𑁮. 𑀯𑀗𑁆𑀕𑀻𑀲𑀲𑀁𑀬𑀼𑀢𑁆𑀢𑀁

𑁧. 𑀦𑀺𑀓𑁆𑀔𑀦𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁦𑁯. 𑀆𑀴𑀯𑀺𑀬𑀦𑁆𑀢𑀺 𑀆𑀴𑀯𑀺𑀦𑀕𑀭𑀲𑀫𑀻𑀧𑁂. 𑀅𑀕𑁆𑀕𑀘𑁂𑀢𑀺𑀬𑁂𑀢𑀺 𑀕𑁄𑀢𑀫𑀓𑀘𑁂𑀢𑀺𑀬𑀸𑀤𑀻𑀳𑀺 𑀉𑀢𑁆𑀢𑀫𑀘𑁂𑀢𑀺𑀬𑁂. 𑀢𑀁 𑀓𑀺𑀭 𑀪𑀽𑀫𑀺𑀭𑀸𑀫𑀡𑁂𑀬𑁆𑀬𑀓𑀪𑀸𑀯𑁂𑀦 𑀫𑀦𑀼𑀜𑁆𑀜𑀢𑀸𑀬 𑀧𑀥𑀸𑀦𑀬𑀼𑀢𑁆𑀢𑀢𑀸𑀤𑀺𑀲𑀫𑁆𑀧𑀢𑁆𑀢𑀺𑀬𑀸 𑀘 𑀇𑀢𑀭𑀘𑁂𑀢𑀺𑀬𑁂𑀳𑀺 𑀲𑁂𑀝𑁆𑀞𑀲𑀫𑁆𑀫𑀢𑀁. 𑀓𑀧𑁆𑀧𑀢𑁆𑀣𑁂𑀭𑁂𑀦𑀸𑀢𑀺 ‘‘𑀓𑀧𑁆𑀧𑁄’’𑀢𑀺 𑀕𑁄𑀢𑁆𑀢𑀢𑁄 𑀆𑀕𑀢𑀦𑀸𑀫𑁄 𑀣𑁂𑀭𑁄, 𑀲𑀳𑀲𑁆𑀲𑀧𑀼𑀭𑀸𑀡𑀚𑀝𑀺𑀮𑀸𑀦𑀁 𑀅𑀩𑁆𑀪𑀦𑁆𑀢𑀭𑁂 𑀅𑀬𑀁 𑀫𑀳𑀸𑀣𑁂𑀭𑁄. 𑀑𑀳𑀻𑀦𑀓𑁄𑀢𑀺 𑀣𑁂𑀭𑁂𑀲𑀼 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀯𑀺𑀝𑁆𑀞𑁂𑀲𑀼 𑀯𑀺𑀳𑀸𑀭𑁂 𑀏𑀯 𑀅𑀯𑀳𑀻𑀦𑀓𑁄 𑀞𑀺𑀢𑁄. 𑀢𑀢𑁆𑀣 𑀓𑀸𑀭𑀡𑀫𑀸𑀳 ‘‘𑀯𑀺𑀳𑀸𑀭𑀧𑀸𑀮𑁄’’𑀢𑀺𑀆𑀤𑀺. 𑀲𑀫𑀮𑀗𑁆𑀓𑀭𑀺𑀢𑁆𑀯𑀸𑀢𑀺 𑀲𑀫𑀁 𑀅𑀮𑀗𑁆𑀓𑀸𑀭𑁂𑀦 𑀅𑀮𑀗𑁆𑀓𑀭𑀺𑀢𑁆𑀯𑀸. 𑀓𑀼𑀲𑀮𑀘𑀺𑀢𑁆𑀢𑀁 𑀯𑀺𑀤𑁆𑀥𑀁𑀲𑁂𑀢𑀺 𑀧𑀯𑀢𑁆𑀢𑀺𑀢𑀼𑀁 𑀅𑀧𑁆𑀧𑀤𑀸𑀦𑀯𑀲𑁂𑀦. 𑀏𑀢𑀲𑁆𑀫𑀺𑀦𑁆𑀢𑀺 𑀏𑀢𑀲𑁆𑀫𑀺𑀁 𑀭𑀸𑀕𑁂 𑀉𑀧𑁆𑀧𑀦𑁆𑀦𑁂. ‘‘𑀏𑀓𑀲𑁆𑀫𑀺’’𑀦𑁆𑀢𑀺 𑀯𑀸 𑀧𑀸𑀞𑁄, 𑀏𑀓𑀲𑁆𑀫𑀺𑀁 𑀯𑀺𑀲𑀪𑀸𑀕𑀯𑀢𑁆𑀣𑀼𑀓𑁂 𑀭𑀸𑀕𑁂 𑀉𑀧𑁆𑀧𑀦𑁆𑀦𑁂. 𑀥𑀫𑁆𑀫𑁄 𑀯𑀸𑀢𑀺 𑀫𑀫 𑀘𑀺𑀢𑁆𑀢𑁂 𑀉𑀧𑁆𑀧𑀚𑁆𑀚𑀦𑀓𑀢𑁄 𑀅𑀜𑁆𑀜𑁄 𑀥𑀫𑁆𑀫𑁄 𑀯𑀸. 𑀬𑁂𑀦 𑀓𑀸𑀭𑀡𑁂𑀦 𑀧𑀭𑁄 𑀅𑀦𑀪𑀺𑀭𑀢𑀺𑀁 𑀯𑀺𑀦𑁄𑀤𑁂𑀢𑁆𑀯𑀸 𑀇𑀤𑀸𑀦𑁂𑀯 𑀅𑀪𑀺𑀭𑀢𑀺𑀁 𑀉𑀧𑁆𑀧𑀸𑀤𑁂𑀬𑁆𑀬, 𑀢𑀁 𑀓𑀸𑀭𑀡𑀁 𑀓𑀼𑀢𑁄 𑀮𑀩𑁆𑀪𑀸𑀢𑀺 𑀬𑁄𑀚𑀦𑀸, 𑀢𑀁 𑀓𑀸𑀭𑀡𑀁 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄, 𑀢𑀲𑁆𑀲 𑀅𑀪𑀸𑀯𑀓𑀸𑀭𑀡𑀯𑀘𑀦𑀁.

𑀅𑀦𑀕𑀸𑀭𑀺𑀬𑀦𑁆𑀢𑀺 𑀅𑀕𑀸𑀭𑀯𑀺𑀭𑀳𑀢𑁄 𑀅𑀦𑀕𑀸𑀭𑀁 𑀧𑀩𑁆𑀩𑀚𑁆𑀚𑀸. 𑀢𑀢𑁆𑀣 𑀦𑀺𑀬𑀼𑀢𑁆𑀢𑀢𑁆𑀢𑀸 𑀅𑀦𑀕𑀸𑀭𑀺𑀬𑀁 𑀓-𑀓𑀸𑀭𑀲𑁆𑀲 𑀬-𑀓𑀸𑀭𑀁 𑀓𑀢𑁆𑀯𑀸, 𑀧𑀩𑁆𑀩𑀚𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀆𑀥𑀸𑀯𑀦𑁆𑀢𑀻𑀢𑀺 𑀳𑀤𑀬𑀁 𑀅𑀪𑀺𑀪𑀯𑀺𑀢𑁆𑀯𑀸 𑀥𑀸𑀯𑀦𑁆𑀢𑀺. 𑀉𑀕𑁆𑀕𑀢𑀸𑀦𑀦𑁆𑀢𑀺 𑀉𑀴𑀸𑀭𑀸𑀦𑀁 𑀧𑀼𑀢𑁆𑀢𑀸. 𑀢𑁂𑀦𑀸𑀳 ‘‘𑀫𑀳𑁂𑀲𑀓𑁆𑀔𑀸 𑀭𑀸𑀚𑀜𑁆𑀜𑀪𑀽𑀢𑀸’’𑀢𑀺. 𑀉𑀢𑁆𑀢𑀫𑀧𑁆𑀧𑀫𑀸𑀡𑀦𑁆𑀢𑀺 𑀲𑀳𑀲𑁆𑀲𑀧𑀮𑀁 𑀲𑀫𑀦𑁆𑀢𑀸𑀢𑀺 𑀲𑀫𑀦𑁆𑀢𑀢𑁄. 𑀧𑀭𑀺𑀓𑀺𑀭𑁂𑀬𑁆𑀬𑀼𑀦𑁆𑀢𑀺 𑀯𑀺𑀚𑁆𑀛𑁂𑀬𑁆𑀬𑀼𑀁. 𑀏𑀢𑀲𑁆𑀫𑀸 𑀲𑀳𑀲𑁆𑀲𑀸𑀢𑀺 𑀬𑀣𑀸𑀯𑀼𑀢𑁆𑀢𑀸 𑀥𑀦𑀼𑀕𑁆𑀕𑀳𑀲𑀳𑀲𑁆𑀲𑀢𑁄. 𑀅𑀢𑀺𑀭𑁂𑀓𑀢𑀭𑀸 𑀅𑀦𑁂𑀓𑀲𑀳𑀲𑁆𑀲𑀸. 𑀇𑀢𑁆𑀣𑀺𑀬𑁄 𑀑𑀮𑁄𑀓𑀦𑀲𑀺𑀢𑀮𑀧𑀺𑀢𑀭𑁄𑀤𑀺𑀢𑀲𑀭𑁂 𑀔𑀺𑀧𑀦𑁆𑀢𑀺𑀬𑁄. 𑀦𑁂𑀯 𑀫𑀁 𑀩𑁆𑀬𑀸𑀥𑀬𑀺𑀲𑁆𑀲𑀦𑁆𑀢𑀺 𑀦𑁂𑀯 𑀫𑀁 𑀦𑀺𑀚𑁆𑀛𑀸𑀬𑀺𑀲𑁆𑀲𑀦𑁆𑀢𑀺. ‘‘𑀩𑁆𑀬𑀸𑀥𑀬𑀺𑀲𑁆𑀲𑀢𑀻’’𑀢𑀺 𑀧𑀸𑀞𑁄𑀢𑀺 𑀯𑀼𑀢𑁆𑀢𑀁 ‘‘𑀘𑀸𑀮𑁂𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀢𑀻𑀢𑀺 𑀅𑀢𑁆𑀣𑁄’’𑀢𑀺. 𑀥𑀫𑁆𑀫𑁂 𑀲𑀫𑁆𑀳𑀻𑀢𑀺 𑀲𑀓𑁂 𑀲𑀦𑁆𑀢𑀺𑀓𑁂 𑀧𑀢𑀺𑀝𑁆𑀞𑀺𑀢𑁂 𑀲𑀸𑀲𑀦𑀥𑀫𑁆𑀫𑁂. 𑀢𑁂𑀦𑀸𑀳 ‘‘𑀅𑀦𑀪𑀺𑀭𑀢𑀺𑀁𑀯𑀺𑀦𑁄𑀤𑁂𑀢𑁆𑀯𑀸’’𑀢𑀺𑀆𑀤𑀺.

𑀫𑀕𑁆𑀕𑀦𑁆𑀢𑀺 ‘‘𑀫𑀕𑁆𑀕𑁄’’𑀢𑀺 𑀯𑀢𑁆𑀢𑀩𑁆𑀩𑁂 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁂𑀦 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀲𑁄 𑀳𑀺 𑀦𑀺𑀩𑁆𑀩𑀸𑀦𑀲𑁆𑀲 𑀧𑀼𑀩𑁆𑀩𑀪𑀸𑀕𑀫𑀕𑁆𑀕𑁆𑀕𑁄’’𑀢𑀺.

𑀦𑀺𑀓𑁆𑀔𑀦𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀅𑀭𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁧𑁦. 𑀯𑀺𑀳𑀸𑀭𑀕𑀭𑀼𑀓𑁄 𑀓𑀺𑀭𑁂𑀲 𑀣𑁂𑀭𑁄𑀢𑀺 𑀏𑀢𑁂𑀦 𑀣𑁂𑀭𑁄 𑀅𑀢𑁆𑀢𑀦𑁄 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀁 𑀯𑀗𑁆𑀕𑀻𑀲𑀁 𑀑𑀯𑀤𑀺𑀢𑀼𑀁 𑀅𑀦𑀯𑀲𑀭𑁄. 𑀢𑁂𑀦 𑀅𑀦𑁆𑀢𑀭𑀦𑁆𑀢𑀭𑀸 𑀢𑀲𑁆𑀲 𑀘𑀺𑀢𑁆𑀢𑀁 𑀭𑀸𑀕𑁄 𑀅𑀦𑀼𑀤𑁆𑀥𑀁𑀲𑁂𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀲𑀸𑀲𑀦𑁂 𑀅𑀭𑀢𑀺𑀦𑁆𑀢𑀺 𑀲𑀻𑀮𑀧𑀭𑀺𑀧𑀽𑀭𑀡𑁂 𑀲𑀫𑀣𑀯𑀺𑀧𑀲𑁆𑀲𑀦𑀸𑀪𑀸𑀯𑀦𑀸𑀬 𑀘 𑀅𑀦𑀪𑀺𑀭𑀢𑀺𑀁. 𑀓𑀸𑀫𑀕𑀼𑀡𑁂𑀲𑀼 𑀘 𑀭𑀢𑀺𑀦𑁆𑀢𑀺 𑀧𑀜𑁆𑀘𑀲𑀼 𑀓𑀸𑀫𑀓𑁄𑀝𑁆𑀞𑀸𑀲𑁂𑀲𑀼 𑀅𑀲𑁆𑀲𑀸𑀤𑀁. 𑀧𑀸𑀧𑀯𑀺𑀢𑀓𑁆𑀓𑀦𑁆𑀢𑀺 𑀓𑀸𑀫𑀲𑀗𑁆𑀓𑀧𑁆𑀧𑀁. 𑀲𑀩𑁆𑀩𑀸𑀓𑀸𑀭𑁂𑀦𑀸𑀢𑀺 𑀲𑀩𑁆𑀩𑁂 𑀢𑀤𑀗𑁆𑀕𑀯𑀺𑀓𑁆𑀔𑀫𑁆𑀪𑀦𑀲𑀫𑀼𑀘𑁆𑀙𑀺𑀦𑁆𑀤𑀦𑀸𑀓𑀸𑀭𑁂𑀦. 𑀬𑀣𑀸 𑀫𑀳𑀦𑁆𑀢𑀁 𑀅𑀭𑀜𑁆𑀜𑀁 𑀯𑀦𑀣𑀦𑁆𑀢𑀺, 𑀏𑀯𑀁 𑀫𑀳𑀦𑁆𑀢𑀁 𑀓𑀺𑀮𑁂𑀲𑀯𑀦𑀁 ‘‘𑀯𑀦𑀣’’𑀦𑁆𑀢𑀺 𑀯𑀼𑀢𑁆𑀢𑀁.

𑀧𑀣𑀯𑀺𑀜𑁆𑀘 𑀯𑁂𑀳𑀸𑀲𑀦𑁆𑀢𑀺 𑀪𑀼𑀫𑁆𑀫𑀢𑁆𑀣𑁂 𑀧𑀘𑁆𑀘𑀢𑁆𑀢𑀯𑀘𑀦𑀁, 𑀢𑀲𑁆𑀫𑀸 𑀧𑀣𑀯𑀺𑀬𑀁 𑀆𑀓𑀸𑀲𑁂 𑀘𑀸𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀧𑀣𑀯𑀺𑀝𑁆𑀞𑀺𑀢’’𑀦𑁆𑀢𑀺𑀆𑀤𑀺. 𑀚𑀕𑀢𑀻𑀢𑀺 𑀘 𑀧𑀣𑀯𑀺𑀬𑀸 𑀯𑁂𑀯𑀘𑀦𑀁. 𑀢𑁂𑀦𑀸𑀳 ‘‘𑀅𑀦𑁆𑀢𑁄𑀧𑀣𑀯𑀺𑀬’’𑀦𑁆𑀢𑀺. 𑀧𑀭𑀺𑀚𑀻𑀭𑀢𑀻𑀢𑀺 𑀲𑀩𑁆𑀩𑁆𑀩𑀲𑁄 𑀚𑀭𑀁 𑀧𑀸𑀧𑀼𑀡𑀸𑀢𑀺. 𑀲𑀫𑀸𑀕𑀦𑁆𑀢𑁆𑀯𑀸𑀢𑀺 𑀜𑀸𑀡𑁂𑀦 𑀲𑀫𑀸𑀕𑀦𑁆𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀫𑀼𑀢𑀢𑁆𑀢𑀸𑀢𑀺 𑀯𑀺𑀜𑁆𑀜𑀸𑀢𑀢𑁆𑀢𑀪𑀸𑀯𑀸’’𑀢𑀺.

𑀧𑀝𑀺𑀖𑀧𑀤𑁂𑀦 𑀕𑀦𑁆𑀥𑀭𑀲𑀸 𑀕𑀳𑀺𑀢𑀸 𑀖𑀸𑀦𑀚𑀺𑀯𑁆𑀳𑀸𑀦𑀁 𑀧𑀝𑀺𑀳𑀦𑀦𑀯𑀲𑁂𑀦 𑀧𑀯𑀢𑁆𑀢𑀦𑀢𑁄. 𑀫𑀼𑀢𑀧𑀤𑁂𑀦 𑀨𑁄𑀝𑁆𑀞𑀩𑁆𑀩𑀸𑀭𑀫𑁆𑀫𑀡𑀁 𑀕𑀳𑀺𑀢𑀁 𑀫𑀼𑀢𑁆𑀯𑀸 𑀕𑀳𑁂𑀢𑀩𑁆𑀩𑀢𑁄. 𑀦 𑀮𑀺𑀧𑁆𑀧𑀢𑀻𑀢𑀺 𑀦 𑀫𑀓𑁆𑀔𑀻𑀬𑀢𑀺.

𑀲𑀝𑁆𑀞𑀺-𑀲𑀤𑁆𑀤𑁄 𑀙-𑀲𑀤𑁆𑀤𑁂𑀦 𑀲𑀫𑀸𑀦𑀢𑁆𑀣𑁄𑀢𑀺 ‘‘𑀲𑀝𑁆𑀞𑀺𑀦𑀺𑀲𑁆𑀲𑀺𑀢𑀸’’𑀢𑀺 𑀧𑀤𑀲𑁆𑀲 ‘‘𑀙𑀆𑀭𑀫𑁆𑀫𑀡𑀦𑀺𑀲𑁆𑀲𑀺𑀢𑀸’’𑀢𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄. 𑀧𑀼𑀣𑀽 𑀅𑀥𑀫𑁆𑀫𑀯𑀺𑀢𑀓𑁆𑀓𑀸𑀢𑀺 𑀭𑀽𑀧𑀯𑀺𑀢𑀓𑁆𑀓𑀸𑀤𑀺𑀯𑀲𑁂𑀦 𑀩𑀳𑀽 𑀦𑀸𑀦𑀸𑀯𑀺𑀢𑀓𑁆𑀓𑀸 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑀸. 𑀚𑀦𑀢𑀸𑀬 𑀦𑀺𑀯𑀺𑀝𑁆𑀞𑀸𑀢𑀺 𑀫𑀳𑀸𑀚𑀦𑁂 𑀧𑀢𑀺𑀝𑁆𑀞𑀺𑀢𑀸. 𑀢𑁂𑀲𑀁 𑀯𑀲𑁂𑀦𑀸𑀢𑀺 𑀢𑁂𑀲𑀫𑁆𑀧𑀺 𑀫𑀺𑀘𑁆𑀙𑀸𑀯𑀺𑀢𑀓𑁆𑀓𑀸𑀦𑀁 𑀯𑀲𑁂𑀦. 𑀦 𑀓𑀢𑁆𑀣𑀘𑀺 𑀆𑀭𑀫𑁆𑀫𑀡𑁂. 𑀓𑀺𑀮𑁂𑀲𑀯𑀕𑁆𑀕𑀕𑀢𑁄𑀢𑀺 𑀓𑀺𑀮𑁂𑀲𑀲𑀗𑁆𑀕𑀡𑀺𑀓𑀁 𑀉𑀧𑀕𑀢𑁄 𑀦 𑀪𑀯𑁂𑀬𑁆𑀬, 𑀓𑀺𑀮𑁂𑀲𑀯𑀺𑀢𑀓𑁆𑀓𑀸 𑀦 𑀉𑀧𑁆𑀧𑀸𑀤𑁂𑀢𑀩𑁆𑀩𑀸𑀢𑀺 𑀅𑀢𑁆𑀣𑁄. 𑀤𑀼𑀝𑁆𑀞𑀼𑀮𑁆𑀮𑀯𑀘𑀦𑀁 𑀓𑀸𑀫𑀧𑀝𑀺𑀲𑀁𑀬𑀼𑀢𑁆𑀢𑀓𑀣𑀸.

𑀤𑀩𑁆𑀩𑀚𑀸𑀢𑀺𑀓𑁄𑀢𑀺 𑀤𑀩𑁆𑀩𑀭𑀽𑀧𑁄. 𑀦𑁂𑀧𑀓𑁆𑀓𑁂𑀦𑀸𑀢𑀺 𑀓𑁄𑀲𑀮𑁆𑀮𑁂𑀦. 𑀦𑀺𑀩𑁆𑀩𑀸𑀦𑀁 𑀧𑀝𑀺𑀘𑁆𑀘𑀸𑀢𑀺 𑀅𑀲𑀗𑁆𑀔𑀢𑀥𑀸𑀢𑀼𑀁 𑀆𑀭𑀫𑁆𑀫𑀡𑀯𑀲𑁂𑀦 𑀧𑀝𑀺𑀘𑁆𑀘. 𑀧𑀭𑀺𑀦𑀺𑀩𑁆𑀩𑀸𑀦𑀓𑀸𑀮𑀦𑁆𑀢𑀺 𑀅𑀦𑀼𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀓𑀸𑀮𑀁.

𑀅𑀭𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀧𑁂𑀲𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁧𑁧. 𑀏𑀢𑁂𑀲𑀦𑁆𑀢𑀺 𑀏𑀢𑁂𑀲𑀁 𑀫𑀳𑀮𑁆𑀮𑀓𑀸𑀦𑀁. 𑀦 𑀧𑀸𑀴𑀺 𑀆𑀕𑀘𑁆𑀙𑀢𑀺 𑀅𑀧𑁆𑀧𑀕𑀼𑀡𑀪𑀸𑀯𑀢𑁄. 𑀦 𑀘 𑀧𑀸𑀴𑀺 𑀉𑀧𑀝𑁆𑀞𑀸𑀢𑀺, 𑀏𑀓𑀸𑀬 𑀧𑀸𑀴𑀺𑀬𑀸 𑀲𑀢𑀺 𑀧𑀸𑀴𑀺𑀕𑀢𑀺𑀬𑀸 𑀢𑀣𑀸 𑀢𑀣𑀸 𑀉𑀧𑀝𑁆𑀞𑀸𑀦𑀫𑁆𑀧𑀺 𑀦𑁂𑀲𑀁 𑀦𑀢𑁆𑀣𑀻𑀢𑀺 𑀯𑀤𑀢𑀺. 𑀦 𑀅𑀝𑁆𑀞𑀓𑀣𑀸𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀲𑀺𑀣𑀺𑀮𑀥𑀦𑀺𑀢𑀸𑀤𑀺𑀢𑀁𑀢𑀁𑀩𑁆𑀬𑀜𑁆𑀚𑀦𑀩𑀼𑀤𑁆𑀥𑀺𑀁 𑀅𑀳𑀸𑀧𑁂𑀢𑁆𑀯𑀸 𑀉𑀘𑁆𑀘𑀸𑀭𑀡𑀁 𑀧𑀤𑀩𑁆𑀬𑀜𑁆𑀚𑀦𑀫𑀥𑀼𑀭𑀢𑀸. 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀫𑀜𑁆𑀜𑀢𑀺 𑀅𑀜𑁆𑀜𑁂 𑀪𑀺𑀓𑁆𑀔𑀽. 𑀳𑀻𑀴𑀦𑀯𑀲𑁂𑀦 𑀅𑀪𑀺𑀪𑀯𑀺𑀢𑁆𑀯𑀸 𑀧𑀝𑀺𑀪𑀸𑀦𑀲𑀼𑀢𑁂𑀦 𑀅𑀢𑁆𑀢𑀸𑀦𑀁 𑀧𑀲𑀁𑀲𑀢𑀺 𑀲𑀫𑁆𑀪𑀸𑀯𑁂𑀢𑀺. 𑀫𑀸𑀦𑀲𑁆𑀲 𑀧𑀯𑀢𑁆𑀢𑀺𑀢𑀸𑀬 𑀲𑀳𑀚𑀸𑀢𑀦𑀺𑀲𑁆𑀲𑀬𑀸𑀤𑀺𑀧𑀘𑁆𑀘𑀬𑀥𑀫𑁆𑀫𑀸 𑀢𑀁𑀲𑀳𑀪𑀼𑀥𑀫𑁆𑀫𑀸. 𑀫𑀸𑀦𑀯𑀲𑁂𑀦 𑀯𑀺𑀧𑁆𑀧𑀝𑀺𑀲𑀸𑀭𑀻 𑀅𑀳𑀼𑀯𑀸. 𑀫𑀸 𑀅𑀳𑁄𑀲𑀻𑀢𑀺 𑀬𑁄𑀚𑀦𑀸. 𑀯𑀡𑁆𑀡𑀪𑀡𑀦𑀦𑁆𑀢𑀺 𑀧𑀭𑁂𑀳𑀺 𑀓𑀺𑀭𑀺𑀬𑀫𑀸𑀦𑀁 𑀕𑀼𑀡𑀸𑀪𑀺𑀢𑁆𑀣𑀯𑀁. 𑀅𑀔𑀺𑀮𑁄𑀢𑀺 𑀧𑀜𑁆𑀘𑀘𑁂𑀢𑁄𑀔𑀺𑀮𑀭𑀳𑀺𑀢𑁄. 𑀦𑀺𑀲𑁆𑀲𑁂𑀲𑀁 𑀦𑀯𑀯𑀺𑀥𑀦𑁆𑀢𑀺 𑀦𑀯𑀯𑀺𑀥𑀫𑁆𑀧𑀺 𑀫𑀸𑀦𑀁 𑀓𑀲𑁆𑀲𑀘𑀺 𑀏𑀓𑀤𑁂𑀲𑀲𑁆𑀲𑀧𑀺 𑀅𑀲𑁂𑀲𑀢𑁄. 𑀯𑀺𑀚𑁆𑀚𑀸𑀬𑀸𑀢𑀺 𑀅𑀕𑁆𑀕𑀫𑀕𑁆𑀕𑀯𑀺𑀚𑁆𑀚𑀸𑀬. 𑀅𑀘𑁆𑀘𑀦𑁆𑀢𑀫𑁂𑀯 𑀲𑀫𑀺𑀢𑀢𑀸𑀬 𑀯𑀽𑀧𑀲𑀫𑀺𑀢𑀢𑀸𑀬 𑀲𑀫𑀺𑀢𑀸𑀯𑀻.

𑀧𑁂𑀲𑀮𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀆𑀦𑀦𑁆𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁧𑁨. 𑀭𑀸𑀕𑁄𑀢𑀺 𑀏𑀢𑁆𑀣 𑀆𑀬𑀲𑁆𑀫𑀢𑁄 𑀯𑀗𑁆𑀕𑀻𑀲𑀲𑁆𑀲 𑀭𑀸𑀕𑀲𑁆𑀲 𑀉𑀧𑁆𑀧𑀢𑁆𑀢𑀺𑀬𑀸 𑀓𑀸𑀭𑀡𑀁 𑀯𑀺𑀪𑀸𑀯𑁂𑀢𑀼𑀁 ‘‘𑀆𑀬𑀲𑁆𑀫𑀸 𑀆𑀦𑀦𑁆𑀤𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀦𑁆𑀢𑀺 𑀆𑀦𑀦𑁆𑀤𑀢𑁆𑀣𑁂𑀭𑀁. 𑀆𑀭𑀫𑁆𑀫𑀡𑀁 𑀧𑀭𑀺𑀕𑁆𑀕𑀳𑁂𑀢𑀼𑀦𑁆𑀢𑀺 𑀓𑀸𑀬𑀯𑁂𑀤𑀦𑀸𑀤𑀺𑀪𑁂𑀤𑀁 𑀆𑀭𑀫𑁆𑀫𑀡𑀁 𑀲𑀢𑀺𑀕𑁄𑀘𑀭𑀁. 𑀅𑀲𑀼𑀪𑀤𑀼𑀓𑁆𑀔𑀸𑀤𑀺𑀢𑁄, 𑀭𑀽𑀧𑀸𑀤𑀺𑀏𑀓𑁂𑀓𑀫𑁂𑀯 𑀯𑀸 𑀙𑀴𑀸𑀭𑀫𑁆𑀫𑀡𑀁 𑀅𑀦𑀺𑀘𑁆𑀘𑀤𑀼𑀓𑁆𑀔𑀸𑀤𑀺𑀢𑁄 𑀧𑀭𑀺𑀕𑁆𑀕𑀡𑁆𑀳𑀺𑀢𑀼𑀁 𑀧𑀭𑀺𑀘𑁆𑀙𑀺𑀚𑁆𑀚 𑀚𑀸𑀦𑀺𑀢𑀼𑀁. 𑀇𑀢𑁆𑀣𑀺𑀭𑀽𑀧𑀸𑀭𑀫𑁆𑀫𑀡𑁂𑀢𑀺 𑀇𑀢𑁆𑀣𑀺𑀲𑀦𑁆𑀢𑀸𑀦𑁂 𑀭𑀽𑀧𑀲𑀪𑀸𑀯𑁂 𑀆𑀭𑀫𑁆𑀫𑀡𑁂.

𑀦𑀺𑀩𑁆𑀩𑀸𑀧𑀦𑀦𑁆𑀢𑀺 𑀦𑀺𑀩𑁆𑀩𑀸𑀧𑀬𑀢𑀺 𑀏𑀢𑁂𑀦𑀸𑀢𑀺 𑀦𑀺𑀩𑁆𑀩𑀸𑀧𑀦𑀁. 𑀯𑀺𑀧𑀮𑁆𑀮𑀸𑀲𑁂𑀦𑀸𑀢𑀺 𑀅𑀲𑀼𑀪𑁂 ‘‘𑀲𑀼𑀪’’𑀦𑁆𑀢𑀺 𑀯𑀺𑀧𑀮𑁆𑀮𑀸𑀲𑀪𑀸𑀯𑀳𑁂𑀢𑀼. 𑀭𑀸𑀕𑀝𑁆𑀞𑀸𑀦𑀺𑀬𑀦𑁆𑀢𑀺 𑀭𑀸𑀕𑀼𑀧𑁆𑀧𑀢𑁆𑀢𑀺𑀳𑁂𑀢𑀼. 𑀇𑀝𑁆𑀞𑀸𑀭𑀫𑁆𑀫𑀡𑀦𑁆𑀢𑀺 𑀲𑀼𑀪𑀸𑀭𑀫𑁆𑀫𑀡𑀁. 𑀏𑀢𑁆𑀣 𑀘 𑀇𑀝𑁆𑀞𑀸𑀭𑀫𑁆𑀫𑀡𑀲𑀻𑀲𑁂𑀦 𑀢𑀢𑁆𑀣 𑀇𑀝𑁆𑀞𑀸𑀓𑀸𑀭𑀕𑁆𑀕𑀳𑀡𑀁 𑀯𑀤𑀢𑀺. 𑀢𑀜𑁆𑀳𑀺 𑀯𑀚𑁆𑀚𑀦𑀻𑀬𑀁. 𑀧𑀭𑀢𑁄𑀢𑀺 𑀅𑀯𑀲𑀯𑀢𑁆𑀢𑀦𑀢𑁆𑀣𑁂𑀦 𑀅𑀜𑁆𑀜𑀢𑁄. 𑀲𑀗𑁆𑀔𑀸𑀭𑀸 𑀳𑀺 ‘‘𑀫𑀸 𑀪𑀺𑀚𑁆𑀚𑀦𑁆𑀢𑀽’’𑀢𑀺 𑀇𑀘𑁆𑀙𑀺𑀢𑀸𑀧𑀺 𑀪𑀺𑀚𑁆𑀚𑀦𑁆𑀢𑁂𑀯, 𑀢𑀲𑁆𑀫𑀸 𑀢𑁂 𑀅𑀯𑀲𑀯𑀢𑁆𑀢𑀺𑀢𑁆𑀢𑀸 𑀧𑀭𑁄 𑀦𑀸𑀫, 𑀲𑀸 𑀘 𑀦𑁂𑀲𑀁 𑀧𑀭𑀢𑀸 𑀅𑀦𑀺𑀘𑁆𑀘𑀤𑀲𑁆𑀲𑀦𑁂𑀦 𑀧𑀸𑀓𑀝𑀸 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀧𑀭𑀢𑁄 𑀧𑀲𑁆𑀲𑀸𑀢𑀺 𑀅𑀦𑀺𑀘𑁆𑀘𑀢𑁄 𑀧𑀲𑁆𑀲𑀸’’𑀢𑀺. 𑀓𑀸𑀫𑀁 𑀯𑀺𑀧𑀲𑁆𑀲𑀦𑀸 𑀲𑀗𑁆𑀔𑀸𑀭𑀦𑀺𑀫𑀺𑀢𑁆𑀢𑀁 𑀦 𑀧𑀭𑀺𑀘𑁆𑀘𑀚𑀢𑀺 𑀲𑀗𑁆𑀔𑀸𑀭𑁂 𑀆𑀭𑀩𑁆𑀪 𑀯𑀢𑁆𑀢𑀦𑀢𑁄, 𑀬𑁂𑀲𑀁 𑀧𑀦 𑀦𑀺𑀫𑀺𑀢𑁆𑀢𑀸𑀦𑀁 𑀅𑀕𑁆𑀕𑀳𑀡𑁂𑀦 𑀅𑀦𑀺𑀫𑀺𑀢𑁆𑀢𑀸𑀢𑀺 𑀕𑀳𑀺𑀢𑀼𑀁 𑀅𑀭𑀳𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀦𑀺𑀘𑁆𑀘𑀸𑀤𑀻𑀦𑀁 𑀦𑀺𑀫𑀺𑀢𑁆𑀢𑀸𑀦’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀮𑀓𑁆𑀔𑀡-𑀲𑀸𑀫𑀜𑁆𑀜𑀮𑀓𑁆𑀔𑀡-𑀤𑀲𑁆𑀲𑀦𑀯𑀲𑁂𑀦 𑀫𑀸𑀦𑀲𑁆𑀲 𑀤𑀲𑁆𑀲𑀦𑀸𑀪𑀺𑀲𑀫𑀬𑁄, 𑀯𑀺𑀧𑀲𑁆𑀲𑀦𑀸𑀬 𑀧𑀳𑀸𑀦𑀸𑀪𑀺𑀲𑀫𑀬𑁄. ‘‘𑀫𑀕𑁆𑀕𑁂𑀦𑀸’’𑀢𑀺 𑀯𑀤𑀦𑁆𑀢𑀺, 𑀫𑀕𑁆𑀕𑁂𑀦𑁂𑀯 𑀧𑀦 𑀅𑀲𑀫𑁆𑀫𑁄𑀳𑀢𑁄 𑀧𑀭𑀺𑀜𑁆𑀜𑀸𑀧𑀝𑀺𑀯𑁂𑀥𑀯𑀲𑁂𑀦 𑀤𑀲𑁆𑀲𑀦𑀸𑀪𑀺𑀲𑀫𑀬𑁄, 𑀧𑀳𑀸𑀦𑀧𑀝𑀺𑀯𑁂𑀥𑀯𑀲𑁂𑀦 𑀧𑀳𑀸𑀦𑀸𑀪𑀺𑀲𑀫𑀬𑁄. 𑀭𑀸𑀕𑀸𑀤𑀺𑀲𑀦𑁆𑀢𑀢𑀸𑀬𑀸𑀢𑀺 𑀭𑀸𑀕𑀸𑀤𑀻𑀦𑀁 𑀲𑀫𑀼𑀘𑁆𑀙𑁂𑀤𑀯𑀲𑁂𑀦 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀯𑀲𑁂𑀦 𑀯𑀽𑀧𑀲𑀫𑁂𑀢𑀩𑁆𑀩𑀢𑁄 𑀲𑀦𑁆𑀢𑀪𑀸𑀯𑁂𑀦.

𑀆𑀦𑀦𑁆𑀤𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀲𑀼𑀪𑀸𑀲𑀺𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁧𑁩. 𑀅𑀗𑁆𑀕𑀻𑀬𑀦𑁆𑀢𑀺 𑀳𑁂𑀢𑀼𑀪𑀸𑀯𑁂𑀦 𑀆𑀕𑀫𑀪𑀸𑀯𑁂𑀦 𑀅𑀯𑀬𑀯𑀪𑀸𑀯𑁂𑀦 𑀯𑀸 𑀜𑀸𑀬𑀦𑁆𑀢𑀻𑀢𑀺 𑀅𑀗𑁆𑀕𑀸𑀦𑀺, 𑀓𑀸𑀭𑀡𑀸𑀦𑀺, 𑀅𑀯𑀬𑀯𑀸 𑀯𑀸𑀢𑀺 𑀆𑀳 ‘‘𑀅𑀗𑁆𑀕𑁂𑀳𑀻𑀢𑀺 𑀓𑀸𑀭𑀡𑁂𑀳𑀺, 𑀅𑀯𑀬𑀯𑁂𑀳𑀺 𑀯𑀸’’𑀢𑀺. 𑀯𑀺𑀭𑀢𑀺𑀬𑁄 𑀲𑀼𑀪𑀸𑀲𑀺𑀢𑀯𑀸𑀘𑀸𑀬 𑀧𑀼𑀩𑁆𑀩𑀁 𑀧𑀢𑀺𑀝𑁆𑀞𑀺𑀢𑀸 𑀳𑁄𑀦𑁆𑀢𑀻𑀢𑀺 𑀫𑀼𑀲𑀸𑀯𑀸𑀤𑀸𑀯𑁂𑀭𑀫𑀡𑀺𑀆𑀤𑀬𑁄 𑀢𑀲𑁆𑀲𑀸 𑀯𑀺𑀲𑁂𑀲𑀳𑁂𑀢𑀽𑀢𑀺 𑀆𑀳 ‘‘𑀫𑀼𑀲𑀸𑀯𑀸𑀤𑀸…𑀧𑁂… 𑀓𑀸𑀭𑀡𑀸𑀦𑀻’’𑀢𑀺. 𑀬𑀲𑁆𑀫𑀸 𑀅𑀭𑀺𑀬𑀯𑁄𑀳𑀸𑀭𑀸 𑀯𑀺𑀲𑁂𑀲𑀢𑁄 𑀘𑁂𑀢𑀦𑀸𑀲𑀪𑀸𑀯𑀸, 𑀢𑀲𑁆𑀫𑀸 𑀯𑀘𑀻𑀲𑀼𑀘𑀭𑀺𑀢𑀲𑀫𑀼𑀤𑀸𑀬𑀲𑁆𑀲 𑀲𑀘𑁆𑀘𑀯𑀸𑀘𑀸𑀤𑀬𑁄 𑀅𑀗𑁆𑀕𑀪𑀽𑀢𑀸𑀢𑀺 𑀆𑀳 ‘‘𑀲𑀘𑁆𑀘𑀯𑀘𑀦𑀸𑀤𑀬𑁄 𑀘𑀢𑁆𑀢𑀸𑀭𑁄 𑀅𑀯𑀬𑀯𑀸’’𑀢𑀺. 𑀦𑀺𑀲𑁆𑀲𑀓𑁆𑀓𑀯𑀘𑀦𑀦𑁆𑀢𑀺 𑀳𑁂𑀢𑀼𑀫𑁆𑀳𑀺 𑀦𑀺𑀲𑁆𑀲𑀓𑁆𑀓𑀯𑀘𑀦𑀁. 𑀢𑁂𑀦𑀸𑀳 ‘‘𑀲𑀫𑀦𑀼𑀆𑀕𑀢𑀸 𑀧𑀯𑀢𑁆𑀢𑀸’’𑀢𑀺. 𑀯𑀸𑀘𑀸 𑀳𑀺 𑀢𑀸𑀬 𑀯𑀺𑀭𑀢𑀺𑀬𑀸 𑀲𑀫𑁆𑀫𑀸 𑀅𑀦𑀼𑀭𑀽𑀧𑀢𑁄 𑀆𑀕𑀢𑀸 𑀧𑀯𑀢𑁆𑀢𑀸𑀢𑀺 ‘‘𑀲𑀫𑀦𑁆𑀦𑀸𑀕𑀢𑀸’’𑀢𑀺 𑀯𑀼𑀘𑁆𑀘𑀢𑀺. 𑀓𑀭𑀡𑀯𑀘𑀦𑀦𑁆𑀢𑀺 𑀲𑀳𑀬𑁄𑀕𑁂 𑀓𑀭𑀡𑀯𑀘𑀦𑀁. 𑀢𑁂𑀦𑀸𑀳 ‘‘𑀬𑀼𑀢𑁆𑀢𑀸’’𑀢𑀺. 𑀲𑀳𑀚𑀸𑀢𑀸𑀧𑀺 𑀳𑀺 𑀘𑁂𑀢𑀦𑀸 𑀬𑀣𑀸𑀲𑀫𑀸𑀤𑀺𑀦𑁆𑀦𑀸𑀬 𑀯𑀺𑀭𑀢𑀺𑀬𑀸 𑀲𑀫𑁆𑀫𑀸 𑀅𑀦𑀼𑀭𑀽𑀧𑀢𑁄 𑀬𑀼𑀢𑁆𑀢𑀸𑀢𑀺 𑀯𑀢𑁆𑀢𑀼𑀁 𑀅𑀭𑀳𑀢𑀺.

𑀲𑀫𑀼𑀮𑁆𑀮𑀧𑀦𑀯𑀸𑀘𑀸𑀢𑀺 𑀲𑀤𑁆𑀤𑀯𑀸𑀘𑀸, 𑀲𑀸 𑀯𑀼𑀘𑁆𑀘𑀢𑀻𑀢𑀺 𑀯𑀸𑀘𑀸 𑀦𑀸𑀫. 𑀯𑀺𑀜𑁆𑀜𑀢𑁆𑀢𑀺 𑀧𑀦 𑀯𑀼𑀘𑁆𑀘𑀢𑀺 𑀏𑀢𑀸𑀬𑀸𑀢𑀺 𑀯𑀸𑀘𑀸 𑀦𑀸𑀫, 𑀢𑀣𑀸 𑀯𑀺𑀭𑀢𑀺 𑀘𑁂𑀢𑀦𑀸𑀯𑀸𑀘𑀸. 𑀦 𑀲𑀸 𑀇𑀥 𑀅𑀥𑀺𑀧𑁆𑀧𑁂𑀢𑀸𑀢𑀺 𑀲𑀸 𑀘𑁂𑀢𑀦𑀸𑀯𑀸𑀘𑀸 𑀯𑀺𑀜𑁆𑀜𑀢𑁆𑀢𑀺𑀯𑀸𑀘𑀸 𑀯𑀺𑀬 𑀇𑀥 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀦 𑀅𑀥𑀺𑀧𑁆𑀧𑁂𑀢𑀸 ‘‘𑀲𑀼𑀪𑀸𑀲𑀺𑀢𑀸 𑀳𑁄𑀢𑀻’’𑀢𑀺 𑀯𑀘𑀦𑀢𑁄. 𑀢𑁂𑀦𑀸𑀳 ‘‘𑀅𑀪𑀸𑀲𑀺𑀢𑀩𑁆𑀩𑀢𑁄’’𑀢𑀺. 𑀲𑀼𑀝𑁆𑀞𑀼 𑀪𑀸𑀲𑀺𑀢𑀸𑀢𑀺 𑀲𑀫𑁆𑀫𑀸 𑀜𑀸𑀬𑁂𑀦 𑀪𑀸𑀲𑀺𑀢𑀸 𑀯𑀘𑀻𑀲𑀼𑀘𑀭𑀺𑀢𑀪𑀸𑀯𑀢𑁄. 𑀅𑀢𑁆𑀣𑀸𑀯𑀳𑀢𑀦𑁆𑀢𑀺 𑀳𑀺𑀢𑀸𑀯𑀳𑀓𑀸𑀮𑀁 𑀧𑀢𑀺 𑀆𑀳. 𑀓𑀸𑀭𑀡𑀲𑀼𑀤𑁆𑀥𑀺𑀦𑁆𑀢𑀺 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂𑀦 𑀓𑀸𑀭𑀡𑀯𑀺𑀲𑀼𑀤𑁆𑀥𑀺𑀁. 𑀤𑁄𑀲𑀸𑀪𑀸𑀯𑀦𑁆𑀢𑀺 𑀅𑀕𑀢𑀺𑀕𑀫𑀦𑀸𑀤𑀺𑀤𑁄𑀲𑀸𑀪𑀸𑀯𑀁. 𑀭𑀸𑀕𑀤𑁄𑀲𑀸𑀤𑀺𑀯𑀺𑀦𑀺𑀫𑀼𑀢𑁆𑀢𑀜𑁆𑀳𑀺 𑀢𑀁 𑀪𑀸𑀲𑀢𑁄 𑀅𑀦𑀼𑀭𑁄𑀥𑀯𑀺𑀭𑁄𑀥𑀯𑀺𑀯𑀚𑁆𑀚𑀦𑀢𑁄 𑀅𑀕𑀢𑀺𑀕𑀫𑀦𑀁 𑀤𑀽𑀭𑀲𑀫𑀼𑀕𑁆𑀖𑀸𑀝𑀺𑀢𑀫𑁂𑀯𑀸𑀢𑀺. 𑀅𑀦𑀼𑀯𑀸𑀤𑀯𑀺𑀫𑀼𑀢𑁆𑀢𑀸𑀢𑀺 𑀅𑀧𑀯𑀸𑀤𑀯𑀺𑀭𑀳𑀺𑀢𑀸. 𑀲𑀩𑁆𑀩𑀸𑀓𑀸𑀭𑀲𑀫𑁆𑀧𑀢𑁆𑀢𑀺𑀁 𑀤𑀻𑀧𑁂𑀢𑀺, 𑀅𑀲𑀢𑀺 𑀳𑀺 𑀲𑀩𑁆𑀩𑀸𑀓𑀸𑀭𑀲𑀫𑁆𑀧𑀢𑀺𑀬𑀁 𑀅𑀦𑀼𑀯𑀚𑁆𑀚𑀢𑀸𑀧𑀺.

𑀓𑀺𑀜𑁆𑀘𑀸𑀧𑀺 𑀧𑀼𑀩𑁆𑀩𑁂 𑀥𑀫𑁆𑀫𑀸𑀥𑀺𑀝𑁆𑀞𑀸𑀦𑀸 𑀤𑁂𑀲𑀦𑀸 𑀆𑀭𑀤𑁆𑀥𑀸, 𑀧𑀼𑀕𑁆𑀕𑀮𑀚𑁆𑀛𑀸𑀲𑀬𑀢𑁄 𑀧𑀦 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀸𑀬…𑀧𑁂… 𑀯𑀘𑀦𑀫𑁂𑀢𑀁. 𑀓𑀸𑀫𑀜𑁆𑀘𑁂𑀢𑁆𑀣 ‘‘𑀅𑀜𑁆𑀜𑀢𑀭𑀦𑀺𑀤𑁆𑀤𑁄𑀲𑀯𑀘𑀦’’𑀦𑁆𑀢𑀺 𑀅𑀯𑀺𑀲𑁂𑀲𑀢𑁄 𑀯𑀼𑀢𑁆𑀢𑀁, ‘‘𑀥𑀫𑁆𑀫𑀁𑀬𑁂𑀯 𑀪𑀸𑀲𑀢𑀻’’𑀢𑀺𑀆𑀤𑀺𑀦𑀸 𑀧𑀦 𑀅𑀥𑀫𑁆𑀫𑀤𑁄𑀲𑀸𑀤𑀺𑀭𑀳𑀺𑀢𑀸𑀬 𑀯𑀸𑀘𑀸𑀬 𑀯𑀼𑀘𑁆𑀘𑀫𑀸𑀦𑀢𑁆𑀢𑀸 𑀇𑀥𑀸𑀧𑀺 𑀲𑀼𑀪𑀸𑀲𑀺𑀢𑀸 𑀯𑀸𑀘𑀸 𑀅𑀥𑀺𑀧𑁆𑀧𑁂𑀢𑀸𑀢𑀺. ‘‘𑀲𑀼𑀪𑀸𑀲𑀺𑀢𑀁𑀬𑁂𑀯𑀸’’𑀢𑀺 𑀅𑀯𑀥𑀸𑀭𑀡𑁂𑀦 𑀦𑀺𑀯𑀢𑁆𑀢𑀺𑀢𑀁 𑀲𑀭𑀽𑀧𑀢𑁄 𑀤𑀲𑁆𑀲𑁂𑀢𑀺 ‘‘𑀦𑁄 𑀤𑀼𑀩𑁆𑀪𑀸𑀲𑀺𑀢’’𑀦𑁆𑀢𑀺 𑀇𑀫𑀺𑀦𑀸. 𑀢𑁂𑀦𑀸𑀳 ‘‘𑀢𑀲𑁆𑀲𑁂𑀯 𑀯𑀸𑀘𑀗𑁆𑀕𑀲𑁆𑀲 𑀧𑀝𑀺𑀧𑀓𑁆𑀔𑀪𑀸𑀲𑀦𑀦𑀺𑀯𑀸𑀭𑀡’’𑀦𑁆𑀢𑀺. 𑀧𑀝𑀺𑀬𑁄𑀕𑀻𑀦𑀺𑀯𑀢𑁆𑀢𑀦𑀢𑁆𑀣𑁄 𑀳𑀺 𑀏𑀯-𑀲𑀤𑁆𑀤𑁄, 𑀢𑁂𑀦 𑀧𑀺𑀲𑀼𑀡𑀯𑀸𑀘𑀸𑀧𑀝𑀺𑀓𑁆𑀔𑁂𑀧𑁄 𑀤𑀲𑁆𑀲𑀺𑀢𑁄. ‘‘𑀲𑀼𑀪𑀸𑀲𑀺𑀢’’𑀦𑁆𑀢𑀺 𑀯𑀸 𑀇𑀫𑀺𑀦𑀸 𑀘𑀢𑀼𑀩𑁆𑀩𑀺𑀥𑀁 𑀯𑀘𑀻𑀲𑀼𑀘𑀭𑀺𑀢𑀁 𑀕𑀳𑀺𑀢𑀦𑁆𑀢𑀺 ‘‘𑀦𑁄 𑀤𑀼𑀩𑁆𑀪𑀸𑀲𑀺𑀢𑀦𑁆𑀢𑀺 𑀇𑀫𑀺𑀦𑀸 𑀫𑀺𑀘𑁆𑀙𑀸𑀯𑀸𑀘𑀧𑁆𑀧𑀳𑀸𑀦𑀁 𑀤𑀻𑀧𑁂𑀢𑀻’’𑀢𑀺 𑀯𑀼𑀢𑁆𑀢𑀁. 𑀲𑀩𑁆𑀩𑀯𑀘𑀻𑀲𑀼𑀘𑀭𑀺𑀢𑀲𑀸𑀥𑀸𑀭𑀡𑀯𑀘𑀦𑀜𑁆𑀳𑀺 𑀲𑀼𑀪𑀸𑀲𑀺𑀢𑀦𑁆𑀢𑀺. 𑀢𑁂𑀦 𑀧𑀭𑀪𑁂𑀤𑀦𑀸𑀤𑀺𑀓𑀁 𑀅𑀲𑀩𑁆𑀪𑀸𑀤𑀺𑀓𑀜𑁆𑀘 𑀩𑁄𑀥𑀺𑀲𑀢𑁆𑀢𑀸𑀦𑀁 𑀯𑀘𑀦𑀁 𑀅𑀧𑀺𑀲𑀼𑀡𑀸𑀤𑀺𑀯𑀺𑀲𑀬𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀪𑀸𑀲𑀺𑀢𑀩𑁆𑀩𑀯𑀘𑀦𑀮𑀓𑁆𑀔𑀡𑀦𑁆𑀢𑀺 𑀪𑀸𑀲𑀺𑀢𑀩𑁆𑀩𑀲𑁆𑀲 𑀯𑀘𑀦𑀲𑁆𑀲 𑀲𑀪𑀸𑀯𑀮𑀓𑁆𑀔𑀡𑀁 𑀤𑀻𑀧𑁂𑀢𑀻𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑁄. 𑀬𑀤𑀺 𑀏𑀯𑀁 𑀦𑀦𑀼 𑀅𑀪𑀸𑀲𑀺𑀢𑀩𑁆𑀩𑀁 𑀧𑀞𑀫𑀁 𑀯𑀢𑁆𑀯𑀸 𑀪𑀸𑀲𑀺𑀢𑀩𑁆𑀩𑀁 𑀧𑀘𑁆𑀙𑀸 𑀯𑀢𑁆𑀢𑀩𑁆𑀩𑀁 𑀬𑀣𑀸 ‘‘𑀯𑀸𑀫𑀁 𑀫𑀼𑀜𑁆𑀘, 𑀤𑀓𑁆𑀔𑀺𑀡𑀁 𑀕𑀡𑁆𑀳𑀸’’𑀢𑀺 𑀆𑀳 ‘‘𑀅𑀗𑁆𑀕𑀧𑀭𑀺𑀤𑀻𑀧𑀦𑀢𑁆𑀣𑀁 𑀧𑀦𑀸’’𑀢𑀺𑀆𑀤𑀺.

𑀧𑀞𑀫𑁂𑀦𑀸𑀢𑀺 ‘‘𑀲𑀼𑀪𑀸𑀲𑀺𑀢’’𑀦𑁆𑀢𑀺 𑀧𑀤𑁂𑀦. 𑀥𑀫𑁆𑀫𑀢𑁄 𑀅𑀦𑀧𑁂𑀢𑀦𑁆𑀢𑀺 𑀅𑀢𑁆𑀢𑀦𑁄 𑀧𑀭𑁂𑀲𑀜𑁆𑀘 𑀳𑀺𑀢𑀲𑀼𑀔𑀸𑀯𑀳𑀥𑀫𑁆𑀫𑀢𑁄 𑀅𑀦𑀧𑁂𑀢𑀁. 𑀫𑀦𑁆𑀢𑀸𑀯𑀘𑀦𑀦𑁆𑀢𑀺 𑀫𑀦𑁆𑀢𑀸𑀬 𑀧𑀯𑀢𑁆𑀢𑁂𑀢𑀩𑁆𑀩𑀯𑀘𑀦𑀁. 𑀧𑀜𑁆𑀜𑀯𑀸 𑀅𑀯𑀺𑀓𑀺𑀡𑁆𑀡𑀯𑀸𑀘𑁄 𑀳𑀺 𑀦 𑀘 𑀅𑀦𑀢𑁆𑀣𑀸𑀯𑀳𑀁 𑀯𑀸𑀘𑀁 𑀪𑀸𑀲𑀢𑀺. 𑀇𑀢𑀭𑁂𑀳𑀺 𑀤𑁆𑀯𑀻𑀳𑀻𑀢𑀺 𑀢𑀢𑀺𑀬𑀘𑀢𑀼𑀢𑁆𑀣𑀧𑀤𑁂𑀳𑀺. ‘‘𑀇𑀫𑁂𑀳𑀺 𑀔𑁄𑀢𑀺𑀆𑀤𑀻𑀦𑀻𑀢𑀺 𑀓𑀭𑀡𑁂 𑀏𑀢𑀁 𑀉𑀧𑀬𑁄𑀕𑀯𑀘𑀦’’𑀦𑁆𑀢𑀺 𑀓𑁂𑀘𑀺. 𑀢𑀁 𑀯𑀸𑀘𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀁 𑀘𑀢𑀼𑀭𑀗𑁆𑀕𑀺𑀓𑀁. 𑀬𑀜𑁆𑀘 𑀯𑀸𑀘𑀁 𑀫𑀜𑁆𑀜𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀜𑁆𑀜𑁂𑀢𑀺 𑀇𑀢𑁄 𑀩𑀸𑀳𑀺𑀭𑀓𑀸 𑀜𑀸𑀬𑀯𑀸𑀤𑀺𑀦𑁄 𑀅𑀓𑁆𑀔𑀭𑀘𑀺𑀦𑁆𑀢𑀓𑀸 𑀘. ‘‘𑀧𑀝𑀺𑀜𑁆𑀜𑀸𑀳𑁂𑀢𑀼𑀉𑀤𑀸𑀳𑀭𑀡𑀽𑀧𑀦𑀬𑀦𑀺𑀕𑀫𑀦𑀸𑀦𑀺 𑀅𑀯𑀬𑀯𑀸 𑀯𑀸𑀓𑁆𑀬𑀲𑁆𑀲𑀸’’𑀢𑀺 𑀯𑀤𑀦𑁆𑀢𑀺. 𑀦𑀸𑀫𑀸𑀤𑀻𑀳𑀻𑀢𑀺 𑀦𑀸𑀫𑀸𑀔𑁆𑀬𑀸𑀢𑀧𑀤𑁂𑀳𑀺. 𑀮𑀺𑀗𑁆𑀕𑀁 𑀇𑀢𑁆𑀣𑀺𑀮𑀺𑀗𑁆𑀕𑀸𑀤𑀺 𑀯𑀘𑀦𑀁 𑀏𑀓𑀯𑀘𑀦𑀸𑀤𑀺. 𑀧𑀞𑀫𑀸𑀤𑀺 𑀯𑀺𑀪𑀢𑁆𑀢𑀺 𑀅𑀢𑀻𑀢𑀸𑀤𑀺 𑀓𑀸𑀮𑀁. 𑀓𑀢𑁆𑀢𑀸 𑀲𑀫𑁆𑀧𑀤𑀸𑀦𑀁 𑀅𑀧𑀸𑀤𑀸𑀦𑀁 𑀓𑀭𑀡𑀁 𑀅𑀥𑀺𑀓𑀭𑀡𑀁 𑀓𑀫𑁆𑀫𑀜𑁆𑀘 𑀓𑀸𑀭𑀓𑀁. 𑀲𑀫𑁆𑀧𑀢𑁆𑀢𑀻𑀳𑀺 𑀲𑀫𑀦𑁆𑀦𑀸𑀕𑀢𑀦𑁆𑀢𑀺 𑀏𑀢𑁂 𑀅𑀯𑀬𑀯𑀸𑀤𑀺𑀓𑁂 𑀲𑀫𑁆𑀧𑀸𑀤𑁂𑀢𑁆𑀯𑀸 𑀯𑀼𑀢𑁆𑀢𑀁. 𑀢𑀁 𑀧𑀝𑀺𑀲𑁂𑀥𑁂𑀢𑀻𑀢𑀺 𑀢𑀁 𑀬𑀣𑀸𑀯𑀼𑀢𑁆𑀢𑀯𑀺𑀲𑁂𑀲𑀫𑁆𑀧𑀺 𑀯𑀸𑀘𑀁 ‘‘𑀇𑀫𑁂𑀳𑀺 𑀔𑁄’’𑀢𑀺 𑀯𑀤𑀦𑁆𑀢𑁄 𑀪𑀕𑀯𑀸 𑀧𑀝𑀺𑀲𑁂𑀥𑁂𑀢𑀺. 𑀔𑁄-𑀲𑀤𑁆𑀤𑁄 𑀳𑁂𑀢𑁆𑀣 𑀅𑀯𑀥𑀸𑀭𑀡𑀢𑁆𑀣𑁄. 𑀢𑁂𑀦𑀸𑀳 ‘‘𑀅𑀯𑀬𑀯𑀸𑀤𑀻’’𑀢𑀺𑀆𑀤𑀺. 𑀬𑀸 𑀓𑀸𑀘𑀺 𑀅𑀲𑀪𑀸𑀯𑀦𑀺𑀭𑀼𑀢𑁆𑀢𑀺𑀮𑀓𑁆𑀔𑀡𑀸. 𑀲𑀸 𑀫𑀺𑀮𑀓𑁆𑀔𑀼𑀪𑀸𑀲𑀸. 𑀲𑀻𑀳𑀴𑀓𑁂𑀦𑁂𑀯𑀸𑀢𑀺 𑀲𑀻𑀳𑀴𑀪𑀸𑀲𑀸𑀬 𑀧𑀭𑀺𑀬𑀸𑀧𑀦𑁆𑀦𑁂𑀦 𑀯𑀘𑀦𑁂𑀦. 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀽𑀢𑀺 𑀲𑀁𑀲𑀸𑀭𑁂 𑀅𑀢𑀺𑀯𑀺𑀬 𑀲𑀜𑁆𑀚𑀸𑀢𑀲𑀁𑀯𑁂𑀕𑀸 𑀢𑀦𑁆𑀦𑀺𑀲𑁆𑀲𑀭𑀡𑁂 𑀦𑀺𑀦𑁆𑀦𑀧𑁄𑀡𑀫𑀸𑀦𑀲𑀸 𑀳𑀼𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀉𑀲𑁆𑀲𑀼𑀓𑁆𑀓𑀸𑀧𑁂𑀢𑁆𑀯𑀸 𑀫𑀕𑁆𑀕𑀧𑀝𑀺𑀧𑀸𑀝𑀺𑀬𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀼.

𑀧𑀸𑀢𑁄𑀯 𑀨𑀼𑀮𑁆𑀮𑀺𑀢𑀓𑁄𑀓𑀦𑀤𑀦𑁆𑀢𑀺 𑀧𑀸𑀢𑁄𑀯 𑀲𑀁𑀨𑀼𑀮𑁆𑀮𑀧𑀤𑀼𑀫𑀁. 𑀪𑀺𑀚𑁆𑀚𑀺𑀬𑀢𑁂𑀢𑀺 𑀦𑀺𑀩𑁆𑀪𑀺𑀚𑁆𑀚𑀺𑀬𑀢𑀺 𑀦𑀺𑀩𑁆𑀪𑀺𑀕𑁆𑀕𑁄 𑀚𑀸𑀬𑀢𑀺. 𑀫𑀦𑀼𑀲𑁆𑀲𑀢𑁆𑀢𑀁 𑀕𑀢𑀸𑀢𑀺 𑀫𑀦𑀼𑀲𑁆𑀲𑀢𑁆𑀢𑀪𑀸𑀯𑀁 𑀉𑀧𑀕𑀢𑀸.

𑀩𑀼𑀤𑁆𑀥𑀦𑁆𑀢𑀭𑁂𑀢𑀺 𑀩𑀼𑀤𑁆𑀥𑀼𑀧𑁆𑀧𑀸𑀤𑀦𑁆𑀢𑀭𑁂 𑀤𑁆𑀯𑀺𑀦𑁆𑀦𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑀸𑀦𑀁 𑀅𑀦𑁆𑀢𑀭𑀸. 𑀢𑀤𑀸 𑀳𑀺 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀲𑀸𑀲𑀦𑁂, 𑀦 𑀩𑀼𑀤𑁆𑀥𑀲𑀸𑀲𑀦𑁂 𑀤𑀺𑀧𑁆𑀧𑀫𑀸𑀦𑁂.

𑀚𑀭𑀸𑀬 𑀧𑀭𑀺𑀫𑀤𑁆𑀤𑀺𑀢𑀦𑁆𑀢𑀺 𑀬𑀣𑀸 𑀳𑀢𑁆𑀣𑀘𑀭𑀡𑀸𑀤𑀺𑀅𑀗𑁆𑀕𑀸𑀦𑀺 𑀲𑀺𑀣𑀺𑀮𑀸𑀦𑀺 𑀳𑁄𑀦𑁆𑀢𑀺, 𑀘𑀓𑁆𑀔𑀸𑀤𑀻𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀲𑀯𑀺𑀲𑀬𑀕𑁆𑀕𑀳𑀡𑁂 𑀅𑀲𑀫𑀢𑁆𑀣𑀸𑀦𑀺 𑀳𑁄𑀦𑁆𑀢𑀺, 𑀬𑁄𑀩𑁆𑀩𑀦𑀁 𑀲𑀩𑁆𑀩𑀲𑁄 𑀯𑀺𑀕𑀢𑀁, 𑀓𑀸𑀬𑀩𑀮𑀁 𑀅𑀧𑀕𑀢𑀁, 𑀲𑀢𑀺𑀫𑀢𑀺𑀥𑀺𑀢𑀺𑀆𑀤𑀬𑁄 𑀯𑀺𑀧𑁆𑀧𑀬𑀼𑀢𑁆𑀢𑀸, 𑀧𑀼𑀩𑁆𑀩𑁂 𑀅𑀢𑁆𑀢𑀦𑁄 𑀑𑀯𑀸𑀤𑀧𑀝𑀺𑀓𑀭𑀸 𑀧𑀼𑀢𑁆𑀢𑀤𑀸𑀭𑀸𑀤𑀬𑁄𑀧𑀺 𑀅𑀧𑀲𑀸𑀤𑀓𑀸, 𑀧𑀭𑁂𑀳𑀺 𑀯𑀼𑀝𑁆𑀞𑀸𑀧𑀦𑀻𑀬𑀲𑀁𑀯𑁂𑀲𑀦𑀻𑀬𑀢𑀸 𑀧𑀼𑀦𑀤𑁂𑀯 𑀩𑀸𑀮𑀪𑀸𑀯𑀧𑁆𑀧𑀢𑁆𑀢𑀺 𑀘 𑀳𑁄𑀦𑁆𑀢𑀺, 𑀏𑀯𑀁 𑀚𑀭𑀸𑀬 𑀲𑀩𑁆𑀩𑀲𑁄 𑀯𑀺𑀫𑀤𑁆𑀤𑀺𑀢𑀁. 𑀏𑀢𑀦𑁆𑀢𑀺 𑀲𑀭𑀻𑀭𑀁 𑀯𑀤𑀢𑀺. 𑀫𑀺𑀮𑀸𑀢𑀙𑀯𑀺𑀘𑀫𑁆𑀫𑀦𑀺𑀲𑁆𑀲𑀺𑀢𑀦𑁆𑀢𑀺 𑀚𑀺𑀡𑁆𑀡𑀪𑀸𑀯𑁂𑀦 𑀅𑀧𑁆𑀧𑀫𑀁𑀲𑀮𑁄𑀳𑀺𑀢𑀢𑁆𑀢𑀸 𑀫𑀺𑀮𑀸𑀢𑁂𑀳𑀺 𑀕𑀢𑀬𑁄𑀩𑁆𑀩𑀦𑁂𑀳𑀺 𑀥𑀫𑁆𑀫𑁂𑀳𑀺 𑀲𑀦𑁆𑀦𑀺𑀲𑁆𑀲𑀺𑀢𑀁. 𑀖𑀸𑀲𑀫𑀸𑀫𑀺𑀲𑀦𑁆𑀢𑀺 𑀖𑀸𑀲𑀪𑀽𑀢𑀁 𑀆𑀫𑀺𑀲𑀁 𑀫𑀘𑁆𑀘𑀼𑀦𑀸 𑀕𑀺𑀮𑀺𑀢𑁆𑀯𑀸 𑀯𑀺𑀬 𑀧𑀢𑀺𑀝𑁆𑀞𑀧𑁂𑀢𑀩𑁆𑀩𑀢𑁄. 𑀓𑁂𑀲𑀮𑁄𑀫𑀸𑀤𑀺𑀦𑀸𑀦𑀸𑀓𑀼𑀡𑀧𑀧𑀽𑀭𑀺𑀢𑀁. 𑀢𑀢𑁄 𑀏𑀯 𑀅𑀲𑀼𑀘𑀺𑀪𑀸𑀚𑀦𑀁 𑀏𑀢𑀁. 𑀲𑀩𑁆𑀩𑀣𑀸𑀧𑀺 𑀦𑀺𑀲𑁆𑀲𑀸𑀭𑀢𑀸𑀬 𑀓𑀤𑀮𑀺𑀓𑁆𑀔𑀦𑁆𑀥𑀲𑀫𑀁.

𑀅𑀦𑀼𑀘𑁆𑀙𑀯𑀺𑀓𑀸𑀳𑀻𑀢𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀅𑀦𑀼𑀭𑀽𑀧𑀸𑀳𑀺. 𑀦 𑀢𑀸𑀧𑁂𑀬𑁆𑀬𑀸𑀢𑀺 𑀘𑀺𑀢𑁆𑀢𑀜𑁆𑀘 𑀓𑀸𑀬𑀜𑁆𑀘 𑀦 𑀢𑀸𑀧𑁂𑀬𑁆𑀬. 𑀢𑀸𑀧𑀦𑀸 𑀘𑁂𑀢𑁆𑀣 𑀲𑀫𑁆𑀧𑀢𑀺 𑀆𑀬𑀢𑀺 𑀘 𑀯𑀺𑀲𑀸𑀤𑀦𑀸. 𑀦 𑀩𑀸𑀥𑁂𑀬𑁆𑀬𑀸𑀢𑀺 ‘‘𑀦𑀸𑀪𑀺𑀪𑀯𑁂𑀬𑁆𑀬𑀸’’𑀢𑀺 𑀧𑀤𑀲𑁆𑀲 𑀅𑀢𑁆𑀣𑀤𑀲𑁆𑀲𑀦𑀁. 𑀅𑀧𑀺𑀲𑀼𑀡𑀯𑀸𑀘𑀸𑀯𑀲𑁂𑀦𑀸𑀢𑀺 𑀲𑀩𑁆𑀩𑀲𑁄 𑀧𑀳𑀻𑀦𑀧𑀺𑀲𑀼𑀡𑀯𑀸𑀘𑀢𑀸𑀯𑀲𑁂𑀦. 𑀧𑀸𑀧𑀸𑀦𑀻𑀢𑀺 𑀮𑀸𑀫𑀓𑀸𑀦𑀺 𑀦𑀺𑀓𑀺𑀝𑁆𑀞𑀓𑀸𑀦𑀺. 𑀢𑁂𑀦𑀸𑀳 ‘‘𑀅𑀧𑁆𑀧𑀺𑀬𑀸𑀦𑀻’’𑀢𑀺𑀆𑀤𑀺. 𑀅𑀦𑀸𑀤𑀸𑀬𑀸𑀢𑀺 𑀅𑀕𑁆𑀕𑀳𑁂𑀢𑁆𑀯𑀸.

𑀲𑀸𑀥𑀼𑀪𑀸𑀯𑁂𑀦𑀸𑀢𑀺 𑀦𑀺𑀤𑁆𑀤𑁄𑀲𑀫𑀥𑀼𑀭𑀪𑀸𑀯𑁂𑀦. 𑀅𑀫𑀢𑀲𑀤𑀺𑀲𑀸𑀢𑀺 𑀲𑀤𑀺𑀲𑁂 𑀢𑀩𑁆𑀩𑁄𑀳𑀸𑀭𑁄𑀢𑀺, 𑀓𑀸𑀭𑀡𑁂 𑀯𑀸𑀬𑀁 𑀓𑀸𑀭𑀺𑀬𑀯𑁄𑀳𑀸𑀭𑁄𑀢𑀺 𑀆𑀳 ‘‘𑀦𑀺𑀩𑁆𑀩𑀸𑀦𑀸𑀫𑀢𑀧𑀘𑁆𑀘𑀬𑀢𑁆𑀢𑀸 𑀯𑀸’’𑀢𑀺. 𑀧𑀘𑁆𑀘𑀬𑀯𑀲𑁂𑀦 𑀳𑀺 𑀲𑀸 𑀢𑀤𑀸 𑀤𑀲𑁆𑀲𑀦𑀧𑁆𑀧𑀯𑀢𑁆𑀢𑀺. 𑀘𑀭𑀺𑀬𑀸𑀢𑀺 𑀘𑀸𑀭𑀺𑀢𑁆𑀢𑀁. 𑀧𑁄𑀭𑀸𑀡𑀸 𑀦𑀸𑀫 𑀧𑀞𑀫𑀓𑀧𑁆𑀧𑀺𑀓𑀸, 𑀩𑀼𑀤𑁆𑀥𑀸𑀤𑀬𑁄 𑀯𑀸 𑀅𑀭𑀺𑀬𑀸.

𑀧𑀢𑀺𑀝𑁆𑀞𑀺𑀢𑀸𑀢𑀺 𑀦𑀺𑀘𑁆𑀘𑀮𑀪𑀸𑀯𑁂𑀦 𑀅𑀝𑁆𑀞𑀺𑀁 𑀓𑀢𑁆𑀯𑀸 𑀧𑀘𑁆𑀘𑀬𑀸𑀬𑀢𑁆𑀢𑀪𑀸𑀯𑀢𑁄 𑀅𑀯𑀺𑀲𑀁𑀯𑀸𑀤𑀦𑀓𑀸. 𑀉𑀪𑀬𑀣𑀸 𑀧𑀝𑀺𑀧𑀢𑁆𑀢𑀺𑀁 𑀆𑀳 ‘‘𑀅𑀢𑁆𑀢𑀦𑁄 𑀘 𑀧𑀭𑁂𑀲𑀜𑁆𑀘 𑀅𑀢𑁆𑀣𑁂 𑀧𑀢𑀺𑀝𑁆𑀞𑀺𑀢𑀸’’𑀢𑀺. 𑀅𑀢𑁆𑀣𑁂 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀸𑀤𑀺𑀳𑀺𑀢𑁂 𑀧𑀢𑀺𑀝𑁆𑀞𑀺𑀢𑀢𑁆𑀢𑀸 𑀏𑀯 𑀥𑀫𑁆𑀫𑁂 𑀅𑀯𑀺𑀳𑀺𑀁𑀲𑀸𑀤𑀺𑀥𑀫𑁆𑀫𑁂 𑀧𑀢𑀺𑀝𑁆𑀞𑀺𑀢𑀸. 𑀅𑀦𑀼𑀧𑀭𑁄𑀥𑀓𑀭𑀦𑁆𑀢𑀺 𑀏𑀢𑁂𑀦 𑀳𑀺𑀢𑀧𑀭𑀺𑀬𑀸𑀬𑁄𑀬𑀁 𑀅𑀢𑁆𑀣-𑀲𑀤𑁆𑀤𑁄𑀢𑀺 𑀤𑀲𑁆𑀲𑁂𑀢𑀺. 𑀥𑀫𑁆𑀫𑀺𑀓𑀦𑁆𑀢𑀺 𑀥𑀫𑁆𑀫𑀢𑁄 𑀅𑀦𑀧𑁂𑀢𑀁, 𑀅𑀢𑁆𑀣𑀥𑀫𑁆𑀫𑀽𑀧𑀲𑀁𑀳𑀺𑀢𑀁 𑀯𑀸.

𑀦𑀺𑀩𑁆𑀩𑀸𑀦𑀧𑁆𑀧𑀢𑁆𑀢𑀺𑀬𑀸𑀢𑀺 𑀦𑀺𑀩𑁆𑀩𑀸𑀦𑀧𑁆𑀧𑀢𑁆𑀢𑀺𑀬𑀢𑁆𑀣𑀁. 𑀤𑀼𑀓𑁆𑀔𑀲𑁆𑀲 𑀅𑀦𑁆𑀢𑀓𑀺𑀭𑀺𑀬𑀸𑀬 𑀅𑀦𑁆𑀢𑀓𑀭𑀡𑀢𑁆𑀣𑀁. 𑀬𑀲𑁆𑀫𑀸 𑀩𑀼𑀤𑁆𑀥𑁄 𑀔𑁂𑀫𑀸𑀬 𑀪𑀸𑀲𑀢𑀺, 𑀢𑀲𑁆𑀫𑀸 𑀔𑁂𑀫𑀼𑀧𑁆𑀧𑀢𑁆𑀢𑀺𑀳𑁂𑀢𑀼𑀬𑀸 𑀔𑁂𑀫𑀸, 𑀢𑀲𑁆𑀫𑀸 𑀲𑀸 𑀲𑀩𑁆𑀩𑀯𑀸𑀘𑀸𑀦𑀁 𑀉𑀢𑁆𑀢𑀫𑀸𑀢𑀺 𑀏𑀯𑀫𑁆𑀧𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀫𑀦𑁆𑀢𑀸𑀯𑀘𑀦𑀯𑀲𑁂𑀦𑀸𑀢𑀺 𑀲𑀩𑁆𑀩𑀤𑁄𑀲𑀭𑀳𑀺𑀢𑀯𑀲𑁂𑀦.

𑀲𑀼𑀪𑀸𑀲𑀺𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀲𑀸𑀭𑀺𑀧𑀼𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁧𑁪. 𑀯𑀸𑀓𑁆𑀓𑀭𑀡𑀘𑀸𑀢𑀼𑀭𑀺𑀬𑀢𑁄 𑀯𑀘𑀦𑀕𑀼𑀡𑀳𑁂𑀢𑀽𑀦𑀁 𑀧𑀽𑀭𑀺𑀬𑀸 𑀧𑀽𑀭𑁂 𑀪𑀯𑀸𑀢𑀺 𑀧𑁄𑀭𑀻, 𑀢𑀸𑀬 𑀧𑁄𑀭𑀺𑀬𑀸. 𑀢𑁂𑀦𑀸𑀳 ‘‘𑀅𑀓𑁆𑀔𑀭𑀸𑀤𑀺𑀧𑀭𑀺𑀧𑀼𑀡𑁆𑀡𑀸𑀬𑀸’’𑀢𑀺. 𑀅𑀯𑀺𑀩𑀤𑁆𑀥𑀸𑀬𑀸𑀢𑀺 𑀧𑀺𑀢𑁆𑀢𑀸𑀤𑀻𑀳𑀺 𑀦 𑀯𑀺𑀩𑀤𑁆𑀥𑀸𑀬 𑀅𑀦𑀼𑀧𑀤𑁆𑀤𑀼𑀢𑀸𑀬. 𑀢𑁂𑀦𑀸𑀳 ‘‘𑀅𑀧𑀮𑀺𑀩𑀼𑀤𑁆𑀥𑀸𑀬𑀸’’𑀢𑀺𑀆𑀤𑀺. 𑀦𑀺𑀤𑁆𑀤𑁄𑀲𑀸𑀬𑀸𑀢𑀺 𑀅𑀢𑁆𑀣𑀢𑁄 𑀩𑁆𑀬𑀜𑁆𑀚𑀦𑀢𑁄 𑀯𑀺𑀕𑀢𑀤𑁄𑀲𑀸𑀬. 𑀅𑀓𑁆𑀔𑀮𑀺𑀢𑀧𑀤𑀩𑁆𑀬𑀜𑁆𑀚𑀦𑀸𑀬𑀸𑀢𑀺 𑀅𑀕𑀮𑀺𑀢𑀧𑀤𑀩𑁆𑀬𑀜𑁆𑀚𑀦𑀸𑀬, 𑀅𑀢𑁆𑀣𑀲𑁆𑀲 𑀯𑀺𑀜𑁆𑀜𑀸𑀧𑀦𑀺𑀬𑀸𑀢𑀺 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀤𑀺𑀅𑀢𑁆𑀣𑀲𑁆𑀲 𑀩𑁄𑀥𑀦𑁂 𑀧𑀭𑀺𑀬𑀢𑁆𑀢𑀸𑀬. 𑀪𑀺𑀓𑁆𑀔𑀼𑀦𑀦𑁆𑀢𑀺 𑀕𑀸𑀣𑀸𑀲𑀼𑀔𑀢𑁆𑀣𑀁 𑀭𑀲𑁆𑀲𑀁 𑀓𑀢𑁆𑀯𑀸 𑀯𑀼𑀢𑁆𑀢𑀁.

‘‘𑀲𑀁𑀔𑀺𑀢𑁆𑀢𑁂𑀦𑀧𑀺 𑀤𑁂𑀲𑁂𑀢𑀺, 𑀯𑀺𑀢𑁆𑀣𑀸𑀭𑁂𑀦𑀧𑀺 𑀪𑀸𑀲𑀢𑀻’’𑀢𑀺 𑀦𑀬𑀺𑀤𑀁 𑀧𑀞𑀫𑀁 𑀉𑀤𑁆𑀤𑀺𑀲𑀺𑀢𑁆𑀯𑀸 𑀢𑀲𑁆𑀲 𑀅𑀢𑁆𑀣𑀲𑁆𑀲 𑀓𑀺𑀢𑁆𑀢𑀦𑀯𑀲𑁂𑀦 𑀧𑀯𑀢𑁆𑀢𑀺𑀢𑀁 𑀯𑀘𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀲𑀸 𑀳𑀺 𑀯𑀺𑀢𑁆𑀣𑀸𑀭𑀤𑁂𑀲𑀦𑀸 𑀏𑀯 𑀳𑁄𑀢𑀺. 𑀬𑀸 𑀧𑀦 𑀤𑁂𑀲𑀦𑀸 𑀓𑀤𑀸𑀘𑀺 𑀥𑀫𑁆𑀫𑀧𑀝𑀺𑀕𑁆𑀕𑀸𑀳𑀓𑀸𑀦𑀁 𑀅𑀚𑁆𑀛𑀸𑀲𑀬𑀯𑀲𑁂𑀦 𑀲𑀁𑀔𑀺𑀢𑁆𑀢𑁂𑀦𑁂𑀯 𑀤𑀲𑁆𑀲𑁂𑀢𑁆𑀯𑀸 𑀦𑀺𑀓𑁆𑀔𑀺𑀧𑀢𑀺, 𑀬𑀸 𑀘 𑀓𑀤𑀸𑀘𑀺 𑀯𑀺𑀢𑁆𑀣𑀸𑀭𑁂𑀦, 𑀢𑀤𑀼𑀪𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀘𑀢𑁆𑀢𑀸𑀭𑀺𑀫𑀸𑀦𑀻’’𑀢𑀺𑀆𑀤𑀺. 𑀲𑀪𑀸𑀯𑀫𑀥𑀼𑀭𑁄 𑀧𑀘𑁆𑀘𑀬𑀯𑀲𑁂𑀦 𑀫𑀥𑀼𑀭𑀢𑀭𑁄 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀬𑀣𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀯𑀺𑀯𑀺𑀥𑀸𑀓𑀸𑀭𑀁 𑀓𑀢𑁆𑀯𑀸 𑀥𑀫𑁆𑀫𑀁 𑀓𑀣𑁂𑀢𑀼𑀁 𑀧𑀝𑀺𑀪𑀸𑀢𑀻𑀢𑀺 𑀧𑀝𑀺𑀪𑀸𑀦𑀁, 𑀤𑁂𑀲𑀦𑀸𑀧𑀓𑀸𑀭𑀜𑀸𑀡𑀁. 𑀢𑁂𑀦𑀸𑀳 ‘‘𑀲𑀫𑀼𑀤𑁆𑀤𑀢𑁄’’𑀢𑀺𑀆𑀤𑀺. 𑀑𑀤𑀳𑀦𑁆𑀢𑀻𑀢𑀺 𑀅𑀯𑀚𑀸𑀦𑀦𑀯𑀲𑁂𑀦 𑀕𑀫𑁂𑀦𑁆𑀢𑀺.

𑀲𑀸𑀭𑀺𑀧𑀼𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀧𑀯𑀸𑀭𑀡𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁧𑁫. 𑀢𑀲𑁆𑀫𑀺𑀁 𑀅𑀳𑀽𑀢𑀺 𑀢𑀲𑁆𑀫𑀺𑀁 𑀅𑀳𑀦𑀻𑀢𑀺 𑀆𑀳 ‘‘𑀢𑀲𑁆𑀫𑀺𑀁 𑀤𑀺𑀯𑀲𑁂’’𑀢𑀺. 𑀅𑀦𑀲𑀦𑁂𑀦𑀸𑀢𑀺 𑀲𑀩𑁆𑀩𑀲𑁄 𑀆𑀳𑀸𑀭𑀲𑁆𑀲 𑀅𑀪𑀼𑀜𑁆𑀚𑀦𑁂𑀦. 𑀲𑀸𑀲𑀦𑀺𑀓𑀲𑀻𑀮𑁂𑀦 𑀩𑀸𑀳𑀺𑀭𑀓𑀅𑀦𑀲𑀦𑁂𑀦 𑀯𑀸 𑀉𑀧𑁂𑀢𑀸 𑀳𑀼𑀢𑁆𑀯𑀸𑀢𑀺 𑀬𑁄𑀚𑀦𑀸. 𑀯𑀸-𑀲𑀤𑁆𑀤𑁂𑀦 𑀔𑀻𑀭𑀧𑀸𑀦𑀫𑀥𑀼𑀲𑀸𑀬𑀦𑀸𑀤𑀻𑀦𑀺𑀧𑀺 𑀲𑀗𑁆𑀕𑀡𑁆𑀳𑀸𑀢𑀺. 𑀧𑀓𑀸𑀭𑁂𑀳𑀺 𑀤𑀺𑀝𑁆𑀞𑀸𑀤𑀻𑀳𑀺 𑀯𑀸𑀭𑁂𑀢𑀺 𑀓𑀸𑀬𑀓𑀫𑁆𑀫𑀸𑀤𑀺𑀓𑁂 𑀲𑀭𑀸𑀧𑁂𑀢𑀺 𑀕𑀸𑀭𑀬𑁆𑀳𑁂 𑀓𑀭𑁄𑀢𑀺 𑀏𑀢𑀸𑀬𑀸𑀢𑀺 𑀧𑀯𑀸𑀭𑀡𑀸, 𑀧𑀝𑀺𑀧𑀢𑁆𑀢𑀺𑀯𑀺𑀲𑁄𑀥𑀦𑀸𑀬 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀯𑀚𑁆𑀚𑀲𑁄𑀥𑀦𑀸𑀬 𑀑𑀓𑀸𑀲𑀤𑀸𑀦𑀁. 𑀬𑀲𑁆𑀫𑀸 𑀬𑁂𑀪𑀼𑀬𑁆𑀬𑁂𑀦 𑀯𑀲𑁆𑀲𑀁𑀯𑀼𑀝𑁆𑀞𑁂𑀳𑀺 𑀓𑀸𑀢𑀩𑁆𑀩𑀸 𑀏𑀲𑀸 𑀯𑀺𑀲𑀼𑀤𑁆𑀥𑀺𑀤𑁂𑀲𑀦𑀸, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀯𑀲𑁆𑀲𑀁𑀯𑀼𑀝𑁆𑀞𑀧𑀯𑀸𑀭𑀡𑀸𑀬. 𑀯𑀺𑀲𑀼𑀤𑁆𑀥𑀺𑀧𑀯𑀸𑀭𑀡𑀸𑀢𑀺𑀧𑀺 𑀏𑀢𑀺𑀲𑁆𑀲𑀸𑀯 𑀦𑀸𑀫’’𑀦𑁆𑀢𑀺. 𑀢𑀤𑀸 𑀢𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀢𑀼𑀡𑁆𑀳𑀻𑀪𑀸𑀯𑀲𑁆𑀲 𑀅𑀦𑀯𑀲𑁂𑀲𑀢𑀸𑀬𑀧𑀺 𑀯𑀡𑁆𑀡𑀁 𑀤𑀲𑁆𑀲𑁂𑀢𑀼𑀁 𑀧𑀸𑀴𑀺𑀬𑀁 ‘‘𑀢𑀼𑀡𑁆𑀳𑀻𑀪𑀽𑀢’’𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀬𑀢𑁄 𑀬𑀢𑁄…𑀧𑁂…𑀦𑀢𑁆𑀣𑀻’’𑀢𑀺. 𑀳𑀢𑁆𑀣𑀲𑁆𑀲 𑀓𑀼𑀓𑁆𑀓𑀼𑀘𑁆𑀘𑀢𑀸 𑀅𑀲𑀁𑀬𑀫𑁄 𑀅𑀲𑀫𑁆𑀧𑀚𑀜𑁆𑀜𑀓𑀺𑀭𑀺𑀬𑀸 𑀳𑀢𑁆𑀣𑀓𑀼𑀓𑁆𑀓𑀼𑀘𑁆𑀘𑀁. 𑀢𑀣𑀸 𑀧𑀸𑀤𑀓𑀼𑀓𑁆𑀓𑀼𑀘𑁆𑀘𑀁 𑀯𑁂𑀤𑀺𑀢𑀩𑁆𑀩𑀁, 𑀯𑀸-𑀲𑀤𑁆𑀤𑁄 𑀅𑀯𑀼𑀢𑁆𑀢𑀯𑀺𑀓𑀧𑁆𑀧𑀢𑁆𑀣𑁄, 𑀢𑁂𑀦 𑀢𑀤𑀜𑁆𑀜𑁂𑀲𑀫𑀪𑀸𑀯𑁄 𑀯𑀺𑀪𑀸𑀯𑀺𑀢𑁄𑀢𑀺 𑀤𑀝𑁆𑀞𑀩𑁆𑀩𑀁.

𑀧𑀜𑁆𑀘𑀧𑀲𑀸𑀤𑁂𑀳𑀻𑀢𑀺 𑀧𑀜𑁆𑀘𑀯𑀡𑁆𑀡𑁂𑀳𑀺 𑀧𑀲𑀸𑀤𑁂𑀳𑀺. 𑀯𑁄𑀲𑁆𑀲𑀕𑁆𑀕𑀢𑁆𑀣𑁄 𑀬𑀣𑀸𑀭𑀼𑀘𑀺 𑀓𑀺𑀭𑀺𑀬𑀸𑀬 𑀯𑁄𑀲𑁆𑀲𑀚𑁆𑀚𑀦𑀁. 𑀧𑀼𑀘𑁆𑀙𑀦𑀢𑁆𑀣𑁂𑀢𑀺 𑀧𑀝𑀺𑀓𑁆𑀔𑁂𑀧𑀫𑀼𑀔𑁂𑀦𑁂𑀯 𑀧𑀼𑀘𑁆𑀙𑀦𑀢𑁆𑀣𑁂 𑀦𑀓𑀸𑀭𑁄, 𑀫𑁂 𑀓𑀺𑀜𑁆𑀘𑀺 𑀓𑀺𑀭𑀺𑀬𑀁 𑀯𑀸 𑀯𑀸𑀘𑀲𑀺𑀓𑀁 𑀯𑀸 𑀦 𑀕𑀭𑀳𑀣, 𑀓𑀺𑀁 𑀦𑀼 𑀕𑀭𑀳𑀣 𑀓𑀸𑀬𑀯𑀸𑀘𑀸𑀳𑀻𑀢𑀺 𑀅𑀢𑁆𑀣𑁄. 𑀓𑁂𑀘𑀺 ‘‘𑀤𑁆𑀯𑀸𑀭𑀸𑀦𑁂𑀯𑀸’’𑀢𑀺 𑀤𑁆𑀯𑀸𑀭𑀲𑀻𑀲𑁂𑀦 𑀤𑁆𑀯𑀸𑀭𑀧𑁆𑀧𑀯𑀢𑁆𑀢𑀘𑀭𑀺𑀬𑀁 𑀯𑀤𑀦𑁆𑀢𑀺. 𑀯𑀺𑀲𑀼𑀤𑁆𑀥𑀺𑀧𑀯𑀸𑀭𑀡𑀸𑀬 𑀅𑀥𑀺𑀧𑁆𑀧𑁂𑀢𑀢𑁆𑀢𑀸 𑀬𑁂𑀦 𑀧𑀯𑀸𑀭𑀺𑀢𑀁, 𑀢𑁂𑀦𑁂𑀯 𑀯𑀺𑀲𑀼𑀤𑁆𑀥𑀻𑀢𑀺 𑀜𑀸𑀬𑀢𑀺, 𑀬𑁂𑀦 𑀦 𑀧𑀯𑀸𑀭𑀺𑀢𑀁. 𑀓𑀺𑀁 𑀦𑀼 𑀢𑀁 𑀅𑀯𑀺𑀲𑀼𑀤𑁆𑀥𑀦𑁆𑀢𑀺 𑀲𑀺𑀬𑀸 𑀓𑀲𑁆𑀲𑀘𑀺 𑀧𑀼𑀣𑀼𑀚𑁆𑀚𑀦𑀲𑁆𑀲 𑀆𑀲𑀗𑁆𑀓𑀸? 𑀢𑀦𑁆𑀦𑀺𑀯𑀸𑀭𑀡𑀢𑁆𑀣𑀫𑀸𑀳 ‘‘𑀦𑁄 𑀅𑀧𑀭𑀺𑀲𑀼𑀤𑁆𑀥𑀢𑁆𑀢𑀸’’𑀢𑀺. 𑀫𑀦𑁄𑀤𑁆𑀯𑀸𑀭𑀁 𑀧𑀭𑀺𑀲𑀼𑀤𑁆𑀥𑀁 𑀅𑀲𑀼𑀘𑀺𑀓𑀸𑀭𑀓𑀉𑀧𑀓𑁆𑀓𑀺𑀮𑁂𑀲𑀸𑀦𑀁 𑀤𑀽𑀭𑀻𑀓𑀢𑀢𑁆𑀢𑀸. 𑀇𑀤𑀸𑀦𑀺 𑀏𑀢𑀭𑀳𑀺 𑀩𑀼𑀤𑁆𑀥𑀓𑀸𑀮𑁂. 𑀏𑀢𑁆𑀣𑀸𑀢𑀺 𑀫𑀦𑁄𑀤𑁆𑀯𑀸𑀭𑀧𑀭𑀺𑀲𑀼𑀤𑁆𑀥𑀺𑀬𑀁.

𑀓𑀸𑀬𑀯𑀘𑀻𑀲𑀫𑀸𑀘𑀸𑀭𑀧𑀭𑀺𑀲𑀼𑀤𑁆𑀥𑀺𑀬𑀸 𑀧𑀯𑁂𑀤𑀺𑀢𑀸𑀬 𑀫𑀦𑁄𑀲𑀫𑀸𑀘𑀸𑀭𑀧𑀭𑀺𑀲𑀼𑀤𑁆𑀥𑀺 𑀅𑀢𑁆𑀣𑀢𑁄 𑀧𑀯𑁂𑀤𑀺𑀢𑀸𑀯 𑀳𑁄𑀢𑀻𑀢𑀺 ‘‘𑀓𑀸𑀬𑀺𑀓𑀁 𑀯𑀸 𑀯𑀸𑀘𑀲𑀺𑀓𑀁 𑀯𑀸’’𑀇𑀘𑁆𑀘𑁂𑀯𑀸𑀳. 𑀢𑀣𑀸 𑀳𑀺 𑀯𑀼𑀢𑁆𑀢𑀁 ‘‘𑀓𑀸𑀬𑀺𑀓𑀁 𑀯𑀸 𑀯𑀸𑀘𑀲𑀺𑀓𑀁 𑀯𑀸𑀢𑀺 𑀇𑀤𑀁 𑀘𑀢𑀼𑀦𑁆𑀦𑀁 𑀅𑀭𑀓𑁆𑀔𑀺𑀬𑀢𑀁 𑀲𑀦𑁆𑀥𑀸𑀬 𑀣𑁂𑀭𑁄 𑀆𑀳𑀸’’𑀢𑀺. ‘‘𑀪𑀺𑀓𑁆𑀔𑀯𑁂, 𑀧𑀯𑀸𑀭𑁂𑀫𑀺 𑀯𑁄’’𑀢𑀺 𑀪𑀺𑀓𑁆𑀔𑀼𑀲𑀗𑁆𑀖𑀯𑀺𑀲𑀬𑀢𑁆𑀢𑀸 𑀧𑀯𑀸𑀭𑀡𑀸𑀬 𑀢𑀢𑁆𑀣 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀯𑀢𑁆𑀢𑀩𑁆𑀩𑀁 𑀧𑀝𑀺𑀯𑀘𑀦𑀁 𑀤𑁂𑀦𑁆𑀢𑁄 𑀥𑀫𑁆𑀫𑀲𑁂𑀦𑀸𑀧𑀢𑀺 ‘‘𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀪𑀸𑀭𑀁 𑀯𑀳𑀦𑁆𑀢𑁄’’𑀢𑀺 𑀯𑀼𑀢𑁆𑀢𑁄. 𑀢𑁂𑀦𑀸𑀳 ‘‘𑀦 𑀔𑁄 𑀫𑀬𑀁, 𑀪𑀦𑁆𑀢𑁂’’𑀢𑀺𑀆𑀤𑀺. 𑀅𑀭𑀓𑁆𑀔𑀺𑀬𑀸𑀦𑀻𑀢𑀺 𑀧𑀭𑀸𑀦𑀼𑀯𑀸𑀤𑀢𑁄 𑀦 𑀪𑀸𑀬𑀺𑀢𑀩𑁆𑀩𑀸𑀦𑀺 𑀲𑀼𑀧𑀭𑀺𑀲𑀼𑀤𑁆𑀥𑀪𑀸𑀯𑀢𑁄.

‘‘𑀅𑀦𑀼𑀧𑁆𑀧𑀦𑁆𑀦𑀲𑁆𑀲𑀸’’𑀢𑀺 𑀇𑀤𑀁 𑀅𑀥𑀺𑀧𑁆𑀧𑀸𑀬𑀺𑀓𑀯𑀘𑀦𑀦𑁆𑀢𑀺 𑀢𑀤𑀥𑀺𑀧𑁆𑀧𑀸𑀬𑀁 𑀯𑀺𑀯𑀭𑀦𑁆𑀢𑁄 ‘‘𑀓𑀲𑁆𑀲𑀧𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀢𑁄 𑀧𑀝𑁆𑀞𑀸𑀬𑀸’’𑀢𑀺𑀆𑀤𑀺𑀫𑀸𑀳. 𑀓𑀲𑁆𑀲𑀧𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀢𑁄𑀢𑀺 𑀯𑀺𑀪𑀢𑁆𑀢𑁂 𑀦𑀺𑀲𑁆𑀲𑀓𑁆𑀓𑀁, 𑀢𑀲𑁆𑀫𑀸 𑀓𑀲𑁆𑀲𑀧𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀢𑁄 𑀑𑀭𑀦𑁆𑀢𑀺 𑀅𑀢𑁆𑀣𑁄𑀢𑀺. 𑀅𑀜𑁆𑀜𑁂𑀦𑀸𑀢𑀺 𑀇𑀢𑁄 𑀪𑀕𑀯𑀢𑁄 𑀅𑀜𑁆𑀜𑁂𑀦. 𑀅𑀦𑀼𑀧𑁆𑀧𑀸𑀤𑀺𑀢𑀧𑀼𑀩𑁆𑀩𑀲𑁆𑀲𑀸𑀢𑀺 𑀧𑀭𑀲𑀦𑁆𑀢𑀸𑀦𑁂 𑀦 𑀉𑀧𑁆𑀧𑀸𑀤𑀺𑀢𑀧𑀼𑀩𑁆𑀩𑀲𑁆𑀲. 𑀲𑀲𑀦𑁆𑀢𑀸𑀦𑁂 𑀧𑀦 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀯𑀲𑁂𑀦 𑀦 𑀉𑀧𑁆𑀧𑀸𑀤𑀺𑀢𑁄𑀢𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀲𑀫𑀦𑀼𑀆𑀕𑀢𑀸𑀢𑀺 𑀲𑀫𑁆𑀫𑀸 𑀅𑀦𑀼 𑀉𑀧𑀕𑀢𑀸. 𑀪𑀕𑀯𑀢𑁄 𑀲𑀻𑀮𑀸𑀤𑀬𑁄 𑀕𑀼𑀡𑀸𑀢𑀺 𑀩𑀼𑀤𑁆𑀥𑀪𑀽𑀢𑀲𑁆𑀲 𑀕𑀼𑀡𑀸 𑀅𑀥𑀺𑀧𑁆𑀧𑁂𑀢𑀸𑀢𑀺 𑀆𑀳 ‘‘𑀅𑀭𑀳𑀢𑁆𑀢𑀫𑀕𑁆𑀕𑀫𑁂𑀯 𑀦𑀺𑀲𑁆𑀲𑀸𑀬 𑀆𑀕𑀢𑀸’’𑀢𑀺. 𑀲𑀩𑁆𑀩𑀕𑀼𑀡𑀸𑀢𑀺 𑀤𑀲𑀩𑀮𑀜𑀸𑀡𑀸𑀤𑀬𑁄 𑀲𑀩𑁆𑀩𑁂 𑀩𑀼𑀤𑁆𑀥𑀕𑀼𑀡𑀸. 𑀪𑀦𑁆𑀢𑁂𑀢𑀺 𑀏𑀢𑁆𑀣 𑀇𑀢𑀺𑀲𑀤𑁆𑀤𑁄 𑀆𑀤𑀺𑀅𑀢𑁆𑀣𑁄. 𑀢𑁂𑀦 ‘‘𑀇𑀫𑁂𑀲𑀁 𑀧𑀦…𑀧𑁂… 𑀯𑀸𑀘𑀲𑀺𑀓𑀁 𑀯𑀸’’𑀢𑀺 𑀬𑀸𑀯𑀸𑀬𑀁 𑀧𑀸𑀴𑀺𑀧𑀤𑁂𑀲𑁄, 𑀢𑀁 𑀲𑀩𑁆𑀩𑀁 𑀕𑀡𑁆𑀳𑀸𑀢𑀺. 𑀢𑁂𑀦𑀸𑀳 ‘‘𑀇𑀤𑀁 𑀣𑁂𑀭𑁄…𑀧𑁂… 𑀧𑀯𑀸𑀭𑁂𑀦𑁆𑀢𑁄 𑀆𑀳𑀸’’𑀢𑀺.

𑀬𑀁 𑀅𑀢𑁆𑀢𑀦𑁄 𑀧𑀼𑀜𑁆𑀜𑀸𑀦𑀼𑀪𑀸𑀯𑀲𑀺𑀤𑁆𑀥𑀁 𑀘𑀓𑁆𑀓𑀭𑀢𑀦𑀁 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀢𑁂𑀦 𑀧𑀯𑀢𑁆𑀢𑀺𑀢𑀁 𑀦𑀸𑀫, 𑀦 𑀇𑀢𑀭𑀦𑁆𑀢𑀺 𑀧𑀞𑀫𑀦𑀬𑁄 𑀯𑀼𑀢𑁆𑀢𑁄. 𑀬𑀲𑁆𑀫𑀸 𑀧𑀯𑀢𑁆𑀢𑀺𑀢𑀲𑁆𑀲𑁂𑀯 𑀅𑀦𑀼𑀧𑀯𑀢𑁆𑀢𑀦𑀁, 𑀧𑀞𑀫𑀦𑀬𑁄 𑀘 𑀢𑀁𑀲𑀤𑀺𑀲𑁂 𑀢𑀩𑁆𑀩𑁄𑀳𑀸𑀭𑀯𑀲𑁂𑀦 𑀯𑀼𑀢𑁆𑀢𑁄𑀢𑀺 𑀢𑀁 𑀅𑀦𑀸𑀤𑀺𑀬𑀺𑀢𑁆𑀯𑀸 𑀤𑀼𑀢𑀺𑀬𑀦𑀬𑁄 𑀯𑀼𑀢𑁆𑀢𑁄. 𑀤𑀲𑀯𑀺𑀥𑀦𑁆𑀢𑀺 𑀅𑀦𑁆𑀢𑁄𑀚𑀦𑀲𑁆𑀫𑀺𑀁, 𑀩𑀮𑀓𑀸𑀬𑁂 𑀭𑀓𑁆𑀔𑀸𑀯𑀭𑀡𑀕𑀼𑀢𑁆𑀢𑀺𑀬𑀸 𑀲𑀁𑀯𑀺𑀥𑀸𑀦𑀁, 𑀔𑀢𑁆𑀢𑀺𑀬𑁂𑀲𑀼 𑀅𑀦𑀼𑀬𑀼𑀢𑁆𑀢𑁂𑀲𑀼, 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑁂𑀲𑀼, 𑀦𑁂𑀕𑀫𑀚𑀸𑀦𑀧𑀤𑁂𑀲𑀼, 𑀲𑀫𑀡𑀩𑁆𑀭𑀸𑀳𑁆𑀫𑀡𑁂𑀲𑀼, 𑀫𑀺𑀕𑀧𑀓𑁆𑀔𑀻𑀲𑀼 𑀅𑀥𑀫𑁆𑀫𑀘𑀸𑀭𑀧𑀝𑀺𑀓𑁆𑀔𑁂𑀧𑁄, 𑀅𑀥𑀦𑀸𑀦𑀁 𑀥𑀦𑀸𑀦𑀼𑀧𑁆𑀧𑀤𑀸𑀦𑀁, 𑀲𑀫𑀡𑀩𑁆𑀭𑀸𑀳𑁆𑀫𑀡𑁂 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀳𑀧𑀼𑀘𑁆𑀙𑀦𑀦𑁆𑀢𑀺 𑀏𑀯𑀁 𑀤𑀲𑀯𑀺𑀥𑀁. 𑀢𑀢𑁆𑀣 𑀕𑀳𑀧𑀢𑀺𑀓𑁂 𑀧𑀓𑁆𑀔𑀺𑀚𑀸𑀢𑁂 𑀘 𑀯𑀺𑀲𑀼𑀁 𑀓𑀢𑁆𑀯𑀸 𑀕𑀳𑀡𑀯𑀲𑁂𑀦 𑀤𑁆𑀯𑀸𑀤𑀲𑀯𑀺𑀥𑀁. 𑀘𑀓𑁆𑀓𑀯𑀢𑁆𑀢𑀺𑀯𑀢𑁆𑀢𑀦𑁆𑀢𑀺 𑀘𑀓𑁆𑀓𑀯𑀢𑁆𑀢𑀺𑀪𑀸𑀯𑀸𑀯𑀳𑀁 𑀯𑀢𑁆𑀢𑀁. 𑀬𑀲𑁆𑀫𑀸 𑀬𑀸𑀣𑀸𑀯𑀢𑁄 𑀧𑀯𑀢𑁆𑀢𑀺𑀢𑀁, 𑀢𑀤𑀦𑀼𑀭𑀽𑀧𑀓𑀁 𑀧𑀦 𑀜𑀸𑀬𑁂𑀦 𑀬𑀼𑀢𑁆𑀢𑀓𑁂𑀦 𑀧𑀯𑀢𑁆𑀢𑀺𑀢𑀁 𑀦𑀸𑀫 𑀳𑁄𑀢𑀻𑀢𑀺 𑀆𑀳 ‘‘𑀲𑀫𑁆𑀫𑀸 𑀦𑀬𑁂𑀦 𑀳𑁂𑀢𑀼𑀦𑀸 𑀓𑀸𑀭𑀡𑁂𑀦𑀸’’𑀢𑀺. 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑀸𑀢𑀺 𑀉𑀪𑀬𑀪𑀸𑀕𑁂𑀳𑀺 𑀉𑀪𑀬𑀪𑀸𑀕𑀢𑁄 𑀯𑀺𑀫𑀼𑀢𑁆𑀢𑀸𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄𑀢𑀺 𑀤𑀲𑁆𑀲𑁂𑀢𑀺 ‘‘𑀤𑁆𑀯𑀻𑀳𑀺 𑀪𑀸𑀕𑁂𑀳𑀺 𑀯𑀺𑀫𑀼𑀢𑁆𑀢𑀸, 𑀅𑀭𑀽𑀧𑀸…𑀧𑁂… 𑀦𑀸𑀫𑀓𑀸𑀬𑀢𑁄’’𑀢𑀺 𑀇𑀫𑀺𑀦𑀸. 𑀢𑁂𑀯𑀺𑀚𑁆𑀚𑀸𑀤𑀺𑀪𑀸𑀯𑀦𑁆𑀢𑀺 𑀢𑁂𑀯𑀺𑀚𑁆𑀚𑀙𑀴𑀪𑀺𑀜𑁆𑀜𑀘𑀢𑀼𑀧𑁆𑀧𑀝𑀺𑀲𑀫𑁆𑀪𑀺𑀤𑀪𑀸𑀯𑀁. 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀸 𑀳𑀺 𑀢𑀁 𑀢𑀺𑀯𑀺𑀥𑀁 𑀅𑀧𑁆𑀧𑀢𑁆𑀢𑀸 𑀓𑁂𑀯𑀮𑀁 𑀧𑀜𑁆𑀜𑀸𑀬 𑀏𑀯 𑀯𑀺𑀫𑀼𑀢𑁆𑀢𑀸.

𑀯𑀺𑀲𑀼𑀤𑁆𑀥𑀢𑁆𑀣𑀸𑀬𑀸𑀢𑀺 𑀯𑀺𑀲𑀼𑀤𑁆𑀥𑀺𑀧𑀯𑀸𑀭𑀡𑀢𑁆𑀣𑀸𑀬. 𑀲𑀁𑀬𑁄𑀚𑀦𑀝𑁆𑀞𑁂𑀦 𑀲𑀁𑀬𑁄𑀚𑀦𑀲𑀗𑁆𑀔𑀸𑀢𑁂 𑀘𑁂𑀯 𑀩𑀦𑁆𑀥𑀦𑀝𑁆𑀞𑁂𑀦 𑀩𑀦𑁆𑀥𑀦𑀲𑀗𑁆𑀔𑀸𑀢𑁂 𑀘. 𑀯𑀺𑀚𑀺𑀢𑀲𑀗𑁆𑀕𑀸𑀫𑀦𑁆𑀢𑀺 𑀬𑀣𑀸 𑀭𑀸𑀕𑀸𑀤𑀬𑁄 𑀧𑀼𑀦 𑀦 𑀲𑀻𑀲𑀁 𑀉𑀓𑁆𑀔𑀺𑀧𑀦𑁆𑀢𑀺, 𑀏𑀯𑀁 𑀅𑀭𑀺𑀬𑀫𑀕𑁆𑀕𑀲𑁂𑀦𑀸𑀬 𑀯𑀲𑁂𑀦 𑀯𑀺𑀚𑀺𑀢𑀲𑀗𑁆𑀕𑀸𑀫𑀁. 𑀢𑁂𑀦𑀸𑀳 ‘‘𑀯𑀺𑀚𑀺𑀢𑀭𑀸𑀕𑀤𑁄𑀲𑀫𑁄𑀳𑀲𑀗𑁆𑀕𑀸𑀫’’𑀦𑁆𑀢𑀺. 𑀫𑀸𑀭𑀩𑀮𑀲𑁆𑀲𑀸𑀢𑀺 𑀫𑀸𑀭𑀲𑁂𑀦𑀸𑀬, 𑀫𑀸𑀭𑀲𑁆𑀲 𑀯𑀸 𑀲𑀸𑀫𑀢𑁆𑀣𑀺𑀬𑀲𑁆𑀲. 𑀯𑁂𑀦𑁂𑀬𑁆𑀬𑀲𑀢𑁆𑀣𑀦𑁆𑀢𑀺 𑀯𑀺𑀦𑁂𑀢𑀩𑁆𑀩𑀚𑀦𑀲𑀫𑀽𑀳𑀁. 𑀲𑀓𑀝𑀸𑀤𑀺𑀲𑀢𑁆𑀣𑀲𑀪𑀸𑀕𑀢𑁄 𑀯𑀺𑀦𑁂𑀬𑁆𑀬𑁄𑀯 𑀲𑀢𑁆𑀣𑁄𑀢𑀺 𑀢𑀁 𑀯𑁂𑀦𑁂𑀬𑁆𑀬𑀲𑀢𑁆𑀣𑀁. 𑀲𑀻𑀮𑀲𑀸𑀭𑀸𑀤𑀺𑀅𑀪𑀸𑀯𑀢𑁄 𑀅𑀦𑁆𑀢𑁄𑀢𑀼𑀘𑁆𑀙𑁄.

𑀧𑀯𑀸𑀭𑀡𑀸𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀧𑀭𑁄𑀲𑀳𑀲𑁆𑀲𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁧𑁬. 𑀲𑀳𑀲𑁆𑀲𑀢𑁄 𑀧𑀭𑀁 𑀅𑀟𑁆𑀠𑀢𑁂𑀬𑁆𑀬𑀪𑀺𑀓𑁆𑀔𑀼𑀲𑀢𑀁 𑀢𑀤𑀸 𑀪𑀕𑀯𑀦𑁆𑀢𑀁 𑀧𑀬𑀺𑀭𑀼𑀧𑀸𑀲𑀢𑀻𑀢𑀺 𑀆𑀳 ‘‘𑀧𑀭𑁄𑀲𑀳𑀲𑁆𑀲𑀦𑁆𑀢𑀺 𑀅𑀢𑀺𑀭𑁂𑀓𑀲𑀳𑀲𑁆𑀲’’𑀦𑁆𑀢𑀺. 𑀦𑀺𑀩𑁆𑀩𑀸𑀦𑁂 𑀓𑀼𑀢𑁄𑀘𑀺 𑀪𑀬𑀁 𑀦𑀢𑁆𑀣𑀻𑀢𑀺 𑀓𑀼𑀢𑁄𑀘𑀺𑀧𑀺 𑀓𑀸𑀭𑀡𑀢𑁄 𑀦𑀺𑀩𑁆𑀩𑀸𑀦𑁂 𑀪𑀬𑀁 𑀦𑀢𑁆𑀣𑀺 𑀅𑀲𑀗𑁆𑀔𑀢𑀪𑀸𑀯𑁂𑀦 𑀲𑀩𑁆𑀩𑀲𑁄 𑀔𑁂𑀫𑀢𑁆𑀢𑀸. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀔𑁂𑀫𑀜𑁆𑀘 𑀯𑁄, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀸𑀫𑀺 𑀔𑁂𑀫𑀕𑀸𑀫𑀺𑀦𑀺𑀜𑁆𑀘 𑀧𑀝𑀺𑀧𑀤’’𑀦𑁆𑀢𑀺𑀆𑀤𑀺 (𑀲𑀁. 𑀦𑀺. 𑁪.𑁩𑁭𑁯-𑁪𑁦𑁮). 𑀦 𑀓𑀼𑀢𑁄𑀘𑀺 𑀪𑀬𑀁 𑀏𑀢𑀲𑁆𑀫𑀺𑀁 𑀅𑀥𑀺𑀕𑀢𑁂𑀢𑀺 𑀅𑀓𑀼𑀢𑁄𑀪𑀬𑀁, 𑀦𑀺𑀩𑁆𑀩𑀸𑀦𑀁. 𑀢𑁂𑀦𑀸𑀳 ‘‘𑀦𑀺𑀩𑁆𑀩𑀸𑀦𑀧𑁆𑀧𑀢𑁆𑀢𑀲𑁆𑀲𑀸’’𑀢𑀺𑀆𑀤𑀺. 𑀯𑀺𑀧𑀲𑁆𑀲𑀺𑀢𑁄 𑀧𑀝𑁆𑀞𑀸𑀬𑀸𑀢𑀺 𑀅𑀫𑁆𑀳𑀸𑀓𑀁 𑀪𑀕𑀯𑀢𑁄 𑀦𑀸𑀫𑀯𑀲𑁂𑀦 𑀇𑀲𑀻𑀦𑀁 𑀲𑀢𑁆𑀢𑀫𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀢𑁂 𑀳𑀺 𑀢𑀢𑁆𑀣 𑀢𑀢𑁆𑀣 𑀲𑀼𑀢𑁆𑀢𑁂 𑀩𑀳𑀼𑀲𑁄 𑀓𑀺𑀢𑁆𑀢𑀺𑀢𑀸. 𑀇𑀲𑀻𑀦𑀦𑁆𑀢𑀺 𑀯𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑀸𑀯𑀓𑀩𑀸𑀳𑀺𑀭𑀓𑀇𑀲𑀻𑀦𑀁 𑀲𑀢𑁆𑀢𑀫𑁄 𑀉𑀢𑁆𑀢𑀭𑁄 𑀲𑁂𑀝𑁆𑀞𑁄𑀢𑀺 𑀅𑀢𑁆𑀣𑁄.

𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀯𑀲𑁂𑀦𑀸𑀢𑀺 𑀓𑀸𑀭𑀡𑀲𑀫𑀼𑀝𑁆𑀞𑀸𑀦𑀯𑀲𑁂𑀦. 𑀢𑀤𑀲𑁆𑀲 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀁 𑀯𑀺𑀪𑀸𑀯𑁂𑀢𑀼𑀁 ‘‘𑀲𑀗𑁆𑀖𑀫𑀚𑁆𑀛𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀝𑀺𑀪𑀸𑀦𑀲𑀫𑁆𑀧𑀦𑁆𑀦𑀯𑀸𑀘𑀸𑀬 𑀅𑀜𑁆𑀜𑁂 𑀈𑀲𑀢𑀺 𑀅𑀪𑀺𑀪𑀯𑀢𑀻𑀢𑀺 𑀯𑀗𑁆𑀕𑀻𑀲𑁄. 𑀢𑁂𑀦𑀸𑀳 ‘‘𑀧𑀝𑀺𑀪𑀸𑀦𑀲𑀫𑁆𑀧𑀢𑁆𑀢𑀺’’𑀦𑁆𑀢𑀺𑀆𑀤𑀺.

𑀓𑀺𑀮𑁂𑀲𑀼𑀫𑁆𑀫𑀼𑀚𑁆𑀚𑀦𑀲𑀢𑀸𑀦𑀻𑀢𑀺 𑀭𑀸𑀕𑀸𑀤𑀺𑀓𑀺𑀮𑁂𑀲𑀸𑀦𑀁 𑀭𑀚𑁆𑀚𑀦𑀤𑀼𑀲𑁆𑀲𑀦𑀸𑀤𑀺𑀦𑀬𑁂𑀳𑀺 𑀲𑀯𑀺𑀲𑀬𑁂 𑀅𑀬𑁄𑀦𑀺𑀲𑁄 𑀉𑀝𑁆𑀞𑀸𑀦𑀸𑀦𑀺. 𑀬𑀤𑀺 𑀅𑀦𑁂𑀓𑀸𑀦𑀺 𑀲𑀢𑀸𑀦𑀺, 𑀅𑀣 𑀓𑀲𑁆𑀫𑀸 ‘‘𑀉𑀫𑁆𑀫𑀕𑁆𑀕𑀧𑀣’’𑀦𑁆𑀢𑀺? 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀯𑀝𑁆𑀝𑀧𑀣𑀢𑁆𑀢𑀸 𑀧𑀦 𑀧𑀣’’𑀦𑁆𑀢𑀺. 𑀭𑀸𑀕𑀤𑁄𑀲𑀫𑁄𑀳𑀫𑀸𑀦𑀤𑀺𑀝𑁆𑀞𑀺𑀯𑀲𑁂𑀦 𑀭𑀸𑀕𑀔𑀺𑀮𑀸𑀤𑀻𑀦𑀺 𑀧𑀜𑁆𑀘𑀔𑀺𑀮𑀸𑀦𑀺. 𑀯𑀺𑀪𑀚𑀦𑁆𑀢𑀦𑁆𑀢𑀺 𑀯𑀺𑀪𑀚𑀦𑀯𑀲𑁂𑀦 𑀓𑀣𑁂𑀦𑁆𑀢𑀁. 𑀯𑀺𑀪𑀚𑀺𑀢𑁆𑀯𑀸𑀢𑀺 𑀜𑀸𑀡𑁂𑀦 𑀯𑀺𑀯𑁂𑀘𑁂𑀢𑁆𑀯𑀸.

𑀅𑀫𑀢𑁂 𑀅𑀓𑁆𑀔𑀸𑀢𑁂𑀢𑀺 𑀅𑀫𑀢𑀸𑀯𑀳𑁂 𑀥𑀫𑁆𑀫𑁂 𑀤𑁂𑀲𑀺𑀢𑁂. 𑀥𑀫𑁆𑀫𑀲𑁆𑀲 𑀧𑀲𑁆𑀲𑀺𑀢𑀸𑀭𑁄 𑀲𑀘𑁆𑀘𑀲𑀫𑁆𑀧𑀝𑀺𑀯𑁂𑀥𑁂𑀦. 𑀅𑀲𑀁𑀳𑀻𑀭𑀸 𑀤𑀺𑀝𑁆𑀞𑀺𑀯𑀸𑀢𑁂𑀳𑀺.

𑀅𑀢𑀺𑀯𑀺𑀚𑁆𑀛𑀺𑀢𑁆𑀯𑀸𑀢𑀺 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸. 𑀅𑀢𑀺𑀓𑁆𑀓𑀫𑀪𑀽𑀢𑀦𑁆𑀢𑀺 𑀅𑀢𑀺𑀓𑁆𑀓𑀫𑀦𑀝𑁆𑀞𑁂𑀦 𑀪𑀽𑀢𑀁. 𑀤𑀲𑀤𑁆𑀥𑀸𑀦𑀦𑁆𑀢𑀺 𑀤𑀲𑀦𑁆𑀦𑀁 𑀉𑀧𑀟𑁆𑀠𑀸𑀦𑀁. 𑀢𑁂𑀦𑀸𑀳 ‘‘𑀧𑀜𑁆𑀘𑀦𑁆𑀦’’𑀦𑁆𑀢𑀺. 𑀚𑀸𑀦𑀦𑁆𑀢𑁂𑀦𑀸𑀢𑀺 𑀥𑀫𑁆𑀫𑀲𑁆𑀲 𑀲𑀼𑀤𑀼𑀮𑁆𑀮𑀪𑀢𑀁 𑀚𑀸𑀦𑀦𑁆𑀢𑁂𑀦.

𑀧𑀭𑁄𑀲𑀳𑀲𑁆𑀲𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀓𑁄𑀡𑁆𑀟𑀜𑁆𑀜𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁧𑁭. 𑀏𑀯𑀁𑀕𑀳𑀺𑀢𑀦𑀸𑀫𑁄𑀢𑀺 ‘‘𑀅𑀜𑁆𑀜𑀸𑀲𑀺 𑀯𑀢, 𑀪𑁄, 𑀓𑁄𑀡𑁆𑀟𑀜𑁆𑀜𑁄’’𑀢𑀺 𑀲𑀢𑁆𑀣𑀼 𑀯𑀘𑀦𑀁 𑀦𑀺𑀲𑁆𑀲𑀸𑀬 𑀪𑀺𑀓𑁆𑀔𑀽𑀳𑀺 𑀅𑀜𑁆𑀜𑁂𑀳𑀺 𑀓𑁄𑀡𑁆𑀟𑀜𑁆𑀜𑀦𑀸𑀫𑀓𑁂𑀳𑀺 𑀯𑀺𑀲𑁂𑀲𑀦𑀢𑁆𑀣𑀁 𑀏𑀯𑀁𑀕𑀳𑀺𑀢𑀦𑀸𑀫𑁄. 𑀤𑁆𑀯𑀸𑀤𑀲𑀦𑁆𑀦𑀁 𑀲𑀁𑀯𑀘𑁆𑀙𑀭𑀸𑀦𑀁 𑀯𑀲𑁂𑀦 𑀘𑀺𑀭𑀲𑁆𑀲𑀁. 𑀙𑀤𑁆𑀤𑀦𑁆𑀢𑀪𑀯𑀦𑁂𑀢𑀺 𑀙𑀤𑁆𑀤𑀦𑁆𑀢𑀦𑀸𑀕𑀭𑀸𑀚𑀪𑀯𑀦𑀝𑁆𑀞𑀸𑀦𑁂. 𑀧𑀜𑁆𑀜𑀯𑀸 𑀫𑀳𑀸𑀲𑀸𑀯𑀓𑁄 𑀭𑀢𑁆𑀢𑀜𑁆𑀜𑀼𑀢𑀸𑀬. ‘‘𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑁂 𑀤𑁂𑀯𑀫𑀦𑀼𑀲𑁆𑀲𑀸𑀦𑀦𑁆𑀢𑀺 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑁂 𑀤𑁂𑀯𑀸𑀦𑀁, 𑀇𑀫𑀲𑁆𑀫𑀺𑀁 𑀘𑀓𑁆𑀓𑀯𑀸𑀴𑁂 𑀤𑁂𑀯𑀫𑀦𑀼𑀲𑁆𑀲𑀸𑀦𑀜𑁆𑀘𑀸𑀢𑀺 𑀏𑀯𑀁 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑁂 𑀤𑁂𑀯𑀫𑀦𑀼𑀲𑁆𑀲𑀸𑀦’’𑀦𑁆𑀢𑀺 𑀯𑀤𑀦𑁆𑀢𑀺. 𑀅𑀕𑁆𑀕𑀦𑁆𑀢𑀺𑀆𑀤𑀺𑀢𑁄. 𑀢𑀢𑁆𑀣𑀸𑀢𑀺 𑀫𑀦𑁆𑀤𑀸𑀓𑀺𑀦𑀺𑀢𑀻𑀭𑁂.

𑀯𑀲𑁆𑀲𑀕𑁆𑀕𑁂𑀦𑀸𑀢𑀺 𑀯𑀲𑁆𑀲𑀧𑀝𑀺𑀧𑀸𑀝𑀺𑀬𑀸. 𑀢𑀦𑁆𑀢𑀺 𑀅𑀜𑁆𑀜𑀸𑀲𑀺𑀓𑁄𑀡𑁆𑀟𑀜𑁆𑀜𑀢𑁆𑀣𑁂𑀭𑀁. 𑀫𑀳𑀸𑀩𑁆𑀭𑀳𑁆𑀫𑀸𑀦𑀁 𑀯𑀺𑀬 𑀮𑁄𑀓𑀺𑀬𑀫𑀦𑀼𑀲𑁆𑀲𑀸 𑀳𑀭𑀸𑀬𑀦𑁆𑀢𑀺. 𑀧𑀸𑀫𑁄𑀓𑁆𑀔𑀪𑀽𑀢𑁄 𑀆𑀬𑀲𑁆𑀫𑀸 𑀣𑁂𑀭𑁄 𑀅𑀦𑁆𑀢𑀭𑀦𑁆𑀢𑀭𑀸 𑀢𑀢𑁆𑀣 𑀢𑀢𑁆𑀣 𑀚𑀦𑀧𑀤𑁂 𑀯𑀲𑀺𑀢𑁆𑀯𑀸 𑀢𑀤𑀦𑀼𑀓𑁆𑀓𑀫𑁂𑀦 𑀫𑀦𑁆𑀤𑀸𑀓𑀺𑀦𑀺𑀢𑀻𑀭𑀁 𑀉𑀧𑀕𑀢𑁄, 𑀢𑀲𑁆𑀫𑀸 𑀯𑀼𑀢𑁆𑀢𑀁 𑁋 ‘‘𑀇𑀘𑁆𑀙𑀸𑀫𑀳𑀁, 𑀪𑀦𑁆𑀢𑁂, 𑀚𑀦𑀧𑀤𑁂 𑀯𑀲𑀺𑀢𑀼’’𑀦𑁆𑀢𑀺.

𑀆𑀦𑀼𑀪𑀸𑀯𑀲𑀫𑁆𑀧𑀦𑁆𑀦𑀸 𑀤𑀺𑀩𑁆𑀩𑀸𑀬𑀼𑀓𑀸 𑀢𑁂 𑀳𑀢𑁆𑀣𑀺𑀦𑀸𑀕𑀸𑀢𑀺 𑀯𑀼𑀢𑁆𑀢𑀁 ‘‘𑀧𑀼𑀩𑁆𑀩𑁂 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀧𑀸𑀭𑀺𑀘𑀭𑀺𑀬𑀸𑀬 𑀓𑀢𑀧𑀭𑀺𑀘𑀬𑀸’’𑀢𑀺. 𑀣𑁂𑀭𑀲𑁆𑀲 𑀲𑀜𑁆𑀘𑀭𑀡𑀝𑁆𑀞𑀸𑀦𑁂 𑀆𑀯𑀭𑀡𑀲𑀸𑀔𑀸 𑀳𑀭𑀺𑀢𑁆𑀯𑀸 𑀅𑀧𑀦𑁂𑀢𑁆𑀯𑀸. 𑀫𑀼𑀔𑁄𑀤𑀓𑀜𑁆𑀘𑁂𑀯 𑀤𑀦𑁆𑀢𑀓𑀝𑁆𑀞𑀜𑁆𑀘 𑀞𑀧𑁂𑀢𑀻𑀢𑀺 𑀲𑀴𑀮𑀤𑁂𑀯𑀤𑀸𑀭𑀼𑀓𑀝𑁆𑀞𑀸𑀤𑀻𑀦𑀺 𑀅𑀜𑁆𑀜𑀫𑀜𑁆𑀜𑀁 𑀖𑀁𑀲𑀺𑀢𑁆𑀯𑀸 𑀅𑀕𑁆𑀕𑀺𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀚𑀸𑀮𑁂𑀢𑁆𑀯𑀸 𑀢𑀢𑁆𑀣 𑀧𑀸𑀲𑀸𑀡𑀔𑀡𑁆𑀟𑀸𑀦𑀺 𑀢𑀸𑀧𑁂𑀢𑁆𑀯𑀸 𑀢𑀸𑀦𑀺 𑀤𑀡𑁆𑀟𑀓𑁂𑀳𑀺 𑀯𑀝𑁆𑀝𑁂𑀢𑁆𑀯𑀸 𑀢𑀴𑀸𑀓𑀸𑀲𑀼 𑀉𑀤𑀓𑀲𑁄𑀡𑁆𑀟𑀻𑀲𑀼 𑀔𑀺𑀧𑀺𑀢𑁆𑀯𑀸 𑀉𑀤𑀓𑀲𑁆𑀲 𑀢𑀢𑁆𑀢𑀪𑀸𑀯𑀁 𑀜𑀢𑁆𑀯𑀸 𑀦𑀸𑀕𑀮𑀢𑀸𑀤𑀦𑁆𑀢𑀓𑀝𑁆𑀞𑀁 𑀉𑀧𑀦𑁂𑀦𑁆𑀢𑁄 𑀫𑀼𑀔𑁄𑀤𑀓𑀜𑁆𑀘 𑀞𑀧𑁂𑀢𑀺. 𑀯𑀢𑁆𑀢𑀁 𑀓𑀭𑁄𑀢𑀻𑀢𑀺 𑀅𑀦𑁆𑀢𑁄𑀓𑀼𑀝𑀺𑀬𑀸 𑀩𑀳𑀺 𑀘 𑀧𑀫𑀼𑀔𑁂𑀧𑀺 𑀅𑀗𑁆𑀕𑀡𑁂𑀧𑀺 𑀲𑀸𑀔𑀸𑀪𑀗𑁆𑀕𑁂𑀳𑀺 𑀲𑀫𑁆𑀫𑀚𑁆𑀚𑀦𑁆𑀢𑁄 𑀯𑀓𑁆𑀔𑀫𑀸𑀦𑀦𑀬𑁂𑀦 𑀆𑀳𑀸𑀭𑀁 𑀉𑀧𑀦𑁂𑀦𑁆𑀢𑁄 𑀯𑀢𑁆𑀢𑀁 𑀓𑀭𑁄𑀢𑀺.

𑀧𑀢𑀺𑀝𑁆𑀞𑀧𑁆𑀧𑀫𑀸𑀡𑁂𑀢𑀺 𑀓𑀝𑀺𑀧𑁆𑀧𑀫𑀸𑀡𑁂, 𑀅𑀬𑀫𑁂𑀯 𑀯𑀸 𑀧𑀸𑀞𑁄 𑀢𑀸𑀯 𑀫𑀳𑀦𑁆𑀢𑀫𑁂𑀯𑀸𑀢𑀺 𑀬𑀸𑀯 𑀫𑀳𑀦𑁆𑀢𑀁 𑀲𑁂𑀢𑀧𑀤𑀼𑀫𑀯𑀦𑀁, 𑀢𑀸𑀯 𑀫𑀳𑀦𑁆𑀢𑀫𑁂𑀯. 𑀏𑀲𑁂𑀯 𑀦𑀬𑁄 𑀭𑀢𑁆𑀢𑀓𑀼𑀫𑀼𑀤𑀯𑀦𑀸𑀤𑀻𑀲𑀼. 𑀔𑀸𑀤𑀦𑁆𑀢𑀸 𑀫𑀦𑀼𑀲𑁆𑀲𑀸. 𑀧𑀓𑁆𑀓𑀧𑀬𑁄𑀖𑀦𑀺𑀓𑀸 𑀯𑀺𑀬𑀸𑀢𑀺 𑀲𑀼𑀧𑀓𑁆𑀓𑀧𑀬𑁄𑀖𑀦𑀁 𑀯𑀺𑀬. 𑀖𑀦𑀪𑀸𑀯𑁂𑀦 𑀧𑀦 𑀧𑀓𑁆𑀔𑀺𑀢𑁆𑀢𑀔𑀼𑀤𑁆𑀤𑀫𑀥𑀼 𑀯𑀺𑀬 𑀳𑁄𑀢𑀺. 𑀢𑁂𑀦𑀸𑀳 ‘‘𑀏𑀢𑀁 𑀧𑁄𑀓𑁆𑀔𑀭𑀫𑀥𑀼 𑀦𑀸𑀫𑀸’’𑀢𑀺. 𑀫𑀼𑀴𑀸𑀮𑀦𑁆𑀢𑀺 𑀲𑁂𑀢𑀧𑀤𑀼𑀫𑀸𑀦𑀁 𑀫𑀽𑀮𑀁. 𑀪𑀺𑀲𑀦𑁆𑀢𑀺 𑀢𑁂𑀲𑀁𑀬𑁂𑀯 𑀓𑀦𑁆𑀤𑀁. 𑀏𑀓𑀲𑁆𑀫𑀺𑀁 𑀧𑀩𑁆𑀩𑁂𑀢𑀺 𑀏𑀓𑁂𑀓𑀲𑁆𑀫𑀺𑀁 𑀧𑀩𑁆𑀩𑀦𑁆𑀢𑀭𑁂. 𑀧𑀸𑀤𑀖𑀝𑀓𑀦𑁆𑀢𑀺 𑀤𑁄𑀡𑀲𑁆𑀲 𑀘𑀢𑀼𑀪𑀸𑀕𑁄 𑀲𑀡𑁆𑀞𑀸𑀦𑀢𑁄 𑀔𑀼𑀤𑁆𑀤𑀓𑁄, 𑀢𑀲𑁆𑀫𑀸 𑀧𑀸𑀤𑀖𑀝𑀓𑀧𑁆𑀧𑀫𑀸𑀡𑀦𑁆𑀢𑀺 𑀢𑀼𑀫𑁆𑀩𑀫𑀢𑁆𑀢𑀁. 𑀲𑁄𑀡𑁆𑀟𑀺𑀆𑀯𑀸𑀝𑁂𑀢𑀺 𑀔𑀼𑀤𑁆𑀤𑀓𑀲𑁄𑀡𑁆𑀟𑀺𑀬𑁄 𑀘𑁂𑀯 𑀔𑀼𑀤𑁆𑀤𑀓𑀆𑀯𑀸𑀝𑁂 𑀘.

𑀏𑀢𑀁 𑀪𑁄𑀚𑀦𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀁 𑀦𑀺𑀭𑀼𑀤𑀓𑀧𑀸𑀬𑀲𑀪𑁄𑀚𑀦𑀁. 𑀓𑁂𑀘𑀺 𑀲𑀜𑁆𑀚𑀸𑀦𑀦𑁆𑀢𑀺 𑀬𑁂 𑀣𑁂𑀭𑀸 𑀯𑀼𑀟𑁆𑀠𑀢𑀭𑀸. 𑀓𑁂𑀘𑀺 𑀦 𑀲𑀜𑁆𑀚𑀸𑀦𑀦𑁆𑀢𑀺 𑀬𑁂 𑀦𑀯𑀸 𑀅𑀘𑀺𑀭𑀧𑀩𑁆𑀩𑀚𑀺𑀢𑀸.

𑀩𑀼𑀤𑁆𑀥𑀸𑀦𑀼𑀩𑀼𑀤𑁆𑀥𑁄𑀢𑀺 𑀩𑀼𑀤𑁆𑀥𑀲𑁆𑀲 𑀅𑀦𑀼𑀩𑀼𑀤𑁆𑀥𑁄. 𑀩𑀸𑀴𑁆𑀳𑀯𑀻𑀭𑀺𑀬𑁄𑀢𑀺 𑀘𑀢𑀼𑀦𑁆𑀦𑀁 𑀲𑀫𑁆𑀫𑀧𑁆𑀧𑀥𑀸𑀦𑀸𑀦𑀁 𑀯𑀲𑁂𑀦 𑀘𑀺𑀭𑀦𑀺𑀘𑀺𑀢𑀯𑀻𑀭𑀺𑀬𑁄. 𑀢𑀺𑀡𑁆𑀡𑀁 𑀯𑀺𑀯𑁂𑀓𑀸𑀦𑀦𑁆𑀢𑀺 𑀓𑀸𑀬𑀘𑀺𑀢𑁆𑀢𑀉𑀧𑀥𑀺𑀯𑀺𑀯𑁂𑀓𑀸𑀦𑀁 𑀮𑀸𑀪𑀻𑀢𑀺 𑀬𑁄𑀚𑀦𑀸. 𑀘𑀢𑀲𑁆𑀲𑁄 𑀯𑀤𑀢𑀺 𑀯𑀗𑁆𑀕𑀻𑀲𑀢𑁆𑀣𑁂𑀭𑁄 𑀲𑀬𑀁𑀧𑀝𑀺𑀪𑀸𑀦𑀁, 𑀦 𑀲𑁂𑀲𑀸𑀪𑀺𑀜𑁆𑀜𑀸𑀦𑀁 𑀅𑀪𑀸𑀯𑀢𑁄𑀢𑀺 𑀆𑀳 ‘‘𑀇𑀢𑀭𑀸’’𑀢𑀺𑀆𑀤𑀺. 𑀧𑀭𑀺𑀲𑀸 𑀲𑀦𑁆𑀦𑀺𑀲𑀻𑀤𑀺 𑀦𑀺𑀲𑁆𑀲𑀤𑁆𑀤𑀪𑀸𑀯𑁂𑀦 𑀢𑀼𑀡𑁆𑀳𑀻 𑀅𑀳𑁄𑀲𑀻𑀢𑀺 𑀅𑀢𑁆𑀣𑁄. 𑀅𑀦𑀼𑀚𑀸𑀦𑀸𑀧𑁂𑀲𑀻𑀢𑀺 𑀧𑀞𑀫𑀁 𑀅𑀢𑁆𑀢𑀦𑀸 𑀜𑀸𑀢𑀁 𑀉𑀧𑀝𑁆𑀞𑀺𑀢𑀁 𑀅𑀢𑁆𑀢𑀦𑁄 𑀧𑀭𑀺𑀦𑀺𑀩𑁆𑀩𑀸𑀦𑀓𑀸𑀮𑀁 𑀅𑀦𑀼 𑀧𑀘𑁆𑀙𑀸 𑀲𑀢𑁆𑀣𑀸𑀭𑀁 𑀚𑀸𑀦𑀸𑀧𑁂𑀲𑀻𑀢𑀺 𑀏𑀯𑀁 𑀏𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀢𑀦𑁆𑀢𑀺 𑀆𑀲𑀸𑀴𑁆𑀳𑀺𑀧𑀼𑀡𑁆𑀡𑀫𑀸𑀬 𑀇𑀲𑀺𑀧𑀢𑀦𑁂 𑀬𑀁 𑀤𑀲𑁆𑀲𑀦𑀁, 𑀬𑀁 𑀯𑀸 𑀤𑀼𑀓𑁆𑀓𑀭𑀘𑀭𑀺𑀬𑀸𑀬𑀁 𑀢𑀼𑀫𑁆𑀳𑀸𑀓𑀁 𑀉𑀧𑀝𑁆𑀞𑀸𑀦𑀁 𑀆𑀤𑀺𑀢𑁄 𑀤𑀲𑁆𑀲𑀦𑀁, 𑀢𑀁, 𑀪𑀦𑁆𑀢𑁂, 𑀧𑀞𑀫𑀤𑀲𑁆𑀲𑀦𑀁. 𑀑𑀦𑀢𑀯𑀺𑀦𑀢𑀸𑀢𑀺 𑀳𑁂𑀝𑁆𑀞𑀸 𑀉𑀧𑀭𑀺 𑀘 𑀑𑀦𑀢𑀸 𑀯𑀺𑀦𑀢𑀸. 𑀓𑀫𑁆𑀧𑁂𑀢𑁆𑀯𑀸𑀢𑀺 𑀣𑁄𑀓𑀁 𑀘𑀸𑀮𑁂𑀢𑁆𑀯𑀸 𑀤𑀲𑁆𑀲𑀦𑀢𑁆𑀣𑀁 𑀏𑀓𑀦𑀺𑀦𑁆𑀦𑀸𑀤𑁄 𑀢𑁂𑀲𑀁 𑀳𑀢𑁆𑀣𑀺𑀦𑀸𑀕𑀸𑀦𑀜𑁆𑀘𑁂𑀯 𑀦𑀸𑀕𑀬𑀓𑁆𑀔𑀓𑀼𑀫𑁆𑀪𑀡𑁆𑀟𑀸𑀦𑀁 𑀤𑁂𑀯𑀢𑀸𑀦𑀜𑁆𑀘 𑀲𑀤𑁆𑀤𑁂𑀦. 𑀩𑁆𑀭𑀳𑁆𑀫𑀸𑀦𑁄 𑀤𑁂𑀯𑀸𑀦𑀁 𑀅𑀤𑀁𑀲𑀽𑀢𑀺 𑀲𑀫𑁆𑀩𑀦𑁆𑀥𑁄.

𑀲𑀚𑁆𑀛𑀸𑀬𑀫𑀓𑀁𑀲𑀼 𑀧𑀲𑀸𑀤𑀦𑀻𑀬𑁂𑀲𑀼 𑀧𑀲𑀸𑀤𑀯𑀲𑁂𑀦 𑀲𑀦𑁆𑀦𑀺𑀧𑀢𑀺𑀢𑀧𑀭𑀺𑀲𑀸𑀬 𑀧𑀲𑀸𑀤𑀚𑀦𑀦𑀢𑁆𑀣𑀁 𑀪𑀕𑀯𑀢𑀺 𑀦𑀺𑀓𑁆𑀔𑀫𑀺𑀢𑁆𑀯𑀸𑀢𑀺 𑀪𑀕𑀯𑀢𑀺 𑀕𑀦𑁆𑀥𑀓𑀼𑀝𑀺𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸. 𑀥𑀭𑀢𑀺𑀬𑁂𑀯𑀸𑀢𑀺 𑀅𑀤𑀼𑀝𑁆𑀞𑀢𑀁 𑀧𑀢𑁆𑀯𑀸 𑀢𑀺𑀝𑁆𑀞𑀢𑁂𑀯.

𑀓𑁄𑀡𑁆𑀟𑀜𑁆𑀜𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀫𑁄𑀕𑁆𑀕𑀮𑁆𑀮𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁧𑁮. 𑀧𑀘𑁆𑀘𑀯𑁂𑀓𑁆𑀔𑀢𑀻𑀢𑀺 𑀢𑁂𑀲𑀁 𑀅𑀭𑀺𑀬𑀸𑀦𑀁 𑀘𑀺𑀢𑁆𑀢𑀁 𑀅𑀢𑁆𑀢𑀦𑁄 𑀜𑀸𑀡𑀘𑀓𑁆𑀔𑀼𑀦𑀸 𑀧𑀢𑀺 𑀅𑀯𑁂𑀓𑁆𑀔𑀢𑀺 𑀧𑀘𑁆𑀘𑀯𑁂𑀓𑁆𑀔𑀢𑀺. 𑀧𑀩𑁆𑀩𑀢𑀲𑁆𑀲𑀸𑀢𑀺 𑀇𑀲𑀺𑀕𑀺𑀮𑀺𑀧𑀩𑁆𑀩𑀢𑀲𑁆𑀲. 𑀤𑀼𑀓𑁆𑀔𑀧𑀸𑀭𑀁 𑀕𑀢𑀦𑁆𑀢𑀺 𑀯𑀝𑁆𑀝𑀤𑀼𑀓𑁆𑀔𑀲𑁆𑀲 𑀧𑀸𑀭𑀁 𑀧𑀭𑀺𑀬𑀦𑁆𑀢𑀁 𑀕𑀢𑀁. 𑀲𑀩𑁆𑀩𑀕𑀼𑀡𑀲𑀫𑁆𑀧𑀦𑁆𑀦𑀦𑁆𑀢𑀺 𑀲𑀩𑁆𑀩𑁂𑀳𑀺 𑀩𑀼𑀤𑁆𑀥𑀕𑀼𑀡𑁂𑀳𑀺 𑀘 𑀲𑀸𑀯𑀓𑀕𑀼𑀡𑁂𑀳𑀺 𑀘 𑀧𑀭𑀺𑀧𑀼𑀡𑁆𑀡𑀁. 𑀅𑀦𑁂𑀓𑀸𑀓𑀸𑀭𑀲𑀫𑁆𑀧𑀦𑁆𑀦𑀦𑁆𑀢𑀺 𑀭𑀽𑀧𑀖𑁄𑀲𑀮𑀽𑀔𑀥𑀫𑁆𑀫𑀧𑁆𑀧𑀫𑀸𑀡𑀺𑀓𑀸𑀦𑀁 𑀲𑀢𑁆𑀢𑀸𑀦𑀁 𑀢𑁂𑀳𑀺 𑀢𑁂𑀳𑀺 𑀆𑀓𑀸𑀭𑁂𑀳𑀺 𑀲𑀩𑁆𑀩𑁂𑀲𑀜𑁆𑀘 𑀅𑀦𑁂𑀓𑁂𑀳𑀺 𑀅𑀦𑀦𑁆𑀢𑀸𑀧𑀭𑀺𑀫𑁂𑀬𑁆𑀬𑁂𑀳𑀺 𑀧𑀲𑀻𑀤𑀺𑀢𑀩𑁆𑀩𑀸𑀓𑀸𑀭𑁂𑀳𑀺 𑀲𑀫𑀦𑁆𑀦𑀸𑀕𑀢𑀁. 𑀢𑁂 𑀧𑀦 𑀆𑀓𑀸𑀭𑀸 𑀬𑀲𑁆𑀫𑀸 𑀅𑀦𑀜𑁆𑀜𑀲𑀸𑀥𑀸𑀭𑀡𑀸 𑀩𑀼𑀤𑁆𑀥𑀕𑀼𑀡𑀸 𑀏𑀯, 𑀢𑀲𑁆𑀫𑀸 𑀆𑀳 ‘‘𑀅𑀦𑁂𑀓𑁂𑀳𑀺 𑀕𑀼𑀡𑁂𑀳𑀺 𑀲𑀫𑀦𑁆𑀦𑀸𑀕𑀢’’𑀦𑁆𑀢𑀺.

𑀫𑁄𑀕𑁆𑀕𑀮𑁆𑀮𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁧. 𑀕𑀕𑁆𑀕𑀭𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁧𑁯. 𑀢𑁂𑀢𑀺 𑀢𑁂 𑀤𑁂𑀯𑀫𑀦𑀼𑀲𑁆𑀲𑁂. ‘‘𑀲𑀭𑀻𑀭𑀯𑀡𑁆𑀡𑁂𑀦𑀸𑀢𑀺 𑀲𑀭𑀻𑀭𑁂 𑀙𑀯𑀺𑀯𑀡𑁆𑀡𑁂𑀦𑀸’’𑀢𑀺 𑀯𑀤𑀦𑁆𑀢𑀺. 𑀲𑀭𑀻𑀭𑀯𑀡𑁆𑀡𑁂𑀦𑀸𑀢𑀺 𑀯𑀸 𑀥𑀫𑁆𑀫𑀭𑀽𑀧𑀓𑀸𑀬𑀕𑀼𑀡𑁂𑀦. ‘‘𑀬𑀲𑀲𑀸’’𑀢𑀺𑀧𑀺 𑀧𑀸𑀞𑁄, 𑀲𑁄 𑀏𑀯𑀢𑁆𑀣𑁄. 𑀯𑀺𑀕𑀢𑀫𑀮𑁄𑀢𑀺 𑀅𑀩𑁆𑀪𑀸𑀫𑀳𑀺𑀓𑀸𑀤𑀻𑀳𑀺 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲𑁄. 𑀪𑀸𑀡𑀼 𑀯𑀼𑀘𑁆𑀘𑀢𑀺 𑀧𑀪𑀸, 𑀲𑀸𑀢𑀺𑀲𑀬𑁄 𑀪𑀸𑀡𑀼 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀪𑀸𑀡𑀼𑀫𑀸. 𑀲𑀽𑀭𑀺𑀬𑁄𑀢𑀺 𑀆𑀳 ‘‘𑀆𑀤𑀺𑀘𑁆𑀘𑁄 𑀯𑀺𑀬𑀸’’𑀢𑀺.

𑀕𑀕𑁆𑀕𑀭𑀸𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁨. 𑀯𑀗𑁆𑀕𑀻𑀲𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁨𑁦. 𑀲𑁄 𑀓𑀺𑀭 𑀯𑀺𑀘𑀭𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀬𑀣𑀸𑀬𑀁 𑀤𑀻𑀧𑁄 𑀚𑀫𑁆𑀩𑀼𑀤𑀻𑀧𑁄𑀢𑀺 𑀚𑀫𑁆𑀩𑀼𑀦𑀸 𑀧𑀜𑁆𑀜𑀸𑀢𑁄, 𑀏𑀯𑀸𑀳𑀫𑁆𑀧𑀺 𑀢𑁂𑀦 𑀚𑀫𑁆𑀩𑀼𑀦𑀸 𑀧𑀜𑁆𑀜𑀸𑀬𑀺𑀲𑁆𑀲’’𑀦𑁆𑀢𑀺 𑀚𑀫𑁆𑀩𑀼𑀲𑀸𑀔𑀁 𑀧𑀭𑀺𑀳𑀭𑀺𑀢𑁆𑀯𑀸. 𑀯𑀸𑀤𑀁 𑀓𑀢𑁆𑀯𑀸𑀢𑀺 ‘‘𑀇𑀫𑀲𑁆𑀫𑀺𑀁 𑀯𑀸𑀤𑁂 𑀲𑀘𑁂 𑀢𑁂 𑀧𑀭𑀸𑀚𑀬𑁄 𑀳𑁄𑀢𑀺, 𑀢𑁆𑀯𑀁 𑀫𑁂 𑀤𑀸𑀲𑁄 𑀳𑁄𑀳𑀺. 𑀲𑀘𑁂 𑀫𑁂 𑀧𑀭𑀸𑀚𑀬𑁄, 𑀅𑀳𑀁 𑀢𑁂 𑀪𑀭𑀺𑀬𑀸’’𑀢𑀺 𑀏𑀯𑀁 𑀓𑀢𑀺𑀓𑀁 𑀓𑀢𑁆𑀯𑀸. 𑀯𑀸𑀤𑁂 𑀚𑀬𑀧𑀭𑀸𑀚𑀬𑀸𑀦𑀼𑀪𑀸𑀯𑁂𑀦𑀸𑀢𑀺 𑀢𑀣𑀸𑀧𑀯𑀢𑁆𑀢𑀺𑀢𑁂 𑀯𑀸𑀤𑁂 𑀧𑀭𑀺𑀩𑁆𑀩𑀸𑀚𑀓𑀲𑁆𑀲 𑀚𑀬𑀸𑀦𑀼𑀪𑀸𑀯𑁂𑀦 𑀘𑁂𑀯 𑀅𑀢𑁆𑀢𑀦𑁄 𑀧𑀭𑀸𑀚𑀬𑁂𑀦 𑀘. 𑀯𑀬𑀁 𑀆𑀕𑀫𑁆𑀫𑀸𑀢𑀺 𑀲𑀺𑀧𑁆𑀧𑀼𑀕𑁆𑀕𑀳𑀡𑀯𑀬𑀁 𑀆𑀕𑀫𑁆𑀫. 𑀯𑀺𑀚𑁆𑀚𑀦𑁆𑀢𑀺 𑀫𑀦𑁆𑀢𑀁.

𑀦𑀺𑀩𑁆𑀩𑀢𑁆𑀢𑀕𑀢𑀺𑀯𑀺𑀪𑀸𑀯𑀦𑀯𑀲𑁂𑀦 𑀙𑀯𑀲𑀻𑀲𑀪𑀸𑀯𑀁 𑀤𑀽𑀲𑁂𑀢𑀺 𑀯𑀺𑀦𑀸𑀲𑁂𑀢𑀻𑀢𑀺 𑀙𑀯𑀤𑀽𑀲𑀓𑀁 𑀲𑀺𑀧𑁆𑀧𑀁, 𑀢𑀣𑀸𑀧𑀯𑀢𑁆𑀢𑀁 𑀫𑀦𑁆𑀢𑀧𑀤𑀁. 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦𑀸𑀢𑀺 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀲𑀢𑁆𑀢𑀲𑁆𑀲 𑀲𑀻𑀲𑀁 𑀬𑀢𑁆𑀣 𑀓𑀢𑁆𑀣𑀘𑀺 𑀞𑀺𑀢𑀁 𑀩𑀼𑀤𑁆𑀥𑀸𑀦𑀼𑀪𑀸𑀯𑁂𑀦 𑀆𑀦𑁂𑀢𑁆𑀯𑀸 𑀤𑀲𑁆𑀲𑁂𑀢𑁆𑀯𑀸. 𑀔𑀻𑀡𑀸𑀲𑀯𑀲𑁆𑀲 𑀲𑀻𑀲𑀦𑁆𑀢𑀺 𑀧𑀭𑀫𑀧𑁆𑀧𑀺𑀘𑁆𑀙𑀢𑀸𑀬 𑀓𑀜𑁆𑀘𑀺𑀧𑀺 𑀅𑀚𑀸𑀦𑀸𑀧𑁂𑀢𑁆𑀯𑀸 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀼𑀢𑀲𑁆𑀲 𑀔𑀻𑀡𑀸𑀲𑀯𑀲𑁆𑀲 𑀙𑀟𑁆𑀟𑀺𑀢𑀁 𑀲𑀻𑀲𑀓𑀝𑀸𑀳𑀁. 𑀤𑀲𑁆𑀲𑁂𑀲𑀻𑀢𑀺 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦 𑀆𑀦𑁂𑀢𑁆𑀯𑀸 𑀤𑀲𑁆𑀲𑁂𑀲𑀺.

‘‘𑀢𑀼𑀫𑁆𑀳𑁂, 𑀪𑁄 𑀕𑁄𑀢𑀫, 𑀚𑀸𑀦𑀸𑀣𑀸’’𑀢𑀺 𑀓𑀸𑀫𑀁 𑀯𑀗𑁆𑀕𑀻𑀲𑁄 𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑀁 𑀲𑀦𑁆𑀥𑀸𑀬 𑀧𑀼𑀘𑁆𑀙𑀢𑀺, 𑀪𑀕𑀯𑀸 𑀧𑀦 𑀅𑀦𑀼𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀁 𑀲𑀦𑁆𑀥𑀸𑀬 ‘‘𑀆𑀫, 𑀯𑀗𑁆𑀕𑀻𑀲…𑀧𑁂… 𑀕𑀢𑀺𑀁 𑀚𑀸𑀦𑀸𑀫𑀻’’𑀢𑀺 𑀆𑀳. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀦𑀺𑀩𑁆𑀩𑀸𑀦𑀁 𑀅𑀭𑀳𑀢𑁄 𑀕𑀢𑀻’’𑀢𑀺. 𑀯𑀗𑁆𑀕𑀻𑀲𑁄 𑀲𑀬𑀁 𑀫𑀦𑁆𑀢𑀩𑀮𑁂𑀦 𑀕𑀢𑀺𑀧𑀭𑀺𑀬𑀸𑀧𑀦𑁆𑀦𑀲𑁆𑀲 𑀕𑀢𑀺𑀁 𑀚𑀸𑀦𑀦𑁆𑀢𑁄 𑀪𑀕𑀯𑀦𑁆𑀢𑀫𑁆𑀧𑀺 ‘‘𑀅𑀬𑀫𑁆𑀧𑀺 𑀢𑀣𑀸’’𑀢𑀺 𑀫𑀜𑁆𑀜𑀫𑀸𑀦𑁄 ‘‘𑀫𑀦𑁆𑀢𑁂𑀦 𑀚𑀸𑀦𑀸𑀲𑀺, 𑀪𑁄 𑀕𑁄𑀢𑀫𑀸’’𑀢𑀺 𑀆𑀳. 𑀪𑀕𑀯𑀸 𑀅𑀢𑁆𑀢𑀦𑁄 𑀩𑀼𑀤𑁆𑀥𑀜𑀸𑀡𑀫𑁂𑀯 𑀫𑀦𑁆𑀢𑀁 𑀓𑀢𑁆𑀯𑀸 𑀤𑀻𑀧𑁂𑀦𑁆𑀢𑁄 ‘‘𑀆𑀫, 𑀯𑀗𑁆𑀕𑀻𑀲, 𑀏𑀓𑁂𑀦 𑀫𑀦𑁆𑀢𑁂𑀦𑁂𑀯 𑀚𑀸𑀦𑀸𑀫𑀻’’𑀢𑀺 𑀆𑀳. 𑀫𑀼𑀥𑀸 𑀏𑀯 𑀤𑀸𑀢𑀩𑁆𑀩𑀦𑁆𑀢𑀺 𑀅𑀫𑀽𑀮𑀺𑀓𑁄. 𑀅𑀦𑀦𑁆𑀢𑀭𑀳𑀺𑀢𑀸𑀬 𑀪𑀽𑀫𑀺𑀬𑀸 𑀲𑀬𑀦𑀁 𑀣𑀡𑁆𑀟𑀺𑀮𑀲𑁂𑀬𑁆𑀬𑀸. 𑀆𑀤𑀺-𑀲𑀤𑁆𑀤𑁂𑀦 𑀲𑀸𑀬𑀢𑀢𑀺𑀬𑀁 𑀉𑀤𑀓𑁄𑀭𑁄𑀳𑀡𑀪𑀽𑀫𑀺𑀳𑀭𑀡𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀲𑁄 𑀢𑀁…𑀧𑁂… 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀻𑀢𑀺 𑀇𑀫𑀺𑀦𑀸 𑀯𑀗𑁆𑀕𑀻𑀲𑀢𑁆𑀣𑁂𑀭𑁄 𑀧𑀩𑁆𑀩𑀚𑀺𑀢𑁆𑀯𑀸 𑀦 𑀘𑀺𑀭𑀲𑁆𑀲𑁂𑀯 𑀲𑀼𑀔𑀸𑀬 𑀧𑀝𑀺𑀧𑀤𑀸𑀬 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄 𑀯𑀺𑀬 𑀤𑀺𑀲𑁆𑀲𑀢𑀺, 𑀦 𑀔𑁄 𑀧𑀦𑁂𑀢𑀁 𑀏𑀯𑀁 𑀤𑀝𑁆𑀞𑀩𑁆𑀩𑀁, 𑀆𑀬𑀢𑀺𑀁 𑀣𑁂𑀭𑁄 𑀧𑀩𑁆𑀩𑀚𑀺𑀢𑁆𑀯𑀸 𑀲𑀫𑀣𑀯𑀺𑀧𑀲𑁆𑀲𑀦𑀸𑀲𑀼 𑀓𑀫𑁆𑀫𑀁 𑀆𑀭𑀪𑀺𑀢𑁆𑀯𑀸𑀧𑀺 𑀤𑀼𑀓𑁆𑀔𑀸𑀬 𑀧𑀝𑀺𑀧𑀤𑀸𑀬 𑀢𑀸𑀤𑀺𑀲𑀁 𑀓𑀸𑀮𑀁 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀢𑁂𑀦𑀸𑀳 𑁋

‘‘𑀦𑀺𑀓𑁆𑀔𑀦𑁆𑀢𑀁 𑀯𑀢 𑀫𑀁 𑀲𑀦𑁆𑀢𑀁, 𑀅𑀕𑀸𑀭𑀲𑁆𑀫𑀸𑀦𑀕𑀸𑀭𑀺𑀬𑀁;

𑀯𑀺𑀢𑀓𑁆𑀓𑀸 𑀉𑀧𑀥𑀸𑀯𑀦𑁆𑀢𑀺, 𑀧𑀕𑀩𑁆𑀪𑀸 𑀓𑀡𑁆𑀳𑀢𑁄 𑀇𑀫𑁂’’. (𑀲𑀁. 𑀦𑀺. 𑁧.𑁨𑁦𑁯; 𑀣𑁂𑀭𑀕𑀸. 𑁧𑁨𑁧𑁮);

𑀆𑀬𑀲𑁆𑀫𑀢𑁄 𑀯𑀗𑁆𑀕𑀻𑀲𑀲𑁆𑀲 𑀅𑀦𑀪𑀺𑀭𑀢𑀺 𑀉𑀧𑁆𑀧𑀦𑁆𑀦𑀸 𑀳𑁄𑀢𑀺, 𑀭𑀸𑀕𑁄 𑀘𑀺𑀢𑁆𑀢𑀁 𑀅𑀦𑀼𑀤𑁆𑀥𑀁𑀲𑁂𑀢𑀺, ‘‘𑀓𑀸𑀫𑀭𑀸𑀕𑁂𑀦 𑀟𑀬𑁆𑀳𑀸𑀫𑀺, 𑀘𑀺𑀢𑁆𑀢𑀁 𑀫𑁂 𑀧𑀭𑀺𑀟𑀬𑁆𑀳𑀢𑀻’’𑀢𑀺𑀆𑀤𑀺 (𑀣𑁂𑀭𑀕𑀸. 𑁧𑁨𑁩𑁨).

𑀯𑀺𑀫𑀼𑀢𑁆𑀢𑀺𑀲𑀼𑀔𑀦𑁆𑀢𑀺 𑀲𑀩𑁆𑀩𑀲𑁄 𑀓𑀺𑀮𑁂𑀲𑀯𑀺𑀫𑀼𑀢𑁆𑀢𑀺𑀬𑀁 𑀦𑀺𑀩𑁆𑀩𑀸𑀦𑁂 𑀘 𑀉𑀧𑁆𑀧𑀦𑁆𑀦𑀁 𑀲𑀫𑁆𑀧𑀢𑀺𑀅𑀭𑀳𑀢𑁆𑀢𑀨𑀮𑀲𑀼𑀔𑀁 𑀧𑀝𑀺𑀲𑀁𑀯𑁂𑀤𑁂𑀦𑁆𑀢𑁄𑀢𑀺 𑀬𑀣𑀸𑀧𑀭𑀺𑀘𑁆𑀙𑀺𑀦𑁆𑀦𑀁 𑀓𑀸𑀮𑀁 𑀧𑀢𑀺 𑀲𑀫𑁆𑀫𑀤𑁂𑀯 𑀯𑁂𑀤𑁂𑀦𑁆𑀢𑁄 𑀅𑀦𑀼𑀪𑀯𑀦𑁆𑀢𑁄. 𑀓𑀯𑀺𑀦𑀸 𑀓𑀢𑀁, 𑀢𑀢𑁄 𑀯𑀸 𑀆𑀕𑀢𑀁, 𑀢𑀲𑁆𑀲 𑀯𑀸 𑀇𑀤𑀦𑁆𑀢𑀺 𑀓𑀸𑀯𑁂𑀬𑀁, 𑀢𑀤𑁂𑀯𑁂𑀢𑁆𑀣 ‘‘𑀓𑀸𑀯𑁂𑀬𑁆𑀬’’𑀦𑁆𑀢𑀺 𑀯𑀼𑀢𑁆𑀢𑀁. 𑀬𑁂 𑀦𑀺𑀬𑀸𑀫𑀕𑀢𑀤𑁆𑀤𑀲𑀸𑀢𑀺 𑀬𑁂 𑀪𑀺𑀓𑁆𑀔𑀽 𑀅𑀭𑀺𑀬𑀸 𑀩𑀼𑀤𑁆𑀥𑀸𑀦𑀁 𑀲𑀸𑀯𑀓𑀸 𑀨𑀮𑀝𑁆𑀞𑀪𑀸𑀯𑁂𑀦 𑀦𑀺𑀬𑀸𑀫𑀕𑀢𑀸 𑀘𑁂𑀯 𑀫𑀕𑁆𑀕𑀝𑁆𑀞𑀪𑀸𑀯𑁂𑀦 𑀦𑀺𑀬𑀸𑀫𑀤𑀲𑀸 𑀘. 𑀦𑀺𑀬𑀸𑀫𑁄𑀢𑀺 𑀳𑀺 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑁄 𑀅𑀥𑀺𑀧𑁆𑀧𑁂𑀢𑁄. 𑀲𑀼𑀆𑀕𑀫𑀦𑀦𑁆𑀢𑀺 𑀫𑀫 𑀇𑀫𑀲𑁆𑀲 𑀲𑀢𑁆𑀣𑀼𑀦𑁄 𑀲𑀦𑁆𑀢𑀺𑀓𑁂 𑀆𑀕𑀫𑀦𑀁 𑀉𑀧𑀕𑀫𑀦𑀁, 𑀇𑀫𑀲𑁆𑀫𑀺𑀜𑁆𑀘 𑀥𑀫𑁆𑀫𑀯𑀺𑀦𑀬𑁂 𑀆𑀕𑀫𑀦𑀁 𑀧𑀩𑁆𑀩𑀚𑀦𑀁 𑀉𑀧𑀲𑀫𑁆𑀧𑀤𑀸 𑀲𑀼𑀦𑁆𑀤𑀭𑀁 𑀆𑀕𑀫𑀦𑀁. 𑀢𑀢𑁆𑀣 𑀓𑀸𑀭𑀡𑀫𑀸𑀳 ‘‘𑀢𑀺𑀲𑁆𑀲𑁄 𑀯𑀺𑀚𑁆𑀚𑀸’’𑀢𑀺𑀆𑀤𑀺. 𑀅𑀯𑀼𑀢𑁆𑀢𑀫𑁆𑀧𑀺 𑀕𑀸𑀣𑀸𑀬 𑀅𑀢𑁆𑀣𑀢𑁄 𑀕𑀳𑀺𑀢𑀫𑁂𑀯 𑀣𑁂𑀭𑀲𑁆𑀲 𑀙𑀴𑀪𑀺𑀜𑁆𑀜𑀪𑀸𑀯𑀢𑁄.

𑀯𑀗𑁆𑀕𑀻𑀲𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀸𑀭𑀢𑁆𑀣𑀧𑁆𑀧𑀓𑀸𑀲𑀺𑀦𑀺𑀬𑀸 𑀲𑀁𑀬𑀼𑀢𑁆𑀢𑀦𑀺𑀓𑀸𑀬-𑀅𑀝𑁆𑀞𑀓𑀣𑀸𑀬

𑀯𑀗𑁆𑀕𑀻𑀲𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.