𑁯. 𑀲𑀢𑁆𑀣𑀸𑀭𑀯𑀦𑁆𑀤𑀦𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁬𑁫. 𑀩𑁆𑀭𑀳𑁆𑀫𑀚𑀸𑀡𑀼𑀓𑁄𑀢𑀺 𑀤𑀓𑁆𑀔𑀺𑀡𑀚𑀸𑀡𑀼𑀫𑀡𑁆𑀟𑀮𑀁 𑀧𑀣𑀯𑀺𑀬𑀁 𑀞𑀧𑁂𑀢𑁆𑀯𑀸 𑀯𑀦𑁆𑀤𑀫𑀸𑀦𑁄 𑀩𑁆𑀭𑀳𑁆𑀫𑀚𑀸𑀡𑀼𑀓𑁄 𑀦𑀸𑀫 𑀢𑀣𑀸𑀪𑀽𑀢𑁄 𑀳𑀼𑀢𑁆𑀯𑀸. 𑀬𑀚𑀺𑀢𑀩𑁆𑀩𑀢𑁄 𑀬𑀓𑁆𑀔𑁄, 𑀧𑀽𑀚𑀦𑀻𑀬𑁄. 𑀏𑀯𑀁 𑀧𑀽𑀚𑀸𑀯𑀺𑀲𑁂𑀲𑀬𑁄𑀕𑀢𑁄 𑀲𑀓𑁆𑀓𑁄𑀢𑀺 𑀆𑀳 ‘‘𑀲𑁄 𑀬𑀓𑁆𑀔𑁄𑀢𑀺 𑀲𑁄 𑀲𑀓𑁆𑀓𑁄’’𑀢𑀺. 𑀲𑀓𑁆𑀓𑀲𑁆𑀲 𑀦𑀫𑀓𑁆𑀓𑀸𑀭𑀪𑀸𑀚𑀦𑀪𑀽𑀢𑀜𑁆𑀳𑀺 𑀧𑀼𑀘𑁆𑀙𑀦𑁆𑀢𑁄 𑀫𑀸𑀢𑀮𑀺 ‘‘𑀓𑁄 𑀦𑀸𑀫 𑀲𑁄 𑀬𑀓𑁆𑀔𑁄’’𑀢𑀺 𑀆𑀳. 𑀕𑀼𑀡𑀦𑁂𑀫𑀺𑀢𑁆𑀢𑀓𑁂𑀳𑀻𑀢𑀺 𑀕𑀼𑀡𑀳𑁂𑀢𑀼𑀓𑁂𑀳𑀺 𑀅𑀦𑀦𑁆𑀢𑀸𑀦𑀺 𑀳𑀺 𑀩𑀼𑀤𑁆𑀥𑀸𑀦𑀁 𑀦𑀸𑀫𑀸𑀦𑀺, 𑀢𑀸𑀦𑀺 𑀘 𑀔𑁄 𑀲𑀩𑁆𑀩𑀸𑀦𑀺𑀧𑀺 𑀕𑀼𑀡𑀦𑁂𑀫𑀺𑀢𑁆𑀢𑀓𑀸𑀦𑁂𑀯. 𑀅𑀦𑀦𑁆𑀢𑀕𑀼𑀡𑀢𑁆𑀢𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀦𑀸𑀫𑀸𑀦𑀺, 𑀲𑀕𑀼𑀡𑁂𑀦 𑀫𑀳𑁂𑀲𑀺𑀦𑁄;

𑀕𑀼𑀡𑁂𑀦 𑀦𑀸𑀫𑀫𑀼𑀤𑁆𑀥𑁂𑀬𑁆𑀬𑀁, 𑀅𑀧𑀺 𑀦𑀸𑀫𑀲𑀳𑀲𑁆𑀲𑀢𑁄’’𑀢𑀺. 𑁋

𑀢𑀲𑁆𑀫𑀸 𑀅𑀦𑁄𑀫𑀦𑀸𑀫𑀦𑁆𑀢𑀺 𑀧𑀭𑀺𑀧𑀼𑀡𑁆𑀡𑀕𑀼𑀡𑀦𑀸𑀫𑀦𑁆𑀢𑀺 𑀅𑀢𑁆𑀣𑁄. 𑀲𑀫𑀢𑀺𑀓𑁆𑀓𑀫𑁂𑀦𑀸𑀢𑀺 𑀲𑀫𑁆𑀫𑀸 𑀲𑀫𑀼𑀘𑁆𑀙𑀺𑀦𑁆𑀤𑀦𑀯𑀲𑁂𑀦 𑀅𑀢𑀺𑀓𑁆𑀓𑀫𑀦𑁂𑀦. 𑀓𑀺𑀮𑁂𑀲𑀸𑀭𑀻𑀦𑀁 𑀅𑀧𑁂𑀢𑀘𑀬𑁄𑀢𑀺 𑀅𑀧𑀘𑀬𑁄, 𑀲𑁄 𑀆𑀭𑀫𑀺𑀢𑀩𑁆𑀩𑀝𑁆𑀞𑁂𑀦 𑀆𑀭𑀸𑀫𑁄 𑀏𑀢𑁂𑀲𑀦𑁆𑀢𑀺 𑀅𑀧𑀘𑀬𑀸𑀭𑀸𑀫𑀸. 𑀢𑁂𑀦𑀸𑀳 ‘‘𑀯𑀝𑁆𑀝𑀯𑀺𑀤𑁆𑀥𑀁𑀲𑀦𑁂 𑀭𑀢𑀸’’𑀢𑀺.

𑀲𑀢𑁆𑀣𑀸𑀭𑀯𑀦𑁆𑀤𑀦𑀸𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.