𑁯. 𑀯𑀦𑀲𑀁𑀬𑀼𑀢𑁆𑀢𑀁

𑁧. 𑀯𑀺𑀯𑁂𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁨𑁧. 𑀲𑀁𑀯𑁂𑀚𑁂𑀢𑀼𑀓𑀸𑀫𑀸𑀢𑀺 𑀅𑀢𑁆𑀣𑀢𑁄 𑀲𑀁𑀯𑁂𑀕𑀁 𑀉𑀧𑁆𑀧𑀸𑀤𑁂𑀢𑀼𑀓𑀸𑀫𑀸. 𑀢𑀣𑀸𑀪𑀽𑀢𑀸 𑀦𑀁 𑀓𑀺𑀮𑁂𑀲𑀲𑀗𑁆𑀕𑀡𑀺𑀓𑀸𑀤𑀺𑀢𑁄 𑀯𑀺𑀯𑁂𑀘𑁂𑀢𑀼𑀓𑀸𑀫𑀸 𑀦𑀸𑀫 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀯𑀺𑀯𑁂𑀓𑀁 𑀧𑀝𑀺𑀧𑀚𑁆𑀚𑀸𑀧𑁂𑀢𑀼𑀓𑀸𑀫𑀸’’𑀢𑀺. 𑀩𑀸𑀳𑀺𑀭𑁂𑀲𑀽𑀢𑀺 𑀕𑁄𑀘𑀭𑀚𑁆𑀛𑀢𑁆𑀢𑀢𑁄 𑀩𑀳𑀺𑀪𑀽𑀢𑁂𑀲𑀼. 𑀧𑀼𑀣𑀼𑀢𑁆𑀢𑀸𑀭𑀫𑁆𑀫𑀡𑁂𑀲𑀽𑀢𑀺 𑀭𑀽𑀧𑀸𑀤𑀺𑀦𑀸𑀦𑀸𑀭𑀫𑁆𑀫𑀡𑁂𑀲𑀼. 𑀘𑀭𑀢𑀻𑀢𑀺 𑀧𑀯𑀢𑁆𑀢𑀢𑀺. 𑀢𑁆𑀯𑀁 𑀚𑀦𑁄𑀢𑀺 𑀢𑁆𑀯𑀁 𑀅𑀢𑁆𑀢𑀦𑁄 𑀓𑀺𑀮𑁂𑀲𑁂𑀳𑀺 𑀚𑀦𑀦𑀢𑁄 𑀯𑀺𑀲𑀼𑀁 𑀚𑀸𑀢𑁄 𑀢𑀸𑀤𑀺𑀲𑁂 𑀏𑀯 𑀅𑀜𑁆𑀜𑀲𑁆𑀫𑀺𑀁 𑀚𑀦𑁂 𑀇𑀫𑀁 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀁 𑀙𑀦𑁆𑀤𑀭𑀸𑀕𑀁 𑀯𑀺𑀦𑀬𑀲𑁆𑀲𑀼 𑀯𑀺𑀦𑁄𑀤𑁂𑀳𑀺. 𑀲𑀢𑀁 𑀢𑀁 𑀲𑀸𑀭𑀬𑀸𑀫𑀲𑁂𑀢𑀺 𑀦𑀺𑀬𑁆𑀬𑀸𑀦𑀺𑀓𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀅𑀭𑀜𑁆𑀜𑀯𑀸𑀲𑁂𑀦 𑀘 𑀲𑀢𑀺𑀫𑀦𑁆𑀢𑀁 𑀧𑀡𑁆𑀟𑀺𑀢𑀁 𑀢𑀁 𑀫𑀬𑀫𑁆𑀧𑀺 𑀬𑀣𑀸𑀉𑀧𑁆𑀧𑀦𑁆𑀦𑀁 𑀯𑀺𑀢𑀓𑁆𑀓𑀁 𑀯𑀺𑀦𑁄𑀤𑀦𑀸𑀬 𑀲𑀸𑀭𑀬𑀸𑀫, 𑀲𑀢𑀁 𑀯𑀸 𑀲𑀧𑁆𑀧𑀼𑀭𑀺𑀲𑀸𑀦𑀁 𑀓𑀺𑀮𑁂𑀲𑀯𑀺𑀕𑀫𑀦𑀥𑀫𑁆𑀫𑀁 𑀧𑀝𑀺𑀧𑀚𑁆𑀚𑀺𑀢𑁆𑀯𑀸 𑀯𑀲𑀦𑁆𑀢𑀁 𑀢𑀁 𑀲𑀸𑀭𑀬𑀸𑀫 𑀯𑀝𑁆𑀝𑀤𑀼𑀓𑁆𑀔𑀁. 𑀧𑀸𑀢𑀸𑀮𑀦𑁆𑀢𑀺 𑀫𑁄𑀳𑀧𑀸𑀢𑀸𑀮𑀁 𑀓𑀺𑀮𑁂𑀲𑀭𑀚𑁄, 𑀢𑀤𑁂𑀯 ‘‘𑀧𑀸𑀢𑀸𑀮’’𑀦𑁆𑀢𑀺 𑀯𑀼𑀢𑁆𑀢𑀁. 𑀫𑀸 𑀅𑀯𑀳𑀭𑀻𑀢𑀺 𑀳𑁂𑀝𑁆𑀞𑀸 𑀤𑀼𑀕𑁆𑀕𑀢𑀺𑀲𑁄𑀢𑀁 𑀫𑀸 𑀉𑀧𑀦𑁂𑀲𑀺. 𑀲𑀺𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑀁. 𑀢𑁂𑀦𑀸𑀳 ‘‘𑀲𑀭𑀻𑀭𑀮𑀕𑁆𑀕’’𑀦𑁆𑀢𑀺. 𑀯𑀺𑀯𑁂𑀓𑀫𑀸𑀧𑀦𑁆𑀦𑁄𑀢𑀺 𑀓𑀺𑀮𑁂𑀲𑀯𑀺𑀯𑁂𑀓𑀁 𑀲𑀫𑀣𑀯𑀺𑀧𑀲𑁆𑀲𑀦𑀸𑀪𑀸𑀯𑀦𑀫𑀸𑀧𑀦𑁆𑀦𑁄. 𑀉𑀢𑁆𑀢𑀫𑀯𑀻𑀭𑀺𑀬𑀦𑁆𑀢𑀺 𑀉𑀲𑁆𑀲𑁄𑀴𑁆𑀳𑀺𑀮𑀓𑁆𑀔𑀡𑀧𑁆𑀧𑀢𑁆𑀢𑀁 𑀯𑀻𑀭𑀺𑀬𑀁, 𑀘𑀢𑀼𑀩𑁆𑀩𑀺𑀥𑀁 𑀲𑀫𑀧𑁆𑀧𑀥𑀸𑀦𑀯𑀻𑀭𑀺𑀬𑀁 𑀯𑀸 𑀲𑀫𑁆𑀧𑀢𑁆𑀢𑀁. 𑀧𑀕𑁆𑀕𑀬𑁆𑀳𑀸𑀢𑀺 𑀆𑀭𑁄𑀧𑁂𑀢𑁆𑀯𑀸. 𑀧𑀭𑀫𑀯𑀺𑀯𑁂𑀓𑀦𑁆𑀢𑀺 𑀧𑀭𑀫𑀁 𑀲𑀫𑀼𑀘𑁆𑀙𑁂𑀤𑀯𑀺𑀯𑁂𑀓𑀁.

𑀯𑀺𑀯𑁂𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀉𑀧𑀝𑁆𑀞𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁨𑁨. 𑀓𑀸𑀬𑀤𑀭𑀣𑁄 𑀳𑁄𑀢𑀺𑀬𑁂𑀯 𑀦𑀺𑀬𑀫𑁂𑀦, 𑀦 𑀘𑀺𑀢𑁆𑀢𑀤𑀭𑀣𑁄 𑀢𑀲𑁆𑀲 𑀫𑀕𑁆𑀕𑁂𑀦𑁂𑀯 𑀲𑀫𑀼𑀕𑁆𑀖𑀸𑀝𑀺𑀢𑀢𑁆𑀢𑀸.

𑀚𑀭𑀸𑀢𑀼𑀭𑁄𑀢𑀺 𑀚𑀭𑀸𑀪𑀺𑀪𑀯𑀦𑁂𑀦 𑀆𑀢𑀼𑀭𑁄𑀬𑁂𑀯. 𑀧𑀤𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀉𑀧𑀭𑀺𑀝𑁆𑀞𑀢𑀸𑀬 𑀧𑀭𑀺𑀢𑁄 𑀤𑀻𑀖𑀧𑀼𑀣𑀼𑀮𑀢𑀸𑀬 𑀅𑀢𑀺𑀯𑀺𑀬 𑀯𑀺𑀚𑁆𑀛𑀢𑀻𑀢𑀺 𑀲𑀢𑁆𑀢𑀺𑀲𑀮𑁆𑀮𑀕𑁆𑀕𑀳𑀡𑀁. 𑀏𑀯𑀁 𑀳𑀺𑀲𑁆𑀲 𑀢𑀡𑁆𑀳𑀸𑀲𑀮𑁆𑀮𑀲𑁆𑀲 𑀲𑀤𑀺𑀲𑀢𑀸. 𑀅𑀯𑀺𑀚𑁆𑀚𑀸𑀬 𑀧𑀦 𑀲𑀫𑁆𑀫𑁄𑀳𑀸𑀧𑀸𑀤𑀦𑁂𑀦 𑀤𑀼𑀓𑁆𑀔𑀸𑀧𑀸𑀤𑀦𑁂𑀦 𑀘 𑀯𑀺𑀲𑀲𑀤𑀺𑀲𑀢𑀸. 𑀭𑀼𑀧𑁆𑀧𑀢𑁄𑀢𑀺 𑀯𑀺𑀓𑀸𑀭𑀁 𑀆𑀧𑀸𑀤𑀺𑀬𑀫𑀸𑀦𑀲𑁆𑀲 𑀧𑀻𑀴𑀺𑀬𑀫𑀸𑀦𑀲𑁆𑀲𑀸𑀢𑀺 𑀅𑀢𑁆𑀣𑁄𑀢𑀺 𑀆𑀳 ‘‘𑀖𑀝𑁆𑀝𑀺𑀬𑀫𑀸𑀦𑀲𑁆𑀲𑀸’’𑀢𑀺.

𑀧𑀩𑁆𑀩𑀚𑀺𑀢𑀦𑁆𑀢𑀺 𑀲𑀲𑀦𑁆𑀢𑀸𑀦𑀢𑁄 𑀧𑀩𑁆𑀩𑀚𑀺𑀢𑀁 𑀯𑀸 𑀭𑀸𑀕𑀸𑀤𑀺𑀫𑀮𑀢𑁄 𑀧𑀩𑁆𑀩𑀚𑀺𑀢𑀁 𑀯𑀸. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀣𑁂𑀭𑀲𑁆𑀲𑁂𑀯𑁂𑀢𑀁 𑀯𑀘𑀦𑀁, 𑀢𑀲𑁆𑀫𑀸 𑀅𑀬𑀁 𑀇𑀤𑀸𑀦𑀺 𑀯𑀼𑀘𑁆𑀘𑀫𑀸𑀦𑁄 𑀏𑀢𑁆𑀣 𑀕𑀸𑀣𑀸𑀬 𑀅𑀢𑁆𑀣𑁄. 𑀤𑁂𑀯𑀢𑀸𑀬 𑀳𑀻𑀢𑀺𑀆𑀤𑀺 𑀯𑀼𑀢𑁆𑀢𑀲𑁆𑀲𑁂𑀯 𑀅𑀢𑁆𑀣𑀲𑁆𑀲 𑀧𑀸𑀓𑀝𑀓𑀭𑀡𑀁. 𑀏𑀢𑁆𑀣𑀸𑀢𑀺 𑀲𑁂𑀲𑀕𑀸𑀣𑀸𑀲𑀼. 𑀅𑀢𑁆𑀣𑀲𑁆𑀲 𑀯𑀼𑀢𑁆𑀢𑀦𑀬𑀢𑁆𑀢𑀸 ‘‘𑀅𑀦𑀼𑀢𑁆𑀢𑀸𑀦𑀧𑀤𑀯𑀡𑁆𑀡𑀦𑀸’’𑀢𑀺 𑀆𑀳. 𑀯𑀺𑀦𑀬𑀸𑀢𑀺 𑀳𑁂𑀢𑀼𑀫𑁆𑀳𑀺 𑀦𑀺𑀲𑁆𑀲𑀓𑁆𑀓𑀯𑀘𑀦𑀦𑁆𑀢𑀺 𑀢𑀲𑁆𑀲 𑀳𑁂𑀢𑀼𑀫𑁆𑀳𑀺 𑀓𑀭𑀡𑀯𑀘𑀦𑁂𑀦 𑀅𑀢𑁆𑀣𑀫𑀸𑀳 ‘‘𑀯𑀺𑀦𑀬𑁂𑀦𑀸’’𑀢𑀺. 𑀢𑀣𑀸 ‘‘𑀲𑀫𑀢𑀺𑀓𑁆𑀓𑀫𑀸’’𑀢𑀺 𑀏𑀢𑁆𑀣𑀸𑀧𑀺. 𑀧𑀭𑀫𑀧𑀭𑀺𑀲𑀼𑀤𑁆𑀥𑀁 𑀲𑀁𑀓𑀺𑀮𑁂𑀲𑀲𑀫𑀼𑀘𑁆𑀙𑀺𑀦𑁆𑀤𑀦𑀢𑁄. 𑀆𑀭𑀤𑁆𑀥𑀯𑀻𑀭𑀺𑀬𑀦𑁆𑀢𑀺 𑀲𑀫𑁆𑀪𑀸𑀯𑀺𑀢𑀯𑀻𑀭𑀺𑀬𑀁. 𑀲𑀫𑁆𑀪𑀸𑀯𑀦𑀜𑁆𑀘𑀲𑁆𑀲 𑀧𑀕𑁆𑀕𑀡𑁆𑀳𑀦𑀁 𑀧𑀭𑀺𑀧𑀽𑀭𑀡𑀜𑁆𑀘𑀸𑀢𑀺 𑀆𑀳 ‘‘𑀧𑀕𑁆𑀕𑀳𑀺𑀢𑀯𑀻𑀭𑀺𑀬𑀁 𑀧𑀭𑀺𑀧𑀼𑀡𑁆𑀡𑀯𑀻𑀭𑀺𑀬’’𑀦𑁆𑀢𑀺.

𑀉𑀧𑀝𑁆𑀞𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀓𑀲𑁆𑀲𑀧𑀕𑁄𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁨𑁩. 𑀙𑁂𑀢𑀦𑁆𑀢𑀺 𑀫𑀺𑀕𑀸𑀦𑀁 𑀚𑀻𑀯𑀺𑀢𑀁 𑀙𑁂𑀢𑀁. 𑀢𑁂𑀦𑀸𑀳 ‘‘𑀫𑀺𑀕𑀮𑀼𑀤𑁆𑀤𑀓’’𑀦𑁆𑀢𑀺. 𑀭𑁄𑀳𑀺𑀢𑀫𑀺𑀕𑀦𑁆𑀢𑀺 𑀮𑁄𑀳𑀺𑀢𑀯𑀡𑁆𑀡𑀁 𑀔𑀼𑀤𑁆𑀤𑀓𑀫𑀺𑀕𑀁, ‘‘𑀫𑀳𑀸𑀭𑁄𑀳𑀺𑀢𑀫𑀺𑀕’’𑀦𑁆𑀢𑀺 𑀓𑁂𑀘𑀺. 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀢𑀲𑁆𑀲 𑀚𑀦𑀧𑀤𑀲𑁆𑀲 𑀲𑀼𑀮𑀪𑀪𑀺𑀓𑁆𑀔𑀢𑀸𑀬 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀯𑀺𑀳𑀭𑀢𑀻𑀢𑀺 𑀇𑀫𑀫𑀢𑁆𑀣𑀁 𑀲𑀦𑁆𑀥𑀸𑀬 ‘‘𑀧𑀞𑀫𑀲𑀼𑀢𑁆𑀢𑁂 𑀯𑀼𑀢𑁆𑀢𑀦𑀬𑁂𑀦𑁂𑀯𑀸’’𑀢𑀺 𑀯𑀼𑀢𑁆𑀢𑀁. 𑀅𑀬𑀁 𑀧𑀦 𑀣𑁂𑀭𑁄 𑀧𑀜𑁆𑀘𑀸𑀪𑀺𑀜𑁆𑀜𑁄 𑀯𑀺𑀧𑀲𑁆𑀲𑀦𑀸𑀓𑀫𑁆𑀫𑀺𑀓𑁄. 𑀞𑀢𑁆𑀯𑀸𑀢𑀺 𑀧𑀤𑀸𑀦𑀼𑀩𑀦𑁆𑀥𑀦𑀯𑀲𑁂𑀦 𑀕𑀫𑀦𑀁 𑀉𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀣𑁂𑀭𑀲𑁆𑀲 𑀆𑀲𑀦𑁆𑀦𑀝𑁆𑀞𑀸𑀦𑁂 𑀞𑀢𑁆𑀯𑀸. 𑀢𑀲𑁆𑀲 𑀯𑀘𑀦𑀁 𑀲𑁄𑀢𑀼𑀁 𑀆𑀭𑀤𑁆𑀥𑁄. 𑀅𑀗𑁆𑀕𑀼𑀝𑁆𑀞𑀓𑀁 𑀚𑀸𑀮𑀸𑀧𑁂𑀲𑀻𑀢𑀺 𑀅𑀥𑀺𑀝𑁆𑀞𑀸𑀦𑀩𑀮𑁂𑀦 𑀤𑀡𑁆𑀟𑀤𑀻𑀧𑀺𑀓𑀁 𑀯𑀺𑀬 𑀅𑀢𑁆𑀢𑀦𑁄 𑀅𑀗𑁆𑀕𑀼𑀝𑁆𑀞𑀓𑀁 𑀚𑀸𑀮𑀸𑀧𑁂𑀲𑀺. 𑀅𑀓𑁆𑀔𑀻𑀳𑀺𑀧𑀺 𑀧𑀲𑁆𑀲𑀢𑀺 𑀅𑀗𑁆𑀕𑀼𑀝𑁆𑀞𑀓𑀁 𑀚𑀸𑀮𑀫𑀸𑀦𑀁. 𑀓𑀡𑁆𑀡𑁂𑀳𑀺𑀧𑀺 𑀲𑀼𑀡𑀸𑀢𑀺 𑀢𑁂𑀦 𑀯𑀼𑀘𑁆𑀘𑀫𑀸𑀦𑀁 𑀥𑀫𑁆𑀫𑀁 𑀏𑀓𑀤𑁂𑀲𑁂𑀦. 𑀘𑀺𑀢𑁆𑀢𑀁 𑀧𑀦𑀲𑁆𑀲 𑀥𑀸𑀯𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀢𑀲𑁆𑀲𑀧𑀻𑀢𑀺 𑀮𑀼𑀤𑁆𑀤𑀓𑀲𑁆𑀲𑀧𑀺.

𑀅𑀧𑁆𑀧𑀧𑀜𑁆𑀜𑀦𑁆𑀢𑀺 𑀏𑀢𑁆𑀣 𑀅𑀧𑁆𑀧-𑀲𑀤𑁆𑀤𑁄 ‘‘𑀅𑀧𑁆𑀧𑀳𑀭𑀺𑀢𑁂’’𑀢𑀺𑀆𑀤𑀻𑀲𑀼 𑀯𑀺𑀬 𑀅𑀪𑀸𑀯𑀢𑁆𑀣𑁄𑀢𑀺 𑀆𑀳 ‘‘𑀦𑀺𑀧𑁆𑀧𑀜𑁆𑀜’’𑀦𑁆𑀢𑀺. 𑀓𑀸𑀭𑀡𑀚𑀸𑀦𑀦𑀲𑀫𑀢𑁆𑀣𑁂𑀦𑀸𑀢𑀺 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀲𑀢𑁆𑀢𑀸𑀦𑀁 𑀲𑀼𑀔𑀁, 𑀇𑀫𑀺𑀦𑀸 𑀤𑀼𑀓𑁆𑀔𑀦𑁆𑀢𑀺 𑀏𑀯𑀁 𑀲𑀫𑀸𑀘𑀭𑀫𑀸𑀦𑁂𑀦 𑀓𑀸𑀭𑀡𑀁 𑀚𑀸𑀦𑀺𑀢𑀼𑀁 𑀲𑀫𑀢𑁆𑀣𑁂𑀦 𑀓𑀫𑁆𑀫𑀲𑁆𑀲𑀓𑀢𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑁂𑀦𑀸𑀢𑀺 𑀅𑀢𑁆𑀣𑁄. 𑀲𑀼𑀡𑀸𑀢𑀻𑀢𑀺 𑀓𑁂𑀯𑀮𑀁 𑀲𑀯𑀦𑀫𑀢𑁆𑀢𑀯𑀲𑁂𑀦 𑀲𑀼𑀡𑀸𑀢𑀺, 𑀦 𑀢𑀤𑀢𑁆𑀣𑀯𑀲𑁂𑀦. 𑀢𑁂𑀦𑀸𑀳 ‘‘𑀅𑀢𑁆𑀣𑀫𑀲𑁆𑀲 𑀦 𑀚𑀸𑀦𑀸𑀢𑀻’’𑀢𑀺. 𑀓𑀸𑀭𑀡𑀭𑀽𑀧𑀸𑀦𑀻𑀢𑀺 𑀲𑀪𑀸𑀯𑀓𑀸𑀭𑀡𑀸𑀦𑀺. 𑀓𑀺𑀁 𑀫𑁂 𑀇𑀫𑀺𑀦𑀸𑀢𑀺? ‘‘𑀇𑀤𑀁 𑀧𑀧𑀜𑁆𑀘’’𑀦𑁆𑀢𑀺 𑀧𑀳𑀸𑀬. 𑀯𑀻𑀭𑀺𑀬𑀁 𑀧𑀕𑁆𑀕𑀬𑁆𑀳𑀸𑀢𑀺 𑀘𑀢𑀼𑀩𑁆𑀩𑀺𑀥𑀁 𑀲𑀫𑁆𑀫𑀧𑁆𑀧𑀥𑀸𑀦𑀁 𑀯𑀻𑀭𑀺𑀬𑀁 𑀧𑀕𑁆𑀕𑀡𑁆𑀳𑀺𑀢𑁆𑀯𑀸.

𑀓𑀲𑁆𑀲𑀧𑀕𑁄𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀲𑀫𑁆𑀩𑀳𑀼𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁨𑁪. 𑀲𑀫𑁆𑀩𑀳𑀼𑀮𑀸𑀢𑀺 𑀲𑀼𑀢𑁆𑀢𑀦𑁆𑀢𑀦𑀬𑁂𑀦 𑀲𑀫𑁆𑀩𑀳𑀼𑀮𑀸. 𑀲𑀼𑀢𑁆𑀢𑀦𑁆𑀢𑁂 𑀲𑀚𑁆𑀛𑀸𑀬𑀺𑀁𑀲𑀽𑀢𑀺 𑀲𑀼𑀢𑁆𑀢𑀦𑁆𑀢𑀺𑀓𑀸. 𑀯𑀺𑀦𑀬𑀁 𑀥𑀸𑀭𑁂𑀦𑁆𑀢𑀻𑀢𑀺 𑀯𑀺𑀦𑀬𑀥𑀭𑀸. 𑀬𑀼𑀜𑁆𑀚𑀦𑁆𑀢𑀻𑀢𑀺 𑀯𑀸𑀲𑀥𑀼𑀭𑁂 𑀬𑁄𑀕𑀁 𑀓𑀭𑁄𑀦𑁆𑀢𑀺. 𑀖𑀝𑁂𑀦𑁆𑀢𑀻𑀢𑀺 𑀢𑀢𑁆𑀣 𑀯𑀸𑀬𑀸𑀫𑀁 𑀓𑀭𑁄𑀦𑁆𑀢𑀺. 𑀓𑀭𑁄𑀦𑁆𑀢𑀸𑀦𑀁𑀬𑁂𑀯 𑀅𑀭𑀼𑀡𑁄 𑀉𑀕𑁆𑀕𑀘𑁆𑀙𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑀓𑁄𑀫𑁂𑀢𑀺 𑀓𑀺𑀁 𑀇𑀫𑁂? 𑀢𑁂𑀦𑀸𑀳 ‘‘𑀓𑀳𑀁 𑀇𑀫𑁂’’𑀢𑀺? 𑀯𑀚𑁆𑀚𑀺𑀪𑀽𑀫𑀺𑀁 𑀯𑀚𑁆𑀚𑀺𑀭𑀝𑁆𑀞𑀁 𑀕𑀢𑀸𑀢𑀺 𑀯𑀚𑁆𑀚𑀺𑀪𑀽𑀫𑀺𑀬𑀸. 𑀢𑁂𑀦𑀸𑀳 ‘‘𑀯𑀚𑁆𑀚𑀺𑀭𑀝𑁆𑀞𑀸𑀪𑀺𑀫𑀼𑀔𑀸 𑀕𑀢𑀸’’𑀢𑀺. 𑀦𑀢𑁆𑀣𑀺 𑀏𑀢𑁂𑀲𑀁 𑀦𑀺𑀓𑁂𑀪𑀁 𑀦𑀺𑀩𑀤𑁆𑀥𑀦𑀺𑀯𑀸𑀲𑀝𑁆𑀞𑀸𑀦𑀦𑁆𑀢𑀺 𑀅𑀦𑀺𑀓𑁂𑀢𑀸 𑀢𑁂𑀦𑀸𑀳 ‘‘𑀅𑀕𑁂𑀳𑀸’’𑀢𑀺. 𑀉𑀢𑀼 𑀏𑀯 𑀲𑀧𑁆𑀧𑀸𑀬𑀁, 𑀉𑀢𑀼𑀯𑀲𑁂𑀦 𑀯𑀸 𑀓𑀸𑀬𑀘𑀺𑀢𑁆𑀢𑀸𑀦𑀁 𑀓𑀮𑁆𑀮𑀢𑁆𑀢𑀸 𑀲𑀧𑁆𑀧𑀸𑀬𑀁. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺.

𑀲𑀫𑁆𑀩𑀳𑀼𑀮𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀆𑀦𑀦𑁆𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁨𑁫. 𑀅𑀢𑀺𑀯𑁂𑀮𑀦𑁆𑀢𑀺 𑀅𑀢𑀺𑀩𑀳𑀼𑀓𑀸𑀮𑀁. 𑀪𑀺𑀓𑁆𑀔𑀼𑀦𑀸 𑀦𑀸𑀫 𑀉𑀧𑀕𑀢𑀸𑀦𑀁 𑀉𑀧𑀦𑀺𑀲𑀺𑀦𑁆𑀦𑀓𑀣𑀸𑀫𑀢𑁆𑀢𑀁 𑀯𑀢𑁆𑀯𑀸 𑀕𑀦𑁆𑀣𑀥𑀼𑀭𑁂𑀳𑀺 𑀯𑀸𑀲𑀥𑀼𑀭𑁂𑀳𑀺 𑀯𑀸 𑀬𑀼𑀢𑁆𑀢𑀧𑀬𑀼𑀢𑁆𑀢𑀘𑀺𑀢𑁆𑀢𑁂𑀦 𑀪𑀯𑀺𑀢𑀩𑁆𑀩𑀁, 𑀦𑀸𑀢𑀺𑀯𑁂𑀮𑀁 𑀢𑁂𑀲𑀁 𑀲𑀜𑁆𑀜𑀢𑁆𑀢𑀺𑀩𑀳𑀼𑀮𑁂𑀦. 𑀣𑁂𑀭𑁄 𑀧𑀦 𑀢𑀤𑀸 𑀓𑁂𑀦𑀘𑀺 𑀓𑀸𑀭𑀡𑁂𑀦 𑀩𑀳𑀼𑀯𑁂𑀮𑀁 𑀕𑀺𑀳𑀺𑀲𑀜𑁆𑀜𑀢𑁆𑀢𑀺𑀩𑀳𑀼𑀮𑁄 𑀅𑀳𑁄𑀲𑀺, 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀅𑀢𑀺𑀯𑁂𑀮’’𑀦𑁆𑀢𑀺𑀆𑀤𑀺. 𑀇𑀤𑀸𑀦𑀺 𑀢𑀫𑀢𑁆𑀣𑀁 𑀯𑀺𑀪𑀸𑀯𑁂𑀢𑀼𑀁 ‘‘𑀪𑀕𑀯𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀦𑁆𑀢𑀺 𑀢𑀁 𑀢𑀸𑀤𑀺𑀲𑀁 𑀲𑀜𑁆𑀜𑀸𑀧𑀦𑀁 𑀲𑀦𑁆𑀥𑀸𑀬 𑀏𑀢𑀁 ‘‘𑀅𑀢𑀺𑀯𑁂𑀮𑀁 𑀕𑀺𑀳𑀺𑀲𑀜𑁆𑀜𑀢𑁆𑀢𑀺𑀩𑀳𑀼𑀮𑁄’’𑀢𑀺 𑀯𑀘𑀦𑀁 𑀯𑀼𑀢𑁆𑀢𑀁. 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀓𑀣𑀁 𑀲𑀼𑀢𑁆𑀯𑀸𑀢𑀺 𑀲𑀗𑁆𑀖𑀲𑁆𑀲 𑀫𑀚𑁆𑀛𑁂 𑀦𑀺𑀲𑀻𑀤𑀺𑀢𑁆𑀯𑀸 𑀣𑁂𑀭𑁂𑀦 𑀓𑀣𑀺𑀢𑀢𑁆𑀢𑀸 𑀯𑀼𑀢𑁆𑀢𑀁. 𑀲𑀢𑁆𑀣𑀼𑀲𑀸𑀲𑀦𑀦𑁆𑀢𑀺 𑀧𑀺𑀝𑀓𑀢𑁆𑀢𑀬𑀁 𑀯𑀤𑀢𑀺.

𑀧𑀲𑀓𑁆𑀓𑀺𑀬𑀸𑀢𑀺 𑀉𑀧𑀲𑀓𑁆𑀓𑀺𑀢𑁆𑀯𑀸 𑀕𑀦𑁆𑀢𑁆𑀯𑀸. 𑀢𑀁 𑀧𑀦 𑀢𑀢𑁆𑀣 𑀅𑀚𑁆𑀛𑁄𑀕𑀸𑀳𑀦𑀁 𑀳𑁄𑀢𑀻𑀢𑀺 𑀆𑀳 ‘‘𑀧𑀯𑀺𑀲𑀺𑀢𑁆𑀯𑀸’’𑀢𑀺. 𑀲𑀗𑁆𑀔𑀸𑀭𑀤𑀼𑀓𑁆𑀔𑀢𑁄 𑀦𑀺𑀩𑁆𑀩𑀺𑀦𑁆𑀦𑀳𑀤𑀬𑀲𑁆𑀲 𑀲𑀩𑁆𑀩𑀲𑀗𑁆𑀔𑀸𑀭𑀯𑀺𑀦𑀺𑀲𑁆𑀲𑀝𑀁 𑀦𑀺𑀩𑁆𑀩𑀸𑀦𑀁 𑀬𑀸𑀣𑀸𑀯𑀢𑁄 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀲𑀫𑁆𑀫𑀤𑁂𑀯 𑀲𑀫𑀲𑁆𑀲𑀸𑀲𑀓𑀭𑀁 𑀳𑀼𑀢𑁆𑀯𑀸 𑀉𑀧𑀝𑁆𑀞𑀳𑀦𑁆𑀢𑀁 𑀢𑀁 𑀉𑀧𑀭𑀺 𑀅𑀥𑀺𑀕𑀫𑀸𑀬 𑀉𑀲𑁆𑀲𑀼𑀓𑁆𑀓𑀁 𑀓𑀭𑁄𑀦𑁆𑀢𑁄 𑀦𑀺𑀩𑁆𑀩𑀸𑀦𑀁 𑀳𑀤𑀬𑁂 𑀦𑀺𑀓𑁆𑀔𑀺𑀧𑀢𑀺 𑀦𑀸𑀫𑀸𑀢𑀺 𑀆𑀳 𑁋 ‘‘𑀦𑀺𑀩𑁆𑀩𑀸𑀦𑀁…𑀧𑁂… 𑀑𑀧𑁂𑀢𑀺 𑀦𑀸𑀫𑀸’’𑀢𑀺. 𑀦𑀺𑀩𑁆𑀩𑀸𑀦𑀁…𑀧𑁂… 𑀆𑀭𑀫𑁆𑀫𑀡𑀢𑁄 𑀑𑀧𑁂𑀢𑀺 𑀦𑀸𑀫𑀸𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑁄. 𑀅𑀢𑁆𑀣𑀯𑀺𑀭𑀳𑀺𑀢𑀸 ‘‘𑀩𑀺𑀴𑀺𑀩𑀺𑀴𑀻’’𑀢𑀺 𑀧𑀯𑀢𑁆𑀢𑀓𑀺𑀭𑀺𑀬𑀸 𑀩𑀺𑀴𑀺𑀓𑀸, 𑀅𑀬𑀁 𑀧𑀦 𑀕𑀺𑀳𑀺𑀲𑀜𑁆𑀜𑀢𑁆𑀢𑀺𑀓𑀣𑀸 𑀣𑁂𑀭𑀲𑁆𑀲 𑀅𑀢𑁆𑀢𑀦𑁄 𑀲𑀸𑀫𑀜𑁆𑀜𑀢𑁆𑀣𑀅𑀲𑀸𑀥𑀦𑀢𑁄 𑀤𑁂𑀯𑀢𑀸𑀬 𑀩𑀺𑀴𑀺𑀓𑀸 𑀯𑀺𑀬𑀸𑀢𑀺 𑀩𑀺𑀴𑀺𑀩𑀺𑀴𑀺𑀓𑀸𑀢𑀺 𑀯𑀼𑀢𑁆𑀢𑀸.

𑀆𑀦𑀦𑁆𑀤𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀅𑀦𑀼𑀭𑀼𑀤𑁆𑀥𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁨𑁬. 𑀅𑀦𑀦𑁆𑀢𑀭𑁂 𑀅𑀢𑁆𑀢𑀪𑀸𑀯𑁂𑀢𑀺 𑀅𑀢𑀻𑀢𑀸𑀦𑀦𑁆𑀢𑀭𑁂 𑀤𑁂𑀯𑀢𑁆𑀢𑀪𑀸𑀯𑁂. 𑀣𑁂𑀭𑁄 𑀳𑀺 𑀢𑀸𑀯𑀢𑀺𑀁𑀲𑀤𑁂𑀯𑀮𑁄𑀓𑀸 𑀘𑀯𑀺𑀢𑁆𑀯𑀸 𑀇𑀥𑀽𑀧𑀧𑀦𑁆𑀦𑁄. 𑀅𑀕𑁆𑀕𑀫𑀳𑁂𑀲𑀻𑀢𑀺 𑀓𑀸𑀘𑀺 𑀧𑀭𑀺𑀘𑀸𑀭𑀺𑀓𑀸 𑀤𑁂𑀯𑀥𑀻𑀢𑀸 𑀘𑀺𑀢𑁆𑀢𑀧𑀡𑀺𑀥𑀸𑀦𑀫𑀢𑁆𑀢𑁂𑀦 𑀇𑀤𑀸𑀦𑀺𑀧𑀺 𑀤𑁂𑀯𑀓𑀸𑀬𑁂 𑀪𑀯𑀺𑀲𑁆𑀲𑀢𑀺 𑀉𑀧𑀘𑀺𑀢𑀓𑀼𑀲𑀮𑀥𑀫𑁆𑀫𑀢𑁆𑀢𑀸𑀢𑀺 𑀫𑀜𑁆𑀜𑀫𑀸𑀦𑀸 𑀢𑀲𑁆𑀫𑀺𑀁 𑀯𑀢𑁆𑀢𑀫𑀸𑀦𑀁 𑀯𑀺𑀬 𑀓𑀣𑁂𑀦𑁆𑀢𑀻 ‘‘𑀲𑁄𑀪𑀲𑀻’’𑀢𑀺 𑀆𑀳. 𑀏𑀯𑀁 𑀅𑀢𑀻𑀢𑀫𑁆𑀧𑀺𑀲𑁆𑀲 𑀤𑀺𑀩𑁆𑀩𑀲𑁄𑀢𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀯𑀺𑀬 𑀫𑀜𑁆𑀜𑁂𑀬𑁆𑀬 𑀦𑀸𑀢𑀺𑀘𑀺𑀭𑀓𑀸𑀮𑀢𑁆𑀢𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀼𑀩𑁆𑀩𑁂𑀧𑀺 𑀲𑁄𑀪𑀲𑀻’’𑀢𑀺 𑀆𑀳. 𑀲𑀼𑀕𑀢𑀺𑀦𑀺𑀭𑀬𑀸𑀤𑀺𑀤𑀼𑀕𑁆𑀕𑀢𑀺𑀬𑀸 𑀯𑀲𑁂𑀦 𑀤𑀼𑀕𑁆𑀕𑀢𑀸 𑀏𑀢𑀭𑀳𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀝𑀺𑀧𑀢𑁆𑀢𑀺𑀤𑀼𑀕𑁆𑀕𑀢𑀺𑀬𑀸 𑀓𑀸𑀫𑁂𑀲𑀼 𑀲𑀫𑁆𑀫𑀼𑀘𑁆𑀙𑀺𑀢𑀪𑀸𑀯𑀢𑁄.

𑀧𑀢𑀺𑀝𑁆𑀞𑀳𑀦𑁆𑀢𑁄𑀢𑀺 𑀦𑀺𑀯𑀺𑀲𑀦𑁆𑀢𑁄. 𑀅𑀝𑁆𑀞𑀳𑀺 𑀓𑀸𑀭𑀡𑁂𑀳𑀻𑀢𑀺 𑀘𑀺𑀭𑀓𑀸𑀮𑀧𑀭𑀺𑀪𑀸𑀯𑀦𑀸𑀬 𑀯𑀺𑀭𑀼𑀴𑁆𑀳𑀫𑀽𑀮𑁂𑀳𑀺 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀸𑀤𑀺𑀧𑀘𑁆𑀘𑀬𑀫𑀽𑀮𑀓𑁂𑀳𑀺 𑀯𑀼𑀘𑁆𑀘𑀫𑀸𑀦𑁂𑀳𑀺 𑀅𑀝𑁆𑀞𑀳𑀺 𑀓𑀸𑀭𑀡𑁂𑀳𑀺. 𑀭𑀢𑁆𑀢𑁄 𑀭𑀸𑀕𑀯𑀲𑁂𑀦𑀸𑀢𑀺 𑀲𑀪𑀸𑀯𑀢𑁄 𑀲𑀗𑁆𑀓𑀧𑁆𑀧𑀢𑁄 𑀘 𑀬𑀣𑀸𑀲𑀫𑀻𑀳𑀺𑀢𑁂 𑀇𑀝𑁆𑀞𑀸𑀓𑀸𑀭𑁂 𑀲𑀓𑁆𑀓𑀸𑀬𑁂 𑀲𑀜𑁆𑀚𑀸𑀢𑀭𑀸𑀕𑀯𑀲𑀸 𑀭𑀢𑁆𑀢𑁄 𑀕𑀺𑀤𑁆𑀥𑁄 𑀕𑀥𑀺𑀢𑁄. 𑀧𑀢𑀺𑀝𑁆𑀞𑀸𑀢𑀻𑀢𑀺 𑀑𑀭𑀼𑀬𑁆𑀳 𑀢𑀺𑀝𑁆𑀞𑀢𑀺. 𑀤𑀼𑀝𑁆𑀞𑁄 𑀤𑁄𑀲𑀯𑀲𑁂𑀦𑀸𑀢𑀺 𑀲𑀪𑀸𑀯𑀢𑁄 𑀲𑀗𑁆𑀓𑀧𑁆𑀧𑀢𑁄 𑀘 𑀬𑀣𑀸𑀲𑀫𑀻𑀳𑀺𑀢𑁂 𑀅𑀦𑀺𑀝𑁆𑀞𑀸𑀓𑀸𑀭𑁂 𑀲𑀓𑁆𑀓𑀸𑀬𑁂 𑀲𑀜𑁆𑀚𑀸𑀢𑀤𑁄𑀲𑀯𑀲𑁂𑀦 𑀤𑀼𑀝𑁆𑀞𑁄 𑀭𑀼𑀧𑀺𑀢𑀘𑀺𑀢𑁆𑀢𑁄. 𑀫𑀽𑀴𑁆𑀳𑁄 𑀫𑁄𑀳𑀯𑀲𑁂𑀦𑀸𑀢𑀺 𑀅𑀲𑀫𑀧𑁂𑀓𑁆𑀔𑀦𑁂𑀦 𑀫𑀽𑀴𑁆𑀳𑁄 𑀫𑀼𑀬𑁆𑀳𑀦𑀯𑀲𑁂𑀦. 𑀯𑀺𑀦𑀺𑀩𑀤𑁆𑀥𑁄𑀢𑀺 𑀅𑀳𑀁𑀓𑀸𑀭𑁂𑀦 𑀯𑀺𑀲𑁂𑀲𑀢𑁄 𑀦𑀺𑀩𑀦𑁆𑀥𑀦𑀢𑁄 𑀫𑀸𑀦𑀯𑀢𑁆𑀣𑀼𑀲𑁆𑀫𑀺𑀁 𑀩𑀦𑁆𑀥𑀺𑀢𑁄. 𑀫𑀸𑀦𑀯𑀲𑁂𑀦𑀸𑀢𑀺 𑀢𑁂𑀦 𑀢𑁂𑀦 𑀫𑀜𑁆𑀜𑀦𑀸𑀓𑀸𑀭𑁂𑀦. 𑀧𑀭𑀸𑀫𑀝𑁆𑀞𑁄𑀢𑀺 𑀥𑀫𑁆𑀫𑀲𑀪𑀸𑀯𑀁 𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀧𑀭𑀢𑁄 𑀆𑀫𑀝𑁆𑀞𑁄. 𑀤𑀺𑀝𑁆𑀞𑀺𑀯𑀲𑁂𑀦𑀸𑀢𑀺 𑀫𑀺𑀘𑁆𑀙𑀸𑀤𑀲𑁆𑀲𑀦𑀯𑀲𑁂𑀦. 𑀣𑀸𑀫𑀕𑀢𑁄𑀢𑀺 𑀭𑀸𑀕𑀸𑀤𑀺𑀓𑀺𑀮𑁂𑀲𑀯𑀲𑁂𑀦 𑀣𑀸𑀫𑀁 𑀣𑀺𑀭𑀪𑀸𑀯𑀁 𑀉𑀧𑀕𑀢𑁄. 𑀅𑀦𑀼𑀲𑀬𑀯𑀲𑁂𑀦𑀸𑀢𑀺 𑀫𑀕𑁆𑀕𑁂𑀦 𑀅𑀧𑁆𑀧𑀳𑀻𑀦𑀢𑀸𑀬 𑀅𑀦𑀼 𑀅𑀦𑀼 𑀲𑀦𑁆𑀢𑀸𑀦𑁂 𑀲𑀬𑀦𑀯𑀲𑁂𑀦. 𑀅𑀧𑁆𑀧𑀳𑀻𑀦𑀝𑁆𑀞𑁄 𑀳𑀺 𑀢𑁂𑀲𑀁 𑀅𑀦𑀼𑀲𑀬𑀝𑁆𑀞𑁄. 𑀅𑀦𑀺𑀝𑁆𑀞𑀗𑁆𑀕𑀢𑁄𑀢𑀺 𑀲𑀁𑀲𑀬𑀺𑀢𑁄. 𑀯𑀺𑀓𑁆𑀔𑁂𑀧𑀕𑀢𑁄𑀢𑀺 𑀯𑀺𑀓𑁆𑀔𑀺𑀢𑁆𑀢𑀪𑀸𑀯𑀁 𑀉𑀧𑀕𑀢𑁄. 𑀉𑀤𑁆𑀥𑀘𑁆𑀘𑀯𑀲𑁂𑀦𑀸𑀢𑀺 𑀘𑀺𑀢𑁆𑀢𑀲𑁆𑀲 𑀉𑀤𑁆𑀥𑀢𑀪𑀸𑀯𑀯𑀲𑁂𑀦. 𑀢𑀸𑀧𑀻𑀢𑀺 𑀢𑀸𑀧𑀺 𑀤𑁂𑀯𑀓𑀜𑁆𑀜𑀸𑀬𑁄. 𑀏𑀯𑀁 𑀧𑀢𑀺𑀝𑁆𑀞𑀺𑀢𑀸𑀯𑀸𑀢𑀺 𑀬𑀣𑀸𑀯𑀼𑀢𑁆𑀢𑀦𑀬𑁂𑀦 𑀭𑀢𑁆𑀢𑀪𑀸𑀯𑀸𑀤𑀺𑀦𑀸 𑀲𑀓𑁆𑀓𑀸𑀬𑀲𑁆𑀫𑀺𑀁 𑀧𑀢𑀺𑀝𑁆𑀞𑀺𑀢𑀸 𑀏𑀯. 𑀦𑀭𑀤𑁂𑀯𑀸𑀦𑀦𑁆𑀢𑀺 𑀧𑀼𑀭𑀺𑀲𑀪𑀽𑀢𑀤𑁂𑀯𑀸𑀦𑀁.

𑀧𑀝𑀺𑀕𑀦𑁆𑀢𑀼𑀦𑁆𑀢𑀺 𑀅𑀧𑁂𑀓𑁆𑀔𑀸𑀯𑀲𑁂𑀦 𑀢𑀢𑁄 𑀅𑀧𑀕𑀦𑁆𑀢𑀼𑀁 𑀅𑀧𑁂𑀓𑁆𑀔𑀁 𑀯𑀺𑀲𑁆𑀲𑀚𑁆𑀚𑁂𑀢𑀼𑀁. 𑀤𑀼𑀲𑁆𑀲𑀦𑁆𑀢𑀦𑁆𑀢𑀺 𑀤𑀲𑀦𑁆𑀢𑀁, ‘‘𑀯𑀢𑁆𑀣’’𑀦𑁆𑀢𑀺 𑀓𑁂𑀘𑀺. 𑀲𑀽𑀘𑀺𑀁 𑀬𑁄𑀚𑁂𑀢𑁆𑀯𑀸𑀢𑀺 𑀲𑀺𑀩𑁆𑀩𑀦𑀲𑀼𑀢𑁆𑀢𑁂𑀦 𑀲𑀽𑀘𑀺𑀁 𑀬𑁄𑀚𑁂𑀢𑁆𑀯𑀸 𑀧𑀸𑀲𑁂 𑀘 𑀧𑀯𑁂𑀲𑁂𑀢𑁆𑀯𑀸. 𑀫𑀦𑀸𑀧𑀓𑀸𑀬𑁂 𑀤𑁂𑀯𑀦𑀺𑀓𑀸𑀬𑁂 𑀚𑀸𑀢𑀸 𑀫𑀦𑀸𑀧𑀓𑀸𑀬𑀺𑀓𑀸. 𑀢𑁂𑀲𑀁 𑀧𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀫𑀦𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀫𑀚𑁆𑀚𑀦𑁆𑀢𑀺 𑀲𑀁𑀳𑀺𑀢𑀁. 𑀕𑀫𑀦𑀪𑀸𑀯𑀦𑁆𑀢𑀺 𑀕𑀫𑀦𑀚𑁆𑀛𑀸𑀲𑀬𑀁. 𑀯𑀺𑀓𑁆𑀔𑀻𑀡𑁄𑀢𑀺 𑀯𑀺𑀘𑁆𑀙𑀺𑀦𑁆𑀤𑀦𑀯𑀲𑁂𑀦 𑀔𑀻𑀡𑁄. 𑀤𑁂𑀯𑀢𑀸𑀦𑀁 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸𑀭𑁄𑀘𑀦𑁂 𑀤𑁄𑀲𑁄 𑀦𑀢𑁆𑀣𑀻𑀢𑀺 𑀢𑀸𑀲𑀁 𑀧𑀼𑀦 𑀅𑀦𑀸𑀕𑀫𑀦𑀢𑁆𑀣𑀁 𑀅𑀭𑀳𑀢𑁆𑀢𑀁 𑀩𑁆𑀬𑀸𑀓𑀸𑀲𑀺.

𑀅𑀦𑀼𑀭𑀼𑀤𑁆𑀥𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀦𑀸𑀕𑀤𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁨𑁭. 𑀅𑀢𑀺𑀓𑀸𑀮𑁂𑀦𑀸𑀢𑀺 𑀅𑀢𑀺𑀯𑀺𑀬 𑀧𑀼𑀩𑁆𑀩𑀡𑁆𑀳𑀓𑀸𑀮𑁂𑀦, 𑀓𑀸𑀮𑀲𑁆𑀲𑁂𑀯𑀸𑀢𑀺 𑀅𑀢𑁆𑀣𑁄. 𑀓𑁄𑀝𑀺𑀲𑀫𑁆𑀫𑀼𑀜𑁆𑀚𑀦𑀺𑀬𑀸𑀢𑀺 𑀲𑀫𑁆𑀫𑀼𑀜𑁆𑀚𑀦𑀺𑀓𑁄𑀝𑀺𑀬𑀸, 𑀲𑀫𑁆𑀫𑀼𑀜𑁆𑀚𑀦𑀺𑀬𑀸 𑀏𑀓𑀤𑁂𑀲𑁂𑀦𑁂𑀯𑀸𑀢𑀺 𑀅𑀢𑁆𑀣𑁄. 𑀇𑀫𑀺𑀦𑀸 𑀲𑀫𑁆𑀫𑀚𑁆𑀚𑀦𑁂 𑀅𑀫𑀦𑀸𑀧𑀓𑀸𑀭𑀺𑀢𑀁 𑀤𑀲𑁆𑀲𑁂𑀢𑀺. 𑀫𑀚𑁆𑀛𑀦𑁆𑀳𑀺𑀓𑁂 𑀯𑀻𑀢𑀺𑀯𑀢𑁆𑀢𑁂𑀢𑀺 𑀕𑀺𑀳𑀺𑀲𑀁𑀲𑀕𑁆𑀕𑀯𑀲𑁂𑀦 𑀓𑀸𑀮𑀁 𑀯𑀻𑀢𑀺𑀦𑀸𑀫𑁂𑀦𑁆𑀢𑁄 𑀫𑀚𑁆𑀛𑀦𑁆𑀳𑁂 𑀩𑀳𑀼𑀯𑀻𑀢𑀺𑀯𑀢𑁆𑀢𑁂. 𑀅𑀜𑁆𑀜𑁂𑀳𑀺 𑀪𑀺𑀓𑁆𑀔𑀽𑀳𑀻𑀢𑀺 𑀦𑀸𑀢𑀺𑀓𑀸𑀮𑀁 𑀧𑀯𑀺𑀝𑁆𑀞𑁂𑀳𑀺. 𑀦𑀺𑀲𑁆𑀲𑀓𑁆𑀓𑀯𑀘𑀦𑀜𑁆𑀘𑁂𑀢𑀁. 𑀪𑀸𑀬𑀸𑀫𑀺 𑀦𑀸𑀕𑀤𑀢𑁆𑀢𑀦𑁆𑀢𑀺 𑀢𑀲𑁆𑀲 𑀧𑀝𑀺𑀧𑀢𑁆𑀢𑀺𑀁 𑀪𑀸𑀬𑀺𑀢𑀩𑁆𑀩𑀁 𑀓𑀢𑁆𑀯𑀸 𑀤𑁂𑀯𑀢𑀸 𑀯𑀤𑀦𑁆𑀢𑀻 𑀧𑀝𑀺𑀧𑀢𑁆𑀢𑀺𑀬𑀁 𑀦𑀺𑀬𑁄𑀚𑁂𑀢𑀺. 𑀲𑀼𑀧𑁆𑀧𑀕𑀩𑁆𑀪𑀦𑁆𑀢𑀺 𑀓𑀸𑀬𑀧𑀸𑀕𑀩𑁆𑀩𑀺𑀬𑀸𑀤𑀻𑀳𑀺 𑀅𑀢𑀺𑀯𑀺𑀬 𑀲𑀫𑀦𑁆𑀦𑀸𑀕𑀢𑀁.

𑀦𑀸𑀕𑀤𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀓𑀼𑀮𑀖𑀭𑀡𑀻𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁨𑁮. 𑀑𑀕𑀸𑀳𑀧𑁆𑀧𑀢𑁆𑀢𑁄𑀢𑀺 𑀯𑀺𑀲𑁆𑀲𑀸𑀲𑀯𑀲𑁂𑀦 𑀅𑀦𑀼𑀧𑁆𑀧𑀯𑁂𑀲𑀁 𑀧𑀢𑁆𑀢𑁄. 𑀅𑀜𑁆𑀜𑀢𑀭𑀁 𑀓𑀼𑀮𑀦𑁆𑀢𑀺 𑀢𑀲𑁆𑀫𑀺𑀁 𑀓𑀼𑀮𑁂 𑀚𑀸𑀬𑀫𑁆𑀧𑀢𑀺𑀁 𑀲𑀦𑁆𑀥𑀸𑀬 𑀯𑀤𑀢𑀺. ‘‘𑀩𑀳𑀽𑀧𑀓𑀸𑀭𑀁 𑀫𑁂 𑀏𑀢𑀁 𑀓𑀼𑀮𑀁 𑀘𑀺𑀭𑀁 𑀲𑀧𑁆𑀧𑀸𑀬𑀸𑀳𑀸𑀭𑀤𑀸𑀦𑀸𑀤𑀺𑀦𑀸; 𑀢𑀲𑁆𑀫𑀸 𑀇𑀥𑀸𑀳𑀁 𑀅𑀕𑁆𑀕𑀤𑀓𑁆𑀔𑀺𑀡𑁂𑀬𑁆𑀬𑁄 𑀚𑀸𑀢𑁄; 𑀇𑀫𑁂𑀲𑀁𑀬𑁂𑀯 𑀤𑁂𑀬𑁆𑀬𑀥𑀫𑁆𑀫𑀧𑀝𑀺𑀕𑁆𑀕𑀡𑁆𑀳𑀦𑁂𑀦 𑀧𑀼𑀜𑁆𑀜𑀁 𑀯𑀟𑁆𑀠𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀲𑀺. 𑀢𑁂𑀦𑀸𑀳 ‘‘𑀅𑀜𑁆𑀜𑀢𑁆𑀣 𑀕𑀦𑁆𑀢𑁆𑀯𑀸 𑀓𑀺𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺𑀆𑀤𑀺. 𑀲𑀸𑀢𑀺 𑀤𑁂𑀯𑀢𑀸. 𑀉𑀪𑁄𑀧𑁂𑀢𑁂𑀢𑀺 𑀢𑀁 𑀪𑀺𑀓𑁆𑀔𑀼𑀜𑁆𑀘 𑀖𑀭𑀡𑀺𑀜𑁆𑀘 𑀲𑀦𑁆𑀥𑀸𑀬 𑀯𑀤𑀢𑀺. 𑀧𑀝𑀺𑀕𑀸𑀥𑀧𑁆𑀧𑀢𑁆𑀢𑀸𑀢𑀺 𑀧𑀝𑀺𑀕𑀸𑀥𑀁 𑀧𑀢𑁆𑀢𑀸 𑀅𑀜𑁆𑀜𑀫𑀜𑁆𑀜𑀲𑁆𑀫𑀺𑀁 𑀧𑀢𑀺𑀝𑁆𑀞𑀺𑀢𑀯𑀺𑀲𑁆𑀲𑀸𑀲𑁂𑀦.

𑀯𑀺𑀲𑁆𑀲𑀫𑀧𑁆𑀧𑀢𑁆𑀢𑀺𑀯𑀲𑁂𑀦 𑀲𑀦𑁆𑀢𑀺𑀝𑁆𑀞𑀦𑁆𑀢𑀺 𑀏𑀢𑁆𑀣𑀸𑀢𑀺 𑀲𑀡𑁆𑀞𑀸𑀦𑀁, 𑀯𑀺𑀲𑁆𑀲𑀫𑀦𑀝𑁆𑀞𑀸𑀦𑀁. 𑀲𑀫𑀸𑀕𑀦𑁆𑀢𑁆𑀯𑀸𑀢𑀺 𑀲𑀦𑁆𑀦𑀺𑀧𑀢𑀺𑀢𑁆𑀯𑀸. 𑀧𑀝𑀺𑀜𑁆𑀜𑀽𑀤𑀸𑀳𑀭𑀡𑁂𑀳𑀺 𑀫𑀦𑁆𑀢𑀬𑀢𑀻𑀢𑀺 𑀫𑀦𑁆𑀢𑀦𑀁, 𑀜𑀸𑀧𑀓𑀁 𑀓𑀸𑀭𑀡𑀁. 𑀧𑀝𑀺𑀮𑁄𑀫𑀲𑀤𑁆𑀤𑀸𑀢𑀺 𑀧𑀝𑀺𑀮𑁄𑀫𑀪𑀸𑀯𑁂𑀦 𑀧𑀢𑀺𑀢𑀢𑁆𑀢𑀸 𑀅𑀲𑀘𑁆𑀘𑀯𑀺𑀪𑀸𑀯𑀦𑀸 𑀧𑀝𑀺𑀓𑀽𑀮𑀲𑀤𑁆𑀤𑀸. 𑀢𑁂𑀦 𑀓𑀸𑀭𑀡𑁂𑀦𑀸𑀢𑀺 𑀢𑁂𑀦 𑀓𑀸𑀭𑀡𑀧𑀝𑀺𑀭𑀽𑀧𑀓𑁂𑀦 𑀫𑀺𑀘𑁆𑀙𑀸𑀯𑀘𑀦𑁂𑀦. 𑀦 𑀫𑀗𑁆𑀓𑀼𑀳𑁄𑀢𑀩𑁆𑀩𑀁 𑀅𑀓𑀸𑀭𑀓𑀪𑀸𑀯𑀢𑁄. 𑀲𑀤𑁆𑀤𑁂𑀦 𑀧𑀭𑀺𑀢𑀲𑁆𑀲𑀢𑀻𑀢𑀺 𑀧𑀭𑁂𑀳𑀺 𑀅𑀢𑁆𑀢𑀦𑀺 𑀧𑀬𑀼𑀢𑁆𑀢𑀫𑀺𑀘𑁆𑀙𑀸𑀲𑀤𑁆𑀤𑀫𑀢𑁆𑀢𑁂𑀦 𑀧𑀭𑀺𑀢𑀲𑁆𑀲𑀦𑀲𑀻𑀮𑁄. 𑀯𑀢𑀁 𑀦 𑀲𑀫𑁆𑀧𑀚𑁆𑀚𑀢𑀻𑀢𑀺 𑀬𑀣𑀸𑀲𑀫𑀸𑀤𑀺𑀦𑁆𑀦𑀯𑀢𑀁 𑀮𑀳𑀼𑀘𑀺𑀢𑁆𑀢𑀢𑀸𑀬 𑀦 𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀢𑀺. 𑀲𑀫𑁆𑀧𑀦𑁆𑀦𑀯𑀢𑁄𑀢𑀺 𑀧𑀭𑀺𑀧𑀼𑀡𑁆𑀡𑀲𑀻𑀮𑀸𑀤𑀺𑀯𑀢𑀕𑀼𑀡𑁄

𑀓𑀼𑀮𑀖𑀭𑀡𑀻𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀯𑀚𑁆𑀚𑀺𑀧𑀼𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁨𑁯. 𑀯𑀚𑁆𑀚𑀺𑀭𑀝𑁆𑀞𑁂 𑀭𑀸𑀚𑀧𑀼𑀢𑁆𑀢𑁄𑀢𑀺 𑀯𑀚𑁆𑀚𑀺𑀭𑀝𑁆𑀞𑁂 𑀚𑀸𑀢𑀲𑀁𑀯𑀤𑁆𑀥𑁄 𑀯𑀚𑁆𑀚𑀺𑀭𑀸𑀚𑀧𑀼𑀢𑁆𑀢𑁄. 𑀲𑀩𑁆𑀩𑀭𑀢𑁆𑀢𑀺𑀘𑀸𑀭𑁄𑀢𑀺 𑀙𑀡𑀲𑀫𑁆𑀧𑀢𑁆𑀢𑀺𑀬𑀸 𑀇𑀢𑁄 𑀘𑀺𑀢𑁄 𑀘𑀭𑀦𑁆𑀢𑁂𑀳𑀺 𑀅𑀦𑀼𑀪𑀯𑀺𑀢𑀩𑁆𑀩𑀦𑀓𑁆𑀔𑀢𑁆𑀢𑀫𑀳𑁄. 𑀢𑁂𑀦𑀸𑀳 ‘‘𑀓𑀢𑁆𑀢𑀺𑀓𑀦𑀓𑁆𑀔𑀢𑁆𑀢𑀁 𑀖𑁄𑀲𑁂𑀢𑁆𑀯𑀸’’ 𑀢𑀺𑀆𑀤𑀺. 𑀏𑀓𑀸𑀩𑀤𑁆𑀥𑀁 𑀳𑁄𑀢𑀻𑀢𑀺 𑀬𑀲𑁆𑀫𑀸 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀤𑁂𑀯𑀸 𑀢𑀲𑁆𑀫𑀺𑀁 𑀤𑀺𑀯𑀲𑁂 𑀦𑀓𑁆𑀔𑀢𑁆𑀢𑀁 𑀖𑁄𑀲𑁂𑀢𑁆𑀯𑀸 𑀅𑀢𑁆𑀢𑀦𑁄 𑀧𑀼𑀜𑁆𑀜𑀸𑀦𑀼𑀪𑀸𑀯𑀲𑀺𑀤𑁆𑀥𑀸𑀬 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀬𑀸 𑀫𑀳𑀦𑁆𑀢𑀁 𑀦𑀓𑁆𑀔𑀢𑁆𑀢𑀓𑀻𑀴𑀸𑀲𑀼𑀔𑀁 𑀅𑀦𑀼𑀪𑀯𑀦𑁆𑀢𑀺, 𑀢𑀲𑁆𑀫𑀸 𑀢𑀁 𑀢𑁂𑀳𑀺 𑀏𑀓𑀸𑀩𑀤𑁆𑀥𑀁 𑀯𑀺𑀬 𑀳𑁄𑀢𑀺. 𑀪𑁂𑀭𑀺𑀆𑀤𑀺𑀢𑀽𑀭𑀺𑀬𑀸𑀦𑀦𑁆𑀢𑀺 𑀪𑁂𑀭𑀺𑀫𑀼𑀤𑀺𑀗𑁆𑀕𑀲𑀗𑁆𑀔𑀧𑀡𑀯𑀯𑀻𑀡𑀸𑀤𑀺𑀢𑀽𑀭𑀺𑀬𑀸𑀦𑀁. 𑀢𑀸𑀴𑀺𑀢𑀸𑀦𑀦𑁆𑀢𑀺 𑀆𑀭𑀤𑁆𑀥𑀮𑀬𑀸𑀦𑀼𑀭𑀽𑀧𑀁 𑀧𑀳𑀝𑀸𑀦𑀁. 𑀯𑀻𑀡𑀸𑀤𑀻𑀦𑀦𑁆𑀢𑀺 𑀯𑀻𑀡𑀸𑀯𑁂𑀡𑀼𑀕𑁄𑀫𑀼𑀔𑀻𑀆𑀤𑀻𑀦𑀁. 𑀯𑀸𑀤𑀺𑀢𑀸𑀦𑀦𑁆𑀢𑀺 𑀬𑀣𑀸𑀭𑀤𑁆𑀥𑀫𑀼𑀘𑁆𑀙𑀦𑀸𑀦𑀼𑀭𑀽𑀧𑀁 𑀲𑀗𑁆𑀖𑀝𑁆𑀝𑀺𑀢𑀸𑀦𑀁. 𑀅𑀪𑀸𑀲𑀻𑀢𑀺 𑀢𑁂𑀦 𑀲𑀤𑁆𑀤𑁂𑀦 𑀆𑀓𑀟𑁆𑀠𑀺𑀬𑀫𑀸𑀦𑀳𑀤𑀬𑁄 𑀅𑀬𑁄𑀦𑀺𑀲𑁄 𑀉𑀫𑁆𑀫𑀼𑀚𑁆𑀚𑀺𑀢𑁆𑀯𑀸 ‘‘𑀫𑀳𑀢𑀻 𑀯𑀢 𑀫𑁂 𑀚𑀸𑀦𑀻’’𑀢𑀺 𑀅𑀦𑀼𑀢𑁆𑀣𑀼𑀦𑀦𑁆𑀢𑁄 𑀅𑀪𑀸𑀲𑀺. 𑀙𑀟𑁆𑀟𑀺𑀢𑀤𑀸𑀭𑀼𑀓𑀁 𑀯𑀺𑀬𑀸𑀢𑀺 𑀯𑀦𑁂 𑀙𑀟𑁆𑀟𑀺𑀢𑀦𑀺𑀭𑀢𑁆𑀣𑀓𑀓𑀴𑀺𑀗𑁆𑀕𑀭𑀁 𑀯𑀺𑀬. 𑀮𑀸𑀫𑀓𑀢𑀭𑁄𑀢𑀺 𑀦𑀺𑀳𑀻𑀦𑀢𑀭𑁄. 𑀤𑁂𑀯𑀢𑀸 𑀧𑀞𑀫𑀧𑁆𑀧𑀺𑀢𑀁 𑀆𑀡𑀺𑀁 𑀧𑀝𑀸𑀡𑀺𑀬𑀸 𑀦𑀻𑀳𑀭𑀦𑁆𑀢𑀻 𑀯𑀺𑀬 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀯𑀼𑀢𑁆𑀢𑀫𑀢𑁆𑀣𑀁 𑀅𑀧𑀦𑁂𑀦𑁆𑀢𑀻 ‘‘𑀢𑀲𑁆𑀲 𑀢𑁂 𑀩𑀳𑀼𑀓𑀸 𑀧𑀺𑀳𑀬𑀦𑁆𑀢𑀻’’𑀢𑀺 𑀅𑀯𑁄𑀘𑀸𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀣𑁂𑀭𑁄’’𑀢𑀺𑀆𑀤𑀺𑀫𑀸𑀳. 𑀲𑀕𑁆𑀕𑀁 𑀕𑀘𑁆𑀙𑀦𑁆𑀢𑀸𑀦𑀁 𑀬𑀣𑀸 𑀦𑁂𑀭𑀬𑀺𑀓𑀸 𑀧𑀺𑀳𑀬𑀦𑁆𑀢𑀺, 𑀏𑀯𑀁 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑀲𑁆𑀲 𑀢𑀼𑀬𑁆𑀳𑀁 𑀩𑀳𑀽 𑀧𑀺𑀳𑀬𑀦𑁆𑀢𑀺, 𑀢𑀲𑁆𑀫𑀸 𑀢𑁆𑀯𑀁 ‘‘𑀧𑀸𑀧𑀺𑀬𑁄’’𑀢𑀺 𑀅𑀢𑁆𑀢𑀸𑀦𑀁 𑀫𑀸 𑀫𑀜𑁆𑀜𑀺𑀢𑁆𑀣𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀯𑀚𑁆𑀚𑀺𑀧𑀼𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀲𑀚𑁆𑀛𑀸𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁩𑁦. 𑀦𑀺𑀲𑁆𑀲𑀭𑀡𑀧𑀭𑀺𑀬𑀢𑁆𑀢𑀺𑀯𑀲𑁂𑀦𑀸𑀢𑀺 𑀅𑀤𑁆𑀥𑀸 𑀇𑀫𑀁 𑀧𑀭𑀺𑀬𑀢𑁆𑀢𑀺𑀁 𑀦𑀺𑀲𑁆𑀲𑀸𑀬 𑀯𑀝𑁆𑀝𑀤𑀼𑀓𑁆𑀔𑀢𑁄 𑀦𑀺𑀲𑁆𑀲𑀭𑀺𑀢𑀼𑀁 𑀮𑀩𑁆𑀪𑀸𑀢𑀺 𑀏𑀯𑀁 𑀦𑀺𑀲𑁆𑀲𑀭𑀡𑀧𑀭𑀺𑀬𑀢𑁆𑀢𑀺𑀯𑀲𑁂𑀦. 𑀲𑀚𑁆𑀛𑀸𑀬𑀦𑀢𑁄𑀢𑀺 𑀯𑀺𑀫𑀼𑀢𑁆𑀢𑀸𑀬𑀢𑀦𑀲𑀻𑀲𑁂 𑀞𑀢𑁆𑀯𑀸 𑀲𑀚𑁆𑀛𑀸𑀬𑀦𑀢𑁄. 𑀇𑀤𑀸𑀦𑀺 𑀢𑀲𑁆𑀲 𑀦𑀺𑀲𑁆𑀲𑀭𑀡𑀧𑀭𑀺𑀬𑀢𑁆𑀢𑀺𑀯𑀲𑁂𑀦 𑀲𑀚𑁆𑀛𑀸𑀬𑀦𑀓𑀭𑀡𑀁, 𑀧𑀝𑀺𑀧𑀢𑁆𑀢𑀺𑀯𑀲𑁂𑀦 𑀯𑀢𑁆𑀢𑀧𑀝𑀺𑀯𑀢𑁆𑀢𑀓𑀭𑀡𑀁, 𑀯𑀺𑀧𑀲𑁆𑀲𑀦𑀸𑀪𑀸𑀯𑀦𑀜𑁆𑀘 𑀤𑀲𑁆𑀲𑁂𑀢𑀼𑀁 ‘‘𑀲𑁄 𑀓𑀺𑀭𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀭𑀳𑀢𑁆𑀢𑀁 𑀧𑀢𑁆𑀢𑀤𑀺𑀯𑀲𑁂 𑀧𑀝𑀺𑀧𑀢𑁆𑀢𑀺𑀓𑀺𑀢𑁆𑀢𑀦𑀸𑀬 𑀧𑀼𑀭𑀺𑀫𑀤𑀺𑀯𑀲𑁂𑀲𑀼𑀧𑀺 𑀢𑀣𑀸 𑀧𑀝𑀺𑀧𑀚𑁆𑀚𑀺, 𑀯𑀺𑀧𑀲𑁆𑀲𑀦𑀁 𑀧𑀦 𑀉𑀲𑁆𑀲𑀼𑀓𑁆𑀓𑀸𑀧𑁂𑀢𑀼𑀁 𑀦𑀸𑀲𑀓𑁆𑀔𑀻𑀢𑀺 𑀤𑀲𑁆𑀲𑁂𑀢𑀺. 𑀓𑀸𑀮𑀁 𑀅𑀢𑀺𑀯𑀢𑁆𑀢𑁂𑀢𑀻𑀢𑀺 𑀇𑀤𑀁 ‘‘𑀲𑀗𑁆𑀓𑀲𑀸𑀬𑀢𑀻’’𑀢𑀺 𑀧𑀤𑀲𑁆𑀲 𑀅𑀢𑁆𑀣𑀯𑀘𑀦𑀁. 𑀣𑁂𑀭𑀲𑁆𑀲𑀸𑀢𑀺 𑀲𑀚𑁆𑀛𑀸𑀬𑀓𑀢𑁆𑀣𑁂𑀭𑀲𑁆𑀲.

𑀥𑀫𑁆𑀫𑀧𑀤𑀸𑀦𑀻𑀢𑀺 𑀲𑀻𑀮𑀸𑀤𑀺𑀥𑀫𑁆𑀫𑀓𑁆𑀔𑀦𑁆𑀥𑀤𑀻𑀧𑀓𑀸𑀦𑀺 𑀧𑀤𑀸𑀦𑀺. 𑀢𑁂𑀦𑀸𑀳 ‘‘𑀲𑀩𑁆𑀩𑀫𑁆𑀧𑀺 𑀩𑀼𑀤𑁆𑀥𑀯𑀘𑀦𑀁 𑀅𑀥𑀺𑀧𑁆𑀧𑁂𑀢’’𑀦𑁆𑀢𑀺. 𑀦 𑀕𑀡𑁆𑀳𑀸𑀲𑀺 𑀉𑀤𑁆𑀤𑁂𑀲𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀸𑀴𑀺𑀬𑀁 ‘‘𑀪𑀺𑀓𑁆𑀔𑀽𑀳𑀺 𑀲𑀁𑀯𑀲𑀦𑁆𑀢𑁄’’𑀢𑀺 𑀇𑀫𑀺𑀦𑀸 𑀢𑁂𑀲𑀁 𑀥𑀫𑁆𑀫𑀲𑁆𑀲𑀯𑀦𑀢𑁆𑀣𑀸𑀬𑀧𑀺 𑀥𑀫𑁆𑀫𑁄 𑀧𑀭𑀺𑀬𑀸𑀧𑀼𑀡𑀺𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀢𑀺. 𑀯𑀺𑀭𑀚𑁆𑀚𑀢𑀺 𑀏𑀢𑁂𑀦𑀸𑀢𑀺 𑀯𑀺𑀭𑀸𑀕𑁄, 𑀅𑀭𑀺𑀬𑀫𑀕𑁆𑀕𑁄. 𑀚𑀸𑀦𑀺𑀢𑁆𑀯𑀸𑀢𑀺 𑀧𑀭𑀺𑀜𑁆𑀜𑀸𑀪𑀺𑀲𑀫𑀬𑀯𑀲𑁂𑀦 𑀤𑀺𑀝𑁆𑀞𑀲𑀼𑀢𑀸𑀤𑀺𑀁 𑀬𑀸𑀣𑀸𑀯𑀢𑁄 𑀚𑀸𑀦𑀺𑀢𑁆𑀯𑀸 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸. 𑀯𑀺𑀲𑁆𑀲𑀚𑁆𑀚𑀦𑀦𑁆𑀢𑀺 𑀧𑀳𑀸𑀦𑀁. 𑀦 𑀩𑀼𑀤𑁆𑀥𑀯𑀘𑀦𑀲𑁆𑀲 𑀯𑀺𑀲𑁆𑀲𑀚𑁆𑀚𑀦𑀁. 𑀪𑀡𑁆𑀟𑀸𑀕𑀸𑀭𑀺𑀓𑀧𑀭𑀺𑀬𑀢𑁆𑀢𑀺𑀬𑀸𑀧𑀺 𑀅𑀦𑀼𑀜𑁆𑀜𑀸𑀢𑀢𑁆𑀢𑀸 𑀧𑀕𑁂𑀯 𑀦𑀺𑀲𑁆𑀲𑀭𑀡𑀢𑁆𑀣𑀸𑀬, 𑀢𑀢𑁆𑀣 𑀧𑀦 𑀫𑀢𑁆𑀢𑀸 𑀚𑀸𑀦𑀺𑀢𑀩𑁆𑀩𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀏𑀢𑁆𑀢𑀸𑀯𑀢𑀸’’𑀢𑀺𑀆𑀤𑀺𑀫𑀸𑀳.

𑀲𑀚𑁆𑀛𑀸𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁧. 𑀅𑀓𑀼𑀲𑀮𑀯𑀺𑀢𑀓𑁆𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁩𑁧. 𑀅𑀓𑀼𑀲𑀮𑁂 𑀯𑀺𑀢𑀓𑁆𑀓𑁂𑀢𑀺 𑀅𑀓𑁄𑀲𑀮𑁆𑀮𑀲𑀫𑁆𑀪𑀽𑀢𑀝𑁆𑀞𑁂𑀦 𑀅𑀓𑀼𑀲𑀮𑁂 𑀫𑀺𑀘𑁆𑀙𑀸𑀯𑀺𑀢𑀓𑁆𑀓𑁂. 𑀬𑁄𑀦𑀺 𑀯𑀼𑀘𑁆𑀘𑀢𑀺 𑀉𑀧𑀸𑀬𑁄, 𑀢𑀲𑁆𑀫𑀸 𑀅𑀲𑀼𑀪𑀸𑀤𑀺𑀓𑁂 𑀲𑀼𑀪𑀸𑀤𑀺𑀯𑀲𑁂𑀦 𑀫𑀦𑀲𑀺𑀓𑀸𑀭𑁄 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄𑀢𑀺 𑀆𑀳 ‘‘𑀅𑀦𑀼𑀧𑀸𑀬𑀫𑀦𑀲𑀺𑀓𑀸𑀭𑁂𑀦𑀸’’𑀢𑀺. 𑀧𑀸𑀲𑀸𑀤𑀺𑀓𑀓𑀫𑁆𑀫𑀝𑁆𑀞𑀸𑀦𑀦𑁆𑀢𑀺 𑀧𑀲𑀸𑀤𑀸𑀯𑀳𑀁 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀆𑀤𑀺𑀓𑀫𑁆𑀫𑀝𑁆𑀞𑀸𑀦𑀁. 𑀩𑀮𑀯𑀧𑀻𑀢𑀺𑀜𑁆𑀘 𑀲𑀼𑀔𑀜𑁆𑀘𑀸𑀢𑀺 𑀦𑀻𑀯𑀭𑀡𑀯𑀺𑀓𑁆𑀔𑀫𑁆𑀪𑀦𑀢𑁄 𑀩𑀮𑀯𑀦𑁆𑀢𑀁 𑀉𑀧𑀘𑀸𑀭𑀚𑁆𑀛𑀸𑀦𑀲𑀳𑀕𑀢𑀁 𑀧𑀻𑀢𑀺𑀜𑁆𑀘 𑀲𑀼𑀔𑀜𑁆𑀘.

𑀅𑀓𑀼𑀲𑀮𑀯𑀺𑀢𑀓𑁆𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁨. 𑀫𑀚𑁆𑀛𑀦𑁆𑀳𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁩𑁨. 𑀦𑀦𑁆𑀤𑀦𑀯𑀕𑁆𑀕𑁂𑀢𑀺 𑀦𑀦𑁆𑀤𑀦𑀯𑀕𑁆𑀕𑀯𑀡𑁆𑀡𑀦𑀸𑀬𑀁 𑀢𑀢𑁆𑀣 𑀇𑀥𑀸𑀧𑀺 𑀕𑀸𑀣𑀸𑀬 𑀯𑀺𑀲𑁂𑀲𑀸𑀪𑀸𑀯𑀢𑁄. 𑀬𑀤𑀺 𑀏𑀯𑀁 𑀓𑀲𑁆𑀫𑀸 𑀢𑀢𑁆𑀣 𑀲𑀗𑁆𑀕𑀻𑀢𑀁 𑀇𑀥 𑀕𑀳𑀺𑀢𑀦𑁆𑀢𑀺? 𑀤𑁂𑀯𑀢𑀸𑀧𑀝𑀺𑀲𑀁𑀬𑀼𑀢𑁆𑀢𑀢𑀁 𑀉𑀧𑀸𑀤𑀸𑀬 𑀤𑁂𑀯𑀢𑀸𑀲𑀁𑀬𑀼𑀢𑁆𑀢𑁂 𑀲𑀗𑁆𑀕𑀳𑀺𑀢𑀫𑁆𑀧𑀺 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀸 𑀧𑀝𑀺𑀲𑀁𑀬𑀼𑀢𑁆𑀢𑀢𑁆𑀢𑀸 𑀇𑀥 𑀕𑀳𑀺𑀢𑀁.

𑀫𑀚𑁆𑀛𑀦𑁆𑀳𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁩. 𑀧𑀸𑀓𑀢𑀺𑀦𑁆𑀤𑁆𑀭𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁩𑁩. 𑀢𑁂𑀭𑀲𑀫𑁂 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀯𑀺𑀢𑁆𑀣𑀸𑀭𑀺𑀢𑀫𑁂𑀯𑀸𑀢𑀺 𑀬𑁄𑀚𑀦𑀸. 𑀚𑀦𑁆𑀢𑀼𑀤𑁂𑀯𑀧𑀼𑀢𑁆𑀢𑀲𑀼𑀢𑁆𑀢𑁂𑀢𑀺 𑀚𑀦𑁆𑀢𑀼𑀤𑁂𑀯𑀧𑀼𑀢𑁆𑀢𑀲𑀼𑀢𑁆𑀢𑀲𑀁𑀯𑀡𑁆𑀡𑀦𑀸𑀬. ‘‘𑀢𑀢𑁆𑀣 𑀲𑀗𑁆𑀕𑀻𑀢𑀁 𑀇𑀥𑀸𑀧𑀻’’𑀢𑀺𑀆𑀤𑀺 𑀅𑀦𑀦𑁆𑀢𑀭𑀲𑀼𑀢𑁆𑀢𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀧𑀸𑀓𑀢𑀺𑀦𑁆𑀤𑁆𑀭𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁪. 𑀕𑀦𑁆𑀥𑀢𑁆𑀣𑁂𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁩𑁪. 𑀕𑀦𑁆𑀥𑀸𑀭𑀫𑁆𑀫𑀡𑀁 𑀉𑀧𑀦𑀺𑀚𑁆𑀛𑀸𑀬𑀢𑀻𑀢𑀺 𑀕𑀦𑁆𑀥𑀲𑀗𑁆𑀔𑀸𑀢𑀁 𑀆𑀭𑀫𑁆𑀫𑀡𑀁 𑀉𑀧𑁂𑀘𑁆𑀘 𑀦𑀺𑀚𑁆𑀛𑀸𑀬𑀢𑀺, 𑀭𑀽𑀧𑀸𑀭𑀫𑁆𑀫𑀡𑁂𑀦 𑀯𑀺𑀬 𑀯𑀺𑀜𑁆𑀜𑀸𑀡𑁂𑀦 𑀭𑀽𑀧𑀁, 𑀕𑀦𑁆𑀥𑀸𑀭𑀫𑁆𑀫𑀡𑁂𑀦 𑀢𑀁 𑀉𑀧𑁂𑀘𑁆𑀘 𑀦𑀺𑀚𑁆𑀛𑀸𑀬𑀢𑀺 𑀧𑀘𑁆𑀘𑀓𑁆𑀔𑀢𑁄, 𑀬𑀸𑀣𑀸𑀯𑀢𑁄 𑀲𑀪𑀸𑀯𑀢𑁄 𑀧𑀝𑀺𑀯𑀺𑀚𑁆𑀛𑀢𑀻𑀢𑀺 𑀅𑀢𑁆𑀣𑁄. 𑀉𑀧𑀲𑀺𑀗𑁆𑀖𑀺𑀲𑁆𑀲𑀢𑀻𑀢𑀺 𑀢𑀡𑁆𑀳𑀸𑀯𑀲𑁂𑀦 𑀉𑀧𑀕𑀦𑁆𑀢𑁆𑀯𑀸 𑀲𑀺𑀗𑁆𑀖𑀺𑀲𑁆𑀲𑀢𑀺.

𑀏𑀓𑀗𑁆𑀕𑀫𑁂𑀢𑀁 𑀣𑁂𑀬𑁆𑀬𑀸𑀦𑀦𑁆𑀢𑀺 𑀆𑀭𑀫𑁆𑀫𑀡𑀯𑀲𑁂𑀦 𑀣𑁂𑀬𑁆𑀬𑀯𑀢𑁆𑀣𑀽𑀲𑀼 𑀯𑀺𑀪𑀚𑀺𑀬𑀫𑀸𑀦𑁂𑀲𑀼 𑀏𑀓𑀫𑀗𑁆𑀕𑀫𑁂𑀢𑀁 𑀕𑀦𑁆𑀥𑀸𑀭𑀫𑁆𑀫𑀡𑀦𑁆𑀢𑀺 𑀆𑀳 ‘‘𑀣𑁂𑀦𑀺𑀢𑀩𑁆𑀩𑀸𑀦’’𑀦𑁆𑀢𑀺𑀆𑀤𑀺. 𑀑𑀚𑀸𑀧𑁂𑀓𑁆𑀔𑀸𑀬 𑀣𑁂𑀬𑁆𑀬𑀸𑀬 𑀧𑀯𑀢𑁆𑀢𑀫𑀸𑀦𑀸𑀬 𑀥𑀫𑁆𑀫𑀸𑀭𑀫𑁆𑀫𑀡𑀢𑀸𑀧𑀺 𑀢𑀲𑁆𑀲𑀸 𑀲𑀺𑀬𑀸, 𑀲𑀸 𑀧𑀦 𑀦 𑀫𑀥𑀼𑀭𑀸 𑀣𑁂𑀬𑁆𑀬𑀓𑀢𑀸 𑀘𑀸𑀢𑀺 ‘‘𑀧𑀜𑁆𑀘𑀓𑁄𑀝𑁆𑀞𑀸𑀲𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀓𑀸𑀫𑀜𑁆𑀘 𑀢𑀁 𑀕𑀦𑁆𑀥𑀸𑀭𑀫𑁆𑀫𑀡𑀁 𑀓𑁂𑀦𑀘𑀺 𑀧𑀭𑀺𑀕𑁆𑀕𑀳𑀺𑀢𑀁 𑀦 𑀳𑁄𑀢𑀻𑀢𑀺 𑀆𑀤𑀺𑀬𑀺𑀢𑀼𑀁 𑀲𑀓𑁆𑀓𑀸, 𑀲𑀢𑁆𑀣𑀸𑀭𑀸 𑀧𑀦 𑀅𑀦𑀦𑀼𑀜𑁆𑀜𑀸𑀢𑀢𑁆𑀢𑀸 𑀦 𑀬𑀼𑀢𑁆𑀢𑁄 𑀢𑀲𑁆𑀲 𑀧𑀭𑀺𑀪𑁄𑀕𑁄. 𑀬𑀁 𑀧𑀦 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀯𑀼𑀢𑁆𑀢𑀁 ‘‘𑀦 𑀳𑀭𑀸𑀫𑀺 𑀦 𑀪𑀜𑁆𑀚𑀸𑀫𑀻’’𑀢𑀺, 𑀢𑀲𑁆𑀲𑀧𑀺 𑀅𑀬𑀫𑁂𑀯 𑀧𑀭𑀺𑀳𑀸𑀭𑁄. 𑀯𑀡𑁆𑀡𑀻𑀬𑀢𑀺 𑀨𑀮𑀁 𑀏𑀢𑁂𑀦𑀸𑀢𑀺 𑀯𑀡𑁆𑀡𑀁, 𑀓𑀸𑀭𑀡𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀯𑀡𑁆𑀡𑁂𑀦𑀸𑀢𑀺 𑀓𑀸𑀭𑀡𑁂𑀦𑀸’’𑀢𑀺.

𑀢𑀲𑁆𑀫𑀺𑀦𑁆𑀢𑀺 𑀢𑀲𑁆𑀫𑀺𑀁 𑀪𑀺𑀓𑁆𑀔𑀼𑀲𑁆𑀫𑀺𑀁. 𑀆𑀓𑀺𑀡𑁆𑀡𑀓𑀫𑁆𑀫𑀦𑁆𑀢𑁄𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀺𑀆𑀤𑀺𑀯𑀲𑁂𑀦 𑀅𑀓𑀼𑀲𑀮𑀓𑀫𑁆𑀫𑀦𑁆𑀢𑁄 𑀤𑀺𑀝𑁆𑀞𑀺𑀫𑁄𑀳𑀢𑀡𑁆𑀳𑀸𑀤𑀺𑀯𑀲𑁂𑀦 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀓𑀼𑀲𑀮𑀓𑀫𑁆𑀫𑀸𑀦𑀁 𑀧𑀝𑀺𑀓𑁆𑀔𑁂𑀧𑀦𑀢𑁄. 𑀤𑀺𑀝𑁆𑀞𑀺𑀯𑀲𑁂𑀦 𑀘 𑀓𑀣𑀺𑀦𑀓𑀓𑁆𑀔𑀴𑀔𑀭𑀺𑀕𑀢𑀢𑁆𑀢𑀸 ‘‘𑀅𑀔𑀻𑀡𑀓𑀫𑁆𑀫𑀦𑁆𑀢𑁄 𑀓𑀓𑁆𑀔𑀴𑀓𑀫𑁆𑀫𑀦𑁆𑀢𑁄’’𑀢𑀺 𑀯𑀼𑀢𑁆𑀢𑀁.

𑀆𑀓𑀺𑀡𑁆𑀡𑀮𑀼𑀤𑁆𑀤𑁄𑀢𑀺 𑀆𑀓𑀺𑀡𑁆𑀡𑁄 𑀳𑀼𑀢𑁆𑀯𑀸 𑀓𑀓𑁆𑀔𑀴𑁄. 𑀢𑁂𑀦𑀸𑀳 ‘‘𑀩𑀳𑀼𑀧𑀸𑀧𑁄’’𑀢𑀺𑀆𑀤𑀺. 𑀫𑀓𑁆𑀔𑀺𑀢𑁄𑀢𑀺 𑀮𑀺𑀢𑁆𑀢𑁄. 𑀢𑀦𑁆𑀢𑀺 𑀤𑁂𑀯𑀢𑀸𑀘𑁄𑀤𑀦𑀁. 𑀢𑀲𑁆𑀫𑀸𑀢𑀺 𑀅𑀢𑀺𑀓𑁆𑀓𑀫𑁆𑀫 𑀞𑀺𑀢𑀢𑁆𑀢𑀸‘‘𑀢𑁆𑀯𑀜𑁆𑀘𑀸𑀭𑀳𑀸𑀫𑀺 𑀯𑀢𑁆𑀢𑀯𑁂’’𑀢𑀺 𑀏𑀯𑀫𑀸𑀳.

𑀕𑀯𑁂𑀲𑀦𑁆𑀢𑀲𑁆𑀲 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀉𑀧𑁆𑀧𑀸𑀤𑀦𑀯𑀲𑁂𑀦 𑀧𑀭𑀺𑀬𑁂𑀲𑀦𑁆𑀢𑀲𑁆𑀲. 𑀅𑀦𑁂𑀓𑀬𑁄𑀚𑀦𑀸𑀬𑀸𑀫𑀯𑀺𑀢𑁆𑀣𑀸𑀭𑀁 𑀕𑀕𑀦𑀢𑀮𑀁 𑀩𑁆𑀬𑀸𑀧𑁂𑀢𑁆𑀯𑀸 𑀉𑀧𑁆𑀧𑀦𑁆𑀦𑀯𑀮𑀸𑀳𑀓𑀓𑀽𑀝𑀧𑁆𑀧𑀫𑀸𑀡𑀁 𑀯𑀺𑀬. 𑀲𑀼𑀤𑁆𑀥𑁄𑀢𑀺 𑀲𑀻𑀮𑁂𑀦 𑀧𑀭𑀺𑀲𑀼𑀤𑁆𑀥𑁄 𑀅𑀬𑀦𑁆𑀢𑀺 𑀚𑀸𑀦𑀸𑀲𑀺. 𑀲𑀼𑀕𑀢𑀺𑀦𑁆𑀢𑀺 𑀲𑀼𑀦𑁆𑀤𑀭𑀦𑀺𑀩𑁆𑀩𑀢𑁆𑀢𑀺𑀁. 𑀢𑁂𑀦 𑀦𑀺𑀩𑁆𑀩𑀸𑀦𑀲𑁆𑀲𑀧𑀺 𑀲𑀗𑁆𑀕𑀳𑁄 𑀲𑀺𑀤𑁆𑀥𑁄.

𑀕𑀦𑁆𑀥𑀢𑁆𑀣𑁂𑀦𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀸𑀭𑀢𑁆𑀣𑀧𑁆𑀧𑀓𑀸𑀲𑀺𑀦𑀺𑀬𑀸 𑀲𑀁𑀬𑀼𑀢𑁆𑀢𑀦𑀺𑀓𑀸𑀬-𑀅𑀝𑁆𑀞𑀓𑀣𑀸𑀬

𑀯𑀦𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.