𑁨. 𑀤𑀼𑀢𑀺𑀬𑀤𑀲𑀩𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁨. 𑀢𑀢𑁆𑀣𑀸𑀢𑀺 𑀤𑀼𑀢𑀺𑀬𑀲𑀼𑀢𑁆𑀢𑁂. 𑀤𑀲𑀳𑀺 𑀩𑀮𑁂𑀳𑀻𑀢𑀺 𑀤𑀲𑀳𑀺 𑀅𑀦𑀜𑁆𑀜𑀲𑀸𑀥𑀸𑀭𑀡𑁂𑀳𑀺 𑀜𑀸𑀡𑀩𑀮𑁂𑀳𑀺, 𑀢𑀸𑀦𑀺 𑀢𑀣𑀸𑀕𑀢𑀲𑁆𑀲𑁂𑀯 𑀩𑀮𑀸𑀦𑀻𑀢𑀺 𑀢𑀣𑀸𑀕𑀢𑀩𑀮𑀸𑀦𑀻𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀓𑀸𑀫𑀜𑁆𑀘 𑀢𑀸𑀦𑀺 𑀏𑀓𑀘𑁆𑀘𑀸𑀦𑀁 𑀲𑀸𑀯𑀓𑀸𑀦𑀫𑁆𑀧𑀺 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀬𑀸𑀤𑀺𑀲𑀸𑀦𑀺 𑀧𑀦 𑀩𑀼𑀤𑁆𑀥𑀸𑀦𑀁 𑀞𑀸𑀦𑀸𑀝𑁆𑀞𑀸𑀦𑀜𑀸𑀡𑀸𑀤𑀻𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀦 𑀢𑀸𑀤𑀺𑀲𑀸𑀦𑀺 𑀢𑀤𑀜𑁆𑀜𑁂𑀲𑀁 𑀓𑀤𑀸𑀘𑀺𑀧𑀺 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺. 𑀳𑀢𑁆𑀣𑀺𑀓𑀼𑀮𑀸𑀦𑀼𑀲𑀸𑀭𑁂𑀦𑀸𑀢𑀺 𑀯𑀓𑁆𑀔𑀫𑀸𑀦𑀳𑀢𑁆𑀣𑀺𑀓𑀼𑀮𑀸𑀦𑀼𑀲𑀸𑀭𑁂𑀦. 𑀓𑀸𑀴𑀸𑀯𑀓𑀦𑁆𑀢𑀺 𑀓𑀼𑀮𑀲𑀤𑁆𑀤𑀸𑀧𑁂𑀓𑁆𑀔𑀸𑀬 𑀦𑀧𑀼𑀁𑀲𑀓𑀦𑀺𑀤𑁆𑀤𑁂𑀲𑁄. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀧𑀓𑀢𑀺𑀳𑀢𑁆𑀣𑀺𑀓𑀼𑀮𑀦𑁆𑀢𑀺 𑀕𑀺𑀭𑀺𑀘𑀭𑀦𑀤𑀺𑀘𑀭𑀯𑀦𑀘𑀭𑀸𑀤𑀺𑀧𑁆𑀧𑀪𑁂𑀤𑀸 𑀕𑁄𑀘𑀭𑀺𑀬𑀓𑀸𑀴𑀸𑀯𑀓𑀦𑀸𑀫𑀸 𑀲𑀩𑁆𑀩𑀸𑀧𑀺 𑀩𑀮𑁂𑀦 𑀧𑀸𑀓𑀢𑀺𑀓𑀸 𑀳𑀢𑁆𑀣𑀺𑀚𑀸𑀢𑀺. 𑀤𑀲𑀦𑁆𑀦𑀁 𑀧𑀼𑀭𑀺𑀲𑀸𑀦𑀦𑁆𑀢𑀺 𑀣𑀸𑀫𑀫𑀚𑁆𑀛𑀺𑀫𑀸𑀦𑀁 𑀤𑀲𑀦𑁆𑀦𑀁 𑀧𑀼𑀭𑀺𑀲𑀸𑀦𑀁. 𑀏𑀓𑀲𑁆𑀲 𑀢𑀣𑀸𑀕𑀢𑀲𑁆𑀲 𑀓𑀸𑀬𑀩𑀮𑀦𑁆𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑁄. 𑀏𑀓𑀲𑁆𑀲𑀸𑀢𑀺 𑀘 𑀢𑀣𑀸 𑀳𑁂𑀝𑁆𑀞𑀸𑀓𑀣𑀸𑀬𑀁 𑀆𑀕𑀢𑀢𑁆𑀢𑀸 𑀤𑁂𑀲𑀦𑀸𑀲𑁄𑀢𑁂𑀦 𑀯𑀼𑀢𑁆𑀢𑀁. 𑀦𑀸𑀭𑀸𑀬𑀦𑀲𑀗𑁆𑀖𑀸𑀢𑀩𑀮𑀦𑁆𑀢𑀺 𑀏𑀢𑁆𑀣 𑀦𑀸𑀭𑀸 𑀯𑀼𑀘𑁆𑀘𑀦𑁆𑀢𑀺 𑀭𑀲𑁆𑀫𑀺𑀬𑁄, 𑀢𑀸 𑀩𑀳𑀽 𑀦𑀸𑀦𑀸𑀯𑀺𑀥𑀸 𑀇𑀢𑁄 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀦𑀸𑀭𑀸𑀬𑀦𑀁, 𑀯𑀚𑀺𑀭𑀁, 𑀢𑀲𑁆𑀫𑀸 𑀦𑀸𑀭𑀸𑀬𑀦𑀲𑀗𑁆𑀖𑀸𑀢𑀩𑀮𑀦𑁆𑀢𑀺 𑀯𑀚𑀺𑀭𑀲𑀗𑁆𑀖𑀸𑀢𑀩𑀮𑀦𑁆𑀢𑀺 𑀅𑀢𑁆𑀣𑁄. 𑀢𑀣𑀸𑀕𑀢𑀲𑁆𑀲 𑀓𑀸𑀬𑀩𑀮𑀦𑁆𑀢𑀺 𑀢𑀣𑀸𑀕𑀢𑀲𑁆𑀲 𑀧𑀸𑀓𑀢𑀺𑀓𑀓𑀸𑀬𑀩𑀮𑀁. 𑀲𑀗𑁆𑀕𑀳𑀁 𑀦 𑀕𑀘𑁆𑀙𑀢𑀺 𑀅𑀢𑁆𑀢𑀦𑁄 𑀩𑀮𑀸𑀪𑀸𑀯𑀢𑁄, 𑀢𑀢𑁄 𑀏𑀯𑀲𑁆𑀲 𑀩𑀸𑀳𑀺𑀭𑀓𑀢𑀸 𑀮𑀸𑀫𑀓𑀢𑀸 𑀘. 𑀢𑀤𑀼𑀪𑀬𑀁 𑀧𑀦𑀲𑁆𑀲 𑀓𑀸𑀭𑀡𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀏𑀢𑀜𑁆𑀳𑀺 𑀦𑀺𑀲𑁆𑀲𑀸𑀬𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀜𑁆𑀜𑀦𑁆𑀢𑀺 𑀓𑀸𑀬𑀩𑀮𑀢𑁄 𑀅𑀜𑁆𑀜𑀁 𑀢𑀢𑁄 𑀯𑀺𑀲𑀼𑀁𑀬𑁂𑀯. 𑀤𑀲𑀲𑀼 𑀞𑀸𑀦𑁂𑀲𑀼 𑀤𑀲𑀲𑀼 𑀜𑀸𑀢𑀩𑁆𑀩𑀝𑁆𑀞𑀸𑀦𑁂𑀲𑀼. 𑀬𑀸𑀣𑀸𑀯𑀧𑀝𑀺𑀯𑁂𑀥𑀢𑁄 𑀲𑀬𑀜𑁆𑀘 𑀅𑀓𑀫𑁆𑀧𑀬𑀁, 𑀧𑀼𑀕𑁆𑀕𑀮𑀜𑁆𑀘 𑀢𑀁𑀲𑀫𑀗𑁆𑀕𑀺𑀁 𑀦𑁂𑀬𑁆𑀬𑁂𑀲𑀼 𑀅𑀥𑀺𑀩𑀮𑀁 𑀓𑀭𑁄𑀢𑀻𑀢𑀺 𑀆𑀳 ‘‘𑀅𑀓𑀫𑁆𑀧𑀦𑀝𑁆𑀞𑁂𑀦 𑀉𑀧𑀢𑁆𑀣𑀫𑁆𑀪𑀦𑀝𑁆𑀞𑁂𑀦 𑀘𑀸’’𑀢𑀺.

𑀞𑀸𑀦𑀜𑁆𑀘 𑀞𑀸𑀦𑀢𑁄𑀢𑀺 𑀓𑀸𑀭𑀡𑀜𑁆𑀘 𑀓𑀸𑀭𑀡𑀢𑁄. 𑀓𑀸𑀭𑀡𑀜𑁆𑀳𑀺 𑀬𑀲𑁆𑀫𑀸 𑀨𑀮𑀁 𑀢𑀺𑀝𑁆𑀞𑀢𑀺 𑀢𑀤𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀸𑀬 𑀉𑀧𑁆𑀧𑀚𑁆𑀚𑀢𑀺 𑀘𑁂𑀯 𑀧𑀯𑀢𑁆𑀢𑀢𑀺 𑀘, 𑀢𑀲𑁆𑀫𑀸 ‘‘𑀞𑀸𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀯𑀺𑀧𑀭𑀺𑀬𑀸𑀬𑁂𑀦 𑀅𑀝𑁆𑀞𑀸𑀦𑀦𑁆𑀢𑀺 𑀅𑀓𑀸𑀭𑀡𑀁 𑀯𑁂𑀤𑀺𑀢𑀩𑁆𑀩𑀁. 𑀢𑀤𑀼𑀪𑀬𑀁 𑀪𑀕𑀯𑀸 𑀬𑁂𑀦 𑀜𑀸𑀡𑁂𑀦 𑀬𑁂 𑀬𑁂 𑀥𑀫𑁆𑀫𑀸 𑀬𑁂𑀲𑀁 𑀬𑁂𑀲𑀁 𑀥𑀫𑁆𑀫𑀸𑀦𑀁 𑀳𑁂𑀢𑀽 𑀧𑀘𑁆𑀘𑀬𑀸 𑀉𑀧𑁆𑀧𑀸𑀤𑀸𑀬, 𑀢𑀁 𑀢𑀁 𑀞𑀸𑀦𑀁, 𑀬𑁂 𑀬𑁂 𑀥𑀫𑁆𑀫𑀸 𑀬𑁂𑀲𑀁 𑀬𑁂𑀲𑀁 𑀥𑀫𑁆𑀫𑀸𑀦𑀁 𑀦 𑀳𑁂𑀢𑀽 𑀦 𑀧𑀘𑁆𑀘𑀬𑀸 𑀉𑀧𑁆𑀧𑀸𑀤𑀸𑀬, 𑀢𑀁 𑀢𑀁 𑀅𑀝𑁆𑀞𑀸𑀦𑀦𑁆𑀢𑀺 𑀧𑀚𑀸𑀦𑀸𑀢𑀺. 𑀢𑀁 𑀲𑀦𑁆𑀥𑀸𑀬𑀸𑀳 ‘‘𑀞𑀸𑀦𑀜𑁆𑀘…𑀧𑁂… 𑀚𑀸𑀦𑀦𑀁 𑀏𑀓’’𑀦𑁆𑀢𑀺. 𑀓𑀫𑁆𑀫𑀲𑀫𑀸𑀤𑀸𑀦𑀸𑀦𑀦𑁆𑀢𑀺 𑀓𑀫𑁆𑀫𑀁 𑀲𑀫𑀸𑀤𑀺𑀬𑀺𑀢𑁆𑀯𑀸 𑀓𑀢𑀸𑀦𑀁 𑀓𑀼𑀲𑀮𑀸𑀓𑀼𑀲𑀮𑀓𑀫𑁆𑀫𑀸𑀦𑀁, 𑀓𑀫𑁆𑀫𑀜𑁆𑀜𑁂𑀯 𑀯𑀸 𑀓𑀫𑁆𑀫𑀲𑀫𑀸𑀤𑀸𑀦𑀁. 𑀞𑀸𑀦𑀲𑁄 𑀳𑁂𑀢𑀼𑀲𑁄𑀢𑀺 𑀧𑀘𑁆𑀘𑀬𑀢𑁄 𑀘 𑀳𑁂𑀢𑀼𑀢𑁄 𑀘. 𑀢𑀢𑁆𑀣 𑀕𑀢𑀺𑀉𑀧𑀥𑀺𑀓𑀸𑀮𑀧𑀬𑁄𑀕𑀸 𑀯𑀺𑀧𑀸𑀓𑀲𑁆𑀲 𑀞𑀸𑀦𑀁, 𑀓𑀫𑁆𑀫𑀁 𑀳𑁂𑀢𑀼. 𑀲𑀩𑁆𑀩𑀢𑁆𑀣𑀕𑀸𑀫𑀺𑀦𑀻𑀧𑀝𑀺𑀧𑀤𑀸𑀚𑀸𑀦𑀦𑀦𑁆𑀢𑀺 𑀲𑀩𑁆𑀩𑀕𑀢𑀺𑀕𑀸𑀫𑀺𑀦𑀺𑀬𑀸 𑀅𑀕𑀢𑀺𑀕𑀸𑀫𑀺𑀦𑀺𑀬𑀸 𑀘 𑀧𑀝𑀺𑀧𑀤𑀸𑀬 𑀫𑀕𑁆𑀕𑀲𑁆𑀲 𑀚𑀸𑀦𑀦𑀁, 𑀩𑀳𑀽𑀲𑀼𑀧𑀺 𑀫𑀦𑀼𑀲𑁆𑀲𑁂𑀲𑀼 𑀏𑀓𑀫𑁂𑀯 𑀧𑀸𑀡𑀁 𑀳𑀦𑀦𑁆𑀢𑁂𑀲𑀼 ‘‘𑀇𑀫𑀲𑁆𑀲 𑀘𑁂𑀢𑀦𑀸 𑀦𑀺𑀭𑀬𑀕𑀸𑀫𑀺𑀦𑀻 𑀪𑀯𑀺𑀲𑁆𑀲𑀢𑀺, 𑀇𑀫𑀲𑁆𑀲 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀕𑀸𑀫𑀺𑀦𑀻’’𑀢𑀺 𑀇𑀫𑀺𑀦𑀸 𑀦𑀬𑁂𑀦 𑀏𑀓𑀯𑀢𑁆𑀣𑀼𑀲𑁆𑀫𑀺𑀫𑁆𑀧𑀺 𑀓𑀼𑀲𑀮𑀸𑀓𑀼𑀲𑀮𑀘𑁂𑀢𑀦𑀸𑀲𑀗𑁆𑀔𑀸𑀢𑀸𑀦𑀁 𑀧𑀝𑀺𑀧𑀢𑁆𑀢𑀻𑀦𑀁 𑀅𑀯𑀺𑀧𑀭𑀻𑀢𑀢𑁄 𑀲𑀪𑀸𑀯𑀚𑀸𑀦𑀦𑀁. 𑀅𑀦𑁂𑀓𑀥𑀸𑀢𑀼𑀦𑀸𑀦𑀸𑀥𑀸𑀢𑀼𑀮𑁄𑀓𑀚𑀸𑀦𑀦𑀦𑁆𑀢𑀺 𑀘𑀓𑁆𑀔𑀼𑀥𑀸𑀢𑀼𑀆𑀤𑀻𑀳𑀺 𑀓𑀸𑀫𑀥𑀸𑀢𑀼𑀆𑀤𑀻𑀳𑀺 𑀯𑀸 𑀩𑀳𑀼𑀥𑀸𑀢𑀼𑀦𑁄, 𑀢𑀸𑀲𑀁𑀬𑁂𑀯 𑀥𑀸𑀢𑀽𑀦𑀁 𑀯𑀺𑀧𑀭𑀻𑀢𑀢𑀸𑀬 𑀦𑀸𑀦𑀧𑁆𑀧𑀓𑀸𑀭𑀥𑀸𑀢𑀼𑀦𑁄 𑀔𑀦𑁆𑀥𑀸𑀬𑀢𑀦𑀥𑀸𑀢𑀼𑀮𑁄𑀓𑀲𑁆𑀲 𑀚𑀸𑀦𑀦𑀁. 𑀧𑀭𑀲𑀢𑁆𑀢𑀸𑀦𑀦𑁆𑀢𑀺 𑀧𑀭𑁂𑀲𑀁 𑀲𑀢𑁆𑀢𑀸𑀦𑀁. 𑀦𑀸𑀦𑀸𑀥𑀺𑀫𑀼𑀢𑁆𑀢𑀺𑀓𑀢𑀸𑀚𑀸𑀦𑀦𑀦𑁆𑀢𑀺 𑀳𑀻𑀦𑀸𑀤𑀻𑀳𑀺 𑀅𑀥𑀺𑀫𑀼𑀢𑁆𑀢𑀻𑀳𑀺 𑀦𑀸𑀦𑀸𑀥𑀺𑀫𑀼𑀢𑁆𑀢𑀺𑀓𑀪𑀸𑀯𑀲𑁆𑀲 𑀚𑀸𑀦𑀦𑀁. 𑀢𑁂𑀲𑀁𑀬𑁂𑀯𑀸𑀢𑀺 𑀧𑀭𑀲𑀢𑁆𑀢𑀸𑀦𑀁𑀬𑁂𑀯. 𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢𑀚𑀸𑀦𑀦𑀦𑁆𑀢𑀺 𑀲𑀤𑁆𑀥𑀸𑀤𑀻𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀧𑀭𑀪𑀸𑀯𑀲𑁆𑀲 𑀅𑀧𑀭𑀪𑀸𑀯𑀲𑁆𑀲 𑀯𑀼𑀤𑁆𑀥𑀺𑀬𑀸 𑀘𑁂𑀯 𑀳𑀸𑀦𑀺𑀬𑀸 𑀘 𑀚𑀸𑀦𑀦𑀁. 𑀛𑀸𑀦𑀯𑀺𑀫𑁄𑀓𑁆𑀔𑀲𑀫𑀸𑀥𑀺𑀲𑀫𑀸𑀧𑀢𑁆𑀢𑀻𑀦𑀦𑁆𑀢𑀺 𑀧𑀞𑀫𑀸𑀤𑀻𑀦𑀁 𑀘𑀢𑀼𑀦𑁆𑀦𑀁 𑀛𑀸𑀦𑀸𑀦𑀁, ‘‘𑀭𑀽𑀧𑀻 𑀭𑀽𑀧𑀸𑀦𑀺 𑀧𑀲𑁆𑀲𑀢𑀻’’𑀢𑀺𑀆𑀤𑀻𑀦𑀁 𑀅𑀝𑁆𑀞𑀦𑁆𑀦𑀁 𑀯𑀺𑀫𑁄𑀓𑁆𑀔𑀸𑀦𑀁, 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀸𑀤𑀻𑀦𑀁 𑀢𑀺𑀡𑁆𑀡𑀁 𑀲𑀫𑀸𑀥𑀻𑀦𑀁, 𑀧𑀞𑀫𑀚𑁆𑀛𑀸𑀦𑀲𑀫𑀸𑀧𑀢𑁆𑀢𑀺𑀆𑀤𑀻𑀦𑀜𑁆𑀘 𑀦𑀯𑀦𑁆𑀦𑀁 𑀅𑀦𑀼𑀧𑀼𑀩𑁆𑀩𑀲𑀫𑀸𑀧𑀢𑁆𑀢𑀻𑀦𑀁. 𑀲𑀁𑀓𑀺𑀮𑁂𑀲𑀯𑁄𑀤𑀸𑀦𑀯𑀼𑀝𑁆𑀞𑀸𑀦𑀚𑀸𑀦𑀦𑀦𑁆𑀢𑀺 𑀳𑀸𑀦𑀪𑀸𑀕𑀺𑀬𑀲𑁆𑀲, 𑀯𑀺𑀲𑁂𑀲𑀪𑀸𑀕𑀺𑀬𑀲𑁆𑀲 ‘‘𑀯𑁄𑀤𑀸𑀦𑀫𑁆𑀧𑀺 𑀯𑀼𑀝𑁆𑀞𑀸𑀦𑀁, 𑀢𑀫𑁆𑀳𑀸 𑀢𑀫𑁆𑀳𑀸 𑀲𑀫𑀸𑀥𑀺𑀫𑁆𑀳𑀸 𑀯𑀼𑀝𑁆𑀞𑀸𑀦𑀫𑁆𑀧𑀺 𑀯𑀼𑀝𑁆𑀞𑀸𑀦’’𑀦𑁆𑀢𑀺 (𑀯𑀺𑀪. 𑁮𑁨𑁮) 𑀏𑀯𑀁 𑀯𑀼𑀢𑁆𑀢𑀧𑀕𑀼𑀡𑀚𑁆𑀛𑀸𑀦𑀲𑁆𑀲 𑀘𑁂𑀯 𑀪𑀯𑀗𑁆𑀕𑀨𑀮𑀲𑀫𑀸𑀧𑀢𑁆𑀢𑀻𑀦𑀜𑁆𑀘 𑀚𑀸𑀦𑀦𑀁. 𑀳𑁂𑀝𑁆𑀞𑀺𑀫𑀁 𑀳𑁂𑀝𑁆𑀞𑀺𑀫𑀜𑁆𑀳𑀺 𑀧𑀕𑀼𑀡𑀚𑁆𑀛𑀸𑀦𑀁 𑀉𑀧𑀭𑀺𑀫𑀲𑁆𑀲 𑀉𑀧𑀭𑀺𑀫𑀲𑁆𑀲 𑀧𑀤𑀝𑁆𑀞𑀸𑀦𑀁 𑀳𑁄𑀢𑀺, 𑀢𑀲𑁆𑀫𑀸 𑀯𑁄𑀤𑀸𑀦𑀫𑁆𑀧𑀺 ‘‘𑀯𑀼𑀝𑁆𑀞𑀸𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀪𑀯𑀗𑁆𑀕𑁂𑀦 𑀧𑀦 𑀲𑀩𑁆𑀩𑀛𑀸𑀦𑁂𑀳𑀺 𑀯𑀼𑀝𑁆𑀞𑀸𑀦𑀁 𑀳𑁄𑀢𑀺. 𑀨𑀮𑀲𑀫𑀸𑀧𑀢𑁆𑀢𑀺𑀬𑀸 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀦𑀫𑁂𑀯 𑀲𑀦𑁆𑀥𑀸𑀬 ‘‘𑀢𑀫𑁆𑀳𑀸 𑀢𑀫𑁆𑀳𑀸 𑀲𑀫𑀸𑀥𑀺𑀫𑁆𑀳𑀸 𑀯𑀼𑀝𑁆𑀞𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀧𑀼𑀩𑁆𑀩𑁂𑀦𑀺𑀯𑀸𑀲𑀚𑀸𑀦𑀦𑀦𑁆𑀢𑀺 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑁂𑀦 𑀦𑀺𑀯𑀼𑀝𑁆𑀞𑀓𑁆𑀔𑀦𑁆𑀥𑀸𑀦𑀁 𑀚𑀸𑀦𑀦𑀁. 𑀘𑀼𑀢𑀽𑀧𑀧𑀸𑀢𑀚𑀸𑀦𑀦𑀦𑁆𑀢𑀺 𑀲𑀢𑁆𑀢𑀸𑀦𑀁 𑀘𑀼𑀢𑀺𑀬𑀸 𑀉𑀧𑀧𑀢𑁆𑀢𑀺𑀬𑀸 𑀘 𑀬𑀸𑀣𑀸𑀯𑀢𑁄 𑀚𑀸𑀦𑀦𑀁. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁄 𑀧𑀦 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀆𑀲𑀯𑀓𑁆𑀔𑀬𑀚𑀸𑀦𑀦𑀁 𑀆𑀲𑀯𑀓𑁆𑀔𑀬𑀜𑀸𑀡𑀁, 𑀫𑀕𑁆𑀕𑀜𑀸𑀡𑀦𑁆𑀢𑀺 𑀅𑀢𑁆𑀣𑁄. 𑀬𑀢𑁆𑀣 𑀧𑀦𑁂𑀢𑀸𑀦𑀺 𑀯𑀺𑀢𑁆𑀣𑀸𑀭𑀢𑁄 𑀆𑀕𑀢𑀸𑀦𑀺 𑀲𑀁𑀯𑀡𑁆𑀡𑀺𑀢𑀸𑀦𑀺, 𑀢𑀸𑀦𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀪𑀺𑀥𑀫𑁆𑀫𑁂 𑀧𑀦𑀸’’𑀢𑀺𑀆𑀤𑀺𑀫𑀸𑀳.

𑀩𑁆𑀬𑀸𑀫𑁄𑀳𑀪𑀬𑀯𑀲𑁂𑀦 𑀲𑀭𑀡𑀧𑀭𑀺𑀬𑁂𑀲𑀦𑀁 𑀲𑀸𑀭𑀚𑁆𑀚𑀦𑀁 𑀲𑀸𑀭𑀤𑁄, 𑀩𑁆𑀬𑀸𑀫𑁄𑀳𑀪𑀬𑀁. 𑀯𑀺𑀕𑀢𑁄 𑀲𑀸𑀭𑀤𑁄 𑀏𑀢𑀲𑁆𑀲𑀸𑀢𑀺 𑀯𑀺𑀲𑀸𑀭𑀤𑁄, 𑀢𑀲𑁆𑀲 𑀪𑀸𑀯𑁄 𑀯𑁂𑀲𑀸𑀭𑀚𑁆𑀚𑀁. 𑀢𑀁 𑀧𑀦 𑀜𑀸𑀡𑀲𑀫𑁆𑀧𑀤𑀁 𑀧𑀳𑀸𑀦𑀲𑀫𑁆𑀧𑀤𑀁 𑀤𑁂𑀲𑀦𑀸𑀯𑀺𑀲𑁂𑀲𑀲𑀫𑁆𑀧𑀤𑀁 𑀔𑁂𑀫𑀁 𑀦𑀺𑀲𑁆𑀲𑀸𑀬 𑀧𑀯𑀢𑁆𑀢𑀁 𑀘𑀢𑀼𑀩𑁆𑀩𑀺𑀥𑀁 𑀧𑀘𑁆𑀘𑀯𑁂𑀓𑁆𑀔𑀡𑀸𑀜𑀸𑀡𑀁. 𑀢𑁂𑀦𑀸𑀳 ‘‘𑀘𑀢𑀽𑀲𑀼 𑀞𑀸𑀦𑁂𑀲𑀽’’𑀢𑀺𑀆𑀤𑀺. 𑀘𑀢𑀽𑀲𑀽𑀢𑀺 𑀧𑀭𑀧𑀭𑀺𑀓𑀧𑁆𑀧𑀺𑀢𑁂𑀲𑀼 𑀯𑀢𑁆𑀣𑀽𑀲𑀼. 𑀧𑀭𑀧𑀭𑀺𑀓𑀧𑁆𑀧𑀺𑀢𑁂𑀲𑀼 𑀯𑀸 𑀯𑀢𑁆𑀣𑀼𑀫𑀢𑁆𑀢𑁂𑀲𑀼 𑀘𑁄𑀤𑀦𑀸𑀓𑀸𑀭𑀡𑁂𑀲𑀼. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀢𑁂 𑀧𑀝𑀺𑀚𑀸𑀦𑀢𑁄𑀢𑀺 ‘‘𑀅𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄’’𑀢𑀺 𑀏𑀯𑀁 𑀧𑀝𑀺𑀚𑀸𑀦𑀦𑁆𑀢𑁂𑀦 𑀢𑀬𑀸. 𑀇𑀫𑁂 𑀥𑀫𑁆𑀫𑀸𑀢𑀺 ‘‘𑀇𑀤𑀁 𑀧𑀜𑁆𑀘𑀫𑀁 𑀅𑀭𑀺𑀬𑀲𑀘𑁆𑀘𑀁, 𑀅𑀬𑀁 𑀙𑀝𑁆𑀞𑁄 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁄, 𑀇𑀤𑀁 𑀢𑁂𑀭𑀲𑀫𑀁 𑀆𑀬𑀢𑀦’’𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀸 𑀇𑀫𑁂 𑀥𑀫𑁆𑀫𑀸. 𑀅𑀦𑀪𑀺𑀲𑀫𑁆𑀩𑀼𑀤𑁆𑀥𑀸 𑀅𑀧𑁆𑀧𑀝𑀺𑀯𑀺𑀤𑁆𑀥𑀢𑁆𑀢𑀸𑀢𑀺.

𑀢𑀢𑁆𑀭𑀸𑀢𑀺 𑀢𑀲𑁆𑀫𑀺𑀁 𑀅𑀦𑀪𑀺𑀲𑀫𑁆𑀩𑀼𑀤𑁆𑀥𑀥𑀫𑁆𑀫𑀲𑀗𑁆𑀔𑀸𑀢𑁂 𑀘𑁄𑀤𑀦𑀸𑀯𑀢𑁆𑀣𑀼𑀲𑁆𑀫𑀺𑀁. 𑀓𑁄𑀘𑀻𑀢𑀺 𑀲𑀫𑀡𑀸𑀤𑀻𑀳𑀺 𑀅𑀜𑁆𑀜𑁄 𑀯𑀸 𑀬𑁄 𑀓𑁄𑀘𑀺. 𑀲𑀳 𑀥𑀫𑁆𑀫𑁂𑀦𑀸𑀢𑀺 𑀲𑀳 𑀳𑁂𑀢𑀼𑀦𑀸. ‘‘𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸’’𑀢𑀺𑀆𑀤𑀻𑀲𑀼 𑀯𑀺𑀬 𑀳𑁂𑀢𑀼𑀧𑀭𑀺𑀬𑀸𑀬𑁄 𑀇𑀥 𑀥𑀫𑁆𑀫-𑀲𑀤𑁆𑀤𑁄. 𑀳𑁂𑀢𑀽𑀢𑀺 𑀘 𑀉𑀧𑁆𑀧𑀢𑁆𑀢𑀺𑀲𑀸𑀥𑀦𑀳𑁂𑀢𑀼 𑀯𑁂𑀤𑀺𑀢𑀩𑁆𑀩𑁄, 𑀦 𑀓𑀸𑀭𑀓𑁄 𑀲𑀫𑁆𑀧𑀸𑀧𑀓𑁄 𑀯𑀸. 𑀦𑀺𑀫𑀺𑀢𑁆𑀢𑀦𑁆𑀢𑀺 𑀓𑀸𑀭𑀡𑀁, 𑀢𑀁 𑀧𑀦𑁂𑀢𑁆𑀣 𑀘𑁄𑀤𑀦𑀸𑀯𑀢𑁆𑀣𑀼𑀫𑁂𑀯. 𑀦 𑀲𑀫𑀦𑀼𑀧𑀲𑁆𑀲𑀸𑀫𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀪𑀸𑀯𑀢𑁄. 𑀔𑁂𑀫𑀧𑁆𑀧𑀢𑁆𑀢𑁄𑀢𑀺 𑀅𑀔𑁂𑀫𑀧𑁆𑀧𑀢𑁆𑀢𑀭𑀽𑀧𑀸𑀬 𑀘𑁄𑀤𑀦𑀸𑀬 𑀅𑀦𑀼𑀧𑀤𑁆𑀤𑀯𑀁 𑀧𑀢𑁆𑀢𑁄 𑀦𑀺𑀘𑁆𑀘𑀮𑀪𑀸𑀯𑀧𑁆𑀧𑀢𑁆𑀢𑁄. 𑀯𑁂𑀲𑀸𑀭𑀚𑁆𑀚𑀧𑁆𑀧𑀢𑁆𑀢𑁄𑀢𑀺 𑀯𑀺𑀲𑀸𑀭𑀤𑀪𑀸𑀯𑀧𑁆𑀧𑀢𑁆𑀢𑁄. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀇𑀫𑁂 𑀆𑀲𑀯𑀸𑀢𑀺 𑀓𑀸𑀫𑀸𑀲𑀯𑀸𑀤𑀻𑀲𑀼 𑀇𑀫𑁂 𑀦𑀸𑀫 𑀆𑀲𑀯𑀸 𑀦 𑀧𑀭𑀺𑀓𑁆𑀔𑀻𑀡𑀸𑀢𑀺 𑀆𑀲𑀯𑀓𑁆𑀔𑀬𑀯𑀘𑀦𑁂𑀦𑁂𑀢𑁆𑀣 𑀲𑀩𑁆𑀩𑀓𑀺𑀮𑁂𑀲𑀧𑁆𑀧𑀳𑀸𑀦𑀁 𑀯𑀼𑀢𑁆𑀢𑀁. 𑀦 𑀳𑀺 𑀲𑁄 𑀓𑀺𑀮𑁂𑀲𑁄 𑀅𑀢𑁆𑀣𑀺, 𑀬𑁄 𑀲𑀩𑁆𑀩𑀲𑁄 𑀆𑀲𑀯𑁂𑀲𑀼 𑀔𑀻𑀡𑁂𑀲𑀼 𑀦𑀧𑁆𑀧𑀳𑀻𑀬𑁂𑀬𑁆𑀬. 𑀅𑀦𑁆𑀢𑀭𑀸𑀬𑀺𑀓𑀸𑀢𑀺 𑀅𑀦𑁆𑀢𑀭𑀸𑀬𑀓𑀭𑀸, 𑀲𑀕𑁆𑀕𑀯𑀺𑀫𑁄𑀓𑁆𑀔𑀸𑀥𑀺𑀕𑀫𑀲𑁆𑀲 𑀅𑀦𑁆𑀢𑀭𑀸𑀬𑀓𑀭𑀸𑀢𑀺 𑀅𑀢𑁆𑀣𑁄. 𑀥𑀫𑁆𑀫𑁄 𑀳𑀺 𑀬𑁄 𑀲𑀁𑀓𑀺𑀮𑁂𑀲𑀢𑁄 𑀦𑀺𑀬𑁆𑀬𑀸𑀢𑀺, 𑀲𑁄 ‘‘𑀦𑀺𑀬𑁆𑀬𑀸𑀦𑀺𑀓𑁄’’𑀢𑀺 𑀯𑀼𑀢𑁆𑀢𑁄. 𑀥𑀫𑁆𑀫𑁂 𑀦𑀺𑀬𑁆𑀬𑀦𑁆𑀢𑁂 𑀢𑀁𑀲𑀫𑀗𑁆𑀕𑀻𑀧𑀼𑀕𑁆𑀕𑀮𑁄 𑀦𑀺𑀬𑁆𑀬𑀸𑀦𑀺𑀓𑁄𑀢𑀺 𑀯𑁄𑀳𑀭𑀺𑀢𑁄 𑀳𑁄𑀢𑀻𑀢𑀺 𑀢𑀲𑁆𑀲 𑀧𑀝𑀺𑀓𑁆𑀔𑀺𑀧𑀦𑁆𑀢𑁄 ‘‘𑀲𑁄 𑀦 𑀦𑀺𑀬𑁆𑀬𑀸𑀢𑀻’’𑀢𑀺 𑀆𑀳. 𑀓𑀣𑀁 𑀧𑀦 𑀤𑁂𑀲𑀦𑀸𑀥𑀫𑁆𑀫𑁄 𑀦𑀺𑀬𑁆𑀬𑀸𑀢𑀻𑀢𑀺 𑀯𑀼𑀘𑁆𑀘𑀢𑀺? 𑀦𑀺𑀬𑁆𑀬𑀸𑀦𑀢𑁆𑀣𑀲𑀫𑀸𑀥𑀸𑀦𑀢𑁄, 𑀲𑁄 𑀅𑀪𑁂𑀤𑁄𑀧𑀘𑀸𑀭𑁂𑀦 ‘‘𑀦𑀺𑀬𑁆𑀬𑀸𑀢𑀻’’𑀢𑀺 𑀯𑀼𑀢𑁆𑀢𑁄. 𑀅𑀣 𑀯𑀸 ‘‘𑀥𑀫𑁆𑀫𑁄 𑀤𑁂𑀲𑀺𑀢𑁄’’𑀢𑀺 𑀅𑀭𑀺𑀬𑀥𑀫𑁆𑀫𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸 𑀦 𑀓𑁄𑀘𑀺 𑀯𑀺𑀭𑁄𑀥𑁄.

𑀉𑀲𑀪𑀲𑁆𑀲 𑀇𑀤𑀦𑁆𑀢𑀺 𑀆𑀲𑀪𑀁, 𑀅𑀲𑀦𑁆𑀢𑀲𑀦𑀝𑁆𑀞𑁂𑀦 𑀆𑀲𑀪𑀁 𑀯𑀺𑀬𑀸𑀢𑀺 𑀆𑀲𑀪𑀁, 𑀲𑁂𑀝𑁆𑀞𑀝𑁆𑀞𑀸𑀦𑀁 𑀲𑀩𑁆𑀩𑀜𑁆𑀜𑀼𑀢𑀁. 𑀆𑀲𑀪𑀝𑁆𑀞𑀸𑀦𑀝𑁆𑀞𑀸𑀬𑀺𑀢𑀸𑀬 𑀆𑀲𑀪𑀸 𑀦𑀸𑀫 𑀧𑀼𑀩𑁆𑀩𑀩𑀼𑀤𑁆𑀥𑀸. 𑀲𑀩𑁆𑀩𑀜𑁆𑀜𑀼𑀢𑀧𑀝𑀺𑀚𑀸𑀦𑀦𑀯𑀲𑁂𑀦 𑀅𑀪𑀺𑀫𑀼𑀔𑀁 𑀕𑀘𑁆𑀙𑀦𑁆𑀢𑀺, 𑀘𑀢𑀲𑁆𑀲𑁄 𑀯𑀸 𑀧𑀭𑀺𑀲𑀸 𑀉𑀧𑀲𑀗𑁆𑀓𑀫𑀦𑁆𑀢𑀻𑀢𑀺 𑀆𑀲𑀪𑀸. 𑀘𑀢𑀲𑁆𑀲𑁄𑀧𑀺 𑀳𑀺 𑀧𑀭𑀺𑀲𑀸 𑀩𑀼𑀤𑁆𑀥𑀸𑀪𑀺𑀫𑀼𑀔𑀸 𑀏𑀯𑀁 𑀢𑀺𑀝𑁆𑀞𑀦𑁆𑀢𑀺, 𑀦 𑀢𑀺𑀝𑁆𑀞𑀦𑁆𑀢𑀺 𑀧𑀭𑀫𑁆𑀫𑀼𑀔𑀸. 𑀇𑀤𑀫𑁆𑀧𑀻𑀢𑀺 ‘‘𑀉𑀲𑀪𑁄’’𑀢𑀺 𑀇𑀤𑀫𑁆𑀧𑀺 𑀧𑀤𑀁. 𑀢𑀲𑁆𑀲𑀸𑀢𑀺 𑀦𑀺𑀲𑀪𑀲𑁆𑀲. 𑀬𑁂𑀲𑀁 𑀩𑀮𑀼𑀧𑁆𑀧𑀸𑀤𑀸𑀯𑀝𑁆𑀞𑀸𑀦𑀸𑀦𑀁 𑀯𑀲𑁂𑀦 𑀉𑀲𑀪𑀲𑁆𑀲 𑀆𑀲𑀪𑀡𑁆𑀞𑀸𑀦𑀁 𑀇𑀘𑁆𑀙𑀺𑀢𑀁, 𑀢𑀢𑁄 𑀲𑀸𑀢𑀺𑀲𑀬𑀸𑀦𑀁 𑀏𑀯 𑀢𑁂𑀲𑀁 𑀯𑀲𑁂𑀦 𑀆𑀲𑀪𑀡𑁆𑀞𑀸𑀦𑀁 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀬𑀁 𑀓𑀺𑀜𑁆𑀘𑀺 𑀮𑁄𑀓𑁂 𑀉𑀧𑀫𑀁 𑀦𑀸𑀫 𑀩𑀼𑀤𑁆𑀥𑀕𑀼𑀡𑀸𑀦𑀁 𑀦𑀺𑀤𑀲𑁆𑀲𑀦𑀪𑀸𑀯𑁂𑀦 𑀯𑀼𑀘𑁆𑀘𑀢𑀺, 𑀲𑀩𑁆𑀩𑀁 𑀢𑀁 𑀦𑀺𑀳𑀻𑀦𑀫𑁂𑀯. 𑀢𑀺𑀝𑁆𑀞𑀫𑀸𑀦𑁄 𑀘𑀸𑀢𑀺 𑀅𑀢𑀺𑀝𑁆𑀞𑀦𑁆𑀢𑁄𑀧𑀺 𑀢𑀺𑀝𑁆𑀞𑀫𑀸𑀦𑁄 𑀏𑀯 𑀧𑀝𑀺𑀚𑀸𑀦𑀸𑀢𑀺 𑀦𑀸𑀫. 𑀉𑀧𑀕𑀘𑁆𑀙𑀢𑀻𑀢𑀺 𑀅𑀦𑀼𑀚𑀸𑀦𑀸𑀢𑀺.

𑀅𑀝𑁆𑀞 𑀔𑁄 𑀇𑀫𑀸𑀢𑀺 𑀇𑀤𑀁 𑀯𑁂𑀲𑀸𑀭𑀚𑁆𑀚𑀜𑀸𑀡𑀲𑁆𑀲 𑀩𑀮𑀤𑀲𑁆𑀲𑀦𑀁. 𑀬𑀣𑀸 𑀳𑀺 𑀩𑁆𑀬𑀢𑁆𑀢𑀁 𑀧𑀭𑀺𑀲𑀁 𑀅𑀚𑁆𑀛𑁄𑀕𑀸𑀳𑁂𑀢𑁆𑀯𑀸 𑀯𑀺𑀜𑁆𑀜𑀽𑀦𑀁 𑀘𑀺𑀢𑁆𑀢𑀁 𑀆𑀭𑀸𑀥𑀦𑀲𑀫𑀢𑁆𑀣𑀸𑀬 𑀓𑀣𑀸𑀬 𑀥𑀫𑁆𑀫𑀓𑀣𑀺𑀓𑀲𑁆𑀲 𑀙𑁂𑀓𑀪𑀸𑀯𑁄 𑀧𑀜𑁆𑀜𑀸𑀬𑀢𑀺, 𑀏𑀯𑀁 𑀇𑀫𑀸 𑀅𑀝𑁆𑀞 𑀧𑀭𑀺𑀲𑀸 𑀧𑀢𑁆𑀯𑀸 𑀲𑀢𑁆𑀣𑀼 𑀯𑁂𑀲𑀸𑀭𑀚𑁆𑀚𑀜𑀸𑀡𑀲𑁆𑀲 𑀩𑀮𑀁 𑀧𑀸𑀓𑀝𑀁 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀧𑀭𑀺𑀲𑀸𑀲𑀽’’𑀢𑀺. 𑀔𑀢𑁆𑀢𑀺𑀬𑀧𑀭𑀺𑀲𑀸𑀢𑀺 𑀔𑀢𑁆𑀢𑀺𑀬𑀸𑀦𑀁 𑀲𑀦𑁆𑀦𑀺𑀧𑀢𑀺𑀢𑀸𑀦𑀁 𑀲𑀫𑀽𑀳𑁄. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣. 𑀫𑀸𑀭𑀧𑀭𑀺𑀲𑀸𑀢𑀺 𑀫𑀸𑀭𑀓𑀸𑀬𑀺𑀓𑀸𑀦𑀁 𑀲𑀦𑁆𑀦𑀺𑀧𑀢𑀺𑀢𑀸𑀦𑀁 𑀲𑀫𑀽𑀳𑁄. 𑀫𑀸𑀭𑀲𑀤𑀺𑀲𑀸𑀦𑀁 𑀫𑀸𑀭𑀸𑀦𑀁 𑀧𑀭𑀺𑀲𑀸𑀢𑀺 𑀫𑀸𑀭𑀧𑀭𑀺𑀲𑀸. 𑀲𑀩𑁆𑀩𑀸 𑀘𑁂𑀢𑀸 𑀧𑀭𑀺𑀲𑀸 𑀉𑀕𑁆𑀕𑀝𑁆𑀞𑀸𑀦𑀤𑀲𑁆𑀲𑀦𑀯𑀲𑁂𑀦 𑀕𑀳𑀺𑀢𑀸. 𑀫𑀦𑀼𑀲𑁆𑀲𑀸 𑀳𑀺 ‘‘𑀏𑀢𑁆𑀣 𑀭𑀸𑀚𑀸 𑀦𑀺𑀲𑀺𑀦𑁆𑀦𑁄’’𑀢𑀺 𑀯𑀼𑀢𑁆𑀢𑁂 𑀧𑀓𑀢𑀺𑀯𑀘𑀦𑀫𑁆𑀧𑀺 𑀯𑀢𑁆𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀓𑀘𑁆𑀙𑁂𑀳𑀺 𑀲𑁂𑀤𑀸 𑀫𑀼𑀘𑁆𑀘𑀦𑁆𑀢𑀺, 𑀏𑀯𑀁 𑀉𑀕𑁆𑀕𑀸 𑀔𑀢𑁆𑀢𑀺𑀬𑀧𑀭𑀺𑀲𑀸, 𑀩𑁆𑀭𑀸𑀳𑁆𑀫𑀡𑀸 𑀢𑀻𑀲𑀼 𑀯𑁂𑀤𑁂𑀲𑀼 𑀓𑀼𑀲𑀮𑀸 𑀳𑁄𑀦𑁆𑀢𑀺, 𑀕𑀳𑀧𑀢𑀬𑁄 𑀦𑀸𑀦𑀸𑀯𑁄𑀳𑀸𑀭𑁂𑀲𑀼 𑀘 𑀅𑀓𑁆𑀔𑀭𑀘𑀺𑀦𑁆𑀢𑀸𑀬 𑀘 𑀓𑀼𑀲𑀮𑀸, 𑀲𑀫𑀡𑀸 𑀲𑀓𑀯𑀸𑀤𑀧𑀭𑀯𑀸𑀤𑁂𑀲𑀼 𑀓𑀼𑀲𑀮𑀸, 𑀢𑁂𑀲𑀁 𑀫𑀚𑁆𑀛𑁂 𑀥𑀫𑁆𑀫𑀓𑀣𑀸𑀓𑀣𑀦𑀁 𑀦𑀸𑀫 𑀅𑀢𑀺𑀯𑀺𑀬 𑀪𑀸𑀭𑀺𑀬𑀁. 𑀤𑁂𑀯𑀸𑀦𑀁 𑀉𑀕𑁆𑀕𑀪𑀸𑀯𑁂 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺. 𑀅𑀫𑀦𑀼𑀲𑁆𑀲𑁄𑀢𑀺 𑀳𑀺 𑀯𑀼𑀢𑁆𑀢𑀫𑀢𑁆𑀢𑁂 𑀫𑀦𑀼𑀲𑁆𑀲𑀸𑀦𑀁 𑀲𑀓𑀮𑀲𑀭𑀻𑀭𑀁 𑀓𑀫𑁆𑀧𑀢𑀺, 𑀢𑁂𑀲𑀁 𑀭𑀽𑀧𑀁 𑀤𑀺𑀲𑁆𑀯𑀸𑀧𑀺 𑀲𑀤𑁆𑀤𑀁 𑀲𑀼𑀢𑁆𑀯𑀸𑀧𑀺 𑀲𑀢𑁆𑀢𑀸 𑀯𑀺𑀲𑀜𑁆𑀜𑀺𑀢𑀸𑀧𑀺 𑀳𑁄𑀦𑁆𑀢𑀺. 𑀏𑀯𑀁 𑀅𑀫𑀦𑀼𑀲𑁆𑀲𑀧𑀭𑀺𑀲𑀸 𑀉𑀕𑁆𑀕𑀸. 𑀇𑀢𑀺 𑀘𑁂𑀢𑀸 𑀧𑀭𑀺𑀲𑀸 𑀉𑀕𑁆𑀕𑀝𑁆𑀞𑀸𑀦𑀤𑀲𑁆𑀲𑀦𑀯𑀲𑁂𑀦 𑀯𑀼𑀢𑁆𑀢𑀸. 𑀓𑀲𑁆𑀫𑀸 𑀧𑀦𑁂𑀢𑁆𑀣 𑀬𑀸𑀫𑀸𑀤𑀺𑀧𑀭𑀺𑀲𑀸 𑀦 𑀕𑀳𑀺𑀢𑀸𑀢𑀺? 𑀪𑀼𑀲𑀁 𑀓𑀸𑀫𑀸𑀪𑀺𑀕𑀺𑀤𑁆𑀥𑀢𑀸𑀬 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀯𑀺𑀭𑀳𑀢𑁄. 𑀬𑀸𑀫𑀸𑀤𑀬𑁄 𑀳𑀺 𑀉𑀴𑀸𑀭𑀼𑀴𑀸𑀭𑁂 𑀓𑀸𑀫𑁂 𑀧𑀝𑀺𑀲𑁂𑀯𑀦𑁆𑀢𑀸 𑀢𑀢𑁆𑀣𑀸𑀪𑀺𑀕𑀺𑀤𑁆𑀥𑀢𑀸𑀬 𑀥𑀫𑁆𑀫𑀲𑁆𑀲𑀯𑀦𑀸𑀬 𑀲𑀪𑀸𑀯𑁂𑀦 𑀘𑀺𑀢𑁆𑀢𑀫𑁆𑀧𑀺 𑀦 𑀉𑀧𑁆𑀧𑀸𑀤𑁂𑀦𑁆𑀢𑀺, 𑀫𑀳𑀸𑀩𑁄𑀥𑀺𑀲𑀢𑁆𑀢𑀸𑀦𑀁 𑀧𑀦 𑀩𑀼𑀤𑁆𑀥𑀸𑀦𑀜𑁆𑀘 𑀆𑀦𑀼𑀪𑀸𑀯𑁂𑀦 𑀆𑀓𑀟𑁆𑀠𑀺𑀬𑀫𑀸𑀦𑀸 𑀓𑀤𑀸𑀘𑀺 𑀦𑁂𑀲𑀁 𑀧𑀬𑀺𑀭𑀼𑀧𑀸𑀲𑀦𑀸𑀤𑀻𑀦𑀺 𑀓𑀭𑁄𑀦𑁆𑀢𑀺 𑀢𑀸𑀤𑀺𑀲𑁂 𑀫𑀳𑀸𑀲𑀫𑀬𑁂. 𑀢𑁂𑀦𑁂𑀯 𑀳𑀺 𑀯𑀺𑀫𑀸𑀦𑀯𑀢𑁆𑀣𑀼𑀤𑁂𑀲𑀦𑀸𑀧𑀺 𑀢𑀁𑀦𑀺𑀫𑀺𑀢𑁆𑀢𑀸 𑀩𑀳𑀼𑀮𑀸 𑀦𑀸𑀳𑁄𑀲𑀺. 𑀲𑁂𑀝𑁆𑀞𑀦𑀸𑀤𑀦𑁆𑀢𑀺 𑀓𑁂𑀦𑀘𑀺 𑀅𑀧𑁆𑀧𑀝𑀺𑀳𑀢𑀪𑀸𑀯𑁂𑀦 𑀉𑀢𑁆𑀢𑀫𑀦𑀸𑀤𑀁. 𑀅𑀪𑀻𑀢𑀦𑀸𑀤𑀦𑁆𑀢𑀺 𑀯𑁂𑀲𑀸𑀭𑀚𑁆𑀚𑀬𑁄𑀕𑀢𑁄 𑀓𑀼𑀢𑁄𑀘𑀺 𑀦𑀺𑀩𑁆𑀪𑀬𑀦𑀸𑀤𑀁. 𑀲𑀻𑀳𑀦𑀸𑀤𑀲𑀼𑀢𑁆𑀢𑁂𑀦𑀸𑀢𑀺 𑀔𑀦𑁆𑀥𑀺𑀬𑀯𑀕𑁆𑀕𑁂 𑀆𑀕𑀢𑁂𑀦 𑀲𑀻𑀳𑀦𑀸𑀤𑀲𑀼𑀢𑁆𑀢𑁂𑀦. 𑀲𑀳𑀦𑀢𑁄𑀢𑀺 𑀔𑀫𑀦𑀢𑁄. 𑀳𑀦𑀦𑀢𑁄𑀢𑀺 𑀯𑀺𑀥𑀫𑀦𑀢𑁄 𑀯𑀺𑀤𑁆𑀥𑀁𑀲𑀦𑀢𑁄. 𑀬𑀣𑀸 𑀯𑀸𑀢𑀺𑀆𑀤𑀺 ‘‘𑀲𑀻𑀳𑀦𑀸𑀤𑀲𑀤𑀺𑀲𑀁 𑀯𑀸 𑀦𑀸𑀤𑀁 𑀦𑀤𑀢𑀻’’𑀢𑀺 𑀲𑀗𑁆𑀔𑁂𑀧𑀢𑁄 𑀯𑀼𑀢𑁆𑀢𑀲𑁆𑀲 𑀅𑀢𑁆𑀣𑀲𑁆𑀲 𑀯𑀺𑀜𑁆𑀜𑀸𑀧𑀦𑀁.

𑀏𑀢𑀦𑁆𑀢𑀺 ‘‘𑀩𑁆𑀭𑀳𑁆𑀫𑀘𑀓𑁆𑀓’’𑀦𑁆𑀢𑀺 𑀏𑀢𑀁 𑀧𑀤𑀁. 𑀧𑀜𑁆𑀜𑀸𑀧𑀪𑀸𑀯𑀺𑀢𑀦𑁆𑀢𑀺 𑀘𑀺𑀭𑀓𑀸𑀮𑀧𑀭𑀺𑀪𑀸𑀯𑀺𑀢𑀸𑀬 𑀧𑀸𑀭𑀫𑀺𑀢𑀸𑀧𑀜𑁆𑀜𑀸𑀬 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀬 𑀘 𑀉𑀧𑁆𑀧𑀸𑀤𑀺𑀢𑀁. 𑀓𑀭𑀼𑀡𑀸𑀧𑀪𑀸𑀯𑀺𑀢𑀦𑁆𑀢𑀺 ‘‘𑀓𑀺𑀘𑁆𑀙𑀁 𑀯𑀢𑀸𑀬𑀁 𑀮𑁄𑀓𑁄 𑀆𑀧𑀦𑁆𑀦𑁄’’𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀸𑀬 𑀫𑀳𑀸𑀓𑀭𑀼𑀡𑀸𑀬 𑀉𑀧𑁆𑀧𑀸𑀤𑀺𑀢𑀁. 𑀬𑀣𑀸 𑀅𑀪𑀺𑀦𑀺𑀓𑁆𑀔𑀫𑀦𑀢𑁄 𑀧𑀪𑀼𑀢𑀺 𑀫𑀳𑀸𑀩𑁄𑀥𑀺𑀲𑀢𑁆𑀢𑀸𑀦𑀁 𑀅𑀭𑀺𑀬𑀫𑀕𑁆𑀕𑀸𑀥𑀺𑀕𑀫𑀦𑀯𑀺𑀭𑁄𑀥𑀺𑀦𑀻 𑀧𑀝𑀺𑀧𑀢𑁆𑀢𑀺 𑀦𑀢𑁆𑀣𑀺, 𑀏𑀯𑀁 𑀢𑀼𑀲𑀺𑀢𑀪𑀯𑀦𑀢𑁄 𑀦𑀺𑀬𑀢𑀪𑀸𑀯𑀸𑀧𑀢𑁆𑀢𑀺𑀢𑁄 𑀘 𑀧𑀝𑁆𑀞𑀸𑀬𑀸𑀢𑀺 𑀤𑀼𑀢𑀺𑀬𑀢𑀢𑀺𑀬𑀦𑀬𑀸 𑀘 𑀕𑀳𑀺𑀢𑀸. 𑀨𑀮𑀓𑁆𑀔𑀡𑁂𑀢𑀺 𑀅𑀕𑁆𑀕𑀨𑀮𑀓𑁆𑀔𑀡𑁂. 𑀧𑀝𑀺𑀯𑁂𑀥𑀦𑀺𑀝𑁆𑀞𑀢𑁆𑀢𑀸 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑀁 𑀯𑀚𑀺𑀭𑀽𑀧𑀫𑀢𑀸𑀬𑁂𑀯 𑀲𑀸𑀢𑀺𑀲𑀬𑁄 𑀧𑀝𑀺𑀯𑁂𑀥𑁄𑀢𑀺 ‘‘𑀨𑀮𑀓𑁆𑀔𑀡𑁂 𑀉𑀧𑁆𑀧𑀦𑁆𑀦𑀁 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑀁. 𑀢𑁂𑀦 𑀧𑀝𑀺𑀮𑀤𑁆𑀥𑀲𑁆𑀲𑀧𑀺 𑀤𑁂𑀲𑀦𑀸𑀜𑀸𑀡𑀲𑁆𑀲 𑀓𑀺𑀘𑁆𑀘𑀦𑀺𑀧𑁆𑀨𑀢𑁆𑀢𑀺 𑀧𑀭𑀲𑁆𑀲 𑀩𑀼𑀚𑁆𑀛𑀦𑀫𑀢𑁆𑀢𑁂𑀦 𑀳𑁄𑀢𑀻𑀢𑀺 ‘‘𑀅𑀜𑁆𑀜𑀸𑀲𑀺𑀓𑁄𑀡𑁆𑀟𑀜𑁆𑀜𑀲𑁆𑀲 𑀲𑁄𑀢𑀸𑀧𑀢𑁆𑀢𑀺…𑀧𑁂… 𑀨𑀮𑀓𑁆𑀔𑀡𑁂 𑀧𑀯𑀢𑁆𑀢𑀦𑀁 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑀁. 𑀢𑀢𑁄 𑀧𑀭𑀁 𑀧𑀦 𑀬𑀸𑀯 𑀧𑀭𑀺𑀦𑀺𑀩𑁆𑀩𑀸𑀦𑀸 𑀤𑁂𑀲𑀦𑀸𑀜𑀸𑀡𑀧𑁆𑀧𑀯𑀢𑁆𑀢𑀺, 𑀢𑀲𑁆𑀲𑁂𑀯 𑀧𑀯𑀢𑁆𑀢𑀺𑀢𑀲𑁆𑀲 𑀥𑀫𑁆𑀫𑀘𑀓𑁆𑀓𑀲𑁆𑀲 𑀞𑀸𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁 𑀧𑀯𑀢𑁆𑀢𑀺𑀢𑀘𑀓𑁆𑀓𑀲𑁆𑀲 𑀘𑀓𑁆𑀓𑀯𑀢𑁆𑀢𑀺𑀦𑁄 𑀘𑀓𑁆𑀓𑀭𑀢𑀦𑀲𑁆𑀲 𑀞𑀸𑀦𑀁 𑀯𑀺𑀬. 𑀉𑀪𑀬𑀫𑁆𑀧𑀻𑀢𑀺 𑀧𑀺-𑀲𑀤𑁆𑀤𑁂𑀦 𑀮𑁄𑀓𑀺𑀬𑀤𑁂𑀲𑀦𑀸𑀜𑀸𑀡𑀲𑁆𑀲 𑀇𑀢𑀭𑁂𑀦 𑀅𑀦𑀜𑁆𑀜𑀲𑀸𑀥𑀸𑀭𑀡𑀢𑀸𑀯𑀲𑁂𑀦 𑀲𑀫𑀸𑀦𑀢𑀁 𑀲𑀫𑁆𑀧𑀺𑀡𑁆𑀟𑁂𑀢𑀺. 𑀉𑀭𑀲𑀺 𑀚𑀸𑀢𑀢𑀸𑀬 𑀉𑀭𑀲𑁄 𑀲𑀫𑁆𑀪𑀽𑀢𑀦𑁆𑀢𑀺 𑀑𑀭𑀲𑀁 𑀜𑀸𑀡𑀁.

𑀇𑀢𑀺 𑀭𑀽𑀧𑀦𑁆𑀢𑀺 𑀏𑀢𑁆𑀣 𑀇𑀢𑀺-𑀲𑀤𑁆𑀤𑁄 𑀅𑀦𑀯𑀲𑁂𑀲𑀢𑁄 𑀭𑀽𑀧𑀲𑁆𑀲 𑀲𑀭𑀽𑀧𑀦𑀺𑀤𑀲𑁆𑀲𑀦𑀢𑁆𑀣𑁄𑀢𑀺 𑀢𑀲𑁆𑀲 ‘‘𑀇𑀤𑀁 𑀭𑀽𑀧’’𑀦𑁆𑀢𑀺 𑀏𑀢𑁂𑀦 𑀲𑀸𑀥𑀸𑀭𑀡𑀢𑁄 𑀘 𑀲𑀭𑀽𑀧𑀦𑀺𑀤𑀲𑁆𑀲𑀦𑀫𑀸𑀳. 𑀏𑀢𑁆𑀢𑀓𑀁 𑀭𑀽𑀧𑀦𑁆𑀢𑀺 𑀏𑀢𑁂𑀦 𑀅𑀦𑀯𑀲𑁂𑀲𑀢𑁄 ‘‘𑀇𑀢𑁄 𑀉𑀤𑁆𑀥𑀁 𑀭𑀽𑀧𑀁 𑀦𑀢𑁆𑀣𑀻’’𑀢𑀺 𑀦𑀺𑀫𑀺𑀢𑁆𑀢𑀲𑁆𑀲 𑀅𑀜𑁆𑀜𑀲𑁆𑀲 𑀅𑀪𑀸𑀯𑀁. 𑀇𑀤𑀸𑀦𑀺 𑀢𑀫𑀢𑁆𑀣𑀁 𑀯𑀺𑀢𑁆𑀣𑀸𑀭𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀭𑀼𑀧𑁆𑀧𑀦𑀲𑀪𑀸𑀯𑀜𑁆𑀘𑁂𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀭𑀼𑀧𑁆𑀧𑀦𑀁 𑀲𑀻𑀢𑀸𑀤𑀺𑀯𑀺𑀭𑁄𑀥𑀺𑀧𑀘𑁆𑀘𑀬𑀲𑀫𑀯𑀸𑀬𑁂 𑀯𑀺𑀲𑀤𑀺𑀲𑀼𑀧𑁆𑀧𑀢𑁆𑀢𑀺. 𑀆𑀤𑀺-𑀲𑀤𑁆𑀤𑁂𑀦 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀸𑀤𑀺𑀪𑁂𑀤𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀮𑀓𑁆𑀔𑀡…𑀧𑁂… 𑀯𑀲𑁂𑀦𑀸𑀢𑀺 𑀓𑀓𑁆𑀔𑀴𑀢𑁆𑀢𑀸𑀤𑀺𑀮𑀓𑁆𑀔𑀡𑀯𑀲𑁂𑀦 𑀲𑀦𑁆𑀥𑀸𑀭𑀡𑀸𑀤𑀺𑀭𑀲𑀯𑀲𑁂𑀦 𑀲𑀫𑁆𑀧𑀝𑀺𑀘𑁆𑀙𑀦𑀸𑀤𑀺𑀧𑀘𑁆𑀘𑀼𑀧𑀝𑁆𑀞𑀸𑀦𑀯𑀲𑁂𑀦 𑀪𑀽𑀢𑀢𑁆𑀢𑀬𑀸𑀤𑀺𑀧𑀤𑀝𑁆𑀞𑀸𑀦𑀯𑀲𑁂𑀦 𑀘. 𑀏𑀯𑀁 𑀧𑀭𑀺𑀕𑁆𑀕𑀳𑀺𑀢𑀲𑁆𑀲𑀸𑀢𑀺 𑀏𑀯𑀁 𑀲𑀸𑀥𑀸𑀭𑀡𑀢𑁄 𑀘 𑀮𑀓𑁆𑀔𑀡𑀸𑀤𑀺𑀢𑁄 𑀘 𑀧𑀭𑀺𑀕𑁆𑀕𑀳𑀺𑀢𑀲𑁆𑀲. 𑀅𑀯𑀺𑀚𑁆𑀚𑀸𑀲𑀫𑀼𑀤𑀬𑀸𑀢𑀺 𑀅𑀯𑀺𑀚𑁆𑀚𑀸𑀬 𑀉𑀧𑁆𑀧𑀸𑀤𑀸, 𑀅𑀢𑁆𑀣𑀺𑀪𑀸𑀯𑀸𑀢𑀺 𑀅𑀢𑁆𑀣𑁄. 𑀦𑀺𑀭𑁄𑀥𑀯𑀺𑀭𑁄𑀥𑀻 𑀳𑀺 𑀅𑀢𑁆𑀣𑀺𑀪𑀸𑀯𑁄 𑀳𑁄𑀢𑀺, 𑀢𑀲𑁆𑀫𑀸 𑀦𑀺𑀭𑁄𑀥𑁂 𑀅𑀲𑀢𑀺 𑀅𑀢𑁆𑀣𑀺𑀪𑀸𑀯𑁄 𑀳𑁄𑀢𑀺, 𑀢𑀲𑁆𑀫𑀸 𑀧𑀼𑀭𑀺𑀫𑀪𑀯𑁂 𑀲𑀺𑀤𑁆𑀥𑀸𑀬 𑀅𑀯𑀺𑀚𑁆𑀚𑀸𑀬 𑀲𑀢𑀺 𑀇𑀫𑀲𑁆𑀫𑀺𑀁 𑀪𑀯𑁂 𑀭𑀽𑀧𑀲𑁆𑀲 𑀲𑀫𑀼𑀤𑀬𑁄 𑀭𑀽𑀧𑀲𑁆𑀲 𑀉𑀧𑁆𑀧𑀸𑀤𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀢𑀡𑁆𑀳𑀸𑀲𑀫𑀼𑀤𑀬𑀸 𑀓𑀫𑁆𑀫𑀲𑀫𑀼𑀤𑀬𑀸𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀅𑀯𑀺𑀚𑁆𑀚𑀸𑀤𑀻𑀳𑀺 𑀘 𑀢𑀻𑀳𑀺 𑀅𑀢𑀻𑀢𑀓𑀸𑀮𑀺𑀓𑀢𑁆𑀢𑀸 𑀢𑁂𑀲𑀁 𑀲𑀳𑀓𑀸𑀭𑀻𑀓𑀸𑀭𑀡𑀪𑀽𑀢𑀁 𑀉𑀧𑀸𑀤𑀸𑀦𑀫𑁆𑀧𑀺 𑀕𑀳𑀺𑀢𑀫𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀧𑀯𑀢𑁆𑀢𑀺𑀧𑀘𑁆𑀘𑀬𑁂𑀲𑀼 𑀓𑀩𑀴𑀻𑀓𑀸𑀭𑀆𑀳𑀸𑀭𑀲𑁆𑀲 𑀩𑀮𑀯𑀢𑀸𑀬, 𑀲𑁄 𑀏𑀯 𑀕𑀳𑀺𑀢𑁄, ‘‘𑀆𑀳𑀸𑀭𑀲𑀫𑀼𑀤𑀬𑀸’’𑀢𑀺 𑀧𑀦 𑀕𑀳𑀺𑀢𑁂𑀦 𑀧𑀯𑀢𑁆𑀢𑀺𑀧𑀘𑁆𑀘𑀬𑀢𑀸𑀫𑀢𑁆𑀢𑁂𑀦 𑀉𑀢𑀼𑀘𑀺𑀢𑁆𑀢𑀸𑀦𑀺𑀧𑀺 𑀕𑀳𑀺𑀢𑀸𑀦𑁂𑀯 𑀳𑁄𑀦𑁆𑀢𑀻𑀢𑀺 𑀤𑁆𑀯𑀸𑀤𑀲𑀲𑀫𑀼𑀝𑁆𑀞𑀸𑀦𑀺𑀓𑀁 𑀭𑀽𑀧𑀲𑁆𑀲 𑀧𑀘𑁆𑀘𑀬𑀢𑁄 𑀤𑀲𑁆𑀲𑀦𑀫𑁆𑀧𑀺 𑀪𑀯𑀺𑀢𑀩𑁆𑀩𑀫𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀦𑀺𑀩𑁆𑀩𑀢𑁆𑀢𑀺𑀮𑀓𑁆𑀔𑀡𑀦𑁆𑀢𑀺𑀆𑀤𑀺𑀦𑀸 𑀓𑀸𑀮𑀯𑀲𑁂𑀦 𑀉𑀤𑀬𑀤𑀲𑁆𑀲𑀦𑀫𑀸𑀳. 𑀢𑀢𑁆𑀣 𑀪𑀽𑀢𑀯𑀲𑁂𑀦 𑀫𑀕𑁆𑀕𑁂 𑀉𑀤𑀬𑀁 𑀧𑀲𑁆𑀲𑀺𑀢𑁆𑀯𑀸 𑀞𑀺𑀢𑁄 𑀇𑀥 𑀲𑀦𑁆𑀢𑀢𑀺𑀯𑀲𑁂𑀦 𑀅𑀦𑀼𑀓𑁆𑀓𑀫𑁂𑀦 𑀔𑀡𑀯𑀲𑁂𑀦 𑀧𑀲𑁆𑀲𑀢𑀺. 𑀅𑀯𑀺𑀚𑁆𑀚𑀸𑀦𑀺𑀭𑁄𑀥𑀸 𑀭𑀽𑀧𑀦𑀺𑀭𑁄𑀥𑁄𑀢𑀺 𑀅𑀕𑁆𑀕𑀫𑀕𑁆𑀕𑀜𑀸𑀡𑁂𑀦 𑀅𑀯𑀺𑀚𑁆𑀚𑀸𑀬 𑀅𑀦𑀼𑀧𑁆𑀧𑀸𑀤𑀦𑀺𑀭𑁄𑀥𑀢𑁄 𑀅𑀦𑀸𑀕𑀢𑀲𑁆𑀲 𑀅𑀦𑀼𑀧𑁆𑀧𑀸𑀤𑀦𑀺𑀭𑁄𑀥𑁄 𑀳𑁄𑀢𑀺 𑀧𑀘𑁆𑀘𑀬𑀸𑀪𑀸𑀯𑁂 𑀅𑀪𑀸𑀯𑀢𑁄. 𑀧𑀘𑁆𑀘𑀬𑀦𑀺𑀭𑁄𑀥𑁂𑀦𑀸𑀢𑀺 𑀅𑀯𑀺𑀚𑁆𑀚𑀸𑀲𑀗𑁆𑀔𑀸𑀢𑀲𑁆𑀲 𑀧𑀘𑁆𑀘𑀬𑀲𑁆𑀲 𑀦𑀺𑀭𑁄𑀥𑀪𑀸𑀯𑁂𑀦. 𑀢𑀡𑁆𑀳𑀸𑀦𑀺𑀭𑁄𑀥𑀸𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀆𑀳𑀸𑀭𑀦𑀺𑀭𑁄𑀥𑀸𑀢𑀺 𑀧𑀯𑀢𑁆𑀢𑀺𑀧𑀘𑁆𑀘𑀬𑀲𑁆𑀲 𑀓𑀩𑀴𑀻𑀓𑀸𑀭𑀸𑀳𑀸𑀭𑀲𑁆𑀲 𑀅𑀪𑀸𑀯𑀸. 𑀭𑀽𑀧𑀦𑀺𑀭𑁄𑀥𑀸𑀢𑀺 𑀢𑀁𑀲𑀫𑀼𑀝𑁆𑀞𑀸𑀦𑀭𑀽𑀧𑀲𑁆𑀲 𑀅𑀪𑀸𑀯𑁄 𑀳𑁄𑀢𑀺. 𑀲𑁂𑀲𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀯𑀺𑀧𑀭𑀺𑀡𑀸𑀫𑀮𑀓𑁆𑀔𑀡𑀦𑁆𑀢𑀺 𑀪𑀯𑀓𑀸𑀮𑀯𑀲𑁂𑀦 𑀳𑁂𑀢𑀼𑀤𑁆𑀯𑀬𑀤𑀲𑁆𑀲𑀦𑀁. 𑀢𑀲𑁆𑀫𑀸 𑀢𑀁 𑀧𑀤𑀝𑁆𑀞𑀸𑀦𑀯𑀲𑁂𑀦 𑀧𑀕𑁂𑀯 𑀧𑀲𑁆𑀲𑀺𑀢𑁆𑀯𑀸 𑀞𑀺𑀢𑁄 𑀇𑀥 𑀲𑀦𑁆𑀢𑀢𑀺𑀯𑀲𑁂𑀦 𑀤𑀺𑀲𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀔𑀡𑀯𑀲𑁂𑀦 𑀧𑀲𑁆𑀲𑀢𑀺.

𑀇𑀢𑀺 𑀯𑁂𑀤𑀦𑀸𑀢𑀺𑀆𑀤𑀻𑀲𑀼𑀧𑀺 𑀯𑀼𑀢𑁆𑀢𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀼𑀔𑀸𑀤𑀺𑀪𑁂𑀤𑀦𑁆𑀢𑀺 𑀲𑀼𑀔𑀤𑀼𑀓𑁆𑀔𑀅𑀤𑀼𑀓𑁆𑀔𑀫𑀲𑀼𑀔𑀸𑀤𑀺𑀯𑀺𑀪𑀸𑀕𑀁. 𑀭𑀽𑀧𑀲𑀜𑁆𑀜𑀸𑀤𑀺𑀪𑁂𑀤𑀦𑁆𑀢𑀺 𑀭𑀽𑀧𑀲𑀜𑁆𑀜𑀸, 𑀲𑀤𑁆𑀤… 𑀕𑀦𑁆𑀥… 𑀭𑀲… 𑀨𑁄𑀝𑁆𑀞𑀩𑁆𑀩 … 𑀥𑀫𑁆𑀫𑀲𑀜𑁆𑀜𑀸𑀤𑀺𑀯𑀺𑀪𑀸𑀕𑀁. 𑀨𑀲𑁆𑀲𑀸𑀤𑀺𑀪𑁂𑀤𑀦𑁆𑀢𑀺 𑀨𑀲𑁆𑀲𑀘𑁂𑀢𑀦𑀸𑀫𑀦𑀲𑀺𑀓𑀸𑀭𑀸𑀤𑀺𑀯𑀺𑀪𑀸𑀕𑀁. 𑀮𑀓𑁆𑀔𑀡…𑀧𑁂… 𑀯𑀲𑁂𑀦𑀸𑀢𑀺 𑀇𑀝𑁆𑀞𑀸𑀦𑀼𑀪𑀯𑀦𑀮𑀓𑁆𑀔𑀡𑀸𑀤𑀺𑀮𑀓𑁆𑀔𑀡𑀯𑀲𑁂𑀦 𑀇𑀝𑁆𑀞𑀸𑀓𑀸𑀭𑀲𑀫𑁆𑀪𑁄𑀕𑀭𑀲𑀸𑀤𑀺𑀭𑀲𑀯𑀲𑁂𑀦 𑀓𑀸𑀬𑀺𑀓𑀅𑀲𑁆𑀲𑀸𑀤𑀸𑀤𑀺𑀧𑀘𑁆𑀘𑀼𑀧𑀝𑁆𑀞𑀸𑀦𑀯𑀲𑁂𑀦 𑀇𑀝𑁆𑀞𑀸𑀭𑀫𑁆𑀫𑀡𑀸𑀤𑀺𑀧𑀤𑀝𑁆𑀞𑀸𑀦𑀯𑀲𑁂𑀦. ‘‘𑀨𑀼𑀝𑁆𑀞𑁄 𑀯𑁂𑀤𑁂𑀢𑀺, 𑀨𑀼𑀝𑁆𑀞𑁄 𑀲𑀜𑁆𑀚𑀸𑀦𑀸𑀢𑀺, 𑀨𑀼𑀝𑁆𑀞𑁄 𑀘𑁂𑀢𑁂𑀢𑀻’’𑀢𑀺 (𑀲𑀁. 𑀦𑀺. 𑁪.𑁯𑁩) 𑀯𑀘𑀦𑀢𑁄 𑀢𑀻𑀲𑀼 𑀯𑁂𑀤𑀦𑀸𑀤𑀻𑀲𑀼 𑀔𑀦𑁆𑀥𑁂𑀲𑀼 𑀨𑀲𑁆𑀲𑀲𑀫𑀼𑀤𑀬𑀸𑀢𑀺 𑀯𑀢𑁆𑀢𑀩𑁆𑀩𑀁. 𑀯𑀺𑀜𑁆𑀜𑀸𑀡𑀧𑁆𑀧𑀘𑁆𑀘𑀬𑀸 𑀦𑀸𑀫𑀭𑀽𑀧’’𑀦𑁆𑀢𑀺 𑀯𑀘𑀦𑀢𑁄 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁂 𑀦𑀸𑀫𑀭𑀽𑀧𑀲𑀫𑀼𑀤𑀬𑀸𑀢𑀺 𑀯𑀢𑁆𑀢𑀩𑁆𑀩𑀁. 𑀢𑁂𑀲𑀁𑀬𑁂𑀯 𑀯𑀲𑁂𑀦𑀸𑀢𑀺 ‘‘𑀅𑀯𑀺𑀚𑁆𑀚𑀸𑀦𑀺𑀭𑁄𑀥𑁄 𑀯𑁂𑀤𑀦𑀸𑀦𑀺𑀭𑁄𑀥𑁄’’𑀢𑀺𑀆𑀤𑀺𑀦𑀸 𑀢𑁂𑀲𑀁𑀬𑁂𑀯 𑀅𑀯𑀺𑀚𑁆𑀚𑀸𑀤𑀻𑀦𑀁 𑀯𑀲𑁂𑀦 𑀬𑁄𑀚𑁂𑀢𑀩𑁆𑀩𑀁.

𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀦𑀁 𑀲𑀫𑀼𑀤𑀬𑀢𑁆𑀣𑀗𑁆𑀕𑀫𑀯𑀲𑁂𑀦 𑀢𑀺𑀢𑁆𑀣𑀺𑀬𑀸𑀦𑀁 𑀅𑀯𑀺𑀲𑀬𑁄𑀧𑀺 𑀲𑀧𑁆𑀧𑀤𑁂𑀲𑁄 𑀲𑀻𑀳𑀦𑀸𑀤𑁄 𑀤𑀲𑁆𑀲𑀺𑀢𑁄. 𑀇𑀤𑀸𑀦𑀺 𑀦𑀺𑀧𑁆𑀧𑀤𑁂𑀲𑁄 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀯𑀲𑁂𑀦 𑀲𑀗𑁆𑀔𑁂𑀧𑀢𑁄 𑀯𑀺𑀢𑁆𑀣𑀸𑀭𑀢𑁄 𑀧𑀘𑁆𑀘𑀬𑀸𑀓𑀸𑀭𑀯𑀺𑀲𑀬𑁄 𑀅𑀦𑀜𑁆𑀜𑀲𑀸𑀥𑀸𑀭𑀡𑁄 𑀤𑀲𑁆𑀲𑀻𑀬𑀢𑀻𑀢𑀺 𑀆𑀳, ‘‘𑀅𑀬𑀫𑁆𑀧𑀺 𑀅𑀧𑀭𑁄 𑀲𑀻𑀳𑀦𑀸𑀤𑁄’’𑀢𑀺. 𑀢𑀲𑁆𑀲𑀸𑀢𑀺 ‘‘𑀇𑀫𑀲𑁆𑀫𑀺𑀁 𑀲𑀢𑀻’’𑀢𑀺𑀆𑀤𑀺𑀦𑀸 𑀲𑀗𑁆𑀔𑁂𑀧𑀢𑁄 𑀯𑀼𑀢𑁆𑀢𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀧𑀸𑀴𑀺𑀬𑀸. 𑀏𑀢𑁆𑀣 𑀘 ‘‘𑀇𑀫𑀲𑁆𑀫𑀺𑀁 𑀲𑀢𑀺 𑀇𑀤𑀁 𑀳𑁄𑀢𑀺, 𑀇𑀫𑀲𑁆𑀲 𑀦𑀺𑀭𑁄𑀥𑀸 𑀇𑀤𑀁 𑀦𑀺𑀭𑀼𑀛𑁆𑀢𑀻’’𑀢𑀺 𑀅𑀯𑀺𑀚𑁆𑀚𑀸𑀤𑀻𑀦𑀁 𑀪𑀸𑀯𑁂 𑀲𑀗𑁆𑀔𑀸𑀭𑀸𑀤𑀻𑀦𑀁 𑀪𑀸𑀯𑀲𑁆𑀲, 𑀅𑀯𑀺𑀚𑁆𑀚𑀸𑀤𑀻𑀦𑀁 𑀦𑀺𑀭𑁄𑀥𑁂 𑀲𑀗𑁆𑀔𑀸𑀭𑀸𑀤𑀻𑀦𑀁 𑀦𑀺𑀭𑁄𑀥𑀲𑁆𑀲 𑀓𑀣𑀦𑁂𑀦 𑀧𑀼𑀭𑀺𑀫𑀲𑁆𑀫𑀺𑀁 𑀧𑀘𑁆𑀘𑀬𑀮𑀓𑁆𑀔𑀡𑁂 𑀦𑀺𑀬𑀫𑁄 𑀤𑀲𑁆𑀲𑀺𑀢𑁄 ‘‘𑀇𑀫𑀲𑁆𑀫𑀺𑀁 𑀲𑀢𑀺 𑀏𑀯, 𑀦𑀸𑀲𑀢𑀺, 𑀇𑀫𑀲𑁆𑀲 𑀉𑀧𑁆𑀧𑀸𑀤𑀸 𑀏𑀯, 𑀦𑀸𑀦𑀼𑀧𑁆𑀧𑀸𑀤𑀸, 𑀦𑀺𑀭𑁄𑀥𑀸 𑀏𑀯, 𑀦𑀸𑀦𑀺𑀭𑁄𑀥𑀸’’𑀢𑀺. 𑀢𑁂𑀦𑁂𑀤𑀁 𑀮𑀓𑁆𑀔𑀡𑀁 𑀅𑀦𑁆𑀢𑁄𑀕𑀥𑀦𑀺𑀬𑀫𑀁 𑀇𑀥 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀲𑁆𑀲 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀦𑀺𑀭𑁄𑀥𑁄𑀢𑀺 𑀘 𑀅𑀯𑀺𑀚𑁆𑀚𑀸𑀤𑀻𑀦𑀁 𑀯𑀺𑀭𑀸𑀕𑀸 𑀯𑀺𑀕𑀫𑁂𑀦 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑁄 𑀅𑀧𑁆𑀧𑀯𑀢𑁆𑀢𑀺. 𑀢𑀣𑀸 𑀳𑀺 𑀯𑀼𑀢𑁆𑀢𑀁 ‘‘𑀅𑀯𑀺𑀚𑁆𑀚𑀸𑀬 𑀢𑁆𑀯𑁂𑀯 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑀸’’𑀢𑀺𑀆𑀤𑀺. 𑀦𑀺𑀭𑁄𑀥𑀯𑀺𑀭𑁄𑀥𑀻 𑀘 𑀉𑀧𑁆𑀧𑀸𑀤𑁄, 𑀬𑁂𑀦 𑀲𑁄 𑀉𑀧𑁆𑀧𑀸𑀤𑀦𑀺𑀭𑁄𑀥𑀯𑀺𑀪𑀸𑀕𑁂𑀦 𑀯𑀼𑀢𑁆𑀢𑁄 ‘‘𑀇𑀫𑀲𑁆𑀲 𑀦𑀺𑀭𑁄𑀥𑀸 𑀇𑀤𑀁 𑀦𑀺𑀭𑀼𑀚𑁆𑀛𑀢𑀻’’𑀢𑀺. 𑀢𑁂𑀦𑁂𑀢𑀁 𑀤𑀲𑁆𑀲𑁂𑀢𑀺 ‘‘𑀅𑀲𑀢𑀺 𑀦𑀺𑀭𑁄𑀥𑁂 𑀉𑀧𑁆𑀧𑀸𑀤𑁄 𑀦𑀸𑀫, 𑀲𑁄 𑀘𑁂𑀢𑁆𑀣 𑀅𑀢𑁆𑀣𑀺𑀪𑀸𑀯𑁄𑀢𑀺 𑀯𑀼𑀘𑁆𑀘𑀢𑀻’’𑀢𑀺. ‘‘𑀇𑀫𑀲𑁆𑀫𑀺𑀁 𑀲𑀢𑀺 𑀇𑀤𑀁 𑀳𑁄𑀢𑀻’’𑀢𑀺 𑀇𑀤𑀫𑁂𑀯 𑀳𑀺 𑀮𑀓𑁆𑀔𑀡𑀁. 𑀧𑀭𑀺𑀬𑀸𑀬𑀦𑁆𑀢𑀭𑁂𑀦 ‘‘𑀇𑀫𑀲𑁆𑀲 𑀉𑀧𑁆𑀧𑀸𑀤𑀸 𑀇𑀤𑀁 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀯𑀤𑀦𑁆𑀢𑁂𑀦 𑀧𑀭𑁂𑀦 𑀧𑀼𑀭𑀺𑀫𑀁 𑀯𑀺𑀲𑁂𑀲𑀺𑀢𑀁 𑀳𑁄𑀢𑀺. 𑀢𑀲𑁆𑀫𑀸 𑀦 𑀯𑀢𑁆𑀢𑀫𑀸𑀦𑀁𑀬𑁂𑀯 𑀲𑀦𑁆𑀥𑀸𑀬 ‘‘𑀇𑀫𑀲𑁆𑀫𑀺𑀁 𑀲𑀢𑀻’’𑀢𑀺 𑀯𑀼𑀢𑁆𑀢𑀁, 𑀅𑀣 𑀔𑁄 𑀫𑀕𑁆𑀕𑁂𑀦 𑀅𑀦𑀺𑀭𑀼𑀚𑁆𑀛𑀦𑀲𑀪𑀸𑀯𑀜𑁆𑀘𑀸𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀬𑀲𑁆𑀫𑀸 𑀘 ‘‘𑀇𑀫𑀲𑁆𑀫𑀺𑀁 𑀅𑀲𑀢𑀺 𑀇𑀤𑀁 𑀦 𑀳𑁄𑀢𑀺, 𑀇𑀫𑀲𑁆𑀲 𑀦𑀺𑀭𑁄𑀥𑀸 𑀇𑀤𑀁 𑀦𑀺𑀭𑀼𑀚𑁆𑀛𑀢𑀻’’𑀢𑀺 𑀤𑁆𑀯𑀺𑀥𑀸𑀧𑀺 𑀉𑀤𑁆𑀤𑀺𑀝𑁆𑀞𑀲𑁆𑀲 𑀮𑀓𑁆𑀔𑀡𑀲𑁆𑀲 𑀦𑀺𑀤𑁆𑀤𑁂𑀲𑀁 𑀯𑀤𑀦𑁆𑀢𑁂𑀦 𑀪𑀕𑀯𑀢𑀸 ‘‘𑀅𑀯𑀺𑀚𑁆𑀚𑀸𑀬 𑀢𑁆𑀯𑁂𑀯 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑀸 𑀲𑀗𑁆𑀔𑀸𑀭𑀦𑀺𑀭𑁄𑀥𑁄’’𑀢𑀺𑀆𑀤𑀺𑀦𑀸 𑀦𑀺𑀭𑁄𑀥𑁄𑀯 𑀯𑀼𑀢𑁆𑀢𑁄, 𑀢𑀲𑁆𑀫𑀸 𑀦𑀢𑁆𑀣𑀺𑀪𑀸𑀯𑁄𑀧𑀺 𑀦𑀺𑀭𑁄𑀥𑁄 𑀏𑀯𑀸𑀢𑀺 𑀦𑀢𑁆𑀣𑀺𑀪𑀸𑀯𑀯𑀺𑀭𑀼𑀤𑁆𑀥𑁄 𑀅𑀢𑁆𑀣𑀺𑀪𑀸𑀯𑁄 𑀅𑀦𑀺𑀭𑁄𑀥𑁄𑀢𑀺 𑀤𑀲𑁆𑀲𑀺𑀢𑀁 𑀳𑁄𑀢𑀺. 𑀢𑁂𑀦 𑀅𑀦𑀺𑀭𑁄𑀥𑀲𑀗𑁆𑀔𑀸𑀢𑁂𑀦 𑀅𑀢𑁆𑀣𑀺𑀪𑀸𑀯𑁂𑀦 𑀉𑀧𑁆𑀧𑀸𑀤𑀁 𑀯𑀺𑀲𑁂𑀲𑁂𑀢𑀺. 𑀢𑀢𑁄 𑀇𑀥 𑀦 𑀓𑁂𑀯𑀮𑀁 𑀅𑀢𑁆𑀣𑀺𑀪𑀸𑀯𑀫𑀢𑁆𑀢𑀁 𑀉𑀧𑁆𑀧𑀸𑀤𑁄𑀢𑀺 𑀅𑀢𑁆𑀣𑁄 𑀅𑀥𑀺𑀧𑁆𑀧𑁂𑀢𑁄, 𑀅𑀣 𑀔𑁄 𑀅𑀦𑀺𑀭𑁄𑀥𑀲𑀗𑁆𑀔𑀸𑀢𑁄 𑀅𑀢𑁆𑀣𑀺𑀪𑀸𑀯𑁄 𑀘𑀸𑀢𑀺 𑀅𑀬𑀫𑀢𑁆𑀣𑁄 𑀯𑀺𑀪𑀸𑀯𑀺𑀢𑁄 𑀳𑁄𑀢𑀺. 𑀏𑀯𑀫𑁂𑀢𑀁 𑀮𑀓𑁆𑀔𑀡𑀤𑁆𑀯𑀬𑀯𑀘𑀦𑀁 𑀅𑀜𑁆𑀜𑀫𑀜𑁆𑀜𑀁 𑀯𑀺𑀲𑁂𑀲𑀦𑀯𑀺𑀲𑁂𑀲𑀺𑀢𑀩𑁆𑀩𑀪𑀸𑀯𑁂𑀦 𑀲𑀸𑀢𑁆𑀣𑀓𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀓𑁄 𑀧𑀦𑀸𑀬𑀁 𑀅𑀦𑀺𑀭𑁄𑀥𑁄 𑀦𑀸𑀫, 𑀬𑁄 ‘‘𑀅𑀢𑁆𑀣𑀺𑀪𑀸𑀯𑁄, 𑀉𑀧𑁆𑀧𑀸𑀤𑁄’’𑀢𑀺 𑀘 𑀯𑀼𑀢𑁆𑀢𑁄𑀢𑀺? 𑀅𑀧𑁆𑀧𑀳𑀻𑀦𑀪𑀸𑀯𑁄 𑀘 𑀅𑀦𑀺𑀩𑁆𑀩𑀢𑁆𑀢𑀺𑀢𑀨𑀮𑀪𑀸𑀯𑁂𑀦 𑀨𑀮𑀼𑀧𑁆𑀧𑀸𑀤𑀦𑀸𑀭𑀳𑀢𑀸 𑀘𑀸𑀢𑀺 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄. 𑀯𑀺𑀢𑁆𑀣𑀸𑀭𑁄 𑀧𑀦 𑀧𑀭𑀫𑀢𑁆𑀣𑀤𑀻𑀧𑀦𑀺𑀬𑀁 𑀉𑀤𑀸𑀦𑀝𑁆𑀞𑀓𑀣𑀸𑀬𑀁 (𑀉𑀤𑀸. 𑀅𑀝𑁆𑀞. 𑁧). 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑁄.

𑀧𑀜𑁆𑀘𑀓𑁆𑀔𑀦𑁆𑀥𑀯𑀺𑀪𑀚𑀦𑀸𑀤𑀺𑀯𑀲𑁂𑀦𑀸𑀢𑀺 𑀧𑀜𑁆𑀘𑀦𑁆𑀦𑀁 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀦𑀁 𑀤𑁆𑀯𑀸𑀤𑀲𑀧𑀤𑀺𑀓𑀲𑁆𑀲 𑀧𑀘𑁆𑀘𑀬𑀸𑀓𑀸𑀭𑀲𑁆𑀲 𑀯𑀺𑀪𑀚𑀦𑀯𑀲𑁂𑀦. 𑀇𑀫𑀲𑁆𑀫𑀺𑀜𑁆𑀳𑀺 𑀤𑀲𑀩𑀮𑀲𑀼𑀢𑁆𑀢𑁂 𑀥𑀫𑁆𑀫𑀲𑁆𑀲 𑀤𑁂𑀲𑀺𑀢𑀸𑀓𑀸𑀭𑁄 𑀧𑀜𑁆𑀘𑀓𑁆𑀔𑀦𑁆𑀥𑀧𑀘𑁆𑀘𑀬𑀸𑀓𑀸𑀭𑀫𑀢𑁆𑀢𑁄. 𑀢𑁂𑀦𑀸𑀳 ‘‘𑀧𑀜𑁆𑀘𑀓𑁆𑀔𑀦𑁆𑀥𑀧𑀘𑁆𑀘𑀬𑀸𑀓𑀸𑀭𑀥𑀫𑁆𑀫𑁄’’𑀢𑀺. 𑀆𑀘𑀭𑀺𑀬𑀫𑀼𑀝𑁆𑀞𑀺𑀬𑀸 𑀅𑀓𑀭𑀡𑁂𑀦 𑀯𑀺𑀪𑀽𑀢𑁄, 𑀲𑁄 𑀧𑀦 𑀅𑀢𑁆𑀣𑀢𑁄 𑀘 𑀲𑀤𑁆𑀤𑀢𑁄 𑀘 𑀧𑀺𑀳𑀺𑀢𑁄 𑀳𑁂𑀝𑁆𑀞𑀸𑀫𑀼𑀔𑀚𑀸𑀢𑁄 𑀯𑀸 𑀦 𑀳𑁄𑀢𑀻𑀢𑀺 𑀆𑀳 ‘‘𑀅𑀦𑀺𑀓𑀼𑀚𑁆𑀚𑀺𑀢𑁄’’𑀢𑀺. 𑀯𑀺𑀯𑀝𑁄𑀢𑀺 𑀯𑀺𑀪𑀸𑀯𑀺𑀢𑁄. 𑀢𑁂𑀦𑀸𑀳 ‘‘𑀯𑀺𑀯𑀭𑀺𑀢𑁆𑀯𑀸 𑀞𑀧𑀺𑀢𑁄’’𑀢𑀺. 𑀧𑀓𑀸𑀲𑀺𑀢𑁄𑀢𑀺 𑀜𑀸𑀡𑁄𑀪𑀸𑀲𑁂𑀦 𑀑𑀪𑀸𑀲𑀺𑀢𑁄 𑀆𑀤𑀻𑀧𑀺𑀢𑁄𑀢𑀺 𑀆𑀳 ‘‘𑀤𑀻𑀧𑀺𑀢𑁄 𑀚𑁄𑀢𑀺𑀢𑁄’’𑀢𑀺. 𑀢𑀢𑁆𑀣 𑀢𑀢𑁆𑀣 𑀙𑀺𑀦𑁆𑀦𑀪𑀺𑀦𑁆𑀦𑀝𑁆𑀞𑀸𑀦𑁂. 𑀲𑀺𑀩𑁆𑀩𑀺𑀢𑀕𑀡𑁆𑀞𑀺𑀢𑀦𑁆𑀢𑀺 𑀯𑀸𑀓𑀁 𑀕𑀳𑁂𑀢𑁆𑀯𑀸 𑀲𑀺𑀩𑁆𑀩𑀺𑀢𑀁, 𑀲𑀺𑀩𑁆𑀩𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀝𑁆𑀞𑀸𑀦𑁂 𑀯𑀸𑀓𑁂𑀦 𑀕𑀡𑁆𑀞𑀺𑀢𑀜𑁆𑀘. 𑀙𑀺𑀦𑁆𑀦𑀧𑀺𑀮𑁄𑀢𑀺𑀓𑀸𑀪𑀸𑀯𑁂𑀦 𑀯𑀺𑀕𑀢𑀧𑀺𑀮𑁄𑀢𑀺𑀓𑁄 𑀥𑀫𑁆𑀫𑁄, 𑀢𑀲𑁆𑀲 𑀙𑀺𑀦𑁆𑀦𑀧𑀺𑀮𑁄𑀢𑀺𑀓𑀲𑁆𑀲 𑀧𑀝𑀺𑀮𑁄𑀫𑀢𑀸 𑀙𑀺𑀦𑁆𑀦𑀪𑀺𑀦𑁆𑀦𑀢𑀸𑀪𑀸𑀯𑁂𑀦𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀦 𑀳𑁂𑀢𑁆𑀣𑀸’’𑀢𑀺𑀆𑀤𑀺𑀫𑀸𑀳. 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀁 𑀧𑀭𑀺𑀕𑁆𑀕𑀳𑀡𑀁. 𑀲𑀬𑀁 𑀧𑀝𑀺𑀪𑀸𑀦𑀁 𑀓𑀧𑁆𑀧𑁂𑀢𑁆𑀯𑀸. 𑀯𑀟𑁆𑀠𑁂𑀦𑁆𑀢𑀸 𑀅𑀢𑁆𑀢𑀦𑁄 𑀲𑀫𑀬𑀁. 𑀲𑀫𑀡𑀓𑀘𑀯𑀭𑀦𑁆𑀢𑀺 𑀲𑀫𑀡𑀯𑁂𑀲𑀥𑀸𑀭𑀡𑀯𑀲𑁂𑀦 𑀲𑀫𑀡𑀧𑀝𑀺𑀭𑀽𑀧𑀢𑀸𑀬 𑀲𑀫𑀡𑀸𑀦𑀁 𑀓𑀘𑀯𑀭𑀪𑀽𑀢𑀁. 𑀅𑀢𑁆𑀢𑀦𑁄 𑀭𑀽𑀧𑀧𑀯𑀢𑁆𑀢𑀺𑀬𑀸 𑀓𑀭𑀡𑁆𑀟𑀁 𑀓𑀼𑀘𑁆𑀙𑀺𑀢𑀁 𑀥𑀼𑀢𑁆𑀢𑀁 𑀯𑀸𑀢𑀺 𑀧𑀯𑀢𑁆𑀢𑁂𑀢𑀻𑀢𑀺 𑀓𑀸𑀭𑀡𑁆𑀟𑀯𑁄, 𑀤𑀼𑀲𑁆𑀲𑀻𑀮𑁄. 𑀢𑀁 𑀓𑀸𑀭𑀡𑁆𑀟𑀯𑀁. 𑀦𑀺𑀤𑁆𑀥𑀫𑀣𑀸𑀢𑀺 𑀦𑀻𑀳𑀭𑀣. 𑀓𑀲𑀫𑁆𑀩𑀼𑀦𑁆𑀢𑀺 𑀲𑀫𑀡𑀓𑀲𑀝𑀁. 𑀅𑀧𑀓𑀲𑁆𑀲𑀣𑀸𑀢𑀺 𑀅𑀧𑀓𑀟𑁆𑀠𑀣 𑀦𑀦𑁆𑀢𑀺 𑀅𑀢𑁆𑀣𑁄. 𑀧𑀮𑀸𑀧𑁂𑀢𑀺 𑀧𑀮𑀸𑀧𑀲𑀤𑀺𑀲𑁂. 𑀢𑀣𑀸 𑀳𑀺 𑀢𑀡𑁆𑀟𑀼𑀮𑀲𑀸𑀭𑀭𑀳𑀺𑀢𑁄 𑀥𑀜𑁆𑀜𑀧𑀝𑀺𑀭𑀽𑀧𑀓𑁄 𑀣𑀼𑀲𑀫𑀢𑁆𑀢𑀓𑁄 𑀧𑀮𑀸𑀧𑁄𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 𑀲𑀻𑀮𑀸𑀤𑀺𑀲𑀸𑀭𑀭𑀳𑀺𑀢𑁄 𑀲𑀫𑀡𑀧𑀝𑀺𑀭𑀽𑀧𑀓𑁄 𑀧𑀮𑀸𑀧𑁄 𑀯𑀺𑀬𑀸𑀢𑀺 𑀧𑀮𑀸𑀧𑁄, 𑀤𑀼𑀲𑁆𑀲𑀻𑀮𑁄. 𑀢𑁂 𑀧𑀮𑀸𑀧𑁂. 𑀯𑀸𑀳𑁂𑀣𑀸𑀢𑀺 𑀅𑀧𑀦𑁂𑀣. 𑀧𑀢𑀺𑀲𑁆𑀲𑀢𑀸𑀢𑀺 𑀩𑀸𑀴𑁆𑀳𑀲𑀢𑀺𑀢𑀸𑀬 𑀧𑀢𑀺𑀲𑁆𑀲𑀢𑀸 𑀳𑁄𑀣𑀸𑀢𑀺.

𑀲𑀤𑁆𑀥𑀸𑀬 𑀧𑀩𑁆𑀩𑀚𑀺𑀢𑁂𑀦𑀸𑀢𑀺 𑀭𑀸𑀚𑀽𑀧𑀤𑁆𑀤𑀯𑀸𑀤𑀻𑀳𑀺 𑀅𑀦𑀼𑀧𑀤𑁆𑀤𑀼𑀢𑁂𑀦 ‘‘𑀏𑀯𑀜𑁆𑀳𑀺 𑀢𑀁 𑀑𑀢𑀺𑀡𑁆𑀡𑀁 𑀚𑀸𑀢𑀺𑀆𑀤𑀺𑀲𑀁𑀲𑀸𑀭𑀪𑀬𑀁 𑀯𑀺𑀚𑀺𑀦𑀺𑀲𑁆𑀲𑀸𑀫𑀻’’𑀢𑀺 𑀯𑀝𑁆𑀝𑀦𑀺𑀲𑁆𑀲𑀭𑀡𑀢𑁆𑀣𑀁 𑀆𑀕𑀢𑀸𑀬 𑀲𑀤𑁆𑀥𑀸𑀬 𑀯𑀲𑁂𑀦 𑀧𑀩𑁆𑀩𑀚𑀺𑀢𑁂𑀦. 𑀆𑀘𑀸𑀭𑀓𑀼𑀮𑀧𑀼𑀢𑁆𑀢𑁄𑀢𑀺 𑀆𑀘𑀸𑀭𑁂𑀦 𑀅𑀪𑀺𑀚𑀸𑀢𑁄. 𑀢𑁂𑀦𑀸𑀳 ‘‘𑀬𑀢𑁄 𑀓𑀼𑀢𑁄𑀘𑀻’’𑀢𑀺𑀆𑀤𑀺. 𑀚𑀸𑀢𑀺𑀓𑀼𑀮𑀧𑀼𑀢𑁆𑀢𑁄𑀢𑀺 𑀚𑀸𑀢𑀺𑀲𑀫𑁆𑀧𑀢𑁆𑀢𑀺𑀬𑀸 𑀅𑀪𑀺𑀚𑀸𑀢𑁄. 𑀯𑀺𑀜𑁆𑀜𑀼𑀧𑁆𑀧𑀲𑀢𑁆𑀣𑀸𑀦𑀺 𑀅𑀗𑁆𑀕𑀸𑀦𑀺 𑀲𑀫𑁆𑀫𑀸𑀧𑀥𑀸𑀦𑀺𑀬𑀗𑁆𑀕𑀪𑀸𑀯𑁂𑀦, 𑀓𑀸𑀬𑁂 𑀘 𑀚𑀻𑀯𑀺𑀢𑁂 𑀘 𑀦𑀺𑀭𑀧𑁂𑀓𑁆𑀔𑀪𑀸𑀯𑁂𑀦 𑀯𑀻𑀭𑀺𑀬𑀁 𑀆𑀭𑀪𑀦𑁆𑀢𑀲𑁆𑀲 𑀢𑀣𑀸𑀧𑀯𑀢𑁆𑀢𑀯𑀻𑀭𑀺𑀬𑀯𑀲𑁂𑀦 ‘‘𑀢𑀘𑁄 𑀏𑀓𑀁 𑀅𑀗𑁆𑀕’’𑀦𑁆𑀢𑀺 𑀯𑀼𑀢𑁆𑀢𑀁. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀦𑀯𑀲𑀼 𑀞𑀸𑀦𑁂𑀲𑀼 𑀲𑀫𑀸𑀥𑀸𑀢𑀩𑁆𑀩𑀦𑁆𑀢𑀺 ‘‘𑀓𑀸𑀮𑀯𑀲𑁂𑀦 𑀧𑀜𑁆𑀘𑀲𑀼, 𑀇𑀭𑀺𑀬𑀸𑀧𑀣𑀯𑀲𑁂𑀦 𑀘𑀢𑀽𑀲𑀽’’𑀢𑀺 𑀏𑀯𑀁 𑀦𑀯𑀲𑀼 𑀞𑀸𑀦𑁂𑀲𑀼 𑀯𑀻𑀭𑀺𑀬𑀁 𑀲𑀫𑀸𑀥𑀸𑀢𑀩𑁆𑀩𑀁 𑀧𑀯𑀢𑁆𑀢𑁂𑀢𑀩𑁆𑀩𑀁.

𑀲𑁄 𑀤𑀼𑀓𑁆𑀔𑀁 𑀯𑀺𑀳𑀭𑀢𑀻𑀢𑀺 𑀓𑀼𑀲𑀻𑀢𑀧𑀼𑀕𑁆𑀕𑀮𑁄 𑀦𑀺𑀬𑁆𑀬𑀸𑀦𑀺𑀓𑀲𑀸𑀲𑀦𑁂 𑀯𑀻𑀭𑀺𑀬𑀸𑀭𑀫𑁆𑀪𑀲𑁆𑀲 𑀅𑀓𑀭𑀡𑁂𑀦 𑀲𑀸𑀫𑀜𑁆𑀜𑀢𑁆𑀣𑀲𑁆𑀲 𑀅𑀦𑀼𑀧𑁆𑀧𑀢𑁆𑀢𑀺𑀬𑀸 𑀤𑀼𑀓𑁆𑀔𑀁 𑀯𑀺𑀳𑀭𑀢𑀺. 𑀲𑀓𑀁 𑀯𑀸 𑀅𑀢𑁆𑀣𑀁 𑀲𑀤𑀢𑁆𑀣𑀁 𑀓-𑀓𑀸𑀭𑀲𑁆𑀲 𑀤-𑀓𑀸𑀭𑀁 𑀓𑀢𑁆𑀯𑀸. 𑀓𑀼𑀲𑀻𑀢𑀲𑁆𑀲 𑀅𑀢𑁆𑀣𑀧𑀭𑀺𑀳𑀸𑀬𑀦𑀁 𑀫𑀽𑀮𑀢𑁄 𑀧𑀝𑁆𑀞𑀸𑀬 𑀤𑀲𑁆𑀲𑁂𑀢𑀼𑀁 ‘‘𑀙 𑀤𑁆𑀯𑀸𑀭𑀸𑀦𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀦𑀺𑀲𑀚𑁆𑀚𑀸𑀯𑀲𑁂𑀦 𑀧𑀻𑀞𑀫𑀤𑁆𑀤𑀦𑀢𑁄 𑀧𑀻𑀞𑀫𑀤𑁆𑀤𑀦𑁄, 𑀦𑀺𑀭𑀲𑁆𑀲𑀦𑀯𑀘𑀦𑀁 𑀢𑀲𑁆𑀲, 𑀓𑀲𑁆𑀲𑀘𑀺𑀧𑀢𑁆𑀣𑀲𑁆𑀲 𑀅𑀥𑀸𑀭𑀡𑀢𑁄 𑀓𑁂𑀯𑀮𑀁 𑀧𑀻𑀞𑀪𑀸𑀭𑀪𑀽𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀜𑁆𑀜𑀢𑁆𑀣 𑀧𑀦 ‘‘𑀫𑀔𑀫𑀤𑁆𑀤𑀦𑁄’’𑀢𑀺 𑀯𑀼𑀘𑁆𑀘𑀢𑀺, 𑀢𑀢𑁆𑀣 𑀤𑀸𑀦𑀫𑀺𑀘𑁆𑀙𑀸𑀬 𑀧𑀭𑁂𑀲𑀁 𑀫𑀔𑀁 𑀧𑀲𑁆𑀲𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀮𑀡𑁆𑀟𑀧𑀽𑀭𑀓𑁄𑀢𑀺 𑀓𑀼𑀘𑁆𑀙𑀺𑀧𑀽𑀭𑀁 𑀪𑀼𑀜𑁆𑀚𑀺𑀢𑁆𑀯𑀸 𑀯𑀘𑁆𑀘𑀓𑀼𑀝𑀺𑀧𑀽𑀭𑀓𑁄.

‘‘𑀆𑀭𑀤𑁆𑀥𑀯𑀻𑀭𑀺𑀬𑁄’’𑀢𑀺𑀆𑀤𑀻𑀲𑀼 ‘‘𑀓𑀼𑀲𑀻𑀢𑁄 𑀧𑀼𑀕𑁆𑀕𑀮𑁄’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄, 𑀆𑀲𑀻𑀲𑀸𑀬 𑀯𑀲𑁂𑀦 𑀣𑁄𑀫𑀺𑀢𑁄. 𑀆𑀭𑀤𑁆𑀥𑀯𑀻𑀭𑀺𑀬𑁂𑀢𑀺 𑀧𑀕𑁆𑀕𑀳𑀺𑀢𑀯𑀻𑀭𑀺𑀬𑁂. 𑀧𑀳𑀺𑀢𑀢𑁆𑀢𑁂𑀢𑀺 𑀦𑀺𑀩𑁆𑀩𑀸𑀦𑀁 𑀧𑀢𑀺𑀧𑁂𑀲𑀺𑀢𑀘𑀺𑀢𑁆𑀢𑁂. 𑀏𑀢𑁂𑀦 𑀲𑀸𑀯𑀓𑀸𑀦𑀁 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀁 𑀲𑀢𑁆𑀣𑀼𑀯𑀦𑁆𑀤𑀦𑀸𑀦𑀺𑀲𑀁𑀲𑀜𑁆𑀘 𑀤𑀲𑁆𑀲𑁂𑀲𑀺.

𑀳𑀻𑀦𑁂𑀦𑀸𑀢𑀺 𑀯𑀝𑁆𑀝𑀦𑀺𑀲𑁆𑀲𑀺𑀢𑁂𑀦 𑀥𑀫𑁆𑀫𑁂𑀦. 𑀢𑁂𑀦𑀸𑀳 ‘‘𑀳𑀻𑀦𑀸𑀬 𑀲𑀤𑁆𑀥𑀸𑀬𑀸’’𑀢𑀺𑀆𑀤𑀺. 𑀅𑀕𑁆𑀕𑁂𑀦𑀸𑀢𑀺 𑀲𑁂𑀝𑁆𑀞𑁂𑀦 𑀯𑀺𑀯𑀝𑁆𑀝𑀦𑀺𑀲𑁆𑀲𑀺𑀢𑁂𑀦 𑀥𑀫𑁆𑀫𑁂𑀦, 𑀈𑀲𑀓𑀫𑁆𑀧𑀺 𑀓𑀢𑀓𑀸𑀮𑀼𑀲𑀺𑀬𑀯𑀺𑀕𑀢𑀝𑁆𑀞𑁂𑀦 𑀫𑀡𑁆𑀟𑀝𑁆𑀞𑁂𑀦 𑀘 𑀧𑀲𑀦𑁆𑀦𑀫𑁆𑀧𑀺 𑀲𑀼𑀭𑀸𑀤𑀺 𑀦 𑀧𑀸𑀢𑀩𑁆𑀩𑀁. 𑀲𑀸𑀲𑀦𑀦𑁆𑀢𑀺 𑀧𑀭𑀺𑀬𑀢𑁆𑀢𑀺𑀧𑀝𑀺𑀧𑀢𑁆𑀢𑀺𑀧𑀝𑀺𑀯𑁂𑀥𑀮𑀓𑁆𑀔𑀡𑀁 𑀲𑀸𑀲𑀦𑀁. 𑀧𑀲𑀦𑁆𑀦𑀁 𑀯𑀺𑀕𑀢𑀤𑁄𑀲𑀫𑀮𑀢𑁆𑀢𑀸 𑀧𑀲𑀸𑀤𑀦𑀺𑀬𑀢𑁆𑀢𑀸 𑀘. 𑀧𑀸𑀢𑀩𑁆𑀩𑀜𑁆𑀘 𑀧𑀢𑁆𑀢𑁂𑀦 𑀯𑀺𑀬 𑀲𑀼𑀔𑁂𑀦 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀢𑁄 𑀤𑀼𑀘𑁆𑀘𑀭𑀺𑀢𑀲𑀩𑁆𑀩𑀓𑀺𑀮𑁂𑀲𑀓𑀲𑀸𑀯𑀫𑀮𑀧𑀗𑁆𑀓𑀤𑁄𑀲𑀭𑀳𑀺𑀢𑀢𑁆𑀢𑀸 𑀘.

𑀫𑀡𑁆𑀟𑀪𑀽𑀢𑀸 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀤𑁂𑀲𑀦𑀸𑀧𑀺 𑀤𑁂𑀲𑀦𑀸𑀫𑀡𑁆𑀟𑁄. 𑀢𑀲𑁆𑀲 𑀏𑀓𑀲𑁆𑀲𑁂𑀯 𑀧𑀦 𑀤𑁂𑀲𑀦𑀸𑀫𑀡𑁆𑀟𑀲𑁆𑀲 𑀧𑀝𑀺𑀕𑁆𑀕𑀸𑀳𑀓𑀸 𑀲𑀼𑀧𑁆𑀧𑀝𑀺𑀧𑀦𑁆𑀦𑀸 𑀤𑁄𑀲𑀭𑀳𑀺𑀢𑀸 𑀘𑀢𑀲𑁆𑀲𑁄 𑀧𑀭𑀺𑀲𑀸 𑀧𑀝𑀺𑀕𑁆𑀕𑀳𑀫𑀡𑁆𑀟𑁄. 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀁 𑀢𑀕𑁆𑀕𑀢𑀺𑀓𑀢𑁆𑀢𑀸 𑀲𑀓𑀮𑁄𑀧𑀺 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀭𑀸𑀲𑀺 𑀩𑁆𑀭𑀳𑁆𑀫𑀘𑀭𑀺𑀬𑀫𑀡𑁆𑀟𑁄. 𑀢𑁂𑀦𑀸𑀳 ‘‘𑀓𑀢𑀫𑁄 𑀤𑁂𑀲𑀦𑀸𑀫𑀡𑁆𑀟𑁄’’𑀢𑀺𑀆𑀤𑀺. 𑀢𑀢𑁆𑀣 𑀯𑀺𑀜𑁆𑀜𑀸𑀢𑀸𑀭𑁄𑀢𑀺 𑀲𑀘𑁆𑀘𑀸𑀦𑀁 𑀅𑀪𑀺𑀲𑀫𑁂𑀢𑀸𑀯𑀺𑀦𑁄. 𑀢𑀣𑀸 𑀳𑀺 𑀆𑀤𑀺𑀢𑁄 ‘‘𑀘𑀢𑀼𑀦𑁆𑀦𑀁 𑀅𑀭𑀺𑀬𑀲𑀘𑁆𑀘𑀸𑀦𑀁 𑀆𑀘𑀺𑀓𑁆𑀔𑀡𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀼𑀩𑁆𑀩𑀪𑀸𑀕𑁂 ‘‘𑀅𑀢𑁆𑀣𑀺 𑀅𑀬𑀁 𑀮𑁄𑀓𑁄’’𑀢𑀺𑀆𑀤𑀺𑀦𑀸 𑀇𑀥𑀮𑁄𑀓𑀧𑀭𑀮𑁄𑀓𑀕𑀢𑀲𑀫𑁆𑀫𑁄𑀲𑀯𑀺𑀕𑀫𑁂𑀦 𑀧𑀯𑀢𑁆𑀢𑁄 𑀅𑀥𑀺𑀫𑁄𑀓𑁆𑀔𑁄𑀯 𑀅𑀥𑀺𑀫𑁄𑀓𑁆𑀔𑀫𑀡𑁆𑀟𑁄. 𑀙𑀟𑁆𑀟𑁂𑀢𑁆𑀯𑀸 𑀲𑀫𑀼𑀘𑁆𑀙𑁂𑀤𑀯𑀲𑁂𑀦 𑀯𑀺𑀚𑀳𑀺𑀢𑁆𑀯𑀸. 𑀘𑀢𑀼𑀪𑀽𑀫𑀓𑀲𑁆𑀲 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀲𑁆𑀲 𑀅𑀥𑀺𑀫𑁄𑀓𑁆𑀔𑀫𑀡𑁆𑀟𑁂𑀦 𑀫𑀡𑁆𑀟𑀪𑀽𑀢𑀁 𑀅𑀥𑀺𑀫𑁄𑀓𑁆𑀔𑀁. 𑀆𑀤𑀺-𑀲𑀤𑁆𑀤𑁂𑀦 ‘‘𑀧𑀕𑁆𑀕𑀳𑀫𑀡𑁆𑀟𑁄 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁 𑀓𑁄𑀲𑀚𑁆𑀚𑀓𑀲𑀝’’𑀦𑁆𑀢𑀺𑀆𑀤𑀺𑀁 𑀧𑀸𑀴𑀺𑀲𑁂𑀲𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 𑀲𑀸𑀲𑀦𑁂, ‘‘𑀫𑀡𑁆𑀟𑀲𑁆𑀫𑀺’’𑀦𑁆𑀢𑀺 𑀯𑀸 𑀯𑀘𑀦𑁂. 𑀓𑀸𑀭𑀡𑀯𑀘𑀦𑀁, 𑀢𑁂𑀦 ‘‘𑀲𑀢𑁆𑀣𑀸 𑀲𑀫𑁆𑀫𑀼𑀔𑀻𑀪𑀽𑀢𑁄’’𑀢𑀺 𑀲𑀫𑁆𑀫𑀼𑀔𑀪𑀸𑀯𑀦𑀸𑀬𑁄𑀕𑁄 𑀦𑀺𑀭𑀸𑀲𑀗𑁆𑀓𑀨𑀮𑀸𑀯𑀳𑁄𑀢𑀺 𑀤𑀲𑁆𑀲𑁂𑀢𑀺. 𑀢𑁂𑀦𑀸𑀳 ‘‘𑀅𑀲𑀫𑁆𑀫𑀼𑀔𑀸’’𑀢𑀺𑀆𑀤𑀺. 𑀧𑀫𑀸𑀡𑀦𑁆𑀢𑀺 𑀅𑀦𑀼𑀭𑀽𑀧𑀁 𑀪𑁂𑀲𑀚𑁆𑀚𑀲𑁆𑀲 𑀧𑀫𑀸𑀡𑀁. 𑀉𑀕𑁆𑀕𑀫𑀦𑀦𑁆𑀢𑀺 𑀪𑁂𑀲𑀚𑁆𑀚𑀲𑁆𑀲 𑀯𑀫𑀦𑀁 𑀯𑀺𑀭𑁂𑀘𑀦𑀁, 𑀢𑀲𑁆𑀲 𑀯𑀸 𑀯𑀲𑁂𑀦 𑀤𑁄𑀲𑀥𑀸𑀢𑀽𑀦𑀁 𑀯𑀫𑀦𑀁 𑀯𑀺𑀭𑁂𑀘𑀦𑀁. 𑀏𑀯𑀫𑁂𑀯𑀸𑀢𑀺 𑀬𑀣𑀸 𑀪𑁂𑀲𑀚𑁆𑀚𑀫𑀡𑁆𑀟𑀁 𑀯𑁂𑀚𑁆𑀚𑀲𑀫𑁆𑀫𑀼𑀔𑀸 𑀦𑀺𑀭𑀸𑀲𑀗𑁆𑀓𑀸 𑀧𑀺𑀯𑀦𑁆𑀢𑀺, 𑀏𑀯𑀫𑁂𑀯 ‘‘𑀲𑀢𑁆𑀣𑀸 𑀲𑀫𑁆𑀫𑀼𑀔𑀻𑀪𑀽𑀢𑁄’’𑀢𑀺 𑀦𑀺𑀭𑀸𑀲𑀗𑁆𑀓𑀸 𑀯𑀻𑀭𑀺𑀬𑀁 𑀓𑀢𑁆𑀯𑀸, 𑀫𑀡𑁆𑀟𑀧𑁂𑀬𑁆𑀬 𑀲𑀸𑀲𑀦𑀁 𑀧𑀺𑀯𑀣𑀸𑀢𑀺 𑀬𑁄𑀚𑀦𑀸. 𑀅𑀪𑀺𑀜𑁆𑀜𑀸𑀲𑀫𑀸𑀧𑀢𑁆𑀢𑀺𑀧𑀝𑀺𑀮𑀸𑀪𑁂𑀦 𑀲𑀸𑀦𑀺𑀲𑀁𑀲𑀸. 𑀫𑀕𑁆𑀕𑀨𑀮𑀸𑀥𑀺𑀕𑀫𑀦𑁂𑀦 𑀲𑀯𑀟𑁆𑀠𑀺. 𑀧𑀭𑀢𑁆𑀣𑀦𑁆𑀢𑀺 𑀅𑀢𑁆𑀢𑀦𑁄 𑀤𑀺𑀝𑁆𑀞𑀸𑀦𑀼𑀕𑀢𑀺𑀆𑀧𑀢𑁆𑀢𑀺𑀬𑀸, 𑀢𑀣𑀸 𑀲𑀫𑁆𑀫𑀸𑀧𑀝𑀺𑀧𑀚𑁆𑀚𑀦𑁆𑀢𑀸𑀦𑀁 𑀧𑀭𑁂𑀲𑀁 𑀅𑀢𑁆𑀣𑀦𑁆𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀤𑀼𑀢𑀺𑀬𑀤𑀲𑀩𑀮𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.