀸𑀳𑀸𑀭𑁄 𑀯𑀼𑀘𑁆𑀘𑀢𑀺, 𑀢𑀁𑀲𑀤𑀺𑀲𑀢𑀸𑀬 𑀅𑀜𑁆𑀜𑁄𑀧𑀺 𑀬𑁄 𑀓𑁄𑀘𑀺 𑀪𑀺𑀓𑁆𑀔𑀸𑀘𑀭𑀺𑀬𑀁 𑀯𑀺𑀦𑀸 𑀪𑀺𑀓𑁆𑀔𑀽𑀳𑀺 𑀮𑀤𑁆𑀥𑁄 𑀧𑀺𑀡𑁆𑀟𑀧𑀸𑀢𑁄𑀢𑁆𑀯𑁂𑀯 𑀯𑀼𑀘𑁆𑀘𑀢𑀺. 𑀧𑀢𑀺 𑀏𑀢𑀺 𑀏𑀢𑀲𑁆𑀫𑀸𑀢𑀺 𑀧𑀘𑁆𑀘𑀬𑁄𑀢𑀺 𑀆𑀳 ‘‘𑀧𑀢𑀺𑀓𑀭𑀡𑀝𑁆𑀞𑁂𑀦 𑀧𑀘𑁆𑀘𑀬𑁄’’𑀢𑀺. 𑀭𑁄𑀕𑀤𑀼𑀓𑁆𑀔𑀸𑀦𑀁 𑀯𑀸 𑀧𑀝𑀺𑀧𑀓𑁆𑀔𑀪𑀸𑀯𑁂𑀦 𑀅𑀬𑀢𑀺 𑀧𑀯𑀢𑁆𑀢𑀢𑀻𑀢𑀺 𑀧𑀘𑁆𑀘𑀬𑁄. 𑀲𑀧𑁆𑀧𑀸𑀬𑀲𑁆𑀲𑀸𑀢𑀺 𑀳𑀺𑀢𑀲𑁆𑀲. 𑀦𑀕𑀭𑀧𑀭𑀺𑀓𑁆𑀔𑀸𑀭𑁂𑀳𑀻𑀢𑀺 𑀦𑀕𑀭𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀭𑀓𑁆𑀔𑀡𑀓𑁂𑀳𑀺. 𑀭𑀸𑀚𑀽𑀦𑀁 𑀕𑁂𑀳𑀧𑀭𑀺𑀓𑁆𑀔𑁂𑀧𑁄 𑀧𑀭𑀺𑀔𑀸 𑀉𑀤𑁆𑀤𑀸𑀧𑁄 𑀧𑀸𑀓𑀸𑀭𑁄 𑀏𑀲𑀺𑀓𑀸 𑀧𑀮𑀺𑀖𑁄 𑀅𑀝𑁆𑀝𑁄𑀢𑀺 𑀇𑀫𑁂 𑀲𑀢𑁆𑀢 𑀦𑀕𑀭𑀧𑀭𑀺𑀓𑁆𑀔𑀸𑀭𑀸𑀢𑀺 𑀯𑀤𑀦𑁆𑀢𑀺. 𑀲𑁂𑀢𑀧𑀭𑀺𑀓𑁆𑀔𑀸𑀭𑁄𑀢𑀺 𑀯𑀺𑀲𑀼𑀤𑁆𑀥𑀺𑀲𑀻𑀮𑀸𑀮𑀗𑁆𑀓𑀸𑀭𑁄. 𑀅𑀭𑀺𑀬𑀫𑀕𑁆𑀕𑁄 𑀳𑀺 𑀇𑀥 ‘‘𑀭𑀣𑁄’’𑀢𑀺 𑀅𑀥𑀺𑀧𑁆𑀧𑁂𑀢𑁄, 𑀢𑀲𑁆𑀲 𑀘 𑀲𑀫𑁆𑀫𑀸𑀯𑀸𑀘𑀸𑀤𑀬𑁄 𑀅𑀮𑀗𑁆𑀓𑀸𑀭𑀝𑁆𑀞𑁂𑀦 ‘‘𑀧𑀭𑀺𑀓𑁆𑀔𑀸𑀭𑀸’’𑀢𑀺 𑀯𑀼𑀢𑁆𑀢𑀸. 𑀘𑀓𑁆𑀓𑀯𑀻𑀭𑀺𑀬𑁄𑀢𑀺 𑀯𑀻𑀭𑀺𑀬𑀘𑀓𑁆𑀓𑁄. 𑀚𑀻𑀯𑀺𑀢𑀧𑀭𑀺𑀓𑁆𑀔𑀸𑀭𑀸𑀢𑀺 𑀚𑀻𑀯𑀺𑀢𑀲𑁆𑀲 𑀧𑀯𑀢𑁆𑀢𑀺𑀓𑀸𑀭𑀡𑀸𑀦𑀺. 𑀲𑀫𑀼𑀤𑀸𑀦𑁂𑀢𑀩𑁆𑀩𑀸𑀢𑀺 𑀲𑀫𑁆𑀫𑀸 𑀉𑀤𑁆𑀥𑀁 𑀆𑀦𑁂𑀢𑀩𑁆𑀩𑀸 𑀧𑀭𑀺𑀬𑁂𑀲𑀺𑀢𑀩𑁆𑀩𑀸.

𑁨𑁯𑁧. 𑀉𑀧𑀘𑀸𑀭𑁂𑀢𑀺 𑀬𑀢𑁆𑀣 𑀞𑀺𑀢𑁄 𑀯𑀺𑀜𑁆𑀜𑀸𑀧𑁂𑀢𑀼𑀁 𑀲𑀓𑁆𑀓𑁄𑀢𑀺, 𑀢𑀸𑀤𑀺𑀲𑁂 𑀞𑀸𑀦𑁂. 𑀓𑀸𑀫𑁄 𑀘𑁂𑀯 𑀳𑁂𑀢𑀼 𑀘 𑀧𑀸𑀭𑀺𑀘𑀭𑀺𑀬𑀸 𑀘 𑀅𑀢𑁆𑀣𑁄𑀢𑀺 𑀧𑀸𑀴𑀺𑀬𑀁 ‘‘𑀅𑀢𑁆𑀢𑀦𑁄 𑀓𑀸𑀫𑀁, 𑀅𑀢𑁆𑀢𑀦𑁄 𑀳𑁂𑀢𑀼𑀁, 𑀅𑀢𑁆𑀢𑀦𑁄 𑀅𑀥𑀺𑀧𑁆𑀧𑀸𑀬𑀁, 𑀅𑀢𑁆𑀢𑀦𑁄 𑀧𑀸𑀭𑀺𑀘𑀭𑀺𑀬’’𑀦𑁆𑀢𑀺 (𑀧𑀸𑀭𑀸. 𑁨𑁯𑁨) 𑀯𑀼𑀢𑁆𑀢𑁂𑀲𑀼 𑀇𑀫𑁂𑀲𑀼 𑀘𑀢𑀽𑀲𑀼 𑀧𑀤𑁂𑀲𑀼 𑀓𑀸𑀫𑁄, 𑀳𑁂𑀢𑀼, 𑀧𑀸𑀭𑀺𑀘𑀭𑀺𑀬𑀸 𑀘 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑁂 𑀧𑀞𑀫𑁂 𑀅𑀢𑁆𑀣𑀯𑀺𑀓𑀧𑁆𑀧𑁂 𑀯𑀺𑀕𑁆𑀕𑀳𑀯𑀸𑀓𑁆𑀬𑀸𑀥𑀺𑀧𑁆𑀧𑀸𑀬𑀲𑀽𑀘𑀦𑀢𑁄 𑀅𑀢𑁆𑀣𑁄. 𑀲𑁂𑀲𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑀧𑀤𑀫𑁂𑀓𑀁. 𑀩𑁆𑀬𑀜𑁆𑀚𑀦𑀦𑁆𑀢𑀺 𑀩𑁆𑀬𑀜𑁆𑀚𑀦𑀫𑀢𑁆𑀢𑀁, 𑀧𑀞𑀫𑀯𑀺𑀓𑀧𑁆𑀧𑀸𑀦𑀼𑀧𑀬𑁄𑀕𑀺𑀢𑀸𑀬 𑀯𑀘𑀦𑀫𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀤𑀼𑀢𑀺𑀬𑁂 𑀅𑀢𑁆𑀣𑀯𑀺𑀓𑀧𑁆𑀧𑁂𑀧𑀺 𑀏𑀲𑁂𑀯 𑀦𑀬𑁄.

𑀬𑀣𑀸𑀯𑀼𑀢𑁆𑀢𑀫𑁂𑀯 𑀅𑀢𑁆𑀣𑀁 𑀧𑀤𑀪𑀸𑀚𑀦𑁂𑀦 𑀲𑀁𑀲𑀦𑁆𑀤𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀅𑀢𑁆𑀢𑀦𑁄 𑀓𑀸𑀫𑀁 𑀅𑀢𑁆𑀢𑀦𑁄 𑀳𑁂𑀢𑀼𑀁 𑀅𑀢𑁆𑀢𑀦𑁄 𑀧𑀸𑀭𑀺𑀘𑀭𑀺𑀬𑀦𑁆𑀢𑀺 𑀳𑀺 𑀯𑀼𑀢𑁆𑀢𑁂 𑀚𑀸𑀦𑀺𑀲𑁆𑀲𑀦𑁆𑀢𑀺 𑀧𑀡𑁆𑀟𑀺𑀢𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 ‘‘𑀅𑀢𑁆𑀢𑀦𑁄 𑀳𑁂𑀢𑀼’’𑀦𑁆𑀢𑀺 𑀯𑀼𑀢𑁆𑀢𑁂 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬𑀸𑀢𑀺 𑀅𑀬𑀫𑀢𑁆𑀣𑁄 𑀯𑀺𑀜𑁆𑀜𑀸𑀬𑀢𑀺, ‘‘𑀅𑀢𑁆𑀢𑀦𑁄 𑀓𑀸𑀫𑀁 𑀅𑀢𑁆𑀢𑀦𑁄 𑀧𑀸𑀭𑀺𑀘𑀭𑀺𑀬’’𑀦𑁆𑀢𑀺 𑀯𑀼𑀢𑁆𑀢𑁂 𑀓𑀸𑀫𑁂𑀦 𑀧𑀸𑀭𑀺𑀘𑀭𑀺𑀬𑀸𑀢𑀺 𑀅𑀬𑀫𑀢𑁆𑀣𑁄 𑀯𑀺𑀜𑁆𑀜𑀸𑀬𑀢𑀺. 𑀢𑀲𑁆𑀫𑀸 𑀇𑀫𑁂𑀳𑀺 𑀢𑀻𑀳𑀺 𑀧𑀤𑁂𑀳𑀺 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀓𑀸𑀫𑁂𑀦 𑀧𑀸𑀭𑀺𑀘𑀭𑀺𑀬𑀸 𑀅𑀢𑁆𑀢𑀓𑀸𑀫𑀧𑀸𑀭𑀺𑀘𑀭𑀺𑀬𑀸𑀢𑀺 𑀇𑀫𑀁 𑀅𑀢𑁆𑀣𑀯𑀺𑀓𑀧𑁆𑀧𑀁 𑀯𑀺𑀜𑁆𑀜𑀽 𑀚𑀸𑀦𑀺𑀲𑁆𑀲𑀦𑁆𑀢𑀺. ‘‘𑀅𑀢𑁆𑀢𑀦𑁄 𑀅𑀥𑀺𑀧𑁆𑀧𑀸𑀬’’𑀦𑁆𑀢𑀺 𑀯𑀼𑀢𑁆𑀢𑁂 𑀧𑀦 𑀅𑀥𑀺𑀧𑁆𑀧𑀸𑀬-𑀲𑀤𑁆𑀤𑀲𑁆𑀲 𑀓𑀸𑀫𑀺𑀢-𑀲𑀤𑁆𑀤𑁂𑀦 𑀲𑀫𑀸𑀦𑀢𑁆𑀣𑀪𑀸𑀯𑀢𑁄 𑀅𑀢𑁆𑀢𑀦𑀸 𑀅𑀥𑀺𑀧𑁆𑀧𑁂𑀢𑀓𑀸𑀫𑀺𑀢𑀝𑁆𑀞𑁂𑀦 𑀅𑀢𑁆𑀢𑀓𑀸𑀫𑀧𑀸𑀭𑀺𑀘𑀭𑀺𑀬𑀸𑀢𑀺 𑀇𑀫𑀫𑀢𑁆𑀣𑀁 𑀯𑀺𑀓𑀧𑁆𑀧𑀁 𑀯𑀺𑀜𑁆𑀜𑀽 𑀚𑀸𑀦𑀺𑀲𑁆𑀲𑀦𑁆𑀢𑀺.

𑀏𑀢𑀤𑀕𑁆𑀕𑀦𑁆𑀢𑀺 𑀏𑀲𑀸 𑀅𑀕𑁆𑀕𑀸. 𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀸𑀲𑀺𑀓𑁆𑀔𑀸𑀧𑀤𑁂𑀧𑀺 (𑀧𑀸𑀭𑀸. 𑁨𑁮𑁫) 𑀓𑀸𑀫𑀁 ‘‘𑀬𑀸𑀘𑀢𑀺𑀧𑀺 𑀆𑀬𑀸𑀘𑀢𑀺𑀧𑀻’’𑀢𑀺 𑀏𑀯𑀁 𑀫𑁂𑀣𑀼𑀦𑀬𑀸𑀘𑀦𑀁 𑀆𑀕𑀢𑀁, 𑀢𑀁 𑀧𑀦 𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀲𑁆𑀲𑀸𑀤𑀭𑀸𑀕𑀯𑀲𑁂𑀦 𑀯𑀼𑀢𑁆𑀢𑀁, 𑀇𑀥 𑀧𑀦 𑀅𑀢𑁆𑀢𑀦𑁄 𑀫𑁂𑀣𑀼𑀦𑀲𑁆𑀲𑀸𑀤𑀭𑀸𑀕𑀯𑀲𑁂𑀦𑀸𑀢𑀺 𑀅𑀬𑀁 𑀯𑀺𑀲𑁂𑀲𑁄.

𑀯𑀺𑀦𑀻𑀢𑀯𑀢𑁆𑀣𑀽𑀲𑀼 ‘‘𑀅𑀕𑁆𑀕𑀤𑀸𑀦𑀁 𑀤𑁂𑀳𑀻’’𑀢𑀺 𑀇𑀤𑀁 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀯𑀼𑀢𑁆𑀢𑀁, 𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀸𑀲𑀺𑀓𑁆𑀔𑀸𑀧𑀤𑁂 𑀧𑀦 𑀧𑀭𑀢𑁆𑀣𑀸𑀬𑀧𑀺 𑀯𑀼𑀢𑁆𑀢𑁂 𑀲𑀻𑀲𑀁 𑀏𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑀼𑀪𑀕𑀸𑀢𑀺 𑀇𑀲𑁆𑀲𑀭𑀺𑀬𑀸𑀤𑀻𑀳𑀺 𑀲𑀼𑀦𑁆𑀤𑀭𑁂𑀳𑀺 𑀪𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀸. 𑀫𑀦𑀼𑀲𑁆𑀲𑀺𑀢𑁆𑀣𑀻, 𑀢𑀣𑀸𑀲𑀜𑁆𑀜𑀺𑀢𑀸, 𑀅𑀢𑁆𑀢𑀓𑀸𑀫𑀧𑀸𑀭𑀺𑀘𑀭𑀺𑀬𑀸𑀬 𑀭𑀸𑀕𑁄, 𑀢𑁂𑀦 𑀓𑀸𑀫𑀧𑀸𑀭𑀺𑀘𑀭𑀺𑀬𑀬𑀸𑀘𑀦𑀁, 𑀢𑀗𑁆𑀔𑀡𑀯𑀺𑀚𑀸𑀦𑀦𑀦𑁆𑀢𑀺 𑀇𑀫𑀸𑀦𑁂𑀢𑁆𑀣 𑀧𑀜𑁆𑀘 𑀅𑀗𑁆𑀕𑀸𑀦𑀺.

𑀅𑀢𑁆𑀢𑀓𑀸𑀫𑀧𑀸𑀭𑀺𑀘𑀭𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.