𑁪. 𑀫𑁂𑀢𑁆𑀢𑀸𑀲𑀳𑀕𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁩𑁫. 𑀓𑀻𑀤𑀺𑀲𑀸 𑀕𑀢𑀺 𑀦𑀺𑀩𑁆𑀩𑀢𑁆𑀢𑀺 𑀏𑀢𑀺𑀲𑁆𑀲𑀸𑀢𑀺 𑀓𑀺𑀁𑀕𑀢𑀺𑀓𑀸, 𑀓𑀺𑀁𑀦𑀺𑀝𑁆𑀞𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀻𑀤𑀺𑀲𑀻 𑀧𑀭𑀫𑀸 𑀉𑀢𑁆𑀢𑀫𑀸 𑀓𑁄𑀝𑀺 𑀏𑀢𑀺𑀲𑁆𑀲𑀸𑀢𑀺 𑀓𑀺𑀁𑀧𑀭𑀫𑀸. 𑀓𑀻𑀤𑀺𑀲𑀁 𑀨𑀮𑀁 𑀆𑀦𑀺𑀲𑀁𑀲𑀁 𑀉𑀤𑀬𑁄 𑀏𑀢𑀺𑀲𑁆𑀲𑀸𑀢𑀺 𑀓𑀺𑀁𑀨𑀮𑀸. 𑀲𑀁𑀲𑀝𑁆𑀞𑀁 𑀲𑀫𑁆𑀧𑀬𑀼𑀢𑁆𑀢𑀦𑁆𑀢𑀺 𑀇𑀤𑀁 𑀲𑀳𑀕𑀢-𑀲𑀤𑁆𑀤𑀲𑁆𑀲 𑀅𑀢𑁆𑀣𑀤𑀲𑁆𑀲𑀦𑀫𑀢𑁆𑀢𑀁, 𑀇𑀥 𑀧𑀦 𑀫𑁂𑀢𑁆𑀢𑀸𑀛𑀸𑀦𑀁 𑀧𑀸𑀤𑀓𑀁 𑀓𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀧𑀼𑀩𑁆𑀩𑀪𑀸𑀕𑀩𑁄𑀚𑁆𑀛𑀗𑁆𑀕𑀸 𑀘 ‘‘𑀫𑁂𑀢𑁆𑀢𑀸𑀲𑀳𑀕𑀢𑀁 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕’’𑀦𑁆𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑁂𑀲𑀼 𑀩𑁄𑀚𑁆𑀛𑀗𑁆𑀕𑁂𑀲𑀼 𑀲𑀩𑁆𑀩𑁂𑀲𑀼 𑀘 𑀩𑁆𑀭𑀳𑁆𑀫𑀯𑀺𑀳𑀸𑀭𑁂𑀲𑀼.

𑀧𑀝𑀺𑀓𑀽𑀮𑁂𑀢𑀺 𑀯𑀺𑀭𑀚𑁆𑀚𑀢𑀻𑀢𑀺 𑀧𑀝𑀺𑀓𑀽𑀮𑀁, 𑀅𑀦𑀺𑀝𑁆𑀞𑀁. 𑀦 𑀧𑀝𑀺𑀓𑀽𑀮𑀁 𑀅𑀧𑁆𑀧𑀝𑀺𑀓𑀽𑀮𑀁, 𑀇𑀝𑁆𑀞𑀁. 𑀢𑁂𑀦𑀸𑀳 ‘‘𑀇𑀝𑁆𑀞𑁂 𑀯𑀢𑁆𑀣𑀼𑀲𑁆𑀫𑀺’’𑀦𑁆𑀢𑀺. 𑀏𑀢𑁆𑀣𑀸𑀢𑀺 𑀅𑀧𑁆𑀧𑀝𑀺𑀓𑀽𑀮𑀯𑀢𑁆𑀣𑀼𑀲𑁆𑀫𑀺𑀁. 𑀏𑀯𑀦𑁆𑀢𑀺 𑀧𑀝𑀺𑀓𑀽𑀮𑀲𑀜𑁆𑀜𑀻. 𑀲𑀢𑁆𑀢𑁂 𑀅𑀧𑁆𑀧𑀝𑀺𑀓𑀽𑀮𑁂 𑀅𑀲𑀼𑀪𑀨𑀭𑀡𑀁, 𑀲𑀗𑁆𑀔𑀸𑀭𑁂 𑀅𑀧𑁆𑀧𑀝𑀺𑀓𑀽𑀮𑁂 𑀅𑀦𑀺𑀘𑁆𑀘𑀦𑁆𑀢𑀺 𑀫𑀦𑀲𑀺𑀓𑀸𑀭𑀁 𑀓𑀭𑁄𑀦𑁆𑀢𑁄. 𑀅𑀲𑀼𑀪𑀸𑀬𑀸𑀢𑀺 𑀅𑀲𑀼𑀪𑀲𑀜𑁆𑀜𑀸𑀬. 𑀅𑀦𑀺𑀘𑁆𑀘𑀢𑁄 𑀯𑀸 𑀉𑀧𑀲𑀁𑀳𑀭𑀢𑀻𑀢𑀺 𑀅𑀦𑀺𑀘𑁆𑀘𑀦𑁆𑀢𑀺 𑀫𑀦𑀲𑀺𑀓𑀸𑀭𑀁 𑀧𑀯𑀢𑁆𑀢𑁂𑀢𑀺. ‘‘𑀏𑀲𑁂𑀯 𑀦𑀬𑁄’’𑀢𑀺 𑀲𑀗𑁆𑀔𑁂𑀧𑀢𑁄 𑀯𑀼𑀢𑁆𑀢𑀫𑀢𑁆𑀣𑀁 𑀯𑀺𑀯𑀭𑀺𑀢𑀼𑀁 ‘‘𑀅𑀧𑁆𑀧𑀝𑀺𑀓𑀽𑀮𑀧𑀝𑀺𑀓𑀽𑀮𑁂𑀲𑀽’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀙𑀴𑀗𑁆𑀕𑀼𑀧𑁂𑀓𑁆𑀔𑀦𑁆𑀢𑀺 𑀙𑀲𑀼 𑀆𑀭𑀫𑁆𑀫𑀡𑁂𑀲𑀼 𑀧𑀳𑀻𑀦𑀸𑀦𑀼𑀭𑁄𑀥𑀲𑁆𑀲 𑀉𑀧𑁆𑀧𑀢𑁆𑀢𑀺𑀬𑀸 𑀙𑀴𑀗𑁆𑀕𑀯𑀦𑁆𑀢𑀁 𑀉𑀧𑁂𑀓𑁆𑀔𑀁.

𑀫𑁂𑀢𑁆𑀢𑀸𑀬𑀸𑀢𑀺 𑀫𑁂𑀢𑁆𑀢𑀸𑀪𑀸𑀯𑀦𑀸𑀬. 𑀧𑀝𑀺𑀓𑀽𑀮𑀸𑀤𑀻𑀲𑀼 𑀯𑀢𑁆𑀣𑀽𑀲𑀼 𑀇𑀘𑁆𑀙𑀺𑀢𑀯𑀺𑀳𑀸𑀭𑁂𑀦 𑀯𑀺𑀳𑀭𑀺𑀢𑀼𑀁 𑀲𑀫𑀢𑁆𑀣𑀢𑀸 𑀅𑀭𑀺𑀬𑀸𑀦𑀁 𑀏𑀯, 𑀢𑀢𑁆𑀣 𑀘 𑀅𑀭𑀳𑀢𑁄 𑀏𑀯 𑀇𑀚𑁆𑀛𑀦𑀢𑁄 𑀅𑀭𑀺𑀬𑀺𑀤𑁆𑀥𑀺 𑀦𑀸𑀫. 𑀢𑀲𑁆𑀲𑀸 𑀅𑀭𑀺𑀬𑀺𑀤𑁆𑀥𑀺𑀬𑀸 𑀘 𑀤𑀲𑁆𑀲𑀺𑀢𑀢𑁆𑀢𑀸 𑀤𑁂𑀲𑀦𑀸 𑀯𑀺𑀦𑀺𑀯𑀝𑁆𑀝𑁂𑀢𑀩𑁆𑀩𑀸 𑀧𑀭𑀺𑀬𑁄𑀲𑀸𑀦𑁂𑀢𑀩𑁆𑀩𑀸 𑀲𑀺𑀬𑀸. 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺 𑀇𑀦𑁆𑀤𑁆𑀭𑀺𑀬𑀸𑀦𑀁 𑀅𑀧𑀭𑀺𑀧𑀓𑁆𑀓𑀢𑁆𑀢𑀸 𑀦𑀺𑀓𑀦𑁆𑀢𑀺𑀬𑀸 𑀘 𑀤𑀼𑀧𑁆𑀧𑀭𑀺𑀬𑀸𑀤𑀸𑀦𑀢𑁄. 𑀅𑀬𑀁 𑀤𑁂𑀲𑀦𑀸𑀢𑀺 ‘‘𑀫𑁂𑀢𑁆𑀢𑀸𑀲𑀳𑀕𑀢𑀁 𑀩𑁄𑀚𑁆𑀛𑀗𑁆𑀕𑀁 𑀪𑀸𑀯𑁂𑀢𑀻’’𑀢𑀺𑀆𑀤𑀺𑀦𑀸 𑀅𑀬𑀁 𑀤𑁂𑀲𑀦𑀸 𑀆𑀭𑀤𑁆𑀥𑀸. 𑀬𑁄 𑀳𑀺 𑀫𑁂𑀢𑁆𑀢𑀸𑀛𑀸𑀦𑀁 𑀧𑀸𑀤𑀓𑀁 𑀓𑀢𑁆𑀯𑀸 𑀲𑀫𑁆𑀫𑀲𑀦𑀁 𑀆𑀭𑀪𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀧𑀭𑀺𑀲𑀼𑀤𑁆𑀥𑁂𑀲𑀼 𑀯𑀡𑁆𑀡𑀓𑀲𑀺𑀡𑁂𑀲𑀼 𑀯𑀺𑀫𑁄𑀓𑁆𑀔𑀲𑀗𑁆𑀔𑀸𑀢𑀁 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀁 𑀦𑀺𑀩𑁆𑀩𑀢𑁆𑀢𑁂𑀢𑀺, 𑀢𑀁 𑀲𑀦𑁆𑀥𑀸𑀬𑀸𑀳 𑀪𑀕𑀯𑀸 𑁋 ‘‘𑀲𑀼𑀪𑀁 𑀔𑁄 𑀧𑀦 𑀯𑀺𑀫𑁄𑀓𑁆𑀔𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀻’’𑀢𑀺.

𑀲𑀼𑀪𑀧𑀭𑀫𑀦𑁆𑀢𑀺 𑀲𑀼𑀪𑀯𑀺𑀫𑁄𑀓𑁆𑀔𑀧𑀭𑀫𑀁. 𑀇𑀥 𑀮𑁄𑀓𑁂 𑀏𑀯 𑀧𑀜𑁆𑀜𑀸 𑀅𑀲𑁆𑀲. 𑀢𑁂𑀦𑀸𑀳 ‘‘𑀮𑁄𑀓𑀺𑀬𑀧𑀜𑁆𑀜𑀲𑁆𑀲𑀸𑀢𑀺 𑀅𑀢𑁆𑀣𑁄’’𑀢𑀺. 𑀅𑀭𑀳𑀢𑁆𑀢𑀧𑀭𑀫𑀸𑀯 𑀫𑁂𑀢𑁆𑀢𑀸 𑀅𑀭𑀳𑀢𑁆𑀢𑀫𑀕𑁆𑀕𑀲𑁆𑀲 𑀧𑀸𑀤𑀓𑀢𑁆𑀢𑀸. 𑀓𑀭𑀼𑀡𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄𑀢𑀺 𑀓𑀭𑀼𑀡𑀸𑀤𑀺𑀛𑀸𑀦𑀁 𑀧𑀸𑀤𑀓𑀁 𑀓𑀢𑁆𑀯𑀸 𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀦𑁆𑀢𑁄 𑀅𑀭𑀳𑀢𑁆𑀢𑀁 𑀧𑀢𑁆𑀢𑀼𑀁 𑀲𑀓𑁆𑀓𑁄𑀢𑀺, 𑀢𑀲𑁆𑀲 𑀅𑀭𑀳𑀢𑁆𑀣𑀧𑀭𑀫𑀸 𑀓𑀭𑀼𑀡𑀸 𑀳𑁄𑀢𑀺, 𑀏𑀯𑀁 𑀫𑀼𑀤𑀺𑀢𑀸𑀉𑀧𑁂𑀓𑁆𑀔𑀸𑀲𑀼𑀧𑀺 𑀯𑀢𑁆𑀢𑀩𑁆𑀩𑀦𑁆𑀢𑀺 𑀇𑀫𑀫𑀢𑁆𑀣𑀁 𑀅𑀢𑀺𑀤𑀺𑀲𑀢𑀺. 𑀧𑀼𑀦 𑀤𑁂𑀲𑀦𑀸𑀭𑀫𑁆𑀪𑀧𑀬𑁄𑀚𑀦𑀁 𑀧𑀦 ‘‘𑀇𑀫𑀺𑀦𑀸 𑀦𑀬𑁂𑀦𑀸’’𑀢𑀺 𑀳𑁂𑀝𑁆𑀞𑀸 𑀅𑀢𑀺𑀤𑀺𑀝𑁆𑀞𑀫𑁂𑀯.

𑀲𑀼𑀪𑀧𑀭𑀫𑀸𑀤𑀺𑀢𑀸𑀢𑀺 𑀫𑁂𑀢𑁆𑀢𑀸𑀓𑀭𑀼𑀡𑀸𑀫𑀼𑀤𑀺𑀢𑀸𑀉𑀧𑁂𑀓𑁆𑀔𑀸𑀦𑀁 𑀲𑀼𑀪𑀧𑀭𑀫𑀢𑀸 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀧𑀭𑀫𑀢𑀸, 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀧𑀭𑀫𑀢𑀸, 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀧𑀭𑀫𑀢𑀸. 𑀢𑀲𑁆𑀲 𑀢𑀲𑁆𑀲𑀸𑀢𑀺 𑀲𑀼𑀪𑀯𑀺𑀫𑁄𑀓𑁆𑀔𑀲𑁆𑀲 𑀳𑁂𑀝𑁆𑀞𑀸 𑀢𑀺𑀡𑁆𑀡𑀁 𑀅𑀭𑀽𑀧𑀚𑁆𑀛𑀸𑀦𑀸𑀦𑀜𑁆𑀘 𑀬𑀣𑀸𑀓𑁆𑀓𑀫𑀁 𑀉𑀧𑀦𑀺𑀲𑁆𑀲𑀬𑀢𑁆𑀢𑀸. 𑀅𑀧𑁆𑀧𑀝𑀺𑀓𑀽𑀮𑀧𑀭𑀺𑀘𑀬𑀸𑀢𑀺 𑀇𑀝𑁆𑀞𑀸𑀭𑀫𑁆𑀫𑀡𑁂 𑀫𑀦𑀲𑀺𑀓𑀸𑀭𑀩𑀳𑀼𑀮𑀻𑀓𑀸𑀭𑀸. 𑀅𑀧𑁆𑀧𑀓𑀲𑀺𑀭𑁂𑀦𑁂𑀯𑀸𑀢𑀺 𑀲𑀼𑀔𑁂𑀦𑁂𑀯. 𑀢𑀢𑁆𑀣𑀸𑀢𑀺 𑀯𑀺𑀲𑀼𑀤𑁆𑀥𑀢𑀸𑀬 𑀇𑀝𑁆𑀞𑁂𑀲𑀼 𑀯𑀡𑁆𑀡𑀓𑀲𑀺𑀡𑁂𑀲𑀼. 𑀘𑀺𑀢𑁆𑀢𑀦𑁆𑀢𑀺 𑀪𑀸𑀯𑀦𑀸𑀫𑀬𑀘𑀺𑀢𑁆𑀢𑀁 𑀧𑀓𑁆𑀔𑀦𑁆𑀤𑀢𑀺 𑀅𑀧𑁆𑀧𑀦𑀸𑀯𑀲𑁂𑀦. 𑀢𑀢𑁄 𑀧𑀭𑀦𑁆𑀢𑀺 𑀢𑀢𑁄 𑀲𑀼𑀪𑀯𑀺𑀫𑁄𑀓𑁆𑀔𑀢𑁄 𑀧𑀭𑀁 𑀯𑀺𑀫𑁄𑀓𑁆𑀔𑀸𑀦𑀁 𑀉𑀧𑀦𑀺𑀲𑁆𑀲𑀬𑁄 𑀦𑀸𑀫 𑀦 𑀳𑁄𑀢𑀺, 𑀫𑁂𑀢𑁆𑀢𑀸𑀲𑀳𑀕𑀢𑀪𑀸𑀯𑁄 𑀤𑀝𑁆𑀞𑀩𑁆𑀩𑁄.

𑀲𑀢𑁆𑀢𑀤𑀼𑀓𑁆𑀔𑀁 𑀲𑀫𑀦𑀼𑀧𑀲𑁆𑀲𑀦𑁆𑀢𑀲𑁆𑀲𑀸𑀢𑀺 𑀤𑀡𑁆𑀟𑁂𑀦 𑀅𑀪𑀺𑀳𑀝𑀧𑁆𑀧𑀢𑁆𑀢𑀭𑀽𑀧𑀳𑁂𑀢𑀼𑀁 𑀲𑀢𑁆𑀢𑁂𑀲𑀼 𑀉𑀧𑁆𑀧𑀚𑁆𑀚𑀦𑀓𑀤𑀼𑀓𑁆𑀔𑀁 𑀜𑀸𑀡𑁂𑀦 𑀯𑀻𑀫𑀁𑀲𑀦𑁆𑀢𑀲𑁆𑀲. 𑀢𑀬𑀺𑀤𑀁 𑀭𑀽𑀧𑀦𑀺𑀫𑀺𑀢𑁆𑀢𑀓𑀁 𑀲𑀢𑁆𑀢𑁂𑀲𑀼 𑀉𑀧𑁆𑀧𑀚𑁆𑀚𑀦𑀓𑀁 𑀤𑀼𑀓𑁆𑀔𑀁 𑀜𑀸𑀡𑁂𑀦 𑀓𑀭𑀼𑀡𑀸𑀯𑀺𑀳𑀸𑀭𑀺𑀲𑁆𑀲 𑀯𑀺𑀲𑁂𑀲𑀢𑁄 𑀧𑀓𑁆𑀔𑀦𑁆𑀤𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀅𑀧𑁆𑀧𑀓𑀲𑀺𑀭𑁂𑀦𑁂𑀯 𑀢𑀢𑁆𑀣 𑀘𑀺𑀢𑁆𑀢𑀁 𑀧𑀓𑁆𑀔𑀦𑁆𑀤𑀢𑀻’’𑀢𑀺, 𑀦 𑀧𑀦 𑀲𑀩𑁆𑀩𑀲𑁄 𑀅𑀭𑀽𑀧𑁂 𑀆𑀦𑀺𑀲𑀁𑀲𑀤𑀲𑁆𑀲𑀦𑀢𑁄.

𑀯𑀺𑀜𑁆𑀜𑀸𑀡𑀁 𑀲𑀫𑀦𑀼𑀧𑀲𑁆𑀲𑀦𑁆𑀢𑀲𑁆𑀲𑀸𑀢𑀺 𑀇𑀤𑀁 𑀧𑀸𑀫𑁄𑀚𑁆𑀚𑀕𑀳𑀡𑀫𑀼𑀔𑁂𑀦 𑀢𑀦𑁆𑀦𑀺𑀲𑁆𑀲𑀬𑀯𑀺𑀜𑁆𑀜𑀸𑀡𑀲𑁆𑀲 𑀕𑀳𑀡𑀁 𑀲𑀫𑁆𑀪𑀯𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀯𑀺𑀜𑁆𑀜𑀸𑀡𑀕𑁆𑀕𑀳𑀡𑀧𑀭𑀺𑀘𑀺𑀢𑀦𑁆𑀢𑀺 𑀯𑀼𑀢𑁆𑀢𑀦𑀬𑁂𑀦 𑀯𑀺𑀜𑁆𑀜𑀸𑀡𑀕𑁆𑀕𑀳𑀡𑁂 𑀧𑀭𑀺𑀘𑀺𑀢𑀁.

𑀉𑀧𑁂𑀓𑁆𑀔𑀸𑀯𑀺𑀳𑀸𑀭𑀺𑀲𑁆𑀲𑀸𑀢𑀺 𑀉𑀧𑁂𑀓𑁆𑀔𑀸𑀩𑁆𑀭𑀳𑁆𑀫𑀯𑀺𑀳𑀸𑀭𑀁 𑀯𑀺𑀳𑀭𑀢𑁄. 𑀆𑀪𑁄𑀕𑀸𑀪𑀸𑀯𑀢𑁄𑀢𑀺 𑀲𑀼𑀔𑀸𑀤𑀺𑀯𑀲𑁂𑀦 𑀆𑀪𑀼𑀚𑀦𑀸𑀪𑀸𑀯𑀢𑁄. 𑀲𑀼𑀔…𑀧𑁂… 𑀲𑀫𑁆𑀪𑀯𑀢𑁄𑀢𑀺 𑀲𑀼𑀔𑀤𑀼𑀓𑁆𑀔𑀸𑀢𑀺 𑀧𑀭𑀫𑀢𑁆𑀣𑀓𑀫𑁆𑀫𑀕𑁆𑀕𑀳𑀡𑁂 𑀯𑀺𑀫𑀼𑀔𑀢𑀸𑀲𑀫𑁆𑀪𑀯𑀢𑁄. 𑀅𑀯𑀺𑀚𑁆𑀚𑀫𑀸𑀦𑀕𑁆𑀕𑀳𑀡𑀤𑀼𑀓𑁆𑀔𑀦𑁆𑀢𑀺 𑀧𑀭𑀫𑀢𑁆𑀣𑀢𑁄 𑀅𑀯𑀺𑀚𑁆𑀚𑀫𑀸𑀦𑀲𑀢𑁆𑀢𑀧𑀜𑁆𑀜𑀢𑁆𑀢𑀺𑀕𑀳𑀡𑀧𑀭𑀺𑀘𑀺𑀢𑀁 𑀢𑀲𑁆𑀲 𑀢𑀲𑁆𑀲 𑀅𑀪𑀸𑀯𑀫𑀢𑁆𑀢𑀓𑀲𑁆𑀲 𑀕𑀳𑀡𑀫𑁆𑀧𑀺 𑀤𑀼𑀓𑁆𑀔𑀁 𑀓𑀼𑀲𑀮𑀫𑁆𑀧𑀺 𑀳𑁄𑀢𑀺. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀫𑁂𑀢𑁆𑀢𑀸𑀲𑀳𑀕𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.