𑁧𑁨. 𑀲𑀘𑁆𑀘𑀲𑀁𑀬𑀼𑀢𑁆𑀢𑀁

𑁧. 𑀲𑀫𑀸𑀥𑀺𑀯𑀕𑁆𑀕𑁄

𑁧. 𑀲𑀫𑀸𑀥𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁭𑁧. 𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀬𑀸𑀢𑀺 𑀦𑀺𑀲𑁆𑀲𑀓𑁆𑀓𑀯𑀘𑀦𑀁 ‘‘𑀧𑀭𑀺𑀳𑀸𑀬𑀦𑁆𑀢𑀻’’𑀢𑀺 𑀧𑀤𑀁 𑀅𑀧𑁂𑀓𑁆𑀔𑀺𑀢𑁆𑀯𑀸. 𑀬𑀣𑀸𑀪𑀽𑀢𑀸𑀤𑀺𑀯𑀲𑁂𑀦𑀸𑀢𑀺 𑀬𑀣𑀸𑀕𑀢𑀸𑀤𑀺𑀯𑀲𑁂𑀦. 𑀬𑀣𑀸𑀪𑀽𑀢𑀁 𑀦𑀸𑀫 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 ‘‘𑀲𑀫𑀸𑀳𑀺𑀢𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀻’’𑀢𑀺𑀆𑀤𑀺. 𑀆𑀤𑀺-𑀲𑀤𑁆𑀤𑁂𑀦 ‘‘𑀢𑀣𑀸 𑀬𑀲𑁆𑀫𑀸’’𑀢𑀺𑀆𑀤𑀺𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀢𑀣𑀸 𑀳𑀺 𑀬𑀣𑀸𑀪𑀽𑀢𑀯𑀲𑁂𑀦 𑀓𑀸𑀭𑀡𑀘𑁆𑀙𑁂𑀤𑁄 𑀓𑀢𑁄 ‘‘𑀢𑀣𑀸 𑀬𑀲𑁆𑀫𑀸’’𑀢𑀺𑀆𑀤𑀺𑀯𑀘𑀦𑁂𑀳𑀺. 𑀯𑀡𑁆𑀡𑀸𑀢𑀺 𑀅𑀓𑁆𑀔𑀭𑀸, ‘‘𑀕𑀼𑀡𑀸’’𑀢𑀺 𑀓𑁂𑀘𑀺. 𑀧𑀤𑀩𑁆𑀬𑀜𑁆𑀚𑀦𑀸𑀦𑀻𑀢𑀺 𑀦𑀸𑀫𑀸𑀤𑀺𑀧𑀤𑀸𑀦𑀺 𑀘𑁂𑀯 𑀢𑀁𑀲𑀫𑀼𑀤𑀸𑀬𑀪𑀽𑀢𑀩𑁆𑀬𑀜𑁆𑀚𑀦𑀸𑀦𑀺 𑀘.

𑁩. 𑀧𑀞𑀫𑀓𑀼𑀮𑀧𑀼𑀢𑁆𑀢𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁦𑁭𑁩-𑁭𑁫. 𑀲𑀸𑀲𑀦𑀸𑀯𑀘𑀭𑀸 𑀅𑀥𑀺𑀧𑁆𑀧𑁂𑀢𑀸 𑀩𑀸𑀳𑀺𑀭𑀓𑀸𑀦𑀁 𑀲𑀘𑁆𑀘𑀸𑀪𑀺𑀲𑀫𑀬𑀲𑁆𑀲 𑀅𑀪𑀸𑀯𑀢𑁄. 𑀢𑀣𑀸𑀢𑀺 𑀇𑀫𑀺𑀦𑀸 𑀘𑀢𑀼𑀢𑁆𑀣𑀧𑀜𑁆𑀘𑀫𑁂𑀲𑀼 𑀅𑀢𑁆𑀣𑀯𑀺𑀲𑁂𑀲𑀸𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀬𑀤𑀺 𑀏𑀯𑀁 𑀓𑀲𑁆𑀫𑀸 𑀯𑀺𑀲𑀼𑀁 𑀯𑀺𑀲𑀼𑀁 𑀤𑁂𑀲𑀦𑀸𑀢𑀺 𑀆𑀳 ‘‘𑀢𑁂𑀦 𑀢𑁂𑀦 𑀅𑀪𑀺𑀮𑀸𑀧𑁂𑀦𑀸’’𑀢𑀺𑀆𑀤𑀺.

𑁧𑁦. 𑀢𑀺𑀭𑀘𑁆𑀙𑀸𑀦𑀓𑀣𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁮𑁦. 𑀤𑀼𑀕𑁆𑀕𑀢𑀺𑀢𑁄 𑀲𑀁𑀲𑀸𑀭𑀢𑁄 𑀘 𑀦𑀺𑀬𑁆𑀬𑀸𑀢𑀺 𑀏𑀢𑁂𑀦𑀸𑀢𑀺 𑀦𑀺𑀬𑁆𑀬𑀸𑀦𑀁, 𑀲𑀕𑁆𑀕𑀫𑀕𑁆𑀕𑁄 𑀫𑁄𑀓𑁆𑀔𑀫𑀕𑁆𑀕𑁄 𑀘. 𑀢𑀲𑁆𑀫𑀺𑀁 𑀦𑀺𑀬𑁆𑀬𑀸𑀦𑁂 𑀦𑀺𑀬𑀼𑀢𑁆𑀢𑀸, 𑀢𑀁 𑀏𑀢𑁆𑀣 𑀅𑀢𑁆𑀣𑀻𑀢𑀺 𑀦𑀺𑀬𑁆𑀬𑀸𑀦𑀺𑀓𑀸. 𑀯𑀘𑀻𑀤𑀼𑀘𑁆𑀘𑀭𑀺𑀢𑀲𑀁𑀓𑀺𑀮𑁂𑀲𑀢𑁄 𑀯𑀸 𑀦𑀺𑀬𑁆𑀬𑀸𑀢𑀻𑀢𑀺 𑀈-𑀓𑀸𑀭𑀲𑁆𑀲 𑀭𑀲𑁆𑀲𑀢𑁆𑀢𑀁 𑀬-𑀓𑀸𑀭𑀲𑁆𑀲 𑀓-𑀓𑀸𑀭𑀁 𑀓𑀢𑁆𑀯𑀸 𑀦𑀺𑀬𑁆𑀬𑀸𑀦𑀺𑀓𑀸. 𑀘𑁂𑀢𑀦𑀸𑀬 𑀲𑀤𑁆𑀥𑀺𑀁 𑀲𑀫𑁆𑀨𑀧𑁆𑀧𑀮𑀸𑀧𑀸 𑀯𑁂𑀭𑀫𑀡𑀺. 𑀢𑀧𑁆𑀧𑀝𑀺𑀧𑀓𑁆𑀔𑀢𑁄 𑀅𑀦𑀺𑀬𑁆𑀬𑀸𑀦𑀺𑀓𑀸, 𑀢𑀲𑁆𑀲 𑀪𑀸𑀯𑁄 𑀅𑀦𑀺𑀬𑁆𑀬𑀸𑀦𑀺𑀓𑀢𑁆𑀢𑀁. 𑀢𑀺𑀭𑀘𑁆𑀙𑀸𑀦𑀪𑀽𑀢𑀦𑁆𑀢𑀺 𑀢𑀺𑀭𑁄𑀓𑀭𑀡𑀪𑀽𑀢𑀁. 𑀓𑀫𑁆𑀫𑀝𑁆𑀞𑀸𑀦𑀪𑀸𑀯𑁂𑀢𑀺 𑀅𑀦𑀺𑀘𑁆𑀘𑀢𑀸𑀧𑀝𑀺𑀲𑀁𑀬𑀼𑀢𑁆𑀢𑀘𑀢𑀼𑀲𑀘𑁆𑀘𑀓𑀫𑁆𑀫𑀝𑁆𑀞𑀸𑀦𑀪𑀸𑀯𑁂. 𑀲𑀸𑀢𑁆𑀣𑀓𑀦𑁆𑀢𑀺 𑀤𑀸𑀦𑀲𑀻𑀮𑀸𑀤𑀺𑀦𑀺𑀲𑁆𑀲𑀺𑀢𑀢𑁆𑀢𑀸 𑀳𑀺𑀢𑀧𑀝𑀺𑀲𑀁𑀬𑀼𑀢𑁆𑀢𑀁.

𑀯𑀺𑀲𑀺𑀔𑀸𑀢𑀺 𑀖𑀭𑀲𑀦𑁆𑀦𑀺𑀯𑁂𑀲𑁄. 𑀯𑀺𑀲𑀺𑀔𑀸𑀕𑀳𑀡𑁂𑀦 𑀘 𑀕𑀸𑀫𑀸𑀤𑀺𑀕𑀳𑀡𑁂 𑀯𑀺𑀬 𑀢𑀦𑁆𑀦𑀺𑀯𑀸𑀲𑀺𑀦𑁄 𑀯𑀺𑀲𑁂𑀲𑀢𑁄 𑀕𑀳𑀺𑀢𑀸 ‘‘𑀆𑀕𑀢𑁄 𑀕𑀸𑀫𑁄’’𑀢𑀺𑀆𑀤𑀻𑀲𑀼 𑀯𑀺𑀬. 𑀢𑁂𑀦𑀸𑀳 ‘‘𑀲𑀽𑀭𑀸 𑀲𑀫𑀢𑁆𑀣𑀸’’𑀢𑀺. 𑀓𑀼𑀫𑁆𑀪𑀝𑁆𑀞𑀸𑀦𑀸𑀧𑀤𑁂𑀲𑁂𑀦 𑀓𑀼𑀫𑁆𑀪𑀤𑀸𑀲𑀺𑀬𑁄 𑀯𑀼𑀢𑁆𑀢𑀸𑀢𑀺 𑀆𑀳 𑁋 ‘‘𑀓𑀼𑀫𑁆𑀪𑀤𑀸𑀲𑀺𑀓𑀣𑀸’’𑀢𑀺. 𑀅𑀬𑀸𑀣𑀸𑀯𑀢𑁄 𑀉𑀧𑁆𑀧𑀢𑁆𑀢𑀺𑀝𑁆𑀞𑀺𑀢𑀺𑀲𑀁𑀳𑀸𑀭𑀸𑀤𑀺𑀯𑀲𑁂𑀦 𑀮𑁄𑀓𑁄 𑀅𑀓𑁆𑀔𑀸𑀬𑀢𑀺 𑀏𑀢𑁂𑀦𑀸𑀢𑀺 𑀮𑁄𑀓𑀓𑁆𑀔𑀸𑀬𑀺𑀓𑀸. 𑀇𑀢𑀺 𑀇𑀫𑀺𑀦𑀸 𑀧𑀓𑀸𑀭𑁂𑀦 𑀪𑀯𑁄, 𑀇𑀫𑀺𑀦𑀸 𑀅𑀪𑀯𑁄𑀢𑀺 𑀏𑀯𑀁 𑀧𑀯𑀢𑁆𑀢𑀸𑀬 𑀇𑀢𑀺𑀪𑀯𑀸𑀪𑀯𑀓𑀣𑀸𑀬 𑀲𑀤𑁆𑀥𑀺𑀁.

𑀲𑀫𑀸𑀥𑀺𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑀯𑀕𑁆𑀕𑁄

𑁧. 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁮𑁧. ‘‘𑀇𑀲𑀻𑀦𑀁 𑀧𑀢𑀦𑀼𑀧𑁆𑀧𑀢𑀦𑀯𑀲𑁂𑀦 𑀑𑀲𑀻𑀤𑀦𑀉𑀧𑁆𑀧𑀢𑀦𑀝𑁆𑀞𑀸𑀦𑀯𑀲𑁂𑀦 𑀏𑀯𑀁 ‘𑀇𑀲𑀺𑀧𑀢𑀦’𑀦𑁆𑀢𑀺 ‘𑀮𑀤𑁆𑀥𑀦𑀸𑀫𑁂’𑀢𑀺 𑀲𑀗𑁆𑀔𑁂𑀧𑀢𑁄 𑀯𑀼𑀢𑁆𑀢𑀫𑀢𑁆𑀣𑀁 𑀯𑀺𑀯𑀭𑀺𑀢𑀼𑀁 ‘𑀏𑀢𑁆𑀣 𑀳𑀻’’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀆𑀫𑀦𑁆𑀢𑁂𑀲𑀻𑀢𑀺 𑀏𑀢𑁆𑀣 𑀬𑀲𑁆𑀫𑀸 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑀢𑁆𑀣𑀁 𑀅𑀬𑀁 𑀆𑀫𑀦𑁆𑀢𑀦𑀸, 𑀢𑀲𑁆𑀫𑀸 𑀲𑀫𑀼𑀤𑀸𑀕𑀫𑀢𑁄 𑀧𑀝𑁆𑀞𑀸𑀬 𑀲𑀢𑁆𑀣𑀼 𑀧𑀼𑀩𑁆𑀩𑀘𑀭𑀺𑀢𑀁 𑀲𑀗𑁆𑀔𑁂𑀧𑁂𑀦𑁂𑀯 𑀧𑀓𑀸𑀲𑁂𑀢𑀼𑀁 𑀯𑀝𑁆𑀝𑀢𑀻𑀢𑀺 ‘‘𑀤𑀻𑀧𑀗𑁆𑀓𑀭𑀧𑀸𑀤𑀫𑀽𑀮𑁂 𑀓𑀢𑀸𑀪𑀺𑀦𑀻𑀳𑀸𑀭𑀢𑁄 𑀧𑀝𑁆𑀞𑀸𑀬𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀫𑀸𑀭𑀩𑀮𑀁 𑀪𑀺𑀦𑁆𑀤𑀺𑀢𑁆𑀯𑀸𑀢𑀺 𑀫𑀸𑀭𑀜𑁆𑀘 𑀫𑀸𑀭𑀩𑀮𑀜𑁆𑀘 𑀪𑀜𑁆𑀚𑀺𑀢𑁆𑀯𑀸. 𑀅𑀣 𑀯𑀸 𑀫𑀸𑀭𑀲𑁆𑀲 𑀅𑀩𑁆𑀪𑀦𑁆𑀢𑀭𑀁 𑀩𑀸𑀳𑀺𑀭𑀜𑁆𑀘𑀸𑀢𑀺 𑀤𑀼𑀯𑀺𑀥𑀁 𑀩𑀮𑀁 𑀪𑀜𑁆𑀚𑀺𑀢𑁆𑀯𑀸. ‘‘𑀤𑁆𑀯𑁂𑀫𑁂, 𑀪𑀺𑀓𑁆𑀔𑀯𑁂, 𑀅𑀦𑁆𑀢𑀸’’𑀢𑀺 𑀏𑀢𑁆𑀣 𑀅𑀦𑁆𑀢-𑀲𑀤𑁆𑀤𑁄 ‘‘𑀧𑀼𑀩𑁆𑀩𑀦𑁆𑀢𑁂 𑀜𑀸𑀡𑀁 𑀅𑀧𑀭𑀦𑁆𑀢𑁂 𑀜𑀸𑀡’’𑀦𑁆𑀢𑀺𑀆𑀤𑀻𑀲𑀼 (𑀥. 𑀲. 𑁧𑁦𑁬𑁩) 𑀯𑀺𑀬 𑀪𑀸𑀕𑀧𑀭𑀺𑀬𑀸𑀬𑁄𑀢𑀺 𑀆𑀳 ‘‘𑀤𑁆𑀯𑁂 𑀇𑀫𑁂, 𑀪𑀺𑀓𑁆𑀔𑀯𑁂, 𑀓𑁄𑀝𑁆𑀞𑀸𑀲𑀸’’𑀢𑀺. 𑀲𑀳 𑀲𑀫𑀼𑀤𑀸𑀳𑀸𑀭𑁂𑀦𑀸𑀢𑀺 𑀉𑀘𑁆𑀘𑀸𑀭𑀡𑀲𑀫𑀓𑀸𑀮𑀁. 𑀧𑀢𑁆𑀣𑀭𑀺𑀢𑁆𑀯𑀸 𑀅𑀝𑁆𑀞𑀸𑀲𑀺 𑀩𑀼𑀤𑁆𑀥𑀸𑀦𑀼𑀪𑀸𑀯𑁂𑀦. 𑀩𑁆𑀭𑀳𑁆𑀫𑀸𑀦𑁄 𑀲𑀫𑀸𑀕𑀘𑁆𑀙𑀺𑀁𑀲𑀼 𑀧𑀭𑀺𑀧𑀓𑁆𑀓𑀓𑀼𑀲𑀮𑀫𑀽𑀮𑀸 𑀲𑀘𑁆𑀘𑀸𑀪𑀺𑀲𑀫𑁆𑀩𑁄𑀥𑀸𑀬 𑀓𑀢𑀸𑀥𑀺𑀓𑀸𑀭𑀸.

𑀕𑀺𑀳𑀺𑀲𑀜𑁆𑀜𑁄𑀚𑀦𑀦𑁆𑀢𑀺 𑀕𑀺𑀳𑀺𑀩𑀦𑁆𑀥𑀦𑀁. 𑀙𑀺𑀦𑁆𑀤𑀺𑀢𑁆𑀯𑀸𑀢𑀺 𑀳𑀭𑀺𑀢𑁆𑀯𑀸. 𑀦 𑀯𑀴𑀜𑁆𑀚𑁂𑀢𑀩𑁆𑀩𑀸𑀢𑀺 𑀦𑀸𑀦𑀼𑀬𑀼𑀜𑁆𑀚𑁂𑀢𑀩𑁆𑀩𑀸. 𑀓𑀺𑀮𑁂𑀲𑀓𑀸𑀫𑀲𑀼𑀔𑀲𑁆𑀲𑀸𑀢𑀺 𑀓𑀺𑀮𑁂𑀲𑀓𑀸𑀫𑀬𑀼𑀢𑁆𑀢𑀲𑁆𑀲 𑀲𑀼𑀔𑀲𑁆𑀲. 𑀅𑀦𑀼𑀬𑁄𑀕𑁄𑀢𑀺 𑀅𑀦𑀼𑀪𑀯𑁄. 𑀕𑀸𑀫𑀯𑀸𑀲𑀻𑀳𑀺 𑀲𑁂𑀯𑀺𑀢𑀩𑁆𑀩𑀢𑁆𑀢𑀸 𑀕𑀸𑀫𑀯𑀸𑀲𑀻𑀦𑀁 𑀲𑀦𑁆𑀢𑀓𑁄. 𑀅𑀢𑁆𑀢𑀦𑁄𑀢𑀺 𑀅𑀢𑁆𑀢𑀪𑀸𑀯𑀲𑁆𑀲. 𑀆𑀳𑀺𑀢𑁄 𑀅𑀳𑀁𑀫𑀸𑀦𑁄 𑀏𑀢𑁆𑀣𑀸𑀢𑀺 𑀅𑀢𑁆𑀢𑀸, 𑀅𑀢𑁆𑀢𑀪𑀸𑀯𑁄. 𑀤𑀼𑀓𑁆𑀔𑀓𑀭𑀡𑀦𑁆𑀢𑀺 𑀤𑀼𑀓𑁆𑀔𑀼𑀧𑁆𑀧𑀸𑀤𑀦𑀁. 𑀅𑀢𑁆𑀢𑀫𑀸𑀭𑀡𑁂𑀳𑀻𑀢𑀺 𑀅𑀢𑁆𑀢𑀩𑀸𑀥𑀦𑁂𑀳𑀺. 𑀉𑀧𑀲𑀫𑀸𑀬𑀸𑀢𑀺 𑀓𑀺𑀮𑁂𑀲𑀯𑀽𑀧𑀲𑀫𑁄 𑀅𑀥𑀺𑀧𑁆𑀧𑁂𑀢𑁄, 𑀢𑀤𑀢𑁆𑀣𑀲𑀫𑁆𑀧𑀤𑀸𑀦𑀯𑀘𑀦𑀦𑁆𑀢𑀺 𑀆𑀳 ‘‘𑀓𑀺𑀮𑁂𑀲𑀽𑀧𑀲𑀫𑀢𑁆𑀣𑀸𑀬𑀸’’𑀢𑀺. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺.

𑀲𑀘𑁆𑀘𑀜𑀸𑀡𑀸𑀤𑀺𑀯𑀲𑁂𑀦 𑀢𑀬𑁄 𑀧𑀭𑀺𑀯𑀝𑁆𑀝𑀸 𑀏𑀢𑀲𑁆𑀲𑀸𑀢𑀺 𑀢𑀺𑀧𑀭𑀺𑀯𑀝𑁆𑀝𑀁, 𑀜𑀸𑀡𑀤𑀲𑁆𑀲𑀦𑀁. 𑀢𑁂𑀦𑀸𑀳 ‘‘𑀲𑀘𑁆𑀘𑀜𑀸𑀡𑀸’’𑀢𑀺𑀆𑀤𑀺. 𑀬𑀣𑀸𑀪𑀽𑀢𑀁 𑀜𑀸𑀡𑀦𑁆𑀢𑀺 𑀧𑀝𑀺𑀯𑁂𑀥𑀜𑀸𑀡𑀁 𑀆𑀳. 𑀢𑁂𑀲𑀼𑀬𑁂𑀯 𑀲𑀘𑁆𑀘𑁂𑀲𑀼. 𑀜𑀸𑀡𑁂𑀦 𑀓𑀢𑁆𑀢𑀩𑁆𑀩𑀲𑁆𑀲 𑀘 𑀧𑀭𑀺𑀜𑁆𑀜𑀸𑀧𑀝𑀺𑀯𑁂𑀥𑀸𑀤𑀺𑀓𑀺𑀘𑁆𑀘𑀲𑁆𑀲 𑀘 𑀚𑀸𑀦𑀦𑀜𑀸𑀡𑀁, ‘‘𑀢𑀜𑁆𑀘 𑀔𑁄 𑀧𑀝𑀺𑀯𑁂𑀥𑀢𑁄 𑀧𑀕𑁂𑀯𑀸’’𑀢𑀺 𑀓𑁂𑀘𑀺. 𑀧𑀘𑁆𑀙𑀸𑀢𑀺 𑀅𑀧𑀭𑁂. 𑀢𑀣𑀸 𑀓𑀢𑀜𑀸𑀡𑀁. 𑀤𑁆𑀯𑀸𑀤𑀲𑀸𑀓𑀸𑀭𑀦𑁆𑀢𑀺 𑀤𑁆𑀯𑀸𑀤𑀲𑀯𑀺𑀥𑀆𑀓𑀸𑀭𑀪𑁂𑀤𑀁. 𑀅𑀜𑁆𑀜𑀢𑁆𑀣𑀸𑀢𑀺 𑀅𑀜𑁆𑀜𑁂𑀲𑀼 𑀲𑀼𑀢𑁆𑀢𑁂𑀲𑀼.

𑀧𑀝𑀺𑀯𑁂𑀥𑀜𑀸𑀡𑀫𑁆𑀧𑀺 𑀤𑁂𑀲𑀦𑀸𑀜𑀸𑀡𑀫𑁆𑀧𑀺 𑀥𑀫𑁆𑀫𑀘𑀓𑁆𑀓𑀦𑁆𑀢𑀺 𑀇𑀤𑀁 𑀢𑀢𑁆𑀣 𑀜𑀸𑀡𑀓𑀺𑀘𑁆𑀘𑀁 𑀧𑀥𑀸𑀦𑀦𑁆𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀸𑀤𑀺𑀥𑀫𑁆𑀫𑀲𑀫𑀼𑀤𑀸𑀬𑁄 𑀧𑀦 𑀧𑀯𑀢𑁆𑀢𑀦𑀝𑁆𑀞𑁂𑀦 𑀘𑀓𑁆𑀓𑀦𑁆𑀢𑀺 𑀥𑀫𑁆𑀫𑀘𑀓𑁆𑀓𑀁. 𑀅𑀣 𑀯𑀸 𑀘𑀓𑁆𑀓𑀦𑁆𑀢𑀺 𑀆𑀡𑀸, 𑀥𑀫𑁆𑀫𑀢𑁄 𑀅𑀦𑀧𑁂𑀢𑀢𑁆𑀢𑀸 𑀥𑀫𑁆𑀫𑀜𑁆𑀘 𑀢𑀁 𑀘𑀓𑁆𑀓𑀜𑁆𑀘, 𑀥𑀫𑁆𑀫𑁂𑀦 𑀜𑀸𑀬𑁂𑀦 𑀘𑀓𑁆𑀓𑀦𑁆𑀢𑀺𑀧𑀺 𑀥𑀫𑁆𑀫𑀘𑀓𑁆𑀓𑀁. 𑀬𑀣𑀸𑀳 ‘‘𑀥𑀫𑁆𑀫𑀜𑁆𑀘 𑀧𑀯𑀢𑁆𑀢𑁂𑀢𑀺 𑀘𑀓𑁆𑀓𑀜𑁆𑀘𑀸𑀢𑀺 𑀥𑀫𑁆𑀫𑀘𑀓𑁆𑀓𑀁, 𑀘𑀓𑁆𑀓𑀜𑁆𑀘 𑀧𑀯𑀢𑁆𑀢𑁂𑀢𑀺 𑀥𑀫𑁆𑀫𑀜𑁆𑀘𑀸𑀢𑀺 𑀥𑀫𑁆𑀫𑀘𑀓𑁆𑀓𑀁, 𑀥𑀫𑁆𑀫𑁂𑀦 𑀧𑀯𑀢𑁆𑀢𑀢𑀻𑀢𑀺 𑀥𑀫𑁆𑀫𑀘𑀓𑁆𑀓𑀁, 𑀥𑀫𑁆𑀫𑀘𑀭𑀺𑀬𑀸𑀬 𑀧𑀯𑀢𑁆𑀢𑀢𑀻𑀢𑀺 𑀥𑀫𑁆𑀫𑀘𑀓𑁆𑀓’’𑀦𑁆𑀢𑀺𑀆𑀤𑀺 (𑀧𑀝𑀺. 𑀫. 𑁨.𑁪𑁦-𑁪𑁧). 𑀉𑀪𑀬𑀫𑁆𑀧𑀻𑀢𑀺 𑀧𑀝𑀺𑀯𑁂𑀥𑀜𑀸𑀡𑀁 𑀤𑁂𑀲𑀦𑀸𑀜𑀸𑀡𑀦𑁆𑀢𑀺 𑀉𑀪𑀬𑀫𑁆𑀧𑀺. 𑀏𑀢𑀦𑁆𑀢𑀺 𑀢𑀤𑀼𑀪𑀬𑀁. 𑀇𑀫𑀸𑀬 𑀤𑁂𑀲𑀦𑀸𑀬𑀸𑀢𑀺 𑀇𑀫𑀺𑀦𑀸 𑀲𑀼𑀢𑁆𑀢𑁂𑀦 𑀧𑀓𑀸𑀲𑁂𑀦𑁆𑀢𑁂𑀦 𑀪𑀕𑀯𑀢𑀸 𑀬𑀣𑀸𑀯𑀼𑀢𑁆𑀢𑀜𑀸𑀡𑀤𑁆𑀯𑀬𑀲𑀗𑁆𑀔𑀸𑀢𑀁 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑀺𑀢𑀁 𑀦𑀸𑀫 𑀧𑀯𑀢𑁆𑀢𑀦𑀓𑀺𑀘𑁆𑀘𑀲𑁆𑀲 𑀅𑀦𑀺𑀝𑁆𑀞𑀺𑀢𑀢𑁆𑀢𑀸. 𑀧𑀢𑀺𑀝𑁆𑀞𑀺𑀢𑁂𑀢𑀺 𑀅𑀜𑁆𑀜𑀸𑀲𑀺 𑀓𑁄𑀡𑁆𑀟𑀜𑁆𑀜𑀢𑁆𑀣𑁂𑀭𑁂𑀦 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀺𑀢𑁂. 𑀧𑀯𑀢𑁆𑀢𑀺𑀢𑀁 𑀦𑀸𑀫 𑀓𑀲𑁆𑀲𑀧𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀦𑁆𑀢𑀭𑀥𑀸𑀦𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀩𑀼𑀤𑁆𑀥𑀼𑀧𑁆𑀧𑀸𑀤𑁄, 𑀏𑀢𑁆𑀢𑀓𑀁 𑀓𑀸𑀮𑀁 𑀅𑀧𑁆𑀧𑀯𑀢𑁆𑀢𑀧𑀼𑀩𑁆𑀩𑀲𑁆𑀲 𑀧𑀯𑀢𑁆𑀢𑀺𑀢𑀢𑁆𑀢𑀸, 𑀉𑀧𑀭𑀺𑀫𑀕𑁆𑀕𑀸𑀥𑀺𑀕𑀫𑁄 𑀧𑀦𑀲𑁆𑀲 𑀅𑀢𑁆𑀣𑀗𑁆𑀕𑀢𑁄 𑀏𑀯𑀸𑀢𑀺.

𑀏𑀓𑀧𑁆𑀧𑀳𑀸𑀭𑁂𑀦𑀸𑀢𑀺 𑀏𑀓𑁂𑀦𑁂𑀯 𑀧𑀳𑀸𑀭𑀲𑀜𑁆𑀜𑀺𑀢𑁂𑀦 𑀓𑀸𑀮𑁂𑀦. 𑀤𑀺𑀯𑀲𑀲𑁆𑀲 𑀳𑀺 𑀢𑀢𑀺𑀬𑁄 𑀪𑀸𑀕𑁄 𑀧𑀳𑀸𑀭𑁄 𑀦𑀸𑀫. 𑀧𑀸𑀴𑀺𑀬𑀁 𑀧𑀦 ‘‘𑀢𑁂𑀦 𑀔𑀡𑁂𑀦 𑀢𑁂𑀦 𑀮𑀬𑁂𑀦 𑀢𑁂𑀦 𑀫𑀼𑀳𑀼𑀢𑁆𑀢𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀢𑀁 𑀧𑀳𑀸𑀭𑀓𑁆𑀔𑀡𑀲𑀮𑁆𑀮𑀓𑁆𑀔𑀡𑀫𑁂𑀯. 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁄𑀪𑀸𑀲𑁄𑀢𑀺 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀸𑀦𑀼𑀪𑀸𑀯𑁂𑀦 𑀧𑀯𑀢𑁆𑀢𑁄 𑀑𑀪𑀸𑀲𑁄 𑀘𑀺𑀢𑁆𑀢𑀁 𑀧𑀝𑀺𑀘𑁆𑀘 𑀉𑀢𑀼𑀲𑀫𑀼𑀝𑁆𑀞𑀸𑀦𑁄 𑀯𑁂𑀤𑀺𑀢𑀩𑁆𑀩𑁄. 𑀬𑀲𑁆𑀫𑀸 𑀪𑀕𑀯𑀢𑁄 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑀲𑁆𑀲 𑀆𑀭𑀫𑁆𑀪𑁂 𑀯𑀺𑀬 𑀧𑀭𑀺𑀲𑀫𑀸𑀧𑀦𑁂 𑀅𑀢𑀺𑀯𑀺𑀬 𑀉𑀴𑀸𑀭𑀢𑀫𑀁 𑀧𑀻𑀢𑀺𑀲𑁄𑀫𑀦𑀲𑁆𑀲𑀁 𑀉𑀤𑀧𑀸𑀤𑀺, 𑀢𑀲𑁆𑀫𑀸 ‘‘𑀇𑀫𑀲𑁆𑀲𑀧𑀺 𑀉𑀤𑀸𑀦𑀲𑁆𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑁯. 𑀲𑀗𑁆𑀓𑀸𑀲𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁮𑁯. 𑀅𑀢𑁆𑀣𑀲𑀁𑀯𑀡𑁆𑀡𑀦𑁂 𑀯𑀡𑁆𑀡𑀻𑀬𑀦𑁆𑀢𑁂𑀢𑀺 𑀯𑀡𑁆𑀡𑀸. 𑀢𑁂𑀬𑁂𑀯 𑀧𑀭𑀺𑀬𑀸𑀬𑁂𑀦 𑀅𑀓𑁆𑀔𑀭𑀡𑀢𑁄 𑀅𑀓𑁆𑀔𑀭𑀸𑀦𑀺. 𑀅𑀢𑁆𑀣𑀁 𑀩𑁆𑀬𑀜𑁆𑀚𑁂𑀦𑁆𑀢𑀻𑀢𑀺 𑀩𑁆𑀬𑀜𑁆𑀚𑀦𑀸𑀦𑀺. 𑀬𑀲𑁆𑀫𑀸 𑀧𑀦 𑀅𑀓𑀸𑀭𑀸𑀤𑀺𑀓𑁂 𑀲𑀭𑀲𑀫𑀜𑁆𑀜𑀸, 𑀓𑀓𑀸𑀭𑀸𑀤𑀺𑀓𑁂 𑀩𑁆𑀬𑀜𑁆𑀚𑀦𑀲𑀫𑀜𑁆𑀜𑀸, 𑀉𑀪𑀬𑀢𑁆𑀣 𑀯𑀡𑁆𑀡𑀲𑀫𑀜𑁆𑀜𑀸, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀯𑀡𑁆𑀡𑀸𑀦𑀁 𑀯𑀸 𑀏𑀓𑀤𑁂𑀲𑀸 𑀬𑀤𑀺𑀤𑀁 𑀩𑁆𑀬𑀜𑁆𑀚𑀦𑀸 𑀦𑀸𑀫𑀸’’𑀢𑀺. 𑀦𑁂𑀢𑁆𑀢𑀺𑀬𑀁 𑀧𑀦 𑀯𑀸𑀓𑁆𑀬𑁂 𑀩𑁆𑀬𑀜𑁆𑀚𑀦𑀲𑀫𑀜𑁆𑀜𑀸. 𑀩𑁆𑀬𑀜𑁆𑀚𑀦𑀕𑁆𑀕𑀳𑀡𑁂𑀦𑁂𑀯 𑀘𑁂𑀢𑁆𑀣 𑀆𑀓𑀸𑀭𑀦𑀺𑀭𑀼𑀢𑁆𑀢𑀺𑀦𑀺𑀤𑁆𑀤𑁂𑀲𑀸 𑀕𑀳𑀺𑀢𑀸 𑀏𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀲𑀗𑁆𑀓𑀸𑀲𑀦𑀸𑀢𑀺 𑀅𑀢𑁆𑀣𑀲𑁆𑀲 𑀜𑀸𑀧𑀦𑀸 𑀪𑀸𑀕𑀲𑁄. 𑀢𑁂𑀦𑀸𑀳 ‘‘𑀯𑀺𑀪𑀢𑁆𑀢𑀺𑀬𑁄’’𑀢𑀺. 𑀲𑀗𑁆𑀓𑀸𑀲𑀦𑀕𑁆𑀕𑀳𑀡𑁂𑀦𑁂𑀯 𑀘𑁂𑀢𑁆𑀣 𑀧𑀓𑀸𑀲𑀦𑀸 𑀯𑀼𑀢𑁆𑀢𑀸 𑀳𑁄𑀢𑀺. 𑀯𑀺𑀪𑀢𑁆𑀢𑀺𑀬𑁄 𑀳𑀺 𑀅𑀢𑁆𑀣𑀯𑀘𑀦𑁂𑀦𑁂𑀯 𑀯𑀺𑀯𑀭𑀦𑁆𑀢𑀺, 𑀢𑀸𑀳𑀺 𑀓𑀸𑀭𑀡𑀧𑀜𑁆𑀜𑀢𑁆𑀢𑀺𑀬𑁄 𑀯𑀼𑀢𑁆𑀢𑀸𑀬𑁂𑀯𑀸𑀢𑀺, 𑀢𑀸𑀳𑀺𑀧𑀺 𑀅𑀢𑁆𑀣𑀧𑀤𑀸𑀦𑀺 𑀕𑀳𑀺𑀢𑀸𑀦𑁂𑀯 𑀳𑁄𑀦𑁆𑀢𑀺. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁄 𑀧𑀦 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀯𑀡𑁆𑀡𑀦𑀸𑀬𑀁 𑀦𑁂𑀢𑁆𑀢𑀺𑀅𑀝𑁆𑀞𑀓𑀣𑀸𑀬𑀜𑁆𑀘 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀲𑀩𑁆𑀩𑀸𑀓𑀸𑀭𑁂𑀦𑀸𑀢𑀺 𑀲𑀪𑀸𑀕𑀸𑀤𑀺𑀯𑀺𑀪𑀸𑀯𑀦𑀸𑀓𑀸𑀭𑁂𑀦. 𑀯𑀡𑁆𑀡𑀸𑀤𑀻𑀦𑀦𑁆𑀢𑀺 𑀢𑀲𑁆𑀫𑀺𑀁 𑀧𑀦 𑀯𑀺𑀢𑁆𑀣𑀸𑀭𑁂 𑀧𑀯𑀢𑁆𑀢𑀯𑀡𑁆𑀡𑀸𑀤𑀻𑀦𑀁. 𑀢𑀲𑁆𑀫𑀸𑀢𑀺 𑀯𑀡𑁆𑀡𑀸𑀤𑀻𑀦𑀁 𑀅𑀦𑁆𑀢𑀅𑀪𑀸𑀯𑀢𑁄. 𑀏𑀯𑀫𑀸𑀳𑀸𑀢𑀺 ‘‘𑀅𑀧𑀭𑀺𑀫𑀸𑀡𑀸 𑀯𑀡𑁆𑀡𑀸 𑀩𑁆𑀬𑀜𑁆𑀚𑀦𑀸 𑀲𑀗𑁆𑀓𑀸𑀲𑀦𑀸’’𑀢𑀺 𑀏𑀯𑀫𑀸𑀳.

𑁧𑁦. 𑀢𑀣𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁯𑁦. 𑀲𑀪𑀸𑀯𑀸𑀯𑀺𑀚𑀳𑀦𑀝𑁆𑀞𑁂𑀦𑀸𑀢𑀺 𑀅𑀢𑁆𑀢𑀦𑁄 𑀤𑀼𑀓𑁆𑀔𑀲𑀪𑀸𑀯𑀲𑁆𑀲 𑀓𑀤𑀸𑀘𑀺𑀧𑀺 𑀅𑀧𑀭𑀺𑀘𑁆𑀘𑀚𑀦𑁂𑀦 𑀢𑀣𑀲𑀪𑀸𑀯𑀁. 𑀢𑁂𑀦𑀸𑀳 ‘‘𑀤𑀼𑀓𑁆𑀔𑀜𑁆𑀳𑀺 𑀤𑀼𑀓𑁆𑀔𑀫𑁂𑀯 𑀯𑀼𑀢𑁆𑀢’’𑀦𑁆𑀢𑀺. 𑀲𑀪𑀸𑀯𑀲𑁆𑀲𑀸𑀢𑀺 𑀤𑀼𑀓𑁆𑀔𑀲𑀪𑀸𑀯𑀲𑁆𑀲. 𑀅𑀫𑁄𑀖𑀢𑀸𑀬𑀸𑀢𑀺 𑀅𑀯𑀜𑁆𑀛𑀢𑀸𑀬. 𑀅𑀯𑀺𑀢𑀣𑀦𑁆𑀢𑀺 𑀦 𑀯𑀺𑀢𑀣𑀁. 𑀢𑁂𑀦𑀸𑀳 ‘‘𑀦 𑀳𑀺 𑀤𑀼𑀓𑁆𑀔𑀁 𑀅𑀤𑀼𑀓𑁆𑀔𑀁 𑀦𑀸𑀫 𑀳𑁄𑀢𑀻’’𑀢𑀺. 𑀅𑀜𑁆𑀜𑀪𑀸𑀯𑀸𑀦𑀼𑀧𑀕𑀫𑁂𑀦𑀸𑀢𑀺 𑀲𑀫𑀼𑀤𑀬𑀸𑀤𑀺𑀲𑀪𑀸𑀯𑀸𑀦𑀼𑀧𑀕𑀫𑀦𑁂𑀦 𑀫𑀼𑀲𑀸 𑀦 𑀳𑁄𑀢𑀻𑀢𑀺 𑀅𑀜𑁆𑀜𑁄 𑀅𑀜𑁆𑀜𑀣𑀸 𑀦 𑀳𑁄𑀢𑀻𑀢𑀺 𑀅𑀦𑀜𑁆𑀜𑀣𑀁. 𑀢𑁂𑀦𑀸𑀳 ‘‘𑀦 𑀳𑀻’’𑀢𑀺𑀆𑀤𑀺.

𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀓𑁄𑀝𑀺𑀕𑀸𑀫𑀯𑀕𑁆𑀕𑁄

𑁧. 𑀓𑁄𑀝𑀺𑀕𑀸𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁯𑁧. 𑀅𑀦𑀦𑀼𑀩𑁄𑀥𑀸𑀢𑀺 𑀧𑀝𑀺𑀯𑁂𑀥𑀲𑁆𑀲 𑀅𑀦𑀼𑀭𑀽𑀧𑀩𑁄𑀥𑀸𑀪𑀸𑀯𑁂𑀦. 𑀅𑀧𑁆𑀧𑀝𑀺𑀯𑁂𑀥𑀸𑀢𑀺 𑀲𑀘𑁆𑀘𑀸𑀦𑀁 𑀧𑀝𑀺𑀫𑀼𑀔𑀁 𑀯𑁂𑀥𑀸𑀪𑀸𑀯𑁂𑀦.

𑁨. 𑀤𑀼𑀢𑀺𑀬𑀓𑁄𑀝𑀺𑀕𑀸𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁯𑁨. 𑀨𑀮𑀲𑀫𑀸𑀥𑀺𑀨𑀮𑀧𑀜𑁆𑀜𑀸𑀦𑀦𑁆𑀢𑀺 𑀅𑀕𑁆𑀕𑀨𑀮𑀲𑀫𑀸𑀥𑀺𑀅𑀕𑁆𑀕𑀨𑀮𑀧𑀜𑁆𑀜𑀸𑀦𑀁.

𑁭. 𑀢𑀣𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁯𑁭. 𑀅𑀭𑀺𑀬𑀸𑀦𑀦𑁆𑀢𑀺 𑀩𑀼𑀤𑁆𑀥𑀸𑀦𑀁 𑀅𑀭𑀺𑀬𑀸𑀦𑀁. 𑀢𑁂𑀦𑀸𑀳 ‘‘𑀦 𑀳𑀻’’𑀢𑀺𑀆𑀤𑀺.

𑁮. 𑀮𑁄𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁯𑁮. 𑀧𑀝𑀺𑀯𑀺𑀤𑁆𑀥𑀢𑁆𑀢𑀸 𑀤𑁂𑀲𑀺𑀢𑀢𑁆𑀢𑀸 𑀘𑀸𑀢𑀺 𑀇𑀫𑀺𑀦𑀸 𑀧𑀝𑀺𑀯𑁂𑀥𑀜𑀸𑀡𑁂𑀦 𑀤𑁂𑀲𑀦𑀸𑀜𑀸𑀡𑁂𑀦 𑀘 𑀧𑀭𑀺𑀕𑁆𑀕𑀳𑀺𑀢𑀢𑁆𑀢𑀸 𑀅𑀭𑀺𑀬𑀲𑀦𑁆𑀢𑀓𑀸𑀦𑀺 𑀳𑁄𑀦𑁆𑀢𑀺 𑀅𑀭𑀺𑀬𑀲𑁆𑀲 𑀪𑀕𑀯𑀢𑁄 𑀲𑀦𑁆𑀢𑀓𑀪𑀸𑀯𑀢𑁄.

𑁧𑁦. 𑀕𑀯𑀫𑁆𑀧𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁦𑁦. 𑀏𑀓𑀧𑁆𑀧𑀝𑀺𑀯𑁂𑀥𑁄𑀢𑀺 𑀏𑀓𑁂𑀦𑁂𑀯 𑀜𑀸𑀡𑁂𑀦 𑀘𑀢𑀼𑀦𑁆𑀦𑀁 𑀅𑀭𑀺𑀬𑀲𑀘𑁆𑀘𑀸𑀦𑀁 𑀏𑀓𑀚𑁆𑀛𑀁 𑀧𑀝𑀺𑀯𑁂𑀥𑁄.

𑀓𑁄𑀝𑀺𑀕𑀸𑀫𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀲𑀻𑀲𑀧𑀸𑀯𑀦𑀯𑀕𑁆𑀕𑁄

𑁩. 𑀤𑀡𑁆𑀟𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁦𑁧. 𑀧𑀼𑀦𑀧𑁆𑀧𑀼𑀦𑀁 𑀯𑀝𑁆𑀝𑀲𑁆𑀫𑀺𑀁𑀬𑁂𑀯 𑀦𑀺𑀩𑁆𑀩𑀢𑁆𑀢𑀦𑁆𑀢𑀺 𑀅𑀤𑀺𑀝𑁆𑀞𑀢𑁆𑀢𑀸 𑀘𑀢𑀼𑀦𑁆𑀦𑀁 𑀅𑀭𑀺𑀬𑀲𑀘𑁆𑀘𑀸𑀦𑀁.

𑁫. 𑀲𑀢𑁆𑀢𑀺𑀲𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁦𑁫. 𑀪𑀯𑁂𑀬𑁆𑀬 𑀘𑁂𑀢𑀺 𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀸𑀦𑀺 𑀅𑀚𑁆𑀛𑀼𑀧𑁂𑀓𑁆𑀔𑀺𑀢𑁆𑀯𑀸 𑀲𑀳𑀺𑀢𑁂𑀳𑀺 𑀢𑁂𑀳𑀺 𑀲𑀘𑁆𑀘𑀸𑀪𑀺𑀲𑀫𑀬𑁄 𑀪𑀯𑁂𑀬𑁆𑀬𑀸𑀢𑀺 𑀏𑀯𑀁 𑀧𑀭𑀺𑀓𑀧𑁆𑀧𑀦𑀸 𑀦 𑀓𑀸𑀢𑀩𑁆𑀩𑀸𑀢𑀺.

𑁯. 𑀇𑀦𑁆𑀤𑀔𑀻𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁦𑁯. 𑀅𑀚𑁆𑀛𑀸𑀲𑀬𑀦𑁆𑀢𑀺 𑀲𑀲𑁆𑀲𑀢𑀸𑀤𑀺𑀪𑁂𑀤𑀁 𑀅𑀚𑁆𑀛𑀸𑀲𑀬𑀁. 𑀲𑁄 𑀳𑀺 ‘‘𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜’’𑀦𑁆𑀢𑀺 𑀕𑀸𑀳𑀲𑁆𑀲 𑀫𑀼𑀔𑀪𑀽𑀢𑀢𑁆𑀢𑀸 𑀫𑀼𑀔𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀢𑀜𑁆𑀘 𑀅𑀧𑀭𑁂 𑀅𑀤𑀺𑀝𑁆𑀞𑀲𑀘𑁆𑀘𑀸 𑀑𑀮𑁄𑀓𑁂𑀦𑁆𑀢𑀺, 𑀤𑀺𑀝𑁆𑀞𑀲𑀘𑁆𑀘𑀸 𑀧𑀦 𑀦𑁂𑀯 𑀑𑀮𑁄𑀓𑁂𑀦𑁆𑀢𑀺.

𑁧𑁦. 𑀯𑀸𑀤𑀢𑁆𑀣𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁧𑁦. 𑀓𑀼𑀓𑁆𑀓𑀼𑀓𑁄 𑀧𑀫𑀸𑀡𑀫𑀚𑁆𑀛𑀺𑀫𑀲𑁆𑀲 𑀧𑀼𑀭𑀺𑀲𑀲𑁆𑀲 𑀳𑀢𑁆𑀣𑁄𑀢𑀺 𑀅𑀢𑁆𑀣𑁄. 𑀓𑀼𑀓𑁆𑀓𑀽𑀢𑀺 𑀢𑀲𑁆𑀲𑁂𑀯 𑀦𑀸𑀫𑀁.

𑀲𑀻𑀲𑀧𑀸𑀯𑀦𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀧𑀧𑀸𑀢𑀯𑀕𑁆𑀕𑁄

𑁧. 𑀮𑁄𑀓𑀘𑀺𑀦𑁆𑀢𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁧𑁧. 𑀮𑁄𑀓𑀘𑀺𑀦𑁆𑀢𑀦𑁆𑀢𑀺 𑀮𑁄𑀓𑀲𑀦𑁆𑀦𑀺𑀯𑁂𑀲𑀧𑀝𑀺𑀲𑀁𑀬𑀼𑀢𑁆𑀢𑀯𑀻𑀫𑀁𑀲𑀸𑀯. ‘‘𑀮𑁄𑀓𑀘𑀺𑀢𑁆𑀢’’𑀦𑁆𑀢𑀺𑀧𑀺 𑀧𑀸𑀞𑁄, 𑀢𑀁𑀢𑀁𑀮𑁄𑀓𑀧𑀭𑀺𑀬𑀸𑀧𑀦𑁆𑀦𑀁 𑀘𑀺𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀦𑀸𑀴𑀺𑀓𑁂𑀭𑀸𑀤𑀬𑁄𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀅𑀯𑀼𑀢𑁆𑀢𑀸𑀦𑀁 𑀑𑀲𑀥𑀺𑀢𑀺𑀡𑀯𑀦𑀧𑁆𑀧𑀢𑀺𑀆𑀤𑀻𑀦𑀁 𑀲𑀗𑁆𑀕𑀳𑁄. 𑀏𑀯𑀭𑀽𑀧𑀦𑁆𑀢𑀺 𑀏𑀤𑀺𑀲𑀁 𑀅𑀜𑁆𑀜𑀫𑁆𑀧𑀺 𑀢𑀁𑀢𑀁𑀮𑁄𑀓𑀘𑀺𑀢𑁆𑀢𑀁.

𑀯𑀺𑀕𑀢𑀘𑀺𑀢𑁆𑀢𑁄𑀢𑀺 𑀅𑀢𑁆𑀢𑀢𑁆𑀣𑀧𑀭𑀢𑁆𑀣𑀢𑁄 𑀅𑀧𑀕𑀢𑀯𑀺𑀢𑀓𑁆𑀓𑁄 𑀅𑀤𑁆𑀤𑀲 𑀏𑀯𑀁 𑀅𑀥𑀺𑀝𑁆𑀞𑀳𑀺𑀁𑀲𑀽𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀫𑁆𑀩𑀭𑀺𑀫𑀸𑀬𑀦𑁆𑀢𑀺 𑀲𑀫𑁆𑀩𑀭𑁂𑀦 𑀅𑀲𑀼𑀭𑀺𑀦𑁆𑀤𑁂𑀦 𑀉𑀧𑁆𑀧𑀸𑀤𑀺𑀢𑀁 𑀅𑀲𑀼𑀭𑀫𑀸𑀬𑀁, 𑀬𑀁 ‘‘𑀇𑀦𑁆𑀤𑀚𑀸𑀮’’𑀦𑁆𑀢𑀺𑀧𑀺 𑀯𑀼𑀘𑁆𑀘𑀢𑀺 𑀇𑀦𑁆𑀤𑀲𑁆𑀲 𑀫𑁄𑀳𑀦𑀢𑁆𑀣𑀁 𑀉𑀧𑁆𑀧𑀸𑀤𑀺𑀢𑀢𑁆𑀢𑀸. 𑀲𑀫𑁆𑀧𑀭𑀺𑀯𑀢𑁆𑀢𑁂𑀢𑁆𑀯𑀸𑀢𑀺 𑀧𑀭𑀺𑀥𑀸𑀯𑁂𑀢𑁆𑀯𑀸. 𑀬𑀣𑀸 𑀦𑁂𑀢𑀺 𑀦𑁂 𑀅𑀲𑀼𑀭𑁂 𑀬𑀣𑀸 𑀲𑁄 𑀧𑀼𑀭𑀺𑀲𑁄 𑀧𑀲𑁆𑀲𑀢𑀺, 𑀏𑀯𑀁 𑀅𑀥𑀺𑀝𑁆𑀞𑀳𑀺𑀁𑀲𑀼. 𑀓𑀲𑁆𑀫𑀸 𑀧𑀦𑁂𑀢𑁂 𑀏𑀯𑀁 𑀅𑀥𑀺𑀝𑁆𑀞𑀳𑀺𑀁𑀲𑀽𑀢𑀺? 𑀢𑀁 𑀧𑀼𑀭𑀺𑀲𑀁 𑀢𑀢𑁆𑀣 𑀢𑀣𑀸𑀦𑀺𑀲𑀺𑀦𑁆𑀦𑀁 𑀤𑀺𑀲𑁆𑀯𑀸 ‘‘𑀅𑀬𑀜𑁆𑀘 𑀤𑁂𑀯𑁄’’𑀢𑀺 𑀆𑀲𑀗𑁆𑀓𑀦𑁆𑀢𑀸 𑀢𑀣𑀸 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀪𑀺𑀲𑀫𑀼𑀴𑀸𑀮𑀙𑀺𑀤𑁆𑀤𑁂𑀳𑀺 𑀧𑀯𑀺𑀲𑀺𑀢𑁆𑀯𑀸 𑀅𑀢𑁆𑀢𑀦𑁄 𑀅𑀲𑀼𑀭𑀪𑀯𑀦𑀁 𑀕𑀢𑀸. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀤𑁂𑀯𑀸𑀦𑀁𑀬𑁂𑀯 𑀫𑁄𑀳𑀬𑀫𑀸𑀦𑀸’’𑀢𑀺.

𑁨-𑁩. 𑀧𑀧𑀸𑀢𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁧𑁧𑁨-𑁩. 𑀫𑀭𑀺𑀬𑀸𑀤𑀧𑀸𑀲𑀸𑀡𑁄𑀢𑀺 𑀕𑀺𑀚𑁆𑀛𑀓𑀽𑀝𑀧𑀩𑁆𑀩𑀢𑀲𑁆𑀲 𑀫𑀭𑀺𑀬𑀸𑀤𑀧𑀸𑀓𑀸𑀭𑀲𑀤𑀺𑀲𑁄 𑀫𑀳𑀦𑁆𑀢𑁄 𑀧𑀸𑀲𑀸𑀡𑁄. 𑀅𑀦𑀺𑀝𑁆𑀞𑀭𑀽𑀧𑀦𑁆𑀢𑀺 𑀏𑀢𑁆𑀣 𑀭𑀽𑀧-𑀲𑀤𑁆𑀤𑁄 𑀲𑀪𑀸𑀯𑀢𑁆𑀣𑁄 ‘‘𑀧𑀺𑀬𑀭𑀽𑀧𑁂 𑀲𑀸𑀢𑀭𑀽𑀧𑁂’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁪𑁦𑁮-𑁪𑁦𑁯) 𑀯𑀺𑀬𑀸𑀢𑀺 𑀆𑀳 𑁋 ‘‘𑀅𑀦𑀺𑀝𑁆𑀞𑀲𑀪𑀸𑀯’’𑀦𑁆𑀢𑀺.

𑁫. 𑀯𑀸𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁧𑁫. 𑀉𑀧𑀸𑀲𑀦𑀦𑁆𑀢𑀺 𑀆𑀘𑀭𑀺𑀬𑀉𑀧𑀸𑀲𑀦𑀁, 𑀆𑀘𑀭𑀺𑀬𑀁 𑀅𑀦𑁆𑀢𑁂𑀯𑀸𑀲𑀺𑀦𑀸 𑀯𑀸 𑀤𑀺𑀯𑀲𑁂 𑀤𑀺𑀯𑀲𑁂 𑀲𑀺𑀓𑁆𑀔𑀦𑀯𑀲𑁂𑀦 𑀉𑀧𑀸𑀲𑀺𑀢𑀩𑁆𑀩𑀢𑁄 𑀉𑀧𑀸𑀲𑀦𑀦𑁆𑀢𑀺 𑀮𑀤𑁆𑀥𑀦𑀸𑀫𑀁 𑀓𑀡𑁆𑀟𑀔𑀺𑀧𑀦𑀲𑀺𑀧𑁆𑀧𑀁. 𑀓𑀡𑁆𑀟𑀁 𑀅𑀢𑀺𑀓𑁆𑀓𑀫𑀦𑁆𑀢𑁂𑀢𑀺 𑀲𑀭𑀁 𑀔𑀺𑀧𑀦𑁆𑀢𑁂. 𑀧𑁄𑀗𑁆𑀔𑀸𑀦𑀼𑀧𑁄𑀗𑁆𑀔𑀦𑁆𑀢𑀺 𑀧𑁄𑀗𑁆𑀔𑀲𑀤𑁆𑀤𑀢𑁆𑀣𑀁 𑀧𑀸𑀓𑀝𑀁 𑀓𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀏𑀓𑀁 𑀓𑀡𑁆𑀟𑀁 𑀔𑀺𑀧𑀺𑀢𑁆𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀧𑀭𑀁 𑀅𑀦𑀼𑀧𑁄𑀗𑁆𑀔𑀦𑁆𑀢𑀺 𑀏𑀢𑁆𑀣 𑀅𑀧𑀭𑀦𑁆𑀢𑀺 𑀢𑀢𑀺𑀬𑀓𑀡𑁆𑀟𑀁. 𑀅𑀦𑀼𑀧𑁄𑀗𑁆𑀔𑀁 𑀦𑀸𑀫 𑀇𑀤𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀦𑀼𑀧𑁄𑀗𑁆𑀔𑀁 𑀦𑀸𑀫 𑀤𑀼𑀢𑀺𑀬𑀲𑁆𑀲 𑀧𑁄𑀗𑁆𑀔’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀜𑁆𑀳𑀺 𑀢𑀢𑀺𑀬𑁂𑀦 𑀲𑀭𑁂𑀦 𑀯𑀺𑀚𑁆𑀛𑀻𑀬𑀢𑀺. 𑀧𑀼𑀦 𑀅𑀧𑀭𑀁 𑀢𑀲𑁆𑀲 𑀧𑁄𑀗𑁆𑀔𑀦𑁆𑀢𑀺 𑀇𑀤𑀁 𑀧𑀦 𑀅𑀧𑀭𑀸𑀧𑀭𑀁 𑀅𑀯𑀺𑀭𑀚𑁆𑀛𑀦𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁. 𑀤𑀼𑀭𑀪𑀺𑀲𑀫𑁆𑀪𑀯𑀢𑀭𑀦𑁆𑀢𑀺 𑀅𑀪𑀺𑀪𑀯𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑀭𑀁. 𑀯𑀸𑀮𑀦𑁆𑀢𑀺 𑀓𑁂𑀲𑀁. 𑀲𑀢𑁆𑀢𑀥𑀸 𑀪𑀺𑀦𑁆𑀤𑀺𑀢𑁆𑀯𑀸𑀢𑀺 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀯𑀺𑀨𑀸𑀮𑁂𑀢𑁆𑀯𑀸. 𑀢𑀲𑁆𑀲 𑀏𑀓𑀁 𑀪𑁂𑀤𑀦𑁆𑀢𑀺 𑀢𑀲𑁆𑀲 𑀓𑁂𑀲𑀲𑁆𑀲 𑀏𑀓𑀁 𑀅𑀁𑀲𑀼𑀲𑀗𑁆𑀔𑀸𑀢𑀁 𑀪𑁂𑀤𑀁 𑀕𑀳𑁂𑀢𑁆𑀯𑀸. 𑀯𑀸𑀢𑀺𑀗𑁆𑀕𑀡𑀫𑀚𑁆𑀛𑁂 𑀩𑀦𑁆𑀥𑀺𑀢𑁆𑀯𑀸𑀢𑀺 𑀯𑀸𑀢𑀺𑀗𑁆𑀕𑀡𑀨𑀮𑀲𑁆𑀲 𑀫𑀚𑁆𑀛𑀝𑁆𑀞𑀸𑀦𑁂 𑀩𑀦𑁆𑀥𑀺𑀢𑁆𑀯𑀸. 𑀅𑀧𑀭𑀁 𑀪𑁂𑀤𑀦𑁆𑀢𑀺 𑀅𑀧𑀭𑀁 𑀓𑁂𑀲𑀲𑁆𑀲 𑀅𑀁𑀲𑀼𑀲𑀗𑁆𑀔𑀸𑀢𑀁 𑀪𑁂𑀤𑀁. 𑀅𑀕𑁆𑀕𑀓𑁄𑀝𑀺𑀬𑀁 𑀩𑀦𑁆𑀥𑀺𑀢𑁆𑀯𑀸𑀢𑀺 𑀬𑀣𑀸 𑀢𑀲𑁆𑀲 𑀯𑀸𑀮𑀪𑁂𑀤𑀲𑁆𑀲 𑀊𑀓𑀸𑀫𑀢𑁆𑀢𑀁 𑀮𑀺𑀔𑀸𑀫𑀢𑁆𑀢𑀁 𑀯𑀸 𑀓𑀡𑁆𑀟𑀲𑁆𑀲 𑀅𑀕𑁆𑀕𑀓𑁄𑀝𑀺𑀁 𑀅𑀥𑀺𑀓𑀁 𑀳𑀼𑀢𑁆𑀯𑀸 𑀢𑀺𑀝𑁆𑀞𑀢𑀺, 𑀏𑀯𑀁 𑀩𑀦𑁆𑀥𑀺𑀢𑁆𑀯𑀸. 𑀉𑀲𑀪𑀫𑀢𑁆𑀢𑁂𑀢𑀺 𑀯𑀻𑀲𑀢𑀺𑀬𑀝𑁆𑀞𑀺𑀫𑀢𑁆𑀢𑁂 𑀞𑀸𑀦𑁂 𑀞𑀺𑀢𑁄. 𑀓𑀡𑁆𑀟𑀩𑀤𑁆𑀥𑀸𑀬 𑀓𑁄𑀝𑀺𑀬𑀸𑀢𑀺 𑀓𑀡𑁆𑀟𑀩𑀤𑁆𑀥𑀸𑀬 𑀯𑀸𑀮𑀲𑁆𑀲 𑀓𑁄𑀝𑀺𑀬𑀸 𑀯𑀸𑀢𑀺𑀗𑁆𑀕𑀡𑀩𑀦𑁆𑀥𑀦𑀯𑀸𑀮𑀲𑁆𑀲 𑀓𑁄𑀝𑀺𑀁 𑀧𑀝𑀺𑀯𑀺𑀚𑁆𑀛𑁂𑀬𑁆𑀬.

𑁮. 𑀤𑀼𑀢𑀺𑀬𑀙𑀺𑀕𑁆𑀕𑀴𑀬𑀼𑀕𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁧𑁮. 𑀅𑀥𑀺𑀘𑁆𑀘𑀼𑀧𑁆𑀧𑀢𑁆𑀢𑀺𑀓𑀦𑁆𑀢𑀺 𑀬𑀤𑀺𑀘𑁆𑀙𑀸𑀯𑀲𑁂𑀦 𑀉𑀧𑁆𑀧𑀚𑁆𑀚𑀦𑀓𑀁. 𑀙𑀺𑀕𑁆𑀕𑀴𑁂𑀦𑀸𑀢𑀺 𑀙𑀺𑀕𑁆𑀕𑀴𑀧𑀤𑁂𑀲𑁂𑀦. 𑀙𑀺𑀕𑁆𑀕𑀴𑀼𑀧𑀭𑀻𑀢𑀺 𑀳𑁂𑀝𑁆𑀞𑀺𑀫𑀬𑀼𑀕𑀲𑁆𑀲 𑀙𑀺𑀕𑁆𑀕𑀴𑀧𑀤𑁂𑀲𑀲𑁆𑀲 𑀉𑀧𑀭𑀺. 𑀆𑀭𑀼𑀴𑁆𑀳𑀲𑁆𑀲 𑀙𑀺𑀕𑁆𑀕𑀴𑁂𑀦𑀸𑀢𑀺 𑀉𑀪𑀺𑀦𑁆𑀦𑀫𑁆𑀧𑀺 𑀙𑀺𑀤𑁆𑀤𑁂𑀦. 𑀕𑀻𑀯𑀧𑁆𑀧𑀯𑁂𑀲𑀦𑀁 𑀯𑀺𑀬𑀸𑀢𑀺 𑀘𑀢𑀼𑀦𑁆𑀦𑀁 𑀬𑀼𑀕𑀸𑀦𑀁 𑀙𑀺𑀤𑁆𑀤𑀧𑀤𑁂𑀲𑁂𑀦𑁂𑀯 𑀉𑀧𑀭𑀽𑀧𑀭𑀺 𑀞𑀺𑀢𑀸𑀦𑀁 𑀙𑀺𑀤𑁆𑀤𑀦𑁆𑀢𑀭𑁂𑀦 𑀓𑀸𑀡𑀓𑀘𑁆𑀙𑀧𑀲𑁆𑀲 𑀕𑀻𑀯𑀧𑁆𑀧𑀯𑁂𑀲𑀦𑀁 𑀅𑀥𑀺𑀘𑁆𑀘𑀢𑀭𑀲𑀫𑁆𑀪𑀯𑀁. 𑀢𑀢𑁄𑀧𑀺 𑀅𑀥𑀺𑀘𑁆𑀘𑀢𑀭𑀲𑀫𑁆𑀪𑀯𑁄 𑀫𑀦𑀼𑀲𑁆𑀲𑀢𑁆𑀢𑀮𑀸𑀪𑁄, 𑀢𑀢𑁄 𑀅𑀥𑀺𑀘𑁆𑀘𑀢𑀫𑀲𑀫𑁆𑀪𑀯𑁄 𑀅𑀭𑀺𑀬𑀫𑀕𑁆𑀕𑀧𑀝𑀺𑀮𑀸𑀪𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀘𑀢𑀼𑀲𑀘𑁆𑀘𑀧𑀝𑀺𑀯𑁂𑀥𑁄 𑀅𑀢𑀺𑀯𑀺𑀬 𑀅𑀥𑀺𑀘𑁆𑀘𑀢𑀭𑀲𑀫𑁆𑀪𑀯𑁄’’𑀢𑀺.

𑀧𑀧𑀸𑀢𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀅𑀪𑀺𑀲𑀫𑀬𑀯𑀕𑁆𑀕𑀯𑀡𑁆𑀡𑀦𑀸

𑁧𑁧𑁨𑁧. 𑀅𑀪𑀺𑀲𑀫𑀬𑀲𑀁𑀬𑀼𑀢𑁆𑀢𑁂 𑀯𑀺𑀢𑁆𑀣𑀸𑀭𑀺𑀢𑁄𑀯, 𑀢𑀲𑁆𑀫𑀸 𑀢𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 𑀢𑀲𑁆𑀲 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑁭. 𑀧𑀞𑀫𑀆𑀫𑀓𑀥𑀜𑁆𑀜𑀧𑁂𑀬𑁆𑀬𑀸𑀮𑀯𑀕𑁆𑀕𑁄

𑁩. 𑀧𑀜𑁆𑀜𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁩𑁩. 𑀮𑁄𑀓𑀺𑀬𑀫𑁆𑀧𑀺 𑀯𑀺𑀲𑀼𑀤𑁆𑀥𑀢𑁆𑀣𑁂𑀦 ‘‘𑀅𑀭𑀺𑀬’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀢𑀁 𑀮𑀪𑀢𑀻𑀢𑀺 ‘‘𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑁂𑀦𑀸’’𑀢𑀺 𑀯𑀼𑀢𑁆𑀢𑀁.

𑁪. 𑀲𑀼𑀭𑀸𑀫𑁂𑀭𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁩𑁪. 𑀧𑀺𑀝𑁆𑀞𑀲𑀼𑀭𑀸𑀢𑀺 𑀧𑀺𑀝𑁆𑀞𑁂𑀦 𑀓𑀸𑀢𑀩𑁆𑀩𑀲𑀼𑀭𑀸, 𑀢𑀣𑀸 𑀑𑀤𑀦𑀲𑀼𑀭𑀸 𑀧𑀽𑀯𑀲𑀼𑀭𑀸, 𑀫𑀚𑁆𑀚𑀭𑀲𑀸𑀤𑀺𑀪𑀽𑀢𑁂 𑀓𑀺𑀡𑁆𑀡𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀓𑀢𑁆𑀢𑀩𑁆𑀩𑀸 𑀲𑀼𑀭𑀸 𑀓𑀺𑀡𑁆𑀡𑀧𑀓𑁆𑀔𑀺𑀢𑁆𑀢𑀲𑀼𑀭𑀸. 𑀲𑀫𑁆𑀪𑀸𑀭𑀲𑀁𑀬𑀼𑀢𑁆𑀢𑀸𑀢𑀺 𑀫𑀽𑀮𑀪𑁂𑀲𑀚𑁆𑀚𑀲𑀫𑁆𑀪𑀸𑀭𑁂𑀳𑀺 𑀲𑀁𑀬𑀼𑀢𑁆𑀢𑀸. 𑀧𑀼𑀧𑁆𑀨𑀸𑀲𑀯𑁄𑀢𑀺 𑀦𑀸𑀴𑀺𑀓𑁂𑀭𑀧𑀼𑀧𑁆𑀨𑀸𑀤𑀺𑀢𑁄 𑀅𑀲𑁆𑀲𑀯𑀦𑀓𑀆𑀲𑀯𑁄. 𑀫𑀼𑀤𑁆𑀤𑀺𑀓𑀨𑀮𑀸𑀤𑀺𑀢𑁄 𑀅𑀲𑁆𑀲𑀯𑀦𑀓𑀆𑀲𑀯𑁄 𑀨𑀮𑀸𑀲𑀯𑁄. 𑀇𑀢𑀻𑀢𑀺𑀆𑀤𑀺𑀅𑀢𑁆𑀣𑁄. 𑀢𑁂𑀦 𑀫𑀥𑁆𑀯𑀸𑀲𑀯𑀕𑀼𑀴𑀸𑀲𑀯𑀲𑀫𑁆𑀪𑀸𑀭𑀲𑀁𑀬𑀼𑀢𑁆𑀢𑁂 𑀲𑀗𑁆𑀕𑀡𑁆𑀳𑀸𑀢𑀺. 𑀲𑀼𑀭𑀸𑀲𑀯𑀯𑀺𑀦𑀺𑀫𑀼𑀢𑁆𑀢𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀲𑀼𑀭𑀸𑀲𑀯𑀯𑀺𑀦𑀺𑀫𑀼𑀢𑁆𑀢𑀁.

𑁧𑁦. 𑀧𑀘𑀸𑀬𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁪𑁦. 𑀦𑀻𑀘𑀯𑀼𑀢𑁆𑀢𑀺𑀦𑁄𑀢𑀺 𑀓𑀼𑀮𑁂 𑀚𑁂𑀝𑁆𑀞𑀸𑀦𑀁 𑀫𑀳𑀸𑀧𑀺𑀢𑀼𑀘𑀽𑀴𑀧𑀺𑀢𑀼𑀚𑁂𑀝𑁆𑀞𑀪𑀸𑀢𑀺𑀓𑀸𑀤𑀻𑀦𑀁 𑀅𑀪𑀺𑀯𑀸𑀤𑀦𑀧𑀘𑁆𑀘𑀼𑀝𑁆𑀞𑀸𑀦𑀅𑀜𑁆𑀚𑀮𑀺𑀓𑀫𑁆𑀫𑀲𑀸𑀫𑀻𑀘𑀺𑀓𑀫𑁆𑀫𑀸𑀤𑀺𑀯𑀲𑁂𑀦 𑀦𑀻𑀘𑀯𑀼𑀢𑁆𑀢𑀺𑀦𑁄.

𑁮. 𑀤𑀼𑀢𑀺𑀬𑀆𑀫𑀓𑀥𑀜𑁆𑀜𑀧𑁂𑀬𑁆𑀬𑀸𑀮𑀯𑀕𑁆𑀕𑁄

𑁮. 𑀩𑀻𑀚𑀕𑀸𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁪𑁮. ‘‘𑀫𑀽𑀮𑀩𑀻𑀚’’𑀦𑁆𑀢𑀺𑀆𑀤𑀻𑀲𑀼 𑀫𑀽𑀮𑀫𑁂𑀯 𑀩𑀻𑀚𑀦𑁆𑀢𑀺 𑀫𑀽𑀮𑀩𑀻𑀚𑀁, 𑀫𑀽𑀮𑀩𑀻𑀚𑀁 𑀏𑀢𑀲𑁆𑀲𑀸𑀢𑀺𑀧𑀺 𑀫𑀽𑀮𑀩𑀻𑀚𑀁. 𑀢𑀢𑁆𑀣 𑀧𑀼𑀭𑀺𑀫𑁂𑀦 𑀩𑀻𑀚𑀕𑀸𑀫𑁄 𑀯𑀼𑀢𑁆𑀢𑁄 ‘‘𑀩𑀻𑀚𑀸𑀦𑀁 𑀲𑀫𑀽𑀳𑁄’’𑀢𑀺 𑀓𑀢𑁆𑀯𑀸, 𑀤𑀼𑀢𑀺𑀬𑁂𑀦 𑀪𑀽𑀢𑀕𑀸𑀫𑁄. 𑀤𑀼𑀯𑀺𑀥𑁄𑀧𑁂𑀲𑁄 𑀲𑀸𑀫𑀜𑁆𑀜𑀦𑀺𑀤𑁆𑀤𑁂𑀲𑁂𑀦, ‘‘𑀫𑀽𑀮𑀩𑀻𑀚𑀜𑁆𑀘 𑀫𑀽𑀮𑀩𑀻𑀚𑀜𑁆𑀘 𑀫𑀽𑀮𑀩𑀻𑀚’’𑀦𑁆𑀢𑀺 𑀏𑀓𑀲𑁂𑀲𑀦𑀬𑁂𑀦 𑀯𑀸 𑀩𑀻𑀚𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀨𑀴𑀼𑀩𑀻𑀚𑀦𑁆𑀢𑀺 𑀧𑀩𑁆𑀩𑀩𑀻𑀚𑀁. 𑀩𑀸𑀳𑀺𑀭𑀧𑀘𑁆𑀘𑀬𑀦𑁆𑀢𑀭𑀲𑀫𑀯𑀸𑀬𑁂 𑀲𑀤𑀺𑀲𑀨𑀮𑀼𑀧𑁆𑀧𑀢𑁆𑀢𑀺𑀬𑀸 𑀯𑀺𑀲𑁂𑀲𑀓𑀸𑀭𑀡𑀪𑀸𑀯𑀢𑁄 𑀯𑀺𑀭𑀼𑀳𑀦𑀲𑀫𑀢𑁆𑀣𑁂 𑀲𑀸𑀭𑀨𑀮𑁂 𑀦𑀺𑀭𑀼𑀴𑁆𑀳𑁄 𑀩𑀻𑀚-𑀲𑀤𑁆𑀤𑁄. 𑀢𑀤𑀢𑁆𑀣𑀲𑀺𑀤𑁆𑀥𑀺𑀬𑀸 𑀫𑀽𑀮𑀸𑀤𑀻𑀲𑀼𑀧𑀺 𑀓𑁂𑀲𑀼𑀘𑀺 𑀧𑀯𑀢𑁆𑀢𑀢𑀻𑀢𑀺 𑀢𑀢𑁄 𑀦𑀺𑀯𑀢𑁆𑀢𑀦𑀢𑁆𑀣𑀁 𑀏𑀓𑁂𑀦 𑀩𑀻𑀚-𑀲𑀤𑁆𑀤𑁂𑀦 𑀯𑀺𑀲𑁂𑀲𑁂𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀩𑀻𑀚𑀩𑀻𑀚’’𑀦𑁆𑀢𑀺 ‘‘𑀭𑀽𑀧𑀭𑀽𑀧𑀁, 𑀤𑀼𑀓𑁆𑀔𑀤𑀼𑀓𑁆𑀔’’𑀦𑁆𑀢𑀺 (𑀲𑀁. 𑀦𑀺. 𑁪.𑁩𑁨𑁭) 𑀘 𑀬𑀣𑀸. 𑀦𑀻𑀮𑀢𑀺𑀡𑀭𑀼𑀓𑁆𑀔𑀸𑀤𑀺𑀓𑀲𑁆𑀲𑀸𑀢𑀺 𑀅𑀮𑁆𑀮𑀢𑀺𑀡𑀲𑁆𑀲 𑀘𑁂𑀯 𑀅𑀮𑁆𑀮𑀭𑀼𑀓𑁆𑀔𑀸𑀤𑀺𑀓𑀲𑁆𑀲 𑀘. 𑀆𑀤𑀺-𑀲𑀤𑁆𑀤𑁂𑀦 𑀑𑀲𑀥𑀺𑀕𑀘𑁆𑀙𑀮𑀢𑀸𑀤𑀻𑀦𑀁 𑀕𑀳𑀡𑀁.

𑁯. 𑀯𑀺𑀓𑀸𑀮𑀪𑁄𑀚𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁪𑁯. 𑀅𑀭𑀼𑀡𑀼𑀕𑁆𑀕𑀫𑀦𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀫𑀚𑁆𑀛𑀦𑁆𑀳𑀺𑀓𑁄, 𑀅𑀬𑀁 𑀩𑀼𑀤𑁆𑀥𑀸𑀤𑀺𑀅𑀭𑀺𑀬𑀸𑀦𑀁 𑀆𑀘𑀺𑀡𑁆𑀡𑀲𑀫𑀸𑀘𑀺𑀡𑁆𑀡𑁄 𑀪𑁄𑀚𑀦𑀲𑁆𑀲 𑀓𑀸𑀮𑁄, 𑀢𑀤𑀜𑁆𑀜𑁄 𑀯𑀺𑀓𑀸𑀮𑁄𑀢𑀺 𑀆𑀳 𑁋 ‘‘𑀯𑀺𑀓𑀸𑀮𑀪𑁄𑀚𑀦𑀸𑀢𑀺 𑀓𑀸𑀮𑀸𑀢𑀺𑀓𑁆𑀓𑀦𑁆𑀢𑀪𑁄𑀚𑀦𑀸’’𑀢𑀺.

𑁧𑁦. 𑀕𑀦𑁆𑀥𑀯𑀺𑀮𑁂𑀧𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁫𑁦. 𑀬𑀁 𑀓𑀺𑀜𑁆𑀘𑀺 𑀧𑀼𑀧𑁆𑀨𑀦𑁆𑀢𑀺 𑀕𑀦𑁆𑀣𑀺𑀫𑀁 𑀅𑀕𑀦𑁆𑀣𑀺𑀫𑀁 𑀯𑀸 𑀬𑀁 𑀓𑀺𑀜𑁆𑀘𑀺 𑀧𑀼𑀧𑁆𑀨𑀚𑀸𑀢𑀁, 𑀢𑀣𑀸 𑀧𑀺𑀲𑀺𑀢𑀸𑀤𑀺𑀪𑁂𑀤𑀁 𑀬𑀁 𑀓𑀺𑀜𑁆𑀘𑀺 𑀕𑀦𑁆𑀥𑀚𑀸𑀢𑀁.

𑁯. 𑀢𑀢𑀺𑀬𑀆𑀫𑀓𑀥𑀜𑁆𑀜𑀧𑁂𑀬𑁆𑀬𑀸𑀮𑀯𑀕𑁆𑀕𑁄

𑁧. 𑀦𑀘𑁆𑀘𑀕𑀻𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁫𑁧. 𑀲𑀗𑁆𑀔𑁂𑀧𑀢𑁄 ‘‘𑀲𑀩𑁆𑀩𑀧𑀸𑀧𑀲𑁆𑀲 𑀅𑀓𑀭𑀡’’𑀦𑁆𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀁 (𑀤𑀻.𑀦𑀺. 𑁨.𑁯𑁦; 𑀥.𑀧. 𑁧𑁮𑁩) 𑀪𑀕𑀯𑀢𑁄 𑀲𑀸𑀲𑀦𑀁 𑀅𑀘𑁆𑀘𑀦𑁆𑀢𑀙𑀦𑁆𑀤𑀭𑀸𑀕𑀧𑀯𑀢𑁆𑀢𑀺𑀢𑁄 𑀦𑀘𑁆𑀘𑀸𑀤𑀻𑀦𑀁 𑀤𑀲𑁆𑀲𑀦𑀁 𑀦 𑀅𑀦𑀼𑀮𑁄𑀫𑁂𑀢𑀻𑀢𑀺 𑀆𑀳 ‘‘𑀲𑀸𑀲𑀦𑀲𑁆𑀲 𑀅𑀦𑀦𑀼𑀮𑁄𑀫𑀢𑁆𑀢𑀸’’𑀢𑀺. 𑀅𑀢𑁆𑀢𑀦𑀸 𑀧𑀭𑁂𑀳𑀺 𑀘 𑀧𑀬𑁄𑀚𑀺𑀬𑀫𑀸𑀦𑀁 𑀧𑀬𑁄𑀚𑀸𑀧𑀺𑀬𑀫𑀸𑀦𑀜𑁆𑀘 𑀏𑀢𑁂𑀦𑁂𑀯 𑀦𑀘𑁆𑀘-𑀲𑀤𑁆𑀤𑁂𑀦 𑀕𑀳𑀺𑀢𑀁, 𑀢𑀣𑀸 𑀕𑀻𑀢𑀯𑀸𑀤𑀺𑀢𑀲𑀤𑁆𑀤𑁂𑀳𑀺 𑀘𑀸𑀢𑀺 𑀆𑀳 𑁋 ‘‘𑀦𑀘𑁆𑀘𑀦𑀦𑀘𑁆𑀘𑀸𑀧𑀦𑀸𑀤𑀺𑀯𑀲𑁂𑀦𑀸’’𑀢𑀺. 𑀆𑀤𑀺-𑀲𑀤𑁆𑀤𑁂𑀦 𑀕𑀸𑀬𑀦-𑀕𑀸𑀬𑀸𑀧𑀦-𑀯𑀸𑀤𑀦-𑀯𑀸𑀤𑀸𑀧𑀦𑀸𑀤𑀻𑀦𑀺 𑀲𑀗𑁆𑀕𑀡𑁆𑀳𑀸𑀢𑀺. 𑀤𑀲𑁆𑀲𑀦𑁂𑀦 𑀘𑁂𑀢𑁆𑀣 𑀲𑀯𑀦𑀫𑁆𑀧𑀺 𑀲𑀗𑁆𑀕𑀳𑀺𑀢𑀁 𑀯𑀺𑀭𑀽𑀧𑁂𑀓𑀲𑁂𑀲𑀦𑀬𑁂𑀦. 𑀬𑀣𑀸𑀲𑀓𑀁 𑀯𑀺𑀲𑀬𑀲𑁆𑀲 𑀆𑀮𑁄𑀘𑀦𑀲𑀪𑀸𑀯𑀢𑀸𑀬 𑀯𑀸 𑀧𑀜𑁆𑀘𑀦𑁆𑀦𑀁 𑀯𑀺𑀜𑁆𑀜𑀸𑀡𑀸𑀦𑀁 𑀲𑀯𑀦𑀓𑀺𑀭𑀺𑀬𑀸𑀬𑀧𑀺 𑀤𑀲𑁆𑀲𑀦𑀲𑀗𑁆𑀔𑁂𑀧𑀲𑀩𑁆𑀪𑀸𑀯𑀢𑁄 ‘‘𑀤𑀲𑁆𑀲𑀦𑀸’’𑀇𑀘𑁆𑀘𑁂𑀯 𑀯𑀼𑀢𑁆𑀢𑀁. 𑀅𑀯𑀺𑀲𑀽𑀓𑀪𑀽𑀢𑀲𑁆𑀲 𑀕𑀻𑀢𑀲𑁆𑀲 𑀲𑀯𑀦𑀁 𑀓𑀤𑀸𑀘𑀺 𑀯𑀝𑁆𑀝𑀢𑀻𑀢𑀺 𑀆𑀳 𑁋 ‘‘𑀯𑀺𑀲𑀽𑀓𑀪𑀽𑀢𑀸 𑀤𑀲𑁆𑀲𑀦𑀸 𑀘𑀸’’𑀢𑀺. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑀧𑀭𑀫𑀢𑁆𑀣𑀚𑁄𑀢𑀺𑀓𑀸𑀬 𑀔𑀼𑀤𑁆𑀤𑀓𑀅𑀝𑁆𑀞𑀓𑀣𑀸𑀬 (𑀔𑀼. 𑀧𑀸. 𑀅𑀝𑁆𑀞. 𑁨.𑀧𑀘𑁆𑀙𑀺𑀫𑀧𑀜𑁆𑀘𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸) 𑁋 ‘‘𑀥𑀫𑁆𑀫𑀽𑀧𑀲𑀁𑀳𑀺𑀢𑀁 𑀕𑀻𑀢𑀁 𑀯𑀝𑁆𑀝𑀢𑀺, 𑀕𑀻𑀢𑀽𑀧𑀲𑀁𑀳𑀺𑀢𑁄 𑀥𑀫𑁆𑀫𑁄 𑀦 𑀯𑀝𑁆𑀝𑀢𑀻’’𑀢𑀺.

𑁨. 𑀉𑀘𑁆𑀘𑀸𑀲𑀬𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁫𑁨. 𑀉𑀘𑁆𑀘𑀸𑀢𑀺 𑀉𑀘𑁆𑀘-𑀲𑀤𑁆𑀤𑁂𑀦 𑀲𑀫𑀸𑀦𑀢𑁆𑀣𑀁 𑀏𑀓𑀁 𑀲𑀤𑁆𑀤𑀦𑁆𑀢𑀭𑀁. 𑀲𑁂𑀢𑀺 𑀏𑀢𑁆𑀣𑀸𑀢𑀺 𑀲𑀬𑀦𑀁, 𑀉𑀘𑁆𑀘𑀸𑀲𑀬𑀦𑀁 𑀫𑀳𑀸𑀲𑀬𑀦𑀜𑁆𑀘 𑀲𑀫𑀡𑀲𑀸𑀭𑀼𑀧𑁆𑀧𑀭𑀳𑀺𑀢𑀁 𑀧𑀝𑀺𑀓𑁆𑀔𑀺𑀢𑁆𑀢𑀦𑁆𑀢𑀺 𑀆𑀳 𑁋 ‘‘𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀁 𑀅𑀓𑀧𑁆𑀧𑀺𑀬𑀢𑁆𑀣𑀭𑀡’’𑀦𑁆𑀢𑀺. 𑀆𑀲𑀦𑁆𑀤𑀸𑀤𑀺𑀆𑀲𑀦𑀜𑁆𑀘𑁂𑀢𑁆𑀣 𑀲𑀬𑀦𑁂𑀦𑁂𑀯 𑀲𑀗𑁆𑀕𑀳𑀺𑀢𑀁. 𑀬𑀲𑁆𑀫𑀸 𑀧𑀦 𑀆𑀥𑀸𑀭𑁂 𑀧𑀝𑀺𑀓𑁆𑀔𑀺𑀢𑁆𑀢𑁂 𑀢𑀤𑀸𑀥𑀸𑀭𑀓𑀺𑀭𑀺𑀬𑀸 𑀧𑀝𑀺𑀓𑁆𑀔𑀺𑀢𑁆𑀢𑀸𑀯 𑀳𑁄𑀢𑀺, 𑀢𑀲𑁆𑀫𑀸 ‘‘𑀉𑀘𑁆𑀘𑀸𑀲𑀬𑀦𑀫𑀳𑀸𑀲𑀬𑀦𑀸’’𑀇𑀘𑁆𑀘𑁂𑀯 𑀯𑀼𑀢𑁆𑀢𑀁. 𑀅𑀢𑁆𑀣𑀢𑁄 𑀧𑀦 𑀢𑀤𑀼𑀧𑀪𑁄𑀕𑀪𑀽𑀢𑀦𑀺𑀲𑀚𑁆𑀚𑀸𑀦𑀺𑀧𑀚𑁆𑀚𑀦𑁂𑀳𑀺 𑀯𑀺𑀭𑀢𑀺 𑀤𑀲𑁆𑀲𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀣 𑀯𑀸 𑀉𑀘𑁆𑀘𑀸𑀲𑀬𑀦𑀫𑀳𑀸𑀲𑀬𑀦𑀜𑁆𑀘 𑀉𑀘𑁆𑀘𑀸𑀲𑀬𑀦𑀫𑀳𑀸𑀲𑀬𑀦𑀜𑁆𑀘𑀸𑀢𑀺 𑀉𑀘𑁆𑀘𑀸𑀲𑀬𑀦𑀫𑀳𑀸𑀲𑀬𑀦𑀦𑁆𑀢𑀺 𑀏𑀢𑀲𑁆𑀫𑀺𑀁 𑀅𑀢𑁆𑀣𑁂 𑀏𑀓𑀲𑁂𑀲𑀦𑀬𑁂𑀦 𑀅𑀬𑀁 𑀦𑀺𑀤𑁆𑀤𑁂𑀲𑁄 𑀓𑀢𑁄 𑀬𑀣𑀸 𑁋 ‘‘𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀲𑀴𑀸𑀬𑀢𑀦’’𑀦𑁆𑀢𑀺 (𑀉𑀤𑀸. 𑁧). 𑀆𑀲𑀦𑀓𑀺𑀭𑀺𑀬𑀸𑀧𑀼𑀩𑁆𑀩𑀓𑀢𑁆𑀢𑀸 𑀯𑀸 𑀲𑀬𑀦𑀓𑀺𑀭𑀺𑀬𑀸𑀬 𑀲𑀬𑀦𑀕𑁆𑀕𑀳𑀡𑁂𑀦𑁂𑀯 𑀆𑀲𑀦𑀫𑁆𑀧𑀺 𑀕𑀳𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑁩. 𑀚𑀸𑀢𑀭𑀽𑀧𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁫𑁩. 𑀅𑀜𑁆𑀜𑁂𑀧𑀺 𑀉𑀕𑁆𑀕𑀳𑀸𑀧𑀦𑁂 𑀉𑀧𑀦𑀺𑀓𑁆𑀔𑀺𑀢𑁆𑀢𑀲𑀸𑀤𑀺𑀬𑀦𑁂 𑀘 𑀧𑀝𑀺𑀕𑁆𑀕𑀳𑀡𑀢𑁆𑀣𑁄 𑀮𑀩𑁆𑀪𑀢𑀻𑀢𑀺 𑀆𑀳 𑁋 ‘‘𑀦 𑀉𑀕𑁆𑀕𑀡𑁆𑀳𑀸𑀧𑁂𑀦𑁆𑀢𑀺, 𑀦 𑀉𑀧𑀦𑀺𑀓𑁆𑀔𑀺𑀢𑁆𑀢𑀁 𑀲𑀸𑀤𑀺𑀬𑀦𑁆𑀢𑀻’’𑀢𑀺. 𑀅𑀣 𑀯𑀸 𑀢𑀺𑀯𑀺𑀥𑀁 𑀧𑀝𑀺𑀕𑁆𑀕𑀳𑀡𑀁 𑀓𑀸𑀬𑁂𑀦 𑀯𑀸𑀘𑀸𑀬 𑀫𑀦𑀲𑀸𑀢𑀺. 𑀢𑀢𑁆𑀣 𑀓𑀸𑀬𑁂𑀦 𑀧𑀝𑀺𑀕𑁆𑀕𑀳𑀡𑀁 𑀉𑀕𑁆𑀕𑀳𑀡𑀁, 𑀯𑀸𑀘𑀸𑀬 𑀧𑀝𑀺𑀕𑁆𑀕𑀳𑀡𑀁 𑀉𑀕𑁆𑀕𑀳𑀸𑀧𑀡𑀁, 𑀫𑀦𑀲𑀸 𑀧𑀝𑀺𑀕𑁆𑀕𑀳𑀡𑀁 𑀲𑀸𑀤𑀺𑀬𑀦𑀁. 𑀢𑀺𑀯𑀺𑀥𑀫𑁆𑀧𑀺 𑀧𑀝𑀺𑀕𑁆𑀕𑀳𑀡𑀁 𑀲𑀸𑀫𑀜𑁆𑀜𑀦𑀺𑀤𑁆𑀤𑁂𑀲𑁂𑀦, 𑀏𑀓𑀲𑁂𑀲𑀦𑀬𑁂𑀦 𑀯𑀸 𑀕𑀳𑁂𑀢𑁆𑀯𑀸 ‘‘𑀧𑀝𑀺𑀕𑁆𑀕𑀳𑀡𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 𑁋 ‘‘𑀦𑁂𑀯 𑀦𑀁 𑀉𑀕𑁆𑀕𑀡𑁆𑀳𑀦𑁆𑀢𑀻’’𑀢𑀺𑀆𑀤𑀺. 𑀏𑀲 𑀦𑀬𑁄 ‘‘𑀆𑀫𑀓𑀥𑀜𑁆𑀜𑀧𑀝𑀺𑀕𑁆𑀕𑀳𑀡𑀸’’𑀢𑀺𑀆𑀤𑀻𑀲𑀼𑀧𑀺.

𑁪. 𑀆𑀫𑀓𑀥𑀜𑁆𑀜𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁫𑁪. 𑀦𑀻𑀯𑀸𑀭𑀸𑀤𑀺𑀉𑀧𑀥𑀜𑁆𑀜𑀲𑁆𑀲 𑀲𑀸𑀮𑀺𑀆𑀤𑀺𑀫𑀽𑀮𑀥𑀜𑁆𑀜𑀦𑁆𑀢𑁄𑀕𑀥𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀲𑀢𑁆𑀢𑀯𑀺𑀥𑀲𑁆𑀲𑀸’’𑀢𑀺.

𑁫. 𑀆𑀫𑀓𑀫𑀁𑀲𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁫𑁫. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀯𑀲𑀸𑀦𑀺 𑀪𑁂𑀲𑀚𑁆𑀚𑀸𑀦𑀺 𑁋 𑀅𑀘𑁆𑀙𑀯𑀲𑀁, 𑀫𑀘𑁆𑀙𑀯𑀲𑀁, 𑀲𑀼𑀲𑀼𑀓𑀸𑀯𑀲𑀁, 𑀲𑀽𑀓𑀭𑀯𑀲𑀁, 𑀕𑀤𑁆𑀭𑀪𑀯𑀲’’𑀦𑁆𑀢𑀺 (𑀫𑀳𑀸𑀯. 𑁨𑁬𑁨; 𑀧𑀸𑀭𑀸. 𑀅𑀝𑁆𑀞. 𑁬𑁨𑁩) 𑀯𑀼𑀢𑁆𑀢𑀢𑁆𑀢𑀸 𑀇𑀤𑀁 𑀉𑀤𑁆𑀤𑀺𑀲𑁆𑀲 𑀅𑀦𑀼𑀜𑁆𑀜𑀸𑀢𑀁 𑀦𑀸𑀫. 𑀢𑀲𑁆𑀲 𑀧𑀦 ‘‘𑀓𑀸𑀮𑁂 𑀧𑀝𑀺𑀕𑁆𑀕𑀳𑀺𑀢’’𑀦𑁆𑀢𑀺 (𑀫𑀳𑀸𑀯. 𑁨𑁬𑁨) 𑀯𑀼𑀢𑁆𑀢𑀢𑁆𑀢𑀸 𑀧𑀝𑀺𑀕𑁆𑀕𑀳𑀡𑀁 𑀯𑀝𑁆𑀝𑀢𑀻𑀢𑀺 𑀆𑀳 𑁋 ‘‘𑀅𑀜𑁆𑀜𑀢𑁆𑀭 𑀉𑀤𑁆𑀤𑀺𑀲𑁆𑀲 𑀅𑀦𑀼𑀜𑁆𑀜𑀸𑀢𑀸’’𑀢𑀺. 𑀯𑀺𑀦𑀬𑀯𑀲𑁂𑀦 𑀉𑀧𑀧𑀭𑀺𑀓𑁆𑀔𑀺𑀢𑀩𑁆𑀩𑁄, 𑀢𑀲𑁆𑀫𑀸 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬 𑀯𑀺𑀦𑀬𑀝𑁆𑀞𑀓𑀣𑀸𑀬 𑀯𑀼𑀢𑁆𑀢𑀦𑀬𑁂𑀦𑁂𑀢𑁆𑀣 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄.

𑁧𑁦. 𑀘𑀢𑀼𑀢𑁆𑀣𑀆𑀫𑀓𑀥𑀜𑁆𑀜𑀧𑁂𑀬𑁆𑀬𑀸𑀮𑀯𑀕𑁆𑀕𑁄

𑁨-𑁩. 𑀓𑀬𑀯𑀺𑀓𑁆𑀓𑀬𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁧𑁬𑁨-𑁬𑁩. 𑀓𑀲𑁆𑀲𑀘𑀺 𑀪𑀡𑁆𑀟𑀲𑁆𑀲 𑀕𑀳𑀡𑀁 𑀓𑀬𑁄, 𑀤𑀸𑀦𑀁 𑀯𑀺𑀓𑁆𑀓𑀬𑁄. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀕𑀸𑀫𑀦𑁆𑀢𑀭𑁂 𑀲𑀦𑁆𑀢𑀺𑀓𑁂 𑀘 𑀕𑀫𑀦𑀁 𑀤𑀽𑀢𑀓𑀫𑁆𑀫𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺 𑀬𑁄𑀚𑀦𑀸. 𑀧𑀳𑀺𑀡𑀕𑀫𑀦𑀁 𑀔𑀼𑀤𑁆𑀤𑀓𑀕𑀫𑀦𑀁.

𑁪. 𑀢𑀼𑀮𑀸𑀓𑀽𑀝𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁬𑁪. 𑀭𑀽𑀧𑀓𑀽𑀝𑀁 𑀲𑀭𑀽𑀧𑁂𑀦 𑀲𑀤𑀺𑀲𑁂𑀦 𑀙𑀮𑀯𑁄𑀳𑀸𑀭𑁄. 𑀅𑀗𑁆𑀕𑀓𑀽𑀝𑀁 𑀅𑀢𑁆𑀢𑀦𑁄 𑀳𑀢𑁆𑀣𑀸𑀤𑀺𑀦𑀸 𑀅𑀗𑁆𑀕𑀸𑀦𑀁 𑀙𑀮𑀓𑀭𑀡𑀁. 𑀕𑀳𑀡𑀓𑀽𑀝𑀁 𑀫𑀸𑀦𑁂𑀲𑀼 𑀕𑀳𑀡𑀯𑀲𑁂𑀦. 𑀧𑀝𑀺𑀘𑁆𑀙𑀦𑁆𑀦𑀓𑀽𑀝𑀁 𑀅𑀬𑀘𑀼𑀡𑁆𑀡𑀸𑀤𑀺𑀦𑀸 𑀧𑀝𑀺𑀘𑁆𑀙𑀦𑁆𑀦𑁂𑀦 𑀙𑀮𑀓𑀭𑀡𑀁. 𑀫𑀳𑀢𑀺𑀬𑀸 𑀢𑀼𑀮𑀸𑀬. 𑀧𑀘𑁆𑀙𑀸𑀪𑀸𑀕𑁂𑀢𑀺 𑀢𑀼𑀮𑀸𑀬 𑀧𑀘𑁆𑀙𑀺𑀫𑀪𑀸𑀕𑁂. 𑀳𑀢𑁆𑀣𑁂𑀦𑀸𑀢𑀺 𑀳𑀢𑁆𑀣𑀧𑀤𑁂𑀲𑁂𑀦. 𑀅𑀓𑁆𑀓𑀫𑀢𑀻𑀢𑀺 𑀉𑀝𑁆𑀞𑀸𑀢𑀼𑀁 𑀅𑀤𑁂𑀦𑁆𑀢𑁄 𑀕𑀡𑁆𑀳𑀸𑀢𑀺. 𑀤𑀤𑀦𑁆𑀢𑁄 𑀧𑀼𑀩𑁆𑀩𑀪𑀸𑀕𑁂𑀢𑀺 𑀧𑀭𑁂𑀲𑀁 𑀤𑀤𑀦𑁆𑀢𑁄 𑀧𑀼𑀩𑁆𑀩𑀪𑀸𑀕𑁂 𑀳𑀢𑁆𑀣𑁂𑀦 𑀢𑀼𑀮𑀁 𑀅𑀓𑁆𑀓𑀫𑀢𑀺. 𑀢𑀦𑁆𑀢𑀺 𑀅𑀬𑀘𑀼𑀡𑁆𑀡𑀁.

𑀮𑁄𑀳𑀧𑀸𑀢𑀺𑀬𑁄𑀢𑀺 𑀢𑀫𑁆𑀩𑀮𑁄𑀳𑀧𑀸𑀢𑀺𑀬𑁄. 𑀲𑀼𑀯𑀡𑁆𑀡𑀯𑀡𑁆𑀡𑀸 𑀓𑀭𑁄𑀦𑁆𑀢𑀻𑀢𑀺 𑀅𑀲𑀦𑀺𑀔𑀸𑀤𑀲𑀼𑀯𑀡𑁆𑀡𑀓𑀦𑀓𑀮𑀺𑀫𑁆𑀧𑀺𑀢𑀸 𑀲𑀼𑀯𑀡𑁆𑀡𑀯𑀡𑁆𑀡𑀸 𑀓𑀭𑁄𑀦𑁆𑀢𑀺. 𑀫𑀸𑀦𑀪𑀸𑀚𑀦𑀲𑁆𑀲 𑀳𑀤𑀬𑀪𑀽𑀢𑀲𑁆𑀲 𑀅𑀩𑁆𑀪𑀦𑁆𑀢𑀭𑀲𑁆𑀲 𑀪𑀺𑀦𑁆𑀦𑀁 𑀳𑀤𑀬𑀪𑁂𑀤𑁄. 𑀦𑀺𑀫𑀺𑀬𑀫𑀸𑀦𑀲𑁆𑀲 𑀢𑀺𑀮𑀢𑀡𑁆𑀟𑀼𑀮𑀸𑀤𑀺𑀓𑀲𑁆𑀲 𑀲𑀺𑀔𑀸𑀬 𑀅𑀕𑁆𑀕𑀓𑁄𑀝𑀺𑀬𑀸 𑀪𑀺𑀦𑁆𑀦𑀁 𑀲𑀺𑀔𑀸𑀪𑁂𑀤𑁄. 𑀔𑁂𑀢𑁆𑀢𑀸𑀤𑀻𑀦𑀁 𑀫𑀺𑀦𑀦𑀭𑀚𑁆𑀚𑀼𑀬𑀸 𑀅𑀜𑁆𑀜𑀣𑀸𑀓𑀭𑀡𑀁 𑀭𑀚𑁆𑀚𑀼𑀪𑁂𑀤𑁄. 𑀭𑀚𑁆𑀚𑀼𑀕𑀳𑀡𑁂𑀦𑁂𑀯 𑀘𑁂𑀢𑁆𑀣 𑀤𑀡𑁆𑀟𑀓𑀲𑁆𑀲 𑀕𑀳𑀡𑀁 𑀓𑀢𑀫𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁.

𑁬-𑁧𑁧. 𑀙𑁂𑀤𑀦𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁧𑁬𑁬-𑁭𑁧. 𑀯𑀥𑁄𑀢𑀺 𑀫𑀼𑀝𑁆𑀞𑀺𑀧𑁆𑀧𑀳𑀸𑀭𑀓𑀲𑀸𑀢𑀸𑀴𑀦𑀸𑀤𑀻𑀳𑀺 𑀳𑀺𑀁𑀲𑀦𑀁, 𑀯𑀺𑀳𑁂𑀞𑀦𑀦𑁆𑀢𑀺 𑀅𑀢𑁆𑀣𑁄. 𑀯𑀺𑀳𑁂𑀞𑀦𑀢𑁆𑀣𑁄𑀧𑀺 𑀳𑀺 𑀯𑀥-𑀲𑀤𑁆𑀤𑁄 𑀤𑀺𑀲𑁆𑀲𑀢𑀺 ‘‘𑀅𑀢𑁆𑀣𑀸𑀦𑀁 𑀯𑀥𑀺𑀢𑁆𑀯𑀸 𑀯𑀥𑀺𑀢𑁆𑀯𑀸 𑀭𑁄𑀤𑁂𑀬𑁆𑀬𑀸’’𑀢𑀺𑀆𑀤𑀻𑀲𑀼. 𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀫𑀸𑀭𑀡’’𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀁 𑀧𑀦 𑀧𑁄𑀣𑀦𑀁 𑀲𑀦𑁆𑀥𑀸𑀬𑀸𑀢𑀺 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀁 𑀫𑀸𑀭𑀡𑀲𑀤𑁆𑀤𑀲𑁆𑀲 𑀯𑀺𑀳𑀺𑀁𑀲𑀦𑁂𑀧𑀺 𑀤𑀺𑀲𑁆𑀲𑀦𑀢𑁄. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀆𑀫𑀓𑀥𑀜𑁆𑀜𑀧𑁂𑀬𑁆𑀬𑀸𑀮𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀸𑀭𑀢𑁆𑀣𑀧𑁆𑀧𑀓𑀸𑀲𑀺𑀦𑀺𑀬𑀸 𑀲𑀁𑀬𑀼𑀢𑁆𑀢𑀦𑀺𑀓𑀸𑀬-𑀅𑀝𑁆𑀞𑀓𑀣𑀸𑀬

𑀫𑀳𑀸𑀯𑀕𑁆𑀕𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀕𑀫𑀦𑀓𑀣𑀸𑀯𑀡𑁆𑀡𑀦𑀸

𑀲𑀓𑀮𑀭𑀽𑀧𑀸𑀭𑀽𑀧𑀲𑀫𑁆𑀫𑀲𑀦𑁂 𑀲𑀡𑁆𑀳𑀲𑀼𑀔𑀼𑀫𑀯𑀺𑀲𑀬𑀜𑀸𑀡𑀢𑀸𑀬 𑀯𑀺𑀧𑀲𑁆𑀲𑀦𑀸𑀘𑀸𑀭𑀦𑀺𑀧𑀼𑀡𑀩𑀼𑀤𑁆𑀥𑀻𑀦𑀁 𑀲𑀼𑀲𑀁𑀬𑀢𑀓𑀸𑀬𑀯𑀘𑀻𑀲𑀫𑀸𑀘𑀸𑀭𑀢𑀸𑀬 𑀲𑀫𑀣𑀯𑀺𑀧𑀲𑁆𑀲𑀦𑀸𑀲𑀼 𑀲𑀫𑁆𑀫𑀤𑁂𑀯 𑀬𑀢𑀦𑀢𑁄 𑀘 𑀬𑀢𑀻𑀦𑀁 𑀪𑀺𑀓𑁆𑀔𑀽𑀦𑀁 𑀔𑀦𑁆𑀥𑀸𑀬𑀢𑀦𑀥𑀸𑀢𑀼𑀲𑀘𑁆𑀘𑀺𑀦𑁆𑀤𑁆𑀭𑀺𑀬𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀪𑁂𑀤𑁂 𑀧𑀭𑀫𑀢𑁆𑀣𑀥𑀫𑁆𑀫𑁂 𑀦𑀸𑀦𑀸𑀦𑀬𑁂𑀳𑀺 𑀜𑀸𑀡𑀯𑀺𑀪𑀸𑀕𑀲𑁆𑀲 𑀲𑀦𑁆𑀦𑀺𑀲𑁆𑀲𑀬𑁂𑀦 𑀩𑀳𑀼𑀓𑀸𑀭𑀲𑁆𑀲 𑀲𑀁𑀬𑀼𑀢𑁆𑀢𑀸𑀕𑀫𑀯𑀭𑀲𑁆𑀲 𑀅𑀢𑁆𑀣𑀲𑀁𑀯𑀡𑁆𑀡𑀦𑀁 𑀓𑀸𑀢𑀼𑀁 𑀲𑀸𑀭𑀢𑁆𑀣𑀧𑁆𑀧𑀓𑀸𑀲𑀦𑀢𑁄 𑀏𑀯 𑀦𑀺𑀧𑀼𑀡𑀸 𑀬𑀸 𑀫𑀬𑀸 𑀅𑀝𑁆𑀞𑀓𑀣𑀸 𑀆𑀭𑀤𑁆𑀥𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀯𑀺𑀲𑁂𑀲𑀁 𑀧𑀜𑁆𑀜𑀸𑀯𑀳𑀕𑀼𑀡𑀢𑁆𑀢𑀸 𑀏𑀯 𑀳𑀺𑀲𑁆𑀲 𑀕𑀦𑁆𑀣𑀸𑀭𑀫𑁆𑀪𑁂 𑀆𑀤𑀺𑀢𑁄𑀧𑀺 ‘‘𑀧𑀜𑁆𑀜𑀸𑀧𑀪𑁂𑀤𑀚𑀦𑀦𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁. 𑀫𑀳𑀸𑀅𑀝𑁆𑀞𑀓𑀣𑀸𑀬 𑀲𑀸𑀭𑀦𑁆𑀢𑀺 𑀲𑀁𑀬𑀼𑀢𑁆𑀢𑀫𑀳𑀸𑀅𑀝𑁆𑀞𑀓𑀣𑀸𑀬 𑀲𑀸𑀭𑀁. 𑀏𑀓𑀽𑀦𑀲𑀝𑁆𑀞𑀺𑀫𑀢𑁆𑀢𑁄𑀢𑀺 𑀣𑁄𑀓𑀁 𑀊𑀦𑀪𑀸𑀯𑀢𑁄 𑀫𑀢𑁆𑀢-𑀲𑀤𑁆𑀤𑀕𑁆𑀕𑀳𑀡𑀁.

𑀫𑀽𑀮𑀝𑁆𑀞𑀓𑀣𑀸𑀬 𑀲𑀸𑀭𑀦𑁆𑀢𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀲𑀁𑀬𑀼𑀢𑁆𑀢𑀫𑀳𑀸𑀅𑀝𑁆𑀞𑀓𑀣𑀸𑀬 𑀲𑀸𑀭𑀫𑁂𑀯 𑀧𑀼𑀦 𑀦𑀺𑀕𑀫𑀦𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺. 𑀅𑀣 𑀯𑀸 𑀫𑀽𑀮𑀝𑁆𑀞𑀓𑀣𑀸𑀬 𑀲𑀸𑀭𑀦𑁆𑀢𑀺 𑀧𑁄𑀭𑀸𑀡𑀝𑁆𑀞𑀓𑀣𑀸𑀲𑀼 𑀅𑀢𑁆𑀣𑀲𑀸𑀭𑀁. 𑀢𑁂𑀦 𑀏𑀢𑀁 𑀤𑀲𑁆𑀲𑁂𑀢𑀺 ‘‘𑀲𑀁𑀬𑀼𑀢𑁆𑀢𑀫𑀳𑀸𑀅𑀝𑁆𑀞𑀓𑀣𑀸𑀬 𑀅𑀢𑁆𑀣𑀲𑀸𑀭𑀁 𑀆𑀤𑀸𑀬 𑀇𑀫𑀁 𑀲𑀸𑀭𑀢𑁆𑀣𑀧𑁆𑀧𑀓𑀸𑀲𑀺𑀦𑀺𑀁 𑀓𑀭𑁄𑀦𑁆𑀢𑁂𑀦 𑀲𑁂𑀲𑀫𑀳𑀸𑀦𑀺𑀓𑀸𑀬𑀸𑀦𑀫𑁆𑀧𑀺 𑀫𑀽𑀮𑀝𑁆𑀞𑀓𑀣𑀸𑀲𑀼 𑀇𑀥 𑀯𑀺𑀬𑁄𑀕𑀓𑁆𑀔𑀫𑀁 𑀅𑀢𑁆𑀣𑀲𑀸𑀭𑀁 𑀆𑀤𑀸𑀬 𑀅𑀓𑀸𑀲𑀺’’𑀦𑁆𑀢𑀺. ‘‘𑀫𑀳𑀸𑀯𑀺𑀳𑀸𑀭𑀸𑀥𑀺𑀯𑀸𑀲𑀻𑀦’’𑀦𑁆𑀢𑀺 𑀘 𑀇𑀤𑀁 𑀧𑀼𑀭𑀺𑀫𑀧𑀘𑁆𑀙𑀺𑀫𑀧𑀤𑁂𑀳𑀺 𑀲𑀤𑁆𑀥𑀺𑀁 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁 ‘‘𑀫𑀳𑀸𑀯𑀺𑀳𑀸𑀭𑀸𑀥𑀺𑀯𑀸𑀲𑀻𑀦𑀁 𑀲𑀫𑀬𑀁 𑀧𑀓𑀸𑀲𑀬𑀦𑁆𑀢𑀺𑀁 𑀫𑀳𑀸𑀯𑀺𑀳𑀸𑀭𑀸𑀥𑀺𑀯𑀸𑀲𑀻𑀦𑀁 𑀫𑀽𑀮𑀝𑁆𑀞𑀓𑀣𑀸𑀬 𑀲𑀸𑀭𑀁 𑀆𑀤𑀸𑀬𑀸’’𑀢𑀺 𑀘. 𑀢𑁂𑀦 𑀧𑀼𑀜𑁆𑀜𑁂𑀦. 𑀳𑁄𑀢𑀼 𑀲𑀩𑁆𑀩𑁄 𑀲𑀼𑀔𑀻 𑀮𑁄𑀓𑁄𑀢𑀺 𑀓𑀸𑀫𑀸𑀯𑀘𑀭𑀸𑀤𑀺𑀯𑀺𑀪𑀸𑀕𑁄 𑀲𑀩𑁆𑀩𑁄 𑀲𑀢𑁆𑀢𑀮𑁄𑀓𑁄 𑀬𑀣𑀸𑀭𑀳𑀁 𑀩𑁄𑀥𑀺𑀢𑁆𑀢𑀬𑀸𑀥𑀺𑀕𑀫𑀯𑀲𑁂𑀦 𑀲𑀫𑁆𑀧𑀬𑀼𑀢𑁆𑀢𑁂𑀦 𑀦𑀺𑀩𑁆𑀩𑀸𑀦𑀲𑀼𑀔𑁂𑀦 𑀲𑀼𑀔𑀺𑀢𑁄 𑀳𑁄𑀢𑀽𑀢𑀺 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀅𑀘𑁆𑀘𑀦𑁆𑀢𑀁 𑀲𑀼𑀔𑀸𑀥𑀺𑀕𑀫𑀸𑀬 𑀅𑀢𑁆𑀢𑀦𑁄 𑀧𑀼𑀜𑁆𑀜𑀁 𑀧𑀭𑀺𑀡𑀸𑀫𑁂𑀢𑀺.

𑀏𑀢𑁆𑀢𑀸𑀯𑀢𑀸 𑀲𑀸𑀭𑀢𑁆𑀣𑀧𑁆𑀧𑀓𑀸𑀲𑀺𑀦𑀺𑀬𑀸

𑀲𑀁𑀬𑀼𑀢𑁆𑀢𑀦𑀺𑀓𑀸𑀬-𑀅𑀝𑁆𑀞𑀓𑀣𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀁𑀬𑀼𑀢𑁆𑀢𑀝𑀻𑀓𑀸 𑀲𑀫𑀢𑁆𑀢𑀸.