𑁧𑁩. 𑀓𑀼𑀮𑀤𑀽𑀲𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁪𑁩𑁧. 𑀢𑁂𑀭𑀲𑀫𑁂 𑀓𑀻𑀝𑀸𑀕𑀺𑀭𑀻𑀢𑀺 𑀢𑀲𑁆𑀲 𑀦𑀺𑀕𑀫𑀲𑁆𑀲 𑀦𑀸𑀫𑀁. 𑀢𑀜𑁆𑀳𑀺 𑀲𑀦𑁆𑀥𑀸𑀬 𑀧𑀭𑀢𑁄 ‘‘𑀦 𑀅𑀲𑁆𑀲𑀚𑀺𑀧𑀼𑀦𑀩𑁆𑀩𑀲𑀼𑀓𑁂𑀳𑀺 𑀪𑀺𑀓𑁆𑀔𑀽𑀳𑀺 𑀓𑀻𑀝𑀸𑀕𑀺𑀭𑀺𑀲𑁆𑀫𑀺𑀁 𑀯𑀢𑁆𑀣𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁, 𑀕𑀸𑀫𑀦𑀺𑀕𑀫𑀢𑁄 𑀘 𑀧𑀩𑁆𑀩𑀸𑀚𑀦𑀁, 𑀦 𑀚𑀦𑀧𑀤𑀢𑁄. 𑀢𑁂𑀦 𑀧𑀦 𑀬𑁄𑀕𑀢𑁄 𑀚𑀦𑀧𑀤𑁄𑀧𑀺 ‘‘𑀓𑀻𑀝𑀸𑀕𑀺𑀭𑀺’’𑀇𑀘𑁆𑀘𑁂𑀯 𑀲𑀗𑁆𑀔𑁆𑀬𑀁 𑀕𑀢𑁄𑀢𑀺 𑀆𑀳 ‘‘𑀏𑀯𑀁𑀦𑀸𑀫𑀓𑁂 𑀚𑀦𑀧𑀤𑁂’’𑀢𑀺.

𑀢𑀢𑁆𑀭𑀸𑀢𑀺 𑀲𑀸𑀯𑀢𑁆𑀣𑀺𑀬𑀁. 𑀥𑀼𑀭𑀝𑁆𑀞𑀸𑀦𑁂𑀢𑀺 𑀅𑀪𑀺𑀫𑀼𑀔𑀝𑁆𑀞𑀸𑀦𑁂, 𑀚𑁂𑀢𑀯𑀦𑀤𑁆𑀯𑀸𑀭𑀲𑀫𑀻𑀧𑁂𑀢𑀺 𑀅𑀢𑁆𑀣𑁄. 𑀤𑁆𑀯𑀻𑀳𑀺 𑀫𑁂𑀖𑁂𑀳𑀻𑀢𑀺 𑀯𑀲𑁆𑀲𑀺𑀓𑁂𑀦, 𑀳𑁂𑀫𑀦𑁆𑀢𑀺𑀓𑁂𑀦 𑀘𑀸𑀢𑀺 𑀤𑁆𑀯𑀻𑀳𑀺 𑀫𑁂𑀖𑁂𑀳𑀺. 𑀕𑀡𑀸𑀘𑀭𑀺𑀬𑁂𑀳𑀺 𑀙𑀳𑀺 𑀅𑀥𑀺𑀓𑀢𑀸𑀬 ‘‘𑀲𑀫𑀥𑀺𑀓’’𑀦𑁆𑀢𑀺 𑀯𑀼𑀢𑁆𑀢𑀁.

𑀉𑀤𑀓𑀲𑁆𑀲𑀸𑀢𑀺 𑀅𑀓𑀧𑁆𑀧𑀺𑀬𑀉𑀤𑀓𑀲𑁆𑀲 ‘‘𑀓𑀧𑁆𑀧𑀺𑀬𑀉𑀤𑀓𑀲𑀺𑀜𑁆𑀘𑀦’’𑀦𑁆𑀢𑀺 𑀯𑀺𑀲𑀼𑀁 𑀯𑀓𑁆𑀔𑀫𑀸𑀦𑀢𑁆𑀢𑀸, 𑀢𑀜𑁆𑀘 ‘‘𑀆𑀭𑀸𑀫𑀸𑀤𑀺𑀅𑀢𑁆𑀣𑀸𑀬 𑀭𑀼𑀓𑁆𑀔𑀭𑁄𑀧𑀦𑁂 𑀅𑀓𑀧𑁆𑀧𑀺𑀬𑀯𑁄𑀳𑀸𑀭𑁂𑀲𑀼𑀧𑀺 𑀓𑀧𑁆𑀧𑀺𑀬𑀉𑀤𑀓𑀲𑀺𑀜𑁆𑀘𑀦𑀸𑀤𑀺 𑀯𑀝𑁆𑀝𑀢𑀻’’𑀢𑀺 𑀯𑀓𑁆𑀔𑀫𑀸𑀦𑀢𑁆𑀢𑀸 𑀇𑀥𑀸𑀧𑀺 𑀯𑀺𑀪𑀸𑀕𑀁 𑀓𑀢𑁆𑀯𑀸 𑀓𑀧𑁆𑀧𑀺𑀬𑀉𑀤𑀓𑀲𑀺𑀜𑁆𑀘𑀦𑀸𑀤𑀺 𑀯𑀺𑀲𑀼𑀁 𑀤𑀲𑁆𑀲𑀺𑀢𑀁. 𑀬𑀣𑀸 𑀓𑁄𑀝𑁆𑀝𑀦𑀔𑀡𑀦𑀸𑀤𑀺𑀓𑀸𑀬𑀺𑀓𑀓𑀺𑀭𑀺𑀬𑀸𑀧𑀺 𑀅𑀓𑀧𑁆𑀧𑀺𑀬𑀯𑁄𑀳𑀸𑀭𑁂 𑀲𑀗𑁆𑀕𑀳𑀺𑀢𑀸, 𑀏𑀯𑀁 𑀫𑀸𑀢𑀺𑀓𑀸𑀉𑀚𑀼𑀓𑀭𑀡𑀸𑀤𑀺𑀓𑀧𑁆𑀧𑀺𑀬𑀯𑁄𑀳𑀸𑀭𑁂𑀧𑀻𑀢𑀺 𑀆𑀳 ‘‘𑀲𑀼𑀓𑁆𑀔𑀫𑀸𑀢𑀺𑀓𑀸𑀬 𑀉𑀚𑀼𑀓𑀭𑀡’’𑀦𑁆𑀢𑀺. 𑀏𑀢𑁆𑀣 𑀧𑀼𑀭𑀸𑀡𑀧𑀡𑁆𑀡𑀸𑀤𑀺𑀳𑀭𑀡𑀫𑁆𑀧𑀺 𑀲𑀗𑁆𑀕𑀬𑁆𑀳𑀢𑀺. 𑀫𑀳𑀸𑀧𑀘𑁆𑀘𑀭𑀺𑀬𑀯𑀸𑀤𑁄𑀯 𑀧𑀫𑀸𑀡𑀢𑁆𑀢𑀸 𑀧𑀘𑁆𑀙𑀸 𑀯𑀼𑀢𑁆𑀢𑁄. 𑀅𑀓𑀧𑁆𑀧𑀺𑀬𑀯𑁄𑀳𑀸𑀭𑁂𑀧𑀺 𑀏𑀓𑀘𑁆𑀘𑀁 𑀯𑀝𑁆𑀝𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀦 𑀓𑁂𑀯𑀮𑀜𑁆𑀘 𑀲𑁂𑀲’’𑀦𑁆𑀢𑀺𑀆𑀤𑀺𑀫𑀸𑀳. 𑀬𑀁𑀓𑀺𑀜𑁆𑀘𑀺 𑀫𑀸𑀢𑀺𑀓𑀦𑁆𑀢𑀺 𑀲𑀼𑀓𑁆𑀔𑀁 𑀯𑀸 𑀅𑀲𑀼𑀓𑁆𑀔𑀁 𑀯𑀸. 𑀢𑀢𑁆𑀣𑀸𑀢𑀺 𑀆𑀭𑀸𑀫𑀸𑀤𑀺𑀅𑀢𑁆𑀣𑀸𑀬 𑀭𑀼𑀓𑁆𑀔𑀭𑁄𑀧𑀦𑁂. 𑀢𑀣𑀸𑀢𑀺 𑀓𑀧𑁆𑀧𑀺𑀬𑀯𑁄𑀳𑀸𑀭𑀧𑀭𑀺𑀬𑀸𑀬𑀸𑀤𑀻𑀳𑀺 𑀕𑀦𑁆𑀣𑀸𑀧𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀇𑀫𑀺𑀦𑀸 𑀘 𑀓𑀼𑀮𑀲𑀗𑁆𑀕𑀳𑀢𑁆𑀣𑀸𑀬 𑀕𑀦𑁆𑀣𑀸𑀧𑀦𑀸𑀤𑀺𑀧𑀺 𑀦 𑀯𑀝𑁆𑀝𑀢𑀻𑀢𑀺 𑀤𑀲𑁆𑀲𑁂𑀢𑀺.

𑀯𑀢𑁆𑀣𑀼𑀧𑀽𑀚𑀦𑀢𑁆𑀣𑀸𑀬 𑀲𑀬𑀁 𑀕𑀦𑁆𑀣𑀦𑀁 𑀓𑀲𑁆𑀫𑀸 𑀦 𑀯𑀝𑁆𑀝𑀢𑀻𑀢𑀺 𑀘𑁄𑀤𑁂𑀦𑁆𑀢𑁄 ‘‘𑀦𑀦𑀼 𑀘𑀸’’𑀢𑀺𑀆𑀤𑀺𑀫𑀸𑀳. 𑀬𑀣𑀸 𑀆𑀭𑀸𑀫𑀸𑀤𑀺𑀅𑀢𑁆𑀣𑀁 𑀓𑀧𑁆𑀧𑀺𑀬𑀧𑀣𑀯𑀺𑀬𑀁 𑀲𑀬𑀁 𑀭𑁄𑀧𑁂𑀢𑀼𑀫𑁆𑀧𑀺 𑀯𑀝𑁆𑀝𑀢𑀺, 𑀢𑀣𑀸 𑀯𑀢𑁆𑀣𑀼𑀧𑀽𑀚𑀦𑀢𑁆𑀣𑀸𑀬 𑀲𑀬𑀁 𑀕𑀦𑁆𑀣𑀦𑀫𑁆𑀧𑀺 𑀓𑀲𑁆𑀫𑀸 𑀦 𑀯𑀝𑁆𑀝𑀢𑀻𑀢𑀺 𑀘𑁄𑀤𑀓𑀲𑁆𑀲 𑀅𑀥𑀺𑀧𑁆𑀧𑀸𑀬𑁄. 𑀯𑀼𑀢𑁆𑀢𑀦𑁆𑀢𑀺𑀆𑀤𑀺 𑀧𑀭𑀺𑀳𑀸𑀭𑁄. 𑀅𑀣 ‘‘𑀦 𑀧𑀦 𑀫𑀳𑀸𑀅𑀝𑁆𑀞𑀓𑀣𑀸𑀬’’𑀦𑁆𑀢𑀺 𑀓𑀲𑁆𑀫𑀸 𑀯𑀤𑀢𑀺? 𑀫𑀳𑀸𑀧𑀘𑁆𑀘𑀭𑀺𑀆𑀤𑀻𑀲𑀼 𑀯𑀼𑀢𑁆𑀢𑀫𑁆𑀧𑀺 𑀳𑀺 𑀧𑀫𑀸𑀡𑀫𑁂𑀯𑀸𑀢𑀺 𑀦𑀸𑀬𑀁 𑀯𑀺𑀭𑁄𑀥𑁄, 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀅𑀯𑀼𑀢𑁆𑀢𑀲𑁆𑀲 𑀲𑀬𑀁 𑀭𑁄𑀧𑀦𑀲𑁆𑀲 𑀢𑀢𑁆𑀣𑁂𑀯 𑀯𑀼𑀢𑁆𑀢𑁂𑀦 𑀉𑀤𑀓𑀲𑀺𑀜𑁆𑀘𑀦𑁂𑀦 𑀲𑀳 𑀲𑀁𑀲𑀦𑁆𑀤𑀦𑀦𑀬𑀤𑀲𑁆𑀲𑀦𑀫𑀼𑀔𑁂𑀦 𑀧𑀫𑀸𑀡𑀫𑁂𑀯𑀸𑀢𑀺 𑀧𑀢𑀺𑀝𑁆𑀞𑀸𑀧𑁂𑀢𑀼𑀁 𑀯𑀼𑀢𑁆𑀢𑀢𑁆𑀢𑀸. ‘‘𑀫𑀜𑁆𑀜𑁂𑀬𑁆𑀬𑀸𑀲𑀻’’𑀢𑀺 𑀧𑀤𑀁 ‘‘𑀢𑀁 𑀓𑀣’’𑀦𑁆𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀢𑀢𑁆𑀣𑀸𑀬𑀁 𑀅𑀥𑀺𑀧𑁆𑀧𑀸𑀬𑁄 𑁋 𑀓𑀺𑀜𑁆𑀘𑀸𑀧𑀺 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀲𑀬𑀁 𑀭𑁄𑀧𑀦𑀁 𑀦 𑀯𑀼𑀢𑁆𑀢𑀁, 𑀓𑀧𑁆𑀧𑀺𑀬𑀉𑀤𑀓𑀲𑁆𑀲 𑀲𑀬𑀁 𑀆𑀲𑀺𑀜𑁆𑀘𑀦𑀁 𑀯𑀼𑀢𑁆𑀢𑀫𑁂𑀯, 𑀢𑀲𑁆𑀫𑀸 𑀬𑀣𑀸 𑀆𑀭𑀸𑀫𑀸𑀤𑀺𑀅𑀢𑁆𑀣𑀸𑀬 𑀓𑀧𑁆𑀧𑀺𑀬𑀉𑀤𑀓𑀁 𑀲𑀬𑀁 𑀲𑀺𑀜𑁆𑀘𑀺𑀢𑀼𑀫𑁆𑀧𑀺 𑀯𑀝𑁆𑀝𑀢𑀺, 𑀢𑀣𑀸 𑀯𑀢𑁆𑀣𑀼𑀧𑀽𑀚𑀦𑀢𑁆𑀣𑀸𑀬 𑀕𑀦𑁆𑀣𑀦𑀫𑁆𑀧𑀺 𑀓𑀲𑁆𑀫𑀸 𑀦 𑀯𑀝𑁆𑀝𑀢𑀻𑀢𑀺. 𑀢𑀫𑁆𑀧𑀺 𑀦 𑀯𑀺𑀭𑀼𑀚𑁆𑀛𑀢𑀻𑀢𑀺 𑀬𑀤𑁂𑀢𑀁 𑀯𑀢𑁆𑀣𑀼𑀧𑀽𑀚𑀦𑀢𑁆𑀣𑀸𑀬𑀧𑀺 𑀕𑀦𑁆𑀣𑀦𑀸𑀤𑀺𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀆𑀭𑀸𑀫𑀸𑀤𑀺𑀅𑀢𑁆𑀣𑀸𑀬 𑀲𑀬𑀁 𑀭𑁄𑀧𑀦𑀲𑀺𑀜𑁆𑀘𑀦𑀁 𑀯𑀼𑀢𑁆𑀢𑀁, 𑀢𑀫𑁆𑀧𑀺 𑀧𑀸𑀴𑀺𑀬𑀸 𑀲𑀁𑀲𑀦𑁆𑀤𑀦𑀢𑁄 𑀧𑀼𑀩𑁆𑀩𑀸𑀧𑀭𑀁 𑀦 𑀯𑀺𑀭𑀼𑀚𑁆𑀛𑀢𑀺.

𑀢𑀁 𑀓𑀣𑀁 𑀦 𑀯𑀺𑀭𑀼𑀚𑁆𑀛𑀢𑀻𑀢𑀺 𑀆𑀳 ‘‘𑀢𑀢𑁆𑀭 𑀳𑀻’’𑀢𑀺𑀆𑀤𑀺. 𑀢𑀢𑁆𑀭𑀸𑀢𑀺 𑀭𑁄𑀧𑀦𑀲𑀺𑀜𑁆𑀘𑀦𑀯𑀺𑀲𑀬𑁂. 𑀧𑀼𑀧𑁆𑀨𑀸𑀤𑀻𑀳𑀺 𑀓𑀼𑀮𑀲𑀗𑁆𑀕𑀳𑀧𑁆𑀧𑀲𑀗𑁆𑀕𑁂 ‘‘𑀫𑀸𑀮𑀸𑀯𑀘𑁆𑀙’’𑀦𑁆𑀢𑀺 𑀯𑀺𑀲𑁂𑀲𑀺𑀢𑀢𑁆𑀢𑀸 𑀓𑀼𑀮𑀲𑀗𑁆𑀕𑀳𑀢𑁆𑀣𑀫𑁂𑀯 𑀭𑁄𑀧𑀦𑀁 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀯𑀺𑀜𑁆𑀜𑀸𑀬𑀢𑀻𑀢𑀺 𑀆𑀳 ‘‘𑀫𑀸𑀮𑀸𑀯𑀘𑁆𑀙𑀦𑁆𑀢𑀺 𑀯𑀤𑀦𑁆𑀢𑁄’’𑀢𑀺𑀆𑀤𑀺. 𑀏𑀢𑀁 𑀯𑀼𑀢𑁆𑀢𑀦𑁆𑀢𑀺 ‘‘𑀫𑀸𑀮𑀸𑀯𑀘𑁆𑀙𑀁 𑀭𑁄𑀧𑁂𑀦𑁆𑀢𑀺𑀧𑀺 𑀭𑁄𑀧𑀸𑀧𑁂𑀦𑁆𑀢𑀺𑀧𑀺, 𑀲𑀺𑀜𑁆𑀘𑀦𑁆𑀢𑀺𑀧𑀺 𑀲𑀺𑀜𑁆𑀘𑀸𑀧𑁂𑀦𑁆𑀢𑀺𑀧𑀻’’𑀢𑀺 𑀏𑀢𑀁 𑀯𑀼𑀢𑁆𑀢𑀁. 𑀅𑀜𑁆𑀜𑀢𑁆𑀭 𑀧𑀦𑀸𑀢𑀺 𑀆𑀭𑀸𑀫𑀸𑀤𑀺𑀅𑀢𑁆𑀣𑀸𑀬 𑀫𑀸𑀮𑀸𑀯𑀘𑁆𑀙𑀸𑀤𑀻𑀦𑀁 𑀭𑁄𑀧𑀦𑁂 𑀧𑀦. 𑀧𑀭𑀺𑀬𑀸𑀬𑁄𑀢𑀺 𑀲𑀬𑀁𑀓𑀭𑀡𑀓𑀸𑀭𑀸𑀧𑀦𑀲𑀗𑁆𑀔𑀸𑀢𑁄 𑀧𑀭𑀺𑀬𑀸𑀬𑁄 𑀯𑁄𑀳𑀸𑀭𑁄 𑀅𑀢𑁆𑀣𑀯𑀺𑀲𑁂𑀲𑁄𑀢𑀺 𑀅𑀢𑁆𑀣𑁄 𑀅𑀢𑁆𑀣𑀺 𑀉𑀧𑀮𑀩𑁆𑀪𑀢𑀺, 𑀓𑀼𑀮𑀲𑀗𑁆𑀕𑀳𑀢𑁆𑀣𑀢𑁆𑀢𑀸𑀪𑀸𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀯𑀫𑁂𑀢𑁆𑀣 𑀧𑀭𑀺𑀬𑀸𑀬𑀲𑀤𑁆𑀤𑀲𑁆𑀲 𑀓𑀭𑀡𑀓𑀸𑀭𑀸𑀧𑀦𑀯𑀲𑁂𑀦 𑀅𑀢𑁆𑀣𑁂 𑀕𑀬𑁆𑀳𑀫𑀸𑀦𑁂 ‘‘𑀕𑀦𑁆𑀣𑁂𑀦𑁆𑀢𑀺𑀧𑀺 𑀕𑀦𑁆𑀣𑀸𑀧𑁂𑀦𑁆𑀢𑀺𑀧𑀻’’𑀢𑀺 𑀧𑀸𑀴𑀺𑀬𑀁 𑀧𑀝𑀺𑀓𑁆𑀔𑀺𑀢𑁆𑀢𑀕𑀦𑁆𑀣𑀦𑀕𑀦𑁆𑀣𑀸𑀧𑀦𑀁 𑀞𑀧𑁂𑀢𑁆𑀯𑀸 𑀬𑀁 𑀧𑀭𑀢𑁄 ‘‘𑀏𑀯𑀁 𑀚𑀸𑀦, 𑀏𑀯𑀁 𑀓𑀢𑁂 𑀲𑁄𑀪𑁂𑀬𑁆𑀬𑀸’’𑀢𑀺𑀆𑀤𑀺𑀓𑀧𑁆𑀧𑀺𑀬𑀯𑀘𑀦𑁂𑀳𑀺 𑀕𑀦𑁆𑀣𑀸𑀧𑀦𑀁 𑀯𑀼𑀢𑁆𑀢𑀁, 𑀢𑀢𑁆𑀣 𑀤𑁄𑀲𑀸𑀪𑀸𑀯𑁄 𑀲𑀫𑀢𑁆𑀣𑀺𑀢𑁄 𑀳𑁄𑀢𑀺, ‘‘𑀕𑀦𑁆𑀣𑁂𑀳𑀻’’𑀢𑀺 𑀆𑀡𑀢𑁆𑀢𑀺𑀬𑀸 𑀓𑀸𑀭𑀸𑀧𑀦𑀲𑁆𑀲𑁂𑀯 𑀕𑀦𑁆𑀣𑀸𑀧𑀦𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀢𑀢𑁆𑀣 𑀧𑀭𑀺𑀬𑀸𑀬𑀁 𑀇𑀥 𑀘 𑀧𑀭𑀺𑀬𑀸𑀬𑀸𑀪𑀸𑀯𑀁 𑀜𑀢𑁆𑀯𑀸𑀢𑀺 𑀢𑀢𑁆𑀣 ‘‘𑀫𑀸𑀮𑀸𑀯𑀘𑁆𑀙𑀁 𑀭𑁄𑀧𑁂𑀦𑁆𑀢𑀻’’𑀢𑀺𑀆𑀤𑀻𑀲𑀼 ‘‘𑀫𑀸𑀮𑀸𑀯𑀘𑁆𑀙’’𑀦𑁆𑀢𑀺 𑀓𑀼𑀮𑀲𑀗𑁆𑀕𑀳𑀢𑁆𑀣𑀢𑀸𑀲𑀽𑀘𑀦𑀓𑀲𑁆𑀲 𑀯𑀺𑀲𑁂𑀲𑀦𑀲𑁆𑀲 𑀲𑀩𑁆𑀪𑀸𑀯𑀢𑁄 𑀓𑀭𑀡𑀓𑀸𑀭𑀸𑀧𑀦𑀲𑀗𑁆𑀔𑀸𑀢𑀧𑀭𑀺𑀬𑀸𑀬𑀲𑀩𑁆𑀪𑀸𑀯𑀁. 𑀇𑀥 ‘‘𑀕𑀦𑁆𑀣𑁂𑀦𑁆𑀢𑀻’’𑀢𑀺𑀆𑀤𑀻𑀲𑀼 𑀢𑀣𑀸𑀯𑀺𑀥𑀯𑀺𑀲𑁂𑀲𑀯𑀘𑀦𑀸𑀪𑀸𑀯𑀢𑁄 𑀢𑀲𑁆𑀲 𑀧𑀭𑀺𑀬𑀸𑀬𑀲𑁆𑀲 𑀅𑀪𑀸𑀯𑀜𑁆𑀘 𑀜𑀢𑁆𑀯𑀸. 𑀢𑀁 𑀲𑀼𑀯𑀼𑀢𑁆𑀢𑀫𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 𑀬𑁄𑀚𑀦𑀸.

𑀲𑀩𑁆𑀩𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 𑀅𑀝𑁆𑀞𑀓𑀣𑀸𑀲𑀼 𑀆𑀕𑀢𑀦𑀬𑁂𑀦𑁂𑀯 𑀭𑁄𑀧𑀦𑀸𑀤𑀺, 𑀕𑀦𑁆𑀣𑀸𑀧𑀦𑀸𑀤𑀺 𑀘 𑀲𑀩𑁆𑀩𑀁 𑀯𑁂𑀤𑀺𑀢𑀩𑁆𑀩𑀁. 𑀦 𑀳𑁂𑀢𑁆𑀣 𑀲𑀦𑁆𑀤𑁂𑀳𑁄 𑀓𑀸𑀢𑀩𑁆𑀩𑁄𑀢𑀺 𑀦𑀺𑀕𑀫𑁂𑀢𑀺.

𑀳𑀭𑀡𑀸𑀤𑀻𑀲𑀽𑀢𑀺 𑀯𑀢𑁆𑀣𑀼𑀧𑀽𑀚𑀦𑀢𑁆𑀣𑀸𑀬 𑀳𑀭𑀡𑀸𑀤𑀻𑀲𑀼. 𑀓𑀼𑀮𑀺𑀢𑁆𑀣𑀺𑀆𑀤𑀻𑀦𑀁 𑀅𑀢𑁆𑀣𑀸𑀬 𑀳𑀭𑀡𑀢𑁄𑀢𑀺 𑀓𑀼𑀮𑀺𑀢𑁆𑀣𑀺𑀆𑀤𑀻𑀦𑀁 𑀳𑀭𑀡𑀲𑁆𑀲𑁂𑀯 𑀯𑀺𑀲𑁂𑀲𑁂𑀢𑁆𑀯𑀸 𑀧𑀝𑀺𑀓𑁆𑀔𑀺𑀢𑁆𑀢𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑀸𑀳 ‘‘𑀳𑀭𑀡𑀸𑀥𑀺𑀓𑀸𑀭𑁂 𑀳𑀻’’𑀢𑀺𑀆𑀤𑀺. 𑀫𑀜𑁆𑀚𑀭𑀻𑀢𑀺 𑀧𑀼𑀧𑁆𑀨𑀕𑁄𑀘𑁆𑀙𑀁. 𑀯𑀝𑀁𑀲𑀓𑁄𑀢𑀺 𑀓𑀡𑁆𑀡𑀲𑁆𑀲 𑀉𑀧𑀭𑀺 𑀧𑀺𑀴𑀦𑁆𑀥𑀦𑀢𑁆𑀣𑀁 𑀓𑀢𑀧𑀼𑀧𑁆𑀨𑀯𑀺𑀓𑀢𑀺, 𑀲𑁄 𑀘 ‘‘𑀯𑀝𑀁𑀲𑁄’’𑀢𑀺 𑀯𑀼𑀘𑁆𑀘𑀢𑀺. 𑀓𑀡𑁆𑀡𑀺𑀓𑀸𑀢𑀺 𑀩𑀳𑀽𑀦𑀁 𑀧𑀼𑀧𑁆𑀨𑀸𑀦𑀁 𑀯𑀸 𑀫𑀸𑀮𑀸𑀦𑀁 𑀯𑀸 𑀏𑀓𑀢𑁄 𑀩𑀦𑁆𑀥𑀺𑀢𑀲𑁆𑀲 𑀦𑀸𑀫𑀁, ‘‘𑀓𑀡𑁆𑀡𑀸𑀪𑀭𑀡’’𑀦𑁆𑀢𑀺𑀧𑀺 𑀯𑀤𑀦𑁆𑀢𑀺. 𑀳𑀸𑀭𑀲𑀤𑀺𑀲𑀦𑁆𑀢𑀺 𑀫𑀼𑀢𑁆𑀢𑀸𑀳𑀸𑀭𑀲𑀤𑀺𑀲𑀁.

𑀓𑀧𑁆𑀧𑀺𑀬𑁂𑀦𑀸𑀢𑀺 𑀓𑀧𑁆𑀧𑀺𑀬𑀉𑀤𑀓𑁂𑀦. 𑀢𑁂𑀲𑀁𑀬𑁂𑀯 𑀤𑁆𑀯𑀺𑀦𑁆𑀦𑀦𑁆𑀢𑀺 𑀓𑀼𑀮𑀤𑀽𑀲𑀦𑀧𑀭𑀺𑀪𑁄𑀕𑀸𑀦𑀁 𑀤𑁆𑀯𑀺𑀦𑁆𑀦𑀁. 𑀤𑀼𑀓𑁆𑀓𑀝𑀦𑁆𑀢𑀺 𑀓𑀼𑀮𑀲𑀗𑁆𑀕𑀳𑀢𑁆𑀣𑀸𑀬 𑀲𑀬𑀁 𑀲𑀺𑀜𑁆𑀘𑀦𑁂, 𑀓𑀧𑁆𑀧𑀺𑀬𑀯𑁄𑀳𑀸𑀭𑁂𑀦 𑀯𑀸 𑀅𑀓𑀧𑁆𑀧𑀺𑀬𑀯𑁄𑀳𑀸𑀭𑁂𑀦 𑀯𑀸 𑀲𑀺𑀜𑁆𑀘𑀸𑀧𑀦𑁂 𑀘 𑀤𑀼𑀓𑁆𑀓𑀝𑀁, 𑀧𑀭𑀺𑀪𑁄𑀕𑀢𑁆𑀣𑀸𑀬 𑀧𑀦 𑀲𑀬𑀁 𑀲𑀺𑀜𑁆𑀘𑀦𑁂, 𑀅𑀓𑀧𑁆𑀧𑀺𑀬𑀯𑁄𑀳𑀸𑀭𑁂𑀦 𑀲𑀺𑀜𑁆𑀘𑀸𑀧𑀦𑁂 𑀘 𑀤𑀼𑀓𑁆𑀓𑀝𑀁. 𑀧𑀬𑁄𑀕𑀩𑀳𑀼𑀮𑀢𑀸𑀬𑀸𑀢𑀺 𑀲𑀬𑀁 𑀓𑀭𑀡𑁂, 𑀓𑀸𑀬𑀧𑀬𑁄𑀕𑀲𑁆𑀲 𑀓𑀸𑀭𑀸𑀧𑀦𑁂 𑀘 𑀯𑀘𑀻𑀧𑀬𑁄𑀕𑀲𑁆𑀲 𑀘 𑀩𑀳𑀼𑀢𑁆𑀢𑁂𑀦.

𑀕𑀦𑁆𑀣𑁂𑀦 𑀦𑀺𑀩𑁆𑀩𑀢𑁆𑀢𑀁 𑀤𑀸𑀫𑀁 𑀕𑀦𑁆𑀣𑀺𑀫𑀁. 𑀏𑀲𑁂𑀯 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀦 𑀯𑀝𑁆𑀝𑀢𑀻𑀢𑀺 𑀯𑀢𑁆𑀣𑀼𑀧𑀽𑀚𑀦𑀢𑁆𑀣𑀸𑀬𑀧𑀺 𑀦 𑀯𑀝𑁆𑀝𑀢𑀺, 𑀤𑀼𑀓𑁆𑀓𑀝𑀦𑁆𑀢𑀺 𑀅𑀢𑁆𑀣𑁄. 𑀯𑀝𑁆𑀝𑀢𑀻𑀢𑀺 𑀯𑀢𑁆𑀣𑀼𑀧𑀽𑀚𑀦𑀢𑁆𑀣𑀸𑀬 𑀯𑀝𑁆𑀝𑀢𑀺, 𑀓𑀼𑀮𑀲𑀗𑁆𑀕𑀳𑀢𑁆𑀣𑀸𑀬 𑀧𑀦 𑀓𑀧𑁆𑀧𑀺𑀬𑀯𑁄𑀳𑀸𑀭𑁂𑀦 𑀓𑀸𑀭𑀸𑀧𑁂𑀦𑁆𑀢𑀲𑁆𑀲𑀸𑀧𑀺 𑀤𑀼𑀓𑁆𑀓𑀝𑀫𑁂𑀯.

𑀦𑀻𑀧𑀧𑀼𑀧𑁆𑀨𑀁 𑀦𑀸𑀫 𑀓𑀤𑀫𑁆𑀩𑀧𑀼𑀧𑁆𑀨𑀁. 𑀧𑀼𑀭𑀺𑀫𑀦𑀬𑁂𑀦𑁂𑀯𑀸𑀢𑀺 ‘‘𑀪𑀺𑀓𑁆𑀔𑀼𑀲𑁆𑀲 𑀯𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀦𑀬𑁂𑀦.

𑀓𑀤𑀮𑀺𑀓𑁆𑀔𑀦𑁆𑀥𑀫𑁆𑀳𑀻𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀁 𑀲𑀩𑁆𑀩𑀫𑁂𑀯 𑀲𑀦𑁆𑀥𑀸𑀬 ‘‘𑀢𑀁 𑀅𑀢𑀺𑀑𑀴𑀸𑀭𑀺𑀓𑀫𑁂𑀯𑀸’’𑀢𑀺 𑀯𑀼𑀢𑁆𑀢𑀁, 𑀲𑀩𑁆𑀩𑀢𑁆𑀣 𑀓𑀭𑀡𑁂, 𑀅𑀓𑀧𑁆𑀧𑀺𑀬𑀯𑀘𑀦𑁂𑀦 𑀓𑀸𑀭𑀸𑀧𑀦𑁂 𑀘 𑀤𑀼𑀓𑁆𑀓𑀝𑀫𑁂𑀯𑀸𑀢𑀺 𑀅𑀢𑁆𑀣𑁄. ‘‘𑀧𑀼𑀧𑁆𑀨𑀯𑀺𑀚𑁆𑀛𑀦𑀢𑁆𑀣𑀁 𑀓𑀡𑁆𑀝𑀓𑀁 𑀩𑀦𑁆𑀥𑀺𑀢𑀼𑀫𑁆𑀧𑀺 𑀦 𑀯𑀝𑁆𑀝𑀢𑀻’’𑀢𑀺 𑀇𑀫𑀲𑁆𑀲 𑀉𑀧𑀮𑀓𑁆𑀔𑀡𑀢𑁆𑀢𑀸 𑀧𑀼𑀧𑁆𑀨𑀤𑀸𑀫𑁄𑀮𑀫𑁆𑀩𑀦𑀸𑀤𑀺𑀅𑀢𑁆𑀣𑀸𑀬 𑀭𑀚𑁆𑀚𑀼𑀩𑀦𑁆𑀥𑀦𑀸𑀤𑀺𑀧𑀺 𑀦 𑀯𑀝𑁆𑀝𑀢𑀻𑀢𑀺 𑀓𑁂𑀘𑀺 𑀯𑀤𑀦𑁆𑀢𑀺, 𑀅𑀜𑁆𑀜𑁂 𑀧𑀦 ‘‘𑀧𑀼𑀧𑁆𑀨𑀯𑀺𑀚𑁆𑀛𑀦𑀢𑁆𑀣𑀁 𑀓𑀡𑁆𑀝𑀓𑀦𑁆𑀢𑀺 𑀯𑀺𑀲𑁂𑀲𑀺𑀢𑀢𑁆𑀢𑀸 𑀢𑀤𑀢𑁆𑀣𑀁 𑀓𑀡𑁆𑀝𑀓𑀫𑁂𑀯 𑀩𑀦𑁆𑀥𑀺𑀢𑀼𑀁 𑀦 𑀯𑀝𑁆𑀝𑀢𑀺, 𑀢𑀜𑁆𑀘 𑀅𑀝𑁆𑀞𑀓𑀣𑀸𑀧𑀫𑀸𑀡𑁂𑀦𑀸’’𑀢𑀺 𑀯𑀤𑀦𑁆𑀢𑀺, 𑀯𑀻𑀫𑀁𑀲𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑀁. 𑀧𑀼𑀧𑁆𑀨𑀧𑀝𑀺𑀘𑁆𑀙𑀓𑀁 𑀦𑀸𑀫 𑀤𑀡𑁆𑀟𑀸𑀤𑀻𑀳𑀺 𑀓𑀢𑀁 𑀧𑀼𑀧𑁆𑀨𑀸𑀥𑀸𑀦𑀁, 𑀏𑀢𑀫𑁆𑀧𑀺 𑀦𑀸𑀕𑀤𑀦𑁆𑀢𑀓𑀫𑁆𑀧𑀺 𑀲𑀙𑀺𑀤𑁆𑀤𑀓𑀫𑁂𑀯 𑀕𑀳𑁂𑀢𑀩𑁆𑀩𑀁. 𑀅𑀲𑁄𑀓𑀧𑀺𑀡𑁆𑀟𑀺𑀬𑀸𑀢𑀺 𑀅𑀲𑁄𑀓𑀲𑀸𑀔𑀸𑀦𑀁, 𑀧𑀼𑀧𑁆𑀨𑀸𑀦𑀁 𑀯𑀸 𑀲𑀫𑀽𑀳𑁂. 𑀥𑀫𑁆𑀫𑀭𑀚𑁆𑀚𑀼 𑀦𑀸𑀫 𑀘𑁂𑀢𑀺𑀬𑀸𑀤𑀻𑀦𑀺 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀢𑁂𑀲𑀜𑁆𑀘 𑀭𑀚𑁆𑀚𑀼𑀬𑀸 𑀘 𑀅𑀦𑁆𑀢𑀭𑀸 𑀧𑀼𑀧𑁆𑀨𑀧𑁆𑀧𑀯𑁂𑀲𑀦𑀢𑁆𑀣𑀸𑀬 𑀩𑀦𑁆𑀥𑀭𑀚𑁆𑀚𑀼. ‘‘𑀲𑀺𑀣𑀺𑀮𑀯𑀝𑁆𑀝𑀺𑀢𑀸 𑀯𑀸 𑀭𑀚𑁆𑀚𑀼𑀯𑀝𑁆𑀝𑀺𑀅𑀦𑁆𑀢𑀭𑁂 𑀧𑀼𑀧𑁆𑀨𑀧𑁆𑀧𑀯𑁂𑀲𑀦𑀢𑁆𑀣𑀸𑀬 𑀏𑀯𑀁 𑀩𑀦𑁆𑀥𑀸’’𑀢𑀺𑀧𑀺 𑀯𑀤𑀦𑁆𑀢𑀺.

𑀫𑀢𑁆𑀣𑀓𑀤𑀸𑀫𑀦𑁆𑀢𑀺 𑀥𑀫𑁆𑀫𑀸𑀲𑀦𑀸𑀤𑀺𑀫𑀢𑁆𑀣𑀓𑀮𑀫𑁆𑀩𑀓𑀤𑀸𑀫𑀁. 𑀢𑁂𑀲𑀁𑀬𑁂𑀯𑀸𑀢𑀺 𑀉𑀧𑁆𑀧𑀮𑀸𑀤𑀻𑀦𑀁 𑀏𑀯. 𑀯𑀸𑀓𑁂𑀦 𑀯𑀸 𑀤𑀡𑁆𑀟𑀓𑁂𑀦 𑀯𑀸𑀢𑀺 𑀧𑀼𑀧𑁆𑀨𑀦𑀸𑀴𑀁 𑀨𑀸𑀮𑁂𑀢𑁆𑀯𑀸 𑀧𑀼𑀧𑁆𑀨𑁂𑀦 𑀏𑀓𑀸𑀩𑀤𑁆𑀥𑀁 𑀞𑀺𑀢𑀯𑀸𑀓𑁂𑀦, 𑀤𑀡𑁆𑀟𑀓𑁂𑀦 𑀘 𑀏𑀓𑀩𑀦𑁆𑀥𑀦𑁂𑀦𑁂𑀯, 𑀏𑀢𑁂𑀦 𑀧𑀼𑀧𑁆𑀨𑀁 𑀩𑀻𑀚𑀕𑀸𑀫𑁂 𑀲𑀗𑁆𑀕𑀳𑀁 𑀦 𑀕𑀘𑁆𑀙𑀢𑀺 𑀧𑀜𑁆𑀘𑀲𑀼 𑀩𑀻𑀚𑁂𑀲𑀼 𑀅𑀧𑁆𑀧𑀯𑀺𑀝𑁆𑀞𑀢𑁆𑀢𑀸 𑀧𑀡𑁆𑀡𑀁 𑀯𑀺𑀬, 𑀢𑀲𑁆𑀫𑀸 𑀓𑀧𑁆𑀧𑀺𑀬𑀁 𑀅𑀓𑀸𑀭𑀸𑀧𑁂𑀢𑁆𑀯𑀸𑀧𑀺 𑀓𑁄𑀧𑀦𑁂 𑀤𑁄𑀲𑁄 𑀦𑀢𑁆𑀣𑀺. 𑀬𑀜𑁆𑀘 𑀙𑀺𑀦𑁆𑀦𑀲𑁆𑀲𑀸𑀧𑀺 𑀫𑀓𑀼𑀴𑀲𑁆𑀲 𑀯𑀺𑀓𑀲𑀦𑀁, 𑀢𑀫𑁆𑀧𑀺 𑀅𑀢𑀺𑀢𑀭𑀼𑀡𑀲𑁆𑀲 𑀅𑀪𑀸𑀯𑀸 𑀯𑀼𑀟𑁆𑀠𑀺𑀮𑀓𑁆𑀔𑀡𑀁 𑀦 𑀳𑁄𑀢𑀺, 𑀧𑀭𑀺𑀡𑀢𑀲𑁆𑀲 𑀧𑀦 𑀫𑀓𑀼𑀴𑀲𑁆𑀲 𑀧𑀢𑁆𑀢𑀸𑀦𑀁 𑀲𑀺𑀦𑁂𑀳𑁂 𑀧𑀭𑀺𑀬𑀸𑀤𑀸𑀦𑀁 𑀕𑀢𑁂 𑀯𑀺𑀲𑀼𑀁𑀪𑀸𑀯𑁄 𑀏𑀯 𑀯𑀺𑀓𑀸𑀲𑁄, 𑀢𑁂𑀦𑁂𑀯 𑀙𑀺𑀦𑁆𑀦𑀫𑀓𑀼𑀴𑀯𑀺𑀓𑀸𑀲𑁄 𑀅𑀘𑁆𑀙𑀺𑀦𑁆𑀦𑀫𑀓𑀼𑀴𑀯𑀺𑀓𑀸𑀲𑀢𑁄 𑀧𑀭𑀺𑀳𑀻𑀦𑁄, 𑀫𑀺𑀮𑀸𑀢𑀬𑀼𑀢𑁆𑀢𑁄 𑀯𑀸 𑀤𑀺𑀲𑁆𑀲𑀢𑀺. 𑀬𑀜𑁆𑀘 𑀫𑀺𑀮𑀸𑀢𑀲𑁆𑀲 𑀉𑀤𑀓𑀲𑀜𑁆𑀜𑁄𑀕𑁂 𑀅𑀫𑀺𑀮𑀸𑀦𑀢𑀸𑀧𑀚𑁆𑀚𑀦𑀁, 𑀢𑀫𑁆𑀧𑀺 𑀢𑀫𑁆𑀩𑀼𑀮𑀧𑀡𑁆𑀡𑀸𑀤𑀻𑀲𑀼 𑀲𑀫𑀸𑀦𑀦𑁆𑀢𑀺 𑀯𑀼𑀟𑁆𑀠𑀺𑀮𑀓𑁆𑀔𑀡𑀁 𑀦 𑀳𑁄𑀢𑀺, 𑀧𑀸𑀴𑀺𑀅𑀝𑁆𑀞𑀓𑀣𑀸𑀤𑀻𑀲𑀼 𑀘 𑀦 𑀓𑀢𑁆𑀣𑀘𑀺 𑀧𑀼𑀧𑁆𑀨𑀸𑀦𑀁 𑀓𑀧𑁆𑀧𑀺𑀬𑀓𑀭𑀡𑀁 𑀆𑀕𑀢𑀁, 𑀢𑀲𑁆𑀫𑀸 𑀧𑀼𑀧𑁆𑀨𑀁 𑀲𑀩𑁆𑀩𑀣𑀸 𑀅𑀩𑀻𑀚𑀫𑁂𑀯𑀸𑀢𑀺 𑀯𑀺𑀜𑁆𑀜𑀸𑀬𑀢𑀺, 𑀯𑀻𑀫𑀁𑀲𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑀁. ‘‘𑀧𑀲𑀺𑀩𑁆𑀩𑀓𑁂 𑀯𑀺𑀬𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀧𑀼𑀧𑁆𑀨𑀧𑀲𑀺𑀩𑁆𑀩𑀓𑁂 𑀯𑀸 𑀧𑀲𑀺𑀩𑁆𑀩𑀓𑀲𑀤𑀺𑀲𑀩𑀦𑁆𑀥𑁂 𑀯𑀸 𑀬𑀢𑁆𑀣 𑀓𑀢𑁆𑀣𑀘𑀺 𑀘𑀻𑀯𑀭𑁂 𑀯𑀸 𑀧𑀓𑁆𑀔𑀺𑀧𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀲𑀺𑀤𑁆𑀥𑀁. 𑀩𑀦𑁆𑀥𑀺𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀭𑀚𑁆𑀚𑀼𑀆𑀤𑀻𑀳𑀺 𑀩𑀦𑁆𑀥𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀧𑀼𑀧𑁆𑀨𑀲𑁆𑀲𑁂𑀯 𑀧𑀦 𑀅𑀘𑁆𑀙𑀺𑀦𑁆𑀦𑀤𑀡𑁆𑀟𑀯𑀸𑀓𑁂𑀳𑀺 𑀩𑀦𑁆𑀥𑀺𑀢𑀼𑀁 𑀯𑀝𑁆𑀝𑀢𑀺 𑀏𑀯.

𑀧𑀼𑀧𑁆𑀨𑀧𑀝𑁂 𑀘 𑀤𑀝𑁆𑀞𑀩𑁆𑀩𑀦𑁆𑀢𑀺 𑀧𑀼𑀧𑁆𑀨𑀧𑀝𑀁 𑀓𑀭𑁄𑀦𑁆𑀢𑀲𑁆𑀲 𑀤𑀻𑀖𑀢𑁄 𑀧𑀼𑀧𑁆𑀨𑀤𑀸𑀫𑀲𑁆𑀲 𑀳𑀭𑀡𑀧𑀘𑁆𑀘𑀸𑀳𑀭𑀡𑀯𑀲𑁂𑀦 𑀧𑀽𑀭𑀡𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀢𑀺𑀭𑀺𑀬𑀢𑁄 𑀳𑀭𑀡𑀁 𑀧𑀦 𑀯𑀸𑀬𑀺𑀫𑀁 𑀦𑀸𑀫 𑀳𑁄𑀢𑀺, 𑀦 𑀧𑀽𑀭𑀺𑀫𑀁. ‘‘𑀧𑀼𑀭𑀺𑀫𑀝𑁆𑀞𑀸𑀦𑀁 𑀅𑀢𑀺𑀓𑁆𑀓𑀸𑀫𑁂𑀢𑀻’’𑀢𑀺 𑀲𑀸𑀫𑀜𑁆𑀜𑀢𑁄 𑀯𑀼𑀢𑁆𑀢𑀢𑁆𑀢𑀸 𑀧𑀼𑀭𑀺𑀫𑀁 𑀧𑀼𑀧𑁆𑀨𑀓𑁄𑀝𑀺𑀁 𑀨𑀼𑀲𑀸𑀧𑁂𑀢𑁆𑀯𑀸 𑀯𑀸 𑀅𑀨𑀼𑀲𑀸𑀧𑁂𑀢𑁆𑀯𑀸 𑀯𑀸 𑀧𑀭𑀺𑀓𑁆𑀔𑀺𑀧𑀦𑀯𑀲𑁂𑀦 𑀧𑀦 𑀅𑀢𑀺𑀓𑁆𑀓𑀫𑀦𑁆𑀢𑀲𑁆𑀲 𑀆𑀧𑀢𑁆𑀢𑀺𑀬𑁂𑀯. 𑀩𑀦𑁆𑀥𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀧𑀼𑀧𑁆𑀨𑀭𑀳𑀺𑀢𑀸𑀬 𑀲𑀼𑀢𑁆𑀢𑀯𑀸𑀓𑀓𑁄𑀝𑀺𑀬𑀸 𑀩𑀦𑁆𑀥𑀺𑀢𑀼𑀁 𑀯𑀝𑁆𑀝𑀢𑀺. ‘‘𑀏𑀓𑀯𑀸𑀭𑀁 𑀳𑀭𑀺𑀢𑁆𑀯𑀸 𑀯𑀸 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀯𑀸’’𑀢𑀺 𑀇𑀤𑀁 𑀧𑀼𑀩𑁆𑀩𑁂 𑀯𑀼𑀢𑁆𑀢𑀘𑁂𑀢𑀺𑀬𑀸𑀤𑀺𑀧𑀭𑀺𑀓𑁆𑀔𑁂𑀧𑀁, 𑀧𑀼𑀧𑁆𑀨𑀧𑀝𑀓𑀭𑀡𑀜𑁆𑀘 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑀧𑀭𑁂𑀳𑀺 𑀧𑀽𑀭𑀺𑀢𑀦𑁆𑀢𑀺 𑀤𑀻𑀖𑀢𑁄 𑀧𑀲𑀸𑀭𑀺𑀢𑀁. 𑀯𑀸𑀬𑀺𑀢𑀼𑀦𑁆𑀢𑀺 𑀢𑀺𑀭𑀺𑀬𑀢𑁄 𑀳𑀭𑀺𑀢𑀼𑀁, 𑀢𑀁 𑀧𑀦 𑀏𑀓𑀯𑀸𑀭𑀫𑁆𑀧𑀺 𑀦 𑀮𑀩𑁆𑀪𑀢𑀺. 𑀧𑀼𑀧𑁆𑀨𑀸𑀦𑀺 𑀞𑀧𑁂𑀦𑁆𑀢𑁂𑀦𑀸𑀢𑀺 𑀅𑀕𑀦𑁆𑀣𑀺𑀢𑀧𑀼𑀧𑁆𑀨𑀸𑀦𑀺 𑀅𑀜𑁆𑀜𑀫𑀜𑁆𑀜𑀁 𑀨𑀼𑀲𑀸𑀧𑁂𑀢𑁆𑀯𑀸𑀧𑀺 𑀞𑀧𑁂𑀦𑁆𑀢𑁂𑀦. 𑀖𑀝𑀺𑀓𑀤𑀸𑀫𑀑𑀮𑀫𑁆𑀩𑀓𑁄𑀢𑀺 𑀳𑁂𑀝𑁆𑀞𑀸𑀪𑀸𑀕𑁂 𑀖𑀝𑀺𑀓𑀸𑀓𑀸𑀭𑀬𑀼𑀢𑁆𑀢𑁄, 𑀤𑀸𑀭𑀼𑀖𑀝𑀺𑀓𑀸𑀓𑀸𑀭𑁄 𑀯𑀸 𑀑𑀮𑀫𑁆𑀩𑀓𑁄. 𑀲𑀼𑀢𑁆𑀢𑀫𑀬𑀁 𑀕𑁂𑀡𑁆𑀟𑀼𑀓𑀁 𑀦𑀸𑀫. 𑀲𑀩𑁆𑀩𑀢𑁆𑀣𑀸𑀢𑀺 𑀕𑀦𑁆𑀣𑀺𑀫𑀸𑀤𑀻𑀲𑀼 𑀲𑀩𑁆𑀩𑀢𑁆𑀣.

𑀭𑁂𑀘𑀓𑀦𑁆𑀢𑀺 𑀅𑀪𑀺𑀦𑀬𑀁, ‘‘𑀏𑀯𑀁 𑀦𑀘𑁆𑀘𑀸𑀳𑀻’’𑀢𑀺 𑀦𑀝𑀦𑀸𑀓𑀸𑀭𑀤𑀲𑁆𑀲𑀦𑀦𑁆𑀢𑀺 𑀅𑀢𑁆𑀣𑁄, ‘‘𑀘𑀓𑁆𑀓𑀁 𑀯𑀺𑀬 𑀅𑀢𑁆𑀢𑀸𑀦𑀁 𑀪𑀫𑀸𑀧𑀦’’𑀦𑁆𑀢𑀺𑀧𑀺 𑀓𑁂𑀘𑀺. 𑀆𑀓𑀸𑀲𑁂𑀬𑁂𑀯 𑀓𑀻𑀴𑀦𑁆𑀢𑀻𑀢𑀺 ‘‘𑀅𑀬𑀁 𑀲𑀸𑀭𑀻 𑀅𑀲𑀼𑀓𑀧𑀤𑀁 𑀫𑀬𑀸 𑀦𑀻𑀢𑀸’’𑀢𑀺 𑀏𑀯𑀁 𑀫𑀼𑀔𑁂𑀦𑁂𑀯 𑀉𑀪𑁄𑀧𑀺 𑀯𑀤𑀦𑁆𑀢𑀸 𑀓𑀻𑀴𑀦𑁆𑀢𑀺. 𑀚𑀽𑀢𑀨𑀮𑀓𑁂𑀢𑀺 𑀚𑀽𑀢𑀫𑀡𑁆𑀟𑀮𑁂. 𑀧𑀸𑀲𑀓𑀓𑀻𑀴𑀸𑀬𑀸𑀢𑀺 𑀤𑁆𑀯𑀺𑀦𑁆𑀦𑀁 𑀢𑀺𑀯𑀗𑁆𑀕𑀼𑀮𑀧𑁆𑀧𑀫𑀸𑀡𑀸𑀦𑀁 𑀤𑀸𑀭𑀼𑀤𑀦𑁆𑀢𑀸𑀤𑀺𑀫𑀬𑀸𑀦𑀁 𑀧𑀸𑀲𑀓𑀸𑀦𑀁 𑀘𑀢𑀽𑀲𑀼 𑀧𑀲𑁆𑀲𑁂𑀲𑀼 𑀏𑀓𑀓𑀸𑀤𑀺𑀯𑀲𑁂𑀦 𑀩𑀺𑀦𑁆𑀤𑀽𑀦𑀺 𑀓𑀢𑁆𑀯𑀸 𑀨𑀮𑀓𑁂 𑀔𑀺𑀧𑀺𑀢𑁆𑀯𑀸 𑀉𑀧𑀭𑀺𑀪𑀸𑀕𑁂 𑀤𑀺𑀝𑁆𑀞𑀩𑀺𑀦𑁆𑀤𑀽𑀦𑀁 𑀯𑀲𑁂𑀦 𑀲𑀸𑀭𑀺𑀬𑁄 𑀅𑀧𑀦𑁂𑀢𑁆𑀯𑀸 𑀓𑀻𑀴𑀦𑀓𑀚𑀽𑀢𑀓𑀻𑀴𑀸𑀬.

𑀫𑀜𑁆𑀚𑀝𑁆𑀞𑀺 𑀦𑀸𑀫 𑀫𑀜𑁆𑀚𑀝𑁆𑀞𑀭𑀼𑀓𑁆𑀔𑀲𑀸𑀭𑀓𑀲𑀸𑀯𑀁. 𑀲𑀮𑀸𑀓𑀳𑀢𑁆𑀣𑀦𑁆𑀢𑀺 𑀦𑀸𑀴𑀺𑀓𑁂𑀭𑀳𑀻𑀭𑀸𑀤𑀻𑀦𑀁 𑀓𑀮𑀸𑀧𑀲𑁆𑀲𑁂𑀢𑀁 𑀦𑀸𑀫𑀁. 𑀧𑀸𑀴𑀺𑀬𑀁 𑀣𑀭𑀼𑀲𑁆𑀫𑀺𑀦𑁆𑀢𑀺 𑀔𑀕𑁆𑀕𑁂. 𑀉𑀲𑁆𑀲𑁂𑀴𑁂𑀦𑁆𑀢𑀻𑀢𑀺 𑀫𑀼𑀔𑁂𑀦 𑀉𑀲𑁆𑀲𑁂𑀴𑀦𑀲𑀤𑁆𑀤𑀁 𑀧𑀫𑀼𑀜𑁆𑀘𑀦𑁆𑀢𑀺, 𑀫𑀳𑀦𑁆𑀢𑀁 𑀅𑀩𑁆𑀬𑀢𑁆𑀢𑀲𑀤𑁆𑀤𑀁 𑀧𑀯𑀢𑁆𑀢𑁂𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀅𑀧𑁆𑀨𑁄𑀝𑁂𑀦𑁆𑀢𑀻𑀢𑀺 𑀤𑁆𑀯𑀺𑀕𑀼𑀡𑀺𑀢𑀯𑀸𑀫𑀳𑀢𑁆𑀣𑁂 𑀤𑀓𑁆𑀔𑀺𑀡𑀳𑀢𑁆𑀣𑁂𑀦 𑀢𑀸𑀴𑁂𑀢𑁆𑀯𑀸 𑀲𑀤𑁆𑀤𑀁 𑀓𑀭𑁄𑀦𑁆𑀢𑀺. 𑀫𑀼𑀔𑀟𑀺𑀡𑁆𑀟𑀺𑀫𑀦𑁆𑀢𑀺 𑀫𑀼𑀔𑀪𑁂𑀭𑀻.

𑁪𑁩𑁨. 𑀢𑁂𑀲𑀦𑁆𑀢𑀺 𑀲𑀫𑀸𑀲𑁂 𑀕𑀼𑀡𑀻𑀪𑀽𑀢𑀸𑀦𑀺 𑀧𑀩𑁆𑀩𑀸𑀦𑀺𑀧𑀺 𑀧𑀭𑀸𑀫𑀲𑀢𑀺. 𑀩𑁄𑀦𑁆𑀤𑁄𑀢𑀺 𑀮𑁄𑀮𑁄, 𑀫𑀦𑁆𑀤𑀥𑀸𑀢𑀼𑀓𑁄𑀢𑀺 𑀅𑀢𑁆𑀣𑁄. 𑀪𑀓𑀼𑀝𑀺𑀁 𑀓𑀢𑁆𑀯𑀸𑀢𑀺 𑀪𑀫𑀼𑀓𑀪𑁂𑀤𑀁 𑀓𑀢𑁆𑀯𑀸. 𑀦𑁂𑀮𑀸𑀢𑀺 𑀦𑀺𑀤𑁆𑀤𑁄𑀲𑀸.

𑁪𑁩𑁩. 𑀧𑀸𑀴𑀺𑀬𑀁 ‘‘𑀲𑀸𑀭𑀺𑀧𑀼𑀢𑁆𑀢𑀸’’𑀢𑀺 𑀇𑀤𑀁 𑀏𑀓𑀲𑁂𑀲𑀦𑀬𑁂𑀦 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀸𑀦𑀁 𑀉𑀪𑀺𑀦𑁆𑀦𑀁 𑀆𑀮𑀧𑀦𑀁, 𑀢𑁂𑀦𑁂𑀯 𑀩𑀳𑀼𑀯𑀘𑀦𑀦𑀺𑀤𑁆𑀤𑁂𑀲𑁄 𑀓𑀢𑁄.

𑁪𑁩𑁫. 𑀅𑀝𑁆𑀞𑀸𑀭𑀲 𑀯𑀢𑁆𑀢𑀸𑀦𑀻𑀢𑀺 ‘‘𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩’’𑀦𑁆𑀢𑀺𑀆𑀤𑀻𑀦𑀺 ‘‘𑀦 𑀪𑀺𑀓𑁆𑀔𑀽𑀳𑀺 𑀲𑀫𑁆𑀧𑀬𑁄𑀚𑁂𑀢𑀩𑁆𑀩’’𑀦𑁆𑀢𑀺 𑀧𑀭𑀺𑀬𑁄𑀲𑀸𑀦𑀸𑀦𑀺 𑀓𑀫𑁆𑀫𑀓𑁆𑀔𑀦𑁆𑀥𑀓𑁂 (𑀘𑀽𑀴𑀯. 𑁭) 𑀆𑀕𑀢𑀸𑀦𑀺 𑀅𑀝𑁆𑀞𑀸𑀭𑀲 𑀯𑀢𑁆𑀢𑀸𑀦𑀺. 𑀦 𑀧𑀦𑁆𑀦𑀮𑁄𑀫𑀸𑀢𑀺 𑀦 𑀧𑀢𑀺𑀢𑀫𑀸𑀦𑀮𑁄𑀫𑀸, 𑀅𑀦𑀦𑀼𑀓𑀽𑀮𑀯𑀢𑁆𑀢𑀺𑀦𑁄𑀢𑀺 𑀅𑀢𑁆𑀣𑁄.

𑁪𑁩𑁭. 𑀧𑀭𑀲𑀦𑁆𑀢𑀓𑀁 𑀤𑁂𑀢𑀺 𑀤𑀼𑀓𑁆𑀓𑀝𑀫𑁂𑀯𑀸𑀢𑀺 𑀯𑀺𑀲𑁆𑀲𑀸𑀲𑀕𑀸𑀳𑁂𑀦 𑀤𑀸𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀣𑀼𑀮𑁆𑀮𑀘𑁆𑀘𑀬𑀦𑁆𑀢𑀺 𑀏𑀢𑁆𑀣 𑀪𑀡𑁆𑀟𑀤𑁂𑀬𑁆𑀬𑀫𑁆𑀧𑀺 𑀳𑁄𑀢𑀺 𑀏𑀯.

𑀢𑀜𑁆𑀘 𑀔𑁄 𑀯𑀢𑁆𑀣𑀼𑀧𑀽𑀚𑀦𑀢𑁆𑀣𑀸𑀬𑀸𑀢𑀺 𑀫𑀸𑀢𑀸𑀧𑀺𑀢𑀽𑀦𑀫𑁆𑀧𑀺 𑀧𑀼𑀧𑁆𑀨𑀁 𑀤𑁂𑀦𑁆𑀢𑁂𑀦 𑀯𑀢𑁆𑀣𑀼𑀧𑀽𑀚𑀦𑀢𑁆𑀣𑀸𑀬𑁂𑀯 𑀤𑀸𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀫𑀡𑁆𑀟𑀦𑀢𑁆𑀣𑀸𑀬 𑀧𑀦 𑀲𑀺𑀯𑀮𑀺𑀗𑁆𑀕𑀸𑀤𑀺𑀧𑀽𑀚𑀦𑀢𑁆𑀣𑀸𑀬𑀸𑀢𑀺 𑀏𑀢𑁆𑀢𑀓𑀫𑁂𑀯 𑀯𑀼𑀢𑁆𑀢𑀢𑁆𑀢𑀸 ‘‘𑀇𑀫𑀁 𑀯𑀺𑀓𑁆𑀓𑀺𑀡𑀺𑀢𑁆𑀯𑀸 𑀚𑀻𑀯𑀺𑀲𑁆𑀲𑀦𑁆𑀢𑀻’’𑀢𑀺 𑀫𑀸𑀢𑀸𑀧𑀺𑀢𑀽𑀦𑀁 𑀤𑀸𑀢𑀼𑀁 𑀯𑀝𑁆𑀝𑀢𑀺, 𑀲𑁂𑀲𑀜𑀸𑀢𑀻𑀦𑀁 𑀧𑀦 𑀢𑀸𑀯𑀓𑀸𑀮𑀺𑀓𑀫𑁂𑀯 𑀤𑀸𑀢𑀼𑀁 𑀯𑀝𑁆𑀝𑀢𑀺. 𑀜𑀸𑀢𑀺𑀲𑀸𑀫𑀡𑁂𑀭𑁂𑀳𑁂𑀯𑀸𑀢𑀺 𑀢𑁂𑀲𑀁 𑀕𑀺𑀳𑀺𑀓𑀫𑁆𑀫𑀧𑀭𑀺𑀫𑁄𑀘𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀇𑀢𑀭𑁂𑀢𑀺 𑀅𑀜𑁆𑀜𑀸𑀢𑀓𑀸, 𑀢𑁂𑀳𑀺𑀧𑀺 𑀲𑀸𑀫𑀡𑁂𑀭𑁂𑀳𑀺 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸𑀦𑀁 𑀯𑀢𑁆𑀢𑀲𑀻𑀲𑁂𑀦 𑀳𑀭𑀺𑀢𑀩𑁆𑀩𑀁. 𑀘𑀽𑀴𑀓𑀦𑁆𑀢𑀺 𑀉𑀧𑀟𑁆𑀠𑀪𑀸𑀕𑀢𑁄𑀧𑀺 𑀉𑀧𑀟𑁆𑀠𑀁.

𑀲𑀸𑀫𑀡𑁂𑀭𑀸…𑀧𑁂… 𑀞𑀧𑁂𑀦𑁆𑀢𑀻𑀢𑀺 𑀅𑀭𑀓𑁆𑀔𑀺𑀢𑀸𑀕𑁄𑀧𑀺𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀫𑀕𑁆𑀕𑁂 𑀯𑀸 𑀘𑁂𑀢𑀺𑀬𑀗𑁆𑀕𑀡𑁂 𑀯𑀸. ‘‘𑀲𑀸𑀫𑀡𑁂𑀭𑁂𑀳𑀺 𑀤𑀸𑀧𑁂𑀢𑀼𑀁 𑀦 𑀮𑀪𑀦𑁆𑀢𑀻’’𑀢𑀺 𑀇𑀤𑀁 𑀲𑀸𑀫𑀡𑁂𑀭𑁂𑀳𑀺 𑀕𑀺𑀳𑀻𑀦𑀁 𑀓𑀫𑁆𑀫𑀁 𑀓𑀸𑀭𑀺𑀢𑀁 𑀯𑀺𑀬 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁, 𑀦 𑀧𑀦 𑀧𑀼𑀧𑁆𑀨𑀤𑀸𑀦𑀁 𑀳𑁄𑀢𑀻𑀢𑀺 𑀲𑀸𑀫𑀡𑁂𑀭𑀸𑀦𑀫𑁆𑀧𑀺 𑀦 𑀯𑀝𑁆𑀝𑀦𑀢𑁄. 𑀯𑀼𑀢𑁆𑀢𑀜𑁆𑀘 ‘‘𑀲𑀬𑀫𑁂𑀯𑀸’’𑀢𑀺𑀆𑀤𑀺. ‘‘𑀅𑀯𑀺𑀲𑁂𑀲𑁂𑀦 𑀯𑀼𑀢𑁆𑀢’’𑀦𑁆𑀢𑀺 𑀇𑀫𑀺𑀦𑀸 𑀲𑀩𑁆𑀩𑁂𑀲𑀫𑁆𑀧𑀺 𑀦 𑀯𑀝𑁆𑀝𑀢𑀻𑀢𑀺 𑀤𑀲𑁆𑀲𑁂𑀢𑀺.

𑀔𑀻𑀡𑀧𑀭𑀺𑀩𑁆𑀩𑀬𑀸𑀦𑀦𑁆𑀢𑀺 𑀆𑀕𑀦𑁆𑀢𑀼𑀓𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀧𑀭𑀺𑀘𑁆𑀙𑀺𑀦𑁆𑀦𑁂𑀲𑀼𑀧𑀺 𑀭𑀼𑀓𑁆𑀔𑁂𑀲𑀼 ‘‘𑀇𑀥 𑀨𑀮𑀸𑀦𑀺 𑀲𑀼𑀦𑁆𑀤𑀭𑀸𑀦𑀻’’𑀢𑀺𑀆𑀤𑀺𑀁 𑀯𑀤𑀦𑁆𑀢𑁂𑀦 𑀓𑀼𑀮𑀲𑀗𑁆𑀕𑀳𑁄 𑀓𑀢𑁄 𑀦𑀸𑀫 𑀳𑁄𑀢𑀻𑀢𑀺 𑀆𑀳 ‘‘𑀏𑀯𑀁 𑀧𑀦 𑀦 𑀯𑀢𑁆𑀢𑀩𑁆𑀩’’𑀦𑁆𑀢𑀺.

𑀭𑀼𑀓𑁆𑀔𑀘𑁆𑀙𑀮𑁆𑀮𑀻𑀢𑀺 𑀭𑀼𑀓𑁆𑀔𑀢𑁆𑀢𑀘𑁄. 𑀅𑀪𑀸𑀚𑀦𑀻𑀬𑀢𑁆𑀢𑀸 𑀕𑀭𑀼𑀪𑀡𑁆𑀟𑀁 𑀯𑀼𑀢𑁆𑀢𑀁. 𑀯𑀼𑀢𑁆𑀢𑀦𑀬𑁂𑀦𑀸𑀢𑀺 𑀧𑀡𑁆𑀡𑀤𑀸𑀦𑀫𑁆𑀧𑀺 𑀧𑀼𑀧𑁆𑀨𑀨𑀮𑀸𑀤𑀻𑀲𑀼 𑀯𑀼𑀢𑁆𑀢𑀦𑀬𑁂𑀦 𑀓𑀼𑀮𑀲𑀗𑁆𑀕𑀳𑁄 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺.

𑀧𑀼𑀩𑁆𑀩𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑀦𑁆𑀢𑀺 𑀫𑀫 𑀯𑀘𑀦𑁂𑀦 𑀪𑀕𑀯𑀢𑁄 𑀧𑀸𑀤𑁂 𑀯𑀦𑁆𑀤𑀣𑀸𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑀲𑀺𑀓𑁆𑀔𑀸𑀧𑀤𑁂 𑀧𑀞𑀫𑀁 𑀯𑀼𑀢𑁆𑀢𑀁. ‘‘𑀧𑀓𑁆𑀓𑀫𑀢𑀸𑀬𑀲𑁆𑀫𑀸’’𑀢𑀺 𑀇𑀤𑀁 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀯𑀲𑁂𑀦 𑀯𑀼𑀢𑁆𑀢𑀁. 𑀧𑀼𑀦 ‘‘𑀧𑀓𑁆𑀓𑀫𑀢𑀸𑀬𑀲𑁆𑀫𑀸’’𑀢𑀺 𑀇𑀤𑀫𑁆𑀧𑀺 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀓𑀢𑀲𑁆𑀲 𑀯𑀢𑁆𑀢𑀯𑀲𑁂𑀦 𑀯𑀼𑀢𑁆𑀢𑀁. 𑀏𑀢𑁆𑀣 𑀘 𑀅𑀲𑁆𑀲𑀚𑀺𑀧𑀼𑀦𑀩𑁆𑀩𑀲𑀼𑀓𑁂𑀳𑀺 𑀆𑀘𑀭𑀺𑀬𑁂𑀲𑀼 𑀅𑀦𑁂𑀓𑀯𑀺𑀥𑁂𑀲𑀼 𑀅𑀦𑀸𑀘𑀸𑀭𑁂𑀲𑀼 𑀧𑀜𑁆𑀜𑀧𑁂𑀢𑀩𑁆𑀩𑀸 𑀆𑀧𑀢𑁆𑀢𑀺𑀬𑁄 𑀲𑀺𑀓𑁆𑀔𑀸𑀧𑀤𑀦𑁆𑀢𑀭𑁂𑀲𑀼 𑀧𑀜𑁆𑀜𑀢𑁆𑀢𑀸 𑀏𑀯𑀸𑀢𑀺 𑀢𑀸 𑀇𑀥 𑀅𑀧𑀜𑁆𑀜𑀧𑁂𑀢𑁆𑀯𑀸 𑀓𑀼𑀮𑀤𑀽𑀲𑀓𑀸𑀦𑀁 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀯𑀲𑁂𑀦 𑀦𑀺𑀕𑁆𑀕𑀳𑀁 𑀓𑀸𑀢𑀼𑀁 𑀢𑀢𑁆𑀣𑁂𑀯 𑀲𑀫𑁆𑀫𑀸 𑀅𑀯𑀢𑁆𑀢𑀺𑀢𑁆𑀯𑀸 𑀓𑀸𑀭𑀓𑀲𑀗𑁆𑀖𑀁 𑀙𑀦𑁆𑀤𑀕𑀸𑀫𑀺𑀢𑀸𑀤𑀻𑀳𑀺 𑀧𑀸𑀧𑁂𑀦𑁆𑀢𑀸𑀦𑀁 𑀲𑀫𑀦𑀼𑀪𑀸𑀲𑀦𑀸𑀬 𑀲𑀗𑁆𑀖𑀸𑀤𑀺𑀲𑁂𑀲𑀁 𑀆𑀭𑁄𑀧𑀺𑀢𑀜𑁆𑀘 𑀇𑀤𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀧𑀞𑀫𑀲𑀗𑁆𑀖𑀪𑁂𑀤𑀲𑀤𑀺𑀲𑀸𑀦𑁂𑀯𑀸𑀢𑀺 𑀏𑀢𑁆𑀣 𑀅𑀗𑁆𑀕𑁂𑀲𑀼𑀧𑀺 𑀬𑀣𑀸 𑀢𑀢𑁆𑀣 𑀧𑀭𑀓𑁆𑀓𑀫𑀦𑀁, 𑀏𑀯𑀫𑀺𑀥 𑀙𑀦𑁆𑀤𑀸𑀤𑀻𑀳𑀺 𑀧𑀸𑀧𑀦𑀁 𑀤𑀝𑁆𑀞𑀩𑁆𑀩𑀁. 𑀲𑁂𑀲𑀁 𑀢𑀸𑀤𑀺𑀲𑀫𑁂𑀯𑀸𑀢𑀺.

𑀓𑀼𑀮𑀤𑀽𑀲𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀕𑀫𑀦𑀯𑀡𑁆𑀡𑀦𑀸

𑁪𑁪𑁨. 𑀇𑀢𑀭𑁂 𑀧𑀦 𑀬𑀸𑀯𑀢𑀢𑀺𑀬𑀓𑀸𑀢𑀺 𑀯𑁂𑀤𑀺𑀢𑀩𑁆𑀩𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀬𑁄 𑀳𑀺 𑀚𑀭𑁄 𑀏𑀓𑀲𑁆𑀫𑀺𑀁 𑀤𑀺𑀯𑀲𑁂 𑀆𑀕𑀦𑁆𑀢𑁆𑀯𑀸𑀧𑀺 𑀕𑀢𑁄 𑀅𑀦𑀦𑁆𑀢𑀭𑁂𑀲𑀼 𑀤𑁆𑀯𑀻𑀲𑀼 𑀤𑀺𑀯𑀲𑁂𑀲𑀼 𑀅𑀦𑀼𑀧𑁆𑀧𑀚𑁆𑀚𑀺𑀢𑁆𑀯𑀸 𑀢𑀢𑀺𑀬𑁂 𑀤𑀺𑀯𑀲𑁂 𑀉𑀧𑁆𑀧𑀚𑁆𑀚𑀢𑀺, 𑀲𑁄 𑀢𑀢𑀺𑀬𑀓𑁄. 𑀬𑁄 𑀧𑀦 𑀢𑀢𑀺𑀬𑁂𑀧𑀺 𑀅𑀦𑀼𑀧𑁆𑀧𑀚𑁆𑀚𑀺𑀢𑁆𑀯𑀸 𑀘𑀢𑀼𑀢𑁆𑀣𑁂 𑀏𑀯 𑀤𑀺𑀯𑀲𑁂 𑀉𑀧𑁆𑀧𑀚𑁆𑀚𑀢𑀺, 𑀲𑁄 𑀘𑀢𑀼𑀢𑁆𑀣𑀓𑁄 𑀘𑀸𑀢𑀺 𑀯𑀼𑀘𑁆𑀘𑀢𑀺. 𑀢𑀁 𑀲𑀦𑁆𑀥𑀸𑀬𑀸𑀳 ‘‘𑀬𑀣𑀸 𑀢𑀢𑀺𑀬𑁂’’𑀢𑀺𑀆𑀤𑀺. ‘‘𑀅𑀓𑀸𑀫𑁂𑀦 𑀅𑀯𑀲𑁂𑀦𑀸’’𑀢𑀺 𑀇𑀫𑀺𑀦𑀸 𑀅𑀧𑁆𑀧𑀝𑀺𑀓𑀫𑁆𑀫𑀓𑀭𑀡𑀁 𑀦𑀸𑀫 𑀬𑀲𑁆𑀫𑀸 𑀅𑀮𑀚𑁆𑀚𑀺𑀮𑀓𑁆𑀔𑀡𑀁, 𑀲𑀕𑁆𑀕𑀫𑁄𑀓𑁆𑀔𑀸𑀯𑀭𑀡𑀜𑁆𑀘, 𑀢𑀲𑁆𑀫𑀸 𑀆𑀧𑀦𑁆𑀦𑁄 𑀧𑀼𑀕𑁆𑀕𑀮𑁄 ‘‘𑀧𑀘𑁆𑀙𑀸 𑀧𑀭𑀺𑀯𑀲𑀺𑀲𑁆𑀲𑀸𑀫𑀻’’𑀢𑀺 𑀯𑀺𑀓𑁆𑀔𑀺𑀧𑀺𑀢𑀼𑀁 𑀦 𑀮𑀪𑀢𑀺, 𑀲𑀗𑁆𑀖𑁂𑀦 𑀘 𑀅𑀦𑀺𑀘𑁆𑀙𑀦𑁆𑀢𑀲𑁆𑀲𑁂𑀯 𑀧𑀭𑀺𑀯𑀸𑀲𑁄 𑀤𑀸𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀢𑀺. 𑀧𑀸𑀴𑀺𑀬𑀁 𑀘𑀺𑀡𑁆𑀡𑀫𑀸𑀦𑀢𑁆𑀢𑁄 𑀪𑀺𑀓𑁆𑀔𑀼…𑀧𑁂… 𑀅𑀩𑁆𑀪𑁂𑀢𑀩𑁆𑀩𑁄𑀢𑀺 𑀏𑀢𑁆𑀣 𑀬𑁄 𑀪𑀺𑀓𑁆𑀔𑀼 𑀘𑀺𑀡𑁆𑀡𑀫𑀸𑀦𑀢𑁆𑀢𑁄, 𑀲𑁄 𑀪𑀺𑀓𑁆𑀔𑀼 𑀅𑀩𑁆𑀪𑁂𑀢𑀩𑁆𑀩𑁄𑀢𑀺 𑀏𑀯𑀁 𑀪𑀺𑀓𑁆𑀔𑀼𑀲𑀤𑁆𑀤𑀤𑁆𑀯𑀬𑀲𑁆𑀲 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀢𑁂 𑀘 𑀪𑀺𑀓𑁆𑀔𑀽 𑀕𑀸𑀭𑀬𑁆𑀳𑀸𑀢𑀺 𑀊𑀦𑀪𑀸𑀯𑀁 𑀜𑀢𑁆𑀯𑀸 𑀅𑀩𑁆𑀪𑁂𑀦𑁆𑀢𑀺, 𑀤𑀼𑀓𑁆𑀓𑀝𑀸𑀧𑀚𑁆𑀚𑀦𑁂𑀦 𑀕𑀭𑀳𑀺𑀢𑀩𑁆𑀩𑀸. 𑀲𑀸𑀫𑀻𑀘𑀻𑀢𑀺 𑀯𑀢𑁆𑀢𑀁.

𑀇𑀢𑀺 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬 𑀯𑀺𑀦𑀬𑀝𑁆𑀞𑀓𑀣𑀸𑀬 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁

𑀢𑁂𑀭𑀲𑀓𑀯𑀡𑁆𑀡𑀦𑀸𑀦𑀬𑁄 𑀦𑀺𑀝𑁆𑀞𑀺𑀢𑁄.