𑀅𑀦𑁆𑀢𑀭𑀧𑁂𑀬𑁆𑀬𑀸𑀮 𑀓𑀢𑀺𑀧𑀼𑀘𑁆𑀙𑀸𑀯𑀸𑀭𑀯𑀡𑁆𑀡𑀦𑀸

𑁨𑁭𑁧. 𑀇𑀤𑀸𑀦𑀺 𑀯𑀼𑀢𑁆𑀢𑁄𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀇𑀤𑀸𑀦𑀻’’𑀢𑀺 𑀧𑀤𑁂𑀦 𑀲𑀫𑁆𑀩𑀦𑁆𑀥𑀢𑁆𑀢𑀸 𑀯𑀼𑀢𑁆𑀢𑁄𑀢𑀺 𑀏𑀢𑁆𑀣 𑀢𑀧𑀘𑁆𑀘𑀬𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑀓𑀸𑀮𑀺𑀓𑁄𑀢𑀺 𑀤𑀝𑁆𑀞𑀩𑁆𑀩𑁄.

𑀢𑀢𑁆𑀣𑀸𑀢𑀺 𑀫𑀸𑀢𑀺𑀓𑀸𑀬𑀁, 𑀧𑀼𑀘𑁆𑀙𑀸𑀲𑀼 𑀯𑀸. 𑀆𑀕𑀢𑀸𑀧𑀢𑁆𑀢𑀺𑀧𑀼𑀘𑁆𑀙𑀸𑀢𑀺 𑀆𑀕𑀢𑀸𑀧𑀢𑁆𑀢𑀺𑀬𑀸 𑀧𑀼𑀘𑁆𑀙𑀸. 𑀳𑀻𑀢𑀺 𑀯𑀺𑀲𑁂𑀲𑀚𑁄𑀢𑀓𑁄, 𑀳𑀺 𑀯𑀺𑀲𑁂𑀲𑀁 𑀯𑀓𑁆𑀔𑀸𑀫𑀻𑀢𑀺 𑀅𑀢𑁆𑀣𑁄. 𑀏𑀢𑁆𑀣𑀸𑀢𑀺 ‘‘𑀓𑀢𑀺 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸’’𑀢𑀺 𑀤𑀼𑀢𑀺𑀬𑀧𑀤𑁂. ‘‘𑀭𑀸𑀲𑀺𑀯𑀲𑁂𑀦𑀸’’𑀢𑀺 𑀇𑀫𑀺𑀦𑀸 𑀔𑀦𑁆𑀥𑀲𑀤𑁆𑀤𑀲𑁆𑀲 𑀭𑀸𑀲𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀯𑀺𑀦𑀻𑀢𑀯𑀢𑁆𑀣𑀽𑀦𑀻𑀢𑀺 𑀏𑀢𑁆𑀣 𑀯𑀺𑀦𑀻𑀢𑀲𑀤𑁆𑀤𑁄 𑀯𑀺𑀦𑀬𑀧𑀭𑀺𑀬𑀸𑀬𑁄𑀢𑀺 𑀆𑀳 ‘‘𑀯𑀺𑀦𑀬𑀧𑀼𑀘𑁆𑀙𑀸’’𑀢𑀺. 𑀦𑀦𑀼 𑀯𑀺𑀦𑀻𑀢𑀯𑀺𑀦𑀬𑀲𑀤𑁆𑀤𑀸𑀦𑀁 𑀲𑀤𑁆𑀤𑀢𑁄 𑀦𑀸𑀦𑀢𑁆𑀢𑀸 𑀅𑀢𑁆𑀣𑀢𑁄𑀧𑀺 𑀦𑀸𑀦𑀁, 𑀓𑀲𑁆𑀫𑀸 𑀧𑀦 ‘‘𑀯𑀺𑀦𑀬𑀧𑀼𑀘𑁆𑀙𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀯𑀺𑀦𑀻𑀢𑀁…𑀧𑁂… 𑀏𑀓’’𑀦𑁆𑀢𑀺. 𑀇𑀤𑀦𑁆𑀢𑀺 𑀧𑀤𑀢𑁆𑀢𑀬𑀁. 𑀅𑀢𑁆𑀣𑀢𑁄 𑀏𑀓𑀦𑁆𑀢𑀺 𑀅𑀢𑁆𑀣𑀢𑁄𑀬𑁂𑀯 𑀏𑀓𑀁, 𑀦 𑀲𑀤𑁆𑀤𑀢𑁄. 𑀯𑀺𑀦𑀻𑀢𑀯𑀢𑁆𑀣𑀽𑀦𑀻𑀢𑀺 𑀆𑀧𑀢𑁆𑀢𑀺𑀯𑀺𑀦𑀬𑀓𑀸𑀭𑀡𑀢𑁆𑀢𑀸 𑀯𑀺𑀦𑀻𑀢𑀯𑀢𑁆𑀣𑀽𑀦𑀺. 𑀬𑁂𑀲𑀽𑀢𑀺 𑀅𑀕𑀸𑀭𑀯𑁂𑀲𑀼. 𑀲𑀢𑀻𑀢𑀺 𑀲𑀦𑁆𑀢𑁂𑀲𑀼. 𑀏𑀢𑁆𑀣 𑀘 𑀬𑁂𑀲𑀼 𑀲𑀢𑀺 𑀆𑀧𑀢𑁆𑀢𑀺𑀬𑁄 𑀦 𑀳𑁄𑀦𑁆𑀢𑀺, 𑀅𑀲𑀢𑀺 𑀳𑁄𑀦𑁆𑀢𑀻𑀢𑀺 𑀯𑀸𑀓𑁆𑀬𑀫𑁆𑀧𑀺 𑀅𑀯𑀼𑀢𑁆𑀢𑀲𑀺𑀤𑁆𑀥𑀺𑀦𑀬𑁂𑀦 𑀕𑀳𑁂𑀢𑀩𑁆𑀩𑀁. 𑀬𑁂𑀲𑀽𑀢𑀺 𑀕𑀸𑀭𑀯𑁂𑀲𑀼. 𑀢𑁂𑀢𑀺 𑀅𑀕𑀸𑀭𑀯𑀕𑀸𑀭𑀯𑁂. 𑀬𑀲𑁆𑀫𑀸 𑀧𑀦 𑀦𑀢𑁆𑀣𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀺𑀧𑀢𑁆𑀢𑀺𑀪𑀸𑀯𑀧𑀼𑀘𑁆𑀙𑀸𑀢𑀺 𑀯𑀺𑀧𑀢𑁆𑀢𑀺𑀪𑀸𑀯𑀲𑁆𑀲 𑀧𑀼𑀘𑁆𑀙𑀸. 𑀧𑀼𑀘𑁆𑀙𑀺𑀬𑀢𑀺 𑀇𑀫𑀸𑀬𑀸𑀢𑀺 𑀧𑀼𑀘𑁆𑀙𑀸. 𑀯𑀺𑀯𑀸𑀤𑀫𑀽𑀮𑀸𑀦𑀺 𑀅𑀦𑀼𑀯𑀸𑀤𑀫𑀽𑀮𑀸𑀦𑀻𑀢𑀺 𑀇𑀫𑀸 𑀧𑀼𑀘𑁆𑀙𑀸𑀬𑁄 𑀫𑀽𑀮𑀧𑀼𑀘𑁆𑀙𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀧𑁄𑀢𑁆𑀣𑀓𑁂𑀲𑀼 ‘‘𑀇𑀫𑀸𑀦𑀻’’𑀢𑀺 𑀦𑀺𑀓𑀸𑀭𑁂𑀦 𑀲𑀳 𑀧𑀸𑀞𑁄 𑀅𑀢𑁆𑀣𑀺, 𑀲𑁄 𑀅𑀧𑀸𑀞𑁄𑀬𑁂𑀯. 𑀫𑀽𑀮𑀧𑀼𑀘𑁆𑀙𑀸𑀢𑀺 𑀧𑀼𑀘𑁆𑀙𑀺𑀬𑀦𑁆𑀢𑀺 𑀇𑀫𑀸𑀳𑀻𑀢𑀺 𑀧𑀼𑀘𑁆𑀙𑀸, 𑀫𑀽𑀮𑀸𑀦𑀁 𑀧𑀼𑀘𑁆𑀙𑀸 𑀫𑀽𑀮𑀧𑀼𑀘𑁆𑀙𑀸. ‘‘𑀅𑀥𑀺𑀓𑀭𑀡’’𑀦𑁆𑀢𑀺𑀆𑀤𑀻𑀲𑀼 ‘‘𑀯𑀼𑀢𑁆𑀢𑀁’’ 𑀇𑀢𑀺 𑀲𑀫𑁆𑀩𑀦𑁆𑀥𑁄. 𑀢𑁂𑀲𑀁𑀬𑁂𑀯𑀸𑀢𑀺 𑀅𑀥𑀺𑀓𑀭𑀡𑀸𑀦𑀁𑀬𑁂𑀯. 𑀅𑀬𑀫𑁂𑀢𑁆𑀣 𑀫𑀸𑀢𑀺𑀓𑀸.

𑀦𑀺𑀤𑁆𑀤𑁂𑀲𑁂 𑀫𑀸𑀢𑀺𑀓𑀸𑀬𑀸𑀢𑀺 𑀧𑀸𑀢𑀺𑀫𑁄𑀓𑁆𑀔𑁂. 𑀯𑀺𑀪𑀗𑁆𑀕𑁂𑀢𑀺 𑀧𑀤𑀪𑀸𑀚𑀦𑀺𑀬𑀁, 𑀆𑀕𑀢𑀯𑀲𑁂𑀦 𑀯𑀼𑀢𑁆𑀢𑀸𑀢𑀺 𑀬𑁄𑀚𑀦𑀸. 𑀅𑀬𑀫𑁂𑀢𑁆𑀣 𑀦𑀺𑀤𑁆𑀤𑁂𑀲𑁄.

𑀧𑀝𑀺𑀦𑀺𑀤𑁆𑀤𑁂𑀲𑁂 𑀆𑀭𑀢𑀻𑀢𑀺𑀆𑀤𑀺𑀧𑀤𑀸𑀦𑀁 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀆𑀭𑀓𑀸’’𑀢𑀺𑀆𑀤𑀺. 𑀢𑀢𑁆𑀣 ‘‘𑀆𑀭𑀓𑀸’’𑀢𑀺 𑀇𑀫𑀺𑀦𑀸 𑀆𑀭𑀢𑀻𑀢𑀺 𑀏𑀢𑁆𑀣 𑀆𑀉𑀧𑀲𑀕𑁆𑀕𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀏𑀢𑁂𑀳𑀻𑀢𑀺 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀳𑀺, 𑀆𑀭𑀓𑀸𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀭𑀫𑀢𑀻’’𑀢𑀺 𑀇𑀫𑀺𑀦𑀸 𑀢𑀺𑀧𑀘𑁆𑀘𑀬𑁄 𑀓𑀢𑁆𑀯𑀢𑁆𑀣𑁂 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀭𑀢𑀻𑀢𑀺 𑀭𑀫𑀦𑀁. 𑀇𑀫𑀺𑀦𑀸 𑀢𑀺𑀧𑀘𑁆𑀘𑀬𑁄 𑀪𑀸𑀯𑀢𑁆𑀣𑁂𑀧𑀺 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀯𑀺𑀦𑀸𑀢𑀺 𑀏𑀢𑁂𑀳𑀺 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀳𑀺 𑀯𑀺𑀦𑀸. 𑀇𑀫𑀺𑀦𑀸 𑀯𑀺𑀭𑀢𑀻𑀢𑀺 𑀏𑀢𑁆𑀣 𑀯𑀺𑀢𑁆𑀬𑀽𑀧𑀲𑀕𑁆𑀕𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀧𑀘𑁆𑀘𑁂𑀓𑀦𑁆𑀢𑀺 𑀧𑀢𑀺 𑀏𑀓𑀁, 𑀧𑀝𑀺𑀲𑀤𑁆𑀤𑁄 𑀯𑀺𑀘𑁆𑀙𑀢𑁆𑀣𑀚𑁄𑀢𑀓𑁄, 𑀯𑀺𑀲𑀼𑀁 𑀯𑀺𑀲𑀼𑀦𑁆𑀢𑀺 𑀅𑀢𑁆𑀣𑁄. 𑀇𑀫𑀺𑀦𑀸 𑀧𑀝𑀺𑀯𑀺𑀭𑀢𑀻𑀢𑀺 𑀏𑀢𑁆𑀣 𑀧𑀝𑀺𑀢𑁆𑀬𑀽𑀧𑀲𑀕𑁆𑀕𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀯𑀺𑀭𑀢𑀺 𑀧𑀝𑀺𑀯𑀺𑀭𑀢𑀻𑀢𑀺 𑀏𑀢𑁆𑀣𑀸𑀧𑀺 𑀢𑀺𑀧𑀘𑁆𑀘𑀬𑁄 𑀪𑀸𑀯𑀢𑁆𑀣𑁂𑀧𑀺 𑀯𑁂𑀤𑀺𑀢𑀩𑁆𑀩𑁄. 𑀯𑁂𑀭𑀦𑁆𑀢𑀺 𑀅𑀦𑀢𑁆𑀣𑀓𑀭𑀢𑁆𑀢𑀸 𑀯𑀺𑀭𑀫𑀺𑀢𑀩𑁆𑀩𑀦𑁆𑀢𑀺 𑀯𑀺𑀭𑀁, 𑀢𑀤𑁂𑀯 𑀯𑁂𑀭𑀁, 𑀭𑀸𑀕𑀸𑀤𑀺𑀅𑀓𑀼𑀲𑀮𑀥𑀫𑁆𑀫𑀸. 𑀢𑁂 𑀳𑀺 𑀯𑁂𑀭𑀳𑁂𑀢𑀼𑀢𑁆𑀢𑀸 𑀯𑁂𑀭𑀦𑁆𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀏𑀢𑀸𑀬𑀸𑀢𑀺 𑀯𑀺𑀭𑀢𑀺𑀬𑀸. 𑀇𑀫𑀺𑀦𑀸 𑀅𑀓𑀺𑀭𑀺𑀬𑀸𑀢𑀺 𑀏𑀢𑁆𑀣 𑀭𑀺𑀭𑀺𑀬𑀧𑀘𑁆𑀘𑀬𑁄 𑀓𑀭𑀡𑀢𑁆𑀣𑁂 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀬𑀁 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀓𑀭𑀡𑀦𑁆𑀢𑀺 𑀬𑁄𑀚𑀦𑀸. 𑀢𑀲𑁆𑀲𑀸𑀢𑀺 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀓𑀭𑀡𑀲𑁆𑀲. 𑀧𑀝𑀺𑀧𑀓𑁆𑀔𑀢𑁄𑀢𑀺 𑀯𑀺𑀭𑀼𑀤𑁆𑀥𑀪𑀸𑀯𑀢𑁄. 𑀇𑀫𑀺𑀦𑀸 𑀅𑀓𑀭𑀡𑀦𑁆𑀢𑀺 𑀏𑀢𑁆𑀣 𑀅𑀓𑀸𑀭𑁄 𑀯𑀺𑀭𑀼𑀤𑁆𑀥𑀢𑁆𑀣𑁄𑀢𑀺 𑀤𑀲𑁆𑀲𑁂𑀢𑀺. 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀅𑀚𑁆𑀛𑀸𑀧𑀢𑁆𑀢𑀺𑀬𑀸𑀢𑀺 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸𑀦𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀆𑀧𑀚𑁆𑀚𑀦𑀲𑁆𑀲. ‘‘𑀯𑁂𑀮𑀦𑀢𑁄’’𑀢𑀺 𑀇𑀫𑀺𑀦𑀸 𑀯𑁂𑀮𑀢𑀻𑀢𑀺 𑀯𑁂𑀮𑀸, 𑀯𑁂𑀮𑀦𑀁 𑀯𑀸 𑀯𑁂𑀮𑀸𑀢𑀺 𑀯𑀘𑀦𑀢𑁆𑀣𑁂 𑀤𑀲𑁆𑀲𑁂𑀢𑀺. 𑀦𑀺𑀬𑁆𑀬𑀸𑀦𑀦𑁆𑀢𑀺 𑀫𑀕𑁆𑀕𑀁. 𑀫𑀕𑁆𑀕𑁄 𑀳𑀺 𑀦𑀺𑀩𑁆𑀩𑀸𑀦𑀁 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀬𑀸𑀢𑀺 𑀕𑀘𑁆𑀙𑀢𑀻𑀢𑀺 𑀦𑀺𑀬𑁆𑀬𑀸𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. ‘‘𑀩𑀦𑁆𑀥𑀢𑀻’’𑀢𑀺 𑀇𑀫𑀺𑀦𑀸 𑀲𑀺𑀥𑀸𑀢𑀼𑀬𑀸 𑀩𑀦𑁆𑀥𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. ‘‘𑀦𑀺𑀯𑀸𑀭𑁂𑀢𑀻’’𑀢𑀺 𑀇𑀫𑀺𑀦𑀸 𑀩𑀦𑁆𑀥𑀥𑀸𑀢𑀼𑀬𑀸 𑀅𑀥𑀺𑀧𑁆𑀧𑀸𑀬𑀢𑁆𑀣𑀁. 𑀏𑀢𑀦𑁆𑀢𑀺 ‘‘𑀲𑁂𑀢𑀽’’𑀢𑀺 𑀦𑀸𑀫𑀁. 𑀢𑀁 𑀲𑁂𑀢𑀼𑀦𑁆𑀢𑀺 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀲𑀗𑁆𑀔𑀸𑀢𑀁 𑀢𑀁 𑀲𑁂𑀢𑀼𑀁. 𑀏𑀢𑁆𑀣 𑀓𑁂𑀲𑀼𑀘𑀺 𑀧𑁄𑀢𑁆𑀣𑀓𑁂𑀲𑀼 ‘‘𑀲𑁄 𑀲𑁂𑀢𑀽’’𑀢𑀺 𑀘 ‘‘𑀏𑀢𑀸𑀬 𑀧𑀜𑁆𑀜𑀢𑁆𑀢𑀺𑀬𑀸’’𑀢𑀺 𑀘 𑀧𑀸𑀞𑁄 𑀅𑀢𑁆𑀣𑀺, 𑀲𑁄 𑀅𑀧𑀸𑀞𑁄𑀬𑁂𑀯.

𑀩𑀼𑀤𑁆𑀥𑁂 𑀅𑀕𑀸𑀭𑀯𑀸𑀤𑀻𑀲𑀼 𑀏𑀯𑀁 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. 𑀬𑁄𑀢𑀺 𑀬𑁄 𑀓𑁄𑀘𑀺, 𑀦 𑀕𑀘𑁆𑀙𑀢𑀻𑀢𑀺𑀆𑀤𑀻𑀲𑀼 𑀲𑀫𑁆𑀩𑀦𑁆𑀥𑁄. 𑀥𑀭𑀫𑀸𑀦𑁂𑀢𑀺 𑀢𑀺𑀝𑁆𑀞𑀫𑀸𑀦𑁂, 𑀲𑀁𑀯𑀺𑀚𑁆𑀚𑀫𑀸𑀦𑁂𑀢𑀺 𑀅𑀢𑁆𑀣𑁄. 𑀉𑀧𑀝𑁆𑀞𑀸𑀦𑀦𑁆𑀢𑀺 𑀉𑀧𑀝𑁆𑀞𑀸𑀦𑀝𑁆𑀞𑀸𑀦𑀁, 𑀉𑀧𑀝𑁆𑀞𑀸𑀦𑀢𑁆𑀣𑀁 𑀯𑀸. 𑀏𑀢𑀲𑁆𑀲𑀸𑀢𑀺 𑀬𑀲𑁆𑀲 𑀓𑀲𑁆𑀲𑀘𑀺 𑀕𑀳𑀝𑁆𑀞𑀲𑁆𑀲 𑀯𑀸 𑀧𑀩𑁆𑀩𑀚𑀺𑀢𑀲𑁆𑀲 𑀯𑀸. 𑀥𑀫𑁆𑀫𑀲𑁆𑀲𑀯𑀦𑀦𑁆𑀢𑀺 𑀥𑀫𑁆𑀫𑀲𑁆𑀲𑀯𑀦𑀝𑁆𑀞𑀸𑀦𑀁, 𑀥𑀫𑁆𑀫𑀲𑁆𑀲𑀯𑀦𑀢𑁆𑀣𑀁 𑀯𑀸. 𑀥𑀫𑁆𑀫𑀲𑁆𑀲𑀯𑀦𑀕𑁆𑀕𑀦𑁆𑀢𑀺 𑀥𑀫𑁆𑀫𑀲𑁆𑀲𑀯𑀦𑀁 𑀕𑀡𑁆𑀳𑀦𑁆𑀢𑀺 𑀏𑀢𑁆𑀣𑀸𑀢𑀺 𑀥𑀫𑁆𑀫𑀲𑁆𑀲𑀯𑀦𑀕𑁆𑀕𑁄, 𑀥𑀫𑁆𑀫𑀲𑀯𑀦𑀫𑀡𑁆𑀟𑀧𑁄. 𑀅𑀣 𑀯𑀸 𑀥𑀫𑁆𑀫𑀲𑁆𑀲𑀯𑀦𑀁 𑀕𑀡𑁆𑀳𑀸𑀢𑀻𑀢𑀺 𑀥𑀫𑁆𑀫𑀲𑁆𑀲𑀯𑀦𑀕𑁆𑀕𑁄, 𑀥𑀫𑁆𑀫𑀲𑁆𑀲𑀯𑀦𑀝𑁆𑀞𑀸𑀦𑁂 𑀲𑀫𑀸𑀕𑀫𑀚𑀦𑁄, 𑀢𑀁 𑀥𑀫𑁆𑀫𑀲𑁆𑀲𑀯𑀦𑀕𑁆𑀕𑀁. 𑀘𑀺𑀢𑁆𑀢𑀻𑀓𑀸𑀭𑀦𑁆𑀢𑀺 𑀅𑀧𑀘𑀸𑀬𑀦𑀸𑀓𑀸𑀭𑀁. 𑀯𑀺𑀓𑁆𑀔𑀺𑀢𑁆𑀢𑁄 𑀯𑀸 𑀅𑀦𑀸𑀤𑀭𑁄 𑀯𑀸 𑀳𑀼𑀢𑁆𑀯𑀸 𑀦𑀺𑀲𑀻𑀤𑀢𑀻𑀢𑀺 𑀬𑁄𑀚𑀦𑀸. 𑀓𑀸𑀬𑀧𑀸𑀕𑀩𑁆𑀩𑀺𑀬𑀦𑁆𑀢𑀺 𑀪𑀼𑀲𑀁 𑀕𑀭𑀢𑀺 𑀅𑀜𑁆𑀜𑁂 𑀧𑀻𑀴𑁂𑀢𑀺 𑀅𑀦𑁂𑀦𑀸𑀢𑀺 𑀧𑀕𑀩𑁆𑀩𑁄, 𑀅𑀢𑀺𑀫𑀸𑀦𑁄, 𑀑𑀝𑁆𑀞𑀚𑁄 𑀢𑀢𑀺𑀬𑀓𑁆𑀔𑀭𑁄. 𑀧𑀕𑀩𑁆𑀩𑀲𑁆𑀲 𑀪𑀸𑀯𑁄 𑀧𑀸𑀕𑀩𑁆𑀩𑀺𑀬𑀁, 𑀓𑀸𑀬𑁂𑀦 𑀧𑀸𑀕𑀩𑁆𑀩𑀺𑀬𑀁 𑀓𑀸𑀬𑀧𑀸𑀕𑀩𑁆𑀩𑀺𑀬𑀁 (𑀯𑀚𑀺𑀭. 𑀝𑀻. 𑀧𑀭𑀺𑀯𑀸𑀭 𑁨𑁭𑁧; 𑀲𑀸𑀭𑀢𑁆𑀣. 𑀝𑀻. 𑀧𑀭𑀺𑀯𑀸𑀭 𑁩.𑁨𑁭𑁧; 𑀯𑀺. 𑀯𑀺. 𑀝𑀻. 𑀧𑀭𑀺𑀯𑀸𑀭 𑁨.𑁨𑁭𑁧 𑀲𑀁. 𑀦𑀺. 𑀅𑀝𑁆𑀞. 𑁨.𑁨.𑁧𑁪𑁬; 𑀅. 𑀦𑀺. 𑀅𑀝𑁆𑀞. 𑁩.𑁬.𑁮𑁨-𑁮𑁪; 𑀲𑀼. 𑀦𑀺. 𑀅𑀝𑁆𑀞. 𑁧.𑁧𑁪𑁪), 𑀓𑀸𑀬𑀸𑀦𑀸𑀘𑀸𑀭𑀁. 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸𑀢𑀺 𑀅𑀥𑀺𑀲𑀻𑀮𑀲𑀺𑀓𑁆𑀔𑀸𑀤𑀺𑀓𑀸 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸. 𑀧𑀫𑀚𑁆𑀚𑀦𑀁 𑀧𑀫𑀸𑀤𑁄, 𑀲𑀢𑀺𑀯𑀺𑀧𑁆𑀧𑀯𑀸𑀲𑁄𑀢𑀺 𑀆𑀳 ‘‘𑀧𑀫𑀸𑀤𑁂 𑀘 𑀲𑀢𑀺𑀯𑀺𑀧𑁆𑀧𑀯𑀸𑀲𑁂’’𑀢𑀺. 𑀆𑀫𑀺𑀲𑀧𑀝𑀺𑀲𑀦𑁆𑀥𑀸𑀭𑀦𑁆𑀢𑀺 𑀆𑀫𑀺𑀲𑁂𑀦 𑀅𑀢𑁆𑀢𑀦𑁄, 𑀧𑀭𑁂𑀲𑀜𑁆𑀘 𑀅𑀦𑁆𑀢𑀭𑀲𑁆𑀲 𑀧𑀝𑀺𑀲𑀦𑁆𑀤𑀳𑀦𑀁 𑀆𑀫𑀺𑀲𑀧𑀝𑀺𑀲𑀦𑁆𑀥𑀸𑀭𑁄, 𑀢𑀣𑀸 𑀥𑀫𑁆𑀫𑀧𑀝𑀺𑀲𑀦𑁆𑀥𑀸𑀭𑁄.

𑁨𑁭𑁨. 𑀲𑀢𑁆𑀣𑀭𑀺𑀧𑀺 𑀅𑀕𑀸𑀭𑀯𑁄𑀢𑀺𑀆𑀤𑀻𑀦𑀁 𑀅𑀢𑁆𑀣𑁄𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀅𑀦𑀻𑀘𑀯𑀼𑀢𑁆𑀢𑀻’’𑀢𑀺𑀆𑀤𑀺𑀦𑀸 𑀅𑀧𑁆𑀧𑀢𑀺𑀲𑁆𑀲𑁄𑀢𑀺 𑀧𑀤𑀲𑁆𑀲 𑀅𑀥𑀺𑀧𑁆𑀧𑀸𑀬𑀢𑁆𑀣𑀁 𑀤𑀲𑁆𑀲𑁂𑀢𑀺, 𑀲𑀤𑁆𑀤𑀢𑁆𑀣𑁄 𑀧𑀦𑁂𑀯𑀁 𑀯𑁂𑀤𑀺𑀢𑀩𑁆𑀩𑁄, 𑀧𑀝𑀺𑀫𑀼𑀔𑀁 𑀆𑀤𑀭𑁂𑀦 𑀲𑀢𑁆𑀣𑀼𑀯𑀘𑀦𑀁 𑀅𑀲𑀼𑀡𑀦𑁆𑀢𑁄 𑀅𑀧𑁆𑀧𑀢𑀺𑀲𑁆𑀲𑁄 𑀦𑀸𑀫𑀸𑀢𑀺. 𑀅𑀚𑁆𑀛𑀢𑁆𑀢𑀁 𑀯𑀸𑀢𑀺 𑀏𑀢𑁆𑀣 𑀦𑀺𑀬𑀓𑀚𑁆𑀛𑀢𑁆𑀢𑀸𑀤𑀻𑀲𑀼 𑀘𑀢𑀽𑀲𑀼 𑀦𑀺𑀬𑀓𑀚𑁆𑀛𑀢𑁆𑀢𑀪𑀸𑀯𑀜𑁆𑀘 𑀲𑀢𑁆𑀢𑀫𑀻𑀯𑀺𑀪𑀢𑁆𑀢𑀺𑀬𑀸 𑀅𑀫𑀸𑀤𑁂𑀲𑀪𑀸𑀯𑀜𑁆𑀘 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀯𑀸’’𑀢𑀺. ‘‘𑀅𑀢𑁆𑀢𑀦𑁄 𑀧𑀓𑁆𑀔𑁂 𑀯𑀸’’𑀢𑀺 𑀇𑀫𑀺𑀦𑀸 𑀅𑀢𑁆𑀢𑀦𑁄 𑀘𑀺𑀢𑁆𑀢𑀲𑀦𑁆𑀢𑀸𑀦𑁂𑀢𑀺 𑀅𑀢𑁆𑀣𑀁 𑀧𑀝𑀺𑀓𑁆𑀔𑀺𑀧𑀢𑀺. 𑀢𑀢𑁆𑀭 𑀢𑀼𑀫𑁆𑀳𑁂𑀢𑀺 𑀏𑀢𑁆𑀣 𑀢𑀲𑀤𑁆𑀤𑀲𑁆𑀲 𑀯𑀺𑀲𑀬𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀢𑀲𑁆𑀫𑀺𑀁 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀪𑁂𑀤𑁂’’𑀢𑀺. 𑀲𑀧𑀭𑀲𑀦𑁆𑀢𑀸𑀦𑁂𑀢𑀺 𑀅𑀢𑁆𑀢𑀧𑀭𑀲𑀦𑁆𑀢𑀸𑀦𑁂. 𑀧𑀳𑀸𑀦𑀸𑀬𑀸𑀢𑀺 𑀏𑀢𑁆𑀣 𑀳𑀸𑀥𑀸𑀢𑀼𑀬𑀸 𑀓𑀭𑀡𑀜𑁆𑀘 𑀆𑀬𑀲𑀤𑁆𑀤𑀲𑁆𑀲 𑀢𑀤𑀢𑁆𑀣𑀪𑀸𑀯𑀜𑁆𑀘 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀫𑁂𑀢𑁆𑀢𑀸𑀪𑀸𑀯𑀦𑀸𑀤𑀻𑀳𑀺 𑀦𑀬𑁂𑀳𑀺 𑀧𑀳𑀸𑀦𑀢𑁆𑀣’’𑀦𑁆𑀢𑀺. 𑀫𑁂𑀢𑁆𑀢𑀸𑀪𑀸𑀯𑀦𑀸𑀤𑀻𑀳𑀻𑀢𑀺𑀆𑀤𑀺𑀲𑀤𑁆𑀤𑁂𑀦 𑀓𑀭𑀼𑀡𑀸𑀪𑀸𑀯𑀦𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀢𑀦𑁆𑀢𑀺 𑀯𑀺𑀯𑀸𑀤𑀫𑀽𑀮𑀁. ‘‘𑀅𑀧𑁆𑀧𑀯𑀢𑁆𑀢𑀺𑀪𑀸𑀯𑀸𑀬𑀸’’𑀢𑀺 𑀇𑀫𑀺𑀦𑀸 𑀅𑀦𑀯𑀲𑁆𑀲𑀯𑀸𑀬𑀸𑀢𑀺 𑀏𑀢𑁆𑀣 𑀅𑀯𑀧𑀼𑀩𑁆𑀩 𑀲𑀼𑀥𑀸𑀢𑀼𑀬𑀸 𑀧𑀯𑀢𑁆𑀢𑀦𑀢𑁆𑀣𑀁 𑀤𑀲𑁆𑀲𑁂𑀢𑀺.

𑀲𑀦𑁆𑀤𑀺𑀝𑁆𑀞𑀺𑀧𑀭𑀸𑀫𑀸𑀲𑀻𑀢𑀺 𑀏𑀢𑁆𑀣 𑀲𑀲𑁆𑀲 𑀅𑀢𑁆𑀢𑀦𑁄 𑀇𑀤𑀁 𑀲𑀁, 𑀲𑀁 𑀤𑀺𑀝𑁆𑀞𑀺𑀁 𑀧𑀭𑀢𑁄 𑀆𑀫𑀲𑀢𑀻𑀢𑀺 𑀲𑀦𑁆𑀤𑀺𑀝𑁆𑀞𑀺𑀧𑀭𑀸𑀫𑀸𑀲𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀓𑀫𑁂𑀯 𑀤𑀺𑀝𑁆𑀞𑀺𑀁 𑀧𑀭𑀸𑀫𑀲𑀢𑀻’’𑀢𑀺. ‘‘𑀬’’𑀦𑁆𑀢𑀺𑀆𑀤𑀺𑀦𑀸 𑀧𑀭𑀸𑀫𑀲𑀦𑀸𑀓𑀸𑀭𑀁 𑀤𑀲𑁆𑀲𑁂𑀢𑀺. 𑀆𑀥𑀸𑀦𑀕𑁆𑀕𑀸𑀳𑀻𑀢𑀺 𑀏𑀢𑁆𑀣 𑀆𑀪𑀼𑀲𑁄 𑀞𑀺𑀬𑀢𑁂 𑀆𑀥𑀸𑀦𑀦𑁆𑀢𑀺 𑀯𑀘𑀦𑀢𑁆𑀣𑁂𑀦 𑀆𑀥𑀸𑀦𑀲𑀤𑁆𑀤𑁄 𑀤𑀴𑁆𑀳𑀧𑀭𑀺𑀬𑀸𑀬𑁄𑀢𑀺 𑀆𑀳 ‘‘𑀤𑀴𑁆𑀳𑀕𑁆𑀕𑀸𑀳𑀻’’𑀢𑀺. 𑀤𑀴𑁆𑀳𑀁 𑀕𑀡𑁆𑀳𑀸𑀢𑀻𑀢𑀺 𑀤𑀴𑁆𑀳𑀕𑁆𑀕𑀸𑀳𑀻.

𑁨𑁭𑁩. 𑀅𑀦𑀼𑀯𑀸𑀤𑀫𑀽𑀮𑀦𑀺𑀤𑁆𑀤𑁂𑀲𑁄 𑀓𑀺𑀜𑁆𑀘𑀸𑀧𑀺 𑀲𑀫𑀸𑀦𑁄𑀢𑀺 𑀬𑁄𑀚𑀦𑀸. 𑀅𑀣 𑀔𑁄𑀢𑀺 𑀢𑀣𑀸 𑀲𑀫𑀸𑀦𑁄𑀧𑀺, 𑀅𑀬𑀫𑁂𑀢𑁆𑀣 𑀯𑀺𑀲𑁂𑀲𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀺𑀯𑀤𑀦𑁆𑀢𑀸𑀦𑀁 𑀧𑀼𑀕𑁆𑀕𑀮𑀸𑀦𑀦𑁆𑀢𑀺 𑀬𑁄𑀚𑀦𑀸. 𑀢𑀣𑀸 𑀯𑀺𑀯𑀤𑀦𑁆𑀢𑀸𑀢𑀺 𑀢𑁂𑀦𑀸𑀓𑀸𑀭𑁂𑀦 𑀯𑀺𑀯𑀤𑀦𑁆𑀢𑀸, 𑀅𑀦𑀼𑀯𑀤𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀅𑀲𑀼𑀓𑀁 𑀦𑀸𑀫 𑀯𑀺𑀧𑀢𑁆𑀢𑀺𑀁 𑀆𑀧𑀦𑁆𑀦𑁄’’𑀢𑀺 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀆𑀧𑀢𑁆𑀢𑀺𑀬𑀸 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀧𑀸𑀭𑀸𑀚𑀺𑀓𑀁 𑀆𑀧𑀦𑁆𑀦𑁄𑀲𑀻’’𑀢𑀺𑀆𑀤𑀺. 𑀏𑀢𑁆𑀣𑀸𑀢𑀺 𑀅𑀦𑀼𑀯𑀸𑀤𑀫𑀽𑀮𑁂. 𑀯𑀺𑀲𑁂𑀲𑁄𑀢𑀺 𑀯𑀺𑀯𑀸𑀤𑀫𑀽𑀮𑀢𑁄 𑀯𑀺𑀲𑁂𑀲𑁄. 𑀯𑀺𑀯𑀤𑀦𑁆𑀢𑀸𑀦𑀁 𑀓𑁄𑀥𑀽𑀧𑀦𑀸𑀳𑀸𑀤𑀻𑀦𑀺 𑀯𑀺𑀯𑀸𑀤𑀫𑀽𑀮𑀸𑀦𑀺, 𑀅𑀦𑀼𑀯𑀤𑀦𑁆𑀢𑀸𑀦𑀁 𑀅𑀦𑀼𑀯𑀸𑀤𑀫𑀽𑀮𑀸𑀦𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁨𑁭𑁪. 𑀫𑁂𑀢𑁆𑀢𑀁 𑀓𑀸𑀬𑀓𑀫𑁆𑀫𑀁 𑀦𑀸𑀫𑀸𑀢𑀺 𑀏𑀢𑁆𑀣 𑀫𑁂𑀢𑁆𑀢𑀸 𑀏𑀢𑀲𑁆𑀲𑀢𑁆𑀣𑀻𑀢𑀺 𑀫𑁂𑀢𑁆𑀢𑀁, 𑀓𑀸𑀬𑀓𑀫𑁆𑀫𑀁, 𑀫𑁂𑀢𑁆𑀢𑀘𑀺𑀢𑁆𑀢𑀲𑀳𑀕𑀢𑀁 𑀓𑀸𑀬𑀓𑀫𑁆𑀫𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀫𑁂𑀢𑁆𑀢𑀘𑀺𑀢𑁆𑀢𑁂𑀦 𑀓𑀢𑀁 𑀓𑀸𑀬𑀓𑀫𑁆𑀫’’𑀦𑁆𑀢𑀺. 𑀲𑀫𑁆𑀫𑀼𑀔𑀧𑀭𑀫𑁆𑀫𑀼𑀔𑀸𑀦𑀁 𑀯𑀺𑀢𑁆𑀣𑀸𑀭𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀢𑀢𑁆𑀣𑀸’’𑀢𑀺𑀆𑀤𑀺. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀲𑀫𑁆𑀫𑀼𑀔𑀧𑀭𑀫𑁆𑀫𑀼𑀔𑁂𑀲𑀼. 𑀓𑀸𑀬𑀓𑀫𑁆𑀫𑀁 𑀦𑀸𑀫𑀸𑀢𑀺 𑀫𑁂𑀢𑁆𑀢𑀁 𑀓𑀸𑀬𑀓𑀫𑁆𑀫𑀁 𑀦𑀸𑀫. 𑀣𑁂𑀭𑀸𑀦𑀁 𑀤𑀸𑀦𑀇𑀢𑀺 𑀲𑀫𑁆𑀩𑀦𑁆𑀥𑁄. 𑀉𑀪𑀬𑁂𑀳𑀺𑀧𑀻𑀢𑀺 𑀦𑀯𑀓𑀢𑁆𑀣𑁂𑀭𑁂𑀳𑀺𑀧𑀺. 𑀢𑁂𑀲𑀽𑀢𑀺 𑀦𑀯𑀓𑀢𑁆𑀣𑁂𑀭𑁂𑀲𑀼. 𑀅𑀯𑀫𑀜𑁆𑀜𑀦𑁆𑀢𑀺 𑀅𑀯𑀫𑀸𑀦𑀁. 𑀅𑀢𑁆𑀢𑀦𑁄 𑀤𑀼𑀦𑁆𑀦𑀺𑀓𑁆𑀔𑀺𑀢𑁆𑀢𑀸𑀦𑀁 𑀧𑀝𑀺𑀲𑀸𑀫𑀦𑀁 𑀯𑀺𑀬 𑀧𑀝𑀺𑀲𑀸𑀫𑀦𑀦𑁆𑀢𑀺 𑀬𑁄𑀚𑀦𑀸. ‘‘𑀫𑁂𑀢𑁆𑀢𑀸𑀓𑀸𑀬𑀓𑀫𑁆𑀫𑀲𑀗𑁆𑀔𑀸𑀢𑁄’’𑀢𑀺 𑀇𑀫𑀺𑀦𑀸 𑀅𑀬𑀫𑁆𑀧𑀺 𑀥𑀫𑁆𑀫𑁄𑀢𑀺 𑀏𑀢𑁆𑀣 𑀥𑀫𑁆𑀫𑀲𑀭𑀽𑀧𑀁 𑀤𑀲𑁆𑀲𑁂𑀢𑀺. 𑀧𑀺𑀲𑀤𑁆𑀤𑁄 𑀉𑀧𑀭𑀺 𑀯𑀓𑁆𑀔𑀫𑀸𑀦𑁂 𑀥𑀫𑁆𑀫𑁂 𑀅𑀧𑁂𑀓𑁆𑀔𑀢𑀺. ‘‘𑀲𑀭𑀺𑀢𑀩𑁆𑀩𑁄’’𑀢𑀺 𑀇𑀫𑀺𑀦𑀸 𑀅𑀦𑀻𑀬𑀲𑀤𑁆𑀤𑁄 𑀓𑀫𑁆𑀫𑀯𑀸𑀘𑀓𑁄𑀢𑀺 𑀤𑀲𑁆𑀲𑁂𑀢𑀺. 𑀲𑀢𑀺𑀚𑀦𑀓𑁄𑀢𑀺 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀲𑀢𑀺𑀚𑀦𑀓𑁄. 𑀢𑀲𑁆𑀲 𑀧𑀤𑀲𑁆𑀲 𑀅𑀥𑀺𑀧𑁆𑀧𑀸𑀬𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀬𑁄 𑀦’’𑀦𑁆𑀢𑀺𑀆𑀤𑀺. 𑀢𑀢𑁆𑀣 𑀬𑁄𑀢𑀺 𑀧𑀼𑀕𑁆𑀕𑀮𑁄. 𑀦𑀦𑁆𑀢𑀺 𑀫𑁂𑀢𑁆𑀢𑀁 𑀓𑀸𑀬𑀓𑀫𑁆𑀫𑀁. 𑀢𑀁 𑀧𑀼𑀕𑁆𑀕𑀮𑀁 𑀅𑀦𑀼𑀲𑁆𑀲𑀭𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀬𑁂𑀲𑀦𑁆𑀢𑀺 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁. 𑀢𑁂𑀢𑀺 𑀲𑀩𑁆𑀭𑀳𑁆𑀫𑀘𑀸𑀭𑀺𑀦𑁄. 𑀧𑀲𑀦𑁆𑀦𑀘𑀺𑀢𑁆𑀢𑀸 𑀳𑀼𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀧𑀺𑀬𑀁 𑀓𑀭𑁄𑀢𑀻’’𑀢𑀺 𑀇𑀫𑀺𑀦𑀸 𑀧𑀺𑀬𑀓𑀭𑀡𑁄𑀢𑀺 𑀧𑀤𑀲𑁆𑀲 𑀧𑀺𑀬𑀁 𑀓𑀭𑁄𑀢𑀻𑀢𑀺 𑀧𑀺𑀬𑀓𑀭𑀡𑁄𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀏𑀲𑁂𑀯 𑀦𑀬𑁄 𑀕𑀭𑀼𑀓𑀭𑀡𑁄𑀢𑀺 𑀏𑀢𑁆𑀣𑀸𑀧𑀺. ‘‘𑀲𑀗𑁆𑀕𑀳𑁂𑀢𑀩𑁆𑀩𑀪𑀸𑀯𑀸𑀬𑀸’’𑀢𑀺 𑀇𑀫𑀺𑀦𑀸 𑀲𑀗𑁆𑀕𑀳𑀸𑀬𑀸𑀢𑀺 𑀧𑀤𑀲𑁆𑀲 𑀪𑀸𑀯𑀧𑁆𑀧𑀥𑀸𑀦𑀓𑀫𑁆𑀫𑀦𑀺𑀤𑁆𑀤𑁂𑀲𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀲𑀗𑁆𑀕𑀳𑁂𑀢𑀩𑁆𑀩𑁄𑀢𑀺 𑀲𑀗𑁆𑀕𑀳𑁄, 𑀢𑀤𑀢𑁆𑀣𑀸𑀬. 𑀢𑁂𑀳𑀻𑀢𑀺 𑀲𑀩𑁆𑀭𑀳𑁆𑀫𑀘𑀸𑀭𑀻𑀳𑀺. ‘‘𑀲𑀫𑀕𑁆𑀕𑀪𑀸𑀯𑀸𑀬𑀸’’𑀢𑀺 𑀇𑀫𑀺𑀦𑀸 𑀲𑀫𑀕𑁆𑀕𑀲𑁆𑀲 𑀪𑀸𑀯𑁄 𑀲𑀸𑀫𑀕𑁆𑀕𑀻𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺.

𑀧𑀕𑁆𑀕𑀬𑁆𑀳 𑀯𑀘𑀦𑀦𑁆𑀢𑀺 𑀧𑀕𑁆𑀕𑀳𑁂𑀢𑁆𑀯𑀸 𑀯𑀘𑀦𑀁. 𑀯𑀺𑀳𑀸𑀭𑁂𑀢𑀺 𑀆𑀥𑀸𑀭𑁂 𑀪𑀼𑀫𑁆𑀫𑀁, 𑀣𑁂𑀭𑁂 𑀅𑀲𑀦𑁆𑀢𑁂𑀢𑀺 𑀬𑁄𑀚𑀦𑀸. 𑀢𑀦𑁆𑀢𑀺 𑀣𑁂𑀭𑀁 𑀓𑀤𑀸 𑀆𑀕𑀫𑀺𑀲𑁆𑀲𑀢𑀺 𑀦𑀼𑀔𑁄𑀢𑀺 𑀬𑁄𑀚𑀦𑀸. 𑀫𑀫𑀸𑀬𑀦𑀯𑀘𑀦𑀦𑁆𑀢𑀺 𑀫𑀫𑀸𑀬𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀁 𑀯𑀘𑀦𑀁. 𑀫𑁂𑀢𑁆𑀢𑀸𑀲𑀺𑀦𑁂𑀳𑀲𑀺𑀦𑀺𑀤𑁆𑀥𑀸𑀦𑀻𑀢𑀺 𑀫𑁂𑀢𑁆𑀢𑀸𑀲𑀗𑁆𑀔𑀸𑀢𑁂𑀦 𑀲𑀺𑀦𑁂𑀳𑁂𑀦 𑀲𑀺𑀦𑁂𑀳𑀺𑀢𑀸𑀦𑀺. 𑀦𑀬𑀦𑀸𑀦𑀻𑀢𑀺 𑀘𑀓𑁆𑀔𑀽𑀦𑀺. ‘‘𑀅𑀧𑁆𑀧𑀸𑀩𑀸𑀥𑁄’’𑀢𑀺 𑀇𑀫𑀺𑀦𑀸 𑀅𑀭𑁄𑀕𑁄𑀢𑀺 𑀧𑀤𑀲𑁆𑀲𑁂𑀯 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀦𑀺𑀘𑁆𑀘𑀸𑀩𑀸𑀥𑁂𑀦 𑀯𑀸 𑀅𑀭𑁄𑀕𑁄, 𑀆𑀕𑀦𑁆𑀢𑀼𑀓𑀸𑀩𑀸𑀥𑁂𑀦 𑀅𑀧𑁆𑀧𑀸𑀩𑀸𑀥𑁄, 𑀅𑀚𑁆𑀛𑀢𑁆𑀢𑀸𑀩𑀸𑀥𑁂𑀦 𑀯𑀸 𑀅𑀭𑁄𑀕𑁄, 𑀩𑀳𑀺𑀤𑁆𑀥𑀸𑀩𑀸𑀥𑁂𑀦 𑀅𑀧𑁆𑀧𑀸𑀩𑀸𑀥𑁄, 𑀓𑀸𑀬𑀸𑀩𑀸𑀥𑁂𑀦 𑀯𑀸 𑀅𑀭𑁄𑀕𑁄, 𑀘𑀺𑀢𑁆𑀢𑀸𑀩𑀸𑀥𑁂𑀦 𑀅𑀧𑁆𑀧𑀸𑀩𑀸𑀥𑁄. 𑀲𑀫𑀦𑁆𑀦𑀸𑀳𑀭𑀡𑀦𑁆𑀢𑀺 𑀧𑀼𑀦𑀧𑁆𑀧𑀼𑀦𑀁 𑀫𑀦𑀲𑀺𑀓𑀭𑀡𑀁.

𑀦 𑀧𑀼𑀕𑁆𑀕𑀮𑀁 𑀧𑀝𑀺𑀯𑀺𑀪𑀚𑀺𑀢𑁆𑀯𑀸 𑀪𑀼𑀜𑁆𑀚𑀢𑀻𑀢𑀺 𑀬𑁄𑀚𑀦𑀸. 𑀢𑀤𑀢𑁆𑀣𑀁 𑀯𑀺𑀢𑁆𑀣𑀸𑀭𑁂𑀦𑁆𑀢𑁄 𑀆𑀳 ‘‘𑀬𑁄 𑀳𑀻’’𑀢𑀺𑀆𑀤𑀺. 𑀢𑀢𑁆𑀣 𑀬𑁄𑀢𑀺 𑀧𑀼𑀕𑁆𑀕𑀮𑁄, 𑀪𑀼𑀜𑁆𑀚𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀏𑀢𑁆𑀢𑀓𑀁…𑀧𑁂… 𑀪𑀼𑀜𑁆𑀚𑀺𑀲𑁆𑀲𑀸𑀫𑀻’’𑀢𑀺 𑀇𑀫𑀺𑀦𑀸 𑀆𑀫𑀺𑀲𑀧𑀝𑀺𑀯𑀺𑀪𑀢𑁆𑀢𑀪𑁄𑀕𑀺𑀪𑀸𑀯𑀁 𑀤𑀲𑁆𑀲𑁂𑀢𑀺. ‘‘𑀏𑀢𑁆𑀢𑀓𑀁 𑀯𑀸 𑀅𑀲𑀼𑀓𑀲𑁆𑀲 𑀘…𑀧𑁂… 𑀪𑀼𑀜𑁆𑀚𑀺𑀲𑁆𑀲𑀸𑀫𑀻’’𑀢𑀺 𑀇𑀫𑀺𑀦𑀸 𑀧𑀼𑀕𑁆𑀕𑀮𑀧𑀝𑀺𑀯𑀺𑀪𑀢𑁆𑀢𑀪𑁄𑀕𑀺𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀅𑀬𑀦𑁆𑀢𑀺 𑀧𑀼𑀕𑁆𑀕𑀮𑁄. 𑀆𑀪𑀢𑀦𑁆𑀢𑀺 𑀕𑀸𑀫𑀸𑀤𑀺𑀢𑁄 𑀆𑀦𑀻𑀢𑀁. 𑀅𑀤𑀸𑀢𑀼𑀫𑁆𑀧𑀻𑀢𑀺 𑀧𑀺𑀲𑀤𑁆𑀤𑁂𑀦 𑀤𑀸𑀢𑀼𑀫𑁆𑀧𑀺 𑀯𑀝𑁆𑀝𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀤𑀸𑀦𑀜𑁆𑀳𑀺 𑀦𑀸𑀫 𑀦 𑀓𑀲𑁆𑀲𑀘𑀺 𑀯𑀸𑀭𑀺𑀢𑀁. 𑀲𑀩𑁆𑀩𑁂𑀲𑀦𑁆𑀢𑀺 𑀤𑀼𑀲𑁆𑀲𑀻𑀮𑀲𑀻𑀮𑀯𑀦𑁆𑀢𑀸𑀦𑀁. 𑀯𑀼𑀢𑁆𑀢𑀦𑁆𑀢𑀺 𑀅𑀝𑁆𑀞𑀓𑀣𑀸𑀬𑀁 (𑀤𑀻. 𑀦𑀺. 𑀅𑀝𑁆𑀞. 𑁨.𑁧𑁪𑁧; 𑀫. 𑀦𑀺. 𑀅𑀝𑁆𑀞. 𑁨.𑁪𑁯𑁨; 𑀅. 𑀦𑀺. 𑀅𑀝𑁆𑀞. 𑁩.𑁬.𑁧𑁧) 𑀯𑀼𑀢𑁆𑀢𑀁. 𑀯𑀺𑀘𑁂𑀬𑁆𑀬𑀸𑀢𑀺 𑀯𑀺𑀘𑀺𑀦𑀺𑀢𑁆𑀯𑀸. 𑀤𑀸𑀢𑀼𑀫𑁆𑀧𑀻𑀢𑀺 𑀧𑀺𑀲𑀤𑁆𑀤𑁂𑀦 𑀅𑀯𑀺𑀘𑀺𑀦𑀺𑀢𑁆𑀯𑀸 𑀲𑀸𑀫𑀜𑁆𑀜𑀢𑁄 𑀤𑀸𑀢𑀼𑀫𑁆𑀧𑀺 𑀯𑀝𑁆𑀝𑀢𑀻𑀢𑀺 𑀲𑀫𑁆𑀧𑀺𑀡𑁆𑀟𑁂𑀢𑀺. 𑀦𑀦𑀼 𑀏𑀯𑀁 𑀲𑀢𑀺 𑀧𑀼𑀕𑁆𑀕𑀮𑀯𑀺𑀪𑀸𑀕𑁄 𑀓𑀢𑁄 𑀦𑀸𑀫 𑀳𑁄𑀢𑀺, 𑀓𑀲𑁆𑀫𑀸 𑀯𑀺𑀘𑁂𑀬𑁆𑀬 𑀤𑀸𑀢𑀼𑀁 𑀯𑀝𑁆𑀝𑀢𑀻𑀢𑀺 𑀆𑀳 ‘‘𑀦 𑀳𑀻’’𑀢𑀺𑀆𑀤𑀺. 𑀳𑀻𑀢𑀺 𑀬𑀲𑁆𑀫𑀸. 𑀏𑀢𑁂𑀢𑀺 𑀕𑀺𑀮𑀸𑀦𑀸𑀤𑀬𑁄. 𑀇𑀤𑀁 𑀧𑀤𑀁 𑀯𑀺𑀘𑀺𑀦𑀺𑀢𑁆𑀯𑀸𑀢𑀺 𑀧𑀤𑁂 𑀓𑀫𑁆𑀫𑀁, ‘‘𑀤𑁂𑀦𑁆𑀢𑁂𑀦𑀸’’𑀢𑀺 𑀧𑀤𑁂 𑀲𑀫𑁆𑀧𑀤𑀸𑀦𑀁. 𑀳𑀻𑀢𑀺 𑀲𑀘𑁆𑀘𑀁. 𑀇𑀢𑀺 𑀅𑀬𑀦𑁆𑀢𑀺 𑀇𑀢𑀺 𑀫𑀦𑀲𑀺𑀓𑀢𑁆𑀯𑀸 𑀅𑀬𑀁 𑀲𑀸𑀭𑀡𑀻𑀬𑀥𑀫𑁆𑀫𑀧𑀽𑀭𑀓𑁄.

𑀅𑀔𑀡𑁆𑀟𑀸𑀦𑀻𑀢𑀺𑀆𑀤𑀻𑀲𑀼 𑀧𑀞𑀫𑀁 𑀢𑀸𑀯 𑀔𑀡𑁆𑀟𑀙𑀺𑀤𑁆𑀤𑀲𑀩𑀮𑀓𑀫𑁆𑀫𑀸𑀲𑀸𑀦𑀺 𑀤𑀲𑁆𑀲𑁂𑀢𑁆𑀯𑀸 𑀢𑁂𑀲𑀁 𑀧𑀝𑀺𑀧𑀓𑁆𑀔𑀯𑀲𑁂𑀦 𑀅𑀔𑀡𑁆𑀟𑀸𑀤𑀻𑀦𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀬𑀲𑁆𑀲𑀸’’𑀢𑀺𑀆𑀤𑀺. 𑀢𑀢𑁆𑀣 𑀬𑀲𑁆𑀲𑀸𑀢𑀺 𑀪𑀺𑀓𑁆𑀔𑀼𑀲𑁆𑀲, 𑀲𑀺𑀓𑁆𑀔𑀸𑀧𑀤𑀁 𑀪𑀺𑀦𑁆𑀦𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀢𑁆𑀢𑀲𑀼 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀲𑀽𑀢𑀺 𑀆𑀥𑀸𑀭𑁂 𑀪𑀼𑀫𑁆𑀫𑀁, 𑀲𑀺𑀓𑁆𑀔𑀸𑀧𑀤𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀆𑀧𑀢𑁆𑀢𑀺𑀜𑁆𑀳𑀺 𑀧𑀝𑀺𑀘𑁆𑀘 𑀲𑀺𑀓𑁆𑀔𑀸𑀧𑀤𑀲𑁆𑀲 𑀧𑀜𑁆𑀜𑀢𑁆𑀢𑀢𑁆𑀢𑀸 𑀆𑀧𑀢𑁆𑀢𑀺 𑀢𑀲𑁆𑀲 𑀯𑀺𑀲𑀬𑁄 𑀳𑁄𑀢𑀺. 𑀆𑀤𑀺𑀫𑁆𑀳𑀺 𑀯𑀸 𑀅𑀦𑁆𑀢𑁂 𑀯𑀸𑀢𑀺 𑀲𑀺𑀓𑁆𑀔𑀸𑀧𑀤𑀸𑀦𑀁 𑀆𑀤𑀺𑀫𑁆𑀳𑀺 𑀯𑀸 𑀅𑀦𑁆𑀢𑁂 𑀯𑀸. 𑀯𑀸𑀲𑀤𑁆𑀤𑁄 𑀅𑀦𑀺𑀬𑀫𑀯𑀺𑀓𑀧𑁆𑀧𑀢𑁆𑀣𑁄. 𑀲𑀺𑀓𑁆𑀔𑀸𑀧𑀤𑁂 𑀪𑀺𑀦𑁆𑀦𑁂 𑀆𑀧𑀢𑁆𑀢𑀺𑀲𑀫𑁆𑀪𑀯𑀢𑁄 𑀯𑀼𑀢𑁆𑀢𑀁 ‘‘𑀲𑀺𑀓𑁆𑀔𑀸𑀧𑀤𑀁 𑀪𑀺𑀦𑁆𑀦’’𑀦𑁆𑀢𑀺. 𑀔𑀡𑁆𑀟𑀁 𑀦𑀸𑀫𑀸𑀢𑀺 𑀙𑀺𑀦𑁆𑀦𑀁 𑀦𑀸𑀫. 𑀯𑁂𑀫𑀚𑁆𑀛𑁂𑀢𑀺 𑀲𑀺𑀓𑁆𑀔𑀸𑀧𑀤𑀸𑀦𑀁 𑀯𑁂𑀫𑀚𑁆𑀛𑁂. 𑀪𑀺𑀦𑁆𑀦𑀦𑁆𑀢𑀺 𑀲𑀺𑀓𑁆𑀔𑀸𑀧𑀤𑀁 𑀪𑀺𑀦𑁆𑀦𑀁. 𑀙𑀺𑀤𑁆𑀤𑀁 𑀦𑀸𑀫𑀸𑀢𑀺 𑀯𑀺𑀯𑀭𑀁 𑀦𑀸𑀫. 𑀤𑁆𑀯𑁂 𑀢𑀻𑀡𑀺 𑀲𑀺𑀓𑁆𑀔𑀸𑀧𑀤𑀸𑀦𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀩𑀮𑀁 𑀦𑀸𑀫𑀸𑀢𑀺 𑀘𑀺𑀢𑁆𑀭𑀁 𑀦𑀸𑀫. 𑀪𑀺𑀦𑁆𑀦𑀸𑀦𑀻𑀢𑀺 𑀲𑀺𑀓𑁆𑀔𑀸𑀧𑀤𑀸𑀦𑀺 𑀪𑀺𑀦𑁆𑀦𑀸𑀦𑀺. 𑀓𑀫𑁆𑀫𑀸𑀲𑀁 𑀦𑀸𑀫𑀸𑀢𑀺 𑀯𑀺𑀘𑀺𑀢𑁆𑀭𑀁 𑀦𑀸𑀫. 𑀏𑀢𑁆𑀣 𑀘 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀏𑀓𑁂𑀦 𑀯𑀺𑀲𑀪𑀸𑀕𑀯𑀡𑁆𑀡𑁂𑀦 𑀘𑀺𑀢𑁆𑀭𑀁 𑀲𑀩𑀮𑀁 𑀦𑀸𑀫, 𑀦𑀸𑀦𑀸𑀞𑀸𑀦𑁂 𑀦𑀸𑀦𑀸𑀯𑀡𑁆𑀡𑁂𑀦 𑀯𑀺𑀘𑀺𑀢𑁆𑀭𑀁 𑀓𑀫𑁆𑀫𑀸𑀲𑀁 𑀦𑀸𑀫𑀸𑀢𑀺 𑀅𑀬𑀫𑁂𑀢𑁂𑀲𑀁 𑀯𑀺𑀲𑁂𑀲𑁄. 𑀔𑀡𑁆𑀟𑀸𑀤𑀻𑀦𑀁 𑀯𑀺𑀧𑀭𑀺𑀯𑀢𑁆𑀢𑀦𑀯𑀲𑁂𑀦 𑀅𑀔𑀡𑁆𑀟𑀸𑀤𑀻𑀦𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀬𑀲𑁆𑀲 𑀧𑀦𑀸’’𑀢𑀺𑀆𑀤𑀺. 𑀅𑀪𑀺𑀦𑁆𑀦𑀸𑀦𑀺𑀲𑀻𑀮𑀸𑀦𑀻𑀢𑀺 𑀅𑀪𑀺𑀦𑁆𑀦𑀸𑀦𑀺 𑀲𑀺𑀓𑁆𑀔𑀸𑀧𑀤𑀲𑀻𑀮𑀸𑀦𑀺. 𑀢𑀸𑀦𑀺 𑀧𑀦𑀸𑀢𑀺 𑀲𑀻𑀮𑀸𑀦𑀺 𑀧𑀦. ‘‘𑀏𑀢𑀸𑀦𑀻’’𑀢𑀺 𑀧𑀤𑀁 𑀧𑀤𑀸𑀮𑀗𑁆𑀓𑀸𑀭𑀫𑀢𑁆𑀢𑀁. 𑀪𑀼𑀚𑀺𑀲𑁆𑀲𑀪𑀸𑀯𑀓𑀭𑀡𑀢𑁄𑀢𑀺 𑀢𑀡𑁆𑀳𑀸𑀤𑀸𑀲𑀩𑁆𑀬𑀢𑁄 𑀫𑁄𑀘𑁂𑀢𑁆𑀯𑀸 𑀪𑀼𑀚𑀺𑀲𑁆𑀲𑀓𑀭𑀡𑀪𑀸𑀯𑀢𑁄. 𑀇𑀫𑀺𑀦𑀸 ‘‘𑀪𑀼𑀚𑀺𑀲𑁆𑀲𑀪𑀸𑀯𑀓𑀭𑀡𑀸𑀦𑀻’’𑀢𑀺 𑀯𑀢𑁆𑀢𑀩𑁆𑀩𑁂 𑀉𑀢𑁆𑀢𑀭𑀧𑀤𑀮𑁄𑀧𑀯𑀲𑁂𑀦 𑀏𑀯𑀁 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀪𑀼𑀚𑀺𑀲𑁆𑀲𑀸𑀦𑀻𑀢𑀺 𑀯𑀼𑀘𑁆𑀘𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀺𑀜𑁆𑀜𑀽𑀳𑀻𑀢𑀺 𑀩𑀼𑀤𑁆𑀥𑀸𑀤𑀻𑀳𑀺 𑀲𑀧𑁆𑀧𑀼𑀭𑀺𑀲𑁂𑀳𑀺. 𑀉𑀧𑀘𑀸𑀭𑀲𑀫𑀸𑀥𑀺𑀁 𑀅𑀧𑁆𑀧𑀦𑀸𑀲𑀫𑀸𑀥𑀺𑀁 𑀯𑀸𑀢𑀺 𑀏𑀢𑁆𑀣 𑀯𑀸𑀲𑀤𑁆𑀤𑁄 𑀲𑀫𑀼𑀘𑁆𑀘𑀬𑀢𑁆𑀣𑁄. 𑀉𑀧𑀘𑀸𑀭𑀲𑀫𑀸𑀥𑀺𑀜𑁆𑀘 𑀅𑀧𑁆𑀧𑀦𑀸𑀲𑀫𑀸𑀥𑀺𑀁 𑀘𑀸𑀢𑀺 𑀳𑀺 𑀅𑀢𑁆𑀣𑁄. ‘‘𑀲𑀁𑀯𑀢𑁆𑀢𑀬𑀦𑁆𑀢𑀻’’𑀢𑀺 𑀇𑀫𑀺𑀦𑀸 𑀲𑀫𑀸𑀥𑀺𑀲𑀁𑀯𑀢𑁆𑀢𑀦𑀺𑀓𑀸𑀦𑀻𑀢𑀺 𑀏𑀢𑁆𑀣 𑀅𑀦𑀻𑀬𑀲𑀤𑁆𑀤𑁄 𑀩𑀳𑀼𑀮𑀁 𑀓𑀢𑁆𑀢𑀼𑀯𑀸𑀘𑀓𑁄𑀢𑀺 𑀤𑀲𑁆𑀲𑁂𑀢𑀺. 𑀲𑀻𑀮𑀲𑀸𑀫𑀜𑁆𑀜𑀕𑀢𑁄𑀢𑀺 𑀏𑀢𑁆𑀣 𑀲𑀫𑀸𑀦𑀲𑁆𑀲 𑀪𑀸𑀯𑁄 𑀲𑀸𑀫𑀜𑁆𑀜𑀁, 𑀢𑀁 𑀕𑀢𑁄𑀢𑀺 𑀲𑀸𑀫𑀜𑁆𑀜𑀕𑀢𑁄, 𑀲𑀻𑀮𑁂𑀦 𑀲𑀸𑀫𑀜𑁆𑀜𑀕𑀢𑁄 𑀲𑀻𑀮𑀲𑀸𑀫𑀜𑁆𑀜𑀕𑀢𑁄, 𑀳𑀼𑀢𑁆𑀯𑀸 𑀯𑀺𑀳𑀭𑀢𑀻𑀢𑀺 𑀬𑁄𑀚𑀦𑀸. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀫𑀸𑀦𑀪𑀸𑀯𑀽𑀧𑀕𑀢𑀲𑀻𑀮𑁄 𑀯𑀺𑀳𑀭𑀢𑀻’’𑀢𑀺.

𑀬𑀸𑀬𑀁 𑀤𑀺𑀝𑁆𑀞𑀻𑀢𑀺 𑀏𑀢𑁆𑀣 ‘‘𑀤𑀺𑀝𑁆𑀞𑀻’’𑀢𑀺 𑀲𑀸𑀫𑀜𑁆𑀜𑀕𑀢𑀲𑁆𑀲𑀸𑀧𑀺 𑀲𑀤𑁆𑀤𑀲𑁆𑀲 ‘‘𑀅𑀭𑀺𑀬𑀸’’𑀢𑀺 𑀲𑀤𑁆𑀤𑀦𑁆𑀢𑀭𑀲𑀦𑁆𑀦𑀺𑀥𑀸𑀦𑁂𑀦 𑀯𑀺𑀲𑁂𑀲𑀯𑀺𑀲𑀬𑀢𑁆𑀢𑀸 𑀲𑀫𑁆𑀫𑀸𑀤𑀺𑀝𑁆𑀞𑀻𑀢𑀺 𑀆𑀳 ‘‘𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀸 𑀲𑀫𑁆𑀫𑀸𑀤𑀺𑀝𑁆𑀞𑀻’’𑀢𑀺. ‘‘𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀸’’𑀢𑀺 𑀇𑀫𑀺𑀦𑀸 𑀮𑁄𑀓𑀺𑀬𑀲𑀫𑁆𑀫𑀸𑀤𑀺𑀝𑁆𑀞𑀺𑀁 𑀧𑀝𑀺𑀓𑁆𑀔𑀺𑀧𑀢𑀺. 𑀦𑀺𑀤𑁆𑀤𑁄𑀲𑀸𑀢𑀺 𑀯𑀺𑀲𑀼𑀤𑁆𑀥𑀢𑁆𑀢𑀸, 𑀉𑀢𑁆𑀢𑀫𑀢𑁆𑀢𑀸 𑀯𑀸 𑀦𑀺𑀤𑁆𑀤𑁄𑀲𑀸. 𑀇𑀫𑀺𑀦𑀸 𑀅𑀭𑀺𑀬𑀲𑀤𑁆𑀤𑁄 𑀦𑀺𑀤𑁆𑀤𑁄𑀲𑀢𑁆𑀣𑀯𑀸𑀘𑀓𑁄 𑀅𑀦𑀺𑀧𑁆𑀨𑀦𑁆𑀦𑀧𑀸𑀝𑀺𑀧𑀤𑀺𑀓𑁄𑀢𑀺 𑀤𑀲𑁆𑀲𑁂𑀢𑀺. 𑀦𑀺𑀬𑁆𑀬𑀸𑀢𑀻𑀢𑀺 𑀦𑀺𑀩𑁆𑀩𑀸𑀦𑀁 𑀬𑀸𑀢𑀺. 𑀇𑀫𑀺𑀦𑀸 𑀅𑀦𑀻𑀬𑀲𑀤𑁆𑀤𑁄 𑀩𑀳𑀼𑀮𑀁 𑀓𑀢𑁆𑀢𑀼𑀯𑀸𑀘𑀓𑁄𑀢𑀺 𑀤𑀲𑁆𑀲𑁂𑀢𑀺. 𑀬𑁄 𑀢𑀣𑀸𑀓𑀸𑀭𑀻 𑀳𑁄𑀢𑀺, 𑀢𑀓𑁆𑀓𑀭𑀲𑁆𑀲𑀸𑀢𑀺 𑀬𑁄𑀚𑀦𑀸. 𑀢𑀣𑀸𑀓𑀸𑀭𑀻𑀢𑀺 𑀢𑀸𑀬 𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀸𑀬 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀓𑀸𑀭𑀻 𑀳𑁄𑀢𑀺. 𑀇𑀫𑀺𑀦𑀸 𑀢𑀸𑀬 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀓𑀭𑁄𑀢𑀻𑀢𑀺 𑀢𑀓𑁆𑀓𑀭𑁄𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀤𑀼𑀓𑁆𑀔𑀓𑁆𑀔𑀬𑀸𑀬𑀸𑀢𑀺 𑀏𑀢𑁆𑀣 𑀔𑀻𑀬𑀦𑀁 𑀔𑀬𑁄, 𑀤𑀼𑀓𑁆𑀔𑀲𑁆𑀲 𑀔𑀬𑁄 𑀤𑀼𑀓𑁆𑀔𑀓𑁆𑀔𑀬𑁄, 𑀢𑀤𑀢𑁆𑀣𑀸𑀬𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀩𑁆𑀩𑀤𑀼𑀓𑁆𑀔𑀲𑁆𑀲 𑀔𑀬𑀢𑁆𑀣’’𑀦𑁆𑀢𑀺. 𑀲𑁂𑀲𑀦𑁆𑀢𑀺 𑀯𑀼𑀢𑁆𑀢𑀯𑀘𑀦𑀢𑁄 𑀲𑁂𑀲𑀁 𑀯𑀘𑀦𑀁.

𑀇𑀢𑀺 𑀓𑀢𑀺𑀧𑀼𑀘𑁆𑀙𑀸𑀯𑀸𑀭𑀯𑀡𑁆𑀡𑀦𑀸𑀬 𑀬𑁄𑀚𑀦𑀸 𑀲𑀫𑀢𑁆𑀢𑀸.