𑁧𑁦. 𑀬𑀓𑁆𑀔𑀲𑀁𑀬𑀼𑀢𑁆𑀢𑀁

𑁧. 𑀇𑀦𑁆𑀤𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁩𑁫. 𑀅𑀢𑁆𑀢𑀦𑁄 𑀧𑀭𑀺𑀡𑀸𑀬𑀓𑀢𑁆𑀢𑁂𑀦 𑀇𑀦𑁆𑀤𑁄 𑀦𑀸𑀫 𑀫𑀳𑁂𑀲𑀓𑁆𑀔𑁄, 𑀇𑀦𑁆𑀤𑁄𑀢𑀺 𑀲𑀫𑀜𑁆𑀜𑀸 𑀅𑀲𑁆𑀲𑀸𑀢𑀺 𑀓𑀢𑁆𑀯𑀸 ‘‘𑀇𑀦𑁆𑀤𑀓𑁄’’𑀢𑀺𑀧𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀲 𑀇𑀦𑁆𑀤𑀓𑀲𑁆𑀲. 𑀇𑀦𑁆𑀤𑀓𑀽𑀝𑁂 𑀧𑀩𑁆𑀩𑀢𑁂 𑀦𑀺𑀯𑀲𑀢𑀻𑀢𑀺 𑀇𑀦𑁆𑀤𑀓𑀽𑀝𑀦𑀺𑀯𑀸𑀲𑀻, 𑀢𑀲𑁆𑀲 𑀇𑀦𑁆𑀤𑀓𑀽𑀝𑀦𑀺𑀯𑀸𑀲𑀺𑀦𑁄. 𑀩𑀮𑀺𑀓𑀫𑁆𑀫𑁂𑀳𑀺 𑀬𑀚𑀺𑀢𑀩𑁆𑀩𑀢𑁄 𑀧𑀽𑀚𑀺𑀢𑀩𑁆𑀩𑀢𑁄 𑀬𑀓𑁆𑀔𑁄, 𑀢𑀲𑁆𑀲 𑀬𑀓𑁆𑀔𑀲𑁆𑀲. 𑀇𑀦𑁆𑀤𑀲𑁆𑀲 𑀦𑀺𑀯𑀸𑀲𑀝𑁆𑀞𑀸𑀦𑀪𑀽𑀢𑀁 𑀓𑀽𑀝𑀁 𑀇𑀦𑁆𑀤𑀓𑀽𑀝𑀦𑁆𑀢𑀺 𑀬𑀓𑁆𑀔𑀢𑁄 𑀓𑀽𑀝𑁂𑀦 𑀦𑀸𑀫𑀁 𑀮𑀤𑁆𑀥𑀁. 𑀇𑀦𑁆𑀤𑀓𑀽𑀝𑁄 𑀇𑀦𑁆𑀤𑁄 𑀉𑀢𑁆𑀢𑀭𑀧𑀤𑀮𑁄𑀧𑁂𑀦 𑀬𑀣𑀸 ‘‘𑀓𑁂𑀮𑀸𑀲𑀓𑀽𑀝𑁄 𑀓𑁂𑀮𑀸𑀲𑁄’’𑀢𑀺. 𑀇𑀦𑁆𑀤𑁄 𑀬𑀓𑁆𑀔𑁄𑀢𑀺 𑀓𑀽𑀝𑀢𑁄 𑀬𑀓𑁆𑀔𑁂𑀦 𑀦𑀸𑀫𑀁 𑀮𑀤𑁆𑀥𑀁. 𑀦 𑀘𑁂𑀢𑁆𑀣 𑀇𑀢𑀭𑀻𑀢𑀭𑀦𑀺𑀲𑁆𑀲𑀬𑀤𑁄𑀲𑁄 𑀅𑀜𑁆𑀜𑀫𑀜𑁆𑀜𑀽𑀧𑀮𑀓𑁆𑀔𑀡𑀪𑀸𑀯𑀢𑁄 𑀬𑀣𑀸 𑀢𑀁 ‘‘𑀓𑀸𑀬𑀓𑀫𑁆𑀫𑀝𑁆𑀞𑀸𑀦’’𑀦𑁆𑀢𑀺. 𑀭𑀽𑀧𑀦𑁆𑀢𑀺 𑀲𑀓𑀮𑀁 𑀭𑀽𑀧𑀓𑁆𑀔𑀦𑁆𑀥𑀫𑀸𑀳, 𑀦 𑀭𑀽𑀧𑀸𑀬𑀢𑀦𑀦𑁆𑀢𑀺. 𑀇𑀫𑀁 𑀲𑀭𑀻𑀭𑀁 𑀧𑁂𑀘𑁆𑀘 𑀅𑀬𑀁 𑀓𑀺𑀦𑁆𑀢𑀺 𑀧𑀝𑀺𑀮𑀪𑀢𑀻𑀢𑀺 𑀘𑁄𑀤𑁂𑀢𑀺.

𑀓𑀼𑀢𑁄 𑀆𑀕𑀘𑁆𑀙𑀢𑀻𑀢𑀺 𑀧𑀭𑀸𑀥𑀸𑀭𑀭𑀽𑀧𑁂 𑀚𑀻𑀯𑁂 𑀅𑀢𑁆𑀢𑀦𑀺 𑀫𑀸𑀢𑀼𑀓𑀼𑀘𑁆𑀙𑀺𑀫𑁄𑀓𑁆𑀓𑀦𑁆𑀢𑁂 𑀭𑀽𑀧𑀲𑁆𑀲 𑀲𑀫𑁆𑀪𑀯𑁄𑀢𑀺 𑀓𑀼𑀢𑁄 𑀦𑀸𑀫 𑀞𑀸𑀦𑀢𑁄 𑀆𑀕𑀘𑁆𑀙𑀢𑀺. 𑀢𑁂𑀦𑀸𑀳 ‘‘𑀇𑀫𑀸𑀦𑀺 𑀘 𑀅𑀝𑁆𑀞𑀻𑀦𑀺 𑀇𑀫𑀸 𑀘 𑀫𑀁𑀲𑀧𑁂𑀲𑀺𑀬𑁄’’𑀢𑀺𑀆𑀤𑀺. 𑀓𑀣𑀁 𑀦𑁆𑀯𑀬𑀦𑁆𑀢𑀺 𑀅𑀬𑀁 𑀓𑀼𑀘𑁆𑀙𑀺𑀲𑀗𑁆𑀔𑀸𑀢𑁂 𑀕𑀩𑁆𑀪𑀭𑁂 𑀓𑀣𑀁 𑀲𑀚𑁆𑀚𑀢𑀻𑀢𑀺 𑀧𑀼𑀘𑁆𑀙𑀢𑀺. ‘‘𑀲𑀻𑀳𑀸𑀦𑀁𑀯 𑀦𑀤𑀦𑁆𑀢𑀸𑀦𑀁, 𑀤𑀸𑀞𑀻𑀦𑀁 𑀕𑀺𑀭𑀺𑀕𑀩𑁆𑀪𑀭𑁂’’𑀢𑀺𑀆𑀤𑀺𑀦𑀸 (𑀣𑁂𑀭𑀕𑀸. 𑀦𑀺𑀤𑀸𑀦𑀕𑀸𑀣𑀸) 𑀕𑀩𑁆𑀪𑀭𑁄 𑀘 𑀓𑀼𑀘𑁆𑀙𑀺𑀯𑀸𑀘𑀓𑁄 𑀆𑀕𑀢𑁄. 𑀢𑁂𑀦𑀸𑀳 ‘‘𑀕𑀩𑁆𑀪𑀭𑀲𑁆𑀫𑀺𑀦𑁆𑀢𑀺 𑀫𑀸𑀢𑀼𑀓𑀼𑀘𑁆𑀙𑀺𑀲𑁆𑀫𑀺’’𑀦𑁆𑀢𑀺. 𑀧𑀼𑀕𑁆𑀕𑀮𑀯𑀸𑀤𑀻𑀢𑀺 𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑁄. 𑀬𑀣𑀸 𑀳𑀺 𑀫𑀘𑁆𑀙𑀫𑀁𑀲𑀁 𑀪𑀼𑀢𑁆𑀢𑀁 𑀨𑁂𑀡𑀁 𑀯𑀺𑀬 𑀳𑀼𑀢𑁆𑀯𑀸 𑀯𑀺𑀮𑀻𑀬𑀢𑀺, 𑀦 𑀘 𑀧𑀜𑁆𑀜𑀸𑀬𑀢𑀺 𑀲𑀢𑁆𑀢𑀪𑀸𑀯𑁂𑀦 𑀅𑀧𑁆𑀧𑀯𑀢𑁆𑀢𑀦𑀢𑁄, 𑀏𑀯𑀫𑁂𑀯𑀁 𑀬𑀤𑀺 𑀫𑀸𑀢𑀼𑀓𑀼𑀘𑁆𑀙𑀺𑀲𑁆𑀫𑀺𑀁 𑀕𑀩𑁆𑀪𑀪𑀸𑀯𑁂𑀦 𑀉𑀧𑁆𑀧𑀦𑁆𑀦𑀁 𑀭𑀽𑀧𑀁 𑀲𑀢𑁆𑀢𑁄 𑀦 𑀪𑀯𑁂𑀬𑁆𑀬 𑀦𑁄 𑀯𑀟𑁆𑀠𑁂𑀬𑁆𑀬, 𑀯𑀺𑀮𑀻𑀬𑀺𑀢𑁆𑀯𑀸 𑀕𑀘𑁆𑀙𑁂𑀬𑁆𑀬, 𑀧𑀜𑁆𑀜𑀸𑀬𑀢𑀺 𑀘 𑀢𑀁 𑀭𑀽𑀧𑀁, 𑀢𑀲𑁆𑀫𑀸 𑀚𑀻𑀯𑁄𑀢𑀺 𑀇𑀫𑀸𑀬 𑀮𑀤𑁆𑀥𑀺𑀬𑀸. 𑀏𑀯𑀫𑀸𑀳𑀸𑀢𑀺 ‘‘𑀭𑀽𑀧𑀁…𑀧𑁂… 𑀕𑀩𑁆𑀪𑀭𑀲𑁆𑀫𑀺’’𑀦𑁆𑀢𑀺 𑀏𑀯𑀫𑀯𑁄𑀘. 𑀧𑀞𑀫𑀦𑁆𑀢𑀺 𑀏𑀢𑁂𑀲𑀁 𑀧𑀜𑁆𑀘𑀦𑁆𑀦𑀁 𑀧𑀞𑀫𑀁. 𑀢𑁂𑀦𑀸𑀳 ‘‘𑀧𑀞𑀫𑁂𑀦 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑁂𑀦 𑀲𑀤𑁆𑀥𑀺’’𑀦𑁆𑀢𑀺. ‘‘𑀚𑀸𑀢𑀺𑀉𑀡𑁆𑀡𑀁𑀲𑀽𑀳𑀻𑀢𑀺 𑀚𑀸𑀢𑀺𑀏𑀴𑀓𑀸𑀬 𑀉𑀡𑁆𑀡𑀁𑀲𑀽𑀳𑀻’’𑀢𑀺 𑀯𑀤𑀦𑁆𑀢𑀺. ‘‘𑀕𑀩𑁆𑀪𑀁 𑀨𑀸𑀮𑁂𑀢𑁆𑀯𑀸 𑀕𑀳𑀺𑀢𑀉𑀡𑁆𑀡𑀸 𑀚𑀸𑀢𑀺𑀉𑀡𑁆𑀡𑀸. 𑀢𑀲𑁆𑀲𑀸 𑀅𑀁𑀲𑀽𑀳𑀺 𑀢𑀻𑀳𑀺 𑀓𑀢𑀲𑀼𑀢𑁆𑀢𑀕𑁆𑀕𑁂’’𑀢𑀺 𑀲𑀁𑀬𑀼𑀢𑁆𑀢𑀪𑀸𑀡𑀓𑀸𑀦𑀁 𑀅𑀥𑀺𑀧𑁆𑀧𑀸𑀬𑁄.

𑀅𑀦𑀸𑀯𑀺𑀮𑁄𑀢𑀺 𑀅𑀘𑁆𑀙𑁄, 𑀲𑀼𑀧𑁆𑀧𑀲𑀦𑁆𑀦𑁄𑀢𑀺 𑀅𑀢𑁆𑀣𑁄. 𑀏𑀯𑀁𑀯𑀡𑁆𑀡𑀧𑁆𑀧𑀝𑀺𑀪𑀸𑀕𑀦𑁆𑀢𑀺 𑀯𑀼𑀢𑁆𑀢𑀧𑁆𑀧𑀫𑀸𑀡𑀲𑀡𑁆𑀞𑀸𑀦𑀲𑀫𑁆𑀧𑀭𑀺𑀘𑁆𑀙𑀺𑀦𑁆𑀦𑀁. 𑀓𑀮𑀮𑀁 𑀲𑀫𑁆𑀧𑀯𑀼𑀘𑁆𑀘𑀢𑀻𑀢𑀺 𑀅𑀢𑁆𑀢𑀪𑀸𑀯𑁄 𑀪𑀽𑀢𑀼𑀧𑀸𑀤𑀸𑀭𑀽𑀧𑀲𑀗𑁆𑀔𑀸𑀢𑁄 𑀲𑀦𑁆𑀢𑀸𑀦𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑁄 𑀓𑀮𑀮𑀁 𑀦𑀸𑀫𑀸𑀢𑀺 𑀓𑀣𑀻𑀬𑀢𑀺.

𑀓𑀮𑀮𑀸𑀢𑀺 𑀬𑀣𑀸𑀯𑀼𑀢𑁆𑀢𑀓𑀮𑀮𑀭𑀽𑀧𑀳𑁂𑀢𑀼 𑀢𑀁 𑀦𑀺𑀲𑁆𑀲𑀸𑀬 𑀧𑀘𑁆𑀘𑀬𑀁 𑀓𑀢𑁆𑀯𑀸. 𑀫𑀁𑀲𑀥𑁄𑀯𑀦𑀉𑀤𑀓𑀯𑀡𑁆𑀡𑀦𑁆𑀢𑀺 𑀯𑀡𑁆𑀡𑀢𑁄 𑀫𑀁𑀲𑀥𑁄𑀯𑀦𑀉𑀤𑀓𑀯𑀡𑁆𑀡𑀁, 𑀲𑀡𑁆𑀞𑀸𑀦𑀢𑁄 𑀧𑀦 𑀯𑀺𑀮𑀻𑀦𑀢𑀺𑀧𑀼𑀲𑀤𑀺𑀲𑀁.

𑀧𑀭𑀺𑀧𑀓𑁆𑀓𑀦𑁆𑀢𑀺 𑀧𑀭𑀺𑀧𑀸𑀓𑀓𑀮𑀮𑀪𑀸𑀯𑀢𑁄 𑀧𑀭𑀺𑀧𑀸𑀓𑀁 𑀕𑀢𑀁 𑀲𑀼𑀧𑀭𑀺𑀧𑀸𑀓𑀁 𑀕𑀢𑀁. 𑀲𑀫𑀽𑀳𑀢𑀦𑁆𑀢𑀺 𑀲𑀫𑀽𑀳𑀪𑀽𑀢𑀁 𑀲𑀗𑁆𑀕𑀢𑀁. 𑀯𑀺𑀯𑀝𑁆𑀝𑀫𑀸𑀦𑀦𑁆𑀢𑀺 𑀧𑀭𑀺𑀡𑀫𑀦𑁆𑀢𑀁. 𑀢𑀩𑁆𑀪𑀸𑀯𑀦𑁆𑀢𑀺 𑀓𑀭𑀡𑁂 𑀏𑀢𑀁 𑀉𑀧𑀬𑁄𑀕𑀯𑀘𑀦𑀁, 𑀢𑀩𑁆𑀪𑀸𑀯𑁂𑀦 𑀧𑀭𑀺𑀡𑀫𑀦𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀦𑀺𑀲𑁆𑀲𑀓𑁆𑀓𑁂 𑀯𑀸 𑀉𑀧𑀬𑁄𑀕𑀯𑀘𑀦𑀁, 𑀢𑀩𑁆𑀪𑀸𑀯𑀢𑁄 𑀓𑀮𑀮𑀪𑀸𑀯𑀢𑁄 𑀓𑀮𑀮𑀁 𑀯𑀺𑀧𑀭𑀺𑀡𑀫𑀦𑁆𑀢𑀁. 𑀅𑀩𑁆𑀩𑀼𑀤𑀁 𑀦𑀸𑀫 𑀚𑀸𑀬𑀢𑀺, 𑀅𑀩𑁆𑀩𑀼𑀤𑀁 𑀦𑀸𑀫 𑀲𑀫𑁆𑀧𑀚𑁆𑀚𑀢𑀻𑀢𑀺 𑀅𑀢𑁆𑀣𑁄.

𑀯𑀺𑀮𑀻𑀦𑀢𑀺𑀧𑀼𑀲𑀤𑀺𑀲𑀸 𑀲𑀡𑁆𑀞𑀸𑀦𑀯𑀲𑁂𑀦, 𑀯𑀡𑁆𑀡𑀯𑀲𑁂𑀦 𑀧𑀦 𑀲𑀺𑀢𑀸 𑀅𑀭𑀢𑁆𑀢𑀸𑀯 𑀳𑁄𑀢𑀻𑀢𑀺 𑀯𑀤𑀦𑁆𑀢𑀺. 𑀫𑀡𑁆𑀟𑀦𑁆𑀢𑀺 𑀤𑀸𑀭𑀺𑀓𑀸𑀦𑀁 𑀢𑀣𑀸 𑀧𑀻𑀴𑀦𑀢𑁄 𑀦𑀺𑀩𑁆𑀩𑀢𑁆𑀢𑀫𑀭𑀺𑀘𑀧𑀓𑁆𑀓𑀲𑁆𑀲 𑀲𑀸𑀭𑀪𑀽𑀢𑀁 𑀭𑀲𑀁. 𑀲𑀩𑁆𑀩𑀪𑀸𑀕𑁂𑀳𑀺 𑀫𑀼𑀘𑁆𑀘𑀢𑀻𑀢𑀺 𑀲𑁄 𑀫𑀡𑁆𑀟𑁄 𑀓𑀧𑀸𑀮𑁂 𑀅𑀮𑀕𑁆𑀕𑁄 𑀳𑀼𑀢𑁆𑀯𑀸 𑀢𑀲𑁆𑀲 𑀲𑀩𑁆𑀩𑀪𑀸𑀕𑁂𑀳𑀺 𑀫𑀼𑀘𑁆𑀙𑀺𑀢𑁆𑀯𑀸 𑀧𑀺𑀡𑁆𑀟𑀺𑀢𑁄 𑀳𑀼𑀢𑁆𑀯𑀸 𑀢𑀺𑀝𑁆𑀞𑀢𑀺. 𑀏𑀯𑀭𑀽𑀧𑀸 𑀧𑁂𑀲𑀺 𑀳𑁄𑀢𑀻𑀢𑀺 𑀲𑀸 𑀧𑁂𑀲𑀺 𑀕𑀩𑁆𑀪𑀸𑀲𑀬𑁂 𑀓𑀢𑁆𑀣𑀘𑀺 𑀅𑀮𑀕𑁆𑀕𑀸 𑀬𑀣𑀸𑀯𑀼𑀢𑁆𑀢𑀫𑀡𑁆𑀟𑁄 𑀯𑀺𑀬 𑀧𑀺𑀡𑁆𑀟𑀺𑀢𑁄 𑀳𑀼𑀢𑁆𑀯𑀸 𑀢𑀺𑀝𑁆𑀞𑀢𑀺. 𑀢𑁂𑀦𑀸𑀳 ‘‘𑀯𑀺𑀮𑀻𑀦𑀢𑀺𑀧𑀼𑀲𑀤𑀺𑀲𑀸’’𑀢𑀺.

𑀧𑁂𑀲𑀺 𑀦𑀺𑀩𑁆𑀩𑀢𑁆𑀢𑀢𑀻𑀢𑀺 𑀏𑀢𑁆𑀣 𑀧𑁂𑀲𑀻𑀢𑀺 𑀦𑀺𑀲𑁆𑀲𑀓𑁆𑀓𑁂 𑀧𑀘𑁆𑀘𑀢𑁆𑀢𑀯𑀘𑀦𑀦𑁆𑀢𑀺 𑀆𑀳 ‘‘𑀢𑀢𑁄 𑀧𑁂𑀲𑀺𑀢𑁄’’𑀢𑀺.

𑀖𑀦𑀲𑁆𑀲 𑀲𑀡𑁆𑀞𑀸𑀦𑀁. 𑀦𑀺𑀩𑁆𑀩𑀢𑁆𑀢𑀁 𑀓𑀫𑁆𑀫𑀧𑀘𑁆𑀘𑀬𑀸𑀢𑀺 𑀢𑀁𑀲𑀡𑁆𑀞𑀸𑀦𑀁 𑀭𑀽𑀧𑀥𑀫𑁆𑀫𑀦𑀺𑀩𑁆𑀩𑀢𑁆𑀢𑀺𑀬𑀸 𑀚𑀸𑀬𑀢𑀺. ‘‘𑀚𑀭𑀸𑀫𑀭𑀡𑀁 𑀅𑀦𑀺𑀘𑁆𑀘𑀁 𑀲𑀗𑁆𑀔𑀢𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦’’𑀦𑁆𑀢𑀺 (𑀲𑀁. 𑀦𑀺. 𑁨.𑁨𑁦) 𑀳𑀺 𑀯𑀼𑀢𑁆𑀢𑀁.

𑀧𑀻𑀴𑀓𑀸𑀢𑀺 𑀧𑀻𑀴𑀓𑀲𑀤𑀺𑀲𑀸 𑀫𑀁𑀲𑀧𑀺𑀡𑁆𑀟𑀸 𑀚𑀸𑀬𑀦𑁆𑀢𑀺.

𑀲𑀢𑁆𑀢𑀫𑀸𑀤𑀻𑀦𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀅𑀝𑁆𑀞𑀫𑀲𑀢𑁆𑀢𑀸𑀳𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀏𑀓𑀘𑀢𑁆𑀢𑀸𑀮𑀻𑀲𑀸 𑀘𑀢𑀼𑀢𑁆𑀢𑀺𑀁𑀲 𑀲𑀢𑁆𑀢𑀸𑀳𑀸𑀦𑀺 𑀲𑀗𑁆𑀕𑀡𑁆𑀳𑀸𑀢𑀺. 𑀧𑀭𑀺𑀡𑀢𑀓𑀸𑀮𑀦𑁆𑀢𑀺 𑀕𑀩𑁆𑀪𑀲𑁆𑀲 𑀧𑀭𑀺𑀡𑀢𑀓𑀸𑀮𑀁. 𑀦𑀯𑀫𑀸𑀲𑀢𑁄 𑀩𑀳𑀺 𑀧𑀭𑀺𑀧𑀓𑁆𑀓𑁄 𑀦𑀸𑀫 𑀳𑁄𑀢𑀺 𑀓𑁂𑀲𑀮𑁄𑀫𑀸𑀤𑀺𑀦𑀺𑀩𑁆𑀩𑀢𑁆𑀢𑀺𑀢𑁄. 𑀢𑁂𑀦𑀸𑀳 ‘‘𑀤𑁆𑀯𑀸𑀘𑀢𑁆𑀢𑀸𑀮𑀻𑀲𑁂 𑀲𑀢𑁆𑀢𑀸𑀳𑁂 𑀏𑀢𑀸𑀦𑀺 𑀚𑀸𑀬𑀦𑁆𑀢𑀻’’𑀢𑀺.

𑀢𑀲𑁆𑀲𑀸𑀢𑀺 𑀕𑀩𑁆𑀪𑀲𑁂𑀬𑁆𑀬𑀓𑀲𑀢𑁆𑀢𑀲𑁆𑀲. 𑀫𑀸𑀢𑀼𑀉𑀤𑀭𑀧𑀝𑀮𑁂𑀦 𑀏𑀓𑀸𑀩𑀤𑁆𑀥𑁄 𑀳𑁄𑀢𑀺 𑀬𑀢𑁄 𑀫𑀸𑀢𑀭𑀸 𑀧𑀭𑀺𑀪𑀼𑀢𑁆𑀢𑀆𑀳𑀸𑀭𑁄 𑀆𑀫𑀸𑀲𑀬𑁂 𑀧𑀢𑀺𑀝𑁆𑀞𑀺𑀢𑁂 𑀕𑀩𑁆𑀪𑀲𑁆𑀲 𑀦𑀸𑀪𑀺𑀦𑀸𑀴𑀸𑀦𑀼𑀲𑀸𑀭𑁂𑀦 𑀕𑀩𑁆𑀪𑀕𑀢𑀲𑁆𑀲 𑀲𑀭𑀻𑀭𑀁 𑀲𑀫𑁆𑀧𑀢𑁆𑀯𑀸 𑀆𑀳𑀸𑀭𑀓𑀺𑀘𑁆𑀘𑀁 𑀓𑀭𑁄𑀢𑀺. 𑀆𑀳𑀸𑀭𑀲𑀫𑀼𑀝𑁆𑀞𑀸𑀦𑀭𑀽𑀧𑀁 𑀲𑀫𑀼𑀝𑁆𑀞𑀸𑀧𑁂𑀢𑀻𑀢𑀺 𑀕𑀩𑁆𑀪𑀕𑀢𑀲𑁆𑀲 𑀓𑀸𑀬𑁂 𑀑𑀚𑀸𑀬 𑀧𑀘𑁆𑀘𑀬𑁄 𑀳𑁄𑀢𑀺. 𑀲𑀸 𑀘 𑀢𑀁 𑀧𑀘𑁆𑀘𑀬𑀁 𑀮𑀪𑀺𑀢𑁆𑀯𑀸 𑀑𑀚𑀝𑁆𑀞𑀫𑀓𑀁 𑀭𑀽𑀧𑀁 𑀲𑀫𑀼𑀝𑁆𑀞𑀸𑀧𑁂𑀢𑀺. 𑀏𑀯𑀁 𑀫𑀸𑀢𑀭𑀸 𑀧𑀭𑀺𑀪𑀼𑀢𑁆𑀢𑀆𑀳𑀸𑀭𑀧𑀘𑁆𑀘𑀬𑁂𑀦 𑀕𑀩𑁆𑀪𑀕𑀢𑁄 𑀤𑀲 𑀫𑀸𑀲𑁂 𑀬𑀸𑀧𑁂𑀢𑀺 𑀅𑀢𑁆𑀢𑀦𑁄 𑀦𑀸𑀪𑀺𑀦𑀸𑀴𑀸𑀦𑀼𑀲𑀸𑀭𑀕𑀢𑁂𑀦𑁂𑀯 𑀢𑁂𑀦 𑀬𑀸𑀯 𑀆𑀳𑀸𑀭𑀲𑀫𑀼𑀝𑁆𑀞𑀸𑀦𑀲𑀢𑁆𑀢𑀸𑀳𑁄, 𑀢𑀢𑁄 𑀧𑀝𑁆𑀞𑀸𑀬 𑀆𑀳𑀭𑀡𑀢𑁄. 𑀓𑁂𑀘𑀺 𑀧𑀦 ‘‘𑀫𑀸𑀢𑀭𑀸 𑀧𑀭𑀺𑀪𑀼𑀢𑁆𑀢𑀆𑀳𑀸𑀭𑁄 𑀩𑀸𑀳𑀺𑀭𑀯𑀕𑁆𑀕𑁄 𑀯𑀺𑀬 𑀢𑀲𑁆𑀲 𑀓𑀸𑀬𑀁 𑀅𑀪𑀺𑀲𑀦𑁆𑀦𑁂𑀢𑀺 𑀧𑀭𑀺𑀲𑀦𑁆𑀦𑁂𑀢𑀺, 𑀢𑁂𑀦 𑀲𑁄 𑀬𑀸𑀧𑁂𑀢𑀻’’𑀢𑀺 𑀯𑀤𑀦𑁆𑀢𑀺. 𑀓𑀼𑀘𑁆𑀙𑀺𑀕𑀢𑀁 𑀉𑀤𑀭𑀧𑀝𑀮𑁂𑀦 𑀢𑀺𑀭𑁄𑀳𑀺𑀢𑀢𑁆𑀢𑀸 𑀩𑀳𑀺 𑀞𑀺𑀢𑀦𑁆𑀢𑀺 𑀯𑀢𑁆𑀢𑀩𑁆𑀩𑀢𑀁 𑀦 𑀅𑀭𑀳𑀢𑀻𑀢𑀺 ‘‘𑀓𑀼𑀘𑁆𑀙𑀺𑀬𑀸 𑀅𑀩𑁆𑀪𑀦𑁆𑀢𑀭𑀕𑀢𑁄’’𑀢𑀺 𑀆𑀳. 𑀫𑀸𑀢𑀼𑀓𑀼𑀘𑁆𑀙𑀺𑀕𑀢𑁄 𑀦𑀭𑁄𑀢𑀺 𑀫𑀸𑀢𑀼 𑀢𑀺𑀭𑁄𑀓𑀼𑀘𑁆𑀙𑀺𑀕𑀢𑁄. 𑀏𑀯𑀁 𑀔𑁄𑀢𑀺 𑀇𑀫𑀺𑀦𑀸 𑀬𑀣𑀸𑀯𑀼𑀢𑁆𑀢𑀸𑀓𑀸𑀭𑁂𑀦 𑀅𑀬𑀁 𑀲𑀢𑁆𑀢𑁄…𑀧𑁂… 𑀦𑀺𑀩𑁆𑀩𑀢𑁆𑀢𑀢𑀺, 𑀢𑀲𑁆𑀫𑀸 𑀭𑀽𑀧𑀁 𑀦 𑀚𑀻𑀯𑁄. 𑀦 𑀳𑀺 𑀤𑀺𑀝𑁆𑀞𑀺𑀕𑀢𑀲𑁆𑀲 𑀲𑀢𑁆𑀢𑀸𑀳𑀓𑁆𑀓𑀫𑁂𑀦 𑀯𑀼𑀟𑁆𑀠𑀺𑀧𑁆𑀧𑀢𑁆𑀢𑁄 𑀇𑀘𑁆𑀙𑀺𑀢𑁄 𑀅𑀦𑀺𑀘𑁆𑀘𑀢𑀸𑀧𑀢𑁆𑀢𑀺𑀢𑁄.

𑀇𑀦𑁆𑀤𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀲𑀓𑁆𑀓𑀦𑀸𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁩𑁬. 𑀲𑀓𑁆𑀓𑀦𑀸𑀫𑀓𑁄𑀢𑀺 𑀩𑀮𑀺𑀧𑀼𑀢𑁆𑀢𑁄 𑀯𑀺𑀬 𑀲𑀓𑁆𑀓𑀲𑁆𑀲 𑀯𑀲𑁂𑀦 𑀕𑀳𑀺𑀢𑀦𑀸𑀫𑁄. ‘‘𑀏𑀲𑁄 𑀓𑀺𑀭𑀸’’𑀢𑀺 𑀧𑀸𑀞𑁄. ‘‘𑀏𑀓𑁄 𑀓𑀺𑀭𑀸’’𑀢𑀺𑀧𑀺 𑀮𑀺𑀔𑀦𑁆𑀢𑀺. 𑀫𑀸𑀭𑀲𑁆𑀲 𑀧𑀓𑁆𑀔𑁂 𑀕𑀢𑁄 𑀫𑀸𑀭𑀧𑀓𑁆𑀔𑀺𑀓𑁄. 𑀬𑀤𑀜𑁆𑀜𑀦𑁆𑀢𑀺 𑀏𑀢𑁆𑀣 𑀬𑀦𑁆𑀢𑀺 𑀓𑀺𑀭𑀺𑀬𑀸𑀧𑀭𑀸𑀫𑀲𑀦𑀁, 𑀢𑀲𑁆𑀫𑀸 𑀬𑀁 𑀅𑀜𑁆𑀜𑀲𑁆𑀲 𑀅𑀦𑀼𑀲𑀸𑀲𑀦𑀁, 𑀢𑀁 𑀲𑀫𑀡𑀲𑁆𑀲 𑀦 𑀲𑀸𑀥𑀽𑀢𑀺 𑀬𑁄𑀚𑀦𑀸. 𑀓𑀸𑀭𑀡𑁂𑀦𑀸𑀢𑀺 𑀓𑀸𑀭𑀡𑀫𑀢𑁆𑀢𑁂𑀦 𑀲𑀁𑀯𑀸𑀲𑁄 𑀚𑀸𑀬𑀢𑀺. 𑀬𑁂𑀦 𑀓𑁂𑀦𑀘𑀺 𑀕𑀳𑀝𑁆𑀞𑁂𑀦 𑀯𑀸 𑀧𑀩𑁆𑀩𑀚𑀺𑀢𑁂𑀦 𑀯𑀸. 𑀢𑀁 𑀓𑀸𑀭𑀡𑀦𑁆𑀢𑀭𑀁 𑀲𑀫𑀸𑀕𑀢𑀁 𑀧𑀼𑀭𑀺𑀲𑀁 𑀲𑀧𑁆𑀧𑀜𑁆𑀜𑁄 𑀲𑀫𑁆𑀩𑀼𑀤𑁆𑀥𑁄 𑀅𑀦𑀼𑀓𑀫𑁆𑀧𑀺𑀢𑀼𑀁 𑀦𑀸𑀭𑀳𑀢𑀺 𑀯𑀺𑀲𑁂𑀲𑀸𑀥𑀺𑀕𑀫𑀸𑀪𑀸𑀯𑀸, 𑀲𑀢𑀺 𑀧𑀦 𑀢𑀲𑁆𑀫𑀺𑀁 𑀲𑀯𑀺𑀲𑁂𑀲𑀁 𑀧𑀲𑀸𑀤𑁄 𑀳𑁄𑀢𑀻𑀢𑀺. 𑀫𑀦𑀲𑀸 𑀘𑁂…𑀧𑁂… 𑀦 𑀢𑁂𑀦 𑀳𑁄𑀢𑀺 𑀲𑀁𑀬𑀼𑀢𑁆𑀢𑁄 𑀲𑀺𑀦𑁂𑀳𑀯𑀲𑁂𑀦 𑀅𑀦𑀼𑀓𑀫𑁆𑀧𑀸 𑀅𑀦𑀼𑀤𑁆𑀤𑀬𑀸 𑀢𑀲𑁆𑀲𑀸 𑀅𑀲𑀁𑀓𑀺𑀮𑀺𑀝𑁆𑀞𑀲𑀪𑀸𑀯𑀢𑁆𑀢𑀸.

𑀲𑀓𑁆𑀓𑀦𑀸𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀲𑀽𑀘𑀺𑀮𑁄𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁩𑁭. 𑀕𑀬𑀸𑀬 𑀅𑀯𑀺𑀤𑀽𑀭𑁂 𑀪𑀯𑁄 𑀕𑀸𑀫𑁄 ‘‘𑀕𑀬𑀸’’𑀢𑀺 𑀯𑀼𑀢𑁆𑀢𑁄𑀢𑀺 𑀆𑀳 ‘‘𑀕𑀬𑀸𑀬’’𑀦𑁆𑀢𑀺, 𑀢𑁂𑀦𑀸𑀳 ‘‘𑀕𑀬𑀸𑀬 𑀅𑀯𑀺𑀤𑀽𑀭𑁂 𑀦𑀺𑀯𑀺𑀝𑁆𑀞𑀕𑀸𑀫𑀁 𑀉𑀧𑀦𑀺𑀲𑀸𑀬𑀸𑀢𑀺 𑀅𑀢𑁆𑀣𑁄’’𑀢𑀺. 𑀕𑁄𑀘𑀭𑀕𑀸𑀫𑀦𑀺𑀤𑀲𑁆𑀲𑀦𑀁 𑀳𑁂𑀢𑀁. 𑀇𑀤𑀁 𑀉𑀧𑀭𑀺 𑀇𑀤𑀁 𑀳𑁂𑀝𑁆𑀞𑀸𑀢𑀺 𑀦𑀢𑁆𑀣𑀺 𑀉𑀧𑁆𑀧𑀝𑀺𑀧𑀸𑀝𑀺𑀬𑁄 𑀫𑀜𑁆𑀘𑀧𑀸𑀤𑀸𑀦𑀁 𑀤𑁆𑀯𑀻𑀲𑀼 𑀧𑀲𑁆𑀲𑁂𑀲𑀼 𑀤𑀻𑀖𑀪𑀸𑀯𑁂𑀦. 𑀩𑀮𑀺𑀓𑀫𑁆𑀫𑀢𑁆𑀣𑀸𑀬 𑀓𑀢𑀁 𑀤𑁂𑀯𑀢𑀸𑀥𑀺𑀝𑁆𑀞𑀸𑀦𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀤𑁂𑀯𑀝𑁆𑀞𑀸𑀦𑁂 𑀞𑀧𑁂𑀦𑁆𑀢𑀺. 𑀅𑀝𑁆𑀞𑀧𑀸𑀤𑀫𑀜𑁆𑀘𑀲𑀤𑀺𑀲𑁄 𑀓𑀺𑀭 𑀲𑁄 𑀳𑁂𑀝𑁆𑀞𑀼𑀧𑀭𑀺𑀧𑀭𑀺𑀯𑀢𑁆𑀢𑁂𑀢𑀩𑁆𑀩𑀢𑁄. 𑀓𑀣𑀺𑀦𑀲𑀺𑀩𑁆𑀩𑀦𑀲𑀽𑀘𑀺 𑀓𑀣𑀺𑀦𑀲𑀽𑀘𑀺. 𑀅𑀧𑀘𑁆𑀘𑀢𑁆𑀣𑀭𑀺𑀢𑁆𑀯𑀸𑀢𑀺 𑀓𑀺𑀜𑁆𑀘𑀺 𑀲𑀗𑁆𑀖𑀺𑀓𑀲𑁂𑀦𑀸𑀲𑀦𑀲𑁆𑀲 𑀉𑀧𑀭𑀺 𑀧𑀝𑀺𑀘𑁆𑀙𑀤𑀦𑀁 𑀅𑀧𑀘𑁆𑀘𑀢𑁆𑀣𑀭𑀺𑀢𑁆𑀯𑀸. 𑀕𑀯𑀘𑁆𑀙𑀺𑀯𑀺𑀚𑁆𑀛𑀺𑀢𑀁 𑀯𑀺𑀬𑀸𑀢𑀺 𑀢𑁂𑀳𑀺 𑀲𑀽𑀘𑀺𑀮𑁄𑀫𑁂𑀳𑀺 𑀕𑀯𑀘𑁆𑀙𑀺𑀚𑀸𑀮𑀁 𑀯𑀺𑀬 𑀕𑀢𑀁 𑀲𑀩𑁆𑀩𑀲𑁄 𑀲𑀫𑁄𑀳𑀢𑀁.

𑀇𑀥𑀸𑀧𑀺 ‘‘𑀔𑀭𑀲𑀭𑀻𑀭𑁄’’𑀢𑀺 𑀯𑀢𑁆𑀯𑀸 𑀔𑀭𑀲𑀭𑀻𑀭𑀁 𑀓𑀣𑀺𑀦𑀲𑀽𑀘𑀺𑀲𑀤𑀺𑀲𑀢𑀸𑀬 𑀮𑁄𑀫𑀲𑁆𑀲𑀸𑀢𑀺 𑀢𑀲𑁆𑀲 𑀢𑀣𑀸𑀪𑀸𑀯𑀲𑁆𑀲 𑀓𑀸𑀭𑀡𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀲𑁄 𑀓𑀺𑀭𑀸’’𑀢𑀺𑀆𑀤𑀺𑀫𑀸𑀳. 𑀅𑀢𑁆𑀢𑀦𑁄 𑀳𑀢𑁆𑀣𑁂𑀳𑀻𑀢𑀺 𑀲𑀗𑁆𑀖𑀺𑀓𑀢𑁂𑀮𑀲𑀫𑁆𑀫𑀓𑁆𑀔𑀺𑀢𑁂𑀳𑀺 𑀅𑀢𑁆𑀢𑀦𑁄 𑀲𑀭𑀻𑀭𑀁 𑀫𑀓𑁆𑀔𑁂𑀲𑀺. 𑀇𑀢𑀻𑀢𑀺 𑀯𑀼𑀢𑁆𑀢𑀸𑀓𑀸𑀭𑁂𑀦.

𑀲𑀫𑀸𑀕𑀫𑀝𑁆𑀞𑀸𑀦𑀦𑁆𑀢𑀺 𑀬𑀓𑁆𑀔𑀲𑀦𑁆𑀦𑀺𑀧𑀸𑀢𑀝𑁆𑀞𑀸𑀦𑀁. 𑀲𑁄𑀢𑀺 𑀲𑀽𑀘𑀺𑀮𑁄𑀫𑁄 𑀬𑀓𑁆𑀔𑁄. 𑀫𑀦𑁆𑀢𑀺 𑀘 𑀢𑀫𑁂𑀯 𑀯𑀤𑀢𑀺.

𑀉𑀝𑁆𑀞𑀸𑀧𑁂𑀢𑁆𑀯𑀸𑀢𑀺 𑀉𑀤𑁆𑀥𑀕𑁆𑀕𑀸 𑀓𑀢𑁆𑀯𑀸. 𑀅𑀧𑀦𑀸𑀫𑁂𑀲𑀻𑀢𑀺 𑀬𑀣𑀸 𑀲𑁄 𑀅𑀢𑁆𑀢𑀦𑁄 𑀓𑀸𑀬𑀁 𑀉𑀧𑀦𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀢𑀣𑀸 𑀓𑀭𑁄𑀦𑁆𑀢𑁄 𑀣𑁄𑀓𑀁 𑀅𑀧𑀦𑀸𑀫𑁂𑀲𑀺. 𑀅𑀫𑀦𑀼𑀜𑁆𑀜𑁄𑀢𑀺 𑀨𑀭𑀼𑀲𑀢𑀺𑀓𑁆𑀔𑀢𑀸𑀬 𑀦 𑀫𑀦𑀼𑀜𑁆𑀜𑁄. 𑀘𑀺𑀢𑁆𑀢𑀁 𑀯𑀸 𑀢𑁂 𑀔𑀺𑀧𑀺𑀲𑁆𑀲𑀸𑀫𑀻𑀢𑀺 𑀫𑀬𑁆𑀳𑀁 𑀆𑀦𑀼𑀪𑀸𑀯𑁂𑀦 𑀢𑀯 𑀘𑀺𑀢𑁆𑀢𑀯𑀺𑀓𑁆𑀔𑁂𑀧𑀁 𑀯𑀸 𑀓𑀭𑀺𑀲𑁆𑀲𑀸𑀫𑀺. 𑀬𑀣𑀸 𑀧𑀦 𑀲𑁄 𑀘𑀺𑀢𑁆𑀢𑀯𑀺𑀓𑁆𑀔𑁂𑀧𑀁 𑀓𑀭𑁂𑀬𑁆𑀬, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀬𑁂𑀲𑀜𑁆𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀪𑁂𑀭𑀯𑀁 𑀯𑀸𑀢𑀺 𑀯𑀼𑀢𑁆𑀢𑀸𑀓𑀸𑀭𑁂𑀦 𑀅𑀜𑁆𑀜𑀣𑀸 𑀯𑀸 𑀪𑀬𑀸𑀦𑀓𑀁 𑀤𑀲𑁆𑀲𑀦𑀫𑀢𑁆𑀢𑁂𑀦𑁂𑀯 𑀲𑀢𑁆𑀢𑀸𑀦𑀁 𑀪𑀬𑀁 𑀙𑀫𑁆𑀪𑀺𑀢𑀢𑁆𑀢𑀁 𑀮𑁄𑀫𑀳𑀁𑀲𑀁 𑀉𑀧𑁆𑀧𑀸𑀤𑁂𑀢𑀼𑀁 𑀲𑀫𑀢𑁆𑀣𑀁. ‘‘𑀓𑀣𑁂𑀦𑁆𑀢𑀸𑀦𑀁𑀬𑁂𑀯𑀸’’𑀢𑀺 𑀯𑀸 𑀧𑀸𑀞𑁄. 𑀢𑀁 𑀤𑁆𑀯𑀻𑀲𑀼 𑀧𑀸𑀤𑁂𑀲𑀼 𑀕𑀳𑁂𑀢𑁆𑀯𑀸 𑀧𑀸𑀭𑀁 𑀕𑀗𑁆𑀕𑀸𑀬 𑀔𑀺𑀧𑀺𑀲𑁆𑀲𑀸𑀫𑀻𑀢𑀺 𑀬𑁄𑀚𑀦𑀸.

𑀓𑀼𑀢𑁄𑀦𑀺𑀤𑀸𑀦𑀸𑀢𑀺 𑀓𑀲𑁆𑀫𑀸 𑀓𑀸𑀭𑀡𑀸? 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀲𑀫𑀸𑀲𑀧𑀤𑀫𑁂𑀢𑀁, 𑀯𑀺𑀪𑀢𑁆𑀢𑀺𑀅𑀮𑁄𑀧𑁂𑀦 𑀦𑀺𑀤𑁆𑀤𑁂𑀲𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀓𑀺𑀁𑀦𑀺𑀤𑀸𑀦𑀸 𑀓𑀺𑀁𑀧𑀘𑁆𑀘𑀬𑀸’’𑀢𑀺? 𑀅𑀢𑁆𑀣𑁄 𑀯𑀼𑀢𑁆𑀢𑁄. 𑀘𑀺𑀢𑁆𑀢𑀁 𑀑𑀲𑁆𑀲𑀚𑀦𑁆𑀢𑀻𑀢𑀺 𑀓𑀼𑀲𑀮𑀘𑀺𑀢𑁆𑀢𑀁 𑀧𑀯𑀢𑁆𑀢𑀺𑀢𑀼𑀁 𑀅𑀧𑁆𑀧𑀤𑀸𑀦𑀯𑀲𑁂𑀦 𑀧𑀼𑀭𑀢𑁄 𑀔𑀺𑀧𑀦𑁆𑀢𑀺. 𑀓𑀼𑀢𑁄 𑀲𑀫𑀼𑀝𑁆𑀞𑀸𑀬𑀸𑀢𑀺 𑀫𑀺𑀘𑁆𑀙𑀸𑀯𑀺𑀢𑀓𑁆𑀓𑀸𑀦𑀁 𑀲𑀫𑀼𑀝𑁆𑀞𑀸𑀦𑀁 𑀧𑀼𑀘𑁆𑀙𑀢𑀺?

𑀓𑀸𑀫𑀭𑀸𑀕𑀸𑀤𑀬𑁄 𑀲𑀼𑀪𑀦𑀺𑀫𑀺𑀢𑁆𑀢𑀸𑀤𑀻𑀲𑀼 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀳𑁂𑀢𑀽. 𑀓𑀸𑀫𑁄 𑀧𑀦 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄 𑀘 𑀦𑀺𑀬𑀓𑀚𑁆𑀛𑀢𑁆𑀢𑀧𑀭𑀺𑀬𑀸𑀧𑀦𑁆𑀦𑁄𑀢𑀺 𑀆𑀳 ‘‘𑀅𑀬𑀁 𑀅𑀢𑁆𑀢𑀪𑀸𑀯𑁄 𑀦𑀺𑀤𑀸𑀦𑀁 𑀏𑀢𑁂𑀲𑀦𑁆𑀢𑀺 𑀇𑀢𑁄𑀦𑀺𑀤𑀸𑀦𑀸’’𑀢𑀺𑀆𑀤𑀺. 𑀏𑀯𑀫𑁂𑀯𑀸𑀢𑀺 𑀅𑀝𑁆𑀞𑀓𑀣𑀸𑀬𑀁 𑀓𑀻𑀴𑀸𑀧𑀲𑀼𑀢𑀓𑀼𑀫𑀸𑀭𑀓𑀸 𑀯𑀺𑀬 𑀫𑀺𑀘𑁆𑀙𑀸𑀯𑀺𑀢𑀓𑁆𑀓𑀸 𑀤𑀝𑁆𑀞𑀩𑁆𑀩𑀸, 𑀢𑁂𑀲𑀁 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀪𑀽𑀢𑁄 𑀮𑁄𑀓𑁄 𑀯𑀺𑀬 𑀅𑀬𑀁 𑀅𑀢𑁆𑀢𑀪𑀸𑀯𑀮𑁄𑀓𑁄. 𑀢𑁂𑀳𑀺 𑀑𑀲𑁆𑀲𑀚𑀺𑀬𑀫𑀸𑀦𑀁 𑀥𑀗𑁆𑀓𑀁 𑀯𑀺𑀬 𑀘𑀺𑀢𑁆𑀢𑀁, 𑀢𑀲𑁆𑀲 𑀧𑀸𑀤𑁂 𑀩𑀤𑁆𑀥𑀤𑀻𑀖𑀲𑀼𑀢𑁆𑀢𑀓𑀁 𑀯𑀺𑀬 𑀢𑀁 𑀤𑀽𑀭𑀸𑀦𑀼𑀩𑀦𑁆𑀥𑀁 𑀲𑀁𑀬𑁄𑀚𑀦𑀦𑁆𑀢𑀺 𑀏𑀯𑀁 𑀉𑀧𑀫𑀸𑀬 𑀲𑀁𑀲𑀦𑁆𑀤𑀦𑀁 𑀤𑀝𑁆𑀞𑀩𑁆𑀩𑀁.

𑀧𑀸𑀧𑀯𑀺𑀢𑀓𑁆𑀓𑀸𑀦𑀁 𑀢𑀁𑀲𑀫𑁆𑀧𑀬𑀼𑀢𑁆𑀢𑀓𑀺𑀮𑁂𑀲𑀸𑀦𑀜𑁆𑀘 𑀢𑀡𑁆𑀳𑀸 𑀯𑀺𑀲𑁂𑀲𑀧𑀘𑁆𑀘𑀬𑁄 𑀢𑀤𑀪𑀸𑀯𑁂𑀦 𑀢𑁂𑀲𑀁 𑀅𑀪𑀸𑀯𑀢𑁄𑀢𑀺 𑀆𑀳 ‘‘𑀢𑀡𑁆𑀳𑀸𑀲𑀺𑀦𑁂𑀳𑀢𑁄 𑀚𑀸𑀢𑀸’’𑀢𑀺. 𑀅𑀢𑁆𑀢𑀪𑀸𑀯𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 ‘‘𑀅𑀢𑁆𑀢𑀦𑀺 𑀲𑀫𑁆𑀪𑀽𑀢𑀸’’𑀢𑀺 𑀯𑀼𑀢𑁆𑀢𑀁. 𑀢𑁂𑀦 𑀦𑁂𑀲𑀁 𑀅𑀦𑀜𑁆𑀜𑀳𑁂𑀢𑀼𑀓𑀢𑀁 𑀤𑀲𑁆𑀲𑁂𑀢𑀺, 𑀦𑀺𑀕𑁆𑀭𑁄𑀥𑀲𑁆𑀲𑁂𑀯 𑀔𑀦𑁆𑀥𑀚𑀸𑀢𑀻𑀢𑀺 𑀇𑀫𑀺𑀦𑀸 𑀧𑀦 𑀧𑀼𑀣𑀼𑀪𑀸𑀯𑀜𑁆𑀘, 𑀯𑀺𑀲𑀢𑁆𑀢𑀸𑀢𑀺𑀆𑀤𑀺𑀦𑀸 𑀤𑀼𑀩𑁆𑀩𑀺𑀦𑀺𑀲𑁆𑀲𑀝𑀢𑀜𑁆𑀘. 𑀯𑀢𑁆𑀣𑀼𑀓𑀸𑀫𑁂𑀲𑀼 𑀭𑀽𑀧𑀸𑀭𑀫𑁆𑀫𑀡𑀸𑀤𑀻𑀲𑀼 𑀧𑀼𑀣𑀽𑀲𑀼. 𑀧𑀼𑀣𑀽 𑀓𑀺𑀮𑁂𑀲𑀓𑀸𑀫𑀸 𑀓𑀸𑀫𑀭𑀽𑀧𑀢𑀡𑁆𑀳𑀸𑀤𑀬𑁄. 𑀢𑁂𑀳𑀺 𑀓𑀺𑀮𑁂𑀲𑀓𑀸𑀫𑁂𑀳𑀺 𑀓𑀭𑀡𑀪𑀽𑀢𑁂𑀳𑀺. 𑀅𑀢𑁆𑀢𑀪𑀸𑀯𑀁 𑀔𑀦𑁆𑀥𑀧𑀜𑁆𑀘𑀓𑀁. 𑀬𑁂 𑀯𑀺𑀧𑀲𑁆𑀲𑀦𑀸𑀬 𑀬𑀼𑀢𑁆𑀢𑀧𑀬𑀼𑀢𑁆𑀢𑀸 𑀬𑀸𑀣𑀸𑀯𑀢𑁄 𑀚𑀸𑀦𑀦𑁆𑀢𑀺.

𑀬𑀢𑁄𑀢𑀺 𑀧𑀘𑁆𑀘𑀢𑁆𑀢𑁂 𑀦𑀺𑀲𑁆𑀲𑀓𑁆𑀓𑀯𑀘𑀦𑀦𑁆𑀢𑀺 𑀆𑀳 ‘‘𑀬𑀁 𑀦𑀺𑀤𑀸𑀦𑀫𑀲𑁆𑀲𑀸’’𑀢𑀺. ‘‘𑀯𑀺𑀦𑁄𑀤𑁂𑀦𑁆𑀢𑀻’’𑀢𑀺 𑀓𑀢𑁆𑀢𑀼𑀦𑀺𑀤𑁆𑀤𑁂𑀲𑁂𑀦 𑀬𑁂𑀦 𑀦 𑀯𑀺𑀦𑁄𑀤𑁂𑀦𑁆𑀢𑀺, 𑀢𑀁 𑀓𑀸𑀭𑀡𑀁 𑀩𑀸𑀥𑀺𑀢𑀫𑁂𑀯𑀸𑀢𑀺 𑀆𑀳 ‘‘𑀫𑀕𑁆𑀕𑀲𑀘𑁆𑀘𑁂𑀦 𑀯𑀺𑀦𑁄𑀤𑁂𑀦𑁆𑀢𑀻’’𑀢𑀺. 𑀯𑀺𑀦𑁄𑀤𑀦𑀜𑁆𑀘𑁂𑀢𑁆𑀣 𑀲𑀦𑁆𑀢𑀸𑀦𑀢𑁄 𑀦𑀻𑀳𑀭𑀡𑀁 𑀩𑀳𑀺𑀓𑀭𑀡𑀁 𑀲𑀩𑁆𑀩𑀲𑁄 𑀧𑀳𑀸𑀦𑀁, 𑀧𑀳𑀻𑀦𑁂 𑀘 𑀢𑀲𑁆𑀫𑀺𑀁 𑀓𑀺𑀮𑁂𑀲𑁂 𑀑𑀖𑀁 𑀢𑀭𑀦𑁆𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀤𑀼𑀢𑁆𑀢𑀭’’𑀦𑁆𑀢𑀺𑀆𑀤𑀺𑀫𑀸𑀳. 𑀏𑀢𑀲𑁆𑀫𑀺𑀁 𑀅𑀥𑀺𑀕𑀢𑁂 𑀦 𑀧𑀼𑀦 𑀪𑀯𑁄𑀢𑀺 𑀅𑀧𑀼𑀦𑀩𑁆𑀪𑀯𑁄, 𑀦𑀺𑀩𑁆𑀩𑀸𑀦𑀦𑁆𑀢𑀺 𑀆𑀳 ‘‘𑀅𑀧𑀼𑀦𑀩𑁆𑀪𑀯𑀲𑀗𑁆𑀔𑀸𑀢𑀲𑁆𑀲𑀸’’𑀢𑀺𑀆𑀤𑀺. 𑀬𑀲𑁆𑀫𑀸 𑀏𑀢𑁆𑀣 ‘‘𑀬𑁂 𑀦𑀁 𑀧𑀚𑀸𑀦𑀦𑁆𑀢𑀺, 𑀬𑀢𑁄𑀦𑀺𑀤𑀸𑀦’’𑀦𑁆𑀢𑀺 𑀧𑀤𑀤𑁆𑀯𑀬𑁂𑀦 𑀤𑀼𑀓𑁆𑀔𑀲𑀫𑀼𑀤𑀬𑀲𑀘𑁆𑀘𑀸𑀦𑀺, 𑀯𑀺𑀦𑁄𑀤𑀦𑀕𑁆𑀕𑀳𑀡𑁂𑀦 𑀫𑀕𑁆𑀕𑀲𑀘𑁆𑀘𑀁, 𑀅𑀧𑀼𑀦𑀩𑁆𑀪𑀯𑀕𑁆𑀕𑀳𑀡𑁂𑀦 𑀦𑀺𑀭𑁄𑀥𑀲𑀘𑁆𑀘𑀁 𑀧𑀓𑀸𑀲𑀺𑀢𑀁, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀦𑁆𑀢𑁄’’𑀢𑀺.

𑀢𑀲𑁆𑀫𑀺𑀁𑀬𑁂𑀯𑀸𑀢𑀺 𑀬𑀢𑁆𑀣 𑀞𑀺𑀢𑁄 ‘‘𑀭𑀸𑀕𑁄 𑀘 𑀤𑁄𑀲𑁄 𑀘𑀸’’𑀢𑀺𑀆𑀤𑀺𑀦𑀸 𑀧𑀜𑁆𑀳𑀁 𑀧𑀼𑀘𑁆𑀙𑀺, 𑀢𑀲𑁆𑀫𑀺𑀁𑀬𑁂𑀯 𑀧𑀤𑁂𑀲𑁂 𑀞𑀺𑀢𑁄. 𑀤𑁂𑀲𑀦𑀸𑀦𑀼𑀲𑀸𑀭𑁂𑀦𑀸𑀢𑀺 𑀲𑀢𑁆𑀣𑀼 𑀲𑀸𑀫𑀼𑀓𑁆𑀓𑀁𑀲𑀺𑀓𑀥𑀫𑁆𑀫𑀤𑁂𑀲𑀦𑀸𑀬 𑀅𑀦𑀼𑀲𑁆𑀲𑀭𑀡𑁂𑀦. 𑀜𑀸𑀡𑀁 𑀧𑁂𑀲𑁂𑀢𑁆𑀯𑀸𑀢𑀺 𑀯𑀺𑀧𑀲𑁆𑀲𑀦𑀸𑀧𑀝𑀺𑀧𑀸𑀝𑀺𑀬𑀸 𑀦𑀺𑀩𑁆𑀩𑀸𑀦𑀁 𑀧𑀢𑀺 𑀅𑀦𑀼𑀩𑁄𑀥𑀜𑀸𑀡𑀁 𑀧𑁂𑀲𑁂𑀢𑁆𑀯𑀸 𑀧𑀯𑀢𑁆𑀢𑁂𑀢𑁆𑀯𑀸. 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀺𑀢𑁄𑀢𑀺 𑀲𑀳𑀲𑁆𑀲𑀦𑀬𑀧𑀝𑀺𑀫𑀡𑁆𑀟𑀺𑀢𑀲𑁆𑀲 𑀧𑀞𑀫𑀫𑀕𑁆𑀕𑀲𑁆𑀲 𑀅𑀥𑀺𑀕𑀫𑁂𑀦 𑀧𑀞𑀫𑀨𑀮𑁂 𑀧𑀢𑀺𑀝𑁆𑀞𑀺𑀢𑁄 𑀧𑀝𑀺𑀮𑀪𑀢𑀻𑀢𑀺 𑀬𑁄𑀚𑀦𑀸. 𑀦 𑀓𑀺𑀮𑀺𑀝𑁆𑀞𑀢𑁆𑀢𑀪𑀸𑀯𑁂 𑀢𑀺𑀝𑁆𑀞𑀦𑁆𑀢𑀺 𑀫𑀳𑀸𑀦𑀼𑀪𑀸𑀯𑀢𑁆𑀢𑀸 𑀅𑀭𑀺𑀬𑀥𑀫𑁆𑀫𑀲𑁆𑀲. 𑀲𑁂𑀢𑀓𑀡𑁆𑀟𑀼𑀧𑀻𑀴𑀓𑀲𑀽𑀘𑀺𑀬𑁄𑀢𑀺 𑀲𑁂𑀢𑀪𑀸𑀯𑀁 𑀧𑀢𑁆𑀯𑀸 𑀓𑀡𑁆𑀟𑀼𑀧𑀻𑀴𑀓𑀸 𑀮𑁄𑀫𑀲𑀽𑀘𑀺𑀬𑁄 𑀲𑀩𑁆𑀩𑀸 𑀅𑀦𑀯𑀲𑁂𑀲𑀸 𑀧𑀢𑀺𑀢𑀸 𑀧𑀭𑀺𑀪𑀝𑁆𑀞𑀸 𑀅𑀧𑀕𑀢𑀸. 𑀪𑀼𑀫𑁆𑀫𑀤𑁂𑀯𑀢𑀸𑀧𑀭𑀺𑀳𑀸𑀭𑀦𑁆𑀢𑀺 𑀪𑀼𑀫𑁆𑀫𑀤𑁂𑀯𑀢𑁆𑀢𑀪𑀸𑀯𑀦𑁆𑀢𑀺.

𑀲𑀽𑀘𑀺𑀮𑁄𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀫𑀡𑀺𑀪𑀤𑁆𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁩𑁮. 𑀲𑀼𑀔𑀁 𑀧𑀝𑀺𑀮𑀪𑀢𑀻𑀢𑀺 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀤𑀺𑀪𑁂𑀤𑀁 𑀲𑀼𑀔𑀁 𑀅𑀥𑀺𑀕𑀘𑁆𑀙𑀢𑀺. 𑀦𑀺𑀘𑁆𑀘𑀫𑁂𑀯 𑀲𑁂𑀬𑁆𑀬𑁄 𑀲𑀢𑀺𑀫𑀢𑁄 𑀆𑀬𑀢𑀺𑀁 𑀳𑀺𑀢𑀘𑀭𑀡𑀢𑁄. 𑀫𑀡𑀺𑀪𑀤𑁆𑀤𑁄 ‘‘𑀲𑀢𑀺𑀫𑀸𑀧𑀼𑀕𑁆𑀕𑀮𑁄 𑀲𑀢𑁄𑀓𑀸𑀭𑀻 𑀲𑀫𑁆𑀧𑀢𑀺 𑀯𑁂𑀭𑀁 𑀦𑀧𑁆𑀧𑀲𑀯𑀢𑀻’’𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀯𑁂𑀭𑀸 𑀘 𑀧𑀭𑀺𑀫𑀼𑀘𑁆𑀘𑀢𑀻’’𑀢𑀺 𑀆𑀳. 𑀪𑀕𑀯𑀸 𑀧𑀦 𑀲𑀢𑀺𑀫𑀦𑁆𑀢𑀢𑀸𑀲𑀺𑀤𑁆𑀥𑀺𑀬𑀸 𑀯𑁂𑀭𑀧𑀭𑀺𑀫𑀼𑀘𑁆𑀘𑀦𑀁 𑀦 𑀅𑀘𑁆𑀘𑀦𑁆𑀢𑀺𑀓𑀁, 𑀦𑀸𑀧𑀺 𑀏𑀓𑀦𑁆𑀢𑀺𑀓𑀁 𑀧𑀝𑀺𑀧𑀓𑁆𑀔𑁂𑀦 𑀧𑀭𑀢𑁄 𑀘 𑀅𑀧𑁆𑀧𑀳𑀻𑀦𑀢𑁆𑀢𑀸𑀢𑀺 𑀢𑀁 𑀦𑀺𑀲𑁂𑀥𑁂𑀦𑁆𑀢𑁄 ‘‘𑀯𑁂𑀭𑀸 𑀘 𑀦 𑀧𑀭𑀺𑀫𑀼𑀘𑁆𑀘𑀢𑀻’’𑀢𑀺 𑀯𑀢𑁆𑀯𑀸, 𑀬𑀁 𑀅𑀘𑁆𑀘𑀦𑁆𑀢𑀺𑀓𑀁 𑀏𑀓𑀦𑁆𑀢𑀺𑀓𑀜𑁆𑀘 𑀧𑀭𑀲𑁆𑀲 𑀯𑀲𑁂𑀦 𑀯𑁂𑀭𑀧𑀭𑀺𑀫𑀼𑀘𑁆𑀘𑀦𑀁, 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀲𑁆𑀲𑀸’’𑀢𑀺 𑀕𑀸𑀣𑀫𑀸𑀳. 𑀓𑀭𑀼𑀡𑀸𑀬𑀸𑀢𑀺 𑀅𑀧𑁆𑀧𑀦𑀸𑀧𑁆𑀧𑀢𑁆𑀢𑀸𑀬 𑀓𑀭𑀼𑀡𑀸𑀬. 𑀓𑀭𑀼𑀡𑀸𑀧𑀼𑀩𑁆𑀩𑀪𑀸𑀕𑁂𑀢𑀺 𑀓𑀭𑀼𑀡𑀸𑀪𑀸𑀯𑀦𑀸𑀬 𑀯𑀲𑁂𑀦 𑀉𑀧𑁆𑀧𑀸𑀤𑀺𑀢𑀧𑀞𑀫𑀚𑁆𑀛𑀸𑀦𑀽𑀧𑀘𑀸𑀭𑁂. 𑀲𑁄𑀢𑀺 𑀓𑀭𑀼𑀡𑀸𑀪𑀸𑀯𑀦𑀁 𑀪𑀸𑀯𑁂𑀦𑁆𑀢𑁄 𑀧𑀼𑀕𑁆𑀕𑀮𑁄. 𑀫𑁂𑀢𑁆𑀢𑀁𑀲𑁄𑀢𑀺 𑀫𑁂𑀢𑁆𑀢𑀘𑀺𑀢𑁆𑀢𑀁 𑀅𑀁𑀲𑁄 𑀏𑀓𑁄 𑀓𑀼𑀲𑀮𑀓𑁄𑀝𑁆𑀞𑀸𑀲𑁄 𑀏𑀢𑀲𑁆𑀲𑀸𑀢𑀺 𑀫𑁂𑀢𑁆𑀢𑀁𑀲𑁄. 𑀢𑀲𑁆𑀲 𑀓𑁂𑀦𑀘𑀻𑀢𑀺 𑀢𑀲𑁆𑀲 𑀅𑀭𑀳𑀢𑁄 𑀓𑀭𑀼𑀡𑀸𑀬 𑀫𑁂𑀢𑁆𑀢𑀸𑀪𑀸𑀯𑀦𑀸𑀬 𑀘 𑀲𑀸𑀢𑀺𑀲𑀬𑀢𑁆𑀢𑀸 𑀢𑀤𑀪𑀸𑀯𑁂𑀦 𑀓𑁂𑀦𑀘𑀺 𑀧𑀼𑀕𑁆𑀕𑀮𑁂𑀦 𑀲𑀤𑁆𑀥𑀺𑀁 𑀯𑁂𑀭𑀧𑁆𑀧𑀲𑀗𑁆𑀕𑁄 𑀦𑀸𑀫 𑀦𑀢𑁆𑀣𑀺. 𑀇𑀫𑀺𑀦𑀸 𑀔𑀻𑀡𑀸𑀲𑀯𑁂𑀧𑀺 𑀫𑁂𑀢𑁆𑀢𑀸𑀓𑀭𑀼𑀡𑀸𑀪𑀸𑀯𑀦𑀸𑀭𑀳𑀺𑀢𑁂 𑀓𑁄𑀘𑀺 𑀅𑀢𑁆𑀢𑀦𑁄 𑀘𑀺𑀢𑁆𑀢𑀤𑁄𑀲𑁂𑀦 𑀯𑁂𑀭𑀁 𑀓𑀭𑁂𑀬𑁆𑀬, 𑀦 𑀧𑀦 𑀢𑀲𑁆𑀫𑀺𑀁 𑀫𑁂𑀢𑁆𑀢𑀸𑀓𑀭𑀼𑀡𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀲𑀫𑀦𑁆𑀦𑀸𑀕𑀢𑁂 𑀓𑁄𑀘𑀺 𑀯𑁂𑀭𑀁 𑀓𑀭𑁂𑀬𑁆𑀬. 𑀏𑀯𑀁 𑀫𑀳𑀺𑀤𑁆𑀥𑀺𑀓𑀸 𑀩𑁆𑀭𑀳𑁆𑀫𑀯𑀺𑀳𑀸𑀭𑀪𑀸𑀯𑀦𑀸𑀢𑀺 𑀤𑀲𑁆𑀲𑁂𑀢𑀺.

𑀫𑀡𑀺𑀪𑀤𑁆𑀤𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀲𑀸𑀦𑀼𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁩𑁯. 𑀬𑀓𑁆𑀔𑁂𑀦 𑀕𑀳𑀺𑀢𑁄 𑀳𑁄𑀢𑀻𑀢𑀺 𑀬𑀓𑁆𑀔𑁂𑀦 𑀅𑀦𑀼𑀧𑀯𑀺𑀝𑁆𑀞𑁄 𑀳𑁄𑀢𑀺. 𑀢𑀲𑁆𑀲 𑀬𑀓𑁆𑀔𑀕𑀳𑀡𑀲𑁆𑀲 𑀓𑀸𑀭𑀡𑀁 𑀫𑀽𑀮𑀢𑁄 𑀧𑀪𑀼𑀢𑀺 𑀯𑀺𑀢𑁆𑀣𑀸𑀭𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀲𑁄’’𑀢𑀺𑀆𑀤𑀺𑀫𑀸𑀳. 𑀢𑀲𑁆𑀲 𑀅𑀦𑁆𑀢𑀺𑀫𑀪𑀯𑀺𑀓𑀢𑁆𑀢𑀸 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀅𑀥𑀺𑀲𑀻𑀮𑀲𑀺𑀓𑁆𑀔𑀸𑀬 𑀲𑀓𑁆𑀓𑀘𑁆𑀘𑀁 𑀧𑀽𑀭𑀡𑀦𑁆𑀢𑀺 𑀤𑀲𑁆𑀲𑁂𑀢𑀺 ‘‘𑀲𑁄 𑀧𑀩𑁆𑀩𑀚𑀺𑀢𑀓𑀸𑀮𑀢𑁄’’𑀢𑀺𑀆𑀤𑀺𑀦𑀸. 𑀧𑀘𑁆𑀘𑀸𑀳𑀸𑀭𑀦𑁆𑀢𑀺 𑀧𑀝𑀺𑀓𑁆𑀔𑁂𑀧𑀁. 𑀇𑀫𑀲𑁆𑀫𑀺𑀁 𑀲𑀭𑀪𑀜𑁆𑀜𑁂𑀢𑀺 𑀇𑀫𑀲𑁆𑀫𑀺𑀁 𑀫𑀫 𑀥𑀫𑁆𑀫𑀪𑀡𑀦𑁂. 𑀧𑀢𑁆𑀢𑀺𑀦𑁆𑀢𑀺 𑀧𑀢𑁆𑀢𑀺𑀤𑀸𑀦𑀁. 𑀧𑀺𑀬𑀸 𑀳𑁄𑀦𑁆𑀢𑀺, 𑀢𑁂𑀦𑀸𑀳 𑀪𑀕𑀯𑀸 ‘‘𑀆𑀓𑀗𑁆𑀔𑁂𑀬𑁆𑀬 𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 ‘𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀧𑀺𑀬𑁄 𑀘 𑀅𑀲𑁆𑀲𑀁 𑀫𑀦𑀸𑀧𑁄 𑀘 𑀕𑀭𑀼 𑀘 𑀪𑀸𑀯𑀦𑀻𑀬𑁄 𑀘𑀸’𑀢𑀺, 𑀲𑀻𑀮𑁂𑀲𑁆𑀯𑁂𑀯𑀲𑁆𑀲 𑀧𑀭𑀺𑀧𑀽𑀭𑀓𑀸𑀭𑀻’’𑀢𑀺 (𑀫. 𑀦𑀺. 𑁧.𑁬𑁫). 𑀢𑀣𑀸 𑀘𑀸𑀳 ‘‘𑀢𑀲𑁆𑀫𑀺𑀁 𑀲𑀸𑀫𑀡𑁂𑀭𑁂’’𑀢𑀺𑀆𑀤𑀺.

𑀯𑀼𑀟𑁆𑀠𑀺𑀫𑀦𑁆𑀯𑀸𑀬𑀸𑀢𑀺 𑀬𑁄𑀩𑁆𑀩𑀦𑀧𑁆𑀧𑀢𑁆𑀢𑀺𑀬𑀸 𑀅𑀗𑁆𑀕𑀧𑀘𑁆𑀘𑀗𑁆𑀕𑀸𑀦𑀁 𑀧𑀭𑀺𑀯𑀼𑀟𑁆𑀠𑀺𑀫𑀸𑀕𑀫𑁆𑀫. 𑀓𑀸𑀫𑀲𑀫𑁆𑀪𑁄𑀕𑀲𑀫𑀢𑁆𑀣𑀢𑀸𑀯𑀲𑁂𑀦 𑀧𑀭𑀺𑀧𑀓𑁆𑀓𑀺𑀦𑁆𑀤𑁆𑀭𑀺𑀬𑁄. 𑀅𑀦𑀼𑀬𑁄𑀚𑁂𑀢𑁆𑀯𑀸𑀯𑀸𑀢𑀺 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸𑀯, 𑀕𑀺𑀳𑀺𑀪𑀸𑀯𑁂 𑀯𑀸 𑀅𑀦𑀼𑀬𑁄𑀚𑁂𑀢𑁆𑀯𑀸𑀯. ‘‘𑀧𑀼𑀩𑁆𑀩𑁂 𑀢𑀼𑀬𑁆𑀳𑀁 𑀧𑀼𑀢𑁆𑀢𑁄 𑀲𑀻𑀮𑀯𑀸 𑀓𑀮𑁆𑀬𑀸𑀡𑀥𑀫𑁆𑀫𑁄 𑀮𑀚𑁆𑀚𑀻 𑀓𑀼𑀓𑁆𑀓𑀼𑀘𑁆𑀘𑀓𑁄 𑀲𑀺𑀓𑁆𑀔𑀸𑀓𑀸𑀫𑁄𑀢𑀺 𑀲𑀫𑁆𑀪𑀸𑀯𑀺𑀢𑁄, 𑀇𑀤𑀸𑀦𑀺 𑀢𑀢𑁄 𑀅𑀜𑁆𑀜𑀣𑀸 𑀚𑀸𑀢𑁄’’𑀢𑀺 𑀖𑁄𑀲𑀦𑀸𑀯𑀲𑁂𑀦 𑀤𑁂𑀯𑀢𑀸𑀦𑀁 𑀅𑀦𑁆𑀢𑀭𑁂 𑀫𑀸𑀳𑁂𑀯 𑀫𑁂 𑀮𑀚𑁆𑀚𑀁 𑀉𑀧𑁆𑀧𑀸𑀤𑁂𑀬𑁆𑀬.

𑀧𑀸𑀝𑀺𑀳𑀸𑀭𑀺𑀬𑀧𑀓𑁆𑀔𑀜𑁆𑀘𑀸𑀢𑀺 𑀘𑀸𑀢𑀼𑀤𑁆𑀤𑀲𑀻𑀧𑀜𑁆𑀘𑀤𑀲𑀻𑀅𑀝𑁆𑀞𑀫𑀻𑀦𑀁 𑀬𑀣𑀸𑀓𑁆𑀓𑀫𑀁 𑀆𑀤𑀺𑀢𑁄 𑀅𑀦𑁆𑀢𑀢𑁄 𑀆𑀤𑀺𑀅𑀦𑁆𑀢𑀢𑁄 𑀘 𑀧𑀯𑁂𑀲𑀦𑀦𑀺𑀓𑁆𑀔𑀫𑀦𑀯𑀲𑁂𑀦 𑀉𑀧𑁄𑀲𑀣𑀲𑀻𑀮𑀲𑁆𑀲 𑀧𑀝𑀺 𑀧𑀝𑀺 𑀅𑀪𑀺𑀫𑀼𑀔𑀁 𑀧𑀘𑁆𑀘𑀸𑀯𑀳𑀺𑀢𑀩𑁆𑀩𑀧𑀓𑁆𑀔𑀜𑁆𑀘. 𑀢𑁂𑀭𑀲𑀺𑀬𑀸𑀧𑀻𑀢𑀺 𑀧𑀭𑀁 𑀲𑀢𑁆𑀢𑀫𑀻𑀦𑀯𑀫𑀻𑀲𑀼𑀧𑀻𑀢𑀺 𑀅𑀢𑁆𑀣𑁄. 𑀧𑀯𑁂𑀲𑀪𑀽𑀢𑀜𑁆𑀳𑀺 𑀉𑀧𑁄𑀲𑀣𑀲𑀻𑀮𑀲𑁆𑀲 𑀲𑀢𑁆𑀢𑀫𑀻𑀲𑀼 𑀲𑀫𑀸𑀤𑀺𑀦𑁆𑀦𑀁 𑀲𑀻𑀮𑀁 𑀧𑀝𑀺𑀧𑀤𑀁, 𑀦𑀯𑀫𑀻𑀲𑀼 𑀦𑀺𑀓𑁆𑀔𑀫𑀪𑀽𑀢𑀦𑁆𑀢𑀺 𑀆𑀘𑀭𑀺𑀬𑀸. 𑀧𑁄𑀭𑀸𑀡𑀝𑁆𑀞𑀓𑀣𑀸𑀬𑀁 𑀧𑀦 𑀧𑀘𑁆𑀘𑀼𑀕𑁆𑀕𑀫𑀦𑀸𑀦𑀼𑀕𑀫𑀦𑀧𑀭𑀺𑀬𑀸𑀬𑁂𑀦 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀫𑀦𑀼𑀲𑁆𑀲𑀸’’𑀢𑀺𑀆𑀤𑀺. 𑀅𑀟𑁆𑀠𑀫𑀸𑀲𑀦𑁆𑀢𑀺 𑀲𑀓𑀮𑀓𑀸𑀮𑀧𑀓𑁆𑀔𑀁. 𑀏𑀯𑀜𑁆𑀳𑀺 𑀯𑀲𑁆𑀲𑀯𑀸𑀲𑀲𑁆𑀲 𑀅𑀦𑀼𑀕𑀫𑀦𑀁 𑀕𑀢𑀁 𑀳𑁄𑀢𑀺. 𑀲𑀼𑀝𑁆𑀞𑀼 𑀲𑀫𑀸𑀕𑀢𑀦𑁆𑀢𑀺 𑀲𑀼𑀧𑀭𑀺𑀲𑀼𑀤𑁆𑀥𑀁 𑀲𑀫𑁆𑀧𑀦𑁆𑀦𑀁 𑀓𑀢𑁆𑀯𑀸 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑀁 𑀆𑀕𑀢𑀁. 𑀢𑀁 𑀧𑀦 𑀅𑀢𑁆𑀢𑀦𑁄 𑀘𑀺𑀢𑁆𑀢𑁂𑀦 𑀲𑀫𑀁 𑀧𑀓𑀸𑀭𑁂𑀳𑀺 𑀬𑀼𑀢𑁆𑀢𑀁 𑀳𑁄𑀢𑀻𑀢𑀺 𑀆𑀳 ‘‘𑀲𑀫𑁆𑀧𑀬𑀼𑀢𑁆𑀢’’𑀦𑁆𑀢𑀺. 𑀅𑀭𑀳𑀦𑁆𑀢𑀸𑀦𑀁 𑀅𑀦𑀼𑀓𑀭𑀡𑁂𑀦 𑀲𑁂𑀝𑁆𑀞𑀘𑀭𑀺𑀬𑀁. ‘‘𑀦 𑀢𑁂 𑀳𑀺 𑀬𑀓𑁆𑀔𑀸 𑀓𑀻𑀴𑀦𑁆𑀢𑀻’’𑀢𑀺 𑀅𑀢𑁆𑀢𑀦𑁄 𑀧𑀼𑀢𑁆𑀢𑀲𑁆𑀲 𑀓𑀸𑀬𑁂 𑀅𑀥𑀺𑀫𑀼𑀘𑁆𑀘𑀦𑀁 𑀅𑀢𑁆𑀢𑀦𑁄 𑀓𑀻𑀴𑀦𑀁 𑀯𑀺𑀬 𑀳𑁄𑀢𑀻𑀢𑀺 𑀓𑀢𑁆𑀯𑀸 𑀆𑀳.

𑀉𑀧𑀸𑀲𑀺𑀓𑀸 𑀬𑀣𑀸𑀯𑀼𑀢𑁆𑀢𑀉𑀧𑁄𑀲𑀣𑀲𑀻𑀮𑁂𑀦 𑀲𑀻𑀮𑀯𑀢𑀻, 𑀲𑀸𑀫𑀡𑁂𑀭𑁄 𑀧𑀦 𑀅𑀢𑁆𑀢𑀦𑁄 𑀲𑀸𑀫𑀡𑁂𑀭𑀲𑀻𑀮𑁂𑀦 𑀲𑀻𑀮𑀯𑀸. 𑀉𑀧𑁆𑀧𑀢𑀺𑀢𑁆𑀯𑀸𑀢𑀺 𑀆𑀓𑀸𑀲𑁂 𑀉𑀧𑁆𑀧𑀢𑀺𑀢𑁆𑀯𑀸. 𑀫𑁄𑀓𑁆𑀔𑁄 𑀦𑀢𑁆𑀣𑀺 𑀤𑀼𑀓𑁆𑀔𑀸𑀯𑀳𑀲𑁆𑀲 𑀓𑀫𑁆𑀫𑀲𑁆𑀲 𑀓𑀢𑀽𑀧𑀘𑀺𑀢𑀢𑁆𑀢𑀸.

𑀤𑀼𑀯𑀺𑀥𑁂𑀧𑀺 𑀓𑀸𑀫𑁂𑀢𑀺 𑀯𑀢𑁆𑀣𑀼𑀓𑀸𑀫𑀓𑀺𑀮𑁂𑀲𑀓𑀸𑀫𑁂. 𑀓𑀺𑀮𑁂𑀲𑀓𑀸𑀫𑀁 𑀧𑀭𑀺𑀘𑁆𑀘𑀚𑀦𑁆𑀢𑁄 𑀏𑀯 𑀳𑀺 𑀯𑀢𑁆𑀣𑀼𑀓𑀸𑀫𑁂 𑀧𑀭𑀺𑀘𑁆𑀘𑀚𑀢𑀺 𑀦𑀸𑀫. 𑀯𑀺𑀩𑁆𑀪𑀫𑀦𑀯𑀲𑁂𑀦 𑀆𑀕𑀘𑁆𑀙𑀢𑀺 𑀪𑀺𑀓𑁆𑀔𑀸𑀬 𑀆𑀳𑀺𑀡𑁆𑀟𑀦𑀸𑀤𑀺𑀧𑀩𑁆𑀩𑀚𑀺𑀢𑀓𑀺𑀘𑁆𑀘𑀢𑁄. 𑀉𑀧𑁆𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀕𑀢𑀲𑀻𑀮𑀲𑁆𑀲 𑀚𑀻𑀯𑀢𑁄 𑀆𑀦𑀸𑀧𑀸𑀦𑀫𑀢𑁆𑀢𑁂𑀦 𑀚𑀻𑀯𑀦𑁆𑀢𑁄𑀧𑀺 𑀲𑁄 𑀫𑀢𑀓𑁄𑀯. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀫𑀭𑀡𑀜𑁆𑀳𑁂𑀢𑀁, 𑀲𑀼𑀦𑀓𑁆𑀔𑀢𑁆𑀢, 𑀅𑀭𑀺𑀬𑀲𑁆𑀲 𑀯𑀺𑀦𑀬𑁂, 𑀬𑁄 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀬 𑀳𑀻𑀦𑀸𑀬𑀸𑀯𑀢𑁆𑀢𑀢𑀻’’𑀢𑀺 (𑀫. 𑀦𑀺. 𑁩.𑁪𑁫).

𑀉𑀡𑁆𑀳𑀝𑁆𑀞𑁂𑀦𑀸𑀢𑀺 𑀲𑀧𑀭𑀺𑀴𑀸𑀳𑀝𑁆𑀞𑁂𑀦. 𑀅𑀪𑀺𑀥𑀸𑀯𑀣𑀸𑀢𑀺 𑀅𑀪𑀺𑀥𑀸𑀯𑀢𑀻𑀢𑀺 𑀇𑀫𑀲𑁆𑀫𑀺𑀁 𑀅𑀪𑀺𑀥𑀸𑀯𑀦𑀓𑀺𑀘𑁆𑀘𑁂 𑀪𑀤𑁆𑀤𑀁 𑀢𑁂 𑀳𑁄𑀢𑀽𑀢𑀺 𑀯𑀢𑁆𑀯𑀸 𑀕𑀺𑀳𑀺𑀪𑀸𑀯𑀸𑀬 𑀅𑀪𑀺𑀥𑀸𑀯𑀣. 𑀦𑀻𑀳𑀭𑀺𑀢𑁆𑀯𑀸𑀢𑀺 𑀦𑀺𑀓𑁆𑀔𑀸𑀫𑁂𑀢𑁆𑀯𑀸. 𑀏𑀓𑀸𑀤𑀲𑀳𑀺 𑀅𑀕𑁆𑀕𑀻𑀳𑀺 𑀆𑀤𑀺𑀢𑁆𑀢𑀢𑁆𑀢𑀸 𑀫𑀳𑀸𑀟𑀸𑀳𑀲𑀤𑀺𑀲𑁂. 𑀲𑀮𑁆𑀮𑀓𑁆𑀔𑁂𑀢𑁆𑀯𑀸𑀢𑀺 𑀕𑀺𑀳𑀺𑀪𑀸𑀯𑁂 𑀆𑀤𑀻𑀦𑀯𑀁, 𑀧𑀩𑁆𑀩𑀚𑁆𑀚𑀸𑀬 𑀆𑀦𑀺𑀲𑀁𑀲𑀜𑁆𑀘 𑀲𑀮𑁆𑀮𑀓𑁆𑀔𑁂𑀢𑁆𑀯𑀸. 𑀳𑀺𑀭𑁄𑀢𑁆𑀢𑀧𑁆𑀧𑀁 𑀧𑀝𑀺𑀮𑀪𑀺𑀢𑁆𑀯𑀸 ‘‘𑀫𑀫 𑀉𑀧𑁆𑀧𑀩𑁆𑀩𑀚𑀺𑀢𑀼𑀓𑀸𑀫𑀢𑀁 𑀲𑀩𑁆𑀭𑀳𑁆𑀫𑀘𑀸𑀭𑀺𑀦𑁄 𑀚𑀸𑀦𑀺𑀲𑁆𑀲𑀦𑁆𑀢𑀻’’𑀢𑀺. 𑀘𑀢𑀼𑀦𑁆𑀦𑀁 𑀧𑀭𑀺𑀲𑀸𑀦𑀁 𑀘𑀺𑀢𑁆𑀢𑀲𑀗𑁆𑀔𑁄𑀪𑀯𑀲𑁂𑀦 𑀲𑀓𑀮𑀚𑀫𑁆𑀩𑀼𑀤𑀻𑀧𑀁 𑀔𑁄𑀪𑁂𑀢𑁆𑀯𑀸.

𑀲𑀸𑀦𑀼𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀧𑀺𑀬𑀗𑁆𑀓𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁪𑁦. 𑀧𑀘𑁆𑀘𑀦𑁆𑀢𑁂𑀢𑀺 𑀧𑀭𑀺𑀬𑀦𑁆𑀢𑁂. 𑀧𑀸𑀝𑀺𑀬𑁂𑀓𑁆𑀓𑀦𑁆𑀢𑀺 𑀲𑀗𑁆𑀕𑀻𑀢𑀺𑀓𑀸𑀮𑁂 𑀯𑀺𑀲𑀼𑀁. 𑀬𑀫𑀓𑀯𑀕𑁆𑀕𑀸𑀤𑀺𑀓𑀸 𑀩𑁆𑀭𑀸𑀳𑁆𑀫𑀡𑀯𑀕𑁆𑀕𑀧𑀭𑀺𑀬𑁄𑀲𑀸𑀦𑀸 𑀙𑀩𑁆𑀩𑀻𑀲𑀢𑀺 𑀯𑀕𑁆𑀕𑀸 𑀏𑀢𑀺𑀲𑁆𑀲𑀸𑀢𑀺 𑀙𑀩𑁆𑀩𑀻𑀲𑀢𑀺𑀯𑀕𑁆𑀕𑀸, 𑀢𑀦𑁆𑀢𑀻𑀢𑀺 𑀧𑀸𑀴𑀺. 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑀸𑀤𑀺 𑀏𑀯𑀭𑀽𑀧𑀁 𑀤𑀼𑀩𑁆𑀪𑁄𑀚𑀦𑀁, ‘‘𑀅𑀲𑀼𑀘𑀺𑀚𑁂𑀕𑀼𑀘𑁆𑀙𑀪𑀸𑀯𑁂𑀦 𑀤𑀼𑀝𑁆𑀞𑀼 𑀪𑁄𑀚𑀦’’𑀦𑁆𑀢𑀺 𑀓𑀢𑁆𑀯𑀸, 𑀤𑀼𑀩𑁆𑀪𑁄𑀚𑀦𑀕𑁆𑀕𑀳𑀡𑁂𑀦 𑀯𑀸 𑀯𑀦𑁆𑀢𑀕𑀩𑁆𑀪𑀫𑀮𑀸𑀤𑀻𑀦𑀺 𑀅𑀢𑀺𑀤𑀺𑀲𑀢𑀺. 𑀙𑀯𑀺𑀆𑀤𑀻𑀦𑀺 𑀙𑁂𑀢𑁆𑀯𑀸𑀢𑀺 𑀙𑀯𑀺𑀆𑀤𑀻𑀦𑀺 𑀅𑀢𑀺𑀯𑀺𑀚𑁆𑀛 𑀅𑀢𑀺𑀯𑀺𑀬 𑀧𑀯𑀺𑀲𑀺𑀢𑁆𑀯𑀸. 𑀅𑀝𑁆𑀞𑀺𑀫𑀺𑀜𑁆𑀚𑀁 𑀆𑀳𑀘𑁆𑀘 𑀅𑀝𑁆𑀞𑀸𑀲𑀺 𑀧𑀻𑀢𑀺𑀲𑀫𑀼𑀝𑁆𑀞𑀸𑀦𑀉𑀴𑀸𑀭𑁄𑀴𑀸𑀭𑀭𑀽𑀧𑀧𑁆𑀧𑀯𑀢𑁆𑀢𑀺𑀬𑀸. 𑀢𑁂𑀦𑀸𑀳 ‘‘𑀳𑀤𑀬𑀗𑁆𑀕𑀫𑀦𑀻𑀬𑁄 𑀳𑀼𑀢𑁆𑀯𑀸’’𑀢𑀺.

𑀥𑀫𑁆𑀫𑀢𑀸𑀬 𑀲𑀫𑀸𑀤𑀺𑀡𑁆𑀡𑀦𑁆𑀢𑀺 𑀓𑀲𑁆𑀲𑀘𑀺 𑀲𑀦𑁆𑀢𑀺𑀓𑁂 𑀅𑀕𑁆𑀕𑀳𑁂𑀢𑁆𑀯𑀸 𑀲𑀬𑀫𑁂𑀯 𑀢𑀲𑁆𑀫𑀺𑀁 𑀔𑀡𑁂 𑀲𑀁𑀬𑀢𑀸 𑀳𑁄𑀫𑀸𑀢𑀺 𑀬𑀣𑀸𑀲𑀁𑀬𑀢𑀸. 𑀢𑀢𑀺𑀬𑀧𑀤𑁂𑀦𑀸𑀢𑀺 ‘‘𑀲𑀺𑀓𑁆𑀔𑁂𑀫 𑀲𑀼𑀲𑀻𑀮𑁆𑀬’’𑀦𑁆𑀢𑀺 𑀇𑀫𑀺𑀦𑀸 𑀧𑀤𑁂𑀦. 𑀲𑁂𑀲𑀸𑀢𑀺 𑀯𑀼𑀢𑁆𑀢𑀸𑀯𑀲𑁂𑀲𑀸. 𑀢𑀺𑀲𑁆𑀲𑁄 𑀅𑀤𑀺𑀦𑁆𑀦𑀸𑀤𑀸𑀦𑀫𑀺𑀘𑁆𑀙𑀸𑀘𑀸𑀭𑀲𑀼𑀭𑀸𑀧𑀸𑀦𑀯𑀺𑀭𑀢𑀺𑀬𑁄. 𑀕𑀳𑀺𑀢𑀸 𑀕𑁄𑀩𑀮𑀻𑀩𑀤𑁆𑀤𑀜𑀸𑀬𑁂𑀦. 𑀙𑀸𑀢𑀓𑀁 𑀤𑀼𑀩𑁆𑀪𑀺𑀓𑁆𑀔𑀜𑁆𑀘 𑀏𑀢𑁆𑀣𑀸𑀢𑀺 𑀙𑀸𑀢𑀓𑀤𑀼𑀩𑁆𑀪𑀺𑀓𑁆𑀔𑀸, 𑀚𑀺𑀖𑀘𑁆𑀙𑀸𑀤𑀼𑀩𑁆𑀪𑀺𑀓𑁆𑀔𑀸𑀩𑀳𑀼𑀮𑀸𑀬𑀸𑀢𑀺 𑀅𑀢𑁆𑀣𑁄. 𑀧𑀺𑀲𑀸𑀘𑀬𑀓𑁆𑀔𑀬𑁄𑀦𑀺𑀬𑀸𑀢𑀺 𑀧𑁂𑀢𑁆𑀢𑀺𑀯𑀺𑀲𑀬𑀲𑀤𑀺𑀲𑀬𑀓𑁆𑀔𑀬𑁄𑀦𑀺𑀬𑀸 𑀅𑀧𑀺 𑀦𑀸𑀫 𑀫𑀼𑀘𑁆𑀘𑁂𑀫𑀸𑀢𑀺 𑀬𑁄𑀚𑀦𑀸.

𑀧𑀺𑀬𑀗𑁆𑀓𑀭𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀧𑀼𑀦𑀩𑁆𑀩𑀲𑀼𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁪𑁧. 𑀯𑀲𑀦𑀝𑁆𑀞𑀸𑀦𑀕𑁆𑀕𑀳𑀡𑁂𑀦 𑀭𑀢𑁆𑀢𑀺𑀝𑁆𑀞𑀸𑀦𑀤𑀺𑀯𑀸𑀝𑁆𑀞𑀸𑀦𑀸𑀤𑀬𑁄 𑀲𑀗𑁆𑀕𑀡𑁆𑀳𑀸𑀢𑀺. 𑀤𑁆𑀯𑀸𑀤𑀲𑀳𑀢𑁆𑀣𑀫𑀢𑁆𑀢𑀫𑁂𑀯 𑀕𑀡𑁆𑀳𑀸𑀢𑀺 𑀧𑀓𑀢𑀺𑀲𑀜𑁆𑀘𑀭𑀡𑀽𑀧𑀘𑀸𑀭𑀫𑀢𑁆𑀢𑀩𑁆𑀬𑀸𑀧𑀦𑀢𑁄. 𑀬𑀣𑀸𑀧𑀭𑀺𑀲𑀦𑁆𑀢𑀺 𑀧𑀭𑀺𑀲𑀸𑀦𑀼𑀭𑀽𑀧𑀁, 𑀬𑀢𑁆𑀣 𑀬𑀢𑁆𑀣 𑀧𑀭𑀺𑀲𑀸 𑀢𑀺𑀝𑁆𑀞𑀢𑀺, 𑀢𑀁 𑀢𑀁 𑀞𑀸𑀦𑀁 𑀕𑀘𑁆𑀙𑀢𑀺 𑀧𑀭𑀺𑀲𑀧𑀭𑀺𑀬𑀦𑁆𑀢𑀺𑀓𑀢𑁆𑀢𑀸. 𑀲𑀢𑁆𑀣𑀼 𑀫𑀼𑀔𑀯𑀺𑀓𑀸𑀭𑀸𑀪𑀸𑀯𑀢𑁄 𑀧𑀯𑁂𑀲𑀸𑀦𑀼𑀜𑁆𑀜𑀁 𑀲𑀮𑁆𑀮𑀓𑁆𑀔𑁂𑀦𑁆𑀢𑀻 ‘‘𑀦𑀽𑀦 𑀅𑀬𑀁 𑀓𑀢𑀸𑀥𑀺𑀓𑀸𑀭𑀸 𑀪𑀯𑀺𑀲𑁆𑀲𑀢𑀻’’𑀢𑀺 𑀅𑀦𑀼𑀫𑀸𑀦𑀲𑀺𑀤𑁆𑀥𑀁 𑀉𑀧𑀦𑀺𑀲𑁆𑀲𑀬𑀁 𑀤𑀺𑀲𑁆𑀯𑀸. 𑀏𑀓𑀻𑀪𑀸𑀯𑀕𑀫𑀦𑁂𑀦𑀸𑀢𑀺 𑀳𑀢𑁆𑀣𑀧𑀸𑀲𑀽𑀧𑀕𑀫𑀦𑁂𑀦 𑀧𑀭𑀺𑀲𑀸𑀬 𑀫𑀺𑀲𑁆𑀲𑀻𑀪𑀸𑀯𑀧𑁆𑀧𑀢𑁆𑀢𑀺𑀬𑀸. 𑀧𑀼𑀢𑁆𑀢𑀓𑀸𑀢𑀺 𑀧𑀼𑀢𑁆𑀢𑀧𑀼𑀢𑁆𑀢𑀺𑀬𑁄. 𑀅𑀦𑀼𑀓𑀫𑁆𑀧𑀸𑀬𑀜𑁆𑀳𑀺 𑀓-𑀲𑀤𑁆𑀤𑁄.

𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑁂𑀦 𑀅𑀭𑀺𑀬𑀫𑀕𑁆𑀕𑁂𑀦 𑀫𑀼𑀜𑁆𑀘𑀺𑀬𑀫𑀸𑀦𑀸 𑀕𑀦𑁆𑀣𑀸 ‘‘𑀦𑀺𑀩𑁆𑀩𑀸𑀦𑀁 𑀆𑀕𑀫𑁆𑀫 𑀧𑀫𑀼𑀘𑁆𑀘𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀸. 𑀯𑁂𑀮𑀸𑀢𑀺𑀓𑁆𑀓𑀦𑁆𑀢𑀸𑀢𑀺 𑀧𑀫𑀸𑀡𑀢𑁄 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑀼𑀁 𑀦 𑀲𑀓𑁆𑀓𑀸𑀢𑀺 𑀆𑀳 ‘‘𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀸’’𑀢𑀺. 𑀧𑀺𑀬𑀸𑀬𑀦𑀸𑀢𑀺 𑀆𑀲𑀻𑀲𑀦𑀸. 𑀆𑀲𑀻𑀲𑀦𑀁 𑀧𑁂𑀫𑀯𑀲𑁂𑀦 𑀧𑁂𑀫𑀯𑀢𑁆𑀣𑀼𑀦𑁄 𑀏𑀲𑀦𑀸 𑀧𑀢𑁆𑀣𑀦𑀸𑀯 𑀳𑁄𑀢𑀻𑀢𑀺 𑀆𑀳 ‘‘𑀫𑀕𑁆𑀕𑀦𑀸 𑀧𑀢𑁆𑀣𑀦𑀸’’𑀢𑀺. 𑀢𑀢𑁄𑀢𑀺 𑀧𑀺𑀬𑀧𑀼𑀢𑁆𑀢𑀸𑀤𑀺𑀢𑁄. 𑀧𑀸𑀡𑀻𑀦𑀦𑁆𑀢𑀺 𑀲𑀸𑀫𑀺𑀅𑀢𑁆𑀣𑁂 𑀧𑀼𑀣𑀼𑀯𑀘𑀦𑀁 𑀤𑀼𑀓𑁆𑀔𑀲𑀤𑁆𑀤𑀸𑀧𑁂𑀓𑁆𑀔𑀁. 𑀓𑁂 𑀫𑁄𑀘𑁂𑀢𑀻𑀢𑀺 𑀫𑁄𑀘𑀦𑀓𑀺𑀭𑀺𑀬𑀸𑀬 𑀓𑀫𑁆𑀫𑀁 𑀧𑀼𑀘𑁆𑀙𑀢𑀺? 𑀇𑀪𑀭𑁄 𑀧𑀦 𑀅𑀢𑁆𑀣𑀯𑀲𑁂𑀦 𑀯𑀺𑀪𑀢𑁆𑀢𑀺𑀯𑀺𑀧𑀭𑀺𑀡𑀸𑀫𑁄𑀢𑀺 ‘‘𑀧𑀸𑀡𑀺𑀦𑁂𑀢𑀺 𑀆𑀳𑀭𑀺𑀢𑁆𑀯𑀸 𑀯𑀢𑁆𑀢𑀩𑁆𑀩’’𑀦𑁆𑀢𑀺 𑀆𑀳. 𑀅𑀪𑀺𑀲𑀫𑁆𑀩𑀼𑀥𑀦𑁆𑀢𑀺 𑀅𑀪𑀺𑀲𑀫𑁆𑀩𑀼𑀥𑀦𑁆𑀢𑁄. 𑀢𑁂𑀦𑀸𑀳 ‘‘𑀅𑀪𑀺𑀲𑀫𑁆𑀩𑀼𑀤𑁆𑀥𑁄’’𑀢𑀺. 𑀲𑀤𑁆𑀥𑀫𑁆𑀫𑀲𑁆𑀲𑀸𑀢𑀺 𑀉𑀧𑀬𑁄𑀕𑀢𑁆𑀣𑁂 𑀲𑀸𑀫𑀺𑀯𑀘𑀦𑀦𑁆𑀢𑀺 𑀆𑀳 ‘‘𑀲𑀤𑁆𑀥𑀫𑁆𑀫𑀫𑁂𑀯 𑀅𑀚𑀸𑀦𑀺𑀢𑁆𑀯𑀸’’𑀢𑀺.

𑀧𑀼𑀢𑁆𑀢𑀲𑁆𑀲 𑀅𑀦𑀼𑀫𑁄𑀤𑀦𑀁 𑀓𑀭𑁄𑀦𑁆𑀢𑀻𑀢𑀺 𑀧𑀼𑀢𑁆𑀢𑀲𑁆𑀲 𑀧𑀝𑀺𑀧𑀢𑁆𑀢𑀺𑀅𑀦𑀼𑀫𑁄𑀤𑀦𑀁 𑀓𑀭𑁄𑀦𑁆𑀢𑀻. 𑀉𑀕𑁆𑀕𑀢𑀸𑀢𑀺 𑀏𑀢𑁆𑀣 𑀓𑀮𑀮𑁂 𑀯𑀝𑁆𑀝𑀤𑀼𑀓𑁆𑀔𑁂 𑀦𑀺𑀫𑀼𑀚𑁆𑀚𑀫𑀸𑀦𑀸 𑀢𑀢𑁄 𑀲𑀻𑀲𑀁 𑀉𑀓𑁆𑀔𑀺𑀧𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀺 𑀅𑀚𑁆𑀚 𑀩𑀼𑀤𑁆𑀥𑀸𑀦𑀼𑀪𑀸𑀯𑁂𑀦 𑀧𑀜𑁆𑀜𑀸𑀲𑀻𑀲𑀁 𑀉𑀓𑁆𑀔𑀺𑀧𑀺𑀢𑀸 𑀉𑀕𑁆𑀕𑀢𑀸. 𑀧𑀼𑀦 𑀯𑀺𑀦𑀺𑀧𑀸𑀢𑀸𑀪𑀸𑀯𑀢𑁄 𑀲𑀫𑁆𑀫𑀤𑁂𑀯 𑀉𑀕𑁆𑀕𑀢𑀢𑁆𑀢𑀸 𑀲𑀫𑀼𑀕𑁆𑀕𑀢𑀸. 𑀢𑀣𑀸𑀪𑀽𑀢𑀸 𑀲𑀸𑀲𑀦𑁂𑀧𑀺 𑀉𑀕𑁆𑀕𑀢𑀸 𑀲𑀫𑀼𑀕𑁆𑀕𑀢𑀸 𑀚𑀸𑀢𑀸. 𑀘𑀢𑀼𑀲𑀘𑁆𑀘𑀧𑀝𑀺𑀯𑁂𑀥𑀪𑀸𑀯𑀦𑁆𑀢𑀺 𑀘𑀢𑀼𑀲𑀘𑁆𑀘𑀧𑀝𑀺𑀯𑁂𑀥𑀲𑁆𑀲 𑀅𑀢𑁆𑀣𑀺𑀪𑀸𑀯𑀁. 𑀓𑀡𑁆𑀟𑀼𑀓𑀘𑁆𑀙𑀼𑀆𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀚𑁂𑀕𑀼𑀘𑁆𑀙𑀅𑀲𑀸𑀢𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀧𑀝𑀺𑀮𑀪𑀢𑀺 𑀧𑀯𑀢𑁆𑀢𑀺𑀬𑀁 𑀲𑀫𑁆𑀧𑀢𑁆𑀢𑀺𑀤𑀸𑀬𑀺𑀦𑁄 𑀓𑀫𑁆𑀫𑀲𑁆𑀲 𑀓𑀢𑁄𑀓𑀸𑀲𑀢𑁆𑀢𑀸. 𑀢𑀼𑀡𑁆𑀳𑀻 𑀉𑀢𑁆𑀢𑀭𑀺𑀓𑁂 𑀳𑁄𑀳𑀻𑀢𑀺 𑀫𑀸𑀢𑀼-𑀯𑀘𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀢𑀲𑁆𑀲 𑀯𑀺𑀲𑁂𑀲𑀸𑀥𑀺𑀕𑀫𑀲𑁆𑀲 𑀅𑀯𑀺𑀩𑀦𑁆𑀥𑀓𑀭𑀡𑀲𑀫𑁆𑀫𑀸𑀧𑀬𑁄𑀕𑁂𑀦 𑀬𑀣𑀸𑀮𑀤𑁆𑀥𑀯𑀺𑀲𑁂𑀲𑀸𑀬 𑀫𑀸𑀢𑀼𑀬𑀸 𑀯𑀲𑁂𑀦 𑀬𑀲𑁆𑀫𑀸 𑀥𑀻𑀢𑀸 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀢𑁆𑀢𑀺𑀮𑀸𑀪𑀻, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀫𑀸𑀢𑀼 𑀆𑀦𑀼𑀪𑀸𑀯𑁂𑀦𑁂𑀯𑀸’’𑀢𑀺.

𑀧𑀼𑀦𑀩𑁆𑀩𑀲𑀼𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀲𑀼𑀤𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁪𑁨. 𑀓𑀭𑀡𑀻𑀬𑁂𑀦𑀸𑀢𑀺 𑀏𑀢𑁆𑀣 𑀓𑀭𑀡𑀻𑀬𑀦𑁆𑀢𑀺 𑀯𑀸𑀡𑀺𑀚𑁆𑀚𑀓𑀫𑁆𑀫𑀁 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀢𑀁 𑀯𑀺𑀯𑀭𑀦𑁆𑀢𑁄 ‘‘𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀘𑀸’’𑀢𑀺𑀆𑀤𑀺𑀫𑀸𑀳. 𑀯𑀺𑀓𑁆𑀓𑀻𑀬𑀢𑀻𑀢𑀺 𑀯𑀺𑀓𑁆𑀓𑀬𑀁 𑀕𑀘𑁆𑀙𑀢𑀺. 𑀢𑀣𑁂𑀯 𑀓𑀭𑁄𑀢𑀻𑀢𑀺 𑀬𑀣𑀸 𑀭𑀸𑀚𑀕𑀳𑀲𑁂𑀝𑁆𑀞𑀺𑀦𑀸 𑀲𑀸𑀯𑀢𑁆𑀣𑀺𑀁 𑀕𑀦𑁆𑀢𑁆𑀯𑀸 𑀓𑀢𑀁, 𑀢𑀣𑁂𑀯 𑀭𑀸𑀚𑀕𑀳𑀁 𑀕𑀦𑁆𑀢𑁆𑀯𑀸 𑀓𑀭𑁄𑀢𑀺. 𑀲𑁆𑀯𑀸𑀬𑀦𑁆𑀢𑀺 𑀅𑀦𑀸𑀣𑀧𑀺𑀡𑁆𑀟𑀺𑀓𑁄.

𑀢𑀁 𑀤𑀺𑀯𑀲𑀦𑁆𑀢𑀺 𑀬𑀁 𑀤𑀺𑀯𑀲𑀁 𑀅𑀦𑀸𑀣𑀧𑀺𑀡𑁆𑀟𑀺𑀓𑁄, 𑀕𑀳𑀧𑀢𑀺, 𑀭𑀸𑀚𑀕𑀳𑀲𑀫𑀻𑀧𑀁 𑀉𑀧𑀕𑀢𑁄, 𑀢𑀁 𑀤𑀺𑀯𑀲𑀁. 𑀧𑀡𑁆𑀡𑀦𑁆𑀢𑀺 𑀲𑀸𑀲𑀦𑀁. 𑀦 𑀲𑀼𑀡𑀻𑀢𑀺 𑀅𑀲𑀼𑀡𑀦𑁆𑀢𑁄 ‘‘𑀧𑀡𑁆𑀡𑀁 𑀦 𑀲𑀼𑀡𑀻’’𑀢𑀺 𑀯𑀼𑀢𑁆𑀢𑁄. 𑀥𑀫𑁆𑀫𑀕𑀸𑀭𑀯𑁂𑀦 𑀳𑀺 𑀲𑁄 𑀲𑁂𑀝𑁆𑀞𑀺 𑀅𑀜𑁆𑀜𑀁 𑀓𑀺𑀘𑁆𑀘𑀁 𑀢𑀺𑀡𑀸𑀬𑀧𑀺 𑀦 𑀫𑀜𑁆𑀜𑀺. 𑀢𑁂𑀦𑀸𑀳 ‘‘𑀥𑀫𑁆𑀫𑀲𑁆𑀲𑀯𑀦𑀢𑁆𑀣𑀸𑀬𑀸’’𑀢𑀺𑀆𑀤𑀺. 𑀤𑀸𑀭𑀓𑀭𑀽𑀧𑀸𑀦𑀦𑁆𑀢𑀺 𑀤𑀸𑀭𑀓𑀸𑀦𑀁. 𑀅𑀦𑀢𑁆𑀣𑀦𑁆𑀢𑀭𑀓𑀭𑁄 𑀳𑀺 𑀭𑀽𑀧-𑀲𑀤𑁆𑀤𑁄 𑀬𑀣𑀸 ‘‘𑀕𑁄𑀭𑀽𑀧𑀸𑀦’’𑀦𑁆𑀢𑀺. 𑀧𑀜𑁆𑀘𑀯𑀡𑁆𑀡𑀦𑁆𑀢𑀺 𑀔𑀼𑀤𑁆𑀤𑀺𑀓𑀸𑀤𑀺𑀪𑁂𑀤𑀁 𑀧𑀜𑁆𑀘𑀧𑁆𑀧𑀓𑀸𑀭𑀁 𑀧𑀻𑀢𑀺𑀁 𑀧𑀝𑀺𑀮𑀪𑀺. 𑀅𑀦𑀼𑀓𑁆𑀓𑀫𑁂𑀦 𑀳𑀺 𑀢𑀸 𑀏𑀢𑀲𑁆𑀲 𑀲𑀫𑁆𑀪𑀯𑀦𑁆𑀢𑀺. ‘‘𑀲𑀻𑀲𑁂𑀦 𑀉𑀝𑁆𑀞𑀸𑀬…𑀧𑁂… 𑀕𑀘𑁆𑀙𑀢𑀻’’𑀢𑀺 𑀧𑀤𑀁 𑀧𑀻𑀢𑀺𑀲𑀫𑀼𑀝𑁆𑀞𑀸𑀦𑀭𑀽𑀧𑀯𑀲𑁂𑀦 𑀮𑀓𑁆𑀔𑁂𑀢𑁆𑀯𑀸 𑀯𑀼𑀢𑁆𑀢𑀁.

𑀲𑀺𑀯𑀣𑀺𑀓𑀸𑀬 𑀯𑀲𑀢𑀻𑀢𑀺 𑀲𑀺𑀯𑀣𑀺𑀓𑀸𑀬 𑀲𑀫𑀻𑀧𑁂 𑀯𑀲𑀢𑀺. 𑀲𑀼𑀲𑀸𑀦𑀲𑁆𑀲𑀸𑀲𑀦𑁆𑀦𑀝𑁆𑀞𑀸𑀦𑁂 𑀳𑀺 𑀲𑁄 𑀯𑀺𑀳𑀸𑀭𑁄. 𑀅𑀣𑀲𑁆𑀲𑀸𑀢𑀺 𑀅𑀣𑀲𑁆𑀲 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 ‘‘𑀅𑀓𑀸𑀮𑁄…𑀧𑁂… 𑀉𑀧𑀲𑀗𑁆𑀓𑀫𑀺𑀲𑁆𑀲𑀸𑀫𑀻’’𑀢𑀺 𑀏𑀢𑀁 𑀅𑀳𑁄𑀲𑀺. 𑀩𑀼𑀤𑁆𑀥𑀕𑀢𑀸𑀬 𑀲𑀢𑀺𑀬𑀸𑀢𑀺 𑀅𑀜𑁆𑀜𑀁 𑀓𑀺𑀜𑁆𑀘𑀺 𑀅𑀘𑀺𑀦𑁆𑀢𑁂𑀢𑁆𑀯𑀸 𑀩𑀼𑀤𑁆𑀥𑀕𑀢𑀸𑀬 𑀏𑀯 𑀲𑀢𑀺𑀬𑀸 𑀲𑀬𑀦𑀯𑀭𑀕𑀢𑁄 𑀦𑀺𑀧𑀚𑁆𑀚𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀢𑀁 𑀤𑀺𑀯𑀲’’𑀦𑁆𑀢𑀺𑀆𑀤𑀺.

𑀩𑀮𑀯𑀧𑁆𑀧𑀲𑀸𑀤𑁄𑀢𑀺 𑀩𑀼𑀤𑁆𑀥𑀸𑀭𑀫𑁆𑀫𑀡𑀸 𑀩𑀮𑀯𑀢𑀻 𑀲𑀤𑁆𑀥𑀸. 𑀧𑀻𑀢𑀺𑀆𑀮𑁄𑀓𑁄𑀢𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀘𑀺𑀭𑀓𑀸𑀮𑀁 𑀧𑀭𑀺𑀘𑀬𑀁 𑀕𑀢𑀲𑁆𑀲 𑀩𑀮𑀯𑀢𑁄 𑀧𑀲𑀸𑀤𑀲𑁆𑀲 𑀯𑀲𑁂𑀦 ‘‘𑀩𑀼𑀤𑁆𑀥𑁄’’𑀢𑀺 𑀦𑀸𑀫𑀁 𑀲𑀯𑀦𑀫𑀢𑁆𑀢𑁂𑀦 𑀉𑀧𑁆𑀧𑀦𑁆𑀦𑀸𑀬 𑀉𑀴𑀸𑀭𑀸𑀬 𑀧𑀻𑀢𑀺𑀬𑀸 𑀲𑀫𑀼𑀝𑁆𑀞𑀸𑀧𑀺𑀢𑁄 𑀯𑀺𑀧𑀲𑁆𑀲𑀦𑁄𑀪𑀸𑀲𑀲𑀤𑀺𑀲𑁄 𑀲𑀸𑀢𑀺𑀲𑀬𑁄 𑀆𑀮𑁄𑀓𑁄 𑀳𑁄𑀢𑀺 𑀘𑀺𑀢𑁆𑀢𑀧𑀘𑁆𑀘𑀬𑀉𑀢𑀼𑀲𑀫𑀼𑀝𑁆𑀞𑀸𑀦𑁄. 𑀢𑁂𑀦𑀸𑀳 ‘‘𑀲𑀩𑁆𑀩𑀢𑀫𑀁 𑀯𑀺𑀕𑀘𑁆𑀙𑀻’’𑀢𑀺𑀆𑀤𑀺. ‘‘𑀤𑁂𑀯𑀢𑀸 𑀳𑀺 𑀓𑀢𑀸’’𑀢𑀺𑀧𑀺 𑀯𑀤𑀦𑁆𑀢𑀺, 𑀧𑀼𑀭𑀺𑀫𑁄 𑀏𑀯𑁂𑀢𑁆𑀣 𑀬𑀼𑀢𑁆𑀢𑁄.

𑀅𑀫𑀦𑀼𑀲𑁆𑀲𑀸𑀢𑀺 𑀅𑀥𑀺𑀕𑀢𑀯𑀺𑀲𑁂𑀲𑀸 𑀤𑁂𑀯𑀢𑀸. 𑀢𑀸 𑀳𑀺 𑀲𑁂𑀝𑁆𑀞𑀺𑀲𑁆𑀲 𑀲𑀫𑁆𑀧𑀢𑁆𑀢𑀺𑀁 𑀧𑀘𑁆𑀘𑀓𑁆𑀔𑀢𑁄 𑀧𑀲𑁆𑀲𑀺𑀁𑀲𑀼. 𑀢𑁂𑀦𑀸𑀳 ‘‘𑀅𑀬𑀁 𑀫𑀳𑀸𑀲𑁂𑀝𑁆𑀞𑀻’’𑀢𑀺𑀆𑀤𑀺. 𑀅𑀮𑁆𑀮𑀲𑀭𑀻𑀭𑀦𑁆𑀢𑀺 𑀢𑀸𑀯𑀤𑁂𑀯 𑀙𑀟𑁆𑀟𑀺𑀢𑀁 𑀅𑀘𑁆𑀙𑀺𑀦𑁆𑀦𑀁 𑀯𑀸 𑀓𑀴𑁂𑀯𑀭𑀁. 𑀅𑀧𑀭𑀫𑁆𑀧𑀻𑀢𑀺 𑀫𑀢𑀁 𑀓𑀼𑀣𑀺𑀢𑀓𑀼𑀡𑀧𑀁. 𑀧𑀭𑀺𑀓𑀺𑀭𑀺𑀁𑀲𑀽𑀢𑀺 𑀲𑀫𑀦𑁆𑀢𑀢𑁄 𑀑𑀲𑀭𑀺𑀢𑀸 𑀅𑀳𑁂𑀲𑀼𑀁. 𑀆𑀮𑁄𑀓𑁄 𑀅𑀦𑁆𑀢𑀭𑀥𑀸𑀬𑀺𑀧𑀻𑀢𑀺𑀯𑁂𑀕𑀲𑁆𑀲 𑀫𑀦𑁆𑀤𑀪𑀸𑀯𑁂𑀦 𑀢𑀁𑀲𑀫𑀼𑀝𑁆𑀞𑀸𑀦𑀭𑀽𑀧𑀸𑀦𑀁 𑀤𑀼𑀩𑁆𑀩𑀮𑀪𑀸𑀯𑀢𑁄.

𑀇𑀫𑀺𑀦𑀸𑀯𑀸𑀢𑀺 𑀅𑀥𑀺𑀓𑀸𑀭𑁂𑀦 𑀲𑀳𑀲𑁆𑀲𑀧𑀤𑁂𑀦 𑀏𑀯 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀸𑀦𑀺. 𑀧𑀤𑀁 𑀯𑀻𑀢𑀺𑀳𑀭𑀢𑀺 𑀏𑀢𑁆𑀣𑀸𑀢𑀺 𑀧𑀤𑀯𑀻𑀢𑀺𑀳𑀸𑀭𑁄, 𑀧𑀤𑀯𑀻𑀢𑀺𑀳𑀸𑀭𑀝𑁆𑀞𑀸𑀦𑀁. 𑀲𑀫𑀕𑀫𑀦𑁂𑀢𑀺 𑀤𑀼𑀢𑀯𑀺𑀮𑀫𑁆𑀩𑀺𑀢𑀁 𑀅𑀓𑀢𑁆𑀯𑀸 𑀲𑀫𑀕𑀫𑀦𑁂. 𑀢𑀢𑁄𑀢𑀺 𑀢𑁂𑀲𑀼 𑀲𑁄𑀴𑀲𑀪𑀸𑀕𑁂𑀲𑀼. 𑀏𑀓𑁄 𑀓𑁄𑀝𑁆𑀞𑀸𑀲𑁄𑀢𑀺 𑀬𑀣𑀸𑀯𑀼𑀢𑁆𑀢𑀁 𑀧𑀤𑀯𑀻𑀢𑀺𑀳𑀸𑀭𑀧𑀤𑁂𑀲𑀁 𑀲𑁄𑀴𑀲𑀥𑀸 𑀪𑀺𑀦𑁆𑀦𑀲𑁆𑀲 𑀏𑀓𑁄 𑀪𑀸𑀕𑁄. 𑀧𑀯𑀢𑁆𑀢𑀘𑁂𑀢𑀦𑀸𑀢𑀺 𑀬𑀣𑀸𑀯𑀼𑀢𑁆𑀢𑀓𑀮𑀸𑀲𑀗𑁆𑀔𑀸𑀢𑀲𑁆𑀲 𑀧𑀤𑁂𑀲𑀲𑁆𑀲 𑀮𑀗𑁆𑀖𑀦𑀥𑀸𑀯𑀦𑀧𑀯𑀢𑁆𑀢𑀘𑁂𑀢𑀦𑀸. 𑀧𑀤𑀁 𑀯𑀸 𑀯𑀻𑀢𑀺𑀳𑀭𑀢𑀺 𑀏𑀢𑁂𑀦𑀸𑀢𑀺 𑀧𑀤𑀯𑀻𑀢𑀺𑀳𑀸𑀭𑁄, 𑀢𑀣𑀸𑀧𑀯𑀢𑁆𑀢𑀸 𑀓𑀼𑀲𑀮𑀘𑁂𑀢𑀦𑀸. ‘‘𑀢𑀲𑁆𑀲𑀸 𑀨𑀮𑀁 𑀲𑁄𑀴𑀲𑀥𑀸 𑀓𑀢𑁆𑀯𑀸’’𑀢𑀺 𑀯𑀤𑀦𑁆𑀢𑀺. 𑀧𑀢𑀺𑀝𑁆𑀞𑀳𑀦𑁆𑀢𑀲𑁆𑀲 𑀯𑀲𑁂𑀦 𑀕𑀳𑀺𑀢𑀦𑁆𑀢𑀺 𑀬𑁄𑀚𑀦𑀸. 𑀯𑀺𑀯𑀝𑁆𑀝𑀦𑀺𑀲𑁆𑀲𑀺𑀢𑀸𑀬 𑀏𑀯 𑀭𑀢𑀦𑀢𑁆𑀢𑀬𑀧𑀽𑀚𑀸𑀬 𑀥𑀫𑁆𑀫𑀲𑁆𑀲𑀯𑀦𑀲𑁆𑀲 𑀲𑀺𑀓𑁆𑀔𑀸𑀧𑀤𑀲𑀫𑀸𑀤𑀸𑀦𑀲𑁆𑀲 𑀲𑀭𑀡𑀕𑀫𑀦𑀲𑁆𑀲 𑀘 𑀅𑀢𑁆𑀣𑀸𑀬 𑀕𑀘𑁆𑀙𑀢𑁄𑀧𑀺 𑀯𑀲𑁂𑀦 𑀯𑀝𑁆𑀝𑀢𑀺. 𑀧𑀞𑀫𑀁 𑀯𑀼𑀢𑁆𑀢𑀕𑀫𑀦𑀁 𑀮𑁄𑀓𑀼𑀢𑁆𑀢𑀭𑀯𑀺𑀲𑁂𑀲𑀸𑀥𑀺𑀕𑀫𑀲𑁆𑀲 𑀏𑀓𑀦𑁆𑀢𑀺𑀓𑀁, 𑀤𑀼𑀢𑀺𑀬𑀁 𑀅𑀦𑁂𑀓𑀦𑁆𑀢𑀺𑀓𑀦𑁆𑀢𑀺 ‘‘𑀯𑀝𑁆𑀝𑀢𑀺𑀬𑁂𑀯𑀸’’𑀢𑀺 𑀲𑀸𑀲𑀗𑁆𑀓𑀯𑀘𑀦𑀁.

𑀲𑁄𑀢𑀺 𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀲𑁂𑀝𑁆𑀞𑀺. 𑀅𑀦𑀼𑀬𑀼𑀢𑁆𑀢𑀸𑀢𑀺 𑀅𑀦𑀼𑀕𑀸𑀫𑀺𑀦𑁄 𑀲𑀳𑀸𑀬𑀸. 𑀢𑁂𑀯 𑀲𑀦𑁆𑀥𑀸𑀬 𑀯𑀤𑀢𑀺. ‘‘𑀲𑀺𑀯𑀓𑁄 𑀅𑀫𑀦𑀼𑀲𑁆𑀲𑁄’’𑀢𑀺 𑀅𑀧𑀭𑁂. 𑀦 𑀓𑁂𑀯𑀮𑀁 ‘‘𑀅𑀦𑀼𑀬𑀼𑀢𑁆𑀢𑀸𑀧𑀺 𑀫𑁂 𑀅𑀢𑁆𑀣𑀺, 𑀓𑀲𑁆𑀫𑀸 𑀪𑀸𑀬𑀸𑀫𑀻’’𑀢𑀺 𑀏𑀯𑀁 𑀲𑀽𑀭𑁄 𑀅𑀳𑁄𑀲𑀺? 𑀅𑀣 𑀔𑁄 𑀩𑀼𑀤𑁆𑀥𑀕𑀢𑀸𑀬 𑀢𑀺𑀓𑁆𑀔𑀯𑀺𑀲𑀤𑀲𑀪𑀸𑀯𑁂𑀦 𑀲𑀩𑁆𑀩𑀁 𑀧𑀭𑀺𑀲𑁆𑀲𑀬𑀁 𑀫𑀤𑁆𑀤𑀺𑀢𑁆𑀯𑀸𑀧𑀺 𑀅𑀕𑀫𑀸𑀲𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀺𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀓𑁆𑀔𑀦𑁆𑀤𑀦𑀮𑀓𑁆𑀔𑀡𑀸 𑀳𑀺 𑀲𑀤𑁆𑀥𑀸, 𑀢𑀸𑀬 𑀬𑀼𑀢𑁆𑀢𑀓𑁄 𑀲𑀧𑁆𑀧𑀼𑀭𑀺𑀲𑁄𑀧𑀺 𑀲𑀤𑁆𑀥𑀫𑁆𑀫𑀕𑀼𑀡𑀯𑀲𑁂𑀦 𑀲𑀩𑁆𑀩𑀁 𑀧𑀭𑀺𑀲𑁆𑀲𑀬𑀁 𑀫𑀤𑁆𑀤𑀺𑀢𑁆𑀯𑀸 𑀧𑀓𑁆𑀔𑀦𑁆𑀤𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.

𑀲𑀩𑁆𑀩𑀓𑀸𑀫𑀲𑀫𑀺𑀤𑁆𑀥𑀢𑀸 𑀧𑀭𑀺𑀘𑁆𑀘𑀸𑀕𑀲𑀻𑀮𑀢𑀸 𑀉𑀴𑀸𑀭𑀚𑁆𑀛𑀸𑀲𑀬𑀢𑀸 𑀧𑀭𑀤𑀼𑀓𑁆𑀔𑀸𑀧𑀦𑀬𑀓𑀸𑀫𑀢𑀸 𑀧𑀭𑁂𑀲𑀁 𑀳𑀺𑀢𑁂𑀲𑀺𑀢𑀸 𑀧𑀭𑀲𑀫𑁆𑀧𑀢𑁆𑀢𑀺𑀧𑀫𑁄𑀤𑀦𑀸𑀢𑀺 𑀏𑀯𑀫𑀸𑀤𑀻𑀦𑀁 𑀫𑀳𑀸𑀕𑀼𑀡𑀸𑀦𑀁 𑀯𑀲𑁂𑀦 𑀦𑀺𑀘𑁆𑀘𑀓𑀸𑀮𑀁 𑀅𑀦𑀸𑀣𑀸𑀦𑀁 𑀧𑀺𑀡𑁆𑀟𑀤𑀸𑀬𑀓𑀢𑁆𑀢𑀸 ‘‘𑀅𑀦𑀸𑀣𑀧𑀺𑀡𑁆𑀟𑀺𑀓𑁄’’𑀢𑀺 𑀏𑀯𑀁 𑀉𑀧𑁆𑀧𑀦𑁆𑀦𑀁 𑀦𑀸𑀫𑀁. 𑀏𑀯𑀫𑀸𑀳𑀸𑀢𑀺 ‘‘𑀏𑀳𑀺 𑀲𑀼𑀤𑀢𑁆𑀢𑀸’’𑀢𑀺 𑀏𑀯𑀁 𑀆𑀳.

𑀓𑀺𑀮𑁂𑀲𑀧𑀭𑀺𑀦𑀺𑀩𑁆𑀩𑀸𑀦𑁂𑀦𑀸𑀢𑀺 𑀲𑀩𑁆𑀩𑀲𑁄 𑀭𑀸𑀕𑀸𑀤𑀺𑀓𑀺𑀮𑁂𑀲𑀯𑀽𑀧𑀲𑀫𑁂𑀦. 𑀓𑀺𑀮𑁂𑀲𑀯𑀽𑀧𑀲𑀫𑀦𑁆𑀢𑀺 𑀲𑀩𑁆𑀩𑀲𑁄 𑀲𑀩𑁆𑀩𑁂𑀲𑀁 𑀓𑀺𑀮𑁂𑀲𑀸𑀦𑀁 𑀯𑀽𑀧𑀲𑀫𑀁 𑀅𑀕𑁆𑀕𑀫𑀕𑁆𑀕𑁂𑀦 𑀧𑀢𑁆𑀯𑀸. 𑀅𑀦𑀼𑀧𑀼𑀩𑁆𑀩𑀺𑀓𑀣𑀦𑁆𑀢𑀺 𑀤𑀸𑀦𑀸𑀤𑀺𑀓𑀣𑀁. 𑀲𑀸 𑀳𑀺 𑀅𑀦𑀼𑀧𑀼𑀩𑁆𑀩𑁂𑀦 𑀓𑀣𑁂𑀢𑀩𑁆𑀩𑀢𑁆𑀢𑀸 ‘‘𑀅𑀦𑀼𑀧𑀼𑀩𑁆𑀩𑀺𑀓𑀣𑀸’’𑀢𑀺 𑀯𑀼𑀘𑁆𑀘𑀢𑀺. 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋 ‘‘𑀅𑀣 𑀔𑁄 𑀪𑀕𑀯𑀸 𑀅𑀦𑀼𑀧𑀼𑀩𑁆𑀩𑀺𑀁 𑀓𑀣𑀁 𑀓𑀣𑁂𑀲𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀤𑀸𑀦𑀓𑀣𑀁 𑀲𑀻𑀮𑀓𑀣𑀁 𑀲𑀕𑁆𑀕𑀓𑀣𑀁 𑀓𑀸𑀫𑀸𑀦𑀁 𑀆𑀤𑀻𑀦𑀯𑀁 𑀑𑀓𑀸𑀭𑀁 𑀲𑀁𑀓𑀺𑀮𑁂𑀲𑀁 𑀦𑁂𑀓𑁆𑀔𑀫𑁆𑀫𑁂 𑀆𑀦𑀺𑀲𑀁𑀲𑀁 𑀧𑀓𑀸𑀲𑁂𑀲𑀻’’𑀢𑀺 (𑀘𑀽𑀴𑀯. 𑁩𑁦𑁫). 𑀫𑀢𑁆𑀣𑀓𑁂𑀢𑀺 𑀅𑀦𑀼𑀧𑀼𑀩𑁆𑀩𑀺𑀓𑀣𑀸𑀬 𑀉𑀧𑀭𑀺 𑀧𑀭𑀢𑁄. 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀲𑀻𑀢𑀺 𑀬𑀣𑀸 𑀫𑀳𑀸𑀲𑁂𑀝𑁆𑀞𑀺 𑀲𑀳𑀲𑁆𑀲𑀦𑀬𑀧𑀝𑀺𑀫𑀡𑁆𑀟𑀺𑀢𑁂 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀢𑀺, 𑀏𑀯𑀁 𑀧𑀯𑀢𑁆𑀢𑀺𑀦𑀺𑀯𑀢𑁆𑀢𑀺𑀬𑁄 𑀲𑀳 𑀳𑁂𑀢𑀼𑀦𑀸 𑀯𑀺𑀪𑀚𑀦𑁆𑀢𑁄 𑀘𑀢𑁆𑀢𑀸𑀭𑀺 𑀅𑀭𑀺𑀬𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀲𑀻𑀢𑀺.

𑀲𑀼𑀤𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀧𑀞𑀫𑀲𑀼𑀓𑁆𑀓𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁪𑁩. 𑀭𑀣𑀺𑀓𑀦𑁆𑀢𑀺 𑀭𑀘𑁆𑀙𑀁. 𑀕𑀳𑁂𑀢𑁆𑀯𑀸𑀢𑀺 𑀕𑀦𑁆𑀢𑁆𑀯𑀸. 𑀲𑀺𑀗𑁆𑀖𑀸𑀝𑀓𑀦𑁆𑀢𑀺 𑀅𑀜𑁆𑀜𑀢𑁆𑀣 𑀢𑀺𑀓𑁄𑀡𑀸 𑀭𑀘𑁆𑀙𑀸 𑀯𑀼𑀘𑁆𑀘𑀢𑀺. 𑀇𑀥 𑀧𑀦 ‘‘𑀘𑀢𑀼𑀓𑁆𑀓’’𑀦𑁆𑀢𑀺 𑀯𑀼𑀢𑁆𑀢𑀁. ‘‘𑀫𑀥𑀼𑀧𑀻𑀓𑀸’’𑀢𑀺 𑀏𑀢𑁆𑀣 𑀫𑀥𑀼-𑀲𑀤𑁆𑀤𑁂𑀦 𑀫𑀥𑀼𑀯𑀺𑀲𑁂𑀲𑁄 𑀯𑀼𑀘𑁆𑀘𑀢𑀻𑀢𑀺 𑀆𑀳 ‘‘𑀕𑀦𑁆𑀥𑀫𑀥𑀼𑀧𑀸𑀦𑀁 𑀧𑀻𑀢𑀸 𑀯𑀺𑀬𑀸’’𑀢𑀺. 𑀲𑀸𑀫𑀜𑁆𑀜𑀚𑁄𑀢𑀦𑀸 𑀳𑀺 𑀯𑀺𑀲𑁂𑀲𑁂 𑀢𑀺𑀝𑁆𑀞𑀢𑀻𑀢𑀺 𑀕𑀦𑁆𑀥𑀫𑀥𑀽𑀢𑀺 𑀘 𑀅𑀢𑀺𑀯𑀺𑀬 𑀫𑀥𑀼𑀭𑁄 𑀫𑀤𑀦𑀺𑀬𑁄 𑀏𑀓𑁄 𑀫𑀥𑀼𑀯𑀺𑀲𑁂𑀲𑁄. 𑀢𑁂𑀦𑀸𑀳 ‘‘𑀅𑀲𑀜𑁆𑀜𑀻 𑀳𑀼𑀢𑁆𑀯𑀸 𑀲𑀬𑀢𑁂𑀯𑀸’’𑀢𑀺.

𑀦 𑀧𑀝𑀺𑀯𑀸𑀦𑀻𑀬𑀁 𑀦 𑀅𑀧𑀦𑁂𑀢𑀩𑁆𑀩𑀦𑁆𑀢𑀺 𑀅𑀧𑁆𑀧𑀝𑀺𑀯𑀸𑀦𑀻𑀬𑀁. 𑀢𑁂𑀦𑀸𑀳 ‘‘𑀩𑀸𑀳𑀺𑀭𑀓𑀜𑁆𑀳𑀻’’𑀢𑀺𑀆𑀤𑀺. 𑀬𑀁 𑀓𑀺𑀜𑁆𑀘𑀺 𑀲𑀦𑁆𑀢𑀧𑀡𑀻𑀢𑀪𑀸𑀯𑀸𑀯𑀳𑀁 𑀦 𑀲𑁂𑀘𑀦𑀦𑁆𑀢𑀺 𑀅𑀲𑁂𑀘𑀦𑀓𑀁. 𑀢𑀢𑁄 𑀏𑀯 𑀅𑀦𑀸𑀲𑀺𑀢𑁆𑀢𑀓𑀁. 𑀑𑀚𑀯𑀦𑁆𑀢𑀦𑁆𑀢𑀺 𑀩𑀳𑀼𑀲𑀫𑁆𑀫𑀢𑀑𑀚𑀯𑀦𑁆𑀢𑀲𑀤𑀺𑀲𑀢𑀸𑀬 𑀑𑀚𑀯𑀦𑁆𑀢𑀁. 𑀢𑁂𑀦𑀸𑀳 ‘‘𑀬𑀣𑀸 𑀳𑀻’’𑀢𑀺𑀆𑀤𑀺. 𑀥𑀫𑁆𑀫𑀢𑀸𑀬𑀸𑀢𑀺 𑀅𑀢𑁆𑀢𑀦𑁄 𑀲𑀪𑀸𑀯𑁂𑀦𑁂𑀯. 𑀫𑀥𑀼𑀭𑁄 𑀇𑀝𑁆𑀞𑁄. 𑀧𑀺𑀯𑀦𑁆𑀢𑀻 𑀯𑀺𑀬𑀸𑀢𑀺 𑀲𑀼𑀓𑁆𑀓𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀉𑀧𑀦𑀻𑀬𑀫𑀸𑀦𑀁 𑀲𑀤𑁆𑀥𑀫𑁆𑀫𑀸𑀫𑀢𑀭𑀲𑀁 𑀅𑀢𑁆𑀢𑀦𑁄 𑀲𑁄𑀢𑀜𑁆𑀚𑀮𑀺𑀁 𑀧𑀽𑀭𑁂𑀢𑁆𑀯𑀸 𑀑𑀤𑀳𑀦𑁆𑀢𑀻𑀯. 𑀯𑀮𑀸𑀳𑀓𑀢𑁄 𑀆𑀕𑀢𑀁 𑀯𑀮𑀸𑀳𑀓𑀁.

𑀧𑀞𑀫𑀲𑀼𑀓𑁆𑀓𑀸𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀤𑀼𑀢𑀺𑀬𑀲𑀼𑀓𑁆𑀓𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁪𑁪. 𑀩𑀳𑀼𑀁 𑀯𑀢 𑀧𑀼𑀜𑁆𑀜𑀁 𑀧𑀲𑀯𑀢𑀺 𑀲𑀩𑁆𑀩𑀕𑀦𑁆𑀣𑀯𑀺𑀫𑀼𑀢𑁆𑀢𑀺𑀬𑀸 𑀲𑀻𑀮𑀲𑀫𑀦𑁆𑀦𑀸𑀕𑀢𑁂𑀦 𑀅𑀕𑁆𑀕𑀤𑀓𑁆𑀔𑀺𑀡𑁂𑀬𑁆𑀬𑀸𑀬 𑀲𑀼𑀓𑁆𑀓𑀸𑀬 𑀣𑁂𑀭𑀺𑀬𑀸 𑀪𑁄𑀚𑀦𑀲𑁆𑀲 𑀤𑀺𑀦𑁆𑀦𑀢𑁆𑀢𑀸.

𑀤𑀼𑀢𑀺𑀬𑀲𑀼𑀓𑁆𑀓𑀸𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁧. 𑀘𑀻𑀭𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁪𑁫. 𑀏𑀓𑀸𑀤𑀲𑀫𑀁 𑀉𑀢𑁆𑀢𑀸𑀦𑀫𑁂𑀯 𑀤𑀲𑀫𑁂𑀦 𑀲𑀤𑀺𑀲𑀢𑁆𑀢𑀸. 𑀢𑀢𑁆𑀣 𑀳𑀺 𑀪𑁄𑀚𑀦𑀁 𑀉𑀧𑀸𑀲𑀓𑀲𑁆𑀲 𑀆𑀪𑀢𑀁, 𑀇𑀥 𑀘𑀻𑀯𑀭𑀤𑀸𑀦𑀦𑁆𑀢𑀺 𑀅𑀬𑀫𑁂𑀯 𑀯𑀺𑀲𑁂𑀲𑁄.

𑀘𑀻𑀭𑀸𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁨. 𑀆𑀴𑀯𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁪𑁬. 𑀆𑀴𑀯𑀺𑀬𑀦𑁆𑀢𑀺 𑀇𑀢𑁆𑀣𑀺𑀮𑀺𑀗𑁆𑀕𑀯𑀲𑁂𑀦 𑀢𑀁 𑀭𑀝𑁆𑀞𑀫𑁆𑀧𑀺 𑀦𑀕𑀭𑀫𑁆𑀧𑀺 𑀯𑀼𑀘𑁆𑀘𑀢𑀺. 𑀭𑀝𑁆𑀞𑁂 𑀅𑀥𑀺𑀧𑁆𑀧𑁂𑀢𑁂𑀧𑀺 𑀦 𑀏𑀢𑁆𑀣 𑀩𑀳𑀼𑀯𑀘𑀦𑀁 𑀢𑀣𑀸𑀭𑀼𑀴𑁆𑀳𑀺𑀬𑀸 𑀅𑀪𑀸𑀯𑀢𑁄. 𑀢𑀜𑁆𑀘 𑀪𑀯𑀦𑀦𑁆𑀢𑀺 𑀢𑀜𑁆𑀘 𑀆𑀴𑀯𑀓𑀲𑁆𑀲 𑀬𑀓𑁆𑀔𑀲𑁆𑀲 𑀪𑀯𑀦𑀁. 𑀢𑀢𑁆𑀣𑀸𑀢𑀺 𑀆𑀴𑀯𑀓𑀲𑁆𑀲 𑀪𑀯𑀦𑁂. ‘‘𑀅𑀣 𑀔𑁄 𑀆𑀴𑀯𑀓𑁄 𑀬𑀓𑁆𑀔𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀻’’𑀢𑀺 𑀏𑀢𑁆𑀣 𑀢𑀲𑁆𑀫𑀺𑀁 𑀧𑀸𑀞𑀧𑀤𑁂𑀲𑁂. 𑀅𑀬𑀫𑀦𑀼𑀧𑀼𑀩𑁆𑀩𑀺𑀓𑀣𑀸𑀢𑀺 𑀅𑀬𑀁 𑀇𑀤𑀸𑀦𑀺 𑀯𑀼𑀘𑁆𑀘𑀫𑀸𑀦𑀸 𑀅𑀦𑀼𑀧𑀼𑀩𑁆𑀩𑀢𑁄 𑀆𑀕𑀢𑀸 𑀓𑀣𑀸. 𑀆𑀴𑀯𑀺𑀬𑀸 𑀇𑀲𑁆𑀲𑀭𑁄𑀢𑀺 𑀆𑀴𑀯𑁄, 𑀆𑀴𑀯𑀓𑁄𑀢𑀺 𑀘 𑀭𑀸𑀚𑀸 𑀯𑀼𑀢𑁆𑀢𑁄. 𑀓𑀤𑀸𑀘𑀺 𑀘𑁄𑀭𑀧𑀝𑀺𑀩𑀸𑀳𑀦𑀢𑁆𑀣𑀁, 𑀓𑀤𑀸𑀘𑀺 𑀉𑀲𑁆𑀲𑀸𑀳𑀲𑀢𑁆𑀢𑀺𑀯𑀺𑀪𑀸𑀯𑀦𑀯𑀲𑁂𑀦 𑀧𑀝𑀺𑀭𑀸𑀚𑀦𑀺𑀲𑁂𑀥𑀦𑀢𑁆𑀣𑀁, 𑀓𑀤𑀸𑀘𑀺 𑀮𑀓𑁆𑀔𑀬𑁄𑀕𑁆𑀬𑀯𑀺𑀦𑀺𑀬𑁄𑀕𑀯𑀲𑁂𑀦 𑀩𑁆𑀬𑀸𑀬𑀸𑀫𑀓𑀭𑀡𑀢𑁆𑀣𑀜𑁆𑀘. 𑀫𑀺𑀕𑀸𑀦𑀁 𑀯𑀦𑀦𑀢𑁄 𑀯𑀲𑀦𑀢𑁄 𑀯𑀸𑀦𑀢𑁄 𑀯𑀸 ‘‘𑀫𑀺𑀕𑀯𑀸’’𑀢𑀺 𑀮𑀤𑁆𑀥𑀲𑀫𑀜𑁆𑀜𑀁 𑀫𑀺𑀕𑀯𑀁. 𑀢𑀲𑁆𑀲𑁂𑀯𑀸𑀢𑀺 𑀭𑀜𑁆𑀜𑁄 𑀏𑀯. 𑀫𑀺𑀕𑁄𑀢𑀺 𑀏𑀓𑁄 𑀏𑀡𑀺𑀫𑀺𑀕𑁄. 𑀢𑀺𑀬𑁄𑀚𑀦𑀦𑁆𑀢𑀺 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑁂 𑀉𑀧𑀬𑁄𑀕𑀯𑀘𑀦𑀁. 𑀉𑀤𑀓𑀁 𑀯𑀺𑀬 𑀧𑀯𑀺𑀲𑀺𑀢𑁆𑀯𑀸 𑀞𑀺𑀢𑀦𑁆𑀢𑀺 𑀬𑀣𑀸 𑀧𑀭𑀺𑀲𑁆𑀲𑀫𑀧𑁆𑀧𑀢𑁆𑀢𑁄 𑀉𑀤𑀓𑀁 𑀧𑀯𑀺𑀲𑀺𑀢𑁆𑀯𑀸 𑀞𑀺𑀢𑁄 𑀦𑀺𑀭𑀲𑁆𑀲𑀸𑀲𑁄 𑀳𑁄𑀢𑀺, 𑀏𑀯𑀁 𑀯𑀺𑀬 𑀞𑀺𑀢𑀁. 𑀫𑀽𑀮𑀦𑁆𑀢𑀺 𑀲𑀫𑀻𑀧𑀁. 𑀬𑀓𑁆𑀔𑀁 𑀤𑀺𑀲𑁆𑀯𑀸𑀯 𑀭𑀜𑁆𑀜𑁄 𑀪𑀬𑀁 𑀙𑀫𑁆𑀪𑀺𑀢𑀢𑁆𑀢𑀁 𑀊𑀭𑀼𑀢𑁆𑀣𑀫𑁆𑀪𑀁 𑀅𑀳𑁄𑀲𑀺, 𑀢𑀲𑁆𑀫𑀸 𑀭𑀸𑀚𑀸 𑀧𑀮𑀸𑀬𑀺𑀢𑀼𑀁 𑀦𑀸𑀲𑀓𑁆𑀔𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀔𑀸𑀤𑀺𑀢𑀼𑀁 𑀉𑀧𑀕𑀢𑁄’’𑀢𑀺. 𑀅𑀣 𑀭𑀸𑀚𑀸 𑀤𑁆𑀯𑀺𑀥𑀸 𑀙𑀺𑀦𑁆𑀦𑀁 𑀫𑀺𑀕𑀁 𑀤𑀢𑁆𑀯𑀸 𑀅𑀢𑁆𑀢𑀸𑀦𑀁 𑀫𑁄𑀘𑁂𑀢𑀼𑀓𑀸𑀫𑁄 𑀅𑀳𑁄𑀲𑀺. 𑀬𑀓𑁆𑀔𑁄 ‘‘𑀦𑀦𑀼 𑀫𑀫 𑀳𑀢𑁆𑀣𑀕𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀫𑀺𑀕𑁄𑀧𑀺 𑀫𑀫 𑀲𑀦𑁆𑀢𑀓𑁄, 𑀢𑀢𑁆𑀣 𑀓𑀺𑀦𑁆𑀦𑀸𑀫 𑀢𑁂 𑀓𑁂𑀭𑀸𑀝𑀺𑀬𑀫𑀺𑀤𑀁 𑀤𑀢𑁆𑀯𑀸 𑀅𑀢𑁆𑀢𑀦𑁄 𑀫𑁄𑀘𑀦’’𑀦𑁆𑀢𑀺 𑀭𑀸𑀚𑀸𑀦𑀁 𑀦 𑀫𑀼𑀜𑁆𑀘𑀺. 𑀅𑀣 𑀭𑀸𑀚𑀸 𑀢𑀲𑁆𑀲 𑀢𑀸𑀤𑀺𑀲𑀁 𑀧𑀝𑀺𑀜𑁆𑀜𑀸𑀢𑀁 𑀅𑀓𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀭𑀸𑀚𑀸 𑀢𑁂𑀦 𑀲𑀤𑁆𑀥𑀺’’𑀦𑁆𑀢𑀺𑀆𑀤𑀺. 𑀪𑀯𑀦𑀁 𑀅𑀦𑀼𑀧𑀕𑀢𑀦𑁆𑀢𑀺 𑀇𑀤𑀁 𑀫𑀫 𑀪𑀯𑀦𑀁 𑀅𑀦𑀼𑀧𑀕𑀢𑀁. 𑀅𑀦𑀦𑀼𑀜𑁆𑀜𑀸𑀢𑀦𑁆𑀢𑀺 𑀉𑀧𑀕𑀢𑁂𑀦 𑀲𑀸𑀫𑀺𑀪𑀽𑀢𑁂𑀦 𑀅𑀦𑀦𑀼𑀜𑁆𑀜𑀸𑀢𑀜𑁆𑀘. 𑀏𑀢𑁂𑀦 𑀉𑀧𑀕𑀢𑀁 𑀢𑀁, 𑀇𑀤𑀸𑀦𑀺 𑀢𑀸𑀤𑀺𑀲𑁂𑀦 𑀅𑀦𑀼𑀜𑁆𑀜𑀸𑀢𑀜𑁆𑀘 𑀔𑀸𑀤𑀺𑀢𑀼𑀁 𑀮𑀪𑀸𑀫𑀻𑀢𑀺 𑀤𑀲𑁆𑀲𑁂𑀢𑀺.

𑀫𑀘𑁆𑀘𑀼𑀧𑀣𑁂𑀢𑀺 𑀫𑀘𑁆𑀘𑀼𑀕𑁄𑀘𑀭𑁂. 𑀆𑀲𑀦𑁆𑀦𑀫𑀭𑀡𑀢𑀸𑀬 𑀏𑀯𑀫𑀸𑀳𑀁𑀲𑀼.

𑀢𑀁 𑀆𑀴𑀯𑀓𑀓𑀼𑀫𑀸𑀭𑀁 𑀆𑀤𑀸𑀬 𑀧𑀓𑁆𑀓𑀫𑀺𑀁𑀲𑀽𑀢𑀺 𑀬𑁄𑀚𑀦𑀸. 𑀢𑀲𑁆𑀲 𑀭𑀜𑁆𑀜𑁄 𑀫𑀳𑁂𑀲𑀻 𑀆𑀴𑀯𑀓𑀓𑀼𑀫𑀸𑀭𑀲𑁆𑀲 𑀫𑀸𑀢𑀸𑀢𑀺 𑀯𑀼𑀢𑁆𑀢𑀸. 𑀤𑁂𑀯𑀺𑀲𑀳𑀲𑁆𑀲𑀸𑀦𑀁 𑀯𑀺𑀧𑁆𑀧𑀮𑀧𑀦𑁆𑀢𑀻𑀦𑀦𑁆𑀢𑀺 𑀯𑀘𑀦𑀁 𑀧𑀭𑀺𑀡𑀸𑀫𑁂𑀢𑀩𑁆𑀩𑀁.

𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂𑀢𑀺 𑀬𑀓𑁆𑀔𑀁 𑀤𑀫𑁂𑀢𑁆𑀯𑀸 𑀧𑀘𑁆𑀘𑀸𑀕𑀦𑁆𑀢𑁆𑀯𑀸 𑀦𑀕𑀭𑀤𑁆𑀯𑀸𑀭𑀲𑀫𑀻𑀧𑁂 𑀭𑀼𑀓𑁆𑀔𑀫𑀽𑀮𑁂 𑀦𑀺𑀲𑀺𑀦𑁆𑀦𑁂𑀦 𑀪𑀕𑀯𑀢𑀸 𑀲𑀭𑀸𑀚𑀺𑀓𑀸𑀬 𑀫𑀳𑀢𑀺𑀬𑀸 𑀧𑀭𑀺𑀲𑀸𑀬 𑀤𑁂𑀲𑀺𑀢𑀤𑁂𑀲𑀦𑀸𑀬 𑀧𑀭𑀺𑀬𑁄𑀲𑀸𑀦𑁂. 𑀲𑁄𑀢𑀺 𑀪𑀕𑀯𑀸. 𑀪𑀯𑀦𑁂 𑀏𑀯𑀸𑀢𑀺 𑀯𑀺𑀫𑀸𑀦𑁂 𑀏𑀯. 𑀪𑀕𑀯𑀸𑀧𑀺 𑀧𑀲𑁆𑀲𑀢𑀺 𑀧𑀓𑀢𑀺𑀘𑀓𑁆𑀔𑀼𑀦𑀸𑀯 𑀦𑀺𑀕𑁆𑀭𑁄𑀥𑀲𑁆𑀲 𑀉𑀧𑀭𑀺 𑀦𑀺𑀩𑁆𑀩𑀢𑁆𑀢𑀢𑁆𑀢𑀸.

𑀢𑀢𑁆𑀭𑀸𑀢𑀺 𑀢𑀲𑁆𑀫𑀺𑀁 ‘‘𑀭𑁄𑀲𑁂𑀢𑀼𑀓𑀸𑀫𑀢𑀸𑀬𑀸’’𑀢𑀺 𑀯𑀘𑀦𑁂. 𑀢𑁂𑀲𑀦𑁆𑀢𑀺 𑀲𑀸𑀢𑀸𑀕𑀺𑀭𑀺𑀳𑁂𑀫𑀯𑀢𑀸𑀦𑀁. 𑀓𑀸𑀮𑀤𑀻𑀧𑀤𑁂𑀲𑀓𑀼𑀮𑀚𑀦𑁂𑀢𑁆𑀢𑀺𑀆𑀬𑀼𑀧𑁆𑀧𑀫𑀸𑀡𑀯𑀺𑀲𑀬𑀁 𑀧𑀜𑁆𑀘𑀫𑀳𑀸𑀯𑀺𑀮𑁄𑀓𑀺𑀢𑀁. ‘‘𑀲𑀻𑀢𑀁 𑀩𑁆𑀬𑀧𑀕𑀢𑀁 𑀳𑁄𑀢𑀺, 𑀉𑀡𑁆𑀳𑀜𑁆𑀘 𑀉𑀧𑀲𑀫𑁆𑀫𑀢𑀻’’𑀢𑀺𑀆𑀤𑀺𑀦𑀸 (𑀩𑀼. 𑀯𑀁. 𑁨.𑁮𑁩) 𑀆𑀕𑀢𑀸𑀦𑀺 𑀤𑁆𑀯𑀢𑁆𑀢𑀺𑀁𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀺. 𑀓𑀝𑀺𑀧𑁆𑀧𑀤𑁂𑀲𑀯𑀢𑁆𑀣𑀺𑀓𑁄𑀲𑀓𑀡𑁆𑀡𑀢𑁄 𑀢𑀺𑀥𑀸. 𑀲𑀤𑁆𑀤𑁄𑀢𑀺 𑀆𑀴𑀯𑀓𑀲𑁆𑀲 𑀉𑀕𑁆𑀖𑁄𑀲𑀺𑀢𑀲𑀤𑁆𑀤𑁄.

𑀇𑀫𑀺𑀦𑀸 𑀧𑀲𑀗𑁆𑀕𑁂𑀦 𑀲𑀓𑀮𑀚𑀫𑁆𑀩𑀼𑀤𑀻𑀧𑀁 𑀩𑁆𑀬𑀸𑀧𑁂𑀢𑁆𑀯𑀸 𑀧𑀯𑀢𑁆𑀢𑁂 𑀅𑀧𑀭𑁂𑀧𑀺 𑀢𑀬𑁄 𑀲𑀤𑁆𑀤𑁂 𑀬𑀣𑀸 𑀏𑀢𑁂, 𑀏𑀯𑀁 𑀆𑀴𑀯𑀓𑀲𑁆𑀲 𑀉𑀕𑁆𑀖𑁄𑀲𑀺𑀢𑀲𑀤𑁆𑀤𑁄𑀧𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀘𑀢𑁆𑀢𑀸𑀭𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀑𑀲𑀓𑁆𑀓𑀦𑁆𑀢𑁂𑀢𑀺 𑀧𑀭𑀺𑀳𑀸𑀬𑀫𑀸𑀦𑁂.

𑀘𑀼𑀡𑁆𑀡𑁂𑀦𑁆𑀢𑀸𑀢𑀺 𑀘𑀼𑀡𑁆𑀡𑁂𑀢𑀼𑀁 𑀲𑀫𑀢𑁆𑀣𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀦 𑀧𑀦 𑀘𑀼𑀡𑁆𑀡𑀦𑀯𑀲𑁂𑀦 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀫𑀸 𑀓𑀲𑁆𑀲𑀘𑀻’’𑀢𑀺𑀆𑀤𑀺. 𑀉𑀲𑁆𑀲𑀸𑀯𑀩𑀺𑀦𑁆𑀤𑀼𑀫𑀢𑁆𑀢𑀫𑁆𑀧𑀻𑀢𑀺 𑀉𑀲𑁆𑀲𑀸𑀯𑀧𑀢𑀦𑀫𑀢𑁆𑀢𑀫𑁆𑀧𑀺. 𑀔𑀼𑀭𑀧𑁆𑀧𑀁 𑀲𑀮𑁆𑀮𑀁.

𑀲𑁂𑀝𑁆𑀞𑀸𑀦𑀻𑀢𑀺 𑀅𑀚𑁂𑀬𑁆𑀬𑁂𑀦 𑀅𑀧𑁆𑀧𑀝𑀺𑀳𑀢𑀪𑀸𑀯𑁂𑀦 𑀉𑀢𑁆𑀢𑀫𑀸𑀦𑀺. 𑀤𑀼𑀲𑁆𑀲𑀸𑀯𑀼𑀥𑀦𑁆𑀢𑀺 𑀆𑀯𑀼𑀥𑀓𑀺𑀘𑁆𑀘𑀓𑀭𑀁 𑀉𑀢𑁆𑀢𑀭𑀺𑀬𑀁 𑀤𑀼𑀲𑁆𑀲𑀁. 𑀇𑀫𑀸𑀦𑀺 𑀓𑀺𑀭 𑀲𑀓𑁆𑀓𑀸𑀤𑀻𑀦𑀁 𑀧𑀼𑀜𑁆𑀜𑀸𑀦𑀼𑀪𑀸𑀯𑁂𑀦 𑀦𑀺𑀩𑁆𑀩𑀢𑁆𑀢𑀸𑀦𑀺 𑀅𑀧𑁆𑀧𑀝𑀺𑀳𑀢𑀧𑁆𑀧𑀪𑀸𑀯𑀸𑀦𑀺 𑀧𑀝𑀺𑀧𑀓𑁆𑀔𑀯𑀺𑀥𑀫𑀦𑀬𑀼𑀢𑁆𑀢𑀸𑀦𑀺 𑀅𑀯𑀚𑁆𑀛𑀸𑀦𑀺 𑀆𑀯𑀼𑀥𑀸𑀦𑀺. 𑀢𑁂𑀦𑀸𑀳 ‘‘𑀬𑀤𑀺 𑀳𑀻’’𑀢𑀺𑀆𑀤𑀺.

𑀅𑀲𑀦𑀺𑀯𑀺𑀘𑀓𑁆𑀓𑀁 𑀯𑀺𑀬𑀸𑀢𑀺 𑀅𑀲𑀦𑀺𑀫𑀡𑁆𑀟𑀮𑀁 𑀯𑀺𑀬.

𑀧𑀺𑀢𑁆𑀢𑀦𑁆𑀢𑀺 𑀅𑀮𑀕𑀤𑁆𑀤𑀧𑀺𑀢𑁆𑀢𑀁. 𑀪𑀺𑀦𑁆𑀤𑁂𑀬𑁆𑀬𑀸𑀢𑀺 𑀆𑀲𑀺𑀜𑁆𑀘𑁂𑀬𑁆𑀬. 𑀲𑀼𑀔𑀦𑁆𑀢𑀺 𑀲𑀼𑀓𑀭𑀁. 𑀫𑀼𑀤𑀼𑀪𑀽𑀢𑀘𑀺𑀢𑁆𑀢𑀯𑀯𑀢𑁆𑀣𑀸𑀦𑀓𑀭𑀡𑀢𑁆𑀣𑀦𑁆𑀢𑀺 𑀫𑀼𑀤𑀼𑀪𑀽𑀢𑀁 𑀅𑀢𑁆𑀢𑀦𑁄 𑀘𑀺𑀢𑁆𑀢𑁂 𑀯𑀯𑀢𑁆𑀣𑀸𑀦𑀲𑁆𑀲 𑀓𑀭𑀡𑀢𑁆𑀣𑀁.

𑀏𑀯𑀁 𑀯𑀼𑀢𑁆𑀢𑁂𑀢𑀺 ‘‘𑀦 𑀔𑁆𑀯𑀸𑀳’’𑀦𑁆𑀢𑀺 𑀏𑀯𑀁 𑀯𑀼𑀢𑁆𑀢𑁂. 𑀪𑀕𑀯𑀢𑁄 𑀲𑀸𑀲𑀦𑁂 𑀞𑀺𑀢𑁂 𑀧𑀬𑀺𑀭𑀼𑀧𑀸𑀲𑀺𑀢𑁆𑀯𑀸 𑀉𑀕𑁆𑀕𑀳𑀺𑀢𑀁 𑀪𑀕𑀯𑀦𑁆𑀢𑀁 𑀧𑀬𑀺𑀭𑀽𑀧𑀸𑀲𑀺𑀢𑁆𑀯𑀸 𑀉𑀕𑁆𑀕𑀳𑀺𑀢𑀫𑁂𑀯 𑀦𑀸𑀫𑀸𑀢𑀺 𑀆𑀳 ‘‘𑀓𑀲𑁆𑀲𑀧𑀁…𑀧𑁂... 𑀉𑀕𑁆𑀕𑀳𑁂𑀲𑀼’’𑀦𑁆𑀢𑀺. 𑀧𑀼𑀝𑁆𑀞𑀧𑀜𑁆𑀳𑀸𑀢𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀧𑀼𑀝𑁆𑀞𑀧𑀜𑁆𑀳𑀸. 𑀬𑀲𑁆𑀫𑀸 𑀩𑀼𑀤𑁆𑀥𑀯𑀺𑀲𑀬𑁂 𑀧𑀼𑀝𑁆𑀞𑀧𑀜𑁆𑀳𑀸, 𑀢𑀲𑁆𑀫𑀸 𑀩𑀼𑀤𑁆𑀥𑀯𑀺𑀲𑀬𑀸𑀯 𑀳𑁄𑀦𑁆𑀢𑀺.

𑀧𑀝𑀺𑀲𑁂𑀥𑁂𑀢𑁆𑀯𑀸𑀢𑀺 𑀯𑀸𑀘𑀸𑀬 𑀅𑀲𑀓𑁆𑀓𑀼𑀡𑁂𑀬𑁆𑀬𑀪𑀸𑀯𑁂𑀦𑁂𑀯 𑀧𑀝𑀺𑀲𑁂𑀥𑁂𑀢𑁆𑀯𑀸. ‘‘𑀬𑀤𑀸𑀓𑀗𑁆𑀔𑀲𑀻’’𑀢𑀺 𑀧𑀤𑀲𑀦𑁆𑀥𑀺𑀯𑀲𑁂𑀦 𑀦𑀺𑀤𑁆𑀤𑁂𑀲𑁄𑀢𑀺 𑀆𑀳 ‘‘𑀬𑀤𑀺 𑀆𑀓𑀗𑁆𑀔𑀲𑀻’’𑀢𑀺. 𑀢𑁂𑀦 𑀢𑀼𑀬𑁆𑀳𑀁 𑀧𑀼𑀘𑁆𑀙𑀁 𑀢𑀸𑀯 𑀲𑀼𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑁂𑀲𑁆𑀲𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀢𑁂𑀦𑀸𑀳 ‘‘𑀦 𑀫𑁂’’𑀢𑀺𑀆𑀤𑀺. 𑀤𑀼𑀢𑀺𑀬𑀯𑀺𑀓𑀧𑁆𑀧𑁂 𑀤-𑀓𑀸𑀭𑁄 𑀧𑀤𑀲𑀦𑁆𑀥𑀺𑀓𑀭𑁄𑀢𑀺 𑀆𑀳 ‘‘𑀬𑀁 𑀆𑀓𑀗𑁆𑀔𑀲𑀻’’𑀢𑀺. ‘‘𑀧𑀼𑀘𑁆𑀙, 𑀆𑀯𑀼𑀲𑁄, 𑀲𑀼𑀢𑁆𑀯𑀸 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺 𑀅𑀯𑀢𑁆𑀯𑀸 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀲𑁆𑀲 𑀅𑀦𑀺𑀬𑀫𑁂𑀢𑁆𑀯𑀸 𑀯𑀘𑀦𑀁 𑀲𑀩𑁆𑀩𑀯𑀺𑀲𑀬𑀁 𑀳𑁄𑀢𑀻𑀢𑀺 𑀆𑀳 ‘‘𑀲𑀩𑁆𑀩𑀁 𑀢𑁂’’𑀢𑀺𑀆𑀤𑀺.

𑀓𑀺𑀁 𑀲𑀽𑀢𑀺 𑀏𑀢𑁆𑀣 𑀓𑀺𑀦𑁆𑀢𑀺 𑀧𑀼𑀘𑁆𑀙𑀸𑀬𑀁, 𑀲𑀽𑀢𑀺 𑀲𑀁𑀲𑀬𑁂, 𑀓𑀺𑀁 𑀦𑀽𑀢𑀺 𑀅𑀢𑁆𑀣𑁄? 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀮𑁄𑀓𑁂. 𑀢𑀲𑁆𑀫𑀸 𑀯𑀺𑀢𑁆𑀢𑀦𑁆𑀢𑀺 𑀬𑀲𑁆𑀫𑀸 𑀯𑀺𑀢𑁆𑀢𑀺𑀓𑀭𑀡𑀢𑁄 𑀯𑀺𑀢𑁆𑀢𑀁. 𑀲𑀼𑀓𑀢𑀦𑁆𑀢𑀺 𑀲𑀼𑀝𑁆𑀞𑀼 𑀲𑀓𑁆𑀓𑀘𑁆𑀘𑀁 𑀓𑀢𑀁. 𑀲𑀼𑀔𑀦𑁆𑀢𑀺 𑀇𑀝𑁆𑀞𑀨𑀮𑀁. 𑀢𑀢𑁆𑀣 𑀬𑀁 𑀧𑀥𑀸𑀦𑀁, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀓𑀸𑀬𑀺𑀓𑀘𑁂𑀢𑀲𑀺𑀓𑀁 𑀲𑀸𑀢’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀦𑀺𑀲𑁆𑀲𑀦𑁆𑀤𑀨𑀮𑀜𑁆𑀳𑀺 𑀢𑀕𑁆𑀕𑀳𑀡𑁂𑀦 𑀕𑀳𑀺𑀢𑀫𑁂𑀯 𑀳𑁄𑀢𑀺. 𑀅𑀧𑁆𑀧𑁂𑀢𑀻𑀢𑀺 𑀧𑀸𑀧𑁂𑀢𑀺. 𑀅𑀢𑀺𑀲𑀬𑀢𑁆𑀣𑀚𑁄𑀢𑀦𑁄 𑀢𑀭-𑀲𑀤𑁆𑀤𑁄𑀢𑀺 𑀆𑀳 ‘‘𑀅𑀢𑀺𑀲𑀬𑁂𑀦 𑀲𑀸𑀤𑀽’’𑀢𑀺. 𑀭𑀲𑀲𑀜𑁆𑀜𑀺𑀢𑀸𑀬 𑀇𑀝𑁆𑀞𑀸𑀦𑀁 𑀭𑀸𑀕𑀸𑀤𑀺𑀥𑀫𑁆𑀫𑀸𑀦𑀁. 𑀓𑁂𑀦 𑀧𑀓𑀸𑀭𑁂𑀦𑀸𑀢𑀺 𑀓𑀣𑀁-𑀲𑀤𑁆𑀤𑀲𑁆𑀲 𑀅𑀢𑁆𑀣𑀫𑀸𑀳. 𑀓𑀣𑀁𑀚𑀻𑀯𑀺𑀦𑁆𑀢𑀺 𑀬𑀤𑀺 𑀲𑀫𑀸𑀲𑀧𑀤𑀫𑁂𑀢𑀁, ‘‘𑀓𑀣’’𑀦𑁆𑀢𑀺 𑀲𑀸𑀦𑀼𑀦𑀸𑀲𑀺𑀓𑀸 𑀓𑀢𑀸𑀢𑀺 𑀆𑀳 ‘‘𑀕𑀸𑀣𑀸𑀩𑀦𑁆𑀥𑀲𑀼𑀔𑀢𑁆𑀣’’𑀦𑁆𑀢𑀺𑀆𑀤𑀺.

𑀲𑀤𑁆𑀥𑀻𑀥 𑀯𑀺𑀢𑁆𑀢𑀦𑁆𑀢𑀺 𑀏𑀓𑀤𑁂𑀲𑁂𑀦 𑀲𑀫𑀼𑀤𑀸𑀬𑀤𑀲𑁆𑀲𑀦𑀁 𑀲𑀫𑀼𑀤𑁆𑀤𑀧𑀩𑁆𑀩𑀢𑀦𑀺𑀤𑀲𑁆𑀲𑀦𑀁 𑀯𑀺𑀬. 𑀇𑀢𑀺-𑀲𑀤𑁆𑀤𑁄 𑀆𑀤𑀺𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. ‘‘𑀯𑀺𑀢𑁆𑀢𑀺𑀓𑀭𑀡𑀢𑁄 𑀯𑀺𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀫𑀢𑁆𑀣𑀁 𑀲𑀦𑁆𑀥𑀸𑀬 𑀳𑁂𑀢𑀽𑀧𑀫𑀸𑀳𑀺 𑀬𑁄𑀚𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀬𑀣𑀸 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑁂𑀦 𑀲𑀼𑀔𑀸𑀯𑀳𑀦𑀢𑁄, 𑀤𑀼𑀓𑁆𑀔𑀧𑀝𑀺𑀩𑀸𑀳𑀦𑀢𑁄, 𑀤𑀸𑀮𑀺𑀤𑁆𑀤𑀺𑀬𑀽𑀧𑀲𑀫𑀦𑀢𑁄, 𑀭𑀢𑀦𑀧𑀝𑀺𑀮𑀸𑀪𑀳𑁂𑀢𑀼𑀢𑁄, 𑀮𑁄𑀓𑀲𑀦𑁆𑀢𑀢𑀺𑀆𑀯𑀳𑀦𑀢𑁄 𑀘 𑀲𑀤𑁆𑀥𑀸 𑀯𑀺𑀢𑁆𑀢𑀁 𑀬𑀣𑀸 𑀢𑀁 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀸𑀤𑀻𑀦𑀺. 𑀢𑁂𑀦𑀸𑀳 ‘‘𑀏𑀯’’𑀦𑁆𑀢𑀺𑀆𑀤𑀺. 𑀦𑀦𑀼 𑀘𑁂𑀢𑀦𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀆𑀤𑀬𑁄 𑀘 𑀲𑀸𑀢𑀺𑀲𑀬𑀁 𑀯𑀺𑀧𑀸𑀓𑀲𑀼𑀔𑀁 𑀆𑀯𑀳𑀦𑁆𑀢𑀺, 𑀢𑀁 𑀓𑀣𑀁 𑀲𑀤𑁆𑀥𑀸 𑀆𑀯𑀳𑀢𑀻𑀢𑀺? 𑀲𑀤𑁆𑀥𑀸𑀥𑀼𑀭𑀪𑀸𑀯𑀲𑀪𑀸𑀯𑀢𑁄. 𑀢𑁂𑀦𑀸𑀳 ‘‘𑀲𑀤𑁆𑀥𑀸𑀥𑀼𑀭𑁂𑀦 𑀧𑀝𑀺𑀧𑀦𑁆𑀦𑀸𑀦’’𑀦𑁆𑀢𑀺. 𑀢𑀲𑁆𑀲 𑀘 𑀲𑁂𑀲𑀧𑀤𑁂𑀲𑀼𑀧𑀺 𑀬𑁄𑀚𑁂𑀢𑀩𑁆𑀩𑀁.

𑀇𑀤𑀸𑀦𑀺 𑀬𑀁 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀸𑀤𑀺 𑀲𑀤𑁆𑀥𑀸𑀯𑀺𑀢𑁆𑀢𑀲𑁆𑀲 𑀑𑀧𑀫𑁆𑀫𑀁, 𑀢𑀁 𑀳𑀻𑀦𑀁, 𑀲𑀤𑁆𑀥𑀸𑀯𑀺𑀢𑁆𑀢𑀫𑁂𑀯 𑀉𑀢𑁆𑀢𑀫𑀦𑁆𑀢𑀺 𑀧𑀸𑀴𑀺𑀬𑀁 𑀲𑁂𑀝𑁆𑀞𑀕𑁆𑀕𑀳𑀡𑀁 𑀓𑀢𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀬𑀲𑁆𑀫𑀸 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀭𑀮𑁄𑀓𑀁 𑀕𑀢𑀁 𑀅𑀦𑀼𑀕𑀘𑁆𑀙𑀢𑀻𑀢𑀺 𑀅𑀦𑀼𑀕𑀸𑀫𑀺𑀓𑀁. 𑀅𑀜𑁆𑀜𑁂𑀳𑀺 𑀦 𑀲𑀸𑀥𑀸𑀭𑀡𑀦𑁆𑀢𑀺 𑀅𑀦𑀜𑁆𑀜𑀲𑀸𑀥𑀸𑀭𑀡𑀁. 𑀲𑀩𑁆𑀩𑀲𑀫𑁆𑀧𑀢𑁆𑀢𑀺𑀳𑁂𑀢𑀽𑀢𑀺 𑀲𑀩𑁆𑀩𑀸𑀲𑀁 𑀲𑀻𑀮𑀲𑀫𑁆𑀧𑀤𑀸𑀤𑀻𑀦𑀁 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸𑀦𑀁 𑀲𑀫𑁆𑀧𑀢𑁆𑀢𑀻𑀦𑀁 𑀳𑁂𑀢𑀼. 𑀅𑀦𑀢𑁆𑀣𑀸𑀬 𑀳𑁄𑀢𑀺 𑀅𑀦𑀼𑀧𑀸𑀬𑀧𑀝𑀺𑀧𑀢𑁆𑀢𑀺𑀢𑁄. 𑀢𑀲𑁆𑀫𑀸 𑀅𑀦𑀼𑀕𑀸𑀫𑀺𑀓𑀢𑁆𑀢𑀸. 𑀅𑀦𑀜𑁆𑀜𑀲𑀸𑀥𑀸𑀭𑀡𑀢𑁆𑀢𑀸 𑀲𑀩𑁆𑀩𑀲𑀫𑁆𑀧𑀢𑁆𑀢𑀺𑀳𑁂𑀢𑀼𑀪𑀸𑀯𑀢𑁄 𑀳𑀺𑀭𑀜𑁆𑀜𑀸𑀤𑀺𑀯𑀺𑀢𑁆𑀢𑀦𑀺𑀤𑀸𑀦𑀢𑁆𑀢𑀸 𑀘 𑀲𑀤𑁆𑀥𑀸𑀯𑀺𑀢𑁆𑀢𑀫𑁂𑀯 𑀲𑁂𑀝𑁆𑀞𑀁. 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑀤𑁂𑀲𑀦𑀸 𑀬𑀣𑀸 ‘‘𑀲𑀢𑁆𑀣𑀸 𑀤𑁂𑀯𑀫𑀦𑀼𑀲𑁆𑀲𑀸𑀦’’𑀦𑁆𑀢𑀺.

‘‘𑀤𑀲𑀓𑀼𑀲𑀮𑀥𑀫𑁆𑀫𑁄’’𑀢𑀺 𑀇𑀫𑀺𑀦𑀸 𑀏𑀓𑀘𑁆𑀘𑀸𑀦𑀁𑀬𑁂𑀯 𑀤𑀸𑀦𑀸𑀤𑀺𑀥𑀫𑁆𑀫𑀸𑀦𑀁 𑀲𑀗𑁆𑀕𑀳𑁄, 𑀦 𑀲𑀩𑁆𑀩𑁂𑀲𑀦𑁆𑀢𑀺 𑀅𑀲𑀗𑁆𑀕𑀳𑀺𑀢𑀲𑀗𑁆𑀕𑀡𑁆𑀳𑀦𑀢𑁆𑀣𑀁 ‘‘𑀤𑀸𑀦𑀲𑀻𑀮𑀪𑀸𑀯𑀦𑀸𑀥𑀫𑁆𑀫𑁄 𑀯𑀸’’𑀢𑀺 𑀯𑀼𑀢𑁆𑀢𑀁. ‘‘𑀲𑀼𑀔’’𑀦𑁆𑀢𑀺 𑀢𑀺𑀯𑀺𑀥𑀲𑁆𑀲𑀧𑀺 𑀲𑀼𑀔𑀲𑁆𑀲 𑀲𑀸𑀥𑀸𑀭𑀡𑀕𑁆𑀕𑀳𑀡𑀫𑁂𑀢𑀦𑁆𑀢𑀺 𑀢𑀁 𑀲𑀯𑀺𑀲𑁂𑀲𑀮𑀤𑁆𑀥𑀁 𑀧𑀼𑀕𑁆𑀕𑀮𑀯𑀲𑁂𑀦 𑀤𑀲𑁆𑀲𑁂𑀦𑁆𑀢𑁄 ‘‘𑀲𑁄𑀡𑀲𑁂𑀝𑁆𑀞𑀺…𑀧𑁂… 𑀆𑀯𑀳𑀢𑀻’’𑀢𑀺 𑀆𑀳. 𑀬𑁄 𑀲𑁄 𑀧𑀤𑀼𑀫𑀯𑀢𑀺𑀬𑀸 𑀤𑁂𑀯𑀺𑀬𑀸 𑀧𑀼𑀢𑁆𑀢𑁄 𑀫𑀳𑀸𑀧𑀤𑀼𑀫𑁄 𑀦𑀸𑀫 𑀭𑀸𑀚𑀸 𑀤𑀺𑀩𑁆𑀩𑀲𑀼𑀔𑀲𑀤𑀺𑀲𑀁 𑀭𑀚𑁆𑀚𑀲𑀼𑀔𑀫𑀦𑀼𑀪𑀯𑀺𑀢𑁆𑀯𑀸 𑀧𑀘𑁆𑀙𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀸𑀦𑀲𑀼𑀔𑀫𑀦𑀼𑀪𑀯𑀺, 𑀢𑀁 𑀦𑀺𑀤𑀲𑁆𑀲𑀦𑀪𑀸𑀯𑁂𑀦 𑀕𑀳𑁂𑀢𑁆𑀯𑀸 𑀆𑀳 ‘‘𑀫𑀳𑀸𑀧𑀤𑀼𑀫𑀸𑀤𑀻𑀦𑀁 𑀯𑀺𑀬 𑀦𑀺𑀩𑁆𑀩𑀸𑀦𑀲𑀼𑀔𑀜𑁆𑀘 𑀆𑀯𑀳𑀢𑀻’’𑀢𑀺.

𑀅𑀢𑁆𑀣𑀼𑀤𑁆𑀥𑀸𑀭𑀦𑀬𑁂𑀦 𑀲𑀘𑁆𑀘𑀲𑀤𑁆𑀤𑀁 𑀲𑀁𑀯𑀡𑁆𑀡𑁂𑀦𑁆𑀢𑁄 ‘‘𑀅𑀦𑁂𑀓𑁂𑀲𑀼 𑀅𑀢𑁆𑀣𑁂𑀲𑀼 𑀤𑀺𑀲𑁆𑀲𑀢𑀻’’𑀢𑀺 𑀆𑀳. 𑀯𑀸𑀘𑀸𑀲𑀘𑁆𑀘𑁂 𑀤𑀺𑀲𑁆𑀲𑀢𑀺 𑀲𑀘𑁆𑀘𑀲𑀤𑁆𑀤𑁄 ‘‘𑀪𑀡𑁂’’𑀢𑀺 𑀯𑀼𑀢𑁆𑀢𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀯𑀺𑀭𑀢𑀺𑀲𑀘𑁆𑀘𑁂 𑀤𑀺𑀲𑁆𑀲𑀢𑀺. 𑀯𑁂𑀭𑀫𑀡𑀻𑀲𑀼 𑀳𑀺 𑀧𑀢𑀺𑀝𑁆𑀞𑀺𑀢𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 ‘‘𑀲𑀘𑁆𑀘𑁂 𑀞𑀺𑀢𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀅𑀢𑁆𑀢𑀸𑀓𑀸𑀭𑀫𑁆𑀧𑀺 𑀯𑀢𑁆𑀣𑀼𑀁 𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜𑀦𑁆𑀢𑀺 𑀧𑀯𑀢𑁆𑀢𑀺𑀬𑀸𑀓𑀸𑀭𑀁 𑀉𑀧𑀸𑀤𑀸𑀬 𑀤𑀺𑀝𑁆𑀞𑀺 𑀏𑀯 𑀲𑀘𑁆𑀘𑀦𑁆𑀢𑀺 𑀤𑀺𑀝𑁆𑀞𑀺𑀲𑀘𑁆𑀘𑀁, 𑀢𑀲𑁆𑀫𑀺𑀁 𑀤𑀺𑀝𑁆𑀞𑀺𑀲𑀘𑁆𑀘𑁂 𑀤𑀺𑀲𑁆𑀲𑀢𑀻𑀢𑀺 𑀬𑁄𑀚𑀦𑀸. 𑀩𑁆𑀭𑀸𑀳𑁆𑀫𑀡𑀲𑀘𑁆𑀘𑀸𑀦𑀻𑀢𑀺 𑀧𑀭𑀫𑀢𑁆𑀣𑀩𑁆𑀭𑀳𑁆𑀫𑀸𑀦𑀁 𑀲𑀘𑁆𑀘𑀸𑀦𑀺, 𑀬𑀸𑀦𑀺 ‘‘𑀲𑀩𑁆𑀩𑁂 𑀧𑀸𑀡𑀸 𑀅𑀯𑀚𑁆𑀛𑀸, 𑀲𑀩𑁆𑀩𑁂 𑀓𑀸𑀫𑀸 𑀅𑀦𑀺𑀘𑁆𑀘𑀸, 𑀲𑀩𑁆𑀩𑁂 𑀪𑀯𑀸 𑀅𑀦𑀺𑀘𑁆𑀘𑀸, 𑀦𑀸𑀳𑀁 𑀓𑁆𑀯𑀘𑀦𑀺 𑀓𑀲𑁆𑀲𑀘𑀺 𑀓𑀺𑀜𑁆𑀘𑀦𑀢𑀲𑁆𑀫𑀺’’𑀦𑁆𑀢𑀺𑀆𑀤𑀺𑀦𑀸 (𑀅. 𑀦𑀺. 𑁪.𑁧𑁮𑁫) 𑀘𑀢𑀼𑀓𑁆𑀓𑀦𑀺𑀧𑀸𑀢𑁂 𑀆𑀕𑀢𑀸𑀦𑀺. 𑀧𑀭𑀫𑀢𑁆𑀣𑀪𑀽𑀢𑀁 𑀲𑀘𑁆𑀘𑀁 𑀦𑀺𑀩𑁆𑀩𑀸𑀦𑀁. 𑀅𑀩𑁆𑀪𑀦𑁆𑀢𑀭𑀁 𑀓𑀢𑁆𑀯𑀸𑀢𑀺 𑀅𑀦𑁆𑀢𑁄𑀕𑀥𑀫𑁂𑀯 𑀓𑀢𑁆𑀯𑀸, 𑀢𑁂𑀳𑀺 𑀲𑀤𑁆𑀥𑀺𑀦𑁆𑀢𑀺 𑀅𑀢𑁆𑀣𑁄 𑀧𑀭𑀫𑀢𑁆𑀣𑀲𑀘𑁆𑀘𑀸𑀦𑀫𑁆𑀧𑀺 𑀲𑀸𑀤𑀼𑀢𑀭𑀢𑁆𑀢𑀸. 𑀬𑀲𑁆𑀲𑀸𑀦𑀼𑀪𑀸𑀯𑁂𑀦𑀸𑀢𑀺 𑀬𑀲𑁆𑀲 𑀯𑀸𑀘𑀸𑀲𑀘𑁆𑀘𑀲𑁆𑀲 𑀆𑀦𑀼𑀪𑀸𑀯𑁂𑀦.

𑀉𑀤𑀓𑀫𑁆𑀳𑀺 𑀥𑀸𑀯𑀢𑀻𑀢𑀺 𑀉𑀤𑀓𑀧𑀺𑀝𑁆𑀞𑀺𑀬𑀁 𑀅𑀪𑀺𑀚𑁆𑀚𑀫𑀸𑀦𑀸𑀬𑀁 𑀧𑀣𑀯𑀺𑀬𑀸 𑀯𑀺𑀬 𑀥𑀸𑀯𑀢𑀺 𑀕𑀘𑁆𑀙𑀢𑀺 𑀫𑀳𑀸𑀓𑀧𑁆𑀧𑀺𑀦𑀭𑀸𑀚𑀸 𑀯𑀺𑀬. 𑀯𑀺𑀲𑀫𑁆𑀧𑀺 𑀲𑀘𑁆𑀘𑁂𑀦 𑀳𑀦𑀦𑁆𑀢𑀺 𑀧𑀡𑁆𑀟𑀺𑀢𑀸𑀢𑀺 𑀓𑀡𑁆𑀳𑀤𑀻𑀧𑀸𑀬𑀦𑀸𑀤𑀬𑁄 𑀯𑀺𑀬. 𑀲𑀘𑁆𑀘𑁂𑀦𑀸𑀢𑀺 𑀫𑀘𑁆𑀙𑀚𑀸𑀢𑀓𑁂 𑀩𑁄𑀥𑀺𑀲𑀢𑁆𑀢𑀲𑁆𑀲 𑀯𑀺𑀬 𑀲𑀘𑁆𑀘𑁂𑀦 𑀤𑁂𑀯𑁄 𑀣𑀦𑀬𑀁 𑀧𑀯𑀲𑁆𑀲𑀢𑀺. 𑀲𑀘𑁆𑀘𑁂 𑀞𑀺𑀢𑀸𑀢𑀺 𑀯𑀺𑀭𑀢𑀺𑀲𑀘𑁆𑀘𑁂 𑀯𑀸𑀘𑀸𑀲𑀘𑁆𑀘𑁂 𑀘 𑀞𑀺𑀢𑀸 𑀢𑀬𑁄𑀧𑀺 𑀩𑁄𑀥𑀺𑀲𑀢𑁆𑀢𑀸. 𑀦𑀺𑀩𑁆𑀩𑀼𑀢𑀺𑀦𑁆𑀢𑀺 𑀦𑀺𑀩𑁆𑀩𑀸𑀦𑀁 𑀧𑀢𑁆𑀣𑀬𑀦𑁆𑀢𑀺. 𑀲𑀸𑀤𑀼𑀢𑀭𑀦𑁆𑀢𑀺 𑀲𑀸𑀢𑀢𑀭𑀁 𑀇𑀝𑁆𑀞𑀢𑀭𑀯𑀺𑀧𑀸𑀓𑀤𑀸𑀦𑀢𑁄.

𑀭𑀲𑀸𑀦𑀦𑁆𑀢𑀺 𑀦𑀺𑀤𑁆𑀥𑀸𑀭𑀡𑀢𑁆𑀣𑁂 𑀲𑀸𑀫𑀺𑀯𑀘𑀦𑀁. 𑀦𑀺𑀤𑁆𑀥𑀸𑀭𑀡𑀜𑁆𑀘 𑀓𑁄𑀘𑀺 𑀓𑀼𑀢𑁄𑀘𑀺 𑀓𑁂𑀦𑀘𑀺 𑀇𑀫𑀦𑁆𑀢𑀺 𑀓𑀲𑁆𑀲𑀘𑀺 𑀯𑀘𑀦𑀁 𑀦 𑀲𑀸𑀥𑁂𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀬𑁂 𑀇𑀫𑁂’’𑀢𑀺𑀆𑀤𑀺𑀫𑀸𑀳. 𑀢𑁂𑀦 𑀳𑀺 𑀦𑀺𑀩𑁆𑀩𑀸𑀦𑀁 𑀭𑀲𑀲𑀫𑀼𑀤𑀸𑀬𑀢𑁄 𑀲𑀸𑀤𑀼𑀢𑀭𑀢𑀸𑀯𑀺𑀲𑁂𑀲𑁂𑀦 𑀦𑀺𑀤𑁆𑀥𑀸𑀭𑀻𑀬𑀢𑀺. 𑀢𑀢𑁆𑀣 𑀬𑁂 𑀇𑀫𑁂 𑀯𑀼𑀘𑁆𑀘𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀲𑀸𑀬𑀦𑀻𑀬𑀥𑀫𑁆𑀫𑀸𑀢𑀺 𑀚𑀺𑀯𑁆𑀳𑀸𑀬 𑀲𑀸𑀬𑀺𑀢𑀩𑁆𑀩𑀸 𑀥𑀫𑁆𑀫𑀸. 𑀭𑀲𑀸𑀬𑀢𑀦𑀁 𑀭𑀲𑁄𑀢𑀺 𑀆𑀳 ‘‘𑀫𑀽𑀮𑀭𑀲𑁄 𑀔𑀦𑁆𑀥𑀭𑀲𑁄’’𑀢𑀺𑀆𑀤𑀺. 𑀨𑀮𑀭𑀲𑀦𑁆𑀢𑀺 𑀨𑀮𑀲𑁆𑀲 𑀭𑀲𑀁, 𑀨𑀮𑀁 𑀧𑀻𑀴𑁂𑀢𑁆𑀯𑀸 𑀢𑀸𑀧𑁂𑀢𑁆𑀯𑀸 𑀕𑀳𑁂𑀢𑀩𑁆𑀩𑀭𑀲𑀦𑁆𑀢𑀺 𑀅𑀢𑁆𑀣𑁄. 𑀅𑀭𑀲𑀭𑀽𑀧𑁄𑀢𑀺 𑀆𑀘𑀸𑀭𑀭𑀳𑀺𑀢𑀲𑀪𑀸𑀯𑁄. 𑀭𑀽𑀧𑀲𑁆𑀲 𑀅𑀲𑁆𑀲𑀸𑀤𑀦𑀯𑀲𑁂𑀦 𑀉𑀧𑁆𑀧𑀚𑁆𑀚𑀦𑀓𑀲𑀼𑀔𑀥𑀫𑁆𑀫𑀸 𑀭𑀽𑀧𑀭𑀲𑀸. 𑀏𑀲 𑀦𑀬𑁄 𑀲𑀤𑁆𑀤𑀭𑀲𑀸𑀤𑀻𑀲𑀼. 𑀲𑀤𑁆𑀤𑀭𑀲𑁄𑀢𑀺 𑀩𑁆𑀬𑀜𑁆𑀚𑀦𑀲𑀫𑁆𑀪𑀽𑀢𑁄 𑀭𑀲𑁄. 𑀯𑀺𑀫𑀼𑀢𑁆𑀢𑀺𑀭𑀲𑁄𑀢𑀺 𑀯𑀺𑀫𑀼𑀢𑁆𑀢𑀺𑀲𑀫𑁆𑀧𑀢𑁆𑀢𑀺𑀓𑁄 𑀭𑀲𑁄. 𑀅𑀢𑁆𑀣𑀭𑀲𑁄𑀢𑀺 𑀅𑀢𑁆𑀣𑀲𑁆𑀲 𑀧𑀝𑀺𑀯𑀺𑀚𑁆𑀛𑀦𑀯𑀲𑁂𑀦 𑀉𑀧𑁆𑀧𑀚𑁆𑀚𑀦𑀓𑀲𑀼𑀔𑀁 𑀅𑀢𑁆𑀣𑀭𑀲𑁄, 𑀢𑀣𑀸 𑀥𑀫𑁆𑀫𑀭𑀲𑁄 𑀯𑁂𑀤𑀺𑀢𑀩𑁆𑀩𑁄. 𑀭𑀽𑀧𑀸𑀘𑀸𑀭𑀸𑀢𑀺𑀆𑀤𑀻𑀲𑀼 𑀭𑀲𑀕𑁆𑀕𑀳𑀡𑁂𑀦 𑀨𑀮𑀭𑀲𑀁 𑀯𑀤𑀢𑀺. 𑀲𑁄 𑀳𑀺 𑀨𑀮𑀲𑁆𑀲 𑀭𑀽𑀧𑁄 𑀘, 𑀭𑀲𑀺𑀢𑀩𑁆𑀩𑀢𑁄 𑀆𑀲𑀸𑀤𑁂𑀢𑀩𑁆𑀩𑀢𑁄 𑀭𑀲𑁄 𑀘𑀸𑀢𑀺 ‘‘𑀭𑀽𑀧𑀭𑀲𑁄’’𑀢𑀺 𑀯𑀼𑀘𑁆𑀘𑀢𑀺. 𑀆𑀘𑀸𑀭𑁄 𑀧𑀦 𑀲𑀸𑀫𑀕𑁆𑀕𑀻𑀭𑀲𑀳𑁂𑀢𑀼𑀢𑀸𑀬 ‘‘𑀭𑀲𑁄’’𑀢𑀺 𑀯𑀼𑀢𑁆𑀢𑁄. 𑀲𑀘𑁆𑀘𑀁 𑀳𑀯𑁂𑀢𑀺 𑀏𑀢𑁆𑀣 𑀳𑀯𑁂𑀢𑀺 𑀏𑀓𑀁𑀲𑀢𑁆𑀣𑁂 𑀦𑀺𑀧𑀸𑀢𑁄, 𑀏𑀓𑀁𑀲𑀢𑁆𑀣𑁄 𑀘 𑀅𑀯𑀥𑀸𑀭𑀡𑀫𑁂𑀯𑀸𑀢𑀺 𑀆𑀳 ‘‘𑀲𑀘𑁆𑀘𑀫𑁂𑀯 𑀲𑀸𑀤𑀼𑀢𑀭’’𑀦𑁆𑀢𑀺𑀆𑀤𑀺. 𑀲𑀭𑀻𑀭𑀫𑀼𑀧𑀩𑁆𑀭𑀽𑀳𑁂𑀦𑁆𑀢𑀺, 𑀦 𑀘𑀺𑀢𑁆𑀢𑀁. 𑀦𑀦𑀼 𑀘 𑀲𑀼𑀔𑀼𑀧𑁆𑀧𑀢𑁆𑀢𑀺𑀧𑀬𑁄𑀚𑀦𑀢𑁆𑀢𑀸 𑀘𑀺𑀢𑁆𑀢𑀫𑁆𑀧𑀺 𑀉𑀧𑀩𑁆𑀭𑀽𑀳𑁂𑀦𑁆𑀢𑀻𑀢𑀺? 𑀦, 𑀲𑀼𑀔𑀲𑁆𑀲 𑀲𑀭𑀻𑀭𑀩𑁆𑀭𑀽𑀳𑀦𑀁 𑀧𑀝𑀺𑀘𑁆𑀘 𑀉𑀧𑁆𑀧𑀦𑁆𑀦𑀢𑁆𑀢𑀸. 𑀯𑀺𑀭𑀢𑀺𑀲𑀘𑁆𑀘𑀯𑀸𑀘𑀸𑀢𑀺 𑀲𑀘𑁆𑀘𑀯𑀺𑀲𑁂𑀲𑁂𑀦 𑀲𑀫𑁆𑀧𑀚𑁆𑀚𑀦𑀁 𑀯𑀤𑀢𑀺. 𑀘𑀺𑀢𑁆𑀢𑀫𑀼𑀧𑀩𑁆𑀭𑀽𑀳𑁂𑀢𑀺 𑀧𑀤𑀸𑀮𑀺𑀓𑀸𑀬 𑀯𑀺𑀭𑀢𑀺𑀯𑀸𑀘𑀸𑀬 𑀲𑀘𑁆𑀘𑀭𑀲𑁂 𑀲𑀢𑀺 𑀲𑀫𑀣𑀯𑀺𑀧𑀲𑁆𑀲𑀦𑀸𑀤𑀻𑀳𑀺 𑀘𑀺𑀢𑁆𑀢𑀧𑀭𑀺𑀩𑁆𑀭𑀽𑀳𑀦𑀲𑁆𑀲 𑀲𑀫𑁆𑀪𑀯𑀢𑁄 𑀫𑀕𑁆𑀕𑀨𑀮𑀸𑀦𑀺𑀲𑀁𑀲𑀁 𑀕𑀡𑁆𑀳𑀸𑀢𑀺. 𑀅𑀲𑀁𑀓𑀺𑀮𑁂𑀲𑀺𑀓𑀜𑁆𑀘 𑀲𑀼𑀔𑀫𑀸𑀯𑀳𑀢𑀺 𑀯𑀺𑀯𑀝𑁆𑀝𑀲𑀦𑁆𑀦𑀺𑀲𑁆𑀲𑀺𑀢𑀢𑁆𑀢𑀸. 𑀯𑀺𑀫𑀼𑀢𑁆𑀢𑀺𑀭𑀲𑁄𑀢𑀺 𑀨𑀮𑀲𑀼𑀔𑀁 𑀯𑀤𑀢𑀺 𑀦𑀺𑀩𑁆𑀩𑀸𑀦𑀲𑀼𑀔𑀫𑁆𑀧𑀺 𑀯𑀸. 𑀧𑀭𑀫𑀢𑁆𑀣𑀲𑀘𑁆𑀘𑀭𑀲𑁄 𑀦𑀸𑀫 𑀦𑀺𑀩𑁆𑀩𑀸𑀦𑀭𑀲𑁄. 𑀢𑀣𑀸 𑀳𑀺 𑀢𑀁 ‘‘𑀅𑀘𑁆𑀘𑀼𑀢𑀺𑀭𑀲𑀁 𑀅𑀲𑁆𑀲𑀸𑀲𑀓𑀭𑀡𑀭𑀲’’𑀦𑁆𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀢𑁂𑀦 𑀧𑀭𑀺𑀪𑀸𑀯𑀺𑀢𑀢𑁆𑀢𑀸𑀢𑀺 𑀯𑀺𑀫𑀼𑀢𑁆𑀢𑀺𑀭𑀲𑀲𑁆𑀲 𑀲𑀸𑀤𑀼𑀢𑀭𑀪𑀸𑀯𑀤𑀲𑁆𑀲𑀦𑀢𑁆𑀣𑀁. 𑀏𑀯𑀁 𑀲𑀦𑁆𑀢𑁂𑀧𑀺 ‘‘𑀯𑀺𑀫𑀼𑀢𑁆𑀢𑀺𑀭𑀲𑀧𑀭𑀺𑀪𑀸𑀯𑀺𑀢𑀢𑁆𑀢𑀸’’𑀢𑀺 𑀏𑀢𑁂𑀦 𑀓𑀸𑀫𑀁 𑀯𑀺𑀫𑀼𑀢𑁆𑀢𑀺𑀭𑀲𑁄 𑀯𑀸 𑀧𑀭𑀫𑀢𑁆𑀣𑀲𑀘𑁆𑀘𑀭𑀲𑁄 𑀯𑀸 𑀲𑀸𑀤𑀼𑀢𑀭𑀭𑀲𑀸𑀢𑀺 𑀤𑀲𑁆𑀲𑁂𑀢𑀺. 𑀢𑀤𑀥𑀺𑀕𑀫𑀽𑀧𑀸𑀬𑀪𑀽𑀢𑀦𑁆𑀢𑀺 𑀢𑀲𑁆𑀲 𑀧𑀭𑀫𑀢𑁆𑀣𑀲𑀘𑁆𑀘𑀲𑁆𑀲 𑀅𑀥𑀺𑀕𑀫𑀽𑀧𑀸𑀬𑀪𑀽𑀢𑀁. 𑀅𑀢𑁆𑀣𑀜𑁆𑀘 𑀥𑀫𑁆𑀫𑀜𑁆𑀘𑀸𑀢𑀺 𑀨𑀮𑀜𑁆𑀘 𑀓𑀸𑀭𑀡𑀜𑁆𑀘 𑀦𑀺𑀲𑁆𑀲𑀸𑀬 𑀧𑀯𑀢𑁆𑀢𑀺𑀢𑁄 𑀅𑀢𑁆𑀣𑀭𑀲𑀸 𑀥𑀫𑁆𑀫𑀭𑀲𑀸 𑀘 𑀲𑀸𑀤𑀽, 𑀢𑀢𑁄𑀧𑀺 𑀧𑀭𑀫𑀢𑁆𑀣𑀲𑀘𑁆𑀘𑀫𑁂𑀯 𑀲𑀸𑀤𑀼𑀭𑀲𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀮𑁄𑀓𑀼𑀢𑁆𑀢𑀭𑀁 𑀮𑁄𑀓𑀺𑀬𑀜𑁆𑀘 𑀅𑀢𑁆𑀣𑀁 𑀅𑀚𑀸𑀦𑀦𑁆𑀢𑁄 𑀅𑀦𑁆𑀥𑁄, 𑀮𑁄𑀓𑀺𑀬𑀢𑁆𑀣𑀫𑁂𑀯 𑀚𑀸𑀦𑀦𑁆𑀢𑁄 𑀏𑀓𑀘𑀓𑁆𑀔𑀼, 𑀉𑀪𑀬𑀁 𑀚𑀸𑀦𑀦𑁆𑀢𑁄 𑀤𑁆𑀯𑀺𑀘𑀓𑁆𑀔𑀼. 𑀧𑀭𑀳𑀺𑀢𑀁 𑀅𑀢𑁆𑀢𑀳𑀺𑀢𑀜𑁆𑀘 𑀅𑀚𑀸𑀦𑀦𑁆𑀢𑁄 𑀅𑀦𑁆𑀥𑁄, 𑀅𑀢𑁆𑀢𑀳𑀺𑀢𑀫𑁂𑀯 𑀚𑀸𑀦𑀦𑁆𑀢𑁄 𑀏𑀓𑀘𑀓𑁆𑀔𑀼, 𑀉𑀪𑀬𑀢𑁆𑀣𑀁 𑀚𑀸𑀦𑀦𑁆𑀢𑁄 𑀤𑁆𑀯𑀺𑀘𑀓𑁆𑀔𑀼. 𑀲𑁄 𑀤𑁆𑀯𑀺𑀘𑀓𑁆𑀔𑀼𑀧𑀼𑀕𑁆𑀕𑀮𑁄 𑀧𑀜𑁆𑀜𑀸𑀚𑀻𑀯𑀻. 𑀢𑀁 𑀧𑀦 𑀕𑀳𑀝𑁆𑀞𑀧𑀩𑁆𑀩𑀚𑀺𑀢𑀯𑀲𑁂𑀦 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀕𑀳𑀝𑁆𑀞𑁄 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀕𑀳𑀝𑁆𑀞𑀧𑀝𑀺𑀧𑀤𑀁 𑀆𑀭𑀸𑀥𑁂𑀢𑁆𑀯𑀸 𑀘𑀸𑀢𑀺 𑀬𑁄𑀚𑀦𑀸. 𑀆𑀭𑀸𑀥𑁂𑀢𑁆𑀯𑀸𑀢𑀺 𑀘 𑀲𑀸𑀥𑁂𑀢𑁆𑀯𑀸𑀢𑀺 𑀅𑀢𑁆𑀣𑁄.

𑀧𑀼𑀭𑀺𑀫𑀦𑀬𑁂𑀦𑁂𑀯𑀸𑀢𑀺 𑀓𑀲𑁆𑀲𑀧𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀯𑀺𑀲𑁆𑀲𑀚𑁆𑀚𑀺𑀢𑀦𑀬𑁂𑀦𑁂𑀯. 𑀓𑀺𑀜𑁆𑀘𑀸𑀧𑀻𑀢𑀺 𑀅𑀦𑀼𑀚𑀸𑀦𑀦𑀲𑀦𑁆𑀤𑀲𑁆𑀲𑀦𑀢𑁆𑀣𑁂 𑀦𑀺𑀧𑀸𑀢𑁄. 𑀓𑀺𑀁 𑀅𑀦𑀼𑀚𑀸𑀦𑀸𑀢𑀻𑀢𑀺? 𑀕𑀸𑀣𑀸𑀬 𑀘𑀢𑀽𑀳𑀺 𑀧𑀤𑁂𑀳𑀺 𑀯𑀼𑀢𑁆𑀢𑁂𑀲𑀼 𑀅𑀢𑁆𑀣𑁂𑀲𑀼 𑀏𑀓𑀲𑁆𑀲 𑀅𑀢𑁆𑀣𑀲𑁆𑀲 𑀲𑀺𑀤𑁆𑀥𑀺𑀬𑀁 𑀇𑀢𑀭𑁂𑀲𑀫𑁆𑀧𑀺 𑀲𑀺𑀤𑁆𑀥𑀺𑀁 𑀅𑀦𑀼𑀚𑀸𑀦𑀸𑀢𑀺. 𑀢𑁂𑀦𑀸𑀳 ‘‘𑀬𑁄 𑀘𑀢𑀼𑀩𑁆𑀩𑀺𑀥𑀫𑁄𑀖𑀁…𑀧𑁂… 𑀧𑀭𑀺𑀲𑀼𑀚𑁆𑀛𑀢𑀻’’𑀢𑀺. 𑀓𑀺𑀁 𑀲𑀦𑁆𑀤𑀲𑁆𑀲𑁂𑀢𑀻𑀢𑀺? 𑀬𑁂𑀲𑀁 𑀧𑀸𑀧𑀥𑀫𑁆𑀫𑀸𑀦𑀁 𑀩𑀮𑀯𑀪𑀸𑀯𑁂𑀦 𑀑𑀖𑀢𑀭𑀡𑀸𑀤𑀺 𑀦 𑀲𑀺𑀚𑁆𑀛𑀢𑀺, 𑀢𑁂𑀲𑀁 𑀧𑀝𑀺𑀧𑀓𑁆𑀔𑀸𑀦𑀁 𑀦𑀺𑀲𑁆𑀲𑀦𑁆𑀤𑁂𑀳𑀯𑀲𑁂𑀦 𑀲𑀦𑁆𑀤𑀲𑁆𑀲𑀦𑀁. 𑀢𑁂𑀦𑀸𑀳 ‘‘𑀏𑀯𑀁 𑀲𑀦𑁆𑀢𑁂𑀧𑀻’’𑀢𑀺𑀆𑀤𑀺. 𑀑𑀖𑀢𑀭𑀡𑀦𑁆𑀢𑀺 𑀑𑀖𑀢𑀭𑀡𑀧𑀝𑀺𑀧𑀢𑁆𑀢𑀺𑀁. 𑀅𑀲𑀤𑁆𑀤𑀳𑀦𑁆𑀢𑁄𑀢𑀺 𑀏𑀯𑀁 𑀧𑀝𑀺𑀧𑀚𑁆𑀚𑀦𑁆𑀢𑁄 𑀇𑀫𑀸𑀬 𑀧𑀝𑀺𑀧𑀢𑁆𑀢𑀺𑀬𑀸 𑀑𑀖𑀁 𑀢𑀭𑀢𑀻𑀢𑀺 𑀦 𑀲𑀤𑁆𑀤𑀳𑀦𑁆𑀢𑁄. 𑀦 𑀧𑀓𑁆𑀔𑀦𑁆𑀤𑀢𑀻𑀢𑀺 𑀧𑀓𑁆𑀔𑀦𑁆𑀤𑀦𑀮𑀓𑁆𑀔𑀡𑀸𑀬 𑀲𑀤𑁆𑀥𑀸𑀬 𑀦 𑀉𑀕𑁆𑀖𑀸𑀝𑀻𑀬𑀢𑀻𑀢𑀺 𑀦 𑀑𑀢𑀭𑀢𑀺. 𑀘𑀺𑀢𑁆𑀢𑀯𑁄𑀲𑁆𑀲𑀕𑁆𑀕𑁂𑀦𑀸𑀢𑀺 𑀬𑀣𑀸𑀓𑀸𑀫𑀸𑀘𑀸𑀭𑀯𑀲𑁂𑀦 𑀘𑀺𑀢𑁆𑀢𑀲𑁆𑀲 𑀯𑁄𑀲𑁆𑀲𑀚𑁆𑀚𑀦𑁂𑀦. 𑀧𑀫𑀢𑁆𑀢𑁄 𑀧𑀫𑀸𑀤𑀁 𑀆𑀧𑀦𑁆𑀦𑁄. 𑀢𑀢𑁆𑀣𑁂𑀯𑀸𑀢𑀺 𑀓𑀸𑀫𑁂𑀲𑀼 𑀏𑀯. 𑀯𑀺𑀲𑀢𑁆𑀢𑀢𑁆𑀢𑀸 𑀮𑀕𑁆𑀕𑀢𑁆𑀢𑀸. 𑀯𑁄𑀓𑀺𑀡𑁆𑀡𑁄𑀢𑀺 𑀯𑀺𑀲𑁂𑀯𑀺𑀢𑁄. 𑀢𑀲𑁆𑀫𑀸𑀢𑀺 𑀯𑀼𑀢𑁆𑀢𑀲𑁆𑀲 𑀘𑀢𑀼𑀩𑁆𑀩𑀺𑀥𑀲𑁆𑀲𑀧𑀺 𑀅𑀢𑁆𑀣𑀲𑁆𑀲 𑀳𑁂𑀢𑀼𑀪𑀸𑀯𑁂𑀦 𑀧𑀘𑁆𑀘𑀸𑀫𑀲𑀦𑀁. 𑀢𑀧𑁆𑀧𑀝𑀺𑀧𑀓𑁆𑀔𑀦𑁆𑀢𑀺 𑀅𑀲𑁆𑀲𑀤𑁆𑀥𑀺𑀬𑀸𑀤𑀻𑀦𑀁 𑀧𑀝𑀺𑀧𑀓𑁆𑀔𑀁 𑀲𑀤𑁆𑀥𑀸𑀤𑀻𑀦𑀁 𑀑𑀓𑀸𑀲𑀢𑁆𑀢𑀸.

𑀏𑀢𑀸𑀬𑀸𑀢𑀺 𑀕𑀸𑀣𑀸𑀬𑀁 𑀇𑀫𑀺𑀦𑀸 𑀧𑀤𑁂𑀦𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀧𑁆𑀧𑀼𑀭𑀺𑀲𑀲𑀁𑀲𑁂𑀯𑁄 𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀁 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑀝𑀺𑀧𑀢𑁆𑀢𑀻𑀢𑀺 𑀇𑀫𑁂𑀲𑀁 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀸𑀥𑀺𑀕𑀫𑀲𑁆𑀲 𑀅𑀗𑁆𑀕𑀸𑀦𑀁 𑀆𑀲𑀦𑁆𑀦𑀓𑀸𑀭𑀡𑀁 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀦𑁆𑀢𑀺 𑀆𑀳 ‘‘𑀲𑁄𑀢𑀸𑀧𑀢𑁆𑀢𑀺𑀬𑀗𑁆𑀕𑀧𑀤𑀝𑁆𑀞𑀸𑀦𑀁 𑀲𑀤𑁆𑀥𑀺𑀦𑁆𑀤𑁆𑀭𑀺𑀬’’𑀦𑁆𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀲𑀤𑁆𑀥𑀸𑀚𑀸𑀢𑁄 𑀉𑀧𑀲𑀗𑁆𑀓𑀫𑀢𑀺, 𑀉𑀧𑀲𑀗𑁆𑀓𑀫𑀦𑁆𑀢𑁄 𑀧𑀬𑀺𑀭𑀼𑀧𑀸𑀲𑀢𑀺, 𑀧𑀬𑀺𑀭𑀼𑀧𑀸𑀲𑀦𑁆𑀢𑁄 𑀲𑁄𑀢𑀁 𑀑𑀤𑀳𑀢𑀺, 𑀑𑀳𑀺𑀢𑀲𑁄𑀢𑁄 𑀥𑀫𑁆𑀫𑀁 𑀲𑀼𑀡𑀸𑀢𑀻’’𑀢𑀺𑀆𑀤𑀺 (𑀫. 𑀦𑀺. 𑁨.𑁧𑁮𑁩, 𑁪𑁩𑁨). 𑀤𑀺𑀝𑁆𑀞𑁄𑀖𑀁 𑀢𑀭𑀢𑀺 𑀏𑀢𑁂𑀦𑀸𑀢𑀺 𑀤𑀺𑀝𑁆𑀞𑁄𑀖𑀢𑀭𑀡𑀁, 𑀤𑀺𑀝𑁆𑀞𑁄𑀖𑀲𑁆𑀲 𑀢𑀭𑀡𑀁. 𑀓𑀸𑀫𑀜𑁆𑀘𑁂𑀢𑁆𑀣 ‘‘𑀢𑀭𑀢𑀺 𑀑𑀖’’𑀦𑁆𑀢𑀺 𑀯𑀼𑀢𑁆𑀢𑀁, 𑀯𑀢𑁆𑀢𑀫𑀸𑀦𑀲𑀫𑀻𑀧𑁂𑀧𑀺 𑀧𑀦 𑀯𑀢𑁆𑀢𑀫𑀸𑀦𑀁 𑀯𑀺𑀬 𑀯𑁄𑀳𑀭𑀡𑀁 𑀬𑀼𑀢𑁆𑀢𑀁 𑀤𑀺𑀝𑁆𑀞𑁄𑀖𑀲𑁆𑀲 𑀢𑀺𑀡𑁆𑀡𑀪𑀸𑀯𑀲𑁆𑀲 𑀏𑀓𑀦𑁆𑀢𑀺𑀓𑀢𑁆𑀢𑀸𑀢𑀺 ‘‘𑀲𑁄𑀢𑀸𑀧𑀦𑁆𑀦𑀜𑁆𑀘 𑀧𑀓𑀸𑀲𑁂𑀢𑀻’’𑀢𑀺 𑀯𑀼𑀢𑁆𑀢𑀁. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀤𑀺𑀝𑁆𑀞𑀺𑀯𑀺𑀘𑀺𑀓𑀺𑀘𑁆𑀙𑀸𑀤𑀺𑀧𑀝𑀺𑀧𑀢𑁆𑀢𑀦𑁆𑀢𑀭𑀸𑀬𑀓𑀭𑀸𑀦𑀁 𑀧𑀸𑀧𑀥𑀫𑁆𑀫𑀸𑀦𑀁 𑀲𑀫𑀼𑀘𑁆𑀙𑀺𑀦𑁆𑀦𑀢𑁆𑀢𑀸 𑀲𑁄𑀢𑀸𑀧𑀦𑁆𑀦𑁄…𑀧𑁂… 𑀅𑀧𑁆𑀧𑀫𑀸𑀤𑁂𑀦 𑀲𑀫𑀦𑁆𑀦𑀸𑀕𑀢𑁄. ‘‘𑀲𑁄𑀢𑀸𑀧𑀢𑁆𑀢𑀺…𑀧𑁂… 𑀢𑀭𑀢𑀻’’𑀢𑀺 𑀏𑀢𑁆𑀢𑀓𑁂 𑀯𑀼𑀢𑁆𑀢𑁂 𑀲𑀓𑀺𑀤𑁂𑀯 𑀇𑀫𑀲𑁆𑀲 𑀮𑁄𑀓𑀲𑁆𑀲 𑀆𑀕𑀫𑀦𑀫𑁆𑀧𑀺 𑀕𑀳𑀺𑀢𑀁 𑀲𑀺𑀬𑀸𑀢𑀺 𑀢𑀦𑁆𑀦𑀺𑀯𑀢𑁆𑀢𑀦𑀢𑁆𑀣𑀁 ‘‘𑀆𑀭𑀸𑀥𑁂𑀢𑁆𑀯𑀸…𑀧𑁂… 𑀅𑀯𑀲𑁂𑀲’’𑀦𑁆𑀢𑀺 𑀯𑀼𑀢𑁆𑀢𑀁. 𑀦𑀦𑀼 ‘‘𑀅𑀯𑀲𑁂𑀲’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦 𑀅𑀢𑀺𑀡𑁆𑀡𑀁 𑀅𑀦𑀯𑀲𑁂𑀲𑀁 𑀪𑀯𑁄𑀖𑀯𑀢𑁆𑀣𑀼 𑀕𑀳𑀺𑀢𑀫𑁂𑀯 𑀲𑀺𑀬𑀸𑀢𑀺? 𑀦, 𑀉𑀧𑀭𑀺 𑀤𑁆𑀯𑀻𑀳𑀺 𑀫𑀕𑁆𑀕𑁂𑀳𑀺 𑀢𑀭𑀺𑀢𑀩𑁆𑀩𑀸𑀦𑀁 𑀢𑁂𑀲𑀁 𑀧𑀭𑀢𑁄 𑀤𑁆𑀯𑀺𑀦𑁆𑀦𑀁 𑀧𑀳𑀸𑀦𑀯𑀲𑁂𑀦 𑀯𑀼𑀘𑁆𑀘𑀫𑀸𑀦𑀢𑁆𑀢𑀸. 𑀅𑀧𑀯𑀸𑀤𑀯𑀺𑀲𑀬𑀫𑁆𑀧𑀺 𑀧𑀭𑀺𑀳𑀭𑀢𑀺 𑁋 ‘‘𑀏𑀯𑀁 𑀏𑀲𑀸 𑀘𑁄𑀤𑀦𑀸 𑀅𑀢𑁆𑀢𑀦𑁄 𑀯𑀺𑀲𑀬𑁂 𑀦 𑀧𑀢𑀺𑀝𑁆𑀞𑀸𑀢𑀻’’𑀢𑀺. 𑀅𑀦𑀸𑀤𑀺𑀓𑀸𑀮𑀪𑀸𑀯𑀢𑁆𑀢𑀸 𑀓𑀸𑀫𑀲𑀜𑁆𑀜𑀸𑀬 𑀓𑀸𑀫𑁄𑀖𑀢𑀭𑀡𑀁 𑀫𑀳𑀢𑀸 𑀏𑀯 𑀯𑀻𑀭𑀺𑀬𑁂𑀦 𑀲𑀸𑀥𑁂𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀯𑀻𑀭𑀺𑀬𑁂𑀦𑀸’’𑀢𑀺. 𑀢𑀢𑀺𑀬𑀁 𑀫𑀕𑁆𑀕𑀁 𑀆𑀭𑀸𑀥𑁂𑀢𑁆𑀯𑀸. 𑀓𑀸𑀫𑁄𑀖𑀲𑁆𑀲 𑀯𑀢𑁆𑀣𑀼 𑀓𑀸𑀫𑁄𑀖𑀯𑀢𑁆𑀣𑀼, 𑀓𑀸𑀫𑀕𑀼𑀡𑁂𑀳𑀺 𑀲𑀤𑁆𑀥𑀺𑀁 𑀲𑀩𑁆𑀩𑁄 𑀓𑀸𑀫𑀪𑀯𑁄. 𑀓𑀸𑀫𑁄𑀖𑀲𑀜𑁆𑀜𑀺𑀢𑀦𑁆𑀢𑀺 𑀓𑀸𑀫𑁄𑀖𑀲𑀗𑁆𑀔𑀸𑀢𑀁. 𑀓𑀸𑀫𑀦𑀝𑁆𑀞𑁂𑀦 𑀓𑀸𑀫𑁄 𑀘 𑀲𑁄 𑀤𑀼𑀓𑁆𑀔𑁄 𑀘𑀸𑀢𑀺 𑀓𑀸𑀫𑀤𑀼𑀓𑁆𑀔𑀁. 𑀅𑀲𑁆𑀲𑀸𑀤𑀦𑀝𑁆𑀞𑁂𑀦 𑀓𑀸𑀫𑁄 𑀏𑀯 𑀲𑀜𑁆𑀜𑀸𑀢𑀺 𑀓𑀸𑀫𑀲𑀜𑁆𑀜𑀸, 𑀲𑀩𑁆𑀩𑀲𑁄 𑀲𑀫𑀼𑀘𑁆𑀙𑀺𑀦𑁆𑀦𑀢𑁆𑀢𑀸 𑀯𑀺𑀕𑀢𑀸 𑀓𑀸𑀫𑀲𑀜𑁆𑀜𑀸 𑀏𑀢𑀺𑀲𑁆𑀲𑀸𑀢𑀺 𑀯𑀺𑀕𑀢𑀓𑀸𑀫𑀲𑀜𑁆𑀜𑀸. 𑀲𑀩𑁆𑀩𑁂𑀲𑀁 𑀭𑀸𑀕𑀸𑀤𑀺𑀫𑀮𑀸𑀦𑀁 𑀫𑀽𑀮𑀪𑀽𑀢𑀢𑁆𑀢𑀸 𑀲𑀢𑁆𑀢𑀲𑀦𑁆𑀢𑀸𑀦𑀲𑁆𑀲 𑀯𑀺𑀲𑁂𑀲𑀢𑁄 𑀫𑀮𑀻𑀦𑀲𑀪𑀸𑀯𑀸𑀧𑀸𑀤𑀦𑀢𑁄 𑀧𑀭𑀫𑀁 𑀉𑀓𑁆𑀓𑀁𑀲𑀕𑀢𑀁 𑀫𑀮𑀦𑁆𑀢𑀺 𑀧𑀭𑀫𑀫𑀮𑀁, 𑀅𑀯𑀺𑀚𑁆𑀚𑀸. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀅𑀯𑀺𑀚𑁆𑀚𑀸𑀧𑀭𑀫𑀁 𑀫𑀮’’𑀦𑁆𑀢𑀺 (𑀥. 𑀧. 𑁨𑁪𑁩).

𑀧𑀜𑁆𑀜𑀸𑀧𑀤𑀁 𑀕𑀳𑁂𑀢𑁆𑀯𑀸𑀢𑀺 𑀬𑀣𑀸𑀯𑀼𑀢𑁆𑀢𑀁 𑀧𑀜𑁆𑀜𑀸𑀧𑀤𑀁 𑀳𑀤𑀬𑁂 𑀞𑀧𑁂𑀢𑁆𑀯𑀸. 𑀢𑀧𑁆𑀧𑀲𑀗𑁆𑀕𑁂𑀦 𑀅𑀢𑁆𑀢𑀦𑁄 𑀧𑀝𑀺𑀪𑀸𑀦𑁂𑀦 𑀲𑀩𑁆𑀩𑁂𑀳𑀺 𑀯𑀺𑀬 𑀉𑀕𑁆𑀕𑀳𑀺𑀢𑀦𑀺𑀬𑀸𑀫𑁂𑀦. 𑀲𑀩𑁆𑀩𑀢𑁆𑀣𑁂𑀯𑀸𑀢𑀺 𑀧𑀜𑁆𑀘𑀲𑀼𑀧𑀺 𑀞𑀸𑀦𑁂𑀲𑀼. 𑀅𑀢𑁆𑀣𑀬𑀼𑀢𑁆𑀢𑀺𑀧𑀼𑀘𑁆𑀙𑀸𑀢𑀺 𑀧𑀜𑁆𑀜𑀸𑀤𑀺𑀅𑀢𑁆𑀣𑀲𑀫𑀥𑀺𑀕𑀫𑀲𑁆𑀲 𑀬𑀼𑀢𑁆𑀢𑀺𑀬𑀸 𑀓𑀸𑀭𑀡𑀲𑁆𑀲 𑀧𑀼𑀘𑁆𑀙𑀸. 𑀢𑁂𑀦𑀸𑀳 ‘‘𑀅𑀬𑀁 𑀳𑀻’’𑀢𑀺𑀆𑀤𑀺. 𑀧𑀜𑁆𑀜𑀸𑀤𑀺𑀅𑀢𑁆𑀣𑀁 𑀜𑀢𑁆𑀯𑀸𑀢𑀺 𑀧𑀜𑁆𑀜𑀸𑀥𑀦-𑀓𑀺𑀢𑁆𑀢𑀺-𑀫𑀺𑀢𑁆𑀢-𑀅𑀪𑀺𑀲𑀫𑁆𑀧𑀭𑀸𑀬𑀲𑀗𑁆𑀔𑀸𑀢𑀁 𑀅𑀢𑁆𑀣𑀁 𑀲𑀭𑀽𑀧𑀢𑁄 𑀲𑀘𑁆𑀘𑀧𑀝𑀺𑀯𑁂𑀥𑀦𑀺𑀧𑁆𑀨𑀸𑀤𑀦𑁂𑀦 𑀜𑀸𑀡𑁂𑀦 𑀚𑀸𑀦𑀺𑀢𑁆𑀯𑀸. 𑀦𑀦𑀼 𑀏𑀲 𑀮𑁄𑀓𑀼𑀢𑁆𑀢𑀭𑀁 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀨𑀮𑀧𑀜𑁆𑀜𑀁 𑀢𑀤𑀥𑀺𑀕𑀫𑀽𑀧𑀸𑀬𑀁 𑀮𑁄𑀓𑀺𑀬𑀧𑀜𑁆𑀜𑀜𑁆𑀘 𑀅𑀪𑀺𑀪𑀯𑀺𑀢𑁆𑀯𑀸 𑀞𑀺𑀢𑁄, 𑀲𑁄 𑀓𑀲𑁆𑀫𑀸 𑀢𑀢𑁆𑀣 𑀅𑀢𑁆𑀣𑀬𑀼𑀢𑁆𑀢𑀺𑀁 𑀧𑀼𑀘𑁆𑀙𑀢𑀻𑀢𑀺? 𑀲𑀘𑁆𑀘𑀫𑁂𑀢𑀁, 𑀉𑀧𑀭𑀺 𑀧𑀦 𑀲𑀫𑀸𑀥𑀺𑀲𑁆𑀲 𑀬𑀼𑀢𑁆𑀢𑀺𑀁 𑀧𑀼𑀘𑁆𑀙𑀺𑀢𑀼𑀓𑀸𑀫𑁄 𑀧𑀜𑁆𑀜𑀸𑀬 𑀲𑁂𑀝𑁆𑀞𑀪𑀸𑀯𑀢𑁄, 𑀢𑀲𑁆𑀲 𑀘 𑀏𑀓𑀤𑁂𑀲𑁂𑀦𑁂𑀯 𑀅𑀥𑀺𑀕𑀢𑀢𑁆𑀢𑀸 𑀢𑀫𑁂𑀯 𑀆𑀤𑀺𑀁 𑀓𑀢𑁆𑀯𑀸 𑀧𑀼𑀘𑁆𑀙𑀢𑀺. ‘‘𑀓𑀸𑀬 𑀬𑀼𑀢𑁆𑀢𑀺𑀬𑀸’’𑀢𑀺𑀆𑀤𑀺 𑀅𑀢𑁆𑀣𑀯𑀡𑁆𑀡𑀦𑀁 𑀅𑀢𑀺𑀤𑀺𑀲𑁆𑀲𑀢𑀺 ‘‘𑀏𑀲 𑀦𑀬𑁄 𑀥𑀦𑀸𑀤𑀻𑀲𑀽’’𑀢𑀺. 𑀢𑀢𑁆𑀣𑀸𑀧𑀺 𑀅𑀢𑁆𑀣𑀬𑀼𑀢𑁆𑀢𑀺𑀧𑀼𑀘𑁆𑀙𑀸𑀪𑀸𑀯𑁄 𑀧𑀦 ‘‘𑀲𑀩𑁆𑀩𑀢𑁆𑀣𑁂𑀯𑀸’’𑀢𑀺 𑀇𑀫𑀺𑀦𑀸 𑀯𑀺𑀪𑀸𑀯𑀺𑀢𑁄𑀢𑀺.

𑀲𑀤𑁆𑀥𑀸𑀲𑀼𑀲𑁆𑀲𑀽𑀲𑀸𑀅𑀧𑁆𑀧𑀫𑀸𑀤𑀉𑀝𑁆𑀞𑀸𑀦𑀲𑀗𑁆𑀔𑀸𑀢𑁂𑀳𑀺 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺. 𑀓𑀸𑀬𑀲𑀼𑀘𑀭𑀺𑀢𑀸𑀤𑀺𑀪𑁂𑀤𑁂𑀦 𑀆𑀚𑀻𑀯𑀝𑁆𑀞𑀫𑀓𑀲𑀻𑀮𑀪𑀽𑀢𑁂𑀦. 𑀲𑀫𑀣𑀯𑀺𑀧𑀲𑁆𑀲𑀦𑀸𑀪𑀽𑀢𑁂𑀦 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀩𑁄𑀥𑀺𑀧𑀓𑁆𑀔𑀺𑀬𑁂 𑀏𑀯 𑀕𑀡𑁆𑀳𑀦𑁆𑀢𑁄 ‘‘𑀅𑀧𑀭𑀪𑀸𑀕𑁂’’𑀢𑀺 𑀆𑀳. 𑀧𑀭𑀺𑀬𑀸𑀬𑀩𑁄𑀥𑀺𑀧𑀓𑁆𑀔𑀺𑀬𑀸 𑀧𑀦 𑀯𑀺𑀲𑁂𑀲𑀢𑁄 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀯𑀺𑀧𑀲𑁆𑀲𑀦𑀸𑀓𑀸𑀮𑁂𑀧𑀺 𑀮𑀩𑁆𑀪𑀦𑁆𑀢𑀺. 𑀧𑀼𑀩𑁆𑀩𑀪𑀸𑀕𑁂𑀢𑀺 𑀯𑀸 𑀢𑀭𑀼𑀡𑀯𑀺𑀧𑀲𑁆𑀲𑀦𑀸𑀓𑀸𑀮𑀁. 𑀢𑀢𑁄 𑀧𑀼𑀩𑁆𑀩𑀲𑀸𑀥𑀦𑀜𑁆𑀘 𑀲𑀦𑁆𑀥𑀸𑀬 ‘‘𑀅𑀧𑀭𑀪𑀸𑀕𑁂’’𑀢𑀺 𑀧𑀼𑀦𑀸𑀳, 𑀢𑀢𑁄 𑀧𑀭𑀦𑁆𑀢𑀺 𑀅𑀢𑁆𑀣𑁄. 𑀥𑀫𑁆𑀫𑀦𑁆𑀢𑀺 𑀧𑀝𑀺𑀧𑀢𑁆𑀢𑀺𑀥𑀫𑁆𑀫𑀁. 𑀦 𑀲𑀤𑁆𑀥𑀸𑀫𑀢𑁆𑀢𑀓𑁂𑀦𑁂𑀯 𑀧𑀜𑁆𑀜𑀁 𑀮𑀪𑀢𑀻𑀢𑀺 𑀬𑁄𑀚𑀦𑀸. 𑀬𑀤𑀺 𑀏𑀯𑀁 𑀓𑀲𑁆𑀫𑀸 ‘‘𑀲𑀤𑁆𑀤𑀳𑀸𑀦𑁄’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀬𑀲𑁆𑀫𑀸 𑀧𑀦𑀸’’𑀢𑀺𑀆𑀤𑀺. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀻𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀫𑁂𑀯 𑀅𑀢𑁆𑀣𑀁 𑀯𑀺𑀯𑀭𑀢𑀺. 𑀦 𑀓𑁂𑀯𑀮𑀁 𑀲𑀼𑀲𑁆𑀲𑀽𑀲𑀸𑀫𑀢𑁆𑀢𑁂𑀦 𑀧𑀜𑁆𑀜𑀸𑀧𑀝𑀺𑀮𑀸𑀪𑁄, 𑀅𑀣 𑀔𑁄 𑀅𑀧𑁆𑀧𑀫𑀸𑀤𑁂𑀦 𑀧𑀜𑁆𑀜𑀁 𑀮𑀪𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 𑀧𑀸𑀴𑀺𑀬𑀁 ‘‘𑀅𑀧𑁆𑀧𑀫𑀢𑁆𑀢𑁄 𑀯𑀺𑀘𑀓𑁆𑀔𑀡𑁄’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀢𑀤𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀏𑀯’’𑀦𑁆𑀢𑀺𑀆𑀤𑀺𑀫𑀸𑀳.

𑀇𑀤𑀸𑀦𑀺 𑀲𑀤𑁆𑀥𑀸𑀤𑀻𑀦𑀁 𑀧𑀜𑁆𑀜𑀸𑀧𑀝𑀺𑀮𑀸𑀪𑀲𑁆𑀲 𑀢𑀁𑀢𑀁𑀯𑀺𑀲𑁂𑀲𑀧𑀘𑁆𑀘𑀬𑀸𑀦𑀺 𑀦𑀻𑀳𑀭𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀏𑀯’’𑀦𑁆𑀢𑀺 𑀯𑀼𑀢𑁆𑀢𑀁. 𑀲𑀼𑀲𑁆𑀲𑀽𑀲𑀸𑀬𑀸𑀢𑀺 𑀲𑁄𑀢𑀼𑀓𑀸𑀫𑀢𑀸𑀬. 𑀲𑀸 𑀅𑀢𑁆𑀣𑀢𑁄 𑀉𑀧𑀲𑀗𑁆𑀓𑀫𑀦𑀸𑀤𑀺. 𑀧𑀜𑁆𑀜𑀸𑀥𑀺𑀕𑀫𑀽𑀧𑀸𑀬𑀦𑁆𑀢𑀺 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀫𑀸𑀳. 𑀢𑁂𑀦𑀸𑀳 ‘‘𑀲𑀼𑀡𑀸𑀢𑀻’’𑀢𑀺. 𑀕𑀳𑀺𑀢𑀁 𑀦 𑀧𑀫𑀼𑀲𑁆𑀲𑀢𑀺, 𑀲𑀢𑀺𑀅𑀯𑀺𑀧𑁆𑀧𑀯𑀸𑀲𑀮𑀓𑁆𑀔𑀡𑁄 𑀳𑀺 𑀅𑀧𑁆𑀧𑀫𑀸𑀤𑁄𑀢𑀺. 𑀦 𑀓𑁂𑀯𑀮𑀁 𑀬𑀸𑀣𑀸𑀯𑀢𑁄 𑀕𑀳𑀡𑀓𑁄𑀲𑀮𑁆𑀮𑀫𑁂𑀯 𑀯𑀺𑀘𑀓𑁆𑀔𑀡𑀢𑀸, 𑀅𑀣 𑀔𑁄 𑀬𑀸𑀣𑀸𑀯𑀢𑁄 𑀧𑀜𑁆𑀜𑀸𑀲𑀫𑁆𑀧𑀯𑁂𑀥𑀦𑀜𑁆𑀘𑀸𑀢𑀺 𑀆𑀳 ‘‘𑀯𑀺𑀢𑁆𑀣𑀸𑀭𑀺𑀓𑀁 𑀓𑀭𑁄𑀢𑀻’’𑀢𑀺. 𑀇𑀤𑀸𑀦𑀺 𑀧𑀜𑁆𑀜𑀸𑀧𑀝𑀺𑀮𑀸𑀪𑀳𑁂𑀢𑀼𑀁 𑀫𑀢𑁆𑀣𑀓𑀁 𑀧𑀸𑀧𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀲𑀼𑀲𑁆𑀲𑀽𑀲𑀸𑀬 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀢𑁆𑀣𑀫𑀼𑀧𑀧𑀭𑀺𑀓𑁆𑀔𑀢𑀻𑀢𑀺 𑀲𑀼𑀢𑀓𑀢𑀸𑀦𑀁 𑀥𑀫𑁆𑀫𑀸𑀦𑀁 𑀧𑀸𑀴𑀺𑀅𑀢𑁆𑀣𑀽𑀧𑀧𑀭𑀺𑀓𑁆𑀔𑀸𑀧𑀼𑀩𑁆𑀩𑀓𑀁 𑀭𑀽𑀧𑀸𑀭𑀽𑀧𑀯𑀺𑀪𑀸𑀕𑀁 𑀧𑀭𑀫𑀢𑁆𑀣𑀁 𑀲𑀮𑀓𑁆𑀔𑀡𑀢𑁄 𑀲𑀸𑀫𑀜𑁆𑀜𑀮𑀓𑁆𑀔𑀡𑀢𑁄 𑀘 𑀉𑀧𑀧𑀭𑀺𑀓𑁆𑀔𑀢𑀺 𑀯𑀻𑀫𑀁𑀲𑀢𑀺. 𑀅𑀦𑀼𑀧𑀼𑀩𑁆𑀩𑁂𑀦𑀸𑀢𑀺 𑀏𑀯𑀁 𑀜𑀸𑀢𑀧𑀭𑀺𑀜𑁆𑀜𑀁 𑀧𑀢𑁆𑀯𑀸 𑀢𑀻𑀭𑀡𑀧𑀭𑀺𑀜𑁆𑀜𑀸𑀬 𑀢𑀢𑁄 𑀅𑀦𑀼𑀓𑁆𑀓𑀫𑁂𑀦 𑀢𑀻𑀭𑀡𑀧𑀭𑀺𑀜𑁆𑀜𑀁 𑀧𑀳𑀸𑀦𑀧𑀭𑀺𑀜𑁆𑀜𑀜𑁆𑀘 𑀫𑀢𑁆𑀣𑀓𑀁 𑀧𑀸𑀧𑁂𑀦𑁆𑀢𑁄 𑀫𑀕𑁆𑀕𑀧𑁆𑀧𑀝𑀺𑀧𑀸𑀝𑀺𑀬𑀸 𑀧𑀭𑀫𑀢𑁆𑀣𑀲𑀘𑁆𑀘𑀪𑀽𑀢𑀁 𑀦𑀺𑀩𑁆𑀩𑀸𑀦𑀁 𑀲𑀘𑁆𑀙𑀺𑀓𑀭𑁄𑀢𑀺.

𑀇𑀫𑀸𑀦𑀺 𑀲𑀤𑁆𑀥𑀸𑀤𑀻𑀦𑀺 𑀘𑀢𑁆𑀢𑀸𑀭𑀺 𑀓𑀸𑀭𑀡𑀸𑀦𑀺 𑀫𑀢𑁆𑀣𑀓𑀁 𑀧𑀸𑀧𑁂𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀤𑁂𑀲𑀓𑀸𑀮𑀸𑀤𑀻𑀦𑀺 𑀅𑀳𑀸𑀧𑁂𑀢𑁆𑀯𑀸’’𑀢𑀺. 𑀬𑀲𑁆𑀫𑀺𑀁 𑀤𑁂𑀲𑁂 𑀬𑀲𑁆𑀫𑀺𑀁 𑀓𑀸𑀮𑁂 𑀬𑁂 𑀘 𑀲𑀳𑀸𑀬𑀓𑁂 𑀦𑀺𑀲𑁆𑀲𑀸𑀬 𑀬𑀁 𑀓𑀺𑀘𑁆𑀘𑀁 𑀢𑀺𑀭𑁂𑀢𑀩𑁆𑀩𑀁, 𑀢𑀸𑀦𑀺 𑀤𑁂𑀲𑀓𑀸𑀮𑀸𑀤𑀻𑀦𑀺 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸 𑀅𑀢𑁆𑀢𑀦𑁄 𑀅𑀪𑀺𑀯𑀼𑀟𑁆𑀠𑀺𑀁 𑀇𑀘𑁆𑀙𑀦𑁆𑀢𑁂𑀦 ‘‘𑀅𑀬𑀁 𑀦𑀸𑀫 𑀤𑁂𑀲𑁄, 𑀬𑀢𑁆𑀣𑀸𑀳𑀁 𑀏𑀢𑀭𑀳𑀺 𑀯𑀲𑀸𑀫𑀺, 𑀅𑀬𑀁 𑀓𑀸𑀮𑁄, 𑀇𑀫𑁂 𑀫𑀺𑀢𑁆𑀢𑀸, 𑀇𑀫𑁂 𑀅𑀫𑀺𑀢𑁆𑀢𑀸, 𑀇𑀫𑁂 𑀆𑀬𑀯𑀬𑀸, 𑀅𑀳𑀜𑁆𑀘 𑀏𑀤𑀺𑀲𑁄 𑀚𑀸𑀢𑀺-𑀓𑀼𑀮-𑀧𑀤𑁂𑀲-𑀩𑀮𑀪𑁄𑀕-𑀧𑀭𑀺𑀯𑀸𑀭𑀸𑀤𑀻𑀳𑀺, 𑀢𑀁 𑀓𑀺𑀘𑁆𑀘𑀁 𑀇𑀤𑀸𑀦𑀺 𑀆𑀭𑀤𑁆𑀥𑀩𑁆𑀩𑀁, 𑀇𑀤𑀸𑀦𑀺 𑀦𑀸𑀭𑀤𑁆𑀥𑀩𑁆𑀩’’𑀦𑁆𑀢𑀺 𑀲𑀩𑁆𑀩𑀁 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀁. 𑀏𑀯𑀁 𑀧𑀝𑀺𑀧𑀚𑁆𑀚𑀦𑁆𑀢𑁄 𑀳𑀺 𑀮𑁄𑀓𑀺𑀬𑀲𑁆𑀲 𑀥𑀦𑀲𑁆𑀲 𑀧𑀝𑀺𑀭𑀽𑀧𑀸𑀥𑀺𑀕𑀫𑀽𑀧𑀸𑀬𑀁 𑀓𑀭𑁄𑀢𑀺 𑀦𑀸𑀫. 𑀮𑁄𑀓𑀼𑀢𑁆𑀢𑀭𑀲𑁆𑀲 𑀧𑀦 𑀲𑀻𑀮𑀯𑀺𑀲𑁄𑀥𑀦𑀸𑀤𑀺𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀯𑀳𑀺𑀢𑀩𑁆𑀩𑀪𑀸𑀯𑁂𑀦 𑀥𑀼𑀭𑁄 𑀯𑀺𑀬𑀸𑀢𑀺 𑀥𑀼𑀭𑁄, 𑀪𑀸𑀭𑁄. 𑀇𑀥 𑀧𑀦 𑀥𑀼𑀭𑀲𑀫𑁆𑀧𑀕𑁆𑀕𑀳𑁄 𑀉𑀢𑁆𑀢𑀭𑀧𑀤𑀮𑁄𑀧𑁂𑀦 𑀥𑀼𑀭𑁄, 𑀯𑀻𑀭𑀺𑀬𑀁. 𑀲𑁄 𑀲𑀸𑀢𑀺𑀲𑀬𑁄 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀥𑀼𑀭𑀯𑀸. ‘‘𑀉𑀝𑁆𑀞𑀸𑀢𑀸’’𑀢𑀺 𑀧𑀤𑁂𑀦 𑀓𑀸𑀬𑀺𑀓𑀯𑀻𑀭𑀺𑀬𑀲𑁆𑀲 𑀯𑀓𑁆𑀔𑀫𑀸𑀦𑀢𑁆𑀢𑀸 ‘‘𑀘𑁂𑀢𑀲𑀺𑀓𑀯𑀻𑀭𑀺𑀬𑀯𑀲𑁂𑀦𑀸’’𑀢𑀺 𑀯𑀺𑀲𑁂𑀲𑀺𑀢𑀁. 𑀅𑀦𑀺𑀓𑁆𑀔𑀺𑀢𑁆𑀢𑀥𑀼𑀭𑁄 𑀥𑁄𑀭𑀬𑁆𑀳𑀪𑀸𑀯𑀢𑁄. 𑀢𑀺𑀡𑀸 𑀪𑀺𑀬𑁆𑀬𑁄 𑀦 𑀫𑀜𑁆𑀜𑀢𑀻𑀢𑀺 𑀢𑀺𑀡𑀁 𑀯𑀺𑀬 𑀧𑀭𑀺𑀪𑀯𑀦𑁆𑀢𑁄 𑀅𑀢𑀺𑀪𑀼𑀬𑁆𑀬 𑀯𑀢𑁆𑀢𑀢𑀻𑀢𑀺 𑀅𑀢𑁆𑀣𑁄. 𑀆𑀤𑀺𑀦𑀸 𑀦𑀬𑁂𑀦𑀸𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑁋

‘‘𑀓𑀭𑀁 𑀧𑀼𑀭𑀺𑀲𑀓𑀺𑀘𑁆𑀘𑀸𑀦𑀺, 𑀲𑁄 𑀲𑀼𑀔𑀸 𑀦 𑀯𑀺𑀳𑀸𑀬𑀢𑀺; (𑀤𑀻. 𑀦𑀺. 𑁩.𑁨𑁫𑁩);

‘‘𑀦 𑀤𑀺𑀯𑀸 𑀲𑁄𑀧𑁆𑀧𑀲𑀻𑀮𑁂𑀦, 𑀭𑀢𑁆𑀢𑀺𑀫𑀼𑀝𑁆𑀞𑀸𑀦𑀤𑁂𑀲𑁆𑀲𑀺𑀦𑀸;

𑀦𑀺𑀘𑁆𑀘𑀁 𑀫𑀢𑁆𑀢𑁂𑀦 𑀲𑁄𑀡𑁆𑀟𑁂𑀦, 𑀲𑀓𑁆𑀓𑀸 𑀆𑀯𑀲𑀺𑀢𑀼𑀁 𑀖𑀭’’𑀦𑁆𑀢𑀺 𑀘. (𑀤𑀻. 𑀦𑀺. 𑁩.𑁨𑁫𑁩); 𑁋

𑀏𑀯𑀫𑀸𑀤𑀻𑀦𑀁 𑀲𑀗𑁆𑀕𑀳𑁄. 𑀅𑀲𑀺𑀣𑀺𑀮𑀧𑀭𑀓𑁆𑀓𑀫𑁄 𑀅𑀦𑀮𑀲𑀪𑀸𑀯𑀢𑁄. 𑀏𑀓𑀫𑀽𑀲𑀺𑀓𑀸𑀬𑀸𑀢𑀺 𑀏𑀓𑀸𑀬 𑀫𑀢𑀫𑀽𑀲𑀺𑀓𑀸𑀬. 𑀦𑀘𑀺𑀭𑀲𑁆𑀲𑁂𑀯𑀸𑀢𑀺 𑀘𑀢𑀼𑀫𑀸𑀲𑀩𑁆𑀪𑀦𑁆𑀢𑀭𑁂𑀬𑁂𑀯. 𑀘𑀢𑀼𑀲𑀢𑀲𑀳𑀲𑁆𑀲𑀲𑀗𑁆𑀔𑀁 𑀘𑀽𑀴𑀦𑁆𑀢𑁂𑀯𑀸𑀲𑀻 𑀯𑀺𑀬𑀸𑀢𑀺 𑀓𑀸𑀓𑀡𑀺𑀓𑀟𑁆𑀠𑀓𑀳𑀸𑀧𑀡-𑀲𑁄𑀴𑀲-𑀓𑀳𑀸𑀧𑀡-𑀘𑀢𑀼𑀯𑀻𑀲𑀢𑀺-𑀓𑀳𑀸𑀧𑀡-𑀲𑀢𑀳𑀭𑀡𑀓𑁆𑀓𑀫𑁂𑀦 𑀤𑁆𑀯𑁂 𑀲𑀢𑀲𑀳𑀲𑁆𑀲𑀸𑀦𑀺, 𑀘𑀽𑀴𑀓𑀫𑀳𑀸𑀲𑁂𑀝𑁆𑀞𑀺𑀦𑁄 𑀥𑀻𑀢𑀼𑀮𑀸𑀪𑀯𑀲𑁂𑀦 𑀤𑁆𑀯𑁂 𑀲𑀢𑀲𑀳𑀲𑁆𑀲𑀸𑀦𑀻𑀢𑀺 𑀏𑀯𑀁 𑀘𑀢𑀼𑀲𑀢𑀲𑀳𑀲𑁆𑀲𑀲𑀗𑁆𑀔𑀁 𑀥𑀦𑀁 𑀏𑀓𑀫𑀽𑀮𑁂𑀦 𑀬𑀣𑀸 𑀘𑀽𑀴𑀦𑁆𑀢𑁂𑀯𑀸𑀲𑀻 𑀯𑀺𑀦𑁆𑀤𑀺, 𑀏𑀯𑀁 𑀅𑀜𑁆𑀜𑁄𑀧𑀺 𑀧𑀢𑀺𑀭𑀽𑀧𑀓𑀸𑀭𑀻 𑀥𑀼𑀭𑀯𑀸 𑀉𑀝𑁆𑀞𑀸𑀢𑀸 𑀯𑀺𑀦𑁆𑀤𑀢𑁂 𑀥𑀦𑀁. 𑀅𑀬𑀜𑁆𑀘 𑀅𑀢𑁆𑀣𑁄 𑀘𑀽𑀴𑀓𑀲𑁂𑀝𑁆𑀞𑀺𑀚𑀸𑀢𑀓𑁂𑀦 𑀤𑀻𑀧𑁂𑀢𑀩𑁆𑀩𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀅𑀧𑁆𑀧𑀓𑁂𑀦𑀧𑀺 𑀫𑁂𑀥𑀸𑀯𑀻, 𑀧𑀸𑀪𑀢𑁂𑀦 𑀯𑀺𑀘𑀓𑁆𑀔𑀡𑁄;

𑀲𑀫𑀼𑀝𑁆𑀞𑀸𑀧𑁂𑀢𑀺 𑀅𑀢𑁆𑀢𑀸𑀦𑀁, 𑀅𑀡𑀼𑀁 𑀅𑀕𑁆𑀕𑀺𑀁𑀯 𑀲𑀦𑁆𑀥𑀫’’𑀦𑁆𑀢𑀺. (𑀚𑀸. 𑁧.𑁧.𑁪);

𑀯𑀢𑁆𑀢𑀁 𑀓𑀢𑁆𑀯𑀸𑀢𑀺 𑀅𑀥𑀺𑀝𑁆𑀞𑀸𑀦𑀯𑀢𑁆𑀢𑀁 𑀓𑀢𑁆𑀯𑀸. ‘‘𑀲𑀘𑁆𑀘𑀯𑀸𑀤𑀻 𑀪𑀽𑀢𑀯𑀸𑀤𑀻’’𑀢𑀺 𑀓𑀺𑀢𑁆𑀢𑀺𑀁 𑀧𑀧𑁆𑀧𑁄𑀢𑀻𑀢𑀺 𑀬𑁄𑀚𑀦𑀸. 𑀇𑀘𑁆𑀙𑀺𑀢𑀧𑀢𑁆𑀣𑀺𑀢𑀦𑁆𑀢𑀺 𑀬𑁂𑀳𑀺 𑀫𑀺𑀢𑁆𑀢𑀁 𑀇𑀘𑁆𑀙𑀢𑀺, 𑀢𑁂𑀳𑀺 𑀇𑀢𑀭𑀁 𑀧𑀢𑁆𑀣𑀺𑀢𑀁. 𑀫𑀺𑀢𑁆𑀢𑀸𑀦𑀺 𑀕𑀦𑁆𑀣𑀢𑀻𑀢𑀺 𑀫𑀺𑀢𑁆𑀢𑀪𑀸𑀯𑀁 𑀖𑀝𑁂𑀢𑀺. 𑀤𑀸𑀦𑀲𑁆𑀲 𑀧𑀺𑀬𑀪𑀸𑀯𑀓𑀭𑀡𑀢𑁄 ‘‘𑀤𑀤𑀁 𑀧𑀺𑀬𑁄 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁. 𑀬𑀁 𑀤𑀸𑀦𑀁 𑀏𑀓𑀦𑁆𑀢𑀢𑁄 𑀫𑀺𑀢𑁆𑀢𑀪𑀸𑀯𑀸𑀯𑀳𑀁, 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀤𑀼𑀤𑁆𑀤𑀤𑀁 𑀯𑀸 𑀤𑀤𑀁 𑀢𑀁 𑀕𑀦𑁆𑀣𑀢𑀻’’𑀢𑀺 𑀆𑀳. 𑀤𑀤𑀦𑁆𑀢𑀺 𑀘 𑀮𑀓𑁆𑀔𑀡𑀯𑀘𑀦𑀫𑁂𑀢𑀦𑁆𑀢𑀺 𑀆𑀳 ‘‘𑀤𑀸𑀦𑀫𑀼𑀔𑁂𑀦 𑀯𑀸’’𑀢𑀺𑀆𑀤𑀺.

𑀆𑀴𑀯𑀓𑀲𑁆𑀲 𑀅𑀚𑁆𑀛𑀸𑀲𑀬𑀸𑀦𑀼𑀭𑀽𑀧𑀁 𑀕𑀳𑀝𑁆𑀞𑀯𑀲𑁂𑀦 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄. 𑀲𑀤𑁆𑀥𑀸 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀲𑀤𑁆𑀥𑁄, 𑀢𑀲𑁆𑀲 𑀲𑀤𑁆𑀥𑀲𑁆𑀲. 𑀖𑀭𑀫𑁂𑀲𑀺𑀦𑁄𑀢𑀺 𑀖𑀭𑀸𑀯𑀸𑀲𑀲𑀗𑁆𑀔𑀸𑀢𑀁 𑀖𑀭𑀁 𑀏𑀲𑀦𑁆𑀢𑀲𑁆𑀲. 𑀖𑀭𑀸𑀯𑀸𑀲𑀲𑀦𑁆𑀦𑀺𑀲𑁆𑀲𑀺𑀢𑀢𑁆𑀢𑀸 ‘‘𑀖𑀭’’𑀦𑁆𑀢𑀺 𑀓𑀸𑀫𑀕𑀼𑀡𑀸 𑀯𑀼𑀘𑁆𑀘𑀦𑁆𑀢𑀻𑀢𑀺 𑀆𑀳 ‘‘𑀧𑀜𑁆𑀘 𑀓𑀸𑀫𑀕𑀼𑀡𑁂’’𑀢𑀺. ‘‘𑀏𑀢𑁂 𑀘𑀢𑀼𑀭𑁄 𑀥𑀫𑁆𑀫𑀸’’𑀢𑀺𑀆𑀤𑀺𑀦𑀸 𑀕𑀳𑀺𑀢𑀸 𑀅𑀦𑀦𑁆𑀢𑀭𑀕𑀸𑀣𑀸𑀬 𑀯𑀼𑀢𑁆𑀢𑀥𑀫𑁆𑀫𑀸 𑀏𑀯𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀲𑀘𑁆𑀘’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 ‘‘𑀇𑀫𑁂 𑀓𑀼𑀲𑀮𑀸, 𑀇𑀫𑁂 𑀅𑀓𑀼𑀲𑀮𑀸’’𑀢𑀺𑀆𑀤𑀺𑀦𑀸 𑀢𑁂 𑀅𑀢𑁆𑀣𑁂 𑀬𑀸𑀣𑀸𑀯𑀢𑁄 𑀥𑀸𑀭𑀡𑀢𑁄 𑀉𑀧𑀥𑀸𑀭𑀡𑀢𑁄 𑀥𑀫𑁆𑀫𑁄. 𑀲𑀜𑁆𑀜𑀸 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀥𑀸𑀭𑀡𑀁, 𑀅𑀯𑀺𑀘𑁆𑀙𑁂𑀤𑀢𑁄 𑀲𑀦𑁆𑀥𑀸𑀭𑀡𑀢𑁄 𑀓𑀼𑀲𑀮𑀲𑀦𑁆𑀢𑀸𑀦𑀁 𑀥𑀸𑀭𑁂𑀢𑀻𑀢𑀺 𑀥𑀺𑀢𑀺, 𑀯𑀻𑀭𑀺𑀬𑀁. 𑀘𑀚𑀢𑀺 𑀏𑀢𑁂𑀦𑀸𑀢𑀺 𑀘𑀸𑀕𑁄, 𑀤𑀸𑀦𑀁. 𑀧𑀘𑁆𑀘𑀬𑀯𑁂𑀓𑀮𑁆𑀮𑀢𑁄 𑀨𑀮𑀼𑀧𑁆𑀧𑀸𑀤𑀦𑀲𑀫𑀢𑁆𑀣𑀢𑀸𑀯𑀲𑁂𑀦 𑀲𑀦𑁆𑀢𑀺.

𑀅𑀜𑁆𑀜𑁂𑀧𑀻𑀢𑀺 𑀇𑀢𑁄 𑀬𑀣𑀸𑀯𑀼𑀢𑁆𑀢𑀥𑀫𑁆𑀫𑀲𑀫𑀼𑀤𑀸𑀬𑀢𑁄 𑀅𑀜𑁆𑀜𑁂𑀧𑀺 𑀥𑀫𑁆𑀫𑀸 𑀬𑀤𑀺 𑀲𑀦𑁆𑀢𑀺, 𑀢𑁂 𑀥𑀫𑁆𑀫𑁂 𑀧𑀼𑀘𑁆𑀙𑀲𑁆𑀲𑀽𑀢𑀺. 𑀓𑀺𑀮𑁂𑀲𑁂, 𑀓𑀸𑀬𑀯𑀸𑀘𑀸𑀤𑀺𑀓𑁂 𑀯𑀸 𑀤𑀫𑁂𑀢𑀻𑀢𑀺 𑀤𑀫𑁄, 𑀧𑀜𑁆𑀜𑀸. 𑀉𑀝𑁆𑀞𑀳𑀢𑀺 𑀉𑀲𑁆𑀲𑀳𑀢𑀺 𑀏𑀢𑁂𑀦𑀸𑀢𑀺 𑀉𑀝𑁆𑀞𑀸𑀦𑀁, 𑀯𑀻𑀭𑀺𑀬𑀁. 𑀏𑀢𑁆𑀣𑀸𑀢𑀺 𑀏𑀢𑀺𑀲𑁆𑀲𑀸 𑀧𑀼𑀘𑁆𑀙𑀸𑀬. 𑀲𑀤𑁆𑀥𑀺𑀦𑁆𑀢𑀺 𑀲𑀗𑁆𑀔𑁂𑀧𑀢𑁄 𑀪𑀸𑀯𑀢𑁆𑀣𑀧𑀤𑀸𑀦𑀁 𑀩𑀦𑁆𑀥𑀦𑁂𑀦 𑀲𑀳. 𑀏𑀓𑀫𑁂𑀓𑀁 𑀧𑀤𑀦𑁆𑀢𑀺 𑀧𑀜𑁆𑀜𑀸𑀤𑀺𑀓𑀫𑁂𑀓𑁂𑀓𑀁 𑀧𑀤𑀁. ‘‘𑀧𑀜𑁆𑀜𑀸 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀧𑀜𑁆𑀜𑀸𑀢𑀺 𑀥𑀫𑁆𑀫𑁄𑀢𑀺 𑀘 𑀆𑀕𑀢𑀸’’𑀢𑀺𑀆𑀤𑀺𑀦𑀸 𑀧𑀜𑁆𑀜𑀸𑀤𑀺𑀅𑀢𑁆𑀣𑀲𑁆𑀲 𑀉𑀤𑁆𑀥𑀭𑀡𑀁 𑀅𑀢𑁆𑀣𑀼𑀤𑁆𑀥𑀸𑀭𑁄. 𑀢𑀲𑁆𑀲 𑀢𑀲𑁆𑀲 𑀅𑀢𑁆𑀣𑀲𑁆𑀲 ‘‘𑀧𑀜𑁆𑀜𑀸 𑀧𑀚𑀸𑀦𑀦𑀸’’𑀢𑀺𑀆𑀤𑀺𑀦𑀸 (𑀥. 𑀲. 𑁧𑁬) 𑀯𑁂𑀯𑀘𑀦𑀧𑀤𑀸𑀦𑀁 𑀉𑀤𑁆𑀥𑀭𑀡𑀁 𑀧𑀤𑀼𑀤𑁆𑀥𑀸𑀭𑁄. 𑀧𑀚𑀸𑀦𑀸𑀢𑀻𑀢𑀺 𑀧𑀜𑁆𑀜𑀸, 𑀥𑀸𑀭𑁂𑀢𑀻𑀢𑀺 𑀥𑀫𑁆𑀫𑁄, 𑀤𑀫𑁂𑀢𑀻𑀢𑀺 𑀤𑀫𑁄𑀢𑀺 𑀏𑀯𑀁 𑀧𑀤𑀲𑁆𑀲 𑀓𑀣𑀦𑀁 𑀧𑀤𑀯𑀡𑁆𑀡𑀦𑀸.

𑀅𑀚𑁆𑀚𑀸𑀢𑀺 𑀯𑀸 𑀏𑀢𑀭𑀳𑀺. 𑀬𑀣𑀸𑀯𑀼𑀢𑁆𑀢𑁂𑀦 𑀧𑀓𑀸𑀭𑁂𑀦𑀸𑀢𑀺 ‘‘𑀲𑀤𑁆𑀤𑀳𑀸𑀦𑁄 𑀅𑀭𑀳𑀢’’𑀦𑁆𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦. 𑀲𑀘𑁆𑀘𑀲𑀫𑁆𑀧𑀝𑀺𑀯𑁂𑀥𑀸𑀯𑀕𑀳𑀡𑀁 𑀯𑀸 𑀬𑀣𑀸𑀯𑀼𑀢𑁆𑀢𑁂𑀦 𑀧𑀓𑀸𑀭𑁂𑀦 𑀤𑀺𑀝𑁆𑀞𑀲𑀘𑁆𑀘𑀢𑀸𑀬 𑀇𑀥𑀮𑁄𑀓𑀧𑀭𑀮𑁄𑀓𑀢𑁆𑀣𑀁 𑀬𑀸𑀣𑀸𑀯𑀢𑁄 𑀚𑀸𑀦𑀦𑁆𑀢𑁄. 𑀏𑀯𑀜𑁆𑀘 𑀬𑀓𑁆𑀔𑁄 𑀲𑀢𑁆𑀣𑀼 𑀤𑁂𑀲𑀦𑀸𑀦𑀼𑀪𑀸𑀯𑀲𑀺𑀤𑁆𑀥𑀁 𑀧𑀜𑁆𑀳𑀁 𑀧𑀼𑀘𑁆𑀙𑀦𑁂𑀦 𑀅𑀢𑁆𑀢𑀦𑁄 𑀧𑀝𑀺𑀮𑀸𑀪𑀲𑀫𑁆𑀧𑀢𑁆𑀢𑀺𑀁 𑀯𑀺𑀪𑀸𑀯𑁂𑀦𑁆𑀢𑁄 ‘‘𑀓𑀣𑀁𑀲𑀼 𑀮𑀪𑀢𑁂 𑀧𑀜𑁆𑀜’’𑀦𑁆𑀢𑀺𑀆𑀤𑀺𑀫𑀸𑀳𑀸𑀢𑀺 𑀆𑀘𑀭𑀺𑀬𑀸. 𑀲𑀫𑁆𑀧𑀭𑀸𑀬𑀺𑀓𑁄𑀢𑀺 𑀏𑀢𑁆𑀣 𑀘-𑀲𑀤𑁆𑀤𑁄 𑀮𑀼𑀢𑁆𑀢𑀦𑀺𑀤𑁆𑀤𑀺𑀝𑁆𑀞𑁄, 𑀢𑁂𑀦 ‘‘𑀤𑀺𑀝𑁆𑀞𑀥𑀫𑁆𑀫𑀺𑀓𑁄 𑀘𑀸’’𑀢𑀺 𑀅𑀬𑀫𑀢𑁆𑀣𑁄 𑀯𑀼𑀢𑁆𑀢𑁄 𑀏𑀯𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀬𑁄 𑀅𑀢𑁆𑀣𑁄…𑀧𑁂… 𑀤𑀲𑁆𑀲𑁂𑀢𑀻’’𑀢𑀺 𑀆𑀳. 𑀅𑀭𑀻𑀬𑀢𑀺 𑀨𑀮𑀁 𑀏𑀢𑀲𑁆𑀫𑀸𑀢𑀺 𑀅𑀢𑁆𑀣𑁄, 𑀓𑀸𑀭𑀡𑀁. 𑀯𑀺𑀘𑀓𑁆𑀔𑀡𑁂 𑀲𑀧𑀬𑁄𑀚𑀦𑀢𑀸𑀬.

𑀢𑀲𑁆𑀲 𑀜𑀸𑀡𑀲𑁆𑀲𑀸𑀢𑀺 𑀢𑀲𑁆𑀲 𑀅𑀢𑁆𑀣𑀲𑁆𑀲 𑀆𑀯𑀺𑀪𑀸𑀯𑀦𑀲𑁆𑀲 𑀜𑀸𑀡𑀲𑁆𑀲. 𑀕𑀼𑀡𑀯𑀺𑀲𑁂𑀲𑁂𑀳𑀺 𑀘 𑀲𑀤𑀺𑀲𑀲𑁆𑀲𑀧𑀺 𑀅𑀜𑁆𑀜𑀲𑁆𑀲 𑀅𑀪𑀸𑀯𑀢𑁄 𑀅𑀕𑁆𑀕𑀤𑀓𑁆𑀔𑀺𑀡𑁂𑀬𑁆𑀬𑁄 𑀩𑀼𑀤𑁆𑀥𑁄 𑀪𑀕𑀯𑀸. 𑀢𑁂𑀦𑀸𑀳 𑁋

‘‘𑀦𑀬𑀺𑀫𑀲𑁆𑀫𑀺𑀁 𑀮𑁄𑀓𑁂 𑀧𑀭𑀲𑁆𑀫𑀺𑀁 𑀯𑀸 𑀧𑀦,

𑀩𑀼𑀤𑁆𑀥𑁂𑀦 𑀲𑁂𑀝𑁆𑀞𑁄𑀯 𑀲𑀫𑁄𑀯 𑀯𑀺𑀚𑁆𑀚𑀢𑀺;

𑀆𑀳𑀼𑀦𑁂𑀬𑁆𑀬𑀸𑀦𑀁 𑀧𑀭𑀫𑀸𑀳𑀼𑀢𑀺𑀁 𑀕𑀢𑁄,

𑀧𑀼𑀜𑁆𑀜𑀢𑁆𑀣𑀺𑀓𑀸𑀦𑀁 𑀯𑀺𑀧𑀼𑀮𑀨𑀮𑁂𑀲𑀺𑀦’’𑀦𑁆𑀢𑀺. (𑀯𑀺. 𑀯. 𑁧𑁦𑁪𑁭);

𑀲𑀳𑀺𑀢𑀧𑀝𑀺𑀧𑀢𑁆𑀢𑀺𑀦𑁆𑀢𑀺 𑀧𑀜𑁆𑀜𑀸𑀲𑀗𑁆𑀕𑀸𑀳𑀺𑀓𑀁 𑀅𑀢𑁆𑀢𑀦𑁄 𑀧𑀝𑀺𑀧𑀢𑁆𑀢𑀺𑀁. 𑀲𑀼𑀦𑁆𑀤𑀭𑀸 𑀩𑁄𑀥𑀺 𑀲𑀼𑀩𑁄𑀥𑀺, 𑀩𑀼𑀤𑁆𑀥𑀲𑁆𑀲 𑀲𑀼𑀩𑁄𑀥𑀺 𑀩𑀼𑀤𑁆𑀥𑀲𑀼𑀩𑁄𑀥𑀺, 𑀲𑀸 𑀏𑀯 𑀩𑀼𑀤𑁆𑀥𑀲𑀼𑀩𑁄𑀥𑀺𑀢𑀸. 𑀥𑀫𑁆𑀫𑀲𑁆𑀲𑀯𑀦𑀢𑁆𑀣𑀁 𑀲𑀦𑁆𑀦𑀺𑀧𑀢𑀺𑀢𑀤𑁂𑀯𑀢𑀸𑀳𑀺 𑀲𑀗𑁆𑀖𑀼𑀝𑁆𑀞𑀲𑀸𑀥𑀼𑀓𑀸𑀭𑀲𑀤𑁆𑀤𑀼𑀝𑁆𑀞𑀸𑀦𑀜𑁆𑀘.

𑀲𑀢𑀧𑀼𑀜𑁆𑀜𑀮𑀓𑁆𑀔𑀡𑀦𑁆𑀢𑀺 𑀲𑀢𑀲𑀳𑀲𑁆𑀲𑀓𑀧𑁆𑀧𑁂 𑀧𑀼𑀜𑁆𑀜𑀲𑀫𑁆𑀪𑀸𑀭𑀲𑁆𑀲 𑀓𑀢𑀢𑁆𑀢𑀸 𑀢𑁂𑀲𑀁 𑀧𑀼𑀜𑁆𑀜𑀸𑀦𑀁 𑀯𑀲𑁂𑀦 𑀲𑀢𑀧𑀼𑀜𑁆𑀜𑀮𑀓𑁆𑀔𑀡𑀁 𑀅𑀦𑁂𑀓𑀧𑀼𑀜𑁆𑀜𑀦𑀺𑀩𑁆𑀩𑀢𑁆𑀢𑀮𑀓𑁆𑀔𑀡𑀁. 𑀅𑀪𑀺𑀦𑀦𑁆𑀤𑀺𑀬𑀢𑀸𑀬 𑀲𑀩𑁆𑀩𑁂𑀳𑀺 𑀅𑀗𑁆𑀕𑁂𑀳𑀺 𑀲𑀫𑀼𑀧𑁂𑀢𑀁 𑀲𑀫𑀦𑁆𑀦𑀸𑀕𑀢𑀁. 𑀓𑀢𑀧𑀼𑀜𑁆𑀜𑀪𑀸𑀯𑀁 𑀩𑁆𑀬𑀜𑁆𑀚𑁂𑀦𑁆𑀢𑀻𑀢𑀺 𑀩𑁆𑀬𑀜𑁆𑀚𑀦𑀸𑀦𑀺, 𑀅𑀗𑁆𑀕𑀧𑀘𑁆𑀘𑀗𑁆𑀕𑀸𑀦𑀺. 𑀢𑁂𑀲𑀁 𑀧𑀭𑀺𑀧𑀼𑀡𑁆𑀡𑀢𑁆𑀢𑀸 𑀧𑀭𑀺𑀧𑀼𑀡𑁆𑀡𑀩𑁆𑀬𑀜𑁆𑀚𑀦𑀁. 𑀢𑀁 𑀬𑀓𑁆𑀔𑁄…𑀧𑁂… 𑀧𑀽𑀭𑁂𑀲𑀻𑀢𑀺 𑀕𑀸𑀣𑀸𑀧𑀽𑀭𑀡𑀢𑁆𑀣𑀫𑁂𑀯 𑀳𑀺 𑀪𑀕𑀯𑀸 𑀢𑀣𑀸𑀭𑀽𑀧𑀸𑀦𑀺 𑀅𑀓𑀸𑀲𑀺. 𑀅𑀩𑁆𑀬𑀸𑀥𑀺𑀢𑀸𑀢𑀺 𑀅𑀭𑁄𑀕𑀸. ‘‘𑀅𑀩𑁆𑀬𑀣𑀺𑀢𑀸’’𑀢𑀺 𑀓𑁂𑀘𑀺 𑀧𑀞𑀦𑁆𑀢𑀺, 𑀲𑀬𑀲𑀦𑁆𑀢𑀸𑀲𑀭𑀳𑀺𑀢𑀸𑀢𑀺 𑀅𑀢𑁆𑀣𑁄.

‘‘𑀳𑀢𑁆𑀣𑀬𑁄’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀳𑀢𑁆𑀣𑀓𑁄’’𑀢𑀺 𑀯𑀼𑀢𑁆𑀢𑀁. 𑀆𑀴𑀯𑀺𑀦𑀕𑀭𑀦𑁆𑀢𑀺 𑀆𑀴𑀯𑀺𑀦𑀕𑀭𑀯𑀸𑀲𑀺𑀦𑁄 𑀯𑀤𑀢𑀺. 𑀪𑀯𑀢𑀺 𑀳𑀺 𑀢𑀢𑁆𑀭𑀝𑁆𑀞𑀢𑀸𑀬 𑀢𑀁-𑀲𑀤𑁆𑀤𑁄 𑀬𑀣𑀸 ‘‘𑀕𑀸𑀫𑁄 𑀆𑀕𑀢𑁄, 𑀫𑀜𑁆𑀘𑀸 𑀉𑀓𑁆𑀓𑀼𑀝𑁆𑀞𑀺𑀁 𑀓𑀭𑁄𑀦𑁆𑀢𑀻’’𑀢𑀺. 𑀏𑀓𑀓𑁄𑀮𑀸𑀳𑀮𑁂𑀦 𑀯𑀢𑁆𑀢𑀫𑀸𑀦𑁂𑀦.

𑀲𑀫𑁆𑀧𑀺𑀡𑁆𑀟𑀺𑀢𑁆𑀯𑀸𑀢𑀺 𑀲𑀦𑁆𑀦𑀺𑀧𑀢𑀺𑀢𑁆𑀯𑀸. 𑀓𑀸𑀫𑀁 𑀲𑀫𑁆𑀪𑀸𑀭𑁄 𑀢𑁂𑀦 𑀓𑀢𑁄𑀢𑀺 𑀦𑀢𑁆𑀣𑀺, 𑀬𑀼𑀤𑁆𑀥𑀢𑁆𑀣𑀁 𑀧𑀦 𑀩𑀳𑀼𑀲𑁄 𑀉𑀲𑁆𑀲𑀸𑀳𑀲𑁆𑀲 𑀓𑀢𑀢𑁆𑀢𑀸 ‘‘𑀬𑀼𑀤𑁆𑀥𑀫𑀸𑀤𑀺𑀁 𑀓𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁. 𑀢𑀫𑁂𑀯 𑀆𑀴𑀯𑀓𑀲𑀼𑀢𑁆𑀢𑀁 𑀓𑀣𑁂𑀲𑀺 𑀢𑀲𑁆𑀲𑀸 𑀏𑀯 𑀤𑁂𑀲𑀦𑀸𑀬 𑀲𑀦𑁆𑀦𑀺𑀧𑀢𑀺𑀢𑀧𑀭𑀺𑀲𑀸𑀬 𑀲𑀧𑁆𑀧𑀸𑀬𑀢𑁆𑀢𑀸. 𑀢𑁂𑀦𑀸𑀳 ‘‘𑀓𑀣𑀸𑀧𑀭𑀺…𑀧𑁂… 𑀅𑀳𑁄𑀲𑀻’’𑀢𑀺. 𑀘𑀢𑀽𑀳𑀺 𑀯𑀢𑁆𑀣𑀽𑀳𑀻𑀢𑀺 𑀘𑀢𑀽𑀳𑀺 𑀲𑀗𑁆𑀕𑀳𑀯𑀢𑁆𑀣𑀽𑀳𑀺. 𑀧𑀭𑀺𑀲𑀦𑁆𑀢𑀺 𑀅𑀢𑁆𑀢𑀦𑁄 𑀧𑀭𑀺𑀲𑀁. ‘‘𑀇𑀢𑀭𑀜𑁆𑀘𑀸’’𑀢𑀺𑀧𑀺 𑀯𑀤𑀦𑁆𑀢𑀺.

𑀆𑀴𑀯𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀸𑀭𑀢𑁆𑀣𑀧𑁆𑀧𑀓𑀸𑀲𑀺𑀦𑀺𑀬𑀸 𑀲𑀁𑀬𑀼𑀢𑁆𑀢𑀦𑀺𑀓𑀸𑀬-𑀅𑀝𑁆𑀞𑀓𑀣𑀸𑀬

𑀬𑀓𑁆𑀔𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.