𑁩. 𑀲𑀻𑀮𑀝𑁆𑀞𑀺𑀢𑀺𑀯𑀕𑁆𑀕𑁄

𑁧-𑁨. 𑀲𑀻𑀮𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁩𑁮𑁭-𑁩𑁮𑁮. 𑀲𑀻𑀮𑀸𑀦𑀻𑀢𑀺 𑀩𑀳𑀼𑀯𑀘𑀦𑀁 𑀅𑀦𑁂𑀓𑀯𑀺𑀥𑀢𑁆𑀢𑀸 𑀲𑀻𑀮𑀲𑁆𑀲. 𑀢𑀜𑁆𑀳𑀺 𑀲𑀻𑀮𑀦𑀝𑁆𑀞𑁂𑀦 𑀏𑀓𑀯𑀺𑀥𑀫𑁆𑀧𑀺 𑀘𑀸𑀭𑀺𑀢𑁆𑀢𑀸𑀤𑀺𑀯𑀲𑁂𑀦 𑀅𑀦𑁂𑀓𑀯𑀺𑀥𑀁. 𑀢𑁂𑀦𑀸𑀳 𑁋 ‘‘𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀸𑀦𑀻’’𑀢𑀺. 𑀧𑀜𑁆𑀳𑀫𑀕𑁆𑀕𑁄𑀢𑀺 𑀜𑀸𑀢𑀼𑀁 𑀇𑀘𑁆𑀙𑀺𑀢𑀲𑁆𑀲 𑀅𑀢𑁆𑀣𑀲𑁆𑀲 𑀯𑀻𑀫𑀁𑀲𑀦𑀁. 𑀢𑁂𑀦𑀸𑀳 𑁋 ‘‘𑀧𑀜𑁆𑀳𑀕𑀯𑁂𑀲𑀦’’𑀦𑁆𑀢𑀺.

𑁩-𑁫. 𑀧𑀭𑀺𑀳𑀸𑀦𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁩𑁮𑁯-𑁩𑁯𑁧. 𑀧𑀼𑀕𑁆𑀕𑀮𑀯𑀲𑁂𑀦 𑀧𑀭𑀺𑀳𑀸𑀦𑀁 𑀳𑁄𑀢𑀺 𑀦 𑀥𑀫𑁆𑀫𑀯𑀲𑁂𑀦. 𑀬𑁄 𑀦 𑀪𑀸𑀯𑁂𑀢𑀺, 𑀢𑀲𑁆𑀲𑁂𑀯 𑀧𑀭𑀺𑀳𑀸𑀬𑀢𑀺. 𑀢𑁂𑀦𑀸𑀳 ‘‘𑀬𑁄 𑀳𑀻’’𑀢𑀺𑀆𑀤𑀺.

𑁬. 𑀧𑀤𑁂𑀲𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁯𑁨. 𑀧𑀤𑁂𑀲𑀢𑁄 𑀪𑀸𑀯𑀺𑀢𑀢𑁆𑀢𑀸𑀢𑀺 𑀏𑀓𑀤𑁂𑀲𑀢𑁄 𑀪𑀸𑀯𑀺𑀢𑀢𑁆𑀢𑀸 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀬𑀸 𑀅𑀦𑀦𑀼𑀧𑁆𑀧𑀢𑁆𑀢𑀢𑁆𑀢𑀸. 𑀢𑁂𑀦𑀸𑀳 𑁋 ‘‘𑀘𑀢𑁆𑀢𑀸𑀭𑁄 𑀳𑀺 𑀫𑀕𑁆𑀕𑁂’’𑀢𑀺𑀆𑀤𑀺.

𑁭. 𑀲𑀫𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁯𑁩. 𑀲𑀫𑀢𑁆𑀢𑀸 𑀪𑀸𑀯𑀺𑀢𑀢𑁆𑀢𑀸𑀢𑀺 𑀧𑀭𑀺𑀬𑀢𑁆𑀢𑀸 𑀪𑀸𑀯𑀺𑀢𑀢𑁆𑀢𑀸.

𑁮-𑁧𑁦. 𑀮𑁄𑀓𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁩𑁯𑁪-𑁩𑁯𑁬. 𑀫𑀳𑀸𑀯𑀺𑀲𑀬𑀢𑁆𑀢𑀸 𑀫𑀳𑀢𑀺𑀬𑁄 𑀅𑀪𑀺𑀜𑁆𑀜𑀸 𑀏𑀢𑀲𑁆𑀲𑀸𑀢𑀺 𑀫𑀳𑀸𑀪𑀺𑀜𑁆𑀜𑁄, 𑀢𑀲𑁆𑀲 𑀪𑀸𑀯𑁄𑀢𑀺 𑀲𑀩𑁆𑀩𑀁 𑀯𑀢𑁆𑀢𑀩𑁆𑀩𑀁. ‘‘𑀲𑀢𑀢𑀯𑀺𑀳𑀸𑀭𑀯𑀲𑁂𑀦 𑀯𑀼𑀢𑁆𑀢’’𑀦𑁆𑀢𑀺 𑀯𑀢𑁆𑀯𑀸 𑀢𑀫𑀢𑁆𑀣𑀁 𑀧𑀸𑀓𑀝𑀁 𑀓𑀸𑀢𑀼𑀁 ‘‘𑀣𑁂𑀭𑁄 𑀓𑀺𑀭𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀲𑁆𑀲𑀸𑀢𑀺 𑀣𑁂𑀭𑀲𑁆𑀲. 𑀆𑀯𑀚𑁆𑀚𑀦𑀲𑁆𑀲 𑀕𑀢𑀺𑀦𑁆𑀢𑀺 𑀏𑀓𑀸𑀯𑀚𑁆𑀚𑀦𑀲𑁆𑀲𑁂𑀯 𑀕𑀫𑀦𑀯𑀻𑀣𑀺𑀁. 𑀅𑀦𑀼𑀩𑀦𑁆𑀥𑀢𑀺 𑀘𑀓𑁆𑀓𑀯𑀸𑀴𑀸𑀦𑀁 𑀲𑀳𑀲𑁆𑀲𑀁 𑀏𑀓𑀸𑀯𑀚𑁆𑀚𑀦𑁂𑀦𑁂𑀯 𑀲𑀳𑀲𑁆𑀲𑀮𑁄𑀓𑀥𑀸𑀢𑀼𑀬𑀸 𑀇𑀘𑁆𑀙𑀺𑀢𑀫𑀢𑁆𑀣𑀁 𑀚𑀸𑀦𑀺𑀢𑀼𑀁 𑀲𑀫𑀢𑁆𑀣𑁄𑀢𑀺 𑀤𑀲𑁆𑀲𑁂𑀢𑀺.

𑀲𑀻𑀮𑀝𑁆𑀞𑀺𑀢𑀺𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.