𑁪. 𑀘𑀢𑀼𑀢𑁆𑀣𑀧𑀸𑀭𑀸𑀚𑀺𑀓𑀁

𑀯𑀕𑁆𑀕𑀼𑀫𑀼𑀤𑀸𑀢𑀻𑀭𑀺𑀬𑀪𑀺𑀓𑁆𑀔𑀼𑀯𑀢𑁆𑀣𑀼𑀯𑀡𑁆𑀡𑀦𑀸

𑁧𑁯𑁩. 𑀅𑀥𑀺𑀝𑁆𑀞𑁂𑀫𑀸𑀢𑀺 𑀲𑀁𑀯𑀺𑀤𑀳𑀸𑀫. 𑀇𑀭𑀺𑀬𑀸𑀧𑀣𑀁 𑀲𑀡𑁆𑀞𑀧𑁂𑀢𑁆𑀯𑀸𑀢𑀺 𑀧𑀥𑀸𑀦𑀸𑀦𑀼𑀭𑀽𑀧𑀁 𑀓𑀢𑁆𑀯𑀸. 𑀅𑀦𑀸𑀕𑀢𑀲𑀫𑁆𑀩𑀦𑁆𑀥𑁂 𑀧𑀦 𑀅𑀲𑀢𑀻𑀢𑀺 𑀪𑀸𑀲𑀺𑀢𑁄 𑀪𑀯𑀺𑀲𑁆𑀲𑀢𑀻𑀢𑀺 𑀧𑀸𑀞𑀲𑁂𑀲𑀁 𑀓𑀢𑁆𑀯𑀸 𑀅𑀦𑀸𑀕𑀢𑀲𑀫𑁆𑀩𑀦𑁆𑀥𑁂 𑀅𑀲𑀢𑀺. 𑀪𑀸𑀲𑀺𑀢𑁄𑀢𑀺 𑀅𑀢𑀻𑀢𑀯𑀘𑀦𑀁 𑀓𑀣𑀁 𑀅𑀦𑀸𑀕𑀢𑀯𑀘𑀦𑁂𑀦 𑀲𑀫𑁆𑀩𑀦𑁆𑀥𑀫𑀼𑀧𑀕𑀘𑁆𑀙𑀢𑀻𑀢𑀺 𑀆𑀳 𑀮𑀓𑁆𑀔𑀡𑀁 𑀧𑀦𑀸𑀢𑀺𑀆𑀤𑀺. 𑀈𑀤𑀺𑀲𑁂 𑀳𑀺 𑀞𑀸𑀦𑁂 𑀥𑀸𑀢𑀼𑀲𑀫𑁆𑀩𑀦𑁆𑀥𑁂 𑀧𑀘𑁆𑀘𑀬𑀸𑀢𑀺 𑀇𑀫𑀺𑀦𑀸 𑀮𑀓𑁆𑀔𑀡𑁂𑀦 𑀥𑀸𑀢𑁆𑀯𑀢𑁆𑀣𑀲𑀫𑁆𑀩𑀦𑁆𑀥𑁂 𑀲𑀢𑀺 𑀅𑀬𑀣𑀸𑀓𑀸𑀮𑀯𑀺𑀳𑀺𑀢𑀸𑀧𑀺 𑀧𑀘𑁆𑀘𑀬𑀸 𑀲𑀸𑀥𑀯𑁄 𑀪𑀯𑀦𑁆𑀢𑀻𑀢𑀺 𑀲𑀤𑁆𑀤𑀲𑀢𑁆𑀣𑀯𑀺𑀤𑀽 𑀯𑀤𑀦𑁆𑀢𑀺.

𑁧𑁯𑁪. 𑀯𑀡𑁆𑀡𑀯𑀸𑀢𑀺 𑀇𑀫𑀺𑀦𑀸 𑀅𑀪𑀺𑀦𑀯𑀼𑀧𑁆𑀧𑀦𑁆𑀦𑀯𑀡𑁆𑀡𑀢𑀸 𑀯𑀼𑀢𑁆𑀢𑀸. 𑀧𑀲𑀦𑁆𑀦𑀫𑀼𑀔𑀯𑀡𑁆𑀡𑀸𑀢𑀺 𑀇𑀫𑀺𑀦𑀸 𑀫𑀼𑀔𑀯𑀡𑁆𑀡𑀲𑁆𑀲 𑀅𑀢𑀺𑀧𑀡𑀻𑀢𑀢𑀸 𑀯𑀼𑀢𑁆𑀢𑀸. 𑀯𑀺𑀧𑁆𑀧𑀲𑀦𑁆𑀦𑀘𑁆𑀙𑀯𑀺𑀯𑀡𑁆𑀡𑀸𑀢𑀺 𑀇𑀫𑀺𑀦𑀸 𑀧𑀓𑀢𑀺𑀲𑀭𑀻𑀭𑀯𑀡𑁆𑀡𑀲𑁆𑀲𑁂𑀯 𑀬𑀣𑀸𑀯𑀼𑀢𑁆𑀢𑀦𑀬𑁂𑀦 𑀯𑀺𑀧𑁆𑀧𑀲𑀦𑁆𑀦𑀢𑀸 𑀯𑀼𑀢𑁆𑀢𑀸. 𑀬𑀲𑁆𑀫𑀸 𑀇𑀦𑁆𑀤𑁆𑀭𑀺𑀬𑀸𑀦𑀁 𑀉𑀧𑀸𑀤𑀸𑀭𑀽𑀧𑀢𑁆𑀢𑀸 𑀦𑀺𑀲𑁆𑀲𑀬𑀯𑀲𑁂𑀦𑁂𑀯 𑀧𑀻𑀡𑀦𑀦𑁆𑀢𑀺 𑀆𑀳 ‘‘𑀅𑀪𑀺𑀦𑀺𑀯𑀺𑀝𑁆𑀞𑁄𑀓𑀸𑀲𑀲𑁆𑀲 𑀧𑀭𑀺𑀧𑀼𑀡𑁆𑀡𑀢𑁆𑀢𑀸’’𑀢𑀺. 𑀧𑀜𑁆𑀘𑀧𑁆𑀧𑀲𑀸𑀤𑀸𑀦𑀁 𑀯𑀺𑀬 𑀳𑀤𑀬𑀭𑀽𑀧𑀲𑁆𑀲𑀸𑀧𑀺 𑀧𑀭𑀺𑀧𑀼𑀡𑁆𑀡𑀢𑀸 𑀯𑀼𑀢𑁆𑀢𑀸𑀬𑁂𑀯𑀸𑀢𑀺 𑀆𑀳 ‘‘𑀫𑀦𑀘𑁆𑀙𑀝𑁆𑀞𑀸𑀦𑀁 𑀇𑀦𑁆𑀤𑁆𑀭𑀺𑀬𑀸𑀦’’𑀦𑁆𑀢𑀺. 𑀉𑀤𑁆𑀤𑁂𑀲𑀁 𑀧𑀭𑀺𑀧𑀼𑀘𑁆𑀙𑀁 𑀅𑀦𑀼𑀬𑀼𑀜𑁆𑀚𑀦𑁆𑀢𑀸 𑀇𑀫𑀁 𑀲𑀭𑀻𑀭𑀲𑁄𑀪𑀁 𑀦𑁂𑀯 𑀧𑀸𑀧𑀼𑀡𑀺𑀁𑀲𑀽𑀢𑀺 𑀲𑀫𑁆𑀩𑀦𑁆𑀥𑁄. 𑀬𑀣𑀸 𑀢𑀦𑁆𑀢𑀺 𑀏𑀢𑁆𑀣 𑀢𑀦𑁆𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀘𑀢𑀼𑀘𑀓𑁆𑀓𑀦𑁆𑀢𑀺 𑀏𑀢𑁆𑀣 𑀧𑀯𑀢𑁆𑀢𑀦𑀝𑁆𑀞𑁂𑀦 𑀇𑀭𑀺𑀬𑀸𑀧𑀣𑁄𑀯 𑀘𑀓𑁆𑀓𑀦𑁆𑀢𑀺 𑀯𑀼𑀢𑁆𑀢𑁄.

𑁧𑁯𑁫. 𑀉𑀧𑀮𑀩𑁆𑀪𑀦𑁆𑀢𑀻𑀢𑀺 𑀤𑀺𑀲𑁆𑀲𑀦𑁆𑀢𑀺, 𑀜𑀸𑀬𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀧𑀘𑀦𑁆𑀢𑁄𑀢𑀺 𑀧𑀻𑀴𑁂𑀦𑁆𑀢𑁄, 𑀕𑁂𑀳𑀸𑀤𑀻𑀦𑀺 𑀯𑀸 𑀲𑀬𑀁 𑀟𑀳𑀦𑁆𑀢𑁄, 𑀅𑀜𑁆𑀜𑁂𑀳𑀺 𑀯𑀸 𑀧𑀸𑀘𑁂𑀦𑁆𑀢𑁄. 𑀉𑀤𑁆𑀥𑀢𑁂𑀢𑀺 𑀉𑀤𑁆𑀥𑀘𑁆𑀘𑀧𑀓𑀢𑀺𑀓𑁂. 𑀉𑀦𑁆𑀦𑀴𑁂𑀢𑀺 𑀉𑀕𑁆𑀕𑀢𑀦𑀴𑀲𑀤𑀺𑀲𑁂𑀦 𑀉𑀕𑁆𑀕𑀢𑀢𑀼𑀘𑁆𑀙𑀫𑀸𑀦𑁂𑀦 𑀲𑀳𑀺𑀢𑁂. 𑀘𑀧𑀮𑁂𑀢𑀺 𑀧𑀢𑁆𑀢𑀘𑀻𑀯𑀭𑀫𑀡𑁆𑀟𑀦𑀸𑀤𑀺𑀦𑀸 𑀘𑀸𑀧𑀮𑁆𑀮𑁂𑀦 𑀬𑀼𑀢𑁆𑀢𑁂. 𑀫𑀼𑀔𑀭𑁂𑀢𑀺 𑀔𑀭𑀯𑀘𑀦𑁂. 𑀧𑀸𑀓𑀢𑀺𑀦𑁆𑀤𑁆𑀭𑀺𑀬𑁂𑀢𑀺 𑀅𑀲𑀁𑀯𑀼𑀢𑀢𑁆𑀢𑀸 𑀕𑀺𑀳𑀺𑀓𑀸𑀮𑁂 𑀯𑀺𑀬 𑀧𑀓𑀢𑀺𑀬𑀁 𑀞𑀺𑀢𑀺𑀦𑁆𑀤𑁆𑀭𑀺𑀬𑁂. 𑀇𑀭𑀺𑀬𑀸𑀧𑀣𑀲𑀡𑁆𑀞𑀧𑀦𑀸𑀤𑀻𑀦𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀧𑀘𑁆𑀘𑀬𑀧𑀝𑀺𑀲𑁂𑀯𑀦𑀲𑀸𑀫𑀦𑁆𑀢𑀚𑀧𑁆𑀧𑀸𑀦𑀁 𑀕𑀳𑀡𑀁 𑀯𑁂𑀤𑀺𑀢𑀩𑁆𑀩𑀁. 𑀧𑀭𑀫𑀲𑀮𑁆𑀮𑁂𑀔𑀯𑀼𑀢𑁆𑀢𑀻𑀳𑀺 𑀫𑀳𑀸𑀅𑀭𑀺𑀬𑀯𑀁𑀲𑁂𑀳𑀺 𑀪𑀺𑀓𑁆𑀔𑀽𑀳𑀺 𑀦𑀺𑀯𑀼𑀢𑁆𑀣𑀲𑁂𑀦𑀸𑀲𑀦𑀸𑀦𑀺 𑀮𑁄𑀓𑀲𑀫𑁆𑀫𑀢𑀲𑁂𑀦𑀸𑀲𑀦𑀸𑀦𑀺 𑀦𑀸𑀫. 𑀧𑀭𑀺𑀧𑀸𑀘𑁂𑀢𑀼𑀦𑁆𑀢𑀺 𑀯𑀺𑀫𑁆𑀳𑀸𑀧𑀦𑀯𑀲𑁂𑀦 𑀧𑀭𑀺𑀡𑀸𑀫𑁂𑀢𑀼𑀁. 𑀪𑀺𑀓𑁆𑀔𑀸𑀘𑀸𑀭𑁂 𑀅𑀲𑀫𑁆𑀧𑀚𑁆𑀚𑀫𑀸𑀦𑁂𑀢𑀺 𑀇𑀤𑀁 𑀚𑀦𑀧𑀤𑀘𑀸𑀭𑀺𑀓𑀁 𑀘𑀭𑀦𑁆𑀢𑀻𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁, 𑀦 𑀧𑀦 𑀧𑀸𑀴𑀺𑀁 𑀯𑀸𑀘𑁂𑀦𑁆𑀢𑁄𑀢𑀺𑀆𑀤𑀻𑀳𑀺, 𑀢𑀸𑀦𑀺 𑀧𑀦 𑀧𑀤𑀸𑀦𑀺 𑀅𑀢𑁆𑀢𑀦𑁄 𑀦𑀺𑀭𑀦𑁆𑀢𑀭𑀯𑀸𑀲𑀝𑁆𑀞𑀸𑀦𑁂𑀧𑀺 𑀚𑀦𑀧𑀤𑁂𑀲𑀼𑀧𑀺 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀤𑀲𑁆𑀲𑀦𑀯𑀲𑁂𑀦 𑀯𑀼𑀢𑁆𑀢𑀸𑀦𑀺, 𑀢𑀸𑀦𑀺 𑀘 𑀢𑁂 𑀯𑀢𑁆𑀢𑀲𑀻𑀲𑁂𑀦 𑀓𑀭𑁄𑀦𑁆𑀢𑀺, 𑀦 𑀮𑀸𑀪𑀦𑀺𑀫𑀺𑀢𑁆𑀢𑀁, 𑀢𑁂𑀦𑀸𑀳 𑀢𑀦𑁆𑀢𑀻𑀢𑀺𑀆𑀤𑀺. 𑀓𑀺𑀘𑁆𑀙𑁂𑀦𑀸𑀢𑀺 𑀇𑀫𑀲𑁆𑀲𑁂𑀯 𑀯𑁂𑀯𑀘𑀦𑀁 𑀓𑀲𑀺𑀭𑁂𑀦𑀸𑀢𑀺. 𑀢𑀤𑀼𑀪𑀬𑀫𑁆𑀧𑀺 𑀧𑀸𑀭𑀫𑀻𑀧𑀽𑀭𑀡𑀯𑀸𑀬𑀸𑀫𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀲𑀸𑀥𑀸𑀭𑀡𑀧𑀭𑀺𑀓𑁆𑀔𑀸𑀭𑀪𑀸𑀯𑁂𑀦𑀸𑀢𑀺 𑀲𑀗𑁆𑀖𑀺𑀓𑀧𑀭𑀺𑀓𑁆𑀔𑀸𑀭𑀪𑀸𑀯𑁂𑀦. 𑀢𑀣𑀸𑀪𑀸𑀯𑀢𑁄 𑀣𑁂𑀦𑁂𑀢𑁆𑀯𑀸𑀢𑀺 𑀅𑀯𑀺𑀲𑁆𑀲𑀚𑁆𑀚𑀺𑀬𑀅𑀯𑁂𑀪𑀗𑁆𑀕𑀺𑀬𑀪𑀸𑀯𑀢𑁄 𑀣𑁂𑀦𑁂𑀢𑁆𑀯𑀸, 𑀦 𑀞𑀸𑀦𑀸𑀘𑀸𑀯𑀦𑀯𑀲𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄, 𑀢𑁂𑀦𑀸𑀳 ‘‘𑀓𑀼𑀮𑀤𑀽𑀲𑀓𑀤𑀼𑀓𑁆𑀓𑀝𑀁 𑀆𑀧𑀚𑁆𑀚𑀢𑀻’’𑀢𑀺. 𑀅𑀲𑀦𑁆𑀢𑀦𑁆𑀢𑀺 𑀇𑀫𑀲𑁆𑀲 𑀅𑀪𑀽𑀢𑀦𑁆𑀢𑀺 𑀇𑀤𑀁 𑀓𑀸𑀭𑀡𑀯𑀘𑀦𑀁, 𑀅𑀦𑀼𑀧𑁆𑀧𑀦𑁆𑀦𑀢𑁆𑀢𑀸 𑀅𑀯𑀺𑀚𑁆𑀚𑀫𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀓𑀺𑀢𑀯𑀲𑁆𑀲𑁂𑀯𑀸𑀢𑀺 𑀓𑀺𑀢𑀯𑀲𑁆𑀲 𑀲𑀓𑀼𑀡𑀕𑀳𑀡𑀫𑀺𑀯. 𑀓𑁂𑀭𑀸𑀝𑀺𑀓𑀲𑁆𑀲𑀸𑀢𑀺 𑀲𑀞𑀲𑁆𑀲. 𑀲𑀫𑀡𑁄𑀢𑀺 𑀕𑁄𑀢𑁆𑀢𑀫𑀢𑁆𑀢𑀁 𑀅𑀦𑀼𑀪𑁄𑀦𑁆𑀢𑀺 𑀥𑀸𑀭𑁂𑀦𑁆𑀢𑀻𑀢𑀺 𑀕𑁄𑀢𑁆𑀭𑀪𑀼𑀦𑁄, 𑀦𑀸𑀫𑀫𑀢𑁆𑀢𑀲𑀫𑀡𑀸𑀢𑀺 𑀅𑀢𑁆𑀣𑁄. 𑀤𑀼𑀚𑁆𑀚𑀸𑀦𑀧𑀭𑀺𑀘𑁆𑀙𑁂𑀤𑀦𑁆𑀢𑀺 𑀅𑀦𑀦𑁆𑀢𑀤𑀼𑀓𑁆𑀔𑀢𑁆𑀢𑀸 ‘‘𑀏𑀢𑁆𑀢𑀓𑀁 𑀤𑀼𑀓𑁆𑀔’’𑀦𑁆𑀢𑀺 𑀲𑀗𑁆𑀔𑁆𑀬𑀸𑀯𑀲𑁂𑀦 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀜𑀸𑀢𑀼𑀁 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂𑀦𑀸𑀧𑀺 𑀤𑀼𑀓𑁆𑀓𑀭𑀁, 𑀦 𑀧𑀦 𑀲𑀭𑀽𑀧𑀯𑀲𑁂𑀦 𑀜𑀸𑀢𑀼𑀁 𑀩𑀼𑀤𑁆𑀥𑀜𑀸𑀡𑀲𑁆𑀲 𑀅𑀯𑀺𑀲𑀬𑀪𑀸𑀯𑀸.

𑀅𑀥𑀺𑀫𑀸𑀦𑀯𑀢𑁆𑀣𑀼𑀯𑀡𑁆𑀡𑀦𑀸

𑁧𑁯𑁬. 𑀅𑀭𑀳𑀢𑁆𑀢𑁂𑀢𑀺 𑀅𑀕𑁆𑀕𑀨𑀮𑁂. 𑀜𑀸𑀡𑀘𑀓𑁆𑀔𑀼𑀦𑀸𑀢𑀺 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀲𑀗𑁆𑀔𑀸𑀢𑁂𑀦 𑀘𑀓𑁆𑀔𑀼𑀦𑀸, 𑀅𑀣 𑀯𑀸 𑀨𑀮𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑁂𑀦𑁂𑀯 𑀜𑀸𑀡𑀘𑀓𑁆𑀔𑀼𑀦𑀸. 𑀅𑀢𑁆𑀢𑀦𑀸 𑀲𑀫𑁆𑀧𑀬𑀼𑀢𑁆𑀢𑁂𑀦𑀸𑀧𑀺 𑀳𑀺 𑀜𑀸𑀡𑁂𑀦 𑀅𑀲𑀫𑁆𑀫𑁄𑀳𑀢𑁄 𑀲𑀬𑀁 𑀤𑀺𑀝𑁆𑀞𑀁 𑀦𑀸𑀫 𑀳𑁄𑀢𑀺, 𑀢𑀣𑀸 𑀢𑀲𑁆𑀫𑀺𑀁 𑀅𑀤𑀺𑀝𑁆𑀞𑁂𑀢𑀺 𑀅𑀢𑁆𑀣𑁄. 𑀲𑀩𑁆𑀩𑁂𑀲𑀁 𑀓𑀺𑀮𑁂𑀲𑀸𑀦𑀁 𑀧𑀳𑀸𑀬𑀓𑀯𑀲𑁂𑀦 𑀆𑀚𑀸𑀦𑀸𑀢𑀺, 𑀲𑀫𑀦𑁆𑀢𑀢𑁄 𑀲𑀩𑁆𑀩𑁂𑀦 𑀯𑀸 𑀧𑀓𑀸𑀭𑁂𑀦 𑀚𑀸𑀦𑀸𑀢𑀻𑀢𑀺 ‘‘𑀅𑀜𑁆𑀜𑀸’’𑀢𑀺 𑀅𑀕𑁆𑀕𑀫𑀕𑁆𑀕𑁄 𑀯𑀼𑀘𑁆𑀘𑀢𑀺, 𑀢𑀤𑀼𑀧𑀘𑀸𑀭𑁂𑀦 𑀧𑀦 𑀢𑀧𑁆𑀨𑀮𑀫𑁆𑀧𑀻𑀢𑀺 𑀆𑀳 ‘‘𑀅𑀜𑁆𑀜𑀁 𑀩𑁆𑀬𑀸𑀓𑀭𑀺𑀁𑀲𑀽𑀢𑀺 𑀅𑀭𑀳𑀢𑁆𑀢𑀁 𑀩𑁆𑀬𑀸𑀓𑀭𑀺𑀁𑀲𑀽’’𑀢𑀺. 𑀅𑀦𑁆𑀢𑀭𑀸 𑀞𑀧𑁂𑀢𑀻𑀢𑀺 𑀲𑁂𑀔𑀪𑀽𑀫𑀺𑀬𑀁 𑀅𑀥𑀺𑀫𑀸𑀦𑁄 𑀞𑀧𑁂𑀢𑀺. 𑀓𑀺𑀮𑁂𑀲𑀲𑀫𑀼𑀤𑀸𑀘𑀸𑀭𑀁 𑀅𑀧𑀲𑁆𑀲𑀦𑁆𑀢𑁄𑀢𑀺 𑀧𑀼𑀭𑀺𑀫𑀫𑀕𑁆𑀕𑀢𑁆𑀢𑀬𑀯𑀚𑁆𑀛𑀸𑀦𑀁𑀬𑁂𑀯 𑀓𑀺𑀮𑁂𑀲𑀸𑀦𑀁 𑀯𑀲𑁂𑀦 𑀯𑀼𑀢𑁆𑀢𑀁, 𑀦 𑀪𑀯𑀭𑀸𑀕𑀸𑀤𑀻𑀦𑀁.

𑀲𑀯𑀺𑀪𑀗𑁆𑀕𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁧𑁯𑁭. 𑀧𑀓𑀢𑀺𑀫𑀦𑀼𑀲𑁆𑀲𑁂𑀳𑀺 𑀉𑀢𑁆𑀢𑀭𑀺𑀢𑀭𑀸𑀦𑀁 𑀩𑀼𑀤𑁆𑀥𑀸𑀤𑀺𑀉𑀢𑁆𑀢𑀫𑀧𑀼𑀭𑀺𑀲𑀸𑀦𑀁 𑀅𑀥𑀺𑀕𑀫𑀥𑀫𑁆𑀫𑁄 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑁄𑀢𑀺 𑀆𑀳 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀸𑀦𑀦𑁆𑀢𑀺𑀆𑀤𑀺. 𑀧𑀸𑀴𑀺𑀬𑀁 (𑀧𑀸𑀭𑀸. 𑁧𑁯𑁮) ‘‘𑀅𑀢𑁆𑀣𑀺 𑀘 𑀫𑁂 𑀏𑀢𑁂 𑀥𑀫𑁆𑀫𑀸 𑀫𑀬𑀻’’𑀢𑀺 𑀏𑀢𑁆𑀣 𑀫𑁂𑀢𑀺 𑀇𑀤𑀁 𑀧𑀤𑀧𑀽𑀭𑀡𑀫𑀢𑁆𑀢𑀁. 𑀅𑀥𑀺𑀕𑀦𑁆𑀢𑀩𑁆𑀩𑀢𑁄 𑀅𑀥𑀺𑀕𑀫𑀲𑀗𑁆𑀔𑀸𑀢𑀲𑁆𑀲 𑀛𑀸𑀦𑀸𑀤𑀺𑀦𑁄 𑀧𑀼𑀘𑁆𑀙𑀸 𑀅𑀥𑀺𑀕𑀫𑀧𑀼𑀘𑁆𑀙𑀸, 𑀲𑀸 𑀘 𑀛𑀸𑀦𑀸𑀤𑀻𑀲𑀼 𑀲𑀸𑀫𑀜𑁆𑀜𑀢𑁄 𑀧𑀯𑀢𑁆𑀢𑀸𑀢𑀺 𑀇𑀤𑀸𑀦𑀺 𑀢𑀢𑁆𑀣 𑀧𑀞𑀫𑀚𑁆𑀛𑀸𑀦𑀁 𑀯𑀸 𑀤𑀼𑀢𑀺𑀬𑀸𑀤𑀻𑀲𑀼 𑀅𑀜𑁆𑀜𑀢𑀭𑀁 𑀯𑀸 𑀢𑀢𑁆𑀣𑀸𑀧𑀺 𑀓𑀲𑀺𑀡𑀸𑀤𑀺𑀆𑀭𑀫𑁆𑀫𑀡𑁂𑀲𑀼 𑀓𑀢𑀭𑀫𑀸𑀭𑀫𑁆𑀫𑀡𑀁 𑀛𑀸𑀦𑀁 𑀯𑀸 𑀮𑁄𑀓𑀼𑀢𑁆𑀢𑀭𑁂𑀲𑀼 𑀘 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀁 𑀯𑀸 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑀸𑀤𑀻𑀲𑀼 𑀅𑀜𑁆𑀜𑀢𑀭𑀁 𑀯𑀸 𑀢𑀢𑁆𑀣𑀸𑀧𑀺 𑀲𑀼𑀜𑁆𑀜𑀢𑀯𑀺𑀫𑁄𑀓𑁆𑀔𑀁 𑀯𑀸 𑀅𑀧𑁆𑀧𑀡𑀺𑀳𑀺𑀢𑀯𑀺𑀫𑁄𑀓𑁆𑀔𑀸𑀤𑀻𑀲𑀼 𑀅𑀜𑁆𑀜𑀢𑀭𑀁 𑀯𑀸𑀢𑀺 𑀏𑀯𑀁 𑀧𑀘𑁆𑀘𑁂𑀓𑀁 𑀪𑁂𑀤𑀦𑀺𑀤𑁆𑀥𑀸𑀭𑀡𑀯𑀲𑁂𑀦 𑀧𑀼𑀘𑁆𑀙𑀦𑀸𑀓𑀸𑀭𑀁 𑀤𑀲𑁆𑀲𑁂𑀢𑀼𑀁 𑀧𑀸𑀴𑀺𑀬𑀁 (𑀧𑀸𑀭𑀸. 𑁧𑁯𑁮) ‘‘𑀧𑀼𑀦 𑀓𑀢𑀫𑁂𑀲𑀁 𑀢𑁆𑀯𑀁 𑀥𑀫𑁆𑀫𑀸𑀦𑀁 𑀮𑀸𑀪𑀻’’𑀢𑀺 𑀅𑀬𑀁 𑀧𑀼𑀘𑁆𑀙𑀸 𑀤𑀲𑁆𑀲𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀸, 𑀢𑁂𑀦𑀸𑀳 𑀧𑀞𑀫𑀫𑀕𑁆𑀕𑀸𑀤𑀻𑀲𑀽𑀢𑀺𑀆𑀤𑀺. 𑀬𑀸𑀬 𑀅𑀦𑀼𑀓𑁆𑀓𑀫𑀧𑀝𑀺𑀧𑀢𑁆𑀢𑀺𑀬𑀸 𑀮𑁄𑀓𑀼𑀢𑁆𑀢𑀭𑁄 𑀅𑀥𑀺𑀕𑀫𑁄 𑀆𑀕𑀘𑁆𑀙𑀢𑀺, 𑀲𑀸 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀢𑁆𑀢𑀺 𑀆𑀕𑀫𑀦𑀧𑀝𑀺𑀧𑀤𑀸. 𑀦 𑀲𑀼𑀚𑁆𑀛𑀢𑀻𑀢𑀺 𑀧𑀼𑀘𑁆𑀙𑀺𑀬𑀫𑀸𑀦𑁄 𑀧𑀝𑀺𑀧𑀢𑁆𑀢𑀺𑀓𑁆𑀓𑀫𑀁 𑀉𑀮𑁆𑀮𑀗𑁆𑀖𑀺𑀢𑁆𑀯𑀸 𑀓𑀣𑁂𑀢𑀺. 𑀅𑀧𑀦𑁂𑀢𑀩𑁆𑀩𑁄𑀢𑀺 𑀢𑀬𑀸 𑀯𑀼𑀢𑁆𑀢𑀓𑁆𑀓𑀫𑁂𑀦𑀸𑀬𑀁 𑀦 𑀲𑀓𑁆𑀓𑀸 𑀅𑀥𑀺𑀕𑀦𑁆𑀢𑀼𑀦𑁆𑀢𑀺 𑀅𑀥𑀺𑀕𑀢𑀫𑀸𑀦𑀢𑁄 𑀅𑀧𑀦𑁂𑀢𑀩𑁆𑀩𑁄. 𑀲𑀦𑁆𑀦𑀺𑀳𑀺𑀢𑁂𑀲𑀼 𑀓𑀧𑁆𑀧𑀺𑀬𑁂𑀲𑀼𑀧𑀺 𑀘𑀢𑀽𑀲𑀼 𑀧𑀘𑁆𑀘𑀬𑁂𑀲𑀼 𑀅𑀮𑀕𑁆𑀕𑀢𑁆𑀢𑀸 ‘‘𑀆𑀓𑀸𑀲𑁂 𑀧𑀸𑀡𑀺𑀲𑀫𑁂𑀦 𑀘𑁂𑀢𑀲𑀸’’𑀢𑀺 𑀯𑀼𑀢𑁆𑀢𑀁. 𑀯𑀼𑀢𑁆𑀢𑀲𑀤𑀺𑀲𑀁 𑀩𑁆𑀬𑀸𑀓𑀭𑀡𑀁 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀔𑀻𑀡𑀸𑀲𑀯𑀧𑀝𑀺𑀧𑀢𑁆𑀢𑀺𑀲𑀤𑀺𑀲𑀸 𑀧𑀝𑀺𑀧𑀤𑀸 𑀳𑁄𑀢𑀺 𑀲𑀼𑀯𑀺𑀓𑁆𑀔𑀫𑁆𑀪𑀺𑀢𑀓𑀺𑀮𑁂𑀲𑀢𑁆𑀢𑀸. 𑀇𑀤𑀜𑁆𑀘 𑀅𑀭𑀳𑀢𑁆𑀢𑀁 𑀧𑀝𑀺𑀚𑀸𑀦𑀦𑁆𑀢𑀲𑁆𑀲 𑀯𑀲𑁂𑀦 𑀯𑀼𑀢𑁆𑀢𑀁, 𑀢𑁂𑀦𑀸𑀳 𑀔𑀻𑀡𑀸𑀲𑀯𑀲𑁆𑀲 𑀦𑀸𑀫𑀸𑀢𑀺𑀆𑀤𑀺. 𑀏𑀯𑀁 𑀲𑀼𑀯𑀺𑀓𑁆𑀔𑀫𑁆𑀪𑀺𑀢𑀓𑀺𑀮𑁂𑀲𑀲𑁆𑀲 𑀯𑀢𑁆𑀢𑀦𑀲𑁂𑀓𑁆𑀔𑀥𑀫𑁆𑀫𑀧𑀝𑀺𑀚𑀸𑀦𑀦𑀁 𑀇𑀫𑀺𑀦𑀸 𑀪𑀬𑀼𑀧𑁆𑀧𑀸𑀤𑀦𑁂𑀦, 𑀅𑀫𑁆𑀩𑀺𑀮𑀸𑀤𑀺𑀤𑀲𑁆𑀲𑀦𑁂 𑀔𑁂𑀴𑀼𑀧𑁆𑀧𑀸𑀤𑀸𑀤𑀺𑀦𑀸 𑀘 𑀦 𑀲𑀓𑁆𑀓𑀸 𑀯𑀻𑀫𑀁𑀲𑀺𑀢𑀼𑀁, 𑀢𑀲𑁆𑀫𑀸 𑀢𑀲𑁆𑀲 𑀯𑀘𑀦𑁂𑀦𑁂𑀯 𑀢𑀁 𑀲𑀤𑁆𑀥𑀸𑀢𑀩𑁆𑀩𑀁. 𑀅𑀬𑀁 𑀪𑀺𑀓𑁆𑀔𑀼 𑀲𑀫𑁆𑀧𑀦𑁆𑀦𑀩𑁆𑀬𑀸𑀓𑀭𑀡𑁄𑀢𑀺 𑀇𑀤𑀁 𑀦 𑀓𑁂𑀯𑀮𑀁 𑀅𑀪𑀸𑀬𑀦𑀓𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑀏𑀓𑀘𑁆𑀘𑀲𑁆𑀲 𑀲𑀽𑀭𑀚𑀸𑀢𑀺𑀓𑀲𑁆𑀲 𑀧𑀼𑀣𑀼𑀚𑁆𑀚𑀦𑀲𑁆𑀲𑀸𑀧𑀺 𑀅𑀪𑀸𑀬𑀦𑀢𑁄, 𑀭𑀚𑁆𑀚𑀦𑀻𑀬𑀸𑀭𑀫𑁆𑀫𑀡𑀸𑀦𑀁 𑀩𑀤𑀭𑀲𑀸𑀴𑀯𑀸𑀤𑀺𑀅𑀫𑁆𑀩𑀺𑀮𑀫𑀤𑁆𑀤𑀦𑀸𑀤𑀻𑀦𑀁 𑀉𑀧𑀦𑀬𑀦𑁂𑀧𑀺 𑀔𑁂𑀴𑀼𑀧𑁆𑀧𑀸𑀤𑀸𑀤𑀺𑀢𑀡𑁆𑀳𑀸𑀧𑀯𑀢𑁆𑀢𑀭𑀳𑀺𑀢𑀁 𑀲𑀩𑁆𑀩𑀣𑀸 𑀲𑀼𑀲𑁄𑀥𑀺𑀢𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀕𑀳𑁂𑀢𑀩𑁆𑀩𑀁.

𑀅𑀲𑀦𑁆𑀢𑀕𑀼𑀡𑀲𑀫𑁆𑀪𑀸𑀯𑀦𑀮𑀓𑁆𑀔𑀡𑀸 𑀧𑀸𑀧𑀺𑀘𑁆𑀙𑀸𑀢𑀺 𑀆𑀳 𑀬𑀸 𑀲𑀸 𑀇𑀥𑁂𑀓𑀘𑁆𑀘𑁄𑀢𑀺𑀆𑀤𑀺. 𑀆𑀤𑀺-𑀲𑀤𑁆𑀤𑁂𑀦 𑀅𑀲𑁆𑀲𑀤𑁆𑀥𑁄𑀢𑀺𑀆𑀤𑀺𑀧𑀸𑀞𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀲𑀸𑀫𑀜𑁆𑀜𑀁 𑀤𑀼𑀧𑁆𑀧𑀭𑀸𑀫𑀝𑁆𑀞𑀦𑁆𑀢𑀺 𑀲𑀫𑀡𑀥𑀫𑁆𑀫𑀲𑀗𑁆𑀔𑀸𑀢𑀁 𑀲𑀸𑀫𑀜𑁆𑀜𑀁 𑀔𑀡𑁆𑀟𑀲𑀻𑀮𑀸𑀤𑀺𑀢𑀸𑀬 𑀤𑀼𑀧𑁆𑀧𑀭𑀸𑀫𑀝𑁆𑀞𑀁 𑀤𑀼𑀝𑁆𑀞𑀼 𑀕𑀳𑀺𑀢𑀁 𑀦𑀺𑀭𑀬𑀸𑀬 𑀦𑀺𑀭𑀬𑀤𑀼𑀓𑁆𑀔𑀸𑀬 𑀢𑀁 𑀧𑀼𑀕𑁆𑀕𑀮𑀁 𑀢𑀢𑁆𑀣 𑀦𑀺𑀭𑀬𑁂 𑀉𑀧𑀓𑀟𑁆𑀠𑀢𑀺 𑀦𑀺𑀩𑁆𑀩𑀢𑁆𑀢𑀸𑀧𑁂𑀢𑀻𑀢𑀺 𑀅𑀢𑁆𑀣𑁄. 𑀲𑀺𑀣𑀺𑀮𑁄𑀢𑀺 𑀑𑀮𑀻𑀬𑀺𑀢𑁆𑀯𑀸 𑀓𑀭𑀡𑁂𑀦 𑀲𑀺𑀣𑀺𑀮𑀕𑀸𑀳𑁂𑀦 𑀓𑀢𑁄, 𑀲𑀣𑁂𑀦 𑀯𑀸 𑀲𑀸𑀞𑁂𑀬𑁆𑀬𑁂𑀦 𑀆𑀤𑀺𑀡𑁆𑀡𑁄 𑀲𑀺𑀣𑀺𑀮𑁄. 𑀧𑀭𑀺𑀩𑁆𑀩𑀚𑁄𑀢𑀺 𑀲𑀫𑀡𑀪𑀸𑀯𑁄. 𑀪𑀺𑀬𑁆𑀬𑁄𑀢𑀺 𑀧𑀼𑀩𑁆𑀩𑁂 𑀯𑀺𑀚𑁆𑀚𑀫𑀸𑀦𑀸𑀦𑀁 𑀭𑀸𑀕𑀭𑀚𑀸𑀤𑀻𑀦𑀁 𑀉𑀧𑀭𑀺 𑀅𑀧𑀭𑀫𑁆𑀧𑀺 𑀭𑀚𑀁 𑀆𑀓𑀺𑀭𑀢𑀻𑀢𑀺 𑀅𑀢𑁆𑀣𑁄. 𑀪𑀺𑀓𑁆𑀔𑀼𑀪𑀸𑀯𑁄𑀢𑀺 𑀅𑀥𑀫𑁆𑀫𑀺𑀓𑀧𑀝𑀺𑀜𑁆𑀜𑀸𑀫𑀢𑁆𑀢𑀲𑀺𑀤𑁆𑀥𑁄 𑀪𑀺𑀓𑁆𑀔𑀼𑀪𑀸𑀯𑁄. 𑀅𑀚𑀸𑀦𑀫𑁂𑀯𑀸𑀢𑀺 𑀏𑀢𑁆𑀣 𑀏𑀯-𑀲𑀤𑁆𑀤𑁄 𑀅𑀯𑀥𑀸𑀭𑀡𑁂 𑀅𑀚𑀸𑀦𑀦𑁆𑀢𑁄 𑀏𑀯𑀸𑀢𑀺, ‘‘𑀅𑀚𑀸𑀦𑀫𑁂𑀯’’𑀦𑁆𑀢𑀺𑀧𑀺 𑀧𑀸𑀞𑁄, 𑀢𑀢𑁆𑀣 𑀧𑀦 𑀏𑀯𑀁 𑀚𑀸𑀦𑀸𑀫𑀺 𑀏𑀯𑀁 𑀧𑀲𑁆𑀲𑀸𑀫𑀻𑀢𑀺 𑀬𑁄𑀚𑁂𑀢𑀩𑁆𑀩𑀁.

𑀧𑀤𑀪𑀸𑀚𑀦𑀻𑀬𑀯𑀡𑁆𑀡𑀦𑀸

𑁧𑁯𑁯. 𑀏𑀯𑀦𑁆𑀢𑀺 𑀘 𑀧𑀞𑀫𑀚𑁆𑀛𑀸𑀦𑀸𑀤𑀺𑀧𑀭𑀸𑀫𑀲𑀦𑀁 𑀧𑀞𑀫𑀚𑁆𑀛𑀸𑀦𑀁 𑀚𑀸𑀦𑀸𑀫𑀺 𑀤𑀼𑀢𑀺𑀬𑀸𑀤𑀺𑀛𑀸𑀦𑀦𑁆𑀢𑀺. 𑀅𑀲𑀼𑀪𑀚𑁆𑀛𑀸𑀦𑀸𑀤𑀻𑀦𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀓𑀸𑀬𑀕𑀢𑀸𑀲𑀢𑀺𑀚𑁆𑀛𑀸𑀦𑀁 𑀓𑀲𑀺𑀡𑀚𑁆𑀛𑀸𑀦𑀁 𑀓𑀲𑀺𑀡𑀫𑀽𑀮𑀓𑀸𑀦𑀺 𑀆𑀭𑀼𑀧𑁆𑀧𑀚𑁆𑀛𑀸𑀦𑀸𑀦𑀺 𑀘 𑀲𑀗𑁆𑀕𑀡𑁆𑀳𑀸𑀢𑀺. 𑀯𑀺𑀫𑁄𑀓𑁆𑀔𑁄𑀢𑀺 𑀘𑀢𑀼𑀩𑁆𑀩𑀺𑀥𑁄 𑀫𑀕𑁆𑀕𑁄, 𑀢𑀲𑁆𑀲 𑀲𑀕𑀼𑀡𑀢𑁄 𑀲𑀼𑀜𑁆𑀜𑀢𑀸𑀤𑀺𑀦𑀸𑀫𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 𑀲𑁄 𑀧𑀦𑀸𑀬𑀦𑁆𑀢𑀺𑀆𑀤𑀺. 𑀫𑀕𑁆𑀕𑁄 𑀳𑀺 𑀦𑀸𑀫 𑀧𑀜𑁆𑀘𑀳𑀺 𑀓𑀸𑀭𑀡𑁂𑀳𑀺 𑀦𑀸𑀫𑀁 𑀮𑀪𑀢𑀺 𑀲𑀭𑀲𑁂𑀦 𑀯𑀸 𑀧𑀘𑁆𑀘𑀦𑀻𑀓𑁂𑀦 𑀯𑀸 𑀲𑀕𑀼𑀡𑁂𑀦 𑀯𑀸 𑀆𑀭𑀫𑁆𑀫𑀡𑁂𑀦 𑀯𑀸 𑀆𑀕𑀫𑀦𑁂𑀦 𑀯𑀸. 𑀲𑀘𑁂 𑀳𑀺 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸 𑀅𑀦𑀺𑀘𑁆𑀘𑀢𑁄 𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀺𑀢𑁆𑀯𑀸 𑀯𑀼𑀝𑁆𑀞𑀸𑀢𑀺, 𑀫𑀕𑁆𑀕𑁄 𑀅𑀦𑀺𑀫𑀺𑀢𑁆𑀢𑀯𑀺𑀫𑁄𑀓𑁆𑀔𑁂𑀦 𑀯𑀺𑀫𑀼𑀘𑁆𑀘𑀢𑀺. 𑀲𑀘𑁂 𑀤𑀼𑀓𑁆𑀔𑀢𑁄 𑀲𑀫𑁆𑀫𑀲𑀺𑀢𑁆𑀯𑀸 𑀯𑀼𑀝𑁆𑀞𑀸𑀢𑀺, 𑀅𑀧𑁆𑀧𑀡𑀺𑀳𑀺𑀢𑀯𑀺𑀫𑁄𑀓𑁆𑀔𑁂𑀦 𑀯𑀺𑀫𑀼𑀘𑁆𑀘𑀢𑀺. 𑀲𑀘𑁂 𑀅𑀦𑀢𑁆𑀢𑀢𑁄 𑀲𑀫𑁆𑀫𑀲𑀺𑀢𑁆𑀯𑀸 𑀯𑀼𑀝𑁆𑀞𑀸𑀢𑀺, 𑀲𑀼𑀜𑁆𑀜𑀢𑀯𑀺𑀫𑁄𑀓𑁆𑀔𑁂𑀦 𑀯𑀺𑀫𑀼𑀘𑁆𑀘𑀢𑀺, 𑀇𑀤𑀁 𑀲𑀭𑀲𑀢𑁄 𑀦𑀸𑀫𑀁 𑀦𑀸𑀫. 𑀬𑀲𑁆𑀫𑀸 𑀧𑀦𑁂𑀲 𑀲𑀗𑁆𑀔𑀸𑀭𑁂𑀲𑀼 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀬 𑀦𑀺𑀘𑁆𑀘𑀦𑀺𑀫𑀺𑀢𑁆𑀢𑀁 𑀧𑀚𑀳𑀦𑁆𑀢𑁄 𑀆𑀕𑀢𑁄, 𑀢𑀲𑁆𑀫𑀸 𑀅𑀦𑀺𑀫𑀺𑀢𑁆𑀢𑁄. 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸𑀬 𑀲𑀼𑀔𑀲𑀜𑁆𑀜𑀁 𑀧𑀡𑀺𑀥𑀺𑀁 𑀧𑀢𑁆𑀣𑀦𑀁 𑀧𑀳𑀸𑀬 𑀆𑀕𑀢𑀢𑁆𑀢𑀸 𑀅𑀧𑁆𑀧𑀡𑀺𑀳𑀺𑀢𑁄. 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀬 𑀅𑀢𑁆𑀢𑀲𑀜𑁆𑀜𑀁 𑀧𑀳𑀸𑀬 𑀅𑀢𑁆𑀢𑀲𑀼𑀜𑁆𑀜𑀢𑀸𑀤𑀲𑁆𑀲𑀦𑀯𑀲𑁂𑀦 𑀲𑀼𑀜𑁆𑀜𑀢𑀸 𑀳𑁄𑀢𑀺, 𑀇𑀤𑀁 𑀧𑀘𑁆𑀘𑀦𑀻𑀓𑀢𑁄 𑀦𑀸𑀫𑀁 𑀦𑀸𑀫. 𑀭𑀸𑀕𑀸𑀤𑀻𑀳𑀺 𑀧𑀦𑁂𑀲 𑀲𑀼𑀜𑁆𑀜𑀢𑀢𑁆𑀢𑀸 𑀲𑀼𑀜𑁆𑀜𑀢𑁄, 𑀭𑀽𑀧𑀦𑀺𑀫𑀺𑀢𑁆𑀢𑀸𑀤𑀻𑀦𑀁, 𑀭𑀸𑀕𑀦𑀺𑀫𑀺𑀢𑁆𑀢𑀸𑀤𑀻𑀦𑀁 𑀏𑀯 𑀯𑀸 𑀅𑀪𑀸𑀯𑁂𑀦 𑀅𑀦𑀺𑀫𑀺𑀢𑁆𑀢𑁄, 𑀭𑀸𑀕𑀧𑀡𑀺𑀥𑀺𑀆𑀤𑀻𑀦𑀁 𑀅𑀪𑀸𑀯𑀢𑁄 𑀅𑀧𑁆𑀧𑀡𑀺𑀳𑀺𑀢𑁄𑀢𑀺 𑀯𑀼𑀘𑁆𑀘𑀢𑀺, 𑀇𑀤𑀁 𑀅𑀲𑁆𑀲 𑀲𑀕𑀼𑀡𑀢𑁄 𑀦𑀸𑀫𑀁. 𑀭𑀸𑀕𑀸𑀤𑀺𑀲𑀼𑀜𑁆𑀜𑀁 𑀅𑀦𑀺𑀫𑀺𑀢𑁆𑀢𑀁 𑀅𑀧𑁆𑀧𑀡𑀺𑀳𑀺𑀢𑀜𑁆𑀘 𑀦𑀺𑀩𑁆𑀩𑀸𑀦𑀁 𑀆𑀭𑀫𑁆𑀫𑀡𑀁 𑀓𑀭𑁄𑀢𑀻𑀢𑀺 𑀲𑀼𑀜𑁆𑀜𑀢𑁄 𑀅𑀦𑀺𑀫𑀺𑀢𑁆𑀢𑁄 𑀅𑀧𑁆𑀧𑀡𑀺𑀳𑀺𑀢𑁄𑀢𑀺 𑀯𑀼𑀘𑁆𑀘𑀢𑀺, 𑀇𑀤𑀫𑀲𑁆𑀲 𑀆𑀭𑀫𑁆𑀫𑀡𑀢𑁄 𑀦𑀸𑀫𑀁. 𑀆𑀕𑀫𑀦𑀁 𑀧𑀦 𑀤𑀼𑀯𑀺𑀥𑀁 𑀯𑀺𑀧𑀲𑁆𑀲𑀦𑀸𑀕𑀫𑀦𑀁 𑀫𑀕𑁆𑀕𑀸𑀕𑀫𑀦𑀜𑁆𑀘. 𑀢𑀢𑁆𑀣 𑀫𑀕𑁆𑀕𑁂 𑀯𑀺𑀧𑀲𑁆𑀲𑀦𑀸𑀕𑀫𑀦𑀫𑁂𑀯, 𑀨𑀮𑁂 𑀧𑀦 𑀫𑀕𑁆𑀕𑀸𑀦𑀦𑁆𑀢𑀭𑁂 𑀫𑀕𑁆𑀕𑀸𑀕𑀫𑀦𑀁, 𑀨𑀮𑀲𑀫𑀸𑀧𑀢𑁆𑀢𑀺𑀬𑀁 𑀯𑀺𑀧𑀲𑁆𑀲𑀦𑀸𑀕𑀫𑀦𑀫𑁆𑀧𑀺. 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀯𑀲𑁂𑀦 𑀫𑀕𑁆𑀕𑁄 𑀲𑀼𑀜𑁆𑀜𑀢𑁄 𑀅𑀦𑀺𑀘𑁆𑀘𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸𑀳𑀺 𑀅𑀦𑀺𑀫𑀺𑀢𑁆𑀢𑁄 𑀅𑀧𑁆𑀧𑀡𑀺𑀳𑀺𑀢𑁄𑀢𑀺 𑀏𑀯𑀁 𑀯𑀺𑀧𑀲𑁆𑀲𑀦𑀸 𑀅𑀢𑁆𑀢𑀦𑁄 𑀦𑀸𑀫𑀁 𑀫𑀕𑁆𑀕𑀲𑁆𑀲 𑀤𑁂𑀢𑀺, 𑀫𑀕𑁆𑀕𑁄 𑀨𑀮𑀲𑁆𑀲𑀸𑀢𑀺 𑀇𑀤𑀁 𑀆𑀕𑀫𑀦𑀢𑁄 𑀦𑀸𑀫𑀁.

𑀲𑀼𑀜𑁆𑀜𑀢𑁆𑀢𑀸𑀢𑀺 𑀯𑀺𑀯𑀺𑀢𑁆𑀢𑀢𑁆𑀢𑀸. 𑀭𑀸𑀕𑀸𑀤𑀬𑁄𑀯 𑀧𑀢𑀺𑀝𑁆𑀞𑀸𑀦𑀝𑁆𑀞𑁂𑀦 𑀧𑀡𑀺𑀥𑀻𑀢𑀺 𑀆𑀳 ‘‘𑀭𑀸𑀕𑀤𑁄𑀲𑀫𑁄𑀳𑀧𑀡𑀺𑀥𑀻𑀦’’𑀦𑁆𑀢𑀺. 𑀇𑀫𑀺𑀲𑁆𑀲𑀸 𑀯𑀺𑀚𑁆𑀚𑀸𑀬𑀸𑀢𑀺 𑀤𑀺𑀩𑁆𑀩𑀘𑀓𑁆𑀔𑀼𑀯𑀺𑀚𑁆𑀚𑀸𑀬𑀸𑀢𑀺𑀆𑀤𑀺𑀦𑀸 𑀏𑀓𑁂𑀓𑀯𑀺𑀚𑁆𑀚𑀁 𑀲𑀦𑁆𑀥𑀸𑀬 𑀯𑀤𑀦𑁆𑀢𑀺. 𑀏𑀯𑀁 𑀏𑀓𑀺𑀲𑁆𑀲𑀸𑀧𑀺 𑀦𑀸𑀫𑀁 𑀅𑀕𑁆𑀕𑀳𑁂𑀢𑁆𑀯𑀸𑀧𑀺 𑀢𑀸 𑀏𑀯 𑀲𑀦𑁆𑀥𑀸𑀬 ‘‘𑀯𑀺𑀚𑁆𑀚𑀸𑀦𑀁 𑀮𑀸𑀪𑀺𑀫𑁆𑀳𑀻’’𑀢𑀺 𑀪𑀡𑀦𑁆𑀢𑁄𑀧𑀺 𑀧𑀸𑀭𑀸𑀚𑀺𑀓𑁄 𑀳𑁄𑀢𑀻𑀢𑀺 𑀲𑀗𑁆𑀔𑁂𑀧𑀝𑁆𑀞𑀓𑀣𑀸𑀬𑀁 𑀅𑀥𑀺𑀧𑁆𑀧𑀸𑀬𑁄. 𑀯𑀢𑁆𑀣𑀼𑀯𑀺𑀚𑁆𑀚𑀸𑀤𑀻𑀦𑀺 𑀧𑀦 𑀲𑀦𑁆𑀥𑀸𑀬 𑀯𑀤𑀦𑁆𑀢𑁄 𑀦 𑀳𑁄𑀢𑀺. 𑀏𑀓𑁂𑀓𑀓𑁄𑀝𑁆𑀞𑀸𑀲𑀯𑀲𑁂𑀦𑀸𑀢𑀺 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀦𑀬𑁂𑀦 𑀮𑁄𑀓𑀼𑀢𑁆𑀢𑀭𑀯𑀺𑀲𑁂𑀲𑀁 𑀅𑀓𑀢𑁆𑀯𑀸 𑀓𑁂𑀯𑀮𑀁 ‘‘𑀲𑀢𑀺𑀧𑀝𑁆𑀞𑀸𑀦𑀸𑀦𑀁 𑀮𑀸𑀪𑀻’’𑀢𑀺 𑀏𑀓𑁂𑀓𑀓𑁄𑀝𑁆𑀞𑀸𑀲𑀯𑀲𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀓𑁄𑀝𑁆𑀞𑀸𑀲𑁂𑀲𑀼. 𑀓𑀺𑀮𑁂𑀲𑀸𑀦𑀁 𑀧𑀳𑀸𑀦𑀁 𑀦𑀸𑀫 𑀅𑀪𑀸𑀯𑀫𑀢𑁆𑀢𑀫𑁆𑀧𑀺 𑀮𑁄𑀓𑀼𑀢𑁆𑀢𑀭𑀓𑀺𑀘𑁆𑀘𑀢𑁆𑀢𑀸 𑀮𑁄𑀓𑀼𑀢𑁆𑀢𑀭𑀦𑁆𑀢𑀺 𑀲𑀫𑀢𑁆𑀣𑁂𑀢𑀼𑀁 𑀢𑀁 𑀧𑀦𑀸𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀭𑀸𑀕𑀸 𑀘𑀺𑀢𑁆𑀢𑀁 𑀯𑀺𑀦𑀻𑀯𑀭𑀡𑀢𑀸𑀢𑀺 𑀭𑀸𑀕𑀢𑁄 𑀘𑀺𑀢𑁆𑀢𑀲𑁆𑀲 𑀯𑀺𑀦𑀻𑀯𑀭𑀡𑀢𑀸, 𑀢𑀢𑁄 𑀭𑀸𑀕𑀢𑁄 𑀯𑀺𑀫𑀼𑀢𑁆𑀢𑀢𑁆𑀢𑀸 𑀏𑀯 𑀯𑀻𑀢𑀭𑀸𑀕𑀦𑀻𑀯𑀭𑀡𑀢𑀸𑀢𑀺 𑀅𑀢𑁆𑀣𑁄, 𑀬𑀸 𑀘 𑀧𑀜𑁆𑀘 𑀯𑀺𑀚𑁆𑀚𑀸𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀦 𑀆𑀕𑀢𑀸𑀢𑀺 𑀇𑀥 𑀧𑀤𑀪𑀸𑀚𑀦𑁂 ‘‘𑀜𑀸𑀡𑀦𑁆𑀢𑀺 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸’’𑀢𑀺 (𑀧𑀸𑀭𑀸. 𑁧𑁯𑁯) 𑀯𑀼𑀢𑁆𑀢𑀢𑁆𑀢𑀸 𑀲𑁂𑀲𑀸 𑀧𑀜𑁆𑀘 𑀯𑀺𑀚𑁆𑀚𑀸 𑀦 𑀆𑀕𑀢𑀸𑀢𑀺 𑀅𑀢𑁆𑀣𑁄. 𑀦𑀺𑀩𑁆𑀩𑀢𑁆𑀢𑀺𑀢𑀮𑁄𑀓𑀼𑀢𑁆𑀢𑀭𑀢𑁆𑀢𑀸𑀢𑀺 𑀮𑁄𑀓𑀺𑀬𑀥𑀫𑁆𑀫𑀲𑀸𑀥𑀸𑀭𑀡𑀲𑀗𑁆𑀔𑀢𑀲𑁆𑀲𑀸𑀧𑀺 𑀅𑀪𑀸𑀯𑀸 𑀮𑁄𑀓𑀺𑀬𑁂𑀳𑀺 𑀲𑀩𑁆𑀩𑀣𑀸 𑀅𑀲𑀫𑁆𑀫𑀺𑀲𑁆𑀲𑀮𑁄𑀓𑀼𑀢𑁆𑀢𑀭𑀢𑁆𑀢𑀸. 𑀅𑀜𑁆𑀜𑀦𑁆𑀢𑀺 𑀲𑀗𑁆𑀔𑁂𑀧𑀝𑁆𑀞𑀓𑀣𑀸𑀤𑀺𑀁 𑀯𑀤𑀦𑁆𑀢𑀺, 𑀢𑀫𑁆𑀧𑀺 𑀢𑀢𑁆𑀣𑁂𑀯 𑀧𑀝𑀺𑀓𑁆𑀔𑀺𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑁨𑁦𑁦. 𑀧𑀼𑀦 𑀆𑀦𑁂𑀢𑁆𑀯𑀸 𑀧𑀞𑀫𑀚𑁆𑀛𑀸𑀦𑀸𑀤𑀻𑀳𑀺 𑀦 𑀬𑁄𑀚𑀺𑀢𑀦𑁆𑀢𑀺 𑀏𑀢𑁆𑀣 ‘‘𑀧𑀞𑀫𑀚𑁆𑀛𑀸𑀦𑁂𑀦𑀸𑀢𑀺 𑀧𑀸𑀞𑁄’’𑀢𑀺 𑀓𑁂𑀘𑀺 𑀯𑀤𑀦𑁆𑀢𑀺, 𑀢𑀁 𑀬𑀼𑀢𑁆𑀢𑀫𑁂𑀯 𑀆𑀤𑀺-𑀲𑀤𑁆𑀤𑁂𑀦 𑀕𑀳𑁂𑀢𑀩𑁆𑀩𑀲𑁆𑀲 𑀛𑀸𑀦𑀲𑁆𑀲 𑀅𑀪𑀸𑀯𑀸. 𑀧𑀞𑀫𑀚𑁆𑀛𑀸𑀦𑀫𑀽𑀮𑀓𑀜𑁆𑀳𑀺 𑀏𑀓𑀫𑁂𑀯 𑀔𑀡𑁆𑀟𑀘𑀓𑁆𑀓𑀁. 𑀓𑀢𑁆𑀢𑀼𑀲𑀸𑀥𑀦𑁄𑀧𑀺 𑀪𑀡𑀺𑀢-𑀲𑀤𑁆𑀤𑁄 𑀳𑁄𑀢𑀻𑀢𑀺 𑀆𑀳 𑀅𑀣 𑀯𑀸𑀢𑀺𑀆𑀤𑀺. 𑀬𑁂𑀦 𑀘𑀺𑀢𑁆𑀢𑁂𑀦 𑀫𑀼𑀲𑀸 𑀪𑀡𑀢𑀺, 𑀢𑁂𑀦𑁂𑀯 𑀘𑀺𑀢𑁆𑀢𑁂𑀦 𑀦 𑀲𑀓𑁆𑀓𑀸 ‘‘𑀫𑀼𑀲𑀸 𑀪𑀡𑀸𑀫𑀻’’𑀢𑀺 𑀚𑀸𑀦𑀺𑀢𑀼𑀁, 𑀅𑀦𑁆𑀢𑀭𑀦𑁆𑀢𑀭𑀸 𑀧𑀦 𑀅𑀜𑁆𑀜𑀸𑀳𑀺 𑀫𑀦𑁄𑀤𑁆𑀯𑀸𑀭𑀯𑀻𑀣𑀻𑀳𑀺 ‘‘𑀫𑀼𑀲𑀸 𑀪𑀡𑀸𑀫𑀻’’𑀢𑀺 𑀚𑀸𑀦𑀸𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀪𑀡𑀦𑁆𑀢𑀲𑁆𑀲 𑀳𑁄𑀢𑀺 𑀫𑀼𑀲𑀸 𑀪𑀡𑀸𑀫𑀻’’𑀢𑀺. 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄 𑀤𑀲𑁆𑀲𑀺𑀢𑁄𑀢𑀺 𑀢𑀻𑀳𑀺 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀫𑀼𑀲𑀸𑀯𑀸𑀤𑁄𑀢𑀺 𑀅𑀬𑀫𑀢𑁆𑀣𑁄 𑀤𑀲𑁆𑀲𑀺𑀢𑁄. 𑀤𑀯𑀸𑀢𑀺 𑀲𑀳𑀲𑀸. 𑀭𑀯𑀸𑀢𑀺 𑀅𑀜𑁆𑀜𑀁 𑀯𑀢𑁆𑀢𑀼𑀓𑀸𑀫𑀲𑁆𑀲 𑀔𑀮𑀺𑀢𑁆𑀯𑀸 𑀅𑀜𑁆𑀜𑀪𑀡𑀦𑀁. 𑀢𑀁 𑀚𑀸𑀦𑀸𑀢𑀻𑀢𑀺 𑀢𑀁𑀜𑀸𑀡𑀁, 𑀢𑀲𑁆𑀲 𑀪𑀸𑀯𑁄 𑀢𑀁𑀜𑀸𑀡𑀢𑀸, 𑀜𑀸𑀡𑀲𑁆𑀲 𑀯𑀺𑀲𑀬𑀯𑀺𑀲𑀬𑀻𑀪𑀸𑀯𑁂𑀦 𑀅𑀢𑁆𑀢𑀲𑀁𑀯𑁂𑀤𑀦𑀦𑁆𑀢𑀺 𑀅𑀢𑁆𑀣𑁄. 𑀜𑀸𑀡𑀲𑀫𑁄𑀥𑀸𑀦𑀦𑁆𑀢𑀺 𑀩𑀳𑀽𑀦𑀁 𑀜𑀸𑀡𑀸𑀦𑀁 𑀏𑀓𑀲𑁆𑀫𑀺𑀁 𑀔𑀡𑁂 𑀲𑀫𑁄𑀥𑀸𑀦𑀁, 𑀲𑀳𑀼𑀧𑁆𑀧𑀢𑁆𑀢𑀻𑀢𑀺 𑀅𑀢𑁆𑀣𑁄. 𑀬𑁂𑀦 𑀘𑀺𑀢𑁆𑀢𑁂𑀦 ‘‘𑀫𑀼𑀲𑀸 𑀪𑀡𑀺𑀲𑁆𑀲’’𑀦𑁆𑀢𑀺 𑀚𑀸𑀦𑀸𑀢𑀻𑀢𑀺 𑀇𑀤𑀁 𑀧𑀼𑀩𑁆𑀩𑀪𑀸𑀕𑀘𑁂𑀢𑀦𑀜𑁆𑀘 𑀲𑀦𑁆𑀦𑀺𑀝𑁆𑀞𑀸𑀦𑀘𑁂𑀢𑀦𑀜𑁆𑀘 𑀏𑀓𑀢𑁄 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀬𑁂𑀦 𑀘𑀺𑀢𑁆𑀢𑁂𑀦 𑀧𑀼𑀩𑁆𑀩𑀪𑀸𑀕𑀘𑁂𑀢𑀦𑀸𑀪𑀽𑀢𑁂𑀦 𑀲𑀦𑁆𑀦𑀺𑀝𑁆𑀞𑀸𑀦𑀘𑁂𑀢𑀦𑀸𑀪𑀽𑀢𑁂𑀦 𑀘 𑀯𑀺𑀲𑀁𑀯𑀸𑀤𑀺𑀢𑀩𑁆𑀩𑀲𑀢𑁆𑀢𑀲𑀗𑁆𑀔𑀸𑀭𑁂 𑀚𑀸𑀦𑀸𑀢𑀺, 𑀬𑁂𑀦 𑀘𑀺𑀢𑁆𑀢𑁂𑀦 𑀫𑀼𑀲𑀸 𑀪𑀡𑀺𑀲𑁆𑀲𑀦𑁆𑀢𑀺 𑀅𑀢𑁆𑀣𑁄. 𑀢𑁂𑀦𑁂𑀯…𑀧𑁂… 𑀧𑀭𑀺𑀘𑁆𑀘𑀚𑀺𑀢𑀩𑁆𑀩𑀸𑀢𑀺 𑀢𑁂𑀦𑁂𑀯 𑀘𑀺𑀢𑁆𑀢𑁂𑀦 ‘‘𑀏𑀯𑀁 𑀅𑀳𑀁 𑀫𑀼𑀲𑀸 𑀪𑀡𑀸𑀫𑀻’’𑀢𑀺 𑀯𑀸 ‘‘𑀪𑀡𑀺𑀢’’𑀦𑁆𑀢𑀺 𑀯𑀸 𑀢𑀤𑁂𑀯 𑀫𑀼𑀲𑀸𑀯𑀸𑀤𑀘𑀺𑀢𑁆𑀢𑀫𑀸𑀭𑀫𑁆𑀫𑀡𑀁 𑀓𑀢𑁆𑀯𑀸 𑀪𑀺𑀓𑁆𑀔𑀼 𑀚𑀸𑀦𑀸𑀢𑀻𑀢𑀺 𑀏𑀯𑀁 𑀧𑀼𑀩𑁆𑀩𑀸𑀧𑀭𑀲𑀦𑁆𑀦𑀺𑀝𑁆𑀞𑀸𑀦𑀘𑁂𑀢𑀦𑀸𑀓𑁆𑀔𑀡𑁂𑀲𑀼 𑀢𑀻𑀲𑀼 𑀏𑀓𑁂𑀦𑁂𑀯 𑀘𑀺𑀢𑁆𑀢𑁂𑀦 𑀜𑀸𑀡𑀯𑀺𑀲𑀬𑀜𑁆𑀘 𑀜𑀸𑀡𑀜𑁆𑀘𑀸𑀢𑀺 𑀉𑀪𑀬𑀫𑁆𑀧𑀺 𑀏𑀓𑀓𑁆𑀔𑀡𑁂 𑀧𑀼𑀕𑁆𑀕𑀮𑁄 𑀚𑀸𑀦𑀸𑀢𑀻𑀢𑀺 𑀅𑀬𑀁 𑀢𑀁𑀜𑀸𑀡𑀢𑀸 𑀧𑀭𑀺𑀘𑁆𑀘𑀚𑀺𑀢𑀩𑁆𑀩𑀸 𑀯𑀺𑀲𑀬𑀲𑁆𑀲𑁂𑀯 𑀢𑀤𑀸 𑀧𑀓𑀸𑀲𑀦𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄, 𑀢𑁂𑀦𑀸𑀳 𑀦 𑀳𑀻𑀢𑀺𑀆𑀤𑀺. 𑀬𑀤𑀺 𑀜𑀸𑀡𑀲𑁆𑀲 𑀅𑀢𑁆𑀢𑀦𑁄 𑀲𑀭𑀽𑀧𑀁 𑀦 𑀜𑀸𑀬𑀢𑀺, 𑀓𑀣𑀁 𑀧𑀘𑁆𑀙𑀺𑀫𑀁 𑀘𑀺𑀢𑁆𑀢𑀁 𑀚𑀸𑀦𑀸𑀢𑀻𑀢𑀺 𑀆𑀳 𑀧𑀼𑀭𑀺𑀫𑀁 𑀧𑀼𑀭𑀺𑀫𑀦𑁆𑀢𑀺𑀆𑀤𑀺. 𑀢𑀢𑁆𑀣 𑀪𑀡𑀺𑀲𑁆𑀲𑀸𑀫𑀻𑀢𑀺𑀆𑀤𑀺𑀦𑀸 𑀢𑀻𑀲𑀼 𑀓𑀸𑀮𑁂𑀲𑀼 𑀉𑀧𑁆𑀧𑀦𑁆𑀦𑀁 𑀧𑀼𑀭𑀺𑀫𑀧𑀼𑀭𑀺𑀫𑀘𑀺𑀢𑁆𑀢𑀁 𑀅𑀢𑁆𑀢𑀸𑀦𑀁 𑀯𑀺𑀲𑀬𑀁 𑀓𑀢𑁆𑀯𑀸 𑀉𑀧𑁆𑀧𑀚𑁆𑀚𑀫𑀸𑀦𑀲𑁆𑀲 𑀧𑀘𑁆𑀙𑀺𑀫𑀲𑁆𑀲 𑀧𑀘𑁆𑀙𑀺𑀫𑀲𑁆𑀲 𑀘𑀺𑀢𑁆𑀢𑀲𑁆𑀲 𑀢𑀣𑀸 𑀉𑀧𑁆𑀧𑀢𑁆𑀢𑀺𑀬𑀸 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀢𑀺 𑀬𑁂𑀦 𑀓𑀸𑀭𑀡𑁂𑀦 𑀢𑀻𑀲𑀼 𑀔𑀡𑁂𑀲𑀼 𑀘𑀺𑀢𑁆𑀢𑀸𑀦𑀺 𑀢𑀤𑀜𑁆𑀜𑁂𑀳𑁂𑀯 𑀘𑀺𑀢𑁆𑀢𑁂𑀳𑀺 𑀚𑀸𑀦𑀺𑀢𑀩𑁆𑀩𑀸𑀦𑀺, 𑀢𑀸𑀦𑀺 𑀘 𑀧𑀼𑀭𑀺𑀫𑀧𑀼𑀭𑀺𑀫𑀘𑀺𑀢𑁆𑀢𑁂𑀦𑁂𑀯 𑀅𑀯𑀲𑁆𑀲𑀁 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑁂𑀦 𑀓𑀸𑀭𑀡𑁂𑀦𑀸𑀢𑀺 𑀅𑀢𑁆𑀣𑁄. 𑀢𑀲𑁆𑀫𑀺𑀁 𑀲𑀢𑀻𑀢𑀺 𑀪𑀡𑀺𑀲𑁆𑀲𑀸𑀫𑀻𑀢𑀺 𑀧𑀼𑀩𑁆𑀩𑀪𑀸𑀕𑁂 𑀲𑀢𑀺. 𑀲𑁂𑀲𑀤𑁆𑀯𑀬𑀦𑁆𑀢𑀺 𑀪𑀡𑀸𑀫𑀺, 𑀪𑀡𑀺𑀢𑀦𑁆𑀢𑀺 𑀇𑀤𑀁 𑀤𑁆𑀯𑀬𑀁 𑀦 𑀳𑁂𑀲𑁆𑀲𑀢𑀻𑀢𑀺 𑀏𑀢𑀁 𑀦𑀢𑁆𑀣𑀻𑀢𑀺 𑀬𑁄𑀚𑀦𑀸 𑀳𑁄𑀢𑀺𑀬𑁂𑀯𑀸𑀢𑀺 𑀅𑀢𑁆𑀣𑁄. 𑀏𑀓𑀁 𑀯𑀺𑀬 𑀧𑀓𑀸𑀲𑀢𑀻𑀢𑀺 𑀪𑀺𑀦𑁆𑀦𑀓𑁆𑀔𑀡𑀸𑀦𑀫𑁆𑀧𑀺 𑀦𑀺𑀭𑀦𑁆𑀢𑀭𑀼𑀧𑁆𑀧𑀢𑁆𑀢𑀺𑀬𑀸 ‘‘𑀢𑀤𑁂𑀯𑁂𑀤’’𑀦𑁆𑀢𑀺 𑀕𑀳𑁂𑀢𑀩𑁆𑀩𑀢𑀁 𑀲𑀦𑁆𑀥𑀸𑀬 𑀯𑀤𑀢𑀺.

𑀩𑀮𑀯𑀥𑀫𑁆𑀫𑀯𑀺𑀦𑀺𑀥𑀸𑀦𑀯𑀲𑁂𑀦𑀸𑀢𑀺 𑀩𑀮𑀯𑀕𑀸𑀳𑀲𑁆𑀲 𑀯𑀺𑀦𑀺𑀥𑀸𑀦𑀯𑀲𑁂𑀦. 𑀤𑀼𑀩𑁆𑀩𑀮𑀤𑀼𑀩𑁆𑀩𑀮𑀸𑀦𑀦𑁆𑀢𑀺 𑀤𑀼𑀩𑁆𑀩𑀮𑀤𑀼𑀩𑁆𑀩𑀮𑀸𑀦𑀁 𑀕𑀸𑀳𑀸𑀦𑀁. 𑀲𑀓𑀪𑀸𑀯𑀧𑀭𑀺𑀘𑁆𑀘𑀚𑀦𑀯𑀲𑁂𑀦𑀸𑀢𑀺 𑀅𑀢𑁆𑀢𑀦𑁄 𑀲𑀦𑁆𑀢𑀓𑀪𑀸𑀯𑀲𑁆𑀲 𑀧𑀭𑀺𑀘𑁆𑀘𑀚𑀦𑀯𑀲𑁂𑀦.

𑁨𑁦𑁭. 𑀉𑀢𑁆𑀢𑀸𑀲𑀺𑀢𑀢𑁆𑀢𑀸𑀢𑀺 𑀪𑀬𑀁 𑀚𑀦𑁂𑀢𑁆𑀯𑀸 𑀯𑀺𑀬 𑀧𑀮𑀸𑀧𑀺𑀢𑀢𑁆𑀢𑀸. 𑀏𑀯𑀁 𑀧𑀮𑀸𑀧𑀺𑀢𑁄 𑀦 𑀧𑀼𑀦 𑀢𑀁 𑀞𑀸𑀦𑀁 𑀆𑀕𑀘𑁆𑀙𑀢𑀻𑀢𑀺 𑀆𑀳 ‘‘𑀧𑀼𑀦 𑀅𑀦𑀮𑁆𑀮𑀻𑀬𑀦𑀪𑀸𑀯𑀤𑀲𑁆𑀲𑀦𑀯𑀲𑁂𑀦𑀸’’𑀢𑀺. 𑀔𑁂𑀝-𑀲𑀤𑁆𑀤𑀁 𑀲𑀤𑁆𑀤𑀢𑁆𑀣𑀯𑀺𑀤𑀽 𑀉𑀢𑁆𑀢𑀸𑀲𑀢𑁆𑀣𑁂 𑀧𑀞𑀦𑁆𑀢𑀻𑀢𑀺 𑀆𑀳 𑀲𑁆𑀯𑀸𑀬𑀫𑀢𑁆𑀣𑁄𑀢𑀺𑀆𑀤𑀺. 𑀅𑀡𑀼 𑀏𑀯 𑀅𑀡𑀼𑀲𑀳𑀕𑀢𑀁, 𑀅𑀡𑀼𑀢𑁆𑀢𑁂𑀦 𑀯𑀸 𑀬𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄.

𑀯𑀢𑁆𑀢𑀼𑀓𑀸𑀫𑀯𑀸𑀭𑀓𑀣𑀸𑀯𑀡𑁆𑀡𑀦𑀸

𑁨𑁧𑁫. 𑀓𑁂𑀯𑀮𑀜𑁆𑀳𑀺𑀬𑀦𑁆𑀢𑀺 𑀓𑁂𑀯𑀮𑀜𑁆𑀳𑀺 𑀅𑀬𑀁 𑀯𑀸𑀭𑁄𑀢𑀺 𑀅𑀚𑁆𑀛𑀸𑀳𑀭𑀺𑀢𑀩𑁆𑀩𑀁. 𑀢𑀗𑁆𑀔𑀡𑀜𑁆𑀜𑁂𑀯 𑀚𑀸𑀦𑀸𑀢𑀻𑀢𑀺 𑀧𑀓𑀢𑀺𑀬𑀸 𑀯𑀘𑀦𑀸𑀦𑀦𑁆𑀢𑀭𑀁 𑀯𑀺𑀚𑀸𑀦𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀏𑀯𑀁 𑀧𑀦 𑀯𑀘𑀻𑀪𑁂𑀤𑀁 𑀅𑀓𑀢𑁆𑀯𑀸 ‘‘𑀬𑁄 𑀇𑀫𑀫𑁆𑀳𑀸 𑀆𑀯𑀸𑀲𑀸 𑀧𑀞𑀫𑀁 𑀧𑀓𑁆𑀓𑀫𑀺𑀲𑁆𑀲𑀢𑀺, 𑀦𑀁 𑀫𑀬𑀁 ‘𑀅𑀭𑀳𑀸’𑀢𑀺 𑀚𑀸𑀦𑀺𑀲𑁆𑀲𑀸𑀫𑀸’’𑀢𑀺 𑀏𑀯𑀁 𑀓𑀢𑀲𑀗𑁆𑀓𑁂𑀢𑀸 𑀯𑀺𑀳𑀸𑀭𑀸 𑀧𑀞𑀫𑀁 𑀧𑀓𑁆𑀓𑀫𑀦𑁂𑀦 𑀢𑀲𑁆𑀫𑀺𑀁 𑀔𑀡𑁂 𑀅𑀯𑀻𑀢𑀺𑀯𑀢𑁆𑀢𑁂𑀧𑀺 𑀦𑀺𑀓𑁆𑀔𑀦𑁆𑀢𑀫𑀢𑁆𑀢𑁂𑀧𑀺 𑀧𑀸𑀭𑀸𑀚𑀺𑀓𑀁 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 ‘‘𑀫𑀁 ‘𑀅𑀭𑀳𑀸’𑀢𑀺 𑀚𑀸𑀦𑀦𑁆𑀢𑀽’’𑀢𑀺 𑀢𑀫𑁆𑀳𑀸 𑀆𑀯𑀸𑀲𑀸 𑀧𑀞𑀫𑀁 𑀧𑀓𑁆𑀓𑀸𑀫𑀻𑀢𑀺 𑀆𑀕𑀢𑀯𑀢𑁆𑀣𑀼𑀫𑁆𑀳𑀺 (𑀧𑀸𑀭𑀸. 𑁨𑁨𑁭) 𑀯𑀺𑀬. 𑀯𑀺𑀜𑁆𑀜𑀢𑁆𑀢𑀺𑀧𑀣𑁂𑀢𑀺 𑀓𑀸𑀬𑀯𑀘𑀻𑀯𑀺𑀜𑁆𑀜𑀢𑁆𑀢𑀻𑀦𑀁 𑀕𑀳𑀡𑀬𑁄𑀕𑁆𑀕𑁂 𑀧𑀤𑁂𑀲𑁂, 𑀢𑁂𑀦 𑀯𑀺𑀜𑁆𑀜𑀢𑁆𑀢𑀺𑀧𑀣𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀞𑀺𑀢𑁄 𑀓𑁄𑀘𑀺 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀓𑀸𑀬𑀯𑀺𑀓𑀸𑀭𑀁 𑀤𑀺𑀲𑁆𑀯𑀸 𑀤𑀺𑀩𑁆𑀩𑀸𑀬 𑀲𑁄𑀢𑀥𑀸𑀢𑀼𑀬𑀸 𑀯𑀘𑀻𑀪𑁂𑀤𑀜𑁆𑀘 𑀲𑀼𑀢𑁆𑀯𑀸 𑀚𑀸𑀦𑀸𑀢𑀺, 𑀦 𑀧𑀸𑀭𑀸𑀚𑀺𑀓𑀦𑁆𑀢𑀺 𑀤𑀻𑀧𑁂𑀢𑀺. 𑀧𑀸𑀴𑀺𑀬𑀁 ‘‘𑀧𑀝𑀺𑀯𑀺𑀚𑀸𑀦𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲𑀸’’𑀢𑀺 (𑀧𑀸𑀭𑀸. 𑁨𑁧𑁫) 𑀇𑀫𑀲𑁆𑀫𑀺𑀁 𑀧𑀝𑀺𑀯𑀺𑀚𑀸𑀦𑀦𑀯𑀸𑀭𑁂 𑀬𑀲𑁆𑀫𑀺𑀁 𑀅𑀓𑁆𑀔𑀭𑁂 𑀯𑀸 𑀉𑀘𑁆𑀘𑀸𑀭𑀺𑀢𑁂 𑀓𑀸𑀬𑀧𑁆𑀧𑀬𑁄𑀕𑁂 𑀯𑀸 𑀓𑀢𑁂𑀬𑁂𑀯 𑀅𑀬𑀁 𑀧𑀞𑀫𑀚𑁆𑀛𑀸𑀦𑀁 𑀲𑀫𑀸𑀧𑀦𑁆𑀦𑁄𑀢𑀺𑀆𑀤𑀺𑀅𑀢𑁆𑀣𑀁 𑀧𑀭𑁄 𑀯𑀺𑀚𑀸𑀦𑀸𑀢𑀺, 𑀢𑀢𑁄 𑀧𑀼𑀭𑀺𑀫𑁂𑀲𑀼 𑀅𑀓𑁆𑀔𑀭𑀼𑀘𑁆𑀘𑀸𑀭𑀡𑀸𑀤𑀺𑀧𑁆𑀧𑀬𑁄𑀕𑁂𑀲𑀼 𑀣𑀼𑀮𑁆𑀮𑀘𑁆𑀘𑀬𑀁 𑀆𑀧𑀚𑁆𑀚𑀺𑀢𑁆𑀯𑀸 𑀧𑀘𑁆𑀙𑀺𑀫𑁂𑀯 𑀧𑀝𑀺𑀯𑀺𑀚𑀸𑀦𑀦𑀧𑀬𑁄𑀕𑀓𑁆𑀔𑀡𑁂 𑀧𑀸𑀭𑀸𑀚𑀺𑀓𑀁 𑀆𑀧𑀚𑁆𑀚𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁 𑀣𑀼𑀮𑁆𑀮𑀘𑁆𑀘𑀬𑀲𑁆𑀲𑁂𑀯𑁂𑀢𑁆𑀣 𑀲𑀸𑀫𑀦𑁆𑀢𑀢𑁆𑀢𑀸, 𑀢𑁂𑀦𑁂𑀯 𑀩𑀼𑀤𑁆𑀥𑀤𑀢𑁆𑀢𑀸𑀘𑀭𑀺𑀬𑁂𑀦 𑁋

‘‘𑀤𑀼𑀓𑁆𑀓𑀝𑀁 𑀧𑀞𑀫𑀲𑁆𑀲𑁂𑀯, 𑀲𑀸𑀫𑀦𑁆𑀢𑀫𑀺𑀢𑀺 𑀯𑀡𑁆𑀡𑀺𑀢𑀁;

𑀲𑁂𑀲𑀸𑀦𑀁 𑀧𑀦 𑀢𑀺𑀡𑁆𑀡𑀫𑁆𑀧𑀺, 𑀣𑀼𑀮𑁆𑀮𑀘𑁆𑀘𑀬𑀫𑀼𑀤𑀻𑀭𑀺𑀢’’𑀦𑁆𑀢𑀺 𑁋

𑀯𑀼𑀢𑁆𑀢𑀁, 𑀅𑀬𑀜𑁆𑀘𑀢𑁆𑀣𑁄 ‘‘𑀦 𑀧𑀝𑀺𑀯𑀺𑀚𑀸𑀦𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲𑀸’’𑀢𑀺 𑀇𑀫𑀺𑀦𑀸 𑀲𑀼𑀢𑁆𑀢𑁂𑀦 𑀲𑀗𑁆𑀕𑀳𑀺𑀢𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀉𑀕𑁆𑀕𑀳𑀧𑀭𑀺𑀧𑀼𑀘𑁆𑀙𑀸𑀤𑀺𑀯𑀲𑁂𑀦𑀸𑀢𑀺𑀆𑀤𑀺𑀦𑀸 𑀛𑀸𑀦𑀲𑀫𑀸𑀥𑀺𑀆𑀤𑀺𑀲𑀤𑁆𑀤𑀸𑀦𑀫𑀢𑁆𑀣𑁂𑀲𑀼 𑀧𑀼𑀩𑁆𑀩𑁂 𑀅𑀓𑀢𑀧𑀭𑀺𑀘𑀬𑀢𑁆𑀢𑀸 𑀲𑀼𑀢𑁆𑀯𑀸 ‘‘𑀅𑀢𑁆𑀣𑀁 𑀈𑀤𑀺𑀲’’𑀦𑁆𑀢𑀺 𑀅𑀚𑀸𑀦𑀺𑀢𑁆𑀯𑀸 𑀓𑁂𑀯𑀮𑀁 ‘‘𑀯𑀺𑀲𑀺𑀝𑁆𑀞𑁄 𑀓𑁄𑀘𑀺 𑀲𑀫𑀡𑀕𑀼𑀡𑁄 𑀅𑀦𑁂𑀦 𑀮𑀤𑁆𑀥𑁄’’𑀢𑀺 𑀧𑀭𑁂𑀦 𑀜𑀸𑀢𑁂𑀧𑀺 𑀧𑀸𑀭𑀸𑀚𑀺𑀓𑀫𑁂𑀯𑀸𑀢𑀺 𑀤𑀲𑁆𑀲𑁂𑀢𑀺.

𑀅𑀦𑀸𑀧𑀢𑁆𑀢𑀺𑀪𑁂𑀤𑀓𑀣𑀸𑀯𑀡𑁆𑀡𑀦𑀸

𑁨𑁨𑁦. 𑀅𑀦𑀼𑀮𑁆𑀮𑀧𑀦𑀸𑀥𑀺𑀧𑁆𑀧𑀸𑀬𑀲𑁆𑀲𑀸𑀢𑀺 ‘‘𑀏𑀯𑀁 𑀯𑀼𑀢𑁆𑀢𑁂 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑁄 𑀫𑀬𑀸 𑀧𑀓𑀸𑀲𑀺𑀢𑁄 𑀳𑁄𑀢𑀻’’𑀢𑀺 𑀅𑀫𑀦𑀲𑀺𑀓𑀢𑁆𑀯𑀸 ‘‘𑀦𑀸𑀳𑀁, 𑀆𑀯𑀼𑀲𑁄, 𑀫𑀘𑁆𑀘𑀼𑀦𑁄 𑀪𑀸𑀬𑀸𑀫𑀻’’𑀢𑀺𑀆𑀤𑀺𑀓𑀁 𑀓𑀣𑁂𑀦𑁆𑀢𑀲𑁆𑀲. 𑀏𑀯𑀁 𑀓𑀣𑁂𑀦𑁆𑀢𑁄 𑀘 𑀯𑁄𑀳𑀸𑀭𑀢𑁄 𑀅𑀜𑁆𑀜𑀁 𑀩𑁆𑀬𑀸𑀓𑀭𑁄𑀦𑁆𑀢𑁄 𑀦𑀸𑀫 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀅𑀜𑁆𑀜𑀁 𑀩𑁆𑀬𑀸𑀓𑀭𑁄𑀦𑁆𑀢𑀲𑁆𑀲𑀸’’𑀢𑀺. 𑀪𑀸𑀬𑀦𑁆𑀢𑁄𑀢𑀺 ‘‘𑀜𑀢𑁆𑀯𑀸 𑀕𑀭𑀳𑀦𑁆𑀢𑀺 𑀦𑀼 𑀔𑁄’’𑀢𑀺 𑀪𑀸𑀬𑀦𑁆𑀢𑁄.

𑀧𑀤𑀪𑀸𑀚𑀦𑀻𑀬𑀯𑀡𑁆𑀡𑀦𑀸𑀦𑀬𑁄 𑀦𑀺𑀝𑁆𑀞𑀺𑀢𑁄.

𑀯𑀺𑀦𑀻𑀢𑀯𑀢𑁆𑀣𑀼𑀯𑀡𑁆𑀡𑀦𑀸

𑁨𑁨𑁩. 𑀲𑁂𑀓𑁆𑀔𑀪𑀽𑀫𑀺𑀬𑀦𑁆𑀢𑀺 𑀇𑀫𑀺𑀦𑀸 𑀛𑀸𑀦𑀪𑀽𑀫𑀺𑀫𑁆𑀧𑀺 𑀲𑀗𑁆𑀕𑀡𑁆𑀳𑀸𑀢𑀺. 𑀢𑀺𑀡𑁆𑀡𑀁 𑀯𑀺𑀯𑁂𑀓𑀸𑀦𑀦𑁆𑀢𑀺 𑀓𑀸𑀬𑀘𑀺𑀢𑁆𑀢𑀉𑀧𑀥𑀺𑀯𑀺𑀯𑁂𑀓𑀸𑀦𑀁. 𑀧𑀺𑀡𑁆𑀟𑀸𑀬 𑀘𑀭𑀡𑀲𑁆𑀲 𑀪𑁄𑀚𑀦𑀧𑀭𑀺𑀬𑁄𑀲𑀸𑀦𑀢𑀸𑀬 𑀯𑀼𑀢𑁆𑀢𑀁 ‘‘𑀬𑀸𑀯 𑀪𑁄𑀚𑀦𑀧𑀅𑀬𑁄𑀲𑀸𑀦’’𑀦𑁆𑀢𑀺. 𑀅𑀦𑁆𑀢𑀭𑀖𑀭𑁂 𑀪𑀼𑀢𑁆𑀯𑀸 𑀆𑀕𑀘𑁆𑀙𑀦𑁆𑀢𑀲𑁆𑀲𑀸𑀧𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑀫𑁆𑀪𑀸𑀯𑀦𑀺𑀘𑁆𑀙𑀸𑀬 𑀘𑀻𑀯𑀭𑀲𑀡𑁆𑀞𑀸𑀧𑀦𑀸𑀤𑀻𑀦𑀺 𑀓𑀭𑁄𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀫𑁂𑀯, 𑀧𑀸𑀴𑀺𑀬𑀁 𑀧𑀦 𑀤𑀼𑀓𑁆𑀓𑀭𑀸𑀤𑀺𑀯𑀢𑁆𑀣𑀽𑀲𑀼 ‘‘𑀅𑀦𑀸𑀧𑀢𑁆𑀢𑀺 𑀅𑀦𑀼𑀮𑁆𑀮𑀧𑀦𑀸𑀥𑀺𑀧𑁆𑀧𑀸𑀬𑀲𑁆𑀲𑀸’’𑀢𑀺 𑀇𑀤𑀁 𑀣𑀼𑀮𑁆𑀮𑀘𑁆𑀘𑀬𑁂𑀦𑀸𑀧𑀺 𑀅𑀦𑀸𑀧𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀉𑀮𑁆𑀮𑀧𑀦𑀸𑀥𑀺𑀧𑁆𑀧𑀸𑀬𑀲𑁆𑀲𑀸𑀧𑀺 𑀳𑀺 ‘‘𑀦𑀸𑀯𑀼𑀲𑁄, 𑀤𑀼𑀓𑁆𑀓𑀭𑀁 𑀅𑀜𑁆𑀜𑀁 𑀩𑁆𑀬𑀸𑀓𑀸𑀢𑀼’’𑀦𑁆𑀢𑀺 𑀯𑀼𑀢𑁆𑀢𑁂 𑀣𑀼𑀮𑁆𑀮𑀘𑁆𑀘𑀬𑀫𑁂𑀯 𑀅𑀢𑁆𑀢𑀼𑀧𑀦𑀸𑀬𑀺𑀓𑀢𑁆𑀢𑀸𑀪𑀸𑀯𑀢𑁄𑀢𑀺 𑀤𑀝𑁆𑀞𑀩𑁆𑀩𑀁.

𑁨𑁨𑁭. 𑀦 𑀤𑀸𑀦𑀸𑀳𑀁 𑀢𑀢𑁆𑀣 𑀕𑀫𑀺𑀲𑁆𑀲𑀸𑀫𑀻𑀢𑀺 𑀧𑀼𑀦 𑀢𑀢𑁆𑀣 𑀯𑀲𑀺𑀢𑀝𑁆𑀞𑀸𑀦𑁂 𑀦 𑀕𑀫𑀺𑀲𑁆𑀲𑀸𑀫𑀺, 𑀏𑀯𑀁 𑀲𑀢𑀺 𑀧𑀞𑀫𑀁 𑀕𑀢𑁄 𑀅𑀬𑀁 𑀧𑀼𑀦 𑀘 𑀦𑀸𑀕𑀢𑁄, 𑀢𑀲𑁆𑀫𑀸 𑀅𑀭𑀳𑀸𑀢𑀺 𑀫𑀜𑁆𑀜𑀺𑀲𑁆𑀲𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀁 𑀞𑀸𑀦𑀦𑁆𑀢𑀺 𑀆𑀯𑀸𑀲𑀁 𑀯𑀸𑀢𑀺𑀆𑀤𑀺𑀦𑀸 𑀧𑀼𑀩𑁆𑀩𑁂 𑀧𑀭𑀺𑀘𑁆𑀙𑀺𑀦𑁆𑀦𑀝𑁆𑀞𑀸𑀦𑀁. 𑀧𑀤𑀲𑀸 𑀕𑀫𑀦𑀁 𑀲𑀦𑁆𑀥𑀸𑀬 𑀓𑀢𑀺𑀓𑀸𑀬 𑀓𑀢𑀢𑁆𑀢𑀸 𑀬𑀸𑀦𑁂𑀦𑀸𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀯𑀺𑀚𑁆𑀚𑀸𑀫𑀬𑀺𑀤𑁆𑀥𑀺𑀁 𑀲𑀦𑁆𑀥𑀸𑀬 ‘‘𑀇𑀤𑁆𑀥𑀺𑀬𑀸’’𑀢𑀺 𑀯𑀼𑀢𑁆𑀢𑀁 𑀉𑀮𑁆𑀮𑀧𑀦𑀸𑀥𑀺𑀧𑁆𑀧𑀸𑀬𑀲𑁆𑀲 𑀅𑀪𑀺𑀜𑁆𑀜𑀺𑀤𑁆𑀥𑀺𑀬𑀸 𑀅𑀲𑀫𑁆𑀪𑀯𑀢𑁄. 𑀅𑀜𑁆𑀜𑀫𑀜𑁆𑀜𑀁 𑀭𑀓𑁆𑀔𑀦𑁆𑀢𑀻𑀢𑀺 𑀉𑀮𑁆𑀮𑀧𑀦𑀸𑀥𑀺𑀧𑁆𑀧𑀸𑀬𑁂 𑀲𑀢𑀺𑀧𑀺 𑀏𑀓𑀲𑁆𑀲𑀸𑀧𑀺 𑀧𑀞𑀫𑀕𑀫𑀦𑀸𑀪𑀸𑀯𑀸 𑀭𑀓𑁆𑀔𑀦𑁆𑀢𑀺. 𑀲𑀘𑁂 𑀧𑀦 𑀓𑀢𑀺𑀓𑀁 𑀓𑀢𑁆𑀯𑀸 𑀦𑀺𑀲𑀺𑀦𑁆𑀦𑁂𑀲𑀼 𑀏𑀓𑀁 𑀤𑁆𑀯𑁂 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀸 𑀉𑀮𑁆𑀮𑀧𑀦𑀸𑀥𑀺𑀧𑁆𑀧𑀸𑀬𑁂𑀦 𑀏𑀓𑀢𑁄 𑀕𑀘𑁆𑀙𑀦𑁆𑀢𑀺, 𑀕𑀢𑀸𑀦𑀁 𑀲𑀩𑁆𑀩𑁂𑀲𑀁 𑀧𑀸𑀭𑀸𑀚𑀺𑀓𑀫𑁂𑀯. 𑀢𑁂𑀲𑀼 𑀬𑀲𑁆𑀲 𑀉𑀮𑁆𑀮𑀧𑀦𑀸𑀥𑀺𑀧𑁆𑀧𑀸𑀬𑁄 𑀦𑀢𑁆𑀣𑀺, 𑀢𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀏𑀢𑀦𑁆𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀁 𑀲𑀩𑁆𑀩𑀁 𑀓𑀢𑀺𑀓𑀯𑀢𑁆𑀢𑀁. 𑀦𑀸𑀦𑀸𑀯𑁂𑀭𑀚𑁆𑀚𑀓𑀸𑀢𑀺 𑀦𑀸𑀦𑀸𑀚𑀦𑀧𑀤𑀯𑀸𑀲𑀺𑀦𑁄. 𑀲𑀗𑁆𑀖𑀮𑀸𑀪𑁄𑀢𑀺 𑀬𑀣𑀸𑀯𑀼𑀟𑁆𑀠𑀁 𑀧𑀸𑀧𑀼𑀡𑀦𑀓𑀓𑁄𑀝𑁆𑀞𑀸𑀲𑁄. 𑀅𑀬𑀜𑁆𑀘 𑀧𑀝𑀺𑀓𑁆𑀔𑁂𑀧𑁄 𑀅𑀯𑀺𑀲𑁂𑀲𑁂𑀢𑁆𑀯𑀸 𑀓𑀭𑀡𑀁 𑀲𑀦𑁆𑀥𑀸𑀬 𑀓𑀢𑁄, 𑀯𑀺𑀲𑁂𑀲𑁂𑀢𑁆𑀯𑀸 𑀧𑀦 ‘‘𑀏𑀢𑁆𑀢𑀓𑁄 𑀅𑀲𑀼𑀓𑀲𑁆𑀲𑀸’’𑀢𑀺 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀅𑀧𑀮𑁄𑀓𑁂𑀢𑁆𑀯𑀸 𑀤𑀸𑀢𑀼𑀁 𑀯𑀝𑁆𑀝𑀢𑀺.

𑁨𑁨𑁮. 𑀥𑀫𑁆𑀫𑀥𑀸𑀢𑀽𑀢𑀺 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁, 𑀥𑀫𑁆𑀫𑀸𑀦𑀁 𑀲𑀪𑀸𑀯𑁄 𑀯𑀸. 𑀉𑀧𑀧𑀢𑁆𑀢𑀻𑀢𑀺 𑀅𑀢𑁆𑀢𑀪𑀸𑀯𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀤𑀼𑀲𑁆𑀲𑀤𑁆𑀥𑀸𑀧𑀬𑀸 𑀳𑁄𑀦𑁆𑀢𑀻𑀢𑀺 𑀧𑀼𑀣𑀼𑀚𑁆𑀚𑀦𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀦 𑀮𑀓𑁆𑀔𑀡𑀢𑁆𑀣𑁂𑀭𑀸𑀤𑀺𑀓𑁂 𑀅𑀭𑀺𑀬𑀧𑀼𑀕𑁆𑀕𑀮𑁂. 𑀯𑀺𑀢𑀼𑀟𑁂𑀦𑁆𑀢𑀻𑀢𑀺 𑀯𑀺𑀦𑀺𑀯𑀺𑀚𑁆𑀛𑀺𑀢𑁆𑀯𑀸 𑀟𑁂𑀦𑁆𑀢𑀺 𑀕𑀘𑁆𑀙𑀦𑁆𑀢𑀺, 𑀨𑀸𑀲𑀼𑀴𑀦𑁆𑀢𑀭𑀺𑀓𑀸𑀬𑁄 𑀙𑀺𑀤𑁆𑀤𑀸𑀯𑀙𑀺𑀤𑁆𑀤𑀁 𑀓𑀢𑁆𑀯𑀸 𑀢𑀸𑀳𑀺 𑀕𑀘𑁆𑀙𑀦𑁆𑀢𑀻𑀢𑀺 𑀦𑀺𑀲𑁆𑀲𑀓𑁆𑀓𑀯𑀲𑁂𑀦 𑀅𑀢𑁆𑀣𑁄. 𑀯𑀺𑀢𑀼𑀤𑁂𑀦𑁆𑀢𑀻𑀢𑀺 𑀧𑀸𑀞𑁂 𑀨𑀸𑀲𑀼𑀴𑀦𑁆𑀢𑀭𑀺𑀓𑀸𑀳𑀻𑀢𑀺 𑀆𑀥𑀸𑀭𑀢𑁆𑀣𑁂 𑀦𑀺𑀲𑁆𑀲𑀓𑁆𑀓𑀯𑀘𑀦𑀁. 𑀮𑁄𑀳𑀢𑀼𑀡𑁆𑀟𑁂𑀳𑀻𑀢𑀺 𑀓𑀸𑀴𑀮𑁄𑀳𑀫𑀬𑁂𑀳𑀺 𑀢𑀼𑀡𑁆𑀟𑁂𑀳𑀺. 𑀅𑀘𑁆𑀙𑀭𑀺𑀬𑀁 𑀯𑀢𑀸𑀢𑀺 𑀕𑀭𑀳𑀺𑀢𑀩𑁆𑀩𑀢𑀸𑀬 𑀅𑀘𑁆𑀙𑀭𑀁 𑀧𑀳𑀭𑀺𑀢𑀼𑀁 𑀬𑀼𑀢𑁆𑀢𑀭𑀽𑀧𑀁. 𑀘𑀓𑁆𑀔𑀼𑀪𑀽𑀢𑀸𑀢𑀺 𑀮𑁄𑀓𑀲𑁆𑀲 𑀘𑀓𑁆𑀔𑀼 𑀯𑀺𑀬 𑀪𑀽𑀢𑀸 𑀲𑀜𑁆𑀚𑀸𑀢𑀸, 𑀘𑀓𑁆𑀔𑀼𑀲𑀤𑀺𑀲𑀸𑀢𑀺𑀧𑀺 𑀅𑀢𑁆𑀣𑁄. 𑀢𑀲𑁆𑀲𑁂𑀯 𑀓𑀫𑁆𑀫𑀲𑁆𑀲𑀸𑀢𑀺 𑀬𑁂𑀦 𑀕𑁄𑀖𑀸𑀢𑀓𑀓𑀫𑁆𑀫𑁂𑀦𑁂𑀯 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑁄, 𑀢𑀲𑁆𑀲𑁂𑀯𑀸𑀢𑀺 𑀅𑀢𑁆𑀣𑁂 𑀕𑀬𑁆𑀳𑀫𑀸𑀦𑁂 𑀏𑀓𑀸𑀬 𑀘𑁂𑀢𑀦𑀸𑀬 𑀩𑀳𑀼𑀧𑀝𑀺𑀲𑀦𑁆𑀥𑀺𑀬𑁄 𑀳𑁄𑀦𑁆𑀢𑀻𑀢𑀺 𑀆𑀧𑀚𑁆𑀚𑀢𑀺, 𑀦 𑀘𑁂𑀢𑀁 𑀬𑀼𑀢𑁆𑀢𑀁 𑀏𑀓𑀲𑁆𑀲 𑀅𑀫𑁆𑀩𑀸𑀤𑀺𑀩𑀻𑀚𑀲𑁆𑀲 𑀅𑀦𑁂𑀓𑀗𑁆𑀓𑀼𑀭𑀼𑀧𑁆𑀧𑀢𑁆𑀢𑀺 𑀯𑀺𑀬𑀸𑀢𑀺 𑀢𑀁 𑀧𑀭𑀺𑀳𑀭𑀦𑁆𑀢𑁄 𑀆𑀳 𑀢𑀲𑁆𑀲 𑀦𑀸𑀦𑀸𑀘𑁂𑀢𑀦𑀸𑀳𑀺 𑀆𑀬𑀽𑀳𑀺𑀢𑀲𑁆𑀲𑀸𑀢𑀺𑀆𑀤𑀺, 𑀢𑁂𑀦 𑀕𑁄𑀖𑀸𑀢𑀓𑀓𑀫𑁆𑀫𑀓𑁆𑀔𑀡𑁂 𑀧𑀼𑀩𑁆𑀩𑀘𑁂𑀢𑀦𑀸 𑀅𑀧𑀭𑀘𑁂𑀢𑀦𑀸 𑀲𑀦𑁆𑀦𑀺𑀝𑁆𑀞𑀸𑀧𑀓𑀘𑁂𑀢𑀦𑀸𑀢𑀺 𑀏𑀓𑀲𑁆𑀫𑀺𑀫𑁆𑀧𑀺 𑀧𑀸𑀡𑀸𑀢𑀺𑀧𑀸𑀢𑁂 𑀩𑀳𑀽 𑀘𑁂𑀢𑀦𑀸 𑀳𑁄𑀦𑁆𑀢𑀺, 𑀦𑀸𑀦𑀸𑀧𑀸𑀡𑀸𑀢𑀺𑀧𑀸𑀢𑁂𑀲𑀼 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺. 𑀢𑀢𑁆𑀣 𑀏𑀓𑀸𑀬 𑀘𑁂𑀢𑀦𑀸𑀬 𑀦𑀭𑀓𑁂 𑀧𑀘𑀺𑀢𑁆𑀯𑀸 𑀢𑀤𑀜𑁆𑀜𑀘𑁂𑀢𑀦𑀸𑀲𑀼 𑀏𑀓𑀸𑀬 𑀅𑀧𑀭𑀸𑀧𑀭𑀺𑀬𑀘𑁂𑀢𑀦𑀸𑀬 𑀇𑀫𑀲𑁆𑀫𑀺𑀁 𑀧𑁂𑀢𑀢𑁆𑀢𑀪𑀸𑀯𑁂 𑀦𑀺𑀩𑁆𑀩𑀢𑁆𑀢𑁄𑀢𑀺 𑀤𑀲𑁆𑀲𑁂𑀢𑀺, 𑀢𑁂𑀦𑀸𑀳 ‘‘𑀅𑀯𑀲𑁂𑀲𑀓𑀫𑁆𑀫𑀁 𑀯𑀸 𑀓𑀫𑁆𑀫𑀦𑀺𑀫𑀺𑀢𑁆𑀢𑀁 𑀯𑀸’’𑀢𑀺. 𑀏𑀢𑁆𑀣 𑀘 𑀓𑀫𑁆𑀫𑀲𑀭𑀺𑀓𑁆𑀔𑀯𑀺𑀧𑀸𑀓𑀼𑀧𑁆𑀧𑀢𑁆𑀢𑀺𑀁 𑀲𑀦𑁆𑀥𑀸𑀬 𑀓𑀫𑁆𑀫𑀓𑀫𑁆𑀫𑀦𑀺𑀫𑀺𑀢𑁆𑀢𑀸𑀦𑀫𑁂𑀯 𑀕𑀳𑀡𑀁 𑀓𑀢𑀁, 𑀦 𑀕𑀢𑀺𑀦𑀺𑀫𑀺𑀢𑁆𑀢𑀲𑁆𑀲, 𑀢𑁂𑀦𑀸𑀳 ‘‘𑀅𑀝𑁆𑀞𑀺𑀭𑀸𑀲𑀺𑀬𑁂𑀯 𑀦𑀺𑀫𑀺𑀢𑁆𑀢𑀁 𑀅𑀳𑁄𑀲𑀻’’𑀢𑀺. 𑀧𑀸𑀴𑀺𑀬𑀁 𑀯𑀺𑀢𑀘𑁆𑀙𑁂𑀦𑁆𑀢𑀻𑀢𑀺 𑀢𑀼𑀡𑁆𑀟𑁂𑀳𑀺 𑀢𑀘𑁆𑀙𑁂𑀦𑁆𑀢𑁄 𑀯𑀺𑀬 𑀮𑀼𑀜𑁆𑀘𑀦𑁆𑀢𑀺. 𑀯𑀺𑀭𑀸𑀚𑁂𑀦𑁆𑀢𑀻𑀢𑀺 𑀯𑀺𑀮𑀺𑀔𑀦𑁆𑀢𑀺.

𑁨𑁨𑁯. 𑀯𑀮𑁆𑀮𑀽𑀭𑀯𑀺𑀓𑁆𑀓𑀬𑁂𑀦𑀸𑀢𑀺 𑀲𑀼𑀓𑁆𑀔𑀸𑀧𑀺𑀢𑀫𑀁𑀲𑀯𑀺𑀓𑁆𑀓𑀬𑁂𑀦. 𑀦𑀺𑀧𑁆𑀧𑀓𑁆𑀔𑀘𑀫𑁆𑀫𑁂𑀢𑀺 𑀯𑀺𑀕𑀢𑀧𑀓𑁆𑀔𑀮𑁄𑀫𑀘𑀫𑁆𑀫𑁂. 𑀏𑀓𑀁 𑀫𑀺𑀕𑀦𑁆𑀢𑀺 𑀤𑀻𑀧𑀓𑀫𑀺𑀕𑀁. 𑀓𑀸𑀭𑀡𑀸𑀳𑀻𑀢𑀺 𑀖𑀸𑀢𑀦𑀸𑀳𑀺. 𑀜𑀢𑁆𑀯𑀸𑀢𑀺 𑀓𑀫𑁆𑀫𑀝𑁆𑀞𑀸𑀦𑀁 𑀜𑀢𑁆𑀯𑀸.

𑁨𑁩𑁦. 𑀫𑀗𑁆𑀕𑀦𑀯𑀲𑁂𑀦 𑀉𑀮𑀢𑀻𑀢𑀺 𑀫𑀗𑁆𑀕𑀼𑀮𑀺, 𑀯𑀺𑀭𑀽𑀧𑀩𑀻𑀪𑀘𑁆𑀙𑀪𑀸𑀯𑁂𑀦 𑀧𑀯𑀢𑁆𑀢𑀢𑀻𑀢𑀺 𑀅𑀢𑁆𑀣𑁄. 𑀘𑀺𑀢𑁆𑀢𑀓𑁂𑀴𑀺𑀦𑁆𑀢𑀺 𑀘𑀺𑀢𑁆𑀢𑀭𑀼𑀘𑀺𑀬𑀁 𑀅𑀦𑀸𑀘𑀸𑀭𑀓𑀻𑀴𑀁.

𑁨𑁩𑁧. 𑀦𑀺𑀲𑁆𑀲𑁂𑀯𑀸𑀮𑀧𑀡𑀓𑀓𑀤𑁆𑀤𑀫𑁄𑀢𑀺 𑀢𑀺𑀮𑀩𑀻𑀚𑀓𑀸𑀤𑀺𑀲𑁂𑀯𑀸𑀮𑁂𑀦 𑀦𑀻𑀮𑀫𑀡𑁆𑀟𑀽𑀓𑀧𑀺𑀝𑁆𑀞𑀺𑀯𑀡𑁆𑀡𑁂𑀦 𑀉𑀤𑀓𑀧𑀺𑀝𑁆𑀞𑁂 𑀉𑀤𑀓𑀁 𑀦𑀻𑀮𑀯𑀡𑁆𑀡𑀁 𑀓𑀼𑀭𑀼𑀫𑀸𑀦𑁂𑀦 𑀧𑀡𑀓𑁂𑀦 𑀓𑀤𑁆𑀤𑀫𑁂𑀦 𑀘 𑀯𑀺𑀭𑀳𑀺𑀢𑁄. 𑀉𑀡𑁆𑀳𑀪𑀸𑀯𑁂𑀦 𑀢𑀧𑀦𑀢𑁄 𑀢𑀧𑀁 𑀉𑀤𑀓𑀁 𑀅𑀲𑁆𑀲𑀸𑀢𑀺 𑀢𑀧𑁄𑀤𑀓𑀸𑀢𑀺 𑀯𑀢𑁆𑀢𑀩𑁆𑀩𑁂 𑀓-𑀓𑀸𑀭𑀮𑁄𑀧𑀁 𑀓𑀢𑁆𑀯𑀸 ‘‘𑀢𑀧𑁄𑀤𑀸’’𑀢𑀺 𑀯𑀼𑀘𑁆𑀘𑀢𑀺. 𑀧𑁂𑀢𑀮𑁄𑀓𑁄𑀢𑀺 𑀧𑀓𑀝𑁆𑀞𑁂𑀦 𑀅𑀓𑀼𑀲𑀮𑀓𑀫𑁆𑀫𑁂𑀦 𑀲𑀼𑀕𑀢𑀺𑀢𑁄 𑀤𑀼𑀕𑁆𑀕𑀢𑀺𑀁 𑀇𑀢𑀸𑀦𑀁 𑀕𑀢𑀸𑀦𑀁 𑀮𑁄𑀓𑁄 𑀲𑀫𑀽𑀳𑁄, 𑀦𑀺𑀯𑀸𑀲𑀝𑁆𑀞𑀸𑀦𑀁 𑀯𑀸. 𑀓𑀢𑀳𑀢𑁆𑀣𑀸𑀢𑀺 𑀥𑀦𑀼𑀲𑀺𑀧𑁆𑀧𑁂 𑀲𑀼𑀝𑁆𑀞𑀼 𑀲𑀺𑀓𑁆𑀔𑀺𑀢𑀳𑀢𑁆𑀣𑀸, 𑀅𑀯𑀺𑀭𑀚𑁆𑀛𑀦𑀮𑀓𑁆𑀔𑀯𑁂𑀥𑀸𑀢𑀺 𑀅𑀢𑁆𑀣𑁄. 𑀲𑀺𑀧𑁆𑀧𑀤𑀲𑁆𑀲𑀦𑀯𑀲𑁂𑀦 𑀭𑀸𑀚𑀓𑀼𑀮𑀸𑀤𑀻𑀲𑀼 𑀭𑀸𑀚𑀲𑀫𑀽𑀳𑀁 𑀉𑀧𑁂𑀘𑁆𑀘 𑀓𑀢𑀁 𑀅𑀲𑀦𑀁 𑀲𑀭𑀓𑁆𑀔𑁂𑀧𑁄 𑀏𑀢𑁂𑀲𑀦𑁆𑀢𑀺 𑀓𑀢𑀼𑀧𑀸𑀲𑀦𑀸, 𑀲𑀩𑁆𑀩𑀢𑁆𑀣 𑀤𑀲𑁆𑀲𑀺𑀢𑀲𑀺𑀧𑁆𑀧𑀸𑀢𑀺 𑀅𑀢𑁆𑀣𑁄. 𑀧𑀪𑀕𑁆𑀕𑁄𑀢𑀺 𑀧𑀪𑀜𑁆𑀚𑀺𑀢𑁄, 𑀧𑀭𑀸𑀚𑀺𑀢𑁄𑀢𑀺 𑀅𑀢𑁆𑀣𑁄.

𑁨𑁩𑁨. 𑀆𑀦𑁂𑀜𑁆𑀚𑀲𑀫𑀸𑀥𑀺𑀦𑁆𑀢𑀺 𑀅𑀭𑀽𑀧𑀲𑀫𑀸𑀧𑀢𑁆𑀢𑀺𑀬𑀁 𑀦𑀺𑀭𑀼𑀤𑁆𑀥𑁂 𑀲𑀢𑀺𑀧𑀺 𑀲𑀤𑁆𑀤𑀓𑀡𑁆𑀝𑀓𑁂𑀦 𑀉𑀝𑁆𑀞𑀸𑀦𑀸𑀭𑀳𑁄 𑀭𑀽𑀧𑀸𑀯𑀘𑀭𑀲𑀫𑀸𑀥𑀺𑀬𑁂𑀯 𑀇𑀥 𑀯𑀢𑁆𑀢𑀩𑁆𑀩𑁄𑀢𑀺 𑀆𑀳 𑀅𑀦𑁂𑀚𑀁 𑀅𑀘𑀮𑀦𑁆𑀢𑀺𑀆𑀤𑀺. 𑀲𑀫𑀸𑀥𑀺𑀧𑀭𑀺𑀧𑀦𑁆𑀣𑀓𑁂𑀢𑀺 𑀯𑀺𑀢𑀓𑁆𑀓𑀸𑀤𑀺𑀓𑁂 𑀲𑀦𑁆𑀥𑀸𑀬 𑀯𑀤𑀢𑀺, 𑀇𑀤𑀁 𑀧𑀦 𑀧𑀞𑀫𑀩𑁄𑀥𑀺𑀬𑀁 𑀉𑀧𑁆𑀧𑀦𑁆𑀦𑀫𑁆𑀧𑀺 𑀯𑀢𑁆𑀣𑀼𑀁 𑀅𑀦𑀸𑀘𑀸𑀭𑀫𑀢𑁆𑀢𑀯𑀲𑁂𑀦 𑀪𑀺𑀓𑁆𑀔𑀽𑀳𑀺 𑀘𑁄𑀤𑀺𑀢𑁂𑀧𑀺 𑀪𑀕𑀯𑀢𑀸 ‘‘𑀅𑀦𑀸𑀧𑀢𑁆𑀢𑀺, 𑀪𑀺𑀓𑁆𑀔𑀯𑁂, 𑀫𑁄𑀕𑁆𑀕𑀮𑁆𑀮𑀸𑀦𑀲𑁆𑀲𑀸’’𑀢𑀺 (𑀧𑀸𑀭𑀸. 𑁨𑁨𑁮) 𑀏𑀯𑀁 𑀆𑀬𑀢𑀺𑀁 𑀅𑀢𑁆𑀢𑀦𑀸 𑀧𑀜𑁆𑀜𑀧𑀺𑀬𑀫𑀸𑀦𑀧𑀸𑀭𑀸𑀚𑀺𑀓𑀸𑀦𑀼𑀕𑀼𑀡𑀁 𑀢𑀤𑀸 𑀏𑀯 𑀯𑀺𑀦𑀻𑀢𑀦𑁆𑀢𑀺 𑀥𑀫𑁆𑀫𑀲𑀗𑁆𑀕𑀸𑀳𑀓𑀢𑁆𑀣𑁂𑀭𑁂𑀳𑀺 𑀧𑀘𑁆𑀙𑀸 𑀧𑀜𑁆𑀜𑀢𑁆𑀢𑀲𑁆𑀲 𑀇𑀫𑀲𑁆𑀲 𑀲𑀺𑀓𑁆𑀔𑀸𑀧𑀤𑀲𑁆𑀲 𑀯𑀺𑀦𑀻𑀢𑀯𑀢𑁆𑀣𑀼𑀪𑀸𑀯𑁂𑀦 𑀲𑀗𑁆𑀕𑀳𑀫𑀸𑀭𑁄𑀧𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀲𑀸𑀯𑀓𑀸𑀦𑀁 𑀉𑀧𑁆𑀧𑀝𑀺𑀧𑀸𑀝𑀺𑀬𑀸 𑀅𑀦𑀼𑀲𑁆𑀲𑀭𑀡𑀸𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀦 𑀉𑀧𑁆𑀧𑀝𑀺𑀧𑀸𑀝𑀺𑀬𑀸’’𑀢𑀺 𑀯𑀼𑀢𑁆𑀢𑀁. 𑀤𑀼𑀓𑁆𑀓𑀭𑀁 𑀓𑀢𑀦𑁆𑀢𑀺 𑀅𑀦𑀦𑁆𑀢𑀭𑁂 𑀧𑀜𑁆𑀘𑀓𑀧𑁆𑀧𑀲𑀢𑀺𑀓𑁂 𑀓𑀸𑀮𑁂 𑀯𑀺𑀜𑁆𑀜𑀸𑀡𑀲𑀦𑁆𑀢𑀢𑀺𑀁 𑀅𑀤𑀺𑀲𑁆𑀯𑀸𑀧𑀺 𑀅𑀲𑀫𑁆𑀫𑀼𑀬𑁆𑀳𑀺𑀢𑁆𑀯𑀸 𑀧𑀭𑀢𑁄 𑀢𑀢𑀺𑀬𑀢𑁆𑀢𑀪𑀸𑀯𑁂 𑀤𑀺𑀝𑁆𑀞𑀘𑀼𑀢𑀺𑀘𑀺𑀢𑁆𑀢𑁂𑀦 𑀲𑀤𑁆𑀥𑀺𑀁 𑀯𑀢𑁆𑀢𑀫𑀸𑀦𑀪𑀯𑀧𑀝𑀺𑀲𑀦𑁆𑀥𑀺𑀬𑀸 𑀅𑀦𑀼𑀫𑀸𑀦𑁂𑀦𑀸𑀧𑀺 𑀓𑀸𑀭𑀺𑀬𑀓𑀸𑀭𑀡𑀸𑀪𑀸𑀯𑀕𑀳𑀡𑀁 𑀦𑀸𑀫 𑀲𑀸𑀯𑀓𑀸𑀦𑀁 𑀤𑀼𑀓𑁆𑀓𑀭𑀢𑁆𑀢𑀸 𑀯𑀼𑀢𑁆𑀢𑀁. 𑀧𑀝𑀺𑀯𑀺𑀤𑁆𑀥𑀸𑀢𑀺 𑀧𑀝𑀺𑀯𑀺𑀤𑁆𑀥𑀲𑀤𑀺𑀲𑀸. 𑀬𑀣𑀸 𑀦𑀸𑀫 𑀲𑀢𑁆𑀢𑀥𑀸 𑀨𑀸𑀮𑀺𑀢𑀲𑁆𑀲 𑀘𑀸𑀫𑀭𑀯𑀸𑀮𑀮𑁄𑀫𑀲𑁆𑀲 𑀏𑀓𑀸𑀬 𑀅𑀕𑁆𑀕𑀓𑁄𑀝𑀺𑀬𑀸 𑀅𑀧𑀭𑀲𑁆𑀲 𑀯𑀸𑀮𑀮𑁄𑀫𑀁𑀲𑀼𑀦𑁄 𑀓𑁄𑀝𑀺𑀁 𑀤𑀽𑀭𑁂 𑀞𑀢𑁆𑀯𑀸 𑀯𑀺𑀚𑁆𑀛𑁂𑀬𑁆𑀬 𑀆𑀯𑀼𑀦𑀦𑁆𑀢𑁄 𑀯𑀺𑀬 𑀧𑀝𑀺𑀧𑀸𑀤𑁂𑀬𑁆𑀬, 𑀏𑀯𑀫𑁂𑀯 𑀇𑀫𑀺𑀦𑀸𑀧𑀺 𑀤𑀼𑀓𑁆𑀓𑀭𑀁 𑀓𑀢𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀢𑀤𑀕𑁆𑀕𑀦𑁆𑀢𑀺 𑀏𑀲𑁄 𑀅𑀕𑁆𑀕𑁄. 𑀬𑀤𑀺𑀤𑀦𑁆𑀢𑀺 𑀬𑁄 𑀅𑀬𑀁.

𑀦𑀺𑀕𑀫𑀦𑀯𑀡𑁆𑀡𑀦𑀸

𑁨𑁩𑁩. 𑀇𑀥𑀸𑀢𑀺 𑀪𑀺𑀓𑁆𑀔𑀼𑀯𑀺𑀪𑀗𑁆𑀕𑁂. 𑀉𑀤𑁆𑀤𑀺𑀝𑁆𑀞𑀧𑀸𑀭𑀸𑀚𑀺𑀓𑀧𑀭𑀺𑀤𑀻𑀧𑀦𑀦𑁆𑀢𑀺 𑀲𑀺𑀓𑁆𑀔𑀸𑀧𑀤𑁂𑀲𑀼 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀯𑀲𑁂𑀦 𑀉𑀤𑁆𑀤𑀺𑀝𑁆𑀞𑀧𑀸𑀭𑀸𑀚𑀺𑀓𑀧𑀭𑀺𑀤𑀻𑀧𑀦𑀁, 𑀦 𑀧𑀦 𑀲𑀩𑁆𑀩𑀲𑁆𑀫𑀺𑀁 𑀧𑀸𑀭𑀸𑀚𑀺𑀓𑀯𑀺𑀪𑀗𑁆𑀕𑁂 𑀆𑀕𑀢𑀆𑀧𑀢𑁆𑀢𑀺𑀧𑀭𑀺𑀤𑀻𑀧𑀦𑀁 𑀢𑀢𑁆𑀣 𑀣𑀼𑀮𑁆𑀮𑀘𑁆𑀘𑀬𑀸𑀤𑀻𑀦𑀫𑁆𑀧𑀺 𑀆𑀕𑀢𑀢𑁆𑀢𑀸 𑀢𑁂𑀦𑁂𑀯 𑀉𑀤𑁆𑀤𑀺𑀝𑁆𑀞-𑀲𑀤𑁆𑀤𑁂𑀦 𑀯𑀼𑀢𑁆𑀢𑀯𑀺𑀪𑀗𑁆𑀕𑀲𑁆𑀲 𑀦𑀺𑀤𑁆𑀤𑁂𑀲𑀢𑁆𑀢𑀸. 𑀪𑀺𑀓𑁆𑀔𑀼𑀦𑀻𑀦𑀁 𑀅𑀲𑀸𑀥𑀸𑀭𑀡𑀸𑀦𑀺 𑀘𑀢𑁆𑀢𑀸𑀭𑀻𑀢𑀺 𑀉𑀩𑁆𑀪𑀚𑀸𑀡𑀼𑀫𑀡𑁆𑀟𑀮𑀺𑀓𑀸 (𑀧𑀸𑀘𑀺. 𑁬𑁫𑁮) 𑀯𑀚𑁆𑀚𑀧𑁆𑀧𑀝𑀺𑀘𑁆𑀙𑀸𑀤𑀺𑀓𑀸 (𑀧𑀸𑀘𑀺. 𑁬𑁬𑁫) 𑀉𑀓𑁆𑀔𑀺𑀢𑁆𑀢𑀸𑀦𑀼𑀯𑀢𑁆𑀢𑀺𑀓𑀸 (𑀧𑀸𑀘𑀺. 𑁬𑁬𑁯) 𑀅𑀝𑁆𑀞𑀯𑀢𑁆𑀣𑀼𑀓𑀸𑀢𑀺 (𑀧𑀸𑀘𑀺. 𑁬𑁭𑁫) 𑀇𑀫𑀸𑀦𑀺 𑀪𑀺𑀓𑁆𑀔𑀽𑀳𑀺 𑀅𑀲𑀸𑀥𑀸𑀭𑀡𑀸𑀦𑀺 𑀪𑀺𑀓𑁆𑀔𑀼𑀦𑀻𑀦𑀁 𑀏𑀯 𑀧𑀜𑁆𑀜𑀢𑁆𑀢𑀸𑀦𑀺 𑀧𑀸𑀭𑀸𑀚𑀺𑀓𑀸𑀦𑀻𑀢𑀺 𑀅𑀢𑁆𑀣𑁄. 𑀯𑀢𑁆𑀣𑀼𑀯𑀺𑀧𑀦𑁆𑀦𑀸𑀢𑀺 𑀧𑀩𑁆𑀩𑀚𑁆𑀚𑀼𑀧𑀲𑀫𑁆𑀧𑀤𑀸𑀦𑀁 𑀯𑀢𑁆𑀣𑀼𑀪𑀸𑀯𑁄 𑀯𑀢𑁆𑀣𑀼 𑀦𑀸𑀫, 𑀢𑁂𑀦 𑀯𑀢𑁆𑀣𑀼𑀫𑀢𑁆𑀢𑁂𑀦 𑀯𑀺𑀧𑀦𑁆𑀦𑀸, 𑀯𑀺𑀧𑀦𑁆𑀦𑀯𑀢𑁆𑀣𑀼𑀓𑀸𑀢𑀺 𑀅𑀢𑁆𑀣𑁄. 𑀅𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀓𑀸𑀢𑀺 𑀫𑀕𑁆𑀕𑀸𑀦𑀼𑀧𑁆𑀧𑀢𑁆𑀢𑀺𑀓𑀸𑀭𑀡𑀫𑀸𑀳. 𑀓𑀺𑀜𑁆𑀘𑀸𑀧𑀺 𑀤𑀼𑀳𑁂𑀢𑀼𑀓𑀸𑀦𑀫𑁆𑀧𑀺 𑀫𑀕𑁆𑀕𑁄 𑀦𑀼𑀧𑁆𑀧𑀚𑁆𑀚𑀢𑀺, 𑀢𑁂 𑀧𑀦 𑀧𑀩𑁆𑀩𑀚𑁆𑀚𑀼𑀧𑀲𑀫𑁆𑀧𑀤𑀸𑀲𑀼 𑀞𑀢𑁆𑀯𑀸 𑀆𑀬𑀢𑀺𑀁 𑀫𑀕𑁆𑀕𑀳𑁂𑀢𑀼𑀁 𑀲𑀫𑁆𑀧𑀸𑀤𑁂𑀢𑀼𑀁 𑀲𑀓𑁆𑀓𑁄𑀦𑁆𑀢𑀺, 𑀅𑀳𑁂𑀢𑀼𑀓𑀸 𑀧𑀦 𑀧𑀭𑀺𑀲𑀼𑀤𑁆𑀥𑁂 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑁂 𑀞𑀢𑁆𑀯𑀸 𑀲𑀫𑁆𑀧𑀸𑀤𑁂𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀢𑀲𑁆𑀫𑀸 𑀢𑁂 𑀢𑀫𑁆𑀧𑀺 𑀧𑀝𑀺𑀘𑁆𑀘 𑀯𑀢𑁆𑀣𑀼𑀯𑀺𑀧𑀦𑁆𑀦𑀸𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀧𑀸𑀭𑀸𑀚𑀺𑀓𑀸𑀢𑀺 𑀓𑀫𑁆𑀫𑀯𑀺𑀧𑀢𑁆𑀢𑀺𑀬𑀸 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂𑀬𑁂𑀯 𑀧𑀭𑀸𑀚𑀬𑀁 𑀆𑀧𑀦𑁆𑀦𑀸. 𑀣𑁂𑀬𑁆𑀬𑀲𑀁𑀯𑀸𑀲𑀓𑀸𑀤𑀻𑀦𑀁 𑀕𑀺𑀳𑀺𑀪𑀸𑀯𑁂 𑀞𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀬 𑀯𑀸𑀬𑀫𑀦𑁆𑀢𑀸𑀦𑀫𑁆𑀧𑀺 𑀢𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀫𑀕𑁆𑀕𑀼𑀧𑁆𑀧𑀢𑁆𑀢𑀺𑀅𑀪𑀸𑀯𑀢𑁄 ‘‘𑀫𑀕𑁆𑀕𑁄 𑀧𑀦 𑀯𑀸𑀭𑀺𑀢𑁄’’𑀢𑀺 𑀯𑀼𑀢𑁆𑀢𑀁. 𑀤𑀻𑀖𑀢𑀸𑀬 𑀮𑀫𑁆𑀩𑀫𑀸𑀦𑀁 𑀅𑀗𑁆𑀕𑀚𑀸𑀢𑀁 𑀮𑀫𑁆𑀩𑀁 𑀦𑀸𑀫, 𑀢𑀁 𑀬𑀲𑁆𑀲 𑀅𑀢𑁆𑀣𑀺 𑀲𑁄 𑀮𑀫𑁆𑀩𑀻. 𑀲𑁄 𑀏𑀢𑁆𑀢𑀸𑀯𑀢𑀸 𑀦 𑀧𑀸𑀭𑀸𑀚𑀺𑀓𑁄, 𑀢𑀁 𑀧𑀦 𑀤𑀻𑀖𑀁 𑀅𑀗𑁆𑀕𑀚𑀸𑀢𑀁 𑀅𑀢𑁆𑀢𑀦𑁄 𑀫𑀼𑀔𑁂 𑀯𑀸 𑀯𑀘𑁆𑀘𑀫𑀕𑁆𑀕𑁂 𑀯𑀸 𑀲𑁂𑀯𑀦𑀸𑀥𑀺𑀧𑁆𑀧𑀸𑀬𑁂𑀦 𑀧𑀯𑁂𑀲𑁂𑀦𑁆𑀢𑁄𑀯 𑀧𑀸𑀭𑀸𑀚𑀺𑀓𑁄, 𑀇𑀥 𑀧𑀦 𑀯𑀘𑁆𑀘𑀫𑀕𑁆𑀕𑁂 𑀧𑀯𑁂𑀲𑁂𑀦𑁆𑀢𑁄𑀯 𑀅𑀥𑀺𑀧𑁆𑀧𑁂𑀢𑁄 𑀫𑀼𑀤𑀼𑀧𑀺𑀝𑁆𑀞𑀺𑀓𑁂𑀦𑁂𑀯 𑀫𑀼𑀔𑁂 𑀧𑀯𑁂𑀲𑀦𑀲𑁆𑀲 𑀯𑀼𑀢𑁆𑀢𑀢𑁆𑀢𑀸. 𑀲𑁄𑀧𑀺 𑀳𑀺 𑀓𑀢𑀧𑀭𑀺𑀓𑀫𑁆𑀫𑀢𑀸𑀬 𑀫𑀼𑀤𑀼𑀪𑀽𑀢𑀸𑀬 𑀧𑀺𑀝𑁆𑀞𑀺𑀬𑀸 𑀑𑀦𑀫𑀺𑀢𑁆𑀯𑀸 𑀅𑀢𑁆𑀢𑀦𑁄 𑀅𑀗𑁆𑀕𑀚𑀸𑀢𑀁 𑀫𑀼𑀔𑁂𑀦 𑀕𑀡𑁆𑀳𑀦𑁆𑀢𑁄𑀯 𑀧𑀸𑀭𑀸𑀚𑀺𑀓𑁄 𑀳𑁄𑀢𑀺, 𑀦 𑀓𑁂𑀯𑀮𑁄. 𑀬𑁄 𑀧𑀦 𑀫𑀼𑀔𑁂𑀦 𑀅𑀢𑁆𑀢𑀦𑁄 𑀯𑀘𑁆𑀘𑀫𑀕𑁆𑀕𑀁 𑀯𑀸 𑀧𑀭𑁂𑀲𑀁 𑀯𑀘𑁆𑀘𑀫𑀕𑁆𑀕𑀫𑀼𑀔𑀁 𑀯𑀸 𑀇𑀢𑁆𑀣𑀻𑀦𑀁 𑀧𑀲𑁆𑀲𑀸𑀯𑀫𑀕𑁆𑀕𑀁 𑀯𑀸 𑀕𑀡𑁆𑀳𑀸𑀢𑀺, 𑀢𑀲𑁆𑀲 𑀘 𑀧𑀼𑀭𑀺𑀲𑀦𑀺𑀫𑀺𑀢𑁆𑀢𑁂𑀦 𑀧𑀼𑀭𑀺𑀲𑀦𑀺𑀫𑀺𑀢𑁆𑀢𑀁 𑀙𑀼𑀧𑀦𑁆𑀢𑀲𑁆𑀲 𑀘 𑀫𑀕𑁆𑀕𑁂𑀦 𑀫𑀕𑁆𑀕𑀧𑀝𑀺𑀧𑀸𑀤𑀦𑁂𑀧𑀺 𑀧𑀸𑀭𑀸𑀚𑀺𑀓𑀁 𑀦 𑀳𑁄𑀢𑀺 𑀧𑀼𑀭𑀺𑀲𑀦𑀺𑀫𑀺𑀢𑁆𑀢𑁂𑀦 𑀢𑀤𑀺𑀢𑀭𑀫𑀕𑁆𑀕𑀲𑀫𑁆𑀧𑀝𑀺𑀧𑀸𑀤𑀦𑁂𑀦𑁂𑀯 𑀫𑁂𑀣𑀼𑀦𑀥𑀫𑁆𑀫𑀯𑁄𑀳𑀸𑀭𑀢𑁄. 𑀧𑀭𑀲𑁆𑀲 𑀅𑀗𑁆𑀕𑀚𑀸𑀢𑁂 𑀅𑀪𑀺𑀦𑀺𑀲𑀻𑀤𑀢𑀻𑀢𑀺 𑀧𑀭𑀲𑁆𑀲 𑀉𑀢𑁆𑀢𑀸𑀦𑀁 𑀲𑀬𑀦𑁆𑀢𑀲𑁆𑀲 𑀓𑀫𑁆𑀫𑀦𑀺𑀬𑁂 𑀅𑀗𑁆𑀕𑀚𑀸𑀢𑁂 𑀅𑀢𑁆𑀢𑀦𑁄 𑀯𑀘𑁆𑀘𑀫𑀕𑁆𑀕𑀁 𑀧𑀯𑁂𑀲𑁂𑀦𑁆𑀢𑁄 𑀢𑀲𑁆𑀲𑀽𑀧𑀭𑀺 𑀦𑀺𑀲𑀻𑀤𑀢𑀺, 𑀇𑀤𑀜𑁆𑀘 𑀉𑀧𑀮𑀓𑁆𑀔𑀡𑀫𑀢𑁆𑀢𑀁 𑀧𑀭𑁂𑀲𑀁 𑀅𑀗𑁆𑀕𑀚𑀸𑀢𑀁 𑀯𑀘𑁆𑀘𑀫𑀕𑁆𑀕𑁂 𑀧𑀯𑁂𑀲𑁂𑀦𑁆𑀢𑁄 𑀲𑀸𑀤𑀺𑀬𑀦𑁆𑀢𑁄𑀧𑀺 𑀧𑀸𑀭𑀸𑀚𑀺𑀓𑁄𑀯, 𑀩𑀮𑀓𑁆𑀓𑀸𑀭𑁂𑀦 𑀧𑀦 𑀯𑀘𑁆𑀘𑀫𑀕𑁆𑀕𑁂 𑀯𑀸 𑀫𑀼𑀔𑁂 𑀯𑀸 𑀧𑀭𑁂𑀦 𑀧𑀯𑁂𑀲𑀺𑀬𑀫𑀸𑀦𑁄 𑀬𑀤𑀺 𑀦 𑀲𑀸𑀤𑀺𑀬𑀢𑀺, 𑀅𑀦𑀸𑀧𑀢𑁆𑀢𑀺𑀓𑁄𑀯. 𑀏𑀢𑁆𑀣 𑀅𑀲𑀸𑀤𑀺𑀬𑀦𑀁 𑀦𑀸𑀫 𑀤𑀼𑀓𑁆𑀓𑀭𑀁 𑀯𑀺𑀭𑀚𑁆𑀚𑀺𑀢𑀩𑁆𑀩𑀢𑁄. 𑀏𑀢𑁆𑀣 𑀘 𑀅𑀦𑀼𑀧𑀲𑀫𑁆𑀧𑀦𑁆𑀦𑀪𑀸𑀯𑁂 𑀞𑀢𑁆𑀯𑀸 𑀫𑀸𑀢𑀼𑀧𑀺𑀢𑀼𑀅𑀭𑀳𑀦𑁆𑀢𑁂𑀲𑀼 𑀅𑀜𑁆𑀜𑀢𑀭𑀁 𑀖𑀸𑀢𑁂𑀦𑁆𑀢𑁄 𑀪𑀺𑀓𑁆𑀔𑀼𑀦𑀺𑀁 𑀤𑀽𑀲𑁂𑀦𑁆𑀢𑁄 𑀘 𑀲𑀸𑀫𑀡𑁂𑀭𑀧𑀩𑁆𑀩𑀚𑁆𑀚𑀫𑁆𑀧𑀺 𑀦 𑀮𑀪𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 𑀯𑀺𑀲𑀼𑀁 𑀕𑀳𑀺𑀢𑀢𑁆𑀢𑀸 𑀫𑀸𑀢𑀼𑀖𑀸𑀢𑀓𑀸𑀤𑀻𑀦𑀁 𑀘𑀢𑀼𑀦𑁆𑀦𑀁 𑀢𑀢𑀺𑀬𑀧𑀞𑀫𑀧𑀸𑀭𑀸𑀚𑀺𑀓𑁂𑀲𑀼 𑀅𑀦𑁆𑀢𑁄𑀕𑀥𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀬𑀣𑀸 𑀏𑀢𑁆𑀣, 𑀏𑀯𑀁 𑀕𑀺𑀳𑀺𑀪𑀸𑀯𑁂 𑀞𑀢𑁆𑀯𑀸 𑀮𑁄𑀳𑀺𑀢𑀼𑀧𑁆𑀧𑀸𑀤𑀁 𑀓𑀭𑁄𑀦𑁆𑀢𑁄 𑀮𑁄𑀳𑀺𑀢𑀼𑀧𑁆𑀧𑀸𑀤𑀓𑁄𑀯𑀸𑀢𑀺 𑀕𑀳𑁂𑀢𑀩𑁆𑀩𑀁. 𑀏𑀢𑁂𑀦 𑀧𑀭𑀺𑀬𑀸𑀬𑁂𑀦𑀸𑀢𑀺 𑀉𑀪𑀺𑀦𑁆𑀦𑀁 𑀭𑀸𑀕𑀧𑀭𑀺𑀬𑀼𑀝𑁆𑀞𑀸𑀦𑀲𑀗𑁆𑀔𑀸𑀢𑁂𑀦 𑀧𑀭𑀺𑀬𑀸𑀬𑁂𑀦. 𑀤𑀼𑀢𑀺𑀬𑀯𑀺𑀓𑀧𑁆𑀧𑁂 𑀓𑀘𑁆𑀘𑀺 𑀅𑀢𑁆𑀣𑀸𑀢𑀺 𑀧𑀤𑀘𑁆𑀙𑁂𑀤𑁄 𑀯𑁂𑀤𑀺𑀢𑀩𑁆𑀩𑁄.

𑀇𑀢𑀺 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬 𑀯𑀺𑀦𑀬𑀝𑁆𑀞𑀓𑀣𑀸𑀬 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁

𑀘𑀢𑀼𑀢𑁆𑀣𑀧𑀸𑀭𑀸𑀚𑀺𑀓𑀯𑀡𑁆𑀡𑀦𑀸𑀦𑀬𑁄 𑀦𑀺𑀝𑁆𑀞𑀺𑀢𑁄.

𑀦𑀺𑀝𑁆𑀞𑀺𑀢𑁄 𑀘 𑀧𑀸𑀭𑀸𑀚𑀺𑀓𑀓𑀡𑁆𑀟𑀯𑀡𑁆𑀡𑀦𑀸𑀦𑀬𑁄.