𑁨. 𑀓𑀸𑀬𑀲𑀁𑀲𑀕𑁆𑀕𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁨𑁬𑁯. 𑀤𑀼𑀢𑀺𑀬𑁂 𑀓𑁂𑀲𑀼𑀘𑀺 𑀯𑀸𑀢𑀧𑀸𑀦𑁂𑀲𑀼 𑀯𑀺𑀯𑀝𑁂𑀲𑀼 𑀩𑀳𑀺𑀧𑀺 𑀅𑀦𑁆𑀥𑀓𑀸𑀭𑀢𑁆𑀢𑀸 𑀆𑀮𑁄𑀓𑁄 𑀦 𑀧𑀯𑀺𑀲𑀢𑀺, 𑀯𑀺𑀯𑀝𑀓𑀯𑀸𑀝𑁂𑀦 𑀅𑀜𑁆𑀜𑀢𑁄 𑀆𑀕𑀘𑁆𑀙𑀦𑁆𑀢𑀲𑁆𑀲 𑀆𑀮𑁄𑀓𑀲𑁆𑀲 𑀦𑀺𑀯𑀸𑀭𑀡𑀢𑁄 𑀓𑀯𑀸𑀝𑀲𑁆𑀲 𑀧𑀺𑀝𑁆𑀞𑀺𑀧𑀲𑁆𑀲𑁂 𑀖𑀦𑀦𑁆𑀥𑀓𑀸𑀭𑁄𑀯 𑀳𑁄𑀢𑀺, 𑀢𑀸𑀤𑀺𑀲𑀸𑀦𑀺 𑀲𑀦𑁆𑀥𑀸𑀬 ‘‘𑀬𑁂𑀲𑀼 𑀯𑀺𑀯𑀝𑁂𑀲𑀼 𑀅𑀦𑁆𑀥𑀓𑀸𑀭𑁄 𑀳𑁄𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀩𑁆𑀭𑀸𑀳𑁆𑀫𑀡𑀻 𑀅𑀢𑁆𑀢𑀦𑁄 𑀅𑀗𑁆𑀕𑀫𑀗𑁆𑀕𑀸𑀦𑀁 𑀧𑀭𑀸𑀫𑀲𑀦𑀓𑁆𑀔𑀡𑁂 𑀅𑀦𑀸𑀘𑀸𑀭𑀸𑀦𑀼𑀓𑀽𑀮𑀸 𑀳𑀼𑀢𑁆𑀯𑀸 𑀦 𑀓𑀺𑀜𑁆𑀘𑀺 𑀯𑀢𑁆𑀯𑀸 𑀪𑀺𑀓𑁆𑀔𑀼𑀦𑁄 𑀯𑀡𑁆𑀡𑀪𑀡𑀦𑀓𑁆𑀔𑀡𑁂 𑀯𑀼𑀢𑁆𑀢𑀢𑁆𑀢𑀸 𑀆𑀳 ‘‘𑀧𑀩𑁆𑀩𑀚𑀺𑀢𑀼𑀓𑀸𑀫𑁄 𑀫𑀜𑁆𑀜𑁂𑀢𑀺 𑀲𑀮𑁆𑀮𑀓𑁆𑀔𑁂𑀢𑁆𑀯𑀸’’𑀢𑀺, 𑀧𑀩𑁆𑀩𑀚𑀺𑀢𑀼𑀓𑀸𑀫𑁄 𑀯𑀺𑀬𑀸𑀢𑀺 𑀲𑀮𑁆𑀮𑀓𑁆𑀔𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀓𑀼𑀮𑀺𑀢𑁆𑀣𑀻𑀦𑀁 𑀏𑀯𑀁 𑀧𑀭𑁂𑀳𑀺 𑀅𑀪𑀺𑀪𑀯𑀦𑀁 𑀦𑀸𑀫 𑀅𑀘𑁆𑀘𑀦𑁆𑀢𑀸𑀯𑀫𑀸𑀦𑁄𑀢𑀺 𑀆𑀳 ‘‘𑀅𑀢𑁆𑀢𑀦𑁄 𑀯𑀺𑀧𑁆𑀧𑀓𑀸𑀭’’𑀦𑁆𑀢𑀺.

𑁨𑁭𑁦. 𑀑𑀢𑀺𑀡𑁆𑀡𑀲𑀤𑁆𑀤𑀲𑁆𑀲 𑀓𑀫𑁆𑀫𑀲𑀸𑀥𑀦𑀧𑀓𑁆𑀔𑀁 𑀲𑀦𑁆𑀥𑀸𑀬 ‘‘𑀬𑀓𑁆𑀔𑀸𑀤𑀻𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀓𑀢𑁆𑀢𑀼𑀲𑀸𑀥𑀦𑀧𑀓𑁆𑀔𑀁 𑀲𑀦𑁆𑀥𑀸𑀬 ‘‘𑀓𑀽𑀧𑀸𑀤𑀻𑀦𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀦𑁆𑀢𑀺 𑀇𑀢𑁆𑀣𑀺𑀲𑀭𑀻𑀭𑀲𑀗𑁆𑀔𑀸𑀢𑁂 𑀯𑀢𑁆𑀣𑀼𑀲𑁆𑀫𑀺𑀁.

𑁨𑁭𑁧. 𑀅𑀲𑁆𑀲𑀸𑀢𑀺 𑀳𑀢𑁆𑀣𑀕𑁆𑀕𑀸𑀳𑀸𑀤𑀺𑀓𑀲𑁆𑀲 𑀲𑀩𑁆𑀩𑀲𑁆𑀲.

𑁨𑁭𑁩. 𑀏𑀢𑁂𑀲𑀁 𑀧𑀤𑀸𑀦𑀦𑁆𑀢𑀺 𑀆𑀫𑀲𑀦𑀸𑀤𑀺𑀧𑀤𑀸𑀦𑀁. 𑀇𑀢𑁆𑀣𑀺𑀲𑀜𑁆𑀜𑀻𑀢𑀺 𑀫𑀦𑀼𑀲𑁆𑀲𑀺𑀢𑁆𑀣𑀺𑀲𑀜𑁆𑀜𑀻. 𑀦𑀁-𑀲𑀤𑁆𑀤𑀲𑁆𑀲 𑀓𑀸𑀬𑀯𑀺𑀲𑁂𑀲𑀦𑀪𑀸𑀯𑁂𑀦 𑀏𑀢𑀁 𑀓𑀸𑀬𑀦𑁆𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀣 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀑𑀫𑀲𑀦𑁆𑀢𑁄…𑀧𑁂… 𑀏𑀓𑀸𑀯 𑀆𑀧𑀢𑁆𑀢𑀻𑀢𑀺 𑀅𑀦𑀺𑀯𑀢𑁆𑀣𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀦 𑀦𑀺𑀯𑀢𑁆𑀣𑀁. 𑀲𑀦𑀺𑀯𑀢𑁆𑀣𑀸𑀬 𑀧𑀦 𑀫𑀢𑁆𑀣𑀓𑀢𑁄 𑀧𑀝𑁆𑀞𑀸𑀬 𑀳𑀢𑁆𑀣𑀁 𑀑𑀢𑀸𑀭𑁂𑀦𑁆𑀢𑀲𑁆𑀲 𑀦𑀺𑀯𑀢𑁆𑀣𑀲𑀸𑀝𑀓𑁄𑀧𑀭𑀺 𑀳𑀢𑁆𑀣𑁂 𑀆𑀭𑀼𑀴𑁆𑀳𑁂 𑀣𑀼𑀮𑁆𑀮𑀘𑁆𑀘𑀬𑀁. 𑀲𑀸𑀝𑀓𑀢𑁄 𑀳𑀢𑁆𑀣𑀁 𑀑𑀢𑀸𑀭𑀸𑀧𑁂𑀢𑁆𑀯𑀸 𑀚𑀗𑁆𑀖𑀢𑁄 𑀧𑀝𑁆𑀞𑀸𑀬 𑀑𑀫𑀲𑀦𑁆𑀢𑀲𑁆𑀲 𑀧𑀼𑀦 𑀲𑀗𑁆𑀖𑀸𑀤𑀺𑀲𑁂𑀲𑁄.

𑀬𑀣𑀸𑀦𑀺𑀤𑁆𑀤𑀺𑀝𑁆𑀞𑀦𑀺𑀤𑁆𑀤𑁂𑀲𑁂𑀢𑀺 𑀬𑀣𑀸𑀯𑀼𑀢𑁆𑀢𑀓𑀸𑀬𑀲𑀁𑀲𑀕𑁆𑀕𑀦𑀺𑀤𑁆𑀤𑁂𑀲𑁂. 𑀢𑁂𑀦𑀸𑀢𑀺 𑀬𑁂𑀦 𑀓𑀸𑀭𑀡𑁂𑀦 𑀯𑀢𑁆𑀣𑀼𑀲𑀜𑁆𑀜𑀸𑀤𑀬𑁄 𑀳𑁄𑀦𑁆𑀢𑀺, 𑀢𑁂𑀦 𑀓𑀸𑀭𑀡𑁂𑀦. 𑀬𑀣𑀸𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀦𑀺𑀤𑁆𑀤𑁂𑀲𑁂 𑀯𑀼𑀢𑁆𑀢𑀁 𑀕𑀭𑀼𑀓𑀁 𑀪𑀺𑀓𑁆𑀔𑀼𑀦𑁄 𑀓𑀭𑁂𑀬𑁆𑀬 𑀧𑀓𑀸𑀲𑁂𑀬𑁆𑀬𑀸𑀢𑀺 𑀬𑁄𑀚𑀦𑀸.

𑀲𑀜𑁆𑀜𑀸𑀬 𑀯𑀺𑀭𑀸𑀕𑀺𑀢𑀫𑁆𑀳𑀻𑀢𑀺 𑀲𑀜𑁆𑀜𑀸𑀬 𑀯𑀺𑀭𑀤𑁆𑀥𑀸𑀬. 𑀇𑀤𑀁 𑀦𑀸𑀫 𑀯𑀢𑁆𑀣𑀼𑀦𑁆𑀢𑀺 𑀇𑀫𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂 𑀆𑀕𑀢𑀁, 𑀅𑀦𑀸𑀕𑀢𑀜𑁆𑀘 𑀬𑀁 𑀓𑀺𑀜𑁆𑀘𑀺 𑀲𑀯𑀺𑀜𑁆𑀜𑀸𑀡𑀓𑀸𑀯𑀺𑀜𑁆𑀜𑀸𑀡𑀓𑀁 𑀨𑀼𑀲𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺𑀅𑀪𑀸𑀯𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑀲𑀸𑀭𑀢𑁆𑀢𑀦𑁆𑀢𑀺 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁂𑀦𑁂𑀯 𑀲𑀸𑀭𑀢𑁆𑀢𑀁. 𑀯𑀺𑀭𑀢𑁆𑀢𑀦𑁆𑀢𑀺 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑀭𑀳𑀺𑀢𑀁 𑀫𑀸𑀢𑀼𑀆𑀤𑀺𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀤𑀼𑀓𑁆𑀓𑀝𑀦𑁆𑀢𑀺 𑀫𑀸𑀢𑀼𑀧𑁂𑀫𑀸𑀤𑀺𑀯𑀲𑁂𑀦 𑀕𑀡𑁆𑀳𑀦𑁆𑀢𑀲𑁆𑀲 𑀯𑀲𑁂𑀦 𑀯𑀼𑀢𑁆𑀢𑀁, 𑀯𑀺𑀭𑀢𑁆𑀢𑀫𑁆𑀧𑀺 𑀇𑀢𑁆𑀣𑀺𑀁 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁂𑀦 𑀕𑀡𑁆𑀳𑀦𑁆𑀢𑀲𑁆𑀲 𑀧𑀦 𑀲𑀗𑁆𑀖𑀸𑀤𑀺𑀲𑁂𑀲𑁄 𑀏𑀯. 𑀇𑀫𑀸𑀬 𑀧𑀸𑀴𑀺𑀬𑀸 𑀲𑀫𑁂𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀣𑀁 𑀲𑀫𑁂𑀢𑀻𑀢𑀺 𑀘𑁂? 𑀬𑀤𑀺 𑀳𑀺 ‘‘𑀇𑀢𑁆𑀣𑀺𑀬𑀸 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑀁 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀢𑁆𑀢𑁂 𑀉𑀧𑁆𑀧𑀦𑁆𑀦𑁂 𑀇𑀢𑁆𑀣𑀺𑀲𑀜𑁆𑀜𑀸 𑀯𑀺𑀭𑀸𑀕𑀺𑀢𑀸 𑀪𑀯𑁂𑀬𑁆𑀬. 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑀕𑁆𑀕𑀳𑀡𑁂𑀧𑀺 𑀣𑀼𑀮𑁆𑀮𑀘𑁆𑀘𑀬𑁂𑀦𑀸𑀧𑀺 𑀦 𑀪𑀯𑀺𑀢𑀩𑁆𑀩𑀁 𑀇𑀢𑁆𑀣𑀺𑀲𑀜𑁆𑀜𑀸𑀬 𑀏𑀯 𑀧𑀸𑀴𑀺𑀬𑀁 (𑀧𑀸𑀭𑀸. 𑁨𑁭𑁬) 𑀣𑀼𑀮𑁆𑀮𑀘𑁆𑀘𑀬𑀲𑁆𑀲 𑀯𑀼𑀢𑁆𑀢𑀢𑁆𑀢𑀸, 𑀢𑀲𑁆𑀫𑀸 ‘‘𑀇𑀢𑁆𑀣𑀺𑀬𑀸 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑀁 𑀕𑀡𑁆𑀳𑀺𑀲𑁆𑀲𑀸𑀫𑀻𑀢𑀺 𑀓𑀸𑀬𑀁 𑀕𑀡𑁆𑀳𑀦𑁆𑀢𑀲𑁆𑀲 𑀇𑀢𑁆𑀣𑀺𑀲𑀜𑁆𑀜𑀸 𑀯𑀺𑀭𑀸𑀕𑀺𑀢𑀸 𑀦𑀸𑀫 𑀦 𑀳𑁄𑀢𑀻𑀢𑀺 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑀁 𑀕𑀡𑁆𑀳𑀺𑀲𑁆𑀲𑀸𑀫𑀻𑀢𑀺 𑀓𑀸𑀬𑀁 𑀕𑀡𑁆𑀳𑀢𑁄 𑀇𑀢𑁆𑀣𑀺𑀲𑀜𑁆𑀜𑀸𑀬 𑀘𑁂𑀯 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑀲𑁆𑀲 𑀘 𑀓𑀸𑀬𑀕𑁆𑀕𑀳𑀡𑀲𑁆𑀲 𑀘 𑀲𑀫𑁆𑀪𑀯𑀸 𑀬𑀣𑀸𑀯𑀢𑁆𑀣𑀼𑀓𑀁 𑀲𑀗𑁆𑀖𑀸𑀤𑀺𑀲𑁂𑀲𑀫𑁂𑀯 𑀆𑀧𑀚𑁆𑀚𑀢𑀻’’𑀢𑀺 𑀫𑀳𑀸𑀲𑀼𑀫𑀢𑁆𑀣𑁂𑀭𑁂𑀦 𑀯𑀼𑀢𑁆𑀢𑀯𑀸𑀤𑁄𑀯 𑀇𑀫𑀸𑀬 𑀧𑀸𑀴𑀺𑀬𑀸 𑀲𑀫𑁂𑀢𑀺. 𑀅𑀝𑁆𑀞𑀓𑀣𑀸𑀬𑀜𑁆𑀳𑀺 ‘‘𑀲𑀫𑁆𑀩𑀳𑀼𑀮𑀸 𑀇𑀢𑁆𑀣𑀺𑀬𑁄 𑀩𑀸𑀳𑀸𑀳𑀺 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀕𑀡𑁆𑀳𑀸𑀫𑀻’’𑀢𑀺 𑀲𑀜𑁆𑀜𑀸𑀬 𑀧𑀭𑀺𑀓𑁆𑀔𑀺𑀧𑀢𑁄 𑀫𑀚𑁆𑀛𑀕𑀢𑀸𑀦𑀁 𑀯𑀲𑁂𑀦 𑀣𑀼𑀮𑁆𑀮𑀘𑁆𑀘𑀬𑀁 𑀯𑀼𑀢𑁆𑀢𑀁. 𑀦 𑀳𑀺 𑀢𑀲𑁆𑀲 ‘‘𑀫𑀚𑁆𑀛𑀕𑀢𑀸 𑀇𑀢𑁆𑀣𑀺𑀬𑁄 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑁂𑀦 𑀕𑀡𑁆𑀳𑀸𑀫𑀻’’𑀢𑀺 𑀲𑀜𑁆𑀜𑀸 𑀅𑀢𑁆𑀣𑀺, 𑀢𑀲𑁆𑀫𑀸 𑀅𑀝𑁆𑀞𑀓𑀣𑀸𑀬𑀧𑀺 𑀲𑀫𑁂𑀢𑀻𑀢𑀺 𑀕𑀳𑁂𑀢𑀩𑁆𑀩𑀁. 𑀦𑀻𑀮𑁂𑀦 𑀤𑀼𑀯𑀺𑀜𑁆𑀜𑁂𑀬𑁆𑀬𑀪𑀸𑀯𑀢𑁄 𑀓𑀸𑀴𑀺𑀢𑁆𑀣𑀻 𑀯𑀼𑀢𑁆𑀢𑀸.

𑁨𑁭𑁯. 𑀲𑁂𑀯𑀦𑀸𑀥𑀺𑀧𑁆𑀧𑀸𑀬𑁄𑀢𑀺 𑀨𑀲𑁆𑀲𑀲𑀼𑀔𑀲𑁂𑀯𑀦𑀸𑀥𑀺𑀧𑁆𑀧𑀸𑀬𑁄. 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑀸𑀫𑀲𑀦𑀯𑀸𑀭𑁂 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑀯𑀲𑁂𑀦 𑀨𑀲𑁆𑀲𑀧𑀝𑀺𑀯𑀺𑀚𑀸𑀦𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀘𑀺𑀢𑁆𑀢𑀼𑀧𑁆𑀧𑀸𑀤𑀫𑀢𑁆𑀢𑁂 𑀆𑀧𑀢𑁆𑀢𑀺𑀬𑀸𑀪𑀸𑀯𑀢𑁄 𑀅𑀦𑀸𑀧𑀢𑁆𑀢𑀻𑀢𑀺 𑀇𑀤𑀁 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑀫𑀢𑁆𑀢𑁂𑀦 𑀓𑀸𑀬𑀘𑀮𑀦𑀲𑁆𑀲 𑀅𑀦𑀼𑀧𑁆𑀧𑀢𑁆𑀢𑀺𑀢𑁄 𑀇𑀢𑁆𑀣𑀺𑀬𑀸 𑀓𑀭𑀺𑀬𑀫𑀸𑀦𑀓𑀸𑀬𑀘𑀮𑀦𑀁 𑀲𑀸𑀤𑀺𑀬𑀢𑁄𑀧𑀺 𑀧𑀬𑁄𑀕𑀸𑀪𑀸𑀯𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀧𑀞𑀫𑀧𑀸𑀭𑀸𑀚𑀺𑀓𑁂 𑀧𑀦 𑀧𑀭𑁂𑀳𑀺 𑀉𑀧𑀓𑁆𑀓𑀫𑀺𑀬𑀫𑀸𑀦𑀲𑁆𑀲 𑀅𑀪𑀸𑀯𑀢𑁄 𑀲𑁂𑀯𑀦𑀸𑀥𑀺𑀧𑁆𑀧𑀸𑀬𑁂 𑀉𑀧𑁆𑀧𑀦𑁆𑀦𑁂 𑀢𑁂𑀦 𑀅𑀥𑀺𑀧𑁆𑀧𑀸𑀬𑁂𑀦 𑀅𑀗𑁆𑀕𑀚𑀸𑀢𑀓𑁆𑀔𑁄𑀪𑁄 𑀲𑀬𑀫𑁂𑀯 𑀅𑀯𑀲𑁆𑀲𑀁 𑀲𑀜𑁆𑀚𑀸𑀬𑀢𑀺, 𑀲𑁄 𑀘 𑀢𑁂𑀦 𑀓𑀢𑁄 𑀦𑀸𑀫 𑀳𑁄𑀢𑀻𑀢𑀺 𑀧𑀸𑀭𑀸𑀚𑀺𑀓𑀁 𑀯𑀼𑀢𑁆𑀢𑀁, 𑀢𑁂𑀦𑁂𑀯 𑀦𑀬𑁂𑀦 𑀧𑀞𑀫𑀲𑀗𑁆𑀖𑀸𑀤𑀺𑀲𑁂𑀲𑁂𑀧𑀺 𑀧𑀭𑁂𑀦 𑀓𑀭𑀺𑀬𑀫𑀸𑀦𑀧𑀬𑁄𑀕𑀲𑀸𑀤𑀺𑀬𑀫𑀸𑀦𑁂𑀧𑀺 𑀅𑀗𑁆𑀕𑀚𑀸𑀢𑀓𑁆𑀔𑁄𑀪𑀲𑀫𑁆𑀪𑀯𑁂𑀦 𑀆𑀧𑀢𑁆𑀢𑀺 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀘𑀢𑀼𑀢𑁆𑀣𑁂𑀢𑀺 ‘‘𑀦 𑀘 𑀓𑀸𑀬𑁂𑀦 𑀯𑀸𑀬𑀫𑀢𑀺, 𑀦 𑀘 𑀨𑀲𑁆𑀲𑀁 𑀧𑀝𑀺𑀯𑀺𑀚𑀸𑀦𑀸𑀢𑀻’’𑀢𑀺 𑀇𑀫𑀲𑁆𑀫𑀺𑀁 𑀯𑀸𑀭𑁂. 𑀨𑀲𑁆𑀲𑀧𑀝𑀺𑀯𑀺𑀚𑀸𑀦𑀦𑀫𑁆𑀧𑀻𑀢𑀺 𑀅𑀧𑀺-𑀲𑀤𑁆𑀤𑁂𑀦 𑀢𑀢𑀺𑀬𑀯𑀸𑀭𑁂 𑀯𑀺𑀬 𑀯𑀸𑀬𑀸𑀫𑁄𑀧𑀺 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀺. 𑀦𑀺𑀲𑁆𑀲𑀕𑁆𑀕𑀺𑀬𑁂𑀦 𑀦𑀺𑀲𑁆𑀲𑀕𑁆𑀕𑀺𑀬𑀸𑀫𑀲𑀦𑁂 𑀯𑀺𑀬𑀸𑀢𑀺 𑀇𑀤𑀁 𑀧𑀦 𑀨𑀲𑁆𑀲𑀧𑀝𑀺𑀯𑀺𑀚𑀸𑀦𑀦𑀸𑀪𑀸𑀯𑀫𑀢𑁆𑀢𑀲𑁆𑀲𑁂𑀯 𑀦𑀺𑀤𑀲𑁆𑀲𑀦𑀁, 𑀦 𑀧𑀬𑁄𑀕𑀸𑀪𑀸𑀯𑀲𑁆𑀲𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀫𑁄𑀓𑁆𑀔𑀸𑀥𑀺𑀧𑁆𑀧𑀸𑀬𑁄𑀢𑀺 𑀏𑀢𑁆𑀣 𑀘𑀺𑀢𑁆𑀢𑀲𑁆𑀲 𑀮𑀳𑀼𑀧𑀭𑀺𑀯𑀢𑁆𑀢𑀺𑀢𑀸𑀬 𑀅𑀦𑁆𑀢𑀭𑀦𑁆𑀢𑀭𑀸 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁂 𑀲𑀫𑀼𑀧𑁆𑀧𑀦𑁆𑀦𑁂𑀧𑀺 𑀫𑁄𑀓𑁆𑀔𑀸𑀥𑀺𑀧𑁆𑀧𑀸𑀬𑀲𑁆𑀲 𑀅𑀯𑀺𑀘𑁆𑀙𑀺𑀦𑁆𑀦𑀢𑀸𑀬 𑀅𑀦𑀸𑀧𑀢𑁆𑀢𑀺𑀬𑁂𑀯, 𑀯𑀺𑀘𑁆𑀙𑀺𑀦𑁆𑀦𑁂 𑀧𑀦 𑀢𑀲𑁆𑀫𑀺𑀁 𑀆𑀧𑀢𑁆𑀢𑀺 𑀏𑀯.

𑀧𑀤𑀪𑀸𑀚𑀦𑀻𑀬𑀯𑀡𑁆𑀡𑀦𑀸𑀦𑀬𑁄.

𑁨𑁮𑁧. 𑀏𑀢𑁆𑀣 𑀕𑀡𑁆𑀳𑀸𑀳𑀻𑀢𑀺 𑀦 𑀯𑀢𑁆𑀢𑀩𑁆𑀩𑀸𑀢𑀺 𑀕𑁂𑀳𑀲𑀺𑀢𑀧𑁂𑀫𑁂𑀦 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑁂𑀦 𑀨𑀼𑀲𑀦𑁂 𑀤𑀼𑀓𑁆𑀓𑀝𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀓𑀸𑀭𑀼𑀜𑁆𑀜𑁂𑀦 𑀧𑀦 𑀯𑀢𑁆𑀣𑀸𑀤𑀺𑀁 𑀕𑀳𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀺𑀁 ‘‘𑀕𑀡𑁆𑀳𑀸’’𑀢𑀺 𑀯𑀤𑀦𑁆𑀢𑀲𑁆𑀲𑀸𑀧𑀺 𑀅𑀯𑀲𑀲𑀪𑀸𑀯𑀧𑁆𑀧𑀢𑁆𑀢𑀁 𑀉𑀤𑀓𑁂 𑀦𑀺𑀫𑀼𑀚𑁆𑀚𑀦𑁆𑀢𑀺𑀁 𑀓𑀸𑀭𑀼𑀜𑁆𑀜𑁂𑀦 𑀲𑀳𑀲𑀸 𑀅𑀦𑀸𑀫𑀸𑀲𑀦𑁆𑀢𑀺 𑀅𑀘𑀺𑀦𑁆𑀢𑁂𑀢𑁆𑀯𑀸 𑀓𑁂𑀲𑀸𑀤𑀻𑀲𑀼 𑀕𑀳𑁂𑀢𑁆𑀯𑀸 𑀫𑁄𑀓𑁆𑀔𑀸𑀥𑀺𑀧𑁆𑀧𑀸𑀬𑁂𑀦 𑀆𑀓𑀟𑁆𑀠𑀢𑁄𑀧𑀺 𑀅𑀦𑀸𑀧𑀢𑁆𑀢𑀺𑀬𑁂𑀯. 𑀦 𑀳𑀺 𑀫𑀻𑀬𑀫𑀸𑀦𑀁 𑀫𑀸𑀢𑀭𑀁 𑀉𑀓𑁆𑀔𑀺𑀧𑀺𑀢𑀼𑀁 𑀦 𑀯𑀝𑁆𑀝𑀢𑀺. 𑀅𑀜𑁆𑀜𑀸𑀢𑀺𑀓𑀸𑀬 𑀇𑀢𑁆𑀣𑀺𑀬𑀸𑀧𑀺 𑀏𑀲𑁂𑀯 𑀦𑀬𑁄. 𑀉𑀓𑁆𑀓𑀝𑁆𑀞𑀸𑀬 𑀫𑀸𑀢𑀼𑀬𑀸𑀧𑀺 𑀆𑀫𑀸𑀲𑁄 𑀦 𑀯𑀝𑁆𑀝𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀫𑀸𑀢𑀭’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀲𑀸 𑀓𑀸𑀢𑀩𑁆𑀩𑀁 𑀧𑀦 𑀅𑀜𑁆𑀜𑀸𑀲𑀫𑁆𑀧𑀺 𑀇𑀢𑁆𑀣𑀻𑀦𑀁 𑀓𑀭𑁄𑀦𑁆𑀢𑀲𑁆𑀲𑀸𑀧𑀺 𑀅𑀦𑀸𑀧𑀢𑁆𑀢𑀺𑀬𑁂𑀯 𑀅𑀦𑀸𑀫𑀸𑀲𑀢𑁆𑀢𑁂 𑀯𑀺𑀲𑁂𑀲𑀸𑀪𑀸𑀯𑀸.

𑀢𑀺𑀡𑀡𑁆𑀟𑀼𑀧𑀓𑀦𑁆𑀢𑀺 𑀳𑀺𑀭𑀺𑀯𑁂𑀭𑀸𑀤𑀺𑀫𑀽𑀮𑁂𑀳𑀺 𑀓𑁂𑀲𑀸𑀮𑀗𑁆𑀓𑀸𑀭𑀢𑁆𑀣𑀸𑀬 𑀓𑀢𑀘𑀼𑀫𑁆𑀩𑀝𑀓𑀁. 𑀧𑀭𑀺𑀯𑀢𑁆𑀢𑁂𑀢𑁆𑀯𑀸𑀢𑀺 𑀅𑀢𑁆𑀢𑀦𑁄 𑀦𑀺𑀯𑀸𑀲𑀦𑀸𑀤𑀺𑀪𑀸𑀯𑀢𑁄 𑀅𑀧𑀦𑁂𑀢𑁆𑀯𑀸. 𑀧𑀽𑀚𑀸𑀤𑀺𑀅𑀢𑁆𑀣𑀁 𑀧𑀦 𑀢𑀸𑀯𑀓𑀸𑀮𑀺𑀓𑀫𑁆𑀧𑀺 𑀆𑀫𑀲𑀺𑀢𑀼𑀁 𑀯𑀝𑁆𑀝𑀢𑀺. 𑀲𑀻𑀲𑀧𑀲𑀸𑀥𑀦𑀓𑀤𑀦𑁆𑀢𑀲𑀽𑀘𑀺𑀆𑀤𑀻𑀢𑀺 𑀇𑀤𑀁 𑀲𑀻𑀲𑀸𑀮𑀗𑁆𑀓𑀸𑀭𑀢𑁆𑀣𑀸𑀬 𑀧𑀝𑀧𑀺𑀮𑁄𑀢𑀺𑀓𑀸𑀤𑀻𑀳𑀺 𑀓𑀢𑀁 𑀲𑀻𑀲𑀧𑀲𑀸𑀥𑀦𑀓𑀜𑁆𑀘𑁂𑀯 𑀤𑀦𑁆𑀢𑀲𑀽𑀘𑀺𑀆𑀤𑀺 𑀘𑀸𑀢𑀺 𑀤𑁆𑀯𑀺𑀥𑀸 𑀬𑁄𑀚𑁂𑀢𑁆𑀯𑀸 𑀲𑀻𑀲𑀧𑀲𑀸𑀥𑀦𑀁 𑀲𑀺𑀧𑀸𑀝𑀺𑀓𑁄𑀧𑀓𑀭𑀡𑀢𑁆𑀣𑀸𑀬 𑀘𑁂𑀯 𑀤𑀦𑁆𑀢𑀲𑀽𑀘𑀺𑀉𑀧𑀓𑀭𑀡𑀢𑁆𑀣𑀸𑀬 𑀘 𑀕𑀳𑁂𑀢𑀩𑁆𑀩𑀦𑁆𑀢𑀺 𑀬𑀣𑀸𑀓𑁆𑀓𑀫𑀁 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀓𑁂𑀲𑀓𑀮𑀸𑀧𑀁 𑀩𑀦𑁆𑀥𑀺𑀢𑁆𑀯𑀸 𑀢𑀢𑁆𑀣 𑀢𑀺𑀭𑀺𑀬𑀁 𑀧𑀯𑁂𑀲𑀦𑀢𑁆𑀣𑀸𑀬 𑀓𑀢𑀸 𑀤𑀦𑁆𑀢𑀲𑀽𑀘𑀺 𑀏𑀯 𑀲𑀻𑀲𑀧𑀲𑀸𑀥𑀦𑀓𑀤𑀦𑁆𑀢𑀲𑀽𑀘𑀻𑀢𑀺 𑀏𑀓𑀫𑁂𑀯 𑀓𑀢𑁆𑀯𑀸 𑀲𑀺𑀧𑀸𑀝𑀺𑀓𑀸𑀬 𑀧𑀓𑁆𑀔𑀺𑀧𑀺𑀢𑁆𑀯𑀸 𑀧𑀭𑀺𑀳𑀭𑀺𑀢𑀩𑁆𑀩𑀲𑀽𑀘𑀺𑀬𑁂𑀯 𑀢𑀲𑁆𑀲 𑀢𑀲𑁆𑀲 𑀓𑀺𑀘𑁆𑀘𑀲𑁆𑀲 𑀉𑀧𑀓𑀭𑀡𑀦𑁆𑀢𑀺 𑀲𑀺𑀧𑀸𑀝𑀺𑀓𑀸𑀲𑀽𑀘𑀺𑀉𑀧𑀓𑀭𑀡𑀦𑁆𑀢𑀺 𑀏𑀯𑀁 𑀯𑀸 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸. 𑀧𑁄𑀢𑁆𑀣𑀓𑀭𑀽𑀧𑀦𑁆𑀢𑀺 𑀲𑀼𑀥𑀸𑀤𑀻𑀳𑀺 𑀓𑀢𑀁, 𑀧𑀸𑀭𑀸𑀚𑀺𑀓𑀯𑀢𑁆𑀣𑀼𑀪𑀽𑀢𑀸𑀦𑀁 𑀢𑀺𑀭𑀘𑁆𑀙𑀸𑀦𑀕𑀢𑀺𑀢𑁆𑀣𑀻𑀦𑀁 𑀲𑀡𑁆𑀞𑀸𑀦𑁂𑀦 𑀓𑀢𑀫𑁆𑀧𑀺 𑀅𑀦𑀸𑀫𑀸𑀲𑀫𑁂𑀯. 𑀇𑀢𑁆𑀣𑀺𑀭𑀽𑀧𑀸𑀤𑀻𑀦𑀺 𑀤𑀲𑁆𑀲𑁂𑀢𑁆𑀯𑀸 𑀓𑀢𑀁, 𑀯𑀢𑁆𑀣𑀪𑀺𑀢𑁆𑀢𑀺𑀆𑀤𑀺𑀜𑁆𑀘 𑀇𑀢𑁆𑀣𑀺𑀭𑀽𑀧𑀁 𑀅𑀦𑀸𑀫𑀲𑀺𑀢𑁆𑀯𑀸 𑀯𑀴𑀜𑁆𑀚𑁂𑀢𑀼𑀁 𑀯𑀝𑁆𑀝𑀢𑀺. 𑀏𑀯𑀭𑀽𑀧𑁂𑀳𑀺 𑀅𑀦𑀸𑀫𑀸𑀲𑁂 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁂 𑀅𑀲𑀢𑀺 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑁂𑀦 𑀆𑀫𑀲𑀢𑁄 𑀤𑁄𑀲𑁄 𑀦𑀢𑁆𑀣𑀺. 𑀪𑀺𑀦𑁆𑀤𑀺𑀢𑁆𑀯𑀸𑀢𑀺 𑀏𑀢𑁆𑀣 𑀅𑀦𑀸𑀫𑀸𑀲𑀫𑁆𑀧𑀺 𑀤𑀡𑁆𑀟𑀧𑀸𑀲𑀸𑀡𑀸𑀤𑀻𑀳𑀺 𑀪𑁂𑀤𑀦𑀲𑁆𑀲 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀢𑁆𑀢𑀸, 𑀧𑀸𑀴𑀺𑀬𑀫𑁆𑀧𑀺 𑀆𑀧𑀤𑀸𑀲𑀼 𑀫𑁄𑀓𑁆𑀔𑀸𑀥𑀺𑀧𑁆𑀧𑀸𑀬𑀲𑁆𑀲 𑀆𑀫𑀲𑀦𑁂𑀧𑀺 𑀅𑀦𑀸𑀧𑀢𑁆𑀢𑀺𑀬𑀸 𑀯𑀼𑀢𑁆𑀢𑀢𑁆𑀢𑀸 𑀘. 𑀲𑀧𑁆𑀧𑀺𑀦𑀻𑀆𑀤𑀻𑀳𑀺 𑀯𑀸𑀴𑀫𑀺𑀕𑀻𑀳𑀺 𑀘 𑀕𑀳𑀺𑀢𑀧𑀸𑀡𑀓𑀸𑀦𑀁 𑀫𑁄𑀘𑀦𑀢𑁆𑀣𑀸𑀬 𑀢𑀁 𑀲𑀧𑁆𑀧𑀺𑀦𑀻𑀆𑀤𑀺𑀁 𑀯𑀢𑁆𑀣𑀤𑀡𑁆𑀟𑀸𑀤𑀻𑀳𑀺 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀕𑀳𑁂𑀢𑀼𑀁, 𑀫𑀸𑀢𑀼𑀆𑀤𑀺𑀁 𑀉𑀤𑀓𑁂 𑀫𑀻𑀬𑀫𑀸𑀦𑀁 𑀯𑀢𑁆𑀣𑀸𑀤𑀻𑀳𑀺 𑀕𑀳𑁂𑀢𑀼𑀁, 𑀅𑀲𑀓𑁆𑀓𑁄𑀦𑁆𑀢𑀺𑀁 𑀓𑁂𑀲𑀸𑀤𑀻𑀲𑀼 𑀕𑀳𑁂𑀢𑁆𑀯𑀸 𑀓𑀸𑀭𑀼𑀜𑁆𑀜𑁂𑀦 𑀉𑀓𑁆𑀔𑀺𑀧𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀅𑀬𑀫𑀢𑁆𑀣𑁄 𑀕𑀳𑁂𑀢𑀩𑁆𑀩𑁄𑀯. 𑀅𑀝𑁆𑀞𑀓𑀣𑀸𑀬𑀁 ‘‘𑀦 𑀢𑁆𑀯𑁂𑀯 𑀆𑀫𑀲𑀺𑀢𑀩𑁆𑀩𑀸’’𑀢𑀺 𑀇𑀤𑀁 𑀧𑀦 𑀯𑀘𑀦𑀁 𑀅𑀫𑀻𑀬𑀫𑀸𑀦𑀯𑀢𑁆𑀣𑀼𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀅𑀬𑀁 𑀅𑀫𑁆𑀳𑀸𑀓𑀁 𑀔𑀦𑁆𑀢𑀺.

𑀫𑀕𑁆𑀕𑀁 𑀅𑀥𑀺𑀝𑁆𑀞𑀸𑀬𑀸𑀢𑀺 ‘‘𑀫𑀕𑁆𑀕𑁄 𑀅𑀬’’𑀦𑁆𑀢𑀺 𑀫𑀕𑁆𑀕𑀲𑀜𑁆𑀜𑀁 𑀉𑀧𑁆𑀧𑀸𑀤𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀧𑀜𑁆𑀜𑀧𑁂𑀢𑁆𑀯𑀸 𑀤𑁂𑀦𑁆𑀢𑀻𑀢𑀺 𑀇𑀤𑀁 𑀲𑀸𑀫𑀻𑀘𑀺𑀯𑀲𑁂𑀦 𑀯𑀼𑀢𑁆𑀢𑀁, 𑀢𑁂𑀳𑀺 𑀧𑀦 𑀆𑀲𑀦𑀁 𑀅𑀧𑀜𑁆𑀜𑀧𑁂𑀢𑁆𑀯𑀸𑀯 𑀦𑀺𑀲𑀻𑀤𑀣𑀸𑀢𑀺 𑀯𑀼𑀢𑁆𑀢𑁂 𑀲𑀬𑀫𑁂𑀯 𑀧𑀜𑁆𑀜𑀧𑁂𑀢𑁆𑀯𑀸 𑀦𑀺𑀲𑀻𑀤𑀺𑀢𑀼𑀫𑁆𑀧𑀺 𑀯𑀝𑁆𑀝𑀢𑀺. 𑀢𑀢𑁆𑀣𑀚𑀸𑀢𑀓𑀸𑀦𑀻𑀢𑀺 𑀅𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀪𑀽𑀢𑀕𑀸𑀫𑀪𑀸𑀯𑁂𑀦𑁂𑀯 𑀞𑀺𑀢𑀸𑀦𑀺. 𑀓𑀻𑀴𑀦𑁆𑀢𑁂𑀦𑀸𑀢𑀺 𑀯𑀼𑀢𑁆𑀢𑀢𑁆𑀢𑀸 𑀲𑀢𑀺 𑀧𑀘𑁆𑀘𑀬𑁂 𑀆𑀫𑀲𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀪𑀺𑀓𑁆𑀔𑀼𑀲𑀦𑁆𑀢𑀓𑀁 𑀧𑀦 𑀧𑀭𑀺𑀪𑁄𑀕𑀸𑀭𑀳𑀁 𑀲𑀩𑁆𑀩𑀣𑀸 𑀆𑀫𑀲𑀺𑀢𑀼𑀁 𑀦 𑀯𑀝𑁆𑀝𑀢𑀺 𑀤𑀼𑀭𑀼𑀧𑀘𑀺𑀡𑁆𑀡𑀢𑁆𑀢𑀸. 𑀅𑀦𑀼𑀧𑀲𑀫𑁆𑀧𑀦𑁆𑀦𑀸𑀦𑀁 𑀤𑀲𑁆𑀲𑀸𑀫𑀻𑀢𑀺 𑀇𑀤𑀁 𑀅𑀧𑁆𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀕𑀳𑀡𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀅𑀢𑁆𑀢𑀦𑁄𑀧𑀺 𑀅𑀢𑁆𑀣𑀸𑀬 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀕𑀳𑀡𑁂 𑀤𑁄𑀲𑁄 𑀦𑀢𑁆𑀣𑀺 𑀅𑀦𑀸𑀫𑀸𑀲𑀢𑁆𑀢𑀸𑀪𑀸𑀯𑀸.

𑀫𑀡𑀻𑀢𑀺 𑀯𑁂𑀴𑀼𑀭𑀺𑀬𑀸𑀤𑀺𑀢𑁄 𑀅𑀜𑁆𑀜𑁄 𑀚𑁄𑀢𑀺𑀭𑀲𑀸𑀤𑀺𑀪𑁂𑀤𑁄 𑀲𑀩𑁆𑀩𑁄𑀧𑀺 𑀫𑀡𑀺. 𑀯𑁂𑀴𑀼𑀭𑀺𑀬𑁄𑀢𑀺 𑀅𑀮𑁆𑀮𑀯𑁂𑀴𑀼𑀯𑀡𑁆𑀡𑁄𑀫𑀡𑀺, ‘‘𑀫𑀚𑁆𑀚𑀸𑀭𑀓𑁆𑀔𑀺 𑀫𑀡𑁆𑀟𑀮𑀯𑀡𑁆𑀡𑁄’’𑀢𑀺𑀧𑀺 𑀯𑀤𑀦𑁆𑀢𑀺. 𑀲𑀺𑀮𑀸𑀢𑀺 𑀫𑀼𑀕𑁆𑀕𑀫𑀸𑀲𑀯𑀡𑁆𑀡𑀸 𑀅𑀢𑀺𑀲𑀺𑀦𑀺𑀤𑁆𑀥𑀸 𑀓𑀸𑀴𑀲𑀺𑀮𑀸, 𑀫𑀡𑀺𑀯𑁄𑀳𑀸𑀭𑀁 𑀆𑀕𑀢𑀸 𑀭𑀢𑁆𑀢𑀲𑁂𑀢𑀸𑀤𑀺𑀯𑀡𑁆𑀡𑀸 𑀲𑀼𑀫𑀝𑁆𑀞𑀸𑀧𑀺 𑀲𑀺𑀮𑀸 𑀅𑀦𑀸𑀫𑀸𑀲𑀸 𑀏𑀯𑀸𑀢𑀺 𑀯𑀤𑀦𑁆𑀢𑀺. 𑀭𑀚𑀢𑀦𑁆𑀢𑀺 𑀓𑀳𑀸𑀧𑀡𑀫𑀸𑀲𑀸𑀤𑀺𑀪𑁂𑀤𑀁 𑀚𑀢𑀼𑀫𑀸𑀲𑀸𑀤𑀺𑀁 𑀉𑀧𑀸𑀤𑀸𑀬 𑀲𑀩𑁆𑀩𑀁 𑀯𑀼𑀢𑁆𑀢𑀸𑀯𑀲𑁂𑀲𑀁 𑀭𑀽𑀧𑀺𑀬𑀁 𑀕𑀳𑀺𑀢𑀁. 𑀮𑁄𑀳𑀺𑀢𑀗𑁆𑀓𑁄𑀢𑀺 𑀭𑀢𑁆𑀢𑀫𑀡𑀺. 𑀫𑀲𑀸𑀭𑀕𑀮𑁆𑀮𑀦𑁆𑀢𑀺 𑀓𑀩𑀭𑀯𑀡𑁆𑀡𑁄 𑀫𑀡𑀺, ‘‘𑀫𑀭𑀓𑀢’’𑀦𑁆𑀢𑀺𑀧𑀺 𑀯𑀤𑀦𑁆𑀢𑀺. 𑀪𑁂𑀲𑀚𑁆𑀚𑀢𑁆𑀣𑀸𑀬 𑀧𑀺𑀲𑀺𑀢𑁆𑀯𑀸 𑀬𑁄𑀚𑀺𑀢𑀸𑀦𑀁 𑀫𑀼𑀢𑁆𑀢𑀸𑀦𑀁 𑀭𑀢𑀦𑀪𑀸𑀯𑀯𑀺𑀭𑀳𑀢𑁄 𑀕𑀳𑀡𑀓𑁆𑀔𑀡𑁂𑀧𑀺 𑀭𑀢𑀦𑀸𑀓𑀸𑀭𑁂𑀦 𑀅𑀧𑁂𑀓𑁆𑀔𑀺𑀢𑀸𑀪𑀸𑀯𑀸 ‘‘𑀪𑁂𑀲𑀚𑁆𑀚𑀢𑁆𑀣𑀸𑀬 𑀧𑀦 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀁. 𑀬𑀸𑀯 𑀧𑀦 𑀢𑀸 𑀫𑀼𑀢𑁆𑀢𑀸 𑀭𑀢𑀦𑀭𑀽𑀧𑁂𑀦 𑀢𑀺𑀝𑁆𑀞𑀦𑁆𑀢𑀺, 𑀢𑀸𑀯 𑀆𑀫𑀲𑀺𑀢𑀼𑀁 𑀦 𑀯𑀝𑁆𑀝𑀢𑀺 𑀏𑀯. 𑀏𑀯𑀁 𑀅𑀜𑁆𑀜𑀫𑁆𑀧𑀺 𑀭𑀢𑀦𑀧𑀸𑀲𑀸𑀡𑀁 𑀧𑀺𑀲𑀺𑀢𑁆𑀯𑀸 𑀪𑁂𑀲𑀚𑁆𑀚𑁂 𑀬𑁄𑀚𑀦𑀢𑁆𑀣𑀸𑀬 𑀕𑀳𑁂𑀢𑀼𑀁 𑀯𑀝𑁆𑀝𑀢𑀺 𑀏𑀯, 𑀚𑀸𑀢𑀭𑀽𑀧𑀭𑀚𑀢𑀁 𑀧𑀦 𑀧𑀺𑀲𑀺𑀢𑁆𑀯𑀸 𑀬𑁄𑀚𑀦𑀪𑁂𑀲𑀚𑁆𑀚𑀢𑁆𑀣𑀸𑀬𑀧𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀁 𑀦 𑀯𑀝𑁆𑀝𑀢𑀺, 𑀕𑀳𑀝𑁆𑀞𑁂𑀳𑀺 𑀬𑁄𑀚𑁂𑀢𑁆𑀯𑀸 𑀤𑀺𑀦𑁆𑀦𑀫𑁆𑀧𑀺 𑀬𑀤𑀺 𑀪𑁂𑀲𑀚𑁆𑀚𑁂 𑀲𑀼𑀯𑀡𑁆𑀡𑀸𑀤𑀺𑀭𑀽𑀧𑁂𑀦 𑀢𑀺𑀝𑁆𑀞𑀢𑀺, 𑀯𑀺𑀬𑁄𑀚𑁂𑀢𑀼𑀜𑁆𑀘 𑀲𑀓𑁆𑀓𑀸, 𑀢𑀸𑀤𑀺𑀲𑀁 𑀪𑁂𑀲𑀚𑁆𑀚𑀫𑁆𑀧𑀺 𑀦 𑀯𑀝𑁆𑀝𑀢𑀺. 𑀢𑀁 𑀅𑀩𑁆𑀩𑁄𑀳𑀸𑀭𑀺𑀓𑀢𑁆𑀢𑀁 𑀕𑀢𑀁 𑀘𑁂, 𑀯𑀝𑁆𑀝𑀢𑀺. ‘‘𑀚𑀸𑀢𑀺𑀨𑀮𑀺𑀓𑀁 𑀉𑀧𑀸𑀤𑀸𑀬𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸, 𑀲𑀽𑀭𑀺𑀬𑀓𑀦𑁆𑀢𑀘𑀦𑁆𑀤𑀓𑀦𑁆𑀢𑀸𑀤𑀺𑀓𑀁 𑀚𑀸𑀢𑀺𑀧𑀸𑀲𑀸𑀡𑀁 𑀫𑀡𑀺𑀫𑁆𑀳𑀺 𑀏𑀯 𑀲𑀗𑁆𑀕𑀳𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀥𑀫𑀦𑀲𑀗𑁆𑀔𑁄 𑀘 𑀥𑁄𑀢𑀯𑀺𑀤𑁆𑀥𑁄 𑀘 𑀭𑀢𑀦𑀫𑀺𑀲𑁆𑀲𑁄 𑀘𑀸𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀯𑀺𑀤𑁆𑀥𑁄𑀢𑀺 𑀫𑀡𑀺𑀆𑀤𑀺𑀪𑀸𑀯𑁂𑀦 𑀓𑀢𑀙𑀺𑀤𑁆𑀤𑁄.

𑀭𑀢𑀦𑀫𑀺𑀲𑁆𑀲𑁄𑀢𑀺 𑀓𑀜𑁆𑀘𑀦𑀮𑀢𑀸𑀤𑀺𑀯𑀺𑀘𑀺𑀢𑁆𑀢𑁄, 𑀫𑀼𑀢𑁆𑀢𑀸𑀤𑀺𑀭𑀢𑀦𑀔𑀘𑀺𑀢𑁄 𑀘, 𑀏𑀢𑁂𑀦 𑀥𑀫𑀦𑀲𑀗𑁆𑀔𑀢𑁄 𑀅𑀜𑁆𑀜𑁄 𑀭𑀢𑀦𑀫𑀺𑀲𑁆𑀲𑁄𑀯 𑀅𑀦𑀸𑀫𑀸𑀲𑁄𑀢𑀺 𑀤𑀲𑁆𑀲𑁂𑀢𑀺. 𑀲𑀺𑀮𑀸𑀬𑀫𑁆𑀧𑀺 𑀏𑀲𑁂𑀯 𑀦𑀬𑁄. 𑀧𑀸𑀦𑀻𑀬𑀲𑀗𑁆𑀔𑁄𑀢𑀺 𑀇𑀫𑀺𑀦𑀸𑀯 𑀣𑀸𑀮𑀓𑀸𑀤𑀺𑀆𑀓𑀸𑀭𑁂𑀦 𑀓𑀢𑀲𑀗𑁆𑀔𑀫𑀬𑀪𑀸𑀚𑀦𑀸𑀦𑀺 𑀪𑀺𑀓𑁆𑀔𑀽𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀲𑀺𑀤𑁆𑀥𑀁. 𑀲𑁂𑀲𑀸𑀢𑀺 𑀭𑀢𑀦𑀲𑀁𑀬𑀼𑀢𑁆𑀢𑀁 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀸.

𑀩𑀻𑀚𑀢𑁄 𑀧𑀝𑁆𑀞𑀸𑀬𑀸𑀢𑀺 𑀥𑀸𑀢𑀼𑀧𑀸𑀲𑀸𑀡𑀢𑁄 𑀧𑀝𑁆𑀞𑀸𑀬. 𑀧𑀝𑀺𑀓𑁆𑀔𑀺𑀧𑀻𑀢𑀺 𑀲𑀼𑀯𑀡𑁆𑀡𑀫𑀬𑀥𑀸𑀢𑀼𑀓𑀭𑀡𑁆𑀟𑀓𑀲𑁆𑀲, 𑀩𑀼𑀤𑁆𑀥𑀭𑀽𑀧𑀸𑀤𑀺𑀲𑁆𑀲 𑀘 𑀅𑀢𑁆𑀢𑀦𑁄 𑀲𑀦𑁆𑀢𑀓𑀓𑀭𑀡𑁂 𑀦𑀺𑀲𑁆𑀲𑀕𑁆𑀕𑀺𑀬𑀢𑁆𑀢𑀸 𑀯𑀼𑀢𑁆𑀢𑀁. ‘‘𑀭𑀽𑀧𑀺𑀬𑀙𑀟𑁆𑀟𑀓𑀝𑁆𑀞𑀸𑀦𑁂’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀭𑀽𑀧𑀺𑀬𑀙𑀟𑁆𑀟𑀓𑀲𑁆𑀲 𑀚𑀸𑀢𑀭𑀽𑀧𑀭𑀚𑀢𑀁 𑀆𑀫𑀲𑀺𑀢𑁆𑀯𑀸 𑀙𑀟𑁆𑀟𑁂𑀢𑀼𑀁 𑀯𑀝𑁆𑀝𑀢𑀻𑀢𑀺 𑀲𑀺𑀤𑁆𑀥𑀁. 𑀓𑁂𑀴𑀸𑀧𑀬𑀺𑀢𑀼𑀦𑁆𑀢𑀺 𑀆𑀫𑀲𑀺𑀢𑁆𑀯𑀸 𑀇𑀢𑁄 𑀘𑀺𑀢𑁄 𑀘 𑀲𑀜𑁆𑀘𑀸𑀭𑁂𑀢𑀼𑀁. 𑀯𑀼𑀢𑁆𑀢𑀦𑁆𑀢𑀺 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁. 𑀓𑀘𑀯𑀭𑀫𑁂𑀯 𑀳𑀭𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀕𑁄𑀧𑀓𑀸 𑀯𑀸 𑀳𑁄𑀦𑁆𑀢𑀼 𑀅𑀜𑁆𑀜𑁂 𑀯𑀸, 𑀳𑀢𑁆𑀣𑁂𑀦 𑀧𑀼𑀜𑁆𑀙𑀺𑀢𑁆𑀯𑀸 𑀓𑀘𑀯𑀭𑀁 𑀅𑀧𑀦𑁂𑀢𑀼𑀁 𑀯𑀝𑁆𑀝𑀢𑀺, 𑀫𑀮𑀫𑁆𑀧𑀺 𑀧𑀫𑀚𑁆𑀚𑀺𑀢𑀼𑀁 𑀯𑀝𑁆𑀝𑀢𑀺 𑀏𑀯𑀸𑀢𑀺 𑀯𑀤𑀦𑁆𑀢𑀺, 𑀢𑀁 𑀅𑀝𑁆𑀞𑀓𑀣𑀸𑀬 𑀦 𑀲𑀫𑁂𑀢𑀺 𑀓𑁂𑀴𑀸𑀬𑀦𑀲𑀤𑀺𑀲𑀢𑁆𑀢𑀸. 𑀆𑀭𑀓𑀽𑀝𑀮𑁄𑀳𑀦𑁆𑀢𑀺 𑀲𑀼𑀯𑀡𑁆𑀡𑀯𑀡𑁆𑀡𑁄 𑀓𑀺𑀢𑁆𑀢𑀺𑀫𑀮𑁄𑀳𑀯𑀺𑀲𑁂𑀲𑁄. 𑀢𑀺𑀯𑀺𑀥𑀜𑁆𑀳𑀺 𑀓𑀺𑀢𑁆𑀢𑀺𑀫𑀮𑁄𑀳𑀁 𑀓𑀁𑀲𑀮𑁄𑀳𑀁 𑀯𑀝𑁆𑀝𑀮𑁄𑀳𑀁 𑀳𑀸𑀭𑀓𑀽𑀝𑀮𑁄𑀳𑀦𑁆𑀢𑀺. 𑀢𑀢𑁆𑀣 𑀢𑀺𑀧𑀼𑀢𑀫𑁆𑀩𑁂 𑀫𑀺𑀲𑁆𑀲𑁂𑀢𑁆𑀯𑀸 𑀓𑀢𑀁 𑀓𑀁𑀲𑀮𑁄𑀳𑀁 𑀦𑀸𑀫. 𑀲𑀻𑀲𑀢𑀫𑁆𑀩𑁂 𑀫𑀺𑀲𑁆𑀲𑁂𑀢𑁆𑀯𑀸 𑀓𑀢𑀁 𑀯𑀝𑁆𑀝𑀮𑁄𑀳𑀁. 𑀭𑀲𑀢𑀫𑁆𑀩𑁂 𑀫𑀺𑀲𑁆𑀲𑁂𑀢𑁆𑀯𑀸 𑀓𑀢𑀁 𑀳𑀸𑀭𑀓𑀽𑀝𑀮𑁄𑀳𑀁 𑀦𑀸𑀫. 𑀢𑀁 𑀧𑀦 ‘‘𑀚𑀸𑀢𑀭𑀽𑀧𑀕𑀢𑀺𑀓’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 𑀉𑀕𑁆𑀕𑀡𑁆𑀳𑀢𑁄 𑀦𑀺𑀲𑁆𑀲𑀕𑁆𑀕𑀺𑀬𑀫𑁆𑀧𑀺 𑀳𑁄𑀢𑀻𑀢𑀺 𑀓𑁂𑀘𑀺 𑀯𑀤𑀦𑁆𑀢𑀺. 𑀭𑀽𑀧𑀺𑀬𑁂𑀲𑀼 𑀧𑀦 𑀅𑀕𑀡𑀺𑀢𑀢𑁆𑀢𑀸 𑀦𑀺𑀲𑁆𑀲𑀕𑁆𑀕𑀺𑀬𑀁 𑀦 𑀳𑁄𑀢𑀺, 𑀆𑀫𑀲𑀦𑁂, 𑀲𑀫𑁆𑀧𑀝𑀺𑀘𑁆𑀙𑀦𑁂 𑀘 𑀤𑀼𑀓𑁆𑀓𑀝𑀫𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑀩𑁆𑀩𑀓𑀧𑁆𑀧𑀺𑀬𑁄𑀢𑀺 𑀬𑀣𑀸𑀯𑀼𑀢𑁆𑀢𑀲𑀼𑀯𑀡𑁆𑀡𑀸𑀤𑀺𑀫𑀬𑀸𑀦𑀁 𑀲𑁂𑀦𑀸𑀲𑀦𑀧𑀭𑀺𑀓𑁆𑀔𑀸𑀭𑀸𑀦𑀁 𑀆𑀫𑀲𑀦𑀕𑁄𑀧𑀦𑀸𑀤𑀺𑀯𑀲𑁂𑀦 𑀧𑀭𑀺𑀪𑁄𑀕𑁄 𑀲𑀩𑁆𑀩𑀣𑀸 𑀓𑀧𑁆𑀧𑀺𑀬𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑀸𑀳 ‘‘𑀢𑀲𑁆𑀫𑀸’’𑀢𑀺𑀆𑀤𑀺. ‘‘𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀯𑀺𑀦𑀬𑀯𑀡𑁆𑀡𑀦𑀝𑁆𑀞𑀸𑀦𑁂’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀲𑀗𑁆𑀖𑀺𑀓𑀫𑁂𑀯 𑀲𑀼𑀯𑀡𑁆𑀡𑀸𑀤𑀺𑀫𑀬𑀁 𑀲𑁂𑀦𑀸𑀲𑀦𑀁, 𑀲𑁂𑀦𑀸𑀲𑀦𑀧𑀭𑀺𑀓𑁆𑀔𑀸𑀭𑀸 𑀘 𑀯𑀝𑁆𑀝𑀦𑁆𑀢𑀺, 𑀦 𑀧𑀼𑀕𑁆𑀕𑀮𑀺𑀓𑀸𑀦𑀻𑀢𑀺 𑀕𑀳𑁂𑀢𑀩𑁆𑀩𑀁.

𑀪𑀺𑀦𑁆𑀤𑀺𑀢𑁆𑀯𑀸𑀢𑀺 𑀧𑀞𑀫𑀫𑁂𑀯 𑀅𑀦𑀸𑀫𑀲𑀺𑀢𑁆𑀯𑀸 𑀧𑀸𑀲𑀸𑀡𑀸𑀤𑀺𑀦𑀸 𑀓𑀺𑀜𑁆𑀘𑀺𑀫𑀢𑁆𑀢𑀁 𑀪𑁂𑀤𑀁 𑀓𑀢𑁆𑀯𑀸 𑀧𑀘𑁆𑀙𑀸 𑀓𑀧𑁆𑀧𑀺𑀬𑀪𑀡𑁆𑀟𑀢𑁆𑀣𑀸𑀬 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀳𑀢𑁆𑀣𑁂𑀦 𑀕𑀳𑁂𑀢𑀼𑀁 𑀯𑀝𑁆𑀝𑀢𑀺. 𑀢𑁂𑀦𑀸𑀳 ‘‘𑀓𑀧𑁆𑀧𑀺𑀬𑀪𑀡𑁆𑀟𑀁 𑀓𑀭𑀺𑀲𑁆𑀲𑀸𑀫𑀻𑀢𑀺 𑀲𑀩𑁆𑀩𑀫𑁆𑀧𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺. 𑀏𑀢𑁆𑀣𑀸𑀧𑀺 𑀓𑀺𑀜𑁆𑀘𑀺 𑀪𑀺𑀦𑁆𑀤𑀺𑀢𑁆𑀯𑀸, 𑀯𑀺𑀬𑁄𑀚𑁂𑀢𑁆𑀯𑀸 𑀯𑀸 𑀆𑀫𑀲𑀺𑀢𑀩𑁆𑀩.

𑀨𑀮𑀓𑀚𑀸𑀮𑀺𑀓𑀸𑀤𑀻𑀦𑀻𑀢𑀺 𑀏𑀢𑁆𑀣 𑀲𑀭𑀧𑀭𑀺𑀢𑁆𑀢𑀸𑀡𑀸𑀬 𑀳𑀢𑁆𑀣𑁂𑀦 𑀕𑀳𑁂𑀢𑀩𑁆𑀩𑀁 𑀓𑀺𑀝𑀺𑀓𑀸𑀨𑀮𑀓𑀁 𑀅𑀓𑁆𑀔𑀺𑀭𑀓𑁆𑀔𑀡𑀢𑁆𑀣𑀸𑀬 𑀅𑀬𑀮𑁄𑀳𑀸𑀤𑀻𑀳𑀺 𑀚𑀸𑀮𑀸𑀓𑀸𑀭𑁂𑀦 𑀓𑀢𑁆𑀯𑀸 𑀲𑀻𑀲𑀸𑀤𑀻𑀲𑀼 𑀧𑀝𑀺𑀫𑀼𑀜𑁆𑀘𑀺𑀢𑀩𑁆𑀩𑀁 𑀚𑀸𑀮𑀺𑀓𑀁 𑀦𑀸𑀫. 𑀆𑀤𑀺-𑀲𑀤𑁆𑀤𑁂𑀦 𑀓𑀯𑀘𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀅𑀦𑀸𑀫𑀸𑀲𑀸𑀦𑀻𑀢𑀺 𑀫𑀘𑁆𑀙𑀚𑀸𑀮𑀸𑀤𑀺𑀧𑀭𑀽𑀧𑀭𑁄𑀥𑀓𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀦 𑀲𑀭𑀧𑀭𑀺𑀢𑁆𑀢𑀸𑀡𑀁 𑀢𑀲𑁆𑀲 𑀆𑀯𑀼𑀥𑀪𑀡𑁆𑀟𑀢𑁆𑀢𑀸𑀪𑀸𑀯𑀸. 𑀢𑁂𑀦𑁂𑀯 𑀯𑀓𑁆𑀔𑀢𑀺 ‘‘𑀧𑀭𑀽𑀧𑀭𑁄𑀥𑀦𑀺𑀯𑀸𑀭𑀡𑀁 𑀳𑀻’’𑀢𑀺𑀆𑀤𑀺. 𑀆𑀲𑀦𑀲𑁆𑀲𑀸𑀢𑀺 𑀘𑁂𑀢𑀺𑀬𑀲𑁆𑀲 𑀲𑀫𑀦𑁆𑀢𑀸 𑀓𑀢𑀧𑀭𑀺𑀪𑀡𑁆𑀟𑀲𑁆𑀲. 𑀩𑀦𑁆𑀥𑀺𑀲𑁆𑀲𑀸𑀫𑀻𑀢𑀺 𑀓𑀸𑀓𑀸𑀤𑀻𑀳𑀺 𑀅𑀤𑀽𑀲𑀦𑀢𑁆𑀣𑀸𑀬 𑀩𑀦𑁆𑀥𑀺𑀲𑁆𑀲𑀸𑀫𑀺.

‘‘𑀪𑁂𑀭𑀺𑀲𑀗𑁆𑀖𑀸𑀝𑁄𑀢𑀺 𑀲𑀗𑁆𑀖𑀝𑀺𑀢𑀘𑀫𑁆𑀫𑀪𑁂𑀭𑀻. 𑀯𑀻𑀡𑀸𑀲𑀗𑁆𑀖𑀸𑀝𑁄𑀢𑀺 𑀲𑀗𑁆𑀖𑀝𑀺𑀢𑀘𑀫𑁆𑀫𑀯𑀻𑀡𑀸’’𑀢𑀺 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 (𑀲𑀸𑀭𑀢𑁆𑀣. 𑀝𑀻. 𑁨.𑁨𑁮𑁧) 𑀯𑀼𑀢𑁆𑀢𑀁. ‘‘𑀘𑀫𑁆𑀫𑀯𑀺𑀦𑀤𑁆𑀥𑀸𑀦𑀺 𑀯𑀻𑀡𑀸𑀪𑁂𑀭𑀺𑀆𑀤𑀻𑀦𑀻’’𑀢𑀺 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀯𑀘𑀦𑀢𑁄 𑀯𑀺𑀲𑁂𑀲𑀸𑀪𑀸𑀯𑀸, ‘‘𑀓𑀼𑀭𑀼𑀦𑁆𑀤𑀺𑀬𑀁 𑀧𑀦𑀸’’𑀢𑀺𑀆𑀤𑀺𑀦𑀸 𑀢𑀢𑁄 𑀯𑀺𑀲𑁂𑀲𑀲𑁆𑀲 𑀯𑀢𑁆𑀢𑀼𑀫𑀸𑀭𑀤𑁆𑀥𑀢𑁆𑀢𑀸 𑀘 𑀪𑁂𑀭𑀺𑀆𑀤𑀻𑀦𑀁 𑀯𑀺𑀦𑀤𑁆𑀥𑀦𑁄𑀧𑀓𑀭𑀡𑀲𑀫𑀽𑀳𑁄 𑀪𑁂𑀭𑀺𑀯𑀻𑀡𑀸𑀲𑀗𑁆𑀖𑀸𑀝𑁄𑀢𑀺 𑀯𑁂𑀤𑀺𑀢𑀩𑁆𑀩𑀁 𑀲𑀗𑁆𑀖𑀝𑀺𑀢𑀩𑁆𑀩𑁄𑀢𑀺 𑀲𑀗𑁆𑀖𑀸𑀝𑁄𑀢𑀺 𑀓𑀢𑁆𑀯𑀸. 𑀢𑀼𑀘𑁆𑀙𑀧𑁄𑀓𑁆𑀔𑀭𑀦𑁆𑀢𑀺 𑀅𑀯𑀺𑀦𑀤𑁆𑀥𑀘𑀫𑁆𑀫𑀪𑁂𑀭𑀺𑀯𑀻𑀡𑀸𑀦𑀁 𑀧𑁄𑀓𑁆𑀔𑀭𑀁. 𑀆𑀭𑁄𑀧𑀺𑀢𑀘𑀫𑁆𑀫𑀦𑁆𑀢𑀺 𑀧𑀼𑀩𑁆𑀩𑁂 𑀆𑀭𑁄𑀧𑀺𑀢𑀁 𑀳𑀼𑀢𑁆𑀯𑀸 𑀧𑀘𑁆𑀙𑀸 𑀢𑀢𑁄 𑀅𑀧𑀦𑁂𑀢𑁆𑀯𑀸 𑀯𑀺𑀲𑀼𑀁 𑀞𑀧𑀺𑀢𑀫𑀼𑀔𑀘𑀫𑁆𑀫𑀫𑀢𑁆𑀢𑀁, 𑀦 𑀲𑁂𑀲𑁄𑀧𑀓𑀭𑀡𑀲𑀳𑀺𑀢𑀁. 𑀲𑀳𑀺𑀢𑀁 𑀧𑀦 𑀲𑀗𑁆𑀖𑀸𑀝𑁄𑀢𑀺 𑀅𑀬𑀁 𑀯𑀺𑀲𑁂𑀲𑁄. 𑀑𑀦𑀳𑀺𑀢𑀼𑀦𑁆𑀢𑀺 𑀪𑁂𑀭𑀺𑀧𑁄𑀓𑁆𑀔𑀭𑀸𑀤𑀻𑀦𑀺 𑀘𑀫𑁆𑀫𑀁 𑀆𑀭𑁄𑀧𑁂𑀢𑁆𑀯𑀸 𑀘𑀫𑁆𑀫𑀯𑀝𑁆𑀝𑀺𑀆𑀤𑀻𑀳𑀺 𑀲𑀩𑁆𑀩𑁂𑀳𑀺 𑀉𑀧𑀓𑀭𑀡𑁂𑀳𑀺 𑀯𑀺𑀦𑀦𑁆𑀥𑀺𑀢𑀼𑀁.

𑀧𑀸𑀴𑀺𑀬𑀁 𑀧𑀡𑁆𑀟𑀓𑀲𑁆𑀲𑀸𑀢𑀺 𑀧𑀡𑁆𑀟𑀓𑁂𑀦. 𑀧𑀸𑀭𑀸𑀚𑀺𑀓𑀧𑁆𑀧𑀳𑁄𑀦𑀓𑀓𑀸𑀮𑁂𑀢𑀺 𑀅𑀓𑀼𑀣𑀺𑀢𑀓𑀸𑀮𑁂. 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑀸𑀤𑀺𑀪𑀸𑀯𑁂 𑀲𑀩𑁆𑀩𑀸𑀯𑀢𑁆𑀣𑀸𑀬𑀧𑀺 𑀇𑀢𑁆𑀣𑀺𑀬𑀸 𑀲𑀡𑁆𑀞𑀸𑀦𑁂 𑀧𑀜𑁆𑀜𑀸𑀬𑀫𑀸𑀦𑁂 𑀅𑀦𑀸𑀫𑀸𑀲𑀤𑀼𑀓𑁆𑀓𑀝𑀁 𑀦 𑀯𑀺𑀕𑀘𑁆𑀙𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀲𑀗𑁆𑀓𑀫𑀸𑀤𑀻𑀦𑀁 𑀞𑀸𑀦𑀸𑀘𑀸𑀯𑀦𑀯𑀲𑁂𑀦 𑀅𑀘𑀸𑀮𑁂𑀢𑀩𑁆𑀩𑀢𑀸𑀬 𑀦 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑀯𑁄𑀳𑀸𑀭𑁄𑀢𑀺 𑀤𑀼𑀓𑁆𑀓𑀝𑀁 𑀯𑀼𑀢𑁆𑀢𑀁.

𑁨𑁮𑁨. 𑀏𑀓𑀧𑀤𑀺𑀓𑀲𑀗𑁆𑀓𑀫𑁄𑀢𑀺 𑀢𑀦𑀼𑀓𑀲𑁂𑀢𑀼. ‘‘𑀆𑀯𑀺𑀜𑁆𑀙𑀦𑁆𑀢𑁄’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀘𑀸𑀮𑁂𑀢𑀼𑀁 𑀬𑀼𑀢𑁆𑀢𑀸𑀬 𑀏𑀯 𑀭𑀚𑁆𑀚𑀼𑀬𑀸 𑀣𑀼𑀮𑁆𑀮𑀘𑁆𑀘𑀬𑀁, 𑀦 𑀇𑀢𑀭𑀸𑀬 𑀪𑀺𑀢𑁆𑀢𑀺𑀣𑀫𑁆𑀪𑀸𑀤𑀺𑀕𑀢𑀺𑀓𑀢𑁆𑀢𑀸𑀢𑀺 𑀆𑀳 ‘‘𑀬𑀸 𑀫𑀳𑀸𑀭𑀚𑁆𑀚𑀼 𑀳𑁄𑀢𑀻’’𑀢𑀺𑀆𑀤𑀺. 𑀢𑁂𑀦 𑀘𑀸𑀮𑁂𑀢𑀼𑀁 𑀬𑀼𑀢𑁆𑀢𑁂 𑀢𑀦𑀼𑀓𑀭𑀚𑁆𑀚𑀼𑀤𑀡𑁆𑀟𑀓𑁂 𑀅𑀘𑀸𑀮𑁂𑀢𑁆𑀯𑀸 𑀨𑀼𑀲𑀦𑁆𑀢𑀲𑁆𑀲𑀸𑀧𑀺 𑀣𑀼𑀮𑁆𑀮𑀘𑁆𑀘𑀬𑀫𑁂𑀯𑀸𑀢𑀺 𑀤𑀻𑀧𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀧𑀝𑀺𑀘𑁆𑀙𑀸𑀤𑁂𑀢𑀩𑁆𑀩𑀸𑀢𑀺 𑀙𑀸𑀤𑀦𑀸𑀤𑀺𑀯𑀲𑁂𑀦 𑀕𑀽𑀳𑀺𑀢𑀩𑁆𑀩𑀸. 𑀫𑀦𑀼𑀲𑁆𑀲𑀺𑀢𑁆𑀣𑀻, 𑀫𑀦𑀼𑀲𑁆𑀲𑀺𑀢𑁆𑀣𑀺𑀲𑀜𑁆𑀜𑀺𑀢𑀸, 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁄, 𑀯𑀸𑀬𑀸𑀫𑁄, 𑀢𑁂𑀦 𑀳𑀢𑁆𑀣𑀸𑀤𑀻𑀲𑀼 𑀨𑀼𑀲𑀦𑀦𑁆𑀢𑀺 𑀇𑀫𑀸𑀦𑁂𑀢𑁆𑀣 𑀧𑀜𑁆𑀘 𑀅𑀗𑁆𑀕𑀸𑀦𑀺.

𑀓𑀸𑀬𑀲𑀁𑀲𑀕𑁆𑀕𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.