𑁧. 𑀫𑀕𑁆𑀕𑀲𑀁𑀬𑀼𑀢𑁆𑀢𑀁

𑁧. 𑀅𑀯𑀺𑀚𑁆𑀚𑀸𑀯𑀕𑁆𑀕𑁄

𑁧-𑁨. 𑀅𑀯𑀺𑀚𑁆𑀚𑀸𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧-𑁨. 𑀧𑀼𑀩𑁆𑀩𑀗𑁆𑀕𑀫𑀸𑀢𑀺 𑀧𑀼𑀩𑁆𑀩𑁂𑀘𑀭𑀸. 𑀅𑀯𑀺𑀚𑁆𑀚𑀸 𑀳𑀺 𑀅𑀜𑁆𑀜𑀸𑀡𑀮𑀓𑁆𑀔𑀡𑀸 𑀲𑀫𑁆𑀫𑀼𑀬𑁆𑀳𑀦𑀸𑀓𑀸𑀭𑁂𑀦 𑀆𑀭𑀫𑁆𑀫𑀡𑁂 𑀧𑀯𑀢𑁆𑀢𑀢𑀻𑀢𑀺 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀫𑁆𑀧𑀺 𑀢𑀤𑀸𑀓𑀸𑀭𑀸𑀦𑀼𑀯𑀺𑀥𑀸𑀦𑀢𑀸𑀬 𑀧𑀘𑁆𑀘𑀬𑁄 𑀳𑁄𑀢𑀺. 𑀢𑀣𑀸 𑀳𑀺 𑀢𑁂 𑀅𑀦𑀺𑀘𑁆𑀘𑀸𑀲𑀼𑀪𑀤𑀼𑀓𑁆𑀔𑀸𑀦𑀢𑁆𑀢𑀲𑀪𑀸𑀯𑁂𑀧𑀺 𑀥𑀫𑁆𑀫𑁂 𑀦𑀺𑀘𑁆𑀘𑀸𑀤𑀺𑀢𑁄 𑀕𑀡𑁆𑀳𑀦𑁆𑀢𑀺, 𑀅𑀬𑀫𑀲𑁆𑀲𑀸 𑀢𑁂𑀲𑀁 𑀲𑀳𑀚𑀸𑀢𑀯𑀲𑁂𑀦 𑀧𑀼𑀩𑁆𑀩𑀗𑁆𑀕𑀫𑀢𑀸. 𑀬𑀁 𑀧𑀦 𑀫𑁄𑀳𑁂𑀦 𑀅𑀪𑀺𑀪𑀽𑀢𑁄 𑀧𑀸𑀧𑀓𑀺𑀭𑀺𑀬𑀸𑀬 𑀆𑀤𑀻𑀦𑀯𑀁 𑀅𑀧𑀲𑁆𑀲𑀦𑁆𑀢𑁄 𑀧𑀸𑀡𑀁 𑀳𑀦𑀢𑀺, 𑀅𑀤𑀺𑀦𑁆𑀦𑀁 𑀆𑀤𑀺𑀬𑀢𑀺, 𑀓𑀸𑀫𑁂𑀲𑀼 𑀫𑀺𑀘𑁆𑀙𑀸 𑀘𑀭𑀢𑀺, 𑀫𑀼𑀲𑀸 𑀪𑀡𑀢𑀺, 𑀅𑀜𑁆𑀜𑀫𑁆𑀧𑀺 𑀯𑀺𑀯𑀺𑀥𑀁 𑀤𑀼𑀲𑁆𑀲𑀻𑀮𑁆𑀬𑀁 𑀆𑀘𑀭𑀢𑀺, 𑀅𑀬𑀫𑀲𑁆𑀲 𑀲𑀳𑀚𑀸𑀢𑀯𑀲𑁂𑀦 𑀘 𑀉𑀧𑀦𑀺𑀲𑁆𑀲𑀬𑀯𑀲𑁂𑀦 𑀘 𑀧𑀼𑀩𑁆𑀩𑀗𑁆𑀕𑀫𑀢𑀸. 𑀲𑀫𑀸𑀧𑀚𑁆𑀚𑀦𑀸𑀬𑀸𑀢𑀺 𑀢𑀩𑁆𑀪𑀸𑀯𑀸𑀧𑀚𑁆𑀚𑀦𑀸𑀬 𑀅𑀓𑀼𑀲𑀮𑀧𑁆𑀧𑀢𑁆𑀢𑀺𑀬𑀸. 𑀲𑀪𑀸𑀯𑀧𑀝𑀺𑀮𑀸𑀪𑀸𑀬𑀸𑀢𑀺 𑀅𑀢𑁆𑀢𑀮𑀸𑀪𑀸𑀬. 𑀢𑁂𑀦𑀸𑀳 ‘‘𑀉𑀧𑁆𑀧𑀢𑁆𑀢𑀺𑀬𑀸’’𑀢𑀺. 𑀲𑀸 𑀧𑀦𑁂𑀲𑀸 𑀯𑀼𑀢𑁆𑀢𑀸𑀓𑀸𑀭𑁂𑀦 𑀅𑀓𑀼𑀲𑀮𑀸𑀦𑀁 𑀧𑀼𑀩𑁆𑀩𑀗𑁆𑀕𑀫𑀪𑀽𑀢𑀸 𑀅𑀯𑀺𑀚𑁆𑀚𑀸 𑀉𑀧𑁆𑀧𑀚𑁆𑀚𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀬𑀤𑁂𑀢𑀦𑁆𑀢𑀺 𑀬𑀁 𑀏𑀢𑀁 𑀧𑀸𑀧𑀸𑀚𑀺𑀕𑀼𑀘𑁆𑀙𑀦𑀢𑀸𑀬 𑀧𑀸𑀧𑀢𑁄 𑀅𑀮𑀚𑁆𑀚𑀦𑀸𑀓𑀸𑀭𑀲𑀡𑁆𑀞𑀺𑀢𑀁 𑀅𑀳𑀺𑀭𑀺𑀓𑀁, 𑀧𑀸𑀧𑀸𑀦𑀼𑀢𑁆𑀭𑀸𑀲𑀢𑀸𑀬 𑀧𑀸𑀧𑀢𑁄 𑀅𑀪𑀸𑀬𑀦𑀸𑀓𑀸𑀭𑀲𑀡𑁆𑀞𑀺𑀢𑀜𑁆𑀘 𑀅𑀦𑁄𑀢𑁆𑀢𑀧𑁆𑀧𑀁, 𑀏𑀢𑀁 𑀤𑁆𑀯𑀬𑀁 𑀅𑀦𑀼𑀤𑁂𑀯 𑀅𑀦𑁆𑀯𑀸𑀕𑀢𑀫𑁂𑀯. 𑀅𑀦𑀼-𑀲𑀤𑁆𑀤𑁂𑀦 𑀘𑁂𑀢𑁆𑀣 𑀏𑀢𑀦𑁆𑀢𑀺 𑀉𑀧𑀬𑁄𑀕𑀯𑀘𑀦𑀁. 𑀅𑀦𑀼𑀤𑁂𑀯𑀸𑀢𑀺 𑀏𑀢𑀲𑁆𑀲 𑀅𑀢𑁆𑀣𑁄 𑀲𑀳𑁂𑀯 𑀏𑀓𑀢𑁄𑀢𑀺. 𑀏𑀢𑁆𑀣 𑀅𑀯𑀺𑀚𑁆𑀚𑀸𑀬 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀢𑀧𑁆𑀧𑀝𑀺𑀧𑀓𑁆𑀔𑀢𑁄 𑀘 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀢𑀢𑁆𑀣 𑀬𑀣𑀸 𑀅𑀓𑀼𑀲𑀮𑀓𑀫𑁆𑀫𑀧𑀣𑀯𑀲𑁂𑀦 𑀧𑀯𑀢𑁆𑀢𑀺𑀬𑀁 𑀧𑀼𑀩𑁆𑀩𑀗𑁆𑀕𑀫𑀢𑀸 𑀅𑀯𑀺𑀚𑁆𑀚𑀸𑀬, 𑀏𑀯𑀁 𑀓𑀼𑀲𑀮𑀓𑀫𑁆𑀫𑀧𑀣𑀯𑀲𑁂𑀦 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼𑀯𑀲𑁂𑀦 𑀘 𑀧𑀯𑀢𑁆𑀢𑀺𑀬𑀁 𑀯𑀺𑀚𑁆𑀚𑀸𑀬 𑀧𑀼𑀩𑁆𑀩𑀗𑁆𑀕𑀫𑀢𑀸 𑀯𑀢𑁆𑀢𑀩𑁆𑀩𑀸. 𑀯𑀻𑀫𑀁𑀲𑀸𑀥𑀺𑀧𑀢𑀺𑀯𑀲𑁂𑀦 𑀧𑀯𑀢𑁆𑀢𑀺𑀬𑀁 𑀆𑀥𑀺𑀧𑀘𑁆𑀘𑀸𑀓𑀸𑀭𑀯𑀲𑁂𑀦 𑀘 𑀧𑀼𑀩𑁆𑀩𑀗𑁆𑀕𑀫𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀤𑁆𑀯𑀻𑀳𑁂𑀯𑀸𑀢𑀺 𑀘 𑀅𑀯𑀥𑀸𑀭𑀡𑀁 𑀆𑀥𑀺𑀧𑀘𑁆𑀘𑀸𑀓𑀸𑀭𑀲𑁆𑀲 𑀲𑀳𑀚𑀸𑀢𑁂𑀦𑁂𑀯 𑀲𑀗𑁆𑀕𑀳𑁂𑀢𑀩𑁆𑀩𑀢𑁄.

𑀮𑀚𑁆𑀚𑀦𑀸𑀓𑀸𑀭𑀲𑀡𑁆𑀞𑀺𑀢𑀸𑀢𑀺 𑀧𑀸𑀧𑀢𑁄 𑀚𑀺𑀕𑀼𑀘𑁆𑀙𑀦𑀸𑀓𑀸𑀭𑀲𑀡𑁆𑀞𑀺𑀢𑀸. 𑀪𑀸𑀬𑀦𑀸𑀓𑀸𑀭𑀲𑀡𑁆𑀞𑀺𑀢𑀦𑁆𑀢𑀺 𑀉𑀢𑁆𑀢𑀲𑀦𑀸𑀓𑀸𑀭𑀲𑀡𑁆𑀞𑀺𑀢𑀁. 𑀏𑀢𑁆𑀣𑀸𑀢𑀺 𑀳𑀺𑀭𑀺𑀑𑀢𑁆𑀢𑀧𑁆𑀧𑁂. 𑀯𑀺𑀤𑀢𑀺, 𑀯𑀺𑀦𑁆𑀤𑀢𑀻𑀢𑀺 𑀯𑀸 𑀯𑀺𑀚𑁆𑀚𑀸. 𑀯𑀺𑀤𑁆𑀤𑀲𑀽𑀢𑀺 𑀘 𑀲𑀧𑁆𑀧𑀜𑁆𑀜𑀧𑀭𑀺𑀬𑀸𑀬𑁄𑀢𑀺 𑀆𑀳 ‘‘𑀯𑀺𑀤𑁆𑀤𑀲𑀼𑀦𑁄𑀢𑀺 𑀯𑀺𑀤𑀼𑀦𑁄’’𑀢𑀺. 𑀬𑀸𑀣𑀸𑀯𑀤𑀺𑀝𑁆𑀞𑀻𑀢𑀺 𑀅𑀯𑀺𑀧𑀭𑀻𑀢𑀸 𑀤𑀺𑀝𑁆𑀞𑀺, 𑀲𑀁𑀓𑀺𑀮𑁂𑀲𑀢𑁄 𑀦𑀺𑀬𑁆𑀬𑀸𑀦𑀺𑀓𑀤𑀺𑀝𑁆𑀞𑀺. 𑀲𑀫𑁆𑀫𑀸𑀤𑀺𑀝𑁆𑀞𑀺 𑀧𑀳𑁄𑀢𑀻𑀢𑀺 𑀏𑀢𑁆𑀣 𑀲𑀸 𑀯𑀺𑀚𑁆𑀚𑀸 𑀲𑀫𑁆𑀫𑀸𑀤𑀺𑀝𑁆𑀞𑀺 𑀯𑁂𑀤𑀺𑀢𑀩𑁆𑀩𑀸. 𑀦 𑀏𑀓𑀢𑁄 𑀲𑀩𑁆𑀩𑀸𑀦𑀺 𑀮𑀩𑁆𑀪𑀦𑁆𑀢𑀺 𑀲𑀫𑁆𑀫𑀸𑀯𑀸𑀘𑀸𑀓𑀫𑁆𑀫𑀦𑁆𑀢𑀸𑀚𑀻𑀯𑀸𑀦𑀁 𑀧𑀼𑀩𑁆𑀩𑀸𑀪𑀺𑀲𑀗𑁆𑀔𑀸𑀭𑀲𑁆𑀲 𑀅𑀦𑁂𑀓𑀭𑀽𑀧𑀢𑁆𑀢𑀸. 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑀓𑁆𑀔𑀡𑁂 𑀏𑀓𑀢𑁄 𑀮𑀩𑁆𑀪𑀦𑁆𑀢𑀺 𑀓𑀺𑀘𑁆𑀘𑀢𑁄 𑀪𑀺𑀦𑁆𑀦𑀸𑀦𑀫𑁆𑀧𑀺 𑀢𑀸𑀲𑀁 𑀢𑀢𑁆𑀣 𑀲𑀭𑀽𑀧𑀢𑁄 𑀅𑀪𑀺𑀦𑁆𑀦𑀢𑁆𑀢𑀸. 𑀏𑀓𑀸 𑀏𑀯 𑀳𑀺 𑀯𑀺𑀭𑀢𑀺 𑀫𑀕𑁆𑀕𑀓𑁆𑀔𑀡𑁂 𑀢𑀺𑀲𑁆𑀲𑀦𑁆𑀦𑀫𑁆𑀧𑀺 𑀯𑀺𑀭𑀢𑀻𑀦𑀁 𑀓𑀺𑀘𑁆𑀘𑀁 𑀲𑀸𑀥𑁂𑀦𑁆𑀢𑀻 𑀧𑀯𑀢𑁆𑀢𑀢𑀺, 𑀬𑀣𑀸 𑀏𑀓𑀸 𑀏𑀯 𑀲𑀫𑁆𑀫𑀸𑀤𑀺𑀝𑁆𑀞𑀺 𑀧𑀭𑀺𑀚𑀸𑀦𑀦𑀸𑀤𑀺𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑀓𑀺𑀘𑁆𑀘𑀁 𑀲𑀸𑀥𑁂𑀦𑁆𑀢𑀻 𑀧𑀯𑀢𑁆𑀢𑀢𑀺. 𑀢𑀸𑀦𑀺 𑀘 𑀔𑁄 𑀲𑀩𑁆𑀩𑀸𑀦𑀺 𑀅𑀝𑁆𑀞𑀧𑀺 𑀧𑀞𑀫𑀚𑁆𑀛𑀸𑀦𑀺𑀓𑁂 𑀫𑀕𑁆𑀕𑁂 𑀮𑀩𑁆𑀪𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀧𑀞𑀫𑀚𑁆𑀛𑀸𑀦𑀺𑀓𑁂𑀢𑀺 𑀧𑀞𑀫𑀛𑀸𑀦𑀯𑀦𑁆𑀢𑁂.

𑀢𑀣𑀸𑀪𑀽𑀢𑀲𑁆𑀲𑀸𑀢𑀺 𑀅𑀭𑀺𑀬𑀫𑀕𑁆𑀕𑀲𑀫𑀗𑁆𑀕𑀺𑀦𑁄. 𑀬𑀲𑁆𑀫𑀸 𑀫𑀳𑀸𑀲𑀴𑀸𑀬𑀢𑀦𑀲𑀼𑀢𑁆𑀢𑁂 𑀯𑀼𑀢𑁆𑀢𑀁 ‘‘𑀲𑀫𑁆𑀫𑀸𑀤𑀺𑀝𑁆𑀞𑀺𑀆𑀤𑀻𑀦𑀁 𑀧𑀜𑁆𑀘𑀦𑁆𑀦𑀁 𑀏𑀯 𑀅𑀗𑁆𑀕𑀸𑀦𑀁 𑀯𑀲𑁂𑀦𑀸’’𑀢𑀺, 𑀢𑀲𑁆𑀫𑀸 𑀧𑀜𑁆𑀘𑀗𑁆𑀕𑀺𑀓𑁄 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑁄 𑀳𑁄𑀢𑀺. ‘‘𑀧𑀼𑀩𑁆𑀩𑁂𑀯 𑀔𑁄 𑀧𑀦𑀸’’𑀢𑀺 𑀳𑀺 𑀯𑀘𑀦𑀁 𑀢𑀤𑀸 𑀫𑀕𑁆𑀕𑀓𑁆𑀔𑀡𑁂 𑀯𑀺𑀭𑀢𑀻𑀦𑀁 𑀅𑀪𑀸𑀯𑀁 𑀜𑀸𑀧𑁂𑀢𑀺, 𑀢𑀲𑁆𑀫𑀸 𑀓𑀸𑀫𑀸𑀯𑀘𑀭𑀘𑀺𑀢𑁆𑀢𑁂𑀲𑀼 𑀯𑀺𑀬 𑀮𑁄𑀓𑀼𑀢𑁆𑀢𑀭𑀘𑀺𑀢𑁆𑀢𑁂𑀲𑀼 𑀯𑀺𑀭𑀢𑀺 𑀅𑀦𑀺𑀬𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀭𑀺𑀲𑀼𑀤𑁆𑀥𑀪𑀸𑀯𑀤𑀲𑁆𑀲𑀦𑀦𑁆𑀢𑀺 𑀧𑀭𑀺𑀲𑀼𑀤𑁆𑀥𑀲𑀻𑀮𑀪𑀸𑀯𑀤𑀲𑁆𑀲𑀦𑀢𑁆𑀣𑀁. 𑀅𑀬𑀫𑀢𑁆𑀣𑁄 𑀤𑀻𑀧𑀺𑀢𑁄, 𑀦 𑀅𑀭𑀺𑀬𑀫𑀕𑁆𑀕𑁂 𑀯𑀺𑀭𑀢𑀻𑀦𑀁 𑀅𑀪𑀸𑀯𑁄.

𑀬𑀤𑀺 𑀏𑀯𑀁 𑀓𑀲𑁆𑀫𑀸 𑀅𑀪𑀺𑀥𑀫𑁆𑀫𑁂 𑀫𑀕𑁆𑀕𑀯𑀺𑀪𑀗𑁆𑀕𑁂 𑀧𑀜𑁆𑀘𑀗𑁆𑀕𑀺𑀓𑀯𑀸𑀭𑁄 𑀆𑀕𑀢𑁄𑀢𑀺 𑀆𑀳 ‘‘𑀬𑀫𑁆𑀧𑀺 𑀅𑀪𑀺𑀥𑀫𑁆𑀫𑁂’’𑀢𑀺𑀆𑀤𑀺. 𑀢𑀦𑁆𑀢𑀺 ‘‘𑀧𑀜𑁆𑀘𑀗𑁆𑀕𑀺𑀓𑁄 𑀫𑀕𑁆𑀕𑁄 𑀳𑁄𑀢𑀻’’𑀢𑀺 𑀯𑀘𑀦𑀁. ‘‘𑀏𑀓𑀁 𑀓𑀺𑀘𑁆𑀘𑀦𑁆𑀢𑀭𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢’’𑀦𑁆𑀢𑀺 𑀯𑀢𑁆𑀯𑀸 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀬𑀲𑁆𑀫𑀺𑀜𑁆𑀳𑀺 𑀓𑀸𑀮𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀬𑀲𑁆𑀫𑀺𑀜𑁆𑀳𑀺 𑀓𑀸𑀮𑁂𑀢𑀺 𑀮𑁄𑀓𑀺𑀬𑀓𑀸𑀮𑁂. 𑀢𑁂𑀦 ‘‘𑀏𑀓𑀁 𑀓𑀺𑀘𑁆𑀘𑀦𑁆𑀢𑀭’’𑀦𑁆𑀢𑀺 𑀯𑀼𑀢𑁆𑀢𑀁 𑀅𑀝𑁆𑀞𑀗𑁆𑀕𑀺𑀓𑀓𑀺𑀘𑁆𑀘𑀁 𑀤𑀲𑁆𑀲𑁂𑀢𑀺. 𑀯𑀺𑀭𑀢𑀺𑀉𑀧𑁆𑀧𑀸𑀤𑀦𑁂𑀦 𑀫𑀺𑀘𑁆𑀙𑀸𑀯𑀸𑀘𑀸𑀤𑀻𑀦𑀺 𑀧𑀼𑀕𑁆𑀕𑀮𑁂𑀦 𑀫𑀕𑁆𑀕𑀲𑀫𑀬𑁂 𑀧𑀚𑀳𑀸𑀧𑁂𑀦𑁆𑀢𑀻𑀢𑀺 𑀲𑀫𑁆𑀫𑀸𑀤𑀺𑀝𑁆𑀞𑀺𑀆𑀤𑀻𑀦𑀺 ‘‘𑀧𑀜𑁆𑀘 𑀓𑀸𑀭𑀓𑀗𑁆𑀕𑀸𑀦𑀻’’𑀢𑀺 𑀯𑀼𑀢𑁆𑀢𑀸𑀦𑀺. 𑀲𑀫𑁆𑀫𑀸𑀯𑀸𑀘𑀸𑀤𑀺𑀓𑀺𑀭𑀺𑀬𑀸 𑀳𑀺 𑀯𑀺𑀭𑀢𑀺, 𑀢𑀜𑁆𑀘 𑀏𑀢𑀸𑀦𑀺 𑀓𑀸𑀭𑀸𑀧𑁂𑀦𑁆𑀢𑀻𑀢𑀺. 𑀯𑀺𑀭𑀢𑀺𑀯𑀲𑁂𑀦𑀸𑀢𑀺 𑀯𑀺𑀭𑀫𑀡𑀓𑀺𑀭𑀺𑀬𑀸𑀯𑀲𑁂𑀦 𑀓𑀸𑀭𑀸𑀧𑀓𑀪𑀸𑀯𑁂𑀦, 𑀓𑀢𑁆𑀢𑀼𑀪𑀸𑀯𑁂𑀦 𑀯𑀸𑀢𑀺 𑀅𑀢𑁆𑀣𑁄. ‘‘𑀯𑀺𑀭𑀢𑀺𑀢𑁆𑀢𑀬𑀯𑀲𑁂𑀦𑀸’’𑀢𑀺 𑀯𑀸 𑀧𑀸𑀞𑁄.

𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄 𑀧𑀽𑀭𑀢𑀻𑀢𑀺 𑀇𑀫𑁂𑀳𑀺 𑀲𑀫𑁆𑀫𑀸𑀤𑀺𑀝𑁆𑀞𑀺𑀆𑀤𑀻𑀳𑀺 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑀓𑀺𑀘𑁆𑀘𑀁 𑀧𑀽𑀭𑀢𑀺 𑀦𑀸𑀫 𑀢𑁂𑀳𑀺 𑀯𑀻𑀭𑀺𑀬𑀸𑀤𑀺𑀓𑁂𑀳𑀺 𑀢𑀤𑀢𑁆𑀣𑀲𑀺𑀤𑁆𑀥𑀺𑀢𑁄. 𑀢𑀫𑁆𑀧𑀺 𑀲𑀦𑁆𑀥𑀸𑀬 ‘‘𑀏𑀓𑀁 𑀓𑀺𑀘𑁆𑀘𑀦𑁆𑀢𑀭𑀁 𑀤𑀲𑁆𑀲𑁂𑀢𑀼’’𑀦𑁆𑀢𑀺 𑀯𑀼𑀢𑁆𑀢𑀁. 𑀇𑀫𑀁 𑀓𑀺𑀘𑁆𑀘𑀦𑁆𑀢𑀭𑀁 𑀤𑀲𑁆𑀲𑁂𑀢𑀼𑀦𑁆𑀢𑀺 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑀓𑁆𑀔𑀡𑁂𑀧𑀺 𑀇𑀫𑀸𑀦𑁂𑀯 𑀧𑀜𑁆𑀘 𑀲𑀫𑁆𑀫𑀸𑀯𑀸𑀘𑀸𑀤𑀺𑀯𑀺𑀭𑀢𑀺𑀢𑁆𑀢𑀬𑀲𑁆𑀲 𑀏𑀓𑀓𑁆𑀔𑀡𑁂 𑀓𑀸𑀭𑀸𑀧𑀓𑀗𑁆𑀕𑀸𑀦𑀻𑀢𑀺 𑀤𑀲𑁆𑀲𑁂𑀢𑀼𑀁. 𑀏𑀯𑀁 𑀯𑀼𑀢𑁆𑀢𑀦𑁆𑀢𑀺 ‘‘𑀢𑀲𑁆𑀫𑀺𑀁 𑀲𑀫𑀬𑁂 𑀧𑀜𑁆𑀘𑀗𑁆𑀕𑀺𑀓𑁄 𑀫𑀕𑁆𑀕𑁄 𑀳𑁄𑀢𑀻’’𑀢𑀺 (𑀯𑀺𑀪. 𑁪𑁯𑁪) 𑀏𑀯𑀁 𑀯𑀼𑀢𑁆𑀢𑀁. 𑀮𑁄𑀓𑀺𑀬𑀫𑀕𑁆𑀕𑀓𑁆𑀔𑀡𑁂 𑀧𑀜𑁆𑀘𑁂𑀯 𑀳𑁄𑀦𑁆𑀢𑀺, 𑀯𑀺𑀭𑀢𑀺 𑀧𑀦 𑀅𑀦𑀺𑀬𑀢𑀸, 𑀢𑀲𑁆𑀫𑀸 ‘‘𑀙𑀅𑀗𑁆𑀕𑀺𑀓𑁄’’𑀢𑀺 𑀅𑀯𑀢𑁆𑀯𑀸 ‘‘𑀧𑀜𑁆𑀘𑀗𑁆𑀕𑀺𑀓𑁄’’𑀇𑀘𑁆𑀘𑁂𑀯 𑀯𑀼𑀢𑁆𑀢𑀁. 𑀢𑀬𑀺𑀤𑀁 𑀅𑀪𑀺𑀥𑀫𑁆𑀫𑁂 𑀧𑀜𑁆𑀘𑀗𑁆𑀕𑀺𑀓𑀯𑀸𑀭𑀤𑁂𑀲𑀦𑀸𑀬 𑀓𑀸𑀭𑀡𑀓𑀺𑀢𑁆𑀢𑀦𑀫𑀕𑁆𑀕𑁄, 𑀅𑀭𑀺𑀬𑀫𑀕𑁆𑀕𑁄 𑀧𑀦 𑀅𑀝𑁆𑀞𑀗𑁆𑀕𑀺𑀓𑁄𑀯𑀸𑀢𑀺 𑀤𑀲𑁆𑀲𑁂𑀢𑀼𑀁, ‘‘𑀬𑀸 𑀘, 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀺𑀫𑀸𑀳, 𑀢𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀆𑀤𑀺𑀓𑀸 𑀤𑀲, 𑀢𑀧𑁆𑀧𑀘𑁆𑀘𑀬𑀸 𑀅𑀓𑀼𑀲𑀮𑀸 𑀘 𑀤𑀲𑀸𑀢𑀺 𑀯𑀻𑀲𑀢𑀺 𑀅𑀓𑀼𑀲𑀮𑀧𑀓𑁆𑀔𑀺𑀬𑀸, 𑀲𑀫𑁆𑀫𑀸𑀤𑀺𑀝𑁆𑀞𑀺𑀆𑀤𑀺𑀓𑀸 𑀤𑀲, 𑀢𑀧𑁆𑀧𑀘𑁆𑀘𑀬𑀸 𑀓𑀼𑀲𑀮𑀸 𑀘 𑀤𑀲𑀸𑀢𑀺 𑀯𑀻𑀲𑀢𑀺 𑀓𑀼𑀲𑀮𑀧𑀓𑁆𑀔𑀺𑀬𑀸 𑀫𑀳𑀸𑀘𑀢𑁆𑀢𑀸𑀭𑀻𑀲𑀓𑀲𑀼𑀢𑁆𑀢𑁂 𑀯𑀼𑀢𑁆𑀢𑀸. 𑀫𑀳𑀸𑀘𑀢𑁆𑀢𑀸𑀭𑀻𑀲𑀓𑀦𑁆𑀢𑀺 𑀢𑀲𑁆𑀲𑁂𑀢𑀁 𑀦𑀸𑀫𑀁. 𑀫𑀺𑀲𑁆𑀲𑀓𑁄𑀯 𑀓𑀣𑀺𑀢𑁄 𑀮𑁄𑀓𑀼𑀢𑁆𑀢𑀭𑀲𑁆𑀲𑀧𑀺 𑀇𑀥 𑀮𑀩𑁆𑀪𑀫𑀸𑀦𑀢𑁆𑀢𑀸.

𑀬𑀲𑁆𑀫𑀸 𑀓𑁄𑀲𑀮𑀲𑀁𑀬𑀼𑀢𑁆𑀢𑁂𑀧𑀺 𑀇𑀥 𑀘 𑀣𑁂𑀭𑁂𑀦 ‘‘𑀉𑀧𑀟𑁆𑀠𑀫𑀺𑀤𑀁, 𑀪𑀦𑁆𑀢𑁂, 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀁 ‘‘𑀫𑀸 𑀳𑁂𑀯𑀁 𑀆𑀦𑀦𑁆𑀤𑀸’’𑀢𑀺𑀆𑀤𑀺𑀦𑀸 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 ‘‘𑀲𑀓𑀮𑀫𑁂𑀯𑀺𑀤𑀁 𑀆𑀦𑀦𑁆𑀤𑀸’’𑀢𑀺𑀆𑀤𑀺𑀦𑀸 𑀪𑀕𑀯𑀢𑀸 𑀤𑁂𑀲𑀺𑀢𑀁 𑀲𑀼𑀢𑁆𑀢𑀁 𑀆𑀕𑀢𑀁. 𑀢𑀲𑁆𑀲𑀢𑁆𑀣𑁄 𑀓𑁄𑀲𑀮𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑁄, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀓𑁄𑀲𑀮𑀲𑀁𑀬𑀼𑀢𑁆𑀢𑁂 𑀯𑀼𑀢𑁆𑀢𑀢𑁆𑀣𑀫𑁂𑀯𑀸’’𑀢𑀺.

𑀅𑀯𑀺𑀚𑁆𑀚𑀸𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀲𑀸𑀭𑀺𑀧𑀼𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁩. 𑀲𑀸𑀯𑀓𑀩𑁄𑀥𑀺 𑀲𑀸𑀯𑀓𑀧𑀸𑀭𑀫𑀺𑀬𑁄, 𑀢𑀧𑁆𑀧𑀭𑀺𑀬𑀸𑀧𑀦𑁆𑀦𑀁 𑀜𑀸𑀡𑀁 𑀲𑀸𑀯𑀓𑀧𑀸𑀭𑀫𑀺𑀜𑀸𑀡𑀁, 𑀢𑀁 𑀧𑀦 𑀤𑁆𑀯𑀺𑀦𑁆𑀦𑀁 𑀅𑀕𑁆𑀕𑀲𑀸𑀯𑀓𑀸𑀦𑀁 𑀢𑀢𑁆𑀣𑀧𑀺 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑁄 𑀏𑀯 𑀲𑀯𑀺𑀲𑁂𑀲𑀁 𑀫𑀢𑁆𑀣𑀓𑀁 𑀧𑀢𑁆𑀢𑀁, 𑀦 𑀇𑀢𑀭𑁂𑀲𑀦𑁆𑀢𑀺 𑀆𑀳 𑁋 ‘‘𑀲𑀸𑀯𑀓…𑀧𑁂… 𑀅𑀧𑁆𑀧𑀢𑁆𑀢𑀢𑀸𑀬𑀸’’𑀢𑀺. 𑀢𑀲𑁆𑀫𑀸 𑀢𑀲𑁆𑀲 𑀫𑀢𑁆𑀣𑀓𑀧𑁆𑀧𑀢𑁆𑀢𑀺𑀬𑀸 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑁂 𑀇𑀚𑁆𑀛𑀦𑁆𑀢𑁂 𑀢𑀲𑁆𑀲 𑀏𑀓𑀤𑁂𑀲𑁄 𑀇𑀥 𑀇𑀚𑁆𑀛𑀢𑀺, 𑀦 𑀲𑀓𑀮𑀦𑁆𑀢𑀺. 𑀦 𑀳𑀺 𑀅𑀤𑁆𑀥𑀩𑁆𑀭𑀳𑁆𑀫𑀘𑀭𑀺𑀬𑀁 𑀦𑀸𑀫 𑀅𑀢𑁆𑀣𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁, ‘‘𑀲𑀓𑀮𑀫𑁆𑀧𑀺 …𑀧𑁂… 𑀮𑀩𑁆𑀪𑀢𑀻’’𑀢𑀺, 𑀢𑀁 𑀧𑀦 𑀪𑀡𑁆𑀟𑀸𑀕𑀸𑀭𑀺𑀓𑁄 𑀦𑀸𑀜𑁆𑀜𑀸𑀲𑀺 𑀜𑀸𑀡𑀲𑁆𑀲 𑀲𑀸𑀯𑀓𑀯𑀺𑀲𑀬𑁂𑀧𑀺 𑀲𑀧𑁆𑀧𑀤𑁂𑀲𑀺𑀓𑀢𑁆𑀢𑀸, 𑀥𑀫𑁆𑀫𑀲𑁂𑀦𑀸𑀧𑀢𑀺 𑀧𑀦 𑀜𑀸𑀡𑀲𑁆𑀲 𑀢𑀢𑁆𑀣 𑀦𑀺𑀧𑁆𑀧𑀤𑁂𑀲𑀺𑀓𑀢𑁆𑀢𑀸 𑀅𑀜𑁆𑀜𑀸𑀲𑀻𑀢𑀺. 𑀢𑁂𑀦𑀸𑀳 𑁋 ‘‘𑀆𑀦𑀦𑁆𑀤𑀢𑁆𑀣𑁂𑀭𑁄…𑀧𑁂… 𑀅𑀜𑁆𑀜𑀸𑀲𑀻’’𑀢𑀺. 𑀏𑀯𑀫𑀸𑀳𑀸𑀢𑀺 ‘‘𑀲𑀓𑀮𑀫𑀺𑀤𑀁, 𑀪𑀦𑁆𑀢𑁂’’𑀢𑀺 𑀏𑀯𑀁 𑀅𑀯𑁄𑀘.

𑀲𑀸𑀭𑀺𑀧𑀼𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀚𑀸𑀡𑀼𑀲𑁆𑀲𑁄𑀡𑀺𑀩𑁆𑀭𑀸𑀳𑁆𑀫𑀡𑀲𑀼𑀢𑁆𑀢𑀯𑀡𑁆𑀡𑀦𑀸

𑁪. 𑀯𑀴𑀯𑀸𑀪𑀺-𑀲𑀤𑁆𑀤𑁄 𑀯𑀴𑀯𑀸𑀧𑀭𑀺𑀬𑀸𑀬𑁄𑀢𑀺 𑀆𑀳 ‘‘𑀘𑀢𑀽𑀳𑀺 𑀯𑀴𑀯𑀸𑀳𑀺 𑀬𑀼𑀢𑁆𑀢𑀭𑀣𑁂𑀦𑀸’’𑀢𑀺. 𑀬𑁄𑀥𑀭𑀣𑁄𑀢𑀺 𑀬𑁄𑀥𑁂𑀳𑀺 𑀬𑀼𑀚𑁆𑀛𑀦𑀢𑁆𑀣𑀁 𑀆𑀭𑁄𑀳𑀺𑀢𑀩𑁆𑀩𑀭𑀣𑁄. 𑀅𑀮𑀗𑁆𑀓𑀸𑀭𑀭𑀣𑁄 𑀫𑀗𑁆𑀕𑀮𑀤𑀺𑀯𑀲𑁂𑀲𑀼 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑁂𑀳𑀺 𑀆𑀭𑁄𑀳𑀺𑀢𑀩𑁆𑀩𑀭𑀣𑁄. 𑀖𑀦𑀤𑀼𑀓𑀼𑀮𑁂𑀦 𑀧𑀭𑀺𑀯𑀸𑀭𑀺𑀢𑁄𑀢𑀺 𑀭𑀚𑀢𑀧𑀝𑁆𑀝𑀯𑀡𑁆𑀡𑁂𑀦 𑀲𑁂𑀢𑀤𑀼𑀓𑀼𑀮𑁂𑀦 𑀧𑀝𑀺𑀘𑁆𑀙𑀸𑀤𑀺𑀢𑁄. 𑀧𑀝𑀺𑀘𑁆𑀙𑀸𑀤𑀦𑀢𑁆𑀣𑁄 𑀳𑀺 𑀇𑀥 𑀧𑀭𑀺𑀯𑀸𑀭𑀲𑀤𑁆𑀤𑁄. 𑀭𑀚𑀢𑀧𑀦𑀸𑀴𑀺𑀲𑀼𑀧𑀭𑀺𑀓𑁆𑀔𑀺𑀢𑁆𑀢𑀸 𑀲𑁂𑀢𑀪𑀸𑀯𑀓𑀭𑀡𑀢𑁆𑀣𑀁.

𑀙𑀦𑁆𑀦𑀁 𑀙𑀦𑁆𑀦𑀁 𑀫𑀸𑀲𑀸𑀦𑀦𑁆𑀢𑀺 𑀦𑀺𑀤𑁆𑀥𑀸𑀭𑀡𑁂 𑀲𑀸𑀫𑀺𑀯𑀘𑀦𑀁. 𑀏𑀓𑀯𑀸𑀭𑀁 𑀦𑀕𑀭𑀁 𑀧𑀤𑀓𑁆𑀔𑀺𑀡𑀁 𑀓𑀭𑁄𑀢𑀻𑀢𑀺 𑀇𑀤𑀁 𑀢𑀲𑁆𑀫𑀺𑀁 𑀞𑀸𑀦𑀦𑁆𑀢𑀭𑁂 𑀞𑀺𑀢𑁂𑀦 𑀓𑀸𑀢𑀩𑁆𑀩𑀁 𑀘𑀸𑀭𑀺𑀢𑁆𑀢𑀁. 𑀦𑀕𑀭𑀢𑁄 𑀦 𑀧𑀓𑁆𑀓𑀦𑁆𑀢𑀸𑀢𑀺 𑀦𑀕𑀭𑀢𑁄 𑀩𑀳𑀺 𑀦 𑀕𑀢𑀸. 𑀫𑀗𑁆𑀕𑀮𑀯𑀘𑀦𑁂 𑀦𑀺𑀬𑀼𑀢𑁆𑀢𑀸 𑀫𑀗𑁆𑀕𑀮𑀺𑀓𑀸, 𑀲𑀼𑀯𑀢𑁆𑀣𑀺𑀯𑀘𑀦𑁂 𑀦𑀺𑀬𑀼𑀢𑁆𑀢𑀸 𑀲𑁄𑀯𑀢𑁆𑀣𑀺𑀓𑀸. 𑀆𑀤𑀺-𑀲𑀤𑁆𑀤𑁂𑀦 𑀣𑀼𑀢𑀺𑀫𑀸𑀕𑀥𑀯𑀦𑁆𑀤𑀺𑀓𑀸𑀘𑀭𑀺𑀬𑀓𑁂 𑀲𑀗𑁆𑀕𑀡𑁆𑀳𑀸𑀢𑀺. 𑀲𑀼𑀓𑀧𑀢𑁆𑀢𑀲𑀤𑀺𑀲𑀸𑀦𑀺 𑀯𑀡𑁆𑀡𑀢𑁄.

𑀯𑀡𑁆𑀡𑀕𑀻𑀢𑀦𑁆𑀢𑀺 𑀣𑀼𑀢𑀺𑀕𑀻𑀢𑀁. 𑀩𑁆𑀭𑀳𑁆𑀫𑀪𑀽𑀢𑀁 𑀲𑁂𑀝𑁆𑀞𑀪𑀽𑀢𑀁 𑀬𑀸𑀦𑀁, 𑀩𑁆𑀭𑀳𑁆𑀫𑀪𑀽𑀢𑀸𑀦𑀁 𑀲𑁂𑀝𑁆𑀞𑀪𑀽𑀢𑀸𑀦𑀁 𑀬𑀸𑀦𑀦𑁆𑀢𑀺 𑀯𑀸 𑀩𑁆𑀭𑀳𑁆𑀫𑀬𑀸𑀦𑀁. 𑀯𑀺𑀚𑀺𑀢𑀢𑁆𑀢𑀸 𑀯𑀺𑀲𑁂𑀲𑁂𑀦 𑀚𑀺𑀦𑀦𑀢𑁄. 𑀭𑀸𑀕𑀁 𑀯𑀺𑀦𑀬𑀫𑀸𑀦𑀸 𑀧𑀭𑀺𑀬𑁄𑀲𑀸𑀧𑁂𑀢𑀻𑀢𑀺 𑀲𑀩𑁆𑀩𑀫𑁆𑀧𑀺 𑀭𑀸𑀕𑀁 𑀲𑀫𑀼𑀘𑁆𑀙𑁂𑀤𑀯𑀺𑀦𑀬𑀯𑀲𑁂𑀦 𑀯𑀺𑀦𑁂𑀢𑀺, 𑀅𑀢𑁆𑀢𑀦𑁄 𑀓𑀺𑀘𑁆𑀘𑀁 𑀧𑀭𑀺𑀬𑁄𑀲𑀸𑀧𑁂𑀢𑀺. 𑀓𑀺𑀘𑁆𑀘𑀧𑀭𑀺𑀬𑁄𑀲𑀸𑀧𑀦𑁂𑀦𑁂𑀯 𑀳𑀺 𑀲𑀬𑀫𑁆𑀧𑀺 𑀧𑀭𑀺𑀬𑁄𑀲𑀸𑀦𑀁 𑀦𑀺𑀧𑁆𑀨𑀢𑁆𑀢𑀺𑀁 𑀉𑀧𑀕𑀘𑁆𑀙𑀢𑀺. 𑀢𑁂𑀦𑀸𑀳 ‘‘𑀧𑀭𑀺𑀬𑁄𑀲𑀸𑀦𑀁 𑀕𑀘𑁆𑀙𑀢𑀺 𑀦𑀺𑀧𑁆𑀨𑀚𑁆𑀚𑀢𑀻’’𑀢𑀺.

𑀥𑀼𑀭𑀦𑁆𑀢𑀺 𑀪𑀼𑀫𑁆𑀫𑀢𑁆𑀣𑁂 𑀉𑀧𑀬𑁄𑀕𑀯𑀘𑀦𑀦𑁆𑀢𑀺 𑀆𑀳 ‘‘𑀢𑀢𑁆𑀭𑀫𑀚𑁆𑀛𑀢𑁆𑀢𑀢𑀸𑀬𑀼𑀕𑁂 𑀬𑀼𑀢𑁆𑀢𑀸’’𑀢𑀺. 𑀈𑀲𑀸𑀢𑀺 𑀬𑀼𑀕𑀲𑀦𑁆𑀥𑀸𑀭𑀺𑀓𑀸 𑀤𑀸𑀭𑀼𑀬𑀼𑀕𑀴𑀸. 𑀬𑀣𑀸 𑀯𑀸 𑀩𑀸𑀳𑀺𑀭𑀁 𑀬𑀼𑀕𑀁 𑀥𑀸𑀭𑁂𑀢𑀺, 𑀢𑀲𑁆𑀲𑀸 𑀞𑀺𑀢𑀸𑀬 𑀏𑀯 𑀓𑀺𑀘𑁆𑀘𑀲𑀺𑀤𑁆𑀥𑀺, 𑀏𑀯𑀁 𑀓𑀺𑀭𑀺𑀬𑀸𑀯𑀲𑁂𑀦 𑀮𑀤𑁆𑀥𑀩𑀮𑁂𑀦 𑀢𑀢𑁆𑀭𑀫𑀚𑁆𑀛𑀢𑁆𑀢𑀢𑀸𑀬𑀼𑀕𑁂 𑀣𑀺𑀭𑀁 𑀥𑀸𑀭𑁂𑀢𑀺, 𑀢𑁂𑀳𑁂𑀯 𑀅𑀭𑀺𑀬𑀫𑀕𑁆𑀕𑀭𑀣𑀲𑁆𑀲 𑀧𑀯𑀢𑁆𑀢𑀦𑀁. 𑀳𑀺𑀭𑀺𑀕𑁆𑀕𑀳𑀡𑁂𑀦 𑀘𑁂𑀢𑁆𑀣 𑀢𑀁𑀲𑀳𑀘𑀭𑀡𑀢𑁄 𑀑𑀢𑁆𑀢𑀧𑁆𑀧𑀫𑁆𑀧𑀺 𑀕𑀳𑀺𑀢𑀁𑀬𑁂𑀯 𑀳𑁄𑀢𑀺. 𑀢𑁂𑀦𑀸𑀳 ‘‘𑀅𑀢𑁆𑀢𑀦𑀸 𑀲𑀤𑁆𑀥𑀺’’𑀦𑁆𑀢𑀺𑀆𑀤𑀺. 𑀦𑀸𑀴𑀺𑀬𑀸 𑀫𑀺𑀦𑀫𑀸𑀦𑁄 𑀧𑀼𑀭𑀺𑀲𑁄 𑀯𑀺𑀬 𑀆𑀭𑀫𑁆𑀫𑀡𑀁 𑀫𑀺𑀦𑀸𑀢𑀻𑀢𑀺 𑀫𑀦𑁄. 𑀓𑀢𑀭𑀁 𑀧𑀦 𑀢𑀁 𑀫𑀦𑁄, 𑀓𑀣𑀜𑁆𑀘𑀲𑁆𑀲 𑀬𑁄𑀢𑁆𑀢𑀲𑀤𑀺𑀲𑀢𑀸𑀢𑀺 𑀆𑀳 ‘‘𑀯𑀺𑀧𑀲𑁆𑀲𑀦𑀸𑀘𑀺𑀢𑁆𑀢’’𑀦𑁆𑀢𑀺𑀆𑀤𑀺. 𑀢𑁂𑀦 𑀬𑁄𑀢𑁆𑀢𑀁 𑀯𑀺𑀬𑀸𑀢𑀺 𑀬𑁄𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀮𑁄𑀓𑀺𑀬𑀯𑀺𑀧𑀲𑁆𑀲𑀦𑀸𑀘𑀺𑀢𑁆𑀢𑀁 𑀅𑀢𑀺𑀭𑁂𑀓𑀧𑀜𑁆𑀜𑀸𑀲 𑀓𑀼𑀲𑀮𑀥𑀫𑁆𑀫𑁂 𑀏𑀓𑀸𑀩𑀤𑁆𑀥𑁂 𑀏𑀓𑀲𑀗𑁆𑀕𑀳𑀺𑀢𑁂 𑀓𑀭𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑁂 𑀧𑀦 ‘‘𑀨𑀲𑁆𑀲𑁄 𑀳𑁄𑀢𑀺…𑀧𑁂… 𑀅𑀯𑀺𑀓𑁆𑀔𑁂𑀧𑁄 𑀳𑁄𑀢𑀻’’𑀢𑀺 𑀘𑀺𑀢𑁆𑀢𑀗𑁆𑀕𑀯𑀲𑁂𑀦 𑀥𑀫𑁆𑀫𑀲𑀗𑁆𑀕𑀳𑁂 (𑀥. 𑀲. 𑁧) 𑀆𑀕𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸. 𑀮𑁄𑀓𑀼𑀢𑁆𑀢𑀭𑀯𑀺𑀧𑀲𑁆𑀲𑀦𑀸𑀘𑀺𑀢𑁆𑀢𑀦𑁆𑀢𑀺 𑀫𑀕𑁆𑀕𑀘𑀺𑀢𑁆𑀢𑀁 𑀆𑀳. 𑀅𑀢𑀺𑀭𑁂𑀓𑀲𑀝𑁆𑀞𑀻𑀢𑀺 𑀢𑁂 𑀏𑀯 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑀸𑀚𑀻𑀯𑁂𑀳𑀺 𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺𑀦𑁆𑀤𑁆𑀭𑀺𑀬𑀸𑀤𑀻𑀳𑀺 𑀘 𑀲𑀤𑁆𑀥𑀺𑀁 𑀅𑀢𑀺𑀭𑁂𑀓𑀲𑀝𑁆𑀞𑀺 𑀓𑀼𑀲𑀮𑀥𑀫𑁆𑀫𑁂. 𑀏𑀓𑀸𑀩𑀤𑁆𑀥𑁂𑀢𑀺 𑀏𑀓𑀲𑁆𑀫𑀺𑀁 𑀏𑀯 𑀆𑀭𑀫𑁆𑀫𑀡𑁂 𑀆𑀩𑀤𑁆𑀥𑁂. 𑀏𑀓𑀲𑀗𑁆𑀕𑀳𑁂𑀢𑀺 𑀢𑀣𑁂𑀯 𑀯𑀺𑀧𑀲𑁆𑀲𑀦𑀸𑀓𑀺𑀘𑁆𑀘𑀯𑀲𑁂𑀦 𑀏𑀓𑀲𑀗𑁆𑀕𑀳𑁂 𑀓𑀭𑁄𑀢𑀺. 𑀧𑀼𑀩𑁆𑀩𑀗𑁆𑀕𑀫𑀪𑀸𑀯𑁂𑀦 𑀆𑀭𑀓𑁆𑀔𑀁 𑀲𑀸𑀭𑁂𑀢𑀻𑀢𑀺 𑀆𑀭𑀓𑁆𑀔𑀲𑀸𑀭𑀣𑀻. ‘‘𑀬𑀣𑀸 𑀳𑀺 𑀭𑀣𑀲𑁆𑀲…𑀧𑁂… 𑀲𑀸𑀭𑀣𑀻’’𑀢𑀺 𑀯𑀢𑁆𑀯𑀸 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀬𑁄𑀕𑁆𑀕𑀺𑀬𑁄’’𑀢𑀺 𑀯𑀼𑀢𑁆𑀢𑀁. 𑀥𑀼𑀭𑀁 𑀯𑀸𑀳𑁂𑀢𑀺 𑀬𑁄𑀕𑁆𑀕𑁂. 𑀬𑁄𑀚𑁂𑀢𑀺 𑀬𑁄𑀕𑁆𑀕𑁂 𑀲𑀫𑀕𑀢𑀺𑀬𑀜𑁆𑀘. 𑀅𑀓𑁆𑀔𑀁 𑀅𑀩𑁆𑀪𑀜𑁆𑀚𑀢𑀺 𑀲𑀼𑀔𑀧𑁆𑀧𑀯𑀢𑁆𑀢𑀦𑀢𑁆𑀣𑀁. 𑀭𑀣𑀁 𑀧𑁂𑀲𑁂𑀢𑀺 𑀬𑁄𑀕𑁆𑀕𑀘𑁄𑀤𑀦𑁂𑀦. 𑀦𑀺𑀩𑁆𑀩𑀺𑀲𑁂𑀯𑀦𑁂 𑀓𑀭𑁄𑀢𑀺 𑀕𑀫𑀦𑀯𑀻𑀣𑀺𑀬𑀁 𑀧𑀝𑀺𑀧𑀸𑀤𑀦𑁂𑀦 𑀲𑀦𑁆𑀦𑀺𑀬𑁄𑀚𑁂𑀢𑀺. 𑀆𑀭𑀓𑁆𑀔𑀧𑀘𑁆𑀘𑀼𑀧𑀝𑁆𑀞𑀸𑀦𑀸𑀢𑀺 𑀆𑀭𑀓𑁆𑀔𑀁 𑀧𑀘𑁆𑀘𑀼𑀧𑀝𑁆𑀞𑀧𑁂𑀢𑀺 𑀅𑀲𑀫𑁆𑀫𑁄𑀲𑀲𑀪𑀸𑀯𑀢𑁆𑀢𑀸. 𑀕𑀢𑀺𑀬𑁄𑀢𑀺 𑀧𑀯𑀢𑁆𑀢𑀺𑀬𑁄, 𑀦𑀺𑀧𑁆𑀨𑀢𑁆𑀢𑀺𑀬𑁄 𑀯𑀸. 𑀲𑀫𑀦𑁆𑀯𑁂𑀲𑀢𑀻𑀢𑀺 𑀕𑀯𑁂𑀲𑀢𑀺.

𑀅𑀭𑀺𑀬𑀧𑀼𑀕𑁆𑀕𑀮𑀲𑁆𑀲 𑀦𑀺𑀩𑁆𑀩𑀸𑀦𑀁 𑀧𑀝𑀺𑀫𑀼𑀔𑀁 𑀲𑀫𑁆𑀧𑀸𑀧𑀦𑁂 𑀭𑀣𑁄 𑀯𑀺𑀬𑀸𑀢𑀺 𑀭𑀣𑁄. 𑀧𑀭𑀺𑀓𑀭𑁄𑀢𑀺 𑀯𑀺𑀪𑀽𑀲𑀬𑀢𑀻𑀢𑀺 𑀧𑀭𑀺𑀓𑁆𑀔𑀸𑀭𑁄, 𑀯𑀺𑀪𑀽𑀲𑀦𑀁, 𑀲𑀻𑀮𑀜𑁆𑀘 𑀅𑀭𑀺𑀬𑀫𑀕𑁆𑀕𑀲𑁆𑀲 𑀯𑀺𑀪𑀽𑀲𑀦𑀝𑁆𑀞𑀸𑀦𑀺𑀬𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀸𑀮𑀗𑁆𑀓𑀸𑀭𑁄’’𑀢𑀺, 𑀲𑀻𑀮𑀪𑀽𑀲𑀦𑁄𑀢𑀺 𑀅𑀢𑁆𑀣𑁄. 𑀯𑀺𑀧𑀲𑁆𑀲𑀦𑀸𑀲𑀫𑁆𑀧𑀬𑀼𑀢𑁆𑀢𑀸𑀦𑀦𑁆𑀢𑀺 𑀮𑁄𑀓𑀺𑀬𑀸𑀬 𑀮𑁄𑀓𑀼𑀢𑁆𑀢𑀭𑀸𑀬 𑀘 𑀯𑀺𑀧𑀲𑁆𑀲𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸𑀦𑀁. 𑀯𑀺𑀥𑀺𑀦𑀸 𑀈𑀭𑁂𑀢𑀩𑁆𑀩𑀢𑁄 𑀧𑀯𑀢𑁆𑀢𑁂𑀢𑀩𑁆𑀩𑀢𑁄 𑀯𑀻𑀭𑀺𑀬𑀁, 𑀲𑀫𑁆𑀫𑀸𑀯𑀸𑀬𑀸𑀫𑁄. 𑀲𑀫𑀁 𑀲𑀫𑁆𑀫𑀸 𑀘 𑀥𑀺𑀬𑀢𑀻𑀢𑀺 𑀲𑀫𑀸𑀥𑀺, 𑀥𑀼𑀭𑀜𑁆𑀘 𑀢𑀁 𑀲𑀫𑀸𑀥𑀺 𑀘𑀸𑀢𑀺 𑀥𑀼𑀭𑀲𑀫𑀸𑀥𑀺, 𑀉𑀧𑁂𑀓𑁆𑀔𑀸 𑀥𑀼𑀭𑀲𑀫𑀸𑀥𑀺 𑀏𑀢𑀲𑁆𑀲𑀸𑀢𑀺 𑀉𑀧𑁂𑀓𑁆𑀔𑀸𑀥𑀼𑀭𑀲𑀫𑀸𑀥𑀺, 𑀅𑀭𑀺𑀬𑀫𑀕𑁆𑀕𑁄 𑀉𑀧𑁂𑀓𑁆𑀔𑀸𑀲𑀗𑁆𑀔𑀸𑀢𑀥𑀼𑀭𑀲𑀫𑀸𑀥𑀻𑀢𑀺 𑀅𑀢𑁆𑀣𑁄. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀩𑁆𑀬𑀜𑁆𑀚𑀦𑀁 𑀅𑀦𑀸𑀤𑀺𑀬𑀺𑀢𑁆𑀯𑀸 𑀥𑀼𑀭𑀲𑀫𑀸𑀥𑀺𑀲𑀤𑁆𑀤𑀸𑀦𑀁 𑀪𑀺𑀦𑁆𑀦𑀸𑀥𑀺𑀓𑀭𑀡𑀢𑀸 𑀯𑀼𑀢𑁆𑀢𑀸. 𑀧𑀬𑁄𑀕𑀫𑀚𑁆𑀛𑀢𑁆𑀢𑁂𑀢𑀺 𑀯𑀻𑀭𑀺𑀬𑀲𑀫𑀢𑀸𑀬. 𑀅𑀦𑀺𑀘𑁆𑀙𑀸𑀢𑀺 𑀇𑀘𑁆𑀙𑀸𑀧𑀝𑀺𑀧𑀓𑁆𑀔𑀸. 𑀢𑁂𑀦𑀸𑀳 ‘‘𑀅𑀮𑁄𑀪𑀲𑀗𑁆𑀔𑀸𑀢𑀸’’𑀢𑀺. 𑀧𑀭𑀺𑀯𑀸𑀭𑀡𑀦𑁆𑀢𑀺 𑀧𑀭𑀺𑀯𑀸𑀭𑁄, 𑀧𑀭𑀺𑀘𑁆𑀙𑀤𑁄𑀢𑀺 𑀅𑀢𑁆𑀣𑁄.

𑀫𑁂𑀢𑁆𑀢𑀸𑀢𑀺 𑀫𑁂𑀢𑁆𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺. 𑀢𑀣𑀸 𑀓𑀭𑀼𑀡𑀸. 𑀧𑀼𑀩𑁆𑀩𑀪𑀸𑀕𑁄𑀢𑀺 𑀉𑀪𑀺𑀦𑁆𑀦𑀫𑁆𑀧𑀺 𑀉𑀧𑀘𑀸𑀭𑁄. 𑀤𑁆𑀯𑁂𑀧𑀺 𑀓𑀸𑀬𑀘𑀺𑀢𑁆𑀢𑀯𑀺𑀯𑁂𑀓𑀸 𑀯𑀺𑀬 𑀧𑀼𑀩𑁆𑀩𑀪𑀸𑀕𑀥𑀫𑁆𑀫𑀯𑀲𑁂𑀦 𑀯𑀼𑀢𑁆𑀢𑀸. 𑀅𑀭𑀺𑀬𑀫𑀕𑁆𑀕𑀭𑀣𑁂𑀢𑀺 𑀧𑀭𑀺𑀲𑀼𑀤𑁆𑀥𑀫𑀕𑁆𑀕𑀲𑀗𑁆𑀔𑀸𑀢𑁂 𑀭𑀣𑁂. 𑀅𑀭𑀺𑀬𑀫𑀕𑁆𑀕𑀭𑀣𑁄 𑀘 𑀫𑀕𑁆𑀕𑀭𑀣𑁄 𑀘𑀸𑀢𑀺 𑀅𑀭𑀺𑀬𑀫𑀕𑁆𑀕𑀭𑀣𑁄, 𑀏𑀯𑀁 𑀏𑀓𑀲𑁂𑀲𑀦𑀬𑁂𑀦 𑀯𑀸 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀢𑁂𑀦𑀸𑀳 ‘‘𑀇𑀫𑀲𑁆𑀫𑀺𑀁 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑀭𑀣𑁂 𑀞𑀺𑀢𑁄’’𑀢𑀺. 𑀲𑀦𑁆𑀦𑀤𑁆𑀥𑀘𑀫𑁆𑀫𑁄𑀢𑀺 𑀬𑁄𑀕𑀸𑀯𑀘𑀭𑀲𑁆𑀲 𑀧𑀝𑀺𑀫𑀼𑀓𑁆𑀓𑀘𑀫𑁆𑀫𑀁. 𑀦 𑀦𑀁 𑀢𑁂 𑀯𑀺𑀚𑁆𑀛𑀦𑁆𑀢𑀻𑀢𑀺 𑀯𑀘𑀦𑀧𑀣𑀸 𑀦 𑀦𑀁 𑀯𑀺𑀚𑁆𑀛𑀦𑁆𑀢𑀺. 𑀥𑀫𑁆𑀫𑀪𑁂𑀤𑀦𑀯𑀲𑁂𑀦 𑀦 𑀪𑀜𑁆𑀚𑀢𑀺, 𑀢𑀲𑁆𑀲 𑀅𑀭𑀺𑀬𑀫𑀕𑁆𑀕𑀲𑁆𑀲 𑀭𑀣𑀲𑁆𑀲 𑀲𑀫𑁆𑀫𑀸 𑀬𑁄𑀚𑀺𑀢𑀲𑁆𑀲 𑀅𑀦𑁆𑀢𑀭𑀸 𑀪𑀗𑁆𑀕𑁄 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄.

𑀅𑀢𑁆𑀢𑀦𑁄 𑀧𑀼𑀭𑀺𑀲𑀓𑀸𑀭𑀁 𑀦𑀺𑀲𑁆𑀲𑀸𑀬 𑀮𑀤𑁆𑀥𑀢𑁆𑀢𑀸 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀦𑀼𑀢𑁆𑀢𑀭𑀦𑁆𑀢𑀺 𑀉𑀢𑁆𑀢𑀭𑀭𑀳𑀺𑀢𑀁. 𑀢𑀢𑁄 𑀏𑀯 𑀲𑁂𑀝𑁆𑀞𑀬𑀸𑀦𑀁, 𑀦𑀲𑁆𑀲 𑀓𑁂𑀦𑀘𑀺 𑀲𑀤𑀺𑀲𑀦𑁆𑀢𑀺 𑀅𑀲𑀤𑀺𑀲𑀁. 𑀥𑀺𑀢𑀺𑀲𑀫𑁆𑀧𑀦𑁆𑀦𑀢𑀸𑀬 𑀥𑀻𑀭𑀸 𑀧𑀡𑁆𑀟𑀺𑀢𑀧𑀼𑀭𑀺𑀲𑀸 𑀮𑁄𑀓𑀫𑁆𑀳𑀸 𑀦𑀺𑀬𑁆𑀬𑀦𑁆𑀢𑀺 𑀕𑀘𑁆𑀙𑀦𑁆𑀢𑀺. ‘‘𑀚𑀬𑀁 𑀚𑀬’’𑀦𑁆𑀢𑀺 𑀕𑀸𑀣𑀸𑀬𑀁 𑀯𑀘𑀦𑀯𑀺𑀧𑀮𑁆𑀮𑀸𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀚𑀺𑀦𑀦𑁆𑀢𑀸 𑀚𑀺𑀦𑀦𑁆𑀢𑀸’’𑀢𑀺.

𑀚𑀸𑀡𑀼𑀲𑁆𑀲𑁄𑀡𑀺𑀩𑁆𑀭𑀸𑀳𑁆𑀫𑀡𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫-𑁬. 𑀓𑀺𑀫𑀢𑁆𑀣𑀺𑀬𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁫-𑁬. 𑀦𑀺𑀬𑀫𑀢𑁆𑀣𑁄𑀢𑀺 𑀅𑀯𑀥𑀸𑀭𑀡𑀢𑁆𑀣𑁄. 𑀢𑁂𑀦 𑀦𑀺𑀬𑀫𑁂𑀦 𑀅𑀯𑀥𑀸𑀭𑀡𑁂𑀦 𑁋 𑀅𑀜𑁆𑀜𑀁 𑀫𑀕𑁆𑀕𑀁 𑀧𑀝𑀺𑀓𑁆𑀔𑀺𑀧𑀢𑀺 𑀇𑀢𑁄 𑀅𑀜𑁆𑀜𑀲𑁆𑀲 𑀦𑀺𑀬𑁆𑀬𑀸𑀦𑀺𑀓𑀫𑀕𑁆𑀕𑀲𑁆𑀲 𑀅𑀪𑀸𑀯𑀢𑁄. ‘‘𑀤𑀼𑀓𑁆𑀔𑀲𑁆𑀲 𑀧𑀭𑀺𑀜𑁆𑀜𑀢𑁆𑀣’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 𑀯𑀝𑁆𑀝𑀤𑀼𑀓𑁆𑀔𑀁 𑀓𑀣𑀺𑀢𑀁. 𑀅𑀭𑀺𑀬𑀫𑀕𑁆𑀕𑁂 𑀕𑀳𑀺𑀢𑁂 𑀢𑀲𑁆𑀲 𑀧𑀼𑀩𑁆𑀩𑀪𑀸𑀕𑀫𑀕𑁆𑀕𑁄 𑀯𑀺𑀧𑀲𑁆𑀲𑀦𑀸𑀬 𑀕𑀳𑀺𑀢𑁄 𑀏𑀯𑀸𑀢𑀺 ‘‘𑀫𑀺𑀲𑁆𑀲𑀓𑀫𑀕𑁆𑀕𑁄 𑀓𑀣𑀺𑀢𑁄’’𑀢𑀺 𑀯𑀼𑀢𑁆𑀢𑀁. 𑀉𑀢𑁆𑀢𑀸𑀦𑀫𑁂𑀯 𑀅𑀧𑀼𑀩𑁆𑀩𑀲𑁆𑀲 𑀅𑀪𑀸𑀯𑀸. 𑀅𑀬𑀁 𑀧𑀦 𑀯𑀺𑀲𑁂𑀲𑁄 ‘‘𑀭𑀸𑀕𑀓𑁆𑀔𑀬𑁄’’𑀢𑀺𑀆𑀤𑀻𑀳𑀺 𑀬𑀤𑀺𑀧𑀺 𑀦𑀺𑀩𑁆𑀩𑀸𑀦𑀁 𑀯𑀼𑀢𑁆𑀢𑀁. 𑀢𑀣𑀸𑀧𑀺 𑀅𑀭𑀳𑀢𑁆𑀢𑀁 𑀯𑀺𑀬 𑀩𑁆𑀭𑀳𑁆𑀫𑀘𑀭𑀺𑀬𑀫𑁆𑀧𑀺. 𑀢𑁂𑀦 𑀦𑀺𑀩𑁆𑀩𑀸𑀦𑀁 𑀏𑀯 𑀯𑀼𑀘𑁆𑀘𑀢𑀺 ‘‘𑀇𑀤𑀁 𑀩𑁆𑀭𑀳𑁆𑀫𑀘𑀭𑀺𑀬𑀧𑀭𑀺𑀬𑁄𑀲𑀸𑀦’’𑀦𑁆𑀢𑀺.

𑀓𑀺𑀫𑀢𑁆𑀣𑀺𑀬𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀤𑀼𑀢𑀺𑀬𑀅𑀜𑁆𑀜𑀢𑀭𑀪𑀺𑀓𑁆𑀔𑀼𑀲𑀼𑀢𑁆𑀢𑀯𑀡𑁆𑀡𑀦𑀸

𑁭. 𑀭𑀸𑀕𑀯𑀺𑀦𑀬𑀸𑀤𑀺𑀧𑀤𑁂𑀳𑀺 𑀦𑀺𑀩𑁆𑀩𑀸𑀦𑀁 𑀯𑀸𑀧𑀺 𑀯𑀼𑀘𑁆𑀘𑁂𑀬𑁆𑀬 𑀅𑀭𑀳𑀢𑁆𑀢𑀁 𑀯𑀸𑀧𑀺. 𑀬𑀲𑁆𑀫𑀸 𑀲𑁄 𑀪𑀺𑀓𑁆𑀔𑀼 𑀉𑀪𑀬𑀢𑁆𑀣𑀧𑀺 𑀦𑀺𑀯𑀺𑀝𑁆𑀞𑀩𑀼𑀤𑁆𑀥𑀺, 𑀢𑀲𑁆𑀫𑀸 𑀪𑀕𑀯𑀸 𑀢𑀲𑁆𑀲 𑀅𑀚𑁆𑀛𑀸𑀲𑀬𑀯𑀲𑁂𑀦 ‘‘𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀔𑁄 𑀏𑀢’’𑀦𑁆𑀢𑀺𑀆𑀤𑀺𑀦𑀸 𑀦𑀺𑀩𑁆𑀩𑀸𑀦𑀥𑀸𑀢𑀼𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀧𑀼𑀦 ‘‘𑀆𑀲𑀯𑀸𑀦𑀁 𑀔𑀬𑁄 𑀢𑁂𑀦 𑀯𑀼𑀘𑁆𑀘𑀢𑀻’’𑀢𑀺 𑀆𑀳. 𑀬𑀲𑁆𑀫𑀸 𑀅𑀭𑀺𑀬𑀫𑀕𑁆𑀕𑁄 𑀭𑀸𑀕𑀸𑀤𑀺𑀓𑁂 𑀲𑀫𑀼𑀘𑁆𑀙𑁂𑀤𑀯𑀲𑁂𑀦 𑀯𑀺𑀦𑁂𑀢𑀺, 𑀆𑀲𑀯𑀜𑁆𑀘 𑀲𑀩𑁆𑀩𑀲𑁄 𑀔𑁂𑀧𑁂𑀢𑀺, 𑀢𑁂𑀦 𑀘 𑀯𑀼𑀢𑁆𑀢𑀁 𑀦𑀺𑀩𑁆𑀩𑀸𑀦𑀁 𑀅𑀭𑀳𑀢𑁆𑀢𑀜𑁆𑀘, 𑀢𑀲𑁆𑀫𑀸 𑀢𑀤𑀼𑀪𑀬𑀁 ‘‘𑀭𑀸𑀕𑀯𑀺𑀦𑀬𑁄𑀢𑀺𑀆𑀤𑀺 𑀦𑀸𑀫𑀫𑁂𑀯𑀸’’𑀢𑀺 𑀯𑀼𑀢𑁆𑀢𑀁. 𑀅𑀦𑀼𑀲𑀦𑁆𑀥𑀺𑀓𑀼𑀲𑀮𑀢𑀸𑀬 𑀧𑀼𑀘𑁆𑀙𑀦𑁆𑀢𑁄 𑀏𑀢𑀁 𑀅𑀯𑁄𑀘𑀸𑀢𑀺 𑀇𑀫𑀺𑀦𑀸 ‘‘𑀧𑀼𑀘𑁆𑀙𑀸𑀦𑀼𑀲𑀦𑁆𑀥𑀺 𑀇𑀥 𑀮𑀩𑁆𑀪𑀢𑀻’’𑀢𑀺 𑀤𑀻𑀧𑀺𑀢𑀁, 𑀅𑀚𑁆𑀛𑀸𑀲𑀬𑀸𑀦𑀼𑀲𑀦𑁆𑀥𑀺𑀧𑀺 𑀏𑀢𑁆𑀣 𑀮𑀩𑁆𑀪𑀢𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀤𑀼𑀢𑀺𑀬𑀅𑀜𑁆𑀜𑀢𑀭𑀪𑀺𑀓𑁆𑀔𑀼𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀯𑀺𑀪𑀗𑁆𑀕𑀲𑀼𑀢𑁆𑀢𑀯𑀡𑁆𑀡𑀦𑀸

𑁮. 𑀏𑀓𑁂𑀦 𑀧𑀭𑀺𑀬𑀸𑀬𑁂𑀦 𑀅𑀝𑁆𑀞𑀗𑁆𑀕𑀺𑀓𑀫𑀕𑁆𑀕𑀁 𑀯𑀺𑀪𑀚𑀺𑀢𑁆𑀯𑀸𑀢𑀺 ‘‘𑀲𑀫𑁆𑀫𑀸𑀤𑀺𑀝𑁆𑀞𑀻’’𑀢𑀺𑀆𑀤𑀺𑀦𑀸 𑀏𑀓𑁂𑀦 𑀧𑀭𑀺𑀬𑀸𑀬𑁂𑀦 𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀯𑀺𑀪𑀸𑀕𑁂𑀦 𑀤𑀲𑁆𑀲𑁂𑀢𑁆𑀯𑀸 ‘‘𑀓𑀢𑀫𑀸 𑀘, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀸𑀤𑀺𑀝𑁆𑀞𑀻’’𑀢𑀺𑀆𑀤𑀺𑀦𑀸 𑀧𑀼𑀦 𑀅𑀧𑀭𑁂𑀦 𑀧𑀭𑀺𑀬𑀸𑀬𑁂𑀦 𑀯𑀺𑀪𑀚𑀺𑀢𑀼𑀓𑀸𑀫𑁄. 𑀉𑀕𑁆𑀕𑀳𑀥𑀸𑀭𑀡𑀧𑀭𑀺𑀘𑀬𑀜𑀸𑀡𑀸𑀦𑀺𑀧𑀺 𑀲𑀯𑀦𑀜𑀸𑀡𑁂 𑀏𑀯 𑀅𑀯𑀭𑁄𑀥𑀁 𑀕𑀘𑁆𑀙𑀦𑁆𑀢𑀻𑀢𑀺 ‘‘𑀲𑀯𑀦𑀲𑀫𑁆𑀫𑀲𑀦𑀧𑀝𑀺𑀯𑁂𑀥𑀧𑀘𑁆𑀘𑀯𑁂𑀓𑁆𑀔𑀡𑀯𑀲𑁂𑀦𑀸’’𑀢𑀺 𑀯𑀼𑀢𑁆𑀢𑀁.

𑀓𑀫𑁆𑀫𑀝𑁆𑀞𑀸𑀦𑀸𑀪𑀺𑀦𑀺𑀯𑁂𑀲𑁄𑀢𑀺 𑀓𑀫𑁆𑀫𑀝𑁆𑀞𑀸𑀦𑀧𑀝𑀺𑀧𑀢𑁆𑀢𑀺. 𑀧𑀼𑀭𑀺𑀫𑀸𑀦𑀺 𑀤𑁆𑀯𑁂 𑀲𑀘𑁆𑀘𑀸𑀦𑀺 𑀉𑀕𑁆𑀕𑀡𑁆𑀳𑀺𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀝𑁆𑀞𑀁 𑀓𑀦𑁆𑀢𑀁 𑀫𑀦𑀸𑀧𑀦𑁆𑀢𑀺 𑀦𑀺𑀭𑁄𑀥𑀫𑀕𑁆𑀕𑁂𑀲𑀼 𑀦𑀺𑀦𑁆𑀦𑀪𑀸𑀯𑀁 𑀤𑀲𑁆𑀲𑁂𑀢𑀺, 𑀦 𑀅𑀪𑀺𑀦𑀦𑁆𑀤𑀦𑀁, 𑀢𑀦𑁆𑀦𑀺𑀦𑁆𑀦𑀪𑀸𑀯𑁄 𑀏𑀯 𑀘 𑀢𑀢𑁆𑀣 𑀓𑀫𑁆𑀫𑀓𑀭𑀡𑀁 𑀤𑀝𑁆𑀞𑀩𑁆𑀩𑀁. 𑀏𑀓𑁂𑀦𑁂𑀯𑀸𑀓𑀸𑀭𑁂𑀦 𑀲𑀘𑁆𑀘𑀸𑀦𑀁 𑀧𑀝𑀺𑀯𑁂𑀥𑀦𑀺𑀫𑀺𑀢𑁆𑀢𑀢𑀸, 𑀲𑁄 𑀏𑀯 𑀅𑀪𑀺𑀫𑀼𑀔𑀪𑀸𑀯𑁄 𑀢𑁂𑀲𑀁 𑀲𑀫𑀸𑀕𑀫𑁄𑀢𑀺 𑀏𑀓𑀸𑀪𑀺𑀲𑀫𑀬𑁄.

𑀅𑀲𑁆𑀲𑀸𑀢𑀺 𑀜𑀸𑀡𑀲𑁆𑀲, 𑀬𑁄𑀕𑀺𑀦𑁄 𑀯𑀸. 𑀏𑀢𑁆𑀣 𑀘 𑀓𑁂𑀘𑀺 ‘‘𑀮𑁄𑀓𑀺𑀬𑀜𑀸𑀡𑀫𑁆𑀧𑀺 𑀧𑀝𑀺𑀯𑁂𑀥𑁄 𑀲𑀩𑁆𑀩𑀲𑁆𑀲 𑀬𑀸𑀣𑀸𑀯𑀩𑁄𑀥𑀪𑀸𑀯𑀢𑁄’’𑀢𑀺 𑀯𑀤𑀦𑁆𑀢𑀺. 𑀦𑀦𑀼 𑀉𑀕𑁆𑀕𑀳𑀸𑀤𑀺𑀧𑀝𑀺𑀯𑁂𑀥𑁄 𑀘 𑀧𑀝𑀺𑀯𑁂𑀥𑁄𑀯, 𑀦 𑀘 𑀲𑁄 𑀮𑁄𑀓𑀼𑀢𑁆𑀢𑀭𑁄𑀢𑀺? 𑀢𑀁 𑀦, 𑀓𑁂𑀯𑀮𑁂𑀦 𑀧𑀝𑀺𑀯𑁂𑀥-𑀲𑀤𑁆𑀤𑁂𑀦 𑀉𑀕𑁆𑀕𑀳𑀸𑀤𑀺𑀧𑀝𑀺𑀯𑁂𑀥𑀸𑀦𑀁 𑀅𑀯𑀘𑀦𑀻𑀬𑀢𑁆𑀢𑀸, 𑀧𑀝𑀺𑀯𑁂𑀥𑀦𑀺𑀫𑀺𑀢𑁆𑀢𑀢𑁆𑀢𑀸 𑀯𑀸 𑀉𑀕𑁆𑀕𑀳𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀁 𑀤𑀼𑀓𑁆𑀔𑀸𑀤𑀻𑀲𑀼 𑀧𑀼𑀩𑁆𑀩𑀪𑀸𑀕𑁂 𑀜𑀸𑀡𑀁 ‘‘𑀧𑀝𑀺𑀯𑁂𑀥𑁄’’𑀢𑀺 𑀯𑀼𑀘𑁆𑀘𑀢𑀺, 𑀦 𑀧𑀝𑀺𑀯𑁂𑀥𑀢𑁆𑀢𑀸, 𑀧𑀝𑀺𑀯𑁂𑀥𑀪𑀽𑀢𑀫𑁂𑀯 𑀧𑀦 𑀜𑀸𑀡𑀁 𑀉𑀚𑀼𑀓𑀁 𑀧𑀝𑀺𑀯𑁂𑀥𑁄𑀢𑀺 𑀯𑀢𑁆𑀢𑀩𑁆𑀩𑀢𑀁 𑀅𑀭𑀳𑀢𑀺. 𑀓𑀺𑀘𑁆𑀘𑀢𑁄𑀢𑀺 𑀧𑀭𑀺𑀜𑁆𑀜𑀸𑀤𑀺𑀓𑀺𑀘𑁆𑀘𑀢𑁄. 𑀆𑀭𑀫𑁆𑀫𑀡𑀧𑀝𑀺𑀯𑁂𑀥𑁄𑀢𑀺 𑀲𑀘𑁆𑀙𑀺𑀓𑀺𑀭𑀺𑀬𑀸𑀧𑀝𑀺𑀯𑁂𑀥𑀫𑀸𑀳. 𑀓𑀺𑀘𑁆𑀘𑀢𑁄𑀢𑀺 𑀅𑀲𑀫𑁆𑀫𑁄𑀳𑀧𑀝𑀺𑀯𑁂𑀥𑀁. 𑀉𑀕𑁆𑀕𑀳𑀸𑀤𑀻𑀳𑀺 𑀲𑀘𑁆𑀘𑀲𑁆𑀲 𑀧𑀭𑀺𑀕𑁆𑀕𑀡𑁆𑀳𑀦𑀁 𑀧𑀭𑀺𑀕𑁆𑀕𑀳𑁄.

𑀤𑀼𑀤𑁆𑀤𑀲𑀢𑁆𑀢𑀸𑀢𑀺 𑀅𑀦𑀥𑀺𑀕𑀢𑀜𑀸𑀡𑁂𑀦 𑀬𑀸𑀣𑀸𑀯𑀲𑀭𑀲𑀮𑀓𑁆𑀔𑀡𑀢𑁄 𑀤𑀝𑁆𑀞𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸 𑀉𑀧𑁆𑀧𑀢𑁆𑀢𑀺𑀢𑁄 𑀧𑀸𑀓𑀝𑀸𑀦𑀺𑀧𑀺. 𑀢𑁂𑀦𑀸𑀳 ‘‘𑀤𑀼𑀓𑁆𑀔𑀲𑀘𑁆𑀘𑀁 𑀳𑀻’’𑀢𑀺𑀆𑀤𑀺. 𑀉𑀪𑀬𑀦𑁆𑀢𑀺 𑀧𑀼𑀭𑀺𑀫𑀁 𑀲𑀘𑁆𑀘𑀤𑁆𑀯𑀬𑀁. 𑀧𑀬𑁄𑀕𑁄𑀢𑀺 𑀓𑀺𑀭𑀺𑀬𑀸, 𑀯𑀸𑀬𑀸𑀫𑁄 𑀯𑀸. 𑀢𑀲𑁆𑀲 𑀫𑀳𑀦𑁆𑀢𑀢𑀭𑀲𑁆𑀲 𑀇𑀘𑁆𑀙𑀺𑀢𑀩𑁆𑀩𑀢𑀁 𑀤𑀼𑀓𑁆𑀓𑀭𑀢𑀭𑀢𑀜𑁆𑀘 𑀉𑀧𑀫𑀸𑀳𑀺 𑀤𑀲𑁆𑀲𑁂𑀢𑀺 ‘‘𑀪𑀯𑀕𑁆𑀕𑀕𑁆𑀕𑀳𑀡𑀢𑁆𑀣’’𑀦𑁆𑀢𑀺𑀆𑀤𑀺𑀦𑀸. 𑀬𑀣𑀸 𑀧𑀼𑀭𑀺𑀫𑀁 𑀲𑀘𑁆𑀘𑀤𑁆𑀯𑀬𑀁 𑀯𑀺𑀬 𑀓𑁂𑀦𑀘𑀺 𑀧𑀭𑀺𑀬𑀸𑀬𑁂𑀦 𑀅𑀧𑀸𑀓𑀝𑀢𑀸𑀬 𑀧𑀭𑀫𑀕𑀫𑁆𑀪𑀻𑀭𑀢𑁆𑀢𑀸 𑀉𑀕𑁆𑀕𑀳𑀸𑀤𑀺𑀯𑀲𑁂𑀦 𑀧𑀼𑀩𑁆𑀩𑀪𑀸𑀕𑁂 𑀧𑀯𑀢𑁆𑀢𑀺𑀪𑁂𑀤𑀁 𑀕𑀳𑁂𑀢𑁆𑀯𑀸 ‘‘𑀤𑀼𑀓𑁆𑀔𑁂 𑀜𑀸𑀡’’𑀦𑁆𑀢𑀺𑀆𑀤𑀺𑀦𑀸 𑀘𑀢𑀼𑀩𑁆𑀩𑀺𑀥𑀁 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀏𑀓𑀫𑁂𑀯 𑀢𑀁 𑀜𑀸𑀡𑀁 𑀳𑁄𑀢𑀺 𑀏𑀓𑀸𑀪𑀺𑀲𑀫𑀬𑀯𑀲𑁂𑀦𑁂𑀯 𑀧𑀯𑀢𑁆𑀢𑀦𑀢𑁄.

𑀓𑀸𑀫𑀧𑀘𑁆𑀘𑀦𑀻𑀓𑀝𑁆𑀞𑁂𑀦𑀸𑀢𑀺 𑀓𑀸𑀫𑀸𑀦𑀁 𑀉𑀚𑀼𑀧𑀘𑁆𑀘𑀦𑀻𑀓𑀪𑀸𑀯𑁂𑀦. 𑀓𑀸𑀫𑀢𑁄 𑀦𑀺𑀲𑁆𑀲𑀝𑀪𑀸𑀯𑁂𑀦𑀸𑀢𑀺 𑀓𑀸𑀫𑁂𑀳𑀺 𑀯𑀺𑀲𑀁𑀬𑀼𑀢𑁆𑀢𑀪𑀸𑀯𑁂𑀦. 𑀓𑀸𑀫𑀁 𑀲𑀫𑁆𑀫𑀲𑀦𑁆𑀢𑀲𑁆𑀲𑀸𑀢𑀺 𑀤𑀼𑀯𑀺𑀥𑀫𑁆𑀧𑀺 𑀓𑀸𑀫𑀁 𑀅𑀦𑀺𑀘𑁆𑀘𑀸𑀤𑀺𑀢𑁄 𑀲𑀫𑁆𑀫𑀲𑀦𑁆𑀢𑀲𑁆𑀲. 𑀧𑀚𑁆𑀚𑀢𑀺 𑀧𑀯𑀢𑁆𑀢𑀢𑀺 𑀏𑀢𑁂𑀦𑀸𑀢𑀺 𑀧𑀤𑀁, 𑀓𑀸𑀫𑀲𑁆𑀲 𑀧𑀤𑀦𑁆𑀢𑀺 𑀓𑀸𑀫𑀧𑀤𑀁, 𑀓𑀸𑀫𑀲𑁆𑀲 𑀉𑀧𑁆𑀧𑀢𑁆𑀢𑀺𑀓𑀸𑀭𑀡𑀲𑁆𑀲 𑀖𑀸𑀢𑁄 𑀲𑀫𑀼𑀕𑁆𑀖𑀸𑀢𑁄, 𑀢𑀁 𑀓𑀸𑀫𑀧𑀤𑀖𑀸𑀢𑀁. 𑀢𑁂𑀦𑀸𑀳 ‘‘𑀓𑀸𑀫𑀯𑀽𑀧𑀲𑀫’’𑀦𑁆𑀢𑀺. 𑀓𑀸𑀫𑁂𑀳𑀺 𑀯𑀺𑀯𑀺𑀢𑁆𑀢𑀁 𑀓𑀸𑀫𑀯𑀺𑀯𑀺𑀢𑁆𑀢𑀁. 𑀲𑁄 𑀏𑀯 𑀘 𑀦𑁂𑀲𑀁 𑀅𑀦𑁆𑀢𑁄 𑀲𑀫𑀼𑀘𑁆𑀙𑁂𑀤𑀯𑀺𑀯𑁂𑀓𑁂𑀢𑀺 𑀓𑀢𑁆𑀯𑀸 𑀢𑀲𑁆𑀫𑀺𑀁 𑀲𑀸𑀥𑁂𑀢𑀩𑁆𑀩𑁂 𑀉𑀧𑁆𑀧𑀦𑁆𑀦𑁄𑀢𑀺 𑀯𑀼𑀢𑁆𑀢𑀁 ‘‘𑀓𑀸𑀫𑀯𑀺𑀯𑀺𑀢𑁆𑀢𑀦𑁆𑀢𑁂 𑀉𑀧𑁆𑀧𑀦𑁆𑀦𑁄’’𑀢𑀺. 𑀓𑀸𑀫𑀢𑁄 𑀦𑀺𑀓𑁆𑀔𑀫𑀢𑀻𑀢𑀺 𑀦𑀺𑀓𑁆𑀔𑀫𑁄, 𑀲𑁄 𑀏𑀯 𑀦𑁂𑀓𑁆𑀔𑀫𑁆𑀫𑀲𑀗𑁆𑀓𑀧𑁆𑀧𑁄. 𑀇𑀫𑀲𑁆𑀫𑀺𑀜𑁆𑀘 𑀦𑁂𑀓𑁆𑀔𑀫𑁆𑀫𑀲𑀗𑁆𑀓𑀧𑁆𑀧𑀲𑁆𑀲 𑀲𑀤𑁆𑀤𑀢𑁆𑀣𑀯𑀺𑀪𑀸𑀯𑁂𑀦 𑀬𑀣𑀸𑀯𑀼𑀢𑁆𑀢𑁄 𑀓𑀸𑀫𑀧𑀘𑁆𑀘𑀦𑀻𑀓𑀝𑁆𑀞𑀸𑀤𑀺𑀓𑁄 𑀅𑀢𑁆𑀣𑀦𑀺𑀤𑁆𑀥𑀸𑀭𑀡𑀯𑀺𑀲𑁂𑀲𑁄 𑀅𑀦𑁆𑀢𑁄𑀕𑀥𑁄.

𑀏𑀲𑁂𑀯 𑀦𑀬𑁄𑀢𑀺 𑀇𑀫𑀺𑀦𑀸 𑀩𑁆𑀬𑀸𑀧𑀸𑀤𑀧𑀘𑁆𑀘𑀦𑀻𑀓𑀝𑁆𑀞𑁂𑀦 𑀯𑀺𑀳𑀺𑀁𑀲𑀸𑀬 𑀧𑀘𑁆𑀘𑀦𑀻𑀓𑀝𑁆𑀞𑁂𑀦𑀸𑀢𑀺𑀆𑀤𑀺𑀓𑀁 𑀅𑀩𑁆𑀬𑀸𑀧𑀸𑀤𑀸𑀯𑀺𑀳𑀺𑀁𑀲𑀸𑀲𑀗𑁆𑀓𑀧𑁆𑀧𑀸𑀦𑀁 𑀅𑀢𑁆𑀣𑀼𑀤𑁆𑀥𑀸𑀭𑀡𑀯𑀺𑀥𑀺𑀁 𑀅𑀢𑀺𑀤𑀺𑀲𑀢𑀺. 𑀦𑁂𑀓𑁆𑀔𑀫𑁆𑀫𑀲𑀗𑁆𑀓𑀧𑁆𑀧𑀸𑀤𑀬𑁄𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀅𑀩𑁆𑀬𑀸𑀧𑀸𑀤𑀅𑀯𑀺𑀳𑀺𑀁𑀲𑀸𑀲𑀗𑁆𑀓𑀧𑁆𑀧𑁂 𑀏𑀯 𑀲𑀗𑁆𑀕𑀡𑁆𑀳𑀸𑀢𑀺. 𑀓𑀸𑀫…𑀧𑁂… 𑀲𑀜𑁆𑀜𑀸𑀦𑀦𑁆𑀢𑀺 𑀓𑀸𑀫𑀯𑀺𑀢𑀓𑁆𑀓𑀸𑀤𑀺𑀯𑀺𑀭𑀢𑀺𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀦𑁂𑀓𑁆𑀔𑀫𑁆𑀫𑀸𑀤𑀺𑀲𑀜𑁆𑀜𑀸𑀦𑀁. 𑀦𑀸𑀦𑀢𑁆𑀢𑀸𑀢𑀺 𑀦𑀸𑀦𑀸𑀔𑀡𑀺𑀓𑀢𑁆𑀢𑀸. 𑀢𑀻𑀲𑀼 𑀞𑀸𑀦𑁂𑀲𑀽𑀢𑀺 𑀢𑀺𑀧𑁆𑀧𑀓𑀸𑀭𑁂𑀲𑀼 𑀓𑀸𑀭𑀡𑁂𑀲𑀼. 𑀉𑀧𑁆𑀧𑀦𑁆𑀦𑀲𑁆𑀲𑀸𑀢𑀺 𑀉𑀧𑁆𑀧𑀚𑁆𑀚𑀦𑀸𑀭𑀳𑀲𑁆𑀲. 𑀪𑀽𑀫𑀺𑀮𑀤𑁆𑀥𑀉𑀧𑁆𑀧𑀦𑁆𑀦𑀁 𑀇𑀥𑀸𑀥𑀺𑀧𑁆𑀧𑁂𑀢𑀁. 𑀏𑀲 𑀦𑀬𑁄 𑀇𑀢𑁄 𑀧𑀭𑁂𑀲𑀼𑀧𑀺. 𑀧𑀤𑀘𑁆𑀙𑁂𑀤𑀢𑁄𑀢𑀺 𑀓𑀸𑀭𑀡𑀼𑀧𑀘𑁆𑀙𑁂𑀤𑀢𑁄. 𑀧𑀤𑀦𑁆𑀢𑀺 𑀳𑀺 𑀉𑀧𑁆𑀧𑀢𑁆𑀢𑀺𑀓𑀸𑀭𑀡𑀦𑁆𑀢𑀺 𑀯𑀼𑀢𑁆𑀢𑁄𑀯𑀸𑀬𑀫𑀢𑁆𑀣𑁄. 𑀅𑀦𑀼𑀧𑁆𑀧𑀢𑁆𑀢𑀺𑀲𑀸𑀥𑀦𑀯𑀲𑁂𑀦𑀸𑀢𑀺 𑀬𑀣𑀸 𑀲𑀗𑁆𑀓𑀧𑁆𑀧𑁄 𑀆𑀬𑀢𑀺𑀁 𑀦𑀼𑀧𑁆𑀧𑀚𑁆𑀚𑀢𑀺, 𑀏𑀯𑀁 𑀅𑀦𑀼𑀧𑁆𑀧𑀢𑁆𑀢𑀺𑀲𑀸𑀥𑀦𑀯𑀲𑁂𑀦. 𑀲𑀫𑁆𑀫𑀸𑀤𑀺𑀝𑁆𑀞𑀺 𑀯𑀺𑀬 𑀏𑀓𑁄𑀯 𑀓𑀼𑀲𑀮𑀲𑀗𑁆𑀓𑀧𑁆𑀧𑁄 𑀉𑀧𑁆𑀧𑀚𑁆𑀚𑀢𑀺.

𑀘𑀢𑀽𑀲𑀼 𑀞𑀸𑀦𑁂𑀲𑀽𑀢𑀺 𑀯𑀺𑀲𑀁𑀯𑀸𑀤𑀦𑀸𑀤𑀻𑀲𑀼 𑀘𑀢𑀽𑀲𑀼 𑀯𑀻𑀢𑀺𑀓𑁆𑀓𑀫𑀝𑁆𑀞𑀸𑀦𑁂𑀲𑀼. 𑀧𑀩𑁆𑀩𑀚𑀺𑀢𑀸𑀦𑀁 𑀫𑀺𑀘𑁆𑀙𑀸𑀚𑀻𑀯𑁄 𑀦𑀸𑀫 𑀆𑀳𑀸𑀭𑀦𑀺𑀫𑀺𑀢𑁆𑀢𑀓𑁄𑀢𑀺 𑀆𑀳 ‘‘𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀸𑀤𑀻𑀦𑀁 𑀅𑀢𑁆𑀣𑀸𑀬𑀸’’𑀢𑀺. 𑀲𑀩𑁆𑀩𑀲𑁄 𑀅𑀦𑁂𑀲𑀦𑀸𑀬 𑀧𑀳𑀸𑀦𑀁 𑀲𑀫𑁆𑀫𑀸𑀆𑀚𑀻𑀯𑁄𑀢𑀺 𑀆𑀳 ‘‘𑀩𑀼𑀤𑁆𑀥𑀧𑁆𑀧𑀲𑀢𑁆𑀣𑁂𑀦 𑀆𑀚𑀻𑀯𑁂𑀦𑀸’’𑀢𑀺. 𑀓𑀫𑁆𑀫𑀧𑀣𑀧𑀢𑁆𑀢𑀸𑀦𑀁 𑀯𑀲𑁂𑀦 ‘‘𑀲𑀢𑁆𑀢𑀲𑀼 𑀞𑀸𑀦𑁂𑀲𑀽’’𑀢𑀺 𑀯𑀼𑀢𑁆𑀢𑀁. 𑀅𑀓𑀫𑁆𑀫𑀧𑀣𑀧𑀢𑁆𑀢𑀸𑀬 𑀳𑀺 𑀅𑀦𑁂𑀲𑀦𑀸𑀬 𑀲𑁄 𑀧𑀤𑀖𑀸𑀢𑀁 𑀓𑀭𑁄𑀢𑀺𑀬𑁂𑀯.

𑀢𑀣𑀸𑀭𑀽𑀧𑁂 𑀯𑀸 𑀆𑀭𑀫𑁆𑀫𑀡𑁂𑀢𑀺 𑀬𑀲𑁆𑀫𑀺𑀁 𑀆𑀭𑀫𑁆𑀫𑀡𑁂 𑀇𑀫𑀲𑁆𑀲 𑀧𑀼𑀩𑁆𑀩𑁂 𑀓𑀺𑀮𑁂𑀲𑀸 𑀦 𑀉𑀧𑁆𑀧𑀦𑁆𑀦𑀸, 𑀢𑀲𑁆𑀫𑀺𑀁 𑀏𑀯. 𑀅𑀦𑀼𑀧𑁆𑀧𑀦𑁆𑀦𑀸𑀦𑀦𑁆𑀢𑀺 𑀅𑀦𑀼𑀧𑁆𑀧𑀸𑀤𑀲𑁆𑀲𑀧𑀺 𑀧𑀢𑁆𑀣𑀦𑀸𑀯𑀲𑁂𑀦 𑀅𑀦𑀼𑀧𑁆𑀧𑀦𑁆𑀦𑀸𑀦𑀁. 𑀯𑀻𑀭𑀺𑀬𑀘𑁆𑀙𑀦𑁆𑀤𑀦𑁆𑀢𑀺 𑀯𑀻𑀭𑀺𑀬𑀲𑁆𑀲 𑀦𑀺𑀩𑁆𑀩𑀢𑁆𑀢𑁂𑀢𑀼𑀓𑀸𑀫𑀢𑀸𑀙𑀦𑁆𑀤𑀁. ‘‘𑀙𑀦𑁆𑀤𑀲𑀫𑁆𑀧𑀬𑀼𑀢𑁆𑀢𑀯𑀻𑀭𑀺𑀬𑀜𑁆𑀘𑀸’’𑀢𑀺 𑀯𑀤𑀦𑁆𑀢𑀺. 𑀯𑀻𑀭𑀺𑀬𑀫𑁂𑀯 𑀧𑀦 𑀅𑀦𑀼𑀧𑁆𑀧𑀦𑁆𑀦𑀸𑀓𑀼𑀲𑀮𑀸𑀦𑀼𑀧𑁆𑀧𑀸𑀤𑀦𑁂 𑀮𑀩𑁆𑀪𑀫𑀸𑀦𑀙𑀦𑁆𑀤𑀢𑀸𑀬 𑀥𑀼𑀭𑀲𑀫𑁆𑀧𑀕𑁆𑀕𑀳𑀢𑀸𑀬 𑀙𑀦𑁆𑀤𑀧𑀭𑀺𑀬𑀸𑀬𑁂𑀦 𑀯𑀼𑀢𑁆𑀢𑀁. 𑀢𑀣𑀸 𑀳𑀺 𑀯𑀻𑀭𑀺𑀬𑀁 𑁋 ‘‘𑀅𑀦𑀺𑀓𑁆𑀔𑀺𑀢𑁆𑀢𑀙𑀦𑁆𑀤𑀢𑀸 𑀅𑀦𑀺𑀓𑁆𑀔𑀺𑀢𑁆𑀢𑀥𑀼𑀭𑀢𑀸’’𑀢𑀺 (𑀥. 𑀲. 𑁨𑁬) 𑀦𑀺𑀤𑁆𑀤𑀺𑀝𑁆𑀞𑀁. 𑀓𑁄𑀲𑀚𑁆𑀚𑀧𑀓𑁆𑀔𑁂 𑀧𑀢𑀺𑀢𑀼𑀁 𑀅𑀤𑀢𑁆𑀯𑀸 𑀘𑀺𑀢𑁆𑀢𑀁 𑀧𑀕𑁆𑀕𑀳𑀺𑀢𑀁 𑀓𑀭𑁄𑀢𑀺. 𑀧𑀥𑀸𑀦𑀦𑁆𑀢𑀺 𑀧𑀥𑀸𑀦𑀪𑀽𑀢𑀯𑀻𑀭𑀺𑀬𑀁.

𑀉𑀧𑁆𑀧𑀢𑁆𑀢𑀺𑀧𑀩𑀦𑁆𑀥𑀯𑀲𑁂𑀦𑀸𑀢𑀺 𑀦𑀺𑀭𑀦𑁆𑀢𑀭𑀼𑀧𑁆𑀧𑀸𑀤𑀦𑀯𑀲𑁂𑀦. 𑀘𑀢𑀽𑀲𑀼 𑀞𑀸𑀦𑁂𑀲𑀼 𑀓𑀺𑀘𑁆𑀘𑀲𑀸𑀥𑀦𑀯𑀲𑁂𑀦𑀸𑀢𑀺 𑀬𑀣𑀸𑀯𑀼𑀢𑁆𑀢𑁂𑀲𑀼 𑀘𑀢𑀽𑀲𑀼 𑀞𑀸𑀦𑁂𑀲𑀼 𑀧𑀥𑀸𑀦𑀓𑀺𑀘𑁆𑀘𑀲𑁆𑀲 𑀦𑀺𑀧𑁆𑀨𑀸𑀤𑀦𑀯𑀲𑁂𑀦 𑀅𑀦𑀼𑀧𑁆𑀧𑀸𑀤𑀦𑀸𑀤𑀺𑀯𑀲𑁂𑀦. 𑀓𑀺𑀘𑁆𑀘𑀲𑀸𑀥𑀦𑀯𑀲𑁂𑀦𑀸𑀢𑀺 𑀓𑀸𑀬𑀯𑁂𑀤𑀦𑀸𑀘𑀺𑀢𑁆𑀢𑀥𑀫𑁆𑀫𑁂𑀲𑀼 𑀲𑀼𑀪𑀲𑀼𑀔𑀦𑀺𑀘𑁆𑀘𑀅𑀢𑁆𑀢𑀕𑀸𑀳𑀯𑀺𑀥𑀫𑀦𑀯𑀲𑁂𑀦 𑀅𑀲𑀼𑀪𑀤𑀼𑀓𑁆𑀔𑀸𑀦𑀺𑀘𑁆𑀘𑀸𑀦𑀢𑁆𑀢𑀲𑀸𑀥𑀦𑀯𑀲𑁂𑀦.

𑀅𑀬𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑁄 𑀲𑀤𑀺𑀲𑀸𑀲𑀤𑀺𑀲𑀢𑀸𑀯𑀺𑀲𑁂𑀲𑁄. 𑀅𑀲𑁆𑀲𑀸𑀢𑀺 𑀫𑀕𑁆𑀕𑀲𑁆𑀲. 𑀏𑀢𑁆𑀣 𑀓𑀣𑀦𑁆𑀢𑀺 𑀬𑀤𑀺 𑀭𑀽𑀧𑀸𑀯𑀘𑀭𑀘𑀢𑀼𑀢𑁆𑀣𑀚𑁆𑀛𑀸𑀦𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀲𑀩𑁆𑀩𑀪𑀯𑀕𑁆𑀕𑀸 𑀛𑀸𑀦𑀗𑁆𑀕𑀫𑀕𑁆𑀕𑀗𑁆𑀕𑀩𑁄𑀚𑁆𑀛𑀗𑁆𑀕𑀸𑀦𑀁 𑀲𑀤𑀺𑀲𑀢𑀸, 𑀏𑀯𑀁 𑀲𑀦𑁆𑀢𑁂 ‘‘𑀆𑀭𑀼𑀧𑁆𑀧𑁂 𑀘𑀢𑀼𑀓𑁆𑀓𑀧𑀜𑁆𑀘𑀓𑀚𑁆𑀛𑀸𑀦𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀜𑁆𑀘 𑀮𑁄𑀓𑀼𑀢𑁆𑀢𑀭’’𑀦𑁆𑀢𑀺 𑀏𑀢𑁆𑀣 𑀓𑀣𑀁 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄𑀢𑀺 𑀆𑀳 ‘‘𑀏𑀢𑁆𑀣𑀸𑀧𑀻’’𑀢𑀺𑀆𑀤𑀺. 𑀢𑀁𑀛𑀸𑀦𑀺𑀓𑀸𑀯𑀸𑀢𑀺 𑀧𑀞𑀫𑀚𑁆𑀛𑀸𑀦𑀸𑀤𑀻𑀲𑀼 𑀬𑀁 𑀛𑀸𑀦𑀁 𑀫𑀕𑁆𑀕𑀧𑀝𑀺𑀮𑀸𑀪𑀲𑁆𑀲 𑀧𑀸𑀤𑀓𑀪𑀽𑀢𑀁, 𑀢𑀁𑀛𑀸𑀦𑀺𑀓𑀸𑀯 𑀅𑀲𑁆𑀲 𑀅𑀭𑀺𑀬𑀲𑁆𑀲 𑀉𑀧𑀭𑀺𑀧𑀺 𑀢𑀬𑁄 𑀫𑀕𑁆𑀕𑀸. 𑀏𑀯𑀦𑁆𑀢𑀺 𑀯𑀼𑀢𑁆𑀢𑀸𑀓𑀸𑀭𑁂𑀦. 𑀧𑀸𑀤𑀓𑀚𑁆𑀛𑀸𑀦𑀫𑁂𑀯 𑀦𑀺𑀬𑀫𑁂𑀢𑀺 𑀆𑀭𑀼𑀧𑁆𑀧𑁂 𑀘𑀢𑀼𑀓𑁆𑀓𑀧𑀜𑁆𑀘𑀓𑀚𑁆𑀛𑀸𑀦𑀼𑀧𑁆𑀧𑀢𑁆𑀢𑀺𑀬𑀁. 𑀯𑀺𑀧𑀲𑁆𑀲𑀦𑀸𑀬 𑀆𑀭𑀫𑁆𑀫𑀡𑀪𑀽𑀢𑀸 𑀔𑀦𑁆𑀥𑀸𑀢𑀺 𑀲𑀫𑁆𑀫𑀲𑀺𑀢𑀔𑀦𑁆𑀥𑁂 𑀯𑀤𑀦𑁆𑀢𑀺. 𑀧𑀼𑀕𑁆𑀕𑀮𑀚𑁆𑀛𑀸𑀲𑀬𑁄 𑀦𑀺𑀬𑀫𑁂𑀢𑀺 𑀧𑀸𑀤𑀓𑀲𑀫𑁆𑀫𑀲𑀺𑀢𑀚𑁆𑀛𑀸𑀦𑀸𑀦𑀁 𑀪𑁂𑀤𑁂. 𑀬𑀲𑁆𑀫𑀸 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀜𑀸𑀡𑀫𑁂𑀯 𑀅𑀭𑀺𑀬𑀫𑀕𑁆𑀕𑀲𑁆𑀲 𑀩𑁄𑀚𑁆𑀛𑀗𑁆𑀕𑀸𑀤𑀺𑀯𑀺𑀲𑁂𑀲𑀁 𑀦𑀺𑀬𑀫𑁂𑀢𑀺, 𑀢𑀢𑁄 𑀤𑀼𑀢𑀺𑀬𑀸𑀤𑀺𑀧𑀸𑀤𑀓𑀚𑁆𑀛𑀸𑀦𑀢𑁄 𑀉𑀧𑁆𑀧𑀦𑁆𑀦𑀲𑁆𑀲 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀜𑀸𑀡𑀲𑁆𑀲 𑀧𑀸𑀤𑀓𑀚𑁆𑀛𑀸𑀦𑀸𑀢𑀺𑀓𑁆𑀓𑀦𑁆𑀢𑀸𑀦𑀁 𑀅𑀗𑁆𑀕𑀸𑀦𑀁 𑀅𑀲𑀫𑀸𑀧𑀚𑁆𑀚𑀺𑀢𑀼𑀓𑀸𑀫𑀢𑀸𑀯𑀺𑀭𑀸𑀕𑀪𑀸𑀯𑀢𑁄 𑀇𑀢𑀭𑀲𑁆𑀲 𑀘 𑀅𑀢𑀩𑁆𑀪𑀸𑀯𑀢𑁄 𑀢𑀻𑀲𑀼𑀧𑀺 𑀯𑀸𑀤𑁂𑀲𑀼 𑀯𑀺𑀧𑀲𑁆𑀲𑀦𑀸𑀯 𑀦𑀺𑀬𑀫𑁂𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄, 𑀢𑀲𑁆𑀫𑀸 𑀯𑀺𑀧𑀲𑁆𑀲𑀦𑀸𑀦𑀺𑀬𑀫𑁂𑀦𑁂𑀯 𑀳𑀺 𑀧𑀞𑀫𑀯𑀸𑀤𑁂𑀧𑀺 𑀅𑀧𑀸𑀤𑀓𑀚𑁆𑀛𑀸𑀦𑀸𑀤𑀺𑀧𑀸𑀤𑀓𑀸𑀧𑀺 𑀫𑀕𑁆𑀕𑀸 𑀧𑀞𑀫𑀚𑁆𑀛𑀸𑀦𑀺𑀓𑀸 𑀳𑁄𑀦𑁆𑀢𑀺. 𑀇𑀢𑀭𑁂𑀳𑀺 𑀘 𑀧𑀸𑀤𑀓𑀚𑁆𑀛𑀸𑀦𑁂𑀳𑀺 𑀯𑀺𑀧𑀲𑁆𑀲𑀦𑀸𑀦𑀺𑀬𑀫𑁂𑀳𑀺 𑀢𑀁𑀢𑀁𑀛𑀸𑀦𑀺𑀓𑀸𑀯. 𑀏𑀯𑀁 𑀲𑁂𑀲𑀯𑀸𑀤𑁂𑀲𑀼 𑀯𑀺𑀧𑀲𑁆𑀲𑀦𑀸𑀦𑀺𑀬𑀫𑁄 𑀬𑀣𑀸𑀲𑀫𑁆𑀪𑀯𑀁 𑀬𑁄𑀚𑁂𑀢𑀩𑁆𑀩𑁄. 𑀤𑀼𑀢𑀺𑀬𑀯𑀸𑀤𑁂 𑀢𑀁𑀢𑀁𑀛𑀸𑀦𑀺𑀓𑀢𑀸 𑀲𑀫𑁆𑀫𑀲𑀺𑀢𑀲𑀗𑁆𑀔𑀸𑀭𑀯𑀺𑀧𑀲𑁆𑀲𑀦𑀸𑀦𑀺𑀬𑀫𑁂𑀳𑀺 𑀳𑁄𑀢𑀺. 𑀢𑀢𑁆𑀭 𑀳𑀺 𑀯𑀺𑀧𑀲𑁆𑀲𑀦𑀸 𑀢𑀁𑀢𑀁𑀯𑀺𑀭𑀸𑀕𑀪𑀸𑀯𑀦𑀸 𑀪𑀸𑀯𑁂𑀢𑀩𑁆𑀩𑀸, 𑀦 𑀲𑁄𑀫𑀦𑀲𑁆𑀲𑀲𑀳𑀕𑀢𑀸 𑀉𑀧𑁂𑀓𑁆𑀔𑀸𑀲𑀳𑀕𑀢𑀸 𑀳𑀼𑀢𑁆𑀯𑀸 𑀛𑀸𑀦𑀗𑁆𑀕𑀸𑀤𑀺𑀦𑀺𑀬𑀫𑀁 𑀫𑀕𑁆𑀕𑀲𑁆𑀲 𑀓𑀭𑁄𑀢𑀻𑀢𑀺 𑀏𑀯𑀁 𑀯𑀺𑀧𑀲𑁆𑀲𑀦𑀸𑀦𑀺𑀬𑀫𑁄 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀇𑀫𑀲𑁆𑀫𑀺𑀜𑁆𑀘 𑀯𑀸𑀤𑁂 𑀧𑀸𑀤𑀓𑀲𑀫𑁆𑀫𑀲𑀺𑀢𑀚𑁆𑀛𑀸𑀦𑀼𑀧𑀦𑀺𑀲𑁆𑀲𑀬𑀲𑀩𑁆𑀪𑀸𑀯𑁂 𑀅𑀚𑁆𑀛𑀸𑀲𑀬𑁄 𑀏𑀓𑀦𑁆𑀢𑁂𑀦 𑀳𑁄𑀢𑀻𑀢𑀺 ‘‘𑀧𑀼𑀕𑁆𑀕𑀮𑀚𑁆𑀛𑀸𑀲𑀬𑁄 𑀦𑀺𑀬𑀫𑁂𑀢𑀻𑀢𑀺 𑀯𑀤𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁, 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀲𑁆𑀲 𑀏𑀢𑀺𑀲𑁆𑀲𑀸 𑀅𑀝𑁆𑀞𑀓𑀣𑀸𑀬 𑀏𑀓𑀲𑀗𑁆𑀕𑀳𑀺𑀢𑀢𑁆𑀢𑀸 ‘‘𑀢𑁂𑀲𑀁 𑀯𑀸𑀤𑀯𑀺𑀦𑀺𑀘𑁆𑀙𑀬𑁄…𑀧𑁂… 𑀯𑁂𑀤𑀺𑀢𑀩𑁆𑀩𑁄’’𑀢𑀺 𑀯𑀼𑀢𑁆𑀢𑀁. 𑀧𑀼𑀩𑁆𑀩𑀪𑀸𑀕𑁂𑀢𑀺 𑀯𑀺𑀧𑀲𑁆𑀲𑀦𑀸𑀓𑁆𑀔𑀡𑁂.

𑀯𑀺𑀪𑀗𑁆𑀕𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀲𑀽𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁯. 𑀲𑀽𑀓𑀦𑁆𑀢𑀺 𑀲𑀸𑀮𑀺𑀬𑀯𑀸𑀤𑀻𑀦𑀁 𑀯𑀸𑀮𑀫𑀸𑀳. 𑀲𑁄 𑀳𑀺 𑀦𑀺𑀓𑀦𑁆𑀢𑀓𑀲𑀤𑀺𑀲𑁄 𑀧𑀝𑀺𑀫𑀼𑀔𑀕𑀢𑀁 𑀳𑀢𑁆𑀣𑀁 𑀯𑀸 𑀧𑀸𑀤𑀁 𑀯𑀸 𑀪𑀺𑀦𑁆𑀤𑀢𑀺, 𑀢𑀲𑁆𑀫𑀸 𑀪𑁂𑀤𑀁 𑀇𑀘𑁆𑀙𑀦𑁆𑀢𑁂𑀦 𑀉𑀤𑁆𑀥𑀕𑁆𑀕𑀁 𑀓𑀢𑁆𑀯𑀸 𑀞𑀧𑀺𑀢𑀁 𑀲𑀫𑁆𑀫𑀸𑀧𑀡𑀺𑀳𑀺𑀢𑀁 𑀦𑀸𑀫, 𑀢𑀣𑀸 𑀅𑀝𑁆𑀞𑀧𑀺𑀢𑀁 𑀫𑀺𑀘𑁆𑀙𑀸𑀧𑀡𑀺𑀳𑀺𑀢𑀁 𑀦𑀸𑀫𑀸𑀢𑀺 𑀯𑀼𑀢𑁆𑀢𑀁. 𑀫𑀺𑀘𑁆𑀙𑀸𑀧𑀡𑀺𑀳𑀺𑀢𑀸𑀬𑀸𑀢𑀺 𑀓𑀫𑁆𑀫𑀲𑁆𑀲𑀓𑀢𑀧𑀜𑁆𑀜𑀸𑀬 𑀫𑀺𑀘𑁆𑀙𑀸𑀞𑀧𑀦𑀁 𑀦𑀸𑀫 𑁋 ‘‘𑀇𑀫𑁂 𑀲𑀢𑁆𑀢𑀸 𑀓𑀫𑁆𑀫𑀯𑀲𑁂𑀦 𑀲𑀼𑀔𑀤𑀼𑀓𑁆𑀔𑀁 𑀧𑀘𑁆𑀘𑀦𑀼𑀪𑀯𑀦𑁆𑀢𑀺, 𑀢𑀁 𑀧𑀦 𑀓𑀫𑁆𑀫𑀁 𑀇𑀲𑁆𑀲𑀭𑀲𑁆𑀲 𑀇𑀘𑁆𑀙𑀸𑀯𑀲𑁂𑀦 𑀩𑁆𑀭𑀳𑁆𑀫𑀸 𑀦𑀺𑀫𑁆𑀫𑀺𑀦𑀸𑀢𑀻’’𑀢𑀺𑀆𑀤𑀺𑀦𑀸 𑀫𑀺𑀘𑁆𑀙𑀸𑀧𑀓𑀧𑁆𑀧𑀦𑀁. 𑀓𑁂𑀘𑀺 𑀧𑀦 ‘‘𑀦𑀢𑁆𑀣𑀺 𑀤𑀺𑀦𑁆𑀦𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀯𑀢𑁆𑀢𑀺, 𑀢𑀲𑁆𑀲 𑀯𑀸 𑀜𑀸𑀡𑀲𑁆𑀲 𑀅𑀧𑁆𑀧𑀯𑀢𑁆𑀢𑀻’’𑀢𑀺 𑀯𑀤𑀦𑁆𑀢𑀺. 𑀫𑀕𑁆𑀕𑀪𑀸𑀯𑀦𑀸𑀬𑀸𑀢𑀺 𑀏𑀢𑁆𑀣𑀸𑀧𑀺 𑀫𑀺𑀘𑁆𑀙𑀸𑀫𑀕𑁆𑀕𑀲𑁆𑀲 𑀧𑀯𑀢𑁆𑀢𑀦𑀁, 𑀅𑀭𑀺𑀬𑀫𑀕𑁆𑀕𑀲𑁆𑀲 𑀯𑀸 𑀅𑀧𑁆𑀧𑀯𑀢𑁆𑀢𑀦𑀁 𑀫𑀺𑀘𑁆𑀙𑀸𑀞𑀧𑀦𑀁. 𑀢𑁂𑀦𑀸𑀳 ‘‘𑀅𑀧𑁆𑀧𑀯𑀢𑁆𑀢𑀺𑀢𑀢𑁆𑀢𑀸’’𑀢𑀺. 𑀅𑀯𑀺𑀚𑁆𑀚𑀁 𑀪𑀺𑀦𑁆𑀤𑀺𑀲𑁆𑀲𑀢𑀻𑀢𑀺 𑀅𑀯𑀺𑀚𑁆𑀚𑀁 𑀲𑀫𑀼𑀘𑁆𑀙𑀺𑀦𑁆𑀤𑀺𑀲𑁆𑀲𑀢𑀺. 𑀫𑀕𑁆𑀕𑀦𑀺𑀲𑁆𑀲𑀺𑀢𑀁 𑀓𑀢𑁆𑀯𑀸 𑀫𑀕𑁆𑀕𑁂 𑀏𑀯 𑀧𑀓𑁆𑀔𑀺𑀧𑀺𑀢𑁆𑀯𑀸. 𑀢𑀜𑁆𑀳𑀺 𑀜𑀸𑀡𑀁 𑀫𑀕𑁆𑀕𑀲𑁆𑀲 𑀫𑀽𑀮𑀓𑀸𑀭𑀡𑀁 𑀫𑀕𑁆𑀕𑁂 𑀲𑀺𑀤𑁆𑀥𑁂 𑀢𑀲𑁆𑀲 𑀓𑀺𑀘𑁆𑀘𑀲𑁆𑀲 𑀫𑀢𑁆𑀣𑀓𑀧𑁆𑀧𑀢𑁆𑀢𑀺𑀢𑁄. ‘‘𑀲𑀫𑁆𑀫𑀸𑀧𑀡𑀺𑀳𑀺𑀢𑀸𑀬 𑀤𑀺𑀝𑁆𑀞𑀺𑀬𑀸 𑀲𑀫𑁆𑀫𑀸𑀧𑀡𑀺𑀳𑀺𑀢𑀸𑀬 𑀫𑀕𑁆𑀕𑀪𑀸𑀯𑀦𑀸𑀬𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀫𑀺𑀲𑁆𑀲𑀓𑀫𑀕𑁆𑀕𑁄 𑀓𑀣𑀺𑀢𑁄. 𑀙𑀯𑀺𑀪𑁂𑀤𑀲𑀤𑀺𑀲𑁄 𑀘𑁂𑀢𑁆𑀣 𑀅𑀯𑀺𑀚𑁆𑀚𑀸𑀪𑁂𑀤𑁄, 𑀮𑁄𑀳𑀺𑀢𑀼𑀧𑁆𑀧𑀸𑀤𑀲𑀤𑀺𑀲𑁄 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑀪𑀸𑀯𑁄 𑀤𑀝𑁆𑀞𑀩𑁆𑀩𑁄.

𑀲𑀽𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀦𑀦𑁆𑀤𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦. 𑀙𑀦𑁆𑀦𑀧𑀭𑀺𑀩𑁆𑀩𑀸𑀚𑀓𑁄 𑀯𑀢𑁆𑀣𑀘𑁆𑀙𑀸𑀤𑀺𑀬𑀸 𑀙𑀦𑁆𑀦𑀗𑁆𑀕𑀧𑀭𑀺𑀩𑁆𑀩𑀸𑀚𑀓𑁄, 𑀦 𑀦𑀕𑁆𑀕𑀧𑀭𑀺𑀩𑁆𑀩𑀸𑀚𑀓𑁄.

𑀅𑀯𑀺𑀚𑁆𑀚𑀸𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀯𑀺𑀳𑀸𑀭𑀯𑀕𑁆𑀕𑁄

𑁧. 𑀧𑀞𑀫𑀯𑀺𑀳𑀸𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧. 𑀅𑀟𑁆𑀠𑀫𑀸𑀲𑀦𑁆𑀢𑀺 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑁂 𑀉𑀧𑀬𑁄𑀕𑀯𑀘𑀦𑀁. 𑀧𑀝𑀺𑀲𑀮𑁆𑀮𑀻𑀬𑀺𑀢𑀼𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀁 𑀓𑀸𑀮𑀁 𑀧𑀝𑀺 𑀤𑀺𑀯𑀲𑁂 𑀤𑀺𑀯𑀲𑁂 𑀲𑀫𑀸𑀧𑀢𑁆𑀢𑀺𑀬𑀁 𑀥𑀫𑁆𑀫𑀘𑀺𑀦𑁆𑀢𑀸𑀬𑀁 𑀘𑀺𑀢𑁆𑀢𑀁 𑀦𑀺𑀮𑀻𑀬𑀺𑀢𑀼𑀁. 𑀯𑀺𑀦𑁂𑀢𑀩𑁆𑀩𑁄𑀢𑀺 𑀲𑀫𑀼𑀘𑁆𑀙𑁂𑀤𑀯𑀺𑀦𑀬𑁂𑀦 𑀯𑀺𑀦𑁂𑀢𑀩𑁆𑀩𑁄 𑀅𑀭𑀺𑀬𑀫𑀕𑁆𑀕𑀸𑀥𑀺𑀕𑀦𑁆𑀢𑀩𑁆𑀩𑁄. 𑀢𑀦𑁆𑀢𑀺 𑀤𑀺𑀝𑁆𑀞𑀸𑀦𑀼𑀕𑀢𑀺𑀆𑀧𑀚𑁆𑀚𑀦𑀁. 𑀅𑀲𑁆𑀲𑀸𑀢𑀺 𑀚𑀦𑀢𑀸𑀬. 𑀅𑀧𑀕𑀘𑁆𑀙𑀢𑀻𑀢𑀺 𑀲𑀢𑁆𑀣𑀼 𑀲𑀦𑁆𑀢𑀺𑀓𑀢𑁄 𑀅𑀧𑁂𑀢𑀺. 𑀲𑀽𑀢𑀺 𑀦𑀺𑀧𑀸𑀢𑀫𑀢𑁆𑀢𑀁.

𑀧𑀤𑁂𑀲𑁂𑀦𑀸𑀢𑀺 𑀏𑀓𑀤𑁂𑀲𑁂𑀦. 𑀲𑀳 𑀧𑀤𑁂𑀲𑁂𑀦𑀸𑀢𑀺 𑀲𑀧𑀤𑁂𑀲𑁄. 𑀲𑁆𑀯𑀸𑀬𑀁 𑀲𑀧𑀤𑁂𑀲𑁄 𑀬𑀲𑁆𑀫𑀸 𑀯𑁂𑀤𑀦𑀸𑀯𑀲𑁂𑀦𑁂𑀯 𑀧𑀸𑀴𑀺𑀬𑀁 𑀆𑀕𑀢𑁄, 𑀢𑀲𑁆𑀫𑀸 𑀧𑀭𑀫𑀢𑁆𑀣𑀥𑀫𑁆𑀫𑀓𑁄𑀝𑁆𑀞𑀸𑀲𑁂 𑀯𑁂𑀤𑀦𑀸 𑀅𑀦𑀯𑀲𑁂𑀲𑀢𑁄 𑀮𑀩𑁆𑀪𑀢𑀺, 𑀢𑁂 𑀕𑀡𑁆𑀳𑀦𑁆𑀢𑁄 ‘‘𑀔𑀦𑁆𑀥𑀧𑀤𑁂𑀲𑁄’’𑀢𑀺𑀆𑀤𑀺𑀫𑀸𑀳. 𑀢𑀁 𑀲𑀩𑁆𑀩𑀦𑁆𑀢𑀺 𑀔𑀦𑁆𑀥𑀧𑀤𑁂𑀲𑀸𑀤𑀺𑀓𑀁 𑀲𑀩𑁆𑀩𑀫𑁆𑀧𑀺. ‘‘𑀲𑀫𑁆𑀫𑀲𑀦𑁆𑀢𑁄’’𑀢𑀺 𑀧𑀤𑀲𑁆𑀲 𑀅𑀢𑁆𑀣𑀤𑀲𑁆𑀲𑀦𑀯𑀲𑁂𑀦 ‘‘𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑁄’’𑀢𑀺 𑀆𑀳. 𑀧𑀘𑁆𑀘𑀯𑁂𑀓𑁆𑀔𑀡𑀸 𑀇𑀥 𑀲𑀫𑁆𑀫𑀲𑀦𑀁 𑀦𑀸𑀫, 𑀦 𑀯𑀺𑀧𑀲𑁆𑀲𑀦𑀸. 𑀯𑀺𑀧𑀲𑁆𑀲𑀦𑀸𑀲𑀫𑁆𑀫𑀲𑀦𑀁 𑀧𑀦 𑀪𑀕𑀯𑀢𑁄 𑀯𑀺𑀲𑀸𑀔𑀧𑀼𑀡𑁆𑀡𑀫𑀸𑀬𑀁 𑀏𑀯 𑀦𑀺𑀧𑁆𑀨𑀦𑁆𑀦𑀁, 𑀢𑀲𑁆𑀫𑀸 𑀪𑀕𑀯𑀢𑁄 𑀅𑀜𑁆𑀜𑀪𑀽𑀫𑀺𑀓𑀸𑀧𑀺 𑀯𑁂𑀤𑀦𑀸 𑀅𑀜𑁆𑀜𑀪𑀽𑀫𑀺𑀓𑀸𑀦𑀁 𑀲𑀢𑁆𑀢𑀸𑀦𑀁 𑀯𑀺𑀭𑀼𑀤𑁆𑀥𑀸 𑀉𑀧𑁆𑀧𑀚𑁆𑀚𑀢𑁂𑀯𑀸𑀢𑀺 𑀯𑀼𑀢𑁆𑀢𑀁 ‘‘𑀬𑀸𑀯 𑀪𑀯𑀕𑁆𑀕𑀸 𑀧𑀯𑀢𑁆𑀢𑀸 𑀲𑀼𑀔𑀸 𑀯𑁂𑀤𑀦𑀸’’𑀢𑀺. 𑀲𑀩𑁆𑀩𑀸𑀓𑀸𑀭𑁂𑀦𑀸𑀢𑀺 𑀲𑀭𑀽𑀧𑀢𑁄 𑀲𑀫𑀼𑀤𑀬𑀢𑁄 𑀅𑀢𑁆𑀣𑀗𑁆𑀕𑀫𑀢𑁄 𑀅𑀲𑁆𑀲𑀸𑀤𑀸𑀤𑀺𑀢𑁄𑀢𑀺 𑀲𑀩𑁆𑀩𑀸𑀓𑀸𑀭𑁂𑀦. 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑁄 𑀉𑀧𑀧𑀭𑀺𑀓𑁆𑀔𑀦𑁆𑀢𑁄.

𑀦𑀺𑀧𑁆𑀧𑀤𑁂𑀲𑀸𑀦𑁂𑀯 𑀅𑀦𑀯𑀲𑁂𑀲𑀸𑀦𑁂𑀯. 𑀇𑀦𑁆𑀤𑁆𑀭𑀺𑀬𑀲𑀢𑀺𑀧𑀝𑁆𑀞𑀸𑀦𑀧𑀤𑁂𑀲𑁄 𑀲𑀼𑀯𑀺𑀜𑁆𑀜𑁂𑀬𑁆𑀬𑁄𑀢𑀺 𑀅𑀦𑀼𑀤𑁆𑀥𑀢𑁄. 𑀅𑀲𑁆𑀲𑀸𑀢𑀺 𑀪𑀕𑀯𑀢𑁄. 𑀞𑀸𑀦𑁂𑀢𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀲𑀗𑁆𑀔𑀸𑀢𑁂 𑀑𑀓𑀸𑀲𑁂. 𑀲𑀸 𑀲𑀸 𑀘 𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀻𑀢𑀺 𑀔𑀦𑁆𑀥𑀯𑀲𑁂𑀦 𑀆𑀬𑀢𑀦𑀸𑀤𑀺𑀯𑀲𑁂𑀦 𑀘 𑀧𑀯𑀢𑁆𑀢𑀺𑀢𑁆𑀯𑀸 𑀢𑁂𑀲𑀁 𑀏𑀓𑀤𑁂𑀲𑀪𑀽𑀢𑀁 𑀯𑁂𑀤𑀦𑀁𑀬𑁂𑀯 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀢𑀁 𑀲𑀫𑁆𑀫𑀲𑀺𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀲𑀫𑀸𑀧𑀦𑁆𑀦𑀸 𑀛𑀸𑀦𑀲𑀫𑀸𑀧𑀢𑁆𑀢𑀺 𑀨𑀮𑀲𑀫𑀸𑀧𑀢𑁆𑀢𑀺 𑀘. 𑀨𑀮𑀲𑀫𑀸𑀧𑀢𑁆𑀢𑀺 𑀳𑀺 𑀢𑀣𑀸 𑀲𑀫𑁆𑀫𑀲𑀺𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀲𑀫𑀸𑀧𑀚𑁆𑀚𑀦𑀯𑀲𑁂𑀦 𑀅𑀢𑁆𑀣𑀢𑁄 𑀅𑀪𑀺𑀦𑁆𑀦𑀸𑀧𑀺 𑀅𑀥𑀺𑀝𑁆𑀞𑀸𑀦𑀪𑀽𑀢𑀥𑀫𑁆𑀫𑀪𑁂𑀤𑁂𑀦 𑀪𑀺𑀦𑁆𑀦𑀸 𑀯𑀺𑀬 𑀯𑀼𑀘𑁆𑀘𑀢𑀺, 𑀬𑀢𑁄 𑀘𑀢𑀼𑀯𑀻𑀲𑀢𑀺𑀓𑁄𑀝𑀺𑀲𑀢𑀲𑀳𑀲𑁆𑀲𑀪𑁂𑀤𑀸 𑀤𑁂𑀯𑀲𑀺𑀓𑀁 𑀯𑀴𑀜𑁆𑀚𑀦𑀲𑀫𑀸𑀧𑀢𑁆𑀢𑀺𑀬𑁄 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀸. 𑀓𑀸𑀫𑀁 𑀅𑀜𑁆𑀜𑀥𑀫𑁆𑀫𑀯𑀲𑁂𑀦𑀧𑀺 𑀚𑀸𑀢𑀸 𑀏𑀯, 𑀯𑁂𑀤𑀦𑀸𑀯𑀲𑁂𑀦 𑀧𑀦𑁂𑀢𑁆𑀣 𑀅𑀪𑀺𑀦𑀺𑀯𑁂𑀲𑁄 𑀓𑀢𑁄 𑀯𑁂𑀤𑀦𑀸𑀦𑀼𑀪𑀸𑀯𑁂𑀦 𑀚𑀸𑀢𑀸. 𑀓𑀲𑁆𑀫𑀸 𑀏𑀯𑀁 𑀚𑀸𑀢𑀸𑀢𑀺? 𑀩𑀼𑀤𑁆𑀥𑀸𑀦𑀁 𑀜𑀸𑀡𑀧𑀤𑀲𑁆𑀲 𑀅𑀦𑁆𑀢𑀭𑀯𑀺𑀪𑀸𑀕𑀢𑁆𑀢𑀸. 𑀢𑀣𑀸 𑀳𑀺 𑀪𑀕𑀯𑀸 𑀲𑀓𑀮𑀫𑁆𑀧𑀺 𑀅𑀟𑁆𑀠𑀫𑀸𑀲𑀁 𑀯𑁂𑀤𑀦𑀸𑀯𑀲𑁂𑀦𑁂𑀯 𑀲𑀫𑁆𑀫𑀲𑀦𑀁 𑀧𑀯𑀢𑁆𑀢𑁂𑀢𑀺, 𑀢𑀤𑀦𑀼𑀲𑀸𑀭𑁂𑀦 𑀘 𑀢𑀸 𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀺𑀬𑁄 𑀲𑀫𑀸𑀧𑀚𑁆𑀚𑀺. 𑀢𑀬𑀺𑀤𑀁 𑀅𑀘𑁆𑀙𑀭𑀺𑀬𑀁 𑀅𑀦𑀜𑁆𑀜𑀲𑀸𑀥𑀸𑀭𑀡𑀁 𑀪𑀺𑀓𑁆𑀔𑀽 𑀧𑀯𑁂𑀤𑁂𑀦𑁆𑀢𑁄 𑀲𑀢𑁆𑀣𑀸 𑁋 ‘‘𑀬𑁂𑀦 𑀲𑁆𑀯𑀸𑀳’’𑀦𑁆𑀢𑀺𑀆𑀤𑀺𑀫𑀯𑁄𑀘.

𑀅𑀓𑀼𑀲𑀮𑀸𑀯𑀸𑀢𑀺 𑀧𑀸𑀡𑀸𑀢𑀺𑀧𑀸𑀢-𑀅𑀤𑀺𑀦𑁆𑀦𑀸𑀤𑀸𑀦-𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭-𑀫𑀼𑀲𑀸𑀯𑀸𑀤-𑀧𑀺𑀲𑀼𑀡𑀯𑀸𑀘𑀸𑀲𑀫𑁆𑀨𑀧𑁆𑀧𑀮𑀸𑀧-𑀅𑀪𑀺𑀚𑁆𑀛𑀸-𑀩𑁆𑀬𑀸𑀧𑀸𑀤𑀯𑀲𑁂𑀦 𑀢𑀁𑀢𑀁𑀫𑀺𑀘𑁆𑀙𑀸𑀤𑀲𑁆𑀲𑀦𑀯𑀲𑁂𑀦 𑀘 𑀅𑀓𑀼𑀲𑀮𑀸 𑀯𑁂𑀤𑀦𑀸 𑀏𑀯 𑀳𑁄𑀢𑀺. 𑀩𑁆𑀭𑀳𑁆𑀫𑀮𑁄𑀓𑀸𑀤𑀻𑀲𑀼 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀢𑀢𑁆𑀣 𑀦𑀺𑀘𑁆𑀘𑀸 𑀥𑀼𑀯𑀸 𑀪𑀯𑀺𑀲𑁆𑀲𑀸𑀫𑀸𑀢𑀺 𑀏𑀯𑀁 𑀤𑀺𑀝𑁆𑀞𑀺𑀁 𑀉𑀧𑀦𑀺𑀲𑁆𑀲𑀸𑀬𑀸𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀤𑁂𑀯𑀓𑀼𑀮𑀸𑀤𑀻𑀲𑀼 𑀤𑁂𑀯𑀧𑀽𑀚𑀢𑁆𑀣𑀁, 𑀲𑀩𑁆𑀩𑀚𑀦𑀧𑀭𑀺𑀪𑁄𑀕𑀢𑁆𑀣𑀁 𑀯𑀸 𑀫𑀸𑀮𑀸𑀯𑀘𑁆𑀙𑀁 𑀭𑁄𑀧𑁂𑀦𑁆𑀢𑀺. 𑀯𑀥𑀩𑀦𑁆𑀥𑀦𑀸𑀤𑀻𑀦𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀅𑀤𑀺𑀦𑁆𑀦𑀸𑀤𑀸𑀦-𑀫𑀺𑀘𑁆𑀙𑀸𑀘𑀸𑀭-𑀫𑀼𑀲𑀸𑀯𑀸𑀤-𑀧𑀺𑀲𑀼𑀡𑀯𑀸𑀘𑀸-𑀲𑀫𑁆𑀨𑀧𑁆𑀧𑀮𑀸𑀧𑀸𑀤𑀻𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀤𑀺𑀝𑁆𑀞𑀥𑀫𑁆𑀫𑀯𑀺𑀧𑀸𑀓𑀲𑁆𑀲 𑀅𑀧𑀘𑀼𑀭𑀢𑁆𑀢𑀸 𑀅𑀧𑀸𑀓𑀝𑀢𑁆𑀢𑀸 𑀘 ‘‘𑀪𑀯𑀦𑁆𑀢𑀭𑀕𑀢𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁.

𑀇𑀢𑀺 𑀦𑁂𑀲𑀦𑁆𑀢𑀺 𑀏𑀢𑁆𑀣 𑀇𑀢𑀺-𑀲𑀤𑁆𑀤𑁄 𑀆𑀤𑀺𑀅𑀢𑁆𑀣𑁄, 𑀧𑀓𑀸𑀭𑀢𑁆𑀣𑁄 𑀯𑀸. 𑀢𑁂𑀦 𑀬𑀣𑀸 𑀨𑀭𑀼𑀲𑀯𑀸𑀘𑀸𑀯𑀲𑁂𑀦, 𑀏𑀯𑀁 𑀢𑀤𑀜𑁆𑀜𑁂𑀲𑀫𑁆𑀧𑀺 𑀅𑀓𑀼𑀲𑀮𑀓𑀫𑁆𑀫𑀸𑀦𑀁 𑀯𑀲𑁂𑀦 𑀲𑀫𑁆𑀫𑀸𑀤𑀺𑀝𑁆𑀞𑀺𑀧𑀘𑁆𑀘𑀬𑀸 𑀅𑀓𑀼𑀲𑀮𑀯𑁂𑀤𑀦𑀸𑀧𑁆𑀧𑀯𑀢𑁆𑀢𑀺 𑀬𑀣𑀸𑀭𑀳𑀁 𑀦𑀻𑀳𑀭𑀺𑀢𑁆𑀯𑀸 𑀯𑀢𑁆𑀢𑀩𑁆𑀩𑀸. 𑀏𑀲𑁂𑀯 𑀦𑀬𑁄𑀢𑀺 𑀇𑀫𑀺𑀦𑀸 𑀬𑀣𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀧𑀘𑁆𑀘𑀬𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀧𑀘𑁆𑀘𑀬𑀸 𑀘 𑀓𑀼𑀲𑀮𑀸𑀓𑀼𑀲𑀮𑀯𑀺𑀧𑀸𑀓𑀯𑁂𑀤𑀦𑀸 𑀲𑀳𑀚𑀸𑀢𑀓𑁄𑀝𑀺𑀬𑀸 𑀉𑀧𑀦𑀺𑀲𑁆𑀲𑀬𑀓𑁄𑀝𑀺𑀬𑀸 𑀘 𑀯𑀲𑁂𑀦 𑀬𑀣𑀸𑀭𑀳𑀁 𑀬𑁄𑀚𑁂𑀢𑁆𑀯𑀸 𑀤𑀲𑁆𑀲𑀺𑀢𑀸, 𑀏𑀯𑀁 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑀧𑀘𑁆𑀘𑀬𑀸𑀤𑀻𑀲𑀼𑀧𑀺 𑀬𑀣𑀸𑀭𑀳𑀁 𑀬𑁄𑀚𑁂𑀢𑁆𑀯𑀸 𑀤𑀲𑁆𑀲𑁂𑀢𑀩𑁆𑀩𑀸𑀢𑀺 𑀇𑀫𑀫𑀢𑁆𑀣𑀁 𑀅𑀢𑀺𑀤𑀺𑀲𑀢𑀺. 𑀙𑀦𑁆𑀤𑀧𑀘𑁆𑀘𑀬𑀸𑀢𑀺 𑀏𑀢𑁆𑀣 𑀢𑀡𑁆𑀳𑀸𑀙𑀦𑁆𑀤𑀲𑀳𑀺𑀢𑁄 𑀓𑀢𑁆𑀢𑀼𑀓𑀸𑀫𑀢𑀸𑀙𑀦𑁆𑀤𑁄 𑀅𑀥𑀺𑀧𑁆𑀧𑁂𑀢𑁄𑀢𑀺 𑀆𑀳 ‘‘𑀙𑀦𑁆𑀤𑀧𑀘𑁆𑀘𑀬𑀸𑀢𑀺𑀆𑀤𑀻𑀲𑀼 𑀧𑀦 𑀙𑀦𑁆𑀤𑀧𑀘𑁆𑀘𑀬𑀸 𑀅𑀝𑁆𑀞𑀮𑁄𑀪𑀲𑀳𑀕𑀢𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀸 𑀯𑁂𑀤𑀦𑀸 𑀯𑁂𑀤𑀺𑀢𑀩𑁆𑀩𑀸’’𑀢𑀺. 𑀯𑀺𑀢𑀓𑁆𑀓𑀧𑀘𑁆𑀘𑀬𑀸𑀢𑀺 𑀏𑀢𑁆𑀣 𑀅𑀧𑁆𑀧𑀦𑀸𑀧𑁆𑀧𑀢𑁆𑀢𑁄𑀯 𑀯𑀺𑀢𑀓𑁆𑀓𑁄 𑀅𑀥𑀺𑀧𑁆𑀧𑁂𑀢𑁄𑀢𑀺 𑀯𑀼𑀢𑁆𑀢𑀁 ‘‘𑀯𑀺𑀢𑀓𑁆𑀓𑀧𑀘𑁆𑀘𑀬𑀸 𑀧𑀞𑀫𑀚𑁆𑀛𑀸𑀦𑀯𑁂𑀤𑀦𑀸𑀯𑀸’’𑀢𑀺. 𑀯𑀺𑀢𑀓𑁆𑀓𑀧𑀘𑁆𑀘𑀬𑀸 𑀧𑀞𑀫𑀚𑁆𑀛𑀸𑀦𑀯𑁂𑀤𑀦𑀸𑀬 𑀕𑀳𑀺𑀢𑀢𑁆𑀢𑀸 ‘‘𑀞𑀧𑁂𑀢𑁆𑀯𑀸 𑀧𑀞𑀫𑀚𑁆𑀛𑀸𑀦’’𑀦𑁆𑀢𑀺. 𑀉𑀧𑀭𑀺 𑀢𑀺𑀲𑁆𑀲𑁄 𑀭𑀽𑀧𑀸𑀯𑀘𑀭𑀸, 𑀳𑁂𑀝𑁆𑀞𑀸 𑀢𑀺𑀲𑁆𑀲𑁄 𑀅𑀭𑀽𑀧𑀸𑀯𑀘𑀭𑀸 𑀏𑀯𑀁 𑀲𑁂𑀲𑀸 𑀙 𑀲𑀜𑁆𑀜𑀸𑀲𑀫𑀸𑀧𑀢𑁆𑀢𑀺𑀯𑁂𑀤𑀦𑀸.

𑀢𑀺𑀡𑁆𑀡𑀦𑁆𑀢𑀺 𑀙𑀦𑁆𑀤𑀯𑀺𑀢𑀓𑁆𑀓𑀲𑀜𑁆𑀜𑀸𑀦𑀁. 𑀅𑀯𑀽𑀧𑀲𑀫𑁂𑀢𑀺 𑀧𑀝𑀺𑀧𑀓𑁆𑀔𑁂𑀦 𑀅𑀯𑀽𑀧𑀲𑀫𑀺𑀢𑁂. 𑀢𑀺𑀡𑁆𑀡𑀜𑁆𑀳𑀺 𑀢𑁂𑀲𑀁 𑀲𑀳𑀪𑀸𑀯𑁂𑀦 𑀧𑀘𑁆𑀘𑀬𑀢𑀸 𑀅𑀝𑁆𑀞𑀮𑁄𑀪𑀲𑀳𑀕𑀢𑀘𑀺𑀢𑁆𑀢𑁂𑀲𑀼 𑀏𑀯. 𑀢𑀢𑁆𑀣 𑀬𑀁 𑀯𑀢𑁆𑀢𑀩𑁆𑀩𑀁 𑀢𑀁 𑀯𑀼𑀢𑁆𑀢𑀫𑁂𑀯. 𑀙𑀦𑁆𑀤𑀫𑀢𑁆𑀢𑀲𑁆𑀲𑀸𑀢𑀺 𑀢𑁂𑀲𑀼 𑀢𑀻𑀲𑀼 𑀙𑀦𑁆𑀤𑀫𑀢𑁆𑀢𑀲𑁆𑀲. 𑀯𑀽𑀧𑀲𑀫𑁂 𑀧𑀞𑀫𑀚𑁆𑀛𑀸𑀦𑀯𑁂𑀤𑀦𑀸𑀯 𑀅𑀧𑁆𑀧𑀦𑀸𑀧𑁆𑀧𑀢𑁆𑀢𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀙𑀦𑁆𑀤𑀯𑀺𑀢𑀓𑁆𑀓𑀸𑀦𑀁 𑀯𑀽𑀧𑀲𑀫𑁂 𑀤𑀼𑀢𑀺𑀬𑀚𑁆𑀛𑀸𑀦𑀸𑀤𑀺𑀯𑁂𑀤𑀦𑀸 𑀅𑀥𑀺𑀧𑁆𑀧𑁂𑀢𑀸 𑀲𑀜𑁆𑀜𑀸𑀬 𑀅𑀯𑀽𑀧𑀲𑀦𑁆𑀢𑀢𑁆𑀢𑀸. 𑀤𑀼𑀢𑀺𑀬𑀚𑁆𑀛𑀸𑀦𑀸𑀤𑀺𑀯𑁂𑀤𑀦𑀸𑀕𑀳𑀡𑁂𑀦 𑀳𑀺 𑀲𑀩𑁆𑀩𑀸 𑀲𑀜𑁆𑀜𑀸𑀲𑀫𑀸𑀧𑀢𑁆𑀢𑀺𑀬𑁄 𑀘 𑀕𑀳𑀺𑀢𑀸𑀯 𑀳𑁄𑀦𑁆𑀢𑀺. 𑀢𑀺𑀡𑁆𑀡𑀫𑁆𑀧𑀺 𑀯𑀽𑀧𑀲𑀫𑁂𑀢𑀺 𑀙𑀦𑁆𑀤𑀯𑀺𑀢𑀓𑁆𑀓𑀲𑀜𑁆𑀜𑀸𑀦𑀁 𑀯𑀽𑀧𑀲𑀫𑁂 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀯𑁂𑀤𑀦𑀸 𑀅𑀥𑀺𑀧𑁆𑀧𑁂𑀢𑀸. 𑀪𑀯𑀕𑁆𑀕𑀧𑁆𑀧𑀢𑁆𑀢𑀲𑀜𑁆𑀜𑀸 𑀳𑀺 𑀯𑀽𑀧𑀲𑀫𑀦𑁆𑀢𑀺 𑀙𑀦𑁆𑀤𑀲𑀗𑁆𑀓𑀧𑁆𑀧𑀸𑀦𑀁 𑀅𑀘𑁆𑀘𑀦𑁆𑀢𑀲𑀼𑀔𑀼𑀫𑀪𑀸𑀯𑀧𑁆𑀧𑀢𑁆𑀢𑀺𑀬𑀸. 𑀳𑁂𑀝𑁆𑀞𑀸 ‘‘𑀲𑀫𑁆𑀫𑀸𑀤𑀺𑀝𑁆𑀞𑀺𑀧𑀘𑁆𑀘𑀬𑀸’’𑀢𑀺 𑀏𑀢𑁆𑀣 𑀲𑀫𑁆𑀫𑀸𑀤𑀺𑀝𑁆𑀞𑀺𑀕𑁆𑀕𑀳𑀡𑁂𑀦 𑀳𑁂𑀝𑁆𑀞𑀺𑀫𑀫𑀕𑁆𑀕𑀲𑀫𑁆𑀫𑀸𑀤𑀺𑀝𑁆𑀞𑀺𑀧𑀺 𑀕𑀳𑀺𑀢𑀸𑀯 𑀳𑁄𑀢𑀻𑀢𑀺 𑀆𑀳 𑁋 ‘‘𑀅𑀧𑁆𑀧𑀢𑁆𑀢𑀲𑁆𑀲 𑀧𑀢𑁆𑀢𑀺𑀬𑀸𑀢𑀺 𑀅𑀭𑀳𑀢𑁆𑀢𑀨𑀮𑀲𑁆𑀲 𑀧𑀢𑁆𑀢𑀢𑁆𑀣𑀸𑀬𑀸’’𑀢𑀺. 𑀅𑀣 𑀯𑀸 𑀳𑁂𑀝𑁆𑀞𑀺𑀫𑀫𑀕𑁆𑀕𑀸𑀥𑀺𑀕𑀫𑁂𑀦 𑀯𑀺𑀦𑀸 𑀅𑀕𑁆𑀕𑀫𑀕𑁆𑀕𑁄 𑀦𑀢𑁆𑀣𑀻𑀢𑀺 𑀳𑁂𑀝𑁆𑀞𑀺𑀫𑀫𑀕𑁆𑀕𑀸𑀥𑀺𑀕𑀫𑀁 𑀅𑀢𑁆𑀣𑀸𑀧𑀦𑁆𑀦𑀁 𑀓𑀢𑁆𑀯𑀸 ‘‘𑀅𑀭𑀳𑀢𑁆𑀢𑀨𑀮𑀲𑁆𑀲 𑀧𑀢𑁆𑀢𑀢𑁆𑀣𑀸𑀬𑀸’’𑀢𑀺 𑀯𑀼𑀢𑁆𑀢𑀁. 𑀆𑀬𑀫𑁂𑀢𑀺 𑀨𑀮𑁂𑀦 𑀫𑀺𑀲𑁆𑀲𑀺𑀢𑁄 𑀳𑁄𑀢𑀺 𑀏𑀢𑁂𑀦𑀸𑀢𑀺 𑀆𑀬𑀸𑀫𑁄, 𑀲𑀫𑁆𑀫𑀸𑀯𑀸𑀬𑀸𑀫𑁄𑀢𑀺 𑀆𑀳 ‘‘𑀅𑀢𑁆𑀣𑀺 𑀆𑀬𑀸𑀫𑀦𑁆𑀢𑀺 𑀅𑀢𑁆𑀣𑀺 𑀯𑀻𑀭𑀺𑀬’’𑀦𑁆𑀢𑀺. 𑀢𑀲𑁆𑀲 𑀯𑀻𑀭𑀺𑀬𑀸𑀭𑀫𑁆𑀪𑀲𑁆𑀲𑀸𑀢𑀺 𑀅𑀜𑁆𑀜𑀸𑀥𑀺𑀕𑀫𑀓𑀸𑀭𑀡𑀲𑁆𑀲 𑀲𑀫𑁆𑀫𑀸𑀯𑀸𑀬𑀸𑀫𑀲𑁆𑀲 𑀯𑀲𑁂𑀦. 𑀧𑀸𑀴𑀺𑀬𑀁 𑀞𑀸𑀦-𑀲𑀤𑁆𑀤𑁄 𑀓𑀸𑀭𑀡𑀧𑀭𑀺𑀬𑀸𑀬𑁄𑀢𑀺 𑀆𑀳 𑁋 ‘‘𑀅𑀭𑀳𑀢𑁆𑀢𑀨𑀮𑀲𑁆𑀲 𑀓𑀸𑀭𑀡𑁂’’𑀢𑀺. 𑀢𑀧𑁆𑀧𑀘𑁆𑀘𑀬𑀸𑀢𑀺 𑀏𑀢𑁆𑀣 𑀢𑀁-𑀲𑀤𑁆𑀤𑁂𑀦 ‘‘𑀞𑀸𑀦𑁂’’𑀢𑀺 𑀯𑀼𑀢𑁆𑀢𑀓𑀸𑀭𑀡𑀫𑁂𑀯 𑀧𑀘𑁆𑀘𑀸𑀫𑀝𑁆𑀞𑀦𑁆𑀢𑀺 𑀆𑀳 𑁋 ‘‘𑀅𑀭𑀳𑀢𑁆𑀢𑀲𑁆𑀲 𑀞𑀸𑀦𑀧𑀘𑁆𑀘𑀬𑀸’’𑀢𑀺. 𑀘𑀢𑀼𑀫𑀕𑁆𑀕𑀲𑀳𑀚𑀸𑀢𑀸𑀢𑀺 𑀏𑀢𑁂𑀦 ‘‘𑀅𑀭𑀳𑀢𑁆𑀢𑀨𑀮𑀲𑁆𑀲 𑀧𑀢𑁆𑀢𑀢𑁆𑀣𑀸𑀬𑀸’’𑀢𑀺 𑀏𑀢𑁆𑀣 𑀳𑁂𑀝𑁆𑀞𑀺𑀫𑀫𑀕𑁆𑀕𑀸𑀦𑀁 𑀅𑀢𑁆𑀣𑀸𑀧𑀢𑁆𑀢𑀺𑀯𑀲𑁂𑀦 𑀕𑀳𑀺𑀢𑀪𑀸𑀯𑀫𑁂𑀯 𑀚𑁄𑀢𑁂𑀢𑀺. 𑀓𑁂𑀘𑀺 𑀧𑀦 ‘‘𑀘𑀢𑀼𑀫𑀕𑁆𑀕𑀲𑀳𑀚𑀸𑀢𑀸𑀢𑀺 𑀯𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺𑀢𑀮𑁄𑀓𑀼𑀢𑁆𑀢𑀭𑀯𑁂𑀤𑀦𑀸𑀢𑀺 𑀪𑀽𑀢𑀓𑀣𑀦𑀁 𑀯𑀺𑀲𑁂𑀲𑀦𑀁. 𑀦𑀺𑀩𑁆𑀩𑀢𑁆𑀢𑀺𑀢𑀮𑁄𑀓𑀼𑀢𑁆𑀢𑀭𑀯𑁂𑀤𑀦𑀸𑀢𑀺 𑀧𑀞𑀫𑀁 𑀅𑀧𑁂𑀓𑁆𑀔𑀺𑀢𑀩𑁆𑀩𑀁, 𑀧𑀘𑁆𑀙𑀸 𑀘𑀢𑀼𑀫𑀕𑁆𑀕𑀲𑀳𑀚𑀸𑀢𑀸’’𑀢𑀺 𑀯𑀤𑀦𑁆𑀢𑀺.

𑀧𑀞𑀫𑀯𑀺𑀳𑀸𑀭𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀤𑀼𑀢𑀺𑀬𑀯𑀺𑀳𑀸𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁨. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀯𑀽𑀧𑀲𑀫𑀢𑀺 𑀲𑀩𑁆𑀩𑀲𑁄 𑀧𑀳𑀻𑀬𑀢𑀺 𑀏𑀢𑁂𑀦𑀸𑀢𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀯𑀽𑀧𑀲𑀫𑁄. ‘‘𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀯𑀽𑀧𑀲𑀫𑁄 𑀦𑀸𑀫 𑀲𑀫𑁆𑀫𑀸𑀤𑀺𑀝𑁆𑀞𑀺. 𑀪𑀯𑀦𑁆𑀢𑀭𑁂 𑀉𑀧𑁆𑀧𑀚𑁆𑀚𑀦𑁆𑀢𑁄 𑀅𑀢𑀺𑀤𑀽𑀭𑁂𑀢𑀺 𑀫𑀜𑁆𑀜𑀫𑀸𑀦𑁄 𑀯𑀺𑀧𑀸𑀓𑀯𑁂𑀤𑀦𑀁 𑀦 𑀕𑀡𑁆𑀳𑀸𑀢𑀻’’𑀢𑀺 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁. ‘‘𑀇𑀫𑀺𑀦𑀸 𑀦𑀬𑁂𑀦𑀸’’𑀢𑀺 𑀅𑀢𑀺𑀤𑀺𑀲𑀺𑀢𑁆𑀯𑀸𑀧𑀺 𑀢𑀫𑀢𑁆𑀣𑀁 𑀧𑀸𑀓𑀝𑀢𑀭𑀁 𑀓𑀸𑀢𑀼𑀁 ‘‘𑀬𑀲𑁆𑀲 𑀬𑀲𑁆𑀲𑀸’’𑀢𑀺𑀆𑀤𑀺𑀁 𑀯𑀢𑁆𑀯𑀸 𑀏𑀯 𑀲𑀸𑀫𑀜𑁆𑀜𑀯𑀲𑁂𑀦 𑀯𑀼𑀢𑁆𑀢𑀫𑀢𑁆𑀣𑀁 𑀧𑀘𑁆𑀙𑀺𑀫𑁂𑀲𑀼 𑀢𑀻𑀲𑀼 𑀧𑀤𑁂𑀲𑀼 𑀲𑀭𑀽𑀧𑀢𑁄𑀯 𑀤𑀲𑁆𑀲𑁂𑀢𑀼𑀁 ‘‘𑀙𑀦𑁆𑀤𑀯𑀽𑀧𑀲𑀫𑀧𑀘𑁆𑀘𑀬𑀸’’𑀢𑀺𑀆𑀤𑀺𑀫𑀸𑀳, 𑀢𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯. 𑀯𑀼𑀢𑁆𑀢𑀢𑁆𑀣𑀸𑀦𑁂𑀯 𑀅𑀦𑀦𑁆𑀢𑀭𑀲𑀼𑀢𑁆𑀢𑁂.

𑀤𑀼𑀢𑀺𑀬𑀯𑀺𑀳𑀸𑀭𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩-𑁭. 𑀲𑁂𑀓𑁆𑀔𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁩-𑁧𑁭. 𑀢𑀺𑀲𑁆𑀲𑀦𑁆𑀦𑀫𑁆𑀧𑀺 𑀲𑀺𑀓𑁆𑀔𑀸𑀦𑀁 𑀲𑀺𑀓𑁆𑀔𑀦𑀁 𑀲𑀻𑀮𑀁 𑀏𑀢𑀲𑁆𑀲𑀸𑀢𑀺 𑀲𑀺𑀓𑁆𑀔𑀦𑀲𑀻𑀮𑁄. 𑀲𑀺𑀓𑁆𑀔𑀢𑀻𑀢𑀺𑀧𑀺 𑀯𑀸 𑀲𑁂𑀓𑁆𑀔𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀲𑀺𑀓𑁆𑀔𑀢𑀻𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀲𑁆𑀫𑀸 𑀲𑁂𑀓𑁆𑀔𑁄𑀢𑀺 𑀯𑀼𑀘𑁆𑀘𑀢𑀺. 𑀓𑀺𑀜𑁆𑀘 𑀲𑀺𑀓𑁆𑀔𑀢𑀺? 𑀅𑀥𑀺𑀲𑀻𑀮𑀫𑁆𑀧𑀺 𑀲𑀺𑀓𑁆𑀔𑀢𑀻’’𑀢𑀺𑀆𑀤𑀺 (𑀅. 𑀦𑀺. 𑁩.𑁮𑁬). 𑀢𑀻𑀳𑀺 𑀨𑀮𑁂𑀳𑀺 𑀳𑁂𑀝𑁆𑀞𑀸. 𑀲𑀸𑀧𑀺 𑀘𑀢𑀼𑀢𑁆𑀣𑀫𑀕𑁆𑀕𑁂𑀦 𑀲𑀤𑁆𑀥𑀺𑀁 𑀉𑀧𑁆𑀧𑀦𑁆𑀦𑀲𑀺𑀓𑁆𑀔𑀸𑀧𑀺. 𑀫𑀕𑁆𑀕𑀓𑁆𑀔𑀡𑁂 𑀳𑀺 𑀲𑀺𑀓𑁆𑀔𑀸𑀓𑀺𑀘𑁆𑀘𑀁 𑀦 𑀦𑀺𑀝𑁆𑀞𑀺𑀢𑀁 𑀯𑀺𑀧𑁆𑀧𑀓𑀢𑀪𑀸𑀯𑀢𑁄, 𑀨𑀮𑀓𑁆𑀔𑀡𑁂 𑀧𑀦 𑀦𑀺𑀝𑁆𑀞𑀺𑀢𑀁 𑀦𑀸𑀫. 𑀉𑀢𑁆𑀢𑀸𑀦𑀢𑁆𑀣𑀸𑀦𑁂𑀯 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀢𑁆𑀢𑀸.

𑀲𑁂𑀓𑁆𑀔𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀯𑀺𑀳𑀸𑀭𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀫𑀺𑀘𑁆𑀙𑀢𑁆𑀢𑀯𑀕𑁆𑀕𑀯𑀡𑁆𑀡𑀦𑀸

𑁨𑁧-𑁩𑁦. 𑀫𑀺𑀘𑁆𑀙𑀸𑀲𑀪𑀸𑀯𑀦𑁆𑀢𑀺 𑀅𑀬𑀸𑀣𑀸𑀯𑀲𑀪𑀸𑀯𑀁 𑀅𑀦𑀺𑀬𑁆𑀬𑀸𑀦𑀺𑀓𑀲𑀪𑀸𑀯𑀁. 𑀲𑀫𑁆𑀫𑀸𑀲𑀪𑀸𑀯𑀦𑁆𑀢𑀺 𑀬𑀸𑀣𑀸𑀯𑀲𑀪𑀸𑀯𑀁 𑀦𑀺𑀬𑁆𑀬𑀸𑀦𑀺𑀓𑀲𑀪𑀸𑀯𑀁. 𑀫𑀺𑀘𑁆𑀙𑀸𑀧𑀝𑀺𑀧𑀢𑁆𑀢𑀸𑀥𑀺𑀓𑀭𑀡𑀳𑁂𑀢𑀽𑀢𑀺 𑀏𑀢𑁆𑀣 𑀅𑀥𑀺-𑀲𑀤𑁆𑀤𑁄 𑀅𑀦𑀢𑁆𑀣𑀓𑁄𑀢𑀺 𑀆𑀳 𑁋 ‘‘𑀫𑀺𑀘𑁆𑀙𑀸𑀧𑀝𑀺𑀧𑀢𑁆𑀢𑀺𑀓𑀭𑀡𑀳𑁂𑀢𑀽’’𑀢𑀺. 𑀜𑀸𑀬𑀢𑀺 𑀧𑀝𑀺𑀯𑀺𑀤𑁆𑀥𑀯𑀲𑁂𑀦 𑀦𑀺𑀩𑁆𑀩𑀸𑀦𑀁 𑀕𑀘𑁆𑀙𑀢𑀻𑀢𑀺 𑀜𑀸𑀬𑁄. 𑀲𑁄 𑀏𑀯 𑀢𑀁𑀲𑀫𑀗𑁆𑀕𑀻𑀦𑀁 𑀯𑀝𑁆𑀝𑀤𑀼𑀓𑁆𑀔𑀧𑀸𑀢𑀢𑁄 𑀥𑀸𑀭𑀡𑀝𑁆𑀞𑁂𑀦 𑀥𑀫𑁆𑀫𑁄𑀢𑀺 𑀆𑀳 𑁋 ‘‘𑀜𑀸𑀬𑀁 𑀥𑀫𑁆𑀫𑀦𑁆𑀢𑀺 𑀅𑀭𑀺𑀬𑀫𑀕𑁆𑀕𑀥𑀫𑁆𑀫’’𑀦𑁆𑀢𑀺. 𑀜𑀸𑀡𑀲𑁆𑀲 𑀫𑀺𑀘𑁆𑀙𑀸𑀲𑀪𑀸𑀯𑁄 𑀦𑀸𑀫 𑀦𑀢𑁆𑀣𑀻𑀢𑀺 𑀯𑀺𑀜𑁆𑀜𑀸𑀡𑀫𑁂𑀯𑁂𑀢𑁆𑀣 𑀧𑀘𑁆𑀘𑀯𑁂𑀓𑁆𑀔𑀡𑀯𑀲𑁂𑀦 𑀧𑀯𑀢𑁆𑀢𑀁 𑀜𑀸𑀡-𑀲𑀤𑁆𑀤𑁂𑀦 𑀯𑀼𑀘𑁆𑀘𑀢𑀻𑀢𑀺 𑀆𑀳 ‘‘𑀫𑀺𑀘𑁆𑀙𑀸𑀯𑀺𑀜𑁆𑀜𑀸𑀡𑁄’’𑀢𑀺. 𑀫𑀺𑀘𑁆𑀙𑀸𑀧𑀘𑁆𑀘𑀯𑁂𑀓𑁆𑀔𑀡𑁄𑀢𑀺 𑀓𑀺𑀜𑁆𑀘𑀺 𑀧𑀸𑀧𑀁 𑀓𑀢𑁆𑀯𑀸 ‘‘𑀅𑀳𑁄 𑀫𑀬𑀸 𑀓𑀢𑀁 𑀲𑀼𑀓𑀢’’𑀦𑁆𑀢𑀺 𑀏𑀯𑀁 𑀧𑀯𑀢𑁆𑀢𑁄 𑀫𑀺𑀘𑁆𑀙𑀸𑀧𑀘𑁆𑀘𑀯𑁂𑀓𑁆𑀔𑀡𑁄. 𑀕𑁄𑀲𑀻𑀮𑀕𑁄𑀯𑀢𑀸𑀤𑀺𑀧𑀽𑀭𑀡𑀁 𑀫𑀼𑀢𑁆𑀢𑀻𑀢𑀺 𑀏𑀯𑀁 𑀕𑀡𑁆𑀳𑀢𑁄 𑀫𑀺𑀘𑁆𑀙𑀸𑀯𑀺𑀫𑀼𑀢𑁆𑀢𑀺 𑀦𑀸𑀫. 𑀫𑀺𑀘𑁆𑀙𑀸𑀧𑀝𑀺𑀧𑀤𑀸𑀤𑀻𑀳𑀺 𑀯𑀺𑀯𑀝𑁆𑀝𑀦𑁆𑀢𑀺 𑀏𑀯𑀁 𑀯𑀝𑁆𑀝𑀯𑀺𑀯𑀝𑁆𑀝𑀁 𑀓𑀣𑀺𑀢𑀁. 𑀧𑀼𑀕𑁆𑀕𑀮𑁄 𑀧𑀼𑀘𑁆𑀙𑀺𑀢𑁄𑀢𑀺 𑀦𑀺𑀕𑀫𑀺𑀢𑁄 𑀘 ‘‘𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀅𑀲𑀧𑁆𑀧𑀼𑀭𑀺𑀲𑁄’’𑀢𑀺𑀆𑀤𑀺𑀦𑀸. 𑀓𑀺𑀜𑁆𑀘𑀸𑀧𑀺 ‘‘𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄 𑀳𑁄𑀢𑀻’’𑀢𑀺𑀆𑀤𑀺𑀦𑀸 𑀧𑀼𑀕𑁆𑀕𑀮𑁄𑀯 𑀦𑀺𑀤𑁆𑀤𑀺𑀝𑁆𑀞𑁄, 𑀢𑀣𑀸𑀧𑀺 𑀧𑀼𑀕𑁆𑀕𑀮𑀲𑀻𑀲𑁂𑀦𑀸𑀬𑀁 𑀥𑀫𑁆𑀫𑀤𑁂𑀲𑀦𑀸𑀢𑀺 𑀆𑀳 ‘‘𑀥𑀫𑁆𑀫𑁄 𑀯𑀺𑀪𑀢𑁆𑀢𑁄’’𑀢𑀺. 𑀢𑁂𑀦𑁂𑀯𑀸𑀳 ‘‘𑀥𑀫𑁆𑀫𑁂𑀦 𑀧𑀼𑀕𑁆𑀕𑀮𑁄 𑀤𑀲𑁆𑀲𑀺𑀢𑁄’’𑀢𑀺. 𑀥𑀫𑁆𑀫𑁂𑀦𑀸𑀢𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀆𑀤𑀺𑀓𑁂𑀦 𑀥𑀫𑁆𑀫𑁂𑀦. 𑀓𑀮𑁆𑀬𑀸𑀡𑀧𑀼𑀣𑀼𑀚𑁆𑀚𑀦𑀢𑁄 𑀧𑀝𑁆𑀞𑀸𑀬 𑀲𑀩𑁆𑀩𑀲𑁄 𑀲𑀧𑁆𑀧𑀼𑀭𑀺𑀲𑀸 𑀦𑀸𑀫, 𑀔𑀻𑀡𑀸𑀲𑀯𑁄 𑀲𑀧𑁆𑀧𑀼𑀭𑀺𑀲𑀢𑀭𑁄. 𑀲𑀼𑀧𑁆𑀧𑀯𑀢𑁆𑀢𑀦𑀺𑀬𑁄𑀢𑀺 𑀲𑀼𑀔𑁂𑀦 𑀧𑀯𑀢𑁆𑀢𑁂𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑁄. 𑀥𑀸𑀯𑀢𑀻𑀢𑀺 𑀕𑀘𑁆𑀙𑀢𑀺. 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑁂𑀦 𑀉𑀧𑁂𑀘𑁆𑀘 𑀦𑀺𑀲𑁆𑀲𑀺𑀢𑀩𑁆𑀩𑀢𑁄 𑀉𑀧𑀦𑀺𑀲𑀸, 𑀧𑀘𑁆𑀘𑀬𑁄, 𑀏𑀓𑀲𑁆𑀲 𑀲-𑀓𑀸𑀭𑀲𑁆𑀲 𑀮𑁄𑀧𑀁 𑀓𑀢𑁆𑀯𑀸 𑀯𑀸𑀢𑀺 𑀆𑀳 𑁋 ‘‘𑀲𑀉𑀧𑀦𑀺𑀲𑀁 𑀲𑀧𑀘𑁆𑀘𑀬’’𑀦𑁆𑀢𑀺. 𑀧𑀭𑀺𑀓𑀭𑀡𑀢𑁄 𑀧𑀭𑀺𑀓𑁆𑀔𑀸𑀭𑁄, 𑀧𑀭𑀺𑀯𑀸𑀭𑁄𑀢𑀺 𑀆𑀳 𑁋 ‘‘𑀲𑀧𑀭𑀺𑀓𑁆𑀔𑀸𑀭𑀁 𑀲𑀧𑀭𑀺𑀯𑀸𑀭’’𑀦𑁆𑀢𑀺. 𑀲𑀳𑀚𑀸𑀢𑀯𑀲𑁂𑀦 𑀉𑀧𑀦𑀺𑀲𑁆𑀲𑀬𑀯𑀲𑁂𑀦 𑀘 𑀲𑀧𑀘𑁆𑀘𑀬𑀢𑀸 𑀓𑀺𑀘𑁆𑀘𑀲𑀸𑀥𑀦𑁂 𑀦𑀺𑀧𑁆𑀨𑀸𑀤𑀦𑁂 𑀲𑀳𑀸𑀬𑀪𑀸𑀯𑀽𑀧𑀕𑀫𑀦𑁂 𑀘 𑀲𑀧𑀭𑀺𑀯𑀸𑀭𑀢𑀸 𑀤𑀝𑁆𑀞𑀩𑁆𑀩𑀸.

𑀫𑀺𑀘𑁆𑀙𑀢𑁆𑀢𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀧𑀝𑀺𑀧𑀢𑁆𑀢𑀺𑀯𑀕𑁆𑀕𑀯𑀡𑁆𑀡𑀦𑀸

𑁩𑁧-𑁪𑁦. 𑀅𑀬𑀸𑀣𑀸𑀯𑀧𑀝𑀺𑀧𑀢𑁆𑀢𑀺, 𑀦 𑀬𑀣𑀸𑀧𑀝𑀺𑀧𑀢𑁆𑀢𑀺, 𑀳𑁂𑀢𑀼𑀫𑁆𑀳𑀺𑀧𑀺 𑀨𑀮𑁂𑀧𑀺 𑀅𑀬𑀸𑀣𑀸𑀯𑀯𑀢𑁆𑀣𑀼𑀲𑀸𑀥𑀦𑀢𑁄. 𑀏𑀓𑀁 𑀲𑀼𑀢𑁆𑀢𑀁 𑀥𑀫𑁆𑀫𑀯𑀲𑁂𑀦 𑀓𑀣𑀺𑀢𑀁 𑀧𑀝𑀺𑀧𑀢𑁆𑀢𑀺𑀯𑀲𑁂𑀦. 𑀏𑀓𑀁 𑀲𑀼𑀢𑁆𑀢𑀁 𑀧𑀼𑀕𑁆𑀕𑀮𑀯𑀲𑁂𑀦 𑀓𑀣𑀺𑀢𑀁 𑀧𑀝𑀺𑀧𑀦𑁆𑀦𑀓𑀯𑀲𑁂𑀦. 𑀲𑀁𑀲𑀸𑀭𑀫𑀳𑁄𑀖𑀲𑁆𑀲 𑀧𑀭𑀢𑀻𑀭𑀪𑀸𑀯𑀢𑁄 𑀬𑁄 𑀦𑀁 𑀅𑀥𑀺𑀕𑀘𑁆𑀙𑀢𑀺, 𑀢𑀁 𑀧𑀸𑀭𑁂𑀢𑀺 𑀕𑀫𑁂𑀢𑀻𑀢𑀺 𑀧𑀸𑀭𑀁, 𑀦𑀺𑀩𑁆𑀩𑀸𑀦𑀁, 𑀢𑀩𑁆𑀩𑀺𑀥𑀼𑀭𑀢𑀸𑀬 𑀦𑀢𑁆𑀣𑀺 𑀏𑀢𑁆𑀣 𑀧𑀸𑀭𑀦𑁆𑀢𑀺 𑀅𑀧𑀸𑀭𑀁, 𑀲𑀁𑀲𑀸𑀭𑁄𑀢𑀺 𑀯𑀼𑀢𑁆𑀢𑀁 𑁋 ‘‘𑀅𑀧𑀸𑀭𑀸𑀧𑀸𑀭𑀦𑁆𑀢𑀺 𑀯𑀝𑁆𑀝𑀢𑁄 𑀦𑀺𑀩𑁆𑀩𑀸𑀦’’𑀦𑁆𑀢𑀺. 𑀧𑀸𑀭𑀗𑁆𑀕𑀢𑀸𑀢𑀺 𑀅𑀲𑁂𑀓𑁆𑀔𑁂 𑀲𑀦𑁆𑀥𑀸𑀬. 𑀬𑁂𑀧𑀺 𑀕𑀘𑁆𑀙𑀦𑁆𑀢𑀻𑀢𑀺 𑀲𑁂𑀓𑁆𑀔𑁂. 𑀬𑁂𑀧𑀺 𑀕𑀫𑀺𑀲𑁆𑀲𑀦𑁆𑀢𑀻𑀢𑀺 𑀓𑀮𑁆𑀬𑀸𑀡𑀧𑀼𑀣𑀼𑀚𑁆𑀚𑀦𑁂. 𑀧𑀸𑀭𑀕𑀸𑀫𑀺𑀦𑁄𑀢𑀺 𑀏𑀢𑁆𑀣 𑀓𑀺𑀢-𑀲𑀤𑁆𑀤𑁄 𑀢𑀺𑀓𑀸𑀮𑀯𑀸𑀘𑀻𑀢𑀺 𑀏𑀯𑀁 𑀯𑀼𑀢𑁆𑀢𑀁.

𑀢𑀻𑀭𑀦𑁆𑀢𑀺 𑀑𑀭𑀺𑀫𑀢𑀻𑀭𑀫𑀸𑀳. 𑀢𑁂𑀦 𑀯𑀼𑀢𑁆𑀢𑀁 ‘‘𑀯𑀝𑁆𑀝𑀫𑁂𑀯 𑀅𑀦𑀼𑀥𑀸𑀯𑀢𑀻’’𑀢𑀺. 𑀏𑀓𑀦𑁆𑀢𑀓𑀸𑀴𑀓𑀢𑁆𑀢𑀸 𑀘𑀺𑀢𑁆𑀢𑀲𑁆𑀲 𑀅𑀧𑀪𑀲𑁆𑀲𑀭𑀪𑀸𑀯𑀓𑀭𑀡𑀢𑁄 𑀓𑀡𑁆𑀳𑀸𑀪𑀺𑀚𑀸𑀢𑀺𑀳𑁂𑀢𑀼𑀢𑁄 𑀘 𑀯𑀼𑀢𑁆𑀢𑀁 ‘‘𑀓𑀡𑁆𑀳𑀦𑁆𑀢𑀺 𑀅𑀓𑀼𑀲𑀮𑀥𑀫𑁆𑀫’’𑀦𑁆𑀢𑀺. 𑀯𑁄𑀤𑀸𑀦𑀪𑀸𑀯𑀢𑁄 𑀘𑀺𑀢𑁆𑀢𑀲𑁆𑀲 𑀧𑀪𑀲𑁆𑀲𑀭𑀪𑀸𑀯𑀓𑀭𑀡𑀢𑁄 𑀲𑀼𑀓𑁆𑀓𑀸𑀪𑀺𑀚𑀸𑀢𑀺𑀳𑁂𑀢𑀼𑀢𑁄 𑀘 𑀯𑀼𑀢𑁆𑀢𑀁 𑁋 ‘‘𑀲𑀼𑀓𑁆𑀓𑀦𑁆𑀢𑀺 𑀓𑀼𑀲𑀮𑀥𑀫𑁆𑀫’’𑀦𑁆𑀢𑀺. 𑀓𑀺𑀮𑁂𑀲𑀫𑀸𑀭-𑀅𑀪𑀺𑀲𑀗𑁆𑀔𑀸𑀭𑀫𑀸𑀭-𑀫𑀘𑁆𑀘𑀼𑀫𑀸𑀭𑀸𑀦𑀁 𑀧𑀯𑀢𑁆𑀢𑀺𑀝𑁆𑀞𑀸𑀦𑀢𑀸𑀬 𑀑𑀓𑀁 𑀯𑀼𑀘𑁆𑀘𑀢𑀺 𑀯𑀝𑁆𑀝𑀁, 𑀢𑀩𑁆𑀩𑀺𑀥𑀼𑀭𑀢𑀸𑀬 𑀅𑀦𑁄𑀓𑀦𑁆𑀢𑀺 𑀦𑀺𑀩𑁆𑀩𑀸𑀦𑀦𑁆𑀢𑀺 𑀆𑀳 𑁋 ‘‘𑀑𑀓𑀸 𑀅𑀦𑁄𑀓𑀦𑁆𑀢𑀺 𑀯𑀝𑁆𑀝𑀢𑁄 𑀦𑀺𑀩𑁆𑀩𑀸𑀦’’𑀦𑁆𑀢𑀺.

𑀧𑀭𑀫𑀢𑁆𑀣𑀢𑁄 𑀲𑀫𑀡𑀸 𑀯𑀼𑀘𑁆𑀘𑀦𑁆𑀢𑀺 𑀅𑀭𑀺𑀬𑀸, 𑀲𑀫𑀡𑀸𑀦𑀁 𑀪𑀸𑀯𑁄 𑀲𑀸𑀫𑀜𑁆𑀜𑀁, 𑀅𑀭𑀺𑀬𑀫𑀕𑁆𑀕𑁄, 𑀢𑁂𑀦 𑀅𑀭𑀡𑀻𑀬𑀢𑁄 𑀉𑀧𑀕𑀦𑁆𑀢𑀩𑁆𑀩𑀢𑁄 𑀲𑀸𑀫𑀜𑁆𑀜𑀢𑁆𑀣𑁄 𑀦𑀺𑀩𑁆𑀩𑀸𑀦𑀦𑁆𑀢𑀺 𑀆𑀳 𑁋 ‘‘𑀲𑀸𑀫𑀜𑁆𑀜𑀢𑁆𑀣𑀦𑁆𑀢𑀺 𑀦𑀺𑀩𑁆𑀩𑀸𑀦𑀁, 𑀢𑀁 𑀳𑀻’’𑀢𑀺𑀆𑀤𑀺. 𑀩𑁆𑀭𑀳𑁆𑀫𑀜𑁆𑀜𑀢𑁆𑀣𑀦𑁆𑀢𑀺 𑀏𑀢𑁆𑀣𑀸𑀧𑀺 𑀇𑀫𑀺𑀦𑀸 𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀩𑁆𑀭𑀳𑁆𑀫𑀜𑁆𑀜𑁂𑀦 𑀅𑀭𑀺𑀬𑀫𑀕𑁆𑀕𑁂𑀦. 𑀭𑀸𑀕𑀓𑁆𑀔𑀬𑁄𑀢𑀺 𑀏𑀢𑁆𑀣 𑀇𑀢𑀺-𑀲𑀤𑁆𑀤𑁄 𑀆𑀤𑀺𑀲𑀤𑁆𑀤𑀢𑁆𑀣𑁄. 𑀢𑁂𑀦 ‘‘𑀤𑁄𑀲𑀓𑁆𑀔𑀬𑁄 𑀫𑁄𑀳𑀓𑁆𑀔𑀬𑁄’’𑀢𑀺 𑀧𑀤𑀤𑁆𑀯𑀬𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀯𑀝𑁆𑀝𑀢𑀺𑀬𑁂𑀯𑀸𑀢𑀺 𑀯𑀤𑀦𑁆𑀢𑀺 ‘‘𑀭𑀸𑀕𑀓𑁆𑀔𑀬𑁄’’𑀢𑀺. 𑀧𑀭𑀺𑀬𑀸𑀬𑁂𑀦 𑀳𑀺 𑀅𑀭𑀳𑀢𑁆𑀢𑀲𑁆𑀲 𑀯𑀢𑁆𑀢𑀩𑁆𑀩𑀢𑁆𑀢𑀸𑀢𑀺.

𑀧𑀝𑀺𑀧𑀢𑁆𑀢𑀺𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀅𑀜𑁆𑀜𑀢𑀺𑀢𑁆𑀣𑀺𑀬𑀧𑁂𑀬𑁆𑀬𑀸𑀮𑀯𑀕𑁆𑀕𑀯𑀡𑁆𑀡𑀦𑀸

𑁪𑁧-𑁪𑁮. 𑀅𑀧𑀭𑀸𑀧𑀭𑀁 𑀧𑀭𑀺𑀯𑀢𑁆𑀢𑀫𑀸𑀦𑁂𑀦 𑀯𑀢𑁆𑀢𑀲𑀫𑁆𑀧𑀦𑁆𑀦𑁂𑀦 𑀲𑀁𑀲𑀸𑀭𑀤𑁆𑀥𑀸𑀦𑀧𑀭𑀺𑀜𑁆𑀜𑀸𑀯𑀲𑁂𑀦𑁂𑀯 𑀦𑀺𑀩𑁆𑀩𑀸𑀦𑀲𑁆𑀲 𑀧𑀢𑁆𑀢𑀩𑁆𑀩𑀢𑁆𑀢𑀸 𑀯𑀼𑀢𑁆𑀢𑀁 𑁋 ‘‘𑀦𑀺𑀩𑁆𑀩𑀸𑀦𑀁 𑀧𑀢𑁆𑀯𑀸 𑀧𑀭𑀺𑀜𑁆𑀜𑀸𑀢𑀁 𑀦𑀸𑀫 𑀳𑁄𑀢𑀻’’𑀢𑀺. 𑀦𑀺𑀩𑁆𑀩𑀸𑀦𑀁 𑀧𑀢𑁆𑀯𑀸𑀢𑀺 𑀦𑀺𑀩𑁆𑀩𑀸𑀦𑀧𑁆𑀧𑀢𑁆𑀢𑀺𑀳𑁂𑀢𑀼. 𑀳𑁂𑀢𑀼𑀅𑀢𑁆𑀣𑁄 𑀳𑀺 𑀅𑀬𑀁 𑀢𑁆𑀯𑀸-𑀲𑀤𑁆𑀤𑁄 𑀬𑀣𑀸 𑁋 ‘‘𑀖𑀢𑀁 𑀧𑀺𑀯𑀺𑀢𑁆𑀯𑀸 𑀩𑀮𑀁 𑀳𑁄𑀢𑀺, 𑀲𑀻𑀳𑀁 𑀤𑀺𑀲𑁆𑀯𑀸 𑀪𑀬𑀁 𑀳𑁄𑀢𑀻’’𑀢𑀺. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀅𑀧𑀭𑀺𑀜𑁆𑀜𑁂𑀬𑁆𑀬𑀧𑀭𑀺𑀚𑀸𑀦𑀦𑀓𑀺𑀘𑁆𑀘𑁂𑀦 𑀦𑀺𑀩𑁆𑀩𑀸𑀦𑀲𑁆𑀲 𑀧𑀢𑁆𑀢𑀺𑀬𑀸 𑀅𑀤𑁆𑀥𑀸𑀦𑀧𑀭𑀺𑀜𑁆𑀜𑀸𑀲𑀺𑀤𑁆𑀥𑀺 𑀜𑀸𑀬𑀢𑀺, 𑀢𑀲𑁆𑀫𑀸 𑀉𑀧𑀘𑀸𑀭𑀯𑀲𑁂𑀦 𑀦𑀺𑀩𑁆𑀩𑀸𑀦𑀁 ‘‘𑀅𑀤𑁆𑀥𑀸𑀦𑀧𑀭𑀺𑀜𑁆𑀜𑀸’’𑀢𑀺 𑀯𑀼𑀘𑁆𑀘𑀢𑀺 𑀬𑀣𑀸 ‘‘𑀳𑀺𑀫𑀲𑀦𑁆𑀢𑀺 𑀲𑀽𑀭𑀺𑀬𑀁 𑀉𑀕𑁆𑀕𑀫𑁂𑀢𑀻’’𑀢𑀺. 𑀯𑀺𑀚𑁆𑀚𑀸𑀯𑀺𑀫𑀼𑀢𑁆𑀢𑀺𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀢𑁆𑀣𑀦𑁆𑀢𑀺 𑀏𑀢𑁆𑀣 𑀯𑀺𑀚𑁆𑀚𑀸𑀢𑀺 𑀅𑀕𑁆𑀕𑀫𑀕𑁆𑀕𑀯𑀺𑀚𑁆𑀚𑀸. 𑀯𑀺𑀫𑀼𑀢𑁆𑀢𑀻𑀢𑀺 𑀅𑀕𑁆𑀕𑀫𑀕𑁆𑀕𑀲𑀫𑀸𑀥𑀺 𑀅𑀥𑀺𑀧𑁆𑀧𑁂𑀢𑁄. 𑀢𑁂𑀲𑀁 𑀨𑀮𑀁 𑀅𑀜𑁆𑀜𑀸𑀢𑀺 𑀆𑀳 𑁋 ‘‘𑀯𑀺𑀚𑁆𑀚𑀸𑀯𑀺𑀫𑀼𑀢𑁆𑀢𑀺𑀨𑀮𑁂𑀦 𑀅𑀭𑀳𑀢𑁆𑀢𑀁 𑀓𑀣𑀺𑀢’’𑀦𑁆𑀢𑀺. 𑀬𑀸𑀣𑀸𑀯𑀢𑁄 𑀚𑀸𑀦𑀦𑀢𑁄 𑀧𑀘𑁆𑀘𑀓𑁆𑀔𑀢𑁄 𑀤𑀲𑁆𑀲𑀦𑀢𑁄 𑀘 𑀜𑀸𑀡𑀤𑀲𑁆𑀲𑀦𑀦𑁆𑀢𑀺 𑀇𑀥 𑀨𑀮𑀦𑀺𑀩𑁆𑀩𑀸𑀦𑀧𑀘𑁆𑀘𑀯𑁂𑀓𑁆𑀔𑀡𑀸 𑀅𑀥𑀺𑀧𑁆𑀧𑁂𑀢𑀸𑀢𑀺 𑀆𑀳 𑁋 ‘‘𑀜𑀸𑀡𑀤𑀲𑁆𑀲𑀦𑁂𑀦 𑀧𑀘𑁆𑀘𑀯𑁂𑀓𑁆𑀔𑀡𑀸 𑀓𑀣𑀺𑀢𑀸’’𑀢𑀺. 𑀲𑁂𑀲𑁂𑀳𑀻𑀢𑀺 𑀭𑀸𑀕-𑀯𑀺𑀭𑀸𑀕-𑀲𑀁𑀬𑁄𑀚𑀦𑀧𑁆𑀧𑀳𑀸𑀦-𑀅𑀦𑀼𑀲𑀬𑀲𑀫𑀼𑀕𑁆𑀖𑀸𑀢-𑀅𑀤𑁆𑀥𑀸𑀦𑀧𑀭𑀺𑀜𑁆𑀜𑀸- 𑀆𑀲𑀯𑀓𑁆𑀔𑀬-𑀯𑀺𑀚𑁆𑀚𑀸-𑀯𑀺𑀫𑀼𑀢𑁆𑀢𑀺-𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸-𑀜𑀸𑀡𑀤𑀲𑁆𑀲𑀦-𑀅𑀦𑀼𑀧𑀸𑀤𑀸𑀧𑀭𑀺𑀦𑀺𑀩𑁆𑀩𑀸𑀦𑀧𑀤𑁂𑀳𑀺.

𑀅𑀜𑁆𑀜𑀢𑀺𑀢𑁆𑀣𑀺𑀬𑀧𑁂𑀬𑁆𑀬𑀸𑀮𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀲𑀽𑀭𑀺𑀬𑀧𑁂𑀬𑁆𑀬𑀸𑀮𑀯𑀕𑁆𑀕𑀯𑀡𑁆𑀡𑀦𑀸

𑁪𑁯-𑁬𑁨. 𑀬𑀣𑀸 𑀅𑀭𑀼𑀡𑀼𑀕𑁆𑀕𑀁 𑀲𑀽𑀭𑀺𑀬𑀼𑀕𑁆𑀕𑀫𑀦𑀲𑁆𑀲 𑀏𑀓𑀦𑁆𑀢𑀺𑀓𑀁 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁, 𑀏𑀯𑀁 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸 𑀅𑀭𑀺𑀬𑀫𑀕𑁆𑀕𑀧𑀸𑀢𑀼𑀪𑀸𑀯𑀲𑁆𑀲𑀸𑀢𑀺 𑀲𑀤𑀺𑀲𑀽𑀧𑀫𑀸 𑀅𑀭𑀼𑀡𑀼𑀕𑁆𑀕𑀁 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸𑀬. 𑀓𑀮𑁆𑀬𑀸𑀡𑀫𑀺𑀢𑁆𑀢𑁄𑀢𑀺 𑀘𑁂𑀢𑁆𑀣 𑀅𑀭𑀺𑀬𑁄, 𑀅𑀭𑀺𑀬𑀫𑀕𑁆𑀕𑁄 𑀯𑀸 𑀤𑀝𑁆𑀞𑀩𑁆𑀩𑁄 𑀲𑀽𑀭𑀺𑀬𑀧𑀸𑀢𑀼𑀪𑀸𑀯𑁄 𑀯𑀺𑀬 𑀢𑁂𑀦 𑀯𑀺𑀥𑀽𑀧𑀦𑀻𑀬𑀦𑁆𑀥𑀓𑀸𑀭𑀯𑀺𑀥𑀫𑀦𑀢𑁄. 𑀓𑀼𑀲𑀮𑀓𑀢𑁆𑀢𑀼𑀓𑀫𑁆𑀬𑀢𑀸𑀙𑀦𑁆𑀤𑁄 𑀙𑀦𑁆𑀤𑀲𑀫𑁆𑀧𑀤𑀸 𑀇𑀢𑀭𑀙𑀦𑁆𑀤𑀢𑁄 𑀲𑀫𑁆𑀧𑀦𑁆𑀦𑀢𑁆𑀢𑀸. 𑀓𑀸𑀭𑀸𑀧𑀓𑀅𑀧𑁆𑀧𑀫𑀸𑀤𑀲𑁆𑀲𑀸𑀢𑀺 𑀲𑀘𑁆𑀘𑀧𑀝𑀺𑀯𑁂𑀥𑀲𑁆𑀲 𑀓𑀸𑀭𑀸𑀧𑀓𑀲𑁆𑀲. 𑀏𑀯𑀁 𑀲𑀩𑁆𑀩𑀢𑁆𑀣𑁂𑀯 𑀲𑀫𑁆𑀧𑀤𑀸𑀲𑀤𑁆𑀤𑀸 𑀯𑀺𑀲𑁂𑀲𑀸𑀥𑀺𑀕𑀫𑀳𑁂𑀢𑀼𑀢𑀸𑀬 𑀯𑁂𑀤𑀺𑀢𑀩𑁆𑀩𑀸. 𑀅𑀜𑁆𑀜𑁂𑀦𑀧𑀺 𑀆𑀓𑀸𑀭𑁂𑀦𑀸𑀢𑀺 ‘‘𑀯𑀺𑀯𑁂𑀓𑀦𑀺𑀲𑁆𑀲𑀺𑀢’’𑀦𑁆𑀢𑀺𑀆𑀤𑀺𑀆𑀓𑀸𑀭𑀢𑁄 𑀅𑀜𑁆𑀜𑁂𑀦 ‘‘𑀭𑀸𑀕𑀯𑀺𑀦𑀬𑀧𑀭𑀺𑀬𑁄𑀲𑀸𑀦’’𑀦𑁆𑀢𑀺𑀆𑀤𑀺𑀦𑀸 𑀆𑀓𑀸𑀭𑁂𑀦.

𑀲𑀽𑀭𑀺𑀬𑀧𑁂𑀬𑁆𑀬𑀸𑀮𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀏𑀓𑀥𑀫𑁆𑀫𑀧𑁂𑀬𑁆𑀬𑀸𑀮𑀯𑀕𑁆𑀕𑀸𑀤𑀺𑀯𑀡𑁆𑀡𑀦𑀸

𑁬𑁩-𑁧𑁩𑁮. 𑀢𑀣𑀸 𑀢𑀣𑀸 𑀯𑀼𑀢𑁆𑀢𑁂 𑀩𑀼𑀚𑁆𑀛𑀦𑀓𑀸𑀦𑀁 𑀅𑀚𑁆𑀛𑀸𑀲𑀬𑀯𑀲𑁂𑀦 𑀓𑀣𑀺𑀢𑁄, 𑀢𑀲𑁆𑀫𑀸 ‘‘𑀯𑀼𑀢𑁆𑀢𑁄 𑀏𑀯 𑀅𑀢𑁆𑀣𑁄, 𑀓𑀲𑁆𑀫𑀸 𑀧𑀼𑀦 𑀯𑀼𑀢𑁆𑀢𑁄’’𑀢𑀺 𑀦 𑀘𑁄𑀤𑁂𑀢𑀩𑁆𑀩𑀁.

𑀏𑀓𑀥𑀫𑁆𑀫𑀧𑁂𑀬𑁆𑀬𑀸𑀮𑀯𑀕𑁆𑀕𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀅𑀧𑁆𑀧𑀫𑀸𑀤𑀧𑁂𑀬𑁆𑀬𑀸𑀮𑀯𑀕𑁆𑀕𑁄

𑁧. 𑀢𑀣𑀸𑀕𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁩𑁯. 𑀓𑀸𑀭𑀸𑀧𑀓𑀅𑀧𑁆𑀧𑀫𑀸𑀤𑁄 𑀦𑀸𑀫 ‘‘𑀇𑀫𑁂 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀧𑀳𑀸𑀢𑀩𑁆𑀩𑀸, 𑀇𑀫𑁂 𑀓𑀼𑀲𑀮𑀸 𑀥𑀫𑁆𑀫𑀸 𑀉𑀧𑁆𑀧𑀸𑀤𑁂𑀢𑀩𑁆𑀩𑀸’’𑀢𑀺 𑀯𑀼𑀢𑁆𑀢𑀯𑀚𑁆𑀚𑁂𑀢𑀩𑁆𑀩𑀯𑀚𑁆𑀚𑀦𑀲𑀫𑁆𑀧𑀸𑀤𑁂𑀢𑀩𑁆𑀩𑀲𑀫𑁆𑀧𑀸𑀤𑀦𑀯𑀲𑁂𑀦 𑀧𑀯𑀢𑁆𑀢𑁄 𑀅𑀧𑁆𑀧𑀫𑀸𑀤𑁄. 𑀏𑀲𑀸𑀢𑀺 𑀅𑀧𑁆𑀧𑀫𑀸𑀤𑁄. 𑀮𑁄𑀓𑀺𑀬𑁄𑀯. 𑀦 𑀮𑁄𑀓𑀼𑀢𑁆𑀢𑀭𑁄. 𑀅𑀬𑀦𑁆𑀢𑀺 𑀏𑀲𑀸𑀢𑀺 𑀘 𑀅𑀧𑁆𑀧𑀫𑀸𑀤𑀫𑁂𑀯 𑀯𑀤𑀢𑀺. 𑀢𑁂𑀲𑀦𑁆𑀢𑀺 𑀘𑀢𑀼𑀪𑀽𑀫𑀓𑀥𑀫𑁆𑀫𑀸𑀦𑀁. 𑀧𑀝𑀺𑀮𑀸𑀪𑀓𑀝𑁆𑀞𑁂𑀦𑀸𑀢𑀺 𑀧𑀝𑀺𑀮𑀸𑀪𑀸𑀧𑀦𑀝𑁆𑀞𑁂𑀦.

𑀢𑀣𑀸𑀕𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀧𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁪𑁦. 𑀚𑀗𑁆𑀕𑀮𑀸𑀦𑀦𑁆𑀢𑀺 𑀚𑀗𑁆𑀕𑀮𑀯𑀸𑀲𑀻𑀦𑀁. 𑀚𑀗𑁆𑀕𑀮-𑀲𑀤𑁆𑀤𑁄 𑀘𑁂𑀢𑁆𑀣 𑀣𑀤𑁆𑀥𑀪𑀸𑀯𑀲𑀸𑀫𑀜𑁆𑀜𑁂𑀦 𑀧𑀣𑀯𑀻𑀧𑀭𑀺𑀬𑀸𑀬𑁄, 𑀦 𑀅𑀦𑀼𑀧𑀝𑁆𑀞𑀸𑀦𑀯𑀺𑀤𑀽𑀭𑀤𑁂𑀲𑀯𑀸𑀘𑀻. 𑀢𑁂𑀦𑀸𑀳 𑁋 ‘‘𑀧𑀣𑀯𑀻𑀢𑀮𑀯𑀸𑀲𑀻𑀦’’𑀦𑁆𑀢𑀺. 𑀧𑀤𑀸𑀦𑀁 𑀯𑀼𑀘𑁆𑀘𑀫𑀸𑀦𑀢𑁆𑀢𑀸 ‘‘𑀲𑀧𑀸𑀤𑀓𑀧𑀸𑀡𑀸𑀦’’𑀦𑁆𑀢𑀺 𑀯𑀺𑀲𑁂𑀲𑁂𑀢𑁆𑀯𑀸 𑀯𑀼𑀢𑁆𑀢𑀁. 𑀲𑀫𑁄𑀥𑀸𑀦𑀦𑁆𑀢𑀺 𑀅𑀦𑁆𑀢𑁄𑀕𑀥𑀪𑀸𑀯𑀁. 𑀢𑁂𑀦𑀸𑀳 𑁋 ‘‘𑀑𑀥𑀸𑀦𑀁 𑀉𑀧𑀓𑁆𑀔𑁂𑀧’’𑀦𑁆𑀢𑀺, 𑀉𑀧𑀦𑁂𑀢𑁆𑀯𑀸 𑀧𑀓𑁆𑀔𑀺𑀧𑀺𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄.

𑀧𑀤𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩-𑁧𑁦. 𑀓𑀽𑀝𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁪𑁧-𑁧𑁪𑁮. 𑀯𑀲𑁆𑀲𑀺𑀓𑀸𑀬 𑀧𑀼𑀧𑁆𑀨𑀁 𑀯𑀲𑁆𑀲𑀺𑀓𑀁 𑀬𑀣𑀸 ‘‘𑀆𑀫𑀮𑀓𑀺𑀬𑀸 𑀨𑀮𑀁 𑀆𑀫𑀮𑀓’’𑀦𑁆𑀢𑀺. 𑀫𑀳𑀸𑀢𑀮𑀲𑁆𑀫𑀺𑀦𑁆𑀢𑀺 𑀉𑀧𑀭𑀺𑀧𑀸𑀲𑀸𑀤𑁂. ‘‘𑀬𑀸𑀦𑀺 𑀓𑀸𑀦𑀺𑀘𑀻’’𑀢𑀺 𑀧𑀤𑁂𑀳𑀺 𑀇𑀢𑀭𑀸𑀦𑀺 𑀲𑀫𑀸𑀦𑀸𑀥𑀺𑀓𑀭𑀡𑀸𑀦𑀺 𑀪𑀯𑀺𑀢𑀼𑀁 𑀬𑀼𑀢𑁆𑀢𑀸𑀦𑀻𑀢𑀺 ‘‘𑀧𑀘𑁆𑀘𑀢𑁆𑀢𑁂 𑀲𑀸𑀫𑀺𑀯𑀘𑀦’’𑀦𑁆𑀢𑀺 𑀯𑀢𑁆𑀯𑀸 𑀢𑀣𑀸 𑀯𑀺𑀪𑀢𑁆𑀢𑀺𑀯𑀺𑀧𑀭𑀺𑀡𑀸𑀫𑁄 𑀓𑀢𑁄. ‘‘𑀢𑀦𑁆𑀢𑀸𑀯𑀼𑀢𑀸𑀦’’𑀦𑁆𑀢𑀺 𑀧𑀤𑀁 𑀦𑀺𑀤𑁆𑀥𑀸𑀭𑀡𑁂 𑀲𑀸𑀫𑀺𑀯𑀘𑀦𑀦𑁆𑀢𑀺 𑀢𑀢𑁆𑀣 ‘‘𑀯𑀢𑁆𑀣𑀸𑀦𑀻’’𑀢𑀺 𑀯𑀘𑀦𑀲𑁂𑀲𑁂𑀦 𑀅𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀣 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀓𑀽𑀝𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀧𑁆𑀧𑀫𑀸𑀤𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀩𑀮𑀓𑀭𑀡𑀻𑀬𑀯𑀕𑁆𑀕𑁄

𑁧. 𑀩𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁪𑁯. 𑀓𑀫𑁆𑀫𑀸𑀦𑀺𑀬𑁂𑀯 𑀓𑀫𑁆𑀫𑀦𑁆𑀢𑀸 𑀬𑀣𑀸 𑀲𑀼𑀢𑁆𑀢𑀦𑁆𑀢𑀸. 𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀦𑁆𑀢𑀺 𑀏𑀢𑁆𑀣 𑀦𑀸𑀦𑀦𑁆𑀢𑀭𑀺𑀬𑀓𑀢𑀸𑀬 𑀯𑀺𑀧𑀲𑁆𑀲𑀦𑀸𑀧𑀺 𑀕𑀳𑀺𑀢𑀸 𑀏𑀯 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀲𑀳𑀯𑀺𑀧𑀲𑁆𑀲𑀦’’𑀦𑁆𑀢𑀺.

𑁨. 𑀩𑀻𑀚𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁫𑁦. 𑀧𑀜𑁆𑀘𑀯𑀺𑀥𑀫𑁆𑀧𑀺 𑀲𑀫𑀽𑀳𑀝𑁆𑀞𑁂𑀦 𑀩𑀻𑀚𑀕𑀸𑀫𑁄 𑀦𑀸𑀫. 𑀢𑀤𑁂𑀯𑀸𑀢𑀺 𑀫𑀽𑀮𑀩𑀻𑀚𑀸𑀤𑀺 𑀏𑀯. 𑀲𑀫𑁆𑀧𑀦𑁆𑀦𑀦𑁆𑀢𑀺 𑀲𑀳𑀚𑀸𑀢𑀫𑀽𑀮𑀯𑀦𑁆𑀢𑀁. 𑀦𑀻𑀮𑀪𑀸𑀯𑀢𑁄 𑀧𑀝𑁆𑀞𑀸𑀬𑀸𑀢𑀺 𑀦𑀻𑀮𑀪𑀸𑀯𑀸𑀧𑀢𑁆𑀢𑀺𑀢𑁄 𑀧𑀝𑁆𑀞𑀸𑀬.

𑁩. 𑀦𑀸𑀕𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁫𑁧. 𑀩𑀮𑀁 𑀕𑀸𑀳𑁂𑀦𑁆𑀢𑀻𑀢𑀺 𑀅𑀢𑁆𑀢𑀦𑁄 𑀲𑀭𑀻𑀭𑀩𑀮𑀁 𑀕𑀸𑀳𑁂𑀦𑁆𑀢𑀺. 𑀢𑀁 𑀧𑀦 𑀦𑀸𑀕𑀸𑀦𑀁 𑀩𑀮𑀧𑁆𑀧𑀢𑁆𑀢𑀺 𑀏𑀯𑀸𑀢𑀺 𑀆𑀳 𑁋 ‘‘𑀩𑀮𑀁 𑀕𑀡𑁆𑀳𑀦𑁆𑀢𑀻’’𑀢𑀺. 𑀲𑀫𑁆𑀪𑁂𑀚𑁆𑀚𑀫𑀼𑀔𑀤𑁆𑀯𑀸𑀭𑀦𑁆𑀢𑀺 𑀫𑀳𑀸𑀲𑀫𑀼𑀤𑁆𑀤𑁂𑀦 𑀲𑀫𑁆𑀪𑁂𑀤𑀕𑀢𑀫𑀳𑀸𑀦𑀤𑀻𑀦𑀁 𑀫𑀼𑀔𑀤𑁆𑀯𑀸𑀭𑀁. 𑀦𑀸𑀕𑀸 𑀓𑀸𑀬𑀁 𑀯𑀟𑁆𑀠𑁂𑀦𑁆𑀢𑀻𑀢𑀺𑀆𑀤𑀺 𑀬𑀲𑁆𑀫𑀸 𑀘 𑀪𑀕𑀯𑀢𑀸 𑀉𑀧𑀫𑀸𑀯𑀲𑁂𑀦 𑀆𑀪𑀢𑀁, 𑀢𑀲𑁆𑀫𑀸 𑀏𑀯𑀫𑁂𑀯 𑀔𑁄𑀢𑀺 𑀏𑀢𑁆𑀣𑀸𑀢𑀺𑀆𑀤𑀺𑀦𑀸 𑀉𑀧𑀫𑀁 𑀲𑀁𑀲𑀦𑁆𑀤𑀢𑀺. 𑀆𑀕𑀢𑁂𑀲𑀽𑀢𑀺𑀆𑀤𑀻𑀲𑀼 𑀢𑀻𑀲𑀼 𑀧𑀤𑁂𑀲𑀼 𑀪𑀸𑀯𑁂𑀦𑀪𑀸𑀯𑀮𑀓𑁆𑀔𑀡𑁂.

𑁫. 𑀓𑀼𑀫𑁆𑀪𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁫𑁩. 𑀦 𑀧𑀢𑀺𑀆𑀯𑀫𑀢𑀻𑀢𑀺 𑀘 𑀦𑀺𑀓𑀼𑀚𑁆𑀚𑀺𑀢𑀪𑀸𑀯𑁂𑀦 𑀉𑀤𑀓𑀯𑀫𑀦𑁄 𑀖𑀝𑁄, 𑀦 𑀢𑀁 𑀧𑀼𑀦 𑀫𑀼𑀔𑁂𑀦 𑀕𑀡𑁆𑀳𑀸𑀢𑀺. 𑀢𑁂𑀦𑀸𑀳 ‘‘𑀦 𑀅𑀦𑁆𑀢𑁄 𑀧𑀯𑁂𑀲𑁂𑀢𑀻’’𑀢𑀺.

𑁭. 𑀆𑀓𑀸𑀲𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁫𑁫. 𑀢𑁂𑀦𑁂𑀢𑀁 𑀯𑀼𑀢𑁆𑀢𑀦𑁆𑀢𑀺 𑀢𑁂𑀦 𑀅𑀭𑀺𑀬𑀫𑀕𑁆𑀕𑀲𑁆𑀲 𑀇𑀚𑁆𑀛𑀦𑁂𑀦 𑀏𑀢𑁂𑀲𑀁 𑀲𑀩𑁆𑀩𑁂𑀲𑀁 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀸𑀦𑀁 𑀇𑀚𑁆𑀛𑀦𑀁 𑀯𑀼𑀢𑁆𑀢𑀁.

𑁮-𑁯-𑁧𑁦. 𑀧𑀞𑀫𑀫𑁂𑀖𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁫𑁬-𑁧𑁫𑁮. 𑀧𑀁𑀲𑀼𑀭𑀚𑁄𑀚𑀮𑁆𑀮𑀦𑁆𑀢𑀺 𑀪𑀽𑀫𑀺𑀭𑁂𑀡𑀼𑀲𑀳𑀚𑀸𑀢𑀫𑀮𑀁. 𑀯𑀸𑀡𑀺𑀚𑀓𑁄𑀧𑀫𑁂𑀢𑀺 𑀯𑀸𑀡𑀺𑀚𑀓𑁄𑀧𑀫𑀧𑀞𑀫𑀲𑀼𑀢𑁆𑀢𑁂 𑀘𑀸𑀧𑀺.

𑁧𑁧-𑁧𑁨. 𑀆𑀕𑀦𑁆𑀢𑀼𑀓𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁫𑁯-𑁧𑁬𑁦. 𑀲𑀳𑀯𑀺𑀧𑀲𑁆𑀲𑀦𑀲𑁆𑀲 𑀅𑀭𑀺𑀬𑀫𑀕𑁆𑀕𑀲𑁆𑀲 𑀪𑀸𑀯𑀦𑀸𑀬 𑀇𑀚𑁆𑀛𑀦𑁂𑀦 𑀏𑀢𑀁 𑀅𑀪𑀺𑀜𑁆𑀜𑀸𑀧𑀭𑀺𑀜𑁆𑀜𑁂𑀬𑁆𑀬𑀸𑀤𑀺𑀥𑀫𑁆𑀫𑀸𑀦𑀁 𑀅𑀪𑀺𑀜𑁆𑀜𑀸𑀧𑀭𑀺𑀚𑀸𑀦𑀦𑀸𑀤𑀻𑀦𑀁 𑀇𑀚𑁆𑀛𑀦𑀁 𑀯𑀼𑀢𑁆𑀢𑀁 𑀔𑀢𑁆𑀢𑀺𑀬𑀸𑀤𑀻𑀦𑀁 𑀯𑀺𑀲𑀬𑀆𑀤𑀺𑀓𑀁 𑀓𑀭𑁄𑀦𑁆𑀢𑀲𑁆𑀲 𑀓𑀣𑀸𑀬 𑀲𑀚𑁆𑀚𑀺𑀢𑀢𑁆𑀢𑀸.

𑀩𑀮𑀓𑀭𑀡𑀻𑀬𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀏𑀲𑀦𑀸𑀯𑀕𑁆𑀕𑁄

𑁧. 𑀏𑀲𑀦𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁬𑁧. 𑀓𑀸𑀫𑀸𑀦𑀦𑁆𑀢𑀺 𑀯𑀢𑁆𑀣𑀼𑀓𑀸𑀫𑀓𑀺𑀮𑁂𑀲𑀓𑀸𑀫𑀸𑀦𑀁. 𑀓𑀺𑀮𑁂𑀲𑀓𑀸𑀫𑁄𑀧𑀺 𑀳𑀺 𑀓𑀸𑀫𑀺𑀢𑀦𑁆𑀢𑀺 𑀧𑀭𑀺𑀓𑀧𑁆𑀧𑀺𑀢𑁂𑀦 𑀯𑀺𑀥𑀺𑀦𑀸 𑀘 𑀅𑀥𑀺𑀓𑀭𑀸𑀕𑁂𑀳𑀺 𑀏𑀲𑀦𑀻𑀬𑁄. 𑀪𑀯𑀸𑀦𑀦𑁆𑀢𑀺 𑀢𑀺𑀡𑁆𑀡𑀁 𑀕𑀢𑀻𑀦𑀁. 𑀤𑀺𑀝𑁆𑀞𑀺𑀕𑀢𑀺𑀓𑀧𑀭𑀺𑀓𑀧𑁆𑀧𑀺𑀢𑀲𑁆𑀲 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀦𑀺𑀫𑀺𑀢𑁆𑀢𑀪𑀸𑀯𑀢𑁄 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 ‘‘𑀩𑁆𑀭𑀳𑁆𑀫𑀘𑀭𑀺𑀬’’𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀸.

𑁨-𑁧𑁧. 𑀯𑀺𑀥𑀸𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁬𑁨-𑁧𑁭𑁧. 𑀲𑁂𑀬𑁆𑀬𑁄𑀳𑀫𑀲𑁆𑀫𑀻𑀢𑀺𑀆𑀤𑀺𑀦𑀸 𑀢𑀁𑀢𑀁𑀯𑀺𑀪𑀸𑀕𑁂𑀦 𑀥𑀻𑀬𑀦𑁆𑀢𑀺 𑀯𑀺𑀥𑀻𑀬𑀦𑁆𑀢𑀻𑀢𑀺 𑀯𑀺𑀥𑀸, 𑀫𑀸𑀦𑀓𑁄𑀝𑁆𑀞𑀸𑀲𑀸, 𑀫𑀸𑀦𑀝𑁆𑀞𑀧𑀦𑀸 𑀯𑀸. 𑀦𑀻𑀳𑀦𑀦𑁆𑀢𑀻𑀢𑀺 𑀯𑀺𑀩𑀸𑀥𑁂𑀦𑁆𑀢𑀺.

𑀏𑀲𑀦𑀸𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁧. 𑀑𑀖𑀯𑀕𑁆𑀕𑁄

𑁧-𑁨. 𑀑𑀖𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁭𑁨-𑁧𑁭𑁩. 𑀯𑀝𑁆𑀝𑁂 𑀑𑀳𑀦𑀦𑁆𑀢𑀺 𑀑𑀲𑀻𑀤𑀸𑀧𑁂𑀦𑁆𑀢𑀻𑀢𑀺 𑀑𑀖𑀸. 𑀭𑀽𑀧𑀸𑀭𑀽𑀧𑀪𑀯𑁂𑀢𑀺 𑀭𑀽𑀧𑀪𑀯𑁂 𑀘 𑀅𑀭𑀽𑀧𑀪𑀯𑁂 𑀘 𑀭𑀽𑀧𑀸𑀭𑀽𑀧𑀢𑀡𑁆𑀳𑁄𑀧𑀦𑀺𑀲𑁆𑀲𑀬𑀸 𑀭𑀽𑀧𑀸𑀭𑀽𑀧𑀸𑀯𑀘𑀭𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑀸 𑀔𑀦𑁆𑀥𑀸. 𑀬𑁄𑀚𑀦𑀝𑁆𑀞𑁂𑀦 𑀬𑁄𑀕𑁄.

𑁩-𑁪. 𑀉𑀧𑀸𑀤𑀸𑀦𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁭𑁪-𑁧𑁭𑁫. 𑀓𑀸𑀫𑀦𑀯𑀲𑁂𑀦 𑀉𑀧𑀸𑀤𑀺𑀬𑀦𑀢𑁄 𑀓𑀸𑀫𑀼𑀧𑀸𑀤𑀸𑀦𑀁. 𑀢𑁂𑀦𑀸𑀳 ‘‘𑀓𑀸𑀫𑀕𑁆𑀕𑀳𑀡’’𑀦𑁆𑀢𑀺. 𑀦𑀸𑀫𑀓𑀸𑀬𑀲𑁆𑀲𑀸𑀢𑀺 𑀯𑁂𑀤𑀦𑀸𑀤𑀻𑀦𑀁 𑀘𑀢𑀼𑀦𑁆𑀦𑀁 𑀅𑀭𑀽𑀧𑀓𑁆𑀔𑀦𑁆𑀥𑀸𑀦𑀁. 𑀖𑀝𑀦𑀧𑀩𑀦𑁆𑀥𑀦𑀓𑀺𑀮𑁂𑀲𑁄𑀢𑀺 𑀳𑁂𑀢𑀼𑀦𑀸 𑀨𑀮𑀲𑁆𑀲 𑀓𑀫𑁆𑀫𑀯𑀝𑁆𑀝𑀲𑁆𑀲 𑀯𑀺𑀧𑀸𑀓𑀯𑀝𑁆𑀝𑁂𑀦 𑀤𑀼𑀓𑁆𑀔𑀧𑁆𑀧𑀩𑀦𑁆𑀥𑀲𑀜𑁆𑀜𑀺𑀢𑀲𑁆𑀲 𑀖𑀝𑀦𑀲𑁆𑀲 𑀲𑀫𑁆𑀩𑀚𑁆𑀛𑀦𑀲𑁆𑀲 𑀦𑀺𑀩𑁆𑀩𑀢𑁆𑀢𑀓𑀓𑀺𑀮𑁂𑀲𑁄. 𑀅𑀦𑁆𑀢𑀕𑁆𑀕𑀸𑀳𑀺𑀓𑀤𑀺𑀝𑁆𑀞𑀺 𑀲𑀲𑁆𑀲𑀢𑀼𑀘𑁆𑀙𑁂𑀤𑀕𑀸𑀳𑁄.

𑀉𑀧𑀸𑀤𑀸𑀦𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫-𑁧𑁦. 𑀅𑀦𑀼𑀲𑀬𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁭𑁬-𑁧𑁮𑁧. 𑀣𑀸𑀫𑀕𑀢𑀝𑁆𑀞𑁂𑀦𑀸𑀢𑀺 𑀲𑀢𑁆𑀢𑀲𑀦𑁆𑀢𑀸𑀦𑁂 𑀣𑀺𑀭𑀪𑀸𑀯𑀽𑀧𑀕𑀫𑀦𑀪𑀸𑀯𑁂𑀦. 𑀣𑀸𑀫𑀕𑀢𑀦𑁆𑀢𑀺 𑀘 𑀅𑀜𑁆𑀜𑁂𑀳𑀺 𑀅𑀲𑀸𑀥𑀸𑀭𑀡𑁄 𑀓𑀸𑀫𑀭𑀸𑀕𑀸𑀤𑀻𑀦𑀁𑀬𑁂𑀯 𑀆𑀯𑁂𑀡𑀺𑀓𑁄 𑀲𑀪𑀸𑀯𑁄 𑀤𑀝𑁆𑀞𑀩𑁆𑀩𑁄. 𑀓𑀸𑀫𑀭𑀸𑀕𑁄𑀯𑀸𑀢𑀺 𑀓𑀸𑀫𑀭𑀸𑀕𑁄 𑀏𑀯 𑀅𑀧𑁆𑀧𑀳𑀻𑀦𑁄. 𑀲𑁄 𑀲𑀢𑀺 𑀧𑀘𑁆𑀘𑀬𑀮𑀸𑀪𑁂 𑀉𑀧𑁆𑀧𑀚𑁆𑀚𑀦𑀸𑀭𑀳𑀢𑀸𑀬 𑀲𑀦𑁆𑀢𑀸𑀦𑁂 𑀅𑀦𑀼𑀲𑁂𑀢𑀻𑀢𑀺 𑀅𑀦𑀼𑀲𑀬𑁄. 𑀲𑁂𑀲𑁂𑀲𑀼𑀧𑀻𑀢𑀺 𑀧𑀝𑀺𑀖𑀸𑀦𑀼𑀲𑀬𑀸𑀤𑀻𑀲𑀼. 𑀑𑀭𑀫𑁆𑀪𑀸𑀕𑁄 𑀯𑀼𑀘𑁆𑀘𑀢𑀺 𑀓𑀸𑀫𑀥𑀸𑀢𑀼 𑀭𑀽𑀧𑀸𑀭𑀽𑀧𑀪𑀸𑀯𑀢𑁄 𑀳𑁂𑀝𑁆𑀞𑀸𑀪𑀽𑀢𑀢𑁆𑀢𑀸. 𑀢𑀢𑁆𑀣 𑀧𑀯𑀢𑁆𑀢𑀺𑀬𑀸 𑀧𑀘𑁆𑀘𑀬𑀪𑀸𑀯𑀢𑁄 𑀑𑀭𑀫𑁆𑀪𑀸𑀕𑀺𑀬𑀸𑀦𑀺 𑀬𑀣𑀸 ‘‘𑀧𑀘𑁆𑀙𑀺𑀬𑁄 𑀕𑁄𑀤𑀼𑀳𑀓𑁄’’𑀢𑀺. 𑀲𑀁𑀬𑁄𑀚𑁂𑀦𑁆𑀢𑀻𑀢𑀺 𑀲𑀁𑀬𑁄𑀚𑀦𑀸𑀦𑀺, 𑀳𑁂𑀝𑁆𑀞𑀸 𑀯𑀺𑀬 𑀅𑀢𑁆𑀣𑁄 𑀯𑀢𑁆𑀢𑀩𑁆𑀩𑁄. 𑀉𑀤𑁆𑀥𑀫𑁆𑀪𑀸𑀕𑁄 𑀫𑀳𑀕𑁆𑀕𑀢𑀪𑀸𑀕𑁄, 𑀢𑀲𑁆𑀲 𑀳𑀺𑀢𑀸𑀦𑀻𑀢𑀺 𑀲𑀩𑁆𑀩𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀢𑁆𑀢𑀸 𑀦 𑀯𑀼𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀅𑀦𑀼𑀲𑀬𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀑𑀖𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀫𑀕𑁆𑀕𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.