𑁨. 𑀩𑁄𑀚𑁆𑀛𑀗𑁆𑀕𑀲𑀁𑀬𑀼𑀢𑁆𑀢𑀁

𑁧. 𑀧𑀩𑁆𑀩𑀢𑀯𑀕𑁆𑀕𑁄

𑁧.𑀳𑀺𑀫𑀯𑀦𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁮𑁨. 𑀩𑀼𑀚𑁆𑀛𑀢𑀺 𑀘𑀢𑀼𑀲𑀘𑁆𑀘𑀁 𑀅𑀭𑀺𑀬𑀲𑀸𑀯𑀓𑁄 𑀏𑀢𑀸𑀬𑀸𑀢𑀺 𑀩𑁄𑀥𑀁, 𑀥𑀫𑁆𑀫𑀲𑀸𑀫𑀕𑁆𑀕𑀻, 𑀅𑀭𑀺𑀬𑀲𑀸𑀯𑀓𑁄 𑀧𑀦 𑀘𑀢𑀼𑀲𑀘𑁆𑀘𑀁 𑀩𑀼𑀚𑁆𑀛𑀢𑀻𑀢𑀺 𑀩𑁄𑀥𑀺. 𑀅𑀗𑁆𑀕𑀸𑀢𑀺 𑀓𑀸𑀭𑀡𑀸. 𑀬𑀸𑀬 𑀥𑀫𑁆𑀫𑀲𑀸𑀫𑀕𑁆𑀕𑀺𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀡𑁆𑀳𑀸𑀯𑀲𑁂𑀦 𑀧𑀢𑀺𑀝𑁆𑀞𑀸𑀦𑀁, 𑀤𑀺𑀝𑁆𑀞𑀺𑀯𑀲𑁂𑀦 𑀆𑀬𑀽𑀳𑀦𑀸. 𑀲𑀲𑁆𑀲𑀢𑀤𑀺𑀝𑁆𑀞𑀺𑀬𑀸 𑀧𑀢𑀺𑀝𑁆𑀞𑀸𑀦𑀁, 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀬𑀸 𑀆𑀬𑀽𑀳𑀦𑀸. 𑀮𑀻𑀦𑀯𑀲𑁂𑀦 𑀧𑀢𑀺𑀝𑁆𑀞𑀸𑀦𑀁, 𑀉𑀤𑁆𑀥𑀘𑁆𑀘𑀯𑀲𑁂𑀦 𑀆𑀬𑀽𑀳𑀦𑀸. 𑀓𑀸𑀫𑀲𑀼𑀔𑀸𑀦𑀼𑀬𑁄𑀕𑀯𑀲𑁂𑀦 𑀧𑀢𑀺𑀝𑁆𑀞𑀸𑀦𑀁, 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑀯𑀲𑁂𑀦 𑀆𑀬𑀽𑀳𑀦𑀸. 𑀑𑀖𑀢𑀭𑀡𑀲𑀼𑀢𑁆𑀢𑀯𑀡𑁆𑀡𑀦𑀸𑀬𑀁 (𑀲𑀁. 𑀦𑀺. 𑁧.𑁧) 𑁋

‘‘𑀓𑀺𑀮𑁂𑀲𑀯𑀲𑁂𑀦 𑀧𑀢𑀺𑀝𑁆𑀞𑀸𑀦𑀁, 𑀅𑀪𑀺𑀲𑀗𑁆𑀔𑀸𑀭𑀯𑀲𑁂𑀦 𑀆𑀬𑀽𑀳𑀦𑀸. 𑀢𑀡𑁆𑀳𑀸𑀤𑀺𑀝𑁆𑀞𑀻𑀳𑀺 𑀧𑀢𑀺𑀝𑁆𑀞𑀸𑀦𑀁, 𑀅𑀯𑀲𑁂𑀲𑀓𑀺𑀮𑁂𑀲𑀸𑀪𑀺𑀲𑀗𑁆𑀔𑀸𑀭𑁂𑀳𑀺 𑀆𑀬𑀽𑀳𑀦𑀸, 𑀲𑀩𑁆𑀩𑀸𑀓𑀼𑀲𑀮𑀸𑀪𑀺𑀲𑀗𑁆𑀔𑀸𑀭𑀯𑀲𑁂𑀦 𑀧𑀢𑀺𑀝𑁆𑀞𑀸𑀦𑀁, 𑀲𑀩𑁆𑀩𑀮𑁄𑀓𑀺𑀬𑀓𑀼𑀲𑀮𑀸𑀪𑀺𑀲𑀗𑁆𑀔𑀸𑀭𑀯𑀲𑁂𑀦 𑀆𑀬𑀽𑀳𑀦𑀸’’𑀢𑀺 𑁋

𑀯𑀼𑀢𑁆𑀢𑁂𑀲𑀼 𑀧𑀓𑀸𑀭𑁂𑀲𑀼 𑀇𑀥 𑀅𑀯𑀼𑀢𑁆𑀢𑀸𑀦𑀁 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀓𑀺𑀮𑁂𑀲𑀲𑀦𑁆𑀢𑀸𑀦𑀦𑀺𑀤𑁆𑀤𑀸𑀬 𑀉𑀝𑁆𑀞𑀳𑀢𑀻𑀢𑀺 𑀏𑀢𑁂𑀦 𑀲𑀺𑀔𑀸𑀧𑀢𑁆𑀢𑀯𑀺𑀧𑀲𑁆𑀲𑀦𑀸𑀲𑀳𑀕𑀢𑀸𑀦𑀫𑁆𑀧𑀺 𑀲𑀢𑀺𑀆𑀤𑀻𑀦𑀁 𑀩𑁄𑀚𑁆𑀛𑀗𑁆𑀕𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀘𑀢𑁆𑀢𑀸𑀭𑀻𑀢𑀺𑀆𑀤𑀺𑀦𑀸 𑀫𑀕𑁆𑀕𑀨𑀮𑁂𑀦 𑀲𑀳𑀕𑀢𑀸𑀦𑀁. 𑀲𑀢𑁆𑀢𑀳𑀺 𑀩𑁄𑀚𑁆𑀛𑀗𑁆𑀕𑁂𑀳𑀺 𑀪𑀸𑀯𑀺𑀢𑁂𑀳𑀺 𑀲𑀘𑁆𑀘𑀧𑀝𑀺𑀯𑁂𑀥𑁄 𑀳𑁄𑀢𑀻𑀢𑀺 𑀓𑀣𑀫𑀺𑀤𑀁 𑀚𑀸𑀦𑀺𑀢𑀩𑁆𑀩𑀦𑁆𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀬𑀣𑀸𑀳𑀸’’𑀢𑀺𑀆𑀤𑀺. 𑀛𑀸𑀦𑀗𑁆𑀕𑀫𑀕𑁆𑀕𑀗𑁆𑀕𑀸𑀤𑀬𑁄 𑀯𑀺𑀬𑀸𑀢𑀺 𑀏𑀢𑁂𑀦 𑀩𑁄𑀥𑀺𑀩𑁄𑀚𑁆𑀛𑀗𑁆𑀕𑀲𑀤𑁆𑀤𑀸𑀦𑀁 𑀲𑀫𑀼𑀤𑀸𑀬𑀸𑀯𑀬𑀯𑀯𑀺𑀲𑀬𑀢𑀁 𑀤𑀲𑁆𑀲𑁂𑀢𑀺. 𑀲𑁂𑀦𑀗𑁆𑀕𑀭𑀣𑀗𑁆𑀕𑀸𑀤𑀬𑁄 𑀯𑀺𑀬𑀸𑀢𑀺 𑀏𑀢𑁂𑀦 𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀺𑀬𑀸 𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺𑀪𑀸𑀯𑀁 𑀤𑀲𑁆𑀲𑁂𑀢𑀺.

𑀩𑁄𑀥𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀩𑁄𑀚𑁆𑀛𑀗𑁆𑀕𑀸𑀢𑀺 𑀯𑀼𑀢𑁆𑀢𑀁 ‘‘𑀓𑀸𑀭𑀡𑀢𑁆𑀣𑁄 𑀅𑀗𑁆𑀕𑀲𑀤𑁆𑀤𑁄’’𑀢𑀺. 𑀩𑀼𑀚𑁆𑀛𑀢𑀻𑀢𑀺 𑀩𑁄𑀥𑀺, 𑀩𑁄𑀥𑀺𑀬𑀸 𑀏𑀯 𑀅𑀗𑁆𑀕𑀸𑀢𑀺 𑀩𑁄𑀚𑁆𑀛𑀗𑁆𑀕𑀸𑀢𑀺 𑀯𑀼𑀢𑁆𑀢𑀁 ‘‘𑀩𑀼𑀚𑁆𑀛𑀦𑁆𑀢𑀻𑀢𑀺 𑀩𑁄𑀚𑁆𑀛𑀗𑁆𑀕𑀸’’𑀢𑀺. 𑀯𑀺𑀧𑀲𑁆𑀲𑀦𑀸𑀤𑀻𑀦𑀁 𑀓𑀸𑀭𑀡𑀸𑀦𑀁 𑀩𑀼𑀚𑁆𑀛𑀺𑀢𑀩𑁆𑀩𑀸𑀦𑀁 𑀲𑀘𑁆𑀘𑀸𑀦𑀁 𑀅𑀦𑀼𑀭𑀽𑀧𑀁 𑀧𑀘𑁆𑀘𑀓𑁆𑀔𑀪𑀸𑀯𑁂𑀦 𑀧𑀝𑀺𑀫𑀼𑀔𑀁 𑀅𑀯𑀺𑀧𑀭𑀻𑀢𑀁 𑀲𑀫𑁆𑀫𑀸 𑀩𑀼𑀚𑁆𑀛𑀦𑁆𑀢𑀻𑀢𑀺 𑀏𑀯𑀁 𑀯𑀢𑁆𑀣𑀼𑀯𑀺𑀲𑁂𑀲𑀤𑀻𑀧𑀓𑁂𑀳𑀺 𑀉𑀧𑀭𑀺𑀫𑀕𑁆𑀕𑁂𑀳𑀺 𑀅𑀦𑀼𑀩𑀼𑀚𑁆𑀛𑀦𑁆𑀢𑀻𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀩𑁄𑀥𑀺𑀲𑀤𑁆𑀤𑁂𑀳𑀺 𑀦𑀺𑀧𑁆𑀧𑀤𑁂𑀲𑁂𑀦 𑀯𑀼𑀢𑁆𑀢𑀁 ‘‘𑀩𑀼𑀚𑁆𑀛𑀦𑀢𑀸𑀲𑀸𑀫𑀜𑁆𑀜𑁂𑀦 𑀲𑀗𑁆𑀕𑀡𑁆𑀳𑀸𑀢𑀻’’𑀢𑀺. 𑀏𑀢𑁆𑀣 𑀘 𑀮𑀻𑀦𑀧𑀢𑀺𑀝𑁆𑀞𑀸𑀦-𑀓𑀸𑀫𑀲𑀼𑀔𑀮𑁆𑀮𑀺𑀓𑀸𑀦𑀼𑀬𑁄𑀕-𑀉𑀘𑁆𑀙𑁂𑀤𑀸𑀪𑀺𑀦𑀺𑀯𑁂𑀲𑀸𑀦𑀁 𑀥𑀫𑁆𑀫𑀯𑀺𑀘𑀬-𑀯𑀻𑀭𑀺𑀬𑀧𑀻𑀢𑀺𑀧𑀥𑀸𑀦-𑀥𑀫𑁆𑀫𑀲𑀸𑀫𑀕𑁆𑀕𑀻 𑀧𑀝𑀺𑀧𑀓𑁆𑀔𑁄. 𑀉𑀤𑁆𑀥𑀘𑁆𑀘𑀸𑀬𑀽𑀳𑀦𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕-𑀲𑀲𑁆𑀲𑀢𑀸𑀪𑀺𑀦𑀺𑀯𑁂𑀲𑀸𑀦𑀁 𑀧𑀲𑁆𑀲𑀤𑁆𑀥𑀺𑀲𑀫𑀸𑀥𑀺-𑀉𑀧𑁂𑀓𑁆𑀔𑀸𑀧𑀥𑀸𑀦-𑀥𑀫𑁆𑀫𑀲𑀸𑀫𑀕𑁆𑀕𑀻 𑀧𑀝𑀺𑀧𑀓𑁆𑀔𑁄. 𑀲𑀢𑀺 𑀧𑀦 𑀉𑀪𑀬𑀢𑁆𑀣𑀸𑀧𑀺 𑀇𑀘𑁆𑀙𑀺𑀢𑀩𑁆𑀩𑀸. 𑀢𑀣𑀸 𑀳𑀺 𑀲𑀸 𑀲𑀩𑁆𑀩𑀢𑁆𑀣𑀺𑀓𑀸 𑀯𑀼𑀢𑁆𑀢𑀸.

𑀲𑀁-𑀲𑀤𑁆𑀤𑁄 𑀧𑀲𑀁𑀲𑀸𑀬𑀁. 𑀧𑀼𑀦𑀤𑁂𑀯 𑀲𑀼𑀦𑁆𑀤𑀭𑁄 𑀘 𑀅𑀢𑁆𑀣𑁄𑀧𑀻𑀢𑀺 𑀆𑀳 ‘‘𑀧𑀲𑀢𑁆𑀣𑁄 𑀲𑀼𑀦𑁆𑀤𑀭𑁄 𑀘 𑀩𑁄𑀚𑁆𑀛𑀗𑁆𑀕𑁄’’𑀢𑀺. 𑀅𑀪𑀺𑀦𑀺𑀩𑁆𑀩𑀢𑁆𑀢𑁂𑀢𑀻𑀢𑀺 𑀅𑀪𑀺𑀯𑀺𑀲𑀺𑀝𑁆𑀞𑀪𑀸𑀯𑁂𑀦 𑀦𑀺𑀩𑁆𑀩𑀢𑁆𑀢𑁂𑀢𑀺 𑀲𑀯𑀺𑀲𑁂𑀲𑀪𑀸𑀯𑀁 𑀯𑀤𑀢𑀺. ‘‘𑀏𑀓𑁂 𑀯𑀡𑁆𑀡𑀬𑀦𑁆𑀢𑀻’’𑀢𑀺 𑀯𑀢𑁆𑀯𑀸 𑀢𑀢𑁆𑀣 𑀬𑀣𑀸𑀯𑀼𑀢𑁆𑀢𑀯𑀺𑀯𑁂𑀓𑀢𑁆𑀢𑀬𑀢𑁄 𑀅𑀜𑁆𑀜𑀁 𑀯𑀺𑀯𑁂𑀓𑀤𑁆𑀯𑀬𑀁 𑀉𑀤𑁆𑀥𑀭𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀢𑁂 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀛𑀸𑀦𑀓𑁆𑀔𑀡𑁂 𑀢𑀸𑀯 𑀓𑀺𑀘𑁆𑀘𑀢𑁄 𑀯𑀺𑀓𑁆𑀔𑀫𑁆𑀪𑀦𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀁, 𑀯𑀺𑀧𑀲𑁆𑀲𑀦𑀸𑀓𑁆𑀔𑀡𑁂 𑀅𑀚𑁆𑀛𑀸𑀲𑀬𑀢𑁄 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀁 𑀪𑀸𑀯𑁂𑀢𑀻𑀢𑀺. 𑀢𑁂𑀦𑀸𑀳 𑁋 ‘‘𑀅𑀦𑀼𑀢𑁆𑀢𑀭𑀁 𑀯𑀺𑀫𑁄𑀓𑁆𑀔𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀺𑀲𑁆𑀲𑀸𑀫𑀻’’𑀢𑀺. 𑀢𑀢𑁆𑀣 𑀢𑀢𑁆𑀣 𑀦𑀺𑀘𑁆𑀙𑀬𑀢𑀸𑀬 𑀓𑀲𑀺𑀡𑀚𑁆𑀛𑀸𑀦𑀕𑁆𑀕𑀳𑀡𑁂𑀦 𑀅𑀦𑀼𑀧𑁆𑀧𑀸𑀤𑀸𑀦𑀫𑁆𑀧𑀺 𑀕𑀳𑀡𑀁 𑀤𑀝𑁆𑀞𑀩𑁆𑀩𑀁.

𑀳𑀺𑀫𑀯𑀦𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀓𑀸𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁮𑁩. 𑀢𑀺𑀝𑁆𑀞𑀦𑁆𑀢𑀺 𑀏𑀢𑁂𑀦𑀸𑀢𑀺 𑀞𑀺𑀢𑀺, 𑀓𑀸𑀭𑀡𑀁. 𑀓𑀫𑁆𑀫𑀉𑀢𑀼𑀘𑀺𑀢𑁆𑀢𑀸𑀳𑀸𑀭𑀲𑀜𑁆𑀜𑀺𑀢𑁄 𑀘𑀢𑀼𑀩𑁆𑀩𑀺𑀥𑁄 𑀧𑀘𑁆𑀘𑀬𑁄 𑀞𑀺𑀢𑀺 𑀏𑀢𑀲𑁆𑀲𑀸𑀢𑀺 𑀧𑀘𑁆𑀘𑀬𑀝𑁆𑀞𑀺𑀢𑀺𑀓𑁄. 𑀆𑀳𑀸𑀭𑀧𑀘𑁆𑀘𑀬𑀲𑀤𑁆𑀤𑀸 𑀳𑀺 𑀏𑀓𑀢𑁆𑀣𑀸. 𑀲𑀼𑀪𑀫𑁆𑀧𑀻𑀢𑀺 𑀓𑀸𑀫𑀘𑁆𑀙𑀦𑁆𑀤𑁄 𑀧𑀘𑁆𑀘𑀬𑁄, 𑀅𑀲𑀼𑀪𑁂 𑀲𑀼𑀪𑀸𑀓𑀸𑀭𑁂𑀦 𑀧𑀯𑀢𑁆𑀢𑀦𑀢𑁄 𑀲𑀼𑀪𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑁂𑀦 𑀓𑀸𑀭𑀡𑁂𑀦 𑀧𑀯𑀢𑁆𑀢𑀦𑀓𑀲𑁆𑀲 𑀅𑀜𑁆𑀜𑀲𑁆𑀲 𑀓𑀸𑀫𑀘𑁆𑀙𑀦𑁆𑀤𑀲𑁆𑀲 𑀦𑀺𑀫𑀺𑀢𑁆𑀢𑀢𑁆𑀢𑀸 𑀲𑀼𑀪𑀦𑀺𑀫𑀺𑀢𑁆𑀢𑀦𑁆𑀢𑀺. 𑀲𑀼𑀪𑀲𑁆𑀲𑀸𑀢𑀺 𑀬𑀣𑀸𑀯𑀼𑀢𑁆𑀢𑀲𑁆𑀲 𑀲𑀼𑀪𑀲𑁆𑀲. 𑀆𑀭𑀫𑁆𑀫𑀡𑀫𑁆𑀧𑀻𑀢𑀺 𑀲𑀼𑀪𑀸𑀓𑀸𑀭𑁂𑀦, 𑀇𑀝𑁆𑀞𑀸𑀓𑀸𑀭𑁂𑀦 𑀯𑀸 𑀕𑀬𑁆𑀳𑀫𑀸𑀦𑀁 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑀫𑁆𑀧𑀺 𑀲𑀼𑀪𑀦𑀺𑀫𑀺𑀢𑁆𑀢𑀁 𑀯𑀼𑀢𑁆𑀢𑀸𑀓𑀸𑀭𑁂𑀦. 𑀅𑀦𑀼𑀧𑀸𑀬𑀫𑀦𑀲𑀺𑀓𑀸𑀭𑁄𑀢𑀺 𑀆𑀓𑀗𑁆𑀔𑀺𑀢𑀲𑁆𑀲 𑀳𑀺𑀢𑀲𑀼𑀔𑀲𑁆𑀲 𑀅𑀦𑀼𑀧𑀸𑀬𑀪𑀽𑀢𑁄 𑀫𑀦𑀲𑀺𑀓𑀸𑀭𑁄, 𑀢𑀢𑁄 𑀏𑀯 𑀉𑀧𑁆𑀧𑀣𑀫𑀦𑀲𑀺𑀓𑀸𑀭𑁄𑀢𑀺 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄. 𑀢𑀲𑁆𑀫𑀺𑀦𑁆𑀢𑀺 𑀬𑀣𑀸𑀦𑀺𑀤𑁆𑀥𑀸𑀭𑀺𑀢𑁂 𑀓𑀸𑀫𑀘𑁆𑀙𑀦𑁆𑀤𑀪𑀽𑀢𑁂 𑀢𑀤𑀸𑀭𑀫𑁆𑀫𑀡𑀪𑀽𑀢𑁂 𑀘 𑀤𑀼𑀯𑀺𑀥𑁂𑀧𑀺 𑀲𑀼𑀪𑀦𑀺𑀫𑀺𑀢𑁆𑀢𑁂. 𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀲𑀼𑀪𑀸𑀭𑀫𑁆𑀫𑀡𑁂’’𑀇𑀘𑁆𑀘𑁂𑀯 𑀯𑀼𑀢𑁆𑀢𑀁. 𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀲𑀼𑀪𑀦𑀺𑀫𑀺𑀢𑁆𑀢𑀦𑁆𑀢𑀺𑀆𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀓𑀸𑀫𑀘𑁆𑀙𑀦𑁆𑀤𑀦𑀻𑀯𑀭𑀡𑀲𑁆𑀲 𑀆𑀳𑀸𑀭𑀤𑀲𑁆𑀲𑀦𑀧𑀸𑀴𑀺 𑀉𑀢𑁆𑀢𑀸𑀦𑀸𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 𑁋 ‘‘𑀏𑀯𑀁 𑀲𑀩𑁆𑀩𑀦𑀻𑀯𑀭𑀡𑁂𑀲𑀼 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸’’𑀢𑀺.

𑀧𑀝𑀺𑀖𑁄𑀧𑀺 𑀧𑀝𑀺𑀖𑀦𑀺𑀫𑀺𑀢𑁆𑀢𑀁 𑀧𑀼𑀭𑀺𑀫𑀼𑀧𑁆𑀧𑀦𑁆𑀦𑀲𑁆𑀲 𑀧𑀘𑁆𑀙𑀸 𑀉𑀧𑁆𑀧𑀚𑁆𑀚𑀦𑀓𑀲𑁆𑀲 𑀦𑀺𑀫𑀺𑀢𑁆𑀢𑀪𑀸𑀯𑀢𑁄. 𑀧𑀝𑀺𑀖𑀸𑀭𑀫𑁆𑀫𑀡𑀁 𑀦𑀸𑀫 𑀏𑀓𑀽𑀦𑀯𑀻𑀲𑀢𑀺 𑀆𑀖𑀸𑀢𑀯𑀢𑁆𑀣𑀼𑀪𑀽𑀢𑀸 𑀲𑀢𑁆𑀢𑀲𑀗𑁆𑀔𑀸𑀭𑀸. 𑀅𑀭𑀢𑀻𑀢𑀺 𑀧𑀦𑁆𑀢𑀲𑁂𑀦𑀸𑀲𑀦𑀸𑀤𑀻𑀲𑀼 𑀅𑀭𑀫𑀡𑀁. 𑀉𑀓𑁆𑀓𑀡𑁆𑀞𑀺𑀢𑀸𑀢𑀺 𑀉𑀓𑁆𑀓𑀡𑁆𑀞𑀪𑀸𑀯𑁄. 𑀧𑀦𑁆𑀢𑁂𑀲𑀽𑀢𑀺 𑀤𑀽𑀭𑁂𑀲𑀼, 𑀯𑀺𑀯𑀺𑀢𑁆𑀢𑁂𑀲𑀼 𑀯𑀸. 𑀅𑀥𑀺𑀓𑀼𑀲𑀮𑁂𑀲𑀽𑀢𑀺 𑀲𑀫𑀣𑀯𑀺𑀧𑀲𑁆𑀲𑀦𑀸𑀥𑀫𑁆𑀫𑁂𑀲𑀼. 𑀅𑀭𑀢𑀺 𑀭𑀢𑀺𑀧𑀝𑀺𑀧𑀓𑁆𑀔𑁄. 𑀅𑀭𑀢𑀺𑀢𑀸𑀢𑀺 𑀅𑀭𑀫𑀡𑀸𑀓𑀸𑀭𑁄. 𑀅𑀦𑀪𑀺𑀭𑀢𑀻𑀢𑀺 𑀅𑀦𑀪𑀺𑀭𑀢𑀪𑀸𑀯𑁄. 𑀅𑀦𑀪𑀺𑀭𑀫𑀡𑀸𑀢𑀺 𑀅𑀦𑀪𑀺𑀭𑀫𑀡𑀸𑀓𑀸𑀭𑁄. 𑀉𑀓𑁆𑀓𑀡𑁆𑀞𑀺𑀢𑀸𑀢𑀺 𑀉𑀓𑁆𑀓𑀡𑁆𑀞𑀦𑀸𑀓𑀸𑀭𑁄. 𑀧𑀭𑀺𑀢𑀲𑁆𑀲𑀺𑀢𑀸𑀢𑀺 𑀉𑀓𑁆𑀓𑀡𑁆𑀞𑀦𑀯𑀲𑁂𑀦𑁂𑀯 𑀧𑀭𑀺𑀢𑀲𑁆𑀲𑀦𑀸.

𑀆𑀕𑀦𑁆𑀢𑀼𑀓𑀁, 𑀦 𑀲𑀪𑀸𑀯𑀲𑀺𑀤𑁆𑀥𑀁. 𑀓𑀸𑀬𑀸𑀮𑀲𑀺𑀬𑀦𑁆𑀢𑀺 𑀦𑀸𑀫𑀓𑀸𑀬𑁂 𑀅𑀮𑀲𑀪𑀸𑀯𑁄. 𑀲𑀫𑁆𑀫𑁄𑀳𑀯𑀺𑀦𑁄𑀤𑀦𑀺𑀬𑀁 𑀧𑀦 ‘‘𑀢𑀦𑁆𑀤𑀻𑀢𑀺 𑀚𑀸𑀢𑀺𑀆𑀮𑀲𑀺𑀬’’𑀦𑁆𑀢𑀺 𑀯𑀼𑀢𑁆𑀢𑀁. 𑀯𑀤𑀢𑀻𑀢𑀺 𑀏𑀢𑁂𑀦 𑀅𑀢𑀺𑀲𑀻𑀢𑀸𑀤𑀺𑀧𑀘𑁆𑀘𑀬𑀸 𑀲𑀗𑁆𑀓𑁄𑀘𑀸𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑀺. 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑀓𑀺𑀮𑁂𑀲𑀯𑀢𑁆𑀣𑀼𑀯𑀺𑀪𑀗𑁆𑀕𑁂 (𑀯𑀺𑀪. 𑀅𑀝𑁆𑀞. 𑁮𑁫𑁭). 𑀢𑀦𑁆𑀤𑀻𑀢𑀺 𑀚𑀸𑀢𑀺𑀆𑀮𑀲𑀺𑀬𑀁. 𑀢𑀦𑁆𑀤𑀺𑀬𑀦𑀸𑀢𑀺 𑀢𑀦𑁆𑀤𑀺𑀬𑀦𑀸𑀓𑀸𑀭𑁄. 𑀢𑀦𑁆𑀤𑀺𑀫𑀦𑀓𑀢𑀸𑀢𑀺 𑀢𑀦𑁆𑀤𑀺𑀬𑀸 𑀅𑀪𑀺𑀪𑀽𑀢𑀘𑀺𑀢𑁆𑀢𑀢𑀸. 𑀅𑀮𑀲𑀲𑁆𑀲 𑀪𑀸𑀯𑁄 𑀆𑀮𑀲𑁆𑀬𑀁. 𑀆𑀮𑀲𑁆𑀬𑀸𑀬𑀦𑀸𑀓𑀸𑀭𑁄 𑀆𑀮𑀲𑁆𑀬𑀸𑀬𑀦𑀸. 𑀆𑀮𑀲𑁆𑀬𑀸𑀬𑀺𑀢𑀲𑁆𑀲 𑀪𑀸𑀯𑁄 𑀆𑀮𑀲𑁆𑀬𑀸𑀬𑀺𑀢𑀢𑁆𑀢𑀁. 𑀇𑀢𑀺 𑀲𑀩𑁆𑀩𑁂𑀳𑀺𑀧𑀺 𑀇𑀫𑁂𑀳𑀺 𑀧𑀤𑁂𑀳𑀺 𑀓𑀺𑀮𑁂𑀲𑀯𑀲𑁂𑀦 𑀓𑀸𑀬𑀸𑀮𑀲𑀺𑀬𑀁 𑀓𑀣𑀺𑀢𑀁.

𑀓𑀺𑀮𑁂𑀲𑀯𑀲𑁂𑀦𑀸𑀢𑀺 𑀲𑀫𑁆𑀫𑁄𑀳𑀯𑀲𑁂𑀦. 𑀓𑀸𑀬𑀯𑀺𑀦𑀫𑀦𑀸𑀢𑀺 𑀓𑀸𑀬𑀲𑁆𑀲 𑀯𑀺𑀭𑀽𑀧𑀢𑁄 𑀦𑀫𑀦𑀸. 𑀚𑀫𑁆𑀪𑀦𑀸𑀢𑀺 𑀨𑀦𑁆𑀤𑀦𑀸. 𑀧𑀼𑀦𑀧𑁆𑀧𑀼𑀦𑀁 𑀚𑀫𑁆𑀪𑀦𑀸 𑀯𑀺𑀚𑀫𑁆𑀪𑀦𑀸. 𑀆𑀦𑀫𑀦𑀸𑀢𑀺 𑀧𑀼𑀭𑀢𑁄 𑀦𑀫𑀦𑀸. 𑀯𑀺𑀦𑀫𑀦𑀸𑀢𑀺 𑀧𑀘𑁆𑀙𑀢𑁄 𑀦𑀫𑀦𑀸. 𑀲𑀦𑁆𑀦𑀫𑀦𑀸𑀢𑀺 𑀲𑀫𑀦𑁆𑀢𑀢𑁄 𑀦𑀫𑀦𑀸. 𑀧𑀡𑀫𑀦𑀸𑀢𑀺 𑀬𑀣𑀸 𑀳𑀺 𑀢𑀦𑁆𑀢𑀢𑁄 𑀉𑀝𑁆𑀞𑀺𑀢𑀧𑁂𑀲𑀓𑀸𑀭𑁄 𑀓𑀺𑀜𑁆𑀘𑀺𑀤𑁂𑀯 𑀉𑀧𑀭𑀺𑀝𑁆𑀞𑀺𑀢𑀁 𑀕𑀳𑁂𑀢𑁆𑀯𑀸 𑀉𑀚𑀼𑀁 𑀓𑀸𑀬𑀁 𑀉𑀲𑁆𑀲𑀸𑀧𑁂𑀢𑀺, 𑀏𑀯𑀁 𑀓𑀸𑀬𑀲𑁆𑀲 𑀉𑀤𑁆𑀥𑀁 𑀞𑀧𑀦𑀸. 𑀩𑁆𑀬𑀸𑀥𑀺𑀬𑀓𑀦𑁆𑀢𑀺 𑀉𑀧𑁆𑀧𑀦𑁆𑀦𑀩𑁆𑀬𑀸𑀥𑀺𑀢𑀸. 𑀇𑀢𑀺 𑀲𑀩𑁆𑀩𑁂𑀳𑀺𑀧𑀺 𑀇𑀫𑁂𑀳𑀺 𑀧𑀤𑁂𑀳𑀺 𑀓𑀺𑀮𑁂𑀲𑀯𑀲𑁂𑀦 𑀓𑀸𑀬𑀨𑀦𑁆𑀤𑀦𑀫𑁂𑀯 𑀓𑀣𑀺𑀢𑀁 (𑀯𑀺𑀪. 𑀅𑀝𑁆𑀞. 𑁮𑁫𑁮).

𑀪𑀢𑁆𑀢𑀧𑀭𑀺𑀴𑀸𑀳𑁄𑀢𑀺 𑀪𑀢𑁆𑀢𑀯𑀲𑁂𑀦 𑀧𑀭𑀺𑀴𑀸𑀳𑀼𑀧𑁆𑀧𑀢𑁆𑀢𑀺. 𑀪𑀼𑀢𑁆𑀢𑀸𑀯𑀺𑀲𑁆𑀲𑀸𑀢𑀺 𑀪𑀼𑀢𑁆𑀢𑀯𑀢𑁄. 𑀪𑀢𑁆𑀢𑀫𑀼𑀘𑁆𑀙𑀸𑀢𑀺 𑀪𑀢𑁆𑀢𑀕𑁂𑀮𑀜𑁆𑀜𑀁. 𑀅𑀢𑀺𑀪𑀼𑀢𑁆𑀢𑀧𑀘𑁆𑀘𑀬𑀸 𑀳𑀺 𑀫𑀼𑀘𑁆𑀙𑀸𑀧𑀢𑁆𑀢𑁄 𑀯𑀺𑀬 𑀳𑁄𑀢𑀺. 𑀪𑀢𑁆𑀢𑀓𑀺𑀮𑀫𑀣𑁄𑀢𑀺 𑀪𑀼𑀢𑁆𑀢𑀧𑀘𑁆𑀘𑀬𑀸 𑀓𑀺𑀮𑀦𑁆𑀢𑀪𑀸𑀯𑁄. 𑀪𑀢𑁆𑀢𑀧𑀭𑀺𑀴𑀸𑀳𑁄𑀢𑀺 𑀪𑀢𑁆𑀢𑀤𑀭𑀣𑁄. 𑀓𑀼𑀘𑁆𑀙𑀺𑀧𑀽𑀭𑀁 𑀪𑀼𑀢𑁆𑀢𑀯𑀢𑁄 𑀳𑀺 𑀧𑀭𑀺𑀴𑀸𑀳𑀼𑀧𑁆𑀧𑀢𑁆𑀢𑀺𑀬𑀸 𑀉𑀧𑀳𑀢𑀺𑀦𑁆𑀤𑁆𑀭𑀺𑀬𑁄 𑀯𑀺𑀬 𑀳𑁄𑀢𑀺, 𑀓𑀸𑀬𑁄 𑀔𑀺𑀚𑁆𑀚𑀢𑀺. 𑀓𑀸𑀬𑀤𑀼𑀝𑁆𑀞𑀼𑀮𑁆𑀮𑀦𑁆𑀢𑀺 𑀪𑀼𑀢𑁆𑀢𑀪𑀢𑁆𑀢𑀁 𑀦𑀺𑀲𑁆𑀲𑀸𑀬 𑀓𑀸𑀬𑀲𑁆𑀲 𑀅𑀓𑀫𑁆𑀫𑀜𑁆𑀜𑀢𑀸.

𑀘𑀺𑀢𑁆𑀢𑀲𑁆𑀲 𑀮𑀻𑀬𑀦𑀸𑀓𑀸𑀭𑁄𑀢𑀺 𑀆𑀭𑀫𑁆𑀫𑀡𑁂 𑀘𑀺𑀢𑁆𑀢𑀲𑁆𑀲 𑀲𑀗𑁆𑀓𑁄𑀘𑀧𑁆𑀧𑀢𑁆𑀢𑀺. 𑀘𑀺𑀢𑁆𑀢𑀲𑁆𑀲 𑀅𑀓𑀮𑁆𑀬𑀢𑀸𑀢𑀺 𑀘𑀺𑀢𑁆𑀢𑀲𑁆𑀲 𑀕𑀺𑀮𑀸𑀦𑀪𑀸𑀯𑁄. 𑀕𑀺𑀮𑀸𑀦𑁄𑀢𑀺 𑀅𑀓𑀮𑁆𑀮𑀓𑁄 𑀯𑀼𑀘𑁆𑀘𑀢𑀺. 𑀢𑀣𑀸 𑀘𑀸𑀳 ‘‘𑀦𑀸𑀳𑀁, 𑀪𑀦𑁆𑀢𑁂, 𑀅𑀓𑀮𑁆𑀮𑀓𑁄’’𑀢𑀺. 𑀅𑀓𑀫𑁆𑀫𑀜𑁆𑀜𑀢𑀸𑀢𑀺 𑀘𑀺𑀢𑁆𑀢𑀕𑁂𑀮𑀜𑁆𑀜𑀲𑀗𑁆𑀔𑀸𑀢𑁄 𑀅𑀓𑀫𑁆𑀫𑀜𑁆𑀜𑀦𑀸𑀓𑀸𑀭𑁄. 𑀑𑀮𑀻𑀬𑀦𑀸𑀢𑀺 𑀑𑀮𑀻𑀬𑀦𑀸𑀓𑀸𑀭𑁄. 𑀇𑀭𑀺𑀬𑀸𑀧𑀣𑀺𑀓𑀫𑁆𑀧𑀺 𑀘𑀺𑀢𑁆𑀢𑀁 𑀬𑀲𑁆𑀲 𑀯𑀲𑁂𑀦 𑀇𑀭𑀺𑀬𑀸𑀧𑀣𑀁 𑀲𑀦𑁆𑀥𑀸𑀭𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀑𑀮𑀻𑀬𑀢𑀺, 𑀢𑀲𑁆𑀲 𑀢𑀁 𑀆𑀓𑀸𑀭𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀑𑀮𑀻𑀬𑀦𑀸’’𑀢𑀺. 𑀤𑀼𑀢𑀺𑀬𑀧𑀤𑀁 𑀉𑀧𑀲𑀕𑁆𑀕𑁂𑀦 𑀯𑀟𑁆𑀠𑀺𑀢𑀁. 𑀮𑀻𑀦𑀦𑁆𑀢𑀺 𑀅𑀯𑀺𑀧𑁆𑀨𑀸𑀭𑀺𑀓𑀢𑀸𑀬 𑀲𑀗𑁆𑀓𑁄𑀘𑀧𑁆𑀧𑀢𑁆𑀢𑀁. 𑀇𑀢𑀭𑁂 𑀤𑁆𑀯𑁂 𑀆𑀓𑀸𑀭𑀦𑀺𑀤𑁆𑀤𑁂𑀲𑀸. 𑀣𑀺𑀦𑀦𑁆𑀢𑀺 𑀅𑀯𑀺𑀧𑁆𑀨𑀸𑀭𑀺𑀓𑀢𑀸𑀬 𑀅𑀦𑀼𑀲𑁆𑀲𑀸𑀳𑀦𑀸 𑀅𑀲𑀗𑁆𑀕𑀳𑀦𑀲𑀗𑁆𑀕𑀳𑀦𑀁. 𑀣𑀺𑀬𑀦𑀸𑀓𑀸𑀭𑁄 𑀣𑀺𑀬𑀦𑀸. 𑀣𑀺𑀬𑀺𑀢𑀢𑁆𑀢𑀦𑁆𑀢𑀺 𑀣𑀺𑀬𑀺𑀢𑀲𑁆𑀲 𑀆𑀓𑀸𑀭𑁄, 𑀅𑀯𑀺𑀧𑁆𑀨𑀸𑀭𑀺𑀓𑀢𑀸𑀢𑀺 𑀅𑀢𑁆𑀣𑁄.

𑀘𑁂𑀢𑀲𑁄 𑀅𑀯𑀽𑀧𑀲𑀫𑁄𑀢𑀺 𑀘𑀺𑀢𑁆𑀢𑀲𑁆𑀲 𑀅𑀯𑀽𑀧𑀲𑀦𑁆𑀢𑀢𑀸 𑀅𑀲𑀦𑁆𑀦𑀺𑀲𑀺𑀦𑁆𑀦𑀪𑀸𑀯𑁄. 𑀢𑁂𑀦𑀸𑀳 𑁋 ‘‘𑀅𑀯𑀽𑀧𑀲𑀦𑁆𑀢𑀸𑀓𑀸𑀭𑁄’’𑀢𑀺. 𑀅𑀢𑁆𑀣𑀢𑁄 𑀧𑀦𑁂𑀢𑀦𑁆𑀢𑀺 𑀲𑁆𑀯𑀸𑀬𑀁 𑀅𑀯𑀽𑀧𑀲𑀦𑁆𑀢𑀸𑀓𑀸𑀭𑁄 𑀯𑀺𑀓𑁆𑀔𑁂𑀧𑀲𑀪𑀸𑀯𑀢𑁆𑀢𑀸 𑀯𑀺𑀓𑁆𑀔𑁂𑀧𑀳𑁂𑀢𑀼𑀢𑀸𑀬 𑀘 𑀅𑀢𑁆𑀣𑀢𑁄 𑀏𑀢𑀁 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀫𑁂𑀯.

𑀯𑀺𑀘𑀺𑀓𑀺𑀘𑁆𑀙𑀸𑀬 𑀆𑀭𑀫𑁆𑀫𑀡𑀥𑀫𑁆𑀫𑀸 𑀦𑀸𑀫 ‘‘𑀩𑀼𑀤𑁆𑀥𑁂 𑀓𑀗𑁆𑀔𑀢𑀻’’𑀢𑀺𑀆𑀤𑀺𑀦𑀸 𑀆𑀕𑀢𑀅𑀝𑁆𑀞𑀓𑀗𑁆𑀔𑀸𑀯𑀢𑁆𑀣𑀼𑀪𑀽𑀢𑀸 𑀥𑀫𑁆𑀫𑀸. 𑀬𑀲𑁆𑀫𑀸 𑀯𑀺𑀘𑀺𑀓𑀺𑀘𑁆𑀙𑀸 𑀩𑁆𑀬𑀸𑀧𑀸𑀤𑀸𑀤𑀬𑁄 𑀯𑀺𑀬 𑀅𑀦𑀼 𑀅𑀦𑀼 𑀉𑀕𑁆𑀕𑀳𑀡𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀓𑀗𑁆𑀔𑀸𑀝𑁆𑀞𑀸𑀦𑀻𑀬𑀁 𑀆𑀭𑀫𑁆𑀫𑀡𑀫𑁂𑀯 𑀤𑀲𑁆𑀲𑀺𑀢𑀁 ‘‘𑀯𑀺𑀘𑀺𑀓𑀺𑀘𑁆𑀙𑀸𑀬 𑀆𑀭𑀫𑁆𑀫𑀡𑀥𑀫𑁆𑀫𑀸’’𑀢𑀺. 𑀬𑀲𑁆𑀫𑀸 𑀧𑀼𑀭𑀺𑀫𑀼𑀧𑁆𑀧𑀦𑁆𑀦𑀸 𑀯𑀺𑀘𑀺𑀓𑀺𑀘𑁆𑀙𑀸 𑀧𑀘𑁆𑀙𑀸 𑀯𑀺𑀘𑀺𑀓𑀺𑀘𑁆𑀙𑀸𑀬 𑀧𑀘𑁆𑀘𑀬𑁄 𑀳𑁄𑀢𑀺, 𑀢𑀲𑁆𑀫𑀸 𑀯𑀺𑀘𑀺𑀓𑀺𑀘𑁆𑀙𑀸𑀧𑀺 𑀯𑀺𑀘𑀺𑀓𑀺𑀘𑁆𑀙𑀸𑀝𑁆𑀞𑀸𑀦𑀻𑀬𑀥𑀫𑁆𑀫𑀸 𑀯𑁂𑀤𑀺𑀢𑀩𑁆𑀩𑀸. 𑀢𑀢𑁆𑀭𑀸𑀬𑀁 𑀯𑀘𑀦𑀢𑁆𑀣𑁄 𑁋 𑀢𑀺𑀝𑁆𑀞𑀦𑁆𑀢𑀺 𑀧𑀯𑀢𑁆𑀢𑀦𑁆𑀢𑀺 𑀏𑀢𑁆𑀣𑀸𑀢𑀺 𑀞𑀸𑀦𑀻𑀬𑀸, 𑀯𑀺𑀘𑀺𑀓𑀺𑀘𑁆𑀙𑀸 𑀏𑀯 𑀞𑀸𑀦𑀻𑀬𑀸 𑀯𑀺𑀘𑀺𑀓𑀺𑀘𑁆𑀙𑀸𑀝𑁆𑀞𑀸𑀦𑀻𑀬𑀸. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀆𑀭𑀫𑁆𑀫𑀡𑀲𑁆𑀲𑀧𑀺 𑀢𑀢𑁆𑀣 𑀯𑀺𑀲𑁂𑀲𑀧𑀘𑁆𑀘𑀬𑀢𑀁 𑀉𑀧𑀸𑀤𑀸𑀬 ‘‘𑀓𑀸𑀫𑀘𑁆𑀙𑀦𑁆𑀤𑁄 𑀯𑀺𑀘𑀺𑀓𑀺𑀘𑁆𑀙𑀸𑀢𑀺 𑀇𑀫𑁂 𑀤𑁆𑀯𑁂 𑀥𑀫𑁆𑀫𑀸 𑀆𑀭𑀫𑁆𑀫𑀡𑁂𑀦 𑀓𑀣𑀺𑀢𑀸’’𑀢𑀺 𑀯𑀼𑀢𑁆𑀢𑀁. 𑀲𑀼𑀪𑀦𑀺𑀫𑀺𑀢𑁆𑀢𑀲𑁆𑀲 𑀳𑀺 𑀧𑀘𑁆𑀘𑀬𑀪𑀸𑀯𑀫𑀢𑁆𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁, 𑀢𑀣𑀸𑀧𑀺 𑀬𑀣𑀸 ‘‘𑀧𑀝𑀺𑀖𑀫𑁆𑀧𑀺 𑀧𑀝𑀺𑀖𑀦𑀺𑀫𑀺𑀢𑁆𑀢’’𑀦𑁆𑀢𑀺 𑀓𑀢𑁆𑀯𑀸 ‘‘𑀩𑁆𑀬𑀸𑀧𑀸𑀤𑁄 𑀉𑀧𑀦𑀺𑀲𑁆𑀲𑀬𑁂𑀦 𑀓𑀣𑀺𑀢𑁄’’𑀢𑀺 𑀯𑀼𑀢𑁆𑀢𑀁, 𑀏𑀯𑀁 𑀲𑀼𑀪𑀫𑁆𑀧𑀺 𑀲𑀼𑀪𑀦𑀺𑀫𑀺𑀢𑁆𑀢𑀦𑁆𑀢𑀺 𑀓𑀢𑁆𑀯𑀸 𑀓𑀸𑀫𑀘𑁆𑀙𑀦𑁆𑀤𑁄 𑀉𑀧𑀦𑀺𑀲𑁆𑀲𑀬𑁂𑀦 𑀓𑀣𑀺𑀢𑁄𑀢𑀺 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀁. 𑀲𑁂𑀲𑀸 𑀣𑀺𑀦𑀫𑀺𑀤𑁆𑀥𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀸𑀦𑀺. 𑀢𑀢𑁆𑀣 𑀣𑀺𑀦𑀫𑀺𑀤𑁆𑀥𑀁 𑀅𑀜𑁆𑀜𑀫𑀜𑁆𑀜𑀁 𑀲𑀳𑀚𑀸𑀢𑀸𑀤𑀺𑀯𑀲𑁂𑀦 𑀧𑀘𑁆𑀘𑀬𑁄, 𑀢𑀣𑀸 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀦𑁆𑀢𑀺. 𑀉𑀪𑀬𑁂𑀲𑀫𑁆𑀧𑀺 𑀉𑀧𑀦𑀺𑀲𑁆𑀲𑀬𑀓𑁄𑀝𑀺𑀬𑀸 𑀧𑀘𑁆𑀘𑀬𑀪𑀸𑀯𑁂 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀻𑀢𑀺 𑀆𑀳 ‘‘𑀲𑀳𑀚𑀸𑀢𑁂𑀦 𑀘 𑀉𑀧𑀦𑀺𑀲𑁆𑀲𑀬𑁂𑀦 𑀘𑀸’’𑀢𑀺.

𑀬𑀲𑁆𑀫𑀸 𑀲𑀢𑀺 𑀦𑀸𑀫 ‘‘𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸’’𑀢𑀺𑀆𑀤𑀺𑀦𑀸 𑀢𑁂𑀲𑀁 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀅𑀦𑀼𑀲𑁆𑀲𑀭𑀡𑀯𑀲𑁂𑀦 𑀯𑀢𑁆𑀢𑀢𑀺, 𑀢𑀲𑁆𑀫𑀸 𑀢𑁂 𑀥𑀫𑁆𑀫𑀸 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀝𑁆𑀞𑀸𑀦𑀻𑀬𑀸 𑀦𑀸𑀫. 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁂 𑀘 𑀅𑀦𑀼𑀲𑁆𑀲𑀯𑀸𑀤𑀺𑀯𑀲𑁂𑀦 𑀕𑀳𑁂𑀢𑁆𑀯𑀸 𑀢𑀣𑀸 𑀧𑀯𑀢𑁆𑀢𑀢𑁂𑀯. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀢𑀺𑀬𑀸’’𑀢𑀺𑀆𑀤𑀺.

𑀓𑁄𑀲𑀮𑁆𑀮𑀁 𑀯𑀼𑀘𑁆𑀘𑀢𑀺 𑀧𑀜𑁆𑀜𑀸, 𑀢𑀢𑁄 𑀉𑀧𑁆𑀧𑀦𑁆𑀦𑀸 𑀓𑁄𑀲𑀮𑁆𑀮𑀲𑀫𑁆𑀪𑀽𑀢𑀸. 𑀅𑀦𑀯𑀚𑁆𑀚𑀲𑀼𑀔𑀯𑀺𑀧𑀸𑀓𑀸𑀢𑀺 𑀅𑀦𑀯𑀚𑁆𑀚𑀸 𑀳𑀼𑀢𑁆𑀯𑀸 𑀲𑀼𑀔𑀯𑀺𑀧𑀸𑀓𑀸 𑀯𑀺𑀧𑀘𑁆𑀘𑀦𑀓𑀸. 𑀧𑀤𑀤𑁆𑀯𑀬𑁂𑀦 𑀧𑀘𑁆𑀘𑀬𑀢𑁄 𑀲𑀪𑀸𑀯𑀢𑁄 𑀓𑀺𑀘𑁆𑀘𑀢𑁄 𑀨𑀮𑀢𑁄 𑀓𑀼𑀲𑀮𑀥𑀫𑁆𑀫𑀁 𑀤𑀲𑁆𑀲𑁂𑀢𑀺. 𑀅𑀓𑀼𑀲𑀮𑀦𑀺𑀤𑁆𑀤𑁂𑀲𑁂𑀧𑀺 𑀏𑀲𑁂𑀯 𑀦𑀬𑁄. 𑀲𑀸𑀯𑀚𑁆𑀚𑀸𑀢𑀺 𑀕𑀸𑀭𑀬𑁆𑀳𑀸. 𑀅𑀦𑀯𑀚𑁆𑀚𑀸𑀢𑀺 𑀅𑀕𑀸𑀭𑀬𑁆𑀳𑀸. 𑀳𑀻𑀦𑀸 𑀮𑀸𑀫𑀓𑀸. 𑀧𑀡𑀻𑀢𑀸 𑀲𑁂𑀝𑁆𑀞𑀸. 𑀓𑀡𑁆𑀳𑀸 𑀓𑀸𑀴𑀓𑀸 𑀅𑀲𑀼𑀤𑁆𑀥𑀸. 𑀲𑀼𑀓𑁆𑀓𑀸 𑀑𑀤𑀸𑀢𑀸 𑀲𑀼𑀤𑁆𑀥𑀸. 𑀧𑀝𑀺𑀪𑀸𑀕-𑀲𑀤𑁆𑀤𑁄 𑀧𑀞𑀫𑁂 𑀯𑀺𑀓𑀧𑁆𑀧𑁂 𑀲𑀤𑀺𑀲𑀓𑁄𑀝𑁆𑀞𑀸𑀲𑀢𑁆𑀣𑁄, 𑀤𑀼𑀢𑀺𑀬𑁂 𑀧𑀝𑀺𑀧𑀓𑁆𑀔𑀓𑁄𑀝𑁆𑀞𑀸𑀲𑀢𑁆𑀣𑁄, 𑀢𑀢𑀺𑀬𑁂 𑀦𑀺𑀕𑁆𑀕𑀳𑁂𑀢𑀩𑁆𑀩𑀧𑀝𑀺𑀧𑀓𑁆𑀔𑀓𑁄𑀝𑁆𑀞𑀸𑀲𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀓𑀼𑀲𑀮𑀓𑀺𑀭𑀺𑀬𑀸𑀬 𑀆𑀤𑀺𑀓𑀫𑁆𑀫𑀪𑀸𑀯𑁂𑀦 𑀧𑀯𑀢𑁆𑀢𑀯𑀻𑀭𑀺𑀬𑀁 𑀥𑀺𑀢𑀺𑀲𑀪𑀸𑀯𑀢𑀸𑀬 𑀥𑀸𑀢𑀽𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀆𑀭𑀫𑁆𑀪𑀥𑀸𑀢𑀽𑀢𑀺 𑀧𑀞𑀫𑀸𑀭𑀫𑁆𑀪𑀯𑀻𑀭𑀺𑀬’’𑀦𑁆𑀢𑀺. 𑀮𑀤𑁆𑀥𑀸𑀲𑁂𑀯𑀦𑀁 𑀯𑀻𑀭𑀺𑀬𑀁 𑀩𑀮𑀧𑁆𑀧𑀢𑁆𑀢𑀁 𑀳𑀼𑀢𑁆𑀯𑀸 𑀧𑀝𑀺𑀧𑀓𑁆𑀔𑀁 𑀯𑀺𑀥𑀫𑀢𑀻𑀢𑀺 𑀆𑀳 𑁋 ‘‘𑀦𑀺𑀓𑁆𑀓𑀫𑀥𑀸𑀢𑀽𑀢𑀺 𑀓𑁄𑀲𑀚𑁆𑀚𑀢𑁄 𑀦𑀺𑀓𑁆𑀔𑀦𑁆𑀢𑀢𑁆𑀢𑀸 𑀢𑀢𑁄 𑀩𑀮𑀯𑀢𑀭’’𑀦𑁆𑀢𑀺. 𑀅𑀥𑀺𑀫𑀢𑁆𑀢𑀸𑀥𑀺𑀫𑀢𑁆𑀢𑀢𑀭𑀸𑀦𑀁 𑀧𑀝𑀺𑀧𑀓𑁆𑀔𑀥𑀫𑁆𑀫𑀸𑀦𑀁 𑀯𑀺𑀥𑀫𑀦𑀲𑀫𑀢𑁆𑀣𑀁 𑀧𑀝𑀼𑀧𑀝𑀼𑀢𑀭𑀸𑀤𑀺𑀪𑀸𑀯𑀧𑁆𑀧𑀢𑁆𑀢𑀁 𑀳𑁄𑀢𑀻𑀢𑀺 𑀆𑀳 𑁋 ‘‘𑀧𑀭𑀓𑁆𑀓𑀫𑀥𑀸𑀢𑀽𑀢𑀺 𑀧𑀭𑀁 𑀧𑀭𑀁 𑀞𑀸𑀦𑀁 𑀅𑀓𑁆𑀓𑀫𑀦𑀢𑀸𑀬 𑀢𑀢𑁄𑀧𑀺 𑀩𑀮𑀯𑀢𑀭’’𑀦𑁆𑀢𑀺.

𑀢𑀺𑀝𑁆𑀞𑀢𑀺 𑀧𑀯𑀢𑁆𑀢𑀢𑀺 𑀏𑀢𑁆𑀣𑀸𑀢𑀺 𑀞𑀸𑀦𑀻𑀬𑀸. 𑀆𑀭𑀫𑁆𑀫𑀡𑀥𑀫𑁆𑀫𑀸, 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀞𑀸𑀦𑀻𑀬𑀸𑀢𑀺 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀝𑁆𑀞𑀸𑀦𑀻𑀬𑀸𑀢𑀺 ‘‘𑀧𑀻𑀢𑀺𑀬𑀸 𑀆𑀭𑀫𑁆𑀫𑀡𑀥𑀫𑁆𑀫𑀸’’𑀢𑀺 𑀯𑀼𑀢𑁆𑀢𑀁. 𑀬𑀲𑁆𑀫𑀸 𑀅𑀧𑀭𑀸𑀧𑀭𑀼𑀧𑁆𑀧𑀢𑁆𑀢𑀺𑀬𑀸 𑀧𑀻𑀢𑀺𑀧𑀺 𑀢𑀣𑀸 𑀯𑀢𑁆𑀢𑀩𑁆𑀩𑀢𑀁 𑀮𑀪𑀢𑀻𑀢𑀺 𑀯𑀼𑀢𑁆𑀢𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 ‘‘𑀧𑀻𑀢𑀺𑀬𑀸 𑀏𑀯 𑀢𑀁 𑀦𑀸𑀫’’𑀦𑁆𑀢𑀺. 𑀤𑀭𑀣𑀧𑀲𑁆𑀲𑀤𑁆𑀥𑀻𑀢𑀺 𑀤𑀭𑀣𑁄 𑀓𑀺𑀮𑁂𑀲𑀧𑀭𑀺𑀴𑀸𑀳𑁄, 𑀲𑁄 𑀧𑀲𑁆𑀲𑀫𑁆𑀪𑀢𑀺 𑀏𑀢𑀸𑀬𑀸𑀢𑀺 𑀤𑀭𑀣𑀧𑀲𑁆𑀲𑀤𑁆𑀥𑀺, 𑀓𑀸𑀬𑀧𑀲𑁆𑀲𑀤𑁆𑀥𑀺𑀬𑀸 𑀯𑁂𑀤𑀦𑀸𑀤𑀺𑀔𑀦𑁆𑀥𑀢𑁆𑀢𑀬𑀲𑁆𑀲 𑀯𑀺𑀬 𑀭𑀽𑀧𑀓𑀸𑀬𑀲𑁆𑀲𑀧𑀺 𑀧𑀲𑁆𑀲𑀫𑁆𑀪𑀦𑀁 𑀳𑁄𑀢𑀺, 𑀘𑀺𑀢𑁆𑀢𑀧𑀲𑁆𑀲𑀤𑁆𑀥𑀺𑀬𑀸 𑀘𑀺𑀢𑁆𑀢𑀲𑁆𑀲𑁂𑀯 𑀧𑀲𑁆𑀲𑀫𑁆𑀪𑀦𑀁, 𑀢𑀢𑁄 𑀏𑀯𑁂𑀢𑁆𑀣 𑀪𑀕𑀯𑀢𑀸 𑀮𑀳𑀼𑀢𑀸𑀤𑀻𑀦𑀁 𑀯𑀺𑀬 𑀤𑀼𑀯𑀺𑀥𑀢𑀸 𑀯𑀼𑀢𑁆𑀢𑀸. 𑀢𑀣𑀸 𑀲𑀫𑀸𑀳𑀺𑀢𑀸𑀓𑀸𑀭𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀕𑀬𑁆𑀳𑀫𑀸𑀦𑁄 𑀲𑀫𑀣𑁄𑀯 𑀲𑀫𑀣𑀦𑀺𑀫𑀺𑀢𑁆𑀢𑀁, 𑀢𑀲𑁆𑀲 𑀆𑀭𑀫𑁆𑀫𑀡𑀪𑀽𑀢𑀁 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀫𑁆𑀧𑀺. 𑀯𑀺𑀯𑀺𑀥𑀁 𑀅𑀕𑁆𑀕𑀁 𑀏𑀢𑀲𑁆𑀲𑀸𑀢𑀺 𑀩𑁆𑀬𑀕𑁆𑀕𑁄, 𑀯𑀺𑀓𑁆𑀔𑁂𑀧𑁄. 𑀢𑀣𑀸 𑀳𑀺 𑀲𑁄 𑀅𑀦𑀯𑀝𑁆𑀞𑀸𑀦𑀭𑀲𑁄 𑀪𑀦𑁆𑀢𑀢𑀸𑀧𑀘𑁆𑀘𑀼𑀧𑀝𑁆𑀞𑀸𑀦𑁄 𑀯𑀼𑀢𑁆𑀢𑁄. 𑀏𑀓𑀕𑁆𑀕𑀪𑀸𑀯𑀢𑁄 𑀩𑁆𑀬𑀕𑁆𑀕𑀧𑀝𑀺𑀧𑀓𑁆𑀔𑁄𑀢𑀺 𑀅𑀩𑁆𑀬𑀕𑁆𑀕𑁄, 𑀲𑀫𑀸𑀥𑀺, 𑀲𑁄 𑀏𑀯 𑀦𑀺𑀫𑀺𑀢𑁆𑀢𑀦𑁆𑀢𑀺 𑀧𑀼𑀩𑁆𑀩𑁂 𑀯𑀺𑀬 𑀯𑀢𑁆𑀢𑀩𑁆𑀩𑀁. 𑀢𑁂𑀦𑀸𑀳 ‘‘𑀢𑀲𑁆𑀲𑁂𑀯 𑀯𑁂𑀯𑀘𑀦’’𑀦𑁆𑀢𑀺.

𑀬𑁄 𑀆𑀭𑀫𑁆𑀫𑀡𑁂 𑀇𑀝𑁆𑀞𑀸𑀦𑀺𑀝𑁆𑀞𑀸𑀓𑀸𑀭𑀁 𑀅𑀦𑀸𑀤𑀺𑀬𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑁄 𑀫𑀚𑁆𑀛𑀢𑁆𑀢𑀸𑀓𑀸𑀭𑁄, 𑀬𑁄 𑀘 𑀧𑀼𑀩𑁆𑀩𑁂 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀯𑀲𑁂𑀦 𑀉𑀧𑁆𑀧𑀦𑁆𑀦𑁄 𑀫𑀚𑁆𑀛𑀢𑁆𑀢𑀸𑀓𑀸𑀭𑁄, 𑀤𑀼𑀯𑀺𑀥𑁄𑀧𑀺 𑀲𑁄 𑀉𑀧𑁂𑀓𑁆𑀔𑀸𑀬 𑀆𑀭𑀫𑁆𑀫𑀡𑀥𑀫𑁆𑀫𑁄𑀢𑀺 𑀅𑀥𑀺𑀧𑁆𑀧𑁂𑀢𑁄𑀢𑀺 𑀆𑀳 𑁋 ‘‘𑀅𑀢𑁆𑀣𑀢𑁄 𑀧𑀦 𑀫𑀚𑁆𑀛𑀢𑁆𑀢𑀸𑀓𑀸𑀭𑁄 𑀉𑀧𑁂𑀓𑁆𑀔𑀸𑀝𑁆𑀞𑀸𑀦𑀻𑀬𑀸 𑀥𑀫𑁆𑀫𑀸𑀢𑀺 𑀯𑁂𑀤𑀺𑀢𑀩𑁆𑀩𑁄’’𑀢𑀺. 𑀆𑀭𑀫𑁆𑀫𑀡𑁂𑀦 𑀓𑀣𑀺𑀢𑀸 𑀆𑀭𑀫𑁆𑀫𑀡𑀲𑁆𑀲𑁂𑀯 𑀢𑁂𑀲𑀁 𑀯𑀺𑀲𑁂𑀲𑀧𑀘𑁆𑀘𑀬𑀪𑀸𑀯𑀢𑁄. 𑀲𑁂𑀲𑀸𑀢𑀺 𑀯𑀻𑀭𑀺𑀬𑀸𑀤𑀬𑁄 𑀘𑀢𑁆𑀢𑀸𑀭𑁄 𑀥𑀫𑁆𑀫𑀸. 𑀢𑁂𑀲𑀜𑁆𑀳𑀺 𑀉𑀧𑀦𑀺𑀲𑁆𑀲𑀬𑁄𑀯 𑀲𑀸𑀢𑀺𑀲𑀬𑁄 𑀇𑀘𑁆𑀙𑀺𑀢𑀩𑁆𑀩𑁄𑀢𑀺.

𑀓𑀸𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀲𑀻𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁮𑁪. 𑀔𑀻𑀡𑀸𑀲𑀯𑀲𑁆𑀲 𑀮𑁄𑀓𑀼𑀢𑁆𑀢𑀭𑀁 𑀲𑀻𑀮𑀁 𑀦𑀸𑀫 𑀫𑀕𑁆𑀕𑀨𑀮𑀧𑀭𑀺𑀬𑀸𑀧𑀦𑁆𑀦𑀸 𑀲𑀫𑁆𑀫𑀸𑀯𑀸𑀘𑀸𑀓𑀫𑁆𑀫𑀦𑁆𑀢𑀸𑀚𑀻𑀯𑀸 𑀲𑀻𑀮𑀮𑀓𑁆𑀔𑀡𑀧𑁆𑀧𑀢𑁆𑀢𑀸 𑀢𑀤𑀜𑁆𑀜𑁂 𑀘𑁂𑀢𑀦𑀸𑀤𑀬𑁄. 𑀮𑁄𑀓𑀺𑀬𑀁 𑀧𑀦 𑀓𑀺𑀭𑀺𑀬𑀸𑀩𑁆𑀬𑀸𑀓𑀢𑀘𑀺𑀢𑁆𑀢𑀧𑀭𑀺𑀬𑀸𑀧𑀦𑁆𑀦𑀁 𑀘𑀸𑀭𑀺𑀢𑁆𑀢𑀲𑀻𑀮𑀁, 𑀯𑀸𑀭𑀺𑀢𑁆𑀢𑀲𑀻𑀮𑀲𑁆𑀲 𑀧𑀦 𑀲𑀫𑁆𑀪𑀯𑁄 𑀏𑀯 𑀦𑀢𑁆𑀣𑀺 𑀯𑀺𑀭𑀫𑀡𑀯𑀲𑁂𑀦 𑀧𑀯𑀢𑁆𑀢𑀺𑀬𑀸 𑀅𑀪𑀸𑀯𑀢𑁄. ‘‘𑀧𑀼𑀩𑁆𑀩𑀪𑀸𑀕𑀲𑀻𑀮𑀁 𑀮𑁄𑀓𑀺𑀬𑀲𑀻𑀮’’𑀦𑁆𑀢𑀺 𑀓𑁂𑀘𑀺.

𑀘𑀓𑁆𑀔𑀼𑀤𑀲𑁆𑀲𑀦𑀦𑁆𑀢𑀺 𑀘𑀓𑁆𑀔𑀽𑀳𑀺 𑀤𑀲𑁆𑀲𑀦𑀁. 𑀮𑀓𑁆𑀔𑀡𑀲𑁆𑀲 𑀤𑀲𑁆𑀲𑀦𑀦𑁆𑀢𑀺 𑀲𑀪𑀸𑀯𑀥𑀫𑁆𑀫𑀸𑀦𑀁 𑀲𑀗𑁆𑀔𑀢𑀸𑀦𑀁 𑀧𑀘𑁆𑀘𑀢𑁆𑀢𑀮𑀓𑁆𑀔𑀡𑀲𑁆𑀲 𑀜𑀸𑀢𑀧𑀭𑀺𑀜𑁆𑀜𑀸𑀬, 𑀅𑀦𑀺𑀘𑁆𑀘𑀸𑀤𑀺𑀲𑀸𑀫𑀜𑁆𑀜𑀮𑀓𑁆𑀔𑀡𑀲𑁆𑀲 𑀢𑀻𑀭𑀡𑀧𑀭𑀺𑀜𑁆𑀜𑀸𑀬 𑀤𑀲𑁆𑀲𑀦𑀁. 𑀧𑀚𑀳𑀦𑁆𑀢𑁄𑀧𑀺 𑀳𑀺 𑀢𑁂 𑀧𑀳𑀸𑀢𑀩𑁆𑀩𑀸𑀓𑀸𑀭𑀢𑁄 𑀧𑀲𑁆𑀲𑀢𑀺 𑀦𑀸𑀫. 𑀦𑀺𑀩𑁆𑀩𑀸𑀦𑀲𑁆𑀲 𑀢𑀣𑀮𑀓𑁆𑀔𑀡𑀁 𑀫𑀕𑁆𑀕𑀨𑀮𑁂𑀳𑀺 𑀤𑀲𑁆𑀲𑀦𑀁, 𑀢𑀁 𑀧𑀦 𑀧𑀝𑀺𑀯𑀺𑀚𑁆𑀛𑀦𑀁. 𑀛𑀸𑀦𑁂𑀦 𑀧𑀣𑀯𑀻𑀓𑀲𑀺𑀡𑀸𑀤𑀻𑀦𑀁, 𑀅𑀪𑀺𑀜𑁆𑀜𑀸𑀳𑀺 𑀭𑀽𑀧𑀸𑀦𑀁 𑀤𑀲𑁆𑀲𑀦𑀫𑁆𑀧𑀺 𑀜𑀸𑀡𑀤𑀲𑁆𑀲𑀦𑀫𑁂𑀯. 𑀘𑀓𑁆𑀔𑀼𑀤𑀲𑁆𑀲𑀦𑀁 𑀅𑀥𑀺𑀧𑁆𑀧𑁂𑀢𑀁 𑀲𑀯𑀦𑀧𑀬𑀺𑀭𑀼𑀧𑀸𑀲𑀦𑀸𑀦𑀁 𑀧𑀭𑀢𑁄 𑀕𑀳𑀺𑀢𑀢𑁆𑀢𑀸. 𑀧𑀜𑁆𑀳𑀧𑀬𑀺𑀭𑀼𑀧𑀸𑀲𑀦𑀦𑁆𑀢𑀺 𑀧𑀜𑁆𑀳𑀧𑀼𑀘𑁆𑀙𑀦𑀯𑀲𑁂𑀦 𑀧𑀬𑀺𑀭𑀼𑀧𑀸𑀲𑀦𑀁 𑀅𑀜𑁆𑀜𑀓𑀫𑁆𑀫𑀢𑁆𑀣𑀸𑀬 𑀉𑀧𑀲𑀗𑁆𑀓𑀫𑀦𑀲𑁆𑀲 𑀓𑁂𑀯𑀮𑀁 𑀉𑀧𑀲𑀗𑁆𑀓𑀫𑀦𑁂𑀦𑁂𑀯 𑀚𑁄𑀢𑀺𑀢𑀢𑁆𑀢𑀸.

𑀅𑀭𑀺𑀬𑀸𑀦𑀁 𑀅𑀦𑀼𑀲𑁆𑀲𑀢𑀺 𑀦𑀸𑀫 𑀕𑀼𑀡𑀯𑀲𑁂𑀦, 𑀢𑀢𑁆𑀣𑀸𑀧𑀺 𑀮𑀤𑁆𑀥𑀑𑀯𑀸𑀤𑀸𑀯𑀚𑁆𑀚𑀦𑀫𑀼𑀔𑁂𑀦 𑀬𑀣𑀸𑀪𑀽𑀢𑀲𑀻𑀮𑀸𑀤𑀺𑀕𑀼𑀡𑀸𑀦𑀼𑀲𑁆𑀲𑀭𑀡𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀛𑀸𑀦𑀯𑀺𑀧𑀲𑁆𑀲𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀜𑁆𑀜𑁂𑀲𑀁𑀬𑁂𑀯 𑀲𑀦𑁆𑀢𑀺𑀓𑁂𑀢𑀺 𑀅𑀭𑀺𑀬𑁂𑀳𑀺 𑀅𑀜𑁆𑀜𑁂𑀲𑀁 𑀲𑀸𑀲𑀦𑀺𑀓𑀸𑀦𑀁𑀬𑁂𑀯 𑀲𑀦𑁆𑀢𑀺𑀓𑁂. 𑀢𑁂𑀦𑀸𑀳 𑁋 ‘‘𑀅𑀦𑀼𑀧𑀩𑁆𑀩𑀚𑁆𑀚𑀸 𑀦𑀸𑀫𑀸’’𑀢𑀺. 𑀅𑀜𑁆𑀜𑁂𑀲𑀽𑀢𑀺 𑀲𑀸𑀲𑀦𑀺𑀓𑁂𑀳𑀺 𑀅𑀜𑁆𑀜𑁂𑀲𑀼 𑀢𑀸𑀧𑀲𑀧𑀭𑀺𑀩𑁆𑀩𑀸𑀚𑀓𑀸𑀤𑀻𑀲𑀼. 𑀢𑀢𑁆𑀣 𑀳𑀺 𑀧𑀩𑁆𑀩𑀚𑁆𑀚𑀸 𑀅𑀭𑀺𑀬𑀸𑀦𑀁 𑀅𑀦𑀼𑀧𑀩𑁆𑀩𑀚𑁆𑀚𑀸 𑀦𑀸𑀫 𑀦 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁.

𑀲𑀢𑀲𑀳𑀲𑁆𑀲𑀫𑀢𑁆𑀢𑀸 𑀅𑀳𑁂𑀲𑀼𑀁 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀢𑁆𑀢𑀸 𑀫𑀳𑀸𑀣𑁂𑀭𑀲𑁆𑀲. 𑀮𑀗𑁆𑀓𑀸𑀤𑀻𑀧𑁂𑀢𑀺 𑀦𑀺𑀲𑁆𑀲𑀬𑀲𑀻𑀲𑁂𑀦 𑀦𑀺𑀲𑁆𑀲𑀺𑀢𑀲𑀮𑁆𑀮𑀓𑁆𑀔𑀡𑀁. 𑀦 𑀳𑀺 𑀧𑀩𑁆𑀩𑀚𑁆𑀚𑀸 𑀤𑀻𑀧𑀧𑀝𑀺𑀮𑀤𑁆𑀥𑀸, 𑀅𑀣 𑀔𑁄 𑀤𑀻𑀧𑀦𑀺𑀯𑀸𑀲𑀺𑀆𑀘𑀭𑀺𑀬𑀧𑀝𑀺𑀮𑀤𑁆𑀥𑀸. 𑀫𑀳𑀺𑀦𑁆𑀤…𑀧𑁂… 𑀧𑀩𑁆𑀩𑀚𑀦𑁆𑀢𑀺 𑀦𑀸𑀫 𑀢𑀲𑁆𑀲 𑀧𑀭𑀺𑀯𑀸𑀭𑀢𑀸𑀬 𑀧𑀩𑁆𑀩𑀚𑁆𑀚𑀸𑀬𑀸𑀢𑀺.

𑀲𑀭𑀢𑀻𑀢𑀺 𑀢𑀁 𑀑𑀯𑀸𑀤𑀸𑀦𑀼𑀲𑀸𑀲𑀦𑀺𑀥𑀫𑁆𑀫𑀁 𑀘𑀺𑀦𑁆𑀢𑁂𑀢𑀺 𑀘𑀺𑀢𑁆𑀢𑁂 𑀓𑀭𑁄𑀢𑀺. 𑀯𑀺𑀢𑀓𑁆𑀓𑀸𑀳𑀢𑀁 𑀓𑀭𑁄𑀢𑀻𑀢𑀺 𑀧𑀼𑀦𑀧𑁆𑀧𑀼𑀦𑀁 𑀧𑀭𑀺𑀯𑀺𑀢𑀓𑁆𑀓𑀦𑁂𑀦 𑀢𑀤𑀢𑁆𑀣𑀁 𑀯𑀺𑀢𑀓𑁆𑀓𑀦𑀺𑀧𑁆𑀨𑀸𑀤𑀺𑀢𑀁 𑀓𑀭𑁄𑀢𑀺. 𑀆𑀭𑀤𑁆𑀥𑁄 𑀳𑁄𑀢𑀻𑀢𑀺 𑀲𑀫𑁆𑀧𑀸𑀤𑀺𑀢𑁄 𑀳𑁄𑀢𑀺. 𑀢𑀁 𑀧𑀦 𑀲𑀫𑁆𑀧𑀸𑀤𑀦𑀁 𑀧𑀸𑀭𑀺𑀧𑀽𑀭𑀺 𑀏𑀯𑀸𑀢𑀺 𑀆𑀳 ‘‘𑀧𑀭𑀺𑀧𑀼𑀡𑁆𑀡𑁄 𑀳𑁄𑀢𑀻’’𑀢𑀺. 𑀢𑀢𑁆𑀣𑀸𑀢𑀺 𑀬𑀣𑀸𑀯𑀼𑀢𑁆𑀢𑁂 𑀥𑀫𑁆𑀫𑁂. 𑀜𑀸𑀡𑀘𑀸𑀭𑀯𑀲𑁂𑀦𑀸𑀢𑀺 𑀜𑀸𑀡𑀲𑁆𑀲 𑀧𑀯𑀢𑁆𑀢𑀦𑀯𑀲𑁂𑀦. 𑀢𑁂𑀲𑀁 𑀢𑁂𑀲𑀁 𑀥𑀫𑁆𑀫𑀸𑀦𑀦𑁆𑀢𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀑𑀯𑀸𑀤𑀥𑀫𑁆𑀫𑁂 𑀆𑀕𑀢𑀸𑀦𑀁 𑀭𑀽𑀧𑀸𑀭𑀽𑀧𑀥𑀫𑁆𑀫𑀸𑀦𑀁. 𑀮𑀓𑁆𑀔𑀡𑀦𑁆𑀢𑀺 𑀯𑀺𑀲𑁂𑀲𑀮𑀓𑁆𑀔𑀡𑀁 𑀲𑀸𑀫𑀜𑁆𑀜𑀮𑀓𑁆𑀔𑀡𑀜𑁆𑀘. 𑀧𑀯𑀺𑀘𑀺𑀦𑀢𑀻𑀢𑀺 ‘‘𑀇𑀤𑀁 𑀭𑀽𑀧𑀁 𑀏𑀢𑁆𑀢𑀓𑀁 𑀭𑀽𑀧’’𑀦𑁆𑀢𑀺𑀆𑀤𑀺𑀦𑀸 𑀯𑀺𑀘𑀬𑀁 𑀆𑀧𑀚𑁆𑀚𑀢𑀺. 𑀜𑀸𑀡𑀜𑁆𑀘 𑀭𑁄𑀧𑁂𑀢𑀻𑀢𑀺 ‘‘𑀅𑀦𑀺𑀘𑁆𑀘𑀁 𑀘𑀮𑀁 𑀧𑀮𑁄𑀓𑀁 𑀧𑀪𑀗𑁆𑀕𑀽’’𑀢𑀺𑀆𑀤𑀺𑀦𑀸 𑀜𑀸𑀡𑀁 𑀧𑀯𑀢𑁆𑀢𑁂𑀢𑀺. 𑀯𑀻𑀫𑀁𑀲𑀦𑀁…𑀧𑁂… 𑀆𑀧𑀚𑁆𑀚𑀢𑀻𑀢𑀺 𑀭𑀽𑀧𑀲𑀢𑁆𑀢𑀓𑀸𑀭𑀽𑀧𑀲𑀢𑁆𑀢𑀓𑀓𑁆𑀓𑀫𑁂𑀦 𑀯𑀺𑀧𑀲𑁆𑀲𑀦𑀁 𑀧𑀘𑁆𑀘𑀓𑁆𑀔𑀢𑁄 𑀯𑀺𑀬 𑀅𑀦𑀺𑀘𑁆𑀘𑀢𑀸𑀤𑀻𑀦𑀁 𑀤𑀲𑁆𑀲𑀦𑀁 𑀲𑀫𑁆𑀫𑀲𑀦𑀁 𑀆𑀧𑀚𑁆𑀚𑀢𑀺.

𑀉𑀪𑀬𑀫𑁆𑀧𑁂𑀢𑀦𑁆𑀢𑀺 𑀨𑀮𑀸𑀦𑀺𑀲𑀁𑀲𑀸𑀢𑀺 𑀯𑀼𑀢𑁆𑀢𑀤𑁆𑀯𑀬𑀁. 𑀅𑀢𑁆𑀣𑀢𑁄 𑀏𑀓𑀁 𑀧𑀭𑀺𑀬𑀸𑀬𑀲𑀤𑁆𑀤𑀢𑁆𑀢𑀸. 𑀧𑀝𑀺𑀓𑀘𑁆𑀘𑀸𑀢𑀺 𑀧𑀕𑁂𑀯. 𑀫𑀭𑀡𑀓𑀸𑀮𑁂𑀢𑀺 𑀫𑀭𑀡𑀓𑀸𑀮𑀲𑀫𑀻𑀧𑁂. 𑀲𑀫𑀻𑀧𑀢𑁆𑀣𑁂 𑀳𑀺 𑀇𑀤𑀁 𑀪𑀼𑀫𑁆𑀫𑀦𑁆𑀢𑀺 𑀆𑀳 ‘‘𑀫𑀭𑀡𑀲𑁆𑀲 𑀆𑀲𑀦𑁆𑀦𑀓𑀸𑀮𑁂’’𑀢𑀺.

𑀲𑁄 𑀢𑀺𑀯𑀺𑀥𑁄 𑀳𑁄𑀢𑀺 𑀜𑀸𑀡𑀲𑁆𑀲 𑀢𑀺𑀓𑁆𑀔𑀫𑀚𑁆𑀛𑀫𑀼𑀤𑀼𑀪𑀸𑀯𑁂𑀦. 𑀢𑁂𑀦𑀸𑀳 ‘‘𑀓𑀧𑁆𑀧𑀲𑀳𑀲𑁆𑀲𑀸𑀬𑀼𑀓𑁂𑀲𑀽’’𑀢𑀺𑀆𑀤𑀺. 𑀉𑀧𑀳𑀘𑁆𑀘𑀧𑀭𑀺𑀦𑀺𑀩𑁆𑀩𑀸𑀬𑀻 𑀦𑀸𑀫 𑀆𑀬𑀼𑀯𑁂𑀫𑀚𑁆𑀛𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀦𑀢𑁄. 𑀬𑀢𑁆𑀣 𑀓𑀢𑁆𑀣𑀘𑀻𑀢𑀺 𑀅𑀯𑀺𑀳𑀸𑀤𑀻𑀲𑀼 𑀬𑀢𑁆𑀣 𑀓𑀢𑁆𑀣𑀘𑀺. 𑀲𑀧𑁆𑀧𑀬𑁄𑀕𑁂𑀦𑀸𑀢𑀺 𑀯𑀺𑀧𑀲𑁆𑀲𑀦𑀸𑀜𑀸𑀡𑀲𑀗𑁆𑀔𑀸𑀭𑀲𑀗𑁆𑀔𑀸𑀢𑁂𑀦 𑀧𑀬𑁄𑀕𑁂𑀦, 𑀲𑀳 𑀯𑀺𑀧𑀲𑁆𑀲𑀦𑀸𑀧𑀬𑁄𑀕𑁂𑀦𑀸𑀢𑀺 𑀅𑀢𑁆𑀣𑁄. 𑀲𑀼𑀤𑁆𑀥𑀸𑀯𑀸𑀲𑀪𑀽𑀫𑀺𑀬𑀁 𑀉𑀤𑁆𑀥𑀁𑀬𑁂𑀯 𑀫𑀕𑁆𑀕𑀲𑁄𑀢𑁄 𑀏𑀢𑀲𑁆𑀲𑀸𑀢𑀺 𑀉𑀤𑁆𑀥𑀁𑀲𑁄𑀢𑁄. 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀅𑀓𑀦𑀺𑀝𑁆𑀞𑀪𑀯𑀁 𑀕𑀘𑁆𑀙𑀢𑀻𑀢𑀺 𑀅𑀓𑀦𑀺𑀝𑁆𑀞𑀕𑀸𑀫𑀻.

𑀅𑀯𑀺𑀳𑀸𑀤𑀻𑀲𑀼 𑀯𑀢𑁆𑀢𑀫𑀸𑀦𑁄𑀧𑀺 𑀏𑀓𑀁𑀲𑀢𑁄 𑀉𑀤𑁆𑀥𑀁𑀕𑀫𑀦𑀸𑀭𑀳𑁄 𑀧𑀼𑀕𑁆𑀕𑀮𑁄 𑀅𑀓𑀦𑀺𑀝𑁆𑀞𑀕𑀸𑀫𑀻 𑀏𑀯 𑀦𑀸𑀫𑀸𑀢𑀺 𑀯𑀼𑀢𑁆𑀢𑀁 ‘‘𑀏𑀓𑁄 𑀉𑀤𑁆𑀥𑀁𑀲𑁄𑀢𑁄 𑀅𑀓𑀦𑀺𑀝𑁆𑀞𑀕𑀸𑀫𑀻𑀢𑀺 𑀧𑀜𑁆𑀘 𑀳𑁄𑀦𑁆𑀢𑀻’’𑀢𑀺. 𑀢𑁂𑀲𑀦𑁆𑀢𑀺 𑀦𑀺𑀤𑁆𑀥𑀸𑀭𑀡𑁂 𑀲𑀸𑀫𑀺𑀯𑀘𑀦𑀁. 𑀉𑀤𑁆𑀥𑀁𑀲𑁄𑀢𑀪𑀸𑀯𑀢𑁄 𑀬𑀤𑀺𑀧𑀺 𑀳𑁂𑀝𑁆𑀞𑀺𑀫𑀸𑀤𑀻𑀲𑀼𑀧𑀺 𑀅𑀭𑀺𑀬𑀪𑀽𑀫𑀺 𑀦𑀺𑀩𑁆𑀩𑀢𑁆𑀢𑀢𑁂𑀯, 𑀢𑀣𑀸𑀧𑀺 𑀢𑀢𑁆𑀣 𑀪𑀽𑀫𑀻𑀲𑀼 𑀆𑀬𑀼𑀁 𑀅𑀕𑁆𑀕𑀳𑁂𑀢𑁆𑀯𑀸 𑀅𑀓𑀦𑀺𑀝𑁆𑀞𑀪𑀯𑁂 𑀆𑀬𑀼𑀯𑀲𑁂𑀦𑁂𑀯 𑀲𑁄𑀴𑀲𑀓𑀧𑁆𑀧𑀲𑀳𑀲𑁆𑀲𑀸𑀬𑀼𑀓𑀢𑀸 𑀤𑀝𑁆𑀞𑀩𑁆𑀩𑀸. ‘‘𑀲𑀢𑁆𑀢 𑀨𑀮𑀸 𑀲𑀢𑁆𑀢𑀸𑀦𑀺𑀲𑀁𑀲𑀸 𑀧𑀸𑀝𑀺𑀓𑀗𑁆𑀔𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 ‘‘𑀅𑀭𑀳𑀢𑁆𑀢𑀫𑀕𑁆𑀕𑀲𑁆𑀲 𑀧𑀼𑀩𑁆𑀩𑀪𑀸𑀕𑀯𑀺𑀧𑀲𑁆𑀲𑀦𑀸 𑀩𑁄𑀚𑁆𑀛𑀗𑁆𑀕𑀸 𑀓𑀣𑀺𑀢𑀸’’𑀢𑀺 𑀯𑀼𑀢𑁆𑀢𑀁. 𑀲𑀢𑁆𑀢𑀦𑁆𑀦𑀫𑁆𑀧𑀺 𑀲𑀳𑀪𑀸𑀯𑁄 𑀮𑀩𑁆𑀪𑀢𑀻𑀢𑀺 ‘‘𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀁 𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑀸’’𑀢𑀺 𑀯𑀼𑀢𑁆𑀢𑀁. 𑀢𑀬𑀺𑀤𑀁 𑀧𑀸𑀴𑀺𑀬𑀁 𑀢𑀢𑁆𑀣 𑀢𑀢𑁆𑀣 ‘‘𑀢𑀲𑁆𑀫𑀺𑀁 𑀲𑀫𑀬𑁂’’𑀢𑀺 𑀆𑀕𑀢𑀯𑀘𑀦𑁂𑀦 𑀯𑀺𑀜𑁆𑀜𑀸𑀬𑀢𑀺, 𑀩𑁄𑀚𑁆𑀛𑀗𑁆𑀕𑀸𑀦𑀁 𑀧𑀦 𑀦𑀸𑀦𑀸𑀲𑀪𑀸𑀯𑀢𑁆𑀢𑀸 ‘‘𑀦𑀸𑀦𑀸𑀮𑀓𑁆𑀔𑀡𑀸’’𑀢𑀺 𑀯𑀼𑀢𑁆𑀢𑀁.

𑀲𑀻𑀮𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀯𑀢𑁆𑀣𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁮𑁫. ‘‘𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄’’𑀢𑀺 𑀏𑀯𑀁 𑀘𑁂 𑀫𑀬𑁆𑀳𑀁 𑀳𑁄𑀢𑀻𑀢𑀺 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀦𑀸𑀫 𑀲𑁂𑀝𑁆𑀞𑁄 𑀉𑀢𑁆𑀢𑀫𑁄 𑀧𑀯𑀭𑁄, 𑀢𑀲𑁆𑀫𑀸𑀳𑀁 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑀻𑀲𑁂𑀦 𑀨𑀮𑀲𑀫𑀸𑀧𑀢𑁆𑀢𑀺𑀁 𑀅𑀧𑁆𑀧𑁂𑀢𑁆𑀯𑀸 𑀯𑀺𑀳𑀭𑀺𑀲𑁆𑀲𑀸𑀫𑀻𑀢𑀺 𑀏𑀯𑀁 𑀘𑁂 𑀫𑀬𑁆𑀳𑀁 𑀧𑀼𑀩𑁆𑀩𑀪𑀸𑀕𑁂 𑀳𑁄𑀢𑀻𑀢𑀺 𑀅𑀢𑁆𑀣𑁄. ‘‘𑀅𑀧𑁆𑀧𑀫𑀸𑀡𑁄’’𑀢𑀺 𑀏𑀯𑀁 𑀫𑀬𑁆𑀳𑀁 𑀳𑁄𑀢𑀻𑀢𑀺 𑀲𑁆𑀯𑀸𑀬𑀁 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄, 𑀲𑀩𑁆𑀩𑀲𑁄 𑀧𑀫𑀸𑀡𑀓𑀭𑀓𑀺𑀮𑁂𑀲𑀸𑀪𑀸𑀯𑀢𑁄 𑀅𑀧𑁆𑀧𑀫𑀸𑀡𑀥𑀫𑁆𑀫𑀸𑀭𑀫𑁆𑀫𑀡𑀢𑁄 𑀘 𑀅𑀧𑁆𑀧𑀫𑀸𑀡𑁄𑀢𑀺 𑀏𑀯𑀁 𑀫𑀬𑁆𑀳𑀁 𑀅𑀦𑁆𑀢𑁄𑀲𑀫𑀸𑀧𑀢𑁆𑀢𑀺𑀬𑀁 𑀅𑀲𑀫𑁆𑀫𑁄𑀳𑀯𑀲𑁂𑀦 𑀳𑁄𑀢𑀺. 𑀲𑀼𑀧𑀭𑀺𑀧𑀼𑀡𑁆𑀡𑁄𑀢𑀺 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀬𑀸 𑀲𑀼𑀝𑁆𑀞𑀼 𑀧𑀭𑀺𑀧𑀼𑀡𑁆𑀡𑁄𑀢𑀺 𑀏𑀯𑀁 𑀫𑀬𑁆𑀳𑀁 𑀅𑀦𑁆𑀢𑁄𑀲𑀫𑀸𑀧𑀢𑁆𑀢𑀺𑀬𑀁 𑀅𑀲𑀫𑁆𑀫𑁄𑀳𑀯𑀲𑁂𑀦 𑀳𑁄𑀢𑀻𑀢𑀺. 𑀢𑀺𑀝𑁆𑀞𑀢𑀻𑀢𑀺 𑀬𑀣𑀸𑀓𑀸𑀮𑀧𑀭𑀺𑀘𑁆𑀙𑁂𑀤𑀲𑀫𑀸𑀧𑀢𑁆𑀢𑀺𑀬𑀸 𑀅𑀯𑀝𑁆𑀞𑀸𑀦𑁂𑀦 𑀢𑀧𑁆𑀧𑀭𑀺𑀬𑀸𑀧𑀦𑁆𑀦𑀢𑀸𑀬 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀢𑀺𑀝𑁆𑀞𑀢𑀺 𑀧𑀝𑀺𑀩𑀦𑁆𑀥𑀯𑀲𑁂𑀦. 𑀉𑀧𑁆𑀧𑀸𑀤𑀁 𑀅𑀦𑀸𑀯𑀚𑁆𑀚𑀺𑀢𑀢𑁆𑀢𑀸𑀢𑀺 𑀉𑀧𑁆𑀧𑀸𑀤𑀲𑁆𑀲 𑀅𑀦𑀸𑀯𑀚𑁆𑀚𑀦𑁂𑀦 𑀅𑀲𑀫𑀦𑁆𑀦𑀸𑀳𑀸𑀭𑁂𑀦. 𑀉𑀧𑁆𑀧𑀸𑀤𑀲𑀻𑀲𑁂𑀦 𑀘𑁂𑀢𑁆𑀣 𑀉𑀧𑁆𑀧𑀸𑀤𑀯𑀦𑁆𑀢𑁄𑀯 𑀲𑀗𑁆𑀔𑀸𑀭𑀸 𑀕𑀳𑀺𑀢𑀸. 𑀅𑀦𑀼𑀧𑁆𑀧𑀸𑀤𑀦𑁆𑀢𑀺 𑀦𑀺𑀩𑁆𑀩𑀸𑀦𑀁 𑀉𑀧𑁆𑀧𑀸𑀤𑀸𑀪𑀸𑀯𑀢𑁄 𑀉𑀧𑁆𑀧𑀸𑀤𑀯𑀦𑁆𑀢𑁂𑀳𑀺 𑀘 𑀯𑀺𑀦𑀺𑀲𑁆𑀲𑀝𑀢𑁆𑀢𑀸. 𑀧𑀯𑀢𑁆𑀢𑀦𑁆𑀢𑀺 𑀯𑀺𑀧𑀸𑀓𑀧𑁆𑀧𑀯𑀢𑁆𑀢𑀁. 𑀅𑀧𑁆𑀧𑀯𑀢𑁆𑀢𑀦𑁆𑀢𑀺 𑀦𑀺𑀩𑁆𑀩𑀸𑀦𑀁 𑀢𑀧𑁆𑀧𑀝𑀺𑀓𑁆𑀔𑁂𑀧𑀢𑁄. 𑀦𑀺𑀫𑀺𑀢𑁆𑀢𑀦𑁆𑀢𑀺 𑀲𑀩𑁆𑀩𑀲𑀗𑁆𑀔𑀸𑀭𑀦𑀺𑀫𑀺𑀢𑁆𑀢𑀁. 𑀅𑀦𑀺𑀫𑀺𑀢𑁆𑀢𑀦𑁆𑀢𑀺 𑀦𑀺𑀩𑁆𑀩𑀸𑀦𑀁. 𑀲𑀗𑁆𑀔𑀸𑀭𑁂𑀢𑀺 𑀉𑀧𑁆𑀧𑀸𑀤𑀸𑀤𑀺𑀅𑀦𑀸𑀫𑀲𑀦𑁂𑀦 𑀓𑁂𑀯𑀮𑀫𑁂𑀯 𑀲𑀗𑁆𑀔𑀸𑀭𑀕𑀳𑀡𑀁. 𑀯𑀺𑀲𑀗𑁆𑀔𑀸𑀭𑀦𑁆𑀢𑀺 𑀦𑀺𑀩𑁆𑀩𑀸𑀦𑀁. 𑀆𑀯𑀚𑁆𑀚𑀺𑀢𑀢𑁆𑀢𑀸 𑀆𑀯𑀚𑁆𑀚𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀆𑀭𑀩𑁆𑀪 𑀧𑀯𑀢𑁆𑀢𑀺𑀬𑀸 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀢𑀺𑀝𑁆𑀞𑀢𑀺. 𑀅𑀝𑁆𑀞𑀳𑀸𑀓𑀸𑀭𑁂𑀳𑀻𑀢𑀺 𑀅𑀝𑁆𑀞𑀳𑀺 𑀓𑀸𑀭𑀡𑁂𑀳𑀺. 𑀚𑀸𑀦𑀸𑀢𑀻𑀢𑀺 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀺𑀢𑀓𑀸𑀮𑁂 𑀧𑀚𑀸𑀦𑀸𑀢𑀺. 𑀅𑀝𑁆𑀞𑀳𑀸𑀓𑀸𑀭𑁂𑀳𑀻𑀢𑀺 𑀉𑀧𑁆𑀧𑀸𑀤𑀸𑀯𑀚𑁆𑀚𑀦𑀸𑀤𑀻𑀳𑀺 𑀘𑁂𑀯 𑀅𑀦𑀼𑀧𑁆𑀧𑀸𑀤𑀸𑀯𑀚𑁆𑀚𑀦𑀸𑀤𑀻𑀳𑀺 𑀘 𑀯𑀼𑀢𑁆𑀢𑀸𑀓𑀸𑀭𑀯𑀺𑀧𑀭𑀻𑀢𑁂𑀳𑀺 𑀅𑀝𑁆𑀞𑀳𑀺 𑀆𑀓𑀸𑀭𑁂𑀳𑀺 𑀘𑀯𑀦𑁆𑀢𑀁 𑀲𑀫𑀸𑀧𑀢𑁆𑀢𑀺𑀯𑀲𑁂𑀦 𑀅𑀦𑀯𑀝𑁆𑀞𑀸𑀦𑀢𑁄𑀧𑀺 𑀕𑀘𑁆𑀙𑀦𑁆𑀢𑀁 𑀘𑀯𑀢𑀻𑀢𑀺 𑀣𑁂𑀭𑁄 𑀧𑀚𑀸𑀦𑀸𑀢𑀻𑀢𑀺.

𑀨𑀮𑀩𑁄𑀚𑁆𑀛𑀗𑁆𑀕𑀸𑀢𑀺 𑀨𑀮𑀲𑀫𑀸𑀧𑀢𑁆𑀢𑀺𑀧𑀭𑀺𑀬𑀸𑀧𑀦𑁆𑀦𑀸 𑀩𑁄𑀚𑁆𑀛𑀗𑁆𑀕𑀸. 𑀓𑀺𑀁 𑀧𑀦 𑀢𑁂 𑀯𑀺𑀲𑀼𑀁 𑀯𑀺𑀲𑀼𑀁 𑀧𑀯𑀢𑁆𑀢𑀦𑁆𑀢𑀻𑀢𑀺 𑀆𑀳 ‘‘𑀬𑀤𑀸 𑀳𑀻’’𑀢𑀺𑀆𑀤𑀺. 𑀲𑀻𑀲𑀁 𑀓𑀢𑁆𑀯𑀸𑀢𑀺 𑀧𑀥𑀸𑀦𑀁 𑀲𑁂𑀝𑁆𑀞𑀁 𑀓𑀢𑁆𑀯𑀸. 𑀢𑀤𑀦𑁆𑀯𑀬𑀸𑀢𑀺 𑀢𑀤𑀦𑀼𑀕𑀢𑀸 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀅𑀦𑀼𑀕𑀘𑁆𑀙𑀦𑀓𑀸. 𑀢𑀜𑁆𑀘 𑀔𑁄 𑀢𑀣𑀸 𑀓𑀢𑁆𑀯𑀸 𑀥𑀫𑁆𑀫𑀁 𑀧𑀘𑁆𑀘𑀯𑁂𑀓𑁆𑀔𑀡𑀯𑀲𑁂𑀦. 𑀓𑁂𑀘𑀺 𑀧𑀦 ‘‘𑀢𑀁 𑀧𑀘𑁆𑀘𑀯𑁂𑀓𑁆𑀔𑀡𑀸𑀤𑀺𑀓𑀁 𑀓𑀢𑁆𑀯𑀸’’𑀢𑀺 𑀯𑀤𑀦𑁆𑀢𑀺.

𑀯𑀢𑁆𑀣𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀪𑀺𑀓𑁆𑀔𑀼𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁮𑁬. 𑀩𑁄𑀥𑀸𑀬𑀸𑀢𑀺 𑀏𑀢𑁆𑀣 𑀩𑁄𑀥𑁄 𑀦𑀸𑀫 𑀩𑀼𑀚𑁆𑀛𑀦𑀁, 𑀢𑀁 𑀧𑀦 𑀓𑀺𑀲𑁆𑀲 𑀓𑁂𑀦𑀸𑀢𑀺 𑀧𑀼𑀘𑁆𑀙𑀦𑁆𑀢𑁄 ‘‘𑀓𑀺𑀁 𑀩𑀼𑀚𑁆𑀛𑀦𑀢𑁆𑀣𑀸𑀬𑀸’’𑀢𑀺 𑀯𑀢𑁆𑀯𑀸 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀫𑀕𑁆𑀕𑁂𑀦𑀸’’𑀢𑀺𑀆𑀤𑀺𑀫𑀸𑀳. 𑀫𑀕𑁆𑀕𑁂𑀦 𑀦𑀺𑀩𑁆𑀩𑀸𑀦𑀁 𑀩𑀼𑀚𑁆𑀛𑀦𑀢𑁆𑀣𑀸𑀬 𑀲𑀁𑀯𑀢𑁆𑀢𑀦𑁆𑀢𑀺, 𑀧𑀘𑁆𑀘𑀯𑁂𑀓𑁆𑀔𑀡𑀸𑀬 𑀓𑀢𑀓𑀺𑀘𑁆𑀘𑀢𑀁 𑀩𑀼𑀚𑁆𑀛𑀦𑀢𑁆𑀣𑀸𑀬 𑀲𑀁𑀯𑀢𑁆𑀢𑀦𑁆𑀢𑀺, 𑀧𑀞𑀫𑀯𑀺𑀓𑀧𑁆𑀧𑁂 𑀲𑀘𑁆𑀙𑀺𑀓𑀺𑀭𑀺𑀬𑀸𑀪𑀺𑀲𑀫𑀬𑁄 𑀏𑀯 𑀤𑀲𑁆𑀲𑀺𑀢𑁄𑀢𑀺 𑀢𑁂𑀦 𑀅𑀢𑀼𑀝𑁆𑀞𑁂 ‘‘𑀫𑀕𑁆𑀕𑁂𑀦 𑀯𑀸’’𑀢𑀺 𑀤𑀼𑀢𑀺𑀬𑀯𑀺𑀓𑀧𑁆𑀧𑀫𑀸𑀳. 𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀁 𑀯𑀺𑀭𑀸𑀕𑀦𑀺𑀲𑁆𑀲𑀺𑀢𑀦𑁆𑀢𑀺 𑀧𑀤𑁂𑀳𑀺 𑀲𑀩𑁆𑀩𑀁 𑀫𑀕𑁆𑀕𑀓𑀺𑀘𑁆𑀘𑀁 𑀢𑀲𑁆𑀲 𑀨𑀮𑀜𑁆𑀘 𑀤𑀲𑁆𑀲𑀺𑀢𑀁. 𑀦𑀺𑀭𑁄𑀥𑀦𑀺𑀲𑁆𑀲𑀺𑀢𑀦𑁆𑀢𑀺 𑀇𑀫𑀺𑀦𑀸 𑀦𑀺𑀩𑁆𑀩𑀸𑀦𑀲𑀘𑁆𑀙𑀺𑀓𑀺𑀭𑀺𑀬𑀸. 𑀓𑀸𑀫𑀸𑀲𑀯𑀸𑀧𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀢𑀻𑀢𑀺𑀆𑀤𑀺𑀦𑀸 𑀓𑀺𑀮𑁂𑀲𑀧𑁆𑀧𑀳𑀸𑀦𑀁. 𑀯𑀺𑀫𑀼𑀢𑁆𑀢𑀲𑁆𑀫𑀺𑀁 𑀯𑀺𑀫𑀼𑀢𑁆𑀢𑀫𑀺𑀢𑀺 𑀜𑀸𑀡𑀁 𑀳𑁄𑀢𑀻𑀢𑀺𑀆𑀤𑀺𑀦𑀸 𑀧𑀘𑁆𑀘𑀯𑁂𑀓𑁆𑀔𑀡𑀸 𑀤𑀲𑁆𑀲𑀺𑀢𑀸.

𑀪𑀺𑀓𑁆𑀔𑀼𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬-𑁭. 𑀓𑀼𑀡𑁆𑀟𑀮𑀺𑀬𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁮𑁭-𑁧𑁮𑁮. 𑀦𑀺𑀩𑀤𑁆𑀥𑀯𑀸𑀲𑀯𑀲𑁂𑀦 𑀆𑀭𑀸𑀫𑁂 𑀦𑀺𑀲𑀻𑀤𑀦𑀲𑀻𑀮𑁄𑀢𑀺 𑀆𑀭𑀸𑀫𑀦𑀺𑀲𑀸𑀤𑀻. 𑀧𑀭𑀺𑀲𑀁 𑀑𑀕𑀸𑀴𑁆𑀳𑁄 𑀳𑀼𑀢𑁆𑀯𑀸 𑀘𑀭𑀢𑀻𑀢𑀺 𑀧𑀭𑀺𑀲𑀸𑀯𑀘𑀭𑁄𑀢𑀺 𑀆𑀳 𑁋 ‘‘𑀬𑁄 𑀧𑀦𑀸’’𑀢𑀺𑀆𑀤𑀺. 𑀏𑀯𑀦𑁆𑀢𑀺 𑀇𑀫𑀺𑀦𑀸𑀓𑀸𑀭𑁂𑀦. 𑀕𑀳𑀡𑀦𑁆𑀢𑀺 𑀦𑀺𑀕𑁆𑀕𑀳𑀡𑀁. 𑀢𑁂𑀦 𑀧𑀼𑀘𑁆𑀙𑀸𑀧𑀤𑀲𑁆𑀲 𑀅𑀢𑁆𑀣𑀁 𑀯𑀺𑀯𑀭𑀢𑀺. 𑀦𑀺𑀩𑁆𑀩𑁂𑀞𑀦𑀦𑁆𑀢𑀺 𑀦𑀺𑀕𑁆𑀕𑀳𑀦𑀺𑀩𑁆𑀩𑁂𑀞𑀦𑀁. 𑀢𑁂𑀦 𑀯𑀺𑀲𑁆𑀲𑀚𑁆𑀚𑀦𑀧𑀤𑀲𑁆𑀲 𑀅𑀢𑁆𑀣𑀁 𑀯𑀺𑀯𑀭𑀢𑀺. 𑀇𑀫𑀺𑀦𑀸 𑀦𑀬𑁂𑀦𑀸𑀢𑀺 𑀏𑀢𑁂𑀦 ‘‘𑀇𑀢𑀺𑀯𑀸𑀤𑁄’’𑀢𑀺 𑀏𑀢𑁆𑀣 𑀇𑀢𑀺-𑀲𑀤𑁆𑀤𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀉𑀧𑀸𑀭𑀫𑁆𑀪𑀸𑀥𑀺𑀧𑁆𑀧𑀸𑀬𑁄 𑀯𑀤𑀢𑀺 𑀏𑀢𑁂𑀦𑀸𑀢𑀺 𑀯𑀸𑀤𑁄, 𑀤𑁄𑀲𑁄. 𑀇𑀢𑀺𑀯𑀸𑀤𑁄 𑀳𑁄𑀢𑀻𑀢𑀺 𑀏𑀯𑀁 𑀇𑀫𑀲𑁆𑀲 𑀉𑀧𑀭𑀺 𑀯𑀸𑀤𑀸𑀭𑁄𑀧𑀦𑀁 𑀳𑁄𑀢𑀺. 𑀇𑀢𑀺𑀯𑀸𑀤𑀧𑁆𑀧𑀫𑁄𑀓𑁆𑀔𑁄𑀢𑀺 𑀏𑀯𑀁 𑀢𑀢𑁄 𑀧𑀫𑁄𑀓𑁆𑀔𑁄 𑀳𑁄𑀢𑀺. 𑀏𑀯𑀁 𑀯𑀸𑀤𑀧𑁆𑀧𑀫𑁄𑀓𑁆𑀔𑀸𑀦𑀺𑀲𑀁𑀲𑀁 𑀧𑀭𑁂𑀳𑀺 𑀆𑀭𑁄𑀧𑀺𑀢𑀤𑁄𑀲𑀲𑁆𑀲 𑀦𑀺𑀩𑁆𑀩𑁂𑀞𑀦𑀯𑀲𑁂𑀦 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀤𑁄𑀲𑀧𑀯𑁂𑀤𑀦𑀯𑀲𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀅𑀬𑀁 𑀧𑀼𑀘𑁆𑀙𑀸𑀬 𑀤𑁄𑀲𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀏𑀢𑁆𑀢𑀓𑀁 𑀞𑀸𑀦𑀦𑁆𑀢𑀺𑀆𑀤𑀺𑀢𑁄 𑀧𑀝𑁆𑀞𑀸𑀬 𑀬𑀸𑀯 ‘‘𑀢𑀻𑀡𑀺 𑀲𑀼𑀘𑀭𑀺𑀢𑀸𑀦𑀻’’𑀢𑀺 𑀏𑀢𑁆𑀢𑀓𑀁 𑀞𑀸𑀦𑀁. 𑀇𑀫𑀁 𑀤𑁂𑀲𑀦𑀦𑁆𑀢𑀺 ‘‘𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁄 𑀔𑁄’’𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀁 𑀇𑀫𑀁 𑀤𑁂𑀲𑀦𑀁. 𑀦𑀸𑀪𑀺𑀚𑁆𑀛𑀸𑀬𑀢𑀻𑀢𑀺 𑀦 𑀅𑀪𑀺𑀚𑁆𑀛𑀸𑀬𑀢𑀺. 𑀦𑀸𑀪𑀺𑀳𑀁𑀲𑀢𑀻𑀢𑀺 𑀦 𑀅𑀪𑀺𑀢𑀼𑀲𑁆𑀲𑀢𑀺. 𑀕𑁄𑀘𑀭𑀚𑁆𑀛𑀢𑁆𑀢𑁂 𑀞𑀺𑀢𑀁 𑀳𑁄𑀢𑀻𑀢𑀺 𑀓𑀫𑁆𑀫𑀝𑁆𑀞𑀸𑀦𑀸𑀭𑀫𑁆𑀫𑀡𑁂 𑀲𑀫𑀸𑀥𑀸𑀦𑀯𑀲𑁂𑀦 𑀞𑀺𑀢𑀁 𑀳𑁄𑀢𑀺 𑀅𑀯𑀝𑁆𑀞𑀺𑀢𑀁. 𑀢𑁂𑀦𑀸𑀳 ‘‘𑀲𑀼𑀲𑀡𑁆𑀞𑀺𑀢’’𑀦𑁆𑀢𑀺. 𑀲𑀼𑀲𑀡𑁆𑀞𑀺𑀢𑀦𑁆𑀢𑀺 𑀲𑀫𑁆𑀫𑀸 𑀅𑀯𑀺𑀓𑁆𑀔𑁂𑀧𑀯𑀲𑁂𑀦 𑀞𑀺𑀢𑀁. 𑀓𑀫𑁆𑀫𑀝𑁆𑀞𑀸𑀦𑀯𑀺𑀫𑀼𑀢𑁆𑀢𑀺𑀬𑀸𑀢𑀺 𑀓𑀫𑁆𑀫𑀝𑁆𑀞𑀸𑀦𑀸𑀦𑀼𑀬𑀼𑀜𑁆𑀚𑀦𑀯𑀲𑁂𑀦 𑀧𑀝𑀺𑀧𑀓𑁆𑀔𑀢𑁄 𑀦𑀻𑀯𑀭𑀡𑀢𑁄 𑀯𑀺𑀫𑀼𑀢𑁆𑀢𑀺𑀬𑀸. 𑀲𑀼𑀝𑁆𑀞𑀼 𑀯𑀺𑀫𑀼𑀢𑁆𑀢𑀦𑁆𑀢𑀺 𑀲𑀼𑀯𑀺𑀫𑀼𑀢𑁆𑀢𑀁. 𑀢𑀲𑁆𑀫𑀺𑀁 𑀅𑀫𑀦𑀸𑀧𑀭𑀽𑀧𑀤𑀲𑁆𑀲𑀦𑁂 𑀦 𑀫𑀗𑁆𑀓𑀼 𑀯𑀺𑀮𑀓𑁆𑀔𑁄 𑀦 𑀳𑁄𑀢𑀺. 𑀓𑀺𑀮𑁂𑀲𑀯𑀲𑁂𑀦 𑀤𑁄𑀲𑀯𑀲𑁂𑀦. 𑀅𑀝𑁆𑀞𑀺𑀢𑀘𑀺𑀢𑁆𑀢𑁄 𑀅𑀣𑀤𑁆𑀥𑀘𑀺𑀢𑁆𑀢𑁄. 𑀓𑁄𑀯𑁂𑀲𑁂𑀦 𑀳𑀺 𑀘𑀺𑀢𑁆𑀢𑀁 𑀣𑀤𑁆𑀥𑀁 𑀳𑁄𑀢𑀺, 𑀦 𑀫𑀼𑀤𑀼𑀓𑀁. 𑀅𑀤𑀻𑀦𑀫𑀸𑀦𑀲𑁄𑀢𑀺 𑀤𑁄𑀫𑀦𑀲𑁆𑀲𑀯𑀲𑁂𑀦 𑀬𑁄 𑀤𑀻𑀦𑀪𑀸𑀯𑁄, 𑀢𑀤𑀪𑀸𑀯𑁂𑀦 𑀦𑀺𑀤𑁆𑀤𑁄𑀲𑀫𑀸𑀦𑀲𑁄. 𑀅𑀧𑀽𑀢𑀺𑀘𑀺𑀢𑁆𑀢𑁄𑀢𑀺 𑀩𑁆𑀬𑀸𑀧𑀚𑁆𑀚𑀸𑀪𑀸𑀯𑁂𑀦 𑀲𑀻𑀢𑀺𑀪𑀽𑀢𑀘𑀺𑀢𑁆𑀢𑁄.

𑀇𑀫𑁂𑀲𑀼 𑀙𑀲𑀼 𑀤𑁆𑀯𑀸𑀭𑁂𑀲𑀼 𑀅𑀝𑁆𑀞𑀸𑀭𑀲 𑀤𑀼𑀘𑁆𑀘𑀭𑀺𑀢𑀸𑀦𑀺 𑀳𑁄𑀦𑁆𑀢𑀺 𑀧𑀘𑁆𑀘𑁂𑀓𑀁 𑀓𑀸𑀬𑀯𑀘𑀻𑀫𑀦𑁄𑀤𑀼𑀘𑁆𑀘𑀭𑀺𑀢𑀪𑁂𑀤𑁂𑀦. 𑀢𑀸𑀦𑀺 𑀯𑀺𑀪𑀸𑀕𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀓𑀣’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀇𑀝𑁆𑀞𑀸𑀭𑀫𑁆𑀫𑀡𑁂 𑀆𑀧𑀸𑀣𑀕𑀢𑁂𑀢𑀺 𑀦𑀬𑀤𑀸𑀦𑀫𑀢𑁆𑀢𑀫𑁂𑀢𑀁. 𑀢𑁂𑀦 ‘‘𑀅𑀦𑀺𑀝𑁆𑀞𑀸𑀭𑀫𑁆𑀫𑀡𑁂 𑀆𑀧𑀸𑀣𑀕𑀢𑁂 𑀤𑁄𑀲𑀁 𑀉𑀧𑁆𑀧𑀸𑀤𑁂𑀦𑁆𑀢𑀲𑁆𑀲𑀸’’𑀢𑀺𑀆𑀤𑀺𑀦𑀸 𑀢𑀺𑀯𑀺𑀥𑀤𑀼𑀘𑁆𑀘𑀭𑀺𑀢𑀁 𑀦𑀻𑀳𑀭𑀺𑀢𑁆𑀯𑀸 𑀯𑀢𑁆𑀢𑀩𑁆𑀩𑀁, 𑀢𑀣𑀸 ‘‘𑀫𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑁂 𑀫𑁄𑀳𑀁 𑀉𑀧𑁆𑀧𑀸𑀤𑁂𑀦𑁆𑀢𑀲𑁆𑀲𑀸’’𑀢𑀺𑀆𑀤𑀺𑀦𑀸 𑀘. 𑀫𑀦𑁄𑀤𑀼𑀘𑁆𑀘𑀭𑀺𑀢𑀸𑀤𑀺𑀲𑀸𑀫𑀜𑁆𑀜𑁂𑀦 𑀧𑀦 𑀢𑀻𑀡𑀺𑀬𑁂𑀯 𑀤𑀼𑀘𑁆𑀘𑀭𑀺𑀢𑀸𑀦𑀺 𑀳𑁄𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀧𑀜𑁆𑀜𑀢𑁆𑀢𑀺𑀯𑀲𑁂𑀦𑀸𑀢𑀺 𑀯𑀢𑁆𑀣𑀼𑀁 𑀅𑀦𑀸𑀫𑀲𑀺𑀢𑁆𑀯𑀸 𑀧𑀺𑀡𑁆𑀟𑀕𑀳𑀡𑀫𑀼𑀔𑁂𑀦 𑀓𑁂𑀯𑀮𑀁 𑀧𑀜𑁆𑀜𑀢𑁆𑀢𑀺𑀯𑀲𑁂𑀦𑁂𑀯. 𑀪𑀸𑀯𑀦𑀸𑀧𑀝𑀺𑀲𑀗𑁆𑀔𑀸𑀦𑁂𑀢𑀺 𑀪𑀸𑀯𑀦𑀸𑀲𑀺𑀤𑁆𑀥𑁂 𑀧𑀝𑀺𑀲𑀗𑁆𑀔𑀸𑀦𑁂, 𑀪𑀸𑀯𑀦𑀸𑀬 𑀧𑀝𑀺𑀲𑀗𑁆𑀔𑀸𑀦𑁂 𑀯𑀸𑀢𑀺 𑀅𑀢𑁆𑀣𑁄. 𑀇𑀫𑀸𑀦𑀻𑀢𑀺 𑀬𑀣𑀸𑀯𑀼𑀢𑁆𑀢𑀸𑀦𑀺 𑀙𑀤𑁆𑀯𑀸𑀭𑀸𑀭𑀫𑁆𑀫𑀡𑀸𑀦𑀺. 𑀤𑀼𑀘𑁆𑀘𑀭𑀺𑀢𑀸𑀦𑀻𑀢𑀺 𑀤𑀼𑀘𑁆𑀘𑀭𑀺𑀢𑀓𑀸𑀭𑀡𑀸𑀦𑀺. 𑀅𑀧𑁆𑀧𑀝𑀺𑀲𑀗𑁆𑀔𑀸𑀦𑁂 𑀞𑀺𑀢𑀲𑁆𑀲 𑀤𑀼𑀘𑁆𑀘𑀭𑀺𑀢𑀸𑀦𑀺 𑀲𑀼𑀘𑀭𑀺𑀢𑀸𑀦𑀺 𑀓𑀢𑁆𑀯𑀸. 𑀧𑀭𑀺𑀡𑀸𑀫𑁂𑀢𑀻𑀢𑀺 𑀧𑀭𑀺𑀯𑀢𑁆𑀢𑁂𑀢𑀺 𑀤𑀼𑀘𑁆𑀘𑀭𑀺𑀢𑀸𑀦𑀺 𑀢𑀢𑁆𑀣 𑀅𑀦𑀼𑀧𑁆𑀧𑀸𑀤𑁂𑀢𑁆𑀯𑀸 𑀲𑀼𑀘𑀭𑀺𑀢𑀸𑀦𑀺 𑀉𑀧𑁆𑀧𑀸𑀤𑁂𑀦𑁆𑀢𑁄. 𑀏𑀯𑀦𑁆𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦. 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁄…𑀧𑁂… 𑀯𑁂𑀤𑀺𑀢𑀩𑁆𑀩𑁄 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀲𑀫𑁆𑀧𑀸𑀤𑀦𑀯𑀲𑁂𑀦 𑀢𑀺𑀡𑁆𑀡𑀁 𑀲𑀼𑀘𑀭𑀺𑀢𑀸𑀦𑀁 𑀲𑀺𑀚𑁆𑀛𑀦𑀢𑁄. 𑀢𑁂𑀦𑀸𑀳 ‘‘𑀏𑀢𑁆𑀢𑀸𑀯𑀢𑀸’’𑀢𑀺𑀆𑀤𑀺. 𑀏𑀢𑁆𑀢𑀸𑀯𑀢𑀸𑀢𑀺 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀬𑀸𑀯 ‘‘𑀢𑀻𑀡𑀺 𑀲𑀼𑀘𑀭𑀺𑀢𑀸𑀦𑀺 𑀧𑀭𑀺𑀧𑀽𑀭𑁂𑀦𑁆𑀢𑀻’’𑀢𑀺 𑀧𑀤𑀁, 𑀏𑀢𑁆𑀢𑀸𑀯𑀢𑀸. 𑀲𑀻𑀮𑀸𑀦𑀼𑀭𑀓𑁆𑀔𑀓𑀁 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀲𑀻𑀮𑀦𑁆𑀢𑀺 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀲𑁆𑀲 𑀅𑀦𑀼𑀭𑀓𑁆𑀔𑀓𑀁 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀲𑀻𑀮𑀁 𑀓𑀣𑀺𑀓𑀁. 𑀓𑀣𑀁 𑀧𑀦 𑀢𑀤𑁂𑀯 𑀢𑀲𑁆𑀲 𑀅𑀦𑀼𑀭𑀓𑁆𑀔𑀓𑀁 𑀳𑁄𑀢𑀻𑀢𑀺? 𑀅𑀧𑀭𑀸𑀧𑀭𑀼𑀧𑁆𑀧𑀢𑁆𑀢𑀺𑀬𑀸 𑀉𑀧𑀦𑀺𑀲𑁆𑀲𑀬𑀪𑀸𑀯𑀢𑁄.

𑀢𑀻𑀡𑀺 𑀲𑀻𑀮𑀸𑀦𑀻𑀢𑀺 𑀇𑀦𑁆𑀤𑁆𑀭𑀺𑀬𑀲𑀁𑀯𑀭-𑀆𑀚𑀻𑀯𑀧𑀸𑀭𑀺𑀲𑀼𑀤𑁆𑀥𑀺-𑀧𑀘𑁆𑀘𑀬𑀲𑀦𑁆𑀦𑀺𑀲𑁆𑀲𑀺𑀢-𑀲𑀻𑀮𑀸𑀦𑀺. 𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀓𑀸𑀢𑀺 𑀮𑁄𑀓𑀺𑀬𑀸𑀧𑀺 𑀮𑁄𑀓𑀼𑀢𑁆𑀢𑀭𑀸𑀧𑀺 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀲𑀢𑁆𑀢𑀦𑁆𑀦𑀁 𑀩𑁄𑀚𑁆𑀛𑀗𑁆𑀕𑀸𑀦𑀦𑁆𑀢𑀺 𑀮𑁄𑀓𑀼𑀢𑁆𑀢𑀭𑀸𑀦𑀁 𑀲𑀢𑁆𑀢𑀦𑁆𑀦𑀁 𑀩𑁄𑀚𑁆𑀛𑀗𑁆𑀕𑀸𑀦𑀁. 𑀫𑀽𑀮𑀪𑀽𑀢𑀸 𑀲𑀢𑀺𑀧𑀝𑁆𑀞𑀸𑀦𑀸 𑀧𑀼𑀩𑁆𑀩𑀪𑀸𑀕𑀸, 𑀢𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀘𑀢𑁆𑀢𑀸𑀭𑁄 𑀔𑁄, 𑀓𑀼𑀡𑁆𑀟𑀮𑀺𑀬, 𑀲𑀢𑀺𑀧𑀝𑁆𑀞𑀸𑀦𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑁂 𑀧𑀭𑀺𑀧𑀽𑀭𑁂𑀦𑁆𑀢𑀻’’𑀢𑀺. 𑀢𑁂𑀧𑀻𑀢𑀺 𑀬𑀣𑀸𑀯𑀼𑀢𑁆𑀢𑀲𑀢𑀺𑀧𑀝𑁆𑀞𑀸𑀦𑀸. 𑀲𑀢𑀺𑀧𑀝𑁆𑀞𑀸𑀦𑀫𑀽𑀮𑀓𑀸 𑀩𑁄𑀚𑁆𑀛𑀗𑁆𑀕𑀸𑀢𑀺 𑀮𑁄𑀓𑀺𑀬𑀲𑀢𑀺𑀧𑀝𑁆𑀞𑀸𑀦𑀫𑀽𑀮𑀓𑀸 𑀩𑁄𑀚𑁆𑀛𑀗𑁆𑀕𑀸𑀯. 𑀧𑀼𑀩𑁆𑀩𑀪𑀸𑀕𑀸𑀯𑀸𑀢𑀺 𑀏𑀢𑁆𑀣 𑀓𑁂𑀘𑀺 ‘‘𑀧𑀼𑀩𑁆𑀩𑀪𑀸𑀕𑀸 𑀘𑀸’’𑀢𑀺 𑀧𑀸𑀞𑀁 𑀓𑀢𑁆𑀯𑀸 ‘‘𑀧𑀼𑀩𑁆𑀩𑁂𑀯 𑀮𑁄𑀓𑀼𑀢𑁆𑀢𑀭𑀸 𑀧𑀼𑀩𑁆𑀩𑀪𑀸𑀕𑀸 𑀘𑀸’’𑀢𑀺 𑀅𑀢𑁆𑀣𑀁 𑀯𑀤𑀦𑁆𑀢𑀺. 𑀯𑀺𑀚𑁆𑀚𑀸𑀯𑀺𑀫𑀼𑀢𑁆𑀢𑀺𑀫𑀽𑀮𑀓𑀸𑀢𑀺 ‘‘𑀲𑀢𑁆𑀢 𑀔𑁄, 𑀓𑀼𑀡𑁆𑀟𑀮𑀺𑀬, 𑀩𑁄𑀚𑁆𑀛𑀗𑁆𑀕𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀯𑀺𑀚𑁆𑀚𑀸𑀯𑀺𑀫𑀼𑀢𑁆𑀢𑀺𑀁 𑀧𑀭𑀺𑀧𑀽𑀭𑁂𑀦𑁆𑀢𑀻’’𑀢𑀺 𑀏𑀯𑀁 𑀯𑀼𑀢𑁆𑀢𑀸 𑀩𑁄𑀚𑁆𑀛𑀗𑁆𑀕𑀸 𑀮𑁄𑀓𑀼𑀢𑁆𑀢𑀭𑀸𑀯 𑀯𑀺𑀚𑁆𑀚𑀸𑀯𑀺𑀫𑀼𑀢𑁆𑀢𑀺𑀲𑀳𑀕𑀢𑀪𑀸𑀯𑀢𑁄.

𑀓𑀼𑀡𑁆𑀟𑀮𑀺𑀬𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀉𑀧𑀯𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁮𑁯. 𑀧𑀘𑁆𑀘𑀢𑁆𑀢𑀦𑁆𑀢𑀺 𑀓𑀭𑀡𑀦𑀺𑀤𑁆𑀤𑁂𑀲𑁄 𑀅𑀬𑀦𑁆𑀢𑀺 𑀆𑀳 𑁋 ‘‘𑀅𑀢𑁆𑀢𑀦𑀸𑀯𑀸’’𑀢𑀺. 𑀓𑀼𑀭𑀼𑀫𑀸𑀦𑁄𑀬𑁂𑀯𑀸𑀢𑀺 𑀉𑀧𑁆𑀧𑀸𑀤𑁂𑀦𑁆𑀢𑁄 𑀏𑀯. 𑀓𑀫𑁆𑀫𑀝𑁆𑀞𑀸𑀦𑀯𑀺𑀫𑀼𑀢𑁆𑀢𑀺𑀬𑀸 𑀲𑀼𑀝𑁆𑀞𑀼 𑀯𑀺𑀫𑀼𑀢𑁆𑀢𑀦𑁆𑀢𑀺 𑀓𑀫𑁆𑀫𑀝𑁆𑀞𑀸𑀦𑀫𑀦𑀲𑀺𑀓𑀸𑀭𑁂𑀦 𑀦𑀻𑀯𑀭𑀡𑀸𑀦𑀁 𑀤𑀽𑀭𑀻𑀪𑀸𑀯𑀢𑁄 𑀢𑁂𑀳𑀺 𑀲𑀼𑀝𑁆𑀞𑀼 𑀯𑀺𑀫𑀼𑀢𑁆𑀢𑀁. 𑀅𑀢𑁆𑀣𑀁 𑀓𑀭𑀺𑀢𑁆𑀯𑀸𑀢𑀺 𑀪𑀸𑀯𑀦𑀸𑀫𑀦𑀲𑀺𑀓𑀸𑀭𑀁 𑀉𑀢𑁆𑀢𑀫𑀁 𑀓𑀢𑁆𑀯𑀸. ‘‘𑀫𑀳𑀸 𑀯𑀢 𑀫𑁂 𑀅𑀬𑀁 𑀅𑀢𑁆𑀣𑁄 𑀉𑀧𑁆𑀧𑀦𑁆𑀦𑁄’’𑀢𑀺 𑀅𑀢𑁆𑀣𑀺𑀓𑁄 𑀳𑀼𑀢𑁆𑀯𑀸.

𑁯. 𑀧𑀞𑀫𑀉𑀧𑁆𑀧𑀦𑁆𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁯𑁦. 𑀢𑀣𑀸𑀕𑀢𑀲𑁆𑀲 𑀧𑀸𑀢𑀼𑀪𑀸𑀯𑀸𑀢𑀺𑀆𑀤𑀺𑀦𑀸 𑀩𑀼𑀤𑁆𑀥𑀼𑀧𑁆𑀧𑀸𑀤𑀓𑀸𑀮𑁂 𑀏𑀯 𑀩𑁄𑀚𑁆𑀛𑀗𑁆𑀕𑀭𑀢𑀦𑀧𑀝𑀺𑀮𑀸𑀪𑁄𑀢𑀺 𑀤𑀲𑁆𑀲𑁂𑀢𑀺.

𑀧𑀩𑁆𑀩𑀢𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀕𑀺𑀮𑀸𑀦𑀯𑀕𑁆𑀕𑁄

𑁧-𑁩. 𑀧𑀸𑀡𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁯𑁨-𑁧𑁯𑁪. 𑀬𑁂𑀲𑀦𑁆𑀢𑀺 𑀬𑁂𑀲𑀁 𑀲𑀢𑁆𑀢𑀸𑀦𑀁. 𑀘𑀢𑁆𑀢𑀸𑀭𑁄 𑀇𑀭𑀺𑀬𑀸𑀧𑀣𑀸 𑀅𑀢𑁆𑀣𑀺 𑀮𑀩𑁆𑀪𑀦𑁆𑀢𑀺 𑀢𑀤𑀼𑀧𑀕𑀲𑀭𑀻𑀭𑀸𑀯𑀬𑀯𑀮𑀸𑀪𑁂𑀦. 𑀏𑀢𑀦𑁆𑀢𑀺 ‘‘𑀘𑀢𑁆𑀢𑀸𑀭𑁄 𑀇𑀭𑀺𑀬𑀸𑀧𑀣𑁂 𑀓𑀧𑁆𑀧𑁂𑀦𑁆𑀢𑀻’’𑀢𑀺 𑀏𑀢𑀁 𑀯𑀘𑀦𑀁. ‘‘𑀯𑀺𑀯𑁂𑀓𑀦𑀺𑀲𑁆𑀲𑀺𑀢’’𑀦𑁆𑀢𑀺𑀆𑀤𑀺𑀯𑀘𑀦𑀢𑁄 ‘‘𑀲𑀳𑀯𑀺𑀧𑀲𑁆𑀲𑀦𑀓𑁂 𑀫𑀕𑁆𑀕𑀩𑁄𑀚𑁆𑀛𑀗𑁆𑀕𑁂’’𑀇𑀘𑁆𑀘𑁂𑀯 𑀯𑀼𑀢𑁆𑀢𑀁. 𑀤𑀼𑀢𑀺𑀬𑀢𑀢𑀺𑀬𑀸𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑁂𑀯 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀢𑁆𑀢𑀸.

𑁪-𑁧𑁦. 𑀧𑀞𑀫𑀕𑀺𑀮𑀸𑀦𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁯𑁫-𑁨𑁦𑁧. 𑀯𑀺𑀲𑀼𑀤𑁆𑀥𑀁 𑀅𑀳𑁄𑀲𑀺 𑀯𑀺𑀲𑀪𑀸𑀕𑀥𑀸𑀢𑀼𑀓𑁆𑀔𑁄𑀪𑀁 𑀯𑀽𑀧𑀲𑀫𑁂𑀦𑁆𑀢𑀁. 𑀢𑁂𑀦𑀸𑀳 𑁋 ‘‘𑀧𑁄𑀓𑁆𑀔𑀭𑀧𑀢𑁆𑀢𑁂 …𑀧𑁂… 𑀯𑀺𑀦𑀺𑀯𑀢𑁆𑀢𑀺𑀢𑁆𑀯𑀸 𑀕𑀢𑁄’’𑀢𑀺. 𑀏𑀲𑁂𑀯 𑀦𑀬𑁄 𑀧𑀸𑀴𑀺𑀢𑁄 𑀅𑀢𑁆𑀣𑀢𑁄 𑀘 𑀘𑀢𑀼𑀢𑁆𑀣𑁂𑀦 𑀧𑀜𑁆𑀘𑀫𑀙𑀝𑁆𑀞𑀸𑀦𑀁 𑀲𑀫𑀸𑀦𑀢𑁆𑀢𑀸. 𑀯𑀺𑀲𑀭𑀼𑀓𑁆𑀔𑀯𑀸𑀢𑀲𑀫𑁆𑀨𑀲𑁆𑀲𑁂𑀦𑀸𑀢𑀺 𑀯𑀺𑀲𑀭𑀼𑀓𑁆𑀔𑀲𑀦𑁆𑀦𑀺𑀲𑁆𑀲𑀺𑀢𑀯𑀸𑀢𑀲𑀫𑁆𑀨𑀲𑁆𑀲𑁂𑀦. 𑀫𑀦𑁆𑀤𑀲𑀻𑀢𑀚𑀭𑁄𑀢𑀺 𑀫𑀼𑀤𑀼𑀓𑁄 𑀲𑀻𑀢𑀚𑀭𑁄. 𑀲𑁂𑀲𑀦𑁆𑀢𑀺 𑀯𑀼𑀢𑁆𑀢𑀸𑀯𑀲𑁂𑀲𑀁. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀢𑁆𑀢𑀫𑀸𑀤𑀻𑀲𑀼 𑀘𑀢𑀽𑀲𑀼.

𑀕𑀺𑀮𑀸𑀦𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀉𑀤𑀸𑀬𑀺𑀯𑀕𑁆𑀕𑁄

𑁧-𑁨. 𑀩𑁄𑀥𑀸𑀬𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁨𑁦𑁨-𑁨𑁦𑁩. 𑀓𑀺𑀢𑁆𑀢𑀓𑁂𑀦 𑀦𑀼 𑀔𑁄 𑀓𑀸𑀭𑀡𑁂𑀦 𑀩𑀼𑀚𑁆𑀛𑀦𑀓𑀅𑀗𑁆𑀕𑀸 𑀦𑀸𑀫 𑀯𑀼𑀘𑁆𑀘𑀦𑁆𑀢𑀺 𑀩𑀼𑀚𑁆𑀛𑀦𑀓𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀅𑀗𑁆𑀕𑀸𑀢𑀺 𑀯𑀢𑁆𑀢𑀩𑁆𑀩𑀢𑀁 𑀮𑀪𑀦𑁆𑀢𑀺. 𑀫𑀺𑀲𑁆𑀲𑀓𑀩𑁄𑀚𑁆𑀛𑀗𑁆𑀕𑀸 𑀓𑀣𑀺𑀢𑀸 𑀲𑀳𑀯𑀺𑀧𑀲𑁆𑀲𑀦𑀸 𑀫𑀕𑁆𑀕𑀩𑁄𑀚𑁆𑀛𑀗𑁆𑀕𑀸 𑀓𑀣𑀺𑀢𑀸𑀢𑀺 𑀓𑀢𑁆𑀯𑀸. 𑀥𑀫𑁆𑀫𑀧𑀭𑀺𑀘𑁆𑀙𑁂𑀤𑁄 𑀓𑀣𑀺𑀢𑁄 𑀕𑀡𑀦𑀸𑀫𑀢𑁆𑀢𑁂𑀦 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀯𑀼𑀢𑁆𑀢𑀢𑁆𑀢𑀸 𑀦 𑀪𑀽𑀫𑀦𑁆𑀢𑀭𑀧𑀭𑀺𑀘𑁆𑀙𑁂𑀤𑁄, 𑀯𑀺𑀧𑀲𑁆𑀲𑀦𑀸𑀤𑀺𑀧𑀭𑀺𑀘𑁆𑀙𑁂𑀤𑁄 𑀯𑀸.

𑁩-𑁫. 𑀞𑀸𑀦𑀺𑀬𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁨𑁦𑁪-𑁨𑁦𑁬. 𑀓𑀸𑀫𑀭𑀸𑀕𑁂𑀦 𑀕𑀥𑀺𑀢𑀩𑁆𑀩𑀝𑁆𑀞𑀸𑀦𑀪𑀽𑀢𑀸 𑀓𑀸𑀫𑀭𑀸𑀕𑀝𑁆𑀞𑀸𑀦𑀺𑀬𑀸𑀢𑀺 𑀆𑀳 ‘‘𑀆𑀭𑀫𑁆𑀫𑀡𑀥𑀫𑁆𑀫𑀸𑀦’’𑀦𑁆𑀢𑀺. ‘‘𑀫𑀦𑀲𑀺𑀓𑀸𑀭𑀩𑀳𑀼𑀮𑀻𑀓𑀸𑀭𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 ‘‘𑀆𑀭𑀫𑁆𑀫𑀡𑁂𑀦𑁂𑀯 𑀓𑀣𑀺𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀯𑀼𑀢𑁆𑀢𑀧𑀭𑀺𑀘𑁆𑀙𑁂𑀤𑁄𑀢𑀺 𑀏𑀢𑁂𑀦 𑀦 𑀓𑁂𑀯𑀮𑀁 𑀆𑀭𑀫𑁆𑀫𑀡𑀯𑀲𑁂𑀦𑁂𑀯, 𑀅𑀣 𑀔𑁄 𑀉𑀧𑀦𑀺𑀲𑁆𑀲𑀬𑀯𑀲𑁂𑀦𑀧𑁂𑀢𑁆𑀣 𑀅𑀢𑁆𑀣𑁄 𑀮𑀩𑁆𑀪𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀧𑀞𑀫𑀯𑀕𑁆𑀕𑀲𑁆𑀲 𑀳𑀺 𑀤𑀼𑀢𑀺𑀬𑁂 𑀲𑀼𑀢𑁆𑀢𑁂 𑀉𑀧𑀦𑀺𑀲𑁆𑀲𑀬𑀯𑀲𑁂𑀦𑁂𑀯 𑀅𑀢𑁆𑀣𑁄 𑀤𑀲𑁆𑀲𑀺𑀢𑁄. 𑀫𑀺𑀲𑁆𑀲𑀓𑀩𑁄𑀚𑁆𑀛𑀗𑁆𑀕𑀸 𑀓𑀣𑀺𑀢𑀸 𑀅𑀯𑀺𑀪𑀸𑀕𑁂𑀦𑁂𑀯 𑀓𑀣𑀺𑀢𑀢𑁆𑀢𑀸. 𑀅𑀧𑀭𑀺𑀳𑀸𑀦𑀺𑀬𑁂𑀢𑀺 𑀢𑀻𑀳𑀺 𑀲𑀺𑀓𑁆𑀔𑀸𑀳𑀺 𑀅𑀧𑀭𑀺𑀳𑀸𑀦𑀸𑀯𑀳𑁂.

𑁬-𑁭. 𑀢𑀡𑁆𑀳𑀓𑁆𑀔𑀬𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁨𑁦𑁭-𑁨𑁦𑁮. ‘‘𑀲𑁄 𑀫𑀁 𑀧𑀼𑀘𑁆𑀙𑀺𑀲𑁆𑀲𑀢𑀻’’𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀪𑀕𑀯𑀢𑀸 𑀑𑀲𑀸𑀧𑀺𑀢𑀤𑁂𑀲𑀦𑀁. 𑀧𑀢𑁆𑀣𑀝𑀢𑁆𑀢𑀸 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀬𑀸 𑀯𑀺𑀢𑁆𑀣𑀸𑀭𑀺𑀢𑀁 𑀕𑀢𑀢𑁆𑀢𑀸. 𑀫𑀳𑀦𑁆𑀢𑀪𑀸𑀯𑀦𑁆𑀢𑀺 𑀪𑀸𑀯𑀦𑀸𑀯𑀲𑁂𑀦𑁂𑀯 𑀫𑀳𑀢𑁆𑀢𑀁 𑀕𑀢𑀢𑁆𑀢𑀸. 𑀢𑀢𑁄 𑀏𑀯 𑀯𑀟𑁆𑀠𑀺𑀧𑁆𑀧𑀫𑀸𑀡𑀸. 𑀦𑀻𑀯𑀭𑀡𑀯𑀺𑀕𑀫𑁂 𑀲𑀫𑁆𑀪𑀯𑀢𑁄 𑀧𑀘𑁆𑀘𑀬𑀢𑁄 𑀩𑁆𑀬𑀸𑀧𑀸𑀤𑁄 𑀯𑀺𑀕𑀢𑁄 𑀳𑁄𑀢𑀻𑀢𑀺 𑀆𑀳 𑁋 ‘‘𑀦𑀻𑀯𑀭𑀡𑀸𑀦𑀁 𑀤𑀽𑀭𑀻𑀪𑀸𑀯𑁂𑀦 𑀩𑁆𑀬𑀸𑀧𑀸𑀤𑀯𑀺𑀭𑀳𑀺𑀢𑀢𑁆𑀢𑀸’’𑀢𑀺. 𑀢𑀡𑁆𑀳𑀸𑀫𑀽𑀮𑀓𑀦𑁆𑀢𑀺 𑀢𑀡𑁆𑀳𑀸𑀧𑀘𑁆𑀘𑀬𑀁. 𑀬𑀜𑁆𑀳𑀺 𑀢𑀡𑁆𑀳𑀸𑀲𑀳𑀕𑀢𑀁 𑀅𑀲𑀳𑀕𑀢𑀫𑁆𑀧𑀺 𑀢𑀡𑁆𑀳𑀁 𑀉𑀧𑀦𑀺𑀲𑁆𑀲𑀸𑀬 𑀦𑀺𑀧𑁆𑀨𑀦𑁆𑀦𑀁, 𑀲𑀩𑁆𑀩𑀁 𑀢𑀁 𑀢𑀡𑁆𑀳𑀸𑀫𑀽𑀮𑀓𑀁. 𑀧𑀳𑀻𑀬𑀢𑀺 𑀅𑀦𑀼𑀧𑁆𑀧𑀸𑀤𑀧𑁆𑀧𑀳𑀸𑀦𑁂𑀦. 𑀢𑀡𑁆𑀳𑀸𑀤𑀻𑀦𑀁𑀬𑁂𑀯 𑀔𑀬𑀸, 𑀦 𑀢𑁂𑀲𑀁 𑀲𑀗𑁆𑀔𑀸𑀭𑀸𑀦𑀁 𑀔𑀬𑀸. 𑀏𑀢𑁂𑀳𑀺 𑀢𑀡𑁆𑀳𑀓𑁆𑀔𑀬𑀸𑀤𑀺𑀧𑀤𑁂𑀳𑀺.

𑁮. 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁦𑁯. 𑀦𑀺𑀩𑁆𑀩𑀺𑀚𑁆𑀛𑀦𑁆𑀢𑀻𑀢𑀺 𑀦𑀺𑀩𑁆𑀩𑁂𑀥𑀸, 𑀦𑀺𑀩𑁆𑀩𑀺𑀚𑁆𑀛𑀦𑀥𑀫𑁆𑀫𑀸 𑀥𑀫𑁆𑀫𑀯𑀺𑀦𑀬𑀸𑀤𑀬𑁄, 𑀢𑀧𑁆𑀧𑀭𑀺𑀬𑀸𑀧𑀦𑁆𑀦𑀢𑀸𑀬 𑀦𑀺𑀩𑁆𑀩𑁂𑀥𑀪𑀸𑀕𑁂 𑀕𑀢𑁄 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑁄, 𑀢𑀁 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀁. 𑀢𑁂𑀦𑀸𑀳 ‘‘𑀦𑀺𑀩𑁆𑀩𑀺𑀚𑁆𑀛𑀦𑀓𑁄𑀝𑁆𑀞𑀸𑀲𑀺𑀬’’𑀦𑁆𑀢𑀺. 𑀪𑀸𑀯𑁂𑀢𑁆𑀯𑀸 𑀞𑀺𑀢𑁂𑀦 𑀘𑀺𑀢𑁆𑀢𑁂𑀦. 𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀫𑁆𑀧𑀺 𑀕𑀳𑁂𑀢𑁆𑀯𑀸 ‘‘𑀫𑀕𑁆𑀕𑀩𑁄𑀚𑁆𑀛𑀗𑁆𑀕𑀸 𑀫𑀺𑀲𑁆𑀲𑀓𑀸’’𑀢𑀺 𑀯𑀼𑀢𑁆𑀢𑀸. 𑀢𑁂𑀳𑀻𑀢𑀺 𑀩𑁄𑀚𑁆𑀛𑀗𑁆𑀕𑁂𑀳𑀺 𑀪𑀸𑀯𑀺𑀢𑀁 𑀘𑀺𑀢𑁆𑀢𑀁. 𑀢𑁂 𑀯𑀸 𑀩𑁄𑀚𑁆𑀛𑀗𑁆𑀕𑁂 𑀪𑀸𑀯𑁂𑀢𑁆𑀯𑀸 𑀞𑀺𑀢𑀁 𑀘𑀺𑀢𑁆𑀢𑀁 𑀦𑀸𑀫 𑀨𑀮𑀘𑀺𑀢𑁆𑀢𑀁, 𑀢𑀲𑁆𑀫𑀸 𑀦𑀺𑀩𑁆𑀩𑀢𑁆𑀢𑀺𑀢𑀮𑁄𑀓𑀼𑀢𑁆𑀢𑀭𑀫𑁂𑀯. 𑀢𑀫𑁆𑀧𑀻𑀢𑀺 𑀨𑀮𑀘𑀺𑀢𑁆𑀢𑀫𑁆𑀧𑀺 𑀫𑀕𑁆𑀕𑀸𑀦𑀦𑁆𑀢𑀭𑀢𑀸𑀬 𑀫𑀕𑁆𑀕𑀦𑀺𑀲𑁆𑀲𑀺𑀢𑀁 𑀓𑀢𑁆𑀯𑀸 𑀫𑀺𑀲𑁆𑀲𑀓𑀫𑁂𑀯 𑀓𑀣𑁂𑀢𑀼𑀁 𑀯𑀝𑁆𑀝𑀢𑀺 ‘‘𑀩𑁄𑀥𑀸𑀬 𑀲𑀁𑀯𑀢𑁆𑀢𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸.

𑁯. 𑀏𑀓𑀥𑀫𑁆𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁧𑁦. 𑀲𑀁𑀬𑁄𑀚𑀦𑀲𑀗𑁆𑀔𑀸𑀢𑀸 𑀯𑀺𑀦𑀺𑀩𑀦𑁆𑀥𑀸𑀢𑀺 𑀓𑀸𑀫𑀭𑀸𑀕𑀸𑀤𑀺𑀲𑀁𑀬𑁄𑀚𑀦𑀲𑀜𑁆𑀜𑀺𑀢𑀸 𑀩𑀦𑁆𑀥𑀦𑀸. 𑀧𑀭𑀺𑀦𑀺𑀝𑁆𑀞𑀧𑁂𑀢𑁆𑀯𑀸 𑀕𑀳𑀡𑀸𑀢𑀺 𑀕𑀺𑀮𑀺𑀢𑁆𑀯𑀸 𑀯𑀺𑀬 𑀧𑀭𑀺𑀦𑀺𑀝𑁆𑀞𑀧𑁂𑀢𑁆𑀯𑀸 𑀕𑀳𑀡𑀸𑀓𑀸𑀭𑀸.

𑁧𑁦. 𑀉𑀤𑀸𑀬𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁧𑁧. 𑀩𑀳𑀼𑀓𑀢𑀁 𑀯𑀼𑀘𑁆𑀘𑀢𑀺 𑀩𑀳𑀼𑀓𑀸𑀭𑁄 𑀩𑀳𑀼𑀫𑀸𑀦𑁄, 𑀦𑀢𑁆𑀣𑀺 𑀏𑀢𑀲𑁆𑀲 𑀩𑀳𑀼𑀓𑀢𑀦𑁆𑀢𑀺 𑀅𑀩𑀳𑀼𑀓𑀢𑁄, 𑀅𑀓𑀢𑀩𑀳𑀼𑀫𑀸𑀦𑁄. 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀫𑀸𑀦𑁄 𑀉𑀓𑁆𑀓𑀼𑀚𑁆𑀚𑀦𑁆𑀢𑁄 𑀯𑀺𑀬 𑀦𑀺𑀭𑀼𑀚𑁆𑀛𑀫𑀸𑀦𑁄 𑀅𑀯𑀓𑀼𑀚𑁆𑀚𑀦𑁆𑀢𑁄 𑀯𑀺𑀬 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀉𑀓𑁆𑀓𑀼𑀚𑁆𑀚𑀁 𑀯𑀼𑀘𑁆𑀘𑀢𑀺 𑀉𑀤𑀬𑁄, 𑀅𑀯𑀓𑀼𑀚𑁆𑀚𑀁 𑀯𑀬𑁄’’𑀢𑀺. 𑀧𑀭𑀺𑀯𑀢𑁆𑀢𑁂𑀦𑁆𑀢𑁄𑀢𑀺 𑀅𑀦𑀺𑀘𑁆𑀘𑀸𑀢𑀺𑀧𑀺 𑀤𑀼𑀓𑁆𑀔𑀸𑀢𑀺𑀧𑀺 𑀅𑀦𑀢𑁆𑀢𑀸𑀢𑀺𑀧𑀺. ‘‘𑀏𑀲𑁄 𑀳𑀺 𑀢𑁂 𑀉𑀤𑀸𑀬𑀺 𑀫𑀕𑁆𑀕𑁄 𑀧𑀝𑀺𑀮𑀤𑁆𑀥𑁄, 𑀬𑁄 𑀢𑁂…𑀧𑁂… 𑀢𑀣𑀢𑁆𑀢𑀸𑀬 𑀉𑀧𑀦𑁂𑀲𑁆𑀲𑀢𑀻’’𑀢𑀺 𑀧𑀭𑀺𑀬𑁄𑀲𑀸𑀦𑁂 𑀪𑀕𑀯𑀢𑁄 𑀯𑀘𑀦𑀜𑁆𑀘𑁂𑀢𑁆𑀣 𑀲𑀸𑀥𑀓𑀁 𑀤𑀝𑁆𑀞𑀩𑁆𑀩𑀁. 𑀢𑁂𑀦 𑀢𑁂𑀦𑀸𑀓𑀸𑀭𑁂𑀦 𑀯𑀺𑀳𑀭𑀦𑁆𑀢𑀦𑁆𑀢𑀺 𑀬𑁂𑀦 𑀲𑀫𑁆𑀫𑀲𑀦𑀸𑀓𑀸𑀭𑁂𑀦 𑀯𑀺𑀧𑀲𑁆𑀲𑀦𑀸𑀯𑀺𑀳𑀸𑀭𑁂𑀦 𑀯𑀺𑀳𑀭𑀦𑁆𑀢𑀁. 𑀢𑀣𑀸𑀪𑀸𑀯𑀸𑀬𑀸𑀢𑀺 𑀔𑀻𑀡𑀸𑀲𑀯𑀪𑀸𑀯𑀧𑀘𑁆𑀘𑀯𑁂𑀓𑁆𑀔𑀡𑀸𑀬. 𑀢𑁂𑀦𑀸𑀳 𑁋 ‘‘𑀔𑀻𑀡𑀸 𑀚𑀸𑀢𑀻𑀢𑀺…𑀧𑁂… 𑀢𑀁 𑀤𑀲𑁆𑀲𑁂𑀦𑁆𑀢𑁄 𑀏𑀯𑀫𑀸𑀳𑀸’’𑀢𑀺.

𑀉𑀤𑀸𑀬𑀺𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀦𑀻𑀯𑀭𑀡𑀯𑀕𑁆𑀕𑁄

𑁩-𑁪. 𑀉𑀧𑀓𑁆𑀓𑀺𑀮𑁂𑀲𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁨𑁧𑁪-𑁨𑁧𑁫. 𑀦 𑀘 𑀧𑀪𑀸𑀯𑀦𑁆𑀢𑀦𑁆𑀢𑀺 𑀦 𑀘 𑀧𑀪𑀸𑀲𑀫𑁆𑀧𑀦𑁆𑀦𑀁. 𑀧𑀪𑀺𑀚𑁆𑀚𑀦𑀲𑀪𑀸𑀯𑀦𑁆𑀢𑀺 𑀢𑀸𑀧𑁂𑀢𑁆𑀯𑀸 𑀢𑀸𑀮𑀦𑁂 𑀧𑀪𑀗𑁆𑀕𑀼𑀢𑀁. 𑀅𑀯𑀲𑁂𑀲𑀁 𑀮𑁄𑀳𑀦𑁆𑀢𑀺 𑀯𑀼𑀢𑁆𑀢𑀸𑀯𑀲𑁂𑀲𑀁 𑀚𑀸𑀢𑀺𑀮𑁄𑀳𑀁, 𑀯𑀺𑀚𑀸𑀢𑀺𑀮𑁄𑀳𑀁, 𑀓𑀺𑀢𑁆𑀢𑀺𑀫𑀮𑁄𑀳𑀦𑁆𑀢𑀺 𑀧𑀪𑁂𑀤𑀁 𑀲𑀩𑁆𑀩𑀫𑁆𑀧𑀺 𑀮𑁄𑀳𑀁. 𑀉𑀧𑁆𑀧𑀚𑁆𑀚𑀺𑀢𑀼𑀁 𑀅𑀧𑁆𑀧𑀤𑀸𑀦𑁂𑀦𑀸𑀢𑀺 𑀏𑀢𑁆𑀣 𑀦𑀦𑀼 𑀮𑁄𑀓𑀺𑀬𑀓𑀼𑀲𑀮𑀘𑀺𑀢𑁆𑀢𑀲𑁆𑀲𑀧𑀺 𑀲𑀼𑀯𑀺𑀲𑀼𑀤𑁆𑀥𑀲𑁆𑀲 𑀉𑀧𑁆𑀧𑀚𑁆𑀚𑀺𑀢𑀼𑀁 𑀅𑀧𑁆𑀧𑀤𑀸𑀦𑁂𑀦 𑀉𑀧𑀓𑁆𑀓𑀺𑀮𑁂𑀲𑀢𑀸𑀢𑀺? 𑀲𑀘𑁆𑀘𑀫𑁂𑀢𑀁, 𑀬𑀲𑁆𑀫𑀺𑀁 𑀧𑀦 𑀲𑀦𑁆𑀢𑀸𑀦𑁂 𑀦𑀻𑀯𑀭𑀡𑀸𑀦𑀺 𑀮𑀤𑁆𑀥𑀧𑀢𑀺𑀝𑁆𑀞𑀸𑀦𑀺, 𑀢𑀢𑁆𑀣 𑀫𑀳𑀕𑁆𑀕𑀢𑀓𑀼𑀲𑀮𑀲𑁆𑀲𑀧𑀺 𑀅𑀲𑀫𑁆𑀪𑀯𑁄, 𑀧𑀕𑁂𑀯 𑀮𑁄𑀓𑀼𑀢𑁆𑀢𑀭𑀓𑀼𑀲𑀮𑀲𑁆𑀲, 𑀧𑀭𑀺𑀢𑁆𑀢𑀓𑀼𑀲𑀮𑀁 𑀧𑀦 𑀬𑀣𑀸𑀧𑀘𑁆𑀘𑀬𑀁 𑀉𑀧𑁆𑀧𑀚𑁆𑀚𑀢𑀺. 𑀦𑀻𑀯𑀭𑀡𑁂 𑀳𑀺 𑀯𑀽𑀧𑀲𑀦𑁆𑀢𑁂 𑀲𑀦𑁆𑀢𑀸𑀦𑁂 𑀉𑀧𑁆𑀧𑀢𑁆𑀢𑀺𑀬𑀸 𑀅𑀧𑀭𑀺𑀲𑀼𑀤𑁆𑀥𑀁 𑀳𑁄𑀢𑀺, 𑀉𑀧𑀓𑁆𑀓𑀺𑀮𑀺𑀝𑁆𑀞𑀁 𑀦𑀸𑀫 𑀳𑁄𑀢𑀺, 𑀅𑀧𑀭𑀺𑀲𑀼𑀤𑁆𑀥𑀤𑀻𑀧𑀓𑀧𑀮𑁆𑀮𑀺𑀓𑀯𑀝𑁆𑀞𑀺𑀢𑁂𑀮𑀸𑀤𑀺𑀲𑀦𑁆𑀦𑀺𑀲𑁆𑀲𑀬𑁄 𑀤𑀻𑀧𑁄 𑀯𑀺𑀬, 𑀅𑀧𑀺𑀘 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀉𑀧𑁆𑀧𑀚𑁆𑀚𑀺𑀢𑀼𑀁 𑀅𑀧𑁆𑀧𑀤𑀸𑀦𑁂𑀦𑁂𑀯 𑀢𑁂𑀲𑀁 𑀉𑀧𑀓𑁆𑀓𑀺𑀮𑁂𑀲𑀢𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀤𑀕𑁆𑀕𑁂𑀦 𑀳𑀻’’𑀢𑀺𑀆𑀤𑀺𑀫𑀸𑀳. 𑀆𑀭𑀫𑁆𑀫𑀡𑁂 𑀯𑀺𑀓𑁆𑀔𑀺𑀢𑁆𑀢𑀧𑁆𑀧𑀢𑁆𑀢𑀺𑀯𑀲𑁂𑀦 𑀘𑀼𑀡𑁆𑀡𑀯𑀺𑀘𑀼𑀡𑁆𑀡𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀦 𑀆𑀯𑀭𑀦𑁆𑀢𑀻𑀢𑀺 𑀓𑀼𑀲𑀮𑀥𑀫𑁆𑀫𑁂 𑀉𑀧𑁆𑀧𑀚𑁆𑀚𑀺𑀢𑀼𑀁 𑀅𑀧𑁆𑀧𑀤𑀸𑀦𑀯𑀲𑁂𑀦 𑀦 𑀆𑀯𑀭𑀦𑁆𑀢𑀺, 𑀅𑀣 𑀔𑁄 𑀢𑁂𑀲𑀁 𑀉𑀧𑁆𑀧𑀢𑁆𑀢𑀺𑀬𑀸 𑀳𑁄𑀦𑁆𑀢𑀺. 𑀦 𑀧𑀝𑀺𑀘𑁆𑀙𑀸𑀤𑁂𑀦𑁆𑀢𑀻𑀢𑀺 𑀦 𑀯𑀺𑀦𑀦𑁆𑀥𑀦𑁆𑀢𑀺. 𑀘𑀢𑀼𑀪𑀽𑀫𑀓𑀘𑀺𑀢𑁆𑀢𑀲𑁆𑀲𑀸𑀢𑀺 𑀘𑀢𑀼𑀢𑁆𑀣𑀪𑀽𑀫𑀓𑀓𑀼𑀲𑀮𑀘𑀺𑀢𑁆𑀢𑀲𑁆𑀲 𑀅𑀦𑀼𑀧𑀓𑁆𑀓𑀺𑀮𑁂𑀲𑀸, 𑀢𑁂𑀳𑀺 𑀅𑀓𑀺𑀮𑀺𑀲𑁆𑀲𑀦𑀢𑁄.

𑁮. 𑀆𑀯𑀭𑀡𑀦𑀻𑀯𑀭𑀡𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁧𑁯. 𑀧𑀜𑁆𑀜𑀸 𑀤𑀼𑀩𑁆𑀩𑀮𑀸 𑀳𑁄𑀢𑀺, 𑀦 𑀩𑀮𑀯𑀢𑀻 𑀧𑀝𑀺𑀧𑀓𑁆𑀔𑁂𑀦 𑀉𑀧𑀓𑁆𑀓𑀺𑀮𑀺𑀝𑁆𑀞𑀪𑀸𑀯𑀢𑁄. 𑀢𑁂𑀦𑀸𑀳 ‘‘𑀫𑀦𑁆𑀤𑀸 𑀅𑀯𑀺𑀲𑀤𑀸’’𑀢𑀺.

𑀧𑀜𑁆𑀘 𑀦𑀻𑀯𑀭𑀡𑀸 𑀤𑀽𑀭𑁂 𑀳𑁄𑀦𑁆𑀢𑀺 𑀆𑀯𑀭𑀡𑀸𑀪𑀸𑀯𑀢𑁄. 𑀢𑀫𑁂𑀯 𑀧𑀻𑀢𑀺𑀦𑁆𑀢𑀺 𑀲𑀧𑁆𑀧𑀸𑀬𑀥𑀫𑁆𑀫𑀲𑀯𑀦𑁂 𑀉𑀧𑁆𑀧𑀦𑁆𑀦𑀁 𑀧𑀻𑀢𑀺𑀁. 𑀢𑀲𑁆𑀲𑀸 𑀢𑀤𑀸 𑀉𑀧𑁆𑀧𑀦𑁆𑀦𑀸𑀓𑀸𑀭𑀲𑀮𑁆𑀮𑀓𑁆𑀔𑀡𑁂𑀦 𑀅𑀯𑀺𑀚𑀳𑀦𑁆𑀢𑁄 𑀧𑀼𑀦𑀧𑁆𑀧𑀼𑀦𑀁 𑀢𑀲𑁆𑀲𑀸 𑀦𑀺𑀩𑁆𑀩𑀢𑁆𑀢𑀦𑁂𑀦. 𑀢𑁂𑀦𑀸𑀳 ‘‘𑀧𑀜𑁆𑀘 𑀦𑀻𑀯𑀭𑀡𑁂 𑀯𑀺𑀓𑁆𑀔𑀫𑁆𑀪𑁂𑀢𑁆𑀯𑀸’’𑀢𑀺. 𑀇𑀤𑀁 𑀲𑀦𑁆𑀥𑀸𑀬𑀸𑀢𑀺 𑀏𑀢𑁆𑀢𑀓𑁂 𑀤𑀺𑀯𑀲𑁂𑀧𑀺 𑀦 𑀯𑀺𑀦𑀲𑁆𑀲𑀦𑁆𑀢𑀺, 𑀲𑀸 𑀥𑀫𑁆𑀫𑀧𑀻𑀢𑀺 𑀮𑀤𑁆𑀥𑀧𑀘𑁆𑀘𑀬𑀸 𑀳𑀼𑀢𑁆𑀯𑀸 𑀯𑀺𑀲𑁂𑀲𑀸𑀯𑀳𑀸𑀢𑀺 𑀇𑀫𑀫𑀢𑁆𑀣𑀁 𑀲𑀦𑁆𑀥𑀸𑀬 𑀏𑀢𑀁 ‘‘𑀇𑀫𑀲𑁆𑀲 𑀧𑀜𑁆𑀘 𑀦𑀻𑀯𑀭𑀡𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀦 𑀳𑁄𑀦𑁆𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀻𑀢𑀺𑀧𑀸𑀫𑁄𑀚𑁆𑀚𑀧𑀓𑁆𑀔𑀺𑀬𑀸𑀢𑀺 𑀧𑀻𑀢𑀺𑀧𑀸𑀫𑁄𑀚𑁆𑀚𑀧𑀘𑁆𑀘𑀬𑀸. 𑀦𑀲𑁆𑀲𑀦𑁆𑀢𑀻𑀢𑀺 𑀦𑀺𑀭𑁄𑀥𑀧𑀘𑁆𑀘𑀬𑀯𑀲𑁂𑀦 𑀧𑀯𑀢𑁆𑀢𑀦𑀢𑁄 𑀦𑀲𑁆𑀲𑀦𑁆𑀢𑀺. 𑀲𑀪𑀸𑀕𑀧𑀘𑁆𑀘𑀬𑀯𑀲𑁂𑀦 𑀧𑀼𑀦 𑀉𑀧𑁆𑀧𑀚𑁆𑀚𑀦𑁆𑀢𑀸𑀧𑀺…𑀧𑁂… 𑀯𑀼𑀘𑁆𑀘𑀢𑀺 𑀓𑀺𑀘𑁆𑀘𑀲𑀸𑀥𑀦𑀯𑀲𑁂𑀦 𑀧𑀯𑀢𑁆𑀢𑀦𑀢𑁄.

𑁯. 𑀭𑀼𑀓𑁆𑀔𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁨𑁦. 𑀅𑀪𑀺𑀭𑀼𑀳𑀦𑀓𑀸𑀢𑀺 𑀲𑀫𑀻𑀧𑀭𑀼𑀓𑁆𑀔𑁂 𑀅𑀪𑀺𑀪𑀯𑀺𑀢𑁆𑀯𑀸 𑀭𑀼𑀳𑀦𑀓𑀸. 𑀅𑀝𑁆𑀞𑀺𑀓𑀘𑁆𑀙𑀓𑁄𑀢𑀺 𑀅𑀝𑁆𑀞𑀺𑀩𑀳𑀼𑀮𑀓𑀘𑁆𑀙𑀓𑁄. 𑀓𑀧𑀺𑀣𑀦𑀲𑀤𑀺𑀲𑀨𑀮𑀢𑁆𑀢𑀸 𑀓𑀧𑀺𑀢𑁆𑀣𑀦𑁄𑀢𑀺 𑀮𑀤𑁆𑀥𑀦𑀸𑀫𑁄.

𑁧𑁦. 𑀦𑀻𑀯𑀭𑀡𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁨𑁧. 𑀅𑀦𑁆𑀥𑀪𑀸𑀯𑀓𑀭𑀡𑀸 𑀧𑀜𑁆𑀜𑀸𑀘𑀓𑁆𑀔𑀼𑀲𑁆𑀲 𑀯𑀺𑀩𑀦𑁆𑀥𑀦𑀢𑁄. 𑀢𑀣𑀸 𑀳𑀺 𑀢𑁂 ‘‘𑀅𑀘𑀓𑁆𑀔𑀼𑀓𑀭𑀡𑀸 𑀧𑀜𑁆𑀜𑀸𑀦𑀺𑀭𑁄𑀥𑀺𑀓𑀸’’𑀢𑀺 𑀯𑀼𑀢𑁆𑀢𑀸. 𑀯𑀺𑀳𑀦𑀢𑀺 𑀯𑀺𑀩𑀸𑀥𑀢𑀻𑀢𑀺 𑀯𑀺𑀖𑀸𑀢𑁄, 𑀤𑀼𑀓𑁆𑀔𑀦𑁆𑀢𑀺 𑀆𑀳 ‘‘𑀯𑀺𑀖𑀸𑀢𑀧𑀓𑁆𑀔𑀺𑀬𑀸𑀢𑀺 𑀤𑀼𑀓𑁆𑀔𑀧𑀓𑁆𑀔𑀺𑀓𑀸’’𑀢𑀺. 𑀦𑀺𑀩𑁆𑀩𑀸𑀦𑀢𑁆𑀣𑀸𑀬 𑀦 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀅𑀦𑀺𑀩𑁆𑀩𑀸𑀦𑀲𑀁𑀯𑀢𑁆𑀢𑀦𑀺𑀓𑀸. 𑀫𑀺𑀲𑁆𑀲𑀓𑀩𑁄𑀚𑁆𑀛𑀗𑁆𑀕𑀸𑀯 𑀓𑀣𑀺𑀢𑀸 𑀧𑀼𑀩𑁆𑀩𑀪𑀸𑀕𑀺𑀓𑀸𑀦𑀁 𑀓𑀣𑀺𑀢𑀢𑁆𑀢𑀸.

𑀦𑀻𑀯𑀭𑀡𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀘𑀓𑁆𑀓𑀯𑀢𑁆𑀢𑀺𑀯𑀕𑁆𑀕𑁄

𑁧. 𑀯𑀺𑀥𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁨𑁨. 𑀯𑀺𑀥𑀻𑀬𑀦𑁆𑀢𑀻𑀢𑀺 𑀯𑀺𑀥𑀸, 𑀫𑀸𑀦𑀸𑀤𑀺𑀪𑀸𑀕𑀸 𑀓𑁄𑀝𑁆𑀞𑀸𑀲𑀸𑀢𑀺 𑀆𑀳 ‘‘𑀢𑀬𑁄 𑀫𑀸𑀦𑀓𑁄𑀝𑁆𑀞𑀸𑀲𑀸’’𑀢𑀺. 𑀢𑀣𑀸 𑀢𑀣𑀸 𑀯𑀺𑀤𑀳𑀦𑀢𑁄𑀢𑀺 ‘‘𑀲𑁂𑀬𑁆𑀬𑁄𑀳𑀫𑀲𑁆𑀫𑀻’’𑀢𑀺𑀆𑀤𑀺𑀦𑀸 𑀢𑁂𑀦 𑀢𑁂𑀦𑀸𑀓𑀸𑀭𑁂𑀦 𑀯𑀺𑀤𑀳𑀦𑀢𑁄 𑀞𑀧𑀦𑀢𑁄, 𑀞𑀧𑁂𑀢𑀩𑁆𑀩𑀢𑁄 𑀯𑀸.

𑁨. 𑀘𑀓𑁆𑀓𑀯𑀢𑁆𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁨𑁩. 𑀲𑀺𑀭𑀺𑀲𑀫𑁆𑀧𑀢𑁆𑀢𑀺𑀬𑀸 𑀭𑀸𑀚𑀢𑀺 𑀤𑀺𑀧𑁆𑀧𑀢𑀺 𑀲𑁄𑀪𑀢𑀻𑀢𑀺 𑀭𑀸𑀚𑀸, 𑀤𑀸𑀦𑀧𑀺𑀬𑀯𑀘𑀦𑀅𑀢𑁆𑀣𑀘𑀭𑀺𑀬𑀸𑀲𑀫𑀸𑀦𑀢𑁆𑀢𑀢𑀸𑀲𑀗𑁆𑀔𑀸𑀢𑁂𑀳𑀺 𑀘𑀢𑀽𑀳𑀺 𑀲𑀗𑁆𑀕𑀳𑀯𑀢𑁆𑀣𑀽𑀳𑀺. 𑀭𑀜𑁆𑀚𑁂𑀢𑀻𑀢𑀺 𑀭𑀫𑁂𑀢𑀺. 𑀅𑀩𑁆𑀪𑀼𑀕𑁆𑀕𑀢𑀸𑀬𑀸𑀢𑀺 𑀉𑀤𑀻𑀭𑀺𑀢𑀸 𑀦𑀺𑀩𑁆𑀩𑀢𑁆𑀢𑀺𑀢𑁄 𑀢𑀢𑁆𑀣 𑀢𑀢𑁆𑀣 𑀕𑀘𑁆𑀙𑀦𑀢𑁄. 𑀘𑀓𑁆𑀓𑀁 𑀯𑀢𑁆𑀢𑁂𑀢𑀻𑀢𑀺 𑀘𑀓𑁆𑀓𑀭𑀢𑀦𑀁 𑀧𑀯𑀢𑁆𑀢𑁂𑀢𑀺. 𑀤𑁂𑀯𑀝𑁆𑀞𑀸𑀦𑀦𑁆𑀢𑀺 𑀧𑀽𑀚𑀦𑀻𑀬𑀤𑁂𑀯𑀝𑁆𑀞𑀸𑀦𑀁. 𑀘𑀺𑀢𑁆𑀢𑀻𑀓𑀢𑀝𑁆𑀞𑁂𑀦𑀸𑀢𑀺 𑀧𑀽𑀚𑀦𑀻𑀬𑀪𑀸𑀯𑁂𑀦. 𑀅𑀕𑁆𑀖𑁄 𑀦𑀢𑁆𑀣𑀺 𑀘𑀺𑀭𑀓𑀸𑀮𑀲𑀫𑁆𑀪𑀯𑀧𑀼𑀜𑁆𑀜𑀸𑀦𑀼𑀪𑀸𑀯𑀲𑀺𑀤𑁆𑀥𑀭𑀢𑀦𑀲𑀩𑁆𑀪𑀸𑀯𑀢𑁄. 𑀅𑀜𑁆𑀜𑁂𑀳𑀺 𑀘𑀓𑁆𑀓𑀯𑀢𑁆𑀢𑀺𑀦𑁄 𑀧𑀭𑀺𑀕𑁆𑀕𑀳𑀪𑀽𑀢𑀭𑀢𑀦𑁂𑀳𑀺. 𑀮𑁄𑀓𑁂𑀢𑀺 𑀫𑀦𑀼𑀲𑁆𑀲𑀮𑁄𑀓𑁂. 𑀢𑁂𑀦 𑀢𑀤𑀜𑁆𑀜𑀮𑁄𑀓𑀁 𑀦𑀺𑀯𑀢𑁆𑀢𑁂𑀢𑀺. 𑀯𑀺𑀚𑁆𑀚𑀫𑀸𑀦𑀕𑁆𑀕𑀳𑀡𑁂𑀦 𑀅𑀢𑀻𑀢𑀸𑀦𑀸𑀕𑀢𑀁 𑀦𑀺𑀯𑀢𑁆𑀢𑁂𑀢𑀺. 𑀩𑀼𑀤𑁆𑀥𑀸 𑀘 𑀓𑀤𑀸𑀘𑀺 𑀓𑀭𑀳𑀘𑀺 𑀉𑀧𑁆𑀧𑀚𑁆𑀚𑀦𑁆𑀢𑀺 𑀘𑀓𑁆𑀓𑀯𑀢𑁆𑀢𑀺𑀦𑁄𑀧𑀺 𑀬𑁂𑀪𑀼𑀬𑁆𑀬𑁂𑀦 𑀢𑀲𑁆𑀫𑀺𑀁𑀬𑁂𑀯 𑀉𑀧𑁆𑀧𑀚𑁆𑀚𑀦𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀦𑁄𑀫𑀲𑁆𑀲𑀸𑀢𑀺 𑀅𑀮𑀸𑀫𑀓𑀲𑁆𑀲 𑀉𑀓𑁆𑀓𑀝𑁆𑀞𑀲𑁆𑀲. 𑀲𑁂𑀲𑀸𑀦𑀺 𑀭𑀢𑀦𑀸𑀦𑀺.

𑀢𑀢𑁆𑀭𑀸𑀢𑀺 𑀯𑀸𑀓𑁆𑀬𑁄𑀧𑀜𑁆𑀜𑀸𑀲𑀦𑁂 𑀦𑀺𑀧𑀸𑀢𑁄, 𑀢𑀲𑁆𑀫𑀺𑀁 𑀧𑀸𑀢𑀼𑀪𑀸𑀯𑀯𑀘𑀦𑁂. ‘‘𑀅𑀬𑀼𑀢𑁆𑀢’’𑀦𑁆𑀢𑀺 𑀯𑀢𑁆𑀯𑀸 𑀢𑀢𑁆𑀣 𑀅𑀥𑀺𑀧𑁆𑀧𑀸𑀬𑀁 𑀯𑀺𑀯𑀭𑀦𑁆𑀢𑁄 ‘‘𑀉𑀧𑁆𑀧𑀦𑁆𑀦𑀁 𑀳𑀻’’𑀢𑀺𑀆𑀤𑀺𑀫𑀸𑀳. 𑀢𑁂𑀳𑀺 𑀭𑀢𑀦𑁂𑀳𑀺 𑀘𑀓𑁆𑀓𑀯𑀢𑁆𑀢𑀦𑀦𑀺𑀬𑀫𑀸𑀧𑁂𑀓𑁆𑀔𑀢𑀸𑀬 𑀘𑀓𑁆𑀓𑀯𑀢𑁆𑀢𑀺𑀯𑀘𑀦𑀲𑁆𑀲. 𑀦𑀺𑀬𑀫𑁂𑀦𑀸𑀢𑀺 𑀏𑀓𑀦𑁆𑀢𑁂𑀦. 𑀯𑀢𑁆𑀢𑀩𑁆𑀩𑀢𑀁 𑀆𑀧𑀚𑁆𑀚𑀢𑀺 𑀪𑀸𑀯𑀺𑀦𑀺 𑀪𑀽𑀢𑁂 𑀯𑀺𑀬 𑀉𑀧𑀘𑀸𑀭𑁄𑀢𑀺 𑀬𑀣𑀸 𑁋 ‘‘𑀅𑀕𑀫𑀸 𑀭𑀸𑀚𑀕𑀳𑀁 𑀩𑀼𑀤𑁆𑀥𑁄’’𑀢𑀺 (𑀲𑀼. 𑀦𑀺. 𑁪𑁧𑁦). 𑀮𑀤𑁆𑀥𑀦𑀸𑀫𑀲𑁆𑀲𑀸𑀢𑀺 𑀘𑀓𑁆𑀓𑀯𑀢𑁆𑀢𑀻𑀢𑀺 𑀮𑁄𑀓𑁂 𑀮𑀤𑁆𑀥𑀲𑀫𑀜𑁆𑀜𑀲𑁆𑀲 𑀧𑀢𑁆𑀣𑀦𑀻𑀬𑀲𑁆𑀲 𑀧𑀼𑀭𑀺𑀲𑀯𑀺𑀲𑁂𑀲𑀲𑁆𑀲. 𑀫𑀽𑀮𑀼𑀧𑁆𑀧𑀢𑁆𑀢𑀺𑀯𑀘𑀦𑀢𑁄𑀧𑀻𑀢𑀺 ‘‘𑀘𑀓𑁆𑀓𑀯𑀢𑁆𑀢𑀺𑀲𑁆𑀲 𑀧𑀸𑀢𑀼𑀪𑀸𑀯𑀸’’𑀢𑀺 𑀏𑀢𑀲𑁆𑀲 𑀧𑀞𑀫𑀼𑀧𑁆𑀧𑀢𑁆𑀢𑀺𑀬𑀸 𑀯𑀘𑀦𑀢𑁄𑀧𑀺. 𑀇𑀤𑀸𑀦𑀺 𑀢𑀫𑀢𑁆𑀣𑀁 𑀯𑀺𑀯𑀭𑀦𑁆𑀢𑁄 ‘‘𑀬𑁄 𑀳𑀻’’𑀢𑀺𑀆𑀤𑀺𑀫𑀸𑀳. 𑀬𑁄 𑀳𑀺 𑀘𑀓𑁆𑀓𑀯𑀢𑁆𑀢𑀺𑀭𑀸𑀚𑀸, 𑀢𑀲𑁆𑀲 𑀉𑀧𑁆𑀧𑀢𑁆𑀢𑀺𑀬𑀸 𑀘𑀓𑁆𑀓𑀭𑀢𑀦𑀲𑁆𑀲 𑀉𑀧𑁆𑀧𑀚𑁆𑀚𑀦𑀢𑁄 𑀘𑀓𑁆𑀓𑀯𑀢𑁆𑀢𑀻𑀢𑀺 𑀏𑀯𑀁 𑀦𑀸𑀫𑀁 𑀉𑀧𑁆𑀧𑀚𑁆𑀚𑀢𑀺. ‘‘𑀘𑀓𑁆𑀓𑀁 𑀯𑀢𑁆𑀢𑁂𑀲𑁆𑀲𑀢𑀻’’𑀢𑀺 𑀇𑀤𑀁 𑀧𑀦 𑀦𑀺𑀬𑀸𑀫𑀁 𑀅𑀦𑀧𑁂𑀓𑁆𑀔𑀺𑀢𑁆𑀯𑀸 𑀢𑀲𑁆𑀲 𑀉𑀧𑁆𑀧𑀚𑁆𑀚𑀢𑀻𑀢𑀺 𑀭𑀢𑀦𑀸𑀦𑀼𑀧𑁆𑀧𑀢𑁆𑀢𑀺𑀁 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀦𑀬𑀢𑁄 𑀲𑀜𑁆𑀜𑀸 𑀉𑀧𑁆𑀧𑀚𑁆𑀚𑀢𑀺 ‘‘𑀘𑀓𑁆𑀓𑀯𑀢𑁆𑀢𑀻’’𑀢𑀺. 𑀏𑀓𑀫𑁂𑀯𑀸𑀢𑀺 𑀘𑀓𑁆𑀓𑀭𑀢𑀦𑀫𑁂𑀯 𑀧𑀞𑀫𑀁 𑀧𑀸𑀢𑀼𑀪𑀯𑀢𑀺. 𑀬𑀲𑁆𑀫𑀺𑀁 𑀪𑀽𑀢𑁂 𑀭𑀜𑁆𑀜𑁄 𑀘𑀓𑁆𑀓𑀯𑀢𑁆𑀢𑀺𑀲𑀫𑀜𑁆𑀜𑀸, 𑀅𑀣 𑀧𑀘𑁆𑀙𑀸 𑀭𑀢𑀦𑀸𑀦𑀺 𑀧𑀸𑀢𑀼𑀪𑀯𑀦𑁆𑀢𑀻𑀢𑀺 𑀩𑀳𑀽𑀦𑀁 𑀧𑀸𑀢𑀼𑀪𑀸𑀯𑀁 𑀉𑀧𑀸𑀤𑀸𑀬 𑀩𑀳𑀼𑀮𑀯𑀘𑀦𑀢𑁄𑀧𑀺 𑀏𑀢𑀁 ‘‘𑀘𑀓𑁆𑀓𑀯𑀢𑁆𑀢𑀺𑀲𑁆𑀲 𑀧𑀸𑀢𑀼𑀪𑀸𑀯𑀸 𑀭𑀢𑀦𑀸𑀦𑀁 𑀧𑀸𑀢𑀼𑀪𑀸𑀯𑁄’’𑀢𑀺 𑀯𑀼𑀢𑁆𑀢𑀁. 𑀅𑀬𑀁 𑀳𑁂𑀢𑀼𑀓𑀢𑁆𑀢𑀼𑀲𑀜𑁆𑀜𑀺𑀢𑁄 𑀅𑀢𑁆𑀣𑀪𑁂𑀤𑁄. 𑀧𑀸𑀢𑀼𑀪𑀸𑀯𑀸𑀢𑀺 𑀧𑀸𑀢𑀼𑀪𑀸𑀯𑀢𑁄. 𑀧𑀼𑀜𑁆𑀜𑀲𑀫𑁆𑀪𑀸𑀭𑁄 𑀪𑀺𑀦𑁆𑀦𑀲𑀦𑁆𑀢𑀸𑀦𑀢𑀸𑀬 𑀭𑀢𑀦𑀸𑀦𑀫𑁆𑀧𑀺 𑀧𑀭𑀺𑀬𑀸𑀬𑁂𑀦 𑀉𑀧𑀦𑀺𑀲𑁆𑀲𑀬𑀳𑁂𑀢𑀽𑀢𑀺 𑀯𑀼𑀢𑁆𑀢𑀁. 𑀬𑀼𑀢𑁆𑀢𑀫𑁂𑀯𑁂𑀢𑀁 𑀬𑀣𑀸𑀯𑀼𑀢𑁆𑀢𑀬𑀼𑀢𑁆𑀢𑀺𑀬𑀼𑀢𑁆𑀢𑀢𑁆𑀢𑀸.

𑀯𑀢𑁆𑀢𑀩𑁆𑀩𑀪𑀽𑀢𑁄 𑀅𑀥𑀺𑀧𑁆𑀧𑀸𑀬𑁄 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀅𑀥𑀺𑀧𑁆𑀧𑀸𑀬𑁄, 𑀅𑀢𑁆𑀣𑀦𑀺𑀤𑁆𑀤𑁂𑀲𑁄, 𑀲𑀗𑁆𑀔𑁂𑀧𑀢𑁄 𑀅𑀥𑀺𑀧𑁆𑀧𑀸𑀬𑁄 𑀲𑀗𑁆𑀔𑁂𑀧𑀸𑀥𑀺𑀧𑁆𑀧𑀸𑀬𑁄. 𑀘𑀓𑁆𑀓𑀭𑀢𑀦𑀸𑀦𑀼𑀪𑀸𑀯𑁂𑀦 𑀘𑀓𑁆𑀓𑀯𑀢𑁆𑀢𑀺𑀲𑁆𑀲𑀭𑀺𑀬𑀲𑁆𑀲 𑀲𑀺𑀚𑁆𑀛𑀦𑀢𑁄 ‘‘𑀤𑀸𑀢𑀼𑀁 𑀲𑀫𑀢𑁆𑀣𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁. 𑀬𑁄𑀚𑀦𑀧𑁆𑀧𑀫𑀸𑀡𑁂 𑀧𑀤𑁂𑀲𑁂 𑀧𑀯𑀢𑁆𑀢𑀢𑁆𑀢𑀸 𑀬𑁄𑀚𑀦𑀧𑁆𑀧𑀫𑀸𑀡𑀁 𑀅𑀦𑁆𑀥𑀓𑀸𑀭𑀁. 𑀅𑀢𑀺𑀤𑀻𑀖𑀸𑀢𑀺𑀭𑀲𑁆𑀲𑀢𑀸𑀤𑀺𑀁 𑀙𑀩𑁆𑀩𑀺𑀥𑀁 𑀤𑁄𑀲𑀁 𑀯𑀺𑀯𑀚𑁆𑀚𑁂𑀢𑁆𑀯𑀸 𑀞𑀺𑀢𑀲𑁆𑀲𑀸𑀢𑀺 𑀯𑀘𑀦𑀲𑁂𑀲𑁄.

𑀲𑀩𑁆𑀩𑁂𑀲𑀁 𑀘𑀢𑀼𑀪𑀽𑀫𑀓𑀥𑀫𑁆𑀫𑀸𑀦𑀁 𑀧𑀼𑀭𑁂𑀘𑀭𑀁 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀕𑀢𑀺𑀬𑁄 𑀲𑀫𑀦𑁆𑀯𑁂𑀲𑀦𑀯𑀲𑁂𑀦 𑀧𑀯𑀢𑁆𑀢𑀦𑀢𑁄. 𑀩𑀼𑀤𑁆𑀥𑀸𑀤𑀻𑀳𑀺𑀧𑀺 𑀅𑀧𑁆𑀧𑀳𑀸𑀦𑀻𑀬𑀢𑀸𑀬 𑀫𑀳𑀦𑁆𑀢𑀥𑀫𑁆𑀫𑀲𑀪𑀸𑀯𑀢𑁆𑀢𑀸 𑀥𑀫𑁆𑀫𑀓𑀸𑀬𑁂 𑀘 𑀚𑁂𑀝𑁆𑀞𑀓𑀝𑁆𑀞𑁂𑀦 𑀥𑀫𑁆𑀫𑀓𑀸𑀬𑀽𑀧𑀧𑀦𑁆𑀦𑀁. 𑀧𑀜𑁆𑀜𑀸𑀧𑀸𑀲𑀸𑀤𑀢𑀸𑀬 𑀘𑀲𑁆𑀲 𑀉𑀧𑀭𑀺𑀕𑀢𑀝𑁆𑀞𑁂𑀦 𑀅𑀘𑁆𑀘𑀼𑀕𑁆𑀕𑀢𑀁. 𑀯𑀺𑀢𑁆𑀣𑀢𑀝𑁆𑀞𑁂𑀦 𑀯𑀺𑀧𑀼𑀮𑀁. 𑀫𑀳𑀦𑁆𑀢𑀢𑀸𑀬 𑀫𑀳𑀦𑁆𑀢𑀁. 𑀅𑀦𑀸𑀤𑀺𑀓𑀸𑀮𑀪𑀸𑀯𑀺𑀢𑀲𑁆𑀲 𑀓𑀺𑀮𑁂𑀲𑀲𑀦𑁆𑀢𑀸𑀦𑀲𑁆𑀲 𑀔𑀡𑁂𑀦𑁂𑀯 𑀯𑀺𑀤𑁆𑀥𑀁𑀲𑀦𑀢𑁄 𑀲𑀻𑀖𑀁 𑀮𑀳𑀼 𑀚𑀯𑀦𑁆𑀢𑀺 𑀧𑀭𑀺𑀬𑀸𑀬𑀸. 𑀩𑁄𑀚𑁆𑀛𑀗𑁆𑀕𑀥𑀫𑁆𑀫𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 𑀳𑀺 𑀯𑀼𑀢𑁆𑀢𑀁 ‘‘𑀏𑀓𑀦𑁆𑀢-𑀓𑀼𑀲𑀮𑀢𑁆𑀢𑀸’’𑀢𑀺. 𑀲𑀫𑁆𑀧𑀬𑀼𑀢𑁆𑀢𑀯𑀲𑁂𑀦 𑀧𑀻𑀢𑀺𑀬𑀸 𑀆𑀮𑁄𑀓𑀯𑀺𑀤𑁆𑀥𑀁𑀲𑀦𑀪𑀸𑀯𑀯𑀲𑁂𑀦𑀸𑀢𑀺 𑀯𑀼𑀢𑁆𑀢𑀁 ‘‘𑀲𑀳𑀚𑀸𑀢𑀧𑀘𑁆𑀘𑀬𑀸𑀤𑀻’’𑀢𑀺𑀆𑀤𑀺. 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀥𑀫𑁆𑀫𑀧𑀭𑀺𑀘𑁆𑀙𑁂𑀤𑁄𑀢𑀺 𑀘𑀢𑀼𑀪𑀽𑀫𑀓𑀢𑁆𑀢𑀸 𑀲𑀩𑁆𑀩𑀲𑀗𑁆𑀕𑀸𑀳𑀓𑁄 𑀩𑁄𑀚𑁆𑀛𑀗𑁆𑀕𑀥𑀫𑁆𑀫𑀧𑀭𑀺𑀘𑁆𑀙𑁂𑀤𑁄 𑀓𑀣𑀺𑀢𑁄.

𑁪-𑁧𑁦. 𑀤𑀼𑀧𑁆𑀧𑀜𑁆𑀜𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁨𑁨𑁫-𑁨𑁩𑁧. 𑀏𑀴𑀁 𑀯𑀼𑀘𑁆𑀘𑀢𑀺 𑀤𑁄𑀲𑁄, 𑀏𑀴𑁂𑀦 𑀫𑀽𑀕𑁄 𑀯𑀺𑀬𑀸𑀢𑀺 𑀏𑀴𑀫𑀽𑀕𑁄𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀫𑀼𑀔𑁂𑀦 𑀯𑀸𑀘’’𑀦𑁆𑀢𑀺𑀆𑀤𑀺𑀫𑀸𑀳.

𑀘𑀓𑁆𑀓𑀯𑀢𑁆𑀢𑀺𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀲𑀸𑀓𑀘𑁆𑀙𑀯𑀕𑁆𑀕𑁄

𑁧. 𑀆𑀳𑀸𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁩𑁨. 𑀧𑀼𑀭𑀺𑀫𑀦𑀬𑀢𑁄𑀢𑀺 ‘‘𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀝𑁆𑀞𑀸𑀦𑀻𑀬𑀸𑀦𑀁 𑀥𑀫𑁆𑀫𑀸𑀦’’𑀦𑁆𑀢𑀺𑀆𑀤𑀺𑀦𑀸 𑀆𑀕𑀢𑀦𑀬𑀢𑁄. 𑀏𑀯𑀦𑁆𑀢𑀺 𑀇𑀤𑀸𑀦𑀺 𑀯𑀼𑀘𑁆𑀘𑀫𑀸𑀦𑀸𑀓𑀸𑀭𑁂𑀦. 𑀲𑀢𑀺 𑀘 𑀲𑀫𑁆𑀧𑀚𑀜𑁆𑀜𑀜𑁆𑀘 𑀲𑀢𑀺𑀲𑀫𑁆𑀧𑀚𑀜𑁆𑀜𑀁. 𑀲𑀢𑀺𑀧𑀥𑀸𑀦𑀁 𑀯𑀸 𑀅𑀪𑀺𑀓𑁆𑀓𑀦𑁆𑀢𑀸𑀤𑀻𑀲𑀼 𑀲𑀢𑁆𑀣𑀓𑀪𑀸𑀯𑀧𑀭𑀺𑀕𑁆𑀕𑀡𑁆𑀳𑀓𑀜𑀸𑀡𑀁 𑀲𑀢𑀺𑀲𑀫𑁆𑀧𑀚𑀜𑁆𑀜𑀁. 𑀢𑀁 𑀲𑀩𑁆𑀩𑀢𑁆𑀣 𑀲𑀢𑁄𑀓𑀸𑀭𑀻𑀪𑀸𑀯𑀸𑀯𑀳𑀢𑁆𑀢𑀸 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀸𑀬 𑀲𑀁𑀯𑀢𑁆𑀢𑀢𑀺. 𑀬𑀣𑀸 𑀘 𑀧𑀘𑁆𑀘𑀦𑀻𑀓𑀥𑀫𑁆𑀫𑀧𑁆𑀧𑀳𑀸𑀦𑀁 𑀅𑀦𑀼𑀭𑀽𑀧𑀥𑀫𑁆𑀫𑀤𑁂𑀲𑀦𑀸 𑀘 𑀅𑀦𑀼𑀧𑁆𑀧𑀦𑁆𑀦𑀸𑀦𑀁 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀉𑀧𑁆𑀧𑀸𑀤𑀸𑀬 𑀳𑁄𑀢𑀺, 𑀏𑀯𑀁 𑀲𑀢𑀺𑀭𑀳𑀺𑀢𑀧𑀼𑀕𑁆𑀕𑀮𑀯𑀚𑁆𑀚𑀦𑀸 𑀲𑀢𑁄𑀓𑀸𑀭𑀻𑀧𑀼𑀕𑁆𑀕𑀮𑀲𑁂𑀯𑀦𑀸 𑀘 𑀢𑀢𑁆𑀣 𑀘 𑀬𑀼𑀢𑁆𑀢𑀧𑀬𑀼𑀢𑁆𑀢𑀢𑀸 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀸𑀬 𑀳𑁄𑀢𑀻𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀺 ‘‘𑀲𑀢𑀺𑀲𑀫𑁆𑀧𑀚𑀜𑁆𑀜’’𑀦𑁆𑀢𑀺𑀆𑀤𑀺𑀦𑀸. 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀻 𑀳𑁄𑀢𑀺. 𑀢𑀣𑀸 𑀳𑀺 𑀅𑀭𑀳𑀸𑀯 ‘‘𑀲𑀢𑀺𑀯𑁂𑀧𑀼𑀮𑁆𑀮𑀧𑁆𑀧𑀢𑁆𑀢𑁄’’𑀢𑀺 𑀯𑀼𑀘𑁆𑀘𑀢𑀺.

𑀥𑀫𑁆𑀫𑀸𑀦𑀁, 𑀥𑀫𑁆𑀫𑁂𑀲𑀼 𑀯𑀸 𑀯𑀺𑀘𑀬𑁄, 𑀲𑁄 𑀏𑀯 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 𑀲𑀫𑁆𑀩𑁄𑀚𑁆𑀛𑀗𑁆𑀕𑁄, 𑀢𑀲𑁆𑀲 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲. 𑀧𑀭𑀺𑀧𑀼𑀘𑁆𑀙𑀓𑀢𑀸𑀢𑀺 𑀆𑀘𑀭𑀺𑀬𑀁 𑀧𑀬𑀺𑀭𑀼𑀧𑀸𑀲𑀺𑀢𑁆𑀯𑀸 𑀧𑀜𑁆𑀘𑀧𑀺 𑀦𑀺𑀓𑀸𑀬𑁂 𑀲𑀳𑀝𑁆𑀞𑀓𑀣𑀸𑀬 𑀧𑀭𑀺𑀬𑁄𑀕𑀸𑀳𑁂𑀢𑁆𑀯𑀸 𑀬𑀁 𑀬𑀁 𑀢𑀢𑁆𑀣 𑀕𑀡𑁆𑀞𑀺𑀝𑁆𑀞𑀸𑀦𑀁, 𑀢𑀲𑁆𑀲 𑀢𑀲𑁆𑀲 ‘‘𑀇𑀤𑀁, 𑀪𑀦𑁆𑀢𑁂, 𑀓𑀣𑀁 𑀇𑀫𑀲𑁆𑀲 𑀓𑁄 𑀅𑀢𑁆𑀣𑁄’’𑀢𑀺 𑀏𑀯𑀁 𑀔𑀦𑁆𑀥𑀸𑀤𑀻𑀲𑀼 𑀅𑀢𑁆𑀣𑀧𑀼𑀘𑁆𑀙𑀓𑀪𑀸𑀯𑁄. 𑀢𑁂𑀦𑀸𑀳 ‘‘𑀔𑀦𑁆𑀥…𑀧𑁂… 𑀩𑀳𑀼𑀮𑀢𑀸’’𑀢𑀺.

𑀯𑀢𑁆𑀣𑀼𑀯𑀺𑀲𑀤𑀓𑀺𑀭𑀺𑀬𑀸𑀢𑀺 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀧𑀯𑀢𑁆𑀢𑀺𑀝𑁆𑀞𑀸𑀦𑀪𑀸𑀯𑀢𑁄 𑀲𑀭𑀻𑀭𑀁 𑀢𑀧𑁆𑀧𑀝𑀺𑀩𑀤𑁆𑀥𑀸𑀦𑀺 𑀘 𑀘𑀻𑀯𑀭𑀸𑀤𑀻𑀦𑀺 𑀇𑀥 ‘‘𑀯𑀢𑁆𑀣𑀽𑀦𑀻’’𑀢𑀺 𑀅𑀥𑀺𑀧𑁆𑀧𑁂𑀢𑀸𑀦𑀺, 𑀢𑀸𑀦𑀺 𑀬𑀣𑀸 𑀘𑀺𑀢𑁆𑀢𑀲𑁆𑀲 𑀲𑀼𑀔𑀸𑀯𑀳𑀸𑀦𑀺 𑀳𑁄𑀦𑁆𑀢𑀺, 𑀢𑀣𑀸 𑀓𑀭𑀡𑀁 𑀢𑁂𑀲𑀁 𑀯𑀺𑀲𑀤𑀪𑀸𑀯𑀓𑀭𑀡𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀸𑀦’’𑀦𑁆𑀢𑀺𑀆𑀤𑀺. 𑀉𑀲𑁆𑀲𑀦𑁆𑀦𑀤𑁄𑀲𑀦𑁆𑀢𑀺 𑀯𑀸𑀢𑀸𑀤𑀺𑀉𑀲𑁆𑀲𑀦𑁆𑀦𑀤𑁄𑀲𑀁. 𑀲𑁂𑀤𑀫𑀮𑀫𑀓𑁆𑀔𑀺𑀢𑀦𑁆𑀢𑀺 𑀲𑁂𑀤𑁂𑀦 𑀘𑁂𑀯 𑀚𑀮𑁆𑀮𑀺𑀓𑀸𑀲𑀗𑁆𑀔𑀸𑀢𑁂𑀦 𑀲𑀭𑀻𑀭𑀫𑀮𑁂𑀦 𑀘 𑀫𑀓𑁆𑀔𑀺𑀢𑀁. 𑀘-𑀲𑀤𑁆𑀤𑁂𑀦 𑀅𑀜𑁆𑀜𑀫𑁆𑀧𑀺 𑀲𑀭𑀻𑀭𑀲𑁆𑀲 𑀘 𑀘𑀺𑀢𑁆𑀢𑀲𑁆𑀲 𑀘 𑀧𑀻𑀴𑀸𑀯𑀳𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀲𑁂𑀦𑀸𑀲𑀦𑀁 𑀯𑀸𑀢𑀺 𑀯𑀸-𑀲𑀤𑁆𑀤𑁂𑀦 𑀧𑀢𑁆𑀢𑀸𑀤𑀻𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀅𑀯𑀺𑀲𑀤𑁂 𑀲𑀢𑀺, 𑀯𑀺𑀲𑀬𑀪𑀽𑀢𑁂 𑀯𑀸. 𑀓𑀣𑀁 𑀪𑀸𑀯𑀦𑀫𑀦𑀼𑀬𑀼𑀢𑁆𑀢𑀲𑁆𑀲 𑀢𑀸𑀦𑀺 𑀯𑀺𑀲𑀬𑁄𑀢𑀺? 𑀅𑀦𑁆𑀢𑀭𑀦𑁆𑀢𑀭𑀸 𑀧𑀯𑀢𑁆𑀢𑀦𑀓𑀘𑀺𑀢𑁆𑀢𑀼𑀧𑁆𑀧𑀸𑀤𑀯𑀲𑁂𑀦 𑀏𑀯𑀁 𑀯𑀼𑀢𑁆𑀢𑀁. 𑀢𑁂 𑀳𑀺 𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀬 𑀇𑀚𑁆𑀛𑀦𑁆𑀢𑀺𑀬𑀸𑀧𑀺 𑀅𑀧𑀭𑀺𑀲𑀼𑀤𑁆𑀥𑀪𑀸𑀯𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀘𑀺𑀢𑁆𑀢𑀘𑁂𑀢𑀲𑀺𑀓𑁂𑀲𑀼 𑀦𑀺𑀲𑁆𑀲𑀬𑀸𑀤𑀺𑀧𑀘𑁆𑀘𑀬𑀪𑀽𑀢𑁂𑀲𑀼. 𑀜𑀸𑀡𑀫𑁆𑀧𑀻𑀢𑀺 𑀧𑀺-𑀲𑀤𑁆𑀤𑁄 𑀲𑀫𑁆𑀧𑀺𑀡𑁆𑀟𑀦𑁂. 𑀢𑁂𑀦 𑀦 𑀓𑁂𑀯𑀮𑀁 𑀢𑀁 𑀯𑀢𑁆𑀣𑀼𑀬𑁂𑀯, 𑀅𑀣 𑀔𑁄 𑀢𑀲𑁆𑀫𑀺𑀁 𑀅𑀧𑀭𑀺𑀲𑀼𑀤𑁆𑀥𑁂 𑀜𑀸𑀡𑀫𑁆𑀧𑀺 𑀅𑀧𑀭𑀺𑀲𑀼𑀤𑁆𑀥𑀁 𑀳𑁄𑀢𑀻𑀢𑀺 𑀦𑀺𑀲𑁆𑀲𑀬𑀸𑀧𑀭𑀺𑀲𑀼𑀤𑁆𑀥𑀺𑀬𑀸 𑀦𑀺𑀲𑁆𑀲𑀺𑀢𑀸𑀧𑀭𑀺𑀲𑀼𑀤𑁆𑀥𑀺 𑀯𑀺𑀬 𑀯𑀺𑀲𑀬𑀲𑁆𑀲 𑀅𑀧𑀭𑀺𑀲𑀼𑀤𑁆𑀥𑀢𑀸𑀬 𑀯𑀺𑀲𑀬𑀻𑀦𑀁 𑀅𑀧𑀭𑀺𑀲𑀼𑀤𑁆𑀥𑀺𑀁 𑀤𑀲𑁆𑀲𑁂𑀢𑀺 𑀅𑀦𑁆𑀯𑀬𑀢𑁄 𑀩𑁆𑀬𑀢𑀺𑀭𑁂𑀓𑀢𑁄 𑀘.

𑀲𑀫𑀪𑀸𑀯𑀓𑀭𑀡𑀁 𑀓𑀺𑀘𑁆𑀘𑀢𑁄 𑀅𑀦𑀽𑀦𑀸𑀥𑀺𑀓𑀪𑀸𑀯𑀓𑀭𑀡𑀁. 𑀬𑀣𑀸𑀧𑀘𑁆𑀘𑀬𑀁 𑀲𑀤𑁆𑀥𑁂𑀬𑁆𑀬𑀯𑀢𑁆𑀣𑀼𑀲𑁆𑀫𑀺𑀁 𑀅𑀥𑀺𑀫𑁄𑀓𑁆𑀔𑀓𑀺𑀘𑁆𑀘𑀲𑁆𑀲 𑀧𑀝𑀼𑀢𑀭𑀪𑀸𑀯𑁂𑀦 𑀧𑀜𑁆𑀜𑀸𑀬 𑀅𑀯𑀺𑀲𑀤𑀢𑀸𑀬 𑀯𑀻𑀭𑀺𑀬𑀸𑀤𑀻𑀦𑀜𑁆𑀘 𑀅𑀦𑀼𑀩𑀮𑀧𑁆𑀧𑀤𑀸𑀦𑀲𑀺𑀣𑀺𑀮𑀢𑀸𑀤𑀺𑀦𑀸 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀩𑀮𑀯𑀁 𑀳𑁄𑀢𑀺. 𑀢𑁂𑀦𑀸𑀳 ‘‘𑀇𑀢𑀭𑀸𑀦𑀺 𑀫𑀦𑁆𑀤𑀸𑀦𑀻’’𑀢𑀺. 𑀢𑀢𑁄𑀢𑀺 𑀢𑀲𑁆𑀫𑀸 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀲𑁆𑀲 𑀩𑀮𑀯𑀪𑀸𑀯𑀢𑁄 𑀇𑀢𑀭𑁂𑀲𑀜𑁆𑀘 𑀫𑀦𑁆𑀤𑀢𑁆𑀢𑀸. 𑀓𑁄𑀲𑀚𑁆𑀚𑀧𑀓𑁆𑀔𑁂 𑀧𑀢𑀺𑀢𑀼𑀁 𑀅𑀤𑀢𑁆𑀯𑀸 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀧𑀕𑁆𑀕𑀡𑁆𑀳𑀦𑀁 𑀅𑀦𑀼𑀩𑀮𑀧𑁆𑀧𑀤𑀸𑀦𑀁 𑀧𑀕𑁆𑀕𑀳𑁄, 𑀧𑀕𑁆𑀕𑀳𑀓𑀺𑀘𑁆𑀘𑀁 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀆𑀭𑀫𑁆𑀫𑀡𑀁 𑀉𑀧𑀕𑀦𑁆𑀢𑁆𑀯𑀸 𑀞𑀸𑀦𑀁, 𑀅𑀦𑀺𑀲𑁆𑀲𑀚𑁆𑀚𑀦𑀁 𑀯𑀸 𑀉𑀧𑀝𑁆𑀞𑀸𑀦𑀁, 𑀯𑀺𑀓𑁆𑀔𑁂𑀧𑀧𑀝𑀺𑀧𑀓𑁆𑀔𑁄. 𑀬𑁂𑀦 𑀯𑀸 𑀲𑀫𑁆𑀧𑀬𑀼𑀢𑁆𑀢𑀸 𑀅𑀯𑀺𑀓𑁆𑀔𑀺𑀢𑁆𑀢𑀸 𑀳𑁄𑀦𑁆𑀢𑀺, 𑀲𑁄 𑀅𑀯𑀺𑀓𑁆𑀔𑁂𑀧𑁄. 𑀭𑀽𑀧𑀕𑀢𑀁 𑀯𑀺𑀬 𑀘𑀓𑁆𑀔𑀼𑀦𑀸 𑀬𑁂𑀦 𑀬𑀸𑀣𑀸𑀯𑀢𑁄 𑀯𑀺𑀲𑀬𑀲𑀪𑀸𑀯𑀁 𑀧𑀲𑁆𑀲𑀢𑀺, 𑀢𑀁 𑀤𑀲𑁆𑀲𑀦𑀓𑀺𑀘𑁆𑀘𑀁 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺 𑀩𑀮𑀯𑀢𑀸 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑁂𑀦 𑀅𑀪𑀺𑀪𑀽𑀢𑀢𑁆𑀢𑀸. 𑀲𑀳𑀚𑀸𑀢𑀥𑀫𑁆𑀫𑁂𑀲𑀼 𑀳𑀺 𑀇𑀦𑁆𑀤𑀝𑁆𑀞𑀁 𑀓𑀭𑁄𑀦𑁆𑀢𑀸𑀦𑀁 𑀲𑀳 𑀧𑀯𑀢𑁆𑀢𑀫𑀸𑀦𑀸𑀦𑀁 𑀥𑀫𑁆𑀫𑀸𑀦𑀁 𑀏𑀓𑀭𑀲𑀢𑀸𑀯𑀲𑁂𑀦𑁂𑀯 𑀅𑀢𑁆𑀣𑀲𑀺𑀤𑁆𑀥𑀺, 𑀦 𑀅𑀜𑁆𑀜𑀣𑀸. 𑀢𑀲𑁆𑀫𑀸𑀢𑀺 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀓𑀸𑀭𑀡𑀪𑀸𑀯𑁂𑀦 𑀧𑀘𑁆𑀘𑀸𑀫𑀲𑀢𑀺. 𑀢𑀦𑁆𑀢𑀺 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁.

𑀥𑀫𑁆𑀫𑀲𑀪𑀸𑀯𑀧𑀘𑁆𑀘𑀯𑁂𑀓𑁆𑀔𑀡𑁂𑀦𑀸𑀢𑀺 𑀬𑀲𑁆𑀲 𑀲𑀤𑁆𑀥𑁂𑀬𑁆𑀬𑀯𑀢𑁆𑀣𑀼𑀦𑁄 𑀉𑀴𑀸𑀭𑀢𑀸𑀤𑀺𑀕𑀼𑀡𑁂 𑀅𑀥𑀺𑀫𑀼𑀘𑁆𑀘𑀦𑀲𑁆𑀲 𑀲𑀸𑀢𑀺𑀲𑀬𑀧𑁆𑀧𑀯𑀢𑁆𑀢𑀺𑀬𑀸 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀩𑀮𑀯𑀁 𑀚𑀸𑀢𑀁, 𑀢𑀲𑁆𑀲 𑀧𑀘𑁆𑀘𑀬𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀢𑀸𑀤𑀺𑀯𑀺𑀪𑀸𑀕𑀢𑁄 𑀬𑀸𑀣𑀸𑀯𑀢𑁄 𑀯𑀻𑀫𑀁𑀲𑀦𑁂𑀦. 𑀏𑀯𑀜𑁆𑀳𑀺 𑀏𑀯𑀁𑀥𑀫𑁆𑀫𑀢𑀸𑀦𑀬𑁂𑀦 𑀲𑀪𑀸𑀯𑀲𑀭𑀲𑀢𑁄 𑀧𑀭𑀺𑀕𑁆𑀕𑀬𑁆𑀳𑀫𑀸𑀦𑁂 𑀲𑀯𑀺𑀧𑁆𑀨𑀸𑀭𑁄 𑀅𑀥𑀺𑀫𑁄𑀓𑁆𑀔𑁄 𑀦 𑀳𑁄𑀢𑀺 𑁋 ‘‘𑀅𑀬𑀁 𑀇𑀫𑁂𑀲𑀁 𑀥𑀫𑁆𑀫𑀸𑀦𑀁 𑀲𑀪𑀸𑀯𑁄’’𑀢𑀺 𑀧𑀜𑁆𑀜𑀸𑀩𑁆𑀬𑀸𑀧𑀸𑀭𑀲𑁆𑀲 𑀲𑀸𑀢𑀺𑀲𑀬𑀢𑁆𑀢𑀸. 𑀥𑀼𑀭𑀺𑀬𑀥𑀫𑁆𑀫𑁂𑀲𑀼 𑀳𑀺 𑀬𑀣𑀸 𑀲𑀤𑁆𑀥𑀸𑀬 𑀩𑀮𑀯𑀪𑀸𑀯𑁂 𑀧𑀜𑁆𑀜𑀸𑀬 𑀫𑀦𑁆𑀤𑀪𑀸𑀯𑁄 𑀳𑁄𑀢𑀺, 𑀏𑀯𑀁 𑀧𑀜𑁆𑀜𑀸𑀬 𑀩𑀮𑀯𑀪𑀸𑀯𑁂 𑀲𑀤𑁆𑀥𑀸𑀬 𑀫𑀦𑁆𑀤𑀪𑀸𑀯𑁄 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀢𑀁 𑀥𑀫𑁆𑀫𑀲𑀪𑀸𑀯𑀧𑀘𑁆𑀘𑀯𑁂𑀓𑁆𑀔𑀡𑁂𑀦…𑀧𑁂… 𑀳𑀸𑀧𑁂𑀢𑀩𑁆𑀩’’𑀦𑁆𑀢𑀺. 𑀢𑀣𑀸 𑀅𑀫𑀦𑀲𑀺𑀓𑀭𑀡𑁂𑀦𑀸𑀢𑀺 𑀬𑁂𑀦𑀸𑀓𑀸𑀭𑁂𑀦 𑀪𑀸𑀯𑀦𑀫𑀦𑀼𑀬𑀼𑀜𑁆𑀚𑀦𑁆𑀢𑀲𑁆𑀲 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀩𑀮𑀯𑀁 𑀚𑀸𑀢𑀁, 𑀢𑁂𑀦𑀸𑀓𑀸𑀭𑁂𑀦 𑀪𑀸𑀯𑀦𑀁 𑀦𑀸𑀦𑀼𑀬𑀼𑀜𑁆𑀚𑀦𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀇𑀥 𑀤𑀼𑀯𑀺𑀥𑁂𑀦 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀲𑁆𑀲 𑀩𑀮𑀯𑀪𑀸𑀯𑁄 𑀅𑀢𑁆𑀢𑀦𑁄 𑀯𑀸 𑀧𑀘𑁆𑀘𑀬𑀯𑀺𑀲𑁂𑀲𑁂𑀦 𑀓𑀺𑀘𑁆𑀘𑀼𑀢𑁆𑀢𑀭𑀺𑀬𑀢𑁄 𑀯𑀻𑀭𑀺𑀬𑀸𑀤𑀻𑀦𑀁 𑀯𑀸 𑀫𑀦𑁆𑀤𑀓𑀺𑀘𑁆𑀘𑀢𑀸𑀬. 𑀢𑀢𑁆𑀣 𑀧𑀞𑀫𑀯𑀺𑀓𑀧𑁆𑀧𑁂 𑀳𑀸𑀧𑀦𑀯𑀺𑀥𑀺 𑀤𑀲𑁆𑀲𑀺𑀢𑁄, 𑀤𑀼𑀢𑀺𑀬𑀯𑀺𑀓𑀧𑁆𑀧𑁂 𑀧𑀦 𑀬𑀣𑀸 𑀫𑀦𑀲𑀺𑀓𑀭𑁄𑀢𑁄 𑀯𑀻𑀭𑀺𑀬𑀸𑀤𑀻𑀦𑀁 𑀫𑀦𑁆𑀤𑀓𑀺𑀘𑁆𑀘𑀢𑀸𑀬 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀩𑀮𑀯𑀁 𑀚𑀸𑀢𑀁, 𑀢𑀣𑀸 𑀅𑀫𑀦𑀲𑀺𑀓𑀸𑀭𑁂𑀦 𑀯𑀻𑀭𑀺𑀬𑀸𑀤𑀻𑀦𑀁 𑀧𑀝𑀼𑀢𑀭𑀪𑀸𑀯𑀸𑀯𑀳𑁂𑀦 𑀫𑀦𑀲𑀺𑀓𑀸𑀭𑁂𑀦 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀢𑁂𑀳𑀺 𑀲𑀫𑀢𑀁 𑀓𑀭𑁄𑀦𑁆𑀢𑁂𑀦 𑀳𑀸𑀧𑁂𑀢𑀩𑁆𑀩𑀁. 𑀇𑀫𑀺𑀦𑀸 𑀦𑀬𑁂𑀦 𑀲𑁂𑀲𑀺𑀦𑁆𑀤𑁆𑀭𑀺𑀬𑁂𑀲𑀼𑀧𑀺 𑀳𑀸𑀧𑀦𑀯𑀺𑀥𑀺 𑀯𑁂𑀤𑀺𑀢𑀩𑁆𑀩𑁄.

𑀯𑀓𑁆𑀓𑀮𑀺𑀢𑁆𑀣𑁂𑀭𑀯𑀢𑁆𑀣𑀽𑀢𑀺 𑀲𑁄 𑀳𑀺 𑀆𑀬𑀲𑁆𑀫𑀸 𑀲𑀤𑁆𑀥𑀸𑀥𑀺𑀫𑀼𑀢𑁆𑀢𑁄 𑀢𑀢𑁆𑀣 𑀘 𑀓𑀢𑀸𑀥𑀺𑀓𑀸𑀭𑁄 𑀲𑀢𑁆𑀣𑀼 𑀭𑀽𑀧𑀓𑀸𑀬𑀤𑀲𑁆𑀲𑀦𑁂 𑀧𑀲𑀼𑀢𑁄 𑀏𑀯 𑀳𑀼𑀢𑁆𑀯𑀸 𑀯𑀺𑀳𑀭𑀦𑁆𑀢𑁄 𑀲𑀢𑁆𑀣𑀸𑀭𑀸 𑁋 ‘‘𑀓𑀺𑀁 𑀢𑁂, 𑀯𑀓𑁆𑀓𑀮𑀺, 𑀇𑀫𑀺𑀦𑀸 𑀧𑀽𑀢𑀺𑀓𑀸𑀬𑁂𑀦 𑀤𑀺𑀝𑁆𑀞𑁂𑀦, 𑀬𑁄 𑀔𑁄, 𑀯𑀓𑁆𑀓𑀮𑀺, 𑀥𑀫𑁆𑀫𑀁 𑀧𑀲𑁆𑀲𑀢𑀺, 𑀲𑁄 𑀫𑀁 𑀧𑀲𑁆𑀲𑀢𑀻’’𑀢𑀺𑀆𑀤𑀺𑀦𑀸 (𑀲𑀁. 𑀦𑀺. 𑁩.𑁮𑁭) 𑀑𑀯𑀤𑀺𑀬𑀫𑀸𑀦𑁄 𑀓𑀫𑁆𑀫𑀝𑁆𑀞𑀸𑀦𑁂 𑀦𑀺𑀬𑁄𑀚𑀺𑀢𑁄𑀧𑀺 𑀢𑀁 𑀅𑀦𑀦𑀼𑀬𑀼𑀜𑁆𑀚𑀦𑁆𑀢𑁄 𑀧𑀡𑀸𑀫𑀺𑀢𑁄 𑀅𑀢𑁆𑀢𑀸𑀦𑀁 𑀯𑀺𑀦𑀺𑀧𑀸𑀢𑁂𑀢𑀼𑀁 𑀧𑀧𑀸𑀢𑀝𑁆𑀞𑀸𑀦𑀁 𑀅𑀪𑀺𑀭𑀼𑀳𑀺. 𑀅𑀣 𑀦𑀁 𑀲𑀢𑁆𑀣𑀸 𑀬𑀣𑀸𑀦𑀺𑀲𑀺𑀦𑁆𑀦𑁄𑀯 𑀑𑀪𑀸𑀲𑀯𑀺𑀲𑁆𑀲𑀚𑁆𑀚𑀦𑁂𑀦 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀢𑁆𑀯𑀸 𑁋

‘‘𑀧𑀸𑀫𑁄𑀚𑁆𑀚𑀩𑀳𑀼𑀮𑁄 𑀪𑀺𑀓𑁆𑀔𑀼, 𑀧𑀲𑀦𑁆𑀦𑁄 𑀩𑀼𑀤𑁆𑀥𑀲𑀸𑀲𑀦𑁂;

𑀅𑀥𑀺𑀕𑀘𑁆𑀙𑁂 𑀧𑀤𑀁 𑀲𑀦𑁆𑀢𑀁, 𑀲𑀗𑁆𑀔𑀸𑀭𑀽𑀧𑀲𑀫𑀁 𑀲𑀼𑀔’’𑀦𑁆𑀢𑀺. (𑀥. 𑀧. 𑁩𑁮𑁧) 𑁋

𑀕𑀸𑀣𑀁 𑀯𑀢𑁆𑀯𑀸 ‘‘𑀏𑀳𑀺, 𑀯𑀓𑁆𑀓𑀮𑀻’’𑀢𑀺 𑀆𑀳. 𑀲𑁄 𑀢𑁂𑀦 𑀯𑀘𑀦𑁂𑀦 𑀅𑀫𑀢𑁂𑀦𑁂𑀯 𑀅𑀪𑀺𑀲𑀺𑀢𑁆𑀢𑁄 𑀳𑀝𑁆𑀞𑀢𑀼𑀝𑁆𑀞𑁄 𑀳𑀼𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀲𑀺, 𑀲𑀤𑁆𑀥𑀸𑀬 𑀩𑀳𑀼𑀮𑀪𑀸𑀯𑀢𑁄 𑀯𑀺𑀧𑀲𑁆𑀲𑀦𑀸𑀯𑀻𑀣𑀺𑀁 𑀦𑀸𑀭𑁄𑀳𑀢𑀺. 𑀢𑀁 𑀜𑀢𑁆𑀯𑀸 𑀪𑀕𑀯𑀸 𑀇𑀦𑁆𑀤𑁆𑀭𑀺𑀬𑀲𑀫𑀢𑁆𑀢𑀧𑀝𑀺𑀧𑀸𑀤𑀦𑀸𑀬 𑀓𑀫𑁆𑀫𑀝𑁆𑀞𑀸𑀦𑀁 𑀲𑁄𑀥𑁂𑀢𑁆𑀯𑀸 𑀅𑀤𑀸𑀲𑀺. 𑀲𑁄 𑀲𑀢𑁆𑀣𑀸𑀭𑀸 𑀤𑀺𑀦𑁆𑀦𑀦𑀬𑁂𑀦 𑀯𑀺𑀧𑀲𑁆𑀲𑀦𑀁 𑀉𑀲𑁆𑀲𑀼𑀓𑁆𑀓𑀸𑀧𑁂𑀢𑁆𑀯𑀸 𑀫𑀕𑁆𑀕𑀧𑀝𑀺𑀧𑀸𑀝𑀺𑀬𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀯𑀓𑁆𑀓𑀮𑀺𑀢𑁆𑀣𑁂𑀭𑀯𑀢𑁆𑀣𑀼 𑀘𑁂𑀢𑁆𑀣 𑀦𑀺𑀤𑀲𑁆𑀲𑀦’’𑀦𑁆𑀢𑀺. 𑀏𑀢𑁆𑀣𑀸𑀢𑀺 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀲𑁆𑀲 𑀅𑀥𑀺𑀫𑀢𑁆𑀢𑀪𑀸𑀯𑁂 𑀲𑁂𑀲𑀺𑀦𑁆𑀤𑁆𑀭𑀺𑀬𑀸𑀦𑀁 𑀲𑀓𑀺𑀘𑁆𑀘𑀸𑀓𑀭𑀡𑁂.

𑀇𑀢𑀭𑀓𑀺𑀘𑁆𑀘𑀪𑁂𑀤𑀦𑁆𑀢𑀺 𑀉𑀧𑀝𑁆𑀞𑀸𑀦𑀸𑀤𑀺𑀓𑀺𑀘𑁆𑀘𑀯𑀺𑀲𑁂𑀲𑀁. 𑀧𑀲𑁆𑀲𑀤𑁆𑀥𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀲𑀫𑀸𑀥𑀺𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀸𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀳𑀸𑀧𑁂𑀢𑀩𑁆𑀩𑀦𑁆𑀢𑀺 𑀬𑀣𑀸 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀲𑁆𑀲 𑀩𑀮𑀯𑀪𑀸𑀯𑁄 𑀥𑀫𑁆𑀫𑀲𑀪𑀸𑀯𑀧𑀘𑁆𑀘𑀯𑁂𑀓𑁆𑀔𑀡𑁂𑀦 𑀳𑀸𑀬𑀢𑀺, 𑀏𑀯𑀁 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀲𑁆𑀲 𑀅𑀥𑀺𑀫𑀢𑁆𑀢𑀢𑀸 𑀧𑀲𑁆𑀲𑀤𑁆𑀥𑀺𑀬𑀸𑀤𑀺𑀪𑀸𑀯𑀦𑀸𑀬 𑀳𑀸𑀬𑀢𑀺 𑀲𑀫𑀸𑀥𑀺𑀧𑀓𑁆𑀔𑀺𑀓𑀢𑁆𑀢𑀸 𑀢𑀲𑁆𑀲𑀸. 𑀢𑀣𑀸 𑀳𑀺 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀲𑁆𑀲 𑀅𑀥𑀺𑀫𑀢𑁆𑀢𑀢𑀁 𑀓𑁄𑀲𑀚𑁆𑀚𑀧𑀸𑀢𑀢𑁄 𑀭𑀓𑁆𑀔𑀦𑁆𑀢𑀻 𑀯𑀻𑀭𑀺𑀬𑀸𑀤𑀺𑀪𑀸𑀯𑀦𑀸 𑀯𑀺𑀬 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀲𑁆𑀲 𑀅𑀥𑀺𑀫𑀢𑁆𑀢𑀢𑀁 𑀉𑀤𑁆𑀥𑀘𑁆𑀘𑀧𑀸𑀢𑀢𑁄 𑀭𑀓𑁆𑀔𑀦𑁆𑀢𑀻 𑀏𑀓𑀁𑀲𑀢𑁄 𑀳𑀸𑀧𑁂𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀧𑀲𑁆𑀲𑀤𑁆𑀥𑀸𑀤𑀺𑀪𑀸𑀯𑀦𑀸𑀬 𑀳𑀸𑀧𑁂𑀢𑀩𑁆𑀩’’𑀦𑁆𑀢𑀺. 𑀲𑁄𑀡𑀢𑁆𑀣𑁂𑀭𑀲𑁆𑀲 𑀯𑀢𑁆𑀣𑀽𑀢𑀺 𑀲𑀼𑀓𑀼𑀫𑀸𑀭𑀲𑁄𑀡𑀢𑁆𑀣𑁂𑀭𑀲𑁆𑀲 𑀯𑀢𑁆𑀣𑀼. 𑀲𑁄 𑀳𑀺 𑀆𑀬𑀲𑁆𑀫𑀸𑀧𑀺 𑀲𑀢𑁆𑀣𑀼 𑀲𑀦𑁆𑀢𑀺𑀓𑀸 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀲𑀻𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑁋 ‘‘𑀫𑀫 𑀲𑀭𑀻𑀭𑀁 𑀲𑀼𑀔𑀼𑀫𑀸𑀮𑀁, 𑀦 𑀘 𑀲𑀓𑁆𑀓𑀸 𑀲𑀼𑀔𑁂𑀦𑁂𑀯 𑀲𑀼𑀔𑀁 𑀅𑀥𑀺𑀕𑀦𑁆𑀢𑀼𑀁, 𑀓𑀸𑀬𑀁 𑀓𑀺𑀮𑀫𑁂𑀢𑁆𑀯𑀸𑀧𑀺 𑀲𑀫𑀡𑀥𑀫𑁆𑀫𑁄 𑀓𑀸𑀢𑀩𑁆𑀩𑁄’’𑀢𑀺 𑀞𑀸𑀦𑀘𑀗𑁆𑀓𑀫𑀦𑀫𑁂𑀯 𑀅𑀥𑀺𑀝𑁆𑀞𑀸𑀬 𑀧𑀥𑀸𑀦𑀫𑀦𑀼𑀬𑀼𑀜𑁆𑀚𑀦𑁆𑀢𑁄 𑀧𑀸𑀤𑀢𑀮𑁂𑀲𑀼 𑀨𑁄𑀝𑁂𑀲𑀼 𑀉𑀝𑁆𑀞𑀺𑀢𑁂𑀲𑀼𑀧𑀺 𑀯𑁂𑀤𑀦𑀁 𑀅𑀚𑁆𑀛𑀼𑀧𑁂𑀓𑁆𑀔𑀺𑀢𑁆𑀯𑀸 𑀤𑀴𑁆𑀳𑀯𑀻𑀭𑀺𑀬𑀁 𑀓𑀭𑁄𑀦𑁆𑀢𑁄 𑀅𑀘𑁆𑀘𑀸𑀭𑀤𑁆𑀥𑀯𑀻𑀭𑀺𑀬𑀢𑀸𑀬 𑀯𑀺𑀲𑁂𑀲𑀁 𑀧𑀯𑀢𑁆𑀢𑁂𑀢𑀼𑀁 𑀦𑀸𑀲𑀓𑁆𑀔𑀺. 𑀲𑀢𑁆𑀣𑀸 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀯𑀻𑀡𑁄𑀧𑀫𑁄𑀯𑀸𑀤𑁂𑀦 𑀑𑀯𑀤𑀺𑀢𑁆𑀯𑀸 𑀯𑀻𑀭𑀺𑀬𑀲𑀫𑀢𑀸𑀬𑁄𑀚𑀦𑀯𑀺𑀥𑀺𑀁 𑀤𑀲𑁆𑀲𑁂𑀦𑁆𑀢𑁄 𑀓𑀫𑁆𑀫𑀝𑁆𑀞𑀸𑀦𑀁 𑀲𑁄𑀥𑁂𑀢𑁆𑀯𑀸 𑀕𑀺𑀚𑁆𑀛𑀓𑀽𑀝𑀁 𑀕𑀢𑁄. 𑀣𑁂𑀭𑁄𑀧𑀺 𑀲𑀢𑁆𑀣𑀸𑀭𑀸 𑀤𑀺𑀦𑁆𑀦𑀦𑀬𑁂𑀦 𑀯𑀻𑀭𑀺𑀬𑀲𑀫𑀢𑀁 𑀬𑀸𑀚𑁂𑀢𑁆𑀯𑀸 𑀪𑀸𑀯𑁂𑀦𑁆𑀢𑁄 𑀯𑀺𑀧𑀲𑁆𑀲𑀦𑀁 𑀉𑀲𑁆𑀲𑀼𑀓𑁆𑀓𑀸𑀧𑁂𑀢𑁆𑀯𑀸 𑀅𑀭𑀳𑀢𑁆𑀢𑁂𑀯 𑀧𑀢𑀺𑀝𑁆𑀞𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑁄𑀡𑀢𑁆𑀣𑁂𑀭𑀲𑁆𑀲 𑀯𑀢𑁆𑀣𑀼 𑀤𑀲𑁆𑀲𑁂𑀢𑀩𑁆𑀩’’𑀦𑁆𑀢𑀺. 𑀲𑁂𑀲𑁂𑀲𑀼𑀧𑀻𑀢𑀺 𑀲𑀢𑀺𑀲𑀫𑀸𑀥𑀺𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑁂𑀲𑀼𑀧𑀺.

𑀲𑀫𑀢𑀦𑁆𑀢𑀺 𑀲𑀤𑁆𑀥𑀸𑀧𑀜𑁆𑀜𑀸𑀦𑀁 𑀅𑀜𑁆𑀜𑀫𑀜𑁆𑀜𑀁 𑀅𑀦𑀽𑀦𑀸𑀥𑀺𑀓𑀪𑀸𑀯𑀁, 𑀢𑀣𑀸 𑀲𑀫𑀸𑀥𑀺𑀯𑀻𑀭𑀺𑀬𑀸𑀦𑀜𑁆𑀘. 𑀬𑀣𑀸 𑀳𑀺 𑀲𑀤𑁆𑀥𑀸𑀧𑀜𑁆𑀜𑀸𑀦𑀁 𑀯𑀺𑀲𑀼𑀁 𑀯𑀺𑀲𑀼𑀁 𑀥𑀼𑀭𑀺𑀬𑀥𑀫𑁆𑀫𑀪𑀽𑀢𑀸𑀦𑀁 𑀓𑀺𑀘𑁆𑀘𑀢𑁄 𑀅𑀜𑁆𑀜𑀫𑀜𑁆𑀜𑀦𑀸𑀢𑀺𑀯𑀢𑁆𑀢𑀦𑀁 𑀯𑀺𑀲𑁂𑀲𑀢𑁄 𑀇𑀘𑁆𑀙𑀺𑀢𑀩𑁆𑀩𑀁. 𑀬𑀢𑁄 𑀢𑁂𑀲𑀁 𑀲𑀫𑀥𑀼𑀭𑀢𑀸𑀬 𑀅𑀧𑁆𑀧𑀦𑀸 𑀲𑀫𑁆𑀧𑀚𑁆𑀚𑀢𑀺, 𑀏𑀯𑀁 𑀲𑀫𑀸𑀥𑀺𑀯𑀻𑀭𑀺𑀬𑀸𑀦𑀁 𑀓𑁄𑀲𑀚𑁆𑀚𑀼𑀤𑁆𑀥𑀘𑁆𑀘𑀧𑀓𑁆𑀔𑀺𑀓𑀸𑀦𑀁 𑀲𑀫𑀢𑀸𑀬 𑀲𑀢𑀺 𑀅𑀜𑁆𑀜𑀫𑀜𑁆𑀜𑀼𑀧𑀢𑁆𑀣𑀫𑁆𑀪𑀦𑀢𑁄 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀅𑀦𑁆𑀢𑀤𑁆𑀯𑀬𑀧𑀸𑀢𑀸𑀪𑀸𑀯𑁂𑀦 𑀲𑀫𑁆𑀫𑀤𑁂𑀯 𑀅𑀧𑁆𑀧𑀦𑀸 𑀇𑀚𑁆𑀛𑀢𑀻𑀢𑀺. 𑀩𑀮𑀯𑀲𑀤𑁆𑀥𑁄𑀢𑀺𑀆𑀤𑀺 𑀯𑀼𑀢𑁆𑀢𑀲𑁆𑀲𑁂𑀯 𑀅𑀢𑁆𑀣𑀲𑁆𑀲 𑀩𑁆𑀬𑀢𑀺𑀭𑁂𑀓𑀫𑀼𑀔𑁂𑀦 𑀲𑀫𑀢𑁆𑀣𑀦𑀁. 𑀢𑀲𑁆𑀲𑀢𑁆𑀣𑁄 𑁋 𑀬𑁄 𑀩𑀮𑀯𑀢𑀺𑀬𑀸 𑀲𑀤𑁆𑀥𑀸𑀬 𑀲𑀫𑀦𑁆𑀦𑀸𑀕𑀢𑁄 𑀅𑀯𑀺𑀲𑀤𑀜𑀸𑀡𑁄, 𑀲𑁄 𑀫𑀼𑀥𑀧𑁆𑀧𑀲𑀦𑁆𑀦𑁄 𑀳𑁄𑀢𑀺, 𑀦 𑀅𑀯𑁂𑀘𑁆𑀘𑀧𑁆𑀧𑀲𑀦𑁆𑀦𑁄. 𑀢𑀣𑀸 𑀳𑀺 𑀲𑁄 𑀅𑀯𑀢𑁆𑀣𑀼𑀲𑁆𑀫𑀺𑀁 𑀧𑀲𑀻𑀤𑀢𑀺, 𑀲𑁂𑀬𑁆𑀬𑀣𑀸𑀧𑀺 𑀢𑀺𑀢𑁆𑀣𑀺𑀬𑀲𑀸𑀯𑀓𑀸. 𑀓𑁂𑀭𑀸𑀝𑀺𑀓𑀧𑀓𑁆𑀔𑀦𑁆𑀢𑀺 𑀲𑀸𑀞𑁂𑀬𑁆𑀬𑀧𑀓𑁆𑀔𑀁 𑀪𑀚𑀢𑀺. 𑀲𑀤𑁆𑀥𑀸𑀳𑀻𑀦𑀸𑀬 𑀧𑀜𑁆𑀜𑀸𑀬 𑀅𑀢𑀺𑀥𑀸𑀯𑀦𑁆𑀢𑁄 ‘‘𑀤𑁂𑀬𑁆𑀬𑀯𑀢𑁆𑀣𑀼𑀧𑀭𑀺𑀘𑁆𑀘𑀸𑀕𑁂𑀦 𑀯𑀺𑀦𑀸 𑀘𑀺𑀢𑁆𑀢𑀼𑀧𑁆𑀧𑀸𑀤𑀫𑀢𑁆𑀢𑁂𑀦𑀧𑀺 𑀤𑀸𑀦𑀫𑀬𑀁 𑀧𑀼𑀜𑁆𑀜𑀁 𑀳𑁄𑀢𑀻’’𑀢𑀺𑀆𑀤𑀻𑀦𑀺 𑀧𑀭𑀺𑀓𑀧𑁆𑀧𑁂𑀢𑀺 𑀳𑁂𑀢𑀼𑀧𑀢𑀺𑀭𑀽𑀧𑀓𑁂𑀳𑀺 𑀯𑀜𑁆𑀘𑀺𑀢𑁄, 𑀏𑀯𑀁𑀪𑀽𑀢𑁄 𑀘 𑀮𑀽𑀔𑀢𑀓𑁆𑀓𑀯𑀺𑀮𑀼𑀢𑁆𑀢𑀘𑀺𑀢𑁆𑀢𑁄 𑀧𑀡𑁆𑀟𑀺𑀢𑀸𑀦𑀁 𑀯𑀘𑀦𑀁 𑀦𑀸𑀤𑀺𑀬𑀢𑀺, 𑀲𑀜𑁆𑀜𑀢𑁆𑀢𑀺𑀁 𑀦 𑀕𑀘𑁆𑀙𑀢𑀺. 𑀢𑁂𑀦𑀸𑀳 ‘‘𑀪𑁂𑀲𑀚𑁆𑀚𑀲𑀫𑀼𑀝𑁆𑀞𑀺𑀢𑁄 𑀯𑀺𑀬 𑀭𑁄𑀕𑁄 𑀅𑀢𑁂𑀓𑀺𑀘𑁆𑀙𑁄 𑀳𑁄𑀢𑀻’’𑀢𑀺. 𑀬𑀣𑀸 𑀘𑁂𑀢𑁆𑀣 𑀲𑀤𑁆𑀥𑀸𑀧𑀜𑁆𑀜𑀸𑀦𑀁 𑀅𑀜𑁆𑀜𑀫𑀜𑁆𑀜𑀁 𑀲𑀫𑀪𑀸𑀯𑁄 𑀅𑀢𑁆𑀣𑀸𑀯𑀳𑁄, 𑀯𑀺𑀲𑀫𑀪𑀸𑀯𑁄 𑀅𑀦𑀢𑁆𑀣𑀸𑀯𑀳𑁄, 𑀏𑀯𑀁 𑀲𑀫𑀸𑀥𑀺𑀯𑀻𑀭𑀺𑀬𑀸𑀦𑀁 𑀅𑀜𑁆𑀜𑀫𑀜𑁆𑀜𑀁 𑀲𑀫𑀪𑀸𑀯𑁄 𑀅𑀢𑁆𑀣𑀸𑀯𑀳𑁄, 𑀇𑀢𑀭𑁄 𑀅𑀦𑀢𑁆𑀣𑀸𑀯𑀳𑁄, 𑀢𑀣𑀸 𑀲𑀫𑀪𑀸𑀯𑁄 𑀅𑀯𑀺𑀓𑁆𑀔𑁂𑀧𑀸𑀯𑀳𑁄, 𑀇𑀢𑀭𑁄 𑀯𑀺𑀓𑁆𑀔𑁂𑀧𑀸𑀯𑀳𑁄. 𑀓𑁄𑀲𑀚𑁆𑀚𑀁 𑀅𑀪𑀺𑀪𑀯𑀢𑀺, 𑀢𑁂𑀦 𑀅𑀧𑁆𑀧𑀦𑀁 𑀦 𑀧𑀸𑀧𑀼𑀡𑀸𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀲 𑀦𑀬𑁄 𑀉𑀤𑁆𑀥𑀘𑁆𑀘𑀁 𑀅𑀪𑀺𑀪𑀯𑀢𑀻𑀢𑀺 𑀏𑀢𑁆𑀣𑀸𑀧𑀺. 𑀢𑀤𑀼𑀪𑀬𑀦𑁆𑀢𑀺 𑀲𑀤𑁆𑀥𑀸𑀧𑀜𑁆𑀜𑀸𑀤𑁆𑀯𑀬𑀁 𑀲𑀫𑀸𑀥𑀺𑀯𑀻𑀭𑀺𑀬𑀤𑁆𑀯𑀬𑀜𑁆𑀘. 𑀲𑀫𑀁 𑀓𑀸𑀢𑀩𑁆𑀩𑀦𑁆𑀢𑀺 𑀲𑀫𑀢𑀁 𑀓𑀸𑀢𑀩𑁆𑀩𑀁.

𑀲𑀫𑀸𑀥𑀺𑀓𑀫𑁆𑀫𑀺𑀓𑀲𑁆𑀲𑀸𑀢𑀺 𑀲𑀫𑀣𑀓𑀫𑁆𑀫𑀝𑁆𑀞𑀸𑀦𑀺𑀓𑀲𑁆𑀲. 𑀏𑀯𑀦𑁆𑀢𑀺 𑀏𑀯𑀁 𑀲𑀦𑁆𑀢𑁂, 𑀲𑀤𑁆𑀥𑀸𑀬 𑀣𑁄𑀓𑀁 𑀩𑀮𑀯𑀪𑀸𑀯𑁂 𑀲𑀢𑀻𑀢𑀺 𑀅𑀢𑁆𑀣𑁄. 𑀲𑀤𑁆𑀤𑀳𑀦𑁆𑀢𑁄𑀢𑀺 ‘‘𑀧𑀣𑀯𑀻 𑀧𑀣𑀯𑀻𑀢𑀺 𑀫𑀦𑀲𑀺𑀓𑀸𑀭𑀫𑀢𑁆𑀢𑁂𑀦 𑀓𑀣𑀁 𑀛𑀸𑀦𑀼𑀧𑁆𑀧𑀢𑁆𑀢𑀻’’𑀢𑀺 𑀅𑀘𑀺𑀦𑁆𑀢𑁂𑀢𑁆𑀯𑀸 ‘‘𑀅𑀤𑁆𑀥𑀸 𑀲𑀫𑁆𑀩𑀼𑀤𑁆𑀥𑁂𑀦 𑀯𑀼𑀢𑁆𑀢𑀯𑀺𑀥𑀺 𑀇𑀚𑁆𑀛𑀢𑀻’’𑀢𑀺 𑀲𑀤𑁆𑀤𑀳𑀦𑁆𑀢𑁄 𑀲𑀤𑁆𑀥𑀁 𑀚𑀦𑁂𑀦𑁆𑀢𑁄. 𑀑𑀓𑀧𑁆𑀧𑁂𑀦𑁆𑀢𑁄𑀢𑀺 𑀆𑀭𑀫𑁆𑀫𑀡𑀁 𑀅𑀦𑀼𑀧𑀯𑀺𑀲𑀺𑀢𑁆𑀯𑀸 𑀯𑀺𑀬 𑀅𑀥𑀺𑀫𑀼𑀘𑁆𑀘𑀦𑀯𑀲𑁂𑀦 𑀅𑀯𑀓𑀧𑁆𑀧𑁂𑀦𑁆𑀢𑁄 𑀧𑀓𑁆𑀔𑀦𑁆𑀤𑀦𑁆𑀢𑁄. 𑀏𑀓𑀕𑁆𑀕𑀢𑀸 𑀩𑀮𑀯𑀢𑀻 𑀯𑀝𑁆𑀝𑀢𑀺 𑀲𑀫𑀸𑀥𑀺𑀧𑀥𑀸𑀦𑀢𑁆𑀢𑀸 𑀛𑀸𑀦𑀲𑁆𑀲. 𑀉𑀪𑀺𑀦𑁆𑀦𑀦𑁆𑀢𑀺 𑀲𑀫𑀸𑀥𑀺𑀧𑀜𑁆𑀜𑀸𑀦𑀁. 𑀲𑀫𑀸𑀥𑀺𑀓𑀫𑁆𑀫𑀺𑀓𑀲𑁆𑀲 𑀲𑀫𑀸𑀥𑀺𑀦𑁄 𑀅𑀥𑀺𑀫𑀢𑁆𑀢𑀢𑀸𑀬 𑀧𑀜𑁆𑀜𑀸𑀬 𑀅𑀥𑀺𑀫𑀢𑁆𑀢𑀢𑀸𑀧𑀺 𑀇𑀘𑁆𑀙𑀺𑀢𑀩𑁆𑀩𑀸𑀢𑀺 𑀆𑀳 ‘‘𑀲𑀫𑀢𑀸𑀬𑀧𑀻’’𑀢𑀺, 𑀲𑀫𑀪𑀸𑀯𑁂𑀦𑀸𑀧𑀻𑀢𑀺 𑀅𑀢𑁆𑀣𑁄. 𑀅𑀧𑁆𑀧𑀦𑀸𑀢𑀺 𑀮𑁄𑀓𑀺𑀬𑀅𑀧𑁆𑀧𑀦𑀸. 𑀢𑀣𑀸 𑀳𑀺 ‘‘𑀳𑁄𑀢𑀺𑀬𑁂𑀯𑀸’’𑀢𑀺 𑀲𑀸𑀲𑀗𑁆𑀓𑀁 𑀯𑀤𑀢𑀺, 𑀮𑁄𑀓𑀼𑀢𑁆𑀢𑀭𑀧𑁆𑀧𑀦𑀸 𑀧𑀦 𑀢𑁂𑀲𑀁 𑀲𑀫𑀪𑀸𑀯𑁂𑀦𑁂𑀯 𑀇𑀘𑁆𑀙𑀺𑀢𑀸. 𑀬𑀣𑀸𑀳 ‘‘𑀲𑀫𑀣𑀯𑀺𑀧𑀲𑁆𑀲𑀦𑀁 𑀬𑀼𑀕𑀦𑀤𑁆𑀥𑀁 𑀪𑀸𑀯𑁂𑀢𑀻’’𑀢𑀺 (𑀅. 𑀦𑀺. 𑁪.𑁧𑁭𑁦). 𑀬𑀤𑀺 𑀯𑀺𑀲𑁂𑀲𑀢𑁄 𑀲𑀤𑁆𑀥𑀸𑀧𑀜𑁆𑀜𑀸𑀦𑀁 𑀲𑀫𑀸𑀥𑀺𑀯𑀻𑀭𑀺𑀬𑀸𑀦𑀜𑁆𑀘 𑀲𑀫𑀸𑀦𑀢𑀁 𑀇𑀘𑁆𑀙𑀢𑀺, 𑀓𑀣𑀁 𑀲𑀢𑀻𑀢𑀺 𑀆𑀳 𑁋 ‘‘𑀲𑀢𑀺 𑀧𑀦 𑀲𑀩𑁆𑀩𑀢𑁆𑀣 𑀩𑀮𑀯𑀢𑀻 𑀯𑀝𑁆𑀝𑀢𑀻’’𑀢𑀺. 𑀲𑀩𑁆𑀩𑀢𑁆𑀣𑀸𑀢𑀺 𑀮𑀻𑀦𑀼𑀤𑁆𑀥𑀘𑁆𑀘𑀧𑀓𑁆𑀔𑀺𑀓𑁂𑀲𑀼 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑁂𑀲𑀼. 𑀉𑀤𑁆𑀥𑀘𑁆𑀘𑀧𑀓𑁆𑀔𑀺𑀓𑁂𑀓𑀤𑁂𑀲𑁂 𑀕𑀡𑁆𑀳𑀦𑁆𑀢𑁄 ‘‘𑀲𑀤𑁆𑀥𑀸𑀯𑀻𑀭𑀺𑀬𑀧𑀜𑁆𑀜𑀸𑀦’’𑀦𑁆𑀢𑀺 𑀆𑀳. 𑀅𑀜𑁆𑀜𑀣𑀸 𑀧𑀻𑀢𑀺 𑀘 𑀕𑀳𑁂𑀢𑀩𑁆𑀩𑀸 𑀲𑀺𑀬𑀸. 𑀢𑀣𑀸 𑀳𑀺 ‘‘𑀓𑁄𑀲𑀚𑁆𑀚𑀧𑀓𑁆𑀔𑀺𑀓𑁂𑀦 𑀲𑀫𑀸𑀥𑀺𑀦𑀸’’𑀇𑀘𑁆𑀘𑁂𑀯 𑀯𑀼𑀢𑁆𑀢𑀁, 𑀦 𑀘 ‘‘𑀧𑀲𑁆𑀲𑀤𑁆𑀥𑀺𑀲𑀫𑀸𑀥𑀺𑀉𑀧𑁂𑀓𑁆𑀔𑀸𑀳𑀻’’𑀢𑀺. 𑀲𑀸𑀢𑀺 𑀲𑀢𑀺. 𑀲𑀩𑁆𑀩𑁂𑀲𑀼 𑀭𑀸𑀚𑀓𑀫𑁆𑀫𑁂𑀲𑀼 𑀦𑀺𑀬𑀼𑀢𑁆𑀢𑁄𑀢𑀺 𑀲𑀩𑁆𑀩𑀓𑀫𑁆𑀫𑀺𑀓𑁄. 𑀢𑁂𑀦𑀸𑀢𑀺 𑀬𑁂𑀦 𑀓𑀸𑀭𑀡𑁂𑀦 𑀲𑀩𑁆𑀩𑀢𑁆𑀣 𑀇𑀘𑁆𑀙𑀺𑀢𑀩𑁆𑀩𑀸, 𑀢𑁂𑀦 𑀆𑀳 𑀅𑀝𑁆𑀞𑀓𑀣𑀸𑀬𑀁. 𑀲𑀩𑁆𑀩𑀢𑁆𑀣 𑀦𑀺𑀬𑀼𑀢𑁆𑀢𑀸 𑀲𑀩𑁆𑀩𑀢𑁆𑀣𑀺𑀓𑀸, 𑀲𑀩𑁆𑀩𑁂𑀦 𑀯𑀸 𑀮𑀻𑀦𑀼𑀤𑁆𑀥𑀘𑁆𑀘𑀧𑀓𑁆𑀔𑀺𑀓𑁂𑀦 𑀩𑁄𑀚𑁆𑀛𑀗𑁆𑀕𑁂𑀦 𑀅𑀢𑁆𑀣𑁂𑀢𑀩𑁆𑀩𑀸 𑀲𑀩𑁆𑀩𑀢𑁆𑀣𑀺𑀬𑀸, 𑀲𑀩𑁆𑀩𑀢𑁆𑀣𑀺𑀬𑀸𑀯 𑀲𑀩𑁆𑀩𑀢𑁆𑀣𑀺𑀓𑀸. 𑀘𑀺𑀢𑁆𑀢𑀦𑁆𑀢𑀺 𑀓𑀼𑀲𑀮𑀘𑀺𑀢𑁆𑀢𑀁. 𑀢𑀲𑁆𑀲 𑀳𑀺 𑀲𑀢𑀺𑀧𑀝𑀺𑀲𑀭𑀡𑀁 𑀧𑀭𑀸𑀬𑀡𑀁 𑀅𑀧𑁆𑀧𑀢𑁆𑀢𑀲𑁆𑀲 𑀧𑀢𑁆𑀢𑀺𑀬𑀸 𑀅𑀦𑀥𑀺𑀕𑀢𑀲𑁆𑀲 𑀅𑀥𑀺𑀕𑀫𑀸𑀬. 𑀢𑁂𑀦𑀸𑀳 𑁋 ‘‘𑀆𑀭𑀓𑁆𑀔𑀧𑀘𑁆𑀘𑀼𑀧𑀝𑁆𑀞𑀸𑀦𑀸’’𑀢𑀺𑀆𑀤𑀺.

𑀔𑀦𑁆𑀥𑀸𑀤𑀺𑀪𑁂𑀤𑁂 𑀅𑀦𑁄𑀕𑀸𑀴𑁆𑀳𑀧𑀜𑁆𑀜𑀸𑀦𑀦𑁆𑀢𑀺 𑀧𑀭𑀺𑀬𑀢𑁆𑀢𑀺𑀩𑀸𑀳𑀼𑀲𑀘𑁆𑀘𑀯𑀲𑁂𑀦𑀧𑀺 𑀔𑀦𑁆𑀥𑀸𑀬𑀢𑀦𑀸𑀤𑀻𑀲𑀼 𑀅𑀧𑁆𑀧𑀢𑀺𑀝𑁆𑀞𑀺𑀢𑀩𑀼𑀤𑁆𑀥𑀻𑀦𑀁. 𑀩𑀳𑀼𑀲𑁆𑀲𑀼𑀢𑀲𑁂𑀯𑀦𑀸 𑀳𑀺 𑀲𑀼𑀢𑀫𑀬𑀜𑀸𑀡𑀸𑀯𑀳𑀸. 𑀢𑀭𑀼𑀡𑀯𑀺𑀧𑀲𑁆𑀲𑀦𑀸𑀲𑀫𑀗𑁆𑀕𑀻𑀧𑀺 𑀪𑀸𑀯𑀦𑀸𑀫𑀬𑀜𑀸𑀡𑁂 𑀞𑀺𑀢𑀢𑁆𑀢𑀸 𑀏𑀓𑀁𑀲𑀢𑁄 𑀧𑀜𑁆𑀜𑀯𑀸 𑀏𑀯 𑀦𑀸𑀫 𑀳𑁄𑀢𑀻𑀢𑀺 𑀆𑀳 𑁋 ‘‘𑀲𑀫𑀧𑀜𑁆𑀜𑀸𑀲…𑀧𑁂… 𑀧𑀼𑀕𑁆𑀕𑀮𑀲𑁂𑀯𑀦𑀸’’𑀢𑀺. 𑀜𑁂𑀬𑁆𑀬𑀥𑀫𑁆𑀫𑀲𑁆𑀲 𑀕𑀫𑁆𑀪𑀻𑀭𑀪𑀸𑀯𑀯𑀲𑁂𑀦 𑀢𑀧𑁆𑀧𑀭𑀺𑀘𑁆𑀙𑁂𑀤𑀓𑀜𑀸𑀡𑀲𑁆𑀲 𑀕𑀫𑁆𑀪𑀻𑀭𑀪𑀸𑀯𑀕𑀳𑀡𑀦𑁆𑀢𑀺 𑀆𑀳 𑁋 ‘‘𑀕𑀫𑁆𑀪𑀻𑀭𑁂𑀲𑀼 𑀔𑀦𑁆𑀥𑀸𑀤𑀻𑀲𑀼 𑀧𑀯𑀢𑁆𑀢𑀸𑀬 𑀕𑀫𑁆𑀪𑀻𑀭𑀧𑀜𑁆𑀜𑀸𑀬𑀸’’𑀢𑀺. 𑀢𑀜𑁆𑀳𑀺 𑀜𑁂𑀬𑁆𑀬𑀁 𑀢𑀸𑀤𑀺𑀲𑀸𑀬 𑀧𑀜𑁆𑀜𑀸𑀬 𑀘𑀭𑀺𑀢𑀩𑁆𑀩𑀢𑁄 𑀕𑀫𑁆𑀪𑀻𑀭𑀜𑀸𑀡𑀘𑀭𑀺𑀬𑀁, 𑀢𑀲𑁆𑀲𑀸 𑀯𑀸 𑀧𑀜𑁆𑀜𑀸𑀬 𑀢𑀢𑁆𑀣 𑀧𑀪𑁂𑀤𑀢𑁄 𑀧𑀯𑀢𑁆𑀢𑀺 𑀕𑀫𑁆𑀪𑀻𑀭𑀜𑀸𑀡𑀘𑀭𑀺𑀬𑀸, 𑀢𑀲𑁆𑀲𑀸 𑀧𑀘𑁆𑀘𑀯𑁂𑀓𑁆𑀔𑀡𑀸𑀢𑀺 𑀆𑀳 ‘‘𑀕𑀫𑁆𑀪𑀻𑀭𑀧𑀜𑁆𑀜𑀸𑀬 𑀧𑀪𑁂𑀤𑀧𑀘𑁆𑀘𑀯𑁂𑀓𑁆𑀔𑀡𑀸’’𑀢𑀺. 𑀬𑀣𑀸 𑀲𑀢𑀺𑀯𑁂𑀧𑀼𑀮𑁆𑀮𑀧𑁆𑀧𑀢𑁆𑀢𑁄 𑀦𑀸𑀫 𑀅𑀭𑀳𑀸 𑀏𑀯, 𑀏𑀯𑀁 𑀲𑁄 𑀏𑀯 𑀧𑀜𑁆𑀜𑀸𑀯𑁂𑀧𑀼𑀮𑁆𑀮𑀧𑁆𑀧𑀢𑁆𑀢𑁄𑀧𑀻𑀢𑀺 𑀆𑀳 ‘‘𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀻 𑀳𑁄𑀢𑀻’’𑀢𑀺. 𑀯𑀻𑀭𑀺𑀬𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄𑀢𑀺.

‘‘𑀢𑀢𑁆𑀢𑀁 𑀅𑀬𑁄𑀔𑀺𑀮𑀁 𑀳𑀢𑁆𑀣𑁂 𑀕𑀫𑁂𑀦𑁆𑀢𑀻’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀧𑀜𑁆𑀘𑀯𑀺𑀥𑀩𑀦𑁆𑀥𑀦𑀓𑀫𑁆𑀫𑀓𑀸𑀭𑀡𑀸 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀲𑀢𑁆𑀢𑀲𑁆𑀲 𑀲𑀩𑁆𑀩𑀧𑀞𑀫𑀁 𑀓𑀭𑁄𑀦𑁆𑀢𑀻𑀢𑀺 𑀤𑁂𑀯𑀤𑀽𑀢𑀲𑀼𑀢𑁆𑀢𑀸𑀤𑀻𑀲𑀼 (𑀫. 𑀦𑀺. 𑁩.𑁨𑁫𑁦), 𑀢𑀲𑁆𑀲𑀸 𑀆𑀤𑀺𑀢𑁄 𑀯𑀼𑀢𑁆𑀢𑀢𑁆𑀢𑀸 𑀘 𑀆𑀳 𑁋 ‘‘𑀧𑀜𑁆𑀘𑀯𑀺𑀥𑀩𑀦𑁆𑀥𑀦𑀓𑀫𑁆𑀫𑀓𑀸𑀭𑀡𑀢𑁄 𑀧𑀝𑁆𑀞𑀸𑀬𑀸’’𑀢𑀺. 𑀲𑀓𑀝𑀯𑀳𑀦𑀸𑀤𑀺𑀓𑀸𑀮𑁂𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀢𑀤𑀜𑁆𑀜𑀫𑀦𑀼𑀲𑁆𑀲𑁂𑀳𑀺 𑀢𑀺𑀭𑀘𑁆𑀙𑀸𑀦𑁂𑀳𑀺 𑀘 𑀯𑀺𑀩𑀸𑀥𑀦𑀻𑀬𑀓𑀸𑀮𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀏𑀓𑀁 𑀩𑀼𑀤𑁆𑀥𑀦𑁆𑀢𑀭𑀦𑁆𑀢𑀺 𑀇𑀤𑀁 𑀅𑀧𑀭𑀸𑀧𑀭𑀁 𑀧𑁂𑀢𑁂𑀲𑀼 𑀏𑀯 𑀉𑀧𑁆𑀧𑀚𑁆𑀚𑀦𑀓𑀲𑀢𑁆𑀢𑀯𑀲𑁂𑀦 𑀯𑀼𑀢𑁆𑀢𑀁, 𑀏𑀓𑀘𑁆𑀘𑀸𑀦𑀁 𑀯𑀸 𑀧𑁂𑀢𑀸𑀦𑀁, 𑀏𑀓𑀘𑁆𑀘𑀢𑀺𑀭𑀘𑁆𑀙𑀸𑀦𑀸𑀦𑀁 𑀯𑀺𑀬 𑀢𑀣𑀸 𑀤𑀻𑀖𑀸𑀬𑀼𑀓𑀢𑀸𑀧𑀺 𑀲𑀺𑀬𑀸𑀢𑀺 𑀢𑀣𑀸 𑀯𑀼𑀢𑁆𑀢𑀁. 𑀢𑀣𑀸 𑀳𑀺 𑀓𑀸𑀮𑁄 𑀦𑀸𑀕𑀭𑀸𑀚𑀸 𑀘𑀢𑀼𑀦𑁆𑀦𑀁 𑀩𑀼𑀤𑁆𑀥𑀸𑀦𑀁 𑀭𑀽𑀧𑀤𑀲𑁆𑀲𑀸𑀯𑀻.

𑀏𑀯𑀁 𑀆𑀦𑀺𑀲𑀁𑀲𑀤𑀲𑁆𑀲𑀸𑀯𑀺𑀦𑁄𑀢𑀺 ‘‘𑀯𑀻𑀭𑀺𑀬𑀸𑀬𑀢𑁆𑀢𑁄 𑀏𑀯 𑀲𑀓𑀮𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀯𑀺𑀲𑁂𑀲𑀸𑀥𑀺𑀕𑀫𑁄’’𑀢𑀺 𑀏𑀯𑀁 𑀆𑀦𑀺𑀲𑀁𑀲𑀤𑀲𑁆𑀲𑀦𑀲𑀻𑀮𑀲𑁆𑀲. 𑀕𑀫𑀦𑀯𑀻𑀣𑀺𑀦𑁆𑀢𑀺 𑀲𑀧𑀼𑀩𑁆𑀩𑀪𑀸𑀕𑀁 𑀦𑀺𑀩𑁆𑀩𑀸𑀦𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀁. 𑀲𑀳 𑀯𑀺𑀧𑀲𑁆𑀲𑀦𑀸𑀬 𑀅𑀭𑀺𑀬𑀫𑀕𑁆𑀕𑀧𑀝𑀺𑀧𑀸𑀝𑀺, 𑀲𑀢𑁆𑀢𑀯𑀺𑀲𑀼𑀤𑁆𑀥𑀺𑀧𑀭𑀫𑁆𑀧𑀭𑀸 𑀯𑀸. 𑀲𑀸 𑀳𑀺 𑀯𑀝𑁆𑀝𑀢𑁄 𑀦𑀺𑀬𑁆𑀬𑀸𑀦𑀸𑀬 𑀕𑀦𑁆𑀢𑀩𑁆𑀩𑀸 𑀧𑀝𑀺𑀧𑀤𑀸𑀢𑀺 𑀓𑀢𑁆𑀯𑀸 𑀕𑀫𑀦𑀯𑀻𑀣𑀺 𑀦𑀸𑀫.

𑀓𑀸𑀬𑀤𑀴𑁆𑀳𑀻𑀩𑀳𑀼𑀮𑁄𑀢𑀺 𑀓𑀸𑀬𑀲𑁆𑀲 𑀧𑁄𑀲𑀦𑀧𑀲𑀼𑀢𑁄. 𑀧𑀺𑀡𑁆𑀟𑀦𑁆𑀢𑀺 𑀭𑀝𑁆𑀞𑀧𑀺𑀡𑁆𑀟𑀁. 𑀧𑀘𑁆𑀘𑀬𑀤𑀸𑀬𑀓𑀸𑀦𑀁 𑀅𑀢𑁆𑀢𑀦𑀺 𑀓𑀸𑀭𑀲𑁆𑀲 𑀅𑀢𑁆𑀢𑀦𑁄 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸 𑀫𑀳𑀧𑁆𑀨𑀮𑀪𑀸𑀯𑀲𑁆𑀲 𑀓𑀭𑀡𑁂𑀦 𑀧𑀺𑀡𑁆𑀟𑀸𑀬 𑀪𑀺𑀓𑁆𑀔𑀸𑀬 𑀧𑀝𑀺𑀧𑀽𑀚𑀦𑀸 𑀧𑀺𑀡𑁆𑀟𑀸𑀧𑀘𑀸𑀬𑀦𑀸. 𑀦𑀻𑀳𑀭𑀦𑁆𑀢𑁄𑀢𑀺 𑀧𑀢𑁆𑀢𑀢𑁆𑀣𑀯𑀺𑀓𑀢𑁄 𑀦𑀻𑀳𑀭𑀦𑁆𑀢𑁄. 𑀢𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸𑀢𑀺 𑀢𑀁 𑀉𑀧𑀸𑀲𑀺𑀓𑀸𑀬 𑀯𑀘𑀦𑀁 𑀧𑀡𑁆𑀡𑀲𑀸𑀮𑀤𑁆𑀯𑀸𑀭𑁂 𑀞𑀺𑀢𑁄𑀯 𑀧𑀜𑁆𑀘𑀸𑀪𑀺𑀜𑁆𑀜𑀢𑀸𑀬 𑀤𑀺𑀩𑁆𑀩𑀲𑁄𑀢𑁂𑀦 𑀲𑀼𑀢𑁆𑀯𑀸𑀢𑀺 𑀯𑀤𑀦𑁆𑀢𑀺. 𑀫𑀦𑀼𑀲𑁆𑀲𑀲𑀫𑁆𑀧𑀢𑁆𑀢𑀺, 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺, 𑀅𑀦𑁆𑀢𑁂 𑀦𑀺𑀩𑁆𑀩𑀸𑀦𑀲𑀫𑁆𑀧𑀢𑁆𑀢𑀻𑀢𑀺 𑀢𑀺𑀲𑁆𑀲𑁄 𑀲𑀫𑁆𑀧𑀢𑁆𑀢𑀺𑀬𑁄. 𑀲𑀺𑀢𑀁 𑀓𑀭𑁄𑀦𑁆𑀢𑁄𑀯𑀸𑀢𑀺 ‘‘𑀅𑀓𑀺𑀘𑁆𑀙𑁂𑀦𑁂𑀯 𑀫𑀬𑀸 𑀯𑀝𑁆𑀝𑀤𑀼𑀓𑁆𑀔𑀁 𑀲𑀫𑀢𑀺𑀓𑁆𑀓𑀦𑁆𑀢’’𑀦𑁆𑀢𑀺 𑀧𑀘𑁆𑀘𑀯𑁂𑀓𑁆𑀔𑀡𑀸𑀯𑀲𑀸𑀦𑁂 𑀲𑀜𑁆𑀚𑀸𑀢𑀧𑀸𑀫𑁄𑀚𑁆𑀚𑀯𑀲𑁂𑀦 𑀲𑀺𑀢𑀁 𑀓𑀭𑁄𑀦𑁆𑀢𑁄 𑀏𑀯.

𑀅𑀮𑀲𑀸𑀦𑀁 𑀪𑀸𑀯𑀦𑀸𑀬 𑀦𑀸𑀫𑀫𑀢𑁆𑀢𑀫𑁆𑀧𑀺 𑀅𑀚𑀸𑀦𑀦𑁆𑀢𑀸𑀦𑀁 𑀓𑀸𑀬𑀲𑁆𑀲 𑀧𑁄𑀲𑀦𑀩𑀳𑀼𑀮𑀸𑀦𑀁 𑀬𑀸𑀯𑀤𑀢𑁆𑀣𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀲𑁂𑀬𑁆𑀬𑀲𑀼𑀔𑀸𑀤𑀺𑀁 𑀅𑀦𑀼𑀬𑀼𑀜𑁆𑀚𑀦𑁆𑀢𑀸𑀦𑀁 𑀢𑀺𑀭𑀘𑁆𑀙𑀸𑀦𑀓𑀣𑀺𑀓𑀸𑀦𑀁 𑀤𑀽𑀭𑀢𑁄𑀯 𑀯𑀚𑁆𑀚𑀦𑀁 𑀓𑀼𑀲𑀻𑀢𑀧𑀼𑀕𑁆𑀕𑀮𑀧𑀭𑀺𑀯𑀚𑁆𑀚𑀦𑀸. ‘‘𑀤𑀺𑀯𑀲𑀁 𑀘𑀗𑁆𑀓𑀫𑁂𑀦 𑀦𑀺𑀲𑀚𑁆𑀚𑀸𑀬𑀸’’𑀢𑀺𑀆𑀤𑀺𑀦𑀸 𑀪𑀸𑀯𑀦𑀸𑀭𑀫𑁆𑀪𑀯𑀲𑁂𑀦 𑀆𑀭𑀤𑁆𑀥𑀯𑀻𑀭𑀺𑀬𑀸𑀦𑀁 𑀤𑀴𑁆𑀳𑀧𑀭𑀓𑁆𑀓𑀫𑀸𑀦𑀁 𑀓𑀸𑀮𑁂𑀦𑀓𑀸𑀮𑀁 𑀉𑀧𑀲𑀗𑁆𑀓𑀫𑀦𑀸 𑀆𑀭𑀤𑁆𑀥𑀯𑀻𑀭𑀺𑀬𑀧𑀼𑀕𑁆𑀕𑀮𑀲𑁂𑀯𑀦𑀸. 𑀢𑁂𑀦𑀸𑀳 ‘‘𑀓𑀼𑀘𑁆𑀙𑀺𑀁 𑀧𑀽𑀭𑁂𑀢𑁆𑀯𑀸’’𑀢𑀺𑀆𑀤𑀺.

𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀧𑀦 ‘‘𑀚𑀸𑀢𑀺𑀫𑀳𑀢𑁆𑀢𑀧𑀘𑁆𑀘𑀯𑁂𑀓𑁆𑀔𑀡𑀸, 𑀲𑀩𑁆𑀭𑀳𑁆𑀫𑀘𑀸𑀭𑀺𑀫𑀳𑀢𑁆𑀢𑀧𑀘𑁆𑀘𑀯𑁂𑀓𑁆𑀔𑀡𑀸’’𑀢𑀺 𑀇𑀤𑀁 𑀤𑁆𑀯𑀬𑀁 𑀦 𑀕𑀳𑀺𑀢𑀁, ‘‘𑀣𑀺𑀦𑀫𑀺𑀤𑁆𑀥𑀯𑀺𑀦𑁄𑀤𑀦𑀢𑀸, 𑀲𑀫𑁆𑀫𑀧𑁆𑀧𑀥𑀸𑀦𑀧𑀘𑁆𑀘𑀯𑁂𑀓𑁆𑀔𑀡𑀸’’𑀢𑀺 𑀇𑀤𑀁 𑀤𑁆𑀯𑀬𑀁 𑀕𑀳𑀺𑀢𑀁. 𑀢𑀢𑁆𑀣 𑀆𑀦𑀺𑀲𑀁𑀲𑀤𑀲𑁆𑀲𑀸𑀯𑀺𑀢𑀸𑀬 𑀏𑀯 𑀲𑀫𑁆𑀫𑀧𑁆𑀧𑀥𑀸𑀦𑀧𑀘𑁆𑀘𑀯𑁂𑀓𑁆𑀔𑀡𑀸 𑀕𑀳𑀺𑀢𑀸 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀯𑀺𑀲𑁂𑀲𑀸𑀥𑀺𑀕𑀫𑀲𑁆𑀲 𑀯𑀻𑀭𑀺𑀬𑀸𑀬𑀢𑁆𑀢𑀢𑀸𑀤𑀲𑁆𑀲𑀦𑀪𑀸𑀯𑀢𑁄. 𑀣𑀺𑀦𑀫𑀺𑀤𑁆𑀥𑀯𑀺𑀦𑁄𑀤𑀦𑀁 𑀢𑀤𑀥𑀺𑀫𑀼𑀢𑁆𑀢𑀢𑀸𑀬 𑀕𑀳𑀺𑀢𑀁, 𑀯𑀻𑀭𑀺𑀬𑀼𑀧𑁆𑀧𑀸𑀤𑀦𑁂 𑀬𑀼𑀢𑁆𑀢𑀧𑀬𑀼𑀢𑁆𑀢𑀲𑁆𑀲 𑀣𑀺𑀦𑀫𑀺𑀤𑁆𑀥𑀯𑀺𑀦𑁄𑀤𑀦𑀁 𑀅𑀢𑁆𑀣𑀢𑁄 𑀲𑀺𑀤𑁆𑀥𑀫𑁂𑀯. 𑀢𑀢𑁆𑀣 𑀣𑀺𑀦𑀫𑀺𑀤𑁆𑀥𑀯𑀺𑀦𑁄𑀤𑀦𑀁 𑀓𑀼𑀲𑀻𑀢𑀧𑀼𑀕𑁆𑀕𑀮𑀧𑀭𑀺𑀯𑀚𑁆𑀚𑀦-𑀆𑀭𑀤𑁆𑀥𑀯𑀻𑀭𑀺𑀬𑀧𑀼𑀕𑁆𑀕𑀮-𑀲𑁂𑀯𑀦- 𑀢𑀤𑀥𑀺𑀫𑀼𑀢𑁆𑀢𑀢𑀸𑀧𑀝𑀺𑀧𑀓𑁆𑀔𑀯𑀺𑀥𑀫𑀦-𑀧𑀘𑁆𑀘𑀬𑀽𑀧𑀲𑀁𑀳𑀸𑀭𑀯𑀲𑁂𑀦, 𑀅𑀧𑀸𑀬𑀪𑀬𑀧𑀘𑁆𑀘𑀯𑁂𑀓𑁆𑀔𑀡𑀸𑀤𑀬𑁄 𑀲𑀫𑀼𑀢𑁆𑀢𑁂𑀚𑀦𑀯𑀲𑁂𑀦 𑀯𑀻𑀭𑀺𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀓𑀸𑀢𑀺 𑀤𑀝𑁆𑀞𑀩𑁆𑀩𑀸.

𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀬𑀸 𑀉𑀧𑀘𑀸𑀭𑀲𑀫𑀸𑀥𑀺𑀦𑀺𑀝𑁆𑀞𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀬𑀸𑀯 𑀉𑀧𑀘𑀸𑀭𑀸’’𑀢𑀺. 𑀲𑀓𑀮𑀲𑀭𑀻𑀭𑀁 𑀨𑀭𑀫𑀸𑀦𑁄𑀢𑀺 𑀧𑀻𑀢𑀺𑀲𑀫𑀼𑀝𑁆𑀞𑀸𑀦𑁂𑀳𑀺 𑀧𑀡𑀻𑀢𑀭𑀽𑀧𑁂𑀳𑀺 𑀲𑀓𑀮𑀲𑀭𑀻𑀭𑀁 𑀨𑀭𑀫𑀸𑀦𑁄. 𑀥𑀫𑁆𑀫𑀲𑀗𑁆𑀖𑀕𑀼𑀡𑁂 𑀅𑀦𑀼𑀲𑁆𑀲𑀭𑀦𑁆𑀢𑀲𑁆𑀲𑀧𑀺 𑀬𑀸𑀯 𑀉𑀧𑀘𑀸𑀭𑀸 𑀲𑀓𑀮𑀲𑀭𑀻𑀭𑀁 𑀨𑀭𑀫𑀸𑀦𑁄 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀉𑀧𑁆𑀧𑀚𑁆𑀚𑀢𑀻𑀢𑀺 𑀬𑁄𑀚𑀦𑀸. 𑀏𑀯𑀁 𑀲𑁂𑀲𑀅𑀦𑀼𑀲𑁆𑀲𑀢𑀻𑀲𑀼 𑀧𑀲𑀸𑀤𑀦𑀻𑀬𑀲𑀼𑀢𑁆𑀢𑀦𑁆𑀢𑀧𑀘𑁆𑀘𑀯𑁂𑀓𑁆𑀔𑀡𑀸𑀬 𑀘 𑀬𑁄𑀚𑁂𑀢𑀩𑁆𑀩𑀁 𑀢𑀲𑁆𑀲𑀸𑀧𑀺 𑀯𑀺𑀫𑀼𑀢𑁆𑀢𑀸𑀬𑀢𑀦𑀪𑀸𑀯𑁂𑀦 𑀢𑀕𑁆𑀕𑀢𑀺𑀓𑀢𑁆𑀢𑀸. 𑀏𑀯𑀭𑀽𑀧𑁂 𑀓𑀸𑀮𑁂𑀢𑀺 𑀤𑀼𑀩𑁆𑀪𑀺𑀓𑁆𑀔𑀪𑀬𑀸𑀤𑀻𑀲𑀽𑀢𑀺 𑀯𑀼𑀢𑁆𑀢𑀓𑀸𑀮𑁂. 𑀲𑀫𑀸𑀧𑀢𑁆𑀢𑀺𑀬𑀸…𑀧𑁂… 𑀦 𑀲𑀫𑀼𑀤𑀸𑀘𑀭𑀦𑁆𑀢𑀻𑀢𑀺 𑀇𑀤𑀁 𑀉𑀧𑀲𑀫𑀸𑀦𑀼𑀲𑁆𑀲𑀢𑀺𑀬𑀸 𑀯𑀲𑁂𑀦 𑀯𑀼𑀢𑁆𑀢𑀁. 𑀲𑀗𑁆𑀔𑀸𑀭𑀸𑀦𑀜𑁆𑀳𑀺 𑀲𑀧𑁆𑀧𑀤𑁂𑀲𑀯𑀽𑀧𑀲𑀫𑁂𑀧𑀺 𑀦𑀺𑀧𑁆𑀧𑀤𑁂𑀲𑀯𑀽𑀧𑀲𑀫𑁂 𑀯𑀺𑀬 𑀢𑀢𑁆𑀣 𑀲𑀧𑀜𑁆𑀜𑀸𑀬 𑀧𑀯𑀢𑁆𑀢𑀦𑀢𑁄 𑀪𑀸𑀯𑀦𑀸𑀫𑀦𑀲𑀺𑀓𑀸𑀭𑁄 𑀓𑀺𑀮𑁂𑀲𑀯𑀺𑀓𑁆𑀔𑀫𑁆𑀪𑀦𑀲𑀫𑀢𑁆𑀣𑁄 𑀳𑀼𑀢𑁆𑀯𑀸 𑀉𑀧𑀘𑀸𑀭𑀲𑀫𑀸𑀥𑀺𑀁 𑀆𑀯𑀳𑀦𑁆𑀢𑁄 𑀢𑀣𑀸𑀭𑀽𑀧𑀧𑀻𑀢𑀺𑀲𑁄𑀫𑀦𑀲𑁆𑀲𑀲𑀫𑀦𑁆𑀦𑀸𑀕𑀢𑁄 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀸𑀬 𑀳𑁄𑀢𑀻𑀢𑀺. 𑀧𑀲𑀸𑀤𑀦𑀻𑀬𑁂𑀲𑀼 𑀞𑀸𑀦𑁂𑀲𑀼 𑀧𑀲𑀸𑀤𑀲𑀺𑀦𑁂𑀳𑀸𑀪𑀸𑀯𑁂𑀦 𑀲𑀁𑀲𑀽𑀘𑀺𑀢𑀳𑀤𑀬𑀢𑀸 𑀮𑀽𑀔𑀢𑀸. 𑀲𑀸 𑀘 𑀢𑀢𑁆𑀣 𑀆𑀤𑀭𑀕𑀸𑀭𑀯𑀸𑀓𑀭𑀡𑁂𑀦 𑀯𑀺𑀜𑁆𑀜𑀸𑀬𑀢𑀻𑀢𑀺 𑀆𑀳 ‘‘𑀅𑀲𑀓𑁆𑀓𑀘𑁆𑀘𑀓𑀺𑀭𑀺𑀬𑀸𑀬 𑀲𑀁𑀲𑀽𑀘𑀺𑀢𑀮𑀽𑀔𑀪𑀸𑀯𑁂’’𑀢𑀺.

𑀓𑀸𑀬𑀘𑀺𑀢𑁆𑀢𑀤𑀭𑀣𑀯𑀽𑀧𑀲𑀫𑀮𑀓𑁆𑀔𑀡𑀸 𑀧𑀲𑁆𑀲𑀤𑁆𑀥𑀺 𑀏𑀯 𑀬𑀣𑀸𑀯𑀼𑀢𑁆𑀢𑀩𑁄𑀥𑀺𑀅𑀗𑁆𑀕𑀪𑀽𑀢𑁄 𑀧𑀲𑁆𑀲𑀤𑁆𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄, 𑀢𑀲𑁆𑀲 𑀧𑀲𑁆𑀲𑀤𑁆𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲. 𑀧𑀡𑀻𑀢𑀪𑁄𑀚𑀦𑀲𑁂𑀯𑀦𑀢𑀸𑀢𑀺 𑀧𑀡𑀻𑀢𑀲𑀧𑁆𑀧𑀸𑀬𑀪𑁄𑀚𑀦𑀲𑁂𑀯𑀦𑀢𑀸. 𑀉𑀢𑀼𑀇𑀭𑀺𑀬𑀸𑀧𑀣𑀲𑀼𑀔𑀕𑁆𑀕𑀳𑀡𑁂𑀳𑀺 𑀲𑀧𑁆𑀧𑀸𑀬𑀉𑀢𑀼𑀇𑀭𑀺𑀬𑀸𑀧𑀣𑀁 𑀕𑀳𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀜𑁆𑀳𑀺 𑀢𑀺𑀯𑀺𑀥𑀫𑁆𑀧𑀺 𑀲𑀧𑁆𑀧𑀸𑀬𑀁 𑀲𑁂𑀯𑀺𑀬𑀫𑀸𑀦𑀁 𑀓𑀸𑀬𑀲𑁆𑀲 𑀓𑀮𑁆𑀮𑀢𑀸𑀧𑀸𑀤𑀦𑀯𑀲𑁂𑀦 𑀘𑀺𑀢𑁆𑀢𑀲𑁆𑀲 𑀓𑀮𑁆𑀮𑀢𑀁 𑀆𑀯𑀳𑀦𑁆𑀢𑀁 𑀤𑀼𑀯𑀺𑀥𑀸𑀬𑀧𑀺 𑀧𑀲𑁆𑀲𑀤𑁆𑀥𑀺𑀬𑀸 𑀓𑀸𑀭𑀡𑀁 𑀳𑁄𑀢𑀺. 𑀲𑀢𑁆𑀢𑁂𑀲𑀼 𑀮𑀩𑁆𑀪𑀫𑀸𑀦𑀁 𑀲𑀼𑀔𑀤𑀼𑀓𑁆𑀔𑀁 𑀅𑀳𑁂𑀢𑀼𑀓𑀦𑁆𑀢𑀺 𑀅𑀬𑀫𑁂𑀓𑁄 𑀅𑀦𑁆𑀢𑁄, 𑀇𑀲𑁆𑀲𑀭𑀸𑀤𑀺𑀯𑀺𑀲𑀫𑀳𑁂𑀢𑀼𑀓𑀦𑁆𑀢𑀺 𑀅𑀬𑀁 𑀤𑀼𑀢𑀺𑀬𑁄, 𑀏𑀢𑁂 𑀉𑀪𑁄 𑀅𑀦𑁆𑀢𑁂 𑀅𑀦𑀼𑀧𑀕𑀫𑁆𑀫 𑀬𑀣𑀸𑀲𑀓𑀁 𑀓𑀫𑁆𑀫𑀼𑀦𑀸 𑀳𑁄𑀢𑀻𑀢𑀺 𑀅𑀬𑀁 𑀫𑀚𑁆𑀛𑀺𑀫𑀸 𑀧𑀝𑀺𑀧𑀢𑁆𑀢𑀺. 𑀫𑀚𑁆𑀛𑀢𑁆𑀢𑁄 𑀧𑀬𑁄𑀕𑁄 𑀬𑀲𑁆𑀲 𑀲𑁄 𑀫𑀚𑁆𑀛𑀢𑁆𑀢𑀧𑀬𑁄𑀕𑁄, 𑀢𑀲𑁆𑀲 𑀪𑀸𑀯𑁄 𑀫𑀚𑁆𑀛𑀢𑁆𑀢𑀧𑀬𑁄𑀕𑀢𑀸. 𑀅𑀬𑀜𑁆𑀳𑀺 𑀧𑀳𑀸𑀦𑀲𑀸𑀭𑀤𑁆𑀥𑀓𑀸𑀬𑀢𑀸-𑀲𑀗𑁆𑀔𑀸𑀢𑀧𑀲𑁆𑀲𑀤𑁆𑀥𑀓𑀸𑀬𑀢𑀸𑀬 𑀓𑀸𑀭𑀡𑀁 𑀳𑁄𑀦𑁆𑀢𑀻 𑀧𑀲𑁆𑀲𑀤𑁆𑀥𑀺𑀤𑁆𑀯𑀬𑀁 𑀆𑀯𑀳𑀢𑀺. 𑀏𑀢𑁂𑀦𑁂𑀯 𑀲𑀸𑀭𑀤𑁆𑀥𑀓𑀸𑀬𑀧𑀼𑀕𑁆𑀕𑀮𑀧𑀭𑀺𑀯𑀚𑁆𑀚𑀦-𑀧𑀲𑁆𑀲𑀤𑁆𑀥𑀓𑀸𑀬𑀧𑀼𑀕𑁆𑀕𑀮𑀲𑁂𑀯𑀦𑀸𑀦𑀁 𑀢𑀤𑀸𑀯𑀳𑀦𑀢𑀸 𑀲𑀁𑀯𑀡𑁆𑀡𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀯𑀢𑁆𑀣𑀼𑀯𑀺𑀲𑀤𑀓𑀺𑀭𑀺𑀬𑀸 𑀇𑀦𑁆𑀤𑁆𑀭𑀺𑀬𑀲𑀫𑀢𑁆𑀢𑀧𑀝𑀺𑀧𑀸𑀤𑀦𑀸 𑀘 ‘‘𑀧𑀜𑁆𑀜𑀸𑀯𑀳𑀸’’𑀢𑀺 𑀯𑀼𑀢𑁆𑀢𑀸. 𑀲𑀫𑀣𑀸𑀯𑀳𑀸𑀧𑀺 𑀢𑀸 𑀳𑁄𑀦𑁆𑀢𑀺 𑀲𑀫𑀣𑀸𑀯𑀳𑀪𑀸𑀯𑁂𑀦𑁂𑀯 𑀧𑀜𑁆𑀜𑀸𑀯𑀳𑀢𑁆𑀢𑀸𑀢𑀺 𑀯𑀼𑀢𑁆𑀢𑀁 ‘‘𑀯𑀢𑁆𑀣𑀼𑀯𑀺𑀲𑀤…𑀧𑁂… 𑀯𑁂𑀤𑀺𑀢𑀩𑁆𑀩𑀸’’𑀢𑀺.

𑀓𑀭𑀡𑀓𑁄𑀲𑀮𑁆𑀮𑀪𑀸𑀯𑀦𑀸𑀓𑁄𑀲𑀮𑁆𑀮𑀸𑀦𑀁 𑀦𑀸𑀦𑀦𑁆𑀢𑀭𑀺𑀬𑀪𑀸𑀯𑀢𑁄 𑀭𑀓𑁆𑀔𑀡𑀓𑁄𑀲𑀮𑁆𑀮𑀲𑁆𑀲 𑀘 𑀢𑀁𑀫𑀽𑀮𑀓𑀢𑁆𑀢𑀸 ‘‘𑀦𑀺𑀫𑀺𑀢𑁆𑀢𑀓𑀼𑀲𑀮𑀢𑀸 𑀦𑀸𑀫 𑀓𑀲𑀺𑀡𑀦𑀺𑀫𑀺𑀢𑁆𑀢𑀲𑁆𑀲 𑀉𑀕𑁆𑀕𑀳𑀡𑀓𑀼𑀲𑀮𑀢𑀸’’𑀇𑀘𑁆𑀘𑁂𑀯 𑀯𑀼𑀢𑁆𑀢𑀁. 𑀅𑀢𑀺𑀲𑀺𑀣𑀺𑀮𑀯𑀻𑀭𑀺𑀬𑀢𑀸𑀤𑀻𑀳𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀧𑀜𑁆𑀜𑀸𑀧𑀬𑁄𑀕𑀫𑀦𑁆𑀤𑀢𑀁 𑀅𑀧𑁆𑀧𑀫𑀸𑀤𑀯𑁂𑀓𑀮𑁆𑀮𑀜𑁆𑀘 𑀲𑀗𑁆𑀕𑀡𑁆𑀳𑀸𑀢𑀺. 𑀢𑀲𑁆𑀲 𑀧𑀕𑁆𑀕𑀡𑁆𑀳𑀦𑀦𑁆𑀢𑀺 𑀢𑀲𑁆𑀲 𑀮𑀻𑀦𑀲𑁆𑀲 𑀘𑀺𑀢𑁆𑀢𑀲𑁆𑀲 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀸𑀤𑀺𑀲𑀫𑀼𑀝𑁆𑀞𑀸𑀧𑀦𑁂𑀦 𑀮𑀬𑀸𑀧𑀢𑁆𑀢𑀺𑀢𑁄 𑀲𑀫𑀼𑀝𑁆𑀞𑀸𑀧𑀦𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋

‘‘𑀬𑀲𑁆𑀫𑀺𑀜𑁆𑀘 𑀔𑁄, 𑀪𑀺𑀓𑁆𑀔𑀯𑁂, 𑀲𑀫𑀬𑁂 𑀮𑀻𑀦𑀁 𑀘𑀺𑀢𑁆𑀢𑀁 𑀳𑁄𑀢𑀺, 𑀓𑀸𑀮𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬, 𑀓𑀸𑀮𑁄 𑀯𑀻𑀭𑀺𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬, 𑀓𑀸𑀮𑁄 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀮𑀻𑀦𑀁, 𑀪𑀺𑀓𑁆𑀔𑀯𑁂, 𑀘𑀺𑀢𑁆𑀢𑀁, 𑀢𑀁 𑀏𑀢𑁂𑀳𑀺 𑀥𑀫𑁆𑀫𑁂𑀳𑀺 𑀲𑀼𑀲𑀫𑀼𑀝𑁆𑀞𑀸𑀧𑀬𑀁 𑀳𑁄𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑁄 𑀧𑀭𑀺𑀢𑁆𑀢𑀁 𑀅𑀕𑁆𑀕𑀺𑀁 𑀉𑀚𑁆𑀚𑀸𑀮𑁂𑀢𑀼𑀓𑀸𑀫𑁄 𑀅𑀲𑁆𑀲, 𑀲𑁄 𑀢𑀢𑁆𑀣 𑀲𑀼𑀓𑁆𑀔𑀸𑀦𑀺 𑀘𑁂𑀯 𑀢𑀺𑀡𑀸𑀦𑀺 𑀧𑀓𑁆𑀔𑀺𑀧𑁂𑀬𑁆𑀬, 𑀲𑀼𑀓𑁆𑀔𑀸𑀦𑀺 𑀕𑁄𑀫𑀬𑀸𑀦𑀺 𑀧𑀓𑁆𑀔𑀺𑀧𑁂𑀬𑁆𑀬, 𑀲𑀼𑀓𑁆𑀔𑀸𑀦𑀺 𑀓𑀝𑁆𑀞𑀸𑀦𑀺 𑀧𑀓𑁆𑀔𑀺𑀧𑁂𑀬𑁆𑀬, 𑀫𑀼𑀔𑀯𑀸𑀢𑀜𑁆𑀘 𑀤𑀤𑁂𑀬𑁆𑀬, 𑀦 𑀘 𑀧𑀁𑀲𑀼𑀓𑁂𑀦 𑀑𑀓𑀺𑀭𑁂𑀬𑁆𑀬, 𑀪𑀩𑁆𑀩𑁄 𑀦𑀼 𑀔𑁄 𑀲𑁄 𑀧𑀼𑀭𑀺𑀲𑁄 𑀧𑀭𑀺𑀢𑁆𑀢𑀁 𑀅𑀕𑁆𑀕𑀺𑀁 𑀉𑀚𑁆𑀚𑀸𑀮𑁂𑀢𑀼𑀦𑁆𑀢𑀺. 𑀏𑀯𑀁, 𑀪𑀦𑁆𑀢𑁂’’𑀢𑀺 (𑀲𑀁. 𑀦𑀺. 𑁫.𑁨𑁩𑁪).

𑀏𑀢𑁆𑀣 𑀘 𑀬𑀣𑀸𑀲𑀓𑀁 𑀆𑀳𑀸𑀭𑀯𑀲𑁂𑀦 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀸𑀤𑀻𑀦𑀁 𑀪𑀸𑀯𑀦𑀸 𑀲𑀫𑀼𑀝𑁆𑀞𑀸𑀧𑀦𑀸𑀢𑀺 𑀯𑁂𑀤𑀺𑀢𑀩𑁆𑀩𑀸, 𑀲𑀸 𑀅𑀦𑀦𑁆𑀢𑀭𑀁 𑀯𑀺𑀪𑀸𑀯𑀺𑀢𑀸 𑀏𑀯.

𑀅𑀘𑁆𑀘𑀸𑀭𑀤𑁆𑀥𑀯𑀻𑀭𑀺𑀬𑀢𑀸𑀤𑀻𑀳𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀧𑀜𑁆𑀜𑀸𑀧𑀬𑁄𑀕𑀩𑀮𑀯𑀢𑀁 𑀧𑀫𑁄𑀤𑀼𑀧𑁆𑀧𑀺𑀮𑀸𑀯𑀦𑀜𑁆𑀘 𑀲𑀗𑁆𑀕𑀡𑁆𑀳𑀸𑀢𑀺. 𑀢𑀲𑁆𑀲 𑀦𑀺𑀕𑁆𑀕𑀡𑁆𑀳𑀦𑀦𑁆𑀢𑀺 𑀢𑀲𑁆𑀲 𑀉𑀤𑁆𑀥𑀢𑀲𑁆𑀲 𑀘𑀺𑀢𑁆𑀢𑀲𑁆𑀲 𑀲𑀫𑀸𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀸𑀤𑀺𑀲𑀫𑀼𑀝𑁆𑀞𑀸𑀧𑀦𑁂𑀦 𑀉𑀤𑁆𑀥𑀢𑀸𑀧𑀢𑁆𑀢𑀺𑀢𑁄 𑀦𑀺𑀲𑁂𑀥𑀦𑀁. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑀪𑀕𑀯𑀢𑀸 𑁋

‘‘𑀬𑀲𑁆𑀫𑀺𑀜𑁆𑀘 𑀔𑁄, 𑀪𑀺𑀓𑁆𑀔𑀯𑁂, 𑀲𑀫𑀬𑁂 𑀉𑀤𑁆𑀥𑀢𑀁 𑀘𑀺𑀢𑁆𑀢𑀁 𑀳𑁄𑀢𑀺, 𑀓𑀸𑀮𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀧𑀲𑁆𑀲𑀤𑁆𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬, 𑀓𑀸𑀮𑁄 𑀲𑀫𑀸𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬, 𑀓𑀸𑀮𑁄 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀉𑀤𑁆𑀥𑀢𑀁, 𑀪𑀺𑀓𑁆𑀔𑀯𑁂, 𑀘𑀺𑀢𑁆𑀢𑀁, 𑀢𑀁 𑀏𑀢𑁂𑀳𑀺 𑀥𑀫𑁆𑀫𑁂𑀳𑀺 𑀲𑀼𑀯𑀽𑀧𑀲𑀫𑀬𑀁 𑀳𑁄𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑁄 𑀫𑀳𑀦𑁆𑀢𑀁 𑀅𑀕𑁆𑀕𑀺𑀓𑁆𑀔𑀦𑁆𑀥𑀁 𑀦𑀺𑀩𑁆𑀩𑀸𑀧𑁂𑀢𑀼𑀓𑀸𑀫𑁄 𑀅𑀲𑁆𑀲, 𑀲𑁄 𑀢𑀢𑁆𑀣 𑀅𑀮𑁆𑀮𑀸𑀦𑀺 𑀘𑁂𑀯 𑀢𑀺𑀡𑀸𑀦𑀺….𑀧𑁂… 𑀧𑀁𑀲𑀼𑀓𑁂𑀦 𑀘 𑀑𑀓𑀺𑀭𑁂𑀬𑁆𑀬, 𑀪𑀩𑁆𑀩𑁄 𑀦𑀼 𑀔𑁄 𑀲𑁄 𑀧𑀼𑀭𑀺𑀲𑁄 𑀫𑀳𑀦𑁆𑀢𑀁 𑀅𑀕𑁆𑀕𑀺𑀓𑁆𑀔𑀦𑁆𑀥𑀁 𑀦𑀺𑀩𑁆𑀩𑀸𑀧𑁂𑀢𑀼𑀦𑁆𑀢𑀺. 𑀏𑀯𑀁, 𑀪𑀦𑁆𑀢𑁂’’𑀢𑀺 (𑀲𑀁. 𑀦𑀺. 𑁫.𑁨𑁩𑁪).

𑀏𑀢𑁆𑀣𑀸𑀧𑀺 𑀬𑀣𑀸𑀲𑀓𑀁 𑀆𑀳𑀸𑀭𑀯𑀲𑁂𑀦 𑀧𑀲𑁆𑀲𑀤𑁆𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀸𑀤𑀻𑀦𑀁 𑀪𑀸𑀯𑀦𑀸 𑀲𑀫𑀼𑀝𑁆𑀞𑀸𑀧𑀦𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑀢𑁆𑀣 𑀧𑀲𑁆𑀲𑀤𑁆𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸 𑀯𑀼𑀢𑁆𑀢𑀸 𑀏𑀯, 𑀲𑀫𑀸𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀯𑀼𑀘𑁆𑀘𑀫𑀸𑀦𑀸, 𑀇𑀢𑀭𑀲𑁆𑀲 𑀅𑀦𑀦𑁆𑀢𑀭𑀁 𑀯𑀓𑁆𑀔𑀢𑀺. 𑀧𑀜𑁆𑀜𑀸𑀧𑀬𑁄𑀕𑀫𑀦𑁆𑀤𑀢𑀸𑀬𑀸𑀢𑀺 𑀧𑀜𑁆𑀜𑀸𑀩𑁆𑀬𑀸𑀧𑀸𑀭𑀲𑁆𑀲 𑀅𑀧𑁆𑀧𑀪𑀸𑀯𑁂𑀦. 𑀬𑀣𑀸 𑀳𑀺 𑀤𑀸𑀦𑀁 𑀅𑀮𑁄𑀪𑀧𑁆𑀧𑀥𑀸𑀦𑀁, 𑀲𑀻𑀮𑀁 𑀅𑀤𑁄𑀲𑀧𑁆𑀧𑀥𑀸𑀦𑀁, 𑀏𑀯𑀁 𑀪𑀸𑀯𑀦𑀸 𑀅𑀫𑁄𑀳𑀧𑁆𑀧𑀥𑀸𑀦𑀸. 𑀢𑀢𑁆𑀣 𑀬𑀤𑀸 𑀧𑀜𑁆𑀜𑀸 𑀦 𑀩𑀮𑀯𑀢𑀻 𑀳𑁄𑀢𑀺, 𑀢𑀤𑀸 𑀪𑀸𑀯𑀦𑀸 𑀧𑀼𑀩𑁆𑀩𑁂𑀦𑀸𑀧𑀭𑀁 𑀯𑀺𑀲𑁂𑀲𑀸𑀯𑀳𑀸 𑀦 𑀳𑁄𑀢𑀺, 𑀅𑀦𑀪𑀺𑀲𑀗𑁆𑀔𑀢𑁄 𑀯𑀺𑀬 𑀆𑀳𑀸𑀭𑁄 𑀧𑀼𑀭𑀺𑀲𑀲𑁆𑀲 𑀬𑁄𑀕𑀺𑀦𑁄 𑀘𑀺𑀢𑁆𑀢𑀲𑁆𑀲 𑀅𑀪𑀺𑀭𑀼𑀘𑀺𑀁 𑀦 𑀉𑀧𑁆𑀧𑀸𑀤𑁂𑀢𑀺, 𑀢𑁂𑀦 𑀢𑀁 𑀦𑀺𑀭𑀲𑁆𑀲𑀸𑀤𑀁 𑀳𑁄𑀢𑀺. 𑀢𑀣𑀸 𑀪𑀸𑀯𑀦𑀸𑀬 𑀲𑀫𑁆𑀫𑀤𑁂𑀯 𑀯𑀻𑀣𑀺𑀧𑀝𑀺𑀧𑀢𑁆𑀢𑀺𑀬𑀸 𑀅𑀪𑀸𑀯𑁂𑀦 𑀉𑀧𑀲𑀫𑀲𑀼𑀔𑀁 𑀦 𑀯𑀺𑀦𑁆𑀤𑀢𑀺, 𑀢𑁂𑀦𑀧𑀺 𑀘𑀺𑀢𑁆𑀢𑀁 𑀦𑀺𑀭𑀲𑁆𑀲𑀸𑀤𑀁 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀧𑀜𑁆𑀜𑀸𑀧𑀬𑁄𑀕…𑀧𑁂… 𑀦𑀺𑀭𑀲𑁆𑀲𑀸𑀤𑀁 𑀳𑁄𑀢𑀻’’𑀢𑀺.

𑀢𑀲𑁆𑀲 𑀲𑀁𑀯𑁂𑀕𑀼𑀧𑁆𑀧𑀸𑀤𑀦𑀜𑁆𑀘 𑀧𑀲𑀸𑀤𑀼𑀧𑁆𑀧𑀸𑀤𑀦𑀜𑁆𑀘 𑀢𑀺𑀓𑀺𑀘𑁆𑀙𑀦𑀦𑁆𑀢𑀺 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀝𑁆𑀞 𑀲𑀁𑀯𑁂𑀕𑀯𑀢𑁆𑀣𑀽𑀦𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀚𑀸𑀢𑀺𑀚𑀭𑀸𑀩𑁆𑀬𑀸𑀥𑀺𑀫𑀭𑀡𑀸𑀦𑀺 𑀬𑀣𑀸𑀭𑀳𑀁 𑀲𑀼𑀕𑀢𑀺𑀬𑀁 𑀤𑀼𑀕𑁆𑀕𑀢𑀺𑀬𑀜𑁆𑀘 𑀳𑁄𑀦𑁆𑀢𑀻𑀢𑀺 𑀢𑀤𑀜𑁆𑀜𑀫𑁂𑀯 𑀧𑀜𑁆𑀘𑀯𑀺𑀥𑀩𑀦𑁆𑀥𑀦𑀸𑀤𑀺𑀔𑀼𑀧𑁆𑀧𑀺𑀧𑀸𑀲𑀸𑀤𑀺𑀅𑀜𑁆𑀜𑀫𑀜𑁆𑀜𑀯𑀺𑀩𑀸𑀥𑀦𑀸𑀤𑀺𑀳𑁂𑀢𑀼𑀓𑀁 𑀅𑀧𑀸𑀬𑀤𑀼𑀓𑁆𑀔𑀁 𑀤𑀝𑁆𑀞𑀩𑁆𑀩𑀁. 𑀢𑀬𑀺𑀤𑀁 𑀲𑀩𑁆𑀩𑀁 𑀢𑁂𑀲𑀁 𑀢𑁂𑀲𑀁 𑀲𑀢𑁆𑀢𑀸𑀦𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀪𑀯𑀦𑀺𑀲𑁆𑀲𑀺𑀢𑀁 𑀕𑀳𑀺𑀢𑀦𑁆𑀢𑀺 𑀅𑀢𑀻𑀢𑁂 𑀅𑀦𑀸𑀕𑀢𑁂 𑀘 𑀓𑀸𑀮𑁂 𑀯𑀝𑁆𑀝𑀫𑀽𑀮𑀓𑀤𑀼𑀓𑁆𑀔𑀸𑀦𑀺 𑀯𑀺𑀲𑀼𑀁 𑀕𑀳𑀺𑀢𑀸𑀦𑀺𑀬𑁂𑀯. 𑀬𑁂 𑀧𑀦 𑀲𑀢𑁆𑀢𑀸 𑀆𑀳𑀸𑀭𑀽𑀧𑀚𑀻𑀯𑀺𑀦𑁄 𑀢𑀢𑁆𑀣 𑀘 𑀉𑀝𑁆𑀞𑀸𑀦𑀨𑀮𑀽𑀧𑀚𑀻𑀯𑀺𑀦𑁄, 𑀢𑁂𑀲𑀁 𑀅𑀜𑁆𑀜𑁂𑀳𑀺 𑀅𑀲𑀸𑀥𑀸𑀭𑀡𑀁 𑀚𑀻𑀯𑀺𑀓𑀤𑀼𑀓𑁆𑀔𑀁 𑀅𑀝𑁆𑀞𑀫𑀁 𑀲𑀁𑀯𑁂𑀕𑀯𑀢𑁆𑀣𑀼 𑀕𑀳𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀬𑀁 𑀯𑀼𑀘𑁆𑀘𑀢𑀺 𑀲𑀫𑀬𑁂 𑀲𑀫𑁆𑀧𑀳𑀁𑀲𑀦𑀸𑀢𑀺 𑀅𑀬𑀁 𑀲𑀫𑁆𑀧𑀳𑀁𑀲𑀺𑀢𑀩𑁆𑀩𑀲𑀫𑀬𑁂 𑀯𑀼𑀢𑁆𑀢𑀦𑀬𑁂𑀦 𑀲𑀁𑀯𑁂𑀕𑀚𑀦𑀦𑀯𑀲𑁂𑀦 𑀘𑁂𑀯 𑀧𑀲𑀸𑀤𑀼𑀧𑁆𑀧𑀸𑀤𑀦𑀯𑀲𑁂𑀦 𑀘 𑀲𑀫𑁆𑀫𑀤𑁂𑀯 𑀧𑀳𑀁𑀲𑀦𑀸, 𑀲𑀁𑀯𑁂𑀕𑀚𑀦𑀦𑀧𑀼𑀩𑁆𑀩𑀓𑀧𑀲𑀸𑀤𑀼𑀧𑁆𑀧𑀸𑀤𑀦𑁂𑀦 𑀪𑀸𑀯𑀦𑀸𑀘𑀺𑀢𑁆𑀢𑀲𑁆𑀲 𑀢𑁄𑀲𑀦𑀸𑀢𑀺𑀅𑀢𑁆𑀣𑁄.

𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀁 𑀆𑀕𑀫𑁆𑀫𑀸𑀢𑀺 𑀮𑀻𑀦𑀼𑀤𑁆𑀥𑀘𑁆𑀘𑀯𑀺𑀭𑀳𑁂𑀦 𑀲𑀫𑀣𑀯𑀻𑀣𑀺𑀧𑀝𑀺𑀧𑀢𑁆𑀢𑀺𑀬𑀸 𑀘 𑀲𑀫𑁆𑀫𑀤𑁂𑀯 𑀪𑀸𑀯𑀦𑀸𑀧𑀝𑀺𑀧𑀢𑁆𑀢𑀺𑀁 𑀆𑀕𑀫𑁆𑀫.

𑀅𑀮𑀻𑀦𑀦𑁆𑀢𑀺𑀆𑀤𑀻𑀲𑀼 𑀓𑁄𑀲𑀚𑁆𑀚𑀧𑀓𑁆𑀔𑀺𑀓𑀸𑀦𑀁 𑀥𑀫𑁆𑀫𑀸𑀦𑀁 𑀅𑀦𑀥𑀺𑀫𑀢𑁆𑀢𑀢𑀸𑀬 𑀅𑀮𑀻𑀦𑀁, 𑀉𑀤𑁆𑀥𑀘𑁆𑀘𑀧𑀓𑁆𑀔𑀺𑀓𑀸𑀦𑀁 𑀅𑀦𑀥𑀺𑀫𑀢𑁆𑀢𑀢𑀸𑀬 𑀅𑀦𑀼𑀤𑁆𑀥𑀢𑀁, 𑀧𑀜𑁆𑀜𑀸𑀧𑀬𑁄𑀕𑀲𑀫𑁆𑀧𑀢𑁆𑀢𑀺𑀬𑀸 𑀉𑀧𑀲𑀫𑀲𑀼𑀔𑀸𑀥𑀺𑀕𑀫𑁂𑀦 𑀘 𑀅𑀦𑀺𑀭𑀲𑁆𑀲𑀸𑀤𑀁, 𑀢𑀢𑁄 𑀏𑀯 𑀆𑀭𑀫𑁆𑀫𑀡𑁂 𑀲𑀫𑀧𑁆𑀧𑀯𑀢𑁆𑀢𑀁 𑀲𑀫𑀣𑀯𑀻𑀣𑀺𑀧𑀝𑀺𑀧𑀦𑁆𑀦𑀜𑁆𑀘. 𑀢𑀢𑁆𑀣 𑀅𑀮𑀻𑀦𑀢𑀸𑀬 𑀧𑀕𑁆𑀕𑀳𑁂, 𑀅𑀦𑀼𑀤𑁆𑀥𑀢𑀸𑀬 𑀘 𑀦𑀺𑀕𑁆𑀕𑀳𑁂, 𑀅𑀦𑀺𑀭𑀲𑁆𑀲𑀸𑀤𑀢𑀸𑀬 𑀲𑀫𑁆𑀧𑀳𑀁𑀲𑀦𑁂 𑀦 𑀩𑁆𑀬𑀸𑀧𑀸𑀭𑀁 𑀆𑀧𑀚𑁆𑀚𑀢𑀺. 𑀅𑀮𑀻𑀦𑀸𑀦𑀼𑀤𑁆𑀥𑀘𑁆𑀘𑀢𑀸𑀳𑀺 𑀆𑀭𑀫𑁆𑀫𑀡𑁂 𑀲𑀫𑀧𑁆𑀧𑀯𑀢𑁆𑀢𑀁, 𑀅𑀦𑀺𑀭𑀲𑁆𑀲𑀸𑀤𑀢𑀸𑀬 𑀲𑀫𑀣𑀯𑀻𑀣𑀺𑀧𑀝𑀺𑀧𑀦𑁆𑀦𑀁, 𑀲𑀫𑀧𑁆𑀧𑀯𑀢𑁆𑀢𑀺𑀬𑀸 𑀯𑀸 𑀅𑀮𑀻𑀦𑀁 𑀅𑀦𑀼𑀤𑁆𑀥𑀢𑀁, 𑀲𑀫𑀣𑀯𑀻𑀣𑀺𑀧𑀝𑀺𑀧𑀢𑁆𑀢𑀺𑀬𑀸 𑀅𑀦𑀺𑀭𑀲𑁆𑀲𑀸𑀤𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀬𑀁 𑀯𑀼𑀘𑁆𑀘𑀢𑀺 𑀲𑀫𑀬𑁂 𑀅𑀚𑁆𑀛𑀼𑀧𑁂𑀓𑁆𑀔𑀦𑀢𑀸𑀢𑀺 𑀅𑀬𑀁 𑀅𑀚𑁆𑀛𑀼𑀧𑁂𑀓𑁆𑀔𑀺𑀢𑀩𑁆𑀩𑀲𑀫𑀬𑁂 𑀘𑀺𑀢𑁆𑀢𑀲𑁆𑀲 𑀧𑀕𑁆𑀕𑀳𑀦𑀺𑀕𑁆𑀕𑀳𑀲𑀫𑁆𑀧𑀳𑀁𑀲𑀦𑁂𑀲𑀼 𑀩𑁆𑀬𑀸𑀯𑀝𑀢𑀸𑀲𑀗𑁆𑀔𑀸𑀢𑀁 𑀧𑀝𑀺𑀧𑀓𑁆𑀔𑀁 𑀅𑀪𑀺𑀪𑀼𑀬𑁆𑀬 𑀉𑀧𑁂𑀓𑁆𑀔𑀦𑀸 𑀯𑀼𑀘𑁆𑀘𑀢𑀺. 𑀏𑀲𑀸𑀢𑀺 𑀲𑀫𑀸𑀥𑀺𑀩𑁄𑀚𑁆𑀛𑀗𑁆𑀕𑁄 𑀅𑀦𑀼𑀧𑁆𑀧𑀦𑁆𑀦𑁄 𑀉𑀧𑁆𑀧𑀚𑁆𑀚𑀢𑀺. 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀻 𑀳𑁄𑀢𑀻𑀢𑀺 𑀏𑀢𑁂𑀦 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀲𑀫𑀸𑀥𑀺𑀯𑁂𑀧𑀼𑀮𑁆𑀮𑀧𑁆𑀧𑀢𑁆𑀢𑁄𑀧𑀺 𑀅𑀭𑀳𑀸 𑀏𑀯𑀸𑀢𑀺 𑀤𑀲𑁆𑀲𑁂𑀢𑀺.

𑀅𑀦𑀼𑀭𑁄𑀥𑀯𑀺𑀭𑁄𑀥𑀧𑀳𑀸𑀦𑀯𑀲𑁂𑀦 𑀫𑀚𑁆𑀛𑀢𑁆𑀢𑀪𑀸𑀯𑁄 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀓𑀸𑀭𑀡𑀁 𑀢𑀲𑁆𑀫𑀺𑀁 𑀲𑀢𑀺 𑀲𑀺𑀚𑁆𑀛𑀦𑀢𑁄, 𑀅𑀲𑀢𑀺 𑀘 𑀅𑀲𑀺𑀚𑁆𑀛𑀦𑀢𑁄, 𑀲𑁄 𑀘 𑀫𑀚𑁆𑀛𑀢𑁆𑀢𑀪𑀸𑀯𑁄 𑀯𑀺𑀲𑀬𑀯𑀲𑁂𑀦 𑀤𑀼𑀯𑀺𑀥𑁄𑀢𑀺 𑀆𑀳 ‘‘𑀲𑀢𑁆𑀢𑀫𑀚𑁆𑀛𑀢𑁆𑀢𑀢𑀸 𑀲𑀗𑁆𑀔𑀸𑀭𑀫𑀚𑁆𑀛𑀢𑁆𑀢𑀢𑀸’’𑀢𑀺. 𑀢𑀤𑀼𑀪𑀬𑀯𑀲𑁂𑀦 𑀘𑀲𑁆𑀲 𑀯𑀺𑀭𑀼𑀚𑁆𑀛𑀦𑀁 𑀧𑀲𑁆𑀲𑀤𑁆𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬 𑀏𑀯 𑀤𑀽𑀭𑀻𑀓𑀢𑀦𑁆𑀢𑀺 𑀅𑀦𑀼𑀭𑀼𑀚𑁆𑀛𑀦𑀲𑁆𑀲𑁂𑀯 𑀧𑀳𑀸𑀦𑀯𑀺𑀥𑀺𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀢𑁆𑀢𑀫𑀚𑁆𑀛𑀢𑁆𑀢𑀢𑀸’’𑀢𑀺𑀆𑀤𑀺𑀫𑀸𑀳. 𑀢𑀣𑀸 𑀳𑀺𑀲𑁆𑀲 𑀲𑀢𑁆𑀢𑀲𑀗𑁆𑀔𑀸𑀭𑀓𑁂𑀮𑀸𑀬𑀦𑀧𑀼𑀕𑁆𑀕𑀮𑀧𑀭𑀺𑀯𑀚𑁆𑀚𑀦𑀁 ‘‘𑀉𑀧𑁆𑀧𑀢𑁆𑀢𑀺𑀬𑀸 𑀓𑀸𑀭𑀡’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀉𑀧𑁂𑀓𑁆𑀔𑀸𑀬 𑀳𑀺 𑀯𑀺𑀲𑁂𑀲𑀢𑁄 𑀭𑀸𑀕𑁄 𑀧𑀝𑀺𑀧𑀓𑁆𑀔𑁄, 𑀢𑀢𑁄 𑀭𑀸𑀕𑀩𑀳𑀼𑀮𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀉𑀧𑁂𑀓𑁆𑀔𑀸 ‘‘𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁄’’𑀢𑀺 𑀯𑀼𑀘𑁆𑀘𑀢𑀺. 𑀤𑁆𑀯𑀻𑀳𑀸𑀓𑀸𑀭𑁂𑀳𑀻𑀢𑀺 𑀓𑀫𑁆𑀫𑀲𑁆𑀲𑀓𑀢𑀸𑀧𑀘𑁆𑀘𑀯𑁂𑀓𑁆𑀔𑀡𑀁 𑀅𑀢𑁆𑀢𑀲𑀼𑀜𑁆𑀜𑀢𑀸𑀧𑀘𑁆𑀘𑀯𑁂𑀓𑁆𑀔𑀡𑀦𑁆𑀢𑀺 𑀇𑀫𑁂𑀳𑀺 𑀤𑁆𑀯𑀻𑀳𑀺 𑀓𑀸𑀭𑀡𑁂𑀳𑀺. 𑀤𑁆𑀯𑀻𑀳𑁂𑀯𑀸𑀢𑀺 𑀅𑀯𑀥𑀸𑀭𑀡𑀁 𑀲𑀗𑁆𑀔𑀸𑀭𑀲𑀳𑀺𑀢𑀸𑀬 𑀲𑀗𑁆𑀔𑁆𑀬𑀸𑀲𑀫𑀸𑀦𑀢𑀸𑀬 𑀤𑀲𑁆𑀲𑀦𑀢𑁆𑀣𑀁. 𑀲𑀗𑁆𑀔𑁆𑀬𑀸 𑀏𑀯 𑀳𑁂𑀢𑁆𑀣 𑀲𑀫𑀸𑀦𑀁, 𑀦 𑀲𑀗𑁆𑀔𑁆𑀬𑁂𑀬𑁆𑀬𑀁 𑀲𑀩𑁆𑀩𑀣𑀸 𑀲𑀫𑀸𑀦𑀦𑁆𑀢𑀺. 𑀅𑀲𑁆𑀲𑀸𑀫𑀺𑀓𑀪𑀸𑀯𑁄 𑀅𑀦𑀢𑁆𑀢𑀦𑀺𑀬𑀢𑀸. 𑀲𑀢𑀺 𑀳𑀺 𑀅𑀢𑁆𑀢𑀦𑀺 𑀢𑀲𑁆𑀲 𑀓𑀺𑀜𑁆𑀘𑀦𑀪𑀸𑀯𑁂𑀦 𑀘𑀻𑀯𑀭𑀁 𑀅𑀜𑁆𑀜𑀁 𑀯𑀸 𑀓𑀺𑀜𑁆𑀘𑀺 𑀅𑀢𑁆𑀢𑀦𑀺𑀬𑀁 𑀦𑀸𑀫 𑀲𑀺𑀬𑀸, 𑀲𑁄 𑀧𑀦 𑀓𑁄𑀘𑀺 𑀦𑀢𑁆𑀣𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀦𑀤𑁆𑀥𑀦𑀺𑀬𑀦𑁆𑀢𑀺, 𑀦 𑀅𑀤𑁆𑀥𑀸𑀦𑀓𑁆𑀔𑀫𑀁, 𑀦 𑀘𑀺𑀭𑀝𑁆𑀞𑀸𑀬𑀺 𑀇𑀢𑁆𑀢𑀭𑀁 𑀅𑀦𑀺𑀘𑁆𑀘𑀦𑁆𑀢𑀺 𑀅𑀢𑁆𑀣𑁄. 𑀢𑀸𑀯𑀓𑀸𑀮𑀺𑀓𑀦𑁆𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁.

𑀫𑀫𑀸𑀬𑀢𑀻𑀢𑀺 𑀫𑀫𑀢𑁆𑀢𑀁 𑀓𑀭𑁄𑀢𑀺. 𑀫𑀫𑀸𑀢𑀺 𑀢𑀡𑁆𑀳𑀸𑀬 𑀧𑀭𑀺𑀕𑁆𑀕𑀬𑁆𑀳 𑀢𑀺𑀝𑁆𑀞𑀢𑀺. 𑀥𑀦𑀸𑀬𑀦𑁆𑀢𑀸𑀢𑀺 𑀥𑀦𑀁 𑀤𑀩𑁆𑀩𑀁 𑀓𑀭𑁄𑀦𑁆𑀢𑀸. 𑀅𑀲𑁆𑀲𑀸𑀢𑀺 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀻 𑀳𑁄𑀢𑀺. 𑀢𑀣𑀸 𑀳𑀺 𑀅𑀭𑀳𑀢𑁄 𑀏𑀯 𑀙𑀴𑀗𑁆𑀕𑀼𑀧𑁂𑀓𑁆𑀔𑀸𑀦𑀺𑀧𑁆𑀨𑀢𑁆𑀢𑀺.

𑀅𑀲𑀼𑀪𑀸𑀭𑀫𑁆𑀫𑀡𑀸 𑀥𑀫𑁆𑀫𑀸𑀢𑀺 𑀅𑀲𑀼𑀪𑀧𑁆𑀧𑀓𑀸𑀭𑀸 𑀅𑀲𑀼𑀪𑀛𑀸𑀦𑀲𑁆𑀲 𑀆𑀭𑀫𑁆𑀫𑀡𑀪𑀽𑀢𑀸 𑀥𑀫𑁆𑀫𑀸. 𑀓𑀸𑀫𑀁 𑀇𑀦𑁆𑀤𑁆𑀭𑀺𑀬𑀩𑀤𑁆𑀥𑀸𑀧𑀺 𑀓𑁂𑀲𑀸𑀤𑀬𑁄 𑀅𑀲𑀼𑀪𑀧𑁆𑀧𑀓𑀸𑀭𑀸 𑀏𑀯, 𑀯𑀺𑀲𑁂𑀲𑀢𑁄 𑀧𑀦 𑀚𑀺𑀕𑀼𑀘𑁆𑀙𑀺𑀢𑀩𑁆𑀩𑁂 𑀚𑀺𑀕𑀼𑀘𑁆𑀙𑀸𑀯𑀳𑁂 𑀕𑀡𑁆𑀳𑀦𑁆𑀢𑁄 ‘‘𑀤𑀲𑀸’’𑀢𑀺 𑀆𑀳. 𑀬𑀣𑀸 𑀫𑀦𑀲𑀺𑀓𑀭𑁄𑀢𑁄 𑀲𑀪𑀸𑀯𑀲𑀭𑀲𑀢𑁄 𑀢𑀢𑁆𑀣 𑀅𑀲𑀼𑀪𑀲𑀜𑁆𑀜𑀸 𑀲𑀦𑁆𑀢𑀺𑀝𑁆𑀞𑀢𑀺, 𑀢𑀣𑀸 𑀧𑀯𑀢𑁆𑀢𑁄 𑀫𑀦𑀲𑀺𑀓𑀸𑀭𑁄 𑀉𑀧𑀸𑀬𑀫𑀦𑀲𑀺𑀓𑀸𑀭𑁄. 𑀅𑀲𑀼𑀪𑁂 𑀅𑀲𑀼𑀪𑀧𑀝𑀺𑀓𑁆𑀓𑀽𑀮𑀸𑀓𑀸𑀭𑀲𑁆𑀲 𑀉𑀕𑁆𑀕𑀡𑁆𑀳𑀦𑀁, 𑀬𑀣𑀸 𑀯𑀸 𑀢𑀢𑁆𑀣 𑀉𑀕𑁆𑀕𑀳𑀦𑀺𑀫𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀣𑀸 𑀫𑀦𑀲𑀺𑀓𑀸𑀭𑁄 𑀅𑀲𑀼𑀪𑀦𑀺𑀫𑀺𑀢𑁆𑀢𑀲𑁆𑀲 𑀉𑀕𑁆𑀕𑀳𑁄. 𑀉𑀧𑀘𑀸𑀭𑀧𑁆𑀧𑀦𑀸𑀯𑀳𑀸𑀬 𑀅𑀲𑀼𑀪𑀪𑀸𑀯𑀦𑀸𑀬 𑀅𑀦𑀼𑀬𑀼𑀜𑁆𑀚𑀦𑀸 𑀅𑀲𑀼𑀪𑀪𑀸𑀯𑀦𑀸𑀦𑀼𑀬𑁄𑀕𑁄.

𑀫𑀦𑀘𑁆𑀙𑀝𑁆𑀞𑀸𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀲𑀼𑀝𑁆𑀞𑀼 𑀲𑀼𑀲𑀁𑀯𑀭𑀡𑁂 𑀲𑀢𑀺 𑀅𑀯𑀲𑀭𑀁 𑀅𑀮𑀪𑀦𑁆𑀢𑁄 𑀓𑀸𑀫𑀘𑁆𑀙𑀦𑁆𑀤𑁄 𑀧𑀳𑀻𑀬𑀢𑁂𑀯, 𑀢𑀣𑀸 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀼𑀦𑁄 𑀫𑀺𑀢𑀸𑀳𑀸𑀭𑀲𑁆𑀲 𑀣𑀺𑀦𑀫𑀺𑀤𑁆𑀥𑀸𑀪𑀺𑀪𑀯𑀸𑀪𑀸𑀯𑀸 𑀑𑀢𑀸𑀭𑀁 𑀅𑀮𑀪𑀫𑀸𑀦𑁄 𑀓𑀸𑀫𑀘𑁆𑀙𑀦𑁆𑀤𑁄 𑀧𑀳𑀻𑀬𑀢𑀺. 𑀬𑁄 𑀧𑀦 𑀆𑀳𑀸𑀭𑁂 𑀧𑀝𑀺𑀓𑁆𑀓𑀽𑀮𑀲𑀜𑁆𑀜𑀁 𑀢𑀩𑁆𑀩𑀺𑀧𑀭𑀺𑀡𑀸𑀫𑀲𑁆𑀲 𑀢𑀤𑀸𑀥𑀸𑀭𑀲𑁆𑀲 𑀢𑀲𑁆𑀲 𑀘 𑀉𑀤𑀭𑀺𑀬𑀪𑀽𑀢𑀲𑁆𑀲 𑀅𑀢𑀺𑀯𑀺𑀬 𑀚𑁂𑀕𑀼𑀘𑁆𑀙𑀢𑀁, 𑀓𑀸𑀬𑀲𑁆𑀲 𑀘 𑀆𑀳𑀸𑀭𑀢𑀺𑀝𑁆𑀞𑀓𑀢𑀁 𑀲𑀫𑁆𑀫𑀤𑁂𑀯 𑀚𑀸𑀦𑀸𑀢𑀺, 𑀲𑁄 𑀲𑀩𑁆𑀩𑀲𑁄 𑀪𑁄𑀚𑀦𑁂 𑀧𑀫𑀸𑀡𑀲𑁆𑀲 𑀚𑀸𑀦𑀦𑁂𑀦 𑀯𑀺𑀲𑁂𑀲𑀢𑁄 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀽 𑀦𑀸𑀫. 𑀢𑀲𑁆𑀲 𑀓𑀸𑀫𑀘𑁆𑀙𑀦𑁆𑀤𑁄 𑀧𑀳𑀻𑀬𑀢𑁂𑀯, 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀅𑀧𑁆𑀧𑀸𑀳𑀸𑀭𑀢𑀁𑀬𑁂𑀯 𑀤𑀲𑁆𑀲𑁂𑀢𑀼𑀁 ‘‘𑀘𑀢𑀼𑀦𑁆𑀦’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀲𑀼𑀪𑀓𑀫𑁆𑀫𑀺𑀓𑀢𑀺𑀲𑁆𑀲𑀢𑁆𑀣𑁂𑀭𑁄 𑀤𑀦𑁆𑀢𑀝𑁆𑀞𑀺𑀤𑀲𑁆𑀲𑀸𑀯𑀻. 𑀧𑀳𑀻𑀦𑀲𑁆𑀲𑀸𑀢𑀺 𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦 𑀧𑀳𑀻𑀦𑀲𑁆𑀲. 𑀅𑀪𑀺𑀥𑀫𑁆𑀫𑀧𑀭𑀺𑀬𑀸𑀬𑁂𑀦 𑀲𑀩𑁆𑀩𑁄𑀧𑀺 𑀮𑁄𑀪𑁄 𑀓𑀸𑀫𑀘𑁆𑀙𑀦𑁆𑀤𑀦𑀻𑀯𑀭𑀡𑀦𑁆𑀢𑀺 ‘‘𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑁄’’𑀢𑀺 𑀯𑀼𑀢𑁆𑀢𑀁.

𑀫𑁂𑀚𑁆𑀚𑀢𑀺 𑀳𑀺𑀢𑀨𑀭𑀡𑀯𑀲𑁂𑀦 𑀲𑀺𑀦𑀺𑀬𑁆𑀳𑀢𑀻𑀢𑀺 𑀫𑀺𑀢𑁆𑀢𑁄, 𑀳𑀺𑀢𑁂𑀲𑀻 𑀧𑀼𑀕𑁆𑀕𑀮𑁄, 𑀢𑀲𑁆𑀫𑀺𑀁 𑀫𑀺𑀢𑁆𑀢𑁂 𑀪𑀯𑀸, 𑀫𑀺𑀢𑁆𑀢𑀲𑁆𑀲 𑀯𑀸 𑀏𑀲𑀸𑀢𑀺 𑀫𑁂𑀢𑁆𑀢𑀸, 𑀳𑀺𑀢𑁂𑀲𑀺𑀢𑀸. 𑀲𑀸 𑀏𑀯 𑀧𑀝𑀺𑀧𑀓𑁆𑀔𑀢𑁄 𑀘𑁂𑀢𑀲𑁄 𑀯𑀺𑀫𑀼𑀢𑁆𑀢𑀻𑀢𑀺 𑀫𑁂𑀢𑁆𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺. 𑀢𑀢𑁆𑀣 𑀫𑁂𑀢𑁆𑀢𑀸𑀬𑀦𑀲𑁆𑀲 𑀲𑀢𑁆𑀢𑁂𑀲𑀼 𑀳𑀺𑀢𑀨𑀭𑀡𑀲𑁆𑀲 𑀉𑀧𑁆𑀧𑀸𑀤𑀦𑀁 𑀧𑀯𑀢𑁆𑀢𑀦𑀁 𑀫𑁂𑀢𑁆𑀢𑀸𑀦𑀺𑀫𑀺𑀢𑁆𑀢𑀲𑁆𑀲 𑀉𑀕𑁆𑀕𑀳𑁄. 𑀢𑁂𑀦𑀸𑀳 ‘‘𑀑𑀤𑀺𑀲𑁆𑀲𑀓𑀸’’𑀢𑀺𑀆𑀤𑀺.

𑀢𑀢𑁆𑀣 𑀅𑀢𑁆𑀢𑀧𑀺𑀬𑀲𑀳𑀸𑀬𑀫𑀚𑁆𑀛𑀢𑁆𑀢𑀯𑁂𑀭𑀺𑀯𑀲𑁂𑀦 𑀑𑀤𑀺𑀲𑁆𑀲𑀓𑀢𑀸. 𑀲𑀻𑀫𑀸𑀲𑀫𑁆𑀪𑁂𑀤𑁂 𑀓𑀢𑁂 𑀅𑀦𑁄𑀤𑀺𑀲𑁆𑀲𑀓𑀢𑀸. 𑀏𑀓𑀸𑀤𑀺𑀤𑀺𑀲𑀸𑀨𑀭𑀡𑀯𑀲𑁂𑀦 𑀤𑀺𑀲𑀸𑀨𑀭𑀡𑀢𑀸 𑀫𑁂𑀢𑁆𑀢𑀸𑀬 𑀉𑀕𑁆𑀕𑀡𑁆𑀳𑀦𑁂 𑀯𑁂𑀤𑀺𑀢𑀩𑁆𑀩𑀸. 𑀉𑀕𑁆𑀕𑀳𑁄 𑀬𑀸𑀯 𑀉𑀧𑀘𑀸𑀭𑀸 𑀤𑀝𑁆𑀞𑀩𑁆𑀩𑁄. 𑀉𑀕𑁆𑀕𑀳𑀺𑀢𑀸𑀬 𑀆𑀲𑁂𑀯𑀦𑀸 𑀪𑀸𑀯𑀦𑀸, 𑀲𑀩𑁆𑀩𑀸 𑀇𑀢𑁆𑀣𑀺𑀬𑁄 𑀧𑀼𑀭𑀺𑀲𑀸 𑀅𑀭𑀺𑀬𑀸 𑀅𑀦𑀭𑀺𑀬𑀸 𑀤𑁂𑀯𑀸 𑀫𑀦𑀼𑀲𑁆𑀲𑀸 𑀯𑀺𑀦𑀺𑀧𑀸𑀢𑀺𑀓𑀸𑀢𑀺 𑀲𑀢𑁆𑀢𑁄𑀥𑀺𑀓𑀭𑀡𑀯𑀲𑁂𑀦 𑀧𑀯𑀢𑁆𑀢𑀸 𑀲𑀢𑁆𑀢𑀯𑀺𑀥𑀸, 𑀅𑀝𑁆𑀞𑀯𑀻𑀲𑀢𑀺𑀯𑀺𑀥𑀸 𑀯𑀸, 𑀤𑀲𑀳𑀺 𑀤𑀺𑀲𑀸𑀳𑀺 𑀤𑀺𑀲𑁄𑀥𑀺𑀓𑀭𑀡𑀯𑀲𑁂𑀦 𑀧𑀯𑀢𑁆𑀢𑀸 𑀤𑀲𑀯𑀺𑀥𑀸, 𑀏𑀓𑁂𑀓𑀸𑀬 𑀤𑀺𑀲𑀸𑀬 𑀲𑀢𑁆𑀢𑀸𑀤𑀺𑀇𑀢𑁆𑀣𑀸𑀤𑀺𑀅𑀯𑁂𑀭𑀸𑀤𑀺𑀪𑁂𑀤𑁂𑀦 𑀅𑀲𑀻𑀢𑀸𑀥𑀺𑀓𑀘𑀢𑀼𑀲𑀢𑀧𑁆𑀧𑀪𑁂𑀤𑀸 𑀘 𑀑𑀥𑀺𑀲𑁄𑀨𑀭𑀡𑀫𑁂𑀢𑁆𑀢𑀸. 𑀲𑀩𑁆𑀩𑁂 𑀲𑀢𑁆𑀢𑀸, 𑀧𑀸𑀡𑀸, 𑀪𑀽𑀢𑀸, 𑀧𑀼𑀕𑁆𑀕𑀮𑀸, 𑀅𑀢𑁆𑀢𑀪𑀸𑀯𑀧𑀭𑀺𑀬𑀸𑀧𑀦𑁆𑀦𑀸𑀢𑀺 𑀏𑀢𑁂𑀲𑀁 𑀯𑀲𑁂𑀦 𑀧𑀜𑁆𑀘𑀯𑀺𑀥𑀸. 𑀏𑀓𑁂𑀓𑀲𑁆𑀫𑀺𑀁 𑀅𑀯𑁂𑀭𑀸 𑀳𑁄𑀦𑁆𑀢𑀼, 𑀅𑀩𑁆𑀬𑀸𑀧𑀚𑁆𑀚𑀸, 𑀅𑀦𑀻𑀖𑀸, 𑀲𑀼𑀔𑀻 𑀅𑀢𑁆𑀢𑀸𑀦𑀁 𑀧𑀭𑀺𑀳𑀭𑀦𑁆𑀢𑀽𑀢𑀺 𑀘𑀢𑀼𑀥𑀸 𑀧𑀯𑀢𑁆𑀢𑀺𑀬𑀸 𑀯𑀻𑀲𑀢𑀺𑀯𑀺𑀥𑀸 𑀅𑀦𑁄𑀥𑀺𑀲𑁄𑀨𑀭𑀡𑀫𑁂𑀢𑁆𑀢𑀸, 𑀢𑀁 𑀲𑀦𑁆𑀥𑀸𑀬𑀸𑀳 𑁋 ‘‘𑀑𑀥𑀺𑀲𑁄…𑀧𑁂… 𑀪𑀸𑀯𑁂𑀦𑁆𑀢𑀲𑁆𑀲𑀧𑀻’’𑀢𑀺. 𑀢𑁆𑀯𑀁 𑀏𑀢𑀲𑁆𑀲𑀸𑀢𑀺𑀆𑀤𑀺𑀦𑀸 𑀓𑀫𑁆𑀫𑀲𑁆𑀲𑀓𑀢𑀸𑀧𑀘𑁆𑀘𑀯𑁂𑀓𑁆𑀔𑀡𑀁 𑀤𑀲𑁆𑀲𑁂𑀢𑀺. 𑀧𑀝𑀺𑀲𑀗𑁆𑀔𑀸𑀦𑁂 𑀞𑀺𑀢𑀲𑁆𑀲𑀸𑀢𑀺 𑀓𑁄𑀥𑁂 𑀬𑀣𑀸𑀯𑀼𑀢𑁆𑀢𑀲𑁆𑀲 𑀆𑀤𑀻𑀦𑀯𑀲𑁆𑀲 𑀢𑀧𑁆𑀧𑀝𑀺𑀧𑀓𑁆𑀔𑀢𑁄 𑀅𑀓𑁄𑀥𑁂 𑀫𑁂𑀢𑁆𑀢𑀸𑀬 𑀆𑀦𑀺𑀲𑀁𑀲𑀲𑁆𑀲 𑀘 𑀧𑀝𑀺𑀲𑀗𑁆𑀔𑀸𑀦𑁂 𑀲𑀫𑁆𑀫𑀤𑁂𑀯 𑀚𑀸𑀦𑀦𑁂. 𑀲𑁂𑀯𑀦𑁆𑀢𑀲𑁆𑀲𑀸𑀢𑀺 𑀪𑀚𑀦𑁆𑀢𑀲𑁆𑀲 𑀩𑁆𑀬𑀸𑀧𑀸𑀤𑁄 𑀧𑀳𑀻𑀬𑀢𑀺.

𑀅𑀢𑀺𑀪𑁄𑀚𑀦𑁂 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑁄𑀢𑀺 𑀆𑀳𑀸𑀭𑀲𑁆𑀲 𑀅𑀥𑀺𑀓𑀪𑁄𑀚𑀦𑁂 𑀣𑀺𑀦𑀫𑀺𑀤𑁆𑀥𑀲𑁆𑀲 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑁄, ‘‘𑀏𑀢𑁆𑀢𑀓𑁂 𑀪𑀼𑀢𑁆𑀢𑁂 𑀣𑀺𑀦𑀫𑀺𑀤𑁆𑀥𑀁 𑀉𑀧𑁆𑀧𑀚𑁆𑀚𑀢𑀺, 𑀏𑀢𑁆𑀢𑀓𑁂 𑀦𑁄’’𑀢𑀺 𑀣𑀺𑀦𑀫𑀺𑀤𑁆𑀥𑀲𑁆𑀲 𑀓𑀸𑀭𑀡𑀸𑀓𑀸𑀭𑀡𑀕𑁆𑀕𑀸𑀳𑁄𑀢𑀺 𑀅𑀢𑁆𑀣𑁄. 𑀤𑀺𑀯𑀸 𑀲𑀽𑀭𑀺𑀬𑀸𑀮𑁄𑀓𑀦𑁆𑀢𑀺 𑀤𑀺𑀯𑀸 𑀕𑀳𑀺𑀢𑀦𑀺𑀫𑀺𑀢𑁆𑀢𑀁 𑀲𑀽𑀭𑀺𑀬𑀸𑀮𑁄𑀓𑀁, 𑀭𑀢𑁆𑀢𑀺𑀬𑀁 𑀫𑀦𑀲𑀺𑀓𑀭𑁄𑀦𑁆𑀢𑀲𑁆𑀲𑀧𑀻𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀥𑀼𑀢𑀗𑁆𑀕𑀸𑀦𑀁 𑀯𑀻𑀭𑀺𑀬𑀦𑀺𑀲𑁆𑀲𑀺𑀢𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀥𑀼𑀢𑀗𑁆𑀕𑀦𑀺𑀲𑁆𑀲𑀺𑀢𑀲𑀧𑁆𑀧𑀸𑀬𑀓𑀣𑀸𑀬𑀧𑀻’’𑀢𑀺.

𑀓𑀼𑀓𑁆𑀓𑀼𑀘𑁆𑀘𑀫𑁆𑀧𑀺 𑀓𑀢𑀸𑀓𑀢𑀸𑀦𑀼𑀲𑁄𑀘𑀦𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀁 𑀘𑁂𑀢𑀲𑁄 𑀅𑀯𑀽𑀧𑀲𑀫𑀸𑀯𑀳𑀢𑀸𑀬 𑀉𑀤𑁆𑀥𑀘𑁆𑀘𑁂𑀦 𑀲𑀫𑀸𑀦𑀮𑀓𑁆𑀔𑀡𑀫𑁂𑀯𑀸𑀢𑀺 𑀢𑀤𑀼𑀪𑀬𑀲𑁆𑀲 𑀧𑀳𑀸𑀦𑀓𑀸𑀭𑀡𑀁 𑀤𑀲𑁆𑀲𑁂𑀦𑁆𑀢𑁄 𑀪𑀕𑀯𑀸 𑁋 ‘‘𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀘𑁂𑀢𑀲𑁄 𑀯𑀽𑀧𑀲𑀫𑁄’’𑀢𑀺𑀆𑀤𑀺𑀫𑀸𑀳. 𑀢𑀲𑁆𑀫𑀸 𑀩𑀸𑀳𑀼𑀲𑀘𑁆𑀘𑀸𑀤𑀺 𑀢𑀲𑁆𑀲 𑀧𑀳𑀸𑀦𑀓𑀸𑀭𑀡𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀺𑀘 𑀙 𑀥𑀫𑁆𑀫𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀩𑀳𑀼𑀲𑁆𑀲𑀼𑀢𑀲𑁆𑀲 𑀕𑀦𑁆𑀣𑀢𑁄, 𑀅𑀢𑁆𑀣𑀢𑁄 𑀥𑀫𑁆𑀫𑀁 𑀯𑀺𑀘𑀸𑀭𑁂𑀦𑁆𑀢𑀲𑁆𑀲 𑀅𑀢𑁆𑀢𑀯𑁂𑀤𑀸𑀤𑀺𑀧𑀝𑀺𑀮𑀸𑀪𑀲𑀫𑁆𑀪𑀯𑀢𑁄 𑀯𑀺𑀓𑁆𑀔𑁂𑀧𑁄 𑀦 𑀳𑁄𑀢𑀺. 𑀬𑀣𑀸𑀯𑀺𑀳𑀺𑀢𑀧𑀝𑀺𑀧𑀢𑁆𑀢𑀺𑀬𑀸 𑀬𑀣𑀸𑀥𑀫𑁆𑀫𑀧𑀝𑀺𑀓𑀸𑀭𑀧𑁆𑀧𑀢𑁆𑀢𑀺𑀬𑀸 𑀘 𑀯𑀺𑀧𑁆𑀧𑀝𑀺𑀲𑀸𑀭𑁄 𑀅𑀦𑀯𑀲𑀭𑁄𑀯𑀸𑀢𑀺 ‘‘𑀩𑀸𑀳𑀼𑀲𑀘𑁆𑀘𑁂𑀦𑀧𑀺…𑀧𑁂… 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀁 𑀧𑀳𑀻𑀬𑀢𑀻’’𑀢𑀺 𑀯𑀼𑀢𑁆𑀢𑀁. 𑀬𑀤𑀕𑁆𑀕𑁂𑀦 𑀩𑀳𑀼𑀲𑁆𑀲𑀼𑀢𑀲𑁆𑀲 𑀧𑀝𑀺𑀲𑀗𑁆𑀔𑀸𑀦𑀯𑀢𑁄 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀁 𑀧𑀳𑀻𑀬𑀢𑀺, 𑀢𑀤𑀕𑁆𑀕𑁂𑀦 𑀧𑀭𑀺𑀧𑀼𑀘𑁆𑀙𑀓𑀢𑀸𑀯𑀺𑀦𑀬𑀧𑀓𑀢𑀜𑁆𑀜𑀼𑀢𑀸𑀳𑀺𑀧𑀺 𑀢𑀁 𑀧𑀳𑀻𑀬𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀯𑀼𑀤𑁆𑀥𑀲𑁂𑀯𑀺𑀢𑀸 𑀘 𑀯𑀼𑀤𑁆𑀥𑀲𑀻𑀮𑀺𑀢𑀁 𑀆𑀯𑀳𑀢𑀻𑀢𑀺 𑀘𑁂𑀢𑀲𑁄 𑀯𑀽𑀧𑀲𑀫𑀓𑀭𑀢𑁆𑀢𑀸 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀲𑁆𑀲 𑀧𑀳𑀸𑀦𑀓𑀸𑀭𑀻 𑀯𑀼𑀢𑁆𑀢𑀸, 𑀯𑀼𑀤𑁆𑀥𑀪𑀸𑀯𑀁 𑀧𑀦 𑀅𑀦𑀧𑁂𑀓𑁆𑀔𑀺𑀢𑁆𑀯𑀸 𑀯𑀺𑀦𑀬𑀥𑀭𑀸 𑀓𑀼𑀓𑁆𑀓𑀼𑀘𑁆𑀘𑀯𑀺𑀦𑁄𑀤𑀓𑀸 𑀓𑀮𑁆𑀬𑀸𑀡𑀫𑀺𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀯𑀺𑀓𑁆𑀔𑁂𑀧𑁄 𑀘 𑀪𑀺𑀓𑁆𑀔𑀽𑀦𑀁 𑀬𑁂𑀪𑀼𑀬𑁆𑀬𑁂𑀦 𑀓𑀼𑀓𑁆𑀓𑀼𑀘𑁆𑀘𑀳𑁂𑀢𑀼𑀓𑁄 𑀳𑁄𑀢𑀻𑀢𑀺 ‘‘𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀧𑀭𑀺𑀧𑀼𑀘𑁆𑀙𑀸𑀩𑀳𑀼𑀮𑀲𑁆𑀲𑀸’’𑀢𑀺𑀆𑀤𑀺𑀦𑀸 𑀯𑀺𑀦𑀬𑀦𑀬𑁂𑀦𑁂𑀯 𑀧𑀭𑀺𑀧𑀼𑀘𑁆𑀙𑀓𑀢𑀸𑀤𑀬𑁄 𑀦𑀺𑀤𑁆𑀤𑀺𑀝𑁆𑀞𑀸. 𑀧𑀳𑀻𑀦𑁂 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑁂𑀢𑀺 𑀦𑀺𑀤𑁆𑀥𑀸𑀭𑀡𑁂 𑀪𑀼𑀫𑁆𑀫𑀁. 𑀓𑀼𑀓𑁆𑀓𑀼𑀘𑁆𑀘𑀲𑁆𑀲 𑀤𑁄𑀫𑀦𑀲𑁆𑀲𑀲𑀳𑀕𑀢𑀢𑁆𑀢𑀸 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑁄 𑀯𑀼𑀢𑁆𑀢𑁄.

𑀓𑀼𑀲𑀮𑀸𑀓𑀼𑀲𑀮𑀸 𑀥𑀫𑁆𑀫𑀸𑀢𑀺𑀆𑀤𑀻𑀲𑀼 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯. 𑀓𑀸𑀫𑀁 𑀩𑀸𑀳𑀼𑀲𑀘𑁆𑀘𑀧𑀭𑀺𑀧𑀼𑀘𑁆𑀙𑀓𑀢𑀸𑀳𑀺 𑀅𑀝𑁆𑀞𑀯𑀢𑁆𑀣𑀼𑀓𑀸𑀧𑀺 𑀯𑀺𑀘𑀺𑀓𑀺𑀘𑁆𑀙𑀸 𑀧𑀳𑀻𑀬𑀢𑀺, 𑀢𑀣𑀸𑀧𑀺 𑀭𑀢𑀦𑀢𑁆𑀢𑀬𑀯𑀺𑀘𑀺𑀓𑀺𑀘𑁆𑀙𑀸𑀫𑀽𑀮𑀺𑀓𑀸 𑀲𑁂𑀲𑀯𑀺𑀘𑀺𑀓𑀺𑀘𑁆𑀙𑀸𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀢𑀻𑀡𑀺 𑀭𑀢𑀦𑀸𑀦𑀺 𑀆𑀭𑀩𑁆𑀪𑀸’’𑀢𑀺𑀆𑀤𑀺. 𑀯𑀺𑀦𑀬𑁂 𑀧𑀓𑀢𑀜𑁆𑀜𑀼𑀢𑀸𑀬 𑀘 𑀲𑀢𑀺 𑀲𑀺𑀓𑁆𑀔𑀸𑀬 𑀓𑀗𑁆𑀔𑀸𑀬 𑀅𑀲𑀫𑁆𑀪𑀯𑁄 𑀏𑀯, 𑀢𑀣𑀸 𑀭𑀢𑀦𑀢𑁆𑀢𑀬𑀕𑀼𑀡𑀸𑀯𑀩𑁄𑀥𑁂 𑀲𑀢𑀺 𑀧𑀼𑀩𑁆𑀩𑀦𑁆𑀢𑀸𑀤𑀻𑀲𑀼 𑀲𑀁𑀲𑀬𑀲𑁆𑀲𑀸𑀢𑀺 𑀆𑀳 𑁋 ‘‘𑀯𑀺𑀦𑀬𑁂’’𑀢𑀺𑀆𑀤𑀺. 𑀑𑀓𑀧𑁆𑀧𑀦𑀻𑀬𑀲𑀤𑁆𑀥𑀸 𑀲𑀤𑁆𑀥𑁂𑀬𑁆𑀬𑀯𑀢𑁆𑀣𑀼𑀁 𑀅𑀦𑀼𑀧𑀯𑀺𑀲𑀺𑀢𑁆𑀯𑀸 𑀯𑀺𑀬 𑀅𑀥𑀺𑀫𑀼𑀘𑁆𑀘𑀦𑀁, 𑀢𑀜𑁆𑀘 𑀢𑀣𑀸 𑀅𑀥𑀺𑀫𑁄𑀓𑁆𑀔𑀼𑀧𑁆𑀧𑀸𑀤𑀦𑀫𑁂𑀯. 𑀲𑀤𑁆𑀥𑀸𑀬 𑀦𑀺𑀦𑁆𑀦𑀧𑁄𑀡𑀧𑀩𑁆𑀪𑀸𑀭𑀢𑀸 𑀅𑀥𑀺𑀫𑀼𑀢𑁆𑀢𑀺. 𑀅𑀭𑀳𑀢𑁆𑀢𑁂𑀦 𑀓𑀽𑀝𑀁 𑀕𑀡𑁆𑀳𑀺 𑀲𑀢𑁆𑀢𑀧𑀺 𑀩𑁄𑀚𑁆𑀛𑀗𑁆𑀕𑁂 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀤𑁂𑀲𑀦𑀸𑀬 𑀑𑀲𑀸𑀧𑀺𑀢𑀢𑁆𑀢𑀸.

𑀆𑀳𑀸𑀭𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀧𑀭𑀺𑀬𑀸𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁩𑁩. 𑀲𑀫𑁆𑀩𑀳𑀼𑀮𑀸𑀢𑀺 𑀯𑀼𑀘𑁆𑀘𑀦𑁆𑀢𑀺 𑀲𑀗𑁆𑀖𑀲𑀫𑀜𑁆𑀜𑀸𑀬 𑀅𑀪𑀸𑀯𑀢𑁄. 𑀢𑀢𑁄 𑀧𑀭𑀦𑁆𑀢𑀺 𑀢𑀺𑀡𑁆𑀡𑀁 𑀚𑀦𑀸𑀦𑀁 𑀉𑀧𑀭𑀺 𑀲𑀗𑁆𑀖𑁄 𑀘𑀢𑀼𑀯𑀕𑁆𑀕𑀓𑀭𑀡𑀻𑀬𑀸𑀤𑀺𑀲𑀗𑁆𑀖𑀓𑀫𑁆𑀫𑀯𑀲𑁂𑀦 𑀓𑀫𑁆𑀫𑀧𑁆𑀧𑀢𑁆𑀢𑀢𑁆𑀢𑀸. 𑀧𑀯𑀺𑀲𑀺𑀁𑀲𑀽𑀢𑀺 𑀪𑀸𑀯𑀺𑀦𑀺 𑀧𑀯𑀺𑀲𑀦𑁂 𑀪𑀽𑀢𑁂 𑀯𑀺𑀬 𑀓𑀢𑁆𑀯𑀸 𑀉𑀧𑀘𑀸𑀭𑁂𑀦 𑀯𑀼𑀢𑁆𑀢𑀦𑁆𑀢𑀺 𑀆𑀳 𑁋 ‘‘𑀧𑀯𑀺𑀝𑁆𑀞𑀸’’𑀢𑀺. 𑀪𑀸𑀯𑀺𑀦𑀺 𑀳𑀺 𑀪𑀽𑀢𑁂 𑀯𑀺𑀬 𑀉𑀧𑀘𑀸𑀭𑁄. 𑀢𑁂𑀦𑀸𑀳 𑁋 ‘‘𑀢𑁂 𑀧𑀦𑀸’’𑀢𑀺𑀆𑀤𑀺, 𑀢𑁂 𑀧𑀦 𑀪𑀺𑀓𑁆𑀔𑀽𑀢𑀺 𑀅𑀢𑁆𑀣𑁄. 𑀧𑀼𑀦 𑀢𑁂 𑀧𑀦𑀸𑀢𑀺 𑀢𑀺𑀢𑁆𑀣𑀺𑀬𑀸 𑀢𑀺𑀢𑁆𑀣𑀺𑀬𑀲𑀸𑀯𑀓𑀸 𑀘.

𑀇𑀫𑀲𑁆𑀫𑀺𑀁 𑀧𑀜𑁆𑀜𑀸𑀧𑀦𑁂𑀢𑀺 ‘‘𑀧𑀜𑁆𑀘 𑀦𑀻𑀯𑀭𑀡𑁂 𑀧𑀳𑀸𑀬𑀸’’𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑁂 𑀇𑀫𑀲𑁆𑀫𑀺𑀁 𑀧𑀓𑀸𑀭𑁂 𑀅𑀢𑁆𑀣𑀧𑀜𑁆𑀜𑀸𑀧𑀦𑁂. 𑀯𑀺𑀲𑀺𑀲𑁆𑀲𑀢𑀺 𑀅𑀜𑁆𑀜𑀫𑀜𑁆𑀜𑀢𑁄 𑀧𑀪𑀺𑀚𑁆𑀚𑀢𑀻𑀢𑀺 𑀯𑀺𑀲𑁂𑀲𑁄, 𑀪𑁂𑀤𑁄. 𑀲𑁆𑀯𑀸𑀬𑀁 𑀇𑀥 𑀅𑀦𑁆𑀢𑁄𑀕𑀥𑀸𑀥𑀺𑀓𑀪𑀸𑀯𑁄 𑀅𑀥𑀺𑀧𑁆𑀧𑁂𑀢𑁄𑀢𑀺 𑀆𑀳 𑁋 ‘‘𑀓𑁄 𑀯𑀺𑀲𑁂𑀲𑁄𑀢𑀺 𑀓𑀺𑀁 𑀅𑀥𑀺𑀓’’𑀦𑁆𑀢𑀺. 𑀅𑀥𑀺𑀓𑀁 𑀧𑀬𑀲𑀦𑀁 𑀧𑀬𑀼𑀜𑁆𑀚𑀦𑀦𑁆𑀢𑀺 𑀅𑀥𑀺𑀧𑁆𑀧𑀬𑀸𑀲𑁄, 𑀅𑀥𑀺𑀓𑀧𑁆𑀧𑀬𑁄𑀕𑁄. 𑀦𑀸𑀦𑀸 𑀓𑀭𑀻𑀬𑀢𑀺 𑀏𑀢𑁂𑀦𑀸𑀢𑀺 𑀦𑀸𑀦𑀸𑀓𑀭𑀡𑀁, 𑀪𑁂𑀤𑁄𑀢𑀺 𑀆𑀳 𑁋 ‘‘𑀓𑀺𑀁 𑀦𑀸𑀦𑀢𑁆𑀢’’𑀦𑁆𑀢𑀺. 𑀤𑀼𑀢𑀺𑀬𑀧𑀤𑁂𑀢𑀺 ‘‘𑀅𑀦𑀼𑀲𑀸𑀲𑀦𑀺𑀬𑀸 𑀯𑀸 𑀅𑀦𑀼𑀲𑀸𑀲𑀦𑀺’’𑀦𑁆𑀢𑀺 𑀏𑀢𑀲𑁆𑀫𑀺𑀁 𑀧𑀤𑁂. 𑀏𑀲𑁂𑀯 𑀦𑀬𑁄𑀢𑀺 𑀬𑀣𑀸 𑀧𑀞𑀫𑀲𑁆𑀫𑀺𑀁 𑀧𑀤𑁂 𑀅𑀢𑁆𑀣𑀬𑁄𑀚𑀦𑀸, 𑀏𑀯𑀁 𑀤𑀼𑀢𑀺𑀬𑀧𑀤𑁂𑀧𑀺 𑀬𑁄𑀚𑁂𑀢𑀩𑁆𑀩𑀸.

𑀢𑀻𑀡𑀺 𑀞𑀸𑀦𑀸𑀦𑀻𑀢𑀺 𑀤𑁂𑀯𑀫𑀸𑀭𑀩𑁆𑀭𑀳𑁆𑀫𑀝𑁆𑀞𑀸𑀦𑀸𑀦𑀺 𑀢𑀻𑀡𑀺 ‘‘𑀲𑀤𑁂𑀯𑀓𑁂 𑀮𑁄𑀓𑁂’’𑀢𑀺𑀆𑀤𑀺𑀦𑀸 𑀮𑁄𑀓𑁂 𑀧𑀓𑁆𑀔𑀺𑀧𑀺𑀢𑁆𑀯𑀸. ‘‘𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀬𑀸 𑀧𑀚𑀸𑀬 𑀲𑀤𑁂𑀯𑀫𑀦𑀼𑀲𑁆𑀲𑀸𑀬𑀸’’𑀢𑀺 𑀤𑁆𑀯𑁂 𑀞𑀸𑀦𑀸𑀦𑀺. ‘‘𑀧𑀚𑀸𑀬𑀸’’𑀢𑀺 𑀏𑀢𑁆𑀣 𑀧𑀓𑁆𑀔𑀺𑀧𑀺𑀢𑁆𑀯𑀸 𑀇𑀢𑀺 𑀧𑀜𑁆𑀘𑀳𑀺 𑀧𑀤𑁂𑀳𑀺. 𑀉𑀤𑁆𑀤𑁂𑀲𑀦𑁆𑀢𑀺 𑀉𑀤𑁆𑀤𑀺𑀲𑀺𑀢𑀩𑁆𑀩𑀢𑀁. 𑀕𑀡𑀦𑀦𑁆𑀢𑀺 𑀏𑀓𑁄 𑀓𑀸𑀫𑀘𑁆𑀙𑀦𑁆𑀤𑁄𑀢𑀺 𑀕𑀳𑁂𑀢𑀩𑁆𑀩𑀢𑀁 𑀕𑀘𑁆𑀙𑀢𑀺. 𑀅𑀢𑁆𑀢𑀦𑁄 𑀳𑀢𑁆𑀣𑀧𑀸𑀤𑀸𑀤𑀻𑀲𑀽𑀢𑀺 𑀦𑀺𑀤𑀲𑁆𑀲𑀦𑀫𑀢𑁆𑀢𑀁 𑀤𑀝𑁆𑀞𑀩𑁆𑀩𑀁 𑀲𑀫𑀼𑀤𑀸𑀬𑀁 𑀆𑀭𑀩𑁆𑀪 𑀧𑀝𑀺𑀖𑀲𑁆𑀲 𑀉𑀧𑁆𑀧𑀚𑁆𑀚𑀦𑀢𑁄. 𑀅𑀢𑁆𑀢𑀦𑁄 𑀔𑀦𑁆𑀥𑁂𑀲𑀼 𑀯𑀺𑀫𑀢𑀺 ‘‘𑀅𑀳𑀁 𑀦𑀼 𑀔𑁄𑀲𑁆𑀫𑀻’’𑀢𑀺𑀆𑀤𑀺𑀦𑀸.

𑀓𑀺𑀜𑁆𑀘𑀸𑀧𑀺 𑀲𑀩𑁆𑀩𑀁 𑀯𑀻𑀭𑀺𑀬𑀁 𑀘𑁂𑀢𑀲𑀺𑀓𑀫𑁂𑀯, 𑀬𑀁 𑀧𑀦 𑀓𑀸𑀬𑀓𑀫𑁆𑀫𑀸𑀥𑀺𑀝𑁆𑀞𑀸𑀦𑀸𑀤𑀺𑀯𑀲𑁂𑀦 𑀫𑀦𑀲𑀺 𑀓𑀸𑀬𑀺𑀓𑀧𑀬𑁄𑀕𑀲𑀫𑀼𑀝𑁆𑀞𑀸𑀧𑀦𑀁 𑀯𑀻𑀭𑀺𑀬𑀁 𑀓𑀸𑀬𑀺𑀓𑀦𑁆𑀢𑀺 𑀮𑀤𑁆𑀥𑀧𑀭𑀺𑀬𑀸𑀬𑀦𑁆𑀢𑀺 𑀢𑀢𑁄 𑀯𑀺𑀲𑁂𑀲𑁂𑀢𑁆𑀯𑀸 𑀘𑁂𑀢𑀲𑀺𑀓𑀦𑁆𑀢𑀺 𑀬𑀣𑀸𑀥𑀺𑀧𑁆𑀧𑁂𑀢𑀤𑀼𑀢𑀺𑀬𑀢𑀸𑀤𑀲𑁆𑀲𑀦𑀢𑁆𑀣𑀁. 𑀬𑀤𑀺𑀧𑀺 𑀬𑀣𑀸𑀓𑀧𑁆𑀧𑀺𑀢𑀇𑀭𑀺𑀬𑀸𑀧𑀣𑀲𑀦𑁆𑀥𑀸𑀭𑀡𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀁 𑀯𑀻𑀭𑀺𑀬𑀁 𑀓𑀸𑀬𑀲𑁆𑀲 𑀢𑀣𑀸𑀧𑀯𑀢𑁆𑀢𑀲𑁆𑀲 𑀧𑀘𑁆𑀘𑀬𑀪𑀽𑀢𑀦𑁆𑀢𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁, 𑀢𑀣𑀸𑀧𑀺 𑀦 𑀢𑀸𑀤𑀺𑀲𑁄 𑀓𑀸𑀬𑀧𑀬𑁄𑀕𑁄, 𑀢𑀤𑀸 𑀧𑀯𑀢𑁆𑀢𑁄 𑀦𑀢𑁆𑀣𑀻𑀢𑀺 𑀯𑀼𑀢𑁆𑀢𑀁 ‘‘𑀓𑀸𑀬𑀧𑀬𑁄𑀕𑀁 𑀯𑀺𑀦𑀸 𑀉𑀧𑁆𑀧𑀦𑁆𑀦𑀯𑀻𑀭𑀺𑀬’’𑀦𑁆𑀢𑀺. 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑀤𑀺𑀲𑁄 𑀯𑀸𑀢𑀺 𑀇𑀫𑀺𑀦𑀸 𑀅𑀚𑁆𑀛𑀢𑁆𑀢𑀺𑀓𑁂 𑀲𑀗𑁆𑀔𑀸𑀭𑁂 𑀅𑀚𑁆𑀛𑀼𑀧𑁂𑀓𑁆𑀔𑀦𑀯𑀲𑁂𑀦 𑀧𑀯𑀢𑁆𑀢𑀸 𑀅𑀚𑁆𑀛𑀢𑁆𑀢𑀥𑀫𑁆𑀫𑁂𑀲𑀼 𑀉𑀧𑁂𑀓𑁆𑀔𑀸𑀢𑀺𑀆𑀤𑀺𑀦𑀬𑀁 𑀅𑀢𑀺𑀤𑀺𑀲𑀢𑀺.

‘‘𑀫𑀺𑀲𑁆𑀲𑀓𑀩𑁄𑀚𑁆𑀛𑀗𑁆𑀕𑀸 𑀓𑀣𑀺𑀢𑀸’’𑀢𑀺 𑀯𑀢𑁆𑀯𑀸 𑀢𑀫𑀢𑁆𑀣𑀁 𑀯𑀺𑀪𑀸𑀯𑁂𑀢𑀼𑀁 ‘‘𑀏𑀢𑁂𑀲𑀽’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀘𑀗𑁆𑀓𑀫𑀦𑁆𑀢𑁂𑀦𑀧𑀺 𑀅𑀭𑀺𑀬𑀫𑀕𑁆𑀕𑀁 𑀅𑀥𑀺𑀕𑀦𑁆𑀢𑀼𑀁 𑀲𑀓𑁆𑀓𑀸𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀫𑀕𑁆𑀕𑀁 𑀅𑀧𑀢𑁆𑀢𑀁 𑀓𑀸𑀬𑀺𑀓𑀯𑀻𑀭𑀺𑀬’’𑀦𑁆𑀢𑀺. 𑀩𑁄𑀚𑁆𑀛𑀗𑁆𑀕𑀸 𑀦 𑀮𑀩𑁆𑀪𑀦𑁆𑀢𑀻𑀢𑀺 𑀦𑀺𑀧𑁆𑀧𑀭𑀺𑀬𑀸𑀬𑀩𑁄𑀚𑁆𑀛𑀗𑁆𑀕𑀸 𑀦 𑀮𑀩𑁆𑀪𑀦𑁆𑀢𑀻. 𑀩𑁄𑀚𑁆𑀛𑀗𑁆𑀕𑁂 𑀉𑀤𑁆𑀥𑀭𑀦𑁆𑀢𑀺 𑀧𑀭𑀺𑀬𑀸𑀬𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑁂𑀲𑀸𑀢𑀺 𑀩𑀳𑀺𑀤𑁆𑀥𑀸𑀥𑀫𑁆𑀫𑁂𑀲𑀼 𑀲𑀢𑀺-𑀥𑀫𑁆𑀫𑀯𑀺𑀘𑀬-𑀉𑀧𑁂𑀓𑁆𑀔𑀸-𑀘𑁂𑀢𑀲𑀺𑀓-𑀯𑀻𑀭𑀺𑀬-𑀲𑀯𑀺𑀢𑀓𑁆𑀓-𑀲𑀯𑀺𑀘𑀸𑀭-𑀧𑀻𑀢𑀺-𑀲𑀫𑀸𑀥𑀻 𑀤𑁆𑀯𑁂 𑀧𑀲𑁆𑀲𑀤𑁆𑀥𑀺𑀬𑁄 𑀘. 𑀅𑀬𑀁 𑀧𑀦 𑀦𑀬𑁄 𑀧𑀘𑀼𑀭𑀧𑁆𑀧𑀯𑀢𑁆𑀢𑀺𑀯𑀲𑁂𑀦 𑀅𑀝𑁆𑀞𑀓𑀣𑀸𑀦𑀬𑁂𑀦𑁂𑀯 𑀯𑀼𑀢𑁆𑀢𑁄. 𑀣𑁂𑀭𑀯𑀸𑀤𑀯𑀲𑁂𑀦 𑀧𑀦 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀫𑀢𑁆𑀢𑀸 𑀧𑀻𑀢𑀺𑀲𑀫𑀸𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀸 𑀭𑀽𑀧𑀸𑀯𑀘𑀭𑀸𑀧𑀺 𑀅𑀢𑁆𑀣𑀻𑀢𑀺 𑀢𑁂𑀧𑀺 𑀕𑀳𑁂𑀢𑁆𑀯𑀸 𑀤𑀲 𑀫𑀺𑀲𑁆𑀲𑀓𑀸𑀯 𑀳𑁄𑀦𑁆𑀢𑀻𑀢𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸𑀢𑀺.

𑀧𑀭𑀺𑀬𑀸𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀅𑀕𑁆𑀕𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁩𑁪. 𑀮𑁄𑀡𑀥𑀽𑀧𑀦𑀦𑁆𑀢𑀺 𑀮𑁄𑀡𑀜𑁆𑀘 𑀥𑀽𑀧𑀦𑀜𑁆𑀘 𑀮𑁄𑀡𑀥𑀽𑀧𑀦𑀁. 𑀬𑁄𑀥𑀓𑀫𑁆𑀫𑀦𑁆𑀢𑀺 𑀬𑁄𑀥𑀧𑀼𑀕𑁆𑀕𑀮𑁂𑀦 𑀓𑀢𑁆𑀢𑀩𑁆𑀩𑀁 𑀓𑀫𑁆𑀫𑀁. 𑀫𑀦𑁆𑀢𑀓𑀫𑁆𑀫𑀦𑁆𑀢𑀺 𑀭𑀸𑀚𑀓𑀺𑀘𑁆𑀘𑀫𑀦𑁆𑀢𑀦𑀁. 𑀧𑀝𑀺𑀳𑀸𑀭𑀓𑀫𑁆𑀫𑀦𑁆𑀢𑀺 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀆𑀕𑀢𑀸𑀦𑀁 𑀯𑀘𑀦𑀁 𑀭𑀜𑁆𑀜𑁄 𑀦𑀺𑀯𑁂𑀤𑁂𑀢𑁆𑀯𑀸 𑀢𑀢𑁄 𑀦𑁂𑀲𑀁 𑀧𑀝𑀺𑀳𑀭𑀡𑀓𑀫𑁆𑀫𑀁. 𑀢𑀲𑁆𑀫𑀸𑀢𑀺 𑀲𑀩𑁆𑀩𑀢𑁆𑀣𑀺𑀓𑀢𑁆𑀢𑀸 𑀲𑀢𑀺𑀬𑀸. 𑀏𑀯𑀁 ‘‘𑀲𑀢𑀺𑀜𑁆𑀘 𑀔𑁆𑀯𑀸𑀳’’𑀦𑁆𑀢𑀺𑀆𑀤𑀺𑀓𑀁 𑀅𑀯𑁄𑀘. 𑀧𑀼𑀩𑁆𑀩𑀪𑀸𑀕𑀯𑀺𑀧𑀲𑁆𑀲𑀦𑀸 𑀩𑁄𑀚𑁆𑀛𑀗𑁆𑀕𑀸𑀯 𑀓𑀣𑀺𑀢𑀸 𑀧𑀕𑁆𑀕𑀳𑀦𑀺𑀕𑁆𑀕𑀳𑀯𑀺𑀦𑁄𑀤𑀺𑀢𑀢𑁆𑀢𑀸.

𑀅𑀕𑁆𑀕𑀺𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀫𑁂𑀢𑁆𑀢𑀸𑀲𑀳𑀕𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁩𑁫. 𑀓𑀻𑀤𑀺𑀲𑀸 𑀕𑀢𑀺 𑀦𑀺𑀩𑁆𑀩𑀢𑁆𑀢𑀺 𑀏𑀢𑀺𑀲𑁆𑀲𑀸𑀢𑀺 𑀓𑀺𑀁𑀕𑀢𑀺𑀓𑀸, 𑀓𑀺𑀁𑀦𑀺𑀝𑁆𑀞𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀻𑀤𑀺𑀲𑀻 𑀧𑀭𑀫𑀸 𑀉𑀢𑁆𑀢𑀫𑀸 𑀓𑁄𑀝𑀺 𑀏𑀢𑀺𑀲𑁆𑀲𑀸𑀢𑀺 𑀓𑀺𑀁𑀧𑀭𑀫𑀸. 𑀓𑀻𑀤𑀺𑀲𑀁 𑀨𑀮𑀁 𑀆𑀦𑀺𑀲𑀁𑀲𑀁 𑀉𑀤𑀬𑁄 𑀏𑀢𑀺𑀲𑁆𑀲𑀸𑀢𑀺 𑀓𑀺𑀁𑀨𑀮𑀸. 𑀲𑀁𑀲𑀝𑁆𑀞𑀁 𑀲𑀫𑁆𑀧𑀬𑀼𑀢𑁆𑀢𑀦𑁆𑀢𑀺 𑀇𑀤𑀁 𑀲𑀳𑀕𑀢-𑀲𑀤𑁆𑀤𑀲𑁆𑀲 𑀅𑀢𑁆𑀣𑀤𑀲𑁆𑀲𑀦𑀫𑀢𑁆𑀢𑀁, 𑀇𑀥 𑀧𑀦 𑀫𑁂𑀢𑁆𑀢𑀸𑀛𑀸𑀦𑀁 𑀧𑀸𑀤𑀓𑀁 𑀓𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀧𑀼𑀩𑁆𑀩𑀪𑀸𑀕𑀩𑁄𑀚𑁆𑀛𑀗𑁆𑀕𑀸 𑀘 ‘‘𑀫𑁂𑀢𑁆𑀢𑀸𑀲𑀳𑀕𑀢𑀁 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕’’𑀦𑁆𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑁂𑀲𑀼 𑀩𑁄𑀚𑁆𑀛𑀗𑁆𑀕𑁂𑀲𑀼 𑀲𑀩𑁆𑀩𑁂𑀲𑀼 𑀘 𑀩𑁆𑀭𑀳𑁆𑀫𑀯𑀺𑀳𑀸𑀭𑁂𑀲𑀼.

𑀧𑀝𑀺𑀓𑀽𑀮𑁂𑀢𑀺 𑀯𑀺𑀭𑀚𑁆𑀚𑀢𑀻𑀢𑀺 𑀧𑀝𑀺𑀓𑀽𑀮𑀁, 𑀅𑀦𑀺𑀝𑁆𑀞𑀁. 𑀦 𑀧𑀝𑀺𑀓𑀽𑀮𑀁 𑀅𑀧𑁆𑀧𑀝𑀺𑀓𑀽𑀮𑀁, 𑀇𑀝𑁆𑀞𑀁. 𑀢𑁂𑀦𑀸𑀳 ‘‘𑀇𑀝𑁆𑀞𑁂 𑀯𑀢𑁆𑀣𑀼𑀲𑁆𑀫𑀺’’𑀦𑁆𑀢𑀺. 𑀏𑀢𑁆𑀣𑀸𑀢𑀺 𑀅𑀧𑁆𑀧𑀝𑀺𑀓𑀽𑀮𑀯𑀢𑁆𑀣𑀼𑀲𑁆𑀫𑀺𑀁. 𑀏𑀯𑀦𑁆𑀢𑀺 𑀧𑀝𑀺𑀓𑀽𑀮𑀲𑀜𑁆𑀜𑀻. 𑀲𑀢𑁆𑀢𑁂 𑀅𑀧𑁆𑀧𑀝𑀺𑀓𑀽𑀮𑁂 𑀅𑀲𑀼𑀪𑀨𑀭𑀡𑀁, 𑀲𑀗𑁆𑀔𑀸𑀭𑁂 𑀅𑀧𑁆𑀧𑀝𑀺𑀓𑀽𑀮𑁂 𑀅𑀦𑀺𑀘𑁆𑀘𑀦𑁆𑀢𑀺 𑀫𑀦𑀲𑀺𑀓𑀸𑀭𑀁 𑀓𑀭𑁄𑀦𑁆𑀢𑁄. 𑀅𑀲𑀼𑀪𑀸𑀬𑀸𑀢𑀺 𑀅𑀲𑀼𑀪𑀲𑀜𑁆𑀜𑀸𑀬. 𑀅𑀦𑀺𑀘𑁆𑀘𑀢𑁄 𑀯𑀸 𑀉𑀧𑀲𑀁𑀳𑀭𑀢𑀻𑀢𑀺 𑀅𑀦𑀺𑀘𑁆𑀘𑀦𑁆𑀢𑀺 𑀫𑀦𑀲𑀺𑀓𑀸𑀭𑀁 𑀧𑀯𑀢𑁆𑀢𑁂𑀢𑀺. ‘‘𑀏𑀲𑁂𑀯 𑀦𑀬𑁄’’𑀢𑀺 𑀲𑀗𑁆𑀔𑁂𑀧𑀢𑁄 𑀯𑀼𑀢𑁆𑀢𑀫𑀢𑁆𑀣𑀁 𑀯𑀺𑀯𑀭𑀺𑀢𑀼𑀁 ‘‘𑀅𑀧𑁆𑀧𑀝𑀺𑀓𑀽𑀮𑀧𑀝𑀺𑀓𑀽𑀮𑁂𑀲𑀽’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀙𑀴𑀗𑁆𑀕𑀼𑀧𑁂𑀓𑁆𑀔𑀦𑁆𑀢𑀺 𑀙𑀲𑀼 𑀆𑀭𑀫𑁆𑀫𑀡𑁂𑀲𑀼 𑀧𑀳𑀻𑀦𑀸𑀦𑀼𑀭𑁄𑀥𑀲𑁆𑀲 𑀉𑀧𑁆𑀧𑀢𑁆𑀢𑀺𑀬𑀸 𑀙𑀴𑀗𑁆𑀕𑀯𑀦𑁆𑀢𑀁 𑀉𑀧𑁂𑀓𑁆𑀔𑀁.