𑁯. 𑀅𑀭𑀜𑁆𑀜𑀸𑀬𑀢𑀦𑀇𑀲𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁫𑁫. 𑀚𑀸𑀫𑀸𑀢𑀺𑀓𑀸 𑀯𑀼𑀘𑁆𑀘𑀢𑀺 𑀥𑀻𑀢𑀼𑀧𑀢𑀺, 𑀲𑀲𑀼𑀭𑁄 𑀪𑀭𑀺𑀬𑀸𑀬 𑀧𑀺𑀢𑀸, 𑀢𑀲𑁆𑀫𑀸 𑀇𑀫𑁂 𑀅𑀦𑁆𑀢𑀭𑀯𑀢𑁆𑀢𑀺𑀦𑁄 𑀤𑁆𑀯𑁂 𑀚𑀦𑀸 𑀲𑀓𑁆𑀓𑀯𑁂𑀧𑀘𑀺𑀢𑁆𑀢𑀺𑀦𑁄 𑀲𑀼𑀚𑀸𑀬 𑀯𑀲𑁂𑀦 𑀚𑀸𑀫𑀸𑀢𑀺𑀓𑀲𑀲𑀼𑀭𑀸. ‘‘𑀘𑀺𑀭𑀤𑀺𑀓𑁆𑀔𑀺𑀢𑀸𑀦’’𑀦𑁆𑀢𑀺 𑀤𑀺𑀓𑁆𑀔𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀘𑀺𑀭𑀓𑀸𑀮𑀸𑀦𑀁 𑀯𑀢𑀲𑀫𑀸𑀤𑀸𑀦𑀯𑀲𑁂𑀦 𑀇𑀢𑁄 𑀩𑀸𑀳𑀺𑀭𑀓𑀸𑀦𑀁 𑀧𑀩𑁆𑀩𑀚𑀺𑀢𑀸𑀦𑀦𑁆𑀢𑀺 𑀆𑀳 ‘‘𑀘𑀺𑀭𑀲𑀫𑀸𑀤𑀺𑀦𑁆𑀦𑀯𑀢𑀸𑀦’’𑀦𑁆𑀢𑀺. 𑀇𑀢𑁄 𑀧𑀝𑀺𑀓𑁆𑀓𑀫𑀸𑀢𑀺 𑀇𑀢𑁄 𑀬𑀣𑀸𑀞𑀺𑀢𑀝𑁆𑀞𑀸𑀦𑀢𑁄 𑀅𑀧𑁂𑀳𑀺 𑀅𑀧𑀓𑁆𑀓𑀫. 𑀦 𑀧𑀝𑀺𑀓𑁆𑀓𑀽𑀮𑀲𑀜𑁆𑀜𑀺𑀦𑁄 𑀕𑀼𑀡𑁂 𑀕𑀸𑀭𑀯𑀬𑁄𑀕𑀢𑁄. 𑀤𑁂𑀯𑀸 𑀳𑀺 𑀬𑁂𑀪𑀼𑀬𑁆𑀬𑁂𑀦 ‘‘𑀫𑀬𑀁 𑀧𑀼𑀩𑁆𑀩𑁂 𑀕𑀼𑀡𑀯𑀦𑁆𑀢𑁂 𑀧𑀬𑀺𑀭𑀼𑀧𑀸𑀲𑀺𑀢𑁆𑀯𑀸 𑀢𑁂𑀲𑀁 𑀑𑀯𑀸𑀤𑁂 𑀞𑀢𑁆𑀯𑀸 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀺𑀢𑁆𑀯𑀸 𑀇𑀥𑀽𑀧𑀧𑀦𑁆𑀦𑀸’’𑀢𑀺 𑀕𑀼𑀡𑀯𑀦𑁆𑀢𑁂𑀲𑀼 𑀆𑀤𑀭𑀪𑀸𑀯𑀁 𑀉𑀧𑀝𑁆𑀞𑀧𑁂𑀦𑁆𑀢𑀺.

𑀅𑀭𑀜𑁆𑀜𑀸𑀬𑀢𑀦𑀇𑀲𑀺𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.