𑁩. 𑀧𑁂𑀲𑀼𑀜𑁆𑀜𑀲𑀺𑀓𑁆𑀔𑀸𑀧𑀤𑀁

𑁩𑁬. 𑀢𑀢𑀺𑀬𑁂 ‘‘𑀚𑀸𑀢𑀪𑀡𑁆𑀟𑀦𑀸𑀦’’𑀦𑁆𑀢𑀺 𑀯𑀢𑁆𑀢𑀩𑁆𑀩𑁂 𑀅𑀕𑁆𑀬𑀸𑀳𑀺𑀢𑁄𑀢𑀺𑀆𑀤𑀻𑀲𑀼 𑀯𑀺𑀬 𑀯𑀺𑀲𑁂𑀲𑀦𑀧𑀭𑀦𑀺𑀧𑀸𑀢𑀯𑀲𑁂𑀦 ‘‘𑀪𑀡𑁆𑀟𑀦𑀚𑀸𑀢𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀲𑀜𑁆𑀚𑀸𑀢𑀪𑀡𑁆𑀟𑀦𑀸𑀦’’𑀦𑁆𑀢𑀺. ‘‘𑀧𑀼𑀩𑁆𑀩𑀪𑀸𑀕𑁄’’𑀢𑀺 𑀯𑀢𑁆𑀯𑀸 𑀢𑀲𑁆𑀲 𑀲𑀭𑀽𑀧𑀁 𑀤𑀲𑁆𑀲𑁂𑀢𑀺 ‘‘𑀇𑀫𑀺𑀦𑀸 𑀘 𑀇𑀫𑀺𑀦𑀸 𑀘𑀸’’𑀢𑀺𑀆𑀤𑀺𑀦𑀸. 𑀯𑀺𑀭𑀼𑀤𑁆𑀥𑀁 𑀯𑀤𑀢𑀺 𑀏𑀢𑁂𑀦𑀸𑀢𑀺 𑀯𑀺𑀯𑀸𑀤𑁄, 𑀯𑀺𑀕𑁆𑀕𑀸𑀳𑀺𑀓𑀓𑀣𑀸, 𑀢𑀁 𑀆𑀧𑀦𑁆𑀦𑀸𑀢𑀺 𑀯𑀺𑀯𑀸𑀤𑀸𑀧𑀦𑁆𑀦𑀸, 𑀢𑁂𑀲𑀁. 𑀧𑀺𑀲𑀢𑀺 𑀲𑀜𑁆𑀘𑀼𑀡𑁆𑀡𑁂𑀢𑀻𑀢𑀺 𑀧𑀺𑀲𑀼𑀡𑁄, 𑀧𑀼𑀕𑁆𑀕𑀮𑁄, 𑀢𑀲𑁆𑀲 𑀇𑀤𑀦𑁆𑀢𑀺 𑀧𑁂𑀲𑀼𑀜𑁆𑀜𑀁, 𑀯𑀘𑀦𑀦𑁆𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀧𑁂𑀲𑀼𑀜𑁆𑀜𑀦𑁆𑀢𑀺 𑀧𑀺𑀲𑀼𑀡𑀯𑀸𑀘’’𑀦𑁆𑀢𑀺.

𑁩𑁭. 𑀪𑀺𑀓𑁆𑀔𑀼𑀧𑁂𑀲𑀼𑀜𑁆𑀜𑁂𑀢𑀺 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑀁 𑀉𑀧𑀲𑀁𑀳𑀝𑁂 𑀧𑁂𑀲𑀼𑀜𑁆𑀜𑀯𑀘𑀦𑁂𑀢𑀺 𑀙𑀝𑁆𑀞𑀻𑀲𑀫𑀸𑀲𑁄.

𑁩𑁮. ‘‘𑀤𑀺𑀲𑁆𑀯𑀸’’𑀢𑀺 𑀧𑀤𑀁 ‘‘𑀪𑀡𑀦𑁆𑀢𑀲𑁆𑀲𑀸’’𑀢𑀺 𑀧𑀤𑁂 𑀧𑀼𑀩𑁆𑀩𑀓𑀸𑀮𑀓𑀺𑀭𑀺𑀬𑀸, 𑀤𑀲𑁆𑀲𑀦𑀁 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀢𑀢𑀺𑀬𑀁.