𑁩. 𑀲𑀢𑀺𑀧𑀝𑁆𑀞𑀸𑀦𑀲𑀁𑀬𑀼𑀢𑁆𑀢𑀁

𑁧. 𑀅𑀫𑁆𑀩𑀧𑀸𑀮𑀺𑀯𑀕𑁆𑀕𑁄

𑁧. 𑀅𑀫𑁆𑀩𑀧𑀸𑀮𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁬𑁭. 𑀏𑀓𑀸𑀬𑀦𑁆𑀯𑀸𑀬𑀦𑁆𑀢𑀺 𑀲𑀦𑁆𑀥𑀺𑀯𑀲𑁂𑀦 𑀯𑀼𑀢𑁆𑀢𑀁 𑀑-𑀓𑀸𑀭𑀲𑁆𑀲 𑀯-𑀓𑀸𑀭𑀁 𑀅-𑀓𑀸𑀭𑀲𑁆𑀲 𑀤𑀻𑀖𑀁 𑀓𑀢𑁆𑀯𑀸. 𑀅𑀬𑀁 𑀓𑀺𑀭 𑀲𑀁𑀬𑀼𑀢𑁆𑀢𑀸𑀪𑀺𑀮𑀸𑀧𑁄, 𑀢𑀢𑁆𑀣 𑀅𑀬𑀦-𑀲𑀤𑁆𑀤𑁄 𑀫𑀕𑁆𑀕𑀧𑀭𑀺𑀬𑀸𑀬𑁄. 𑀦 𑀓𑁂𑀯𑀮𑀁 𑀅𑀬𑀫𑁂𑀯, 𑀅𑀣 𑀔𑁄 𑀅𑀜𑁆𑀜𑁂𑀧𑀺 𑀫𑀕𑁆𑀕𑀧𑀭𑀺𑀬𑀸𑀬𑀸𑀢𑀺 𑀧𑀤𑀼𑀤𑁆𑀥𑀸𑀭𑀁 𑀓𑀭𑁄𑀦𑁆𑀢𑁄 ‘‘𑀫𑀕𑁆𑀕𑀲𑁆𑀲 𑀳𑀻’’𑀢𑀺𑀆𑀤𑀺𑀁 𑀯𑀢𑁆𑀯𑀸 𑀬𑀤𑀺 𑀫𑀕𑁆𑀕𑀧𑀭𑀺𑀬𑀸𑀬𑁄 𑀆𑀬𑀦-𑀲𑀤𑁆𑀤𑁄, 𑀓𑀲𑁆𑀫𑀸 𑀧𑀼𑀦 𑀫𑀕𑁆𑀕𑁄𑀢𑀺 𑀯𑀼𑀢𑁆𑀢𑀦𑁆𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀢𑀲𑁆𑀫𑀸’’𑀢𑀺𑀆𑀤𑀺. 𑀢𑀢𑁆𑀣 𑀏𑀓𑀫𑀕𑁆𑀕𑁄𑀢𑀺 𑀏𑀓𑁄𑀯 𑀫𑀕𑁆𑀕𑁄. 𑀦 𑀳𑀺 𑀦𑀺𑀩𑁆𑀩𑀸𑀦𑀕𑀸𑀫𑀺𑀫𑀕𑁆𑀕𑁄 𑀅𑀜𑁆𑀜𑁄 𑀅𑀢𑁆𑀣𑀻𑀢𑀺. 𑀦𑀦𑀼 𑀲𑀢𑀺𑀧𑀝𑁆𑀞𑀸𑀦𑀁 𑀇𑀥 𑀫𑀕𑁆𑀕𑁄𑀢𑀺 𑀅𑀥𑀺𑀧𑁆𑀧𑁂𑀢𑀁, 𑀢𑀤𑀜𑁆𑀜𑁂𑀧𑀺 𑀩𑀳𑀽 𑀫𑀕𑁆𑀕𑀥𑀫𑁆𑀫𑀸 𑀅𑀢𑁆𑀣𑀻𑀢𑀺? 𑀲𑀘𑁆𑀘𑀁 𑀅𑀢𑁆𑀣𑀺, 𑀢𑁂 𑀧𑀦 𑀲𑀢𑀺𑀧𑀝𑁆𑀞𑀸𑀦𑀕𑁆𑀕𑀳𑀡𑁂𑀦𑁂𑀯 𑀕𑀳𑀺𑀢𑀸 𑀢𑀤𑀯𑀺𑀦𑀸𑀪𑀸𑀯𑀢𑁄. 𑀢𑀣𑀸 𑀳𑀺 𑀜𑀸𑀡𑀯𑀻𑀭𑀺𑀬𑀸𑀤𑀬𑁄 𑀦𑀺𑀤𑁆𑀤𑁂𑀲𑁂 𑀕𑀳𑀺𑀢𑀸, 𑀉𑀤𑁆𑀤𑁂𑀲𑁂 𑀲𑀢𑀺𑀬𑀸 𑀏𑀯 𑀕𑀳𑀡𑀁 𑀯𑁂𑀦𑁂𑀬𑁆𑀬𑀚𑁆𑀛𑀸𑀲𑀬𑀯𑀲𑁂𑀦𑀸𑀢𑀺 𑀤𑀝𑁆𑀞𑀩𑁆𑀩𑀁, 𑀲𑀢𑀺𑀬𑀸 𑀫𑀕𑁆𑀕𑀪𑀸𑀯𑀤𑀲𑁆𑀲𑀦𑀢𑁆𑀣𑀜𑁆𑀘. 𑀦 𑀤𑁆𑀯𑁂𑀥𑀸𑀧𑀣𑀪𑀽𑀢𑁄𑀢𑀺 𑀇𑀫𑀺𑀦𑀸 𑀇𑀫𑀲𑁆𑀲 𑀤𑁆𑀯𑀬𑀪𑀸𑀯𑀸𑀪𑀸𑀯𑀁 𑀯𑀺𑀬 𑀅𑀦𑀺𑀩𑁆𑀩𑀸𑀦𑀕𑀸𑀫𑀺𑀪𑀸𑀯𑀸𑀪𑀸𑀯𑀜𑁆𑀘 𑀤𑀲𑁆𑀲𑁂𑀢𑀺. 𑀦𑀺𑀩𑁆𑀩𑀸𑀦𑀕𑀫𑀦𑀝𑁆𑀞𑁂𑀦𑀸𑀢𑀺 𑀦𑀺𑀩𑁆𑀩𑀸𑀦𑀁 𑀕𑀘𑁆𑀙𑀢𑀺 𑀏𑀢𑁂𑀦𑀸𑀢𑀺 𑀦𑀺𑀩𑁆𑀩𑀸𑀦𑀕𑀫𑀦𑀁, 𑀲𑁄 𑀏𑀯 𑀅𑀯𑀺𑀧𑀭𑀻𑀢𑀪𑀸𑀯𑀦𑀸𑀬 𑀅𑀢𑁆𑀣𑁄, 𑀢𑁂𑀦 𑀦𑀺𑀩𑁆𑀩𑀸𑀦𑀕𑀫𑀦𑀝𑁆𑀞𑁂𑀦, 𑀦𑀺𑀩𑁆𑀩𑀸𑀦𑀸𑀥𑀺𑀕𑀫𑀽𑀧𑀸𑀬𑀢𑀸𑀬𑀸𑀢𑀺 𑀅𑀢𑁆𑀣𑁄. 𑀫𑀕𑁆𑀕𑀦𑀻𑀬𑀝𑁆𑀞𑁂𑀦𑀸𑀢𑀺 𑀕𑀯𑁂𑀲𑀺𑀢𑀩𑁆𑀩𑀢𑀸𑀬.

𑀭𑀸𑀕𑀸𑀤𑀻𑀳𑀻𑀢𑀺 ‘‘𑀭𑀸𑀕𑁄 𑀫𑀮𑀁, 𑀤𑁄𑀲𑁄 𑀫𑀮𑀁, 𑀫𑁄𑀳𑁄 𑀫𑀮’’𑀦𑁆𑀢𑀺 (𑀯𑀺𑀪. 𑁯𑁨𑁪) 𑀏𑀯𑀁 𑀯𑀼𑀢𑁆𑀢𑁂𑀳𑀺 𑀭𑀸𑀕𑀸𑀤𑀻𑀳𑀺 𑀫𑀮𑁂𑀳𑀺. 𑀲𑀸 𑀧𑀦𑀸𑀬𑀁 𑀲𑀁𑀓𑀺𑀮𑀺𑀝𑁆𑀞𑀘𑀺𑀢𑁆𑀢𑀸𑀦𑀁 𑀯𑀺𑀲𑀼𑀤𑁆𑀥𑀺 𑀲𑀺𑀚𑁆𑀛𑀫𑀸𑀦𑀸 𑀬𑀲𑁆𑀫𑀸 𑀲𑁄𑀓𑀸𑀤𑀻𑀦𑀁 𑀅𑀦𑀼𑀧𑁆𑀧𑀸𑀤𑀸𑀬 𑀲𑀁𑀯𑀢𑁆𑀢𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀲𑁄𑀓𑀧𑀭𑀺𑀤𑁂𑀯𑀸𑀦𑀁 𑀲𑀫𑀢𑀺𑀓𑁆𑀓𑀫𑀸𑀬𑀸’’𑀢𑀺𑀆𑀤𑀺. 𑀢𑀢𑁆𑀣 𑀲𑁄𑀘𑀦𑀁 𑀜𑀸𑀢𑀺𑀩𑁆𑀬𑀲𑀦𑀸𑀤𑀺𑀦𑀺𑀫𑀺𑀢𑁆𑀢𑀁 𑀘𑁂𑀢𑀲𑁄 𑀲𑀦𑁆𑀢𑀸𑀧𑁄 𑀅𑀦𑁆𑀢𑁄𑀦𑀺𑀚𑁆𑀛𑀸𑀦𑀁 𑀲𑁄𑀓𑁄. 𑀜𑀸𑀢𑀺𑀩𑁆𑀬𑀲𑀦𑀸𑀤𑀺𑀦𑀺𑀫𑀺𑀢𑁆𑀢𑀫𑁂𑀯 𑀲𑁄𑀓𑀸𑀥𑀺𑀓𑀢𑀸𑀚𑀦𑀺𑀢𑁄 ‘‘𑀓𑀳𑀁 𑀏𑀓𑀧𑀼𑀢𑁆𑀢𑀓𑀸’’𑀢𑀺𑀆𑀤𑀺𑀦𑀸 𑀧𑀭𑀺𑀤𑁂𑀯𑀦𑀯𑀲𑁂𑀦 𑀯𑀸𑀘𑀸𑀯𑀺𑀧𑁆𑀧𑀮𑀸𑀧𑁄 𑀧𑀭𑀺𑀤𑁂𑀯𑀦𑀁 𑀧𑀭𑀺𑀤𑁂𑀯𑁄. 𑀢𑀲𑁆𑀲 𑀆𑀬𑀢𑀺𑀁 𑀅𑀦𑀼𑀧𑁆𑀧𑀚𑁆𑀚𑀦𑀁 𑀇𑀥 𑀲𑀫𑀢𑀺𑀓𑁆𑀓𑀫𑁄𑀢𑀺 𑀆𑀳 ‘‘𑀧𑀳𑀸𑀦𑀸𑀬𑀸’’𑀢𑀺. 𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀸𑀦𑀦𑁆𑀢𑀺 𑀏𑀢𑁆𑀣 𑀘𑁂𑀢𑀲𑀺𑀓𑀤𑀼𑀓𑁆𑀔𑀢𑀸𑀬 𑀤𑁄𑀫𑀦𑀲𑁆𑀲𑀲𑁆𑀲𑀧𑀺 𑀤𑀼𑀓𑁆𑀔𑀲𑀤𑁆𑀤𑁂𑀦𑁂𑀯 𑀕𑀳𑀡𑁂 𑀲𑀺𑀤𑁆𑀥𑁂 𑀲𑀤𑁆𑀤𑁂𑀦 𑀅𑀦𑀺𑀯𑀢𑁆𑀢𑀦𑀢𑁄 𑀲𑀸𑀫𑀜𑁆𑀜𑀚𑁄𑀢𑀦𑀸𑀬 𑀯𑀺𑀲𑁂𑀲𑀯𑀘𑀦𑀁 𑀲𑁂𑀝𑁆𑀞𑀦𑁆𑀢𑀺 ‘‘𑀤𑁄𑀫𑀦𑀲𑁆𑀲𑀸𑀦’’𑀦𑁆𑀢𑁂𑀯 𑀯𑀼𑀢𑁆𑀢𑀁. 𑀘𑁂𑀢𑀲𑀺𑀓𑀤𑁄𑀫𑀦𑀲𑁆𑀲𑀲𑁆𑀲𑀸𑀢𑀺 𑀪𑀽𑀢𑀓𑀣𑀦𑀁 𑀤𑀝𑁆𑀞𑀩𑁆𑀩𑀁. 𑀜𑀸𑀬𑀢𑀺 𑀏𑀢𑁂𑀦 𑀬𑀸𑀣𑀸𑀯𑀢𑁄 𑀧𑀝𑀺𑀯𑀺𑀚𑁆𑀛𑀻𑀬𑀢𑀺 𑀘𑀢𑀼𑀲𑀘𑁆𑀘𑀦𑁆𑀢𑀺 𑀜𑀸𑀬𑁄 𑀯𑀼𑀘𑁆𑀘𑀢𑀺 𑀅𑀭𑀺𑀬𑀫𑀕𑁆𑀕𑁄. 𑀦𑀦𑀼 𑀅𑀬𑀫𑁆𑀧𑀺 𑀫𑀕𑁆𑀕𑁄, 𑀓𑀺𑀁 𑀫𑀕𑁆𑀕𑁄 𑀏𑀯 𑀫𑀕𑁆𑀕𑀲𑁆𑀲 𑀅𑀥𑀺𑀕𑀫𑀸𑀬 𑀳𑁄𑀢𑀻𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 𑁋 ‘‘𑀅𑀬𑀁 𑀳𑀻’’𑀢𑀺𑀆𑀤𑀺. 𑀢𑀡𑁆𑀳𑀸𑀯 𑀓𑀫𑁆𑀫𑀓𑀺𑀮𑁂𑀲𑀯𑀺𑀧𑀸𑀓𑀸𑀦𑀁 𑀯𑀺𑀦𑀦𑀝𑁆𑀞𑁂𑀦 𑀲𑀁𑀲𑀺𑀩𑁆𑀩𑀦𑀝𑁆𑀞𑁂𑀦 𑀯𑀸𑀦𑀁. 𑀢𑁂𑀦 𑀢𑀡𑁆𑀳𑀸𑀯𑀸𑀦𑁂𑀦 𑀯𑀺𑀭𑀳𑀺𑀢𑀢𑁆𑀢𑀸 𑀢𑀲𑁆𑀲 𑀅𑀪𑀸𑀯𑀸𑀢𑀺 𑀅𑀢𑁆𑀣𑁄. 𑀅𑀢𑁆𑀢𑀧𑀘𑁆𑀘𑀓𑁆𑀔𑀸𑀬𑀸𑀢𑀺 𑀅𑀢𑁆𑀢𑀧𑀘𑁆𑀘𑀓𑁆𑀔𑀢𑁆𑀣𑀸𑀬.

𑀯𑀡𑁆𑀡𑀪𑀸𑀲𑀦𑀦𑁆𑀢𑀺 𑀧𑀲𑀁𑀲𑀸𑀯𑀘𑀦𑀁. 𑀯𑀺𑀲𑀼𑀤𑁆𑀥𑀺𑀦𑁆𑀢𑀺 𑀯𑀺𑀲𑀼𑀚𑁆𑀛𑀦𑀁 𑀓𑀺𑀮𑁂𑀲𑀧𑁆𑀧𑀳𑀸𑀦𑀁. 𑀉𑀕𑁆𑀕𑀳𑁂𑀢𑀩𑁆𑀩𑀦𑁆𑀢𑀺 𑀏𑀢𑁆𑀣 𑀯𑀸𑀘𑀼𑀕𑁆𑀕𑀢𑀓𑀭𑀡𑀁 𑀉𑀕𑁆𑀕𑀳𑁄. 𑀧𑀭𑀺𑀘𑀬𑀓𑀭𑀡𑀁 𑀧𑀭𑀺𑀧𑀼𑀘𑁆𑀙𑀸𑀫𑀽𑀮𑀓𑀢𑁆𑀢𑀸 𑀢𑀕𑁆𑀕𑀳𑀡𑁂𑀦𑁂𑀯 𑀕𑀳𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀦 𑀢𑀢𑁄 𑀳𑁂𑀝𑁆𑀞𑀸𑀢𑀺 𑀇𑀥 𑀅𑀥𑀺𑀧𑁆𑀧𑁂𑀢𑀓𑀸𑀬𑀸𑀤𑀻𑀦𑀁 𑀯𑁂𑀤𑀦𑀸𑀤𑀺𑀲𑀪𑀸𑀯𑀢𑁆𑀢𑀸𑀪𑀸𑀯𑀸 𑀓𑀸𑀬𑀯𑁂𑀤𑀦𑀸𑀘𑀺𑀢𑁆𑀢𑀯𑀺𑀫𑀼𑀢𑁆𑀢𑀲𑁆𑀲 𑀢𑁂𑀪𑀽𑀫𑀓𑀥𑀫𑁆𑀫𑀲𑁆𑀲 𑀯𑀺𑀲𑀼𑀁 𑀯𑀺𑀧𑀮𑁆𑀮𑀸𑀲𑀯𑀢𑁆𑀣𑀦𑁆𑀢𑀭𑀪𑀸𑀯𑁂𑀦 𑀕𑀳𑀺𑀢𑀢𑁆𑀢𑀸 𑀘 𑀳𑁂𑀝𑁆𑀞𑀸 𑀕𑀳𑀡𑁂𑀲𑀼 𑀯𑀺𑀧𑀮𑁆𑀮𑀸𑀲𑀯𑀢𑁆𑀣𑀽𑀦𑀁 𑀅𑀦𑀺𑀝𑁆𑀞𑀸𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀧𑀜𑁆𑀘𑀫𑀲𑁆𑀲 𑀧𑀦 𑀯𑀺𑀧𑀮𑁆𑀮𑀸𑀲𑀯𑀢𑁆𑀣𑀼𑀦𑁄 𑀅𑀪𑀸𑀯𑁂𑀦 ‘‘𑀦 𑀉𑀤𑁆𑀥’’𑀦𑁆𑀢𑀺 𑀆𑀳. 𑀆𑀭𑀫𑁆𑀫𑀡𑀯𑀺𑀪𑀸𑀕𑁂𑀦 𑀳𑁂𑀢𑁆𑀣 𑀲𑀢𑀺𑀧𑀝𑁆𑀞𑀸𑀦𑀯𑀺𑀪𑀸𑀕𑁄𑀢𑀺. 𑀢𑀬𑁄 𑀲𑀢𑀺𑀧𑀝𑁆𑀞𑀸𑀦𑀸𑀢𑀺 𑀲𑀢𑀺𑀧𑀝𑁆𑀞𑀸𑀦𑀲𑀤𑁆𑀤𑀲𑁆𑀲 𑀅𑀢𑁆𑀣𑀼𑀤𑁆𑀥𑀸𑀭𑀤𑀲𑁆𑀲𑀦𑀁, 𑀦 𑀇𑀥 𑀧𑀸𑀴𑀺𑀬𑀁 𑀯𑀼𑀢𑁆𑀢𑀲𑁆𑀲 𑀲𑀢𑀺𑀧𑀝𑁆𑀞𑀸𑀦𑀲𑀤𑁆𑀤𑀲𑁆𑀲 𑀅𑀢𑁆𑀣𑀤𑀲𑁆𑀲𑀦𑀁. 𑀆𑀤𑀻𑀲𑀼 𑀳𑀻𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 ‘‘𑀨𑀲𑁆𑀲𑀲𑀫𑀼𑀤𑀬𑀸 𑀯𑁂𑀤𑀦𑀸𑀦𑀁 𑀲𑀫𑀼𑀤𑀬𑁄, 𑀦𑀸𑀫𑀭𑀽𑀧𑀲𑀫𑀼𑀤𑀬𑀸 𑀘𑀺𑀢𑁆𑀢𑀲𑁆𑀲 𑀲𑀫𑀼𑀤𑀬𑁄, 𑀫𑀦𑀲𑀺𑀓𑀸𑀭𑀲𑀫𑀼𑀤𑀬𑀸 𑀥𑀫𑁆𑀫𑀸𑀦𑀁 𑀲𑀫𑀼𑀤𑀬𑁄’’𑀢𑀺 (𑀲𑀁. 𑀦𑀺. 𑁫.𑁪𑁦𑁮) 𑀲𑀢𑀺𑀧𑀝𑁆𑀞𑀸𑀦𑀸𑀢𑀺 𑀯𑀼𑀢𑁆𑀢𑀸𑀦𑀁 𑀲𑀢𑀺𑀕𑁄𑀘𑀭𑀸𑀦𑀁 𑀧𑀓𑀸𑀲𑀓𑁂 𑀲𑀼𑀢𑁆𑀢𑀧𑀤𑁂𑀲𑁂 𑀲𑀗𑁆𑀕𑀡𑁆𑀳𑀸𑀢𑀺. 𑀏𑀯𑀁 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑀧𑀸𑀴𑀺𑀬𑀫𑁆𑀧𑀺 𑀅𑀯𑀲𑁂𑀲𑀧𑀸𑀴𑀺𑀧𑀤𑁂𑀲𑀤𑀲𑁆𑀲𑀦𑀢𑁆𑀣𑁄 𑀆𑀤𑀺-𑀲𑀤𑁆𑀤𑁄 𑀤𑀝𑁆𑀞𑀩𑁆𑀩𑁄. 𑀲𑀢𑀺𑀬𑀸 𑀧𑀝𑁆𑀞𑀸𑀦𑀦𑁆𑀢𑀺 𑀲𑀢𑀺𑀬𑀸 𑀧𑀢𑀺𑀝𑁆𑀞𑀸𑀢𑀩𑁆𑀩𑀝𑁆𑀞𑀸𑀦𑀁.

𑀅𑀭𑀺𑀬𑁄𑀢𑀺 𑀆𑀭𑀓𑀢𑁆𑀢𑀸𑀤𑀺𑀦𑀸 𑀅𑀭𑀺𑀬𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀫𑀸𑀳. 𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 𑀲𑀴𑀸𑀬𑀢𑀦𑀯𑀺𑀪𑀗𑁆𑀕𑀲𑀼𑀢𑁆𑀢𑁂 (𑀫. 𑀦𑀺. 𑁩.𑁩𑁧𑁧). 𑀢𑀢𑁆𑀣 𑀳𑀺 𑁋

‘‘𑀢𑀬𑁄 𑀲𑀢𑀺𑀧𑀝𑁆𑀞𑀸𑀦𑀸 𑀬𑀤𑀭𑀺𑀬𑁄…𑀧𑁂… 𑀫𑀭𑀳𑀢𑀻𑀢𑀺 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁, 𑀓𑀺𑀜𑁆𑀘𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁. 𑀇𑀥, 𑀪𑀺𑀓𑁆𑀔𑀯𑁂, 𑀲𑀢𑁆𑀣𑀸 𑀲𑀸𑀯𑀓𑀸𑀦𑀁 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀅𑀦𑀼𑀓𑀫𑁆𑀧𑀓𑁄 𑀳𑀺𑀢𑁂𑀲𑀻 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬 𑁋 ‘𑀇𑀤𑀁 𑀯𑁄 𑀳𑀺𑀢𑀸𑀬 𑀇𑀤𑀁 𑀯𑁄 𑀲𑀼𑀔𑀸𑀬𑀸’𑀢𑀺. 𑀢𑀲𑁆𑀲 𑀲𑀸𑀯𑀓𑀸 𑀦 𑀲𑀼𑀲𑁆𑀲𑀽𑀲𑀦𑁆𑀢𑀺, 𑀦 𑀲𑁄𑀢𑀁 𑀑𑀤𑀳𑀦𑁆𑀢𑀺, 𑀦 𑀅𑀜𑁆𑀜𑀸 𑀘𑀺𑀢𑁆𑀢𑀁 𑀉𑀧𑀝𑁆𑀞𑀧𑁂𑀦𑁆𑀢𑀺, 𑀯𑁄𑀓𑁆𑀓𑀫𑁆𑀫 𑀘 𑀲𑀢𑁆𑀣𑀼𑀲𑀸𑀲𑀦𑀸 𑀯𑀢𑁆𑀢𑀦𑁆𑀢𑀺. 𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀦 𑀘𑁂𑀯 𑀅𑀦𑀢𑁆𑀢𑀫𑀦𑁄 𑀳𑁄𑀢𑀺, 𑀦 𑀘 𑀅𑀦𑀢𑁆𑀢𑀫𑀦𑀢𑀁 𑀧𑀝𑀺𑀲𑀁𑀯𑁂𑀤𑁂𑀢𑀺, 𑀅𑀦𑀯𑀲𑁆𑀲𑀼𑀢𑁄 𑀘 𑀯𑀺𑀳𑀭𑀢𑀺 𑀲𑀢𑁄 𑀲𑀫𑁆𑀧𑀚𑀸𑀦𑁄. 𑀇𑀤𑀁, 𑀪𑀺𑀓𑁆𑀔𑀯𑁂, 𑀧𑀞𑀫𑀁 𑀲𑀢𑀺𑀧𑀝𑁆𑀞𑀸𑀦𑀁. 𑀬𑀤𑀭𑀺𑀬𑁄 𑀲𑁂𑀯𑀢𑀺…𑀧𑁂... 𑀫𑀭𑀳𑀢𑀺. 𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀲𑀢𑁆𑀣𑀸 …𑀧𑁂… 𑀇𑀤𑀁 𑀯𑁄 𑀲𑀼𑀔𑀸𑀬𑀸𑀢𑀺. 𑀢𑀲𑁆𑀲 𑀏𑀓𑀘𑁆𑀘𑁂 𑀲𑀸𑀯𑀓𑀸 𑀦 𑀲𑀼𑀲𑁆𑀲𑀽𑀲𑀦𑁆𑀢𑀺…𑀧𑁂… 𑀏𑀓𑀘𑁆𑀘𑁂 𑀲𑀸𑀯𑀓𑀸 𑀲𑀼𑀲𑁆𑀲𑀽𑀲𑀦𑁆𑀢𑀺…𑀧𑁂… 𑀦 𑀘 𑀯𑁄𑀓𑁆𑀓𑀫𑁆𑀫 𑀲𑀢𑁆𑀣𑀼𑀲𑀸𑀲𑀦𑀸 𑀯𑀢𑁆𑀢𑀦𑁆𑀢𑀺. 𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀦 𑀘𑁂𑀯 𑀅𑀦𑀢𑁆𑀢𑀫𑀦𑁄 𑀳𑁄𑀢𑀺, 𑀦 𑀘 𑀅𑀦𑀢𑁆𑀢𑀫𑀦𑀢𑀁 𑀧𑀝𑀺𑀲𑀁𑀯𑁂𑀤𑁂𑀢𑀺, 𑀦 𑀘𑁂𑀯 𑀅𑀢𑁆𑀢𑀫𑀦𑁄 𑀳𑁄𑀢𑀺, 𑀦 𑀘 𑀅𑀢𑁆𑀢𑀫𑀦𑀢𑀁 𑀧𑀝𑀺𑀲𑀁𑀯𑁂𑀤𑁂𑀢𑀺. 𑀅𑀦𑀢𑁆𑀢𑀫𑀦𑀢𑀜𑁆𑀘 𑀅𑀢𑁆𑀢𑀫𑀦𑀢𑀜𑁆𑀘 𑀢𑀤𑀼𑀪𑀬𑀁 𑀅𑀪𑀺𑀦𑀺𑀯𑀚𑁆𑀚𑁂𑀢𑁆𑀯𑀸 𑀉𑀧𑁂𑀓𑁆𑀔𑀓𑁄 𑀯𑀺𑀳𑀭𑀢𑀺 𑀲𑀢𑁄 𑀲𑀫𑁆𑀧𑀚𑀸𑀦𑁄. 𑀇𑀤𑀁, 𑀪𑀺𑀓𑁆𑀔𑀯𑁂, 𑀤𑀼𑀢𑀺𑀬𑀁 𑀲𑀢𑀺𑀧𑀝𑁆𑀞𑀸𑀦𑀁…𑀧𑁂… 𑀫𑀭𑀳𑀢𑀺. 𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂,…𑀧𑁂… 𑀲𑀼𑀔𑀸𑀬𑀸𑀢𑀺, 𑀢𑀲𑁆𑀲 𑀲𑀸𑀯𑀓𑀸 𑀲𑀼𑀲𑁆𑀲𑀽𑀲𑀦𑁆𑀢𑀺…𑀧𑁂… 𑀯𑀢𑁆𑀢𑀦𑁆𑀢𑀺. 𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀅𑀢𑁆𑀢𑀫𑀦𑁄 𑀘𑁂𑀯 𑀳𑁄𑀢𑀺, 𑀅𑀢𑁆𑀢𑀫𑀦𑀢𑀜𑁆𑀘 𑀧𑀝𑀺𑀲𑀁𑀯𑁂𑀤𑁂𑀢𑀺, 𑀅𑀦𑀯𑀲𑁆𑀲𑀼𑀢𑁄 𑀘 𑀯𑀺𑀳𑀭𑀢𑀺 𑀲𑀢𑁄 𑀲𑀫𑁆𑀧𑀚𑀸𑀦𑁄. 𑀇𑀤𑀁, 𑀪𑀺𑀓𑁆𑀔𑀯𑁂, 𑀢𑀢𑀺𑀬𑀁 𑀲𑀢𑀺𑀧𑀝𑁆𑀞𑀸𑀦’’𑀦𑁆𑀢𑀺 𑁋

𑀏𑀯𑀁 𑀧𑀝𑀺𑀖𑀸𑀦𑀼𑀦𑀬𑁂𑀳𑀺 𑀅𑀦𑀯𑀲𑁆𑀲𑀼𑀢𑀢𑀸 𑀦𑀺𑀘𑁆𑀘𑀁 𑀉𑀧𑀝𑁆𑀞𑀺𑀢𑀲𑁆𑀲𑀢𑀺𑀢𑀸𑀬 𑀢𑀤𑀼𑀪𑀬𑀯𑀻𑀢𑀺𑀯𑀢𑁆𑀢𑀢𑀸 ‘‘𑀲𑀢𑀺𑀧𑀝𑁆𑀞𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀸. 𑀩𑀼𑀤𑁆𑀥𑀸𑀦𑀁𑀬𑁂𑀯 𑀳𑀺 𑀦𑀺𑀘𑁆𑀘𑀁 𑀉𑀧𑀝𑁆𑀞𑀺𑀢𑀲𑁆𑀲𑀢𑀺𑀢𑀸 𑀳𑁄𑀢𑀺 𑀆𑀯𑁂𑀡𑀺𑀓𑀥𑀫𑁆𑀫𑀪𑀸𑀯𑀢𑁄, 𑀦 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀤𑀻𑀦𑀁. 𑀧-𑀲𑀤𑁆𑀤𑁄 𑀆𑀭𑀫𑁆𑀪𑀁 𑀚𑁄𑀢𑁂𑀢𑀺, 𑀆𑀭𑀫𑁆𑀪𑁄 𑀘 𑀧𑀯𑀢𑁆𑀢𑀻𑀢𑀺 𑀓𑀢𑁆𑀯𑀸 𑀆𑀳 ‘‘𑀧𑀯𑀢𑁆𑀢𑀬𑀺𑀢𑀩𑁆𑀩𑀢𑁄𑀢𑀺 𑀅𑀢𑁆𑀣𑁄’’𑀢𑀺. 𑀲𑀢𑀺𑀬𑀸 𑀓𑀭𑀡𑀪𑀽𑀢𑀸𑀬 𑀧𑀝𑁆𑀞𑀸𑀦𑀁 𑀧𑀝𑁆𑀞𑀧𑁂𑀢𑀩𑁆𑀩𑀁 𑀲𑀢𑀺𑀧𑀝𑁆𑀞𑀸𑀦𑀁. 𑀅𑀦-𑀲𑀤𑁆𑀤𑁄 𑀳𑀺 𑀩𑀳𑀼𑀮𑀯𑀘𑀦𑁂𑀦 𑀓𑀫𑁆𑀫𑀢𑁆𑀣𑁄𑀧𑀺 𑀳𑁄𑀢𑀻𑀢𑀺.

𑀢𑀣𑀸𑀲𑁆𑀲 𑀓𑀢𑁆𑀢𑀼𑀅𑀢𑁆𑀣𑁄𑀧𑀺 𑀮𑀩𑁆𑀪𑀢𑀻𑀢𑀺 ‘‘𑀧𑀢𑀺𑀝𑁆𑀞𑀸𑀢𑀻𑀢𑀺 𑀧𑀝𑁆𑀞𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀉𑀧𑀝𑁆𑀞𑀸𑀢𑀻𑀢𑀺 𑀏𑀢𑁆𑀣 𑀉𑀧-𑀲𑀤𑁆𑀤𑁄 𑀪𑀼𑀲𑀢𑁆𑀣𑀯𑀺𑀲𑀺𑀝𑁆𑀞𑀁 𑀧𑀓𑁆𑀔𑀦𑁆𑀤𑀦𑀁 𑀤𑀻𑀧𑁂𑀢𑀻𑀢𑀺 ‘‘𑀑𑀓𑁆𑀓𑀦𑁆𑀤𑀺𑀢𑁆𑀯𑀸 𑀧𑀓𑁆𑀔𑀦𑁆𑀤𑀺𑀢𑁆𑀯𑀸 𑀧𑀯𑀢𑁆𑀢𑀢𑀻𑀢𑀺 𑀅𑀢𑁆𑀣𑁄’’𑀢𑀺 𑀯𑀼𑀢𑁆𑀢𑀁. 𑀧𑀼𑀦 𑀪𑀸𑀯𑀢𑁆𑀣𑀁 𑀲𑀢𑀺𑀲𑀤𑁆𑀤𑀁 𑀧𑀝𑁆𑀞𑀸𑀦𑀲𑀤𑁆𑀤𑀜𑁆𑀘 𑀯𑀡𑁆𑀡𑁂𑀦𑁆𑀢𑁄 ‘‘𑀅𑀣 𑀯𑀸’’𑀢𑀺𑀆𑀤𑀺𑀫𑀸𑀳. 𑀢𑁂𑀦 𑀧𑀼𑀭𑀺𑀫𑀯𑀺𑀓𑀧𑁆𑀧𑁂 𑀲𑀢𑀺-𑀲𑀤𑁆𑀤𑁄 𑀧𑀝𑁆𑀞𑀸𑀦-𑀲𑀤𑁆𑀤𑁄 𑀘 𑀓𑀢𑁆𑀢𑀼𑀅𑀢𑁆𑀣𑁄𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀲𑀭𑀡𑀝𑁆𑀞𑁂𑀦𑀸𑀢𑀺 𑀘𑀺𑀭𑀓𑀢𑀲𑁆𑀲 𑀘𑀺𑀭𑀪𑀸𑀲𑀺𑀢𑀲𑁆𑀲 𑀘 𑀅𑀦𑀼𑀲𑁆𑀲𑀭𑀡𑀝𑁆𑀞𑁂𑀦. 𑀇𑀤𑀦𑁆𑀢𑀺 𑀬𑀁 ‘‘𑀲𑀢𑀺𑀬𑁂𑀯 𑀲𑀢𑀺𑀧𑀝𑁆𑀞𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁, 𑀇𑀤𑀁 𑀇𑀥 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑀧𑀤𑁂𑀲𑁂 𑀅𑀥𑀺𑀧𑁆𑀧𑁂𑀢𑀁.

𑀬𑀤𑀺 𑀏𑀯𑀦𑁆𑀢𑀺 𑀬𑀤𑀺 𑀲𑀢𑀺 𑀏𑀯 𑀲𑀢𑀺𑀧𑀝𑁆𑀞𑀸𑀦𑀁, 𑀲𑀢𑀺 𑀦𑀸𑀫 𑀏𑀓𑁄 𑀥𑀫𑁆𑀫𑁄, 𑀏𑀯𑀁 𑀲𑀦𑁆𑀢𑁂 𑀓𑀲𑁆𑀫𑀸 𑀲𑀢𑀺𑀧𑀝𑁆𑀞𑀸𑀦𑀸𑀢𑀺 𑀩𑀳𑀼𑀯𑀘𑀦𑀦𑁆𑀢𑀺 𑀆𑀳 ‘‘𑀲𑀢𑀻𑀦𑀁 𑀩𑀳𑀼𑀢𑁆𑀢𑀸’’𑀢𑀺𑀆𑀤𑀺. 𑀬𑀤𑀺 𑀩𑀳𑀼𑀓𑀸 𑀢𑀸 𑀲𑀢𑀺𑀬𑁄, 𑀅𑀣 𑀓𑀲𑁆𑀫𑀸 𑀫𑀕𑁆𑀕𑁄𑀢𑀺 𑀏𑀓𑀯𑀘𑀦𑀦𑁆𑀢𑀺 𑀬𑁄𑀚𑀦𑀸. 𑀫𑀕𑁆𑀕𑀦𑀝𑁆𑀞𑁂𑀦𑀸𑀢𑀺 𑀦𑀺𑀬𑁆𑀬𑀸𑀦𑀝𑁆𑀞𑁂𑀦. 𑀦𑀺𑀬𑁆𑀬𑀸𑀦𑀺𑀓𑁄 𑀳𑀺 𑀫𑀕𑁆𑀕𑀥𑀫𑁆𑀫𑁄, 𑀢𑁂𑀦𑁂𑀯 𑀦𑀺𑀬𑁆𑀬𑀸𑀦𑀺𑀓𑀪𑀸𑀯𑁂𑀦 𑀏𑀓𑀢𑁆𑀢𑀼𑀧𑀕𑀢𑁄 𑀏𑀓𑀦𑁆𑀢𑀢𑁄 𑀦𑀺𑀩𑁆𑀩𑀸𑀦𑀁 𑀕𑀘𑁆𑀙𑀢𑀺, 𑀅𑀢𑁆𑀣𑀺𑀓𑁂𑀳𑀺 𑀘 𑀢𑀤𑀢𑁆𑀣𑀁 𑀫𑀕𑁆𑀕𑀻𑀬𑀢𑀻𑀢𑀺 𑀆𑀳 ‘‘𑀯𑀼𑀢𑁆𑀢𑀜𑁆𑀳𑁂𑀢’’𑀦𑁆𑀢𑀺𑀆𑀤𑀺. 𑀢𑀢𑁆𑀣 𑀘𑀢𑀲𑁆𑀲𑁄𑀧𑀺 𑀘𑁂𑀢𑀸𑀢𑀺 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀤𑀺𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑀸𑀧𑀺 𑀘 𑀏𑀢𑀸 𑀲𑀢𑀺𑀬𑁄. 𑀅𑀧𑀭𑀪𑀸𑀕𑁂𑀢𑀺 𑀅𑀭𑀺𑀬𑀫𑀕𑁆𑀕𑀓𑁆𑀔𑀡𑁂. 𑀓𑀺𑀘𑁆𑀘𑀁 𑀲𑀸𑀥𑀬𑀫𑀸𑀦𑀸𑀢𑀺 𑀧𑀼𑀩𑁆𑀩𑀪𑀸𑀕𑁂 𑀓𑀸𑀬𑀸𑀤𑀻𑀲𑀼 𑀆𑀭𑀫𑁆𑀫𑀡𑁂𑀲𑀼 𑀲𑀼𑀪𑀲𑀜𑁆𑀜𑀸𑀤𑀺𑀯𑀺𑀥𑀫𑀦𑀯𑀲𑁂𑀦 𑀯𑀺𑀲𑀼𑀁 𑀯𑀺𑀲𑀼𑀁 𑀧𑀯𑀢𑁆𑀢𑀺𑀢𑁆𑀯𑀸 𑀫𑀕𑁆𑀕𑀓𑁆𑀔𑀡𑁂 𑀲𑀓𑀺𑀁𑀬𑁂𑀯 𑀢𑀢𑁆𑀣 𑀘𑀢𑀼𑀩𑁆𑀩𑀺𑀥𑀲𑁆𑀲𑀧𑀺 𑀯𑀺𑀧𑀮𑁆𑀮𑀸𑀲𑀲𑁆𑀲 𑀲𑀫𑀼𑀘𑁆𑀙𑁂𑀤𑀯𑀲𑁂𑀦 𑀧𑀳𑀸𑀦𑀓𑀺𑀘𑁆𑀘𑀁 𑀲𑀸𑀥𑀬𑀫𑀸𑀦𑀸 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀦𑀺𑀩𑁆𑀩𑀸𑀦𑀁 𑀕𑀘𑁆𑀙𑀦𑁆𑀢𑀺, 𑀢𑀫𑁂𑀯𑀲𑁆𑀲 𑀘𑀢𑀼𑀓𑀺𑀘𑁆𑀘𑀲𑀸𑀥𑀦𑀢𑀁 𑀉𑀧𑀸𑀤𑀸𑀬 𑀩𑀳𑀼𑀯𑀘𑀦𑀦𑀺𑀤𑁆𑀤𑁂𑀲𑁄, 𑀢𑀣𑀸𑀧𑀺 𑀅𑀢𑁆𑀣𑀢𑁄 𑀪𑁂𑀤𑀸𑀪𑀸𑀯𑀢𑁄 𑀫𑀕𑁆𑀕𑁄𑀢𑀺 𑀏𑀓𑀯𑀘𑀦𑁂𑀦 𑀯𑀼𑀘𑁆𑀘𑀢𑀺. 𑀢𑁂𑀦𑀸𑀳 𑁋 ‘‘𑀢𑀲𑁆𑀫𑀸 𑀘𑀢𑀲𑁆𑀲𑁄𑀧𑀺 𑀏𑀓𑁄 𑀫𑀕𑁆𑀕𑁄𑀢𑀺 𑀯𑀼𑀢𑁆𑀢𑀸’’𑀢𑀺.

𑀓𑀣𑁂𑀢𑀼𑀓𑀫𑁆𑀬𑀢𑀸𑀧𑀼𑀘𑁆𑀙𑀸 𑀇𑀢𑀭𑀸𑀲𑀁 𑀧𑀼𑀘𑁆𑀙𑀸𑀦𑀁 𑀇𑀥 𑀅𑀲𑀫𑁆𑀪𑀯𑀢𑁄 𑀦𑀺𑀤𑁆𑀤𑁂𑀲𑀸𑀤𑀺𑀯𑀲𑁂𑀦 𑀤𑁂𑀲𑁂𑀢𑀼𑀓𑀸𑀫𑀢𑀸𑀬 𑀘 𑀢𑀣𑀸 𑀯𑀼𑀢𑁆𑀢𑀢𑁆𑀢𑀸. ‘‘𑀅𑀬𑀜𑁆𑀘𑁂𑀯 𑀓𑀸𑀬𑁄 𑀩𑀳𑀺𑀤𑁆𑀥𑀸 𑀘 𑀦𑀸𑀫𑀭𑀽𑀧’’𑀦𑁆𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁨𑁭𑁧, 𑁨𑁮𑁭, 𑁨𑁯𑁭; 𑀧𑀸𑀭𑀸. 𑁧𑁧) 𑀔𑀦𑁆𑀥𑀧𑀜𑁆𑀘𑀓𑀁, ‘‘𑀲𑀼𑀔𑀜𑁆𑀘 𑀓𑀸𑀬𑁂𑀦 𑀧𑀝𑀺𑀲𑀁𑀯𑁂𑀤𑁂𑀢𑀻’’𑀢𑀺𑀆𑀤𑀻𑀲𑀼 𑀯𑁂𑀤𑀦𑀸𑀤𑀬𑁄 𑀢𑀬𑁄 𑀅𑀭𑀽𑀧𑀓𑁆𑀔𑀦𑁆𑀥𑀸, ‘‘𑀬𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀓𑀸𑀬𑀲𑁆𑀲 𑀧𑀲𑁆𑀲𑀤𑁆𑀥𑀺 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀻’’𑀢𑀺𑀆𑀤𑀻𑀲𑀼 (𑀥. 𑀲. 𑁪𑁦) 𑀯𑁂𑀤𑀦𑀸𑀤𑀬𑁄 𑀢𑀬𑁄 𑀘𑁂𑀢𑀲𑀺𑀓𑀸 𑀔𑀦𑁆𑀥𑀸 ‘‘𑀓𑀸𑀬𑁄’’𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀢𑀢𑁄 𑀯𑀺𑀲𑁂𑀲𑀦𑀢𑁆𑀣𑀁 ‘‘𑀓𑀸𑀬𑁂𑀢𑀺 𑀭𑀽𑀧𑀓𑀸𑀬𑁂’’𑀢𑀺 𑀆𑀳. 𑀓𑀸𑀬𑀸𑀦𑀼𑀧𑀲𑁆𑀲𑀻𑀢𑀺 𑀏𑀢𑁆𑀣 𑀢𑀲𑁆𑀲𑀻𑀮𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀓𑀸𑀬𑀁 𑀅𑀦𑀼𑀧𑀲𑁆𑀲𑀦𑀲𑀻𑀮𑁄’’𑀢𑀺 𑀆𑀳. 𑀅𑀦𑀺𑀘𑁆𑀘𑀢𑁄 𑀅𑀦𑀼𑀧𑀲𑁆𑀲𑀢𑀻𑀢𑀺 𑀘𑀢𑀼𑀲𑀫𑀼𑀝𑁆𑀞𑀸𑀦𑀺𑀓𑀓𑀸𑀬𑀁 ‘‘𑀅𑀦𑀺𑀘𑁆𑀘’’𑀦𑁆𑀢𑀺 𑀅𑀦𑀼𑀧𑀲𑁆𑀲𑀢𑀺, 𑀏𑀯𑀁 𑀧𑀲𑁆𑀲𑀦𑁆𑀢𑁄 𑀏𑀯 𑀘𑀲𑁆𑀲 𑀅𑀦𑀺𑀘𑁆𑀘𑀸𑀓𑀸𑀭𑀫𑁆𑀧𑀺 𑀅𑀦𑀼𑀧𑀲𑁆𑀲𑀢𑀻𑀢𑀺 𑀯𑀼𑀘𑁆𑀘𑀢𑀺, 𑀢𑀣𑀸𑀪𑀽𑀢𑀲𑁆𑀲 𑀘𑀲𑁆𑀲 𑀦𑀺𑀘𑁆𑀘𑀕𑀸𑀳𑀲𑁆𑀲 𑀯𑀺𑀲𑁂𑀲𑁄𑀧𑀺 𑀦 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀦𑁄 𑀦𑀺𑀘𑁆𑀘𑀢𑁄’’𑀢𑀺. 𑀢𑀣𑀸 𑀳𑁂𑀲 ‘‘𑀦𑀺𑀘𑁆𑀘𑀲𑀜𑁆𑀜𑀁 𑀧𑀚𑀳𑀢𑀻’’𑀢𑀺 (𑀧𑀝𑀺. 𑀫. 𑁧.𑁨𑁮) 𑀯𑀼𑀢𑁆𑀢𑁄. 𑀏𑀢𑁆𑀣 𑀘 𑀅𑀦𑀺𑀘𑁆𑀘𑀢𑁄 𑀏𑀯 𑀅𑀦𑀼𑀧𑀲𑁆𑀲𑀢𑀻𑀢𑀺 𑀏𑀯𑀓𑀸𑀭𑁄 𑀮𑀼𑀢𑁆𑀢𑀦𑀺𑀤𑁆𑀤𑀺𑀝𑁆𑀞𑁄𑀢𑀺 𑀢𑁂𑀦 𑀦𑀺𑀯𑀢𑁆𑀢𑀺𑀢𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀦𑁄 𑀦𑀺𑀘𑁆𑀘𑀢𑁄’’𑀢𑀺 𑀯𑀼𑀢𑁆𑀢𑀁. 𑀦 𑀘𑁂𑀢𑁆𑀣 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸𑀤𑀺𑀦𑀺𑀯𑀢𑁆𑀢𑀦𑀫𑀸𑀲𑀗𑁆𑀓𑀺𑀢𑀩𑁆𑀩𑀁 𑀧𑀝𑀺𑀬𑁄𑀕𑀺𑀦𑀺𑀯𑀢𑁆𑀢𑀦𑀧𑀭𑀢𑁆𑀢𑀸 𑀏𑀯-𑀓𑀸𑀭𑀲𑁆𑀲, 𑀉𑀧𑀭𑀺 𑀤𑁂𑀲𑀦𑀸𑀆𑀭𑀼𑀴𑁆𑀳𑀢𑁆𑀢𑀸 𑀘 𑀢𑀸𑀲𑀁. 𑀤𑀼𑀓𑁆𑀔𑀢𑁄 𑀅𑀦𑀼𑀧𑀲𑁆𑀲𑀢𑀻𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀅𑀦𑀺𑀘𑁆𑀘𑀲𑁆𑀲 𑀤𑀼𑀓𑁆𑀔𑀢𑁆𑀢𑀸 𑀢𑀫𑁂𑀯 𑀓𑀸𑀬𑀁 𑀤𑀼𑀓𑁆𑀔𑀢𑁄 𑀅𑀦𑀼𑀧𑀲𑁆𑀲𑀢𑀺, 𑀤𑀼𑀓𑁆𑀔𑀲𑁆𑀲 𑀅𑀦𑀢𑁆𑀢𑀢𑁆𑀢𑀸 𑀅𑀦𑀢𑁆𑀢𑀢𑁄 𑀅𑀦𑀼𑀧𑀲𑁆𑀲𑀢𑀻𑀢𑀺.

𑀬𑀲𑁆𑀫𑀸 𑀧𑀦 𑀬𑀁 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀅𑀦𑀢𑁆𑀢𑀸, 𑀦 𑀢𑀁 𑀅𑀪𑀺𑀦𑀦𑁆𑀤𑀺𑀢𑀩𑁆𑀩𑀁, 𑀬𑀜𑁆𑀘 𑀦 𑀅𑀪𑀺𑀦𑀦𑁆𑀤𑀺𑀢𑀩𑁆𑀩𑀁, 𑀦 𑀢𑀢𑁆𑀣 𑀭𑀚𑁆𑀚𑀺𑀢𑀩𑁆𑀩𑀁, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀅𑀦𑀺𑀘𑁆𑀘𑀢𑁄 𑀅𑀦𑀼𑀧𑀲𑁆𑀲𑀢𑀺, 𑀦𑁄 𑀦𑀺𑀘𑁆𑀘𑀢𑁄, 𑀤𑀼𑀓𑁆𑀔𑀢𑁄 𑀅𑀦𑀼𑀧𑀲𑁆𑀲𑀢𑀺, 𑀦𑁄 𑀲𑀼𑀔𑀢𑁄, 𑀅𑀦𑀢𑁆𑀢𑀢𑁄 𑀅𑀦𑀼𑀧𑀲𑁆𑀲𑀢𑀺, 𑀦𑁄 𑀅𑀢𑁆𑀢𑀢𑁄, 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀦𑁄 𑀦𑀦𑁆𑀤𑀢𑀺, 𑀯𑀺𑀭𑀚𑁆𑀚𑀢𑀺, 𑀦𑁄 𑀭𑀚𑁆𑀚𑀢𑀻’’𑀢𑀺. 𑀲𑁄 𑀏𑀯𑀁 𑀅𑀭𑀚𑁆𑀚𑀦𑁆𑀢𑁄 𑀭𑀸𑀕𑀁 𑀦𑀺𑀭𑁄𑀥𑁂𑀢𑀺, 𑀦𑁄 𑀲𑀫𑀼𑀤𑁂𑀢𑀺, 𑀲𑀫𑀼𑀤𑀬𑀁 𑀦 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄. 𑀏𑀯𑀁 𑀧𑀝𑀺𑀧𑀦𑁆𑀦𑁄 𑀘 𑀧𑀝𑀺𑀦𑀺𑀲𑁆𑀲𑀚𑁆𑀚𑀢𑀺, 𑀦𑁄 𑀆𑀤𑀺𑀬𑀢𑀺. 𑀅𑀬𑀜𑁆𑀳𑀺 𑀅𑀦𑀺𑀘𑁆𑀘𑀸𑀤𑀺𑀅𑀦𑀼𑀧𑀲𑁆𑀲𑀦𑀸 𑀢𑀤𑀗𑁆𑀕𑀯𑀲𑁂𑀦 𑀲𑀤𑁆𑀥𑀺𑀁 𑀓𑀸𑀬𑀢𑀦𑁆𑀦𑀺𑀲𑁆𑀲𑀬𑀔𑀦𑁆𑀥𑀸𑀪𑀺𑀲𑀗𑁆𑀔𑀸𑀭𑁂𑀳𑀺 𑀓𑀺𑀮𑁂𑀲𑀸𑀦𑀁 𑀧𑀭𑀺𑀘𑁆𑀘𑀚𑀦𑀢𑁄 𑀲𑀗𑁆𑀔𑀢𑀤𑁄𑀲𑀤𑀲𑁆𑀲𑀦𑁂𑀦 𑀢𑀩𑁆𑀩𑀺𑀧𑀭𑀻𑀢𑁂 𑀦𑀺𑀩𑁆𑀩𑀸𑀦𑁂 𑀢𑀦𑁆𑀦𑀺𑀦𑁆𑀦𑀢𑀸𑀬 𑀧𑀓𑁆𑀔𑀦𑁆𑀤𑀦𑀢𑁄 ‘‘𑀧𑀭𑀺𑀘𑁆𑀘𑀸𑀕𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀘𑁂𑀯 𑀧𑀓𑁆𑀔𑀦𑁆𑀤𑀦𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀘𑀸’’𑀢𑀺 𑀯𑀼𑀘𑁆𑀘𑀢𑀺. 𑀢𑀲𑁆𑀫𑀸 𑀢𑀸𑀬 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀯𑀼𑀢𑁆𑀢𑀦𑀬𑁂𑀦 𑀓𑀺𑀮𑁂𑀲𑁂 𑀘 𑀧𑀭𑀺𑀘𑁆𑀘𑀚𑀢𑀺, 𑀦𑀺𑀩𑁆𑀩𑀸𑀦𑁂 𑀘 𑀧𑀓𑁆𑀔𑀦𑁆𑀤𑀢𑀺, 𑀢𑀣𑀸𑀪𑀽𑀢𑁄 𑀘 𑀧𑀭𑀺𑀘𑁆𑀘𑀚𑀦𑀯𑀲𑁂𑀦 𑀓𑀺𑀮𑁂𑀲𑁂 𑀦 𑀆𑀤𑀺𑀬𑀢𑀺, 𑀦𑀸𑀧𑀺 𑀅𑀤𑁄𑀲𑀤𑀲𑁆𑀲𑀺𑀢𑀸𑀯𑀲𑁂𑀦 𑀲𑀗𑁆𑀔𑀢𑀸𑀭𑀫𑁆𑀫𑀡𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀧𑀝𑀺𑀦𑀺𑀲𑁆𑀲𑀚𑁆𑀚𑀢𑀺, 𑀦𑁄 𑀆𑀤𑀺𑀬𑀢𑀻’’𑀢𑀺. 𑀇𑀤𑀸𑀦𑀺 𑀦𑀺𑀲𑁆𑀲𑀺𑀢𑀸𑀳𑀺 𑀅𑀦𑀼𑀧𑀲𑁆𑀲𑀦𑀸𑀳𑀺 𑀬𑁂𑀲𑀁 𑀥𑀫𑁆𑀫𑀸𑀦𑀁 𑀧𑀳𑀸𑀦𑀁 𑀳𑁄𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀦𑀺𑀘𑁆𑀘𑀢𑁄 𑀅𑀦𑀼𑀧𑀲𑁆𑀲𑀦𑁆𑀢𑁄 𑀦𑀺𑀘𑁆𑀘𑀲𑀜𑁆𑀜𑀁 𑀧𑀚𑀳𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀦𑀺𑀘𑁆𑀘𑀲𑀜𑁆𑀜𑀦𑁆𑀢𑀺 𑀲𑀗𑁆𑀔𑀸𑀭𑀸 𑀦𑀺𑀘𑁆𑀘𑀸𑀢𑀺 𑀏𑀯𑀁 𑀧𑀯𑀢𑁆𑀢𑀁 𑀯𑀺𑀧𑀭𑀻𑀢𑀲𑀜𑁆𑀜𑀁. 𑀤𑀺𑀝𑁆𑀞𑀺𑀘𑀺𑀢𑁆𑀢𑀯𑀺𑀧𑀮𑁆𑀮𑀸𑀲𑀧𑀳𑀸𑀦𑀫𑀼𑀔𑁂𑀦𑁂𑀯 𑀲𑀜𑁆𑀜𑀸𑀯𑀺𑀧𑀮𑁆𑀮𑀸𑀲𑀧𑁆𑀧𑀳𑀸𑀦𑀦𑁆𑀢𑀺 𑀲𑀜𑁆𑀜𑀸𑀕𑀳𑀡𑀁, 𑀲𑀜𑁆𑀜𑀸𑀲𑀻𑀲𑁂𑀦 𑀯𑀸 𑀢𑁂𑀲𑀫𑁆𑀧𑀺 𑀕𑀳𑀡𑀁 𑀤𑀝𑁆𑀞𑀩𑁆𑀩𑀁. 𑀦𑀦𑁆𑀤𑀺𑀦𑁆𑀢𑀺 𑀲𑀧𑁆𑀧𑀻𑀢𑀺𑀓𑀢𑀡𑁆𑀳𑀁. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀯𑀺𑀳𑀭𑀢𑀻𑀢𑀺 𑀇𑀫𑀺𑀦𑀸 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀲𑀫𑀗𑁆𑀕𑀺𑀦𑁄 𑀇𑀭𑀺𑀬𑀸𑀧𑀣𑀯𑀺𑀳𑀸𑀭𑁄 𑀯𑀼𑀢𑁆𑀢𑁄𑀢𑀺 𑀆𑀳 𑁋 ‘‘𑀇𑀭𑀺𑀬𑀢𑀻’’𑀢𑀺, 𑀇𑀭𑀺𑀬𑀸𑀧𑀣𑀁 𑀧𑀯𑀢𑁆𑀢𑁂𑀢𑀻𑀢𑀺 𑀅𑀢𑁆𑀣𑁄. 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀅𑀪𑀺𑀩𑁆𑀬𑀸𑀧𑀦𑀢𑁄 ‘‘𑀢𑀻𑀲𑀼 𑀪𑀯𑁂𑀲𑀽’’𑀢𑀺 𑀯𑀼𑀢𑁆𑀢𑀁, 𑀉𑀧𑁆𑀧𑀚𑁆𑀚𑀦𑀯𑀲𑁂𑀦 𑀧𑀦 𑀓𑀺𑀮𑁂𑀲𑀸 𑀧𑀭𑀺𑀢𑁆𑀢𑀪𑀽𑀫𑀓𑀸 𑀏𑀯𑀸𑀢𑀺. 𑀬𑀤𑀺𑀧𑀺 𑀓𑀺𑀮𑁂𑀲𑀸𑀦𑀁 𑀧𑀳𑀸𑀦𑀁 𑀆𑀢𑀸𑀧𑀦𑀦𑁆𑀢𑀺 𑀢𑀁 𑀲𑀫𑁆𑀫𑀸𑀤𑀺𑀝𑁆𑀞𑀺𑀆𑀤𑀻𑀦𑀫𑁆𑀧𑀺 𑀅𑀢𑁆𑀣𑁂𑀯, 𑀆𑀢𑀧𑁆𑀧-𑀲𑀤𑁆𑀤𑁄𑀯𑀺𑀬 𑀧𑀦 𑀆𑀢𑀸𑀧-𑀲𑀤𑁆𑀤𑁄𑀧𑀺 𑀯𑀻𑀭𑀺𑀬𑁂 𑀏𑀯 𑀦𑀺𑀭𑀼𑀴𑁆𑀳𑁄𑀢𑀺 𑀯𑀼𑀢𑁆𑀢𑀁 ‘‘𑀯𑀻𑀭𑀺𑀬𑀲𑁆𑀲𑁂𑀢𑀁 𑀦𑀸𑀫’’𑀦𑁆𑀢𑀺. 𑀅𑀣 𑀯𑀸 𑀧𑀝𑀺𑀧𑀓𑁆𑀔𑀧𑁆𑀧𑀳𑀸𑀦𑁂 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀅𑀩𑁆𑀪𑀼𑀲𑁆𑀲𑀳𑀦𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀲𑁆𑀲 𑀯𑀻𑀭𑀺𑀬𑀲𑁆𑀲 𑀲𑀸𑀢𑀺𑀲𑀬𑀁 𑀢𑀤𑀸𑀢𑀸𑀧𑀦𑀦𑁆𑀢𑀺 𑀯𑀻𑀭𑀺𑀬𑀫𑁂𑀯 𑀢𑀣𑀸 𑀯𑀼𑀘𑁆𑀘𑀢𑀺, 𑀦 𑀅𑀜𑁆𑀜𑁂 𑀥𑀫𑁆𑀫𑀸.

𑀆𑀢𑀸𑀧𑀻𑀢𑀺 𑀘𑀸𑀬𑀫𑀻𑀓𑀸𑀭𑁄 𑀧𑀲𑀁𑀲𑀸𑀬, 𑀅𑀢𑀺𑀲𑀬𑀲𑁆𑀲 𑀯𑀸 𑀤𑀻𑀧𑀓𑁄𑀢𑀺 𑀆𑀢𑀸𑀧𑀻𑀕𑀳𑀡𑁂𑀦 𑀲𑀫𑁆𑀫𑀧𑁆𑀧𑀥𑀸𑀦𑀲𑀫𑀗𑁆𑀕𑀺𑀢𑀁 𑀤𑀲𑁆𑀲𑁂𑀢𑀺. 𑀲𑀫𑁆𑀫𑀸 𑀲𑀫𑀦𑁆𑀢𑀢𑁄 𑀲𑀸𑀫𑀜𑁆𑀘 𑀧𑀚𑀸𑀦𑀦𑁆𑀢𑁄 𑀲𑀫𑁆𑀧𑀚𑀸𑀦𑁄, 𑀅𑀲𑀫𑁆𑀫𑀺𑀲𑁆𑀲𑀢𑁄 𑀯𑀯𑀢𑁆𑀣𑀸𑀦𑁂 𑀅𑀜𑁆𑀜𑀥𑀫𑁆𑀫𑀸𑀦𑀼𑀧𑀲𑁆𑀲𑀺𑀢𑀸𑀪𑀸𑀯𑁂𑀦 𑀲𑀫𑁆𑀫𑀸 𑀅𑀯𑀺𑀧𑀭𑀻𑀢𑀁, 𑀲𑀩𑁆𑀩𑀸𑀓𑀸𑀭𑀧𑀚𑀸𑀦𑀦𑁂𑀦 𑀲𑀫𑀦𑁆𑀢𑀢𑁄, 𑀉𑀧𑀭𑀽𑀧𑀭𑀺 𑀯𑀺𑀲𑁂𑀲𑀸𑀯𑀳𑀪𑀸𑀯𑁂𑀦 𑀧𑀯𑀢𑁆𑀢𑀺𑀬𑀸 𑀲𑀸𑀫𑀁 𑀧𑀚𑀸𑀦𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀬𑀤𑀺 𑀧𑀜𑁆𑀜𑀸𑀬 𑀅𑀦𑀼𑀧𑀲𑁆𑀲𑀢𑀺, 𑀓𑀣𑀁 𑀲𑀢𑀺𑀧𑀝𑁆𑀞𑀸𑀦𑀢𑀸𑀢𑀺 𑀆𑀳 ‘‘𑀦 𑀳𑀻’’𑀢𑀺𑀆𑀤𑀺. 𑀢𑀲𑁆𑀫𑀸 𑀲𑀢𑀺𑀬𑀸 𑀮𑀤𑁆𑀥𑀼𑀧𑀓𑀸𑀭𑀸𑀬 𑀏𑀯 𑀧𑀜𑁆𑀜𑀸𑀬 𑀏𑀢𑁆𑀣 𑀬𑀣𑀸𑀯𑀼𑀢𑁆𑀢𑁂 𑀓𑀸𑀬𑁂 𑀓𑀫𑁆𑀫𑀝𑁆𑀞𑀸𑀦𑀺𑀓𑁄 𑀪𑀺𑀓𑁆𑀔𑀼 𑀅𑀦𑀼𑀧𑀲𑁆𑀲𑀓𑁄, 𑀢𑀲𑁆𑀫𑀸 ‘‘𑀓𑀸𑀬𑀸𑀦𑀼𑀧𑀲𑁆𑀲𑀻’’𑀢𑀺 𑀯𑀼𑀘𑁆𑀘𑀢𑀺. 𑀅𑀦𑁆𑀢𑁄𑀲𑀗𑁆𑀔𑁂𑀧𑁄 𑀅𑀦𑁆𑀢𑁄𑀮𑀻𑀦𑀢𑀸, 𑀓𑁄𑀲𑀚𑁆𑀚𑀦𑁆𑀢𑀺 𑀅𑀢𑁆𑀣𑁄. 𑀉𑀧𑀸𑀬𑀧𑀭𑀺𑀕𑁆𑀕𑀳𑁄𑀢𑀺 𑀏𑀢𑁆𑀣 𑀲𑀻𑀮𑀯𑀺𑀲𑁄𑀥𑀦𑀸𑀤𑀺 𑀕𑀡𑀦𑀸𑀤𑀺 𑀉𑀕𑁆𑀕𑀳𑀓𑁄𑀲𑀮𑁆𑀮𑀸𑀤𑀺 𑀘 𑀉𑀧𑀸𑀬𑁄, 𑀢𑀩𑁆𑀩𑀺𑀧𑀭𑀺𑀬𑀸𑀬𑀢𑁄 𑀅𑀦𑀼𑀧𑀸𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀬𑀲𑁆𑀫𑀸 𑀘 𑀉𑀧𑀝𑁆𑀞𑀺𑀢𑀲𑁆𑀲𑀢𑀻 𑀬𑀣𑀸𑀯𑀼𑀢𑁆𑀢𑀁 𑀉𑀧𑀸𑀬𑀁 𑀦 𑀧𑀭𑀺𑀘𑁆𑀘𑀚𑀢𑀺, 𑀅𑀦𑀼𑀧𑀸𑀬𑀜𑁆𑀘 𑀦 𑀉𑀧𑀸𑀤𑀺𑀬𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀫𑀼𑀝𑁆𑀞𑀲𑁆𑀲𑀢𑀺…𑀧𑁂… 𑀅𑀲𑀫𑀢𑁆𑀣𑁄 𑀳𑁄𑀢𑀻’’𑀢𑀺. 𑀢𑁂𑀦𑀸𑀢𑀺 𑀉𑀧𑀸𑀬𑀸𑀦𑀼𑀧𑀸𑀬𑀸𑀦𑀁 𑀧𑀭𑀺𑀕𑁆𑀕𑀳𑀧𑀭𑀺𑀯𑀚𑁆𑀚𑀦𑁂𑀲𑀼 𑀅𑀧𑀭𑀺𑀘𑁆𑀘𑀸𑀕𑀸𑀧𑀭𑀺𑀕𑁆𑀕𑀳𑁂𑀲𑀼 𑀘 𑀅𑀲𑀫𑀢𑁆𑀣𑀪𑀸𑀯𑁂𑀦. 𑀅𑀲𑁆𑀲 𑀬𑁄𑀕𑀺𑀦𑁄.

𑀬𑀲𑁆𑀫𑀸 𑀲𑀢𑀺𑀬𑁂𑀯𑁂𑀢𑁆𑀣 𑀲𑀢𑀺𑀧𑀝𑁆𑀞𑀸𑀦𑀁 𑀯𑀼𑀢𑁆𑀢𑀸, 𑀢𑀲𑁆𑀫𑀸𑀲𑁆𑀲 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸 𑀯𑀻𑀭𑀺𑀬𑀸𑀤𑀬𑁄 𑀅𑀗𑁆𑀕𑀦𑁆𑀢𑀺 𑀆𑀳 𑁋 ‘‘𑀲𑀫𑁆𑀧𑀬𑁄𑀕𑀗𑁆𑀕𑀜𑁆𑀘𑀲𑁆𑀲 𑀤𑀲𑁆𑀲𑁂𑀢𑁆𑀯𑀸’’𑀢𑀺. 𑀅𑀗𑁆𑀕-𑀲𑀤𑁆𑀤𑁄 𑀘𑁂𑀢𑁆𑀣 𑀓𑀸𑀭𑀡𑀧𑀭𑀺𑀬𑀸𑀬𑁄 𑀤𑀝𑁆𑀞𑀩𑁆𑀩𑁄. 𑀲𑀢𑀺𑀕𑁆𑀕𑀳𑀡𑁂𑀦𑁂𑀯𑁂𑀢𑁆𑀣 𑀲𑀫𑁆𑀫𑀸𑀲𑀫𑀸𑀥𑀺𑀲𑁆𑀲𑀧𑀺 𑀕𑀳𑀡𑀁 𑀤𑀝𑁆𑀞𑀩𑁆𑀩𑀁 𑀢𑀲𑁆𑀲𑀸 𑀲𑀫𑀸𑀥𑀺𑀓𑁆𑀔𑀦𑁆𑀥𑁂 𑀲𑀗𑁆𑀕𑀳𑀺𑀢𑀢𑁆𑀢𑀸. 𑀬𑀲𑁆𑀫𑀸 𑀯𑀸 𑀲𑀢𑀺𑀲𑀻𑀲𑁂𑀦𑀸𑀬𑀁 𑀤𑁂𑀲𑀦𑀸. 𑀦 𑀳𑀺 𑀓𑁂𑀯𑀮𑀸𑀬 𑀲𑀢𑀺𑀬𑀸 𑀓𑀺𑀮𑁂𑀲𑀧𑁆𑀧𑀳𑀸𑀦𑀁 𑀲𑀫𑁆𑀪𑀯𑀢𑀺, 𑀦𑀺𑀩𑁆𑀩𑀸𑀦𑀸𑀥𑀺𑀕𑀫𑁄 𑀯𑀸, 𑀦𑀸𑀧𑀺 𑀓𑁂𑀯𑀮𑀸 𑀲𑀢𑀺 𑀧𑀯𑀢𑁆𑀢𑀢𑀺, 𑀢𑀲𑁆𑀫𑀸𑀲𑁆𑀲 𑀛𑀸𑀦𑀤𑁂𑀲𑀦𑀸𑀬𑀁 𑀲𑀯𑀺𑀢𑀓𑁆𑀓𑀸𑀤𑀺𑀯𑀘𑀦𑀲𑁆𑀲 𑀯𑀺𑀬 𑀲𑀫𑁆𑀧𑀬𑁄𑀕𑀗𑁆𑀕𑀤𑀲𑁆𑀲𑀦𑀢𑀸𑀢𑀺 𑀅𑀗𑁆𑀕-𑀲𑀤𑁆𑀤𑀲𑁆𑀲 𑀅𑀯𑀬𑀯𑀧𑀭𑀺𑀬𑀸𑀬𑀢𑀸 𑀤𑀝𑁆𑀞𑀩𑁆𑀩𑀸. 𑀧𑀳𑀸𑀦𑀗𑁆𑀕𑀦𑁆𑀢𑀺 ‘‘𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀻’’𑀢𑀺𑀆𑀤𑀻𑀲𑀼 𑀯𑀺𑀬 𑀧𑀳𑀸𑀢𑀩𑁆𑀩𑀗𑁆𑀕𑀁 𑀤𑀲𑁆𑀲𑁂𑀢𑀼𑀁. 𑀬𑀲𑁆𑀫𑀸 𑀏𑀢𑁆𑀣 𑀧𑀼𑀩𑁆𑀩𑀪𑀸𑀕𑀫𑀕𑁆𑀕𑁄 𑀅𑀥𑀺𑀧𑁆𑀧𑁂𑀢𑁄, 𑀦 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑁄, 𑀢𑀲𑁆𑀫𑀸 𑀧𑀼𑀩𑁆𑀩𑀪𑀸𑀕𑀺𑀬𑀫𑁂𑀯 𑀯𑀺𑀦𑀬𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀤𑀗𑁆𑀕𑀯𑀺𑀦𑀬𑁂𑀦 𑀯𑀸 𑀯𑀺𑀓𑁆𑀔𑀫𑁆𑀪𑀦𑀯𑀺𑀦𑀬𑁂𑀦 𑀯𑀸’’𑀢𑀺 𑀆𑀳. 𑀅𑀲𑁆𑀲𑀸𑀢𑀺 𑀬𑁄𑀕𑀺𑀦𑁄. 𑀢𑁂𑀲𑀁 𑀥𑀫𑁆𑀫𑀸𑀦𑀦𑁆𑀢𑀺 𑀯𑁂𑀤𑀦𑀸𑀤𑀺𑀥𑀫𑁆𑀫𑀸𑀦𑀁. 𑀢𑁂𑀲𑀜𑁆𑀳𑀺 𑀢𑀢𑁆𑀣 𑀅𑀦𑀥𑀺𑀧𑁆𑀧𑁂𑀢𑀢𑁆𑀢𑀸 ‘‘𑀅𑀢𑁆𑀣𑀼𑀤𑁆𑀥𑀸𑀭𑀦𑀬𑁂𑀦𑁂𑀢𑀁 𑀯𑀼𑀢𑁆𑀢’’𑀦𑁆𑀢𑀺 𑀆𑀳. 𑀬𑀁 𑀧𑀦𑀸𑀢𑀺 𑀯𑀺𑀪𑀗𑁆𑀕𑁂, 𑀯𑀺𑀪𑀗𑁆𑀕𑀧𑀓𑀭𑀡𑁂𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀢𑁆𑀣𑀸𑀢𑀺 ‘‘𑀮𑁄𑀓𑁂’’𑀢𑀺 𑀏𑀢𑀲𑁆𑀫𑀺𑀁 𑀧𑀤𑁂, 𑀢𑀸 𑀘 𑀮𑁄𑀓𑀺𑀬𑀸 𑀏𑀯 𑀅𑀦𑀼𑀧𑀲𑁆𑀲𑀦𑀸 𑀦𑀸𑀫 𑀲𑀫𑁆𑀫𑀲𑀦𑀦𑁆𑀢𑀺 𑀓𑀢𑁆𑀯𑀸.

𑀤𑀼𑀓𑁆𑀔𑀢𑁄𑀢𑀺 𑀯𑀺𑀧𑀭𑀺𑀡𑀸𑀫𑀲𑀗𑁆𑀔𑀸𑀭𑀤𑀼𑀓𑁆𑀔𑀢𑀸𑀳𑀺 𑀤𑀼𑀓𑁆𑀔𑀲𑀪𑀸𑀯𑀢𑁄, 𑀤𑀼𑀓𑁆𑀔𑀸𑀢𑀺 𑀅𑀦𑀼𑀧𑀲𑁆𑀲𑀺𑀢𑀩𑁆𑀩𑀸𑀢𑀺 𑀅𑀢𑁆𑀣𑁄. 𑀲𑁂𑀲𑀧𑀤𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀬𑁄 𑀲𑀼𑀔𑀁 𑀤𑀼𑀓𑁆𑀔𑀢𑁄 𑀅𑀤𑁆𑀤𑀸𑀢𑀺 𑀬𑁄 𑀪𑀺𑀓𑁆𑀔𑀼 𑀲𑀼𑀔𑀁 𑀯𑁂𑀤𑀦𑀁 𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑀢𑀸𑀬 𑀤𑀼𑀓𑁆𑀔𑀦𑁆𑀢𑀺 𑀧𑀜𑁆𑀜𑀸𑀘𑀓𑁆𑀔𑀼𑀦𑀸 𑀅𑀤𑁆𑀤𑀓𑁆𑀔𑀺. 𑀤𑀼𑀓𑁆𑀔𑀫𑀤𑁆𑀤𑀓𑁆𑀔𑀺 𑀲𑀮𑁆𑀮𑀢𑁄𑀢𑀺 𑀤𑀼𑀓𑁆𑀔𑀯𑁂𑀤𑀦𑀁 𑀧𑀻𑀴𑀸𑀚𑀦𑀦𑀢𑁄 𑀅𑀦𑁆𑀢𑁄𑀢𑀼𑀤𑀦𑀢𑁄 𑀤𑀼𑀦𑁆𑀦𑀻𑀳𑀭𑀡𑀢𑁄 𑀘 𑀲𑀮𑁆𑀮𑀦𑁆𑀢𑀺 𑀅𑀤𑁆𑀤𑀓𑁆𑀔𑀺 𑀧𑀲𑁆𑀲𑀺. 𑀅𑀤𑀼𑀓𑁆𑀔𑀫𑀲𑀼𑀔𑀦𑁆𑀢𑀺 𑀉𑀧𑁂𑀓𑁆𑀔𑀸𑀯𑁂𑀤𑀦𑀁. 𑀲𑀦𑁆𑀢𑀦𑁆𑀢𑀺 𑀲𑀼𑀔𑀤𑀼𑀓𑁆𑀔𑀸𑀦𑀁 𑀯𑀺𑀬 𑀅𑀦𑁄𑀴𑀸𑀭𑀺𑀓𑀢𑀸𑀬 𑀧𑀘𑁆𑀘𑀬𑀯𑀲𑁂𑀦 𑀯𑀽𑀧𑀲𑀦𑁆𑀢𑀲𑀪𑀸𑀯𑀢𑁆𑀢𑀸 𑀘 𑀲𑀦𑁆𑀢𑀁. 𑀅𑀦𑀺𑀘𑁆𑀘𑀢𑁄𑀢𑀺 𑀳𑀼𑀢𑁆𑀯𑀸 𑀅𑀪𑀸𑀯𑀢𑁄 𑀉𑀤𑀬𑀩𑁆𑀩𑀬𑀯𑀦𑁆𑀢𑀢𑁄 𑀢𑀸𑀯𑀓𑀸𑀮𑀺𑀓𑀢𑁄 𑀦𑀺𑀘𑁆𑀘𑀧𑀝𑀺𑀓𑁆𑀔𑁂𑀧𑀢𑁄 𑀘 𑀅𑀦𑀺𑀘𑁆𑀘𑀦𑁆𑀢𑀺 𑀬𑁄 𑀅𑀤𑁆𑀤𑀓𑁆𑀔𑀺. 𑀲 𑀯𑁂 𑀲𑀫𑁆𑀫𑀤𑁆𑀤𑀲𑁄 𑀪𑀺𑀓𑁆𑀔𑀽𑀢𑀺 𑀲𑁄 𑀪𑀺𑀓𑁆𑀔𑀼 𑀏𑀓𑀁𑀲𑁂𑀦, 𑀧𑀭𑀺𑀩𑁆𑀬𑀢𑁆𑀢𑀁 𑀯𑀸 𑀯𑁂𑀤𑀦𑀸𑀬 𑀲𑀫𑁆𑀫𑀸 𑀧𑀲𑁆𑀲𑀦𑀓𑁄𑀢𑀺 𑀅𑀢𑁆𑀣𑁄.

𑀤𑀼𑀓𑁆𑀔𑀸𑀢𑀺𑀧𑀻𑀢𑀺 𑀲𑀗𑁆𑀔𑀸𑀭𑀤𑀼𑀓𑁆𑀔𑀢𑀸𑀬 𑀤𑀼𑀓𑁆𑀔𑀸 𑀇𑀢𑀺𑀧𑀺. 𑀲𑀩𑁆𑀩𑀁 𑀢𑀁 𑀯𑁂𑀤𑀬𑀺𑀢𑀁 𑀤𑀼𑀓𑁆𑀔𑀲𑁆𑀫𑀺𑀁 𑀅𑀦𑁆𑀢𑁄𑀕𑀥𑀁 𑀧𑀭𑀺𑀬𑀸𑀧𑀦𑁆𑀦𑀦𑁆𑀢𑀺 𑀯𑀤𑀸𑀫𑀺 𑀲𑀗𑁆𑀔𑀸𑀭𑀤𑀼𑀓𑁆𑀔𑀦𑁆𑀢𑀺 𑀯𑀢𑁆𑀢𑀩𑁆𑀩𑀢𑁄. 𑀲𑀼𑀔𑀤𑀼𑀓𑁆𑀔𑀢𑁄𑀧𑀺 𑀘𑀸𑀢𑀺 𑀲𑀼𑀔𑀸𑀤𑀻𑀦𑀁 𑀞𑀺𑀢𑀺𑀯𑀺𑀧𑀭𑀺𑀡𑀸𑀫𑀜𑀸𑀡𑀲𑀼𑀔𑀢𑀸𑀬 𑀘 𑀯𑀺𑀧𑀭𑀺𑀡𑀸𑀫𑀝𑁆𑀞𑀺𑀢𑀺𑀅𑀜𑁆𑀜𑀸𑀡𑀤𑀼𑀓𑁆𑀔𑀢𑀸𑀬 𑀘 𑀯𑀼𑀢𑁆𑀢𑀢𑁆𑀢𑀸 𑀢𑀺𑀲𑁆𑀲𑁄𑀧𑀺 𑀲𑀼𑀔𑀢𑁄 𑀢𑀺𑀲𑁆𑀲𑁄𑀧𑀺 𑀘 𑀤𑀼𑀓𑁆𑀔𑀢𑁄 𑀅𑀦𑀼𑀧𑀲𑁆𑀲𑀺𑀢𑀩𑁆𑀩𑀸𑀢𑀺 𑀅𑀢𑁆𑀣𑁄. 𑀲𑀢𑁆𑀢 𑀅𑀦𑀼𑀧𑀲𑁆𑀲𑀦𑀸 𑀳𑁂𑀝𑁆𑀞𑀸 𑀧𑀓𑀸𑀲𑀺𑀢𑀸 𑀏𑀯.

𑀆𑀭𑀫𑁆𑀫𑀡𑀸…𑀧𑁂… 𑀪𑁂𑀤𑀸𑀦𑀦𑁆𑀢𑀺 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑀦𑀸𑀦𑀢𑁆𑀢𑀲𑁆𑀲 𑀦𑀻𑀮𑀸𑀤𑀺𑀢𑀩𑁆𑀪𑁂𑀤𑀲𑁆𑀲, 𑀙𑀦𑁆𑀤𑀸𑀤𑀺𑀅𑀥𑀺𑀧𑀢𑀺𑀦𑀸𑀦𑀢𑁆𑀢𑀲𑁆𑀲 𑀳𑀻𑀦𑀸𑀤𑀺𑀢𑀩𑁆𑀪𑁂𑀤𑀲𑁆𑀲, 𑀜𑀸𑀡𑀛𑀸𑀦𑀸𑀤𑀺𑀲𑀳𑀚𑀸𑀢𑀦𑀸𑀦𑀢𑁆𑀢𑀲𑁆𑀲 𑀲𑀲𑀗𑁆𑀔𑀸𑀭𑀺𑀓𑀸𑀲𑀗𑁆𑀔𑀸𑀭𑀺𑀓-𑀲𑀯𑀺𑀢𑀓𑁆𑀓-𑀲𑀯𑀺𑀘𑀸𑀭𑀸𑀤𑀺𑀢𑀩𑁆𑀪𑁂𑀤𑀲𑁆𑀲, 𑀓𑀸𑀫𑀸𑀯𑀘𑀭𑀸𑀤𑀺𑀪𑀽𑀫𑀺𑀦𑀸𑀦𑀢𑁆𑀢𑀲𑁆𑀲, 𑀉𑀓𑁆𑀓𑀝𑁆𑀞𑀫𑀚𑁆𑀛𑀺𑀫𑀸𑀤𑀺𑀢𑀩𑁆𑀪𑁂𑀤𑀲𑁆𑀲, 𑀓𑀼𑀲𑀮𑀸𑀤𑀺𑀓𑀫𑁆𑀫𑀦𑀸𑀦𑀢𑁆𑀢𑀲𑁆𑀲, 𑀤𑁂𑀯𑀕𑀢𑀺𑀲𑀁𑀯𑀢𑁆𑀢𑀦𑀺𑀬𑀢𑀸𑀤𑀺𑀢𑀩𑁆𑀪𑁂𑀤𑀲𑁆𑀲, 𑀓𑀡𑁆𑀳𑀲𑀼𑀓𑁆𑀓𑀯𑀺𑀧𑀸𑀓𑀦𑀸𑀦𑀢𑁆𑀢𑀲𑁆𑀲, 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀢𑀸𑀤𑀺𑀢𑀩𑁆𑀪𑁂𑀤𑀲𑁆𑀲, 𑀧𑀭𑀺𑀢𑁆𑀢𑀪𑀽𑀫𑀓𑀸𑀤𑀺𑀓𑀺𑀭𑀺𑀬𑀸𑀦𑀸𑀦𑀢𑁆𑀢𑀲𑁆𑀲, 𑀢𑀺𑀳𑁂𑀢𑀼𑀓𑀸𑀤𑀺𑀢𑀩𑁆𑀪𑁂𑀤𑀲𑁆𑀲 𑀯𑀲𑁂𑀦 𑀅𑀦𑀼𑀧𑀲𑁆𑀲𑀺𑀢𑀩𑁆𑀩𑀦𑁆𑀢𑀺 𑀬𑁄𑀚𑀦𑀸. 𑀆𑀤𑀺-𑀲𑀤𑁆𑀤𑁂𑀦 𑀲𑀯𑀢𑁆𑀣𑀼𑀓𑀸𑀯𑀢𑁆𑀣𑀼𑀓𑀸𑀤𑀺𑀦𑀸𑀦𑀢𑁆𑀢𑀲𑁆𑀲 𑀧𑀼𑀕𑁆𑀕𑀮𑀢𑁆𑀢𑀬𑀲𑀸𑀥𑀸𑀭𑀡𑀸𑀤𑀺𑀢𑀩𑁆𑀪𑁂𑀤𑀲𑁆𑀲 𑀘 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀲𑀭𑀸𑀕𑀸𑀤𑀻𑀦𑀦𑁆𑀢𑀺 𑀫𑀳𑀸𑀲𑀢𑀺𑀧𑀝𑁆𑀞𑀸𑀦𑀲𑀼𑀢𑁆𑀢𑁂 (𑀤𑀻. 𑀦𑀺. 𑁨.𑁩𑁮𑁧; 𑀫. 𑀦𑀺. 𑁧.𑁧𑁧𑁪) 𑀆𑀕𑀢𑀸𑀦𑀁 𑀲𑀭𑀸𑀕𑀯𑀻𑀢𑀭𑀸𑀕𑀸𑀤𑀺𑀪𑁂𑀤𑀸𑀦𑀁. 𑀲𑀮𑀓𑁆𑀔𑀡-𑀲𑀸𑀫𑀜𑁆𑀜𑀮𑀓𑁆𑀔𑀡𑀸𑀦𑀦𑁆𑀢𑀺 𑀨𑀼𑀲𑀦𑀸𑀤𑀺𑀢𑀁𑀢𑀁𑀲𑀮𑀓𑁆𑀔𑀡𑀸𑀦𑀜𑁆𑀘𑁂𑀯 𑀅𑀦𑀺𑀘𑁆𑀘𑀢𑀸𑀤𑀺𑀲𑀸𑀫𑀜𑁆𑀜𑀮𑀓𑁆𑀔𑀡𑀸𑀦𑀜𑁆𑀘 𑀯𑀲𑁂𑀦𑀸𑀢𑀺 𑀬𑁄𑀚𑀦𑀸.

𑀲𑀼𑀜𑁆𑀜𑀢𑀥𑀫𑁆𑀫𑀲𑁆𑀲𑀸𑀢𑀺 𑀅𑀦𑀢𑁆𑀢𑀢𑀸𑀲𑀗𑁆𑀔𑀸𑀢𑀲𑀼𑀜𑁆𑀜𑀢𑀲𑀪𑀸𑀯𑀲𑁆𑀲. ‘‘𑀲𑀮𑀓𑁆𑀔𑀡-𑀲𑀸𑀫𑀜𑁆𑀜𑀮𑀓𑁆𑀔𑀡𑀸𑀦’’𑀦𑁆𑀢𑀺 𑀳𑀺 𑀇𑀫𑀺𑀦𑀸 𑀬𑁄 𑀇𑀢𑁄 𑀩𑀸𑀳𑀺𑀭𑀓𑁂𑀳𑀺 𑀲𑀸𑀫𑀺𑀦𑀺𑀯𑀸𑀲𑀻𑀓𑀸𑀭𑀓𑀯𑁂𑀤𑀓𑀅𑀥𑀺𑀝𑁆𑀞𑀸𑀬𑀓𑀪𑀸𑀯𑁂𑀦 𑀧𑀭𑀺𑀓𑀧𑁆𑀧𑀺𑀢𑁄 𑀅𑀢𑁆𑀢𑀸, 𑀢𑀲𑁆𑀲 𑀲𑀗𑁆𑀔𑀸𑀭𑁂𑀲𑀼 𑀦𑀺𑀘𑁆𑀘𑀢𑀸 𑀲𑀼𑀔𑀢𑀸 𑀯𑀺𑀬 𑀓𑀢𑁆𑀣𑀘𑀺𑀧𑀺 𑀅𑀪𑀸𑀯𑁄 𑀯𑀺𑀪𑀸𑀯𑀺𑀢𑁄. 𑀦𑀢𑁆𑀣𑀺 𑀏𑀢𑁂𑀲𑀁 𑀅𑀢𑁆𑀢𑀸𑀢𑀺 𑀅𑀦𑀢𑁆𑀢𑀸, 𑀬𑀲𑁆𑀫𑀸 𑀧𑀦 𑀲𑀗𑁆𑀔𑀸𑀭𑁂𑀲𑀼 𑀏𑀓𑀥𑀫𑁆𑀫𑁄𑀧𑀺 𑀅𑀢𑁆𑀢𑀸 𑀦 𑀳𑁄𑀢𑀺, 𑀢𑀲𑁆𑀫𑀸 𑀢𑁂 𑀦 𑀅𑀢𑁆𑀢𑀸𑀢𑀺𑀧𑀺 𑀅𑀦𑀢𑁆𑀢𑀸𑀢𑀺 𑀅𑀬𑀁 𑀢𑁂𑀲𑀁 𑀲𑀼𑀜𑁆𑀜𑀢𑀥𑀫𑁆𑀫𑁄. 𑀢𑀲𑁆𑀲 𑀲𑀼𑀜𑁆𑀜𑀢𑀥𑀫𑁆𑀫𑀲𑁆𑀲, 𑀬𑀁 𑀯𑀺𑀪𑀸𑀯𑁂𑀢𑀼𑀁 𑀅𑀪𑀺𑀥𑀫𑁆𑀫𑁂 (𑀥. 𑀲. 𑁧𑁨𑁧) ‘‘𑀢𑀲𑁆𑀫𑀺𑀁 𑀔𑁄 𑀧𑀦 𑀲𑀫𑀬𑁂 𑀥𑀫𑁆𑀫𑀸 𑀳𑁄𑀦𑁆𑀢𑀻’’𑀢𑀺𑀆𑀤𑀺𑀦𑀸 𑀲𑀼𑀜𑁆𑀜𑀢𑀯𑀸𑀭𑀤𑁂𑀲𑀦𑀸 𑀯𑀼𑀢𑁆𑀢𑀸. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀅𑀫𑁆𑀩𑀧𑀸𑀮𑀺𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀲𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁬𑁮. 𑀲𑀭𑀢𑀻𑀢𑀺 𑀲𑀢𑁄. 𑀅𑀬𑀁 𑀧𑀦 𑀦 𑀬𑀸𑀬 𑀓𑀸𑀬𑀘𑀺 𑀲𑀢𑀺𑀬𑀸 𑀲𑀢𑁄, 𑀅𑀣 𑀔𑁄 𑀏𑀤𑀺𑀲𑀸𑀬𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀓𑀸𑀬𑀸𑀤𑀺𑀅𑀦𑀼𑀧𑀲𑁆𑀲𑀦𑀸𑀲𑀢𑀺𑀬𑀸’’𑀢𑀺 𑀆𑀳. 𑀘𑀢𑀼𑀲𑀫𑁆𑀧𑀚𑀜𑁆𑀜𑀧𑀜𑁆𑀜𑀸𑀬𑀸𑀢𑀺 𑀘𑀢𑀼𑀩𑁆𑀩𑀺𑀥𑀲𑀫𑁆𑀧𑀚𑀜𑁆𑀜𑀧𑀜𑁆𑀜𑀸𑀬, 𑀅𑀪𑀺𑀓𑁆𑀓𑀫𑀦𑀁 𑀅𑀪𑀺𑀓𑁆𑀓𑀦𑁆𑀢𑀦𑁆𑀢𑀺 𑀆𑀳 𑁋 ‘‘𑀅𑀪𑀺𑀓𑁆𑀓𑀦𑁆𑀢𑀁 𑀯𑀼𑀘𑁆𑀘𑀢𑀺 𑀕𑀫𑀦’’𑀦𑁆𑀢𑀺. 𑀢𑀣𑀸 𑀧𑀝𑀺𑀓𑁆𑀓𑀫𑀦𑀁 𑀧𑀝𑀺𑀓𑁆𑀓𑀦𑁆𑀢𑀦𑁆𑀢𑀺 𑀯𑀼𑀢𑁆𑀢𑀁 𑁋 ‘‘𑀧𑀝𑀺𑀓𑁆𑀓𑀦𑁆𑀢𑀁 𑀦𑀺𑀯𑀢𑁆𑀢𑀦’’𑀦𑁆𑀢𑀺. 𑀦𑀺𑀯𑀢𑁆𑀢𑀦𑀜𑁆𑀘 𑀦𑀺𑀯𑀢𑁆𑀢𑀺𑀫𑀢𑁆𑀢𑀁, 𑀦𑀺𑀯𑀢𑁆𑀢𑀺𑀢𑁆𑀯𑀸 𑀧𑀦 𑀕𑀫𑀦𑀁 𑀕𑀫𑀦𑀫𑁂𑀯. 𑀓𑀸𑀬𑀁 𑀅𑀪𑀺𑀳𑀭𑀦𑁆𑀢𑁄 𑀅𑀪𑀺𑀕𑀫𑀦𑀯𑀲𑁂𑀦 𑀓𑀸𑀬𑀁 𑀦𑀸𑀫𑁂𑀦𑁆𑀢𑁄. 𑀞𑀸𑀦𑀦𑀺𑀲𑀚𑁆𑀚𑀸𑀲𑀬𑀦𑁂𑀲𑀼 𑀬𑁄 𑀕𑀫𑀦𑀸𑀤𑀺𑀯𑀺𑀥𑀺𑀦𑀸 𑀓𑀸𑀬𑀲𑁆𑀲 𑀧𑀼𑀭𑀢𑁄 𑀅𑀪𑀺𑀳𑀸𑀭𑁄, 𑀲𑁄 𑀅𑀪𑀺𑀓𑁆𑀓𑀫𑁄, 𑀧𑀘𑁆𑀙𑀢𑁄 𑀅𑀧𑀳𑀭𑀡𑀁 𑀧𑀝𑀺𑀓𑁆𑀓𑀫𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀞𑀸𑀦𑁂𑀧𑀻’’𑀢𑀺𑀆𑀤𑀺𑀫𑀸𑀳. 𑀆𑀲𑀦𑀲𑁆𑀲𑀸𑀢𑀺 𑀧𑀻𑀞𑀓𑀸𑀤𑀺𑀆𑀲𑀦𑀲𑁆𑀲. 𑀧𑀼𑀭𑀺𑀫𑀅𑀗𑁆𑀕𑀸𑀪𑀺𑀫𑀼𑀔𑁄𑀢𑀺 𑀅𑀝𑀦𑀺𑀓𑀸𑀤𑀺𑀧𑀼𑀭𑀺𑀫𑀸𑀯𑀬𑀯𑀸𑀪𑀺𑀫𑀼𑀔𑁄. 𑀲𑀁𑀲𑀭𑀦𑁆𑀢𑁄𑀢𑀺 𑀲𑀁𑀲𑀧𑁆𑀧𑀦𑁆𑀢𑁄. 𑀧𑀘𑁆𑀘𑀸𑀲𑀁𑀲𑀭𑀦𑁆𑀢𑁄𑀢𑀺 𑀧𑀝𑀺𑀆𑀲𑀧𑁆𑀧𑀦𑁆𑀢𑁄. 𑀏𑀲𑁂𑀯 𑀦𑀬𑁄𑀢𑀺 𑀇𑀫𑀺𑀦𑀸 𑀲𑀭𑀻𑀭𑀲𑁆𑀲𑁂𑀯 𑀅𑀪𑀺𑀫𑀼𑀔𑀲𑀁𑀲𑀧𑁆𑀧𑀦𑀧𑀝𑀺𑀆𑀲𑀧𑁆𑀧𑀦𑀸𑀦𑀺 𑀦𑀺𑀤𑀲𑁆𑀲𑁂𑀢𑀺.

𑀲𑀫𑁆𑀫𑀸 𑀧𑀚𑀸𑀦𑀦𑀁 𑀲𑀫𑁆𑀧𑀚𑀸𑀦𑀁. 𑀢𑁂𑀦 𑀅𑀢𑁆𑀢𑀦𑀸 𑀓𑀸𑀢𑀩𑁆𑀩𑀓𑀺𑀘𑁆𑀘𑀲𑁆𑀲 𑀓𑀭𑀡𑀲𑀻𑀮𑁄 𑀲𑀫𑁆𑀧𑀚𑀸𑀦𑀓𑀸𑀭𑀻𑀢𑀺 𑀆𑀳 𑁋 ‘‘𑀲𑀫𑁆𑀧𑀚𑀜𑁆𑀜𑁂𑀦 𑀲𑀩𑁆𑀩𑀓𑀺𑀘𑁆𑀘𑀓𑀸𑀭𑀻’’𑀢𑀺. 𑀲𑀫𑁆𑀧𑀚𑀸𑀦𑀫𑁂𑀯 𑀳𑀺 𑀲𑀫𑁆𑀧𑀚𑀜𑁆𑀜𑀁. 𑀲𑀫𑁆𑀧𑀚𑀜𑁆𑀜𑀲𑁆𑀲𑁂𑀯 𑀯𑀸 𑀓𑀸𑀭𑀻𑀢𑀺 𑀲𑀫𑁆𑀧𑀚𑀜𑁆𑀜𑀲𑁆𑀲𑁂𑀯 𑀓𑀭𑀡𑀲𑀻𑀮𑁄. 𑀲𑀫𑁆𑀧𑀚𑀜𑁆𑀜𑀁 𑀓𑀭𑁄𑀢𑁂𑀯𑀸𑀢𑀺 𑀅𑀪𑀺𑀓𑁆𑀓𑀦𑁆𑀢𑀸𑀤𑀻𑀲𑀼 𑀅𑀲𑀫𑁆𑀫𑁄𑀳𑀁 𑀉𑀧𑁆𑀧𑀸𑀤𑁂𑀢𑀺 𑀏𑀯, 𑀲𑀫𑁆𑀧𑀚𑀸𑀦𑀲𑁆𑀲𑁂𑀯 𑀯𑀸 𑀓𑀸𑀭𑁄 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀲𑀫𑁆𑀧𑀚𑀸𑀦𑀓𑀸𑀭𑀻.

𑀥𑀫𑁆𑀫𑀢𑁄 𑀯𑀟𑁆𑀠𑀺𑀢𑀲𑀗𑁆𑀔𑀸𑀢𑁂𑀦 𑀲𑀳 𑀅𑀢𑁆𑀣𑁂𑀦 𑀯𑀢𑁆𑀢𑀢𑀻𑀢𑀺 𑀲𑀸𑀢𑁆𑀣𑀓𑀁, 𑀅𑀪𑀺𑀓𑁆𑀓𑀦𑁆𑀢𑀸𑀤𑀺, 𑀲𑀸𑀢𑁆𑀣𑀓𑀲𑁆𑀲 𑀲𑀫𑁆𑀧𑀚𑀸𑀦𑀦𑀁 𑀲𑀸𑀢𑁆𑀣𑀓𑀲𑀫𑁆𑀧𑀚𑀜𑁆𑀜𑀁. 𑀲𑀧𑁆𑀧𑀸𑀬𑀲𑁆𑀲 𑀅𑀢𑁆𑀢𑀦𑁄 𑀉𑀧𑀓𑀸𑀭𑀸𑀯𑀳𑀲𑁆𑀲 𑀳𑀺𑀢𑀲𑁆𑀲 𑀲𑀫𑁆𑀧𑀚𑀸𑀦𑀦𑀁 𑀲𑀧𑁆𑀧𑀸𑀬𑀲𑀫𑁆𑀧𑀚𑀜𑁆𑀜𑀁. 𑀅𑀪𑀺𑀓𑁆𑀓𑀫𑀸𑀤𑀻𑀲𑀼 𑀪𑀺𑀓𑁆𑀔𑀸𑀘𑀸𑀭𑀕𑁄𑀘𑀭𑁂, 𑀅𑀜𑁆𑀜𑀢𑁆𑀣𑀸𑀧𑀺 𑀘 𑀧𑀯𑀢𑁆𑀢𑁂𑀲𑀼 𑀅𑀯𑀺𑀚𑀳𑀺𑀢𑁂 𑀓𑀫𑁆𑀫𑀝𑁆𑀞𑀸𑀦𑀲𑀗𑁆𑀔𑀸𑀢𑁂 𑀕𑁄𑀘𑀭𑁂 𑀲𑀫𑁆𑀧𑀚𑀜𑁆𑀜𑀁 𑀕𑁄𑀘𑀭𑀲𑀫𑁆𑀧𑀚𑀜𑁆𑀜𑀁. 𑀅𑀪𑀺𑀓𑁆𑀓𑀫𑀸𑀤𑀻𑀲𑀼 𑀅𑀲𑀫𑁆𑀫𑀼𑀬𑁆𑀳𑀦𑀫𑁂𑀯 𑀲𑀫𑁆𑀧𑀚𑀜𑁆𑀜𑀁 𑀅𑀲𑀫𑁆𑀫𑁄𑀳𑀲𑀫𑁆𑀧𑀚𑀜𑁆𑀜𑀁. 𑀧𑀭𑀺𑀕𑁆𑀕𑀡𑁆𑀳𑀺𑀢𑁆𑀯𑀸𑀢𑀺 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑁂𑀢𑁆𑀯𑀸, 𑀧𑀝𑀺𑀲𑀗𑁆𑀔𑀸𑀬𑀸𑀢𑀺 𑀅𑀢𑁆𑀣𑁄. 𑀲𑀗𑁆𑀖𑀤𑀲𑁆𑀲𑀦𑁂𑀦𑁂𑀯 𑀉𑀧𑁄𑀲𑀣𑀧𑀯𑀸𑀭𑀡𑀸𑀤𑀺𑀅𑀢𑁆𑀣𑀁 𑀕𑀫𑀦𑀁 𑀲𑀗𑁆𑀕𑀳𑀺𑀢𑀁. 𑀅𑀲𑀼𑀪𑀤𑀲𑁆𑀲𑀦𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀓𑀲𑀺𑀡𑀧𑀭𑀺𑀓𑀫𑁆𑀫𑀸𑀤𑀻𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀲𑀗𑁆𑀔𑁂𑀧𑀢𑁄 𑀯𑀼𑀢𑁆𑀢𑀫𑀢𑁆𑀣𑀁 𑀯𑀺𑀯𑀭𑀺𑀢𑀼𑀁 ‘‘𑀘𑁂𑀢𑀺𑀬𑀁 𑀤𑀺𑀲𑁆𑀯𑀸𑀧𑀺 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀻𑀢𑀺 𑀉𑀓𑁆𑀓𑀝𑁆𑀞𑀦𑀺𑀤𑁆𑀤𑁂𑀲𑁄 𑀏𑀲𑁄. 𑀲𑀫𑀣𑀯𑀺𑀧𑀲𑁆𑀲𑀦𑀼𑀧𑁆𑀧𑀸𑀤𑀦𑀫𑁆𑀧𑀺 𑀳𑀺 𑀪𑀺𑀓𑁆𑀔𑀼𑀦𑁄 𑀯𑀼𑀤𑁆𑀥𑀺 𑀏𑀯. 𑀤𑀓𑁆𑀔𑀺𑀡𑀤𑁆𑀯𑀸𑀭𑁂𑀢𑀺 𑀘𑁂𑀢𑀺𑀬𑀗𑁆𑀕𑀡𑀲𑁆𑀲 𑀤𑀓𑁆𑀔𑀺𑀡𑀤𑁆𑀯𑀸𑀭𑁂, 𑀢𑀣𑀸 𑀧𑀘𑁆𑀙𑀺𑀫𑀤𑁆𑀯𑀸𑀭𑁂𑀢𑀺𑀆𑀤𑀻𑀲𑀼. 𑀅𑀪𑀬𑀯𑀸𑀧𑀺 𑀧𑀸𑀴𑀺𑀬𑀦𑁆𑀢𑀺 𑀅𑀪𑀬𑀯𑀸𑀧𑀺𑀬𑀸 𑀧𑀼𑀭𑀢𑁆𑀣𑀺𑀫𑀢𑀻𑀭𑁂.

𑀩𑀼𑀤𑁆𑀥𑀯𑀁𑀲-𑀅𑀭𑀺𑀬𑀯𑀁𑀲-𑀘𑁂𑀢𑀺𑀬𑀯𑀁𑀲-𑀤𑀻𑀧𑀯𑀁𑀲𑀸𑀤𑀺𑀯𑀁𑀲𑀓𑀣𑀦𑀢𑁄 𑀫𑀳𑀸𑀅𑀭𑀺𑀬𑀯𑀁𑀲𑀪𑀸𑀡𑀓𑁄 𑀣𑁂𑀭𑁄. 𑀧𑀜𑁆𑀜𑀸𑀬𑀦𑀝𑁆𑀞𑀸𑀦𑁂𑀢𑀺 𑀘𑁂𑀢𑀺𑀬𑀲𑁆𑀲 𑀧𑀜𑁆𑀜𑀸𑀬𑀦𑀝𑁆𑀞𑀸𑀦𑁂. 𑀏𑀓𑀧𑀤𑀼𑀤𑁆𑀥𑀸𑀭𑁂𑀢𑀺 𑀧𑀤𑀼𑀤𑁆𑀥𑀸𑀭𑀧𑀢𑀺𑀝𑁆𑀞𑀸𑀦𑀧𑀭𑀺𑀯𑀢𑁆𑀢𑀦𑀁 𑀅𑀓𑀢𑁆𑀯𑀸 𑀏𑀓𑀲𑁆𑀫𑀺𑀁𑀬𑁂𑀯 𑀅𑀯𑀝𑁆𑀞𑀸𑀦𑁂. 𑀓𑁂𑀘𑀻𑀢𑀺 𑀅𑀪𑀬𑀕𑀺𑀭𑀺𑀯𑀸𑀲𑀺𑀦𑁄.

𑀢𑀲𑁆𑀫𑀺𑀁 𑀧𑀦𑀸𑀢𑀺 𑀲𑀸𑀢𑁆𑀣𑀓𑀲𑀫𑁆𑀧𑀚𑀜𑁆𑀜𑀯𑀲𑁂𑀦 𑀧𑀭𑀺𑀕𑁆𑀕𑀳𑀺𑀢𑀅𑀢𑁆𑀣𑁂𑀧𑀺 𑀕𑀫𑀦𑁂. 𑀅𑀢𑁆𑀣𑁄 𑀦𑀸𑀫 𑀥𑀫𑁆𑀫𑀢𑁄 𑀯𑀟𑁆𑀠𑀻𑀢𑀺 𑀬𑀁 𑀲𑀸𑀢𑁆𑀣𑀓𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀁 𑀕𑀫𑀦𑀁, 𑀢𑀁 𑀲𑀧𑁆𑀧𑀸𑀬𑀫𑁂𑀯𑀸𑀢𑀺 𑀲𑀺𑀬𑀸 𑀓𑀲𑁆𑀲𑀘𑀺 𑀆𑀲𑀗𑁆𑀓𑀸𑀢𑀺 𑀢𑀦𑁆𑀦𑀺𑀯𑀢𑁆𑀢𑀦𑀢𑁆𑀣𑀁 ‘‘𑀘𑁂𑀢𑀺𑀬𑀤𑀲𑁆𑀲𑀦𑀁 𑀢𑀸𑀯𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀘𑀺𑀢𑁆𑀢𑀓𑀫𑁆𑀫𑀭𑀽𑀧𑀓𑀸𑀦𑀺 𑀯𑀺𑀬𑀸𑀢𑀺 𑀘𑀺𑀢𑁆𑀢𑀓𑀫𑁆𑀫𑀓𑀢𑀸 𑀧𑀝𑀺𑀫𑀸𑀬𑁄 𑀯𑀺𑀬, 𑀬𑀦𑁆𑀢𑀧𑀬𑁄𑀕𑁂𑀦 𑀯𑀸 𑀯𑀺𑀘𑀺𑀢𑁆𑀢𑀓𑀫𑁆𑀫𑀸 𑀧𑀝𑀺𑀫𑀸𑀬 𑀲𑀤𑀺𑀲𑀸 𑀬𑀦𑁆𑀢𑀭𑀽𑀧𑀓𑀸 𑀯𑀺𑀬. 𑀅𑀲𑀫𑀧𑁂𑀓𑁆𑀔𑀦𑀁 𑀕𑁂𑀳𑀲𑁆𑀲𑀺𑀢𑀅𑀜𑁆𑀜𑀸𑀡𑀼𑀧𑁂𑀓𑁆𑀔𑀸𑀯𑀲𑁂𑀦 𑀆𑀭𑀫𑁆𑀫𑀡𑁂 𑀅𑀬𑁄𑀦𑀺𑀲𑁄 𑀑𑀮𑁄𑀓𑀦𑀸𑀤𑀺. 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀉𑀧𑁆𑀧𑀚𑁆𑀚𑀢𑀺 𑀉𑀧𑁂𑀓𑁆𑀔𑀸 𑀩𑀸𑀮𑀲𑁆𑀲 𑀫𑀽𑀴𑁆𑀳𑀲𑁆𑀲 𑀧𑀼𑀣𑀼𑀚𑁆𑀚𑀦𑀲𑁆𑀲𑀸’’𑀢𑀺𑀆𑀤𑀺 (𑀫. 𑀦𑀺. 𑁩.𑁩𑁦𑁮). 𑀳𑀢𑁆𑀣𑀺𑀆𑀤𑀺𑀲𑀫𑁆𑀫𑀤𑁆𑀤𑁂𑀦 𑀚𑀻𑀯𑀺𑀢𑀦𑁆𑀢𑀭𑀸𑀬𑁄. 𑀯𑀺𑀲𑀪𑀸𑀕𑀭𑀽𑀧𑀤𑀲𑁆𑀲𑀦𑀸𑀤𑀺𑀦𑀸 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀭𑀸𑀬𑁄.

𑀧𑀩𑁆𑀩𑀚𑀺𑀢𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀪𑀺𑀓𑁆𑀔𑀽𑀦𑀁 𑀅𑀦𑀼𑀯𑀢𑁆𑀢𑀦𑀓𑀣𑀸 𑀆𑀘𑀺𑀡𑁆𑀡𑀸, 𑀅𑀦𑀦𑀼𑀯𑀢𑁆𑀢𑀦𑀓𑀣𑀸 𑀧𑀦 𑀢𑀲𑁆𑀲𑀸 𑀅𑀧𑀭𑀸 𑀤𑀼𑀢𑀺𑀬𑀸 𑀦𑀸𑀫 𑀳𑁄𑀢𑀻𑀢𑀺 𑀆𑀳 𑁋 ‘‘𑀤𑁆𑀯𑁂 𑀓𑀣𑀸 𑀦𑀸𑀫 𑀦 𑀓𑀣𑀺𑀢𑀧𑀼𑀩𑁆𑀩𑀸’’𑀢𑀺. 𑀏𑀯𑀦𑁆𑀢𑀺 𑀇𑀫𑀺𑀦𑀸 ‘‘𑀲𑀘𑁂 𑀧𑀦𑀸’’𑀢𑀺𑀆𑀤𑀺𑀓𑀁 𑀲𑀩𑁆𑀩𑀫𑁆𑀧𑀺 𑀯𑀼𑀢𑁆𑀢𑀸𑀓𑀸𑀭𑀁 𑀧𑀘𑁆𑀘𑀸𑀫𑀲𑀢𑀺, 𑀦 ‘‘𑀧𑀼𑀭𑀺𑀲𑀲𑁆𑀲 𑀫𑀸𑀢𑀼𑀕𑀸𑀫𑀸𑀲𑀼𑀪’’𑀦𑁆𑀢𑀺𑀆𑀤𑀺𑀓𑀁 𑀯𑀼𑀘𑁆𑀘𑀫𑀸𑀦𑀁.

𑀬𑁄𑀕𑀓𑀫𑁆𑀫𑀲𑁆𑀲 𑀧𑀯𑀢𑁆𑀢𑀺𑀝𑁆𑀞𑀸𑀦𑀢𑀸𑀬 𑀪𑀸𑀯𑀦𑀸𑀬 𑀆𑀭𑀫𑁆𑀫𑀡𑀁 𑀓𑀫𑁆𑀫𑀝𑁆𑀞𑀸𑀦𑀁 𑀯𑀼𑀘𑁆𑀘𑀢𑀻𑀢𑀺 𑀆𑀳 ‘‘𑀓𑀫𑁆𑀫𑀝𑁆𑀞𑀸𑀦𑀲𑀗𑁆𑀔𑀸𑀢𑀁 𑀕𑁄𑀘𑀭’’𑀦𑁆𑀢𑀺. 𑀉𑀕𑁆𑀕𑀳𑁂𑀢𑁆𑀯𑀸𑀢𑀺 𑀬𑀣𑀸 𑀉𑀕𑁆𑀕𑀳𑀦𑀺𑀫𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺, 𑀏𑀯𑀁 𑀉𑀕𑁆𑀕𑀳𑀓𑁄𑀲𑀮𑁆𑀮𑀲𑁆𑀲 𑀲𑀫𑁆𑀧𑀸𑀤𑀦𑀯𑀲𑁂𑀦 𑀉𑀕𑁆𑀕𑀳𑁂𑀢𑁆𑀯𑀸.

𑀳𑀭𑀢𑀻𑀢𑀺 𑀓𑀫𑁆𑀫𑀝𑁆𑀞𑀸𑀦𑀁 𑀧𑀯𑀢𑁆𑀢𑁂𑀢𑀺, 𑀬𑀸𑀯 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀫𑀸 𑀅𑀦𑀼𑀬𑀼𑀜𑁆𑀚𑀢𑀻𑀢𑀺 𑀅𑀢𑁆𑀣𑁄. 𑀦 𑀧𑀘𑁆𑀘𑀸𑀳𑀭𑀢𑀻𑀢𑀺 𑀆𑀳𑀸𑀭𑀽𑀧𑀪𑁄𑀕𑀢𑁄 𑀬𑀸𑀯 𑀤𑀺𑀯𑀸𑀝𑁆𑀞𑀸𑀦𑀼𑀧𑀲𑀗𑁆𑀓𑀫𑀦𑀸 𑀓𑀫𑁆𑀫𑀝𑁆𑀞𑀸𑀦𑀁 𑀦 𑀧𑀝𑀺𑀦𑁂𑀢𑀺. 𑀲𑀫𑀸𑀤𑀸𑀬 𑀯𑀢𑁆𑀢𑀢𑀺 𑀲𑀫𑁆𑀫𑀸 𑀆𑀤𑀺𑀬𑀺𑀢𑁆𑀯𑀸 𑀢𑁂𑀲𑀁 𑀯𑀢𑁆𑀢𑀸𑀦𑀁 𑀧𑀭𑀺𑀧𑀽𑀭𑀡𑀯𑀲𑁂𑀦 𑀯𑀢𑁆𑀢𑀢𑀺. 𑀲𑀭𑀻𑀭𑀧𑀭𑀺𑀓𑀫𑁆𑀫𑀦𑁆𑀢𑀺 𑀫𑀼𑀔𑀥𑁄𑀯𑀦𑀸𑀤𑀺𑀲𑀭𑀻𑀭𑀧𑀝𑀺𑀚𑀕𑁆𑀕𑀦𑀁. 𑀤𑁆𑀯𑁂 𑀢𑀬𑁄 𑀧𑀮𑁆𑀮𑀗𑁆𑀓𑁂𑀢𑀺 𑀤𑁆𑀯𑁂 𑀢𑀬𑁄 𑀦𑀺𑀲𑀚𑁆𑀚𑀸𑀯𑀸𑀭𑁂 𑀤𑁆𑀯𑁂 𑀢𑀻𑀡𑀺 𑀉𑀡𑁆𑀳𑀸𑀲𑀦𑀸𑀦𑀺. 𑀢𑁂𑀦𑀸𑀳 𑁋 ‘‘𑀉𑀲𑀼𑀫𑀁 𑀕𑀸𑀳𑀸𑀧𑁂𑀦𑁆𑀢𑁄’’𑀢𑀺. 𑀓𑀫𑁆𑀫𑀝𑁆𑀞𑀸𑀦𑀲𑀻𑀲𑁂𑀦𑁂𑀯𑀸𑀢𑀺 𑀓𑀫𑁆𑀫𑀝𑁆𑀞𑀸𑀦𑀫𑀼𑀔𑁂𑀦𑁂𑀯 𑀓𑀫𑁆𑀫𑀝𑁆𑀞𑀸𑀦𑀁 𑀅𑀯𑀺𑀚𑀳𑀦𑁆𑀢𑁄 𑀏𑀯. 𑀢𑁂𑀦 ‘‘𑀧𑀢𑁆𑀢𑁄𑀧𑀺 𑀅𑀘𑁂𑀢𑀦𑁄’’𑀢𑀺𑀆𑀤𑀺𑀦𑀸 𑀧𑀯𑀢𑁆𑀢𑁂𑀢𑀩𑁆𑀩𑀓𑀫𑁆𑀫𑀝𑁆𑀞𑀸𑀦𑀁, 𑀬𑀣𑀸𑀧𑀭𑀺𑀳𑀭𑀺𑀬𑀫𑀸𑀦𑀁 𑀯𑀸 𑀓𑀫𑁆𑀫𑀝𑁆𑀞𑀸𑀦𑀁 𑀅𑀯𑀺𑀚𑀳𑀺𑀢𑁆𑀯𑀸𑀢𑀺 𑀤𑀲𑁆𑀲𑁂𑀢𑀺. 𑀢𑀣𑁂𑀯𑀸𑀢𑀺 𑀢𑀺𑀓𑁆𑀔𑀢𑁆𑀢𑀼𑀫𑁂𑀯. 𑀧𑀭𑀺𑀪𑁄𑀕𑀘𑁂𑀢𑀺𑀬𑀢𑁄 𑀲𑀭𑀻𑀭𑀘𑁂𑀢𑀺𑀬𑀁 𑀕𑀭𑀼𑀢𑀭𑀦𑁆𑀢𑀺 𑀓𑀢𑁆𑀯𑀸 ‘‘𑀘𑁂𑀢𑀺𑀬𑀁 𑀯𑀦𑁆𑀤𑀺𑀢𑁆𑀯𑀸’’𑀢𑀺 𑀘𑁂𑀢𑀺𑀬𑀯𑀦𑁆𑀤𑀦𑀸𑀬 𑀧𑀞𑀫𑀁 𑀓𑀭𑀡𑀻𑀬𑀢𑀸 𑀯𑀼𑀢𑁆𑀢𑀸. 𑀢𑀣𑀸 𑀳𑀺 𑀅𑀝𑁆𑀞𑀓𑀣𑀸𑀬𑀁 𑁋 ‘‘𑀘𑁂𑀢𑀺𑀬𑀁 𑀩𑀸𑀥𑀬𑀫𑀸𑀦𑀸 𑀩𑁄𑀥𑀺𑀲𑀸𑀔𑀸 𑀳𑀭𑀺𑀢𑀩𑁆𑀩𑀸’’𑀢𑀺 𑀯𑀼𑀢𑁆𑀢𑀸. 𑀩𑀼𑀤𑁆𑀥𑀕𑀼𑀡𑀸𑀦𑀼𑀲𑁆𑀲𑀭𑀡𑀯𑀲𑁂𑀦𑁂𑀯 𑀩𑁄𑀥𑀺𑀜𑁆𑀘 𑀧𑀡𑀺𑀧𑀸𑀢𑀓𑀭𑀡𑀦𑁆𑀢𑀺 𑀆𑀳 𑁋 ‘‘𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀲𑀫𑁆𑀫𑀼𑀔𑀸 𑀯𑀺𑀬 𑀦𑀺𑀧𑀘𑁆𑀘𑀓𑀸𑀭𑀁 𑀤𑀲𑁆𑀲𑁂𑀢𑁆𑀯𑀸’’𑀢𑀺. 𑀕𑀸𑀫𑀲𑀫𑀻𑀧𑁂𑀢𑀺 𑀕𑀸𑀫𑀲𑁆𑀲 𑀉𑀧𑀘𑀸𑀭𑀝𑁆𑀞𑀸𑀦𑁂.

𑀚𑀦𑀲𑀗𑁆𑀕𑀳𑀡𑀢𑁆𑀣𑀦𑁆𑀢𑀺 ‘‘𑀫𑀬𑀺 𑀅𑀓𑀣𑁂𑀦𑁆𑀢𑁂 𑀏𑀢𑁂𑀲𑀁 𑀓𑁄 𑀓𑀣𑁂𑀲𑁆𑀲𑀢𑀻’’𑀢𑀺 𑀥𑀫𑁆𑀫𑀸𑀦𑀼𑀕𑁆𑀕𑀳𑁂𑀦 𑀚𑀦𑀲𑀗𑁆𑀕𑀳𑀡𑀢𑁆𑀣𑀁. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 ‘‘𑀥𑀫𑁆𑀫𑀓𑀣𑀸 𑀦𑀸𑀫 𑀓𑀣𑁂𑀢𑀩𑁆𑀩𑀸 𑀏𑀯𑀸’’𑀢𑀺 𑀅𑀝𑁆𑀞𑀓𑀣𑀸𑀘𑀭𑀺𑀬𑀸 𑀯𑀤𑀦𑁆𑀢𑀺, 𑀬𑀲𑁆𑀫𑀸 𑀘 𑀥𑀫𑁆𑀫𑀓𑀣𑀸 𑀓𑀫𑁆𑀫𑀝𑁆𑀞𑀸𑀦𑀯𑀺𑀦𑀺𑀫𑀼𑀢𑁆𑀢𑀸 𑀦𑀸𑀫 𑀦𑀢𑁆𑀣𑀺, 𑀢𑀲𑁆𑀫𑀸. 𑀓𑀫𑁆𑀫𑀝𑁆𑀞𑀸𑀦𑀲𑀻𑀲𑁂𑀦𑁂𑀯𑀸𑀢𑀺 𑀅𑀢𑁆𑀢𑀦𑀸 𑀧𑀭𑀺𑀳𑀭𑀺𑀬𑀫𑀸𑀦𑀁 𑀓𑀫𑁆𑀫𑀝𑁆𑀞𑀸𑀦𑀁 𑀅𑀯𑀺𑀚𑀳𑀦𑁆𑀢𑁄 𑀢𑀤𑀦𑀼𑀕𑀼𑀡𑀁𑀬𑁂𑀯 𑀥𑀫𑁆𑀫𑀓𑀣𑀁 𑀓𑀣𑁂𑀢𑁆𑀯𑀸. 𑀅𑀦𑀼𑀫𑁄𑀤𑀦𑀁 𑀓𑀢𑁆𑀯𑀸𑀢𑀺 𑀏𑀢𑁆𑀣𑀸𑀧𑀺 ‘‘𑀓𑀫𑁆𑀫𑀝𑁆𑀞𑀸𑀦𑀲𑀻𑀲𑁂𑀦𑁂𑀯𑀸’’𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀲𑀫𑁆𑀧𑀢𑁆𑀢𑀧𑀭𑀺𑀘𑁆𑀙𑁂𑀤𑁂𑀦𑁂𑀯𑀸𑀢𑀺 𑀧𑀭𑀺𑀘𑀺𑀢𑁄 𑀅𑀧𑀭𑀺𑀘𑀺𑀢𑁄𑀢𑀺𑀆𑀤𑀺𑀯𑀺𑀪𑀸𑀕𑀁 𑀅𑀓𑀢𑁆𑀯𑀸 𑀲𑀫𑁆𑀧𑀢𑁆𑀢𑀓𑁄𑀝𑀺𑀬𑀸 𑀏𑀯, 𑀲𑀫𑀸𑀕𑀫𑀫𑀢𑁆𑀢𑁂𑀦𑁂𑀯𑀸𑀢𑀺 𑀅𑀢𑁆𑀣𑁄. 𑀪𑀬𑁂𑀢𑀺 𑀧𑀭𑀘𑀓𑁆𑀓𑀸𑀤𑀺𑀪𑀬𑁂.

𑀓𑀫𑁆𑀫𑀚𑀢𑁂𑀚𑁄𑀢𑀺 𑀕𑀳𑀡𑀺𑀁 𑀲𑀦𑁆𑀥𑀸𑀬𑀸𑀳. 𑀓𑀫𑁆𑀫𑀝𑁆𑀞𑀸𑀦𑀯𑀻𑀣𑀺𑀁 𑀦𑀸𑀭𑁄𑀳𑀢𑀺 𑀔𑀼𑀤𑀸𑀧𑀭𑀺𑀲𑁆𑀲𑀫𑁂𑀦 𑀓𑀺𑀮𑀦𑁆𑀢𑀓𑀸𑀬𑀢𑁆𑀢𑀸 𑀲𑀫𑀸𑀥𑀸𑀦𑀸𑀪𑀸𑀯𑀢𑁄. 𑀅𑀯𑀲𑁂𑀲𑀝𑁆𑀞𑀸𑀦𑁂𑀢𑀺 𑀬𑀸𑀕𑀼𑀬𑀸 𑀅𑀕𑁆𑀕𑀳𑀺𑀢𑀝𑁆𑀞𑀸𑀦𑁂. 𑀧𑁄𑀗𑁆𑀔𑀸𑀦𑀼𑀧𑁄𑀗𑁆𑀔𑀦𑁆𑀢𑀺 𑀓𑀫𑁆𑀫𑀝𑁆𑀞𑀸𑀦𑀼𑀧𑀝𑁆𑀞𑀸𑀦𑀲𑁆𑀲 𑀅𑀯𑀺𑀘𑁆𑀙𑁂𑀤-𑀤𑀲𑁆𑀲𑀦𑀫𑁂𑀢𑀁, 𑀬𑀣𑀸 𑀧𑁄𑀗𑁆𑀔𑀸𑀦𑀼𑀧𑁄𑀗𑁆𑀔𑀁 𑀧𑀯𑀢𑁆𑀢𑀸𑀬 𑀲𑀭𑀧𑀝𑀺𑀧𑀸𑀝𑀺𑀬𑀸 𑀅𑀦𑀯𑀺𑀘𑁆𑀙𑁂𑀤𑁄, 𑀏𑀯𑀫𑁂𑀢𑀲𑁆𑀲𑀧𑀺 𑀓𑀫𑁆𑀫𑀝𑁆𑀞𑀸𑀦𑀼𑀧𑀝𑁆𑀞𑀸𑀦𑀲𑁆𑀲𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀦𑀺𑀓𑁆𑀔𑀺𑀢𑁆𑀢𑀥𑀼𑀭𑁄 𑀪𑀸𑀯𑀦𑀸𑀦𑀼𑀬𑁄𑀕𑁂. 𑀯𑀢𑁆𑀢𑀧𑀝𑀺𑀧𑀢𑁆𑀢𑀺𑀬𑀸 𑀅𑀧𑀽𑀭𑀡𑁂𑀦 𑀲𑀩𑁆𑀩𑀯𑀢𑁆𑀢𑀸𑀦𑀺 𑀪𑀺𑀦𑁆𑀤𑀺𑀢𑁆𑀯𑀸. 𑀓𑀸𑀫𑁂 𑀅𑀯𑀻𑀢𑀭𑀸𑀕𑁄 𑀳𑁄𑀢𑀺. 𑀓𑀸𑀬𑁂 𑀅𑀯𑀻𑀢𑀭𑀸𑀕𑁄. 𑀭𑀽𑀧𑁂 𑀅𑀯𑀻𑀢𑀭𑀸𑀕𑁄. 𑀬𑀸𑀯𑀤𑀢𑁆𑀣𑀁 𑀉𑀤𑀭𑀸𑀯𑀤𑁂𑀳𑀁 𑀪𑀼𑀜𑁆𑀚𑀺𑀢𑁆𑀯𑀸 𑀲𑁂𑀬𑁆𑀬𑀲𑀼𑀔𑀁 𑀧𑀲𑁆𑀲𑀲𑀼𑀔𑀁 𑀫𑀺𑀤𑁆𑀥𑀲𑀼𑀔𑀁 𑀅𑀦𑀼𑀬𑀼𑀢𑁆𑀢𑁄 𑀯𑀺𑀳𑀭𑀢𑀺. 𑀅𑀜𑁆𑀜𑀢𑀭𑀁 𑀤𑁂𑀯𑀦𑀺𑀓𑀸𑀬𑀁 𑀧𑀡𑀺𑀥𑀸𑀬 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀢𑀻’’𑀢𑀺 (𑀤𑀻. 𑀦𑀺. 𑁩.𑁩𑁨𑁦; 𑀫. 𑀦𑀺. 𑁧.𑁧𑁮𑁬) 𑀏𑀯𑀁 𑀯𑀼𑀢𑁆𑀢𑀁 𑀧𑀜𑁆𑀘𑀯𑀺𑀥𑀘𑁂𑀢𑁄𑀯𑀺𑀦𑀺𑀩𑀦𑁆𑀥𑀘𑀺𑀢𑁆𑀢𑁄. 𑀘𑀭𑀺𑀢𑁆𑀯𑀸𑀢𑀺 𑀧𑀯𑀢𑁆𑀢𑀺𑀢𑁆𑀯𑀸.

𑀕𑀢𑀧𑀘𑁆𑀘𑀸𑀕𑀢𑀺𑀓𑀯𑀢𑁆𑀢𑀯𑀲𑁂𑀦𑀸𑀢𑀺 𑀪𑀸𑀯𑀦𑀸𑀲𑀳𑀺𑀢𑀁𑀬𑁂𑀯 𑀪𑀺𑀓𑁆𑀔𑀸𑀬 𑀕𑀢𑀧𑀘𑁆𑀘𑀸𑀕𑀢𑀁 𑀕𑀫𑀦𑀧𑀘𑁆𑀘𑀸𑀕𑀫𑀦𑀁 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀕𑀢𑀧𑀘𑁆𑀘𑀸𑀕𑀢𑀺𑀓𑀁, 𑀢𑀤𑁂𑀯 𑀯𑀢𑁆𑀢𑀁, 𑀢𑀲𑁆𑀲 𑀯𑀲𑁂𑀦. 𑀅𑀢𑁆𑀢𑀦𑁄 𑀳𑀺𑀢𑀲𑀼𑀔𑀁 𑀓𑀸𑀫𑁂𑀦𑁆𑀢𑀺 𑀇𑀘𑁆𑀙𑀦𑁆𑀢𑀻𑀢𑀺 𑀅𑀢𑁆𑀢𑀓𑀸𑀫𑀸, 𑀥𑀫𑁆𑀫𑀘𑁆𑀙𑀦𑁆𑀤𑀯𑀦𑁆𑀢𑁄. ‘‘𑀥𑀫𑁆𑀫𑁄’’𑀢𑀺 𑀳𑀺 𑀳𑀺𑀢𑀁 𑀢𑀁𑀦𑀺𑀫𑀺𑀢𑁆𑀢𑀓𑀜𑁆𑀘 𑀲𑀼𑀔𑀦𑁆𑀢𑀺. 𑀅𑀣 𑀯𑀸 𑀯𑀺𑀜𑁆𑀜𑀽𑀦𑀁 𑀥𑀫𑁆𑀫𑀸𑀦𑀁 𑀅𑀢𑁆𑀢𑀦𑀺𑀬𑀢𑁆𑀢𑀸 𑀅𑀢𑁆𑀢𑀪𑀸𑀯𑀧𑀭𑀺𑀘𑁆𑀙𑀦𑁆𑀦𑀢𑁆𑀢𑀸 𑀘 𑀅𑀢𑁆𑀢𑀸 𑀦𑀸𑀫 𑀥𑀫𑁆𑀫𑁄. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀅𑀢𑁆𑀢𑀤𑀻𑀧𑀸, 𑀪𑀺𑀓𑁆𑀔𑀯𑁂, 𑀯𑀺𑀳𑀭𑀣 𑀅𑀢𑁆𑀢𑀲𑀭𑀡𑀸’’𑀢𑀺𑀆𑀤𑀺 (𑀲𑀁. 𑀦𑀺. 𑁩.𑁪𑁩). 𑀢𑀁 𑀓𑀸𑀫𑁂𑀦𑁆𑀢𑀺 𑀇𑀘𑁆𑀙𑀦𑁆𑀢𑀻𑀢𑀺 𑀅𑀢𑁆𑀢𑀓𑀸𑀫𑀸. 𑀉𑀲𑀪𑀁 𑀦𑀸𑀫 𑀯𑀻𑀲𑀢𑀺 𑀬𑀝𑁆𑀞𑀺𑀬𑁄. 𑀢𑀸𑀬 𑀲𑀜𑁆𑀜𑀸𑀬𑀸𑀢𑀺 𑀢𑀸𑀬 𑀧𑀸𑀲𑀸𑀡𑀲𑀜𑁆𑀜𑀸𑀬, ‘‘𑀏𑀢𑁆𑀢𑀓𑀁 𑀞𑀸𑀦𑀫𑀸𑀕𑀢𑀸’’𑀢𑀺 𑀚𑀸𑀦𑀦𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑁄 𑀏𑀯 𑀦𑀬𑁄 𑀅𑀬𑀁 𑀪𑀺𑀓𑁆𑀔𑀽𑀢𑀺𑀆𑀤𑀺𑀓𑁄 𑀬𑁄 𑀞𑀸𑀦𑁂 𑀯𑀼𑀢𑁆𑀢𑁄, 𑀲𑁄 𑀏𑀯 𑀦𑀺𑀲𑀚𑁆𑀚𑀸𑀬𑀧𑀺 𑀦𑀬𑁄. 𑀧𑀘𑁆𑀙𑀢𑁄 𑀆𑀕𑀘𑁆𑀙𑀦𑁆𑀢𑀸𑀦𑀁 𑀙𑀺𑀦𑁆𑀦𑀪𑀢𑁆𑀢𑀪𑀸𑀯𑀪𑀬𑁂𑀦𑀧𑀺 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀁 𑀧𑀭𑀺𑀩𑁆𑀭𑀽𑀳𑁂𑀢𑀺.

𑀫𑀤𑁆𑀤𑀦𑁆𑀢𑀸𑀢𑀺 𑀥𑀜𑁆𑀜𑀓𑀭𑀡𑀝𑁆𑀞𑀸𑀦𑁂 𑀲𑀸𑀮𑀺𑀲𑀻𑀲𑀸𑀦𑀺 𑀫𑀤𑁆𑀤𑀦𑁆𑀢𑀸. 𑀫𑀳𑀸𑀧𑀥𑀸𑀦𑀁 𑀧𑀽𑀚𑁂𑀲𑁆𑀲𑀸𑀫𑀻𑀢𑀺 𑀅𑀫𑁆𑀳𑀸𑀓𑀁 𑀅𑀢𑁆𑀣𑀸𑀬 𑀮𑁄𑀓𑀦𑀸𑀣𑁂𑀦 𑀙 𑀯𑀲𑁆𑀲𑀸𑀦𑀺 𑀓𑀢𑀁 𑀤𑀼𑀓𑁆𑀓𑀭𑀘𑀭𑀺𑀬𑀁 𑀏𑀯𑀸𑀳𑀁 𑀬𑀣𑀸𑀲𑀢𑁆𑀢𑀺 𑀧𑀽𑀚𑁂𑀲𑁆𑀲𑀸𑀫𑀻𑀢𑀺. 𑀧𑀝𑀺𑀧𑀢𑁆𑀢𑀺𑀧𑀽𑀚𑀸 𑀳𑀺 𑀲𑀢𑁆𑀣𑀼𑀧𑀽𑀚𑀸, 𑀦 𑀆𑀫𑀺𑀲𑀧𑀽𑀚𑀸𑀢𑀺. 𑀞𑀸𑀦𑀘𑀗𑁆𑀓𑀫𑀫𑁂𑀯𑀸𑀢𑀺 𑀅𑀥𑀺𑀝𑁆𑀞𑀸𑀢𑀩𑁆𑀩𑀇𑀭𑀺𑀬𑀸𑀧𑀣𑀓𑀸𑀮𑀯𑀲𑁂𑀦 𑀯𑀼𑀢𑁆𑀢𑀁, 𑀦 𑀪𑁄𑀚𑀦𑀸𑀤𑀺𑀓𑀸𑀮𑁂𑀲𑀼 𑀅𑀯𑀲𑁆𑀲𑀁 𑀓𑀸𑀢𑀩𑁆𑀩𑀦𑀺𑀲𑀚𑁆𑀚𑀸𑀬 𑀧𑀝𑀺𑀓𑁆𑀔𑁂𑀧𑀯𑀲𑁂𑀦.

𑀯𑀻𑀣𑀺𑀁 𑀑𑀢𑀭𑀺𑀢𑁆𑀯𑀸 𑀇𑀢𑁄 𑀘𑀺𑀢𑁄 𑀅𑀦𑁄𑀮𑁄𑀓𑁂𑀢𑁆𑀯𑀸 𑀧𑀞𑀫𑀫𑁂𑀯 𑀯𑀻𑀣𑀺𑀬𑁄 𑀲𑀮𑁆𑀮𑀓𑁆𑀔𑁂𑀢𑀩𑁆𑀩𑀸𑀢𑀺 𑀆𑀳 ‘‘𑀯𑀻𑀣𑀺𑀬𑁄 𑀲𑀮𑁆𑀮𑀓𑁆𑀔𑁂𑀢𑁆𑀯𑀸’’𑀢𑀺. 𑀬𑀁 𑀲𑀦𑁆𑀥𑀸𑀬 𑀯𑀼𑀘𑁆𑀘𑀢𑀺 𑁋 ‘‘𑀧𑀸𑀲𑀸𑀤𑀺𑀓𑁂𑀦 𑀅𑀪𑀺𑀓𑁆𑀓𑀦𑁆𑀢𑁂𑀦𑀸’’𑀢𑀺𑀆𑀤𑀺. 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣 𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀆𑀳𑀸𑀭𑁂 𑀧𑀝𑀺𑀓𑀽𑀮𑀲𑀜𑁆𑀜𑀁 𑀉𑀧𑀝𑁆𑀞𑀧𑁂𑀢𑁆𑀯𑀸𑀢𑀺𑀆𑀤𑀻𑀲𑀼 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯. 𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑀦𑁆𑀢𑀺 ‘‘𑀬𑀸𑀯𑀤𑁂𑀯 𑀇𑀫𑀲𑁆𑀲 𑀓𑀸𑀬𑀲𑁆𑀲 𑀞𑀺𑀢𑀺𑀬𑀸’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁨𑁩; 𑁨.𑁨𑁪; 𑁩.𑁭𑁫; 𑀲𑀁. 𑀦𑀺. 𑁪.𑁧𑁨𑁦; 𑀅. 𑀦𑀺. 𑁬.𑁫𑁮; 𑁮.𑁯) 𑀯𑀼𑀢𑁆𑀢𑁂𑀳𑀺 𑀅𑀝𑁆𑀞𑀳𑀺 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀓𑀢𑁆𑀯𑀸. 𑀦𑁂𑀯 𑀤𑀯𑀸𑀬𑀸𑀢𑀺𑀆𑀤𑀺 𑀧𑀦 𑀧𑀝𑀺𑀓𑁆𑀔𑁂𑀧𑀤𑀲𑁆𑀲𑀦𑀁.

𑀧𑀘𑁆𑀘𑁂𑀓𑀩𑁄𑀥𑀺𑀁 𑀲𑀘𑁆𑀙𑀺𑀓𑀭𑁄𑀢𑀺, 𑀬𑀤𑀺 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑁄 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀤𑀜𑁆𑀘 𑀬𑀣𑀸 𑀳𑁂𑀝𑁆𑀞𑀸 𑀢𑀻𑀲𑀼 𑀞𑀸𑀦𑁂𑀲𑀼, 𑀏𑀯𑀁 𑀇𑀢𑁄 𑀧𑀭𑁂𑀲𑀼 𑀞𑀸𑀦𑁂𑀲𑀼 𑀉𑀧𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀢𑀢𑁆𑀣 𑀧𑀘𑁆𑀘𑁂𑀓𑀩𑁄𑀥𑀺𑀬𑀸 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀤𑀸 𑀓𑀧𑁆𑀧𑀸𑀦𑀁 𑀤𑁆𑀯𑁂 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀲𑀢𑀲𑀳𑀲𑁆𑀲𑀜𑁆𑀘 𑀢𑀚𑁆𑀚𑀁 𑀧𑀼𑀜𑁆𑀜𑀜𑀸𑀡𑀲𑀫𑁆𑀪𑀸𑀭𑀲𑀫𑁆𑀪𑀭𑀡𑀁, 𑀲𑀸𑀯𑀓𑀩𑁄𑀥𑀺𑀬𑀁 𑀅𑀕𑁆𑀕𑀲𑀸𑀯𑀓𑀸𑀦𑀁 𑀏𑀓𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀁 𑀓𑀧𑁆𑀧𑀲𑀢𑀲𑀳𑀲𑁆𑀲𑀜𑁆𑀘, 𑀫𑀳𑀸𑀲𑀸𑀯𑀓𑀸𑀦𑀁 𑀓𑀧𑁆𑀧𑀲𑀢𑀲𑀳𑀲𑁆𑀲𑀫𑁂𑀯 𑀢𑀚𑁆𑀚𑀁 𑀲𑀫𑁆𑀪𑀸𑀭𑀲𑀫𑁆𑀪𑀭𑀡𑀁, 𑀇𑀢𑀭𑁂𑀲𑀁 𑀅𑀢𑀻𑀢𑀸𑀲𑀼 𑀚𑀸𑀢𑀻𑀲𑀼 𑀯𑀺𑀯𑀝𑁆𑀝𑀲𑀦𑁆𑀦𑀺𑀲𑁆𑀲𑀬𑀯𑀲𑁂𑀦 𑀦𑀺𑀩𑁆𑀩𑀢𑁆𑀢𑀺𑀢𑀁 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀁 𑀓𑀼𑀲𑀮𑀁. 𑀩𑀸𑀳𑀺𑀬𑁄 𑀤𑀸𑀭𑀼𑀘𑀻𑀭𑀺𑀬𑁄𑀢𑀺 𑀩𑀸𑀳𑀺𑀬𑀯𑀺𑀲𑀬𑁂 𑀚𑀸𑀢𑀲𑀁𑀯𑀤𑁆𑀥𑀢𑀸𑀬 𑀩𑀸𑀳𑀺𑀬𑁄, 𑀤𑀸𑀭𑀼𑀘𑀻𑀭𑀧𑀭𑀺𑀳𑀭𑀡𑁂𑀦 𑀤𑀸𑀭𑀼𑀘𑀻𑀭𑀺𑀬𑁄𑀢𑀺 𑀮𑀤𑁆𑀥𑀲𑀫𑀜𑁆𑀜𑁄. 𑀲𑁄 𑀳𑀺 𑀆𑀬𑀲𑁆𑀫𑀸 ‘‘𑀢𑀲𑁆𑀫𑀸𑀢𑀺𑀳 𑀢𑁂, 𑀩𑀸𑀳𑀺𑀬, 𑀏𑀯𑀁 𑀲𑀺𑀓𑁆𑀔𑀺𑀢𑀩𑁆𑀩𑀁 𑁋 𑀤𑀺𑀝𑁆𑀞𑁂 𑀤𑀺𑀝𑁆𑀞𑀫𑀢𑁆𑀢𑀁 𑀪𑀯𑀺𑀲𑁆𑀲𑀢𑀻’’𑀢𑀺𑀆𑀤𑀺𑀯𑀲𑀧𑁆𑀧𑀯𑀢𑁆𑀢𑁂𑀦 (𑀉𑀤𑀸. 𑁧𑁦) 𑀲𑀁𑀔𑀺𑀢𑁆𑀢𑁂𑀦𑁂𑀯 𑀑𑀯𑀸𑀤𑁂𑀦 𑀔𑀺𑀧𑁆𑀧𑀢𑀭𑀁 𑀯𑀺𑀲𑁂𑀲𑀁 𑀅𑀥𑀺𑀕𑀘𑁆𑀙𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀔𑀺𑀧𑁆𑀧𑀸𑀪𑀺𑀜𑁆𑀜𑁄 𑀯𑀸 𑀳𑁄𑀢𑀺 𑀲𑁂𑀬𑁆𑀬𑀣𑀸𑀧𑀺 𑀣𑁂𑀭𑁄 𑀩𑀸𑀳𑀺𑀬𑁄 𑀤𑀸𑀭𑀼𑀘𑀻𑀭𑀺𑀬𑁄’’𑀢𑀺. 𑀏𑀯𑀁 𑀫𑀳𑀸𑀧𑀜𑁆𑀜𑁄 𑀯𑀸𑀢𑀺𑀆𑀤𑀻𑀲𑀼 𑀬𑀣𑀸𑀭𑀳𑀁 𑀯𑀢𑁆𑀢𑀩𑁆𑀩𑀦𑁆𑀢𑀺.

𑀢𑀦𑁆𑀢𑀺 𑀅𑀲𑀫𑁆𑀫𑀼𑀬𑁆𑀳𑀦𑀁. 𑀏𑀯𑀦𑁆𑀢𑀺 𑀇𑀤𑀸𑀦𑀺 𑀯𑀼𑀘𑁆𑀘𑀫𑀸𑀦𑀸𑀓𑀸𑀭𑀤𑀲𑁆𑀲𑀦𑀁. 𑀅𑀢𑁆𑀢𑀸 𑀅𑀪𑀺𑀓𑁆𑀓𑀫𑀢𑀻𑀢𑀺 𑀇𑀫𑀺𑀦𑀸 𑀅𑀦𑁆𑀥𑀧𑀼𑀣𑀼𑀚𑁆𑀚𑀦𑀲𑁆𑀲 𑀤𑀺𑀝𑁆𑀞𑀺𑀕𑁆𑀕𑀸𑀳𑀯𑀲𑁂𑀦 𑀅𑀪𑀺𑀓𑁆𑀓𑀫𑁂 𑀲𑀫𑁆𑀫𑀼𑀬𑁆𑀳𑀦𑀁 𑀤𑀲𑁆𑀲𑁂𑀢𑀺, 𑀅𑀳𑀁 𑀅𑀪𑀺𑀓𑁆𑀓𑀫𑀸𑀫𑀻𑀢𑀺 𑀧𑀦 𑀇𑀫𑀺𑀦𑀸 𑀫𑀸𑀦𑀕𑁆𑀕𑀸𑀳𑀯𑀲𑁂𑀦, 𑀢𑀤𑀼𑀪𑀬𑀁 𑀧𑀦 𑀢𑀡𑁆𑀳𑀸𑀬 𑀯𑀺𑀦𑀸 𑀦 𑀳𑁄𑀢𑀻𑀢𑀺 𑀢𑀡𑁆𑀳𑀸𑀕𑁆𑀕𑀸𑀳𑀯𑀲𑁂𑀦𑀧𑀺 𑀲𑀫𑁆𑀫𑀼𑀬𑁆𑀳𑀦𑀁 𑀤𑀲𑁆𑀲𑀺𑀢𑀫𑁂𑀯 𑀳𑁄𑀢𑀺, ‘‘𑀢𑀣𑀸 𑀅𑀲𑀫𑁆𑀫𑀼𑀬𑁆𑀳𑀦𑁆𑀢𑁄’’𑀢𑀺 𑀯𑀢𑁆𑀯𑀸 𑀢𑀁 𑀅𑀲𑀫𑁆𑀫𑀼𑀬𑁆𑀳𑀦𑀁 𑀬𑁂𑀦 𑀖𑀦𑀯𑀺𑀦𑀺𑀩𑁆𑀪𑁄𑀕𑁂𑀦 𑀳𑁄𑀢𑀺, 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀪𑀺𑀓𑁆𑀓𑀫𑀸𑀫𑀻𑀢𑀺 𑀘𑀺𑀢𑁆𑀢𑁂 𑀉𑀧𑁆𑀧𑀚𑁆𑀚𑀫𑀸𑀦𑁂’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀬𑀲𑁆𑀫𑀸 𑀯𑀸𑀬𑁄𑀥𑀸𑀢𑀼𑀬𑀸 𑀅𑀦𑀼𑀕𑀢𑀸 𑀢𑁂𑀚𑁄𑀥𑀸𑀢𑀼 𑀉𑀤𑁆𑀥𑀭𑀡𑀲𑁆𑀲 𑀧𑀘𑁆𑀘𑀬𑁄. 𑀉𑀤𑁆𑀥𑀭𑀡𑀕𑀢𑀺𑀓𑀸 𑀳𑀺 𑀢𑁂𑀚𑁄𑀥𑀸𑀢𑀽𑀢𑀺 𑀉𑀤𑁆𑀥𑀭𑀡𑁂 𑀯𑀸𑀬𑁄𑀥𑀸𑀢𑀼𑀬𑀸 𑀢𑀲𑁆𑀲𑀸 𑀅𑀦𑀼𑀕𑀢𑀪𑀸𑀯𑁄, 𑀢𑀲𑁆𑀫𑀸 𑀇𑀫𑀸𑀲𑀁 𑀤𑁆𑀯𑀺𑀦𑁆𑀦𑀫𑁂𑀢𑁆𑀣 𑀥𑀸𑀢𑀽𑀦𑀁 𑀲𑀸𑀫𑀢𑁆𑀣𑀺𑀬𑀢𑁄 𑀅𑀥𑀺𑀫𑀢𑁆𑀢𑀢𑀸, 𑀇𑀢𑀭𑀸𑀲𑀜𑁆𑀘 𑀑𑀫𑀢𑁆𑀢𑀢𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀏𑀓𑁂𑀓𑀧𑀸𑀤𑀼𑀤𑁆𑀥𑀭𑀡𑁂…𑀧𑁂… 𑀩𑀮𑀯𑀢𑀺𑀬𑁄’’𑀢𑀺 𑀆𑀳. 𑀬𑀲𑁆𑀫𑀸 𑀧𑀦 𑀢𑁂𑀚𑁄𑀥𑀸𑀢𑀼𑀬𑀸 𑀅𑀦𑀼𑀕𑀢𑀸 𑀯𑀸𑀬𑁄𑀥𑀸𑀢𑀼 𑀅𑀢𑀺𑀳𑀭𑀡𑀯𑀻𑀢𑀺𑀳𑀭𑀡𑀸𑀦𑀁 𑀧𑀘𑁆𑀘𑀬𑁄. 𑀢𑀺𑀭𑀺𑀬𑀕𑀢𑀺𑀓𑀸𑀬 𑀳𑀺 𑀯𑀸𑀬𑁄𑀥𑀸𑀢𑀼𑀬𑀸 𑀅𑀢𑀺𑀳𑀭𑀡𑀯𑀻𑀢𑀺𑀳𑀭𑀡𑁂𑀲𑀼 𑀲𑀸𑀢𑀺𑀲𑀬𑁄 𑀩𑁆𑀬𑀸𑀧𑀸𑀭𑁄𑀢𑀺 𑀢𑁂𑀚𑁄𑀥𑀸𑀢𑀼𑀬𑀸 𑀢𑀲𑁆𑀲𑀸𑀦𑀼𑀕𑀢𑀪𑀸𑀯𑁄, 𑀢𑀲𑁆𑀫𑀸 𑀇𑀫𑀸𑀲𑀁 𑀤𑁆𑀯𑀺𑀦𑁆𑀦𑀫𑁂𑀢𑁆𑀣 𑀲𑀸𑀫𑀢𑁆𑀣𑀺𑀬𑀢𑁄 𑀅𑀥𑀺𑀫𑀢𑁆𑀢𑀢𑀸, 𑀇𑀢𑀭𑀸𑀲𑀜𑁆𑀘 𑀑𑀫𑀢𑁆𑀢𑀢𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀣𑀸 𑀅𑀢𑀺𑀳𑀭𑀡𑀯𑀻𑀢𑀺𑀳𑀭𑀡𑁂𑀲𑀽’’𑀢𑀺 𑀆𑀳. 𑀲𑀢𑀺𑀧𑀺 𑀅𑀦𑀼𑀕𑀫𑀦𑀸𑀦𑀼𑀕𑀦𑁆𑀢𑀩𑁆𑀩𑀢𑀸𑀯𑀺𑀲𑁂𑀲𑁂 𑀢𑁂𑀚𑁄𑀥𑀸𑀢𑀼𑀯𑀸𑀬𑁄𑀥𑀸𑀢𑀼𑀪𑀸𑀯𑀫𑀢𑁆𑀢𑀁 𑀲𑀦𑁆𑀥𑀸𑀬 𑀢𑀣𑀸-𑀲𑀤𑁆𑀤𑀕𑁆𑀕𑀳𑀡𑀁.

𑀢𑀢𑁆𑀣 𑀅𑀓𑁆𑀓𑀦𑁆𑀢𑀝𑁆𑀞𑀸𑀦𑀢𑁄 𑀧𑀸𑀤𑀲𑁆𑀲 𑀉𑀓𑁆𑀔𑀺𑀧𑀦𑀁 𑀉𑀤𑁆𑀥𑀭𑀡𑀁, 𑀞𑀺𑀢𑀝𑁆𑀞𑀸𑀦𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀧𑀼𑀭𑀢𑁄 𑀳𑀭𑀡𑀁 𑀅𑀢𑀺𑀳𑀭𑀡𑀁. 𑀭𑀼𑀓𑁆𑀔𑀔𑀸𑀡𑀼𑀆𑀤𑀺𑀧𑀭𑀺𑀳𑀭𑀡𑀢𑁆𑀣𑀁, 𑀧𑀢𑀺𑀝𑁆𑀞𑀺𑀢𑀧𑀸𑀤𑀖𑀝𑁆𑀝𑀦𑀧𑀭𑀺𑀳𑀭𑀡𑀢𑁆𑀣𑀁 𑀯𑀸 𑀧𑀲𑁆𑀲𑁂𑀦 𑀳𑀭𑀡𑀁 𑀯𑀻𑀢𑀺𑀳𑀭𑀡𑀁. 𑀬𑀸𑀯 𑀧𑀢𑀺𑀝𑁆𑀞𑀺𑀢𑀧𑀸𑀤𑁄, 𑀢𑀸𑀯 𑀆𑀳𑀭𑀡𑀁 𑀅𑀢𑀺𑀳𑀭𑀡𑀁, 𑀢𑀢𑁄 𑀧𑀭𑀁 𑀳𑀭𑀡𑀁 𑀯𑀻𑀢𑀺𑀳𑀭𑀡𑀦𑁆𑀢𑀺 𑀅𑀬𑀁 𑀯𑀸 𑀏𑀢𑁂𑀲𑀁 𑀯𑀺𑀲𑁂𑀲𑁄. 𑀬𑀲𑁆𑀫𑀸 𑀧𑀣𑀯𑀻𑀥𑀸𑀢𑀼𑀬𑀸 𑀅𑀦𑀼𑀕𑀢𑀸 𑀆𑀧𑁄𑀥𑀸𑀢𑀼 𑀯𑁄𑀲𑁆𑀲𑀚𑁆𑀚𑀦𑀲𑁆𑀲 𑀧𑀘𑁆𑀘𑀬𑁄. 𑀕𑀭𑀼𑀢𑀭𑀲𑀪𑀸𑀯𑀸 𑀳𑀺 𑀆𑀧𑁄𑀥𑀸𑀢𑀽𑀢𑀺 𑀯𑁄𑀲𑁆𑀲𑀚𑁆𑀚𑀦𑁂 𑀧𑀣𑀯𑀻𑀥𑀸𑀢𑀼𑀬𑀸 𑀢𑀲𑁆𑀲𑀸𑀦𑀼𑀕𑀢𑀪𑀸𑀯𑁄, 𑀢𑀲𑁆𑀫𑀸 𑀢𑀸𑀲𑀁 𑀤𑁆𑀯𑀺𑀦𑁆𑀦𑀫𑁂𑀢𑁆𑀣 𑀲𑀸𑀫𑀢𑁆𑀣𑀺𑀬𑀢𑁄 𑀅𑀥𑀺𑀫𑀢𑁆𑀢𑀢𑀸, 𑀇𑀢𑀭𑀸𑀲𑀜𑁆𑀘 𑀑𑀫𑀢𑁆𑀢𑀢𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀯𑁄𑀲𑁆𑀲𑀚𑁆𑀚𑀦𑁂…𑀧𑁂… 𑀩𑀮𑀯𑀢𑀺𑀬𑁄’’𑀢𑀺. 𑀬𑀲𑁆𑀫𑀸 𑀧𑀦 𑀆𑀧𑁄𑀥𑀸𑀢𑀼𑀬𑀸 𑀅𑀦𑀼𑀕𑀢𑀸 𑀧𑀣𑀯𑀻𑀥𑀸𑀢𑀼 𑀲𑀦𑁆𑀦𑀺𑀓𑁆𑀔𑁂𑀧𑀦𑀲𑁆𑀲 𑀧𑀘𑁆𑀘𑀬𑁄. 𑀧𑀢𑀺𑀝𑁆𑀞𑀸𑀪𑀸𑀯𑁂 𑀯𑀺𑀬 𑀧𑀢𑀺𑀝𑁆𑀞𑀸𑀧𑀦𑁂𑀧𑀺 𑀢𑀲𑁆𑀲𑀸 𑀲𑀸𑀢𑀺𑀲𑀬𑀓𑀺𑀘𑁆𑀘𑀢𑁆𑀢𑀸 𑀆𑀧𑁄𑀥𑀸𑀢𑀼𑀬𑀸 𑀢𑀲𑁆𑀲𑀸 𑀅𑀦𑀼𑀕𑀢𑀪𑀸𑀯𑁄, 𑀢𑀣𑀸 𑀖𑀝𑁆𑀝𑀦𑀓𑀺𑀭𑀺𑀬𑀸𑀬 𑀧𑀣𑀯𑀻𑀥𑀸𑀢𑀼𑀬𑀸 𑀯𑀲𑁂𑀦 𑀲𑀦𑁆𑀦𑀺𑀭𑀼𑀫𑁆𑀪𑀦𑀲𑁆𑀲 𑀲𑀺𑀚𑁆𑀛𑀦𑀢𑁄 𑀢𑀢𑁆𑀣𑀸𑀧𑀺 𑀧𑀣𑀯𑀻𑀥𑀸𑀢𑀼𑀬𑀸 𑀆𑀧𑁄𑀥𑀸𑀢𑀼𑀅𑀦𑀼𑀕𑀢𑀪𑀸𑀯𑁄, 𑀢𑀲𑁆𑀫𑀸 𑀯𑀼𑀢𑁆𑀢𑀁 𑁋 ‘‘𑀢𑀣𑀸 𑀲𑀦𑁆𑀦𑀺𑀓𑁆𑀔𑁂𑀧𑀦𑀲𑀦𑁆𑀦𑀺𑀭𑀼𑀫𑁆𑀪𑀦𑁂𑀲𑀽’’𑀢𑀺.

𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀅𑀪𑀺𑀓𑁆𑀓𑀫𑀦𑁂, 𑀢𑁂𑀲𑀼 𑀯𑀸 𑀯𑀼𑀢𑁆𑀢𑁂𑀲𑀼 𑀉𑀤𑁆𑀥𑀭𑀡𑀸𑀤𑀻𑀲𑀼 𑀙𑀲𑀼 𑀓𑁄𑀝𑁆𑀞𑀸𑀲𑁂𑀲𑀼. 𑀉𑀤𑁆𑀥𑀭𑀡𑁂𑀢𑀺 𑀉𑀤𑁆𑀥𑀭𑀡𑀓𑁆𑀔𑀡𑁂. 𑀭𑀽𑀧𑀸𑀭𑀽𑀧𑀥𑀫𑁆𑀫𑀸𑀢𑀺 𑀉𑀤𑁆𑀥𑀭𑀡𑀸𑀓𑀸𑀭𑁂𑀦 𑀧𑀯𑀢𑁆𑀢𑀸 𑀭𑀽𑀧𑀥𑀫𑁆𑀫𑀸 𑀢𑀁𑀲𑀫𑀼𑀝𑁆𑀞𑀸𑀧𑀓𑀸 𑀅𑀭𑀽𑀧𑀥𑀫𑁆𑀫𑀸 𑀘. 𑀅𑀢𑀺𑀳𑀭𑀡𑀁 𑀦 𑀧𑀸𑀧𑀼𑀡𑀦𑁆𑀢𑀺 𑀔𑀡𑀫𑀢𑁆𑀢𑀸𑀯𑀝𑁆𑀞𑀸𑀦𑀢𑁄. 𑀢𑀢𑁆𑀣 𑀢𑀢𑁆𑀣𑁂𑀯𑀸𑀢𑀺 𑀬𑀢𑁆𑀣 𑀬𑀢𑁆𑀣 𑀉𑀧𑁆𑀧𑀦𑁆𑀦𑀸, 𑀢𑀢𑁆𑀣 𑀢𑀢𑁆𑀣𑁂𑀯. 𑀦 𑀳𑀺 𑀥𑀫𑁆𑀫𑀸𑀦𑀁 𑀤𑁂𑀲𑀦𑁆𑀢𑀭𑀲𑀗𑁆𑀓𑀫𑀦𑀁 𑀅𑀢𑁆𑀣𑀺. 𑀧𑀩𑁆𑀩𑀁 𑀧𑀩𑁆𑀩𑀦𑁆𑀢𑀺𑀆𑀤𑀺 𑀉𑀤𑁆𑀥𑀭𑀡𑀸𑀤𑀺𑀓𑁄𑀝𑁆𑀞𑀸𑀲𑁂 𑀲𑀦𑁆𑀥𑀸𑀬 𑀲𑀪𑀸𑀕𑀲𑀦𑁆𑀢𑀢𑀺𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀢𑀺𑀇𑀢𑁆𑀢𑀭𑁄 𑀳𑀺 𑀭𑀽𑀧𑀥𑀫𑁆𑀫𑀸𑀦𑀫𑁆𑀧𑀺 𑀧𑀯𑀢𑁆𑀢𑀺𑀓𑁆𑀔𑀡𑁄, 𑀕𑀫𑀦𑀲𑁆𑀲𑀸𑀤𑀸𑀦𑀁 𑀤𑁂𑀯𑀧𑀼𑀢𑁆𑀢𑀸𑀦𑀁 𑀳𑁂𑀝𑁆𑀞𑀼𑀧𑀭𑀺𑀬𑀸𑀬𑁂𑀦 𑀧𑀝𑀺𑀫𑀼𑀔𑀁 𑀥𑀸𑀯𑀦𑁆𑀢𑀸𑀦𑀁 𑀲𑀺𑀭𑀲𑀺 𑀧𑀸𑀤𑁂 𑀘 𑀩𑀤𑁆𑀥𑀔𑀼𑀭𑀥𑀸𑀭𑀸𑀲𑀫𑀸𑀕𑀫𑀢𑁄𑀧𑀺 𑀲𑀻𑀖𑀢𑀭𑁄. 𑀬𑀣𑀸 𑀢𑀺𑀮𑀸𑀦𑀁 𑀪𑀚𑁆𑀚𑀺𑀬𑀫𑀸𑀦𑀸𑀦𑀁 𑀢𑀝𑀢𑀝𑀸𑀬𑀦𑁂𑀦 𑀪𑁂𑀤𑁄 𑀮𑀓𑁆𑀔𑀻𑀬𑀢𑀺, 𑀏𑀯𑀁 𑀲𑀗𑁆𑀔𑀢𑀥𑀫𑁆𑀫𑀸𑀦𑀁 𑀉𑀧𑁆𑀧𑀸𑀤𑁂𑀦𑀸𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀢𑀝𑀢𑀝𑀸𑀬𑀦𑁆𑀢𑀸’’𑀢𑀺 𑀯𑀼𑀢𑁆𑀢𑀁. 𑀉𑀧𑁆𑀧𑀦𑁆𑀦𑀸 𑀳𑀺 𑀏𑀓𑀦𑁆𑀢𑀢𑁄 𑀪𑀺𑀚𑁆𑀚𑀦𑁆𑀢𑀻𑀢𑀺.

𑀲𑀤𑁆𑀥𑀺𑀁 𑀭𑀽𑀧𑁂𑀦𑀸𑀢𑀺 𑀇𑀤𑀁 𑀢𑀲𑁆𑀲 𑀢𑀲𑁆𑀲 𑀘𑀺𑀢𑁆𑀢𑀲𑁆𑀲 𑀦𑀺𑀭𑁄𑀥𑁂𑀦 𑀲𑀤𑁆𑀥𑀺𑀁 𑀦𑀺𑀭𑀼𑀚𑁆𑀛𑀦𑀓𑀭𑀽𑀧𑀥𑀫𑁆𑀫𑀯𑀲𑁂𑀦 𑀯𑀼𑀢𑁆𑀢𑀁, 𑀬𑀁 𑀢𑀢𑁄 𑀲𑀢𑁆𑀢𑀭𑀲𑀫𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂 𑀉𑀧𑁆𑀧𑀦𑁆𑀦𑀁. 𑀅𑀜𑁆𑀜𑀣𑀸 𑀬𑀤𑀺 𑀭𑀽𑀧𑀸𑀭𑀽𑀧𑀥𑀫𑁆𑀫𑀸 𑀲𑀫𑀸𑀦𑀓𑁆𑀔𑀡𑀸 𑀲𑀺𑀬𑀼𑀁, ‘‘𑀭𑀽𑀧𑀁 𑀕𑀭𑀼𑀧𑀭𑀺𑀡𑀸𑀫𑀁 𑀤𑀦𑁆𑀥𑀦𑀺𑀭𑁄𑀥’’𑀦𑁆𑀢𑀺𑀆𑀤𑀺𑀯𑀘𑀦𑁂𑀳𑀺 𑀯𑀺𑀭𑁄𑀥𑁄 𑀲𑀺𑀬𑀸. 𑀢𑀣𑀸 𑁋 ‘‘𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀁 𑀏𑀓𑀥𑀫𑁆𑀫𑀫𑁆𑀧𑀺 𑀲𑀫𑀦𑀼𑀧𑀲𑁆𑀲𑀸𑀫𑀺, 𑀬𑀁 𑀏𑀯𑀁 𑀮𑀳𑀼𑀧𑀭𑀺𑀯𑀢𑁆𑀢𑀁, 𑀬𑀣𑀬𑀺𑀤𑀁 𑀘𑀺𑀢𑁆𑀢’’𑀦𑁆𑀢𑀺 (𑀅. 𑀦𑀺. 𑁧.𑁪𑁮) 𑀏𑀯𑀫𑀸𑀤𑀺𑀧𑀸𑀴𑀺𑀬𑀸 𑀘. 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀳𑀺 𑀲𑀸𑀭𑀫𑁆𑀫𑀡𑀲𑀪𑀸𑀯𑀸 𑀬𑀣𑀸𑀩𑀮𑀁 𑀅𑀢𑁆𑀢𑀦𑁄 𑀆𑀭𑀫𑁆𑀫𑀡𑀧𑀘𑁆𑀘𑀬𑀪𑀽𑀢𑀫𑀢𑁆𑀣𑀁 𑀯𑀺𑀪𑀸𑀯𑁂𑀦𑁆𑀢𑀸𑀬𑁂𑀯 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀢𑁂𑀲𑀁 𑀢𑀁𑀲𑀪𑀸𑀯𑀦𑀺𑀧𑁆𑀨𑀢𑁆𑀢𑀺𑀅𑀦𑀦𑁆𑀢𑀭𑀁 𑀦𑀺𑀭𑁄𑀥𑁄, 𑀭𑀽𑀧𑀥𑀫𑁆𑀫𑀸 𑀧𑀦 𑀅𑀦𑀸𑀭𑀫𑁆𑀫𑀡𑀸 𑀧𑀓𑀸𑀲𑁂𑀢𑀩𑁆𑀩𑀸. 𑀏𑀯𑀁 𑀢𑁂𑀲𑀁 𑀧𑀓𑀸𑀲𑁂𑀢𑀩𑁆𑀩𑀪𑀸𑀯𑀦𑀺𑀧𑁆𑀨𑀢𑁆𑀢𑀺 𑀲𑁄𑀴𑀲𑀳𑀺 𑀘𑀺𑀢𑁆𑀢𑁂𑀳𑀺 𑀳𑁄𑀢𑀻𑀢𑀺 𑀢𑀗𑁆𑀔𑀡𑀸𑀬𑀼𑀓𑀢𑀸 𑀢𑁂𑀲𑀁 𑀇𑀘𑁆𑀙𑀺𑀢𑀸, 𑀮𑀳𑀼𑀓𑀯𑀺𑀜𑁆𑀜𑀸𑀡𑀲𑁆𑀲 𑀯𑀺𑀲𑀬𑀲𑀗𑁆𑀕𑀢𑀺𑀫𑀢𑁆𑀢𑀧𑀘𑁆𑀘𑀬𑀢𑀸𑀬 𑀢𑀺𑀡𑁆𑀡𑀁 𑀔𑀦𑁆𑀥𑀸𑀦𑀁, 𑀯𑀺𑀲𑀬𑀲𑀗𑁆𑀕𑀢𑀺𑀫𑀢𑁆𑀢𑀢𑀸𑀬 𑀘 𑀯𑀺𑀜𑁆𑀜𑀸𑀡𑀲𑁆𑀲 𑀮𑀳𑀼𑀧𑀭𑀺𑀯𑀢𑁆𑀢𑀺𑀢𑀸, 𑀤𑀦𑁆𑀥𑀫𑀳𑀸𑀪𑀽𑀢𑀧𑀘𑁆𑀘𑀬𑀢𑀸𑀬 𑀭𑀽𑀧𑀥𑀫𑁆𑀫𑀸𑀦𑀁 𑀤𑀦𑁆𑀥𑀧𑀭𑀺𑀯𑀢𑁆𑀢𑀺𑀢𑀸. 𑀦𑀸𑀦𑀸𑀥𑀸𑀢𑀼𑀬𑀸 𑀬𑀣𑀸𑀪𑀽𑀢𑀜𑀸𑀡𑀁 𑀔𑁄 𑀧𑀦 𑀢𑀣𑀸𑀕𑀢𑀲𑁆𑀲𑁂𑀯, 𑀢𑁂𑀦 𑀘 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁄 𑀭𑀽𑀧𑀥𑀫𑁆𑀫𑁄𑀯 𑀯𑀼𑀢𑁆𑀢𑁄, 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑁄 𑀘 𑀢𑀲𑁆𑀲𑁂𑀯𑀸𑀢𑀺 𑀭𑀽𑀧𑀸𑀭𑀽𑀧𑀥𑀫𑁆𑀫𑀸𑀦𑀁 𑀲𑀫𑀸𑀦𑀓𑁆𑀔𑀡𑀢𑀸 𑀦 𑀬𑀼𑀚𑁆𑀚𑀢𑁂𑀯, 𑀢𑀲𑁆𑀫𑀸 𑀯𑀼𑀢𑁆𑀢𑀦𑀬𑁂𑀦𑁂𑀯𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀅𑀜𑁆𑀜𑀁 𑀉𑀧𑁆𑀧𑀚𑁆𑀚𑀢𑁂 𑀘𑀺𑀢𑁆𑀢𑀁, 𑀅𑀜𑁆𑀜𑀁 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀢𑀻𑀢𑀺 𑀬𑀁 𑀧𑀼𑀭𑀺𑀫𑀼𑀧𑁆𑀧𑀦𑁆𑀦𑀁 𑀘𑀺𑀢𑁆𑀢𑀁, 𑀢𑀁 𑀅𑀜𑁆𑀜𑀁, 𑀢𑀁 𑀧𑀦 𑀦𑀺𑀭𑀼𑀚𑁆𑀛𑀦𑁆𑀢𑀁 𑀅𑀧𑀭𑀲𑁆𑀲 𑀅𑀦𑀦𑁆𑀢𑀭𑀸𑀤𑀺𑀧𑀘𑁆𑀘𑀬𑁄 𑀳𑀼𑀢𑁆𑀯𑀸 𑀏𑀯 𑀦𑀺𑀭𑀼𑀚𑁆𑀛𑀢𑀻𑀢𑀺 𑀢𑀣𑀸𑀮𑀤𑁆𑀥𑀧𑀘𑁆𑀘𑀬𑀁 𑀅𑀜𑁆𑀜𑀁 𑀉𑀧𑁆𑀧𑀚𑁆𑀚𑀢𑁂 𑀘𑀺𑀢𑁆𑀢𑀁. 𑀬𑀤𑀺 𑀏𑀯𑀁 𑀢𑁂𑀲𑀁 𑀅𑀦𑁆𑀢𑀭𑁄 𑀮𑀩𑁆𑀪𑁂𑀬𑁆𑀬𑀸𑀢𑀺, 𑀦𑁄𑀢𑀺 𑀆𑀳 ‘‘𑀅𑀯𑀻𑀘𑀺𑀫𑀦𑀼𑀧𑀩𑀦𑁆𑀥𑁄’’𑀢𑀺. 𑀬𑀣𑀸 𑀯𑀻𑀘𑀺 𑀅𑀦𑁆𑀢𑀭𑁄 𑀦 𑀮𑀩𑁆𑀪𑀢𑀺, ‘‘𑀢𑀤𑁂𑀯𑁂𑀢’’𑀦𑁆𑀢𑀺 𑀅𑀯𑀺𑀲𑁂𑀲𑀯𑀺𑀤𑀽 𑀫𑀜𑁆𑀜𑀦𑁆𑀢𑀺, 𑀏𑀯𑀁 𑀅𑀦𑀼 𑀅𑀦𑀼 𑀧𑀩𑀦𑁆𑀥𑁄 𑀘𑀺𑀢𑁆𑀢𑀲𑀦𑁆𑀢𑀸𑀦𑁄 𑀭𑀽𑀧𑀲𑀦𑁆𑀢𑀸𑀦𑁄 𑀘 𑀦𑀤𑀻𑀲𑁄𑀢𑁄𑀯 𑀦𑀤𑀺𑀬𑀁 𑀉𑀤𑀓𑀧𑁆𑀧𑀯𑀸𑀳𑁄 𑀯𑀺𑀬 𑀯𑀢𑁆𑀢𑀢𑀺.

𑀅𑀪𑀺𑀫𑀼𑀔𑀁 𑀮𑁄𑀓𑀺𑀢𑀁 𑀆𑀮𑁄𑀓𑀺𑀢𑀦𑁆𑀢𑀺 𑀆𑀳 ‘‘𑀧𑀼𑀭𑀢𑁄𑀧𑁂𑀓𑁆𑀔𑀦’’𑀦𑁆𑀢𑀺. 𑀬𑀲𑁆𑀫𑀸 𑀬𑀁𑀤𑀺𑀲𑀸𑀪𑀺𑀫𑀼𑀔𑁄 𑀕𑀘𑁆𑀙𑀢𑀺 𑀢𑀺𑀝𑁆𑀞𑀢𑀺 𑀦𑀺𑀲𑀻𑀤𑀢𑀺 𑀯𑀸, 𑀢𑀤𑀪𑀺𑀫𑀼𑀔𑀁 𑀧𑁂𑀓𑁆𑀔𑀦𑀁 𑀆𑀮𑁄𑀓𑀺𑀢𑀁, 𑀢𑀲𑁆𑀫𑀸 𑀢𑀤𑀦𑀼𑀕𑀢𑀁 𑀯𑀺𑀤𑀺𑀲𑀸𑀮𑁄𑀓𑀦𑀁 𑀯𑀺𑀮𑁄𑀓𑀺𑀢𑀦𑁆𑀢𑀺 𑀆𑀳 ‘‘𑀯𑀺𑀮𑁄𑀓𑀺𑀢𑀁 𑀦𑀸𑀫 𑀅𑀦𑀼𑀤𑀺𑀲𑀸𑀧𑁂𑀓𑁆𑀔𑀦’’𑀦𑁆𑀢𑀺. 𑀲𑀫𑁆𑀫𑀚𑁆𑀚𑀦𑀧𑀭𑀺𑀪𑀡𑁆𑀟𑀸𑀤𑀺𑀓𑀭𑀡𑁂 𑀑𑀮𑁄𑀓𑀺𑀢𑀲𑁆𑀲, 𑀉𑀮𑁆𑀮𑁄𑀓𑀸𑀳𑀭𑀡𑀸𑀤𑀻𑀲𑀼 𑀉𑀮𑁆𑀮𑁄𑀓𑀺𑀢𑀲𑁆𑀲, 𑀧𑀘𑁆𑀙𑀢𑁄 𑀆𑀕𑀘𑁆𑀙𑀦𑁆𑀢𑀲𑁆𑀲 𑀧𑀭𑀺𑀲𑁆𑀲𑀬𑀲𑁆𑀲 𑀧𑀭𑀺𑀯𑀚𑁆𑀚𑀦𑀸𑀤𑀺𑀯𑀲𑁂𑀦 𑀅𑀧𑀮𑁄𑀓𑀺𑀢𑀲𑁆𑀲 𑀘 𑀲𑀺𑀬𑀸 𑀲𑀫𑁆𑀪𑀯𑁄𑀢𑀺 𑀆𑀳 𑁋 ‘‘𑀇𑀫𑀺𑀦𑀸 𑀯𑀸 𑀫𑀼𑀔𑁂𑀦 𑀲𑀩𑁆𑀩𑀸𑀦𑀺𑀧𑀺 𑀢𑀸𑀦𑀺 𑀕𑀳𑀺𑀢𑀸𑀦𑁂𑀯𑀸’’𑀢𑀺.

𑀓𑀸𑀬𑀲𑀓𑁆𑀔𑀺𑀦𑁆𑀢𑀺 𑀓𑀸𑀬𑁂𑀦 𑀲𑀘𑁆𑀙𑀺𑀓𑀢𑀯𑀦𑁆𑀢𑀁, 𑀧𑀘𑁆𑀘𑀓𑁆𑀔𑀓𑀸𑀭𑀺𑀦𑀦𑁆𑀢𑀺 𑀅𑀢𑁆𑀣𑁄. 𑀲𑁄𑀳𑀸𑀬𑀲𑁆𑀫𑀸 𑀯𑀺𑀧𑀲𑁆𑀲𑀦𑀸𑀓𑀸𑀮𑁂 𑀏𑀯 ‘‘𑀬𑀫𑁂𑀯𑀸𑀳𑀁 𑀇𑀦𑁆𑀤𑁆𑀭𑀺𑀬𑁂𑀲𑀼 𑀅𑀕𑀼𑀢𑁆𑀢𑀤𑁆𑀯𑀸𑀭𑀢𑀁 𑀦𑀺𑀲𑁆𑀲𑀸𑀬 𑀲𑀸𑀲𑀦𑁂 𑀅𑀦𑀪𑀺𑀭𑀢𑀺𑀆𑀤𑀺𑀯𑀺𑀧𑁆𑀧𑀓𑀸𑀭𑀁 𑀧𑀢𑁆𑀢𑁄, 𑀢𑀫𑁂𑀯 𑀲𑀼𑀝𑁆𑀞𑀼 𑀦𑀺𑀕𑁆𑀕𑀳𑁂𑀲𑁆𑀲𑀸𑀫𑀻’’𑀢𑀺 𑀉𑀲𑁆𑀲𑀸𑀳𑀚𑀸𑀢𑁄 𑀩𑀮𑀯𑀳𑀺𑀭𑁄𑀢𑁆𑀢𑀧𑁆𑀧𑁄, 𑀢𑀢𑁆𑀣 𑀘 𑀓𑀢𑀸𑀥𑀺𑀓𑀸𑀭𑀢𑁆𑀢𑀸 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁂 𑀉𑀓𑁆𑀓𑀁𑀲𑀧𑀸𑀭𑀫𑀺𑀧𑁆𑀧𑀢𑁆𑀢𑁄, 𑀢𑁂𑀦𑁂𑀯 𑀦𑀁 𑀲𑀢𑁆𑀣𑀸 𑁋 ‘‘𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑀸𑀦𑀁 𑀬𑀤𑀺𑀤𑀁 𑀦𑀦𑁆𑀤𑁄’’𑀢𑀺 (𑀅. 𑀦𑀺. 𑁧.𑁨𑁩𑁦) 𑀏𑀢𑀤𑀕𑁆𑀕𑁂 𑀞𑀧𑁂𑀲𑀺.

𑀲𑀸𑀢𑁆𑀣𑀓𑀢𑀸 𑀘 𑀲𑀧𑁆𑀧𑀸𑀬𑀢𑀸 𑀘 𑀯𑁂𑀤𑀺𑀢𑀩𑁆𑀩𑀸 𑀆𑀮𑁄𑀓𑀺𑀢𑀯𑀺𑀮𑁄𑀓𑀺𑀢𑀲𑁆𑀲𑀸𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑁄. 𑀢𑀲𑁆𑀫𑀸𑀢𑀺 𑀓𑀫𑁆𑀫𑀝𑁆𑀞𑀸𑀦𑀸𑀯𑀺𑀚𑀳𑀦𑀲𑁆𑀲𑁂𑀯 𑀕𑁄𑀘𑀭𑀲𑀫𑁆𑀧𑀚𑀜𑁆𑀜𑀪𑀸𑀯𑀢𑁄𑀢𑀺 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀳𑁂𑀢𑀼𑀪𑀸𑀯𑁂𑀦 𑀧𑀘𑁆𑀘𑀸𑀫𑀲𑀢𑀺. 𑀅𑀢𑁆𑀢𑀦𑁄 𑀓𑀫𑁆𑀫𑀝𑁆𑀞𑀸𑀦𑀯𑀲𑁂𑀦𑁂𑀯 𑀆𑀮𑁄𑀓𑀦𑀯𑀺𑀮𑁄𑀓𑀦𑀁 𑀓𑀸𑀢𑀩𑁆𑀩𑀁, 𑀔𑀦𑁆𑀥𑀸𑀤𑀺𑀓𑀫𑁆𑀫𑀝𑁆𑀞𑀸𑀦𑀺𑀓𑁂𑀳𑀺 𑀅𑀜𑁆𑀜𑁄 𑀉𑀧𑀸𑀬𑁄 𑀦 𑀕𑀯𑁂𑀲𑀺𑀢𑀩𑁆𑀩𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑀲𑁆𑀫𑀸 𑀆𑀮𑁄𑀓𑀺𑀢𑀸𑀤𑀺𑀲𑀫𑀜𑁆𑀜𑀸𑀧𑀺 𑀥𑀫𑁆𑀫𑀫𑀢𑁆𑀢𑀲𑁆𑀲𑁂𑀯 𑀧𑀯𑀢𑁆𑀢𑀺𑀯𑀺𑀲𑁂𑀲𑁄, 𑀢𑀲𑁆𑀫𑀸 𑀢𑀲𑁆𑀲 𑀬𑀸𑀣𑀸𑀯𑀢𑁄 𑀧𑀚𑀸𑀦𑀦𑀁 𑀅𑀲𑀫𑁆𑀫𑁄𑀳𑀲𑀫𑁆𑀧𑀚𑀜𑁆𑀜𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀩𑁆𑀪𑀦𑁆𑀢𑀭𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀘𑀺𑀢𑁆𑀢𑀓𑀺𑀭𑀺𑀬𑀯𑀸𑀬𑁄𑀥𑀸𑀢𑀼𑀯𑀺𑀧𑁆𑀨𑀸𑀭𑀯𑀲𑁂𑀦𑀸𑀢𑀺 𑀓𑀺𑀭𑀺𑀬𑀫𑀬𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀯𑀸𑀬𑁄𑀥𑀸𑀢𑀼𑀬𑀸 𑀘𑀮𑀦𑀸𑀓𑀸𑀭𑀧𑀯𑀢𑁆𑀢𑀺𑀯𑀲𑁂𑀦. 𑀅𑀥𑁄 𑀲𑀻𑀤𑀢𑀻𑀢𑀺 𑀣𑁄𑀓𑀁 𑀑𑀢𑀭𑀢𑀺. 𑀉𑀤𑁆𑀥𑀁 𑀮𑀗𑁆𑀖𑁂𑀢𑀻𑀢𑀺 𑀮𑀗𑁆𑀖𑀦𑁆𑀢𑀁 𑀯𑀺𑀬 𑀉𑀧𑀭𑀺 𑀕𑀘𑁆𑀙𑀢𑀺.

𑀅𑀗𑁆𑀕𑀓𑀺𑀘𑁆𑀘𑀁 𑀲𑀸𑀥𑀬𑀫𑀸𑀦𑀦𑁆𑀢𑀺 𑀧𑀥𑀸𑀦𑀪𑀽𑀢𑀁 𑀅𑀗𑁆𑀕𑀓𑀺𑀘𑁆𑀘𑀁 𑀦𑀺𑀧𑁆𑀨𑀸𑀤𑁂𑀦𑁆𑀢𑀁, 𑀉𑀧𑀧𑀢𑁆𑀢𑀺𑀪𑀯𑀲𑁆𑀲 𑀲𑀭𑀻𑀭𑀁 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀧𑀞𑀫𑀚𑀯𑀦𑁂𑀧𑀺…𑀧𑁂… 𑀲𑀢𑁆𑀢𑀫𑀚𑀯𑀦𑁂𑀧𑀺 𑀦 𑀳𑁄𑀢𑀻𑀢𑀺 𑀇𑀤𑀁 𑀧𑀜𑁆𑀘𑀤𑁆𑀯𑀸𑀭𑀯𑀺𑀜𑁆𑀜𑀸𑀡𑀯𑀻𑀣𑀺𑀬𑀁 ‘‘𑀇𑀢𑁆𑀣𑀻 𑀧𑀼𑀭𑀺𑀲𑁄’’𑀢𑀺 𑀭𑀚𑁆𑀚𑀦𑀸𑀤𑀻𑀦𑀁 𑀅𑀪𑀸𑀯𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑀢𑁆𑀣 𑀳𑀺 𑀆𑀯𑀚𑁆𑀚𑀦𑀯𑁄𑀝𑁆𑀞𑀩𑁆𑀩𑀦𑀸𑀦𑀁 𑀅𑀬𑁄𑀦𑀺𑀲𑁄 𑀆𑀯𑀚𑁆𑀚𑀦𑀯𑁄𑀝𑁆𑀞𑀩𑁆𑀩𑀦𑀯𑀲𑁂𑀦 𑀇𑀝𑁆𑀞𑁂 𑀇𑀢𑁆𑀣𑀺𑀭𑀽𑀧𑀸𑀤𑀺𑀫𑁆𑀳𑀺 𑀮𑁄𑀪𑀫𑀢𑁆𑀢𑀁, 𑀅𑀦𑀺𑀝𑁆𑀞𑁂 𑀧𑀝𑀺𑀖𑀫𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺. 𑀫𑀦𑁄𑀤𑁆𑀯𑀸𑀭𑁂 𑀧𑀦 ‘‘𑀇𑀢𑁆𑀣𑀻 𑀧𑀼𑀭𑀺𑀲𑁄’’𑀢𑀺 𑀭𑀚𑁆𑀚𑀦𑀸𑀤𑀺 𑀳𑁄𑀢𑀺, 𑀢𑀲𑁆𑀲 𑀧𑀜𑁆𑀘𑀤𑁆𑀯𑀸𑀭𑀚𑀯𑀦𑀁 𑀫𑀽𑀮𑀁, 𑀬𑀣𑀸𑀯𑀼𑀢𑁆𑀢𑀁 𑀯𑀸 𑀲𑀩𑁆𑀩𑀁 𑀪𑀯𑀗𑁆𑀕𑀸𑀤𑀺. 𑀏𑀯𑀁 𑀫𑀦𑁄𑀤𑁆𑀯𑀸𑀭𑀚𑀯𑀦𑀲𑁆𑀲 𑀫𑀽𑀮𑀪𑀽𑀢𑀥𑀫𑁆𑀫𑀧𑀭𑀺𑀚𑀸𑀦𑀦𑀯𑀲𑁂𑀦𑁂𑀯 𑀫𑀽𑀮𑀧𑀭𑀺𑀜𑁆𑀜𑀸 𑀯𑀼𑀢𑁆𑀢𑀸, 𑀆𑀕𑀦𑁆𑀢𑀼𑀓𑀢𑀸𑀯𑀓𑀸𑀮𑀺𑀓𑀢𑀸 𑀧𑀦 𑀧𑀜𑁆𑀘𑀤𑁆𑀯𑀸𑀭𑀚𑀯𑀦𑀲𑁆𑀲𑁂𑀯 𑀅𑀧𑀼𑀩𑁆𑀩𑀪𑀸𑀯𑀯𑀲𑁂𑀦 𑀘𑁂𑀯 𑀇𑀢𑁆𑀢𑀭𑀪𑀸𑀯𑀯𑀲𑁂𑀦 𑀘 𑀯𑀼𑀢𑁆𑀢𑀸. 𑀳𑁂𑀝𑁆𑀞𑀼𑀧𑀭𑀺𑀬𑀯𑀲𑁂𑀦 𑀪𑀺𑀚𑁆𑀚𑀺𑀢𑁆𑀯𑀸 𑀧𑀢𑀺𑀢𑁂𑀲𑀽𑀢𑀺 𑀳𑁂𑀝𑁆𑀞𑀺𑀫𑀲𑁆𑀲 𑀉𑀧𑀭𑀺𑀫𑀲𑁆𑀲 𑀘 𑀅𑀧𑀭𑀸𑀧𑀭𑀁 𑀪𑀗𑁆𑀕𑀧𑁆𑀧𑀢𑁆𑀢𑀺𑀫𑀸𑀳.

𑀢𑀦𑁆𑀢𑀺 𑀚𑀯𑀦𑀁. 𑀢𑀲𑁆𑀲 𑀚𑀯𑀦𑀲𑁆𑀲 𑀦 𑀬𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀆𑀕𑀦𑁆𑀢𑀼𑀓𑁄 𑀅𑀩𑁆𑀪𑀸𑀕𑀢𑁄. 𑀉𑀤𑀬𑀩𑁆𑀩𑀬𑀧𑀭𑀺𑀘𑁆𑀙𑀺𑀦𑁆𑀦𑁄 𑀢𑀸𑀯𑀢𑀓𑁄 𑀓𑀸𑀮𑁄 𑀏𑀢𑁂𑀲𑀦𑁆𑀢𑀺 𑀢𑀸𑀯𑀓𑀸𑀮𑀺𑀓𑀸𑀦𑀺.

𑀏𑀢𑀁 𑀅𑀲𑀫𑁆𑀫𑁄𑀳𑀲𑀫𑁆𑀧𑀚𑀜𑁆𑀜𑀁. 𑀲𑀫𑀯𑀸𑀬𑁂𑀢𑀺 𑀲𑀸𑀫𑀕𑁆𑀕𑀺𑀬𑀁. 𑀢𑀢𑁆𑀣𑀸𑀢𑀺 𑀧𑀜𑁆𑀘𑀓𑁆𑀔𑀦𑁆𑀥𑀯𑀲𑁂𑀦 𑀆𑀮𑁄𑀓𑀦𑀯𑀺𑀮𑁄𑀓𑀦𑁂 𑀧𑀜𑁆𑀜𑀸𑀬𑀫𑀸𑀦𑁂 𑀢𑀩𑁆𑀩𑀺𑀦𑀺𑀫𑀼𑀢𑁆𑀢𑁄 𑁋 𑀓𑁄 𑀏𑀓𑁄 𑀆𑀮𑁄𑀓𑁂𑀢𑀺, 𑀓𑁄 𑀯𑀺𑀮𑁄𑀓𑁂𑀢𑀺. 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁄𑀢𑀺 𑀇𑀤𑀁 𑀲𑀼𑀢𑁆𑀢𑀦𑁆𑀢𑀦𑀬𑁂𑀦 𑀧𑀭𑀺𑀬𑀸𑀬𑀢𑁄 𑀯𑀼𑀢𑁆𑀢𑀁. 𑀲𑀳𑀚𑀸𑀢𑀧𑀘𑁆𑀘𑀬𑁄𑀢𑀺 𑀦𑀺𑀤𑀲𑁆𑀲𑀦𑀫𑀢𑁆𑀢𑀫𑁂𑀢𑀁 𑀅𑀜𑁆𑀜𑀫𑀜𑁆𑀜𑀲𑀫𑁆𑀧𑀬𑀼𑀢𑁆𑀢𑀅𑀢𑁆𑀣𑀺𑀅𑀯𑀺𑀕𑀢𑀸𑀤𑀺𑀧𑀘𑁆𑀘𑀬𑀸𑀦𑀫𑁆𑀧𑀺 𑀮𑀩𑁆𑀪𑀦𑀢𑁄.

𑀓𑀸𑀮𑁂𑀢𑀺 𑀲𑀫𑀺𑀜𑁆𑀚𑀺𑀢𑀼𑀁 𑀬𑀼𑀢𑁆𑀢𑀓𑀸𑀮𑁂 𑀲𑀫𑀺𑀜𑁆𑀚𑀦𑁆𑀢𑀲𑁆𑀲, 𑀢𑀣𑀸 𑀧𑀲𑀸𑀭𑁂𑀢𑀼𑀁 𑀬𑀼𑀢𑁆𑀢𑀓𑀸𑀮𑁂 𑀧𑀲𑀸𑀭𑁂𑀦𑁆𑀢𑀲𑁆𑀲. ‘‘𑀫𑀡𑀺𑀲𑀧𑁆𑀧𑁄 𑀦𑀸𑀫 𑀏𑀓𑀸 𑀲𑀧𑁆𑀧𑀚𑀸𑀢𑀻’’𑀢𑀺 𑀯𑀤𑀦𑁆𑀢𑀺. 𑀮𑀴𑀦𑀦𑁆𑀢𑀺 𑀓𑀫𑁆𑀧𑀦𑀁, 𑀮𑀻𑀴𑀸𑀓𑀭𑀡𑀁 𑀯𑀸.

𑀉𑀡𑁆𑀳𑀧𑀓𑀢𑀺𑀓𑁄 𑀧𑀭𑀺𑀴𑀸𑀳𑀩𑀳𑀼𑀮𑀓𑀸𑀬𑁄. 𑀲𑀻𑀮𑀲𑁆𑀲 𑀯𑀺𑀤𑀽𑀲𑀦𑁂𑀦 𑀅𑀳𑀺𑀢𑀸𑀯𑀳𑀢𑁆𑀢𑀸 𑀫𑀺𑀘𑁆𑀙𑀸𑀚𑀻𑀯𑀯𑀲𑁂𑀦 𑀉𑀧𑁆𑀧𑀦𑁆𑀦𑀁 𑀅𑀲𑀧𑁆𑀧𑀸𑀬𑀁. ‘‘𑀘𑀻𑀯𑀭𑀫𑁆𑀧𑀺 𑀅𑀘𑁂𑀢𑀦’’𑀦𑁆𑀢𑀺𑀆𑀤𑀺𑀦𑀸 𑀘𑀻𑀯𑀭𑀲𑁆𑀲 𑀯𑀺𑀬 𑀓𑀸𑀬𑁄𑀧𑀺 𑀅𑀘𑁂𑀢𑀦𑁄𑀢𑀺 𑀓𑀸𑀬𑀲𑁆𑀲 𑀅𑀢𑁆𑀢𑀲𑀼𑀜𑁆𑀜𑀢𑀸𑀯𑀺𑀪𑀸𑀯𑀦𑁂𑀦 ‘‘𑀅𑀩𑁆𑀪𑀦𑁆𑀢𑀭𑁂’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀧𑀭𑀺𑀤𑀻𑀧𑁂𑀦𑁆𑀢𑁄 𑀇𑀢𑀭𑀻𑀢𑀭𑀲𑀦𑁆𑀢𑁄𑀲𑀲𑁆𑀲 𑀓𑀸𑀭𑀡𑀁 𑀤𑀲𑁆𑀲𑁂𑀢𑀺. 𑀢𑁂𑀦𑀸𑀳 ‘‘𑀢𑀲𑁆𑀫𑀸’’𑀢𑀺𑀆𑀤𑀺.

𑀘𑀢𑀼𑀧𑀜𑁆𑀘𑀕𑀡𑁆𑀞𑀺𑀓𑀸𑀳𑀢𑁄𑀢𑀺 𑀆𑀳𑀢𑀘𑀢𑀼𑀧𑀜𑁆𑀘𑀕𑀡𑁆𑀞𑀺𑀓𑁄, 𑀘𑀢𑀼𑀧𑀜𑁆𑀘𑀕𑀡𑁆𑀞𑀺𑀓𑀸𑀳𑀺 𑀯𑀸 𑀳𑀢𑀲𑁄𑀪𑁄.

𑀅𑀝𑁆𑀞𑀯𑀺𑀥𑁄𑀧𑀺 𑀅𑀢𑁆𑀣𑁄𑀢𑀺 𑀅𑀝𑁆𑀞𑀯𑀺𑀥𑁄𑀧𑀺 𑀧𑀬𑁄𑀚𑀦𑀯𑀺𑀲𑁂𑀲𑁄. 𑀫𑀳𑀸𑀲𑀺𑀯𑀢𑁆𑀣𑁂𑀭𑀯𑀸𑀤𑀯𑀲𑁂𑀦 ‘‘𑀇𑀫𑀲𑁆𑀲 𑀓𑀸𑀬𑀲𑁆𑀲 𑀞𑀺𑀢𑀺𑀬𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀼𑀢𑁆𑀢𑁄 𑀤𑀝𑁆𑀞𑀩𑁆𑀩𑁄. 𑀇𑀫𑀲𑁆𑀫𑀺𑀁 𑀧𑀓𑁆𑀔𑁂 ‘‘𑀦𑁂𑀯 𑀤𑀯𑀸𑀬𑀸𑀢𑀺𑀆𑀤𑀺𑀦𑀸 𑀦𑀬𑁂𑀦𑀸’’𑀢𑀺 𑀧𑀦 𑀇𑀤𑀁 𑀧𑀝𑀺𑀓𑁆𑀔𑁂𑀧𑀗𑁆𑀕𑀤𑀲𑁆𑀲𑀦𑀫𑀼𑀔𑁂𑀦 𑀧𑀸𑀴𑀺 𑀆𑀕𑀢𑀸𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀧𑀣𑀯𑀻𑀲𑀦𑁆𑀥𑀸𑀭𑀓𑀚𑀮𑀲𑁆𑀲 𑀢𑀁𑀲𑀦𑁆𑀥𑀸𑀭𑀓𑀯𑀸𑀬𑀼𑀦𑀸 𑀯𑀺𑀬 𑀧𑀭𑀺𑀪𑀼𑀢𑁆𑀢𑀲𑁆𑀲 𑀆𑀳𑀸𑀭𑀲𑁆𑀲 𑀯𑀸𑀬𑁄𑀥𑀸𑀢𑀼𑀬𑀸𑀯 𑀆𑀲𑀬𑁂 𑀅𑀯𑀝𑁆𑀞𑀸𑀦𑀦𑁆𑀢𑀺 𑀆𑀳 𑁋 ‘‘𑀯𑀸𑀬𑁄𑀥𑀸𑀢𑀼𑀯𑀲𑁂𑀦𑁂𑀯 𑀢𑀺𑀝𑁆𑀞𑀢𑀻’’𑀢𑀺. 𑀅𑀢𑀺𑀳𑀭𑀢𑀻𑀢𑀺 𑀬𑀸𑀯 𑀫𑀼𑀔𑀸 𑀅𑀪𑀺𑀳𑀭𑀢𑀺. 𑀯𑀻𑀢𑀺𑀳𑀭𑀢𑀻𑀢𑀺 𑀢𑀢𑁄 𑀓𑀼𑀘𑁆𑀙𑀺𑀬𑀁 𑀯𑀺𑀫𑀺𑀲𑁆𑀲𑀁 𑀓𑀭𑁄𑀦𑁆𑀢𑁄 𑀳𑀭𑀢𑀺. 𑀅𑀢𑀺𑀳𑀭𑀢𑀻𑀢𑀺 𑀯𑀸 𑀫𑀼𑀔𑀤𑁆𑀯𑀸𑀭𑀁 𑀅𑀢𑀺𑀓𑁆𑀓𑀸𑀫𑁂𑀦𑁆𑀢𑁄 𑀳𑀭𑀢𑀺. 𑀯𑀻𑀢𑀺𑀳𑀭𑀢𑀻𑀢𑀺 𑀓𑀼𑀘𑁆𑀙𑀺𑀕𑀢𑀁 𑀧𑀲𑁆𑀲𑀢𑁄 𑀳𑀭𑀢𑀺. 𑀧𑀭𑀺𑀯𑀢𑁆𑀢𑁂𑀢𑀻𑀢𑀺 𑀅𑀧𑀭𑀸𑀧𑀭𑀁 𑀘𑀸𑀭𑁂𑀢𑀺. 𑀏𑀢𑁆𑀣 𑀘 𑀆𑀳𑀸𑀭𑀲𑁆𑀲 𑀥𑀸𑀭𑀡𑀧𑀭𑀺𑀯𑀢𑁆𑀢𑀦𑀲𑀜𑁆𑀘𑀼𑀡𑁆𑀡𑀦𑀯𑀺𑀲𑁄𑀲𑀦𑀸𑀦𑀺 𑀧𑀣𑀯𑀻𑀥𑀸𑀢𑀼𑀲𑀳𑀺𑀢𑀸 𑀏𑀯 𑀯𑀸𑀬𑁄𑀥𑀸𑀢𑀼 𑀓𑀭𑁄𑀢𑀺, 𑀦 𑀓𑁂𑀯𑀮𑀸𑀢𑀺 𑀢𑀸𑀦𑀺 𑀧𑀣𑀯𑀻𑀥𑀸𑀢𑀼𑀬𑀸 𑀓𑀺𑀘𑁆𑀘𑀪𑀸𑀯𑁂𑀦 𑀯𑀼𑀢𑁆𑀢𑀸𑀦𑀺, 𑀲𑀸 𑀏𑀯 𑀥𑀸𑀭𑀡𑀸𑀤𑀻𑀦𑀺 𑀓𑀺𑀘𑁆𑀘𑀸𑀦𑀺 𑀓𑀭𑁄𑀦𑁆𑀢𑀲𑁆𑀲 𑀲𑀸𑀥𑀸𑀭𑀡𑀸𑀢𑀺 𑀯𑀼𑀢𑁆𑀢𑀸𑀦𑀺. 𑀅𑀮𑁆𑀮𑀢𑁆𑀢𑀜𑁆𑀘 𑀅𑀦𑀼𑀧𑀸𑀮𑁂𑀢𑀻𑀢𑀺 𑀬𑀣𑀸 𑀯𑀸𑀬𑁄𑀥𑀸𑀢𑀼𑀆𑀤𑀻𑀳𑀺 𑀅𑀜𑁆𑀜𑁂𑀳𑀺 𑀯𑀺𑀲𑁄𑀲𑀦𑀁 𑀦 𑀳𑁄𑀢𑀺, 𑀢𑀣𑀸 𑀅𑀦𑀼𑀧𑀸𑀮𑁂𑀢𑀺 𑀅𑀮𑁆𑀮𑀪𑀸𑀯𑀁. 𑀢𑁂𑀚𑁄𑀥𑀸𑀢𑀽𑀢𑀺 𑀕𑀳𑀡𑀻𑀲𑀗𑁆𑀔𑀸𑀢𑀸 𑀢𑁂𑀚𑁄𑀥𑀸𑀢𑀼. 𑀲𑀸 𑀳𑀺 𑀅𑀦𑁆𑀢𑁄𑀧𑀯𑀺𑀝𑁆𑀞𑀁 𑀆𑀳𑀸𑀭𑀁 𑀧𑀭𑀺𑀧𑀸𑀘𑁂𑀢𑀺. 𑀅𑀜𑁆𑀚𑀲𑁄 𑀳𑁄𑀢𑀻𑀢𑀺 𑀆𑀳𑀸𑀭𑀲𑁆𑀲 𑀧𑀯𑀺𑀲𑀦𑀸𑀤𑀻𑀦𑀁 𑀫𑀕𑁆𑀕𑁄 𑀳𑁄𑀢𑀺. 𑀆𑀪𑀼𑀚𑀢𑀻𑀢𑀺 𑀧𑀭𑀺𑀬𑁂𑀲𑀦𑀯𑀲𑁂𑀦, 𑀅𑀚𑁆𑀛𑁄𑀳𑀭𑀡𑀚𑀺𑀡𑁆𑀡𑀸𑀚𑀺𑀡𑁆𑀡𑀢𑀸𑀤𑀺𑀧𑀝𑀺𑀲𑀁𑀯𑁂𑀤𑀦𑀯𑀲𑁂𑀦 𑀘 𑀆𑀯𑀚𑁆𑀚𑁂𑀢𑀺, 𑀯𑀺𑀚𑀸𑀦𑀸𑀢𑀻𑀢𑀺 𑀅𑀢𑁆𑀣𑁄. 𑀢𑀁𑀢𑀁𑀯𑀺𑀚𑀸𑀦𑀦𑀲𑁆𑀲 𑀧𑀘𑁆𑀘𑀬𑀪𑀽𑀢𑁄𑀬𑁂𑀯 𑀳𑀺 𑀧𑀬𑁄𑀕𑁄 ‘‘𑀲𑀫𑁆𑀫𑀸𑀧𑀬𑁄𑀕𑁄’’𑀢𑀺 𑀯𑀼𑀢𑁆𑀢𑁄. 𑀬𑁂𑀦 𑀳𑀺 𑀧𑀬𑁄𑀕𑁂𑀦 𑀧𑀭𑀺𑀬𑁂𑀲𑀦𑀸𑀤𑀺 𑀦𑀺𑀧𑁆𑀨𑀚𑁆𑀚𑀢𑀺, 𑀲𑁄 𑀢𑀩𑁆𑀩𑀺𑀲𑀬𑀯𑀺𑀚𑀸𑀦𑀦𑀫𑁆𑀧𑀺 𑀦𑀺𑀧𑁆𑀨𑀸𑀤𑁂𑀢𑀺 𑀦𑀸𑀫 𑀢𑀤𑀯𑀺𑀦𑀸𑀪𑀸𑀯𑀢𑁄. 𑀅𑀣 𑀯𑀸 𑀲𑀫𑁆𑀫𑀸𑀧𑀬𑁄𑀕𑀁 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀁 𑀅𑀦𑁆𑀯𑀸𑀬 𑀆𑀕𑀫𑁆𑀫 𑀆𑀪𑀼𑀚𑀢𑀺 𑀲𑀫𑀦𑁆𑀦𑀸𑀳𑀭𑀢𑀺. 𑀆𑀪𑁄𑀕𑀧𑀼𑀩𑁆𑀩𑀓𑁄 𑀳𑀺 𑀲𑀩𑁆𑀩𑁄𑀧𑀺 𑀯𑀺𑀜𑁆𑀜𑀸𑀡𑀩𑁆𑀬𑀸𑀧𑀸𑀭𑁄𑀢𑀺 𑀢𑀣𑀸 𑀯𑀼𑀢𑁆𑀢𑀁.

𑀕𑀫𑀦𑀢𑁄𑀢𑀺 𑀪𑀺𑀓𑁆𑀔𑀸𑀘𑀸𑀭𑀯𑀲𑁂𑀦 𑀕𑁄𑀘𑀭𑀕𑀸𑀫𑀁 𑀉𑀤𑁆𑀤𑀺𑀲𑁆𑀲 𑀕𑀫𑀦𑀢𑁄. 𑀧𑀭𑀺𑀬𑁂𑀲𑀦𑀢𑁄𑀢𑀺 𑀕𑁄𑀘𑀭𑀕𑀸𑀫𑁂 𑀪𑀺𑀓𑁆𑀔𑀢𑁆𑀣𑀁 𑀆𑀳𑀺𑀡𑁆𑀟𑀦𑀢𑁄. 𑀧𑀭𑀺𑀪𑁄𑀕𑀢𑁄𑀢𑀺 𑀆𑀳𑀸𑀭𑀲𑁆𑀲 𑀧𑀭𑀺𑀪𑀼𑀜𑁆𑀚𑀦𑀢𑁄. 𑀆𑀲𑀬𑀢𑁄𑀢𑀺 𑀧𑀺𑀢𑁆𑀢𑀸𑀤𑀺𑀆𑀲𑀬𑀢𑁄. 𑀆𑀲𑀬𑀢𑀺 𑀏𑀢𑁆𑀣 𑀏𑀓𑀚𑁆𑀛𑀁 𑀧𑀯𑀢𑁆𑀢𑀫𑀸𑀦𑁄𑀧𑀺 𑀓𑀫𑁆𑀫𑀩𑀮𑀯𑀯𑀢𑁆𑀣𑀺𑀢𑁄 𑀳𑀼𑀢𑁆𑀯𑀸 𑀫𑀭𑀺𑀬𑀸𑀤𑀯𑀲𑁂𑀦 𑀅𑀜𑁆𑀜𑀫𑀜𑁆𑀜𑀁 𑀅𑀲𑀗𑁆𑀓𑀭𑀢𑁄 𑀲𑀬𑀢𑀺 𑀢𑀺𑀝𑁆𑀞𑀢𑀺 𑀧𑀯𑀢𑁆𑀢𑀢𑀻𑀢𑀺 𑀆𑀲𑀬𑁄, 𑀆𑀫𑀸𑀲𑀬𑀲𑁆𑀲 𑀉𑀧𑀭𑀺 𑀢𑀺𑀝𑁆𑀞𑀦𑀓𑁄 𑀧𑀺𑀢𑁆𑀢𑀸𑀤𑀺𑀓𑁄. 𑀫𑀭𑀺𑀬𑀸𑀤𑀢𑁆𑀣𑁄 𑀳𑀺 𑀅𑀬𑀫𑀸𑀓𑀸𑀭𑁄. 𑀦𑀺𑀥𑁂𑀢𑀺 𑀬𑀣𑀸𑀪𑀼𑀢𑁆𑀢𑁄 𑀆𑀳𑀸𑀭𑁄 𑀦𑀺𑀘𑀺𑀢𑁄 𑀳𑀼𑀢𑁆𑀯𑀸 𑀢𑀺𑀝𑁆𑀞𑀢𑀺 𑀏𑀢𑁆𑀣𑀸𑀢𑀺 𑀦𑀺𑀥𑀸𑀦𑀁, 𑀆𑀫𑀸𑀲𑀬𑁄, 𑀢𑀢𑁄 𑀦𑀺𑀥𑀸𑀦𑀢𑁄. 𑀅𑀧𑀭𑀺𑀧𑀓𑁆𑀓𑀢𑁄𑀢𑀺 𑀕𑀳𑀡𑀻𑀲𑀗𑁆𑀔𑀸𑀢𑁂𑀦 𑀓𑀫𑁆𑀫𑀚𑀢𑁂𑀚𑁂𑀦 𑀅𑀯𑀺𑀧𑀓𑁆𑀓𑀢𑁄. 𑀧𑀭𑀺𑀧𑀓𑁆𑀓𑀢𑁄𑀢𑀺 𑀬𑀣𑀸𑀪𑀼𑀢𑁆𑀢𑀲𑁆𑀲 𑀆𑀳𑀸𑀭𑀲𑁆𑀲 𑀯𑀺𑀧𑀓𑁆𑀓𑀪𑀸𑀯𑀢𑁄. 𑀨𑀮𑀢𑁄𑀢𑀺 𑀦𑀺𑀧𑁆𑀨𑀢𑁆𑀢𑀺𑀢𑁄. 𑀦𑀺𑀲𑁆𑀲𑀦𑁆𑀤𑀢𑁄𑀢𑀺 𑀇𑀢𑁄 𑀘𑀺𑀢𑁄 𑀘 𑀯𑀺𑀲𑁆𑀲𑀦𑁆𑀤𑀦𑀢𑁄. 𑀲𑀫𑁆𑀫𑀓𑁆𑀔𑀦𑀢𑁄𑀢𑀺 𑀲𑀩𑁆𑀩𑀲𑁄 𑀫𑀓𑁆𑀔𑀦𑀢𑁄. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁄 𑀧𑀦 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀲𑀁𑀯𑀡𑁆𑀡𑀦𑀸𑀬 (𑀯𑀺𑀲𑀼𑀤𑁆𑀥𑀺. 𑀫𑀳𑀸𑀝𑀻. 𑁧.𑁨𑁯𑁪) 𑀕𑀳𑁂𑀢𑀩𑁆𑀩𑁄.

𑀲𑀭𑀻𑀭𑀢𑁄 𑀲𑁂𑀤𑀸 𑀫𑀼𑀘𑁆𑀘𑀦𑁆𑀢𑀻𑀢𑀺 𑀯𑁂𑀕𑀲𑀦𑁆𑀥𑀸𑀭𑀡𑁂𑀦 𑀉𑀧𑁆𑀧𑀦𑁆𑀦𑀧𑀭𑀺𑀴𑀸𑀳𑀢𑁄 𑀲𑀭𑀻𑀭𑀢𑁄 𑀲𑁂𑀤𑀸 𑀫𑀼𑀘𑁆𑀘𑀦𑁆𑀢𑀺. 𑀅𑀜𑁆𑀜𑁂 𑀘 𑀭𑁄𑀕𑀸 𑀓𑀡𑁆𑀡𑀲𑀽𑀮𑀪𑀕𑀦𑁆𑀤𑀭𑀸𑀤𑀬𑁄. 𑀅𑀝𑁆𑀞𑀸𑀦𑁂𑀢𑀺 𑀫𑀦𑀼𑀲𑁆𑀲𑀸𑀫𑀦𑀼𑀲𑁆𑀲𑀧𑀭𑀺𑀕𑁆𑀕𑀳𑁂 𑀅𑀬𑀼𑀢𑁆𑀢𑀝𑁆𑀞𑀸𑀦𑁂 𑀔𑁂𑀢𑁆𑀢𑀤𑁂𑀯𑀸𑀬𑀢𑀦𑀸𑀤𑀺𑀓𑁂. 𑀓𑀼𑀤𑁆𑀥𑀸 𑀳𑀺 𑀫𑀦𑀼𑀲𑁆𑀲𑀸 𑀅𑀫𑀦𑀼𑀲𑁆𑀲𑀸𑀧𑀺 𑀯𑀸 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑁂𑀦𑁆𑀢𑀺. 𑀯𑀺𑀲𑁆𑀲𑀝𑁆𑀞𑀢𑁆𑀢𑀸 𑀦𑁂𑀯 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀢𑁆𑀢𑀦𑁄, 𑀓𑀲𑁆𑀲𑀘𑀺 𑀅𑀦𑀺𑀲𑁆𑀲𑀚𑁆𑀚𑀺𑀢𑀢𑁆𑀢𑀸 𑀚𑀺𑀕𑀼𑀘𑁆𑀙𑀦𑀻𑀬𑀢𑁆𑀢𑀸 𑀘 𑀦 𑀧𑀭𑀲𑁆𑀲, 𑀉𑀤𑀓𑀢𑀼𑀫𑁆𑀩𑀢𑁄𑀢𑀺 𑀯𑁂𑀴𑀼𑀦𑀸𑀴𑀺𑀆𑀤𑀺𑀉𑀤𑀓𑀪𑀸𑀚𑀦𑀢𑁄. 𑀢𑀦𑁆𑀢𑀺 𑀙𑀟𑁆𑀟𑀺𑀢𑀉𑀤𑀓𑀁.

𑀏𑀢𑁆𑀣 𑀘 𑀏𑀓𑁄 𑀇𑀭𑀺𑀬𑀸𑀧𑀣𑁄 𑀤𑁆𑀯𑀻𑀲𑀼 𑀞𑀸𑀦𑁂𑀲𑀼 𑀆𑀕𑀢𑁄, 𑀲𑁄 𑀧𑀼𑀩𑁆𑀩𑁂 𑀅𑀪𑀺𑀓𑁆𑀓𑀫𑀧𑀝𑀺𑀓𑁆𑀓𑀫𑀕𑀳𑀡𑁂𑀦. ‘‘𑀕𑀫𑀦𑁂𑀧𑀺 𑀧𑀼𑀭𑀢𑁄 𑀧𑀘𑁆𑀙𑀢𑁄 𑀘 𑀓𑀸𑀬𑀲𑁆𑀲 𑀅𑀪𑀺𑀳𑀭𑀡𑀁 𑀯𑀼𑀢𑁆𑀢𑀦𑁆𑀢𑀺 𑀇𑀥 𑀕𑀫𑀦𑀫𑁂𑀯 𑀕𑀳𑀺𑀢’’𑀦𑁆𑀢𑀺 𑀅𑀧𑀭𑁂. 𑀬𑀲𑁆𑀫𑀸 𑀇𑀥 𑀲𑀫𑁆𑀧𑀚𑀜𑁆𑀜𑀓𑀣𑀸𑀬𑀁 𑀅𑀲𑀫𑁆𑀫𑁄𑀳𑀲𑀫𑁆𑀧𑀚𑀜𑁆𑀜𑀫𑁂𑀯 𑀥𑀼𑀭𑀁, 𑀢𑀲𑁆𑀫𑀸 𑀅𑀦𑁆𑀢𑀭𑀦𑁆𑀢𑀭𑁂 𑀇𑀭𑀺𑀬𑀸𑀧𑀣𑁂 𑀧𑀯𑀢𑁆𑀢𑀸𑀦𑀁 𑀭𑀽𑀧𑀸𑀭𑀽𑀧𑀥𑀫𑁆𑀫𑀸𑀦𑀁 𑀢𑀢𑁆𑀣 𑀢𑀢𑁆𑀣𑁂𑀯 𑀦𑀺𑀭𑁄𑀥𑀤𑀲𑁆𑀲𑀦𑀯𑀲𑁂𑀦 𑀲𑀫𑁆𑀧𑀚𑀸𑀦𑀓𑀸𑀭𑀺𑀢𑀸 𑀕𑀳𑀺𑀢𑀸𑀢𑀺. 𑀫𑀚𑁆𑀛𑀺𑀫𑀪𑀸𑀡𑀓𑀸 𑀧𑀦 𑀏𑀯𑀁 𑀯𑀤𑀦𑁆𑀢𑀺 𑁋 𑀏𑀓𑁄 𑀳𑀺 𑀪𑀺𑀓𑁆𑀔𑀼 𑀕𑀘𑁆𑀙𑀦𑁆𑀢𑁄 𑀅𑀜𑁆𑀜𑀁 𑀘𑀺𑀦𑁆𑀢𑁂𑀦𑁆𑀢𑁄, 𑀅𑀜𑁆𑀜𑀁 𑀯𑀺𑀢𑀓𑁆𑀓𑁂𑀦𑁆𑀢𑁄 𑀕𑀘𑁆𑀙𑀢𑀺, 𑀏𑀓𑁄 𑀓𑀫𑁆𑀫𑀝𑁆𑀞𑀸𑀦𑀁 𑀅𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸𑀯 𑀕𑀘𑁆𑀙𑀢𑀺, 𑀢𑀣𑀸 𑀏𑀓𑁄 𑀢𑀺𑀝𑁆𑀞𑀦𑁆𑀢𑁄, 𑀦𑀺𑀲𑀻𑀤𑀦𑁆𑀢𑁄, 𑀲𑀬𑀦𑁆𑀢𑁄 𑀅𑀜𑁆𑀜𑀁 𑀘𑀺𑀦𑁆𑀢𑁂𑀦𑁆𑀢𑁄, 𑀅𑀜𑁆𑀜𑀁 𑀯𑀺𑀢𑀓𑁆𑀓𑁂𑀦𑁆𑀢𑁄 𑀲𑀬𑀢𑀺, 𑀏𑀓𑁄 𑀓𑀫𑁆𑀫𑀝𑁆𑀞𑀸𑀦𑀁 𑀅𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸𑀯 𑀲𑀬𑀢𑀺. 𑀏𑀢𑁆𑀢𑀓𑁂𑀦 𑀧𑀦 𑀦 𑀧𑀸𑀓𑀝𑀁 𑀳𑁄𑀢𑀻𑀢𑀺 𑀘𑀗𑁆𑀓𑀫𑀦𑁂𑀦 𑀤𑀻𑀧𑁂𑀦𑁆𑀢𑀺. 𑀬𑁄 𑀪𑀺𑀓𑁆𑀔𑀼 𑀘𑀗𑁆𑀓𑀫𑀦𑀁 𑀑𑀢𑀭𑀺𑀢𑁆𑀯𑀸 𑀘𑀗𑁆𑀓𑀫𑀦𑀓𑁄𑀝𑀺𑀬𑀁 𑀞𑀺𑀢𑁄 𑀧𑀭𑀺𑀕𑁆𑀕𑀡𑁆𑀳𑀸𑀢𑀺 𑁋 ‘‘𑀧𑀸𑀘𑀻𑀦𑀘𑀗𑁆𑀓𑀫𑀦𑀓𑁄𑀝𑀺𑀬𑀁 𑀧𑀯𑀢𑁆𑀢𑀸 𑀭𑀽𑀧𑀸𑀭𑀽𑀧𑀥𑀫𑁆𑀫𑀸 𑀧𑀘𑁆𑀙𑀺𑀫𑀘𑀗𑁆𑀓𑀫𑀦𑀓𑁄𑀝𑀺𑀁 𑀅𑀧𑁆𑀧𑀢𑁆𑀯𑀸 𑀏𑀢𑁆𑀣𑁂𑀯 𑀦𑀺𑀭𑀼𑀤𑁆𑀥𑀸, 𑀧𑀘𑁆𑀙𑀺𑀫𑀘𑀗𑁆𑀓𑀫𑀦𑀓𑁄𑀝𑀺𑀬𑀁 𑀧𑀯𑀢𑁆𑀢𑀸𑀧𑀺 𑀧𑀸𑀘𑀻𑀦𑀘𑀗𑁆𑀓𑀫𑀦𑀓𑁄𑀝𑀺𑀁 𑀅𑀧𑁆𑀧𑀢𑁆𑀯𑀸 𑀏𑀢𑁆𑀣𑁂𑀯 𑀦𑀺𑀭𑀼𑀤𑁆𑀥𑀸, 𑀘𑀗𑁆𑀓𑀫𑀦𑀫𑀚𑁆𑀛𑁂 𑀧𑀯𑀢𑁆𑀢𑀸 𑀉𑀪𑁄 𑀓𑁄𑀝𑀺𑀬𑁄 𑀅𑀧𑁆𑀧𑀢𑁆𑀯𑀸 𑀏𑀢𑁆𑀣𑁂𑀯 𑀦𑀺𑀭𑀼𑀤𑁆𑀥𑀸, 𑀘𑀗𑁆𑀓𑀫𑀦𑁂 𑀧𑀯𑀢𑁆𑀢𑀸 𑀭𑀽𑀧𑀸𑀭𑀽𑀧𑀥𑀫𑁆𑀫𑀸 𑀞𑀸𑀦𑀁 𑀅𑀧𑁆𑀧𑀢𑁆𑀯𑀸 𑀏𑀢𑁆𑀣𑁂𑀯 𑀦𑀺𑀭𑀼𑀤𑁆𑀥𑀸, 𑀞𑀸𑀦𑁂 𑀧𑀯𑀢𑁆𑀢𑀸 𑀦𑀺𑀲𑀚𑁆𑀚𑀁 𑀅𑀧𑁆𑀧𑀢𑁆𑀯𑀸 𑀏𑀢𑁆𑀣𑁂𑀯 𑀦𑀺𑀭𑀼𑀤𑁆𑀥𑀸, 𑀦𑀺𑀲𑀚𑁆𑀚𑀸𑀬 𑀧𑀯𑀢𑁆𑀢𑀸 𑀲𑀬𑀦𑀁 𑀅𑀧𑁆𑀧𑀢𑁆𑀯𑀸 𑀏𑀢𑁆𑀣𑁂𑀯 𑀦𑀺𑀭𑀼𑀤𑁆𑀥𑀸’’𑀢𑀺, 𑀏𑀯𑀁 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑁄 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑁄 𑀏𑀯 𑀘𑀺𑀢𑁆𑀢𑀁 𑀪𑀯𑀗𑁆𑀕𑀁 𑀑𑀢𑀸𑀭𑁂𑀢𑀺, 𑀉𑀝𑁆𑀞𑀳𑀦𑁆𑀢𑁄 𑀧𑀦 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸𑀯 𑀉𑀝𑁆𑀞𑀳𑀢𑀺. 𑀅𑀬𑀁 𑀪𑀺𑀓𑁆𑀔𑀼 𑀕𑀢𑀸𑀤𑀻𑀲𑀼 𑀲𑀫𑁆𑀧𑀚𑀸𑀦𑀓𑀸𑀭𑀻 𑀦𑀸𑀫 𑀳𑁄𑀢𑀻𑀢𑀺.

𑀏𑀯𑀫𑁆𑀧𑀺 𑀲𑀼𑀢𑁆𑀢𑁂 𑀓𑀫𑁆𑀫𑀝𑁆𑀞𑀸𑀦𑀁 𑀅𑀯𑀺𑀪𑀽𑀢𑀁 𑀳𑁄𑀢𑀺, 𑀓𑀫𑁆𑀫𑀝𑁆𑀞𑀸𑀦𑀁 𑀅𑀯𑀺𑀪𑀽𑀢𑀁 𑀦 𑀓𑀸𑀢𑀩𑁆𑀩𑀁, 𑀢𑀲𑁆𑀫𑀸 𑀲𑁄 𑀪𑀺𑀓𑁆𑀔𑀼 𑀬𑀸𑀯 𑀲𑀓𑁆𑀓𑁄𑀢𑀺, 𑀢𑀸𑀯 𑀘𑀗𑁆𑀓𑀫𑀺𑀢𑁆𑀯𑀸 𑀞𑀢𑁆𑀯𑀸 𑀦𑀺𑀲𑀻𑀤𑀺𑀢𑁆𑀯𑀸 𑀲𑀬𑀫𑀸𑀦𑁄 𑀏𑀯𑀁 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀲𑀬𑀢𑀺 𑁋 ‘‘𑀓𑀸𑀬𑁄 𑀅𑀘𑁂𑀢𑀦𑁄 𑀫𑀜𑁆𑀘𑁄 𑀅𑀘𑁂𑀢𑀦𑁄, 𑀓𑀸𑀬𑁄 𑀦 𑀚𑀸𑀦𑀸𑀢𑀺 ‘𑀅𑀳𑀁 𑀫𑀜𑁆𑀘𑁂 𑀲𑀬𑀺𑀢𑁄’𑀢𑀺, 𑀫𑀜𑁆𑀘𑁄𑀧𑀺 𑀦 𑀚𑀸𑀦𑀸𑀢𑀺 ‘𑀫𑀬𑀺 𑀓𑀸𑀬𑁄 𑀲𑀬𑀺𑀢𑁄’𑀢𑀺, 𑀅𑀘𑁂𑀢𑀦𑁄 𑀓𑀸𑀬𑁄 𑀅𑀘𑁂𑀢𑀦𑁂 𑀫𑀜𑁆𑀘𑁂 𑀲𑀬𑀺𑀢𑁄’’𑀢𑀺, 𑀏𑀯𑀁 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑁄 𑀏𑀯 𑀘𑀺𑀢𑁆𑀢𑀁 𑀪𑀯𑀗𑁆𑀕𑀁 𑀑𑀢𑀸𑀭𑁂𑀢𑀺, 𑀧𑀩𑀼𑀚𑁆𑀛𑀦𑁆𑀢𑁄 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸𑀯 𑀧𑀩𑀼𑀚𑁆𑀛𑀢𑀻𑀢𑀺 𑀅𑀬𑀁 𑀲𑀼𑀢𑁆𑀢𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀦𑀸𑀫 𑀳𑁄𑀢𑀺. 𑀓𑀸𑀬𑀺𑀓𑀸𑀤𑀺𑀓𑀺𑀭𑀺𑀬𑀸𑀦𑀺𑀩𑁆𑀩𑀢𑁆𑀢𑀦𑁂𑀦 𑀢𑀫𑁆𑀫𑀬𑀢𑁆𑀢𑀸 𑀆𑀯𑀚𑁆𑀚𑀦𑀓𑀺𑀭𑀺𑀬𑀸𑀦𑀺𑀩𑁆𑀩𑀢𑁆𑀢𑀓𑀢𑁆𑀢𑀸 𑀆𑀯𑀚𑁆𑀚𑀦𑀓𑀺𑀭𑀺𑀬𑀸𑀲𑀫𑀼𑀝𑁆𑀞𑀺𑀢𑀢𑁆𑀢𑀸 𑀘 𑀚𑀯𑀦𑀁, 𑀲𑀩𑁆𑀩𑀫𑁆𑀧𑀺 𑀯𑀸 𑀙𑀤𑁆𑀯𑀸𑀭𑀧𑁆𑀧𑀯𑀢𑁆𑀢𑀁 𑀓𑀺𑀭𑀺𑀬𑀸𑀫𑀬𑀧𑀯𑀢𑁆𑀢𑀁 𑀦𑀸𑀫, 𑀢𑀲𑁆𑀫𑀺𑀁 𑀲𑀢𑀺 𑀚𑀸𑀕𑀭𑀺𑀢𑀁 𑀦𑀸𑀫 𑀳𑁄𑀢𑀻𑀢𑀺 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑁄 𑀚𑀸𑀕𑀭𑀺𑀢𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀦𑀸𑀫. 𑀅𑀧𑀺𑀘 𑀭𑀢𑁆𑀢𑀺𑀦𑁆𑀤𑀺𑀯𑀁 𑀙 𑀓𑁄𑀝𑁆𑀞𑀸𑀲𑁂 𑀓𑀢𑁆𑀯𑀸 𑀧𑀜𑁆𑀘 𑀓𑁄𑀝𑁆𑀞𑀸𑀲𑁂 𑀚𑀕𑁆𑀕𑀦𑁆𑀢𑁄𑀧𑀺 𑀚𑀸𑀕𑀭𑀺𑀢𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀦𑀸𑀫 𑀳𑁄𑀢𑀻𑀢𑀺.

𑀯𑀺𑀫𑀼𑀢𑁆𑀢𑀸𑀬𑀢𑀦𑀲𑀻𑀲𑁂 𑀞𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄𑀧𑀺 𑀩𑀸𑀢𑁆𑀢𑀺𑀁𑀲𑀢𑀺𑀭𑀘𑁆𑀙𑀸𑀦𑀓𑀣𑀁 𑀧𑀳𑀸𑀬 𑀤𑀲𑀓𑀣𑀸𑀯𑀢𑁆𑀣𑀼𑀦𑀺𑀲𑁆𑀲𑀺𑀢𑀲𑀧𑁆𑀧𑀸𑀬𑀓𑀣𑀁 𑀓𑀣𑁂𑀦𑁆𑀢𑁄𑀧𑀺 𑀪𑀸𑀲𑀺𑀢𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀦𑀸𑀫 𑀳𑁄𑀢𑀺. 𑀅𑀝𑁆𑀞𑀢𑀺𑀁𑀲𑀸𑀬 𑀆𑀭𑀫𑁆𑀫𑀡𑁂𑀲𑀼 𑀘𑀺𑀢𑁆𑀢𑀭𑀼𑀘𑀺𑀬𑀁 𑀆𑀭𑀫𑁆𑀫𑀡𑀁 𑀫𑀦𑀲𑀺𑀓𑀸𑀭𑀁 𑀧𑀯𑀢𑁆𑀢𑁂𑀦𑁆𑀢𑁄𑀧𑀺 𑀤𑀼𑀢𑀺𑀬𑀚𑁆𑀛𑀸𑀦𑀁 𑀲𑀫𑀸𑀧𑀦𑁆𑀦𑁄𑀧𑀺 𑀢𑀼𑀡𑁆𑀳𑀻𑀪𑀸𑀯𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀦𑀸𑀫. 𑀤𑀼𑀢𑀺𑀬𑀜𑁆𑀳𑀺 𑀛𑀸𑀦𑀁 𑀯𑀘𑀻𑀲𑀗𑁆𑀔𑀸𑀭𑀧𑁆𑀧𑀳𑀸𑀦𑀢𑁄 𑀯𑀺𑀲𑁂𑀲𑀢𑁄 𑀢𑀼𑀡𑁆𑀳𑀻𑀪𑀸𑀯𑁄 𑀦𑀸𑀫𑀸𑀢𑀺. 𑀑𑀝𑁆𑀞𑁂 𑀘𑀸𑀢𑀺𑀆𑀤𑀻𑀲𑀼 𑀘-𑀲𑀤𑁆𑀤𑁂𑀦 𑀓𑀡𑁆𑀞𑀲𑀻𑀲𑀦𑀸𑀪𑀺𑀆𑀤𑀻𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀢𑀤𑀦𑀼𑀭𑀽𑀧𑀁 𑀧𑀬𑁄𑀕𑀦𑁆𑀢𑀺 𑀢𑀲𑁆𑀲 𑀉𑀧𑁆𑀧𑀢𑁆𑀢𑀺𑀬𑀸 𑀅𑀦𑀼𑀘𑁆𑀙𑀯𑀺𑀓𑀁 𑀘𑀺𑀢𑁆𑀢𑀲𑁆𑀲 𑀧𑀯𑀢𑁆𑀢𑀺𑀆𑀓𑀸𑀭𑀲𑀜𑁆𑀜𑀺𑀢𑀁 𑀧𑀬𑁄𑀕𑀁, 𑀬𑀢𑁄 𑀲𑀩𑁆𑀩𑁂 𑀯𑀺𑀘𑀸𑀭𑀸𑀤𑀬𑁄 𑀦𑀺𑀧𑁆𑀨𑀚𑁆𑀚𑀦𑁆𑀢𑀺. 𑀉𑀧𑀸𑀤𑀸𑀭𑀽𑀧𑀧𑀯𑀢𑁆𑀢𑀺𑀬𑀸𑀢𑀺 𑀯𑀺𑀜𑁆𑀜𑀢𑁆𑀢𑀺𑀯𑀺𑀓𑀸𑀭𑀲𑀳𑀺𑀢𑀲𑀤𑁆𑀤𑀸𑀬𑀢𑀦𑀼𑀧𑁆𑀧𑀢𑁆𑀢𑀺𑀬𑀸. 𑀏𑀯𑀦𑁆𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦. 𑀲𑀢𑁆𑀢𑀲𑀼𑀧𑀺 𑀞𑀸𑀦𑁂𑀲𑀼 𑀅𑀲𑀫𑁆𑀫𑀼𑀬𑁆𑀳𑀦𑀯𑀲𑁂𑀦 ‘‘𑀫𑀺𑀲𑁆𑀲𑀓’’𑀦𑁆𑀢𑀺 𑀯𑀼𑀢𑁆𑀢𑀁. 𑀫𑀕𑁆𑀕𑀲𑀫𑁆𑀫𑀸𑀲𑀢𑀺𑀬𑀸𑀧𑀺 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀤𑀺𑀅𑀦𑀼𑀭𑀽𑀧𑀢𑁆𑀢𑀸 𑀲𑀫𑁆𑀧𑀚𑀜𑁆𑀜𑀸𑀦𑀼𑀭𑀽𑀧𑀧𑀼𑀩𑁆𑀩𑀪𑀸𑀕𑀁 𑀲𑀢𑁆𑀢𑀝𑁆𑀞𑀸𑀦𑀺𑀬𑀲𑁆𑀲 𑀏𑀓𑀦𑁆𑀢𑀮𑁄𑀓𑀺𑀬𑀢𑁆𑀢𑀸.

𑀲𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀪𑀺𑀓𑁆𑀔𑀼𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁬𑁯. 𑀬𑀲𑁆𑀫𑀸 𑀲𑁄 𑀪𑀺𑀓𑁆𑀔𑀼 ‘‘𑀤𑁂𑀲𑁂𑀢𑀼 𑀫𑁂, 𑀪𑀦𑁆𑀢𑁂, 𑀪𑀕𑀯𑀸 𑀲𑀁𑀔𑀺𑀢𑁆𑀢𑁂𑀦 𑀥𑀫𑁆𑀫’’𑀦𑁆𑀢𑀺 𑀲𑀁𑀔𑀺𑀢𑁆𑀢𑁂𑀦 𑀥𑀫𑁆𑀫𑀤𑁂𑀲𑀦𑀁 𑀬𑀸𑀘𑀺, 𑀢𑀲𑁆𑀲 𑀲𑀁𑀔𑀺𑀢𑁆𑀢𑀭𑀼𑀘𑀺𑀪𑀸𑀯𑀢𑁄, 𑀢𑀲𑁆𑀫𑀸 𑀲𑀁𑀔𑀺𑀢𑁆𑀢𑁂𑀦𑁂𑀯 𑀥𑀫𑁆𑀫𑀁 𑀤𑁂𑀲𑁂𑀢𑀼𑀓𑀸𑀫𑁄 𑀪𑀕𑀯𑀸 ‘‘𑀢𑀲𑁆𑀫𑀸𑀢𑀺𑀳𑀸’’𑀢𑀺𑀆𑀤𑀺𑀫𑀸𑀳𑀸𑀢𑀺 𑀯𑀼𑀢𑁆𑀢𑀁 𑁋 ‘‘𑀬𑀲𑁆𑀫𑀸 𑀲𑀁𑀔𑀺𑀢𑁆𑀢𑁂𑀦 𑀤𑁂𑀲𑀦𑀁 𑀬𑀸𑀘𑀲𑀺, 𑀢𑀲𑁆𑀫𑀸’’𑀢𑀺. 𑀓𑀫𑁆𑀫𑀲𑁆𑀲𑀓𑀢𑀸𑀤𑀺𑀝𑁆𑀞𑀺𑀓𑀲𑁆𑀲𑁂𑀯 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀕𑀼𑀡𑀯𑀺𑀲𑁂𑀲𑀸 𑀇𑀚𑁆𑀛𑀦𑁆𑀢𑀺, 𑀦 𑀤𑀺𑀝𑁆𑀞𑀺𑀯𑀺𑀧𑀦𑁆𑀦𑀲𑁆𑀲, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀤𑀺𑀝𑁆𑀞𑀻𑀢𑀺 𑀓𑀫𑁆𑀫𑀲𑁆𑀲𑀓𑀢𑀸𑀤𑀺𑀝𑁆𑀞𑀻’’𑀢𑀺.

𑁪. 𑀲𑀸𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁭𑁦. 𑀬𑀣𑀸𑀦𑀼𑀲𑀺𑀝𑁆𑀞𑀁 𑀧𑀝𑀺𑀧𑀚𑁆𑀚𑀫𑀸𑀦𑁂 𑀅𑀧𑀸𑀬𑀤𑀼𑀓𑁆𑀔𑁂 𑀅𑀧𑀸𑀢𑀦𑀯𑀲𑁂𑀦 𑀥𑀸𑀭𑀡𑀝𑁆𑀞𑁂𑀦 𑀥𑀫𑁆𑀫𑁄, 𑀲𑀸𑀲𑀦𑀩𑁆𑀭𑀳𑁆𑀫𑀘𑀭𑀺𑀬𑀁, 𑀢𑀤𑁂𑀯 𑀢𑀤𑀗𑁆𑀕𑀸𑀤𑀺𑀯𑀲𑁂𑀦 𑀓𑀺𑀮𑁂𑀲𑀸𑀦𑀁 𑀯𑀺𑀦𑀬𑀦𑀝𑁆𑀞𑁂𑀦 𑀯𑀺𑀦𑀬𑁄𑀢𑀺 𑀆𑀳 𑁋 ‘‘𑀥𑀫𑁆𑀫𑁄𑀢𑀺 𑀯𑀸…𑀧𑁂… 𑀦𑀸𑀫’’𑀦𑁆𑀢𑀺. 𑀧𑀝𑀺𑀧𑀓𑁆𑀔𑀥𑀫𑁆𑀫𑁂𑀳𑀺 𑀅𑀦𑀪𑀺𑀪𑀽𑀢𑀢𑀸𑀬 𑀏𑀓𑁄 𑀉𑀤𑁂𑀢𑀻𑀢𑀺 𑀏𑀓𑁄𑀤𑀻𑀢𑀺 𑀮𑀤𑁆𑀥𑀦𑀸𑀫𑁄 𑀲𑀫𑀸𑀥𑀺 𑀪𑀽𑀢𑁄 𑀚𑀸𑀢𑁄 𑀏𑀢𑁂𑀲𑀦𑁆𑀢𑀺 𑀏𑀓𑁄𑀤𑀺𑀪𑀽𑀢𑀸. 𑀏𑀢𑁆𑀣 𑀘 𑀏𑀓𑁄𑀤𑀺𑀪𑀽𑀢𑀸𑀢𑀺 𑀏𑀢𑁂𑀦 𑀉𑀧𑀘𑀸𑀭𑀚𑁆𑀛𑀸𑀦𑀸𑀯𑀳𑁄 𑀧𑀼𑀩𑁆𑀩𑀪𑀸𑀕𑀺𑀓𑁄 𑀲𑀫𑀸𑀥𑀺 𑀯𑀼𑀢𑁆𑀢𑁄. 𑀲𑀫𑀸𑀳𑀺𑀢𑀸𑀢𑀺 𑀏𑀢𑁂𑀦 𑀉𑀧𑀘𑀸𑀭𑀧𑁆𑀧𑀦𑀸𑀲𑀫𑀸𑀥𑀺. 𑀏𑀓𑀕𑁆𑀕𑀘𑀺𑀢𑁆𑀢𑀸𑀢𑀺 𑀏𑀢𑁂𑀦 𑀲𑀼𑀪𑀸𑀯𑀺𑀢𑁄 𑀯𑀲𑀺𑀧𑁆𑀧𑀢𑁆𑀢𑁄 𑀅𑀧𑁆𑀧𑀦𑀸𑀲𑀫𑀸𑀥𑀺 𑀯𑀼𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀦𑀯𑀓𑀪𑀺𑀓𑁆𑀔𑀽𑀳𑀺 𑀪𑀸𑀯𑀺𑀢𑀲𑀢𑀺𑀧𑀝𑁆𑀞𑀸𑀦𑀸 𑀧𑀼𑀩𑁆𑀩𑀪𑀸𑀕𑀸. 𑀢𑁂 𑀳𑀺 𑀬𑀣𑀸𑀪𑀽𑀢𑀜𑀸𑀡𑀸𑀬 𑀪𑀸𑀯𑀺𑀢𑀸. 𑀬𑀣𑀸𑀪𑀽𑀢𑀜𑀸𑀡𑀦𑁆𑀢𑀺 𑀳𑀺 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀜𑀸𑀡𑀁 𑀇𑀥𑀸𑀥𑀺𑀧𑁆𑀧𑁂𑀢𑀁. 𑀔𑀻𑀡𑀸𑀲𑀯𑁂𑀳𑀺 𑀪𑀸𑀯𑀺𑀢𑀲𑀢𑀺𑀧𑀝𑁆𑀞𑀸𑀦𑀸𑀧𑀺 𑀧𑀼𑀩𑁆𑀩𑀪𑀸𑀕𑀸. 𑀢𑁂𑀲𑀜𑁆𑀳𑀺 𑀓𑀢𑀓𑀭𑀡𑀻𑀬𑀸𑀦𑀁 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀸𑀬 𑀲𑀢𑀺𑀧𑀝𑁆𑀞𑀸𑀦𑀪𑀸𑀯𑀦𑀸, 𑀲𑁂𑀓𑁆𑀔𑀸𑀦𑀁 𑀧𑀦 𑀲𑀢𑀺𑀧𑀝𑁆𑀞𑀸𑀦𑀪𑀸𑀯𑀦𑀸 𑀧𑀭𑀺𑀜𑁆𑀜𑀢𑁆𑀣𑀸𑀬 𑀧𑀯𑀢𑁆𑀢𑀸 𑀮𑁄𑀓𑀺𑀬𑀸, 𑀧𑀭𑀺𑀚𑀸𑀦𑀦𑀯𑀲𑁂𑀦 𑀧𑀯𑀢𑁆𑀢𑀸 𑀮𑁄𑀓𑀼𑀢𑁆𑀢𑀭𑀸𑀢𑀺 ‘‘𑀫𑀺𑀲𑁆𑀲𑀓𑀸’’𑀢𑀺 𑀯𑀼𑀢𑁆𑀢𑀁.

𑁫. 𑀅𑀓𑀼𑀲𑀮𑀭𑀸𑀲𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁭𑁧. 𑀧𑀜𑁆𑀘𑀫𑁂 𑀓𑁂𑀯𑀮𑁄𑀢𑀺 𑀓𑀼𑀲𑀮𑀥𑀫𑁆𑀫𑁂𑀳𑀺 𑀅𑀲𑀫𑁆𑀫𑀺𑀲𑁆𑀲𑁄, 𑀢𑀢𑁄 𑀏𑀯 𑀲𑀓𑀮𑁄 𑀲𑀼𑀓𑁆𑀓𑀧𑀓𑁆𑀔𑁄 𑀅𑀦𑀯𑀚𑁆𑀚𑀝𑁆𑀞𑁄. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑁬. 𑀲𑀓𑀼𑀡𑀕𑁆𑀖𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁭𑁨. 𑀧𑀸𑀓𑀢𑀺𑀓𑀲𑀓𑀼𑀡𑀓𑀼𑀮𑁂𑀲𑀼 𑀩𑀮𑀯𑀪𑀸𑀯𑀢𑁄 𑀢𑁂𑀲𑀁 𑀳𑀦𑀦𑀢𑁄 𑀲𑀓𑀼𑀡𑀕𑁆𑀖𑀺. 𑀲𑁂𑀦𑁄𑀢𑀺 𑀯𑀼𑀢𑁆𑀢𑀁 ‘‘𑀲𑁂𑀦𑀲𑁆𑀲𑁂𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺, 𑀲𑁂𑀦𑀯𑀺𑀲𑁂𑀲𑁄 𑀧𑀦 𑀲𑁄 𑀯𑁂𑀤𑀺𑀢𑀩𑁆𑀩𑁄. 𑀆𑀫𑀺𑀲𑀢𑁆𑀣𑀸𑀬 𑀧𑀢𑁆𑀢𑀢𑁆𑀢𑀸 ‘‘𑀮𑁄𑀪𑀲𑀸𑀳𑀲𑁂𑀦 𑀧𑀢𑁆𑀢𑀸’’𑀢𑀺 𑀯𑀼𑀢𑁆𑀢𑀁, 𑀮𑁄𑀪𑀦𑀺𑀫𑀺𑀢𑁆𑀢𑁂𑀦 𑀲𑀸𑀳𑀲𑀸𑀓𑀸𑀭𑁂𑀦 𑀧𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀦𑀗𑁆𑀕𑀮𑁂𑀦 𑀓𑀝𑁆𑀞𑀁 𑀓𑀲𑀺𑀢𑀁 𑀦𑀗𑁆𑀕𑀮𑀓𑀝𑁆𑀞𑀁, 𑀢𑀁 𑀓𑀭𑀻𑀬𑀢𑀺 𑀏𑀢𑁆𑀣𑀸𑀢𑀺 𑀦𑀗𑁆𑀕𑀮𑀓𑀝𑁆𑀞𑀓𑀭𑀡𑀦𑁆𑀢𑀺 𑀆𑀳 𑁋 ‘‘𑀅𑀥𑀼𑀦𑀸 𑀓𑀝𑁆𑀞𑀁 𑀔𑁂𑀢𑁆𑀢𑀝𑁆𑀞𑀸𑀦’’𑀦𑁆𑀢𑀺. 𑀮𑁂𑀟𑁆𑀟𑀼𑀬𑁄 𑀢𑀺𑀝𑁆𑀞𑀦𑁆𑀢𑀺 𑀏𑀢𑁆𑀣𑀸𑀢𑀺 𑀮𑁂𑀟𑁆𑀟𑀼𑀝𑁆𑀞𑀸𑀦𑀁, 𑀮𑁂𑀟𑁆𑀟𑀼𑀦𑀺𑀫𑀺𑀢𑁆𑀢𑀁 𑀓𑀲𑀺𑀢𑀝𑁆𑀞𑀸𑀦𑀁. 𑀯𑀚𑁆𑀚𑀢𑀻𑀢𑀺 𑀯𑀤𑀁, 𑀯𑀘𑀦𑀁. 𑀓𑀼𑀘𑁆𑀙𑀺𑀢𑀁 𑀯𑀤𑀁 𑀅𑀯𑀤𑀁. 𑀕𑀭𑀳𑀦𑁂 𑀳𑀺 𑀅𑀬𑀁 𑀅-𑀓𑀸𑀭𑁄 𑀬𑀣𑀸 𑁋 ‘‘𑀅𑀧𑀼𑀢𑁆𑀢𑁄 𑀅𑀪𑀭𑀺𑀬𑀸’’𑀢𑀺. 𑀅𑀯𑀤𑀁 𑀫𑀸𑀦𑁂𑀢𑀻𑀢𑀺 𑀅𑀯𑀤𑀫𑀸𑀦𑀸, 𑀅𑀢𑁆𑀢𑀦𑁄 𑀩𑀮𑀫𑀤𑁂𑀦 𑀮𑀸𑀧𑀁 𑀅𑀢𑀺𑀫𑀜𑁆𑀜𑀺𑀢𑁆𑀯𑀸 𑀯𑀤𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀢𑁂𑀦𑁂𑀯𑀸𑀳 ‘‘𑀕𑀘𑁆𑀙 𑀔𑁄, 𑀢𑁆𑀯𑀁 𑀮𑀸𑀧, 𑀢𑀢𑁆𑀭𑀧𑀺 𑀫𑁂 𑀕𑀦𑁆𑀢𑁆𑀯𑀸 𑀦 𑀫𑁄𑀓𑁆𑀔𑀲𑀻’’𑀢𑀺. 𑀬𑀁 𑀧𑀦 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁 ‘‘𑀅𑀢𑁆𑀢𑀦𑁄 𑀩𑀮𑀲𑁆𑀲 𑀲𑀼𑀝𑁆𑀞𑀼 𑀯𑀡𑁆𑀡𑀁 𑀯𑀤𑀫𑀸𑀦𑀸’’𑀢𑀺, 𑀢𑀢𑁆𑀣 𑀅𑀢𑁆𑀢𑀢𑁄 𑀆𑀧𑀦𑁆𑀦𑀁 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀁. ‘‘𑀯𑀤𑀫𑀸𑀦𑁄’’𑀢𑀺 𑀯𑀸 𑀧𑀸𑀞𑁄, 𑀲𑀸𑀭𑀫𑁆𑀪𑀯𑀲𑁂𑀦 𑀅𑀯𑁆𑀳𑀸𑀬𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀏𑀳𑀺 𑀔𑁄 𑀤𑀸𑀦𑀺 𑀲𑀓𑀼𑀡𑀕𑁆𑀖𑀻’’𑀢𑀺. 𑀲𑀼𑀝𑁆𑀞𑀼 𑀞𑀧𑁂𑀢𑁆𑀯𑀸𑀢𑀺 𑀚𑀺𑀬𑀸𑀫𑀼𑀢𑁆𑀢𑀲𑀭𑀲𑁆𑀲 𑀯𑀺𑀬 𑀲𑀻𑀖𑀧𑀸𑀢𑀬𑁄𑀕𑁆𑀬𑀢𑀸𑀓𑀭𑀡𑁂𑀦 𑀉𑀪𑁄 𑀧𑀓𑁆𑀔𑁂 𑀲𑀫𑁆𑀫𑀸 𑀞𑀧𑁂𑀢𑁆𑀯𑀸. 𑀅𑀬𑀦𑁆𑀢𑀺 𑀲𑀓𑀼𑀡𑀕𑁆𑀖𑀺. 𑀜𑀢𑁆𑀯𑀸𑀢𑀺 𑀬𑀣𑀸𑀪𑀽𑀢𑀤𑀲𑁆𑀲𑀦𑁂𑀦 𑀅𑀢𑁆𑀢𑀦𑁄 𑀜𑀸𑀡𑁂𑀦 𑀚𑀸𑀦𑀺𑀢𑁆𑀯𑀸. 𑀨𑀸𑀮𑀻𑀬𑀺𑀢𑁆𑀣𑀸𑀢𑀺 𑀨𑀸𑀮𑀘𑁆𑀙𑁂𑀤𑀢𑀺𑀔𑀺𑀡𑀲𑀺𑀔𑀭𑁂 𑀲𑀼𑀓𑁆𑀔𑀮𑁂𑀟𑁆𑀟𑀼𑀲𑁆𑀫𑀺𑀁 𑀪𑀺𑀚𑁆𑀚𑀺𑀢𑁆𑀣.

𑁭. 𑀫𑀓𑁆𑀓𑀝𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁭𑁩. 𑀲𑀜𑁆𑀘𑀸𑀭𑁄𑀢𑀺 𑀲𑀜𑁆𑀘𑀭𑀡𑀁. 𑀮𑁂𑀧𑀦𑁆𑀢𑀺 𑀲𑀺𑀮𑁂𑀲𑀲𑀤𑀺𑀲𑀁 𑀆𑀮𑁂𑀧𑀦𑀁. 𑀓𑀸𑀚𑀲𑀺𑀓𑁆𑀓𑀸 𑀯𑀺𑀬𑀸𑀢𑀺 𑀓𑀸𑀚𑀤𑀡𑁆𑀟𑀓𑁂 𑀑𑀮𑀕𑁆𑀕𑁂𑀢𑀩𑁆𑀩𑀸 𑀲𑀺𑀓𑁆𑀓𑀸 𑀯𑀺𑀬. 𑀅𑀧𑀺𑀘 𑀘𑀢𑀲𑁆𑀲𑁄 𑀭𑀚𑁆𑀚𑀼𑀬𑁄 𑀉𑀧𑀭𑀺 𑀩𑀦𑁆𑀥𑀦𑀝𑁆𑀞𑀸𑀦𑀜𑁆𑀘𑀸𑀢𑀺 𑀧𑀜𑁆𑀘𑀝𑁆𑀞𑀸𑀦𑀁. 𑀑𑀟𑁆𑀟𑀺𑀢𑁄𑀢𑀺 𑀑𑀮𑀫𑁆𑀩𑀺𑀢𑁄. 𑀣𑀼𑀦𑀦𑁆𑀢𑁄𑀢𑀺 𑀦𑀺𑀢𑁆𑀣𑀼𑀦𑀦𑁆𑀢𑁄.

𑁮. 𑀲𑀽𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁭𑁪. 𑀆𑀳𑀸𑀭𑀲𑀫𑁆𑀧𑀸𑀤𑀦𑁂𑀦 𑀢𑀁𑀢𑀁𑀆𑀳𑀸𑀭𑀯𑀢𑁆𑀣𑀼𑀕𑀢𑁂 𑀲𑀽𑀤𑁂𑀢𑀺 𑀧𑀕𑁆𑀖𑀭𑁂𑀢𑀻𑀢𑀺 𑀲𑀽𑀤𑁄, 𑀪𑀢𑁆𑀢𑀓𑀸𑀭𑀓𑁄. 𑀤𑀳𑀭𑁂𑀳𑀺 𑀫𑀦𑀸𑀧𑀢𑀭𑀁 𑀅𑀘𑁆𑀘𑁂𑀢𑀩𑁆𑀩𑀢𑁄 𑀅𑀢𑀺𑀓𑁆𑀓𑀫𑀺𑀢𑀩𑁆𑀩𑀢𑁄 𑀅𑀘𑁆𑀘𑀬𑀸, 𑀪𑁄𑀚𑀦𑁂 𑀭𑀲𑀯𑀺𑀲𑁂𑀲𑀸, 𑀢𑀲𑁆𑀫𑀸 𑀦𑀸𑀦𑀘𑁆𑀘𑀬𑁂𑀳𑀻𑀢𑀺 𑀦𑀸𑀦𑀧𑁆𑀧𑀓𑀸𑀭𑀭𑀲𑀯𑀺𑀲𑁂𑀲𑁂𑀳𑀻𑀢𑀺 𑀅𑀢𑁆𑀣𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀦𑀸𑀦𑀘𑁆𑀘𑀬𑁂𑀳𑀻’’𑀢𑀺𑀆𑀤𑀺. 𑀅𑀕𑁆𑀕𑀻𑀬𑀢𑀺 𑀅𑀲𑀗𑁆𑀓𑀭𑀢𑁄 𑀯𑀺𑀪𑀚𑀻𑀬𑀢𑀻𑀢𑀺 𑀅𑀕𑁆𑀕𑁄, 𑀅𑀫𑁆𑀩𑀺𑀮𑀫𑁂𑀯 𑀅𑀕𑁆𑀕𑁄 𑀅𑀫𑁆𑀩𑀺𑀮𑀕𑁆𑀕𑁄𑀢𑀺 𑀆𑀳 𑁋 ‘‘𑀅𑀫𑁆𑀩𑀺𑀮𑀕𑁆𑀕𑁂𑀳𑀻𑀢𑀺 𑀅𑀫𑁆𑀩𑀺𑀮𑀓𑁄𑀝𑁆𑀞𑀸𑀲𑁂𑀳𑀻’’𑀢𑀺. 𑀤𑀸𑀢𑀼𑀁 𑀅𑀪𑀺𑀳𑀭𑀺𑀢𑀩𑁆𑀩𑀢𑀸𑀬 𑀅𑀪𑀺𑀳𑀸𑀭𑀸, 𑀤𑁂𑀬𑁆𑀬𑀥𑀫𑁆𑀫𑀸. 𑀢𑁂𑀦𑀸𑀳 𑁋 ‘‘𑀅𑀪𑀺𑀳𑀝𑀸𑀦𑀁 𑀤𑀸𑀬𑀸𑀦’’𑀦𑁆𑀢𑀺. 𑀇𑀤𑀁 𑀫𑁂 𑀓𑀫𑁆𑀫𑀝𑁆𑀞𑀸𑀦𑀁 𑀅𑀦𑀼𑀮𑁄𑀫𑀁𑀯𑀸𑀢𑀺 𑀇𑀤𑀁 𑀫𑀫 𑀓𑀫𑁆𑀫𑀝𑁆𑀞𑀸𑀦𑀁 𑀏𑀯𑀁 𑀧𑀯𑀢𑁆𑀢𑀫𑀸𑀦𑀁 𑀅𑀦𑀼𑀮𑁄𑀫𑀸𑀯𑀲𑀸𑀦𑀫𑁂𑀯 𑀳𑀼𑀢𑁆𑀯𑀸 𑀢𑀺𑀝𑁆𑀞𑀢𑀺. 𑀏𑀯𑀁 𑀧𑀼𑀦 𑀧𑀯𑀢𑁆𑀢𑀫𑀸𑀦𑀁 𑀉𑀲𑁆𑀲𑀓𑁆𑀓𑀺𑀢𑁆𑀯𑀸 𑀯𑀺𑀲𑁂𑀲𑀦𑀺𑀩𑁆𑀩𑀢𑁆𑀢𑀦𑀢𑁆𑀣𑀫𑁂𑀯 𑀳𑁄𑀢𑀻𑀢𑀺 𑀏𑀯𑀁 𑀦𑀺𑀫𑀺𑀢𑁆𑀢𑀁 𑀕𑀳𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺 𑀩𑀸𑀮𑁄 𑀅𑀩𑁆𑀬𑀢𑁆𑀢𑁄, 𑀧𑀡𑁆𑀟𑀺𑀢𑁄 𑀧𑀦 𑀲𑀓𑁆𑀓𑁄𑀢𑀺. 𑀅𑀢𑁆𑀢𑀦𑁄 𑀘𑀺𑀢𑁆𑀢𑀲𑁆𑀲𑀸𑀢𑀺 𑀅𑀢𑁆𑀢𑀦𑁄 𑀪𑀸𑀯𑀦𑀸𑀘𑀺𑀢𑁆𑀢𑀲𑁆𑀲. 𑀧𑀼𑀩𑁆𑀩𑀪𑀸𑀕𑀯𑀺𑀧𑀲𑁆𑀲𑀦𑀸 𑀲𑀢𑀺𑀧𑀝𑁆𑀞𑀸𑀦𑀸𑀯 𑀓𑀣𑀺𑀢𑀸 ‘‘𑀲𑀓𑀲𑁆𑀲 𑀘𑀺𑀢𑁆𑀢𑀲𑁆𑀲 𑀦𑀺𑀫𑀺𑀢𑁆𑀢𑀁 𑀉𑀕𑁆𑀕𑀡𑁆𑀳𑀸𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸.

𑁯. 𑀕𑀺𑀮𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁭𑁫. 𑀧𑀸𑀤𑀕𑀸𑀫𑁄𑀢𑀺 𑀦𑀕𑀭𑀲𑁆𑀲 𑀧𑀤𑀲𑀤𑀺𑀲𑁄 𑀫𑀳𑀦𑁆𑀢𑀕𑀸𑀫𑁄. 𑀢𑁂𑀦𑁂𑀯𑀸𑀳 ‘‘𑀯𑁂𑀲𑀸𑀮𑀺𑀬𑀁 𑀯𑀺𑀳𑀭𑀢𑀺 𑀯𑁂𑀴𑀼𑀯𑀕𑀸𑀫𑀓𑁂’’𑀢𑀺. 𑀅𑀳𑀺𑀢𑀦𑀺𑀲𑁂𑀥𑀦-𑀳𑀺𑀢𑀦𑀺𑀬𑁄𑀚𑀦-𑀩𑁆𑀬𑀲𑀦𑀧𑀭𑀺𑀘𑁆𑀘𑀚𑀦-𑀮𑀓𑁆𑀔𑀡𑁄 𑀫𑀺𑀢𑁆𑀢𑀪𑀸𑀯𑁄 𑀬𑁂𑀲𑀼 𑀅𑀢𑁆𑀣𑀺, 𑀢𑁂 𑀫𑀺𑀢𑁆𑀢𑀸. 𑀬𑁂 𑀧𑀦 𑀤𑀺𑀝𑁆𑀞𑀫𑀢𑁆𑀢𑀲𑀳𑀸𑀬𑀸, 𑀢𑁂 𑀲𑀦𑁆𑀤𑀺𑀝𑁆𑀞𑀸. 𑀬𑁂 𑀲𑀯𑀺𑀲𑁂𑀲𑀁 𑀪𑀢𑁆𑀢𑀺𑀫𑀦𑁆𑀢𑁄, 𑀢𑁂 𑀲𑀫𑁆𑀪𑀢𑁆𑀢𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀫𑀺𑀢𑁆𑀢𑀸𑀢𑀺 𑀫𑀺𑀢𑁆𑀢𑀸𑀯𑀸’’𑀢𑀺𑀆𑀤𑀺𑀫𑀸𑀳. 𑀅𑀲𑁆𑀲𑀸𑀢𑀺 𑀪𑀕𑀯𑀢𑁄. 𑀧𑀜𑁆𑀘𑀫𑀺𑀬𑀁 𑀅𑀝𑁆𑀞𑀫𑀺𑀬𑀁 𑀘𑀸𑀢𑀼𑀤𑁆𑀤𑀲𑀺𑀬𑀁 𑀧𑀜𑁆𑀘𑀤𑀲𑀺𑀬𑀦𑁆𑀢𑀺 𑀏𑀓𑁂𑀓𑀲𑁆𑀫𑀺𑀁 𑀧𑀓𑁆𑀔𑁂 𑀘𑀢𑁆𑀢𑀸𑀭𑁄 𑀯𑀸𑀭𑁂 𑀓𑀢𑁆𑀯𑀸 𑀫𑀸𑀲𑀲𑁆𑀲 𑀅𑀝𑁆𑀞𑀯𑀸𑀭𑁂.

𑀯𑁂𑀤𑀦𑀸𑀦𑀁 𑀩𑀮𑀯𑀪𑀸𑀯𑁂𑀦 𑀔𑀭𑁄 𑀨𑀭𑀼𑀲𑁄 𑀓𑀓𑁆𑀔𑀴𑁄. 𑀆𑀩𑀸𑀥𑁄𑀢𑀺 𑀧𑀼𑀩𑁆𑀩𑀓𑀫𑁆𑀫𑀳𑁂𑀢𑀼𑀢𑀸𑀬 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑁄 𑀆𑀩𑀸𑀥𑁄 𑀲𑀗𑁆𑀔𑀸𑀭𑀤𑀼𑀓𑁆𑀔𑀢𑀸𑀲𑀗𑁆𑀔𑀸𑀢𑁄 𑀲𑀩𑁆𑀩𑀓𑀸𑀮𑀺𑀓𑀢𑁆𑀢𑀸 𑀲𑀭𑀻𑀭𑀲𑁆𑀲 𑀲𑀪𑀸𑀕𑀭𑁄𑀕𑁄 𑀦𑀸𑀫. 𑀦𑀸𑀬𑀫𑀻𑀤𑀺𑀲𑁄 𑀆𑀩𑀸𑀥𑁄, 𑀅𑀬𑀁 𑀧𑀦 𑀩𑀳𑀮𑀢𑀭𑀩𑁆𑀬𑀸𑀥𑀺𑀢𑀸𑀬 ‘‘𑀯𑀺𑀲𑀪𑀸𑀕𑀭𑁄𑀕𑁄’’𑀢𑀺 𑀯𑀼𑀢𑁆𑀢𑁄. 𑀅𑀦𑁆𑀢-𑀲𑀤𑁆𑀤𑁄 𑀲𑀫𑀻𑀧𑀧𑀯𑀢𑁆𑀢𑁄𑀢𑀺 𑀆𑀳 𑁋 ‘‘𑀫𑀭𑀡𑀦𑁆𑀢𑀁 𑀫𑀭𑀡𑀲𑀦𑁆𑀢𑀺𑀓’’𑀦𑁆𑀢𑀺. 𑀯𑁂𑀤𑀦𑀸…𑀧𑁂… 𑀅𑀓𑀭𑁄𑀦𑁆𑀢𑁄 𑀉𑀓𑁆𑀓𑀁𑀲𑀕𑀢𑀪𑀸𑀯𑀺𑀢𑀓𑀸𑀬𑀸𑀤𑀺𑀢𑀸𑀬. 𑀅𑀧𑀻𑀴𑀺𑀬𑀫𑀸𑀦𑁄𑀢𑀺 𑀅𑀧𑀻𑀴𑀺𑀬𑀫𑀸𑀦𑁄 𑀯𑀺𑀬. 𑀑𑀯𑀸𑀤𑀫𑁂𑀯 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀅𑀧𑀮𑁄𑀓𑀦𑀦𑁆𑀢𑀺 𑀆𑀳 𑁋 ‘‘𑀑𑀯𑀸𑀤𑀸𑀦𑀼𑀲𑀸𑀲𑀦𑀺𑀁 𑀅𑀤𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺. 𑀧𑀼𑀩𑁆𑀩𑀪𑀸𑀕𑀯𑀻𑀭𑀺𑀬𑀁 𑀦𑀸𑀫 𑀨𑀮𑀲𑀫𑀸𑀧𑀢𑁆𑀢𑀺𑀬𑀸 𑀧𑀭𑀺𑀓𑀫𑁆𑀫𑀪𑀽𑀢𑀯𑀺𑀧𑀲𑁆𑀲𑀦𑀸𑀯𑀻𑀭𑀺𑀬𑀁. 𑀚𑀻𑀯𑀺𑀢𑀫𑁆𑀧𑀺 𑀚𑀻𑀯𑀺𑀢𑀲𑀗𑁆𑀔𑀸𑀭𑁄 𑀧𑀢𑀺𑀢𑀼𑀁 𑀅𑀤𑀢𑁆𑀯𑀸 𑀅𑀢𑁆𑀢𑀪𑀸𑀯𑀲𑁆𑀲 𑀅𑀪𑀺𑀲𑀗𑁆𑀔𑀭𑀡𑀢𑁄.

‘‘𑀏𑀢𑁆𑀢𑀓𑀁 𑀓𑀸𑀮𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀯𑀼𑀝𑁆𑀞𑀳𑀺𑀲𑁆𑀲𑀸𑀫𑀻’’𑀢𑀺 𑀔𑀡𑀧𑀭𑀺𑀘𑁆𑀙𑁂𑀤𑀯𑀢𑀻 𑀲𑀫𑀸𑀧𑀢𑁆𑀢𑀺 𑀔𑀡𑀺𑀓𑀲𑀫𑀸𑀧𑀢𑁆𑀢𑀺. 𑀦𑀺𑀕𑁆𑀕𑀼𑀫𑁆𑀩𑀁 𑀦𑀺𑀚𑁆𑀚𑀝𑀁 𑀓𑀢𑁆𑀯𑀸𑀢𑀺 𑀭𑀽𑀧𑀲𑀢𑁆𑀢𑀓𑀸𑀭𑀽𑀧𑀲𑀢𑁆𑀢𑀓𑀯𑀲𑁂𑀦 𑀧𑀯𑀢𑁆𑀢𑀺𑀬𑀫𑀸𑀦𑀁 𑀯𑀺𑀧𑀲𑁆𑀲𑀦𑀸𑀪𑀸𑀯𑀦𑀁 𑀲𑀩𑁆𑀩𑀲𑁄 𑀔𑀺𑀮𑀯𑀺𑀭𑀳𑁂𑀦 𑀦𑀺𑀕𑁆𑀕𑀼𑀫𑁆𑀩𑀁, 𑀅𑀩𑁆𑀬𑀸𑀓𑀼𑀮𑀢𑀸𑀬 𑀦𑀺𑀚𑁆𑀚𑀝𑀁 𑀓𑀢𑁆𑀯𑀸. 𑀫𑀳𑀸𑀯𑀺𑀧𑀲𑁆𑀲𑀦𑀸𑀯𑀲𑁂𑀦𑀸𑀢𑀺 𑀧𑀘𑁆𑀘𑁂𑀓𑀁 𑀲𑀯𑀺𑀲𑁂𑀲𑀁 𑀯𑀺𑀢𑁆𑀣𑀸𑀭𑀺𑀢𑀸𑀦𑀁 𑀅𑀝𑁆𑀞𑀸𑀭𑀲𑀸𑀤𑀻𑀦𑀁 𑀫𑀳𑀸𑀯𑀺𑀧𑀲𑁆𑀲𑀦𑀸𑀦𑀁 𑀯𑀲𑁂𑀦 𑀯𑀺𑀧𑀲𑁆𑀲𑀺𑀢𑁆𑀯𑀸 𑀲𑀫𑀸𑀧𑀦𑁆𑀦𑀸 𑀬𑀸 𑀲𑀫𑀸𑀧𑀢𑁆𑀢𑀺, 𑀲𑀸 𑀲𑀼𑀝𑁆𑀞𑀼 𑀯𑀺𑀓𑁆𑀔𑀫𑁆𑀪𑁂𑀢𑀺 𑀯𑁂𑀤𑀦𑀁 𑀫𑀳𑀸𑀩𑀮𑀯𑀢𑀸𑀬 𑀧𑀼𑀩𑁆𑀩𑀸𑀭𑀫𑁆𑀫𑀡𑀲𑁆𑀲, 𑀫𑀳𑀸𑀦𑀼𑀪𑀸𑀯𑀢𑀸𑀬 𑀢𑀣𑀸𑀧𑀯𑀢𑁆𑀢𑀺𑀢𑀯𑀺𑀧𑀲𑁆𑀲𑀦𑀸𑀯𑀻𑀭𑀺𑀬𑀲𑁆𑀲. 𑀬𑀣𑀸 𑀦𑀸𑀫𑀸𑀢𑀺𑀆𑀤𑀺𑀦𑀸 𑀢𑀲𑁆𑀲 𑀦𑀺𑀤𑀲𑁆𑀲𑀦𑀁 𑀤𑀲𑁆𑀲𑁂𑀢𑀺. 𑀯𑁂𑀤𑀦𑀸𑀢𑀺 𑀤𑀼𑀓𑁆𑀔𑀯𑁂𑀤𑀦𑀸. 𑀘𑀼𑀤𑁆𑀤𑀲𑀳𑀸𑀓𑀸𑀭𑁂𑀳𑀻𑀢𑀺 𑀢𑀲𑁆𑀲𑁂𑀯 𑀲𑀢𑁆𑀢𑀓𑀤𑁆𑀯𑀬𑀲𑁆𑀲 𑀯𑀲𑁂𑀦 𑀯𑀤𑀢𑀺. 𑀲𑀦𑁆𑀦𑁂𑀢𑁆𑀯𑀸𑀢𑀺 𑀅𑀦𑁆𑀢𑀭𑀦𑁆𑀢𑀭𑀸 𑀲𑀫𑀸𑀧𑀦𑁆𑀦𑀚𑁆𑀛𑀸𑀦𑀲𑀫𑀸𑀧𑀢𑁆𑀢𑀺𑀲𑀫𑁆𑀪𑀽𑀢𑁂𑀦 𑀯𑀺𑀧𑀲𑁆𑀲𑀦𑀸𑀧𑀻𑀢𑀺𑀲𑀺𑀦𑁂𑀳𑁂𑀦 𑀢𑁂𑀫𑁂𑀢𑁆𑀯𑀸. 𑀲𑀫𑀸𑀧𑀢𑁆𑀢𑀻𑀢𑀺 𑀨𑀮𑀲𑀫𑀸𑀧𑀢𑁆𑀢𑀺.

𑀕𑀺𑀮𑀸𑀦𑀸 𑀯𑀼𑀝𑁆𑀞𑀺𑀢𑁄𑀢𑀺 𑀕𑀺𑀮𑀸𑀦𑀪𑀸𑀯𑀢𑁄 𑀯𑀼𑀝𑁆𑀞𑀺𑀢𑁄. 𑀲𑀭𑀻𑀭𑀲𑁆𑀲 𑀕𑀭𑀼𑀣𑀤𑁆𑀥𑀪𑀸𑀯𑀧𑁆𑀧𑀢𑁆𑀢𑀺 𑀫𑀥𑀼𑀭𑀓𑀢𑀸𑀢𑀺 𑀆𑀳 𑁋 ‘‘𑀲𑀜𑁆𑀚𑀸𑀢𑀕𑀭𑀼𑀪𑀸𑀯𑁄 𑀲𑀜𑁆𑀚𑀸𑀢𑀣𑀤𑁆𑀥𑀪𑀸𑀯𑁄’’𑀢𑀺. 𑀦𑀸𑀦𑀸𑀓𑀸𑀭𑀢𑁄𑀢𑀺 𑀧𑀼𑀭𑀢𑁆𑀣𑀺𑀫𑀸𑀤𑀺𑀪𑁂𑀤𑀢𑁄. 𑀲𑀢𑀺𑀧𑀝𑁆𑀞𑀸𑀦𑀥𑀫𑁆𑀫𑀸𑀢𑀺 𑀧𑀼𑀩𑁆𑀩𑁂 𑀅𑀢𑁆𑀢𑀦𑀸 𑀪𑀸𑀯𑀺𑀬𑀫𑀸𑀦𑀸 𑀲𑀢𑀺𑀧𑀝𑁆𑀞𑀸𑀦𑀥𑀫𑁆𑀫𑀸. 𑀧𑀸𑀓𑀝𑀸 𑀦 𑀳𑁄𑀦𑁆𑀢𑀺 𑀓𑀸𑀬𑀘𑀺𑀢𑁆𑀢𑀸𑀦𑀁 𑀅𑀓𑀫𑁆𑀫𑀜𑁆𑀜𑀢𑀸𑀬. 𑀢𑀦𑁆𑀢𑀺 𑀥𑀫𑁆𑀫𑀸𑀢𑀺 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀸 𑀦 𑀜𑀸𑀬𑀦𑁆𑀢𑀺.

𑀅𑀦𑀦𑁆𑀢𑀭𑀁 𑀅𑀩𑀸𑀳𑀺𑀭𑀦𑁆𑀢𑀺 𑀥𑀫𑁆𑀫𑀯𑀲𑁂𑀦 𑀧𑀼𑀕𑁆𑀕𑀮𑀯𑀲𑁂𑀦 𑀘 𑀅𑀦𑁆𑀢𑀭𑀩𑀸𑀳𑀺𑀭𑀁 𑀅𑀓𑀢𑁆𑀯𑀸. 𑀏𑀢𑁆𑀢𑀓𑀦𑁆𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀯𑀺𑀯𑀭𑀢𑀺. 𑀤𑀳𑀭𑀓𑀸𑀮𑁂𑀢𑀺 𑀅𑀢𑁆𑀢𑀦𑁄 𑀤𑀳𑀭𑀓𑀸𑀮𑁂. 𑀦 𑀏𑀯𑀁 𑀳𑁄𑀢𑀻𑀢𑀺 ‘‘𑀅𑀳𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀭𑀺𑀳𑀭𑀺𑀲𑁆𑀲𑀸𑀫𑀻’’𑀢𑀺𑀆𑀤𑀺𑀓𑁄 𑀫𑀸𑀦𑀢𑀡𑁆𑀳𑀸𑀫𑀽𑀮𑀓𑁄 𑀇𑀲𑁆𑀲𑀸𑀫𑀘𑁆𑀙𑀭𑀺𑀬𑀸𑀦𑀁 𑀧𑀯𑀢𑁆𑀢𑀺𑀆𑀓𑀸𑀭𑁄 𑀢𑀣𑀸𑀕𑀢𑀲𑁆𑀲 𑀦 𑀳𑁄𑀢𑀺, 𑀦𑀢𑁆𑀣𑁂𑀯 𑀧𑀕𑁂𑀯 𑀢𑁂𑀲𑀁 𑀲𑀫𑀼𑀘𑁆𑀙𑀺𑀦𑁆𑀦𑀢𑁆𑀢𑀸𑀢𑀺 𑀆𑀳 𑁋 ‘‘𑀩𑁄𑀥𑀺𑀧𑀮𑁆𑀮𑀗𑁆𑀓𑁂𑀬𑁂𑀯𑀸’’𑀢𑀺𑀆𑀤𑀺. 𑀧𑀝𑀺𑀲𑀗𑁆𑀔𑀭𑀡𑁂𑀦 𑀯𑁂𑀞𑁂𑀦 𑀫𑀺𑀲𑁆𑀲𑀓𑁂𑀦. 𑀫𑀜𑁆𑀜𑁂𑀢𑀺 𑀬𑀣𑀸𑀯𑀼𑀢𑁆𑀢𑀁 𑀧𑀝𑀺𑀲𑀗𑁆𑀔𑀭𑀡𑀲𑀜𑁆𑀜𑀺𑀢𑁂𑀦 𑀯𑁂𑀞𑀫𑀺𑀲𑁆𑀲𑀓𑁂𑀦 𑀯𑀺𑀬 𑀚𑀭𑀲𑀓𑀝𑀁. 𑀅𑀭𑀳𑀢𑁆𑀢𑀨𑀮𑀯𑁂𑀞𑁂𑀦𑀸𑀢𑀺 𑀅𑀭𑀳𑀢𑁆𑀢𑀨𑀮𑀲𑀫𑀸𑀧𑀢𑁆𑀢𑀺𑀲𑀜𑁆𑀜𑀺𑀢𑁂𑀦 𑀅𑀢𑁆𑀣𑀪𑀸𑀯𑀯𑁂𑀞𑁂𑀦.

𑀨𑀮𑀲𑀫𑀸𑀧𑀢𑁆𑀢𑀺𑀬𑀸 𑀅𑀥𑀺𑀧𑁆𑀧𑁂𑀢𑀢𑁆𑀢𑀸 ‘‘𑀏𑀓𑀘𑁆𑀘𑀸𑀦𑀁 𑀯𑁂𑀤𑀦𑀸𑀦𑀦𑁆𑀢𑀺 𑀮𑁄𑀓𑀺𑀬𑀸𑀦𑀁 𑀯𑁂𑀤𑀦𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀢𑁆𑀢𑀤𑀻𑀧𑀸𑀢𑀺 𑀏𑀢𑁆𑀣 𑀅𑀢𑁆𑀢-𑀲𑀤𑁆𑀤𑁂𑀦 𑀥𑀫𑁆𑀫𑁄 𑀏𑀯 𑀯𑀼𑀢𑁆𑀢𑁄, 𑀲𑁆𑀯𑀸𑀬𑀫𑀢𑁆𑀣𑁄 𑀳𑁂𑀝𑁆𑀞𑀸 𑀯𑀺𑀪𑀸𑀯𑀺𑀢𑁄 𑀏𑀯. 𑀦𑀯𑀯𑀺𑀥𑁄 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁄 𑀯𑁂𑀤𑀺𑀢𑀩𑁆𑀩𑁄. 𑀲𑁄 𑀳𑀺 𑀘𑀢𑀽𑀳𑀺 𑀑𑀖𑁂𑀳𑀺 𑀅𑀦𑀚𑁆𑀛𑁄𑀢𑁆𑀣𑀭𑀡𑀻𑀬𑀢𑁄 ‘‘𑀤𑀻𑀧𑁄’’𑀢𑀺 𑀯𑀼𑀢𑁆𑀢𑁄. 𑀢𑀫𑀅𑀕𑁆𑀕𑁂𑀢𑀺 𑀢𑀫𑀬𑁄𑀕𑀸𑀪𑀸𑀯𑁂𑀦 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀅𑀕𑁆𑀕𑁂. 𑀲𑀩𑁆𑀩𑁂𑀲𑀦𑁆𑀢𑀺 𑀲𑀩𑁆𑀩𑁂𑀲𑀁 𑀲𑀺𑀓𑁆𑀔𑀸𑀓𑀸𑀫𑀸𑀦𑀁. 𑀢𑁂 ‘‘𑀥𑀫𑁆𑀫𑀤𑀻𑀧𑀸 𑀯𑀺𑀳𑀭𑀣𑀸’’𑀢𑀺 𑀯𑀼𑀢𑁆𑀢𑀸 𑀘𑀢𑀼𑀲𑀢𑀺𑀧𑀝𑁆𑀞𑀸𑀦𑀕𑁄𑀘𑀭𑀸𑀯 𑀪𑀺𑀓𑁆𑀔𑀽 𑀅𑀕𑁆𑀕𑁂 𑀪𑀯𑀺𑀲𑁆𑀲𑀦𑁆𑀢𑀺.

𑁧𑁦. 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁭𑁬. 𑀓𑀫𑁆𑀫𑀝𑁆𑀞𑀸𑀦𑀓𑀫𑁆𑀫𑀺𑀓𑀸𑀢𑀺 𑀓𑀫𑁆𑀫𑀝𑁆𑀞𑀸𑀦𑀫𑀦𑀼𑀬𑀼𑀢𑁆𑀢𑀸. 𑀯𑀺𑀲𑁂𑀲𑁂𑀢𑀻𑀢𑀺 𑀯𑀺𑀲𑁂𑀲𑁄, 𑀅𑀢𑀺𑀲𑀬𑁄, 𑀲𑁆𑀯𑀸𑀬𑀁 𑀧𑀼𑀩𑁆𑀩𑀸𑀧𑀭𑀯𑀺𑀲𑁂𑀲𑁄 𑀉𑀧𑀸𑀤𑀸𑀬𑀼𑀧𑀸𑀤𑀸𑀬 𑀕𑀳𑁂𑀢𑀩𑁆𑀩𑁄𑀢𑀺 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣𑀸’’𑀢𑀺𑀆𑀤𑀺𑀫𑀸𑀳.

𑀉𑀧𑁆𑀧𑀚𑁆𑀚𑀢𑀺 𑀓𑀺𑀮𑁂𑀲𑀧𑀭𑀺𑀴𑀸𑀳𑁄𑀢𑀺 𑀓𑀸𑀬𑁂 𑀅𑀲𑀼𑀪𑀸𑀤𑀺𑀯𑀲𑁂𑀦 𑀫𑀦𑀲𑀺𑀓𑀸𑀭𑀁 𑀅𑀤𑀳𑀦𑁆𑀢𑀲𑁆𑀲 𑀫𑀦𑀲𑀺𑀓𑀸𑀭𑀲𑁆𑀲 𑀯𑀻𑀣𑀺𑀬𑀁 𑀅𑀧𑀝𑀺𑀧𑀦𑁆𑀦𑀢𑀸 𑀲𑀼𑀪𑀸𑀤𑀺𑀯𑀲𑁂𑀦 𑀓𑀸𑀬𑀸𑀭𑀫𑁆𑀫𑀡𑁄 𑀓𑀺𑀮𑁂𑀲𑀧𑀭𑀺𑀴𑀸𑀳𑁄 𑀘 𑀉𑀧𑁆𑀧𑀚𑁆𑀚𑀢𑀺. 𑀯𑀻𑀭𑀺𑀬𑀸𑀭𑀫𑁆𑀪𑀲𑁆𑀲 𑀅𑀪𑀸𑀯𑁂𑀦 𑀢𑀲𑁆𑀫𑀺𑀁 𑀆𑀭𑀫𑁆𑀫𑀡𑁂 𑀘𑁂𑀢𑀲𑁄 𑀯𑀸 𑀮𑀻𑀦𑀢𑁆𑀢𑀁 𑀳𑁄𑀢𑀺, 𑀕𑁄𑀘𑀭𑀚𑁆𑀛𑀢𑁆𑀢𑀢𑁄 𑀩𑀳𑀺𑀤𑁆𑀥𑀸 𑀧𑀼𑀣𑀼𑀢𑁆𑀢𑀸𑀭𑀫𑁆𑀫𑀡𑁂 𑀘𑀺𑀢𑁆𑀢𑀁 𑀯𑀺𑀓𑁆𑀔𑀺𑀧𑀢𑀺. 𑀏𑀯𑀁 𑀓𑀺𑀮𑁂𑀲𑀧𑀭𑀺𑀴𑀸𑀳𑁂 𑀘𑀸𑀢𑀺𑀆𑀤𑀺𑀦𑀸 𑀢𑀺𑀯𑀺𑀥𑀫𑁆𑀧𑀺 𑀪𑀸𑀯𑀦𑀸𑀦𑀼𑀬𑁄𑀕𑀲𑁆𑀲 𑀓𑀺𑀮𑁂𑀲𑀯𑀢𑁆𑀣𑀼𑀪𑀸𑀯𑀁 𑀉𑀧𑀸𑀤𑀸𑀬 𑀲𑀫𑀼𑀘𑁆𑀘𑀬𑀯𑀲𑁂𑀦 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁. 𑀬𑀲𑁆𑀫𑀸 𑀧𑀦 𑀢𑁂 𑀧𑀭𑀺𑀴𑀸𑀳𑀮𑀻𑀦𑀢𑁆𑀢𑀯𑀺𑀓𑁆𑀔𑁂𑀧𑀸 𑀏𑀓𑀚𑁆𑀛𑀁 𑀦 𑀧𑀯𑀢𑁆𑀢𑀦𑁆𑀢𑀺, 𑀢𑀲𑁆𑀫𑀸 𑀧𑀸𑀴𑀺𑀬𑀁 ‘‘𑀓𑀸𑀬𑀸𑀭𑀫𑁆𑀫𑀡𑁄 𑀯𑀸’’𑀢𑀺𑀆𑀤𑀺𑀦𑀸 𑀅𑀦𑀺𑀬𑀫𑀢𑁆𑀣𑁄 𑀯𑀸-𑀲𑀤𑁆𑀤𑁄 𑀕𑀳𑀺𑀢𑁄. 𑀓𑀺𑀮𑁂𑀲𑀸𑀦𑀼𑀭𑀜𑁆𑀚𑀺𑀢𑁂𑀦𑀸𑀢𑀺 𑀓𑀺𑀮𑁂𑀲𑀯𑀺𑀯𑀡𑁆𑀡𑀺𑀢𑀘𑀺𑀢𑁆𑀢𑁂𑀦 𑀳𑀼𑀢𑁆𑀯𑀸 𑀦 𑀯𑀢𑁆𑀢𑀺𑀢𑀩𑁆𑀩𑀁. 𑀓𑀣𑀁 𑀧𑀦 𑀯𑀢𑁆𑀢𑀺𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀓𑀺𑀲𑁆𑀫𑀺𑀜𑁆𑀘𑀺𑀤𑁂𑀯𑀸’’𑀢𑀺. 𑀦 𑀘 𑀯𑀺𑀢𑀓𑁆𑀓𑁂𑀢𑀺 𑀦 𑀘 𑀯𑀺𑀘𑀸𑀭𑁂𑀢𑀻𑀢𑀺 𑀓𑀺𑀮𑁂𑀲𑀲𑀳𑀕𑀢𑁂 𑀯𑀺𑀢𑀓𑁆𑀓𑀯𑀺𑀘𑀸𑀭𑁂 𑀦 𑀧𑀯𑀢𑁆𑀢𑁂𑀢𑀺. 𑀲𑀼𑀔𑀺𑀢𑁄𑀢𑀺 𑀛𑀸𑀦𑀲𑀼𑀔𑁂𑀦 𑀲𑀼𑀔𑀺𑀢𑁄.

𑀇𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀪𑀸𑀯𑀦𑀸 𑀧𑀯𑀢𑁆𑀢𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀬𑀲𑁆𑀫𑀸 𑀳𑀺 𑀇𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀢𑀁 𑀫𑀽𑀮𑀓𑀫𑁆𑀫𑀝𑁆𑀞𑀸𑀦𑀁 𑀧𑀭𑀺𑀧𑀦𑁆𑀣𑁂 𑀲𑀢𑀺 𑀞𑀧𑁂𑀢𑁆𑀯𑀸 𑀩𑀼𑀤𑁆𑀥𑀕𑀼𑀡𑀸𑀤𑀺𑀅𑀦𑀼𑀲𑁆𑀲𑀭𑀡𑁂𑀦 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸 𑀫𑀽𑀮𑀓𑀫𑁆𑀫𑀝𑁆𑀞𑀸𑀦𑀪𑀸𑀯𑀦𑀸 𑀧𑀯𑀢𑁆𑀢𑀸, 𑀢𑀲𑁆𑀫𑀸 𑀧𑀡𑀺𑀥𑀸𑀬 𑀪𑀸𑀯𑀦𑀸𑀢𑀺 𑀯𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀝𑁆𑀞𑀧𑁂𑀢𑁆𑀯𑀸𑀢𑀺 𑀘𑀺𑀢𑁆𑀢𑀁 𑀅𑀧𑁆𑀧𑀯𑀢𑁆𑀢𑁂𑀢𑁆𑀯𑀸𑀢𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀓𑀫𑁆𑀫𑀝𑁆𑀞𑀸𑀦𑀸𑀤𑀻𑀦𑀁 𑀢𑀺𑀡𑁆𑀡𑀫𑁆𑀧𑀺 𑀯𑀲𑁂𑀦 𑀅𑀢𑁆𑀣𑀬𑁄𑀚𑀦𑀸 𑀲𑀫𑁆𑀪𑀯𑀢𑀺. 𑀢𑁂𑀦𑀸𑀳 ‘‘𑀢𑀢𑁆𑀣𑀸’’𑀢𑀺𑀆𑀤𑀺. 𑀲𑀸𑀭𑁂𑀦𑁆𑀢𑁄 𑀯𑀺𑀬𑀸𑀢𑀺 𑀭𑀣𑀁 𑀯𑀸𑀳𑀬𑀦𑁆𑀢𑁄 𑀯𑀺𑀬. 𑀲𑀫𑀧𑁆𑀧𑀫𑀸𑀡𑀢𑁄 𑀅𑀝𑁆𑀞𑀓𑀸𑀤𑀺𑀯𑀲𑁂𑀦 𑀲𑀼𑀢𑀘𑁆𑀙𑀺𑀢𑀁 𑀧𑀓𑁆𑀔𑀺𑀧𑀦𑁆𑀢𑁄 𑀯𑀺𑀬. 𑀲𑀼𑀔𑁂𑀦𑁂𑀯 𑀓𑀺𑀮𑁂𑀲𑀸𑀦𑀁 𑀑𑀓𑀸𑀲𑀁 𑀅𑀤𑁂𑀦𑁆𑀢𑁄 𑀅𑀦𑁆𑀢𑀭𑀸 𑀅𑀲𑀚𑁆𑀚𑀦𑁆𑀢𑁄 𑀅𑀮𑀕𑁆𑀕𑀦𑁆𑀢𑁄. 𑀯𑀺𑀧𑀲𑁆𑀲𑀦𑀸𑀘𑀸𑀭𑀲𑁆𑀲 𑀆𑀭𑀤𑁆𑀥𑀯𑀼𑀢𑁆𑀢𑀺𑀢𑀁 𑀅𑀧𑀭𑀺𑀧𑀦𑁆𑀣𑀢𑀜𑁆𑀘 𑀤𑀲𑁆𑀲𑁂𑀦𑁆𑀢𑁄 𑀑𑀧𑀫𑁆𑀫𑀤𑁆𑀯𑀬𑀫𑀸𑀳. 𑀩𑁆𑀬𑀸𑀪𑀗𑁆𑀕𑀺𑀬𑀸𑀢𑀺 𑀓𑀸𑀚𑀤𑀡𑁆𑀟𑁂𑀦. 𑀓𑀺𑀮𑁂𑀲𑀧𑀭𑀺𑀴𑀸𑀳𑀸𑀤𑀻𑀦𑀦𑁆𑀢𑀺 𑀓𑀺𑀮𑁂𑀲𑀧𑀭𑀺𑀴𑀸𑀳𑀮𑀻𑀦𑀢𑁆𑀢𑀯𑀺𑀓𑁆𑀔𑁂𑀧𑀸𑀦𑀁.

𑀕𑀼𑀴𑀔𑀡𑁆𑀟𑀸𑀤𑀻𑀦𑀻𑀢𑀺 𑀕𑀼𑀴𑀔𑀡𑁆𑀟𑀲𑀓𑁆𑀔𑀭𑀔𑀡𑁆𑀟𑀸𑀤𑀻𑀦𑀺 𑀉𑀘𑁆𑀙𑀼𑀯𑀺𑀓𑀸𑀭𑀪𑀽𑀢𑀸𑀦𑀺. ‘‘𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀸𑀫𑀻’’𑀢𑀺𑀆𑀤𑀺𑀯𑀘𑀦𑀢𑁄 ‘‘𑀧𑀼𑀩𑁆𑀩𑀪𑀸𑀕𑀯𑀺𑀧𑀲𑁆𑀲𑀦𑀸 𑀓𑀣𑀺𑀢𑀸’’𑀢𑀺 𑀯𑀼𑀢𑁆𑀢𑀁.

𑀅𑀫𑁆𑀩𑀧𑀸𑀮𑀺𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀦𑀸𑀮𑀦𑁆𑀤𑀯𑀕𑁆𑀕𑁄

𑁨. 𑀦𑀸𑀮𑀦𑁆𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁭𑁮. 𑀤𑀼𑀢𑀺𑀬𑀯𑀕𑁆𑀕𑁂 𑀧𑀞𑀫𑀲𑀼𑀢𑁆𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀢𑁆𑀢𑀸 𑀲𑀼𑀯𑀺𑀜𑁆𑀜𑁂𑀬𑁆𑀬𑀦𑁆𑀢𑀺 𑀢𑀁 𑀮𑀗𑁆𑀖𑀺𑀢𑁆𑀯𑀸 ‘‘𑀤𑀼𑀢𑀺𑀬𑁂’’𑀢𑀺 𑀯𑀼𑀢𑁆𑀢𑀁.

𑀪𑀺𑀬𑁆𑀬𑀢𑀭𑁄 𑀅𑀪𑀺𑀜𑁆𑀜𑀸𑀢𑁄𑀢𑀺 𑀲𑀫𑁆𑀩𑁄𑀥𑀺𑀬𑀸 𑀲𑁂𑀝𑁆𑀞𑀢𑀭𑁄𑀢𑀺 𑀅𑀪𑀺𑀮𑀓𑁆𑀔𑀺𑀢𑁄. 𑀪𑀺𑀬𑁆𑀬𑀢𑀭𑀸𑀪𑀺𑀜𑁆𑀜𑁄𑀢𑀺 𑀲𑀩𑁆𑀩𑀲𑀢𑁆𑀢𑁂𑀲𑀼 𑀅𑀥𑀺𑀓𑀢𑀭𑀧𑀜𑁆𑀜𑁄. 𑀢𑁂𑀦𑀸𑀳 ‘‘𑀉𑀢𑁆𑀢𑀭𑀺𑀢𑀭𑀜𑀸𑀡𑁄’’𑀢𑀺. 𑀲𑀫𑁆𑀫𑀸 𑀅𑀦𑀯𑀲𑁂𑀲𑀢𑁄 𑀩𑀼𑀚𑁆𑀛𑀢𑀺 𑀏𑀢𑁂𑀦𑀸𑀢𑀺 𑀲𑀫𑁆𑀩𑁄𑀥𑀻𑀢𑀺 𑀆𑀳 𑁋 ‘‘𑀲𑀫𑁆𑀩𑁄𑀥𑀺𑀬𑀦𑁆𑀢𑀺 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂’’𑀢𑀺. 𑀦𑀺𑀧𑁆𑀧𑀤𑁂𑀲𑀸 𑀕𑀳𑀺𑀢𑀸𑀢𑀺 𑀅𑀦𑀯𑀲𑁂𑀲𑀸 𑀩𑀼𑀤𑁆𑀥𑀕𑀼𑀡𑀸 𑀕𑀳𑀺𑀢𑀸 𑀅𑀕𑁆𑀕𑀫𑀕𑁆𑀕𑀲𑀺𑀤𑁆𑀥𑀺𑀬𑀸𑀯 𑀪𑀕𑀯𑀢𑁄 𑀲𑀩𑁆𑀩𑀕𑀼𑀡𑀸𑀦𑀁 𑀲𑀺𑀤𑁆𑀥𑀢𑁆𑀢𑀸. 𑀦 𑀓𑁂𑀯𑀮𑀜𑁆𑀘 𑀩𑀼𑀤𑁆𑀥𑀸𑀦𑀁, 𑀅𑀣 𑀔𑁄 𑀅𑀕𑁆𑀕𑀲𑀸𑀯𑀓𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀫𑁆𑀧𑀺 𑀢𑀁𑀢𑀁𑀕𑀼𑀡𑀲𑀫𑀺𑀚𑁆𑀛𑀦𑀁 𑀅𑀕𑁆𑀕𑀫𑀕𑁆𑀕𑀸𑀥𑀺𑀕𑀫𑁂𑀦𑁂𑀯𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀤𑁆𑀯𑁂𑀧𑀺 𑀅𑀕𑁆𑀕𑀲𑀸𑀯𑀓𑀸’’𑀢𑀺𑀆𑀤𑀺𑀫𑀸𑀳.

𑀅𑀧𑀭𑁄 𑀦𑀬𑁄 𑁋 𑀧𑀲𑀦𑁆𑀦𑁄𑀢𑀺 𑀇𑀫𑀺𑀦𑀸 𑀧𑀲𑀸𑀤𑀲𑁆𑀲 𑀯𑀢𑁆𑀢𑀫𑀸𑀦𑀢𑀸 𑀤𑀻𑀧𑀺𑀢𑀸𑀢𑀺 𑀉𑀧𑁆𑀧𑀦𑁆𑀦𑀲𑀤𑁆𑀥𑁄𑀢𑀺 𑀇𑀫𑀺𑀦𑀸𑀧𑀺 𑀲𑀤𑁆𑀥𑀸𑀬 𑀧𑀘𑁆𑀘𑀼𑀧𑁆𑀧𑀦𑁆𑀦𑀢𑀸 𑀧𑀓𑀸𑀲𑀺𑀢𑀸𑀢𑀺 𑀆𑀳 𑁋 ‘‘𑀏𑀯𑀁 𑀲𑀤𑁆𑀤𑀳𑀸𑀫𑀻𑀢𑀺 𑀅𑀢𑁆𑀣𑁄’’𑀢𑀺. 𑀅𑀪𑀺𑀚𑀸𑀦𑀸𑀢𑀺 𑀅𑀪𑀺𑀫𑀼𑀔𑀪𑀸𑀯𑁂𑀦 𑀲𑀩𑁆𑀩𑀜𑁆𑀜𑁂𑀬𑁆𑀬𑀁 𑀚𑀸𑀦𑀸𑀢𑀻𑀢𑀺 𑀅𑀪𑀺𑀜𑁆𑀜𑁄, 𑀪𑀺𑀬𑁆𑀬𑁄 𑀅𑀥𑀺𑀓𑁄 𑀅𑀪𑀺𑀜𑁆𑀜𑁄𑀢𑀺 𑀪𑀺𑀬𑁆𑀬𑁄𑀪𑀺𑀜𑁆𑀜𑁄. 𑀲𑁄 𑀏𑀯 𑀅𑀢𑀺𑀲𑀬𑀯𑀘𑀦𑀺𑀘𑁆𑀙𑀸𑀯𑀲𑁂𑀦 𑀪𑀺𑀬𑁆𑀬𑁄𑀪𑀺𑀜𑁆𑀜𑀢𑀭𑁄𑀢𑀺 𑀯𑀼𑀢𑁆𑀢𑁄𑀢𑀺 𑀆𑀳 𑁋 ‘‘𑀪𑀺𑀬𑁆𑀬𑀢𑀭𑁄 𑀅𑀪𑀺𑀜𑁆𑀜𑀸𑀢𑁄’’𑀢𑀺. 𑀤𑀼𑀢𑀺𑀬𑀯𑀺𑀓𑀧𑁆𑀧𑁂 𑀧𑀦 𑀅𑀪𑀺𑀚𑀸𑀦𑀸𑀢𑀻𑀢𑀺 𑀅𑀪𑀺𑀜𑁆𑀜𑀸, 𑀅𑀪𑀺𑀯𑀺𑀲𑀺𑀝𑁆𑀞𑀸 𑀧𑀜𑁆𑀜𑀸. 𑀪𑀺𑀬𑁆𑀬𑁄 𑀅𑀪𑀺𑀜𑁆𑀜𑀸 𑀏𑀢𑀲𑁆𑀲𑀸𑀢𑀺 𑀪𑀺𑀬𑁆𑀬𑁄𑀪𑀺𑀜𑁆𑀜𑁄, 𑀲𑁄 𑀏𑀯 𑀅𑀢𑀺𑀲𑀬𑀯𑀘𑀦𑀺𑀘𑁆𑀙𑀸𑀯𑀲𑁂𑀦 𑀪𑀺𑀬𑁆𑀬𑁄𑀪𑀺𑀜𑁆𑀜𑀢𑀭𑁄. 𑀲𑁆𑀯𑀸𑀬𑀁 𑀅𑀲𑁆𑀲 𑀅𑀢𑀺𑀲𑀬𑁄 𑀅𑀪𑀺𑀜𑁆𑀜𑀸𑀬 𑀪𑀺𑀬𑁆𑀬𑁄𑀪𑀸𑀯𑀓𑀢𑁄𑀢𑀺 𑀆𑀳 𑁋 ‘‘𑀪𑀺𑀬𑁆𑀬𑀢𑀭𑀸𑀪𑀺𑀜𑁆𑀜𑁄 𑀯𑀸’’𑀢𑀺. 𑀲𑀫𑁆𑀩𑀼𑀚𑁆𑀛𑀢𑀺 𑀏𑀢𑀸𑀬𑀸𑀢𑀺 𑀲𑀫𑁆𑀩𑁄𑀥𑀺, 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀅𑀕𑁆𑀕𑀫𑀕𑁆𑀕𑀜𑀸𑀡𑀜𑁆𑀘. 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀧𑀤𑀝𑁆𑀞𑀸𑀦𑀜𑁆𑀳𑀺 𑀅𑀕𑁆𑀕𑀫𑀕𑁆𑀕𑀜𑀸𑀡𑀁, 𑀅𑀕𑁆𑀕𑀫𑀕𑁆𑀕𑀜𑀸𑀡𑀧𑀤𑀝𑁆𑀞𑀸𑀦𑀜𑁆𑀘 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀲𑀫𑁆𑀩𑁄𑀥𑀺 𑀦𑀸𑀫. 𑀢𑀢𑁆𑀣 𑀧𑀥𑀸𑀦𑀯𑀲𑁂𑀦 𑀢𑀤𑀢𑁆𑀣𑀤𑀲𑁆𑀲𑀦𑁂 𑀧𑀞𑀫𑀯𑀺𑀓𑀧𑁆𑀧𑁄, 𑀧𑀤𑀝𑁆𑀞𑀸𑀦𑀯𑀲𑁂𑀦 𑀤𑀼𑀢𑀺𑀬𑀯𑀺𑀓𑀧𑁆𑀧𑁄. 𑀓𑀲𑁆𑀫𑀸 𑀧𑀦𑁂𑀢𑁆𑀣 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑀲𑁆𑀲𑁂𑀯 𑀕𑀳𑀡𑀁, 𑀦𑀦𑀼 𑀳𑁂𑀝𑁆𑀞𑀺𑀫𑀸𑀦𑀺𑀧𑀺 𑀪𑀕𑀯𑀢𑁄 𑀫𑀕𑁆𑀕𑀜𑀸𑀡𑀸𑀦𑀺 𑀲𑀯𑀸𑀲𑀦𑀫𑁂𑀯 𑀬𑀣𑀸𑀲𑀓𑀁 𑀧𑀝𑀺𑀧𑀓𑁆𑀔𑀯𑀺𑀥𑀫𑀦𑀯𑀲𑁂𑀦 𑀧𑀯𑀢𑁆𑀢𑀸𑀦𑀺. 𑀲𑀯𑀸𑀲𑀦𑀧𑁆𑀧𑀳𑀸𑀦𑀜𑁆𑀳𑀺 𑀜𑁂𑀬𑁆𑀬𑀸𑀯𑀭𑀡𑀧𑁆𑀧𑀳𑀸𑀦𑀦𑁆𑀢𑀺? 𑀲𑀘𑁆𑀘𑀫𑁂𑀢𑀁, 𑀢𑀁 𑀧𑀦 𑀅𑀧𑀭𑀺𑀧𑀼𑀡𑁆𑀡𑀁 𑀧𑀝𑀺𑀧𑀓𑁆𑀔𑀯𑀺𑀥𑀫𑀦𑀲𑁆𑀲 𑀯𑀺𑀧𑁆𑀧𑀓𑀢𑀪𑀸𑀯𑀢𑁄𑀢𑀺 𑀆𑀳 ‘‘𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑁂 𑀯𑀸’’𑀢𑀺. 𑀲𑀩𑁆𑀩𑀦𑁆𑀢𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀅𑀥𑀺𑀕𑀦𑁆𑀢𑀩𑁆𑀩𑀁 𑀲𑀩𑁆𑀩𑀁.

𑀔𑀸𑀤𑀦𑀻𑀬𑀸𑀦𑀁 𑀉𑀴𑀸𑀭𑀢𑀸 𑀲𑀸𑀢𑀭𑀲𑀸𑀦𑀼𑀪𑀸𑀯𑁂𑀦𑀸𑀢𑀺 𑀆𑀳 ‘‘𑀫𑀥𑀼𑀭𑁂 𑀆𑀕𑀘𑁆𑀙𑀢𑀻’’𑀢𑀺. 𑀧𑀲𑀁𑀲𑀸𑀬 𑀉𑀴𑀸𑀭𑀢𑀸 𑀯𑀺𑀲𑀺𑀝𑁆𑀞𑀪𑀸𑀯𑁂𑀦𑀸𑀢𑀺 𑀆𑀳 𑁋 ‘‘𑀲𑁂𑀝𑁆𑀞𑁂’’𑀢𑀺. 𑀑𑀪𑀸𑀲𑀲𑁆𑀲 𑀉𑀴𑀸𑀭𑀢𑀸 𑀫𑀳𑀦𑁆𑀢𑀪𑀸𑀯𑁂𑀦𑀸𑀢𑀺 𑀯𑀼𑀢𑁆𑀢𑀁 𑁋 ‘‘𑀯𑀺𑀧𑀼𑀮𑁂’’𑀢𑀺. 𑀉𑀲𑀪𑀲𑁆𑀲 𑀅𑀬𑀦𑁆𑀢𑀺 𑀆𑀲𑀪𑀻, 𑀇𑀥 𑀧𑀦 𑀆𑀲𑀪𑀻 𑀯𑀺𑀬𑀸𑀢𑀺 𑀆𑀲𑀪𑀻. 𑀢𑁂𑀦𑀸𑀳 𑁋 ‘‘𑀉𑀲𑀪𑀲𑁆𑀲 𑀯𑀸𑀘𑀸𑀲𑀤𑀺𑀲𑀻’’𑀢𑀺. 𑀬𑁂𑀦 𑀕𑀼𑀡𑁂𑀦 𑀲𑀸 𑀢𑀁𑀲𑀤𑀺𑀲𑀸, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀘𑀮𑀸 𑀅𑀲𑀫𑁆𑀧𑀯𑁂𑀥𑀻’’𑀢𑀺 𑀯𑀼𑀢𑁆𑀢𑀁. 𑀬𑀢𑁄 𑀓𑀼𑀢𑁄𑀘𑀺 𑀅𑀦𑀼𑀲𑁆𑀲𑀯𑀦𑀁 𑀅𑀦𑀼𑀲𑁆𑀲𑀯𑁄. 𑀯𑀺𑀚𑁆𑀚𑀸𑀝𑁆𑀞𑀸𑀦𑀸𑀤𑀻𑀲𑀼 𑀓𑀢𑀧𑀭𑀺𑀘𑀬𑀸𑀦𑀁 𑀆𑀘𑀭𑀺𑀬𑀸𑀦𑀁 𑀢𑀁 𑀢𑀁 𑀅𑀢𑁆𑀣𑀁 𑀜𑀸𑀧𑁂𑀦𑁆𑀢𑀻 𑀧𑀯𑁂𑀡𑀻 𑀆𑀘𑀭𑀺𑀬𑀧𑀭𑀫𑁆𑀧𑀭𑀸. 𑀓𑁂𑀯𑀮𑀁 𑀅𑀢𑁆𑀢𑀦𑁄 𑀫𑀢𑀺𑀬𑀸 ‘‘𑀇𑀢𑀺 𑀓𑀺𑀭 𑀏𑀯𑀁 𑀓𑀺𑀭𑀸’’𑀢𑀺 𑀧𑀭𑀺𑀓𑀧𑁆𑀧𑀦𑀸 𑀇𑀢𑀺𑀓𑀺𑀭𑀸. 𑀧𑀺𑀝𑀓𑀲𑁆𑀲 𑀕𑀦𑁆𑀣𑀲𑁆𑀲 𑀲𑀫𑁆𑀧𑀤𑀸𑀦𑀢𑁄 𑀪𑀽𑀢𑀢𑁄 𑀢𑀲𑁆𑀲 𑀕𑀳𑀡𑀁 𑀧𑀺𑀝𑀓𑀲𑀫𑁆𑀧𑀤𑀸𑀦𑀁. 𑀬𑀣𑀸𑀲𑀼𑀢𑀸𑀦𑀁 𑀅𑀢𑁆𑀢𑀸𑀦𑀁 𑀆𑀓𑀸𑀭𑀲𑁆𑀲 𑀧𑀭𑀺𑀯𑀺𑀢𑀓𑁆𑀓𑀦𑀁 𑀆𑀓𑀸𑀭𑀧𑀭𑀺𑀯𑀺𑀢𑀓𑁆𑀓𑁄. 𑀢𑀣𑁂𑀯𑀲𑁆𑀲 ‘‘𑀏𑀯𑀫𑁂𑀢’’𑀦𑁆𑀢𑀺 𑀤𑀺𑀝𑁆𑀞𑀺𑀬𑀸 𑀦𑀺𑀚𑁆𑀛𑀸𑀦𑀓𑁆𑀔𑀫𑀦𑀁 𑀤𑀺𑀝𑁆𑀞𑀺𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀺. 𑀆𑀕𑀫𑀸𑀥𑀺𑀕𑀫𑁂𑀳𑀺 𑀯𑀺𑀦𑀸 𑀓𑁂𑀯𑀮𑀁 𑀅𑀦𑀼𑀲𑁆𑀲𑀼𑀢𑀢𑁄 𑀢𑀓𑁆𑀓𑀫𑀕𑁆𑀕𑀁 𑀦𑀺𑀲𑁆𑀲𑀸𑀬 𑀢𑀓𑁆𑀓𑀦𑀁 𑀢𑀓𑁆𑀓𑁄. 𑀅𑀦𑀼𑀫𑀸𑀦𑀯𑀺𑀥𑀺𑀁 𑀦𑀺𑀲𑁆𑀲𑀸𑀬 𑀕𑀳𑀡𑀁 𑀦𑀬𑀕𑁆𑀕𑀸𑀳𑁄. 𑀬𑀲𑁆𑀫𑀸 𑀩𑀼𑀤𑁆𑀥𑀯𑀺𑀲𑀬𑁂 𑀞𑀢𑁆𑀯𑀸 𑀪𑀕𑀯𑀢𑁄 𑀅𑀬𑀁 𑀣𑁂𑀭𑀲𑁆𑀲 𑀘𑁄𑀤𑀦𑀸 𑀣𑁂𑀭𑀲𑁆𑀲 𑀘 𑀲𑁄 𑀅𑀯𑀺𑀲𑀬𑁄, 𑀢𑀲𑁆𑀫𑀸 ‘‘𑀧𑀘𑁆𑀘𑀓𑁆𑀔𑀢𑁄 𑀜𑀸𑀡𑁂𑀦 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸 𑀯𑀺𑀬𑀸’’𑀢𑀺 𑀯𑀼𑀢𑁆𑀢𑀁. 𑀲𑀻𑀳𑀦𑀸𑀤𑁄 𑀯𑀺𑀬𑀸𑀢𑀺 𑀲𑀻𑀳𑀦𑀸𑀤𑁄. 𑀢𑀁𑀲𑀤𑀺𑀲𑀢𑀸 𑀘𑀲𑁆𑀲 𑀲𑁂𑀝𑁆𑀞𑀪𑀸𑀯𑁂𑀦, 𑀲𑁄 𑀘𑁂𑀢𑁆𑀣 𑀏𑀯𑀁 𑀯𑁂𑀤𑀺𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀻𑀳𑀦𑀸𑀤𑁄’’𑀢𑀺𑀆𑀤𑀺𑀫𑀸𑀳. 𑀉𑀦𑁆𑀦𑀸𑀤𑀬𑀦𑁆𑀢𑁂𑀦𑀸𑀢𑀺 𑀅𑀲𑀦𑀺𑀲𑀤𑀺𑀲𑀁 𑀓𑀭𑁄𑀦𑁆𑀢𑁂𑀦.

𑀅𑀦𑀼𑀬𑁄𑀕𑀤𑀸𑀧𑀦𑀢𑁆𑀣𑀦𑁆𑀢𑀺 𑀅𑀦𑀼𑀬𑁄𑀕𑀁 𑀲𑁄𑀥𑀸𑀧𑁂𑀢𑀼𑀁. 𑀯𑀺𑀫𑀤𑁆𑀤𑀓𑁆𑀔𑀫𑀜𑁆𑀳𑀺 𑀲𑀻𑀳𑀦𑀸𑀤𑀁 𑀦𑀤𑀦𑁆𑀢𑁄 𑀅𑀢𑁆𑀣𑀢𑁄 𑀅𑀦𑀼𑀬𑁄𑀕𑀁 𑀲𑁄𑀥𑁂𑀢𑀺 𑀦𑀸𑀫, 𑀅𑀦𑀼𑀬𑀼𑀚𑁆𑀛𑀦𑁆𑀢𑁄 𑀘 𑀦𑀁 𑀲𑁄𑀥𑀸𑀧𑁂𑀢𑀺 𑀦𑀸𑀫. 𑀤𑀸𑀢𑀼𑀦𑁆𑀢𑀺 𑀲𑁄𑀥𑁂𑀢𑀼𑀁. 𑀓𑁂𑀘𑀺 ‘‘𑀤𑀸𑀦𑀢𑁆𑀣’’𑀦𑁆𑀢𑀺 𑀅𑀢𑁆𑀣𑀁 𑀯𑀤𑀦𑁆𑀢𑀺, 𑀢𑀁 𑀦 𑀬𑀼𑀢𑁆𑀢𑀁. 𑀦 𑀳𑀺 𑀬𑁄 𑀲𑀻𑀳𑀤𑀸𑀦𑀁 𑀦𑀤𑀢𑀺, 𑀲𑁄 𑀏𑀯 𑀢𑀢𑁆𑀣 𑀅𑀦𑀼𑀬𑁄𑀕𑀁 𑀤𑁂𑀢𑀻𑀢𑀺 𑀬𑀼𑀚𑁆𑀚𑀢𑀺. 𑀦𑀺𑀖𑀁𑀲𑀦𑀦𑁆𑀢𑀺 𑀯𑀺𑀫𑀤𑁆𑀤𑀦𑀁. 𑀥𑀫𑀫𑀸𑀦𑀦𑁆𑀢𑀺 𑀢𑀸𑀧𑀬𑀫𑀸𑀦𑀁. 𑀢𑀸𑀧𑀦𑀜𑁆𑀘𑁂𑀢𑁆𑀣 𑀕𑀕𑁆𑀕𑀭𑀺𑀬𑀸 𑀥𑀫𑁆𑀫𑀸𑀧𑀦𑀲𑀻𑀲𑁂𑀦 𑀯𑀤𑀢𑀺.

𑀲𑀩𑁆𑀩𑁂 𑀢𑁂𑀢𑀺 𑀲𑀩𑁆𑀩𑁂 𑀢𑁂 𑀅𑀢𑀻𑀢𑁂 𑀦𑀺𑀭𑀼𑀤𑁆𑀥𑁂 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂. 𑀢𑁂𑀦𑁂𑀢𑀁 𑀤𑀲𑁆𑀲𑁂𑀢𑀺 𑁋 𑀬𑁂 𑀢𑁂 𑀅𑀳𑁂𑀲𑀼𑀁 𑀅𑀢𑀻𑀢𑀫𑀤𑁆𑀥𑀸𑀦𑀁 𑀢𑀯 𑀅𑀪𑀺𑀦𑀻𑀳𑀸𑀭𑀢𑁄 𑀑𑀭𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸, 𑀢𑁂𑀲𑀁 𑀢𑀸𑀯 𑀲𑀸𑀯𑀓𑀜𑀸𑀡𑀕𑁄𑀘𑀭𑁂 𑀥𑀫𑁆𑀫𑁂 𑀧𑀭𑀺𑀘𑁆𑀙𑀺𑀦𑁆𑀤𑀦𑁆𑀢𑁄 𑀫𑀸𑀭𑀸𑀤𑀬𑁄 𑀯𑀺𑀬 𑀘 𑀩𑀼𑀤𑁆𑀥𑀸𑀦𑀁 𑀮𑁄𑀓𑀺𑀬𑀘𑀺𑀢𑁆𑀢𑀸𑀘𑀸𑀭𑀁 𑀢𑁆𑀯𑀁 𑀚𑀸𑀦𑁂𑀬𑁆𑀬𑀸𑀲𑀺. 𑀬𑁂 𑀧𑀦 𑀢𑁂 𑀅𑀩𑁆𑀪𑀢𑀻𑀢𑀸, 𑀢𑀢𑁄 𑀧𑀭𑀢𑁄 𑀙𑀺𑀦𑁆𑀦𑀯𑀝𑀼𑀫𑀸 𑀙𑀺𑀦𑁆𑀦𑀧𑀧𑀜𑁆𑀘𑀸 𑀧𑀭𑀺𑀬𑀸𑀤𑀺𑀦𑁆𑀦𑀯𑀝𑁆𑀝𑀸 𑀲𑀩𑁆𑀩𑀤𑀼𑀓𑁆𑀔𑀯𑀻𑀢𑀺𑀯𑀢𑁆𑀢𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸, 𑀢𑁂𑀲𑀁 𑀲𑀩𑁆𑀩𑁂𑀲𑀫𑁆𑀧𑀺 𑀢𑀯 𑀲𑀸𑀯𑀓𑀜𑀸𑀡𑀲𑁆𑀲 𑀅𑀯𑀺𑀲𑀬𑀪𑀽𑀢𑁂 𑀥𑀫𑁆𑀫𑁂 𑀓𑀣𑀁 𑀚𑀸𑀦𑀺𑀲𑁆𑀲𑀲𑀻𑀢𑀺. 𑀢𑁂𑀦𑀸𑀢𑀺 𑀲𑀫𑁆𑀩𑁄𑀥𑀺𑀲𑀗𑁆𑀔𑀸𑀢𑁂𑀦 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀧𑀤𑀝𑁆𑀞𑀸𑀦𑁂𑀦 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑁂𑀦. 𑀏𑀯𑀁𑀲𑀻𑀮𑀸𑀢𑀺 𑀢𑀸𑀤𑀺𑀲𑀲𑀻𑀮𑀸. 𑀲𑀫𑀸𑀥𑀺𑀧𑀓𑁆𑀔𑀸𑀢𑀺 𑀲𑀫𑀸𑀥𑀺 𑀘 𑀲𑀫𑀸𑀥𑀺𑀧𑀓𑁆𑀔𑀸 𑀘 𑀲𑀫𑀸𑀥𑀺𑀧𑀓𑁆𑀔𑀸 𑀏𑀓𑀤𑁂𑀲𑀲𑀭𑀽𑀧𑁂𑀓𑀲𑁂𑀲𑀦𑀬𑁂𑀦. 𑀢𑀢𑁆𑀣 𑀲𑀫𑀸𑀥𑀺𑀧𑀓𑁆𑀔𑀸𑀢𑀺 𑀯𑀻𑀭𑀺𑀬𑀲𑀢𑀺𑀬𑁄 𑀢𑀤𑀦𑀼𑀕𑀼𑀡𑀸 𑀘 𑀥𑀫𑁆𑀫𑀸 𑀯𑁂𑀤𑀺𑀢𑀩𑁆𑀩𑀸. 𑀛𑀸𑀦𑀲𑀫𑀸𑀧𑀢𑁆𑀢𑀻𑀲𑀼 𑀬𑁂𑀪𑀼𑀬𑁆𑀬𑁂𑀦 𑀯𑀺𑀳𑀸𑀭𑀯𑁄𑀳𑀸𑀭𑁄, 𑀛𑀸𑀦𑀲𑀫𑀸𑀧𑀢𑁆𑀢𑀺𑀬𑁄 𑀲𑀫𑀸𑀥𑀺𑀧𑁆𑀧𑀥𑀸𑀦𑀸𑀢𑀺 𑀯𑀼𑀢𑁆𑀢𑀁 ‘‘𑀲𑀫𑀸𑀥𑀺𑀧𑀓𑁆𑀔𑀸𑀦𑀁 𑀥𑀫𑁆𑀫𑀸𑀦𑀁 𑀕𑀳𑀺𑀢𑀢𑁆𑀢𑀸 𑀯𑀺𑀳𑀸𑀭𑁄 𑀕𑀳𑀺𑀢𑁄’’𑀢𑀺.

𑀬𑀣𑀸 𑀧𑀦 𑀳𑁂𑀝𑁆𑀞𑀸 𑀕𑀳𑀺𑀢𑀸𑀧𑀺 𑀲𑀫𑀸𑀥𑀺𑀧𑀜𑁆𑀜𑀸 𑀧𑀝𑀺𑀧𑀓𑁆𑀔𑀢𑁄 𑀯𑀺𑀫𑀼𑀢𑁆𑀢𑀢𑁆𑀢𑀸 𑀯𑀺𑀫𑀼𑀘𑁆𑀘𑀦-𑀲𑀗𑁆𑀔𑀸𑀢-𑀓𑀺𑀘𑁆𑀘𑀯𑀺𑀲𑁂𑀲-𑀤𑀲𑁆𑀲𑀦𑀯𑀲𑁂𑀦 𑀯𑀺𑀫𑀼𑀢𑁆𑀢𑀺𑀧𑀭𑀺𑀬𑀸𑀬𑁂𑀦 𑀧𑀼𑀦 𑀕𑀳𑀺𑀢𑀸 ‘‘𑀏𑀯𑀁𑀯𑀺𑀫𑀼𑀢𑁆𑀢𑀸’’𑀢𑀺, 𑀏𑀯𑀁 𑀤𑀺𑀩𑁆𑀩𑀯𑀺𑀳𑀸𑀭𑁄 𑀤𑀺𑀩𑁆𑀩𑀯𑀺𑀳𑀸𑀭𑀯𑀺𑀲𑁂𑀲𑀤𑀲𑁆𑀲𑀦𑀯𑀲𑁂𑀦 𑀧𑀼𑀦 𑀕𑀳𑀺𑀢𑁄 ‘‘𑀏𑀯𑀁𑀯𑀺𑀳𑀸𑀭𑀻’’𑀢𑀺, 𑀢𑀲𑁆𑀫𑀸 𑀲𑀩𑁆𑀩𑁂𑀲𑀁 𑀲𑀫𑀸𑀧𑀢𑁆𑀢𑀺𑀯𑀺𑀳𑀸𑀭𑀸𑀦𑀁 𑀯𑀲𑁂𑀦𑁂𑀢𑁆𑀣 𑀅𑀢𑁆𑀣𑁄 𑀬𑀼𑀚𑁆𑀚𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀯𑀺𑀫𑀼𑀢𑁆𑀢𑀻𑀢𑀺 𑀲𑀗𑁆𑀔𑀁 𑀕𑀘𑁆𑀙𑀦𑁆𑀢𑀺 𑀯𑀺𑀫𑀼𑀘𑁆𑀘𑀺𑀢𑁆𑀣𑀸𑀢𑀺 𑀓𑀢𑁆𑀯𑀸. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀦𑁆𑀢𑁂𑀢𑀺 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑁄𑀲𑀸𑀧𑀦𑁂𑀦. 𑀲𑀩𑁆𑀩𑀓𑀺𑀮𑁂𑀲𑁂𑀳𑀺 𑀦𑀺𑀲𑁆𑀲𑀝𑀢𑁆𑀢𑀸 𑀅𑀲𑀁𑀲𑀝𑁆𑀞𑀢𑁆𑀢𑀸 𑀯𑀺𑀫𑀼𑀢𑁆𑀢𑀢𑁆𑀢𑀸 𑀘 𑀦𑀺𑀲𑁆𑀲𑀭𑀡𑀯𑀺𑀫𑀼𑀢𑁆𑀢𑀺 𑀦𑀺𑀩𑁆𑀩𑀸𑀦𑀁.

𑀅𑀦𑀸𑀕𑀢𑀩𑀼𑀤𑁆𑀥𑀸𑀦𑀁 𑀧𑀦𑀸𑀢𑀺 𑀧𑀦-𑀲𑀤𑁆𑀤𑁄 𑀯𑀺𑀲𑁂𑀲𑀢𑁆𑀣𑀚𑁄𑀢𑀦𑁄. 𑀢𑁂𑀦 𑀅𑀢𑀻𑀢𑁂𑀲𑀼 𑀢𑀸𑀯 𑀔𑀦𑁆𑀥𑀸𑀦𑀁 𑀪𑀽𑀢𑀧𑀼𑀩𑁆𑀩𑀢𑁆𑀢𑀸 𑀢𑀢𑁆𑀣 𑀲𑀺𑀬𑀸 𑀜𑀸𑀡𑀲𑁆𑀲 𑀲𑀯𑀺𑀲𑀬𑁂 𑀕𑀢𑀺, 𑀅𑀦𑀸𑀕𑀢𑁂𑀲𑀼 𑀧𑀦 𑀲𑀩𑁆𑀩𑀲𑁄 𑀅𑀲𑀜𑁆𑀚𑀸𑀢𑁂𑀲𑀼 𑀓𑀣𑀦𑁆𑀢𑀺 𑀇𑀫𑀫𑀢𑁆𑀣𑀁 𑀚𑁄𑀢𑁂𑀢𑀺. 𑀢𑁂𑀦𑀸𑀳 ‘‘𑀅𑀦𑀸𑀕𑀢𑀸𑀧𑀻’’𑀢𑀺𑀆𑀤𑀺. ‘‘𑀅𑀢𑁆𑀢𑀦𑁄 𑀘𑁂𑀢𑀲𑀸 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀯𑀺𑀤𑀺𑀢𑀸’’𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁? 𑀦𑀦𑀼 𑀅𑀢𑀻𑀢𑀸𑀦𑀸𑀕𑀢𑁂 𑀲𑀢𑁆𑀢𑀸𑀳𑁂 𑀏𑀯 𑀧𑀯𑀢𑁆𑀢𑀁 𑀘𑀺𑀢𑁆𑀢𑀁 𑀘𑁂𑀢𑁄𑀧𑀭𑀺𑀬𑀜𑀸𑀡𑀲𑁆𑀲 𑀯𑀺𑀲𑀬𑁄, 𑀦 𑀢𑀢𑁄 𑀧𑀭𑀦𑁆𑀢𑀺? 𑀦𑀬𑀺𑀤𑀁 𑀘𑁂𑀢𑁄𑀧𑀭𑀺𑀬𑀜𑀸𑀡𑀓𑀺𑀘𑁆𑀘𑀯𑀲𑁂𑀦 𑀯𑀼𑀢𑁆𑀢𑀁, 𑀅𑀣 𑀔𑁄 𑀧𑀼𑀩𑁆𑀩𑁂𑀦𑀺𑀯𑀸𑀲𑀅𑀦𑀸𑀕𑀢𑀁𑀲𑀜𑀸𑀡𑀸𑀦𑀁 𑀯𑀲𑁂𑀦 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀦𑀸𑀬𑀁 𑀤𑁄𑀲𑁄. 𑀯𑀺𑀤𑀺𑀢𑀝𑁆𑀞𑀸𑀦𑁂 𑀦 𑀓𑀭𑁄𑀢𑀺 𑀲𑀺𑀓𑁆𑀔𑀸𑀧𑀤𑁂𑀦𑁂𑀯 𑀢𑀸𑀤𑀺𑀲𑀲𑁆𑀲 𑀧𑀝𑀺𑀓𑁆𑀔𑁂𑀧𑀲𑁆𑀲 𑀧𑀝𑀺𑀓𑁆𑀔𑀺𑀢𑁆𑀢𑀢𑁆𑀢𑀸 𑀲𑁂𑀢𑀼𑀖𑀸𑀢𑀢𑁄 𑀘. 𑀓𑀣𑀁 𑀧𑀦 𑀣𑁂𑀭𑁄 𑀤𑁆𑀯𑀬𑀲𑀫𑁆𑀪𑀯𑁂 𑀧𑀝𑀺𑀓𑁆𑀔𑁂𑀧𑀫𑁂𑀯 𑀅𑀓𑀸𑀲𑀺, 𑀦 𑀯𑀺𑀪𑀚𑁆𑀚 𑀩𑁆𑀬𑀸𑀓𑀸𑀲𑀻𑀢𑀺 𑀆𑀳 ‘‘𑀣𑁂𑀭𑁄 𑀓𑀺𑀭𑀸’’𑀢𑀺𑀆𑀤𑀺. 𑀧𑀸𑀭𑀁 𑀧𑀭𑀺𑀬𑀦𑁆𑀢𑀁 𑀫𑀺𑀦𑁄𑀢𑀻𑀢𑀺 𑀧𑀸𑀭𑀫𑀻, 𑀲𑀸 𑀏𑀯 𑀜𑀸𑀡𑀦𑁆𑀢𑀺 𑀧𑀸𑀭𑀫𑀺𑀜𑀸𑀡𑀁, 𑀲𑀸𑀯𑀓𑀸𑀦𑀁 𑀧𑀸𑀭𑀫𑀺𑀜𑀸𑀡𑀁 𑀲𑀸𑀯𑀓𑀧𑀸𑀭𑀫𑀺𑀜𑀸𑀡𑀁. 𑀢𑀲𑁆𑀫𑀺𑀁 𑀲𑀸𑀯𑀓𑀸𑀦𑀁 𑀉𑀓𑁆𑀓𑀁𑀲𑀧𑀭𑀺𑀬𑀦𑁆𑀢𑀕𑀢𑁂 𑀚𑀸𑀦𑀦𑁂 𑀦𑀸𑀬𑀫𑀦𑀼𑀬𑁄𑀕𑁄, 𑀅𑀣 𑀔𑁄 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂 𑀲𑀩𑁆𑀩𑀜𑁆𑀜𑀼𑀢𑀸𑀬 𑀚𑀸𑀦𑀦𑁂. 𑀓𑁂𑀘𑀺 𑀧𑀦 ‘‘𑀲𑀸𑀯𑀓𑀧𑀸𑀭𑀫𑀺𑀜𑀸𑀡𑁂𑀢𑀺 𑀲𑀸𑀯𑀓𑀧𑀸𑀭𑀫𑀺𑀜𑀸𑀡𑀯𑀺𑀲𑀬𑁂’’𑀢𑀺 𑀅𑀢𑁆𑀣𑀁 𑀯𑀤𑀦𑁆𑀢𑀺, 𑀢𑀣𑀸 𑀲𑁂𑀲𑀧𑀤𑁂𑀲𑀼𑀧𑀺. 𑀲𑀻𑀮…𑀧𑁂… 𑀲𑀫𑀢𑁆𑀣𑀦𑁆𑀢𑀺 𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀜𑀸𑀡𑀲𑀗𑁆𑀔𑀸𑀢𑀸𑀦𑀁 𑀓𑀸𑀭𑀡𑀸𑀦𑀁 𑀚𑀸𑀦𑀦𑀲𑀫𑀢𑁆𑀣𑀁. 𑀩𑀼𑀤𑁆𑀥𑀲𑀻𑀮𑀸𑀤𑀬𑁄 𑀳𑀺 𑀩𑀼𑀤𑁆𑀥𑀸𑀦𑀁 𑀩𑀼𑀤𑁆𑀥𑀓𑀺𑀘𑁆𑀘𑀲𑁆𑀲 𑀧𑀭𑁂𑀳𑀺 𑀏𑀢𑁂 𑀩𑀼𑀤𑁆𑀥𑀸𑀢𑀺 𑀚𑀸𑀦𑀦𑀲𑁆𑀲 𑀘 𑀓𑀸𑀭𑀡𑀁.

𑀅𑀦𑀼𑀫𑀸𑀦𑀜𑀸𑀡𑀁 𑀯𑀺𑀬 𑀲𑀁𑀲𑀬𑀝𑁆𑀞𑀺𑀢𑀁 𑀅𑀳𑀼𑀢𑁆𑀯𑀸 𑀇𑀤𑀫𑀺𑀤𑀦𑁆𑀢𑀺 𑀬𑀣𑀸𑀲𑀪𑀸𑀯𑀢𑁄 𑀜𑁂𑀬𑁆𑀬𑀁 𑀥𑀸𑀭𑁂𑀢𑀺 𑀦𑀺𑀘𑁆𑀙𑀺𑀦𑁄𑀢𑀻𑀢𑀺 𑀥𑀫𑁆𑀫𑁄, 𑀧𑀘𑁆𑀘𑀓𑁆𑀔𑀜𑀸𑀡𑀦𑁆𑀢𑀺 𑀆𑀳 ‘‘𑀥𑀫𑁆𑀫𑀲𑁆𑀲 𑀧𑀘𑁆𑀘𑀓𑁆𑀔𑀢𑁄 𑀜𑀸𑀡𑀲𑁆𑀲𑀸’’𑀢𑀺. 𑀅𑀦𑀼𑀏𑀢𑀻𑀢𑀺 𑀅𑀦𑁆𑀯𑀬𑁄𑀢𑀺 𑀆𑀳 ‘‘𑀅𑀦𑀼𑀬𑁄𑀕𑀁 𑀅𑀦𑀼𑀕𑀦𑁆𑀢𑁆𑀯𑀸’’𑀢𑀺. 𑀧𑀘𑁆𑀘𑀓𑁆𑀔𑀲𑀺𑀤𑁆𑀥𑀜𑁆𑀳𑀺 𑀅𑀢𑁆𑀣𑀁 𑀅𑀦𑀼𑀕𑀦𑁆𑀢𑁆𑀯𑀸 𑀅𑀦𑀼𑀫𑀸𑀦𑀜𑀸𑀡𑀲𑁆𑀲 𑀧𑀯𑀢𑁆𑀢𑀺 ‘‘𑀤𑀺𑀝𑁆𑀞𑁂𑀦 𑀅𑀤𑀺𑀝𑁆𑀞𑀲𑁆𑀲 𑀅𑀦𑀼𑀫𑀸𑀦’’𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀯𑀺𑀤𑀺𑀢𑁂 𑀯𑁂𑀤𑀓𑀫𑁆𑀧𑀺 𑀜𑀸𑀡𑀁 𑀅𑀢𑁆𑀣𑀢𑁄 𑀯𑀺𑀤𑀺𑀢𑀫𑁂𑀯 𑀳𑁄𑀢𑀻𑀢𑀺 ‘‘𑀅𑀦𑀼𑀫𑀸𑀦𑀜𑀸𑀡𑀁 𑀦𑀬𑀕𑁆𑀕𑀸𑀳𑁄 𑀯𑀺𑀤𑀺𑀢𑁄’’𑀢𑀺 𑀯𑀼𑀢𑁆𑀢𑀁. 𑀯𑀺𑀤𑀺𑀢𑁄𑀢𑀺 𑀯𑀺𑀤𑁆𑀥𑁄 𑀧𑀝𑀺𑀮𑀤𑁆𑀥𑁄, 𑀅𑀥𑀺𑀕𑀢𑁄𑀢𑀺 𑀅𑀢𑁆𑀣𑁄. 𑀅𑀧𑁆𑀧𑀫𑀸𑀡𑁄𑀢𑀺 𑀅𑀧𑀭𑀺𑀫𑀸𑀡𑁄 𑀫𑀳𑀸𑀯𑀺𑀲𑀬𑀢𑁆𑀢𑀸. 𑀢𑁂𑀦𑀸𑀳 ‘‘𑀅𑀧𑀭𑀺𑀬𑀦𑁆𑀢𑁄’’𑀢𑀺. 𑀢𑁂𑀦𑀸𑀢𑀺 𑀅𑀧𑀭𑀺𑀬𑀦𑁆𑀢𑀢𑁆𑀢𑀸. 𑀢𑁂𑀦 𑀯𑀸 𑀅𑀧𑀭𑀺𑀬𑀦𑁆𑀢𑁂𑀦 𑀜𑀸𑀡𑁂𑀦. 𑀏𑀢𑁂𑀦 𑀣𑁂𑀭𑁄 𑀬𑀁 𑀬𑀁 𑀅𑀦𑀼𑀫𑁂𑀬𑁆𑀬𑀫𑀢𑁆𑀣𑀁 𑀜𑀸𑀢𑀼𑀓𑀸𑀫𑁄 𑀳𑁄𑀢𑀺, 𑀢𑀢𑁆𑀣 𑀢𑀢𑁆𑀣 𑀢𑀲𑁆𑀲 𑀅𑀲𑀗𑁆𑀕𑀫𑀧𑁆𑀧𑀝𑀺𑀳𑀢𑀁 𑀅𑀦𑀼𑀫𑀸𑀦𑀜𑀸𑀡𑀁 𑀧𑀯𑀢𑁆𑀢𑁂𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀢𑁂𑀦𑀸𑀳 ‘‘𑀲𑁄 𑀇𑀫𑀺𑀦𑀸’’𑀢𑀺𑀆𑀤𑀺. 𑀢𑀢𑁆𑀣 𑀇𑀫𑀺𑀦𑀸𑀢𑀺 𑀇𑀫𑀺𑀦𑀸 𑀓𑀸𑀭𑀡𑁂𑀦.

𑀧𑀸𑀓𑀸𑀭𑀲𑁆𑀲 𑀣𑀺𑀭𑀪𑀸𑀯𑀁 𑀉𑀤𑁆𑀥𑀫𑀼𑀤𑁆𑀥𑀁 𑀆𑀧𑁂𑀢𑀻𑀢𑀺 𑀉𑀤𑁆𑀥𑀸𑀧𑀁, 𑀧𑀸𑀓𑀸𑀭𑀫𑀽𑀮𑀁. 𑀆𑀤𑀺-𑀲𑀤𑁆𑀤𑁂𑀦 𑀧𑀸𑀓𑀸𑀭𑀤𑁆𑀯𑀸𑀭𑀩𑀦𑁆𑀥𑀧𑀭𑀺𑀔𑀸𑀤𑀻𑀦𑀁 𑀲𑀗𑁆𑀕𑀳𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀘𑁆𑀘𑀦𑁆𑀢𑁂 𑀪𑀯𑀁 𑀧𑀘𑁆𑀘𑀦𑁆𑀢𑀺𑀫𑀁. 𑀧𑀡𑁆𑀟𑀺𑀢𑀤𑁄𑀯𑀸𑀭𑀺𑀓𑀝𑁆𑀞𑀸𑀦𑀺𑀬𑀁 𑀓𑀢𑁆𑀯𑀸 𑀣𑁂𑀭𑁄 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀏𑀓𑀤𑁆𑀯𑀸𑀭𑀦𑁆𑀢𑀺 𑀓𑀲𑁆𑀫𑀸 𑀆𑀳𑀸’’𑀢𑀺 𑀘𑁄𑀤𑀦𑀁 𑀲𑀫𑀼𑀝𑁆𑀞𑀸𑀧𑁂𑀲𑀺.

𑀬𑀲𑁆𑀲𑀸 𑀧𑀜𑁆𑀜𑀸𑀬 𑀯𑀲𑁂𑀦 𑀧𑀼𑀭𑀺𑀲𑁄 𑀧𑀡𑁆𑀟𑀺𑀢𑁄𑀢𑀺 𑀯𑀼𑀘𑁆𑀘𑀢𑀺, 𑀢𑀁 𑀧𑀡𑁆𑀟𑀺𑀘𑁆𑀘𑀦𑁆𑀢𑀺 𑀆𑀳 𑁋 ‘‘𑀧𑀡𑁆𑀟𑀺𑀘𑁆𑀘𑁂𑀦 𑀲𑀫𑀦𑁆𑀦𑀸𑀕𑀢𑁄’’𑀢𑀺. 𑀢𑀁𑀢𑀁𑀇𑀢𑀺𑀓𑀢𑁆𑀢𑀩𑁆𑀩𑀢𑀸𑀲𑀼 𑀙𑁂𑀓𑀪𑀸𑀯𑁄 𑀩𑁆𑀬𑀢𑁆𑀢𑀪𑀸𑀯𑁄 𑀯𑁂𑀬𑁆𑀬𑀢𑁆𑀢𑀺𑀬𑀁. 𑀫𑁂𑀥𑀢𑀺 𑀅𑀜𑁆𑀜𑀸𑀡𑀁 𑀳𑀺𑀁𑀲𑀢𑀺 𑀯𑀺𑀥𑀫𑀢𑀻𑀢𑀺 𑀫𑁂𑀥𑀸, 𑀲𑀸 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀫𑁂𑀥𑀸𑀯𑀻. 𑀞𑀸𑀦𑁂 𑀞𑀸𑀦𑁂 𑀉𑀧𑁆𑀧𑀢𑁆𑀢𑀺 𑀏𑀢𑀺𑀲𑁆𑀲𑀸 𑀅𑀢𑁆𑀣𑀻𑀢𑀺 𑀞𑀸𑀦𑀼𑀧𑁆𑀧𑀢𑁆𑀢𑀺𑀓𑀸, 𑀞𑀸𑀦𑀲𑁄 𑀉𑀧𑁆𑀧𑀚𑁆𑀚𑀦𑀧𑀜𑁆𑀜𑀸. 𑀅𑀦𑀼𑀧𑀭𑀺𑀬𑀸𑀬𑀦𑁆𑀢𑀺 𑀏𑀢𑁂𑀦𑀸𑀢𑀺 𑀅𑀦𑀼𑀧𑀭𑀺𑀬𑀸𑀬𑁄, 𑀲𑁄 𑀏𑀯 𑀧𑀣𑁄𑀢𑀺 𑀅𑀦𑀼𑀧𑀭𑀺𑀬𑀸𑀬𑀧𑀣𑁄, 𑀧𑀭𑀺𑀢𑁄 𑀧𑀸𑀓𑀸𑀭𑀲𑁆𑀲 𑀅𑀦𑀼𑀬𑀸𑀬𑀦𑀫𑀕𑁆𑀕𑁄. 𑀧𑀸𑀓𑀸𑀭𑀪𑀸𑀕𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀸 𑀏𑀢𑁆𑀣𑀸𑀢𑀺 𑀧𑀸𑀓𑀸𑀭𑀲𑀦𑁆𑀥𑀺, 𑀧𑀸𑀓𑀸𑀭𑀲𑁆𑀲 𑀨𑀼𑀮𑁆𑀮𑀺𑀢𑀧𑀤𑁂𑀲𑁄. 𑀲𑁄 𑀧𑀦 𑀳𑁂𑀝𑁆𑀞𑀺𑀫𑀦𑁆𑀢𑁂𑀦 𑀤𑁆𑀯𑀺𑀦𑁆𑀦𑀫𑁆𑀧𑀺 𑀇𑀝𑁆𑀞𑀓𑀸𑀦𑀁 𑀯𑀺𑀕𑀫𑁂𑀦 𑀏𑀯𑀁 𑀯𑀼𑀘𑁆𑀘𑀢𑀻𑀢𑀺 𑀆𑀳 𑁋 ‘‘𑀤𑁆𑀯𑀺𑀦𑁆𑀦𑀁 𑀇𑀝𑁆𑀞𑀓𑀸𑀦𑀁 𑀅𑀧𑀕𑀢𑀝𑁆𑀞𑀸𑀦’’𑀦𑁆𑀢𑀺. 𑀙𑀺𑀦𑁆𑀦𑀝𑁆𑀞𑀸𑀦𑀦𑁆𑀢𑀺 𑀙𑀺𑀦𑁆𑀦𑀪𑀺𑀦𑁆𑀦𑀧𑀤𑁂𑀲𑀁, 𑀙𑀺𑀦𑁆𑀦𑀝𑁆𑀞𑀸𑀦𑀁 𑀯𑀸. 𑀢𑀜𑁆𑀳𑀺 ‘‘𑀯𑀺𑀯𑀭’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀓𑀻𑀮𑀺𑀝𑁆𑀞𑀦𑁆𑀢𑀺 𑀫𑀮𑀻𑀦𑀁. 𑀉𑀧𑀢𑀸𑀧𑁂𑀦𑁆𑀢𑀻𑀢𑀺 𑀓𑀺𑀮𑁂𑀲𑀧𑀭𑀺𑀴𑀸𑀳𑁂𑀦 𑀲𑀦𑁆𑀢𑀸𑀧𑁂𑀦𑁆𑀢𑀺. 𑀯𑀺𑀩𑀸𑀥𑁂𑀦𑁆𑀢𑀻𑀢𑀺 𑀧𑀻𑀴𑁂𑀦𑁆𑀢𑀺. 𑀉𑀧𑁆𑀧𑀦𑁆𑀦𑀸𑀬 𑀧𑀜𑁆𑀜𑀸𑀬 𑀦𑀻𑀯𑀭𑀡𑁂𑀳𑀺 𑀦 𑀓𑀺𑀜𑁆𑀘𑀺 𑀓𑀸𑀢𑀼𑀁 𑀲𑀓𑁆𑀓𑀸𑀢𑀺 𑀆𑀳 ‘‘𑀅𑀦𑀼𑀧𑁆𑀧𑀦𑁆𑀦𑀸𑀬 𑀧𑀜𑁆𑀜𑀸𑀬 𑀉𑀧𑁆𑀧𑀚𑁆𑀚𑀺𑀢𑀼𑀁 𑀦 𑀤𑁂𑀦𑁆𑀢𑀻’’𑀢𑀺. 𑀢𑀲𑁆𑀫𑀸𑀢𑀺 𑀧𑀘𑁆𑀘𑀬𑀽𑀧𑀖𑀸𑀢𑁂𑀦 𑀉𑀧𑁆𑀧𑀚𑁆𑀚𑀺𑀢𑀼𑀁 𑀅𑀧𑁆𑀧𑀤𑀸𑀦𑀢𑁄. 𑀘𑀢𑀽𑀲𑀼 𑀲𑀢𑀺𑀧𑀝𑁆𑀞𑀸𑀦𑁂𑀲𑀼 𑀲𑀼𑀝𑁆𑀞𑀼 𑀞𑀧𑀺𑀢𑀘𑀺𑀢𑁆𑀢𑀸𑀢𑀺 𑀘𑀢𑀼𑀩𑁆𑀩𑀺𑀥𑀸𑀬𑀧𑀺 𑀲𑀢𑀺𑀧𑀝𑁆𑀞𑀸𑀦𑀪𑀸𑀯𑀦𑀸𑀬 𑀲𑀫𑁆𑀫𑀤𑁂𑀯 𑀞𑀧𑀺𑀢𑀘𑀺𑀢𑁆𑀢𑀸 𑀅𑀧𑁆𑀧𑀺𑀢𑀘𑀺𑀢𑁆𑀢𑀸. 𑀬𑀣𑀸𑀲𑀪𑀸𑀯𑁂𑀦 𑀪𑀸𑀯𑁂𑀢𑁆𑀯𑀸𑀢𑀺 𑀬𑀸𑀣𑀸𑀯𑀢𑁄 𑀲𑀫𑁆𑀫𑀤𑁂𑀯 𑀬𑀣𑀸 𑀧𑀝𑀺𑀧𑀓𑁆𑀔𑀸 𑀲𑀫𑀼𑀘𑁆𑀙𑀺𑀚𑁆𑀚𑀦𑁆𑀢𑀺, 𑀏𑀯𑀁 𑀪𑀸𑀯𑁂𑀢𑁆𑀯𑀸.

𑀧𑀼𑀭𑀺𑀫𑀦𑀬𑁂 𑀲𑀢𑀺𑀧𑀝𑁆𑀞𑀸𑀦𑀸𑀦𑀺 𑀩𑁄𑀚𑁆𑀛𑀗𑁆𑀕𑀸 𑀘 𑀫𑀺𑀲𑁆𑀲𑀓𑀸 𑀅𑀥𑀺𑀧𑁆𑀧𑁂𑀢𑀸𑀢𑀺 𑀢𑀢𑁄 𑀅𑀜𑁆𑀜𑀣𑀸 𑀯𑀢𑁆𑀢𑀼𑀁 ‘‘𑀅𑀧𑀺𑀘𑁂𑀢𑁆𑀣𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀫𑀺𑀲𑁆𑀲𑀓𑀸𑀢𑀺 𑀲𑀫𑀣𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀯𑀲𑁂𑀦 𑀫𑀺𑀲𑁆𑀲𑀓𑀸. ‘‘𑀘𑀢𑀽𑀲𑀼 𑀲𑀢𑀺𑀧𑀝𑁆𑀞𑀸𑀦𑁂𑀲𑀼 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀘𑀺𑀢𑁆𑀢𑀸𑀢𑀺 𑀧𑀞𑀫𑀁 𑀯𑀼𑀢𑁆𑀢𑀢𑁆𑀢𑀸 𑀲𑀢𑀺𑀧𑀝𑁆𑀞𑀸𑀦𑁂𑀲𑀼 𑀯𑀺𑀧𑀲𑁆𑀲𑀦𑀁 𑀕𑀳𑁂𑀢𑁆𑀯𑀸 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑁂 𑀬𑀣𑀸𑀪𑀽𑀢𑀁 𑀪𑀸𑀯𑁂𑀢𑁆𑀯𑀸𑀢𑀺 𑀯𑀼𑀢𑁆𑀢𑀢𑁆𑀢𑀸 𑀫𑀕𑁆𑀕𑀧𑀭𑀺𑀬𑀸𑀧𑀦𑁆𑀦𑀸𑀦𑀁𑀬𑁂𑀯 𑀘 𑀦𑁂𑀲𑀁 𑀦𑀺𑀧𑁆𑀧𑀭𑀺𑀬𑀸𑀬𑀩𑁄𑀚𑁆𑀛𑀗𑁆𑀕𑀪𑀸𑀯𑀢𑁄 𑀢𑁂𑀲𑀼 𑀘 𑀅𑀥𑀺𑀕𑀢𑀫𑁂𑀯 𑀳𑁄𑀢𑀻𑀢𑀺 𑀩𑁄𑀚𑁆𑀛𑀗𑁆𑀕𑁂 𑀫𑀕𑁆𑀕𑁄 𑀘 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀜𑁆𑀘𑀸𑀢𑀺 𑀕𑀳𑀺𑀢𑁂 𑀲𑀼𑀦𑁆𑀤𑀭𑁄 𑀧𑀜𑁆𑀳𑁄 𑀪𑀯𑁂𑀬𑁆𑀬𑀸’’𑀢𑀺 𑀫𑀳𑀸𑀲𑀺𑀯𑀢𑁆𑀣𑁂𑀭𑁄 𑀆𑀳. 𑀦 𑀧𑀦𑁂𑀯𑀁 𑀕𑀳𑀺𑀢𑀁 𑀧𑁄𑀭𑀸𑀡𑁂𑀳𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀇𑀢𑀻𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑀧𑀭𑀸𑀫𑀲𑀦𑀁. 𑀣𑁂𑀭𑁄𑀢𑀺 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄.

𑀢𑀢𑁆𑀣𑀸𑀢𑀺 𑀢𑁂𑀲𑀼 𑀧𑀘𑁆𑀘𑀦𑁆𑀢𑀦𑀕𑀭𑀸𑀤𑀻𑀲𑀼. 𑀦𑀕𑀭𑀁 𑀯𑀺𑀬 𑀦𑀺𑀩𑁆𑀩𑀸𑀦𑀁 𑀢𑀤𑀢𑁆𑀣𑀺𑀓𑁂𑀳𑀺 𑀉𑀧𑀕𑀦𑁆𑀢𑀩𑁆𑀩𑀢𑁄 𑀉𑀧𑀕𑀢𑀸𑀦𑀜𑁆𑀘 𑀧𑀭𑀺𑀲𑁆𑀲𑀬𑀭𑀳𑀺𑀢𑀲𑀼𑀔𑀸𑀥𑀺𑀕𑀫𑀝𑁆𑀞𑀸𑀦𑀢𑁄. 𑀧𑀸𑀓𑀸𑀭𑁄 𑀯𑀺𑀬 𑀲𑀻𑀮𑀁 𑀢𑀤𑀼𑀧𑀕𑀢𑀸𑀦𑀁 𑀧𑀭𑀺𑀢𑁄 𑀆𑀭𑀓𑁆𑀔𑀪𑀸𑀯𑀢𑁄. 𑀅𑀦𑀼𑀧𑀭𑀺𑀬𑀸𑀬𑀧𑀣𑁄 𑀯𑀺𑀬 𑀳𑀺𑀭𑀻 𑀲𑀻𑀮𑀧𑀸𑀓𑀸𑀭𑀲𑁆𑀲 𑀅𑀥𑀺𑀝𑁆𑀞𑀸𑀦𑀪𑀸𑀯𑀢𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀧𑀭𑀺𑀬𑀸𑀬𑀧𑀣𑁄𑀢𑀺 𑀔𑁄 𑀪𑀺𑀓𑁆𑀔𑀼 𑀳𑀺𑀭𑀺𑀬𑀸 𑀏𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺. 𑀤𑁆𑀯𑀸𑀭𑀁 𑀯𑀺𑀬 𑀅𑀭𑀺𑀬𑀫𑀕𑁆𑀕𑁄 𑀦𑀺𑀩𑁆𑀩𑀸𑀦𑀦𑀕𑀭𑀧𑁆𑀧𑀯𑁂𑀲𑀦𑁂 𑀅𑀜𑁆𑀚𑀲𑀪𑀸𑀯𑀢𑁄. 𑀧𑀡𑁆𑀟𑀺𑀢𑀤𑁄𑀯𑀸𑀭𑀺𑀓𑁄 𑀯𑀺𑀬 𑀥𑀫𑁆𑀫𑀲𑁂𑀦𑀸𑀧𑀢𑀺 𑀦𑀺𑀩𑁆𑀩𑀸𑀦𑀦𑀕𑀭𑀁 𑀧𑀯𑀺𑀝𑁆𑀞𑀧𑀯𑀺𑀲𑀦𑀓𑀸𑀦𑀁 𑀲𑀢𑁆𑀢𑀸𑀦𑀁 𑀲𑀮𑁆𑀮𑀓𑁆𑀔𑀡𑀢𑁄. 𑀤𑀺𑀦𑁆𑀦𑁄𑀢𑀺 𑀤𑀸𑀧𑀺𑀢𑁄, 𑀲𑁄𑀥𑀺𑀢𑁄𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑁩. 𑀘𑀼𑀦𑁆𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁭𑁯. 𑀧𑀼𑀩𑁆𑀩𑁂 𑀲𑀸𑀯𑀢𑁆𑀣𑀺𑀢𑁄 𑀯𑁂𑀴𑀼𑀯𑀕𑀸𑀫𑀲𑁆𑀲 𑀕𑀢𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀆𑀕𑀢𑀫𑀕𑁆𑀕𑁂𑀦𑁂𑀯 𑀧𑀝𑀺𑀦𑀺𑀯𑀢𑁆𑀢𑀦𑁆𑀢𑁄’’𑀢𑀺. 𑀲𑀢𑁆𑀢𑀦𑁆𑀦𑀦𑁆𑀢𑀺 𑀉𑀧𑀲𑁂𑀦𑁄, 𑀭𑁂𑀯𑀢𑁄, 𑀔𑀤𑀺𑀭𑀯𑀦𑀺𑀬𑁄, 𑀘𑀼𑀦𑁆𑀤𑁄, 𑀲𑀫𑀡𑀼𑀤𑁆𑀤𑁂𑀲𑁄 𑀅𑀳𑀦𑁆𑀢𑀺 𑀘𑀢𑀼𑀦𑁆𑀦𑀁, 𑀘𑀸𑀮𑀸, 𑀉𑀧𑀘𑀸𑀮𑀸, 𑀲𑀻𑀲𑀽𑀧𑀘𑀸𑀮𑀸𑀢𑀺, 𑀢𑀺𑀲𑁆𑀲𑀦𑁆𑀦𑀦𑁆𑀢𑀺 𑀇𑀫𑁂𑀲𑀁 𑀲𑀢𑁆𑀢𑀦𑁆𑀦𑀁 𑀅𑀭𑀳𑀦𑁆𑀢𑀸𑀦𑀁. 𑀦𑀢𑁆𑀣𑀺 𑀦𑀼 𑀔𑁄𑀢𑀺 𑀏𑀢𑁆𑀣𑀸𑀧𑀺 ‘‘𑀑𑀮𑁄𑀓𑁂𑀦𑁆𑀢𑁄’’𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑁄 𑀲𑀻𑀳𑀸𑀯𑀮𑁄𑀓𑀦𑀜𑀸𑀬𑁂𑀦. 𑀪𑀯𑀺𑀲𑁆𑀲𑀦𑁆𑀢𑀺 𑀫𑁂 𑀯𑀢𑁆𑀢𑀸𑀭𑁄 𑀳𑀭𑀺𑀢𑀼𑀁 𑀦𑀸𑀲𑀓𑁆𑀔𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀤𑀁 𑀤𑀸𑀦𑀺 𑀧𑀘𑁆𑀙𑀺𑀫𑀤𑀲𑁆𑀲𑀦𑀦𑁆𑀢𑀺 𑀪𑀽𑀢𑀓𑀣𑀦𑀫𑀢𑁆𑀢𑀁, 𑀦 𑀢𑀢𑁆𑀣 𑀲𑀸𑀮𑀬𑀢𑀸𑀤𑀲𑁆𑀲𑀦𑀁 𑀬𑀣𑀸 𑀢𑀣𑀸𑀕𑀢𑀲𑁆𑀲 𑀯𑁂𑀲𑀸𑀮𑀺𑀬𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀦𑀸𑀕𑀸𑀧𑀮𑁄𑀓𑀺𑀢𑀁.

𑀢𑀲𑁆𑀲 𑀢𑀲𑁆𑀲 𑀯𑀺𑀲𑁂𑀲𑀲𑁆𑀲 𑀅𑀥𑀺𑀝𑁆𑀞𑀸𑀦𑀯𑀲𑁂𑀦𑁂𑀯 𑀇𑀤𑁆𑀥𑀺𑀪𑁂𑀤𑀤𑀲𑁆𑀲𑀦𑀁 𑀇𑀤𑁆𑀥𑀺𑀯𑀺𑀓𑀼𑀩𑁆𑀩𑀦𑀁. 𑀲𑀻𑀳𑀲𑁆𑀲 𑀯𑀺𑀚𑀫𑁆𑀪𑀦𑀸𑀤𑀺𑀯𑀲𑁂𑀦 𑀓𑀻𑀴𑀺𑀢𑁆𑀯𑀸 𑀦𑀸𑀤𑀲𑀤𑀺𑀲𑀻 𑀅𑀬𑀁 𑀥𑀫𑁆𑀫𑀓𑀣𑀸𑀢𑀺 𑀯𑀼𑀢𑁆𑀢𑀁 ‘‘𑀲𑀻𑀳𑀯𑀺𑀓𑀻𑀴𑀺𑀢𑁄 𑀥𑀫𑁆𑀫𑀧𑀭𑀺𑀬𑀸𑀬𑁄’’𑀢𑀺. 𑀕𑀫𑀦𑀓𑀸𑀮𑁄 𑀫𑀬𑁆𑀳𑀦𑁆𑀢𑀻𑀢𑀺 𑀏𑀢𑁆𑀣 𑀇𑀢𑀺-𑀲𑀤𑁆𑀤𑁄 𑀧𑀭𑀺𑀲𑀫𑀸𑀧𑀦𑁂. 𑀢𑁂𑀦 𑀣𑁂𑀭𑁂𑀦 𑀬𑀣𑀸𑀭𑀫𑁆𑀪𑀲𑁆𑀲 𑀯𑀘𑀦𑀧𑀩𑀦𑁆𑀥𑀲𑁆𑀲 𑀲𑀫𑀸𑀧𑀺𑀢𑀪𑀸𑀯𑀁 𑀚𑁄𑀢𑁂𑀢𑀺. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺 𑀏𑀤𑀺𑀲𑁂𑀲𑀼 𑀲𑀩𑁆𑀩𑀝𑁆𑀞𑀸𑀦𑁂𑀲𑀼. 𑀬𑀼𑀕𑀦𑁆𑀥𑀭𑀸𑀤𑀬𑁄 𑀧𑀭𑀺𑀪𑀡𑁆𑀟𑀧𑀩𑁆𑀩𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀏𑀓𑀧𑁆𑀧𑀳𑀸𑀭𑁂𑀦𑁂𑀯𑀸𑀢𑀺 𑀏𑀓𑀧𑁆𑀧𑀳𑀸𑀭𑁂𑀦 𑀇𑀯. 𑀲𑁆𑀯𑀸𑀬𑀁 𑀇𑀯-𑀲𑀤𑁆𑀤𑁄 𑀦 𑀲𑀓𑁆𑀓𑁄𑀫𑀻𑀢𑀺 𑀏𑀢𑁆𑀣 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑁄.

𑀧𑀝𑀺𑀧𑀸𑀤𑁂𑀲𑁆𑀲𑀸𑀫𑀻𑀢𑀺 𑀞𑀺𑀢𑀓𑀸𑀬𑀁 𑀧𑀝𑀺𑀧𑀸𑀤𑁂𑀲𑁆𑀲𑀸𑀫𑀺. 𑀧𑀢𑁆𑀣𑀦𑀸𑀓𑀸𑀮𑁂 𑀅𑀦𑁄𑀫𑀤𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀯𑀘𑀦𑀲𑀼𑀢𑀸𑀦𑀼𑀲𑀸𑀭𑁂𑀦 𑀜𑀸𑀡𑁂𑀦 𑀤𑀺𑀝𑁆𑀞𑀫𑀢𑁆𑀢𑀢𑀁 𑀲𑀦𑁆𑀥𑀸𑀬 ‘‘𑀢𑀁 𑀧𑀞𑀫𑀤𑀲𑁆𑀲𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀥𑀸𑀭𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀻 𑀕𑀼𑀡𑀲𑀸𑀭𑀁. 𑀏𑀲 𑀫𑀕𑁆𑀕𑁄𑀢𑀺 𑀏𑀲𑁄 𑀚𑀸𑀢𑀸𑀦𑀁 𑀲𑀢𑁆𑀢𑀸𑀦𑀁 𑀫𑀭𑀡𑀦𑀺𑀝𑁆𑀞𑀺𑀢𑁄 𑀧𑀦𑁆𑀣𑁄. 𑀧𑀼𑀦𑀧𑀺 𑀏𑀯𑀁𑀪𑀸𑀯𑀺𑀦𑁄 𑀦𑀸𑀫 𑀲𑀗𑁆𑀔𑀸𑀭𑀸𑀢𑀺 𑀲𑀗𑁆𑀔𑀸𑀭𑀸 𑀦𑀸𑀫 𑀏𑀯𑀁𑀪𑀸𑀯𑀺𑀦𑁄, 𑀫𑀭𑀡𑀧𑀭𑀺𑀬𑁄𑀲𑀸𑀦𑀸𑀢𑀺 𑀅𑀢𑁆𑀣𑁄. 𑀏𑀢𑁆𑀢𑀓𑀦𑁆𑀢𑀺 𑀏𑀢𑁆𑀢𑀓𑀁 𑀓𑀸𑀮𑀁. 𑀲𑀗𑁆𑀓𑀟𑁆𑀠𑀺𑀢𑁆𑀯𑀸 𑀲𑀁𑀳𑀭𑀺𑀢𑁆𑀯𑀸. 𑀫𑀼𑀔𑀁 𑀧𑀺𑀥𑀸𑀬𑀸𑀢𑀺 𑀫𑀼𑀔𑀁 𑀙𑀸𑀤𑁂𑀢𑁆𑀯𑀸. 𑀅𑀕𑁆𑀖𑀺𑀓𑀲𑀢𑀸𑀦𑀻𑀢𑀺 𑀫𑀓𑀼𑀴𑀗𑁆𑀓𑀼𑀭𑀘𑁂𑀢𑀺𑀬𑀲𑀢𑀸𑀦𑀺.

𑀧𑀼𑀭𑀺𑀫𑀤𑀺𑀯𑀲𑁂𑀢𑀺 𑀅𑀢𑀻𑀢𑀤𑀺𑀯𑀲𑁂. 𑀬𑀲𑁆𑀫𑀸 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑁄 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀤𑀺𑀯𑀲𑁂𑀬𑁂𑀯 𑀲𑀢𑁆𑀣𑀼 𑀲𑀸𑀯𑀓𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺, 𑀢𑀲𑁆𑀫𑀸 ‘‘𑀧𑀽𑀭𑀺𑀢𑀲𑀸𑀯𑀓𑀲𑀦𑁆𑀦𑀺𑀧𑀸𑀢𑁄 𑀏𑀲 𑀪𑀺𑀓𑁆𑀔𑀽’’𑀢𑀺 𑀯𑀼𑀢𑁆𑀢𑀁. 𑀧𑀜𑁆𑀘 𑀚𑀸𑀢𑀺𑀲𑀢𑀸𑀦𑀻𑀢𑀺 𑀪𑀼𑀫𑁆𑀫𑀢𑁆𑀣𑁂, 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑁂 𑀯𑀸 𑀉𑀧𑀬𑁄𑀕𑀯𑀘𑀦𑀁.

𑀓𑀴𑁄𑀧𑀺𑀳𑀢𑁆𑀣𑁄𑀢𑀺 𑀯𑀺𑀮𑀻𑀯𑀫𑀬𑀪𑀸𑀚𑀦𑀳𑀢𑁆𑀣𑁄. ‘‘𑀘𑀫𑁆𑀫𑀫𑀬𑀪𑀸𑀚𑀦𑀳𑀢𑁆𑀣𑁄’’𑀢𑀺 𑀘 𑀯𑀤𑀦𑁆𑀢𑀺. 𑀧𑀼𑀭𑀦𑁆𑀢𑀭𑁂𑀢𑀺 𑀦𑀕𑀭𑀫𑀚𑁆𑀛𑁂. 𑀯𑀦𑁂𑀢𑀺 𑀅𑀭𑀜𑁆𑀜𑁂.

𑀑𑀲𑀓𑁆𑀓𑀦𑀸𑀓𑀸𑀭𑀯𑀺𑀭𑀳𑀺𑀢𑁄𑀢𑀺 𑀥𑀫𑁆𑀫𑀤𑁂𑀲𑀦𑀸𑀬 𑀲𑀗𑁆𑀓𑁄𑀘𑀳𑁂𑀢𑀼𑀯𑀺𑀭𑀳𑀺𑀢𑁄. 𑀯𑀺𑀲𑀸𑀭𑀤𑁄𑀢𑀺 𑀲𑀸𑀭𑀤𑀯𑀺𑀭𑀳𑀺𑀢𑁄. 𑀥𑀫𑁆𑀫𑁄𑀚𑀦𑁆𑀢𑀺 𑀥𑀫𑁆𑀫𑀭𑀲𑀁, 𑀑𑀚𑀯𑀦𑁆𑀢𑀁 𑀤𑁂𑀲𑀦𑀸𑀥𑀫𑁆𑀫𑀦𑁆𑀢𑀺 𑀅𑀢𑁆𑀣𑁄. 𑀥𑀫𑁆𑀫𑀪𑁄𑀕𑀦𑁆𑀢𑀺 𑀥𑀫𑁆𑀫𑀧𑀭𑀺𑀪𑁄𑀕𑀁, 𑀧𑀭𑁂𑀳𑀺 𑀲𑀤𑁆𑀥𑀺𑀁 𑀲𑀁𑀯𑀺𑀪𑀚𑀦𑀯𑀲𑁂𑀦 𑀧𑀯𑀢𑁆𑀢𑀁 𑀥𑀫𑁆𑀫𑀲𑀫𑁆𑀪𑁄𑀕𑀦𑁆𑀢𑀺 𑀤𑁂𑀲𑀦𑀸𑀥𑀫𑁆𑀫𑀫𑁂𑀯 𑀯𑀤𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀉𑀪𑀬𑁂𑀦𑀧𑀺 𑀥𑀫𑁆𑀫𑀧𑀭𑀺𑀪𑁄𑀕𑁄𑀯 𑀓𑀣𑀺𑀢𑁄’’𑀢𑀺.

𑀧𑀺𑀬𑀸𑀬𑀺𑀢𑀩𑁆𑀩𑀢𑁄 𑀧𑀺𑀬𑁂𑀳𑀺. 𑀫𑀦𑀲𑁆𑀲 𑀯𑀟𑁆𑀠𑀦𑀢𑁄 𑀫𑀦𑀸𑀧𑁂𑀳𑀺. 𑀚𑀸𑀢𑀺𑀬𑀸𑀢𑀺 𑀔𑀢𑁆𑀢𑀺𑀬𑀸𑀤𑀺𑀚𑀸𑀢𑀺𑀬𑀸. 𑀦𑀸𑀦𑀸𑀪𑀸𑀯𑁄 𑀅𑀲𑀳𑀪𑀸𑀯𑁄 𑀯𑀺𑀲𑀼𑀁𑀪𑀸𑀯𑁄. 𑀅𑀜𑁆𑀜𑀣𑀸𑀪𑀸𑀯𑁄 𑀅𑀜𑁆𑀜𑀣𑀢𑁆𑀢𑀁. 𑀲𑀭𑀻𑀭𑀦𑁆𑀢𑀺 𑀭𑀽𑀧𑀥𑀫𑁆𑀫𑀓𑀸𑀬𑀲𑀗𑁆𑀔𑀸𑀢𑀁 𑀲𑀭𑀻𑀭𑀁. 𑀭𑀽𑀧𑀓𑀸𑀬𑁂 𑀳𑀺 𑀪𑀺𑀚𑁆𑀚𑀦𑁆𑀢𑁂 𑀪𑀺𑀚𑁆𑀚𑀦𑁆𑀢𑁂𑀯. 𑀲𑁄 𑀪𑀺𑀚𑁆𑀚𑁂𑀬𑁆𑀬𑀸𑀢𑀺 𑀲𑁄 𑀫𑀳𑀦𑁆𑀢𑀢𑀭𑁄 𑀔𑀦𑁆𑀥𑁄 𑀪𑀺𑀚𑁆𑀚𑁂𑀬𑁆𑀬.

𑀤𑀓𑁆𑀔𑀺𑀡𑀤𑀺𑀲𑀁 𑀕𑀢𑁄𑀢𑀺 𑀤𑀓𑁆𑀔𑀺𑀡𑀤𑀺𑀲𑀸𑀫𑀼𑀔𑁂 𑀧𑀯𑀢𑁆𑀢𑁄. 𑀫𑀳𑀸𑀔𑀦𑁆𑀥𑁄 𑀯𑀺𑀬𑀸𑀢𑀺 𑀫𑀳𑀦𑁆𑀢𑁄 𑀲𑀸𑀭𑀯𑀦𑁆𑀢𑁄 𑀲𑀸𑀔𑀸𑀔𑀦𑁆𑀥𑁄 𑀯𑀺𑀬. 𑀲𑀸𑀔𑀔𑀦𑁆𑀥𑀸 𑀳𑀺 𑀤𑀺𑀲𑀸𑀪𑀺𑀫𑀼𑀔𑀧𑀯𑀢𑁆𑀢𑀸𑀓𑀸𑀭𑀸, 𑀫𑀽𑀮𑀔𑀦𑁆𑀥𑁄 𑀧𑀦 𑀉𑀤𑁆𑀥𑀫𑀼𑀕𑁆𑀕𑀢𑁄. 𑀲𑁄𑀴𑀲𑀦𑁆𑀦𑀁 𑀧𑀜𑁆𑀳𑀸𑀦𑀦𑁆𑀢𑀺 𑀲𑁄𑀴𑀲𑀦𑁆𑀦𑀁 𑀅𑀧𑀭𑀸𑀧𑀭𑀺𑀬𑀧𑀯𑀢𑁆𑀢𑀦𑀺𑀬𑀸𑀦𑀁 𑀅𑀢𑁆𑀣𑀸𑀦𑀁. 𑀜𑀸𑀢𑀼𑀁 𑀇𑀘𑁆𑀙𑀺𑀢𑁄 𑀳𑀺 𑀅𑀢𑁆𑀣𑁄 𑀧𑀜𑁆𑀳𑁄.

𑁪-𑁫. 𑀉𑀓𑁆𑀓𑀘𑁂𑀮𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁩𑁮𑁦-𑁩𑁮𑁧. 𑀅𑀫𑀸𑀯𑀲𑀼𑀧𑁄𑀲𑀣𑁂𑀢𑀺 𑀅𑀫𑀸𑀯𑀲𑀺𑀉𑀧𑁄𑀲𑀣𑁂, 𑀓𑀸𑀮𑀧𑀓𑁆𑀔𑀉𑀧𑁄𑀲𑀣𑁂𑀢𑀺 𑀅𑀢𑁆𑀣𑁄. 𑀧𑀼𑀭𑀺𑀫𑀦𑀬𑁂𑀦𑁂𑀯𑀸𑀢𑀺 𑀅𑀦𑀦𑁆𑀢𑀭𑀲𑀼𑀢𑁆𑀢𑁂 𑀯𑀼𑀢𑁆𑀢𑀦𑀬𑁂𑀦𑁂𑀯.

𑁬. 𑀉𑀢𑁆𑀢𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁮𑁨. 𑀫𑀘𑁆𑀘𑀼𑀥𑁂𑀬𑁆𑀬𑀲𑁆𑀲𑀸𑀢𑀺 𑀫𑀘𑁆𑀘𑀼𑀦𑁄 𑀧𑀯𑀢𑁆𑀢𑀺𑀝𑁆𑀞𑀸𑀦𑀲𑁆𑀲.

𑁮. 𑀩𑁆𑀭𑀳𑁆𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁮𑁪. 𑀢𑀲𑁆𑀫𑀺𑀁 𑀓𑀸𑀮𑁂𑀢𑀺 𑀧𑀞𑀫𑀸𑀪𑀺𑀲𑀫𑁆𑀩𑁄𑀥𑀺𑀬𑀁. 𑀪𑀺𑀓𑁆𑀔𑀼𑀬𑁂𑀯 𑀦𑀢𑁆𑀣𑀺 𑀥𑀫𑁆𑀫𑀘𑀓𑁆𑀓𑀲𑁆𑀲 𑀅𑀧𑁆𑀧𑀯𑀢𑁆𑀢𑀺𑀢𑀢𑁆𑀢𑀸, 𑀪𑀺𑀓𑁆𑀔𑀼𑀬𑁂𑀯 𑀪𑀺𑀓𑁆𑀔𑀼𑀮𑀓𑁆𑀔𑀡𑀬𑁄𑀕𑀢𑁄. 𑀏𑀓𑀓𑁄 𑀫𑀕𑁆𑀕𑁄, 𑀦 𑀤𑁆𑀯𑁂𑀥𑀸𑀧𑀣𑀪𑀽𑀢𑁄𑀢𑀺 𑀏𑀓𑀫𑀕𑁆𑀕𑁄, 𑀢𑀁 𑀏𑀓𑀫𑀕𑁆𑀕𑀁. 𑀚𑀸𑀢𑀺𑀬𑀸 𑀔𑀬𑁄 𑀯𑀝𑁆𑀝𑀤𑀼𑀓𑁆𑀔𑀲𑁆𑀲 𑀅𑀦𑁆𑀢𑀪𑀽𑀢𑁄𑀢𑀺 𑀚𑀸𑀢𑀺𑀓𑁆𑀔𑀬𑀦𑁆𑀢𑁄, 𑀦𑀺𑀩𑁆𑀩𑀸𑀦𑀁, 𑀢𑀁 𑀤𑀺𑀝𑁆𑀞𑀢𑁆𑀢𑀸 𑀚𑀸𑀢𑀺𑀓𑁆𑀔𑀬𑀦𑁆𑀢𑀤𑀲𑁆𑀲𑀻𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑁯. 𑀲𑁂𑀤𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁮𑁫. 𑀅𑀬𑀁 𑀢𑀲𑁆𑀲 𑀮𑀤𑁆𑀥𑀻𑀢𑀺 𑀅𑀬𑀁 𑀇𑀤𑀸𑀦𑀺 𑀯𑀼𑀘𑁆𑀘𑀫𑀸𑀦𑀸 𑀢𑀲𑁆𑀲 𑀆𑀘𑀭𑀺𑀬𑀲𑁆𑀲 𑀮𑀤𑁆𑀥𑀺. 𑀢𑀢𑁄 𑀅𑀦𑀸𑀫𑁂𑀦𑁆𑀢𑁄𑀢𑀺 𑀬𑁂𑀦 𑀯𑀁𑀲𑁄 𑀦𑀫𑀢𑀺, 𑀢𑁂𑀦 𑀓𑀸𑀬𑀁 𑀅𑀦𑀸𑀫𑁂𑀦𑁆𑀢𑁄. 𑀢𑀣𑀸 𑀦𑀫𑀦𑁆𑀢𑁄 𑀳𑀺 𑀧𑀢𑀺𑀢𑁆𑀯𑀸 𑀘𑀼𑀡𑁆𑀡𑀯𑀺𑀘𑀼𑀡𑁆𑀡𑀁 𑀳𑁄𑀢𑀺. 𑀢𑀦𑁆𑀢𑀺 𑀓𑀸𑀬𑀁, 𑀢𑀁 𑀯𑀁𑀲𑀁 𑀯𑀸. 𑀆𑀓𑀟𑁆𑀠𑁂𑀦𑁆𑀢𑁄 𑀯𑀺𑀬𑀸𑀢𑀺 𑀦𑀫𑀺𑀢𑀝𑁆𑀞𑀸𑀦𑀢𑁄 𑀧𑀭𑀪𑀸𑀕𑁂𑀦 𑀆𑀓𑀟𑁆𑀠𑁂𑀦𑁆𑀢𑁄 𑀯𑀺𑀬. 𑀏𑀓𑀢𑁄𑀪𑀸𑀕𑀺𑀬𑀁 𑀓𑀢𑁆𑀯𑀸𑀢𑀺 𑀬𑀣𑀸𑀯𑀼𑀢𑁆𑀢𑀁 𑀲𑀢𑀺𑀁 𑀲𑀽𑀧𑀝𑁆𑀞𑀺𑀢𑀁 𑀓𑀢𑁆𑀯𑀸 𑀑𑀦𑀢𑀁 𑀯𑀺𑀬 𑀓𑀢𑁆𑀯𑀸. 𑀢𑀣𑀸 𑀓𑀭𑀡𑀁 𑀧𑀦 𑀢𑀣𑀸 𑀯𑀸𑀢𑀽𑀧𑀢𑁆𑀣𑀫𑁆𑀪𑀕𑀸𑀳𑀸𑀧𑀦𑁂𑀦𑀸𑀢𑀺 𑀆𑀳 𑁋 ‘‘𑀯𑀸𑀢𑀽𑀧𑀢𑁆𑀣𑀫𑁆𑀪𑀁 𑀕𑀸𑀳𑀸𑀧𑁂𑀢𑁆𑀯𑀸’’𑀢𑀺. 𑀢𑀜𑁆𑀘 𑀲𑀢𑀺𑀬𑀸 𑀢𑀤𑀢𑁆𑀣𑀁 𑀉𑀧𑀝𑁆𑀞𑀸𑀦𑁂𑀦𑀸𑀢𑀺 𑀯𑀼𑀢𑁆𑀢𑀁 ‘‘𑀲𑀢𑀺𑀁 𑀲𑀽𑀧𑀝𑁆𑀞𑀺𑀢𑀁 𑀓𑀢𑁆𑀯𑀸’’𑀢𑀺. 𑀦𑀺𑀘𑁆𑀘𑀮𑁄𑀯 𑀦𑀺𑀲𑀻𑀤𑀦𑁆𑀢𑁄 𑀅𑀦𑁆𑀢𑁂𑀯𑀸𑀲𑀻 𑀆𑀘𑀭𑀺𑀬𑀁 𑀭𑀓𑁆𑀔𑀢𑀺, 𑀏𑀢𑁆𑀢𑀓𑀁 𑀆𑀘𑀭𑀺𑀬𑀲𑁆𑀲 𑀮𑀤𑁆𑀥𑀺𑀯𑀲𑁂𑀦 𑀯𑀼𑀢𑁆𑀢𑀁. ‘‘𑀆𑀘𑀭𑀺𑀬𑁄 𑀯𑀁𑀲𑀁 𑀲𑀼𑀕𑁆𑀕𑀳𑀺𑀢𑀁 𑀕𑀡𑁆𑀳𑀦𑁆𑀢𑁄’’𑀢𑀺𑀆𑀤𑀺 𑀲𑀩𑁆𑀩𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀫𑁂𑀯.

‘‘𑀅𑀢𑁆𑀢𑀸𑀦𑀫𑁂𑀯 𑀭𑀓𑁆𑀔𑀢𑀻’’𑀢𑀺 𑀇𑀤𑀁 𑀅𑀢𑁆𑀢𑀦𑁄 𑀭𑀓𑁆𑀔𑀡𑀁 𑀧𑀥𑀸𑀦𑀁 𑀓𑀢𑁆𑀯𑀸 𑀯𑀼𑀢𑁆𑀢𑀁, 𑀦 𑀅𑀦𑁆𑀢𑁂𑀯𑀸𑀲𑀺𑀓𑀦𑁆𑀢𑀺 𑀅𑀯𑀥𑀸𑀭𑀡𑀨𑀮𑀁. 𑀅𑀢𑁆𑀢𑀭𑀓𑁆𑀔𑀸𑀬 𑀧𑀦𑁂𑀢𑁆𑀣 𑀲𑀺𑀚𑁆𑀛𑀫𑀸𑀦𑀸𑀬 𑀅𑀦𑁆𑀢𑁂𑀯𑀸𑀲𑀺𑀓𑀭𑀓𑁆𑀔𑀸𑀧𑀺 𑀲𑀺𑀤𑁆𑀥𑀸 𑀏𑀯 𑀳𑁄𑀢𑀻𑀢𑀺. 𑀤𑀼𑀢𑀺𑀬𑀧𑀓𑁆𑀔𑁂𑀧𑀺 𑀏𑀲𑁂𑀯 𑀦𑀬𑁄. 𑀲𑁄 𑀢𑀢𑁆𑀣 𑀜𑀸𑀬𑁄𑀢𑀺 𑀬𑀸 𑀅𑀢𑁆𑀢𑀦𑁄 𑀏𑀯 𑀭𑀓𑁆𑀔𑀸, 𑀲𑀸 𑀅𑀢𑁆𑀣𑀢𑁄 𑀧𑀭𑀭𑀓𑁆𑀔𑀸𑀧𑀺 𑀳𑁄𑀢𑀻𑀢𑀺 𑀅𑀬𑀫𑁂𑀢𑁆𑀣 𑀜𑀸𑀬𑁄 𑀬𑀼𑀢𑁆𑀢𑀧𑁆𑀧𑀬𑁄𑀕𑁄. 𑀅𑀦𑀼𑀯𑀟𑁆𑀠𑀺𑀬𑀸𑀢𑀺 𑀬𑀣𑀸𑀯𑀟𑁆𑀠𑀺𑀢𑀲𑁆𑀲 𑀅𑀦𑀼𑀅𑀦𑀼𑀯𑀟𑁆𑀠𑀺𑀬𑀸. 𑀏𑀢𑁂𑀦 𑀧𑀝𑀺𑀮𑀤𑁆𑀥𑀲𑀫𑁆𑀧𑀬𑀼𑀢𑁆𑀢𑀧𑀫𑁄𑀤𑀦𑀸𑀓𑀸𑀭𑁄 𑀤𑀲𑁆𑀲𑀺𑀢𑁄𑀢𑀺 𑀆𑀳 𑁋 ‘‘𑀲𑀧𑀼𑀩𑁆𑀩𑀪𑀸𑀕𑀸𑀬 𑀫𑀼𑀤𑀺𑀢𑀸𑀬𑀸𑀢𑀺 𑀅𑀢𑁆𑀣𑁄’’𑀢𑀺. 𑀆𑀲𑁂𑀯𑀦𑀸𑀬𑀸𑀢𑀺𑀆𑀤𑀻𑀦𑀺 𑀧𑀤𑀸𑀦𑀺 𑀅𑀦𑀼𑀤𑀬𑀢𑀸𑀧𑀭𑀺𑀬𑁄𑀲𑀸𑀦𑀸𑀦𑀺 (𑀬𑀲𑁆𑀫𑀸 𑀲𑀢𑀺𑀧𑀝𑁆𑀞𑀸𑀦𑀁 𑀲𑁂𑀯𑀦𑁆𑀢𑀲𑁆𑀲 𑀲𑀺𑀤𑁆𑀥𑀁 𑀅𑀢𑁆𑀢𑀦𑁄 𑀘 𑀧𑀭𑀲𑁆𑀲 𑀘 𑀭𑀓𑁆𑀔𑀡𑀁 𑀧𑀓𑀸𑀲𑁂𑀦𑁆𑀢𑀺, 𑀢𑀲𑁆𑀫𑀸) 𑁋 ‘‘𑀅𑀢𑁆𑀢𑀸𑀦𑀁, 𑀪𑀺𑀓𑁆𑀔𑀯𑁂, 𑀭𑀓𑁆𑀔𑀺𑀲𑁆𑀲𑀸𑀫𑀻𑀢𑀺 𑀲𑀢𑀺𑀧𑀝𑁆𑀞𑀸𑀦𑀁 𑀲𑁂𑀯𑀺𑀢𑀩𑁆𑀩’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁.

𑁧𑁦. 𑀚𑀦𑀧𑀤𑀓𑀮𑁆𑀬𑀸𑀡𑀻𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁮𑁬. 𑀚𑀦𑀧𑀤𑀲𑁆𑀫𑀺𑀁 𑀓𑀮𑁆𑀬𑀸𑀡𑀻𑀢𑀺 𑀲𑀓𑀮𑀚𑀦𑀧𑀤𑁂 𑀪𑀤𑁆𑀤𑀸 𑀭𑀽𑀧𑀲𑀫𑁆𑀧𑀢𑁆𑀢𑀺𑀬𑀸 𑀲𑀺𑀓𑁆𑀔𑀸𑀲𑀫𑁆𑀧𑀢𑁆𑀢𑀺𑀬𑀸 𑀘 𑀲𑀼𑀦𑁆𑀤𑀭𑀸 𑀲𑁂𑀝𑁆𑀞𑀸. 𑀭𑀽𑀧𑀲𑀫𑁆𑀧𑀢𑁆𑀢𑀺 𑀘 𑀦𑀸𑀫 𑀲𑀩𑁆𑀩𑀲𑁄 𑀭𑀽𑀧𑀤𑁄𑀲𑀸𑀪𑀸𑀯𑁂𑀦 𑀭𑀽𑀧𑀕𑀼𑀡𑀧𑀸𑀭𑀺𑀧𑀽𑀭𑀺𑀬𑀸 𑀳𑁄𑀢𑀻𑀢𑀺 𑀢𑀤𑀼𑀪𑀬𑀁 𑀤𑀲𑁆𑀲𑁂𑀢𑀼𑀁 ‘‘𑀙𑀲𑀭𑀻𑀭𑀤𑁄𑀲𑀭𑀳𑀺𑀢𑀸 𑀧𑀜𑁆𑀘𑀓𑀮𑁆𑀬𑀸𑀡𑀲𑀫𑀦𑁆𑀦𑀸𑀕𑀢𑀸’’𑀢𑀺 𑀯𑀼𑀢𑁆𑀢𑀁. 𑀢𑀁 𑀤𑀼𑀯𑀺𑀥𑀫𑁆𑀧𑀺 𑀯𑀺𑀯𑀭𑀦𑁆𑀢𑁄 ‘‘𑀲𑀸 𑀳𑀻’’𑀢𑀺𑀆𑀤𑀺𑀫𑀸𑀳. 𑀧𑀜𑁆𑀘𑀓𑀮𑁆𑀬𑀸𑀡𑀲𑀫𑀦𑁆𑀦𑀸𑀕𑀢𑀸𑀢𑀺 𑀧𑀜𑁆𑀘𑀯𑀺𑀥𑀲𑀭𑀻𑀭𑀕𑀼𑀡𑀲𑀫𑁆𑀧𑀤𑀸𑀳𑀺 𑀲𑀫𑀦𑁆𑀦𑀸𑀕𑀢𑀸. 𑀦𑀸𑀢𑀺𑀤𑀻𑀖𑀸 𑀦𑀸𑀢𑀺𑀭𑀲𑁆𑀲𑀸𑀢𑀺 𑀧𑀫𑀸𑀡𑀫𑀚𑁆𑀛𑀺𑀫𑀸 𑀤𑀻𑀖𑀢𑀭𑀧𑁆𑀧𑀫𑀸𑀡𑀸 𑀦 𑀳𑁄𑀢𑀺, 𑀦 𑀅𑀢𑀺𑀭𑀲𑁆𑀲𑀸, 𑀮𑀓𑀼𑀡𑁆𑀟𑀓𑀭𑀽𑀧𑀸 𑀦 𑀳𑁄𑀢𑀺. 𑀦𑀸𑀢𑀺𑀓𑀺𑀲𑀸𑀢𑀺 𑀅𑀢𑀺𑀯𑀺𑀬 𑀓𑀺𑀲𑀣𑀤𑁆𑀥𑀫𑀁𑀲𑀮𑁄𑀳𑀺𑀢𑀸 𑀤𑀺𑀲𑁆𑀲𑀫𑀸𑀦𑀸 𑀅𑀝𑁆𑀞𑀺𑀲𑀭𑀻𑀭𑀸 𑀚𑀸𑀮𑀲𑀭𑀻𑀭𑀸 𑀦 𑀳𑁄𑀢𑀺. 𑀦𑀸𑀢𑀺𑀣𑀽𑀮𑀸𑀢𑀺 𑀪𑀸𑀭𑀺𑀬𑀫𑀁𑀲𑀸 𑀫𑀳𑁄𑀤𑀭𑀸 𑀦 𑀳𑁄𑀢𑀺. 𑀦𑀸𑀢𑀺𑀓𑀸𑀴𑀸 𑀦𑀸𑀘𑁆𑀘𑁄𑀤𑀸𑀢𑀸𑀢𑀺 𑀅𑀢𑀺𑀯𑀺𑀬 𑀓𑀸𑀴𑀯𑀡𑁆𑀡𑀸 𑀛𑀸𑀫𑀗𑁆𑀕𑀸𑀭𑁄 𑀯𑀺𑀬, 𑀤𑀥𑀺𑀢𑀓𑁆𑀓𑀸𑀤𑀻𑀳𑀺 𑀧𑀫𑀚𑁆𑀚𑀺𑀢𑀫𑀢𑁆𑀢𑀓𑀁𑀲𑀮𑁄𑀳𑀯𑀡𑁆𑀡𑀸 𑀦 𑀳𑁄𑀢𑀺. 𑀫𑀦𑀼𑀲𑁆𑀲𑀮𑁄𑀓𑁂 𑀢𑀸𑀤𑀺𑀲𑀺𑀬𑀸 𑀭𑀽𑀧𑀲𑀫𑁆𑀧𑀢𑁆𑀢𑀺𑀬𑀸 𑀅𑀪𑀸𑀯𑀢𑁄 𑀅𑀢𑀺𑀓𑁆𑀓𑀦𑁆𑀢𑀸 𑀫𑀦𑀼𑀲𑁆𑀲𑀯𑀡𑁆𑀡𑀁. 𑀬𑀣𑀸 𑀧𑀫𑀸𑀡𑀬𑀼𑀢𑁆𑀢𑀸, 𑀏𑀯𑀁 𑀆𑀭𑁄𑀳𑀧𑀭𑀺𑀡𑀸𑀳𑀬𑁄𑀕𑀢𑁄 𑀘 𑀧𑀭𑁂𑀲𑀁 𑀧𑀲𑀸𑀤𑀸𑀯𑀳𑀸 𑀦𑀸𑀢𑀺𑀤𑀻𑀖𑀢𑀸𑀤𑀬𑁄. 𑀏𑀯𑀁 𑀫𑀦𑀼𑀲𑁆𑀲𑀸𑀦𑀁 𑀤𑀺𑀩𑁆𑀩𑀭𑀽𑀧𑀢𑀸𑀲𑀫𑁆𑀧𑀢𑁆𑀢𑀻𑀧𑀻𑀢𑀺 𑀯𑀼𑀢𑁆𑀢𑀁 ‘‘𑀅𑀧𑁆𑀧𑀢𑁆𑀢𑀸 𑀤𑀺𑀩𑁆𑀩𑀯𑀡𑁆𑀡’’𑀦𑁆𑀢𑀺. 𑀏𑀢𑁆𑀣 𑀘 𑀦𑀸𑀢𑀺𑀤𑀻𑀖𑀦𑀸𑀢𑀺𑀭𑀲𑁆𑀲𑀢𑀸𑀯𑀘𑀦𑁂𑀦 𑀆𑀭𑁄𑀳𑀲𑀫𑁆𑀧𑀢𑁆𑀢𑀺 𑀯𑀼𑀢𑁆𑀢𑀸 𑀉𑀩𑁆𑀩𑁂𑀥𑁂𑀦 𑀧𑀸𑀲𑀸𑀤𑀺𑀓𑀪𑀸𑀯𑀢𑁄. 𑀓𑀺𑀲𑀣𑀽𑀮𑀤𑁄𑀲𑀸𑀪𑀸𑀯𑀯𑀘𑀦𑁂𑀦 𑀧𑀭𑀺𑀡𑀸𑀳𑀲𑀫𑁆𑀧𑀢𑁆𑀢𑀺 𑀯𑀼𑀢𑁆𑀢𑀸. 𑀉𑀪𑀬𑁂𑀦𑀧𑀺 𑀲𑀡𑁆𑀞𑀸𑀦𑀲𑀫𑁆𑀧𑀤𑀸 𑀯𑀺𑀪𑀸𑀯𑀺𑀢𑀸, 𑀦𑀸𑀢𑀺𑀓𑀸𑀴𑀢𑀸𑀯𑀘𑀦𑁂𑀦 𑀯𑀡𑁆𑀡𑀲𑀫𑁆𑀧𑀢𑁆𑀢𑀺 𑀯𑀼𑀢𑁆𑀢𑀸 𑀯𑀺𑀯𑀡𑁆𑀡𑀢𑀸𑀪𑀸𑀯𑀢𑁄. 𑀧𑀺𑀬𑀗𑁆𑀕𑀼𑀲𑀸𑀫𑀸𑀢𑀺 𑀧𑀭𑀺𑀡𑀢𑀧𑀺𑀬𑀗𑁆𑀕𑀼𑀧𑀼𑀧𑁆𑀨𑀲𑀤𑀺𑀲𑀲𑀭𑀻𑀭𑀦𑀺𑀪𑀸𑀲𑀸. 𑀫𑀼𑀔𑀧𑀭𑀺𑀬𑁄𑀲𑀸𑀦𑀦𑁆𑀢𑀺 𑀅𑀥𑀭𑁄𑀝𑁆𑀞𑀫𑀸𑀳. 𑀅𑀬𑀁 𑀬𑀣𑀸𑀯𑀼𑀢𑁆𑀢𑀸 𑀲𑀭𑀻𑀭𑀯𑀡𑁆𑀡𑀲𑀫𑁆𑀧𑀢𑁆𑀢𑀺. 𑀅𑀲𑁆𑀲𑀸𑀢𑀺 𑀚𑀦𑀧𑀤𑀓𑀮𑁆𑀬𑀸𑀡𑀺𑀬𑀸. 𑀙𑀯𑀺𑀓𑀮𑁆𑀬𑀸𑀡𑀢𑀸 𑀙𑀯𑀺𑀲𑀫𑁆𑀧𑀢𑁆𑀢𑀺𑀳𑁂𑀢𑀼𑀓𑀢𑁆𑀢𑀸 𑀢𑀲𑁆𑀲𑀸. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀦𑀔𑀸 𑀏𑀯 𑀧𑀢𑁆𑀢𑀲𑀤𑀺𑀲𑀢𑀸𑀬 𑀦𑀔𑀧𑀢𑁆𑀢𑀸𑀦𑀺.

(𑀧𑀲𑀸𑀯𑁄 𑀲𑀭𑀻𑀭𑀸𑀯𑀬𑀯𑁂𑀦 𑀇𑀭𑀺𑀬𑀦𑀦𑁆𑀢𑀺 𑀆𑀳 𑁋 ‘‘𑀧𑀯𑀢𑁆𑀢𑀻𑀢𑀺 𑀅𑀢𑁆𑀣𑁄’’𑀢𑀺, 𑀧𑀲𑀸𑀯𑁄 𑀬𑀣𑀸𑀧𑀭𑀺𑀢𑀫𑁂𑀯 𑀓𑀦𑀢𑀦𑁆𑀢𑀺, 𑀦 𑀲𑀪𑀸𑀯𑀲𑀦𑁆𑀥𑀸𑀦𑀁. 𑀬𑀣𑀸𑀯𑀺𑀪𑀸𑀯𑀲𑁂𑀦 𑀉𑀢𑁆𑀢𑀫𑀫𑁂𑀯 𑀦𑀘𑁆𑀘𑀁 𑀦𑀘𑁆𑀘𑀢𑀺. 𑀢𑁂 𑀯𑀸 𑀯𑀻𑀲𑀢𑀺𑀬𑀸𑀲𑀽𑀢𑀺𑀭𑀁 𑀥𑀸𑀦𑀧𑁆𑀧𑀢𑁆𑀢𑀺𑀬𑀸 𑀧𑀯𑀢𑁆𑀢𑀺𑀬𑀸 𑀧𑀯𑀢𑁆𑀢𑀺𑀫𑀓𑀢𑀫𑀦𑁆𑀤𑀢𑀸 𑀯𑀺𑀪𑀸𑀯𑀲𑀼𑀝𑀢𑀲𑁆𑀲 𑀉𑀢𑁆𑀢𑀫𑀫𑁂𑀯 𑀕𑀻𑀢𑀜𑁆𑀘 𑀕𑀸𑀬𑀢𑀻𑀢𑀺 𑀅𑀢𑁆𑀣𑁄.) [𑀏𑀢𑁆𑀣𑀦𑁆𑀢𑀭𑁂 𑀧𑀸𑀞𑁄 𑀅𑀲𑀼𑀤𑁆𑀥𑁄 𑀤𑀼𑀲𑁆𑀲𑁄𑀥𑀦𑀻𑀬𑁄 𑀘. 𑀲𑀼𑀤𑁆𑀥𑀧𑀸𑀞𑁄 𑀕𑀯𑁂𑀲𑀺𑀢𑀩𑁆𑀩𑁄.] 𑀲𑀫𑀢𑀺𑀢𑁆𑀢𑀺𑀓𑁄 𑀢𑁂𑀮𑀧𑀢𑁆𑀢𑁄𑀢𑀺 𑀫𑀼𑀔𑀯𑀢𑁆𑀢𑀺𑀲𑀫𑀁 𑀢𑁂𑀮𑀸𑀦𑀁 𑀧𑀽𑀭𑀺𑀢𑀢𑁆𑀢𑀸 𑀲𑀫𑀢𑀺𑀢𑁆𑀢𑀺𑀓𑀫𑀼𑀔𑀁 𑀢𑁂𑀮𑀪𑀸𑀚𑀦𑀁. 𑀅𑀦𑁆𑀢𑀭𑁂𑀦 𑀘 𑀫𑀳𑀸𑀲𑀫𑀚𑁆𑀚𑀁 𑀅𑀦𑁆𑀢𑀭𑁂𑀦 𑀘 𑀚𑀦𑀧𑀤𑀓𑀮𑁆𑀬𑀸𑀡𑀺𑀦𑁆𑀢𑀺 𑀚𑀦𑀧𑀤𑀓𑀮𑁆𑀬𑀸𑀡𑀺𑀬𑀸, 𑀢𑀲𑁆𑀲𑀸 𑀘 𑀦𑀘𑁆𑀘𑀕𑀻𑀢𑀁 𑀧𑁂𑀓𑁆𑀔𑀺𑀢𑀼𑀁 𑀲𑀦𑁆𑀦𑀺𑀧𑀢𑀺𑀢𑀫𑀳𑀸𑀚𑀦𑀲𑀫𑀽𑀳𑀲𑁆𑀲 𑀫𑀚𑁆𑀛𑀢𑁄 𑀧𑀭𑀺𑀳𑀭𑀺𑀢𑀩𑁆𑀩𑁄 𑀦𑁂𑀢𑀩𑁆𑀩𑁄. 𑀦𑀦𑁆𑀢𑀺 𑀢𑁂𑀮𑀁. 𑀆𑀳𑀭𑁂𑀬𑁆𑀬𑀸𑀢𑀺 𑀆𑀧𑀚𑁆𑀚𑁂𑀬𑁆𑀬. 𑀢𑀢𑁆𑀭𑀺𑀤𑀁 𑀑𑀧𑀫𑁆𑀫𑀲𑀁𑀲𑀦𑁆𑀤𑀦𑀁 𑁋 𑀢𑁂𑀮𑀧𑀢𑁆𑀢𑀁 𑀯𑀺𑀬 𑀓𑀸𑀬𑀕𑀢𑀸𑀲𑀢𑀺, 𑀢𑀲𑁆𑀲 𑀧𑀭𑀺𑀳𑀭𑀡𑀧𑀼𑀕𑁆𑀕𑀮𑁄 𑀯𑀺𑀬 𑀯𑀺𑀧𑀲𑁆𑀲𑀓𑁄, 𑀚𑀦𑀓𑀸𑀬𑀸 𑀯𑀺𑀬 𑀧𑀼𑀣𑀼𑀢𑁆𑀢𑀸𑀭𑀫𑁆𑀫𑀡𑀸𑀦𑀺, 𑀅𑀲𑀺𑀧𑀼𑀭𑀺𑀲𑁄 𑀯𑀺𑀬 𑀫𑀦𑁄, 𑀢𑁂𑀮𑀲𑁆𑀲 𑀘𑀚𑀦𑀁 𑀯𑀺𑀬 𑀓𑀺𑀮𑁂𑀲𑀼𑀧𑁆𑀧𑀸𑀤𑀦𑀁, 𑀲𑀻𑀲𑀧𑀸𑀢𑀦𑀁 𑀯𑀺𑀬 𑀅𑀭𑀺𑀬𑀫𑀕𑁆𑀕𑀜𑀸𑀡𑀲𑀻𑀲𑀸𑀦𑀼𑀧𑁆𑀧𑀢𑁆𑀢𑀺. ‘‘𑀓𑀸𑀬𑀕𑀢𑀸 𑀲𑀢𑀺 𑀦𑁄 𑀪𑀸𑀯𑀺𑀢𑀸…𑀧𑁂… 𑀲𑀺𑀓𑁆𑀔𑀺𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 ‘‘𑀧𑀼𑀩𑁆𑀩𑀪𑀸𑀕𑀯𑀺𑀧𑀲𑁆𑀲𑀦𑀸𑀯 𑀓𑀣𑀺𑀢𑀸’’𑀢𑀺 𑀯𑀼𑀢𑁆𑀢𑀁.

𑀦𑀸𑀮𑀦𑁆𑀤𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀲𑀻𑀮𑀝𑁆𑀞𑀺𑀢𑀺𑀯𑀕𑁆𑀕𑁄

𑁧-𑁨. 𑀲𑀻𑀮𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁩𑁮𑁭-𑁩𑁮𑁮. 𑀲𑀻𑀮𑀸𑀦𑀻𑀢𑀺 𑀩𑀳𑀼𑀯𑀘𑀦𑀁 𑀅𑀦𑁂𑀓𑀯𑀺𑀥𑀢𑁆𑀢𑀸 𑀲𑀻𑀮𑀲𑁆𑀲. 𑀢𑀜𑁆𑀳𑀺 𑀲𑀻𑀮𑀦𑀝𑁆𑀞𑁂𑀦 𑀏𑀓𑀯𑀺𑀥𑀫𑁆𑀧𑀺 𑀘𑀸𑀭𑀺𑀢𑁆𑀢𑀸𑀤𑀺𑀯𑀲𑁂𑀦 𑀅𑀦𑁂𑀓𑀯𑀺𑀥𑀁. 𑀢𑁂𑀦𑀸𑀳 𑁋 ‘‘𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀸𑀦𑀻’’𑀢𑀺. 𑀧𑀜𑁆𑀳𑀫𑀕𑁆𑀕𑁄𑀢𑀺 𑀜𑀸𑀢𑀼𑀁 𑀇𑀘𑁆𑀙𑀺𑀢𑀲𑁆𑀲 𑀅𑀢𑁆𑀣𑀲𑁆𑀲 𑀯𑀻𑀫𑀁𑀲𑀦𑀁. 𑀢𑁂𑀦𑀸𑀳 𑁋 ‘‘𑀧𑀜𑁆𑀳𑀕𑀯𑁂𑀲𑀦’’𑀦𑁆𑀢𑀺.

𑁩-𑁫. 𑀧𑀭𑀺𑀳𑀸𑀦𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁩𑁮𑁯-𑁩𑁯𑁧. 𑀧𑀼𑀕𑁆𑀕𑀮𑀯𑀲𑁂𑀦 𑀧𑀭𑀺𑀳𑀸𑀦𑀁 𑀳𑁄𑀢𑀺 𑀦 𑀥𑀫𑁆𑀫𑀯𑀲𑁂𑀦. 𑀬𑁄 𑀦 𑀪𑀸𑀯𑁂𑀢𑀺, 𑀢𑀲𑁆𑀲𑁂𑀯 𑀧𑀭𑀺𑀳𑀸𑀬𑀢𑀺. 𑀢𑁂𑀦𑀸𑀳 ‘‘𑀬𑁄 𑀳𑀻’’𑀢𑀺𑀆𑀤𑀺.

𑁬. 𑀧𑀤𑁂𑀲𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁯𑁨. 𑀧𑀤𑁂𑀲𑀢𑁄 𑀪𑀸𑀯𑀺𑀢𑀢𑁆𑀢𑀸𑀢𑀺 𑀏𑀓𑀤𑁂𑀲𑀢𑁄 𑀪𑀸𑀯𑀺𑀢𑀢𑁆𑀢𑀸 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀬𑀸 𑀅𑀦𑀦𑀼𑀧𑁆𑀧𑀢𑁆𑀢𑀢𑁆𑀢𑀸. 𑀢𑁂𑀦𑀸𑀳 𑁋 ‘‘𑀘𑀢𑁆𑀢𑀸𑀭𑁄 𑀳𑀺 𑀫𑀕𑁆𑀕𑁂’’𑀢𑀺𑀆𑀤𑀺.

𑁭. 𑀲𑀫𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁯𑁩. 𑀲𑀫𑀢𑁆𑀢𑀸 𑀪𑀸𑀯𑀺𑀢𑀢𑁆𑀢𑀸𑀢𑀺 𑀧𑀭𑀺𑀬𑀢𑁆𑀢𑀸 𑀪𑀸𑀯𑀺𑀢𑀢𑁆𑀢𑀸.

𑁮-𑁧𑁦. 𑀮𑁄𑀓𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁩𑁯𑁪-𑁩𑁯𑁬. 𑀫𑀳𑀸𑀯𑀺𑀲𑀬𑀢𑁆𑀢𑀸 𑀫𑀳𑀢𑀺𑀬𑁄 𑀅𑀪𑀺𑀜𑁆𑀜𑀸 𑀏𑀢𑀲𑁆𑀲𑀸𑀢𑀺 𑀫𑀳𑀸𑀪𑀺𑀜𑁆𑀜𑁄, 𑀢𑀲𑁆𑀲 𑀪𑀸𑀯𑁄𑀢𑀺 𑀲𑀩𑁆𑀩𑀁 𑀯𑀢𑁆𑀢𑀩𑁆𑀩𑀁. ‘‘𑀲𑀢𑀢𑀯𑀺𑀳𑀸𑀭𑀯𑀲𑁂𑀦 𑀯𑀼𑀢𑁆𑀢’’𑀦𑁆𑀢𑀺 𑀯𑀢𑁆𑀯𑀸 𑀢𑀫𑀢𑁆𑀣𑀁 𑀧𑀸𑀓𑀝𑀁 𑀓𑀸𑀢𑀼𑀁 ‘‘𑀣𑁂𑀭𑁄 𑀓𑀺𑀭𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀲𑁆𑀲𑀸𑀢𑀺 𑀣𑁂𑀭𑀲𑁆𑀲. 𑀆𑀯𑀚𑁆𑀚𑀦𑀲𑁆𑀲 𑀕𑀢𑀺𑀦𑁆𑀢𑀺 𑀏𑀓𑀸𑀯𑀚𑁆𑀚𑀦𑀲𑁆𑀲𑁂𑀯 𑀕𑀫𑀦𑀯𑀻𑀣𑀺𑀁. 𑀅𑀦𑀼𑀩𑀦𑁆𑀥𑀢𑀺 𑀘𑀓𑁆𑀓𑀯𑀸𑀴𑀸𑀦𑀁 𑀲𑀳𑀲𑁆𑀲𑀁 𑀏𑀓𑀸𑀯𑀚𑁆𑀚𑀦𑁂𑀦𑁂𑀯 𑀲𑀳𑀲𑁆𑀲𑀮𑁄𑀓𑀥𑀸𑀢𑀼𑀬𑀸 𑀇𑀘𑁆𑀙𑀺𑀢𑀫𑀢𑁆𑀣𑀁 𑀚𑀸𑀦𑀺𑀢𑀼𑀁 𑀲𑀫𑀢𑁆𑀣𑁄𑀢𑀺 𑀤𑀲𑁆𑀲𑁂𑀢𑀺.

𑀲𑀻𑀮𑀝𑁆𑀞𑀺𑀢𑀺𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀅𑀦𑀦𑀼𑀲𑁆𑀲𑀼𑀢𑀯𑀕𑁆𑀕𑀯𑀡𑁆𑀡𑀦𑀸

𑁩𑁯𑁭-𑁪𑁦𑁭. 𑀬𑀸 𑀯𑁂𑀤𑀦𑀸 𑀲𑀫𑁆𑀫𑀲𑀺𑀢𑁆𑀯𑀸𑀢𑀺 𑀬𑀸 𑀢𑁂𑀪𑀽𑀫𑀓𑀯𑁂𑀤𑀦𑀸 𑀲𑀫𑁆𑀫𑀲𑀺𑀢𑁆𑀯𑀸. 𑀢𑀸𑀯𑀲𑁆𑀲𑀸𑀢𑀺 𑀢𑀸 𑀢𑁂𑀪𑀽𑀫𑀓𑀯𑁂𑀤𑀦𑀸 𑀏𑀯 𑀅𑀲𑁆𑀲 𑀪𑀺𑀓𑁆𑀔𑀼𑀦𑁄. 𑀲𑀤𑀺𑀲𑀯𑀲𑁂𑀦 𑀘𑁂𑀢𑀁 𑀯𑀼𑀢𑁆𑀢𑀁, 𑀅𑀦𑀺𑀘𑁆𑀘𑀸𑀤𑀺𑀲𑀫𑁆𑀫𑀲𑀦𑀯𑀲𑁂𑀦 𑀯𑀺𑀤𑀺𑀢𑀸 𑀧𑀼𑀩𑁆𑀩𑀪𑀸𑀕𑁂 𑀲𑀫𑁆𑀫𑀲𑀦𑀓𑀸𑀮𑁂 𑀉𑀧𑀝𑁆𑀞𑀳𑀦𑁆𑀢𑀺. 𑀧𑀭𑀺𑀕𑁆𑀕𑀳𑀺𑀢𑁂𑀲𑀽𑀢𑀺 𑀧𑀭𑀺𑀚𑀸𑀦𑀦𑀯𑀲𑁂𑀦 𑀧𑀭𑀺𑀘𑁆𑀙𑀺𑀚𑁆𑀚 𑀕𑀳𑀺𑀢𑁂𑀲𑀼. ‘‘𑀯𑁂𑀤𑀦𑀸 𑀢𑀡𑁆𑀳𑀸𑀧𑀧𑀜𑁆𑀘𑀲𑁆𑀲, 𑀯𑀺𑀢𑀓𑁆𑀓𑁄 𑀫𑀸𑀦𑀧𑀧𑀜𑁆𑀘𑀲𑁆𑀲, 𑀲𑀜𑁆𑀜𑀸 𑀤𑀺𑀝𑁆𑀞𑀺𑀧𑀧𑀜𑁆𑀘𑀲𑁆𑀲 𑀫𑀽𑀮𑀯𑀲𑁂𑀦 𑀲𑀫𑁆𑀫𑀲𑀦𑀁 𑀯𑀼𑀢𑁆𑀢𑀸’’𑀢𑀺 𑀯𑀤𑀦𑁆𑀢𑀺. ‘‘𑀯𑁂𑀤𑀦𑀸𑀯𑀺𑀢𑀓𑁆𑀓𑀲𑀜𑁆𑀜𑀸 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀺𑀧𑀧𑀜𑁆𑀘𑀸𑀦𑀁 𑀫𑀽𑀮𑀤𑀲𑁆𑀲𑀦𑀯𑀲𑁂𑀦𑀸’’𑀢𑀺 𑀅𑀧𑀭𑁂.

𑀅𑀦𑀦𑀼𑀲𑁆𑀲𑀼𑀢𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀅𑀫𑀢𑀯𑀕𑁆𑀕𑁄

𑁨. 𑀲𑀫𑀼𑀤𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁦𑁮. 𑀲𑀸𑀭𑀫𑁆𑀫𑀡𑀲𑀢𑀺𑀧𑀝𑁆𑀞𑀸𑀦𑀸𑀢𑀺 𑀆𑀭𑀫𑁆𑀫𑀡𑀮𑀓𑁆𑀔𑀺𑀢𑀸 𑀲𑀢𑀺𑀧𑀝𑁆𑀞𑀸𑀦𑀸 𑀓𑀣𑀺𑀢𑀸, 𑀦 𑀲𑀢𑀺𑀮𑀓𑁆𑀔𑀡𑀸.

𑁪. 𑀲𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁧𑁦. 𑀲𑀼𑀤𑁆𑀥𑀺𑀓𑀁 𑀓𑀢𑁆𑀯𑀸 𑀯𑀺𑀲𑀼𑀁 𑀯𑀺𑀲𑀼𑀁 𑀓𑀢𑁆𑀯𑀸. 𑀢𑀣𑀸 𑀘 𑀯𑀼𑀢𑁆𑀢𑀁 𑀧𑀸𑀴𑀺𑀬𑀁 ‘‘𑀓𑀸𑀬𑁂 𑀯𑀸 𑀪𑀺𑀓𑁆𑀔𑀽’’𑀢𑀺.

𑁬. 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁧𑁨. 𑀚𑁂𑀝𑁆𑀞𑀓𑀲𑀻𑀮𑀦𑁆𑀢𑀺 𑀧𑀥𑀸𑀦𑀓𑀲𑀻𑀮𑀁. 𑀲𑀻𑀮𑀕𑁆𑀕𑀳𑀡𑀜𑁆𑀳𑀺 𑀧𑀸𑀴𑀺𑀬𑀁 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀯𑀲𑁂𑀦𑁂𑀯 𑀆𑀕𑀢𑀁. 𑀢𑁂𑀦𑀸𑀳 ‘‘𑀢𑀺𑀧𑀺𑀝𑀓𑀘𑀽𑀴𑀦𑀸𑀕𑀢𑁆𑀣𑁂𑀭𑁄 𑀧𑀦𑀸’’𑀢𑀺𑀆𑀤𑀺. 𑀢𑀢𑁆𑀣 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑁄𑀯 𑀲𑀻𑀮𑀦𑁆𑀢𑀺 𑀅𑀯𑀥𑀸𑀭𑀡𑀁 𑀇𑀢𑀭𑁂𑀲𑀁 𑀢𑀺𑀡𑁆𑀡𑀁 𑀏𑀓𑀤𑁂𑀲𑁂𑀦 𑀧𑀸𑀢𑀺𑀫𑁄𑀓𑁆𑀔𑀦𑁆𑀢𑁄𑀕𑀥𑀪𑀸𑀯𑀁 𑀤𑀻𑀧𑁂𑀢𑀺. 𑀢𑀣𑀸 𑀳𑀺 𑀅𑀦𑁄𑀮𑁄𑀓𑀺𑀬𑁄𑀮𑁄𑀓𑀦𑁂 𑀆𑀚𑀻𑀯𑀳𑁂𑀢𑀼 𑀘 𑀙𑀲𑀺𑀓𑁆𑀔𑀸𑀧𑀤𑀯𑀻𑀢𑀺𑀓𑁆𑀓𑀫𑀦𑁂 𑀕𑀺𑀮𑀸𑀦𑀧𑀘𑁆𑀘𑀬𑀲𑁆𑀲 𑀅𑀧𑁆𑀧𑀘𑁆𑀘𑀯𑁂𑀓𑁆𑀔𑀺𑀢𑀧𑀭𑀺𑀪𑁄𑀕𑁂 𑀘 𑀆𑀧𑀢𑁆𑀢𑀺 𑀯𑀺𑀳𑀺𑀢𑀸𑀢𑀺. 𑀢𑀻𑀡𑀻𑀢𑀺 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀸𑀤𑀻𑀦𑀺. 𑀲𑀻𑀮𑀦𑁆𑀢𑀺 𑀯𑀼𑀢𑁆𑀢𑀝𑁆𑀞𑀸𑀦𑀁 𑀦𑀸𑀫 𑀦𑀢𑁆𑀣𑀻𑀢𑀺 𑀲𑀻𑀮𑀧𑀭𑀺𑀬𑀸𑀬𑁂𑀦 𑀢𑁂𑀲𑀁 𑀓𑀢𑁆𑀣𑀘𑀺 𑀲𑀼𑀢𑁆𑀢𑁂 𑀕𑀳𑀺𑀢𑀝𑁆𑀞𑀸𑀦𑀁 𑀦𑀸𑀫 𑀦𑀢𑁆𑀣𑀻𑀢𑀺 𑀦𑀺𑀧𑁆𑀧𑀭𑀺𑀬𑀸𑀬𑀲𑀻𑀮𑀢𑀁 𑀢𑁂𑀲𑀁 𑀧𑀝𑀺𑀓𑁆𑀔𑀺𑀧𑀢𑀺. 𑀙𑀤𑁆𑀯𑀸𑀭𑀭𑀓𑁆𑀔𑀡𑀫𑀢𑁆𑀢𑀫𑁂𑀯𑀸𑀢𑀺 𑀢𑀲𑁆𑀲 𑀲𑀮𑁆𑀮𑀳𑀼𑀓𑀢𑀫𑀸𑀳 𑀘𑀺𑀢𑁆𑀢𑀸𑀥𑀺𑀝𑁆𑀞𑀸𑀦𑀫𑀢𑁆𑀢𑁂𑀦 𑀧𑀝𑀺𑀧𑀸𑀓𑀢𑀺𑀓𑀪𑀸𑀯𑀧𑁆𑀧𑀢𑁆𑀢𑀺𑀢𑁄. 𑀇𑀢𑀭𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀧𑀘𑁆𑀘𑀬𑀼𑀧𑁆𑀧𑀢𑁆𑀢𑀺𑀫𑀢𑁆𑀢𑀓𑀦𑁆𑀢𑀺 𑀨𑀮𑁂𑀦 𑀳𑁂𑀢𑀼𑀁 𑀤𑀲𑁆𑀲𑁂𑀢𑀺. 𑀉𑀧𑁆𑀧𑀸𑀤𑀦𑀳𑁂𑀢𑀼𑀓𑀸 𑀳𑀺 𑀧𑀘𑁆𑀘𑀬𑀸𑀦𑀁 𑀉𑀧𑁆𑀧𑀢𑁆𑀢𑀺. 𑀇𑀤𑀫𑀢𑁆𑀣𑀦𑁆𑀢𑀺 𑀇𑀤𑀁 𑀧𑀬𑁄𑀚𑀦𑀁 𑀇𑀫𑀲𑁆𑀲 𑀧𑀘𑁆𑀘𑀬𑀲𑁆𑀲 𑀧𑀭𑀺𑀪𑀼𑀜𑁆𑀚𑀦𑁂𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦𑀺𑀧𑁆𑀧𑀭𑀺𑀬𑀸𑀬𑁂𑀦𑀸𑀢𑀺 𑀇𑀫𑀺𑀦𑀸 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀸𑀤𑀻𑀦𑀺 𑀢𑀻𑀡𑀺 𑀧𑀥𑀸𑀦𑀲𑀻𑀮𑀲𑁆𑀲 𑀧𑀭𑀺𑀧𑀸𑀮𑀦𑀧𑀭𑀺𑀲𑁄𑀥𑀦𑀯𑀲𑁂𑀦 𑀧𑀯𑀢𑁆𑀢𑀺𑀬𑀸 𑀧𑀭𑀺𑀬𑀸𑀬𑀲𑀻𑀮𑀸𑀦𑀺 𑀦𑀸𑀫𑀸𑀢𑀺 𑀤𑀲𑁆𑀲𑁂𑀢𑀺. 𑀇𑀤𑀸𑀦𑀺 𑀧𑀸𑀢𑀺𑀫𑁄𑀓𑁆𑀔𑀲𑀻𑀮𑀲𑁆𑀲𑁂𑀯 𑀧𑀥𑀸𑀦𑀪𑀸𑀯𑀁 𑀩𑁆𑀬𑀢𑀺𑀭𑁂𑀓𑀢𑁄 𑀅𑀦𑁆𑀯𑀬𑀢𑁄 𑀘 𑀉𑀧𑀫𑀸𑀬 𑀯𑀺𑀪𑀸𑀯𑁂𑀢𑀼𑀁 ‘‘𑀬𑀲𑁆𑀲𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑁄𑀢𑀺 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑁄. 𑀲𑁂𑀲𑀸𑀦𑀺 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀸𑀤𑀻𑀦𑀺. 𑀧𑀸𑀢𑀺𑀫𑁄𑀓𑁆𑀔𑀲𑀤𑁆𑀤𑀲𑁆𑀲 𑀅𑀢𑁆𑀣𑁄 𑀧𑀦 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀲𑀁𑀯𑀡𑁆𑀡𑀦𑀸𑀤𑀻𑀲𑀼 𑀯𑀺𑀢𑁆𑀣𑀸𑀭𑀺𑀢𑁄, 𑀢𑀲𑁆𑀫𑀸 𑀢𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄.

𑀆𑀘𑀸𑀭𑁂𑀦 𑀘 𑀕𑁄𑀘𑀭𑁂𑀦 𑀘 𑀲𑀫𑁆𑀧𑀦𑁆𑀦𑁄𑀢𑀺 𑀓𑀸𑀬𑀺𑀓𑀘𑁂𑀢𑀲𑀺𑀓𑀅𑀯𑀻𑀢𑀺𑀓𑁆𑀓𑀫𑀲𑀗𑁆𑀔𑀸𑀢𑁂𑀦 𑀆𑀘𑀸𑀭𑁂𑀦 𑀘 𑀦𑀯𑁂𑀲𑀺𑀬𑀸𑀤𑀺𑀕𑁄𑀘𑀭𑀢𑀸𑀤𑀺𑀲𑀗𑁆𑀔𑀸𑀢𑁂𑀦 𑀕𑁄𑀘𑀭𑁂𑀦 𑀘 𑀲𑀫𑁆𑀧𑀦𑁆𑀦𑁄, 𑀲𑀫𑁆𑀧𑀦𑁆𑀦𑀆𑀘𑀸𑀭𑀕𑁄𑀘𑀭𑁄𑀢𑀺 𑀅𑀢𑁆𑀣𑁄. 𑀅𑀧𑁆𑀧𑀫𑀢𑁆𑀢𑀓𑁂𑀲𑀽𑀢𑀺 𑀅𑀢𑀺𑀧𑀭𑀺𑀢𑁆𑀢𑀓𑁂𑀲𑀼 𑀅𑀦𑀸𑀧𑀢𑁆𑀢𑀺𑀕𑀫𑀦𑀻𑀬𑁂𑀲𑀼. ‘‘𑀤𑀼𑀓𑁆𑀓𑀝𑀤𑀼𑀩𑁆𑀪𑀸𑀲𑀺𑀢𑀫𑀢𑁆𑀢𑁂𑀲𑀽’’𑀢𑀺 𑀅𑀧𑀭𑁂. 𑀯𑀚𑁆𑀚𑁂𑀲𑀽𑀢𑀺 𑀅𑀓𑀭𑀡𑀻𑀬𑁂𑀲𑀼 𑀕𑀸𑀭𑀬𑁆𑀳𑁂𑀲𑀼. 𑀢𑁂 𑀧𑀦 𑀏𑀓𑀦𑁆𑀢𑀢𑁄 𑀅𑀓𑀼𑀲𑀮𑀸 𑀳𑁄𑀦𑁆𑀢𑀻𑀢𑀺 𑀆𑀳 𑁋 ‘‘𑀅𑀓𑀼𑀲𑀮𑀥𑀫𑁆𑀫𑁂𑀲𑀽’’𑀢𑀺. 𑀪𑀬𑀤𑀲𑁆𑀲𑀸𑀯𑀻𑀢𑀺 𑀪𑀬𑀢𑁄 𑀤𑀲𑁆𑀲𑀦𑀲𑀻𑀮𑁄, 𑀧𑀭𑀫𑀸𑀡𑀼𑀫𑀢𑁆𑀢𑀫𑁆𑀧𑀺 𑀯𑀚𑁆𑀚𑀁 𑀲𑀺𑀦𑁂𑀭𑀼𑀧𑁆𑀧𑀫𑀸𑀡𑀁 𑀯𑀺𑀬 𑀓𑀢𑁆𑀯𑀸 𑀤𑀲𑁆𑀲𑀦𑀲𑀻𑀮𑁄. 𑀲𑀫𑁆𑀫𑀸 𑀆𑀤𑀺𑀬𑀺𑀢𑁆𑀯𑀸𑀢𑀺 𑀲𑀫𑁆𑀫𑀤𑁂𑀯 𑀲𑀓𑁆𑀓𑀘𑁆𑀘𑀁 𑀲𑀩𑁆𑀩𑀲𑁄 𑀘 𑀆𑀤𑀺𑀬𑀺𑀢𑁆𑀯𑀸. 𑀲𑀺𑀓𑁆𑀔𑀸𑀧𑀤𑁂𑀲𑀽𑀢𑀺 𑀦𑀺𑀤𑁆𑀥𑀸𑀭𑀡𑁂 𑀪𑀼𑀫𑁆𑀫𑀦𑁆𑀢𑀺 𑀲𑀫𑀼𑀤𑀸𑀬𑀢𑁄 𑀅𑀯𑀬𑀯𑀦𑀺𑀤𑁆𑀥𑀸𑀭𑀡𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀺𑀓𑁆𑀔𑀸𑀧𑀤𑁂𑀲𑀼 𑀢𑀁 𑀢𑀁 𑀲𑀺𑀓𑁆𑀔𑀸𑀧𑀤’’𑀦𑁆𑀢𑀺𑀆𑀤𑀺𑀫𑀸𑀳. 𑀲𑀺𑀓𑁆𑀔𑀸𑀧𑀤𑀁 𑀲𑀫𑀸𑀤𑀸𑀢𑀩𑁆𑀩𑀁 𑀲𑀺𑀓𑁆𑀔𑀺𑀢𑀩𑁆𑀩𑀜𑁆𑀘𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀺𑀓𑁆𑀔𑀸𑀢𑀺 𑀅𑀥𑀺𑀲𑀻𑀮𑀲𑀺𑀓𑁆𑀔𑀸. 𑀧𑀼𑀩𑁆𑀩𑁂 𑀧𑀤-𑀲𑀤𑁆𑀤𑁄 𑀅𑀥𑀺𑀝𑁆𑀞𑀸𑀦𑀝𑁆𑀞𑁄, 𑀇𑀥 𑀪𑀸𑀕𑀢𑁆𑀣𑁄𑀢𑀺 𑀤𑀝𑁆𑀞𑀩𑁆𑀩𑀦𑁆𑀢𑀺 𑀆𑀳 𑁋 ‘‘𑀲𑀺𑀓𑁆𑀔𑀸𑀓𑁄𑀝𑁆𑀞𑀸𑀲𑁂𑀲𑀽’’𑀢𑀺. 𑀫𑀽𑀮𑀧𑀜𑁆𑀜𑀢𑁆𑀢𑀺𑀅𑀦𑀼𑀧𑀜𑁆𑀜𑀢𑁆𑀢𑀺𑀆𑀤𑀺𑀪𑁂𑀤𑀁 𑀬𑀁𑀓𑀺𑀜𑁆𑀘𑀺 𑀲𑀺𑀓𑁆𑀔𑀺𑀢𑀩𑁆𑀩𑀁 𑀧𑀽𑀭𑁂𑀢𑀩𑁆𑀩𑀁 𑀲𑀻𑀮𑀁, 𑀢𑀁 𑀧𑀦 𑀤𑁆𑀯𑀸𑀭𑀯𑀲𑁂𑀦 𑀤𑀼𑀯𑀺𑀥𑀫𑁂𑀯𑀸𑀢𑀺 𑀆𑀳 𑁋 ‘‘𑀓𑀸𑀬𑀺𑀓𑀁 𑀯𑀸 𑀯𑀸𑀘𑀲𑀺𑀓𑀁 𑀯𑀸’’𑀢𑀺. 𑀇𑀫𑀲𑁆𑀫𑀺𑀁 𑀅𑀢𑁆𑀣𑀯𑀺𑀓𑀧𑁆𑀧𑁂 𑀲𑀺𑀓𑁆𑀔𑀸𑀧𑀤𑁂𑀲𑀽𑀢𑀺 𑀆𑀥𑀸𑀭𑁂 𑀪𑀼𑀫𑁆𑀫𑀁 𑀲𑀺𑀓𑁆𑀔𑀸𑀪𑀸𑀕𑁂𑀲𑀼 𑀓𑀲𑁆𑀲𑀘𑀺 𑀯𑀺𑀲𑀼𑀁 𑀅𑀕𑁆𑀕𑀳𑀡𑀢𑁄. 𑀢𑁂𑀦𑀸𑀳 𑁋 ‘‘𑀢𑀁 𑀢𑀁 𑀲𑀩𑁆𑀩’’𑀦𑁆𑀢𑀺. ‘‘𑀢𑀢𑁄 𑀢𑁆𑀯𑀁 𑀪𑀺𑀓𑁆𑀔𑀼 𑀲𑀻𑀮𑀁 𑀦𑀺𑀲𑁆𑀲𑀸𑀬𑀸’’𑀢𑀺 𑀯𑀘𑀦𑀢𑁄 𑀅𑀦𑀪𑀺𑀚𑁆𑀛𑀸 𑀅𑀩𑁆𑀬𑀸𑀧𑀸𑀤𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑁄𑀧𑀺 𑀲𑀻𑀮𑀦𑁆𑀢𑀺 𑀯𑀼𑀢𑁆𑀢𑀸, 𑀢𑀲𑁆𑀫𑀸 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 ‘‘𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀻𑀮𑀫𑁂𑀯 𑀓𑀣𑀺𑀢’’𑀦𑁆𑀢𑀺 𑀯𑀼𑀢𑁆𑀢𑀁.

𑁭. 𑀤𑀼𑀘𑁆𑀘𑀭𑀺𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁧𑁩. 𑀏𑀢𑁆𑀣𑀸𑀧𑀺 𑀫𑀦𑁄𑀲𑀼𑀘𑀭𑀺𑀢𑀁 𑀲𑀻𑀮𑀁 𑀦𑀸𑀫𑀸𑀢𑀺 𑀤𑀲𑁆𑀲𑁂𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀧𑀘𑁆𑀙𑀺𑀫𑀸𑀧𑀺 𑀢𑀬𑁄’’𑀢𑀺. 𑀅𑀦𑀪𑀺𑀚𑁆𑀛𑀸𑀅𑀩𑁆𑀬𑀸𑀧𑀸𑀤𑀲𑀫𑁆𑀫𑀸𑀤𑀺𑀝𑁆𑀞𑀺𑀥𑀫𑁆𑀫𑀸 𑀲𑀻𑀮𑀁 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸 𑀓𑀸𑀬𑀯𑀘𑀻𑀲𑀼𑀘𑀭𑀺𑀢𑁂𑀳𑀺 𑀲𑀤𑁆𑀥𑀺𑀁 𑀫𑀦𑁄𑀲𑀼𑀘𑀭𑀺𑀢𑀫𑁆𑀧𑀺 𑀯𑀢𑁆𑀯𑀸 ‘‘𑀢𑀢𑁄 𑀢𑁆𑀯𑀁 𑀪𑀺𑀓𑁆𑀔𑀼 𑀲𑀻𑀮𑀁 𑀦𑀺𑀲𑁆𑀲𑀸𑀬 𑀲𑀻𑀮𑁂 𑀧𑀢𑀺𑀝𑁆𑀞𑀸𑀬𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯. 𑀙𑀝𑁆𑀞𑀲𑀢𑁆𑀢𑀫𑁂𑀲𑀽𑀢𑀺 𑀙𑀝𑁆𑀞𑀲𑀢𑁆𑀢𑀫𑀯𑀕𑁆𑀕𑁂𑀲𑀼 𑀅𑀧𑀼𑀩𑁆𑀩𑀁 𑀦𑀢𑁆𑀣𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄’’𑀢𑀺. 𑀯𑀕𑁆𑀕𑀧𑁂𑀬𑁆𑀬𑀸𑀮𑀢𑁄 𑀧𑀦 𑀇𑀫𑀲𑁆𑀫𑀺𑀁 𑀲𑀢𑀺𑀧𑀝𑁆𑀞𑀸𑀦𑀲𑀁𑀬𑀼𑀢𑁆𑀢𑁂 𑀓𑀢𑀺𑀧𑀬𑀯𑀕𑁆𑀕𑀸 𑀲𑀗𑁆𑀕𑀳𑀁 𑀆𑀭𑀽𑀴𑁆𑀳𑀸, 𑀢𑀣𑀸𑀧𑀺 𑀢𑁂𑀲𑀁 𑀅𑀢𑁆𑀣𑀯𑀺𑀲𑁂𑀲𑀸𑀪𑀸𑀯𑀢𑁄 𑀏𑀓𑀘𑁆𑀘𑁂𑀲𑀼 𑀧𑁄𑀢𑁆𑀣𑀓𑁂𑀲𑀼 𑀫𑀼𑀔𑀫𑀢𑁆𑀢𑀁 𑀤𑀲𑁆𑀲𑁂𑀢𑁆𑀯𑀸 𑀲𑀁𑀔𑀺𑀢𑁆𑀢𑀸, 𑀏𑀓𑀘𑁆𑀘𑁂𑀲𑀼 𑀅𑀢𑀺𑀲𑀁𑀔𑀺𑀢𑁆𑀢𑀸𑀯, 𑀢𑁂 𑀲𑀗𑁆𑀔𑁂𑀧𑀯𑀲𑁂𑀦 𑀤𑁆𑀯𑁂 𑀓𑀢𑁆𑀯𑀸 ‘‘𑀙𑀝𑁆𑀞𑀲𑀢𑁆𑀢𑀫𑁂𑀲𑀽’’𑀢𑀺 𑀯𑀼𑀢𑁆𑀢𑀁.

𑀅𑀫𑀢𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀢𑀺𑀧𑀝𑁆𑀞𑀸𑀦𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.