𑁧. 𑀲𑀳𑀲𑁆𑀲𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁦𑁭. 𑀥𑀫𑁆𑀫𑀺𑀓𑀢𑁆𑀢𑀸 𑀤𑁂𑀲𑀯𑀸𑀲𑀻𑀳𑀺 𑀅𑀦𑀼𑀓𑀫𑁆𑀧𑀺𑀢𑁄 𑀭𑀸𑀚𑀸𑀢𑀺 𑀭𑀸𑀚𑀓𑁄, 𑀢𑀲𑁆𑀲 𑀆𑀭𑀸𑀫𑁄 𑀭𑀸𑀚𑀓𑀸𑀭𑀸𑀫𑁄, 𑀢𑀲𑁆𑀫𑀺𑀁. 𑀪𑀽𑀫𑀺𑀲𑀻𑀲𑀁 𑀲𑁂𑀝𑁆𑀞𑀧𑁆𑀧𑀤𑁂𑀲𑁄, 𑀬𑀢𑁆𑀣 𑀯𑀲𑀦𑁆𑀢𑁄 𑀮𑀸𑀪𑀕𑁆𑀕𑀬𑀲𑀕𑁆𑀕𑀧𑁆𑀧𑀢𑁆𑀢𑁄 𑀳𑁄𑀢𑀻𑀢𑀺 𑀢𑁂𑀲𑀁 𑀅𑀥𑀺𑀧𑁆𑀧𑀸𑀬𑁄.

𑀯𑀸𑀭𑀸𑀧𑁂𑀳𑀻𑀢𑀺 𑀧𑀝𑀺𑀲𑁂𑀥𑁂𑀳𑀺. 𑀬𑀼𑀚𑁆𑀛𑀸𑀧𑁂𑀢𑀼𑀦𑁆𑀢𑀺 𑀓𑀮𑀳𑀁 𑀓𑀸𑀭𑀸𑀧𑁂𑀢𑀼𑀁. 𑀧𑀼𑀦 𑀆𑀕𑀘𑁆𑀙𑀦𑁆𑀢𑀸𑀢𑀺 𑀅𑀧𑀭𑀲𑁆𑀫𑀺𑀁 𑀲𑀁𑀯𑀘𑁆𑀙𑀭𑁂 𑀆𑀕𑀘𑁆𑀙𑀦𑁆𑀢𑀸. 𑀉𑀩𑁆𑀩𑀝𑁆𑀝𑁂𑀢𑁆𑀯𑀸𑀢𑀺 𑀫𑀳𑀢𑀻 𑀯𑀻𑀘𑀺𑀬𑁄 𑀉𑀩𑁆𑀩𑀝𑁆𑀝𑁂𑀢𑁆𑀯𑀸. 𑀬𑀣𑀸 𑀢𑀲𑁆𑀲 𑀲𑀓𑀮𑀫𑁂𑀯 𑀭𑀝𑁆𑀞𑀁 𑀏𑀓𑁄𑀤𑀓𑀻𑀪𑀽𑀢𑀁 𑀳𑁄𑀢𑀺, 𑀏𑀯𑀁 𑀓𑀢𑁆𑀯𑀸 𑀲𑀫𑀼𑀤𑁆𑀤𑀫𑁂𑀯 𑀚𑀸𑀢𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀫𑀼𑀤𑁆𑀤𑀫𑁂𑀯 𑀅𑀓𑀁𑀲𑀽’’𑀢𑀺.

𑀇𑀲𑀻𑀦𑀫𑀦𑁆𑀢𑀭𑀁 𑀓𑀢𑁆𑀯𑀸𑀢𑀺 𑀇𑀲𑀻𑀦𑀁 𑀓𑀸𑀭𑀡𑀁 𑀓𑀢𑁆𑀯𑀸, 𑀇𑀲𑀻𑀦𑀁 𑀳𑁂𑀢𑀽𑀢𑀺 𑀅𑀢𑁆𑀣𑁄, 𑀇𑀲𑀻𑀦𑀁 𑀯𑀸 𑀅𑀦𑁆𑀢𑀭𑀪𑁂𑀤𑀁 𑀓𑀢𑁆𑀯𑀸. 𑀢𑀣𑀸 𑀮𑁄𑀓𑁂 𑀓𑁄𑀮𑀸𑀳𑀮𑀲𑁆𑀲 𑀧𑀢𑁆𑀣𑀝𑀢𑀁 𑀯𑀺𑀪𑀸𑀯𑁂𑀦𑁆𑀢𑁄 𑀪𑀕𑀯𑀸 ‘‘𑀫𑁂 𑀲𑀼𑀢’’𑀦𑁆𑀢𑀺 𑀆𑀳 𑀧𑀘𑁆𑀘𑀓𑁆𑀔𑀢𑁄 𑀚𑀸𑀦𑀫𑁆𑀧𑀺. 𑀉𑀘𑁆𑀙𑀺𑀦𑁆𑀦𑁄𑀢𑀺 𑀓𑀼𑀮𑀘𑁆𑀙𑁂𑀤𑁂𑀦 𑀉𑀘𑁆𑀙𑀺𑀦𑁆𑀦𑁄. 𑀦 𑀓𑁂𑀯𑀮𑀁 𑀲𑀬𑀫𑁂𑀯, 𑀅𑀣 𑀔𑁄 𑀲𑀳 𑀭𑀝𑁆𑀞𑁂𑀳𑀺. 𑀯𑀺𑀪𑀯𑀦𑁆𑀢𑀺 𑀯𑀺𑀦𑀸𑀲𑀁 𑀉𑀧𑀕𑀢𑁄.

𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀦𑁆𑀢𑀺 𑀢𑀁 𑀬𑀣𑀸𑀯𑀼𑀢𑁆𑀢𑀁 𑀧𑀲𑁂𑀦𑀤𑀺𑀦𑀸 𑀓𑁄𑀲𑀮𑀭𑀸𑀚𑁂𑀦 𑀓𑀸𑀭𑀺𑀢𑀁 𑀯𑀺𑀳𑀸𑀭𑀁 𑀲𑀦𑁆𑀥𑀸𑀬 𑀏𑀢𑀁 ‘‘𑀭𑀸𑀚𑀓𑀸𑀭𑀸𑀫𑁂’’𑀢𑀺 𑀯𑀼𑀢𑁆𑀢𑀁.