𑁨. 𑀩𑁆𑀭𑀳𑁆𑀫𑀘𑀭𑀺𑀬𑁄𑀕𑀥𑀲𑀼𑀢𑁆𑀢𑀯𑀡𑁆𑀡𑀦𑀸

𑁯𑁯𑁮. 𑀬𑁂𑀲𑀦𑁆𑀢𑀺 𑀅𑀦𑀺𑀬𑀫𑀢𑁄 𑀲𑀤𑁆𑀥𑀸𑀤𑀻𑀦𑀫𑀸𑀥𑀸𑀭𑀪𑀽𑀢𑀧𑀼𑀕𑁆𑀕𑀮𑀤𑀲𑁆𑀲𑀦𑀁. 𑀩𑀼𑀤𑁆𑀥𑁂 𑀧𑀲𑀸𑀤𑁄 𑀕𑀳𑀺𑀢𑁄. 𑀲𑁄 𑀳𑀺 𑀇𑀢𑀭𑁂𑀳𑀺 𑀧𑀞𑀫𑀁 𑀕𑀳𑁂𑀢𑀩𑁆𑀩𑁄𑀢𑀺. 𑀅𑀭𑀺𑀬𑀓𑀦𑁆𑀢𑀸𑀦𑀺 𑀲𑀻𑀮𑀸𑀦𑀺 𑀕𑀳𑀺𑀢𑀸𑀦𑀺 𑀲𑁄𑀢𑀸𑀧𑀦𑁆𑀦𑀲𑁆𑀲 𑀲𑀻𑀮𑀸𑀦𑀁 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀲𑀗𑁆𑀖𑁂 𑀧𑀲𑀸𑀤𑁄 𑀕𑀳𑀺𑀢𑁄 𑀥𑀫𑁆𑀫𑀧𑁆𑀧𑀲𑀸𑀤𑀲𑁆𑀲 𑀅𑀦𑀦𑁆𑀢𑀭𑀁 𑀯𑀼𑀘𑁆𑀘𑀫𑀸𑀦𑀢𑁆𑀢𑀸. 𑀥𑀫𑁆𑀫𑁂 𑀧𑀲𑀸𑀤𑁄 𑀕𑀳𑀺𑀢𑁄 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑀪𑀸𑀯𑀢𑁄. 𑀲𑁄𑀢𑀁 𑀅𑀭𑀺𑀬𑀫𑀕𑁆𑀕𑀁 𑀆𑀤𑀺𑀢𑁄 𑀧𑀢𑁆𑀢𑀺 𑀲𑁄𑀢𑀸𑀧𑀢𑁆𑀢𑀺, 𑀢𑀲𑁆𑀲𑀸 𑀅𑀗𑁆𑀕𑀸𑀦𑀺 𑀲𑁄𑀢𑀸𑀧𑀢𑁆𑀢𑀺𑀬𑀗𑁆𑀕𑀸𑀦𑀺. 𑀧𑀘𑁆𑀘𑁂𑀦𑁆𑀢𑀻𑀢𑀺 𑀧𑀚𑀸𑀬𑀦𑁆𑀢𑀺 𑀅𑀥𑀺𑀕𑀘𑁆𑀙𑀦𑁆𑀢𑀺. 𑀢𑁂𑀦𑀸𑀳 ‘‘𑀧𑀸𑀧𑀼𑀡𑀦𑁆𑀢𑀻’’𑀢𑀺. 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀁. 𑀓𑀢𑀭𑀧𑀲𑀸𑀤𑁄 𑀯𑀢𑁆𑀢𑀫𑀸𑀦𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀫𑀕𑁆𑀕𑀧𑁆𑀧𑀲𑀸𑀤𑁄𑀢𑀺 𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑁄 𑀧𑀲𑀸𑀤𑁄. 𑀆𑀕𑀢𑀫𑀕𑁆𑀕𑀲𑁆𑀲𑀸𑀢𑀺 𑀅𑀥𑀺𑀕𑀢𑀫𑀕𑁆𑀕𑀲𑁆𑀲. 𑀫𑀺𑀲𑁆𑀲𑀓𑀧𑁆𑀧𑀲𑀸𑀤𑁄 𑀏𑀲𑁄𑀢𑀺 𑀢𑀲𑁆𑀫𑀸 𑀉𑀪𑁄𑀧𑀺 𑀣𑁂𑀭𑀸 𑀧𑀡𑁆𑀟𑀺𑀢𑀸 𑀩𑀳𑀼𑀲𑁆𑀲𑀼𑀢𑀸.