𑁧𑁧. 𑀲𑁄𑀢𑀸𑀧𑀢𑁆𑀢𑀺𑀲𑀁𑀬𑀼𑀢𑁆𑀢𑀁

𑁧. 𑀯𑁂𑀴𑀼𑀤𑁆𑀯𑀸𑀭𑀯𑀕𑁆𑀕𑁄

𑁧. 𑀘𑀓𑁆𑀓𑀯𑀢𑁆𑀢𑀺𑀭𑀸𑀚𑀲𑀼𑀢𑁆𑀢𑀯𑀡𑁆𑀡𑀦𑀸

𑁯𑁯𑁭. 𑀅𑀦𑀼𑀕𑁆𑀕𑀳𑀕𑀭𑀳𑀡𑁂𑀲𑀼 𑀦𑀺𑀧𑀸𑀢𑁄𑀢𑀺 𑀅𑀦𑀼𑀕𑁆𑀕𑀡𑁆𑀳𑀦𑀕𑀭𑀳𑀢𑁆𑀣𑀚𑁄𑀢𑀓𑁄 𑀦𑀺𑀧𑀸𑀢𑁄. 𑀓𑀺𑀫𑁂𑀢𑁆𑀣 𑀅𑀦𑀼𑀕𑁆𑀕𑀡𑁆𑀳𑀸𑀢𑀺, 𑀓𑀺𑀁 𑀯𑀸 𑀕𑀭𑀳𑀢𑀻𑀢𑀺 𑀆𑀳 ‘‘𑀘𑀢𑀼𑀦𑁆𑀦’’𑀦𑁆𑀢𑀺𑀆𑀤𑀺. 𑀢𑀢𑁆𑀣 𑀅𑀦𑀼𑀕𑁆𑀕𑀡𑁆𑀳𑀦𑁆𑀢𑁄 𑀅𑀦𑀼𑀘𑁆𑀙𑀯𑀺𑀓𑀁 𑀓𑀢𑁆𑀯𑀸 𑀕𑀡𑁆𑀳𑀦𑁆𑀢𑁄. 𑀕𑀭𑀳𑀦𑁆𑀢𑁄 𑀦𑀺𑀦𑁆𑀤𑀦𑁆𑀢𑁄. 𑀇𑀲𑁆𑀲𑀭𑀲𑀻𑀮𑁄 𑀇𑀲𑁆𑀲𑀭𑁄, 𑀢𑀲𑁆𑀲 𑀪𑀸𑀯𑁄 𑀇𑀲𑁆𑀲𑀭𑀺𑀬𑀁, 𑀧𑀪𑀼𑀢𑀸. 𑀅𑀥𑀻𑀦𑀁 𑀧𑀢𑀺 𑀅𑀥𑀺𑀧𑀢𑀺, 𑀢𑀲𑁆𑀲 𑀪𑀸𑀯𑁄 𑀆𑀥𑀺𑀧𑀘𑁆𑀘𑀁, 𑀲𑀸𑀫𑀺𑀪𑀸𑀯𑁄𑀢𑀺 𑀆𑀳 𑁋 ‘‘𑀇𑀲𑁆𑀲𑀭𑀺𑀬𑀸𑀥𑀺𑀧𑀘𑁆𑀘’’𑀦𑁆𑀢𑀺𑀆𑀤𑀺. 𑀅𑀦𑀦𑁆𑀢𑀓𑀸𑀦𑀻𑀢𑀺 𑀅𑀦𑁆𑀢𑀭𑀳𑀺𑀢𑀸𑀦𑀺.

𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂𑀦𑀸𑀢𑀺 𑀯𑀢𑁆𑀣𑀼𑀢𑁆𑀢𑀬𑀲𑁆𑀲 𑀕𑀼𑀡𑁂 𑀬𑀸𑀣𑀸𑀯𑀢𑁄 𑀅𑀯𑁂𑀘𑁆𑀘 𑀧𑀯𑀺𑀲𑀺𑀢𑁆𑀯𑀸 𑀧𑀲𑀸𑀤𑁄. 𑀲𑁄 𑀧𑀦 𑀓𑁂𑀦𑀘𑀺 𑀘𑀮𑀦𑀭𑀳𑀺𑀢𑁄𑀢𑀺 𑀆𑀳 ‘‘𑀅𑀘𑀮𑀧𑁆𑀧𑀲𑀸𑀤𑁂𑀦𑀸’’𑀢𑀺. 𑀫𑀕𑁆𑀕𑁂𑀦𑀸𑀢𑀺 𑀅𑀭𑀺𑀬𑀫𑀕𑁆𑀕𑁂𑀦. 𑀆𑀕𑀢𑀧𑁆𑀧𑀲𑀸𑀤𑁄 𑀢𑀲𑁆𑀲 𑀅𑀥𑀺𑀕𑀫𑁂𑀦 𑀮𑀤𑁆𑀥𑀧𑁆𑀧𑀲𑀸𑀤𑁄. 𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀦𑁆𑀢𑀺 𑀏𑀓𑀚𑁆𑀛𑀁. 𑀅𑀭𑀺𑀬𑀲𑀸𑀯𑀓𑀸𑀦𑀜𑁆𑀳𑀺 𑀅𑀭𑀺𑀬𑀫𑀕𑁆𑀕𑁄 𑀉𑀧𑁆𑀧𑀚𑁆𑀚𑀦𑁆𑀢𑁄𑀯 𑀢𑀻𑀲𑀼 𑀯𑀢𑁆𑀣𑀽𑀲𑀼 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑀁 𑀆𑀯𑀳𑀦𑁆𑀢𑁄 𑀏𑀯 𑀉𑀧𑁆𑀧𑀚𑁆𑀚𑀢𑀺. 𑀢𑁂𑀲𑀦𑁆𑀢𑀺 𑀯𑀺𑀲𑀬𑀪𑀽𑀢𑀸𑀦𑀁 𑀢𑀺𑀡𑁆𑀡𑀁 𑀯𑀢𑁆𑀣𑀽𑀦𑀁 𑀯𑀲𑁂𑀦 𑀢𑀺𑀥𑀸 𑀯𑀼𑀢𑁆𑀢𑁄. 𑀬𑀲𑁆𑀫𑀸 𑀘 𑀅𑀢𑁆𑀣𑀢𑁄 𑀏𑀓𑁄, 𑀢𑀲𑁆𑀫𑀸𑀯 𑀦𑀺𑀦𑁆𑀦𑀸𑀦𑀸𑀓𑀭𑀡𑁄 𑀳𑁄𑀢𑀺 𑀧𑀯𑀢𑁆𑀢𑀝𑁆𑀞𑀸𑀦𑀪𑁂𑀤𑁂 𑀲𑀢𑀺𑀧𑀺. 𑀅𑀭𑀺𑀬𑀲𑀸𑀯𑀓𑀲𑁆𑀲 𑀳𑀻𑀢𑀺𑀆𑀤𑀺𑀦𑀸 𑀦𑀬𑁂𑀦 𑀢𑀫𑀢𑁆𑀣𑀁 𑀯𑀺𑀯𑀭𑀢𑀺. 𑀧𑀲𑀸𑀤𑁄 𑀑𑀓𑀧𑁆𑀧𑀦𑀸. 𑀧𑁂𑀫𑀁 𑀪𑀢𑁆𑀢𑀺. 𑀕𑀸𑀭𑀯𑀁 𑀕𑀭𑀼𑀓𑀭𑀡𑀁. 𑀫𑀳𑀦𑁆𑀢𑀁 𑀉𑀴𑀸𑀭𑀁. 𑀏𑀢𑀁 𑀯𑀺𑀪𑀸𑀕𑁂𑀦 𑀦𑀢𑁆𑀣𑀺 𑀲𑀩𑁆𑀩𑀢𑁆𑀣 𑀲𑀫𑀸𑀦𑀢𑁆𑀢𑀸.

𑀏𑀯𑀦𑁆𑀢𑀺 𑀪𑀯𑀦𑁆𑀢𑀭𑁂𑀧𑀺 𑀅𑀓𑁄𑀧𑀦𑀻𑀬𑀢𑀸𑀬. 𑀲𑀤𑀺𑀲𑀯𑀲𑁂𑀦𑀸𑀢𑀺 𑀅𑀜𑁆𑀜𑁂𑀳𑀺 𑀅𑀔𑀡𑁆𑀟𑀸𑀤𑀻𑀳𑀺 𑀲𑀤𑀺𑀲𑀯𑀲𑁂𑀦. 𑀢𑁂𑀦𑀸𑀳 ‘‘𑀫𑀼𑀔𑀯𑀝𑁆𑀝𑀺 𑀬𑀜𑁆𑀳𑀺 𑀙𑀺𑀦𑁆𑀦𑁂’’𑀢𑀺𑀆𑀤𑀺. 𑀔𑀡𑁆𑀟𑀸 𑀏𑀢𑀺𑀲𑁆𑀲𑀸 𑀅𑀢𑁆𑀣𑀻𑀢𑀺 𑀔𑀡𑁆𑀟𑀸. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀧𑀸𑀢𑀺𑀫𑁄𑀓𑁆𑀔𑁂 𑀆𑀕𑀢𑀸𑀦𑀼𑀓𑁆𑀓𑀫𑁂𑀦 𑀲𑀻𑀮𑀲𑁆𑀲 𑀆𑀤𑀺𑀫𑀚𑁆𑀛𑀯𑀺𑀪𑀸𑀕𑁄 𑀯𑁂𑀤𑀺𑀢𑀩𑁆𑀩𑁄. 𑀤𑁆𑀯𑀺𑀦𑁆𑀦𑀁 𑀯𑀸 𑀢𑀺𑀡𑁆𑀡𑀁 𑀯𑀸𑀢𑀺 𑀲𑀻𑀮𑀓𑁄𑀝𑁆𑀞𑀸𑀲𑀸𑀦𑀁. 𑀏𑀓𑀦𑁆𑀢𑀭𑀁 𑀪𑀺𑀦𑁆𑀦𑀦𑁆𑀢𑀺 𑀅𑀪𑀺𑀦𑁆𑀦𑁂𑀦 𑀏𑀓𑀦𑁆𑀢𑀭𑀁 𑀳𑀼𑀢𑁆𑀯𑀸 𑀪𑀺𑀦𑁆𑀦𑀁. 𑀢𑁂𑀲𑀁 𑀔𑀡𑁆𑀟𑀸𑀤𑀻𑀦𑀁. ‘‘𑀪𑀼𑀚𑀺𑀲𑁆𑀲𑁂𑀳𑀻’’𑀢𑀺 𑀉𑀢𑁆𑀢𑀭𑀧𑀤𑀮𑁄𑀧𑁂𑀦 𑀦𑀺𑀤𑁆𑀤𑁂𑀲𑁄𑀢𑀺 𑀆𑀳 ‘‘𑀪𑀼𑀚𑀺𑀲𑁆𑀲𑀪𑀸𑀯𑀓𑀭𑁂𑀳𑀻’’𑀢𑀺. 𑀇𑀤𑀁 𑀯𑀻𑀢𑀺𑀓𑁆𑀓𑀦𑁆𑀢𑀦𑁆𑀢𑀺 𑀇𑀤𑀫𑁆𑀧𑀺 𑀲𑀻𑀮𑀁 𑀯𑀻𑀢𑀺𑀓𑁆𑀓𑀦𑁆𑀢𑀁. ‘‘𑀅𑀬𑀁 𑀲𑀻𑀮𑀲𑁆𑀲 𑀯𑀻𑀢𑀺𑀓𑁆𑀓𑀫𑁄’’𑀢𑀺 𑀏𑀯𑀁 𑀧𑀭𑀸𑀫𑀲𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑁂𑀳𑀺.

𑁨. 𑀩𑁆𑀭𑀳𑁆𑀫𑀘𑀭𑀺𑀬𑁄𑀕𑀥𑀲𑀼𑀢𑁆𑀢𑀯𑀡𑁆𑀡𑀦𑀸

𑁯𑁯𑁮. 𑀬𑁂𑀲𑀦𑁆𑀢𑀺 𑀅𑀦𑀺𑀬𑀫𑀢𑁄 𑀲𑀤𑁆𑀥𑀸𑀤𑀻𑀦𑀫𑀸𑀥𑀸𑀭𑀪𑀽𑀢𑀧𑀼𑀕𑁆𑀕𑀮𑀤𑀲𑁆𑀲𑀦𑀁. 𑀩𑀼𑀤𑁆𑀥𑁂 𑀧𑀲𑀸𑀤𑁄 𑀕𑀳𑀺𑀢𑁄. 𑀲𑁄 𑀳𑀺 𑀇𑀢𑀭𑁂𑀳𑀺 𑀧𑀞𑀫𑀁 𑀕𑀳𑁂𑀢𑀩𑁆𑀩𑁄𑀢𑀺. 𑀅𑀭𑀺𑀬𑀓𑀦𑁆𑀢𑀸𑀦𑀺 𑀲𑀻𑀮𑀸𑀦𑀺 𑀕𑀳𑀺𑀢𑀸𑀦𑀺 𑀲𑁄𑀢𑀸𑀧𑀦𑁆𑀦𑀲𑁆𑀲 𑀲𑀻𑀮𑀸𑀦𑀁 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀲𑀗𑁆𑀖𑁂 𑀧𑀲𑀸𑀤𑁄 𑀕𑀳𑀺𑀢𑁄 𑀥𑀫𑁆𑀫𑀧𑁆𑀧𑀲𑀸𑀤𑀲𑁆𑀲 𑀅𑀦𑀦𑁆𑀢𑀭𑀁 𑀯𑀼𑀘𑁆𑀘𑀫𑀸𑀦𑀢𑁆𑀢𑀸. 𑀥𑀫𑁆𑀫𑁂 𑀧𑀲𑀸𑀤𑁄 𑀕𑀳𑀺𑀢𑁄 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑀪𑀸𑀯𑀢𑁄. 𑀲𑁄𑀢𑀁 𑀅𑀭𑀺𑀬𑀫𑀕𑁆𑀕𑀁 𑀆𑀤𑀺𑀢𑁄 𑀧𑀢𑁆𑀢𑀺 𑀲𑁄𑀢𑀸𑀧𑀢𑁆𑀢𑀺, 𑀢𑀲𑁆𑀲𑀸 𑀅𑀗𑁆𑀕𑀸𑀦𑀺 𑀲𑁄𑀢𑀸𑀧𑀢𑁆𑀢𑀺𑀬𑀗𑁆𑀕𑀸𑀦𑀺. 𑀧𑀘𑁆𑀘𑁂𑀦𑁆𑀢𑀻𑀢𑀺 𑀧𑀚𑀸𑀬𑀦𑁆𑀢𑀺 𑀅𑀥𑀺𑀕𑀘𑁆𑀙𑀦𑁆𑀢𑀺. 𑀢𑁂𑀦𑀸𑀳 ‘‘𑀧𑀸𑀧𑀼𑀡𑀦𑁆𑀢𑀻’’𑀢𑀺. 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀁. 𑀓𑀢𑀭𑀧𑀲𑀸𑀤𑁄 𑀯𑀢𑁆𑀢𑀫𑀸𑀦𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀫𑀕𑁆𑀕𑀧𑁆𑀧𑀲𑀸𑀤𑁄𑀢𑀺 𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑁄 𑀧𑀲𑀸𑀤𑁄. 𑀆𑀕𑀢𑀫𑀕𑁆𑀕𑀲𑁆𑀲𑀸𑀢𑀺 𑀅𑀥𑀺𑀕𑀢𑀫𑀕𑁆𑀕𑀲𑁆𑀲. 𑀫𑀺𑀲𑁆𑀲𑀓𑀧𑁆𑀧𑀲𑀸𑀤𑁄 𑀏𑀲𑁄𑀢𑀺 𑀢𑀲𑁆𑀫𑀸 𑀉𑀪𑁄𑀧𑀺 𑀣𑁂𑀭𑀸 𑀧𑀡𑁆𑀟𑀺𑀢𑀸 𑀩𑀳𑀼𑀲𑁆𑀲𑀼𑀢𑀸.

𑁩. 𑀤𑀻𑀖𑀸𑀯𑀼𑀉𑀧𑀸𑀲𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁯𑁯𑁯. 𑀬𑀤𑀕𑁆𑀕𑁂𑀦 𑀢𑀲𑁆𑀫𑀺𑀁 𑀉𑀧𑀸𑀲𑀓𑁂 𑀬𑀣𑀸𑀯𑀼𑀢𑁆𑀢𑀸𑀦𑀺 𑀲𑁄𑀢𑀸𑀧𑀢𑁆𑀢𑀺𑀬𑀗𑁆𑀕𑀸𑀦𑀺 𑀲𑀁𑀯𑀺𑀚𑁆𑀚𑀦𑁆𑀢𑀺, 𑀢𑀤𑀕𑁆𑀕𑁂𑀦 𑀲𑁄 𑀢𑁂𑀲𑀼 𑀯𑀢𑁆𑀢𑀺𑀲𑁆𑀲𑀢𑀻𑀢𑀺 𑀆𑀳 ‘‘𑀘𑀢𑀽𑀲𑀼 𑀲𑁄𑀢𑀸𑀧𑀢𑁆𑀢𑀺𑀬𑀗𑁆𑀕𑁂𑀲𑀼 𑀲𑀦𑁆𑀤𑀺𑀲𑁆𑀲𑀲𑀻’’𑀢𑀺. 𑀯𑀺𑀚𑁆𑀚𑀁 𑀪𑀚𑀦𑁆𑀢𑀻𑀢𑀺 𑀯𑀺𑀚𑁆𑀚𑀸𑀪𑀸𑀕𑀺𑀬𑀸, 𑀢𑁂𑀲𑀼 𑀓𑁄𑀝𑁆𑀞𑀸𑀲𑁂𑀲𑀼 𑀧𑀭𑀺𑀬𑀸𑀧𑀦𑁆𑀦𑀸𑀢𑀺 𑀯𑀼𑀢𑁆𑀢𑀁 ‘‘𑀯𑀺𑀚𑁆𑀚𑀸𑀪𑀸𑀕𑀺𑀬𑁂𑀢𑀺 𑀯𑀺𑀚𑁆𑀚𑀸𑀓𑁄𑀝𑁆𑀞𑀸𑀲𑀺𑀓𑁂’’𑀢𑀺.

𑁪-𑁫. 𑀧𑀞𑀫𑀲𑀸𑀭𑀺𑀧𑀼𑀢𑁆𑀢𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁦𑁦𑁦-𑁧𑁦𑁦𑁧. ‘‘𑀲𑁄𑀢𑀸𑀧𑀢𑁆𑀢𑀻’’𑀢𑀺 𑀧𑀞𑀫𑀫𑀕𑁆𑀕𑁄 𑀅𑀥𑀺𑀧𑁆𑀧𑁂𑀢𑁄, 𑀢𑀲𑁆𑀲 𑀅𑀥𑀺𑀕𑀫𑀽𑀧𑀸𑀬𑁄 𑀲𑁄𑀢𑀸𑀧𑀢𑁆𑀢𑀺𑀬𑀗𑁆𑀕𑀁. 𑀢𑁂𑀦𑀸𑀳 ‘‘𑀲𑁄𑀢𑀸𑀧𑀢𑁆𑀢𑀺𑀬𑀸 𑀧𑀼𑀩𑁆𑀩𑀪𑀸𑀕𑀧𑀝𑀺𑀮𑀸𑀪𑀗𑁆𑀕’’𑀦𑁆𑀢𑀺. 𑀲𑁄𑀢𑀸𑀧𑀢𑁆𑀢𑀺𑀅𑀢𑁆𑀣𑀸𑀬𑀸𑀢𑀺 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀢𑁆𑀣𑀸𑀬. 𑀅𑀗𑁆𑀕𑀦𑁆𑀢𑀺 𑀓𑀸𑀭𑀡𑀁. 𑀇𑀢𑀭𑁂 𑀭𑀢𑀦𑀢𑁆𑀢𑀬𑀧𑁆𑀧𑀲𑀸𑀤𑀸𑀤𑀬𑁄. 𑀧𑀼𑀩𑁆𑀩𑀪𑀸𑀕𑀺𑀬𑀸𑀬 𑀲𑁄𑀢𑀸𑀧𑀢𑁆𑀢𑀺𑀬𑀸 𑀅𑀗𑁆𑀕𑀁 𑀓𑀸𑀭𑀡𑀦𑁆𑀢𑀺.

𑁬. 𑀣𑀧𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁦𑁨. (𑀯𑀺𑀢𑀸𑀦𑀁 𑀓𑀸𑀬𑀸𑀦𑀁 𑀓𑀸𑀮𑀦𑀓𑀸𑀬, 𑀓𑀸𑀭𑀡𑀲𑁆𑀲 𑀉𑀧𑀕𑀢𑀸𑀦𑀁 𑀲𑀸𑀢𑀧𑀭𑀺𑀬𑀸 𑀲𑀺𑀚𑁆𑀛𑀢𑀺. 𑀢𑀢𑁆𑀣 𑀓𑀸𑀬𑀧𑀭𑀺𑀧𑀚𑁆𑀛𑀸𑀬𑀫𑀼𑀔𑁂𑀦 𑀢𑀦𑁆𑀢𑀺𑀁 𑀞𑀧𑁂𑀲𑀺 𑀪𑀕𑀯𑀸. 𑀦 𑀳𑀺 𑀧𑀲𑁆𑀲𑀣 𑀦𑀫𑀢𑁆𑀣𑁂𑀳𑀺 𑀓𑀭𑀡𑁂 𑀦𑀺𑀭𑀢𑁆𑀣𑀓𑁄 𑀧𑀺𑀢𑀺 𑀯𑀢𑁆𑀢𑀢𑀺. ‘‘𑀦𑀺𑀬𑀢𑀢𑁆𑀢𑀸’’𑀢𑀺 𑀯𑀼𑀢𑁆𑀢𑀁. 𑀢𑀫𑁂𑀯 𑀦𑀺𑀬𑀫𑀁 ‘‘𑀫𑀚𑁆𑀛𑀺𑀫𑀧𑀤𑁂𑀲𑁂𑀬𑁂𑀯𑀸’’𑀢𑀺 𑀅𑀯𑀥𑀸𑀭𑀡𑁂𑀦 𑀯𑀺𑀪𑀸𑀯𑁂𑀢𑀺. 𑀫𑀳𑀸𑀫𑀡𑁆𑀟𑀮𑀘𑀸𑀭𑀺𑀓𑀁 𑀘𑀭𑀦𑁆𑀢𑁄𑀧𑀺 𑀫𑀚𑁆𑀛𑀺𑀫𑀧𑀤𑁂𑀲𑀲𑁆𑀲 𑀅𑀦𑁆𑀢𑀦𑁆𑀢𑁂𑀦𑁂𑀯 𑀘𑀭𑀢𑀺. 𑀢𑀢𑁆𑀣 𑀘 𑀯𑀺𑀦𑁂𑀬𑁆𑀬𑀚𑀦𑀲𑁆𑀲 𑀲𑀫𑁄𑀲𑀭𑀡𑀢𑀸 𑀫𑀢𑁆𑀢𑀧𑀦𑀯𑀸𑀘𑀫𑀳𑀢𑁆𑀣𑀲𑀼𑀧𑀦𑀦𑁆𑀢𑀺.) [𑀏𑀢𑁆𑀣𑀦𑁆𑀢𑀭𑁂 𑀧𑀸𑀞𑁄 𑀅𑀲𑀼𑀤𑁆𑀥𑁄 𑀤𑀼𑀲𑁆𑀲𑁄𑀥𑀦𑀻𑀬𑁄 𑀘, 𑀲𑀼𑀤𑁆𑀥𑀧𑀸𑀞𑁄 𑀕𑀯𑁂𑀲𑀺𑀢𑀩𑁆𑀩𑁄.] 𑀅𑀭𑀼𑀡𑀼𑀝𑁆𑀞𑀸𑀧𑀦𑀫𑁆𑀧𑀺 𑀢𑀢𑁆𑀣𑁂𑀯 𑀳𑁄𑀢𑀺. 𑀧𑀘𑁆𑀘𑀦𑁆𑀢𑀧𑀤𑁂𑀲𑁂 𑀧𑀦 𑀤𑀽𑀭𑁂 𑀯𑀺𑀦𑁂𑀬𑁆𑀬𑀚𑀦𑀸 𑀳𑁄𑀦𑁆𑀢𑀺, 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀫𑀕𑁆𑀕𑀨𑀮𑁂𑀲𑀼 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀢𑀢𑁄 𑀧𑀘𑁆𑀘𑀸𑀕𑀦𑁆𑀢𑁆𑀯𑀸 𑀫𑀚𑁆𑀛𑀺𑀫𑀧𑀤𑁂𑀲𑁂 𑀏𑀯 𑀯𑀸𑀲𑀁 𑀉𑀧𑀕𑀘𑁆𑀙𑀢𑀺, 𑀢𑀢𑁆𑀣 𑀫𑀦𑀼𑀲𑁆𑀲𑁂𑀳𑀺 𑀓𑀢𑀸𑀦𑀁 𑀓𑀸𑀭𑀸𑀦𑀁 𑀫𑀳𑀧𑁆𑀨𑀮𑀪𑀸𑀯𑀦𑀺𑀬𑀫𑀦𑀢𑁆𑀣𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. ‘‘𑀆𑀲𑀦𑁆𑀦𑁂 𑀦𑁄 𑀪𑀕𑀯𑀸’’𑀢𑀺 𑀇𑀤𑀁 𑀦𑀺𑀤𑀲𑁆𑀲𑀦𑀫𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀦 𑀓𑁂𑀯𑀮’’𑀦𑁆𑀢𑀺 𑀆𑀤𑀺𑀫𑀸𑀳.

𑀲𑀓𑀺𑀜𑁆𑀘𑀦𑀲𑀧𑀮𑀺𑀩𑁄𑀥𑀦𑀝𑁆𑀞𑁂𑀦𑀸𑀢𑀺 𑀏𑀢𑁆𑀣 𑀓𑀺𑀜𑁆𑀘𑀦𑀁 𑀧𑀮𑀺𑀩𑁄𑀥𑁄 𑀅𑀲𑀫𑀸𑀧𑀺𑀢𑀓𑀺𑀘𑁆𑀘𑀢𑀸, 𑀢𑀤𑀼𑀪𑀬𑀲𑁆𑀲 𑀅𑀢𑁆𑀣𑀺𑀪𑀸𑀯𑁂𑀦𑀸𑀢𑀺 𑀅𑀢𑁆𑀣𑁄. 𑀫𑀳𑀸𑀯𑀸𑀲𑁂𑀢𑀺 𑀫𑀳𑀸𑀕𑁂𑀳𑁂.

𑀤𑁆𑀯𑁂𑀧𑀺 𑀚𑀦𑀸𑀢𑀺 𑀇𑀲𑀺𑀤𑀢𑁆𑀢𑀧𑀼𑀭𑀸𑀡𑀸. 𑀲𑀺𑀢𑀁 𑀦𑀸𑀫 𑀫𑀦𑁆𑀤𑀳𑀲𑀺𑀢𑀁. 𑀳𑀲𑀺𑀢𑀁 𑀦𑀸𑀫 𑀯𑀺𑀲𑁆𑀲𑀝𑁆𑀞𑀳𑀲𑀺𑀢𑀁. 𑀫𑀼𑀢𑁆𑀢𑀘𑀸𑀕𑁄𑀢𑀺𑀆𑀤𑀻𑀲𑀼 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀝𑀻𑀓𑀸𑀬𑀁 (𑀯𑀺𑀲𑀼𑀤𑁆𑀥𑀺. 𑀫𑀳𑀸𑀝𑀻. 𑁧.𑁧𑁬𑁦) 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀲𑀁𑀯𑀺𑀪𑀸𑀕𑁂𑀢𑀺 𑀧𑀭𑀲𑁆𑀲 𑀤𑀸𑀦𑀯𑀲𑁂𑀦 𑀲𑀁𑀯𑀺𑀪𑀚𑀦𑁂. 𑀅𑀓𑀢𑀯𑀺𑀪𑀸𑀕𑀦𑁆𑀢𑀺 𑀤𑁂𑀬𑁆𑀬𑀥𑀫𑁆𑀫𑀯𑀲𑁂𑀦 𑀦 𑀓𑀢𑀯𑀺𑀪𑀸𑀕𑀁. 𑀧𑀼𑀕𑁆𑀕𑀮𑀯𑀲𑁂𑀦 𑀧𑀦 ‘‘𑀲𑀻𑀮𑀯𑀦𑁆𑀢𑁂𑀳𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀓𑀢𑀯𑀺𑀪𑀸𑀕𑀫𑁂𑀯 𑀫𑀳𑀧𑁆𑀨𑀮𑀢𑀸𑀓𑀭𑀡𑁂𑀦. 𑀢𑁂𑀦𑀸𑀳 ‘‘𑀲𑀩𑁆𑀩𑀁 𑀤𑀸𑀢𑀩𑁆𑀩𑀫𑁂𑀯 𑀳𑀼𑀢𑁆𑀯𑀸 𑀞𑀺𑀢’’𑀦𑁆𑀢𑀺.

(𑀏𑀢𑁆𑀣𑀦𑁆𑀢𑀭𑁂 𑀧𑀸𑀞𑁄 𑀅𑀲𑀼𑀤𑁆𑀥𑁄 𑀤𑀼𑀲𑁆𑀲𑁄𑀥𑀦𑀻𑀬𑁄 𑀘, 𑀲𑀼𑀤𑁆𑀥𑀧𑀸𑀞𑁄 𑀕𑀯𑁂𑀲𑀺𑀢𑀩𑁆𑀩𑁄.)

𑁭. 𑀯𑁂𑀴𑀼𑀤𑁆𑀯𑀸𑀭𑁂𑀬𑁆𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁦𑁩. 𑀧𑀯𑁂𑀡𑀺𑀆𑀕𑀢𑀲𑁆𑀲𑀸𑀢𑀺 𑀅𑀦𑁂𑀓𑀧𑀼𑀭𑀺𑀲𑀬𑀼𑀕𑀯𑀲𑁂𑀦 𑀧𑀭𑀫𑁆𑀧𑀭𑀸𑀕𑀢𑀲𑁆𑀲. 𑀅𑀢𑁆𑀢𑀦𑀺 𑀉𑀧𑀦𑁂𑀢𑀩𑁆𑀩𑀦𑁆𑀢𑀺 𑀅𑀢𑁆𑀢𑀦𑀺 𑀦𑁂𑀢𑁆𑀯𑀸 𑀧𑀭𑀲𑁆𑀫𑀺𑀁 𑀉𑀧𑀦𑁂𑀢𑀩𑁆𑀩𑀁. 𑀢𑁂𑀦𑀸𑀳 ‘‘𑀬𑁄 𑀔𑁄 𑀫𑁆𑀬𑀸𑀬𑀁 𑀥𑀫𑁆𑀫𑁄 𑀅𑀧𑁆𑀧𑀺𑀬𑁄 𑀅𑀫𑀦𑀸𑀧𑁄, 𑀧𑀭𑀲𑁆𑀲𑀧𑁂𑀲𑁄 𑀥𑀫𑁆𑀫𑁄 𑀅𑀧𑁆𑀧𑀺𑀬𑁄 𑀅𑀫𑀦𑀸𑀧𑁄’’𑀢𑀺𑀆𑀤𑀺. 𑀅𑀫𑀦𑁆𑀢𑀪𑀸𑀲𑁂𑀦𑀸𑀢𑀺 𑀲𑀫𑁆𑀨𑀲𑁆𑀲 𑀲𑀫𑁆𑀨𑀧𑁆𑀧𑀮𑀸𑀧𑀲𑁆𑀲 𑀅𑀫𑀦𑁆𑀢𑀸𑀬 𑀫𑀦𑁆𑀢𑀸𑀭𑀳𑀺𑀢𑀪𑀸𑀲𑀦𑁂𑀦.

𑁮-𑁯. 𑀧𑀞𑀫𑀕𑀺𑀜𑁆𑀚𑀓𑀸𑀯𑀲𑀣𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁦𑁦𑁪-𑁫. 𑀤𑁆𑀯𑁂 𑀕𑀸𑀫𑀸 𑀤𑁆𑀯𑀺𑀦𑁆𑀦𑀁 𑀜𑀸𑀢𑀻𑀦𑀁 𑀕𑀸𑀫𑀸𑀢𑀺 𑀓𑀢𑁆𑀯𑀸. 𑀜𑀸𑀢𑀺𑀓𑁂𑀢𑀺 𑀏𑀯𑀁𑀮𑀤𑁆𑀥𑀦𑀸𑀫𑁂 𑀏𑀓𑀲𑁆𑀫𑀺𑀁 𑀕𑀸𑀫𑀓𑁂. 𑀕𑀺𑀜𑁆𑀚𑀓𑀸𑀯𑀲𑀣𑁂𑀢𑀺 𑀕𑀺𑀜𑁆𑀚𑀓𑀸 𑀯𑀼𑀘𑁆𑀘𑀦𑁆𑀢𑀺 𑀇𑀝𑁆𑀞𑀓𑀸, 𑀕𑀺𑀜𑁆𑀚𑀓𑀸𑀳𑀺 𑀏𑀯 𑀓𑀢𑁄 𑀆𑀯𑀲𑀣𑁄, 𑀢𑀲𑁆𑀫𑀺𑀁. 𑀲𑁄 𑀓𑀺𑀭 𑀆𑀯𑀸𑀲𑁄 𑀬𑀣𑀸 𑀲𑀼𑀥𑀸𑀳𑀺 𑀧𑀭𑀺𑀓𑀫𑁆𑀫𑁂𑀦 𑀧𑀬𑁄𑀚𑀦𑀁 𑀦𑀢𑁆𑀣𑀺, 𑀏𑀯𑀁 𑀇𑀝𑁆𑀞𑀓𑀸𑀳𑀺 𑀏𑀯 𑀘𑀺𑀦𑀺𑀢𑁆𑀯𑀸 𑀓𑀢𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀇𑀝𑁆𑀞𑀓𑀸𑀫𑀬𑁂 𑀆𑀯𑀲𑀣𑁂’’𑀢𑀺. 𑀢𑀼𑀮𑀸𑀣𑀫𑁆𑀪𑀤𑁆𑀯𑀸𑀭𑀩𑀦𑁆𑀥𑀓𑀯𑀸𑀝𑀨𑀮𑀓𑀸𑀦𑀺 𑀧𑀦 𑀤𑀸𑀭𑀼𑀫𑀬𑀸 𑀏𑀯. 𑀑𑀭𑀁 𑀯𑀼𑀘𑁆𑀘𑀢𑀺 𑀓𑀸𑀫𑀥𑀸𑀢𑀼, 𑀧𑀘𑁆𑀘𑀬𑀪𑀸𑀯𑁂𑀦 𑀢𑀁 𑀑𑀭𑀁 𑀪𑀚𑀦𑁆𑀢𑀻𑀢𑀺 𑀑𑀭𑀫𑁆𑀪𑀸𑀕𑀺𑀬𑀸𑀦𑀺, 𑀑𑀭𑀫𑁆𑀪𑀸𑀕𑀲𑁆𑀲 𑀯𑀸 𑀳𑀺𑀢𑀸𑀦𑀺 𑀑𑀭𑀫𑁆𑀪𑀸𑀕𑀺𑀬𑀸𑀦𑀺. 𑀢𑁂𑀦𑀸𑀳 ‘‘𑀳𑁂𑀝𑁆𑀞𑀸𑀪𑀸𑀕𑀺𑀬𑀸𑀦’’𑀦𑁆𑀢𑀺𑀆𑀤𑀺. 𑀢𑀻𑀳𑀺 𑀫𑀕𑁆𑀕𑁂𑀳𑀻𑀢𑀺 𑀳𑁂𑀝𑁆𑀞𑀺𑀫𑁂𑀳𑀺 𑀢𑀻𑀳𑀺 𑀫𑀕𑁆𑀕𑁂𑀳𑀺. 𑀢𑁂𑀳𑀺 𑀧𑀳𑀸𑀢𑀩𑁆𑀩𑀢𑀸𑀬 𑀳𑀺 𑀢𑁂𑀲𑀁 𑀲𑀜𑁆𑀜𑁄𑀚𑀦𑀸𑀦𑀁 𑀑𑀭𑀫𑁆𑀪𑀸𑀕𑀺𑀬𑀢𑀸, 𑀑𑀭𑀁 𑀪𑀜𑁆𑀚𑀺𑀬𑀸𑀦𑀺 𑀯𑀸 𑀑𑀭𑀫𑁆𑀪𑀸𑀕𑀺𑀬𑀸𑀦𑀺 𑀯𑀼𑀢𑁆𑀢𑀸𑀦𑀺 𑀦𑀺𑀭𑀼𑀢𑁆𑀢𑀺𑀦𑀬𑁂𑀦. 𑀇𑀤𑀸𑀦𑀺 𑀩𑁆𑀬𑀢𑀺𑀭𑁂𑀓𑀫𑀼𑀔𑁂𑀦 𑀦𑁂𑀲𑀁 𑀑𑀭𑀫𑁆𑀪𑀸𑀕𑀺𑀬𑀪𑀸𑀯𑀁 𑀯𑀺𑀪𑀸𑀯𑁂𑀢𑀼𑀁 ‘‘𑀢𑀢𑁆𑀣𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀯𑀺𑀓𑁆𑀔𑀫𑁆𑀪𑀺𑀢𑀸𑀦𑀺 𑀲𑀫𑀢𑁆𑀣𑀢𑀸𑀯𑀺𑀖𑀸𑀢𑁂𑀦 𑀧𑀼𑀣𑀼𑀚𑁆𑀚𑀦𑀸𑀦𑀁, 𑀲𑀫𑀼𑀘𑁆𑀙𑀺𑀦𑁆𑀦𑀸𑀦𑀺 𑀲𑀩𑁆𑀩𑀲𑁄 𑀅𑀪𑀸𑀯𑁂𑀦 𑀅𑀭𑀺𑀬𑀸𑀦𑀁 𑀭𑀽𑀧𑀸𑀭𑀽𑀧𑀪𑀯𑀽𑀧𑀧𑀢𑁆𑀢𑀺𑀬𑀸 𑀯𑀺𑀩𑀦𑁆𑀥𑀦𑀸𑀬 𑀦 𑀳𑁄𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀅𑀯𑀺𑀓𑁆𑀔𑀫𑁆𑀪𑀺𑀢𑀸𑀦𑀺 𑀫𑀕𑁆𑀕𑁂𑀦 𑀯𑀸 𑀅𑀲𑀫𑀼𑀘𑁆𑀙𑀺𑀦𑁆𑀦𑀸𑀦𑀻’’𑀢𑀺. 𑀦𑀺𑀩𑁆𑀩𑀢𑁆𑀢𑀺𑀯𑀲𑁂𑀦𑀸𑀢𑀺 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀯𑀲𑁂𑀦 𑀕𑀦𑁆𑀢𑀼𑀁 𑀦 𑀤𑁂𑀦𑁆𑀢𑀺. 𑀫𑀳𑀕𑁆𑀕𑀢𑀪𑀯𑀕𑀸𑀫𑀺𑀓𑀫𑁆𑀫𑀸𑀬𑀽𑀳𑀦𑀲𑁆𑀲 𑀯𑀺𑀩𑀦𑁆𑀥𑀦𑀢𑁄 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀆𑀤𑀻𑀦𑀺 𑀢𑀻𑀡𑀺 𑀲𑀜𑁆𑀜𑁄𑀚𑀦𑀸𑀦𑀺 𑀓𑀸𑀫𑀘𑁆𑀙𑀦𑁆𑀤𑀩𑁆𑀬𑀸𑀧𑀸𑀤𑀸 𑀯𑀺𑀬 𑀫𑀳𑀕𑁆𑀕𑀢𑀪𑀯𑀽𑀧𑀧𑀢𑁆𑀢𑀺𑀬𑀸 𑀯𑀺𑀲𑁂𑀲𑀧𑀘𑁆𑀘𑀬𑀢𑁆𑀢𑀸 𑀢𑀢𑁆𑀣 𑀫𑀳𑀕𑁆𑀕𑀢𑀪𑀯𑁂 𑀦𑀺𑀩𑁆𑀩𑀢𑁆𑀢𑀫𑁆𑀧𑀺 𑀢𑀦𑁆𑀦𑀺𑀩𑁆𑀩𑀢𑁆𑀢𑀺𑀳𑁂𑀢𑀼𑀓𑀫𑁆𑀫𑀧𑀭𑀺𑀓𑁆𑀔𑀬𑁂 𑀓𑀸𑀫𑀪𑀯𑀽𑀧𑀧𑀢𑁆𑀢𑀺𑀧𑀘𑁆𑀘𑀬𑀢𑀸𑀬 𑀫𑀳𑀕𑁆𑀕𑀢𑀪𑀯𑀢𑁄 𑀆𑀦𑁂𑀢𑁆𑀯𑀸 𑀇𑀥𑁂𑀯 𑀓𑀸𑀫𑀪𑀯𑁂 𑀏𑀯 𑀦𑀺𑀩𑁆𑀩𑀢𑁆𑀢𑀸𑀧𑁂𑀦𑁆𑀢𑀺. 𑀢𑀲𑁆𑀫𑀸 𑀲𑀩𑁆𑀩𑀸𑀦𑀺𑀧𑀺 𑀧𑀜𑁆𑀘𑀧𑀺 𑀲𑀁𑀬𑁄𑀚𑀦𑀸𑀦𑀺 𑀑𑀭𑀫𑁆𑀪𑀸𑀕𑀺𑀬𑀸𑀦𑁂𑀯. 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀅𑀦𑀸𑀕𑀫𑀦𑀲𑀪𑀸𑀯𑁄𑀢𑀺 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀯𑀲𑁂𑀦 𑀢𑀲𑁆𑀫𑀸 𑀮𑁄𑀓𑀸 𑀇𑀥 𑀦 𑀆𑀕𑀫𑀦𑀲𑀪𑀸𑀯𑁄. 𑀩𑀼𑀤𑁆𑀥𑀤𑀲𑁆𑀲𑀦-𑀣𑁂𑀭𑀤𑀲𑁆𑀲𑀦-𑀥𑀫𑁆𑀫𑀲𑁆𑀲𑀯𑀦𑀸𑀦𑀁 𑀧𑀦 𑀅𑀢𑁆𑀣𑀸𑀬 𑀅𑀲𑁆𑀲 𑀆𑀕𑀫𑀦𑀁 𑀅𑀦𑀺𑀯𑀸𑀭𑀺𑀢𑀁.

𑀓𑀤𑀸𑀘𑀺 𑀉𑀧𑁆𑀧𑀢𑁆𑀢𑀺𑀬𑀸 𑀯𑀺𑀭𑀴𑀸𑀓𑀸𑀭𑀢𑀸, 𑀧𑀭𑀺𑀬𑀼𑀝𑁆𑀞𑀸𑀦𑀫𑀦𑁆𑀤𑀢𑀸𑀬 𑀅𑀩𑀳𑀮𑀢𑀸𑀢𑀺 𑀤𑁆𑀯𑁂𑀥𑀸𑀧𑀺 𑀢𑀦𑀼𑀪𑀸𑀯𑁄. 𑀅𑀪𑀺𑀡𑁆𑀳𑀦𑁆𑀢𑀺 𑀩𑀳𑀼𑀲𑁄. 𑀩𑀳𑀮𑀩𑀳𑀮𑀸𑀢𑀺 𑀢𑀺𑀩𑁆𑀩𑀢𑀺𑀩𑁆𑀩𑀸. 𑀬𑀢𑁆𑀣 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀁 𑀲𑀦𑁆𑀢𑀸𑀦𑀁 𑀫𑀤𑁆𑀤𑀦𑁆𑀢𑀸 𑀨𑀭𑀦𑁆𑀢𑀸 𑀲𑀸𑀥𑁂𑀦𑁆𑀢𑀸 𑀅𑀦𑁆𑀥𑀓𑀸𑀭𑀁 𑀓𑀭𑁄𑀦𑁆𑀢𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀤𑁆𑀯𑀻𑀳𑀺 𑀧𑀦 𑀫𑀕𑁆𑀕𑁂𑀳𑀺 𑀧𑀳𑀻𑀦𑀢𑁆𑀢𑀸 𑀢𑀦𑀼𑀓𑀢𑀦𑀼𑀓𑀸 𑀫𑀦𑁆𑀤𑀫𑀦𑁆𑀤𑀸 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀧𑀼𑀢𑁆𑀢𑀥𑀻𑀢𑀭𑁄 𑀳𑁄𑀦𑁆𑀢𑀻𑀢𑀺 𑀇𑀤𑀁 𑀅𑀓𑀸𑀭𑀡𑀁. 𑀢𑀣𑀸 𑀳𑀺 𑀅𑀗𑁆𑀕𑀧𑀘𑁆𑀘𑀗𑁆𑀕𑀧𑀭𑀸𑀫𑀲𑀦𑀫𑀢𑁆𑀢𑁂𑀦𑀧𑀺 𑀢𑁂 𑀳𑁄𑀦𑁆𑀢𑀺. 𑀇𑀤𑀦𑁆𑀢𑀺 ‘‘𑀭𑀸𑀕𑀤𑁄𑀲𑀫𑁄𑀳𑀸𑀦𑀁 𑀢𑀦𑀼𑀢𑁆𑀢𑀸’’𑀢𑀺 𑀇𑀤𑀁 𑀯𑀘𑀦𑀁. 𑀪𑀯𑀢𑀦𑀼𑀓𑀯𑀲𑁂𑀦𑀸𑀢𑀺 𑀅𑀧𑁆𑀧𑀓𑀪𑀯𑀯𑀲𑁂𑀦. 𑀢𑀦𑁆𑀢𑀺 𑀫𑀳𑀸𑀲𑀻𑀯𑀢𑁆𑀣𑁂𑀭𑀲𑁆𑀲 𑀯𑀘𑀦𑀁 𑀧𑀝𑀺𑀓𑁆𑀔𑀺𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀬𑁂 𑀪𑀯𑀸 𑀅𑀭𑀺𑀬𑀸𑀦𑀁 𑀮𑀩𑁆𑀪𑀦𑁆𑀢𑀺, 𑀢𑁂 𑀧𑀭𑀺𑀧𑀼𑀡𑁆𑀡𑀮𑀓𑁆𑀔𑀡𑀪𑀯𑀸 𑀏𑀯. 𑀬𑁂 𑀦 𑀮𑀩𑁆𑀪𑀦𑁆𑀢𑀺, 𑀢𑀢𑁆𑀣 𑀓𑀻𑀤𑀺𑀲𑀁 𑀢𑀁 𑀪𑀯𑀢𑀦𑀼𑀓𑀁. 𑀢𑀲𑁆𑀫𑀸 𑀉𑀪𑀬𑀣𑀸𑀧𑀺 𑀪𑀯𑀢𑀦𑀼𑀓𑀲𑁆𑀲 𑀅𑀲𑀫𑁆𑀪𑀯𑁄 𑀏𑀯𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀲𑁄𑀢𑀸𑀧𑀦𑁆𑀦𑀲𑁆𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀝𑁆𑀞𑀫𑁂 𑀪𑀯𑁂 𑀪𑀯𑀢𑀦𑀼𑀓𑀁 𑀦𑀢𑁆𑀣𑀺 𑀅𑀝𑁆𑀞𑀫𑀲𑁆𑀲𑁂𑀯 𑀪𑀯𑀲𑁆𑀲 𑀲𑀩𑁆𑀩𑀲𑁆𑀲𑁂𑀯 𑀅𑀪𑀸𑀯𑀢𑁄. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀓𑀸𑀫𑀸𑀯𑀘𑀭𑀮𑁄𑀓𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑀇𑀢𑀭𑀲𑁆𑀲 𑀮𑁄𑀓𑀲𑁆𑀲 𑀯𑀲𑁂𑀦 𑀢𑀣𑀸 𑀯𑀢𑁆𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸. 𑀬𑁄 𑀳𑀺 𑀲𑀓𑀤𑀸𑀕𑀸𑀫𑀻 𑀤𑁂𑀯𑀫𑀦𑀼𑀲𑁆𑀲𑀮𑁄𑀓𑁂𑀲𑀼 𑀯𑁄𑀫𑀺𑀲𑁆𑀲𑀓𑀯𑀲𑁂𑀦 𑀦𑀺𑀩𑁆𑀩𑀢𑁆𑀢𑀢𑀺, 𑀲𑁄𑀧𑀺 𑀓𑀸𑀫𑀪𑀯𑀯𑀲𑁂𑀦𑁂𑀯 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑀩𑁆𑀩𑁄. 𑀪𑀕𑀯𑀢𑀸 𑀘 𑀓𑀸𑀫𑀮𑁄𑀓𑁂 𑀞𑀢𑁆𑀯𑀸 𑁋 ‘‘𑀲𑀓𑀺𑀤𑁂𑀯 𑀇𑀫𑀁 𑀮𑁄𑀓𑀁 𑀆𑀕𑀦𑁆𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁. 𑀇𑀫𑀁 𑀮𑁄𑀓𑀁 𑀆𑀕𑀦𑁆𑀢𑁆𑀯𑀸𑀢𑀺 𑀘 𑀇𑀫𑀺𑀦𑀸 𑀧𑀜𑁆𑀘𑀲𑀼 𑀲𑀓𑀤𑀸𑀕𑀸𑀫𑀻𑀲𑀼 𑀘𑀢𑁆𑀢𑀸𑀭𑁄 𑀯𑀚𑁆𑀚𑁂𑀢𑁆𑀯𑀸 𑀏𑀓𑁄𑀯 𑀕𑀳𑀺𑀢𑁄. 𑀏𑀓𑀘𑁆𑀘𑁄 𑀳𑀺 𑀇𑀥 𑀲𑀓𑀤𑀸𑀕𑀸𑀫𑀺𑀨𑀮𑀁 𑀧𑀢𑁆𑀯𑀸 𑀇𑀥𑁂𑀯 𑀧𑀭𑀺𑀦𑀺𑀩𑁆𑀩𑀸𑀬𑀢𑀺, 𑀏𑀓𑀘𑁆𑀘𑁄 𑀇𑀥 𑀧𑀢𑁆𑀯𑀸 𑀤𑁂𑀯𑀮𑁄𑀓𑁂 𑀧𑀭𑀺𑀦𑀺𑀩𑁆𑀩𑀸𑀬𑀢𑀺, 𑀏𑀓𑀘𑁆𑀘𑁄 𑀤𑁂𑀯𑀮𑁄𑀓𑁂 𑀧𑀢𑁆𑀯𑀸 𑀢𑀢𑁆𑀣𑁂𑀯 𑀧𑀭𑀺𑀦𑀺𑀩𑁆𑀩𑀸𑀬𑀢𑀺, 𑀏𑀓𑀘𑁆𑀘𑁄 𑀤𑁂𑀯𑀮𑁄𑀓𑁂 𑀧𑀢𑁆𑀯𑀸 𑀇𑀥𑀽𑀧𑀧𑀚𑁆𑀚𑀺𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀢𑀺, 𑀇𑀫𑁂 𑀘𑀢𑁆𑀢𑀸𑀭𑁄 𑀇𑀥 𑀦 𑀮𑀩𑁆𑀪𑀦𑁆𑀢𑀺. 𑀬𑁄 𑀧𑀦 𑀇𑀥 𑀧𑀢𑁆𑀯𑀸 𑀤𑁂𑀯𑀮𑁄𑀓𑁂 𑀬𑀸𑀯𑀢𑀸𑀬𑀼𑀓𑀁 𑀯𑀲𑀺𑀢𑁆𑀯𑀸 𑀧𑀼𑀦 𑀇𑀥𑀽𑀧𑀧𑀚𑁆𑀚𑀺𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀢𑀺, 𑀅𑀬𑀫𑀺𑀥 𑀅𑀥𑀺𑀧𑁆𑀧𑁂𑀢𑁄. 𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀇𑀫𑀁 𑀮𑁄𑀓𑀦𑁆𑀢𑀺 𑀓𑀸𑀫𑀪𑀯𑁄 𑀅𑀥𑀺𑀧𑁆𑀧𑁂𑀢𑁄’’𑀢𑀺 𑀇𑀫𑀫𑀢𑁆𑀣𑀁 𑀯𑀺𑀪𑀸𑀯𑁂𑀢𑀼𑀁 ‘‘𑀲𑀘𑁂 𑀳𑀻’’𑀢𑀺𑀆𑀤𑀺𑀦𑀸 𑀅𑀜𑁆𑀜𑀁𑀬𑁂𑀯 𑀘𑀢𑀼𑀓𑁆𑀓𑀁 𑀤𑀲𑁆𑀲𑀺𑀢𑀁.

𑀘𑀢𑀽𑀲𑀼…𑀧𑁂… 𑀲𑀪𑀸𑀯𑁄𑀢𑀺 𑀅𑀢𑁆𑀣𑁄 𑀅𑀧𑀸𑀬𑀕𑀫𑀦𑀻𑀬𑀸𑀦𑀁 𑀧𑀸𑀧𑀥𑀫𑁆𑀫𑀸𑀦𑀁 𑀲𑀩𑁆𑀩𑀲𑁄 𑀧𑀳𑀻𑀦𑀢𑁆𑀢𑀸. 𑀥𑀫𑁆𑀫𑀦𑀺𑀬𑀸𑀫𑁂𑀦𑀸𑀢𑀺 𑀫𑀕𑁆𑀕𑀥𑀫𑁆𑀫𑀦𑀺𑀬𑀸𑀫𑁂𑀦 𑀦𑀺𑀬𑀢𑁄 𑀉𑀧𑀭𑀺𑀫𑀕𑁆𑀕𑀸𑀥𑀺𑀕𑀫𑀲𑁆𑀲 𑀅𑀯𑀲𑁆𑀲𑀁𑀪𑀸𑀯𑀺𑀪𑀸𑀯𑀢𑁄. 𑀢𑁂𑀦𑀸𑀳 ‘‘𑀲𑀫𑁆𑀩𑁄𑀥𑀺𑀧𑀭𑀸𑀬𑀡𑁄’’𑀢𑀺. 𑀢𑁂𑀲𑀁 𑀢𑁂𑀲𑀁 𑀜𑀸𑀡𑀕𑀢𑀺𑀦𑁆𑀢𑀺 𑀢𑁂𑀲𑀁 𑀢𑁂𑀲𑀁 𑀲𑀢𑁆𑀢𑀸𑀦𑀁 ‘‘𑀅𑀲𑀼𑀓𑁄 𑀲𑁄𑀢𑀸𑀧𑀦𑁆𑀦𑁄, 𑀅𑀲𑀼𑀓𑁄 𑀲𑀓𑀤𑀸𑀕𑀸𑀫𑀻’’𑀢𑀺𑀆𑀤𑀺𑀦𑀸 𑀢𑀁𑀢𑀁𑀜𑀸𑀡𑀸𑀥𑀺𑀕𑀫𑀦𑀁 𑀜𑀸𑀡𑀽𑀧𑀧𑀢𑁆𑀢𑀺𑀁. 𑀜𑀸𑀡𑀸𑀪𑀺𑀲𑀫𑁆𑀧𑀭𑀸𑀬𑀦𑁆𑀢𑀺 𑀢𑀢𑁄 𑀧𑀭𑀫𑁆𑀧𑀺 𑁋 ‘‘𑀦𑀺𑀬𑀢𑁄 𑀲𑀫𑁆𑀩𑁄𑀥𑀺𑀧𑀭𑀸𑀬𑀡𑁄 𑀲𑀓𑀺𑀤𑁂𑀯 𑀇𑀫𑀁 𑀮𑁄𑀓𑀁 𑀆𑀕𑀦𑁆𑀢𑁆𑀯𑀸 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑀺𑀲𑁆𑀲𑀢𑀻’’𑀢𑀺𑀆𑀤𑀺𑀦𑀸 𑀜𑀸𑀡𑀲𑀳𑀺𑀢𑀁 𑀉𑀧𑀧𑀢𑁆𑀢𑀺𑀧𑀘𑁆𑀘𑀬𑀪𑀯𑀁. 𑀑𑀮𑁄𑀓𑁂𑀦𑁆𑀢𑀲𑁆𑀲 𑀜𑀸𑀡𑀘𑀓𑁆𑀔𑀼𑀦𑀸 𑀅𑀧𑁂𑀓𑁆𑀔𑀦𑁆𑀢𑀲𑁆𑀲. 𑀓𑁂𑀯𑀮𑀁 𑀓𑀸𑀬𑀓𑀺𑀮𑀫𑀣𑁄𑀯, 𑀦 𑀢𑁂𑀦 𑀓𑀸𑀘𑀺 𑀧𑀭𑁂𑀲𑀁 𑀅𑀢𑁆𑀣𑀲𑀺𑀤𑁆𑀥𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀘𑀺𑀢𑁆𑀢𑀯𑀺𑀳𑁂𑀲𑀸 𑀘𑀺𑀢𑁆𑀢𑀔𑁂𑀤𑁄, 𑀲𑀸 𑀓𑀺𑀮𑁂𑀲𑀽𑀧𑀲𑀁𑀳𑀺𑀢𑀢𑁆𑀢𑀸 𑀩𑀼𑀤𑁆𑀥𑀸𑀦𑀁 𑀦𑀢𑁆𑀣𑀺.

𑀆𑀤𑀺𑀲𑁆𑀲𑀢𑀺 𑀆𑀮𑁄𑀓𑀻𑀬𑀢𑀺 𑀅𑀢𑁆𑀢𑀸 𑀏𑀢𑁂𑀦𑀸𑀢𑀺 𑀆𑀤𑀸𑀲𑀁, 𑀥𑀫𑁆𑀫𑀪𑀽𑀢𑀁 𑀆𑀤𑀸𑀲𑀁 𑀥𑀫𑁆𑀫𑀸𑀤𑀸𑀲𑀁, 𑀅𑀭𑀺𑀬𑀫𑀕𑁆𑀕𑀜𑀸𑀡𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀢𑁂𑀦 𑀳𑀺 𑀅𑀭𑀺𑀬𑀲𑀸𑀯𑀓𑁄 𑀘𑀢𑀽𑀲𑀼 𑀅𑀭𑀺𑀬𑀲𑀘𑁆𑀘𑁂𑀲𑀼 𑀯𑀺𑀤𑁆𑀥𑀲𑁆𑀢𑀲𑀫𑁆𑀫𑁄𑀳𑀢𑁆𑀢𑀸 𑀅𑀢𑁆𑀢𑀸𑀦𑀁 𑀬𑀸𑀣𑀸𑀯𑀢𑁄 𑀜𑀢𑁆𑀯𑀸 𑀬𑀸𑀣𑀸𑀯𑀢𑁄 𑀩𑁆𑀬𑀸𑀓𑀭𑁂𑀬𑁆𑀬, 𑀢𑀧𑁆𑀧𑀓𑀸𑀲𑀦𑀢𑁄 𑀧𑀦 𑀥𑀫𑁆𑀫𑀧𑀭𑀺𑀬𑀸𑀬𑀲𑁆𑀲 𑀲𑀼𑀢𑁆𑀢𑀲𑁆𑀲 𑀥𑀫𑁆𑀫𑀸𑀤𑀸𑀲𑀢𑀸 𑀯𑁂𑀤𑀺𑀢𑀩𑁆𑀩𑀸𑀢𑀺. 𑀬𑁂𑀦 𑀥𑀫𑁆𑀫𑀸𑀤𑀸𑀲𑁂𑀦𑀸𑀢𑀺 𑀇𑀥 𑀧𑀦 𑀫𑀕𑁆𑀕𑀥𑀫𑁆𑀫𑀫𑁂𑀯 𑀯𑀤𑀢𑀺. 𑀲𑁂𑀲𑀁 𑀉𑀢𑁆𑀢𑀸𑀦𑀢𑁆𑀣𑀢𑁆𑀢𑀸 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺.

𑀯𑁂𑀴𑀼𑀤𑁆𑀯𑀸𑀭𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀭𑀸𑀚𑀓𑀸𑀭𑀸𑀫𑀯𑀕𑁆𑀕𑁄

𑁧. 𑀲𑀳𑀲𑁆𑀲𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁦𑁭. 𑀥𑀫𑁆𑀫𑀺𑀓𑀢𑁆𑀢𑀸 𑀤𑁂𑀲𑀯𑀸𑀲𑀻𑀳𑀺 𑀅𑀦𑀼𑀓𑀫𑁆𑀧𑀺𑀢𑁄 𑀭𑀸𑀚𑀸𑀢𑀺 𑀭𑀸𑀚𑀓𑁄, 𑀢𑀲𑁆𑀲 𑀆𑀭𑀸𑀫𑁄 𑀭𑀸𑀚𑀓𑀸𑀭𑀸𑀫𑁄, 𑀢𑀲𑁆𑀫𑀺𑀁. 𑀪𑀽𑀫𑀺𑀲𑀻𑀲𑀁 𑀲𑁂𑀝𑁆𑀞𑀧𑁆𑀧𑀤𑁂𑀲𑁄, 𑀬𑀢𑁆𑀣 𑀯𑀲𑀦𑁆𑀢𑁄 𑀮𑀸𑀪𑀕𑁆𑀕𑀬𑀲𑀕𑁆𑀕𑀧𑁆𑀧𑀢𑁆𑀢𑁄 𑀳𑁄𑀢𑀻𑀢𑀺 𑀢𑁂𑀲𑀁 𑀅𑀥𑀺𑀧𑁆𑀧𑀸𑀬𑁄.

𑀯𑀸𑀭𑀸𑀧𑁂𑀳𑀻𑀢𑀺 𑀧𑀝𑀺𑀲𑁂𑀥𑁂𑀳𑀺. 𑀬𑀼𑀚𑁆𑀛𑀸𑀧𑁂𑀢𑀼𑀦𑁆𑀢𑀺 𑀓𑀮𑀳𑀁 𑀓𑀸𑀭𑀸𑀧𑁂𑀢𑀼𑀁. 𑀧𑀼𑀦 𑀆𑀕𑀘𑁆𑀙𑀦𑁆𑀢𑀸𑀢𑀺 𑀅𑀧𑀭𑀲𑁆𑀫𑀺𑀁 𑀲𑀁𑀯𑀘𑁆𑀙𑀭𑁂 𑀆𑀕𑀘𑁆𑀙𑀦𑁆𑀢𑀸. 𑀉𑀩𑁆𑀩𑀝𑁆𑀝𑁂𑀢𑁆𑀯𑀸𑀢𑀺 𑀫𑀳𑀢𑀻 𑀯𑀻𑀘𑀺𑀬𑁄 𑀉𑀩𑁆𑀩𑀝𑁆𑀝𑁂𑀢𑁆𑀯𑀸. 𑀬𑀣𑀸 𑀢𑀲𑁆𑀲 𑀲𑀓𑀮𑀫𑁂𑀯 𑀭𑀝𑁆𑀞𑀁 𑀏𑀓𑁄𑀤𑀓𑀻𑀪𑀽𑀢𑀁 𑀳𑁄𑀢𑀺, 𑀏𑀯𑀁 𑀓𑀢𑁆𑀯𑀸 𑀲𑀫𑀼𑀤𑁆𑀤𑀫𑁂𑀯 𑀚𑀸𑀢𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀫𑀼𑀤𑁆𑀤𑀫𑁂𑀯 𑀅𑀓𑀁𑀲𑀽’’𑀢𑀺.

𑀇𑀲𑀻𑀦𑀫𑀦𑁆𑀢𑀭𑀁 𑀓𑀢𑁆𑀯𑀸𑀢𑀺 𑀇𑀲𑀻𑀦𑀁 𑀓𑀸𑀭𑀡𑀁 𑀓𑀢𑁆𑀯𑀸, 𑀇𑀲𑀻𑀦𑀁 𑀳𑁂𑀢𑀽𑀢𑀺 𑀅𑀢𑁆𑀣𑁄, 𑀇𑀲𑀻𑀦𑀁 𑀯𑀸 𑀅𑀦𑁆𑀢𑀭𑀪𑁂𑀤𑀁 𑀓𑀢𑁆𑀯𑀸. 𑀢𑀣𑀸 𑀮𑁄𑀓𑁂 𑀓𑁄𑀮𑀸𑀳𑀮𑀲𑁆𑀲 𑀧𑀢𑁆𑀣𑀝𑀢𑀁 𑀯𑀺𑀪𑀸𑀯𑁂𑀦𑁆𑀢𑁄 𑀪𑀕𑀯𑀸 ‘‘𑀫𑁂 𑀲𑀼𑀢’’𑀦𑁆𑀢𑀺 𑀆𑀳 𑀧𑀘𑁆𑀘𑀓𑁆𑀔𑀢𑁄 𑀚𑀸𑀦𑀫𑁆𑀧𑀺. 𑀉𑀘𑁆𑀙𑀺𑀦𑁆𑀦𑁄𑀢𑀺 𑀓𑀼𑀮𑀘𑁆𑀙𑁂𑀤𑁂𑀦 𑀉𑀘𑁆𑀙𑀺𑀦𑁆𑀦𑁄. 𑀦 𑀓𑁂𑀯𑀮𑀁 𑀲𑀬𑀫𑁂𑀯, 𑀅𑀣 𑀔𑁄 𑀲𑀳 𑀭𑀝𑁆𑀞𑁂𑀳𑀺. 𑀯𑀺𑀪𑀯𑀦𑁆𑀢𑀺 𑀯𑀺𑀦𑀸𑀲𑀁 𑀉𑀧𑀕𑀢𑁄.

𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀦𑁆𑀢𑀺 𑀢𑀁 𑀬𑀣𑀸𑀯𑀼𑀢𑁆𑀢𑀁 𑀧𑀲𑁂𑀦𑀤𑀺𑀦𑀸 𑀓𑁄𑀲𑀮𑀭𑀸𑀚𑁂𑀦 𑀓𑀸𑀭𑀺𑀢𑀁 𑀯𑀺𑀳𑀸𑀭𑀁 𑀲𑀦𑁆𑀥𑀸𑀬 𑀏𑀢𑀁 ‘‘𑀭𑀸𑀚𑀓𑀸𑀭𑀸𑀫𑁂’’𑀢𑀺 𑀯𑀼𑀢𑁆𑀢𑀁.

𑁨-𑁩. 𑀩𑁆𑀭𑀸𑀳𑁆𑀫𑀡𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁦𑁦𑁮-𑁯. 𑀉𑀤𑀬𑀕𑀸𑀫𑀺𑀦𑀺𑀦𑁆𑀢𑀺 𑀆𑀭𑀫𑁆𑀪𑀢𑁄 𑀧𑀝𑁆𑀞𑀸𑀬 𑀲𑀫𑁆𑀧𑀢𑁆𑀢𑀺𑀆𑀯𑀳𑀁.

𑁪. 𑀤𑀼𑀕𑁆𑀕𑀢𑀺𑀪𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁧𑁦. 𑀤𑀼𑀝𑁆𑀞𑀸 𑀕𑀢𑀺 𑀦𑀺𑀧𑁆𑀨𑀢𑁆𑀢𑀺 𑀤𑀼𑀕𑁆𑀕𑀢𑀺, 𑀤𑀼𑀕𑁆𑀕𑀢𑀪𑀸𑀯𑁄 𑀤𑀸𑀮𑀺𑀤𑁆𑀤𑀺𑀬𑀁, 𑀢𑀤𑁂𑀯 𑀪𑀬𑀁, 𑀢𑀁 𑀲𑀩𑁆𑀩𑀁 𑀅𑀦𑀯𑀲𑁂𑀲𑀁 𑀯𑀸 𑀤𑀼𑀕𑁆𑀕𑀢𑀺𑀪𑀬𑀁 𑀤𑀮𑀺𑀤𑁆𑀤𑀪𑀬𑀁. 𑀲𑀫𑁆𑀫𑀤𑁂𑀯 𑀅𑀢𑀺𑀓𑁆𑀓𑀦𑁆𑀢𑁄𑀢𑀺 𑀲𑀫𑀢𑀺𑀓𑁆𑀓𑀦𑁆𑀢𑁄.

𑁬. 𑀧𑀞𑀫𑀫𑀺𑀢𑁆𑀢𑀸𑀫𑀘𑁆𑀘𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁧𑁨. 𑀯𑁄𑀳𑀸𑀭𑀫𑀺𑀢𑁆𑀢𑀸𑀢𑀺 𑀢𑀁𑀢𑀁𑀤𑀸𑀦𑀕𑁆𑀕𑀳𑀡𑀯𑀲𑁂𑀦 𑀯𑁄𑀳𑀸𑀭𑀓𑀸 𑀫𑀺𑀢𑁆𑀢𑀸. 𑀆𑀫𑀦𑁆𑀢𑀦𑀧𑀝𑀺𑀫𑀦𑁆𑀢𑀦𑀇𑀭𑀺𑀬𑀸𑀧𑀣𑀸𑀤𑀻𑀲𑀼𑀧𑀻𑀢𑀺 𑀆𑀮𑀸𑀧𑀲𑀮𑁆𑀮𑀸𑀧𑀕𑀫𑀦𑀦𑀺𑀲𑀚𑁆𑀚𑀸𑀤𑀺𑀅𑀢𑁆𑀣𑀲𑀁𑀯𑀺𑀥𑀸𑀦𑀸𑀤𑀻𑀲𑀼. 𑀏𑀓𑀢𑁄 𑀧𑀯𑀢𑁆𑀢𑀓𑀺𑀘𑁆𑀘𑀸𑀢𑀺 𑀲𑀳 𑀧𑀯𑀢𑁆𑀢𑀓𑀢𑁆𑀢𑀩𑁆𑀩𑀸. 𑀅𑀫𑀸 𑀲𑀳 𑀪𑀯𑀦𑁆𑀢𑀻𑀢𑀺 𑀅𑀫𑀘𑁆𑀘𑀸. ‘‘𑀅𑀫𑁆𑀳𑀸𑀓𑀁 𑀇𑀫𑁂’’𑀢𑀺 𑀜𑀸𑀬𑀦𑁆𑀢𑀻𑀢𑀺 𑀜𑀸𑀢𑀻, 𑀆𑀯𑀸𑀳𑀯𑀺𑀯𑀸𑀳𑀲𑀫𑁆𑀩𑀤𑁆𑀥𑀸. 𑀢𑁂𑀦𑀸𑀳 ‘‘𑀲𑀲𑁆𑀲𑀼𑀲𑀲𑀼𑀭𑀧𑀓𑁆𑀔𑀺𑀓𑀸’’𑀢𑀺. 𑀬𑁄𑀦𑀺𑀲𑀫𑁆𑀩𑀦𑁆𑀥𑀸 𑀯𑀸 𑀲𑀸𑀮𑁄𑀳𑀺𑀢𑀸. 𑀢𑁂𑀦𑀸𑀳 ‘‘𑀪𑀸𑀢𑀺𑀪𑀕𑀺𑀦𑀺𑀫𑀸𑀢𑀼𑀮𑀸𑀤𑀬𑁄’’𑀢𑀺.

𑁭. 𑀤𑀼𑀢𑀺𑀬𑀫𑀺𑀢𑁆𑀢𑀸𑀫𑀘𑁆𑀘𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁧𑁩. 𑀓𑀺𑀲𑁆𑀫𑀺𑀜𑁆𑀘𑀺 𑀓𑀲𑁆𑀲𑀘𑀺 𑀘 𑀢𑀣𑀸 𑀢𑀣𑀸 𑀉𑀧𑁆𑀧𑀦𑁆𑀦𑀲𑁆𑀲 𑀧𑀲𑀸𑀤𑀲𑁆𑀲 𑀅𑀜𑁆𑀜𑀣𑀸𑀪𑀸𑀯𑁄 𑀧𑀲𑀸𑀤𑀜𑁆𑀜𑀣𑀢𑁆𑀢𑀁. 𑀪𑀽𑀢𑀲𑀗𑁆𑀖𑀸𑀢𑀲𑁆𑀲 𑀖𑀦𑀆𑀤𑀺𑀓𑀲𑁆𑀲 𑀅𑀜𑁆𑀜𑀣𑀸𑀪𑀸𑀯𑁄 𑀪𑀸𑀯𑀜𑁆𑀜𑀣𑀢𑁆𑀢𑀁. 𑀦𑀺𑀭𑀬𑀸𑀤𑀺𑀕𑀢𑀺𑀅𑀦𑁆𑀢𑀭𑀉𑀧𑀧𑀢𑁆𑀢𑀺 𑀕𑀢𑀺𑀅𑀜𑁆𑀜𑀣𑀢𑁆𑀢𑀁. 𑀲𑀪𑀸𑀯𑀥𑀫𑁆𑀫𑀸𑀦𑀁 𑀓𑀓𑁆𑀔𑀴𑀨𑀼𑀲𑀦𑀸𑀤𑀺𑀮𑀓𑁆𑀔𑀡𑀲𑁆𑀲 𑀅𑀜𑁆𑀜𑀣𑀸𑀪𑀸𑀯𑁄 𑀮𑀓𑁆𑀔𑀡𑀜𑁆𑀜𑀣𑀢𑁆𑀢𑀁. ‘‘𑀞𑀺𑀢𑀲𑁆𑀲 𑀅𑀜𑁆𑀜𑀣𑀢𑁆𑀢𑀁 𑀧𑀜𑁆𑀜𑀸𑀬𑀢𑀻’’𑀢𑀺 𑀏𑀯𑀁 𑀯𑀼𑀢𑁆𑀢𑀁 𑀅𑀜𑁆𑀜𑀣𑀢𑁆𑀢𑀁 𑀯𑀺𑀧𑀭𑀺𑀡𑀸𑀫𑀜𑁆𑀜𑀣𑀢𑁆𑀢𑀁. 𑀮𑀓𑁆𑀔𑀡𑀜𑁆𑀜𑀣𑀢𑁆𑀢𑀁 𑀦 𑀮𑀩𑁆𑀪𑀢𑀺. 𑀢𑁂𑀦𑀸𑀳 ‘‘𑀮𑀓𑁆𑀔𑀡𑀁 𑀧𑀦 𑀦 𑀯𑀺𑀕𑀘𑁆𑀙𑀢𑀻’’𑀢𑀺, 𑀲𑁂𑀲𑀁 𑀮𑀩𑁆𑀪𑀢𑀻𑀢𑀺. 𑀧𑀣𑀯𑀻𑀥𑀸𑀢𑀼𑀬𑀸𑀢𑀺 𑀲𑀲𑀫𑁆𑀪𑀸𑀭𑀧𑀣𑀯𑀻𑀥𑀸𑀢𑀼𑀬𑀸. 𑀆𑀧𑁄𑀥𑀸𑀢𑀼𑀬𑀸𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀧𑀼𑀭𑀺𑀫𑀪𑀸𑀯𑁄𑀢𑀺 𑀖𑀦𑀓𑀞𑀺𑀦𑀪𑀸𑀯𑁄. 𑀪𑀸𑀯𑀜𑁆𑀜𑀣𑀢𑁆𑀢𑀁 𑀭𑀲𑀜𑁆𑀜𑀣𑀢𑁆𑀢𑀲𑀪𑀸𑀯𑁄. 𑀕𑀢𑀺𑀅𑀜𑁆𑀜𑀣𑀢𑁆𑀢𑀁 𑀉𑀕𑁆𑀕𑀢𑀽𑀧𑀧𑀢𑁆𑀢𑀺. 𑀢𑁂𑀦𑀸𑀳 ‘‘𑀢𑀜𑁆𑀳𑀺 𑀅𑀭𑀺𑀬𑀲𑀸𑀯𑀓𑀲𑁆𑀲 𑀦𑀢𑁆𑀣𑀻’’𑀢𑀺. 𑀧𑀲𑀸𑀤𑀜𑁆𑀜𑀣𑀢𑁆𑀢𑀫𑁆𑀧𑀺 𑀦𑀢𑁆𑀣𑀺𑀬𑁂𑀯 𑀅𑀭𑀺𑀬𑀲𑀸𑀯𑀓𑀲𑁆𑀲.

𑀭𑀸𑀚𑀓𑀸𑀭𑀸𑀫𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀲𑀭𑀡𑀸𑀦𑀺𑀯𑀕𑁆𑀕𑁄

𑁧-𑁨. 𑀧𑀞𑀫𑀫𑀳𑀸𑀦𑀸𑀫𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁦𑁧𑁭-𑁧𑁮. 𑀲𑀫𑀺𑀤𑁆𑀥𑀦𑁆𑀢𑀺 𑀲𑀫𑁆𑀧𑀼𑀡𑁆𑀡𑀁. 𑀲𑀼𑀧𑀼𑀧𑁆𑀨𑀺𑀢𑀦𑁆𑀢𑀺 𑀉𑀧𑀲𑁄𑀪𑀺𑀢𑀢𑀸𑀬 𑀲𑀼𑀧𑀼𑀧𑁆𑀨𑀺𑀢𑀲𑀤𑀺𑀲𑀢𑁆𑀢𑀸. 𑀩𑁆𑀬𑀽𑀳𑀸 𑀦𑀸𑀫 𑀬𑁂𑀳𑀺 𑀏𑀯 𑀧𑀯𑀺𑀲𑀦𑁆𑀢𑀺, 𑀢𑁂𑀳𑀺 𑀏𑀯 𑀦𑀺𑀓𑁆𑀔𑀫𑀦𑁆𑀢𑀺. 𑀢𑁂𑀦𑀸𑀳 ‘‘𑀩𑁆𑀬𑀽𑀳𑀸 𑀯𑀼𑀘𑁆𑀘𑀦𑁆𑀢𑀺 𑀅𑀯𑀺𑀦𑀺𑀩𑁆𑀩𑀺𑀤𑁆𑀥𑀭𑀘𑁆𑀙𑀸𑀬𑁄’’𑀢𑀺. 𑀉𑀤𑁆𑀥𑀢𑀘𑀸𑀭𑀺𑀦𑀸𑀢𑀺 𑀬𑀝𑁆𑀞𑀦𑁆𑀢𑀭𑀸.

𑁩. 𑀕𑁄𑀥𑀲𑀓𑁆𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁧𑁯. 𑀢𑀻𑀳𑀻𑀢𑀺 𑀭𑀢𑀦𑀢𑁆𑀢𑀬𑁂 𑀉𑀧𑁆𑀧𑀦𑁆𑀦𑁂𑀳𑀺 𑀢𑀻𑀳𑀺 𑀧𑀲𑀸𑀤𑀥𑀫𑁆𑀫𑁂𑀳𑀺. 𑀘𑀢𑀽𑀳𑀻𑀢𑀺 𑀢𑁂𑀳𑀺 𑀏𑀯 𑀲𑀤𑁆𑀥𑀺𑀁 𑀲𑀻𑀮𑁂𑀦. 𑀓𑁄𑀘𑀺𑀤𑁂𑀯𑀸𑀢𑀺𑀆𑀤𑀺 𑀧𑀭𑀺𑀓𑀧𑁆𑀧𑀯𑀲𑁂𑀦 𑀯𑀼𑀢𑁆𑀢𑀁 𑀪𑀕𑀯𑀢𑀺 𑀅𑀢𑁆𑀢𑀦𑁄 𑀲𑀤𑁆𑀥𑀸𑀬 𑀉𑀴𑀸𑀭𑀢𑀫𑀪𑀸𑀯𑀤𑀲𑁆𑀲𑀦𑀢𑁆𑀣𑀁. 𑀢𑁂𑀦𑀸𑀳 ‘‘𑀪𑀕𑀯𑀢𑁄 𑀲𑀩𑁆𑀩𑀜𑁆𑀜𑀼𑀢𑀸𑀬𑀸’’𑀢𑀺𑀆𑀤𑀺. 𑀥𑀫𑁆𑀫𑁄 𑀲𑀫𑀼𑀧𑁆𑀧𑀸𑀤𑁄𑀢𑀺 𑀯𑀺𑀯𑀸𑀤𑀥𑀫𑁆𑀫𑀉𑀧𑁆𑀧𑀢𑁆𑀢𑀺𑀳𑁂𑀢𑀼. 𑀢𑀤𑁂𑀯 𑀳𑀺 𑀲𑀦𑁆𑀥𑀸𑀬𑀸𑀳 ‘‘𑀓𑀺𑀜𑁆𑀘𑀺𑀤𑁂𑀯 𑀓𑀸𑀭𑀡’’𑀦𑁆𑀢𑀺. 𑀓𑀸𑀭𑀡𑀦𑁆𑀢𑀺 𑀦𑀸𑀦𑀸𑀓𑀸𑀭𑀡𑀁. 𑀓𑀮𑁆𑀬𑀸𑀡𑀓𑀼𑀲𑀮𑀯𑀺𑀫𑀼𑀢𑁆𑀢𑀦𑁆𑀢𑀺 𑀅𑀓𑀮𑁆𑀬𑀸𑀡𑀁 𑀅𑀓𑀼𑀲𑀮𑀁, 𑀢𑀤𑀺𑀤𑀁 𑀬𑀣𑀸𑀯𑀼𑀢𑁆𑀢𑀅𑀧𑁆𑀧𑀲𑀸𑀤𑀦𑁂𑀦 𑀅𑀧𑀦𑀻𑀢𑀅𑀢𑁆𑀣𑀤𑀲𑁆𑀲𑀦𑀢𑁆𑀣𑀁. 𑀅𑀲𑁆𑀲𑀸𑀢𑀺 𑀫𑀳𑀸𑀦𑀸𑀫𑀲𑀓𑁆𑀓𑀲𑁆𑀲. 𑀅𑀦𑀯𑀚𑁆𑀚𑀦𑀤𑁄𑀲𑁄 𑀏𑀲𑁄𑀢𑀺 𑀘𑀢𑀽𑀲𑀼 𑀥𑀫𑁆𑀫𑁂𑀲𑀼 𑀏𑀓𑁂𑀦𑀧𑀺 𑀲𑀫𑀦𑁆𑀦𑀸𑀕𑀢𑁄 𑀲𑁄𑀢𑀸𑀧𑀦𑁆𑀦𑁄 𑀳𑁄𑀢𑀻𑀢𑀺 𑀅𑀦𑀼𑀚𑀸𑀦𑀺𑀢𑁆𑀯𑀸 𑀘𑀢𑀽𑀳𑀺𑀧𑀺 𑀲𑀫𑀦𑁆𑀦𑀸𑀕𑀢𑁂𑀦 𑀆𑀘𑀺𑀓𑁆𑀔𑀺𑀢𑀩𑁆𑀩𑀦𑁆𑀢𑀺 𑀬𑀸𑀣𑀸𑀯𑀢𑁄 𑀅𑀦𑀯𑀚𑁆𑀚𑀦𑀤𑁄𑀲𑁄𑀢𑀺 𑀅𑀢𑁆𑀣𑁄.

𑁪. 𑀧𑀞𑀫𑀲𑀭𑀡𑀸𑀦𑀺𑀲𑀓𑁆𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁨𑁦. 𑀧𑀫𑀸𑀡𑁂𑀦𑀸𑀢𑀺 𑀏𑀓𑁂𑀦 𑀧𑀫𑀸𑀡𑁂𑀦, 𑀦 𑀲𑀩𑁆𑀩𑀲𑁄. 𑀑𑀮𑁄𑀓𑀦𑀁 𑀔𑀫𑀦𑁆𑀢𑀻𑀢𑀺 𑀤𑀲𑁆𑀲𑀦𑀫𑀕𑁆𑀕𑁂𑀦 𑀘𑀢𑀼𑀲𑀘𑁆𑀘𑀥𑀫𑁆𑀫𑀸 𑀧𑀘𑁆𑀘𑀢𑁆𑀢𑀁 𑀧𑀲𑁆𑀲𑀺𑀢𑀩𑁆𑀩𑀸 𑀧𑀝𑀺𑀯𑀺𑀚𑁆𑀛𑀺𑀢𑀩𑁆𑀩𑀸. 𑀧𑀞𑀫𑀫𑀕𑁆𑀕𑀓𑁆𑀔𑀡𑁂 𑀳𑀺 𑀘𑀢𑀼𑀲𑀘𑁆𑀘𑀥𑀫𑁆𑀫𑀸 𑀏𑀓𑀤𑁂𑀲𑀢𑁄𑀯 𑀤𑀺𑀝𑁆𑀞𑀸 𑀦𑀸𑀫 𑀳𑁄𑀦𑁆𑀢𑀺. ‘‘𑀧𑀭𑀺𑀫𑀼𑀘𑁆𑀘𑀢𑀻’’𑀢𑀺 𑀧𑀦 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺 𑀧𑀝𑀺𑀯𑀺𑀚𑁆𑀛𑀦𑀓𑀺𑀭𑀺𑀬𑀸𑀬 𑀯𑀢𑁆𑀢𑀫𑀸𑀦𑀢𑁆𑀢𑀸. 𑀅𑀕𑀦𑁆𑀢𑁆𑀯𑀸 𑀅𑀧𑀸𑀬𑁂𑀲𑀼 𑀅𑀦𑀼𑀧𑁆𑀧𑀢𑁆𑀢𑀺𑀭𑀳𑀢𑁆𑀢𑀸. 𑀢𑁂𑀦𑀸𑀳 ‘‘𑀦 𑀕𑀘𑁆𑀙𑀢𑀻’’𑀢𑀺, 𑀦 𑀉𑀧𑁆𑀧𑀚𑁆𑀚𑀢𑀻𑀢𑀺 𑀅𑀢𑁆𑀣𑁄. 𑀫𑀳𑀸𑀲𑀸𑀭𑀭𑀼𑀓𑁆𑀔𑁂 𑀤𑀲𑁆𑀲𑁂𑀦𑁆𑀢𑁄 𑀆𑀳 𑁋 ‘‘𑀬𑁄 𑀓𑁄𑀘𑀺 𑀯𑀺𑀜𑁆𑀜𑀼𑀚𑀸𑀢𑀺𑀓𑁄 𑀫𑀫 𑀘𑁂 𑀕𑁄𑀘𑀭𑀁 𑀕𑀘𑁆𑀙𑀢𑀺, 𑀏𑀓𑀲𑁆𑀲 𑀆𑀕𑀫𑀦𑀁 𑀅𑀯𑀜𑁆𑀛𑀁 𑀅𑀫𑁄𑀖’’𑀦𑁆𑀢𑀺 𑀤𑀲𑁆𑀲𑁂𑀢𑀼𑀁.

𑁫. 𑀤𑀼𑀢𑀺𑀬𑀲𑀭𑀡𑀸𑀦𑀺𑀲𑀓𑁆𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁨𑁧. 𑀤𑀼𑀓𑁆𑀔𑁂𑀢𑁆𑀢𑀁 𑀦𑀺𑀭𑁄𑀚𑀓𑀁, 𑀢𑀸𑀬 𑀏𑀯 𑀤𑀼𑀓𑁆𑀔𑁂𑀢𑁆𑀢𑀢𑀸𑀬 𑀯𑀺𑀲𑀫𑀁 𑀳𑁄𑀢𑀻𑀢𑀺 𑀆𑀳 ‘‘𑀯𑀺𑀲𑀫𑀔𑁂𑀢𑁆𑀢’’𑀦𑁆𑀢𑀺. 𑀮𑁄𑀡𑀽𑀧𑀳𑀢𑀦𑁆𑀢𑀺 𑀚𑀸𑀢𑀲𑀪𑀸𑀯𑁂𑀦 𑀮𑁄𑀡𑁂𑀦 𑀊𑀲𑀭𑁂𑀦 𑀉𑀧𑀳𑀢𑀁. 𑀔𑀡𑁆𑀟𑀸𑀦𑀻𑀢𑀺 𑀔𑀡𑁆𑀟𑀺𑀢𑀸𑀦𑀺. 𑀢𑁂𑀫𑁂𑀢𑁆𑀯𑀸𑀢𑀺 𑀢𑁂𑀫𑀺𑀢𑀢𑁆𑀢𑀸. 𑀯𑀸𑀢𑀸𑀢𑀧𑀳𑀢𑀸𑀦𑀻𑀢𑀺 𑀘𑀺𑀭𑀓𑀸𑀮𑀁 𑀯𑀸𑀢𑁂𑀦 𑀘𑁂𑀯 𑀆𑀢𑀧𑁂𑀦 𑀘 𑀉𑀧𑀳𑀢𑀸𑀦𑀺 𑀆𑀩𑀸𑀥𑀺𑀢𑀸𑀦𑀺.

𑁬. 𑀧𑀞𑀫𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁨𑁨. 𑀞𑀸𑀦𑀦𑁆𑀢𑀺 𑀞𑀸𑀦𑀲𑁄. 𑀢𑁂𑀦𑀸𑀳 ‘‘𑀔𑀡𑁂𑀦𑀸’’𑀢𑀺. 𑀦𑀺𑀬𑁆𑀬𑀸𑀦𑀺𑀓𑀦𑁆𑀢𑀺 𑀧𑀯𑀢𑁆𑀢𑀁 𑀜𑀸𑀡𑀧𑀝𑀺𑀭𑀽𑀧𑀓𑀁 𑀧𑀓𑀢𑀺𑀧𑀼𑀭𑀺𑀲𑀦𑁆𑀢𑀭𑀚𑀸𑀦𑀦𑀸𑀤𑀺𑀫𑀺𑀘𑁆𑀙𑀸𑀜𑀸𑀡𑀁. 𑀢𑀁 𑀧𑀦 𑀅𑀦𑀺𑀬𑁆𑀬𑀸𑀦𑀺𑀓𑀁 ‘‘𑀦𑀺𑀬𑁆𑀬𑀸𑀦𑀺𑀓’’𑀦𑁆𑀢𑀺 𑀧𑀘𑁆𑀘𑀯𑁂𑀓𑁆𑀔𑀡𑀯𑀲𑁂𑀦 𑀧𑀯𑀢𑁆𑀢𑁂𑀬𑁆𑀬𑀸𑀢𑀺 𑀆𑀳 ‘‘𑀫𑀺𑀘𑁆𑀙𑀸𑀧𑀘𑁆𑀘𑀯𑁂𑀓𑁆𑀔𑀡𑁂𑀦𑀸’’𑀢𑀺. 𑀕𑀼𑀡𑀯𑀺𑀬𑀼𑀢𑁆𑀢𑀲𑁆𑀲 𑀅𑀢𑁆𑀢𑀦𑁄 𑀲𑀓𑀢𑁆𑀢𑀦𑀺 𑀅𑀯𑀝𑁆𑀞𑀸𑀦𑀲𑀗𑁆𑀔𑀸𑀢𑀸 𑀯𑀺𑀫𑀼𑀢𑁆𑀢𑀺 𑀫𑀺𑀘𑁆𑀙𑀸𑀯𑀺𑀫𑀼𑀢𑁆𑀢𑀺.

𑁭. 𑀤𑀼𑀢𑀺𑀬𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁨𑁩. 𑀬𑀣𑀸𑀓𑀫𑁆𑀫𑀁 𑀲𑀫𑁆𑀧𑀭𑁂𑀢𑀩𑁆𑀩𑀢𑁄 𑀲𑀫𑁆𑀧𑀭𑀸𑀬𑁄, 𑀧𑁂𑀘𑁆𑀘𑀪𑀯𑁄, 𑀲𑀫𑁆𑀧𑀭𑀸𑀬𑀳𑁂𑀢𑀼𑀓𑀁 𑀲𑀫𑁆𑀧𑀭𑀸𑀬𑀺𑀓𑀁, 𑀫𑀭𑀡𑀪𑀬𑀁.

𑀲𑀭𑀡𑀸𑀦𑀺𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑀯𑀕𑁆𑀕𑁄

𑁧. 𑀧𑀞𑀫𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁨𑁭. 𑀅𑀯𑀺𑀘𑁆𑀙𑁂𑀤𑁂𑀦 𑀦𑀺𑀘𑁆𑀘𑀧𑁆𑀧𑀯𑀢𑁆𑀢𑀺𑀬𑀫𑀸𑀦𑀸𑀦𑀺 𑀧𑀼𑀜𑁆𑀜𑀸𑀦𑀺 𑀅𑀪𑀺𑀲𑀦𑁆𑀤𑀦𑀝𑁆𑀞𑁂𑀦 ‘‘𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑀸’’𑀢𑀺 𑀯𑀼𑀢𑁆𑀢𑀸, 𑀢𑁂𑀦 𑀧𑀼𑀜𑁆𑀜𑀦𑀤𑀺𑀬𑁄𑀢𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄. 𑀲𑀼𑀔𑀲𑁆𑀲 𑀆𑀳𑀭𑀡𑀢𑁄 𑀆𑀦𑀬𑀦𑀢𑁄 𑀲𑀼𑀔𑀲𑁆𑀲𑀸𑀳𑀸𑀭𑁄.

𑁪. 𑀧𑀞𑀫𑀤𑁂𑀯𑀧𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁩𑁦. 𑀤𑁂𑀯𑀸𑀦𑀦𑁆𑀢𑀺 𑀯𑀺𑀲𑀼𑀤𑁆𑀥𑀺𑀤𑁂𑀯𑀸𑀦𑀁. 𑀤𑁂𑀯𑀧𑀤𑀸𑀦𑀻𑀢𑀺 𑀢𑁂𑀲𑀁 𑀧𑀤𑀸𑀦𑀺 𑀤𑁂𑀯𑀧𑀤𑀸𑀦𑀺, 𑀤𑁂𑀯𑁄𑀢𑀺 𑀯𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄. 𑀤𑁂𑀯𑀲𑁆𑀲 𑀜𑀸𑀡𑁂𑀦 𑀅𑀓𑁆𑀓𑀦𑁆𑀢𑀧𑀤𑀸𑀦𑀻𑀢𑀺 𑀧𑀝𑀺𑀯𑁂𑀥𑀜𑀸𑀡𑁂𑀦 𑀘𑁂𑀯 𑀤𑁂𑀲𑀦𑀸𑀜𑀸𑀡𑁂𑀦 𑀘 𑀅𑀓𑁆𑀓𑀦𑁆𑀢𑀧𑀤𑀸𑀦𑀺. 𑀤𑁂𑀯𑀸 𑀦𑀸𑀫 𑀚𑀸𑀢𑀺𑀤𑁂𑀯𑀸. 𑀢𑁂𑀲𑀫𑁆𑀧𑀺 𑀤𑁂𑀯𑀝𑁆𑀞𑁂𑀦 𑀤𑁂𑀯𑁄𑀢𑀺 𑀤𑁂𑀯𑀤𑁂𑀯𑁄, 𑀲𑀫𑁆𑀩𑀼𑀤𑁆𑀥𑁄.

𑁮. 𑀯𑀲𑁆𑀲𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁩𑁪. 𑀧𑀸𑀭𑀁 𑀯𑀼𑀘𑁆𑀘𑀢𑀺 𑀦𑀺𑀩𑁆𑀩𑀸𑀦𑀁 𑀲𑀁𑀲𑀸𑀭𑀫𑀳𑁄𑀖𑀲𑁆𑀲 𑀧𑀭𑀢𑀻𑀭𑀪𑀸𑀯𑀢𑁄. 𑀢𑁂𑀦𑀸𑀳 𑁋 ‘‘𑀢𑀺𑀡𑁆𑀡𑁄 𑀧𑀸𑀭𑀗𑁆𑀕𑀢𑁄, 𑀣𑀮𑁂 𑀢𑀺𑀝𑁆𑀞𑀢𑀺 𑀩𑁆𑀭𑀸𑀳𑁆𑀫𑀡𑁄 (𑀲𑀁. 𑀦𑀺. 𑁪.𑁨𑁩𑁮; 𑀇𑀢𑀺𑀯𑀼. 𑁬𑁯; 𑀧𑀼. 𑀧. 𑁧𑁮𑁮), 𑀬𑁂 𑀚𑀦𑀸 𑀧𑀸𑀭𑀕𑀸𑀫𑀺𑀦𑁄’’𑀢𑀺 (𑀥. 𑀧. 𑁮𑁫) 𑀘. 𑀅𑀣 𑀯𑀸 𑀧𑀸𑀢𑀺 𑀭𑀓𑁆𑀔𑀢𑀻𑀢𑀺 𑀧𑀸𑀭𑀁, 𑀦𑀺𑀩𑁆𑀩𑀸𑀦𑀁. 𑀬𑁄 𑀧𑀝𑀺𑀯𑀺𑀚𑁆𑀛𑀢𑀺, 𑀢𑀁 𑀯𑀝𑁆𑀝𑀤𑀼𑀓𑁆𑀔𑀢𑁄 𑀧𑀸𑀢𑀺 𑀭𑀓𑁆𑀔𑀢𑀺, 𑀅𑀘𑁆𑀘𑀦𑁆𑀢𑀳𑀺𑀢𑁂𑀦 𑀘 𑀯𑀺𑀫𑀼𑀢𑁆𑀢𑀺𑀲𑀼𑀔𑁂𑀦 𑀘 𑀭𑀫𑁂𑀢𑀺, 𑀢𑀲𑁆𑀫𑀸 𑀧𑀸𑀭𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀕𑀘𑁆𑀙𑀫𑀸𑀦𑀸 𑀏𑀯𑀸𑀢𑀺 𑀧𑀸𑀭𑀁 𑀦𑀺𑀩𑁆𑀩𑀸𑀦𑀁 𑀕𑀘𑁆𑀙𑀫𑀸𑀦𑀸 𑀏𑀯. 𑀢𑁂 𑀥𑀫𑁆𑀫𑀸 𑀆𑀲𑀯𑀸𑀦𑀁 𑀔𑀬𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑀲𑀘𑁆𑀙𑀺𑀓𑀺𑀭𑀺𑀬𑀸𑀧𑀳𑀸𑀦𑀧𑀝𑀺𑀯𑁂𑀥𑀸𑀦𑀁 𑀲𑀫𑀓𑀸𑀮𑀢𑁆𑀢𑀸.

𑁧𑁦. 𑀦𑀦𑁆𑀤𑀺𑀬𑀲𑀓𑁆𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁩𑁬. 𑀧𑀯𑀺𑀯𑁂𑀓𑀢𑁆𑀣𑀸𑀬𑀸𑀢𑀺 𑀧𑀯𑀺𑀯𑁂𑀓𑀲𑀼𑀔𑀢𑁆𑀣𑀸𑀬. 𑀧𑀝𑀺𑀲𑀮𑁆𑀮𑀸𑀦𑀢𑁆𑀣𑀸𑀬𑀸𑀢𑀺 𑀩𑀳𑀺𑀤𑁆𑀥𑀸 𑀦𑀸𑀦𑀸𑀭𑀫𑁆𑀫𑀡𑀢𑁄 𑀘𑀺𑀢𑁆𑀢𑀁 𑀧𑀝𑀺𑀦𑀺𑀯𑀢𑁆𑀢𑁂𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑁂 𑀲𑀫𑁆𑀫𑀤𑁂𑀯 𑀮𑀻𑀦𑀢𑁆𑀣𑀸𑀬.

𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀲𑀕𑀸𑀣𑀓𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑀯𑀕𑁆𑀕𑁄

𑁧. 𑀧𑀞𑀫𑀅𑀪𑀺𑀲𑀦𑁆𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁩𑁭. 𑀲𑀗𑁆𑀔𑁆𑀬𑀸 𑀅𑀢𑁆𑀣𑀺 𑀳𑁂𑀝𑁆𑀞𑀸 𑀫𑀳𑀸𑀧𑀣𑀯𑀺𑀬𑀸, 𑀉𑀧𑀭𑀺 𑀆𑀓𑀸𑀲𑁂𑀦, 𑀧𑀭𑀺𑀢𑁄 𑀘𑀓𑁆𑀓𑀯𑀸𑀴𑀧𑀩𑁆𑀩𑀢𑁂𑀦, 𑀫𑀚𑁆𑀛𑁂 𑀢𑀢𑁆𑀣 𑀢𑀢𑁆𑀣 𑀞𑀺𑀢𑁂𑀳𑀺 𑀤𑀻𑀧𑀧𑀩𑁆𑀩𑀢𑀧𑀭𑀺𑀬𑀦𑁆𑀢𑁂𑀳𑀺 𑀧𑀭𑀺𑀘𑁆𑀙𑀺𑀦𑁆𑀦𑀢𑁆𑀢𑀸. 𑀚𑀸𑀦𑀦𑁆𑀢𑁂𑀦 𑀬𑁄𑀚𑀦𑀢𑁄 𑀲𑀗𑁆𑀔𑀸𑀢𑀼𑀁 𑀲𑀓𑁆𑀓𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀫𑀳𑀸𑀲𑀭𑀻𑀭𑀫𑀘𑁆𑀙-𑀓𑀼𑀫𑁆𑀪𑀻𑀮-𑀬𑀓𑁆𑀔-𑀭𑀓𑁆𑀔𑀲-𑀫𑀳𑀸𑀦𑀸𑀕𑀤𑀸𑀦𑀯𑀸𑀤𑀻𑀦𑀁 𑀲𑀯𑀺𑀜𑁆𑀜𑀸𑀡𑀓𑀸𑀦𑀁, 𑀩𑀴𑀯𑀸𑀫𑀼𑀔𑀧𑀸𑀢𑀸𑀮𑀸𑀤𑀻𑀦𑀁 𑀅𑀯𑀺𑀜𑁆𑀜𑀸𑀡𑀓𑀸𑀦𑀁 𑀪𑁂𑀭𑀯𑀸𑀭𑀫𑁆𑀫𑀡𑀸𑀦𑀁 𑀯𑀲𑁂𑀦 𑀩𑀳𑀼𑀪𑁂𑀭𑀯𑀁.

𑁨. 𑀤𑀼𑀢𑀺𑀬𑀅𑀪𑀺𑀲𑀦𑁆𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁩𑁮. 𑀲𑀫𑁆𑀪𑁂𑀤𑁂𑀢𑀺 𑀲𑀫𑁆𑀪𑁂𑀤𑀁 𑀲𑀫𑁄𑀥𑀸𑀦𑀁 𑀕𑀢𑀝𑁆𑀞𑀸𑀦𑁂. 𑀬𑀢𑁆𑀣𑀺𑀫𑀸 𑀫𑀳𑀸𑀦𑀤𑀺𑀬𑁄 𑀲𑀁𑀲𑀦𑁆𑀤𑀦𑁆𑀢𑀺 𑀲𑀫𑁂𑀦𑁆𑀢𑀻𑀢𑀺 𑀧𑀭𑀺𑀓𑀧𑁆𑀧𑀯𑀘𑀦𑀫𑁂𑀢𑀁. 𑀢𑀸𑀤𑀺𑀲𑀸𑀲𑀼 𑀳𑀺 𑀫𑀳𑀸𑀦𑀤𑀻𑀲𑀼 𑀓𑀸𑀘𑀺 𑀧𑀼𑀭𑀢𑁆𑀣𑀺𑀫𑀲𑀫𑀼𑀤𑁆𑀤𑀁 𑀧𑀯𑀺𑀝𑁆𑀞𑀸, 𑀓𑀸𑀘𑀺 𑀧𑀘𑁆𑀙𑀺𑀫𑀁.

𑁩. 𑀢𑀢𑀺𑀬𑀅𑀪𑀺𑀲𑀦𑁆𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁩𑁯. ‘‘𑀓𑀼𑀲𑀮𑁂 𑀧𑀢𑀺𑀝𑁆𑀞𑀺𑀢𑁄’’𑀢𑀺 𑀏𑀢𑁆𑀣 𑀬𑀁 𑀅𑀘𑁆𑀘𑀦𑁆𑀢𑀺𑀓𑀁 𑀓𑀼𑀲𑀮𑁂 𑀧𑀢𑀺𑀝𑁆𑀞𑀸𑀦𑀁. 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀫𑀕𑁆𑀕𑀓𑀼𑀲𑀮𑁂 𑀧𑀢𑀺𑀝𑁆𑀞𑀺𑀢𑁄’’𑀢𑀺 𑀆𑀳, 𑀳𑁂𑀝𑁆𑀞𑀺𑀫𑀫𑀕𑁆𑀕𑀓𑀼𑀲𑀮𑁂𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑀸𑀳 ‘‘𑀪𑀸𑀯𑁂𑀢𑀺 𑀫𑀕𑁆𑀕’’𑀦𑁆𑀢𑀺. 𑀅𑀭𑀺𑀬𑀨𑀮𑀁𑀬𑁂𑀯 𑀥𑀫𑁆𑀫𑀲𑀸𑀭𑁄. 𑀓𑀺𑀮𑁂𑀲𑀸 𑀔𑀻𑀬𑀦𑁆𑀢𑀺 𑀏𑀢𑁆𑀣𑀸𑀢𑀺 𑀓𑀺𑀮𑁂𑀲𑀓𑁆𑀔𑀬𑁄, 𑀦𑀺𑀩𑁆𑀩𑀸𑀦𑀁, 𑀢𑀲𑁆𑀫𑀺𑀁 𑀓𑀺𑀮𑁂𑀲𑀓𑁆𑀔𑀬𑁂 𑀭𑀢𑁄.

𑁪. 𑀧𑀞𑀫𑀫𑀳𑀤𑁆𑀥𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁪𑁦. 𑀅𑀭𑀺𑀬𑀸𑀦𑀁 𑀩𑀼𑀤𑁆𑀥𑀸𑀦𑀁 𑀥𑀦𑀦𑁆𑀢𑀺𑀧𑀺 𑀅𑀭𑀺𑀬𑀥𑀦𑀁, 𑀦𑀺𑀩𑁆𑀩𑀸𑀦𑀦𑁆𑀢𑀺 𑀓𑁂𑀘𑀺. 𑀅𑀦𑀬𑀢𑁄𑀧𑀺 𑀯𑀺𑀲𑀼𑀤𑁆𑀥𑀝𑁆𑀞𑁂𑀦 𑀅𑀭𑀺𑀬𑀜𑁆𑀘 𑀢𑀁 𑀥𑀦𑀜𑁆𑀘 𑀥𑀦𑀸𑀬𑀺𑀢𑀝𑁆𑀞𑁂𑀦𑀸𑀢𑀺 𑀅𑀭𑀺𑀬𑀥𑀦𑀁, 𑀢𑁂𑀦 𑀅𑀭𑀺𑀬𑀥𑀦𑁂𑀦. 𑀢𑁂𑀦𑁂𑀯 𑀪𑁄𑀕𑁂𑀦𑀸𑀢𑀺 𑀅𑀭𑀺𑀬𑀥𑀦𑀪𑁄𑀕𑁂𑀦.

𑀲𑀕𑀸𑀣𑀓𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀲𑀧𑁆𑀧𑀜𑁆𑀜𑀯𑀕𑁆𑀕𑁄

𑁨. 𑀯𑀲𑁆𑀲𑀁𑀯𑀼𑀢𑁆𑀣𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁪𑁮. 𑀲𑀫𑁄𑀥𑀸𑀦𑁂𑀢𑁆𑀯𑀸𑀢𑀺 𑀬𑁂𑀳𑀺 𑀇𑀦𑁆𑀤𑁆𑀭𑀺𑀬𑀸𑀤𑀻𑀳𑀺 𑀪𑀸𑀯𑀺𑀬𑀫𑀸𑀦𑁂𑀳𑀺 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁄 𑀅𑀦𑀼𑀧𑁆𑀧𑀢𑁆𑀢𑁄, 𑀢𑀸𑀦𑁂𑀯. 𑀥𑀫𑁆𑀫𑀲𑀫𑀸𑀦𑀢𑀸𑀬 𑀘𑁂𑀢𑀁 𑀯𑀼𑀢𑁆𑀢𑀁. 𑀅𑀜𑁆𑀜𑀸𑀦𑁂𑀯 𑀳𑀺 𑀅𑀢𑁆𑀣𑀢𑁄 𑀢𑀁 𑀢𑀁 𑀫𑀕𑁆𑀕𑀁 𑀲𑀸𑀥𑀓𑀸𑀦𑀺 𑀇𑀦𑁆𑀤𑁆𑀭𑀺𑀬𑀸𑀤𑀻𑀦𑀺. 𑀢𑀦𑁆𑀢𑀺 𑀧𑀯𑁂𑀡𑀻 𑀓𑀣𑀺𑀢𑀸𑀢𑀺 𑀬𑀁 𑀓𑀜𑁆𑀘𑀺 𑀯𑀺𑀦𑁂𑀬𑁆𑀬𑀧𑀼𑀕𑁆𑀕𑀮𑀁 𑀅𑀦𑀧𑁂𑀓𑁆𑀔𑀺𑀢𑁆𑀯𑀸 𑀓𑁂𑀯𑀮𑀁 𑀢𑀦𑁆𑀢𑀺𑀯𑀲𑁂𑀦 𑀞𑀺𑀢𑀺 𑀓𑀣𑀺𑀢𑀸.

𑁩. 𑀥𑀫𑁆𑀫𑀤𑀺𑀦𑁆𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁪𑁯. 𑀲𑀢𑁆𑀢𑀲𑀼 𑀚𑀦𑁂𑀲𑀽𑀢𑀺 𑀲𑀢𑁆𑀢𑀲𑀼 𑀓𑀺𑀢𑁆𑀢𑀺𑀬𑀫𑀸𑀦𑁂𑀲𑀼 𑀉𑀧𑀸𑀲𑀓𑀚𑀦𑁂𑀲𑀼. 𑀕𑀫𑁆𑀪𑀻𑀭𑀸𑀢𑀺𑀆𑀤𑀻𑀲𑀼 𑀥𑀫𑁆𑀫𑀕𑀫𑁆𑀪𑀻𑀭𑀸𑀢𑀺 𑀧𑀸𑀴𑀺𑀕𑀢𑀺𑀬𑀸 𑀕𑀫𑁆𑀪𑀻𑀭𑀸, 𑀢𑀣𑀸 𑀘 𑀲𑀮𑁆𑀮𑀲𑀼𑀢𑁆𑀢𑀁 𑀳𑁂𑀝𑁆𑀞𑀸 𑀧𑀓𑀸𑀲𑀺𑀢𑀫𑁂𑀯. ‘‘𑀘𑁂𑀢𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑀁 𑀯𑀤𑀸𑀫𑀻’’𑀢𑀺𑀆𑀤𑀺𑀦𑀸 (𑀅. 𑀦𑀺. 𑁬.𑁬𑁩; 𑀓𑀣𑀸. 𑁫𑁩𑁯) 𑀆𑀕𑀢𑀁 𑀘𑁂𑀢𑀦𑀸𑀲𑀼𑀢𑁆𑀢𑀁. 𑀢𑀢𑁆𑀣 ‘‘𑀘𑁂𑀢𑀦𑀸𑀲𑀳𑀚𑀸𑀢𑀁 𑀦𑀸𑀦𑀸𑀓𑁆𑀔𑀡𑀺𑀓’’𑀦𑁆𑀢𑀺𑀆𑀤𑀺𑀦𑀸 𑀧𑀝𑁆𑀞𑀸𑀦𑁂 𑀆𑀕𑀢𑀦𑀬𑁂𑀦, 𑀲𑀼𑀢𑁆𑀢𑁂𑀲𑀼 (𑀅. 𑀦𑀺. 𑁩.𑁧𑁦𑁧) 𑀘 ‘‘𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬’’𑀦𑁆𑀢𑀺𑀆𑀤𑀺𑀦𑀸 𑀆𑀕𑀢𑀦𑀬𑁂𑀦 𑀕𑀫𑁆𑀪𑀻𑀭𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄, 𑀦𑀺𑀩𑁆𑀩𑀸𑀦𑀲𑁆𑀲 𑀘𑁂𑀯 𑀅𑀭𑀺𑀬𑀫𑀕𑁆𑀕𑀲𑁆𑀲 𑀘 𑀧𑀓𑀸𑀲𑀦𑀢𑁄 𑀅𑀲𑀗𑁆𑀔𑀢𑀲𑀁𑀬𑀼𑀢𑁆𑀢𑀲𑁆𑀲 𑀮𑁄𑀓𑀼𑀢𑁆𑀢𑀭𑀢𑁆𑀣𑀤𑀻𑀧𑀓𑀢𑀸. ‘‘𑀅𑀢𑀻𑀢𑀁𑀧𑀸𑀳𑀁 𑀭𑀽𑀧𑁂𑀦 𑀔𑀚𑁆𑀚𑀺𑀁, 𑀏𑀢𑀭𑀳𑀺 𑀔𑀚𑁆𑀚𑀸𑀫𑀻’’𑀢𑀺𑀆𑀤𑀺𑀦𑀸 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀔𑀸𑀤𑀓𑀪𑀸𑀯𑀲𑁆𑀲, 𑀧𑀼𑀕𑁆𑀕𑀮𑀲𑁆𑀲 𑀔𑀸𑀤𑀺𑀢𑀩𑁆𑀩𑀢𑀸𑀬 𑀯𑀺𑀪𑀸𑀯𑀦𑁂𑀦 𑀔𑀚𑁆𑀚𑀦𑀻𑀬𑀧𑀭𑀺𑀬𑀸𑀬𑁂 (𑀲𑀁. 𑀦𑀺. 𑁩.𑁭𑁯) 𑀯𑀺𑀲𑁂𑀲𑀢𑁄 𑀦𑀺𑀲𑁆𑀲𑀢𑁆𑀢𑀦𑀺𑀚𑁆𑀚𑀻𑀯𑀢𑀸 𑀤𑀻𑀧𑀺𑀢𑀸𑀢𑀺 𑀯𑀼𑀢𑁆𑀢𑀁 ‘‘𑀲𑀢𑁆𑀢𑀲𑀼𑀜𑁆𑀜𑀢𑀸𑀤𑀻𑀧𑀓𑀸 𑀔𑀚𑁆𑀚𑀦𑀺𑀓𑀲𑀼𑀢𑁆𑀢𑀦𑁆𑀢𑀸𑀤𑀬𑁄’’𑀢𑀺. 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀺𑀲𑁆𑀲𑀸𑀫𑀸𑀢𑀺 𑀬𑁂 𑀢𑁂𑀲𑀼 𑀲𑀼𑀢𑁆𑀢𑁂𑀲𑀼 𑀯𑀼𑀢𑁆𑀢𑀧𑀝𑀺𑀧𑀤𑀁 𑀲𑀫𑁆𑀫𑀤𑁂𑀯 𑀧𑀭𑀺𑀧𑀽𑀭𑁂𑀦𑁆𑀢𑀺, 𑀢𑁂 𑀢𑁂𑀲𑀼 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀦𑁆𑀢𑀺 𑀦𑀸𑀫. 𑀏𑀢𑁆𑀣𑀸𑀢𑀺 ‘‘𑀦 𑀔𑁄 𑀦𑁂𑀢’’𑀦𑁆𑀢𑀺 𑀏𑀢𑁆𑀣 𑀦-𑀓𑀸𑀭𑁄 ‘‘𑀅𑀜𑁆𑀜𑀫𑀜𑁆𑀜’’𑀦𑁆𑀢𑀺 𑀏𑀢𑁆𑀣 𑀫-𑀓𑀸𑀭𑁄 𑀯𑀺𑀬 𑀩𑁆𑀬𑀜𑁆𑀚𑀦𑀲𑀦𑁆𑀥𑀺𑀫𑀢𑁆𑀢𑀫𑁂𑀯, 𑀦𑀸𑀲𑁆𑀲 𑀓𑁄𑀘𑀺 𑀅𑀢𑁆𑀣𑁄.

𑁪. 𑀕𑀺𑀮𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁫𑁦. 𑀦 𑀔𑁄 𑀧𑀦𑁂𑀢𑀦𑁆𑀢𑀺 𑀦 𑀔𑁄 𑀏𑀢𑀁, 𑀦𑁄𑀢𑀺 𑀘 𑀅𑀫𑁆𑀳𑁂𑀳𑀻𑀢𑀺 𑀅𑀢𑁆𑀣𑁄𑀢𑀺 𑀆𑀳 ‘‘𑀦 𑀔𑁄 𑀅𑀫𑁆𑀳𑁂𑀳𑀻’’𑀢𑀺𑀆𑀤𑀺. 𑀅𑀲𑁆𑀲𑀲𑀦𑁆𑀢𑀻𑀢𑀺 𑀅𑀲𑁆𑀲𑀸𑀲𑀦𑀻𑀬𑀸𑀢𑀺 𑀆𑀳 ‘‘𑀅𑀲𑁆𑀲𑀸𑀲𑀓𑀭𑁂𑀳𑀻’’𑀢𑀺. 𑀫𑀭𑀺𑀲𑁆𑀲𑀢𑀻𑀢𑀺 𑀫𑀸𑀭𑀺𑀲𑁄, 𑀏𑀓𑀦𑁆𑀢𑀪𑀸𑀯𑀺𑀫𑀭𑀡𑁄, 𑀲𑁄 𑀧𑀦 𑀫𑀭𑀡𑀸𑀥𑀻𑀦𑀯𑀼𑀢𑁆𑀢𑀺𑀓𑁄𑀢𑀺 𑀯𑀼𑀢𑁆𑀢𑀁 ‘‘𑀫𑀭𑀡𑀧𑀝𑀺𑀩𑀤𑁆𑀥𑁄’’𑀢𑀺. 𑀅𑀥𑀺𑀫𑀼𑀘𑁆𑀘𑁂𑀳𑀻𑀢𑀺 𑀅𑀥𑀺𑀫𑀼𑀢𑁆𑀢𑀺𑀁 𑀉𑀧𑁆𑀧𑀸𑀤𑁂𑀳𑀺. 𑀢𑀁 𑀧𑀦 𑀢𑀣𑀸 𑀘𑀺𑀢𑁆𑀢𑀲𑁆𑀲 𑀧𑀡𑀺𑀥𑀸𑀦𑀁 𑀞𑀧𑀦𑀦𑁆𑀢𑀺 𑀆𑀳 ‘‘𑀞𑀧𑁂𑀳𑀻’’𑀢𑀺. 𑀆𑀕𑀫𑀦𑀻𑀬𑀕𑀼𑀡𑁂𑀲𑀽𑀢𑀺 𑀧𑀼𑀩𑁆𑀩𑀪𑀸𑀕𑀕𑀼𑀡𑁂𑀲𑀼. 𑀧𑀫𑀸𑀡𑀁 𑀦𑀸𑀫 𑀦𑀢𑁆𑀣𑀺 𑀅𑀦𑀦𑁆𑀢𑀸𑀧𑀭𑀺𑀫𑀸𑀡𑀢𑁆𑀢𑀸. 𑀦𑀸𑀦𑀸𑀓𑀭𑀡𑀁 𑀦𑀢𑁆𑀣𑀺 𑀯𑀺𑀫𑀼𑀢𑁆𑀢𑀺𑀬𑀸 𑀦𑀺𑀦𑁆𑀦𑀸𑀦𑀢𑁆𑀢𑀸.

𑁯. 𑀧𑀜𑁆𑀜𑀸𑀧𑀝𑀺𑀮𑀸𑀪𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁫𑁫. 𑀧𑀜𑁆𑀜𑀸𑀧𑀝𑀺𑀮𑀸𑀪𑀸𑀬𑀸𑀢𑀺 𑀫𑀕𑁆𑀕𑀨𑀮𑀧𑀜𑁆𑀜𑀸𑀬 𑀧𑀝𑀺𑀮𑀸𑀪𑀢𑁆𑀣𑀁. 𑀢𑁂𑀦𑀸𑀳 ‘‘𑀲𑀢𑁆𑀢 𑀲𑁂𑀓𑁆𑀔𑀸’’𑀢𑀺𑀆𑀤𑀺.

𑀲𑀧𑁆𑀧𑀜𑁆𑀜𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀫𑀳𑀸𑀧𑀜𑁆𑀜𑀯𑀕𑁆𑀕𑁄

𑁧. 𑀫𑀳𑀸𑀧𑀜𑁆𑀜𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁫𑁮. 𑀫𑀳𑀦𑁆𑀢𑁂 𑀅𑀢𑁆𑀣𑁂 𑀧𑀭𑀺𑀕𑁆𑀕𑀡𑁆𑀳𑀸𑀢𑀻𑀢𑀺 𑀲𑀘𑁆𑀘𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀸𑀤𑀺𑀓𑁂 𑀫𑀳𑀸𑀯𑀺𑀢𑁆𑀣𑀸𑀭𑁂 𑀅𑀢𑁆𑀣𑁂 𑀧𑀭𑀺𑀘𑁆𑀙𑀺𑀚𑁆𑀚 𑀅𑀲𑁂𑀲𑁂𑀢𑁆𑀯𑀸 𑀫𑀼𑀝𑁆𑀞𑀺𑀕𑀢𑁂 𑀯𑀺𑀬 𑀓𑀢𑁆𑀯𑀸 𑀕𑀡𑁆𑀳𑀸𑀢𑀺. 𑀲𑁂𑀲𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀫𑁂𑀯.

𑀫𑀳𑀸𑀧𑀜𑁆𑀜𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑁄𑀢𑀸𑀧𑀢𑁆𑀢𑀺𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.