𑀧𑀜𑁆𑀜𑀢𑁆𑀢𑀺𑀯𑀸𑀭𑀬𑁄𑀚𑀦𑀸

𑀏𑀯𑀁 𑀤𑁆𑀯𑀸𑀯𑀻𑀲𑀢𑀺𑀔𑀦𑁆𑀥𑀓𑀸𑀦𑀁 𑀲𑀁𑀯𑀡𑁆𑀡𑀦𑀁 𑀓𑀢𑁆𑀯𑀸 𑀇𑀤𑀸𑀦𑀺 ‘‘𑀧𑀭𑀺𑀯𑀸𑀭𑁄’’𑀢𑀺 𑀲𑀗𑁆𑀕𑀳𑀫𑀸𑀭𑀽𑀴𑁆𑀳𑀲𑁆𑀲 𑀯𑀺𑀦𑀬𑀲𑁆𑀲 𑀲𑀁𑀯𑀡𑁆𑀡𑀦𑀁 𑀓𑀭𑁄𑀦𑁆𑀢𑁄 𑀅𑀬𑀫𑀸𑀘𑀭𑀺𑀬𑁄 𑀧𑀞𑀫𑀁 𑀢𑀸𑀯 𑀅𑀦𑀼𑀲𑀦𑁆𑀥𑀺𑀤𑀲𑁆𑀲𑀦𑀫𑀼𑀔𑁂𑀦 𑀧𑀝𑀺𑀜𑁆𑀜𑀁 𑀓𑀸𑀢𑀼𑀓𑀸𑀫𑁄 𑀆𑀳 ‘‘𑀯𑀺𑀲𑀼𑀤𑁆𑀥𑀧𑀭𑀺𑀯𑀸𑀭𑀲𑁆𑀲𑀸’’𑀢𑀺𑀆𑀤𑀺. 𑀢𑀢𑁆𑀣 𑀯𑀺𑀲𑀼𑀤𑁆𑀥𑀧𑀭𑀺𑀯𑀸𑀭𑀲𑁆𑀲𑀸𑀢𑀺 𑀯𑀺𑀲𑀼𑀤𑁆𑀥𑀸𑀬 𑀘𑀢𑀼𑀧𑀭𑀺𑀲𑀸𑀬 𑀧𑀭𑀺𑀯𑀸𑀭𑀺𑀢𑀲𑁆𑀲, 𑀅𑀣𑀯𑀸 𑀯𑀺𑀲𑀼𑀤𑁆𑀥𑁂𑀦 𑀘𑀢𑀼𑀧𑀭𑀺𑀲𑀲𑀗𑁆𑀔𑀸𑀢𑁂𑀦 𑀧𑀭𑀺𑀯𑀸𑀭𑁂𑀦 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀕𑀯𑀢𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀭𑀺𑀯𑀸𑀭𑁂 𑀳𑀺 𑀯𑀺𑀲𑀼𑀤𑁆𑀥𑁂 𑀢𑁂𑀦 𑀧𑀭𑀺𑀯𑀸𑀭𑀺𑀢𑁄, 𑀢𑀁𑀧𑀭𑀺𑀯𑀸𑀭𑀺𑀢𑁄 𑀯𑀸 𑀪𑀕𑀯𑀸𑀧𑀺 𑀯𑀺𑀲𑀼𑀤𑁆𑀥𑁄𑀬𑁂𑀯 𑀦𑀸𑀫 𑀳𑁄𑀢𑀺. 𑀇𑀫𑀺𑀦𑀸 𑀲𑀁𑀯𑀡𑁆𑀡𑀺𑀬𑀫𑀸𑀦𑀲𑁆𑀲 ‘‘𑀧𑀭𑀺𑀯𑀸𑀭𑁄’’𑀢𑀺 𑀲𑀗𑁆𑀕𑀳𑀫𑀸𑀭𑀽𑀴𑁆𑀳𑀲𑁆𑀲 𑀤𑁂𑀲𑁂𑀢𑀩𑁆𑀩𑀥𑀫𑁆𑀫𑀲𑁆𑀲 𑀅𑀦𑀼𑀭𑀽𑀧𑁂𑀦 𑀤𑁂𑀲𑀓𑀪𑀽𑀢𑀲𑁆𑀲 𑀪𑀕𑀯𑀢𑁄 𑀣𑁄𑀫𑀦𑀁 𑀓𑀢𑀁 𑀳𑁄𑀢𑀺. 𑀥𑀫𑁆𑀫𑀓𑁆𑀔𑀦𑁆𑀥𑀲𑀭𑀻𑀭𑀲𑁆𑀲𑀸𑀢𑀺 𑀲𑀻𑀮𑀸𑀤𑀺𑀥𑀫𑁆𑀫𑀓𑁆𑀔𑀦𑁆𑀥𑀲𑀗𑁆𑀔𑀸𑀢𑁂𑀦 𑀲𑀭𑀻𑀭𑁂𑀦 𑀲𑀫𑀦𑁆𑀦𑀸𑀕𑀢𑀲𑁆𑀲, 𑀇𑀫𑀺𑀦𑀸 𑀲𑀁𑀯𑀡𑁆𑀡𑀺𑀢𑀸𑀦𑀁 𑀔𑀦𑁆𑀥𑀓𑀸𑀦𑀫𑀦𑀼𑀭𑀽𑀧𑁂𑀦 𑀪𑀕𑀯𑀢𑁄 𑀣𑁄𑀫𑀦𑀁 𑀓𑀢𑀁 𑀳𑁄𑀢𑀺. 𑀧𑀓𑀢𑀺 𑀳𑁂𑀲𑀸𑀘𑀭𑀺𑀬𑀸𑀦𑀁 𑀬𑀤𑀺𑀤𑀁 𑀤𑁂𑀲𑁂𑀢𑀩𑁆𑀩𑀥𑀫𑁆𑀫𑀸𑀦𑀼𑀭𑀽𑀧𑁂𑀦 𑀤𑁂𑀲𑀓𑀲𑁆𑀲 𑀣𑁄𑀫𑀦𑀸 (𑀲𑀸𑀭𑀢𑁆𑀣. 𑀝𑀻. 𑁧.𑀕𑀦𑁆𑀣𑀸𑀭𑀫𑁆𑀪𑀓𑀣𑀸; 𑀯𑀺𑀲𑀼𑀤𑁆𑀥𑀺. 𑀫𑀳𑀸𑀝𑀻. 𑁧.𑁧). 𑀅𑀦𑀦𑁆𑀢𑀭𑀸𑀢𑀺 𑀅𑀦𑀦𑁆𑀢𑀭𑁂 𑀓𑀸𑀮𑁂.

𑀬𑁄𑀢𑀺 𑀯𑀺𑀦𑀬𑁄. 𑀧𑀼𑀩𑁆𑀩𑀸𑀕𑀢𑀦𑁆𑀢𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑁂𑀲𑀼 𑀯𑀺𑀪𑀗𑁆𑀕𑀔𑀦𑁆𑀥𑀓𑁂𑀲𑀼 𑀆𑀕𑀢𑀁. 𑀦𑀬𑀦𑁆𑀢𑀺 𑀲𑀤𑁆𑀤𑀅𑀢𑁆𑀣𑀯𑀺𑀦𑀺𑀘𑁆𑀙𑀬𑀦𑀬𑀲𑀗𑁆𑀔𑀸𑀢𑀁 𑀲𑀩𑁆𑀩𑀁 𑀦𑀬𑀁. 𑀳𑀺𑀢𑁆𑀯𑀸𑀢𑀺 𑀘𑀚𑀺𑀢𑁆𑀯𑀸. 𑀅𑀦𑀼𑀢𑁆𑀢𑀸𑀦𑀢𑁆𑀣𑀯𑀡𑁆𑀡𑀦𑀦𑁆𑀢𑀺 𑀅𑀦𑀼𑀢𑁆𑀢𑀸𑀦𑀸𑀦𑀁 𑀧𑀤𑀸𑀦𑀫𑀢𑁆𑀣𑀯𑀡𑁆𑀡𑀦𑀁. 𑀅𑀬𑀁 𑀧𑀦𑁂𑀢𑁆𑀣 𑀬𑁄𑀚𑀦𑀸 𑁋 𑀯𑀺𑀲𑀼𑀤𑁆𑀥𑀧𑀭𑀺𑀯𑀸𑀭𑀲𑁆𑀲 𑀥𑀫𑁆𑀫𑀓𑁆𑀔𑀦𑁆𑀥𑀲𑀭𑀻𑀭𑀲𑁆𑀲 𑀪𑀕𑀯𑀢𑁄 𑀲𑀸𑀲𑀦𑁂 𑀔𑀦𑁆𑀥𑀓𑀸𑀦𑀫𑀦𑀦𑁆𑀢𑀭𑀸 ‘‘𑀧𑀭𑀺𑀯𑀸𑀭𑁄’’𑀢𑀺 𑀬𑁄 𑀯𑀺𑀦𑀬𑁄 𑀲𑀗𑁆𑀕𑀳𑀁 𑀲𑀫𑀸𑀭𑀽𑀴𑁆𑀳𑁄, 𑀢𑀲𑁆𑀲 𑀯𑀺𑀦𑀬𑀲𑁆𑀲 𑀧𑀼𑀩𑁆𑀩𑀸𑀕𑀢𑀁 𑀦𑀬𑀁 𑀳𑀺𑀢𑁆𑀯𑀸 𑀇𑀤𑀸𑀦𑀺 𑀅𑀦𑀼𑀢𑁆𑀢𑀸𑀦𑀢𑁆𑀣𑀯𑀡𑁆𑀡𑀦𑀁 𑀓𑀭𑀺𑀲𑁆𑀲𑀸𑀫𑀻𑀢𑀺.

𑁧. 𑀢𑀢𑁆𑀣 𑀢𑀢𑁆𑀣𑀸𑀢𑀺 ‘‘𑀢𑀲𑁆𑀲 𑀅𑀦𑀼𑀢𑁆𑀢𑀸𑀦𑀢𑁆𑀣𑀯𑀡𑁆𑀡𑀦𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀬𑁄 𑀧𑀭𑀺𑀯𑀸𑀭𑀲𑀗𑁆𑀔𑀸𑀢𑁄 𑀯𑀺𑀦𑀬𑁄 𑀲𑀁𑀯𑀡𑁆𑀡𑁂𑀢𑀩𑁆𑀩𑀪𑀸𑀯𑁂𑀦 𑀯𑀼𑀢𑁆𑀢𑁄, 𑀢𑀢𑁆𑀣. 𑀲𑀗𑁆𑀔𑁂𑀧𑀢𑁆𑀣𑁄𑀢𑀺 𑀲𑀫𑀸𑀲𑀢𑁆𑀣𑁄. 𑀬𑀁 𑀢𑁂𑀦𑀸𑀢𑀺 𑀏𑀢𑁆𑀣 𑀢𑀲𑀤𑁆𑀤𑀲𑁆𑀲 𑀅𑀦𑀺𑀬𑀫𑀦𑀺𑀤𑁆𑀤𑁂𑀲𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀬𑁄 𑀲𑁄’’𑀢𑀺. 𑀢𑀢𑁆𑀣 𑀬𑁄𑀢𑀺 𑀅𑀦𑀺𑀬𑀫 𑀦𑀺𑀤𑁆𑀤𑁂𑀲𑁄, 𑀢𑀲𑁆𑀲 ‘‘𑀢𑁂𑀦𑀸’’𑀢𑀺 𑀦𑀺𑀬𑀫𑀦𑀁 𑀤𑀝𑁆𑀞𑀩𑁆𑀩𑀁. 𑀲𑁄𑀢𑀺 𑀧𑀤𑀸𑀮𑀗𑁆𑀓𑀸𑀭𑁄. 𑀤𑁆𑀯𑀻𑀲𑀼 𑀳𑀺 𑀲𑀩𑁆𑀩𑀦𑀸𑀫𑁂𑀲𑀼 𑀬𑁂𑀪𑀼𑀬𑁆𑀬𑁂𑀦 𑀧𑀼𑀩𑁆𑀩𑀫𑁂𑀯 𑀧𑀥𑀸𑀦𑀁, 𑀧𑀘𑁆𑀙𑀺𑀫𑀁 𑀧𑀦 𑀯𑀘𑀦𑀸𑀮𑀗𑁆𑀓𑀸𑀭𑀁. 𑀬𑁄 𑀲𑁄 𑀪𑀕𑀯𑀸 𑀧𑀜𑁆𑀜𑀧𑁂𑀲𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀘𑀺𑀭𑀝𑁆𑀞𑀺𑀢𑀺𑀓𑀢𑁆𑀣𑀦𑁆𑀢𑀺 𑀘𑀺𑀭𑀁 𑀧𑀜𑁆𑀘𑀯𑀲𑁆𑀲𑀲𑀳𑀲𑁆𑀲𑀓𑀸𑀮𑀁 𑀞𑀺𑀢𑀺𑀓𑀢𑁆𑀣𑀸𑀬, ‘‘𑀬𑀸𑀘𑀺𑀢𑁄’’𑀢𑀺 𑀘 ‘‘𑀧𑀜𑁆𑀜𑀧𑁂𑀲𑀻’’𑀢𑀺 𑀘 𑀲𑀫𑁆𑀩𑀦𑁆𑀥𑁄. 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑀸 𑀬𑀸𑀘𑀺𑀢𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀬𑀸𑀘𑀺𑀢𑁄 𑀳𑀼𑀢𑁆𑀯𑀸 𑀧𑀜𑁆𑀜𑀧𑁂𑀲𑀻𑀢𑀺 𑀬𑁄𑀚𑀦𑀸. 𑀢𑁂𑀦 𑀪𑀕𑀯𑀢𑀸 𑀧𑀜𑁆𑀜𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀚𑀸𑀦𑀢𑀸 𑀧𑀲𑁆𑀲𑀢𑀸’’𑀢𑀺 𑀤𑁆𑀯𑀺𑀦𑁆𑀦𑀁 𑀧𑀤𑀸𑀦𑀁 𑀓𑀫𑁆𑀫𑀫𑁂𑀯 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀢𑀲𑁆𑀲 𑀢𑀲𑁆𑀲𑀸’’𑀢𑀺𑀆𑀤𑀺. 𑀢𑀢𑁆𑀣 ‘‘𑀧𑀜𑁆𑀜𑀢𑁆𑀢𑀺𑀓𑀸𑀮’’𑀦𑁆𑀢𑀺 𑀇𑀫𑀺𑀦𑀸 ‘‘𑀚𑀸𑀦𑀢𑀸’’𑀢𑀺 𑀧𑀤𑀲𑁆𑀲 𑀓𑀫𑁆𑀫𑀁 𑀤𑀲𑁆𑀲𑁂𑀢𑀺, ‘‘𑀤𑀲 𑀅𑀢𑁆𑀣𑀯𑀲𑁂’’𑀢𑀺 𑀇𑀫𑀺𑀦𑀸 ‘‘𑀧𑀲𑁆𑀲𑀢𑀸’’𑀢𑀺 𑀧𑀤𑀲𑁆𑀲 𑀓𑀫𑁆𑀫𑀁.

𑀏𑀯𑀁 𑀓𑀫𑁆𑀫𑀤𑀲𑁆𑀲𑀦𑁂𑀦 𑀬𑁄𑀚𑀦𑀸𑀦𑀬𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀓𑀭𑀡𑀤𑀲𑁆𑀲𑀦𑁂𑀦 𑀅𑀧𑀭𑀫𑁆𑀧𑀺 𑀬𑁄𑀚𑀦𑀸𑀦𑀬𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀧𑀺𑀘𑀸’’𑀢𑀺𑀆𑀤𑀺. ‘‘𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀤𑀻𑀳𑀻’’𑀢𑀺𑀆𑀤𑀺𑀲𑀤𑁆𑀤𑁂𑀦 𑀤𑀺𑀩𑁆𑀩𑀘𑀓𑁆𑀔𑀼𑀲𑁆𑀲 𑀯𑀺𑀲𑀼𑀁 𑀕𑀳𑁂𑀢𑀩𑁆𑀩𑀢𑁆𑀢𑀸 𑀇𑀤𑁆𑀥𑀺𑀯𑀺𑀥𑀤𑀺𑀩𑁆𑀩𑀲𑁄𑀢𑀧𑀭𑀘𑀺𑀢𑁆𑀢𑀯𑀺𑀚𑀸𑀦𑀦𑀸𑀦𑀺 𑀕𑀳𑁂𑀢𑀩𑁆𑀩𑀸𑀦𑀺. 𑀇𑀫𑁂𑀳𑀺 𑀧𑀤𑁂𑀳𑀺 ‘‘𑀚𑀸𑀦𑀢𑀸, 𑀧𑀲𑁆𑀲𑀢𑀸’’𑀢𑀺 𑀤𑁆𑀯𑀺𑀦𑁆𑀦𑀁 𑀧𑀤𑀸𑀦𑀁 𑀧𑀜𑁆𑀘𑀦𑁆𑀦𑀁 𑀮𑁄𑀓𑀺𑀬𑀅𑀪𑀺𑀜𑁆𑀜𑀸𑀦𑀫𑁂𑀯 𑀓𑀭𑀡𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀢𑀻𑀳𑀺 𑀯𑀺𑀚𑁆𑀚𑀸𑀳𑀻𑀢𑀺 𑀧𑀼𑀩𑁆𑀩𑁂𑀦𑀺𑀯𑀸𑀲𑀤𑀺𑀩𑁆𑀩𑀘𑀓𑁆𑀔𑀼𑀆𑀲𑀯𑀓𑁆𑀔𑀬𑀜𑀸𑀡𑀲𑀗𑁆𑀔𑀸𑀢𑀸𑀳𑀺 𑀢𑀻𑀳𑀺 𑀯𑀺𑀚𑁆𑀚𑀸𑀳𑀺. 𑀙𑀳𑀺 𑀯𑀸 𑀧𑀦 𑀅𑀪𑀺𑀜𑁆𑀜𑀸𑀳𑀻𑀢𑀺 𑀲𑀳 𑀆𑀲𑀯𑀓𑁆𑀔𑀬𑀜𑀸𑀡𑁂𑀦 𑀧𑀜𑁆𑀘𑀮𑁄𑀓𑀺𑀬𑀸𑀪𑀺𑀜𑁆𑀜𑀸𑀲𑀗𑁆𑀔𑀸𑀢𑀸𑀳𑀺 𑀙𑀳𑀺 𑀅𑀪𑀺𑀜𑁆𑀜𑀸𑀳𑀺. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑁂𑀲𑀼 𑀢𑀻𑀲𑀼 𑀓𑀸𑀮𑁂𑀲𑀼, 𑀧𑀜𑁆𑀘𑀲𑀼𑀧𑀺 𑀜𑁂𑀬𑁆𑀬𑀥𑀫𑁆𑀫𑁂𑀲𑀼. 𑀲𑀫𑀦𑁆𑀢𑀘𑀓𑁆𑀔𑀼𑀦𑀸𑀢𑀺 𑀅𑀦𑀸𑀯𑀭𑀡𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑀗𑁆𑀔𑀸𑀢𑁂𑀦 𑀲𑀫𑀦𑁆𑀢𑀘𑀓𑁆𑀔𑀼𑀦𑀸. 𑀧𑀜𑁆𑀜𑀸𑀬𑀸𑀢𑀺 𑀲𑀩𑁆𑀩𑀜𑁆𑀜𑀼𑀢𑀧𑀜𑁆𑀜𑀸𑀬. 𑀢𑀺𑀭𑁄𑀓𑀼𑀝𑁆𑀝𑀸𑀤𑀻𑀢𑀺 𑀆𑀤𑀺𑀲𑀤𑁆𑀤𑁂𑀦 𑀢𑀺𑀭𑁄𑀧𑀩𑁆𑀩𑀢𑀸𑀤𑀬𑁄 𑀲𑀗𑁆𑀕𑀡𑁆𑀳𑀸𑀢𑀺. 𑀫𑀁𑀲𑀘𑀓𑁆𑀔𑀼𑀦𑀸𑀢𑀺 𑀧𑀲𑀸𑀤𑀘𑀓𑁆𑀔𑀼𑀦𑀸. 𑀧𑀝𑀺𑀯𑁂𑀥𑀧𑀜𑁆𑀜𑀸𑀬𑀸𑀢𑀺 𑀫𑀕𑁆𑀕𑀧𑀜𑁆𑀜𑀸𑀬. 𑀤𑁂𑀲𑀦𑀸𑀧𑀜𑁆𑀜𑀸𑀬𑀸𑀢𑀺 𑀲𑀩𑁆𑀩𑀜𑁆𑀜𑀼𑀢𑀧𑀜𑁆𑀜𑀸𑀬. 𑀲𑀩𑁆𑀩𑀜𑁆𑀜𑀼𑀢𑀧𑀜𑁆𑀜𑀸𑀬𑁂𑀯 𑀳𑀺 𑀅𑀢𑁆𑀣𑀢𑁄 𑀤𑁂𑀲𑀦𑀸𑀧𑀜𑁆𑀜𑀸 𑀦𑀸𑀫. 𑀢𑁂𑀦 𑀯𑀼𑀢𑁆𑀢𑀁 ‘‘𑀢𑀲𑁆𑀲𑀸 𑀧𑀜𑁆𑀜𑀸𑀬 𑀢𑁂𑀚𑀲𑀸. 𑀅𑀪𑀺𑀥𑀫𑁆𑀫𑀓𑀣𑀸𑀫𑀕𑁆𑀕𑀁, 𑀤𑁂𑀯𑀸𑀦𑀁 𑀲𑀫𑁆𑀧𑀯𑀢𑁆𑀢𑀬𑀻𑀢𑀺 (𑀥. 𑀲. 𑀅𑀝𑁆𑀞. 𑀕𑀦𑁆𑀣𑀸𑀭𑀫𑁆𑀪𑀓𑀣𑀸 𑁫). 𑀇𑀫𑁂𑀳𑀺 𑀧𑀤𑁂𑀳𑀺 𑀅𑀯𑀢𑁆𑀣𑀸𑀯𑀲𑁂𑀦 𑀯𑀺𑀲𑀼𑀁 𑀯𑀺𑀲𑀼𑀁 𑀤𑁆𑀯𑀺𑀦𑁆𑀦𑀁 𑀧𑀤𑀸𑀦𑀁 𑀓𑀭𑀡𑀲𑀫𑁆𑀪𑀯𑀁 𑀤𑀲𑁆𑀲𑁂𑀢𑀺. 𑀅𑀭𑀳𑀢𑀸𑀢𑀺 𑀅𑀭𑀻𑀦𑀁 𑀅𑀭𑀸𑀦𑀜𑁆𑀘 𑀳𑀢𑀢𑁆𑀢𑀸, 𑀧𑀘𑁆𑀘𑀬𑀸𑀤𑀻𑀦𑀜𑁆𑀘 𑀅𑀭𑀳𑀢𑁆𑀢𑀸 𑀅𑀭𑀳𑀢𑀸. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦𑀸𑀢𑀺 𑀲𑀫𑁆𑀫𑀸 𑀲𑀸𑀫𑀜𑁆𑀘 𑀲𑀩𑁆𑀩𑀥𑀫𑁆𑀫𑀸𑀦𑀁 𑀩𑀼𑀤𑁆𑀥𑀢𑁆𑀢𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦, 𑀢𑁂𑀦 𑀪𑀕𑀯𑀢𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀓𑁂𑀦𑀸𑀪𑀢𑀦𑁆𑀢𑀺 𑀢𑀁 𑀧𑀞𑀫𑀁 𑀧𑀸𑀭𑀸𑀚𑀺𑀓𑀁 𑀓𑁂𑀦 𑀆𑀪𑀢𑀁, 𑀇𑀢𑀺 𑀲𑀗𑁆𑀔𑁂𑀧𑀢𑁆𑀣𑁄𑀢𑀺 𑀬𑁄𑀚𑀦𑀸.

𑁨. 𑀧𑀼𑀘𑁆𑀙𑀸𑀯𑀺𑀲𑀚𑁆𑀚𑀦𑁂 𑀧𑀦 𑀏𑀯𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. 𑀬𑀁 𑀢𑁂𑀦…𑀧𑁂… 𑀧𑀸𑀭𑀸𑀚𑀺𑀓𑀦𑁆𑀢𑀺 𑀇𑀤𑀁 𑀧𑀤𑀁 𑀧𑀘𑁆𑀘𑀼𑀤𑁆𑀥𑀭𑀡𑀫𑀢𑁆𑀢𑀫𑁂𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀢𑀺𑀉𑀤𑁆𑀥𑀭𑀡𑀫𑀢𑁆𑀢𑀫𑁂𑀯, 𑀦 𑀅𑀢𑁆𑀣𑀤𑀲𑁆𑀲𑀦𑀦𑁆𑀢𑀺 𑀅𑀢𑁆𑀣𑁄. 𑀏𑀢𑁆𑀣𑀸𑀢𑀺 𑀏𑀢𑁂𑀲𑀼 𑀧𑀤𑁂𑀲𑀼. 𑀏𑀓𑀸 𑀧𑀜𑁆𑀜𑀢𑁆𑀢𑀻𑀢𑀺 𑀏𑀓𑀸 𑀧𑀞𑀫𑀧𑀜𑁆𑀜𑀢𑁆𑀢𑀺. 𑀅𑀦𑀼𑀧𑀜𑁆𑀜𑀢𑁆𑀢𑀺𑀬𑁄𑀢𑀺 𑀧𑀘𑁆𑀙𑀸 𑀞𑀧𑀺𑀢𑀸 𑀧𑀜𑁆𑀜𑀢𑁆𑀢𑀺𑀬𑁄.

𑀏𑀢𑁆𑀢𑀸𑀯𑀢𑀸𑀢𑀺 𑀏𑀢𑁆𑀢𑀓𑁂𑀦 ‘‘𑀏𑀓𑀸 𑀧𑀜𑁆𑀜𑀢𑁆𑀢𑀺, 𑀤𑁆𑀯𑁂 𑀅𑀦𑀼𑀧𑀜𑁆𑀜𑀢𑁆𑀢𑀺𑀬𑁄’’𑀢𑀺 𑀯𑀘𑀦𑀫𑀢𑁆𑀢𑁂𑀦 𑀯𑀺𑀲𑁆𑀲𑀚𑁆𑀚𑀺𑀢𑀸 𑀳𑁄𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑀺𑀬𑀁 𑀧𑀼𑀘𑁆𑀙𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀲𑁆𑀫𑀸 𑀅𑀦𑀼𑀧𑁆𑀧𑀦𑁆𑀦𑀧𑀜𑁆𑀜𑀢𑁆𑀢𑀺 𑀢𑀲𑁆𑀫𑀺𑀁 𑀦𑀢𑁆𑀣𑀻𑀢𑀺 𑀆𑀳 ‘‘𑀅𑀬𑀁 𑀳𑀻’’𑀢𑀺𑀆𑀤𑀺. 𑀢𑀢𑁆𑀣 𑀳𑀺 𑀬𑀲𑁆𑀫𑀸 𑀅𑀜𑁆𑀜𑀢𑁆𑀭 𑀦𑀢𑁆𑀣𑀺, 𑀢𑀲𑁆𑀫𑀸 𑀦𑀢𑁆𑀣𑀻𑀢𑀺 𑀬𑁄𑀚𑀦𑀸. ‘‘𑀅𑀦𑀼𑀧𑁆𑀧𑀦𑁆𑀦𑁂 𑀤𑁄𑀲𑁂 𑀧𑀜𑁆𑀜𑀢𑁆𑀢𑀸’’𑀢𑀺 𑀇𑀫𑀺𑀦𑀸 𑀅𑀦𑀼𑀧𑁆𑀧𑀦𑁆𑀦𑁂 𑀤𑁄𑀲𑁂 𑀧𑀜𑁆𑀜𑀧𑁂𑀢𑀩𑁆𑀩𑀸𑀢𑀺 𑀅𑀦𑀼𑀧𑁆𑀧𑀦𑁆𑀦𑀧𑀜𑁆𑀜𑀢𑁆𑀢𑀻𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀲𑀸𑀢𑀺 𑀅𑀦𑀼𑀧𑁆𑀧𑀦𑁆𑀦𑀧𑀜𑁆𑀜𑀢𑁆𑀢𑀺. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀅𑀜𑁆𑀜𑀢𑁆𑀭 𑀦𑀢𑁆𑀣𑀺, 𑀢𑀲𑁆𑀫𑀸. 𑀲𑀩𑁆𑀩𑀢𑁆𑀣𑀧𑀜𑁆𑀜𑀢𑁆𑀢𑀻𑀢𑀺 𑀏𑀢𑁆𑀣 𑀲𑀩𑁆𑀩𑀲𑁆𑀫𑀺𑀁 𑀧𑀤𑁂𑀲𑁂 𑀧𑀜𑁆𑀜𑀢𑁆𑀢𑀺 𑀲𑀩𑁆𑀩𑀢𑁆𑀣𑀧𑀜𑁆𑀜𑀢𑁆𑀢𑀻𑀢𑀺 𑀅𑀮𑀼𑀢𑁆𑀢𑀲𑀫𑀸𑀲𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀫𑀚𑁆𑀛𑀺𑀫𑀤𑁂𑀲𑁂 𑀘𑁂𑀯𑀸’’𑀢𑀺𑀆𑀤𑀺. ‘‘𑀫𑀚𑁆𑀛𑀺𑀫𑀤𑁂𑀲𑁂 𑀘𑁂𑀯 𑀧𑀘𑁆𑀘𑀦𑁆𑀢𑀺𑀫𑀚𑀦𑀧𑀤𑁂𑀲𑀼 𑀘𑀸’’𑀢𑀺 𑀇𑀫𑀺𑀦𑀸 ‘‘𑀲𑀩𑁆𑀩𑀢𑁆𑀣𑀸’’𑀢𑀺 𑀧𑀤𑀲𑁆𑀲 𑀲𑀭𑀽𑀧𑀁 𑀤𑀲𑁆𑀲𑁂𑀢𑀺. 𑀧𑀤𑁂𑀲𑀧𑀜𑁆𑀜𑀢𑁆𑀢𑀺𑀁 𑀅𑀧𑀦𑁂𑀢𑁆𑀯𑀸 𑀲𑀩𑁆𑀩𑀢𑁆𑀣𑀧𑀜𑁆𑀜𑀢𑁆𑀢𑀺𑀁 𑀧𑀸𑀭𑀺𑀲𑁂𑀲𑀦𑀬𑁂𑀦 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀯𑀺𑀦𑀬𑀥𑀭𑀧𑀜𑁆𑀘𑀫𑁂𑀦𑀸’’𑀢𑀺𑀆𑀤𑀺. 𑀢𑀢𑁆𑀣 𑀯𑀺𑀦𑀬𑀥𑀭𑀧𑀜𑁆𑀘𑀫𑁂𑀦𑀸𑀢𑀺 𑀅𑀦𑀼𑀲𑁆𑀲𑀸𑀯𑀦𑀸𑀘𑀭𑀺𑀬𑀧𑀜𑁆𑀘𑀫𑁂𑀦. 𑀏𑀢𑁆𑀣𑁂𑀯𑀸𑀢𑀺 𑀫𑀚𑁆𑀛𑀺𑀫𑀤𑁂𑀲𑁂𑀬𑁂𑀯. 𑀏𑀢𑁂𑀳𑀻𑀢𑀺 𑀘𑀢𑀽𑀳𑀺 𑀲𑀺𑀓𑁆𑀔𑀸𑀧𑀤𑁂𑀳𑀺. 𑀲𑁂𑀲𑀸𑀦𑀻𑀢𑀺 𑀘𑀢𑀽𑀳𑀺 𑀲𑀺𑀓𑁆𑀔𑀸𑀧𑀤𑁂𑀳𑀺 𑀲𑁂𑀲𑀸𑀦𑀺.

𑀲𑀸𑀥𑀸𑀭𑀡𑀧𑀜𑁆𑀜𑀢𑁆𑀢𑀻𑀢𑀺 𑀏𑀢𑁆𑀣 𑀲𑀸𑀥𑀸𑀭𑀡𑀸 𑀦𑀸𑀫 𑀪𑀺𑀓𑁆𑀔𑀼𑀪𑀺𑀓𑁆𑀔𑀼𑀦𑀻𑀦𑀫𑁂𑀯𑀸𑀢𑀺 𑀆𑀳 ‘‘𑀪𑀺𑀓𑁆𑀔𑀽𑀦𑀜𑁆𑀘𑁂𑀯 𑀪𑀺𑀓𑁆𑀔𑀼𑀦𑀻𑀦𑀜𑁆𑀘𑀸’’𑀢𑀺. 𑀇𑀤𑀁 𑀧𑀦𑀸𑀢𑀺 𑀧𑀞𑀫𑀧𑀸𑀭𑀸𑀚𑀺𑀓𑀁 𑀧𑀦, 𑀧𑀜𑁆𑀜𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀺𑀦𑀻𑀢𑀓𑀣𑀸𑀫𑀢𑁆𑀢𑀫𑁂𑀯𑀸𑀢𑀺 𑀯𑀺𑀦𑀻𑀢𑀯𑀢𑁆𑀣𑀼𑀧𑀓𑀸𑀲𑀓𑀁 𑀓𑀣𑀸𑀫𑀢𑁆𑀢𑀫𑁂𑀯. 𑀢𑀸𑀲𑀦𑁆𑀢𑀺 𑀪𑀺𑀓𑁆𑀔𑀼𑀦𑀻𑀦𑀁. 𑀩𑁆𑀬𑀜𑁆𑀚𑀦𑀫𑀢𑁆𑀢𑀫𑁂𑀯𑀸𑀢𑀺 ‘‘𑀲𑀸𑀥𑀸𑀭𑀡𑀸’’𑀢𑀺 𑀘 ‘‘𑀉𑀪𑀢𑁄’’𑀢𑀺 𑀘 𑀩𑁆𑀬𑀜𑁆𑀚𑀦𑀫𑀢𑁆𑀢𑀫𑁂𑀯. 𑀏𑀢𑁆𑀣𑀸𑀢𑀺 𑀲𑀸𑀥𑀸𑀭𑀡𑀧𑀜𑁆𑀜𑀢𑁆𑀢𑀺𑀉𑀪𑀢𑁄𑀧𑀜𑁆𑀜𑀢𑁆𑀢𑀺𑀧𑀤𑁂.

‘‘𑀦𑀺𑀤𑀸𑀦𑁂 𑀅𑀦𑀼𑀧𑀯𑀺𑀝𑁆𑀞’’𑀦𑁆𑀢𑀺 𑀇𑀫𑀺𑀦𑀸 ‘‘𑀦𑀺𑀤𑀸𑀦𑁄𑀕𑀥’’𑀦𑁆𑀢𑀺 𑀧𑀤𑀲𑁆𑀲 𑀲𑀢𑁆𑀢𑀫𑀻𑀲𑀫𑀸𑀲𑀜𑁆𑀘 𑀑𑀕𑀥𑀲𑀤𑁆𑀤𑀲𑁆𑀲 𑀅𑀦𑀼𑀧𑀯𑀺𑀝𑁆𑀞𑀢𑁆𑀣𑀜𑁆𑀘 𑀤𑀲𑁆𑀲𑁂𑀢𑀺. 𑀑𑀕𑀸𑀴𑁆𑀳𑁄 𑀳𑀼𑀢𑁆𑀯𑀸 𑀥𑀭𑀢𑀺 𑀢𑀺𑀝𑁆𑀞𑀢𑀻𑀢𑀺 𑀑𑀕𑀥𑀁. 𑀦𑀦𑀼 𑀦𑀺𑀤𑀸𑀦𑁄𑀕𑀥𑁂 𑀲𑀢𑀺 ‘‘𑀧𑀞𑀫𑁂𑀦 𑀉𑀤𑁆𑀤𑁂𑀲𑁂𑀦𑀸’’𑀢𑀺 𑀯𑀢𑁆𑀢𑀩𑁆𑀩𑀁, 𑀓𑀲𑁆𑀫𑀸 ‘‘𑀤𑀼𑀢𑀺𑀬𑁂𑀦 𑀉𑀤𑁆𑀤𑁂𑀲𑁂𑀦𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀦𑀺𑀤𑀸𑀦𑁄𑀕𑀥’’𑀦𑁆𑀢𑀺. 𑀦𑀺𑀤𑀸𑀦𑀧𑀭𑀺𑀬𑀸𑀧𑀦𑁆𑀦𑀫𑁆𑀧𑀺 𑀲𑀫𑀸𑀦𑀦𑁆𑀢𑀺 𑀦𑀺𑀤𑀸𑀦𑀧𑀭𑀺𑀬𑀸𑀧𑀦𑁆𑀦𑀁 𑀲𑀫𑀸𑀦𑀫𑁆𑀧𑀻𑀢𑀺 𑀬𑁄𑀚𑀦𑀸. 𑀧𑀺𑀲𑀤𑁆𑀤𑁄 𑀕𑀭𑀳𑀢𑁆𑀣𑁄, 𑀧𑀕𑁂𑀯 𑀤𑀼𑀢𑀺𑀬𑁂 𑀉𑀤𑁆𑀤𑁂𑀲𑁂 𑀧𑀭𑀺𑀬𑀸𑀧𑀦𑁆𑀦𑁂𑀢𑀺 𑀤𑀲𑁆𑀲𑁂𑀢𑀺. ‘‘𑀲𑀻𑀮𑀯𑀺𑀧𑀢𑁆𑀢𑀺𑀆𑀤𑀻𑀦’’𑀦𑁆𑀢𑀺 𑀯𑀘𑀦𑀁 𑀯𑀺𑀢𑁆𑀣𑀸𑀭𑁂𑀦𑁆𑀢𑁄 𑀆𑀳 ‘‘𑀧𑀞𑀫𑀸 𑀳𑀻’’𑀢𑀺𑀆𑀤𑀺.

𑀤𑁆𑀯𑀗𑁆𑀕𑀺𑀓𑁂𑀦𑀸𑀢𑀺 𑀓𑀸𑀬𑀘𑀺𑀢𑁆𑀢𑀲𑀗𑁆𑀔𑀸𑀢𑁂𑀦 𑀤𑁆𑀯𑀗𑁆𑀕𑀺𑀓𑁂𑀦. 𑀦𑀦𑀼 ‘‘𑀏𑀓𑁂𑀦 𑀲𑀫𑀼𑀝𑁆𑀞𑀸𑀦𑁂𑀦𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 ‘‘𑀓𑀸𑀬𑀢𑁄𑀬𑁂𑀯𑀸’’𑀢𑀺 𑀯𑀢𑁆𑀢𑀩𑁆𑀩𑀁, 𑀅𑀣 𑀓𑀲𑁆𑀫𑀸 ‘‘𑀓𑀸𑀬𑀢𑁄 𑀘 𑀘𑀺𑀢𑁆𑀢𑀢𑁄 𑀘 𑀲𑀫𑀼𑀝𑁆𑀞𑀸𑀢𑀻’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀏𑀢𑁆𑀣 𑀳𑀻’’𑀢𑀺𑀆𑀤𑀺. 𑀏𑀢𑁆𑀣𑀸𑀢𑀺 ‘‘𑀏𑀓𑁂𑀦 𑀲𑀫𑀼𑀝𑁆𑀞𑀸𑀦𑁂𑀦𑀸’’𑀢𑀺 𑀯𑀘𑀦𑁂. 𑀘𑀺𑀢𑁆𑀢𑀦𑁆𑀢𑀺 𑀲𑁂𑀯𑀦𑀘𑀺𑀢𑁆𑀢𑀁. 𑀆𑀧𑀦𑁆𑀦𑁄𑀲𑀻𑀢𑀺 𑀢𑁆𑀯𑀁 𑀆𑀧𑀦𑁆𑀦𑁄 𑀅𑀲𑀻𑀢𑀺 𑀬𑁄𑀚𑀦𑀸. 𑀆𑀫 𑀆𑀧𑀦𑁆𑀦𑁄𑀫𑁆𑀳𑀻𑀢𑀺 𑀆𑀫 𑀅𑀳𑀁 𑀆𑀧𑀦𑁆𑀦𑁄 𑀅𑀫𑁆𑀳𑀻𑀢𑀺 𑀬𑁄𑀚𑀦𑀸. 𑀢𑀸𑀯𑀤𑁂𑀯𑀸𑀢𑀺 𑀢𑀲𑁆𑀫𑀺𑀁 𑀧𑀝𑀺𑀚𑀸𑀦𑀓𑁆𑀔𑀡𑁂𑀬𑁂𑀯. 𑀢𑀁 𑀧𑀼𑀕𑁆𑀕𑀮𑀦𑁆𑀢𑀺 𑀧𑀸𑀭𑀸𑀚𑀺𑀓𑀫𑀸𑀧𑀦𑁆𑀦𑀁 𑀢𑀁 𑀧𑀼𑀕𑁆𑀕𑀮𑀁. 𑀢𑀧𑁆𑀧𑀘𑁆𑀘𑀬𑀸𑀢𑀺 𑀢𑀲𑁆𑀲 𑀧𑀸𑀭𑀸𑀚𑀺𑀓𑀫𑀸𑀧𑀦𑁆𑀦𑀲𑁆𑀲 𑀓𑀸𑀭𑀡𑀸. ‘‘𑀦 𑀓𑀢𑀫𑁂𑀦 𑀲𑀫𑀣𑁂𑀦 𑀲𑀫𑁆𑀫𑀢𑀻’’𑀢𑀺 𑀬𑀁 𑀧𑀦 𑀯𑀘𑀦𑀁 𑀯𑀼𑀢𑁆𑀢𑀦𑁆𑀢𑀺 𑀬𑁄𑀚𑀦𑀸. 𑀢𑀦𑁆𑀢𑀺 𑀯𑀘𑀦𑀁, 𑀯𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑀯𑀼𑀢𑁆𑀢𑀫𑀸𑀢𑀺𑀓𑀸 𑀧𑀜𑁆𑀜𑀢𑁆𑀢𑀻𑀢𑀺 𑀯𑀼𑀢𑁆𑀢𑀫𑀸𑀢𑀺𑀓𑀸𑀲𑀗𑁆𑀔𑀸𑀢𑀸 𑀧𑀜𑁆𑀜𑀢𑁆𑀢𑀺 𑀯𑀺𑀦𑀬𑁄 𑀦𑀸𑀫𑀸𑀢𑀺 𑀬𑁄𑀚𑀦𑀸. 𑀫𑀸𑀢𑀺𑀓𑀸 𑀳𑀺 𑀬𑀲𑁆𑀫𑀸 𑀧𑀜𑁆𑀜𑀧𑀻𑀬𑀢𑀺 𑀲𑀗𑁆𑀔𑁂𑀧𑁂𑀦 𑀞𑀧𑀻𑀬𑀢𑀺, 𑀧𑀓𑀸𑀭𑀁 𑀚𑀸𑀦𑀸𑀧𑁂𑀢𑀺 𑀯𑀸, 𑀢𑀲𑁆𑀫𑀸 𑀧𑀜𑁆𑀜𑀢𑁆𑀢𑀻𑀢𑀺 𑀯𑀼𑀘𑁆𑀘𑀢𑀺. ‘‘𑀧𑀤𑀪𑀸𑀚𑀦𑀁 𑀯𑀼𑀘𑁆𑀘𑀢𑀻’’𑀢𑀺 𑀇𑀫𑀺𑀦𑀸 𑀯𑀺𑀢𑁆𑀣𑀸𑀭𑁂𑀦 𑀪𑀸𑀚𑀺𑀬𑀢𑀺 𑀏𑀢𑀸𑀬𑀸𑀢𑀺 𑀯𑀺𑀪𑀢𑁆𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀯𑀻𑀢𑀺𑀓𑁆𑀓𑀫𑁄𑀢𑀺 𑀓𑀸𑀬𑀯𑀸𑀘𑀸𑀯𑀻𑀢𑀺𑀓𑁆𑀓𑀫𑁄. 𑀲𑁄 𑀳𑀺 𑀦 𑀲𑀁𑀯𑀭𑀢𑀺 𑀓𑀸𑀬𑀯𑀸𑀘𑀁 𑀦 𑀧𑀺𑀤𑀳𑀢𑀻𑀢𑀺 𑀅𑀲𑀁𑀯𑀭𑁄𑀢𑀺 𑀯𑀼𑀘𑁆𑀘𑀢𑀺. 𑀬𑁂𑀲𑀁 𑀯𑀢𑁆𑀢𑀢𑀻𑀢𑀺 𑀏𑀢𑁆𑀣 𑀯𑀢𑁆𑀢𑀢𑀺𑀓𑀺𑀭𑀺𑀬𑀸𑀬 𑀓𑀢𑁆𑀢𑀸𑀭𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀯𑀺𑀦𑀬𑀧𑀺𑀝𑀓𑀜𑁆𑀘 𑀅𑀝𑁆𑀞𑀓𑀣𑀸 𑀘𑀸’’𑀢𑀺. 𑀧𑀕𑀼𑀡𑀸𑀢𑀺 𑀯𑀸𑀘𑀼𑀕𑁆𑀕𑀢𑀸. 𑀢𑁂𑀢𑀺 𑀢𑁂 𑀧𑀼𑀕𑁆𑀕𑀮𑀸, 𑀥𑀸𑀭𑁂𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀳𑀻𑀢𑀺 𑀲𑀘𑁆𑀘𑀁, 𑀬𑀲𑁆𑀫𑀸 𑀯𑀸. 𑀏𑀢𑀲𑁆𑀲𑀸𑀢𑀺 𑀧𑀞𑀫𑀧𑀸𑀭𑀸𑀚𑀺𑀓𑀲𑁆𑀲. 𑀓𑁂𑀦𑀸𑀪𑀢𑀦𑁆𑀢𑀺 𑀏𑀢𑁆𑀣 𑀪𑀭𑀥𑀸𑀢𑀼𑀬𑀸 𑀥𑀸𑀭𑀡𑀧𑁄𑀲𑀦𑀢𑁆𑀣𑁂𑀲𑀼 (𑀧𑀸𑀡𑀺𑀦𑀻 𑁧𑁦𑁮 𑀥𑀸𑀢𑀼𑀧𑀸𑀞𑁂) 𑀥𑀸𑀭𑀡𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀓𑁂𑀦 𑀆𑀦𑀻𑀢’’𑀦𑁆𑀢𑀺. ‘‘𑀧𑀭𑀫𑁆𑀧𑀭𑀸𑀬 𑀆𑀦𑀻𑀢’’𑀦𑁆𑀢𑀺 𑀇𑀫𑀺𑀦𑀸 𑀧𑀭𑀫𑁆𑀧𑀭𑀸𑀪𑀢𑀦𑁆𑀢𑀺 𑀧𑀤𑀲𑁆𑀲 𑀢𑀢𑀺𑀬𑀸𑀲𑀫𑀸𑀲𑀁 𑀤𑀲𑁆𑀲𑁂𑀢𑀺. 𑀅𑀣𑀯𑀸 ‘‘𑀓𑁂𑀦𑀸𑀪𑀢’’𑀦𑁆𑀢𑀺 𑀧𑀼𑀘𑁆𑀙𑀸𑀬 𑀅𑀦𑀼𑀭𑀽𑀧𑀁 𑀬𑀓𑀸𑀭𑀮𑁄𑀧𑀯𑀲𑁂𑀦 𑀯𑀸𑀓𑁆𑀬𑀦𑁆𑀢𑀺 𑀤𑀲𑁆𑀲𑁂𑀢𑀺.

𑁩. 𑀉𑀧𑀸𑀮𑀺 𑀤𑀸𑀲𑀓𑁄 𑀘𑁂𑀯𑀸𑀢𑀺𑀆𑀤𑀺𑀓𑀸 𑀕𑀸𑀣𑀸𑀬𑁄 𑀓𑀺𑀫𑀢𑁆𑀣𑀁 𑀓𑁂𑀳𑀺 𑀞𑀧𑀺𑀢𑀸𑀢𑀺 𑀆𑀳 ‘‘𑀇𑀤𑀸𑀦𑀻’’𑀢𑀺𑀆𑀤𑀺. 𑀢𑀦𑁆𑀢𑀺 𑀧𑀭𑀁 𑀧𑀭𑀁. 𑀢𑀢𑁆𑀣𑀸𑀢𑀺 𑀢𑀸𑀲𑀼 𑀕𑀸𑀣𑀸𑀲𑀼. 𑀬𑀦𑁆𑀢𑀺 𑀯𑀘𑀦𑀁. 𑀇𑀫𑀺𑀦𑀸 𑀦𑀬𑁂𑀦𑀸𑀢𑀺 𑀧𑀞𑀫𑀧𑀸𑀭𑀸𑀚𑀺𑀓𑀲𑁆𑀲 𑀧𑀼𑀘𑁆𑀙𑀸𑀯𑀺𑀲𑀚𑁆𑀚𑀦𑁂 𑀯𑀼𑀢𑁆𑀢𑁂𑀦 𑀇𑀫𑀺𑀦𑀸 𑀦𑀬𑁂𑀦.

𑀇𑀢𑀺 𑀫𑀳𑀸𑀯𑀺𑀪𑀗𑁆𑀕𑁂 𑀧𑀜𑁆𑀜𑀢𑁆𑀢𑀺𑀯𑀸𑀭𑀯𑀡𑁆𑀡𑀦𑀸𑀬 𑀬𑁄𑀚𑀦𑀸 𑀲𑀫𑀢𑁆𑀢𑀸.

𑀓𑀢𑀸𑀧𑀢𑁆𑀢𑀺𑀯𑀸𑀭𑀸𑀤𑀺𑀯𑀡𑁆𑀡𑀦𑀸

𑁧𑁫𑁭. 𑀇𑀢𑁄𑀢𑀺 𑀧𑀜𑁆𑀜𑀢𑁆𑀢𑀺𑀯𑀸𑀭𑀢𑁄, 𑀧𑀭𑀁 𑀯𑀼𑀢𑁆𑀢𑀸 𑀲𑀢𑁆𑀢 𑀯𑀸𑀭𑀸 𑀉𑀢𑁆𑀢𑀸𑀦𑀢𑁆𑀣𑀸 𑀏𑀯𑀸𑀢𑀺 𑀬𑁄𑀚𑀦𑀸. 𑀓𑀢𑀸𑀧𑀢𑁆𑀢𑀺𑀯𑀸𑀭𑁄𑀢𑀺 ‘‘𑀓𑀢𑀸𑀧𑀢𑁆𑀢𑀻’’𑀢𑀺 𑀧𑀤𑁂𑀦 𑀮𑀓𑁆𑀔𑀺𑀢𑁄 𑀯𑀸𑀭𑁄. 𑀏𑀲𑁂𑀯 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀢𑀤𑀦𑀦𑁆𑀢𑀭𑁄𑀢𑀺 𑀢𑁂𑀲𑀁 𑀲𑀢𑁆𑀢𑀦𑁆𑀦𑀁 𑀯𑀸𑀭𑀸𑀦𑀁 𑀅𑀦𑀦𑁆𑀢𑀭𑁂 𑀯𑀼𑀢𑁆𑀢𑁄. 𑀲𑀫𑀼𑀘𑁆𑀘𑀬𑀯𑀸𑀭𑁄𑀢𑀺 𑀲𑀁 𑀏𑀓𑀢𑁄 𑀆𑀧𑀢𑁆𑀢𑀺𑀯𑀺𑀧𑀢𑁆𑀢𑀺𑀆𑀤𑀬𑁄 𑀉𑀘𑀺𑀬𑀦𑁆𑀢𑀺 𑀲𑀫𑁆𑀧𑀺𑀡𑁆𑀟𑀺𑀬𑀦𑁆𑀢𑀺 𑀏𑀢𑁆𑀣𑀸𑀢𑀺 𑀲𑀫𑀼𑀘𑁆𑀘𑀬𑁄, 𑀲𑁄𑀬𑁂𑀯 𑀯𑀸𑀭𑁄 𑀲𑀫𑀼𑀘𑁆𑀘𑀬𑀯𑀸𑀭𑁄.

𑁧𑁮𑁮. 𑀢𑀢𑁄𑀢𑀺 𑀢𑁂𑀳𑀺 𑀅𑀝𑁆𑀞𑀳𑀺 𑀯𑀸𑀭𑁂𑀳𑀺, 𑀧𑀭𑀁 𑀯𑀼𑀢𑁆𑀢𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀘𑁆𑀘𑀬𑀯𑀲𑁂𑀦 𑀯𑀼𑀢𑁆𑀢𑁄 𑀏𑀓𑁄 𑀧𑀜𑁆𑀜𑀢𑁆𑀢𑀺𑀯𑀸𑀭𑁄𑀢𑀺 𑀬𑁄𑀚𑀦𑀸. 𑀧𑀘𑁆𑀘𑀬𑀯𑀲𑁂𑀦𑀸𑀢𑀺 𑀧𑀘𑁆𑀘𑀬𑀲𑀤𑁆𑀤𑀲𑁆𑀲 𑀯𑀲𑁂𑀦. 𑀢𑀲𑁆𑀲𑀸𑀢𑀺 𑀧𑀘𑁆𑀘𑀬𑀲𑁆𑀲. 𑀢𑁂𑀧𑀻𑀢𑀺 𑀅𑀝𑁆𑀞 𑀯𑀸𑀭𑀸𑀧𑀺. 𑀇𑀢𑀻𑀢𑀺𑀆𑀤𑀺 𑀦𑀺𑀕𑀫𑀦𑀁. 𑀢𑀢𑁄𑀢𑀺 𑀫𑀳𑀸𑀯𑀺𑀪𑀗𑁆𑀕𑀢𑁄, 𑀧𑀭𑀁 𑀆𑀕𑀢𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀯𑀁 𑀇𑀫𑁂 𑀤𑁆𑀯𑀢𑁆𑀢𑀺𑀁𑀲 𑀯𑀸𑀭𑀸𑀢𑀺 𑀬𑁄𑀚𑀦𑀸. 𑀳𑀻𑀢𑀺 𑀲𑀘𑁆𑀘𑀁, 𑀬𑀲𑁆𑀫𑀸 𑀯𑀸. 𑀏𑀢𑁆𑀣𑀸𑀢𑀺 𑀤𑁆𑀯𑀢𑁆𑀢𑀺𑀁𑀲𑀯𑀸𑀭𑁂𑀲𑀼.

𑀲𑀫𑀼𑀝𑁆𑀞𑀸𑀦𑀲𑀻𑀲𑀯𑀡𑁆𑀡𑀦𑀸

𑁨𑁫𑁭. 𑀢𑀤𑀦𑀦𑁆𑀢𑀭𑀸𑀬𑀸𑀢𑀺 𑀢𑁂𑀲𑀁 𑀤𑁆𑀯𑀢𑁆𑀢𑀺𑀁𑀲𑀯𑀸𑀭𑀸𑀦𑀁 𑀅𑀦𑀦𑁆𑀢𑀭𑀁 𑀯𑀼𑀢𑁆𑀢𑀸𑀬 𑀲𑀫𑀼𑀝𑁆𑀞𑀸𑀦𑀓𑀣𑀸𑀬 𑀏𑀯𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. 𑀅𑀦𑀢𑁆𑀢𑀸 𑀇𑀢𑀺 𑀦𑀺𑀘𑁆𑀙𑀺𑀢𑀸𑀢𑀺 𑀅𑀦𑀢𑁆𑀢𑀸𑀢𑁆𑀯𑁂𑀯 𑀯𑀺𑀦𑀺𑀘𑁆𑀙𑀺𑀢𑀸. 𑀇𑀫𑀺𑀦𑀸 𑀅𑀦𑀢𑁆𑀢𑀸 𑀇𑀢𑀺 𑀦𑀺𑀘𑁆𑀙𑀬𑀸𑀢𑀺 𑀏𑀢𑁆𑀣 𑀘𑀺𑀥𑀸𑀢𑀼𑀬𑀸 𑀯𑀺𑀦𑀺𑀘𑁆𑀙𑀬𑀢𑁆𑀣𑀁 𑀤𑀲𑁆𑀲𑁂𑀢𑀺. ‘‘𑀅𑀦𑀺𑀘𑁆𑀘𑀸𑀓𑀸𑀭𑀸𑀤𑀻𑀳𑀻’’𑀢𑀺 𑀇𑀫𑀺𑀦𑀸 𑀲𑀪𑀸𑀕𑀥𑀫𑁆𑀫𑀸𑀦𑀦𑁆𑀢𑀺 𑀏𑀢𑁆𑀣 𑀅𑀦𑀺𑀘𑁆𑀘𑀸𑀓𑀸𑀭𑀸𑀤𑀻𑀳𑀺 𑀲𑀫𑀸𑀦𑁄 𑀪𑀸𑀕𑁄 𑀏𑀢𑁂𑀲𑀦𑁆𑀢𑀺 𑀲𑀪𑀸𑀕𑀸, 𑀢𑁂𑀬𑁂𑀯 𑀥𑀫𑁆𑀫𑀸 𑀲𑀪𑀸𑀕𑀥𑀫𑁆𑀫𑀸𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀦𑀸𑀫𑀫𑀢𑁆𑀢𑀫𑁆𑀧𑀻𑀢𑀺 𑀅𑀦𑀺𑀘𑁆𑀘𑀸𑀤𑀺𑀦𑀸𑀫𑀫𑀢𑁆𑀢𑀫𑁆𑀧𑀺. 𑀧𑀺𑀲𑀤𑁆𑀤𑁂𑀦 𑀧𑀕𑁂𑀯 𑀦𑀸𑀫𑀺𑀓𑁄 𑀅𑀦𑀺𑀘𑁆𑀘𑀸𑀤𑀺𑀲𑀪𑀸𑀯𑁄𑀢𑀺 𑀤𑀲𑁆𑀲𑁂𑀢𑀺. 𑀦 𑀧𑀜𑁆𑀜𑀸𑀬𑀢𑀻𑀢𑀺 𑀦 𑀔𑀸𑀬𑀢𑀺. 𑀇𑀫𑀺𑀦𑀸 𑀦 𑀦𑀸𑀬𑀢𑀻𑀢𑀺 𑀏𑀢𑁆𑀣 𑀜𑀸𑀥𑀸𑀢𑀼𑀬𑀸 𑀔𑀸𑀬𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀤𑀼𑀓𑁆𑀔𑀳𑀸𑀦𑀺𑀦𑁆𑀢𑀺 𑀏𑀢𑁆𑀣 𑀤𑀼𑀓𑁆𑀔𑀁 𑀚𑀳𑀸𑀢𑀻𑀢𑀺 𑀤𑀼𑀓𑁆𑀔𑀳𑀸𑀦𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀤𑀼𑀓𑁆𑀔𑀖𑀸𑀢𑀦’’𑀦𑁆𑀢𑀺. 𑀤𑀼𑀓𑁆𑀔𑀁 𑀳𑀦𑀢𑀻𑀢𑀺 𑀤𑀼𑀓𑁆𑀔𑀖𑀸𑀢𑀦𑁄, 𑀲𑀤𑁆𑀥𑀫𑁆𑀫𑁄, 𑀢𑀁. ‘‘𑀔𑀦𑁆𑀥𑀓𑀸 𑀬𑀸 𑀘 𑀫𑀸𑀢𑀺𑀓𑀸’’𑀢𑀺 𑀯𑀢𑁆𑀢𑀩𑁆𑀩𑁂 𑀲𑀼𑀔𑀼𑀘𑁆𑀘𑀸𑀭𑀡𑀢𑁆𑀣𑀸𑀬 𑀭𑀲𑁆𑀲𑀯𑀲𑁂𑀦 𑀧𑀸𑀞𑁄 𑀅𑀢𑁆𑀣𑀻𑀢𑀺 𑀆𑀳 ‘‘𑀔𑀦𑁆𑀥𑀓𑀸 𑀬 𑀘 𑀫𑀸𑀢𑀺𑀓𑀸’’𑀢𑀺. 𑀲𑀫𑀼𑀝𑁆𑀞𑀸𑀦𑀁 𑀦𑀺𑀬𑀢𑁄𑀓𑀢𑀦𑁆𑀢𑀺 (𑀲𑀁. 𑀦𑀺. 𑁧.𑁨𑁧𑁬) 𑀏𑀢𑁆𑀣 ‘‘𑀲𑀫𑀼𑀝𑁆𑀞𑀸𑀦𑀁 𑀦𑀺𑀬𑀢𑀓𑀢’’𑀦𑁆𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀧𑀭𑁄𑀲𑀳𑀲𑁆𑀲’’𑀦𑁆𑀢𑀺𑀆𑀤𑀻𑀲𑀼 𑀯𑀺𑀬 𑀑𑀓𑀸𑀭𑀸𑀕𑀫𑀯𑀲𑁂𑀦 ‘‘𑀲𑀫𑀼𑀝𑁆𑀞𑀸𑀦𑀦𑀺𑀬𑀢𑁄𑀓𑀢’’𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀲𑀫𑀼𑀝𑁆𑀞𑀸𑀦𑀁 𑀦𑀺𑀬𑀢𑀓𑀢’’𑀦𑁆𑀢𑀺. 𑀏𑀢𑁂𑀦𑀸𑀢𑀺 ‘‘𑀲𑀫𑀼𑀝𑁆𑀞𑀸𑀦𑀁 𑀦𑀺𑀬𑀢𑁄𑀓𑀢’’𑀦𑁆𑀢𑀺 𑀧𑀸𑀞𑁂𑀦. 𑀧𑀘𑁆𑀘𑁂𑀢𑀩𑁆𑀩𑁄𑀢𑀺 𑀧𑀢𑀺 𑀏𑀢𑀩𑁆𑀩𑁄, 𑀧𑀝𑀺𑀫𑀼𑀔𑀁 𑀜𑀸𑀢𑀩𑁆𑀩𑁄𑀢𑀺 𑀅𑀢𑁆𑀣𑁄. 𑀅𑀜𑁆𑀜𑁂𑀳𑀻𑀢𑀺 𑀢𑀻𑀳𑀺 𑀲𑀺𑀓𑁆𑀔𑀸𑀧𑀤𑁂𑀳𑀺 𑀅𑀜𑁆𑀜𑁂𑀳𑀺 𑀲𑀺𑀓𑁆𑀔𑀸𑀧𑀤𑁂𑀳𑀺.

𑀢𑀢𑁆𑀣𑀸𑀢𑀺 𑀲𑀫𑁆𑀪𑁂𑀤𑀦𑀺𑀤𑀸𑀦𑀯𑀘𑀦𑁂𑀲𑀼. 𑀲𑀫𑁆𑀪𑁂𑀤𑀯𑀘𑀦𑁂𑀦 𑀧𑀘𑁆𑀘𑁂𑀢𑀩𑁆𑀩𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀳𑀻𑀢𑀺 𑀲𑀘𑁆𑀘𑀁. 𑀢𑀸𑀦𑀺 𑀢𑀻𑀡𑀺 𑀲𑀺𑀓𑁆𑀔𑀸𑀧𑀤𑀸𑀦𑀺 𑀞𑀧𑁂𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀜𑁆𑀜𑀢𑁆𑀢𑀺𑀤𑁂𑀲𑀲𑀗𑁆𑀔𑀸𑀢𑀦𑁆𑀢𑀺 𑀧𑀜𑁆𑀜𑀢𑁆𑀢𑀺𑀝𑁆𑀞𑀸𑀦𑀪𑀽𑀢𑀤𑁂𑀲𑀲𑀗𑁆𑀔𑀸𑀢𑀁. ‘‘𑀇𑀫𑀸𑀦𑀺 𑀢𑀻𑀡𑀻’’𑀢𑀺 𑀇𑀫𑀺𑀦𑀸 ‘‘𑀤𑀺𑀲𑁆𑀲𑀦𑁆𑀢𑀻’’𑀢𑀺 𑀓𑀺𑀭𑀺𑀬𑀸𑀬 𑀓𑀢𑁆𑀢𑀸𑀭𑀁 𑀤𑀲𑁆𑀲𑁂𑀢𑀺. ‘‘𑀧𑀜𑁆𑀜𑀸𑀬𑀦𑁆𑀢𑀻’’𑀢𑀺 𑀇𑀫𑀺𑀦𑀸 𑀤𑀺𑀲𑀥𑀸𑀢𑀼𑀬𑀸 𑀔𑀸𑀬𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀢𑀢𑁆𑀣𑀸𑀢𑀺 𑀲𑀫𑀼𑀝𑁆𑀞𑀸𑀦𑀦𑀺𑀬𑀫𑀲𑀫𑁆𑀪𑁂𑀤𑀦𑀺𑀤𑀸𑀦𑀲𑀗𑁆𑀔𑀸𑀢𑁂𑀲𑀼 𑀢𑀻𑀲𑀼, 𑀦𑀺𑀤𑁆𑀥𑀸𑀭𑀡𑁂 𑀪𑀼𑀫𑁆𑀫𑀁. 𑀇𑀢𑀭𑀁 𑀧𑀦𑀸𑀢𑀺 𑀲𑀫𑀼𑀝𑁆𑀞𑀸𑀦𑀦𑀺𑀬𑀫𑀲𑀫𑁆𑀪𑁂𑀤𑁂𑀳𑀺 𑀅𑀜𑁆𑀜𑀁 𑀧𑀦.

𑀆𑀴𑀯𑀻𑀢𑀺 𑀆𑀴𑀯𑀺𑀬𑀁. 𑀲𑀓𑁆𑀓𑁂𑀲𑀼 𑀪𑀕𑁆𑀕𑁂𑀲𑀼 𑀘𑀸𑀢𑀺 𑀏𑀢𑁆𑀣 𑀚𑀦𑀧𑀤𑀦𑀸𑀫𑀢𑁆𑀢𑀸 𑀩𑀳𑀼𑀯𑀘𑀦𑀯𑀲𑁂𑀦 𑀯𑀼𑀢𑁆𑀢𑀁.

𑀤𑁆𑀯𑀻𑀲𑀼 𑀯𑀺𑀪𑀗𑁆𑀕𑁂𑀲𑀼 𑀧𑀜𑁆𑀜𑀢𑁆𑀢𑀁 𑀬𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑀦𑁆𑀢𑀻𑀢𑀺 𑀬𑁄𑀚𑀦𑀸. ‘‘𑀯𑀺𑀪𑀗𑁆𑀕𑁂𑀲𑀽’’𑀢𑀺 𑀇𑀫𑀺𑀦𑀸 𑀯𑀺𑀪𑀗𑁆𑀕𑁂𑀢𑀺 𑀏𑀢𑁆𑀣 𑀲𑀼𑀓𑀸𑀭𑀮𑁄𑀧𑁄𑀢𑀺 𑀤𑀲𑁆𑀲𑁂𑀢𑀺. 𑀢𑀲𑁆𑀲𑀸𑀢𑀺 𑀲𑀺𑀓𑁆𑀔𑀸𑀧𑀤𑀲𑁆𑀲. 𑀬𑀣𑀸𑀜𑀸𑀬𑀦𑁆𑀢𑀺 𑀬𑀼𑀢𑁆𑀢𑀺𑀬𑀸 𑀅𑀦𑀼𑀭𑀽𑀧𑀁. 𑀢𑀦𑁆𑀢𑀺 𑀲𑀫𑀼𑀝𑁆𑀞𑀸𑀦𑀁. 𑀫𑁂 𑀲𑀼𑀡𑀸𑀣𑀸𑀢𑀺 𑀫𑀫 𑀲𑀦𑁆𑀢𑀺𑀓𑀸 𑀲𑀼𑀡𑀸𑀣. 𑀇𑀢𑀻𑀢𑀺 𑀅𑀬𑀫𑀢𑁆𑀣𑁄.

𑀓𑀣𑀺𑀦𑀦𑁆𑀢𑀺 𑀧𑀞𑀫𑀓𑀣𑀺𑀦𑀲𑀫𑀼𑀝𑁆𑀞𑀸𑀦𑀁. 𑀅𑀦𑀦𑀼𑀜𑁆𑀜𑀸𑀢𑀸𑀬 𑀲𑀤𑁆𑀥𑀺𑀦𑁆𑀢𑀺 𑀅𑀦𑀦𑀼𑀜𑁆𑀜𑀸𑀢𑀲𑀫𑀼𑀝𑁆𑀞𑀸𑀦𑁂𑀦 𑀲𑀤𑁆𑀥𑀺𑀁. 𑀲𑀤𑀺𑀲𑀸 𑀇𑀥 𑀤𑀺𑀲𑁆𑀲𑀭𑁂𑀢𑀺 𑀏𑀢𑁆𑀣 𑀇𑀥𑀲𑀤𑁆𑀤𑁄 𑀅𑀢𑁆𑀣𑀧𑀓𑀭𑀡𑀯𑀲𑁂𑀦 𑀉𑀪𑀢𑁄𑀯𑀺𑀪𑀗𑁆𑀕𑀯𑀺𑀲𑀬𑁄𑀢𑀺 𑀆𑀳 ‘‘𑀇𑀥 𑀉𑀪𑀢𑁄𑀯𑀺𑀪𑀗𑁆𑀕𑁂’’𑀢𑀺. ‘‘𑀲𑀤𑀺𑀲𑀸𑀦𑀻’’𑀢𑀺 𑀇𑀫𑀺𑀦𑀸 𑀲𑀤𑀺𑀲𑀸𑀢𑀺 𑀏𑀢𑁆𑀣 𑀦𑀺𑀓𑀸𑀭𑀲𑁆𑀲𑀸𑀓𑀸𑀭𑀸𑀤𑁂𑀲𑁄 𑀤𑀲𑁆𑀲𑀺𑀢𑁄. ‘‘𑀤𑀺𑀲𑁆𑀲𑀦𑁆𑀢𑀻’’𑀢𑀺 𑀇𑀫𑀺𑀦𑀸 𑀤𑀺𑀲𑁆𑀲𑀭𑁂𑀢𑀺 𑀏𑀢𑁆𑀣 𑀅𑀦𑁆𑀢𑀺𑀲𑀤𑁆𑀤𑀲𑁆𑀲 𑀭𑁂𑀓𑀸𑀭𑁄 (𑀦𑀺𑀭𑀼𑀢𑁆𑀢𑀺𑀤𑀻𑀧𑀦𑀺𑀬𑀁 𑁫𑁭𑁦 𑀲𑀼𑀢𑁂) 𑀤𑀲𑁆𑀲𑀺𑀢𑁄.