𑁧. 𑀧𑀞𑀫𑀯𑀕𑁆𑀕𑁄

𑁧. 𑀤𑀸𑀭𑀼𑀡𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁫𑁭. 𑀣𑀤𑁆𑀥𑁄𑀢𑀺 𑀓𑀓𑁆𑀔𑀴𑁄 𑀅𑀦𑀺𑀝𑁆𑀞𑀲𑁆𑀲 𑀧𑀤𑀸𑀦𑀢𑁄. 𑀘𑀢𑀼𑀧𑀘𑁆𑀘𑀬𑀮𑀸𑀪𑁄𑀢𑀺 𑀘𑀢𑀼𑀦𑁆𑀦𑀁 𑀧𑀘𑁆𑀘𑀬𑀸𑀦𑀁 𑀧𑀝𑀺𑀮𑀸𑀪𑁄. 𑀲𑀓𑁆𑀓𑀸𑀭𑁄𑀢𑀺 𑀢𑁂𑀳𑀺𑀬𑁂𑀯 𑀧𑀘𑁆𑀘𑀬𑁂𑀳𑀺 𑀲𑀼𑀲𑀗𑁆𑀔𑀢𑁂𑀳𑀺 𑀧𑀽𑀚𑀦𑀸, 𑀲𑁄 𑀧𑀦 𑀅𑀢𑁆𑀣𑀢𑁄 𑀲𑀫𑁆𑀧𑀢𑁆𑀢𑀺𑀬𑁂𑀯𑀸𑀢𑀺 𑀆𑀳 ‘‘𑀢𑁂𑀲𑀁𑀬𑁂𑀯…𑀧𑁂… 𑀮𑀸𑀪𑁄’’𑀢𑀺. 𑀯𑀡𑁆𑀡𑀖𑁄𑀲𑁄𑀢𑀺 𑀕𑀼𑀡𑀓𑀺𑀢𑁆𑀢𑀦𑀸. 𑀅𑀦𑁆𑀢𑀭𑀸𑀬𑀲𑁆𑀲 𑀅𑀦𑀢𑀺𑀯𑀢𑁆𑀢𑀦𑀢𑁄 𑀅𑀦𑁆𑀢𑀭𑀸𑀬𑀺𑀓𑁄 𑀅𑀦𑀢𑁆𑀣𑀸𑀯𑀳𑀢𑁆𑀢𑀸.

𑀤𑀸𑀭𑀼𑀡𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀩𑀴𑀺𑀲𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁫𑁮. 𑀩𑀴𑀺𑀲𑁂𑀦 𑀘𑀭𑀢𑀺, 𑀢𑁂𑀦 𑀯𑀸 𑀚𑀻𑀯𑀢𑀻𑀢𑀺 𑀩𑀸𑀴𑀺𑀲𑀺𑀓𑁄. 𑀢𑁂𑀦𑀸𑀳 ‘‘𑀩𑀴𑀺𑀲𑀁 𑀕𑀳𑁂𑀢𑁆𑀯𑀸 𑀘𑀭𑀫𑀸𑀦𑁄’’𑀢𑀺. 𑀆𑀫𑀺𑀲𑀕𑀢𑀦𑁆𑀢𑀺 𑀆𑀫𑀺𑀲𑀽𑀧𑀕𑀢𑀁 𑀆𑀫𑀺𑀲𑀧𑀢𑀺𑀢𑀁. 𑀢𑁂𑀦𑀸𑀳 ‘‘𑀆𑀫𑀺𑀲𑀫𑀓𑁆𑀔𑀺𑀢’’𑀦𑁆𑀢𑀺. 𑀪𑀺𑀦𑁆𑀦𑀸𑀥𑀺𑀓𑀭𑀡𑀸𑀦𑀫𑁆𑀧𑀺 𑀩𑀸𑀳𑀺𑀭𑀢𑁆𑀣𑀲𑀫𑀸𑀲𑁄 𑀳𑁄𑀢𑁂𑀯𑀸𑀢𑀺 𑀆𑀳 ‘‘𑀆𑀫𑀺𑀲𑁂 𑀘𑀓𑁆𑀔𑀼𑀤𑀲𑁆𑀲𑀦’’𑀦𑁆𑀢𑀺. 𑀅𑀬𑁄 𑀯𑀼𑀘𑁆𑀘𑀢𑀺 𑀲𑀼𑀔𑀁, 𑀢𑀩𑁆𑀩𑀺𑀥𑀼𑀭𑀢𑀸𑀬 𑀅𑀦𑀬𑁄, 𑀤𑀼𑀓𑁆𑀔𑀦𑁆𑀢𑀺 𑀆𑀳 ‘‘𑀤𑀼𑀓𑁆𑀔𑀁 𑀧𑀢𑁆𑀢𑁄’’𑀢𑀺. 𑀅𑀲𑁆𑀲𑀸𑀢𑀺 𑀏𑀢𑁂𑀦. 𑀓𑀢𑁆𑀢𑀼𑀅𑀢𑁆𑀣𑁂 𑀳𑀺 𑀏𑀢𑀁 𑀲𑀸𑀫𑀺𑀯𑀘𑀦𑀁. 𑀬𑀣𑀸 𑀓𑀺𑀮𑁂𑀲𑀸 𑀯𑀢𑁆𑀢𑀦𑁆𑀢𑀺, 𑀏𑀯𑀁 𑀧𑀯𑀢𑁆𑀢𑀫𑀸𑀦𑁄 𑀧𑀼𑀕𑁆𑀕𑀮𑁄 𑀓𑀺𑀮𑁂𑀲𑀯𑀺𑀧𑁆𑀧𑀬𑁄𑀕𑁄 𑀦 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀬𑀣𑀸 𑀓𑀺𑀮𑁂𑀲𑀫𑀸𑀭𑀲𑁆𑀲 𑀓𑀸𑀫𑁄, 𑀏𑀯𑀁 𑀓𑀢𑁆𑀢𑀩𑁆𑀩𑁄’’𑀢𑀺.

𑀩𑀴𑀺𑀲𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩-𑁪. 𑀓𑀼𑀫𑁆𑀫𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁫𑁯-𑁧𑁬𑁦. 𑀅𑀝𑁆𑀞𑀺𑀓𑀘𑁆𑀙𑀧𑀸 𑀯𑀼𑀘𑁆𑀘𑀦𑁆𑀢𑀺 𑀬𑁂𑀲𑀁 𑀓𑀧𑀸𑀮𑀫𑀢𑁆𑀣𑀓𑁂 𑀢𑀺𑀔𑀺𑀡𑀸 𑀅𑀝𑁆𑀞𑀺𑀓𑁄𑀝𑀺 𑀳𑁄𑀢𑀺, 𑀢𑁂𑀲𑀁 𑀲𑀫𑀽𑀳𑁄 𑀅𑀝𑁆𑀞𑀺𑀓𑀘𑁆𑀙𑀧𑀓𑀼𑀮𑀁. 𑀫𑀘𑁆𑀙𑀓𑀘𑁆𑀙𑀧𑀸𑀤𑀻𑀦𑀁 𑀲𑀭𑀻𑀭𑁂 𑀮𑀫𑁆𑀩𑀦𑁆𑀢𑀻 𑀧𑀧𑀢𑀢𑀻𑀢𑀺 𑀧𑀧𑀢𑀸, 𑀯𑀼𑀘𑁆𑀘𑀫𑀸𑀦𑀸𑀓𑀸𑀭𑁄 𑀅𑀬𑀓𑀡𑁆𑀝𑀓𑁄. 𑀅𑀬𑀓𑁄𑀲𑀓𑁂𑀢𑀺 𑀅𑀬𑁄𑀫𑀬𑀓𑁄𑀲𑀓𑁂. 𑀓𑀡𑁆𑀡𑀺𑀓𑀲𑀮𑁆𑀮𑀲𑀡𑁆𑀞𑀸𑀦𑁄𑀢𑀺 𑀅𑀢𑁆𑀢𑀦𑀺𑀓𑀸𑀧𑀦𑀲𑀮𑁆𑀮𑀲𑀡𑁆𑀞𑀸𑀦𑁄. 𑀅𑀬𑀓𑀡𑁆𑀝𑀓𑁄𑀢𑀺 𑀅𑀬𑁄𑀫𑀬𑀯𑀗𑁆𑀓𑀓𑀡𑁆𑀝𑀓𑁄. 𑀦𑀺𑀓𑁆𑀔𑀫𑀢𑀺 𑀏𑀢𑁆𑀣 𑀅𑀣𑀸𑀯𑀭𑀢𑁄. 𑀧𑀯𑁂𑀲𑀺𑀢𑀫𑀢𑁆𑀢𑁄 𑀳𑀺 𑀲𑁄. 𑀇𑀤𑀸𑀦𑀺 𑀢𑁆𑀯𑀁 ‘‘𑀅𑀫𑁆𑀳𑀸𑀓’’𑀦𑁆𑀢𑀺 𑀦 𑀯𑀢𑁆𑀢𑀩𑁆𑀩𑁄. 𑀇𑀢𑁄 𑀅𑀦𑀦𑁆𑀢𑀭𑀲𑀼𑀢𑁆𑀢𑁂𑀢𑀺 𑀘𑀢𑀼𑀢𑁆𑀣𑀲𑀼𑀢𑁆𑀢𑀫𑀸𑀳.

𑀓𑀼𑀫𑁆𑀫𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀫𑀻𑀴𑁆𑀳𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁬𑁧. 𑀫𑀻𑀴𑁆𑀳𑀓𑀸𑀢𑀺 𑀏𑀯𑀁 𑀇𑀢𑁆𑀣𑀺𑀮𑀺𑀗𑁆𑀕𑀯𑀲𑁂𑀦 𑀯𑀼𑀘𑁆𑀘𑀫𑀸𑀦𑀸. 𑀕𑀽𑀣𑀧𑀸𑀡𑀓𑀸𑀢𑀺 𑀕𑀽𑀣𑀪𑀓𑁆𑀔𑀧𑀸𑀡𑀓𑀸. 𑀅𑀦𑁆𑀢𑁄𑀢𑀺 𑀓𑀼𑀘𑁆𑀙𑀺𑀬𑀁.

𑀫𑀻𑀴𑁆𑀳𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀅𑀲𑀦𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁬𑁨. ‘‘𑀇𑀫𑁂 𑀮𑀸𑀪𑀲𑀓𑁆𑀓𑀸𑀭𑀁 𑀅𑀦𑀸𑀳𑀭𑀦𑁆𑀢𑀸 𑀚𑀺𑀖𑀘𑁆𑀙𑀸𑀤𑀺𑀤𑀼𑀓𑁆𑀔𑀁 𑀧𑀸𑀧𑀼𑀡𑀦𑁆𑀢𑀽’’𑀢𑀺 𑀏𑀯𑀁 𑀦 𑀲𑀢𑁆𑀢𑀸𑀦𑀁 𑀤𑀼𑀓𑁆𑀔𑀓𑀸𑀫𑀢𑀸𑀬 𑀏𑀯𑀫𑀸𑀳𑀸𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑁄. 𑀅𑀦𑀦𑁆𑀢𑀤𑀼𑀓𑁆𑀔𑀁 𑀅𑀦𑀼𑀪𑁄𑀢𑀺 𑀅𑀧𑀭𑀸𑀧𑀭𑀁 𑀉𑀧𑁆𑀧𑀚𑁆𑀚𑀦𑀓𑀅𑀓𑀼𑀲𑀮𑀘𑀺𑀢𑁆𑀢𑀸𑀦𑀁 𑀩𑀳𑀼𑀪𑀸𑀯𑀢𑁄.

𑀅𑀲𑀦𑀺𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀤𑀺𑀤𑁆𑀥𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁬𑁩. 𑀅𑀘𑁆𑀙𑀯𑀺𑀲𑀬𑀼𑀢𑁆𑀢𑀸𑀢𑀺 𑀯𑀸 𑀤𑀺𑀤𑁆𑀥𑁂 𑀕𑀢𑁂𑀦 𑀕𑀢𑀤𑀺𑀤𑁆𑀥𑁂𑀦. 𑀢𑁂𑀦𑀸𑀳 ‘‘𑀯𑀺𑀲𑀫𑀓𑁆𑀔𑀺𑀢𑁂𑀦𑀸’’𑀢𑀺.

𑀤𑀺𑀤𑁆𑀥𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀲𑀺𑀗𑁆𑀕𑀸𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁬𑁪. 𑀚𑀭𑀲𑀺𑀗𑁆𑀕𑀸𑀮𑁄𑀢𑁆𑀯𑁂𑀯 𑀯𑀼𑀘𑁆𑀘𑀢𑀺 𑀲𑀭𑀻𑀭𑀲𑁄𑀪𑀸𑀬 𑀅𑀪𑀸𑀯𑀢𑁄. 𑀲𑀭𑀻𑀭𑀲𑁆𑀲 𑀉𑀕𑁆𑀕𑀢𑀓𑀡𑁆𑀝𑀓𑀢𑁆𑀢𑀸 𑀉𑀓𑁆𑀓𑀡𑁆𑀝𑀓𑁂𑀦 𑀦𑀸𑀫. 𑀨𑀼𑀝𑀢𑀻𑀢𑀺 𑀨𑀮𑀢𑀺 𑀪𑀺𑀚𑁆𑀚𑀢𑀺.

𑀲𑀺𑀗𑁆𑀕𑀸𑀮𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀯𑁂𑀭𑀫𑁆𑀪𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁬𑁫. 𑀓𑀸𑀬𑀁 𑀦 𑀭𑀓𑁆𑀔𑀢𑀺 𑀦𑀸𑀫 𑀙𑀩𑁆𑀩𑀻𑀲𑀢𑀺𑀬𑀸 𑀲𑀸𑀭𑀼𑀧𑁆𑀧𑀸𑀦𑀁 𑀧𑀭𑀺𑀘𑁆𑀘𑀚𑀦𑀢𑁄. 𑀯𑀸𑀘𑀁 𑀦 𑀭𑀓𑁆𑀔𑀢𑀺 𑀦𑀸𑀫 𑀭𑀸𑀕𑀲𑀸𑀫𑀦𑁆𑀢𑀸 𑀘 𑀓𑁄𑀥𑀲𑀸𑀫𑀦𑁆𑀢𑀸 𑀘 𑀬𑀸𑀯 𑀦𑀺𑀘𑁆𑀙𑀸𑀭𑀡𑀢𑁄.

𑀯𑁂𑀭𑀫𑁆𑀪𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀲𑀕𑀸𑀣𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁬𑁬. ‘‘𑀬𑀲𑁆𑀲 𑀲𑀓𑁆𑀓𑀭𑀺𑀬𑀫𑀸𑀦𑀲𑁆𑀲𑀸’’𑀢𑀺 𑀏𑀢𑁆𑀣 𑀅𑀲𑀓𑁆𑀓𑀸𑀭𑁂𑀦 𑀘𑀽𑀪𑀬𑀦𑁆𑀢𑀺 𑀅𑀲𑀓𑁆𑀓𑀸𑀭𑁂𑀦 𑀘 𑀉𑀪𑀬𑀜𑁆𑀘, 𑀓𑀤𑀸𑀘𑀺 𑀲𑀓𑁆𑀓𑀸𑀭𑁂𑀦, 𑀓𑀤𑀸𑀘𑀺 𑀅𑀲𑀓𑁆𑀓𑀸𑀭𑁂𑀦 𑀓𑀤𑀸𑀘𑀺 𑀉𑀪𑀬𑁂𑀦𑀸𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀅𑀲𑀓𑁆𑀓𑀸𑀭𑁂𑀦𑀸’’𑀢𑀺𑀆𑀤𑀺. 𑀲𑀢𑀢𑀯𑀺𑀳𑀸𑀭𑀸𑀦𑀁 𑀲𑀫𑁆𑀧𑀢𑁆𑀢𑀺𑀬𑀸 𑀲𑀸𑀢𑀢𑀺𑀓𑁄𑀢𑀺 𑀆𑀳 ‘‘𑀅𑀭𑀳𑀢𑁆𑀢…𑀧𑁂… 𑀲𑀼𑀔𑀼𑀫𑀤𑀺𑀝𑁆𑀞𑀻’’𑀢𑀺𑀆𑀤𑀺. 𑀢𑀣𑀸 𑀳𑀺 𑀲𑀸 ‘‘𑀯𑀚𑀺𑀭𑀽𑀧𑀫𑀜𑀸𑀡’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀆𑀕𑀢𑀢𑁆𑀢𑀸𑀢𑀺 𑀨𑀮𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺𑀢𑀼𑀁 𑀢𑀲𑁆𑀲𑀸 𑀧𑀼𑀩𑁆𑀩𑀧𑀭𑀺𑀓𑀫𑁆𑀫𑀁 𑀉𑀧𑀕𑀢𑀢𑁆𑀢𑀸.

𑀲𑀕𑀸𑀣𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀞𑀫𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.