𑁨. 𑀤𑀼𑀢𑀺𑀬𑀧𑀸𑀭𑀸𑀚𑀺𑀓𑀁

𑀅𑀤𑀼𑀢𑀺𑀬𑁂𑀦𑀸𑀢𑀺 𑀅𑀲𑀤𑀺𑀲𑁂𑀦 𑀚𑀺𑀦𑁂𑀦 𑀬𑀁 𑀤𑀼𑀢𑀺𑀬𑀁 𑀧𑀸𑀭𑀸𑀚𑀺𑀓𑀁 𑀧𑀓𑀸𑀲𑀺𑀢𑀁, 𑀢𑀲𑁆𑀲 𑀇𑀤𑀸𑀦𑀺 𑀬𑀲𑁆𑀫𑀸 𑀲𑀁𑀯𑀡𑁆𑀡𑀦𑀸𑀓𑁆𑀓𑀫𑁄 𑀧𑀢𑁆𑀢𑁄, 𑀢𑀲𑁆𑀫𑀸 𑀅𑀲𑁆𑀲 𑀤𑀼𑀢𑀺𑀬𑀲𑁆𑀲 𑀅𑀬𑀁 𑀲𑀁𑀯𑀡𑁆𑀡𑀦𑀸 𑀳𑁄𑀢𑀻𑀢𑀺 𑀬𑁄𑀚𑀦𑀸.

𑀥𑀦𑀺𑀬𑀯𑀢𑁆𑀣𑀼𑀯𑀡𑁆𑀡𑀦𑀸

𑁮𑁪. 𑀭𑀸𑀚𑀽𑀳𑀺 𑀕𑀳𑀺𑀢𑀦𑁆𑀢𑀺 𑀭𑀸𑀚𑀕𑀳𑀦𑁆𑀢𑀺 𑀆𑀳 ‘‘𑀫𑀦𑁆𑀥𑀸𑀢𑀽’’𑀢𑀺. 𑀭𑀸𑀚𑀧𑀼𑀭𑁄𑀳𑀺𑀢𑁂𑀦 𑀧𑀭𑀺𑀕𑁆𑀕𑀳𑀺𑀢𑀫𑁆𑀧𑀺 𑀭𑀸𑀚𑀧𑀭𑀺𑀕𑁆𑀕𑀳𑀺𑀢𑀫𑁂𑀯𑀸𑀢𑀺 𑀫𑀳𑀸𑀕𑁄𑀯𑀺𑀦𑁆𑀤𑀕𑁆𑀕𑀳𑀡𑀁, 𑀦𑀕𑀭𑀲𑀤𑁆𑀤𑀸𑀧𑁂𑀓𑁆𑀔𑀸𑀬 𑀘𑁂𑀢𑁆𑀣 ‘‘𑀭𑀸𑀚𑀕𑀳’’𑀦𑁆𑀢𑀺 𑀦𑀧𑀼𑀁𑀲𑀓𑀦𑀺𑀤𑁆𑀤𑁂𑀲𑁄. 𑀅𑀜𑁆𑀜𑁂𑀧𑁂𑀢𑁆𑀣 𑀧𑀓𑀸𑀭𑁂𑀢𑀺 𑀲𑀼𑀲𑀁𑀯𑀺𑀳𑀺𑀢𑀸𑀭𑀓𑁆𑀔𑀢𑁆𑀢𑀸 𑀭𑀸𑀚𑀽𑀦𑀁 𑀕𑀳𑀁 𑀕𑁂𑀳𑀪𑀽𑀢𑀦𑁆𑀢𑀺 𑀭𑀸𑀚𑀕𑀳𑀦𑁆𑀢𑀺𑀆𑀤𑀺𑀓𑁂 𑀧𑀓𑀸𑀭𑁂. 𑀯𑀲𑀦𑁆𑀢𑀯𑀦𑀦𑁆𑀢𑀺 𑀓𑀻𑀴𑀸𑀯𑀦𑀁, 𑀯𑀲𑀦𑁆𑀢𑀓𑀸𑀮𑁂 𑀓𑀻𑀴𑀸𑀬 𑀬𑁂𑀪𑀼𑀬𑁆𑀬𑀢𑁆𑀢𑀸 𑀧𑀦 𑀯𑀲𑀦𑁆𑀢𑀯𑀦𑀦𑁆𑀢𑀺 𑀯𑀼𑀢𑁆𑀢𑀁.

𑀲𑀤𑁆𑀯𑀸𑀭𑀩𑀦𑁆𑀥𑀸𑀢𑀺 𑀯𑀲𑁆𑀲𑀽𑀧𑀕𑀫𑀦𑀬𑁄𑀕𑁆𑀕𑀢𑀸𑀤𑀲𑁆𑀲𑀦𑀁. 𑀦𑀸𑀮𑀓𑀧𑀝𑀺𑀧𑀤𑀦𑁆𑀢𑀺 𑀲𑀼𑀢𑁆𑀢𑀦𑀺𑀧𑀸𑀢𑁂 (𑀲𑀼. 𑀦𑀺. 𑁬𑁮𑁪 𑀆𑀤𑀬𑁄) 𑀦𑀸𑀮𑀓𑀢𑁆𑀣𑁂𑀭𑀲𑁆𑀲 𑀤𑁂𑀲𑀺𑀢𑀁 𑀫𑁄𑀦𑁂𑀬𑁆𑀬𑀧𑀝𑀺𑀧𑀤𑀁. 𑀧𑀜𑁆𑀘𑀦𑁆𑀦𑀁 𑀙𑀤𑀦𑀸𑀦𑀦𑁆𑀢𑀺 𑀢𑀺𑀡𑀧𑀡𑁆𑀡𑀇𑀝𑁆𑀞𑀓𑀲𑀺𑀮𑀸𑀲𑀼𑀥𑀸𑀲𑀗𑁆𑀔𑀸𑀢𑀸𑀦𑀁 𑀧𑀜𑁆𑀘𑀦𑁆𑀦𑀁. 𑀦𑁄 𑀘𑁂 𑀮𑀪𑀢𑀺…𑀧𑁂… 𑀲𑀸𑀫𑀫𑁆𑀧𑀺 𑀓𑀸𑀢𑀩𑁆𑀩𑀦𑁆𑀢𑀺 𑀇𑀫𑀺𑀦𑀸 𑀦𑀸𑀯𑀸𑀲𑀢𑁆𑀣𑀯𑀚𑁂 𑀞𑀧𑁂𑀢𑁆𑀯𑀸 𑀅𑀜𑁆𑀜𑀢𑁆𑀣 ‘‘𑀅𑀲𑁂𑀦𑀸𑀲𑀦𑀺𑀓𑁄 𑀅𑀳’’𑀦𑁆𑀢𑀺 𑀆𑀮𑀬𑀓𑀭𑀡𑀫𑀢𑁆𑀢𑁂𑀦 𑀉𑀧𑀕𑀫𑀦𑀁 𑀦 𑀯𑀝𑁆𑀝𑀢𑀺. 𑀲𑁂𑀦𑀸𑀲𑀦𑀁 𑀧𑀭𑀺𑀬𑁂𑀲𑀺𑀢𑁆𑀯𑀸 𑀯𑀘𑀻𑀪𑁂𑀤𑀁 𑀓𑀢𑁆𑀯𑀸 𑀯𑀲𑁆𑀲𑀁 𑀉𑀧𑀕𑀦𑁆𑀢𑀩𑁆𑀩𑀫𑁂𑀯𑀸𑀢𑀺 𑀤𑀲𑁆𑀲𑁂𑀢𑀺. ‘‘𑀦, 𑀪𑀺𑀓𑁆𑀔𑀯𑁂, 𑀅𑀲𑁂𑀦𑀸𑀲𑀦𑀺𑀓𑁂𑀦𑀸’’𑀢𑀺𑀆𑀤𑀺𑀦𑀸 (𑀫𑀳𑀸𑀯. 𑁨𑁦𑁪) 𑀳𑀺 𑀧𑀸𑀴𑀺𑀬𑀁 ‘‘𑀦𑀸𑀮𑀓𑀧𑀝𑀺𑀧𑀤𑀁 𑀧𑀝𑀺𑀧𑀦𑁆𑀦𑁂𑀦𑀸𑀧𑀻’’𑀢𑀺 𑀅𑀝𑁆𑀞𑀓𑀣𑀸𑀬𑀜𑁆𑀘 𑀅𑀯𑀺𑀲𑁂𑀲𑁂𑀦 𑀤𑀴𑁆𑀳𑀁 𑀓𑀢𑁆𑀯𑀸 𑀯𑀼𑀢𑁆𑀢𑀁, 𑀦𑀸𑀯𑀸𑀲𑀢𑁆𑀣𑀯𑀚𑁂𑀲𑀼𑀬𑁂𑀯 𑀘 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀦𑀸𑀯𑀸𑀬 𑀯𑀲𑁆𑀲𑀁 𑀉𑀧𑀕𑀦𑁆𑀢𑀼’’𑀦𑁆𑀢𑀺𑀆𑀤𑀺𑀦𑀸 (𑀫𑀳𑀸𑀯. 𑁨𑁦𑁩) 𑀅𑀲𑀢𑀺𑀧𑀺 𑀲𑁂𑀦𑀸𑀲𑀦𑁂 𑀆𑀮𑀬𑀓𑀭𑀡𑀯𑀲𑁂𑀦 𑀯𑀲𑁆𑀲𑀽𑀧𑀕𑀫𑀦𑀁 𑀅𑀦𑀼𑀜𑁆𑀜𑀸𑀢𑀁, 𑀦𑀸𑀜𑁆𑀜𑀢𑁆𑀣𑀸𑀢𑀺 𑀕𑀳𑁂𑀢𑀩𑁆𑀩𑀁. 𑀅𑀬𑀫𑀦𑀼𑀥𑀫𑁆𑀫𑀢𑀸𑀢𑀺 𑀲𑀸𑀫𑀻𑀘𑀺𑀯𑀢𑁆𑀢𑀁. 𑀓𑀢𑀺𑀓𑀯𑀢𑁆𑀢𑀸𑀦𑀻𑀢𑀺 𑀪𑀲𑁆𑀲𑀸𑀭𑀸𑀫𑀢𑀸𑀤𑀺𑀁 𑀯𑀺𑀳𑀸𑀬 𑀲𑀩𑁆𑀩𑀤𑀸 𑀅𑀧𑁆𑀧𑀫𑀢𑁆𑀢𑁂𑀳𑀺 𑀪𑀯𑀺𑀢𑀩𑁆𑀩𑀦𑁆𑀢𑀺𑀆𑀤𑀺𑀓𑀢𑀺𑀓𑀯𑀢𑁆𑀢𑀸𑀦𑀺. 𑀔𑀦𑁆𑀥𑀓𑀯𑀢𑁆𑀢𑀸𑀦𑀻𑀢𑀺 ‘‘𑀆𑀕𑀦𑁆𑀢𑀼𑀓𑀸𑀤𑀺𑀔𑀦𑁆𑀥𑀓𑀯𑀢𑁆𑀢𑀁 𑀧𑀽𑀭𑁂𑀢𑀩𑁆𑀩’’𑀦𑁆𑀢𑀺 𑀏𑀯𑀁 𑀔𑀦𑁆𑀥𑀓𑀯𑀢𑁆𑀢𑀸𑀦𑀺 𑀘 𑀅𑀥𑀺𑀝𑁆𑀞𑀳𑀺𑀢𑁆𑀯𑀸.

𑀯𑀲𑁆𑀲𑀁𑀯𑀼𑀢𑁆𑀣𑀸𑀢𑀺 𑀧𑀤𑀲𑁆𑀲 𑀅𑀝𑁆𑀞𑀓𑀣𑀸𑀬𑀁 ‘‘𑀧𑀼𑀭𑀺𑀫𑀺𑀓𑀸𑀬 𑀉𑀧𑀕𑀢𑀸 𑀫𑀳𑀸𑀧𑀯𑀸𑀭𑀡𑀸𑀬 𑀧𑀯𑀸𑀭𑀺𑀢𑀸 𑀧𑀸𑀝𑀺𑀧𑀤𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 ‘𑀯𑀼𑀢𑁆𑀣𑀯𑀲𑁆𑀲𑀸’𑀢𑀺 𑀯𑀼𑀘𑁆𑀘𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀫𑀳𑀸𑀧𑀯𑀸𑀭𑀡𑀸𑀤𑀺𑀯𑀲𑁂 𑀧𑀯𑀸𑀭𑁂𑀢𑁆𑀯𑀸 𑀯𑀸 𑀅𑀧𑁆𑀧𑀯𑀸𑀭𑁂𑀢𑁆𑀯𑀸 𑀯𑀸 𑀅𑀜𑁆𑀜𑀢𑁆𑀣 𑀕𑀘𑁆𑀙𑀦𑁆𑀢𑁂𑀳𑀺 𑀲𑀢𑁆𑀢𑀸𑀳𑀓𑀭𑀡𑀻𑀬𑀦𑀺𑀫𑀺𑀢𑁆𑀢𑁂 𑀲𑀢𑀺 𑀏𑀯 𑀕𑀦𑁆𑀢𑀩𑁆𑀩𑀁, 𑀦𑀸𑀲𑀢𑀺, 𑀇𑀢𑀭𑀣𑀸 𑀯𑀲𑁆𑀲𑀘𑁆𑀙𑁂𑀤𑁄 𑀤𑀼𑀓𑁆𑀓𑀝𑀜𑁆𑀘 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. ‘‘𑀇𑀫𑀁 𑀢𑁂𑀫𑀸𑀲𑀁 𑀯𑀲𑁆𑀲𑀁 𑀉𑀧𑁂𑀫𑀻’’𑀢𑀺 𑀳𑀺 ‘‘𑀦, 𑀪𑀺𑀓𑁆𑀔𑀯𑁂, 𑀯𑀲𑁆𑀲𑀁 𑀉𑀧𑀕𑀦𑁆𑀢𑁆𑀯𑀸 𑀧𑀼𑀭𑀺𑀫𑀁 𑀯𑀸 𑀢𑁂𑀫𑀸𑀲𑀁 𑀧𑀘𑁆𑀙𑀺𑀫𑀁 𑀯𑀸 𑀢𑁂𑀫𑀸𑀲𑀁 𑀅𑀯𑀲𑀺𑀢𑁆𑀯𑀸 𑀘𑀸𑀭𑀺𑀓𑀸 𑀧𑀓𑁆𑀓𑀫𑀺𑀢𑀩𑁆𑀩𑀸’’𑀢𑀺 (𑀫𑀳𑀸𑀯. 𑁧𑁮𑁫) 𑀘 𑀯𑀼𑀢𑁆𑀢𑀁. 𑀇𑀥𑁂𑀯 𑀘 𑀯𑀲𑁆𑀲𑀁𑀯𑀼𑀢𑁆𑀣𑀸 𑀢𑁂𑀫𑀸𑀲𑀘𑁆𑀘𑀬𑁂𑀦…𑀧𑁂… 𑀧𑀓𑁆𑀓𑀫𑀺𑀁𑀲𑀽𑀢𑀺 𑀯𑀼𑀢𑁆𑀢𑀁. 𑀧𑀯𑀸𑀭𑀡𑀸𑀤𑀺𑀯𑀲𑁄𑀧𑀺 𑀢𑁂𑀫𑀸𑀲𑀧𑀭𑀺𑀬𑀸𑀧𑀦𑁆𑀦𑁄𑀯. 𑀓𑁂𑀘𑀺 𑀧𑀦 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀯𑀲𑁆𑀲𑀁𑀯𑀼𑀢𑁆𑀣𑀸𑀦𑀁 𑀪𑀺𑀓𑁆𑀔𑀽𑀦𑀁 𑀢𑀻𑀳𑀺 𑀞𑀸𑀦𑁂𑀳𑀺 𑀧𑀯𑀸𑀭𑁂𑀢𑀼𑀦𑁆𑀢𑀺 (𑀫𑀳𑀸𑀯. 𑁨𑁦𑁯) 𑀧𑀯𑀸𑀭𑀡𑀸𑀓𑀫𑁆𑀫𑀲𑁆𑀲 𑀧𑀼𑀩𑁆𑀩𑁂𑀬𑁂𑀯 𑀯𑀲𑁆𑀲𑀁𑀯𑀼𑀢𑁆𑀣𑀸𑀦𑀦𑁆𑀢𑀺 𑀯𑀼𑀢𑁆𑀣𑀯𑀲𑁆𑀲𑀢𑀸𑀬 𑀯𑀼𑀢𑁆𑀢𑀢𑁆𑀢𑀸 𑀫𑀳𑀸𑀧𑀯𑀸𑀭𑀡𑀸𑀤𑀺𑀯𑀲𑁂 𑀲𑀢𑁆𑀢𑀸𑀳𑀓𑀭𑀡𑀻𑀬𑀦𑀺𑀫𑀺𑀢𑁆𑀢𑀁 𑀯𑀺𑀦𑀸𑀧𑀺 𑀬𑀣𑀸𑀲𑀼𑀔𑀁 𑀕𑀦𑁆𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀤𑀦𑁆𑀢𑀺, 𑀢𑀁 𑀢𑁂𑀲𑀁 𑀫𑀢𑀺𑀫𑀢𑁆𑀢𑀁, 𑀯𑀼𑀢𑁆𑀣𑀯𑀲𑁆𑀲𑀸𑀦𑀜𑁆𑀳𑀺 𑀧𑀯𑀸𑀭𑀡𑀸𑀦𑀼𑀚𑀸𑀦𑀦𑀁 𑀅𑀦𑀼𑀧𑀕𑀢𑀙𑀺𑀦𑁆𑀦𑀯𑀲𑁆𑀲𑀸𑀤𑀻𑀦𑀁 𑀦𑀺𑀯𑀢𑁆𑀢𑀦𑀢𑁆𑀣𑀁 𑀓𑀢𑀁, 𑀦 𑀧𑀦 𑀧𑀯𑀸𑀭𑀡𑀸𑀤𑀺𑀯𑀲𑁂 𑀅𑀯𑀲𑀺𑀢𑁆𑀯𑀸 𑀧𑀓𑁆𑀓𑀫𑀺𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑀦𑀢𑁆𑀣𑀁 𑀢𑀤𑀢𑁆𑀣𑀲𑁆𑀲 𑀇𑀥 𑀧𑀲𑀗𑁆𑀕𑀸𑀪𑀸𑀯𑀸, 𑀧𑀯𑀸𑀭𑀡𑀁 𑀓𑀸𑀢𑀼𑀁 𑀅𑀦𑀼𑀘𑁆𑀙𑀯𑀺𑀓𑀸𑀦𑀁 𑀧𑀯𑀸𑀭𑀡𑀸 𑀇𑀥 𑀯𑀺𑀥𑀻𑀬𑀢𑀺, 𑀬𑁂 𑀘 𑀯𑀲𑁆𑀲𑀁 𑀉𑀧𑀕𑀦𑁆𑀢𑁆𑀯𑀸 𑀯𑀲𑁆𑀲𑀘𑁆𑀙𑁂𑀤𑀜𑁆𑀘 𑀅𑀓𑀢𑁆𑀯𑀸 𑀬𑀸𑀯 𑀧𑀯𑀸𑀭𑀡𑀸𑀤𑀺𑀯𑀲𑀸 𑀯𑀲𑀺𑀁𑀲𑀼, 𑀢𑁂 𑀢𑀢𑁆𑀢𑀓𑁂𑀦 𑀧𑀯𑀸𑀭𑀡𑀸𑀓𑀫𑁆𑀫𑀁 𑀧𑀢𑀺 𑀧𑀭𑀺𑀬𑀸𑀬𑀢𑁄 𑀯𑀼𑀢𑁆𑀣𑀯𑀲𑁆𑀲𑀸𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀅𑀧𑁆𑀧𑀓𑀁 𑀊𑀦𑀫𑀥𑀺𑀓𑀁 𑀯𑀸 𑀕𑀡𑀦𑀽𑀧𑀕𑀁 𑀦 𑀳𑁄𑀢𑀻𑀢𑀺 𑀜𑀸𑀬𑀢𑁄, 𑀦 𑀓𑀣𑀺𑀦𑀓𑀫𑁆𑀫𑀁 𑀧𑀢𑀺 𑀢𑁂𑀫𑀸𑀲𑀲𑁆𑀲 𑀅𑀧𑀭𑀺𑀧𑀼𑀡𑁆𑀡𑀢𑁆𑀢𑀸, 𑀇𑀢𑀭𑀣𑀸 𑀢𑀲𑁆𑀫𑀺𑀁 𑀫𑀳𑀸𑀧𑀯𑀸𑀭𑀡𑀸𑀤𑀺𑀯𑀲𑁂𑀧𑀺 𑀓𑀣𑀺𑀦𑀢𑁆𑀣𑀸𑀭𑀧𑁆𑀧𑀲𑀗𑁆𑀕𑀢𑁄. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀯𑀲𑁆𑀲𑀁𑀯𑀼𑀢𑁆𑀣𑀸𑀦𑀁 𑀪𑀺𑀓𑁆𑀔𑀽𑀦𑀁 𑀓𑀣𑀺𑀦𑀁 𑀅𑀢𑁆𑀣𑀭𑀺𑀢𑀼’’𑀦𑁆𑀢𑀺 (𑀫𑀳𑀸𑀯. 𑁩𑁦𑁬) 𑀇𑀤𑀁 𑀧𑀦 ‘‘𑀦, 𑀪𑀺𑀓𑁆𑀔𑀯𑁂, 𑀯𑀲𑁆𑀲𑀁 𑀉𑀧𑀕𑀦𑁆𑀢𑁆𑀯𑀸 𑀧𑀼𑀭𑀺𑀫𑀁 𑀯𑀸 𑀢𑁂𑀫𑀸𑀲𑀁 𑀧𑀘𑁆𑀙𑀺𑀫𑀁 𑀯𑀸 𑀢𑁂𑀫𑀸𑀲𑀁 𑀅𑀯𑀲𑀺𑀢𑁆𑀯𑀸 𑀘𑀸𑀭𑀺𑀓𑀸 𑀧𑀓𑁆𑀓𑀫𑀺𑀢𑀩𑁆𑀩𑀸’’𑀢𑀺𑀆𑀤𑀺 (𑀫𑀳𑀸𑀯. 𑁧𑁮𑁫) 𑀘 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀫𑀳𑀸𑀧𑀯𑀸𑀭𑀡𑀸𑀬 𑀅𑀦𑀦𑁆𑀢𑀭𑀧𑀸𑀝𑀺𑀧𑀤𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀓𑀣𑀺𑀦𑀢𑁆𑀣𑀸𑀭𑀁 𑀧𑀓𑁆𑀓𑀫𑀦𑀜𑁆𑀘 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀧𑀭𑀺𑀯𑀸𑀭𑁂 𑀘 ‘‘𑀓𑀣𑀺𑀦𑀲𑁆𑀲 𑀅𑀢𑁆𑀣𑀸𑀭𑀫𑀸𑀲𑁄 𑀚𑀸𑀦𑀺𑀢𑀩𑁆𑀩𑁄’’𑀢𑀺 (𑀧𑀭𑀺. 𑁪𑁧𑁨) 𑀯𑀢𑁆𑀯𑀸 ‘‘𑀯𑀲𑁆𑀲𑀸𑀦𑀲𑁆𑀲 𑀧𑀘𑁆𑀙𑀺𑀫𑁄 𑀫𑀸𑀲𑁄 𑀚𑀸𑀦𑀺𑀢𑀩𑁆𑀩𑁄’’𑀢𑀺 (𑀧𑀭𑀺. 𑁪𑁧𑁨) 𑀯𑀼𑀢𑁆𑀢𑀁. 𑀬𑁄 𑀳𑀺 𑀓𑀣𑀺𑀦𑀢𑁆𑀣𑀸𑀭𑀲𑁆𑀲 𑀓𑀸𑀮𑁄, 𑀢𑀢𑁄 𑀧𑀝𑁆𑀞𑀸𑀬𑁂𑀯 𑀘𑀸𑀭𑀺𑀓𑀸𑀧𑀓𑁆𑀓𑀫𑀦𑀲𑁆𑀲𑀸𑀧𑀺 𑀓𑀸𑀮𑁄, 𑀦 𑀢𑀢𑁄 𑀧𑀼𑀭𑁂 𑀯𑀲𑁆𑀲𑀁𑀯𑀼𑀢𑁆𑀣𑀸𑀦𑀁𑀬𑁂𑀯 𑀓𑀣𑀺𑀦𑀢𑁆𑀣𑀸𑀭𑀸𑀭𑀳𑀢𑁆𑀢𑀸. 𑀬𑀤𑀕𑁆𑀕𑁂𑀦 𑀳𑀺 𑀧𑀯𑀸𑀭𑀡𑀸𑀤𑀺𑀯𑀲𑁂 𑀓𑀣𑀺𑀦𑀢𑁆𑀣𑀸𑀭𑁄 𑀦 𑀯𑀝𑁆𑀝𑀢𑀺, 𑀢𑀤𑀕𑁆𑀕𑁂𑀦 𑀪𑀺𑀓𑁆𑀔𑀽𑀧𑀺 𑀯𑀼𑀢𑁆𑀣𑀯𑀲𑁆𑀲𑀸 𑀦 𑀳𑁄𑀦𑁆𑀢𑀺 𑀧𑀯𑀸𑀭𑀡𑀸𑀤𑀺𑀯𑀲𑀲𑁆𑀲 𑀅𑀯𑀼𑀢𑁆𑀣𑀢𑁆𑀢𑀸.

𑀬𑀁 𑀧𑀦 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 (𑀲𑀸𑀭𑀢𑁆𑀣. 𑀝𑀻. 𑀧𑀸𑀭𑀸𑀚𑀺𑀓𑀓𑀡𑁆𑀟 𑁨.𑁮𑁪) ‘‘𑀏𑀓𑀤𑁂𑀲𑁂𑀦 𑀅𑀯𑀼𑀢𑁆𑀣𑀫𑁆𑀧𑀺 𑀢𑀁 𑀤𑀺𑀯𑀲𑀁 𑀯𑀼𑀢𑁆𑀣𑀪𑀸𑀕𑀸𑀧𑁂𑀓𑁆𑀔𑀸𑀬 𑀯𑀼𑀢𑁆𑀣𑀫𑁂𑀯 𑀳𑁄𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀢𑀁 𑀦 𑀬𑀼𑀢𑁆𑀢𑀁, 𑀢𑀁𑀤𑀺𑀯𑀲𑀧𑀭𑀺𑀬𑁄𑀲𑀸𑀦𑁂 𑀅𑀭𑀼𑀡𑀼𑀕𑁆𑀕𑀫𑀦𑀓𑀸𑀮𑁂 𑀯𑀲𑀦𑁆𑀢𑁄𑀯 𑀳𑀺 𑀢𑀁 𑀤𑀺𑀯𑀲𑀁 𑀯𑀼𑀢𑁆𑀣𑁄 𑀦𑀸𑀫 𑀳𑁄𑀢𑀺 𑀧𑀭𑀺𑀯𑀸𑀲𑀅𑀭𑀜𑁆𑀜𑀯𑀸𑀲𑀸𑀤𑀻𑀲𑀼 𑀯𑀺𑀬, 𑀅𑀬𑀜𑁆𑀘 𑀯𑀺𑀘𑀸𑀭𑀡𑀸 𑀉𑀧𑀭𑀺 𑀯𑀲𑁆𑀲𑀽𑀧𑀦𑀸𑀬𑀺𑀓𑀓𑁆𑀔𑀦𑁆𑀥𑀓𑁂 𑀆𑀯𑀺 𑀪𑀯𑀺𑀲𑁆𑀲𑀢𑀻𑀢𑀺 𑀢𑀢𑁆𑀣𑁂𑀯 𑀢𑀁 𑀧𑀸𑀓𑀝𑀁 𑀓𑀭𑀺𑀲𑁆𑀲𑀸𑀫.

𑀫𑀳𑀸𑀧𑀯𑀸𑀭𑀡𑀸𑀬 𑀧𑀯𑀸𑀭𑀺𑀢𑀸𑀢𑀺 𑀧𑀼𑀭𑀺𑀫𑀺𑀓𑀸𑀬 𑀯𑀲𑁆𑀲𑀁 𑀉𑀧𑀕𑀦𑁆𑀢𑁆𑀯𑀸 𑀅𑀘𑁆𑀙𑀺𑀦𑁆𑀦𑀯𑀲𑁆𑀲𑀢𑀸𑀤𑀲𑁆𑀲𑀦𑀧𑀭𑀁 𑀏𑀢𑀁 𑀓𑁂𑀦𑀘𑀺 𑀅𑀦𑁆𑀢𑀭𑀸𑀬𑁂𑀦 𑀅𑀧𑁆𑀧𑀯𑀸𑀭𑀺𑀢𑀸𑀦𑀫𑁆𑀧𑀺 𑀯𑀼𑀢𑁆𑀣𑀯𑀲𑁆𑀲𑀢𑁆𑀢𑀸. 𑀦 𑀑𑀯𑀲𑁆𑀲𑀺𑀬𑀢𑀻𑀢𑀺 𑀅𑀦𑁄𑀯𑀲𑁆𑀲𑀓𑀦𑁆𑀢𑀺 𑀓𑀫𑁆𑀫𑀲𑀸𑀥𑀦𑀁 𑀤𑀝𑁆𑀞𑀩𑁆𑀩𑀁, 𑀬𑀣𑀸 𑀦 𑀢𑁂𑀫𑀺𑀬𑀢𑀺, 𑀢𑀣𑀸 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀅𑀦𑀯𑀬𑁄𑀢𑀺 𑀏𑀢𑁆𑀣 𑀅𑀦𑀼𑀲𑀤𑁆𑀤𑁄 𑀯𑀺𑀘𑁆𑀙𑀸𑀬𑀁 𑀯𑀢𑁆𑀢𑀢𑀻𑀢𑀺 𑀆𑀳 𑀅𑀦𑀼 𑀅𑀦𑀼 𑀅𑀯𑀬𑁄𑀢𑀺𑀆𑀤𑀺. 𑀆𑀘𑀭𑀺𑀬𑀲𑁆𑀲 𑀓𑀫𑁆𑀫𑀁 𑀆𑀘𑀭𑀺𑀬𑀓𑀦𑁆𑀢𑀺 𑀆𑀳 ‘‘𑀆𑀘𑀭𑀺𑀬𑀓𑀫𑁆𑀫𑁂’’𑀢𑀺. 𑀓𑀝𑁆𑀞𑀓𑀫𑁆𑀫𑀁 𑀣𑀫𑁆𑀪𑀸𑀤𑀺. 𑀢𑁂𑀮𑀢𑀫𑁆𑀩𑀫𑀢𑁆𑀢𑀺𑀓𑀸𑀬𑀸𑀢𑀺 𑀢𑁂𑀮𑀫𑀺𑀲𑁆𑀲𑀸𑀬 𑀢𑀫𑁆𑀩𑀫𑀢𑁆𑀢𑀺𑀓𑀸𑀬.

𑁮𑁫. 𑀓𑀼𑀝𑀺𑀓𑀸𑀬 𑀓𑀭𑀡𑀪𑀸𑀯𑀦𑁆𑀢𑀺 𑀓𑀼𑀝𑀺𑀬𑀸 𑀓𑀢𑀪𑀸𑀯𑀁. 𑀓𑀺𑀁-𑀲𑀤𑁆𑀤𑀧𑁆𑀧𑀬𑁄𑀕𑁂 𑀅𑀦𑀸𑀕𑀢𑀧𑁆𑀧𑀘𑁆𑀘𑀬𑀯𑀺𑀥𑀸𑀦𑀁 𑀲𑀦𑁆𑀥𑀸𑀬 𑀢𑀲𑁆𑀲 𑀮𑀓𑁆𑀔𑀡𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀓𑀺𑀜𑁆𑀘𑀸𑀧𑀺 𑀣𑁂𑀭𑀲𑁆𑀲 𑀧𑀸𑀡𑀖𑀸𑀢𑀸𑀥𑀺𑀧𑁆𑀧𑀸𑀬𑁄 𑀦𑀢𑁆𑀣𑀺, 𑀅𑀦𑀼𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀓𑀭𑀡𑁂𑀦 𑀧𑀦 𑀩𑀳𑀽𑀦𑀁 𑀧𑀸𑀡𑀸𑀦𑀁 𑀫𑀭𑀡𑀢𑁆𑀢𑀸 𑀧𑀸𑀡𑁂 𑀩𑁆𑀬𑀸𑀩𑀸𑀥𑁂𑀦𑁆𑀢𑀲𑁆𑀲𑀸𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀸𑀢𑀩𑁆𑀬𑀪𑀸𑀯𑀦𑁆𑀢𑀺 𑀯𑀺𑀦𑀸𑀲𑁂𑀢𑀩𑁆𑀩𑀢𑀁. 𑀧𑀸𑀡𑀸𑀢𑀺𑀧𑀸𑀢𑀁 𑀓𑀭𑁄𑀦𑁆𑀢𑀸𑀦𑀦𑁆𑀢𑀺 𑀣𑁂𑀭𑁂𑀦 𑀅𑀓𑀢𑁂𑀧𑀺 𑀧𑀸𑀡𑀸𑀢𑀺𑀧𑀸𑀢𑁂 𑀧𑀸𑀡𑀓𑀸𑀦𑀁 𑀫𑀭𑀡𑀫𑀢𑁆𑀢𑁂𑀦 𑀧𑀘𑁆𑀙𑀺𑀫𑀸𑀦𑀁 𑀮𑁂𑀲𑁂𑀦 𑀕𑀳𑀡𑀸𑀓𑀸𑀭𑀁 𑀤𑀲𑁆𑀲𑁂𑀢𑀺, 𑀢𑁂𑀦 𑀘 ‘‘𑀫𑀫 𑀢𑀸𑀤𑀺𑀲𑀁 𑀅𑀓𑀼𑀲𑀮𑀁 𑀦𑀢𑁆𑀣𑀻’’𑀢𑀺 𑀧𑀘𑁆𑀙𑀺𑀫𑀸𑀦𑀁 𑀯𑀺𑀧𑀮𑁆𑀮𑀸𑀲𑀮𑁂𑀲𑀕𑁆𑀕𑀳𑀡𑀦𑀺𑀫𑀺𑀢𑁆𑀢𑀓𑀺𑀘𑁆𑀘𑀁 𑀦 𑀓𑀢𑁆𑀢𑀩𑁆𑀩𑀦𑁆𑀢𑀺 𑀤𑀻𑀧𑀺𑀢𑀁 𑀳𑁄𑀢𑀺. 𑀤𑀺𑀝𑁆𑀞𑀸𑀦𑀼𑀕𑀢𑀺𑀦𑁆𑀢𑀺 𑀤𑀺𑀝𑁆𑀞𑀲𑁆𑀲 𑀓𑀫𑁆𑀫𑀲𑁆𑀲 𑀅𑀦𑀼𑀧𑀕𑀫𑀦𑀁 𑀅𑀦𑀼𑀓𑀺𑀭𑀺𑀬𑀁, 𑀤𑀺𑀝𑁆𑀞𑀺𑀬𑀸 𑀯𑀸 𑀮𑀤𑁆𑀥𑀺𑀬𑀸 𑀅𑀦𑀼𑀕𑀫𑀦𑀁 𑀕𑀸𑀳𑀁. 𑀖𑀁𑀲𑀺𑀢𑀩𑁆𑀩𑁂𑀢𑀺 𑀫𑀤𑁆𑀤𑀺𑀢𑀩𑁆𑀩𑁂, 𑀯𑀺𑀦𑀸𑀲𑀺𑀢𑀩𑁆𑀩𑁂𑀢𑀺 𑀅𑀢𑁆𑀣𑁄. 𑀓𑀢𑀁 𑀮𑀪𑀺𑀢𑁆𑀯𑀸 𑀢𑀢𑁆𑀣 𑀯𑀲𑀦𑁆𑀢𑀸𑀦𑀫𑁆𑀧𑀺 𑀤𑀼𑀓𑁆𑀓𑀝𑀫𑁂𑀯𑀸𑀢𑀺 𑀇𑀤𑀁 𑀪𑀕𑀯𑀢𑀸 𑀓𑀼𑀝𑀺𑀬𑀸 𑀪𑁂𑀤𑀸𑀧𑀦𑀯𑀘𑀦𑁂𑀦 𑀲𑀺𑀤𑁆𑀥𑀁, 𑀲𑀸𑀧𑀺 𑀢𑀺𑀡𑀤𑀩𑁆𑀩𑀲𑀫𑁆𑀪𑀸𑀭𑁂𑀳𑀺 𑀢𑀼𑀮𑀸𑀣𑀫𑁆𑀪𑀸𑀤𑀻𑀳𑀺 𑀅𑀫𑀺𑀲𑁆𑀲𑀸 𑀲𑀼𑀤𑁆𑀥𑀫𑀢𑁆𑀢𑀺𑀓𑀸𑀫𑀬𑀸𑀧𑀺 𑀇𑀝𑁆𑀞𑀓𑀸𑀳𑀺 𑀓𑀢𑀸 𑀯𑀝𑁆𑀝𑀢𑀺. 𑀓𑁂𑀘𑀺 𑀳𑀺 𑀇𑀝𑁆𑀞𑀓𑀸𑀳𑀺𑀬𑁂𑀯 𑀣𑀫𑁆𑀪𑁂 𑀘𑀺𑀦𑀺𑀢𑁆𑀯𑀸 𑀢𑀤𑀼𑀧𑀭𑀺 𑀇𑀝𑁆𑀞𑀓𑀸𑀳𑀺𑀬𑁂𑀯 𑀯𑀺𑀢𑀸𑀦𑀸𑀤𑀺𑀲𑀡𑁆𑀞𑀸𑀦𑁂𑀦 𑀢𑀼𑀮𑀸𑀤𑀺𑀤𑀸𑀭𑀼𑀲𑀫𑁆𑀪𑀸𑀭𑀯𑀺𑀭𑀳𑀺𑀢𑀁 𑀙𑀤𑀦𑀫𑁆𑀧𑀺 𑀩𑀦𑁆𑀥𑀺𑀢𑁆𑀯𑀸 𑀇𑀝𑁆𑀞𑀓𑀸𑀫𑀬𑀫𑁂𑀯 𑀆𑀯𑀲𑀣𑀁 𑀓𑀭𑁄𑀦𑁆𑀢𑀺, 𑀢𑀸𑀤𑀺𑀲𑀁 𑀯𑀝𑁆𑀝𑀢𑀺. 𑀕𑀺𑀜𑁆𑀚𑀓𑀸𑀯𑀲𑀣𑀲𑀗𑁆𑀔𑁂𑀧𑁂𑀦 𑀓𑀢𑀸𑀢𑀺 𑀏𑀢𑁆𑀣 𑀕𑀺𑀜𑁆𑀚𑀓𑀸 𑀯𑀼𑀘𑁆𑀘𑀦𑁆𑀢𑀺 𑀇𑀝𑁆𑀞𑀓𑀸, 𑀢𑀸𑀳𑀺𑀬𑁂𑀯 𑀓𑀢𑁄 𑀆𑀯𑀲𑀣𑁄 𑀕𑀺𑀜𑁆𑀚𑀓𑀸𑀯𑀲𑀣𑁄. 𑀯𑀬𑀓𑀫𑁆𑀫𑀫𑁆𑀧𑀻𑀢𑀺 𑀫𑀢𑁆𑀢𑀺𑀓𑀼𑀤𑁆𑀥𑀸𑀭𑀡𑀇𑀝𑁆𑀞𑀓𑀤𑀸𑀭𑀼𑀘𑁆𑀙𑁂𑀤𑀦𑀸𑀤𑀺𑀓𑀸𑀭𑀓𑀸𑀦𑀁 𑀤𑀺𑀦𑁆𑀦𑀪𑀢𑁆𑀢𑀯𑁂𑀢𑁆𑀢𑀦𑀸𑀤𑀺𑀯𑀢𑁆𑀣𑀼𑀩𑁆𑀩𑀬𑁂𑀦 𑀦𑀺𑀧𑁆𑀨𑀦𑁆𑀦𑀓𑀫𑁆𑀫𑀫𑁆𑀧𑀺 𑀅𑀢𑁆𑀣𑀺, 𑀏𑀢𑁂𑀦 𑀓𑀼𑀝𑀺𑀪𑁂𑀤𑀓𑀸𑀦𑀁 𑀕𑀻𑀯𑀸𑀤𑀺𑀪𑀸𑀯𑀁 𑀧𑀭𑀺𑀲𑀗𑁆𑀓𑀢𑀺. 𑀢𑀺𑀢𑁆𑀣𑀺𑀬𑀥𑀚𑁄𑀢𑀺 𑀢𑀺𑀢𑁆𑀣𑀺𑀬𑀸𑀦𑀫𑁂𑀯 𑀲𑀜𑁆𑀜𑀸𑀡𑀪𑀽𑀢𑀢𑁆𑀢𑀸 𑀯𑀼𑀢𑁆𑀢𑀁. 𑀢𑁂 𑀳𑀺 𑀈𑀤𑀺𑀲𑁂𑀲𑀼 𑀘𑀸𑀝𑀺𑀆𑀤𑀻𑀲𑀼 𑀯𑀲𑀦𑁆𑀢𑀺. 𑀅𑀜𑁆𑀜𑀸𑀦𑀺𑀧𑀻𑀢𑀺 𑀧𑀺-𑀲𑀤𑁆𑀤𑁂𑀦 𑀅𑀢𑁆𑀢𑀦𑀸 𑀯𑀼𑀢𑁆𑀢𑀓𑀸𑀭𑀡𑀤𑁆𑀯𑀬𑀫𑁆𑀧𑀺 𑀫𑀳𑀸𑀅𑀝𑁆𑀞𑀓𑀣𑀸𑀬𑀫𑁂𑀯 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀬𑀲𑁆𑀫𑀸 𑀲𑀩𑁆𑀩𑀫𑀢𑁆𑀢𑀺𑀓𑀸𑀫𑀬𑀸 𑀓𑀼𑀝𑀺 𑀲𑀻𑀢𑀓𑀸𑀮𑁂 𑀅𑀢𑀺𑀲𑀻𑀢𑀸 𑀉𑀡𑁆𑀳𑀓𑀸𑀮𑁂 𑀘 𑀉𑀡𑁆𑀳𑀸 𑀲𑀼𑀓𑀭𑀸 𑀘 𑀳𑁄𑀢𑀺 𑀘𑁄𑀭𑁂𑀳𑀺 𑀪𑀺𑀦𑁆𑀤𑀺𑀢𑀼𑀁, 𑀢𑀲𑁆𑀫𑀸 𑀢𑀢𑁆𑀣 𑀞𑀧𑀺𑀢𑀧𑀢𑁆𑀢𑀘𑀻𑀯𑀭𑀸𑀤𑀺𑀓𑀁 𑀲𑀻𑀢𑀼𑀡𑁆𑀳𑀘𑁄𑀭𑀸𑀤𑀻𑀳𑀺 𑀯𑀺𑀦𑀲𑁆𑀲𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀧𑀢𑁆𑀢𑀘𑀻𑀯𑀭𑀕𑀼𑀢𑁆𑀢𑀢𑁆𑀣𑀸𑀬𑀸’’𑀢𑀺. 𑀙𑀺𑀦𑁆𑀤𑀸𑀧𑁂𑀬𑁆𑀬 𑀯𑀸 𑀪𑀺𑀦𑁆𑀤𑀸𑀧𑁂𑀬𑁆𑀬 𑀯𑀸 𑀅𑀦𑀼𑀧𑀯𑀚𑁆𑀚𑁄𑀢𑀺 𑀇𑀤𑀁 𑀅𑀬𑀁 𑀓𑀼𑀝𑀺 𑀯𑀺𑀬 𑀲𑀩𑁆𑀩𑀣𑀸 𑀅𑀦𑀼𑀧𑀬𑁄𑀕𑀸𑀭𑀳𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀬𑀁 𑀧𑀦 𑀧𑀜𑁆𑀘𑀯𑀡𑁆𑀡𑀲𑀼𑀢𑁆𑀢𑁂𑀳𑀺 𑀯𑀺𑀦𑀤𑁆𑀥𑀙𑀢𑁆𑀢𑀸𑀤𑀺𑀓𑀁, 𑀢𑀢𑁆𑀣 𑀅𑀓𑀧𑁆𑀧𑀺𑀬𑀪𑀸𑀕𑁄𑀯 𑀙𑀺𑀦𑁆𑀤𑀺𑀢𑀩𑁆𑀩𑁄, 𑀦 𑀢𑀤𑀯𑀲𑁂𑀲𑁄 𑀢𑀲𑁆𑀲 𑀓𑀧𑁆𑀧𑀺𑀬𑀢𑁆𑀢𑀸, 𑀢𑀁 𑀙𑀺𑀦𑁆𑀤𑀦𑁆𑀢𑁄 𑀉𑀧𑀯𑀚𑁆𑀚𑁄𑀯 𑀳𑁄𑀢𑀺. 𑀢𑁂𑀦𑁂𑀯 𑀯𑀓𑁆𑀔𑀢𑀺 ‘‘𑀖𑀝𑀓𑀫𑁆𑀧𑀺 𑀯𑀸𑀴𑀭𑀽𑀧𑀫𑁆𑀧𑀺 𑀪𑀺𑀦𑁆𑀤𑀺𑀢𑁆𑀯𑀸 𑀥𑀸𑀭𑁂𑀢𑀩𑁆𑀩’’𑀦𑁆𑀢𑀺𑀆𑀤𑀺.

𑀧𑀸𑀴𑀺𑀫𑀼𑀢𑁆𑀢𑀓𑀯𑀺𑀦𑀺𑀘𑁆𑀙𑀬𑀯𑀡𑁆𑀡𑀦𑀸

𑀙𑀢𑁆𑀢𑀤𑀡𑁆𑀟𑀕𑁆𑀕𑀸𑀳𑀓𑀁 𑀲𑀮𑀸𑀓𑀧𑀜𑁆𑀚𑀭𑀦𑁆𑀢𑀺 𑀏𑀢𑁆𑀣 𑀬𑁄 𑀧𑀜𑁆𑀚𑀭𑀲𑀮𑀸𑀓𑀸𑀦𑀁 𑀫𑀚𑁆𑀛𑀝𑁆𑀞𑁄 𑀩𑀼𑀦𑁆𑀤𑁂 𑀧𑀼𑀣𑀼𑀮𑁄 𑀅𑀳𑀺𑀘𑁆𑀙𑀢𑁆𑀢𑀓𑀲𑀤𑀺𑀲𑁄 𑀅𑀕𑁆𑀕𑁂 𑀲𑀙𑀺𑀤𑁆𑀤𑁄 𑀬𑀢𑁆𑀣 𑀤𑀡𑁆𑀟𑀦𑁆𑀢𑀭𑀁 𑀧𑀯𑁂𑀲𑁂𑀢𑁆𑀯𑀸 𑀙𑀢𑁆𑀢𑀁 𑀕𑀡𑁆𑀳𑀦𑁆𑀢𑀺, 𑀬𑁄 𑀯𑀸 𑀲𑀬𑀫𑁂𑀯 𑀤𑀻𑀖𑀢𑀸𑀬 𑀕𑀳𑀡𑀤𑀡𑁆𑀟𑁄 𑀳𑁄𑀢𑀺, 𑀅𑀬𑀁 𑀙𑀢𑁆𑀢𑀤𑀡𑁆𑀟𑁄 𑀦𑀸𑀫, 𑀢𑀲𑁆𑀲 𑀅𑀧𑀭𑀺𑀕𑀴𑀦𑀢𑁆𑀣𑀸𑀬 𑀙𑀢𑁆𑀢𑀲𑀮𑀸𑀓𑀸𑀦𑀁 𑀫𑀽𑀮𑀧𑁆𑀧𑀤𑁂𑀲𑀤𑀡𑁆𑀟𑀲𑁆𑀲 𑀲𑀫𑀦𑁆𑀢𑀢𑁄 𑀤𑀴𑁆𑀳𑀧𑀜𑁆𑀚𑀭𑀁 𑀓𑀢𑁆𑀯𑀸 𑀲𑀼𑀢𑁆𑀢𑁂𑀳𑀺 𑀯𑀺𑀦𑀦𑁆𑀥𑀦𑁆𑀢𑀺, 𑀲𑁄 𑀧𑀤𑁂𑀲𑁄 𑀙𑀢𑁆𑀢𑀤𑀡𑁆𑀟𑀕𑀸𑀳𑀓𑀲𑀮𑀸𑀓𑀧𑀜𑁆𑀚𑀭𑀁 𑀦𑀸𑀫, 𑀢𑀁 𑀯𑀺𑀦𑀦𑁆𑀥𑀺𑀢𑀼𑀁 𑀯𑀝𑁆𑀝𑀢𑀺. 𑀦 𑀯𑀡𑁆𑀡𑀫𑀝𑁆𑀞𑀢𑁆𑀣𑀸𑀬𑀸𑀢𑀺 𑀇𑀫𑀺𑀦𑀸 𑀣𑀺𑀭𑀓𑀭𑀡𑀢𑁆𑀣𑀫𑁂𑀯 𑀏𑀓𑀯𑀡𑁆𑀡𑀲𑀼𑀢𑁆𑀢𑁂𑀦 𑀯𑀺𑀦𑀦𑁆𑀥𑀺𑀬𑀫𑀸𑀦𑀁 𑀬𑀤𑀺 𑀯𑀡𑁆𑀡𑀫𑀝𑁆𑀞𑀁 𑀳𑁄𑀢𑀺, 𑀦 𑀢𑀢𑁆𑀣 𑀤𑁄𑀲𑁄𑀢𑀺 𑀤𑀲𑁆𑀲𑁂𑀢𑀺. 𑀆𑀭𑀕𑁆𑀕𑁂𑀦𑀸𑀢𑀺 𑀦𑀺𑀔𑀸𑀤𑀦𑀫𑀼𑀔𑁂𑀦. 𑀤𑀡𑁆𑀟𑀩𑀼𑀦𑁆𑀤𑁂𑀢𑀺 𑀤𑀡𑁆𑀟𑀫𑀽𑀮𑁂 𑀓𑁄𑀝𑀺𑀬𑀁. 𑀙𑀢𑁆𑀢𑀫𑀡𑁆𑀟𑀮𑀺𑀓𑀦𑁆𑀢𑀺 𑀙𑀢𑁆𑀢𑀧𑀜𑁆𑀚𑀭𑁂 𑀫𑀡𑁆𑀟𑀮𑀸𑀓𑀸𑀭𑁂𑀦 𑀩𑀤𑁆𑀥𑀤𑀡𑁆𑀟𑀯𑀮𑀬𑀁. 𑀉𑀓𑁆𑀓𑀺𑀭𑀺𑀢𑁆𑀯𑀸𑀢𑀺 𑀦𑀺𑀦𑁆𑀦𑀁, 𑀉𑀦𑁆𑀦𑀢𑀁 𑀯𑀸 𑀓𑀢𑁆𑀯𑀸.

𑀦𑀸𑀦𑀸𑀲𑀼𑀢𑁆𑀢𑀓𑁂𑀳𑀻𑀢𑀺 𑀦𑀸𑀦𑀸𑀯𑀡𑁆𑀡𑁂𑀳𑀺 𑀲𑀼𑀢𑁆𑀢𑁂𑀳𑀺. 𑀇𑀤𑀜𑁆𑀘 𑀢𑀣𑀸 𑀓𑀭𑁄𑀦𑁆𑀢𑀸𑀦𑀁 𑀯𑀲𑁂𑀦 𑀯𑀼𑀢𑁆𑀢𑀁, 𑀏𑀓𑀯𑀡𑁆𑀡𑀲𑀼𑀢𑁆𑀢𑀓𑁂𑀦𑀸𑀧𑀺 𑀦 𑀯𑀝𑁆𑀝𑀢𑀺𑀬𑁂𑀯, ‘‘𑀧𑀓𑀢𑀺𑀲𑀽𑀘𑀺𑀓𑀫𑁆𑀫𑀫𑁂𑀯 𑀯𑀝𑁆𑀝𑀢𑀻’’𑀢𑀺 𑀳𑀺 𑀯𑀼𑀢𑁆𑀢𑀁. 𑀧𑀝𑁆𑀝𑀫𑀼𑀔𑁂𑀢𑀺 𑀤𑁆𑀯𑀺𑀦𑁆𑀦𑀁 𑀧𑀝𑁆𑀝𑀸𑀦𑀁 𑀲𑀗𑁆𑀖𑀝𑀺𑀢𑀝𑁆𑀞𑀸𑀦𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀧𑀭𑀺𑀬𑀦𑁆𑀢𑁂𑀢𑀺 𑀘𑀻𑀯𑀭𑀧𑀭𑀺𑀬𑀦𑁆𑀢𑁂, 𑀅𑀦𑀼𑀯𑀸𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀯𑁂𑀡𑀺𑀦𑁆𑀢𑀺 𑀯𑀭𑀓𑀲𑀻𑀲𑀸𑀓𑀸𑀭𑁂𑀦 𑀲𑀺𑀩𑁆𑀩𑀦𑀁. 𑀲𑀗𑁆𑀔𑀮𑀺𑀓𑀦𑁆𑀢𑀺 𑀤𑀺𑀕𑀼𑀡𑀲𑀗𑁆𑀔𑀮𑀺𑀓𑀸𑀓𑀸𑀭𑁂𑀦 𑀲𑀺𑀩𑁆𑀩𑀦𑀁, 𑀯𑁂𑀡𑀺𑀁 𑀯𑀸 𑀲𑀗𑁆𑀔𑀮𑀺𑀓𑀁 𑀯𑀸 𑀓𑀭𑁄𑀦𑁆𑀢𑀻𑀢𑀺 𑀧𑀓𑀢𑁂𑀦 𑀲𑀫𑁆𑀩𑀦𑁆𑀥𑁄. 𑀅𑀕𑁆𑀖𑀺𑀬𑀁 𑀦𑀸𑀫 𑀘𑁂𑀢𑀺𑀬𑀲𑀡𑁆𑀞𑀸𑀦𑀁, 𑀬𑀁 𑀅𑀕𑁆𑀖𑀺𑀬𑀢𑁆𑀣𑀫𑁆𑀪𑁄𑀢𑀺 𑀯𑀤𑀦𑁆𑀢𑀺. 𑀉𑀓𑁆𑀓𑀺𑀭𑀦𑁆𑀢𑀻𑀢𑀺 𑀉𑀝𑁆𑀞𑀧𑁂𑀦𑁆𑀢𑀺. 𑀘𑀢𑀼𑀓𑁄𑀡𑀫𑁂𑀯 𑀯𑀝𑁆𑀝𑀢𑀻𑀢𑀺 𑀕𑀡𑁆𑀞𑀺𑀓𑀧𑀸𑀲𑀓𑀧𑀝𑁆𑀝𑀸𑀦𑀺 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀓𑁄𑀡𑀲𑀼𑀢𑁆𑀢𑀧𑀺𑀴𑀓𑀸𑀢𑀺 𑀕𑀡𑁆𑀞𑀺𑀓𑀧𑀸𑀲𑀓𑀧𑀝𑁆𑀝𑀸𑀦𑀁 𑀓𑁄𑀡𑁂𑀳𑀺 𑀩𑀳𑀺 𑀦𑀺𑀕𑁆𑀕𑀢𑀲𑀼𑀢𑁆𑀢𑀸𑀦𑀁 𑀧𑀺𑀴𑀓𑀸𑀓𑀸𑀭𑁂𑀦 𑀞𑀧𑀺𑀢𑀓𑁄𑀝𑀺𑀬𑁄𑀢𑀺 𑀓𑁂𑀘𑀺 𑀯𑀤𑀦𑁆𑀢𑀺, 𑀢𑁂 𑀧𑀺𑀴𑀓𑁂 𑀙𑀺𑀦𑁆𑀤𑀺𑀢𑁆𑀯𑀸 𑀤𑀼𑀯𑀺𑀜𑁆𑀜𑁂𑀬𑁆𑀬𑀸 𑀓𑀸𑀢𑀩𑁆𑀩𑀸𑀢𑀺 𑀢𑁂𑀲𑀁 𑀅𑀥𑀺𑀧𑁆𑀧𑀸𑀬𑁄. 𑀓𑁂𑀘𑀺 𑀧𑀦 ‘‘𑀓𑁄𑀡𑀲𑀼𑀢𑁆𑀢𑀸 𑀘 𑀧𑀺𑀴𑀓𑀸𑀢𑀺 𑀤𑁆𑀯𑁂𑀬𑁂𑀯𑀸’’𑀢𑀺 𑀯𑀤𑀦𑁆𑀢𑀺, 𑀢𑁂𑀲𑀁 𑀫𑀢𑁂𑀦 𑀕𑀡𑁆𑀞𑀺𑀓𑀧𑀸𑀲𑀓𑀧𑀝𑁆𑀝𑀸𑀦𑀁 𑀓𑁄𑀡𑀢𑁄 𑀓𑁄𑀡𑁂𑀳𑀺 𑀦𑀻𑀳𑀢𑀲𑀼𑀢𑁆𑀢𑀸 𑀓𑁄𑀡𑀲𑀼𑀢𑁆𑀢𑀸 𑀦𑀸𑀫. 𑀲𑀫𑀦𑁆𑀢𑀢𑁄 𑀧𑀦 𑀧𑀭𑀺𑀬𑀦𑁆𑀢𑁂𑀦 𑀓𑀢𑀸 𑀘𑀢𑀼𑀭𑀲𑁆𑀲𑀲𑀼𑀢𑁆𑀢𑀸 𑀧𑀺𑀴𑀓𑀸 𑀦𑀸𑀫. 𑀢𑀁 𑀤𑀼𑀯𑀺𑀥𑀫𑁆𑀧𑀺 𑀓𑁂𑀘𑀺 𑀘𑀻𑀯𑀭𑀢𑁄 𑀯𑀺𑀲𑀼𑀁 𑀧𑀜𑁆𑀜𑀸𑀬𑀦𑀢𑁆𑀣𑀸𑀬 𑀯𑀺𑀓𑀸𑀭𑀬𑀼𑀢𑁆𑀢𑀁 𑀓𑀭𑁄𑀦𑁆𑀢𑀺, 𑀢𑀁 𑀦𑀺𑀲𑁂𑀥𑀸𑀬 ‘‘𑀤𑀼𑀯𑀺𑀜𑁆𑀜𑁂𑀬𑁆𑀬𑀭𑀽𑀧𑀸 𑀯𑀝𑁆𑀝𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁, 𑀦 𑀧𑀦 𑀲𑀩𑁆𑀩𑀣𑀸 𑀅𑀘𑀓𑁆𑀔𑀼𑀕𑁄𑀘𑀭𑀪𑀸𑀯𑁂𑀦 𑀲𑀺𑀩𑁆𑀩𑀦𑀢𑁆𑀣𑀸𑀬 𑀢𑀣𑀸𑀲𑀺𑀩𑁆𑀩𑀦𑀲𑁆𑀲 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸. 𑀬𑀣𑀸 𑀧𑀓𑀢𑀺𑀘𑀻𑀯𑀭𑀢𑁄 𑀯𑀺𑀓𑀸𑀭𑁄 𑀦 𑀧𑀜𑁆𑀜𑀸𑀬𑀢𑀺, 𑀏𑀯𑀁 𑀲𑀺𑀩𑁆𑀩𑀺𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀭𑀚𑀦𑀓𑀫𑁆𑀫𑀢𑁄 𑀧𑀼𑀩𑁆𑀩𑁂 𑀧𑀜𑁆𑀜𑀸𑀬𑀫𑀸𑀦𑁄𑀧𑀺 𑀯𑀺𑀲𑁂𑀲𑁄 𑀘𑀻𑀯𑀭𑁂 𑀭𑀢𑁆𑀢𑁂 𑀏𑀓𑀯𑀡𑁆𑀡𑀢𑀸𑀬 𑀦 𑀧𑀜𑁆𑀜𑀸𑀬𑀢𑀻𑀢𑀺 𑀆𑀳 ‘‘𑀘𑀻𑀯𑀭𑁂 𑀭𑀢𑁆𑀢𑁂’’𑀢𑀺. 𑀫𑀡𑀺𑀦𑀸𑀢𑀺 𑀦𑀻𑀮𑀫𑀡𑀺𑀆𑀤𑀺𑀫𑀝𑁆𑀞𑀧𑀸𑀲𑀸𑀡𑁂𑀦, 𑀅𑀁𑀲𑀯𑀤𑁆𑀥𑀓𑀓𑀸𑀬𑀩𑀦𑁆𑀥𑀦𑀸𑀤𑀺𑀓𑀁 𑀧𑀦 𑀅𑀘𑀻𑀯𑀭𑀢𑁆𑀢𑀸 𑀲𑀗𑁆𑀔𑀸𑀤𑀻𑀳𑀺 𑀖𑀁𑀲𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀯𑀤𑀦𑁆𑀢𑀺. 𑀓𑀡𑁆𑀡𑀲𑀼𑀢𑁆𑀢𑀓𑀦𑁆𑀢𑀺 𑀘𑀻𑀯𑀭𑀲𑁆𑀲 𑀤𑀻𑀖𑀢𑁄 𑀢𑀺𑀭𑀺𑀬𑀜𑁆𑀘 𑀲𑀺𑀩𑁆𑀩𑀺𑀢𑀸𑀦𑀁 𑀘𑀢𑀽𑀲𑀼 𑀓𑀡𑁆𑀡𑁂𑀲𑀼 𑀓𑁄𑀡𑁂𑀲𑀼 𑀘 𑀦𑀺𑀓𑁆𑀔𑀦𑁆𑀢𑀸𑀦𑀁 𑀲𑀼𑀢𑁆𑀢𑀲𑀻𑀲𑀸𑀦𑀫𑁂𑀢𑀁 𑀦𑀸𑀫𑀁, 𑀢𑀁 𑀙𑀺𑀦𑁆𑀤𑀺𑀢𑁆𑀯𑀸𑀯 𑀧𑀸𑀭𑀼𑀧𑀺𑀢𑀩𑁆𑀩𑀁, 𑀢𑁂𑀦𑀸𑀳 ‘‘𑀭𑀚𑀺𑀢𑀓𑀸𑀮𑁂 𑀙𑀺𑀦𑁆𑀤𑀺𑀢𑀩𑁆𑀩’’𑀦𑁆𑀢𑀺. 𑀪𑀕𑀯𑀢𑀸 𑀅𑀦𑀼𑀜𑁆𑀜𑀸𑀢𑀁 𑀏𑀓𑀁 𑀓𑀡𑁆𑀡𑀲𑀼𑀢𑁆𑀢𑀫𑁆𑀧𑀺 𑀅𑀢𑁆𑀣𑀺, 𑀢𑀁 𑀧𑀦 𑀦𑀸𑀫𑁂𑀦 𑀲𑀤𑀺𑀲𑀫𑁆𑀧𑀺 𑀇𑀢𑁄 𑀅𑀜𑁆𑀜𑀫𑁂𑀯𑀸𑀢𑀺 𑀤𑀲𑁆𑀲𑁂𑀢𑀼𑀁 𑀬𑀁 𑀧𑀦𑀸𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀮𑀕𑁆𑀕𑀦𑀢𑁆𑀣𑀸𑀬𑀸𑀢𑀺 𑀘𑀻𑀯𑀭𑀭𑀚𑁆𑀚𑀼𑀬𑀁 𑀘𑀻𑀯𑀭𑀩𑀦𑁆𑀥𑀦𑀢𑁆𑀣𑀸𑀬. 𑀕𑀡𑁆𑀞𑀺𑀓𑁂𑀢𑀺 𑀤𑀦𑁆𑀢𑀸𑀤𑀺𑀫𑀬𑁂. 𑀧𑀻𑀴𑀓𑀸𑀢𑀺 𑀩𑀺𑀦𑁆𑀤𑀼𑀁 𑀩𑀺𑀦𑁆𑀤𑀼𑀁 𑀓𑀢𑁆𑀯𑀸 𑀉𑀝𑁆𑀞𑀸𑀧𑁂𑀢𑀩𑁆𑀩𑀧𑀻𑀴𑀓𑀸.

𑀣𑀸𑀮𑀓𑁂 𑀯𑀸𑀢𑀺 𑀢𑀫𑁆𑀩𑀸𑀤𑀺𑀫𑀬𑁂 𑀧𑀼𑀕𑁆𑀕𑀮𑀺𑀓𑁂 𑀢𑀺𑀯𑀺𑀥𑁂𑀧𑀺 𑀓𑀧𑁆𑀧𑀺𑀬𑀣𑀸𑀮𑀓𑁂. 𑀦 𑀯𑀝𑁆𑀝𑀢𑀻𑀢𑀺 𑀫𑀡𑀺𑀯𑀡𑁆𑀡𑀓𑀭𑀡𑀧𑁆𑀧𑀬𑁄𑀕𑁄 𑀦 𑀯𑀝𑁆𑀝𑀢𑀺, 𑀢𑁂𑀮𑀯𑀡𑁆𑀡𑀓𑀭𑀡𑀢𑁆𑀣𑀁 𑀧𑀦 𑀯𑀝𑁆𑀝𑀢𑀺. 𑀧𑀢𑁆𑀢𑀫𑀡𑁆𑀟𑀮𑁂𑀢𑀺 𑀢𑀺𑀧𑀼𑀲𑀻𑀲𑀸𑀤𑀺𑀫𑀬𑁂. ‘‘𑀦, 𑀪𑀺𑀓𑁆𑀔𑀯𑁂, 𑀘𑀺𑀢𑁆𑀢𑀸𑀦𑀺 𑀧𑀢𑁆𑀢𑀫𑀡𑁆𑀟𑀮𑀸𑀦𑀺 𑀥𑀸𑀭𑁂𑀢𑀩𑁆𑀩𑀸𑀦𑀺 𑀭𑀽𑀧𑀓𑀸𑀓𑀺𑀡𑁆𑀡𑀸𑀦𑀺 𑀪𑀺𑀢𑁆𑀢𑀺𑀓𑀫𑁆𑀫𑀓𑀢𑀸𑀦𑀻’’𑀢𑀺 (𑀘𑀽𑀴𑀯. 𑁨𑁫𑁩) 𑀯𑀼𑀢𑁆𑀢𑀢𑁆𑀢𑀸 ‘‘𑀪𑀺𑀢𑁆𑀢𑀺𑀓𑀫𑁆𑀫𑀁 𑀦 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀫𑀓𑀭𑀤𑀦𑁆𑀢𑀓𑀁 𑀙𑀺𑀦𑁆𑀤𑀺𑀢𑀼’’𑀦𑁆𑀢𑀺 (𑀘𑀽𑀴𑀯. 𑁨𑁫𑁩) 𑀯𑀼𑀢𑁆𑀢𑀢𑁆𑀢𑀸 ‘‘𑀫𑀓𑀭𑀤𑀦𑁆𑀢𑀓𑀁 𑀧𑀦 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀁, 𑀇𑀤𑀁 𑀧𑀦 𑀧𑀸𑀴𑀺𑀬𑀸 𑀮𑀤𑁆𑀥𑀫𑁆𑀧𑀺 𑀇𑀥 𑀧𑀸𑀴𑀺𑀬𑀸 𑀫𑀼𑀢𑁆𑀢𑀢𑁆𑀢𑀸 𑀧𑀸𑀴𑀺𑀫𑀼𑀢𑁆𑀢𑀓𑀦𑀬𑁂 𑀯𑀼𑀢𑁆𑀢𑀁. 𑀏𑀯𑀫𑀜𑁆𑀜𑀫𑁆𑀧𑀺 𑀈𑀤𑀺𑀲𑀁.

𑀮𑁂𑀔𑀸 𑀦 𑀯𑀝𑁆𑀝𑀢𑀻𑀢𑀺 𑀆𑀭𑀕𑁆𑀕𑁂𑀦 𑀤𑀺𑀦𑁆𑀦𑀮𑁂𑀔𑀸𑀯 𑀦 𑀯𑀝𑁆𑀝𑀢𑀺, 𑀚𑀸𑀢𑀺𑀳𑀺𑀗𑁆𑀕𑀼𑀮𑀺𑀓𑀸𑀤𑀺𑀯𑀡𑁆𑀡𑁂𑀳𑀺 𑀓𑀢𑀮𑁂𑀔𑀸 𑀯𑀝𑁆𑀝𑀢𑀺. 𑀙𑀢𑁆𑀢𑀫𑀼𑀔𑀯𑀝𑁆𑀝𑀺𑀬𑀦𑁆𑀢𑀺 𑀥𑀫𑀓𑀭𑀡𑀲𑁆𑀲 𑀳𑀢𑁆𑀣𑁂𑀦 𑀕𑀳𑀡𑀙𑀢𑁆𑀢𑀸𑀓𑀸𑀭𑀲𑁆𑀲 𑀫𑀼𑀔𑀯𑀝𑁆𑀝𑀺𑀬𑀁, ‘‘𑀧𑀭𑀺𑀲𑁆𑀲𑀸𑀯𑀦𑀘𑁄𑀴𑀩𑀦𑁆𑀥𑀦𑀝𑁆𑀞𑀸𑀦𑁂’’𑀢𑀺 𑀓𑁂𑀘𑀺.

𑀤𑁂𑀟𑁆𑀟𑀼𑀪𑀲𑀻𑀲𑀦𑁆𑀢𑀺 𑀉𑀤𑀓𑀲𑀧𑁆𑀧𑀲𑀻𑀲𑀁. 𑀅𑀘𑁆𑀙𑀻𑀦𑀻𑀢𑀺 𑀓𑀼𑀜𑁆𑀚𑀭𑀘𑁆𑀙𑀺𑀲𑀡𑁆𑀞𑀸𑀦𑀸𑀦𑀺. 𑀏𑀓𑀫𑁂𑀯 𑀯𑀝𑁆𑀝𑀢𑀻𑀢𑀺 𑀏𑀢𑁆𑀣 𑀏𑀓𑀭𑀚𑁆𑀚𑀼𑀓𑀁 𑀤𑀺𑀕𑀼𑀡𑀁 𑀢𑀺𑀕𑀼𑀡𑀁 𑀓𑀢𑁆𑀯𑀸𑀧𑀺 𑀩𑀦𑁆𑀥𑀺𑀢𑀼𑀁 𑀦 𑀯𑀝𑁆𑀝𑀢𑀺, 𑀏𑀓𑀫𑁂𑀯 𑀧𑀦 𑀲𑀢𑀯𑀸𑀭𑀫𑁆𑀧𑀺 𑀲𑀭𑀻𑀭𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀩𑀦𑁆𑀥𑀺𑀢𑀼𑀁 𑀯𑀝𑁆𑀝𑀢𑀺, 𑀩𑀳𑀼𑀭𑀚𑁆𑀚𑀼𑀓𑁂 𑀏𑀓𑀢𑁄 𑀓𑀢𑁆𑀯𑀸 𑀏𑀓𑁂𑀦 𑀦𑀺𑀭𑀦𑁆𑀢𑀭𑀁 𑀯𑁂𑀞𑁂𑀢𑁆𑀯𑀸 𑀓𑀢𑀁 ‘‘𑀩𑀳𑀼𑀭𑀚𑁆𑀚𑀼𑀓’’𑀦𑁆𑀢𑀺 𑀦 𑀯𑀢𑁆𑀢𑀩𑁆𑀩𑀁 ‘‘𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸, 𑀢𑀁 𑀫𑀼𑀭𑀚𑀲𑀗𑁆𑀔𑀁 𑀦 𑀕𑀘𑁆𑀙𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀫𑀼𑀭𑀚𑀜𑁆𑀳𑀺 𑀦𑀸𑀦𑀸𑀯𑀡𑁆𑀡𑁂𑀳𑀺 𑀲𑀼𑀢𑁆𑀢𑁂𑀳𑀺 𑀫𑀼𑀭𑀚𑀯𑀝𑁆𑀝𑀺𑀲𑀡𑁆𑀞𑀸𑀦𑀁 𑀯𑁂𑀞𑁂𑀢𑁆𑀯𑀸 𑀓𑀢𑀁, 𑀇𑀤𑀁 𑀧𑀦 𑀫𑀼𑀭𑀚𑀁 𑀫𑀤𑁆𑀤𑀯𑀻𑀡𑀲𑀗𑁆𑀔𑀸𑀢𑀁 𑀧𑀸𑀫𑀗𑁆𑀕𑀲𑀡𑁆𑀞𑀸𑀦𑀜𑁆𑀘 𑀤𑀲𑀸𑀲𑀼 𑀯𑀝𑁆𑀝𑀢𑀺 ‘‘𑀓𑀸𑀬𑀩𑀦𑁆𑀥𑀦𑀲𑁆𑀲 𑀤𑀲𑀸 𑀚𑀻𑀭𑀦𑁆𑀢𑀺; 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀫𑀼𑀭𑀚𑀁 𑀫𑀤𑁆𑀤𑀯𑀻𑀡’’𑀦𑁆𑀢𑀺 (𑀘𑀽𑀴𑀯. 𑁨𑁭𑁮) 𑀯𑀼𑀢𑁆𑀢𑀢𑁆𑀢𑀸.

𑀯𑀺𑀥𑁂𑀢𑀺 𑀤𑀲𑀸𑀧𑀭𑀺𑀬𑁄𑀲𑀸𑀦𑁂 𑀣𑀺𑀭𑀪𑀸𑀯𑀸𑀬 𑀤𑀦𑁆𑀢𑀯𑀺𑀲𑀸𑀡𑀲𑀼𑀢𑁆𑀢𑀸𑀤𑀻𑀳𑀺 𑀓𑀢𑁆𑀢𑀩𑁆𑀩𑁂 𑀯𑀺𑀥𑁂. 𑀅𑀝𑁆𑀞 𑀫𑀗𑁆𑀕𑀮𑀸𑀦𑀺 𑀦𑀸𑀫 𑀲𑀗𑁆𑀔𑁄 𑀘𑀓𑁆𑀓𑀁 𑀧𑀼𑀡𑁆𑀡𑀓𑀼𑀫𑁆𑀪𑁄 𑀕𑀬𑀸 𑀲𑀺𑀭𑀻𑀯𑀘𑁆𑀙𑁄 𑀅𑀗𑁆𑀓𑀼𑀲𑁄 𑀥𑀚𑀁 𑀲𑁄𑀯𑀢𑁆𑀢𑀺𑀓𑀦𑁆𑀢𑀺 𑀯𑀤𑀦𑁆𑀢𑀺. 𑀫𑀘𑁆𑀙𑀬𑀼𑀕𑀴𑀙𑀢𑁆𑀢𑀦𑀦𑁆𑀤𑀺𑀬𑀸𑀯𑀝𑁆𑀝𑀸𑀤𑀺𑀯𑀲𑁂𑀦𑀧𑀺 𑀯𑀤𑀦𑁆𑀢𑀺. 𑀧𑀭𑀺𑀘𑁆𑀙𑁂𑀤𑀮𑁂𑀔𑀸𑀫𑀢𑁆𑀢𑀦𑁆𑀢𑀺 𑀤𑀦𑁆𑀢𑀸𑀤𑀻𑀳𑀺 𑀓𑀢𑀯𑀺𑀥𑀲𑁆𑀲 𑀉𑀪𑁄𑀲𑀼 𑀓𑁄𑀝𑀻𑀲𑀼 𑀓𑀢𑀧𑀭𑀺𑀘𑁆𑀙𑁂𑀤𑀭𑀸𑀚𑀺𑀫𑀢𑁆𑀢𑀁.

‘‘𑀉𑀚𑀼𑀓𑀫𑁂𑀯𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀘𑀢𑀼𑀭𑀲𑁆𑀲𑀸𑀤𑀺𑀲𑀡𑁆𑀞𑀸𑀦𑀸𑀧𑀺 𑀅𑀜𑁆𑀚𑀦𑀻 𑀯𑀗𑁆𑀓𑀕𑀢𑀺𑀓𑀸 𑀦 𑀯𑀝𑁆𑀝𑀢𑀺. 𑀲𑀺𑀧𑀸𑀝𑀺𑀓𑀸𑀬𑀸𑀢𑀺 𑀯𑀸𑀲𑀺𑀆𑀤𑀺𑀪𑀡𑁆𑀟𑀦𑀺𑀓𑁆𑀔𑀺𑀧𑀦𑀧𑀲𑀺𑀩𑁆𑀩𑀓𑁂. 𑀆𑀭𑀓𑀡𑁆𑀝𑀓𑀁 𑀦𑀸𑀫 𑀧𑁄𑀢𑁆𑀣𑀓𑀸𑀤𑀺𑀅𑀅𑀲𑀗𑁆𑀔𑀸𑀭𑀡𑀢𑁆𑀣𑀁 𑀓𑀢𑀤𑀻𑀖𑀫𑀼𑀔𑀲𑀢𑁆𑀣𑀓𑀦𑁆𑀢𑀺 𑀯𑀤𑀦𑁆𑀢𑀺. ‘‘𑀪𑀫𑀓𑀸𑀭𑀸𑀦𑀁 𑀤𑀸𑀭𑀼𑀆𑀤𑀺𑀮𑀺𑀔𑀦𑀲𑀢𑁆𑀣𑀓’’𑀦𑁆𑀢𑀺 𑀓𑁂𑀘𑀺. 𑀯𑀝𑁆𑀝𑀫𑀡𑀺𑀓𑀦𑁆𑀢𑀺 𑀯𑀝𑁆𑀝𑀁 𑀓𑀢𑁆𑀯𑀸 𑀉𑀝𑁆𑀞𑀧𑁂𑀢𑀩𑁆𑀩𑀁 𑀧𑀼𑀧𑁆𑀨𑀼𑀴𑀓𑀁. 𑀅𑀜𑁆𑀜𑀦𑁆𑀢𑀺 𑀇𑀫𑀺𑀦𑀸 𑀧𑀺𑀴𑀓𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀧𑀺𑀧𑁆𑀨𑀮𑀺𑀓𑁂𑀢𑀺 𑀬𑀁 𑀓𑀺𑀜𑁆𑀘𑀺 𑀙𑁂𑀤𑀦𑀓𑁂 𑀔𑀼𑀤𑁆𑀤𑀓𑀲𑀢𑁆𑀣𑁂. 𑀯𑀮𑀺𑀢𑀓𑀦𑁆𑀢𑀺 𑀦𑀔𑀘𑁆𑀙𑁂𑀤𑀦𑀓𑀸𑀮𑁂 𑀤𑀴𑁆𑀳𑀕𑁆𑀕𑀳𑀡𑀢𑁆𑀣𑀁 𑀯𑀮𑀻𑀳𑀺 𑀬𑀼𑀢𑁆𑀢𑀫𑁂𑀯 𑀓𑀭𑁄𑀦𑁆𑀢𑀺. 𑀢𑀲𑁆𑀫𑀸 𑀢𑀁 𑀯𑀝𑁆𑀝𑀢𑀻𑀢𑀺 𑀇𑀫𑀺𑀦𑀸 𑀬𑀁 𑀅𑀜𑁆𑀜𑀫𑁆𑀧𑀺 𑀯𑀺𑀓𑀸𑀭𑀁 𑀤𑀴𑁆𑀳𑀻𑀓𑀫𑁆𑀫𑀸𑀤𑀺𑀅𑀢𑁆𑀣𑀸𑀬 𑀓𑀭𑁄𑀦𑁆𑀢𑀺, 𑀦 𑀯𑀡𑁆𑀡𑀫𑀝𑁆𑀞𑀢𑁆𑀣𑀸𑀬, 𑀢𑀁 𑀯𑀝𑁆𑀝𑀢𑀻𑀢𑀺 𑀤𑀻𑀧𑀺𑀢𑀁, 𑀢𑁂𑀦 𑀘 𑀓𑀢𑁆𑀢𑀭𑀤𑀡𑁆𑀟𑀓𑁄𑀝𑀺𑀬𑀁 𑀅𑀜𑁆𑀜𑀫𑀜𑁆𑀜𑀫𑁆𑀧𑀺 𑀖𑀝𑁆𑀝𑀦𑁂𑀦 𑀲𑀤𑁆𑀤𑀦𑀺𑀘𑁆𑀙𑀭𑀡𑀢𑁆𑀣𑀸𑀬 𑀓𑀢𑀁 𑀅𑀬𑁄𑀯𑀮𑀬𑀸𑀤𑀺𑀓𑀁 𑀲𑀁𑀬𑀼𑀢𑁆𑀢𑀫𑁆𑀧𑀺 𑀓𑀧𑁆𑀧𑀺𑀬𑀢𑁄 𑀉𑀧𑀧𑀦𑁆𑀦𑀁 𑀳𑁄𑀢𑀺. 𑀫𑀡𑁆𑀟𑀮𑀦𑁆𑀢𑀺 𑀉𑀢𑁆𑀢𑀭𑀸𑀭𑀡𑀺𑀬𑀸 𑀧𑀯𑁂𑀲𑀦𑀢𑁆𑀣𑀁 𑀆𑀯𑀸𑀝𑀫𑀡𑁆𑀟𑀮𑀁 𑀳𑁄𑀢𑀺. 𑀉𑀚𑀼𑀓𑀫𑁂𑀯 𑀩𑀦𑁆𑀥𑀺𑀢𑀼𑀦𑁆𑀢𑀺 𑀲𑀫𑁆𑀩𑀦𑁆𑀥𑁄, 𑀉𑀪𑁄𑀲𑀼 𑀯𑀸 𑀧𑀲𑁆𑀲𑁂𑀲𑀼 𑀏𑀓𑀧𑀲𑁆𑀲𑁂 𑀯𑀸𑀢𑀺 𑀯𑀘𑀦𑀲𑁂𑀲𑁄. 𑀯𑀸𑀲𑀺𑀤𑀡𑁆𑀟𑀲𑁆𑀲 𑀉𑀪𑁄𑀲𑀼 𑀧𑀲𑁆𑀲𑁂𑀲𑀼 𑀤𑀡𑁆𑀟𑀓𑁄𑀝𑀻𑀦𑀁 𑀅𑀘𑀮𑀦𑀢𑁆𑀣𑀁 𑀩𑀦𑁆𑀥𑀺𑀢𑀼𑀦𑁆𑀢𑀺 𑀅𑀢𑁆𑀣𑁄.

𑀆𑀫𑀡𑁆𑀟𑀲𑀸𑀭𑀓𑁂𑀢𑀺 𑀆𑀫𑀮𑀓𑀨𑀮𑀸𑀦𑀺 𑀧𑀺𑀲𑀺𑀢𑁆𑀯𑀸 𑀢𑁂𑀦 𑀓𑀓𑁆𑀓𑁂𑀦 𑀓𑀢𑀢𑁂𑀮𑀪𑀸𑀚𑀦𑁂. 𑀢𑀢𑁆𑀣 𑀓𑀺𑀭 𑀧𑀓𑁆𑀔𑀺𑀢𑁆𑀢𑀁 𑀢𑁂𑀮𑀁 𑀲𑀻𑀢𑀮𑀁 𑀳𑁄𑀢𑀺. 𑀪𑀽𑀫𑀢𑁆𑀣𑀭𑀡𑁂𑀢𑀺 𑀓𑀝𑀲𑀸𑀭𑀸𑀤𑀺𑀫𑀬𑁂 𑀧𑀭𑀺𑀓𑀫𑁆𑀫𑀓𑀢𑀸𑀬 𑀪𑀽𑀫𑀺𑀬𑀸 𑀅𑀢𑁆𑀣𑀭𑀺𑀢𑀩𑁆𑀩𑀅𑀢𑁆𑀣𑀭𑀡𑁂. 𑀧𑀸𑀦𑀻𑀬𑀖𑀝𑁂𑀢𑀺 𑀲𑀩𑁆𑀩𑀁 𑀪𑀸𑀚𑀦𑀯𑀺𑀓𑀢𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀲𑀩𑁆𑀩𑀁…𑀧𑁂… 𑀯𑀝𑁆𑀝𑀢𑀻𑀢𑀺 𑀬𑀣𑀸𑀯𑀼𑀢𑁆𑀢𑁂𑀲𑀼 𑀫𑀜𑁆𑀘𑀸𑀤𑀻𑀲𑀼 𑀇𑀢𑁆𑀣𑀺𑀧𑀼𑀭𑀺𑀲𑀭𑀽𑀧𑀫𑁆𑀧𑀺 𑀯𑀝𑁆𑀝𑀢𑀺 𑀢𑁂𑀮𑀪𑀸𑀚𑀦𑁂𑀲𑀼𑀬𑁂𑀯 𑀇𑀢𑁆𑀣𑀺𑀧𑀼𑀭𑀺𑀲𑀭𑀽𑀧𑀸𑀦𑀁 𑀧𑀝𑀺𑀓𑁆𑀔𑀺𑀢𑁆𑀢𑀢𑁆𑀢𑀸, 𑀢𑁂𑀮𑀪𑀸𑀚𑀦𑁂𑀦 𑀲𑀳 𑀅𑀕𑀡𑁂𑀢𑁆𑀯𑀸 𑀯𑀺𑀲𑀼𑀁 𑀫𑀜𑁆𑀘𑀸𑀤𑀻𑀦𑀁 𑀕𑀳𑀺𑀢𑀢𑁆𑀢𑀸 𑀘𑀸𑀢𑀺 𑀯𑀤𑀦𑁆𑀢𑀺, 𑀓𑀺𑀜𑁆𑀘𑀸𑀧𑀺 𑀯𑀤𑀦𑁆𑀢𑀺, 𑀏𑀢𑁂𑀲𑀁 𑀧𑀦 𑀫𑀜𑁆𑀘𑀸𑀤𑀻𑀦𑀁 𑀳𑀢𑁆𑀣𑁂𑀦 𑀆𑀫𑀲𑀺𑀢𑀩𑁆𑀩𑀪𑀡𑁆𑀟𑀢𑁆𑀢𑀸 𑀇𑀢𑁆𑀣𑀺𑀭𑀽𑀧𑀫𑁂𑀯𑁂𑀢𑁆𑀣 𑀦 𑀯𑀝𑁆𑀝𑀢𑀻𑀢𑀺 𑀕𑀳𑁂𑀢𑀩𑁆𑀩𑀁. 𑀅𑀜𑁆𑀜𑁂𑀲𑀦𑁆𑀢𑀺 𑀲𑀻𑀫𑀲𑀸𑀫𑀺𑀓𑀸𑀦𑀁. 𑀭𑀸𑀚𑀯𑀮𑁆𑀮𑀪𑁂𑀳𑀻𑀢𑀺 𑀮𑀚𑁆𑀚𑀻𑀧𑁂𑀲𑀮𑀸𑀤𑀻𑀦𑀁 𑀉𑀧𑁄𑀲𑀣𑀸𑀤𑀺𑀅𑀦𑁆𑀢𑀭𑀸𑀬𑀓𑀭𑀸 𑀅𑀮𑀚𑁆𑀚𑀺𑀦𑁄 𑀪𑀺𑀦𑁆𑀦𑀮𑀤𑁆𑀥𑀺𑀓𑀸 𑀘 𑀪𑀺𑀓𑁆𑀔𑀽 𑀅𑀥𑀺𑀧𑁆𑀧𑁂𑀢𑀸 𑀢𑁂𑀳𑀺 𑀲𑀳 𑀉𑀧𑁄𑀲𑀣𑀸𑀤𑀺𑀓𑀭𑀡𑀸𑀬𑁄𑀕𑀸, 𑀢𑁂𑀦𑁂𑀯 ‘‘𑀲𑀻𑀫𑀸𑀬𑀸’’𑀢𑀺 𑀯𑀼𑀢𑁆𑀢𑀁. 𑀢𑁂𑀲𑀁 𑀮𑀚𑁆𑀚𑀻𑀧𑀭𑀺𑀲𑀸𑀢𑀺 𑀢𑁂𑀲𑀁 𑀲𑀻𑀫𑀸𑀲𑀸𑀫𑀺𑀓𑀸𑀦𑀁 𑀅𑀦𑀼𑀩𑀮𑀁 𑀤𑀸𑀢𑀼𑀁 𑀲𑀫𑀢𑁆𑀣𑀸 𑀮𑀚𑁆𑀚𑀻𑀧𑀭𑀺𑀲𑀸. 𑀪𑀺𑀓𑁆𑀔𑀽𑀳𑀺 𑀓𑀢𑀦𑁆𑀢𑀺 𑀬𑀁 𑀅𑀮𑀚𑁆𑀚𑀻𑀦𑀁 𑀲𑁂𑀦𑀸𑀲𑀦𑀪𑁂𑀤𑀦𑀸𑀤𑀺𑀓𑀁 𑀮𑀚𑁆𑀚𑀻𑀪𑀺𑀓𑁆𑀔𑀽𑀳𑀺 𑀓𑀢𑀁, 𑀲𑀩𑁆𑀩𑀜𑁆𑀘𑁂𑀢𑀁 𑀲𑀼𑀓𑀢𑀫𑁂𑀯 𑀅𑀮𑀚𑁆𑀚𑀻𑀦𑀺𑀕𑁆𑀕𑀳𑀢𑁆𑀣𑀸𑀬 𑀧𑀯𑀢𑁆𑀢𑀺𑀢𑀩𑁆𑀩𑀢𑁄.

𑁮𑁮. 𑀅𑀯𑀚𑁆𑀛𑀸𑀬𑀦𑁆𑀢𑀻𑀢𑀺 𑀦𑀻𑀘𑀢𑁄 𑀘𑀺𑀦𑁆𑀢𑁂𑀦𑁆𑀢𑀺. 𑀉𑀚𑁆𑀛𑀸𑀬𑀦𑀢𑁆𑀣𑁄𑀢𑀺 𑀪𑀺𑀓𑁆𑀔𑀼𑀦𑁄 𑀣𑁂𑀬𑁆𑀬𑀓𑀫𑁆𑀫𑀦𑀺𑀦𑁆𑀤𑀦𑀢𑁆𑀣𑁄 ‘‘𑀓𑀣𑀜𑁆𑀳𑀺 𑀦𑀸𑀫 𑀅𑀤𑀺𑀦𑁆𑀦𑀁 𑀆𑀤𑀺𑀬𑀺𑀲𑁆𑀲𑀢𑀻’’𑀢𑀺, 𑀦 𑀧𑀦 𑀤𑀸𑀭𑀼-𑀲𑀤𑁆𑀤𑀯𑀺𑀲𑁂𑀲𑀦𑀢𑁆𑀣𑁄 𑀢𑀲𑁆𑀲 𑀩𑀳𑀼𑀯𑀘𑀦𑀢𑁆𑀢𑀸. 𑀯𑀘𑀦𑀪𑁂𑀤𑁂𑀢𑀺 𑀏𑀓𑀯𑀘𑀦𑀩𑀳𑀼𑀯𑀘𑀦𑀸𑀦𑀁 𑀪𑁂𑀤𑁂. 𑀲𑀩𑁆𑀩𑀸𑀯𑀦𑁆𑀢𑀦𑁆𑀢𑀺 𑀪𑀺𑀓𑁆𑀔𑀼𑀪𑀺𑀓𑁆𑀔𑀼𑀦𑀻𑀆𑀤𑀺𑀲𑀩𑁆𑀩𑀸𑀯𑀬𑀯𑀯𑀦𑁆𑀢𑀁. 𑀩𑀺𑀫𑁆𑀩𑀺𑀲𑀸𑀭𑁄𑀢𑀺 𑀢𑀲𑁆𑀲 𑀦𑀸𑀫𑀦𑁆𑀢𑀺 𑀏𑀢𑁆𑀣 𑀩𑀺𑀫𑁆𑀩𑀻𑀢𑀺 𑀲𑀼𑀯𑀡𑁆𑀡𑀁. 𑀢𑀲𑁆𑀫𑀸 𑀲𑀸𑀭𑀲𑀼𑀯𑀡𑁆𑀡𑀲𑀤𑀺𑀲𑀯𑀡𑁆𑀡𑀢𑀸𑀬 ‘‘𑀩𑀺𑀫𑁆𑀩𑀺𑀲𑀸𑀭𑁄’’𑀢𑀺 𑀯𑀼𑀘𑁆𑀘𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀧𑁄𑀭𑀸𑀡𑀲𑀢𑁆𑀣𑀸𑀦𑀼𑀭𑀽𑀧𑀁 𑀉𑀧𑁆𑀧𑀸𑀤𑀺𑀢𑁄 𑀯𑀻𑀲𑀢𑀺𑀫𑀸𑀲𑀧𑁆𑀧𑀫𑀸𑀡𑀉𑀢𑁆𑀢𑀫𑀲𑀼𑀯𑀡𑁆𑀡𑀕𑁆𑀖𑀦𑀓𑁄 𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑁄 𑀦𑀻𑀮𑀓𑀳𑀸𑀧𑀡𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀭𑀼𑀤𑁆𑀭𑀤𑀸𑀫𑁂𑀦 𑀦𑀸𑀫 𑀓𑁂𑀦𑀘𑀺 𑀉𑀧𑁆𑀧𑀸𑀤𑀺𑀢𑁄 𑀭𑀼𑀤𑁆𑀭𑀤𑀸𑀫𑀓𑁄. 𑀲𑁄 𑀓𑀺𑀭 𑀦𑀻𑀮𑀓𑀳𑀸𑀧𑀡𑀲𑁆𑀲 𑀢𑀺𑀪𑀸𑀕𑀁 𑀅𑀕𑁆𑀖𑀢𑀺. 𑀬𑀲𑁆𑀫𑀺𑀁 𑀧𑀦 𑀤𑁂𑀲𑁂 𑀦𑀻𑀮𑀓𑀳𑀸𑀧𑀡𑀸 𑀦 𑀲𑀦𑁆𑀢𑀺, 𑀢𑀢𑁆𑀣𑀸𑀧𑀺 𑀓𑀸𑀴𑀓𑀯𑀺𑀭𑀳𑀺𑀢𑀲𑁆𑀲 𑀦𑀺𑀤𑁆𑀥𑀦𑁆𑀢𑀲𑀼𑀯𑀡𑁆𑀡𑀲𑁆𑀲 𑀧𑀜𑁆𑀘𑀫𑀸𑀲𑀕𑁆𑀖𑀦𑀓𑁂𑀦 𑀪𑀡𑁆𑀟𑁂𑀦 𑀧𑀸𑀤𑀧𑀭𑀺𑀘𑁆𑀙𑁂𑀤𑁄 𑀓𑀸𑀢𑀩𑁆𑀩𑁄. 𑀢𑁂𑀦𑀸𑀢𑀺 𑀦𑀻𑀮𑀓𑀳𑀸𑀧𑀡𑀲𑁆𑀲 𑀘𑀢𑀼𑀢𑁆𑀣𑀪𑀸𑀕𑀪𑀽𑀢𑁂𑀦. 𑀧𑀸𑀭𑀸𑀚𑀺𑀓𑀯𑀢𑁆𑀣𑀼𑀫𑁆𑀳𑀺 𑀯𑀸𑀢𑀺𑀆𑀤𑀺 𑀧𑀸𑀭𑀸𑀚𑀺𑀓𑀸𑀦𑀁 𑀲𑀩𑁆𑀩𑀩𑀼𑀤𑁆𑀥𑁂𑀳𑀺 𑀧𑀜𑁆𑀜𑀢𑁆𑀢𑀪𑀸𑀯𑁂𑀦 𑀯𑀼𑀢𑁆𑀢𑀁, 𑀲𑀗𑁆𑀖𑀸𑀤𑀺𑀲𑁂𑀲𑀸𑀤𑀻𑀲𑀼 𑀧𑀦 𑀇𑀢𑀭𑀸𑀧𑀢𑁆𑀢𑀻𑀲𑀼𑀧𑀺 𑀢𑀩𑁆𑀩𑀢𑁆𑀣𑀽𑀲𑀼 𑀘 𑀦𑀸𑀦𑀢𑁆𑀢𑀁 𑀦𑀢𑁆𑀣𑁂𑀯, 𑀓𑁂𑀯𑀮𑀁 𑀓𑁂𑀘𑀺 𑀲𑀩𑁆𑀩𑀸𑀓𑀸𑀭𑁂𑀦 𑀧𑀜𑁆𑀜𑀧𑁂𑀦𑁆𑀢𑀺, 𑀓𑁂𑀘𑀺 𑀏𑀓𑀤𑁂𑀲𑁂𑀦𑀸𑀢𑀺 𑀏𑀢𑁆𑀢𑀓𑀫𑁂𑀯 𑀯𑀺𑀲𑁂𑀲𑁄. 𑀦 𑀳𑀺 𑀓𑀤𑀸𑀘𑀺𑀧𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀬𑀣𑀸𑀧𑀭𑀸𑀥𑀁 𑀅𑀢𑀺𑀓𑁆𑀓𑀫𑁆𑀫 𑀊𑀦𑀫𑀥𑀺𑀓𑀁 𑀯𑀸 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀦𑁆𑀢𑀺.

𑀧𑀤𑀪𑀸𑀚𑀦𑀻𑀬𑀯𑀡𑁆𑀡𑀦𑀸

𑁯𑁨. 𑀧𑀼𑀦𑀧𑀺 ‘‘𑀆𑀕𑀦𑁆𑀢𑀼𑀓𑀸𑀫𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀘 𑀲𑀩𑁆𑀩𑀣𑀸 𑀫𑀦𑀼𑀲𑁆𑀲𑁂𑀳𑀺 𑀅𑀦𑀺𑀯𑀼𑀢𑁆𑀣𑀧𑀼𑀩𑁆𑀩𑁂 𑀅𑀪𑀺𑀦𑀯𑀫𑀸𑀧𑀺𑀢𑁂, ‘‘𑀧𑀼𑀦 𑀦 𑀧𑀯𑀺𑀲𑀺𑀲𑁆𑀲𑀸𑀫𑀸’’𑀢𑀺 𑀦𑀺𑀭𑀸𑀮𑀬𑁂𑀳𑀺 𑀧𑀭𑀺𑀘𑁆𑀘𑀢𑁆𑀢𑁂 𑀘 𑀕𑀸𑀫𑁂 𑀕𑀸𑀫𑀯𑁄𑀳𑀸𑀭𑀸𑀪𑀸𑀯𑀸 𑀕𑀸𑀫𑀧𑁆𑀧𑀯𑁂𑀲𑀦𑀸𑀧𑀼𑀘𑁆𑀙𑀦𑀸𑀤𑀺𑀓𑀺𑀘𑁆𑀘𑀁 𑀦𑀢𑁆𑀣𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀭𑀜𑁆𑀜𑀧𑀭𑀺𑀘𑁆𑀙𑁂𑀤𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀕𑀸𑀫𑀕𑀸𑀫𑀽𑀧𑀘𑀸𑀭𑁂𑀲𑀼 𑀤𑀲𑁆𑀲𑀺𑀢𑁂𑀲𑀼 𑀢𑀤𑀜𑁆𑀜𑀁 𑀅𑀭𑀜𑁆𑀜𑀦𑁆𑀢𑀺 𑀅𑀭𑀜𑁆𑀜𑀧𑀭𑀺𑀘𑁆𑀙𑁂𑀤𑁄 𑀲𑀓𑁆𑀓𑀸 𑀜𑀸𑀢𑀼𑀦𑁆𑀢𑀺 𑀯𑀼𑀢𑁆𑀢𑀁. 𑀫𑀸𑀢𑀺𑀓𑀸𑀬𑀁 𑀧𑀦 𑀕𑀸𑀫𑀕𑁆𑀕𑀳𑀡𑁂𑀦𑁂𑀯 𑀕𑀸𑀫𑀽𑀧𑀘𑀸𑀭𑁄𑀧𑀺 𑀕𑀳𑀺𑀢𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀇𑀦𑁆𑀤𑀔𑀻𑀮𑁂𑀢𑀺 𑀉𑀫𑁆𑀫𑀸𑀭𑁂. 𑀅𑀭𑀜𑁆𑀜𑀲𑀗𑁆𑀔𑁂𑀧𑀁 𑀕𑀘𑁆𑀙𑀢𑀺 𑀢𑀣𑀸 𑀅𑀪𑀺𑀥𑀫𑁆𑀫𑁂 𑀯𑀼𑀢𑁆𑀢𑀢𑁆𑀢𑀸. 𑀅𑀲𑀢𑀺𑀧𑀺 𑀇𑀦𑁆𑀤𑀔𑀻𑀮𑁂 𑀇𑀦𑁆𑀤𑀔𑀻𑀮𑀝𑁆𑀞𑀸𑀦𑀺𑀬𑀢𑁆𑀢𑀸 ‘‘𑀯𑁂𑀫𑀚𑁆𑀛𑀫𑁂𑀯 𑀇𑀦𑁆𑀤𑀔𑀻𑀮𑁄𑀢𑀺 𑀯𑀼𑀘𑁆𑀘𑀢𑀻’’𑀢𑀺 𑀯𑀼𑀢𑁆𑀢𑀁. 𑀬𑀢𑁆𑀣 𑀧𑀦 𑀤𑁆𑀯𑀸𑀭𑀩𑀸𑀳𑀸𑀧𑀺 𑀦𑀢𑁆𑀣𑀺, 𑀢𑀢𑁆𑀣 𑀧𑀸𑀓𑀸𑀭𑀯𑁂𑀫𑀚𑁆𑀛𑀫𑁂𑀯 𑀇𑀦𑁆𑀤𑀔𑀻𑀮𑁄𑀢𑀺 𑀕𑀳𑁂𑀢𑀩𑁆𑀩𑀁. 𑀮𑀼𑀞𑀺𑀢𑁆𑀯𑀸𑀢𑀺 𑀧𑀯𑀝𑁆𑀝𑀺𑀢𑁆𑀯𑀸.

𑀫𑀚𑁆𑀛𑀺𑀫𑀲𑁆𑀲 𑀧𑀼𑀭𑀺𑀲𑀲𑁆𑀲 𑀲𑀼𑀧𑁆𑀧𑀧𑀸𑀢𑁄 𑀯𑀸𑀢𑀺𑀆𑀤𑀺 𑀫𑀸𑀢𑀼𑀕𑀸𑀫𑀲𑁆𑀲 𑀓𑀸𑀓𑀼𑀝𑁆𑀞𑀸𑀧𑀦𑀯𑀲𑁂𑀦 𑀕𑀳𑁂𑀢𑀩𑁆𑀩𑀁, 𑀦 𑀩𑀮𑀤𑀲𑁆𑀲𑀦𑀯𑀲𑁂𑀦 ‘‘𑀫𑀸𑀢𑀼𑀕𑀸𑀫𑁄 𑀪𑀸𑀚𑀦𑀥𑁄𑀯𑀦𑀉𑀤𑀓𑀁 𑀙𑀟𑁆𑀟𑁂𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁧.𑁯𑁨) 𑀉𑀧𑀭𑀺 𑀯𑀼𑀘𑁆𑀘𑀫𑀸𑀦𑀢𑁆𑀢𑀸, 𑀢𑁂𑀦𑁂𑀯 ‘‘𑀮𑁂𑀟𑁆𑀟𑀼𑀧𑀸𑀢𑁄’’𑀢𑀺 𑀅𑀯𑀢𑁆𑀯𑀸 𑀲𑀼𑀧𑁆𑀧𑀧𑀸𑀢𑁄𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀓𑀼𑀭𑀼𑀦𑁆𑀤𑀝𑁆𑀞𑀓𑀣𑀸𑀬𑀁 𑀫𑀳𑀸𑀧𑀘𑁆𑀘𑀭𑀺𑀬𑀜𑁆𑀘 𑀖𑀭𑀽𑀧𑀘𑀸𑀭𑁄𑀯 𑀕𑀸𑀫𑁄𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀖𑀭𑀽𑀧𑀘𑀸𑀭𑁂 𑀞𑀺𑀢𑀲𑁆𑀲 𑀮𑁂𑀟𑁆𑀟𑀼𑀧𑀸𑀢𑁄 𑀕𑀸𑀫𑀽𑀧𑀘𑀸𑀭𑁄’’𑀢𑀺 𑀯𑀼𑀢𑁆𑀢𑀁. 𑀓𑀢𑀧𑀭𑀺𑀓𑁆𑀔𑁂𑀧𑁄𑀢𑀺 𑀇𑀫𑀺𑀦𑀸 𑀧𑀭𑀺𑀓𑁆𑀔𑁂𑀧𑀢𑁄 𑀩𑀳𑀺 𑀉𑀧𑀘𑀸𑀭𑁄 𑀦 𑀕𑀳𑁂𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀢𑀺. 𑀲𑀼𑀧𑁆𑀧𑀫𑀼𑀲𑀮𑀧𑀸𑀢𑁄𑀧𑀺 𑀅𑀧𑀭𑀺𑀓𑁆𑀔𑀺𑀢𑁆𑀢𑀕𑁂𑀳𑀲𑁆𑀲𑁂𑀯, 𑀲𑁄 𑀘 𑀬𑀢𑁄 𑀧𑀳𑁄𑀢𑀺, 𑀢𑀢𑁆𑀣𑁂𑀯 𑀕𑀳𑁂𑀢𑀩𑁆𑀩𑁄, 𑀅𑀧𑁆𑀧𑀳𑁄𑀦𑀝𑁆𑀞𑀸𑀦𑁂 𑀧𑀦 𑀯𑀺𑀚𑁆𑀚𑀫𑀸𑀦𑀝𑁆𑀞𑀸𑀦𑀫𑁂𑀯 𑀕𑀳𑁂𑀢𑀩𑁆𑀩𑀁. 𑀬𑀲𑁆𑀲 𑀧𑀦 𑀖𑀭𑀲𑁆𑀲 𑀲𑀫𑀦𑁆𑀢𑀢𑁄 𑀧𑀸𑀓𑀸𑀭𑀸𑀤𑀻𑀳𑀺 𑀧𑀭𑀺𑀓𑁆𑀔𑁂𑀧𑁄 𑀓𑀢𑁄 𑀳𑁄𑀢𑀺, 𑀢𑀢𑁆𑀣 𑀲𑁄𑀯 𑀧𑀭𑀺𑀓𑁆𑀔𑁂𑀧𑁄 𑀖𑀭𑀽𑀧𑀘𑀸𑀭𑁄𑀢𑀺 𑀕𑀳𑁂𑀢𑀩𑁆𑀩𑀁.

𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑀸𑀢𑀺 𑀧𑀭𑀺𑀓𑁆𑀔𑀺𑀢𑁆𑀢𑀕𑀸𑀫𑁂 𑀯𑀼𑀢𑁆𑀢𑀦𑀬𑁂𑀦. 𑀲𑀗𑁆𑀓𑀭𑀻𑀬𑀢𑀻𑀢𑀺 𑀫𑀺𑀲𑁆𑀲𑀻𑀬𑀢𑀺. 𑀯𑀺𑀓𑀸𑀮𑁂 𑀕𑀸𑀫𑀧𑁆𑀧𑀯𑁂𑀲𑀦𑁂 ‘‘𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀕𑀸𑀫𑀲𑁆𑀲 𑀧𑀭𑀺𑀓𑁆𑀔𑁂𑀧𑀁 𑀅𑀢𑀺𑀓𑁆𑀓𑀫𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲. 𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀕𑀸𑀫𑀲𑁆𑀲 𑀉𑀧𑀘𑀸𑀭𑀁 𑀑𑀓𑁆𑀓𑀫𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲𑀸’’𑀢𑀺 (𑀧𑀸𑀘𑀺. 𑁫𑁧𑁩) 𑀯𑀼𑀢𑁆𑀢𑀢𑁆𑀢𑀸 𑀕𑀸𑀫𑀕𑀸𑀫𑀽𑀧𑀘𑀸𑀭𑀸𑀦𑀁 𑀅𑀲𑀗𑁆𑀓𑀭𑀢𑀸 𑀇𑀘𑁆𑀙𑀺𑀢𑀩𑁆𑀩𑀸𑀢𑀺 𑀆𑀳 𑀅𑀲𑀗𑁆𑀓𑀭𑀢𑁄 𑀘𑀸𑀢𑀺𑀆𑀤𑀺. 𑀓𑁂𑀘𑀺 𑀧𑀦𑁂𑀢𑁆𑀣 𑀧𑀸𑀴𑀺𑀬𑀁 ‘‘𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀕𑀸𑀫𑀲𑁆𑀲 𑀉𑀧𑀘𑀸𑀭𑀁 𑀑𑀓𑁆𑀓𑀫𑀦𑁆𑀢𑀲𑁆𑀲𑀸𑀢𑀺 𑀇𑀤𑀁 𑀧𑀭𑀺𑀓𑁆𑀔𑁂𑀧𑀸𑀭𑀳𑀝𑁆𑀞𑀸𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀦 𑀢𑀢𑁄 𑀧𑀭𑀁 𑀏𑀓𑀮𑁂𑀟𑁆𑀟𑀼𑀧𑀸𑀢𑀧𑀭𑀺𑀘𑁆𑀙𑀺𑀦𑁆𑀦𑀁 𑀉𑀧𑀘𑀸𑀭𑀁. 𑀢𑀲𑁆𑀫𑀸 𑀧𑀭𑀺𑀓𑁆𑀔𑁂𑀧𑀸𑀭𑀳𑀝𑁆𑀞𑀸𑀦𑀲𑀗𑁆𑀔𑀸𑀢𑀁 𑀕𑀸𑀫𑀁 𑀑𑀓𑁆𑀓𑀫𑀦𑁆𑀢𑀲𑁆𑀲𑁂𑀯 𑀆𑀧𑀢𑁆𑀢𑀺, 𑀦 𑀉𑀧𑀘𑀸𑀭’’𑀦𑁆𑀢𑀺 𑀯𑀤𑀦𑁆𑀢𑀺, 𑀢𑀁 𑀦 𑀕𑀳𑁂𑀢𑀩𑁆𑀩𑀁 ‘‘𑀖𑀭𑀽𑀧𑀘𑀸𑀭𑁂 𑀞𑀺𑀢𑀲𑁆𑀲 𑀫𑀚𑁆𑀛𑀺𑀫𑀲𑁆𑀲 𑀧𑀼𑀭𑀺𑀲𑀲𑁆𑀲 𑀮𑁂𑀟𑁆𑀟𑀼𑀧𑀸𑀢𑀩𑁆𑀪𑀦𑁆𑀢𑀭𑀁 𑀕𑀸𑀫𑁄 𑀦𑀸𑀫. 𑀢𑀢𑁄 𑀅𑀜𑁆𑀜𑀲𑁆𑀲 𑀮𑁂𑀟𑁆𑀟𑀼𑀧𑀸𑀢𑀲𑁆𑀲 𑀅𑀩𑁆𑀪𑀦𑁆𑀢𑀭𑀁 𑀕𑀸𑀫𑀽𑀧𑀘𑀸𑀭𑁄 𑀦𑀸𑀫𑀸’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁧.𑁯𑁨) 𑀇𑀥𑁂𑀯 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀢𑁆𑀢𑀸. 𑀯𑀺𑀓𑀸𑀮𑁂 𑀕𑀸𑀫𑀧𑁆𑀧𑀯𑁂𑀲𑀦𑀲𑀺𑀓𑁆𑀔𑀸𑀧𑀤𑀝𑁆𑀞𑀓𑀣𑀸𑀬𑀜𑁆𑀳𑀺 𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀕𑀸𑀫𑀲𑁆𑀲 𑀉𑀧𑀘𑀸𑀭𑁄 𑀅𑀤𑀺𑀦𑁆𑀦𑀸𑀤𑀸𑀦𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄𑀢𑀺 (𑀧𑀸𑀘𑀺. 𑀅𑀝𑁆𑀞. 𑁫𑁧𑁨) 𑀅𑀬𑀫𑁂𑀯 𑀦𑀬𑁄 𑀅𑀢𑀺𑀤𑀺𑀲𑀺𑀢𑁄. 𑀢𑁂𑀦𑁂𑀯 𑀫𑀸𑀢𑀺𑀓𑀸𑀝𑁆𑀞𑀓𑀣𑀸𑀬𑀫𑁆𑀧𑀺 ‘‘𑀬𑁆𑀯𑀸𑀬𑀁 𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀕𑀸𑀫𑀲𑁆𑀲 𑀉𑀧𑀘𑀸𑀭𑁄 𑀤𑀲𑁆𑀲𑀺𑀢𑁄, 𑀢𑀲𑁆𑀲 𑀯𑀲𑁂𑀦 𑀯𑀺𑀓𑀸𑀮𑁂 𑀕𑀸𑀫𑀧𑁆𑀧𑀯𑁂𑀲𑀦𑀸𑀤𑀻𑀲𑀼 𑀆𑀧𑀢𑁆𑀢𑀺 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑀩𑁆𑀩𑀸’’𑀢𑀺 (𑀓𑀗𑁆𑀔𑀸. 𑀅𑀝𑁆𑀞. 𑀤𑀼𑀢𑀺𑀬𑀧𑀸𑀭𑀸𑀚𑀺𑀓𑀯𑀡𑁆𑀡𑀦𑀸) 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀕𑀸𑀫𑀲𑁆𑀲 𑀧𑀭𑀺𑀓𑁆𑀔𑁂𑀧𑀁 𑀅𑀢𑀺𑀓𑁆𑀓𑀫𑀦𑁆𑀢𑀲𑁆𑀲, 𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀕𑀸𑀫𑀲𑁆𑀲 𑀖𑀭𑀽𑀧𑀘𑀸𑀭𑀢𑁄 𑀧𑀝𑁆𑀞𑀸𑀬 𑀤𑀼𑀢𑀺𑀬𑀮𑁂𑀟𑁆𑀟𑀼𑀧𑀸𑀢𑀲𑀗𑁆𑀔𑀸𑀢𑀁 𑀕𑀸𑀫𑀽𑀧𑀘𑀸𑀭𑀁 𑀑𑀓𑁆𑀓𑀫𑀦𑁆𑀢𑀲𑁆𑀲 𑀯𑀺𑀓𑀸𑀮𑁂 𑀕𑀸𑀫𑀧𑁆𑀧𑀯𑁂𑀲𑀦𑀸𑀧𑀢𑁆𑀢𑀺 𑀳𑁄𑀢𑀺, 𑀫𑀸𑀢𑀺𑀓𑀸𑀬𑀜𑁆𑀘 𑀯𑀺𑀓𑀸𑀮𑁂 𑀕𑀸𑀫𑀁 𑀧𑀯𑀺𑀲𑁂𑀬𑁆𑀬𑀸𑀢𑀺 𑀕𑀸𑀫𑀕𑁆𑀕𑀳𑀡𑁂𑀦𑁂𑀯 𑀕𑀸𑀫𑀽𑀧𑀘𑀸𑀭𑁄𑀧𑀺 𑀕𑀳𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀯𑀺𑀓𑀸𑀮𑁂 𑀕𑀸𑀫𑀧𑁆𑀧𑀯𑁂𑀲𑀦𑀸𑀤𑀻𑀲𑀽𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀖𑀭𑀖𑀭𑀽𑀧𑀘𑀸𑀭𑀸𑀤𑀻𑀲𑀼 𑀞𑀺𑀢𑀸𑀦𑀁 𑀉𑀧𑁆𑀧𑀦𑁆𑀦𑀮𑀸𑀪𑀪𑀸𑀚𑀦𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺.

𑀦𑀺𑀓𑁆𑀔𑀫𑀺𑀢𑁆𑀯𑀸 𑀩𑀳𑀺 𑀇𑀦𑁆𑀤𑀔𑀻𑀮𑀸𑀢𑀺 𑀇𑀦𑁆𑀤𑀔𑀻𑀮𑀢𑁄 𑀩𑀳𑀺 𑀦𑀺𑀓𑁆𑀔𑀫𑀺𑀢𑁆𑀯𑀸 𑀞𑀺𑀢𑀁 𑀬𑀁 𑀞𑀸𑀦𑀁 𑀲𑀩𑁆𑀩𑀫𑁂𑀢𑀁 𑀅𑀭𑀜𑁆𑀜𑀦𑁆𑀢𑀺 𑀬𑁄𑀚𑀦𑀸. 𑀆𑀘𑀭𑀺𑀬𑀥𑀦𑀼 𑀦𑀸𑀫 𑀧𑀓𑀢𑀺𑀳𑀢𑁆𑀣𑁂𑀦 𑀦𑀯𑀯𑀺𑀤𑀢𑁆𑀣𑀺𑀧𑀫𑀸𑀡𑀁, 𑀚𑀺𑀬𑀸𑀬 𑀧𑀦 𑀆𑀭𑁄𑀧𑀺𑀢𑀸𑀬 𑀲𑀢𑁆𑀢𑀝𑁆𑀞𑀯𑀺𑀤𑀢𑁆𑀣𑀺𑀫𑀢𑁆𑀢𑀦𑁆𑀢𑀺 𑀯𑀤𑀦𑁆𑀢𑀺.

𑀓𑀧𑁆𑀧𑀺𑀬𑀦𑁆𑀢𑀺 𑀅𑀦𑀼𑀭𑀽𑀧𑀯𑀲𑁂𑀦 𑀯𑀼𑀢𑁆𑀢𑀁 𑀅𑀓𑀧𑁆𑀧𑀺𑀬𑀲𑁆𑀲𑀸𑀧𑀺 𑀅𑀧𑁆𑀧𑀝𑀺𑀕𑁆𑀕𑀳𑀺𑀢𑀲𑁆𑀲 𑀧𑀭𑀺𑀪𑁄𑀕𑁂 𑀧𑀸𑀘𑀺𑀢𑁆𑀢𑀺𑀬𑀢𑁆𑀢𑀸. 𑀧𑀭𑀺𑀘𑁆𑀘𑀸𑀕𑀸𑀤𑀺𑀫𑁆𑀳𑀺 𑀅𑀓𑀢𑁂 ‘‘𑀇𑀤𑀁 𑀫𑀬𑁆𑀳𑀁 𑀲𑀦𑁆𑀢𑀓’’𑀦𑁆𑀢𑀺 𑀯𑀢𑁆𑀣𑀼𑀲𑀸𑀫𑀺𑀦𑀸 𑀅𑀯𑀺𑀤𑀺𑀢𑀫𑁆𑀧𑀺 𑀧𑀭𑀺𑀕𑁆𑀕𑀳𑀺𑀢𑀫𑁂𑀯 𑀩𑀸𑀮𑀼𑀫𑁆𑀫𑀢𑁆𑀢𑀸𑀤𑀻𑀦𑀁 𑀲𑀦𑁆𑀢𑀓𑀁 𑀯𑀺𑀬, 𑀢𑀸𑀤𑀺𑀲𑀁 𑀅𑀯𑀳𑀭𑀦𑁆𑀢𑁄𑀧𑀺 𑀜𑀸𑀢𑀓𑀸𑀤𑀻𑀳𑀺 𑀧𑀘𑁆𑀙𑀸 𑀜𑀢𑁆𑀯𑀸 𑀯𑀢𑁆𑀣𑀼𑀲𑀸𑀫𑀺𑀦𑀸 𑀘 𑀅𑀦𑀼𑀩𑀦𑁆𑀥𑀺𑀢𑀩𑁆𑀩𑀢𑁄 𑀧𑀸𑀭𑀸𑀚𑀺𑀓𑁄𑀯 𑀳𑁄𑀢𑀺. 𑀬𑀲𑁆𑀲 𑀯𑀲𑁂𑀦 𑀧𑀼𑀭𑀺𑀲𑁄 𑀣𑁂𑀦𑁄 𑀳𑁄𑀢𑀺, 𑀢𑀁 𑀣𑁂𑀬𑁆𑀬𑀦𑁆𑀢𑀺 𑀆𑀳 ‘‘𑀅𑀯𑀳𑀭𑀡𑀘𑀺𑀢𑁆𑀢𑀲𑁆𑀲𑁂𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺. 𑀧𑀧𑀜𑁆𑀘𑀲𑀗𑁆𑀔𑀸𑀢𑀺 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀺𑀲𑀗𑁆𑀔𑀸𑀢𑀸 𑀧𑀧𑀜𑁆𑀘𑀓𑁄𑀝𑁆𑀞𑀸𑀲𑀸. 𑀏𑀓𑁄 𑀘𑀺𑀢𑁆𑀢𑀓𑁄𑀝𑁆𑀞𑀸𑀲𑁄𑀢𑀺 𑀞𑀸𑀦𑀸𑀘𑀸𑀯𑀦𑀧𑀬𑁄𑀕𑀲𑀫𑀼𑀝𑁆𑀞𑀸𑀧𑀓𑁄 𑀏𑀓𑁄 𑀘𑀺𑀢𑁆𑀢𑀓𑁄𑀝𑁆𑀞𑀸𑀲𑁄𑀢𑀺 𑀅𑀢𑁆𑀣𑁄.

𑀅𑀪𑀺𑀬𑁄𑀕𑀯𑀲𑁂𑀦𑀸𑀢𑀺 𑀅𑀝𑁆𑀝𑀓𑀭𑀡𑀯𑀲𑁂𑀦. 𑀲𑀯𑀺𑀜𑁆𑀜𑀸𑀡𑀓𑁂𑀦𑁂𑀯𑀸𑀢𑀺 𑀇𑀤𑀁 𑀲𑀯𑀺𑀜𑁆𑀜𑀸𑀡𑀓𑀸𑀦𑀜𑁆𑀜𑁂𑀯 𑀆𑀯𑁂𑀡𑀺𑀓𑀯𑀺𑀦𑀺𑀘𑁆𑀙𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀧𑀸𑀡𑁄 𑀅𑀧𑀤𑀦𑁆𑀢𑀺𑀆𑀤𑀻𑀲𑀼 𑀳𑀺 ‘‘𑀧𑀤𑀲𑀸 𑀦𑁂𑀲𑁆𑀲𑀸𑀫𑀻’’𑀢𑀺 𑀧𑀞𑀫𑀁 𑀧𑀸𑀤𑀁 𑀲𑀗𑁆𑀓𑀸𑀫𑁂𑀢𑀺, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲𑀸𑀢𑀺𑀆𑀤𑀺𑀦𑀸 𑀧𑀸𑀴𑀺𑀬𑀁 (𑀧𑀸𑀭𑀸. 𑁧𑁧𑁧), 𑀪𑀺𑀓𑁆𑀔𑀼 𑀤𑀸𑀲𑀁 𑀤𑀺𑀲𑁆𑀯𑀸 𑀲𑀼𑀔𑀤𑀼𑀓𑁆𑀔𑀁 𑀧𑀼𑀘𑁆𑀙𑀺𑀢𑁆𑀯𑀸 𑀯𑀸 𑀅𑀧𑀼𑀘𑁆𑀙𑀺𑀢𑁆𑀯𑀸 𑀯𑀸 ‘‘𑀕𑀘𑁆𑀙, 𑀧𑀮𑀸𑀬𑀺𑀢𑁆𑀯𑀸 𑀲𑀼𑀔𑀁 𑀚𑀻𑀯𑀸’’𑀢𑀺 𑀯𑀤𑀢𑀺, 𑀲𑁄 𑀘𑁂 𑀧𑀮𑀸𑀬𑀢𑀺, 𑀤𑀼𑀢𑀺𑀬𑀧𑀤𑀯𑀸𑀭𑁂 𑀧𑀸𑀭𑀸𑀚𑀺𑀓𑀦𑁆𑀢𑀺𑀆𑀤𑀺𑀦𑀸 (𑀧𑀸𑀭𑀸. 𑀅𑀝𑁆𑀞. 𑁧.𑁧𑁧𑁪) 𑀅𑀝𑁆𑀞𑀓𑀣𑀸𑀬𑀜𑁆𑀘 𑀬𑁄 𑀲𑀯𑀺𑀜𑁆𑀜𑀸𑀡𑀓𑀸𑀦𑀜𑁆𑀜𑁂𑀯 𑀆𑀯𑁂𑀡𑀺𑀓𑁄 𑀯𑀺𑀦𑀺𑀘𑁆𑀙𑀬𑁄 𑀯𑀼𑀢𑁆𑀢𑁄, 𑀲𑁄 𑀆𑀭𑀸𑀫𑀸𑀤𑀺𑀅𑀯𑀺𑀜𑁆𑀜𑀸𑀡𑀓𑁂𑀲𑀼 𑀦 𑀮𑀩𑁆𑀪𑀢𑀻𑀢𑀺 𑀢𑀸𑀤𑀺𑀲𑀁 𑀲𑀦𑁆𑀥𑀸𑀬 ‘‘𑀲𑀯𑀺𑀜𑁆𑀜𑀸𑀡𑀓𑁂𑀦𑁂𑀯𑀸’’𑀢𑀺 𑀯𑀼𑀢𑁆𑀢𑀁. 𑀬𑁄 𑀧𑀦 𑀯𑀺𑀦𑀺𑀘𑁆𑀙𑀬𑁄 𑀆𑀭𑀸𑀫𑀸𑀤𑀺𑀅𑀯𑀺𑀜𑁆𑀜𑀸𑀡𑀓𑁂𑀲𑀼 𑀮𑀩𑁆𑀪𑀢𑀺, 𑀲𑁄 𑀬𑀲𑁆𑀫𑀸 𑀲𑀯𑀺𑀜𑁆𑀜𑀸𑀡𑀓𑁂𑀲𑀼 𑀅𑀮𑀩𑁆𑀪𑀦𑀓𑁄 𑀦𑀸𑀫 𑀦𑀢𑁆𑀣𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀦𑀸𑀦𑀸𑀪𑀡𑁆𑀟𑀯𑀲𑁂𑀦 𑀲𑀯𑀺𑀜𑁆𑀜𑀸𑀡𑀓𑀸𑀯𑀺𑀜𑁆𑀜𑀸𑀡𑀓𑀫𑀺𑀲𑁆𑀲𑀓𑁂𑀦𑀸’’𑀢𑀺. 𑀲𑀯𑀺𑀜𑁆𑀜𑀸𑀡𑀓𑁂𑀦 𑀘 𑀅𑀯𑀺𑀜𑁆𑀜𑀸𑀡𑀓𑁂𑀦 𑀘𑀸𑀢𑀺 𑀅𑀢𑁆𑀣𑁄. 𑀬𑀲𑁆𑀫𑀸 𑀘𑁂𑀢𑁆𑀣 𑀅𑀯𑀺𑀜𑁆𑀜𑀸𑀡𑀓𑁂𑀦𑁂𑀯 𑀆𑀤𑀺𑀬𑀦𑀸𑀤𑀻𑀦𑀺 𑀙𑀧𑀺 𑀧𑀤𑀸𑀦𑀺 𑀦 𑀲𑀓𑁆𑀓𑀸 𑀬𑁄𑀚𑁂𑀢𑀼𑀁 𑀇𑀭𑀺𑀬𑀸𑀧𑀣𑀯𑀺𑀓𑁄𑀧𑀦𑀲𑁆𑀲 𑀲𑀯𑀺𑀜𑁆𑀜𑀸𑀡𑀓𑀯𑀲𑁂𑀦𑁂𑀯 𑀬𑁄𑀚𑁂𑀢𑀩𑁆𑀩𑀢𑁄, 𑀢𑀲𑁆𑀫𑀸 ‘‘𑀅𑀯𑀺𑀜𑁆𑀜𑀸𑀡𑀓𑁂𑀦𑁂𑀯𑀸’’𑀢𑀺 𑀢𑀢𑀺𑀬𑀁 𑀧𑀓𑀸𑀭𑀁 𑀦 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀆𑀭𑀸𑀫𑀦𑁆𑀢𑀺 𑀇𑀤𑀁 𑀉𑀧𑀮𑀓𑁆𑀔𑀡𑀫𑀢𑁆𑀢𑀁 𑀤𑀸𑀲𑀸𑀤𑀺𑀲𑀯𑀺𑀜𑁆𑀜𑀸𑀡𑀓𑀲𑁆𑀲𑀸𑀧𑀺 𑀇𑀥 𑀲𑀗𑁆𑀕𑀳𑁂𑀢𑀩𑁆𑀩𑀢𑁄, 𑀦𑀸𑀦𑀸𑀪𑀡𑁆𑀟𑀯𑀲𑁂𑀦 𑀳𑁂𑀢𑁆𑀣 𑀬𑁄𑀚𑀦𑀸 𑀤𑀲𑁆𑀲𑀺𑀬𑀢𑀺. 𑀧𑀭𑀺𑀓𑀧𑁆𑀧𑀺𑀢𑀝𑁆𑀞𑀸𑀦𑀦𑁆𑀢𑀺 𑀧𑀭𑀺𑀓𑀧𑁆𑀧𑀺𑀢𑁄𑀓𑀸𑀲𑀁. 𑀲𑀼𑀗𑁆𑀓𑀖𑀸𑀢𑀦𑁆𑀢𑀺 𑀏𑀢𑁆𑀣 𑀫𑀕𑁆𑀕𑀁 𑀕𑀘𑁆𑀙𑀦𑁆𑀢𑁂𑀳𑀺 𑀲𑀢𑁆𑀣𑀺𑀓𑁂𑀳𑀺 𑀅𑀢𑁆𑀢𑀦𑀸 𑀦𑀻𑀬𑀫𑀸𑀦𑀪𑀡𑁆𑀟𑀢𑁄 𑀭𑀜𑁆𑀜𑁄 𑀤𑀸𑀢𑀩𑁆𑀩𑀪𑀸𑀕𑁄 𑀲𑀼𑀗𑁆𑀓𑁄 𑀦𑀸𑀫, 𑀲𑁄 𑀏𑀢𑁆𑀣 𑀳𑀜𑁆𑀜𑀢𑀺 𑀅𑀤𑀢𑁆𑀯𑀸 𑀕𑀘𑁆𑀙𑀦𑁆𑀢𑁂𑀳𑀺 𑀅𑀯𑀳𑀭𑀻𑀬𑀢𑀺, 𑀢𑀁 𑀯𑀸 𑀳𑀦𑁆𑀢𑀺 𑀏𑀢𑁆𑀣 𑀭𑀸𑀚𑀧𑀼𑀭𑀺𑀲𑀸 𑀅𑀤𑀤𑀦𑁆𑀢𑀸𑀦𑀁 𑀲𑀦𑁆𑀢𑀓𑀁 𑀩𑀮𑀓𑁆𑀓𑀸𑀭𑁂𑀦𑀸𑀢𑀺 𑀲𑀼𑀗𑁆𑀓𑀖𑀸𑀢𑁄, ‘‘𑀏𑀢𑁆𑀣 𑀧𑀯𑀺𑀝𑁆𑀞𑁂𑀳𑀺 𑀲𑀼𑀗𑁆𑀓𑁄 𑀤𑀸𑀢𑀩𑁆𑀩𑁄’’𑀢𑀺 𑀭𑀼𑀓𑁆𑀔𑀧𑀩𑁆𑀩𑀢𑀸𑀤𑀺𑀲𑀜𑁆𑀜𑀸𑀡𑁂𑀦 𑀦𑀺𑀬𑀫𑀺𑀢𑀧𑁆𑀧𑀤𑁂𑀲𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁.

𑀧𑀜𑁆𑀘𑀯𑀻𑀲𑀢𑀺𑀅𑀯𑀳𑀸𑀭𑀓𑀣𑀸𑀯𑀡𑁆𑀡𑀦𑀸

𑀓𑀢𑁆𑀣𑀘𑀻𑀢𑀺 𑀏𑀓𑀺𑀲𑁆𑀲𑀸 𑀅𑀝𑁆𑀞𑀓𑀣𑀸𑀬𑀁. 𑀏𑀓𑀁 𑀧𑀜𑁆𑀘𑀓𑀁 𑀤𑀲𑁆𑀲𑀺𑀢𑀦𑁆𑀢𑀺 ‘‘𑀧𑀭𑀧𑀭𑀺𑀕𑁆𑀕𑀳𑀺𑀢𑀜𑁆𑀘 𑀳𑁄𑀢𑀺, 𑀧𑀭𑀧𑀭𑀺𑀕𑁆𑀕𑀳𑀺𑀢𑀲𑀜𑁆𑀜𑀻 𑀘, 𑀕𑀭𑀼𑀓𑁄 𑀘 𑀳𑁄𑀢𑀺 𑀧𑀭𑀺𑀓𑁆𑀔𑀸𑀭𑁄 𑀧𑀜𑁆𑀘𑀫𑀸𑀲𑀓𑁄 𑀯𑀸 𑀅𑀢𑀺𑀭𑁂𑀓𑀧𑀜𑁆𑀘𑀫𑀸𑀲𑀓𑁄 𑀯𑀸, 𑀣𑁂𑀬𑁆𑀬𑀘𑀺𑀢𑁆𑀢𑀜𑁆𑀘 𑀧𑀘𑁆𑀘𑀼𑀧𑀝𑁆𑀞𑀺𑀢𑀁 𑀳𑁄𑀢𑀺, 𑀞𑀸𑀦𑀸 𑀘𑀸𑀯𑁂𑀢𑀻’’𑀢𑀺 (𑀧𑀸𑀭𑀸. 𑁧𑁨𑁨) 𑀯𑀼𑀢𑁆𑀢𑀧𑀜𑁆𑀘𑀅𑀯𑀳𑀸𑀭𑀗𑁆𑀕𑀸𑀦𑀺 𑀏𑀓𑀁 𑀧𑀜𑁆𑀘𑀓𑀦𑁆𑀢𑀺 𑀤𑀲𑁆𑀲𑀺𑀢𑀁. 𑀤𑁆𑀯𑁂 𑀧𑀜𑁆𑀘𑀓𑀸𑀦𑀺 𑀤𑀲𑁆𑀲𑀺𑀢𑀸𑀦𑀻𑀢𑀺 ‘‘𑀙𑀳𑀺 𑀆𑀓𑀸𑀭𑁂𑀳𑀺 𑀅𑀤𑀺𑀦𑁆𑀦𑀁 𑀆𑀤𑀺𑀬𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲. 𑀦 𑀘 𑀲𑀓𑀲𑀜𑁆𑀜𑀻, 𑀦 𑀘 𑀯𑀺𑀲𑁆𑀲𑀸𑀲𑀕𑁆𑀕𑀸𑀳𑀻, 𑀦 𑀘 𑀢𑀸𑀯𑀓𑀸𑀮𑀺𑀓𑀁, 𑀕𑀭𑀼𑀓𑁄 𑀘 𑀳𑁄𑀢𑀺 𑀧𑀭𑀺𑀓𑁆𑀔𑀸𑀭𑁄 𑀧𑀜𑁆𑀘𑀫𑀸𑀲𑀓𑁄 𑀯𑀸 𑀅𑀢𑀺𑀭𑁂𑀓𑀧𑀜𑁆𑀘𑀫𑀸𑀲𑀓𑁄 𑀯𑀸, 𑀣𑁂𑀬𑁆𑀬𑀘𑀺𑀢𑁆𑀢𑀜𑁆𑀘 𑀧𑀘𑁆𑀘𑀼𑀧𑀝𑁆𑀞𑀺𑀢𑀁 𑀳𑁄𑀢𑀺, 𑀞𑀸𑀦𑀸 𑀘𑀸𑀯𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲𑀸’’𑀢𑀺 (𑀧𑀸𑀭𑀸. 𑁧𑁨𑁫) 𑀏𑀯𑀁 𑀯𑀼𑀢𑁆𑀢𑁂𑀲𑀼 𑀙𑀲𑀼 𑀧𑀤𑁂𑀲𑀼 𑀏𑀓𑀁 𑀅𑀧𑀦𑁂𑀢𑁆𑀯𑀸 𑀲𑁂𑀲𑀸𑀦𑀺 𑀧𑀜𑁆𑀘 𑀧𑀤𑀸𑀦𑀺 𑀏𑀓𑀁 𑀧𑀜𑁆𑀘𑀓𑀁 𑀓𑀢𑁆𑀯𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀧𑀜𑁆𑀘𑀓𑀜𑁆𑀘 𑀕𑀳𑁂𑀢𑁆𑀯𑀸 𑀤𑁆𑀯𑁂 𑀧𑀜𑁆𑀘𑀓𑀸𑀦𑀺 𑀤𑀲𑁆𑀲𑀺𑀢𑀸𑀦𑀺. 𑀏𑀢𑁆𑀣 𑀧𑀦𑀸𑀢𑀺 𑀧𑀜𑁆𑀘𑀳𑀸𑀓𑀸𑀭𑁂𑀳𑀻𑀢𑀺𑀆𑀤𑀻𑀲𑀼. 𑀲𑀩𑁆𑀩𑁂𑀳𑀺𑀧𑀺 𑀧𑀤𑁂𑀳𑀻𑀢𑀺 𑀧𑀭𑀧𑀭𑀺𑀕𑁆𑀕𑀳𑀺𑀢𑀜𑁆𑀘 𑀳𑁄𑀢𑀻𑀢𑀺𑀆𑀤𑀻𑀳𑀺 𑀲𑀩𑁆𑀩𑁂𑀳𑀺 𑀧𑀜𑁆𑀘𑀳𑀺 𑀧𑀤𑁂𑀳𑀺.

𑀧𑀜𑁆𑀘𑀦𑁆𑀦𑀁 𑀅𑀯𑀳𑀸𑀭𑀸𑀦𑀁 𑀲𑀫𑀽𑀳𑁄 𑀧𑀜𑁆𑀘𑀓𑀁. 𑀲𑀓𑁄 𑀳𑀢𑁆𑀣𑁄 𑀲𑀳𑀢𑁆𑀣𑁄, 𑀢𑁂𑀦 𑀦𑀺𑀩𑁆𑀩𑀢𑁆𑀢𑁄, 𑀢𑀲𑁆𑀲 𑀯𑀸 𑀲𑀫𑁆𑀩𑀦𑁆𑀥𑀻𑀢𑀺 𑀲𑀸𑀳𑀢𑁆𑀣𑀺𑀓𑁄, 𑀅𑀯𑀳𑀸𑀭𑁄. 𑀲𑀸𑀳𑀢𑁆𑀣𑀺𑀓𑀸𑀤𑀺 𑀧𑀜𑁆𑀘𑀓𑀁 𑀲𑀸𑀳𑀢𑁆𑀣𑀺𑀓𑀧𑀜𑁆𑀘𑀓𑀦𑁆𑀢𑀺𑀆𑀤𑀺𑀧𑀤𑀯𑀲𑁂𑀦 𑀦𑀸𑀫𑀮𑀸𑀪𑁄 𑀤𑀝𑁆𑀞𑀩𑁆𑀩𑁄. 𑀏𑀯𑀁 𑀲𑁂𑀲𑁂𑀲𑀼𑀧𑀺. 𑀢𑀢𑀺𑀬𑀧𑀜𑁆𑀘𑀫𑁂𑀲𑀼 𑀧𑀜𑁆𑀘𑀓𑁂𑀲𑀽𑀢𑀺 𑀲𑀸𑀳𑀢𑁆𑀣𑀺𑀓𑀧𑀜𑁆𑀘𑀓𑀣𑁂𑀬𑁆𑀬𑀸𑀯𑀳𑀸𑀭𑀧𑀜𑁆𑀘𑀓𑁂𑀲𑀼. 𑀮𑀩𑁆𑀪𑀫𑀸𑀦𑀧𑀤𑀯𑀲𑁂𑀦𑀸𑀢𑀺 𑀲𑀸𑀳𑀢𑁆𑀣𑀺𑀓𑀧𑀜𑁆𑀘𑀓𑁂 𑀮𑀩𑁆𑀪𑀫𑀸𑀦𑀲𑁆𑀲 𑀦𑀺𑀲𑁆𑀲𑀕𑁆𑀕𑀺𑀬𑀸𑀯𑀳𑀸𑀭𑀧𑀤𑀲𑁆𑀲 𑀯𑀲𑁂𑀦, 𑀣𑁂𑀬𑁆𑀬𑀸𑀯𑀳𑀸𑀭𑀧𑀜𑁆𑀘𑀓𑁂 𑀮𑀩𑁆𑀪𑀫𑀸𑀦𑀲𑁆𑀲 𑀧𑀭𑀺𑀓𑀧𑁆𑀧𑀸𑀯𑀳𑀸𑀭𑀧𑀤𑀲𑁆𑀲 𑀘 𑀯𑀲𑁂𑀦 𑀬𑁄𑀚𑁂𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄.

𑀦𑀺𑀲𑁆𑀲𑀕𑁆𑀕𑀺𑀬𑁄 𑀦𑀸𑀫…𑀧𑁂… 𑀧𑀸𑀭𑀸𑀚𑀺𑀓𑀲𑁆𑀲𑀸𑀢𑀺 𑀇𑀫𑀺𑀦𑀸 𑀩𑀳𑀺𑀲𑀼𑀗𑁆𑀓𑀖𑀸𑀢𑀧𑀸𑀢𑀦𑀁 𑀦𑀺𑀲𑁆𑀲𑀕𑁆𑀕𑀺𑀬𑀧𑀬𑁄𑀕𑁄𑀢𑀺 𑀤𑀲𑁆𑀲𑁂𑀢𑀺. ‘‘𑀳𑀢𑁆𑀣𑁂 𑀪𑀸𑀭𑀁 𑀣𑁂𑀬𑁆𑀬𑀘𑀺𑀢𑁆𑀢𑁄 𑀪𑀽𑀫𑀺𑀬𑀁 𑀦𑀺𑀓𑁆𑀔𑀺𑀧𑀢𑀺, 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲𑀸’’𑀢𑀺 (𑀧𑀸𑀭𑀸. 𑁧𑁦𑁧) 𑀯𑀼𑀢𑁆𑀢𑀢𑁆𑀢𑀸 𑀧𑀦 𑀲𑀼𑀤𑁆𑀥𑀘𑀺𑀢𑁆𑀢𑁂𑀦 𑀕𑀳𑀺𑀢𑀧𑀭𑀪𑀡𑁆𑀟𑀲𑁆𑀲 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀕𑀼𑀫𑁆𑀩𑀸𑀤𑀺𑀧𑀝𑀺𑀘𑁆𑀙𑀦𑁆𑀦𑀝𑁆𑀞𑀸𑀦𑁂 𑀔𑀺𑀧𑀦𑀫𑁆𑀧𑀺 𑀇𑀫𑀲𑁆𑀫𑀺𑀁 𑀦𑀺𑀲𑁆𑀲𑀕𑁆𑀕𑀺𑀬𑀧𑀬𑁄𑀕𑁂 𑀲𑀗𑁆𑀕𑀬𑁆𑀳𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀓𑀺𑀭𑀺𑀬𑀸𑀲𑀺𑀤𑁆𑀥𑀺𑀢𑁄 𑀧𑀼𑀭𑁂𑀢𑀭𑀫𑁂𑀯 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀲𑀗𑁆𑀔𑀸𑀢𑀁 𑀅𑀢𑁆𑀣𑀁 𑀲𑀸𑀥𑁂𑀢𑀻𑀢𑀺 𑀅𑀢𑁆𑀣𑀲𑀸𑀥𑀓𑁄. 𑀅𑀣 𑀯𑀸 𑀅𑀢𑁆𑀢𑀦𑁄 𑀯𑀢𑁆𑀢𑀫𑀸𑀦𑀓𑁆𑀔𑀡𑁂 𑀅𑀯𑀺𑀚𑁆𑀚𑀫𑀸𑀦𑀫𑁆𑀧𑀺 𑀓𑀺𑀭𑀺𑀬𑀸𑀲𑀺𑀤𑁆𑀥𑀺𑀲𑀗𑁆𑀔𑀸𑀢𑀁 𑀅𑀢𑁆𑀣𑀁 𑀅𑀯𑀲𑁆𑀲𑀁 𑀆𑀧𑀢𑁆𑀢𑀺𑀁 𑀲𑀸𑀥𑁂𑀢𑀻𑀢𑀺𑀧𑀺 𑀅𑀢𑁆𑀣𑀲𑀸𑀥𑀓𑁄. 𑀅𑀲𑀼𑀓𑀁 𑀦𑀸𑀫 𑀪𑀡𑁆𑀟𑀁 𑀬𑀤𑀸 𑀲𑀓𑁆𑀓𑁄𑀲𑀻𑀢𑀺 𑀇𑀤𑀁 𑀦𑀺𑀤𑀲𑁆𑀲𑀦𑀫𑀢𑁆𑀢𑀁 𑀧𑀭𑀲𑁆𑀲 𑀢𑁂𑀮𑀓𑀼𑀫𑁆𑀪𑀺𑀬𑀸 𑀉𑀧𑀸𑀳𑀦𑀸𑀤𑀻𑀦𑀁 𑀦𑀺𑀓𑁆𑀔𑁂𑀧𑀧𑀬𑁄𑀕𑀲𑁆𑀲𑀸𑀧𑀺 𑀅𑀢𑁆𑀣𑀲𑀸𑀥𑀓𑀢𑁆𑀢𑀸. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑀫𑀸𑀢𑀺𑀓𑀸𑀝𑁆𑀞𑀓𑀣𑀸𑀬𑀁 𑁋

‘‘𑀅𑀢𑁆𑀣𑀲𑀸𑀥𑀓𑁄 𑀦𑀸𑀫 ‘𑀅𑀲𑀼𑀓𑀲𑁆𑀲 𑀪𑀡𑁆𑀟𑀁 𑀬𑀤𑀸 𑀲𑀓𑁆𑀓𑁄𑀢𑀺, 𑀢𑀤𑀸 𑀢𑀁 𑀅𑀯𑀳𑀭𑀸’𑀢𑀺 𑀅𑀜𑁆𑀜𑀁 𑀆𑀡𑀸𑀧𑁂𑀢𑀺. 𑀢𑀢𑁆𑀣 𑀲𑀘𑁂 𑀧𑀭𑁄 𑀅𑀦𑀦𑁆𑀢𑀭𑀸𑀬𑀺𑀓𑁄 𑀳𑀼𑀢𑁆𑀯𑀸 𑀢𑀁 𑀅𑀯𑀳𑀭𑀢𑀺, 𑀆𑀡𑀸𑀧𑀓𑀲𑁆𑀲 𑀆𑀡𑀢𑁆𑀢𑀺𑀓𑁆𑀔𑀡𑁂𑀬𑁂𑀯 𑀧𑀸𑀭𑀸𑀚𑀺𑀓𑀁. 𑀧𑀭𑀲𑁆𑀲 𑀯𑀸 𑀧𑀦 𑀢𑁂𑀮𑀓𑀼𑀫𑁆𑀪𑀺𑀬𑀸 𑀧𑀸𑀤𑀕𑁆𑀖𑀦𑀓𑀢𑁂𑀮𑀁 𑀅𑀯𑀲𑁆𑀲𑀁 𑀧𑀺𑀯𑀦𑀓𑀸𑀦𑀺 𑀉𑀧𑀸𑀳𑀦𑀸𑀤𑀻𑀦𑀺 𑀧𑀓𑁆𑀔𑀺𑀧𑀢𑀺, 𑀳𑀢𑁆𑀣𑀢𑁄 𑀫𑀼𑀢𑁆𑀢𑀫𑀢𑁆𑀢𑁂𑀬𑁂𑀯 𑀧𑀸𑀭𑀸𑀚𑀺𑀓’’𑀦𑁆𑀢𑀺 (𑀓𑀗𑁆𑀔𑀸. 𑀅𑀝𑁆𑀞. 𑀤𑀼𑀢𑀺𑀬𑀧𑀸𑀭𑀸𑀚𑀺𑀓𑀯𑀡𑁆𑀡𑀦𑀸).

𑀇𑀫𑀲𑁆𑀲 𑀅𑀢𑁆𑀣𑀲𑀸𑀥𑀓𑀲𑁆𑀲 𑀆𑀡𑀢𑁆𑀢𑀺𑀬𑀸 𑀘 𑀓𑁄 𑀯𑀺𑀲𑁂𑀲𑁄𑀢𑀺? 𑀢𑀗𑁆𑀔𑀡𑀜𑁆𑀜𑁂𑀯 𑀕𑀳𑀡𑁂 𑀦𑀺𑀬𑀼𑀜𑁆𑀚𑀦𑀁 𑀆𑀡𑀢𑁆𑀢𑀺𑀓𑀧𑀬𑁄𑀕𑁄, 𑀓𑀸𑀮𑀦𑁆𑀢𑀭𑁂𑀦 𑀕𑀳𑀡𑀢𑁆𑀣𑀁 𑀦𑀺𑀬𑁄𑀕𑁄 𑀅𑀢𑁆𑀣𑀲𑀸𑀥𑀓𑁄𑀢𑀺 𑀅𑀬𑀁 𑀦𑁂𑀲𑀁 𑀯𑀺𑀲𑁂𑀲𑁄. 𑀢𑁂𑀦𑁂𑀯𑀸𑀳 ‘‘𑀅𑀲𑀼𑀓𑀁 𑀦𑀸𑀫 𑀪𑀡𑁆𑀟𑀁 𑀬𑀤𑀸 𑀲𑀓𑁆𑀓𑁄𑀲𑀻’’𑀢𑀺𑀆𑀤𑀺. 𑀥𑀼𑀭𑀦𑀺𑀓𑁆𑀔𑁂𑀧𑁄 𑀧𑀦 𑀉𑀧𑀦𑀺𑀓𑁆𑀔𑀺𑀢𑁆𑀢𑀪𑀡𑁆𑀟𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄𑀢𑀺 𑀇𑀤𑀁 𑀦𑀺𑀤𑀲𑁆𑀲𑀦𑀫𑀢𑁆𑀢𑀁, 𑀆𑀭𑀸𑀫𑀸𑀪𑀺𑀬𑀼𑀜𑁆𑀚𑀦𑀸𑀤𑀻𑀲𑀼𑀧𑀺 𑀢𑀸𑀯𑀓𑀸𑀮𑀺𑀓𑀪𑀡𑁆𑀟𑀤𑁂𑀬𑁆𑀬𑀸𑀦𑀁 𑀅𑀤𑀸𑀦𑁂𑀧𑀺 𑀏𑀲𑁂𑀯 𑀦𑀬𑁄. 𑀪𑀡𑁆𑀟𑀕𑁆𑀕𑀳𑀡𑀧𑁆𑀧𑀬𑁄𑀕𑀢𑁄 𑀆𑀡𑀢𑁆𑀢𑀺𑀬𑀸 𑀧𑀼𑀩𑁆𑀩𑀢𑁆𑀢𑀸 𑀆𑀳 ‘‘𑀆𑀡𑀢𑁆𑀢𑀺𑀯𑀲𑁂𑀦 𑀧𑀼𑀩𑁆𑀩𑀧𑀬𑁄𑀕𑁄 𑀯𑁂𑀤𑀺𑀢𑀩𑁆𑀩𑁄’’𑀢𑀺. 𑀧𑀬𑁄𑀕𑁂𑀦 𑀲𑀳 𑀯𑀢𑁆𑀢𑀫𑀸𑀦𑁄 𑀅𑀯𑀳𑀸𑀭𑁄 𑀲𑀳𑀧𑀬𑁄𑀕𑁄𑀢𑀺 𑀆𑀳 ‘‘𑀞𑀸𑀦𑀸𑀘𑀸𑀯𑀦𑀯𑀲𑁂𑀦𑀸’’𑀢𑀺, 𑀇𑀤𑀜𑁆𑀘 𑀦𑀺𑀤𑀲𑁆𑀲𑀦𑀫𑀢𑁆𑀢𑀁 𑀔𑀻𑀮𑀲𑀗𑁆𑀓𑀫𑀦𑀸𑀤𑀻𑀲𑀼𑀧𑀺 𑀅𑀲𑀢𑀺 𑀞𑀸𑀦𑀸𑀘𑀸𑀯𑀦𑁂 𑀲𑀳𑀧𑀬𑁄𑀕𑀢𑁆𑀢𑀸. 𑀯𑀼𑀢𑁆𑀢𑀜𑁆𑀳𑀺 𑀫𑀸𑀢𑀺𑀓𑀸𑀝𑁆𑀞𑀓𑀣𑀸𑀬𑀁 ‘‘𑀞𑀸𑀦𑀸𑀘𑀸𑀯𑀦𑀯𑀲𑁂𑀦 𑀔𑀻𑀮𑀸𑀤𑀻𑀦𑀺 𑀲𑀗𑁆𑀓𑀸𑀫𑁂𑀢𑁆𑀯𑀸 𑀔𑁂𑀢𑁆𑀢𑀸𑀤𑀺𑀕𑁆𑀕𑀳𑀡𑀯𑀲𑁂𑀦 𑀘 𑀲𑀳𑀧𑀬𑁄𑀕𑁄 𑀯𑁂𑀤𑀺𑀢𑀩𑁆𑀩𑁄’’𑀢𑀺 (𑀓𑀗𑁆𑀔𑀸. 𑀅𑀝𑁆𑀞. 𑀤𑀼𑀢𑀺𑀬𑀧𑀸𑀭𑀸𑀚𑀺𑀓𑀯𑀡𑁆𑀡𑀦𑀸).

𑀢𑀼𑀮𑀬𑀺𑀢𑁆𑀯𑀸𑀢𑀺 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸. 𑀲𑀸𑀫𑀻𑀘𑀻𑀢𑀺 𑀯𑀢𑁆𑀢𑀁. 𑀲𑀓𑀲𑀜𑁆𑀜𑀸𑀬 𑀅𑀤𑁂𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀦𑀢𑁆𑀣𑀻𑀢𑀺 𑀯𑀤𑀦𑁆𑀢𑀺. 𑀲𑀫𑁆𑀫𑀤𑁆𑀤𑁄𑀢𑀺 𑀦𑀺𑀯𑀺𑀤𑁆𑀥𑀢𑀸𑀲𑀗𑁆𑀔𑁄𑀪𑁄. 𑀪𑀝𑁆𑀞𑁂 𑀚𑀦𑀓𑀸𑀬𑁂𑀢𑀺 𑀅𑀧𑀕𑀢𑁂 𑀚𑀦𑀲𑀫𑀽𑀳𑁂. 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀓𑀢𑁆𑀯𑀸 𑀏𑀢𑀲𑁆𑀲𑁂𑀯 𑀪𑀺𑀓𑁆𑀔𑀼𑀦𑁄 𑀤𑁂𑀳𑀻𑀢𑀺 𑀇𑀤𑀁 𑀉𑀪𑀺𑀦𑁆𑀦𑀫𑁆𑀧𑀺 𑀓𑀼𑀓𑁆𑀓𑀼𑀘𑁆𑀘𑀯𑀺𑀦𑁄𑀤𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀅𑀯𑀳𑀸𑀭𑀓𑀲𑁆𑀲 𑀳𑀺 ‘‘𑀫𑀬𑀸 𑀲𑀳𑀢𑁆𑀣𑁂𑀦 𑀦 𑀤𑀺𑀦𑁆𑀦𑀁, 𑀪𑀡𑁆𑀟𑀤𑁂𑀬𑁆𑀬𑀁 𑀏𑀢’’𑀦𑁆𑀢𑀺 𑀓𑀼𑀓𑁆𑀓𑀼𑀘𑁆𑀘𑀁 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀇𑀢𑀭𑀲𑁆𑀲 𑀘 ‘‘𑀫𑀬𑀸 𑀧𑀞𑀫𑀁 𑀥𑀼𑀭𑀦𑀺𑀓𑁆𑀔𑁂𑀧𑀁 𑀓𑀢𑁆𑀯𑀸 𑀧𑀘𑁆𑀙𑀸 𑀅𑀤𑀺𑀦𑁆𑀦𑀁 𑀕𑀳𑀺𑀢’’𑀦𑁆𑀢𑀺 𑀓𑀼𑀓𑁆𑀓𑀼𑀘𑁆𑀘𑀁 𑀉𑀧𑁆𑀧𑀚𑁆𑀚𑁂𑀬𑁆𑀬𑀸𑀢𑀺.

𑀲𑀫𑀕𑁆𑀖𑀦𑁆𑀢𑀺 𑀅𑀧𑁆𑀧𑀕𑁆𑀖𑀁. 𑀤𑀸𑀭𑀼𑀅𑀢𑁆𑀣𑀁 𑀨𑀭𑀢𑀻𑀢𑀺 𑀤𑀸𑀭𑀽𑀳𑀺 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀁 𑀲𑀸𑀥𑁂𑀢𑀺. 𑀏𑀓𑀤𑀺𑀯𑀲𑀁 𑀤𑀦𑁆𑀢𑀓𑀝𑁆𑀞𑀘𑁆𑀙𑁂𑀤𑀦𑀸𑀤𑀺𑀦𑀸 𑀬𑀸 𑀅𑀬𑀁 𑀅𑀕𑁆𑀖𑀳𑀸𑀦𑀺 𑀯𑀼𑀢𑁆𑀢𑀸, 𑀲𑀸 𑀲𑀩𑁆𑀩𑀸 𑀪𑀡𑁆𑀟𑀲𑀸𑀫𑀺𑀦𑀸 𑀓𑀺𑀡𑀺𑀢𑁆𑀯𑀸 𑀕𑀳𑀺𑀢𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀸. 𑀲𑀩𑁆𑀩𑀁 𑀧𑀦𑁂𑀢𑀁 𑀅𑀝𑁆𑀞𑀓𑀣𑀸𑀘𑀭𑀺𑀬𑀧𑁆𑀧𑀫𑀸𑀡𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀧𑀸𑀲𑀸𑀡𑀜𑁆𑀘 𑀲𑀓𑁆𑀔𑀭𑀜𑁆𑀘 𑀧𑀸𑀲𑀸𑀡𑀲𑀓𑁆𑀔𑀭𑀁.

𑀅𑀓𑁆𑀔𑀤𑀲𑁆𑀲𑀸𑀢𑀺 𑀏𑀢𑁆𑀣 𑀅𑀓𑁆𑀔-𑀲𑀤𑁆𑀤𑁂𑀦 𑀓𑀺𑀭 𑀯𑀺𑀦𑀺𑀘𑁆𑀙𑀬𑀲𑀸𑀮𑀸 𑀯𑀼𑀘𑁆𑀘𑀢𑀺, 𑀢𑀢𑁆𑀣 𑀦𑀺𑀲𑀻𑀤𑀺𑀢𑁆𑀯𑀸 𑀯𑀚𑁆𑀚𑀸𑀯𑀚𑁆𑀚𑀁 𑀦𑀺𑀭𑀽𑀧𑀬𑀦𑁆𑀢𑀻𑀢𑀺 ‘‘𑀅𑀓𑁆𑀔𑀤𑀲𑁆𑀲𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺 𑀥𑀫𑁆𑀫𑀯𑀺𑀦𑀺𑀘𑁆𑀙𑀦𑀓𑀸. 𑀳𑀦𑀦𑀁 𑀦𑀸𑀫 𑀳𑀢𑁆𑀣𑀧𑀸𑀤𑀸𑀤𑀻𑀳𑀺 𑀧𑁄𑀣𑀦𑀜𑁆𑀘𑁂𑀯 𑀳𑀢𑁆𑀣𑀦𑀸𑀲𑀸𑀤𑀺𑀘𑁆𑀙𑁂𑀤𑀦𑀜𑁆𑀘 𑀳𑁄𑀢𑀻𑀢𑀺 𑀆𑀳 ‘‘𑀳𑀦𑁂𑀬𑁆𑀬𑀼𑀦𑁆𑀢𑀺 𑀧𑁄𑀣𑁂𑀬𑁆𑀬𑀼𑀜𑁆𑀘𑁂𑀯 𑀙𑀺𑀦𑁆𑀤𑁂𑀬𑁆𑀬𑀼𑀜𑁆𑀘𑀸’’𑀢𑀺.

𑀧𑀤𑀪𑀸𑀚𑀦𑀻𑀬𑀜𑁆𑀘 ‘‘𑀳𑀢𑁆𑀣𑁂𑀦 𑀯𑀸 𑀧𑀸𑀤𑁂𑀦 𑀯𑀸 𑀓𑀲𑀸𑀬 𑀯𑀸 𑀯𑁂𑀢𑁆𑀢𑁂𑀦 𑀯𑀸 𑀅𑀟𑁆𑀠𑀤𑀡𑁆𑀟𑀓𑁂𑀦 𑀯𑀸 𑀙𑀚𑁆𑀚𑀸𑀬 𑀯𑀸 𑀳𑀦𑁂𑀬𑁆𑀬𑀼’’𑀦𑁆𑀢𑀺 (𑀧𑀸𑀭𑀸. 𑁯𑁨) 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀟𑁆𑀠𑀤𑀡𑁆𑀟𑀓𑁂𑀦𑀸𑀢𑀺 𑀤𑁆𑀯𑀺𑀳𑀢𑁆𑀣𑀧𑁆𑀧𑀫𑀸𑀡𑁂𑀦 𑀭𑀲𑁆𑀲𑀫𑀼𑀕𑁆𑀕𑀭𑁂𑀦, 𑀯𑁂𑀴𑀼𑀧𑁂𑀲𑀺𑀓𑀸𑀬 𑀯𑀸. 𑀙𑁂𑀚𑁆𑀚𑀸𑀬 𑀯𑀸𑀢𑀺 𑀳𑀢𑁆𑀣𑀸𑀤𑀻𑀦𑀁 𑀙𑁂𑀤𑀦𑁂𑀦. 𑀙𑀺𑀦𑁆𑀤𑀦𑁆𑀢𑀺 𑀏𑀢𑀸𑀬 𑀳𑀢𑁆𑀣𑀧𑀸𑀤𑀸𑀤𑀻𑀦𑀻𑀢𑀺 𑀙𑁂𑀚𑁆𑀚𑀸, 𑀲𑀢𑁆𑀣𑀁, 𑀢𑁂𑀦 𑀲𑀢𑁆𑀣𑁂𑀦𑀸𑀢𑀺𑀧𑀺 𑀅𑀢𑁆𑀣𑁄. 𑀦𑀻𑀳𑀭𑁂𑀬𑁆𑀬𑀼𑀦𑁆𑀢𑀺 𑀭𑀝𑁆𑀞𑀢𑁄 𑀦𑀻𑀳𑀭𑁂𑀬𑁆𑀬𑀼𑀁. ‘‘𑀘𑁄𑀭𑁄𑀲𑀺…𑀧𑁂… 𑀣𑁂𑀦𑁄𑀲𑀻’’𑀢𑀺 𑀏𑀢𑁆𑀣 𑀧𑀭𑀺𑀪𑀸𑀲𑁂𑀬𑁆𑀬𑀼𑀦𑁆𑀢𑀺 𑀧𑀤𑀁 𑀅𑀚𑁆𑀛𑀸𑀳𑀭𑀺𑀢𑁆𑀯𑀸 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀆𑀳 ‘‘𑀘𑁄𑀭𑁄𑀲𑀺…𑀧𑁂… 𑀧𑀭𑀺𑀪𑀸𑀲𑁂𑀬𑁆𑀬𑀼’’𑀦𑁆𑀢𑀺. 𑀬𑀁 𑀢𑀁 𑀪𑀡𑁆𑀟𑀁 𑀤𑀲𑁆𑀲𑀺𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑁯𑁩. 𑀬𑀢𑁆𑀣 𑀬𑀢𑁆𑀣 𑀞𑀺𑀢𑀦𑁆𑀢𑀺 𑀪𑀽𑀫𑀺𑀬𑀸𑀤𑀻𑀲𑀼 𑀬𑀢𑁆𑀣 𑀬𑀢𑁆𑀣 𑀞𑀺𑀢𑀁. 𑀬𑀣𑀸 𑀬𑀣𑀸 𑀆𑀤𑀸𑀦𑀁 𑀕𑀘𑁆𑀙𑀢𑀻𑀢𑀺 𑀬𑁂𑀦 𑀬𑁂𑀦 𑀆𑀓𑀸𑀭𑁂𑀦 𑀕𑀳𑀡𑀁 𑀉𑀧𑀕𑀘𑁆𑀙𑀢𑀺.

𑀪𑀽𑀫𑀝𑁆𑀞𑀓𑀣𑀸𑀯𑀡𑁆𑀡𑀦𑀸

𑁯𑁪. 𑀯𑀸𑀘𑀸𑀬 𑀯𑀸𑀘𑀸𑀬𑀸𑀢𑀺 𑀏𑀓𑁂𑀓𑀢𑁆𑀣𑀤𑀻𑀧𑀺𑀓𑀸𑀬 𑀯𑀸𑀘𑀸𑀬 𑀯𑀸𑀘𑀸𑀬. 𑀉𑀧𑀮𑀤𑁆𑀥𑁄𑀢𑀺 𑀜𑀸𑀢𑁄. 𑀧𑀸𑀴𑀺𑀬𑀁 𑀲𑁂𑀲𑀅𑀝𑁆𑀞𑀓𑀣𑀸𑀲𑀼 𑀘 𑀓𑀼𑀤𑀸𑀮𑀁 𑀯𑀸 𑀧𑀺𑀝𑀓𑀁 𑀯𑀸𑀢𑀺 𑀇𑀤𑀫𑁂𑀯 𑀤𑁆𑀯𑀬𑀁 𑀯𑀢𑁆𑀯𑀸 𑀯𑀸𑀲𑀺𑀨𑀭𑀲𑀽𑀦𑀁 𑀅𑀯𑀼𑀢𑁆𑀢𑀢𑁆𑀢𑀸 𑀢𑁂𑀲𑀫𑁆𑀧𑀺 𑀲𑀗𑁆𑀔𑁂𑀧𑀝𑁆𑀞𑀓𑀣𑀸𑀤𑀻𑀲𑀼 𑀆𑀕𑀢𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 𑀲𑀗𑁆𑀔𑁂𑀧𑀝𑁆𑀞𑀓𑀣𑀸𑀬𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀓𑀢𑀢𑁆𑀢𑀸 ‘‘𑀤𑀼𑀓𑁆𑀓𑀝𑁂𑀳𑀺 𑀲𑀤𑁆𑀥𑀺𑀁 𑀧𑀸𑀘𑀺𑀢𑁆𑀢𑀺𑀬𑀸𑀦𑀻’’𑀢𑀺 𑀯𑀼𑀢𑁆𑀢𑀁.

𑀅𑀝𑁆𑀞𑀯𑀺𑀥𑀁 𑀳𑁂𑀢𑀦𑁆𑀢𑀺𑀆𑀤𑀻𑀲𑀼 𑀏𑀢𑀁 𑀤𑀼𑀓𑁆𑀓𑀝𑀁 𑀦𑀸𑀫 𑀣𑁂𑀭𑁂𑀳𑀺 𑀥𑀫𑁆𑀫𑀲𑀗𑁆𑀕𑀸𑀳𑀓𑁂𑀳𑀺 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀲𑀫𑁄𑀥𑀸𑀦𑁂𑀢𑁆𑀯𑀸 𑀅𑀝𑁆𑀞𑀯𑀺𑀥𑀦𑁆𑀢𑀺 𑀤𑀲𑁆𑀲𑀺𑀢𑀦𑁆𑀢𑀺 𑀬𑁄𑀚𑀦𑀸. 𑀲𑀩𑁆𑀩𑁂𑀲𑀫𑁆𑀧𑀺 𑀤𑀼𑀓𑁆𑀓𑀝𑀸𑀦𑀁 𑀇𑀫𑁂𑀲𑀼𑀬𑁂𑀯 𑀅𑀝𑁆𑀞𑀲𑀼 𑀲𑀗𑁆𑀕𑀳𑁂𑀢𑀩𑁆𑀩𑀪𑀸𑀯𑀢𑁄 𑀧𑀦 𑀇𑀢𑀭𑁂𑀳𑀺 𑀲𑀢𑁆𑀢𑀳𑀺 𑀤𑀼𑀓𑁆𑀓𑀝𑁂𑀳𑀺 𑀯𑀺𑀦𑀺𑀫𑀼𑀢𑁆𑀢𑀁 𑀯𑀺𑀦𑀬𑀤𑀼𑀓𑁆𑀓𑀝𑁂𑀬𑁂𑀯 𑀲𑀗𑁆𑀕𑀳𑁂𑀢𑀩𑁆𑀩𑀁. 𑀤𑀲𑀯𑀺𑀥𑀁 𑀭𑀢𑀦𑀦𑁆𑀢𑀺 ‘‘𑀫𑀼𑀢𑁆𑀢𑀸 𑀫𑀡𑀺 𑀯𑁂𑀴𑀼𑀭𑀺𑀬𑁄 𑀲𑀗𑁆𑀔𑁄 𑀲𑀺𑀮𑀸 𑀧𑀯𑀸𑀴𑀁 𑀭𑀚𑀢𑀁 𑀚𑀸𑀢𑀭𑀽𑀧𑀁 𑀮𑁄𑀳𑀺𑀢𑀓𑁄 𑀫𑀲𑀸𑀭𑀕𑀮𑁆𑀮’’𑀦𑁆𑀢𑀺 𑀏𑀯𑀫𑀸𑀕𑀢𑀁 𑀤𑀲𑀯𑀺𑀥𑀁 𑀭𑀢𑀦𑀁.

‘‘𑀫𑀼𑀢𑁆𑀢𑀸 𑀫𑀡𑀺 𑀯𑁂𑀴𑀼𑀭𑀺𑀬𑁄 𑀘 𑀲𑀗𑁆𑀔𑁄,

𑀲𑀺𑀮𑀸 𑀧𑀯𑀸𑀴𑀁 𑀭𑀚𑀢𑀜𑁆𑀘 𑀳𑁂𑀫𑀁;

𑀮𑁄𑀳𑀺𑀢𑀓𑀜𑁆𑀘 𑀫𑀲𑀸𑀭𑀕𑀮𑁆𑀮𑀁,

𑀤𑀲𑁂𑀢𑁂 𑀥𑀻𑀭𑁄 𑀭𑀢𑀦𑀸𑀦𑀺 𑀚𑀜𑁆𑀜𑀸’’𑀢𑀺. 𑁋

𑀳𑀺 𑀯𑀼𑀢𑁆𑀢𑀁. 𑀲𑀢𑁆𑀢𑀯𑀺𑀥𑀁 𑀥𑀜𑁆𑀜𑀦𑁆𑀢𑀺 𑀲𑀸𑀮𑀺 𑀯𑀻𑀳𑀺 𑀬𑀯𑁄 𑀓𑀗𑁆𑀕𑀼 𑀓𑀼𑀤𑁆𑀭𑀽𑀲𑀁 𑀯𑀭𑀓𑁄 𑀕𑁄𑀥𑀼𑀫𑁄𑀢𑀺 𑀇𑀫𑀁 𑀲𑀢𑁆𑀢𑀯𑀺𑀥𑀁 𑀥𑀜𑁆𑀜𑀁. 𑀆𑀯𑀼𑀥𑀪𑀡𑁆𑀟𑀸𑀤𑀺𑀦𑁆𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀢𑀼𑀭𑀺𑀬𑀪𑀡𑁆𑀟𑀇𑀢𑁆𑀣𑀺𑀭𑀽𑀧𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀅𑀦𑀸𑀫𑀲𑀺𑀢𑀩𑁆𑀩𑁂 𑀯𑀢𑁆𑀣𑀼𑀫𑁆𑀳𑀺 𑀤𑀼𑀓𑁆𑀓𑀝𑀁 𑀅𑀦𑀸𑀫𑀸𑀲𑀤𑀼𑀓𑁆𑀓𑀝𑀁. 𑀤𑀼𑀭𑀽𑀧𑀘𑀺𑀡𑁆𑀡𑀤𑀼𑀓𑁆𑀓𑀝𑀦𑁆𑀢𑀺 ‘‘𑀅𑀓𑀢𑁆𑀢𑀩𑁆𑀩’’𑀦𑁆𑀢𑀺 𑀯𑀸𑀭𑀺𑀢𑀲𑁆𑀲 𑀓𑀢𑀢𑁆𑀢𑀸 𑀤𑀼𑀝𑁆𑀞𑀼 𑀉𑀧𑀘𑀺𑀡𑁆𑀡𑀁 𑀘𑀭𑀺𑀢𑀦𑁆𑀢𑀺 𑀤𑀼𑀭𑀽𑀧𑀘𑀺𑀡𑁆𑀡𑀁, 𑀢𑀲𑁆𑀫𑀺𑀁 𑀤𑀼𑀓𑁆𑀓𑀝𑀁 𑀤𑀼𑀭𑀽𑀧𑀘𑀺𑀡𑁆𑀡𑀤𑀼𑀓𑁆𑀓𑀝𑀁. 𑀯𑀺𑀦𑀬𑁂 𑀧𑀜𑁆𑀜𑀢𑁆𑀢𑀁 𑀅𑀯𑀲𑁂𑀲𑀁 𑀤𑀼𑀓𑁆𑀓𑀝𑀁 𑀯𑀺𑀦𑀬𑀤𑀼𑀓𑁆𑀓𑀝𑀁. 𑀏𑀓𑀸𑀤𑀲 𑀲𑀫𑀦𑀼𑀪𑀸𑀲𑀦𑀸 𑀦𑀸𑀫 𑀪𑀺𑀓𑁆𑀔𑀼𑀧𑀸𑀢𑀺𑀫𑁄𑀓𑁆𑀔𑁂 𑀘𑀢𑁆𑀢𑀸𑀭𑁄 𑀬𑀸𑀯𑀢𑀢𑀺𑀬𑀓𑀸 𑀲𑀗𑁆𑀖𑀸𑀤𑀺𑀲𑁂𑀲𑀸 𑀅𑀭𑀺𑀝𑁆𑀞𑀲𑀺𑀓𑁆𑀔𑀸𑀧𑀤𑀦𑁆𑀢𑀺 𑀧𑀜𑁆𑀘, 𑀪𑀺𑀓𑁆𑀔𑀼𑀦𑀻𑀧𑀸𑀢𑀺𑀫𑁄𑀓𑁆𑀔𑁂 𑀏𑀓𑀁 𑀬𑀸𑀯𑀢𑀢𑀺𑀬𑀓𑀧𑀸𑀭𑀸𑀚𑀺𑀓𑀁 𑀘𑀢𑁆𑀢𑀸𑀭𑁄 𑀲𑀗𑁆𑀖𑀸𑀤𑀺𑀲𑁂𑀲𑀸 𑀘𑀡𑁆𑀟𑀓𑀸𑀴𑀻𑀲𑀺𑀓𑁆𑀔𑀸𑀧𑀤𑀦𑁆𑀢𑀺 𑀙.

𑀲𑀳𑀧𑀬𑁄𑀕𑀢𑁄 𑀧𑀝𑁆𑀞𑀸𑀬 𑀘𑁂𑀢𑁆𑀣 𑀧𑀼𑀭𑀺𑀫𑀧𑀼𑀭𑀺𑀫𑀸 𑀆𑀧𑀢𑁆𑀢𑀺𑀬𑁄 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑁆𑀢𑀻𑀢𑀺 𑀆𑀳 𑀅𑀣 𑀥𑀼𑀭𑀦𑀺𑀓𑁆𑀔𑁂𑀧𑀁 𑀅𑀓𑀢𑁆𑀯𑀸𑀢𑀺𑀆𑀤𑀺. ‘‘𑀥𑀼𑀭𑀦𑀺𑀓𑁆𑀔𑁂𑀧𑀁 𑀅𑀓𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀥𑀼𑀭𑀦𑀺𑀓𑁆𑀔𑁂𑀧𑀁 𑀓𑀢𑁆𑀯𑀸 𑀧𑀼𑀦 𑀔𑀡𑀦𑁆𑀢𑀲𑁆𑀲 𑀧𑀼𑀭𑀺𑀫𑀸𑀧𑀢𑁆𑀢𑀺𑀬𑁄 𑀦 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑁆𑀢𑀻𑀢𑀺 𑀯𑀤𑀦𑁆𑀢𑀺. ‘‘𑀙𑁂𑀤𑀦𑀧𑀘𑁆𑀘𑀬𑀸 𑀤𑀼𑀓𑁆𑀓𑀝𑀁 𑀤𑁂𑀲𑁂𑀢𑁆𑀯𑀸 𑀫𑀼𑀘𑁆𑀘𑀢𑀻’’𑀢𑀺 𑀯𑀢𑁆𑀯𑀸 𑀧𑀼𑀩𑁆𑀩𑀧𑀬𑁄𑀕𑁂 𑀆𑀧𑀢𑁆𑀢𑀻𑀦𑀁 𑀤𑁂𑀲𑁂𑀢𑀩𑁆𑀩𑀢𑀸𑀬 𑀅𑀯𑀼𑀢𑁆𑀢𑀢𑁆𑀢𑀸 𑀲𑀳𑀧𑀬𑁄𑀕𑁂 𑀧𑀢𑁆𑀢𑁂 𑀧𑀼𑀩𑁆𑀩𑀧𑀬𑁄𑀕𑁂 𑀆𑀧𑀢𑁆𑀢𑀺𑀬𑁄 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀅𑀧𑀭𑀤𑁆𑀥𑀁 𑀯𑀺𑀭𑀤𑁆𑀥𑀁 𑀔𑀮𑀺𑀢𑀦𑁆𑀢𑀺 𑀲𑀩𑁆𑀩𑀫𑁂𑀢𑀁 𑀬𑀜𑁆𑀘 𑀤𑀼𑀓𑁆𑀓𑀝𑀦𑁆𑀢𑀺 𑀏𑀢𑁆𑀣 𑀯𑀼𑀢𑁆𑀢𑀲𑁆𑀲 𑀤𑀼𑀓𑁆𑀓𑀝𑀲𑁆𑀲 𑀧𑀭𑀺𑀬𑀸𑀬𑀯𑀘𑀦𑀁, 𑀬𑀁 𑀫𑀦𑀼𑀲𑁆𑀲𑁄 𑀓𑀭𑁂𑀢𑀺𑀆𑀤𑀺 𑀧𑀦𑁂𑀢𑁆𑀣 𑀑𑀧𑀫𑁆𑀫𑀦𑀺𑀤𑀲𑁆𑀲𑀦𑀁. 𑀲𑀁𑀬𑁄𑀕𑀪𑀸𑀯𑁄𑀢𑀺 𑀤𑁆𑀯𑀺𑀢𑁆𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀢𑁂𑀦 𑀭𑀲𑁆𑀲𑀢𑁆𑀢𑀲𑁆𑀲𑀸𑀧𑀺 𑀦𑀺𑀫𑀺𑀢𑁆𑀢𑀁 𑀤𑀲𑁆𑀲𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀏𑀓𑀲𑁆𑀲 𑀫𑀽𑀮𑁂𑀢𑀺 𑀏𑀓𑀲𑁆𑀲 𑀲𑀦𑁆𑀢𑀺𑀓𑁂. 𑀲𑀩𑁆𑀩𑀢𑁆𑀣𑀸𑀧𑀺 𑀆𑀫𑀲𑀦𑁂 𑀤𑀼𑀓𑁆𑀓𑀝𑀁, 𑀨𑀦𑁆𑀤𑀸𑀧𑀦𑁂 𑀣𑀼𑀮𑁆𑀮𑀘𑁆𑀘𑀬𑀜𑁆𑀘 𑀯𑀺𑀲𑀼𑀁 𑀯𑀺𑀲𑀼𑀁 𑀆𑀫𑀲𑀦𑀨𑀦𑁆𑀤𑀸𑀧𑀦𑀧𑀬𑁄𑀕𑀁 𑀓𑀭𑁄𑀦𑁆𑀢𑀲𑁆𑀲𑁂𑀯 𑀳𑁄𑀢𑀺, 𑀏𑀓𑀧𑀬𑁄𑀕𑁂𑀦 𑀕𑀡𑁆𑀳𑀦𑁆𑀢𑀲𑁆𑀲 𑀧𑀦 𑀉𑀤𑁆𑀥𑀸𑀭𑁂 𑀧𑀸𑀭𑀸𑀚𑀺𑀓𑀫𑁂𑀯, 𑀦 𑀤𑀼𑀓𑁆𑀓𑀝𑀣𑀼𑀮𑁆𑀮𑀘𑁆𑀘𑀬𑀸𑀦𑀻𑀢𑀺 𑀯𑀤𑀦𑁆𑀢𑀺, 𑀏𑀓𑀧𑀬𑁄𑀕𑁂𑀦 𑀕𑀡𑁆𑀳𑀦𑁆𑀢𑀲𑁆𑀲𑀸𑀧𑀺 𑀆𑀫𑀲𑀦𑀨𑀦𑁆𑀤𑀸𑀧𑀦𑀸𑀦𑀫𑁆𑀧𑀺 𑀮𑀩𑁆𑀪𑀫𑀸𑀦𑀢𑁆𑀢𑀸 𑀢𑀁 𑀦 𑀕𑀳𑁂𑀢𑀩𑁆𑀩𑀁. 𑀦 𑀳𑀺 𑀲𑀓𑁆𑀓𑀸 𑀅𑀦𑀸𑀫𑀲𑀺𑀢𑁆𑀯𑀸 𑀅𑀨𑀦𑁆𑀤𑀸𑀧𑁂𑀢𑁆𑀯𑀸 𑀘 𑀓𑀺𑀜𑁆𑀘𑀺 𑀕𑀳𑁂𑀢𑀼𑀁. ‘‘𑀏𑀓𑀫𑁂𑀯 𑀤𑁂𑀲𑁂𑀢𑁆𑀯𑀸 𑀫𑀼𑀘𑁆𑀘𑀢𑀻’’𑀢𑀺 𑀧𑀁𑀲𑀼𑀔𑀡𑀦𑀸𑀤𑀺𑀲𑀫𑀸𑀦𑀧𑀬𑁄𑀕𑁂𑀧𑀺 𑀧𑀼𑀭𑀺𑀫𑀸 𑀆𑀧𑀢𑁆𑀢𑀺 𑀉𑀢𑁆𑀢𑀭𑀫𑀼𑀢𑁆𑀢𑀭𑀁 𑀆𑀧𑀢𑁆𑀢𑀺𑀁 𑀧𑀢𑁆𑀯𑀸 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑁆𑀢𑀻𑀢𑀺 𑀲𑀜𑁆𑀜𑀸𑀬 𑀓𑀼𑀭𑀼𑀦𑁆𑀤𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁, 𑀇𑀢𑀭𑀝𑁆𑀞𑀓𑀣𑀸𑀲𑀼 𑀧𑀦 𑀔𑀡𑀦𑀧𑀬𑁄𑀕𑀪𑁂𑀤𑁂𑀳𑀺 𑀧𑀬𑁄𑀕𑁂 𑀧𑀬𑁄𑀕𑁂 𑀆𑀧𑀦𑁆𑀦𑀸 𑀆𑀧𑀢𑁆𑀢𑀺𑀬𑁄 𑀉𑀢𑁆𑀢𑀭𑀫𑀼𑀢𑁆𑀢𑀭𑀁 𑀧𑀢𑁆𑀯𑀸 𑀦 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑁆𑀢𑀺 𑀅𑀜𑁆𑀜𑀫𑀜𑁆𑀜𑀁 𑀲𑀤𑀺𑀲𑀢𑁆𑀢𑀸 𑀯𑀺𑀬𑀽𑀳𑀦𑀁 𑀧𑀢𑁆𑀯𑀸 𑀢𑀸 𑀲𑀩𑁆𑀩𑀸𑀧𑀺 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑁆𑀢𑀺 𑀯𑀺𑀲𑀤𑀺𑀲𑀧𑀬𑁄𑀕𑀢𑁆𑀢𑀸𑀢𑀺 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀯𑀺𑀥𑀸𑀦𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀇𑀫𑀺𑀦𑀸 𑀳𑀺 𑀅𑀯𑀳𑀸𑀭𑀓𑀲𑁆𑀲 𑀆𑀲𑀦𑁆𑀦𑀁 𑀑𑀭𑀺𑀫𑀦𑁆𑀢𑀁 𑀧𑀭𑀸𑀫𑀲𑀢𑀺.

𑀢𑀢𑁆𑀣𑁂𑀯𑀸𑀢𑀺 𑀫𑀼𑀔𑀯𑀝𑁆𑀝𑀺𑀬𑀫𑁂𑀯. 𑀩𑀼𑀦𑁆𑀤𑁂𑀦𑀸𑀢𑀺 𑀓𑀼𑀫𑁆𑀪𑀺𑀬𑀸 𑀳𑁂𑀝𑁆𑀞𑀺𑀫𑀢𑀮𑁂𑀦. 𑀏𑀓𑀝𑁆𑀞𑀸𑀦𑁂 𑀞𑀺𑀢𑀸𑀬 𑀓𑀼𑀫𑁆𑀪𑀺𑀬𑀸 𑀞𑀸𑀦𑀸 𑀘𑀸𑀯𑀦𑀁 𑀙𑀳𑀺 𑀆𑀓𑀸𑀭𑁂𑀳𑀺 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀓𑀝𑁆𑀞𑀸𑀦𑁂𑀢𑀺 𑀘 𑀲𑀗𑁆𑀔𑀮𑀺𑀓𑀩𑀤𑁆𑀥𑀪𑀸𑀯𑁂𑀦 𑀏𑀓𑀲𑁆𑀫𑀺𑀁 𑀧𑀢𑀺𑀝𑁆𑀞𑀺𑀢𑁄𑀓𑀸𑀲𑀝𑁆𑀞𑀸𑀦𑁂𑀢𑀺 𑀅𑀢𑁆𑀣𑁄. 𑀔𑀸𑀡𑀼𑀓𑀁 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀞𑀸𑀦𑀸 𑀘𑀸𑀯𑁂𑀢𑀻𑀢𑀺 𑀔𑀸𑀡𑀼𑀓𑀁 𑀅𑀢𑁆𑀢𑀦𑁄 𑀧𑀢𑀺𑀝𑁆𑀞𑀺𑀢𑀝𑁆𑀞𑀸𑀦𑀢𑁄 𑀧𑀜𑁆𑀘𑀳𑀺 𑀆𑀓𑀸𑀭𑁂𑀳𑀺 𑀞𑀸𑀦𑀸 𑀘𑀸𑀯𑁂𑀢𑀺. 𑀙𑀺𑀦𑁆𑀦𑀫𑀢𑁆𑀢𑁂 𑀧𑀸𑀭𑀸𑀚𑀺𑀓𑀦𑁆𑀢𑀺 𑀅𑀯𑀲𑁆𑀲𑀁 𑀘𑁂 𑀧𑀢𑀢𑀺, 𑀙𑀺𑀦𑁆𑀦𑀫𑀢𑁆𑀢𑁂 𑀧𑀸𑀭𑀸𑀚𑀺𑀓𑀁. 𑀧𑀭𑀺𑀘𑁆𑀙𑁂𑀤𑁄𑀢𑀺 𑀧𑀜𑁆𑀘𑀫𑀸𑀲𑀓𑀸𑀤𑀺𑀕𑀭𑀼𑀪𑀸𑀯𑀧𑀭𑀺𑀘𑁆𑀙𑁂𑀤𑁄. 𑀅𑀧𑀩𑁆𑀬𑀽𑀳𑀦𑁆𑀢𑁄𑀢𑀺 𑀞𑀺𑀢𑀝𑁆𑀞𑀸𑀦𑀢𑁄 𑀅𑀧𑀦𑀬𑀦𑀯𑀲𑁂𑀦 𑀯𑀺𑀬𑀽𑀳𑀦𑁆𑀢𑁄 𑀭𑀸𑀲𑀺𑀁 𑀓𑀭𑁄𑀦𑁆𑀢𑁄. 𑀏𑀯𑀁 𑀓𑀢𑁆𑀯𑀸𑀢𑀺 𑀪𑀸𑀚𑀦𑀫𑀼𑀔𑀯𑀝𑁆𑀝𑀺𑀬𑀸 𑀓𑀼𑀫𑁆𑀪𑀺𑀕𑀢𑁂𑀦 𑀪𑀸𑀚𑀦𑀕𑀢𑀲𑁆𑀲 𑀏𑀓𑀸𑀩𑀤𑁆𑀥𑀪𑀸𑀯𑀁 𑀯𑀺𑀬𑁄𑀚𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀉𑀧𑀟𑁆𑀠𑀓𑀼𑀫𑁆𑀪𑀻𑀬𑀦𑁆𑀢𑀺 𑀉𑀧𑀟𑁆𑀠𑀧𑀼𑀡𑁆𑀡𑀸𑀬 𑀓𑀼𑀫𑁆𑀪𑀺𑀬𑀸. 𑀯𑀺𑀦𑀬𑀥𑀫𑁆𑀫𑀢𑀸𑀢𑀺 𑀅𑀥𑀺𑀓𑀓𑀸𑀭𑀡𑀸𑀮𑀸𑀪𑁂 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑀥𑀫𑁆𑀫𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦 𑀓𑁂𑀯𑀮𑀜𑁆𑀘𑁂𑀢𑁆𑀣 𑀕𑀭𑀼𑀓𑀢𑀸𑀯, 𑀲𑀼𑀢𑁆𑀢𑀸𑀦𑀼𑀕𑀫𑀦𑀫𑁆𑀧𑀺 𑀅𑀢𑁆𑀣𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀅𑀧𑀺𑀘𑀸𑀢𑀺𑀆𑀤𑀺𑀫𑀸𑀳. 𑀓𑀡𑁆𑀞𑁂𑀦 𑀧𑀦 𑀧𑀭𑀺𑀘𑁆𑀙𑀺𑀦𑁆𑀦𑀓𑀸𑀮𑁂𑀢𑀺 𑀫𑀼𑀔𑀕𑀢𑀁 𑀅𑀚𑁆𑀛𑁄𑀳𑀝𑀓𑀸𑀮𑁂𑀢𑀺 𑀅𑀢𑁆𑀣𑁄. 𑀅𑀚𑁆𑀛𑁄𑀳𑀭𑀡𑀫𑁂𑀯 𑀳𑁂𑀢𑁆𑀣 𑀧𑀭𑀺𑀘𑁆𑀙𑀺𑀦𑁆𑀤𑀦𑀁, 𑀦 𑀓𑀡𑁆𑀞𑀧𑀺𑀤𑀳𑀦𑀁. 𑀘𑀺𑀓𑁆𑀓𑀦𑀦𑁆𑀢𑀺 𑀣𑀤𑁆𑀥𑀁, 𑀩𑀳𑀮𑀁 𑀖𑀦𑀦𑁆𑀢𑀺 𑀅𑀢𑁆𑀣𑁄.

𑀬𑁄𑀧𑀺 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀧𑀭𑀲𑁆𑀲 𑀓𑀼𑀫𑁆𑀪𑀺𑀬𑀸 𑀧𑀸𑀤𑀕𑁆𑀖𑀦𑀓𑀁 𑀲𑀧𑁆𑀧𑀺𑀁 𑀯𑀸 𑀢𑁂𑀮𑀁 𑀯𑀸 𑀅𑀯𑀲𑁆𑀲𑀁 𑀧𑀺𑀯𑀦𑀓𑀁 𑀬𑀁 𑀓𑀺𑀜𑁆𑀘𑀺 𑀤𑀼𑀓𑀽𑀮𑀲𑀸𑀝𑀓𑀁 𑀯𑀸 𑀘𑀫𑁆𑀫𑀔𑀡𑁆𑀟𑀸𑀤𑀻𑀦𑀁 𑀯𑀸 𑀅𑀜𑁆𑀜𑀢𑀭𑀁 𑀧𑀓𑁆𑀔𑀺𑀧𑀢𑀺, 𑀳𑀢𑁆𑀣𑀢𑁄 𑀫𑀼𑀢𑁆𑀢𑀫𑀢𑁆𑀢𑁂 𑀧𑀸𑀭𑀸𑀚𑀺𑀓𑀦𑁆𑀢𑀺 𑀏𑀢𑁆𑀣 𑀅𑀯𑀳𑀸𑀭𑁄 𑀯𑀻𑀫𑀁𑀲𑀺𑀢𑀩𑁆𑀩𑁄. 𑀬𑀤𑀺 𑀘 𑀤𑀼𑀓𑀽𑀮𑀸𑀤𑀻𑀲𑀼 𑀲𑀧𑁆𑀧𑀺𑀢𑁂𑀮𑀸𑀦𑀁 𑀧𑀯𑀺𑀲𑀦𑀁 𑀲𑀦𑁆𑀥𑀸𑀬 𑀧𑀸𑀭𑀸𑀚𑀺𑀓𑀁 𑀪𑀯𑁂𑀬𑁆𑀬, 𑀢𑀢𑁆𑀣 𑀧𑀯𑀺𑀝𑁆𑀞𑀢𑁂𑀮𑀸𑀤𑀺𑀦𑁄 𑀓𑀼𑀫𑁆𑀪𑀺𑀕𑀢𑁂𑀦 𑀏𑀓𑀸𑀩𑀤𑁆𑀥𑀢𑀸𑀬 𑀦 𑀢𑀸𑀯 𑀅𑀯𑀳𑀸𑀭𑁄 𑀪𑀸𑀚𑀦𑀦𑁆𑀢𑀭𑀁 𑀧𑀯𑁂𑀲𑁂𑀢𑁆𑀯𑀸 𑀕𑀳𑀡𑀓𑀸𑀮𑁂 𑀯𑀺𑀬. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑁋 ‘‘𑀪𑀸𑀚𑀦𑀁 𑀧𑀦 𑀦𑀺𑀫𑀼𑀚𑁆𑀚𑀸𑀧𑁂𑀢𑁆𑀯𑀸 𑀕𑀡𑁆𑀳𑀦𑁆𑀢𑀲𑁆𑀲 𑀬𑀸𑀯 𑀏𑀓𑀸𑀩𑀤𑁆𑀥𑀁 𑀳𑁄𑀢𑀺, 𑀢𑀸𑀯 𑀭𑀓𑁆𑀔𑀢𑀻’’𑀢𑀺𑀆𑀤𑀺. 𑀅𑀣 𑀢𑁂𑀮𑀸𑀤𑀺𑀯𑀺𑀦𑀸𑀲𑁂𑀦 𑀧𑀸𑀭𑀸𑀚𑀺𑀓𑀁 𑀪𑀯𑁂𑀬𑁆𑀬, 𑀢𑀤𑀸𑀧𑀺 𑀢𑀺𑀡𑀚𑁆𑀛𑀸𑀧𑀦𑀸𑀤𑀻𑀲𑀼 𑀯𑀺𑀬 𑀅𑀯𑀳𑀸𑀭𑁄 𑀦𑀢𑁆𑀣𑀺, 𑀤𑀼𑀓𑁆𑀓𑀝𑁂𑀦 𑀲𑀤𑁆𑀥𑀺𑀁 𑀪𑀡𑁆𑀟𑀤𑁂𑀬𑁆𑀬𑀫𑁂𑀯 𑀳𑁄𑀢𑀺, 𑀢𑀣𑀸 𑀘 𑀧𑀸𑀤𑀕𑁆𑀖𑀦𑀓𑀁 𑀢𑁂𑀮𑀸𑀤𑀺𑀁 𑀧𑀻𑀢𑀁 𑀤𑀼𑀓𑀽𑀮𑀸𑀤𑀺𑀁 𑀉𑀤𑁆𑀥𑀭𑀦𑁆𑀢𑀲𑁆𑀲𑀸𑀧𑀺 𑀧𑀸𑀭𑀸𑀚𑀺𑀓𑀁 𑀦 𑀲𑀺𑀬𑀸 𑀢𑀢𑁆𑀣 𑀧𑀯𑀺𑀝𑁆𑀞𑀲𑁆𑀲 𑀢𑁂𑀮𑀸𑀤𑀺𑀦𑁄 𑀯𑀺𑀦𑀝𑁆𑀞𑀝𑁆𑀞𑁂𑀦 𑀕𑀳𑀡𑀓𑁆𑀔𑀡𑁂 𑀅𑀯𑀺𑀚𑁆𑀚𑀫𑀸𑀦𑀢𑁆𑀢𑀸, 𑀯𑀺𑀚𑁆𑀚𑀫𑀸𑀦𑀢𑁆𑀢𑁂𑀦 𑀘 𑀉𑀤𑁆𑀥𑀸𑀭𑁂𑀬𑁂𑀯 𑀧𑀸𑀭𑀸𑀚𑀺𑀓𑀁 𑀯𑀢𑁆𑀢𑀩𑁆𑀩𑀁, 𑀦 𑀳𑀢𑁆𑀣𑀢𑁄 𑀫𑀼𑀢𑁆𑀢𑀫𑀢𑁆𑀢𑁂𑀢𑀺. 𑀲𑀩𑁆𑀩𑀅𑀝𑁆𑀞𑀓𑀣𑀸𑀲𑀼 𑀘 𑀤𑀼𑀓𑀽𑀮𑀸𑀤𑀻𑀦𑀁 𑀧𑀓𑁆𑀔𑀺𑀧𑀦𑁂 𑀳𑀢𑁆𑀣𑀢𑁄 𑀫𑀼𑀢𑁆𑀢𑀫𑀢𑁆𑀢𑁂 𑀧𑀸𑀭𑀸𑀚𑀺𑀓𑀲𑁆𑀲 𑀯𑀼𑀢𑁆𑀢𑀢𑁆𑀢𑀸 𑀦 𑀢𑀁 𑀧𑀝𑀺𑀓𑁆𑀔𑀺𑀧𑀺𑀢𑀼𑀁 𑀲𑀓𑁆𑀓𑀸. 𑀅𑀝𑁆𑀞𑀓𑀣𑀸𑀧𑁆𑀧𑀫𑀸𑀡𑁂𑀦 𑀧𑀦𑁂𑀢𑀁 𑀕𑀳𑁂𑀢𑀩𑁆𑀩𑀁, 𑀬𑀼𑀢𑁆𑀢𑀺 𑀧𑀦𑁂𑀢𑁆𑀣 𑀧𑀡𑁆𑀟𑀺𑀢𑁂𑀳𑀺 𑀧𑀼𑀩𑁆𑀩𑀸𑀧𑀭𑀁 𑀲𑀁𑀲𑀦𑁆𑀤𑀺𑀢𑁆𑀯𑀸 𑀉𑀤𑁆𑀥𑀸𑀭𑁂𑀢𑀩𑁆𑀩𑀸.

𑀧𑀮𑀺𑀩𑀼𑀚𑁆𑀛𑀺𑀲𑁆𑀲𑀢𑀻𑀢𑀺 𑀦𑀺𑀯𑀸𑀭𑁂𑀲𑁆𑀲𑀢𑀺. 𑀯𑀼𑀢𑁆𑀢𑀦𑀬𑁂𑀦 𑀧𑀸𑀭𑀸𑀚𑀺𑀓𑀦𑁆𑀢𑀺 𑀳𑀢𑁆𑀣𑀢𑁄 𑀫𑀼𑀢𑁆𑀢𑀫𑀢𑁆𑀢𑁂𑀬𑁂𑀯 𑀧𑀸𑀭𑀸𑀚𑀺𑀓𑀁. 𑀦𑁂𑀯 𑀅𑀯𑀳𑀸𑀭𑁄, 𑀦 𑀕𑀻𑀯𑀸𑀢𑀺 𑀅𑀢𑁆𑀢𑀦𑁄 𑀪𑀸𑀚𑀦𑀢𑁆𑀢𑀸 𑀯𑀼𑀢𑁆𑀢𑀁, 𑀅𑀦𑀸𑀧𑀢𑁆𑀢𑀺𑀫𑀢𑁆𑀢𑀫𑁂𑀯 𑀯𑀼𑀢𑁆𑀢𑀁, 𑀦 𑀧𑀦 𑀏𑀯𑀁 𑀯𑀺𑀘𑀸𑀭𑀺𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀩𑀳𑀺𑀕𑀢𑀁 𑀦𑀸𑀫 𑀳𑁄𑀢𑀻𑀢𑀺 𑀢𑀢𑁄 𑀧𑀝𑁆𑀞𑀸𑀬 𑀢𑁂𑀮𑀲𑁆𑀲 𑀅𑀝𑁆𑀞𑀸𑀦𑀢𑁄 𑀅𑀥𑁄𑀫𑀼𑀔𑀪𑀸𑀯𑀢𑁄 𑀘 𑀩𑀳𑀺𑀕𑀢𑀁 𑀦𑀸𑀫 𑀳𑁄𑀢𑀺. 𑀅𑀦𑁆𑀢𑁄 𑀧𑀝𑁆𑀞𑀸𑀬 𑀙𑀺𑀤𑁆𑀤𑁂 𑀓𑀭𑀺𑀬𑀫𑀸𑀦𑁂 𑀢𑁂𑀮𑀲𑁆𑀲 𑀦𑀺𑀓𑁆𑀔𑀫𑀺𑀢𑁆𑀯𑀸 𑀕𑀢𑀕𑀢𑀝𑁆𑀞𑀸𑀦𑀁 𑀪𑀸𑀚𑀦𑀲𑀗𑁆𑀔𑁆𑀬𑀫𑁂𑀯 𑀕𑀘𑁆𑀙𑀢𑀻𑀢𑀺 𑀆𑀳 ‘‘𑀩𑀸𑀳𑀺𑀭𑀦𑁆𑀢𑀢𑁄 𑀧𑀸𑀤𑀕𑁆𑀖𑀦𑀓𑁂 𑀕𑀴𑀺𑀢𑁂 𑀧𑀸𑀭𑀸𑀚𑀺𑀓’’𑀦𑁆𑀢𑀺. 𑀬𑀣𑀸 𑀢𑀣𑀸 𑀯𑀸 𑀓𑀢𑀲𑁆𑀲𑀸𑀢𑀺 𑀩𑀸𑀳𑀺𑀭𑀦𑁆𑀢𑀢𑁄 𑀯𑀸 𑀅𑀩𑁆𑀪𑀦𑁆𑀢𑀭𑀦𑁆𑀢𑀢𑁄 𑀯𑀸 𑀧𑀝𑁆𑀞𑀸𑀬 𑀓𑀢𑀲𑁆𑀲. 𑀫𑀚𑁆𑀛𑁂 𑀞𑀧𑁂𑀢𑁆𑀯𑀸 𑀓𑀢𑀙𑀺𑀤𑁆𑀤𑁂𑀢𑀺 𑀫𑀚𑁆𑀛𑁂 𑀣𑁄𑀓𑀁 𑀓𑀧𑀸𑀮𑀁 𑀞𑀧𑁂𑀢𑁆𑀯𑀸 𑀧𑀘𑁆𑀙𑀸 𑀢𑀁 𑀙𑀺𑀦𑁆𑀤𑀦𑁆𑀢𑁂𑀦 𑀓𑀢𑀙𑀺𑀤𑁆𑀤𑁂.

𑀧𑀢𑁆𑀣𑀻𑀦𑀲𑁆𑀲 𑀔𑀸𑀤𑀦𑀁 𑀇𑀢𑀭𑀲𑁆𑀲 𑀧𑀸𑀦𑀜𑁆𑀘 𑀲𑀧𑁆𑀧𑀺𑀆𑀤𑀻𑀦𑀁 𑀧𑀭𑀺𑀪𑁄𑀕𑁄𑀢𑀺 𑀆𑀳 ‘‘𑀅𑀔𑀸𑀤𑀺𑀢𑀩𑁆𑀩𑀁 𑀯𑀸 𑀅𑀧𑀸𑀢𑀩𑁆𑀩𑀁 𑀯𑀸 𑀓𑀭𑁄𑀢𑀻’’𑀢𑀺. 𑀓𑀲𑁆𑀫𑀸 𑀧𑀦𑁂𑀢𑁆𑀣 𑀤𑀼𑀓𑁆𑀓𑀝𑀁 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀞𑀸𑀦𑀸𑀘𑀸𑀯𑀦𑀲𑁆𑀲 𑀦𑀢𑁆𑀣𑀺𑀢𑀸𑀬 𑀤𑀼𑀓𑁆𑀓𑀝’’𑀦𑁆𑀢𑀺. 𑀧𑀼𑀭𑀺𑀫𑀤𑁆𑀯𑀬𑀦𑁆𑀢𑀺 𑀪𑁂𑀤𑀦𑀁 𑀙𑀟𑁆𑀟𑀦𑀜𑁆𑀘. 𑀓𑀼𑀫𑁆𑀪𑀺𑀚𑀚𑁆𑀚𑀭𑀓𑀭𑀡𑁂𑀦𑀸𑀢𑀺 𑀧𑀼𑀡𑁆𑀡𑀓𑀼𑀫𑁆𑀪𑀺𑀬𑀸 𑀚𑀚𑁆𑀚𑀭𑀓𑀭𑀡𑁂𑀦. 𑀫𑀸𑀢𑀺𑀓𑀸𑀉𑀚𑀼𑀓𑀭𑀡𑁂𑀦𑀸𑀢𑀺 𑀉𑀤𑀓𑀧𑀼𑀡𑁆𑀡𑀸𑀬 𑀫𑀸𑀢𑀺𑀓𑀸𑀬 𑀉𑀚𑀼𑀓𑀭𑀡𑁂𑀦. 𑀏𑀓𑀮𑀓𑁆𑀔𑀡𑀦𑁆𑀢𑀺 𑀪𑁂𑀤𑀦𑀁 𑀓𑀼𑀫𑁆𑀪𑀺𑀬𑀸 𑀚𑀚𑁆𑀚𑀭𑀓𑀭𑀡𑁂𑀦, 𑀙𑀟𑁆𑀟𑀦𑀁 𑀫𑀸𑀢𑀺𑀓𑀸𑀬 𑀉𑀚𑀼𑀓𑀭𑀡𑁂𑀦 𑀘 𑀲𑀤𑁆𑀥𑀺𑀁 𑀏𑀓𑀲𑀪𑀸𑀯𑀁. 𑀧𑀘𑁆𑀙𑀺𑀫𑀁 𑀧𑀦 𑀤𑁆𑀯𑀬𑀦𑁆𑀢𑀺 𑀛𑀸𑀧𑀦𑀁 𑀅𑀧𑀭𑀺𑀪𑁄𑀕𑀓𑀭𑀡𑀜𑁆𑀘. 𑀏𑀢𑁆𑀣 𑀏𑀯𑀁 𑀯𑀺𑀦𑀺𑀘𑁆𑀙𑀬𑀁 𑀯𑀤𑀦𑁆𑀢𑀻𑀢𑀺 𑀏𑀢𑀲𑁆𑀫𑀺𑀁 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑁂 𑀅𑀢𑁆𑀣𑁂 𑀏𑀓𑁂 𑀆𑀘𑀭𑀺𑀬𑀸 𑀏𑀯𑀁 𑀯𑀺𑀦𑀺𑀘𑁆𑀙𑀬𑀁 𑀯𑀤𑀦𑁆𑀢𑀺. 𑀧𑀘𑁆𑀙𑀺𑀫𑀤𑁆𑀯𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀏𑀢𑁆𑀣 𑀧𑀼𑀭𑀺𑀫𑀧𑀤𑀤𑁆𑀯𑀬𑁂 𑀯𑀺𑀦𑀺𑀘𑁆𑀙𑀬𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑀸𑀦𑀼𑀲𑀸𑀭𑁂𑀦 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀦𑁆𑀢𑀺 𑀢𑀢𑁆𑀣 𑀓𑀺𑀜𑁆𑀘𑀺 𑀅𑀯𑀢𑁆𑀯𑀸 𑀧𑀘𑁆𑀙𑀺𑀫𑀧𑀤𑀤𑁆𑀯𑀬𑀁 𑀲𑀦𑁆𑀥𑀸𑀬 ‘‘𑀞𑀸𑀦𑀸𑀘𑀸𑀯𑀦𑀲𑁆𑀲 𑀦𑀢𑁆𑀣𑀺𑀢𑀸𑀬 𑀤𑀼𑀓𑁆𑀓𑀝’’𑀦𑁆𑀢𑀺 𑀇𑀤𑀁 𑀯𑀼𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀣𑁂𑀬𑁆𑀬𑀘𑀺𑀢𑁆𑀢𑁂𑀦𑀸𑀢𑀺 𑀅𑀢𑁆𑀢𑀦𑁄 𑀯𑀸 𑀧𑀭𑀲𑁆𑀲 𑀯𑀸 𑀓𑀸𑀢𑀼𑀓𑀸𑀫𑀢𑀸𑀯𑀲𑁂𑀦 𑀉𑀧𑁆𑀧𑀦𑁆𑀦𑀣𑁂𑀬𑁆𑀬𑀘𑀺𑀢𑁆𑀢𑁂𑀦. 𑀯𑀺𑀦𑀸𑀲𑁂𑀢𑀼𑀓𑀸𑀫𑀢𑀸𑀬𑀸𑀢𑀺 𑀳𑀢𑁆𑀣𑀧𑀸𑀤𑀸𑀤𑀻𑀦𑀺 𑀙𑀺𑀦𑁆𑀤𑀦𑁆𑀢𑁄 𑀯𑀺𑀬 𑀓𑁂𑀯𑀮𑀁 𑀯𑀺𑀦𑀸𑀲𑁂𑀢𑀼𑀓𑀸𑀫𑀢𑀸𑀬. 𑀯𑀼𑀢𑁆𑀢𑀦𑀬𑁂𑀦 𑀪𑀺𑀦𑁆𑀤𑀦𑁆𑀢𑀲𑁆𑀲 𑀯𑀸 𑀙𑀟𑁆𑀟𑁂𑀦𑁆𑀢𑀲𑁆𑀲 𑀯𑀸𑀢𑀺 𑀫𑀼𑀕𑁆𑀕𑀭𑁂𑀦 𑀧𑁄𑀣𑁂𑀢𑁆𑀯𑀸 𑀪𑀺𑀦𑁆𑀤𑀦𑁆𑀢𑀲𑁆𑀲 𑀯𑀸 𑀉𑀤𑀓𑀁 𑀯𑀸 𑀯𑀸𑀮𑀺𑀓𑀁 𑀯𑀸 𑀆𑀓𑀺𑀭𑀺𑀢𑁆𑀯𑀸 𑀉𑀢𑁆𑀢𑀭𑀸𑀧𑁂𑀦𑁆𑀢𑀲𑁆𑀲 𑀯𑀸𑀢𑀺 𑀅𑀢𑁆𑀣𑁄. 𑀅𑀬𑀼𑀢𑁆𑀢𑀦𑁆𑀢𑀺 𑀘𑁂𑀢𑀺 𑀧𑀸𑀴𑀺𑀬𑀁 𑀧𑀼𑀭𑀺𑀫𑀤𑁆𑀯𑀬𑁂𑀧𑀺 𑀤𑀼𑀓𑁆𑀓𑀝𑀲𑁆𑀲𑁂𑀯 𑀯𑀼𑀢𑁆𑀢𑀢𑁆𑀢𑀸 ‘‘𑀧𑀼𑀭𑀺𑀫𑀤𑁆𑀯𑀬𑁂 𑀧𑀸𑀭𑀸𑀚𑀺𑀓’’𑀦𑁆𑀢𑀺 𑀇𑀤𑀁 𑀅𑀬𑀼𑀢𑁆𑀢𑀦𑁆𑀢𑀺 𑀬𑀤𑀺 𑀢𑀼𑀫𑁆𑀳𑀸𑀓𑀁 𑀲𑀺𑀬𑀸𑀢𑀺 𑀅𑀢𑁆𑀣𑁄. 𑀦𑀸𑀢𑀺 𑀅𑀬𑀼𑀢𑁆𑀢𑀪𑀸𑀯𑀁 𑀦𑀺𑀲𑁂𑀥𑁂𑀢𑁆𑀯𑀸 𑀢𑀢𑁆𑀣 𑀓𑀸𑀭𑀡𑀫𑀸𑀳 ‘‘𑀅𑀜𑁆𑀜𑀣𑀸 𑀕𑀳𑁂𑀢𑀩𑁆𑀩𑀢𑁆𑀣𑀢𑁄’’𑀢𑀺.

𑀏𑀯𑀫𑁂𑀓𑁂 𑀯𑀤𑀦𑁆𑀢𑀻𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀲𑁆𑀲 𑀅𑀢𑁆𑀣𑀦𑀬𑀲𑁆𑀲 𑀅𑀢𑁆𑀢𑀦𑀸 𑀅𑀦𑀪𑀺𑀫𑀢𑀪𑀸𑀯𑀁 𑀤𑀲𑁆𑀲𑁂𑀢𑁆𑀯𑀸 𑀲𑀬𑀁 𑀅𑀜𑁆𑀜𑀣𑀸𑀧𑀺 𑀧𑀸𑀴𑀺𑀁 𑀅𑀝𑁆𑀞𑀓𑀣𑀜𑁆𑀘 𑀲𑀁𑀲𑀦𑁆𑀤𑀺𑀢𑁆𑀯𑀸 𑀅𑀢𑁆𑀣𑀁 𑀤𑀲𑁆𑀲𑁂𑀢𑀼𑀓𑀸𑀫𑁄 𑀅𑀬𑀁 𑀧𑀦𑁂𑀢𑁆𑀣 𑀲𑀸𑀭𑁄𑀢𑀺𑀆𑀤𑀺𑀫𑀸𑀳. 𑀅𑀘𑀸𑀯𑁂𑀢𑀼𑀓𑀸𑀫𑁄𑀯𑀸𑀢𑀺 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀞𑀸𑀦𑀸 𑀅𑀘𑀸𑀯𑁂𑀢𑀼𑀓𑀸𑀫𑁄𑀯. 𑀅𑀙𑀟𑁆𑀟𑁂𑀢𑀼𑀓𑀸𑀫𑁄𑀬𑁂𑀯𑀸𑀢𑀺 𑀏𑀢𑁆𑀣𑀸𑀧𑀺 𑀣𑁂𑀬𑁆𑀬𑀘𑀺𑀢𑁆𑀢𑁂𑀦𑀸𑀢𑀺 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀇𑀤𑀜𑁆𑀳𑀺 𑀣𑁂𑀬𑁆𑀬𑀘𑀺𑀢𑁆𑀢𑀧𑀓𑁆𑀔𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑀦𑀸𑀲𑁂𑀢𑀼𑀓𑀸𑀫𑀢𑀸𑀧𑀓𑁆𑀔𑀲𑁆𑀲 𑀯𑀓𑁆𑀔𑀫𑀸𑀦𑀢𑁆𑀢𑀸. 𑀢𑁂𑀦𑁂𑀯𑀸𑀳 𑀦𑀸𑀲𑁂𑀢𑀼𑀓𑀸𑀫𑀢𑀸𑀧𑀓𑁆𑀔𑁂 𑀧𑀦𑀸𑀢𑀺𑀆𑀤𑀺. 𑀇𑀢𑀭𑀣𑀸𑀧𑀺 𑀬𑀼𑀚𑁆𑀚𑀢𑀻𑀢𑀺 𑀣𑁂𑀬𑁆𑀬𑀘𑀺𑀢𑁆𑀢𑀸𑀪𑀸𑀯𑀸 𑀞𑀸𑀦𑀸 𑀘𑀸𑀯𑁂𑀢𑀼𑀓𑀸𑀫𑀲𑁆𑀲𑀸𑀧𑀺 𑀤𑀼𑀓𑁆𑀓𑀝𑀁 𑀬𑀼𑀚𑁆𑀚𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀪𑀽𑀫𑀝𑁆𑀞𑀓𑀣𑀸𑀯𑀡𑁆𑀡𑀦𑀸𑀦𑀬𑁄 𑀦𑀺𑀝𑁆𑀞𑀺𑀢𑁄.

𑀆𑀓𑀸𑀲𑀝𑁆𑀞𑀓𑀣𑀸𑀯𑀡𑁆𑀡𑀦𑀸

𑁯𑁬. 𑀆𑀓𑀸𑀲𑀝𑁆𑀞𑀓𑀣𑀸𑀬𑀁 𑀅𑀦𑁆𑀢𑁄𑀯𑀢𑁆𑀣𑀼𑀫𑁆𑀳𑀻𑀢𑀺 𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀯𑀢𑁆𑀣𑀼𑀲𑁆𑀲 𑀅𑀦𑁆𑀢𑁄. 𑀅𑀦𑁆𑀢𑁄𑀕𑀸𑀫𑁂𑀢𑀺 𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀕𑀸𑀫𑀲𑁆𑀲 𑀅𑀦𑁆𑀢𑁄. 𑀅𑀧𑀭𑀺𑀓𑁆𑀔𑀺𑀢𑁆𑀢𑁂 𑀧𑀦 𑀯𑀢𑁆𑀣𑀼𑀫𑁆𑀳𑀺 𑀕𑀸𑀫𑁂 𑀯𑀸 𑀞𑀺𑀢𑀝𑁆𑀞𑀸𑀦𑀫𑁂𑀯 𑀞𑀸𑀦𑀁. 𑀅𑀝𑀯𑀺𑀫𑀼𑀔𑀁 𑀓𑀭𑁄𑀢𑀺…𑀧𑁂… 𑀭𑀓𑁆𑀔𑀢𑀻𑀢𑀺 𑀢𑁂𑀦 𑀧𑀬𑁄𑀕𑁂𑀦 𑀢𑀲𑁆𑀲 𑀇𑀘𑁆𑀙𑀺𑀢𑀝𑁆𑀞𑀸𑀦𑀁 𑀆𑀕𑀢𑀢𑁆𑀢𑀸 𑀭𑀓𑁆𑀔𑀢𑀺. 𑀕𑀸𑀫𑀢𑁄 𑀦𑀺𑀓𑁆𑀔𑀦𑁆𑀢𑀲𑁆𑀲𑀸𑀢𑀺 𑀧𑀭𑀺𑀓𑁆𑀔𑀺𑀢𑁆𑀢𑀕𑀸𑀫𑀢𑁄 𑀦𑀺𑀓𑁆𑀔𑀦𑁆𑀢𑀲𑁆𑀲. 𑀓𑀧𑀺𑀜𑁆𑀚𑀭𑁄 𑀦𑀸𑀫 𑀅𑀜𑁆𑀜𑀫𑀜𑁆𑀜𑀁 𑀬𑀼𑀚𑁆𑀛𑀸𑀧𑀦𑀢𑁆𑀣𑀸𑀬 𑀩𑀸𑀮𑀚𑀦𑁂𑀳𑀺 𑀧𑁄𑀲𑀸𑀯𑀦𑀺𑀬𑀧𑀓𑁆𑀔𑀺𑀚𑀸𑀢𑀺.

𑀯𑁂𑀳𑀸𑀲𑀝𑁆𑀞𑀓𑀣𑀸𑀯𑀡𑁆𑀡𑀦𑀸

𑁯𑁭. 𑀯𑁂𑀳𑀸𑀲𑀝𑁆𑀞𑀓𑀣𑀸𑀬𑀁 𑀙𑀺𑀦𑁆𑀦𑀫𑀢𑁆𑀢𑁂 𑀫𑀼𑀢𑁆𑀢𑀫𑀢𑁆𑀢𑁂𑀢𑀺 𑀬𑀣𑀸 𑀙𑀺𑀦𑁆𑀦𑀁 𑀫𑀼𑀢𑁆𑀢𑀜𑁆𑀘 𑀧𑀓𑀢𑀺𑀝𑁆𑀞𑀸𑀦𑁂 𑀦 𑀢𑀺𑀝𑁆𑀞𑀢𑀺, 𑀢𑀣𑀸 𑀙𑁂𑀤𑀦𑀁 𑀫𑁄𑀘𑀦𑀜𑁆𑀘 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑀉𑀤𑀓𑀝𑁆𑀞𑀓𑀣𑀸𑀯𑀡𑁆𑀡𑀦𑀸

𑁯𑁮. 𑀉𑀤𑀓𑀝𑁆𑀞𑀓𑀣𑀸𑀬𑀁 𑀲𑀦𑁆𑀤𑀫𑀸𑀦𑀉𑀤𑀓𑁂 𑀦𑀺𑀓𑁆𑀔𑀺𑀢𑁆𑀢𑀁 𑀦 𑀢𑀺𑀝𑁆𑀞𑀢𑀻𑀢𑀺 𑀆𑀳 ‘‘𑀅𑀲𑀦𑁆𑀤𑀦𑀓𑁂 𑀉𑀤𑀓𑁂’’𑀢𑀺. 𑀅𑀦𑀸𑀧𑀢𑁆𑀢𑀻𑀢𑀺 𑀳𑀢𑁆𑀣𑀯𑀸𑀭𑀧𑀤𑀯𑀸𑀭𑁂𑀲𑀼 𑀤𑀼𑀓𑁆𑀓𑀝𑀸𑀧𑀢𑁆𑀢𑀺𑀬𑀸 𑀅𑀪𑀸𑀯𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀓𑀟𑁆𑀠𑀢𑀻𑀢𑀺 𑀳𑁂𑀝𑁆𑀞𑀢𑁄 𑀑𑀲𑀸𑀭𑁂𑀢𑀺. 𑀲𑀓𑀮𑀫𑀼𑀤𑀓𑀦𑁆𑀢𑀺 𑀤𑀡𑁆𑀟𑁂𑀦 𑀨𑀼𑀝𑁆𑀞𑁄𑀓𑀸𑀲𑀕𑀢𑀁 𑀲𑀓𑀮𑀫𑀼𑀤𑀓𑀁. 𑀦 𑀉𑀤𑀓𑀁 𑀞𑀸𑀦𑀦𑁆𑀢𑀺 𑀅𑀢𑁆𑀢𑀦𑀸 𑀓𑀢𑀝𑁆𑀞𑀸𑀦𑀲𑁆𑀲 𑀅𑀝𑁆𑀞𑀸𑀦𑀢𑁆𑀢𑀸. 𑀧𑀤𑀼𑀫𑀺𑀦𑀺𑀬𑀦𑁆𑀢𑀺 𑀧𑀤𑀼𑀫𑀕𑀘𑁆𑀙𑁂. 𑀓𑀮𑀸𑀧𑀩𑀦𑁆𑀥𑀦𑁆𑀢𑀺 𑀳𑀢𑁆𑀣𑀓𑀯𑀲𑁂𑀦 𑀔𑀼𑀤𑁆𑀤𑀓𑀁 𑀓𑀢𑁆𑀯𑀸 𑀩𑀤𑁆𑀥𑀁 𑀓𑀮𑀸𑀧𑀩𑀤𑁆𑀥𑀁. 𑀪𑀸𑀭𑀩𑀤𑁆𑀥𑀁 𑀦𑀸𑀫 𑀲𑀻𑀲𑀪𑀸𑀭𑀸𑀤𑀺𑀯𑀲𑁂𑀦 𑀩𑀤𑁆𑀥𑀁. 𑀫𑀼𑀴𑀸𑀮𑀦𑁆𑀢𑀺 𑀓𑀦𑁆𑀤𑀁. 𑀧𑀢𑁆𑀢𑀁 𑀯𑀸 𑀧𑀼𑀧𑁆𑀨𑀁 𑀯𑀸𑀢𑀺 𑀇𑀤𑀁 𑀓𑀤𑁆𑀤𑀫𑀲𑁆𑀲 𑀅𑀦𑁆𑀢𑁄 𑀧𑀯𑀺𑀲𑀺𑀢𑁆𑀯𑀸 𑀞𑀺𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀦𑀺𑀤𑁆𑀥𑀫𑀦𑀢𑀼𑀫𑁆𑀩𑀦𑁆𑀢𑀺 𑀯𑀸𑀧𑀺𑀬𑀸 𑀉𑀤𑀓𑀲𑁆𑀲 𑀦𑀺𑀓𑁆𑀔𑀫𑀦𑀦𑀸𑀴𑀁. 𑀉𑀤𑀓𑀯𑀸𑀳𑀓𑀦𑁆𑀢𑀺 𑀫𑀳𑀸𑀫𑀸𑀢𑀺𑀓𑀁. 𑀅𑀯𑀳𑀸𑀭𑁂𑀦 𑀲𑁄 𑀦 𑀓𑀸𑀭𑁂𑀢𑀩𑁆𑀩𑁄𑀢𑀺 𑀇𑀫𑀺𑀦𑀸 𑀧𑀸𑀡𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑀦𑁂 𑀆𑀧𑀢𑁆𑀢𑀺𑀬𑀸 𑀲𑀩𑁆𑀩𑀢𑁆𑀣 𑀦 𑀫𑀼𑀘𑁆𑀘𑀢𑀻𑀢𑀺 𑀤𑀻𑀧𑁂𑀢𑀺. 𑀫𑀸𑀢𑀺𑀓𑀁 𑀆𑀭𑁄𑀧𑁂𑀢𑁆𑀯𑀸𑀢𑀺 𑀔𑀼𑀤𑁆𑀤𑀓𑀫𑀸𑀢𑀺𑀓𑀁 𑀆𑀭𑁄𑀧𑁂𑀢𑁆𑀯𑀸. 𑀫𑀭𑀺𑀢𑁆𑀯𑀸…𑀧𑁂… 𑀢𑀺𑀝𑁆𑀞𑀦𑁆𑀢𑀻𑀢𑀺 𑀏𑀢𑁆𑀣 𑀫𑀢𑀫𑀘𑁆𑀙𑀸𑀦𑀁𑀬𑁂𑀯 𑀢𑁂𑀲𑀁 𑀲𑀦𑁆𑀢𑀓𑀢𑁆𑀢𑀸 𑀅𑀫𑀢𑁂 𑀕𑀡𑁆𑀳𑀦𑁆𑀢𑀲𑁆𑀲 𑀦𑀢𑁆𑀣𑀺 𑀅𑀯𑀳𑀸𑀭𑁄.

𑀦𑀸𑀯𑀝𑁆𑀞𑀓𑀣𑀸𑀯𑀡𑁆𑀡𑀦𑀸

𑁯𑁯. 𑀦𑀸𑀯𑀝𑁆𑀞𑀓𑀣𑀸𑀬𑀁 𑀣𑀼𑀮𑁆𑀮𑀘𑁆𑀘𑀬𑀫𑁆𑀧𑀺 𑀧𑀸𑀭𑀸𑀚𑀺𑀓𑀫𑁆𑀧𑀺 𑀳𑁄𑀢𑀻𑀢𑀺 𑀏𑀢𑁆𑀣 𑀧𑀞𑀫𑀁 𑀞𑀸𑀦𑀸 𑀅𑀘𑀸𑀯𑁂𑀢𑁆𑀯𑀸 𑀫𑀼𑀢𑁆𑀢𑁂 𑀣𑀼𑀮𑁆𑀮𑀘𑁆𑀘𑀬𑀁, 𑀧𑀞𑀫𑀁 𑀧𑀦 𑀞𑀸𑀦𑀸 𑀘𑀸𑀯𑁂𑀢𑁆𑀯𑀸 𑀫𑀼𑀢𑁆𑀢𑁂 𑀧𑀸𑀭𑀸𑀚𑀺𑀓𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀧𑀸𑀲𑁂 𑀩𑀤𑁆𑀥𑀲𑀽𑀓𑀭𑁄 𑀯𑀺𑀬𑀸𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀁 𑀲𑀦𑁆𑀥𑀸𑀬𑀸𑀳 ‘‘𑀢𑀢𑁆𑀣 𑀬𑀼𑀢𑁆𑀢𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀸𑀏𑀯𑀸’’𑀢𑀺. 𑀯𑀺𑀧𑀦𑁆𑀦𑀝𑁆𑀞𑀦𑀸𑀯𑀸𑀢𑀺 𑀯𑀺𑀲𑀫𑀯𑀸𑀢𑁂𑀳𑀺 𑀤𑁂𑀲𑀦𑁆𑀢𑀭𑀁 𑀧𑀮𑀸𑀢𑀸, 𑀪𑀺𑀚𑁆𑀚𑀺𑀢𑁆𑀯𑀸 𑀯𑀸 𑀯𑀺𑀦𑀸𑀲𑀁 𑀧𑀢𑁆𑀯𑀸 𑀉𑀤𑀓𑁂 𑀦𑀺𑀫𑀼𑀚𑁆𑀚𑀺𑀢𑁆𑀯𑀸 𑀳𑁂𑀝𑁆𑀞𑀸 𑀪𑀽𑀫𑀺𑀢𑀮𑀁 𑀅𑀧𑁆𑀧𑀢𑁆𑀯𑀸 𑀲𑀸𑀫𑀺𑀓𑁂𑀳𑀺 𑀘 𑀅𑀧𑀭𑀺𑀘𑁆𑀘𑀢𑁆𑀢𑀸𑀮𑀬𑀸 𑀯𑀼𑀘𑁆𑀘𑀢𑀺. 𑀩𑀮𑀯𑀸 𑀘 𑀯𑀸𑀢𑁄 𑀆𑀕𑀫𑁆𑀫𑀸𑀢𑀺 𑀇𑀫𑀺𑀦𑀸 𑀅𑀲𑀢𑀺 𑀯𑀸𑀢𑁂 𑀅𑀬𑀁 𑀧𑀬𑁄𑀕𑁄 𑀓𑀢𑁄𑀢𑀺 𑀤𑀲𑁆𑀲𑁂𑀢𑀺. 𑀧𑀼𑀕𑁆𑀕𑀮𑀲𑁆𑀲 𑀦𑀢𑁆𑀣𑀺 𑀅𑀯𑀳𑀸𑀭𑁄𑀢𑀺 𑀲𑀼𑀓𑁆𑀔𑀫𑀸𑀢𑀺𑀓𑀸𑀬𑀁 𑀉𑀚𑀼𑀓𑀭𑀡𑀦𑀬𑁂𑀦 𑀯𑀼𑀢𑁆𑀢𑀁. 𑀢𑀁 𑀅𑀢𑁆𑀢𑀦𑁄 𑀧𑀸𑀤𑁂𑀦 𑀅𑀦𑀓𑁆𑀓𑀫𑀺𑀢𑁆𑀯𑀸 𑀳𑀢𑁆𑀣𑁂𑀦 𑀘 𑀅𑀦𑀼𑀓𑁆𑀔𑀺𑀧𑀺𑀢𑁆𑀯𑀸 𑀅𑀜𑁆𑀜𑀲𑁆𑀫𑀺𑀁 𑀤𑀡𑁆𑀟𑀸𑀤𑀻𑀲𑀼 𑀩𑀦𑁆𑀥𑀺𑀢𑁆𑀯𑀸 𑀞𑀧𑀺𑀢𑁂 𑀬𑀼𑀚𑁆𑀚𑀢𑀺, 𑀅𑀢𑁆𑀢𑀦𑁄 𑀧𑀸𑀤𑁂𑀦 𑀅𑀓𑁆𑀓𑀫𑀺𑀢𑁆𑀯𑀸 𑀳𑀢𑁆𑀣𑁂𑀦 𑀘 𑀉𑀓𑁆𑀔𑀺𑀧𑀺𑀢𑁆𑀯𑀸 𑀞𑀺𑀢𑀲𑁆𑀲 𑀧𑀦 𑀩𑀮𑀯𑀯𑀸𑀢𑁂𑀦 𑀙𑀢𑁆𑀢𑀘𑀻𑀯𑀭𑀸𑀤𑀻𑀲𑀼 𑀧𑀳𑀝𑁂𑀲𑀼 𑀧𑀓𑀢𑀺𑀁 𑀯𑀺𑀚𑀳𑀺𑀢𑁆𑀯𑀸 𑀤𑀴𑁆𑀳𑀢𑀭𑀁 𑀅𑀓𑁆𑀓𑀫𑀦𑀕𑀳𑀡𑀸𑀤𑀺𑀧𑀬𑁄𑀕𑁄 𑀅𑀪𑀺𑀦𑀯𑁄 𑀓𑀸𑀢𑀩𑁆𑀩𑁄 𑀲𑀺𑀬𑀸. 𑀇𑀢𑀭𑀣𑀸 𑀙𑀢𑁆𑀢𑀘𑀻𑀯𑀭𑀸𑀤𑀻𑀦𑀺 𑀯𑀸 𑀯𑀺𑀕𑀘𑁆𑀙𑀦𑁆𑀢𑀺, 𑀅𑀯𑀳𑀸𑀭𑀓𑁄 𑀯𑀸 𑀲𑀬𑀁 𑀧𑀢𑀺𑀲𑁆𑀲𑀢𑀺, 𑀦𑀸𑀯𑀸 𑀘 𑀢𑀤𑀸 𑀦 𑀕𑀫𑀺𑀲𑁆𑀲𑀢𑀺. 𑀢𑀲𑁆𑀫𑀸 𑀈𑀤𑀺𑀲𑁂 𑀅𑀪𑀺𑀦𑀯𑀧𑁆𑀧𑀬𑁄𑀕𑁂 𑀲𑀢𑀺 𑀅𑀯𑀳𑀸𑀭𑁂𑀦 𑀪𑀯𑀺𑀢𑀩𑁆𑀩𑀁. 𑀲𑀼𑀓𑁆𑀔𑀫𑀸𑀢𑀺𑀓𑀸𑀬𑀁 𑀉𑀚𑀼𑀓𑀢𑀸𑀬 𑀉𑀤𑀓𑀸𑀕𑀫𑀦𑀓𑀸𑀮𑁂 𑀓𑀸𑀢𑀩𑁆𑀩𑀓𑀺𑀘𑁆𑀘𑀁 𑀦𑀢𑁆𑀣𑀻𑀢𑀺 𑀢𑀁 𑀇𑀥 𑀦𑀺𑀤𑀲𑁆𑀲𑀦𑀁 𑀦 𑀳𑁄𑀢𑀺. 𑀤𑀸𑀲𑀁 𑀧𑀦 𑀧𑀓𑀢𑀺𑀬𑀸 𑀧𑀮𑀸𑀬𑀦𑁆𑀢𑀁 ‘‘𑀲𑀻𑀖𑀁 𑀬𑀸𑀳𑀻’’𑀢𑀺 𑀯𑀢𑁆𑀯𑀸 𑀧𑀓𑀢𑀺𑀕𑀫𑀦𑀢𑁄 𑀢𑀼𑀭𑀺𑀢𑀕𑀫𑀦𑀼𑀧𑁆𑀧𑀸𑀤𑀦𑀸𑀤𑀺𑀦𑀸 𑀇𑀥 𑀦𑀺𑀤𑀲𑁆𑀲𑀦𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺 𑀅𑀫𑁆𑀳𑀸𑀓𑀁 𑀔𑀦𑁆𑀢𑀺, 𑀯𑀻𑀫𑀁𑀲𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑀁. 𑀯𑀸𑀢𑁂 𑀆𑀕𑀢𑁂𑀧𑀺 𑀬𑀢𑁆𑀣 𑀅𑀢𑀺𑀮𑀳𑀼𑀓𑀢𑁆𑀢𑀸 𑀦𑀸𑀯𑀸𑀬 𑀓𑀜𑁆𑀘𑀺 𑀧𑀬𑁄𑀕𑀁 𑀅𑀓𑀢𑁆𑀯𑀸 𑀧𑀓𑀢𑀺𑀬𑀸 𑀅𑀯𑀳𑀸𑀭𑀓𑁄 𑀢𑀺𑀝𑁆𑀞𑀢𑀺, 𑀢𑀢𑁆𑀣𑀺𑀤𑀁 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀦𑁆𑀢𑀺 𑀕𑀳𑁂𑀢𑀩𑁆𑀩𑀁.

𑀬𑀸𑀦𑀝𑁆𑀞𑀓𑀣𑀸𑀯𑀡𑁆𑀡𑀦𑀸

𑁧𑁦𑁦. 𑀬𑀸𑀦𑀝𑁆𑀞𑀓𑀣𑀸𑀬𑀁 𑀉𑀪𑁄𑀲𑀼 𑀧𑀲𑁆𑀲𑁂𑀲𑀽𑀢𑀺 𑀘𑀢𑀼𑀦𑁆𑀦𑀁 𑀣𑀫𑁆𑀪𑀸𑀦𑀁 𑀉𑀧𑀭𑀺 𑀘𑀢𑀼𑀭𑀲𑁆𑀲𑀁 𑀤𑀸𑀭𑀼𑀲𑀗𑁆𑀖𑀸𑀝𑀁 𑀆𑀭𑁄𑀧𑁂𑀢𑁆𑀯𑀸 𑀢𑀲𑁆𑀲 𑀯𑀸𑀫𑀤𑀓𑁆𑀔𑀺𑀡𑀧𑀲𑁆𑀲𑁂𑀲𑀼 𑀉𑀪𑁄𑀲𑀼 𑀯𑀸𑀢𑀸𑀢𑀧𑀸𑀤𑀺𑀧𑀭𑀺𑀲𑁆𑀲𑀬𑀯𑀺𑀦𑁄𑀤𑀦𑀢𑁆𑀣𑀁 𑀕𑀭𑀼𑀴𑀧𑀓𑁆𑀔𑀺𑀦𑁄 𑀉𑀪𑁄 𑀧𑀓𑁆𑀔𑀸 𑀯𑀺𑀬 𑀓𑀢𑀸 𑀲𑀦𑁆𑀤𑀫𑀸𑀦𑀺𑀓𑀸. 𑀤𑀼𑀓𑀬𑀼𑀢𑁆𑀢𑀲𑁆𑀲𑀸𑀢𑀺 𑀤𑁆𑀯𑀻𑀳𑀺 𑀕𑁄𑀡𑁂𑀳𑀺 𑀬𑀼𑀢𑁆𑀢𑀲𑁆𑀲. 𑀅𑀬𑀼𑀢𑁆𑀢𑀓𑀦𑁆𑀢𑀺 𑀕𑁄𑀡𑁂𑀳𑀺 𑀅𑀬𑀼𑀢𑁆𑀢𑀁. 𑀓𑀧𑁆𑀧𑀓𑀢𑀸𑀢𑀺 𑀤𑁆𑀯𑀺𑀦𑁆𑀦𑀁 𑀲𑀺𑀔𑀸𑀦𑀁 𑀲𑀦𑁆𑀥𑀺𑀝𑁆𑀞𑀸𑀦𑁂 𑀕𑁄𑀲𑀺𑀗𑁆𑀕𑀸𑀦𑀺 𑀯𑀺𑀬 𑀤𑁆𑀯𑁂 𑀓𑁄𑀝𑀺𑀬𑁄 𑀞𑀧𑁂𑀢𑁆𑀯𑀸 𑀉𑀧𑀢𑁆𑀣𑀫𑁆𑀪𑀦𑀻 𑀓𑀧𑁆𑀧𑀓𑀢𑀸 𑀦𑀸𑀫, 𑀲𑀸 𑀤𑁆𑀯𑀻𑀳𑀺𑀧𑀺 𑀓𑁄𑀝𑀻𑀳𑀺 𑀪𑀽𑀫𑀺𑀬𑀁 𑀧𑀢𑀺𑀝𑁆𑀞𑀸𑀢𑀺, 𑀢𑁂𑀦𑀸𑀳 ‘‘𑀙 𑀞𑀸𑀦𑀸𑀦𑀻’’𑀢𑀺. 𑀢𑀻𑀡𑀺 𑀯𑀸 𑀘𑀢𑁆𑀢𑀸𑀭𑀺 𑀯𑀸 𑀞𑀸𑀦𑀸𑀦𑀻𑀢𑀺 𑀅𑀓𑀧𑁆𑀧𑀓𑀢𑀸𑀬 𑀉𑀧𑀢𑁆𑀣𑀫𑁆𑀪𑀦𑀺𑀬𑀸 𑀘 𑀤𑁆𑀯𑀺𑀦𑁆𑀦𑀁 𑀘𑀓𑁆𑀓𑀸𑀦𑀜𑁆𑀘 𑀯𑀲𑁂𑀦 𑀢𑀻𑀡𑀺 𑀞𑀸𑀦𑀸𑀦𑀺, 𑀓𑀧𑁆𑀧𑀓𑀢𑀸𑀬 𑀯𑀲𑁂𑀦 𑀘𑀢𑁆𑀢𑀸𑀭𑀺 𑀞𑀸𑀦𑀸𑀦𑀺, 𑀢𑀣𑀸 𑀧𑀣𑀯𑀺𑀬𑀁 𑀞𑀧𑀺𑀢𑀲𑁆𑀲 𑀢𑀻𑀡𑀺 𑀞𑀸𑀦𑀸𑀦𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀓𑁆𑀔𑀲𑀻𑀲𑁂𑀳𑀻𑀢𑀺 𑀅𑀓𑁆𑀔𑀤𑀸𑀭𑀼𑀦𑁄 𑀤𑁆𑀯𑀻𑀳𑀺 𑀓𑁄𑀝𑀻𑀳𑀺. 𑀅𑀓𑁆𑀔𑀼𑀤𑁆𑀥𑀻𑀳𑀻𑀢𑀺 𑀅𑀓𑁆𑀔𑀤𑀸𑀭𑀼𑀦𑀸 𑀲𑀫𑁆𑀧𑀝𑀺𑀘𑁆𑀙𑀓𑀸 𑀳𑁂𑀝𑁆𑀞𑀺𑀫𑀪𑀸𑀕𑁂 𑀓𑀧𑁆𑀧𑀓𑀢𑀸 𑀤𑁆𑀯𑁂 𑀤𑀸𑀭𑀼𑀔𑀡𑁆𑀟𑀸 𑀅𑀓𑁆𑀔𑀼𑀤𑁆𑀥𑀺𑀬𑁄 𑀦𑀸𑀫, 𑀢𑀸𑀲𑀁 𑀓𑀧𑁆𑀧𑀓𑀢𑀸𑀦𑀁 𑀤𑁆𑀯𑀺𑀦𑁆𑀦𑀁 𑀓𑀧𑁆𑀧𑀲𑀻𑀲𑀸𑀦𑀺 𑀘𑀢𑁆𑀢𑀸𑀭𑀺 𑀇𑀥 ‘‘𑀅𑀓𑁆𑀔𑀼𑀤𑁆𑀥𑀺𑀬𑁄’’𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀢𑁂𑀦𑀸𑀳 ‘‘𑀘𑀢𑀽𑀳𑀺 𑀘 𑀅𑀓𑁆𑀔𑀼𑀤𑁆𑀥𑀻𑀳𑀻’’𑀢𑀺. 𑀢𑀸𑀳𑀺 𑀧𑀢𑀺𑀝𑁆𑀞𑀺𑀢𑀸𑀳𑀺 𑀧𑀢𑀺𑀝𑁆𑀞𑀺𑀢𑀝𑁆𑀞𑀸𑀦𑀸𑀦𑀺 𑀘𑀢𑁆𑀢𑀸𑀭𑀺 𑀥𑀼𑀭𑁂𑀦 𑀧𑀢𑀺𑀝𑁆𑀞𑀺𑀢𑀝𑁆𑀞𑀸𑀦𑀁 𑀏𑀓𑀦𑁆𑀢𑀺 𑀧𑀜𑁆𑀘 𑀞𑀸𑀦𑀸𑀦𑀺 𑀳𑁄𑀦𑁆𑀢𑀺. 𑀉𑀤𑁆𑀥𑀺𑀬𑁄𑀯 ‘‘𑀉𑀤𑁆𑀥𑀺𑀔𑀸𑀡𑀼𑀓𑀸’’𑀢𑀺 𑀯𑀼𑀢𑁆𑀢𑀸, 𑀉𑀤𑁆𑀥𑀺𑀔𑀸𑀡𑀼𑀓𑀸𑀦𑀁 𑀅𑀪𑀸𑀯𑁂 𑀅𑀓𑁆𑀔𑀲𑀻𑀲𑀸𑀦𑀁 𑀧𑀢𑀺𑀝𑁆𑀞𑀸𑀦𑁄𑀓𑀸𑀲𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 𑀲𑀫𑀫𑁂𑀯 𑀩𑀸𑀳𑀁 𑀓𑀢𑁆𑀯𑀸𑀢𑀺𑀆𑀤𑀺. 𑀢𑀢𑁆𑀣 𑀲𑀫𑀫𑁂𑀯𑀸𑀢𑀺 𑀉𑀤𑁆𑀥𑀺𑀬𑁄 𑀳𑁂𑀝𑁆𑀞𑀸 𑀅𑀦𑁄𑀮𑀫𑁆𑀩𑁂𑀢𑁆𑀯𑀸 𑀩𑀸𑀳𑀼𑀦𑁄 𑀳𑁂𑀝𑁆𑀞𑀺𑀫𑀪𑀸𑀕𑀁 𑀲𑀫𑀁 𑀓𑀢𑁆𑀯𑀸 𑀤𑁆𑀯𑀺𑀦𑁆𑀦𑀁 𑀩𑀸𑀳𑀼𑀤𑀸𑀭𑀽𑀦𑀁 𑀫𑀚𑁆𑀛𑁂 𑀅𑀓𑁆𑀔𑀲𑀻𑀲𑀧𑁆𑀧𑀫𑀸𑀡𑁂𑀦 𑀙𑀺𑀤𑁆𑀤𑀁 𑀓𑀢𑁆𑀯𑀸 𑀢𑀢𑁆𑀣 𑀅𑀓𑁆𑀔𑀲𑀻𑀲𑀸𑀦𑀺 𑀧𑀯𑁂𑀲𑀺𑀢𑀸𑀦𑀺 𑀳𑁄𑀦𑁆𑀢𑀺, 𑀢𑁂𑀦 𑀩𑀸𑀳𑀸𑀦𑀁 𑀳𑁂𑀝𑁆𑀞𑀸𑀪𑀸𑀕𑀁 𑀲𑀩𑁆𑀩𑀁 𑀪𑀽𑀫𑀺𑀁 𑀨𑀼𑀲𑀺𑀢𑁆𑀯𑀸 𑀢𑀺𑀝𑁆𑀞𑀢𑀺, 𑀢𑁂𑀦𑀸𑀳 ‘‘𑀲𑀩𑁆𑀩𑀁 𑀧𑀣𑀯𑀺𑀁 𑀨𑀼𑀲𑀺𑀢𑁆𑀯𑀸 𑀢𑀺𑀝𑁆𑀞𑀢𑀻’’𑀢𑀺. 𑀲𑁂𑀲𑀁 𑀦𑀸𑀯𑀸𑀬𑀁 𑀯𑀼𑀢𑁆𑀢𑀲𑀤𑀺𑀲𑀦𑁆𑀢𑀺 𑀇𑀫𑀺𑀦𑀸 𑀬𑀤𑀺 𑀧𑀦 𑀢𑀁 𑀏𑀯𑀁 𑀕𑀘𑁆𑀙𑀦𑁆𑀢𑀁 𑀧𑀓𑀢𑀺𑀕𑀫𑀦𑀁 𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀅𑀜𑁆𑀜𑀁 𑀤𑀺𑀲𑀸𑀪𑀸𑀕𑀁 𑀦𑁂𑀢𑀺, 𑀧𑀸𑀭𑀸𑀚𑀺𑀓𑀁. 𑀲𑀬𑀫𑁂𑀯 𑀬𑀁 𑀓𑀺𑀜𑁆𑀘𑀺 𑀞𑀸𑀦𑀁 𑀲𑀫𑁆𑀧𑀢𑁆𑀢𑀁 𑀞𑀸𑀦𑀸 𑀅𑀘𑀸𑀮𑁂𑀦𑁆𑀢𑁄𑀯 𑀯𑀺𑀓𑁆𑀓𑀺𑀡𑀺𑀢𑁆𑀯𑀸 𑀕𑀘𑁆𑀙𑀢𑀺, 𑀦𑁂𑀯𑀢𑁆𑀣𑀺 𑀅𑀯𑀳𑀸𑀭𑁄, 𑀪𑀡𑁆𑀟𑀤𑁂𑀬𑁆𑀬𑀁 𑀧𑀦 𑀳𑁄𑀢𑀻𑀢𑀺 𑀇𑀫𑀁 𑀦𑀬𑀁 𑀅𑀢𑀺𑀤𑀺𑀲𑀢𑀺.

𑀪𑀸𑀭𑀝𑁆𑀞𑀓𑀣𑀸𑀯𑀡𑁆𑀡𑀦𑀸

𑁧𑁦𑁧. 𑀪𑀸𑀭𑀝𑁆𑀞𑀓𑀣𑀸𑀬𑀁 𑀪𑀸𑀭𑀝𑁆𑀞𑀦𑁆𑀢𑀺 𑀫𑀸𑀢𑀺𑀓𑀸𑀧𑀤𑀲𑁆𑀲 𑀪𑀸𑀭𑁄 𑀦𑀸𑀫𑀸𑀢𑀺 𑀇𑀤𑀁 𑀅𑀢𑁆𑀣𑀤𑀲𑁆𑀲𑀦𑀦𑁆𑀢𑀺 𑀆𑀳 ‘‘𑀪𑀸𑀭𑁄𑀬𑁂𑀯 𑀪𑀸𑀭𑀝𑁆𑀞’’𑀦𑁆𑀢𑀺. 𑀧𑀼𑀭𑀺𑀫𑀕𑀮𑁂𑀢𑀺 𑀕𑀮𑀲𑁆𑀲 𑀧𑀼𑀭𑀺𑀫𑀪𑀸𑀕𑁂. 𑀕𑀮𑀯𑀸𑀝𑀓𑁄𑀢𑀺 𑀕𑀻𑀯𑀸𑀬 𑀉𑀧𑀭𑀺𑀫𑀕𑀮𑀯𑀸𑀝𑀓𑁄. 𑀉𑀭𑀧𑀭𑀺𑀘𑁆𑀙𑁂𑀤𑀫𑀚𑁆𑀛𑁂𑀢𑀺 𑀉𑀭𑀧𑀭𑀺𑀬𑀦𑁆𑀢𑀲𑁆𑀲 𑀫𑀚𑁆𑀛𑁂. 𑀲𑀸𑀫𑀺𑀓𑁂𑀳𑀺 𑀅𑀦𑀸𑀡𑀢𑁆𑀢𑁄𑀢𑀺 𑀇𑀤𑀁 𑀬𑀤𑀺 𑀲𑀸𑀫𑀺𑀓𑁂𑀳𑀺 ‘‘𑀇𑀫𑀁 𑀪𑀸𑀭𑀁 𑀦𑁂𑀢𑁆𑀯𑀸 𑀅𑀲𑀼𑀓𑀝𑁆𑀞𑀸𑀦𑁂 𑀤𑁂𑀳𑀻’’𑀢𑀺 𑀆𑀡𑀢𑁆𑀢𑁄 𑀪𑀯𑁂𑀬𑁆𑀬, 𑀢𑀤𑀸 𑀢𑁂𑀦 𑀕𑀳𑀺𑀢𑀪𑀡𑁆𑀟𑀁 𑀉𑀧𑀦𑀺𑀓𑁆𑀔𑀺𑀢𑁆𑀢𑀁 𑀲𑀺𑀬𑀸, 𑀢𑀜𑁆𑀘 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀲𑀻𑀲𑀸𑀤𑀺𑀢𑁄 𑀑𑀭𑁄𑀧𑁂𑀦𑁆𑀢𑀲𑁆𑀲𑀸𑀧𑀺 𑀅𑀯𑀳𑀸𑀭𑁄 𑀦 𑀲𑀺𑀬𑀸, 𑀲𑀸𑀫𑀺𑀓𑀸𑀦𑀁 𑀧𑀦 𑀥𑀼𑀭𑀦𑀺𑀓𑁆𑀔𑁂𑀧𑁂 𑀏𑀯 𑀲𑀺𑀬𑀸𑀢𑀺 𑀢𑀢𑁄 𑀉𑀧𑀦𑀺𑀓𑁆𑀔𑀺𑀢𑁆𑀢𑀪𑀡𑁆𑀟𑀪𑀸𑀯𑀢𑁄 𑀯𑀺𑀬𑁄𑀚𑁂𑀢𑀼𑀁 𑀯𑀼𑀢𑁆𑀢𑀁, 𑀢𑁂𑀦𑁂𑀯 𑀯𑀓𑁆𑀔𑀢𑀺 ‘‘𑀢𑁂𑀳𑀺 𑀧𑀦 𑀅𑀦𑀸𑀡𑀢𑁆𑀢𑀢𑁆𑀢𑀸 𑀧𑀸𑀭𑀸𑀚𑀺𑀓’’𑀦𑁆𑀢𑀺. 𑀖𑀁𑀲𑀦𑁆𑀢𑁄𑀢𑀺 𑀲𑀻𑀲𑀢𑁄 𑀅𑀦𑀼𑀓𑁆𑀔𑀺𑀧𑀦𑁆𑀢𑁄, 𑀬𑀤𑀺 𑀉𑀓𑁆𑀔𑀺𑀧𑁂𑀬𑁆𑀬, 𑀉𑀓𑁆𑀔𑀺𑀢𑁆𑀢𑀫𑀢𑁆𑀢𑁂 𑀧𑀸𑀭𑀸𑀚𑀺𑀓𑀁, 𑀢𑁂𑀦𑀸𑀳 𑀲𑀻𑀲𑀢𑁄 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀻𑀢𑀺𑀆𑀤𑀺. 𑀬𑁄 𑀘𑀸𑀬𑀦𑁆𑀢𑀺 𑀬𑁄 𑀅𑀬𑀁 𑀯𑀺𑀦𑀺𑀘𑁆𑀙𑀬𑁄.

𑀆𑀭𑀸𑀫𑀝𑁆𑀞𑀓𑀣𑀸𑀯𑀡𑁆𑀡𑀦𑀸

𑁧𑁦𑁨. 𑀆𑀭𑀸𑀫𑀝𑁆𑀞𑀓𑀣𑀸𑀬𑀁 𑀆𑀭𑀸𑀫𑀁 𑀅𑀪𑀺𑀬𑀼𑀜𑁆𑀚𑀢𑀻𑀢𑀺 𑀇𑀤𑀁 𑀅𑀪𑀺𑀬𑁄𑀕𑀓𑀭𑀡𑀁 𑀧𑀭𑁂𑀲𑀁 𑀪𑀽𑀫𑀝𑁆𑀞𑀪𑀡𑁆𑀟𑀸𑀤𑀻𑀲𑀼𑀧𑀺 𑀓𑀸𑀢𑀼𑀁 𑀯𑀝𑁆𑀝𑀢𑀺𑀬𑁂𑀯. 𑀆𑀭𑀸𑀫𑀸𑀤𑀺𑀣𑀸𑀯𑀭𑁂𑀲𑀼 𑀧𑀦 𑀬𑁂𑀪𑀼𑀬𑁆𑀬𑁂𑀦 𑀅𑀪𑀺𑀬𑁄𑀕𑀯𑀲𑁂𑀦𑁂𑀯 𑀕𑀳𑀡𑀲𑀫𑁆𑀪𑀯𑀢𑁄 𑀏𑀢𑁆𑀣𑁂𑀯 𑀧𑀸𑀴𑀺𑀬𑀁 𑀅𑀪𑀺𑀬𑁄𑀕𑁄 𑀯𑀼𑀢𑁆𑀢𑁄, 𑀇𑀢𑀺 𑀇𑀫𑀺𑀦𑀸 𑀦𑀬𑁂𑀦 𑀲𑀩𑁆𑀩𑀢𑁆𑀣𑀸𑀧𑀺 𑀲𑀓𑁆𑀓𑀸 𑀜𑀸𑀢𑀼𑀦𑁆𑀢𑀺 𑀕𑀳𑁂𑀢𑀩𑁆𑀩𑀁. 𑀅𑀤𑀺𑀦𑁆𑀦𑀸𑀤𑀸𑀦𑀲𑁆𑀲 𑀧𑀬𑁄𑀕𑀢𑁆𑀢𑀸𑀢𑀺 𑀲𑀳𑀧𑀬𑁄𑀕𑀫𑀸𑀳. 𑀯𑀢𑁆𑀣𑀼𑀫𑁆𑀳𑀺𑀬𑁂𑀯 𑀓𑀢𑀧𑀬𑁄𑀕𑀢𑁆𑀢𑀸 𑀲𑀳𑀧𑀬𑁄𑀕𑀯𑀲𑁂𑀦 𑀳𑁂𑀢𑀁 𑀤𑀼𑀓𑁆𑀓𑀝𑀁. 𑀲𑀬𑀫𑁆𑀧𑀻𑀢𑀺 𑀅𑀪𑀺𑀬𑀼𑀜𑁆𑀚𑀓𑁄𑀧𑀺. ‘‘𑀓𑀺𑀁 𑀓𑀭𑁄𑀫𑀺 𑀓𑀺𑀁 𑀓𑀭𑁄𑀫𑀻’’𑀢𑀺 𑀏𑀯𑀁 𑀓𑀺𑀗𑁆𑀓𑀸𑀭𑀫𑁂𑀯 𑀧𑀝𑀺𑀲𑁆𑀲𑀼𑀡𑀦𑁆𑀢𑁄 𑀯𑀺𑀬 𑀘𑀭𑀢𑀻𑀢𑀺 𑀓𑀺𑀗𑁆𑀓𑀸𑀭𑀧𑀝𑀺𑀲𑁆𑀲𑀸𑀯𑀻, 𑀢𑀲𑁆𑀲 𑀪𑀸𑀯𑁄 𑀓𑀺𑀗𑁆𑀓𑀸𑀭𑀧𑀝𑀺𑀲𑁆𑀲𑀸𑀯𑀺𑀪𑀸𑀯𑁄, 𑀢𑀲𑁆𑀫𑀺𑀁, 𑀅𑀢𑁆𑀢𑀦𑁄 𑀯𑀲𑀯𑀢𑁆𑀢𑀺𑀪𑀸𑀯𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀉𑀓𑁆𑀓𑁄𑀘𑀦𑁆𑀢𑀺 𑀮𑀜𑁆𑀚𑀁. 𑀲𑀩𑁆𑀩𑁂𑀲𑀁 𑀧𑀸𑀭𑀸𑀚𑀺𑀓𑀦𑁆𑀢𑀺 𑀓𑀽𑀝𑀯𑀺𑀦𑀺𑀘𑁆𑀙𑀬𑀺𑀓𑀸𑀤𑀻𑀦𑀁. 𑀅𑀬𑀁 𑀯𑀢𑁆𑀣𑀼𑀲𑀸𑀫𑀻𑀢𑀺𑀆𑀤𑀺𑀓𑀲𑁆𑀲 𑀉𑀪𑀺𑀦𑁆𑀦𑀁 𑀥𑀼𑀭𑀦𑀺𑀓𑁆𑀔𑁂𑀧𑀓𑀭𑀡𑀳𑁂𑀢𑀼𑀦𑁄 𑀧𑀬𑁄𑀕𑀲𑁆𑀲 𑀓𑀭𑀡𑀓𑁆𑀔𑀡𑁂𑀯 𑀧𑀸𑀭𑀸𑀚𑀺𑀓𑀁 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑀘𑁂 𑀧𑀦 𑀲𑀸𑀫𑀺𑀓𑀲𑁆𑀲 𑀯𑀺𑀫𑀢𑀺 𑀘 𑀥𑀼𑀭𑀦𑀺𑀓𑁆𑀔𑁂𑀧𑁄 𑀘 𑀓𑀫𑁂𑀦 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀧𑀬𑁄𑀕𑀲𑀫𑀼𑀝𑁆𑀞𑀸𑀧𑀓𑀘𑀺𑀢𑁆𑀢𑀓𑁆𑀔𑀡𑁂 𑀧𑀸𑀭𑀸𑀚𑀺𑀓𑀫𑁂𑀯 𑀳𑁄𑀢𑀺, 𑀦 𑀣𑀼𑀮𑁆𑀮𑀘𑁆𑀘𑀬𑀁. 𑀬𑀤𑀺 𑀯𑀺𑀫𑀢𑀺𑀬𑁂𑀯 𑀉𑀧𑁆𑀧𑀚𑁆𑀚𑀢𑀺, 𑀢𑀤𑀸 𑀣𑀼𑀮𑁆𑀮𑀘𑁆𑀘𑀬𑀫𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀁, 𑀅𑀬𑀁 𑀦𑀬𑁄 𑀲𑀩𑁆𑀩𑀢𑁆𑀣 𑀬𑀣𑀸𑀦𑀼𑀭𑀽𑀧𑀁 𑀕𑀳𑁂𑀢𑀩𑁆𑀩𑁄. 𑀥𑀼𑀭𑀦𑀺𑀓𑁆𑀔𑁂𑀧𑀯𑀲𑁂𑀦𑁂𑀯 𑀧𑀭𑀸𑀚𑀬𑁄𑀢𑀺 𑀲𑀸𑀫𑀺𑀓𑁄 ‘‘𑀅𑀳𑀁 𑀦 𑀫𑀼𑀘𑁆𑀘𑀸𑀫𑀻’’𑀢𑀺 𑀥𑀼𑀭𑀁 𑀅𑀦𑀺𑀓𑁆𑀔𑀺𑀧𑀦𑁆𑀢𑁄 𑀅𑀝𑁆𑀝𑁄 𑀧𑀭𑀸𑀚𑀺𑀢𑁄 𑀦𑀸𑀫 𑀦 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺.

𑀯𑀺𑀳𑀸𑀭𑀝𑁆𑀞𑀓𑀣𑀸𑀯𑀡𑁆𑀡𑀦𑀸

𑁧𑁦𑁩. 𑀯𑀺𑀳𑀸𑀭𑀝𑁆𑀞𑀓𑀣𑀸𑀬𑀁 𑀯𑀺𑀳𑀸𑀭𑀦𑁆𑀢𑀺 𑀉𑀧𑀘𑀸𑀭𑀲𑀻𑀫𑀸𑀲𑀗𑁆𑀔𑀸𑀢𑀁 𑀲𑀓𑀮𑀁 𑀯𑀺𑀳𑀸𑀭𑀁. 𑀧𑀭𑀺𑀯𑁂𑀡𑀦𑁆𑀢𑀺 𑀢𑀲𑁆𑀲 𑀯𑀺𑀳𑀸𑀭𑀲𑁆𑀲 𑀅𑀩𑁆𑀪𑀦𑁆𑀢𑀭𑁂 𑀯𑀺𑀲𑀼𑀁 𑀯𑀺𑀲𑀼𑀁 𑀧𑀸𑀓𑀸𑀭𑀸𑀤𑀺𑀧𑀭𑀺𑀘𑁆𑀙𑀺𑀦𑁆𑀦𑀝𑁆𑀞𑀸𑀦𑀁. 𑀆𑀯𑀸𑀲𑀦𑁆𑀢𑀺 𑀏𑀓𑀁 𑀆𑀯𑀲𑀣𑀫𑀢𑁆𑀢𑀁. 𑀕𑀡𑀲𑀦𑁆𑀢𑀓𑁂 𑀧𑀭𑀺𑀘𑁆𑀙𑀺𑀦𑁆𑀦𑀲𑀸𑀫𑀺𑀓𑀢𑁆𑀢𑀸 𑀲𑀓𑁆𑀓𑀸 𑀥𑀼𑀭𑀁 𑀦𑀺𑀓𑁆𑀔𑀺𑀧𑀸𑀧𑁂𑀢𑀼𑀦𑁆𑀢𑀺 𑀆𑀳 ‘‘𑀤𑀻𑀖𑀪𑀸𑀡𑀓𑀸𑀤𑀺𑀪𑁂𑀤𑀲𑁆𑀲 𑀧𑀦 𑀕𑀡𑀲𑁆𑀲𑀸’’𑀢𑀺. 𑀇𑀥𑀸𑀧𑀺 𑀲𑀘𑁂 𑀏𑀓𑁄𑀧𑀺 𑀥𑀼𑀭𑀁 𑀦 𑀦𑀺𑀓𑁆𑀔𑀺𑀧𑀢𑀺, 𑀭𑀓𑁆𑀔𑀢𑀺𑀬𑁂𑀯. 𑀏𑀲 𑀦𑀬𑁄 𑀩𑀳𑀽𑀦𑀁 𑀲𑀦𑁆𑀢𑀓𑁂 𑀲𑀩𑁆𑀩𑀢𑁆𑀣.

𑀔𑁂𑀢𑁆𑀢𑀝𑁆𑀞𑀓𑀣𑀸𑀯𑀡𑁆𑀡𑀦𑀸

𑁧𑁦𑁪. 𑀔𑁂𑀢𑁆𑀢𑀝𑁆𑀞𑀓𑀣𑀸𑀬𑀁 𑀦𑀺𑀭𑀼𑀫𑁆𑀪𑀺𑀢𑁆𑀯𑀸 𑀯𑀸𑀢𑀺𑀆𑀤𑀻𑀲𑀼 𑀕𑀡𑁆𑀳𑀦𑁆𑀢𑀲𑁆𑀲𑀸𑀢𑀺 𑀧𑀘𑁆𑀘𑁂𑀓𑀁 𑀬𑁄𑀚𑁂𑀢𑀩𑁆𑀩𑀁, 𑀢𑀢𑁆𑀣 𑀦𑀺𑀭𑀼𑀫𑁆𑀪𑀺𑀢𑁆𑀯𑀸 𑀕𑀳𑀡𑀁 𑀦𑀸𑀫 𑀯𑀻𑀳𑀺𑀲𑀻𑀲𑀁 𑀅𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀬𑀣𑀸𑀞𑀺𑀢𑀫𑁂𑀯 𑀳𑀢𑁆𑀣𑁂𑀦 𑀕𑀳𑁂𑀢𑁆𑀯𑀸 𑀆𑀓𑀟𑁆𑀠𑀺𑀢𑁆𑀯𑀸 𑀩𑀻𑀚𑀫𑀢𑁆𑀢𑀲𑁆𑀲𑁂𑀯 𑀕𑀳𑀡𑀁. 𑀏𑀓𑀫𑁂𑀓𑀦𑁆𑀢𑀺 𑀏𑀓𑀁 𑀯𑀻𑀳𑀺𑀲𑀻𑀲𑀁. 𑀬𑀲𑁆𑀫𑀺𑀁 𑀩𑀻𑀚𑁂 𑀯𑀸𑀢𑀺𑀆𑀤𑀺 𑀦𑀺𑀭𑀼𑀫𑁆𑀪𑀺𑀢𑁆𑀯𑀸 𑀕𑀳𑀡𑀸𑀤𑀻𑀲𑀼 𑀬𑀣𑀸𑀓𑁆𑀓𑀫𑀁 𑀬𑁄𑀚𑁂𑀢𑀩𑁆𑀩𑀁. ‘‘𑀢𑀲𑁆𑀫𑀺𑀁 𑀩𑀦𑁆𑀥𑀦𑀸 𑀫𑁄𑀘𑀺𑀢𑀫𑀢𑁆𑀢𑁂’’𑀢𑀺 𑀯𑀘𑀦𑀢𑁄 𑀢𑀲𑁆𑀫𑀺𑀁 𑀩𑀻𑀚𑀸𑀤𑀺𑀫𑁆𑀳𑀺 𑀩𑀦𑁆𑀥𑀦𑀸 𑀫𑀼𑀢𑁆𑀢𑁂 𑀲𑀢𑀺 𑀢𑀢𑁄 𑀅𑀦𑀧𑀦𑀻𑀢𑁂𑀧𑀺 𑀞𑀸𑀦𑀦𑁆𑀢𑀭𑀲𑁆𑀲 𑀅𑀪𑀸𑀯𑀸 𑀧𑀸𑀭𑀸𑀚𑀺𑀓𑀫𑁂𑀯. 𑀬𑀲𑁆𑀲 𑀧𑀦 𑀲𑀻𑀲𑀸𑀤𑀺𑀓𑀲𑁆𑀲 𑀲𑀦𑁆𑀢𑀭𑀸𑀤𑀺𑀦𑀸 𑀲𑀳 𑀲𑀁𑀲𑀺𑀩𑁆𑀩𑀦𑀁 𑀯𑀸 𑀏𑀓𑀸𑀩𑀤𑁆𑀥𑀢𑀸 𑀯𑀸 𑀳𑁄𑀢𑀺, 𑀢𑀲𑁆𑀲 𑀩𑀦𑁆𑀥𑀦𑀸 𑀫𑁄𑀘𑀺𑀢𑁂 𑀣𑀼𑀮𑁆𑀮𑀘𑁆𑀘𑀬𑀁, 𑀇𑀢𑀭𑀝𑁆𑀞𑀸𑀦𑀢𑁄 𑀫𑁄𑀘𑀺𑀢𑁂 𑀧𑀸𑀭𑀸𑀚𑀺𑀓𑀦𑁆𑀢𑀺 𑀕𑀳𑁂𑀢𑀩𑁆𑀩𑀁, 𑀢𑁂𑀦𑀸𑀳 𑀯𑀻𑀳𑀺𑀦𑀸𑀴𑀦𑁆𑀢𑀺𑀆𑀤𑀺. 𑀲𑀪𑀼𑀲𑀦𑁆𑀢𑀺 𑀧𑀮𑀸𑀮𑀲𑀳𑀺𑀢𑀁. 𑀔𑀻𑀮𑁂𑀦𑀸𑀢𑀺 𑀔𑀸𑀡𑀼𑀓𑁂𑀦. 𑀏𑀢𑁆𑀣 𑀘 𑀔𑀻𑀮𑀲𑀗𑁆𑀓𑀫𑀦𑀸𑀤𑀻𑀲𑀼 𑀲𑀳𑀧𑀬𑁄𑀕𑁄 𑀥𑀼𑀭𑀦𑀺𑀓𑁆𑀔𑁂𑀧𑁄 𑀘𑀸𑀢𑀺 𑀉𑀪𑀬𑀁 𑀲𑀫𑁆𑀪𑀯𑀢𑀺. 𑀔𑀻𑀮𑀲𑀗𑁆𑀓𑀫𑀦𑀸𑀤𑀺 𑀏𑀢𑁆𑀣 𑀲𑀳𑀧𑀬𑁄𑀕𑁄. 𑀢𑀲𑁆𑀫𑀺𑀜𑁆𑀘 𑀓𑀢𑁂 𑀬𑀤𑀺 𑀲𑀸𑀫𑀺𑀓𑀸 𑀥𑀼𑀭𑀁 𑀦 𑀦𑀺𑀓𑁆𑀔𑀺𑀧𑀦𑁆𑀢𑀺 𑀧𑀼𑀦 𑀕𑀡𑁆𑀳𑀺𑀢𑀼𑀓𑀸𑀫𑀸𑀯 𑀳𑁄𑀦𑁆𑀢𑀺, 𑀦 𑀢𑀸𑀯 𑀅𑀯𑀳𑀸𑀭𑁄, ‘‘𑀔𑀻𑀮𑀁 𑀲𑀗𑁆𑀓𑀸𑀫𑁂𑀢𑁆𑀯𑀸 𑀔𑁂𑀢𑁆𑀢𑀸𑀤𑀺𑀁 𑀅𑀲𑀼𑀓𑁄 𑀭𑀸𑀚𑀯𑀮𑁆𑀮𑀪𑁄 𑀪𑀺𑀓𑁆𑀔𑀼 𑀕𑀡𑁆𑀳𑀺𑀢𑀼𑀓𑀸𑀫𑁄’’𑀢𑀺 𑀜𑀢𑁆𑀯𑀸 𑀢𑀲𑁆𑀲 𑀩𑀮𑀁 𑀓𑀓𑁆𑀔𑀴𑀸𑀤𑀺𑀪𑀸𑀯𑀜𑁆𑀘 𑀦𑀺𑀲𑁆𑀲𑀸𑀬 𑀔𑀻𑀮𑀲𑀗𑁆𑀓𑀫𑀦𑀸𑀤𑀺𑀓𑀺𑀭𑀺𑀬𑀸𑀦𑀺𑀝𑁆𑀞𑀸𑀦𑀢𑁄 𑀧𑀞𑀫𑀫𑁂𑀯 𑀲𑀸𑀫𑀺𑀓𑀸 𑀥𑀼𑀭𑀁 𑀦𑀺𑀓𑁆𑀔𑀺𑀧𑀦𑁆𑀢𑀺, 𑀦 𑀅𑀯𑀳𑀸𑀭𑁄 𑀏𑀢𑀲𑁆𑀲 𑀧𑀬𑁄𑀕𑀦𑀺𑀝𑁆𑀞𑀸𑀦𑀢𑁄 𑀧𑀼𑀭𑁂𑀢𑀭𑀫𑁂𑀯 𑀥𑀼𑀭𑀲𑁆𑀲 𑀦𑀺𑀓𑁆𑀔𑀺𑀢𑁆𑀢𑀢𑁆𑀢𑀸. 𑀬𑀤𑀸 𑀧𑀦 𑀔𑀻𑀮𑀲𑀗𑁆𑀓𑀫𑀦𑀸𑀤𑀺𑀧𑀬𑁄𑀕𑁂𑀦𑁂𑀯 𑀥𑀼𑀭𑀦𑀺𑀓𑁆𑀔𑁂𑀧𑁄 𑀳𑁄𑀢𑀺, 𑀢𑀤𑀸𑀬𑁂𑀯 𑀅𑀯𑀳𑀸𑀭𑁄, 𑀢𑁂𑀦𑁂𑀯𑁂𑀢𑁆𑀣 ‘‘𑀢𑀜𑁆𑀘 𑀔𑁄 𑀲𑀸𑀫𑀺𑀓𑀸𑀦𑀁 𑀥𑀼𑀭𑀦𑀺𑀓𑁆𑀔𑁂𑀧𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀔𑀻𑀮𑀸𑀤𑀻𑀦𑀁 𑀲𑀗𑁆𑀓𑀫𑀺𑀢𑀪𑀸𑀯𑀁 𑀅𑀚𑀸𑀦𑀺𑀢𑁆𑀯𑀸 𑀲𑀸𑀫𑀺𑀓𑀸𑀦𑀁 𑀲𑀫𑁆𑀧𑀝𑀺𑀘𑁆𑀙𑀦𑀫𑁆𑀧𑁂𑀢𑁆𑀣 𑀥𑀼𑀭𑀦𑀺𑀓𑁆𑀔𑁂𑀧𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀏𑀯𑀁 𑀲𑀩𑁆𑀩𑀢𑁆𑀣𑀸𑀢𑀺 𑀬𑀣𑀸𑀯𑀼𑀢𑁆𑀢𑀫𑀢𑁆𑀣𑀁 𑀭𑀚𑁆𑀚𑀼𑀲𑀗𑁆𑀓𑀫𑀦𑀸𑀤𑀻𑀲𑀼𑀧𑀺 𑀅𑀢𑀺𑀤𑀺𑀲𑀢𑀺. 𑀬𑀝𑁆𑀞𑀺𑀦𑁆𑀢𑀺 𑀫𑀸𑀦𑀤𑀡𑁆𑀟𑀁. 𑀏𑀓𑀲𑁆𑀫𑀺𑀁 𑀅𑀦𑀸𑀕𑀢𑁂 𑀣𑀼𑀮𑁆𑀮𑀘𑁆𑀘𑀬𑀁, 𑀢𑀲𑁆𑀫𑀺𑀁 𑀆𑀕𑀢𑁂 𑀧𑀸𑀭𑀸𑀚𑀺𑀓𑀦𑁆𑀢𑀺 𑀲𑀘𑁂 𑀤𑀸𑀭𑀽𑀦𑀺 𑀦𑀺𑀔𑀡𑀺𑀢𑁆𑀯𑀸 𑀢𑀢𑁆𑀢𑀓𑁂𑀦𑁂𑀯 𑀕𑀡𑁆𑀳𑀺𑀢𑀼𑀓𑀸𑀫𑁄 𑀳𑁄𑀢𑀺, 𑀅𑀯𑀲𑀸𑀦𑁂 𑀤𑀸𑀭𑀼𑀫𑁆𑀳𑀺 𑀧𑀸𑀭𑀸𑀚𑀺𑀓𑀁. 𑀲𑀘𑁂 𑀢𑀢𑁆𑀣 𑀓𑀡𑁆𑀝𑀓𑀲𑀸𑀔𑀸𑀤𑀻𑀳𑀺 𑀧𑀸𑀤𑀸𑀦𑀁 𑀅𑀦𑁆𑀢𑀭𑀁 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀓𑀲𑁆𑀲𑀘𑀺 𑀅𑀧𑁆𑀧𑀯𑁂𑀲𑀸𑀭𑀳𑀁 𑀓𑀢𑁆𑀯𑀸 𑀕𑀳𑁂𑀢𑀼𑀓𑀸𑀫𑁄 𑀳𑁄𑀢𑀺, 𑀅𑀯𑀲𑀸𑀦𑀲𑀸𑀔𑀸𑀬 𑀧𑀸𑀭𑀸𑀚𑀺𑀓𑀁, 𑀢𑁂𑀦𑀸𑀳 ‘‘𑀲𑀸𑀔𑀸𑀧𑀭𑀺𑀯𑀸𑀭𑁂𑀦𑁂𑀯 𑀅𑀢𑁆𑀢𑀦𑁄 𑀓𑀸𑀢𑀼𑀁 𑀲𑀓𑁆𑀓𑁄𑀢𑀻’’𑀢𑀺, 𑀤𑀸𑀭𑀽𑀦𑀺 𑀘 𑀦𑀺𑀔𑀡𑀺𑀢𑁆𑀯𑀸 𑀲𑀸𑀔𑀸𑀧𑀭𑀺𑀯𑀸𑀭𑀜𑁆𑀘 𑀓𑀢𑁆𑀯𑀸 𑀏𑀯 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀓𑀸𑀢𑀼𑀁 𑀲𑀓𑁆𑀓𑁄𑀢𑀻𑀢𑀺 𑀅𑀢𑁆𑀣𑁄. 𑀔𑁂𑀢𑁆𑀢𑀫𑀭𑀺𑀬𑀸𑀤𑀦𑁆𑀢𑀺 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀯𑀺𑀪𑀸𑀯𑁂𑀢𑀼𑀁 ‘‘𑀓𑁂𑀤𑀸𑀭𑀧𑀸𑀴𑀺’’𑀦𑁆𑀢𑀺 𑀯𑀼𑀢𑁆𑀢𑀁. 𑀇𑀤𑀜𑁆𑀘 𑀔𑀻𑀮𑀲𑀗𑁆𑀓𑀫𑀦𑀸𑀤𑀺𑀦𑀸 𑀕𑀳𑀡𑀁 𑀆𑀭𑀸𑀫𑀸𑀤𑀻𑀲𑀼𑀧𑀺 𑀮𑀩𑁆𑀪𑀢𑁂𑀯.

𑀯𑀢𑁆𑀣𑀼𑀝𑁆𑀞𑀓𑀣𑀸𑀯𑀡𑁆𑀡𑀦𑀸

𑁧𑁦𑁫. 𑀯𑀢𑁆𑀣𑀼𑀝𑁆𑀞𑀓𑀣𑀸𑀬𑀁 𑀢𑀺𑀡𑁆𑀡𑀁 𑀧𑀸𑀓𑀸𑀭𑀸𑀦𑀦𑁆𑀢𑀺 𑀇𑀝𑁆𑀞𑀓𑀲𑀺𑀮𑀸𑀤𑀸𑀭𑀽𑀦𑀁 𑀯𑀲𑁂𑀦 𑀢𑀺𑀡𑁆𑀡𑀁 𑀧𑀸𑀓𑀸𑀭𑀸𑀦𑀁.

𑁧𑁦𑁬. 𑀕𑀸𑀫𑀝𑁆𑀞𑀓𑀣𑀸𑀬𑀁 ‘‘𑀕𑀸𑀫𑁄 𑀦𑀸𑀫𑀸’’𑀢𑀺 𑀧𑀸𑀴𑀺𑀬𑀁 𑀦 𑀯𑀼𑀢𑁆𑀢𑀁 𑀲𑀩𑁆𑀩𑀲𑁄 𑀕𑀸𑀫𑀮𑀓𑁆𑀔𑀡𑀲𑁆𑀲 𑀧𑀼𑀩𑁆𑀩𑁂 𑀯𑀼𑀢𑁆𑀢𑀢𑁆𑀢𑀸.

𑀅𑀭𑀜𑁆𑀜𑀝𑁆𑀞𑀓𑀣𑀸𑀯𑀡𑁆𑀡𑀦𑀸

𑁧𑁦𑁭. 𑀅𑀭𑀜𑁆𑀜𑀝𑁆𑀞𑀓𑀣𑀸𑀬𑀁 𑀯𑀺𑀦𑀺𑀯𑀺𑀚𑁆𑀛𑀺𑀢𑁆𑀯𑀸𑀢𑀺 𑀉𑀚𑀼𑀓𑀫𑁂𑀯 𑀯𑀺𑀦𑀺𑀯𑀺𑀚𑁆𑀛𑀺𑀢𑁆𑀯𑀸. 𑀮𑀓𑁆𑀔𑀡𑀘𑁆𑀙𑀺𑀦𑁆𑀦𑀲𑁆𑀲𑀸𑀢𑀺 𑀅𑀭𑀜𑁆𑀜𑀲𑀸𑀫𑀺𑀓𑀸𑀦𑀁 𑀳𑀢𑁆𑀣𑀢𑁄 𑀓𑀺𑀡𑀺𑀢𑁆𑀯𑀸 𑀕𑀡𑁆𑀳𑀦𑁆𑀢𑁂𑀳𑀺 𑀓𑀢𑀅𑀓𑁆𑀔𑀭𑀸𑀤𑀺𑀲𑀜𑁆𑀜𑀸𑀡𑀲𑁆𑀲. 𑀙𑀮𑁆𑀮𑀺𑀬𑀸 𑀧𑀭𑀺𑀬𑁄𑀦𑀤𑁆𑀥𑀦𑁆𑀢𑀺 𑀇𑀫𑀺𑀦𑀸 𑀲𑀸𑀫𑀺𑀓𑀸𑀦𑀁 𑀦𑀺𑀭𑀸𑀧𑁂𑀓𑁆𑀔𑀢𑀸𑀬 𑀘𑀺𑀭𑀙𑀟𑁆𑀟𑀺𑀢𑀪𑀸𑀯𑀁 𑀤𑀻𑀧𑁂𑀢𑀺, 𑀢𑁂𑀦𑀸𑀳 ‘‘𑀕𑀳𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺. 𑀬𑀤𑀺 𑀲𑀸𑀫𑀺𑀓𑀸𑀦𑀁 𑀲𑀸𑀧𑁂𑀓𑁆𑀔𑀢𑀸 𑀅𑀢𑁆𑀣𑀺, 𑀦 𑀯𑀝𑁆𑀝𑀢𑀺. 𑀢𑀸𑀦𑀺 𑀓𑀢𑀸𑀦𑀺 𑀅𑀚𑁆𑀛𑀸𑀯𑀼𑀢𑁆𑀣𑀸𑀦𑀺 𑀘 𑀳𑁄𑀦𑁆𑀢𑀻𑀢𑀺 𑀢𑀸𑀦𑀺 𑀕𑁂𑀳𑀸𑀤𑀻𑀦𑀺 𑀓𑀢𑀸𑀦𑀺 𑀧𑀭𑀺𑀦𑀺𑀝𑁆𑀞𑀺𑀢𑀸𑀦𑀺 𑀫𑀦𑀼𑀲𑁆𑀲𑁂𑀳𑀺 𑀘 𑀅𑀚𑁆𑀛𑀸𑀯𑀼𑀢𑁆𑀣𑀸𑀦𑀺 𑀘 𑀳𑁄𑀦𑁆𑀢𑀺. 𑀤𑀸𑀭𑀽𑀦𑀻𑀢𑀺 𑀕𑁂𑀳𑀸𑀤𑀻𑀦𑀁 𑀓𑀢𑀢𑁆𑀢𑀸 𑀅𑀯𑀲𑀺𑀝𑁆𑀞𑀤𑀸𑀭𑀽𑀦𑀺. 𑀕𑀳𑁂𑀢𑀼𑀁 𑀯𑀝𑁆𑀝𑀢𑀻𑀢𑀺 𑀲𑀸𑀫𑀺𑀓𑀸𑀦𑀁 𑀅𑀦𑀸𑀮𑀬𑀢𑁆𑀢𑀸 𑀯𑀼𑀢𑁆𑀢𑀁, 𑀢𑁂 𑀘 𑀬𑀤𑀺 𑀕𑀳𑀡𑀓𑀸𑀮𑁂 𑀤𑀺𑀲𑁆𑀯𑀸 𑀲𑀸𑀮𑀬𑀸 𑀳𑀼𑀢𑁆𑀯𑀸 𑀯𑀸𑀭𑁂𑀦𑁆𑀢𑀺, 𑀕𑀳𑁂𑀢𑀼𑀁 𑀦 𑀯𑀝𑁆𑀝𑀢𑀺𑀬𑁂𑀯. ‘‘𑀤𑁂𑀳𑀻’’𑀢𑀺 𑀯𑀼𑀢𑁆𑀢𑁂 𑀤𑀸𑀢𑀩𑁆𑀩𑀫𑁂𑀯𑀸𑀢𑀺 ‘‘𑀤𑁂𑀳𑀻’’𑀢𑀺 𑀯𑀼𑀢𑁆𑀢𑁂 ‘‘𑀤𑀲𑁆𑀲𑀸𑀫𑀻’’𑀢𑀺 𑀆𑀪𑁄𑀕𑀁 𑀓𑀢𑁆𑀯𑀸 𑀕𑀘𑁆𑀙𑀦𑁆𑀢𑀲𑁆𑀲 ‘‘𑀤𑁂𑀳𑀻’’𑀢𑀺 𑀅𑀯𑀼𑀢𑁆𑀢𑁂 𑀅𑀤𑀢𑁆𑀯𑀸 𑀕𑀫𑀦𑁂 𑀆𑀧𑀢𑁆𑀢𑀺 𑀦𑀢𑁆𑀣𑀺. 𑀧𑀘𑁆𑀙𑀸𑀧𑀺 𑀢𑁂𑀳𑀺 𑀘𑁄𑀤𑀺𑀢𑁂 𑀤𑀸𑀢𑀩𑁆𑀩𑀫𑁂𑀯.

𑀅𑀤𑀺𑀲𑁆𑀯𑀸 𑀕𑀘𑁆𑀙𑀢𑀺, 𑀪𑀡𑁆𑀟𑀤𑁂𑀬𑁆𑀬𑀦𑁆𑀢𑀺 𑀲𑀼𑀤𑁆𑀥𑀘𑀺𑀢𑁆𑀢𑁂𑀦 𑀕𑀢𑀲𑁆𑀲 𑀪𑀡𑁆𑀟𑀤𑁂𑀬𑁆𑀬𑀁. 𑀆𑀭𑀓𑁆𑀔𑀝𑁆𑀞𑀸𑀦𑀫𑁆𑀧𑀺 𑀲𑀼𑀤𑁆𑀥𑀘𑀺𑀢𑁆𑀢𑁂𑀦 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀣𑁂𑀬𑁆𑀬𑀘𑀺𑀢𑁆𑀢𑁂 𑀉𑀧𑁆𑀧𑀦𑁆𑀦𑁂𑀧𑀺 𑀅𑀯𑀳𑀸𑀭𑁄 𑀦𑀢𑁆𑀣𑀺 𑀆𑀭𑀓𑁆𑀔𑀝𑁆𑀞𑀸𑀦𑀲𑁆𑀲 𑀅𑀢𑀺𑀓𑁆𑀓𑀦𑁆𑀢𑀢𑁆𑀢𑀸. 𑀓𑁂𑀘𑀺 𑀧𑀦 ‘‘𑀬𑀢𑁆𑀣 𑀓𑀢𑁆𑀣𑀘𑀺 𑀦𑀻𑀢𑀸𑀦𑀫𑁆𑀧𑀺 𑀤𑀸𑀭𑀽𑀦𑀁 𑀅𑀭𑀜𑁆𑀜𑀲𑀸𑀫𑀺𑀓𑀸𑀦𑀜𑁆𑀜𑁂𑀯 𑀲𑀦𑁆𑀢𑀓𑀢𑁆𑀢𑀸 𑀧𑀼𑀦 𑀣𑁂𑀬𑁆𑀬𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀕𑀘𑁆𑀙𑀢𑀺, 𑀧𑀸𑀭𑀸𑀚𑀺𑀓𑀫𑁂𑀯𑀸’’𑀢𑀺 𑀯𑀤𑀦𑁆𑀢𑀺, 𑀢𑀁 𑀦 𑀬𑀼𑀢𑁆𑀢𑀁 ‘‘𑀆𑀭𑀓𑁆𑀔𑀝𑁆𑀞𑀸𑀦𑀁 𑀧𑀢𑁆𑀯𑀸…𑀧𑁂… 𑀅𑀲𑁆𑀲𑀢𑀺𑀬𑀸 𑀅𑀢𑀺𑀓𑁆𑀓𑀫𑀢𑀻’’𑀢𑀺, 𑀲𑀳𑀲𑀸 𑀢𑀁 𑀞𑀸𑀦𑀁 𑀅𑀢𑀺𑀓𑁆𑀓𑀫𑀢𑀻𑀢𑀺𑀆𑀤𑀺𑀦𑀸 (𑀧𑀸𑀭𑀸. 𑀅𑀝𑁆𑀞. 𑁧.𑁧𑁦𑁭) 𑀘 𑀆𑀭𑀓𑁆𑀔𑀝𑁆𑀞𑀸𑀦𑀸𑀢𑀺𑀓𑁆𑀓𑀫𑁂𑀬𑁂𑀯 𑀆𑀧𑀢𑁆𑀢𑀺𑀬𑀸 𑀯𑀼𑀘𑁆𑀘𑀫𑀸𑀦𑀢𑁆𑀢𑀸, 𑀆𑀭𑀓𑁆𑀔𑀝𑁆𑀞𑀸𑀦𑀸𑀢𑀺𑀓𑁆𑀓𑀫𑀫𑁂𑀯 𑀲𑀦𑁆𑀥𑀸𑀬 ‘‘𑀇𑀤𑀁 𑀧𑀦 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀧𑀭𑀺𑀳𑀭𑀦𑁆𑀢𑀲𑁆𑀲 𑀆𑀓𑀸𑀲𑁂𑀦 𑀕𑀘𑁆𑀙𑀢𑁄𑀧𑀺 𑀧𑀸𑀭𑀸𑀚𑀺𑀓𑀫𑁂𑀯𑀸’’𑀢𑀺 𑀯𑀼𑀢𑁆𑀢𑀁. 𑀬𑀜𑁆𑀘 ‘‘𑀬𑀢𑁆𑀣 𑀓𑀢𑁆𑀣𑀘𑀺 𑀦𑀻𑀢𑀸𑀦𑀫𑁆𑀧𑀺 𑀤𑀸𑀭𑀽𑀦𑀁 𑀅𑀭𑀜𑁆𑀜𑀲𑀸𑀫𑀺𑀓𑀸𑀦𑀜𑁆𑀜𑁂𑀯 𑀲𑀦𑁆𑀢𑀓𑀢𑁆𑀢𑀸’’𑀢𑀺 𑀓𑀸𑀭𑀡𑀁 𑀯𑀼𑀢𑁆𑀢𑀁, 𑀢𑀫𑁆𑀧𑀺 𑀆𑀭𑀓𑁆𑀔𑀝𑁆𑀞𑀸𑀦𑀢𑁄 𑀩𑀳𑀺 𑀧𑀸𑀭𑀸𑀚𑀺𑀓𑀸𑀧𑀚𑁆𑀚𑀦𑀲𑁆𑀲 𑀓𑀸𑀭𑀡𑀁 𑀦 𑀳𑁄𑀢𑀺 𑀪𑀡𑁆𑀟𑀤𑁂𑀬𑁆𑀬𑀪𑀸𑀯𑀲𑁆𑀲𑁂𑀯 𑀓𑀸𑀭𑀡𑀢𑁆𑀢𑀸. 𑀢𑁂𑀲𑀁 𑀲𑀦𑁆𑀢𑀓𑀢𑁆𑀢𑁂𑀦𑁂𑀯 𑀳𑀺 𑀩𑀳𑀺 𑀓𑀢𑀲𑁆𑀲𑀸𑀧𑀺 𑀪𑀡𑁆𑀟𑀤𑁂𑀬𑁆𑀬𑀁 𑀚𑀸𑀢𑀁, 𑀇𑀢𑀭𑀣𑀸 𑀘 𑀪𑀡𑁆𑀟𑀤𑁂𑀬𑁆𑀬𑀫𑁆𑀧𑀺 𑀦 𑀲𑀺𑀬𑀸 𑀲𑀼𑀗𑁆𑀓𑀖𑀸𑀢𑀸𑀢𑀺𑀓𑁆𑀓𑀫𑁂 𑀯𑀺𑀬. 𑀅𑀤𑁆𑀥𑀺𑀓𑁂𑀳𑀺 𑀤𑀺𑀦𑁆𑀦𑀫𑁂𑀯 𑀲𑀼𑀗𑁆𑀓𑀺𑀓𑀸𑀦𑀁 𑀲𑀦𑁆𑀢𑀓𑀁 𑀳𑁄𑀢𑀺, 𑀦𑀸𑀤𑀺𑀦𑁆𑀦𑀁, 𑀢𑁂𑀦 𑀢𑀁 𑀞𑀸𑀦𑀁 𑀬𑀢𑁄 𑀓𑀼𑀢𑁄𑀘𑀺 𑀧𑀘𑁆𑀘𑀬𑀢𑁄 𑀲𑀼𑀤𑁆𑀥𑀘𑀺𑀢𑁆𑀢𑁂𑀦 𑀅𑀢𑀺𑀓𑁆𑀓𑀦𑁆𑀢𑀲𑁆𑀲 𑀪𑀡𑁆𑀟𑀤𑁂𑀬𑁆𑀬𑀫𑁆𑀧𑀺 𑀦 𑀳𑁄𑀢𑀺. 𑀇𑀥 𑀧𑀦 𑀅𑀭𑀜𑁆𑀜𑀲𑀸𑀫𑀺𑀓𑀸𑀦𑀁 𑀲𑀦𑁆𑀢𑀓𑀢𑁆𑀢𑀸 𑀲𑀩𑁆𑀩𑀢𑁆𑀣𑀸𑀧𑀺 𑀪𑀡𑁆𑀟𑀤𑁂𑀬𑁆𑀬𑀫𑁂𑀯 𑀳𑁄𑀢𑀺, 𑀢𑁂𑀦𑁂𑀯𑁂𑀢𑀁 𑀅𑀭𑀜𑁆𑀜𑁂 𑀆𑀭𑀓𑁆𑀔𑀝𑁆𑀞𑀸𑀦𑀁 𑀲𑀼𑀗𑁆𑀓𑀖𑀸𑀢𑀢𑁄𑀧𑀺 𑀕𑀭𑀼𑀢𑀭𑀁 𑀚𑀸𑀢𑀁. 𑀬𑀤𑀺 𑀳𑀺 𑀆𑀭𑀓𑁆𑀔𑀝𑁆𑀞𑀸𑀦𑀢𑁄 𑀩𑀳𑀺𑀧𑀺 𑀣𑁂𑀬𑁆𑀬𑀘𑀺𑀢𑁆𑀢𑁂 𑀲𑀢𑀺 𑀅𑀯𑀳𑀸𑀭𑁄 𑀪𑀯𑁂𑀬𑁆𑀬, 𑀆𑀭𑀓𑁆𑀔𑀝𑁆𑀞𑀸𑀦𑀁 𑀧𑀢𑁆𑀯𑀸𑀢𑀺𑀆𑀤𑀺𑀦𑀸 𑀞𑀸𑀦𑀦𑀺𑀬𑀫𑁄 𑀦𑀺𑀭𑀢𑁆𑀣𑀓𑁄 𑀲𑀺𑀬𑀸 𑀬𑀢𑁆𑀣 𑀓𑀢𑁆𑀣𑀘𑀺 𑀣𑁂𑀬𑁆𑀬𑀘𑀺𑀢𑁆𑀢𑁂 𑀉𑀧𑁆𑀧𑀦𑁆𑀦𑁂 𑀧𑀸𑀭𑀸𑀚𑀺𑀓𑀦𑁆𑀢𑀺 𑀯𑀢𑁆𑀢𑀩𑁆𑀩𑀢𑁄. 𑀢𑀲𑁆𑀫𑀸 𑀆𑀭𑀓𑁆𑀔𑀝𑁆𑀞𑀸𑀦𑀢𑁄 𑀩𑀳𑀺 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀕𑀘𑁆𑀙𑀦𑁆𑀢𑀲𑁆𑀲 𑀅𑀯𑀳𑀸𑀭𑁄 𑀦 𑀪𑀯𑀢𑀺 𑀏𑀯𑀸𑀢𑀺 𑀦𑀺𑀝𑁆𑀞𑀫𑁂𑀢𑁆𑀣 𑀕𑀦𑁆𑀢𑀩𑁆𑀩𑀁. 𑀇𑀤𑀁 𑀧𑀦 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀧𑀭𑀺𑀳𑀭𑀦𑁆𑀢𑀲𑁆𑀲𑀸𑀢𑀺 𑀬𑀲𑁆𑀫𑀺𑀁 𑀧𑀤𑁂𑀲𑁂 𑀅𑀢𑀺𑀓𑁆𑀓𑀦𑁆𑀢𑁂 𑀢𑁂𑀲𑀁 𑀅𑀭𑀜𑁆𑀜𑀁 𑀆𑀭𑀓𑁆𑀔𑀝𑁆𑀞𑀸𑀦𑀜𑁆𑀘 𑀅𑀢𑀺𑀓𑁆𑀓𑀦𑁆𑀢𑁄 𑀦𑀸𑀫 𑀳𑁄𑀢𑀺, 𑀢𑀁 𑀧𑀤𑁂𑀲𑀁 𑀆𑀓𑀸𑀲𑁂𑀦𑀸𑀧𑀺 𑀅𑀢𑀺𑀓𑁆𑀓𑀫𑀦𑀯𑀲𑁂𑀦 𑀕𑀘𑁆𑀙𑀦𑁆𑀢𑀲𑁆𑀲𑀸𑀧𑀻𑀢𑀺 𑀅𑀢𑁆𑀣𑁄.

𑀉𑀤𑀓𑀓𑀣𑀸𑀯𑀡𑁆𑀡𑀦𑀸

𑁧𑁦𑁮. 𑀉𑀤𑀓𑀓𑀣𑀸𑀬𑀁 𑀫𑀳𑀸𑀓𑀼𑀘𑁆𑀙𑀺𑀓𑀸 𑀉𑀤𑀓𑀘𑀸𑀝𑀺 𑀉𑀤𑀓𑀫𑀡𑀺𑀓𑁄, ‘‘𑀲𑀫𑁂𑀔𑀮𑀸 𑀘𑀸𑀝𑀺 𑀉𑀤𑀓𑀫𑀡𑀺𑀓𑁄’’𑀢𑀺𑀧𑀺 𑀯𑀤𑀦𑁆𑀢𑀺. 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀪𑀸𑀚𑀦𑁂𑀲𑀼. 𑀪𑀽𑀢𑀕𑀸𑀫𑁂𑀦 𑀲𑀤𑁆𑀥𑀺𑀫𑁆𑀧𑀻𑀢𑀺 𑀧𑀺-𑀲𑀤𑁆𑀤𑁂𑀦 𑀅𑀓𑀧𑁆𑀧𑀺𑀬𑀧𑀣𑀯𑀺𑀫𑁆𑀧𑀺 𑀲𑀗𑁆𑀕𑀡𑁆𑀳𑀸𑀢𑀺. 𑀢𑀴𑀸𑀓𑀭𑀓𑁆𑀔𑀡𑀢𑁆𑀣𑀸𑀬𑀸𑀢𑀺 ‘‘𑀫𑀳𑁄𑀤𑀓𑀁 𑀆𑀕𑀦𑁆𑀢𑁆𑀯𑀸 𑀢𑀴𑀸𑀓𑀫𑀭𑀺𑀬𑀸𑀤𑀁 𑀫𑀸 𑀙𑀺𑀦𑁆𑀤𑀻’’𑀢𑀺 𑀢𑀴𑀸𑀓𑀭𑀓𑁆𑀔𑀡𑀢𑁆𑀣𑀁. 𑀦𑀺𑀩𑁆𑀩𑀳𑀦𑀉𑀤𑀓𑀦𑁆𑀢𑀺 𑀏𑀢𑁆𑀣 𑀢𑀴𑀸𑀓𑀲𑁆𑀲 𑀏𑀓𑁂𑀦 𑀉𑀦𑁆𑀦𑀢𑁂𑀦 𑀧𑀲𑁆𑀲𑁂𑀦 𑀅𑀥𑀺𑀓𑀚𑀮𑀁 𑀦𑀺𑀩𑁆𑀩𑀳𑀢𑀺 𑀦𑀺𑀕𑀘𑁆𑀙𑀢𑀺 𑀏𑀢𑁂𑀦𑀸𑀢𑀺 ‘‘𑀦𑀺𑀩𑁆𑀩𑀳𑀦’’𑀦𑁆𑀢𑀺 𑀅𑀥𑀺𑀓𑀚𑀮𑀦𑀺𑀓𑁆𑀔𑀫𑀦𑀫𑀸𑀢𑀺𑀓𑀸 𑀯𑀼𑀘𑁆𑀘𑀢𑀺. 𑀢𑀢𑁆𑀣 𑀕𑀘𑁆𑀙𑀫𑀸𑀦𑀁 𑀉𑀤𑀓𑀁 𑀦𑀺𑀩𑁆𑀩𑀳𑀦𑀉𑀤𑀓𑀁 𑀦𑀸𑀫. 𑀦𑀺𑀤𑁆𑀥𑀫𑀦𑀢𑀼𑀫𑁆𑀩𑀦𑁆𑀢𑀺 𑀲𑀲𑁆𑀲𑀸𑀤𑀻𑀦𑀁 𑀅𑀢𑁆𑀣𑀸𑀬 𑀇𑀝𑁆𑀞𑀓𑀸𑀤𑀻𑀳𑀺 𑀓𑀢𑀁 𑀉𑀤𑀓𑀦𑀺𑀓𑁆𑀔𑀫𑀦𑀧𑀦𑀸𑀴𑀺. 𑀫𑀭𑀺𑀬𑀸𑀤𑀁 𑀤𑀼𑀩𑁆𑀩𑀮𑀁 𑀓𑀢𑁆𑀯𑀸𑀢𑀺 𑀏𑀢𑁆𑀣 𑀤𑀼𑀩𑁆𑀩𑀮𑀁 𑀅𑀓𑀢𑁆𑀯𑀸𑀧𑀺 𑀬𑀣𑀸𑀯𑀼𑀢𑁆𑀢𑀧𑁆𑀧𑀬𑁄𑀕𑁂 𑀓𑀢𑁂 𑀫𑀭𑀺𑀬𑀸𑀤𑀁 𑀙𑀺𑀦𑁆𑀤𑀺𑀢𑁆𑀯𑀸 𑀦𑀺𑀓𑁆𑀔𑀦𑁆𑀢𑀉𑀤𑀓𑀕𑁆𑀖𑀸𑀦𑀼𑀭𑀽𑀧𑁂𑀦 𑀅𑀯𑀳𑀸𑀭𑁂𑀦 𑀓𑀢𑁆𑀢𑀩𑁆𑀩𑀫𑁂𑀯. 𑀬𑀢𑁆𑀢𑀓𑀁 𑀢𑀧𑁆𑀧𑀘𑁆𑀘𑀬𑀸 𑀲𑀲𑁆𑀲𑀁 𑀉𑀧𑁆𑀧𑀚𑁆𑀚𑀢𑀻𑀢𑀺 𑀩𑀻𑀚𑀓𑀲𑀺𑀓𑀫𑁆𑀫𑀸𑀤𑀺𑀩𑁆𑀩𑀬𑀁 𑀞𑀧𑁂𑀢𑁆𑀯𑀸 𑀬𑀁 𑀅𑀥𑀺𑀓𑀮𑀸𑀪𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀦 𑀳𑀺 𑀢𑁂𑀳𑀺 𑀓𑀸𑀢𑀩𑁆𑀩𑀁 𑀯𑀬𑀓𑀭𑀡𑀫𑁆𑀧𑀺 𑀏𑀢𑀲𑁆𑀲 𑀤𑀸𑀢𑀩𑁆𑀩𑀁. 𑀇𑀤𑀜𑁆𑀘 𑀢𑀭𑀼𑀡𑀲𑀲𑁆𑀲𑁂 𑀚𑀸𑀢𑁂 𑀉𑀤𑀓𑀁 𑀯𑀺𑀦𑀸𑀲𑁂𑀦𑁆𑀢𑀲𑁆𑀲 𑀬𑀼𑀚𑁆𑀚𑀢𑀺, 𑀲𑀲𑁆𑀲𑁂 𑀧𑀦 𑀲𑀩𑁆𑀩𑀣𑀸 𑀅𑀓𑀢𑁂𑀬𑁂𑀯 𑀉𑀤𑀓𑀁 𑀯𑀺𑀦𑀸𑀲𑁂𑀦𑁆𑀢𑁂𑀦 𑀘 𑀉𑀤𑀓𑀕𑁆𑀖𑀫𑁂𑀯 𑀤𑀸𑀢𑀩𑁆𑀩𑀁, 𑀦 𑀢𑀧𑁆𑀧𑀘𑁆𑀘𑀬𑀸 𑀲𑀓𑀮𑀁 𑀲𑀲𑁆𑀲𑀁 𑀢𑁂𑀦 𑀯𑀺𑀦𑀸𑀲𑀺𑀢𑀪𑀡𑁆𑀟𑀲𑁆𑀲𑁂𑀯 𑀪𑀡𑁆𑀟𑀤𑁂𑀬𑁆𑀬𑀢𑁆𑀢𑀸, 𑀇𑀢𑀭𑀣𑀸 𑀯𑀸𑀡𑀺𑀚𑁆𑀚𑀸𑀤𑀺𑀅𑀢𑁆𑀣𑀸𑀬 𑀧𑀭𑁂𑀳𑀺 𑀞𑀧𑀺𑀢𑀪𑀡𑁆𑀟𑀁 𑀅𑀯𑀳𑀭𑀦𑁆𑀢𑀲𑁆𑀲 𑀢𑀤𑀼𑀪𑀬𑀫𑁆𑀧𑀺 𑀕𑀳𑁂𑀢𑁆𑀯𑀸 𑀪𑀡𑁆𑀟𑀕𑁆𑀖𑀁 𑀓𑀸𑀢𑀩𑁆𑀩𑀁 𑀲𑀺𑀬𑀸, 𑀢𑀜𑁆𑀘 𑀦 𑀬𑀼𑀢𑁆𑀢𑀦𑁆𑀢𑀺 𑀅𑀫𑁆𑀳𑀸𑀓𑀁 𑀔𑀦𑁆𑀢𑀺. 𑀲𑀸𑀫𑀺𑀓𑀸𑀦𑀁 𑀥𑀼𑀭𑀦𑀺𑀓𑁆𑀔𑁂𑀧𑁂𑀦𑀸𑀢𑀺 𑀏𑀢𑁆𑀣 𑀏𑀓𑀲𑁆𑀲 𑀲𑀦𑁆𑀢𑀓𑁂 𑀢𑀴𑀸𑀓𑁂 𑀔𑁂𑀢𑁆𑀢𑁂 𑀘 𑀚𑀸𑀢𑁂 𑀢𑀲𑁆𑀲𑁂𑀯 𑀥𑀼𑀭𑀦𑀺𑀓𑁆𑀔𑁂𑀧𑁂𑀦 𑀧𑀸𑀭𑀸𑀚𑀺𑀓𑀁, 𑀬𑀤𑀺 𑀧𑀦 𑀢𑀁 𑀢𑀴𑀸𑀓𑀁 𑀲𑀩𑁆𑀩𑀲𑀸𑀥𑀸𑀭𑀡𑀁, 𑀔𑁂𑀢𑁆𑀢𑀸𑀦𑀺 𑀧𑀸𑀝𑀺𑀧𑀼𑀕𑁆𑀕𑀮𑀺𑀓𑀸𑀦𑀺, 𑀢𑀲𑁆𑀲 𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲𑁂𑀯 𑀥𑀼𑀭𑀦𑀺𑀓𑁆𑀔𑁂𑀧𑁂 𑀅𑀯𑀳𑀸𑀭𑁄, 𑀅𑀣 𑀔𑁂𑀢𑁆𑀢𑀸𑀦𑀺𑀧𑀺 𑀲𑀩𑁆𑀩𑀲𑀸𑀥𑀸𑀭𑀡𑀸𑀦𑀺, 𑀲𑀩𑁆𑀩𑁂𑀲𑀁 𑀥𑀼𑀭𑀦𑀺𑀓𑁆𑀔𑁂𑀧𑁂𑀬𑁂𑀯 𑀧𑀸𑀭𑀸𑀚𑀺𑀓𑀁, 𑀦𑀸𑀲𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.

𑀅𑀦𑀺𑀕𑁆𑀕𑀢𑁂𑀢𑀺 𑀅𑀦𑀺𑀓𑁆𑀔𑀦𑁆𑀢𑁂, 𑀢𑀴𑀸𑀓𑁂𑀬𑁂𑀯 𑀞𑀺𑀢𑁂𑀢𑀺 𑀅𑀢𑁆𑀣𑁄. 𑀧𑀭𑁂𑀲𑀁 𑀫𑀸𑀢𑀺𑀓𑀸𑀫𑀼𑀔𑀦𑁆𑀢𑀺 𑀔𑀼𑀤𑁆𑀤𑀓𑀫𑀸𑀢𑀺𑀓𑀸𑀫𑀼𑀔𑀁. 𑀅𑀲𑀫𑁆𑀧𑀢𑁆𑀢𑁂𑀯𑀸𑀢𑀺 𑀢𑀴𑀸𑀓𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀫𑀳𑀸𑀫𑀸𑀢𑀺𑀓𑀸𑀬𑀁 𑀏𑀯 𑀞𑀺𑀢𑁂. 𑀅𑀦𑀺𑀓𑁆𑀔𑀦𑁆𑀢𑁂 𑀩𑀤𑁆𑀥𑀸 𑀲𑀼𑀩𑀤𑁆𑀥𑀸𑀢𑀺 𑀢𑀴𑀸𑀓𑀢𑁄 𑀅𑀦𑀺𑀓𑁆𑀔𑀦𑁆𑀢𑁂 𑀪𑀡𑁆𑀟𑀤𑁂𑀬𑁆𑀬𑀫𑁆𑀧𑀺 𑀦 𑀳𑁄𑀢𑀺 𑀲𑀩𑁆𑀩𑀲𑀸𑀥𑀸𑀭𑀡𑀢𑁆𑀢𑀸 𑀉𑀤𑀓𑀲𑁆𑀲𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦𑀺𑀓𑁆𑀔𑀦𑁆𑀢𑁂 𑀧𑀦 𑀧𑀸𑀝𑀺𑀧𑀼𑀕𑁆𑀕𑀮𑀺𑀓𑀁 𑀳𑁄𑀢𑀻𑀢𑀺 𑀆𑀳 ‘‘𑀦𑀺𑀓𑁆𑀔𑀦𑁆𑀢𑁂 𑀩𑀤𑁆𑀥𑀸 𑀪𑀡𑁆𑀟𑀤𑁂𑀬𑁆𑀬’’𑀦𑁆𑀢𑀺. 𑀇𑀥 𑀧𑀦 𑀔𑀼𑀤𑁆𑀤𑀓𑀫𑀸𑀢𑀺𑀓𑀸𑀬𑀁 𑀅𑀧𑁆𑀧𑀯𑀺𑀝𑁆𑀞𑀢𑁆𑀢𑀸 𑀅𑀯𑀳𑀸𑀭𑁄 𑀦 𑀚𑀸𑀢𑁄, ‘‘𑀢𑀴𑀸𑀓𑀢𑁄 𑀅𑀦𑀺𑀕𑁆𑀕𑀢𑁂 𑀧𑀭𑁂𑀲𑀁 𑀫𑀸𑀢𑀺𑀓𑀸𑀫𑀼𑀔𑀁 𑀅𑀲𑀫𑁆𑀧𑀢𑁆𑀢𑁂𑀯𑀸’’𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀲𑁆𑀲 𑀯𑀺𑀓𑀧𑁆𑀧𑀤𑁆𑀯𑀬𑀲𑁆𑀲 ‘‘𑀅𑀦𑀺𑀓𑁆𑀔𑀦𑁆𑀢𑁂 𑀩𑀤𑁆𑀥𑀸 𑀲𑀼𑀩𑀤𑁆𑀥𑀸, 𑀦𑀺𑀓𑁆𑀔𑀦𑁆𑀢𑁂 𑀩𑀤𑁆𑀥𑀸 𑀪𑀡𑁆𑀟𑀤𑁂𑀬𑁆𑀬’’𑀦𑁆𑀢𑀺 𑀇𑀤𑀁 𑀤𑁆𑀯𑀬𑀁 𑀬𑀣𑀸𑀓𑁆𑀓𑀫𑁂𑀦 𑀬𑁄𑀚𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀦𑀢𑁆𑀣𑀺 𑀅𑀯𑀳𑀸𑀭𑁄𑀢𑀺 𑀏𑀢𑁆𑀣 ‘‘𑀅𑀯𑀳𑀸𑀭𑁄 𑀦𑀢𑁆𑀣𑀺, 𑀪𑀡𑁆𑀟𑀤𑁂𑀬𑁆𑀬𑀁 𑀧𑀦 𑀳𑁄𑀢𑀻’’𑀢𑀺 𑀓𑁂𑀘𑀺 𑀯𑀤𑀦𑁆𑀢𑀺, 𑀢𑀁 𑀦 𑀬𑀼𑀢𑁆𑀢𑀁. 𑀯𑀢𑁆𑀣𑀼𑀁…𑀧𑁂… 𑀦 𑀲𑀫𑁂𑀢𑀻𑀢𑀺 𑀏𑀢𑁆𑀣 𑀢𑀴𑀸𑀓𑀕𑀢𑀉𑀤𑀓𑀲𑁆𑀲 𑀲𑀩𑁆𑀩𑀲𑀸𑀥𑀸𑀭𑀡𑀢𑁆𑀢𑀸 𑀧𑀭𑀲𑀦𑁆𑀢𑀓𑀯𑀢𑁆𑀣𑀼 𑀦 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀤𑀦𑁆𑀢𑀧𑁄𑀦𑀓𑀣𑀸𑀯𑀡𑁆𑀡𑀦𑀸

𑁧𑁦𑁯. 𑀤𑀦𑁆𑀢𑀓𑀝𑁆𑀞𑀓𑀣𑀸𑀬𑀁 𑀢𑀢𑁄 𑀧𑀝𑁆𑀞𑀸𑀬 𑀅𑀯𑀳𑀸𑀭𑁄 𑀦𑀢𑁆𑀣𑀻𑀢𑀺 ‘‘𑀬𑀣𑀸𑀲𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑁄 𑀧𑀭𑀺𑀪𑀼𑀜𑁆𑀚𑀢𑀽’’𑀢𑀺 𑀅𑀪𑀸𑀚𑁂𑀢𑁆𑀯𑀸𑀯 𑀬𑀸𑀯𑀤𑀺𑀘𑁆𑀙𑀓𑀁 𑀕𑀳𑀡𑀢𑁆𑀣𑀫𑁂𑀯 𑀞𑀧𑀺𑀢𑀢𑁆𑀢𑀸 𑀅𑀭𑀓𑁆𑀔𑀺𑀢𑀢𑁆𑀢𑀸 𑀲𑀩𑁆𑀩𑀲𑀸𑀥𑀸𑀭𑀡𑀢𑁆𑀢𑀸 𑀘 𑀅𑀜𑁆𑀜𑀁 𑀲𑀗𑁆𑀖𑀺𑀓𑀁 𑀯𑀺𑀬 𑀦 𑀳𑁄𑀢𑀻𑀢𑀺 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀕𑀡𑁆𑀳𑀦𑁆𑀢𑀲𑁆𑀲𑀸𑀧𑀺 𑀦𑀢𑁆𑀣𑀺 𑀅𑀯𑀳𑀸𑀭𑁄. 𑀔𑀸𑀤𑀦𑁆𑀢𑀼, 𑀧𑀼𑀦 𑀲𑀸𑀫𑀡𑁂𑀭𑀸 𑀆𑀳𑀭𑀺𑀲𑁆𑀲𑀦𑁆𑀢𑀻𑀢𑀺 𑀓𑁂𑀘𑀺 𑀣𑁂𑀭𑀸 𑀯𑀤𑁂𑀬𑁆𑀬𑀼𑀦𑁆𑀢𑀺 𑀬𑁄𑀚𑁂𑀢𑀩𑁆𑀩𑀁.

𑀯𑀦𑀧𑁆𑀧𑀢𑀺𑀓𑀣𑀸𑀯𑀡𑁆𑀡𑀦𑀸

𑁧𑁧𑁦. 𑀯𑀦𑀧𑁆𑀧𑀢𑀺𑀓𑀣𑀸𑀬𑀁 𑀲𑀦𑁆𑀥𑀸𑀭𑀺𑀢𑀢𑁆𑀢𑀸𑀢𑀺 𑀙𑀺𑀦𑁆𑀦𑀲𑁆𑀲 𑀭𑀼𑀓𑁆𑀔𑀲𑁆𑀲 𑀧𑀢𑀺𑀢𑀼𑀁 𑀆𑀭𑀤𑁆𑀥𑀲𑁆𑀲 𑀲𑀦𑁆𑀥𑀸𑀭𑀡𑀫𑀢𑁆𑀢𑁂𑀦 𑀯𑀼𑀢𑁆𑀢𑀁, 𑀦 𑀧𑀦 𑀫𑀭𑀺𑀘𑀯𑀮𑁆𑀮𑀺𑀆𑀤𑀻𑀳𑀺 𑀧𑀼𑀩𑁆𑀩𑁂 𑀯𑁂𑀞𑁂𑀢𑁆𑀯𑀸 𑀞𑀺𑀢𑀪𑀸𑀯𑁂𑀦. 𑀢𑀸𑀤𑀺𑀲𑁂 𑀳𑀺 𑀙𑀺𑀦𑁆𑀦𑁂𑀧𑀺 𑀅𑀯𑀳𑀸𑀭𑁄 𑀦𑀢𑁆𑀣𑀺 𑀅𑀭𑀜𑁆𑀜𑀝𑁆𑀞𑀓𑀣𑀸𑀬𑀁 𑀯𑁂𑀞𑀺𑀢𑀯𑀮𑁆𑀮𑀺𑀬𑀁 𑀯𑀺𑀬. 𑀉𑀚𑀼𑀓𑀫𑁂𑀯 𑀢𑀺𑀝𑁆𑀞𑀢𑀻𑀢𑀺 𑀇𑀫𑀺𑀦𑀸 𑀲𑀩𑁆𑀩𑀲𑁄 𑀙𑀺𑀦𑁆𑀤𑀦𑀫𑁂𑀯 𑀯𑀮𑁆𑀮𑀺𑀆𑀤𑀻𑀳𑀺 𑀅𑀲𑀫𑁆𑀩𑀤𑁆𑀥𑀲𑁆𑀲 𑀭𑀼𑀓𑁆𑀔𑀲𑁆𑀲 𑀞𑀸𑀦𑀸𑀘𑀸𑀯𑀦𑀁 𑀧𑀼𑀩𑁆𑀩𑁂 𑀯𑀺𑀬 𑀆𑀓𑀸𑀲𑀸𑀤𑀻𑀲𑀼 𑀨𑀼𑀝𑁆𑀞𑀲𑀓𑀮𑀧𑀤𑁂𑀲𑀢𑁄 𑀫𑁄𑀘𑀦𑀦𑁆𑀢𑀺 𑀆𑀯𑁂𑀡𑀺𑀓𑀫𑀺𑀥 𑀞𑀸𑀦𑀸𑀘𑀸𑀯𑀦𑀁 𑀤𑀲𑁆𑀲𑁂𑀢𑀺. 𑀓𑁂𑀘𑀺 𑀧𑀦 ‘‘𑀭𑀼𑀓𑁆𑀔𑀪𑀸𑀭𑁂𑀦 𑀓𑀺𑀜𑁆𑀘𑀺𑀤𑁂𑀯 𑀪𑀲𑁆𑀲𑀺𑀢𑁆𑀯𑀸 𑀞𑀺𑀢𑀢𑁆𑀢𑀸 𑀳𑁄𑀢𑀺𑀬𑁂𑀯 𑀞𑀸𑀦𑀸𑀘𑀸𑀯𑀦’’𑀦𑁆𑀢𑀺 𑀯𑀤𑀦𑁆𑀢𑀺, 𑀢𑀦𑁆𑀦, 𑀭𑀼𑀓𑁆𑀔𑁂𑀦 𑀨𑀼𑀝𑁆𑀞𑀲𑁆𑀲 𑀲𑀓𑀮𑀲𑁆𑀲 𑀆𑀓𑀸𑀲𑀧𑀤𑁂𑀲𑀲𑁆𑀲 𑀧𑀜𑁆𑀘𑀳𑀺 𑀙𑀳𑀺 𑀯𑀸 𑀆𑀓𑀸𑀭𑁂𑀳𑀺 𑀅𑀦𑀢𑀺𑀓𑁆𑀓𑀫𑀺𑀢𑀢𑁆𑀢𑀸. 𑀯𑀸𑀢𑀫𑀼𑀔𑀁 𑀲𑁄𑀥𑁂𑀢𑀻𑀢𑀺 𑀬𑀣𑀸 𑀯𑀸𑀢𑁄 𑀆𑀕𑀦𑁆𑀢𑁆𑀯𑀸 𑀭𑀼𑀓𑁆𑀔𑀁 𑀧𑀸𑀢𑁂𑀢𑀺, 𑀏𑀯𑀁 𑀯𑀸𑀢𑀲𑁆𑀲 𑀆𑀕𑀫𑀦𑀫𑀕𑁆𑀕𑀁 𑀭𑀼𑀦𑁆𑀥𑀺𑀢𑁆𑀯𑀸 𑀞𑀺𑀢𑀸𑀦𑀺 𑀲𑀸𑀔𑀸𑀕𑀼𑀫𑁆𑀩𑀸𑀤𑀻𑀦𑀺 𑀙𑀺𑀦𑁆𑀤𑀺𑀢𑁆𑀯𑀸 𑀅𑀧𑀦𑁂𑀦𑁆𑀢𑁄 𑀲𑁄𑀥𑁂𑀢𑀺. 𑀫𑀡𑁆𑀟𑀽𑀓𑀓𑀡𑁆𑀝𑀓𑀁 𑀯𑀸𑀢𑀺 𑀫𑀡𑁆𑀟𑀽𑀓𑀸𑀦𑀁 𑀦𑀗𑁆𑀕𑀼𑀝𑁆𑀞𑁂 𑀅𑀕𑁆𑀕𑀓𑁄𑀝𑀺𑀬𑀁 𑀞𑀺𑀢𑀓𑀡𑁆𑀝𑀓𑀦𑁆𑀢𑀺 𑀯𑀤𑀦𑁆𑀢𑀺, 𑀏𑀓𑁂 ‘‘𑀯𑀺𑀲𑀫𑀘𑁆𑀙𑀓𑀡𑁆𑀝𑀓’’𑀦𑁆𑀢𑀺𑀧𑀺 𑀯𑀤𑀦𑁆𑀢𑀺.

𑀳𑀭𑀡𑀓𑀓𑀣𑀸𑀯𑀡𑁆𑀡𑀦𑀸

𑁧𑁧𑁧. 𑀳𑀭𑀡𑀓𑀓𑀣𑀸𑀬𑀁 𑀳𑀭𑀡𑀓𑀦𑁆𑀢𑀺 𑀯𑀢𑁆𑀣𑀼𑀲𑀸𑀫𑀺𑀦𑀸 𑀳𑀭𑀺𑀬𑀫𑀸𑀦𑀁. 𑀲𑁄 𑀘 𑀧𑀸𑀤𑀁 𑀅𑀕𑁆𑀖𑀢𑀺, 𑀧𑀸𑀭𑀸𑀚𑀺𑀓𑀫𑁂𑀯𑀸𑀢𑀺 ‘‘𑀅𑀦𑁆𑀢𑀁 𑀦 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀅𑀲𑀮𑁆𑀮𑀓𑁆𑀔𑀺𑀢𑀢𑁆𑀢𑀸 𑀲𑀸𑀫𑀜𑁆𑀜𑀢𑁄 ‘‘𑀕𑀡𑁆𑀳𑀺𑀲𑁆𑀲𑀸𑀫𑀺 𑀏𑀢’’𑀦𑁆𑀢𑀺 𑀲𑀮𑁆𑀮𑀓𑁆𑀔𑀺𑀢𑀲𑁆𑀲𑁂𑀯 𑀧𑀝𑀲𑁆𑀲 𑀏𑀓𑀤𑁂𑀲𑀢𑀸𑀬 𑀢𑀫𑁆𑀧𑀺 𑀕𑀡𑁆𑀳𑀺𑀢𑀼𑀓𑀸𑀫𑁄𑀯𑀸𑀢𑀺 𑀧𑀸𑀭𑀸𑀚𑀺𑀓𑀁 𑀯𑀼𑀢𑁆𑀢𑀁. 𑀲𑀪𑀡𑁆𑀟𑀳𑀸𑀭𑀓𑀦𑁆𑀢𑀺 𑀲𑀳𑀪𑀡𑁆𑀟𑀳𑀸𑀭𑀓𑀁, 𑀲𑀓𑀸𑀭𑀸𑀤𑁂𑀲𑀲𑁆𑀲 𑀯𑀺𑀓𑀧𑁆𑀧𑀢𑁆𑀢𑀸 𑀲𑀳 𑀲𑀤𑁆𑀤𑁄𑀯 𑀞𑀺𑀢𑁄, 𑀪𑀡𑁆𑀟𑀳𑀸𑀭𑀓𑁂𑀦 𑀲𑀳 𑀢𑀁 𑀪𑀡𑁆𑀟𑀦𑁆𑀢𑀺 𑀅𑀢𑁆𑀣𑁄. 𑀲𑀸𑀲𑀗𑁆𑀓𑁄𑀢𑀺 ‘‘𑀬𑀤𑀺 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀡𑁆𑀟𑀁 𑀕𑀡𑁆𑀳𑀺𑀲𑁆𑀲𑀸𑀫𑀺, 𑀆𑀯𑀼𑀥𑁂𑀦 𑀫𑀁 𑀧𑀳𑀭𑁂𑀬𑁆𑀬𑀸’’𑀢𑀺 𑀪𑀬𑁂𑀦 𑀲𑀜𑁆𑀚𑀸𑀢𑀸𑀲𑀗𑁆𑀓𑁄. 𑀏𑀓𑀫𑀦𑁆𑀢𑀁 𑀧𑀝𑀺𑀓𑁆𑀓𑀫𑁆𑀫𑀸𑀢𑀺 𑀪𑀬𑁂𑀦𑁂𑀯 𑀅𑀦𑀼𑀧𑀕𑀦𑁆𑀢𑁆𑀯𑀸 𑀫𑀕𑁆𑀕𑀢𑁄 𑀲𑀬𑀁 𑀧𑀝𑀺𑀓𑁆𑀓𑀫𑁆𑀫. 𑀲𑀦𑁆𑀢𑀚𑁆𑀚𑁂𑀢𑁆𑀯𑀸𑀢𑀺 𑀨𑀭𑀼𑀲𑀯𑀸𑀘𑀸𑀬 𑀘𑁂𑀯 𑀆𑀯𑀼𑀥𑀧𑀭𑀺𑀯𑀢𑁆𑀢𑀦𑀸𑀤𑀺𑀓𑀸𑀬𑀯𑀺𑀓𑀸𑀭𑁂𑀦 𑀘 𑀲𑀦𑁆𑀢𑀚𑁆𑀚𑁂𑀢𑁆𑀯𑀸. 𑀅𑀦𑀚𑁆𑀛𑀸𑀯𑀼𑀢𑁆𑀣𑀓𑀦𑁆𑀢𑀺 𑀅𑀧𑀭𑀺𑀕𑁆𑀕𑀳𑀺𑀢𑀓𑀁. 𑀆𑀮𑀬𑁂𑀦 𑀅𑀦𑀥𑀺𑀫𑀼𑀢𑁆𑀢𑀫𑁆𑀧𑀺 𑀪𑀡𑁆𑀟𑀁 𑀅𑀦𑀚𑁆𑀛𑀸𑀯𑀼𑀢𑁆𑀣𑀓𑀁 𑀦𑀸𑀫 𑀳𑁄𑀢𑀻𑀢𑀺 𑀆𑀳 ‘‘𑀆𑀳𑀭𑀸𑀧𑁂𑀦𑁆𑀢𑁂 𑀤𑀸𑀢𑀩𑁆𑀩’’𑀦𑁆𑀢𑀺, 𑀇𑀫𑀺𑀦𑀸 𑀧𑀞𑀫𑀁 𑀧𑀭𑀺𑀘𑁆𑀘𑀢𑁆𑀢𑀸𑀮𑀬𑀸𑀦𑀫𑁆𑀧𑀺 𑀬𑀤𑀺 𑀧𑀘𑁆𑀙𑀸𑀧𑀺 𑀲𑀓𑀲𑀜𑁆𑀜𑀸 𑀉𑀧𑁆𑀧𑀚𑁆𑀚𑀢𑀺, 𑀢𑁂𑀲𑀜𑁆𑀜𑁂𑀯 𑀢𑀁 𑀪𑀡𑁆𑀟𑀁 𑀳𑁄𑀢𑀺, 𑀩𑀮𑀓𑁆𑀓𑀸𑀭𑁂𑀦𑀸𑀧𑀺 𑀲𑀓𑀲𑀜𑁆𑀜𑀸𑀬 𑀢𑀲𑁆𑀲 𑀕𑀳𑀡𑁂 𑀤𑁄𑀲𑁄 𑀦𑀢𑁆𑀣𑀺, 𑀅𑀤𑀤𑀦𑁆𑀢𑀲𑁆𑀲𑁂𑀯 𑀅𑀯𑀳𑀸𑀭𑁄𑀢𑀺 𑀤𑀲𑁆𑀲𑁂𑀢𑀺. 𑀬𑀤𑀺 𑀧𑀦 𑀲𑀸𑀫𑀺𑀦𑁄 ‘‘𑀧𑀭𑀺𑀘𑁆𑀘𑀢𑁆𑀢𑀁 𑀫𑀬𑀸 𑀧𑀞𑀫𑀁, 𑀇𑀤𑀸𑀦𑀺 𑀫𑀫 𑀲𑀦𑁆𑀢𑀓𑀁 𑀯𑀸 𑀏𑀢𑀁, 𑀦𑁄’’𑀢𑀺 𑀆𑀲𑀗𑁆𑀓𑀸 𑀳𑁄𑀢𑀺, 𑀩𑀮𑀓𑁆𑀓𑀸𑀭𑁂𑀦 𑀕𑀳𑁂𑀢𑀼𑀁 𑀦 𑀯𑀝𑁆𑀝𑀢𑀺 𑀲𑀓𑀲𑀜𑁆𑀜𑀸𑀩𑀮𑁂𑀦𑁂𑀯 𑀧𑀼𑀦 𑀕𑀳𑁂𑀢𑀩𑁆𑀩𑀪𑀸𑀯𑀲𑁆𑀲 𑀆𑀧𑀦𑁆𑀦𑀢𑁆𑀢𑀸. ‘‘𑀅𑀤𑁂𑀦𑁆𑀢𑀲𑁆𑀲 𑀧𑀸𑀭𑀸𑀚𑀺𑀓’’𑀦𑁆𑀢𑀺 𑀯𑀘𑀦𑀢𑁄 𑀘𑁄𑀭𑀲𑁆𑀲 𑀲𑀓𑀲𑀜𑁆𑀜𑀸𑀬 𑀯𑀺𑀚𑁆𑀚𑀫𑀸𑀦𑀸𑀬𑀧𑀺 𑀲𑀸𑀫𑀺𑀓𑁂𑀲𑀼 𑀲𑀸𑀮𑀬𑁂𑀲𑀼 𑀅𑀤𑀸𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀤𑀻𑀧𑀺𑀢𑀁 𑀳𑁄𑀢𑀺. 𑀅𑀜𑁆𑀜𑁂𑀲𑀽𑀢𑀺 𑀫𑀳𑀸𑀧𑀘𑁆𑀘𑀭𑀺𑀬𑀸𑀤𑀻𑀲𑀼. 𑀯𑀺𑀘𑀸𑀭𑀡𑀸𑀬𑁂𑀯 𑀦𑀢𑁆𑀣𑀻𑀢𑀺 𑀇𑀫𑀺𑀦𑀸 𑀢𑀢𑁆𑀣𑀸𑀧𑀺 𑀧𑀝𑀺𑀓𑁆𑀔𑁂𑀧𑀸𑀪𑀸𑀯𑀢𑁄 𑀅𑀬𑀫𑁂𑀯 𑀅𑀢𑁆𑀣𑁄𑀢𑀺 𑀤𑀲𑁆𑀲𑁂𑀢𑀺.

𑀉𑀧𑀦𑀺𑀥𑀺𑀓𑀣𑀸𑀯𑀡𑁆𑀡𑀦𑀸

𑁧𑁧𑁨. 𑀉𑀧𑀦𑀺𑀥𑀺𑀓𑀣𑀸𑀬𑀁 𑀲𑀗𑁆𑀕𑁄𑀧𑀦𑀢𑁆𑀣𑀸𑀬 𑀅𑀢𑁆𑀢𑀦𑁄 𑀳𑀢𑁆𑀣𑁂 𑀦𑀺𑀓𑁆𑀔𑀺𑀢𑁆𑀢𑀲𑁆𑀲 𑀪𑀡𑁆𑀟𑀲𑁆𑀲 𑀕𑀼𑀢𑁆𑀢𑀝𑁆𑀞𑀸𑀦𑁂 𑀧𑀝𑀺𑀲𑀸𑀫𑀦𑀧𑁆𑀧𑀬𑁄𑀕𑀁 𑀯𑀺𑀦𑀸 𑀦𑀸𑀳𑀁 𑀕𑀡𑁆𑀳𑀸𑀫𑀻𑀢𑀺𑀆𑀤𑀺𑀦𑀸 𑀅𑀜𑁆𑀜𑀲𑁆𑀫𑀺𑀁 𑀧𑀬𑁄𑀕𑁂 𑀅𑀓𑀢𑁂 𑀭𑀚𑁆𑀚𑀲𑀗𑁆𑀔𑁄𑀪𑀸𑀤𑀺𑀓𑀸𑀮𑁂 ‘‘𑀦 𑀤𑀸𑀦𑀺 𑀢𑀲𑁆𑀲 𑀤𑀲𑁆𑀲𑀸𑀫𑀺, 𑀦 𑀫𑀬𑁆𑀳𑀁 𑀤𑀸𑀦𑀺 𑀤𑀲𑁆𑀲𑀢𑀻’’𑀢𑀺 𑀉𑀪𑁄𑀳𑀺𑀧𑀺 𑀲𑀓𑀲𑀓𑀝𑁆𑀞𑀸𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀥𑀼𑀭𑀦𑀺𑀓𑁆𑀔𑁂𑀧𑁂 𑀓𑀢𑁂𑀧𑀺 𑀅𑀯𑀳𑀸𑀭𑁄 𑀦𑀢𑁆𑀣𑀺. 𑀓𑁂𑀘𑀺 𑀧𑀦𑁂𑀢𑁆𑀣 ‘‘𑀧𑀸𑀭𑀸𑀚𑀺𑀓𑀫𑁂𑀯 𑀧𑀝𑀺𑀲𑀸𑀫𑀦𑀧𑁆𑀧𑀬𑁄𑀕𑀲𑁆𑀲 𑀓𑀢𑀢𑁆𑀢𑀸’’𑀢𑀺 𑀯𑀤𑀦𑁆𑀢𑀺, 𑀢𑀁 𑀢𑁂𑀲𑀁 𑀫𑀢𑀺𑀫𑀢𑁆𑀢𑀁, 𑀦 𑀲𑀸𑀭𑀢𑁄 𑀧𑀘𑁆𑀘𑁂𑀢𑀩𑁆𑀩𑀁. 𑀧𑀝𑀺𑀲𑀸𑀫𑀦𑀓𑀸𑀮𑁂 𑀳𑀺𑀲𑁆𑀲 𑀣𑁂𑀬𑁆𑀬𑀘𑀺𑀢𑁆𑀢𑀁 𑀦𑀢𑁆𑀣𑀺, ‘‘𑀦 𑀤𑀸𑀦𑀺 𑀢𑀲𑁆𑀲 𑀤𑀲𑁆𑀲𑀸𑀫𑀻’’𑀢𑀺 𑀣𑁂𑀬𑁆𑀬𑀘𑀺𑀢𑁆𑀢𑀼𑀧𑁆𑀧𑀢𑁆𑀢𑀺𑀓𑁆𑀔𑀡𑁂 𑀧𑀦 𑀲𑀸𑀫𑀺𑀦𑁄 𑀥𑀼𑀭𑀦𑀺𑀓𑁆𑀔𑁂𑀧𑀘𑀺𑀢𑁆𑀢𑀼𑀧𑁆𑀧𑀢𑁆𑀢𑀺𑀬𑀸 𑀳𑁂𑀢𑀼𑀪𑀽𑀢𑁄 𑀓𑀸𑀬𑀯𑀘𑀻𑀧𑀬𑁄𑀕𑁄 𑀦𑀢𑁆𑀣𑀺, 𑀬𑁂𑀦 𑀲𑁄 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑁂𑀬𑁆𑀬. 𑀦 𑀳𑀺 𑀅𑀓𑀺𑀭𑀺𑀬𑀲𑀫𑀼𑀝𑁆𑀞𑀸𑀦𑀸𑀬𑀁 𑀆𑀧𑀢𑁆𑀢𑀻𑀢𑀺. 𑀤𑀸𑀦𑁂 𑀲𑀉𑀲𑁆𑀲𑀸𑀳𑁄, 𑀭𑀓𑁆𑀔𑀢𑀺 𑀢𑀸𑀯𑀸𑀢𑀺 𑀅𑀯𑀳𑀸𑀭𑀁 𑀲𑀦𑁆𑀥𑀸𑀬 𑀅𑀯𑀼𑀢𑁆𑀢𑀢𑁆𑀢𑀸 𑀦𑀸𑀳𑀁 𑀕𑀡𑁆𑀳𑀸𑀫𑀻𑀢𑀺𑀆𑀤𑀺𑀦𑀸 𑀫𑀼𑀲𑀸𑀯𑀸𑀤𑀓𑀭𑀡𑁂 𑀧𑀸𑀘𑀺𑀢𑁆𑀢𑀺𑀬𑀫𑁂𑀯 𑀳𑁄𑀢𑀺, 𑀦 𑀤𑀼𑀓𑁆𑀓𑀝𑀁 𑀣𑁂𑀬𑁆𑀬𑀘𑀺𑀢𑁆𑀢𑀸𑀪𑀸𑀯𑁂𑀦 𑀲𑀳𑀧𑀬𑁄𑀕𑀲𑁆𑀲𑀸𑀧𑀺 𑀅𑀪𑀸𑀯𑀢𑁄𑀢𑀺 𑀕𑀳𑁂𑀢𑀩𑁆𑀩𑀁. 𑀬𑀤𑀺𑀧𑀺 𑀫𑀼𑀔𑁂𑀦 𑀤𑀲𑁆𑀲𑀸𑀫𑀻𑀢𑀺 𑀯𑀤𑀢𑀺…𑀧𑁂… 𑀧𑀸𑀭𑀸𑀚𑀺𑀓𑀦𑁆𑀢𑀺 𑀏𑀢𑁆𑀣 𑀓𑀢𑀭𑀧𑀬𑁄𑀕𑁂𑀦 𑀆𑀧𑀢𑁆𑀢𑀺, 𑀦 𑀢𑀸𑀯 𑀧𑀞𑀫𑁂𑀦 𑀪𑀡𑁆𑀟𑀧𑀝𑀺𑀲𑀸𑀫𑀦𑀧𑁆𑀧𑀬𑁄𑀕𑁂𑀦 𑀢𑀤𑀸 𑀣𑁂𑀬𑁆𑀬𑀘𑀺𑀢𑁆𑀢𑀸𑀪𑀸𑀯𑀸, 𑀦𑀸𑀧𑀺 ‘‘𑀤𑀲𑁆𑀲𑀸𑀫𑀻’’𑀢𑀺 𑀓𑀣𑀦𑀧𑁆𑀧𑀬𑁄𑀕𑁂𑀦 𑀢𑀤𑀸 𑀣𑁂𑀬𑁆𑀬𑀘𑀺𑀢𑁆𑀢𑁂 𑀯𑀺𑀚𑁆𑀚𑀫𑀸𑀦𑁂𑀧𑀺 𑀧𑀬𑁄𑀕𑀲𑁆𑀲 𑀓𑀧𑁆𑀧𑀺𑀬𑀢𑁆𑀢𑀸𑀢𑀺? 𑀯𑀼𑀘𑁆𑀘𑀢𑁂 𑁋 𑀲𑀸𑀫𑀺𑀦𑀸 ‘‘𑀤𑁂𑀳𑀻’’𑀢𑀺 𑀩𑀳𑀼𑀲𑁄 𑀬𑀸𑀘𑀺𑀬𑀫𑀸𑀦𑁄𑀧𑀺 𑀅𑀤𑀢𑁆𑀯𑀸 𑀬𑁂𑀦 𑀧𑀬𑁄𑀕𑁂𑀦 𑀅𑀢𑁆𑀢𑀦𑁄 𑀅𑀤𑀸𑀢𑀼𑀓𑀸𑀫𑀢𑀁 𑀲𑀸𑀫𑀺𑀓𑀲𑁆𑀲 𑀜𑀸𑀧𑁂𑀢𑀺, 𑀬𑁂𑀦 𑀘 𑀲𑁄 ‘‘𑀅𑀤𑀸𑀢𑀼𑀓𑀸𑀫𑁄 𑀅𑀬𑀁 𑀯𑀺𑀓𑁆𑀔𑀺𑀧𑀢𑀻’’𑀢𑀺 𑀜𑀢𑁆𑀯𑀸 𑀥𑀼𑀭𑀁 𑀦𑀺𑀓𑁆𑀔𑀺𑀧𑀢𑀺, 𑀢𑁂𑀦𑁂𑀯 𑀧𑀬𑁄𑀕𑁂𑀦𑀲𑁆𑀲 𑀆𑀧𑀢𑁆𑀢𑀺. 𑀦 𑀳𑁂𑀢𑁆𑀣 𑀉𑀧𑀦𑀺𑀓𑁆𑀔𑀺𑀢𑁆𑀢𑀪𑀡𑁆𑀟𑁂 𑀧𑀭𑀺𑀬𑀸𑀬𑁂𑀦 𑀫𑀼𑀢𑁆𑀢𑀺 𑀅𑀢𑁆𑀣𑀺. 𑀅𑀤𑀸𑀢𑀼𑀓𑀸𑀫𑀢𑀸𑀬 𑀳𑀺 𑀓𑀤𑀸 𑀢𑁂 𑀤𑀺𑀦𑁆𑀦𑀁, 𑀓𑀢𑁆𑀣 𑀢𑁂 𑀤𑀺𑀦𑁆𑀦𑀦𑁆𑀢𑀺𑀆𑀤𑀺𑀧𑀭𑀺𑀬𑀸𑀬𑀯𑀘𑀦𑁂𑀦𑀸𑀧𑀺 𑀲𑀸𑀫𑀺𑀓𑀲𑁆𑀲 𑀥𑀼𑀭𑁂 𑀦𑀺𑀓𑁆𑀔𑀺𑀧𑀸𑀧𑀺𑀢𑁂 𑀆𑀧𑀢𑁆𑀢𑀺𑀬𑁂𑀯. 𑀢𑁂𑀦𑁂𑀯 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁 𑁋 ‘‘𑀓𑀺𑀁 𑀢𑀼𑀫𑁆𑀳𑁂 𑀪𑀡𑀣…𑀧𑁂… 𑀏𑀯𑀁 𑀉𑀪𑀺𑀦𑁆𑀦𑀁 𑀥𑀼𑀭𑀦𑀺𑀓𑁆𑀔𑁂𑀧𑁂𑀦 𑀪𑀺𑀓𑁆𑀔𑀼𑀦𑁄 𑀧𑀸𑀭𑀸𑀚𑀺𑀓’’𑀦𑁆𑀢𑀺 (𑀧𑀸𑀭𑀸. 𑀅𑀝𑁆𑀞. 𑁧.𑁧𑁧𑁧). 𑀧𑀭𑀲𑀦𑁆𑀢𑀓𑀲𑁆𑀲 𑀧𑀭𑁂𑀳𑀺 𑀕𑀡𑁆𑀳𑀸𑀧𑀦𑁂 𑀏𑀯 𑀧𑀭𑀺𑀬𑀸𑀬𑀢𑁄 𑀫𑀼𑀢𑁆𑀢𑀺, 𑀦 𑀲𑀩𑁆𑀩𑀢𑁆𑀣𑀸𑀢𑀺 𑀕𑀳𑁂𑀢𑀩𑁆𑀩𑀁. 𑀅𑀢𑁆𑀢𑀦𑁄 𑀳𑀢𑁆𑀣𑁂 𑀦𑀺𑀓𑁆𑀔𑀺𑀢𑁆𑀢𑀢𑁆𑀢𑀸𑀢𑀺 𑀏𑀢𑁆𑀣 𑀅𑀢𑁆𑀢𑀦𑁄 𑀳𑀢𑁆𑀣𑁂 𑀲𑀸𑀫𑀺𑀦𑀸 𑀤𑀺𑀦𑁆𑀦𑀢𑀸𑀬 𑀪𑀡𑁆𑀟𑀸𑀕𑀸𑀭𑀺𑀓𑀝𑁆𑀞𑀸𑀦𑁂 𑀞𑀺𑀢𑀢𑁆𑀢𑀸 𑀘 𑀞𑀸𑀦𑀸𑀘𑀸𑀯𑀦𑁂𑀧𑀺 𑀦𑀢𑁆𑀣𑀺 𑀅𑀯𑀳𑀸𑀭𑁄, 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀧𑀦 𑀕𑀳𑀡𑁂 𑀤𑀼𑀓𑁆𑀓𑀝𑀢𑁄 𑀦 𑀫𑀼𑀘𑁆𑀘𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀏𑀲𑁂𑀯 𑀦𑀬𑁄𑀢𑀺 𑀉𑀤𑁆𑀥𑀸𑀭𑁂𑀬𑁂𑀯 𑀘𑁄𑀭𑀲𑁆𑀲 𑀧𑀸𑀭𑀸𑀚𑀺𑀓𑀁, 𑀓𑀲𑁆𑀫𑀸? 𑀅𑀜𑁆𑀜𑁂𑀳𑀺 𑀲𑀸𑀥𑀸𑀭𑀡𑀲𑁆𑀲 𑀅𑀪𑀺𑀜𑁆𑀜𑀸𑀡𑀲𑁆𑀲 𑀯𑀼𑀢𑁆𑀢𑀢𑁆𑀢𑀸. 𑀅𑀜𑁆𑀜𑀁 𑀢𑀸𑀤𑀺𑀲𑀫𑁂𑀯 𑀕𑀡𑁆𑀳𑀦𑁆𑀢𑁂 𑀬𑀼𑀚𑁆𑀚𑀢𑀻𑀢𑀺 𑀲𑀜𑁆𑀜𑀸𑀡𑀢𑁄 𑀑𑀓𑀸𑀲𑀢𑁄 𑀘 𑀢𑁂𑀦 𑀲𑀤𑀺𑀲𑀫𑁂𑀯 𑀅𑀜𑁆𑀜𑀁 𑀕𑀡𑁆𑀳𑀦𑁆𑀢𑁂 𑀬𑀼𑀚𑁆𑀚𑀢𑀺, 𑀘𑁄𑀭𑁂𑀦 𑀲𑀮𑁆𑀮𑀓𑁆𑀔𑀺𑀢𑀧𑁆𑀧𑀤𑁂𑀲𑀢𑁄 𑀢𑀁 𑀅𑀧𑀦𑁂𑀢𑁆𑀯𑀸 𑀓𑁂𑀳𑀺𑀘𑀺 𑀢𑀢𑁆𑀣 𑀢𑀸𑀤𑀺𑀲𑁂 𑀅𑀜𑁆𑀜𑀲𑁆𑀫𑀺𑀁 𑀧𑀢𑁆𑀢𑁂 𑀞𑀧𑀺𑀢𑁂 𑀢𑀁 𑀕𑀡𑁆𑀳𑀦𑁆𑀢𑁂𑀬𑁂𑀯 𑀬𑀼𑀚𑁆𑀚𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄, 𑀢𑁂𑀦 𑀘𑁄𑀭𑁂𑀦 𑀤𑀺𑀯𑀸 𑀲𑀮𑁆𑀮𑀓𑁆𑀔𑀺𑀢𑀧𑀢𑁆𑀢𑀁 𑀅𑀜𑁆𑀜𑀢𑁆𑀣 𑀅𑀧𑀦𑁂𑀢𑁆𑀯𑀸 𑀢𑀤𑀜𑁆𑀜𑁂 𑀢𑀸𑀤𑀺𑀲𑁂 𑀧𑀢𑁆𑀢𑁂 𑀢𑀢𑁆𑀣 𑀞𑀧𑀺𑀢𑁂𑀧𑀺 𑀘𑁄𑀭𑀲𑁆𑀲 𑀧𑀘𑁆𑀙𑀸 𑀭𑀢𑁆𑀢𑀺𑀪𑀸𑀕𑁂 𑀉𑀧𑁆𑀧𑀚𑁆𑀚𑀫𑀸𑀦𑀁 𑀣𑁂𑀬𑁆𑀬𑀘𑀺𑀢𑁆𑀢𑀁 𑀤𑀺𑀯𑀸 𑀲𑀮𑁆𑀮𑀓𑁆𑀔𑀺𑀢𑀧𑁆𑀧𑀤𑁂𑀲𑁂 𑀞𑀧𑀺𑀢𑀁 𑀅𑀜𑁆𑀜𑀁 𑀢𑀸𑀤𑀺𑀲𑀁 𑀧𑀢𑁆𑀢𑀫𑁂𑀯 𑀆𑀮𑀫𑁆𑀩𑀺𑀢𑁆𑀯𑀸 𑀉𑀧𑁆𑀧𑀚𑁆𑀚𑀢𑀻𑀢𑀺 𑀤𑀲𑁆𑀲𑀺𑀢𑀁 𑀳𑁄𑀢𑀺. 𑀧𑀤𑀯𑀸𑀭𑁂𑀦𑀸𑀢𑀺 𑀣𑁂𑀭𑁂𑀦 𑀦𑀻𑀳𑀭𑀺𑀢𑁆𑀯𑀸 𑀤𑀺𑀦𑁆𑀦𑀁 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀕𑀘𑁆𑀙𑀢𑁄 𑀘𑁄𑀭𑀲𑁆𑀲 𑀧𑀤𑀯𑀸𑀭𑁂𑀦. 𑀅𑀢𑀸𑀤𑀺𑀲𑀫𑁂𑀯 𑀕𑀡𑁆𑀳𑀦𑁆𑀢𑁂 𑀬𑀼𑀚𑁆𑀚𑀢𑀻𑀢𑀺 𑀅𑀢𑀸𑀤𑀺𑀲𑀲𑁆𑀲 𑀣𑁂𑀭𑁂𑀦 𑀕𑀳𑀡𑀓𑁆𑀔𑀡𑁂 𑀅𑀯𑀳𑀸𑀭𑀸𑀪𑀸𑀯𑀢𑁄 𑀧𑀘𑁆𑀙𑀸 𑀳𑀢𑁆𑀣𑀧𑀢𑁆𑀢𑀁 ‘‘𑀢’’𑀦𑁆𑀢𑀺 𑀯𑀸 ‘‘𑀅𑀜𑁆𑀜’’𑀦𑁆𑀢𑀺 𑀯𑀸 𑀲𑀜𑁆𑀜𑀸𑀬 ‘‘𑀇𑀤𑀁 𑀕𑀳𑁂𑀢𑁆𑀯𑀸 𑀕𑀘𑁆𑀙𑀸𑀫𑀻’’𑀢𑀺 𑀕𑀫𑀦𑁂 𑀧𑀤𑀯𑀸𑀭𑁂𑀦𑁂𑀯 𑀅𑀯𑀳𑀸𑀭𑁄 𑀬𑀼𑀚𑁆𑀚𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀧𑀸𑀭𑀸𑀚𑀺𑀓𑀁 𑀦𑀢𑁆𑀣𑀻𑀢𑀺 𑀧𑀤𑀯𑀸𑀭𑁂𑀧𑀺 𑀧𑀸𑀭𑀸𑀚𑀺𑀓𑀁 𑀦𑀢𑁆𑀣𑀺 𑀉𑀧𑀦𑀺𑀥𑀺𑀪𑀡𑁆𑀟𑁂 𑀯𑀺𑀬𑀸𑀢𑀺 𑀕𑀳𑁂𑀢𑀩𑁆𑀩𑀁. 𑀕𑀸𑀫𑀤𑁆𑀯𑀸𑀭𑀦𑁆𑀢𑀺 𑀩𑀳𑀺𑀕𑀸𑀫𑁂 𑀯𑀺𑀳𑀸𑀭𑀲𑁆𑀲 𑀧𑀢𑀺𑀝𑁆𑀞𑀺𑀢𑀢𑁆𑀢𑀸 𑀕𑀸𑀫𑀧𑁆𑀧𑀯𑁂𑀲𑀲𑁆𑀲 𑀆𑀭𑀫𑁆𑀪𑀧𑁆𑀧𑀤𑁂𑀲𑀤𑀲𑁆𑀲𑀦𑀯𑀲𑁂𑀦 𑀯𑀼𑀢𑁆𑀢𑀁, 𑀅𑀦𑁆𑀢𑁄𑀕𑀸𑀫𑀦𑁆𑀢𑀺 𑀅𑀢𑁆𑀣𑁄. 𑀤𑁆𑀯𑀺𑀦𑁆𑀦𑀫𑁆𑀧𑀺 𑀉𑀤𑁆𑀥𑀸𑀭𑁂𑀬𑁂𑀯 𑀧𑀸𑀭𑀸𑀚𑀺𑀓𑀦𑁆𑀢𑀺 𑀣𑁂𑀭𑀲𑁆𑀲 𑀅𑀪𑀡𑁆𑀟𑀸𑀕𑀸𑀭𑀺𑀓𑀢𑁆𑀢𑀸 𑀯𑀼𑀢𑁆𑀢𑀁. 𑀬𑀤𑀺 𑀳𑀺 𑀲𑁄 𑀪𑀡𑁆𑀟𑀸𑀕𑀸𑀭𑀺𑀓𑁄 𑀪𑀯𑁂𑀬𑁆𑀬, 𑀲𑀩𑁆𑀩𑀫𑁆𑀧𑀺 𑀉𑀧𑀦𑀺𑀓𑁆𑀔𑀺𑀢𑁆𑀢𑀫𑁂𑀯 𑀲𑀺𑀬𑀸, 𑀉𑀧𑀦𑀺𑀓𑁆𑀔𑀺𑀢𑁆𑀢𑀪𑀡𑁆𑀟𑁂 𑀘 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀕𑀡𑁆𑀳𑀢𑁄𑀧𑀺 𑀦 𑀢𑀸𑀯 𑀣𑁂𑀭𑀲𑁆𑀲 𑀅𑀯𑀳𑀸𑀭𑁄 𑀳𑁄𑀢𑀺, 𑀘𑁄𑀭𑀲𑁆𑀲𑁂𑀯 𑀅𑀯𑀳𑀸𑀭𑁄. 𑀉𑀪𑀺𑀦𑁆𑀦𑀫𑁆𑀧𑀺 𑀤𑀼𑀓𑁆𑀓𑀝𑀦𑁆𑀢𑀺 𑀣𑁂𑀭𑀲𑁆𑀲 𑀅𑀢𑁆𑀢𑀦𑁄 𑀲𑀦𑁆𑀢𑀓𑀢𑀸𑀬 𑀘𑁄𑀭𑀲𑁆𑀲 𑀲𑀸𑀫𑀺𑀓𑁂𑀦 𑀤𑀺𑀦𑁆𑀦𑀢𑁆𑀢𑀸 𑀅𑀯𑀳𑀸𑀭𑁄 𑀦 𑀚𑀸𑀢𑁄, 𑀉𑀪𑀺𑀦𑁆𑀦𑀫𑁆𑀧𑀺 𑀅𑀲𑀼𑀤𑁆𑀥𑀘𑀺𑀢𑁆𑀢𑁂𑀦 𑀕𑀳𑀺𑀢𑀢𑁆𑀢𑀸 𑀤𑀼𑀓𑁆𑀓𑀝𑀦𑁆𑀢𑀺 𑀅𑀢𑁆𑀣𑁄.

𑀆𑀡𑀢𑁆𑀢𑀺𑀬𑀸 𑀕𑀳𑀺𑀢𑀢𑁆𑀢𑀸𑀢𑀺 ‘‘𑀧𑀢𑁆𑀢𑀘𑀻𑀯𑀭𑀁 𑀕𑀡𑁆𑀳𑀸’’𑀢𑀺 𑀏𑀯𑀁 𑀣𑁂𑀭𑁂𑀦 𑀓𑀢𑀆𑀡𑀢𑁆𑀢𑀺𑀬𑀸 𑀕𑀳𑀺𑀢𑀢𑁆𑀢𑀸. 𑀅𑀝𑀯𑀺𑀁 𑀧𑀯𑀺𑀲𑀢𑀺, 𑀧𑀤𑀯𑀸𑀭𑁂𑀦 𑀓𑀸𑀭𑁂𑀢𑀩𑁆𑀩𑁄𑀢𑀺 ‘‘𑀧𑀢𑁆𑀢𑀘𑀻𑀯𑀭𑀁 𑀕𑀡𑁆𑀳, 𑀅𑀲𑀼𑀓𑀁 𑀦𑀸𑀫 𑀕𑀸𑀫𑀁 𑀕𑀦𑁆𑀢𑁆𑀯𑀸 𑀧𑀺𑀡𑁆𑀟𑀸𑀬 𑀘𑀭𑀺𑀲𑁆𑀲𑀸𑀫𑀸’’𑀢𑀺 𑀣𑁂𑀭𑁂𑀦 𑀯𑀺𑀳𑀸𑀭𑀢𑁄 𑀧𑀝𑁆𑀞𑀸𑀬 𑀕𑀸𑀫𑀫𑀕𑁆𑀕𑁂𑀧𑀺 𑀲𑀓𑀮𑁂𑀧𑀺 𑀕𑀸𑀫𑁂 𑀯𑀺𑀘𑀭𑀡𑀲𑁆𑀲 𑀦𑀺𑀬𑀫𑀺𑀢𑀢𑁆𑀢𑀸 𑀫𑀕𑁆𑀕𑀢𑁄 𑀑𑀓𑁆𑀓𑀫𑁆𑀫 𑀕𑀘𑁆𑀙𑀦𑁆𑀢𑀲𑁆𑀲𑁂𑀯 𑀧𑀤𑀯𑀸𑀭𑁂𑀦 𑀆𑀧𑀢𑁆𑀢𑀺 𑀯𑀼𑀢𑁆𑀢𑀸. 𑀯𑀺𑀳𑀸𑀭𑀲𑁆𑀲 𑀳𑀺 𑀧𑀭𑀪𑀸𑀕𑁂 𑀉𑀧𑀘𑀸𑀭𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀢𑀲𑁆𑀲 𑀕𑀸𑀫𑀲𑁆𑀲 𑀧𑀭𑀢𑁄 𑀉𑀧𑀘𑀸𑀭𑁄, 𑀢𑀸𑀯 𑀲𑀩𑁆𑀩𑀁 𑀤𑀳𑀭𑀲𑁆𑀲 𑀣𑁂𑀭𑀸𑀡𑀢𑁆𑀢𑀺𑀬𑀸 𑀲𑀜𑁆𑀘𑀭𑀡𑀽𑀧𑀘𑀸𑀭𑁄𑀯 𑀳𑁄𑀢𑀺, 𑀦 𑀧𑀦 𑀢𑀢𑁄 𑀧𑀭𑀁. 𑀢𑁂𑀦𑁂𑀯 ‘‘𑀉𑀧𑀘𑀸𑀭𑀸𑀢𑀺𑀓𑁆𑀓𑀫𑁂 𑀧𑀸𑀭𑀸𑀚𑀺𑀓𑀁. 𑀕𑀸𑀫𑀽𑀧𑀘𑀸𑀭𑀸𑀢𑀺𑀓𑁆𑀓𑀫𑁂 𑀧𑀸𑀭𑀸𑀚𑀺𑀓’’𑀦𑁆𑀢𑀺 𑀘 𑀯𑀼𑀢𑁆𑀢𑀁. 𑀧𑀝𑀺𑀦𑀺𑀯𑀢𑁆𑀢𑀦𑁂 𑀘𑀻𑀯𑀭𑀥𑁄𑀯𑀦𑀸𑀤𑀺𑀅𑀢𑁆𑀣𑀸𑀬 𑀧𑁂𑀲𑀦𑁂𑀧𑀺 𑀏𑀲𑁂𑀯 𑀦𑀬𑁄. 𑀅𑀝𑁆𑀞𑀢𑁆𑀯𑀸 𑀅𑀦𑀺𑀲𑀻𑀤𑀺𑀢𑁆𑀯𑀸𑀢𑀺 𑀏𑀢𑁆𑀣 𑀯𑀺𑀳𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 𑀲𑀻𑀲𑀸𑀤𑀻𑀲𑀼 𑀪𑀸𑀭𑀁 𑀪𑀽𑀫𑀺𑀬𑀁 𑀅𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀢𑀺𑀝𑁆𑀞𑀦𑁆𑀢𑁄 𑀯𑀸 𑀦𑀺𑀲𑀻𑀤𑀦𑁆𑀢𑁄 𑀯𑀸 𑀯𑀺𑀲𑁆𑀲𑀫𑀺𑀢𑁆𑀯𑀸 𑀣𑁂𑀬𑁆𑀬𑀘𑀺𑀢𑁆𑀢𑁂 𑀯𑀽𑀧𑀲𑀦𑁆𑀢𑁂 𑀧𑀼𑀦 𑀣𑁂𑀬𑁆𑀬𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀕𑀘𑁆𑀙𑀢𑀺 𑀘𑁂, 𑀧𑀸𑀤𑀼𑀤𑁆𑀥𑀸𑀭𑁂𑀦 𑀓𑀸𑀭𑁂𑀢𑀩𑁆𑀩𑁄. 𑀲𑀘𑁂 𑀪𑀽𑀫𑀺𑀬𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀼𑀦 𑀢𑀁 𑀕𑀳𑁂𑀢𑁆𑀯𑀸 𑀕𑀘𑁆𑀙𑀢𑀺, 𑀉𑀤𑁆𑀥𑀸𑀭𑁂𑀦 𑀓𑀸𑀭𑁂𑀢𑀩𑁆𑀩𑁄. 𑀓𑀲𑁆𑀫𑀸? 𑀆𑀡𑀸𑀧𑀓𑀲𑁆𑀲 𑀆𑀡𑀢𑁆𑀢𑀺𑀬𑀸 𑀬𑀁 𑀓𑀢𑁆𑀢𑀩𑁆𑀩𑀁, 𑀢𑀲𑁆𑀲 𑀢𑀸𑀯𑀢𑀸 𑀧𑀭𑀺𑀦𑀺𑀝𑁆𑀞𑀺𑀢𑀢𑁆𑀢𑀸. ‘‘𑀅𑀲𑀼𑀓𑀁 𑀦𑀸𑀫 𑀕𑀸𑀫’’𑀦𑁆𑀢𑀺 𑀅𑀦𑀺𑀬𑀫𑁂𑀢𑁆𑀯𑀸 ‘‘𑀅𑀦𑁆𑀢𑁄𑀕𑀸𑀫𑀁 𑀕𑀫𑀺𑀲𑁆𑀲𑀸𑀫𑀸’’𑀢𑀺 𑀅𑀯𑀺𑀲𑁂𑀲𑁂𑀦 𑀯𑀼𑀢𑁆𑀢𑁂 𑀯𑀺𑀳𑀸𑀭𑀲𑀸𑀫𑀦𑁆𑀢𑀸 𑀧𑀼𑀩𑁆𑀩𑁂 𑀧𑀺𑀡𑁆𑀟𑀸𑀬 𑀧𑀯𑀺𑀝𑁆𑀞𑀧𑀼𑀩𑁆𑀩𑀸 𑀲𑀩𑁆𑀩𑁂 𑀕𑁄𑀘𑀭𑀕𑀸𑀫𑀸𑀧𑀺 𑀔𑁂𑀢𑁆𑀢𑀫𑁂𑀯𑀸𑀢𑀺 𑀯𑀤𑀦𑁆𑀢𑀺. 𑀲𑁂𑀲𑀦𑁆𑀢𑀺 𑀫𑀕𑁆𑀕𑀼𑀓𑁆𑀓𑀫𑀦𑀯𑀺𑀳𑀸𑀭𑀸𑀪𑀺𑀫𑀼𑀔𑀕𑀫𑀦𑀸𑀤𑀺 𑀲𑀩𑁆𑀩𑀁. 𑀧𑀼𑀭𑀺𑀫𑀲𑀤𑀺𑀲𑀫𑁂𑀯𑀸𑀢𑀺 𑀅𑀦𑀸𑀡𑀢𑁆𑀢𑀺𑀬𑀸 𑀕𑀳𑀺𑀢𑁂𑀧𑀺 𑀲𑀸𑀫𑀺𑀓𑀲𑁆𑀲 𑀓𑀣𑁂𑀢𑁆𑀯𑀸 𑀕𑀳𑀺𑀢𑀢𑁆𑀢𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀯𑀺𑀳𑀸𑀭𑀽𑀧𑀘𑀸𑀭𑀸𑀤𑀺 𑀲𑀩𑁆𑀩𑀁 𑀔𑁂𑀢𑁆𑀢𑀫𑁂𑀯𑀸𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀏𑀲𑁂𑀯 𑀦𑀬𑁄𑀢𑀺 𑀅𑀦𑁆𑀢𑀭𑀸𑀫𑀕𑁆𑀕𑁂 𑀣𑁂𑀬𑁆𑀬𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀢𑁆𑀯𑀸𑀢𑀺𑀆𑀤𑀺𑀦𑀸 (𑀧𑀸𑀭𑀸. 𑀅𑀝𑁆𑀞. 𑁧.𑁧𑁧𑁨) 𑀯𑀼𑀢𑁆𑀢𑀁 𑀦𑀬𑀁 𑀅𑀢𑀺𑀤𑀺𑀲𑀢𑀺.

𑀦𑀺𑀫𑀺𑀢𑁆𑀢𑁂 𑀯𑀸 𑀓𑀢𑁂𑀢𑀺 𑀘𑀻𑀯𑀭𑀁 𑀫𑁂 𑀓𑀺𑀮𑀺𑀝𑁆𑀞𑀁, 𑀓𑁄 𑀦𑀼 𑀔𑁄 𑀭𑀚𑀺𑀢𑁆𑀯𑀸 𑀤𑀲𑁆𑀲𑀢𑀻𑀢𑀺𑀆𑀤𑀺𑀦𑀸 𑀦𑀺𑀫𑀺𑀢𑁆𑀢𑁂 𑀓𑀢𑁂. 𑀯𑀼𑀢𑁆𑀢𑀦𑀬𑁂𑀦𑁂𑀯𑀸𑀢𑀺 𑀅𑀦𑀸𑀡𑀢𑁆𑀢𑀲𑁆𑀲 𑀣𑁂𑀭𑁂𑀦 𑀲𑀤𑁆𑀥𑀺𑀁 𑀧𑀢𑁆𑀢𑀘𑀻𑀯𑀭𑀁 𑀕𑀳𑁂𑀢𑁆𑀯𑀸 𑀕𑀫𑀦𑀯𑀸𑀭𑁂 𑀯𑀼𑀢𑁆𑀢𑀦𑀬𑁂𑀦𑁂𑀯. 𑀏𑀓𑀧𑀲𑁆𑀲𑁂𑀢𑀺 𑀯𑀺𑀳𑀸𑀭𑀲𑁆𑀲 𑀫𑀳𑀦𑁆𑀢𑀢𑀸𑀬 𑀅𑀢𑁆𑀢𑀸𑀦𑀁 𑀅𑀤𑀲𑁆𑀲𑁂𑀢𑁆𑀯𑀸 𑀏𑀓𑀲𑁆𑀫𑀺𑀁 𑀧𑀲𑁆𑀲𑁂. 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀧𑀭𑀺𑀪𑀼𑀜𑁆𑀚𑀦𑁆𑀢𑁄 𑀚𑀻𑀭𑀸𑀧𑁂𑀢𑀻𑀢𑀺 𑀣𑁂𑀬𑁆𑀬𑀘𑀺𑀢𑁆𑀢𑁂 𑀉𑀧𑁆𑀧𑀦𑁆𑀦𑁂 𑀞𑀸𑀦𑀸𑀘𑀸𑀯𑀦𑀁 𑀅𑀓𑀢𑁆𑀯𑀸 𑀦𑀺𑀯𑀢𑁆𑀣𑀧𑀸𑀭𑀼𑀢𑀦𑀻𑀳𑀸𑀭𑁂𑀦𑁂𑀯 𑀧𑀭𑀺𑀪𑀼𑀜𑁆𑀚𑀦𑁆𑀢𑁄 𑀚𑀻𑀭𑀸𑀧𑁂𑀢𑀺, 𑀞𑀸𑀦𑀸 𑀘𑀸𑀯𑁂𑀦𑁆𑀢𑀲𑁆𑀲 𑀧𑀦 𑀣𑁂𑀬𑁆𑀬𑀘𑀺𑀢𑁆𑀢𑁂 𑀲𑀢𑀺 𑀧𑀸𑀭𑀸𑀚𑀺𑀓𑀫𑁂𑀯 𑀲𑀻𑀲𑁂 𑀪𑀸𑀭𑀁 𑀔𑀦𑁆𑀥𑁂 𑀓𑀭𑀡𑀸𑀤𑀻𑀲𑀼 𑀯𑀺𑀬 (𑀧𑀸𑀭𑀸. 𑁧𑁦𑁧). 𑀬𑀣𑀸 𑀯𑀸 𑀢𑀣𑀸 𑀯𑀸 𑀦𑀲𑁆𑀲𑀢𑀻𑀢𑀺 𑀅𑀕𑁆𑀕𑀺𑀆𑀤𑀺𑀦𑀸 𑀦𑀲𑁆𑀲𑀢𑀺, 𑀅𑀜𑁆𑀜𑁄 𑀯𑀸 𑀓𑁄𑀘𑀻𑀢𑀺 𑀇𑀫𑀺𑀦𑀸 𑀬𑁂𑀦 𑀞𑀧𑀺𑀢𑀁, 𑀲𑁄𑀧𑀺 𑀲𑀗𑁆𑀕𑀳𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀇𑀢𑀭𑀲𑁆𑀲𑀸𑀢𑀺 𑀘𑁄𑀭𑀲𑁆𑀲. 𑀇𑀢𑀭𑀁 𑀕𑀡𑁆𑀳𑀢𑁄 𑀉𑀤𑁆𑀥𑀸𑀭𑁂 𑀧𑀸𑀭𑀸𑀚𑀺𑀓𑀦𑁆𑀢𑀺 𑀏𑀢𑁆𑀣 ‘‘𑀧𑀯𑀺𑀲𑀺𑀢𑁆𑀯𑀸 𑀢𑀯 𑀲𑀸𑀝𑀓𑀁 𑀕𑀡𑁆𑀳𑀸𑀳𑀻’’𑀢𑀺 𑀇𑀫𑀺𑀦𑀸𑀯 𑀉𑀧𑀦𑀺𑀥𑀺𑀪𑀸𑀯𑀢𑁄 𑀫𑁄𑀘𑀺𑀢𑀢𑁆𑀢𑀸, 𑀲𑀸𑀫𑀺𑀓𑀲𑁆𑀲 𑀇𑀢𑀭𑀁 𑀕𑀡𑁆𑀳𑀢𑁄 𑀅𑀢𑁆𑀢𑀦𑁄 𑀲𑀸𑀝𑀓𑁂 𑀆𑀮𑀬𑀲𑁆𑀲 𑀲𑀩𑁆𑀪𑀸𑀯𑀢𑁄 𑀘 ‘‘𑀉𑀤𑁆𑀥𑀸𑀭𑁂 𑀧𑀸𑀭𑀸𑀚𑀺𑀓’’𑀦𑁆𑀢𑀺 𑀯𑀼𑀢𑁆𑀢𑀁. 𑀲𑀸𑀫𑀺𑀓𑁄 𑀘𑁂 ‘‘𑀫𑀫 𑀲𑀦𑁆𑀢𑀓𑀁 𑀇𑀤𑀁 𑀯𑀸 𑀳𑁄𑀢𑀼, 𑀅𑀜𑁆𑀜𑀁 𑀯𑀸, 𑀓𑀺𑀁 𑀢𑁂𑀦, 𑀅𑀮𑀁 𑀫𑀬𑁆𑀳𑀁 𑀇𑀫𑀺𑀦𑀸’’𑀢𑀺 𑀏𑀯𑀁 𑀲𑀼𑀝𑁆𑀞𑀼 𑀦𑀺𑀭𑀸𑀮𑀬𑁄 𑀳𑁄𑀢𑀺, 𑀘𑁄𑀭𑀲𑁆𑀲 𑀧𑀸𑀭𑀸𑀚𑀺𑀓𑀁 𑀦𑀢𑁆𑀣𑀻𑀢𑀺 𑀕𑀳𑁂𑀢𑀩𑁆𑀩𑀁. 𑀦 𑀚𑀸𑀦𑀦𑁆𑀢𑀻𑀢𑀺 𑀢𑁂𑀦 𑀯𑀼𑀢𑁆𑀢𑀯𑀘𑀦𑀁 𑀅𑀲𑀼𑀡𑀦𑁆𑀢𑀸 𑀦 𑀚𑀸𑀦𑀦𑁆𑀢𑀺. 𑀏𑀲𑁂𑀯 𑀦𑀬𑁄𑀢𑀺 𑀏𑀢𑁆𑀣 𑀲𑀘𑁂 𑀚𑀸𑀦𑀺𑀢𑁆𑀯𑀸𑀧𑀺 𑀘𑀺𑀢𑁆𑀢𑁂𑀦 𑀦 𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑀺, 𑀏𑀲𑁂𑀯 𑀦𑀬𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀧𑀝𑀺𑀓𑁆𑀔𑀺𑀧𑀦𑁆𑀢𑀻𑀢𑀺 𑀏𑀢𑁆𑀣 𑀘𑀺𑀢𑁆𑀢𑁂𑀦 𑀧𑀝𑀺𑀓𑁆𑀔𑁂𑀧𑁄𑀧𑀺 𑀲𑀗𑁆𑀕𑀳𑀺𑀢𑁄𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀉𑀧𑀘𑀸𑀭𑁂 𑀯𑀺𑀚𑁆𑀚𑀫𑀸𑀦𑁂𑀢𑀺 𑀪𑀡𑁆𑀟𑀸𑀕𑀸𑀭𑀲𑁆𑀲 𑀲𑀫𑀻𑀧𑁂 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑀝𑁆𑀞𑀸𑀦𑁂 𑀯𑀺𑀚𑁆𑀚𑀫𑀸𑀦𑁂. 𑀫𑀬𑀺 𑀘 𑀫𑀢𑁂 𑀲𑀗𑁆𑀖𑀲𑁆𑀲 𑀘 𑀲𑁂𑀦𑀸𑀲𑀦𑁂 𑀯𑀺𑀦𑀝𑁆𑀞𑁂𑀢𑀺 𑀏𑀢𑁆𑀣 ‘‘𑀢𑀁 𑀫𑀸𑀭𑁂𑀲𑁆𑀲𑀸𑀫𑀸’’𑀢𑀺 𑀏𑀢𑁆𑀢𑀓𑁂 𑀯𑀼𑀢𑁆𑀢𑁂𑀧𑀺 𑀯𑀺𑀯𑀭𑀺𑀢𑀼𑀁 𑀯𑀝𑁆𑀝𑀢𑀺 𑀕𑀺𑀮𑀸𑀦𑀧𑀓𑁆𑀔𑁂 𑀞𑀺𑀢𑀢𑁆𑀢𑀸 𑀅𑀯𑀺𑀲𑀬𑁄𑀢𑀺 𑀯𑀼𑀢𑁆𑀢𑀢𑁆𑀢𑀸. 𑀫𑀭𑀡𑀢𑁄 𑀳𑀺 𑀧𑀭𑀁 𑀕𑁂𑀮𑀜𑁆𑀜𑀁 𑀅𑀯𑀺𑀲𑀬𑀢𑁆𑀢𑀜𑁆𑀘 𑀦𑀢𑁆𑀣𑀺. ‘‘𑀤𑁆𑀯𑀸𑀭𑀁 𑀙𑀺𑀦𑁆𑀤𑀺𑀢𑁆𑀯𑀸 𑀧𑀭𑀺𑀓𑁆𑀔𑀸𑀭𑀁 𑀳𑀭𑀺𑀲𑁆𑀲𑀸𑀫𑀸’’𑀢𑀺 𑀏𑀢𑁆𑀢𑀓𑁂 𑀯𑀼𑀢𑁆𑀢𑁂𑀧𑀺 𑀯𑀺𑀯𑀭𑀺𑀢𑀼𑀁 𑀯𑀝𑁆𑀝𑀢𑀺𑀬𑁂𑀯. 𑀲𑀳𑀸𑀬𑁂𑀳𑀺 𑀪𑀯𑀺𑀢𑀩𑁆𑀩𑀦𑁆𑀢𑀺 𑀢𑁂𑀳𑀺𑀧𑀺 𑀪𑀺𑀓𑁆𑀔𑀸𑀘𑀸𑀭𑀸𑀤𑀻𑀳𑀺 𑀧𑀭𑀺𑀬𑁂𑀲𑀺𑀢𑁆𑀯𑀸 𑀅𑀢𑁆𑀢𑀦𑁄 𑀲𑀦𑁆𑀢𑀓𑁂𑀧𑀺 𑀓𑀺𑀜𑁆𑀘𑀺 𑀓𑀺𑀜𑁆𑀘𑀺 𑀤𑀸𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀬𑀁 𑀲𑀸𑀫𑀻𑀘𑀻𑀢𑀺 𑀪𑀡𑁆𑀟𑀸𑀕𑀸𑀭𑁂 𑀯𑀲𑀦𑁆𑀢𑀸𑀦𑀁 𑀇𑀤𑀁 𑀯𑀢𑁆𑀢𑀁.

𑀮𑁄𑀮𑀫𑀳𑀸𑀣𑁂𑀭𑁄𑀢𑀺 𑀫𑀦𑁆𑀤𑁄 𑀫𑁄𑀫𑀽𑀳𑁄 𑀆𑀓𑀺𑀡𑁆𑀡𑀯𑀺𑀳𑀸𑀭𑀻. 𑀇𑀢𑀭𑁂𑀳𑀻𑀢𑀺 𑀢𑀲𑁆𑀫𑀺𑀁𑀬𑁂𑀯 𑀕𑀩𑁆𑀪𑁂 𑀯𑀲𑀦𑁆𑀢𑁂𑀳𑀺 𑀇𑀢𑀭𑀪𑀺𑀓𑁆𑀔𑀽𑀳𑀺. 𑀯𑀺𑀳𑀸𑀭𑀭𑀓𑁆𑀔𑀡𑀯𑀸𑀭𑁂 𑀦𑀺𑀬𑀼𑀢𑁆𑀢𑁄 𑀯𑀺𑀳𑀸𑀭𑀯𑀸𑀭𑀺𑀓𑁄, 𑀯𑀼𑀟𑁆𑀠𑀧𑀝𑀺𑀧𑀸𑀝𑀺𑀬𑀸 𑀅𑀢𑁆𑀢𑀦𑁄 𑀯𑀸𑀭𑁂 𑀯𑀺𑀳𑀸𑀭𑀭𑀓𑁆𑀔𑀡𑀓𑁄. 𑀦𑀺𑀯𑀸𑀧𑀦𑁆𑀢𑀺 𑀪𑀢𑁆𑀢𑀯𑁂𑀢𑀦𑀁. 𑀘𑁄𑀭𑀸𑀦𑀁 𑀧𑀝𑀺𑀧𑀣𑀁 𑀕𑀢𑁂𑀲𑀽𑀢𑀺 𑀘𑁄𑀭𑀸𑀦𑀁 𑀆𑀕𑀫𑀦𑀁 𑀜𑀢𑁆𑀯𑀸 ‘‘𑀧𑀞𑀫𑀢𑀭𑀜𑁆𑀜𑁂𑀯 𑀕𑀦𑁆𑀢𑁆𑀯𑀸 𑀲𑀤𑁆𑀤𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀘𑁄𑀭𑀸𑀦𑀁 𑀅𑀪𑀺𑀫𑀼𑀔𑀁 𑀕𑀢𑁂𑀲𑀼, ‘‘𑀘𑁄𑀭𑁂𑀳𑀺 𑀳𑀝𑀪𑀡𑁆𑀟𑀁 𑀆𑀳𑀭𑀺𑀲𑁆𑀲𑀸𑀫𑀸’’𑀢𑀺 𑀢𑀤𑀦𑀼𑀧𑀣𑀁 𑀕𑀢𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀦𑀺𑀩𑀤𑁆𑀥𑀁 𑀓𑀢𑁆𑀯𑀸𑀢𑀺 ‘‘𑀅𑀲𑀼𑀓𑀓𑀼𑀮𑁂 𑀬𑀸𑀕𑀼𑀪𑀢𑁆𑀢𑀁 𑀯𑀺𑀳𑀸𑀭𑀯𑀸𑀭𑀺𑀓𑀸𑀦𑀜𑁆𑀜𑁂𑀯𑀸’’𑀢𑀺 𑀏𑀯𑀁 𑀦𑀺𑀬𑀫𑀦𑀁 𑀓𑀢𑁆𑀯𑀸. 𑀤𑁆𑀯𑁂 𑀢𑀺𑀲𑁆𑀲𑁄 𑀬𑀸𑀕𑀼𑀲𑀮𑀸𑀓𑀸 𑀘𑀢𑁆𑀢𑀸𑀭𑀺 𑀧𑀜𑁆𑀘 𑀲𑀮𑀸𑀓𑀪𑀢𑁆𑀢𑀸𑀦𑀺 𑀘 𑀮𑀪𑀫𑀸𑀦𑁄𑀯𑀸𑀢𑀺 𑀇𑀤𑀁 𑀦𑀺𑀤𑀲𑁆𑀲𑀦𑀫𑀢𑁆𑀢𑀁, 𑀢𑀢𑁄 𑀊𑀦𑀁 𑀯𑀸 𑀳𑁄𑀢𑀼 𑀅𑀥𑀺𑀓𑀁 𑀯𑀸 𑀅𑀢𑁆𑀢𑀦𑁄 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑀲𑁆𑀲 𑀘 𑀬𑀸𑀧𑀦𑀫𑀢𑁆𑀢𑀁 𑀮𑀪𑀦𑀫𑁂𑀯 𑀧𑀫𑀸𑀡𑀦𑁆𑀢𑀺 𑀕𑀳𑁂𑀢𑀩𑁆𑀩𑀁. 𑀦𑀺𑀲𑁆𑀲𑀺𑀢𑀓𑁂 𑀚𑀕𑁆𑀕𑁂𑀦𑁆𑀢𑀻𑀢𑀺 𑀢𑁂𑀳𑀺 𑀯𑀺𑀳𑀸𑀭𑀁 𑀚𑀕𑁆𑀕𑀸𑀧𑁂𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀅𑀲𑀳𑀸𑀬𑀓𑀲𑁆𑀲𑀸𑀢𑀺 𑀲𑀳𑀸𑀬𑀭𑀳𑀺𑀢𑀲𑁆𑀲. 𑀅𑀢𑁆𑀢𑀤𑀼𑀢𑀺𑀬𑀲𑁆𑀲𑀸𑀢𑀺 𑀅𑀧𑁆𑀧𑀺𑀘𑁆𑀙𑀲𑁆𑀲 𑀅𑀢𑁆𑀢𑀸 𑀲𑀭𑀻𑀭𑀫𑁂𑀯 𑀤𑀼𑀢𑀺𑀬𑁄 𑀅𑀲𑁆𑀲 𑀦𑀸𑀜𑁆𑀜𑁄𑀢𑀺 𑀅𑀢𑁆𑀢𑀤𑀼𑀢𑀺𑀬𑁄. 𑀢𑀤𑀼𑀪𑀬𑀲𑁆𑀲𑀸𑀧𑀺 𑀅𑀢𑁆𑀣𑀲𑁆𑀲 𑀯𑀺𑀪𑀸𑀯𑀦𑀁 𑀬𑀲𑁆𑀲𑀸𑀢𑀺𑀆𑀤𑀺, 𑀏𑀢𑁂𑀦 𑀲𑀩𑁆𑀩𑁂𑀦 𑀏𑀓𑁂𑀓𑀲𑁆𑀲 𑀯𑀸𑀭𑁄 𑀦 𑀧𑀸𑀧𑁂𑀢𑀩𑁆𑀩𑁄𑀢𑀺 𑀤𑀲𑁆𑀲𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀧𑀸𑀓𑀯𑀢𑁆𑀢𑀢𑁆𑀣𑀸𑀬𑀸𑀢𑀺 𑀦𑀺𑀘𑁆𑀘𑀁 𑀧𑀘𑀺𑀢𑀩𑁆𑀩𑀬𑀸𑀕𑀼𑀪𑀢𑁆𑀢𑀲𑀗𑁆𑀔𑀸𑀢𑀯𑀢𑁆𑀢𑀢𑁆𑀣𑀸𑀬. 𑀞𑀧𑁂𑀦𑁆𑀢𑀻𑀢𑀺 𑀤𑀸𑀬𑀓𑀸 𑀞𑀧𑁂𑀦𑁆𑀢𑀺. 𑀢𑀁 𑀕𑀳𑁂𑀢𑁆𑀯𑀸𑀢𑀺 𑀢𑀁 𑀆𑀭𑀸𑀫𑀺𑀓𑀸𑀤𑀻𑀳𑀺 𑀤𑀺𑀬𑁆𑀬𑀫𑀸𑀦𑀁 𑀪𑀸𑀕𑀁 𑀕𑀳𑁂𑀢𑁆𑀯𑀸. 𑀦 𑀕𑀸𑀳𑀸𑀧𑁂𑀢𑀩𑁆𑀩𑁄𑀢𑀺 𑀏𑀢𑁆𑀣 𑀅𑀩𑁆𑀪𑁄𑀓𑀸𑀲𑀺𑀓𑀲𑁆𑀲𑀸𑀧𑀺 𑀅𑀢𑁆𑀢𑀦𑁄 𑀅𑀥𑀺𑀓𑀧𑀭𑀺𑀓𑁆𑀔𑀸𑀭𑁄 𑀯𑀸 𑀞𑀧𑀺𑀢𑁄 𑀅𑀢𑁆𑀣𑀺, 𑀘𑀻𑀯𑀭𑀸𑀤𑀺𑀲𑀗𑁆𑀖𑀺𑀓𑀪𑀸𑀕𑁂𑀧𑀺 𑀆𑀮𑀬𑁄 𑀯𑀸 𑀅𑀢𑁆𑀣𑀺, 𑀲𑁄𑀧𑀺 𑀕𑀸𑀳𑀸𑀧𑁂𑀢𑀩𑁆𑀩𑁄𑀯. 𑀤𑀺𑀕𑀼𑀡𑀦𑁆𑀢𑀺 𑀅𑀜𑁆𑀜𑁂𑀳𑀺 𑀮𑀩𑁆𑀪𑀫𑀸𑀦𑀢𑁄 𑀤𑀺𑀕𑀼𑀡𑀁. 𑀧𑀓𑁆𑀔𑀯𑀸𑀭𑁂𑀦𑀸𑀢𑀺 𑀅𑀟𑁆𑀠𑀫𑀸𑀲𑀯𑀸𑀭𑁂𑀦.

𑀲𑀼𑀗𑁆𑀓𑀖𑀸𑀢𑀓𑀣𑀸𑀯𑀡𑁆𑀡𑀦𑀸

𑁧𑁧𑁩. 𑀲𑀼𑀗𑁆𑀓𑀖𑀸𑀢𑀓𑀣𑀸𑀬𑀁 𑀲𑀼𑀗𑁆𑀓𑀁 𑀬𑀢𑁆𑀣 𑀭𑀸𑀚𑀧𑀼𑀭𑀺𑀲𑀸 𑀳𑀦𑀦𑁆𑀢𑀺 𑀅𑀤𑀤𑀦𑁆𑀢𑀸𑀦𑀁 𑀲𑀦𑁆𑀢𑀓𑀁 𑀅𑀘𑁆𑀙𑀺𑀦𑁆𑀤𑀺𑀢𑁆𑀯𑀸𑀧𑀺 𑀕𑀡𑁆𑀳𑀦𑁆𑀢𑀺, 𑀢𑀁 𑀞𑀸𑀦𑀁 𑀲𑀼𑀗𑁆𑀓𑀖𑀸𑀢𑀦𑁆𑀢𑀺 𑀏𑀯𑀫𑁆𑀧𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀧𑀸𑀓𑀝𑀁 𑀓𑀸𑀢𑀼𑀁 𑀢𑀜𑁆𑀳𑀻𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀤𑀼𑀢𑀺𑀬𑀁 𑀧𑀸𑀤𑀁 𑀅𑀢𑀺𑀓𑁆𑀓𑀸𑀫𑁂𑀢𑀻𑀢𑀺 𑀏𑀢𑁆𑀣 𑀧𑀞𑀫𑀧𑀸𑀤𑀁 𑀧𑀭𑀺𑀘𑁆𑀙𑁂𑀤𑀢𑁄 𑀩𑀳𑀺 𑀞𑀧𑁂𑀢𑁆𑀯𑀸 𑀤𑀼𑀢𑀺𑀬𑀧𑀸𑀤𑁂 𑀉𑀤𑁆𑀥𑀝𑀫𑀢𑁆𑀢𑁂 𑀧𑀸𑀭𑀸𑀚𑀺𑀓𑀁. 𑀉𑀤𑁆𑀥𑀭𑀺𑀢𑁆𑀯𑀸 𑀩𑀳𑀺 𑀅𑀝𑁆𑀞𑀧𑀺𑀢𑁂𑀧𑀺 𑀩𑀳𑀺 𑀞𑀺𑀢𑁄 𑀏𑀯 𑀦𑀸𑀫 𑀳𑁄𑀢𑀻𑀢𑀺 𑀓𑀢𑁆𑀯𑀸 𑀏𑀯𑀁 𑀲𑀩𑁆𑀩𑀢𑁆𑀣 𑀧𑀤𑀯𑀸𑀭𑁂𑀲𑀼𑀧𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀅𑀩𑁆𑀪𑀦𑁆𑀢𑀭𑀺𑀫𑀁 𑀩𑀳𑀺 𑀞𑀧𑁂𑀢𑀺, 𑀧𑀸𑀭𑀸𑀚𑀺𑀓𑀦𑁆𑀢𑀺 𑀇𑀤𑀁 𑀲𑀬𑀁 𑀩𑀳𑀺 𑀞𑀢𑁆𑀯𑀸 𑀧𑀞𑀫𑀁 𑀅𑀩𑁆𑀪𑀦𑁆𑀢𑀭𑀺𑀫𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀯𑀸 𑀲𑀫𑀓𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀯𑀸 𑀧𑀭𑀺𑀯𑀢𑁆𑀢𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀩𑀳𑀺 𑀞𑀢𑁆𑀯𑀸 𑀉𑀓𑁆𑀔𑀺𑀢𑁆𑀢𑀫𑀢𑁆𑀢𑁂 𑀳𑀺 𑀲𑀩𑁆𑀩𑀁 𑀩𑀳𑀺𑀕𑀢𑀫𑁂𑀯 𑀳𑁄𑀢𑀻𑀢𑀺. 𑀲𑀘𑁂 𑀧𑀦 𑀲𑁄 𑀩𑀳𑀺 𑀞𑀢𑁆𑀯𑀸𑀧𑀺 𑀩𑀸𑀳𑀺𑀭𑀧𑀼𑀝𑀓𑀁 𑀧𑀞𑀫𑀁 𑀅𑀦𑁆𑀢𑁄 𑀞𑀧𑁂𑀢𑁆𑀯𑀸 𑀧𑀘𑁆𑀙𑀸 𑀅𑀩𑁆𑀪𑀦𑁆𑀢𑀭𑀺𑀫𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀩𑀳𑀺 𑀞𑀧𑁂𑀢𑀺, 𑀢𑀤𑀸𑀧𑀺 𑀏𑀓𑀸𑀩𑀤𑁆𑀥𑀢𑀸𑀬 𑀅𑀯𑀺𑀚𑀳𑀺𑀢𑀢𑁆𑀢𑀸 𑀅𑀯𑀳𑀸𑀭𑁄 𑀦 𑀤𑀺𑀲𑁆𑀲𑀢𑀺. 𑀓𑁂𑀘𑀺 𑀧𑀦 ‘‘𑀪𑀽𑀫𑀺𑀬𑀁 𑀧𑀢𑀺𑀢𑁆𑀯𑀸 𑀯𑀢𑁆𑀢𑀦𑁆𑀢𑀁 𑀧𑀼𑀦 𑀅𑀦𑁆𑀢𑁄 𑀧𑀯𑀺𑀲𑀢𑀺, 𑀧𑀸𑀭𑀸𑀚𑀺𑀓𑀫𑁂𑀯𑀸𑀢𑀺 (𑀧𑀸𑀭𑀸. 𑀅𑀝𑁆𑀞. 𑁧.𑁧𑁧𑁩) 𑀯𑀼𑀢𑁆𑀢𑀢𑁆𑀢𑀸 𑀩𑀸𑀳𑀺𑀭𑀧𑀼𑀝𑀓𑁂 𑀅𑀦𑁆𑀢𑁄𑀧𑀯𑀺𑀝𑁆𑀞𑁂𑀧𑀺 𑀩𑀳𑀺𑀕𑀢𑀪𑀸𑀯𑀢𑁄 𑀦 𑀫𑀼𑀘𑁆𑀘𑀢𑀺, 𑀅𑀦𑁆𑀢𑁄𑀕𑀢𑀁 𑀧𑀦 𑀧𑀼𑀝𑀓𑀁 𑀧𑀞𑀫𑀁, 𑀧𑀘𑁆𑀙𑀸 𑀏𑀯 𑀯𑀸 𑀩𑀳𑀺 𑀞𑀧𑀺𑀢𑀫𑀢𑁆𑀢𑁂 𑀯𑀸 𑀧𑀸𑀭𑀸𑀚𑀺𑀓𑀫𑁂𑀯𑀸’’𑀢𑀺 𑀯𑀤𑀦𑁆𑀢𑀺, 𑀢𑀁 𑀦 𑀬𑀼𑀢𑁆𑀢𑀁. 𑀩𑀳𑀺 𑀪𑀽𑀫𑀺𑀬𑀁 𑀧𑀸𑀢𑀺𑀢𑀲𑁆𑀲 𑀓𑁂𑀦𑀘𑀺 𑀲𑀤𑁆𑀥𑀺𑀁 𑀏𑀓𑀸𑀩𑀤𑁆𑀥𑀢𑀸𑀬 𑀅𑀪𑀸𑀯𑁂𑀦 𑀅𑀦𑁆𑀢𑁄𑀧𑀯𑀺𑀝𑁆𑀞𑁂𑀧𑀺 𑀧𑀸𑀭𑀸𑀚𑀺𑀓𑀫𑁂𑀯𑀸𑀢𑀺 𑀯𑀢𑁆𑀢𑀼𑀁 𑀬𑀼𑀢𑁆𑀢𑀁, 𑀇𑀤𑀁 𑀧𑀦 𑀏𑀓𑀸𑀩𑀤𑁆𑀥𑀢𑁆𑀢𑀸 𑀢𑁂𑀦 𑀲𑀤𑁆𑀥𑀺𑀁 𑀦 𑀲𑀫𑁂𑀢𑀺. 𑀢𑀲𑁆𑀫𑀸 𑀬𑀣𑀸 𑀅𑀦𑁆𑀢𑁄𑀪𑀽𑀫𑀺𑀕𑀢𑁂𑀦 𑀏𑀓𑀸𑀩𑀤𑁆𑀥𑀢𑀸 𑀦 𑀳𑁄𑀢𑀺, 𑀏𑀯𑀁 𑀉𑀪𑀬𑀲𑁆𑀲𑀸𑀧𑀺 𑀩𑀳𑀺𑀕𑀢𑀪𑀸𑀯𑁂 𑀲𑀸𑀥𑀺𑀢𑁂𑀬𑁂𑀯 𑀅𑀯𑀳𑀸𑀭𑁄𑀢𑀺 𑀯𑀺𑀜𑁆𑀜𑀸𑀬𑀢𑀺, 𑀯𑀻𑀫𑀁𑀲𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑀁. 𑀬𑁂 𑀧𑀦 𑀧𑀭𑀺𑀯𑀢𑁆𑀢𑀺𑀢𑁆𑀯𑀸𑀢𑀺 𑀇𑀫𑀲𑁆𑀲 𑀦𑀺𑀯𑀢𑁆𑀢𑀺𑀢𑁆𑀯𑀸𑀢𑀺 𑀅𑀢𑁆𑀣𑀁 𑀯𑀤𑀦𑁆𑀢𑀺, 𑀢𑁂𑀳𑀺 𑀧𑀦 𑀅𑀩𑁆𑀪𑀦𑁆𑀢𑀭𑀺𑀫𑀁 𑀩𑀳𑀺 𑀞𑀧𑁂𑀢𑀻𑀢𑀺 𑀅𑀬𑀫𑀢𑁆𑀣𑁄 𑀕𑀳𑀺𑀢𑁄 𑀳𑁄𑀢𑀻𑀢𑀺 𑀢𑀢𑁆𑀣 𑀲𑀗𑁆𑀓𑀸𑀬𑁂𑀯 𑀦𑀢𑁆𑀣𑀺. 𑀏𑀓𑀸𑀩𑀤𑁆𑀥𑀦𑁆𑀢𑀺 𑀓𑀸𑀚𑀓𑁄𑀝𑀺𑀬𑀁 𑀭𑀚𑁆𑀚𑀼𑀬𑀸 𑀩𑀦𑁆𑀥𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀅𑀩𑀦𑁆𑀥𑀺𑀢𑁆𑀯𑀸 𑀓𑀸𑀚𑀓𑁄𑀝𑀺𑀬𑀁 𑀞𑀧𑀺𑀢𑀫𑀢𑁆𑀢𑀫𑁂𑀯 𑀳𑁄𑀢𑀺, 𑀧𑀸𑀭𑀸𑀚𑀺𑀓𑀦𑁆𑀢𑀺 𑀩𑀳𑀺 𑀕𑀳𑀺𑀢𑀓𑀸𑀚𑀓𑁄𑀝𑀺𑀬𑀁 𑀞𑀧𑀺𑀢𑀁 𑀬𑀤𑀺 𑀧𑀸𑀤𑀁 𑀅𑀕𑁆𑀖𑀢𑀺, 𑀧𑀸𑀭𑀸𑀚𑀺𑀓𑀫𑁂𑀯, 𑀅𑀦𑁆𑀢𑁄𑀞𑀧𑀺𑀢𑁂𑀦 𑀏𑀓𑀸𑀩𑀤𑁆𑀥𑀢𑀸𑀬 𑀅𑀪𑀸𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀕𑀘𑁆𑀙𑀦𑁆𑀢𑁂 𑀬𑀸𑀦𑁂 𑀯𑀸…𑀧𑁂… 𑀞𑀧𑁂𑀢𑀻𑀢𑀺 𑀲𑀼𑀗𑁆𑀓𑀖𑀸𑀢𑀁 𑀧𑀯𑀺𑀲𑀺𑀢𑁆𑀯𑀸 𑀅𑀧𑁆𑀧𑀯𑀺𑀲𑀺𑀢𑁆𑀯𑀸 𑀯𑀸 𑀞𑀧𑁂𑀢𑀺. 𑀲𑀼𑀗𑁆𑀓𑀝𑁆𑀞𑀸𑀦𑀲𑁆𑀲 𑀩𑀳𑀺 𑀞𑀺𑀢𑀦𑁆𑀢𑀺 𑀬𑀸𑀦𑀸𑀤𑀻𑀳𑀺 𑀦𑀻𑀳𑀝𑀢𑁆𑀢𑀸 𑀩𑀳𑀺 𑀞𑀺𑀢𑀁. 𑀓𑁂𑀘𑀺 𑀧𑀦 ‘‘𑀩𑀳𑀺 𑀞𑀧𑀺𑀢’’𑀦𑁆𑀢𑀺 𑀧𑀸𑀞𑀁 𑀯𑀺𑀓𑀧𑁆𑀧𑁂𑀢𑁆𑀯𑀸 𑀲𑀼𑀗𑁆𑀓𑀝𑁆𑀞𑀸𑀦𑀢𑁄 𑀧𑀼𑀩𑁆𑀩𑁂𑀯 𑀩𑀳𑀺 𑀞𑀧𑀺𑀢𑀦𑁆𑀢𑀺 𑀅𑀢𑁆𑀣𑀁 𑀯𑀤𑀦𑁆𑀢𑀺, 𑀢𑀁 𑀦 𑀲𑀼𑀦𑁆𑀤𑀭𑀁; 𑀲𑀼𑀗𑁆𑀓𑀝𑁆𑀞𑀸𑀦𑁂 𑀧𑀯𑀺𑀲𑀺𑀢𑁆𑀯𑀸 𑀬𑀸𑀦𑁂 𑀞𑀧𑀺𑀢𑁂𑀧𑀺 𑀧𑀯𑀢𑁆𑀢𑀺𑀢𑁆𑀯𑀸 𑀕𑀢𑁂 𑀯𑀺𑀬 𑀤𑁄𑀲𑀸𑀪𑀸𑀯𑀢𑁄. 𑀬𑁄 𑀧𑀦 𑀲𑀼𑀗𑁆𑀓𑀝𑁆𑀞𑀸𑀦𑀲𑁆𑀲 𑀅𑀦𑁆𑀢𑁄𑀯 𑀧𑀯𑀺𑀲𑀺𑀢𑁆𑀯𑀸 ‘‘𑀲𑀼𑀗𑁆𑀓𑀝𑁆𑀞𑀸𑀦’’𑀦𑁆𑀢𑀺 𑀜𑀢𑁆𑀯𑀸 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀆𑀕𑀢𑀫𑀕𑁆𑀕𑁂𑀦 𑀧𑀝𑀺𑀦𑀺𑀯𑀢𑁆𑀢𑀺𑀢𑁆𑀯𑀸 𑀕𑀘𑁆𑀙𑀢𑀺, 𑀢𑀲𑁆𑀲𑀸𑀧𑀺 𑀬𑀤𑀺 𑀢𑁂𑀦 𑀤𑀺𑀲𑀸𑀪𑀸𑀕𑁂𑀦 𑀕𑀘𑁆𑀙𑀦𑁆𑀢𑀸𑀦𑀫𑁆𑀧𑀺 𑀳𑀢𑁆𑀣𑀢𑁄 𑀲𑀼𑀗𑁆𑀓𑀁 𑀕𑀡𑁆𑀳𑀦𑁆𑀢𑀺, 𑀧𑀸𑀭𑀸𑀚𑀺𑀓𑀫𑁂𑀯. 𑀇𑀫𑀲𑁆𑀫𑀺𑀁 𑀞𑀸𑀦𑁂𑀢𑀺 𑀬𑀸𑀦𑀸𑀤𑀻𑀳𑀺 𑀦𑀻𑀳𑀭𑀡𑁂. 𑀢𑀢𑁆𑀭𑀸𑀢𑀺 𑀢𑀲𑁆𑀫𑀺𑀁 𑀏𑀴𑀓𑀮𑁄𑀫𑀲𑀺𑀓𑁆𑀔𑀸𑀧𑀤𑁂 (𑀧𑀸𑀭𑀸. 𑁫𑁭𑁧 𑀆𑀤𑀬𑁄).

𑀧𑀸𑀡𑀓𑀣𑀸𑀯𑀡𑁆𑀡𑀦𑀸

𑁧𑁧𑁪. 𑀧𑀸𑀡𑀓𑀣𑀸𑀬𑀁 𑀆𑀞𑀧𑀺𑀢𑁄𑀢𑀺 𑀫𑀸𑀢𑀸𑀧𑀺𑀢𑀽𑀳𑀺 𑀇𑀡𑀁 𑀕𑀡𑁆𑀳𑀦𑁆𑀢𑁂𑀳𑀺 ‘‘𑀬𑀸𑀯 𑀇𑀡𑀤𑀸𑀦𑀸 𑀅𑀬𑀁 𑀢𑀼𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑁂 𑀳𑁄𑀢𑀽’’𑀢𑀺 𑀇𑀡𑀤𑀸𑀬𑀓𑀸𑀦𑀁 𑀦𑀺𑀬𑁆𑀬𑀸𑀢𑀺𑀢𑁄. 𑀅𑀯𑀳𑀸𑀭𑁄 𑀦𑀢𑁆𑀣𑀻𑀢𑀺 𑀫𑀸𑀢𑀸𑀧𑀺𑀢𑀽𑀳𑀺 𑀧𑀼𑀢𑁆𑀢𑀲𑁆𑀲 𑀅𑀧𑀭𑀺𑀘𑁆𑀘𑀢𑁆𑀢𑀢𑁆𑀢𑀸 𑀫𑀸𑀢𑀸𑀧𑀺𑀢𑀽𑀦𑀜𑁆𑀘 𑀅𑀲𑀦𑁆𑀢𑀓𑀢𑁆𑀢𑀸 𑀅𑀯𑀳𑀸𑀭𑁄 𑀦𑀢𑁆𑀣𑀺. 𑀥𑀦𑀁 𑀧𑀦 𑀕𑀢𑀝𑁆𑀞𑀸𑀦𑁂 𑀯𑀟𑁆𑀠𑀢𑀻𑀢𑀺 𑀇𑀫𑀺𑀦𑀸 𑀆𑀞𑀧𑁂𑀢𑁆𑀯𑀸 𑀕𑀳𑀺𑀢𑀥𑀦𑀁 𑀯𑀟𑁆𑀠𑀺𑀬𑀸 𑀲𑀳 𑀆𑀞𑀧𑀺𑀢𑀧𑀼𑀢𑁆𑀢𑀳𑀸𑀭𑀓𑀲𑁆𑀲 𑀕𑀻𑀯𑀸𑀢𑀺 𑀤𑀲𑁆𑀲𑀺𑀢𑀦𑁆𑀢𑀺 𑀯𑀤𑀦𑁆𑀢𑀺. 𑀤𑀸𑀲𑀲𑁆𑀲 𑀚𑀸𑀢𑁄𑀢𑀺 𑀉𑀓𑁆𑀓𑀝𑁆𑀞𑀮𑀓𑁆𑀔𑀡𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁. 𑀤𑀸𑀲𑀺𑀓𑀼𑀘𑁆𑀙𑀺𑀬𑀁 𑀧𑀦 𑀅𑀤𑀸𑀲𑀲𑁆𑀲 𑀚𑀸𑀢𑁄𑀧𑀺 𑀏𑀢𑁆𑀣𑁂𑀯 𑀲𑀗𑁆𑀕𑀳𑀺𑀢𑁄. 𑀧𑀭𑀤𑁂𑀲𑀢𑁄 𑀧𑀳𑀭𑀺𑀢𑁆𑀯𑀸𑀢𑀺 𑀧𑀭𑀤𑁂𑀲𑀯𑀺𑀮𑀼𑀫𑁆𑀧𑀓𑁂𑀳𑀺 𑀭𑀸𑀚𑀘𑁄𑀭𑀸𑀤𑀻𑀳𑀺 𑀧𑀳𑀭𑀺𑀢𑁆𑀯𑀸. 𑀲𑀼𑀔𑀁 𑀚𑀻𑀯𑀸𑀢𑀺 𑀯𑀤𑀢𑀻𑀢𑀺 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀲𑀸𑀫𑀺𑀓𑀸𑀦𑀁 𑀲𑀦𑁆𑀢𑀺𑀓𑀢𑁄 𑀧𑀮𑀸𑀧𑁂𑀢𑀼𑀓𑀸𑀫𑀢𑀸𑀬 𑀯𑀤𑀢𑀺, 𑀢𑀣𑀸 𑀧𑀦 𑀅𑀘𑀺𑀦𑁆𑀢𑁂𑀢𑁆𑀯𑀸 𑀓𑀸𑀭𑀼𑀜𑁆𑀜𑁂𑀦 ‘‘𑀲𑀼𑀔𑀁 𑀕𑀦𑁆𑀢𑁆𑀯𑀸 𑀚𑀻𑀯𑀸’’𑀢𑀺 𑀯𑀤𑀦𑁆𑀢𑀲𑁆𑀲 𑀦𑀢𑁆𑀣𑀺 𑀅𑀯𑀳𑀸𑀭𑁄, 𑀕𑀻𑀯𑀸 𑀧𑀦 𑀳𑁄𑀢𑀺. 𑀤𑀼𑀢𑀺𑀬𑀧𑀤𑀯𑀸𑀭𑁂𑀢𑀺 𑀬𑀤𑀺 𑀤𑀼𑀢𑀺𑀬𑀧𑀤𑀁 𑀅𑀯𑀲𑁆𑀲𑀁 𑀉𑀤𑁆𑀥𑀭𑀺𑀲𑁆𑀲𑀢𑀺, 𑀪𑀺𑀓𑁆𑀔𑀼𑀲𑁆𑀲 ‘‘𑀧𑀮𑀸𑀬𑀺𑀢𑁆𑀯𑀸 𑀲𑀼𑀔𑀁 𑀚𑀻𑀯𑀸’’𑀢𑀺 𑀯𑀘𑀦𑀓𑁆𑀔𑀡𑁂𑀬𑁂𑀯 𑀧𑀸𑀭𑀸𑀚𑀺𑀓𑀁. 𑀅𑀦𑀸𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲𑀸𑀢𑀺 𑀢𑀲𑁆𑀲 𑀯𑀘𑀦𑁂𑀦 𑀯𑁂𑀕𑀯𑀟𑁆𑀠𑀦𑁂 𑀅𑀓𑀢𑁂𑀧𑀺 𑀤𑀼𑀓𑁆𑀓𑀝𑀸 𑀦 𑀫𑀼𑀘𑁆𑀘𑀢𑀻𑀢𑀺 𑀤𑀲𑁆𑀲𑁂𑀢𑀺. ‘‘𑀅𑀤𑀺𑀦𑁆𑀦𑀁 𑀣𑁂𑀬𑁆𑀬𑀲𑀗𑁆𑀔𑀸𑀢𑀁 𑀆𑀤𑀺𑀬𑁂𑀬𑁆𑀬𑀸’’𑀢𑀺 (𑀧𑀸𑀭𑀸. 𑁮𑁯, 𑁯𑁧) 𑀆𑀤𑀸𑀦𑀲𑁆𑀲𑁂𑀯 𑀯𑀼𑀢𑁆𑀢𑀢𑁆𑀢𑀸 𑀯𑀼𑀢𑁆𑀢𑀧𑀭𑀺𑀬𑀸𑀬𑁂𑀦 𑀫𑀼𑀘𑁆𑀘𑀢𑀻𑀢𑀺.

𑀘𑀢𑀼𑀧𑁆𑀧𑀤𑀓𑀣𑀸𑀯𑀡𑁆𑀡𑀦𑀸

𑁧𑁧𑁭. 𑀘𑀢𑀼𑀧𑁆𑀧𑀤𑀓𑀣𑀸𑀬𑀁 𑀧𑀸𑀴𑀺𑀬𑀁 𑀆𑀕𑀢𑀸𑀯𑀲𑁂𑀲𑀸𑀢𑀺 𑀧𑀸𑀴𑀺𑀬𑀁 𑀆𑀕𑀢𑁂𑀳𑀺 𑀳𑀢𑁆𑀣𑀺 𑀆𑀤𑀻𑀳𑀺 𑀅𑀜𑁆𑀜𑁂 𑀧𑀲𑀼-𑀲𑀤𑁆𑀤𑀲𑁆𑀲 𑀲𑀩𑁆𑀩𑀲𑀸𑀥𑀸𑀭𑀡𑀢𑁆𑀢𑀸. 𑀪𑀺𑀗𑁆𑀓𑀘𑁆𑀙𑀸𑀧𑀦𑁆𑀢𑀺 ‘‘𑀪𑀺𑀗𑁆𑀓𑀸 𑀪𑀺𑀗𑁆𑀓𑀸’’𑀢𑀺 𑀲𑀤𑁆𑀤𑀸𑀬𑀦𑀢𑁄 𑀏𑀯𑀁 𑀮𑀤𑁆𑀥𑀦𑀸𑀫𑀁 𑀳𑀢𑁆𑀣𑀺𑀧𑁄𑀢𑀓𑀁. 𑀅𑀦𑁆𑀢𑁄𑀯𑀢𑁆𑀣𑀼𑀫𑁆𑀳𑀻𑀢𑀺 𑀧𑀭𑀺𑀓𑁆𑀔𑀺𑀢𑁆𑀢𑁂. 𑀩𑀳𑀺𑀦𑀕𑀭𑁂 𑀞𑀺𑀢𑀲𑁆𑀲𑀸𑀢𑀺 𑀧𑀭𑀺𑀓𑁆𑀔𑀺𑀢𑁆𑀢𑀦𑀕𑀭𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀅𑀧𑀭𑀺𑀓𑁆𑀔𑀺𑀢𑁆𑀢𑀦𑀕𑀭𑁂 𑀧𑀦 𑀅𑀦𑁆𑀢𑁄𑀦𑀕𑀭𑁂 𑀞𑀺𑀢𑀲𑁆𑀲𑀸𑀧𑀺 𑀞𑀺𑀢𑀝𑁆𑀞𑀸𑀦𑀫𑁂𑀯 𑀞𑀸𑀦𑀁. 𑀔𑀡𑁆𑀟𑀤𑁆𑀯𑀸𑀭𑀦𑁆𑀢𑀺 𑀅𑀢𑁆𑀢𑀦𑀸 𑀔𑀡𑁆𑀟𑀺𑀢𑀤𑁆𑀯𑀸𑀭𑀁. 𑀏𑀓𑁄 𑀦𑀺𑀧𑀦𑁆𑀦𑁄𑀢𑀺 𑀏𑀢𑁆𑀣𑀸𑀧𑀺 𑀩𑀦𑁆𑀥𑁄𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁, 𑀢𑁂𑀦𑀸𑀳 ‘‘𑀦𑀺𑀧𑀦𑁆𑀦𑀲𑁆𑀲 𑀤𑁆𑀯𑁂’’𑀢𑀺. 𑀖𑀸𑀢𑁂𑀢𑀻𑀢𑀺 𑀏𑀢𑁆𑀣 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀯𑀺𑀦𑀸𑀲𑁂𑀦𑁆𑀢𑀲𑁆𑀲 𑀲𑀳𑀧𑀬𑁄𑀕𑀢𑁆𑀢𑀸 𑀤𑀼𑀓𑁆𑀓𑀝𑀫𑁂𑀯𑀸𑀢𑀺 𑀯𑀤𑀦𑁆𑀢𑀺.

𑀑𑀘𑀭𑀓𑀓𑀣𑀸𑀯𑀡𑁆𑀡𑀦𑀸

𑁧𑁧𑁮. 𑀑𑀘𑀭𑀓𑀓𑀣𑀸𑀬𑀁 𑀧𑀭𑀺𑀬𑀸𑀬𑁂𑀦 𑀳𑀺 𑀅𑀤𑀺𑀦𑁆𑀦𑀸𑀤𑀸𑀦𑀢𑁄 𑀫𑀼𑀘𑁆𑀘𑀢𑀻𑀢𑀺 𑀇𑀤𑀁 𑀆𑀡𑀢𑁆𑀢𑀺𑀓𑀧𑀬𑁄𑀕𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀲𑀬𑀫𑁂𑀯 𑀧𑀦 𑀅𑀪𑀺𑀬𑀼𑀜𑁆𑀚𑀦𑀸𑀤𑀻𑀲𑀼 𑀧𑀭𑀺𑀬𑀸𑀬𑁂𑀦𑀧𑀺 𑀫𑁄𑀓𑁆𑀔𑁄 𑀦𑀢𑁆𑀣𑀺.

𑀑𑀡𑀺𑀭𑀓𑁆𑀔𑀓𑀣𑀸𑀯𑀡𑁆𑀡𑀦𑀸

𑀑𑀡𑀺𑀭𑀓𑁆𑀔𑀓𑀣𑀸𑀬𑀁 𑀑𑀡𑀺𑀦𑁆𑀢𑀺 𑀑𑀡𑀻𑀢𑀁, 𑀆𑀦𑀻𑀢𑀦𑁆𑀢𑀺 𑀅𑀢𑁆𑀣𑁄. 𑀑𑀡𑀺𑀭𑀓𑁆𑀔𑀲𑁆𑀲 𑀲𑀦𑁆𑀢𑀺𑀓𑁂 𑀞𑀧𑀺𑀢𑀪𑀡𑁆𑀟𑀁 𑀉𑀧𑀦𑀺𑀥𑀺 (𑀧𑀸𑀭𑀸. 𑁧𑁧𑁨) 𑀯𑀺𑀬 𑀕𑀼𑀢𑁆𑀢𑀝𑁆𑀞𑀸𑀦𑁂 𑀞𑀧𑁂𑀢𑁆𑀯𑀸 𑀲𑀗𑁆𑀕𑁄𑀧𑀦𑀢𑁆𑀣𑀸𑀬 𑀅𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀬𑀣𑀸𑀞𑀧𑀺𑀢𑀝𑁆𑀞𑀸𑀦𑁂 𑀏𑀯 𑀫𑀼𑀳𑀼𑀢𑁆𑀢𑀫𑀢𑁆𑀢𑀁 𑀑𑀮𑁄𑀓𑀦𑀢𑁆𑀣𑀸𑀬 𑀞𑀧𑀺𑀢𑀢𑁆𑀢𑀸 𑀢𑀲𑁆𑀲 𑀪𑀡𑁆𑀟𑀲𑁆𑀲 𑀞𑀸𑀦𑀸𑀘𑀸𑀯𑀦𑀫𑀢𑁆𑀢𑁂𑀦 𑀑𑀡𑀺𑀭𑀓𑁆𑀔𑀓𑀲𑁆𑀲 𑀧𑀸𑀭𑀸𑀚𑀺𑀓𑀁 𑀳𑁄𑀢𑀺.

𑀲𑀁𑀯𑀺𑀤𑀸𑀯𑀳𑀸𑀭𑀓𑀣𑀸𑀯𑀡𑁆𑀡𑀦𑀸

𑀲𑀁𑀯𑀺𑀤𑀸𑀯𑀳𑀸𑀭𑀓𑀣𑀸𑀬𑀁 𑀲𑀁𑀯𑀺𑀥𑀸𑀬𑀸𑀢𑀺 𑀲𑀁𑀯𑀺𑀤𑀳𑀺𑀢𑁆𑀯𑀸. 𑀢𑁂𑀦 𑀦𑁂𑀲𑀁 𑀤𑀼𑀓𑁆𑀓𑀝𑀸𑀧𑀢𑁆𑀢𑀺𑀬𑁄𑀢𑀺 𑀆𑀡𑀢𑁆𑀢𑀺𑀯𑀲𑁂𑀦 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀬𑀸 𑀅𑀲𑀫𑁆𑀪𑀯𑁂 𑀲𑀢𑀻𑀢𑀺 𑀯𑀼𑀢𑁆𑀢𑀁. 𑀬𑀤𑀺 𑀳𑀺 𑀢𑁂𑀦 𑀆𑀡𑀢𑁆𑀢𑀸 𑀬𑀣𑀸𑀡𑀢𑁆𑀢𑀺𑀯𑀲𑁂𑀦 𑀳𑀭𑀦𑁆𑀢𑀺, 𑀆𑀡𑀢𑁆𑀢𑀺𑀓𑁆𑀔𑀡𑁂 𑀏𑀯 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀁 𑀆𑀧𑀚𑁆𑀚𑀦𑁆𑀢𑀺. 𑀧𑀸𑀴𑀺𑀬𑀁 ‘‘𑀲𑀫𑁆𑀩𑀳𑀼𑀮𑀸 𑀲𑀁𑀯𑀺𑀤𑀳𑀺𑀢𑁆𑀯𑀸 𑀏𑀓𑁄 𑀪𑀡𑁆𑀟𑀁 𑀅𑀯𑀳𑀭𑀢𑀺, 𑀆𑀧𑀢𑁆𑀢𑀺 𑀲𑀩𑁆𑀩𑁂𑀲𑀁 𑀧𑀸𑀭𑀸𑀚𑀺𑀓𑀲𑁆𑀲𑀸’’𑀢𑀺 (𑀧𑀸𑀭𑀸. 𑁧𑁧𑁮) 𑀏𑀢𑁆𑀣𑀸𑀧𑀺 𑀆𑀡𑀸𑀧𑀓𑀸𑀦𑀁 𑀆𑀡𑀢𑁆𑀢𑀺𑀓𑁆𑀔𑀡𑁂𑀬𑁂𑀯 𑀆𑀧𑀢𑁆𑀢𑀺, 𑀅𑀯𑀳𑀸𑀭𑀓𑀲𑁆𑀲 𑀉𑀤𑁆𑀥𑀸𑀭𑁂𑀢𑀺 𑀕𑀳𑁂𑀢𑀩𑁆𑀩𑁄. 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽 𑀏𑀓𑀁 𑀆𑀡𑀸𑀧𑁂𑀦𑁆𑀢𑀺 ‘𑀕𑀘𑁆𑀙𑁂𑀢𑀁 𑀆𑀳𑀭𑀸’𑀢𑀺, 𑀢𑀲𑁆𑀲𑀼𑀤𑁆𑀥𑀸𑀭𑁂 𑀲𑀩𑁆𑀩𑁂𑀲𑀁 𑀧𑀸𑀭𑀸𑀚𑀺𑀓𑀦𑁆𑀢𑀺𑀆𑀤𑀻𑀲𑀼𑀧𑀺 𑀏𑀯𑀫𑁂𑀯 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀲𑀸𑀳𑀢𑁆𑀣𑀺𑀓𑀁 𑀯𑀸 𑀆𑀡𑀢𑁆𑀢𑀺𑀓𑀲𑁆𑀲 𑀆𑀡𑀢𑁆𑀢𑀺𑀓𑀁 𑀯𑀸 𑀲𑀸𑀳𑀢𑁆𑀣𑀺𑀓𑀲𑁆𑀲 𑀅𑀗𑁆𑀕𑀁 𑀦 𑀳𑁄𑀢𑀻𑀢𑀺 𑀪𑀺𑀦𑁆𑀦𑀓𑀸𑀮𑀺𑀓𑀢𑁆𑀢𑀸 𑀅𑀜𑁆𑀜𑀫𑀜𑁆𑀜𑀲𑁆𑀲 𑀅𑀗𑁆𑀕𑀁 𑀦 𑀳𑁄𑀢𑀺. 𑀢𑀣𑀸 𑀳𑀺 𑀲𑀳𑀢𑁆𑀣𑀸 𑀅𑀯𑀳𑀭𑀦𑁆𑀢𑀲𑁆𑀲 𑀞𑀸𑀦𑀸𑀘𑀸𑀯𑀦𑀓𑁆𑀔𑀡𑁂 𑀆𑀧𑀢𑁆𑀢𑀺, 𑀆𑀡𑀢𑁆𑀢𑀺𑀬𑀸 𑀧𑀦 𑀆𑀡𑀢𑁆𑀢𑀺𑀓𑁆𑀔𑀡𑁂𑀬𑁂𑀯𑀸𑀢𑀺 𑀪𑀺𑀦𑁆𑀦𑀓𑀸𑀮𑀺𑀓𑀢𑁆𑀢𑀸 𑀆𑀧𑀢𑁆𑀢𑀺𑀬𑁄𑀢𑀺.

𑀲𑀗𑁆𑀓𑁂𑀢𑀓𑀫𑁆𑀫𑀓𑀣𑀸𑀯𑀡𑁆𑀡𑀦𑀸

𑁧𑁧𑁯. 𑀲𑀗𑁆𑀓𑁂𑀢𑀓𑀫𑁆𑀫𑀓𑀣𑀸𑀬𑀁 𑀑𑀘𑀭𑀓𑁂 𑀯𑀼𑀢𑁆𑀢𑀦𑀬𑁂𑀦𑁂𑀯𑀸𑀢𑀺 𑀏𑀢𑁆𑀣 𑀅𑀯𑀲𑁆𑀲𑀁 𑀳𑀸𑀭𑀺𑀬𑁂 𑀪𑀡𑁆𑀟𑁂𑀢𑀺𑀆𑀤𑀺𑀦𑀸 (𑀧𑀸𑀭𑀸. 𑀅𑀝𑁆𑀞. 𑁧.𑁧𑁧𑁮) 𑀯𑀼𑀢𑁆𑀢𑀦𑀬𑁂𑀦𑁂𑀯. 𑀧𑀸𑀴𑀺𑀬𑀁 ‘‘𑀢𑀁 𑀲𑀗𑁆𑀓𑁂𑀢𑀁 𑀧𑀼𑀭𑁂 𑀯𑀸 𑀧𑀘𑁆𑀙𑀸 𑀯𑀸’’𑀢𑀺 𑀢𑀲𑁆𑀲 𑀲𑀗𑁆𑀓𑁂𑀢𑀲𑁆𑀲 𑀧𑀼𑀭𑁂 𑀯𑀸 𑀧𑀘𑁆𑀙𑀸 𑀯𑀸𑀢𑀺 𑀅𑀢𑁆𑀣𑁄. ‘‘𑀢𑀁 𑀦𑀺𑀫𑀺𑀢𑁆𑀢𑀁 𑀧𑀼𑀭𑁂 𑀯𑀸 𑀧𑀘𑁆𑀙𑀸 𑀯𑀸’’𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄.

𑀦𑀺𑀫𑀺𑀢𑁆𑀢𑀓𑀫𑁆𑀫𑀓𑀣𑀸𑀯𑀡𑁆𑀡𑀦𑀸

𑁧𑁨𑁦. 𑀦𑀺𑀫𑀺𑀢𑁆𑀢𑀓𑀫𑁆𑀫𑀓𑀣𑀸𑀬𑀁 𑀅𑀓𑁆𑀔𑀺𑀦𑀺𑀔𑀡𑀦𑀸𑀤𑀺𑀦𑀺𑀫𑀺𑀢𑁆𑀢𑀓𑀫𑁆𑀫𑀁 𑀧𑀦 𑀮𑀳𑀼𑀓𑀁 𑀇𑀢𑁆𑀢𑀭𑀓𑀸𑀮𑀁, 𑀢𑀲𑁆𑀫𑀸 𑀢𑀗𑁆𑀔𑀡𑁂𑀬𑁂𑀯 𑀢𑀁 𑀪𑀡𑁆𑀟𑀁 𑀅𑀯𑀳𑀭𑀺𑀢𑀼𑀁 𑀦 𑀲𑀓𑁆𑀓𑀸. 𑀦𑀺𑀫𑀺𑀢𑁆𑀢𑀓𑀫𑁆𑀫𑀸𑀦𑀦𑁆𑀢𑀭𑀫𑁂𑀯 𑀕𑀡𑁆𑀳𑀺𑀢𑀼𑀁 𑀆𑀭𑀤𑁆𑀥𑀢𑁆𑀢𑀸 𑀢𑁂𑀦𑁂𑀯 𑀦𑀺𑀫𑀺𑀢𑁆𑀢𑁂𑀦 𑀅𑀯𑀳𑀭𑀢𑀻𑀢𑀺 𑀯𑀼𑀘𑁆𑀘𑀢𑀺. 𑀬𑀤𑀺 𑀏𑀯𑀁 𑀧𑀼𑀭𑁂𑀪𑀢𑁆𑀢𑀧𑁆𑀧𑀬𑁄𑀕𑁄𑀯 𑀏𑀲𑁄𑀢𑀺 𑀯𑀸𑀤𑁄 𑀧𑀫𑀸𑀡𑀪𑀸𑀯𑀁 𑀆𑀧𑀚𑁆𑀚𑀢𑀻𑀢𑀺? 𑀦𑀸𑀧𑀚𑁆𑀚𑀢𑀺. 𑀦 𑀳𑀺 𑀲𑀗𑁆𑀓𑁂𑀢𑀓𑀫𑁆𑀫𑀁 (𑀧𑀸𑀭𑀸. 𑁧𑁧𑁯) 𑀯𑀺𑀬 𑀦𑀺𑀫𑀺𑀢𑁆𑀢𑀓𑀫𑁆𑀫𑀁 𑀓𑀸𑀮𑀧𑀭𑀺𑀘𑁆𑀙𑁂𑀤𑀬𑀼𑀢𑁆𑀢𑀁. 𑀓𑀸𑀮𑀯𑀲𑁂𑀦 𑀳𑀺 𑀲𑀗𑁆𑀓𑁂𑀢𑀓𑀫𑁆𑀫𑀁 𑀯𑀼𑀢𑁆𑀢𑀁, 𑀓𑀺𑀭𑀺𑀬𑀸𑀯𑀲𑁂𑀦 𑀦𑀺𑀫𑀺𑀢𑁆𑀢𑀓𑀫𑁆𑀫𑀦𑁆𑀢𑀺 𑀅𑀬𑀫𑁂𑀯 𑀢𑁂𑀲𑀁 𑀯𑀺𑀲𑁂𑀲𑁄. ‘‘𑀢𑀁 𑀦𑀺𑀫𑀺𑀢𑁆𑀢𑀁 𑀧𑀼𑀭𑁂 𑀯𑀸 𑀧𑀘𑁆𑀙𑀸 𑀯𑀸 𑀢𑀁 𑀪𑀡𑁆𑀟𑀁 𑀅𑀯𑀳𑀭𑀢𑀺, 𑀫𑀽𑀮𑀝𑁆𑀞𑀲𑁆𑀲 𑀅𑀦𑀸𑀧𑀢𑁆𑀢𑀻’’𑀢𑀺 𑀇𑀤𑀁 𑀧𑀦 𑀦𑀺𑀫𑀺𑀢𑁆𑀢𑀓𑀭𑀡𑀢𑁄 𑀧𑀼𑀭𑁂 𑀕𑀡𑁆𑀳𑀦𑁆𑀢𑀲𑁆𑀲 𑀘𑁂𑀯 𑀦𑀺𑀫𑀺𑀢𑁆𑀢𑀓𑀫𑁆𑀫𑁂 𑀘 𑀓𑀢𑁂𑀧𑀺 𑀕𑀡𑁆𑀳𑀺𑀢𑀼𑀁 𑀅𑀦𑀸𑀭𑀪𑀺𑀢𑁆𑀯𑀸 𑀧𑀘𑁆𑀙𑀸 𑀲𑀬𑀫𑁂𑀯 𑀕𑀡𑁆𑀳𑀦𑁆𑀢𑀲𑁆𑀲 𑀘 𑀯𑀲𑁂𑀦 𑀯𑀼𑀢𑁆𑀢𑀁.

𑀆𑀡𑀢𑁆𑀢𑀺𑀓𑀣𑀸𑀯𑀡𑁆𑀡𑀦𑀸

𑁧𑁨𑁧. 𑀆𑀡𑀢𑁆𑀢𑀺𑀓𑀣𑀸𑀬𑀁 𑀅𑀲𑀫𑁆𑀫𑁄𑀳𑀢𑁆𑀣𑀦𑁆𑀢𑀺 𑀬𑀲𑁆𑀫𑀸 𑀲𑀗𑁆𑀓𑁂𑀢𑀓𑀫𑁆𑀫𑀦𑀺𑀫𑀺𑀢𑁆𑀢𑀓𑀫𑁆𑀫𑀸𑀦𑀺 𑀓𑀭𑁄𑀦𑁆𑀢𑁄 𑀦 𑀓𑁂𑀯𑀮𑀁 𑀧𑀼𑀭𑁂𑀪𑀢𑁆𑀢𑀸𑀤𑀺𑀓𑀸𑀮𑀲𑀗𑁆𑀓𑁂𑀢𑀓𑀫𑁆𑀫𑀁 𑀅𑀓𑁆𑀔𑀺𑀦𑀺𑀔𑀡𑀦𑀸𑀤𑀺𑀦𑀺𑀫𑀺𑀢𑁆𑀢𑀓𑀫𑁆𑀫𑀫𑁂𑀯 𑀯𑀸 𑀓𑀭𑁄𑀢𑀺, 𑀅𑀣 𑀔𑁄 𑀏𑀯𑀁𑀯𑀡𑁆𑀡𑀲𑀡𑁆𑀞𑀸𑀦𑀪𑀡𑁆𑀟𑀁 𑀕𑀡𑁆𑀳𑀸𑀢𑀺, 𑀪𑀡𑁆𑀟𑀦𑀺𑀬𑀫𑀫𑁆𑀧𑀺 𑀓𑀭𑁄𑀢𑀺, 𑀢𑁆𑀯𑀁 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀧𑀸𑀯𑀤, 𑀲𑁄 𑀅𑀜𑁆𑀜𑀲𑁆𑀲 𑀧𑀸𑀯𑀤𑀢𑀽𑀢𑀺𑀆𑀤𑀺𑀦𑀸 𑀧𑀼𑀕𑁆𑀕𑀮𑀧𑀝𑀺𑀧𑀸𑀝𑀺𑀬𑀸 𑀘 𑀆𑀡𑀸𑀧𑁂𑀢𑀺, 𑀢𑀲𑁆𑀫𑀸 𑀧𑀼𑀩𑁆𑀩𑀡𑁆𑀳𑀸𑀤𑀺𑀓𑀸𑀮𑀯𑀲𑁂𑀦 𑀅𑀓𑁆𑀔𑀺𑀦𑀺𑀔𑀡𑀦𑀸𑀤𑀺𑀓𑀺𑀭𑀺𑀬𑀸𑀯𑀲𑁂𑀦 𑀪𑀡𑁆𑀟𑀧𑀼𑀕𑁆𑀕𑀮𑀧𑀝𑀺𑀧𑀸𑀝𑀺𑀯𑀲𑁂𑀦 𑀘 𑀆𑀡𑀢𑁆𑀢𑁂 𑀏𑀢𑁂𑀲𑀼 𑀲𑀗𑁆𑀓𑁂𑀢𑀓𑀫𑁆𑀫𑀦𑀺𑀫𑀺𑀢𑁆𑀢𑀓𑀫𑁆𑀫𑁂𑀲𑀼 𑀯𑀺𑀲𑀗𑁆𑀓𑁂𑀢𑀸 𑀯𑀺𑀲𑀗𑁆𑀓𑁂𑀢𑀪𑀸𑀯𑁂 𑀲𑀫𑁆𑀫𑁄𑀳𑁄 𑀚𑀸𑀬𑀢𑀺, 𑀢𑀤𑀧𑀕𑀫𑁂𑀦 𑀅𑀲𑀫𑁆𑀫𑁄𑀳𑀢𑁆𑀣𑀁. 𑀬𑀁 𑀆𑀡𑀸𑀧𑀓𑁂𑀦 𑀦𑀺𑀫𑀺𑀢𑁆𑀢𑀲𑀜𑁆𑀜𑀁 𑀓𑀢𑁆𑀯𑀸 𑀯𑀼𑀢𑁆𑀢𑀦𑁆𑀢𑀺 𑀧𑀼𑀩𑁆𑀩𑀡𑁆𑀳𑀸𑀤𑀻𑀲𑀼 𑀅𑀓𑁆𑀔𑀺𑀦𑀺𑀔𑀡𑀦𑀸𑀤𑀻𑀲𑀼 𑀯𑀸 𑀕𑀳𑀡𑀢𑁆𑀣𑀁 𑀆𑀡𑀸𑀧𑁂𑀦𑁆𑀢𑁂𑀦 𑀈𑀤𑀺𑀲𑀯𑀡𑁆𑀡𑀲𑀡𑁆𑀞𑀸𑀦𑀸𑀤𑀺𑀬𑀼𑀢𑁆𑀢𑀁 𑀕𑀡𑁆𑀳𑀸𑀢𑀺 𑀏𑀯𑀁 𑀕𑀳𑀡𑀲𑁆𑀲 𑀦𑀺𑀫𑀺𑀢𑁆𑀢𑀪𑀽𑀢𑀲𑀜𑁆𑀜𑀸𑀡𑀁 𑀓𑀢𑁆𑀯𑀸 𑀬𑀁 𑀪𑀡𑁆𑀟𑀁 𑀯𑀼𑀢𑁆𑀢𑀁. 𑀅𑀬𑀁 𑀬𑀼𑀢𑁆𑀢𑀺 𑀲𑀩𑁆𑀩𑀢𑁆𑀣𑀸𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑁂𑀲𑀼 𑀉𑀧𑀭𑀺 𑀯𑀓𑁆𑀔𑀫𑀸𑀦𑁂𑀲𑀼 𑀘 𑀲𑀩𑁆𑀩𑀢𑁆𑀣 𑀆𑀡𑀢𑁆𑀢𑀺𑀧𑁆𑀧𑀲𑀗𑁆𑀕𑁂𑀲𑀼 𑀆𑀡𑀢𑁆𑀢𑀺𑀓𑁆𑀔𑀡𑁂𑀬𑁂𑀯 𑀧𑀸𑀭𑀸𑀚𑀺𑀓𑀸𑀤𑀻𑀦𑀁 𑀪𑀸𑀯𑀲𑀗𑁆𑀔𑀸𑀢𑀸 𑀯𑀺𑀦𑀬𑀬𑀼𑀢𑁆𑀢𑀺, 𑀲𑀸 𑀘 𑀆𑀡𑀢𑁆𑀢𑀲𑁆𑀲 𑀓𑀺𑀭𑀺𑀬𑀸𑀦𑀺𑀝𑁆𑀞𑀸𑀧𑀦𑀓𑁆𑀔𑀡𑁂 𑀆𑀡𑀸𑀧𑀓𑀲𑁆𑀲 𑀧𑀬𑁄𑀕𑁂 𑀣𑁂𑀬𑁆𑀬𑀘𑀺𑀢𑁆𑀢𑀸𑀦𑀁 𑀅𑀪𑀸𑀯𑀸 𑀆𑀡𑀢𑁆𑀢𑀺𑀓𑁆𑀔𑀡𑁂 𑀏𑀓𑀸 𑀏𑀯 𑀆𑀧𑀢𑁆𑀢𑀺 𑀳𑁄𑀢𑀻𑀢𑀺 𑀏𑀯𑀁 𑀉𑀧𑀧𑀢𑁆𑀢𑀺𑀬𑀸 𑀧𑀯𑀢𑁆𑀢𑀢𑁆𑀢𑀸 𑀬𑀼𑀢𑁆𑀢𑀻𑀢𑀺 𑀯𑀼𑀢𑁆𑀢𑀸. ‘‘𑀫𑀽𑀮𑀝𑁆𑀞𑀲𑁆𑀲 𑀣𑀼𑀮𑁆𑀮𑀘𑁆𑀘𑀬’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 𑀲𑀗𑁆𑀖𑀭𑀓𑁆𑀔𑀺𑀢𑁂𑀦 𑀧𑀝𑀺𑀕𑁆𑀕𑀳𑀺𑀢𑁂𑀧𑀺 𑀩𑀼𑀤𑁆𑀥𑀭𑀓𑁆𑀔𑀺𑀢𑀥𑀫𑁆𑀫𑀭𑀓𑁆𑀔𑀺𑀢𑀸𑀦𑀁 𑀤𑀼𑀓𑁆𑀓𑀝𑀫𑁂𑀯, 𑀓𑀲𑁆𑀫𑀸 𑀧𑀦𑁂𑀢𑁆𑀣 𑀆𑀘𑀭𑀺𑀬𑀲𑁆𑀲 𑀣𑀼𑀮𑁆𑀮𑀘𑁆𑀘𑀬𑀦𑁆𑀢𑀺 𑀆𑀳 ‘‘𑀫𑀳𑀸𑀚𑀦𑁄 𑀳𑀻’’𑀢𑀺𑀆𑀤𑀺. 𑀫𑀳𑀸𑀚𑀦𑁄𑀢𑀺 𑀘 𑀩𑀼𑀤𑁆𑀥𑀭𑀓𑁆𑀔𑀺𑀢𑀥𑀫𑁆𑀫𑀭𑀓𑁆𑀔𑀺𑀢𑀲𑀗𑁆𑀖𑀭𑀓𑁆𑀔𑀺𑀢𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀫𑀽𑀮𑀝𑁆𑀞𑀲𑁆𑀲𑁂𑀯 𑀤𑀼𑀓𑁆𑀓𑀝𑀦𑁆𑀢𑀺 𑀩𑀼𑀤𑁆𑀥𑀭𑀓𑁆𑀔𑀺𑀢𑀲𑁆𑀲 𑀤𑀼𑀓𑁆𑀓𑀝𑀁. 𑀇𑀤𑀜𑁆𑀘 𑀫𑀽𑀮𑀝𑁆𑀞𑀲𑁆𑀲 𑀣𑀼𑀮𑁆𑀮𑀘𑁆𑀘𑀬𑀸𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀧𑀞𑀫𑀁 𑀆𑀡𑀢𑁆𑀢𑀺𑀓𑁆𑀔𑀡𑁂 𑀤𑀼𑀓𑁆𑀓𑀝𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀦 𑀧𑀦 𑀲𑀗𑁆𑀖𑀭𑀓𑁆𑀔𑀺𑀢𑀲𑁆𑀲 𑀧𑀝𑀺𑀕𑁆𑀕𑀳𑀡𑀧𑀘𑁆𑀘𑀬𑀸 𑀧𑀼𑀦 𑀤𑀼𑀓𑁆𑀓𑀝𑀲𑀫𑁆𑀪𑀯𑀁 𑀲𑀦𑁆𑀥𑀸𑀬. 𑀦 𑀳𑀺 𑀲𑁄 𑀏𑀓𑀧𑀬𑁄𑀕𑁂𑀦 𑀤𑀼𑀓𑁆𑀓𑀝𑀤𑁆𑀯𑀬𑀁 𑀆𑀧𑀚𑁆𑀚𑀢𑀺. 𑀓𑁂𑀘𑀺 𑀧𑀦 ‘‘𑀯𑀺𑀲𑀗𑁆𑀓𑁂𑀢𑀢𑁆𑀢𑀸 𑀧𑀸𑀴𑀺𑀬𑀁 ‘𑀫𑀽𑀮𑀝𑁆𑀞𑀲𑁆𑀲𑀸’𑀢𑀺 𑀅𑀯𑀢𑁆𑀯𑀸 ‘𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’𑀢𑀺 𑀲𑀸𑀫𑀜𑁆𑀜𑁂𑀦 𑀯𑀼𑀢𑁆𑀢𑀢𑁆𑀢𑀸 𑀇𑀤𑀁 𑀲𑀗𑁆𑀖𑀭𑀓𑁆𑀔𑀺𑀢𑀲𑁆𑀲 𑀤𑀼𑀓𑁆𑀓𑀝𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢’’𑀦𑁆𑀢𑀺 𑀯𑀤𑀦𑁆𑀢𑀺, 𑀢𑀁 𑀓𑀺𑀜𑁆𑀘𑀸𑀧𑀺 𑀅𑀝𑁆𑀞𑀓𑀣𑀸𑀬 𑀦 𑀲𑀫𑁂𑀢𑀺, 𑀧𑀸𑀴𑀺𑀢𑁄 𑀧𑀦 𑀬𑀼𑀢𑁆𑀢𑀁 𑀯𑀺𑀬 𑀤𑀺𑀲𑁆𑀲𑀢𑀺. 𑀦 𑀳𑀺 𑀢𑀲𑁆𑀲 𑀧𑀝𑀺𑀕𑁆𑀕𑀳𑀡𑀧𑁆𑀧𑀬𑁄𑀕𑁂 𑀅𑀦𑀸𑀧𑀢𑁆𑀢𑀺 𑀳𑁄𑀢𑀻𑀢𑀺. 𑀇𑀫𑀺𑀦𑀸𑀯 𑀳𑁂𑀝𑁆𑀞𑀸 𑀆𑀕𑀢𑀯𑀸𑀭𑁂𑀲𑀼𑀧𑀺 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀸𑀦𑀁 𑀤𑀼𑀓𑁆𑀓𑀝𑀁 𑀯𑁂𑀤𑀺𑀢𑀩𑁆𑀩𑀁. ‘‘𑀧𑀡𑁆𑀡𑁂 𑀯𑀸 𑀲𑀺𑀮𑀸𑀤𑀻𑀲𑀼 𑀯𑀸 ‘𑀘𑁄𑀭𑀺𑀬𑀁 𑀓𑀸𑀢𑀩𑁆𑀩’𑀦𑁆𑀢𑀺 𑀮𑀺𑀔𑀺𑀢𑁆𑀯𑀸 𑀞𑀧𑀺𑀢𑁂 𑀧𑀸𑀭𑀸𑀚𑀺𑀓𑀫𑁂𑀯𑀸’’𑀢𑀺 𑀓𑁂𑀘𑀺 𑀯𑀤𑀦𑁆𑀢𑀺, 𑀢𑀁 𑀧𑀦 ‘‘𑀅𑀲𑀼𑀓𑀲𑁆𑀲 𑀕𑁂𑀳𑁂 𑀪𑀡𑁆𑀟’’𑀦𑁆𑀢𑀺 𑀏𑀯𑀁 𑀦𑀺𑀬𑀫𑁂𑀢𑁆𑀯𑀸 𑀮𑀺𑀔𑀺𑀢𑁂 𑀬𑀼𑀚𑁆𑀚𑀢𑀺, 𑀦 𑀅𑀦𑀺𑀬𑀫𑁂𑀢𑁆𑀯𑀸 𑀮𑀺𑀔𑀺𑀢𑁂𑀢𑀺 𑀯𑀻𑀫𑀁𑀲𑀺𑀢𑀩𑁆𑀩𑀁. 𑀫𑀕𑁆𑀕𑀸𑀦𑀦𑁆𑀢𑀭𑀨𑀮𑀲𑀤𑀺𑀲𑀸𑀢𑀺 𑀇𑀫𑀺𑀦𑀸 𑀬𑀣𑀸 𑀅𑀭𑀺𑀬𑀧𑀼𑀕𑁆𑀕𑀮𑀸𑀦𑀁 𑀫𑀕𑁆𑀕𑀸𑀦𑀦𑁆𑀢𑀭𑁂 𑀨𑀮𑁂 𑀉𑀧𑁆𑀧𑀦𑁆𑀦𑁂 𑀓𑀺𑀮𑁂𑀲𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀧𑀭𑀺𑀬𑁄𑀲𑀸𑀦𑀁 𑀪𑀸𑀯𑀦𑀸𑀓𑀺𑀘𑁆𑀘𑀁 𑀦𑀺𑀧𑁆𑀨𑀦𑁆𑀦𑀁 𑀦𑀸𑀫 𑀳𑁄𑀢𑀺, 𑀏𑀯𑀫𑁂𑀢𑀺𑀲𑁆𑀲𑀸 𑀅𑀢𑁆𑀣𑀲𑀸𑀥𑀓𑀘𑁂𑀢𑀦𑀸𑀬 𑀉𑀧𑁆𑀧𑀦𑁆𑀦𑀸𑀬 𑀆𑀡𑀢𑁆𑀢𑀺𑀓𑀺𑀘𑁆𑀘𑀁 𑀦𑀺𑀧𑁆𑀨𑀦𑁆𑀦𑀫𑁂𑀯𑀸𑀢𑀺 𑀤𑀲𑁆𑀲𑁂𑀢𑀺, 𑀢𑁂𑀦𑀸𑀳 ‘‘𑀢𑀲𑁆𑀫𑀸 𑀅𑀬𑀁 𑀆𑀡𑀢𑁆𑀢𑀺𑀓𑁆𑀔𑀡𑁂𑀬𑁂𑀯 𑀧𑀸𑀭𑀸𑀚𑀺𑀓𑁄’’𑀢𑀺, 𑀆𑀡𑀢𑁆𑀢𑀺𑀯𑀘𑀻𑀧𑀬𑁄𑀕𑀲𑀫𑀼𑀝𑁆𑀞𑀸𑀧𑀓𑀘𑁂𑀢𑀦𑀸𑀓𑁆𑀔𑀡𑁂𑀬𑁂𑀯 𑀧𑀸𑀭𑀸𑀚𑀺𑀓𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑀆𑀡𑀢𑁆𑀢𑀺𑀓𑀣𑀸𑀯𑀡𑁆𑀡𑀦𑀸𑀦𑀬𑁄 𑀦𑀺𑀝𑁆𑀞𑀺𑀢𑁄.

𑀆𑀧𑀢𑁆𑀢𑀺𑀪𑁂𑀤𑀯𑀡𑁆𑀡𑀦𑀸

𑁧𑁨𑁨. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀪𑀽𑀫𑀝𑁆𑀞𑀣𑀮𑀝𑁆𑀞𑀸𑀤𑀻𑀲𑀼. 𑀧𑀸𑀴𑀺𑀬𑀁 𑀫𑀦𑀼𑀲𑁆𑀲𑀧𑀭𑀺𑀕𑁆𑀕𑀳𑀺𑀢𑀁 𑀲𑀦𑁆𑀥𑀸𑀬 ‘‘𑀧𑀭𑀧𑀭𑀺𑀕𑁆𑀕𑀳𑀺𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀆𑀫𑀲𑀢𑀺 𑀨𑀦𑁆𑀤𑀸𑀧𑁂𑀢𑀺 𑀞𑀸𑀦𑀸 𑀘𑀸𑀯𑁂𑀢𑀻𑀢𑀺 𑀇𑀫𑁂𑀳𑀺 𑀢𑀻𑀳𑀺 𑀧𑀤𑁂𑀳𑀺 𑀧𑀼𑀩𑁆𑀩𑀧𑀬𑁄𑀕𑀲𑀳𑀺𑀢𑀁 𑀧𑀜𑁆𑀘𑀫𑀁 𑀅𑀯𑀳𑀸𑀭𑀗𑁆𑀕𑀁 𑀯𑀼𑀢𑁆𑀢𑀁, 𑀞𑀸𑀦𑀸 𑀘𑀸𑀯𑁂𑀢𑀻𑀢𑀺 𑀘 𑀇𑀤𑀁 𑀉𑀧𑀮𑀓𑁆𑀔𑀡𑀫𑀢𑁆𑀢𑀁. 𑀆𑀡𑀢𑁆𑀢𑀺𑀓𑀸𑀤𑀬𑁄 𑀲𑀩𑁆𑀩𑁂𑀧𑀺 𑀧𑀬𑁄𑀕𑀸 𑀥𑀼𑀭𑀦𑀺𑀓𑁆𑀔𑁂𑀧𑁄 𑀘 𑀇𑀥 𑀲𑀗𑁆𑀕𑀳𑁂𑀢𑀩𑁆𑀩𑀸𑀯𑀸𑀢𑀺 𑀤𑀝𑁆𑀞𑀩𑁆𑀩𑀁.

𑁧𑁨𑁫. 𑀞𑀸𑀦𑀸𑀘𑀸𑀯𑀦𑀦𑁆𑀢𑀺 𑀇𑀤𑀁 𑀧𑀸𑀴𑀺𑀅𑀦𑀼𑀲𑀸𑀭𑀢𑁄 𑀯𑀼𑀢𑁆𑀢𑀁 𑀥𑀼𑀭𑀦𑀺𑀓𑁆𑀔𑁂𑀧𑀲𑁆𑀲𑀸𑀧𑀺 𑀲𑀗𑁆𑀕𑀳𑁂𑀢𑀩𑁆𑀩𑀢𑁄. 𑀏𑀲 𑀦𑀬𑁄 𑀉𑀧𑀭𑀺𑀧𑀺 𑀲𑀩𑁆𑀩𑀢𑁆𑀣. 𑀢𑀢𑁆𑀣 𑀳𑀺 𑀦 𑀘 𑀲𑀓𑀲𑀜𑁆𑀜𑀻𑀢𑀺 𑀇𑀫𑀺𑀦𑀸 𑀧𑀭𑀧𑀭𑀺𑀕𑁆𑀕𑀳𑀺𑀢𑀢𑀸 𑀯𑀼𑀢𑁆𑀢𑀸, 𑀦 𑀘 𑀯𑀺𑀲𑁆𑀲𑀸𑀲𑀕𑁆𑀕𑀸𑀳𑀻 𑀦 𑀘 𑀢𑀸𑀯𑀓𑀸𑀮𑀺𑀓𑀦𑁆𑀢𑀺 𑀇𑀫𑁂𑀳𑀺 𑀧𑀭𑀧𑀭𑀺𑀕𑁆𑀕𑀳𑀺𑀢𑀲𑀜𑁆𑀜𑀺𑀢𑀸, 𑀢𑀻𑀳𑀺 𑀯𑀸 𑀏𑀢𑁂𑀳𑀺 𑀧𑀭𑀧𑀭𑀺𑀕𑁆𑀕𑀳𑀺𑀢𑀢𑀸 𑀧𑀭𑀧𑀭𑀺𑀕𑁆𑀕𑀳𑀺𑀢𑀲𑀜𑁆𑀜𑀺𑀢𑀸 𑀘 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀦𑀚𑁆𑀛𑀸𑀯𑀼𑀢𑁆𑀣𑀓𑀦𑁆𑀢𑀺 ‘‘𑀫𑀫𑁂𑀤’’𑀦𑁆𑀢𑀺 𑀧𑀭𑀺𑀕𑁆𑀕𑀳𑀯𑀲𑁂𑀦 𑀅𑀦𑀚𑁆𑀛𑀸𑀯𑀼𑀢𑁆𑀣𑀓𑀁 𑀅𑀭𑀜𑁆𑀜𑁂 𑀤𑀸𑀭𑀼𑀢𑀺𑀡𑀧𑀡𑁆𑀡𑀸𑀤𑀺. 𑀙𑀟𑁆𑀟𑀺𑀢𑀦𑁆𑀢𑀺 𑀧𑀞𑀫𑀁 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀧𑀘𑁆𑀙𑀸 𑀅𑀦𑀢𑁆𑀣𑀺𑀓𑀢𑀸𑀬 𑀙𑀟𑁆𑀟𑀺𑀢𑀁 𑀬𑀁 𑀓𑀺𑀜𑁆𑀘𑀺. 𑀙𑀺𑀦𑁆𑀦𑀫𑀽𑀮𑀓𑀦𑁆𑀢𑀺 𑀦𑀝𑁆𑀞𑀁 𑀧𑀭𑀺𑀬𑁂𑀲𑀺𑀢𑁆𑀯𑀸 𑀆𑀮𑀬𑀲𑀗𑁆𑀔𑀸𑀢𑀲𑁆𑀲 𑀫𑀽𑀮𑀲𑁆𑀲 𑀙𑀺𑀦𑁆𑀦𑀢𑁆𑀢𑀸 𑀙𑀺𑀦𑁆𑀦𑀫𑀽𑀮𑀓𑀁. 𑀅𑀲𑁆𑀲𑀸𑀫𑀺𑀓𑀦𑁆𑀢𑀺 𑀅𑀦𑀚𑁆𑀛𑀸𑀯𑀼𑀢𑁆𑀣𑀓𑀸𑀤𑀻𑀳𑀺 𑀢𑀻𑀳𑀺 𑀆𑀓𑀸𑀭𑁂𑀳𑀺 𑀤𑀲𑁆𑀲𑀺𑀢𑀁 𑀅𑀲𑁆𑀲𑀸𑀫𑀺𑀓𑀯𑀢𑁆𑀣𑀼. 𑀉𑀪𑀬𑀫𑁆𑀧𑀻𑀢𑀺 𑀅𑀲𑁆𑀲𑀸𑀫𑀺𑀓𑀁 𑀅𑀢𑁆𑀢𑀦𑁄 𑀲𑀦𑁆𑀢𑀓𑀜𑁆𑀘.

𑀅𑀦𑀸𑀧𑀢𑁆𑀢𑀺𑀪𑁂𑀤𑀯𑀡𑁆𑀡𑀦𑀸

𑁧𑁩𑁧. 𑀢𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂 𑀦𑀺𑀩𑁆𑀩𑀢𑁆𑀢𑀸𑀢𑀺 𑀢𑀲𑁆𑀫𑀺𑀁𑀬𑁂𑀯 𑀫𑀢𑀲𑀭𑀻𑀭𑁂 𑀧𑁂𑀢𑀢𑁆𑀢𑀪𑀸𑀯𑁂𑀦 𑀦𑀺𑀩𑁆𑀩𑀢𑁆𑀢𑀸. 𑀭𑀼𑀓𑁆𑀔𑀸𑀤𑀻𑀲𑀼 𑀮𑀕𑁆𑀕𑀺𑀢𑀲𑀸𑀝𑀓𑁂 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀻𑀢𑀺 𑀫𑀦𑀼𑀲𑁆𑀲𑁂𑀳𑀺 𑀅𑀕𑁄𑀧𑀺𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀲𑀘𑁂 𑀧𑀦𑁂𑀢𑀁 𑀤𑁂𑀯𑀸𑀮𑀬𑀘𑁂𑀢𑀺𑀬𑀭𑀼𑀓𑁆𑀔𑀸𑀤𑀻𑀲𑀼 𑀦𑀺𑀬𑀼𑀢𑁆𑀢𑁂𑀳𑀺 𑀧𑀼𑀭𑀺𑀲𑁂𑀳𑀺 𑀭𑀓𑁆𑀔𑀺𑀢𑀕𑁄𑀧𑀺𑀢𑀁 𑀳𑁄𑀢𑀺, 𑀕𑀳𑁂𑀢𑀼𑀁 𑀦 𑀯𑀝𑁆𑀝𑀢𑀺. 𑀣𑁄𑀓𑁂 𑀔𑀸𑀬𑀺𑀢𑁂…𑀧𑁂… 𑀕𑀳𑁂𑀢𑀼𑀁 𑀯𑀝𑁆𑀝𑀢𑀻𑀢𑀺 𑀇𑀤𑀁 𑀅𑀤𑀺𑀦𑁆𑀦𑀸𑀤𑀸𑀦𑀸𑀪𑀸𑀯𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀚𑀺𑀖𑀘𑁆𑀙𑀺𑀢𑀧𑀸𑀡𑀺𑀦𑀸 𑀔𑀸𑀤𑀺𑀬𑀫𑀸𑀦𑀫𑀁𑀲𑀲𑁆𑀲 𑀅𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀔𑀸𑀤𑀦𑀁 𑀦𑀸𑀫 𑀓𑀸𑀭𑀼𑀜𑁆𑀜𑀳𑀸𑀦𑀺𑀢𑁄 𑀮𑁄𑀮𑀪𑀸𑀯𑀢𑁄 𑀘 𑀅𑀲𑀸𑀭𑀼𑀧𑁆𑀧𑀫𑁂𑀯. 𑀢𑁂𑀦𑁂𑀯 𑀳𑀺 𑀅𑀭𑀺𑀬𑀯𑀁𑀲𑀺𑀓𑀸 𑀅𑀢𑁆𑀢𑀦𑁄 𑀧𑀢𑁆𑀢𑁂 𑀪𑀢𑁆𑀢𑀁 𑀔𑀸𑀤𑀦𑁆𑀢𑀫𑁆𑀧𑀺 𑀲𑀼𑀦𑀔𑀸𑀤𑀺𑀁 𑀢𑀚𑁆𑀚𑁂𑀢𑁆𑀯𑀸 𑀦 𑀯𑀸𑀭𑁂𑀦𑁆𑀢𑀺, 𑀢𑀺𑀭𑀘𑁆𑀙𑀸𑀦𑀸𑀦𑀁 𑀆𑀫𑀺𑀲𑀤𑀸𑀦𑁂 𑀓𑀼𑀲𑀮𑀁 𑀯𑀺𑀬 𑀢𑁂𑀲𑀁 𑀆𑀫𑀺𑀲𑀲𑁆𑀲 𑀅𑀘𑁆𑀙𑀺𑀦𑁆𑀤𑀦𑁂𑀧𑀺 𑀅𑀓𑀼𑀲𑀮𑀫𑁂𑀯𑀸𑀢𑀺 𑀕𑀳𑁂𑀢𑀩𑁆𑀩𑀁, 𑀢𑁂𑀦𑁂𑀯 𑀯𑀓𑁆𑀔𑀢𑀺 ‘‘𑀧𑀭𑀸𑀦𑀼𑀤𑁆𑀤𑀬𑀢𑀸𑀬 𑀘 𑀦 𑀕𑀳𑁂𑀢𑀩𑁆𑀩’’𑀦𑁆𑀢𑀺 (𑀧𑀸𑀭𑀸. 𑀅𑀝𑁆𑀞. 𑁧.𑁧𑁪𑁦).

𑀧𑀓𑀺𑀡𑁆𑀡𑀓𑀓𑀣𑀸𑀯𑀡𑁆𑀡𑀦𑀸

𑀩𑀳𑀼 𑀏𑀓𑀢𑁄 𑀤𑀸𑀭𑀼𑀆𑀤𑀺𑀪𑀸𑀭𑀺𑀬𑀲𑁆𑀲 𑀏𑀓𑀲𑁆𑀲 𑀪𑀡𑁆𑀟𑀲𑁆𑀲 𑀉𑀓𑁆𑀔𑀺𑀧𑀦𑀓𑀸𑀮𑁂 ‘‘𑀕𑀡𑁆𑀳𑀣 𑀉𑀓𑁆𑀔𑀺𑀧𑀣𑀸’’𑀢𑀺 𑀯𑀘𑀻𑀧𑀬𑁄𑀕𑁂𑀦 𑀲𑀤𑁆𑀥𑀺𑀁 𑀓𑀸𑀬𑀧𑀬𑁄𑀕𑀲𑀩𑁆𑀪𑀸𑀯𑀝𑁆𑀞𑀸𑀦𑀁 𑀲𑀦𑁆𑀥𑀸𑀬 ‘‘𑀲𑀸𑀳𑀢𑁆𑀣𑀺𑀓𑀸𑀡𑀢𑁆𑀢𑀺𑀓’’𑀦𑁆𑀢𑀺 𑀯𑀼𑀢𑁆𑀢𑀁. ‘‘𑀢𑁆𑀯𑀁 𑀏𑀢𑀁 𑀯𑀢𑁆𑀣𑀼𑀁 𑀕𑀡𑁆𑀳, 𑀅𑀳𑀁 𑀅𑀜𑁆𑀜’’𑀦𑁆𑀢𑀺 𑀏𑀯𑀁 𑀧𑀯𑀢𑁆𑀢𑁂 𑀧𑀦 𑀅𑀯𑀳𑀸𑀭𑁂 𑀅𑀢𑁆𑀢𑀦𑀸 𑀕𑀳𑀺𑀢𑀁 𑀲𑀸𑀳𑀢𑁆𑀣𑀺𑀓𑀫𑁂𑀯, 𑀧𑀭𑁂𑀦 𑀕𑀸𑀳𑀸𑀧𑀺𑀢𑀁 𑀆𑀡𑀢𑁆𑀢𑀺𑀓𑀫𑁂𑀯, 𑀢𑁂𑀦𑁂𑀯 𑀢𑀤𑀼𑀪𑀬𑀕𑁆𑀖𑁂𑀦 𑀧𑀜𑁆𑀘𑀫𑀸𑀲𑁂𑀧𑀺 𑀧𑀸𑀭𑀸𑀚𑀺𑀓𑀁 𑀦 𑀳𑁄𑀢𑀺, 𑀏𑀓𑁂𑀓𑀪𑀡𑁆𑀟𑀕𑁆𑀖𑀯𑀲𑁂𑀦 𑀣𑀼𑀮𑁆𑀮𑀘𑁆𑀘𑀬𑀸𑀤𑀺𑀫𑁂𑀯 𑀳𑁄𑀢𑀺. 𑀯𑀼𑀢𑁆𑀢𑀜𑁆𑀳𑀺 ‘‘𑀲𑀸𑀳𑀢𑁆𑀣𑀺𑀓𑀁 𑀯𑀸 𑀆𑀡𑀢𑁆𑀢𑀺𑀓𑀲𑁆𑀲 𑀅𑀗𑁆𑀕𑀁 𑀦 𑀳𑁄𑀢𑀻’’𑀢𑀺𑀆𑀤𑀺. 𑀉𑀧𑀦𑀺𑀓𑁆𑀔𑀺𑀢𑁆𑀢𑀪𑀡𑁆𑀟𑀁 𑀪𑀡𑁆𑀟𑀤𑁂𑀬𑁆𑀬𑀜𑁆𑀘 𑀅𑀤𑀸𑀢𑀼𑀓𑀸𑀫𑀢𑀸𑀬 ‘‘𑀤𑁂𑀫𑀺 𑀤𑀫𑁆𑀫𑀻’’𑀢𑀺 𑀯𑀺𑀓𑁆𑀔𑀺𑀧𑀦𑁆𑀢𑁄 𑀢𑀼𑀡𑁆𑀳𑀻𑀪𑀸𑀯𑁂𑀦 𑀯𑀺𑀳𑁂𑀞𑁂𑀦𑁆𑀢𑁄𑀧𑀺 𑀢𑁂𑀦 𑀢𑁂𑀦 𑀓𑀸𑀬𑀯𑀺𑀓𑀸𑀭𑀸𑀤𑀺𑀓𑀺𑀭𑀺𑀬𑀸𑀬 𑀧𑀭𑀲𑁆𑀲 𑀥𑀼𑀭𑀁 𑀦𑀺𑀓𑁆𑀔𑀺𑀧𑀸𑀧𑁂𑀲𑀻𑀢𑀺 ‘‘𑀓𑀺𑀭𑀺𑀬𑀸𑀲𑀫𑀼𑀝𑁆𑀞𑀸𑀦𑀜𑁆𑀘𑀸’’𑀢𑀺 𑀯𑀼𑀢𑁆𑀢𑀁.

𑀧𑀤𑀪𑀸𑀚𑀦𑀻𑀬𑀯𑀡𑁆𑀡𑀦𑀸𑀦𑀬𑁄 𑀦𑀺𑀝𑁆𑀞𑀺𑀢𑁄.

𑀯𑀺𑀦𑀻𑀢𑀯𑀢𑁆𑀣𑀼𑀯𑀡𑁆𑀡𑀦𑀸

𑁧𑁩𑁫. 𑀯𑀺𑀦𑀻𑀢𑀯𑀢𑁆𑀣𑀽𑀲𑀼 𑀦𑀺𑀭𑀼𑀢𑁆𑀢𑀺𑀬𑁂𑀯 𑀢𑀁𑀢𑀁𑀅𑀢𑁆𑀣𑀕𑁆𑀕𑀳𑀡𑀲𑁆𑀲 𑀉𑀧𑀸𑀬𑀢𑀸𑀬 𑀧𑀣𑁄𑀢𑀺 𑀦𑀺𑀭𑀼𑀢𑁆𑀢𑀺𑀧𑀣𑁄, 𑀢𑁂𑀦𑁂𑀯𑀸𑀳 ‘‘𑀯𑁄𑀳𑀸𑀭𑀯𑀘𑀦𑀫𑀢𑁆𑀢𑁂’’𑀢𑀺. 𑀬𑀣𑀸𑀓𑀫𑁆𑀫𑀁 𑀕𑀢𑁄𑀢𑀺 𑀢𑀢𑁄 𑀧𑁂𑀢𑀢𑁆𑀢𑀪𑀸𑀯𑀢𑁄 𑀫𑀢𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀅𑀩𑁆𑀪𑀼𑀡𑁆𑀳𑁂𑀢𑀺 𑀆𑀲𑀦𑁆𑀦𑀫𑀭𑀡𑀢𑀸𑀬 𑀲𑀭𑀻𑀭𑀲𑁆𑀲 𑀉𑀡𑁆𑀳𑀲𑀫𑀗𑁆𑀕𑀺𑀢𑀁 𑀤𑀲𑁆𑀲𑁂𑀢𑀺, 𑀢𑁂𑀦𑁂𑀯𑀸𑀳 ‘‘𑀅𑀮𑁆𑀮𑀲𑀭𑀻𑀭𑁂’’𑀢𑀺. 𑀓𑀼𑀡𑀧𑀪𑀸𑀯𑀁 𑀉𑀧𑀕𑀢𑀫𑁆𑀧𑀺 𑀪𑀺𑀦𑁆𑀦𑀫𑁂𑀯 𑀅𑀮𑁆𑀮𑀪𑀸𑀯𑀢𑁄 𑀪𑀺𑀦𑁆𑀦𑀢𑁆𑀢𑀸. 𑀯𑀺𑀲𑀪𑀸𑀕𑀲𑀭𑀻𑀭𑁂𑀢𑀺 𑀇𑀢𑁆𑀣𑀺𑀲𑀭𑀻𑀭𑁂. 𑀲𑀻𑀲𑁂 𑀯𑀸𑀢𑀺𑀆𑀤𑀺 𑀅𑀥𑀓𑁆𑀔𑀓𑁂 𑀉𑀩𑁆𑀪𑀚𑀸𑀡𑀼𑀫𑀡𑁆𑀟𑀮𑁂 𑀧𑀤𑁂𑀲𑁂 𑀘𑀺𑀢𑁆𑀢𑀯𑀺𑀓𑀸𑀭𑀧𑁆𑀧𑀢𑁆𑀢𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀬𑀢𑁆𑀣 𑀓𑀢𑁆𑀣𑀘𑀺 𑀅𑀦𑀸𑀫𑀲𑀦𑁆𑀢𑁂𑀦 𑀓𑀢𑀁 𑀲𑀼𑀓𑀢𑀫𑁂𑀯. 𑀫𑀢𑀲𑀭𑀻𑀭𑀫𑁆𑀧𑀺 𑀳𑀺 𑀬𑁂𑀦 𑀓𑁂𑀦𑀘𑀺 𑀆𑀓𑀸𑀭𑁂𑀦 𑀲𑀜𑁆𑀘𑀺𑀘𑁆𑀘 𑀨𑀼𑀲𑀦𑁆𑀢𑀲𑁆𑀲 𑀅𑀦𑀸𑀫𑀸𑀲𑀤𑀼𑀓𑁆𑀓𑀝𑀫𑁂𑀯𑀸𑀢𑀺 𑀯𑀤𑀦𑁆𑀢𑀺, 𑀢𑀁 𑀬𑀼𑀢𑁆𑀢𑀫𑁂𑀯. 𑀦 𑀳𑀺 𑀅𑀧𑀸𑀭𑀸𑀚𑀺𑀓𑀯𑀢𑁆𑀣𑀼𑀓𑁂𑀧𑀺 𑀘𑀺𑀢𑁆𑀢𑀸𑀤𑀺𑀇𑀢𑁆𑀣𑀺𑀭𑀽𑀧𑁂 𑀪𑀯𑀦𑁆𑀢𑀁 𑀤𑀼𑀓𑁆𑀓𑀝𑀁 𑀧𑀸𑀭𑀸𑀚𑀺𑀓𑀯𑀢𑁆𑀣𑀼𑀪𑀽𑀢𑁂 𑀫𑀢𑀺𑀢𑁆𑀣𑀺𑀲𑀭𑀻𑀭𑁂 𑀦𑀺𑀯𑀢𑁆𑀢𑀢𑀺.

𑀓𑀼𑀲𑀲𑀗𑁆𑀓𑀸𑀫𑀦𑀯𑀢𑁆𑀣𑀼𑀓𑀣𑀸𑀯𑀡𑁆𑀡𑀦𑀸

𑁧𑁩𑁮. 𑀩𑀮𑀲𑀸𑀢𑀺 𑀩𑀮𑁂𑀦. 𑀲𑀸𑀝𑀓𑁄 𑀪𑀯𑀺𑀲𑁆𑀲𑀢𑀺, 𑀕𑀡𑁆𑀳𑀺𑀲𑁆𑀲𑀸𑀫𑀻𑀢𑀺 𑀅𑀦𑀸𑀕𑀢𑀯𑀘𑀦𑀁 𑀧𑀲𑀺𑀩𑁆𑀩𑀓𑀕𑁆𑀕𑀳𑀡𑀢𑁄 𑀧𑀼𑀭𑁂𑀢𑀭𑀁 𑀲𑀫𑀼𑀧𑁆𑀧𑀦𑁆𑀦𑀧𑀭𑀺𑀓𑀧𑁆𑀧𑀤𑀲𑁆𑀲𑀦𑀯𑀲𑁂𑀦 𑀯𑀼𑀢𑁆𑀢𑀁. 𑀕𑀳𑀡𑀓𑁆𑀔𑀡𑁂 𑀧𑀦 ‘‘𑀲𑀸𑀝𑀓𑁄 𑀘𑁂, 𑀕𑀡𑁆𑀳𑀸𑀫𑀻’’𑀢𑀺 𑀧𑀲𑀺𑀩𑁆𑀩𑀓𑀁 𑀕𑀡𑁆𑀳𑀸𑀢𑀻𑀢𑀺 𑀏𑀯𑀫𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑀕𑀳𑁂𑀢𑀩𑁆𑀩𑁄, 𑀦 𑀧𑀦 𑀩𑀳𑀺 𑀦𑀻𑀳𑀭𑀺𑀢𑁆𑀯𑀸 𑀲𑀸𑀝𑀓𑀪𑀸𑀯𑀁 𑀜𑀢𑁆𑀯𑀸 𑀕𑀳𑁂𑀲𑁆𑀲𑀸𑀫𑀻𑀢𑀺, 𑀢𑁂𑀦𑀸𑀳 ‘‘𑀉𑀤𑁆𑀥𑀸𑀭𑁂𑀬𑁂𑀯 𑀧𑀸𑀭𑀸𑀚𑀺𑀓’’𑀦𑁆𑀢𑀺. 𑀇𑀢𑀭𑀣𑀸 ‘‘𑀇𑀤𑀸𑀦𑀺 𑀦 𑀕𑀡𑁆𑀳𑀸𑀫𑀺, 𑀧𑀘𑁆𑀙𑀸 𑀅𑀦𑁆𑀥𑀓𑀸𑀭𑁂 𑀚𑀸𑀢𑁂 𑀯𑀺𑀚𑀸𑀦𑀦𑀓𑀸𑀮𑁂 𑀯𑀸 𑀕𑀡𑁆𑀳𑀺𑀲𑁆𑀲𑀸𑀫𑀺, 𑀇𑀤𑀸𑀦𑀺 𑀑𑀮𑁄𑀓𑁂𑀦𑁆𑀢𑁄 𑀯𑀺𑀬 𑀳𑀢𑁆𑀣𑀕𑀢𑀁 𑀓𑀭𑁄𑀫𑀻’’𑀢𑀺 𑀕𑀡𑁆𑀳𑀦𑁆𑀢𑀲𑁆𑀲𑀸𑀧𑀺 𑀕𑀳𑀡𑀓𑁆𑀔𑀡𑁂 𑀅𑀯𑀳𑀸𑀭𑁄 𑀪𑀯𑁂𑀬𑁆𑀬, 𑀦 𑀘 𑀢𑀁 𑀬𑀼𑀢𑁆𑀢𑀁 𑀢𑀤𑀸 𑀕𑀳𑀡𑁂 𑀲𑀦𑁆𑀦𑀺𑀝𑁆𑀞𑀸𑀦𑀸𑀪𑀸𑀯𑀸. 𑀲𑀦𑁆𑀦𑀺𑀝𑁆𑀞𑀸𑀧𑀓𑀘𑁂𑀢𑀦𑀸𑀬 𑀏𑀯 𑀳𑀺 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀅𑀓𑀼𑀲𑀮𑀁 𑀯𑀺𑀬. 𑀦 𑀳𑀺 ‘‘𑀧𑀘𑁆𑀙𑀸 𑀯𑀥𑀺𑀲𑁆𑀲𑀸𑀫𑀻’’𑀢𑀺 𑀧𑀸𑀡𑀁 𑀕𑀡𑁆𑀳𑀦𑁆𑀢𑀲𑁆𑀲 𑀢𑀤𑁂𑀯 𑀢𑀲𑁆𑀫𑀺𑀁 𑀫𑀢𑁂𑀧𑀺 𑀧𑀸𑀡𑀸𑀢𑀺𑀧𑀸𑀢𑁄 𑀳𑁄𑀢𑀺 𑀯𑀥𑀓𑀘𑁂𑀢𑀦𑀸𑀬 𑀧𑀬𑁄𑀕𑀲𑁆𑀲 𑀅𑀓𑀢𑀢𑁆𑀢𑀸, 𑀏𑀯𑀫𑀺𑀥𑀸𑀧𑀺 𑀅𑀢𑁆𑀣𑀗𑁆𑀕𑀢𑁂 𑀲𑀽𑀭𑀺𑀬𑁂 𑀅𑀯𑀳𑀭𑀺𑀲𑁆𑀲𑀸𑀫𑀻𑀢𑀺𑀆𑀤𑀺𑀦𑀸 𑀓𑀸𑀮𑀧𑀭𑀺𑀓𑀧𑁆𑀧𑀦𑀯𑀲𑁂𑀦 𑀞𑀸𑀦𑀸 𑀘𑀸𑀯𑀺𑀢𑁂𑀧𑀺 𑀢𑀤𑀸𑀧𑀺 𑀅𑀯𑀳𑀸𑀭𑁄 𑀦 𑀳𑁄𑀢𑀺 𑀑𑀓𑀸𑀲𑀧𑀭𑀺𑀓𑀧𑁆𑀧𑁂 (𑀧𑀸𑀭𑀸. 𑀅𑀝𑁆𑀞. 𑁧.𑁧𑁩𑁮) 𑀯𑀺𑀬, 𑀢𑀲𑁆𑀫𑀺𑀁 𑀧𑀦 𑀬𑀣𑀸𑀧𑀭𑀺𑀓𑀧𑁆𑀧𑀺𑀢𑀝𑁆𑀞𑀸𑀦𑁂 𑀓𑀸𑀮𑁂 𑀆𑀕𑀢𑁂 𑀪𑀡𑁆𑀟𑀁 𑀪𑀽𑀫𑀺𑀬𑀁 𑀅𑀦𑀺𑀓𑁆𑀔𑀺𑀧𑀺𑀢𑁆𑀯𑀸𑀧𑀺 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀕𑀘𑁆𑀙𑀢𑁄 𑀧𑀤𑀯𑀸𑀭𑁂𑀦 𑀅𑀯𑀳𑀸𑀭𑁄𑀢𑀺 𑀔𑀸𑀬𑀢𑀺. 𑀢𑀲𑁆𑀫𑀸 𑀪𑀡𑁆𑀟𑀧𑀭𑀺𑀓𑀧𑁆𑀧𑁄 𑀑𑀓𑀸𑀲𑀧𑀭𑀺𑀓𑀧𑁆𑀧𑁄 𑀓𑀸𑀮𑀧𑀭𑀺𑀓𑀧𑁆𑀧𑁄𑀢𑀺 𑀢𑀺𑀯𑀺𑀥𑁄𑀧𑀺 𑀧𑀭𑀺𑀓𑀧𑁆𑀧𑁄 𑀕𑀳𑁂𑀢𑀩𑁆𑀩𑁄. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀑𑀓𑀸𑀲𑀧𑀭𑀺𑀓𑀧𑁆𑀧𑁂 𑀲𑀫𑁄𑀥𑀸𑀦𑁂𑀢𑁆𑀯𑀸 𑀓𑀸𑀮𑀧𑀭𑀺𑀓𑀧𑁆𑀧𑁄 𑀯𑀺𑀲𑀼𑀁 𑀦 𑀯𑀼𑀢𑁆𑀢𑁄𑀢𑀺 𑀅𑀫𑁆𑀳𑀸𑀓𑀁 𑀔𑀦𑁆𑀢𑀺, 𑀯𑀻𑀫𑀁𑀲𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑀁. 𑀧𑀤𑀯𑀸𑀭𑁂𑀦 𑀓𑀸𑀭𑁂𑀢𑀩𑁆𑀩𑁄𑀢𑀺 𑀪𑀽𑀫𑀺𑀬𑀁 𑀅𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀯𑀻𑀫𑀁𑀲𑀺𑀢𑀢𑁆𑀢𑀸 𑀯𑀼𑀢𑁆𑀢𑀁. 𑀧𑀭𑀺𑀬𑀼𑀝𑁆𑀞𑀺𑀢𑁄𑀢𑀺 𑀅𑀦𑀼𑀩𑀤𑁆𑀥𑁄.

𑀧𑀭𑀺𑀓𑀧𑁆𑀧𑁄 𑀤𑀺𑀲𑁆𑀲𑀢𑀻𑀢𑀺 𑀕𑀳𑀡𑀓𑁆𑀔𑀡𑁂 𑀧𑀭𑀺𑀓𑀧𑁆𑀧𑁄 𑀤𑀺𑀲𑁆𑀲𑀢𑀺, 𑀦 𑀢𑀤𑀸 𑀢𑁂𑀲𑀁 𑀫𑀢𑁂𑀦 𑀅𑀯𑀳𑀸𑀭𑁄𑀢𑀺 𑀤𑀲𑁆𑀲𑁂𑀢𑀺. 𑀤𑀺𑀲𑁆𑀯𑀸 𑀳𑀝𑀢𑁆𑀢𑀸 𑀧𑀭𑀺𑀓𑀧𑁆𑀧𑀸𑀯𑀳𑀸𑀭𑁄 𑀦 𑀤𑀺𑀲𑁆𑀲𑀢𑀻𑀢𑀺 𑀧𑀘𑁆𑀙𑀸 𑀧𑀦 𑀩𑀳𑀺 𑀯𑀻𑀫𑀁𑀲𑀺𑀢𑁆𑀯𑀸 𑀲𑀸𑀝𑀓𑀪𑀸𑀯𑀁 𑀜𑀢𑁆𑀯𑀸 𑀢𑀢𑁄 𑀧𑀘𑁆𑀙𑀸 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀳𑀝𑀢𑁆𑀢𑀸 𑀧𑀼𑀩𑁆𑀩𑁂 𑀓𑀢𑀲𑁆𑀲 𑀧𑀭𑀺𑀓𑀧𑁆𑀧𑀲𑁆𑀲 𑀅𑀯𑀳𑀸𑀭𑀸𑀦𑀗𑁆𑀕𑀢𑁆𑀢𑀸 ‘‘𑀲𑀼𑀢𑁆𑀢’’𑀦𑁆𑀢𑀺 𑀜𑀢𑁆𑀯𑀸 𑀳𑀭𑀡𑁂 𑀯𑀺𑀬 𑀣𑁂𑀬𑁆𑀬𑀸𑀯𑀳𑀸𑀭𑁄 𑀏𑀯 𑀲𑀺𑀬𑀸. 𑀢𑀲𑁆𑀫𑀸 𑀧𑀭𑀺𑀓𑀧𑁆𑀧𑀸𑀯𑀳𑀸𑀭𑁄 𑀦 𑀤𑀺𑀲𑁆𑀲𑀢𑀺. 𑀲𑀸𑀝𑀓𑁄 𑀘𑁂 𑀪𑀯𑀺𑀲𑁆𑀲𑀢𑀻𑀢𑀺𑀆𑀤𑀺𑀓𑀲𑁆𑀲 𑀧𑀭𑀺𑀓𑀧𑁆𑀧𑀲𑁆𑀲 𑀢𑀤𑀸 𑀅𑀯𑀺𑀚𑁆𑀚𑀫𑀸𑀦𑀢𑁆𑀢𑀸 𑀓𑁂𑀯𑀮𑀁 𑀅𑀯𑀳𑀸𑀭𑁄 𑀏𑀯, 𑀦 𑀧𑀭𑀺𑀓𑀧𑁆𑀧𑀸𑀯𑀳𑀸𑀭𑁄𑀢𑀺 𑀅𑀥𑀺𑀧𑁆𑀧𑀸𑀬𑁄, 𑀢𑁂𑀦 𑀪𑀡𑁆𑀟𑀧𑀭𑀺𑀓𑀧𑁆𑀧𑀸𑀯𑀳𑀸𑀭𑀲𑁆𑀲 ‘‘𑀲𑀸𑀝𑀓𑁄 𑀘𑁂 𑀪𑀯𑀺𑀲𑁆𑀲𑀢𑀺, 𑀕𑀳𑁂𑀲𑁆𑀲𑀸𑀫𑀻’’𑀢𑀺 𑀏𑀯𑀁 𑀪𑀡𑁆𑀟𑀲𑀦𑁆𑀦𑀺𑀝𑁆𑀞𑀸𑀦𑀸𑀪𑀸𑀯𑀓𑁆𑀔𑀡𑁂𑀬𑁂𑀯 𑀧𑀯𑀢𑁆𑀢𑀺𑀁 𑀤𑀲𑁆𑀲𑁂𑀢𑀺, 𑀢𑁂𑀦𑀸𑀳 ‘‘𑀬𑀁 𑀧𑀭𑀺𑀓𑀧𑁆𑀧𑀺𑀢𑀁, 𑀢𑀁 𑀅𑀤𑀺𑀝𑁆𑀞𑀁 𑀧𑀭𑀺𑀓𑀧𑁆𑀧𑀺𑀢𑀪𑀸𑀯𑁂 𑀞𑀺𑀢𑀁𑀬𑁂𑀯 𑀉𑀤𑁆𑀥𑀭𑀦𑁆𑀢𑀲𑁆𑀲 𑀅𑀯𑀳𑀸𑀭𑁄’’𑀢𑀺. 𑀬𑀤𑀺 𑀏𑀯𑀁 𑀓𑀲𑁆𑀫𑀸 𑀑𑀓𑀸𑀲𑀧𑀅𑀧𑁆𑀧𑀸𑀯𑀳𑀸𑀭𑁄 𑀪𑀡𑁆𑀟𑀁 𑀤𑀺𑀲𑁆𑀯𑀸 𑀅𑀯𑀳𑀭𑀦𑁆𑀢𑀲𑁆𑀲 𑀧𑀭𑀺𑀓𑀧𑁆𑀧𑀸𑀯𑀳𑀸𑀭𑁄 𑀲𑀺𑀬𑀸𑀢𑀺? 𑀦𑀸𑀬𑀁 𑀤𑁄𑀲𑁄 𑀅𑀪𑀡𑁆𑀟𑀯𑀺𑀲𑀬𑀢𑁆𑀢𑀸 𑀢𑀲𑁆𑀲 𑀧𑀭𑀺𑀓𑀧𑁆𑀧𑀲𑁆𑀲, 𑀧𑀼𑀩𑁆𑀩𑁂𑀯 𑀤𑀺𑀲𑁆𑀯𑀸 𑀜𑀸𑀢𑀪𑀡𑁆𑀟𑀲𑁆𑀲𑁂𑀯 𑀳𑀺 𑀑𑀓𑀸𑀲𑀧𑀭𑀺𑀓𑀧𑁆𑀧𑁄 𑀯𑀼𑀢𑁆𑀢𑁄. 𑀢𑀁 𑀫𑀜𑁆𑀜𑀫𑀸𑀦𑁄 𑀢𑀁 𑀅𑀯𑀳𑀭𑀻𑀢𑀺 𑀇𑀤𑀁 𑀲𑀼𑀢𑁆𑀢𑀁 𑀓𑀺𑀜𑁆𑀘𑀸𑀧𑀺 ‘‘𑀢𑀜𑁆𑀜𑁂𑀯𑁂𑀢’’𑀦𑁆𑀢𑀺 𑀦𑀺𑀬𑀫𑁂𑀢𑁆𑀯𑀸 𑀕𑀡𑁆𑀳𑀦𑁆𑀢𑀲𑁆𑀲 𑀯𑀲𑁂𑀦 𑀯𑀼𑀢𑁆𑀢𑀁, 𑀢𑀣𑀸𑀧𑀺 ‘‘𑀢𑀜𑁆𑀘𑁂 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀏𑀯𑀁 𑀧𑀯𑀢𑁆𑀢𑁂 𑀇𑀫𑀲𑁆𑀫𑀺𑀁 𑀧𑀭𑀺𑀓𑀧𑁆𑀧𑁂𑀧𑀺 ‘‘𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀕𑀳𑀡𑁂 𑀦𑀺𑀬𑀫𑀲𑀩𑁆𑀪𑀸𑀯𑀸 𑀅𑀯𑀳𑀸𑀭𑀢𑁆𑀣𑀲𑀸𑀥𑀓𑀁 𑀳𑁄𑀢𑀻𑀢𑀺 𑀉𑀤𑁆𑀥𑀝𑀁, 𑀢𑁂𑀦𑁂𑀯 ‘‘𑀲𑀫𑁂𑀢𑀻’’𑀢𑀺 𑀯𑀼𑀢𑁆𑀢𑀁.

𑀓𑁂𑀘𑀻𑀢𑀺 𑀫𑀳𑀸𑀅𑀝𑁆𑀞𑀓𑀣𑀸𑀬𑀫𑁂𑀯 𑀏𑀓𑀘𑁆𑀘𑁂 𑀆𑀘𑀭𑀺𑀬𑀸. 𑀫𑀳𑀸𑀧𑀘𑁆𑀘𑀭𑀺𑀬𑀁 𑀧𑀦𑀸𑀢𑀺𑀆𑀤𑀺𑀦𑀸𑀧𑀺 𑀓𑁂𑀘𑀺𑀯𑀸𑀤𑁄 𑀕𑀸𑀭𑀬𑁆𑀳𑁄, 𑀫𑀳𑀸𑀅𑀝𑁆𑀞𑀓𑀣𑀸𑀯𑀸𑀤𑁄𑀯 𑀬𑀼𑀢𑁆𑀢𑀢𑀭𑁄𑀢𑀺 𑀤𑀲𑁆𑀲𑁂𑀢𑀺.

𑀅𑀮𑀗𑁆𑀓𑀸𑀭𑀪𑀡𑁆𑀟𑀦𑁆𑀢𑀺 𑀅𑀗𑁆𑀕𑀼𑀮𑀺𑀫𑀼𑀤𑁆𑀤𑀺𑀓𑀸𑀤𑀺. 𑀓𑀼𑀲𑀁 𑀧𑀸𑀢𑁂𑀢𑁆𑀯𑀸𑀢𑀺 𑀯𑀺𑀮𑀻𑀯𑀫𑀬𑀁 𑀯𑀸 𑀢𑀸𑀮𑀧𑀡𑁆𑀡𑀸𑀤𑀺𑀫𑀬𑀁 𑀯𑀸 𑀓𑀢𑀲𑀜𑁆𑀜𑀸𑀡𑀁 𑀧𑀸𑀢𑁂𑀢𑁆𑀯𑀸. 𑀧𑀭𑀓𑁄𑀝𑁆𑀞𑀸𑀲𑀢𑁄 𑀓𑀼𑀲𑁂 𑀉𑀤𑁆𑀥𑀝𑁂𑀧𑀺 𑀦 𑀢𑀸𑀯 𑀓𑀼𑀲𑀲𑁆𑀲 𑀧𑀭𑀺𑀯𑀢𑁆𑀢𑀦𑀁 𑀚𑀸𑀢𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀉𑀤𑁆𑀥𑀸𑀭𑁂 𑀭𑀓𑁆𑀔𑀢𑀻’’𑀢𑀺. 𑀳𑀢𑁆𑀣𑀢𑁄 𑀫𑀼𑀢𑁆𑀢𑀫𑀢𑁆𑀢𑁂 𑀧𑀸𑀭𑀸𑀚𑀺𑀓𑀦𑁆𑀢𑀺 𑀇𑀫𑀺𑀦𑀸 𑀞𑀸𑀦𑀸𑀘𑀸𑀯𑀦𑀁 𑀥𑀼𑀭𑀦𑀺𑀓𑁆𑀔𑁂𑀧𑀜𑁆𑀘 𑀯𑀺𑀦𑀸 𑀓𑀼𑀲𑀲𑀗𑁆𑀓𑀸𑀫𑀦𑀁 𑀦𑀸𑀫 𑀯𑀺𑀲𑀼𑀁 𑀏𑀓𑁄𑀬𑀁 𑀅𑀯𑀳𑀸𑀭𑁄𑀢𑀺 𑀤𑀲𑁆𑀲𑁂𑀢𑀺. 𑀲𑀩𑁆𑀩𑁂𑀧𑀺 𑀳𑀺 𑀅𑀯𑀳𑀸𑀭𑀸 𑀲𑀸𑀳𑀢𑁆𑀣𑀺𑀓𑀸𑀡𑀢𑁆𑀢𑀺𑀓𑀸𑀥𑀺𑀧𑁆𑀧𑀸𑀬𑀬𑁄𑀕𑁂𑀳𑀺 𑀦𑀺𑀧𑁆𑀨𑀸𑀤𑀺𑀬𑀫𑀸𑀦𑀸 𑀅𑀢𑁆𑀣𑀢𑁄 𑀞𑀸𑀦𑀸𑀘𑀸𑀯𑀦𑀥𑀼𑀭𑀦𑀺𑀓𑁆𑀔𑁂𑀧𑀓𑀼𑀲𑀲𑀗𑁆𑀓𑀸𑀫𑀦𑁂𑀲𑀼 𑀢𑀻𑀲𑀼 𑀲𑀫𑁄𑀲𑀭𑀦𑁆𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀇𑀢𑀭𑁄 𑀢𑀲𑁆𑀲 𑀪𑀸𑀕𑀁 𑀉𑀤𑁆𑀥𑀭𑀢𑀺, 𑀉𑀤𑁆𑀥𑀸𑀭𑁂 𑀧𑀸𑀭𑀸𑀚𑀺𑀓𑀦𑁆𑀢𑀺 𑀧𑀼𑀭𑀺𑀫𑀲𑁆𑀲 𑀅𑀢𑁆𑀢𑀦𑁄 𑀓𑁄𑀝𑁆𑀞𑀸𑀲𑁂 𑀆𑀮𑀬𑀲𑁆𑀲 𑀅𑀯𑀺𑀕𑀢𑀢𑁆𑀢𑀸 𑀯𑀼𑀢𑁆𑀢𑀁, 𑀆𑀮𑀬𑁂 𑀧𑀦 𑀲𑀩𑁆𑀩𑀣𑀸 𑀅𑀲𑀢𑀺 𑀅𑀯𑀳𑀸𑀭𑁄 𑀦 𑀳𑁄𑀢𑀺, 𑀢𑁂𑀦𑀸𑀳 ‘‘𑀯𑀺𑀘𑀺𑀦𑀺𑀢𑀸𑀯𑀲𑁂𑀲𑀁 𑀕𑀡𑁆𑀳𑀦𑁆𑀢𑀲𑁆𑀲𑀸𑀧𑀺 𑀅𑀯𑀳𑀸𑀭𑁄 𑀦𑀢𑁆𑀣𑁂𑀯𑀸’’𑀢𑀺.

𑀦𑀸𑀬𑀁 𑀫𑀫𑀸𑀢𑀺 𑀚𑀸𑀦𑀦𑁆𑀢𑁄𑀧𑀻𑀢𑀺 𑀏𑀢𑁆𑀣 𑀧𑀺-𑀲𑀤𑁆𑀤𑁂𑀦 𑀢𑀢𑁆𑀣 𑀯𑁂𑀫𑀢𑀺𑀓𑁄𑀧𑀺 𑀳𑀼𑀢𑁆𑀯𑀸 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀕𑀡𑁆𑀳𑀦𑁆𑀢𑁄𑀧𑀺 𑀲𑀗𑁆𑀕𑀬𑁆𑀳𑀢𑀺. 𑀲𑀺𑀯𑁂𑀬𑁆𑀬𑀓𑀦𑁆𑀢𑀺 𑀲𑀺𑀯𑀺𑀭𑀝𑁆𑀞𑁂 𑀚𑀸𑀢𑀁.

𑁧𑁪𑁦-𑁧. 𑀓𑀧𑁆𑀧𑀺𑀬𑀁 𑀓𑀸𑀭𑀸𑀧𑁂𑀢𑁆𑀯𑀸𑀢𑀺 𑀧𑀘𑀸𑀧𑁂𑀢𑁆𑀯𑀸. 𑀢𑀲𑁆𑀫𑀺𑀁 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀅𑀤𑀺𑀦𑁆𑀦𑀸𑀤𑀸𑀦𑀪𑀸𑀯𑁂𑀦 𑀲𑀳𑀧𑀬𑁄𑀕𑀲𑁆𑀲𑀸𑀧𑀺 𑀅𑀪𑀸𑀯𑀸 𑀤𑀼𑀓𑁆𑀓𑀝𑀁 𑀦 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀆𑀡𑀢𑁆𑀢𑁂𑀳𑀻𑀢𑀺 𑀲𑀫𑁆𑀫𑀢𑁂𑀦 𑀆𑀡𑀢𑁆𑀢𑁂𑀳𑀺. 𑀆𑀡𑀢𑁆𑀢𑁂𑀦𑀸𑀢𑀺 𑀲𑀸𑀫𑀺𑀓𑁂𑀳𑀺 𑀆𑀡𑀢𑁆𑀢𑁂𑀦. 𑀪𑀡𑁆𑀟𑀤𑁂𑀬𑁆𑀬𑀦𑁆𑀢𑀺 𑀲𑀫𑁆𑀫𑀢𑀸𑀤𑀻𑀳𑀺 𑀤𑀺𑀦𑁆𑀦𑀢𑁆𑀢𑀸 𑀦 𑀧𑀭𑀸𑀚𑀺𑀓𑀁 𑀚𑀸𑀢𑀁, 𑀅𑀲𑀦𑁆𑀢𑀁 𑀧𑀼𑀕𑁆𑀕𑀮𑀁 𑀯𑀢𑁆𑀯𑀸 𑀕𑀳𑀺𑀢𑀢𑁆𑀢𑀸 𑀧𑀦 𑀪𑀡𑁆𑀟𑀤𑁂𑀬𑁆𑀬𑀁 𑀯𑀼𑀢𑁆𑀢𑀁. 𑀅𑀜𑁆𑀜𑁂𑀦 𑀤𑀺𑀬𑁆𑀬𑀫𑀸𑀦𑀦𑁆𑀢𑀺 𑀲𑀫𑁆𑀫𑀢𑀸𑀤𑀻𑀳𑀺 𑀘𑀢𑀽𑀳𑀺 𑀅𑀜𑁆𑀜𑁂𑀦 𑀤𑀺𑀬𑁆𑀬𑀫𑀸𑀦𑀁. 𑀕𑀡𑁆𑀳𑀦𑁆𑀢𑁄𑀢𑀺 ‘‘𑀅𑀧𑀭𑀲𑁆𑀲 𑀪𑀸𑀕𑀁 𑀤𑁂𑀳𑀻’’𑀢𑀺 𑀯𑀢𑁆𑀯𑀸 𑀕𑀡𑁆𑀳𑀦𑁆𑀢𑁄. 𑀅𑀧𑀭𑀲𑁆𑀲𑀸𑀢𑀺 𑀅𑀲𑀦𑁆𑀢𑀁 𑀧𑀼𑀕𑁆𑀕𑀮𑀁 𑀅𑀤𑀲𑁆𑀲𑁂𑀢𑁆𑀯𑀸 𑀧𑀦 ‘‘𑀅𑀧𑀭𑀁 𑀪𑀸𑀕𑀁 𑀤𑁂𑀳𑀻’’𑀢𑀺 𑀯𑀸 𑀓𑀽𑀝𑀯𑀲𑁆𑀲𑀸𑀦𑀺 𑀕𑀡𑁂𑀢𑁆𑀯𑀸 𑀯𑀸 𑀕𑀡𑁆𑀳𑀢𑁄 𑀕𑀺𑀳𑀺𑀲𑀦𑁆𑀢𑀓𑁂 𑀲𑀸𑀫𑀺𑀦𑀸 𑀘 ‘‘𑀇𑀫𑀲𑁆𑀲 𑀤𑁂𑀳𑀻’’𑀢𑀺 𑀏𑀯𑀁 𑀆𑀡𑀢𑁆𑀢𑁂𑀦 𑀘 𑀤𑀺𑀦𑁆𑀦𑁂 𑀪𑀡𑁆𑀟𑀤𑁂𑀬𑁆𑀬𑀫𑁆𑀧𑀺 𑀦 𑀳𑁄𑀢𑀺, 𑀲𑀗𑁆𑀖𑀲𑀦𑁆𑀢𑀓𑁂 𑀧𑀦 𑀳𑁄𑀢𑀻𑀢𑀺 𑀇𑀫𑀁 𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀼𑀁 𑀅𑀲𑀫𑁆𑀫𑀢𑁂𑀦 𑀯𑀸 𑀅𑀦𑀸𑀡𑀢𑁆𑀢𑁂𑀦 𑀯𑀸𑀢𑀺𑀆𑀤𑀺 𑀧𑀼𑀦 𑀯𑀼𑀢𑁆𑀢𑀁. 𑀇𑀢𑀭𑁂𑀳𑀺 𑀤𑀺𑀬𑁆𑀬𑀫𑀸𑀦𑀦𑁆𑀢𑀺 𑀲𑀫𑁆𑀫𑀢𑁂𑀦 𑀆𑀡𑀢𑁆𑀢𑁂𑀦 𑀯𑀸 𑀤𑀺𑀬𑁆𑀬𑀫𑀸𑀦𑀁. 𑀏𑀯𑀁 𑀕𑀡𑁆𑀳𑀢𑁄𑀢𑀺 ‘‘𑀅𑀧𑀭𑀫𑁆𑀧𑀺 𑀪𑀸𑀕𑀁 𑀤𑁂𑀳𑀻’’𑀢𑀺 𑀯𑀢𑁆𑀯𑀸 𑀓𑀽𑀝𑀯𑀲𑁆𑀲𑀸𑀦𑀺 𑀕𑀡𑁂𑀢𑁆𑀯𑀸 𑀯𑀸 𑀕𑀡𑁆𑀳𑀢𑁄. 𑀲𑀸𑀫𑀺𑀓𑁂𑀦 𑀧𑀦𑀸𑀢𑀺 𑀏𑀢𑁆𑀣 𑀧𑀦-𑀲𑀤𑁆𑀤𑁄 𑀯𑀺𑀲𑁂𑀲𑀢𑁆𑀣𑀚𑁄𑀢𑀓𑁄, 𑀢𑁂𑀦 ‘‘𑀅𑀧𑀭𑀫𑁆𑀧𑀺 𑀪𑀸𑀕𑀁 𑀤𑁂𑀳𑀻’’𑀢𑀺 𑀯𑀸 𑀓𑀽𑀝𑀯𑀲𑁆𑀲𑀸𑀦𑀺 𑀕𑀡𑁂𑀢𑁆𑀯𑀸 𑀯𑀸 𑀕𑀡𑁆𑀳𑀦𑁆𑀢𑁂 𑀲𑀸𑀫𑀺𑀓𑁂𑀦 𑀲𑀬𑀁 𑀤𑁂𑀦𑁆𑀢𑁂 𑀯𑀸 𑀤𑀸𑀧𑁂𑀦𑁆𑀢𑁂 𑀯𑀸 𑀯𑀺𑀲𑁂𑀲𑁄 𑀅𑀢𑁆𑀣𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀼𑀤𑀺𑀦𑁆𑀦𑀦𑁆𑀢𑀺 𑀪𑀡𑁆𑀟𑀤𑁂𑀬𑁆𑀬𑀁 𑀦 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀳𑁂𑀝𑁆𑀞𑀸 𑀧𑀦 𑀲𑀸𑀫𑀺𑀓𑁂𑀦 𑀢𑁂𑀦 𑀆𑀡𑀢𑁆𑀢𑁂𑀦 𑀯𑀸 𑀤𑀺𑀬𑁆𑀬𑀫𑀸𑀦𑀁 𑀕𑀺𑀳𑀺𑀲𑀦𑁆𑀢𑀓𑀁 ‘‘𑀅𑀧𑀭𑀲𑁆𑀲 𑀪𑀸𑀕𑀁 𑀤𑁂𑀳𑀻’’𑀢𑀺 𑀯𑀢𑁆𑀯𑀸 𑀕𑀡𑁆𑀳𑀢𑁄 𑀅𑀧𑀭𑀲𑁆𑀲 𑀅𑀪𑀸𑀯𑀢𑁄 𑀲𑀸𑀫𑀺𑀲𑀦𑁆𑀢𑀓𑀫𑁂𑀯 𑀳𑁄𑀢𑀻𑀢𑀺 𑀪𑀡𑁆𑀟𑀤𑁂𑀬𑁆𑀬𑀁 𑀚𑀸𑀢𑀁, 𑀇𑀥 𑀧𑀦 𑀢𑁂𑀳𑀺𑀬𑁂𑀯 𑀤𑀺𑀬𑁆𑀬𑀫𑀸𑀦𑀁 ‘‘𑀅𑀧𑀭𑀫𑁆𑀧𑀺 𑀪𑀸𑀕𑀁 𑀤𑁂𑀳𑀻’’𑀢𑀺 𑀯𑀢𑁆𑀯𑀸 𑀯𑀸 𑀓𑀽𑀝𑀯𑀲𑁆𑀲𑀸𑀦𑀺 𑀕𑀡𑁂𑀢𑁆𑀯𑀸 𑀯𑀸 𑀕𑀡𑁆𑀳𑀢𑁄 ‘‘𑀤𑁂𑀳𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀅𑀜𑁆𑀜𑀸𑀢𑀓𑀯𑀺𑀜𑁆𑀜𑀢𑁆𑀢𑀺𑀫𑀢𑁆𑀢𑀁 𑀞𑀧𑁂𑀢𑁆𑀯𑀸 𑀪𑀡𑁆𑀟𑀤𑁂𑀬𑁆𑀬𑀁 𑀦 𑀳𑁄𑀢𑀻𑀢𑀺 𑀲𑀼𑀤𑀺𑀦𑁆𑀦𑀫𑁂𑀯𑀸𑀢𑀺 𑀯𑀼𑀢𑁆𑀢𑀁. 𑀅𑀲𑁆𑀲𑀸𑀫𑀺𑀓𑁂𑀦 𑀧𑀦 𑀆𑀡𑀢𑁆𑀢𑁂𑀦 𑀤𑀺𑀦𑁆𑀦𑀁 𑀪𑀡𑁆𑀟𑀁 𑀕𑀡𑁆𑀳𑀢𑁄 𑀪𑀡𑁆𑀟𑀤𑁂𑀬𑁆𑀬𑀫𑁂𑀯𑀸𑀢𑀺 𑀯𑀤𑀦𑁆𑀢𑀺, 𑀧𑀢𑁆𑀢𑀘𑀢𑀼𑀓𑁆𑀓𑁂 𑀯𑀺𑀬 𑀅𑀯𑀳𑀸𑀭𑀢𑀸𑀯𑁂𑀢𑁆𑀣 𑀬𑀼𑀢𑁆𑀢𑀸, 𑀲𑀗𑁆𑀖𑀲𑀦𑁆𑀢𑀓𑁂 𑀧𑀦 ‘‘𑀤𑁂𑀳𑀻’’𑀢𑀺 𑀯𑀼𑀢𑁆𑀢𑁂𑀧𑀺 𑀲𑀸𑀫𑀺𑀓𑀲𑁆𑀲 𑀓𑀲𑁆𑀲𑀘𑀺 𑀅𑀪𑀸𑀯𑀸 𑀲𑀫𑁆𑀫𑀢𑁂𑀦 𑀤𑀺𑀦𑁆𑀦𑁂𑀧𑀺 𑀪𑀡𑁆𑀟𑀤𑁂𑀬𑁆𑀬𑀁 𑀯𑀼𑀢𑁆𑀢𑀦𑁆𑀢𑀺 𑀕𑀳𑁂𑀢𑀩𑁆𑀩𑀁.

𑁧𑁪𑁬-𑁯. 𑀆𑀳𑀭𑀸𑀧𑁂𑀦𑁆𑀢𑁂𑀲𑀼 𑀪𑀡𑁆𑀟𑀤𑁂𑀬𑁆𑀬𑀦𑁆𑀢𑀺 ‘‘𑀕𑀳𑀺𑀢𑁂 𑀅𑀢𑁆𑀢𑀫𑀦𑁄 𑀳𑁄𑀢𑀻’’𑀢𑀺 𑀯𑀘𑀦𑀢𑁄 𑀅𑀦𑀢𑁆𑀢𑀫𑀦𑀲𑁆𑀲 𑀲𑀦𑁆𑀢𑀓𑀁 𑀕𑀳𑀺𑀢𑀫𑁆𑀧𑀺 𑀧𑀼𑀦 𑀤𑀸𑀢𑀩𑁆𑀩𑀫𑁂𑀯𑀸𑀢𑀺 𑀯𑀼𑀢𑁆𑀢𑀁. ‘‘𑀲𑀫𑁆𑀫𑀼𑀔𑀻𑀪𑀽𑀢𑁂𑀳𑀺 𑀪𑀸𑀚𑁂𑀢𑀩𑁆𑀩’’𑀦𑁆𑀢𑀺 𑀯𑀘𑀦𑀢𑁄 𑀪𑀸𑀚𑀦𑀻𑀬𑀪𑀡𑁆𑀟𑀁 𑀉𑀧𑀘𑀸𑀭𑀲𑀻𑀫𑀝𑁆𑀞𑀸𑀦𑀫𑁂𑀯 𑀧𑀸𑀧𑀼𑀡𑀸𑀢𑀻𑀢𑀺 𑀆𑀳 ‘‘𑀅𑀦𑁆𑀢𑁄𑀉𑀧𑀘𑀸𑀭𑀲𑀻𑀫𑀸𑀬𑀁 𑀞𑀺𑀢𑀲𑁆𑀲𑁂𑀯 𑀕𑀳𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺. 𑀪𑀡𑁆𑀟𑀤𑁂𑀬𑁆𑀬𑀦𑁆𑀢𑀺 𑀉𑀪𑀺𑀦𑁆𑀦𑀁 𑀲𑀸𑀮𑀬𑀪𑀸𑀯𑁂𑀧𑀺 𑀘𑁄𑀭𑀲𑁆𑀲 𑀅𑀤𑀢𑁆𑀯𑀸 𑀲𑀸𑀫𑀺𑀓𑀲𑁆𑀲𑁂𑀯 𑀤𑀸𑀢𑀩𑁆𑀩𑀁 𑀘𑁄𑀭𑁂𑀦𑀸𑀧𑀺 𑀲𑀸𑀫𑀺𑀓𑀲𑁆𑀲𑁂𑀯 𑀤𑀸𑀢𑀩𑁆𑀩𑀢𑁄. 𑀏𑀲𑁂𑀯 𑀦𑀬𑁄𑀢𑀺 𑀧𑀁𑀲𑀼𑀓𑀽𑀮𑀲𑀜𑁆𑀜𑀸𑀬 𑀕𑀳𑀺𑀢𑁂 𑀪𑀡𑁆𑀟𑀤𑁂𑀬𑁆𑀬𑀁, 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀧𑀸𑀭𑀸𑀚𑀺𑀓𑀦𑁆𑀢𑀺 𑀅𑀢𑁆𑀣𑁄.

𑀯𑀼𑀝𑁆𑀞𑀳𑀦𑁆𑀢𑁂𑀲𑀽𑀢𑀺 𑀕𑀸𑀫𑀁 𑀙𑀟𑁆𑀟𑁂𑀢𑁆𑀯𑀸 𑀧𑀮𑀸𑀬𑀦𑁆𑀢𑁂𑀲𑀼. 𑀅𑀯𑀺𑀲𑁂𑀲𑁂𑀦𑀸𑀢𑀺 𑀲𑀉𑀲𑁆𑀲𑀸𑀳𑀢𑀸𑀤𑀺𑀯𑀺𑀲𑁂𑀲𑀁 𑀅𑀧𑀭𑀸𑀫𑀲𑀺𑀢𑁆𑀯𑀸 𑀲𑀸𑀫𑀜𑁆𑀜𑀢𑁄. 𑀲𑀉𑀲𑁆𑀲𑀸𑀳𑀫𑀢𑁆𑀢𑀫𑁂𑀯 𑀆𑀧𑀢𑁆𑀢𑀺𑀪𑀸𑀯𑀲𑁆𑀲 𑀧𑀫𑀸𑀡𑀁 𑀲𑀸𑀫𑀺𑀓𑀸𑀦𑀁 𑀧𑀭𑀺𑀘𑁆𑀙𑀺𑀦𑁆𑀦𑀪𑀸𑀯𑀢𑁄. 𑀢𑀢𑁄𑀢𑀺 𑀕𑀡𑀲𑀦𑁆𑀢𑀓𑀸𑀤𑀺𑀢𑁄. 𑀓𑀼𑀮𑀲𑀗𑁆𑀕𑀳𑀡𑀢𑁆𑀣𑀸𑀬 𑀤𑁂𑀢𑀻𑀢𑀺 𑀧𑀁𑀲𑀼𑀓𑀽𑀮𑀯𑀺𑀲𑁆𑀲𑀸𑀲𑀺𑀓𑀸𑀤𑀺𑀲𑀜𑁆𑀜𑀸𑀬 𑀕𑀳𑁂𑀢𑁆𑀯𑀸 𑀤𑁂𑀢𑀺, 𑀢𑀤𑀸 𑀓𑀼𑀮𑀲𑀗𑁆𑀕𑀳𑀧𑀘𑁆𑀘𑀬𑀸 𑀘 𑀤𑀼𑀓𑁆𑀓𑀝𑀁 𑀪𑀡𑁆𑀟𑀤𑁂𑀬𑁆𑀬𑀜𑁆𑀘, 𑀣𑁂𑀬𑁆𑀬𑀘𑀺𑀢𑁆𑀢𑁂 𑀧𑀦 𑀲𑀢𑀺 𑀓𑀼𑀮𑀲𑀗𑁆𑀕𑀳𑀡𑀢𑁆𑀣𑀸𑀬 𑀕𑀡𑁆𑀳𑀢𑁄𑀧𑀺 𑀧𑀸𑀭𑀸𑀚𑀺𑀓𑀫𑁂𑀯. 𑀊𑀦𑀧𑀜𑁆𑀘𑀫𑀸𑀲𑀓𑀸𑀤𑀻𑀲𑀼 𑀓𑀼𑀮𑀤𑀽𑀲𑀓𑀤𑀼𑀓𑁆𑀓𑀝𑁂𑀦 𑀲𑀤𑁆𑀥𑀺𑀁 𑀣𑀼𑀮𑁆𑀮𑀘𑁆𑀘𑀬𑀤𑀼𑀓𑁆𑀓𑀝𑀸𑀦𑀺. 𑀲𑁂𑀦𑀸𑀲𑀦𑀢𑁆𑀣𑀸𑀬 𑀦𑀺𑀬𑀫𑀺𑀢𑀦𑁆𑀢𑀺 𑀇𑀤𑀁 𑀇𑀲𑁆𑀲𑀭𑀯𑀢𑀸𑀬 𑀤𑀤𑀢𑁄 𑀣𑀼𑀮𑁆𑀮𑀘𑁆𑀘𑀬𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀇𑀢𑀭𑀧𑀘𑁆𑀘𑀬𑀢𑁆𑀣𑀸𑀬 𑀤𑀺𑀦𑁆𑀦𑀫𑁆𑀧𑀺 𑀅𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀇𑀲𑁆𑀲𑀭𑀯𑀢𑀸𑀬 𑀓𑀼𑀮𑀲𑀗𑁆𑀕𑀳𑀡𑀢𑁆𑀣𑀸𑀬 𑀯𑀸 𑀜𑀸𑀢𑀓𑀸𑀤𑀻𑀦𑀁 𑀯𑀸 𑀤𑀤𑀢𑁄 𑀤𑀼𑀓𑁆𑀓𑀝𑀁 𑀪𑀡𑁆𑀟𑀤𑁂𑀬𑁆𑀬𑀜𑁆𑀘 𑀳𑁄𑀢𑁂𑀯. 𑀇𑀲𑁆𑀲𑀭𑀯𑀢𑀸𑀬𑀸𑀢𑀺 ‘‘𑀫𑀬𑀺 𑀤𑁂𑀦𑁆𑀢𑁂 𑀓𑁄 𑀦𑀺𑀯𑀸𑀭𑁂𑀲𑁆𑀲𑀢𑀺, 𑀅𑀳𑀫𑁂𑀯𑁂𑀢𑁆𑀣 𑀧𑀫𑀸𑀡’’𑀦𑁆𑀢𑀺 𑀏𑀯𑀁 𑀅𑀢𑁆𑀢𑀦𑁄 𑀇𑀲𑁆𑀲𑀭𑀺𑀬𑀪𑀸𑀯𑁂𑀦. 𑀣𑀼𑀮𑁆𑀮𑀘𑁆𑀘𑀬𑀦𑁆𑀢𑀺 𑀓𑀼𑀮𑀲𑀗𑁆𑀕𑀳𑀡𑀢𑁆𑀣𑀸𑀬 𑀯𑀸 𑀅𑀜𑁆𑀜𑀣𑀸 𑀯𑀸 𑀓𑀸𑀭𑀡𑁂𑀦 𑀤𑀤𑀢𑁄 𑀲𑁂𑀦𑀸𑀲𑀦𑀢𑁆𑀣𑀸𑀬 𑀦𑀺𑀬𑀫𑀺𑀢𑀲𑁆𑀲 𑀕𑀭𑀼𑀪𑀡𑁆𑀟𑀢𑀸𑀬 𑀣𑀼𑀮𑁆𑀮𑀘𑁆𑀘𑀬𑀁 𑀪𑀡𑁆𑀟𑀤𑁂𑀬𑁆𑀬𑀜𑁆𑀘. 𑀕𑀻𑀯𑀸𑀢𑀺 𑀏𑀢𑁆𑀣 𑀲𑁂𑀦𑀸𑀲𑀦𑀢𑁆𑀣𑀸𑀬 𑀦𑀺𑀬𑀫𑀺𑀢𑁂 𑀣𑀼𑀮𑁆𑀮𑀘𑁆𑀘𑀬𑁂𑀦 𑀲𑀤𑁆𑀥𑀺𑀁 𑀕𑀻𑀯𑀸, 𑀇𑀢𑀭𑀲𑁆𑀫𑀺𑀁 𑀤𑀼𑀓𑁆𑀓𑀝𑁂𑀦 𑀲𑀤𑁆𑀥𑀺𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑀼𑀔𑀸𑀤𑀺𑀢𑀫𑁂𑀯𑀸𑀢𑀺 𑀅𑀦𑁆𑀢𑁄𑀉𑀧𑀘𑀸𑀭𑀲𑀻𑀫𑀸𑀬𑀁 𑀞𑀢𑁆𑀯𑀸 𑀪𑀸𑀚𑁂𑀢𑁆𑀯𑀸 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀓𑀢𑁆𑀯𑀸 𑀔𑀸𑀤𑀺𑀢𑀢𑁆𑀢𑀸 𑀯𑀼𑀢𑁆𑀢𑀁. 𑀲𑀗𑁆𑀖𑀺𑀓𑀜𑁆𑀳𑀺 𑀯𑀺𑀳𑀸𑀭𑀧𑀝𑀺𑀩𑀤𑁆𑀥𑀁 𑀯𑁂𑀪𑀗𑁆𑀕𑀺𑀬𑀁 𑀩𑀳𑀺𑀉𑀧𑀘𑀸𑀭𑀲𑀻𑀫𑀝𑁆𑀞𑀁 𑀪𑀡𑁆𑀟𑀁 𑀅𑀦𑁆𑀢𑁄𑀉𑀧𑀘𑀸𑀭𑀝𑁆𑀞𑁂𑀳𑀺 𑀪𑀺𑀓𑁆𑀔𑀽𑀳𑀺 𑀏𑀯 𑀪𑀸𑀚𑁂𑀢𑀩𑁆𑀩𑀁, 𑀦 𑀩𑀳𑀺 𑀞𑀺𑀢𑁂𑀳𑀺 𑀉𑀧𑀘𑀸𑀭𑀲𑀻𑀫𑀸𑀬 𑀪𑀸𑀚𑁂𑀢𑀩𑁆𑀩𑀦𑁆𑀢𑀺.

𑁧𑁫𑁦. ‘‘𑀯𑀼𑀢𑁆𑀢𑁄 𑀯𑀚𑁆𑀚𑁂𑀫𑀻’’𑀢𑀺 𑀯𑀼𑀢𑁆𑀢𑀪𑀺𑀓𑁆𑀔𑀼𑀲𑁆𑀫𑀺𑀁 ‘‘𑀯𑀼𑀢𑁆𑀢𑁄 𑀯𑀚𑁆𑀚𑁂𑀳𑀻’’𑀢𑀺 𑀯𑀼𑀢𑁆𑀢𑀲𑁆𑀲 𑀧𑀘𑁆𑀙𑀸 𑀉𑀧𑁆𑀧𑀚𑁆𑀚𑀦𑀓𑀧𑀸𑀭𑀸𑀚𑀺𑀓𑀸𑀤𑀺𑀤𑁄𑀲𑀸𑀭𑁄𑀧𑀦𑀢𑁄, 𑀕𑀳𑀝𑁆𑀞𑀸𑀦𑀁 𑀯𑀸 ‘‘𑀪𑀤𑀦𑁆𑀢𑀸 𑀅𑀧𑀭𑀺𑀘𑁆𑀙𑁂𑀤𑀁 𑀓𑀢𑁆𑀯𑀸 𑀯𑀤𑀦𑁆𑀢𑀻’’𑀢𑀺 𑀏𑀯𑀁 𑀤𑁄𑀲𑀸𑀭𑁄𑀧𑀦𑀢𑁄.

𑁧𑁫𑁩-𑁫. 𑀙𑀸𑀢𑀚𑁆𑀛𑀢𑁆𑀢𑀦𑁆𑀢𑀺 𑀢𑁂𑀦 𑀙𑀸𑀢𑁂𑀦 𑀚𑀺𑀖𑀘𑁆𑀙𑀸𑀬 𑀉𑀤𑀭𑀕𑁆𑀕𑀺𑀦𑀸 𑀛𑀢𑁆𑀢𑀁, 𑀤𑀟𑁆𑀠𑀁 𑀧𑀻𑀴𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀥𑀦𑀼𑀓𑀦𑁆𑀢𑀺 𑀔𑀼𑀤𑁆𑀤𑀓𑀥𑀦𑀼𑀲𑀡𑁆𑀞𑀸𑀦𑀁 𑀮𑀕𑁆𑀕𑀦𑀓𑀤𑀡𑁆𑀟𑀁. 𑀫𑀤𑁆𑀤𑀦𑁆𑀢𑁄 𑀕𑀘𑁆𑀙𑀢𑀺, 𑀪𑀡𑁆𑀟𑀤𑁂𑀬𑁆𑀬𑀦𑁆𑀢𑀺 𑀏𑀢𑁆𑀣 𑀏𑀓𑀲𑀽𑀓𑀭𑀕𑁆𑀖𑀦𑀓𑀪𑀡𑁆𑀟𑀁 𑀤𑀸𑀢𑀩𑁆𑀩𑀁 𑀏𑀓𑀲𑁆𑀫𑀺𑀁 𑀩𑀦𑁆𑀥𑁂 𑀅𑀜𑁆𑀜𑁂𑀲𑀁 𑀢𑀢𑁆𑀣 𑀅𑀩𑀚𑁆𑀛𑀦𑀢𑁄. 𑀅𑀤𑀽𑀳𑀮𑀦𑁆𑀢𑀺 𑀬𑀦𑁆𑀢𑀧𑀸𑀲𑀸𑀡𑁄, 𑀬𑁂𑀦 𑀅𑀚𑁆𑀛𑁄𑀢𑁆𑀣𑀝𑀢𑁆𑀢𑀸 𑀫𑀺𑀕𑀸 𑀧𑀮𑀸𑀬𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀧𑀘𑁆𑀙𑀸 𑀕𑀘𑁆𑀙𑀢𑀻𑀢𑀺 𑀢𑁂𑀦 𑀓𑀢𑀧𑀬𑁄𑀕𑁂𑀦 𑀅𑀕𑀦𑁆𑀢𑁆𑀯𑀸 𑀧𑀘𑁆𑀙𑀸 𑀲𑀬𑀫𑁂𑀯 𑀕𑀘𑁆𑀙𑀢𑀺, 𑀳𑁂𑀝𑁆𑀞𑀸 𑀯𑀼𑀢𑁆𑀢𑁂𑀲𑀼𑀧𑀺 𑀈𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀏𑀲𑁂𑀯 𑀦𑀬𑁄. 𑀭𑀓𑁆𑀔𑀁 𑀬𑀸𑀘𑀺𑀢𑁆𑀯𑀸𑀢𑀺 𑀭𑀸𑀚𑀧𑀼𑀭𑀺𑀲𑀸𑀦𑀁 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀅𑀦𑀼𑀤𑁆𑀤𑀺𑀲𑁆𑀲 𑀭𑀓𑁆𑀔𑀁 𑀬𑀸𑀘𑀺𑀢𑁆𑀯𑀸. 𑀓𑀼𑀫𑀻𑀦𑀫𑀼𑀔𑀦𑁆𑀢𑀺 𑀓𑀼𑀫𑀻𑀦𑀲𑁆𑀲 𑀅𑀦𑁆𑀢𑁄 𑀫𑀘𑁆𑀙𑀸𑀦𑀁 𑀧𑀯𑀺𑀲𑀦𑀫𑀼𑀔𑀁.

𑁧𑁫𑁬. 𑀣𑁂𑀭𑀸𑀦𑀦𑁆𑀢𑀺 𑀆𑀕𑀦𑁆𑀢𑀼𑀓𑀢𑁆𑀣𑁂𑀭𑀸𑀦𑀁. 𑀢𑁂𑀲𑀫𑁆𑀧𑀻𑀢𑀺 𑀆𑀯𑀸𑀲𑀺𑀓𑀪𑀺𑀓𑁆𑀔𑀽𑀦𑀫𑁆𑀧𑀺. 𑀧𑀭𑀺𑀪𑁄𑀕𑀢𑁆𑀣𑀸𑀬𑀸𑀢𑀺 𑀲𑀗𑁆𑀖𑀺𑀓𑁂 𑀓𑀢𑁆𑀢𑀩𑁆𑀩𑀯𑀺𑀥𑀺𑀁 𑀓𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀦𑀢𑁆𑀣𑀸𑀬. 𑀕𑀳𑀡𑁂𑀢𑀺 𑀧𑀸𑀞𑀲𑁂𑀲𑁄 𑀤𑀝𑁆𑀞𑀩𑁆𑀩𑁄. 𑀬𑀢𑁆𑀣𑀸𑀢𑀺 𑀬𑀲𑁆𑀫𑀺𑀁 𑀆𑀯𑀸𑀲𑁂. 𑀅𑀜𑁆𑀜𑁂𑀲𑀦𑁆𑀢𑀺 𑀅𑀜𑁆𑀜𑁂𑀲𑀁 𑀆𑀕𑀦𑁆𑀢𑀼𑀓𑀸𑀦𑀁. 𑀢𑁂𑀲𑀼𑀧𑀺 𑀆𑀕𑀦𑁆𑀢𑀼𑀓𑀸 𑀅𑀦𑀺𑀲𑁆𑀲𑀭𑀸𑀢𑀺 𑀲𑁂𑀦𑀸𑀲𑀦𑁂 𑀦𑀺𑀭𑀦𑁆𑀢𑀭𑀁 𑀯𑀲𑀦𑁆𑀢𑀸𑀦𑀁 𑀘𑀻𑀯𑀭𑀢𑁆𑀣𑀸𑀬 𑀤𑀸𑀬𑀓𑁂𑀳𑀺 𑀪𑀺𑀓𑁆𑀔𑀽𑀳𑀺 𑀯𑀸 𑀦𑀺𑀬𑀫𑁂𑀢𑁆𑀯𑀸 𑀤𑀺𑀦𑁆𑀦𑀢𑁆𑀢𑀸 𑀪𑀸𑀚𑁂𑀢𑁆𑀯𑀸 𑀔𑀸𑀤𑀺𑀢𑀼𑀁 𑀅𑀦𑀺𑀲𑁆𑀲𑀭𑀸, 𑀆𑀕𑀦𑁆𑀢𑀼𑀓𑁂𑀳𑀺𑀧𑀺 𑀇𑀘𑁆𑀙𑀦𑁆𑀢𑁂𑀳𑀺 𑀢𑀲𑁆𑀫𑀺𑀁 𑀯𑀺𑀳𑀸𑀭𑁂 𑀯𑀲𑁆𑀲𑀸𑀦𑀸𑀤𑀻𑀲𑀼 𑀧𑀯𑀺𑀲𑀺𑀢𑁆𑀯𑀸 𑀘𑀻𑀯𑀭𑀢𑁆𑀣𑀸𑀬 𑀕𑀳𑁂𑀢𑀩𑁆𑀩𑀁. 𑀢𑁂𑀲𑀁 𑀓𑀢𑀺𑀓𑀸𑀬 𑀞𑀸𑀢𑀩𑁆𑀩𑀦𑁆𑀢𑀺 𑀲𑀩𑁆𑀩𑀸𑀦𑀺 𑀨𑀮𑀸𑀨𑀮𑀸𑀦𑀺 𑀅𑀪𑀸𑀚𑁂𑀢𑁆𑀯𑀸 ‘‘𑀏𑀢𑁆𑀢𑀓𑁂𑀲𑀼 𑀭𑀼𑀓𑁆𑀔𑁂𑀲𑀼 𑀨𑀮𑀸𑀦𑀺 𑀪𑀸𑀚𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀸𑀫, 𑀅𑀜𑁆𑀜𑁂𑀲𑀼 𑀨𑀮𑀸𑀨𑀮𑁂𑀳𑀺 𑀲𑁂𑀦𑀸𑀲𑀦𑀸𑀦𑀺 𑀧𑀝𑀺𑀚𑀕𑁆𑀕𑀺𑀲𑁆𑀲𑀸𑀫𑀸’’𑀢𑀺 𑀯𑀸, ‘‘𑀧𑀺𑀡𑁆𑀟𑀧𑀸𑀢𑀸𑀤𑀺𑀧𑀘𑁆𑀘𑀬𑀁 𑀲𑀫𑁆𑀧𑀸𑀤𑁂𑀲𑁆𑀲𑀸𑀫𑀸’’𑀢𑀺 𑀯𑀸, ‘‘𑀓𑀺𑀜𑁆𑀘𑀺𑀧𑀺 𑀅𑀪𑀸𑀚𑁂𑀢𑁆𑀯𑀸 𑀘𑀢𑀼𑀧𑀘𑁆𑀘𑀬𑀢𑁆𑀣𑀸𑀬𑁂𑀯 𑀉𑀧𑀦𑁂𑀫𑀸’’𑀢𑀺 𑀯𑀸 𑀏𑀯𑀁 𑀲𑀫𑁆𑀫𑀸 𑀉𑀧𑀦𑁂𑀦𑁆𑀢𑀸𑀦𑀁 𑀆𑀯𑀸𑀲𑀺𑀓𑀸𑀦𑀁 𑀓𑀢𑀺𑀓𑀸𑀬 𑀆𑀕𑀦𑁆𑀢𑀼𑀓𑁂𑀳𑀺 𑀞𑀸𑀢𑀩𑁆𑀩𑀁. 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 ‘‘𑀅𑀦𑀺𑀲𑁆𑀲𑀭𑀸’’𑀢𑀺 𑀯𑀘𑀦𑁂𑀦 𑀤𑀻𑀧𑀺𑀢𑁄 𑀏𑀯 𑀅𑀢𑁆𑀣𑁄, 𑀫𑀳𑀸𑀧𑀘𑁆𑀘𑀭𑀺𑀬𑀁 𑀘𑀢𑀼𑀦𑁆𑀦𑀁 𑀧𑀘𑁆𑀘𑀬𑀸𑀦𑀦𑁆𑀢𑀺𑀆𑀤𑀺𑀦𑀸 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀤𑀲𑁆𑀲𑀺𑀢𑁄. 𑀧𑀭𑀺𑀪𑁄𑀕𑀯𑀲𑁂𑀦𑁂𑀯𑀸𑀢𑀺 𑀏𑀢𑁆𑀣 𑀏𑀯-𑀲𑀤𑁆𑀤𑁄 𑀅𑀝𑁆𑀞𑀸𑀦𑀧𑁆𑀧𑀬𑀼𑀢𑁆𑀢𑁄, 𑀧𑀭𑀺𑀪𑁄𑀕𑀯𑀲𑁂𑀦 𑀢𑀫𑁂𑀯 𑀪𑀸𑀚𑁂𑀢𑁆𑀯𑀸𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 𑀯𑀺𑀳𑀸𑀭𑁂, 𑀭𑀝𑁆𑀞𑁂 𑀯𑀸.

𑀲𑁂𑀦𑀸𑀲𑀦𑀧𑀘𑁆𑀘𑀬𑀦𑁆𑀢𑀺 𑀲𑁂𑀦𑀸𑀲𑀦𑀜𑁆𑀘 𑀢𑀤𑀢𑁆𑀣𑀸𑀬 𑀦𑀺𑀬𑀫𑁂𑀢𑁆𑀯𑀸 𑀞𑀧𑀺𑀢𑀜𑁆𑀘. 𑀏𑀓𑀁 𑀯𑀸 𑀤𑁆𑀯𑁂 𑀯𑀸 𑀯𑀭𑀲𑁂𑀦𑀸𑀲𑀦𑀸𑀦𑀺 𑀞𑀧𑁂𑀢𑁆𑀯𑀸𑀢𑀺 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀧𑀼𑀦 𑀩𑁆𑀬𑀢𑀺𑀭𑁂𑀓𑀫𑀼𑀔𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀫𑀽𑀮𑀯𑀢𑁆𑀣𑀼𑀘𑁆𑀙𑁂𑀤𑀁 𑀧𑀦 𑀓𑀢𑁆𑀯𑀸 𑀦 𑀉𑀧𑀦𑁂𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁, 𑀲𑁂𑀦𑀸𑀲𑀦𑀲𑀗𑁆𑀔𑀸𑀢𑀯𑀢𑁆𑀣𑀼𑀦𑁄 𑀫𑀽𑀮𑀘𑁆𑀙𑁂𑀤𑀁 𑀓𑀢𑁆𑀯𑀸 𑀲𑀩𑁆𑀩𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀦 𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑀸𑀦𑀻𑀢𑀺 𑀅𑀢𑁆𑀣𑁄. 𑀓𑁂𑀘𑀺 𑀧𑀦𑁂𑀢𑁆𑀣 ‘‘𑀏𑀓𑀁 𑀯𑀸 𑀤𑁆𑀯𑁂 𑀯𑀸 𑀯𑀭𑀲𑁂𑀦𑀸𑀲𑀦𑀸𑀦𑀺 𑀞𑀧𑁂𑀢𑁆𑀯𑀸 𑀮𑀸𑀫𑀓𑀢𑁄 𑀧𑀝𑁆𑀞𑀸𑀬 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁂𑀳𑀺𑀧𑀺 𑀲𑁂𑀦𑀸𑀲𑀦𑀪𑀽𑀫𑀺𑀬𑁄 𑀦 𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑀸𑀢𑀺 𑀅𑀬𑀫𑀢𑁆𑀣𑁄 𑀯𑀼𑀢𑁆𑀢𑁄’’𑀢𑀺 𑀯𑀤𑀦𑁆𑀢𑀺, 𑀢𑀫𑁆𑀧𑀺 𑀬𑀼𑀢𑁆𑀢𑀫𑁂𑀯 𑀇𑀫𑀲𑁆𑀲𑀸𑀧𑀺 𑀅𑀢𑁆𑀣𑀲𑁆𑀲 𑀅𑀯𑀲𑁆𑀲𑀁 𑀯𑀢𑁆𑀢𑀩𑁆𑀩𑀢𑁄, 𑀇𑀢𑀭𑀣𑀸 𑀓𑁂𑀘𑀺 𑀲𑀳 𑀯𑀢𑁆𑀣𑀼𑀦𑀸𑀧𑀺 𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑀁 𑀫𑀜𑁆𑀜𑁂𑀬𑁆𑀬𑀼𑀁.

𑀧𑀡𑁆𑀡𑀁 𑀆𑀭𑁄𑀧𑁂𑀢𑁆𑀯𑀸𑀢𑀺 ‘‘𑀏𑀢𑁆𑀢𑀓𑁂 𑀭𑀼𑀓𑁆𑀔𑁂 𑀭𑀓𑁆𑀔𑀺𑀢𑁆𑀯𑀸 𑀢𑀢𑁄 𑀏𑀢𑁆𑀢𑀓𑀁 𑀕𑀳𑁂𑀢𑀩𑁆𑀩’’𑀦𑁆𑀢𑀺 𑀧𑀡𑁆𑀡𑀁 𑀆𑀭𑁄𑀧𑁂𑀢𑁆𑀯𑀸. 𑀦𑀺𑀫𑀺𑀢𑁆𑀢𑀲𑀜𑁆𑀜𑀁 𑀓𑀢𑁆𑀯𑀸𑀢𑀺 𑀲𑀗𑁆𑀓𑁂𑀢𑀁 𑀓𑀢𑁆𑀯𑀸. 𑀤𑀸𑀭𑀓𑀸𑀢𑀺 𑀢𑁂𑀲𑀁 𑀧𑀼𑀢𑁆𑀢𑀦𑀢𑁆𑀢𑀸𑀤𑀬𑁄 𑀬𑁂 𑀓𑁂𑀘𑀺 𑀕𑁄𑀧𑁂𑀦𑁆𑀢𑀺, 𑀢𑁂 𑀲𑀩𑁆𑀩𑁂𑀧𑀺 𑀇𑀥 ‘‘𑀤𑀸𑀭𑀓𑀸’’𑀢𑀺 𑀯𑀼𑀢𑁆𑀢𑀸. 𑀢𑀢𑁄𑀢𑀺 𑀬𑀣𑀸𑀯𑀼𑀢𑁆𑀢𑀤𑀸𑀭𑀼𑀲𑀫𑁆𑀪𑀸𑀭𑀢𑁄. 𑀆𑀧𑀼𑀘𑁆𑀙𑀺𑀢𑁆𑀯𑀸𑀢𑀺 𑀓𑀸𑀭𑀓𑀲𑀗𑁆𑀖𑀁 𑀆𑀧𑀼𑀘𑁆𑀙𑀺𑀢𑁆𑀯𑀸. 𑀢𑀁 𑀲𑀩𑁆𑀩𑀫𑁆𑀧𑀺 𑀆𑀳𑀭𑀺𑀢𑁆𑀯𑀸𑀢𑀺 𑀅𑀦𑀸𑀧𑀼𑀘𑁆𑀙𑀺𑀢𑁆𑀯𑀸𑀧𑀺 𑀢𑀸𑀯𑀓𑀸𑀮𑀺𑀓𑀁 𑀆𑀳𑀭𑀺𑀢𑁆𑀯𑀸. 𑀅𑀬𑀫𑁂𑀯 𑀪𑀺𑀓𑁆𑀔𑀼 𑀇𑀲𑁆𑀲𑀭𑁄𑀢𑀺𑀆𑀤𑀺𑀢𑁄 𑀧𑀝𑁆𑀞𑀸𑀬 𑀅𑀢𑁆𑀢𑀦𑁄 𑀲𑀦𑁆𑀢𑀓𑁂𑀳𑀺 𑀤𑀸𑀭𑀼𑀲𑀫𑁆𑀪𑀸𑀭𑀸𑀤𑀻𑀳𑀺 𑀘 𑀓𑀸𑀭𑀸𑀧𑀺𑀢𑀢𑁆𑀢𑀸 𑀧𑀝𑀺𑀚𑀕𑁆𑀕𑀺𑀢𑀢𑁆𑀢𑀸 𑀘 𑀲𑀗𑁆𑀖𑀺𑀓𑀲𑁂𑀦𑀸𑀲𑀦𑁂 𑀪𑀸𑀕𑀺𑀢𑀸𑀬 𑀘 𑀅𑀬𑀫𑁂𑀯 𑀇𑀲𑁆𑀲𑀭𑁄, 𑀦 𑀘 𑀲𑁄 𑀢𑀢𑁄 𑀯𑀼𑀝𑁆𑀞𑀸𑀧𑁂𑀢𑀩𑁆𑀩𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀉𑀤𑀓𑀧𑀽𑀚𑀦𑁆𑀢𑀺 𑀘𑁂𑀢𑀺𑀬𑀗𑁆𑀕𑀡𑁂 𑀲𑀺𑀜𑁆𑀘𑀦𑀸𑀤𑀺𑀧𑀽𑀚𑀁. 𑀯𑀢𑁆𑀢𑀲𑀻𑀲𑁂𑀦𑀸𑀢𑀺 𑀓𑁂𑀯𑀮𑀁 𑀲𑀤𑁆𑀥𑀸𑀬, 𑀦 𑀯𑁂𑀢𑀦𑀸𑀤𑀺𑀅𑀢𑁆𑀣𑀸𑀬. 𑀲𑀯𑀢𑁆𑀣𑀼𑀓𑀦𑁆𑀢𑀺 𑀲𑀳 𑀪𑀽𑀫𑀺𑀬𑀸. 𑀓𑀼𑀝𑁆𑀝𑀦𑁆𑀢𑀺 𑀕𑁂𑀳𑀪𑀺𑀢𑁆𑀢𑀺𑀁. 𑀧𑀸𑀓𑀸𑀭𑀦𑁆𑀢𑀺 𑀧𑀭𑀺𑀓𑁆𑀔𑁂𑀧𑀧𑀸𑀓𑀸𑀭𑀁. 𑀢𑀢𑁄𑀢𑀺 𑀙𑀟𑁆𑀟𑀺𑀢𑀯𑀺𑀳𑀸𑀭𑀢𑁄. 𑀢𑀢𑁄 𑀆𑀳𑀭𑀺𑀢𑁆𑀯𑀸 𑀲𑁂𑀦𑀸𑀲𑀦𑀁 𑀓𑀢𑀁 𑀳𑁄𑀢𑀻𑀢𑀺 𑀲𑀸𑀫𑀦𑁆𑀢𑀕𑀸𑀫𑀯𑀸𑀲𑀻𑀳𑀺 𑀪𑀺𑀓𑁆𑀔𑀽𑀳𑀺 𑀙𑀟𑁆𑀟𑀺𑀢𑀯𑀺𑀳𑀸𑀭𑀢𑁄 𑀤𑀸𑀭𑀼𑀲𑀫𑁆𑀪𑀸𑀭𑀸𑀤𑀺𑀁 𑀆𑀳𑀭𑀺𑀢𑁆𑀯𑀸 𑀲𑁂𑀦𑀸𑀲𑀦𑀁 𑀓𑀢𑀁 𑀳𑁄𑀢𑀺.

𑁧𑁫𑁭. ‘‘𑀧𑀼𑀕𑁆𑀕𑀮𑀺𑀓𑀧𑀭𑀺𑀪𑁄𑀕𑁂𑀦 𑀧𑀭𑀺𑀪𑀼𑀜𑁆𑀚𑀢𑀻’’𑀢𑀺 𑀯𑀼𑀢𑁆𑀢𑀫𑀢𑁆𑀣𑀁𑀬𑁂𑀯 𑀧𑀸𑀓𑀝𑀁 𑀓𑀸𑀢𑀼𑀁 ‘‘𑀆𑀕𑀢𑀸𑀕𑀢𑀸𑀦𑀁 𑀯𑀼𑀟𑁆𑀠𑀢𑀭𑀸𑀦𑀁 𑀦 𑀤𑁂𑀢𑀻’’𑀢𑀺 𑀯𑀼𑀢𑁆𑀢𑀁. 𑀘𑀢𑀼𑀪𑀸𑀕𑀉𑀤𑀓𑀲𑀫𑁆𑀪𑀺𑀦𑁆𑀦𑁂𑀢𑀺 𑀘𑀢𑀼𑀢𑁆𑀣𑀪𑀸𑀕𑁂𑀦 𑀲𑀫𑁆𑀪𑀺𑀦𑁆𑀦𑁂. 𑀧𑀸𑀴𑀺𑀬𑀁 ‘‘𑀅𑀦𑀸𑀧𑀢𑁆𑀢𑀺, 𑀪𑀺𑀓𑁆𑀔𑀯𑁂, 𑀧𑀸𑀭𑀸𑀚𑀺𑀓𑀲𑁆𑀲𑀸’’𑀢𑀺 (𑀧𑀸𑀭𑀸. 𑁧𑁫𑁭) 𑀲𑀸𑀫𑀺𑀓𑁂𑀳𑀺 𑀣𑀼𑀮𑁆𑀮𑀦𑀦𑁆𑀤𑀁 𑀉𑀤𑁆𑀤𑀺𑀲𑁆𑀲 𑀏𑀢𑀺𑀲𑁆𑀲𑀸 𑀳𑀢𑁆𑀣𑁂 𑀤𑀺𑀦𑁆𑀦𑀢𑁆𑀢𑀸, 𑀅𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀧𑀭𑀺𑀪𑀼𑀜𑁆𑀚𑀺𑀢𑀢𑁆𑀢𑀸 𑀘 𑀯𑀼𑀢𑁆𑀢𑀁. 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀧𑀭𑀺𑀪𑀼𑀢𑁆𑀢𑁂𑀧𑀺 𑀘𑀲𑁆𑀲𑀸 𑀪𑀡𑁆𑀟𑀤𑁂𑀬𑁆𑀬𑀫𑁂𑀯 𑀉𑀧𑀦𑀺𑀓𑁆𑀔𑀺𑀢𑁆𑀢𑀪𑀡𑁆𑀟𑀝𑁆𑀞𑀸𑀦𑀺𑀬𑀢𑁆𑀢𑀸. 𑀑𑀤𑀦𑀪𑀸𑀚𑀦𑀻𑀬𑀯𑀢𑁆𑀣𑀼𑀲𑁆𑀫𑀺𑀦𑁆𑀢𑀺 ‘‘𑀅𑀧𑀭𑀲𑁆𑀲 𑀪𑀸𑀕𑀁 𑀤𑁂𑀳𑀻’’𑀢𑀺 𑀆𑀕𑀢𑀯𑀢𑁆𑀣𑀼𑀲𑁆𑀫𑀺𑀁 (𑀧𑀸𑀭𑀸. 𑁧𑁪𑁧).

𑁧𑁫𑁯. 𑀢𑀲𑁆𑀲 𑀓𑀼𑀮𑀲𑁆𑀲 𑀅𑀦𑀼𑀓𑀫𑁆𑀧𑀸𑀬 𑀧𑀲𑀸𑀤𑀸𑀦𑀼𑀭𑀓𑁆𑀔𑀡𑀢𑁆𑀣𑀸𑀬𑀸𑀢𑀺𑀆𑀤𑀺𑀦𑀸 𑀓𑀼𑀮𑀲𑀗𑁆𑀕𑀳𑀢𑁆𑀣𑀁 𑀦𑀸𑀓𑀸𑀲𑀻𑀢𑀺 𑀤𑀲𑁆𑀲𑁂𑀢𑀺. ‘‘𑀬𑀸𑀯 𑀤𑀸𑀭𑀓𑀸 𑀧𑀸𑀲𑀸𑀤𑀁 𑀆𑀭𑁄𑀳𑀦𑁆𑀢𑀺, 𑀢𑀸𑀯 𑀧𑀸𑀲𑀸𑀤𑁄 𑀢𑁂𑀲𑀁 𑀲𑀦𑁆𑀢𑀺𑀓𑁂 𑀳𑁄𑀢𑀽’’𑀢𑀺 𑀧𑀼𑀩𑁆𑀩𑁂 𑀓𑀸𑀮𑀧𑀭𑀺𑀘𑁆𑀙𑁂𑀤𑀁 𑀓𑀢𑁆𑀯𑀸 𑀅𑀥𑀺𑀝𑁆𑀞𑀺𑀢𑀢𑁆𑀢𑀸 𑀏𑀯 𑀬𑀣𑀸𑀓𑀸𑀮𑀧𑀭𑀺𑀘𑁆𑀙𑁂𑀤𑀫𑁂𑀯 𑀢𑀢𑁆𑀣 𑀢𑀺𑀝𑁆𑀞𑀢𑀺, 𑀢𑀢𑁄 𑀧𑀭𑀁 𑀧𑀸𑀲𑀸𑀤𑁄 𑀲𑀬𑀫𑁂𑀯 𑀬𑀣𑀸𑀞𑀸𑀦𑀁 𑀕𑀘𑁆𑀙𑀢𑀺, 𑀢𑀣𑀸𑀕𑀫𑀦𑀜𑁆𑀘 𑀇𑀤𑁆𑀥𑀺𑀯𑀺𑀲𑁆𑀲𑀚𑁆𑀚𑀦𑁂𑀦 𑀲𑀜𑁆𑀚𑀸𑀢𑀁 𑀯𑀺𑀬 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀣𑁂𑀭𑁄 𑀇𑀤𑁆𑀥𑀺𑀁 𑀧𑀝𑀺𑀲𑀁𑀳𑀭𑀻’’𑀢𑀺. 𑀬𑀲𑁆𑀫𑀸 𑀏𑀯𑀁 𑀇𑀤𑁆𑀥𑀺𑀯𑀺𑀥𑀜𑀸𑀡𑁂𑀦 𑀓𑀭𑁄𑀦𑁆𑀢𑀲𑁆𑀲 𑀓𑀸𑀬𑀯𑀘𑀻𑀧𑀬𑁄𑀕𑀸 𑀦 𑀲𑀦𑁆𑀢𑀺 𑀣𑁂𑀬𑁆𑀬𑀘𑀺𑀢𑁆𑀢𑀜𑁆𑀘 𑀦𑀢𑁆𑀣𑀺 𑀧𑀸𑀲𑀸𑀤𑀲𑁆𑀲𑁂𑀯 𑀯𑀺𑀘𑀸𑀭𑀺𑀢𑀢𑁆𑀢𑀸, 𑀢𑀲𑁆𑀫𑀸 ‘‘𑀏𑀢𑁆𑀣 𑀅𑀯𑀳𑀸𑀭𑁄 𑀦𑀢𑁆𑀣𑀻’’𑀢𑀺 𑀣𑁂𑀭𑁄 𑀏𑀯𑀫𑀓𑀸𑀲𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀣 𑀯𑀸 𑀤𑀸𑀭𑀓𑁂𑀲𑀼 𑀅𑀦𑀼𑀓𑀫𑁆𑀧𑀸𑀬 𑀆𑀦𑀬𑀦𑀢𑁆𑀣𑀫𑁂𑀯 𑀧𑀸𑀲𑀸𑀤𑁂 𑀉𑀧𑀦𑀻𑀢𑁂 𑀧𑀸𑀲𑁂 𑀩𑀤𑁆𑀥𑀲𑀽𑀓𑀭𑀸𑀤𑀻𑀦𑀁 𑀆𑀫𑀺𑀲𑀁 𑀤𑀲𑁆𑀲𑁂𑀢𑁆𑀯𑀸 𑀞𑀸𑀦𑀸𑀘𑀸𑀯𑀦𑀁 𑀯𑀺𑀬 𑀓𑀭𑀫𑀭𑀸𑀦𑀻𑀢𑁂𑀲𑀼 𑀤𑀸𑀭𑀓𑁂𑀲𑀼 𑀧𑀸𑀲𑀸𑀤𑀁 𑀆𑀭𑀼𑀴𑁆𑀳𑁂𑀲𑀼𑀧𑀺 𑀧𑀼𑀦 𑀧𑀝𑀺𑀲𑀁𑀳𑀭𑀡𑁂 𑀘 𑀇𑀥 𑀅𑀯𑀳𑀸𑀭𑁄 𑀦𑀢𑁆𑀣𑀺 𑀓𑀸𑀭𑀼𑀜𑁆𑀜𑀸𑀥𑀺𑀧𑁆𑀧𑀸𑀬𑀢𑁆𑀢𑀸, 𑀪𑀡𑁆𑀟𑀤𑁂𑀬𑁆𑀬𑀫𑁆𑀧𑀺 𑀦 𑀳𑁄𑀢𑀺 𑀓𑀸𑀬𑀯𑀘𑀻𑀧𑀬𑁄𑀕𑀸𑀪𑀸𑀯𑀸. 𑀓𑀸𑀬𑀯𑀘𑀻𑀧𑀬𑁄𑀕𑁂 𑀲𑀢𑀺𑀬𑁂𑀯 𑀳𑀺 𑀆𑀧𑀢𑁆𑀢𑀺 𑀪𑀡𑁆𑀟𑀤𑁂𑀬𑁆𑀬𑀁 𑀯𑀸 𑀳𑁄𑀢𑀺, 𑀢𑁂𑀦𑁂𑀯 𑀪𑀕𑀯𑀸 ‘‘𑀅𑀦𑀸𑀧𑀢𑁆𑀢𑀺, 𑀪𑀺𑀓𑁆𑀔𑀯𑁂, 𑀅𑀣𑁂𑀬𑁆𑀬𑀘𑀺𑀢𑁆𑀢𑀲𑁆𑀲𑀸’’𑀢𑀺𑀆𑀤𑀺𑀁 𑀅𑀯𑀢𑁆𑀯𑀸 ‘‘𑀅𑀦𑀸𑀧𑀢𑁆𑀢𑀺, 𑀪𑀺𑀓𑁆𑀔𑀯𑁂, 𑀇𑀤𑁆𑀥𑀺𑀫𑀲𑁆𑀲 𑀇𑀤𑁆𑀥𑀺𑀯𑀺𑀲𑀬𑁂’’𑀢𑀺 (𑀧𑀸𑀭𑀸. 𑁧𑁫𑁯) 𑀏𑀢𑁆𑀢𑀓𑀫𑁂𑀯 𑀅𑀯𑁄𑀘. 𑀇𑀤𑁆𑀥𑀺𑀯𑀺𑀲𑀬𑁂𑀢𑀺 𑀘𑁂𑀢𑁆𑀣 𑀧𑀭𑀪𑀡𑁆𑀟𑀸𑀤𑀸𑀬𑀓𑀓𑀸𑀬𑀯𑀘𑀻𑀧𑀬𑁄𑀕𑀸𑀲𑀫𑀼𑀝𑁆𑀞𑀸𑀧𑀓𑀲𑁆𑀲 𑀓𑁂𑀯𑀮𑀁 𑀫𑀦𑁄𑀤𑁆𑀯𑀸𑀭𑀺𑀓𑀲𑁆𑀲 𑀅𑀣𑁂𑀬𑁆𑀬𑀘𑀺𑀢𑁆𑀢𑀪𑀽𑀢𑀲𑁆𑀲 𑀇𑀤𑁆𑀥𑀺𑀘𑀺𑀢𑁆𑀢𑀲𑁆𑀲 𑀯𑀺𑀲𑀬𑁂 𑀆𑀧𑀢𑁆𑀢𑀺 𑀦𑀸𑀫 𑀦𑀢𑁆𑀣𑀻𑀢𑀺 𑀅𑀥𑀺𑀧𑁆𑀧𑀸𑀬𑁄 𑀕𑀳𑁂𑀢𑀩𑁆𑀩𑁄. 𑀓𑀺𑀁 𑀧𑀦 𑀧𑀝𑀺𑀓𑁆𑀔𑀺𑀢𑁆𑀢𑀁 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀈𑀤𑀺𑀲𑀸𑀬 𑀅𑀥𑀺𑀝𑁆𑀞𑀸𑀦𑀺𑀤𑁆𑀥𑀺𑀬𑀸 𑀅𑀦𑀸𑀧𑀢𑁆𑀢𑀻’’𑀢𑀺. ‘‘𑀅𑀦𑀸𑀧𑀢𑁆𑀢𑀺, 𑀪𑀺𑀓𑁆𑀔𑀯𑁂, 𑀇𑀤𑁆𑀥𑀺𑀫𑀲𑁆𑀲 𑀇𑀤𑁆𑀥𑀺𑀯𑀺𑀲𑀬𑁂’’𑀢𑀺 𑀳𑀺 𑀇𑀫𑀺𑀦𑀸𑀬𑁂𑀯 𑀲𑀼𑀢𑁆𑀢𑁂𑀦 𑀅𑀥𑀺𑀝𑁆𑀞𑀸𑀦𑀺𑀤𑁆𑀥𑀺𑀬𑀸 𑀅𑀧𑁆𑀧𑀝𑀺𑀓𑁆𑀔𑀺𑀢𑁆𑀢𑀪𑀸𑀯𑁄 𑀲𑀺𑀚𑁆𑀛𑀢𑀺. 𑀅𑀢𑁆𑀢𑀦𑁄 𑀧𑀓𑀢𑀺𑀯𑀡𑁆𑀡𑀁 𑀅𑀯𑀺𑀚𑀳𑀺𑀢𑁆𑀯𑀸 𑀩𑀳𑀺𑀤𑁆𑀥𑀸 𑀳𑀢𑁆𑀣𑀺𑀆𑀤𑀺𑀤𑀲𑁆𑀲𑀦𑀁, ‘‘𑀏𑀓𑁄𑀧𑀺 𑀳𑀼𑀢𑁆𑀯𑀸 𑀩𑀳𑀼𑀥𑀸 𑀳𑁄𑀢𑀻’’𑀢𑀺 (𑀤𑀻. 𑀦𑀺. 𑁧.𑁨𑁩𑁮, 𑁨𑁩𑁯; 𑀫. 𑀦𑀺. 𑁧.𑁧𑁪𑁭; 𑀧𑀝𑀺. 𑀫. 𑁧.𑁧𑁦𑁨) 𑀆𑀕𑀢𑀜𑁆𑀘 𑀅𑀥𑀺𑀝𑁆𑀞𑀸𑀦𑀯𑀲𑁂𑀦 𑀦𑀺𑀧𑁆𑀨𑀦𑁆𑀦𑀢𑁆𑀢𑀸 𑀅𑀥𑀺𑀝𑁆𑀞𑀸𑀦𑀺𑀤𑁆𑀥𑀺 𑀦𑀸𑀫, ‘‘𑀲𑁄 𑀧𑀓𑀢𑀺𑀯𑀡𑁆𑀡𑀁 𑀯𑀺𑀚𑀳𑀺𑀢𑁆𑀯𑀸 𑀓𑀼𑀫𑀸𑀭𑀓𑀯𑀡𑁆𑀡𑀁 𑀯𑀸 𑀤𑀲𑁆𑀲𑁂𑀢𑀺, 𑀦𑀸𑀕𑀯𑀡𑁆𑀡𑀁…𑀧𑁂… 𑀯𑀺𑀯𑀺𑀥𑀫𑁆𑀧𑀺 𑀲𑁂𑀦𑀸𑀩𑁆𑀬𑀽𑀳𑀁 𑀤𑀲𑁆𑀲𑁂𑀢𑀻’’𑀢𑀺 (𑀧𑀝𑀺. 𑀫. 𑁩.𑁧𑁩) 𑀏𑀯𑀁 𑀆𑀕𑀢𑀸 𑀇𑀤𑁆𑀥𑀺 𑀧𑀓𑀢𑀺𑀯𑀡𑁆𑀡𑀯𑀺𑀚𑀳𑀦𑀯𑀺𑀓𑀸𑀭𑀯𑀲𑁂𑀦 𑀧𑀯𑀢𑁆𑀢𑀢𑁆𑀢𑀸 𑀯𑀺𑀓𑀼𑀩𑁆𑀩𑀦𑀺𑀤𑁆𑀥𑀺 𑀦𑀸𑀫. 𑀅𑀢𑁆𑀢𑀦𑁄 𑀧𑀦 𑀧𑀓𑀢𑀺𑀭𑀽𑀧𑀁 𑀬𑀣𑀸𑀲𑀪𑀸𑀯𑁂𑀦 𑀞𑀧𑁂𑀢𑁆𑀯𑀸𑀯 𑀩𑀳𑀺 𑀳𑀢𑁆𑀣𑀺𑀆𑀤𑀺𑀤𑀲𑁆𑀲𑀦𑀁 𑀯𑀺𑀓𑀼𑀩𑁆𑀩𑀦𑀺𑀤𑁆𑀥𑀺 𑀦𑀸𑀫 𑀦 𑀳𑁄𑀢𑀺, 𑀅𑀢𑁆𑀢𑀦𑁄 𑀭𑀽𑀧𑀫𑁂𑀯 𑀳𑀢𑁆𑀣𑀺𑀆𑀤𑀺𑀭𑀽𑀧𑁂𑀦 𑀦𑀺𑀫𑁆𑀫𑀸𑀦𑀁 𑀯𑀺𑀓𑀼𑀩𑁆𑀩𑀦𑀺𑀤𑁆𑀥𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀧𑀭𑀸𑀚𑀺𑀢𑀓𑀺𑀮𑁂𑀲𑁂𑀦𑀸𑀢𑀺 𑀯𑀺𑀚𑀺𑀢𑀓𑀺𑀮𑁂𑀲𑁂𑀦, 𑀦𑀺𑀓𑁆𑀓𑀺𑀮𑁂𑀲𑁂𑀦𑀸𑀢𑀺 𑀅𑀢𑁆𑀣𑁄. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂, 𑀢𑁂𑀦 𑀤𑀼𑀢𑀺𑀬𑀧𑀸𑀭𑀸𑀚𑀺𑀓𑀲𑀺𑀓𑁆𑀔𑀸𑀧𑀤𑁂𑀦 𑀲𑀫𑀁 𑀅𑀜𑁆𑀜𑀁 𑀅𑀦𑁂𑀓𑀦𑀬𑀯𑁄𑀓𑀺𑀡𑁆𑀡𑀁 𑀕𑀫𑁆𑀪𑀻𑀭𑀢𑁆𑀣𑀯𑀺𑀦𑀺𑀘𑁆𑀙𑀬𑀁 𑀓𑀺𑀜𑁆𑀘𑀺 𑀲𑀺𑀓𑁆𑀔𑀸𑀧𑀤𑀁 𑀦 𑀯𑀺𑀚𑁆𑀚𑀢𑀻𑀢𑀺 𑀬𑁄𑀚𑀦𑀸. 𑀢𑀢𑁆𑀣 𑀅𑀢𑁆𑀣𑁄 𑀦𑀸𑀫 𑀧𑀸𑀴𑀺𑀅𑀢𑁆𑀣𑁄, 𑀯𑀺𑀦𑀺𑀘𑁆𑀙𑀬𑁄 𑀧𑀸𑀴𑀺𑀫𑀼𑀢𑁆𑀢𑀓𑀯𑀺𑀦𑀺𑀘𑁆𑀙𑀬𑁄, 𑀢𑁂 𑀕𑀫𑁆𑀪𑀻𑀭𑀸 𑀬𑀲𑁆𑀫𑀺𑀁, 𑀢𑀁 𑀕𑀫𑁆𑀪𑀻𑀭𑀢𑁆𑀣𑀯𑀺𑀦𑀺𑀘𑁆𑀙𑀬𑀁. 𑀯𑀢𑁆𑀣𑀼𑀫𑁆𑀳𑀺 𑀑𑀢𑀺𑀡𑁆𑀡𑁂𑀢𑀺 𑀘𑁄𑀤𑀦𑀸𑀯𑀲𑁂𑀦 𑀯𑀸 𑀅𑀢𑁆𑀢𑀦𑀸𑀯 𑀅𑀢𑁆𑀢𑀦𑁄 𑀯𑀻𑀢𑀺𑀓𑁆𑀓𑀫𑀸𑀭𑁄𑀘𑀦𑀯𑀲𑁂𑀦 𑀯𑀸 𑀲𑀗𑁆𑀖𑀫𑀚𑁆𑀛𑁂 𑀅𑀤𑀺𑀦𑁆𑀦𑀸𑀤𑀸𑀦𑀯𑀢𑁆𑀣𑀼𑀲𑁆𑀫𑀺𑀁 𑀑𑀢𑀺𑀡𑁆𑀡𑁂. 𑀏𑀢𑁆𑀣𑀸𑀢𑀺 𑀑𑀢𑀺𑀡𑁆𑀡𑀯𑀢𑁆𑀣𑀼𑀫𑁆𑀳𑀺. 𑀯𑀺𑀦𑀺𑀘𑁆𑀙𑀬𑁄𑀢𑀺 𑀆𑀧𑀢𑁆𑀢𑀸𑀦𑀸𑀧𑀢𑁆𑀢𑀺𑀦𑀺𑀬𑀫𑀦𑀁. 𑀓𑀧𑁆𑀧𑀺𑀬𑁂𑀧𑀺 𑀘 𑀯𑀢𑁆𑀣𑀼𑀲𑁆𑀫𑀺𑀦𑁆𑀢𑀺 𑀅𑀢𑁆𑀢𑀦𑀸 𑀕𑀳𑁂𑀢𑀼𑀁 𑀬𑀼𑀢𑁆𑀢𑁂 𑀫𑀸𑀢𑀸𑀧𑀺𑀢𑀸𑀤𑀻𑀦𑀁 𑀲𑀦𑁆𑀢𑀓𑁂𑀧𑀺.

𑀇𑀢𑀺 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬 𑀯𑀺𑀦𑀬𑀝𑁆𑀞𑀓𑀣𑀸𑀬 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁

𑀤𑀼𑀢𑀺𑀬𑀧𑀸𑀭𑀸𑀚𑀺𑀓𑀯𑀡𑁆𑀡𑀦𑀸𑀦𑀬𑁄 𑀦𑀺𑀝𑁆𑀞𑀺𑀢𑁄.