𑁭. 𑀇𑀲𑁆𑀲𑀭𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁭. 𑀲𑀢𑁆𑀣𑀲𑁆𑀲 𑀫𑀮𑀦𑁆𑀢𑀺 𑀲𑀢𑁆𑀣𑀫𑀮𑀁, 𑀬𑁂𑀦 𑀲𑀢𑁆𑀣𑀁 𑀫𑀮𑀻𑀦𑀁 𑀳𑁄𑀢𑀺, 𑀲𑀢𑁆𑀣𑀫𑀮𑀕𑁆𑀕𑀳𑀡𑁂𑀦 𑀘𑁂𑀢𑁆𑀣 𑀫𑀮𑀻𑀦𑀁 𑀲𑀢𑁆𑀣𑀫𑁂𑀯 𑀕𑀳𑀺𑀢𑀦𑁆𑀢𑀺 𑀆𑀳 ‘‘𑀫𑀮𑀕𑁆𑀕𑀳𑀺𑀢𑀲𑀢𑁆𑀣’’𑀦𑁆𑀢𑀺. 𑀆𑀡𑀸𑀧𑀯𑀢𑁆𑀢𑀦𑀦𑁆𑀢𑀺 𑀅𑀧𑁆𑀧𑀓𑁂 𑀯𑀸 𑀫𑀳𑀦𑁆𑀢𑁂 𑀯𑀸 𑀬𑀢𑁆𑀣 𑀓𑀢𑁆𑀣𑀘𑀺 𑀅𑀢𑁆𑀢𑀦𑁄 𑀆𑀡𑀸𑀬 𑀧𑀯𑀢𑁆𑀢𑀦𑀯𑀲𑁂𑀦 𑀯𑀲𑀦𑀁 𑀇𑀲𑁆𑀲𑀭𑀺𑀬𑀢𑁆𑀢𑀫𑀺𑀘𑁆𑀙𑀦𑁆𑀢𑀺. 𑀫𑀡𑀺𑀭𑀢𑀦𑀫𑁆𑀧𑀺 𑀯𑀺𑀲𑁆𑀲𑀚𑁆𑀚𑀦𑀻𑀬𑀧𑀓𑁆𑀔𑀺𑀓𑀢𑁆𑀢𑀸 𑀉𑀢𑁆𑀢𑀫𑀁 𑀪𑀡𑁆𑀟𑀁 𑀦𑀸𑀫 𑀦 𑀳𑁄𑀢𑀺, 𑀇𑀢𑁆𑀣𑀻 𑀧𑀦 𑀧𑀭𑀺𑀘𑁆𑀘𑀢𑁆𑀢𑀓𑀼𑀮𑀸𑀘𑀸𑀭𑀺𑀢𑁆𑀣𑀺𑀓𑀸𑀬𑀧𑀺 𑀅𑀦𑀺𑀲𑁆𑀲𑀚𑁆𑀚𑀦𑀻𑀬𑀢𑀸𑀬 𑀉𑀢𑁆𑀢𑀫𑀪𑀡𑁆𑀟𑀁 𑀦𑀸𑀫. 𑀢𑁂𑀦𑀸𑀳 ‘‘𑀇𑀢𑁆𑀣𑀻 𑀪𑀡𑁆𑀟𑀸𑀦𑀫𑀼𑀢𑁆𑀢𑀫’’𑀦𑁆𑀢𑀺. 𑀢𑁂𑀲𑀁 𑀢𑁂𑀲𑀜𑁆𑀳𑀺 𑀧𑀼𑀭𑀺𑀲𑀸𑀚𑀸𑀦𑀻𑀬𑀸𑀦𑀁 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀢𑀸𑀬 𑀉𑀢𑁆𑀢𑀫𑀭𑀢𑀦𑀸𑀓𑀭𑀢𑁆𑀢𑀸 𑀇𑀢𑁆𑀣𑀻 𑀪𑀡𑁆𑀟𑀸𑀦𑀫𑀼𑀢𑁆𑀢𑀫𑀁. 𑀫𑀮𑀕𑁆𑀕𑀳𑀺𑀢𑀲𑀢𑁆𑀣𑀲𑀤𑀺𑀲𑁄 𑀅𑀯𑀩𑁄𑀥𑀓𑀺𑀘𑁆𑀘𑀯𑀺𑀩𑀦𑁆𑀥𑀦𑀢𑁄. 𑀲𑀢𑁆𑀣𑀫𑀮𑀁 𑀯𑀺𑀬 𑀲𑀢𑁆𑀣𑀲𑁆𑀲 𑀧𑀜𑁆𑀜𑀸𑀲𑀢𑁆𑀣𑀲𑁆𑀲 𑀕𑀼𑀡𑀸𑀪𑀸𑀯𑀓𑀭𑀡𑀢𑁄 𑀧𑀜𑁆𑀜𑀸𑀲𑀢𑁆𑀣𑀫𑀮𑀁. 𑀅𑀩𑁆𑀩𑀼 𑀯𑀼𑀘𑁆𑀘𑀢𑀺 𑀉𑀧𑀤𑁆𑀤𑀯𑀁, 𑀢𑀁 𑀤𑁂𑀢𑀻𑀢𑀺 𑀅𑀩𑁆𑀩𑀼𑀤𑀁, 𑀯𑀺𑀦𑀸𑀲𑀓𑀸𑀭𑀡𑀁. 𑀦𑀦𑀼 𑀳𑀭𑀡𑀁 𑀲𑀫𑀡𑀲𑁆𑀲 𑀅𑀬𑀼𑀢𑁆𑀢𑀦𑁆𑀢𑀺? 𑀬𑀼𑀢𑁆𑀢𑀁. 𑀢𑀲𑁆𑀲 𑀅𑀦𑁆𑀯𑀬𑀢𑁄 𑀩𑁆𑀬𑀢𑀺𑀭𑁂𑀓𑀢𑁄 𑀘 𑀬𑀼𑀢𑁆𑀢𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀮𑀸𑀓𑀪𑀢𑁆𑀢𑀸𑀤𑀻𑀦𑀻’’𑀢𑀺𑀆𑀤𑀺𑀫𑀸𑀳.

𑀇𑀲𑁆𑀲𑀭𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.