𑁮. 𑀲𑀽𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁭𑁪. 𑀆𑀳𑀸𑀭𑀲𑀫𑁆𑀧𑀸𑀤𑀦𑁂𑀦 𑀢𑀁𑀢𑀁𑀆𑀳𑀸𑀭𑀯𑀢𑁆𑀣𑀼𑀕𑀢𑁂 𑀲𑀽𑀤𑁂𑀢𑀺 𑀧𑀕𑁆𑀖𑀭𑁂𑀢𑀻𑀢𑀺 𑀲𑀽𑀤𑁄, 𑀪𑀢𑁆𑀢𑀓𑀸𑀭𑀓𑁄. 𑀤𑀳𑀭𑁂𑀳𑀺 𑀫𑀦𑀸𑀧𑀢𑀭𑀁 𑀅𑀘𑁆𑀘𑁂𑀢𑀩𑁆𑀩𑀢𑁄 𑀅𑀢𑀺𑀓𑁆𑀓𑀫𑀺𑀢𑀩𑁆𑀩𑀢𑁄 𑀅𑀘𑁆𑀘𑀬𑀸, 𑀪𑁄𑀚𑀦𑁂 𑀭𑀲𑀯𑀺𑀲𑁂𑀲𑀸, 𑀢𑀲𑁆𑀫𑀸 𑀦𑀸𑀦𑀘𑁆𑀘𑀬𑁂𑀳𑀻𑀢𑀺 𑀦𑀸𑀦𑀧𑁆𑀧𑀓𑀸𑀭𑀭𑀲𑀯𑀺𑀲𑁂𑀲𑁂𑀳𑀻𑀢𑀺 𑀅𑀢𑁆𑀣𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀦𑀸𑀦𑀘𑁆𑀘𑀬𑁂𑀳𑀻’’𑀢𑀺𑀆𑀤𑀺. 𑀅𑀕𑁆𑀕𑀻𑀬𑀢𑀺 𑀅𑀲𑀗𑁆𑀓𑀭𑀢𑁄 𑀯𑀺𑀪𑀚𑀻𑀬𑀢𑀻𑀢𑀺 𑀅𑀕𑁆𑀕𑁄, 𑀅𑀫𑁆𑀩𑀺𑀮𑀫𑁂𑀯 𑀅𑀕𑁆𑀕𑁄 𑀅𑀫𑁆𑀩𑀺𑀮𑀕𑁆𑀕𑁄𑀢𑀺 𑀆𑀳 𑁋 ‘‘𑀅𑀫𑁆𑀩𑀺𑀮𑀕𑁆𑀕𑁂𑀳𑀻𑀢𑀺 𑀅𑀫𑁆𑀩𑀺𑀮𑀓𑁄𑀝𑁆𑀞𑀸𑀲𑁂𑀳𑀻’’𑀢𑀺. 𑀤𑀸𑀢𑀼𑀁 𑀅𑀪𑀺𑀳𑀭𑀺𑀢𑀩𑁆𑀩𑀢𑀸𑀬 𑀅𑀪𑀺𑀳𑀸𑀭𑀸, 𑀤𑁂𑀬𑁆𑀬𑀥𑀫𑁆𑀫𑀸. 𑀢𑁂𑀦𑀸𑀳 𑁋 ‘‘𑀅𑀪𑀺𑀳𑀝𑀸𑀦𑀁 𑀤𑀸𑀬𑀸𑀦’’𑀦𑁆𑀢𑀺. 𑀇𑀤𑀁 𑀫𑁂 𑀓𑀫𑁆𑀫𑀝𑁆𑀞𑀸𑀦𑀁 𑀅𑀦𑀼𑀮𑁄𑀫𑀁𑀯𑀸𑀢𑀺 𑀇𑀤𑀁 𑀫𑀫 𑀓𑀫𑁆𑀫𑀝𑁆𑀞𑀸𑀦𑀁 𑀏𑀯𑀁 𑀧𑀯𑀢𑁆𑀢𑀫𑀸𑀦𑀁 𑀅𑀦𑀼𑀮𑁄𑀫𑀸𑀯𑀲𑀸𑀦𑀫𑁂𑀯 𑀳𑀼𑀢𑁆𑀯𑀸 𑀢𑀺𑀝𑁆𑀞𑀢𑀺. 𑀏𑀯𑀁 𑀧𑀼𑀦 𑀧𑀯𑀢𑁆𑀢𑀫𑀸𑀦𑀁 𑀉𑀲𑁆𑀲𑀓𑁆𑀓𑀺𑀢𑁆𑀯𑀸 𑀯𑀺𑀲𑁂𑀲𑀦𑀺𑀩𑁆𑀩𑀢𑁆𑀢𑀦𑀢𑁆𑀣𑀫𑁂𑀯 𑀳𑁄𑀢𑀻𑀢𑀺 𑀏𑀯𑀁 𑀦𑀺𑀫𑀺𑀢𑁆𑀢𑀁 𑀕𑀳𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺 𑀩𑀸𑀮𑁄 𑀅𑀩𑁆𑀬𑀢𑁆𑀢𑁄, 𑀧𑀡𑁆𑀟𑀺𑀢𑁄 𑀧𑀦 𑀲𑀓𑁆𑀓𑁄𑀢𑀺. 𑀅𑀢𑁆𑀢𑀦𑁄 𑀘𑀺𑀢𑁆𑀢𑀲𑁆𑀲𑀸𑀢𑀺 𑀅𑀢𑁆𑀢𑀦𑁄 𑀪𑀸𑀯𑀦𑀸𑀘𑀺𑀢𑁆𑀢𑀲𑁆𑀲. 𑀧𑀼𑀩𑁆𑀩𑀪𑀸𑀕𑀯𑀺𑀧𑀲𑁆𑀲𑀦𑀸 𑀲𑀢𑀺𑀧𑀝𑁆𑀞𑀸𑀦𑀸𑀯 𑀓𑀣𑀺𑀢𑀸 ‘‘𑀲𑀓𑀲𑁆𑀲 𑀘𑀺𑀢𑁆𑀢𑀲𑁆𑀲 𑀦𑀺𑀫𑀺𑀢𑁆𑀢𑀁 𑀉𑀕𑁆𑀕𑀡𑁆𑀳𑀸𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸.