𑁧. 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁨𑁩𑁪. 𑀢𑁂𑀭𑀲𑀓𑀲𑁆𑀲𑀸𑀢𑀺 𑀢𑁂𑀭𑀲 𑀲𑀺𑀓𑁆𑀔𑀸𑀧𑀤𑀸𑀦𑀺 𑀧𑀭𑀺𑀫𑀸𑀡𑀸𑀦𑀺 𑀅𑀲𑁆𑀲𑀸𑀢𑀺 𑀢𑁂𑀭𑀲𑀓𑁄, 𑀓𑀡𑁆𑀟𑁄, 𑀢𑀲𑁆𑀲. 𑀲𑀫𑀣𑁂 𑀯𑀺𑀧𑀲𑁆𑀲𑀦𑀸𑀬 𑀯𑀸 𑀅𑀪𑀺𑀭𑀢𑀺𑀭𑀳𑀺𑀢𑁄 𑀇𑀥 𑀅𑀦𑀪𑀺𑀭𑀢𑁄, 𑀦 𑀧𑀩𑁆𑀩𑀚𑁆𑀚𑀸𑀬𑀸𑀢𑀺 𑀆𑀳 ‘‘𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑁄’’𑀢𑀺. 𑀯𑀺𑀓𑁆𑀔𑀺𑀢𑁆𑀢𑀢𑀸𑀬 𑀓𑀸𑀭𑀡𑀫𑀸𑀳 𑀓𑀸𑀫𑀭𑀸𑀕𑀸𑀇𑀘𑁆𑀘𑀸𑀤𑀺.

𑁨𑁩𑁫. 𑀅𑀩𑁆𑀩𑁄𑀳𑀸𑀭𑀺𑀓𑀸𑀢𑀺 𑀲𑀻𑀮𑀯𑀺𑀧𑀢𑁆𑀢𑀺𑀯𑁄𑀳𑀸𑀭𑀁 𑀦𑀸𑀭𑀳𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀅𑀓𑀼𑀲𑀮𑀪𑀸𑀯𑁂 𑀧𑀦𑀲𑁆𑀲𑀸 𑀅𑀩𑁆𑀩𑁄𑀳𑀸𑀭𑀢𑀸 𑀦𑀢𑁆𑀣𑀺.

𑁨𑁩𑁬-𑁭. 𑀘𑁂𑀢𑀦𑀸-𑀲𑀤𑁆𑀤𑀢𑁄 𑀯𑀺𑀲𑀼𑀁 𑀲𑀁-𑀲𑀤𑁆𑀤𑀲𑁆𑀲 𑀅𑀢𑁆𑀣𑀸𑀪𑀸𑀯𑀁 𑀇𑀓-𑀧𑀘𑁆𑀘𑀬𑀲𑁆𑀲 𑀘 𑀅𑀢𑁆𑀣𑀯𑀦𑁆𑀢𑀢𑀁 𑀤𑀲𑁆𑀲𑁂𑀢𑀼𑀁 𑀲𑀜𑁆𑀘𑁂𑀢𑀦𑀸 𑀯𑀸𑀢𑀺𑀆𑀤𑀺 𑀤𑀼𑀢𑀺𑀬𑀯𑀺𑀓𑀧𑁆𑀧𑁄 𑀯𑀼𑀢𑁆𑀢𑁄. 𑀲𑀺𑀔𑀸𑀧𑁆𑀧𑀢𑁆𑀢𑁄 𑀅𑀢𑁆𑀣𑁄𑀢𑀺 𑀅𑀥𑀺𑀧𑁆𑀧𑁂𑀢𑀢𑁆𑀣𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀆𑀲𑀬𑀪𑁂𑀤𑀢𑁄𑀢𑀺 𑀧𑀺𑀢𑁆𑀢𑀲𑁂𑀫𑁆𑀳𑀧𑀼𑀩𑁆𑀩𑀮𑁄𑀳𑀺𑀢𑀸𑀦𑀁 𑀘𑀢𑀼𑀦𑁆𑀦𑀁 𑀆𑀲𑀬𑀸𑀦𑀁 𑀪𑁂𑀤𑁂𑀦. 𑀥𑀸𑀢𑀼𑀦𑀸𑀦𑀢𑁆𑀢𑀢𑁄𑀢𑀺 𑀭𑀲𑀭𑀼𑀳𑀺𑀭𑀸𑀤𑀻𑀦𑀁 𑀲𑀢𑁆𑀢𑀦𑁆𑀦𑀁, 𑀧𑀣𑀯𑀸𑀤𑀻𑀦𑀁 𑀯𑀸 𑀘𑀢𑀼𑀦𑁆𑀦𑀁 𑀥𑀸𑀢𑀽𑀦𑀁 𑀦𑀸𑀦𑀢𑁆𑀢𑁂𑀦. 𑀯𑀢𑁆𑀣𑀺𑀲𑀻𑀲𑀦𑁆𑀢𑀺 𑀫𑀼𑀢𑁆𑀢𑀯𑀢𑁆𑀣𑀺𑀢𑁄 𑀫𑀢𑁆𑀣𑀓𑀧𑀲𑁆𑀲𑀁. 𑀳𑀢𑁆𑀣𑀺𑀫𑀤𑀘𑀮𑀦𑀁 𑀦𑀸𑀫𑀜𑁆𑀘 𑀲𑀫𑁆𑀪𑀯𑁄𑀢𑀺 𑀆𑀳 ‘‘𑀲𑀫𑁆𑀪𑀯𑁄 𑀦𑀺𑀓𑁆𑀔𑀫𑀢𑀻’’𑀢𑀺. 𑀲𑀫𑁆𑀪𑀯𑀯𑁂𑀕𑀦𑁆𑀢𑀺 𑀲𑀫𑁆𑀪𑀯𑀲𑁆𑀲 𑀞𑀸𑀦𑀢𑁄 𑀘𑀯𑀺𑀢𑁆𑀯𑀸 𑀤𑀓𑀲𑁄𑀢𑀸𑀪𑀺𑀫𑀼𑀔𑀁 𑀑𑀢𑀭𑀡𑁂𑀦 𑀲𑀜𑁆𑀚𑀸𑀢𑀲𑀭𑀻𑀭𑀓𑁆𑀔𑁄𑀪𑀯𑁂𑀕𑀁. 𑀩𑀸𑀳𑀼𑀲𑀻𑀲𑀦𑁆𑀢𑀺 𑀔𑀦𑁆𑀥𑀧𑁆𑀧𑀤𑁂𑀲𑀁. 𑀤𑀲𑁆𑀲𑁂𑀲𑀻𑀢𑀺 𑀏𑀢𑁆𑀣 𑀇𑀢𑀺-𑀲𑀤𑁆𑀤𑁄 𑀳𑁂𑀢𑀼𑀢𑁆𑀣𑁄, 𑀢𑁂𑀦 𑀬𑀲𑁆𑀫𑀸 𑀓𑀡𑁆𑀡𑀘𑀽𑀴𑀺𑀓𑀸𑀳𑀺 𑀲𑀫𑁆𑀪𑀯𑁄 𑀦𑀺𑀓𑁆𑀔𑀫𑀢𑀺…𑀧𑁂… 𑀲𑀫𑁆𑀪𑀯𑀜𑁆𑀘 𑀤𑀲𑁆𑀲𑁂𑀲𑀺, 𑀢𑀲𑁆𑀫𑀸 𑀢𑀢𑀺𑀬𑀲𑁆𑀲 𑀪𑀸𑀲𑀺𑀢𑀁 𑀲𑀼𑀪𑀸𑀲𑀺𑀢𑀦𑁆𑀢𑀺 𑀏𑀯𑀁 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀤𑀓𑀲𑁄𑀢𑀦𑁆𑀢𑀺 𑀫𑀼𑀢𑁆𑀢𑀲𑁆𑀲 𑀯𑀢𑁆𑀣𑀺𑀢𑁄 𑀦𑀺𑀓𑁆𑀔𑀫𑀦𑀫𑀕𑁆𑀕𑀁, 𑀅𑀗𑁆𑀕𑀚𑀸𑀢𑀧𑁆𑀧𑀤𑁂𑀲𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀼𑀓𑁆𑀓𑀜𑁆𑀘 𑀦𑀸𑀫𑁂𑀢𑀁 𑀭𑀲𑀭𑀼𑀳𑀺𑀭𑀸𑀤𑀺𑀲𑀢𑁆𑀢𑀤𑁂𑀳𑀥𑀸𑀢𑀽𑀲𑀼 𑀫𑀚𑁆𑀛𑀺𑀫𑀥𑀸𑀢𑀼𑀘𑀢𑀼𑀚𑀁 𑀅𑀝𑁆𑀞𑀺𑀫𑀺𑀜𑁆𑀚𑀸𑀤𑀺 𑀯𑀺𑀬 𑀧𑀣𑀯𑀻𑀥𑀸𑀢𑀼𑀲𑀗𑁆𑀕𑀳𑀺𑀢𑀁 𑀆𑀳𑀸𑀭𑀽𑀧𑀚𑀻𑀯𑀻𑀦𑀁 𑀲𑀓𑀮𑀓𑀸𑀬𑀕𑀢𑀁 𑀅𑀢𑀺𑀤𑀳𑀭𑀤𑀸𑀭𑀓𑀸𑀦𑀫𑁆𑀧𑀺 𑀅𑀢𑁆𑀣𑁂𑀯, 𑀢𑀁 𑀧𑀦 𑀧𑀦𑁆𑀦𑀭𑀲𑀲𑁄𑀴𑀲𑀯𑀲𑁆𑀲𑀼𑀤𑁆𑀤𑁂𑀲𑀢𑁄 𑀧𑀝𑁆𑀞𑀸𑀬 𑀲𑀢𑁆𑀢𑀸𑀦𑀁 𑀲𑀫𑀼𑀧𑁆𑀧𑀚𑁆𑀚𑀦𑀓𑀓𑀸𑀫𑀭𑀸𑀕𑁂𑀳𑁂𑀯 𑀞𑀸𑀦𑀢𑁄 𑀘𑀮𑀢𑀺, 𑀘𑀮𑀺𑀢𑀜𑁆𑀘 𑀆𑀧𑁄𑀥𑀸𑀢𑀼𑀪𑀸𑀯𑁂𑀦 𑀘𑀺𑀢𑁆𑀢𑀚𑀫𑁂𑀯 𑀳𑀼𑀢𑁆𑀯𑀸 𑀤𑀓𑀲𑁄𑀢𑀁 𑀑𑀢𑀭𑀢𑀺, 𑀤𑀓𑀲𑁄𑀢𑀢𑁄 𑀧𑀦 𑀧𑀝𑁆𑀞𑀸𑀬 𑀘𑀺𑀢𑁆𑀢𑀧𑀘𑁆𑀘𑀬𑀉𑀢𑀼𑀚𑀁 𑀳𑁄𑀢𑀺 𑀫𑀢𑁆𑀣𑀮𑀼𑀗𑁆𑀕𑀢𑁄 𑀘𑀮𑀺𑀢𑀲𑀺𑀗𑁆𑀖𑀸𑀡𑀺𑀓𑀸 𑀯𑀺𑀬. 𑀬𑁂𑀲𑀁 𑀧𑀦 𑀲𑀫𑀼𑀘𑁆𑀙𑁂𑀤𑀦𑀯𑀺𑀓𑁆𑀔𑀫𑁆𑀪𑀦𑀸𑀤𑀻𑀳𑀺 𑀭𑀸𑀕𑀧𑀭𑀺𑀬𑀼𑀝𑁆𑀞𑀸𑀦𑀁 𑀦𑀢𑁆𑀣𑀺, 𑀢𑁂𑀲𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺 𑀦 𑀲𑀺𑀬𑀸. 𑀇𑀢𑀺 𑀬𑀣𑀸𑀞𑀸𑀦𑀢𑁄 𑀲𑀼𑀓𑁆𑀓𑀲𑁆𑀲 𑀯𑀺𑀲𑁆𑀲𑀝𑁆𑀞𑀺𑀬𑁂𑀯 𑀭𑀸𑀕𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸, 𑀦 𑀧𑀓𑀢𑀺𑀭𑀽𑀧𑀁, 𑀢𑁂𑀦𑁂𑀯 𑀓𑀣𑀸𑀯𑀢𑁆𑀣𑀼𑀅𑀝𑁆𑀞𑀓𑀣𑀸𑀬𑀁 (𑀓𑀣𑀸. 𑀅𑀝𑁆𑀞. 𑁩𑁦𑁭) ‘‘𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺 𑀦𑀸𑀫 𑀭𑀸𑀕𑀲𑀫𑀼𑀝𑁆𑀞𑀸𑀦𑀸 𑀳𑁄𑀢𑀻’’𑀢𑀺 𑀲𑀼𑀓𑁆𑀓𑀲𑁆𑀲 𑀯𑀺𑀲𑁆𑀲𑀝𑁆𑀞𑀺 𑀏𑀯 𑀭𑀸𑀕𑀲𑀫𑀼𑀝𑁆𑀞𑀸𑀦𑀸 𑀯𑀼𑀢𑁆𑀢𑀸, 𑀦 𑀧𑀓𑀢𑀺𑀭𑀽𑀧𑀁. 𑀙𑀦𑁆𑀦𑀁 𑀧𑀦 𑀓𑀸𑀫𑀸𑀯𑀘𑀭𑀤𑁂𑀯𑀸𑀦𑀁 𑀯𑀺𑀚𑁆𑀚𑀫𑀸𑀦𑀸𑀧𑀺 𑀲𑀼𑀓𑁆𑀓𑀥𑀸𑀢𑀼 𑀤𑁆𑀯𑀬𑀁𑀤𑁆𑀯𑀬𑀲𑀫𑀸𑀧𑀢𑁆𑀢𑀺𑀯𑀲𑁂𑀦 𑀧𑀭𑀺𑀬𑀼𑀝𑁆𑀞𑀺𑀢𑀭𑀸𑀕𑁂𑀦𑀸𑀧𑀺 𑀞𑀸𑀦𑀢𑁄 𑀦 𑀕𑀴𑀢𑀺, 𑀬𑀣𑀸𑀞𑀸𑀦𑁂 𑀏𑀯 𑀞𑀢𑁆𑀯𑀸 𑀓𑀺𑀜𑁆𑀘𑀺 𑀯𑀺𑀓𑀸𑀭𑀁 𑀆𑀧𑀚𑁆𑀚𑀫𑀸𑀦𑀸 𑀢𑀗𑁆𑀔𑀡𑀺𑀓𑀧𑀭𑀺𑀴𑀸𑀳𑀯𑀽𑀧𑀲𑀫𑀸𑀯𑀳𑀸 𑀫𑁂𑀣𑀼𑀦𑀓𑀺𑀘𑁆𑀘𑀦𑀺𑀝𑁆𑀞𑀸𑀧𑀺𑀢𑀸 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀓𑁂𑀘𑀺 𑀧𑀦 ‘‘𑀓𑀸𑀬𑀲𑀫𑁆𑀨𑀲𑁆𑀲𑀲𑀼𑀔𑀫𑁂𑀯 𑀢𑁂𑀲𑀁 𑀓𑀸𑀫𑀓𑀺𑀘𑁆𑀘’’𑀦𑁆𑀢𑀺 𑀯𑀤𑀦𑁆𑀢𑀺. 𑀔𑀻𑀡𑀸𑀲𑀯𑀸𑀦𑀁 𑀧𑀦 𑀅𑀦𑀸𑀕𑀸𑀫𑀻𑀦𑀜𑁆𑀘 𑀲𑀩𑁆𑀩𑀲𑁄 𑀓𑀸𑀫𑀭𑀸𑀕𑀸𑀪𑀸𑀯𑁂𑀦 𑀲𑀼𑀓𑁆𑀓𑀥𑀸𑀢𑀼𑀯𑀺𑀓𑀸𑀭𑀫𑁆𑀧𑀺 𑀦𑀸𑀧𑀚𑁆𑀚𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀭𑀽𑀧𑀻𑀩𑁆𑀭𑀳𑁆𑀫𑀸𑀦𑀁 𑀧𑀦 𑀯𑀺𑀓𑁆𑀔𑀫𑁆𑀪𑀺𑀢𑀓𑀸𑀫𑀭𑀸𑀕𑁂𑀦 𑀚𑀦𑀺𑀢𑀢𑁆𑀢𑀸 𑀅𑀦𑀸𑀳𑀸𑀭𑀽𑀧𑀚𑀻𑀯𑀺𑀢𑀢𑁆𑀢𑀸 𑀘 𑀲𑀩𑁆𑀩𑀣𑀸 𑀲𑀼𑀓𑁆𑀓𑀥𑀸𑀢𑀼𑀧𑀺 𑀦𑀢𑁆𑀣𑁂𑀯. 𑀢𑀣𑁂𑀯𑀸𑀢𑀺 𑀫𑁄𑀘𑀦𑀲𑁆𑀲𑀸𑀤𑁂𑀦 𑀦𑀺𑀫𑀺𑀢𑁆𑀢𑁂 𑀉𑀧𑀓𑁆𑀓𑀫𑀢𑁄𑀢𑀺𑀆𑀤𑀺𑀁 𑀅𑀢𑀺𑀤𑀺𑀲𑀢𑀺. ‘‘𑀯𑀺𑀲𑁆𑀲𑀝𑁆𑀞𑀻𑀢𑀺 𑀞𑀸𑀦𑀸𑀘𑀸𑀯𑀦𑀸 𑀯𑀼𑀘𑁆𑀘𑀢𑀻’’𑀢𑀺 𑀧𑀤𑀪𑀸𑀚𑀦𑁂 (𑀧𑀸𑀭𑀸. 𑁨𑁩𑁭) 𑀯𑀼𑀢𑁆𑀢𑀢𑁆𑀢𑀸 ‘‘𑀤𑀓𑀲𑁄𑀢𑀁 𑀑𑀢𑀺𑀡𑁆𑀡𑀫𑀢𑁆𑀢𑁂’’𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀦𑁆𑀢𑀺 𑀆𑀳 𑀤𑀓𑀲𑁄𑀢𑁄𑀭𑁄𑀳𑀡𑀜𑁆𑀘𑁂𑀢𑁆𑀣𑀸𑀢𑀺𑀆𑀤𑀺. 𑀏𑀢𑁆𑀣𑀸𑀢𑀺 𑀢𑀻𑀲𑀼𑀧𑀺 𑀯𑀸𑀤𑁂𑀲𑀼. 𑀅𑀥𑀺𑀯𑀸𑀲𑁂𑀢𑁆𑀯𑀸𑀢𑀺 𑀦𑀺𑀫𑀺𑀢𑁆𑀢𑁂 𑀉𑀧𑀓𑁆𑀓𑀫𑀺𑀢𑁆𑀯𑀸 𑀧𑀼𑀦 𑀯𑀺𑀧𑁆𑀧𑀝𑀺𑀲𑀸𑀭𑁂 𑀉𑀧𑁆𑀧𑀦𑁆𑀦𑁂 𑀫𑁄𑀘𑀦𑀲𑁆𑀲𑀸𑀤𑀁 𑀯𑀺𑀦𑁄𑀤𑁂𑀢𑁆𑀯𑀸. 𑀅𑀦𑁆𑀢𑀭𑀸 𑀦𑀺𑀯𑀸𑀭𑁂𑀢𑀼𑀦𑁆𑀢𑀺 𑀅𑀢𑁆𑀢𑀦𑁄 𑀦𑀺𑀫𑀺𑀢𑁆𑀢𑁂 𑀓𑀢𑀽𑀧𑀓𑁆𑀓𑀫𑁂𑀦 𑀞𑀸𑀦𑀸 𑀘𑀼𑀢𑀁 𑀤𑀓𑀲𑁄𑀢𑀁 𑀑𑀢𑀭𑀺𑀢𑀼𑀁 𑀅𑀤𑀢𑁆𑀯𑀸 𑀅𑀦𑁆𑀢𑀭𑀸 𑀦𑀺𑀯𑀸𑀭𑁂𑀢𑀼𑀁. 𑀫𑁄𑀘𑀦𑀲𑁆𑀲𑀸𑀤𑁂𑀦 𑀳𑀢𑁆𑀣𑀧𑀭𑀺𑀓𑀫𑁆𑀫𑀸𑀤𑀺𑀁 𑀓𑀭𑁄𑀦𑁆𑀢𑀲𑁆𑀲 𑀫𑀼𑀢𑁆𑀢𑁂𑀧𑀺 𑀤𑀼𑀓𑁆𑀓𑀝𑀫𑁂𑀯, 𑀦𑀺𑀫𑀺𑀢𑁆𑀢𑁂 𑀉𑀧𑀓𑁆𑀓𑀫𑀸𑀪𑀸𑀯𑀢𑁄 𑀧𑀦 𑀲𑀗𑁆𑀖𑀸𑀤𑀺𑀲𑁂𑀲𑁄 𑀦 𑀳𑁄𑀢𑀻𑀢𑀺 𑀆𑀳 ‘‘𑀳𑀢𑁆𑀣…𑀧𑁂… 𑀅𑀦𑀸𑀧𑀢𑁆𑀢𑀻’’𑀢𑀺. 𑀤𑀓𑀲𑁄𑀢𑁄𑀭𑁄𑀳𑀡𑀜𑁆𑀘𑁂𑀢𑁆𑀣𑀸𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀯𑀺𑀦𑀺𑀘𑁆𑀙𑀬𑀁 𑀲𑀦𑁆𑀥𑀸𑀬 ‘‘𑀅𑀬𑀁 𑀲𑀩𑁆𑀩𑀸𑀘𑀭𑀺𑀬𑀲𑀸𑀥𑀸𑀭𑀡𑀯𑀺𑀦𑀺𑀘𑁆𑀙𑀬𑁄’’𑀢𑀺 𑀯𑀼𑀢𑁆𑀢𑀁.

𑀔𑁄𑀪𑀓𑀭𑀡𑀧𑀘𑁆𑀘𑀬𑁄 𑀦𑀸𑀫 𑀯𑀺𑀲𑀪𑀸𑀕𑀪𑁂𑀲𑀚𑁆𑀚𑀲𑁂𑀦𑀸𑀲𑀦𑀸𑀳𑀸𑀭𑀸𑀤𑀺𑀧𑀘𑁆𑀘𑀬𑁄. 𑀦𑀸𑀦𑀸𑀯𑀺𑀥𑀁 𑀲𑀼𑀧𑀺𑀦𑀦𑁆𑀢𑀺 𑀔𑀼𑀪𑀺𑀢𑀯𑀸𑀢𑀸𑀤𑀺𑀥𑀸𑀢𑀽𑀦𑀁 𑀅𑀦𑀼𑀕𑀼𑀡𑀁. 𑀅𑀦𑀼𑀪𑀽𑀢𑀧𑀼𑀩𑁆𑀩𑀦𑁆𑀢𑀺 𑀧𑀼𑀩𑁆𑀩𑁂 𑀪𑀽𑀢𑀧𑀼𑀩𑁆𑀩𑀁 𑀫𑀦𑀲𑀸 𑀧𑀭𑀺𑀓𑀧𑁆𑀧𑀺𑀢𑀧𑀼𑀩𑁆𑀩𑀜𑁆𑀘. 𑀲𑀕𑁆𑀕𑀦𑀭𑀓𑀤𑁂𑀲𑀦𑁆𑀢𑀭𑀸𑀤𑀻𑀦𑀫𑁆𑀧𑀺 𑀳𑀺 𑀲𑀗𑁆𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀁. 𑀅𑀢𑁆𑀣𑀓𑀸𑀫𑀢𑀸𑀬 𑀯𑀸 𑀅𑀦𑀢𑁆𑀣𑀓𑀸𑀫𑀢𑀸𑀬 𑀯𑀸𑀢𑀺 𑀇𑀤𑀁 𑀤𑁂𑀯𑀢𑀸𑀦𑀁 𑀳𑀺𑀢𑀸𑀳𑀺𑀢𑀸𑀥𑀺𑀧𑁆𑀧𑀸𑀬𑀢𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁. 𑀅𑀢𑁆𑀣𑀸𑀬 𑀯𑀸 𑀅𑀦𑀢𑁆𑀣𑀸𑀬 𑀯𑀸𑀢𑀺 𑀲𑀪𑀸𑀯𑀢𑁄 𑀪𑀯𑀺𑀢𑀩𑁆𑀩𑀁 𑀳𑀺𑀢𑀸𑀳𑀺𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀦𑀦𑀼 𑀤𑁂𑀯𑀢𑀸𑀳𑀺 𑀉𑀧𑀲𑀁𑀳𑀭𑀺𑀬𑀫𑀸𑀦𑀸𑀦𑀺 𑀆𑀭𑀫𑁆𑀫𑀡𑀸𑀦𑀺 𑀧𑀭𑀫𑀢𑁆𑀣𑀢𑁄 𑀦𑀢𑁆𑀣𑀺, 𑀓𑀣𑀁 𑀢𑀸𑀦𑀺 𑀧𑀼𑀭𑀺𑀲𑁄 𑀧𑀲𑁆𑀲𑀢𑀺, 𑀤𑁂𑀯𑀢𑀸 𑀯𑀸 𑀢𑀸𑀦𑀺 𑀅𑀯𑀺𑀚𑁆𑀚𑀫𑀸𑀦𑀸𑀦𑀺 𑀉𑀧𑀲𑀁𑀳𑀭𑀦𑁆𑀢𑀻𑀢𑀺 𑀘𑁄𑀤𑀦𑀁 𑀫𑀦𑀲𑀺 𑀓𑀢𑁆𑀯𑀸 𑀆𑀳 𑀲𑁄 𑀢𑀸𑀲𑀦𑁆𑀢𑀺𑀆𑀤𑀺. 𑀢𑁂𑀦 ‘‘𑀏𑀯𑀫𑁂𑀲𑁄 𑀧𑀭𑀺𑀓𑀧𑁆𑀧𑀢𑀽’’𑀢𑀺 𑀤𑁂𑀯𑀢𑀸𑀳𑀺 𑀘𑀺𑀦𑁆𑀢𑀺𑀢𑀫𑀢𑁆𑀢𑁂𑀦 𑀲𑀼𑀧𑀦𑁆𑀢𑀲𑁆𑀲 𑀘𑀺𑀢𑁆𑀢𑀁 𑀪𑀯𑀗𑁆𑀕𑀲𑀦𑁆𑀢𑀢𑀺𑀢𑁄 𑀦𑀺𑀧𑀢𑀺𑀢𑁆𑀯𑀸 𑀤𑁂𑀯𑀢𑀸𑀳𑀺 𑀘𑀺𑀦𑁆𑀢𑀺𑀢𑀦𑀺𑀬𑀸𑀫𑁂𑀦𑁂𑀯 𑀧𑀭𑀺𑀓𑀧𑁆𑀧𑀫𑀸𑀦𑀁 𑀧𑀯𑀢𑁆𑀢𑀢𑀺, 𑀏𑀯𑀁 𑀢𑁂𑀦 𑀧𑀭𑀺𑀓𑀧𑁆𑀧𑀫𑀸𑀦𑀸𑀦𑀺 𑀆𑀭𑀫𑁆𑀫𑀡𑀸𑀦𑀺 𑀤𑁂𑀯𑀢𑀸𑀳𑀺 𑀉𑀧𑀲𑀁𑀳𑀝𑀸𑀦𑀺 𑀦𑀸𑀫 𑀳𑁄𑀦𑁆𑀢𑀺, 𑀢𑀸𑀦𑀺 𑀘 𑀲𑁄 𑀤𑁂𑀯𑀢𑀸𑀦𑀼𑀪𑀸𑀯𑁂𑀦 𑀧𑀲𑁆𑀲𑀢𑀺 𑀦𑀸𑀫𑀸𑀢𑀺 𑀤𑀲𑁆𑀲𑁂𑀢𑀺. 𑀩𑁄𑀥𑀺𑀲𑀢𑁆𑀢𑀫𑀸𑀢𑀸 𑀯𑀺𑀬 𑀧𑀼𑀢𑁆𑀢𑀧𑀝𑀺𑀮𑀸𑀪𑀦𑀺𑀫𑀺𑀢𑁆𑀢𑀦𑁆𑀢𑀺𑀆𑀤𑀻𑀲𑀼 𑀩𑁄𑀥𑀺𑀲𑀢𑁆𑀢𑀲𑁆𑀲 𑀕𑀩𑁆𑀪𑁄𑀓𑁆𑀓𑀦𑁆𑀢𑀺𑀤𑀺𑀯𑀲𑁂 𑀫𑀳𑀸𑀫𑀸𑀬𑀸𑀤𑁂𑀯𑀺𑀬𑀸 𑀅𑀢𑁆𑀢𑀦𑁄 𑀤𑀓𑁆𑀔𑀺𑀡𑀧𑀲𑁆𑀲𑁂𑀦 𑀏𑀓𑀲𑁆𑀲 𑀲𑁂𑀢𑀯𑀭𑀯𑀸𑀭𑀡𑀲𑁆𑀲 𑀅𑀦𑁆𑀢𑁄𑀓𑀼𑀘𑁆𑀙𑀺𑀧𑀯𑀺𑀝𑁆𑀞𑀪𑀸𑀯𑀤𑀲𑁆𑀲𑀦𑀁 𑀧𑀼𑀢𑁆𑀢𑀧𑀝𑀺𑀮𑀸𑀪𑀦𑀺𑀫𑀺𑀢𑁆𑀢𑀁 𑀲𑀼𑀧𑀺𑀦𑀁 𑀦𑀸𑀫. 𑀅𑀫𑁆𑀳𑀸𑀓𑀁 𑀧𑀦 𑀩𑁄𑀥𑀺𑀲𑀢𑁆𑀢𑀲𑁆𑀲 ‘‘𑀲𑁆𑀯𑁂 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀘𑀸𑀢𑀼𑀤𑁆𑀤𑀲𑀺𑀬𑀁 𑀧𑀓𑁆𑀔𑀲𑁆𑀲 𑀭𑀢𑁆𑀢𑀺𑀯𑀺𑀪𑀸𑀬𑀦𑀓𑀸𑀮𑁂 𑀳𑀺𑀫𑀯𑀦𑁆𑀢𑀁 𑀩𑀺𑀩𑁆𑀩𑁄𑀳𑀦𑀁 𑀓𑀢𑁆𑀯𑀸 𑀧𑀼𑀭𑀢𑁆𑀣𑀺𑀫𑀧𑀘𑁆𑀙𑀺𑀫𑀲𑀫𑀼𑀤𑁆𑀤𑁂𑀲𑀼 𑀯𑀸𑀫𑀤𑀓𑁆𑀔𑀺𑀡𑀳𑀢𑁆𑀣𑁂 𑀤𑀓𑁆𑀔𑀺𑀡𑀲𑀫𑀼𑀤𑁆𑀤𑁂 𑀧𑀸𑀤𑁂 𑀘 𑀑𑀤𑀳𑀺𑀢𑁆𑀯𑀸 𑀫𑀳𑀸𑀧𑀣𑀯𑀺𑀬𑀸 𑀲𑀬𑀦𑀁 𑀏𑀓𑁄, 𑀤𑀩𑁆𑀩𑀢𑀺𑀡𑀲𑀗𑁆𑀔𑀸𑀢𑀸𑀬 𑀢𑀺𑀭𑀺𑀬𑀸 𑀦𑀸𑀫 𑀢𑀺𑀡𑀚𑀸𑀢𑀺𑀬𑀸 𑀦𑀗𑁆𑀕𑀮𑀫𑀢𑁆𑀢𑀭𑀢𑁆𑀢𑀤𑀡𑁆𑀟𑀸𑀬 𑀦𑀸𑀪𑀺𑀢𑁄 𑀉𑀕𑁆𑀕𑀢𑀸𑀬 𑀔𑀡𑁂𑀦 𑀅𑀦𑁂𑀓𑀬𑁄𑀚𑀦𑀲𑀳𑀲𑁆𑀲𑀁 𑀦𑀪𑀁 𑀆𑀳𑀘𑁆𑀘 𑀞𑀸𑀦𑀁 𑀏𑀓𑁄, 𑀲𑁂𑀢𑀸𑀦𑀁 𑀓𑀡𑁆𑀳𑀲𑀻𑀲𑀸𑀦𑀁 𑀓𑀺𑀫𑀻𑀦𑀁 𑀧𑀸𑀤𑁂𑀳𑀺 𑀉𑀲𑁆𑀲𑀓𑁆𑀓𑀺𑀢𑁆𑀯𑀸 𑀬𑀸𑀯 𑀚𑀸𑀡𑀼𑀫𑀡𑁆𑀟𑀮𑀁 𑀆𑀳𑀘𑁆𑀘 𑀞𑀸𑀦𑀁 𑀏𑀓𑁄, 𑀦𑀸𑀦𑀸𑀯𑀡𑁆𑀡𑀸𑀦𑀁 𑀘𑀢𑀼𑀦𑁆𑀦𑀁 𑀲𑀓𑀼𑀡𑀸𑀦𑀁 𑀘𑀢𑀽𑀳𑀺 𑀤𑀺𑀲𑀸𑀳𑀺 𑀆𑀕𑀦𑁆𑀢𑁆𑀯𑀸 𑀧𑀸𑀤𑀫𑀽𑀮𑁂 𑀲𑁂𑀢𑀯𑀡𑁆𑀡𑀢𑀸𑀧𑀚𑁆𑀚𑀦𑀁 𑀏𑀓𑁄, 𑀩𑁄𑀥𑀺𑀲𑀢𑁆𑀢𑀲𑁆𑀲 𑀫𑀳𑀢𑁄 𑀫𑀻𑀴𑁆𑀳𑀧𑀩𑁆𑀩𑀢𑀲𑁆𑀲 𑀉𑀧𑀭𑀺 𑀅𑀮𑀺𑀫𑁆𑀧𑀫𑀸𑀦𑀲𑁆𑀲 𑀘𑀗𑁆𑀓𑀫𑀦𑀁 𑀏𑀓𑁄𑀢𑀺 𑀇𑀫𑁂 𑀧𑀜𑁆𑀘 𑀫𑀳𑀸𑀲𑀼𑀧𑀺𑀦𑀸 𑀦𑀸𑀫, 𑀇𑀫𑁂 𑀘 𑀬𑀣𑀸𑀓𑁆𑀓𑀫𑀁 𑀲𑀫𑁆𑀩𑁄𑀥𑀺𑀬𑀸, 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀅𑀭𑀺𑀬𑀫𑀕𑁆𑀕𑀧𑁆𑀧𑀓𑀸𑀲𑀦𑀲𑁆𑀲, 𑀕𑀺𑀳𑀻𑀦𑀜𑁆𑀘 𑀲𑀭𑀡𑀽𑀧𑀕𑀫𑀦𑀲𑁆𑀲, 𑀔𑀢𑁆𑀢𑀺𑀬𑀸𑀤𑀺𑀘𑀢𑀼𑀯𑀡𑁆𑀡𑀸𑀦𑀁 𑀧𑀩𑁆𑀩𑀚𑀺𑀢𑁆𑀯𑀸 𑀅𑀭𑀳𑀢𑁆𑀢𑀧𑀝𑀺𑀮𑀸𑀪𑀲𑁆𑀲, 𑀘𑀢𑀼𑀦𑁆𑀦𑀁 𑀧𑀘𑁆𑀘𑀬𑀸𑀦𑀁 𑀮𑀸𑀪𑁂 𑀅𑀮𑀺𑀢𑁆𑀢𑀪𑀸𑀯𑀲𑁆𑀲 𑀘 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑁄𑀴𑀲 𑀲𑀼𑀧𑀺𑀦𑀸 𑀧𑀸𑀓𑀝𑀸 𑀏𑀯. 𑀏𑀓𑀦𑁆𑀢𑀲𑀘𑁆𑀘𑀫𑁂𑀯𑀸𑀢𑀺 𑀨𑀮𑀦𑀺𑀬𑀫𑀼𑀧𑁆𑀧𑀢𑁆𑀢𑀺𑀢𑁄 𑀯𑀼𑀢𑁆𑀢𑀁. 𑀤𑀲𑁆𑀲𑀦𑀁 𑀧𑀦 𑀲𑀩𑁆𑀩𑀢𑁆𑀣 𑀯𑀺𑀧𑀮𑁆𑀮𑀢𑁆𑀣𑀫𑁂𑀯. 𑀥𑀸𑀢𑀼𑀓𑁆𑀔𑁄𑀪𑀸𑀤𑀻𑀲𑀼 𑀘𑀢𑀽𑀲𑀼 𑀫𑀽𑀮𑀓𑀸𑀭𑀡𑁂𑀲𑀼 𑀤𑁆𑀯𑀻𑀳𑀺 𑀢𑀻𑀳𑀺𑀧𑀺 𑀓𑀸𑀭𑀡𑁂𑀳𑀺 𑀓𑀤𑀸𑀘𑀺 𑀲𑀼𑀧𑀺𑀦𑀁 𑀧𑀲𑁆𑀲𑀦𑁆𑀢𑀻𑀢𑀺 𑀆𑀳 ‘‘𑀲𑀁𑀲𑀕𑁆𑀕𑀪𑁂𑀤𑀢𑁄’’𑀢𑀺. 𑀲𑀼𑀧𑀺𑀦𑀪𑁂𑀤𑁄𑀢𑀺 𑀲𑀘𑁆𑀘𑀸𑀲𑀘𑁆𑀘𑀢𑁆𑀣𑀢𑀸𑀪𑁂𑀤𑁄.

𑀭𑀽𑀧𑀦𑀺𑀫𑀺𑀢𑁆𑀢𑀸𑀤𑀺𑀆𑀭𑀫𑁆𑀫𑀡𑀦𑁆𑀢𑀺 𑀏𑀢𑁆𑀣 𑀓𑀫𑁆𑀫𑀦𑀺𑀫𑀺𑀢𑁆𑀢𑀕𑀢𑀺𑀦𑀺𑀫𑀺𑀢𑁆𑀢𑀢𑁄 𑀅𑀜𑁆𑀜𑀭𑀽𑀧𑀫𑁂𑀯 𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀫𑀺𑀢𑁆𑀢𑀦𑁆𑀢𑀺 𑀭𑀽𑀧𑀦𑀺𑀫𑀺𑀢𑁆𑀢𑀁, 𑀢𑀁 𑀆𑀤𑀺 𑀬𑁂𑀲𑀁 𑀲𑀢𑁆𑀢𑀦𑀺𑀫𑀺𑀢𑁆𑀢𑀸𑀤𑀻𑀦𑀁 𑀢𑀸𑀦𑀺 𑀭𑀽𑀧𑀦𑀺𑀫𑀺𑀢𑁆𑀢𑀸𑀤𑀻𑀦𑀺 𑀆𑀭𑀫𑁆𑀫𑀡𑀸𑀦𑀺 𑀬𑀲𑁆𑀲 𑀪𑀯𑀗𑁆𑀕𑀘𑀺𑀢𑁆𑀢𑀲𑁆𑀲 𑀢𑀁 𑀭𑀽𑀧𑀦𑀺𑀫𑀺𑀢𑁆𑀢𑀸𑀤𑀺𑀆𑀭𑀫𑁆𑀫𑀡𑀁. 𑀈𑀤𑀺𑀲𑀸𑀦𑀻𑀢𑀺 𑀭𑀽𑀧𑀦𑀺𑀫𑀺𑀢𑁆𑀢𑀸𑀤𑀺𑀆𑀭𑀫𑁆𑀫𑀡𑀸𑀦𑀺 𑀭𑀸𑀕𑀸𑀤𑀺𑀲𑀫𑁆𑀧𑀬𑀼𑀢𑁆𑀢𑀸𑀦𑀺 𑀘. 𑀲𑀩𑁆𑀩𑁄𑀳𑀸𑀭𑀺𑀓𑀘𑀺𑀢𑁆𑀢𑁂𑀦𑀸𑀢𑀺 𑀧𑀝𑀺𑀩𑀼𑀤𑁆𑀥𑀲𑁆𑀲 𑀧𑀓𑀢𑀺𑀯𑀻𑀣𑀺𑀘𑀺𑀢𑁆𑀢𑁂𑀦. 𑀓𑁄 𑀦𑀸𑀫 𑀧𑀲𑁆𑀲𑀢𑀻𑀢𑀺 𑀲𑀼𑀢𑁆𑀢𑀧𑀝𑀺𑀩𑀼𑀤𑁆𑀥𑀪𑀸𑀯𑀯𑀺𑀬𑀼𑀢𑁆𑀢𑀸𑀬 𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀬𑀸 𑀅𑀪𑀸𑀯𑀢𑁄 𑀲𑀼𑀧𑀺𑀦𑀁 𑀧𑀲𑁆𑀲𑀦𑁆𑀢𑁄 𑀦𑀸𑀫 𑀦 𑀲𑀺𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄, 𑀢𑁂𑀦𑀸𑀳 ‘‘𑀲𑀼𑀧𑀺𑀦𑀲𑁆𑀲 𑀅𑀪𑀸𑀯𑁄𑀯 𑀆𑀧𑀚𑁆𑀚𑀢𑀻’’𑀢𑀺. 𑀓𑀧𑀺𑀫𑀺𑀤𑁆𑀥𑀧𑀭𑁂𑀢𑁄𑀢𑀺 𑀇𑀫𑀺𑀦𑀸 𑀦𑀺𑀤𑁆𑀤𑀸𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀪𑀯𑀗𑁆𑀕𑀲𑀦𑁆𑀢𑀢𑀺𑀩𑁆𑀬𑀯𑀳𑀺𑀢𑀸𑀬 𑀓𑀼𑀲𑀮𑀸𑀓𑀼𑀲𑀮𑀸𑀬 𑀫𑀦𑁄𑀤𑁆𑀯𑀸𑀭𑀯𑀻𑀣𑀺𑀬𑀸 𑀘 𑀧𑀲𑁆𑀲𑀢𑀻𑀢𑀺 𑀤𑀲𑁆𑀲𑁂𑀢𑀺, 𑀢𑁂𑀦𑀸𑀳 𑀬𑀸 𑀦𑀺𑀤𑁆𑀤𑀸𑀢𑀺𑀆𑀤𑀺. 𑀤𑁆𑀯𑀻𑀳𑀺 𑀅𑀦𑁆𑀢𑁂𑀳𑀺 𑀫𑀼𑀢𑁆𑀢𑁄𑀢𑀺 𑀓𑀼𑀲𑀮𑀸𑀓𑀼𑀲𑀮𑀲𑀗𑁆𑀔𑀸𑀢𑁂𑀳𑀺 𑀤𑁆𑀯𑀻𑀳𑀺 𑀅𑀦𑁆𑀢𑁂𑀳𑀺 𑀫𑀼𑀢𑁆𑀢𑁄. 𑀆𑀯𑀚𑁆𑀚𑀦𑀢𑀤𑀸𑀭𑀫𑁆𑀫𑀡𑀓𑁆𑀔𑀡𑁂𑀢𑀺 𑀲𑀼𑀧𑀺𑀦𑁂 𑀧𑀜𑁆𑀘𑀤𑁆𑀯𑀸𑀭𑀯𑀻𑀣𑀺𑀬𑀸 𑀅𑀪𑀸𑀯𑀢𑁄 𑀫𑀦𑁄𑀤𑁆𑀯𑀸𑀭𑁂 𑀉𑀧𑁆𑀧𑀚𑁆𑀚𑀦𑀸𑀭𑀳𑀁 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀁.

𑀏𑀢𑁆𑀣 𑀘 𑀲𑀼𑀧𑀺𑀦𑀦𑁆𑀢𑁂𑀧𑀺 𑀢𑀤𑀸𑀭𑀫𑁆𑀫𑀡𑀯𑀘𑀦𑀢𑁄 𑀅𑀦𑀼𑀪𑀽𑀢𑁂𑀲𑀼 𑀲𑀼𑀢𑀧𑀼𑀩𑁆𑀩𑁂𑀲𑀼 𑀯𑀸 𑀭𑀽𑀧𑀸𑀤𑀻𑀲𑀼 𑀧𑀼𑀭𑀸𑀧𑀢𑁆𑀢𑀺𑀪𑀸𑀯𑁂𑀦 𑀧𑀭𑀺𑀓𑀧𑁆𑀧𑁂𑀢𑁆𑀯𑀸 𑀯𑀺𑀧𑀮𑁆𑀮𑀸𑀲𑀢𑁄 𑀧𑀯𑀢𑁆𑀢𑀫𑀸𑀦𑀸𑀧𑀺 𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀥𑀫𑁆𑀫𑀸 𑀧𑀭𑀺𑀢𑁆𑀢𑀥𑀫𑁆𑀫𑁂 𑀦𑀺𑀲𑁆𑀲𑀸𑀬 𑀧𑀭𑀺𑀓𑀧𑁆𑀧𑁂𑀢𑁆𑀯𑀸 𑀧𑀯𑀢𑁆𑀢𑀢𑁆𑀢𑀸 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸 𑀯𑀼𑀢𑁆𑀢𑀸, 𑀦 𑀧𑀦 𑀲𑀭𑀽𑀧𑀢𑁄 𑀧𑀭𑀺𑀢𑁆𑀢𑀥𑀫𑁆𑀫𑁂 𑀕𑀳𑁂𑀢𑁆𑀯𑀸 𑀧𑀯𑀢𑁆𑀢𑀢𑁆𑀢𑀸 𑀏𑀯𑀸𑀢𑀺 𑀕𑀳𑁂𑀢𑀩𑁆𑀩𑀁. 𑀏𑀯𑀜𑁆𑀘 𑀇𑀢𑁆𑀣𑀺𑀧𑀼𑀭𑀺𑀲𑀸𑀤𑀺𑀆𑀓𑀸𑀭𑀁 𑀆𑀭𑁄𑀧𑁂𑀢𑁆𑀯𑀸 𑀧𑀯𑀢𑁆𑀢𑀫𑀸𑀦𑀸𑀦𑀁 𑀭𑀸𑀕𑀸𑀤𑀺𑀲𑀯𑀺𑀧𑀸𑀓𑀥𑀫𑁆𑀫𑀸𑀦𑀫𑁆𑀧𑀺 𑀢𑁂𑀲𑀁 𑀆𑀭𑀫𑁆𑀫𑀡𑀁 𑀕𑀳𑁂𑀢𑁆𑀯𑀸 𑀉𑀧𑁆𑀧𑀦𑁆𑀦𑀸𑀦𑀁 𑀧𑀝𑀺𑀲𑀦𑁆𑀥𑀸𑀤𑀺𑀯𑀺𑀧𑀸𑀓𑀸𑀦𑀫𑁆𑀧𑀺 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀢𑀸 𑀓𑀫𑁆𑀫𑀦𑀺𑀫𑀺𑀢𑁆𑀢𑀸𑀭𑀫𑁆𑀫𑀡𑀢𑀸 𑀘 𑀉𑀧𑀧𑀦𑁆𑀦𑀸 𑀏𑀯 𑀳𑁄𑀢𑀺. 𑀯𑀢𑁆𑀣𑀼𑀥𑀫𑁆𑀫𑀯𑀺𑀦𑀺𑀫𑀼𑀢𑁆𑀢𑀁 𑀧𑀦 𑀲𑀫𑁆𑀫𑀼𑀢𑀺𑀪𑀽𑀢𑀁 𑀓𑀲𑀺𑀡𑀸𑀤𑀺𑀧𑀝𑀺𑀪𑀸𑀕𑀸𑀭𑀫𑁆𑀫𑀡𑀁 𑀕𑀳𑁂𑀢𑁆𑀯𑀸 𑀉𑀧𑁆𑀧𑀦𑁆𑀦𑀸 𑀉𑀧𑀘𑀸𑀭𑀧𑁆𑀧𑀦𑀸𑀤𑀺𑀯𑀲𑀧𑁆𑀧𑀯𑀢𑁆𑀢𑀸 𑀘𑀺𑀢𑁆𑀢𑀘𑁂𑀢𑀲𑀺𑀓𑀥𑀫𑁆𑀫𑀸 𑀏𑀯 𑀧𑀭𑀺𑀢𑁆𑀢𑀢𑁆𑀢𑀺𑀓𑁂 (𑀥. 𑀲. 𑀢𑀺𑀓𑀫𑀸𑀢𑀺𑀓𑀸 𑁧𑁨) 𑀦 𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀸𑀢𑀺 𑀕𑀳𑁂𑀢𑀩𑁆𑀩𑀸.

𑀲𑁆𑀯𑀸𑀬𑀦𑁆𑀢𑀺 𑀲𑀼𑀧𑀺𑀦𑁄. 𑀯𑀺𑀧𑀮𑁆𑀮𑀸𑀲𑁂𑀦 𑀧𑀭𑀺𑀓𑀧𑁆𑀧𑀺𑀢𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀢𑁆𑀢𑀸 ‘‘𑀤𑀼𑀩𑁆𑀩𑀮𑀯𑀢𑁆𑀣𑀼𑀓𑀢𑁆𑀢𑀸’’𑀢𑀺 𑀯𑀼𑀢𑁆𑀢𑀁, 𑀅𑀯𑀺𑀚𑁆𑀚𑀫𑀸𑀦𑀸𑀭𑀫𑁆𑀫𑀡𑁂 𑀅𑀯𑀲𑀯𑀢𑁆𑀢𑀺𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄, 𑀢𑁂𑀦𑀸𑀳 𑀅𑀯𑀺𑀲𑀬𑁂 𑀉𑀧𑁆𑀧𑀦𑁆𑀦𑀢𑁆𑀢𑀸𑀢𑀺𑀆𑀤𑀺.

𑀆𑀧𑀢𑁆𑀢𑀺𑀦𑀺𑀓𑀸𑀬𑀲𑁆𑀲𑀸𑀢𑀺 𑀇𑀤𑀁 𑀲𑀗𑁆𑀖𑀸𑀤𑀺𑀲𑁂𑀲𑁄𑀢𑀺 𑀧𑀼𑀮𑁆𑀮𑀺𑀗𑁆𑀕-𑀲𑀤𑁆𑀤𑀲𑁆𑀲 𑀅𑀦𑀼𑀭𑀽𑀧𑀯𑀲𑁂𑀦 𑀯𑀼𑀢𑁆𑀢𑀁. 𑀅𑀲𑁆𑀲𑀸𑀢𑀺 𑀅𑀲𑁆𑀲 𑀆𑀧𑀢𑁆𑀢𑀺𑀦𑀺𑀓𑀸𑀬𑀲𑁆𑀲, 𑀯𑀼𑀝𑁆𑀞𑀸𑀧𑁂𑀢𑀼𑀁 𑀇𑀘𑁆𑀙𑀺𑀢𑀲𑁆𑀲𑀸𑀢𑀺 𑀅𑀢𑁆𑀣𑁄, 𑀢𑁂𑀦𑀸𑀳 𑀓𑀺𑀁 𑀯𑀼𑀢𑁆𑀢𑀦𑁆𑀢𑀺𑀆𑀤𑀺. 𑀭𑀼𑀴𑁆𑀳𑀺𑀲𑀤𑁆𑀤𑁂𑀦𑀸𑀢𑀺 𑀏𑀢𑁆𑀣 𑀲𑀫𑀼𑀤𑀸𑀬𑁂 𑀦𑀺𑀧𑁆𑀨𑀦𑁆𑀦𑀲𑁆𑀲𑀸𑀧𑀺 𑀲𑀤𑁆𑀤𑀲𑁆𑀲 𑀢𑀤𑁂𑀓𑀤𑁂𑀲𑁂𑀧𑀺 𑀧𑀲𑀺𑀤𑁆𑀥𑀺 𑀇𑀥 𑀭𑀼𑀴𑁆𑀳𑀻 𑀦𑀸𑀫, 𑀢𑀸𑀬 𑀭𑀼𑀴𑁆𑀳𑀺𑀬𑀸 𑀬𑀼𑀢𑁆𑀢𑁄 𑀲𑀤𑁆𑀤𑁄 𑀭𑀼𑀴𑁆𑀳𑀻𑀲𑀤𑁆𑀤𑁄, 𑀢𑁂𑀦. 𑀭𑀼𑀴𑁆𑀳𑀺𑀬𑀸 𑀓𑀸𑀭𑀡𑀫𑀸𑀳 𑀅𑀯𑀬𑀯𑁂𑀇𑀘𑁆𑀘𑀸𑀤𑀺𑀦𑀸.

𑀓𑀸𑀮𑀜𑁆𑀘𑀸𑀢𑀺 ‘‘𑀭𑀸𑀕𑀽𑀧𑀢𑁆𑀣𑀫𑁆𑀪𑁂’’𑀢𑀺𑀆𑀤𑀺𑀦𑀸 𑀤𑀲𑁆𑀲𑀺𑀢𑀓𑀸𑀮𑀜𑁆𑀘, ‘‘𑀭𑀸𑀕𑀽𑀧𑀢𑁆𑀣𑀫𑁆𑀪𑁂’’𑀢𑀺 𑀯𑀼𑀢𑁆𑀢𑁂 𑀭𑀸𑀕𑀽𑀧𑀢𑁆𑀣𑀫𑁆𑀪𑁂 𑀚𑀸𑀢𑁂 𑀢𑀲𑁆𑀫𑀺𑀁 𑀓𑀸𑀮𑁂 𑀫𑁄𑀘𑁂𑀢𑀻𑀢𑀺 𑀅𑀢𑁆𑀣𑀢𑁄 𑀓𑀸𑀮𑁄 𑀕𑀫𑁆𑀫𑀢𑀺. 𑀦𑀯𑀫𑀲𑁆𑀲 𑀅𑀥𑀺𑀧𑁆𑀧𑀸𑀬𑀲𑁆𑀲𑀸𑀢𑀺 𑀯𑀻𑀫𑀁𑀲𑀸𑀥𑀺𑀧𑁆𑀧𑀸𑀬𑀲𑁆𑀲. 𑀯𑀢𑁆𑀣𑀽𑀢𑀺 𑀯𑀺𑀲𑀬𑀁.

𑁨𑁩𑁮. 𑀮𑁄𑀫𑀸 𑀏𑀢𑁂𑀲𑀁 𑀲𑀦𑁆𑀢𑀻𑀢𑀺 𑀮𑁄𑀫𑀲𑀸, 𑀩𑀳𑀼𑀮𑁄𑀫𑀧𑀸𑀡𑀓𑀸.

𑁨𑁩𑁯. 𑀫𑁄𑀘𑀦𑁂𑀦𑀸𑀢𑀺 𑀫𑁄𑀘𑀦𑀧𑁆𑀧𑀬𑁄𑀕𑁂𑀦. 𑀫𑁄𑀘𑀦𑀲𑁆𑀲𑀸𑀤𑀲𑀫𑁆𑀧𑀬𑀼𑀢𑁆𑀢𑀸𑀬𑀸𑀢𑀺 𑀏𑀢𑁆𑀣 𑀫𑁄𑀘𑀦𑀺𑀘𑁆𑀙𑀸𑀯 𑀫𑁄𑀘𑀦𑀲𑁆𑀲𑀸𑀤𑁄, 𑀢𑁂𑀦 𑀲𑀫𑁆𑀧𑀬𑀼𑀢𑁆𑀢𑀸 𑀘𑁂𑀢𑀦𑀸 𑀫𑁄𑀘𑀦𑀲𑁆𑀲𑀸𑀤𑀘𑁂𑀢𑀦𑀸𑀢𑀺 𑀅𑀢𑁆𑀣𑁄, 𑀦 𑀧𑀦 𑀫𑁄𑀘𑀦𑁂 𑀅𑀲𑁆𑀲𑀸𑀤𑀁 𑀲𑀼𑀔𑀁 𑀧𑀢𑁆𑀣𑁂𑀦𑁆𑀢𑀺𑀬𑀸 𑀘𑁂𑀢𑀦𑀸𑀬𑀸𑀢𑀺 𑀏𑀯𑀁 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄, 𑀇𑀢𑀭𑀣𑀸 𑀲𑀼𑀔𑀢𑁆𑀣𑀸𑀬 𑀫𑁄𑀘𑁂𑀦𑁆𑀢𑀲𑁆𑀲𑁂𑀯 𑀆𑀧𑀢𑁆𑀢𑀺, 𑀦 𑀆𑀭𑁄𑀕𑁆𑀬𑀸𑀤𑀺𑀅𑀢𑁆𑀣𑀸𑀬𑀸𑀢𑀺 𑀆𑀧𑀚𑁆𑀚𑀢𑀺. 𑀢𑀲𑁆𑀫𑀸 𑀆𑀭𑁄𑀕𑁆𑀬𑀸𑀤𑀻𑀲𑀼 𑀬𑁂𑀦 𑀓𑁂𑀦𑀘𑀺 𑀅𑀥𑀺𑀧𑁆𑀧𑀸𑀬𑁂𑀦 𑀫𑁄𑀘𑀦𑀺𑀘𑁆𑀙𑀸𑀬 𑀘𑁂𑀢𑀦𑀸𑀬𑀸𑀢𑀺 𑀅𑀢𑁆𑀣𑁄𑀯 𑀕𑀳𑁂𑀢𑀩𑁆𑀩𑁄.

𑁨𑁪𑁦. 𑀯𑀸𑀬𑀫𑀢𑁄𑀢𑀺 𑀅𑀗𑁆𑀕𑀚𑀸𑀢𑁂 𑀓𑀸𑀬𑁂𑀦 𑀉𑀧𑀓𑁆𑀓𑀫𑀢𑁄. 𑀤𑁆𑀯𑁂 𑀆𑀧𑀢𑁆𑀢𑀺𑀲𑀳𑀲𑁆𑀲𑀸𑀦𑀻𑀢𑀺 𑀔𑀡𑁆𑀟𑀘𑀓𑁆𑀓𑀸𑀤𑀻𑀦𑀺 𑀅𑀦𑀸𑀫𑀲𑀺𑀢𑁆𑀯𑀸𑀯 𑀯𑀼𑀢𑁆𑀢𑀁, 𑀇𑀘𑁆𑀙𑀦𑁆𑀢𑁂𑀦 𑀧𑀦 𑀔𑀡𑁆𑀟𑀘𑀓𑁆𑀓𑀸𑀤𑀺𑀪𑁂𑀤𑁂𑀦𑀸𑀧𑀺 𑀕𑀡𑀦𑀸 𑀓𑀸𑀢𑀩𑁆𑀩𑀸. 𑀏𑀓𑁂𑀦 𑀧𑀤𑁂𑀦𑀸𑀢𑀺 𑀕𑁂𑀳𑀲𑀺𑀢𑀧𑁂𑀫𑀧𑀤𑁂𑀦. 𑀢𑀣𑁂𑀯𑀸𑀢𑀺 𑀫𑁄𑀘𑀦𑀲𑁆𑀲𑀸𑀤𑀘𑁂𑀢𑀦𑀸𑀬 𑀏𑀯 𑀕𑀸𑀴𑁆𑀳𑀁 𑀧𑀻𑀴𑀦𑀸𑀤𑀺𑀧𑁆𑀧𑀬𑁄𑀕𑀁 𑀅𑀯𑀺𑀚𑀳𑀺𑀢𑁆𑀯𑀸 𑀲𑀼𑀧𑀦𑁂𑀦 𑀲𑀗𑁆𑀖𑀸𑀤𑀺𑀲𑁂𑀲𑁄𑀢𑀺 𑀯𑀼𑀢𑁆𑀢𑀁. 𑀲𑀼𑀤𑁆𑀥𑀘𑀺𑀢𑁆𑀢𑁄𑀢𑀺 𑀫𑁄𑀘𑀦𑀲𑁆𑀲𑀸𑀤𑀲𑁆𑀲 𑀦𑀺𑀫𑀺𑀢𑁆𑀢𑁂 𑀊𑀭𑀼𑀆𑀤𑀻𑀳𑀺 𑀓𑀢𑀉𑀧𑀓𑁆𑀓𑀫𑀲𑁆𑀲 𑀯𑀺𑀚𑀳𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑁂𑀦 𑀅𑀲𑀼𑀪𑀫𑀦𑀲𑀺𑀓𑀸𑀭𑀸𑀪𑀸𑀯𑁂𑀧𑀺 𑀧𑀬𑁄𑀕𑀸𑀪𑀸𑀯𑁂𑀦𑁂𑀯 𑀫𑁄𑀘𑀦𑁂𑀧𑀺 𑀅𑀦𑀸𑀧𑀢𑁆𑀢𑀺 𑀤𑀻𑀧𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀢𑁂𑀦 𑀉𑀧𑀓𑁆𑀓𑀫𑁂𑀦 𑀫𑀼𑀢𑁆𑀢𑁂𑀢𑀺 𑀫𑀼𑀘𑁆𑀘𑀫𑀸𑀦𑀁 𑀯𑀺𑀦𑀸 𑀅𑀜𑁆𑀜𑀲𑁆𑀫𑀺𑀫𑁆𑀧𑀺 𑀲𑀼𑀓𑁆𑀓𑁂 𑀞𑀸𑀦𑀢𑁄 𑀫𑀼𑀢𑁆𑀢𑁂. 𑀬𑀤𑀺 𑀧𑀦 𑀉𑀧𑀓𑁆𑀓𑀫𑁂 𑀓𑀢𑁂𑀧𑀺 𑀫𑀼𑀘𑁆𑀘𑀫𑀸𑀦𑀫𑁂𑀯 𑀤𑀓𑀲𑁄𑀢𑀁 𑀑𑀢𑀭𑀢𑀺, 𑀣𑀼𑀮𑁆𑀮𑀘𑁆𑀘𑀬𑀫𑁂𑀯 𑀧𑀬𑁄𑀕𑁂𑀦 𑀫𑀼𑀢𑁆𑀢𑀲𑁆𑀲 𑀅𑀪𑀸𑀯𑀸. 𑀚𑀕𑁆𑀕𑀦𑀢𑁆𑀣𑀸𑀬𑀸𑀢𑀺 𑀘𑀻𑀯𑀭𑀸𑀤𑀻𑀲𑀼 𑀮𑀺𑀫𑁆𑀧𑀦𑀧𑀭𑀺𑀳𑀸𑀭𑀸𑀬 𑀳𑀢𑁆𑀣𑁂𑀦 𑀅𑀗𑁆𑀕𑀚𑀸𑀢𑀕𑁆𑀕𑀳𑀡𑀁 𑀯𑀝𑁆𑀝𑀢𑀺, 𑀢𑀧𑁆𑀧𑀬𑁄𑀕𑁄 𑀦 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀦𑁄𑀓𑀸𑀲𑀦𑁆𑀢𑀺 𑀅𑀗𑁆𑀕𑀚𑀸𑀢𑀧𑁆𑀧𑀤𑁂𑀲𑀁.

𑁨𑁬𑁨. 𑀲𑀼𑀧𑀺𑀦𑀦𑁆𑀢𑁂𑀦 𑀓𑀸𑀭𑀡𑁂𑀦𑀸𑀢𑀺 𑀲𑀼𑀧𑀺𑀦𑀦𑁆𑀢𑁂 𑀧𑀯𑀢𑁆𑀢𑀉𑀧𑀓𑁆𑀓𑀫𑀳𑁂𑀢𑀼𑀦𑀸. 𑀆𑀧𑀢𑁆𑀢𑀺𑀝𑁆𑀞𑀸𑀦𑁂𑀬𑁂𑀯 𑀳𑀺 𑀅𑀬𑀁 𑀅𑀦𑀸𑀧𑀢𑁆𑀢𑀺 𑀅𑀯𑀺𑀲𑀬𑀢𑁆𑀢𑀸 𑀯𑀼𑀢𑁆𑀢𑀸. 𑀢𑁂𑀦𑀸𑀳 ‘‘𑀲𑀘𑀲𑁆𑀲 𑀯𑀺𑀲𑀬𑁄 𑀳𑁄𑀢𑀺 𑀦𑀺𑀘𑁆𑀘𑀮𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺𑀆𑀤𑀺.

𑁨𑁬𑁩. 𑀯𑀺𑀦𑀻𑀢𑀯𑀢𑁆𑀣𑀼𑀧𑀸𑀴𑀺𑀬𑀁 𑀅𑀡𑁆𑀟𑀓𑀡𑁆𑀟𑀼𑀯𑀦𑀯𑀢𑁆𑀣𑀼𑀲𑁆𑀫𑀺𑀁 𑀫𑁄𑀘𑀦𑀸𑀥𑀺𑀧𑁆𑀧𑀸𑀬𑁂𑀦 𑀅𑀡𑁆𑀟𑀘𑀮𑀦𑁂𑀦 𑀅𑀗𑁆𑀕𑀚𑀸𑀢𑀲𑁆𑀲𑀸𑀧𑀺 𑀘𑀮𑀦𑀢𑁄 𑀦𑀺𑀫𑀺𑀢𑁆𑀢𑁂 𑀉𑀧𑀓𑁆𑀓𑀫𑁄 𑀳𑁄𑀢𑀻𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑁄 𑀯𑀼𑀢𑁆𑀢𑁄. 𑀬𑀣𑀸 𑀧𑀦 𑀅𑀗𑁆𑀕𑀚𑀸𑀢𑀁 𑀦 𑀘𑀮𑀢𑀺, 𑀏𑀯𑀁 𑀅𑀡𑁆𑀟𑀫𑁂𑀯 𑀓𑀡𑁆𑀟𑀼𑀯𑀦𑁂𑀦 𑀨𑀼𑀲𑀦𑁆𑀢𑀲𑁆𑀲 𑀫𑀼𑀢𑁆𑀢𑁂𑀧𑀺 𑀅𑀦𑀸𑀧𑀢𑁆𑀢𑀺 𑀅𑀡𑁆𑀟𑀲𑁆𑀲 𑀅𑀦𑀗𑁆𑀕𑀚𑀸𑀢𑀢𑁆𑀢𑀸.

𑁨𑁬𑁪. 𑀯𑀢𑁆𑀣𑀺𑀦𑁆𑀢𑀺 𑀅𑀗𑁆𑀕𑀚𑀸𑀢𑀲𑀻𑀲𑀘𑁆𑀙𑀸𑀤𑀓𑀘𑀫𑁆𑀫𑀁. 𑀉𑀤𑀭𑀁 𑀢𑀸𑀧𑁂𑀦𑁆𑀢𑀲𑁆𑀲…𑀧𑁂… 𑀅𑀦𑀸𑀧𑀢𑁆𑀢𑀺𑀬𑁂𑀯𑀸𑀢𑀺 𑀉𑀤𑀭𑀢𑀸𑀧𑀦𑁂𑀦 𑀅𑀗𑁆𑀕𑀚𑀸𑀢𑁂𑀧𑀺 𑀢𑀢𑁆𑀢𑁂 𑀢𑀸𑀯𑀢𑁆𑀢𑀓𑁂𑀦 𑀦𑀺𑀫𑀺𑀢𑁆𑀢𑁂 𑀉𑀧𑀓𑁆𑀓𑀫𑁄 𑀓𑀢𑁄 𑀦𑀸𑀫 𑀦 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁.

𑁨𑁬𑁫. 𑀏𑀳𑀺 𑀫𑁂 𑀢𑁆𑀯𑀁, 𑀆𑀯𑀼𑀲𑁄, 𑀲𑀸𑀫𑀡𑁂𑀭𑀸𑀢𑀺 𑀯𑀢𑁆𑀣𑀼𑀲𑁆𑀫𑀺𑀁 𑀅𑀜𑁆𑀜𑀁 𑀆𑀡𑀸𑀧𑁂𑀢𑀼, 𑀢𑁂𑀦 𑀓𑀭𑀺𑀬𑀫𑀸𑀦𑀲𑁆𑀲 𑀅𑀗𑁆𑀕𑀚𑀸𑀢𑀘𑀮𑀦𑀲𑁆𑀲 𑀫𑁄𑀘𑀦𑀲𑁆𑀲𑀸𑀤𑁂𑀦 𑀲𑀸𑀤𑀺𑀬𑀦𑀢𑁄 𑀢𑀁 𑀘𑀮𑀦𑀁 𑀪𑀺𑀓𑁆𑀔𑀼𑀲𑁆𑀲 𑀲𑀸𑀤𑀺𑀬𑀦𑀘𑀺𑀢𑁆𑀢𑀲𑀫𑀼𑀝𑁆𑀞𑀺𑀢𑀫𑁆𑀧𑀺 𑀳𑁄𑀢𑀻𑀢𑀺 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀧𑀘𑁆𑀘𑀬𑀲𑁆𑀲 𑀅𑀗𑁆𑀕𑀚𑀸𑀢𑀘𑀮𑀦𑀲𑁆𑀲 𑀳𑁂𑀢𑀼𑀪𑀽𑀢𑀸 𑀅𑀲𑁆𑀲𑀸𑀤𑀘𑁂𑀢𑀦𑀸𑀯 𑀆𑀧𑀢𑁆𑀢𑀺𑀬𑀸 𑀅𑀗𑁆𑀕𑀁 𑀳𑁄𑀢𑀺, 𑀦 𑀆𑀡𑀸𑀧𑀦𑀯𑀸𑀘𑀸 𑀢𑀲𑁆𑀲𑀸 𑀧𑀯𑀢𑁆𑀢𑀺𑀓𑁆𑀔𑀡𑁂 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲 𑀅𑀲𑀺𑀚𑁆𑀛𑀦𑀢𑁄. 𑀏𑀯𑀁 𑀆𑀡𑀸𑀧𑁂𑀢𑁆𑀯𑀸𑀧𑀺 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂𑀦 𑀫𑁄𑀘𑀦𑀲𑁆𑀲𑀸𑀤𑀁 𑀧𑀝𑀺𑀯𑀺𑀦𑁄𑀤𑁂𑀦𑁆𑀢𑀲𑁆𑀲 𑀆𑀧𑀢𑁆𑀢𑀺𑀅𑀲𑀫𑁆𑀪𑀯𑀢𑁄 𑀇𑀤𑀁 𑀲𑀺𑀓𑁆𑀔𑀸𑀧𑀤𑀁 𑀅𑀦𑀸𑀡𑀢𑁆𑀢𑀺𑀓𑀁, 𑀓𑀸𑀬𑀓𑀫𑁆𑀫𑀁, 𑀓𑀺𑀭𑀺𑀬𑀲𑀫𑀼𑀝𑁆𑀞𑀸𑀦𑀜𑁆𑀘 𑀚𑀸𑀢𑀦𑁆𑀢𑀺 𑀕𑀳𑁂𑀢𑀩𑁆𑀩𑀁, 𑀆𑀡𑀸𑀧𑀦𑀯𑀸𑀘𑀸𑀬 𑀧𑀦 𑀤𑀼𑀓𑁆𑀓𑀝𑀁 𑀆𑀧𑀚𑁆𑀚𑀢𑀺. 𑀬𑁄 𑀧𑀦 𑀧𑀭𑁂𑀦 𑀅𑀦𑀸𑀡𑀢𑁆𑀢𑁂𑀦 𑀩𑀮𑀓𑁆𑀓𑀸𑀭𑁂𑀦𑀸𑀧𑀺 𑀓𑀭𑀺𑀬𑀫𑀸𑀦𑀧𑁆𑀧𑀬𑁄𑀕𑀁 𑀫𑁄𑀘𑀦𑀲𑁆𑀲𑀸𑀤𑁂𑀦 𑀲𑀸𑀤𑀺𑀬𑀢𑀺, 𑀢𑀲𑁆𑀲𑀸𑀧𑀺 𑀫𑀼𑀢𑁆𑀢𑁂 𑀧𑀞𑀫𑀧𑀸𑀭𑀸𑀚𑀺𑀓𑁂 𑀯𑀺𑀬 𑀲𑀗𑁆𑀖𑀸𑀤𑀺𑀲𑁂𑀲𑁄𑀯, 𑀅𑀫𑀼𑀢𑁆𑀢𑁂 𑀣𑀼𑀮𑁆𑀮𑀘𑁆𑀘𑀬𑀁. 𑀫𑁄𑀘𑀦𑀲𑁆𑀲𑀸𑀤𑁂 𑀘𑁂𑀢𑀦𑀸𑀬 𑀧𑀦 𑀅𑀲𑀢𑀺 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁂𑀦 𑀲𑀸𑀤𑀺𑀬𑀦𑁆𑀢𑀲𑁆𑀲𑀸𑀧𑀺 𑀫𑀼𑀢𑁆𑀢𑁂𑀧𑀺 𑀲𑀗𑁆𑀖𑀸𑀤𑀺𑀲𑁂𑀲𑁂𑀦 𑀅𑀦𑀸𑀧𑀢𑁆𑀢𑀻𑀢𑀺 𑀆𑀘𑀭𑀺𑀬𑀸 𑀯𑀤𑀦𑁆𑀢𑀺, 𑀢𑀜𑁆𑀘 𑀬𑀼𑀢𑁆𑀢𑀫𑁂𑀯.

𑁨𑁬𑁬. 𑀓𑀸𑀬𑀢𑁆𑀣𑀫𑁆𑀪𑀦𑀯𑀢𑁆𑀣𑀼𑀲𑁆𑀫𑀺𑀁 𑀘𑀮𑀦𑀯𑀲𑁂𑀦 𑀬𑀣𑀸 𑀅𑀗𑁆𑀕𑀚𑀸𑀢𑁂 𑀉𑀧𑀓𑁆𑀓𑀫𑁄 𑀲𑀫𑁆𑀪𑀯𑀢𑀺, 𑀢𑀣𑀸 𑀯𑀺𑀚𑀫𑁆𑀪𑀺𑀢𑀢𑁆𑀢𑀸 𑀆𑀧𑀢𑁆𑀢𑀺 𑀯𑀼𑀢𑁆𑀢𑀸.

𑀉𑀧𑀦𑀺𑀚𑁆𑀛𑀸𑀬𑀦𑀯𑀢𑁆𑀣𑀼𑀲𑁆𑀫𑀺𑀁 𑀅𑀗𑁆𑀕𑀚𑀸𑀢𑀦𑁆𑀢𑀺 𑀚𑀻𑀯𑀫𑀸𑀦𑀇𑀢𑁆𑀣𑀻𑀦𑀁 𑀧𑀲𑁆𑀲𑀸𑀯𑀫𑀕𑁆𑀕𑁄𑀯 𑀅𑀥𑀺𑀧𑁆𑀧𑁂𑀢𑁄, 𑀦𑁂𑀢𑀭𑁄.

𑁨𑁬𑁭. 𑀧𑀼𑀧𑁆𑀨𑀸𑀯𑀮𑀻𑀢𑀺 𑀓𑀻𑀴𑀸𑀯𑀺𑀲𑁂𑀲𑁄. 𑀢𑀁 𑀓𑀺𑀭 𑀓𑀻𑀴𑀦𑁆𑀢𑀸 𑀦𑀤𑀻𑀆𑀤𑀻𑀲𑀼 𑀙𑀺𑀦𑁆𑀦𑀢𑀝𑀁 𑀉𑀤𑀓𑁂𑀦 𑀘𑀺𑀓𑁆𑀔𑀮𑁆𑀮𑀁 𑀓𑀢𑁆𑀯𑀸 𑀢𑀢𑁆𑀣 𑀉𑀪𑁄 𑀧𑀸𑀤𑁂 𑀧𑀲𑀸𑀭𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀸 𑀧𑀢𑀦𑁆𑀢𑀺, ‘‘𑀧𑀼𑀧𑁆𑀨𑀸𑀯𑀮𑀺𑀬’’𑀦𑁆𑀢𑀺𑀧𑀺 𑀧𑀸𑀞𑁄. 𑀧𑀯𑁂𑀲𑁂𑀦𑁆𑀢𑀲𑁆𑀲𑀸𑀢𑀺 𑀧𑀬𑁄𑀚𑀓𑀢𑁆𑀢𑁂𑀦 𑀤𑁆𑀯𑀺𑀓𑀫𑁆𑀫𑀺𑀓𑀢𑁆𑀢𑀸 ‘‘𑀯𑀸𑀮𑀺𑀓𑀁 𑀅𑀗𑁆𑀕𑀚𑀸𑀢’’𑀦𑁆𑀢𑀺 𑀉𑀪𑀬𑀢𑁆𑀣𑀸𑀧𑀺 𑀉𑀧𑀬𑁄𑀕𑀯𑀘𑀦𑀁 𑀓𑀢𑀁. 𑀘𑁂𑀢𑀦𑀸, 𑀉𑀧𑀓𑁆𑀓𑀫𑁄, 𑀫𑀼𑀘𑁆𑀘𑀦𑀦𑁆𑀢𑀺 𑀇𑀫𑀸𑀦𑁂𑀢𑁆𑀣 𑀢𑀻𑀡𑀺 𑀅𑀗𑁆𑀕𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.