𑁧𑁨. 𑀤𑀼𑀩𑁆𑀩𑀘𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁪𑁨𑁪. 𑀤𑁆𑀯𑀸𑀤𑀲𑀫𑁂 𑀯𑀫𑁆𑀪𑀦𑀯𑀘𑀦𑀦𑁆𑀢𑀺 𑀕𑀭𑀳𑀯𑀘𑀦𑀁. 𑀲𑀝-𑀲𑀤𑁆𑀤𑁄 𑀧𑀢𑀺𑀢𑀲𑀤𑁆𑀤𑁂𑀦 𑀲𑀫𑀸𑀦𑀢𑁆𑀣𑁄, 𑀢𑀲𑁆𑀲 𑀘 𑀯𑀺𑀲𑁂𑀲𑀦𑀲𑁆𑀲 𑀧𑀭𑀦𑀺𑀧𑀸𑀢𑁄𑀢𑀺 𑀆𑀳 ‘‘𑀢𑀢𑁆𑀣 𑀢𑀢𑁆𑀣 𑀧𑀢𑀺𑀢𑀁 𑀢𑀺𑀡𑀓𑀝𑁆𑀞𑀧𑀡𑁆𑀡’’𑀦𑁆𑀢𑀺. 𑀓𑁂𑀦𑀸𑀧𑀻𑀢𑀺 𑀯𑀸𑀢𑀸𑀤𑀺𑀲𑀤𑀺𑀲𑁂𑀦 𑀉𑀧𑀚𑁆𑀛𑀸𑀬𑀸𑀤𑀺𑀦𑀸.

𑁪𑁨𑁬. 𑀘𑀺𑀢𑁆𑀢𑀧𑀭𑀺𑀬𑁄𑀦𑀸𑀳𑁄 𑀤𑀴𑁆𑀳𑀓𑁄𑀥𑁄𑀯 𑀉𑀧𑀦𑀸𑀳𑁄. 𑀢𑀢𑁄𑀧𑀺 𑀩𑀮𑀯𑀢𑀭𑁄 𑀤𑀼𑀫𑁆𑀫𑁄𑀘𑀦𑀻𑀬𑁄 𑀓𑁄𑀥𑀸𑀪𑀺𑀲𑀗𑁆𑀕𑁄. 𑀘𑁄𑀤𑀓𑀁 𑀧𑀝𑀺𑀧𑁆𑀨𑀭𑀡𑀢𑀸𑀢𑀺 𑀘𑁄𑀤𑀓𑀲𑁆𑀲 𑀧𑀝𑀺𑀯𑀺𑀭𑀼𑀤𑁆𑀥𑁄 𑀳𑀼𑀢𑁆𑀯𑀸 𑀅𑀯𑀝𑁆𑀞𑀸𑀦𑀁. 𑀘𑁄𑀤𑀓𑀁 𑀅𑀧𑀲𑀸𑀤𑀦𑀸𑀢𑀺 𑀯𑀸𑀘𑀸𑀬 𑀖𑀝𑁆𑀝𑀦𑀸. 𑀧𑀘𑁆𑀘𑀸𑀭𑁄𑀧𑀦𑀸𑀢𑀺 ‘‘𑀢𑁆𑀯𑀫𑁆𑀧𑀺 𑀲𑀸𑀧𑀢𑁆𑀢𑀺𑀓𑁄’’𑀢𑀺 𑀘𑁄𑀤𑀓𑀲𑁆𑀲 𑀆𑀧𑀢𑁆𑀢𑀺𑀆𑀭𑁄𑀧𑀦𑀸. 𑀧𑀝𑀺𑀘𑀭𑀡𑀢𑀸𑀢𑀺 𑀧𑀝𑀺𑀘𑁆𑀙𑀸𑀤𑀦𑀢𑀸. 𑀅𑀧𑀤𑀸𑀦𑁂𑀦𑀸𑀢𑀺 𑀅𑀢𑁆𑀢𑀦𑁄 𑀘𑀭𑀺𑀬𑀸𑀬. 𑀦 𑀲𑀫𑁆𑀧𑀸𑀬𑀦𑀢𑀸𑀢𑀺 ‘‘𑀬𑀁 𑀢𑁆𑀯𑀁 𑀘𑁄𑀤𑀓𑁄 𑀯𑀤𑁂𑀲𑀺 ‘𑀫𑀬𑀸 𑀏𑀲 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄 𑀤𑀺𑀝𑁆𑀞𑁄’𑀢𑀺, 𑀢𑁆𑀯𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀓𑀺𑀁 𑀓𑀭𑁄𑀲𑀺, 𑀅𑀬𑀁 𑀓𑀺𑀁 𑀓𑀭𑁄𑀢𑀺, 𑀓𑀢𑁆𑀣 𑀘 𑀢𑁆𑀯𑀁 𑀅𑀳𑁄𑀲𑀺, 𑀓𑀢𑁆𑀣 𑀅𑀬’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀘𑀭𑀺𑀬𑀁 𑀧𑀼𑀝𑁆𑀞𑁂𑀦 𑀲𑀫𑁆𑀧𑀸𑀤𑁂𑀢𑁆𑀯𑀸 𑀅𑀓𑀣𑀦𑀁.

‘‘𑀬𑀲𑁆𑀲 𑀲𑀺𑀬𑀸 𑀆𑀧𑀢𑁆𑀢𑀻’’𑀢𑀺 (𑀫𑀳𑀸𑀯. 𑁧𑁩𑁪) 𑀇𑀫𑀺𑀦𑀸 𑀦𑀺𑀤𑀸𑀦𑀯𑀘𑀦𑁂𑀦 𑀲𑀩𑁆𑀩𑀸𑀧𑀺 𑀆𑀧𑀢𑁆𑀢𑀺𑀬𑁄 𑀲𑀗𑁆𑀕𑀳𑀺𑀢𑀸𑀢𑀺 𑀆𑀳 ‘‘𑀬𑀲𑁆𑀲 𑀲𑀺𑀬𑀸’’𑀢𑀺𑀆𑀤𑀺. 𑀅𑀗𑁆𑀕𑀸𑀦𑀺 𑀘𑁂𑀢𑁆𑀣 𑀧𑀞𑀫𑀲𑀗𑁆𑀖𑀪𑁂𑀤𑀲𑀤𑀺𑀲𑀸𑀦𑀺, 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑀬𑀣𑀸 𑀢𑀢𑁆𑀣 𑀪𑁂𑀤𑀸𑀬 𑀧𑀭𑀓𑁆𑀓𑀫𑀦𑀁, 𑀇𑀥 𑀅𑀯𑀘𑀦𑀻𑀬𑀓𑀭𑀡𑀢𑀸 𑀤𑀝𑁆𑀞𑀩𑁆𑀩𑀸.

𑀤𑀼𑀩𑁆𑀩𑀘𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.