𑁪. 𑀇𑀦𑁆𑀤𑁆𑀭𑀺𑀬𑀲𑀁𑀬𑀼𑀢𑁆𑀢𑀁

𑁧. 𑀲𑀼𑀤𑁆𑀥𑀺𑀓𑀯𑀕𑁆𑀕𑁄

𑁧. 𑀲𑀼𑀤𑁆𑀥𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁭𑁧. 𑀘𑀢𑀼𑀪𑀽𑀫𑀓 …𑀧𑁂… 𑀮𑀩𑁆𑀪𑀦𑁆𑀢𑀺 𑀓𑀼𑀲𑀮𑀸𑀩𑁆𑀬𑀸𑀓𑀢𑀪𑀸𑀯𑀢𑁄 𑀢𑁂𑀲𑀁 𑀢𑀺𑀡𑁆𑀡𑀁 𑀇𑀦𑁆𑀤𑁆𑀭𑀺𑀬𑀸𑀦𑀁. 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀸𑀦𑀺…𑀧𑁂… 𑀲𑀩𑁆𑀩𑀢𑁆𑀣 𑀮𑀩𑁆𑀪𑀦𑁆𑀢𑀺 𑀓𑀼𑀲𑀮𑀢𑁆𑀢𑀺𑀓𑀲𑀸𑀥𑀸𑀭𑀡𑀢𑁆𑀢𑀸. 𑀘𑀢𑀼𑀪𑀽𑀫𑀓 …𑀧𑁂… 𑀯𑀲𑁂𑀦𑀸𑀢𑀺 𑀘𑀢𑀼𑀪𑀽𑀫𑀓𑀥𑀫𑁆𑀫𑀧𑀭𑀺𑀘𑁆𑀙𑁂𑀤𑀯𑀲𑁂𑀦 𑀘𑁂𑀯 𑀓𑀼𑀲𑀮𑀸𑀤𑀻𑀳𑀺 𑀲𑀩𑁆𑀩𑀲𑀗𑁆𑀕𑀸𑀳𑀓𑀥𑀫𑁆𑀫𑀧𑀭𑀺𑀘𑁆𑀙𑁂𑀤𑀯𑀲𑁂𑀦 𑀘 𑀯𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄.

𑀤𑀼𑀢𑀺𑀬𑀲𑀫𑀡𑀩𑁆𑀭𑀸𑀳𑁆𑀫𑀡𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁭𑁭. 𑀤𑀼𑀓𑁆𑀔𑀲𑀘𑁆𑀘𑀯𑀲𑁂𑀦𑀸𑀢𑀺 𑀤𑀼𑀓𑁆𑀔𑀲𑀘𑁆𑀘𑀪𑀸𑀯𑁂𑀦 𑀦 𑀧𑀚𑀸𑀦𑀦𑁆𑀢𑀺. 𑀢𑀜𑁆𑀳𑀺 𑀧𑀭𑀺𑀜𑁆𑀜𑁂𑀬𑁆𑀬𑀢𑀸𑀬 𑀤𑀼𑀓𑁆𑀔𑀲𑀘𑁆𑀘𑀲𑀗𑁆𑀕𑀳𑀁. 𑀲𑀫𑀼𑀤𑀬𑀲𑀘𑁆𑀘𑀯𑀲𑁂𑀦𑀸𑀢𑀺 𑀢𑀡𑁆𑀳𑀸𑀯𑀺𑀚𑁆𑀚𑀸𑀤𑀺𑀁 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀲𑁆𑀲 𑀲𑀫𑀼𑀤𑀬𑀲𑀘𑁆𑀘𑀪𑀸𑀯𑁂𑀦 𑀦 𑀧𑀚𑀸𑀦𑀦𑁆𑀢𑀺. 𑀦𑀺𑀭𑁄𑀥𑀦𑁆𑀢𑀺 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀲𑁆𑀲 𑀅𑀦𑀼𑀧𑀸𑀤𑀸𑀬 𑀦𑀺𑀭𑁄𑀥𑀦𑀺𑀫𑀺𑀢𑁆𑀢𑀁 𑀦𑀺𑀩𑁆𑀩𑀸𑀦𑀁. 𑀧𑀝𑀺𑀧𑀤𑀦𑁆𑀢𑀺 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀦𑀺𑀭𑁄𑀥𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀁 𑀅𑀭𑀺𑀬𑀫𑀕𑁆𑀕𑀁. 𑀲𑁂𑀲𑁂𑀲𑀽𑀢𑀺 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀸𑀤𑀻𑀲𑀼.

𑀲𑀼𑀓𑁆𑀓𑀧𑀓𑁆𑀔𑁂𑀢𑀺 ‘‘𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀧𑀚𑀸𑀦𑀦𑁆𑀢𑀻’’𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑁂 𑀅𑀦𑀯𑀚𑁆𑀚𑀧𑀓𑁆𑀔𑁂. 𑀅𑀥𑀺𑀫𑁄𑀓𑁆𑀔𑀯𑀲𑁂𑀦 𑀆𑀯𑀚𑁆𑀚𑀦𑀲𑀫𑀼𑀤𑀬𑀸𑀢𑀺 ‘‘𑀅𑀢𑁆𑀣𑀺 𑀤𑀺𑀦𑁆𑀦’’𑀦𑁆𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀧𑀼𑀩𑁆𑀩𑀪𑀸𑀕𑀪𑀽𑀢𑀲𑀤𑁆𑀥𑀸𑀥𑀺𑀫𑁄𑀓𑁆𑀔𑀯𑀲𑁂𑀦 𑀆𑀯𑀚𑁆𑀚𑀦𑀼𑀧𑁆𑀧𑀢𑁆𑀢𑀺𑀬𑀸. 𑀢𑀲𑁆𑀫𑀸 𑀧𑀞𑀫𑀼𑀧𑁆𑀧𑀦𑁆𑀦𑀸 𑀲𑀤𑁆𑀥𑀸 𑀏𑀯 𑀳𑁂𑀢𑁆𑀣 ‘‘𑀆𑀯𑀚𑁆𑀚𑀦’’𑀦𑁆𑀢𑀺 𑀯𑀼𑀢𑁆𑀢𑀸, 𑀦 𑀫𑀦𑁄𑀤𑁆𑀯𑀸𑀭𑀸𑀯𑀚𑁆𑀚𑀦𑀁. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀢𑀲𑁆𑀫𑀸 𑀧𑀞𑀫𑀼𑀧𑁆𑀧𑀦𑁆𑀦𑀸 𑀆𑀯𑀚𑁆𑀚𑀦𑀸 𑀧𑀕𑁆𑀕𑀳𑀼𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀸𑀦𑀁 𑀢𑀺𑀓𑁆𑀔𑀸𑀦𑀁 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀸𑀤𑀻𑀦𑀁 𑀧𑀞𑀫𑀼𑀧𑁆𑀧𑀢𑁆𑀢𑀺𑀬𑀸 𑀆𑀯𑀚𑁆𑀚𑀦𑀧𑀭𑀺𑀬𑀸𑀬𑁂𑀦 𑀯𑀼𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀤𑀼𑀩𑁆𑀩𑀮𑀸 𑀳𑀺 𑀧𑀞𑀫𑀼𑀧𑁆𑀧𑀦𑁆𑀦𑀸 𑀧𑀕𑁆𑀕𑀳𑀸𑀪𑀸𑀯𑀢𑁄 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀸𑀤𑀻𑀦𑀁 𑀲𑀫𑀼𑀤𑀬𑁄𑀢𑀺 𑀩𑀮𑀯𑀪𑀸𑀯𑀧𑁆𑀧𑀢𑁆𑀢𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀸𑀤𑀺𑀓𑀲𑁆𑀲 𑀆𑀯𑀚𑁆𑀚𑀦𑀝𑁆𑀞𑀸𑀦𑀺𑀬𑀸𑀦𑀺 𑀳𑁄𑀦𑁆𑀢𑀻𑀢𑀺 𑀢𑁂𑀲𑀁 𑀲𑀫𑀼𑀤𑀬𑁄𑀢𑀺 𑀯𑀼𑀢𑁆𑀢𑀸, 𑀧𑀼𑀩𑁆𑀩𑁂 𑀅𑀥𑀺𑀫𑀼𑀘𑁆𑀘𑀦𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀲𑁆𑀲 𑀆𑀯𑀚𑁆𑀚𑀦𑀲𑁆𑀲 𑀲𑀫𑀼𑀤𑀬𑀸𑀢𑀺 𑀅𑀢𑁆𑀣𑁄. 𑀧𑀼𑀦 𑀙𑀦𑁆𑀤𑀯𑀲𑁂𑀦𑀸𑀢𑀺 𑀓𑀢𑁆𑀢𑀼𑀓𑀸𑀫𑀢𑀸𑀓𑀼𑀲𑀮𑀘𑁆𑀙𑀦𑁆𑀤𑀯𑀲𑁂𑀦 𑀲𑀤𑁆𑀥𑀸𑀤𑀻𑀦𑀁 𑀉𑀧𑁆𑀧𑀸𑀤𑁂𑀢𑀼𑀓𑀸𑀫𑀢𑀸𑀓𑀸𑀭𑀧𑁆𑀧𑀯𑀢𑁆𑀢𑀲𑁆𑀲 𑀙𑀦𑁆𑀤𑀲𑁆𑀲 𑀯𑀲𑁂𑀦. 𑀫𑀦𑀲𑀺𑀓𑀸𑀭𑀯𑀲𑁂𑀦 𑀆𑀯𑀚𑁆𑀚𑀦𑀲𑀫𑀼𑀤𑀬𑀸𑀢𑀺 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀲𑁆𑀲 𑀤𑀼𑀩𑁆𑀩𑀮𑀲𑁆𑀲 𑀢𑀲𑁆𑀲 𑀦𑀺𑀩𑁆𑀩𑀢𑁆𑀢𑀓𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀯𑀲𑁂𑀦 𑀆𑀯𑀚𑁆𑀚𑀦𑀲𑁆𑀲 𑀉𑀧𑁆𑀧𑀢𑁆𑀢𑀺𑀬𑀸. 𑀏𑀯𑀫𑁆𑀧𑀻𑀢𑀺 ‘‘𑀅𑀥𑀺𑀫𑁄𑀓𑁆𑀔𑀯𑀲𑁂𑀦𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀸𑀓𑀸𑀭𑁂𑀦𑀧𑀺. 𑀙𑀲𑀼 𑀲𑀼𑀢𑁆𑀢𑁂𑀲𑀽𑀢𑀺 𑀤𑀼𑀢𑀺𑀬𑀢𑁄 𑀧𑀝𑁆𑀞𑀸𑀬 𑀙𑀲𑀼 𑀲𑀼𑀢𑁆𑀢𑁂𑀲𑀼. 𑀘𑀢𑀼𑀲𑀘𑁆𑀘𑀫𑁂𑀯 𑀓𑀣𑀺𑀢𑀁. 𑀅𑀲𑁆𑀲𑀸𑀤𑀕𑁆𑀕𑀳𑀡𑁂𑀦 𑀳𑀺 𑀲𑀫𑀼𑀤𑀬𑀲𑀘𑁆𑀘𑀁, 𑀆𑀤𑀻𑀦𑀯𑀕𑁆𑀕𑀳𑀡𑁂𑀦 𑀤𑀼𑀓𑁆𑀔𑀲𑀘𑁆𑀘𑀁, 𑀦𑀺𑀲𑁆𑀲𑀭𑀡𑀕𑁆𑀕𑀳𑀡𑁂𑀦 𑀦𑀺𑀭𑁄𑀥𑀫𑀕𑁆𑀕𑀲𑀘𑁆𑀘𑀸𑀦𑀺 𑀕𑀳𑀺𑀢𑀸𑀦𑀻𑀢𑀺. 𑀧𑀞𑀫𑀲𑀼𑀢𑁆𑀢𑁂 𑀧𑀦 𑀇𑀦𑁆𑀤𑁆𑀭𑀺𑀬𑀸𑀦𑀁 𑀲𑀭𑀽𑀧𑀤𑀲𑁆𑀲𑀦𑀫𑁂𑀯𑀸𑀢𑀺.

𑁮. 𑀤𑀩𑁆𑀩𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁭𑁮. 𑀲𑁄𑀢𑁄 𑀆𑀧𑀚𑁆𑀚𑀻𑀬𑀢𑀺 𑀏𑀢𑁂𑀦𑀸𑀢𑀺 𑀲𑁄𑀢𑀸𑀧𑀢𑁆𑀢𑀺, 𑀅𑀦𑀸𑀕𑀢𑀁 𑀧𑀢𑀺 𑀧𑀞𑀫𑀫𑀕𑁆𑀕𑁄. 𑀲𑁄𑀢𑁄𑀢𑀺 𑀅𑀭𑀺𑀬𑀫𑀕𑁆𑀕𑀲𑁄𑀢𑁄 𑀤𑀝𑁆𑀞𑀩𑁆𑀩𑁄. 𑀆𑀧𑀚𑁆𑀚𑀻𑀬𑀢𑀻𑀢𑀺𑀆𑀤𑀺𑀢𑁄 𑀧𑀝𑀺𑀧𑀚𑁆𑀚𑀻𑀬𑀢𑀺. 𑀧𑀞𑀫𑀫𑀕𑁆𑀕𑀧𑀝𑀺𑀮𑀸𑀪𑀦𑀺𑀫𑀺𑀢𑁆𑀢𑀸𑀦𑀺 𑀲𑁄𑀢𑀸𑀧𑀦𑁆𑀦𑀲𑁆𑀲 𑀅𑀗𑁆𑀕𑀸𑀦𑀺 𑀇𑀥 ‘‘𑀲𑁄𑀢𑀸𑀧𑀢𑁆𑀢𑀺𑀬𑀗𑁆𑀕𑀸𑀦𑀻’’𑀢𑀺 𑀯𑀼𑀢𑁆𑀢𑀸𑀦𑀺. 𑀢𑀸𑀦𑀺 𑀧𑀦 𑀢𑀻𑀲𑀼 𑀞𑀸𑀦𑁂𑀲𑀼 𑀲𑀤𑁆𑀥𑀸 𑀅𑀭𑀺𑀬𑀓𑀦𑁆𑀢𑀲𑀻𑀮𑀜𑁆𑀘𑀸𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀲𑀯𑀺𑀲𑀬𑁂𑀢𑀺 𑀲𑀓𑀯𑀺𑀲𑀬𑁂. 𑀚𑁂𑀝𑁆𑀞𑀓𑀪𑀸𑀯𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀧𑀥𑀸𑀦𑀪𑀸𑀯𑀤𑀲𑁆𑀲𑀦𑀢𑁆𑀣𑀁. 𑀬𑀢𑁆𑀣 𑀲𑀤𑁆𑀥𑀸𑀤𑀺𑀇𑀦𑁆𑀤𑁆𑀭𑀺𑀬𑀸𑀦𑀁 𑀲𑀸𑀢𑀺𑀲𑀬𑀓𑀺𑀘𑁆𑀘𑀁, 𑀢𑁂𑀲𑀁 𑀓𑀺𑀘𑁆𑀘𑀸𑀢𑀺𑀭𑁂𑀓𑀢𑀁 𑀤𑀲𑁆𑀲𑁂𑀢𑀼𑀦𑁆𑀢𑀺 𑀅𑀢𑁆𑀣𑁄. 𑀇𑀤𑀸𑀦𑀺 𑀢𑀫𑀢𑁆𑀣𑀁 𑀉𑀧𑀫𑀸𑀳𑀺 𑀯𑀺𑀪𑀸𑀯𑁂𑀢𑀼𑀁 ‘‘𑀬𑀣𑀸 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀢𑁆𑀯𑀸𑀢𑀺 𑀅𑀢𑁆𑀢𑀦𑁄 𑀓𑀺𑀘𑁆𑀘𑀸𑀢𑀺𑀭𑁂𑀓𑀝𑁆𑀞𑀸𑀦𑀁 𑀧𑀝𑀺𑀮𑀪𑀺𑀢𑁆𑀯𑀸. 𑀧𑀼𑀩𑁆𑀩𑀗𑁆𑀕𑀫𑀦𑁆𑀢𑀺 𑀲𑀤𑁆𑀤𑀳𑀦𑀓𑀺𑀘𑁆𑀘𑁂𑀲𑀼 𑀧𑀼𑀭𑁂𑀘𑀸𑀭𑀁 𑀥𑁄𑀭𑀬𑁆𑀳𑀁. 𑀲𑁂𑀲𑀸𑀦𑀺 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀸𑀤𑀻𑀦𑀺. 𑀢𑀤𑀦𑁆𑀯𑀬𑀸𑀦𑀻𑀢𑀺 𑀢𑀤𑀦𑀼𑀕𑀢𑀸𑀦𑀺 𑀢𑀲𑁆𑀲 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀸𑀤𑀺𑀓𑀲𑁆𑀲 𑀧𑀓𑁆𑀔𑀺𑀓𑀸𑀦𑀺. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀛𑀸𑀦𑀯𑀺𑀫𑁄𑀓𑁆𑀔𑁂𑀢𑀺 𑀛𑀸𑀦𑀲𑀗𑁆𑀔𑀸𑀢𑁂 𑀯𑀺𑀫𑁄𑀓𑁆𑀔𑁂 𑀲𑀫𑀸𑀥𑀺𑀧𑀥𑀸𑀦𑀢𑀸𑀬 𑀛𑀸𑀦𑀸𑀦𑀁. 𑀏𑀯𑀜𑁆𑀘 𑀓𑀢𑁆𑀯𑀸 ‘‘𑀲𑁄𑀢𑀸𑀧𑀢𑁆𑀢𑀺𑀬𑀗𑁆𑀕𑀸𑀦𑀺 𑀧𑀢𑁆𑀯𑀸’’𑀢𑀺 𑀇𑀤𑀜𑁆𑀘 𑀯𑀘𑀦𑀁 𑀲𑀫𑀢𑁆𑀣𑀺𑀢𑀁 𑀳𑁄𑀢𑀺. 𑀲𑀤𑁆𑀥𑀽𑀧𑀦𑀺𑀲𑀜𑁆𑀳𑀺 𑀲𑀻𑀮𑀦𑁆𑀢𑀺. 𑀅𑀭𑀺𑀬𑀲𑀘𑁆𑀘𑀸𑀦𑀺 𑀧𑀢𑁆𑀯𑀸𑀢𑀺 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀅𑀪𑀺𑀲𑀫𑁂𑀢𑀩𑁆𑀩𑀸𑀦𑀺 𑀧𑀸𑀧𑀼𑀡𑀺𑀢𑁆𑀯𑀸.

𑁯-𑁧𑁦. 𑀧𑀞𑀫𑀯𑀺𑀪𑀗𑁆𑀕𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁪𑁭𑁯-𑁪𑁮𑁦. 𑀦𑁂𑀧𑀓𑁆𑀓𑀁 𑀯𑀼𑀘𑁆𑀘𑀢𑀺 𑀧𑀜𑁆𑀜𑀸𑀢𑀺 𑀆𑀳 𑁋 ‘‘𑀧𑀜𑁆𑀜𑀸𑀬𑁂𑀢𑀁 𑀦𑀸𑀫’’𑀦𑁆𑀢𑀺. 𑀦𑀺𑀧𑀸𑀬𑀢𑀺 𑀲𑀁𑀓𑀺𑀮𑁂𑀲𑀥𑀫𑁆𑀫𑁂 𑀯𑀺𑀲𑁄𑀲𑁂𑀢𑀺 𑀦𑀺𑀓𑁆𑀔𑀸𑀫𑁂𑀢𑀻𑀢𑀺 𑀦𑀺𑀧𑀓𑁄, 𑀣𑀺𑀭𑀢𑀺𑀓𑁆𑀔𑀲𑀢𑀺𑀧𑀼𑀕𑁆𑀕𑀮𑁄, 𑀢𑀲𑁆𑀲 𑀪𑀸𑀯𑁄 𑀦𑁂𑀧𑀓𑁆𑀓𑀦𑁆𑀢𑀺 𑀲𑀢𑀺𑀬𑀸𑀧𑀺 𑀦𑁂𑀧𑀓𑁆𑀓𑀪𑀸𑀯𑁄 𑀬𑀼𑀚𑁆𑀚𑀢𑁂𑀯. 𑀏𑀯𑀜𑁆𑀳𑀺 ‘‘𑀲𑀢𑀺𑀦𑁂𑀧𑀓𑁆𑀓𑁂𑀦𑀸’’𑀢𑀺 𑀇𑀤𑀁 𑀯𑀘𑀦𑀁 𑀲𑀫𑀢𑁆𑀣𑀺𑀢𑀁 𑀳𑁄𑀢𑀺, 𑀲𑀢𑀺𑀬𑀸 𑀘 𑀦𑁂𑀧𑀓𑁆𑀓𑁂𑀦𑀸𑀢𑀺 𑀏𑀯𑀁 𑀯𑀼𑀘𑁆𑀘𑀫𑀸𑀦𑁂𑀦 𑀲𑀢𑀺𑀦𑀺𑀤𑁆𑀤𑁂𑀲𑁄 𑀦𑀸𑀫 𑀓𑀢𑁄 𑀳𑁄𑀢𑀺𑀬𑁂𑀯. 𑀅𑀲𑀼𑀓𑀁 𑀦𑀸𑀫 𑀲𑀼𑀢𑁆𑀢𑀁 𑀯𑀸 𑀓𑀫𑁆𑀫𑀝𑁆𑀞𑀸𑀦𑀁 𑀯𑀸 𑀫𑁂 𑀪𑀸𑀲𑀺𑀢𑀦𑁆𑀢𑀺. 𑀯𑁄𑀲𑁆𑀲𑀚𑁆𑀚𑀻𑀬𑀢𑀺 𑀲𑀗𑁆𑀔𑀸𑀭𑀕𑀢𑀁 𑀏𑀢𑀲𑁆𑀫𑀺𑀁 𑀅𑀥𑀺𑀕𑀢𑁂𑀢𑀺 𑀯𑁄𑀲𑁆𑀲𑀕𑁆𑀕𑁄, 𑀦𑀺𑀩𑁆𑀩𑀸𑀦𑀁. 𑀢𑀁 𑀆𑀭𑀫𑁆𑀫𑀡𑀁 𑀓𑀭𑀺𑀢𑁆𑀯𑀸𑀢𑀺 𑀆𑀳 𑁋 ‘‘𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀁 𑀓𑀢𑁆𑀯𑀸’’𑀢𑀺. 𑀕𑀘𑁆𑀙𑀦𑁆𑀢𑀺𑀬𑀸𑀢𑀺 𑀲𑀗𑁆𑀔𑀸𑀭𑀸𑀦𑀁 𑀉𑀤𑀬𑀜𑁆𑀘 𑀯𑀬𑀜𑁆𑀘 𑀉𑀤𑀬𑀩𑁆𑀩𑀬𑀁 𑀕𑀘𑁆𑀙𑀦𑁆𑀢𑀺𑀬𑀸 𑀩𑀼𑀚𑁆𑀛𑀦𑁆𑀢𑀺𑀬𑀸. 𑀢𑁂𑀦𑀸𑀳 ‘‘𑀉𑀤𑀬𑀩𑁆𑀩𑀬𑀧𑀭𑀺𑀕𑁆𑀕𑀸𑀳𑀺𑀓𑀸𑀬𑀸’’𑀢𑀺. 𑀲𑀤𑁆𑀥𑀸𑀲𑀢𑀺𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀸𑀦𑀺 𑀧𑀼𑀩𑁆𑀩𑀪𑀸𑀕𑀸𑀦𑀺 ‘‘𑀇𑀢𑀺𑀧𑀺 𑀲𑁄 𑀪𑀕𑀯𑀸 𑀅𑀭𑀳𑀁, 𑀘𑀺𑀭𑀓𑀢𑀫𑁆𑀧𑀺 𑀘𑀺𑀭𑀪𑀸𑀲𑀺𑀢𑀫𑁆𑀧𑀺 𑀲𑀭𑀺𑀢𑀸 𑀅𑀦𑀼𑀲𑁆𑀲𑀭𑀺𑀢𑀸, 𑀉𑀤𑀬𑀢𑁆𑀣𑀕𑀸𑀫𑀺𑀦𑀺𑀬𑀸 𑀧𑀜𑁆𑀜𑀸𑀬𑀸’’𑀢𑀺 𑀘 𑀯𑀼𑀢𑁆𑀢𑀢𑁆𑀢𑀸. ‘‘𑀆𑀭𑀤𑁆𑀥𑀯𑀻𑀭𑀺𑀬𑁄 𑀯𑀺𑀳𑀭𑀢𑀺, 𑀲𑁄 𑀅𑀦𑀼𑀧𑁆𑀧𑀦𑁆𑀦𑀸𑀦’’𑀦𑁆𑀢𑀺𑀆𑀤𑀺𑀦𑀸 𑀘 𑀯𑀼𑀢𑁆𑀢𑀢𑁆𑀢𑀸 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁 𑀫𑀺𑀲𑁆𑀲𑀓𑀁. ‘‘𑀯𑁄𑀲𑁆𑀲𑀕𑁆𑀕𑀸𑀭𑀫𑁆𑀫𑀡𑀁 𑀓𑀭𑀺𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁 𑀦𑀺𑀩𑁆𑀩𑀢𑁆𑀢𑀺𑀢𑀮𑁄𑀓𑀼𑀢𑁆𑀢𑀭𑀫𑁂𑀯. 𑀅𑀬𑀫𑁂𑀯𑀸𑀢𑀺 𑀬𑁆𑀯𑀸𑀬𑀁 𑀦𑀯𑀫𑁂 𑀯𑀼𑀢𑁆𑀢𑁄. 𑀅𑀬𑀫𑁂𑀯 𑀧𑀼𑀩𑁆𑀩𑀪𑀸𑀕𑀫𑀺𑀲𑁆𑀲𑀓𑀮𑁄𑀓𑀼𑀢𑁆𑀢𑀭𑀢𑁆𑀢𑀥𑀫𑁆𑀫𑀧𑀭𑀺𑀘𑁆𑀙𑁂𑀤𑁄.

𑀲𑀼𑀤𑁆𑀥𑀺𑀓𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀫𑀼𑀤𑀼𑀢𑀭𑀯𑀕𑁆𑀕𑁄

𑁧. 𑀧𑀝𑀺𑀮𑀸𑀪𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁮𑁧. 𑀲𑀫𑁆𑀫𑀧𑁆𑀧𑀥𑀸𑀦𑁂 𑀆𑀭𑀩𑁆𑀪𑀸𑀢𑀺 𑀲𑀫𑁆𑀫𑀧𑁆𑀧𑀥𑀸𑀦𑁂 𑀪𑀸𑀯𑀦𑀸𑀯𑀲𑁂𑀦 𑀆𑀭𑀩𑁆𑀪. 𑀢𑁂𑀦𑀸𑀳 ‘‘𑀪𑀸𑀯𑁂𑀦𑁆𑀢𑁄’’𑀢𑀺. 𑀬𑀣𑀸 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀦𑀺𑀤𑁆𑀤𑁂𑀲𑁂 ‘‘𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑁂 𑀆𑀭𑀩𑁆𑀪 𑀯𑀻𑀭𑀺𑀬𑀁 𑀧𑀝𑀺𑀮𑀪𑀢𑀻’’𑀢𑀺 𑀤𑁂𑀲𑀦𑀸 𑀆𑀕𑀢𑀸, 𑀏𑀯𑀁 𑀲𑀢𑀺𑀦𑁆𑀤𑁆𑀭𑀺𑀬𑀦𑀺𑀤𑁆𑀤𑁂𑀲𑁂 ‘‘𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑁂 𑀆𑀭𑀩𑁆𑀪 𑀲𑀢𑀺𑀁 𑀧𑀝𑀺𑀮𑀪𑀢𑀻’’𑀢𑀺, 𑀢𑀲𑁆𑀫𑀸 ‘‘𑀲𑀢𑀺𑀦𑁆𑀤𑁆𑀭𑀺𑀬𑁂𑀧𑀺 𑀏𑀲𑁂𑀯 𑀦𑀬𑁄’’𑀢𑀺 𑀯𑀼𑀢𑁆𑀢𑀁. 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀸𑀤𑀺𑀦𑀺𑀤𑁆𑀤𑁂𑀲𑁂𑀲𑀼 𑀧𑀦 𑀦 𑀢𑀣𑀸 𑀤𑁂𑀲𑁂𑀢𑀺.

𑁨. 𑀧𑀞𑀫𑀲𑀁𑀔𑀺𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁮𑁨. 𑀇𑀦𑁆𑀤𑁆𑀭𑀺𑀬𑀸𑀦𑀁 𑀢𑀺𑀓𑁆𑀔𑀸𑀤𑀺𑀪𑀸𑀯𑁄 𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀯𑀸 𑀫𑀕𑁆𑀕𑀯𑀲𑁂𑀦 𑀯𑀸 𑀨𑀮𑀯𑀲𑁂𑀦 𑀯𑀸 𑀕𑀳𑁂𑀢𑀩𑁆𑀩𑁄𑀢𑀺 𑀯𑀼𑀢𑁆𑀢𑀁 ‘‘𑀢𑀢𑁄𑀢𑀺…𑀧𑁂… 𑀯𑁂𑀤𑀺𑀢𑀩𑁆𑀩’’𑀦𑁆𑀢𑀺. 𑀦𑀦𑀼 𑀘𑁂𑀢𑁆𑀣 𑀫𑀼𑀤𑀼𑀪𑀸𑀯𑁄 𑀏𑀯 𑀧𑀸𑀴𑀺𑀬𑀁 𑀕𑀳𑀺𑀢𑁄𑀢𑀺? 𑀲𑀘𑁆𑀘𑀫𑁂𑀢𑀁, 𑀢𑀁 𑀧𑀦 𑀢𑀺𑀓𑁆𑀔𑀪𑀸𑀯𑁂 𑀅𑀲𑀢𑀺 𑀦 𑀳𑁄𑀢𑀺 𑀢𑀺𑀓𑁆𑀔𑀸𑀤𑀺𑀪𑀸𑀯𑁄𑀢𑀺 𑀯𑀼𑀢𑁆𑀢𑀁. 𑀬𑀢𑁄 𑀳𑀺 𑀅𑀬𑀁 𑀫𑀼𑀤𑀼, 𑀇𑀢𑁄 𑀢𑀁 𑀢𑀺𑀓𑁆𑀔𑀦𑁆𑀢𑀺 𑀯𑀢𑁆𑀢𑀩𑁆𑀩𑀢𑀁 𑀮𑀪𑀢𑀺 𑀅𑀧𑁂𑀓𑁆𑀔𑀸𑀲𑀺𑀤𑁆𑀥𑀢𑁆𑀢𑀸 𑀢𑀺𑀓𑁆𑀔𑀫𑀼𑀤𑀼𑀪𑀸𑀯𑀸𑀦𑀁 𑀧𑀸𑀭𑀸𑀧𑀸𑀭𑀁 𑀯𑀺𑀬. 𑀇𑀤𑀸𑀦𑀺 ‘‘𑀢𑀢𑁄’’𑀢𑀺𑀆𑀤𑀺𑀦𑀸 𑀲𑀗𑁆𑀔𑁂𑀧𑀢𑁄 𑀯𑀼𑀢𑁆𑀢𑀫𑀢𑁆𑀣𑀁 𑀯𑀺𑀢𑁆𑀣𑀸𑀭𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀲𑀫𑀢𑁆𑀢𑀸𑀦𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀫𑀢𑁆𑀢𑀸𑀦𑀻𑀢𑀺 𑀲𑀫𑁆𑀧𑀦𑁆𑀦𑀸𑀦𑀺. 𑀇𑀢𑀭𑀁 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀲𑀫𑀢𑁆𑀢𑀸𑀦𑀻𑀢𑀺 𑀯𑀸 𑀧𑀭𑀺𑀬𑀢𑁆𑀢𑀸𑀦𑀺, 𑀲𑀫𑀢𑁆𑀢𑀸𑀦𑀻𑀢𑀺 𑀅𑀢𑁆𑀣𑁄. ‘‘𑀢𑀢𑁄 𑀫𑀼𑀤𑀼𑀢𑀭𑀸𑀦𑀺 𑀥𑀫𑁆𑀫𑀸𑀦𑀼𑀲𑀸𑀭𑀻𑀫𑀕𑁆𑀕𑀲𑁆𑀲𑀸’’𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁? 𑀢𑀢𑁄𑀢𑀺 𑀳𑀺 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀯𑀺𑀧𑀲𑁆𑀲𑀦𑀺𑀦𑁆𑀤𑁆𑀭𑀺𑀬𑀸𑀦𑀺 𑀅𑀥𑀺𑀧𑁆𑀧𑁂𑀢𑀸𑀦𑀺𑀬𑁂𑀯, ‘‘𑀢𑀢𑁄 𑀫𑀼𑀤𑀼𑀢𑀭𑀸𑀦𑀻’’𑀢𑀺 𑀯𑀼𑀢𑁆𑀢𑀧𑀞𑀫𑀫𑀕𑁆𑀕𑁄 𑀥𑀫𑁆𑀫𑀸𑀦𑀼𑀲𑀸𑀭𑀻 𑀯𑀸 𑀲𑀺𑀬𑀸 𑀲𑀤𑁆𑀥𑀸𑀦𑀼𑀲𑀸𑀭𑀻 𑀯𑀸𑀢𑀺 𑀩𑁆𑀬𑀪𑀺𑀘𑀭𑀢𑀺? 𑀦𑀸𑀬𑀁 𑀤𑁄𑀲𑁄, 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀓𑀤𑁂𑀲𑀯𑀲𑁂𑀦𑁂𑀯 𑀮𑀤𑁆𑀥𑀩𑁆𑀩𑀧𑀞𑀫𑀫𑀕𑁆𑀕𑀸𑀧𑁂𑀓𑁆𑀔𑀸𑀬 𑀯𑀺𑀧𑀲𑁆𑀲𑀦𑀸𑀬 𑀯𑀺𑀪𑀸𑀕𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀬𑁄 𑀳𑀺 𑀲𑁄𑀢𑀸𑀧𑀦𑁆𑀦𑁄 𑀳𑀼𑀢𑁆𑀯𑀸 𑀇𑀭𑀺𑀬𑀸𑀧𑀣𑀁 𑀅𑀓𑁄𑀧𑁂𑀢𑁆𑀯𑀸 𑀬𑀣𑀸𑀦𑀺𑀲𑀺𑀦𑁆𑀦𑁄𑀯 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑀁 𑀧𑀸𑀧𑀼𑀡𑀸𑀢𑀺, 𑀢𑀲𑁆𑀲 𑀯𑀺𑀧𑀲𑁆𑀲𑀦𑀺𑀦𑁆𑀤𑁆𑀭𑀺𑀬𑀸𑀦𑀺 𑀲𑀦𑁆𑀥𑀸𑀬 𑀅𑀯𑀺𑀪𑀸𑀕𑁂𑀦 𑀯𑀼𑀢𑁆𑀢𑀁 𑁋 ‘‘𑀢𑀢𑁄 𑀫𑀼𑀤𑀼𑀢𑀭𑀸𑀦𑀺 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀲𑁆𑀲 𑀯𑀺𑀧𑀲𑁆𑀲𑀦𑀺𑀦𑁆𑀤𑁆𑀭𑀺𑀬𑀸𑀦𑀺 𑀦𑀸𑀫𑀸’’𑀢𑀺. 𑀬𑁄 𑀧𑀦 𑀲𑁄𑀢𑀸𑀧𑀦𑁆𑀦𑁄 𑀳𑀼𑀢𑁆𑀯𑀸 𑀓𑀸𑀮𑀦𑁆𑀢𑀭𑁂𑀦 𑀲𑀓𑀤𑀸𑀕𑀸𑀫𑀻 𑀳𑁄𑀢𑀺, 𑀢𑀲𑁆𑀲 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀢𑁆𑀣𑀸𑀬 𑀧𑀯𑀢𑁆𑀢𑀸𑀦𑀺 𑀯𑀺𑀧𑀲𑁆𑀲𑀦𑀺𑀦𑁆𑀤𑁆𑀭𑀺𑀬𑀸𑀦𑀺 𑀦𑀸𑀫 𑀳𑁄𑀦𑁆𑀢𑀺. 𑀲𑁄 𑀘𑁂 𑀥𑀫𑁆𑀫𑀸𑀦𑀼𑀲𑀸𑀭𑀻𑀕𑁄𑀢𑁆𑀢𑁄, 𑀢𑀲𑁆𑀲 𑀬𑀣𑀸𑀯𑀼𑀢𑁆𑀢𑀯𑀺𑀧𑀲𑁆𑀲𑀦𑀺𑀦𑁆𑀤𑁆𑀭𑀺𑀬𑀢𑁄 𑀫𑀼𑀤𑀼𑀢𑀭𑀸𑀦𑀻𑀢𑀺 ‘‘𑀢𑀢𑁄 𑀫𑀼𑀤𑀼𑀢𑀭𑀸𑀦𑀺 𑀥𑀫𑁆𑀫𑀸𑀦𑀼𑀲𑀸𑀭𑀻𑀫𑀕𑁆𑀕𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁. 𑀯𑀺𑀧𑀲𑁆𑀲𑀦𑀺𑀦𑁆𑀤𑁆𑀭𑀺𑀬𑀸𑀦𑀺 𑀦𑀸𑀫𑀸𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑁄. 𑀥𑀫𑁆𑀫𑀸𑀦𑀼𑀲𑀸𑀭𑀻𑀯𑀺𑀧𑀲𑁆𑀲𑀦𑀺𑀦𑁆𑀤𑁆𑀭𑀺𑀬𑀢𑁄 𑀲𑀤𑁆𑀥𑀸𑀦𑀼𑀲𑀸𑀭𑀻𑀯𑀺𑀧𑀲𑁆𑀲𑀦𑀺𑀦𑁆𑀤𑁆𑀭𑀺𑀬𑀸𑀦𑀁 𑀫𑀼𑀤𑀼𑀪𑀸𑀯𑀲𑁆𑀲 𑀓𑀸𑀭𑀡𑀁 𑀲𑀬𑀫𑁂𑀯 𑀯𑀓𑁆𑀔𑀢𑀺. 𑀥𑀫𑁆𑀫𑁂𑀦 𑀧𑀜𑁆𑀜𑀸𑀬 𑀫𑀕𑁆𑀕𑀲𑁄𑀢𑀁 𑀅𑀦𑀼𑀲𑁆𑀲𑀭𑀢𑀻𑀢𑀺 𑀥𑀫𑁆𑀫𑀸𑀦𑀼𑀲𑀸𑀭𑀻, 𑀧𑀜𑁆𑀜𑀼𑀢𑁆𑀢𑀭𑁄 𑀅𑀭𑀺𑀬𑁄. 𑀲𑀤𑁆𑀥𑀸𑀬 𑀫𑀕𑁆𑀕𑀲𑁄𑀢𑀁 𑀅𑀦𑀼𑀲𑁆𑀲𑀭𑀢𑀻𑀢𑀺 𑀲𑀤𑁆𑀥𑀸𑀦𑀼𑀲𑀸𑀭𑀻, 𑀲𑀤𑁆𑀥𑀼𑀢𑁆𑀢𑀭𑁄 𑀅𑀭𑀺𑀬𑁄.

𑀏𑀯𑀁 𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀤𑀲𑁆𑀲𑁂𑀢𑁆𑀯𑀸 𑀫𑀕𑁆𑀕𑀯𑀲𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀢𑀣𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀲𑀫𑁆𑀧𑀬𑁄𑀕𑀢𑁄 𑀲𑀪𑀸𑀯𑀢𑁄 𑀘 𑀅𑀭𑀳𑀢𑁆𑀢𑀫𑀕𑁆𑀕𑀧𑀭𑀺𑀬𑀸𑀧𑀦𑁆𑀦𑀸𑀦𑀺 𑀅𑀭𑀳𑀢𑁆𑀢𑀫𑀕𑁆𑀕𑀺𑀦𑁆𑀤𑁆𑀭𑀺𑀬𑀸𑀦𑀺. 𑀅𑀭𑀳𑀢𑁆𑀢𑀨𑀮𑀺𑀦𑁆𑀤𑁆𑀭𑀺𑀬𑀸𑀦𑀻𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄.

𑀇𑀤𑀸𑀦𑀺 𑀨𑀮𑀯𑀲𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀲𑀫𑀢𑁆𑀢𑀸𑀦𑀺 𑀧𑀭𑀺𑀧𑀼𑀡𑁆𑀡𑀸𑀦𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀝𑁆𑀞𑀧𑀼𑀕𑁆𑀕𑀮𑀯𑀲𑁂𑀦 𑀦𑀸𑀦𑀢𑁆𑀢𑀁 𑀚𑀸𑀢𑀁, 𑀢𑀲𑁆𑀫𑀸 𑀢𑁂 𑀤𑁆𑀯𑁂𑀧𑀺 𑀇𑀥 𑀢𑀢𑀺𑀬𑀯𑀸𑀭𑁂 𑀦 𑀮𑀩𑁆𑀪𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀥𑀫𑁆𑀫𑀸𑀦𑀼𑀲𑀸𑀭𑀻𑀲𑀤𑁆𑀥𑀸𑀦𑀼𑀲𑀸𑀭𑀻𑀦𑀁 𑀦𑀸𑀦𑀢𑁆𑀢𑀁 𑀓𑀣𑀁 𑀚𑀸𑀢𑀦𑁆𑀢𑀺 𑀆𑀳 ‘‘𑀆𑀕𑀫𑀦𑁂𑀦𑀧𑀺 𑀫𑀕𑁆𑀕𑁂𑀦𑀧𑀻’’𑀢𑀺. 𑀢𑀤𑀼𑀪𑀬𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀤𑁆𑀥𑀸𑀦𑀼𑀲𑀸𑀭𑀻𑀧𑀼𑀕𑁆𑀕𑀮𑁄’’𑀢𑀺𑀆𑀤𑀺𑀫𑀸𑀳. 𑀉𑀤𑁆𑀤𑀺𑀲𑀸𑀧𑁂𑀦𑁆𑀢𑁄𑀢𑀺 𑀉𑀤𑁆𑀤𑁂𑀲𑀁 𑀕𑀡𑁆𑀳𑀦𑁆𑀢𑁄.

𑀫𑀕𑁆𑀕𑁄 𑀢𑀺𑀓𑁆𑀔𑁄 𑀳𑁄𑀢𑀺 𑀉𑀧𑀦𑀺𑀲𑁆𑀲𑀬𑀺𑀦𑁆𑀤𑁆𑀭𑀺𑀬𑀸𑀦𑀁 𑀢𑀺𑀓𑁆𑀔𑀯𑀺𑀲𑀤𑀪𑀸𑀯𑀢𑁄. 𑀢𑁂𑀦𑀸𑀳 ‘‘𑀲𑀽𑀭𑀁 𑀜𑀸𑀡𑀁 𑀯𑀳𑀢𑀻’’𑀢𑀺. 𑀅𑀲𑀗𑁆𑀔𑀸𑀭𑁂𑀦𑀸𑀢𑀺 𑀲𑀭𑀲𑁂𑀦𑁂𑀯. 𑀅𑀧𑁆𑀧𑀬𑁄𑀕𑁂𑀦𑀸𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀥𑀫𑁆𑀫𑀸𑀦𑀼𑀲𑀸𑀭𑀻𑀧𑀼𑀕𑁆𑀕𑀮𑁄 𑀳𑀺 𑀆𑀕𑀫𑀦𑀫𑁆𑀳𑀺 𑀓𑀺𑀮𑁂𑀲𑁂 𑀯𑀺𑀓𑁆𑀔𑀫𑁆𑀪𑁂𑀦𑁆𑀢𑁄 𑀅𑀧𑁆𑀧𑀤𑀼𑀓𑁆𑀔𑁂𑀦 𑀅𑀧𑁆𑀧𑀓𑀲𑀺𑀭𑁂𑀦 𑀅𑀓𑀺𑀮𑀫𑀦𑁆𑀢𑁄𑀯 𑀯𑀺𑀓𑁆𑀔𑀫𑁆𑀪𑁂𑀢𑀼𑀁 𑀲𑀓𑁆𑀓𑁄𑀢𑀺. 𑀲𑀤𑁆𑀥𑀸𑀦𑀼𑀲𑀸𑀭𑀻𑀧𑀼𑀕𑁆𑀕𑀮𑁄 𑀧𑀦 𑀤𑀼𑀓𑁆𑀔𑁂𑀦 𑀓𑀲𑀺𑀭𑁂𑀦 𑀓𑀺𑀮𑀫𑀦𑁆𑀢𑁄 𑀳𑀼𑀢𑁆𑀯𑀸 𑀯𑀺𑀓𑁆𑀔𑀫𑁆𑀪𑁂𑀢𑀼𑀁 𑀲𑀓𑁆𑀓𑁄𑀢𑀺, 𑀢𑀲𑁆𑀫𑀸 𑀥𑀫𑁆𑀫𑀸𑀦𑀼𑀲𑀸𑀭𑀺𑀲𑁆𑀲 𑀧𑀼𑀩𑁆𑀩𑀪𑀸𑀕𑀫𑀕𑁆𑀕𑀓𑁆𑀔𑀡𑁂 𑀓𑀺𑀮𑁂𑀲𑀘𑁆𑀙𑁂𑀤𑀓𑀜𑀸𑀡𑀁 𑀅𑀤𑀦𑁆𑀥𑀁 𑀢𑀺𑀔𑀺𑀡𑀁 𑀳𑀼𑀢𑁆𑀯𑀸 𑀯𑀳𑀢𑀺, 𑀬𑀣𑀸 𑀦𑀸𑀫 𑀢𑀺𑀔𑀺𑀡𑁂𑀦 𑀅𑀲𑀺𑀦𑀸 𑀓𑀤𑀮𑀺𑀁 𑀙𑀺𑀦𑁆𑀤𑀦𑁆𑀢𑀲𑁆𑀲 𑀙𑀺𑀦𑁆𑀦𑀝𑁆𑀞𑀸𑀦𑀁 𑀫𑀝𑁆𑀞𑀁 𑀳𑁄𑀢𑀺, 𑀅𑀲𑀺 𑀔𑀺𑀧𑁆𑀧𑀁 𑀯𑀳𑀢𑀺, 𑀲𑀤𑁆𑀤𑁄 𑀦 𑀲𑀼𑀬𑁆𑀬𑀢𑀺, 𑀩𑀮𑀯𑀯𑀸𑀬𑀸𑀫𑀓𑀺𑀘𑁆𑀘𑀁 𑀦 𑀳𑁄𑀢𑀺, 𑀏𑀯𑀭𑀽𑀧𑀸 𑀥𑀫𑁆𑀫𑀸𑀦𑀼𑀲𑀸𑀭𑀺𑀦𑁄 𑀧𑀼𑀩𑁆𑀩𑀪𑀸𑀕𑀪𑀸𑀯𑀦𑀸 𑀳𑁄𑀢𑀺, 𑀲𑀤𑁆𑀥𑀸𑀦𑀼𑀲𑀸𑀭𑀺𑀦𑁄 𑀧𑀦 𑀧𑀼𑀩𑁆𑀩𑀪𑀸𑀕𑀓𑁆𑀔𑀡𑁂 𑀓𑀺𑀮𑁂𑀲𑀘𑁆𑀙𑁂𑀤𑀓𑀜𑀸𑀡𑀁 𑀤𑀦𑁆𑀥𑀁 𑀦 𑀢𑀺𑀔𑀺𑀡𑀁 𑀅𑀲𑀽𑀭𑀁 𑀳𑀼𑀢𑁆𑀯𑀸 𑀯𑀳𑀢𑀺, 𑀬𑀣𑀸 𑀦𑀸𑀫 𑀦𑀸𑀢𑀺𑀢𑀺𑀔𑀺𑀡𑁂𑀦 𑀅𑀲𑀺𑀦𑀸 𑀓𑀤𑀮𑀺𑀁 𑀙𑀺𑀦𑁆𑀤𑀦𑁆𑀢𑀲𑁆𑀲 𑀙𑀺𑀦𑁆𑀦𑀝𑁆𑀞𑀸𑀦𑀁 𑀦 𑀫𑀝𑁆𑀞𑀁 𑀳𑁄𑀢𑀺, 𑀅𑀲𑀺 𑀲𑀻𑀖𑀁 𑀦 𑀯𑀳𑀢𑀺, 𑀲𑀤𑁆𑀤𑁄 𑀲𑀼𑀬𑁆𑀬𑀢𑀺, 𑀩𑀮𑀯𑀯𑀸𑀬𑀸𑀫𑀓𑀺𑀘𑁆𑀘𑀁 𑀇𑀘𑁆𑀙𑀺𑀢𑀩𑁆𑀩𑀁 𑀳𑁄𑀢𑀺, 𑀏𑀯𑀭𑀽𑀧𑀸 𑀲𑀤𑁆𑀥𑀸𑀦𑀼𑀲𑀸𑀭𑀺𑀦𑁄 𑀧𑀼𑀩𑁆𑀩𑀪𑀸𑀕𑀪𑀸𑀯𑀦𑀸 𑀳𑁄𑀢𑀺. 𑀏𑀯𑀁 𑀲𑀦𑁆𑀢𑁂𑀧𑀺 𑀓𑀺𑀮𑁂𑀲𑀓𑁆𑀔𑀬𑁂 𑀦𑀸𑀦𑀢𑁆𑀢𑀁 𑀦𑀢𑁆𑀣𑀺. 𑀢𑁂𑀦𑀸𑀳 ‘‘𑀓𑀺𑀮𑁂𑀲𑀓𑁆𑀔𑀬𑁂 𑀧𑀦𑀸’’𑀢𑀺𑀆𑀤𑀺. 𑀅𑀯𑀲𑁂𑀲𑀸 𑀘 𑀓𑀺𑀮𑁂𑀲𑀸 𑀔𑀻𑀬𑀦𑁆𑀢𑀺 𑀲𑀁𑀬𑁄𑀚𑀦𑀓𑁆𑀔𑀬𑀸𑀬 𑀬𑁄𑀕𑀢𑁆𑀢𑀸.

𑁩. 𑀤𑀼𑀢𑀺𑀬𑀲𑀁𑀔𑀺𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁮𑁩. 𑀢𑀢𑁄𑀢𑀺 𑀨𑀮𑀢𑁄 𑀨𑀮𑀯𑁂𑀫𑀢𑁆𑀢𑀢𑀸𑀬 𑀘𑀭𑀺𑀬𑀫𑀸𑀦𑀢𑁆𑀢𑀸. 𑀇𑀦𑁆𑀤𑁆𑀭𑀺𑀬𑀯𑁂𑀫𑀢𑁆𑀢𑀢𑀸 𑀲𑀤𑁆𑀥𑀸𑀤𑀻𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀦𑀸𑀦𑀢𑁆𑀢𑁂𑀦. 𑀨𑀮𑀦𑀸𑀦𑀢𑁆𑀢𑀦𑁆𑀢𑀺 𑀅𑀭𑀳𑀢𑁆𑀢𑀨𑀮𑀸𑀤𑀺𑀦𑀸𑀦𑀢𑁆𑀢𑀁. 𑀧𑀼𑀕𑁆𑀕𑀮𑀦𑀸𑀦𑀢𑁆𑀢𑀦𑁆𑀢𑀺 𑀅𑀦𑀸𑀕𑀸𑀫𑀺𑀆𑀤𑀺𑀧𑀼𑀕𑁆𑀕𑀮𑀦𑀸𑀦𑀢𑁆𑀢𑀁.

𑁪. 𑀢𑀢𑀺𑀬𑀲𑀁𑀔𑀺𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁮𑁪. 𑀲𑀻𑀮𑀓𑁆𑀔𑀦𑁆𑀥𑀸𑀤𑀻𑀳𑀺 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀸𑀤𑀻𑀳𑀺 𑀘 𑀧𑀭𑀺𑀢𑁄 𑀧𑀽𑀭𑀡𑁂𑀦 𑀧𑀭𑀺𑀧𑀽𑀭𑀁 𑀅𑀭𑀳𑀢𑁆𑀢𑀫𑀕𑁆𑀕𑀁 𑀓𑀭𑁄𑀦𑁆𑀢𑁄 𑀦𑀺𑀧𑁆𑀨𑀢𑁆𑀢𑀺𑀢𑁄 𑀅𑀭𑀳𑀢𑁆𑀢𑀨𑀮𑀁 𑀆𑀭𑀸𑀥𑁂𑀢𑀺 𑀦𑀺𑀧𑁆𑀨𑀸𑀤𑁂𑀢𑀺. 𑀢𑀬𑁄 𑀧𑀤𑁂𑀲𑀫𑀕𑁆𑀕𑁂𑀢𑀺 𑀲𑀻𑀮𑀓𑁆𑀔𑀦𑁆𑀥𑀸𑀤𑀻𑀦𑀁 𑀅𑀧𑀸𑀭𑀺𑀧𑀽𑀭𑀺𑀬𑀸 𑀏𑀓𑀤𑁂𑀲𑀪𑀽𑀢𑁂 𑀢𑀬𑁄 𑀳𑁂𑀝𑁆𑀞𑀺𑀫𑀫𑀕𑁆𑀕𑁂. 𑀧𑀤𑁂𑀲𑀁 𑀳𑁂𑀝𑁆𑀞𑀺𑀫𑀨𑀮𑀢𑁆𑀢𑀬𑀁. 𑀘𑀢𑀽𑀲𑀽𑀢𑀺 𑀇𑀫𑀲𑁆𑀫𑀺𑀁 𑀯𑀕𑁆𑀕𑁂 𑀧𑀞𑀫𑀸𑀤𑀻𑀲𑀼 𑀘𑀢𑀽𑀲𑀼 𑀲𑀼𑀢𑁆𑀢𑁂𑀲𑀼. 𑀓𑀸𑀫𑀜𑁆𑀘𑁂𑀢𑁆𑀣 𑀢𑀢𑀺𑀬𑁂 ‘‘𑀢𑀢𑁄𑀢𑀺 𑀨𑀮𑀯𑀲𑁂𑀦 𑀦𑀺𑀲𑁆𑀲𑀓𑁆𑀓’’𑀦𑁆𑀢𑀺 𑀯𑀼𑀢𑁆𑀢𑀁, 𑀘𑀢𑀼𑀢𑁆𑀣𑁂 ‘‘𑀧𑀭𑀺𑀧𑀽𑀭𑀁 𑀧𑀭𑀺𑀧𑀽𑀭𑀓𑀸𑀭𑀻 𑀆𑀭𑀸𑀥𑁂𑀢𑀺, 𑀧𑀤𑁂𑀲𑀁 𑀧𑀤𑁂𑀲𑀓𑀸𑀭𑀻’’𑀢𑀺, ‘‘𑀘𑀢𑀽𑀲𑀼𑀧𑀺 𑀲𑀼𑀢𑁆𑀢𑁂𑀲𑀼 𑀫𑀺𑀲𑁆𑀲𑀓𑀸𑀦𑁂𑀯 𑀇𑀦𑁆𑀤𑁆𑀭𑀺𑀬𑀸𑀦𑀺 𑀓𑀣𑀺𑀢𑀸𑀦𑀻’’𑀢𑀺 𑀧𑀦 𑀯𑀘𑀦𑀢𑁄 𑀯𑀺𑀧𑀲𑁆𑀲𑀦𑀸𑀯𑀲𑁂𑀦𑀧𑀺 𑀬𑁄𑀚𑀦𑀸 𑀮𑀩𑁆𑀪𑀢𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁.

𑁫-𑁭. 𑀧𑀞𑀫𑀯𑀺𑀢𑁆𑀣𑀸𑀭𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁪𑁮𑁫-𑁪𑁮𑁭. 𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀦𑀺𑀲𑁆𑀲𑀓𑁆𑀓𑀁 𑀯𑁂𑀤𑀺𑀢𑀩𑁆𑀩𑀁, 𑀦 𑀫𑀕𑁆𑀕𑀨𑀮𑀯𑀲𑁂𑀦, 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀲𑀩𑁆𑀩𑀲𑁄𑀯 𑀯𑀺𑀧𑀲𑁆𑀲𑀦𑀺𑀦𑁆𑀤𑁆𑀭𑀺𑀬𑀸𑀦𑀁 𑀏𑀯 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀇𑀤𑀸𑀦𑀺 𑀢𑀫𑀢𑁆𑀣𑀁 𑀧𑀸𑀓𑀝𑀁 𑀓𑀸𑀢𑀼𑀁 ‘‘𑀧𑀭𑀺𑀧𑀼𑀡𑁆𑀡𑀸𑀦𑀺 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀯𑀺𑀳𑀸𑀤𑀻𑀲𑀼 𑀧𑀜𑁆𑀘𑀲𑀼 𑀲𑀼𑀤𑁆𑀥𑀸𑀯𑀸𑀲𑁂𑀲𑀼 𑀢𑀢𑁆𑀣 𑀢𑀢𑁆𑀣 𑀆𑀬𑀼𑀯𑁂𑀫𑀚𑁆𑀛𑀁 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸 𑀅𑀦𑁆𑀢𑀭𑀸 𑀓𑀺𑀮𑁂𑀲𑀧𑀭𑀺𑀦𑀺𑀩𑁆𑀩𑀸𑀦𑁂𑀦 𑀧𑀭𑀺𑀦𑀺𑀩𑁆𑀩𑀸𑀬𑀦𑀢𑁄 𑀅𑀦𑁆𑀢𑀭𑀸𑀧𑀭𑀺𑀦𑀺𑀩𑁆𑀩𑀸𑀬𑀻, 𑀅𑀲𑀗𑁆𑀔𑀸𑀭𑁂𑀦 𑀅𑀧𑁆𑀧𑀬𑁄𑀕𑁂𑀦 𑀲𑀭𑀲𑀢𑁄𑀯 𑀧𑀭𑀺𑀦𑀺𑀩𑁆𑀩𑀸𑀬𑀦𑀢𑁄 𑀅𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀻, 𑀢𑀩𑁆𑀩𑀺𑀧𑀭𑀺𑀬𑀸𑀬𑀢𑁄 𑀲𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀻, 𑀉𑀤𑁆𑀥𑀁 𑀯𑀸𑀳𑀺𑀪𑀸𑀯𑁂𑀦 𑀉𑀤𑁆𑀥𑀫𑀲𑁆𑀲 𑀢𑀡𑁆𑀳𑀸𑀲𑁄𑀢𑀁 𑀯𑀝𑁆𑀝𑀲𑁄𑀢𑀁 𑀯𑀸𑀢𑀺 𑀉𑀤𑁆𑀥𑀁𑀲𑁄𑀢𑁄, 𑀉𑀤𑁆𑀥𑀁 𑀯𑀸 𑀕𑀦𑁆𑀢𑁆𑀯𑀸 𑀧𑀝𑀺𑀮𑀪𑀺𑀢𑀩𑁆𑀩𑀢𑁄 𑀉𑀤𑁆𑀥𑀫𑀲𑁆𑀲 𑀫𑀕𑁆𑀕𑀲𑁄𑀢𑀦𑁆𑀢𑀺 𑀉𑀤𑁆𑀥𑀁𑀲𑁄𑀢𑁄, 𑀅𑀓𑀦𑀺𑀝𑁆𑀞𑀪𑀯𑀁 𑀕𑀘𑁆𑀙𑀢𑀻𑀢𑀺 𑀅𑀓𑀦𑀺𑀝𑁆𑀞𑀕𑀸𑀫𑀻𑀢𑀺 𑀏𑀯𑀫𑁂𑀢𑁆𑀣 𑀲𑀤𑁆𑀤𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀇𑀫𑀲𑁆𑀫𑀺𑀁 𑀧𑀦 𑀞𑀸𑀦𑁂𑀢𑀺 ‘‘𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀦𑀺𑀲𑁆𑀲𑀓𑁆𑀓’’𑀦𑁆𑀢𑀺 𑀯𑀼𑀢𑁆𑀢𑀝𑁆𑀞𑀸𑀦𑁂. 𑀅𑀭𑀳𑀢𑁆𑀢𑀫𑀕𑁆𑀕𑁂𑀬𑁂𑀯 𑀞𑀢𑁆𑀯𑀸𑀢𑀺 𑀇𑀫𑀲𑁆𑀫𑀺𑀁𑀬𑁂𑀯 𑀪𑀯𑁂 𑀅𑀭𑀳𑀢𑁆𑀢𑀫𑀕𑁆𑀕𑁂𑀬𑁂𑀯, 𑀦 𑀯𑀺𑀧𑀲𑁆𑀲𑀦𑀸𑀬 𑀘 𑀞𑀢𑁆𑀯𑀸. 𑀧𑀜𑁆𑀘 𑀦𑀺𑀲𑁆𑀲𑀓𑁆𑀓𑀸𑀦𑀺 𑀦𑀻𑀳𑀭𑀺𑀢𑀩𑁆𑀩𑀸𑀦𑀻𑀢𑀺 ‘‘𑀢𑀢𑁄 𑀫𑀼𑀤𑀼𑀢𑀭𑁂𑀳𑀺 𑀅𑀦𑁆𑀢𑀭𑀸𑀧𑀭𑀺𑀦𑀺𑀩𑁆𑀩𑀸𑀬𑀻 𑀳𑁄𑀢𑀻’’𑀢𑀺𑀆𑀤𑀻𑀦𑀺 𑀧𑀜𑁆𑀘 𑀦𑀺𑀲𑁆𑀲𑀓𑁆𑀓𑀸𑀦𑀺 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀓𑀣𑁂𑀢𑀩𑁆𑀩𑀸𑀦𑀺. 𑀇𑀤𑀸𑀦𑀺 𑀢𑀫𑀢𑁆𑀣𑀁 𑀯𑀺𑀯𑀭𑀦𑁆𑀢𑁄 ‘‘𑀅𑀭𑀳𑀢𑁆𑀢𑀫𑀕𑁆𑀕𑀲𑁆𑀲 𑀳𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀯𑀺𑀳𑀸𑀤𑀻𑀲𑀼 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀉𑀧𑁆𑀧𑀦𑁆𑀦𑀲𑀫𑀦𑀦𑁆𑀢𑀭𑀸𑀬 𑀧𑀭𑀺𑀦𑀺𑀩𑁆𑀩𑀸𑀬𑀦𑀢𑁄 𑀧𑀞𑀫𑀅𑀦𑁆𑀢𑀭𑀸𑀧𑀭𑀺𑀦𑀺𑀩𑁆𑀩𑀸𑀬𑀻. 𑀢𑀢𑁆𑀣 𑀆𑀬𑀼𑀧𑁆𑀧𑀫𑀸𑀡𑀯𑁂𑀫𑀚𑁆𑀛𑀁 𑀅𑀧𑁆𑀧𑀢𑁆𑀯𑀸𑀯 𑀧𑀭𑀺𑀦𑀺𑀩𑁆𑀩𑀸𑀬𑀦𑀢𑁄 𑀤𑀼𑀢𑀺𑀬𑀅𑀦𑁆𑀢𑀭𑀸𑀧𑀭𑀺𑀦𑀺𑀩𑁆𑀩𑀸𑀬𑀻, 𑀆𑀬𑀼𑀯𑁂𑀫𑀚𑁆𑀛𑀁 𑀧𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀦𑀢𑁄 𑀢𑀢𑁄 𑀧𑀭𑀁 𑀢𑀢𑀺𑀬𑀅𑀦𑁆𑀢𑀭𑀸𑀧𑀭𑀺𑀦𑀺𑀩𑁆𑀩𑀸𑀬𑀻 𑀯𑁂𑀤𑀺𑀢𑀩𑁆𑀩𑁄. ‘‘𑀧𑀜𑁆𑀘 𑀦𑀺𑀲𑁆𑀲𑀓𑁆𑀓𑀸𑀦𑀻’’𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁? 𑀦𑀦𑀼 𑀅𑀲𑀗𑁆𑀔𑀸𑀭𑀲𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀻𑀢𑀺 𑀯𑀢𑁆𑀢𑀩𑁆𑀩𑀦𑁆𑀢𑀺? 𑀦 𑀯𑀢𑁆𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲 𑀲𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀺𑀦𑁄𑀧𑀺 𑀏𑀢𑁂𑀯 𑀧𑀜𑁆𑀘 𑀚𑀦𑀸’’𑀢𑀺.

𑀢𑀻𑀡𑀺 𑀦𑀺𑀲𑁆𑀲𑀓𑁆𑀓𑀸𑀦𑀻𑀢𑀺 ‘‘𑀢𑀢𑁄 𑀫𑀼𑀤𑀼𑀢𑀭𑁂𑀳𑀺 𑀲𑁄𑀢𑀸𑀧𑀦𑁆𑀦𑁄 𑀳𑁄𑀢𑀻’’𑀢𑀺𑀆𑀤𑀻𑀦𑀺 𑀢𑀻𑀡𑀺 𑀦𑀺𑀲𑁆𑀲𑀓𑁆𑀓𑀧𑀤𑀸𑀦𑀺. 𑀇𑀥 𑀲𑀓𑀤𑀸𑀕𑀸𑀫𑀻 𑀦 𑀕𑀳𑀺𑀢𑁄, 𑀲𑁄 𑀅𑀦𑀸𑀕𑀸𑀫𑀺𑀫𑀕𑁆𑀕𑁂 𑀞𑀢𑁆𑀯𑀸 𑀦𑀻𑀳𑀭𑀺𑀢𑀩𑁆𑀩𑁄, 𑀅𑀦𑀸𑀕𑀸𑀫𑀺𑀫𑀕𑁆𑀕𑀲𑁆𑀲 𑀯𑀺𑀧𑀲𑁆𑀲𑀦𑀺𑀦𑁆𑀤𑁆𑀭𑀺𑀬𑁂𑀳𑀺 𑀫𑀼𑀤𑀼𑀢𑀭𑁂𑀳𑀺 𑀲𑀓𑀤𑀸𑀕𑀸𑀫𑀻 𑀳𑁄𑀢𑀺. 𑀲𑀓𑀤𑀸…𑀧𑁂… 𑀫𑀼𑀤𑀼𑀢𑀭𑀸𑀦𑀻𑀢𑀺 𑀇𑀤𑀁 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑀲𑁆𑀲 𑀯𑀺𑀧𑀲𑁆𑀲𑀦𑀺𑀦𑁆𑀤𑁆𑀭𑀺𑀬𑁂𑀳𑀺 𑀏𑀓𑀩𑀻𑀚𑀺𑀲𑀗𑁆𑀔𑀸𑀢𑀲𑁄𑀢𑀸𑀧𑀦𑁆𑀦𑀯𑀺𑀧𑀲𑁆𑀲𑀦𑀺𑀦𑁆𑀤𑁆𑀭𑀺𑀬𑀸𑀦𑀺 𑀫𑀼𑀤𑀼𑀢𑀭𑀸𑀦𑀺 𑀳𑁄𑀦𑁆𑀢𑀻𑀢𑀺 𑀢𑀻𑀡𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀥𑀫𑁆𑀫𑀸𑀦𑀼𑀲𑀸𑀭𑀻𑀢𑀺𑀆𑀤𑀺𑀤𑁆𑀯𑀬𑀁 𑀓𑁄𑀮𑀁𑀓𑁄𑀮𑀸𑀤𑀺𑀤𑁆𑀯𑀬𑁂𑀦 𑀕𑀳𑀺𑀢𑀁 𑀳𑁄𑀢𑀻𑀢𑀺. 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑀲𑁆𑀲 𑀳𑀻𑀢𑀺𑀆𑀤𑀺 𑀯𑀼𑀢𑁆𑀢𑀲𑁆𑀲𑁂𑀯 𑀅𑀢𑁆𑀣𑀲𑁆𑀲 𑀯𑀺𑀯𑀭𑀡𑀁. 𑀲𑁂𑀲𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀫𑁂𑀯. 𑀙𑀝𑁆𑀞𑀲𑀢𑁆𑀢𑀫𑀸𑀦𑀺 𑀯𑀼𑀢𑁆𑀢𑀦𑀬𑀸𑀦𑁂𑀯𑀸𑀢𑀺 𑀙𑀝𑁆𑀞𑀲𑀢𑁆𑀢𑀫𑀸𑀦𑀺 𑀲𑀼𑀢𑁆𑀢𑀸𑀦𑀺 𑀤𑀼𑀢𑀺𑀬𑀢𑀢𑀺𑀬𑁂𑀲𑀼 𑀯𑀼𑀢𑁆𑀢𑀦𑀬𑀸𑀦𑁂𑀯. 𑀢𑀢𑁆𑀣 𑀧𑀦 𑀫𑀺𑀲𑁆𑀲𑀓𑀸𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀓𑀣𑀺𑀢𑀸𑀦𑀺, 𑀇𑀥 𑀧𑀼𑀩𑁆𑀩𑀪𑀸𑀕𑀯𑀺𑀧𑀲𑁆𑀲𑀦𑀺𑀦𑁆𑀤𑁆𑀭𑀺𑀬𑀸𑀦𑀺 𑀓𑀣𑀺𑀢𑀸𑀦𑀻𑀢𑀺 𑀅𑀬𑀫𑁂𑀯 𑀯𑀺𑀲𑁂𑀲𑁄.

𑁮. 𑀧𑀝𑀺𑀧𑀦𑁆𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁮𑁮. 𑀢𑀦𑁆𑀢𑀺 𑀫𑀕𑁆𑀕𑀨𑀮𑀯𑀲𑁂𑀦 𑀦𑀺𑀲𑁆𑀲𑀓𑁆𑀓𑀁. 𑀧𑀸𑀴𑀺𑀬𑀁 𑀯𑀼𑀢𑁆𑀢𑀫𑁂𑀯 ‘‘𑀅𑀭𑀳𑀢𑁆𑀢𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀧𑀝𑀺𑀧𑀦𑁆𑀦𑁄 𑀳𑁄𑀢𑀻’’𑀢𑀺𑀆𑀤𑀺𑀦𑀸. 𑀅𑀝𑁆𑀞𑀳𑀻𑀢𑀺 𑀘𑀢𑀽𑀳𑀺 𑀨𑀮𑁂𑀳𑀺 𑀘𑀢𑀽𑀳𑀺 𑀘 𑀫𑀕𑁆𑀕𑁂𑀳𑀻𑀢𑀺 𑀅𑀝𑁆𑀞𑀳𑀺. 𑀩𑀳𑀺𑀪𑀽𑀢𑁄 𑀦 𑀅𑀦𑁆𑀢𑁄𑀪𑀸𑀯𑁄. 𑀮𑁄𑀓𑀼𑀢𑁆𑀢𑀭𑀸𑀦𑁂𑀯 𑀇𑀦𑁆𑀤𑁆𑀭𑀺𑀬𑀸𑀦𑀺 𑀓𑀣𑀺𑀢𑀸𑀦𑀺 𑀫𑀕𑁆𑀕𑀨𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸.

𑁯-𑁧𑁦. 𑀲𑀫𑁆𑀧𑀦𑁆𑀦𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁪𑁮𑁯-𑁪𑁯𑁦. 𑀇𑀦𑁆𑀤𑁆𑀭𑀺𑀬𑀲𑀫𑁆𑀧𑀦𑁆𑀦𑁄𑀢𑀺 𑀏𑀢𑁆𑀣 𑀲𑀫𑁆𑀧𑀦𑁆𑀦𑀲𑀤𑁆𑀤𑁄 𑀧𑀭𑀺𑀧𑀽𑀭𑀺𑀅𑀢𑁆𑀣𑁄𑀢𑀺 𑀆𑀳 ‘‘𑀧𑀭𑀺𑀧𑀼𑀡𑁆𑀡𑀺𑀦𑁆𑀤𑁆𑀭𑀺𑀬𑁄’’𑀢𑀺. 𑀫𑀺𑀲𑁆𑀲𑀓𑀸𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀓𑀣𑀺𑀢𑀸𑀦𑀺 𑀲𑀸𑀫𑀜𑁆𑀜𑀢𑁄𑀯 𑀤𑁂𑀲𑀺𑀢𑀢𑁆𑀢𑀸.

𑀫𑀼𑀤𑀼𑀢𑀭𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀙𑀴𑀺𑀦𑁆𑀤𑁆𑀭𑀺𑀬𑀯𑀕𑁆𑀕𑁄

𑁨. 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁯𑁨. 𑀇𑀢𑁆𑀣𑀺𑀪𑀸𑀯𑁂𑀢𑀺 𑀇𑀢𑁆𑀣𑀺𑀢𑀸𑀬. 𑀇𑀦𑁆𑀤𑀝𑁆𑀞𑀁 𑀓𑀭𑁄𑀢𑀺 𑀢𑀣𑀸𑀲𑀢𑁆𑀢𑀚𑀦𑀲𑀸𑀫𑀜𑁆𑀜𑀓𑀸𑀭𑀡𑀪𑀸𑀯𑀢𑁄. 𑀇𑀢𑁆𑀣𑀺𑀬𑀸 𑀏𑀯 𑀇𑀦𑁆𑀤𑁆𑀭𑀺𑀬𑀁 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁. 𑀏𑀲 𑀦𑀬𑁄 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑁂. 𑀚𑀻𑀯𑀺𑀢𑁂𑀢𑀺 𑀲𑀳𑀚𑀸𑀢𑀥𑀫𑁆𑀫𑀸𑀦𑀁 𑀚𑀻𑀯𑀦𑁂 𑀧𑀸𑀮𑀦𑁂 𑀧𑀯𑀢𑁆𑀢𑀦𑁂. 𑀯𑀝𑁆𑀝𑀺𑀦𑁆𑀤𑁆𑀭𑀺𑀬𑀸𑀦𑀻𑀢𑀺 𑀯𑀝𑁆𑀝𑀳𑁂𑀢𑀼𑀪𑀽𑀢𑀸𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺. 𑀇𑀫𑁂𑀲𑀼 𑀳𑀺 𑀉𑀧𑀸𑀤𑀺𑀦𑁆𑀦𑀇𑀦𑁆𑀤𑁆𑀭𑀺𑀬𑁂𑀲𑀼 𑀲𑀢𑀺 𑀯𑀝𑁆𑀝𑀁 𑀯𑀢𑁆𑀢𑀢𑀺 𑀧𑀜𑁆𑀜𑀸𑀬𑀢𑀺.

𑁩. 𑀅𑀜𑁆𑀜𑀺𑀦𑁆𑀤𑁆𑀭𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁯𑁩. 𑀅𑀚𑀸𑀦𑀺𑀢𑀧𑀼𑀩𑁆𑀩𑀁 𑀥𑀫𑁆𑀫𑀦𑁆𑀢𑀺 𑀘𑀢𑀼𑀲𑀘𑁆𑀘𑀥𑀫𑁆𑀫𑀫𑀸𑀳, 𑀢𑀣𑀸 𑀢𑁂𑀲𑀁𑀬𑁂𑀯 𑀜𑀸𑀢𑀥𑀫𑁆𑀫𑀸𑀦𑀦𑁆𑀢𑀺. 𑀅𑀬𑀁 𑀧𑀦𑁂𑀢𑁆𑀣 𑀅𑀢𑁆𑀣𑁄 𑁋 𑀆𑀚𑀸𑀦𑀸𑀢𑀻𑀢𑀺 𑀅𑀜𑁆𑀜𑀸, 𑀧𑀞𑀫𑀫𑀕𑁆𑀕𑁂𑀦 𑀜𑀸𑀢𑀫𑀦𑀢𑀺𑀓𑁆𑀓𑀫𑀺𑀢𑁆𑀯𑀸 𑀚𑀸𑀦𑀸𑀢𑀻𑀢𑀺 𑀅𑀢𑁆𑀣𑁄. 𑀲𑁄𑀢𑀸𑀧𑀦𑁆𑀦𑀸𑀤𑀻𑀦𑀁 𑀙𑀅𑀭𑀺𑀬𑀸𑀦𑀁 𑀏𑀢𑀁 𑀦𑀸𑀫𑀁. 𑀅𑀜𑁆𑀜𑀲𑁆𑀲 𑀇𑀦𑁆𑀤𑁆𑀭𑀺𑀬𑀸𑀦𑀺 𑀅𑀜𑁆𑀜𑀺𑀦𑁆𑀤𑁆𑀭𑀺𑀬𑀸𑀦𑀺. 𑀅𑀜𑁆𑀜𑀸𑀢𑀸𑀯𑀻𑀲𑀽𑀢𑀺 𑀆𑀚𑀸𑀦𑀺𑀢𑀯𑀦𑁆𑀢𑁂𑀲𑀼. 𑀬𑀲𑁆𑀫𑀸 𑀅𑀕𑁆𑀕𑀨𑀮𑀥𑀫𑁆𑀫𑁂𑀲𑀼 𑀜𑀸𑀡𑀓𑀺𑀘𑁆𑀘𑀁 𑀲𑀸𑀢𑀺𑀲𑀬𑀁, 𑀢𑀲𑁆𑀫𑀸 𑀢𑀁 𑀓𑀺𑀘𑁆𑀘𑀁 𑀲𑁂𑀲𑀥𑀫𑁆𑀫𑁂𑀲𑀼𑀧𑀺 𑀲𑀫𑀸𑀭𑁄𑀧𑁂𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀅𑀜𑁆𑀜𑀸𑀢𑀸𑀯𑀻𑀲𑀼 𑀅𑀭𑀳𑀢𑁆𑀢𑀨𑀮𑀥𑀫𑁆𑀫𑁂𑀲𑀽’’𑀢𑀺. 𑀢𑀢𑁆𑀣 𑀢𑀢𑁆𑀣 𑀢𑁂𑀲𑀼 𑀢𑁂𑀲𑀼 𑀫𑀕𑁆𑀕𑀨𑀮𑁂𑀲𑀼. 𑀢𑁂𑀦 𑀢𑁂𑀦𑀸𑀓𑀸𑀭𑁂𑀦𑀸𑀢𑀺 𑀅𑀦𑀜𑁆𑀜𑀸𑀢𑀚𑀸𑀦𑀦𑀸𑀤𑀺𑀆𑀓𑀸𑀭𑁂𑀦.

𑁪. 𑀏𑀓𑀩𑀻𑀚𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁯𑁪. 𑀯𑀺𑀧𑀲𑁆𑀲𑀦𑀢𑁄 𑀦𑀺𑀲𑁆𑀲𑀓𑁆𑀓𑀦𑁆𑀢𑀺 𑀯𑀺𑀧𑀲𑁆𑀲𑀦𑀺𑀦𑁆𑀤𑁆𑀭𑀺𑀬𑁂𑀳𑀺 𑀦𑀺𑀲𑁆𑀲𑀓𑁆𑀓𑀁. 𑀇𑀤𑀸𑀦𑀺 𑀢𑀫𑁂𑀯 𑀲𑀗𑁆𑀔𑁂𑀧𑀢𑁄 𑀯𑀼𑀢𑁆𑀢𑀫𑀢𑁆𑀣𑀁 𑀯𑀺𑀯𑀭𑀦𑁆𑀢𑁄 ‘‘𑀲𑀫𑀢𑁆𑀢𑀸𑀦𑀻’’𑀢𑀺𑀆𑀤𑀺𑀫𑀸𑀳. 𑀢𑀻𑀡𑀺 𑀦𑀺𑀲𑁆𑀲𑀓𑁆𑀓𑀸𑀦𑀺 𑀏𑀯𑀫𑀺𑀥 𑀧𑀜𑁆𑀘 𑀦𑀺𑀲𑁆𑀲𑀓𑁆𑀓𑀸𑀦𑀺 𑀦𑀻𑀳𑀭𑀺𑀢𑀩𑁆𑀩𑀸𑀦𑀺 𑀏𑀓𑀩𑀻𑀚𑀺𑀆𑀤𑀺𑀯𑀺𑀪𑀸𑀯𑀦𑀢𑁄. 𑀢𑁂𑀦𑀸𑀳 ‘‘𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑀲𑁆𑀲 𑀳𑀻’’𑀢𑀺𑀆𑀤𑀺. 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀲𑁆𑀲 𑀯𑀺𑀧𑀲𑁆𑀲𑀦𑀺𑀦𑁆𑀤𑁆𑀭𑀺𑀬𑀸𑀦𑀺 𑀦𑀸𑀫 𑀢𑁂𑀦𑀢𑁆𑀢𑀪𑀸𑀯𑁂𑀦 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑀁 𑀧𑀢𑁆𑀢𑀼𑀁 𑀕𑀘𑁆𑀙𑀦𑁆𑀢𑀲𑁆𑀲 𑀲𑁄𑀢𑀸𑀧𑀦𑁆𑀦𑀲𑁆𑀲 𑀯𑀺𑀧𑀲𑁆𑀲𑀦𑀺𑀦𑁆𑀤𑁆𑀭𑀺𑀬𑀸𑀦𑀺. 𑀧𑀜𑁆𑀘𑀧𑀺 𑀢𑁂 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀲𑁆𑀲 𑀪𑁂𑀤𑀸𑀬𑁂𑀯𑀸𑀢𑀺 ‘‘𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑁂 𑀞𑀢𑁆𑀯𑀸 𑀦𑀻𑀳𑀭𑀺𑀢𑀩𑁆𑀩𑀸𑀦𑀻’’𑀢𑀺 𑀯𑀼𑀢𑁆𑀢𑀁.

𑀏𑀓𑀩𑀻𑀚𑀻𑀢𑀺 𑀏𑀢𑁆𑀣 𑀔𑀦𑁆𑀥𑀩𑀻𑀚𑀁 𑀦𑀸𑀫 𑀓𑀣𑀺𑀢𑀁. 𑀬𑀲𑁆𑀲 𑀳𑀺 𑀲𑁄𑀢𑀸𑀧𑀦𑁆𑀦𑀲𑁆𑀲 𑀏𑀓𑀁 𑀔𑀦𑁆𑀥𑀩𑀻𑀚𑀁 𑀅𑀢𑁆𑀣𑀺, 𑀏𑀓𑀁 𑀅𑀢𑁆𑀢𑀪𑀸𑀯𑀕𑁆𑀕𑀳𑀡𑀁, 𑀲𑁄 𑀏𑀓𑀩𑀻𑀚𑀺 𑀦𑀸𑀫. 𑀢𑁂𑀦𑀸𑀳 𑁋 ‘‘𑀲𑁄𑀢𑀸𑀧𑀦𑁆𑀦𑁄 𑀳𑀼𑀢𑁆𑀯𑀸’’𑀢𑀺𑀆𑀤𑀺. 𑀫𑀸𑀦𑀼𑀲𑀓𑀁 𑀪𑀯𑀦𑁆𑀢𑀺 𑀇𑀤𑀁 𑀧𑀦𑁂𑀢𑁆𑀣 𑀤𑁂𑀲𑀦𑀸𑀫𑀢𑁆𑀢𑀁, 𑀤𑁂𑀯𑀪𑀯𑀁 𑀦𑀺𑀩𑁆𑀩𑀢𑁆𑀢𑁂𑀢𑀻𑀢𑀺𑀧𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺𑀬𑁂𑀯. 𑀪𑀕𑀯𑀢𑀸 𑀕𑀳𑀺𑀢𑀦𑀸𑀫𑀸𑀦𑁂𑀢𑀸𑀦𑀺. 𑀏𑀢𑁆𑀢𑀓𑀜𑁆𑀳𑀺 𑀧𑀫𑀸𑀡𑀁 𑀕𑀢𑁄 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑁄 𑀦𑀸𑀫 𑀳𑁄𑀢𑀺, 𑀏𑀢𑁆𑀢𑀓𑀁 𑀓𑁄𑀮𑀁𑀓𑁄𑀮𑁄, 𑀏𑀢𑁆𑀢𑀓𑀁 𑀏𑀓𑀩𑀻𑀚𑀻𑀢𑀺 𑀪𑀕𑀯𑀢𑀸 𑀏𑀢𑁂𑀲𑀁 𑀦𑀸𑀫𑀁 𑀕𑀳𑀺𑀢𑀁.

𑀤𑁆𑀯𑁂 𑀢𑀬𑁄 𑀪𑀯𑁂𑀢𑀺 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀏𑀯 𑀤𑁆𑀯𑁂 𑀢𑀬𑁄 𑀪𑀯𑁂. 𑀲𑀫𑁆𑀩𑁄𑀥𑀺𑀘𑀢𑀼𑀲𑀘𑁆𑀘𑀥𑀫𑁆𑀫𑁄 𑀧𑀭𑀁 𑀅𑀬𑀦𑀁 𑀦𑀺𑀲𑁆𑀲𑀬𑁄 𑀕𑀢𑀺 𑀏𑀢𑀲𑁆𑀲𑀸𑀢𑀺 𑀲𑀫𑁆𑀩𑁄𑀥𑀺𑀧𑀭𑀸𑀬𑀡𑁄. 𑀓𑀼𑀮𑀢𑁄 𑀓𑀼𑀮𑀁 𑀕𑀘𑁆𑀙𑀢𑀻𑀢𑀺 𑀓𑁄𑀮𑀁𑀓𑁄𑀮𑁄. 𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀢𑁄 𑀧𑀝𑁆𑀞𑀸𑀬 𑀳𑀺 𑀦𑀻𑀘𑀓𑀼𑀮𑁂 𑀉𑀧𑁆𑀧𑀢𑁆𑀢𑀺 𑀦𑀸𑀫 𑀦𑀢𑁆𑀣𑀺, 𑀫𑀳𑀸𑀪𑁄𑀕𑁂𑀲𑀼 𑀓𑀼𑀮𑁂𑀲𑀼 𑀏𑀯 𑀦𑀺𑀩𑁆𑀩𑀢𑁆𑀢𑀢𑀻𑀢𑀺 𑀅𑀢𑁆𑀣𑁄. 𑀓𑁂𑀯𑀮𑁄𑀧𑀺 𑀳𑀺 𑀓𑀼𑀮-𑀲𑀤𑁆𑀤𑁄 𑀫𑀳𑀸𑀪𑁄𑀕𑀓𑀼𑀮𑀫𑁂𑀯 𑀯𑀤𑀢𑀺. 𑀤𑁆𑀯𑁂 𑀯𑀸 𑀢𑀻𑀡𑀺 𑀯𑀸 𑀓𑀼𑀮𑀸𑀦𑀻𑀢𑀺 𑀤𑁂𑀯𑀫𑀦𑀼𑀲𑁆𑀲𑀯𑀲𑁂𑀦 𑀤𑁆𑀯𑁂 𑀯𑀸 𑀢𑀬𑁄 𑀯𑀸 𑀪𑀯𑁂𑀢𑀺 𑀅𑀬𑀫𑁆𑀧𑀺 𑀫𑀺𑀲𑁆𑀲𑀓𑀪𑀯𑁂𑀦 𑀓𑀣𑀺𑀢𑁄. 𑀚𑀸𑀢𑀲𑁆𑀲 𑀓𑀼𑀫𑀸𑀭𑀲𑁆𑀲 𑀯𑀺𑀬 𑀅𑀭𑀺𑀬𑀸𑀬 𑀚𑀸𑀢𑀺𑀬𑀸 𑀚𑀸𑀢𑀲𑁆𑀲 𑀦𑀸𑀫𑀫𑁂𑀢𑀁, 𑀬𑀤𑀺𑀤𑀁 𑀦𑀺𑀬𑀢𑁄𑀢𑀺 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑀸𑀤𑀺𑀓𑁄𑀢𑀺 𑀘 𑀲𑀫𑀜𑁆𑀜𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀪𑀕𑀯𑀢𑀸 𑀕𑀳𑀺𑀢𑀦𑀸𑀫𑀯𑀲𑁂𑀦𑁂𑀯𑀸’’𑀢𑀺𑀆𑀤𑀺.

𑀬𑀤𑀺 𑀧𑀼𑀩𑁆𑀩𑀳𑁂𑀢𑀼𑀦𑀺𑀬𑀫𑀢𑁄 𑀲𑁄𑀢𑀸𑀧𑀦𑁆𑀦𑁄 𑀘 𑀦𑀺𑀬𑀢𑁄𑀢𑀺 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀢𑁄 𑀉𑀤𑁆𑀥𑀁 𑀢𑀺𑀡𑁆𑀡𑀁 𑀫𑀕𑁆𑀕𑀸𑀦𑀁 𑀉𑀧𑀦𑀺𑀲𑁆𑀲𑀬𑀸𑀪𑀸𑀯𑀢𑁄 𑀧𑀼𑀩𑁆𑀩𑀳𑁂𑀢𑀼𑀓𑀺𑀘𑁆𑀘𑀁 𑀦𑀢𑁆𑀣𑀻𑀢𑀺 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀲𑁆𑀲 𑀉𑀧𑀦𑀺𑀲𑁆𑀲𑀬𑀪𑀸𑀯𑁄 𑀆𑀧𑀚𑁆𑀚𑀢𑀺. 𑀬𑀤𑀺 𑀢𑀲𑁆𑀲𑀧𑀺 𑀧𑀼𑀩𑁆𑀩𑀳𑁂𑀢𑀼𑀉𑀧𑀦𑀺𑀲𑁆𑀲𑀬𑁄 𑀲𑀺𑀬𑀸, 𑀢𑀸𑀯 𑀦𑀺𑀬𑀫𑀢𑁄 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀼𑀧𑁆𑀧𑀢𑁆𑀢𑀺𑀢𑁄 𑀧𑀼𑀩𑁆𑀩𑁂 𑀏𑀯 𑀦𑀺𑀬𑀫𑀺𑀢𑁄, 𑀬𑀸𑀯𑀜𑁆𑀘 𑀅𑀓𑀦𑀺𑀝𑁆𑀞𑀁 𑀢𑀲𑁆𑀲 𑀧𑀼𑀩𑁆𑀩𑀳𑁂𑀢𑀼 𑀦𑀸𑀫, 𑀅𑀳𑁂𑀢𑀼𑀓𑀢𑀸 𑀆𑀧𑀦𑁆𑀦𑀸, 𑀇𑀘𑁆𑀘𑀲𑁆𑀲 𑀅𑀳𑁂𑀢𑀼 𑀅𑀧𑁆𑀧𑀘𑁆𑀘𑀬𑀸 𑀦𑀺𑀧𑁆𑀨𑀢𑁆𑀢𑀺 𑀧𑀸𑀧𑀼𑀡𑀸𑀢𑀺. 𑀓𑀺𑀜𑁆𑀘 𑀳𑁂𑀢𑀼 𑀘𑁂? 𑀦𑀺𑀬𑀫𑀢𑁄 𑀲𑁄𑀢𑀸𑀧𑀦𑁆𑀦𑁄 𑀘 𑀦𑀺𑀬𑀢𑁄𑀢𑀺 𑀧𑀞𑀫𑀫𑀕𑁆𑀕𑀸𑀥𑀺𑀕𑀫𑁂𑀦𑁂𑀯 𑀅𑀦𑀼𑀓𑁆𑀓𑀫𑁂𑀦 𑀉𑀧𑀭𑀺 𑀢𑀺𑀡𑁆𑀡𑀁 𑀫𑀕𑁆𑀕𑀸𑀦𑀁 𑀓𑀺𑀘𑁆𑀘𑀸𑀦𑀺 𑀦𑀺𑀧𑁆𑀨𑀚𑁆𑀚𑀦𑁆𑀢𑀺, 𑀏𑀯𑀁 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑀢𑀸𑀤𑀺𑀦𑀺𑀬𑀫𑁂 𑀲𑀢𑀺 𑀲𑀢𑁆𑀢𑀫𑀪𑀯𑀸𑀤𑀺𑀢𑁄 𑀉𑀤𑁆𑀥𑀁 𑀧𑀯𑀢𑁆𑀢𑀢𑀸𑀬 𑀤𑀼𑀓𑁆𑀔𑀲𑁆𑀲 𑀫𑀽𑀮𑀪𑀽𑀢𑀸 𑀓𑀺𑀮𑁂𑀲𑀸 𑀧𑀞𑀫𑀫𑀕𑁆𑀕𑁂𑀦𑁂𑀯 𑀔𑀻𑀡𑀸𑀢𑀺 𑀉𑀧𑀭𑀺 𑀢𑀬𑁄 𑀫𑀕𑁆𑀕𑀸 𑀅𑀓𑀺𑀘𑁆𑀘𑀸 𑀲𑀺𑀬𑀼𑀁. 𑀢𑁂𑀦𑀸𑀳 ‘‘𑀧𑀞𑀫𑀫𑀕𑁆𑀕𑀲𑁆𑀲 𑀉𑀧𑀦𑀺𑀲𑁆𑀲𑀬𑁄 𑀓𑀢𑁄 𑀦𑀸𑀫𑀸’’𑀢𑀺𑀆𑀤𑀺.

𑀬𑀤𑀺 𑀉𑀧𑀭𑀺 𑀢𑀬𑁄 𑀫𑀕𑁆𑀕𑀸 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑀸𑀤𑀺𑀢𑀁 𑀦𑀺𑀬𑀫𑁂𑀦𑁆𑀢𑀺, 𑀢𑀢𑁄 𑀘 𑀅𑀜𑁆𑀜𑁄 𑀲𑁄𑀢𑀸𑀧𑀦𑁆𑀦𑁄 𑀦𑀢𑁆𑀣𑀻𑀢𑀺 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀲𑁆𑀲 𑀅𑀓𑀺𑀘𑁆𑀘𑀓𑀢𑀸 𑀦𑀺𑀧𑁆𑀧𑀬𑁄𑀚𑀦𑀢𑀸 𑀆𑀧𑀚𑁆𑀚𑁂𑀬𑁆𑀬. 𑀅𑀣 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀆𑀤𑀺𑀧𑁆𑀧𑀳𑀸𑀦𑀁 𑀢𑀲𑁆𑀲 𑀓𑀺𑀘𑁆𑀘𑀁, 𑀢𑁂𑀲𑀁 𑀢𑁂𑀲𑀁 𑀧𑀳𑀸𑀦𑁂𑀦 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑀸𑀤𑀺𑀦𑀺𑀬𑀫𑀢𑀸𑀬. 𑀪𑀯𑀺𑀢𑀩𑁆𑀩𑀁, 𑀬𑀸𑀯 𑀉𑀧𑀭𑀺𑀫𑀕𑁆𑀕𑀸 𑀏𑀯 𑀳𑁄𑀦𑁆𑀢𑀻𑀢𑀺 𑀲𑀢𑁆𑀢𑀪𑀯𑀸𑀤𑀺𑀢𑁄 𑀉𑀤𑁆𑀥𑀫𑀧𑀯𑀢𑁆𑀢𑀦𑀢𑁄 𑀢𑁂𑀦 𑀯𑀺𑀦𑀸𑀦𑁂𑀦 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀆𑀤𑀺𑀧𑁆𑀧𑀳𑀸𑀦𑁂𑀦 𑀘 𑀢𑁂𑀦 𑀯𑀺𑀦𑀸 𑀪𑀯𑀺𑀢𑀩𑁆𑀩𑀦𑁆𑀢𑀺 𑀆𑀳 𑁋 ‘‘𑀧𑀞𑀫𑀫𑀕𑁆𑀕𑁂 𑀅𑀦𑀼𑀧𑁆𑀧𑀦𑁆𑀦𑁂𑀯 𑀉𑀧𑀭𑀺 𑀢𑀬𑁄 𑀫𑀕𑁆𑀕𑀸 𑀉𑀧𑁆𑀧𑀦𑁆𑀦𑀸𑀢𑀺 𑀆𑀧𑀚𑁆𑀚𑀢𑀻’’𑀢𑀺. 𑀢𑀺𑀡𑁆𑀡𑀁 𑀫𑀕𑁆𑀕𑀸𑀦𑀦𑁆𑀢𑀺 𑀉𑀧𑀭𑀺 𑀢𑀺𑀡𑁆𑀡𑀁 𑀫𑀕𑁆𑀕𑀸𑀦𑀁. 𑀯𑀺𑀧𑀲𑁆𑀲𑀦𑀸 𑀦𑀺𑀬𑀫𑁂𑀢𑀻𑀢𑀺 𑀬𑀼𑀚𑁆𑀚𑀢𑀻𑀢𑀺 𑀯𑀼𑀢𑁆𑀢𑀫𑀢𑁆𑀣𑀁 𑀯𑀺𑀯𑀭𑀦𑁆𑀢𑁄 ‘‘𑀲𑀘𑁂 𑀳𑀻’’𑀢𑀺𑀆𑀤𑀺𑀫𑀸𑀳.

𑀲𑁄𑀢𑀸𑀧𑀦𑁆𑀦𑁄 𑀯𑀝𑁆𑀝𑀚𑁆𑀛𑀸𑀲𑀬𑁄. 𑀢𑀢𑁆𑀭𑁂𑀓𑀘𑁆𑀘𑁂 𑀧𑀸𑀓𑀝𑁂 𑀧𑀜𑁆𑀜𑀸𑀢𑁂 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀦𑀸𑀣𑀧𑀺𑀡𑁆𑀟𑀺𑀓𑁄’’𑀢𑀺𑀆𑀤𑀺𑀫𑀸𑀳. 𑀇𑀥𑀝𑁆𑀞𑀓𑀯𑁄𑀓𑀺𑀡𑁆𑀡𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑀲𑁆𑀲𑀸𑀢𑀺 𑀬𑁄 𑀇𑀫𑀲𑁆𑀫𑀺𑀁 𑀓𑀸𑀫𑀪𑀯𑁂 𑀞𑀺𑀢𑁄 𑀫𑀦𑀼𑀲𑁆𑀲𑀤𑁂𑀯𑀯𑀲𑁂𑀦 𑀯𑁄𑀓𑀺𑀡𑁆𑀡𑀪𑀯𑀽𑀧𑀧𑀢𑁆𑀢𑀺𑀓𑁄 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑁄 𑀘, 𑀢𑀲𑁆𑀲 𑀯𑀲𑁂𑀦. 𑀦𑀸𑀫𑀁 𑀓𑀣𑀺𑀢𑀦𑁆𑀢𑀺 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑁄𑀢𑀺 𑀦𑀸𑀫𑀁 𑀓𑀣𑀺𑀢𑀁. 𑀓𑁂𑀘𑀺 𑀧𑀦 ‘‘𑀓𑀸𑀫𑀪𑀯𑁂 𑀲𑀢𑁆𑀢𑀓𑁆𑀔𑀢𑁆𑀢𑀼𑀁𑀬𑁂𑀯 𑀉𑀧𑁆𑀧𑀚𑁆𑀚𑀢𑀺, 𑀦 𑀢𑀢𑁄’’𑀢𑀺 𑀯𑀤𑀦𑁆𑀢𑀺, 𑀢𑀁 𑀯𑀻𑀫𑀁𑀲𑀺𑀢𑀩𑁆𑀩𑀁.

𑀲𑁄𑀥𑁂𑀲𑁆𑀲𑀸𑀫𑀻𑀢𑀺 𑀚𑀫𑁆𑀩𑀼𑀤𑀻𑀧𑁂 𑀓𑁂𑀦𑀘𑀺 𑀢𑁂𑀧𑀺𑀝𑀓𑁂𑀦 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁 𑀧𑀺𑀝𑀓𑀢𑁆𑀢𑀬𑀫𑁂𑀯 𑀫𑀬𑁆𑀳𑀁 𑀉𑀕𑁆𑀕𑀳𑀧𑀭𑀺𑀧𑀼𑀘𑁆𑀙𑀸𑀯𑀲𑁂𑀦 𑀲𑁄𑀥𑁂𑀬𑁆𑀬𑀸𑀫𑀻𑀢𑀺 𑀧𑀭𑀢𑀻𑀭𑀁 𑀚𑀫𑁆𑀩𑀼𑀤𑀻𑀧𑀁 𑀕𑀢𑁄. 𑀬𑁄 𑀪𑀺𑀓𑁆𑀔𑀼 𑀲𑀓𑁆𑀓𑁄𑀢𑀻𑀢𑀺 𑀬𑁄𑀚𑀦𑀸. 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀤𑀻𑀲𑀼 𑀏𑀓𑀫𑀼𑀔𑁂𑀦 𑀅𑀪𑀺𑀦𑀺𑀯𑀺𑀝𑁆𑀞𑁂𑀦𑀧𑀺 𑀅𑀪𑀺𑀥𑀫𑁆𑀫𑀧𑀭𑀺𑀬𑀸𑀬𑁂𑀦 𑀢𑀻𑀳𑀺 𑀏𑀯 𑀯𑀺𑀫𑁄𑀓𑁆𑀔𑁂𑀳𑀺 𑀫𑀕𑁆𑀕𑀁 𑀮𑀪𑀢𑀻𑀢𑀺 𑀅𑀪𑀺𑀦𑀺𑀯𑁂𑀲𑀪𑁂𑀤𑁂𑀦 𑀢𑀬𑁄 𑀧𑀼𑀕𑁆𑀕𑀮𑀸 𑀲𑀼𑀜𑁆𑀜𑀢𑀢𑁄 𑀯𑀼𑀝𑁆𑀞𑀺𑀢𑀸, 𑀢𑀣𑀸 𑀢𑀬𑁄 𑀅𑀧𑁆𑀧𑀡𑀺𑀳𑀺𑀢𑀢𑁄 𑀯𑀼𑀝𑁆𑀞𑀺𑀢𑀸𑀢𑀺 𑀙 𑀳𑁄𑀦𑁆𑀢𑀺, 𑀢𑁂𑀯 𑀲𑀤𑁆𑀥𑀸𑀥𑀼𑀭𑀧𑀜𑁆𑀜𑀸𑀥𑀼𑀭𑀯𑀲𑁂𑀦 𑀤𑁆𑀯𑀸𑀤𑀲 𑀲𑀓𑀤𑀸𑀕𑀸𑀫𑀺𑀦𑁄. 𑀢𑀣𑀸 𑀅𑀭𑀳𑀦𑁆𑀢𑁄, 𑀢𑀬𑁄 𑀅𑀦𑁆𑀢𑀭𑀸𑀧𑀭𑀺𑀦𑀺𑀩𑁆𑀩𑀸𑀬𑀺𑀦𑁄 𑀏𑀓𑁄 𑀉𑀧𑀳𑀘𑁆𑀘𑀧𑀭𑀺𑀦𑀺𑀩𑁆𑀩𑀸𑀬𑀻 𑀏𑀓𑁄 𑀉𑀤𑁆𑀥𑀁𑀲𑁄𑀢𑁄 𑀅𑀓𑀦𑀺𑀝𑁆𑀞𑀕𑀸𑀫𑀻𑀢𑀺 𑀧𑀜𑁆𑀘, 𑀢𑁂 𑀅𑀲𑀗𑁆𑀔𑀸𑀭𑀲𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀺𑀪𑁂𑀤𑁂𑀦 𑀤𑀲𑀸𑀢𑀺 𑀅𑀯𑀺𑀳𑀸𑀤𑀻𑀲𑀼 𑀘𑀢𑀽𑀲𑀼𑀧𑀺 𑀘𑀢𑁆𑀢𑀸𑀮𑀻𑀲, 𑀅𑀓𑀦𑀺𑀝𑁆𑀞𑁂 𑀧𑀦 𑀉𑀤𑁆𑀥𑀁𑀲𑁄𑀢𑁄 𑀦𑀢𑁆𑀣𑀻𑀢𑀺 𑀅𑀝𑁆𑀞𑀘𑀢𑁆𑀢𑀸𑀮𑀻𑀲 𑀅𑀦𑀸𑀕𑀸𑀫𑀺𑀦𑁄. 𑀯𑀺𑀧𑀲𑁆𑀲𑀦𑀸 𑀓𑀣𑀺𑀢𑀸 𑀲𑀫𑁆𑀫𑀲𑀦𑀘𑀸𑀭𑀲𑁆𑀲 𑀓𑀣𑀺𑀢𑀢𑁆𑀢𑀸.

𑁫-𑁧𑁦. 𑀲𑀼𑀤𑁆𑀥𑀓𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁪𑁯𑁫-𑁫𑁦𑁦. 𑀬𑀣𑀸 𑀘𑀓𑁆𑀔𑀼𑀲𑁆𑀲 𑀲𑀳𑀚𑀸𑀢𑀢𑀤𑀺𑀦𑁆𑀤𑁆𑀭𑀺𑀬𑀦𑀺𑀲𑁆𑀲𑀺𑀢𑀥𑀫𑁆𑀫𑁂𑀲𑀼 𑀅𑀥𑀺𑀧𑀢𑁂𑀬𑁆𑀬𑀁 𑀅𑀦𑀼𑀯𑀢𑁆𑀢𑀦𑀻𑀬𑀢𑁆𑀢𑀸, 𑀏𑀯𑀁 𑀢𑀁𑀤𑁆𑀯𑀸𑀭𑀺𑀓𑀥𑀫𑁆𑀫𑁂𑀲𑀼𑀧𑀺 𑀅𑀥𑀺𑀧𑀢𑁂𑀬𑁆𑀬𑀁 𑀢𑁂𑀳𑀺 𑀅𑀦𑀼𑀯𑀢𑁆𑀢𑀦𑀻𑀬𑀢𑁆𑀢𑀸𑀢𑀺 𑀯𑀼𑀢𑁆𑀢𑀁 𑁋 ‘‘𑀅𑀥𑀺𑀧𑀢𑁂𑀬𑁆𑀬𑀲𑀗𑁆𑀔𑀸𑀢𑁂𑀦 𑀇𑀦𑁆𑀤𑀝𑁆𑀞𑁂𑀦𑀸’’𑀢𑀺. 𑀏𑀲 𑀦𑀬𑁄 𑀲𑁂𑀲𑀺𑀦𑁆𑀤𑁆𑀭𑀺𑀬𑀸𑀤𑀻𑀲𑀼𑀧𑀺. 𑀘𑀢𑀼𑀲𑀘𑁆𑀘𑀯𑀲𑁂𑀦 𑀓𑀣𑀺𑀢𑀸𑀦𑀺 𑀲𑀪𑀸𑀯𑀸𑀤𑀺𑀯𑀺𑀪𑀸𑀯𑀦𑀲𑁆𑀲 𑀓𑀣𑀺𑀢𑀢𑁆𑀢𑀸.

𑀙𑀴𑀺𑀦𑁆𑀤𑁆𑀭𑀺𑀬𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀲𑀼𑀔𑀺𑀦𑁆𑀤𑁆𑀭𑀺𑀬𑀯𑀕𑁆𑀕𑁄

𑁧-𑁫. 𑀲𑀼𑀤𑁆𑀥𑀺𑀓𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁫𑁦𑁧-𑁫𑁦𑁫. 𑀬𑀣𑀸 𑀘𑀓𑁆𑀔𑀼 𑀤𑀲𑁆𑀲𑀦𑁂 𑀅𑀥𑀺𑀧𑀢𑁂𑀬𑁆𑀬𑀝𑁆𑀞𑁂𑀦 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁, 𑀏𑀯𑀁 𑀲𑀼𑀔𑀯𑁂𑀤𑀦𑀸 𑀲𑀼𑀔𑀦𑁂 𑀅𑀥𑀺𑀧𑀢𑁂𑀬𑁆𑀬𑀝𑁆𑀞𑁂𑀦 𑀲𑀼𑀔𑀺𑀦𑁆𑀤𑁆𑀭𑀺𑀬𑀁. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀲𑁂𑀲𑀁 𑀢𑁂𑀪𑀽𑀫𑀓𑀦𑁆𑀢𑀺 𑀲𑁂𑀲𑀁 𑀪𑀽𑀫𑀺𑀢𑁆𑀢𑀬𑀯𑀲𑁂𑀦 𑀢𑁂𑀪𑀽𑀫𑀓𑀁.

𑁬. 𑀧𑀞𑀫𑀯𑀺𑀪𑀗𑁆𑀕𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁦𑁬. 𑀓𑀸𑀬𑀺𑀓𑀦𑁆𑀢𑀺 𑀅𑀬𑀫𑀲𑁆𑀲 𑀦𑀺𑀲𑁆𑀲𑀬𑀯𑀲𑁂𑀦 𑀦𑀺𑀤𑁆𑀤𑁂𑀲𑁄𑀢𑀺 𑀆𑀳 𑁋 ‘‘𑀓𑀸𑀬𑀧𑀲𑀸𑀤𑀯𑀢𑁆𑀣𑀼𑀓’’𑀦𑁆𑀢𑀺. 𑀲𑀭𑀽𑀧𑀦𑀺𑀤𑁆𑀤𑁂𑀲𑁄 𑀲𑀼𑀔𑀁 𑀲𑀼𑀔𑀺𑀦𑁆𑀤𑁆𑀭𑀺𑀬𑀲𑁆𑀲 𑀲𑀭𑀽𑀧𑀦𑁆𑀢𑀺. 𑀲𑀸𑀤𑀦𑀻𑀬𑀝𑁆𑀞𑁂𑀦 𑀥𑀫𑁆𑀫𑀧𑀤𑀸𑀦𑀺 𑀅𑀢𑁆𑀢𑀦𑀺 𑀅𑀲𑁆𑀲𑀸𑀤𑀬𑀢𑀻𑀢𑀺 𑀲𑀸𑀢𑀁, 𑀫𑀥𑀼𑀭𑀁. 𑀯𑁂𑀤𑀬𑀺𑀢𑀦𑁆𑀢𑀺 𑀯𑁂𑀤𑀺𑀬𑀦𑀁, 𑀅𑀦𑀼𑀪𑀯𑀦𑀦𑁆𑀢𑀺 𑀅𑀢𑁆𑀣𑁄. 𑀅𑀜𑁆𑀜𑀥𑀫𑁆𑀫𑀯𑀺𑀲𑀺𑀝𑁆𑀞𑁄𑀢𑀺 𑀨𑀲𑁆𑀲𑀸𑀤𑀻𑀳𑀺 𑀅𑀜𑁆𑀜𑁂𑀳𑀺 𑀥𑀫𑁆𑀫𑁂𑀳𑀺 𑀯𑀺𑀲𑀤𑀺𑀲𑁄. 𑀓𑀸𑀬𑀺𑀓𑀦𑁆𑀢𑀺 𑀧𑀲𑀸𑀤𑀓𑀸𑀬𑀲𑀦𑁆𑀦𑀺𑀲𑁆𑀲𑀺𑀢𑀁. 𑀘𑁂𑀢𑀲𑀺𑀓𑀦𑁆𑀢𑀺 𑀘𑁂𑀢𑁄𑀲𑀦𑁆𑀦𑀺𑀲𑁆𑀲𑀺𑀢𑀁, 𑀢𑁂𑀦 𑀯𑀼𑀢𑁆𑀢𑀁 ‘‘𑀏𑀢𑁆𑀣 𑀧𑀦𑀸’’𑀢𑀺𑀆𑀤𑀺. 𑀓𑀸𑀬𑀧𑀲𑀸𑀤…𑀧𑁂… 𑀦𑀢𑁆𑀣𑀺, 𑀢𑀲𑁆𑀫𑀸 ‘‘𑀘𑀢𑁆𑀢𑀸𑀭𑁄 𑀧𑀲𑀸𑀤𑀓𑀸𑀬𑁂 𑀯𑀢𑁆𑀣𑀼𑀁 𑀓𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁.

𑁯. 𑀓𑀝𑁆𑀞𑁄𑀧𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁦𑁯. 𑀤𑁆𑀯𑀺𑀦𑁆𑀦𑀁 𑀅𑀭𑀡𑀻𑀦𑀦𑁆𑀢𑀺 𑀅𑀥𑀭𑀼𑀢𑁆𑀢𑀭𑀸𑀭𑀡𑀻𑀦𑀁. 𑀓𑀺𑀜𑁆𑀘𑀺 𑀤𑁆𑀯𑀬𑀁 𑀲𑀗𑁆𑀖𑀝𑁆𑀝𑀺𑀢𑀫𑀢𑁆𑀢𑀁 𑀳𑀼𑀢𑁆𑀯𑀸 𑀦 𑀲𑀫𑁄𑀥𑀸𑀦𑀕𑀢𑀁 𑀳𑁄𑀢𑀻𑀢𑀺 𑀢𑀁𑀦𑀺𑀯𑀢𑁆𑀢𑀦𑀢𑁆𑀣𑀁 ‘‘𑀲𑀗𑁆𑀖𑀝𑁆𑀝𑀦𑀲𑀫𑁄𑀥𑀸𑀦𑀸’’𑀢𑀺 𑀯𑀼𑀢𑁆𑀢𑀁. 𑀧𑀼𑀦𑀧𑁆𑀧𑀼𑀦𑀁 𑀲𑀗𑁆𑀖𑀝𑁆𑀝𑀦𑁂𑀦 𑀳𑀺 𑀢𑁂𑀚𑁄𑀧𑀸𑀢𑀼𑀪𑀸𑀯𑁄. 𑀅𑀥𑀭𑀸𑀭𑀡𑀻 𑀯𑀺𑀬 𑀯𑀢𑁆𑀣𑀸𑀭𑀫𑁆𑀫𑀡𑀁 𑀅𑀲𑀢𑀺𑀧𑀺 𑀯𑀸𑀬𑀸𑀫𑁂 𑀢𑀚𑁆𑀚𑀲𑀫𑁆𑀨𑀲𑁆𑀲𑀧𑀘𑁆𑀘𑀬𑀢𑁄. 𑀉𑀢𑁆𑀢𑀭𑀸𑀭𑀡𑀻 𑀯𑀺𑀬 𑀨𑀲𑁆𑀲𑁄 𑀯𑀢𑁆𑀣𑀸𑀭𑀫𑁆𑀫𑀡𑀸𑀤𑀺𑀨𑀲𑁆𑀲𑁂𑀦 𑀧𑀯𑀢𑁆𑀢𑀦𑀢𑁄. 𑀲𑀗𑁆𑀖𑀝𑁆𑀝𑁄 𑀯𑀺𑀬 𑀨𑀲𑁆𑀲𑀲𑀗𑁆𑀖𑀝𑁆𑀝𑀦𑀁 𑀅𑀭𑀡𑀺𑀤𑁆𑀯𑀬𑀲𑀗𑁆𑀖𑀝𑁆𑀝𑀦𑀸 𑀯𑀺𑀬 𑀨𑀲𑁆𑀲𑀲𑁆𑀲𑁂𑀯 𑀯𑀢𑁆𑀣𑀸𑀭𑀫𑁆𑀫𑀡𑁂𑀲𑀼 𑀲𑀗𑁆𑀖𑀝𑁆𑀝𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀺𑀢𑁄. 𑀅𑀕𑁆𑀕𑀺 𑀯𑀺𑀬 𑀯𑁂𑀤𑀦𑀸 𑀅𑀦𑀼𑀤𑀳𑀦𑀝𑁆𑀞𑁂𑀦 𑀔𑀡𑀺𑀓𑀸𑀯𑀸𑀬𑀜𑁆𑀘. 𑀯𑀢𑁆𑀣𑀸𑀭𑀫𑁆𑀫𑀡𑀁 𑀯𑀸 𑀉𑀢𑁆𑀢𑀭𑀸𑀭𑀡𑀻 𑀯𑀺𑀬 𑀇𑀦𑁆𑀥𑀦𑀸𑀧𑀸𑀢𑀕𑀳𑀡𑀸𑀤𑀻𑀲𑀼 𑀉𑀲𑁆𑀲𑀸𑀳𑀲𑁆𑀲 𑀯𑀺𑀬 𑀧𑀯𑀢𑁆𑀢𑀺𑀲𑀫𑁆𑀪𑀯𑀢𑁄. 𑀨𑀲𑁆𑀲𑁄 𑀅𑀥𑀭𑀸𑀭𑀡𑀻 𑀯𑀺𑀬 𑀦𑀺𑀭𑀼𑀲𑁆𑀲𑀸𑀳𑀦𑀺𑀭𑀻𑀳𑀢𑀸𑀯𑀲𑁂𑀦 𑀅𑀢𑁆𑀢𑀲𑀸𑀥𑀦𑀢𑁄.

𑁧𑁦. 𑀉𑀧𑁆𑀧𑀝𑀺𑀧𑀸𑀝𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁧𑁦. 𑀭𑀲𑀦𑀁 𑀪𑀜𑁆𑀚𑀦𑀁 𑀦𑀺𑀭𑀼𑀚𑁆𑀛𑀦𑀁 𑀭𑀲𑁄. 𑀬𑁄 𑀬𑁄 𑀥𑀫𑁆𑀫𑀸𑀦𑀁 𑀭𑀲𑁄 𑀬𑀣𑀸𑀥𑀫𑁆𑀫𑀭𑀲𑁄, 𑀢𑁂𑀦 𑀬𑀣𑀸𑀥𑀫𑁆𑀫𑀭𑀲𑁂𑀦. 𑀧𑀝𑀺𑀧𑀸𑀝𑀺𑀬𑀸𑀢𑀺 𑀓𑀫𑁂𑀦, 𑀉𑀪𑀬𑁂𑀦𑀧𑀺 𑀥𑀫𑁆𑀫𑀸𑀦𑀁 𑀧𑀳𑀸𑀦𑀓𑁆𑀓𑀫𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀇𑀫𑀲𑁆𑀫𑀺𑀁 𑀇𑀦𑁆𑀤𑁆𑀭𑀺𑀬𑀯𑀺𑀪𑀗𑁆𑀕𑁂𑀢𑀺 𑀇𑀫𑀲𑁆𑀫𑀺𑀁 𑀇𑀦𑁆𑀤𑁆𑀭𑀺𑀬𑀲𑀁𑀬𑀼𑀢𑁆𑀢𑀲𑀜𑁆𑀜𑀺𑀢𑁂 𑀇𑀦𑁆𑀤𑁆𑀭𑀺𑀬𑀯𑀺𑀪𑀗𑁆𑀕𑁂. 𑀅𑀤𑁂𑀲𑀺𑀢𑀢𑁆𑀢𑀸𑀢𑀺 𑀲𑁂𑀲𑀲𑀼𑀢𑁆𑀢𑀸𑀦𑀺 𑀯𑀺𑀬 ‘‘𑀲𑀼𑀔𑀺𑀦𑁆𑀤𑁆𑀭𑀺𑀬’’𑀦𑁆𑀢𑀺𑀆𑀤𑀺𑀦𑀸 𑀅𑀤𑁂𑀲𑀺𑀢𑀢𑁆𑀢𑀸 𑀇𑀤𑀁 𑀉𑀧𑁆𑀧𑀝𑀺𑀧𑀸𑀝𑀺𑀓𑀲𑀼𑀢𑁆𑀢𑀁 𑀦𑀸𑀫. 𑀯𑀮𑀺𑀬𑀸 𑀔𑀭𑀲𑀫𑁆𑀨𑀲𑁆𑀲𑀸𑀬 𑀨𑀼𑀝𑁆𑀞𑀲𑁆𑀲. 𑀢𑀦𑁆𑀢𑀺 𑀓𑀡𑁆𑀝𑀓𑀯𑁂𑀤𑀦𑀸𑀤𑀺𑀁. 𑀏𑀢𑀲𑁆𑀲 𑀤𑀼𑀓𑁆𑀔𑀺𑀦𑁆𑀤𑁆𑀭𑀺𑀬𑀲𑁆𑀲.

𑀢𑁂𑀲𑀁 𑀢𑁂𑀲𑀦𑁆𑀢𑀺 𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀸𑀤𑀻𑀦𑀁. 𑀓𑀸𑀭𑀡𑀯𑀲𑁂𑀦𑁂𑀯𑀸𑀢𑀺 𑀢𑀁𑀢𑀁𑀅𑀲𑀸𑀥𑀸𑀭𑀡𑀓𑀸𑀭𑀡𑀯𑀲𑁂𑀦. 𑀢𑁂𑀲𑀜𑁆𑀳𑀺 𑀯𑀺𑀲𑁂𑀲𑀓𑀸𑀭𑀡𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀢𑁆𑀢𑀘𑀻𑀯𑀭𑀸𑀤𑀻𑀦𑀁 𑀯𑀸’’𑀢𑀺 𑀆𑀳.

𑀏𑀓𑀢𑁄𑀯𑀸𑀢𑀺 𑀧𑀼𑀦𑀧𑁆𑀧𑀼𑀦𑀁 𑀧𑀤𑀼𑀤𑁆𑀥𑀸𑀭𑀡𑀁 𑀅𑀓𑀢𑁆𑀯𑀸 𑀏𑀓𑀚𑁆𑀛𑀫𑁂𑀯. 𑀤𑀼𑀢𑀺𑀬𑀚𑁆𑀛𑀸𑀦𑀸𑀤𑀻𑀦𑀁 𑀉𑀧𑀘𑀸𑀭𑀓𑁆𑀔𑀡𑁂 𑀏𑀯 𑀦𑀺𑀭𑀼𑀚𑁆𑀛𑀦𑁆𑀢𑀻𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑁄. 𑀢𑁂𑀲𑀁 𑀤𑀼𑀓𑁆𑀔𑀺𑀦𑁆𑀤𑁆𑀭𑀺𑀬𑀤𑁄𑀫𑀦𑀲𑁆𑀲𑀸𑀤𑀻𑀦𑀁. 𑀅𑀢𑀺𑀲𑀬𑀦𑀺𑀭𑁄𑀥𑁄𑀢𑀺 𑀲𑀼𑀝𑁆𑀞𑀼 𑀧𑀳𑀸𑀦𑀁 𑀉𑀚𑀼𑀧𑁆𑀧𑀝𑀺𑀧𑀓𑁆𑀔𑁂𑀦 𑀯𑀽𑀧𑀲𑀫𑁄. 𑀦𑀺𑀭𑁄𑀥𑁄𑀬𑁂𑀯𑀸𑀢𑀺 𑀦𑀺𑀭𑁄𑀥𑀫𑀢𑁆𑀢𑀫𑁂𑀯. 𑀦𑀸𑀦𑀸𑀯𑀚𑁆𑀚𑀦𑁂𑀢𑀺 𑀬𑁂𑀦 𑀆𑀯𑀚𑁆𑀚𑀦𑁂𑀦 𑀅𑀧𑁆𑀧𑀦𑀸𑀯𑀻𑀣𑀺 𑀳𑁄𑀢𑀺, 𑀢𑀢𑁄 𑀪𑀺𑀚𑁆𑀚𑀸𑀯𑀚𑁆𑀚𑀦𑁂, 𑀅𑀦𑁂𑀓𑀸𑀯𑀚𑁆𑀚𑀦𑁂 𑀯𑀸. 𑀅𑀧𑁆𑀧𑀦𑀸𑀯𑀻𑀣𑀺𑀬𑀜𑁆𑀳𑀺 𑀉𑀧𑀘𑀸𑀭𑁄 𑀏𑀓𑀸𑀯𑀚𑁆𑀚𑀦𑁄, 𑀇𑀢𑀭𑁄 𑀅𑀦𑁂𑀓𑀸𑀯𑀚𑁆𑀚𑀦𑁄 𑀅𑀦𑁂𑀓𑀓𑁆𑀔𑀢𑁆𑀢𑀼𑀁 𑀧𑀯𑀢𑁆𑀢𑀦𑀢𑁄. 𑀯𑀺𑀲𑀫𑀦𑀺𑀲𑀚𑁆𑀚𑀸𑀬 𑀉𑀧𑁆𑀧𑀦𑁆𑀦𑀓𑀺𑀮𑀫𑀣𑁄 𑀯𑀺𑀲𑀫𑀸𑀲𑀦𑀼𑀧𑀢𑀸𑀧𑁄. 𑀧𑀻𑀢𑀺𑀨𑀭𑀡𑁂𑀦𑀸𑀢𑀺 𑀧𑀻𑀢𑀺𑀬𑀸 𑀨𑀭𑀡𑀭𑀲𑀢𑁆𑀢𑀸. 𑀧𑀻𑀢𑀺𑀲𑀫𑀼𑀝𑁆𑀞𑀸𑀦𑀸𑀦𑀁 𑀯𑀸 𑀧𑀡𑀻𑀢𑀭𑀽𑀧𑀸𑀦𑀁 𑀓𑀸𑀬𑀲𑁆𑀲 𑀩𑁆𑀬𑀸𑀧𑀦𑀢𑁄 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀲𑀩𑁆𑀩𑁄 𑀓𑀸𑀬𑁄 𑀲𑀼𑀔𑁄𑀓𑁆𑀓𑀦𑁆𑀢𑁄 𑀳𑁄𑀢𑀻’’𑀢𑀺. 𑀯𑀺𑀢𑀓𑁆𑀓𑀯𑀺𑀘𑀸𑀭𑀧𑀘𑁆𑀘𑀬𑁂𑀧𑀻𑀢𑀺 𑀧𑀺-𑀲𑀤𑁆𑀤𑁄 𑀅𑀝𑁆𑀞𑀸𑀦𑀧𑀬𑀼𑀢𑁆𑀢𑁄, 𑀲𑁄 ‘‘𑀧𑀳𑀻𑀦𑀲𑁆𑀲𑀸’’𑀢𑀺 𑀏𑀢𑁆𑀣 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑁄 ‘‘𑀧𑀳𑀻𑀦𑀲𑁆𑀲𑀧𑀺 𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀲𑁆𑀲𑀸’’𑀢𑀺. 𑀏𑀢𑀁 𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀉𑀧𑁆𑀧𑀚𑁆𑀚𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀢𑀲𑁆𑀲 𑀫𑀬𑁆𑀳𑀁 𑀅𑀢𑀺𑀘𑀺𑀭𑀁 𑀯𑀺𑀢𑀓𑁆𑀓𑀬𑀢𑁄 𑀯𑀺𑀘𑀸𑀭𑀬𑀢𑁄 𑀓𑀸𑀬𑁄𑀧𑀺 𑀓𑀺𑀮𑀫𑀺, 𑀘𑀺𑀢𑁆𑀢𑀫𑁆𑀧𑀺 𑀯𑀺𑀳𑀜𑁆𑀜𑀻’’𑀢𑀺 𑀘 𑀯𑀘𑀦𑀢𑁄 𑀓𑀸𑀬𑀘𑀺𑀢𑁆𑀢𑀔𑁂𑀤𑀸𑀦𑀁 𑀯𑀺𑀢𑀓𑁆𑀓𑀯𑀺𑀘𑀸𑀭𑀧𑀘𑁆𑀘𑀬𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀯𑀺𑀢𑀓𑁆𑀓𑀯𑀺𑀘𑀸𑀭𑀪𑀸𑀯𑁂 𑀉𑀧𑁆𑀧𑀚𑁆𑀚𑀢𑀺 𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀦𑁆𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀢𑀢𑁆𑀣𑀲𑁆𑀲 𑀲𑀺𑀬𑀸 𑀉𑀧𑁆𑀧𑀢𑁆𑀢𑀻𑀢𑀺 𑀢𑀢𑁆𑀣 𑀤𑀼𑀢𑀺𑀬𑀚𑁆𑀛𑀸𑀦𑀼𑀧𑀘𑀸𑀭𑁂 𑀅𑀲𑁆𑀲 𑀤𑁄𑀫𑀦𑀲𑁆𑀲𑀲𑁆𑀲 𑀉𑀧𑁆𑀧𑀢𑁆𑀢𑀺 𑀪𑀯𑁂𑀬𑁆𑀬. ‘‘𑀢𑀢𑁆𑀣𑀲𑁆𑀲 𑀲𑀺𑀬𑀸 𑀉𑀧𑁆𑀧𑀢𑁆𑀢𑀻’’𑀢𑀺 𑀇𑀤𑀁 𑀧𑀭𑀺𑀓𑀧𑁆𑀧𑀯𑀘𑀦𑀁 𑀉𑀧𑀘𑀸𑀭𑀓𑁆𑀔𑀡𑁂 𑀤𑁄𑀫𑀦𑀲𑁆𑀲𑀲𑁆𑀲 𑀲𑀼𑀧𑁆𑀧𑀳𑀻𑀦𑀪𑀸𑀯𑀤𑀲𑁆𑀲𑀦𑀢𑁆𑀣𑀁. 𑀢𑀣𑀸 𑀳𑀺 𑀯𑀼𑀢𑁆𑀢𑀁 ‘‘𑀦 𑀢𑁆𑀯𑁂𑀯 𑀤𑀼𑀢𑀺𑀬𑀚𑁆𑀛𑀸𑀦𑁂 𑀧𑀳𑀻𑀦𑀧𑀘𑁆𑀘𑀬𑀢𑁆𑀢𑀸’’𑀢𑀺. 𑀧𑀳𑀻𑀦𑀫𑁆𑀧𑀺 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀧𑀻𑀢𑀺 𑀯𑀺𑀬 𑀦 𑀤𑀽𑀭𑁂𑀢𑀺 𑀓𑀢𑁆𑀯𑀸 ‘‘𑀆𑀲𑀦𑁆𑀦𑀢𑁆𑀢𑀸’’𑀢𑀺 𑀯𑀼𑀢𑁆𑀢𑀁. 𑀦𑀸𑀦𑀸𑀯𑀚𑁆𑀚𑀦𑀼𑀧𑀘𑀸𑀭𑁂 𑀧𑀳𑀻𑀦𑀫𑁆𑀧𑀺 𑀧𑀳𑀸𑀦𑀗𑁆𑀕𑀁 𑀧𑀝𑀺𑀧𑀓𑁆𑀔𑁂𑀦 𑀅𑀯𑀺𑀳𑀢𑀢𑁆𑀢𑀸 𑀅𑀦𑁆𑀢𑀭𑀦𑁆𑀢𑀭𑀸 𑀉𑀧𑁆𑀧𑀚𑁆𑀚𑁂𑀬𑁆𑀬𑀸𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀧𑁆𑀧𑀦𑀸𑀧𑁆𑀧𑀢𑁆𑀢𑀸𑀬𑀸’’𑀢𑀺𑀆𑀤𑀺𑀫𑀸𑀳. ‘‘𑀢𑀸𑀤𑀺𑀲𑀸𑀬 𑀆𑀲𑁂𑀯𑀦𑀸𑀬 𑀇𑀘𑁆𑀙𑀺𑀢𑀩𑁆𑀩𑀢𑁆𑀢𑀸 𑀬𑀣𑀸 𑀫𑀕𑁆𑀕𑀯𑀻𑀣𑀺𑀢𑁄 𑀧𑀼𑀩𑁆𑀩𑁂 𑀤𑁆𑀯𑁂 𑀢𑀬𑁄 𑀚𑀯𑀦𑀯𑀸𑀭𑀸 𑀲𑀤𑀺𑀲𑀸𑀦𑀼𑀧𑀲𑁆𑀲𑀦𑀸𑀯 𑀧𑀯𑀢𑁆𑀢𑀦𑁆𑀢𑀺, 𑀏𑀯𑀫𑀺𑀥𑀸𑀧𑀺 𑀅𑀧𑁆𑀧𑀦𑀸𑀯𑀸𑀭𑀢𑁄 𑀧𑀼𑀩𑁆𑀩𑁂 𑀤𑁆𑀯𑁂 𑀢𑀬𑁄 𑀚𑀯𑀦𑀯𑀸𑀭𑀸 𑀉𑀧𑁂𑀓𑁆𑀔𑀸𑀲𑀳𑀕𑀢𑀸𑀯 𑀧𑀯𑀢𑁆𑀢𑀦𑁆𑀢𑀻’’𑀢𑀺 𑀯𑀤𑀦𑁆𑀢𑀺. 𑀅𑀧𑀭𑀺𑀲𑁂𑀲𑀦𑁆𑀢𑀺 𑀲𑀼𑀯𑀺𑀓𑁆𑀔𑀫𑁆𑀪𑀺𑀢𑀦𑁆𑀢𑀺 𑀓𑀢𑁆𑀯𑀸 𑀯𑀺𑀓𑁆𑀔𑀫𑁆𑀪𑀦𑁂𑀦 𑀅𑀦𑀯𑀲𑁂𑀲𑀁.

𑀢𑀣𑀢𑁆𑀢𑀸𑀬𑀸𑀢𑀺 𑀢𑀣𑀪𑀸𑀯𑀸𑀬 𑀧𑀞𑀫𑀚𑁆𑀛𑀸𑀦𑀲𑀫𑀗𑁆𑀕𑀺𑀢𑀸𑀬. 𑀲𑀸 𑀧𑀦𑀲𑁆𑀲 𑀉𑀧𑁆𑀧𑀸𑀤𑀦𑁂𑀦 𑀯𑀸 𑀉𑀧𑁆𑀧𑀦𑁆𑀦𑀲𑁆𑀲 𑀲𑀫𑀸𑀧𑀚𑁆𑀚𑀦𑁂𑀦 𑀯𑀸 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀉𑀧𑁆𑀧𑀸𑀤𑀦𑀢𑁆𑀣𑀸𑀬 𑀲𑀫𑀸𑀧𑀚𑁆𑀚𑀦𑀢𑁆𑀣𑀸𑀬𑀸’’𑀢𑀺. 𑀤𑁆𑀯𑀻𑀲𑀽𑀢𑀺 𑀦𑀯𑀫𑀤𑀲𑀫𑁂𑀲𑀼 𑀲𑀼𑀢𑁆𑀢𑀦𑁆𑀢𑁂𑀲𑀼.

𑀲𑀼𑀔𑀺𑀦𑁆𑀤𑁆𑀭𑀺𑀬𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀚𑀭𑀸𑀯𑀕𑁆𑀕𑁄

𑁧. 𑀚𑀭𑀸𑀥𑀫𑁆𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁧𑁧. 𑀧𑀫𑀼𑀔𑁂, 𑀧𑀸𑀲𑀸𑀤𑀲𑁆𑀲 𑀘 𑀧𑀘𑁆𑀙𑀺𑀫𑀪𑀸𑀕𑁂 𑀆𑀢𑀧𑁄 𑀧𑀘𑁆𑀙𑀸𑀢𑀧𑁄, 𑀢𑀲𑁆𑀫𑀺𑀁 𑀧𑀘𑁆𑀙𑀸𑀢𑀧𑁂. 𑀲𑁄 𑀳𑀺 𑀧𑀸𑀲𑀸𑀤𑀲𑁆𑀲 𑀧𑀫𑀼𑀔𑀪𑀸𑀯𑁂𑀦 𑀓𑀢𑁄. 𑀓𑀺𑀁 𑀧𑀦 𑀪𑀕𑀯𑀢𑁄 𑀯𑀚𑀺𑀭𑀲𑀸𑀭𑀁 𑀲𑀭𑀻𑀭𑀁 𑀑𑀢𑀸𑀧𑁂𑀢𑀩𑁆𑀩𑀁 𑀳𑁄𑀢𑀻𑀢𑀺 𑀆𑀳 𑁋 ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲𑀸’’𑀢𑀺𑀆𑀤𑀺. 𑀅𑀬𑀜𑁆𑀘 𑀇𑀫𑀁 𑀲𑀼𑀢𑁆𑀢𑀁 𑀤𑁂𑀲𑀺𑀢𑀲𑀫𑀬𑁂. 𑀦 𑀲𑀓𑁆𑀓𑁄𑀢𑀺 𑀩𑁆𑀬𑀸𑀫𑀧𑁆𑀧𑀪𑀸𑀬 𑀓𑀸𑀬𑀘𑀺 𑀧𑀪𑀸𑀬 𑀅𑀦𑀪𑀺𑀪𑀯𑀦𑀻𑀬𑀢𑁆𑀢𑀸. 𑀓𑀺𑀜𑁆𑀘𑀸𑀧𑀺 𑀩𑀼𑀤𑁆𑀥𑀸𑀪𑀸 𑀲𑀽𑀭𑀺𑀬𑀸𑀪𑀸𑀬 𑀅𑀦𑀪𑀺𑀪𑀯𑀦𑀻𑀬𑀸, 𑀖𑀫𑁆𑀫𑀲𑀪𑀸𑀯𑀢𑀸𑀬 𑀧𑀦 𑀭𑀲𑁆𑀫𑀻𑀦𑀁 𑀧𑀭𑀺𑀢𑁄 𑀨𑀭𑀦𑁆𑀢𑀻 𑀲𑀽𑀭𑀺𑀬𑀸𑀪𑀸 𑀢𑀺𑀔𑀺𑀡𑀸 𑀉𑀡𑁆𑀳𑀸𑀢𑀺 𑀆𑀳 ‘‘𑀭𑀲𑁆𑀫𑀺𑀢𑁂𑀚’’𑀦𑁆𑀢𑀺. 𑀇𑀤𑀸𑀦𑀺 𑀢𑀫𑀢𑁆𑀣𑀁 𑀉𑀧𑀫𑀸𑀬 𑀯𑀺𑀪𑀸𑀯𑁂𑀢𑀼𑀁 ‘‘𑀬𑀣𑁂𑀯 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀲𑀼𑀯𑀡𑁆𑀡𑀸𑀯𑀝𑁆𑀝𑀁 𑀯𑀺𑀬𑀸𑀢𑀺 𑀅𑀘𑁆𑀙𑁂 𑀲𑀼𑀯𑀡𑁆𑀡𑀧𑀢𑁆𑀢𑁂 𑀯𑀺𑀦𑀺𑀯𑀢𑁆𑀢𑀆𑀯𑀝𑁆𑀝𑀁 𑀯𑀺𑀬. 𑀕𑀭𑀳𑀡𑀘𑁆𑀙𑀭𑀺𑀬𑀁 𑀦𑀸𑀫 𑀓𑀺𑀭𑁂𑀢𑀁 ‘‘𑀅𑀘𑁆𑀙𑀭𑀺𑀬𑀫𑁂𑀢𑀁 𑀅𑀯𑀺𑀲𑀺𑀘𑁆𑀙𑁂𑀨𑀮𑀯𑀤’’𑀦𑁆𑀢𑀺𑀆𑀤𑀻𑀲𑀼 𑀯𑀺𑀬. 𑀦 𑀏𑀯𑀫𑁂𑀢𑀭𑀳𑀻𑀢𑀺 𑀅𑀢𑁆𑀢𑀦𑁄 𑀧𑀸𑀓𑀝𑀯𑀲𑁂𑀦 𑀯𑀤𑀢𑀺, 𑀦 𑀇𑀢𑀭𑁂𑀲𑀫𑁆𑀧𑀻𑀢𑀺. 𑀲𑀺𑀭𑀸𑀚𑀸𑀮𑀸𑀢𑀺 𑀲𑀺𑀭𑀸𑀲𑀦𑁆𑀢𑀸𑀦𑀸. 𑀏𑀯𑀭𑀽𑀧𑀁 𑀦 𑀳𑁄𑀢𑀻𑀢𑀺 𑀅𑀜𑁆𑀜𑁂𑀲𑀁 𑀧𑀸𑀓𑀢𑀺𑀓𑀲𑀢𑁆𑀢𑀸𑀦𑀁 𑀯𑀼𑀢𑁆𑀢𑀸𑀓𑀸𑀭𑀁 𑀯𑀺𑀬 𑀦 𑀳𑁄𑀢𑀺 𑀧𑀼𑀜𑁆𑀜𑀲𑀫𑁆𑀪𑀸𑀭𑀲𑁆𑀲 𑀉𑀴𑀸𑀭𑀢𑀫𑀢𑁆𑀢𑀸 𑀯𑀺𑀧𑀘𑁆𑀘𑀦𑀲𑁆𑀲 𑀧𑀭𑀺𑀬𑀦𑁆𑀢𑀕𑀢𑀢𑁆𑀢𑀸. 𑀢𑁂𑀦𑀸𑀳 ‘‘𑀅𑀜𑁆𑀜𑁂𑀲𑀁 𑀅𑀧𑀸𑀓𑀝’’𑀦𑁆𑀢𑀺. 𑀯𑀮𑀺𑀬𑀸𑀯𑀝𑁆𑀝𑀓𑀦𑁆𑀢𑀺 𑀅𑀧𑁆𑀧𑀓𑀁 𑀯𑀮𑀺𑀬𑀸𑀯𑀝𑁆𑀝𑀁. 𑀢𑁂𑀦𑀸𑀳 ‘‘𑀓𑁂𑀲𑀕𑁆𑀕𑀧𑁆𑀧𑀫𑀸𑀡’’𑀦𑁆𑀢𑀺. 𑀲𑀩𑁆𑀩𑀸𑀦𑀻𑀢𑀺 𑀲𑀺𑀭𑀸𑀚𑀸𑀮𑀸𑀦𑀺. 𑀧𑀼𑀭𑀢𑁄 𑀯𑀗𑁆𑀓𑁄𑀢𑀺 𑀣𑁄𑀓𑀁 𑀧𑀼𑀭𑀢𑁄 𑀦𑀢𑀫𑀢𑁆𑀢𑀁 𑀲𑀦𑁆𑀥𑀸𑀬𑀸𑀳. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑁆𑀯𑀸𑀬𑀁 𑀅𑀜𑁆𑀜𑁂𑀲𑀁 𑀅𑀧𑀸𑀓𑀝𑁄’’𑀢𑀺. 𑀦𑀬𑀕𑁆𑀕𑀸𑀳𑀢𑁄𑀢𑀺 𑀅𑀦𑀼𑀫𑀸𑀦𑀢𑁄. 𑀥𑀻 𑀢𑀦𑁆𑀢𑀺 𑀥𑀻-𑀲𑀤𑁆𑀤𑀬𑁄𑀕𑁂 𑀉𑀧𑀬𑁄𑀕𑀯𑀘𑀦𑀁. 𑀥𑀻𑀢𑀺 𑀚𑀺𑀕𑀼𑀘𑁆𑀙𑀦𑀢𑁆𑀣𑁂 𑀦𑀺𑀧𑀸𑀢𑁄. 𑀥𑀺𑀓𑁆𑀓𑀸𑀭𑁄𑀢𑀺 𑀚𑀺𑀕𑀼𑀘𑁆𑀙𑀸𑀧𑀬𑁄𑀕𑁄. 𑀢𑀁 𑀨𑀼𑀲𑀢𑀽𑀢𑀺 𑀢𑀼𑀬𑁆𑀳𑀁 𑀧𑀸𑀧𑀼𑀡𑀸𑀢𑀼.

𑁨. 𑀉𑀡𑁆𑀡𑀸𑀪𑀩𑁆𑀭𑀸𑀳𑁆𑀫𑀡𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁧𑁨. 𑀅𑀜𑁆𑀜𑀫𑀜𑁆𑀜𑀲𑁆𑀲𑀸𑀢𑀺 𑀅𑀜𑁆𑀜𑁄 𑀅𑀜𑁆𑀜𑀲𑁆𑀲. 𑀦 𑀧𑀘𑁆𑀘𑀦𑀼𑀪𑁄𑀢𑀺 𑀅𑀢𑁆𑀢𑀦𑁄 𑀅𑀯𑀺𑀲𑀬𑀪𑀸𑀯𑀢𑁄. 𑀇𑀤𑀸𑀦𑀺 𑀢𑀁 𑀅𑀜𑁆𑀜𑀯𑀺𑀲𑀬𑀢𑀁 𑀅𑀦𑁆𑀯𑀬𑀢𑁄 𑀩𑁆𑀬𑀢𑀺𑀭𑁂𑀓𑀢𑁄 𑀯𑀺𑀪𑀸𑀯𑁂𑀢𑀼𑀁 ‘‘𑀲𑀘𑁂 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀯𑀺𑀲𑀬𑀸𑀦𑀺 𑀧𑀝𑀺𑀲𑀭𑀦𑁆𑀢𑀺 𑀏𑀢𑁆𑀣𑀸𑀢𑀺 𑀧𑀝𑀺𑀲𑀭𑀡𑀁. 𑀇𑀦𑁆𑀤𑁆𑀭𑀺𑀬𑀯𑀺𑀜𑁆𑀜𑀸𑀡𑀸𑀦𑀺 𑀳𑀺 𑀅𑀲𑀢𑀺𑀧𑀺 𑀢𑀸𑀤𑀺𑀲𑁂 𑀅𑀥𑀺𑀧𑁆𑀧𑀸𑀬𑁂 𑀅𑀢𑁆𑀢𑀦𑁄 𑀆𑀭𑀫𑁆𑀫𑀡𑀲𑁆𑀲 𑀬𑀸𑀣𑀸𑀯𑀢𑁄 𑀲𑀫𑁆𑀧𑀚𑀸𑀦𑀦𑀢𑁄 𑀧𑀯𑁂𑀤𑀦𑀯𑀺𑀚𑀸𑀦𑀦𑀸𑀦𑀺 𑀓𑀭𑁄𑀦𑁆𑀢𑀸𑀦𑀺 𑀯𑀺𑀬 𑀧𑀯𑀢𑁆𑀢𑀦𑁆𑀢𑀺, 𑀢𑀣𑀸 𑀮𑁄𑀓𑀲𑁆𑀲 𑀅𑀜𑁆𑀜𑀢𑁆𑀣 𑀲𑀺𑀤𑁆𑀥𑀺𑀢𑁄. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀫𑀦𑁄 𑀧𑀝𑀺𑀲𑀭𑀡𑀁, 𑀫𑀦𑁄𑀯 𑀦𑁂𑀲𑀁 𑀕𑁄𑀘𑀭𑀯𑀺𑀲𑀬𑀁 𑀧𑀘𑁆𑀘𑀦𑀼𑀪𑁄𑀢𑀻’’𑀢𑀺 𑀫𑀦𑁄𑀤𑁆𑀯𑀸𑀭𑀺𑀓𑀚𑀯𑀦𑀫𑀦𑁄 𑀳𑀺 𑀲𑀯𑀺𑀲𑁂𑀲𑀁 𑀫𑀦𑁄𑀯𑀺𑀲𑀬𑀁 𑀧𑀘𑁆𑀘𑀦𑀼𑀪𑁄𑀢𑀺, 𑀧𑀜𑁆𑀘𑀤𑁆𑀯𑀸𑀭𑀺𑀓𑀚𑀯𑀦𑀫𑀦𑁄 𑀫𑀦𑀦𑀫𑀢𑁆𑀢𑀫𑁂𑀯 𑀧𑀘𑁆𑀘𑀦𑀼𑀪𑀯𑀢𑀺. 𑀭𑀚𑁆𑀚𑀦𑀸𑀤𑀺𑀕𑁆𑀕𑀳𑀡𑀜𑁆𑀘𑁂𑀢𑁆𑀣 𑀦𑀺𑀤𑀲𑁆𑀲𑀦𑀫𑀢𑁆𑀢𑀁, 𑀢𑀲𑁆𑀫𑀸 𑀲𑀤𑁆𑀤𑀳𑀦𑀸𑀤𑀺𑀧𑀺 𑀕𑀳𑀺𑀢𑀫𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁, 𑀧𑀜𑁆𑀘𑀤𑁆𑀯𑀸𑀭𑀧𑁆𑀧𑀯𑀢𑁆𑀢𑀺𑀯𑀲𑁂𑀦 𑀢𑀣𑀸 𑀯𑀼𑀢𑁆𑀢𑀁. 𑀏𑀓𑀲𑁆𑀫𑀺𑀁 𑀧𑀦 𑀤𑁆𑀯𑀸𑀭𑁂𑀢𑀺 𑀘𑀓𑁆𑀔𑀼𑀤𑁆𑀯𑀸𑀭𑁂.

𑀤𑀼𑀩𑁆𑀩𑀮𑀪𑁄𑀚𑀓𑀸𑀢𑀺 𑀅𑀧𑁆𑀧𑀸𑀦𑀼𑀪𑀸𑀯𑀸 𑀭𑀸𑀚𑀪𑁄𑀕𑁆𑀕𑀸. 𑀆𑀬𑀦𑁆𑀢𑀺 𑀪𑁄𑀕𑀼𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀁. 𑀬𑁄𑀢𑁆𑀢𑀩𑀦𑁆𑀥𑀸𑀤𑀺𑀦𑀺𑀫𑀺𑀢𑁆𑀢𑀁 𑀮𑀤𑁆𑀥𑀩𑁆𑀩𑀓𑀳𑀸𑀧𑀡𑁄 𑀬𑁄𑀢𑁆𑀢𑀓𑀳𑀸𑀧𑀡𑁄. 𑀅𑀤𑁆𑀤𑀼𑀩𑀦𑁆𑀥𑀸𑀤𑀺𑀦𑀺𑀫𑀺𑀢𑁆𑀢𑀁 𑀕𑀳𑁂𑀢𑀩𑁆𑀩𑀓𑀳𑀸𑀧𑀡𑁄 𑀅𑀤𑁆𑀤𑀼𑀓𑀳𑀸𑀧𑀡𑁄. 𑀫𑀸𑀖𑀸𑀢𑀖𑁄𑀲𑀦𑀸𑀬 𑀓𑀢𑀸𑀬 𑀳𑀺𑀁𑀲𑀸𑀦𑀺𑀫𑀺𑀢𑁆𑀢𑀁 𑀕𑀳𑁂𑀢𑀩𑁆𑀩𑀓𑀳𑀸𑀧𑀡𑁄 𑀫𑀸𑀧𑀳𑀸𑀭𑀓𑀳𑀸𑀧𑀡𑁄. 𑀢𑀲𑁆𑀲 𑀧𑀭𑀺𑀫𑀸𑀡𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀝𑁆𑀞𑀓𑀳𑀸𑀧𑀡𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀢𑀯𑀢𑁆𑀣𑀼𑀓𑀦𑁆𑀢𑀺 𑀲𑀢𑀓𑀭𑀻𑀲𑀯𑀢𑁆𑀣𑀼𑀓𑀁.

𑀫𑀕𑁆𑀕𑀲𑀢𑀻𑀢𑀺 𑀅𑀭𑀺𑀬𑀫𑀕𑁆𑀕𑀲𑀢𑀺. 𑀪𑀸𑀯𑀦𑀫𑀦𑀼𑀬𑀼𑀜𑁆𑀚𑀦𑁆𑀢𑀲𑁆𑀲 𑀳𑀺 𑀚𑀯𑀦𑀫𑀦𑁄 𑀉𑀲𑁆𑀲𑀓𑁆𑀓𑀺𑀢𑁆𑀯𑀸𑀯 𑀫𑀕𑁆𑀕𑀲𑀢𑀺𑀁 𑀧𑀝𑀺𑀲𑀭𑀢𑀺 𑀢𑀧𑁆𑀧𑀭𑀺𑀬𑁄𑀲𑀸𑀦𑀢𑁆𑀢𑀸. 𑀢𑀦𑁆𑀢𑀺 𑀦𑀺𑀩𑁆𑀩𑀸𑀦𑀁. 𑀲𑀸𑀢𑀺 𑀨𑀮𑀯𑀺𑀫𑀼𑀢𑁆𑀢𑀺. 𑀧𑀝𑀺𑀲𑀭𑀢𑀺 𑀅𑀕𑁆𑀕𑀫𑀕𑁆𑀕𑀲𑀢𑀺𑀬𑀸. 𑀨𑀮𑀯𑀺𑀫𑀼𑀢𑁆𑀢𑀺 𑀦𑀺𑀩𑁆𑀩𑀸𑀦𑀦𑁆𑀢𑀺 𑀉𑀪𑀬𑀁 𑀫𑀕𑁆𑀕𑀲𑁆𑀲 𑀲𑀺𑀤𑁆𑀥𑀸𑀬𑁂𑀯𑀸𑀢𑀺. 𑀆𑀭𑀫𑁆𑀫𑀡𑀯𑀲𑁂𑀦 𑀦𑀢𑁆𑀣𑀺 𑀏𑀢𑀲𑁆𑀲 𑀧𑀝𑀺𑀲𑀭𑀡𑀦𑁆𑀢𑀺 𑀅𑀧𑁆𑀧𑀝𑀺𑀲𑀭𑀡𑀁 𑀅𑀲𑀗𑁆𑀔𑀢𑀸𑀫𑀢𑀲𑁆𑀲 𑀲𑀦𑁆𑀢𑀺𑀦𑀺𑀘𑁆𑀘𑀲𑀪𑀸𑀯𑀢𑁆𑀢𑀸. 𑀲𑀬𑀁 𑀧𑀦 𑀲𑀩𑁆𑀩𑁂𑀲𑀁𑀬𑁂𑀯 𑀅𑀭𑀺𑀬𑀸𑀦𑀁 𑀧𑀝𑀺𑀲𑀭𑀡𑀁. 𑀢𑁂𑀦𑀸𑀳 ‘‘𑀦𑀺𑀩𑁆𑀩𑀸𑀦𑀁 𑀅𑀭𑀳𑀢𑁄 𑀕𑀢𑀻’’𑀢𑀺 (𑀧𑀭𑀺. 𑁩𑁩𑁯). 𑀦𑀺𑀩𑁆𑀩𑀸𑀦𑀁 𑀅𑀦𑀼𑀧𑀯𑀺𑀝𑁆𑀞𑀁 𑀦𑀺𑀩𑁆𑀩𑀸𑀦𑀦𑀺𑀲𑁆𑀲𑀬𑀢𑁆𑀢𑀸. 𑀦 𑀢𑀢𑁄 𑀧𑀭𑀁 𑀕𑀘𑁆𑀙𑀢𑀺 𑀕𑀢𑀲𑁆𑀲 𑀅𑀜𑁆𑀜𑀲𑁆𑀲 𑀢𑀸𑀤𑀺𑀲𑀲𑁆𑀲 𑀅𑀪𑀸𑀯𑀸. 𑀦𑀺𑀩𑁆𑀩𑀸𑀦𑀁 𑀧𑀭𑀺 𑀲𑀩𑁆𑀩𑀲𑁄 𑀑𑀲𑀸𑀦𑀦𑁆𑀢𑀺 𑀦𑀺𑀩𑁆𑀩𑀸𑀦𑀧𑀭𑀺𑀬𑁄𑀲𑀸𑀦𑀁.

𑀫𑀽𑀮𑀚𑀸𑀢𑀸 𑀚𑀸𑀢𑀫𑀽𑀮𑀸. 𑀢𑀢𑁄 𑀏𑀯 𑀧𑀢𑀺𑀝𑁆𑀞𑀺𑀢𑀸. 𑀓𑀸 𑀧𑀦𑀲𑁆𑀲𑀸𑀢𑀺 𑀆𑀳 ‘‘𑀫𑀕𑁆𑀕𑁂𑀦 𑀆𑀕𑀢𑀲𑀤𑁆𑀥𑀸’’𑀢𑀺. 𑀫𑀕𑁆𑀕𑁄 𑀤𑀴𑁆𑀳𑀸𑀬 𑀅𑀲𑀁𑀳𑀸𑀭𑀺𑀬𑀲𑀤𑁆𑀥𑀸𑀬 𑀫𑀽𑀮𑀁 𑀤𑀺𑀝𑁆𑀞𑀺𑀲𑀫𑁆𑀧𑀬𑀼𑀢𑁆𑀢𑀸𑀦𑀺 𑀘𑁂𑀯 𑀯𑀺𑀘𑀺𑀓𑀺𑀘𑁆𑀙𑀸𑀘𑀺𑀢𑁆𑀢𑀜𑁆𑀘𑀸𑀢𑀺 𑀧𑀜𑁆𑀘 𑀅𑀓𑀼𑀲𑀮𑀘𑀺𑀢𑁆𑀢𑀸𑀦𑀺 𑀲𑀫𑀼𑀘𑁆𑀙𑁂𑀤𑀯𑀲𑁂𑀦 𑀧𑀳𑀻𑀦𑀸𑀦𑀺. 𑀧𑀜𑁆𑀘 𑀦𑀻𑀯𑀭𑀡𑀸𑀦𑀻𑀢𑀺 𑀏𑀢𑁆𑀣 𑀅𑀧𑀸𑀬𑀕𑀫𑀦𑀻𑀬𑀸𑀦𑀺 𑀧𑀞𑀫𑀫𑀕𑁆𑀕𑁂𑀦𑁂𑀯 𑀧𑀳𑀻𑀦𑀸𑀦𑀺, 𑀇𑀢𑀭𑀸𑀦𑀺 𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦 𑀛𑀸𑀦𑁂𑀦 𑀧𑀳𑀻𑀦𑀸𑀦𑀻𑀢𑀺 𑀧𑀜𑁆𑀘𑀲𑀼 𑀑𑀭𑀫𑁆𑀪𑀸𑀕𑀺𑀬𑀓𑀺𑀮𑁂𑀲𑀲𑀁𑀬𑁄𑀚𑀦𑁂𑀲𑀼 𑀏𑀓𑀤𑁂𑀲𑀯𑀺𑀕𑀫𑁂𑀦𑁂𑀯 𑀩𑀳𑀺𑀤𑁆𑀥𑀸𑀲𑀁𑀬𑁄𑀚𑀦𑁄 𑀯𑀺𑀬 𑀚𑀸𑀢𑁄𑀢𑀺 𑀯𑀼𑀢𑁆𑀢𑀁 ‘‘𑀛𑀸𑀦𑀅𑀦𑀸𑀕𑀸𑀫𑀺𑀝𑁆𑀞𑀸𑀦𑁂 𑀞𑀺𑀢𑁄’’𑀢𑀺. 𑀢𑁂𑀦𑀸𑀳 ‘‘𑀲𑁄 𑀅𑀧𑀭𑀺𑀳𑀻𑀦…𑀧𑁂… 𑀦𑀺𑀩𑁆𑀩𑀸𑀬𑁂𑀬𑁆𑀬𑀸’’𑀢𑀺.

𑁫. 𑀧𑀞𑀫𑀧𑀼𑀩𑁆𑀩𑀸𑀭𑀸𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁧𑁫. 𑀧𑀼𑀩𑁆𑀩𑀓𑁄𑀝𑁆𑀞𑀓𑁂 𑀏𑀯𑀁 𑀆𑀕𑀢𑀲𑀼𑀢𑁆𑀢𑀁 𑀆𑀤𑀺𑀁 𑀓𑀢𑁆𑀯𑀸 𑀨𑀮𑀺𑀦𑁆𑀤𑁆𑀭𑀺𑀬𑀸𑀦𑁂𑀯 𑀓𑀣𑀺𑀢𑀸𑀦𑀺 𑀅𑀕𑁆𑀕𑀨𑀮𑀯𑀲𑁂𑀦 𑀤𑁂𑀲𑀦𑀸𑀬 𑀆𑀕𑀢𑀢𑁆𑀢𑀸.

𑁧𑁦. 𑀆𑀧𑀡𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁨𑁦. 𑀉𑀧𑀭𑀺 𑀲𑀳 𑀯𑀺𑀧𑀲𑁆𑀲𑀦𑀸𑀬 𑀢𑀬𑁄 𑀫𑀕𑁆𑀕𑀸𑀢𑀺 𑀯𑀺𑀧𑀲𑁆𑀲𑀦𑀸𑀬 𑀲𑀳 𑀲𑁄𑀢𑀸𑀧𑀢𑁆𑀢𑀺𑀨𑀮𑀢𑁄 𑀉𑀧𑀭𑀺 𑀢𑀬𑁄 𑀫𑀕𑁆𑀕𑀸. 𑀫𑀕𑁆𑀕𑀸𑀥𑀺𑀕𑀫𑁂𑀦 𑀇𑀤𑀸𑀦𑀺 𑀧𑀘𑁆𑀘𑀓𑁆𑀔𑀪𑀽𑀢𑀢𑁆𑀢𑀸 ‘‘𑀇𑀫𑁂 𑀔𑁄 𑀢𑁂 𑀥𑀫𑁆𑀫𑀸’’𑀢𑀺 𑀯𑀼𑀢𑁆𑀢𑀸. 𑀢𑀢𑁆𑀣 𑀬𑀁 𑀅𑀕𑁆𑀕𑀪𑀽𑀢𑀁, 𑀢𑀲𑁆𑀲 𑀯𑀲𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀅𑀭𑀳𑀢𑁆𑀢𑀨𑀮𑀺𑀦𑁆𑀤𑁆𑀭𑀺𑀬𑀁 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑀁 𑀇𑀦𑁆𑀤𑁆𑀭𑀺𑀬𑀪𑀸𑀯𑀲𑀸𑀫𑀜𑁆𑀜𑁂𑀦 𑀏𑀓𑀚𑁆𑀛𑀁 𑀓𑀢𑁆𑀯𑀸. 𑀅𑀢𑀺𑀯𑀺𑀚𑁆𑀛𑀺𑀢𑁆𑀯𑀸 𑀧𑀲𑁆𑀲𑀸𑀫𑀻𑀢𑀺 𑀲𑀘𑁆𑀙𑀺𑀓𑀢𑁆𑀯𑀸 𑀬𑀸𑀣𑀸𑀯𑀢𑁄 𑀧𑀲𑁆𑀲𑀸𑀫𑀺. 𑀘𑀢𑀽𑀳𑀺 𑀇𑀦𑁆𑀤𑁆𑀭𑀺𑀬𑁂𑀳𑀻𑀢𑀺 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀸𑀤𑀻𑀳𑀺 𑀘𑀢𑀽𑀳𑀺 𑀇𑀦𑁆𑀤𑁆𑀭𑀺𑀬𑁂𑀳𑀺. 𑀲𑀸 𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀨𑀮𑀲𑀳𑀕𑀢𑀸 𑀲𑀺𑀬𑀸𑀢𑀺 𑀫𑀺𑀲𑁆𑀲𑀓𑀸 𑀯𑀼𑀢𑁆𑀢𑀸.

𑀚𑀭𑀸𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀲𑀽𑀓𑀭𑀔𑀢𑀯𑀕𑁆𑀕𑁄

𑁧. 𑀲𑀸𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁨𑁧. 𑀲𑀽𑀭𑀪𑀸𑀯𑁂𑀦𑀸𑀢𑀺 𑀅𑀢𑀺𑀲𑀽𑀭𑀪𑀸𑀯𑁂𑀦. 𑀩𑀼𑀚𑁆𑀛𑀦𑀢𑁆𑀣𑀸𑀬𑀸𑀢𑀺 𑀲𑀘𑁆𑀘𑀧𑀝𑀺𑀯𑁂𑀥𑀸𑀬.

𑁨. 𑀫𑀮𑁆𑀮𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁨𑁨. 𑀘𑀢𑁆𑀢𑀸𑀭𑀺 𑀇𑀦𑁆𑀤𑁆𑀭𑀺𑀬𑀸𑀦𑀻𑀢𑀺 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀞𑀧𑁂𑀢𑁆𑀯𑀸 𑀲𑁂𑀲𑀸𑀦𑀺 𑀘𑀢𑁆𑀢𑀸𑀭𑀺. ‘‘𑀅𑀭𑀺𑀬𑀜𑀸𑀡𑀁 𑀮𑁄𑀓𑀼𑀢𑁆𑀢𑀭’’𑀦𑁆𑀢𑀺 𑀯𑀼𑀢𑁆𑀢𑀁 𑀫𑀕𑁆𑀕𑀜𑀸𑀡𑀁 𑀓𑀢𑁆𑀯𑀸. 𑀅𑀭𑀺𑀬-𑀲𑀤𑁆𑀤𑁄 𑀧𑀦 𑀬𑀣𑀸 𑀢𑀣𑀸 𑀯𑀺𑀲𑀼𑀤𑁆𑀥𑁂𑀧𑀺 𑀳𑁄𑀢𑀻𑀢𑀺 𑀢𑀸𑀤𑀺𑀲𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀢𑀫𑁆𑀧𑀺 𑀧𑀦𑀸’’𑀢𑀺𑀆𑀤𑀺. 𑀬𑀣𑀸 𑀳𑀺 𑀘𑀢𑁆𑀢𑀸𑀭𑀺𑀦𑁆𑀤𑁆𑀭𑀺𑀬𑀸𑀦𑀺 𑀫𑀺𑀲𑁆𑀲𑀓𑀸𑀦𑀺, 𑀏𑀯𑀁 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀫𑁆𑀧𑀺 𑀫𑀺𑀲𑁆𑀲𑀓𑀦𑁆𑀢𑀺 𑀯𑀼𑀘𑁆𑀘𑀫𑀸𑀦𑁂 𑀦 𑀓𑁄𑀘𑀺 𑀯𑀺𑀭𑁄𑀥𑁄𑀢𑀺 𑀅𑀥𑀺𑀧𑁆𑀧𑀸𑀬𑁂𑀦𑀸𑀳 ‘‘𑀢𑀫𑁆𑀧𑀺 𑀧𑀦…𑀧𑁂… 𑀯𑀝𑁆𑀝𑀢𑀻’’𑀢𑀺.

𑁩. 𑀲𑁂𑀔𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁨𑁩. 𑀦 𑀲𑀓𑁆𑀓𑁄𑀢𑀺 𑀇𑀦𑁆𑀤𑁆𑀭𑀺𑀬𑀸𑀦𑀁 𑀅𑀧𑀭𑀺𑀧𑀓𑁆𑀓𑀢𑁆𑀢𑀸. 𑀅𑀢𑁆𑀣𑀻𑀢𑀺 𑀧𑀚𑀸𑀦𑀸𑀢𑀺 𑀦𑀬𑀕𑁆𑀕𑀸𑀳𑁂𑀦, 𑀦 𑀧𑀘𑁆𑀘𑀓𑁆𑀔𑀢𑁄. 𑀦 𑀳𑀺 𑀅𑀭𑀺𑀬𑀸𑀧𑀺 𑀅𑀦𑀥𑀺𑀕𑀢𑀁 𑀫𑀕𑁆𑀕𑀨𑀮𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑀼𑀁 𑀲𑀓𑁆𑀓𑁄𑀦𑁆𑀢𑀺.

𑁬. 𑀧𑀢𑀺𑀝𑁆𑀞𑀺𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁨𑁬. 𑀲𑀸𑀲𑀯𑁂𑀲𑀽𑀢𑀺 𑀘𑀢𑀼𑀭𑀸𑀲𑀯𑀯𑀺𑀦𑀺𑀫𑀼𑀢𑁆𑀢𑁂𑀲𑀼 𑀲𑁂𑀲𑀥𑀫𑁆𑀫𑁂𑀲𑀼 𑀆𑀭𑀫𑁆𑀫𑀡𑁂𑀲𑀼. 𑀢𑁂𑀲𑀼𑀧𑀺 𑀉𑀧𑁆𑀧𑀚𑁆𑀚𑀦𑀓𑀅𑀦𑀢𑁆𑀣𑀢𑁄 𑀘𑀺𑀢𑁆𑀢𑀁 𑀭𑀓𑁆𑀔𑀢𑀺 𑀦𑀸𑀫.

𑁮. 𑀲𑀽𑀓𑀭𑀔𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁨𑁮. 𑀢𑀁 𑀲𑀦𑁆𑀥𑀸𑀬𑀸𑀢𑀺 𑀢𑀁 𑀲𑀽𑀓𑀭𑀔𑀢𑀮𑁂𑀡𑀁 𑀲𑀦𑁆𑀥𑀸𑀬. 𑀏𑀢𑀁 ‘‘𑀲𑀽𑀓𑀭𑀔𑀢𑀸𑀬’’𑀦𑁆𑀢𑀺 𑀯𑀘𑀦𑀁 𑀯𑀼𑀢𑁆𑀢𑀁. 𑀪𑀸𑀯𑀦𑀧𑀼𑀁𑀲𑀓𑀦𑁆𑀢𑀺 𑀪𑀸𑀯𑀚𑁄𑀢𑀓𑀁 𑀦𑀧𑀼𑀁𑀲𑀓𑀯𑀘𑀦𑀁 𑀬𑀣𑀸 ‘‘𑀯𑀺𑀲𑀫𑀁 𑀯𑀸𑀢𑀸 𑀯𑀸𑀬𑀦𑁆𑀢𑀺, 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀻’’𑀢𑀺. 𑀓𑀺𑀘𑁆𑀘𑀧𑀝𑀺𑀧𑀢𑁆𑀢𑀺 𑀢𑁂𑀲𑀁 𑀲𑀁𑀓𑀸𑀲𑀦𑀝𑁆𑀞𑁂𑀦 𑀲𑀧𑀢𑀺𑀲𑁄, 𑀲𑀧𑀢𑀺𑀲𑁄 𑀏𑀯 𑀲𑀧𑁆𑀧𑀢𑀺𑀲𑁆𑀲𑁄, 𑀲𑀚𑁂𑀝𑁆𑀞𑀓𑁄𑀢𑀺 𑀆𑀳 ‘‘𑀲𑀧𑁆𑀧𑀢𑀺𑀲𑁆𑀲𑁄𑀢𑀺 𑀲𑀚𑁂𑀝𑁆𑀞𑀓𑁄’’𑀢𑀺.

𑀲𑀽𑀓𑀭𑀔𑀢𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀩𑁄𑀥𑀺𑀧𑀓𑁆𑀔𑀺𑀬𑀯𑀕𑁆𑀕𑀯𑀡𑁆𑀡𑀦𑀸

𑁫𑁩𑁧-𑁬𑁫𑁦. 𑀲𑀢𑁆𑀢𑀸𑀦𑀁 𑀨𑀮𑀸𑀦𑀁 𑀳𑁂𑀢𑀼𑀪𑀽𑀢𑀸𑀦𑀺 ‘‘𑀇𑀫𑁂𑀲𑀁 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀦𑁆𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀪𑀸𑀯𑀺𑀢𑀢𑁆𑀢𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀸𑀦𑀺, 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺𑀬𑁂𑀯 𑀨𑀮𑀽𑀧𑀘𑀸𑀭𑁂𑀦 ‘‘𑀲𑀢𑁆𑀢 𑀨𑀮𑀸𑀦𑀻’’𑀢𑀺 𑀯𑀼𑀢𑁆𑀢𑀸𑀦𑀺. 𑀢𑀸𑀦𑀺 𑀘 𑀧𑀼𑀩𑁆𑀩𑀪𑀸𑀕𑀸𑀦𑀺 ‘‘𑀇𑀫𑁂𑀲𑀁, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀦𑁆𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀪𑀸𑀯𑀺𑀢𑀢𑁆𑀢𑀸…𑀧𑁂… 𑀲𑀢𑁆𑀢𑀸𑀦𑀺𑀲𑀁𑀲𑀸 𑀧𑀸𑀝𑀺𑀓𑀗𑁆𑀔𑀸’’𑀢𑀺 𑀯𑀘𑀦𑀢𑁄. 𑀢𑁂𑀲𑀦𑁆𑀢𑀺 𑀲𑀢𑁆𑀢𑀸𑀦𑀁 𑀨𑀮𑀸𑀦𑀁. ‘‘𑀤𑁆𑀯𑀺𑀦𑁆𑀦𑀁 𑀨𑀮𑀸𑀦𑀁 𑀅𑀜𑁆𑀜𑀢𑀭𑀁 𑀨𑀮’’𑀦𑁆𑀢𑀺 𑀏𑀯𑀁 𑀅𑀢𑀻𑀢𑀲𑀼𑀢𑁆𑀢𑁂 𑀯𑀼𑀢𑁆𑀢𑀸𑀦𑀺 𑀳𑁂𑀝𑁆𑀞𑀸 𑀤𑁆𑀯𑁂 𑀨𑀮𑀸𑀦𑀺 𑀦𑀸𑀫𑀸𑀢𑀺 𑀯𑀤𑀦𑁆𑀢𑀺. 𑀬𑁂𑀳𑀺 𑀧𑀦 𑀇𑀦𑁆𑀤𑁆𑀭𑀺𑀬𑁂𑀳𑀺 𑀅𑀜𑁆𑀜𑀢𑁆𑀭 𑀧𑀦 𑀅𑀦𑁆𑀢𑀭𑀸𑀧𑀭𑀺𑀦𑀺𑀩𑁆𑀩𑀸𑀬𑀺𑀁 𑀲𑁂𑀲𑀸𑀦𑀺 𑀨𑀮𑀸𑀦𑀺 𑀳𑁄𑀦𑁆𑀢𑀺, 𑀢𑀸𑀦𑀺 𑀘𑀢𑁆𑀢𑀸𑀭𑀺 𑀲𑀧𑀼𑀩𑁆𑀩𑀪𑀸𑀕𑀸𑀦𑀺 𑀮𑁄𑀓𑀼𑀢𑁆𑀢𑀭𑀸𑀦𑀻𑀢𑀺 𑀯𑀼𑀢𑁆𑀢𑀁 𑀲𑀺𑀬𑀸.

𑀇𑀦𑁆𑀤𑁆𑀭𑀺𑀬𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.