𑁩. 𑀢𑀢𑀺𑀬𑀧𑀸𑀭𑀸𑀚𑀺𑀓𑀁

𑀢𑀻𑀳𑀻𑀢𑀺 𑀓𑀸𑀬𑀯𑀘𑀻𑀫𑀦𑁄𑀤𑁆𑀯𑀸𑀭𑁂𑀳𑀺.

𑀧𑀞𑀫𑀧𑀜𑁆𑀜𑀢𑁆𑀢𑀺𑀦𑀺𑀤𑀸𑀦𑀯𑀡𑁆𑀡𑀦𑀸

𑁧𑁬𑁨. 𑀬𑀸 𑀅𑀬𑀁 𑀳𑁂𑀝𑁆𑀞𑀸 𑀢𑀁 𑀧𑀦𑁂𑀢𑀁 𑀩𑀼𑀤𑁆𑀥𑀓𑀸𑀮𑁂 𑀘 𑀘𑀓𑁆𑀓𑀯𑀢𑁆𑀢𑀺𑀓𑀸𑀮𑁂 𑀘 𑀦𑀕𑀭𑀁 𑀳𑁄𑀢𑀻𑀢𑀺𑀆𑀤𑀺𑀦𑀸 (𑀧𑀸𑀭𑀸. 𑀅𑀝𑁆𑀞. 𑁧.𑁮𑁪) 𑀭𑀸𑀚𑀕𑀳𑀲𑁆𑀲 𑀩𑀼𑀤𑁆𑀥𑀼𑀧𑁆𑀧𑀸𑀤𑁂𑀬𑁂𑀯 𑀯𑁂𑀧𑀼𑀮𑁆𑀮𑀧𑁆𑀧𑀢𑁆𑀢𑀺 𑀯𑀼𑀢𑁆𑀢𑀸, 𑀲𑀸 𑀏𑀢𑁆𑀣𑀸𑀧𑀺 𑀲𑀫𑀸𑀦𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀇𑀤𑀫𑁆𑀧𑀺 𑀘 𑀦𑀕𑀭’’𑀦𑁆𑀢𑀺 𑀯𑀼𑀢𑁆𑀢𑀁, 𑀢𑁂𑀦 𑀘 𑀦 𑀓𑁂𑀯𑀮𑀁 𑀭𑀸𑀚𑀕𑀳𑀸𑀤𑀬𑁄 𑀏𑀯𑀸𑀢𑀺 𑀤𑀲𑁆𑀲𑁂𑀢𑀺. 𑀫𑀳𑀸𑀯𑀦𑀁 𑀦𑀸𑀫𑀸𑀢𑀺𑀆𑀤𑀺 𑀫𑀚𑁆𑀛𑀺𑀫𑀪𑀸𑀡𑀓𑀲𑀁𑀬𑀼𑀢𑁆𑀢𑀪𑀸𑀡𑀓𑀸𑀦𑀁 𑀫𑀢𑁂𑀦 𑀯𑀼𑀢𑁆𑀢𑀁, 𑀤𑀻𑀖𑀪𑀸𑀡𑀓𑀸 𑀧𑀦 ‘‘𑀳𑀺𑀫𑀯𑀦𑁆𑀢𑁂𑀦 𑀲𑀤𑁆𑀥𑀺𑀁 𑀏𑀓𑀸𑀩𑀤𑁆𑀥𑀁 𑀳𑀼𑀢𑁆𑀯𑀸 𑀞𑀺𑀢𑀁 𑀫𑀳𑀸𑀯𑀦’’𑀦𑁆𑀢𑀺 𑀯𑀤𑀦𑁆𑀢𑀺. 𑀳𑀁𑀲𑀯𑀝𑁆𑀝𑀓𑀘𑁆𑀙𑀤𑀦𑁂𑀦𑀸𑀢𑀺 𑀳𑀁𑀲𑀯𑀝𑁆𑀝𑀓𑀧𑀝𑀺𑀘𑁆𑀙𑀦𑁆𑀦𑁂𑀦, 𑀳𑀁𑀲𑀫𑀡𑁆𑀟𑀮𑀸𑀓𑀸𑀭𑁂𑀦𑀸𑀢𑀺 𑀅𑀢𑁆𑀣𑁄. 𑀓𑀸𑀬𑀯𑀺𑀘𑁆𑀙𑀦𑁆𑀤𑀦𑀺𑀬𑀓𑀣𑀦𑁆𑀢𑀺 𑀓𑀭𑀚𑀓𑀸𑀬𑁂 𑀯𑀺𑀭𑀸𑀕𑀼𑀧𑁆𑀧𑀸𑀤𑀦𑀓𑀣𑀁. 𑀙𑀦𑁆𑀤𑁄𑀢𑀺 𑀤𑀼𑀩𑁆𑀩𑀮𑀭𑀸𑀕𑁄. 𑀭𑀸𑀕𑁄𑀢𑀺 𑀩𑀮𑀯𑀭𑀸𑀕𑁄. ‘‘𑀓𑁂𑀲𑀮𑁄𑀫𑀸𑀤𑀺’’𑀦𑁆𑀢𑀺 𑀲𑀗𑁆𑀔𑁂𑀧𑀢𑁄 𑀯𑀼𑀢𑁆𑀢𑀫𑀢𑁆𑀣𑀁 𑀯𑀺𑀪𑀸𑀕𑁂𑀦 𑀤𑀲𑁆𑀲𑁂𑀢𑀼𑀁 𑀬𑁂𑀧𑀺 𑀳𑀻𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀜𑁆𑀘𑀧𑀜𑁆𑀘𑀧𑁆𑀧𑀪𑁂𑀤𑁂𑀦𑀸𑀢𑀺 𑀏𑀢𑁆𑀣 𑀧𑀜𑁆𑀘 𑀧𑀜𑁆𑀘 𑀧𑀪𑁂𑀤𑀸 𑀏𑀢𑀲𑁆𑀲 𑀧𑀭𑀺𑀬𑀸𑀬𑀲𑁆𑀲𑀸𑀢𑀺 𑀧𑀜𑁆𑀘𑀧𑀜𑁆𑀘𑀧𑁆𑀧𑀪𑁂𑀤𑁄, 𑀢𑁂𑀦 𑀧𑀜𑁆𑀘𑀧𑀜𑁆𑀘𑀧𑁆𑀧𑀪𑁂𑀤𑁂𑀦𑀸𑀢𑀺 𑀏𑀯𑀁 𑀩𑀸𑀳𑀺𑀭𑀢𑁆𑀣𑀲𑀫𑀸𑀲𑀯𑀲𑁂𑀦 𑀧𑀭𑀺𑀬𑀸𑀬𑀯𑀺𑀲𑁂𑀲𑀦𑀢𑀸 𑀤𑀝𑁆𑀞𑀩𑁆𑀩𑀸.

𑀅𑀲𑀼𑀪𑀸𑀬𑀸𑀢𑀺 𑀅𑀲𑀼𑀪𑀫𑀸𑀢𑀺𑀓𑀸𑀬. 𑀯𑀡𑁆𑀡𑁂𑀢𑀩𑁆𑀩𑀫𑀸𑀢𑀺𑀓𑀜𑁆𑀳𑀺 𑀅𑀧𑁂𑀓𑁆𑀔𑀺𑀢𑁆𑀯𑀸 𑀇𑀢𑁆𑀣𑀺𑀮𑀺𑀗𑁆𑀕𑁂 𑀲𑀸𑀫𑀺𑀯𑀘𑀦𑀁, 𑀢𑁂𑀦𑀸𑀳 𑀫𑀸𑀢𑀺𑀓𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸𑀢𑀺𑀆𑀤𑀺. 𑀢𑀁 𑀯𑀺𑀪𑀚𑀦𑁆𑀢𑁄𑀢𑀺 𑀫𑀸𑀢𑀺𑀓𑀁 𑀯𑀺𑀪𑀚𑀦𑁆𑀢𑁄. 𑀨𑀸𑀢𑀺𑀓𑀫𑁆𑀫𑀦𑁆𑀢𑀺 𑀦𑀺𑀧𑁆𑀨𑀢𑁆𑀢𑀺𑀓𑀭𑀡𑀁. 𑀧𑀜𑁆𑀘𑀗𑁆𑀕𑀯𑀺𑀧𑁆𑀧𑀳𑀻𑀦𑀦𑁆𑀢𑀺 𑀓𑀸𑀫𑀘𑁆𑀙𑀦𑁆𑀤𑀸𑀤𑀺𑀧𑀜𑁆𑀘𑀦𑀻𑀯𑀭𑀡𑀗𑁆𑀕𑀯𑀺𑀕𑀫𑁂𑀦 𑀧𑀜𑁆𑀘𑀗𑁆𑀕𑀯𑀺𑀧𑁆𑀧𑀳𑀻𑀦𑀢𑀸, 𑀅𑀧𑁆𑀧𑀦𑀸𑀧𑁆𑀧𑀢𑁆𑀢𑀯𑀺𑀢𑀓𑁆𑀓𑀸𑀤𑀺𑀚𑁆𑀛𑀸𑀦𑀗𑁆𑀕𑀸𑀦𑀁 𑀉𑀧𑁆𑀧𑀢𑁆𑀢𑀺𑀯𑀲𑁂𑀦 𑀧𑀜𑁆𑀘𑀗𑁆𑀕𑀲𑀫𑀦𑁆𑀦𑀸𑀕𑀢𑀢𑀸 𑀘 𑀯𑁂𑀤𑀺𑀢𑀩𑁆𑀩𑀸. 𑀢𑀺𑀯𑀺𑀥𑀓𑀮𑁆𑀬𑀸𑀡𑀁 𑀤𑀲𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑀦𑁆𑀢𑀺 𑀏𑀢𑁆𑀣 𑀧𑀦 𑀛𑀸𑀦𑀲𑁆𑀲 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀸𑀦𑀁 𑀯𑀲𑁂𑀦 𑀢𑀺𑀯𑀺𑀥𑀓𑀮𑁆𑀬𑀸𑀡𑀢𑀸, 𑀢𑁂𑀲𑀁𑀬𑁂𑀯 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀸𑀦𑀁 𑀮𑀓𑁆𑀔𑀡𑀯𑀲𑁂𑀦 𑀤𑀲𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑀢𑀸 𑀘 𑀯𑁂𑀤𑀺𑀢𑀩𑁆𑀩𑀸. 𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀤𑀲𑀮𑀓𑁆𑀔𑀡𑀯𑀺𑀪𑀸𑀯𑀦𑁂𑀦𑁂𑀯 𑀢𑀦𑁆𑀦𑀺𑀲𑁆𑀲𑀬𑀪𑀽𑀢𑀸 𑀢𑀺𑀯𑀺𑀥𑀓𑀮𑁆𑀬𑀸𑀡𑀢𑀸𑀧𑀺 𑀛𑀸𑀦𑀲𑁆𑀲 𑀧𑀸𑀓𑀝𑀸 𑀳𑁄𑀢𑀻𑀢𑀺 𑀢𑀢𑁆𑀭𑀺𑀫𑀸𑀦𑀻𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀢𑀢𑁆𑀭𑀸𑀬𑀁 𑀧𑀸𑀴𑀻𑀢𑀺 𑀢𑀲𑁆𑀫𑀺𑀁 𑀤𑀲𑀮𑀓𑁆𑀔𑀡𑀯𑀺𑀪𑀸𑀯𑀦𑀯𑀺𑀲𑀬𑁂 𑀅𑀬𑀁 𑀧𑀸𑀴𑀺. 𑀧𑀝𑀺𑀧𑀤𑀸𑀯𑀺𑀲𑀼𑀤𑁆𑀥𑀻𑀢𑀺 𑀕𑁄𑀢𑁆𑀭𑀪𑀼𑀧𑀭𑀺𑀬𑁄𑀲𑀸𑀦𑀸𑀬 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀸𑀬 𑀛𑀸𑀦𑀲𑁆𑀲 𑀦𑀻𑀯𑀭𑀡𑀸𑀤𑀺𑀧𑀭𑀺𑀩𑀦𑁆𑀥𑀢𑁄 𑀯𑀺𑀲𑀼𑀤𑁆𑀥𑀺, 𑀲𑀸𑀬𑀁 𑀬𑀲𑁆𑀫𑀸 𑀉𑀧𑁂𑀓𑁆𑀔𑀸𑀦𑀼𑀩𑁆𑀭𑀽𑀳𑀦𑀸𑀤𑀻𑀦𑀫𑁆𑀧𑀺 𑀧𑀘𑁆𑀘𑀬𑀢𑁆𑀢𑁂𑀦 𑀧𑀥𑀸𑀦𑀸 𑀧𑀼𑀭𑀺𑀫𑀓𑀸𑀭𑀡𑀲𑀺𑀤𑁆𑀥𑀸 𑀘, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀧𑀝𑀺𑀧𑀤𑀸𑀯𑀺𑀲𑀼𑀤𑁆𑀥𑀺 𑀆𑀤𑀻’’𑀢𑀺. 𑀉𑀧𑁂𑀓𑁆𑀔𑀸𑀦𑀼𑀩𑁆𑀭𑀽𑀳𑀦𑀸𑀢𑀺 𑀯𑀺𑀲𑁄𑀥𑁂𑀢𑀩𑁆𑀩𑀢𑀸𑀤𑀻𑀦𑀁 𑀅𑀪𑀸𑀯𑀢𑁄 𑀢𑀢𑁆𑀭𑀫𑀚𑁆𑀛𑀢𑁆𑀢𑀼𑀧𑁂𑀓𑁆𑀔𑀸𑀬 𑀓𑀺𑀘𑁆𑀘𑀦𑀺𑀧𑁆𑀨𑀢𑁆𑀢𑀺𑀬𑀸 𑀅𑀦𑀼𑀩𑁆𑀭𑀽𑀳𑀦𑀸, 𑀲𑀸 𑀧𑀦 𑀧𑀭𑀺𑀩𑀦𑁆𑀥𑀯𑀺𑀲𑀼𑀤𑁆𑀥𑀺𑀲𑀫𑀓𑀸𑀮𑀯𑀺𑀪𑀸𑀯𑀺𑀦𑀻𑀧𑀺 𑀢𑀩𑁆𑀩𑀺𑀲𑀼𑀤𑁆𑀥𑀺𑀬𑀸𑀯 𑀦𑀺𑀧𑁆𑀨𑀦𑁆𑀦𑀸𑀢𑀺 𑀤𑀻𑀧𑀦𑀢𑁆𑀣𑀫𑀸𑀳 ‘‘𑀉𑀧𑁂𑀓𑁆𑀔𑀸𑀦𑀼𑀩𑁆𑀭𑀽𑀳𑀦𑀸 𑀫𑀚𑁆𑀛𑁂’’𑀢𑀺. 𑀲𑀫𑁆𑀧𑀳𑀁𑀲𑀦𑀸𑀢𑀺 𑀯𑀢𑁆𑀣𑀼𑀥𑀫𑁆𑀫𑀸𑀤𑀻𑀦𑀁 𑀅𑀦𑀢𑀺𑀯𑀢𑁆𑀢𑀦𑀸𑀤𑀺𑀲𑀸𑀥𑀓𑀲𑁆𑀲 𑀜𑀸𑀡𑀲𑁆𑀲 𑀓𑀺𑀘𑁆𑀘𑀦𑀺𑀧𑁆𑀨𑀢𑁆𑀢𑀺𑀯𑀲𑁂𑀦 𑀧𑀭𑀺𑀬𑁄𑀤𑀧𑀦𑀸, 𑀲𑀸 𑀧𑀦 𑀬𑀲𑁆𑀫𑀸 𑀓𑀢𑁆𑀢𑀩𑁆𑀩𑀲𑁆𑀲 𑀲𑀩𑁆𑀩𑀓𑀺𑀘𑁆𑀘𑀲𑁆𑀲 𑀦𑀺𑀧𑁆𑀨𑀢𑁆𑀢𑀺𑀬𑀸𑀯 𑀲𑀺𑀤𑁆𑀥𑀸 𑀦𑀸𑀫 𑀳𑁄𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀲𑀫𑁆𑀧𑀳𑀁𑀲𑀦𑀸 𑀧𑀭𑀺𑀬𑁄𑀲𑀸𑀦’’𑀦𑁆𑀢𑀺. 𑀢𑀻𑀡𑀺𑀧𑀺 𑀘𑁂𑀢𑀸𑀦𑀺 𑀓𑀮𑁆𑀬𑀸𑀡𑀸𑀦𑀺 𑀏𑀓𑀓𑁆𑀔𑀡𑁂 𑀮𑀩𑁆𑀪𑀫𑀸𑀦𑀸𑀦𑀺𑀧𑀺 𑀧𑀘𑁆𑀘𑀬𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀢𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀦𑁆𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀪𑀸𑀯𑁂𑀦 𑀯𑀼𑀢𑁆𑀢𑀸𑀦𑀺, 𑀦 𑀧𑀦 𑀛𑀸𑀦𑀲𑁆𑀲 𑀉𑀧𑁆𑀧𑀸𑀤𑀸𑀤𑀺𑀓𑁆𑀔𑀡𑀢𑁆𑀢𑀬𑁂 𑀬𑀣𑀸𑀓𑁆𑀓𑀫𑀁 𑀮𑀩𑁆𑀪𑀫𑀸𑀦𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀫𑀚𑁆𑀛𑀺𑀫𑀁 𑀲𑀫𑀸𑀥𑀺𑀦𑀺𑀫𑀺𑀢𑁆𑀢𑀁 𑀧𑀝𑀺𑀧𑀚𑁆𑀚𑀢𑀻𑀢𑀺𑀆𑀤𑀻𑀲𑀼 𑀫𑀚𑁆𑀛𑀺𑀫𑀁 𑀲𑀫𑀸𑀥𑀺𑀦𑀺𑀫𑀺𑀢𑁆𑀢𑀁 𑀦𑀸𑀫 𑀲𑀫𑀧𑁆𑀧𑀯𑀢𑁆𑀢𑁄 𑀅𑀧𑁆𑀧𑀦𑀸𑀲𑀫𑀸𑀥𑀺𑀬𑁂𑀯. 𑀲𑁄 𑀳𑀺 𑀮𑀻𑀦𑀼𑀤𑁆𑀥𑀘𑁆𑀘𑀲𑀗𑁆𑀔𑀸𑀢𑀸𑀦𑀁 𑀉𑀪𑀺𑀦𑁆𑀦𑀁 𑀅𑀦𑁆𑀢𑀸𑀦𑀁 𑀅𑀦𑀼𑀧𑀕𑀫𑀦𑁂𑀦 𑀫𑀚𑁆𑀛𑀺𑀫𑁄, 𑀲𑀯𑀺𑀲𑁂𑀲𑀁 𑀘𑀺𑀢𑁆𑀢𑀲𑁆𑀲 𑀏𑀓𑀢𑁆𑀢𑀸𑀭𑀫𑁆𑀫𑀡𑁂 𑀞𑀧𑀦𑀢𑁄 𑀲𑀫𑀸𑀥𑀺𑀬𑁂𑀯 𑀉𑀧𑀭𑀺𑀯𑀺𑀲𑁂𑀲𑀸𑀦𑀁 𑀓𑀸𑀭𑀡𑀪𑀸𑀯𑀢𑁄 ‘‘𑀲𑀫𑀸𑀥𑀺𑀦𑀺𑀫𑀺𑀢𑁆𑀢’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀢𑀁 𑀧𑀝𑀺𑀧𑀚𑁆𑀚𑀢𑀺 𑀧𑀝𑀺𑀮𑀩𑁆𑀪𑀢𑀻𑀢𑀺 𑀅𑀢𑁆𑀣𑁄. 𑀏𑀯𑀁 𑀧𑀝𑀺𑀧𑀦𑁆𑀦𑀢𑁆𑀢𑀸 𑀫𑀚𑁆𑀛𑀺𑀫𑁂𑀦 𑀲𑀫𑀸𑀥𑀺𑀦𑀺𑀫𑀺𑀢𑁆𑀢𑁂𑀦 𑀢𑀢𑁆𑀣 𑀏𑀓𑀢𑁆𑀢𑀸𑀭𑀫𑁆𑀫𑀡𑁂 𑀅𑀧𑁆𑀧𑀦𑀸𑀕𑁄𑀘𑀭𑁂 𑀧𑀓𑁆𑀔𑀦𑁆𑀤𑀢𑀺 𑀉𑀧𑀢𑀺𑀝𑁆𑀞𑀢𑀺, 𑀏𑀯𑀁 𑀯𑀺𑀲𑀼𑀤𑁆𑀥𑀲𑁆𑀲 𑀧𑀦 𑀢𑀲𑁆𑀲 𑀘𑀺𑀢𑁆𑀢𑀲𑁆𑀲 𑀧𑀼𑀦 𑀯𑀺𑀲𑁄𑀥𑁂𑀢𑀩𑁆𑀩𑀸𑀪𑀸𑀯𑀢𑁄 𑀯𑀺𑀲𑁄𑀥𑀦𑁂 𑀩𑁆𑀬𑀸𑀧𑀸𑀭𑀁 𑀅𑀓𑀭𑁄𑀦𑁆𑀢𑁄 𑀧𑀼𑀕𑁆𑀕𑀮𑁄 𑀯𑀺𑀲𑀼𑀤𑁆𑀥𑀁 𑀘𑀺𑀢𑁆𑀢𑀁 𑀅𑀚𑁆𑀛𑀼𑀧𑁂𑀓𑁆𑀔𑀢𑀺 𑀦𑀸𑀫. 𑀲𑀫𑀣𑀪𑀸𑀯𑀽𑀧𑀕𑀫𑀦𑁂𑀦 𑀲𑀫𑀣𑀧𑀝𑀺𑀧𑀦𑁆𑀦𑀲𑁆𑀲 𑀧𑀼𑀦 𑀲𑀫𑀸𑀥𑀸𑀦𑁂 𑀩𑁆𑀬𑀸𑀧𑀸𑀭𑀁 𑀅𑀓𑀭𑁄𑀦𑁆𑀢𑁄 𑀲𑀫𑀣𑀧𑀝𑀺𑀧𑀦𑁆𑀦𑀁 𑀅𑀚𑁆𑀛𑀼𑀧𑁂𑀓𑁆𑀔𑀢𑀺, 𑀲𑀫𑀣𑀧𑀝𑀺𑀧𑀦𑁆𑀦𑀪𑀸𑀯𑀢𑁄 𑀏𑀯𑀫𑀲𑁆𑀲 𑀓𑀺𑀮𑁂𑀲𑀲𑀁𑀲𑀕𑁆𑀕𑀁 𑀧𑀳𑀸𑀬 𑀏𑀓𑀢𑁆𑀢𑁂𑀦 𑀉𑀧𑀝𑁆𑀞𑀺𑀢𑀲𑁆𑀲 𑀧𑀼𑀦 𑀏𑀓𑀢𑁆𑀢𑀼𑀧𑀝𑁆𑀞𑀸𑀦𑁂 𑀩𑁆𑀬𑀸𑀧𑀸𑀭𑀁 𑀅𑀓𑀭𑁄𑀦𑁆𑀢𑁄 𑀏𑀓𑀢𑁆𑀢𑀼𑀧𑀝𑁆𑀞𑀸𑀦𑀁 𑀅𑀚𑁆𑀛𑀼𑀧𑁂𑀓𑁆𑀔𑀢𑀺 𑀦𑀸𑀫.

𑀢𑀢𑁆𑀣 𑀚𑀸𑀢𑀸𑀦𑀦𑁆𑀢𑀺𑀆𑀤𑀻𑀲𑀼 𑀬𑁂 𑀧𑀦 𑀢𑁂 𑀏𑀯𑀁 𑀉𑀧𑁂𑀓𑁆𑀔𑀸𑀦𑀼𑀩𑁆𑀭𑀽𑀳𑀺𑀢𑁂 𑀢𑀲𑁆𑀫𑀺𑀁 𑀛𑀸𑀦𑀘𑀺𑀢𑁆𑀢𑁂 𑀚𑀸𑀢𑀸 𑀲𑀫𑀸𑀥𑀺𑀧𑀜𑁆𑀜𑀸𑀲𑀗𑁆𑀔𑀸𑀢𑀸 𑀬𑀼𑀕𑀦𑀤𑁆𑀥𑀥𑀫𑁆𑀫𑀸, 𑀢𑁂𑀲𑀁 𑀅𑀜𑁆𑀜𑀫𑀜𑁆𑀜𑀁 𑀅𑀦𑀢𑀺𑀯𑀢𑁆𑀢𑀦𑀲𑀪𑀸𑀯𑁂𑀦 𑀲𑀫𑁆𑀧𑀳𑀁𑀲𑀦𑀸 𑀯𑀺𑀲𑁄𑀥𑀦𑀸 𑀧𑀭𑀺𑀬𑁄𑀤𑀧𑀦𑀸 𑀘, 𑀲𑀤𑁆𑀥𑀸𑀤𑀻𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀓𑀺𑀮𑁂𑀲𑁂𑀳𑀺 𑀯𑀺𑀫𑀼𑀢𑁆𑀢𑀢𑁆𑀢𑀸 𑀯𑀺𑀫𑀼𑀢𑁆𑀢𑀺𑀭𑀲𑁂𑀦 𑀏𑀓𑀭𑀲𑀢𑀸𑀬 𑀲𑀫𑁆𑀧𑀳𑀁𑀲𑀦𑀸 𑀘, 𑀬𑀜𑁆𑀘𑁂𑀢𑀁 𑀢𑀤𑀼𑀧𑀕𑀁 𑀢𑁂𑀲𑀁 𑀅𑀦𑀢𑀺𑀯𑀢𑁆𑀢𑀦𑀏𑀓𑀭𑀲𑀪𑀸𑀯𑀸𑀦𑀁 𑀅𑀦𑀼𑀘𑁆𑀙𑀯𑀺𑀓𑀁 𑀯𑀻𑀭𑀺𑀬𑀁, 𑀢𑀲𑁆𑀲 𑀢𑀤𑀼𑀧𑀕𑀯𑀻𑀭𑀺𑀬𑀲𑁆𑀲 𑀯𑀸𑀳𑀦𑀝𑁆𑀞𑁂𑀦 𑀧𑀯𑀢𑁆𑀢𑀦𑀝𑁆𑀞𑁂𑀦 𑀲𑀫𑁆𑀧𑀳𑀁𑀲𑀦𑀸 𑀘, 𑀢𑀲𑁆𑀫𑀺𑀁 𑀔𑀡𑁂 𑀬𑀣𑀸𑀯𑀼𑀢𑁆𑀢𑀥𑀫𑁆𑀫𑀸𑀦𑀁 𑀆𑀲𑁂𑀯𑀦𑀝𑁆𑀞𑁂𑀦 𑀲𑀫𑁆𑀧𑀳𑀁𑀲𑀦𑀸 𑀘, 𑀧𑀭𑀺𑀬𑁄𑀤𑀧𑀦𑀸 𑀘 𑀧𑀭𑀺𑀬𑁄𑀤𑀧𑀦𑀓𑀲𑁆𑀲 𑀜𑀸𑀡𑀲𑁆𑀲 𑀓𑀺𑀘𑁆𑀘𑀦𑀺𑀧𑁆𑀨𑀢𑁆𑀢𑀺𑀯𑀲𑁂𑀦𑁂𑀯 𑀇𑀚𑁆𑀛𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀏𑀯𑀁 𑀢𑀺𑀯𑀺𑀥𑀢𑁆𑀢𑀕𑀢𑀁 𑀘𑀺𑀢𑁆𑀢𑀦𑁆𑀢𑀺𑀆𑀤𑀻𑀦𑀺 𑀢𑀲𑁆𑀲𑁂𑀯 𑀘𑀺𑀢𑁆𑀢𑀲𑁆𑀲 𑀣𑁄𑀫𑀦𑀯𑀘𑀦𑀸𑀦𑀺. 𑀯𑀺𑀢𑀓𑁆𑀓𑀲𑀫𑁆𑀧𑀦𑁆𑀦𑀦𑁆𑀢𑀺 𑀯𑀺𑀢𑀓𑁆𑀓𑀗𑁆𑀕𑁂𑀦 𑀲𑀼𑀦𑁆𑀤𑀭𑀪𑀸𑀯𑀫𑀼𑀧𑀕𑀢𑀁. 𑀘𑀺𑀢𑁆𑀢𑀲𑁆𑀲 𑀅𑀥𑀺𑀝𑁆𑀞𑀸𑀦𑀲𑀫𑁆𑀧𑀦𑁆𑀦𑀦𑁆𑀢𑀺 𑀢𑀲𑁆𑀫𑀺𑀜𑁆𑀜𑁂𑀯 𑀆𑀭𑀫𑁆𑀫𑀡𑁂 𑀘𑀺𑀢𑁆𑀢𑀲𑁆𑀲 𑀦𑀺𑀭𑀦𑁆𑀢𑀭𑀧𑁆𑀧𑀯𑀢𑁆𑀢𑀺𑀲𑀗𑁆𑀔𑀸𑀢𑁂𑀦 𑀲𑀫𑀸𑀥𑀺𑀦𑀸 𑀲𑀫𑁆𑀧𑀦𑁆𑀦𑀁, 𑀇𑀤𑀁 𑀛𑀸𑀦𑀗𑁆𑀕𑀯𑀲𑁂𑀦 𑀯𑀼𑀢𑁆𑀢𑀁. 𑀲𑀫𑀸𑀥𑀺𑀲𑀫𑁆𑀧𑀦𑁆𑀦𑀦𑁆𑀢𑀺 𑀇𑀤𑀁 𑀧𑀦 𑀇𑀦𑁆𑀤𑁆𑀭𑀺𑀬𑀯𑀲𑁂𑀦𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀧𑀝𑀺𑀓𑀼𑀝𑀢𑀻𑀢𑀺 𑀲𑀗𑁆𑀓𑀼𑀘𑀢𑀺. 𑀧𑀝𑀺𑀯𑀝𑁆𑀝𑀢𑀻𑀢𑀺 𑀧𑀝𑀺𑀦𑀺𑀯𑀝𑁆𑀝𑀢𑀺. 𑀦𑁆𑀳𑀸𑀭𑀼𑀤𑀤𑁆𑀤𑀼𑀮𑀦𑁆𑀢𑀺 𑀦𑁆𑀳𑀸𑀭𑀼𑀔𑀡𑁆𑀟𑀁. 𑀧𑀬𑀼𑀢𑁆𑀢𑀯𑀸𑀘𑀦𑁆𑀢𑀺 𑀧𑀘𑁆𑀘𑀬𑀧𑀭𑀺𑀬𑁂𑀲𑀦𑁂 𑀦𑀺𑀬𑀼𑀢𑁆𑀢𑀯𑀸𑀘𑀁. 𑀤𑀡𑁆𑀟𑀯𑀸𑀕𑀼𑀭𑀸𑀳𑀻𑀢𑀺 𑀤𑀡𑁆𑀟𑀧𑀝𑀺𑀩𑀤𑁆𑀥𑀸𑀳𑀺 𑀤𑀻𑀖𑀚𑀸𑀮𑀲𑀗𑁆𑀔𑀸𑀢𑀸𑀳𑀺 𑀯𑀸𑀕𑀼𑀭𑀸𑀳𑀺.

𑀲𑀫𑀡𑀓𑀼𑀢𑁆𑀢𑀓𑁄𑀢𑀺 𑀓𑀸𑀲𑀸𑀬𑀦𑀺𑀯𑀸𑀲𑀦𑀸𑀤𑀺𑀲𑀫𑀡𑀓𑀺𑀘𑁆𑀘𑀓𑁄. 𑀯𑀕𑁆𑀕𑀼𑀫𑀼𑀤𑀸𑀢𑀺 𑀏𑀢𑁆𑀣 ‘‘𑀯𑀕𑁆𑀕𑀼𑀫𑀢𑀸’’𑀢𑀺 𑀯𑀢𑁆𑀢𑀩𑁆𑀩𑁂 𑀮𑁄𑀓𑀺𑀓𑀸 ‘‘𑀫𑀼𑀤𑀸’’𑀢𑀺 𑀯𑁄𑀳𑀭𑀺𑀁𑀲𑀽𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀯𑀕𑁆𑀕𑀼𑀫𑀢𑀸’’𑀢𑀺. ‘‘𑀯𑀕𑁆𑀕𑀽’’𑀢𑀺 𑀫𑀢𑀸, 𑀲𑀼𑀤𑁆𑀥𑀲𑀫𑁆𑀫𑀢𑀸𑀢𑀺 𑀅𑀢𑁆𑀣𑁄, 𑀢𑁂𑀦𑀸𑀳 ‘‘𑀧𑀼𑀜𑁆𑀜𑀲𑀫𑁆𑀫𑀢𑀸’’𑀢𑀺. 𑀲𑀢𑁆𑀢𑀸𑀦𑀁 𑀧𑀸𑀧𑀼𑀦𑀦𑁂𑀦 𑀲𑁄𑀥𑀦𑁂𑀦 𑀲𑀸 𑀧𑀼𑀜𑁆𑀜𑀲𑀫𑁆𑀫𑀢𑀸.

𑁧𑁬𑁩. 𑀫𑀸𑀭𑀲𑁆𑀲 𑀥𑁂𑀬𑁆𑀬𑀁 𑀞𑀸𑀦𑀁, 𑀯𑀢𑁆𑀣𑀼 𑀯𑀸 𑀦𑀺𑀯𑀸𑀲𑁄 𑀫𑀸𑀭𑀥𑁂𑀬𑁆𑀬𑀁, 𑀲𑁄 𑀅𑀢𑁆𑀣𑀢𑁄 𑀢𑁂𑀪𑀽𑀫𑀓𑀥𑀫𑁆𑀫𑀸 𑀏𑀯, 𑀇𑀥 𑀧𑀦 𑀧𑀜𑁆𑀘 𑀓𑀸𑀫𑀕𑀼𑀡𑀸 𑀅𑀥𑀺𑀧𑁆𑀧𑁂𑀢𑀸, 𑀢𑀁 𑀫𑀸𑀭𑀥𑁂𑀬𑁆𑀬𑀁. ‘‘𑀅𑀬𑀁 𑀲𑀫𑀡𑀓𑀼𑀢𑁆𑀢𑀓𑁄 𑀬𑀣𑀸𑀲𑀫𑀼𑀧𑁆𑀧𑀦𑁆𑀦𑀲𑀁𑀯𑁂𑀕𑀫𑀽𑀮𑀓𑁂𑀦 𑀲𑀫𑀡𑀪𑀸𑀯𑀽𑀧𑀕𑀫𑀦𑁂𑀦 𑀅𑀢𑀺𑀓𑁆𑀓𑀫𑀺𑀢𑀼𑀁 𑀲𑀓𑁆𑀔𑀺𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀅𑀯𑁄𑀘, 𑀦 𑀧𑀦 ‘‘𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺𑀬𑀸 𑀢𑀻𑀲𑀼 𑀪𑀯𑁂𑀲𑀼 𑀅𑀧𑁆𑀧𑀝𑀺𑀲𑀦𑁆𑀥𑀺𑀓𑀢𑀸𑀬 𑀢𑀁 𑀅𑀢𑀺𑀓𑁆𑀓𑀫𑀺𑀢𑀼𑀁 𑀲𑀓𑁆𑀔𑀺𑀲𑁆𑀲𑀢𑀻’’𑀢𑀺 𑀫𑀭𑀡𑁂𑀦𑁂𑀯 𑀲𑀢𑁆𑀢𑀸𑀦𑀁 𑀲𑀁𑀲𑀸𑀭𑀫𑁄𑀘𑀦𑀮𑀤𑁆𑀥𑀺𑀓𑀢𑁆𑀢𑀸 𑀤𑁂𑀯𑀢𑀸𑀬. 𑀦 𑀳𑀺 𑀫𑀢𑀸𑀦𑀁 𑀓𑀢𑁆𑀣𑀘𑀺 𑀧𑀝𑀺𑀲𑀦𑁆𑀥𑀺 𑀕𑀘𑁆𑀙𑀢𑀺. 𑀇𑀫𑀺𑀦𑀸 𑀅𑀢𑁆𑀣𑁂𑀦 𑀏𑀯𑀫𑁂𑀯 𑀪𑀯𑀺𑀢𑀩𑁆𑀩𑀦𑁆𑀢𑀺 𑀇𑀫𑀺𑀦𑀸 𑀧𑀭𑁂𑀲𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑀦𑀢𑁆𑀣𑁂𑀦 𑀏𑀯𑀫𑁂𑀯 𑀲𑀁𑀲𑀸𑀭𑀫𑁄𑀘𑀦𑀲𑀪𑀸𑀯𑁂𑀦𑁂𑀯 𑀪𑀯𑀺𑀢𑀩𑁆𑀩𑀁. ‘‘𑀅𑀢𑁆𑀢𑀦𑀸𑀧𑀺 𑀅𑀢𑁆𑀢𑀸𑀦𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀦𑁆𑀢𑀺, 𑀅𑀜𑁆𑀜𑀫𑀜𑁆𑀜𑀫𑁆𑀧𑀺 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀦𑁆𑀢𑀻’’𑀢𑀺 (𑀧𑀸𑀭𑀸. 𑁧𑁬𑁨) 𑀯𑀼𑀢𑁆𑀢𑀢𑁆𑀢𑀸 𑀲𑀩𑁆𑀩𑀸𑀦𑀺𑀧𑀺 𑀢𑀸𑀦𑀺 𑀧𑀜𑁆𑀘𑀪𑀺𑀓𑁆𑀔𑀼𑀲𑀢𑀸𑀦𑀺 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀲𑀻𑀢𑀺 𑀇𑀤𑀁 𑀬𑁂𑀪𑀼𑀬𑁆𑀬𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀕𑀳𑁂𑀢𑀩𑁆𑀩𑀁. 𑀢𑀲𑁆𑀫𑀸 𑀬𑁂 𑀅𑀢𑁆𑀢𑀦𑀸𑀧𑀺 𑀅𑀢𑁆𑀢𑀸𑀦𑀁 𑀅𑀜𑁆𑀜𑀫𑀜𑁆𑀜𑀜𑁆𑀘 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀲𑀼𑀁, 𑀢𑁂 𑀧𑀼𑀣𑀼𑀚𑁆𑀚𑀦𑀪𑀺𑀓𑁆𑀔𑀽 𑀞𑀧𑁂𑀢𑁆𑀯𑀸 𑀢𑀤𑀯𑀲𑁂𑀲𑁂 𑀘 𑀧𑀼𑀣𑀼𑀚𑁆𑀚𑀦𑀪𑀺𑀓𑁆𑀔𑀽, 𑀲𑀩𑁆𑀩𑁂 𑀘 𑀅𑀭𑀺𑀬𑁂 𑀅𑀬𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀲𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁧𑁬𑁪. 𑀏𑀓𑀻𑀪𑀸𑀯𑀢𑁄𑀢𑀺 𑀧𑀯𑀺𑀯𑁂𑀓𑀢𑁄. 𑀉𑀤𑁆𑀤𑁂𑀲𑀁 𑀧𑀭𑀺𑀧𑀼𑀘𑁆𑀙𑀁 𑀕𑀡𑁆𑀳𑀦𑁆𑀢𑀻𑀢𑀺 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀆𑀘𑀭𑀺𑀬𑀸𑀦𑀁 𑀲𑀦𑁆𑀢𑀺𑀓𑁂 𑀕𑀡𑁆𑀳𑀦𑁆𑀢𑀺, 𑀕𑀳𑁂𑀢𑁆𑀯𑀸 𑀘 𑀆𑀘𑀭𑀺𑀬𑁂𑀳𑀺 𑀲𑀤𑁆𑀥𑀺𑀁 𑀪𑀕𑀯𑀦𑁆𑀢𑀁 𑀉𑀧𑀝𑁆𑀞𑀳𑀦𑁆𑀢𑀺. 𑀢𑀤𑀸 𑀧𑀦 𑀉𑀤𑁆𑀤𑁂𑀲𑀸𑀤𑀺𑀤𑀸𑀬𑀓𑀸 𑀢𑀦𑀼𑀪𑀽𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀪𑀕𑀯𑀦𑁆𑀢𑀁 𑀉𑀧𑀕𑀢𑀸, 𑀢𑀁 𑀲𑀦𑁆𑀥𑀸𑀬 𑀪𑀕𑀯𑀸 𑀧𑀼𑀘𑁆𑀙𑀢𑀺.

𑀆𑀦𑀸𑀧𑀸𑀦𑀲𑁆𑀲𑀢𑀺𑀲𑀫𑀸𑀥𑀺𑀓𑀣𑀸𑀯𑀡𑁆𑀡𑀦𑀸

𑁧𑁬𑁫. 𑀤𑀲𑀸𑀦𑀼𑀲𑁆𑀲𑀢𑀻𑀲𑀼 𑀅𑀦𑁆𑀢𑁄𑀕𑀥𑀸𑀧𑀺 𑀆𑀦𑀸𑀧𑀸𑀦𑀲𑁆𑀲𑀢𑀺 𑀢𑀤𑀸 𑀪𑀺𑀓𑁆𑀔𑀽𑀦𑀁 𑀩𑀳𑀽𑀦𑀁 𑀲𑀧𑁆𑀧𑀸𑀬𑀢𑀁 𑀤𑀲𑁆𑀲𑁂𑀢𑀼𑀁 𑀧𑀼𑀦 𑀕𑀳𑀺𑀢𑀸. 𑀢𑀣𑀸 𑀳𑀺 𑀢𑀁 𑀪𑀕𑀯𑀸 𑀢𑁂𑀲𑀁 𑀤𑁂𑀲𑁂𑀲𑀺. 𑀆𑀳𑀸𑀭𑁂 𑀧𑀝𑀺𑀓𑁆𑀓𑀽𑀮𑀲𑀜𑁆𑀜𑀸 𑀅𑀲𑀼𑀪𑀓𑀫𑁆𑀫𑀝𑁆𑀞𑀸𑀦𑀲𑀤𑀺𑀲𑀸, 𑀘𑀢𑁆𑀢𑀸𑀭𑁄 𑀧𑀦 𑀆𑀭𑀼𑀧𑁆𑀧𑀸 𑀆𑀤𑀺𑀓𑀫𑁆𑀫𑀺𑀓𑀸𑀦𑀁 𑀅𑀦𑀦𑀼𑀭𑀽𑀧𑀸𑀢𑀺 𑀢𑁂𑀲𑀁 𑀇𑀥 𑀅𑀕𑁆𑀕𑀳𑀡𑀁 𑀤𑀝𑁆𑀞𑀩𑁆𑀩𑀁. 𑀅𑀜𑁆𑀜𑀁 𑀧𑀭𑀺𑀬𑀸𑀬𑀦𑁆𑀢𑀺 𑀅𑀭𑀳𑀢𑁆𑀢𑀸𑀥𑀺𑀕𑀫𑀢𑁆𑀣𑀸𑀬 𑀅𑀜𑁆𑀜𑀁 𑀓𑀸𑀭𑀡𑀁. 𑀅𑀢𑁆𑀣𑀬𑁄𑀚𑀦𑀸𑀓𑁆𑀓𑀫𑀦𑁆𑀢𑀺 𑀅𑀢𑁆𑀣𑀜𑁆𑀘 𑀬𑁄𑀚𑀦𑀸𑀓𑁆𑀓𑀫𑀜𑁆𑀘. 𑀅𑀲𑁆𑀲𑀸𑀲𑀯𑀲𑁂𑀦𑀸𑀢𑀺 𑀅𑀲𑁆𑀲𑀸𑀲𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀉𑀧𑀝𑁆𑀞𑀸𑀦𑀁 𑀲𑀢𑀻𑀢𑀺 𑀅𑀧𑁆𑀧𑀫𑀼𑀲𑁆𑀲𑀦𑀢𑀸𑀬 𑀢𑀫𑁂𑀯 𑀅𑀲𑁆𑀲𑀸𑀲𑀁 𑀧𑀲𑁆𑀲𑀸𑀲𑀜𑁆𑀘 𑀉𑀧𑀕𑀦𑁆𑀢𑁆𑀯𑀸 𑀞𑀸𑀦𑀁, 𑀢𑀣𑀸 𑀢𑀺𑀝𑁆𑀞𑀦𑀓𑀥𑀫𑁆𑀫𑁄 𑀲𑀢𑀺 𑀦𑀸𑀫𑀸𑀢𑀺 𑀅𑀢𑁆𑀣𑁄. 𑀇𑀤𑀸𑀦𑀺 𑀲𑀢𑀺𑀯𑀲𑁂𑀦𑁂𑀯 𑀧𑀼𑀕𑁆𑀕𑀮𑀁 𑀦𑀺𑀤𑁆𑀤𑀺𑀲𑀺𑀢𑀼𑀓𑀸𑀫𑁂𑀦 𑀬𑁄 𑀅𑀲𑁆𑀲𑀲𑀢𑀻𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑁄 𑀅𑀲𑁆𑀲𑀲𑀢𑀺, 𑀢𑀲𑁆𑀲 𑀲𑀢𑀺 𑀅𑀲𑁆𑀲𑀸𑀲𑀁 𑀉𑀧𑀕𑀦𑁆𑀢𑁆𑀯𑀸 𑀢𑀺𑀝𑁆𑀞𑀢𑀻𑀢𑀺𑀆𑀤𑀺𑀦𑀸 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀅𑀓𑁄𑀲𑀮𑁆𑀮𑀲𑀫𑁆𑀪𑀽𑀢𑁂𑀢𑀺 𑀅𑀯𑀺𑀚𑁆𑀚𑀸𑀲𑀫𑁆𑀪𑀽𑀢𑁂. 𑀔𑀡𑁂𑀦𑁂𑀯𑀸𑀢𑀺 𑀅𑀢𑁆𑀢𑀦𑁄 𑀧𑀯𑀢𑁆𑀢𑀺𑀓𑁆𑀔𑀡𑁂𑀦𑁂𑀯. 𑀅𑀭𑀺𑀬𑀫𑀕𑁆𑀕𑀲𑁆𑀲 𑀧𑀸𑀤𑀓𑀪𑀽𑀢𑁄 𑀅𑀬𑀁 𑀲𑀫𑀸𑀥𑀺 𑀅𑀦𑀼𑀓𑁆𑀓𑀫𑁂𑀦 𑀯𑀟𑁆𑀠𑀺𑀢𑁆𑀯𑀸 𑀅𑀭𑀺𑀬𑀫𑀕𑁆𑀕𑀪𑀸𑀯𑀁 𑀉𑀧𑀕𑀢𑁄 𑀯𑀺𑀬 𑀳𑁄𑀢𑀻𑀢𑀺 𑀆𑀳 ‘‘𑀅𑀭𑀺𑀬𑀫𑀕𑁆𑀕𑀯𑀼𑀟𑁆𑀠𑀺𑀧𑁆𑀧𑀢𑁆𑀢𑁄’’𑀢𑀺. 𑀑𑀧𑀫𑁆𑀫𑀦𑀺𑀤𑀲𑁆𑀲𑀦𑀦𑁆𑀢𑀺 𑀏𑀢𑁆𑀣 𑀉𑀧𑀫𑀸𑀯 𑀑𑀧𑀫𑁆𑀫𑀁, 𑀢𑀲𑁆𑀲 𑀦𑀺𑀤𑀲𑁆𑀲𑀦𑀁.

𑀩𑀸𑀳𑀺𑀭𑀓𑀸 𑀆𑀦𑀸𑀧𑀸𑀦𑀲𑁆𑀲𑀢𑀺𑀁 𑀚𑀸𑀦𑀦𑁆𑀢𑀸 𑀆𑀤𑀺𑀢𑁄 𑀘𑀢𑀼𑀧𑁆𑀧𑀓𑀸𑀭𑀫𑁂𑀯 𑀚𑀸𑀦𑀦𑁆𑀢𑀺, 𑀦 𑀲𑀩𑁆𑀩𑀁 𑀲𑁄𑀴𑀲𑀧𑁆𑀧𑀓𑀸𑀭𑀦𑁆𑀢𑀺 𑀆𑀳 𑀲𑀩𑁆𑀩𑀧𑁆𑀧𑀓𑀸𑀭𑀇𑀘𑁆𑀘𑀸𑀤𑀺. 𑀏𑀯𑀫𑀲𑁆𑀲𑁂𑀢𑀁 𑀲𑁂𑀦𑀸𑀲𑀦𑀦𑁆𑀢𑀺 𑀏𑀢𑁆𑀣 𑀏𑀯𑀦𑁆𑀢𑀺 𑀪𑀸𑀯𑀦𑀸𑀲𑀢𑀺𑀬𑀸 𑀬𑀣𑀸𑀯𑀼𑀢𑁆𑀢𑀦𑀬𑁂𑀦 𑀆𑀭𑀫𑁆𑀫𑀡𑁂 𑀘𑀺𑀢𑁆𑀢𑀲𑁆𑀲 𑀦𑀺𑀩𑀦𑁆𑀥𑀦𑁂 𑀲𑀢𑀺𑀬𑁂𑀯, 𑀦𑀸𑀲𑀢𑀻𑀢𑀺 𑀅𑀢𑁆𑀣𑁄, 𑀢𑁂𑀦 𑀫𑀼𑀝𑁆𑀞𑀲𑁆𑀲𑀢𑀺𑀲𑁆𑀲 𑀅𑀭𑀜𑁆𑀜𑀯𑀸𑀲𑁄 𑀦𑀺𑀭𑀢𑁆𑀣𑀓𑁄 𑀅𑀦𑀦𑀼𑀭𑀽𑀧𑁄𑀢𑀺 𑀤𑀲𑁆𑀲𑁂𑀢𑀺. 𑀅𑀯𑀲𑁂𑀲𑀲𑀢𑁆𑀢𑀯𑀺𑀥𑀲𑁂𑀦𑀸𑀲𑀦𑀦𑁆𑀢𑀺 ‘‘𑀧𑀩𑁆𑀩𑀢𑀁 𑀓𑀦𑁆𑀤𑀭𑀁 𑀕𑀺𑀭𑀺𑀕𑀼𑀳𑀁 𑀲𑀼𑀲𑀸𑀦𑀁 𑀯𑀦𑀧𑀢𑁆𑀣𑀁 𑀅𑀩𑁆𑀪𑁄𑀓𑀸𑀲𑀁 𑀧𑀮𑀸𑀮𑀧𑀼𑀜𑁆𑀚’’𑀦𑁆𑀢𑀺 (𑀯𑀺𑀪. 𑁫𑁦𑁮) 𑀏𑀯𑀁 𑀯𑀼𑀢𑁆𑀢𑀁. 𑀉𑀢𑀼𑀢𑁆𑀢𑀬𑀸𑀦𑀼𑀓𑀽𑀮𑀁 𑀥𑀸𑀢𑀼𑀘𑀭𑀺𑀬𑀸𑀦𑀼𑀓𑀽𑀮𑀦𑁆𑀢𑀺 𑀕𑀺𑀫𑁆𑀳𑀸𑀦𑀸𑀤𑀺𑀉𑀢𑀼𑀢𑁆𑀢𑀬𑀲𑁆𑀲 𑀲𑁂𑀫𑁆𑀳𑀸𑀤𑀺𑀥𑀸𑀢𑀼𑀢𑁆𑀢𑀬𑀲𑁆𑀲 𑀫𑁄𑀳𑀸𑀤𑀺𑀘𑀭𑀺𑀬𑀢𑁆𑀢𑀬𑀲𑁆𑀲 𑀘 𑀅𑀦𑀼𑀓𑀽𑀮𑀁. 𑀦𑀺𑀲𑀚𑁆𑀚𑀸𑀬 𑀤𑀴𑁆𑀳𑀪𑀸𑀯𑀁 𑀧𑀮𑁆𑀮𑀗𑁆𑀓𑀸𑀪𑀼𑀚𑀦𑁂𑀦, 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸𑀦𑀁 𑀧𑀯𑀢𑁆𑀢𑀦𑀲𑀼𑀔𑀢𑀁 𑀉𑀧𑀭𑀺𑀫𑀓𑀸𑀬𑀲𑁆𑀲 𑀉𑀚𑀼𑀓𑀁 𑀞𑀧𑀦𑁂𑀦, 𑀆𑀭𑀫𑁆𑀫𑀡𑀧𑀭𑀺𑀕𑁆𑀕𑀳𑀽𑀧𑀸𑀬𑀁 𑀧𑀭𑀺𑀫𑀼𑀔𑀁 𑀲𑀢𑀺𑀬𑀸 𑀞𑀧𑀦𑁂𑀦 𑀉𑀧𑀤𑀺𑀲𑀦𑁆𑀢𑁄. 𑀦 𑀧𑀡𑀫𑀦𑁆𑀢𑀻𑀢𑀺 𑀦 𑀑𑀡𑀫𑀦𑁆𑀢𑀺. 𑀧𑀭𑀺𑀕𑁆𑀕𑀳𑀺𑀢𑀦𑀺𑀬𑁆𑀬𑀸𑀦𑀁 𑀲𑀢𑀺𑀦𑁆𑀢𑀺 𑀲𑀩𑁆𑀩𑀣𑀸 𑀕𑀳𑀺𑀢𑀁 𑀲𑀫𑁆𑀫𑁄𑀲𑀧𑀝𑀺𑀧𑀓𑁆𑀔𑀢𑁄 𑀦𑀺𑀕𑁆𑀕𑀫𑀦𑀲𑀗𑁆𑀔𑀸𑀢𑀁 𑀲𑀢𑀺𑀁 𑀓𑀢𑁆𑀯𑀸, 𑀧𑀭𑀫𑀁 𑀲𑀢𑀺𑀦𑁂𑀧𑀓𑁆𑀓𑀁 𑀉𑀧𑀝𑁆𑀞𑀧𑁂𑀢𑁆𑀯𑀸𑀢𑀺 𑀅𑀢𑁆𑀣𑁄.

𑀲𑀢𑁄𑀯𑀸𑀢𑀺 𑀲𑀢𑀺𑀬𑀸 𑀲𑀫𑀦𑁆𑀦𑀸𑀕𑀢𑁄 𑀏𑀯. 𑀩𑀸𑀢𑁆𑀢𑀺𑀁𑀲𑀸𑀬 𑀆𑀓𑀸𑀭𑁂𑀳𑀻𑀢𑀺 𑀘𑀢𑀽𑀲𑀼 𑀘𑀢𑀼𑀓𑁆𑀓𑁂𑀲𑀼 𑀆𑀕𑀢𑀸𑀦𑀺 𑀤𑀻𑀖𑀭𑀲𑁆𑀲𑀸𑀤𑀻𑀦𑀺 𑀲𑁄𑀴𑀲 𑀧𑀤𑀸𑀦𑀺 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀯𑀲𑁂𑀦 𑀤𑁆𑀯𑀺𑀥𑀸 𑀯𑀺𑀪𑀚𑀺𑀢𑁆𑀯𑀸 𑀯𑀼𑀢𑁆𑀢𑁂𑀳𑀺 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑁂𑀳𑀺. 𑀤𑀻𑀖𑀁𑀅𑀲𑁆𑀲𑀸𑀲𑀯𑀲𑁂𑀦𑀸𑀢𑀺 𑀤𑀻𑀖𑀅𑀲𑁆𑀲𑀸𑀲𑀯𑀲𑁂𑀦, 𑀯𑀺𑀪𑀢𑁆𑀢𑀺𑀅𑀮𑁄𑀧𑀁 𑀓𑀢𑁆𑀯𑀸 𑀦𑀺𑀤𑁆𑀤𑁂𑀲𑁄, 𑀤𑀻𑀖𑀦𑁆𑀢𑀺 𑀯𑀸 𑀪𑀕𑀯𑀢𑀸 𑀯𑀼𑀢𑁆𑀢𑀅𑀲𑁆𑀲𑀸𑀲𑀯𑀲𑁂𑀦. 𑀘𑀺𑀢𑁆𑀢𑀲𑁆𑀲 𑀏𑀓𑀕𑁆𑀕𑀢𑀁 𑀅𑀯𑀺𑀓𑁆𑀔𑁂𑀧𑀦𑁆𑀢𑀺 𑀯𑀺𑀓𑁆𑀔𑁂𑀧𑀧𑀝𑀺𑀧𑀓𑁆𑀔𑀪𑀸𑀯𑀢𑁄 ‘‘𑀅𑀯𑀺𑀓𑁆𑀔𑁂𑀧𑁄’’𑀢𑀺 𑀮𑀤𑁆𑀥𑀦𑀸𑀫𑀁 𑀘𑀺𑀢𑁆𑀢𑀲𑁆𑀲 𑀏𑀓𑀕𑁆𑀕𑀪𑀸𑀯𑀁 𑀧𑀚𑀸𑀦𑀢𑁄. 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀻 𑀅𑀲𑁆𑀲𑀸𑀲𑀯𑀲𑁂𑀦𑀸𑀢𑀺 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀻 𑀳𑀼𑀢𑁆𑀯𑀸 𑀅𑀲𑁆𑀲𑀸𑀲𑀯𑀲𑁂𑀦, ‘‘𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀺𑀅𑀲𑁆𑀲𑀸𑀲𑀦𑀯𑀲𑁂𑀦𑀸’’𑀢𑀺 𑀯𑀸 𑀧𑀸𑀞𑁄, 𑀢𑀲𑁆𑀲 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀺𑀦𑁄 𑀅𑀲𑁆𑀲𑀸𑀲𑀯𑀲𑁂𑀦𑀸𑀢𑀺 𑀅𑀢𑁆𑀣𑁄. 𑀆 𑀧𑀞𑀫𑀁 𑀩𑀳𑀺𑀫𑀼𑀔𑀁 𑀲𑀲𑀦𑀁 𑀅𑀲𑁆𑀲𑀸𑀲𑁄, 𑀢𑀢𑁄 𑀅𑀦𑁆𑀢𑁄𑀫𑀼𑀔𑀁 𑀧𑀝𑀺𑀲𑀲𑀦𑀁 𑀧𑀲𑁆𑀲𑀸𑀲𑁄𑀢𑀺 𑀆𑀳 𑀅𑀲𑁆𑀲𑀸𑀲𑁄𑀢𑀺 𑀩𑀳𑀺𑀦𑀺𑀓𑁆𑀔𑀫𑀦𑀯𑀸𑀢𑁄𑀢𑀺𑀆𑀤𑀺, 𑀲𑀼𑀢𑁆𑀢𑀦𑁆𑀢𑀝𑁆𑀞𑀓𑀣𑀸𑀲𑀼 𑀧𑀦 𑀆𑀓𑀟𑁆𑀠𑀦𑀯𑀲𑁂𑀦 𑀅𑀦𑁆𑀢𑁄 𑀲𑀲𑀦𑀁 𑀅𑀲𑁆𑀲𑀸𑀲𑁄, 𑀩𑀳𑀺 𑀧𑀝𑀺𑀲𑀲𑀦𑀁 𑀧𑀲𑁆𑀲𑀸𑀲𑁄𑀢𑀺 𑀓𑀢𑁆𑀯𑀸 𑀉𑀧𑁆𑀧𑀝𑀺𑀧𑀸𑀝𑀺𑀬𑀸 𑀯𑀼𑀢𑁆𑀢𑀁.

𑀢𑀢𑁆𑀣𑀸𑀢𑀺 𑀩𑀳𑀺𑀦𑀺𑀓𑁆𑀔𑀫𑀦𑀅𑀦𑁆𑀢𑁄𑀧𑀯𑀺𑀲𑀦𑀯𑀸𑀢𑁂𑀲𑀼, 𑀢𑀲𑁆𑀲 𑀘 𑀧𑀞𑀫𑀁 𑀅𑀩𑁆𑀪𑀦𑁆𑀢𑀭𑀯𑀸𑀢𑁄 𑀦𑀺𑀓𑁆𑀔𑀫𑀢𑀻𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄. ‘‘𑀲𑀩𑁆𑀩𑁂𑀲𑀫𑁆𑀧𑀺 𑀕𑀩𑁆𑀪𑀲𑁂𑀬𑁆𑀬𑀓𑀸𑀦𑀦𑁆𑀢𑀺𑀆𑀤𑀺𑀦𑀸 𑀤𑀸𑀭𑀓𑀸𑀦𑀁 𑀧𑀯𑀢𑁆𑀢𑀺𑀓𑁆𑀓𑀫𑁂𑀦 𑀅𑀲𑁆𑀲𑀸𑀲𑁄 𑀩𑀳𑀺𑀦𑀺𑀓𑁆𑀔𑀫𑀦𑀯𑀸𑀢𑁄𑀢𑀺 𑀕𑀳𑁂𑀢𑀩𑁆𑀩𑀦𑁆𑀢𑀺 𑀤𑀻𑀧𑁂𑀢𑀻’’𑀢𑀺 𑀓𑁂𑀘𑀺 𑀯𑀤𑀦𑁆𑀢𑀺. 𑀲𑀼𑀢𑁆𑀢𑀦𑀬𑁄 𑀏𑀯 𑀘𑁂𑀢𑁆𑀣 ‘‘𑀅𑀲𑁆𑀲𑀸𑀲𑀸𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀁 𑀲𑀢𑀺𑀬𑀸 𑀅𑀦𑀼𑀕𑀘𑁆𑀙𑀢𑁄 𑀅𑀚𑁆𑀛𑀢𑁆𑀢𑀁 𑀯𑀺𑀓𑁆𑀔𑁂𑀧𑀕𑀢𑁂𑀦 𑀘𑀺𑀢𑁆𑀢𑁂𑀦 𑀓𑀸𑀬𑁄𑀧𑀺 𑀘𑀺𑀢𑁆𑀢𑀫𑁆𑀧𑀺 𑀲𑀸𑀭𑀤𑁆𑀥𑀸 𑀘 𑀳𑁄𑀦𑁆𑀢𑀺 𑀇𑀜𑁆𑀚𑀺𑀢𑀸 𑀘 𑀨𑀦𑁆𑀤𑀺𑀢𑀸 𑀘 𑀧𑀲𑁆𑀲𑀸𑀲𑀸𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀁 𑀲𑀢𑀺𑀬𑀸 𑀅𑀦𑀼𑀕𑀘𑁆𑀙𑀢𑁄 𑀩𑀳𑀺𑀤𑁆𑀥𑀸 𑀯𑀺𑀓𑁆𑀔𑁂𑀧𑀕𑀢𑁂𑀦 𑀘𑀺𑀢𑁆𑀢𑁂𑀦 𑀓𑀸𑀬𑁄𑀧𑀺 𑀘𑀺𑀢𑁆𑀢𑀫𑁆𑀧𑀺 𑀲𑀸𑀭𑀤𑁆𑀥𑀸 𑀘 𑀳𑁄𑀦𑁆𑀢𑀺 𑀇𑀜𑁆𑀚𑀺𑀢𑀸 𑀘 𑀨𑀦𑁆𑀤𑀺𑀢𑀸 𑀘𑀸’’𑀢𑀺 𑀇𑀫𑀸𑀬 𑀧𑀸𑀴𑀺𑀬𑀸 𑀲𑀫𑁂𑀢𑀻𑀢𑀺 𑀕𑀳𑁂𑀢𑀩𑁆𑀩𑀁. 𑀅𑀤𑁆𑀥𑀸𑀦𑀯𑀲𑁂𑀦𑀸𑀢𑀺 𑀓𑀸𑀮𑀤𑁆𑀥𑀸𑀦𑀯𑀲𑁂𑀦. 𑀅𑀬𑀜𑁆𑀳𑀺 𑀅𑀤𑁆𑀥𑀸𑀦-𑀲𑀤𑁆𑀤𑁄 𑀓𑀸𑀮𑀲𑁆𑀲 𑀤𑁂𑀲𑀲𑁆𑀲 𑀘 𑀯𑀸𑀘𑀓𑁄. 𑀢𑀢𑁆𑀣 𑀬𑀣𑀸 𑀳𑀻𑀢𑀺𑀆𑀤𑀺𑀦𑀸 𑀤𑁂𑀲𑀤𑁆𑀥𑀸𑀦𑀁 𑀉𑀧𑀫𑀸𑀯𑀲𑁂𑀦 𑀤𑀲𑁆𑀲𑀺𑀢𑀁. 𑀇𑀤𑀸𑀦𑀺 𑀢𑀩𑁆𑀩𑀺𑀲𑀺𑀝𑁆𑀞𑀓𑀸𑀮𑀤𑁆𑀥𑀸𑀦𑀯𑀲𑁂𑀦 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸𑀦𑀁 𑀤𑀻𑀖𑀭𑀲𑁆𑀲𑀢𑀁 𑀉𑀧𑀫𑁂𑀬𑁆𑀬𑀯𑀲𑁂𑀦 𑀯𑀺𑀪𑀸𑀯𑁂𑀢𑀼𑀁 𑀏𑀯𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀘𑀼𑀡𑁆𑀡𑀯𑀺𑀘𑀼𑀡𑁆𑀡𑀸 𑀅𑀦𑁂𑀓𑀓𑀮𑀸𑀧𑀪𑀸𑀯𑁂𑀦. 𑀏𑀢𑁆𑀣 𑀘 𑀳𑀢𑁆𑀣𑀺𑀆𑀤𑀺𑀲𑀭𑀻𑀭𑁂 𑀲𑀼𑀦𑀔𑀸𑀤𑀺𑀲𑀭𑀻𑀭𑁂 𑀘 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸𑀦𑀁 𑀤𑁂𑀲𑀤𑁆𑀥𑀸𑀦𑀯𑀺𑀲𑀺𑀝𑁆𑀞𑀓𑀸𑀮𑀤𑁆𑀥𑀸𑀦𑀯𑀲𑁂𑀦𑁂𑀯 𑀤𑀻𑀖𑀭𑀲𑁆𑀲𑀢𑀸 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸 𑀅𑀢𑁆𑀢𑀪𑀸𑀯𑀲𑀗𑁆𑀔𑀸𑀢𑀁 𑀤𑀻𑀖𑀁 𑀅𑀤𑁆𑀥𑀸𑀦𑀁 𑀲𑀡𑀺𑀓𑀁 𑀧𑀽𑀭𑁂𑀢𑁆𑀯𑀸𑀢𑀺𑀆𑀤𑀺𑀯𑀘𑀦𑀢𑁄. 𑀢𑁂𑀲𑀦𑁆𑀢𑀺 𑀲𑀢𑁆𑀢𑀸𑀦𑀁. 𑀢𑁂𑀢𑀺 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸. 𑀇𑀢𑁆𑀢𑀭𑀫𑀤𑁆𑀥𑀸𑀦𑀦𑁆𑀢𑀺 𑀅𑀧𑁆𑀧𑀓𑀁 𑀓𑀸𑀮𑀁. 𑀦𑀯𑀳𑀸𑀓𑀸𑀭𑁂𑀳𑀻𑀢𑀺 𑀪𑀸𑀯𑀦𑀫𑀦𑀼𑀬𑀼𑀜𑁆𑀚𑀦𑁆𑀢𑀲𑁆𑀲 𑀧𑀼𑀩𑁆𑀩𑁂𑀦𑀸𑀧𑀭𑀁 𑀅𑀮𑀤𑁆𑀥𑀯𑀺𑀲𑁂𑀲𑀲𑁆𑀲 𑀓𑁂𑀯𑀮𑀁 𑀅𑀤𑁆𑀥𑀸𑀦𑀯𑀲𑁂𑀦 𑀆𑀤𑀺𑀢𑁄 𑀯𑀼𑀢𑁆𑀢𑀸 𑀢𑀬𑁄 𑀆𑀓𑀸𑀭𑀸, 𑀢𑁂 𑀘 𑀓𑀲𑁆𑀲𑀘𑀺 𑀅𑀲𑁆𑀲𑀸𑀲𑁄𑀯, 𑀓𑀲𑁆𑀲𑀘𑀺 𑀧𑀲𑁆𑀲𑀸𑀲𑁄𑀯, 𑀓𑀲𑁆𑀲𑀘𑀺 𑀢𑀤𑀼𑀪𑀬𑀫𑁆𑀧𑀺 𑀉𑀧𑀝𑁆𑀞𑀸𑀢𑀻𑀢𑀺 𑀢𑀺𑀡𑁆𑀡𑀁 𑀧𑀼𑀕𑁆𑀕𑀮𑀸𑀦𑀁 𑀯𑀲𑁂𑀦 𑀯𑀼𑀢𑁆𑀢𑀸, 𑀢𑀣𑀸 𑀙𑀦𑁆𑀤𑀯𑀲𑁂𑀦 𑀢𑀬𑁄, 𑀢𑀣𑀸 𑀧𑀸𑀫𑁄𑀚𑁆𑀚𑀯𑀲𑁂𑀦𑀸𑀢𑀺 𑀇𑀫𑁂𑀳𑀺 𑀦𑀯𑀳𑀺 𑀆𑀓𑀸𑀭𑁂𑀳𑀺. 𑀏𑀓𑁂𑀦𑀸𑀓𑀸𑀭𑁂𑀦𑀸𑀢𑀺 𑀤𑀻𑀖𑀁 𑀅𑀲𑁆𑀲𑀸𑀲𑀸𑀤𑀻𑀲𑀼 𑀏𑀓𑁂𑀦𑀸𑀓𑀸𑀭𑁂𑀦.

𑀅𑀤𑁆𑀥𑀸𑀦𑀲𑀗𑁆𑀔𑀸𑀢𑁂𑀢𑀺 𑀤𑀻𑀖𑁂 𑀑𑀓𑀸𑀲𑀤𑁆𑀥𑀸𑀦𑀲𑀗𑁆𑀔𑀸𑀢𑁂 𑀅𑀢𑁆𑀢𑀪𑀸𑀯𑁂 𑀓𑀸𑀮𑀤𑁆𑀥𑀸𑀦𑁂𑀧𑀺 𑀯𑀸, 𑀏𑀯𑀁 𑀉𑀧𑀭𑀺 𑀇𑀢𑁆𑀢𑀭𑀲𑀗𑁆𑀔𑀸𑀢𑁂𑀢𑀺 𑀏𑀢𑁆𑀣𑀸𑀧𑀺. 𑀙𑀦𑁆𑀤𑁄 𑀉𑀧𑁆𑀧𑀚𑁆𑀚𑀢𑀻𑀢𑀺 𑀪𑀸𑀯𑀦𑀸𑀬 𑀧𑀼𑀩𑁆𑀩𑁂𑀦𑀸𑀧𑀭𑀁 𑀯𑀺𑀲𑁂𑀲𑀁 𑀆𑀯𑀳𑀦𑁆𑀢𑀺𑀬𑀸 𑀮𑀤𑁆𑀥𑀲𑁆𑀲𑀸𑀤𑀢𑁆𑀢𑀸 𑀢𑀢𑁆𑀣 𑀲𑀸𑀢𑀺𑀲𑀬𑁄 𑀓𑀢𑁆𑀢𑀼𑀓𑀸𑀫𑀢𑀸𑀮𑀓𑁆𑀔𑀡𑁄 𑀓𑀼𑀲𑀮𑀘𑁆𑀙𑀦𑁆𑀤𑁄 𑀉𑀧𑁆𑀧𑀚𑁆𑀚𑀢𑀺. 𑀙𑀦𑁆𑀤𑀯𑀲𑁂𑀦𑀸𑀢𑀺 𑀢𑀣𑀸𑀧𑀯𑀢𑁆𑀢𑀙𑀦𑁆𑀤𑀲𑁆𑀲 𑀯𑀲𑁂𑀦. 𑀧𑀸𑀫𑁄𑀚𑁆𑀚𑀁 𑀉𑀧𑁆𑀧𑀚𑁆𑀚𑀢𑀻𑀢𑀺 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸𑀦𑀁 𑀲𑀼𑀔𑀼𑀫𑀢𑀭𑀪𑀸𑀯𑁂 𑀆𑀭𑀫𑁆𑀫𑀡𑀲𑁆𑀲 𑀲𑀦𑁆𑀢𑀢𑀭𑀢𑀸𑀬, 𑀓𑀫𑁆𑀫𑀝𑁆𑀞𑀸𑀦𑀲𑁆𑀲 𑀘 𑀯𑀻𑀣𑀺𑀧𑀝𑀺𑀧𑀦𑁆𑀦𑀢𑀸𑀬 𑀪𑀸𑀯𑀦𑀸𑀘𑀺𑀢𑁆𑀢𑀲𑀳𑀕𑀢𑁄 𑀧𑀫𑁄𑀤𑁄 𑀔𑀼𑀤𑁆𑀤𑀓𑀸𑀤𑀺𑀪𑁂𑀤𑀸 𑀢𑀭𑀼𑀡𑀸 𑀧𑀻𑀢𑀺 𑀉𑀧𑁆𑀧𑀚𑁆𑀚𑀢𑀺. 𑀘𑀺𑀢𑁆𑀢𑀁 𑀯𑀺𑀯𑀢𑁆𑀢𑀢𑀻𑀢𑀺 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑁂 𑀉𑀧𑁆𑀧𑀦𑁆𑀦𑁂 𑀧𑀓𑀢𑀺𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀢𑁄 𑀘𑀺𑀢𑁆𑀢𑀁 𑀦𑀺𑀯𑀢𑁆𑀢𑀢𑀺. 𑀉𑀧𑁂𑀓𑁆𑀔𑀸 𑀲𑀡𑁆𑀞𑀸𑀢𑀻𑀢𑀺 𑀢𑀲𑁆𑀫𑀺𑀁 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑁂 𑀉𑀧𑀘𑀸𑀭𑀧𑁆𑀧𑀦𑀸𑀪𑁂𑀤𑁂 𑀲𑀫𑀸𑀥𑀺𑀫𑁆𑀳𑀺 𑀉𑀧𑁆𑀧𑀦𑁆𑀦𑁂 𑀧𑀼𑀦 𑀛𑀸𑀦𑀦𑀺𑀩𑁆𑀩𑀢𑁆𑀢𑀦𑀢𑁆𑀣𑀁 𑀩𑁆𑀬𑀸𑀧𑀸𑀭𑀸𑀪𑀸𑀯𑀢𑁄 𑀅𑀚𑁆𑀛𑀼𑀧𑁂𑀓𑁆𑀔𑀦𑀁 𑀳𑁄𑀢𑀺, 𑀲𑀸 𑀧𑀦𑀸𑀬𑀁 𑀉𑀧𑁂𑀓𑁆𑀔𑀸 𑀢𑀢𑁆𑀭𑀫𑀚𑁆𑀛𑀢𑁆𑀢𑀼𑀧𑁂𑀓𑁆𑀔𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀦𑀼𑀧𑀲𑁆𑀲𑀦𑀸𑀜𑀸𑀡𑀦𑁆𑀢𑀺 𑀲𑀫𑀣𑀯𑀲𑁂𑀦 𑀦𑀺𑀫𑀺𑀢𑁆𑀢𑀲𑁆𑀲 𑀅𑀦𑀼𑀧𑀲𑁆𑀲𑀦𑀸, 𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀫𑀼𑀔𑁂𑀦 𑀢𑀦𑁆𑀦𑀺𑀲𑁆𑀲𑀬𑀦𑀸𑀫𑀭𑀽𑀧𑀲𑁆𑀲 𑀅𑀦𑀼𑀧𑀲𑁆𑀲𑀦𑀸 𑀘 𑀜𑀸𑀡𑀁. 𑀓𑀸𑀬𑁄 𑀉𑀧𑀝𑁆𑀞𑀸𑀦𑀦𑁆𑀢𑀺 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀲𑀗𑁆𑀔𑀸𑀢𑁄 𑀓𑀸𑀬𑁄 𑀉𑀧𑀕𑀦𑁆𑀢𑁆𑀯𑀸 𑀢𑀺𑀝𑁆𑀞𑀢𑀺 𑀏𑀢𑁆𑀣 𑀲𑀢𑀻𑀢𑀺 𑀉𑀧𑀝𑁆𑀞𑀸𑀦𑀁, 𑀦𑁄 𑀲𑀢𑀺, 𑀲𑀢𑀺 𑀧𑀦 𑀲𑀭𑀲𑀢𑁄 𑀉𑀧𑀢𑀺𑀝𑁆𑀞𑀦𑀝𑁆𑀞𑁂𑀦 𑀲𑀭𑀡𑀝𑁆𑀞𑁂𑀦 𑀘 𑀉𑀧𑀝𑁆𑀞𑀸𑀦𑀜𑁆𑀘𑁂𑀯 𑀲𑀢𑀺 𑀘. 𑀢𑁂𑀦 𑀯𑀼𑀘𑁆𑀘𑀢𑀻𑀢𑀺𑀆𑀤𑀻𑀲𑀼 𑀬𑀸 𑀅𑀬𑀁 𑀬𑀣𑀸𑀯𑀼𑀢𑁆𑀢𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀓𑀸𑀬𑁂, 𑀢𑀦𑁆𑀦𑀺𑀲𑁆𑀲𑀬𑀪𑀽𑀢𑁂 𑀓𑀭𑀚𑀓𑀸𑀬𑁂 𑀘 𑀓𑀸𑀬𑀲𑁆𑀲𑁂𑀯 𑀅𑀦𑀼𑀧𑀲𑁆𑀲𑀦𑀸 𑀦𑀺𑀘𑁆𑀘𑀸𑀤𑀺𑀪𑀸𑀯𑀁 𑀯𑀸 𑀇𑀢𑁆𑀣𑀺𑀧𑀼𑀭𑀺𑀲𑀲𑀢𑁆𑀢𑀚𑀻𑀯𑀸𑀤𑀺𑀪𑀸𑀯𑀁 𑀯𑀸 𑀅𑀦𑀦𑀼𑀧𑀲𑁆𑀲𑀺𑀢𑁆𑀯𑀸 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀓𑀸𑀬𑀫𑀢𑁆𑀢𑀲𑁆𑀲𑁂𑀯 𑀅𑀦𑀺𑀘𑁆𑀘𑀸𑀤𑀺𑀪𑀸𑀯𑀲𑁆𑀲 𑀘 𑀅𑀦𑀼𑀧𑀲𑁆𑀲𑀦𑀸, 𑀢𑀸𑀬 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀬 𑀲𑀢𑀺𑀲𑀗𑁆𑀔𑀸𑀢𑀲𑁆𑀲 𑀧𑀝𑁆𑀞𑀸𑀦𑀲𑁆𑀲 𑀪𑀸𑀯𑀦𑀸 𑀯𑀟𑁆𑀠𑀦𑀸 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀦𑀸 𑀲𑀢𑀺𑀧𑀝𑁆𑀞𑀸𑀦𑀪𑀸𑀯𑀦𑀸𑀢𑀺 𑀅𑀬𑀁 𑀲𑀗𑁆𑀔𑁂𑀧𑀢𑁆𑀣𑁄.

𑀇𑀢𑁆𑀢𑀭𑀯𑀲𑁂𑀦𑀸𑀢𑀺 𑀧𑀭𑀺𑀢𑁆𑀢𑀓𑀸𑀮𑀯𑀲𑁂𑀦. 𑀢𑀸𑀤𑀺𑀲𑁄𑀢𑀺 𑀤𑀻𑀖𑁄 𑀭𑀲𑁆𑀲𑁄 𑀘. 𑀯𑀡𑁆𑀡𑀸𑀢𑀺 𑀤𑀻𑀖𑀸𑀤𑀺𑀆𑀓𑀸𑀭𑀸. 𑀦𑀸𑀲𑀺𑀓𑀕𑁆𑀕𑁂𑀯 𑀪𑀺𑀓𑁆𑀔𑀼𑀦𑁄𑀢𑀺 𑀦𑀸𑀲𑀺𑀓𑀕𑁆𑀕𑁂 𑀯𑀸, 𑀯𑀸-𑀲𑀤𑁆𑀤𑁂𑀦 𑀉𑀢𑁆𑀢𑀭𑁄𑀝𑁆𑀞𑁂 𑀯𑀸𑀢𑀺 𑀅𑀢𑁆𑀣𑁄. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 ‘‘𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀯𑀲𑁂𑀦 𑀲𑀩𑁆𑀩𑀁 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀓𑀸𑀬𑀁 𑀯𑀺𑀤𑀺𑀢𑀁 𑀧𑀸𑀓𑀝𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀧𑀼𑀩𑁆𑀩𑁂 𑀧𑀯𑀢𑁆𑀢𑀆𑀪𑁄𑀕𑀯𑀲𑁂𑀦 𑀧𑀘𑁆𑀙𑀸 𑀢𑀣𑀸 𑀲𑀫𑀼𑀧𑁆𑀧𑀦𑁆𑀦𑁂𑀦 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑁂𑀦 𑀢𑀁 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀓𑀸𑀬𑀁 𑀏𑀯𑀁 𑀯𑀺𑀤𑀺𑀢𑀁 𑀧𑀸𑀓𑀝𑀁 𑀓𑀭𑁄𑀦𑁆𑀢𑁄 𑀅𑀲𑁆𑀲𑀲𑀢𑀺 𑀘𑁂𑀯 𑀧𑀲𑁆𑀲𑀲𑀢𑀺 𑀘, 𑀢𑀲𑁆𑀫𑀸 𑀏𑀯𑀁𑀪𑀽𑀢𑁄 𑀲𑀩𑁆𑀩𑀓𑀸𑀬𑀧𑀝𑀺𑀲𑀁𑀯𑁂𑀤𑀻 𑀅𑀲𑁆𑀲𑀲𑀺𑀲𑁆𑀲𑀸𑀫𑀺 𑀧𑀲𑁆𑀲𑀲𑀺𑀲𑁆𑀲𑀸𑀫𑀻𑀢𑀺 𑀲𑀺𑀓𑁆𑀔𑀢𑀺 𑀦𑀸𑀫, 𑀦 𑀧𑀦 ‘‘𑀅𑀦𑀸𑀕𑀢𑁂 𑀏𑀯𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑀦𑀫𑀢𑁆𑀢𑁂𑀦 𑀲𑁄 𑀏𑀯𑀁 𑀯𑀼𑀘𑁆𑀘𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀣𑀸𑀪𑀽𑀢𑀲𑁆𑀲𑀸𑀢𑀺 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀁 𑀯𑀺𑀤𑀺𑀢𑀁 𑀓𑀭𑁄𑀦𑁆𑀢𑀲𑁆𑀲. 𑀲𑀁𑀯𑀭𑁄𑀢𑀺 𑀲𑀢𑀺 𑀯𑀻𑀭𑀺𑀬𑀫𑁆𑀧𑀺 𑀯𑀸. 𑀦 𑀅𑀜𑁆𑀜𑀁 𑀓𑀺𑀜𑁆𑀘𑀻𑀢𑀺 𑀲𑀩𑁆𑀩𑀓𑀸𑀬𑀁 𑀯𑀺𑀤𑀺𑀢𑀁 𑀓𑀭𑀺𑀲𑁆𑀲𑀸𑀫𑀻𑀢𑀺𑀆𑀤𑀺𑀓𑀁 𑀧𑀼𑀩𑁆𑀩𑀸𑀪𑁄𑀕𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀜𑀸𑀡𑀼𑀧𑁆𑀧𑀸𑀤𑀦𑀸𑀤𑀻𑀲𑀽𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀓𑀸𑀬𑀲𑀗𑁆𑀔𑀸𑀭𑀧𑀲𑁆𑀲𑀫𑁆𑀪𑀦𑀧𑀻𑀢𑀺𑀧𑀝𑀺𑀲𑀁𑀯𑁂𑀤𑀦𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀓𑀸𑀬𑀲𑀗𑁆𑀔𑀸𑀭𑀦𑁆𑀢𑀺 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀁. 𑀲𑁄 𑀳𑀺 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑁄𑀧𑀺 𑀲𑀫𑀸𑀦𑁄 𑀓𑀭𑀚𑀓𑀸𑀬𑀧𑀝𑀺𑀩𑀤𑁆𑀥𑀯𑀼𑀢𑁆𑀢𑀺𑀢𑀸𑀬 𑀢𑁂𑀦 𑀲𑀗𑁆𑀔𑀭𑀻𑀬𑀢𑀻𑀢𑀺 𑀓𑀸𑀬𑀲𑀗𑁆𑀔𑀸𑀭𑁄𑀢𑀺 𑀯𑀼𑀘𑁆𑀘𑀢𑀺. 𑀅𑀧𑀭𑀺𑀕𑁆𑀕𑀳𑀺𑀢𑀓𑀸𑀮𑁂𑀢𑀺 𑀓𑀫𑁆𑀫𑀝𑁆𑀞𑀸𑀦𑀲𑁆𑀲 𑀅𑀦𑀸𑀭𑀤𑁆𑀥𑀓𑀸𑀮𑁂, 𑀢𑀤𑀸𑀭𑀫𑁆𑀪𑀢𑁆𑀣𑀸𑀬 𑀓𑀸𑀬𑀘𑀺𑀢𑁆𑀢𑀸𑀦𑀫𑁆𑀧𑀺 𑀅𑀧𑀭𑀺𑀕𑁆𑀕𑀳𑀺𑀢𑀓𑀸𑀮𑁂𑀢𑀺 𑀅𑀢𑁆𑀣𑁄. 𑀦𑀺𑀲𑀻𑀤𑀢𑀺 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀉𑀚𑀼𑀁 𑀓𑀸𑀬𑀁 𑀧𑀡𑀺𑀥𑀸𑀬𑀸𑀢𑀺 𑀳𑀺 𑀇𑀫𑀺𑀦𑀸 𑀓𑀸𑀬𑀧𑀭𑀺𑀕𑁆𑀕𑀳𑁄, 𑀧𑀭𑀺𑀫𑀼𑀔𑀁 𑀲𑀢𑀺𑀁 𑀉𑀧𑀝𑁆𑀞𑀧𑁂𑀢𑁆𑀯𑀸𑀢𑀺 𑀇𑀫𑀺𑀦𑀸 𑀘𑀺𑀢𑁆𑀢𑀧𑀭𑀺𑀕𑁆𑀕𑀳𑁄 𑀯𑀼𑀢𑁆𑀢𑁄. 𑀅𑀥𑀺𑀫𑀢𑁆𑀢𑀦𑁆𑀢𑀺 𑀩𑀮𑀯𑀁 𑀑𑀴𑀸𑀭𑀺𑀓𑀁, 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁂𑀦 𑀯𑀼𑀢𑁆𑀢𑀁. 𑀓𑀸𑀬𑀲𑀗𑁆𑀔𑀸𑀭𑁄 𑀳𑀺 𑀅𑀥𑀺𑀧𑁆𑀧𑁂𑀢𑁄. 𑀅𑀥𑀺𑀫𑀢𑁆𑀢𑀁 𑀳𑀼𑀢𑁆𑀯𑀸 𑀧𑀯𑀢𑁆𑀢𑀢𑀻𑀢𑀺 𑀓𑀺𑀭𑀺𑀬𑀸𑀯𑀺𑀲𑁂𑀲𑀦𑀁 𑀯𑀸 𑀏𑀢𑀁. 𑀲𑀩𑁆𑀩𑁂𑀲𑀁𑀬𑁂𑀯𑀸𑀢𑀺 𑀉𑀪𑀬𑁂𑀲𑀫𑁆𑀧𑀺.

𑀫𑀳𑀸𑀪𑀽𑀢𑀧𑀭𑀺𑀕𑁆𑀕𑀳𑁂 𑀲𑀼𑀔𑀼𑀫𑁄𑀢𑀺 𑀘𑀢𑀼𑀥𑀸𑀢𑀼𑀫𑀼𑀔𑁂𑀦 𑀯𑀺𑀧𑀲𑁆𑀲𑀦𑀸𑀪𑀺𑀦𑀺𑀯𑁂𑀲𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀮𑀓𑁆𑀔𑀡𑀸𑀭𑀫𑁆𑀫𑀡𑀺𑀓𑀯𑀺𑀧𑀲𑁆𑀲𑀦𑀸𑀬𑀸𑀢𑀺 𑀓𑀮𑀸𑀧𑀲𑀫𑁆𑀫𑀲𑀦𑀫𑀸𑀳. 𑀦𑀺𑀩𑁆𑀩𑀺𑀤𑀸𑀦𑀼𑀧𑀲𑁆𑀲𑀦𑀢𑁄 𑀧𑀝𑁆𑀞𑀸𑀬 𑀩𑀮𑀯𑀯𑀺𑀧𑀲𑁆𑀲𑀦𑀸, 𑀢𑀢𑁄 𑀑𑀭𑀁 𑀤𑀼𑀩𑁆𑀩𑀮𑀯𑀺𑀧𑀲𑁆𑀲𑀦𑀸. 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑀸𑀢𑀺 𑀅𑀧𑀭𑀺𑀕𑁆𑀕𑀳𑀺𑀢𑀓𑀸𑀮𑁂𑀢𑀺𑀆𑀤𑀺𑀦𑀸 𑀲𑀫𑀣𑀦𑀬𑁂 𑀯𑀼𑀢𑁆𑀢𑀦𑀬𑁂𑀦.

𑀘𑁄𑀤𑀦𑀸𑀲𑁄𑀥𑀦𑀸𑀳𑀻𑀢𑀺 𑀅𑀦𑀼𑀬𑁄𑀕𑀧𑀭𑀺𑀳𑀸𑀭𑁂𑀳𑀺. 𑀓𑀣𑀦𑁆𑀢𑀺𑀆𑀤𑀺 𑀧𑀝𑀺𑀲𑀫𑁆𑀪𑀺𑀤𑀸𑀧𑀸𑀴𑀺, 𑀢𑀢𑁆𑀣 𑀓𑀣𑀁 𑀲𑀺𑀓𑁆𑀔𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀢𑀺 𑀓𑀺𑀭𑀸𑀢𑀺𑀆𑀤𑀺 𑀘𑁄𑀤𑀓𑀯𑀘𑀦𑀁. 𑀇𑀢𑀺 𑀓𑀺𑀭𑀸𑀢𑀺 𑀏𑀯𑀜𑁆𑀘𑁂𑀢𑀺 𑀅𑀢𑁆𑀣𑁄. 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑁄 𑀲𑀩𑁆𑀩𑀣𑀸 𑀅𑀪𑀸𑀯𑀁 𑀉𑀧𑀦𑁂𑀢𑀺 𑀘𑁂𑀢𑀺 𑀘𑁄𑀤𑀓𑀲𑁆𑀲 𑀅𑀥𑀺𑀧𑁆𑀧𑀸𑀬𑁄. 𑀯𑀸𑀢𑀽𑀧𑀮𑀤𑁆𑀥𑀺𑀬𑀸𑀢𑀺 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀯𑀸𑀢𑀲𑁆𑀲 𑀅𑀪𑀸𑀯𑁂𑀦 𑀢𑀩𑁆𑀩𑀺𑀲𑀬𑀸𑀬 𑀉𑀧𑀮𑀤𑁆𑀥𑀺𑀬𑀸 𑀪𑀸𑀯𑀦𑀸𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑁄 𑀯𑀟𑁆𑀠𑀺 𑀘 𑀦 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀦 𑀘 𑀦𑀦𑁆𑀢𑀺 𑀏𑀢𑁆𑀣 𑀦𑀦𑁆𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀧𑀼𑀦 𑀇𑀢𑀺 𑀓𑀺𑀭𑀸𑀢𑀺𑀆𑀤𑀺 𑀬𑀣𑀸𑀯𑀼𑀢𑁆𑀢𑀸𑀬 𑀘𑁄𑀤𑀦𑀸𑀬 𑀯𑀺𑀲𑁆𑀲𑀚𑁆𑀚𑀦𑀸, 𑀢𑀢𑁆𑀣 𑀇𑀢𑀺 𑀓𑀺𑀭 𑀲𑀺𑀓𑁆𑀔𑀢𑀻𑀢𑀺 𑀫𑀬𑀸 𑀯𑀼𑀢𑁆𑀢𑀸𑀓𑀸𑀭𑁂𑀦 𑀬𑀤𑀺 𑀲𑀺𑀓𑁆𑀔𑀢𑀻𑀢𑀺 𑀅𑀢𑁆𑀣𑁄. 𑀧𑀪𑀸𑀯𑀦𑀸 𑀳𑁄𑀢𑀻𑀢𑀺 𑀬𑀤𑀺𑀧𑀺 𑀑𑀴𑀸𑀭𑀺𑀓𑀸 𑀓𑀸𑀬𑀲𑀗𑁆𑀔𑀸𑀭𑀸 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑁆𑀢𑀺, 𑀲𑀼𑀔𑀼𑀫𑀸 𑀧𑀦 𑀅𑀢𑁆𑀣𑁂𑀯𑀸𑀢𑀺 𑀪𑀸𑀯𑀦𑀸𑀬𑀧𑀺 𑀯𑀟𑁆𑀠𑀺 𑀳𑁄𑀢𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀓𑀁𑀲𑁂𑀢𑀺 𑀓𑀁𑀲𑀪𑀸𑀚𑀦𑁂. 𑀦𑀺𑀫𑀺𑀢𑁆𑀢𑀦𑁆𑀢𑀺 𑀦𑀺𑀫𑀺𑀢𑁆𑀢𑀲𑁆𑀲, 𑀢𑁂𑀲𑀁 𑀲𑀤𑁆𑀤𑀸𑀦𑀁 𑀧𑀯𑀢𑁆𑀢𑀺𑀆𑀓𑀸𑀭𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀲𑀼𑀔𑀼𑀫𑀓𑀸 𑀲𑀤𑁆𑀤𑀸𑀢𑀺 𑀅𑀦𑀼𑀭𑀯𑁂 𑀆𑀳. 𑀲𑀼𑀔𑀼𑀫𑀲𑀤𑁆𑀤𑀦𑀺𑀫𑀺𑀢𑁆𑀢𑀸𑀭𑀫𑁆𑀫𑀡𑀢𑀸𑀧𑀻𑀢𑀺 𑀲𑀼𑀔𑀼𑀫𑁄 𑀲𑀤𑁆𑀤𑁄𑀯 𑀦𑀺𑀫𑀺𑀢𑁆𑀢𑀁 𑀢𑀤𑀸𑀭𑀫𑁆𑀫𑀡𑀢𑀸𑀬𑀧𑀺.

𑀆𑀪𑀺𑀲𑀫𑀸𑀘𑀸𑀭𑀺𑀓𑀲𑀻𑀮𑀦𑁆𑀢𑀺 𑀏𑀢𑁆𑀣 𑀅𑀪𑀺𑀲𑀫𑀸𑀘𑀸𑀭𑁄𑀢𑀺 𑀉𑀢𑁆𑀢𑀫𑀲𑀫𑀸𑀘𑀸𑀭𑁄, 𑀢𑀤𑁂𑀯 𑀆𑀪𑀺𑀲𑀫𑀸𑀘𑀸𑀭𑀺𑀓𑀁 𑀲𑀻𑀮𑀁, 𑀔𑀦𑁆𑀥𑀓𑀯𑀢𑁆𑀢𑀧𑀭𑀺𑀬𑀸𑀧𑀦𑁆𑀦𑀲𑁆𑀲 𑀲𑀻𑀮𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀅𑀳𑀁 𑀲𑀻𑀮𑀁 𑀭𑀓𑁆𑀔𑀸𑀫𑀻𑀢𑀺 𑀉𑀪𑀢𑁄𑀯𑀺𑀪𑀗𑁆𑀕𑀧𑀭𑀺𑀬𑀸𑀧𑀦𑁆𑀦𑀁 𑀲𑀻𑀮𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀆𑀯𑀸𑀲𑁄𑀢𑀺 𑀆𑀯𑀸𑀲𑀧𑀮𑀺𑀩𑁄𑀥𑁄. 𑀓𑀼𑀮𑀦𑁆𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀓𑀫𑁆𑀫𑀦𑁆𑀢𑀺 𑀦𑀯𑀓𑀫𑁆𑀫𑀁. 𑀇𑀤𑁆𑀥𑀻𑀢𑀺 𑀧𑁄𑀣𑀼𑀚𑁆𑀚𑀦𑀺𑀓𑀸 𑀇𑀤𑁆𑀥𑀺, 𑀲𑀸 𑀯𑀺𑀧𑀲𑁆𑀲𑀦𑀸𑀬 𑀧𑀮𑀺𑀩𑁄𑀥𑁄. 𑀲𑁄 𑀉𑀧𑀘𑁆𑀙𑀺𑀦𑁆𑀤𑀺𑀢𑀩𑁆𑀩𑁄𑀢𑀺 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁧.𑁪𑁧) 𑀯𑀼𑀢𑁆𑀢𑁂𑀦 𑀢𑀲𑁆𑀲 𑀢𑀲𑁆𑀲 𑀧𑀮𑀺𑀩𑁄𑀥𑀲𑁆𑀲 𑀉𑀧𑀘𑁆𑀙𑁂𑀤𑀧𑁆𑀧𑀓𑀸𑀭𑁂𑀦 𑀉𑀧𑀘𑁆𑀙𑀺𑀦𑁆𑀤𑀺𑀢𑀩𑁆𑀩𑁄. 𑀬𑁄𑀕𑀸𑀦𑀼𑀬𑁄𑀕𑁄𑀢𑀺 𑀬𑁄𑀕𑀲𑁆𑀲 𑀪𑀸𑀯𑀦𑀸𑀬 𑀅𑀦𑀼𑀬𑀼𑀜𑁆𑀚𑀦𑀁. 𑀅𑀝𑁆𑀞𑀢𑀺𑀁𑀲𑀸𑀭𑀫𑁆𑀫𑀡𑁂𑀲𑀽𑀢𑀺 𑀆𑀮𑁄𑀓𑀸𑀓𑀸𑀲𑀓𑀲𑀺𑀡𑀤𑁆𑀯𑀬𑀁 𑀯𑀚𑁆𑀚𑁂𑀢𑁆𑀯𑀸 𑀧𑀸𑀴𑀺𑀬𑀁 𑀆𑀕𑀢𑀸𑀦𑀁 𑀅𑀝𑁆𑀞𑀦𑁆𑀦𑀁 𑀓𑀲𑀺𑀡𑀸𑀦𑀁 𑀯𑀲𑁂𑀦 𑀯𑀼𑀢𑁆𑀢𑀁, 𑀘𑀢𑁆𑀢𑀸𑀭𑀻𑀲𑀜𑁆𑀜𑁂𑀯 𑀧𑀦 𑀓𑀫𑁆𑀫𑀝𑁆𑀞𑀸𑀦𑀸𑀦𑀺. 𑀬𑀣𑀸𑀯𑀼𑀢𑁆𑀢𑁂𑀦𑁂𑀯 𑀦𑀬𑁂𑀦𑀸𑀢𑀺 𑀬𑁄𑀕𑀸𑀦𑀼𑀬𑁄𑀕𑀓𑀫𑁆𑀫𑀲𑁆𑀲 𑀧𑀤𑀝𑁆𑀞𑀸𑀦𑀢𑁆𑀢𑀸𑀢𑀺 𑀇𑀫𑀫𑀢𑁆𑀣𑀁 𑀅𑀢𑀺𑀤𑀺𑀲𑀢𑀺. 𑀇𑀫𑀺𑀦𑀸𑀯 𑀓𑀫𑁆𑀫𑀝𑁆𑀞𑀸𑀦𑁂𑀦𑀸𑀢𑀺 𑀇𑀫𑀺𑀦𑀸 𑀆𑀦𑀸𑀧𑀸𑀦𑀲𑁆𑀲𑀢𑀺𑀓𑀫𑁆𑀫𑀝𑁆𑀞𑀸𑀦𑁂𑀦. 𑀫𑀳𑀸𑀳𑀢𑁆𑀣𑀺𑀧𑀣𑀁 𑀦𑀻𑀳𑀭𑀦𑁆𑀢𑁄 𑀯𑀺𑀬𑀸𑀢𑀺 𑀓𑀫𑁆𑀫𑀝𑁆𑀞𑀸𑀦𑀯𑀻𑀣𑀺𑀁 𑀫𑀳𑀸𑀳𑀢𑁆𑀣𑀺𑀫𑀕𑁆𑀕𑀁 𑀓𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑀯𑀺𑀬.

𑀯𑀼𑀢𑁆𑀢𑀧𑁆𑀧𑀓𑀸𑀭𑀫𑀸𑀘𑀭𑀺𑀬𑀦𑁆𑀢𑀺 ‘‘𑀇𑀫𑀺𑀦𑀸𑀯 𑀓𑀫𑁆𑀫𑀝𑁆𑀞𑀸𑀦𑁂𑀦 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀢𑀲𑁆𑀲𑀸’’𑀢𑀺𑀆𑀤𑀺𑀦𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀆𑀘𑀭𑀺𑀬𑀁. ‘‘𑀧𑀺𑀬𑁄 𑀕𑀭𑀼 𑀪𑀸𑀯𑀦𑀻𑀬𑁄’’𑀢𑀺𑀆𑀤𑀺𑀦𑀸 (𑀅. 𑀦𑀺. 𑁭.𑁩𑁭; 𑀦𑁂𑀢𑁆𑀢𑀺. 𑁧𑁧𑁩; 𑀫𑀺. 𑀧. 𑁬.𑁧.𑁧𑁦) 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁧.𑁪𑁨) 𑀯𑀼𑀢𑁆𑀢𑀧𑁆𑀧𑀓𑀸𑀭𑀫𑀸𑀘𑀭𑀺𑀬𑀦𑁆𑀢𑀺𑀧𑀺 𑀯𑀤𑀦𑁆𑀢𑀺. 𑀧𑀜𑁆𑀘𑀲𑀦𑁆𑀥𑀺𑀓𑀦𑁆𑀢𑀺 𑀧𑀜𑁆𑀘𑀧𑀩𑁆𑀩𑀁, 𑀧𑀜𑁆𑀘𑀪𑀸𑀕𑀦𑁆𑀢𑀺 𑀅𑀢𑁆𑀣𑁄. 𑀓𑀫𑁆𑀫𑀝𑁆𑀞𑀸𑀦𑀲𑁆𑀲 𑀉𑀕𑁆𑀕𑀡𑁆𑀳𑀦𑀦𑁆𑀢𑀺 𑀓𑀫𑁆𑀫𑀝𑁆𑀞𑀸𑀦𑀕𑀦𑁆𑀣𑀲𑁆𑀲 𑀉𑀕𑁆𑀕𑀡𑁆𑀳𑀦𑀁. 𑀢𑀤𑀢𑁆𑀣𑀧𑀭𑀺𑀧𑀼𑀘𑁆𑀙𑀸 𑀓𑀫𑁆𑀫𑀝𑁆𑀞𑀸𑀦𑀲𑁆𑀲 𑀧𑀭𑀺𑀧𑀼𑀘𑁆𑀙𑀸, 𑀢𑀢𑁆𑀣 𑀲𑀁𑀲𑀬𑀧𑀭𑀺𑀧𑀼𑀘𑁆𑀙𑀸 𑀯𑀸. 𑀓𑀫𑁆𑀫𑀝𑁆𑀞𑀸𑀦𑀲𑁆𑀲 𑀉𑀧𑀝𑁆𑀞𑀸𑀦𑀦𑁆𑀢𑀺 𑀏𑀯𑀁 𑀪𑀸𑀯𑀦𑀫𑀦𑀼𑀬𑀼𑀜𑁆𑀚𑀦𑁆𑀢𑀲𑁆𑀲 𑀏𑀯𑀫𑀺𑀥 𑀦𑀺𑀫𑀺𑀢𑁆𑀢𑀁 𑀉𑀧𑀢𑀺𑀝𑁆𑀞𑀢𑀻𑀢𑀺 𑀉𑀧𑀥𑀸𑀭𑀡𑀁. 𑀢𑀣𑀸 𑀓𑀫𑁆𑀫𑀝𑁆𑀞𑀸𑀦𑀧𑁆𑀧𑀦𑀸 𑀏𑀯𑀁 𑀛𑀸𑀦𑀫𑀧𑁆𑀧𑁂𑀢𑀻𑀢𑀺. 𑀓𑀫𑁆𑀫𑀝𑁆𑀞𑀸𑀦𑀲𑁆𑀲 𑀮𑀓𑁆𑀔𑀡𑀦𑁆𑀢𑀺 𑀕𑀡𑀦𑀸𑀦𑀼𑀩𑀦𑁆𑀥𑀦𑀸𑀨𑀼𑀲𑀦𑀸𑀦𑀁 𑀯𑀲𑁂𑀦 𑀪𑀸𑀯𑀦𑀁 𑀉𑀲𑁆𑀲𑀼𑀓𑁆𑀓𑀸𑀧𑁂𑀢𑁆𑀯𑀸 𑀞𑀧𑀦𑀸𑀯𑀲𑁂𑀦 𑀫𑀢𑁆𑀣𑀓𑀧𑁆𑀧𑀢𑁆𑀢𑀺 𑀇𑀥 𑀪𑀸𑀯𑀦𑀸𑀢𑀺 𑀓𑀫𑁆𑀫𑀝𑁆𑀞𑀸𑀦𑀲𑀪𑀸𑀯𑀲𑁆𑀲 𑀲𑀮𑁆𑀮𑀓𑁆𑀔𑀡𑀁, 𑀢𑁂𑀦𑀸𑀳 ‘‘𑀓𑀫𑁆𑀫𑀝𑁆𑀞𑀸𑀦𑀲𑀪𑀸𑀯𑀽𑀧𑀥𑀸𑀭𑀡𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺.

𑀅𑀝𑁆𑀞𑀸𑀭𑀲𑀲𑁂𑀦𑀸𑀲𑀦𑀤𑁄𑀲𑀯𑀺𑀯𑀚𑁆𑀚𑀺𑀢𑀦𑁆𑀢𑀺 𑀫𑀳𑀢𑁆𑀢𑀁 𑀦𑀯𑀢𑁆𑀢𑀁 𑀚𑀺𑀡𑁆𑀡𑀢𑁆𑀢𑀁 𑀧𑀦𑁆𑀣𑀦𑀺𑀲𑁆𑀲𑀺𑀢𑀢𑁆𑀢𑀁 𑀲𑁄𑀡𑁆𑀟𑀺𑀧𑀡𑁆𑀡𑀧𑀼𑀧𑁆𑀨𑀨𑀮𑀬𑀼𑀢𑁆𑀢𑀢𑀸 𑀧𑀢𑁆𑀣𑀦𑀻𑀬𑀢𑀸 𑀦𑀕𑀭𑀤𑀸𑀭𑀼𑀔𑁂𑀢𑁆𑀢𑀲𑀦𑁆𑀦𑀺𑀲𑁆𑀲𑀺𑀢𑀢𑀸 𑀯𑀺𑀲𑀪𑀸𑀕𑀸𑀦𑀁 𑀧𑀼𑀕𑁆𑀕𑀮𑀸𑀦𑀁 𑀅𑀢𑁆𑀣𑀺𑀢𑀸 𑀧𑀝𑁆𑀝𑀦𑀲𑀦𑁆𑀦𑀺𑀲𑁆𑀲𑀺𑀢𑀢𑀸 𑀧𑀘𑁆𑀘𑀦𑁆𑀢𑀲𑀦𑁆𑀦𑀺𑀲𑁆𑀲𑀺𑀢𑀢𑀸 𑀭𑀚𑁆𑀚𑀲𑀻𑀫𑀲𑀦𑁆𑀦𑀺𑀲𑁆𑀲𑀺𑀢𑀢𑀸 𑀅𑀲𑀧𑁆𑀧𑀸𑀬𑀢𑀸 𑀓𑀮𑁆𑀬𑀸𑀡𑀫𑀺𑀢𑁆𑀢𑀸𑀦𑀁 𑀅𑀮𑀸𑀪𑁄𑀢𑀺 𑀇𑀫𑁂𑀳𑀺 𑀅𑀝𑁆𑀞𑀸𑀭𑀲𑀳𑀺 𑀲𑁂𑀦𑀸𑀲𑀦𑀤𑁄𑀲𑁂𑀳𑀺 𑀯𑀺𑀯𑀚𑁆𑀚𑀺𑀢𑀁. 𑀧𑀜𑁆𑀘𑀲𑁂𑀦𑀸𑀲𑀦𑀗𑁆𑀕𑀲𑀫𑀦𑁆𑀦𑀸𑀕𑀢𑀦𑁆𑀢𑀺 𑁋

‘‘𑀇𑀥, 𑀪𑀺𑀓𑁆𑀔𑀯𑁂, 𑀲𑁂𑀦𑀸𑀲𑀦𑀁 𑀦𑀸𑀢𑀺𑀤𑀽𑀭𑀁 𑀳𑁄𑀢𑀺 𑀦𑀸𑀘𑁆𑀘𑀸𑀲𑀦𑁆𑀦𑀁 𑀕𑀫𑀦𑀸𑀕𑀫𑀦𑀲𑀫𑁆𑀧𑀦𑁆𑀦𑀁 𑀤𑀺𑀯𑀸 𑀅𑀧𑁆𑀧𑀸𑀓𑀺𑀡𑁆𑀡𑀁 𑀭𑀢𑁆𑀢𑀺𑀁 𑀅𑀧𑁆𑀧𑀲𑀤𑁆𑀤𑀁 𑀅𑀧𑁆𑀧𑀦𑀺𑀕𑁆𑀖𑁄𑀲𑀁 𑀅𑀧𑁆𑀧𑀟𑀁𑀲𑀫𑀓𑀲𑀯𑀸𑀢𑀸𑀢𑀧𑀲𑀭𑀻𑀲𑀧𑀲𑀫𑁆𑀨𑀲𑁆𑀲𑀁, 𑀢𑀲𑁆𑀫𑀺𑀁 𑀔𑁄 𑀧𑀦 𑀲𑁂𑀦𑀸𑀲𑀦𑁂 𑀯𑀺𑀳𑀭𑀦𑁆𑀢𑀲𑁆𑀲 𑀅𑀧𑁆𑀧𑀓𑀲𑀺𑀭𑁂𑀦 𑀉𑀧𑁆𑀧𑀚𑁆𑀚𑀦𑁆𑀢𑀺 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸, 𑀢𑀲𑁆𑀫𑀺𑀁 𑀔𑁄 𑀧𑀦 𑀲𑁂𑀦𑀸𑀲𑀦𑁂 𑀣𑁂𑀭𑀸 𑀪𑀺𑀓𑁆𑀔𑀽 𑀯𑀺𑀳𑀭𑀦𑁆𑀢𑀺 …𑀧𑁂… 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀲𑁂𑀦𑀸𑀲𑀦𑀁 𑀧𑀜𑁆𑀘𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀳𑁄𑀢𑀻’’𑀢𑀺 (𑀅. 𑀦𑀺. 𑁧𑁦.𑁧𑁧) 𑁋

𑀏𑀯𑀁 𑀪𑀕𑀯𑀢𑀸 𑀯𑀼𑀢𑁆𑀢𑁂𑀳𑀺 𑀧𑀜𑁆𑀘𑀳𑀺 𑀲𑁂𑀦𑀸𑀲𑀦𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁, 𑀏𑀢𑁆𑀣 𑀘 𑀦𑀸𑀢𑀺𑀤𑀽𑀭𑀢𑀸𑀤𑀺 𑀏𑀓𑀁, 𑀤𑀺𑀯𑀸 𑀅𑀧𑁆𑀧𑀸𑀓𑀺𑀡𑁆𑀡𑀢𑀸𑀤𑀺 𑀏𑀓𑀁, 𑀅𑀧𑁆𑀧𑀟𑀁𑀲𑀸𑀤𑀺𑀢𑀸 𑀏𑀓𑀁, 𑀘𑀻𑀯𑀭𑀸𑀤𑀺𑀮𑀸𑀪𑁄 𑀏𑀓𑀁, 𑀣𑁂𑀭𑀸𑀦𑀁 𑀪𑀺𑀓𑁆𑀔𑀽𑀦𑀁 𑀦𑀺𑀯𑀸𑀲𑁄 𑀏𑀓𑀦𑁆𑀢𑀺 𑀏𑀯𑀁 𑀧𑀜𑁆𑀘𑀗𑁆𑀕𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀉𑀧𑀘𑁆𑀙𑀺𑀦𑁆𑀦𑀔𑀼𑀤𑁆𑀤𑀓𑀧𑀮𑀺𑀩𑁄𑀥𑁂𑀦𑀸𑀢𑀺 𑀤𑀻𑀖𑀸𑀦𑀁 𑀓𑁂𑀲𑀸𑀤𑀻𑀦𑀁 𑀳𑀭𑀡𑁂𑀦 𑀧𑀢𑁆𑀢𑀘𑀻𑀯𑀭𑀸𑀤𑀻𑀦𑀁 𑀧𑀘𑀦𑀢𑀼𑀦𑁆𑀦𑀓𑀭𑀡𑀭𑀚𑀦𑀸𑀤𑀺𑀓𑀭𑀡𑁂𑀳𑀺 𑀘 𑀉𑀧𑀘𑁆𑀙𑀺𑀦𑁆𑀦𑀸 𑀔𑀼𑀤𑁆𑀤𑀓𑀸 𑀧𑀮𑀺𑀩𑁄𑀥𑀸 𑀬𑁂𑀦, 𑀢𑁂𑀦. 𑀪𑀢𑁆𑀢𑀲𑀫𑁆𑀫𑀤𑀦𑁆𑀢𑀺 𑀪𑁄𑀚𑀦𑀦𑀺𑀫𑀺𑀢𑁆𑀢𑀁 𑀧𑀭𑀺𑀲𑁆𑀲𑀫𑀁. 𑀆𑀘𑀭𑀺𑀬𑀢𑁄 𑀉𑀕𑁆𑀕𑀳𑁄 𑀆𑀘𑀭𑀺𑀬𑀼𑀕𑁆𑀕𑀳𑁄, 𑀲𑀩𑁆𑀩𑁄𑀧𑀺 𑀓𑀫𑁆𑀫𑀝𑁆𑀞𑀸𑀦𑀯𑀺𑀥𑀺, 𑀦 𑀧𑀼𑀩𑁆𑀩𑁂 𑀯𑀼𑀢𑁆𑀢𑀉𑀕𑁆𑀕𑀳𑀫𑀢𑁆𑀢𑀁, 𑀢𑀢𑁄. 𑀏𑀓𑀧𑀤𑀫𑁆𑀧𑀻𑀢𑀺 𑀏𑀓𑀓𑁄𑀝𑁆𑀞𑀸𑀲𑀫𑁆𑀧𑀺.

𑀅𑀦𑀼𑀯𑀳𑀦𑀸𑀢𑀺 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸𑀦𑀁 𑀅𑀦𑀼𑀕𑀫𑀦𑀯𑀲𑁂𑀦 𑀲𑀢𑀺𑀬𑀸 𑀦𑀺𑀭𑀦𑁆𑀢𑀭𑀁 𑀅𑀦𑀼𑀧𑁆𑀧𑀯𑀢𑁆𑀢𑀦𑀸. 𑀬𑀲𑁆𑀫𑀸 𑀧𑀦 𑀕𑀡𑀦𑀸𑀤𑀺𑀯𑀲𑁂𑀦 𑀯𑀺𑀬 𑀨𑀼𑀲𑀦𑀸𑀯𑀲𑁂𑀦 𑀯𑀺𑀲𑀼𑀁 𑀫𑀦𑀲𑀺𑀓𑀸𑀭𑁄 𑀦𑀢𑁆𑀣𑀺, 𑀨𑀼𑀝𑁆𑀞𑀨𑀼𑀝𑁆𑀞𑀝𑁆𑀞𑀸𑀦𑁂 𑀏𑀯 𑀕𑀡𑀦𑀸𑀤𑀺 𑀓𑀸𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 𑀇𑀥 𑀨𑀼𑀲𑀦𑀸𑀕𑀳𑀡𑀦𑁆𑀢𑀺 𑀤𑀻𑀧𑁂𑀦𑁆𑀢𑁄 ‘‘𑀨𑀼𑀲𑀦𑀸𑀢𑀺 𑀨𑀼𑀝𑁆𑀞𑀝𑁆𑀞𑀸𑀦’’𑀦𑁆𑀢𑀺 𑀆𑀳. 𑀞𑀧𑀦𑀸𑀢𑀺 𑀲𑀫𑀸𑀥𑀸𑀦𑀁, 𑀲𑀫𑀸𑀥𑀺𑀧𑁆𑀧𑀥𑀸𑀦𑀸 𑀧𑀦 𑀅𑀧𑁆𑀧𑀦𑀸𑀢𑀺 𑀆𑀳 ‘‘𑀞𑀧𑀦𑀸𑀢𑀺 𑀅𑀧𑁆𑀧𑀦𑀸’’𑀢𑀺. 𑀅𑀦𑀺𑀘𑁆𑀘𑀢𑀸𑀤𑀻𑀦𑀁 𑀮𑀓𑁆𑀔𑀡𑀢𑁄 𑀲𑀮𑁆𑀮𑀓𑁆𑀔𑀡𑀸 𑀯𑀺𑀧𑀲𑁆𑀲𑀦𑀸. 𑀧𑀯𑀢𑁆𑀢𑀢𑁄 𑀦𑀺𑀫𑀺𑀢𑁆𑀢𑀢𑁄 𑀘 𑀯𑀺𑀦𑀺𑀯𑀝𑁆𑀝𑀦𑀢𑁄 𑀯𑀺𑀦𑀺𑀯𑀝𑁆𑀝𑀦𑀸 𑀫𑀕𑁆𑀕𑁄. 𑀓𑀺𑀮𑁂𑀲𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀪𑀸𑀯𑀢𑁄 𑀧𑀸𑀭𑀺𑀲𑀼𑀤𑁆𑀥𑀺 𑀨𑀮𑀁. 𑀢𑁂𑀲𑀦𑁆𑀢𑀺 𑀯𑀺𑀦𑀺𑀯𑀝𑁆𑀝𑀦𑀸𑀧𑀸𑀭𑀺𑀲𑀼𑀤𑁆𑀥𑀻𑀦𑀁. 𑀔𑀡𑁆𑀟𑀦𑁆𑀢𑀺 ‘‘𑀏𑀓𑀁 𑀢𑀻𑀡𑀺 𑀧𑀜𑁆𑀘𑀸’’𑀢𑀺 𑀏𑀓𑀦𑁆𑀢𑀭𑀺𑀓𑀸𑀤𑀺𑀪𑀸𑀯𑁂𑀦 𑀕𑀡𑀦𑀸𑀬 𑀔𑀡𑁆𑀟𑀦𑀁. 𑀅𑀣 𑀯𑀸 𑀔𑀡𑁆𑀟𑀦𑁆𑀢𑀺 𑀅𑀦𑁆𑀢𑀭𑀦𑁆𑀢𑀭𑀸 𑀓𑀢𑀺𑀧𑀬𑀓𑀸𑀮𑀁 𑀅𑀕𑀡𑁂𑀢𑁆𑀯𑀸 𑀧𑀼𑀦 𑀕𑀡𑀦𑀯𑀲𑁂𑀦 𑀅𑀦𑁆𑀢𑀭𑀸 𑀑𑀥𑀺𑀧𑀭𑀺𑀘𑁆𑀙𑁂𑀤𑁄 𑀦 𑀤𑀲𑁆𑀲𑁂𑀢𑀩𑁆𑀩𑁄. 𑀢𑀣𑀸 𑀔𑀡𑁆𑀟𑀁 𑀤𑀲𑁆𑀲𑁂𑀦𑁆𑀢𑀲𑁆𑀲 𑀳𑀺 ‘‘𑀓𑀫𑁆𑀫𑀝𑁆𑀞𑀸𑀦𑀦𑀺𑀦𑁆𑀦𑀁 𑀧𑀯𑀢𑁆𑀢𑀢𑀺 𑀦𑀼 𑀔𑁄 𑀫𑁂 𑀘𑀺𑀢𑁆𑀢𑀁, 𑀦𑁄’’𑀢𑀺 𑀯𑀻𑀫𑀁𑀲𑀼𑀧𑁆𑀧𑀢𑁆𑀢𑀺𑀬𑀸 𑀯𑀺𑀓𑁆𑀔𑁂𑀧𑁄 𑀳𑁄𑀢𑀺, 𑀢𑁂𑀦𑀸𑀳 𑀲𑀺𑀔𑀸𑀧𑁆𑀧𑀢𑁆𑀢𑀁 𑀦𑀼 𑀔𑁄 𑀫𑁂𑀢𑀺𑀆𑀤𑀺, 𑀇𑀤𑀜𑁆𑀘 𑀏𑀯𑀁 𑀔𑀡𑁆𑀟𑀁 𑀤𑀲𑁆𑀲𑁂𑀢𑁆𑀯𑀸 𑀘𑀺𑀭𑀢𑀭𑀁 𑀕𑀡𑀦𑀸𑀬 𑀫𑀦𑀲𑀺𑀓𑀭𑁄𑀦𑁆𑀢𑀲𑁆𑀲 𑀯𑀲𑁂𑀦 𑀯𑀼𑀢𑁆𑀢𑀁. 𑀲𑁄 𑀳𑀺 𑀢𑀣𑀸 𑀮𑀤𑁆𑀥𑀁 𑀅𑀯𑀺𑀓𑁆𑀔𑁂𑀧𑀫𑀢𑁆𑀢𑀁 𑀦𑀺𑀲𑁆𑀲𑀸𑀬 𑀏𑀯𑀁 𑀫𑀜𑁆𑀜𑁂𑀬𑁆𑀬. 𑀬𑁄 𑀉𑀧𑀝𑁆𑀞𑀸𑀢𑀺, 𑀢𑀁 𑀕𑀳𑁂𑀢𑁆𑀯𑀸𑀢𑀺 𑀇𑀤𑀁 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑁂𑀲𑀼 𑀬𑀲𑁆𑀲 𑀏𑀓𑁄𑀯 𑀧𑀞𑀫𑀁 𑀉𑀧𑀝𑁆𑀞𑀸𑀢𑀺, 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀬𑀲𑁆𑀲 𑀧𑀦 𑀉𑀪𑁄𑀧𑀺 𑀉𑀧𑀝𑁆𑀞𑀳𑀦𑁆𑀢𑀺, 𑀢𑁂𑀦 𑀉𑀪𑀬𑀫𑁆𑀧𑀺 𑀕𑀳𑁂𑀢𑁆𑀯𑀸 𑀕𑀡𑀺𑀢𑀩𑁆𑀩𑀁. 𑀬𑁄 𑀉𑀧𑀝𑁆𑀞𑀸𑀢𑀻𑀢𑀺 𑀇𑀫𑀺𑀦𑀸𑀯 𑀤𑁆𑀯𑀻𑀲𑀼 𑀦𑀸𑀲𑀸𑀧𑀼𑀝𑀯𑀸𑀢𑁂𑀲𑀼 𑀬𑁄 𑀧𑀸𑀓𑀝𑁄 𑀳𑁄𑀢𑀺, 𑀲𑁄 𑀕𑀳𑁂𑀢𑀩𑁆𑀩𑁄𑀢𑀺 𑀅𑀬𑀫𑁆𑀧𑀺 𑀅𑀢𑁆𑀣𑁄 𑀤𑀻𑀧𑀺𑀢𑁄𑀢𑀺 𑀕𑀳𑁂𑀢𑀩𑁆𑀩𑀁. 𑀧𑀞𑀫𑀁 𑀏𑀓𑁂𑀓𑀲𑁆𑀫𑀺𑀁 𑀉𑀧𑀝𑁆𑀞𑀺𑀢𑁂𑀧𑀺 𑀉𑀧𑀮𑀓𑁆𑀔𑁂𑀢𑁆𑀯𑀸 𑀕𑀡𑀦𑁆𑀢𑀲𑁆𑀲𑁂𑀯 𑀓𑀫𑁂𑀦 𑀉𑀪𑁄𑀧𑀺 𑀧𑀸𑀓𑀝𑀸 𑀳𑁄𑀦𑁆𑀢𑀻𑀢𑀺 𑀆𑀳 ‘‘𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸 𑀧𑀸𑀓𑀝𑀸 𑀳𑁄𑀦𑁆𑀢𑀻’’𑀢𑀺. 𑀏𑀯𑀁 𑀲𑀻𑀖𑀁 𑀲𑀻𑀖𑀁 𑀕𑀡𑁂𑀢𑀩𑁆𑀩𑀫𑁂𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀯𑀁 𑀲𑀻𑀖𑀕𑀡𑀦𑀸𑀭𑀫𑁆𑀪𑀲𑁆𑀲 𑀑𑀓𑀸𑀲𑀁 𑀤𑀲𑁆𑀲𑁂𑀢𑀼𑀁 𑀇𑀫𑀲𑁆𑀲𑀸𑀧𑀺 𑀧𑀼𑀭𑀺𑀫𑀦𑀬𑁂𑀦 𑀕𑀡𑀬𑀢𑁄𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀧𑀼𑀭𑀺𑀫𑀦𑀬𑁂𑀦𑀸𑀢𑀺 𑀤𑀦𑁆𑀥𑀕𑀡𑀦𑀸𑀬, 𑀧𑀸𑀓𑀝𑀸 𑀳𑀼𑀢𑁆𑀯𑀸𑀢𑀺 𑀇𑀫𑀺𑀦𑀸 𑀤𑀦𑁆𑀥𑀕𑀡𑀦𑀸𑀬 𑀆𑀭𑀤𑁆𑀥𑀓𑀸𑀮𑁂 𑀘𑀺𑀢𑁆𑀢𑀲𑁆𑀲 𑀅𑀯𑀺𑀲𑀤𑀢𑀸𑀬 𑀲𑀼𑀔𑀼𑀫𑀲𑁆𑀲𑀸𑀲𑀸𑀤𑀻𑀦𑀁 𑀅𑀧𑀸𑀓𑀝𑀢𑀁, 𑀧𑀘𑁆𑀙𑀸 𑀯𑀺𑀲𑀤𑀓𑀸𑀮𑁂 𑀧𑀸𑀓𑀝𑀢𑀜𑁆𑀘 𑀢𑁂𑀲𑀼 𑀘 𑀧𑀸𑀓𑀝𑁂𑀲𑀼 𑀤𑀦𑁆𑀥𑀕𑀡𑀦𑀁 𑀧𑀳𑀸𑀬 𑀲𑀻𑀖𑀕𑀡𑀦𑀸 𑀓𑀸𑀢𑀩𑁆𑀩𑀸𑀢𑀺 𑀤𑀲𑁆𑀲𑁂𑀢𑀺. 𑀲𑀻𑀖𑀕𑀡𑀦𑀸𑀬 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀦𑀺𑀭𑀦𑁆𑀢𑀭𑀧𑁆𑀧𑀯𑀢𑁆𑀢𑀺 𑀅𑀧𑁆𑀧𑀦𑀸𑀯𑀻𑀣𑀺𑀬𑀫𑁂𑀯, 𑀦 𑀓𑀸𑀫𑀸𑀯𑀘𑀭𑁂 𑀪𑀯𑀗𑁆𑀕𑀦𑁆𑀢𑀭𑀺𑀓𑀢𑁆𑀢𑀸𑀢𑀺 𑀆𑀳 ‘‘𑀦𑀺𑀭𑀦𑁆𑀢𑀭𑀧𑁆𑀧𑀯𑀢𑁆𑀢𑀁 𑀯𑀺𑀬𑀸’’𑀢𑀺. 𑀧𑀼𑀭𑀺𑀫𑀦𑀬𑁂𑀦𑁂𑀯𑀸𑀢𑀺 𑀲𑀻𑀖𑀕𑀡𑀦𑀸𑀬. 𑀅𑀦𑁆𑀢𑁄 𑀧𑀯𑀺𑀲𑀦𑁆𑀢𑀁 𑀯𑀸𑀢𑀁 𑀫𑀦𑀲𑀺𑀓𑀭𑁄𑀦𑁆𑀢𑁄 𑀅𑀦𑁆𑀢𑁄 𑀘𑀺𑀢𑁆𑀢𑀁 𑀧𑀯𑁂𑀲𑁂𑀢𑀺 𑀦𑀸𑀫.

𑀏𑀢𑀦𑁆𑀢𑀺 𑀏𑀢𑀁 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀚𑀸𑀢𑀁. 𑀅𑀦𑀼𑀕𑀫𑀦𑀦𑁆𑀢𑀺 𑀨𑀼𑀝𑁆𑀞𑀝𑁆𑀞𑀸𑀦𑁂 𑀫𑀦𑀲𑀺𑀓𑀭𑀡𑀫𑁂𑀯, 𑀦 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸𑀦𑀁 𑀅𑀦𑀼𑀯𑀢𑁆𑀢𑀦𑀁, 𑀢𑁂𑀦𑀸𑀳 𑁋 ‘‘𑀢𑀜𑁆𑀘 𑀔𑁄 𑀦 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀸𑀦𑀼𑀕𑀫𑀦𑀯𑀲𑁂𑀦𑀸’’𑀢𑀺. 𑀨𑀼𑀲𑀦𑀸𑀞𑀧𑀦𑀸𑀯𑀲𑁂𑀦 𑀯𑀺𑀲𑀼𑀁 𑀫𑀦𑀲𑀺𑀓𑀸𑀭𑁄 𑀦𑀢𑁆𑀣𑀻𑀢𑀺 𑀇𑀫𑀺𑀦𑀸 𑀬𑀣𑀸 𑀕𑀡𑀦𑀸𑀬 𑀨𑀼𑀲𑀦𑀸𑀬 𑀘 𑀫𑀦𑀲𑀺𑀓𑀭𑁄𑀢𑀺, 𑀏𑀯𑀁 𑀅𑀦𑀼𑀩𑀦𑁆𑀥𑀦𑀁 𑀯𑀺𑀦𑀸 𑀓𑁂𑀯𑀮𑀁 𑀞𑀧𑀦𑀸𑀬 𑀘 𑀨𑀼𑀲𑀦𑀸𑀬 𑀘 𑀫𑀦𑀲𑀺𑀓𑀸𑀭𑁄𑀧𑀺 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀦𑁆𑀢𑁂𑀦 𑀕𑀡𑀦𑀁 𑀧𑀝𑀺𑀲𑀁𑀳𑀭𑀺𑀢𑁆𑀯𑀸 𑀬𑀸𑀯 𑀅𑀧𑁆𑀧𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀢𑀸𑀯 𑀅𑀦𑀼𑀩𑀦𑁆𑀥𑀦𑀸𑀬 𑀘 𑀨𑀼𑀲𑀦𑀸𑀬 𑀘 𑀫𑀦𑀲𑀺𑀓𑀭𑁄𑀢𑀺, 𑀅𑀧𑁆𑀧𑀦𑀸𑀬 𑀧𑀦 𑀉𑀧𑁆𑀧𑀦𑁆𑀦𑀸𑀬 𑀅𑀦𑀼𑀩𑀦𑁆𑀥𑀦𑀸𑀬 𑀞𑀧𑀦𑀸𑀬 𑀘 𑀫𑀦𑀲𑀺𑀓𑀭𑁄𑀢𑀺 𑀦𑀸𑀫𑀸𑀢𑀺 𑀤𑀻𑀧𑀺𑀢𑀁 𑀳𑁄𑀢𑀺, 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀅𑀦𑀼𑀩𑀦𑁆𑀥𑀦𑀸𑀬 𑀯𑀺𑀦𑀸 𑀞𑀧𑀦𑀸𑀬 𑀫𑀦𑀲𑀺𑀓𑀸𑀭𑁄 𑀦𑀢𑁆𑀣𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀅𑀦𑀼𑀩𑀦𑁆𑀥𑀦𑀸𑀬 𑀘 𑀨𑀼𑀲𑀦𑀸𑀬 𑀘 𑀞𑀧𑀦𑀸𑀬 𑀘 𑀫𑀦𑀲𑀺𑀓𑀭𑁄𑀢𑀻𑀢𑀺 𑀯𑀼𑀘𑁆𑀘𑀢𑀻’’𑀢𑀺 𑀏𑀢𑁆𑀢𑀓𑀫𑁂𑀯 𑀯𑀼𑀢𑁆𑀢𑀦𑁆𑀢𑀺 𑀕𑀳𑁂𑀢𑀩𑁆𑀩𑀁. 𑀬𑀸 𑀅𑀘𑁆𑀘𑀦𑁆𑀢𑀸𑀬 𑀦 𑀫𑀺𑀦𑁄𑀢𑀺 𑀦 𑀯𑀺𑀦𑀺𑀘𑁆𑀙𑀦𑀢𑀺, 𑀲𑀸 𑀫𑀸𑀦𑀲𑁆𑀲 𑀲𑀫𑀻𑀧𑁂𑀢𑀺 𑀉𑀧𑀫𑀸𑀦𑀁 𑀲𑀺𑀤𑁆𑀥𑀲𑀸𑀤𑀺𑀲𑁂𑀦 𑀲𑀸𑀥𑁆𑀬𑀲𑀸𑀥𑀦𑀁 𑀬𑀣𑀸 𑀕𑁄 𑀯𑀺𑀬 𑀕𑀯𑀬𑁄𑀢𑀺. 𑀧𑀗𑁆𑀕𑀼𑀴𑁄𑀢𑀺 𑀧𑀻𑀞𑀲𑀧𑁆𑀧𑀻. 𑀤𑁄𑀮𑀸𑀢𑀺 𑀧𑁂𑀗𑁆𑀔𑁄𑀮𑁄. 𑀓𑀻𑀴𑀢𑀦𑁆𑀢𑀺 𑀓𑀻𑀴𑀦𑁆𑀢𑀸𑀦𑀁. 𑀉𑀧𑀦𑀺𑀩𑀦𑁆𑀥𑀦𑀢𑁆𑀣𑀫𑁆𑀪𑀫𑀽𑀮𑁂𑀢𑀺 𑀦𑀸𑀲𑀺𑀓𑀕𑁆𑀕𑀁 𑀫𑀼𑀔𑀦𑀺𑀫𑀺𑀢𑁆𑀢𑀜𑁆𑀘 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀆𑀤𑀺𑀢𑁄 𑀧𑀪𑀼𑀢𑀻𑀢𑀺 𑀉𑀧𑀫𑁂𑀬𑁆𑀬𑀢𑁆𑀣𑀤𑀲𑁆𑀲𑀦𑀢𑁄 𑀧𑀝𑁆𑀞𑀸𑀬. 𑀦𑀺𑀫𑀺𑀢𑁆𑀢𑀦𑁆𑀢𑀺 𑀉𑀧𑀦𑀺𑀩𑀦𑁆𑀥𑀦𑀦𑀺𑀫𑀺𑀢𑁆𑀢𑀁 𑀦𑀸𑀲𑀺𑀓𑀕𑁆𑀕𑀁, 𑀫𑀼𑀔𑀦𑀺𑀫𑀺𑀢𑁆𑀢𑀁 𑀯𑀸. 𑀅𑀦𑀸𑀭𑀫𑁆𑀫𑀡𑀫𑁂𑀓𑀘𑀺𑀢𑁆𑀢𑀲𑁆𑀲𑀸𑀢𑀺 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸𑀦𑀁 𑀏𑀓𑀓𑁆𑀔𑀡𑁂 𑀅𑀧𑁆𑀧𑀯𑀢𑁆𑀢𑀦𑀢𑁄 𑀏𑀓𑀲𑁆𑀲 𑀘𑀺𑀢𑁆𑀢𑀲𑁆𑀲 𑀢𑀬𑁄𑀧𑀺 𑀆𑀭𑀫𑁆𑀫𑀡𑀁 𑀦 𑀳𑁄𑀦𑁆𑀢𑀺, 𑀦𑀺𑀫𑀺𑀢𑁆𑀢𑁂𑀦 𑀲𑀳 𑀅𑀲𑁆𑀲𑀸𑀲𑁄 𑀧𑀲𑁆𑀲𑀸𑀲𑁄 𑀯𑀸𑀢𑀺 𑀤𑁆𑀯𑁂𑀬𑁂𑀯 𑀏𑀓𑀓𑁆𑀔𑀡𑁂 𑀆𑀭𑀫𑁆𑀫𑀡𑀁 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀅𑀚𑀸𑀦𑀢𑁄 𑀘 𑀢𑀬𑁄 𑀥𑀫𑁆𑀫𑁂𑀢𑀺 𑀦𑀺𑀫𑀺𑀢𑁆𑀢𑀁 𑀅𑀲𑁆𑀲𑀸𑀲𑁄 𑀧𑀲𑁆𑀲𑀸𑀲𑁄𑀢𑀺 𑀇𑀫𑁂 𑀢𑀬𑁄 𑀥𑀫𑁆𑀫𑁂 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀅𑀯𑀺𑀦𑁆𑀤𑀦𑁆𑀢𑀲𑁆𑀲, 𑀘-𑀲𑀤𑁆𑀤𑁄 𑀩𑁆𑀬𑀢𑀺𑀭𑁂𑀓𑁄, 𑀢𑁂𑀦 𑀏𑀯𑀜𑁆𑀘 𑀲𑀢𑀺 𑀅𑀬𑀁 𑀅𑀦𑀺𑀝𑁆𑀞𑀧𑁆𑀧𑀲𑀗𑁆𑀕𑁄𑀢𑀺 𑀩𑁆𑀬𑀢𑀺𑀭𑁂𑀓𑀁 𑀤𑀲𑁆𑀲𑁂𑀢𑀺. 𑀪𑀸𑀯𑀦𑀸𑀢𑀺 𑀆𑀦𑀸𑀧𑀸𑀦𑀲𑁆𑀲𑀢𑀺𑀪𑀸𑀯𑀦𑀸.

𑀓𑀣𑀁 𑀇𑀫𑁂…𑀧𑁂… 𑀯𑀺𑀲𑁂𑀲𑀫𑀥𑀺𑀕𑀘𑁆𑀙𑀢𑀻𑀢𑀺 𑀇𑀤𑀁 𑀧𑀭𑀺𑀳𑀸𑀭𑀕𑀸𑀣𑀸𑀬 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀓𑀓𑀘𑁄𑀧𑀫𑀸𑀬 (𑀫. 𑀦𑀺. 𑁧.𑁨𑁨𑁨 𑀆𑀤𑀬𑁄) 𑀯𑀺𑀯𑀭𑀺𑀢𑀼𑀁 𑀧𑀼𑀘𑁆𑀙𑀸𑀞𑀧𑀦𑀁. 𑀢𑀢𑁆𑀣 𑀓𑀣𑀁-𑀲𑀤𑁆𑀤𑁄 𑀧𑀘𑁆𑀘𑁂𑀓𑀁 𑀬𑁄𑀚𑁂𑀢𑀩𑁆𑀩𑁄 ‘‘𑀓𑀣𑀫𑀺𑀫𑁂 𑀅𑀯𑀺𑀤𑀺𑀢𑀸…𑀧𑁂… 𑀓𑀣𑀁 𑀯𑀺𑀲𑁂𑀲𑀫𑀥𑀺𑀕𑀘𑁆𑀙𑀢𑀻’’𑀢𑀺. 𑀧𑀥𑀸𑀦𑀦𑁆𑀢𑀺 𑀪𑀸𑀯𑀦𑀸𑀦𑀺𑀧𑁆𑀨𑀸𑀤𑀓𑀁 𑀯𑀻𑀭𑀺𑀬𑀁. 𑀧𑀬𑁄𑀕𑀦𑁆𑀢𑀺 𑀦𑀻𑀯𑀭𑀡𑀯𑀺𑀓𑁆𑀔𑀫𑁆𑀪𑀓𑀁 𑀪𑀸𑀯𑀦𑀸𑀦𑀼𑀬𑁄𑀕𑀁. 𑀯𑀺𑀲𑁂𑀲𑀦𑁆𑀢𑀺 𑀅𑀭𑀳𑀢𑁆𑀢𑀧𑀭𑀺𑀬𑁄𑀲𑀸𑀦𑀯𑀺𑀲𑁂𑀲𑀁. 𑀧𑀥𑀸𑀦𑀦𑁆𑀢𑀺 𑀭𑀼𑀓𑁆𑀔𑀲𑁆𑀲 𑀙𑁂𑀤𑀦𑀯𑀻𑀭𑀺𑀬𑀁. 𑀧𑀬𑁄𑀕𑀦𑁆𑀢𑀺 𑀢𑀲𑁆𑀲𑁂𑀯 𑀙𑁂𑀤𑀦𑀓𑀓𑀺𑀭𑀺𑀬𑀁. 𑀓𑀺𑀜𑁆𑀘𑀸𑀧𑁂𑀢𑁆𑀣 ‘‘𑀯𑀺𑀲𑁂𑀲𑀫𑀥𑀺𑀕𑀘𑁆𑀙𑀢𑀻’’𑀢𑀺 𑀉𑀧𑀫𑀸𑀬𑀁 𑀦 𑀯𑀼𑀢𑁆𑀢𑀁, 𑀢𑀣𑀸𑀧𑀺 𑀅𑀢𑁆𑀣𑀢𑁄 𑀬𑁄𑀚𑁂𑀢𑀩𑁆𑀩𑀫𑁂𑀯. 𑀬𑀣𑀸 𑀭𑀼𑀓𑁆𑀔𑁄𑀢𑀺𑀆𑀤𑀺 𑀉𑀧𑀫𑀸𑀲𑀁𑀲𑀦𑁆𑀤𑀦𑀁. 𑀦𑀸𑀲𑀺𑀓𑀕𑁆𑀕𑁂 𑀯𑀸 𑀫𑀼𑀔𑀦𑀺𑀫𑀺𑀢𑁆𑀢𑁂 𑀯𑀸𑀢𑀺 𑀤𑀻𑀖𑀦𑀸𑀲𑀺𑀓𑁄 𑀦𑀸𑀲𑀺𑀓𑀕𑁆𑀕𑁂, 𑀇𑀢𑀭𑁄 𑀫𑀼𑀔𑀁 𑀦𑀺𑀫𑀺𑀬𑀢𑀺 𑀙𑀸𑀤𑀺𑀬𑀢𑀺 𑀏𑀢𑁂𑀦𑀸𑀢𑀺 𑀫𑀼𑀔𑀦𑀺𑀫𑀺𑀢𑁆𑀢𑀦𑁆𑀢𑀺 𑀮𑀤𑁆𑀥𑀦𑀸𑀫𑁂 𑀉𑀢𑁆𑀢𑀭𑁄𑀝𑁆𑀞𑁂.

𑀇𑀤𑀁 𑀧𑀥𑀸𑀦𑀦𑁆𑀢𑀺 𑀬𑁂𑀦 𑀯𑀻𑀭𑀺𑀬𑀸𑀭𑀫𑁆𑀪𑁂𑀦 𑀓𑀸𑀬𑁄𑀧𑀺 𑀘𑀺𑀢𑁆𑀢𑀫𑁆𑀧𑀺 𑀪𑀸𑀯𑀦𑀸𑀓𑀫𑁆𑀫𑀲𑁆𑀲 𑀅𑀭𑀳𑀁 𑀇𑀥 𑀧𑀥𑀸𑀦𑀦𑁆𑀢𑀺 𑀨𑀮𑁂𑀦 𑀳𑁂𑀢𑀼𑀁 𑀤𑀲𑁆𑀲𑁂𑀢𑀺. 𑀉𑀧𑀓𑁆𑀓𑀺𑀮𑁂𑀲𑀸𑀢𑀺 𑀦𑀻𑀯𑀭𑀡𑀸. 𑀯𑀺𑀢𑀓𑁆𑀓𑀸𑀢𑀺 𑀓𑀸𑀫𑀯𑀺𑀢𑀓𑁆𑀓𑀸𑀤𑀺𑀫𑀺𑀘𑁆𑀙𑀸𑀯𑀺𑀢𑀓𑁆𑀓𑀸, 𑀦𑀻𑀯𑀭𑀡𑀧𑁆𑀧𑀳𑀸𑀦𑁂𑀦 𑀯𑀸 𑀧𑀞𑀫𑀚𑁆𑀛𑀸𑀦𑀸𑀥𑀺𑀕𑀫𑀁 𑀤𑀲𑁆𑀲𑁂𑀢𑁆𑀯𑀸 𑀯𑀺𑀢𑀓𑁆𑀓𑀽𑀧𑀲𑀫𑀸𑀧𑀤𑁂𑀲𑁂𑀦 𑀤𑀼𑀢𑀺𑀬𑀚𑁆𑀛𑀸𑀦𑀸𑀤𑀻𑀦𑀫𑀥𑀺𑀕𑀫𑀫𑀸𑀳. 𑀅𑀬𑀁 𑀧𑀬𑁄𑀕𑁄𑀢𑀺 𑀅𑀬𑀁 𑀛𑀸𑀦𑀸𑀥𑀺𑀕𑀫𑀲𑁆𑀲 𑀳𑁂𑀢𑀼𑀪𑀽𑀢𑁄 𑀓𑀫𑁆𑀫𑀝𑁆𑀞𑀸𑀦𑀸𑀦𑀼𑀬𑁄𑀕𑀲𑀗𑁆𑀔𑀸𑀢𑁄 𑀧𑀬𑁄𑀕𑁄. 𑀲𑀁𑀬𑁄𑀚𑀦𑀸 𑀧𑀳𑀻𑀬𑀦𑁆𑀢𑀻𑀢𑀺 𑀤𑀲𑀧𑀺 𑀲𑀁𑀬𑁄𑀚𑀦𑀸𑀦𑀺 𑀫𑀕𑁆𑀕𑀧𑀅𑀧𑀸𑀝𑀺𑀬𑀸 𑀲𑀫𑀼𑀘𑁆𑀙𑁂𑀤𑀯𑀲𑁂𑀦 𑀧𑀳𑀻𑀬𑀦𑁆𑀢𑀺. 𑀩𑁆𑀬𑀦𑁆𑀢𑀻 𑀳𑁄𑀦𑁆𑀢𑀻𑀢𑀺 𑀢𑀣𑀸 𑀲𑀢𑁆𑀢𑀧𑀺 𑀅𑀦𑀼𑀲𑀬𑀸 𑀪𑀗𑁆𑀕𑀫𑀢𑁆𑀢𑀲𑁆𑀲𑀧𑀺 𑀅𑀦𑀯𑀲𑁂𑀲𑀢𑁄 𑀯𑀺𑀕𑀢𑀦𑁆𑀢𑀸 𑀳𑁄𑀦𑁆𑀢𑀺. 𑀅𑀬𑀁 𑀯𑀺𑀲𑁂𑀲𑁄𑀢𑀺 𑀇𑀫𑀁 𑀲𑀫𑀸𑀥𑀺𑀁 𑀦𑀺𑀲𑁆𑀲𑀸𑀬 𑀅𑀦𑀼𑀓𑁆𑀓𑀫𑁂𑀦 𑀮𑀩𑁆𑀪𑀫𑀸𑀦𑁄 𑀅𑀬𑀁 𑀲𑀁𑀬𑁄𑀚𑀦𑀧𑁆𑀧𑀳𑀸𑀦𑀸𑀤𑀺𑀓𑁄 𑀇𑀫𑀲𑁆𑀲 𑀲𑀫𑀸𑀥𑀺𑀲𑁆𑀲 𑀯𑀺𑀲𑁂𑀲𑁄𑀢𑀺 𑀅𑀢𑁆𑀣𑁄. 𑀏𑀯𑀁 𑀇𑀫𑁂 𑀢𑀬𑁄 𑀥𑀫𑁆𑀫𑀸𑀢𑀺𑀆𑀤𑀺 𑀦𑀺𑀕𑀫𑀦𑀯𑀘𑀦𑀁. 𑀧𑀭𑀺𑀧𑀼𑀡𑁆𑀡𑀸𑀢𑀺 𑀲𑁄𑀴𑀲𑀦𑁆𑀦𑀁 𑀯𑀢𑁆𑀣𑀽𑀦𑀁 𑀧𑀸𑀭𑀺𑀧𑀽𑀭𑀺𑀬𑀸 𑀲𑀩𑁆𑀩𑀲𑁄 𑀧𑀼𑀡𑁆𑀡𑀸. 𑀅𑀦𑀼𑀧𑀼𑀩𑁆𑀩𑀦𑁆𑀢𑀺 𑀅𑀦𑀼𑀓𑁆𑀓𑀫𑁂𑀦. 𑀧𑀭𑀺𑀘𑀺𑀢𑀸𑀢𑀺 𑀧𑀭𑀺𑀘𑀺𑀡𑁆𑀡𑀸. 𑀇𑀫𑀁 𑀮𑁄𑀓𑀦𑁆𑀢𑀺 𑀔𑀦𑁆𑀥𑀸𑀤𑀺𑀮𑁄𑀓𑀁 𑀧𑀜𑁆𑀜𑀸𑀧𑀪𑀸𑀲𑁂𑀦 𑀧𑀪𑀸𑀲𑁂𑀢𑀺.

𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀞𑀸𑀦𑁂. 𑀅𑀲𑁆𑀲𑀸𑀢𑀺 𑀉𑀧𑀫𑀸𑀪𑀽𑀢𑀲𑁆𑀲 𑀓𑀓𑀘𑀲𑁆𑀲. 𑀆𑀦𑀬𑀦𑁂 𑀧𑀬𑁄𑀚𑀦𑀦𑁆𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀦𑀺𑀫𑀺𑀢𑁆𑀢𑀦𑁆𑀢𑀺 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀁. 𑀅𑀯𑀲𑁂𑀲𑀛𑀸𑀦𑀗𑁆𑀕𑀧𑀝𑀺𑀫𑀡𑁆𑀟𑀺𑀢𑀸𑀢𑀺 𑀯𑀺𑀢𑀓𑁆𑀓𑀸𑀤𑀺𑀅𑀯𑀲𑁂𑀲𑀛𑀸𑀦𑀗𑁆𑀕𑀧𑀝𑀺𑀫𑀡𑁆𑀟𑀺𑀢𑀸𑀢𑀺 𑀯𑀤𑀦𑁆𑀢𑀺. 𑀯𑀺𑀘𑀸𑀭𑀸𑀤𑀻𑀳𑀻𑀢𑀺 𑀧𑀦 𑀯𑀢𑁆𑀢𑀩𑁆𑀩𑀁 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀯𑀺𑀢𑀓𑁆𑀓𑀲𑁆𑀲 𑀅𑀧𑁆𑀧𑀦𑀸𑀪𑀸𑀯𑀢𑁄. 𑀲𑁄 𑀳𑀺 ‘‘𑀅𑀧𑁆𑀧𑀦𑀸 𑀩𑁆𑀬𑀧𑁆𑀧𑀦𑀸’’𑀢𑀺 𑀦𑀺𑀤𑁆𑀤𑀺𑀝𑁆𑀞𑁄. 𑀏𑀯𑀜𑁆𑀳𑀺 𑀲𑀢𑀺 𑀅𑀯𑀲𑁂𑀲-𑀲𑀤𑁆𑀤𑁄 𑀉𑀧𑀧𑀦𑁆𑀦𑁄 𑀳𑁄𑀢𑀺, 𑀯𑀺𑀢𑀓𑁆𑀓𑀲𑀫𑁆𑀧𑀬𑁄𑀕𑀢𑁄 𑀯𑀸 𑀛𑀸𑀦𑀗𑁆𑀕𑁂𑀲𑀼 𑀧𑀥𑀸𑀦𑀪𑀽𑀢𑁄 𑀲𑀫𑀸𑀥𑀺 𑀅𑀧𑁆𑀧𑀦𑀸𑀢𑀺 𑀓𑀢𑁆𑀯𑀸 ‘‘𑀅𑀯𑀲𑁂𑀲𑀛𑀸𑀦𑀗𑁆𑀕𑀧𑀝𑀺𑀫𑀡𑁆𑀟𑀺𑀢𑀸 𑀅𑀧𑁆𑀧𑀦𑀸𑀲𑀗𑁆𑀔𑀸𑀢𑀸 𑀞𑀧𑀦𑀸 𑀘 𑀲𑀫𑁆𑀧𑀚𑁆𑀚𑀢𑀻’’𑀢𑀺 𑀯𑀼𑀢𑁆𑀢𑀁. 𑀓𑀲𑁆𑀲𑀘𑀺 𑀧𑀦 𑀕𑀡𑀦𑀸𑀯𑀲𑁂𑀦𑁂𑀯 𑀫𑀦𑀲𑀺𑀓𑀸𑀭𑀓𑀸𑀮𑀢𑁄 𑀧𑀪𑀼𑀢𑀻𑀢𑀺 𑀏𑀢𑁆𑀣 ‘‘𑀅𑀦𑀼𑀓𑁆𑀓𑀫𑀢𑁄…𑀧𑁂… 𑀧𑀢𑁆𑀢𑀁 𑀯𑀺𑀬 𑀳𑁄𑀢𑀻’’𑀢𑀺 𑀉𑀧𑀭𑀺 𑀯𑀓𑁆𑀔𑀫𑀸𑀦𑁄 𑀕𑀦𑁆𑀣𑁄 𑀧𑀼𑀭𑀸𑀡𑀧𑁄𑀢𑁆𑀣𑀓𑁂𑀲𑀼 𑀤𑀺𑀲𑁆𑀲𑀢𑀺, 𑀢𑀲𑁆𑀫𑀸 𑀅𑀬𑀁 𑀧𑀸𑀞𑁄 𑀏𑀢𑁆𑀣𑀸𑀧𑀺 𑀮𑀺𑀔𑀺𑀢𑀩𑁆𑀩𑁄, 𑀮𑁂𑀔𑀓𑀸𑀦𑀁 𑀧𑀦 𑀤𑁄𑀲𑁂𑀦 𑀕𑀴𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀑𑀴𑀸𑀭𑀺𑀓𑁂 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑁂 𑀦𑀺𑀭𑀼𑀤𑁆𑀥𑁂𑀢𑀺𑀆𑀤𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀫𑁆𑀧𑀺 𑀯𑀺𑀘𑁂𑀢𑀩𑁆𑀩𑀸𑀓𑀸𑀭𑀧𑁆𑀧𑀢𑁆𑀢𑀲𑁆𑀲 𑀓𑀸𑀬𑀲𑀗𑁆𑀔𑀸𑀭𑀲𑁆𑀲 𑀯𑀺𑀘𑀬𑀦𑀯𑀺𑀥𑀺𑀁 𑀤𑀲𑁆𑀲𑁂𑀢𑀼𑀁 𑀆𑀦𑀻𑀢𑀁. 𑀤𑁂𑀲𑀢𑁄𑀢𑀺 𑀧𑀼𑀩𑁆𑀩𑁂 𑀨𑀼𑀲𑀦𑀯𑀲𑁂𑀦 𑀕𑀳𑀺𑀢𑀝𑁆𑀞𑀸𑀦𑀢𑁄. 𑀦𑀺𑀫𑀺𑀢𑁆𑀢𑀁 𑀧𑀝𑁆𑀞𑀧𑁂𑀢𑀩𑁆𑀩𑀦𑁆𑀢𑀺 𑀧𑀼𑀩𑁆𑀩𑁂 𑀕𑀳𑀺𑀢𑀸𑀓𑀸𑀭𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀺𑀓𑀸 𑀲𑀜𑁆𑀜𑀸 𑀨𑀼𑀲𑀦𑀝𑁆𑀞𑀸𑀦𑁂 𑀧𑀝𑁆𑀞𑀧𑁂𑀢𑀩𑁆𑀩𑀸. 𑀇𑀫𑀫𑁂𑀯 𑀳𑀺 𑀅𑀢𑁆𑀣𑀯𑀲𑀦𑁆𑀢𑀺 𑀇𑀫𑀁 𑀅𑀦𑀼𑀧𑀝𑁆𑀞𑀳𑀦𑁆𑀢𑀲𑁆𑀲 𑀆𑀭𑀫𑁆𑀫𑀡𑀲𑁆𑀲 𑀉𑀧𑀝𑁆𑀞𑀸𑀦𑀯𑀺𑀥𑀺𑀲𑀗𑁆𑀔𑀸𑀢𑀁 𑀓𑀸𑀭𑀡𑀁 𑀧𑀝𑀺𑀘𑁆𑀘. 𑀇𑀢𑁄𑀢𑀺 𑀆𑀦𑀸𑀧𑀸𑀦𑀓𑀫𑁆𑀫𑀝𑁆𑀞𑀸𑀦𑀢𑁄. 𑀕𑀭𑀼𑀓𑀢𑀸 𑀘 𑀪𑀸𑀯𑀦𑀸𑀤𑀼𑀓𑁆𑀓𑀭𑀢𑀸𑀬𑀸𑀢𑀺 𑀆𑀳 ‘‘𑀕𑀭𑀼𑀓𑀪𑀸𑀯𑀦’’𑀦𑁆𑀢𑀺. 𑀘𑀭𑀺𑀢𑁆𑀯𑀸𑀢𑀺 𑀕𑁄𑀘𑀭𑀁 𑀕𑀳𑁂𑀢𑁆𑀯𑀸. 𑀦𑀺𑀫𑀺𑀢𑁆𑀢𑀦𑁆𑀢𑀺 𑀉𑀕𑁆𑀕𑀳𑀦𑀺𑀫𑀺𑀢𑁆𑀢𑀁, 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀁 𑀯𑀸. 𑀉𑀪𑀬𑀫𑁆𑀧𑀺 𑀳𑀺 𑀇𑀥 𑀏𑀓𑀚𑁆𑀛𑀁 𑀯𑀼𑀢𑁆𑀢𑀁. 𑀢𑀣𑀸 𑀳𑀺 𑀢𑀽𑀮𑀧𑀺𑀘𑀼𑀆𑀤𑀺𑀉𑀧𑀫𑀢𑁆𑀢𑀬𑀁 𑀉𑀕𑁆𑀕𑀳𑁂 𑀬𑀼𑀚𑁆𑀚𑀢𑀺, 𑀲𑁂𑀲𑀁 𑀉𑀪𑀬𑀢𑁆𑀣.

𑀢𑀸𑀭𑀓𑀭𑀽𑀧𑀁 𑀯𑀺𑀬𑀸𑀢𑀺 𑀢𑀸𑀭𑀓𑀸𑀬 𑀲𑀭𑀽𑀧𑀁 𑀯𑀺𑀬. 𑀲𑀜𑁆𑀜𑀸𑀦𑀸𑀦𑀢𑀸𑀬𑀸𑀢𑀺 𑀦𑀺𑀫𑀺𑀢𑁆𑀢𑀼𑀧𑀝𑁆𑀞𑀸𑀦𑀢𑁄 𑀧𑀼𑀩𑁆𑀩𑁂 𑀧𑀯𑀢𑁆𑀢𑀲𑀜𑁆𑀜𑀸𑀦𑀁 𑀦𑀸𑀦𑀢𑀸𑀬. 𑀲𑀜𑁆𑀜𑀚𑀦𑁆𑀢𑀺 𑀪𑀸𑀯𑀦𑀸𑀲𑀜𑁆𑀜𑀸𑀬 𑀧𑀭𑀺𑀓𑀧𑁆𑀧𑀺𑀢𑀁, 𑀦 𑀉𑀧𑁆𑀧𑀸𑀤𑀺𑀢𑀁 𑀅𑀯𑀺𑀚𑁆𑀚𑀫𑀸𑀦𑀢𑁆𑀢𑀸, 𑀢𑁂𑀦𑀸𑀳 ‘‘𑀦𑀸𑀦𑀢𑁄 𑀉𑀧𑀝𑁆𑀞𑀸𑀢𑀻’’𑀢𑀺. 𑀏𑀯𑀁 𑀳𑁄𑀢𑀻𑀢𑀺 𑀪𑀸𑀯𑀦𑀫𑀦𑀼𑀬𑀼𑀢𑁆𑀢𑀲𑁆𑀲 𑀏𑀯𑀁 𑀉𑀧𑀝𑁆𑀞𑀸𑀢𑀺. 𑀏𑀯𑀦𑁆𑀢𑀺 𑀏𑀯𑀁 𑀲𑀢𑀺, 𑀬𑀣𑀸𑀯𑀼𑀢𑁆𑀢𑀦𑀬𑁂𑀦 𑀦𑀺𑀫𑀺𑀢𑁆𑀢𑁂 𑀏𑀯 𑀘𑀺𑀢𑁆𑀢𑀲𑁆𑀲 𑀞𑀧𑀦𑁂 𑀲𑀢𑀻𑀢𑀺 𑀅𑀢𑁆𑀣𑁄. 𑀇𑀢𑁄 𑀧𑀪𑀼𑀢𑀻𑀢𑀺 𑀇𑀢𑁄 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀼𑀧𑁆𑀧𑀢𑁆𑀢𑀺𑀢𑁄 𑀧𑀝𑁆𑀞𑀸𑀬. 𑀦𑀺𑀫𑀺𑀢𑁆𑀢𑁂𑀢𑀺 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑁂. 𑀞𑀧𑀬𑀦𑁆𑀢𑀺 𑀞𑀧𑀦𑀸𑀯𑀲𑁂𑀦 𑀘𑀺𑀢𑁆𑀢𑀁 𑀞𑀧𑀦𑁆𑀢𑁄. 𑀦𑀸𑀦𑀸𑀓𑀸𑀭𑀦𑁆𑀢𑀺 ‘‘𑀘𑀢𑁆𑀢𑀸𑀭𑁄 𑀯𑀡𑁆𑀡𑀸’’𑀢𑀺 𑀏𑀯𑀁 𑀯𑀼𑀢𑁆𑀢𑀁 𑀦𑀸𑀦𑀸𑀓𑀸𑀭𑀁. 𑀯𑀺𑀪𑀸𑀯𑀬𑀦𑁆𑀢𑀺 𑀯𑀺𑀪𑀸𑀯𑁂𑀦𑁆𑀢𑁄 𑀅𑀦𑁆𑀢𑀭𑀥𑀸𑀧𑁂𑀦𑁆𑀢𑁄. 𑀦𑀺𑀫𑀺𑀢𑁆𑀢𑀼𑀧𑁆𑀧𑀢𑁆𑀢𑀺𑀢𑁄 𑀧𑀝𑁆𑀞𑀸𑀬 𑀳𑀺 𑀢𑁂 𑀆𑀓𑀸𑀭𑀸 𑀅𑀫𑀦𑀲𑀺𑀓𑀭𑁄𑀢𑁄 𑀅𑀦𑁆𑀢𑀭𑀳𑀺𑀢𑀸 𑀯𑀺𑀬 𑀳𑁄𑀦𑁆𑀢𑀺. 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑁂𑀢𑀺 𑀅𑀲𑁆𑀲𑀸𑀲𑁂 𑀧𑀲𑁆𑀲𑀸𑀲𑁂 𑀘 𑀬𑁄 𑀦𑀸𑀦𑀸𑀓𑀸𑀭𑁄, 𑀢𑀁 𑀯𑀺𑀪𑀸𑀯𑀬𑀁 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀲𑀫𑁆𑀪𑀽𑀢𑁂 𑀯𑀸 𑀦𑀺𑀫𑀺𑀢𑁆𑀢𑁂 𑀘𑀺𑀢𑁆𑀢𑀁 𑀞𑀧𑀬𑀁 𑀲𑀓𑀁 𑀘𑀺𑀢𑁆𑀢𑀁 𑀦𑀺𑀩𑀦𑁆𑀥𑀢𑀺 𑀦𑀸𑀫𑀸𑀢𑀺 𑀬𑁄𑀚𑀦𑀸. 𑀓𑁂𑀘𑀺 𑀧𑀦 𑀯𑀺𑀪𑀸𑀯𑀬𑀦𑁆𑀢𑀺 𑀏𑀢𑀲𑁆𑀲 𑀯𑀺𑀪𑀸𑀯𑁂𑀦𑁆𑀢𑁄 𑀯𑀺𑀤𑀺𑀢𑀁 𑀧𑀸𑀓𑀝𑀁 𑀓𑀭𑁄𑀦𑁆𑀢𑁄𑀢𑀺 𑀅𑀢𑁆𑀣𑀁 𑀯𑀤𑀦𑁆𑀢𑀺, 𑀢𑀁 𑀧𑀼𑀩𑁆𑀩𑀪𑀸𑀕𑀯𑀲𑁂𑀦 𑀬𑀼𑀚𑁆𑀚𑁂𑀬𑁆𑀬. 𑀅𑀬𑀜𑁆𑀳𑁂𑀢𑁆𑀣 𑀅𑀢𑁆𑀣𑁄 𑁋 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑁂 𑀦𑀸𑀦𑀸𑀓𑀸𑀭𑀁 𑀯𑀺𑀪𑀸𑀯𑁂𑀦𑁆𑀢𑁄 𑀧𑀚𑀸𑀦𑀦𑁆𑀢𑁄 𑀢𑀢𑁆𑀣 𑀬𑀁 𑀮𑀤𑁆𑀥𑀁 𑀦𑀺𑀫𑀺𑀢𑁆𑀢𑀁, 𑀢𑀲𑁆𑀫𑀺𑀁 𑀘𑀺𑀢𑁆𑀢𑀁 𑀞𑀧𑁂𑀦𑁆𑀢𑁄 𑀅𑀦𑀼𑀓𑁆𑀓𑀫𑁂𑀦 𑀲𑀓𑀁 𑀘𑀺𑀢𑁆𑀢𑀁 𑀦𑀺𑀩𑀦𑁆𑀥𑀢𑀺 𑀅𑀧𑁆𑀧𑁂𑀢𑀻𑀢𑀺.

𑀓𑀺𑀮𑁂𑀲𑀸𑀢𑀺 𑀅𑀯𑀲𑁂𑀲𑀓𑀺𑀮𑁂𑀲𑀸. 𑀲𑀦𑁆𑀦𑀺𑀲𑀺𑀦𑁆𑀦𑀸𑀬𑁂𑀯𑀸𑀢𑀺 𑀅𑀮𑀤𑁆𑀥𑀦𑀻𑀯𑀭𑀡𑀲𑀳𑀸𑀬𑀸 𑀑𑀮𑀻𑀦𑀸𑀬𑁂𑀯. 𑀉𑀧𑀘𑀸𑀭𑀪𑀽𑀫𑀺𑀬𑀦𑁆𑀢𑀺 𑀉𑀧𑀘𑀸𑀭𑀸𑀯𑀢𑁆𑀣𑀸𑀬𑀁. 𑀮𑀓𑁆𑀔𑀡𑀢𑁄𑀢𑀺 𑀯𑀺𑀓𑁆𑀔𑀫𑁆𑀪𑀦𑀸𑀤𑀺𑀲𑀪𑀸𑀯𑀢𑁄 𑀯𑀸 𑀅𑀦𑀺𑀘𑁆𑀘𑀸𑀤𑀺𑀲𑀪𑀸𑀯𑀢𑁄 𑀯𑀸. 𑀕𑁄𑀘𑀭𑁄𑀢𑀺 𑀪𑀺𑀓𑁆𑀔𑀸𑀘𑀸𑀭𑀕𑀸𑀫𑁄. 𑀬𑀢𑁆𑀣 𑀤𑀼𑀮𑁆𑀮𑀪𑀸 𑀲𑀧𑁆𑀧𑀸𑀬𑀪𑀺𑀓𑁆𑀔𑀸, 𑀲𑁄 𑀅𑀲𑀧𑁆𑀧𑀸𑀬𑁄, 𑀇𑀢𑀭𑁄 𑀲𑀧𑁆𑀧𑀸𑀬𑁄. 𑀪𑀲𑁆𑀲𑀦𑁆𑀢𑀺 𑀤𑀲𑀓𑀣𑀸𑀯𑀢𑁆𑀣𑀼𑀦𑀺𑀲𑁆𑀲𑀺𑀢𑀁 𑀪𑀲𑁆𑀲𑀁, 𑀢𑀁 𑀲𑀧𑁆𑀧𑀸𑀬𑀁, 𑀇𑀢𑀭𑀫𑀲𑀧𑁆𑀧𑀸𑀬𑀁. 𑀲𑁂𑀲𑁂𑀲𑀼 𑀆𑀯𑀸𑀲𑀸𑀤𑀻𑀲𑀼 𑀬𑀢𑁆𑀣 𑀬𑀢𑁆𑀣 𑀅𑀲𑀫𑀸𑀳𑀺𑀢𑀁 𑀘𑀺𑀢𑁆𑀢𑀁 𑀲𑀫𑀸𑀥𑀺𑀬𑀢𑀺, 𑀢𑀁 𑀢𑀁 𑀲𑀧𑁆𑀧𑀸𑀬𑀁, 𑀇𑀢𑀭𑀫𑀲𑀧𑁆𑀧𑀸𑀬𑀦𑁆𑀢𑀺 𑀕𑀳𑁂𑀢𑀩𑁆𑀩𑀁. 𑀬𑀲𑁆𑀲 𑀧𑀦 𑀏𑀯𑀁 𑀲𑀢𑁆𑀢𑀯𑀺𑀥𑀁 𑀅𑀲𑀧𑁆𑀧𑀸𑀬𑀁 𑀯𑀚𑁆𑀚𑁂𑀢𑁆𑀯𑀸 𑀲𑀧𑁆𑀧𑀸𑀬𑀫𑁂𑀯 𑀲𑁂𑀯𑀦𑁆𑀢𑀲𑁆𑀲𑀧𑀺 𑀅𑀧𑁆𑀧𑀦𑀸 𑀦 𑀳𑁄𑀢𑀺, 𑀢𑁂𑀦 𑀲𑀫𑁆𑀧𑀸𑀤𑁂𑀢𑀩𑁆𑀩𑀁 𑀤𑀲𑀯𑀺𑀥𑀁 𑀅𑀧𑁆𑀧𑀦𑀸𑀓𑁄𑀲𑀮𑁆𑀮𑀁 𑀤𑀲𑁆𑀲𑁂𑀦𑁆𑀢𑁄 𑀯𑀢𑁆𑀣𑀼𑀯𑀺𑀲𑀤𑀓𑀺𑀭𑀺𑀬𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀯𑀢𑁆𑀣𑀼𑀯𑀺𑀲𑀤𑀓𑀺𑀭𑀺𑀬𑀸 𑀦𑀸𑀫 𑀓𑁂𑀲𑀦𑀔𑀘𑁆𑀙𑁂𑀤𑀦𑀸𑀤𑀻𑀳𑀺 𑀅𑀚𑁆𑀛𑀢𑁆𑀢𑀺𑀓𑀲𑁆𑀲 𑀲𑀭𑀻𑀭𑀯𑀢𑁆𑀣𑀼𑀲𑁆𑀲, 𑀘𑀻𑀯𑀭𑀲𑁂𑀦𑀸𑀲𑀦𑀸𑀤𑀺𑀥𑁄𑀯𑀦𑀧𑀭𑀺𑀓𑀫𑁆𑀫𑀸𑀤𑀻𑀳𑀺 𑀩𑀸𑀳𑀺𑀭𑀯𑀢𑁆𑀣𑀼𑀲𑁆𑀲 𑀘 𑀯𑀺𑀲𑀤𑀪𑀸𑀯𑀓𑀭𑀡𑀁. 𑀏𑀯𑀜𑁆𑀳𑀺 𑀜𑀸𑀡𑀫𑁆𑀧𑀺 𑀯𑀺𑀲𑀤𑀓𑀺𑀘𑁆𑀘𑀦𑀺𑀧𑁆𑀨𑀢𑁆𑀢𑀺𑀓𑀭𑀁 𑀳𑁄𑀢𑀺. 𑀇𑀦𑁆𑀤𑁆𑀭𑀺𑀬𑀲𑀫𑀢𑁆𑀢𑀧𑀝𑀺𑀧𑀸𑀤𑀦𑀢𑀸 𑀦𑀸𑀫 𑀲𑀤𑁆𑀥𑀸𑀤𑀻𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀲𑀫𑀪𑀸𑀯𑀓𑀭𑀡𑀁. 𑀦𑀺𑀫𑀺𑀢𑁆𑀢𑀓𑀼𑀲𑀮𑀢𑀸 𑀦𑀸𑀫 𑀪𑀸𑀯𑀦𑀸𑀬 𑀮𑀤𑁆𑀥𑀦𑀺𑀫𑀺𑀢𑁆𑀢𑀲𑁆𑀲 𑀭𑀓𑁆𑀔𑀡𑀓𑁄𑀲𑀮𑁆𑀮𑀁. 𑀬𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀦𑀺𑀕𑁆𑀕𑀳𑁂𑀢𑀩𑁆𑀩𑀦𑁆𑀢𑀺𑀆𑀤𑀻𑀲𑀼 𑀬𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀅𑀘𑁆𑀘𑀸𑀭𑀤𑁆𑀥𑀢𑀸𑀤𑀻𑀳𑀺 𑀓𑀸𑀭𑀡𑁂𑀳𑀺 𑀉𑀤𑁆𑀥𑀢𑀢𑀸𑀬 𑀦𑀺𑀕𑁆𑀕𑀳𑁂𑀢𑀩𑁆𑀩𑀁, 𑀢𑀤𑀸 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀸𑀤𑀬𑁄 𑀢𑀬𑁄 𑀅𑀪𑀸𑀯𑁂𑀢𑁆𑀯𑀸 𑀧𑀲𑁆𑀲𑀤𑁆𑀥𑀸𑀤𑀻𑀦𑀁 𑀢𑀺𑀡𑁆𑀡𑀁 𑀪𑀸𑀯𑀦𑁂𑀦 𑀘𑀺𑀢𑁆𑀢𑀲𑁆𑀲 𑀦𑀺𑀕𑁆𑀕𑀡𑁆𑀳𑀦𑀸 𑀳𑁄𑀢𑀺. 𑀬𑀤𑀸𑀲𑁆𑀲 𑀘𑀺𑀢𑁆𑀢𑀁 𑀅𑀢𑀺𑀲𑀺𑀣𑀺𑀮𑀯𑀻𑀭𑀺𑀬𑀢𑀸𑀤𑀻𑀳𑀺 𑀮𑀻𑀦𑀢𑀸𑀬 𑀧𑀕𑁆𑀕𑀳𑁂𑀢𑀩𑁆𑀩𑀁, 𑀢𑀤𑀸 𑀧𑀲𑁆𑀲𑀤𑁆𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀸𑀤𑀬𑁄 𑀢𑀬𑁄 𑀅𑀪𑀸𑀯𑁂𑀢𑁆𑀯𑀸 𑀥𑀫𑁆𑀫𑀯𑀺𑀘𑀬𑀸𑀤𑀻𑀦𑀁 𑀢𑀺𑀡𑁆𑀡𑀁 𑀪𑀸𑀯𑀦𑁂𑀦 𑀘𑀺𑀢𑁆𑀢𑀲𑁆𑀲 𑀧𑀕𑁆𑀕𑀡𑁆𑀳𑀦𑀁 𑀳𑁄𑀢𑀺. 𑀬𑀤𑀸𑀲𑁆𑀲 𑀧𑀜𑁆𑀜𑀸𑀧𑀬𑁄𑀕𑀫𑀦𑁆𑀤𑀢𑀸𑀤𑀻𑀳𑀺 𑀦𑀺𑀭𑀲𑁆𑀲𑀸𑀤𑀁 𑀘𑀺𑀢𑁆𑀢𑀁 𑀳𑁄𑀢𑀺, 𑀢𑀤𑀸 𑀢𑀲𑁆𑀲 𑀘𑀺𑀢𑁆𑀢𑀲𑁆𑀲 𑀅𑀝𑁆𑀞𑀲𑀁𑀯𑁂𑀕𑀯𑀢𑁆𑀣𑀼𑀧𑀘𑁆𑀘𑀯𑁂𑀓𑁆𑀔𑀡𑀸𑀤𑀺𑀦𑀸 (𑀅. 𑀦𑀺. 𑀅𑀝𑁆𑀞. 𑁧.𑁧.𑁪𑁧𑁮) 𑀲𑀫𑁆𑀧𑀳𑀁𑀲𑀦𑀲𑀗𑁆𑀔𑀸𑀢𑀸 𑀲𑀁𑀯𑁂𑀚𑀦𑀸 𑀳𑁄𑀢𑀺. 𑀬𑀤𑀸 𑀧𑀦𑀲𑁆𑀲 𑀏𑀯𑀁 𑀧𑀝𑀺𑀧𑀚𑁆𑀚𑀦𑀢𑁄 𑀅𑀮𑀻𑀦𑀁 𑀅𑀦𑀼𑀤𑁆𑀥𑀢𑀁 𑀅𑀦𑀺𑀭𑀲𑁆𑀲𑀸𑀤𑀁 𑀆𑀭𑀫𑁆𑀫𑀡𑁂 𑀲𑀫𑀧𑁆𑀧𑀯𑀢𑁆𑀢𑀁 𑀲𑀫𑀣𑀯𑀻𑀣𑀺𑀧𑀝𑀺𑀧𑀦𑁆𑀦𑀜𑁆𑀘 𑀘𑀺𑀢𑁆𑀢𑀁 𑀳𑁄𑀢𑀺, 𑀢𑀤𑀸 𑀢𑀲𑁆𑀲 𑀧𑀕𑁆𑀕𑀳𑀦𑀺𑀕𑁆𑀕𑀳𑀲𑀫𑁆𑀧𑀳𑀁𑀲𑀦𑁂𑀲𑀼 𑀅𑀩𑁆𑀬𑀸𑀧𑀸𑀭𑀢𑀸𑀲𑀫𑀸𑀧𑀚𑁆𑀚𑀦𑁂𑀦 𑀅𑀚𑁆𑀛𑀼𑀧𑁂𑀓𑁆𑀔𑀦𑀸 𑀳𑁄𑀢𑀺.

𑀢𑀤𑀥𑀺𑀫𑀼𑀢𑁆𑀢𑀢𑀸 𑀦𑀸𑀫 𑀲𑀫𑀸𑀥𑀺𑀅𑀥𑀺𑀫𑀼𑀢𑁆𑀢𑀢𑀸, 𑀲𑀫𑀸𑀥𑀺𑀦𑀺𑀦𑁆𑀦𑀧𑁄𑀡𑀧𑀩𑁆𑀪𑀸𑀭𑀢𑀸𑀢𑀺 𑀅𑀢𑁆𑀣𑁄. 𑀏𑀢𑁆𑀣𑀸𑀢𑀺 𑀏𑀢𑀺𑀲𑁆𑀲𑀁 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀬𑀁.

𑀧𑀸𑀭𑀺𑀲𑀼𑀤𑁆𑀥𑀺𑀁 𑀧𑀢𑁆𑀢𑀼𑀓𑀸𑀫𑁄𑀢𑀺 𑀨𑀮𑀁 𑀅𑀥𑀺𑀕𑀦𑁆𑀢𑀼𑀓𑀸𑀫𑁄 𑀲𑀫𑀸𑀧𑀚𑁆𑀚𑀺𑀢𑀼𑀓𑀸𑀫𑁄 𑀘. 𑀢𑀢𑁆𑀣 𑀲𑀮𑁆𑀮𑀓𑁆𑀔𑀡𑀸𑀯𑀺𑀯𑀝𑁆𑀝𑀦𑀸𑀯𑀲𑁂𑀦 𑀧𑀞𑀫𑀁 𑀫𑀕𑁆𑀕𑀸𑀦𑀦𑁆𑀢𑀭𑀨𑀮𑀁 𑀅𑀥𑀺𑀕𑀦𑁆𑀢𑀼𑀓𑀸𑀫𑁄. 𑀢𑀢𑁄 𑀧𑀭𑀁 𑀲𑀮𑁆𑀮𑀓𑁆𑀔𑀡𑀯𑀲𑁂𑀦 𑀨𑀮𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺𑀢𑀼𑀓𑀸𑀫𑁄𑀧𑀻𑀢𑀺 𑀏𑀯𑀫𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀆𑀯𑀚𑁆𑀚𑀦𑀲𑀫𑀸𑀧𑀚𑁆𑀚𑀦…𑀧𑁂… 𑀯𑀲𑀺𑀧𑁆𑀧𑀢𑁆𑀢𑀦𑁆𑀢𑀺 𑀏𑀢𑁆𑀣 𑀧𑀝𑀺𑀮𑀤𑁆𑀥𑀛𑀸𑀦𑀢𑁄 𑀯𑀼𑀝𑁆𑀞𑀸𑀬 𑀯𑀺𑀢𑀓𑁆𑀓𑀸𑀤𑀻𑀲𑀼 𑀛𑀸𑀦𑀗𑁆𑀕𑁂𑀲𑀼 𑀏𑀓𑁂𑀓𑀁 𑀆𑀯𑀚𑁆𑀚𑀬𑀢𑁄 𑀪𑀯𑀗𑁆𑀕𑀁 𑀉𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀉𑀧𑁆𑀧𑀦𑁆𑀦𑀸𑀯𑀚𑁆𑀚𑀦𑀸𑀦𑀦𑁆𑀢𑀭𑀁 𑀯𑀺𑀢𑀓𑁆𑀓𑀸𑀤𑀻𑀲𑀼 𑀬𑀣𑀸𑀯𑀚𑁆𑀚𑀺𑀢𑀛𑀸𑀦𑀗𑁆𑀕𑀸𑀭𑀫𑁆𑀫𑀡𑀸𑀦𑀺 𑀓𑀸𑀫𑀸𑀯𑀘𑀭𑀚𑀯𑀦𑀸𑀦𑀺 𑀪𑀯𑀗𑁆𑀕𑀦𑁆𑀢𑀭𑀺𑀢𑀸𑀦𑀺 𑀬𑀤𑀸 𑀦𑀺𑀭𑀦𑁆𑀢𑀭𑀁 𑀧𑀯𑀢𑁆𑀢𑀦𑁆𑀢𑀺, 𑀅𑀣𑀲𑁆𑀲 𑀆𑀯𑀚𑁆𑀚𑀦𑀯𑀲𑀻 𑀲𑀺𑀤𑁆𑀥𑀸 𑀳𑁄𑀢𑀺. 𑀢𑀁 𑀧𑀦 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑀼𑀓𑀸𑀫𑀢𑀸𑀦𑀦𑁆𑀢𑀭𑀁 𑀲𑀻𑀖𑀁 𑀲𑀫𑀸𑀧𑀚𑁆𑀚𑀦𑀲𑀫𑀢𑁆𑀣𑀢𑀸 𑀲𑀫𑀸𑀧𑀚𑁆𑀚𑀦𑀯𑀲𑀻 𑀦𑀸𑀫. 𑀅𑀘𑁆𑀙𑀭𑀸𑀫𑀢𑁆𑀢𑀁 𑀯𑀸 𑀤𑀲𑀘𑁆𑀙𑀭𑀸𑀫𑀢𑁆𑀢𑀁 𑀯𑀸 𑀔𑀡𑀁 𑀛𑀸𑀦𑀁 𑀞𑀧𑁂𑀢𑀼𑀁 𑀲𑀫𑀢𑁆𑀣𑀢𑀸 𑀅𑀥𑀺𑀝𑁆𑀞𑀸𑀦𑀯𑀲𑀻 𑀦𑀸𑀫. 𑀢𑀣𑁂𑀯 𑀮𑀳𑀼𑀁 𑀔𑀡𑀁 𑀛𑀸𑀦𑀲𑀫𑀗𑁆𑀕𑀻 𑀳𑀼𑀢𑁆𑀯𑀸 𑀛𑀸𑀦𑀢𑁄 𑀪𑀯𑀗𑁆𑀕𑀼𑀧𑁆𑀧𑀢𑁆𑀢𑀺𑀯𑀲𑁂𑀦 𑀯𑀼𑀝𑁆𑀞𑀸𑀢𑀼𑀁 𑀲𑀫𑀢𑁆𑀣𑀢𑀸 𑀯𑀼𑀝𑁆𑀞𑀸𑀦𑀯𑀲𑀻 𑀦𑀸𑀫. ‘‘𑀏𑀢𑁆𑀢𑀓𑀫𑁂𑀯 𑀔𑀡𑀁 𑀲𑀫𑀸𑀧𑀚𑁆𑀚𑀺𑀲𑁆𑀲𑀸𑀫𑀻’’𑀢𑀺, ‘‘𑀏𑀢𑁆𑀢𑀓𑀫𑁂𑀯 𑀔𑀡𑀁 𑀛𑀸𑀦𑀲𑀫𑀗𑁆𑀕𑀻 𑀳𑀼𑀢𑁆𑀯𑀸 𑀛𑀸𑀦𑀢𑁄 𑀯𑀼𑀝𑁆𑀞𑀳𑀺𑀲𑁆𑀲𑀸𑀫𑀻’’𑀢𑀺 𑀘 𑀧𑀯𑀢𑁆𑀢𑀧𑀼𑀩𑁆𑀩𑀧𑀭𑀺𑀓𑀫𑁆𑀫𑀪𑁂𑀤𑁂𑀦𑁂𑀢𑁆𑀣 𑀅𑀥𑀺𑀝𑁆𑀞𑀸𑀦𑀯𑀼𑀝𑁆𑀞𑀸𑀦𑀯𑀲𑀺𑀬𑁄 𑀪𑀺𑀦𑁆𑀦𑀸, 𑀦 𑀲𑀭𑀽𑀧𑀪𑁂𑀤𑁂𑀦, 𑀬𑀸 ‘‘𑀲𑀫𑀸𑀧𑀢𑁆𑀢𑀺𑀓𑀼𑀲𑀮𑀢𑀸, 𑀯𑀼𑀝𑁆𑀞𑀸𑀦𑀓𑀼𑀲𑀮𑀢𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀧𑀘𑁆𑀘𑀯𑁂𑀓𑁆𑀔𑀡𑀯𑀲𑀻 𑀧𑀦 𑀆𑀯𑀚𑁆𑀚𑀦𑀯𑀲𑀺𑀬𑀸 𑀏𑀯 𑀯𑀼𑀢𑁆𑀢𑀸. 𑀧𑀘𑁆𑀘𑀯𑁂𑀓𑁆𑀔𑀡𑀯𑀻𑀣𑀺𑀬𑀜𑁆𑀳𑀺 𑀲𑀻𑀖𑀁 𑀆𑀯𑀚𑁆𑀚𑀦𑀼𑀧𑁆𑀧𑀢𑁆𑀢𑀺𑀬𑀸 𑀆𑀯𑀚𑁆𑀚𑀦𑀯𑀲𑀻 𑀢𑀤𑀦𑀦𑁆𑀢𑀭𑀸𑀦𑀁 𑀚𑀯𑀦𑀸𑀦𑀁 𑀲𑀫𑀼𑀧𑁆𑀧𑀢𑁆𑀢𑀺𑀬𑀸 𑀧𑀘𑁆𑀘𑀯𑁂𑀓𑁆𑀔𑀡𑀯𑀲𑀻𑀢𑀺 𑀆𑀯𑀚𑁆𑀚𑀦𑀯𑀲𑀻𑀲𑀺𑀤𑁆𑀥𑀺𑀬𑀸𑀯 𑀧𑀘𑁆𑀘𑀯𑁂𑀓𑁆𑀔𑀡𑀯𑀲𑀻 𑀲𑀺𑀤𑁆𑀥𑀸 𑀏𑀯 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀛𑀸𑀦𑀗𑁆𑀕𑀸𑀦𑀺 𑀧𑀭𑀺𑀕𑁆𑀕𑀳𑁂𑀢𑁆𑀯𑀸𑀢𑀺 𑀛𑀸𑀦𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀸𑀦𑀺 𑀛𑀸𑀦𑀗𑁆𑀕𑀸𑀦𑀺 𑀮𑀓𑁆𑀔𑀡𑀸𑀤𑀺𑀯𑀲𑁂𑀦 𑀧𑀭𑀺𑀕𑁆𑀕𑀳𑁂𑀢𑁆𑀯𑀸. 𑀢𑁂𑀲𑀜𑁆𑀘 𑀦𑀺𑀲𑁆𑀲𑀬𑀦𑁆𑀢𑀺 𑀢𑁂𑀲𑀁 𑀯𑀢𑁆𑀣𑀼𑀦𑀺𑀲𑁆𑀲𑀬𑀸𑀦𑀁 𑀪𑀽𑀢𑀸𑀦𑀁 𑀦𑀺𑀲𑁆𑀲𑀬𑀁. 𑀇𑀤𑀜𑁆𑀘 𑀓𑀭𑀚𑀓𑀸𑀬𑀲𑁆𑀲 𑀯𑀢𑁆𑀣𑀼𑀤𑀲𑀓𑀲𑁆𑀲 𑀪𑀽𑀢𑀦𑀺𑀲𑁆𑀲𑀬𑀢𑁆𑀢𑀸 𑀲𑀼𑀢𑁆𑀢𑀦𑁆𑀢𑀦𑀬𑁂𑀦 𑀯𑀼𑀢𑁆𑀢𑀁, 𑀦 𑀧𑀝𑁆𑀞𑀸𑀦𑀦𑀬𑁂𑀦. 𑀦 𑀳𑀺 𑀓𑀮𑀸𑀧𑀦𑁆𑀢𑀭𑀕𑀢𑀸𑀦𑀺 𑀪𑀽𑀢𑀸𑀦𑀺 𑀓𑀮𑀸𑀧𑀦𑁆𑀢𑀭𑀕𑀢𑀸𑀦𑀁 𑀪𑀽𑀢𑀸𑀦𑀁 𑀦𑀺𑀲𑁆𑀲𑀬𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀲𑀼𑀢𑁆𑀢𑀦𑁆𑀢𑀦𑀬𑁂𑀦 𑀧𑀦 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁄𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀧𑀝𑁆𑀞𑀸𑀦𑁂 𑀳𑀺 𑀅𑀲𑀗𑁆𑀕𑀳𑀺𑀢𑀸 𑀲𑀩𑁆𑀩𑁂 𑀧𑀘𑁆𑀘𑀬𑀸 𑀲𑀼𑀢𑁆𑀢𑀦𑁆𑀢𑀺𑀓𑀦𑀬𑁂𑀦 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂 𑀲𑀗𑁆𑀕𑀬𑁆𑀳𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀁𑀦𑀺𑀲𑁆𑀲𑀺𑀢𑀭𑀽𑀧𑀸𑀦𑀻𑀢𑀺 𑀉𑀧𑀸𑀤𑀸𑀭𑀽𑀧𑀸𑀦𑀺. 𑀬𑀣𑀸𑀧𑀭𑀺𑀕𑁆𑀕𑀳𑀺𑀢𑀭𑀽𑀧𑀯𑀢𑁆𑀣𑀼𑀤𑁆𑀯𑀸𑀭𑀸𑀭𑀫𑁆𑀫𑀡𑀁 𑀯𑀸𑀢𑀺 𑀏𑀢𑁆𑀣 𑀬𑀣𑀸𑀧𑀭𑀺𑀕𑁆𑀕𑀳𑀺𑀢𑀓𑁂𑀲𑀸𑀤𑀺𑀭𑀽𑀧𑀸𑀭𑀫𑁆𑀫𑀡𑀁 𑀢𑀢𑁄 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑀯𑀢𑁆𑀣𑀸𑀭𑀫𑁆𑀫𑀡𑀜𑁆𑀘 𑀢𑀦𑁆𑀦𑀺𑀲𑁆𑀲𑀬𑀓𑀭𑀚𑀓𑀸𑀬𑀧𑀅𑀕𑁆𑀕𑀳𑀫𑀼𑀔𑁂𑀦 𑀉𑀧𑀝𑁆𑀞𑀺𑀢𑀘𑀓𑁆𑀔𑀸𑀤𑀺𑀤𑁆𑀯𑀸𑀭𑀜𑁆𑀘 𑀲𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀯𑀺𑀜𑁆𑀜𑀸𑀡𑀁 𑀯𑀸𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀓𑀫𑁆𑀫𑀸𑀭𑀕𑀕𑁆𑀕𑀭𑀻𑀢𑀺 𑀓𑀫𑁆𑀫𑀸𑀭𑀸𑀦𑀁 𑀅𑀕𑁆𑀕𑀺𑀥𑀫𑀦𑀪𑀲𑁆𑀢𑀸. 𑀢𑀚𑁆𑀚𑀦𑁆𑀢𑀺 𑀢𑀤𑀦𑀼𑀭𑀽𑀧𑀁. 𑀢𑀲𑁆𑀲𑀸𑀢𑀺 𑀦𑀸𑀫𑀭𑀽𑀧𑀲𑁆𑀲. 𑀢𑀁 𑀤𑀺𑀲𑁆𑀯𑀸𑀢𑀺 𑀅𑀯𑀺𑀚𑁆𑀚𑀸𑀢𑀡𑁆𑀳𑀸𑀤𑀺𑀧𑀘𑁆𑀘𑀬𑀁 𑀤𑀺𑀲𑁆𑀯𑀸. 𑀓𑀗𑁆𑀔𑀁 𑀯𑀺𑀢𑀭𑀢𑀻𑀢𑀺 𑀅𑀳𑁄𑀲𑀺𑀁 𑀦𑀼 𑀔𑁄 𑀅𑀳𑀁 𑀅𑀢𑀻𑀢𑀫𑀤𑁆𑀥𑀸𑀦𑀦𑁆𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀁 (𑀫. 𑀦𑀺. 𑁧.𑁧𑁮; 𑀲𑀁. 𑀦𑀺. 𑁨.𑁨𑁦) 𑀲𑁄𑀴𑀲𑀯𑀢𑁆𑀣𑀼𑀓𑀁 𑀯𑀺𑀘𑀺𑀓𑀺𑀘𑁆𑀙𑀁 𑀅𑀢𑀺𑀓𑁆𑀓𑀫𑀢𑀺. 𑀓𑀮𑀸𑀧𑀲𑀫𑁆𑀫𑀲𑀦𑀯𑀲𑁂𑀦𑀸𑀢𑀺 𑀬𑀁 𑀓𑀺𑀜𑁆𑀘𑀺 𑀭𑀽𑀧𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀦𑁆𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁩𑁬𑁧; 𑁩.𑁮𑁬, 𑁮𑁯; 𑀅. 𑀦𑀺. 𑁪.𑁧𑁮𑁧) 𑀧𑀜𑁆𑀘𑀲𑀼 𑀔𑀦𑁆𑀥𑁂𑀲𑀼 𑀅𑀢𑀻𑀢𑀸𑀤𑀺𑀓𑁄𑀝𑁆𑀞𑀸𑀲𑀁 𑀏𑀓𑁂𑀓𑀓𑀮𑀸𑀧𑀢𑁄 𑀕𑀳𑁂𑀢𑁆𑀯𑀸 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀲𑀫𑁆𑀫𑀲𑀦𑀁 𑀓𑀮𑀸𑀧𑀲𑀫𑁆𑀫𑀲𑀦𑀁, 𑀢𑀲𑁆𑀲 𑀯𑀲𑁂𑀦. 𑀧𑀼𑀩𑁆𑀩𑀪𑀸𑀕𑁂𑀢𑀺 𑀧𑀝𑀺𑀧𑀤𑀸𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀧𑀭𑀺𑀬𑀸𑀧𑀦𑁆𑀦𑀸𑀬 𑀉𑀤𑀬𑀩𑁆𑀩𑀬𑀸𑀦𑀼𑀧𑀲𑁆𑀲𑀦𑀸𑀬 𑀧𑀼𑀩𑁆𑀩𑀪𑀸𑀕𑁂. 𑀑𑀪𑀸𑀲𑀸𑀤𑀬𑁄𑀢𑀺 𑀑𑀪𑀸𑀲𑁄 𑀜𑀸𑀡𑀁 𑀧𑀻𑀢𑀺 𑀧𑀲𑁆𑀲𑀤𑁆𑀥𑀺 𑀲𑀼𑀔𑀁 𑀅𑀥𑀺𑀫𑁄𑀓𑁆𑀔𑁄 𑀧𑀕𑁆𑀕𑀳𑁄 𑀉𑀧𑁂𑀓𑁆𑀔𑀸 𑀉𑀧𑀝𑁆𑀞𑀸𑀦𑀁 𑀦𑀺𑀓𑀦𑁆𑀢𑀺 𑀘. 𑀢𑀢𑁆𑀣 𑀅𑀥𑀺𑀫𑁄𑀓𑁆𑀔𑁄𑀢𑀺 𑀲𑀤𑁆𑀥𑀸. 𑀉𑀧𑀝𑁆𑀞𑀸𑀦𑀦𑁆𑀢𑀺 𑀲𑀢𑀺. 𑀉𑀧𑁂𑀓𑁆𑀔𑀸𑀢𑀺 𑀢𑀢𑁆𑀭𑀫𑀚𑁆𑀛𑀢𑁆𑀢𑀢𑀸. 𑀏𑀢𑁆𑀣 𑀘 𑀑𑀪𑀸𑀲𑀸𑀤𑀬𑁄 𑀦𑀯 𑀦𑀺𑀓𑀦𑁆𑀢𑀺𑀲𑀗𑁆𑀔𑀸𑀢𑀢𑀡𑁆𑀳𑀼𑀧𑀓𑁆𑀓𑀺𑀮𑁂𑀲𑀯𑀢𑁆𑀣𑀼𑀢𑀸𑀬 𑀉𑀧𑀓𑁆𑀓𑀺𑀮𑁂𑀲𑀸 𑀯𑀼𑀢𑁆𑀢𑀸, 𑀦𑀺𑀓𑀦𑁆𑀢𑀺 𑀧𑀦 𑀉𑀧𑀓𑁆𑀓𑀺𑀮𑁂𑀲𑀢𑀸𑀬 𑀢𑀩𑁆𑀩𑀢𑁆𑀣𑀼𑀢𑀸𑀬 𑀘. 𑀦𑀺𑀩𑁆𑀩𑀺𑀦𑁆𑀤𑀦𑁆𑀢𑁄 𑀆𑀤𑀻𑀦𑀯𑀸𑀦𑀼𑀧𑀲𑁆𑀲𑀦𑀸𑀧𑀼𑀩𑁆𑀩𑀗𑁆𑀕𑀫𑀸𑀬 𑀦𑀺𑀩𑁆𑀩𑀺𑀤𑀸𑀦𑀼𑀧𑀲𑁆𑀲𑀦𑀸𑀬 𑀦𑀺𑀩𑁆𑀩𑀺𑀦𑁆𑀤𑀦𑁆𑀢𑁄. 𑀫𑀼𑀜𑁆𑀘𑀺𑀢𑀼𑀓𑀫𑁆𑀬𑀢𑀸𑀧𑀝𑀺𑀲𑀗𑁆𑀔𑀸𑀦𑀼𑀧𑀲𑁆𑀲𑀦𑀸𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀦𑀼𑀮𑁄𑀫𑀜𑀸𑀡𑀸𑀦𑀁 𑀘𑀺𑀡𑁆𑀡𑀧𑀭𑀺𑀬𑀦𑁆𑀢𑁂 𑀉𑀧𑁆𑀧𑀦𑁆𑀦𑀕𑁄𑀢𑁆𑀭𑀪𑀼𑀜𑀸𑀡𑀸𑀦𑀦𑁆𑀢𑀭𑀁 𑀉𑀧𑁆𑀧𑀦𑁆𑀦𑁂𑀦 𑀫𑀕𑁆𑀕𑀜𑀸𑀡𑁂𑀦 𑀲𑀩𑁆𑀩𑀲𑀗𑁆𑀔𑀸𑀭𑁂𑀲𑀼 𑀯𑀺𑀭𑀚𑁆𑀚𑀦𑁆𑀢𑁄 𑀯𑀺𑀫𑀼𑀘𑁆𑀘𑀦𑁆𑀢𑁄. 𑀨𑀮𑀓𑁆𑀔𑀡𑁂 𑀳𑀺 𑀯𑀺𑀫𑀼𑀢𑁆𑀢𑁄 𑀦𑀸𑀫 𑀯𑀼𑀘𑁆𑀘𑀢𑀺, 𑀫𑀕𑁆𑀕𑀓𑁆𑀔𑀡𑁂 𑀯𑀺𑀫𑀼𑀘𑁆𑀘𑀦𑁆𑀢𑁄𑀢𑀺. 𑀏𑀓𑀽𑀦𑀯𑀻𑀲𑀢𑀺𑀪𑁂𑀤𑀲𑁆𑀲𑀸𑀢𑀺 𑀘𑀢𑀼𑀦𑁆𑀦𑀁 𑀫𑀕𑁆𑀕𑀯𑀻𑀣𑀻𑀦𑀁 𑀅𑀦𑀦𑁆𑀢𑀭𑀁 𑀧𑀘𑁆𑀘𑁂𑀓𑀁 𑀉𑀧𑁆𑀧𑀚𑁆𑀚𑀦𑁆𑀢𑀲𑁆𑀲 𑀫𑀕𑁆𑀕𑀨𑀮𑀦𑀺𑀩𑁆𑀩𑀸𑀦𑀧𑀳𑀻𑀦𑀸𑀯𑀲𑀺𑀝𑁆𑀞𑀓𑀺𑀮𑁂𑀲𑀸𑀦𑀁 𑀧𑀜𑁆𑀘𑀦𑁆𑀦𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀸𑀦𑀁 𑀯𑀲𑁂𑀦 𑀏𑀓𑀽𑀦𑀯𑀻𑀲𑀢𑀺𑀪𑁂𑀤𑀲𑁆𑀲. 𑀅𑀭𑀳𑀢𑁄 𑀳𑀺 𑀅𑀯𑀲𑀺𑀝𑁆𑀞𑀓𑀺𑀮𑁂𑀲𑀸𑀪𑀸𑀯𑁂𑀦 𑀏𑀓𑀽𑀦𑀯𑀻𑀲𑀢𑀺𑀢𑀸. 𑀅𑀲𑁆𑀲𑀸𑀢𑀺 𑀆𑀦𑀸𑀧𑀸𑀦𑀓𑀫𑁆𑀫𑀝𑁆𑀞𑀸𑀦𑀺𑀓𑀲𑁆𑀲.

𑀲𑀧𑁆𑀧𑀻𑀢𑀺𑀓𑁂 𑀤𑁆𑀯𑁂 𑀛𑀸𑀦𑁂𑀢𑀺 𑀧𑀻𑀢𑀺𑀲𑀳𑀕𑀢𑀸𑀦𑀺 𑀘𑀢𑀼𑀓𑁆𑀓𑀦𑀬𑁂 𑀤𑁆𑀯𑁂 𑀧𑀞𑀫𑀤𑀼𑀢𑀺𑀬𑀚𑁆𑀛𑀸𑀦𑀸𑀦𑀺. 𑀢𑀲𑁆𑀲𑀸𑀢𑀺 𑀢𑁂𑀦 𑀬𑁄𑀕𑀺𑀦𑀸. 𑀲𑀫𑀸𑀧𑀢𑁆𑀢𑀺𑀓𑁆𑀔𑀡𑁂𑀢𑀺 𑀲𑀫𑀸𑀧𑀦𑁆𑀦𑀓𑁆𑀔𑀡𑁂. 𑀆𑀭𑀫𑁆𑀫𑀡𑀢𑁄𑀢𑀺 𑀧𑀝𑀺𑀪𑀸𑀕𑀸𑀭𑀫𑁆𑀫𑀡𑀕𑁆𑀕𑀳𑀡𑀫𑀼𑀔𑁂𑀦 𑀧𑀻𑀢𑀺 𑀧𑀝𑀺𑀲𑀁𑀯𑀺𑀤𑀺𑀢𑀸 𑀳𑁄𑀢𑀺, 𑀆𑀭𑀫𑁆𑀫𑀡𑀲𑁆𑀲 𑀧𑀝𑀺𑀲𑀁𑀯𑀺𑀤𑀺𑀢𑀢𑁆𑀢𑀸. 𑀆𑀭𑀫𑁆𑀫𑀡𑁂 𑀳𑀺 𑀯𑀺𑀤𑀺𑀢𑁂 𑀢𑀩𑁆𑀩𑀺𑀲𑀬𑀸 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸 𑀲𑀬𑀁 𑀅𑀢𑁆𑀢𑀦𑁄 𑀧𑀝𑀺𑀲𑀁𑀯𑀺𑀤𑀺𑀢𑀸 𑀦𑀸𑀫 𑀳𑁄𑀢𑀺 𑀲𑀮𑀓𑁆𑀔𑀡𑀢𑁄 𑀲𑀸𑀫𑀜𑁆𑀜𑀮𑀓𑁆𑀔𑀡𑀢𑁄 𑀘 𑀧𑀘𑁆𑀙𑀸 𑀕𑀳𑀡𑁂 𑀲𑀦𑁆𑀤𑁂𑀳𑀸𑀪𑀸𑀯𑀢𑁄. 𑀯𑀺𑀧𑀲𑁆𑀲𑀦𑀸𑀓𑁆𑀔𑀡𑁂𑀢𑀺 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀬 𑀯𑀺𑀲𑀬𑀢𑁄 𑀤𑀲𑁆𑀲𑀦𑀓𑁆𑀔𑀡𑁂. 𑀏𑀯𑀁 𑀧𑀻𑀢𑀺𑀁 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀕𑀳𑀡𑀫𑁂𑀯 𑀅𑀲𑀫𑁆𑀫𑁄𑀳𑀢𑁄 𑀧𑀻𑀢𑀺𑀧𑀝𑀺𑀲𑀁𑀯𑁂𑀤𑀦𑀁 𑀦𑀸𑀫.

𑀤𑀻𑀖𑀁 𑀅𑀲𑁆𑀲𑀸𑀲𑀯𑀲𑁂𑀦𑀸𑀢𑀺 𑀤𑀻𑀖𑀲𑁆𑀲 𑀅𑀲𑁆𑀲𑀸𑀲𑀲𑁆𑀲 𑀆𑀭𑀫𑁆𑀫𑀡𑀪𑀽𑀢𑀲𑁆𑀲 𑀯𑀲𑁂𑀦, 𑀧𑀚𑀸𑀦𑀢𑁄 𑀲𑀸 𑀧𑀻𑀢𑀺 𑀧𑀝𑀺𑀲𑀁𑀯𑀺𑀤𑀺𑀢𑀸 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀘𑀺𑀢𑁆𑀢𑀲𑁆𑀲 𑀏𑀓𑀕𑁆𑀕𑀢𑀁 𑀅𑀯𑀺𑀓𑁆𑀔𑁂𑀧𑀁 𑀧𑀚𑀸𑀦𑀢𑁄𑀢𑀺 𑀛𑀸𑀦𑀧𑀭𑀺𑀬𑀸𑀧𑀦𑁆𑀦𑀁 𑀅𑀯𑀺𑀓𑁆𑀔𑁂𑀧𑀸𑀧𑀦𑁆𑀦𑀁 𑀦𑀸𑀫 𑀘𑀺𑀢𑁆𑀢𑀲𑁆𑀲𑁂𑀓𑀕𑁆𑀕𑀢𑀁 𑀢𑀁𑀲𑀫𑁆𑀧𑀬𑀼𑀢𑁆𑀢𑀸𑀬 𑀧𑀜𑁆𑀜𑀸𑀬 𑀧𑀚𑀸𑀦𑀢𑁄. 𑀬𑀣𑁂𑀯 𑀳𑀺 𑀆𑀭𑀫𑁆𑀫𑀡𑀫𑀼𑀔𑁂𑀦 𑀧𑀻𑀢𑀺 𑀧𑀝𑀺𑀲𑀁𑀯𑀺𑀤𑀺𑀢𑀸 𑀳𑁄𑀢𑀺, 𑀏𑀯𑀁 𑀢𑀁𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀧𑀺 𑀧𑀝𑀺𑀲𑀁𑀯𑀺𑀤𑀺𑀢𑀸 𑀏𑀯 𑀳𑁄𑀦𑁆𑀢𑀻𑀢𑀺. 𑀲𑀢𑀺 𑀉𑀧𑀝𑁆𑀞𑀺𑀢𑀸 𑀳𑁄𑀢𑀻𑀢𑀺 𑀤𑀻𑀖𑀁 𑀅𑀲𑁆𑀲𑀸𑀲𑀯𑀲𑁂𑀦 𑀛𑀸𑀦𑀲𑀫𑁆𑀧𑀬𑀼𑀢𑁆𑀢𑀸 𑀲𑀢𑀺 𑀢𑀲𑁆𑀲 𑀆𑀭𑀫𑁆𑀫𑀡𑁂 𑀉𑀧𑀝𑁆𑀞𑀺𑀢𑀸 𑀢𑀤𑀸𑀭𑀫𑁆𑀫𑀡𑀚𑁆𑀛𑀸𑀦𑁂𑀧𑀺 𑀉𑀧𑀝𑁆𑀞𑀺𑀢𑀸 𑀦𑀸𑀫 𑀳𑁄𑀢𑀻𑀢𑀺. 𑀤𑀻𑀖𑀁 𑀧𑀲𑁆𑀲𑀸𑀲𑀯𑀲𑁂𑀦𑀸𑀢𑀺𑀆𑀤𑀻𑀲𑀼𑀧𑀺 𑀇𑀫𑀺𑀦𑀸𑀯 𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀯𑀁 𑀤𑀲𑁆𑀲𑀺𑀢𑀁 𑀧𑀻𑀢𑀺𑀧𑀝𑀺𑀲𑀁𑀯𑁂𑀤𑀦𑀁 𑀆𑀭𑀫𑁆𑀫𑀡𑀢𑁄 𑀅𑀲𑀫𑁆𑀫𑁄𑀳𑀢𑁄 𑀘 𑀯𑀺𑀪𑀸𑀕𑀢𑁄 𑀤𑀲𑁆𑀲𑁂𑀢𑀼𑀁 𑀆𑀯𑀚𑁆𑀚𑀢𑁄𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀆𑀯𑀚𑁆𑀚𑀢𑁄𑀢𑀺 𑀛𑀸𑀦𑀁 𑀆𑀯𑀚𑁆𑀚𑀦𑁆𑀢𑀲𑁆𑀲. 𑀲𑀸 𑀧𑀻𑀢𑀻𑀢𑀺 𑀲𑀸 𑀛𑀸𑀦𑀧𑀭𑀺𑀬𑀸𑀧𑀦𑁆𑀦𑀸 𑀧𑀻𑀢𑀺. 𑀚𑀸𑀦𑀢𑁄𑀢𑀺 𑀲𑀫𑀸𑀧𑀦𑁆𑀦𑀓𑁆𑀔𑀡𑁂 𑀆𑀭𑀫𑁆𑀫𑀡𑀫𑀼𑀔𑁂𑀦 𑀚𑀸𑀦𑀢𑁄, 𑀢𑀲𑁆𑀲 𑀲𑀸 𑀧𑀻𑀢𑀺 𑀧𑀝𑀺𑀲𑀁𑀯𑀺𑀤𑀺𑀢𑀸 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀲𑁆𑀲𑀢𑁄𑀢𑀺 𑀤𑀲𑁆𑀲𑀦𑀪𑀽𑀢𑁂𑀦 𑀜𑀸𑀡𑁂𑀦 𑀛𑀸𑀦𑀢𑁄 𑀯𑀼𑀝𑁆𑀞𑀸𑀬 𑀧𑀲𑁆𑀲𑀦𑁆𑀢𑀲𑁆𑀲. 𑀧𑀘𑁆𑀘𑀯𑁂𑀓𑁆𑀔𑀢𑁄𑀢𑀺 𑀛𑀸𑀦𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲. 𑀘𑀺𑀢𑁆𑀢𑀁 𑀅𑀥𑀺𑀝𑁆𑀞𑀳𑀢𑁄𑀢𑀺 ‘‘𑀏𑀢𑁆𑀢𑀓𑀁 𑀯𑁂𑀮𑀁 𑀛𑀸𑀦𑀲𑀫𑀗𑁆𑀕𑀻 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀛𑀸𑀦𑀘𑀺𑀢𑁆𑀢𑀁 𑀅𑀥𑀺𑀝𑁆𑀞𑀳𑀦𑁆𑀢𑀲𑁆𑀲. 𑀏𑀯𑀁 𑀧𑀜𑁆𑀘𑀦𑁆𑀦𑀁 𑀯𑀲𑀺𑀪𑀸𑀯𑀸𑀦𑀁 𑀯𑀲𑁂𑀦 𑀛𑀸𑀦𑀲𑁆𑀲 𑀧𑀚𑀸𑀦𑀦𑀫𑀼𑀔𑁂𑀦 𑀆𑀭𑀫𑁆𑀫𑀡𑀢𑁄 𑀧𑀻𑀢𑀺𑀬𑀸 𑀧𑀝𑀺𑀲𑀁𑀯𑁂𑀤𑀦𑀸 𑀤𑀲𑁆𑀲𑀺𑀢𑀸. 𑀅𑀥𑀺𑀫𑀼𑀘𑁆𑀘𑀢𑁄𑀢𑀺 𑀲𑀤𑁆𑀤𑀳𑀦𑁆𑀢𑀲𑁆𑀲, 𑀲𑀫𑀣𑀯𑀺𑀧𑀲𑁆𑀲𑀦𑀸𑀯𑀲𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀯𑀻𑀭𑀺𑀬𑀁 𑀧𑀕𑁆𑀕𑀡𑁆𑀳𑀢𑁄𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀪𑀺𑀜𑁆𑀜𑁂𑀬𑁆𑀬𑀦𑁆𑀢𑀺 𑀯𑀺𑀲𑀺𑀝𑁆𑀞𑀸𑀬 𑀧𑀜𑁆𑀜𑀸𑀬 𑀚𑀸𑀦𑀺𑀢𑀩𑁆𑀩𑀁 𑀘𑀢𑀼𑀲𑀘𑁆𑀘𑀁 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀧𑀼𑀩𑁆𑀩𑀗𑁆𑀕𑀫𑀸𑀬 𑀫𑀕𑁆𑀕𑀧𑀜𑁆𑀜𑀸𑀬 𑀅𑀪𑀺𑀚𑀸𑀦𑀢𑁄𑀢𑀺𑀆𑀤𑀺 𑀬𑁄𑀚𑀦𑀸. 𑀏𑀯𑀁 𑀧𑀭𑀺𑀜𑁆𑀜𑁂𑀬𑁆𑀬𑀦𑁆𑀢𑀺𑀆𑀤𑀻𑀲𑀼𑀧𑀺 𑀧𑀭𑀺𑀚𑀸𑀦𑀢𑁄𑀢𑀺𑀆𑀤𑀺𑀦𑀸 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀢𑀢𑁆𑀣 𑀧𑀭𑀺𑀜𑁆𑀜𑁂𑀬𑁆𑀬𑀦𑁆𑀢𑀺 𑀤𑀼𑀓𑁆𑀔𑀲𑀘𑁆𑀘𑀁. 𑀅𑀯𑀲𑁂𑀲𑀧𑀤𑀸𑀦𑀻𑀢𑀺 𑀲𑀼𑀔𑀧𑀝𑀺𑀲𑀁𑀯𑁂𑀤𑀻 𑀘𑀺𑀢𑁆𑀢𑀲𑀗𑁆𑀔𑀸𑀭𑀧𑀝𑀺𑀲𑀁𑀯𑁂𑀤𑀻𑀢𑀺 𑀧𑀤𑀸𑀦𑀺.

𑀯𑁂𑀤𑀦𑀸𑀤𑀬𑁄𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀲𑀜𑁆𑀜𑀸 𑀕𑀳𑀺𑀢𑀸, 𑀢𑁂𑀦𑀸𑀳 ‘‘𑀤𑁆𑀯𑁂 𑀔𑀦𑁆𑀥𑀸’’𑀢𑀺. 𑀯𑀺𑀧𑀲𑁆𑀲𑀦𑀸𑀪𑀽𑀫𑀺𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀓𑀸𑀬𑀺𑀓𑀲𑀼𑀔𑀸𑀤𑀺𑀲𑀻𑀲𑁂𑀦 𑀧𑀓𑀺𑀡𑁆𑀡𑀓𑀲𑀗𑁆𑀔𑀸𑀭𑀤𑀲𑁆𑀲𑀦𑀢𑁄 𑀯𑀼𑀢𑁆𑀢𑀁 𑀲𑀫𑀣𑁂 𑀓𑀸𑀬𑀺𑀓𑀲𑀼𑀔𑀸𑀪𑀸𑀯𑀢𑁄. 𑀲𑁄𑀢𑀺 𑀧𑀲𑁆𑀲𑀫𑁆𑀪𑀦𑀧𑀭𑀺𑀬𑀸𑀬𑁂𑀦 𑀯𑀼𑀢𑁆𑀢𑁄 𑀦𑀺𑀭𑁄𑀥𑁄. 𑀯𑀼𑀢𑁆𑀢𑀦𑀬𑁂𑀦𑀸𑀢𑀺 𑀇𑀫𑀲𑁆𑀲 𑀳𑀺 𑀪𑀺𑀓𑁆𑀔𑀼𑀦𑁄 𑀧𑀼𑀩𑁆𑀩𑁂 𑀅𑀧𑀭𑀺𑀕𑁆𑀕𑀳𑀺𑀢𑀓𑀸𑀮𑁂𑀢𑀺𑀆𑀤𑀺𑀦𑀸 (𑀧𑀸𑀭𑀸. 𑀅𑀝𑁆𑀞. 𑁨.𑁧𑁬𑁫) 𑀓𑀸𑀬𑀲𑀗𑁆𑀔𑀸𑀭𑁂 𑀯𑀼𑀢𑁆𑀢𑀦𑀬𑁂𑀦. 𑀧𑀻𑀢𑀺𑀲𑀻𑀲𑁂𑀦 𑀯𑁂𑀤𑀦𑀸 𑀯𑀼𑀢𑁆𑀢𑀸𑀢𑀺 𑀧𑀻𑀢𑀺𑀅𑀧𑀤𑁂𑀲𑁂𑀦 𑀯𑁂𑀤𑀦𑀸 𑀯𑀼𑀢𑁆𑀢𑀸, 𑀲𑀼𑀔𑀕𑁆𑀕𑀳𑀡𑀢𑁄 𑀯𑁂𑀤𑀦𑀸𑀦𑀼𑀧𑀲𑁆𑀲𑀦𑀸𑀧𑀲𑀗𑁆𑀕𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀤𑁆𑀯𑀻𑀲𑀼 𑀘𑀺𑀢𑁆𑀢𑀲𑀗𑁆𑀔𑀸𑀭𑀧𑀤𑁂𑀲𑀽𑀢𑀺 ‘‘𑀘𑀺𑀢𑁆𑀢𑀲𑀗𑁆𑀔𑀸𑀭𑀧𑀝𑀺𑀲𑀁𑀯𑁂𑀤𑀻 𑀧𑀲𑁆𑀲𑀫𑁆𑀪𑀬𑀁 𑀘𑀺𑀢𑁆𑀢𑀲𑀗𑁆𑀔𑀸𑀭’’𑀦𑁆𑀢𑀺 𑀇𑀫𑁂𑀲𑀼 𑀤𑁆𑀯𑀻𑀲𑀼 𑀓𑁄𑀝𑁆𑀞𑀸𑀲𑁂𑀲𑀼. 𑀲𑀜𑁆𑀜𑀸𑀲𑀫𑁆𑀧𑀬𑀼𑀢𑁆𑀢𑀸 𑀯𑁂𑀤𑀦𑀸𑀢𑀺 𑀯𑁂𑀤𑀦𑀸𑀦𑀼𑀧𑀲𑁆𑀲𑀦𑀸𑀪𑀸𑀯𑀢𑁄 𑀯𑀼𑀢𑁆𑀢𑀁. 𑀘𑀺𑀢𑁆𑀢𑀧𑀝𑀺𑀲𑀁𑀯𑁂𑀤𑀺𑀢𑀸 𑀯𑁂𑀤𑀺𑀢𑀩𑁆𑀩𑀸𑀢𑀺 𑀆𑀭𑀫𑁆𑀫𑀡𑀢𑁄 𑀅𑀲𑀫𑁆𑀫𑁄𑀳𑀢𑁄𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀦𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀘𑀺𑀢𑁆𑀢𑀦𑁆𑀢𑀺 𑀛𑀸𑀦𑀲𑀫𑁆𑀧𑀬𑀼𑀢𑁆𑀢𑀁 𑀯𑀺𑀧𑀲𑁆𑀲𑀦𑀸𑀲𑀫𑁆𑀧𑀬𑀼𑀢𑁆𑀢𑀜𑁆𑀘 𑀘𑀺𑀢𑁆𑀢𑀁. 𑀆𑀫𑁄𑀤𑁂𑀢𑀻𑀢𑀺 𑀲𑀫𑁆𑀧𑀬𑀼𑀢𑁆𑀢𑀸𑀬 𑀧𑀻𑀢𑀺𑀬𑀸 𑀛𑀸𑀦𑀯𑀺𑀲𑀬𑀸𑀬 𑀫𑁄𑀤𑁂𑀢𑀺. 𑀯𑀺𑀧𑀲𑁆𑀲𑀦𑀸𑀓𑁆𑀔𑀡𑁂𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀪𑀗𑁆𑀕𑀸𑀦𑀼𑀧𑀲𑁆𑀲𑀦𑀓𑁆𑀔𑀡𑁂.

𑀆𑀦𑀸𑀧𑀸𑀦𑀲𑁆𑀲𑀢𑀺𑀲𑀫𑀸𑀥𑀺𑀓𑀣𑀸𑀯𑀡𑁆𑀡𑀦𑀸𑀦𑀬𑁄 𑀦𑀺𑀝𑁆𑀞𑀺𑀢𑁄.

𑁧𑁬𑁭. 𑀬𑀤𑀺𑀧𑀺 𑀅𑀭𑀺𑀬𑀸 𑀦𑁂𑀯 𑀅𑀢𑁆𑀢𑀦𑀸𑀯 𑀅𑀢𑁆𑀢𑀸𑀦𑀁 𑀅𑀜𑁆𑀜𑀫𑀜𑁆𑀜𑀁 𑀯𑀸 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀦𑁆𑀢𑀺, 𑀦𑀸𑀧𑀺 𑀧𑀭𑁂𑀳𑀺 𑀲𑀫𑀸𑀤𑀧𑁂𑀦𑁆𑀢𑀺, 𑀢𑀣𑀸𑀧𑀺 𑀬𑀣𑀸𑀯𑀼𑀢𑁆𑀢𑁂𑀳𑀺 𑀢𑀻𑀳𑀺 𑀧𑀓𑀸𑀭𑁂𑀳𑀺 𑀫𑀢𑀸𑀦𑀁 𑀧𑀼𑀣𑀼𑀚𑁆𑀚𑀦𑀸𑀦𑀁 𑀅𑀦𑁆𑀢𑀭𑁂 𑀫𑀺𑀕𑀮𑀡𑁆𑀟𑀺𑀓𑁂𑀦 𑀫𑀸𑀭𑀺𑀢𑀸𑀦𑀁 𑀅𑀭𑀺𑀬𑀧𑀼𑀕𑁆𑀕𑀮𑀸𑀦𑀫𑁆𑀧𑀺 𑀅𑀢𑁆𑀣𑀺𑀢𑀸𑀬 ‘‘𑀅𑀭𑀺𑀬𑀧𑀼𑀕𑁆𑀕𑀮𑀫𑀺𑀲𑁆𑀲𑀓𑀢𑁆𑀢𑀸’’𑀢𑀺 𑀯𑀼𑀢𑁆𑀢𑀁. 𑀅𑀣 𑀯𑀸 𑀧𑀼𑀣𑀼𑀚𑁆𑀚𑀦𑀓𑀸𑀮𑁂 𑀅𑀢𑁆𑀢𑀦𑀸𑀯 𑀅𑀢𑁆𑀢𑀸𑀦𑀁 𑀖𑀸𑀢𑁂𑀢𑁆𑀯𑀸 𑀫𑀭𑀡𑀲𑀫𑀬𑁂 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀺𑀬𑀫𑀕𑁆𑀕𑀁 𑀧𑀝𑀺𑀮𑀪𑀺𑀢𑁆𑀯𑀸 𑀫𑀢𑀸𑀦𑀫𑁆𑀧𑀺 𑀲𑀩𑁆𑀪𑀸𑀯𑀢𑁄 𑀏𑀯𑀁 𑀯𑀼𑀢𑁆𑀢𑀦𑁆𑀢𑀺 𑀕𑀳𑁂𑀢𑀩𑁆𑀩𑀁.

𑀧𑀤𑀪𑀸𑀚𑀦𑀻𑀬𑀯𑀡𑁆𑀡𑀦𑀸

𑁧𑁭𑁨. 𑀩𑁆𑀬𑀜𑁆𑀚𑀦𑁂 𑀆𑀤𑀭𑀁 𑀅𑀓𑀢𑁆𑀯𑀸𑀢𑀺 𑀚𑀸𑀦𑀺𑀢𑁆𑀯𑀸 𑀲𑀜𑁆𑀚𑀸𑀦𑀺𑀢𑁆𑀯𑀸𑀢𑀺𑀆𑀤𑀺𑀦𑀸 𑀩𑁆𑀬𑀜𑁆𑀚𑀦𑀸𑀦𑀼𑀭𑀽𑀧𑀁 𑀅𑀯𑀼𑀢𑁆𑀢𑀢𑁆𑀢𑀸 𑀯𑀼𑀢𑁆𑀢𑀁. 𑀧𑀸𑀡𑁄𑀢𑀺 𑀚𑀸𑀦𑀦𑁆𑀢𑁄𑀢𑀺 𑀇𑀤𑀁 𑀫𑀦𑀼𑀲𑁆𑀲𑁄𑀢𑀺 𑀅𑀚𑀸𑀦𑀺𑀢𑁆𑀯𑀸𑀧𑀺 𑀓𑁂𑀯𑀮𑀁 𑀲𑀢𑁆𑀢𑀲𑀜𑁆𑀜𑀸𑀬 𑀏𑀯 𑀧𑀸𑀭𑀸𑀚𑀺𑀓𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀯𑀥𑀓𑀘𑁂𑀢𑀦𑀸𑀯𑀲𑁂𑀦 𑀘𑁂𑀢𑁂𑀢𑁆𑀯𑀸𑀢𑀺 ‘‘𑀇𑀫𑀁 𑀫𑀸𑀭𑁂𑀫𑀻’’𑀢𑀺 𑀯𑀥𑀓𑀘𑁂𑀢𑀦𑀸𑀬 𑀘𑀺𑀦𑁆𑀢𑁂𑀢𑁆𑀯𑀸. 𑀧𑀓𑀧𑁆𑀧𑁂𑀢𑁆𑀯𑀸𑀢𑀺 ‘‘𑀯𑀥𑀸𑀫𑀺 𑀦’’𑀦𑁆𑀢𑀺 𑀏𑀯𑀁 𑀘𑀺𑀢𑁆𑀢𑁂𑀦 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸. 𑀅𑀪𑀺𑀯𑀺𑀢𑀭𑀺𑀢𑁆𑀯𑀸𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀁 𑀓𑀢𑁆𑀯𑀸, 𑀢𑁂𑀦𑀸𑀳 ‘‘𑀦𑀺𑀭𑀸𑀲𑀗𑁆𑀓𑀘𑀺𑀢𑁆𑀢𑀁 𑀧𑁂𑀲𑁂𑀢𑁆𑀯𑀸’’𑀢𑀺. 𑀲𑀺𑀔𑀸𑀧𑁆𑀧𑀢𑁆𑀢𑁄 𑀅𑀢𑁆𑀣𑁄𑀢𑀺 𑀲𑀜𑁆𑀘𑀺𑀘𑁆𑀘𑀸𑀢𑀺 𑀧𑀼𑀩𑁆𑀩𑀓𑀸𑀮𑀓𑀺𑀭𑀺𑀬𑀸𑀯𑀲𑁂𑀦 𑀯𑀼𑀢𑁆𑀢𑀲𑁆𑀲𑀧𑀺 𑀯𑀻𑀢𑀺𑀓𑁆𑀓𑀫𑀪𑀽𑀢𑀲𑁆𑀲 𑀅𑀧𑀭𑀓𑀸𑀮𑀓𑀺𑀭𑀺𑀬𑀸𑀬𑀼𑀢𑁆𑀢𑀤𑀲𑁆𑀲𑀦𑁂𑀦 𑀓𑁄𑀝𑀺𑀧𑁆𑀧𑀢𑁆𑀢𑁄 𑀅𑀢𑁆𑀣𑁄. 𑀚𑀸𑀢𑀺𑀉𑀡𑁆𑀡𑀸 𑀦𑀸𑀫 𑀢𑀤𑀳𑀼𑀚𑀸𑀢𑀏𑀴𑀓𑀲𑁆𑀲 𑀮𑁄𑀫𑀁. 𑀏𑀯𑀁 𑀯𑀡𑁆𑀡𑀧𑁆𑀧𑀝𑀺𑀪𑀸𑀕𑀦𑁆𑀢𑀺 𑀏𑀯𑀁 𑀯𑀡𑁆𑀡𑀲𑀡𑁆𑀞𑀸𑀦𑀁. 𑀢𑀢𑁄 𑀯𑀸 𑀉𑀤𑁆𑀥𑀦𑁆𑀢𑀺 𑀤𑀼𑀢𑀺𑀬𑀲𑀢𑁆𑀢𑀸𑀳𑀸𑀤𑀻𑀲𑀼 𑀅𑀩𑁆𑀩𑀼𑀤𑀸𑀤𑀺𑀪𑀸𑀯𑀧𑁆𑀧𑀢𑁆𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀧𑀭𑀺𑀳𑀻𑀦𑀯𑁂𑀕𑀲𑁆𑀲 𑀲𑀦𑁆𑀢𑀸𑀦𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀲𑀳𑀓𑀸𑀭𑀻𑀧𑀘𑁆𑀘𑀬𑁄 𑀳𑁄𑀢𑀺, 𑀦 𑀚𑀦𑀓𑁄. 𑀓𑀫𑁆𑀫𑀫𑁂𑀯 𑀳𑀺 𑀔𑀡𑁂 𑀔𑀡𑁂 𑀉𑀧𑁆𑀧𑀚𑁆𑀚𑀫𑀸𑀦𑀸𑀦𑀁 𑀓𑀫𑁆𑀫𑀚𑀭𑀽𑀧𑀸𑀦𑀁 𑀚𑀦𑀓𑀧𑀘𑁆𑀘𑀬𑁄, 𑀢𑀜𑁆𑀘 𑀧𑀯𑀢𑁆𑀢𑀺𑀬𑀁 𑀧𑀼𑀩𑁆𑀩𑁂 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀞𑀺𑀢𑀁 𑀅𑀦𑀼𑀧𑀳𑀢𑀁 𑀘𑀢𑀼𑀲𑀦𑁆𑀢𑀢𑀺𑀭𑀽𑀧𑀁 𑀲𑀳𑀓𑀸𑀭𑀻𑀧𑀘𑁆𑀘𑀬𑀁 𑀮𑀪𑀺𑀢𑁆𑀯𑀸𑀯 𑀓𑀸𑀢𑀼𑀁 𑀲𑀓𑁆𑀓𑁄𑀢𑀺, 𑀦 𑀅𑀜𑁆𑀜𑀣𑀸, 𑀬𑁂𑀦 𑀓𑁂𑀦𑀘𑀺 𑀯𑀺𑀭𑁄𑀥𑀺𑀧𑀘𑁆𑀘𑀬𑁂𑀦 𑀦𑀺𑀭𑀼𑀤𑁆𑀥𑀘𑀓𑁆𑀔𑀸𑀤𑀺𑀧𑁆𑀧𑀲𑀸𑀤𑀸𑀦𑀁 𑀧𑀼𑀕𑁆𑀕𑀮𑀸𑀦𑀁 𑀯𑀺𑀚𑁆𑀚𑀫𑀸𑀦𑀫𑁆𑀧𑀺 𑀓𑀫𑁆𑀫𑀁 𑀘𑀓𑁆𑀔𑀸𑀤𑀺𑀓𑀁 𑀚𑀦𑁂𑀢𑀼𑀁 𑀦 𑀲𑀓𑁆𑀓𑁄𑀢𑀻𑀢𑀺 𑀲𑀺𑀤𑁆𑀥𑀫𑁂𑀯 𑀳𑁄𑀢𑀺.

𑀅𑀢𑀺𑀧𑀸𑀢𑁂𑀦𑁆𑀢𑁄𑀢𑀺 𑀅𑀢𑀺𑀧𑀸𑀢𑁂𑀦𑁆𑀢𑁄 𑀯𑀺𑀦𑀸𑀲𑁂𑀦𑁆𑀢𑁄. 𑀯𑀼𑀢𑁆𑀢𑀧𑀓𑀸𑀭𑀫𑁂𑀯𑀸𑀢𑀺 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀸𑀢𑀺𑀧𑀸𑀢𑀦𑀯𑀺𑀥𑀸𑀦𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑀫𑁂𑀯. 𑀲𑀭𑀲𑁂𑀦𑁂𑀯 𑀧𑀢𑀦𑀲𑀪𑀸𑀯𑀲𑁆𑀲 𑀲𑀡𑀺𑀓𑀁 𑀧𑀢𑀺𑀢𑀼𑀁 𑀅𑀤𑀢𑁆𑀯𑀸 𑀅𑀢𑀻𑀯 𑀧𑀸𑀢𑀦𑀁 𑀲𑀻𑀖𑀧𑀸𑀢𑀦𑀁 𑀅𑀢𑀺𑀧𑀸𑀢𑁄, 𑀧𑀸𑀡𑀲𑁆𑀲 𑀅𑀢𑀺𑀧𑀸𑀢𑁄 𑀧𑀸𑀡𑀸𑀢𑀺𑀧𑀸𑀢𑁄. 𑀆𑀣𑀩𑁆𑀩𑀡𑀺𑀓𑀸𑀢𑀺 𑀅𑀣𑀩𑁆𑀩𑀡𑀯𑁂𑀤𑀺𑀦𑁄. 𑀅𑀣𑀩𑁆𑀩𑀡𑀦𑁆𑀢𑀺 𑀅𑀣𑀩𑁆𑀩𑀡𑀯𑁂𑀤𑀯𑀺𑀳𑀺𑀢𑀁. 𑀫𑀦𑁆𑀢𑀁 𑀧𑀬𑁄𑀚𑁂𑀦𑁆𑀢𑀻𑀢𑀺 𑀅𑀮𑁄𑀡𑀪𑁄𑀚𑀦𑀤𑀩𑁆𑀩𑀲𑀬𑀦𑀲𑀼𑀲𑀸𑀦𑀕𑀫𑀦𑀸𑀤𑀻𑀳𑀺 𑀧𑀬𑁄𑀕𑁂𑀳𑀺 𑀫𑀦𑁆𑀢𑀁 𑀧𑀭𑀺𑀯𑀢𑁆𑀢𑁂𑀦𑁆𑀢𑀺, 𑀢𑁂𑀦 𑀬𑀣𑀺𑀘𑁆𑀙𑀺𑀢𑀧𑀸𑀡𑀯𑀥𑀸𑀤𑀺𑀨𑀮𑀁 𑀉𑀧𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀢𑀁 𑀓𑀸𑀬𑀯𑀘𑀻𑀓𑀫𑁆𑀫𑁂𑀲𑀼 𑀧𑀯𑀺𑀝𑁆𑀞𑀁. 𑀈𑀢𑀺𑀦𑁆𑀢𑀺 𑀧𑀻𑀴𑀁. 𑀉𑀧𑀤𑁆𑀤𑀯𑀦𑁆𑀢𑀺 𑀢𑀢𑁄 𑀅𑀥𑀺𑀓𑀢𑀭𑀁 𑀧𑀻𑀴𑀁. 𑀧𑀚𑁆𑀚𑀭𑀓𑀦𑁆𑀢𑀺 𑀯𑀺𑀲𑀫𑀚𑁆𑀚𑀭𑀁. 𑀲𑀽𑀘𑀺𑀓𑀦𑁆𑀢𑀺 𑀲𑀽𑀘𑀻𑀳𑀺 𑀯𑀺𑀬 𑀯𑀺𑀚𑁆𑀛𑀫𑀸𑀦𑀁 𑀲𑀽𑀮𑀁. 𑀯𑀺𑀲𑀽𑀘𑀺𑀓𑀦𑁆𑀢𑀺 𑀲𑀲𑀽𑀮𑀁 𑀆𑀫𑀸𑀢𑀺𑀲𑀸𑀭𑀁. 𑀧𑀓𑁆𑀔𑀦𑁆𑀤𑀺𑀬𑀦𑁆𑀢𑀺 𑀭𑀢𑁆𑀢𑀸𑀢𑀺𑀲𑀸𑀭𑀁. 𑀯𑀺𑀚𑁆𑀚𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸𑀢𑀺 𑀕𑀦𑁆𑀥𑀸𑀭𑀯𑀺𑀚𑁆𑀚𑀸𑀤𑀺𑀓𑀁 𑀅𑀢𑁆𑀢𑀦𑁄 𑀯𑀺𑀚𑁆𑀚𑀁 𑀓𑀢𑀽𑀧𑀘𑀸𑀭𑀁 𑀫𑀦𑁆𑀢𑀧𑀞𑀦𑀓𑁆𑀓𑀫𑁂𑀦 𑀧𑀭𑀺𑀚𑀧𑁆𑀧𑀺𑀢𑁆𑀯𑀸. 𑀢𑁂𑀳𑀻𑀢𑀺 𑀢𑁂𑀳𑀺 𑀯𑀢𑁆𑀣𑀽𑀳𑀺. 𑀧𑀬𑁄𑀚𑀦𑀦𑁆𑀢𑀺 𑀧𑀯𑀢𑁆𑀢𑀦𑀁. 𑀅𑀳𑁄 𑀯𑀢𑀸𑀬𑀦𑁆𑀢𑀺 𑀅𑀬𑀁 𑀢𑀁 𑀓𑀼𑀘𑁆𑀙𑀺𑀕𑀢𑀁. 𑀕𑀩𑁆𑀪𑀦𑁆𑀢𑀺 𑀇𑀤𑀁 𑀓𑀼𑀘𑁆𑀙𑀺𑀕𑀢𑀁 𑀕𑀩𑁆𑀪𑀁. 𑀓𑀼𑀮𑀼𑀫𑁆𑀩𑀲𑁆𑀲𑀸𑀢𑀺 𑀕𑀩𑁆𑀪𑀲𑁆𑀲, 𑀓𑀼𑀮𑀲𑁆𑀲𑁂𑀯 𑀯𑀸, 𑀓𑀼𑀝𑀼𑀫𑁆𑀩𑀲𑁆𑀲𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀪𑀸𑀯𑀦𑀸𑀫𑀬𑀺𑀤𑁆𑀥𑀺𑀬𑀸𑀢𑀺 𑀅𑀥𑀺𑀝𑁆𑀞𑀸𑀦𑀺𑀤𑁆𑀥𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑀁 𑀢𑁂𑀲𑀁 𑀇𑀘𑁆𑀙𑀸𑀫𑀢𑁆𑀢𑀦𑁆𑀢𑀺 𑀲𑀼𑀢𑁆𑀢𑀢𑁆𑀣𑀢𑁄 𑀦 𑀲𑀫𑁂𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀣𑀩𑁆𑀩𑀡𑀺𑀤𑁆𑀥𑀺𑀯𑀲𑁂𑀦𑁂𑀯 𑀳𑀺 𑀲𑀼𑀢𑁆𑀢𑁂 ‘‘𑀇𑀤𑁆𑀥𑀺𑀫𑀸 𑀘𑁂𑀢𑁄𑀯𑀲𑀺𑀧𑁆𑀧𑀢𑁆𑀢𑁄’’𑀢𑀺 𑀯𑀼𑀢𑁆𑀢𑀁, 𑀦 𑀪𑀸𑀯𑀦𑀸𑀫𑀬𑀺𑀤𑁆𑀥𑀺𑀯𑀲𑁂𑀦𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀇𑀢𑀭𑀣𑀸𑀢𑀺 𑀧𑀭𑀺𑀬𑁂𑀲𑁂𑀬𑁆𑀬𑀸𑀢𑀺 𑀧𑀤𑀲𑁆𑀲 𑀕𑀯𑁂𑀲𑀦𑀫𑀢𑁆𑀢𑀫𑁂𑀯 𑀬𑀣𑀸𑀭𑀼𑀢𑀯𑀲𑁂𑀦 𑀅𑀢𑁆𑀣𑁄 𑀲𑀺𑀬𑀸, 𑀢𑀤𑀸 𑀧𑀭𑀺𑀬𑀺𑀝𑁆𑀞𑀫𑀢𑁆𑀢𑁂𑀦 𑀧𑀭𑀺𑀬𑁂𑀲𑀺𑀢𑁆𑀯𑀸 𑀲𑀢𑁆𑀣𑀸𑀤𑀻𑀦𑀁 𑀮𑀤𑁆𑀥𑀫𑀢𑁆𑀢𑁂𑀦𑀸𑀢𑀺 𑀅𑀢𑁆𑀣𑁄. 𑀲𑀲𑀦𑁆𑀢𑀺 𑀳𑀺𑀁𑀲𑀦𑁆𑀢𑀺 𑀏𑀢𑁂𑀦𑀸𑀢𑀺 𑀲𑀢𑁆𑀣𑀦𑁆𑀢𑀺 𑀯𑀥𑁄𑀧𑀓𑀭𑀡𑀲𑁆𑀲 𑀧𑀸𑀲𑀸𑀡𑀭𑀚𑁆𑀚𑀼𑀆𑀤𑀺𑀦𑁄 𑀲𑀩𑁆𑀩𑀲𑁆𑀲𑀸𑀧𑀺 𑀦𑀸𑀫𑀦𑁆𑀢𑀺 𑀆𑀳 𑀮𑀕𑀼𑀴𑀸𑀢𑀺𑀆𑀤𑀺. 𑀮𑀕𑀼𑀴𑀦𑁆𑀢𑀺 𑀫𑀼𑀕𑁆𑀕𑀭𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀲𑀢𑁆𑀣𑀲𑀗𑁆𑀕𑀳𑁄𑀢𑀺 𑀫𑀸𑀢𑀺𑀓𑀸𑀬𑀁 𑀲𑀢𑁆𑀣𑀳𑀸𑀭𑀓𑀦𑁆𑀢𑀺 𑀏𑀢𑁆𑀣 𑀯𑀼𑀢𑁆𑀢𑀲𑀢𑁆𑀣𑀲𑀗𑁆𑀕𑀳𑁄. 𑀧𑀭𑀢𑁄 𑀯𑀼𑀢𑁆𑀢𑀦𑀬𑀢𑁆𑀢𑀸𑀢𑀺 𑀧𑀭𑀢𑁄 𑀦𑀺𑀕𑀫𑀦𑀯𑀲𑁂𑀦 𑀯𑀼𑀢𑁆𑀢𑀲𑁆𑀲 𑀤𑀼𑀢𑀺𑀬𑀧𑀤𑀲𑁆𑀲 𑀧𑀤𑀪𑀸𑀚𑀦𑁂 𑀯𑀼𑀢𑁆𑀢𑀦𑀬𑀢𑁆𑀢𑀸. 𑀘𑀺𑀢𑁆𑀢𑀲𑀤𑁆𑀤𑀲𑁆𑀲 𑀅𑀢𑁆𑀣𑀤𑀻𑀧𑀦𑀢𑁆𑀣𑀁 𑀯𑀼𑀢𑁆𑀢𑁄𑀢𑀺 𑀘𑀺𑀢𑁆𑀢-𑀲𑀤𑁆𑀤𑀲𑁆𑀲 𑀯𑀺𑀘𑀺𑀢𑁆𑀢𑀸𑀤𑀺𑀅𑀦𑁂𑀓𑀢𑁆𑀣𑀯𑀺𑀲𑀬𑀢𑁆𑀢𑀸 𑀇𑀢𑀭𑁂𑀳𑀺 𑀦𑀺𑀯𑀢𑁆𑀢𑁂𑀢𑁆𑀯𑀸 𑀯𑀺𑀜𑁆𑀜𑀸𑀡𑀢𑁆𑀣𑀁 𑀦𑀺𑀬𑀫𑁂𑀢𑀼𑀁 𑀯𑀼𑀢𑁆𑀢𑁄.

𑁧𑁭𑁪. 𑀓𑀫𑁆𑀫𑀼𑀦𑀸 𑀩𑀚𑁆𑀛𑀢𑀻𑀢𑀺 𑀧𑀸𑀡𑀸𑀢𑀺𑀧𑀸𑀢𑀓𑀫𑁆𑀫𑀼𑀦𑀸 𑀩𑀚𑁆𑀛𑀢𑀺, 𑀢𑀁 𑀓𑀫𑁆𑀫𑀫𑀲𑁆𑀲 𑀲𑀺𑀤𑁆𑀥𑀦𑁆𑀢𑀺 𑀅𑀢𑁆𑀣𑁄. 𑀉𑀪𑀬𑀣𑀸𑀧𑀻𑀢𑀺 𑀉𑀤𑁆𑀤𑀺𑀲𑀓𑀸𑀦𑀼𑀤𑁆𑀤𑀺𑀲𑀓𑀯𑀲𑁂𑀦. 𑀧𑀘𑁆𑀙𑀸 𑀯𑀸 𑀢𑁂𑀦 𑀭𑁄𑀕𑁂𑀦𑀸𑀢𑀺 𑀏𑀢𑁂𑀦 𑀅𑀦𑀸𑀕𑀢𑀫𑁆𑀧𑀺 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀆𑀭𑀩𑁆𑀪 𑀧𑀸𑀡𑀸𑀢𑀺𑀧𑀸𑀢𑀲𑁆𑀲 𑀧𑀯𑀢𑁆𑀢𑀺𑀁 𑀤𑀲𑁆𑀲𑁂𑀢𑀺. 𑀏𑀯𑀜𑁆𑀘 ‘‘𑀬𑀤𑀸 𑀲𑀓𑁆𑀓𑁄𑀢𑀺, 𑀢𑀤𑀸 𑀢𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀳𑀻’’𑀢𑀺 𑀆𑀡𑀢𑁆𑀢𑀺𑀬𑀸 𑀘𑀺𑀭𑁂𑀦 𑀲𑀫𑀺𑀤𑁆𑀥𑀺𑀬𑀫𑁆𑀧𑀺 𑀆𑀡𑀢𑁆𑀢𑀺𑀓𑁆𑀔𑀡𑁂𑀬𑁂𑀯 𑀧𑀸𑀡𑀸𑀢𑀺𑀧𑀸𑀢𑁄. 𑀑𑀧𑀸𑀢𑀔𑀡𑀦𑀸𑀤𑀺𑀣𑀸𑀯𑀭𑀧𑀬𑁄𑀕𑁂𑀲𑀼 𑀧𑀬𑁄𑀕𑀓𑀭𑀡𑀢𑁄 𑀧𑀘𑁆𑀙𑀸 𑀕𑀳𑀺𑀢𑀧𑀝𑀺𑀲𑀦𑁆𑀥𑀺𑀓𑀲𑁆𑀲𑀸𑀧𑀺 𑀲𑀢𑁆𑀢𑀲𑁆𑀲 𑀫𑀭𑀡𑁂 𑀧𑀸𑀡𑀸𑀢𑀺𑀧𑀸𑀢𑁄 𑀘 𑀅𑀦𑀸𑀕𑀢𑀸𑀭𑀫𑁆𑀫𑀡𑁄 𑀉𑀧𑀧𑀦𑁆𑀦𑁄 𑀳𑁄𑀢𑀺. 𑀬𑀁 𑀧𑀦 𑀲𑀺𑀓𑁆𑀔𑀸𑀧𑀤𑀯𑀺𑀪𑀗𑁆𑀕𑁂 ‘‘𑀧𑀜𑁆𑀘 𑀲𑀺𑀓𑁆𑀔𑀸𑀧𑀤𑀸𑀦𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀸𑀬𑁂𑀯𑀸’’𑀢𑀺 𑀯𑀼𑀢𑁆𑀢𑀁, 𑀢𑀁 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀢𑁄 𑀯𑀺𑀭𑀢𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀦 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀦𑁆𑀢𑀺 𑀕𑀳𑁂𑀢𑀩𑁆𑀩𑀁. 𑀅𑀜𑁆𑀜𑀘𑀺𑀢𑁆𑀢𑁂𑀦𑀸𑀢𑀺 𑀅𑀫𑀸𑀭𑁂𑀢𑀼𑀓𑀸𑀫𑀢𑀸𑀘𑀺𑀢𑁆𑀢𑁂𑀦. 𑀤𑀼𑀢𑀺𑀬𑀧𑁆𑀧𑀳𑀸𑀭𑁂𑀦 𑀫𑀭𑀢𑀻𑀢𑀺 𑀧𑀞𑀫𑀧𑁆𑀧𑀳𑀸𑀭𑀁 𑀯𑀺𑀦𑀸 𑀤𑀼𑀢𑀺𑀬𑁂𑀦𑁂𑀯 𑀫𑀭𑀢𑀻𑀢𑀺 𑀅𑀢𑁆𑀣𑁄. 𑀧𑀞𑀫𑀧𑁆𑀧𑀳𑀸𑀭𑁂𑀦𑁂𑀯𑀸𑀢𑀺 𑀧𑀞𑀫𑀧𑁆𑀧𑀳𑀸𑀭𑀲𑀫𑀼𑀝𑁆𑀞𑀸𑀧𑀓𑀘𑁂𑀢𑀦𑀸𑀓𑁆𑀔𑀡𑁂𑀬𑁂𑀯𑀸𑀢𑀺 𑀅𑀢𑁆𑀣𑁄. 𑀓𑀺𑀜𑁆𑀘𑀸𑀧𑀺 𑀧𑀞𑀫𑀧𑁆𑀧𑀳𑀸𑀭𑁄 𑀲𑀬𑀫𑁂𑀯 𑀦 𑀲𑀓𑁆𑀓𑁄𑀢𑀺 𑀫𑀸𑀭𑁂𑀢𑀼𑀁, 𑀤𑀼𑀢𑀺𑀬𑀁 𑀧𑀦 𑀮𑀪𑀺𑀢𑁆𑀯𑀸 𑀲𑀓𑁆𑀓𑁄𑀦𑁆𑀢𑁄 𑀚𑀻𑀯𑀺𑀢𑀯𑀺𑀦𑀸𑀲𑀳𑁂𑀢𑀼 𑀳𑁄𑀢𑀺, 𑀢𑀲𑁆𑀫𑀸 𑀧𑀞𑀫𑀧𑁆𑀧𑀳𑀸𑀭𑀁 𑀯𑀺𑀦𑀸 𑀫𑀭𑀡𑀲𑁆𑀲 𑀅𑀲𑀺𑀤𑁆𑀥𑀢𑁆𑀢𑀸 ‘‘𑀧𑀬𑁄𑀕𑁄 𑀢𑁂𑀦 𑀘 𑀫𑀭𑀡’’𑀦𑁆𑀢𑀺 𑀇𑀫𑀺𑀦𑀸 𑀲𑀁𑀲𑀦𑁆𑀤𑀦𑀢𑁄 𑀧𑀞𑀫𑀧𑁆𑀧𑀳𑀸𑀭𑁂𑀦𑁂𑀯 𑀓𑀫𑁆𑀫𑀩𑀤𑁆𑀥𑁄 𑀬𑀼𑀢𑁆𑀢𑁄, 𑀦 𑀤𑀼𑀢𑀺𑀬𑁂𑀦 𑀢𑀲𑁆𑀲 𑀅𑀜𑁆𑀜𑀘𑀺𑀢𑁆𑀢𑁂𑀦 𑀤𑀺𑀦𑁆𑀦𑀢𑁆𑀢𑀸. 𑀬𑀣𑀸 𑀘𑁂𑀢𑁆𑀣, 𑀏𑀯𑀁 𑀅𑀜𑁆𑀜𑁂𑀦 𑀧𑀼𑀕𑁆𑀕𑀮𑁂𑀦 𑀤𑀼𑀢𑀺𑀬𑀧𑁆𑀧𑀳𑀸𑀭𑀤𑀸𑀦𑀸𑀤𑀻𑀲𑀼 𑀯𑀺𑀬. 𑀬𑀤𑀺 𑀧𑀦 𑀤𑀼𑀢𑀺𑀬𑀧𑁆𑀧𑀳𑀸𑀭𑀤𑀸𑀬𑀓𑀲𑁆𑀲𑀸𑀧𑀺 𑀧𑀼𑀕𑁆𑀕𑀮𑀲𑁆𑀲 𑀯𑀥𑀓𑀘𑁂𑀢𑀦𑀸 𑀅𑀢𑁆𑀣𑀺, 𑀢𑀲𑁆𑀲𑀸𑀧𑀺 𑀅𑀢𑁆𑀢𑀦𑁄 𑀧𑀬𑁄𑀕𑁂𑀦𑀸𑀧𑀺 𑀫𑀢𑀢𑁆𑀢𑀸 𑀧𑀬𑁄𑀕𑀓𑁆𑀔𑀡𑁂 𑀧𑀸𑀡𑀸𑀢𑀺𑀧𑀸𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀓𑀫𑁆𑀫𑀸𑀧𑀢𑁆𑀢𑀺𑀩𑁆𑀬𑀢𑁆𑀢𑀺𑀪𑀸𑀯𑀢𑁆𑀣𑀦𑁆𑀢𑀺 𑀆𑀦𑀦𑁆𑀢𑀭𑀺𑀬𑀸𑀤𑀺𑀓𑀫𑁆𑀫𑀯𑀺𑀪𑀸𑀕𑀲𑁆𑀲 𑀧𑀸𑀭𑀸𑀚𑀺𑀓𑀸𑀤𑀺𑀆𑀧𑀢𑁆𑀢𑀺𑀯𑀺𑀪𑀸𑀕𑀲𑁆𑀲 𑀘 𑀧𑀸𑀓𑀝𑀪𑀸𑀯𑀢𑁆𑀣𑀁. ‘‘𑀏𑀴𑀓𑀁 𑀫𑀸𑀭𑁂𑀫𑀻’’𑀢𑀺 𑀯𑀺𑀧𑀭𑀻𑀢𑀕𑁆𑀕𑀳𑀡𑁂𑀧𑀺 ‘‘𑀇𑀫’’𑀦𑁆𑀢𑀺 𑀬𑀣𑀸𑀦𑀺𑀧𑀦𑁆𑀦𑀲𑁆𑀲𑁂𑀯 𑀧𑀭𑀫𑀢𑁆𑀣𑀢𑁄 𑀕𑀳𑀺𑀢𑀢𑁆𑀢𑀸 𑀬𑀣𑀸𑀯𑀢𑁆𑀣𑀼𑀓𑀁 𑀓𑀫𑁆𑀫𑀩𑀤𑁆𑀥𑁄 𑀳𑁄𑀢𑀺𑀬𑁂𑀯𑀸𑀢𑀺 𑀆𑀳 𑀇𑀫𑀁 𑀯𑀢𑁆𑀣𑀼𑀦𑁆𑀢𑀺𑀆𑀤𑀺. 𑀖𑀸𑀢𑀓𑁄 𑀘 𑀳𑁄𑀢𑀻𑀢𑀺 𑀧𑀸𑀡𑀸𑀢𑀺𑀧𑀸𑀢𑀓𑀫𑁆𑀫𑁂𑀦 𑀩𑀤𑁆𑀥𑁄𑀢𑀺 𑀅𑀢𑁆𑀣𑁄. 𑀫𑀸𑀢𑀸𑀤𑀺𑀕𑀼𑀡𑀫𑀳𑀦𑁆𑀢𑁂 𑀆𑀭𑀩𑁆𑀪 𑀧𑀯𑀢𑁆𑀢𑀯𑀥𑀓𑀘𑁂𑀢𑀦𑀸𑀬 𑀫𑀳𑀸𑀲𑀸𑀯𑀚𑁆𑀚𑀢𑀸𑀬 𑀯𑀼𑀢𑁆𑀢𑀁 ‘‘𑀇𑀥 𑀧𑀦 𑀘𑁂𑀢𑀦𑀸 𑀤𑀸𑀭𑀼𑀡𑀸 𑀳𑁄𑀢𑀻’’𑀢𑀺.

𑀮𑁄𑀳𑀺𑀢𑀓𑀦𑁆𑀢𑀺 𑀮𑁄𑀳𑀺𑀢𑀫𑀓𑁆𑀔𑀺𑀢𑀁. 𑀓𑀫𑁆𑀫𑀁 𑀓𑀭𑁄𑀦𑁆𑀢𑁂𑀢𑀺 𑀬𑀼𑀤𑁆𑀥𑀓𑀫𑁆𑀫𑀁 𑀓𑀭𑁄𑀦𑁆𑀢𑁂. 𑀬𑀣𑀸𑀥𑀺𑀧𑁆𑀧𑀸𑀬𑀁 𑀕𑀢𑁂𑀢𑀺 𑀬𑁄𑀥𑀁 𑀯𑀺𑀚𑁆𑀛𑀺𑀢𑁆𑀯𑀸 𑀧𑀺𑀢𑀭𑀺 𑀯𑀺𑀤𑁆𑀥𑁂, 𑀬𑁄𑀥𑀁 𑀧𑀦 𑀅𑀯𑀺𑀚𑁆𑀛𑀺𑀢𑁆𑀯𑀸 𑀓𑁂𑀯𑀮𑀁 𑀧𑀺𑀢𑀭𑀺 𑀯𑀺𑀤𑁆𑀥𑁂𑀧𑀺 𑀯𑀺𑀲𑀗𑁆𑀓𑁂𑀢𑁄 𑀦𑀢𑁆𑀣𑀺𑀬𑁂𑀯 𑀧𑀺𑀢𑀭𑀺𑀧𑀺 𑀯𑀥𑀓𑀘𑀺𑀢𑁆𑀢𑀲𑁆𑀲 𑀅𑀢𑁆𑀣𑀺𑀢𑀸𑀬, 𑀓𑁂𑀯𑀮𑀁 𑀬𑁄𑀥𑁂 𑀯𑀺𑀤𑁆𑀥𑁂𑀧𑀺 𑀏𑀲𑁂𑀯 𑀦𑀬𑁄. 𑀆𑀦𑀦𑁆𑀢𑀭𑀺𑀬𑀁 𑀧𑀦 𑀦𑀢𑁆𑀣𑀻𑀢𑀺 𑀧𑀺𑀢𑀼𑀯𑀺𑀲𑀬𑀁 𑀧𑀸𑀡𑀸𑀢𑀺𑀧𑀸𑀢𑀓𑀫𑁆𑀫𑀁 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄.

𑀏𑀯𑀁 𑀯𑀺𑀚𑁆𑀛𑀸𑀢𑀺 𑀏𑀯𑀁 𑀧𑀸𑀤𑁂𑀳𑀺 𑀪𑀽𑀫𑀺𑀬𑀁 𑀞𑀢𑁆𑀯𑀸 𑀏𑀯𑀁 𑀥𑀦𑀼𑀁 𑀕𑀳𑁂𑀢𑁆𑀯𑀸 𑀆𑀓𑀟𑁆𑀠𑀺𑀢𑁆𑀯𑀸𑀢𑀺𑀆𑀤𑀺𑀦𑀸 𑀯𑀺𑀚𑁆𑀛𑀦𑀧𑁆𑀧𑀓𑀸𑀭𑀲𑀺𑀓𑁆𑀔𑀸𑀧𑀦𑀫𑀼𑀔𑁂𑀦 𑀆𑀡𑀸𑀧𑁂𑀢𑀻𑀢𑀺 𑀅𑀢𑁆𑀣𑁄. 𑀏𑀯𑀁 𑀧𑀳𑀭𑀸𑀢𑀺 𑀤𑀴𑁆𑀳𑀁 𑀅𑀲𑀺𑀁 𑀕𑀳𑁂𑀢𑁆𑀯𑀸 𑀏𑀯𑀁 𑀧𑀳𑀭. 𑀏𑀯𑀁 𑀖𑀸𑀢𑁂𑀳𑀻𑀢𑀺 𑀏𑀯𑀁 𑀓𑀫𑁆𑀫𑀓𑀸𑀭𑀡𑀁 𑀓𑀢𑁆𑀯𑀸 𑀫𑀸𑀭𑁂𑀳𑀺. 𑀢𑀢𑁆𑀢𑀓𑀸 𑀉𑀪𑀺𑀦𑁆𑀦𑀁 𑀧𑀸𑀡𑀸𑀢𑀺𑀧𑀸𑀢𑀸𑀢𑀺 𑀅𑀦𑀼𑀤𑁆𑀤𑀺𑀲𑀺𑀢𑁆𑀯𑀸 𑀬𑁂𑀲𑀁 𑀓𑁂𑀲𑀜𑁆𑀘𑀺 𑀫𑀸𑀭𑀡𑀢𑁆𑀣𑀸𑀬 𑀉𑀪𑁄𑀳𑀺 𑀧𑀬𑁄𑀕𑀲𑁆𑀲 𑀓𑀢𑀢𑁆𑀢𑀸 𑀯𑀼𑀢𑁆𑀢𑀁. 𑀲𑀘𑁂 𑀳𑀺 𑀆𑀡𑀸𑀧𑀓𑁄 ‘‘𑀏𑀯𑀁 𑀯𑀺𑀤𑁆𑀥𑁂 𑀅𑀲𑀼𑀓𑁄 𑀏𑀯𑀁 𑀫𑀭𑀢𑀻’’𑀢𑀺 𑀲𑀜𑁆𑀜𑀸𑀬 ‘‘𑀏𑀯𑀁 𑀯𑀺𑀚𑁆𑀛𑀸’’𑀢𑀺 𑀆𑀡𑀸𑀧𑁂𑀢𑀺, 𑀦𑀺𑀬𑀫𑀺𑀢𑀲𑁆𑀲𑁂𑀯 𑀫𑀭𑀡𑁂 𑀆𑀡𑀸𑀧𑀓𑀲𑁆𑀲 𑀓𑀫𑁆𑀫𑀩𑀤𑁆𑀥𑁄𑀢𑀺 𑀯𑀤𑀦𑁆𑀢𑀺. 𑀲𑀘𑁂 𑀆𑀡𑀢𑁆𑀢𑁄 ‘‘𑀅𑀲𑀼𑀓’’𑀦𑁆𑀢𑀺 𑀦𑀺𑀬𑀫𑁂𑀢𑁆𑀯𑀸 𑀉𑀤𑁆𑀤𑀺𑀲𑁆𑀲 𑀲𑀭𑀁 𑀔𑀺𑀧𑀢𑀺, 𑀆𑀡𑀸𑀧𑀓𑁄 𑀅𑀦𑀺𑀬𑀫𑁂𑀢𑁆𑀯𑀸 𑀆𑀡𑀸𑀧𑁂𑀢𑀺, 𑀆𑀡𑀸𑀧𑀓𑀲𑁆𑀲 𑀬𑁂𑀲𑀁 𑀓𑁂𑀲𑀜𑁆𑀘𑀺 𑀫𑀭𑀡𑁂𑀧𑀺 𑀓𑀫𑁆𑀫𑀩𑀤𑁆𑀥𑁄, 𑀆𑀡𑀢𑁆𑀢𑀲𑁆𑀲 𑀧𑀦 𑀦𑀺𑀬𑀫𑀺𑀢𑀫𑀭𑀡𑁂𑀬𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀫𑀚𑁆𑀛𑁂𑀢𑀺 𑀳𑀢𑁆𑀣𑀺𑀦𑁄 𑀧𑀺𑀝𑁆𑀞𑀺𑀦𑁄 𑀫𑀚𑁆𑀛𑁂. 𑀏𑀢𑁂𑀦𑀸𑀢𑀺 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀆𑀡𑀸𑀧𑁂𑀢𑀻𑀢𑀺𑀆𑀤𑀺𑀧𑀸𑀴𑀺𑀯𑀘𑀦𑁂𑀦. 𑀢𑀢𑁆𑀣𑀸𑀢𑀺 𑀆𑀡𑀢𑁆𑀢𑀺𑀓𑀧𑀬𑁄𑀕𑁂.

𑀓𑀺𑀜𑁆𑀘𑀸𑀧𑀺 𑀓𑀺𑀭𑀺𑀬𑀸𑀯𑀺𑀲𑁂𑀲𑁄 𑀅𑀝𑁆𑀞𑀓𑀣𑀸𑀲𑀼 𑀅𑀦𑀸𑀕𑀢𑁄, 𑀧𑀸𑀴𑀺𑀬𑀁 𑀧𑀦 ‘‘𑀏𑀯𑀁 𑀯𑀺𑀚𑁆𑀛, 𑀏𑀯𑀁 𑀧𑀳𑀭, 𑀏𑀯𑀁 𑀖𑀸𑀢𑁂𑀳𑀻’’𑀢𑀺 (𑀧𑀸𑀭𑀸. 𑁧𑁭𑁪) 𑀓𑀺𑀭𑀺𑀬𑀸𑀯𑀺𑀲𑁂𑀲𑀲𑁆𑀲 𑀧𑀭𑀸𑀫𑀝𑁆𑀞𑀢𑁆𑀢𑀸 𑀆𑀘𑀭𑀺𑀬𑀧𑀭𑀫𑁆𑀧𑀭𑀸 𑀆𑀕𑀢𑀁 𑀓𑀺𑀭𑀺𑀬𑀸𑀯𑀺𑀲𑁂𑀲𑀫𑁆𑀧𑀺 𑀧𑀸𑀴𑀺𑀲𑀁𑀲𑀦𑁆𑀤𑀦𑀢𑁄 𑀕𑀳𑁂𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑀅𑀧𑀭𑁄 𑀦𑀬𑁄𑀢𑀺𑀆𑀤𑀺𑀫𑀸𑀳. 𑀯𑀺𑀚𑁆𑀛𑀦𑀦𑁆𑀢𑀺 𑀉𑀲𑀼𑀲𑀢𑁆𑀢𑀺𑀆𑀤𑀻𑀳𑀺 𑀯𑀺𑀚𑁆𑀛𑀦𑀁. 𑀙𑁂𑀤𑀦𑀦𑁆𑀢𑀺 𑀅𑀲𑀺𑀆𑀤𑀻𑀳𑀺 𑀳𑀢𑁆𑀣𑀧𑀸𑀤𑀸𑀤𑀺𑀘𑁆𑀙𑁂𑀤𑀦𑀁. 𑀪𑁂𑀤𑀦𑀦𑁆𑀢𑀺 𑀫𑀼𑀕𑁆𑀕𑀭𑀸𑀤𑀻𑀳𑀺 𑀲𑀻𑀲𑀸𑀤𑀺𑀪𑁂𑀤𑀦𑀁 𑀤𑁆𑀯𑀺𑀥𑀸𑀓𑀭𑀡𑀁. 𑀲𑀗𑁆𑀔𑀫𑀼𑀡𑁆𑀟𑀓𑀦𑁆𑀢𑀺 𑀲𑀻𑀲𑀓𑀝𑀸𑀳𑁂 𑀘𑀫𑁆𑀫𑀁 𑀲𑀳 𑀓𑁂𑀲𑁂𑀳𑀺 𑀉𑀧𑁆𑀧𑀸𑀝𑁂𑀢𑁆𑀯𑀸 𑀣𑀽𑀮𑀲𑀓𑁆𑀔𑀭𑀸𑀳𑀺 𑀲𑀻𑀲𑀓𑀝𑀸𑀳𑀁 𑀖𑀁𑀲𑀺𑀢𑁆𑀯𑀸 𑀲𑀗𑁆𑀔𑀯𑀡𑁆𑀡𑀓𑀭𑀡𑀯𑀲𑁂𑀦 𑀲𑀗𑁆𑀔𑀫𑀼𑀡𑁆𑀟𑀓𑀫𑁆𑀫𑀓𑀭𑀡𑀁. 𑀏𑀯𑀫𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀩𑀺𑀴𑀗𑁆𑀕𑀣𑀸𑀮𑀺𑀓𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀉𑀭𑁂 𑀧𑀳𑀭𑀺𑀢𑁆𑀯𑀸 𑀧𑀺𑀝𑁆𑀞𑀺𑀬𑀁 𑀧𑀳𑀭𑀺𑀢𑁆𑀯𑀸 𑀕𑀻𑀯𑀸𑀬𑀁 𑀧𑀳𑀭𑀺𑀢𑁆𑀯𑀸𑀢𑀺𑀆𑀤𑀺𑀦𑀸 𑀲𑀭𑀻𑀭𑀸𑀯𑀬𑀯𑀧𑁆𑀧𑀤𑁂𑀲𑁂𑀲𑀼 𑀧𑀳𑀭𑀡𑀯𑀺𑀚𑁆𑀛𑀦𑀸𑀤𑀺𑀦𑀺𑀬𑀫𑁄𑀧𑀺 𑀓𑀺𑀭𑀺𑀬𑀸𑀯𑀺𑀲𑁂𑀲𑁂𑀬𑁂𑀯 𑀲𑀗𑁆𑀕𑀬𑁆𑀳𑀢𑀺 𑀅𑀝𑁆𑀞𑀓𑀣𑀸𑀲𑀼 𑀲𑀗𑁆𑀔𑀫𑀼𑀡𑁆𑀟𑀓𑀸𑀤𑀺𑀲𑀭𑀻𑀭𑀧𑁆𑀧𑀤𑁂𑀲𑀯𑀺𑀲𑀬𑀸𑀬𑀧𑀺 𑀖𑀸𑀢𑀦𑀸𑀬 𑀢𑀢𑁆𑀣 𑀧𑀯𑁂𑀲𑀺𑀢𑀢𑁆𑀢𑀸, 𑀬𑀁 𑀧𑀦 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 (𑀲𑀸𑀭𑀢𑁆𑀣. 𑀝𑀻. 𑀧𑀸𑀭𑀸𑀚𑀺𑀓𑀓𑀡𑁆𑀟 𑁨.𑁧𑁭𑁪 𑀧𑀬𑁄𑀕𑀓𑀣𑀸𑀯𑀡𑁆𑀡𑀦𑀸) 𑀧𑀼𑀭𑀢𑁄 𑀧𑀳𑀭𑀺𑀢𑁆𑀯𑀸 𑀫𑀸𑀭𑁂𑀳𑀻𑀢𑀺𑀆𑀤𑀺𑀓𑀲𑁆𑀲 𑀅𑀝𑁆𑀞𑀓𑀣𑀸𑀧𑀸𑀞𑀲𑁆𑀲 ‘‘𑀧𑀼𑀭𑀺𑀫𑀧𑀲𑁆𑀲𑀸𑀤𑀻𑀦𑀫𑁆𑀧𑀺 𑀯𑀢𑁆𑀣𑀼𑀲𑀪𑀸𑀕𑀢𑁄 𑀯𑀢𑁆𑀣𑀼𑀕𑁆𑀕𑀳𑀡𑁂𑀦𑁂𑀯 𑀕𑀳𑀡𑀦𑁆𑀢𑀺 𑀆𑀳 𑀧𑀼𑀭𑀢𑁄 𑀧𑀳𑀭𑀺𑀢𑁆𑀯𑀸𑀢𑀺𑀆𑀤𑀻’’𑀢𑀺 𑀏𑀯𑀫𑀥𑀺𑀧𑁆𑀧𑀸𑀬𑀓𑀣𑀦𑀁, 𑀢𑀁 𑀲𑀗𑁆𑀔𑀫𑀼𑀡𑁆𑀟𑀓𑀸𑀤𑀺𑀓𑀲𑁆𑀲 𑀲𑀭𑀻𑀭𑀧𑁆𑀧𑀤𑁂𑀲𑁂 𑀓𑀫𑁆𑀫𑀓𑀸𑀭𑀡𑀸𑀓𑀭𑀡𑀲𑁆𑀲 𑀅𑀝𑁆𑀞𑀓𑀣𑀸𑀬 𑀓𑀺𑀭𑀺𑀬𑀸𑀯𑀺𑀲𑁂𑀲𑀯𑀺𑀲𑀬𑁂 𑀯𑀼𑀢𑁆𑀢𑀢𑁆𑀢𑀸 𑀦 𑀬𑀼𑀚𑁆𑀚𑀢𑀺. 𑀬𑀣𑀸𑀡𑀢𑁆𑀢𑀁 𑀫𑀼𑀜𑁆𑀘𑀺𑀢𑁆𑀯𑀸 𑀧𑀼𑀕𑁆𑀕𑀮𑀦𑁆𑀢𑀭𑀫𑀸𑀭𑀡𑀫𑁂𑀯 𑀳𑀺 𑀯𑀢𑁆𑀣𑀼𑀯𑀺𑀲𑀁𑀯𑀸𑀤𑁄, 𑀦 𑀧𑀳𑀭𑀺𑀢𑀼𑀁 𑀆𑀡𑀢𑁆𑀢𑀁 𑀲𑀭𑀻𑀭𑀧𑁆𑀧𑀤𑁂𑀲𑀯𑀺𑀲𑀁𑀯𑀸𑀤𑀦𑀁, 𑀢𑁂𑀦𑀸𑀳 ‘‘𑀯𑀢𑁆𑀣𑀼𑀁 𑀯𑀺𑀲𑀁 𑀯𑀸𑀤𑁂𑀢𑁆𑀯𑀸…𑀧𑁂… 𑀢𑀢𑁄 𑀅𑀜𑁆𑀜𑀁 𑀫𑀸𑀭𑁂𑀢𑀺. 𑀧𑀼𑀭𑀢𑁄 𑀧𑀳𑀭𑀺𑀢𑁆𑀯𑀸 𑀫𑀸𑀭𑁂𑀳𑀻𑀢𑀺 𑀯𑀸…𑀧𑁂… 𑀦𑀢𑁆𑀣𑀺 𑀓𑀫𑁆𑀫𑀩𑀤𑁆𑀥𑁄’’𑀢𑀺, 𑀇𑀤𑀁 𑀧𑀦 𑀬𑀣𑀸𑀡𑀢𑁆𑀢𑀯𑀢𑁆𑀣𑀼𑀲𑁆𑀫𑀺𑀫𑁆𑀧𑀺 𑀓𑀺𑀭𑀺𑀬𑀸𑀯𑀺𑀲𑁂𑀲𑀯𑀺𑀲𑀗𑁆𑀓𑁂𑀢𑁂𑀦 𑀓𑀫𑁆𑀫𑀩𑀤𑁆𑀥𑀸𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀦𑁆𑀢𑀺 𑀧𑀜𑁆𑀜𑀸𑀬𑀢𑀺. 𑀢𑁂𑀦 ‘‘𑀯𑀢𑁆𑀣𑀼𑀁 𑀅𑀯𑀺𑀲𑀁𑀯𑀸𑀤𑁂𑀢𑁆𑀯𑀸 𑀫𑀸𑀭𑁂𑀦𑁆𑀢𑀻’’𑀢𑀺 𑀏𑀢𑁆𑀢𑀓𑀫𑁂𑀯 𑀅𑀯𑀢𑁆𑀯𑀸 ‘‘𑀬𑀣𑀸𑀡𑀢𑁆𑀢𑀺𑀬𑀸’’𑀢𑀺 𑀓𑀺𑀭𑀺𑀬𑀸𑀯𑀺𑀲𑁂𑀲𑀦𑀺𑀬𑀫𑁄𑀧𑀺 𑀤𑀲𑁆𑀲𑀺𑀢𑁄, 𑀇𑀢𑀭𑀣𑀸 𑀬𑀣𑀸𑀡𑀢𑁆𑀢𑀺𑀬𑀸𑀢𑀺 𑀯𑀘𑀦𑀲𑁆𑀲 𑀦𑀺𑀭𑀢𑁆𑀣𑀓𑀢𑀸𑀧𑀢𑁆𑀢𑀺𑀢𑁄. 𑀯𑀢𑁆𑀣𑀼𑀦𑀺𑀤𑁆𑀤𑁂𑀲𑁂 𑀘 ‘‘𑀯𑀢𑁆𑀣𑀽𑀢𑀺 𑀫𑀸𑀭𑁂𑀢𑀩𑁆𑀩𑁄 𑀲𑀢𑁆𑀢𑁄’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁧𑁭𑁪) 𑀏𑀢𑁆𑀢𑀓𑀫𑁂𑀯 𑀯𑀼𑀢𑁆𑀢𑀁, 𑀦 𑀧𑀦 ‘‘𑀬𑀣𑀸𑀡𑀢𑁆𑀢𑀲𑁆𑀲 𑀧𑀳𑀭𑀺𑀢𑀩𑁆𑀩𑀲𑀭𑀻𑀭𑀧𑁆𑀧𑀤𑁂𑀲𑁄𑀧𑀻’’𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀧𑀼𑀭𑀢𑁄 𑀧𑀳𑀭𑀡𑀸𑀤𑀺𑀧𑀺 𑀓𑀺𑀭𑀺𑀬𑀸𑀯𑀺𑀲𑁂𑀲𑁂 𑀏𑀯 𑀲𑀗𑁆𑀕𑀬𑁆𑀳𑀢𑀻𑀢𑀺 𑀅𑀫𑁆𑀳𑀸𑀓𑀁 𑀔𑀦𑁆𑀢𑀺, 𑀯𑀻𑀫𑀁𑀲𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑀁. 𑀯𑀢𑁆𑀣𑀼𑀯𑀺𑀲𑁂𑀲𑁂𑀦𑀸𑀢𑀺 𑀫𑀸𑀢𑀼𑀆𑀤𑀺𑀫𑀢𑀲𑀢𑁆𑀢𑀯𑀺𑀲𑁂𑀲𑁂𑀦. 𑀓𑀫𑁆𑀫𑀯𑀺𑀲𑁂𑀲𑁄𑀢𑀺 𑀆𑀦𑀦𑁆𑀢𑀭𑀺𑀬𑀸𑀤𑀺𑀓𑀫𑁆𑀫𑀯𑀺𑀲𑁂𑀲𑁄. 𑀆𑀧𑀢𑁆𑀢𑀺𑀯𑀺𑀲𑁂𑀲𑁄𑀢𑀺 𑀧𑀸𑀭𑀸𑀚𑀺𑀓𑀸𑀤𑀺𑀆𑀧𑀢𑁆𑀢𑀺𑀯𑀺𑀲𑁂𑀲𑁄.

𑀬𑀤𑀸 𑀓𑀤𑀸𑀘𑀺 𑀧𑀼𑀩𑁆𑀩𑀡𑁆𑀳𑁂𑀢𑀺 𑀆𑀡𑀢𑁆𑀢𑀤𑀺𑀯𑀲𑀢𑁄 𑀅𑀜𑁆𑀜𑀲𑁆𑀲𑀧𑀺 𑀬𑀲𑁆𑀲 𑀓𑀲𑁆𑀲𑀘𑀺 𑀤𑀺𑀯𑀲𑀲𑁆𑀲 𑀧𑀼𑀩𑁆𑀩𑀡𑁆𑀳𑁂. 𑀏𑀢𑀁 𑀕𑀸𑀫𑁂 𑀞𑀺𑀢𑀦𑁆𑀢𑀺 𑀕𑀸𑀫𑁄 𑀧𑀼𑀕𑁆𑀕𑀮𑀦𑀺𑀬𑀫𑀦𑀢𑁆𑀣𑀁 𑀯𑀼𑀢𑁆𑀢𑁄, 𑀦 𑀑𑀓𑀸𑀲𑀦𑀺𑀬𑀫𑀦𑀢𑁆𑀣𑀁, 𑀢𑀲𑁆𑀫𑀸 ‘‘𑀬𑀢𑁆𑀣 𑀓𑀢𑁆𑀣𑀘𑀺 𑀫𑀸𑀭𑁂𑀢𑀺, 𑀦𑀢𑁆𑀣𑀺 𑀯𑀺𑀲𑀗𑁆𑀓𑁂𑀢𑁄’’𑀢𑀺 𑀯𑀼𑀢𑁆𑀢𑀁, 𑀏𑀢𑁂𑀦 𑀓𑀸𑀮𑁄𑀓𑀸𑀲𑀆𑀯𑀼𑀥𑀇𑀅𑀬𑀸𑀧𑀣𑀓𑀺𑀭𑀺𑀬𑀸𑀯𑀺𑀲𑁂𑀲𑀸𑀦𑀁 𑀦𑀺𑀬𑀫𑀺𑀘𑁆𑀙𑀸𑀬 𑀅𑀲𑀢𑀺 𑀬𑁂𑀦 𑀓𑁂𑀦𑀘𑀺 𑀧𑀓𑀸𑀭𑁂𑀦 𑀫𑀭𑀡𑀫𑁂𑀯 𑀇𑀘𑁆𑀙𑀦𑁆𑀢𑀲𑁆𑀲 𑀆𑀡𑀸𑀧𑀓𑀲𑁆𑀲 𑀫𑀼𑀔𑀸𑀭𑀼𑀴𑁆𑀳𑀯𑀲𑁂𑀦 𑀯𑀼𑀢𑁆𑀢𑀲𑁆𑀲 𑀤𑁂𑀲𑀓𑀸𑀮𑀸𑀤𑀺𑀦𑀺𑀬𑀫𑀲𑁆𑀲 𑀯𑀺𑀲𑀗𑁆𑀓𑁂𑀢𑁂𑀧𑀺 𑀓𑀫𑁆𑀫𑀩𑀤𑁆𑀥𑁄𑀬𑁂𑀯𑀸𑀢𑀺 𑀜𑀸𑀧𑀺𑀢𑀁 𑀳𑁄𑀢𑀺. 𑀬𑁄 𑀧𑀦 𑀘𑀺𑀢𑁆𑀢𑁂𑀦 𑀬𑀢𑁆𑀣 𑀓𑀢𑁆𑀣𑀘𑀺 𑀬𑀤𑀸 𑀓𑀤𑀸𑀘𑀺 𑀬𑁂𑀦 𑀓𑁂𑀦𑀘𑀺 𑀧𑀓𑀸𑀭𑁂𑀦 𑀫𑀭𑀡𑀫𑁂𑀯 𑀇𑀘𑁆𑀙𑀦𑁆𑀢𑁄𑀧𑀺 𑀓𑀸𑀮𑀸𑀤𑀺𑀯𑀺𑀲𑀗𑁆𑀓𑁂𑀢𑁂𑀦 𑀅𑀓𑀼𑀲𑀮𑀢𑁄 𑀘𑁄𑀤𑀦𑀢𑁄 𑀯𑀸 𑀫𑀼𑀘𑁆𑀘𑀺𑀢𑀼𑀓𑀸𑀫𑁄 𑀮𑁂𑀲𑁂𑀦 𑀓𑀸𑀮𑀸𑀤𑀺𑀦𑀺𑀬𑀫𑀁 𑀓𑀭𑁄𑀢𑀺, 𑀢𑀲𑁆𑀲 𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑀧𑀸𑀭𑀸𑀚𑀺𑀓𑀢𑁄 𑀧𑀭𑀺𑀬𑀸𑀬𑁂𑀦 𑀅𑀫𑀼𑀘𑁆𑀘𑀦𑀢𑁄 𑀓𑀸𑀮𑀸𑀤𑀺𑀯𑀺𑀲𑀗𑁆𑀓𑁂𑀢𑁂𑀧𑀺 𑀓𑀫𑁆𑀫𑀩𑀤𑁆𑀥𑁄𑀯𑀸𑀢𑀺 𑀕𑀳𑁂𑀢𑁆𑀯𑀸 𑀯𑀺𑀘𑀸𑀭𑀡𑀢𑁄 𑀕𑀳𑁂𑀢𑀩𑁆𑀩𑀁, 𑀓𑁂𑀘𑀺 𑀧𑀦𑁂𑀢𑀁 𑀦 𑀇𑀘𑁆𑀙𑀦𑁆𑀢𑀺, 𑀯𑀻𑀫𑀁𑀲𑀺𑀢𑀩𑁆𑀩𑀁. 𑀢𑀼𑀡𑁆𑀟𑁂𑀦𑀸𑀢𑀺 𑀅𑀕𑁆𑀕𑀓𑁄𑀝𑀺𑀬𑀸. 𑀣𑀭𑀼𑀦𑀸𑀢𑀺 𑀔𑀕𑁆𑀕𑀫𑀼𑀝𑁆𑀞𑀺𑀦𑀸. 𑀏𑀢𑀁 𑀕𑀘𑁆𑀙𑀦𑁆𑀢𑀦𑁆𑀢𑀺 𑀕𑀫𑀦𑁂𑀦 𑀧𑀼𑀕𑁆𑀕𑀮𑁄𑀯 𑀦𑀺𑀬𑀫𑀺𑀢𑁄, 𑀦 𑀇𑀭𑀺𑀬𑀸𑀧𑀣𑁄, 𑀢𑁂𑀦𑀸𑀳 ‘‘𑀦𑀢𑁆𑀣𑀺 𑀯𑀺𑀲𑀗𑁆𑀓𑁂𑀢’’𑀦𑁆𑀢𑀺.

‘‘𑀤𑀻𑀖𑀁 𑀫𑀸𑀭𑁂𑀳𑀻’’𑀢𑀺 𑀯𑀼𑀢𑁆𑀢𑁂𑀧𑀺 𑀤𑀻𑀖𑀲𑀡𑁆𑀞𑀸𑀦𑀸𑀦𑀁 𑀩𑀳𑀼𑀪𑀸𑀯𑀢𑁄 ‘‘𑀇𑀢𑁆𑀣𑀦𑁆𑀦𑀸𑀫𑀁 𑀏𑀯𑀭𑀽𑀧𑀜𑁆𑀘 𑀤𑀻𑀖’’𑀦𑁆𑀢𑀺 𑀅𑀜𑁆𑀜𑁂𑀲𑀁 𑀅𑀲𑀸𑀥𑀸𑀭𑀡𑀮𑀓𑁆𑀔𑀡𑁂𑀦 𑀅𑀦𑀺𑀤𑁆𑀤𑀺𑀝𑁆𑀞𑀢𑁆𑀢𑀸 ‘‘𑀅𑀦𑀺𑀬𑀫𑁂𑀢𑁆𑀯𑀸 𑀆𑀡𑀸𑀧𑁂𑀢𑀻’’𑀢𑀺 𑀯𑀼𑀢𑁆𑀢𑀁, 𑀢𑁂𑀦𑁂𑀯𑀸𑀳 ‘‘𑀬𑀁 𑀓𑀺𑀜𑁆𑀘𑀺 𑀢𑀸𑀤𑀺𑀲𑀁 𑀫𑀸𑀭𑁂𑀫𑀻’’𑀢𑀺. 𑀏𑀢𑁆𑀣 𑀘 𑀘𑀺𑀢𑁆𑀢𑁂𑀦 𑀩𑀳𑀽𑀲𑀼 𑀤𑀻𑀖𑀲𑀡𑁆𑀞𑀸𑀦𑁂𑀲𑀼 𑀏𑀓𑀁 𑀦𑀺𑀬𑀫𑁂𑀢𑁆𑀯𑀸 𑀯𑀼𑀢𑁆𑀢𑁂𑀧𑀺 𑀯𑀸𑀘𑀸𑀬 𑀅𑀦𑀺𑀬𑀫𑀺𑀢𑀢𑁆𑀢𑀸 𑀅𑀜𑁆𑀜𑀲𑁆𑀫𑀺𑀁 𑀢𑀸𑀤𑀺𑀲𑁂 𑀫𑀸𑀭𑀺𑀢𑁂 𑀦𑀢𑁆𑀣𑀺 𑀯𑀺𑀲𑀗𑁆𑀓𑁂𑀢𑁄𑀢𑀺 𑀯𑀤𑀦𑁆𑀢𑀺. 𑀅𑀢𑁆𑀢𑀸𑀦𑀁 𑀫𑀼𑀜𑁆𑀘𑀺𑀢𑁆𑀯𑀸 𑀧𑀭𑀧𑀸𑀡𑀺𑀫𑁆𑀳𑀺 𑀧𑀸𑀡𑀲𑀜𑁆𑀜𑀺𑀢𑀸𑀮𑀓𑁆𑀔𑀡𑀲𑁆𑀲 𑀅𑀗𑁆𑀕𑀲𑁆𑀲 𑀅𑀪𑀸𑀯𑀢𑁄 𑀦𑁂𑀯𑀢𑁆𑀣𑀺 𑀧𑀸𑀡𑀸𑀢𑀺𑀧𑀸𑀢𑁄𑀢𑀺 𑀆𑀳 ‘‘𑀆𑀡𑀸𑀧𑀓𑁄 𑀫𑀼𑀘𑁆𑀘𑀢𑀻’’𑀢𑀺. 𑀅𑀢𑁆𑀢𑀸𑀦𑀁 𑀉𑀤𑁆𑀤𑀺𑀲𑁆𑀲 ‘‘𑀅𑀲𑀼𑀓𑀝𑁆𑀞𑀸𑀦𑁂 𑀦𑀺𑀲𑀺𑀦𑁆𑀦’’𑀦𑁆𑀢𑀺 𑀑𑀓𑀸𑀲𑀦𑀺𑀬𑀫𑁂 𑀢𑀲𑁆𑀫𑀺𑀁 𑀧𑀤𑁂𑀲𑁂 𑀦𑀺𑀲𑀺𑀦𑁆𑀦𑀲𑁆𑀲 𑀬𑀲𑁆𑀲 𑀓𑀲𑁆𑀲𑀘𑀺 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀆𑀭𑀩𑁆𑀪 𑀯𑀥𑀓𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀦𑁂𑀯 𑀯𑀥𑀓𑁄 𑀫𑀼𑀘𑁆𑀘𑀢𑀺 𑀦 𑀆𑀡𑀸𑀧𑀓𑁄’’𑀢𑀺. 𑀑𑀓𑀸𑀲𑀜𑁆𑀳𑀺 𑀦𑀺𑀬𑀫𑁂𑀢𑁆𑀯𑀸 𑀦𑀺𑀤𑁆𑀤𑀺𑀲𑀦𑁆𑀢𑁄 𑀢𑀲𑁆𑀫𑀺𑀁 𑀑𑀓𑀸𑀲𑁂 𑀦𑀺𑀲𑀺𑀦𑁆𑀦𑀁 𑀫𑀸𑀭𑁂𑀢𑀼𑀓𑀸𑀫𑁄 𑀳𑁄𑀢𑀺, 𑀲𑀬𑀁 𑀧𑀦 𑀢𑀤𑀸 𑀢𑀢𑁆𑀣 𑀦𑀢𑁆𑀣𑀺, 𑀢𑀲𑁆𑀫𑀸 𑀑𑀓𑀸𑀲𑁂𑀦 𑀲𑀳 𑀢𑀢𑁆𑀣 𑀦𑀺𑀲𑀺𑀦𑁆𑀦𑀲𑁆𑀲𑁂𑀯 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀆𑀭𑀫𑁆𑀫𑀡𑀁 𑀳𑁄𑀢𑀺, 𑀦 𑀅𑀢𑁆𑀢𑀦𑁄𑀢𑀺 𑀕𑀳𑁂𑀢𑀩𑁆𑀩𑀁. 𑀲𑀘𑁂 𑀧𑀦 𑀲𑀬𑀁 𑀢𑀢𑁆𑀣𑁂𑀯 𑀦𑀺𑀲𑀻𑀤𑀺𑀢𑁆𑀯𑀸 𑀅𑀢𑁆𑀢𑀦𑁄 𑀦𑀺𑀲𑀺𑀦𑁆𑀦𑀝𑁆𑀞𑀸𑀦𑀫𑁂𑀯 𑀦𑀺𑀬𑀫𑁂𑀢𑁆𑀯𑀸 ‘‘𑀫𑀸𑀭𑁂𑀳𑀻’’𑀢𑀺 𑀯𑀼𑀢𑁆𑀢𑁂𑀧𑀺 𑀅𑀜𑁆𑀜𑁄 𑀢𑀢𑁆𑀣 𑀦𑀺𑀲𑀺𑀦𑁆𑀦𑁄 𑀫𑀸𑀭𑀺𑀬𑀢𑀺, 𑀢𑀲𑁆𑀲𑀸𑀧𑀺 𑀅𑀢𑁆𑀢𑀦𑁄𑀧𑀺 𑀚𑀻𑀯𑀺𑀢𑀁 𑀆𑀭𑀩𑁆𑀪 𑀯𑀥𑀓𑀘𑁂𑀢𑀦𑀸 𑀧𑀯𑀢𑁆𑀢𑀢𑀺, 𑀧𑀭𑀲𑁆𑀫𑀺𑀁 𑀢𑀢𑁆𑀣 𑀫𑀸𑀭𑀺𑀢𑁂 𑀆𑀡𑀸𑀧𑀓𑀲𑁆𑀲 𑀓𑀫𑁆𑀫𑀩𑀤𑁆𑀥𑁄𑀢𑀺 𑀕𑀳𑁂𑀢𑀩𑁆𑀩𑀁. 𑀏𑀯𑀭𑀽𑀧𑁂 𑀞𑀸𑀦𑁂 𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀦𑀺𑀬𑀫𑁄 𑀩𑀼𑀤𑁆𑀥𑀯𑀺𑀲𑀬𑁄, 𑀦 𑀅𑀜𑁆𑀜𑁂𑀲𑀁 𑀯𑀺𑀲𑀬𑁄𑀢𑀺 𑀆𑀳 ‘‘𑀢𑀲𑁆𑀫𑀸 𑀏𑀢𑁆𑀣 𑀦 𑀅𑀦𑀸𑀤𑀭𑀺𑀬𑀁 𑀓𑀸𑀢𑀩𑁆𑀩’’𑀦𑁆𑀢𑀺.

𑀏𑀯𑀁 𑀆𑀡𑀸𑀧𑁂𑀦𑁆𑀢𑀲𑁆𑀲 𑀆𑀘𑀭𑀺𑀬𑀲𑁆𑀲 𑀢𑀸𑀯 𑀤𑀼𑀓𑁆𑀓𑀝𑀦𑁆𑀢𑀺 𑀲𑀘𑁂 𑀆𑀡𑀢𑁆𑀢𑀺𑀓𑁄 𑀬𑀣𑀸𑀥𑀺𑀧𑁆𑀧𑀸𑀬𑀁 𑀦 𑀕𑀘𑁆𑀙𑀢𑀺, 𑀆𑀘𑀭𑀺𑀬𑀲𑁆𑀲 𑀆𑀡𑀢𑁆𑀢𑀺𑀓𑁆𑀔𑀡𑁂 𑀤𑀼𑀓𑁆𑀓𑀝𑀁. 𑀲𑀘𑁂 𑀧𑀦 𑀲𑁄 𑀬𑀣𑀸𑀥𑀺𑀧𑁆𑀧𑀸𑀬𑀁 𑀕𑀘𑁆𑀙𑀢𑀺, 𑀬𑀁 𑀧𑀭𑀢𑁄 𑀣𑀼𑀮𑁆𑀮𑀘𑁆𑀘𑀬𑀁 𑀯𑀼𑀢𑁆𑀢𑀁, 𑀆𑀡𑀢𑁆𑀢𑀺𑀓𑁆𑀔𑀡𑁂 𑀢𑀤𑁂𑀯 𑀳𑁄𑀢𑀺. 𑀅𑀣 𑀲𑁄 𑀅𑀯𑀲𑁆𑀲𑀁 𑀖𑀸𑀢𑁂𑀢𑀺, 𑀬𑀁 𑀧𑀭𑀢𑁄 ‘‘𑀆𑀧𑀢𑁆𑀢𑀺 𑀲𑀩𑁆𑀩𑁂𑀲𑀁 𑀧𑀸𑀭𑀸𑀚𑀺𑀓𑀲𑁆𑀲𑀸’’𑀢𑀺 (𑀧𑀸𑀭𑀸. 𑁧𑁭𑁪) 𑀯𑀼𑀢𑁆𑀢𑀁, 𑀢𑀢𑁄 𑀇𑀫𑀲𑁆𑀲 𑀆𑀡𑀢𑁆𑀢𑀺𑀓𑁆𑀔𑀡𑁂𑀬𑁂𑀯 𑀧𑀸𑀭𑀸𑀚𑀺𑀓𑀁 𑀳𑁄𑀢𑀺, 𑀦 𑀤𑀼𑀓𑁆𑀓𑀝𑀣𑀼𑀮𑁆𑀮𑀘𑁆𑀘𑀬𑀸𑀦𑀻𑀢𑀺 𑀕𑀳𑁂𑀢𑀩𑁆𑀩𑀁. 𑀢𑁂𑀲𑀫𑁆𑀧𑀺 𑀤𑀼𑀓𑁆𑀓𑀝𑀦𑁆𑀢𑀺 𑀩𑀼𑀤𑁆𑀥𑀭𑀓𑁆𑀔𑀺𑀢𑀸𑀤𑀻𑀦𑀫𑁆𑀧𑀺 𑀆𑀭𑁄𑀘𑀦𑀧𑀘𑁆𑀘𑀬𑀸 𑀤𑀼𑀓𑁆𑀓𑀝𑀁, 𑀇𑀤𑀜𑁆𑀘 𑀬𑀣𑀸𑀡𑀢𑁆𑀢𑀺𑀯𑀲𑁂𑀦 𑀲𑀗𑁆𑀖𑀭𑀓𑁆𑀔𑀺𑀢𑀲𑁆𑀲 𑀚𑀻𑀯𑀺𑀢𑀸 𑀯𑁄𑀭𑁄𑀧𑀦𑁂 𑀅𑀲𑀢𑀺 𑀬𑀼𑀚𑁆𑀚𑀢𑀺, 𑀯𑁄𑀭𑁄𑀧𑀦𑁂 𑀲𑀢𑀺 𑀢𑁂𑀲𑀫𑁆𑀧𑀺 𑀆𑀭𑁄𑀘𑀦𑀓𑁆𑀔𑀡𑁂𑀬𑁂𑀯 𑀧𑀸𑀭𑀸𑀚𑀺𑀓𑀁. 𑀧𑀝𑀺𑀕𑁆𑀕𑀳𑀺𑀢𑀫𑀢𑁆𑀢𑁂𑀢𑀺 𑀇𑀤𑀁 𑀅𑀯𑀲𑁆𑀲𑀁 𑀧𑀝𑀺𑀕𑁆𑀕𑀳𑀡𑀲𑀪𑀸𑀯𑀤𑀻𑀧𑀦𑀢𑁆𑀣𑀁 𑀯𑀼𑀢𑁆𑀢𑀁, 𑀦 𑀧𑀝𑀺𑀕𑁆𑀕𑀳𑀺𑀢𑀓𑁆𑀔𑀡𑁂𑀬𑁂𑀯 𑀣𑀼𑀮𑁆𑀮𑀘𑁆𑀘𑀬𑀦𑁆𑀢𑀺 𑀤𑀲𑁆𑀲𑀦𑀢𑁆𑀣𑀁. 𑀲𑀘𑁂 𑀳𑀺 𑀲𑁄 𑀅𑀯𑀲𑁆𑀲𑀁 𑀧𑀝𑀺𑀕𑁆𑀕𑀳𑁂𑀲𑁆𑀲𑀢𑀺, 𑀓𑀫𑁆𑀫𑀁 𑀧𑀦 𑀦 𑀦𑀺𑀧𑁆𑀨𑀸𑀤𑁂𑀲𑁆𑀲𑀢𑀺, 𑀢𑀤𑀸 𑀆𑀘𑀭𑀺𑀬𑀲𑁆𑀲 𑀆𑀡𑀢𑁆𑀢𑀺𑀓𑁆𑀔𑀡𑁂𑀬𑁂𑀯 𑀣𑀼𑀮𑁆𑀮𑀘𑁆𑀘𑀬𑀁 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.

𑀫𑀽𑀮𑀝𑁆𑀞𑀲𑁆𑀲𑁂𑀯 𑀤𑀼𑀓𑁆𑀓𑀝𑀦𑁆𑀢𑀺 𑀇𑀤𑀁 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀆𑀕𑀢𑀦𑀬𑀤𑀲𑁆𑀲𑀦𑀫𑀢𑁆𑀢𑀁, 𑀦 𑀧𑀦𑁂𑀢𑀁 𑀅𑀢𑁆𑀢𑀦𑀸 𑀅𑀥𑀺𑀧𑁆𑀧𑁂𑀢𑀁, 𑀢𑁂𑀦𑀸𑀳 𑀏𑀯𑀁 𑀲𑀦𑁆𑀢𑁂𑀢𑀺𑀆𑀤𑀺, 𑀏𑀯𑀁 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀦𑀬𑁂𑀦 𑀅𑀢𑁆𑀣𑁂 𑀲𑀢𑀻𑀢𑀺 𑀅𑀢𑁆𑀣𑁄. 𑀧𑀝𑀺𑀕𑁆𑀕𑀳𑀡𑁂 𑀆𑀧𑀢𑁆𑀢𑀺𑀬𑁂𑀯 𑀦 𑀲𑀺𑀬𑀸𑀢𑀺 𑀯𑀥𑀓𑀲𑁆𑀲 ‘‘𑀲𑀸𑀥𑀼 𑀲𑀼𑀝𑁆𑀞𑀽’’𑀢𑀺 𑀫𑀭𑀡𑀧𑀝𑀺𑀕𑁆𑀕𑀳𑀡𑁂 𑀤𑀼𑀓𑁆𑀓𑀝𑀸𑀧𑀢𑁆𑀢𑀺 𑀦𑁂𑀯 𑀲𑀺𑀬𑀸, 𑀏𑀯𑀁 𑀅𑀦𑁄𑀴𑀸𑀭𑀺𑀓𑀯𑀺𑀲𑀬𑁂𑀧𑀺 𑀢𑀸𑀯 𑀤𑀼𑀓𑁆𑀓𑀝𑀁, 𑀓𑀺𑀫𑀗𑁆𑀕𑀁 𑀧𑀦 𑀫𑀭𑀡𑀧𑀝𑀺𑀕𑁆𑀕𑀳𑀡𑁂𑀢𑀺 𑀤𑀲𑁆𑀲𑀦𑀢𑁆𑀣𑀁 𑀲𑀜𑁆𑀘𑀭𑀺𑀢𑁆𑀢𑀧𑀝𑀺𑀕𑁆𑀕𑀳𑀡𑀸𑀤𑀺 𑀦𑀺𑀤𑀲𑁆𑀲𑀺𑀢𑀁. ‘‘𑀅𑀳𑁄 𑀯𑀢 𑀇𑀢𑁆𑀣𑀦𑁆𑀦𑀸𑀫𑁄 𑀳𑀢𑁄 𑀅𑀲𑁆𑀲𑀸’’𑀢𑀺 𑀏𑀯𑀁 𑀫𑀭𑀡𑀸𑀪𑀺𑀦𑀦𑁆𑀤𑀦𑀤𑀲𑁆𑀲𑀦𑀢𑁆𑀣𑀁 𑀲𑀜𑁆𑀘𑀭𑀺𑀢𑁆𑀢𑀧𑀝𑀺𑀕𑁆𑀕𑀳𑀡𑀸𑀤𑀺𑀪𑀺𑀦𑀦𑁆𑀤𑀦𑁂 𑀤𑀼𑀓𑁆𑀓𑀝𑁂 𑀲𑀢𑀺 𑀧𑀕𑁂𑀯 ‘‘𑀅𑀳𑀁 𑀢𑀁 𑀫𑀸𑀭𑁂𑀲𑁆𑀲𑀸𑀫𑀻’’𑀢𑀺 𑀫𑀭𑀡𑀧𑀝𑀺𑀕𑁆𑀕𑀳𑀡𑁂𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀲𑁆𑀲𑁂𑀯𑁂𑀢𑀁 𑀤𑀼𑀓𑁆𑀓𑀝𑀦𑁆𑀢𑀺 𑀅𑀯𑀥𑀸𑀭𑀡𑁂𑀦 𑀲𑀗𑁆𑀖𑀭𑀓𑁆𑀔𑀺𑀢𑀲𑁆𑀲 𑀧𑀝𑀺𑀕𑁆𑀕𑀳𑀡𑀧𑀘𑁆𑀘𑀬𑀸 𑀫𑀽𑀮𑀝𑁆𑀞𑀲𑁆𑀲 𑀦𑀢𑁆𑀣𑁂𑀯 𑀆𑀧𑀢𑁆𑀢𑀻𑀢𑀺 𑀤𑀲𑁆𑀲𑁂𑀢𑀺, 𑀯𑀺𑀲𑀗𑁆𑀓𑁂𑀢𑀢𑁆𑀢𑀸 𑀧𑀞𑀫𑀁 𑀆𑀡𑀢𑁆𑀢𑀤𑀼𑀓𑁆𑀓𑀝𑀫𑁂𑀯𑀲𑁆𑀲 𑀳𑁄𑀢𑀺. 𑀓𑁂𑀘𑀺 𑀧𑀦 ‘‘𑀫𑀽𑀮𑀝𑁆𑀞𑀲𑁆𑀲𑀸𑀧𑀺 𑀤𑀼𑀓𑁆𑀓𑀝𑀫𑁂𑀯𑀸’’𑀢𑀺 𑀯𑀤𑀦𑁆𑀢𑀺, 𑀢𑀁 𑀦 𑀬𑀼𑀢𑁆𑀢𑀁 𑀏𑀓𑁂𑀦 𑀧𑀬𑁄𑀕𑁂𑀦 𑀤𑁆𑀯𑀺𑀦𑁆𑀦𑀁 𑀤𑀼𑀓𑁆𑀓𑀝𑀸𑀦𑀁 𑀅𑀲𑀫𑁆𑀪𑀯𑀸. 𑀧𑀼𑀭𑀺𑀫𑀦𑀬𑁂𑀢𑀺 𑀲𑀫𑀦𑀦𑁆𑀢𑀭𑀸𑀢𑀻𑀢𑁂 𑀅𑀯𑀺𑀲𑀓𑁆𑀓𑀺𑀬𑀤𑀽𑀢𑀦𑀺𑀤𑁆𑀤𑁂𑀲𑁂. 𑀏𑀢𑀦𑁆𑀢𑀺 𑀤𑀼𑀓𑁆𑀓𑀝𑀁. 𑀑𑀓𑀸𑀲𑀸𑀪𑀸𑀯𑁂𑀦𑀸𑀢𑀺 𑀫𑀽𑀮𑀝𑁆𑀞𑀲𑁆𑀲 𑀣𑀼𑀮𑁆𑀮𑀘𑁆𑀘𑀬𑀲𑁆𑀲 𑀯𑀼𑀘𑁆𑀘𑀫𑀸𑀦𑀢𑁆𑀢𑀸 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁 𑀦 𑀯𑀼𑀢𑁆𑀢𑀁 𑀑𑀓𑀸𑀲𑀸𑀪𑀸𑀯𑁂𑀦, 𑀦 𑀧𑀦 𑀆𑀧𑀢𑁆𑀢𑀺𑀅𑀪𑀸𑀯𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁧𑁭𑁫. 𑀲𑀬𑀁 𑀲𑀗𑁆𑀖𑀢𑁆𑀣𑁂𑀭𑀢𑁆𑀢𑀸 ‘‘𑀉𑀧𑀝𑁆𑀞𑀸𑀦𑀓𑀸𑀮𑁂’’𑀢𑀺 𑀯𑀼𑀢𑁆𑀢𑀁. 𑀯𑀸𑀘𑀸𑀬 𑀯𑀸𑀘𑀸𑀬 𑀤𑀼𑀓𑁆𑀓𑀝𑀦𑁆𑀢𑀺 ‘‘𑀬𑁄 𑀓𑁄𑀘𑀺 𑀫𑀫 𑀯𑀘𑀦𑀁 𑀲𑀼𑀢𑁆𑀯𑀸 𑀇𑀫𑀁 𑀫𑀸𑀭𑁂𑀢𑀽’’𑀢𑀺 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦 𑀅𑀯𑀢𑁆𑀯𑀸 𑀓𑁂𑀯𑀮𑀁 𑀫𑀭𑀡𑀸𑀪𑀺𑀦𑀦𑁆𑀤𑀦𑀯𑀲𑁂𑀦𑁂𑀯 𑀯𑀼𑀢𑁆𑀢𑀢𑁆𑀢𑀸 𑀘𑁄𑀭𑀸𑀧𑀺 𑀦𑀸𑀫 𑀢𑀁 𑀦 𑀳𑀦𑀦𑁆𑀢𑀻𑀢𑀺𑀆𑀤𑀺𑀯𑀸𑀘𑀸𑀬𑀧𑀺 𑀤𑀼𑀓𑁆𑀓𑀝𑀫𑁂𑀯 𑀯𑀼𑀢𑁆𑀢𑀁. 𑀤𑁆𑀯𑀺𑀦𑁆𑀦𑀁 𑀉𑀤𑁆𑀤𑀺𑀲𑁆𑀲𑀸𑀢𑀺 𑀤𑁆𑀯𑁂 𑀉𑀤𑁆𑀤𑀺𑀲𑁆𑀲, 𑀤𑁆𑀯𑀺𑀦𑁆𑀦𑀁 𑀯𑀸 𑀫𑀭𑀡𑀁 𑀉𑀤𑁆𑀤𑀺𑀲𑁆𑀲. 𑀉𑀪𑁄 𑀉𑀤𑁆𑀤𑀺𑀲𑁆𑀲 𑀫𑀭𑀡𑀁 𑀲𑀁𑀯𑀡𑁆𑀡𑁂𑀦𑁆𑀢𑀲𑁆𑀲 𑀧𑀬𑁄𑀕𑀲𑀫𑀼𑀝𑁆𑀞𑀸𑀧𑀺𑀓𑀸𑀬 𑀘𑁂𑀢𑀦𑀸𑀬 𑀏𑀓𑀢𑁆𑀢𑁂𑀧𑀺 ‘‘𑀤𑁆𑀯𑁂 𑀧𑀸𑀡𑀸𑀢𑀺𑀧𑀸𑀢𑀸’’𑀢𑀺 𑀯𑀢𑁆𑀢𑀩𑁆𑀩𑀢𑀸𑀲𑀗𑁆𑀔𑀸𑀢𑀁 𑀩𑀮𑀯𑀪𑀸𑀯𑀁 𑀆𑀧𑀚𑁆𑀚𑀺𑀢𑁆𑀯𑀸 𑀧𑀝𑀺𑀲𑀦𑁆𑀥𑀺𑀧𑀯𑀢𑁆𑀢𑀻𑀲𑀼 𑀫𑀳𑀸𑀯𑀺𑀧𑀸𑀓𑀢𑁆𑀢𑀸 ‘‘𑀅𑀓𑀼𑀲𑀮𑀭𑀸𑀲𑀻’’𑀢𑀺 𑀯𑀼𑀢𑁆𑀢𑀁, 𑀩𑀳𑀽 𑀉𑀤𑁆𑀤𑀺𑀲𑁆𑀲 𑀫𑀭𑀡𑀲𑀁𑀯𑀡𑁆𑀡𑀦𑁂𑀧𑀺 𑀏𑀲𑁂𑀯 𑀦𑀬𑁄. 𑀢𑀢𑁆𑀢𑀓𑀸 𑀧𑀸𑀡𑀸𑀢𑀺𑀧𑀸𑀢𑀸𑀢𑀺 𑀬𑀢𑁆𑀢𑀓𑀸 𑀲𑀁𑀯𑀡𑁆𑀡𑀦𑀁 𑀲𑀼𑀢𑁆𑀯𑀸 𑀫𑀭𑀺𑀲𑁆𑀲𑀦𑁆𑀢𑀺, 𑀢𑀢𑁆𑀢𑀓𑀸𑀦𑀫𑁆𑀧𑀺 𑀯𑀢𑁆𑀢𑀫𑀸𑀦𑀁 𑀅𑀦𑀸𑀕𑀢𑀜𑁆𑀘 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀲𑀩𑁆𑀩𑀁 𑀆𑀮𑀫𑁆𑀩𑀺𑀢𑁆𑀯𑀸𑀯 𑀘𑁂𑀢𑀦𑀸𑀬 𑀧𑀯𑀢𑁆𑀢𑀦𑀢𑁄 𑀢𑀢𑁆𑀢𑀓𑀸 𑀧𑀸𑀡𑀸𑀢𑀺𑀧𑀸𑀢𑀸 𑀳𑁄𑀦𑁆𑀢𑀺, 𑀢𑀢𑁆𑀢𑀓𑀸𑀳𑀺 𑀘𑁂𑀢𑀦𑀸𑀳𑀺 𑀤𑀸𑀢𑀩𑁆𑀩𑀁 𑀧𑀯𑀢𑁆𑀢𑀺𑀯𑀺𑀧𑀸𑀓𑀁 𑀏𑀓𑀸𑀯 𑀲𑀸 𑀘𑁂𑀢𑀦𑀸 𑀤𑀸𑀢𑀼𑀁 𑀲𑀓𑁆𑀓𑁄𑀢𑀻𑀢𑀺 𑀅𑀢𑁆𑀣𑁄, 𑀧𑀝𑀺𑀲𑀦𑁆𑀥𑀺𑀯𑀺𑀧𑀸𑀓𑀁 𑀧𑀦 𑀲𑀬𑀜𑁆𑀘 𑀧𑀼𑀩𑁆𑀩𑀸𑀧𑀭𑀘𑁂𑀢𑀦𑀸 𑀘 𑀏𑀓𑁂𑀓𑀫𑁂𑀯 𑀤𑀸𑀢𑀼𑀁 𑀲𑀓𑁆𑀓𑁄𑀢𑀻𑀢𑀺 𑀕𑀳𑁂𑀢𑀩𑁆𑀩𑀁.

𑁧𑁭𑁬. 𑀬𑁂𑀲𑀁 𑀳𑀢𑁆𑀣𑀢𑁄𑀢𑀺 𑀬𑁂𑀲𑀁 𑀜𑀸𑀢𑀓𑀧𑀯𑀸𑀭𑀺𑀢𑀸𑀤𑀻𑀦𑀁 𑀳𑀢𑁆𑀣𑀢𑁄, 𑀇𑀤𑀜𑁆𑀘 𑀪𑀺𑀓𑁆𑀔𑀼𑀦𑁄 𑀭𑀽𑀧𑀺𑀬𑀫𑀽𑀮𑀲𑁆𑀲 𑀅𑀪𑀸𑀯𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀅𑀢𑁆𑀢𑀦𑁄𑀯 𑀥𑀦𑀜𑁆𑀘𑁂, 𑀲𑀬𑀫𑁂𑀯 𑀫𑀽𑀮𑀁 𑀕𑀳𑁂𑀢𑁆𑀯𑀸 𑀫𑀼𑀜𑁆𑀘𑀢𑀺, 𑀫𑀽𑀮𑀁 𑀧𑀦 𑀅𑀕𑁆𑀕𑀳𑁂𑀢𑁆𑀯𑀸𑀧𑀺 𑀧𑁄𑀢𑁆𑀣𑀓𑀲𑁆𑀲 𑀧𑁄𑀢𑁆𑀣𑀓𑀲𑀸𑀫𑀺𑀦𑁄 𑀲𑀦𑁆𑀢𑀓𑀢𑁆𑀢𑀸𑀧𑀸𑀤𑀦𑀫𑁂𑀯𑁂𑀢𑁆𑀣 𑀧𑀫𑀸𑀡𑀦𑁆𑀢𑀺 𑀕𑀳𑁂𑀢𑀩𑁆𑀩𑀁. 𑀮𑁂𑀔𑀸𑀤𑀲𑁆𑀲𑀦𑀓𑁄𑀢𑀽𑀳𑀮𑀓𑀸𑀢𑀺 𑀲𑀼𑀦𑁆𑀤𑀭𑀓𑁆𑀔𑀭𑀁 𑀤𑀺𑀲𑁆𑀯𑀸 𑀯𑀸 ‘‘𑀓𑀻𑀤𑀺𑀲𑀁 𑀦𑀼 𑀔𑁄 𑀧𑁄𑀢𑁆𑀣𑀓’’𑀦𑁆𑀢𑀺 𑀯𑀸 𑀑𑀮𑁄𑀓𑁂𑀢𑀼𑀓𑀸𑀫𑀸.

𑀧𑀸𑀡𑀸𑀢𑀺𑀧𑀸𑀢𑀲𑁆𑀲 𑀧𑀬𑁄𑀕𑀢𑁆𑀢𑀸𑀢𑀺 𑀲𑀭𑀻𑀭𑀢𑁄 𑀧𑀸𑀡𑀯𑀺𑀬𑁄𑀚𑀦𑀲𑁆𑀲 𑀦𑀺𑀝𑁆𑀞𑀸𑀧𑀓𑀧𑀬𑁄𑀕𑀢𑁆𑀢𑀸. 𑀑𑀧𑀸𑀢𑀔𑀡𑀦𑀢𑁆𑀣𑀁 𑀧𑀦 𑀓𑀼𑀤𑀸𑀮𑀸𑀤𑀺𑀅𑀢𑁆𑀣𑀸𑀬 𑀅𑀬𑁄𑀩𑀻𑀚𑀲𑀫𑀼𑀝𑁆𑀞𑀸𑀧𑀦𑀢𑁆𑀣𑀁 𑀅𑀓𑀧𑁆𑀧𑀺𑀬𑀧𑀣𑀯𑀺𑀁 𑀯𑀸 𑀓𑀼𑀤𑀸𑀮𑀤𑀡𑁆𑀟𑀸𑀤𑀻𑀦𑀁 𑀅𑀢𑁆𑀣𑀸𑀬 𑀪𑀽𑀢𑀕𑀸𑀫𑀁 𑀯𑀺𑀓𑁄𑀧𑁂𑀦𑁆𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀫𑁂𑀯. 𑀧𑀸𑀡𑀸𑀢𑀺𑀧𑀸𑀢𑀧𑀬𑁄𑀕𑀢𑁆𑀢𑀸𑀪𑀸𑀯𑀸 𑀅𑀤𑀺𑀦𑁆𑀦𑀸𑀤𑀸𑀦𑀧𑀼𑀩𑁆𑀩𑀧𑀬𑀑𑀕𑁂 𑀯𑀺𑀬 𑀤𑀼𑀢𑀺𑀬𑀧𑀭𑀺𑀬𑁂𑀲𑀦𑀸𑀤𑀻𑀲𑀼𑀧𑀺 𑀏𑀢𑁆𑀣 𑀤𑀼𑀓𑁆𑀓𑀝𑀝𑁆𑀞𑀸𑀦𑁂 𑀤𑀼𑀓𑁆𑀓𑀝𑀁, 𑀫𑀼𑀲𑀸𑀯𑀸𑀤𑀸𑀤𑀺𑀧𑀸𑀘𑀺𑀢𑁆𑀢𑀺𑀬𑀝𑁆𑀞𑀸𑀦𑁂 𑀧𑀸𑀘𑀺𑀢𑁆𑀢𑀺𑀬𑀫𑁂𑀯𑀸𑀢𑀺 𑀕𑀳𑁂𑀢𑀩𑁆𑀩𑀁. 𑀧𑀫𑀸𑀡𑁂𑀢𑀺 𑀅𑀢𑁆𑀢𑀦𑀸 𑀲𑀮𑁆𑀮𑀓𑁆𑀔𑀺𑀢𑁂 𑀧𑀫𑀸𑀡𑁂. 𑀢𑀘𑁆𑀙𑁂𑀢𑁆𑀯𑀸𑀢𑀺 𑀉𑀦𑁆𑀦𑀢𑀧𑁆𑀧𑀤𑁂𑀲𑀁 𑀢𑀘𑁆𑀙𑁂𑀢𑁆𑀯𑀸. 𑀧𑀁𑀲𑀼𑀧𑀘𑁆𑀙𑀺𑀦𑁆𑀢𑀺 𑀲𑀩𑁆𑀩𑀦𑁆𑀢𑀺𑀫𑀁 𑀧𑀁𑀲𑀼𑀧𑀘𑁆𑀙𑀺𑀁. 𑀏𑀢𑁆𑀢𑀓𑀁 𑀅𑀮𑀦𑁆𑀢𑀺 𑀦𑀺𑀝𑁆𑀞𑀸𑀧𑁂𑀢𑀼𑀓𑀸𑀫𑀢𑀸𑀬 𑀲𑀩𑁆𑀩𑀦𑁆𑀢𑀺𑀫𑀧𑀬𑀑𑀕𑀲𑀸𑀥𑀺𑀓𑀸 𑀘𑁂𑀢𑀦𑀸 𑀲𑀦𑁆𑀦𑀺𑀝𑁆𑀞𑀸𑀧𑀓𑀘𑁂𑀢𑀦𑀸, 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 ‘‘𑀏𑀓𑀲𑁆𑀫𑀺𑀁 𑀤𑀺𑀯𑀲𑁂 𑀅𑀯𑀽𑀧𑀲𑀦𑁆𑀢𑁂𑀦𑁂𑀯 𑀧𑀬𑁄𑀕𑁂𑀦 𑀔𑀡𑀺𑀢𑁆𑀯𑀸 𑀦𑀺𑀝𑁆𑀞𑀸𑀧𑁂𑀦𑁆𑀢𑀁 𑀲𑀦𑁆𑀥𑀸𑀬 𑀲𑀩𑁆𑀩𑀦𑁆𑀢𑀺𑀫𑀸 𑀲𑀦𑁆𑀦𑀺𑀝𑁆𑀞𑀸𑀧𑀓𑀘𑁂𑀢𑀦𑀸 𑀯𑀼𑀢𑁆𑀢𑀸, 𑀇𑀢𑀭𑀸𑀲𑀼 𑀧𑀦 𑀅𑀝𑁆𑀞𑀓𑀣𑀸𑀲𑀼 ‘‘𑀇𑀫𑀲𑁆𑀫𑀺𑀁 𑀧𑀢𑀺𑀢𑁆𑀯𑀸 𑀫𑀭𑀦𑁆𑀢𑀽’’𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀏𑀓𑀲𑁆𑀫𑀺𑀁 𑀤𑀺𑀯𑀲𑁂 𑀓𑀺𑀜𑁆𑀘𑀺 𑀔𑀡𑀺𑀢𑁆𑀯𑀸 𑀅𑀧𑀭𑀲𑁆𑀫𑀺𑀫𑁆𑀧𑀺 𑀤𑀺𑀯𑀲𑁂 𑀢𑀢𑁄 𑀓𑀺𑀜𑁆𑀘𑀺 𑀓𑀺𑀜𑁆𑀘𑀺 𑀔𑀡𑀺𑀢𑁆𑀯𑀸 𑀦𑀺𑀝𑁆𑀞𑀸𑀧𑁂𑀦𑁆𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀏𑀯𑀁 𑀅𑀝𑁆𑀞𑀓𑀣𑀸𑀦𑀁 𑀅𑀜𑁆𑀜𑀫𑀜𑁆𑀜𑀯𑀺𑀭𑁄𑀥𑁄 𑀜𑀸𑀢𑀩𑁆𑀩𑁄. 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬𑀸𑀢𑀺 𑀅𑀚𑀸𑀦𑀺𑀢𑁆𑀯𑀸, 𑀧𑀓𑁆𑀔𑀮𑀺𑀢𑁆𑀯𑀸 𑀯𑀸. 𑀅𑀭𑀳𑀦𑁆𑀢𑀸𑀧𑀺 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀻𑀢𑀺 𑀅𑀜𑁆𑀜𑁂𑀳𑀺 𑀧𑀸𑀢𑀺𑀬𑀫𑀸𑀦𑀸𑀦𑀁 𑀅𑀫𑀭𑀺𑀢𑀼𑀓𑀸𑀫𑀸𑀦𑀫𑁆𑀧𑀺 𑀅𑀭𑀳𑀦𑁆𑀢𑀸𑀦𑀁 𑀫𑀭𑀡𑀁 𑀲𑀫𑁆𑀪𑀯𑀢𑀻𑀢𑀺 𑀯𑀼𑀢𑁆𑀢𑀁. 𑀧𑀼𑀭𑀺𑀫𑀦𑀬𑁂𑀢𑀺 ‘‘𑀫𑀭𑀺𑀢𑀼𑀓𑀸𑀫𑀸 𑀇𑀥 𑀫𑀭𑀺𑀲𑁆𑀲𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀦𑀬𑁂. 𑀯𑀺𑀲𑀗𑁆𑀓𑁂𑀢𑁄𑀢𑀺 𑀫𑀭𑀺𑀢𑀼𑀓𑀸𑀫𑀸𑀦𑀁 𑀫𑀸𑀭𑁂𑀢𑀼𑀓𑀸𑀫𑀸𑀦𑀜𑁆𑀘 𑀉𑀤𑁆𑀤𑀺𑀲𑁆𑀲 𑀔𑀢𑀢𑁆𑀢𑀸 𑀅𑀫𑀭𑀺𑀢𑀼𑀓𑀸𑀫𑀸𑀦𑀁 𑀫𑀭𑀡𑁂 𑀓𑀫𑁆𑀫𑀩𑀤𑁆𑀥𑁄 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄.

𑀢𑀢𑁆𑀣 𑀧𑀢𑀺𑀢𑀁 𑀩𑀳𑀺 𑀦𑀻𑀳𑀭𑀺𑀢𑁆𑀯𑀸𑀢𑀺 𑀇𑀤𑀁 𑀢𑀢𑁆𑀣 𑀧𑀢𑀦𑀧𑀘𑁆𑀘𑀬𑀸 𑀫𑀭𑀡𑀲𑁆𑀲 𑀧𑀯𑀢𑁆𑀢𑀢𑁆𑀢𑀸 𑀯𑀼𑀢𑁆𑀢𑀁. 𑀆𑀯𑀸𑀝𑁂 𑀧𑀢𑀺𑀢𑁆𑀯𑀸 𑀣𑁄𑀓𑀁 𑀘𑀺𑀭𑀸𑀬𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀁 𑀕𑀳𑁂𑀢𑁆𑀯𑀸 𑀫𑀸𑀭𑀺𑀢𑁂 𑀢𑀢𑁆𑀣 𑀧𑀢𑀺𑀢𑀭𑁄𑀕𑁂𑀦 𑀧𑀻𑀴𑀺𑀢𑀲𑁆𑀲 𑀕𑀘𑁆𑀙𑀢𑁄 𑀧𑀓𑁆𑀔𑀮𑀺𑀢𑁆𑀯𑀸 𑀧𑀸𑀲𑀸𑀡𑀸𑀤𑀻𑀲𑀼 𑀧𑀢𑀦𑁂𑀦𑀸𑀧𑀺 𑀫𑀭𑀡𑁂𑀧𑀺 𑀑𑀧𑀸𑀢𑀔𑀡𑀓𑁄 𑀦 𑀫𑀼𑀘𑁆𑀘𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀫𑀭𑀺𑀢𑀼𑀓𑀸𑀫𑀸 𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑀲𑁆𑀲 𑀲𑀫𑁆𑀪𑀯𑀢𑁄 𑀑𑀧𑀧𑀸𑀢𑀺𑀓𑁂 𑀉𑀢𑁆𑀢𑀭𑀺𑀢𑀼𑀁 𑀅𑀲𑀓𑁆𑀓𑀼𑀡𑀺𑀢𑁆𑀯𑀸 𑀫𑀢𑁂𑀧𑀺 𑀧𑀸𑀭𑀸𑀚𑀺𑀓𑀁 𑀯𑀼𑀢𑁆𑀢𑀁. ‘‘𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀧𑀢𑀦𑀁 𑀦 𑀤𑀺𑀲𑁆𑀲𑀢𑀻𑀢𑀺 𑀘𑁂? 𑀢𑀢𑁆𑀣𑀲𑁆𑀲 𑀦𑀺𑀩𑁆𑀩𑀢𑁆𑀢𑀺𑀬𑁂𑀯 𑀧𑀢𑀦𑀦𑁆𑀢𑀺 𑀦𑀢𑁆𑀣𑀺 𑀯𑀺𑀭𑁄𑀥𑁄. 𑀬𑀲𑁆𑀫𑀸 𑀫𑀸𑀢𑀼𑀬𑀸 𑀧𑀢𑀺𑀢𑁆𑀯𑀸 𑀧𑀭𑀺𑀯𑀢𑁆𑀢𑀺𑀢𑀮𑀺𑀗𑁆𑀕𑀸𑀬 𑀫𑀢𑀸𑀬 𑀲𑁄 𑀫𑀸𑀢𑀼𑀖𑀸𑀢𑀓𑁄 𑀳𑁄𑀢𑀺, 𑀦 𑀓𑁂𑀯𑀮𑀁 𑀫𑀦𑀼𑀲𑁆𑀲𑀧𑀼𑀭𑀺𑀲𑀖𑀸𑀢𑀓𑁄, 𑀢𑀲𑁆𑀫𑀸 𑀧𑀢𑀺𑀢𑀲𑁆𑀲𑁂𑀯 𑀯𑀲𑁂𑀦 𑀆𑀧𑀢𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀧𑀢𑀦𑀭𑀽𑀧𑀁 𑀧𑀫𑀸𑀡’’𑀦𑁆𑀢𑀺 𑀯𑀼𑀢𑁆𑀢𑀁, 𑀇𑀤𑀁 𑀧𑀦 𑀅𑀓𑀸𑀭𑀡𑀁 ‘‘𑀮𑀺𑀗𑁆𑀕𑁂 𑀧𑀭𑀺𑀯𑀢𑁆𑀢𑁂𑀧𑀺 𑀏𑀓𑀲𑀦𑁆𑀢𑀸𑀦𑀢𑁆𑀢𑀲𑁆𑀲 𑀅𑀯𑀺𑀕𑀢𑀢𑁆𑀢𑀸. 𑀫𑀦𑀼𑀲𑁆𑀲𑀪𑀽𑀢𑀁 𑀫𑀸𑀢𑀭𑀁 𑀯𑀸 𑀧𑀺𑀢𑀭𑀁 𑀯𑀸 𑀅𑀧𑀺 𑀧𑀭𑀺𑀯𑀢𑁆𑀢𑀮𑀺𑀗𑁆𑀕𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀦𑁆𑀢𑀲𑁆𑀲 𑀓𑀫𑁆𑀫𑀁 𑀆𑀦𑀦𑁆𑀢𑀭𑀺𑀬’’𑀦𑁆𑀢𑀺 𑀳𑀺 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁. 𑀬𑁂𑀦 𑀧𑀦 𑀲𑀪𑀸𑀯𑁂𑀦 𑀲𑀢𑁆𑀢𑀸 𑀚𑀸𑀬𑀦𑁆𑀢𑀺, 𑀢𑁂𑀦𑁂𑀯 𑀫𑀭𑀦𑁆𑀢𑀺, 𑀲𑁄𑀯 𑀢𑁂𑀲𑀁 𑀭𑀽𑀧𑀦𑁆𑀢𑀭𑀕𑁆𑀕𑀳𑀡𑁂𑀧𑀺 𑀲𑀪𑀸𑀯𑁄𑀢𑀺 ‘‘𑀫𑀭𑀡𑀭𑀽𑀧𑀫𑁂𑀯 𑀧𑀫𑀸𑀡𑀁, 𑀢𑀲𑁆𑀫𑀸 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 𑀯𑀼𑀢𑁆𑀢𑁄. 𑀧𑀘𑁆𑀙𑀺𑀫𑁄 𑀯𑀸𑀤𑁄 𑀧𑀫𑀸𑀡𑀁, 𑀏𑀯𑀁 𑀲𑀦𑁆𑀢𑁂 𑀧𑀸𑀴𑀺𑀬𑀁 ‘‘𑀬𑀓𑁆𑀔𑁄 𑀯𑀸 𑀧𑁂𑀢𑁄 𑀯𑀸 𑀢𑀺𑀭𑀘𑁆𑀙𑀸𑀦𑀕𑀢𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑁄 𑀯𑀸 𑀢𑀲𑁆𑀫𑀺𑀁 𑀧𑀢𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀧𑀢𑀺𑀢𑁂 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀫𑀭𑀢𑀺, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲𑀸’’𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀦𑁆𑀢𑀺 𑀘𑁂? 𑀦𑀸𑀬𑀁 𑀤𑁄𑀲𑁄. ‘‘𑀬𑀓𑁆𑀔𑁄 𑀯𑀸 𑀧𑁂𑀢𑁄 𑀯𑀸’’𑀢𑀺 𑀳𑀺 𑀧𑀞𑀫𑀁 𑀲𑀓𑀭𑀽𑀧𑀁 𑀤𑀲𑁆𑀲𑁂𑀢𑁆𑀯𑀸 𑀭𑀽𑀧𑀦𑁆𑀢𑀭𑀁 𑀕𑀳𑁂𑀢𑁆𑀯𑀸𑀧𑀺 𑀞𑀺𑀢𑁂𑀬𑁂𑀯 𑀬𑀓𑁆𑀔𑀧𑁂𑀢𑁂 𑀤𑀲𑁆𑀲𑁂𑀢𑀼𑀁 ‘‘𑀢𑀺𑀭𑀘𑁆𑀙𑀸𑀦𑀕𑀢𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑁄 𑀯𑀸’’𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀢𑀺𑀭𑀘𑁆𑀙𑀸𑀦𑀕𑀢𑀯𑀺𑀕𑁆𑀕𑀳𑁄 𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑁄 𑀯𑀸 𑀬𑀓𑁆𑀔𑁄 𑀯𑀸 𑀧𑁂𑀢𑁄 𑀯𑀸𑀢𑀺 𑀏𑀯𑀫𑁂𑀢𑁆𑀣 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸. 𑀓𑁂𑀘𑀺 𑀧𑀦 ‘‘𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑁂𑀦 𑀞𑀺𑀢𑀢𑀺𑀭𑀘𑁆𑀙𑀸𑀦𑀕𑀢𑀸𑀦𑀁 𑀆𑀯𑁂𑀡𑀺𑀓𑀁 𑀓𑀢𑁆𑀯𑀸 𑀣𑀼𑀮𑁆𑀮𑀘𑁆𑀘𑀬𑀁 𑀯𑀼𑀢𑁆𑀢𑀁 𑀯𑀺𑀬 𑀤𑀺𑀲𑁆𑀲𑀢𑀻’’𑀢𑀺 𑀯𑀤𑀦𑁆𑀢𑀺, 𑀢𑀁 𑀦 𑀬𑀼𑀢𑁆𑀢𑀁 𑀢𑀺𑀭𑀘𑁆𑀙𑀸𑀦𑁄 𑀯𑀸 𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑁄𑀢𑀺 𑀯𑀢𑁆𑀢𑀩𑁆𑀩𑀢𑁄, 𑀅𑀝𑁆𑀞𑀓𑀣𑀸𑀲𑀼 𑀘 𑀇𑀫𑀲𑁆𑀲 𑀯𑀺𑀲𑁂𑀲𑀲𑁆𑀲 𑀅𑀯𑀼𑀢𑁆𑀢𑀢𑁆𑀢𑀸. 𑀬𑀓𑁆𑀔𑀧𑁂𑀢𑀭𑀽𑀧𑁂𑀦 𑀫𑀢𑁂𑀧𑀺 𑀏𑀲𑁂𑀯 𑀦𑀬𑁄𑀢𑀺 𑀇𑀫𑀺𑀦𑀸 𑀫𑀭𑀡𑀭𑀽𑀧𑀲𑁆𑀲𑁂𑀯 𑀧𑀫𑀸𑀡𑀢𑁆𑀢𑀸 𑀣𑀼𑀮𑁆𑀮𑀘𑁆𑀘𑀬𑀁 𑀅𑀢𑀺𑀤𑀺𑀲𑀢𑀺.

𑀫𑀼𑀥𑀸𑀢𑀺 𑀅𑀫𑀽𑀮𑁂𑀦. 𑀲𑁄 𑀦𑀺𑀤𑁆𑀤𑁄𑀲𑁄𑀢𑀺 𑀢𑁂𑀦 𑀢𑀢𑁆𑀣 𑀓𑀢𑀧𑀬𑁄𑀕𑀲𑁆𑀲 𑀅𑀪𑀸𑀯𑀢𑁄, 𑀬𑀤𑀺 𑀧𑀦 𑀲𑁄𑀧𑀺 𑀢𑀢𑁆𑀣 𑀓𑀺𑀜𑁆𑀘𑀺 𑀓𑀭𑁄𑀢𑀺, 𑀦 𑀫𑀼𑀘𑁆𑀘𑀢𑀺 𑀏𑀯𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀏𑀯𑀁 𑀧𑀢𑀺𑀢𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀏𑀯𑀦𑁆𑀢𑀺 𑀏𑀯𑀁 𑀫𑀬𑀸 𑀓𑀢𑁂𑀢𑀺 𑀅𑀢𑁆𑀣𑁄. 𑀦 𑀦𑀲𑁆𑀲𑀺𑀲𑁆𑀲𑀦𑁆𑀢𑀻𑀢𑀺 𑀅𑀤𑀲𑁆𑀲𑀦𑀁 𑀦 𑀕𑀫𑀺𑀲𑁆𑀲𑀦𑁆𑀢𑀺, 𑀦 𑀧𑀮𑀸𑀬𑀺𑀲𑁆𑀲𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀼𑀉𑀤𑁆𑀥𑀭𑀸 𑀯𑀸 𑀪𑀯𑀺𑀲𑁆𑀲𑀦𑁆𑀢𑀻𑀢𑀺 𑀇𑀤𑀁 𑀕𑀫𑁆𑀪𑀻𑀭𑀲𑁆𑀲 𑀑𑀧𑀸𑀢𑀲𑁆𑀲 𑀧𑀽𑀭𑀡𑁂 𑀧𑀬𑁄𑀚𑀦𑀤𑀲𑁆𑀲𑀦𑀁. 𑀉𑀢𑁆𑀢𑀸𑀦𑁂 𑀓𑀢𑁂 𑀑𑀧𑀸𑀢𑁂 𑀲𑀻𑀖𑀁 𑀅𑀫𑁆𑀳𑁂𑀳𑀺 𑀕𑀳𑁂𑀢𑁆𑀯𑀸 𑀫𑀸𑀭𑁂𑀢𑀼𑀁 𑀲𑀼𑀉𑀤𑁆𑀥𑀭𑀸 𑀪𑀯𑀺𑀲𑁆𑀲𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀯𑀺𑀧𑁆𑀧𑀝𑀺𑀲𑀸𑀭𑁂 𑀉𑀧𑁆𑀧𑀦𑁆𑀦𑁂𑀢𑀺 𑀫𑀽𑀮𑀝𑁆𑀞𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀬𑀤𑀺 𑀧𑀦 𑀧𑀘𑁆𑀙𑀺𑀫𑁄𑀧𑀺 𑀮𑀪𑀺𑀢𑁆𑀯𑀸 𑀢𑀢𑁆𑀣 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀓𑀺𑀜𑁆𑀘𑀺 𑀓𑀢𑁆𑀯𑀸 𑀧𑀼𑀦 𑀯𑀺𑀧𑁆𑀧𑀝𑀺𑀲𑀸𑀭𑁂 𑀉𑀧𑁆𑀧𑀦𑁆𑀦𑁂 𑀏𑀯𑀁 𑀓𑀭𑁄𑀢𑀺, 𑀢𑀲𑁆𑀲𑀸𑀧𑀺 𑀏𑀲𑁂𑀯 𑀦𑀬𑁄. 𑀚𑀸𑀢𑀧𑀣𑀯𑀻 𑀚𑀸𑀢𑀸𑀢𑀺 𑀈𑀤𑀺𑀲𑁂 𑀧𑀼𑀦 𑀅𑀜𑁆𑀜𑁂𑀦 𑀑𑀧𑀸𑀢𑁂 𑀔𑀢𑁂 𑀢𑀤𑀸 𑀫𑀼𑀘𑁆𑀘𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁, 𑀚𑀸𑀢𑀧𑀣𑀯𑀻𑀲𑀤𑀺𑀲𑀁 𑀓𑀢𑁆𑀯𑀸 𑀧𑀼𑀦 𑀲𑀼𑀝𑁆𑀞𑀼 𑀓𑁄𑀝𑁆𑀝𑁂𑀢𑁆𑀯𑀸 𑀤𑀴𑁆𑀳𑀢𑀭𑀁 𑀧𑀽𑀭𑀺𑀢𑁂𑀧𑀺 𑀫𑀼𑀘𑁆𑀘𑀢𑀺𑀬𑁂𑀯𑀸𑀢𑀺 𑀕𑀳𑁂𑀢𑀩𑁆𑀩𑀁.

𑀣𑀤𑁆𑀥𑀢𑀭𑀦𑁆𑀢𑀺 𑀣𑀺𑀭𑀓𑀭𑀡𑀢𑁆𑀣𑀁 𑀅𑀧𑀭𑀸𑀧𑀭𑀸𑀬 𑀧𑀸𑀲𑀬𑀝𑁆𑀞𑀺𑀬𑀸 𑀲𑀤𑁆𑀥𑀺𑀁 𑀩𑀦𑁆𑀥𑀺𑀢𑁆𑀯𑀸 𑀯𑀸 𑀢𑀫𑁂𑀯 𑀯𑀸 𑀲𑀺𑀣𑀺𑀮𑀪𑀽𑀢𑀧𑀸𑀲𑀁 𑀣𑀤𑁆𑀥𑀢𑀭𑀁 𑀩𑀦𑁆𑀥𑀺𑀢𑁆𑀯𑀸 𑀞𑀧𑁂𑀢𑀺. 𑀔𑀸𑀡𑀼𑀓𑀦𑁆𑀢𑀺 𑀧𑀸𑀲𑀬𑀝𑁆𑀞𑀺𑀩𑀦𑁆𑀥𑀦𑀔𑀸𑀡𑀼𑀓𑀁. 𑀢𑀢𑁆𑀣𑀚𑀸𑀢𑀓𑀬𑀝𑁆𑀞𑀺𑀁 𑀙𑀺𑀦𑁆𑀤𑀺𑀢𑁆𑀯𑀸 𑀫𑀼𑀘𑁆𑀘𑀢𑀻𑀢𑀺 𑀇𑀤𑀁 𑀅𑀭𑀜𑁆𑀜𑁂 𑀬𑀣𑀸𑀞𑀺𑀢𑀫𑁂𑀯 𑀤𑀡𑁆𑀟𑀁 𑀫𑀽𑀮𑁂 𑀅𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀧𑀸𑀲𑀩𑀦𑁆𑀥𑀦𑀬𑁄𑀕𑁆𑀕𑀁 𑀓𑀢𑁆𑀯𑀸 𑀞𑀧𑀺𑀢𑀢𑁆𑀢𑀸 𑀢𑀢𑁆𑀣 𑀅𑀜𑁆𑀜𑁄𑀧𑀺 𑀓𑁄𑀘𑀺 𑀧𑀸𑀲𑀁 𑀩𑀦𑁆𑀥𑁂𑀬𑁆𑀬, 𑀫𑀽𑀮𑀝𑁆𑀞𑁄 𑀦 𑀫𑀼𑀘𑁆𑀘𑀢𑀺, 𑀢𑀁 𑀧𑀦 𑀫𑀽𑀮𑁂𑀧𑀺 𑀙𑀺𑀦𑁆𑀤𑀺𑀢𑁆𑀯𑀸 𑀔𑀡𑁆𑀟𑀸𑀔𑀡𑁆𑀟𑀁 𑀓𑀢𑁆𑀯𑀸 𑀫𑀼𑀘𑁆𑀘𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀭𑀚𑁆𑀚𑀼𑀓𑁂𑀢𑀺 𑀯𑀸𑀓𑁂𑀳𑀺 𑀏𑀓𑀯𑀸𑀭𑀁 𑀯𑀝𑁆𑀝𑀺𑀢𑀭𑀚𑁆𑀚𑀼𑀓𑁂. 𑀲𑀬𑀁 𑀯𑀝𑁆𑀝𑀺𑀢𑀦𑁆𑀢𑀺 𑀢𑀦𑀼𑀓𑀯𑀝𑁆𑀝𑀺𑀢𑀁 𑀤𑀺𑀕𑀼𑀡𑀢𑀺𑀕𑀼𑀡𑀢𑀸𑀧𑀸𑀤𑀦𑁂𑀦 𑀅𑀢𑁆𑀢𑀦𑀸 𑀯𑀝𑁆𑀝𑀺𑀢𑀁. 𑀉𑀩𑁆𑀩𑀝𑁆𑀝𑁂𑀢𑁆𑀯𑀸𑀢𑀺 𑀧𑀸𑀓𑀢𑀺𑀓𑀁 𑀓𑀢𑁆𑀯𑀸. 𑀕𑁄𑀧𑁂𑀦𑁆𑀢𑁄𑀧𑀻𑀢𑀺 𑀳𑀻𑀭𑀁 𑀳𑀻𑀭𑀁 𑀓𑀢𑁆𑀯𑀸 𑀕𑁄𑀧𑁂𑀦𑁆𑀢𑁄𑀧𑀺.

𑁧𑁭𑁭. 𑀆𑀮𑀫𑁆𑀩𑀦𑀭𑀼𑀓𑁆𑀔𑁄 𑀯𑀸𑀢𑀺 𑀢𑀢𑁆𑀣𑀚𑀸𑀢𑀓𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑀤𑀢𑁆𑀣𑀫𑁂𑀯 𑀓𑀢𑁆𑀯𑀸𑀢𑀺 𑀫𑀸𑀭𑀡𑀢𑁆𑀣𑀫𑁂𑀯 𑀅𑀬𑁄𑀩𑀻𑀚𑀲𑀫𑀼𑀝𑁆𑀞𑀸𑀧𑀦𑀸𑀤𑀺𑀦𑀸 𑀯𑀸𑀲𑀺𑀆𑀤𑀺𑀁 𑀲𑀢𑁆𑀣𑀁 𑀓𑀸𑀭𑁂𑀢𑁆𑀯𑀸. 𑀧𑀸𑀓𑀢𑀺𑀓𑀦𑁆𑀢𑀺 𑀅𑀜𑁆𑀜𑁂𑀳𑀺 𑀓𑀢𑀁 𑀧𑀓𑀢𑀺𑀲𑀢𑁆𑀣𑀫𑁂𑀯 𑀮𑀪𑀺𑀢𑁆𑀯𑀸 𑀫𑀽𑀮𑀝𑁆𑀞𑁂𑀦 𑀞𑀧𑀺𑀢𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀫𑀼𑀘𑁆𑀘𑀢𑀻𑀢𑀺 𑀫𑀽𑀮𑀝𑁆𑀞𑁄 𑀫𑀼𑀘𑁆𑀘𑀢𑀺. 𑀯𑀺𑀲𑀫𑀡𑁆𑀟𑀮𑀦𑁆𑀢𑀺 𑀫𑀜𑁆𑀘𑀧𑀻𑀞𑀸𑀤𑀻𑀲𑀼 𑀆𑀮𑀺𑀢𑁆𑀢𑀁 𑀯𑀺𑀲𑀫𑀡𑁆𑀟𑀮𑀁.

𑀯𑀢𑁆𑀯𑀸 𑀅𑀲𑀺𑀁 𑀉𑀧𑀦𑀺𑀓𑁆𑀔𑀺𑀧𑀢𑀻𑀢𑀺 𑀏𑀢𑁆𑀣 𑀫𑀼𑀔𑁂𑀦 𑀅𑀯𑀢𑁆𑀯𑀸 𑀫𑀦𑀲𑀸𑀯 𑀘𑀺𑀦𑁆𑀢𑁂𑀢𑁆𑀯𑀸 𑀉𑀧𑀦𑀺𑀓𑁆𑀔𑀺𑀧𑀦𑁂𑀧𑀺 𑀏𑀲𑁂𑀯 𑀦𑀬𑁄. 𑀧𑀼𑀭𑀺𑀫𑀦𑀬𑁂𑀦𑀸𑀢𑀺 𑀬𑁂𑀲𑀁 𑀳𑀢𑁆𑀣𑀢𑁄 𑀫𑀽𑀮𑀁 𑀕𑀳𑀺𑀢𑀦𑁆𑀢𑀺𑀆𑀤𑀺𑀦𑀸. 𑀯𑀺𑀲𑀪𑀸𑀕𑀭𑁄𑀕𑁄 𑀦𑀸𑀫 𑀓𑀼𑀝𑁆𑀞𑀸𑀤𑀺𑀯𑀺𑀭𑀽𑀧𑀪𑀸𑀯𑀢𑁄, 𑀕𑀡𑁆𑀟𑀧𑀻𑀴𑀓𑀸𑀤𑀺 𑀯𑀸 𑀚𑀻𑀯𑀺𑀢𑀧𑁆𑀧𑀯𑀢𑁆𑀢𑀺𑀬𑀸 𑀧𑀘𑁆𑀘𑀦𑀻𑀓𑀢𑁆𑀢𑀸.

𑁧𑁭𑁮. 𑀫𑀦𑀸𑀧𑀺𑀬𑁂𑀧𑀺 𑀏𑀲𑁂𑀯 𑀦𑀬𑁄𑀢𑀺 𑀏𑀢𑁂𑀦 𑀫𑀦𑀸𑀧𑀺𑀬𑀁 𑀭𑀽𑀧𑀁 𑀉𑀧𑀲𑀁𑀳𑀭𑀢𑀻𑀢𑀺 𑀏𑀢𑁆𑀣 𑀬𑀁 𑀯𑀸 𑀫𑀦𑀸𑀧𑀭𑀽𑀧𑀁, 𑀢𑀲𑁆𑀲 𑀲𑀫𑀻𑀧𑁂 𑀞𑀧𑁂𑀢𑀺, 𑀅𑀢𑁆𑀢𑀦𑀸 𑀯𑀸 𑀫𑀦𑀸𑀧𑀺𑀬𑁂𑀦 𑀭𑀽𑀧𑁂𑀦 𑀲𑀫𑀦𑁆𑀦𑀸𑀕𑀢𑁄 𑀢𑀺𑀝𑁆𑀞𑀢𑀻𑀢𑀺𑀆𑀤𑀺 𑀬𑁄𑀚𑁂𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀅𑀮𑀗𑁆𑀓𑀭𑀺𑀢𑁆𑀯𑀸 𑀉𑀧𑀲𑀁𑀳𑀭𑀢𑀻𑀢𑀺 ‘‘𑀅𑀮𑀸𑀪𑀓𑁂𑀦 𑀲𑀼𑀲𑁆𑀲𑀺𑀢𑁆𑀯𑀸 𑀫𑀭𑀢𑀽’’𑀢𑀺 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦 𑀉𑀧𑀲𑀁𑀳𑀭𑀢𑀺, 𑀢𑁂𑀦𑁂𑀯 ‘‘𑀲𑀘𑁂 𑀉𑀢𑁆𑀢𑀲𑀺𑀢𑁆𑀯𑀸 𑀫𑀭𑀢𑀺, 𑀯𑀺𑀲𑀗𑁆𑀓𑁂𑀢𑁄’’𑀢𑀺 𑀯𑀼𑀢𑁆𑀢𑀁. 𑀅𑀮𑀸𑀪𑀓𑁂𑀦 𑀲𑀼𑀲𑁆𑀲𑀺𑀢𑁆𑀯𑀸 𑀫𑀭𑀢𑀻𑀢𑀺 𑀏𑀢𑁆𑀣 𑀧𑀸𑀭𑀸𑀚𑀺𑀓𑁄𑀢𑀺 𑀧𑀸𑀞𑀲𑁂𑀲𑁄 𑀤𑀝𑁆𑀞𑀩𑁆𑀩𑁄. 𑀫𑀳𑀸𑀓𑀘𑁆𑀙𑀼 𑀦𑀸𑀫 𑀯𑀮𑁆𑀮𑀺𑀨𑀮𑀯𑀺𑀲𑁂𑀲𑁄, 𑀬𑀲𑁆𑀲 𑀫𑀚𑁆𑀚𑀸𑀭𑀧𑀸𑀤𑀲𑁆𑀲𑁂𑀯 𑀲𑀡𑁆𑀞𑀸𑀦𑀁 𑀤𑀼𑀓𑁆𑀔𑀲𑀫𑁆𑀨𑀲𑁆𑀲𑀸𑀦𑀺 𑀲𑀼𑀔𑀼𑀫𑀮𑁄𑀫𑀸𑀦𑀺 𑀘 𑀳𑁄𑀦𑁆𑀢𑀺. 𑀳𑀁𑀲𑀧𑀼𑀧𑁆𑀨𑀦𑁆𑀢𑀺 𑀳𑀁𑀲𑀸𑀤𑀻𑀦𑀁 𑀧𑀓𑁆𑀔𑀮𑁄𑀫𑀁 𑀲𑀦𑁆𑀥𑀸𑀬 𑀯𑀤𑀦𑁆𑀢𑀺. 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀫𑀭𑀢𑀺, 𑀅𑀦𑀸𑀧𑀢𑁆𑀢𑀻𑀢𑀺 𑀧𑀸𑀭𑀸𑀚𑀺𑀓𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑀤𑀼𑀓𑁆𑀓𑀝𑀸 𑀦 𑀫𑀼𑀘𑁆𑀘𑀦𑀢𑁄.

𑁧𑁭𑁯. 𑀅𑀲𑀜𑁆𑀘𑀺𑀘𑁆𑀘𑀸𑀢𑀺 𑀇𑀤𑀁 𑀫𑀭𑀡𑀲𑀁𑀯𑀢𑁆𑀢𑀦𑀺𑀓𑀉𑀧𑀓𑁆𑀓𑀫𑀲𑁆𑀲 𑀅𑀲𑀮𑁆𑀮𑀓𑁆𑀔𑀡𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀆𑀳 𑀇𑀫𑀺𑀦𑀸 𑀉𑀧𑀓𑁆𑀓𑀫𑁂𑀦𑀸𑀢𑀺𑀆𑀤𑀺. 𑀅𑀚𑀸𑀦𑀦𑁆𑀢𑀲𑁆𑀲𑀸𑀢𑀺 𑀇𑀤𑀁 𑀧𑀦 𑀫𑀭𑀡𑀲𑀁𑀯𑀢𑁆𑀢𑀦𑀺𑀓𑀯𑀺𑀲𑀸𑀤𑀺𑀉𑀧𑀓𑁆𑀓𑀫𑀓𑀭𑀡𑀲𑁆𑀲 𑀅𑀚𑀸𑀦𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀆𑀳 𑀇𑀫𑀺𑀦𑀸 𑀅𑀬𑀁 𑀫𑀭𑀺𑀲𑁆𑀲𑀢𑀻𑀢𑀺𑀆𑀤𑀺. 𑀦 𑀫𑀭𑀡𑀸𑀥𑀺𑀧𑁆𑀧𑀸𑀬𑀲𑁆𑀲𑀸𑀢𑀺 𑀇𑀤𑀁 𑀤𑀼𑀓𑁆𑀔𑀼𑀧𑁆𑀧𑀸𑀤𑀓𑀁 𑀉𑀧𑀓𑁆𑀓𑀫𑀦𑁆𑀢𑀺 𑀚𑀸𑀦𑀦𑁆𑀢𑀲𑁆𑀲𑀸𑀧𑀺 𑀫𑀭𑀡𑀸𑀥𑀺𑀧𑁆𑀧𑀸𑀬𑀲𑁆𑀲 𑀅𑀪𑀸𑀯𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀆𑀳 𑀫𑀭𑀡𑀁 𑀅𑀦𑀺𑀘𑁆𑀙𑀦𑁆𑀢𑀲𑁆𑀲𑀸𑀢𑀺𑀆𑀤𑀺. 𑀅𑀦𑀼𑀧𑁆𑀧𑀩𑀦𑁆𑀥𑀸𑀪𑀸𑀯𑀸𑀢𑀺 𑀤𑁄𑀫𑀦𑀲𑁆𑀲𑀯𑀻𑀣𑀻𑀦𑀁 𑀦𑀺𑀭𑀦𑁆𑀢𑀭𑀧𑁆𑀧𑀯𑀢𑁆𑀢𑀺𑀅𑀪𑀸𑀯𑀸.

𑀧𑀤𑀪𑀸𑀚𑀦𑀻𑀬𑀯𑀡𑁆𑀡𑀦𑀸𑀦𑀬𑁄 𑀦𑀺𑀝𑁆𑀞𑀺𑀢𑁄.

𑀯𑀺𑀦𑀻𑀢𑀯𑀢𑁆𑀣𑀼𑀯𑀡𑁆𑀡𑀦𑀸

𑁧𑁮𑁦. 𑀯𑁄𑀳𑀸𑀭𑀯𑀲𑁂𑀦𑀸𑀢𑀺 𑀧𑀼𑀩𑁆𑀩𑀪𑀸𑀕𑀯𑁄𑀳𑀸𑀭𑀯𑀲𑁂𑀦, 𑀫𑀭𑀡𑀸𑀥𑀺𑀧𑁆𑀧𑀸𑀬𑀲𑁆𑀲 𑀲𑀦𑁆𑀦𑀺𑀝𑁆𑀞𑀸𑀧𑀓𑀘𑁂𑀢𑀦𑀸𑀓𑁆𑀔𑀡𑁂 𑀓𑀭𑀼𑀡𑀸𑀬 𑀅𑀪𑀸𑀯𑀢𑁄 𑀓𑀸𑀭𑀼𑀜𑁆𑀜𑁂𑀦 𑀧𑀸𑀲𑁂 𑀩𑀤𑁆𑀥𑀲𑀽𑀓𑀭𑀫𑁄𑀘𑀦𑀁 (𑀧𑀸𑀭𑀸. 𑁧𑁫𑁩) 𑀯𑀺𑀬 𑀦 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀬𑀣𑀸𑀬𑀼𑀦𑀸’’𑀢𑀺 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 ‘‘𑀬𑀣𑀸𑀦𑀼𑀲𑀦𑁆𑀥𑀺𑀦𑀸’’𑀢𑀺 𑀧𑀭𑀺𑀬𑀸𑀬𑀦𑁆𑀢𑀭𑁂𑀦 𑀯𑀼𑀢𑁆𑀢𑀁. 𑀳𑁂𑀝𑁆𑀞𑀸 𑀓𑀺𑀲𑁆𑀫𑀺𑀜𑁆𑀘𑀺 𑀯𑀺𑀚𑁆𑀚𑀫𑀸𑀦𑁂 𑀲𑀸𑀝𑀓𑀁 𑀯𑀮𑀺𑀁 𑀕𑀡𑁆𑀳𑀸𑀢𑀻𑀢𑀺 𑀆𑀳 ‘‘𑀬𑀲𑁆𑀫𑀺𑀁 𑀯𑀮𑀺 𑀦 𑀧𑀜𑁆𑀜𑀸𑀬𑀢𑀻’’𑀢𑀺. 𑀧𑀝𑀺𑀯𑁂𑀓𑁆𑀔𑀡𑀜𑁆𑀘𑁂𑀢𑀁 𑀕𑀺𑀳𑀻𑀦𑀁 𑀲𑀦𑁆𑀢𑀓𑁂 𑀏𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀧𑀸𑀴𑀺𑀬𑀁 𑀫𑀼𑀲𑀮𑁂 𑀉𑀲𑁆𑀲𑀺𑀢𑁂𑀢𑀺 𑀅𑀜𑁆𑀜𑀫𑀜𑁆𑀜𑀁 𑀉𑀧𑀢𑁆𑀣𑀫𑁆𑀪𑁂𑀢𑁆𑀯𑀸 𑀤𑁆𑀯𑀻𑀲𑀼 𑀫𑀼𑀲𑀮𑁂𑀲𑀼 𑀪𑀺𑀢𑁆𑀢𑀺𑀁 𑀅𑀧𑀲𑁆𑀲𑀸𑀬 𑀞𑀧𑀺𑀢𑁂𑀲𑀽𑀢𑀺 𑀅𑀢𑁆𑀣𑁄. 𑀉𑀤𑀼𑀓𑁆𑀔𑀮𑀪𑀡𑁆𑀟𑀺𑀓𑀦𑁆𑀢𑀺 𑀉𑀤𑀼𑀓𑁆𑀔𑀮𑀢𑁆𑀣𑀸𑀬 𑀆𑀦𑀻𑀢𑀁 𑀤𑀸𑀭𑀼𑀪𑀡𑁆𑀟𑀁. 𑀧𑀭𑀺𑀩𑀦𑁆𑀥𑀦𑁆𑀢𑀺 𑀪𑁄𑀚𑀦𑀧𑀭𑀺𑀩𑀦𑁆𑀥𑀁, 𑀪𑁄𑀚𑀦𑀦𑁆𑀢𑀭𑀸𑀬𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁧𑁮𑁧. 𑀅𑀕𑁆𑀕𑀓𑀸𑀭𑀺𑀓𑀦𑁆𑀢𑀺 𑀏𑀢𑁆𑀣 𑀓𑀸𑀭𑀺𑀓-𑀲𑀤𑁆𑀤𑀲𑁆𑀲 𑀪𑀸𑀯𑀯𑀘𑀦𑀢𑁆𑀢𑀸 ‘‘𑀅𑀕𑁆𑀕𑀓𑀺𑀭𑀺𑀬’’𑀦𑁆𑀢𑀺 𑀅𑀢𑁆𑀣𑀁 𑀯𑀢𑁆𑀯𑀸𑀧𑀺 𑀬𑀲𑁆𑀫𑀸 𑀓𑀺𑀭𑀺𑀬𑀁 𑀤𑀸𑀢𑀼𑀁 𑀦 𑀲𑀓𑁆𑀓𑀸, 𑀢𑀲𑁆𑀫𑀸 𑀤𑀸𑀦𑀲𑀗𑁆𑀔𑀸𑀢𑀸𑀬 𑀅𑀕𑁆𑀕𑀓𑀺𑀭𑀺𑀬𑀸𑀬 𑀬𑀼𑀢𑁆𑀢𑀧𑀺𑀡𑁆𑀟𑀧𑀸𑀢𑀫𑁂𑀯 𑀇𑀥 𑀉𑀧𑀘𑀸𑀭𑀬𑀼𑀢𑁆𑀢𑀺𑀬𑀸 𑀅𑀕𑁆𑀕𑀓𑀺𑀭𑀺𑀬𑀸𑀢𑀺 𑀕𑀳𑁂𑀢𑀩𑁆𑀩𑀦𑁆𑀢𑀺 𑀆𑀳 𑀧𑀞𑀫𑀁 𑀮𑀤𑁆𑀥𑀧𑀺𑀡𑁆𑀟𑀧𑀸𑀢𑀦𑁆𑀢𑀺𑀆𑀤𑀺.

𑁧𑁮𑁨-𑁩. 𑀤𑀡𑁆𑀟𑀫𑀼𑀕𑁆𑀕𑀭𑀦𑀺𑀔𑀸𑀤𑀦𑀯𑁂𑀫𑀸𑀤𑀻𑀦𑀁 𑀯𑀲𑁂𑀦𑀸𑀢𑀺 𑀏𑀢𑁆𑀣 𑀤𑀡𑁆𑀟𑁄 𑀦𑀸𑀫 𑀤𑀻𑀖𑀤𑀡𑁆𑀟𑁄. 𑀫𑀼𑀕𑁆𑀕𑀭𑁄 𑀦𑀸𑀫 𑀭𑀲𑁆𑀲𑁄. 𑀯𑁂𑀫𑀁 𑀦𑀸𑀫 𑀢𑀦𑁆𑀢𑀯𑀸𑀬𑀸𑀦𑀁 𑀯𑀢𑁆𑀣𑀯𑀸𑀬𑀦𑀉𑀧𑀓𑀭𑀡𑀁, 𑀬𑁂𑀦 𑀯𑀻𑀢𑀁 𑀢𑀦𑁆𑀢𑀁 𑀖𑀝𑁆𑀝𑁂𑀦𑁆𑀢𑀺. 𑀯𑀺𑀪𑀢𑁆𑀢𑀺𑀩𑁆𑀬𑀢𑁆𑀢𑀬𑁂𑀦𑀸𑀢𑀺 𑀯𑀺𑀪𑀢𑁆𑀢𑀺𑀯𑀺𑀧𑀭𑀺𑀡𑀸𑀫𑁂𑀦. 𑀯𑀺𑀲𑁂𑀲𑀸𑀥𑀺𑀕𑀫𑁄𑀢𑀺 𑀲𑀫𑀸𑀥𑀺 𑀯𑀺𑀧𑀲𑁆𑀲𑀦𑀸 𑀘. 𑀯𑀺𑀲𑁂𑀲𑀸𑀥𑀺𑀕𑀫𑀦𑁆𑀢𑀺 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀧𑀝𑀺𑀮𑀸𑀪𑀁. 𑀩𑁆𑀬𑀸𑀓𑀭𑀺𑀢𑁆𑀯𑀸𑀢𑀺 𑀆𑀭𑁄𑀘𑁂𑀢𑁆𑀯𑀸, 𑀇𑀤𑀜𑁆𑀘 𑀯𑀺𑀲𑁂𑀲𑀲𑁆𑀲 𑀅𑀥𑀺𑀕𑀢𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀅𑀥𑀺𑀕𑀢𑀯𑀺𑀲𑁂𑀲𑀸 𑀳𑀺 𑀤𑀺𑀝𑁆𑀞𑀸𑀦𑀼𑀕𑀢𑀺𑀆𑀧𑀚𑁆𑀚𑀦𑀢𑁆𑀣𑀁 𑀮𑀚𑁆𑀚𑀻𑀪𑀺𑀓𑁆𑀔𑀽𑀦𑀁 𑀅𑀯𑀲𑁆𑀲𑀁 𑀅𑀥𑀺𑀕𑀫𑀁 𑀩𑁆𑀬𑀸𑀓𑀭𑁄𑀦𑁆𑀢𑀺, 𑀅𑀥𑀺𑀕𑀢𑀯𑀺𑀲𑁂𑀲𑁂𑀦 𑀧𑀦 𑀅𑀩𑁆𑀬𑀸𑀓𑀭𑀺𑀢𑁆𑀯𑀸𑀧𑀺 𑀆𑀳𑀸𑀭𑀁 𑀉𑀧𑀘𑁆𑀙𑀺𑀦𑁆𑀤𑀺𑀢𑀼𑀁 𑀦 𑀯𑀝𑁆𑀝𑀢𑀺, 𑀅𑀥𑀺𑀕𑀫𑀦𑁆𑀢𑀭𑀸𑀬𑀯𑀺𑀦𑁄𑀤𑀦𑀢𑁆𑀣𑀫𑁂𑀯 𑀆𑀳𑀸𑀭𑀽𑀧𑀘𑁆𑀙𑁂𑀤𑀲𑁆𑀲 𑀅𑀦𑀼𑀜𑁆𑀜𑀸𑀢𑀢𑁆𑀢𑀸 𑀢𑀤𑀥𑀺𑀕𑀫𑁂 𑀲𑁄 𑀦 𑀓𑀸𑀢𑀩𑁆𑀩𑁄𑀯. 𑀓𑀺𑀁 𑀧𑀦𑀸𑀥𑀺𑀕𑀫𑀁 𑀆𑀭𑁄𑀘𑁂𑀢𑀼𑀁 𑀯𑀝𑁆𑀝𑀢𑀻𑀢𑀺 𑀆𑀳 𑀲𑀪𑀸𑀕𑀸𑀦𑀦𑁆𑀢𑀺𑀆𑀤𑀺. 𑀪𑀡𑁆𑀟𑀓𑀁 𑀯𑀸 𑀥𑁄𑀯𑀦𑁆𑀢𑀸𑀢𑀺 𑀘𑀻𑀯𑀭𑀁 𑀯𑀸 𑀥𑁄𑀯𑀦𑁆𑀢𑀸. 𑀥𑁄𑀯𑀦𑀤𑀡𑁆𑀟𑀓𑀦𑁆𑀢𑀺 𑀘𑀻𑀯𑀭𑀥𑁄𑀯𑀦𑀤𑀡𑁆𑀟𑀁.

𑁧𑁮𑁫. 𑀫𑀤𑁆𑀤𑀸𑀧𑁂𑀢𑁆𑀯𑀸 𑀧𑀸𑀢𑁂𑀢𑀺, 𑀯𑀺𑀲𑀗𑁆𑀓𑁂𑀢𑁄𑀢𑀺 𑀬𑀣𑀸𑀡𑀢𑁆𑀢𑀺𑀬𑀸 𑀅𑀓𑀢𑀢𑁆𑀢𑀸 𑀯𑀼𑀢𑁆𑀢𑀁, 𑀬𑀤𑀺 𑀧𑀦 𑀆𑀡𑀸𑀧𑀓𑁄 𑀫𑀤𑁆𑀤𑀦𑀫𑁆𑀧𑀺 𑀫𑀤𑁆𑀤𑀸𑀧𑀦𑀫𑁆𑀧𑀺 𑀲𑀦𑁆𑀥𑀸𑀬 𑀯𑁄𑀳𑀸𑀭𑀯𑀲𑁂𑀦 ‘‘𑀫𑀤𑁆𑀤𑀺𑀢𑁆𑀯𑀸 𑀧𑀸𑀢𑁂𑀳𑀻’’𑀢𑀺 𑀯𑀤𑀢𑀺, 𑀯𑀺𑀲𑀗𑁆𑀓𑁂𑀢𑁄 𑀦𑀢𑁆𑀣𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. ‘‘𑀫𑀭𑀡𑀯𑀡𑁆𑀡𑀁 𑀯𑀸 𑀲𑀁𑀯𑀡𑁆𑀡𑁂𑀬𑁆𑀬𑀸’’𑀢𑀺 (𑀧𑀸𑀭𑀸. 𑁧𑁭𑁧) 𑀯𑀼𑀢𑁆𑀢𑀢𑁆𑀢𑀸 𑀆𑀳 ‘‘𑀧𑀭𑀺𑀬𑀸𑀬𑁄 𑀦𑀸𑀫 𑀦𑀢𑁆𑀣𑀻’’𑀢𑀺, 𑀧𑀭𑀺𑀬𑀸𑀬𑁂𑀦 𑀆𑀧𑀢𑁆𑀢𑀺𑀫𑁄𑀓𑁆𑀔𑁄 𑀦 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀯𑀺𑀚𑀸𑀬𑀦𑀢𑁆𑀣𑀸𑀬 𑀕𑀩𑁆𑀪𑀕𑁆𑀕𑀳𑀡𑀢𑁄 𑀧𑀼𑀭𑁂𑀢𑀭𑀫𑁂𑀯 𑀪𑁂𑀲𑀚𑁆𑀚𑀁 𑀤𑁂𑀦𑁆𑀢𑀲𑁆𑀲 𑀓𑀼𑀘𑁆𑀙𑀺𑀬𑀁 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀕𑀩𑁆𑀪𑁄 𑀯𑀺𑀦𑀲𑁆𑀲𑀢𑀻𑀢𑀺 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦 𑀤𑀺𑀦𑁆𑀦𑁂 𑀢𑀣𑀸𑀫𑀭𑀦𑁆𑀢𑀸𑀦𑀁 𑀯𑀲𑁂𑀦 𑀓𑀫𑁆𑀫𑀩𑀤𑁆𑀥𑁄, 𑀓𑀼𑀘𑁆𑀙𑀺𑀬𑀁 𑀦 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻𑀢𑀺 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦 𑀤𑀺𑀦𑁆𑀦𑁂 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀫𑀭𑀢𑀼 𑀯𑀸 𑀫𑀸 𑀯𑀸, 𑀦𑁂𑀯𑀢𑁆𑀣𑀺 𑀓𑀫𑁆𑀫𑀩𑀤𑁆𑀥𑁄.

𑀲𑀳𑀥𑀫𑁆𑀫𑀺𑀓𑀸𑀦𑀦𑁆𑀢𑀺 𑀏𑀓𑀲𑁆𑀲 𑀲𑀢𑁆𑀣𑀼 𑀲𑀸𑀲𑀦𑁂 𑀲𑀳𑀲𑀺𑀓𑁆𑀔𑀫𑀸𑀦𑀥𑀫𑁆𑀫𑀸𑀦𑀁, 𑀲𑀳𑀥𑀫𑁆𑀫𑁂 𑀯𑀸 𑀲𑀺𑀓𑁆𑀔𑀸𑀧𑀤𑁂 𑀲𑀺𑀓𑁆𑀔𑀦𑀪𑀸𑀯𑁂𑀦 𑀦𑀺𑀬𑀼𑀢𑁆𑀢𑀸𑀦𑀁. 𑀲𑀫𑀲𑀻𑀮𑀲𑀤𑁆𑀥𑀸𑀦𑀦𑁆𑀢𑀺𑀆𑀤𑀺𑀦𑀸 𑀤𑀼𑀲𑁆𑀲𑀻𑀮𑀸𑀦𑀁 𑀪𑀺𑀦𑁆𑀦𑀮𑀤𑁆𑀥𑀺𑀓𑀸𑀦𑀜𑁆𑀘 𑀅𑀓𑀸𑀢𑀼𑀫𑁆𑀧𑀺 𑀮𑀩𑁆𑀪𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀜𑀸𑀢𑀓𑀧𑀯𑀸𑀭𑀺𑀢𑀝𑁆𑀞𑀸𑀦𑀢𑁄𑀢𑀺 𑀅𑀢𑁆𑀢𑀦𑁄 𑀢𑁂𑀲𑀁 𑀯𑀸 𑀜𑀸𑀢𑀓𑀧𑀯𑀸𑀭𑀺𑀢𑀝𑁆𑀞𑀸𑀦𑀢𑁄. 𑀅𑀭𑀺𑀬𑁂𑀳𑀺 𑀅𑀓𑀢𑀸 𑀅𑀬𑀼𑀢𑁆𑀢𑀯𑀲𑁂𑀦 𑀅𑀓𑀢𑀧𑀼𑀩𑁆𑀩𑀸 𑀯𑀺𑀜𑁆𑀜𑀢𑁆𑀢𑀺 𑀅𑀓𑀢𑀯𑀺𑀜𑁆𑀜𑀢𑁆𑀢𑀺.

𑀧𑀝𑀺𑀬𑀸𑀤𑀺𑀬𑀢𑀻𑀢𑀺 𑀲𑀫𑁆𑀧𑀸𑀤𑀺𑀬𑀢𑀺. 𑀅𑀓𑀸𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀏𑀢𑁆𑀣 𑀤𑀼𑀓𑁆𑀓𑀝𑀁 𑀯𑀤𑀦𑁆𑀢𑀺, 𑀅𑀬𑀼𑀢𑁆𑀢𑀢𑀸𑀯𑀲𑁂𑀦𑁂𑀯 𑀧𑀦𑁂𑀢𑁆𑀣 𑀅𑀓𑀭𑀡𑀧𑀝𑀺𑀓𑁆𑀔𑁂𑀧𑁄 𑀬𑀼𑀢𑁆𑀢𑁄, 𑀦 𑀆𑀧𑀢𑁆𑀢𑀺𑀯𑀲𑁂𑀦𑀸𑀢𑀺 𑀕𑀳𑁂𑀢𑀩𑁆𑀩𑀁. 𑀬𑀸𑀯 𑀜𑀸𑀢𑀓𑀸 𑀧𑀲𑁆𑀲𑀦𑁆𑀢𑀻𑀢𑀺 𑀬𑀸𑀯 𑀢𑀲𑁆𑀲 𑀜𑀸𑀢𑀓𑀸 𑀧𑀲𑁆𑀲𑀦𑁆𑀢𑀺.

𑀧𑀺𑀢𑀼𑀪𑀕𑀺𑀦𑀻 𑀧𑀺𑀢𑀼𑀘𑁆𑀙𑀸. 𑀫𑀸𑀢𑀼𑀪𑀸𑀢𑀸 𑀫𑀸𑀢𑀼𑀮𑁄. 𑀦𑀧𑁆𑀧𑀳𑁄𑀦𑁆𑀢𑀻𑀢𑀺 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀦 𑀬𑀸𑀘𑀦𑁆𑀢𑀻𑀢𑀺 𑀮𑀚𑁆𑀚𑀸𑀬 𑀦 𑀬𑀸𑀘𑀦𑁆𑀢𑀺. ‘‘𑀆𑀪𑁄𑀕𑀁 𑀓𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀅𑀜𑁆𑀜𑀣𑀸 𑀤𑁂𑀦𑁆𑀢𑀲𑁆𑀲 𑀆𑀧𑀢𑁆𑀢𑀺𑀬𑁂𑀯. 𑀓𑁂𑀘𑀺 𑀧𑀦 ‘‘𑀆𑀪𑁄𑀕𑀁 𑀅𑀓𑀢𑁆𑀯𑀸𑀧𑀺 𑀤𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀤𑀦𑁆𑀢𑀺, 𑀢𑀁 𑀦 𑀬𑀼𑀢𑁆𑀢𑀁 𑀪𑁂𑀲𑀚𑁆𑀚𑀓𑀭𑀡𑀲𑁆𑀲 𑀧𑀸𑀴𑀺𑀬𑀁 ‘‘𑀅𑀦𑀸𑀧𑀢𑁆𑀢𑀺 𑀪𑀺𑀓𑁆𑀔𑀼 𑀧𑀸𑀭𑀸𑀚𑀺𑀓𑀲𑁆𑀲, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀧𑀸𑀭𑀸. 𑁧𑁮𑁭) 𑀏𑀯𑀁 𑀅𑀦𑁆𑀢𑀭𑀸𑀧𑀢𑁆𑀢𑀺𑀤𑀲𑁆𑀲𑀦𑀯𑀲𑁂𑀦 𑀲𑀸𑀫𑀜𑁆𑀜𑀢𑁄 𑀧𑀝𑀺𑀓𑁆𑀔𑀺𑀢𑁆𑀢𑀢𑁆𑀢𑀸, 𑀅𑀝𑁆𑀞𑀓𑀣𑀸𑀬𑀁 𑀅𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀓𑀭𑁄𑀦𑁆𑀢𑀲𑁆𑀲 𑀲𑀼𑀢𑁆𑀢𑁂𑀦𑁂𑀯 𑀆𑀧𑀢𑁆𑀢𑀺 𑀲𑀺𑀤𑁆𑀥𑀸𑀢𑀺 𑀤𑀝𑁆𑀞𑀩𑁆𑀩𑀸, 𑀢𑁂𑀦𑁂𑀯 𑀅𑀝𑁆𑀞𑀓𑀣𑀸𑀬𑀫𑁆𑀧𑀺 ‘‘𑀢𑁂𑀲𑀜𑁆𑀜𑁂𑀯 𑀲𑀦𑁆𑀢𑀓’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀜𑁆𑀜𑁂𑀲𑀦𑁆𑀢𑀺 𑀅𑀲𑀸𑀮𑁄𑀳𑀺𑀢𑀸𑀦𑀁, 𑀢𑁂𑀦𑀸𑀳 𑀏𑀢𑁂𑀲𑀁 𑀧𑀼𑀢𑁆𑀢𑀧𑀭𑀫𑁆𑀧𑀭𑀸𑀬𑀸𑀢𑀺𑀆𑀤𑀺. 𑀓𑀼𑀮𑀧𑀭𑀺𑀯𑀝𑁆𑀝𑁄𑀢𑀺 𑀓𑀼𑀮𑀲𑁆𑀫𑀺𑀁 𑀜𑀸𑀢𑀺𑀧𑀭𑀫𑁆𑀧𑀭𑀸. 𑀪𑁂𑀲𑀚𑁆𑀚𑀁 𑀓𑀭𑁄𑀦𑁆𑀢𑀲𑁆𑀲𑀸𑀢𑀺 𑀬𑀣𑀸𑀯𑀼𑀢𑁆𑀢𑀯𑀺𑀥𑀺𑀦𑀸 𑀓𑀭𑁄𑀦𑁆𑀢𑀲𑁆𑀲, ‘‘𑀢𑀸𑀯𑀓𑀸𑀮𑀺𑀓𑀁 𑀤𑀲𑁆𑀲𑀸𑀫𑀻’’𑀢𑀺 𑀆𑀪𑁄𑀕𑀁 𑀅𑀓𑀢𑁆𑀯𑀸 𑀤𑁂𑀦𑁆𑀢𑀲𑁆𑀲𑀸𑀧𑀺 𑀧𑀦 𑀅𑀦𑁆𑀢𑀭𑀸𑀧𑀢𑁆𑀢𑀺 𑀤𑀼𑀓𑁆𑀓𑀝𑀁 𑀯𑀺𑀦𑀸 𑀫𑀺𑀘𑁆𑀙𑀸𑀚𑀻𑀯𑀁 𑀯𑀸 𑀓𑀼𑀮𑀤𑀽𑀲𑀦𑀁 𑀯𑀸 𑀦 𑀳𑁄𑀢𑀺𑀬𑁂𑀯, 𑀢𑁂𑀦𑀸𑀳 𑁋 ‘‘𑀯𑁂𑀚𑁆𑀚𑀓𑀫𑁆𑀫𑀁 𑀯𑀸 𑀓𑀼𑀮𑀤𑀽𑀲𑀓𑀸𑀧𑀢𑁆𑀢𑀺 𑀯𑀸 𑀦 𑀳𑁄𑀢𑀻’’𑀢𑀺. 𑀜𑀸𑀢𑀓𑀸𑀦𑀜𑁆𑀳𑀺 𑀲𑀦𑁆𑀢𑀓𑀁 𑀬𑀸𑀘𑀺𑀢𑁆𑀯𑀸𑀧𑀺 𑀕𑀳𑁂𑀢𑀼𑀁 𑀯𑀝𑁆𑀝𑀢𑀺, 𑀢𑀲𑁆𑀫𑀸 𑀢𑀢𑁆𑀣 𑀓𑀼𑀮𑀤𑀽𑀲𑀦𑀸𑀤𑀺 𑀦 𑀲𑀺𑀬𑀸. 𑀲𑀩𑁆𑀩𑀧𑀤𑁂𑀲𑀽𑀢𑀺 ‘‘𑀘𑀽𑀴𑀫𑀸𑀢𑀼𑀬𑀸’’𑀢𑀺𑀆𑀤𑀻𑀲𑀼 𑀲𑀩𑁆𑀩𑀧𑀤𑁂𑀲𑀼.

𑀉𑀧𑀚𑁆𑀛𑀸𑀬𑀲𑁆𑀲 𑀆𑀳𑀭𑀸𑀫𑀸𑀢𑀺 𑀇𑀤𑀁 𑀉𑀧𑀚𑁆𑀛𑀸𑀬𑁂𑀦 ‘‘𑀫𑀫 𑀜𑀸𑀢𑀓𑀸𑀦𑀁 𑀪𑁂𑀲𑀚𑁆𑀚𑀁 𑀆𑀳𑀭𑀣𑀸’’𑀢𑀺 𑀆𑀡𑀢𑁆𑀢𑁂𑀳𑀺 𑀓𑀢𑁆𑀢𑀩𑁆𑀩𑀯𑀺𑀥𑀺𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁, 𑀇𑀫𑀺𑀦𑀸 𑀘 𑀲𑀸𑀫𑀡𑁂𑀭𑀸𑀤𑀻𑀦𑀁 𑀅𑀧𑀘𑁆𑀘𑀸𑀲𑀸𑀬𑀧𑀺 𑀧𑀭𑀚𑀦𑀲𑁆𑀲 𑀪𑁂𑀲𑀚𑁆𑀚𑀓𑀭𑀡𑀁 𑀦 𑀯𑀝𑁆𑀝𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀯𑀼𑀢𑁆𑀢𑀦𑀬𑁂𑀦 𑀧𑀭𑀺𑀬𑁂𑀲𑀺𑀢𑁆𑀯𑀸𑀢𑀺 𑀇𑀫𑀺𑀦𑀸 ‘‘𑀪𑀺𑀓𑁆𑀔𑀸𑀘𑀸𑀭𑀯𑀢𑁆𑀢𑁂𑀦 𑀯𑀸’’𑀢𑀺 𑀇𑀫𑀺𑀦𑀸, ‘‘𑀜𑀸𑀢𑀺𑀲𑀸𑀫𑀡𑁂𑀭𑁂𑀳𑀻’’𑀢𑀺 𑀇𑀫𑀺𑀦𑀸 𑀘 𑀯𑀼𑀢𑁆𑀢𑀫𑀢𑁆𑀣𑀁 𑀅𑀢𑀺𑀤𑀺𑀲𑀢𑀺. 𑀅𑀧𑀘𑁆𑀘𑀸𑀲𑀻𑀲𑀦𑁆𑀢𑁂𑀦𑀸𑀢𑀺 𑀆𑀕𑀦𑁆𑀢𑀼𑀓𑀘𑁄𑀭𑀸𑀤𑀻𑀦𑀁 𑀓𑀭𑁄𑀦𑁆𑀢𑁂𑀦𑀸𑀧𑀺 ‘‘𑀫𑀦𑀼𑀲𑁆𑀲𑀸 𑀦𑀸𑀫 𑀉𑀧𑀓𑀸𑀭𑀓𑀸 𑀳𑁄𑀦𑁆𑀢𑀻’’𑀢𑀺 𑀅𑀢𑁆𑀢𑀦𑁄 𑀢𑁂𑀳𑀺 𑀮𑀸𑀪𑀁 𑀅𑀧𑀢𑁆𑀣𑀬𑀦𑁆𑀢𑁂𑀦. 𑀧𑀘𑁆𑀘𑀸𑀲𑀸𑀬 𑀓𑀭𑁄𑀦𑁆𑀢𑀲𑁆𑀲 𑀧𑀦 𑀯𑁂𑀚𑁆𑀚𑀓𑀫𑁆𑀫𑀓𑀼𑀮𑀤𑀽𑀲𑀦𑀸𑀤𑀺𑀤𑁄𑀲𑁄 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀏𑀯𑀁 𑀉𑀧𑀓𑀸𑀭𑁂 𑀓𑀢𑁂 𑀲𑀸𑀲𑀦𑀕𑀼𑀡𑀁 𑀜𑀢𑁆𑀯𑀸 𑀧𑀲𑀻𑀤𑀦𑁆𑀢𑀺, 𑀲𑀗𑁆𑀖𑀲𑁆𑀲 𑀯𑀸 𑀉𑀧𑀓𑀸𑀭𑀓𑀸 𑀳𑁄𑀦𑁆𑀢𑀻’’𑀢𑀺 𑀓𑀭𑀡𑁂 𑀧𑀦 𑀤𑁄𑀲𑁄 𑀦𑀢𑁆𑀣𑀺. 𑀓𑁂𑀘𑀺 𑀧𑀦 ‘‘𑀅𑀧𑀘𑁆𑀘𑀸𑀲𑀻𑀲𑀦𑁆𑀢𑁂𑀦 𑀆𑀕𑀦𑁆𑀢𑀼𑀓𑀸𑀤𑀻𑀦𑀁 𑀧𑀝𑀺𑀓𑁆𑀔𑀺𑀢𑁆𑀢𑀧𑀼𑀕𑁆𑀕𑀮𑀸𑀤𑀻𑀦𑀫𑁆𑀧𑀺 𑀤𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀤𑀦𑁆𑀢𑀺, 𑀢𑀁 𑀦 𑀬𑀼𑀢𑁆𑀢𑀁 𑀓𑀢𑁆𑀢𑀩𑁆𑀩𑀸𑀓𑀢𑁆𑀢𑀩𑁆𑀩𑀝𑁆𑀞𑀸𑀦𑀯𑀺𑀪𑀸𑀕𑀲𑁆𑀲𑀦𑀺𑀭𑀢𑁆𑀣𑀓𑀢𑁆𑀢𑀧𑁆𑀧𑀲𑀗𑁆𑀕𑀢𑁄 ‘‘𑀅𑀧𑀘𑁆𑀘𑀸𑀲𑀻𑀲𑀦𑁆𑀢𑁂𑀦 𑀲𑀩𑁆𑀩𑁂𑀲𑀁 𑀤𑀸𑀢𑀼𑀁 𑀓𑀸𑀢𑀼𑀜𑁆𑀘 𑀯𑀝𑁆𑀝𑀢𑀻’’𑀢𑀺 𑀏𑀢𑁆𑀢𑀓𑀫𑀢𑁆𑀢𑀲𑁆𑀲𑁂𑀯 𑀯𑀢𑁆𑀢𑀩𑁆𑀩𑀢𑁄. 𑀅𑀧𑀘𑁆𑀘𑀸𑀲𑀻𑀲𑀦𑀜𑁆𑀘 𑀫𑀺𑀘𑁆𑀙𑀸𑀚𑀻𑀯𑀓𑀼𑀮𑀤𑀽𑀲𑀦𑀸𑀤𑀺𑀤𑁄𑀲𑀦𑀺𑀲𑁂𑀥𑀦𑀢𑁆𑀣𑀫𑁂𑀯 𑀯𑀼𑀢𑁆𑀢𑀁 𑀪𑁂𑀲𑀚𑁆𑀚𑀓𑀭𑀡𑀲𑀗𑁆𑀔𑀢𑀸𑀬 𑀇𑀫𑀺𑀲𑁆𑀲𑀸 𑀅𑀦𑁆𑀢𑀭𑀸𑀧𑀢𑁆𑀢𑀺𑀬𑀸 𑀫𑀼𑀘𑁆𑀘𑀦𑀢𑁆𑀣𑀁 𑀆𑀕𑀦𑁆𑀢𑀼𑀓𑀘𑁄𑀭𑀸𑀤𑀻𑀦𑀁 𑀅𑀦𑀼𑀜𑁆𑀜𑀸𑀢𑀸𑀦𑀁 𑀤𑀸𑀦𑁂𑀦𑁂𑀯 𑀢𑀸𑀬 𑀆𑀧𑀢𑁆𑀢𑀺𑀬𑀸 𑀫𑀼𑀘𑁆𑀘𑀦𑀢𑁄𑀢𑀺 𑀕𑀳𑁂𑀢𑀩𑁆𑀩𑀁. 𑀢𑁂𑀦𑁂𑀯 𑀅𑀧𑀘𑁆𑀘𑀸𑀲𑀻𑀲𑀦𑁆𑀢𑁂𑀦𑀸𑀧𑀺 𑀅𑀓𑀸𑀢𑀩𑁆𑀩𑀝𑁆𑀞𑀸𑀦𑀁 𑀤𑀲𑁆𑀲𑁂𑀢𑀼𑀁 𑀲𑀤𑁆𑀥𑀁 𑀓𑀼𑀮𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀼𑀘𑁆𑀙𑀦𑁆𑀢𑀻𑀢𑀺 𑀇𑀫𑀺𑀦𑀸 𑀤𑀺𑀝𑁆𑀞𑀤𑀺𑀝𑁆𑀞𑀭𑁄𑀕𑀻𑀦𑀁 𑀧𑀭𑀺𑀬𑀸𑀬𑁂𑀦𑀸𑀧𑀺 𑀯𑀢𑁆𑀯𑀸 𑀯𑀺𑀘𑀭𑀡𑀁 𑀅𑀬𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀧𑀼𑀘𑁆𑀙𑀺𑀢𑀲𑁆𑀲𑀸𑀧𑀺 𑀧𑀦 𑀧𑀘𑁆𑀘𑀸𑀲𑀻𑀲𑀦𑁆𑀢𑀲𑁆𑀲 𑀧𑀭𑀺𑀬𑀸𑀬𑀓𑀣𑀸𑀧𑀺 𑀦 𑀯𑀝𑁆𑀝𑀢𑀻𑀢𑀺 𑀯𑀤𑀦𑁆𑀢𑀺.

𑀲𑀫𑀼𑀮𑁆𑀮𑀧𑁂𑀲𑀻𑀢𑀺 𑀅𑀧𑀘𑁆𑀘𑀸𑀲𑀻𑀲𑀦𑁆𑀢𑁄 𑀏𑀯𑀁 𑀅𑀜𑁆𑀜𑀫𑀜𑁆𑀜𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀺. 𑀆𑀘𑀭𑀺𑀬𑀪𑀸𑀕𑁄𑀢𑀺 𑀯𑀺𑀦𑀬𑀸𑀘𑀸𑀭𑀁 𑀅𑀓𑁄𑀧𑁂𑀢𑁆𑀯𑀸 𑀪𑁂𑀲𑀚𑁆𑀚𑀸𑀘𑀺𑀓𑁆𑀔𑀡𑁂𑀦 𑀯𑁂𑀚𑁆𑀚𑀸𑀘𑀭𑀺𑀬𑀪𑀸𑀕𑁄𑀢𑀺 𑀅𑀢𑁆𑀣𑁄. 𑀧𑀼𑀧𑁆𑀨𑀧𑀽𑀚𑀦𑀢𑁆𑀣𑀸𑀬 𑀲𑀫𑁆𑀧𑀝𑀺𑀘𑁆𑀙𑀺𑀬𑀫𑀸𑀦𑀁 𑀭𑀽𑀧𑀺𑀬𑀁 𑀅𑀢𑁆𑀢𑀦𑁄 𑀲𑀦𑁆𑀢𑀓𑀢𑁆𑀢𑀪𑀚𑀦𑁂𑀦 𑀦𑀺𑀲𑁆𑀲𑀕𑁆𑀕𑀺𑀬𑀫𑁂𑀯𑀸𑀢𑀺 𑀆𑀳 ‘‘𑀓𑀧𑁆𑀧𑀺𑀬𑀯𑀲𑁂𑀦 𑀕𑀸𑀳𑀸𑀧𑁂𑀢𑁆𑀯𑀸’’𑀢𑀺, ‘‘𑀅𑀫𑁆𑀳𑀸𑀓𑀁 𑀭𑀽𑀧𑀺𑀬𑀁 𑀦 𑀯𑀝𑁆𑀝𑀢𑀺, 𑀧𑀼𑀧𑁆𑀨𑀧𑀽𑀚𑀦𑀢𑁆𑀣𑀁 𑀧𑀼𑀧𑁆𑀨𑀁 𑀯𑀝𑁆𑀝𑀢𑀻’’𑀢𑀺𑀆𑀤𑀺𑀦𑀸 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀓𑀧𑁆𑀧𑀺𑀬𑁂𑀦 𑀓𑀫𑁆𑀫𑁂𑀦 𑀕𑀸𑀳𑀸𑀧𑁂𑀢𑁆𑀯𑀸𑀢𑀺 𑀅𑀢𑁆𑀣𑁄.

𑀬𑀤𑀺 ‘‘𑀧𑀭𑀺𑀢𑁆𑀢𑀁 𑀓𑀭𑁄𑀣𑀸’’𑀢𑀺 𑀯𑀼𑀢𑁆𑀢𑁂 𑀓𑀭𑁄𑀦𑁆𑀢𑀺, 𑀪𑁂𑀲𑀚𑁆𑀚𑀓𑀭𑀡𑀁 𑀯𑀺𑀬 𑀕𑀺𑀳𑀺𑀓𑀫𑁆𑀫𑀁 𑀯𑀺𑀬 𑀳𑁄𑀢𑀻𑀢𑀺 ‘‘𑀦 𑀓𑀸𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁. ‘‘𑀧𑀭𑀺𑀢𑁆𑀢𑀁 𑀪𑀡𑀣𑀸’’𑀢𑀺 𑀯𑀼𑀢𑁆𑀢𑁂 𑀧𑀦 𑀥𑀫𑁆𑀫𑀚𑁆𑀛𑁂𑀲𑀦𑀢𑁆𑀢𑀸 𑀅𑀦𑀚𑁆𑀛𑀺𑀝𑁆𑀞𑁂𑀦𑀧𑀺 𑀪𑀡𑀺𑀢𑀩𑁆𑀩𑁄 𑀥𑀫𑁆𑀫𑁄, 𑀧𑀕𑁂𑀯 𑀅𑀚𑁆𑀛𑀺𑀝𑁆𑀞𑁂𑀦𑀸𑀧𑀻𑀢𑀺 ‘‘𑀓𑀸𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁. 𑀘𑀸𑀮𑁂𑀢𑁆𑀯𑀸 𑀲𑀼𑀢𑁆𑀢𑀁 𑀧𑀭𑀺𑀫𑀚𑁆𑀚𑀺𑀢𑁆𑀯𑀸𑀢𑀺 𑀇𑀤𑀁 ‘‘𑀧𑀭𑀺𑀢𑁆𑀢𑀸𑀡𑀁 𑀏𑀢𑁆𑀣 𑀧𑀯𑁂𑀲𑁂𑀫𑀻’’𑀢𑀺 𑀘𑀺𑀢𑁆𑀢𑁂𑀦 𑀏𑀯𑀁 𑀓𑀢𑁂 𑀧𑀭𑀺𑀢𑁆𑀢𑀸𑀡𑀸 𑀢𑀢𑁆𑀣 𑀧𑀯𑁂𑀲𑀺𑀢𑀸 𑀦𑀸𑀫 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁. 𑀯𑀺𑀳𑀸𑀭𑀢𑁄…𑀧𑁂… 𑀤𑀼𑀓𑁆𑀓𑀝𑀦𑁆𑀢𑀺 𑀇𑀤𑀁 𑀅𑀜𑁆𑀜𑀸𑀢𑀓𑀕𑀳𑀝𑁆𑀞𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀯𑀤𑀦𑁆𑀢𑀺. 𑀧𑀸𑀤𑁂𑀲𑀼 𑀉𑀤𑀓𑀁 𑀆𑀓𑀺𑀭𑀺𑀢𑁆𑀯𑀸𑀢𑀺 𑀇𑀤𑀁 𑀢𑀲𑁆𑀫𑀺𑀁 𑀤𑁂𑀲𑁂 𑀘𑀸𑀭𑀺𑀢𑁆𑀢𑀯𑀲𑁂𑀦 𑀯𑀼𑀢𑁆𑀢𑀁. 𑀯𑀼𑀢𑁆𑀢𑀜𑁆𑀳𑀺 ‘‘𑀢𑀢𑁆𑀣 𑀧𑀸𑀴𑀺𑀬𑀸 𑀦𑀺𑀲𑀺𑀦𑁆𑀦𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀸𑀤𑁂𑀲𑀼 𑀭𑁄𑀕𑀯𑀽𑀧𑀲𑀫𑀦𑀸𑀤𑀺𑀅𑀢𑁆𑀣𑀸𑀬 𑀉𑀤𑀓𑀁 𑀲𑀺𑀜𑁆𑀘𑀺𑀢𑁆𑀯𑀸 𑀧𑀭𑀺𑀢𑁆𑀢𑀁 𑀓𑀸𑀢𑀼𑀁 𑀲𑀼𑀢𑁆𑀢𑀜𑁆𑀘 𑀞𑀧𑁂𑀢𑁆𑀯𑀸 ‘𑀧𑀭𑀺𑀢𑁆𑀢𑀁 𑀪𑀡𑀣𑀸’𑀢𑀺 𑀯𑀢𑁆𑀯𑀸 𑀕𑀘𑁆𑀙𑀦𑁆𑀢𑀺. 𑀏𑀯𑀜𑁆𑀳𑀺 𑀓𑀭𑀺𑀬𑀫𑀸𑀦𑁂 𑀬𑀤𑀺 𑀧𑀸𑀤𑁂 𑀅𑀧𑀦𑁂𑀦𑁆𑀢𑀺, 𑀫𑀦𑀼𑀲𑁆𑀲𑀸 𑀢𑀁 𑀅𑀯𑀫𑀗𑁆𑀕𑀮𑀦𑁆𑀢𑀺 𑀫𑀜𑁆𑀜𑀦𑁆𑀢𑀺, 𑀭𑁄𑀕𑁄 𑀯𑀸 𑀦 𑀯𑀽𑀧𑀲𑀫𑀺𑀲𑁆𑀲𑀢𑀻’’𑀢𑀺. 𑀢𑁂𑀦𑀸𑀳 ‘‘𑀦 𑀧𑀸𑀤𑀸 𑀅𑀧𑀦𑁂𑀢𑀩𑁆𑀩𑀸’’𑀢𑀺. 𑀫𑀢𑀲𑀭𑀻𑀭𑀤𑀲𑁆𑀲𑀦𑁂 𑀯𑀺𑀬 𑀓𑁂𑀯𑀮𑀁 𑀲𑀼𑀲𑀸𑀦𑀤𑀲𑁆𑀲𑀦𑁂𑀧𑀺 ‘‘𑀇𑀤𑀁 𑀚𑀸𑀢𑀸𑀦𑀁 𑀲𑀢𑁆𑀢𑀸𑀦𑀁 𑀔𑀬𑀕𑀫𑀦𑀝𑁆𑀞𑀸𑀦’’𑀦𑁆𑀢𑀺 𑀫𑀭𑀡𑀲𑀜𑁆𑀜𑀸 𑀉𑀧𑁆𑀧𑀚𑁆𑀚𑀢𑀻𑀢𑀺 𑀆𑀳 ‘‘𑀲𑀻𑀯𑀣𑀺𑀓𑀤𑀲𑁆𑀲𑀦𑁂…𑀧𑁂… ‘𑀫𑀭𑀡𑀲𑁆𑀲𑀢𑀺𑀁 𑀧𑀝𑀺𑀮𑀪𑀺𑀲𑁆𑀲𑀸𑀫𑀸’𑀢𑀺 𑀓𑀫𑁆𑀫𑀝𑁆𑀞𑀸𑀦𑀲𑀻𑀲𑁂𑀦 𑀕𑀦𑁆𑀢𑀼𑀁 𑀯𑀝𑁆𑀝𑀢𑀻’’𑀢𑀺. 𑀮𑁂𑀲𑀓𑀧𑁆𑀧𑀁 𑀅𑀓𑀢𑁆𑀯𑀸 𑀲𑀫𑀼𑀧𑁆𑀧𑀦𑁆𑀦𑀲𑀼𑀤𑁆𑀥𑀘𑀺𑀢𑁆𑀢𑁂𑀦 ‘‘𑀧𑀭𑀺𑀯𑀸𑀭𑀢𑁆𑀣𑀸𑀬 𑀆𑀕𑀘𑁆𑀙𑀦𑁆𑀢𑀽’’𑀢𑀺 𑀯𑀼𑀢𑁆𑀢𑁂𑀧𑀺 𑀕𑀦𑁆𑀢𑀼𑀁 𑀯𑀝𑁆𑀝𑀢𑀺.

𑀅𑀦𑀸𑀫𑀝𑁆𑀞𑀧𑀺𑀡𑁆𑀟𑀧𑀸𑀢𑁄𑀢𑀺 𑀅𑀕𑁆𑀕𑀳𑀺𑀢𑀅𑀕𑁆𑀕𑁄, 𑀅𑀧𑀭𑀺𑀪𑀼𑀢𑁆𑀢𑁄𑀢𑀺 𑀅𑀢𑁆𑀣𑁄. 𑀓𑀳𑀸𑀧𑀡𑀕𑁆𑀖𑀦𑀓𑁄 𑀳𑁄𑀢𑀻𑀢𑀺 𑀇𑀫𑀺𑀦𑀸 𑀤𑀸𑀬𑀓𑁂𑀳𑀺 𑀩𑀳𑀼𑀩𑁆𑀬𑀜𑁆𑀚𑀦𑁂𑀦 𑀲𑀫𑁆𑀧𑀸𑀤𑁂𑀢𑁆𑀯𑀸 𑀲𑀓𑁆𑀓𑀘𑁆𑀘𑀁 𑀤𑀺𑀦𑁆𑀦𑀪𑀸𑀯𑀁 𑀤𑀻𑀧𑁂𑀢𑀺. 𑀣𑀸𑀮𑀓𑁂𑀢𑀺 𑀲𑀗𑁆𑀖𑀺𑀓𑁂 𑀓𑀁𑀲𑀸𑀤𑀺𑀫𑀬𑁂 𑀣𑀸𑀮𑀓𑁂, 𑀧𑀢𑁆𑀢𑁄𑀧𑀺 𑀏𑀢𑁆𑀣 𑀲𑀗𑁆𑀕𑀬𑁆𑀳𑀢𑀺. 𑀦 𑀯𑀝𑁆𑀝𑀢𑀻𑀢𑀺 𑀇𑀫𑀺𑀦𑀸 𑀤𑀼𑀓𑁆𑀓𑀝𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀤𑀸𑀫𑀭𑀺𑀓𑀘𑁄𑀭𑀲𑁆𑀲𑀸𑀢𑀺 𑀭𑀚𑁆𑀚𑀁 𑀧𑀢𑁆𑀣𑁂𑀦𑁆𑀢𑀲𑁆𑀲 𑀧𑀸𑀓𑀝𑀘𑁄𑀭𑀲𑁆𑀲. 𑀅𑀤𑀻𑀬𑀫𑀸𑀦𑁂𑀧𑀺 ‘‘𑀦 𑀤𑁂𑀦𑁆𑀢𑀻’’𑀢𑀺 𑀓𑀼𑀚𑁆𑀛𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀆𑀫𑀺𑀲𑀲𑁆𑀲 𑀥𑀫𑁆𑀫𑀲𑁆𑀲 𑀘 𑀅𑀮𑀸𑀪𑁂𑀦 𑀅𑀢𑁆𑀢𑀦𑁄 𑀧𑀭𑀲𑁆𑀲 𑀘 𑀅𑀦𑁆𑀢𑀭𑁂 𑀲𑀫𑁆𑀪𑀯𑀦𑁆𑀢𑀲𑁆𑀲 𑀙𑀺𑀤𑁆𑀤𑀲𑁆𑀲 𑀘 𑀯𑀺𑀯𑀭𑀲𑁆𑀲 𑀧𑀝𑀺𑀲𑀦𑁆𑀣𑀭𑀡𑀁 𑀧𑀺𑀤𑀳𑀦𑀁 𑀧𑀝𑀺𑀲𑀦𑁆𑀣𑀸𑀭𑁄, 𑀲𑁄 𑀧𑀦 𑀥𑀫𑁆𑀫𑀸𑀫𑀺𑀲𑀯𑀲𑁂𑀦 𑀤𑀼𑀯𑀺𑀥𑁄. 𑀢𑀢𑁆𑀣 𑀆𑀫𑀺𑀲𑀧𑀝𑀺𑀲𑀦𑁆𑀣𑀸𑀭𑀁 𑀲𑀦𑁆𑀥𑀸𑀬 ‘‘𑀓𑀲𑁆𑀲 𑀓𑀸𑀢𑀩𑁆𑀩𑁄, 𑀓𑀲𑁆𑀲 𑀦 𑀓𑀸𑀢𑀩𑁆𑀩𑁄’’𑀢𑀺 𑀯𑀼𑀢𑁆𑀢𑀁. ‘‘𑀆𑀕𑀦𑁆𑀢𑀼𑀓𑀲𑁆𑀲 𑀯𑀸…𑀧𑁂… 𑀓𑀢𑁆𑀢𑀩𑁆𑀩𑁄 𑀬𑁂𑀯𑀸’’𑀢𑀺 𑀲𑀗𑁆𑀔𑁂𑀧𑀢𑁄 𑀯𑀼𑀢𑁆𑀢𑀫𑀢𑁆𑀣𑀁 𑀧𑀸𑀓𑀝𑀁 𑀓𑀸𑀢𑀼𑀁 𑀆𑀕𑀦𑁆𑀢𑀼𑀓𑀁 𑀢𑀸𑀯𑀸𑀢𑀺𑀆𑀤𑀺𑀫𑀸𑀳. 𑀔𑀻𑀡𑀧𑀭𑀺𑀩𑁆𑀩𑀬𑀦𑁆𑀢𑀺 𑀇𑀫𑀺𑀦𑀸 𑀅𑀕𑀢𑀺𑀪𑀸𑀯𑀁 𑀓𑀸𑀭𑀼𑀜𑁆𑀜𑀪𑀸𑀚𑀦𑀢𑀜𑁆𑀘 𑀤𑀲𑁆𑀲𑁂𑀢𑀺, 𑀢𑁂𑀦 𑀘 𑀢𑀩𑁆𑀩𑀺𑀥𑀼𑀭𑀸𑀦𑀁 𑀲𑀫𑀺𑀤𑁆𑀥𑀸𑀦𑀁 𑀤𑀸𑀬𑀓𑀸𑀤𑀻𑀦𑀁 𑀆𑀕𑀦𑁆𑀢𑀼𑀓𑀢𑁆𑀢𑁂𑀧𑀺 𑀤𑀸𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀲𑀺𑀤𑁆𑀥𑀁 𑀳𑁄𑀢𑀺. 𑀢𑀡𑁆𑀟𑀼𑀮𑀸𑀤𑀺𑀫𑁆𑀳𑀺 𑀤𑀸𑀢𑀩𑁆𑀩𑁂 𑀲𑀢𑀺 ‘‘𑀅𑀯𑁂𑀮𑀸𑀬𑀁…𑀧𑁂… 𑀦 𑀯𑀢𑁆𑀢𑀩𑁆𑀩𑁄’’𑀢𑀺 𑀯𑀼𑀢𑁆𑀢𑀁. ‘‘𑀅𑀧𑀘𑁆𑀘𑀸𑀲𑀻𑀲𑀦𑁆𑀢𑁂𑀦𑀸’’𑀢𑀺 𑀯𑀢𑁆𑀯𑀸 𑀧𑀘𑁆𑀘𑀸𑀲𑀻𑀲𑀦𑀧𑁆𑀧𑀓𑀸𑀭𑀁 𑀤𑀲𑁆𑀲𑁂𑀢𑀼𑀁 𑀫𑀦𑀼𑀲𑁆𑀲𑀸 𑀦𑀸𑀫𑀸𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀦𑀦𑀼𑀜𑁆𑀜𑀸𑀢𑀸𑀦𑀁 𑀧𑀦 𑀅𑀧𑀘𑁆𑀘𑀸𑀲𑀻𑀲𑀦𑁆𑀢𑁂𑀦𑀸𑀧𑀺 𑀤𑀸𑀢𑀼𑀁 𑀦 𑀯𑀝𑁆𑀝𑀢𑀺 𑀲𑀤𑁆𑀥𑀸𑀤𑁂𑀬𑁆𑀬𑀯𑀺𑀦𑀺𑀧𑀸𑀢𑀢𑁆𑀢𑀸, 𑀧𑀘𑁆𑀘𑀸𑀲𑀻𑀲𑀸𑀬 𑀧𑀦 𑀲𑀢𑀺 𑀓𑀼𑀮𑀤𑀽𑀲𑀦𑀫𑁆𑀧𑀺 𑀳𑁄𑀢𑀺.

𑀉𑀩𑁆𑀩𑀸𑀲𑁂𑀢𑁆𑀯𑀸𑀢𑀺 𑀲𑀫𑀦𑁆𑀢𑀢𑁄 𑀢𑀺𑀬𑁄𑀚𑀦𑀁 𑀯𑀺𑀮𑀼𑀫𑁆𑀧𑀦𑁆𑀢𑁂 𑀫𑀦𑀼𑀲𑁆𑀲𑁂 𑀧𑀮𑀸𑀧𑁂𑀢𑁆𑀯𑀸. 𑀯𑀭𑀧𑁄𑀢𑁆𑀣𑀓𑀘𑀺𑀢𑁆𑀢𑀢𑁆𑀣𑀭𑀡𑀦𑁆𑀢𑀺 𑀅𑀦𑁂𑀓𑀧𑁆𑀧𑀓𑀸𑀭𑀇𑀢𑁆𑀣𑀺𑀧𑀼𑀭𑀺𑀲𑀸𑀤𑀺𑀉𑀢𑁆𑀢𑀫𑀭𑀽𑀧𑀯𑀺𑀘𑀺𑀢𑁆𑀢𑀁 𑀅𑀢𑁆𑀣𑀭𑀡𑀁.

𑁧𑁮𑁭. 𑀲𑀢𑁆𑀢𑀭𑀲𑀯𑀕𑁆𑀕𑀺𑀬𑁂𑀲𑀼 𑀧𑀼𑀩𑁆𑀩𑁂 𑀏𑀓𑀲𑁆𑀲 𑀅𑀗𑁆𑀕𑀼𑀮𑀺𑀧𑀢𑁄𑀤𑀓𑁂𑀦 𑀫𑀸𑀭𑀺𑀢𑀢𑁆𑀢𑀸 𑀲𑁂𑀲𑁂𑀲𑀼 𑀲𑁄𑀴𑀲𑀚𑀦𑁂𑀲𑀼 𑀉𑀤𑀭𑀁 𑀆𑀭𑀼𑀳𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀫𑁂𑀓𑀁 𑀞𑀧𑁂𑀢𑁆𑀯𑀸 ‘‘𑀲𑁂𑀲𑀸𑀧𑀺 𑀧𑀦𑁆𑀦𑀭𑀲 𑀚𑀦𑀸’’𑀢𑀺 𑀯𑀼𑀢𑁆𑀢𑀁. 𑀅𑀤𑀽𑀳𑀮𑀧𑀸𑀲𑀸𑀡𑀸 𑀯𑀺𑀬𑀸𑀢𑀺 𑀅𑀤𑀽𑀳𑀮𑁂 𑀆𑀭𑁄𑀧𑀺𑀢𑀧𑀸𑀲𑀸𑀡𑀸 𑀯𑀺𑀬. 𑀓𑀫𑁆𑀫𑀸𑀥𑀺𑀧𑁆𑀧𑀸𑀬𑀸𑀢𑀺 𑀢𑀚𑁆𑀚𑀦𑀻𑀬𑀸𑀤𑀺𑀓𑀫𑁆𑀫𑀓𑀭𑀡𑀸𑀥𑀺𑀧𑁆𑀧𑀸𑀬𑀸.

𑀆𑀯𑀸𑀳𑁂𑀢𑁆𑀯𑀸𑀢𑀺 𑀆𑀯𑀺𑀲𑀸𑀧𑁂𑀢𑁆𑀯𑀸. 𑀭𑀽𑀧𑀁 𑀓𑀢𑁆𑀯𑀸 𑀳𑀢𑁆𑀣𑀧𑀸𑀤𑀸𑀤𑀻𑀦𑀺 𑀙𑀺𑀦𑁆𑀤𑀦𑁆𑀢𑀻𑀢𑀺 𑀢𑀲𑁆𑀫𑀺𑀁 𑀧𑀺𑀝𑁆𑀞𑀸𑀤𑀺𑀫𑀬𑁂 𑀭𑀽𑀧𑁂 𑀅𑀫𑀦𑀼𑀲𑁆𑀲𑀁 𑀆𑀯𑀸𑀳𑁂𑀢𑁆𑀯𑀸 𑀢𑀲𑁆𑀲 𑀳𑀢𑁆𑀣𑀧𑀸𑀤𑀸𑀤𑀻𑀦𑀺 𑀙𑀺𑀦𑁆𑀤𑀦𑁆𑀢𑀺. 𑀲𑀓𑁆𑀓𑀁 𑀤𑁂𑀯𑀭𑀸𑀚𑀸𑀦𑀁 𑀫𑀸𑀭𑁂𑀬𑁆𑀬𑀸𑀢𑀺 𑀇𑀤𑀁 𑀲𑀫𑁆𑀪𑀸𑀯𑀦𑀯𑀲𑁂𑀦 𑀯𑀼𑀢𑁆𑀢𑀁. 𑀦 𑀳𑀺 𑀢𑀸𑀤𑀺𑀲𑀸 𑀫𑀳𑀸𑀦𑀼𑀪𑀸𑀯𑀸 𑀬𑀓𑁆𑀔𑀸 𑀲𑀢𑁆𑀣𑀖𑀸𑀢𑀸𑀭𑀳𑀸 𑀳𑁄𑀦𑁆𑀢𑀺 𑀤𑁂𑀯𑀸𑀲𑀼𑀭𑀬𑀼𑀤𑁆𑀥𑁂𑀧𑀺 𑀢𑁂𑀲𑀁 𑀲𑀢𑁆𑀣𑀧𑁆𑀧𑀳𑀸𑀭𑁂𑀦 𑀫𑀭𑀡𑀸𑀪𑀸𑀯𑀸.

𑁧𑁮𑁮. 𑀧𑀳𑀸𑀭𑁄 𑀦 𑀤𑀸𑀢𑀩𑁆𑀩𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀫𑀦𑀼𑀲𑁆𑀲𑀁 𑀓𑁄𑀥𑀘𑀺𑀢𑁆𑀢𑁂𑀦 𑀧𑀳𑀭𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀫𑁂𑀯. 𑀘𑀺𑀓𑀺𑀘𑁆𑀙𑀸𑀥𑀺𑀧𑁆𑀧𑀸𑀬𑁂𑀦 𑀧𑀳𑀭𑀦𑁆𑀢𑀲𑁆𑀲 𑀅𑀦𑀸𑀘𑀸𑀭𑁄𑀢𑀺 𑀕𑀳𑁂𑀢𑀩𑁆𑀩𑁄. 𑀢𑀸𑀮𑀧𑀡𑁆𑀡𑀁…𑀧𑁂… 𑀩𑀦𑁆𑀥𑀺𑀢𑀩𑁆𑀩𑀦𑁆𑀢𑀺 𑀅𑀫𑀦𑀼𑀲𑁆𑀲𑀸 𑀢𑀸𑀮𑀧𑀡𑁆𑀡𑀩𑀦𑁆𑀥𑀦𑁂𑀦 𑀧𑀮𑀸𑀬𑀦𑁆𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁, 𑀇𑀤𑀜𑁆𑀘 𑀕𑀺𑀳𑀻𑀦𑀁 𑀯𑁂𑀚𑁆𑀚𑀓𑀫𑁆𑀫𑀯𑀲𑁂𑀦 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀺.

𑁧𑁮𑁯. 𑀬𑁄 𑀭𑀼𑀓𑁆𑀔𑁂𑀦 𑀑𑀢𑁆𑀣𑀢𑁄𑀧𑀺 𑀦 𑀫𑀭𑀢𑀻𑀢𑀺𑀆𑀤𑀻𑀲𑀼 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀪𑀽𑀢𑀕𑀸𑀫𑀲𑀺𑀓𑁆𑀔𑀸𑀧𑀤𑀝𑁆𑀞𑀓𑀣𑀸𑀬𑀁 𑀲𑀬𑀫𑁂𑀯 𑀯𑀓𑁆𑀔𑀢𑀺, 𑀢𑀁 𑀢𑀢𑁆𑀣𑁂𑀯 𑀕𑀳𑁂𑀢𑀩𑁆𑀩𑀁.

𑁧𑁯𑁦. 𑀤𑀩𑁆𑀩𑀽𑀧𑀓𑀭𑀡𑀸𑀦𑀻𑀢𑀺 𑀓𑁂𑀳𑀺𑀘𑀺 𑀙𑀺𑀦𑁆𑀤𑀺𑀢𑁆𑀯𑀸 𑀞𑀧𑀺𑀢𑀸𑀦𑀺 𑀲𑀧𑀭𑀺𑀕𑁆𑀕𑀳𑀺𑀢𑀸𑀦𑀺 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑀢𑁆𑀣 𑀳𑀺 𑀞𑀸𑀦𑀸𑀘𑀸𑀯𑀦𑀸𑀪𑀸𑀯𑁂𑀦 𑀯𑀺𑀦𑀸𑀲𑀸𑀥𑀺𑀧𑁆𑀧𑀸𑀬𑀲𑁆𑀲 𑀤𑀼𑀓𑁆𑀓𑀝𑀁 𑀯𑀼𑀢𑁆𑀢𑀁. 𑀔𑀺𑀟𑁆𑀟𑀸𑀥𑀺𑀧𑁆𑀧𑀸𑀬𑁂𑀦𑀸𑀧𑀺 𑀤𑀼𑀓𑁆𑀓𑀝𑀦𑁆𑀢𑀺 𑀲𑀼𑀓𑁆𑀔𑀢𑀺𑀡𑀸𑀤𑀻𑀲𑀼 𑀅𑀕𑁆𑀕𑀺𑀓𑀭𑀡𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀅𑀮𑁆𑀮𑁂𑀲𑀼 𑀧𑀦 𑀓𑀻𑀴𑀸𑀥𑀺𑀧𑁆𑀧𑀸𑀬𑁂𑀦𑀧𑀺 𑀓𑀭𑁄𑀦𑁆𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀫𑁂𑀯. 𑀧𑀝𑀺𑀧𑀓𑁆𑀔𑀪𑀽𑀢𑁄, 𑀧𑀝𑀺𑀫𑀼𑀔𑀁 𑀕𑀘𑁆𑀙𑀦𑁆𑀢𑁄 𑀯𑀸 𑀅𑀕𑁆𑀕𑀺 𑀧𑀝𑀕𑁆𑀕𑀺, 𑀢𑀲𑁆𑀲 𑀅𑀮𑁆𑀮𑀢𑀺𑀡𑀸𑀤𑀻𑀲𑀼𑀧𑀺 𑀤𑀸𑀦𑀁 𑀅𑀦𑀼𑀜𑁆𑀜𑀸𑀢𑀁, 𑀢𑀁 𑀤𑁂𑀦𑁆𑀢𑁂𑀦 𑀤𑀽𑀭𑀢𑁄 𑀆𑀕𑀘𑁆𑀙𑀦𑁆𑀢𑀁 𑀤𑀸𑀯𑀕𑁆𑀕𑀺𑀁 𑀤𑀺𑀲𑁆𑀯𑀸 𑀯𑀺𑀳𑀸𑀭𑀲𑁆𑀲 𑀲𑀫𑀦𑁆𑀢𑀢𑁄 𑀏𑀓𑀓𑁆𑀔𑀡𑁂 𑀅𑀤𑀢𑁆𑀯𑀸 𑀏𑀓𑀤𑁂𑀲𑀢𑁄 𑀧𑀝𑁆𑀞𑀸𑀬 𑀯𑀺𑀳𑀸𑀭𑀲𑁆𑀲 𑀲𑀫𑀦𑁆𑀢𑀢𑁄 𑀲𑀡𑀺𑀓𑀁 𑀛𑀸𑀧𑁂𑀢𑁆𑀯𑀸 𑀬𑀣𑀸 𑀫𑀳𑀦𑁆𑀢𑁄𑀧𑀺 𑀅𑀕𑁆𑀕𑀺 𑀯𑀺𑀳𑀸𑀭𑀁 𑀧𑀸𑀧𑀼𑀡𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀏𑀯𑀁 𑀯𑀺𑀳𑀸𑀭𑀲𑁆𑀲 𑀲𑀫𑀦𑁆𑀢𑀸 𑀅𑀩𑁆𑀪𑁄𑀓𑀸𑀲𑀁 𑀓𑀢𑁆𑀯𑀸 𑀧𑀝𑀕𑁆𑀕𑀺 𑀤𑀸𑀢𑀩𑁆𑀩𑁄, 𑀲𑁄 𑀤𑀸𑀯𑀕𑁆𑀕𑀺𑀦𑁄 𑀧𑀝𑀺𑀧𑀣𑀁 𑀕𑀦𑁆𑀢𑁆𑀯𑀸 𑀏𑀓𑀢𑁄 𑀳𑀼𑀢𑁆𑀯𑀸 𑀢𑁂𑀦 𑀲𑀳 𑀦𑀺𑀩𑁆𑀩𑀸𑀢𑀺. 𑀧𑀭𑀺𑀢𑁆𑀢𑀓𑀭𑀡𑀦𑁆𑀢𑀺 𑀲𑀫𑀦𑁆𑀢𑀸 𑀭𑀼𑀓𑁆𑀔𑀢𑀺𑀡𑀸𑀤𑀺𑀘𑁆𑀙𑁂𑀤𑀦𑀧𑀭𑀺𑀔𑀸𑀔𑀡𑀦𑀸𑀤𑀺𑀆𑀭𑀓𑁆𑀔𑀓𑀭𑀡𑀁, 𑀢𑁂𑀦𑀸𑀳 𑀢𑀺𑀡𑀓𑀼𑀝𑀺𑀓𑀸𑀦𑀁 𑀲𑀫𑀦𑁆𑀢𑀸 𑀪𑀽𑀫𑀺𑀢𑀘𑁆𑀙𑀦𑀦𑁆𑀢𑀺𑀆𑀤𑀺.

𑁧𑁯𑁧. 𑀔𑁂𑀢𑁆𑀢𑀫𑁂𑀯 𑀑𑀢𑀺𑀡𑁆𑀡𑀢𑁆𑀢𑀸 𑀧𑀸𑀭𑀸𑀚𑀺𑀓𑀦𑁆𑀢𑀺 𑀤𑁆𑀯𑀻𑀲𑀼 𑀏𑀓𑀲𑁆𑀲𑀸𑀧𑀺 𑀅𑀦𑁆𑀢𑁄𑀕𑀥𑀢𑁆𑀢𑀸 ‘‘𑀤𑁆𑀯𑀻𑀳𑀻’’𑀢𑀺 𑀯𑀼𑀢𑁆𑀢𑀔𑁂𑀢𑁆𑀢𑁂 𑀏𑀓𑀲𑁆𑀲𑀸𑀧𑀺 𑀑𑀢𑀺𑀡𑁆𑀡𑀢𑁆𑀢𑀸 𑀧𑀸𑀭𑀸𑀚𑀺𑀓𑀁, ‘‘𑀤𑁆𑀯𑀻𑀳𑀺 𑀏𑀯 𑀫𑀸𑀭𑁂𑀳𑀺 𑀦 𑀏𑀓𑁂𑀦𑀸’’𑀢𑀺 𑀦𑀺𑀬𑀫𑀺𑀢𑁂 𑀧𑀦 𑀏𑀓𑁂𑀦𑁂𑀯 𑀫𑀸𑀭𑀺𑀢𑁂 𑀦𑀢𑁆𑀣𑀺 𑀧𑀸𑀭𑀸𑀚𑀺𑀓𑀦𑁆𑀢𑀺 𑀯𑀤𑀦𑁆𑀢𑀺, 𑀏𑀯𑀁 𑀤𑁆𑀯𑁂 𑀏𑀯 𑀧𑀼𑀭𑀺𑀲𑀸𑀢𑀺𑀆𑀤𑀻𑀲𑀼𑀧𑀺. 𑀧𑀼𑀩𑁆𑀩𑁂 𑀓𑀢𑀲𑀻𑀲𑀘𑁆𑀙𑁂𑀤𑀧𑀬𑁄𑀕𑀢𑁄 𑀅𑀜𑁆𑀜𑁄 𑀧𑀬𑁄𑀕𑁄 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀼𑀧𑀘𑁆𑀙𑁂𑀤𑀓𑁄 𑀦 𑀉𑀧𑀮𑀩𑁆𑀪𑀢𑀺, 𑀧𑀞𑀫𑁂𑀦 𑀧𑀬𑁄𑀕𑁂𑀦𑀲𑁆𑀲 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀉𑀧𑀘𑁆𑀙𑀺𑀚𑁆𑀚𑀢𑀻𑀢𑀺 ‘‘𑀲𑀻𑀲𑀘𑁆𑀙𑁂𑀤𑀓𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁, 𑀬𑀁 𑀧𑀦 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 ‘‘𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲 𑀅𑀯𑀺𑀚𑁆𑀚𑀫𑀸𑀦𑀢𑁆𑀢𑀸’’𑀢𑀺 𑀓𑀸𑀭𑀡𑀁 𑀯𑀼𑀢𑁆𑀢𑀁, 𑀢𑀁 𑀅𑀓𑀸𑀭𑀡𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑀦𑁆𑀦𑀺𑀲𑁆𑀲𑀺𑀢𑀘𑀺𑀢𑁆𑀢𑀲𑀦𑁆𑀢𑀢𑀺𑀁 𑀯𑀺𑀦𑀸 𑀉𑀓𑁆𑀔𑀺𑀧𑀦𑀲𑀦𑁆𑀦𑀺𑀭𑀼𑀚𑁆𑀛𑀦𑀸𑀤𑀺𑀯𑀲𑀧𑁆𑀧𑀯𑀢𑁆𑀢𑀲𑁆𑀲 𑀕𑀫𑀦𑀲𑁆𑀲 𑀅𑀲𑀫𑁆𑀪𑀯𑀢𑁄. 𑀦 𑀳𑀺 𑀯𑀸𑀬𑀼𑀯𑁂𑀕𑁂𑀦 𑀧𑀡𑁆𑀡𑀧𑀝𑀸𑀤𑀬𑁄 𑀯𑀺𑀬 𑀓𑀸𑀬𑁄 𑀕𑀘𑁆𑀙𑀢𑀺, 𑀦 𑀘 𑀉𑀓𑁆𑀔𑀺𑀧𑀦𑁂 𑀧𑀯𑀢𑁆𑀢𑀸𑀯 𑀘𑀺𑀢𑁆𑀢𑀚𑀯𑀺𑀜𑁆𑀜𑀢𑁆𑀢𑀺𑀆𑀤𑀬𑁄𑀯 𑀦𑀺𑀓𑁆𑀔𑀺𑀧𑀦𑀸𑀤𑀺𑀦𑁄𑀧𑀺 𑀳𑁂𑀢𑀼𑀪𑀽𑀢𑀸𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀁 𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀧𑀯𑀢𑁆𑀢𑀦𑀢𑁄. 𑀧𑀼𑀩𑁆𑀩𑁂 𑀅𑀦𑀸𑀳𑀺𑀢𑀯𑁂𑀕𑀸𑀧𑀺 𑀳𑀺 𑀓𑀸𑀘𑀺 𑀲𑀭𑀻𑀲𑀧𑀚𑀸𑀢𑀺 𑀤𑁆𑀯𑀺𑀥𑀸 𑀙𑀺𑀦𑁆𑀦𑀸 𑀙𑁂𑀤𑀦𑀫𑀢𑁆𑀢𑀸 𑀤𑁆𑀯𑀻𑀳𑀺 𑀯𑀺𑀪𑀸𑀕𑁂𑀳𑀺 𑀓𑀢𑀺𑀧𑀬𑀓𑁆𑀔𑀡𑀁 𑀤𑁆𑀯𑀻𑀲𑀼 𑀤𑀺𑀲𑀸𑀲𑀼 𑀕𑀘𑁆𑀙𑀢𑀺, 𑀢𑀢𑁆𑀣 𑀘 𑀬𑀲𑁆𑀫𑀺𑀁 𑀪𑀸𑀕𑁂 𑀳𑀤𑀬𑀯𑀢𑁆𑀣𑀼 𑀢𑀺𑀝𑁆𑀞𑀢𑀺, 𑀢𑀢𑁆𑀭𑀝𑁆𑀞𑀁 𑀧𑀜𑁆𑀘𑀤𑁆𑀯𑀸𑀭𑀸𑀯𑀚𑁆𑀚𑀦𑀘𑀺𑀢𑁆𑀢𑀁 𑀤𑁆𑀯𑀻𑀲𑀼𑀧𑀺 𑀪𑀸𑀕𑁂𑀲𑀼 𑀓𑀸𑀬𑀧𑁆𑀧𑀲𑀸𑀤𑁂 𑀖𑀝𑁆𑀝𑀺𑀢𑀁 𑀨𑁄𑀝𑁆𑀞𑀩𑁆𑀩𑀁 𑀆𑀮𑀫𑁆𑀩𑀺𑀢𑁆𑀯𑀸 𑀉𑀧𑁆𑀧𑀚𑁆𑀚𑀢𑀺, 𑀢𑀢𑁄 𑀢𑀤𑀸𑀭𑀫𑁆𑀫𑀡𑀫𑁂𑀯 𑀬𑀣𑀸𑀭𑀳𑀫𑁂𑀓𑀲𑁆𑀫𑀺𑀁 𑀪𑀸𑀕𑁂 𑀏𑀓𑀤𑀸 𑀅𑀜𑁆𑀜𑀲𑁆𑀫𑀺𑀁 𑀅𑀜𑁆𑀜𑀤𑀸𑀢𑀺 𑀏𑀯𑀁 𑀧𑀭𑀺𑀬𑀸𑀬𑁂𑀦 𑀓𑀸𑀬𑀯𑀺𑀜𑁆𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀢𑁄 𑀳𑀤𑀬𑀯𑀢𑁆𑀣𑀼𑀲𑁆𑀫𑀺𑀁𑀬𑁂𑀯 𑀲𑀫𑁆𑀧𑀝𑀺𑀘𑁆𑀙𑀦𑀸𑀤𑀺𑀯𑀻𑀣𑀺𑀘𑀺𑀢𑁆𑀢𑀸𑀦𑀺 𑀪𑀯𑀗𑁆𑀕𑀦𑁆𑀢𑀭𑀺𑀢𑀸𑀦𑀺 𑀫𑀦𑁄𑀤𑁆𑀯𑀸𑀭𑀯𑀻𑀣𑀺𑀯𑀺𑀜𑁆𑀜𑀸𑀡𑀸𑀦𑀺 𑀘 𑀯𑀺𑀜𑁆𑀜𑀢𑁆𑀢𑀺𑀚𑀦𑀓𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀬𑁂 𑀳𑀺 𑀉𑀪𑀬𑀪𑀸𑀕𑀸 𑀕𑀘𑁆𑀙𑀦𑁆𑀢𑀺 𑀯𑀸 𑀘𑀮𑀦𑁆𑀢𑀺 𑀯𑀸 𑀨𑀦𑁆𑀤𑀦𑁆𑀢𑀺 𑀯𑀸. 𑀘𑀺𑀢𑁆𑀢𑀲𑁆𑀲 𑀧𑀦 𑀮𑀳𑀼𑀧𑀭𑀺𑀯𑀢𑁆𑀢𑀺𑀬𑀸 𑀏𑀓𑀓𑁆𑀔𑀡𑁂 𑀉𑀪𑀬𑀪𑀸𑀕𑀸𑀧𑀺 𑀘𑀮𑀦𑁆𑀢𑀸 𑀯𑀺𑀬 𑀉𑀧𑀝𑁆𑀞𑀳𑀦𑁆𑀢𑀺, 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀓𑀼𑀓𑁆𑀓𑀼𑀴𑀸𑀤𑀺𑀦𑀭𑀓𑁂𑀲𑀼 𑀦𑀺𑀫𑀼𑀕𑁆𑀕𑀲𑀓𑀮𑀲𑀭𑀻𑀭𑀲𑁆𑀲 𑀲𑀢𑁆𑀢𑀲𑁆𑀲 𑀏𑀓𑀲𑁆𑀫𑀺𑀁 𑀔𑀡𑁂 𑀲𑀓𑀮𑀲𑀭𑀻𑀭𑁂𑀧𑀺 𑀓𑀸𑀬𑀯𑀺𑀜𑁆𑀜𑀸𑀡𑀤𑀼𑀓𑁆𑀔𑀁 𑀉𑀧𑁆𑀧𑀚𑁆𑀚𑀫𑀸𑀦𑀁 𑀯𑀺𑀬 𑀉𑀧𑀝𑁆𑀞𑀸𑀢𑀺, 𑀏𑀯𑀁𑀲𑀫𑁆𑀧𑀤𑀫𑀺𑀤𑀁 𑀤𑀝𑁆𑀞𑀩𑁆𑀩𑀁, 𑀢𑀢𑁄 𑀧𑀦 𑀬𑀲𑁆𑀫𑀺𑀁 𑀪𑀸𑀕𑁂 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀲𑀲𑁂𑀲𑀓𑀫𑁆𑀫𑀚𑀭𑀽𑀧𑀁 𑀦𑀺𑀭𑀼𑀚𑁆𑀛𑀢𑀺, 𑀢𑀢𑁆𑀣 𑀓𑀸𑀬𑀯𑀺𑀜𑁆𑀜𑀸𑀡𑀁 𑀦𑀧𑁆𑀧𑀯𑀢𑁆𑀢𑀢𑀺, 𑀳𑀤𑀬𑀯𑀢𑁆𑀣𑀼𑀲𑀳𑀺𑀢𑀪𑀸𑀕𑁂𑀬𑁂𑀯 𑀬𑀸𑀯 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀦𑀺𑀭𑁄𑀥𑀸 𑀧𑀯𑀢𑁆𑀢𑀢𑀺.

𑀦𑀦𑀼 𑀦𑀭𑀓𑀸𑀤𑀻𑀲𑀼 𑀏𑀓𑀸𑀩𑀤𑁆𑀥𑁂 𑀲𑀭𑀻𑀭𑁂 𑀲𑀩𑁆𑀩𑀢𑁆𑀣 𑀧𑀭𑀺𑀬𑀸𑀬𑁂𑀦 𑀓𑀸𑀬𑀯𑀺𑀜𑁆𑀜𑀸𑀡𑀲𑀫𑀼𑀧𑁆𑀧𑀢𑁆𑀢𑀺 𑀬𑀼𑀢𑁆𑀢𑀸 𑀳𑁄𑀢𑀼, 𑀤𑁆𑀯𑀺𑀥𑀸 𑀳𑀼𑀢𑁆𑀯𑀸 𑀯𑀺𑀘𑁆𑀙𑀺𑀦𑁆𑀦𑁂 𑀧𑀦 𑀪𑀸𑀕𑀤𑁆𑀯𑀬𑁂 𑀓𑀣𑀦𑁆𑀢𑀺? 𑀦𑀸𑀬𑀁 𑀤𑁄𑀲𑁄. 𑀲𑀭𑀻𑀭𑁂 𑀳𑀺 𑀏𑀓𑀸𑀩𑀤𑁆𑀥𑀢𑀸 𑀦𑀸𑀫 𑀧𑀭𑀫𑀢𑁆𑀣𑀥𑀫𑁆𑀫𑀩𑁆𑀬𑀢𑀺𑀭𑀺𑀢𑁆𑀢𑀸 𑀓𑀸𑀘𑀺 𑀦𑀢𑁆𑀣𑀺 𑀧𑀭𑀯𑀸𑀤𑀻𑀦𑀁 𑀅𑀯𑀬𑀯𑀻𑀆𑀤𑀺 𑀯𑀺𑀬, 𑀓𑀫𑁆𑀫𑀸𑀤𑀺𑀏𑀓𑀓𑀸𑀭𑀡𑀧𑀼𑀜𑁆𑀚𑀸𑀬𑀢𑁆𑀢𑀢𑀸𑀬 𑀩𑀳𑀽𑀦𑀁 𑀲𑀳𑀼𑀧𑁆𑀧𑀢𑁆𑀢𑀺𑀬𑁂𑀯 𑀏𑀓𑀸𑀩𑀤𑁆𑀥𑀢𑀸. 𑀢𑀢𑁆𑀣 𑀘 𑀲𑀢𑁆𑀣𑀧𑁆𑀧𑀳𑀸𑀭𑀸𑀤𑀺𑀯𑀺𑀭𑀼𑀤𑁆𑀥𑀧𑀘𑁆𑀘𑀬𑁄𑀧𑀦𑀺𑀧𑀸𑀢𑁂𑀦 𑀯𑀺𑀪𑀺𑀦𑁆𑀦𑀸𑀦𑀫𑁆𑀧𑀺 𑀓𑀫𑁆𑀫𑀸𑀤𑀺𑀏𑀓𑀓𑀸𑀭𑀡𑀸𑀦𑀁 𑀧𑀼𑀜𑁆𑀚𑀸𑀬𑀢𑁆𑀢𑀢𑀸 𑀦 𑀯𑀺𑀕𑀘𑁆𑀙𑀢𑀺, 𑀬𑀸𑀯 𑀲𑀸 𑀦 𑀯𑀺𑀕𑀘𑁆𑀙𑀢𑀺, 𑀢𑀸𑀯 𑀅𑀯𑀺𑀘𑁆𑀙𑀺𑀦𑁆𑀦𑀸𑀯 𑀢𑀢𑁆𑀣 𑀯𑀺𑀜𑁆𑀜𑀸𑀡𑀧𑁆𑀧𑀯𑀢𑁆𑀢𑀺. 𑀯𑀺𑀪𑀺𑀦𑁆𑀦𑀸𑀦𑀁 𑀧𑀦 𑀓𑀫𑁆𑀫𑀚𑀭𑀽𑀧𑀸𑀦𑀁 𑀅𑀜𑁆𑀜𑁂𑀲𑀜𑁆𑀘 𑀲𑁂𑀲𑀢𑀺𑀲𑀦𑁆𑀢𑀢𑀺𑀭𑀽𑀧𑀸𑀦𑀜𑁆𑀘 𑀉𑀧𑀢𑁆𑀣𑀫𑁆𑀪𑀦𑀪𑀸𑀯𑁂𑀦 𑀘𑀺𑀭𑀁 𑀧𑀯𑀢𑁆𑀢𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀬𑀸𑀯 𑀘 𑀥𑀭𑀦𑁆𑀢𑀺, 𑀢𑀸𑀯 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀯𑀺𑀜𑁆𑀜𑀸𑀡𑁂𑀦 𑀘 𑀢𑁂𑀲𑀁 𑀘𑀮𑀦𑀕𑀫𑀦𑀸𑀤𑀺𑀤𑁂𑀲𑀦𑁆𑀢𑀭𑀼𑀧𑁆𑀧𑀢𑁆𑀢𑀺. 𑀢𑀲𑁆𑀫𑀸 𑀓𑀩𑀦𑁆𑀥𑀲𑁆𑀲𑀧𑀺 𑀥𑀸𑀯𑀓𑁆𑀔𑀡𑁂 𑀲𑀯𑀺𑀜𑁆𑀜𑀸𑀡𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀅𑀢𑁆𑀣𑁂𑀯, 𑀢𑀜𑁆𑀘 𑀲𑀻𑀲𑀘𑁆𑀙𑁂𑀤𑀓𑀧𑁆𑀧𑀬𑁄𑀕𑁂𑀦𑁂𑀯 𑀲𑀻𑀖𑀁 𑀧𑀢𑀢𑀺, 𑀢𑀢𑁄 𑀅𑀜𑁆𑀜𑀧𑁆𑀧𑀬𑁄𑀕𑀲𑁆𑀲 𑀲𑀭𑀻𑀭𑁂 𑀯𑀺𑀲𑁂𑀲𑀼𑀧𑁆𑀧𑀸𑀤𑀦𑀢𑁄 𑀧𑀼𑀭𑁂𑀢𑀭𑀫𑁂𑀯 𑀧𑀞𑀫𑁂𑀦𑁂𑀯 𑀓𑀺𑀘𑁆𑀘𑀦𑀺𑀧𑁆𑀨𑀢𑁆𑀢𑀺𑀢𑁄 𑀲𑀻𑀲𑀘𑁆𑀙𑁂𑀤𑀓𑀲𑁆𑀲𑁂𑀯 𑀓𑀫𑁆𑀫𑀩𑀤𑁆𑀥𑁄𑀢𑀺 𑀕𑀳𑁂𑀢𑀩𑁆𑀩𑁄. 𑀏𑀯𑀭𑀽𑀧𑀸𑀦𑀻𑀢𑀺 𑀓𑀩𑀦𑁆𑀥𑀯𑀢𑁆𑀣𑀼𑀲𑀤𑀺𑀲𑀸𑀦𑀺. 𑀇𑀫𑀲𑁆𑀲 𑀯𑀢𑁆𑀣𑀼𑀲𑁆𑀲𑀸𑀢𑀺 𑀆𑀖𑀸𑀢𑀦𑀯𑀢𑁆𑀣𑀼𑀲𑁆𑀲. 𑀅𑀢𑁆𑀣𑀤𑀻𑀧𑀦𑁂𑀢𑀺 𑀏𑀓𑁂𑀦 𑀧𑀼𑀭𑀺𑀲𑁂𑀦 𑀧𑀬𑁄𑀕𑁂𑀦 𑀯𑀸 𑀫𑀸𑀭𑀺𑀢𑀢𑀸𑀲𑀗𑁆𑀔𑀸𑀢𑀲𑁆𑀲 𑀅𑀢𑁆𑀣𑀲𑁆𑀲 𑀤𑀻𑀧𑀦𑁂.

𑁧𑁯𑁨. 𑀧𑀸𑀦𑀧𑀭𑀺𑀪𑁄𑀕𑁂𑀦 𑀯𑀝𑁆𑀝𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀯𑀁 𑀧𑀦 𑀯𑀼𑀢𑁆𑀢𑀢𑁆𑀢𑀸 ‘‘𑀮𑁄𑀡𑀲𑁄𑀯𑀻𑀭𑀓𑀁 𑀬𑀸𑀫𑀓𑀸𑀮𑀺𑀓’’𑀦𑁆𑀢𑀺 𑀓𑁂𑀘𑀺 𑀯𑀤𑀦𑁆𑀢𑀺, 𑀓𑁂𑀘𑀺 𑀧𑀦 ‘‘𑀕𑀺𑀮𑀸𑀦𑀸𑀦𑀁 𑀧𑀸𑀓𑀢𑀺𑀓𑀫𑁂𑀯, 𑀅𑀕𑀺𑀮𑀸𑀦𑀸𑀦𑀁 𑀧𑀦 𑀉𑀤𑀓𑀲𑀫𑁆𑀪𑀺𑀦𑁆𑀦’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 ‘‘𑀕𑀼𑀴𑀁 𑀯𑀺𑀬 𑀲𑀢𑁆𑀢𑀸𑀳𑀓𑀸𑀮𑀺𑀓’’𑀦𑁆𑀢𑀺.

𑀇𑀢𑀺 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬 𑀯𑀺𑀦𑀬𑀝𑁆𑀞𑀓𑀣𑀸𑀬 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁

𑀢𑀢𑀺𑀬𑀧𑀸𑀭𑀸𑀚𑀺𑀓𑀯𑀡𑁆𑀡𑀦𑀸𑀦𑀬𑁄 𑀦𑀺𑀝𑁆𑀞𑀺𑀢𑁄.