𑁯. 𑀅𑀭𑀡𑀯𑀺𑀪𑀗𑁆𑀕𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁨𑁩. 𑀕𑁂𑀳𑀲𑁆𑀲𑀺𑀢𑀯𑀲𑁂𑀦𑀸𑀢𑀺 𑀓𑀺𑀮𑁂𑀲𑀦𑀺𑀲𑁆𑀲𑀺𑀢𑀯𑀲𑁂𑀦 𑀅𑀦𑀼𑀭𑁄𑀥𑀯𑀲𑁂𑀦. 𑀦𑁂𑀯 𑀉𑀓𑁆𑀔𑀺𑀧𑁂𑀬𑁆𑀬𑀸𑀢𑀺 𑀦 𑀅𑀦𑀼𑀕𑁆𑀕𑀡𑁆𑀳𑁂𑀬𑁆𑀬. 𑀦 𑀅𑀯𑀓𑁆𑀔𑀺𑀧𑁂𑀬𑁆𑀬𑀸𑀢𑀺 𑀕𑁂𑀳𑀲𑁆𑀲𑀺𑀢𑀯𑀲𑁂𑀦 𑀯𑀺𑀭𑁄𑀥𑀯𑀲𑁂𑀦 𑀦 𑀦𑀺𑀕𑁆𑀕𑀡𑁆𑀳𑁂𑀬𑁆𑀬. 𑀅𑀦𑀼𑀭𑁄𑀥𑁂𑀦 𑀯𑀺𑀦𑀸 𑀲𑀫𑁆𑀧𑀳𑀁𑀲𑀦𑀯𑀲𑁂𑀦 𑀬𑀣𑀸𑀪𑀽𑀢𑀕𑀼𑀡𑀓𑀣𑀦𑀁 𑀦𑁂𑀯𑀼𑀲𑁆𑀲𑀸𑀤𑀦𑀸 𑀯𑀚𑁆𑀚𑀸𑀪𑀸𑀯𑀢𑁄; 𑀢𑀣𑀸 𑀯𑀺𑀭𑁄𑀥𑁂𑀦 𑀯𑀺𑀦𑀸 𑀯𑀺𑀯𑁂𑀘𑀦𑀯𑀲𑁂𑀦 𑀬𑀣𑀸𑀪𑀽𑀢𑀤𑁄𑀲𑀓𑀣𑀦𑀁 𑀦 𑀅𑀧𑀲𑀸𑀤𑀦𑀁. 𑀲𑀪𑀸𑀯𑀫𑁂𑀯𑀸𑀢𑀺 𑀬𑀣𑀸𑀪𑀽𑀢𑀲𑀪𑀸𑀯𑀫𑁂𑀯 𑀓𑀲𑁆𑀲𑀘𑀺 𑀧𑀼𑀕𑁆𑀕𑀮𑀲𑁆𑀲 𑀅𑀦𑀸𑀤𑁂𑀲𑀓𑀭𑀡𑀯𑀲𑁂𑀦 𑀓𑀣𑁂𑀬𑁆𑀬, 𑀲𑁂𑀬𑁆𑀬𑀣𑀸𑀧𑀺 𑀆𑀬𑀲𑁆𑀫𑀸 𑀲𑀼𑀪𑀽𑀢𑀺𑀢𑁆𑀣𑁂𑀭𑁄. 𑀯𑀺𑀦𑀺𑀘𑁆𑀙𑀺𑀢𑀲𑀼𑀔𑀦𑁆𑀢𑀺, ‘‘𑀅𑀚𑁆𑀛𑀢𑁆𑀢𑀁 𑀅𑀦𑀯𑀚𑁆𑀚’’𑀦𑁆𑀢𑀺𑀆𑀤𑀺𑀦𑀸 𑀯𑀺𑀲𑁂𑀲𑀢𑁄 𑀯𑀺𑀦𑀺𑀘𑁆𑀙𑀺𑀢𑀲𑀼𑀔𑀸𑀬 𑀳𑁄𑀢𑀺. 𑀧𑀭𑀫𑁆𑀫𑀼𑀔𑀸 𑀅𑀯𑀡𑁆𑀡𑀦𑁆𑀢𑀺 𑀲𑁆𑀯𑀸𑀬𑀁 𑀭𑀳𑁄𑀯𑀸𑀤𑁄 𑀧𑁂𑀲𑀼𑀜𑁆𑀜𑀽𑀧𑀲𑀁𑀳𑀸𑀭𑀯𑀲𑁂𑀦 𑀧𑀯𑀢𑁆𑀢𑁄 𑀇𑀥𑀸𑀥𑀺𑀧𑁆𑀧𑁂𑀢𑁄𑀢𑀺 𑀆𑀳 ‘‘𑀧𑀺𑀲𑀼𑀡𑀯𑀸𑀘𑀦𑁆𑀢𑀺 𑀅𑀢𑁆𑀣𑁄’’𑀢𑀺. 𑀔𑀻𑀡𑀸𑀢𑀻𑀢𑀺 𑀔𑀻𑀡𑁄, 𑀬𑁄 𑀪𑀸𑀲𑀢𑀺, 𑀬𑀜𑁆𑀘 𑀉𑀤𑁆𑀤𑀺𑀲𑁆𑀲 𑀪𑀸𑀲𑀢𑀺, 𑀤𑁆𑀯𑁂𑀧𑀺 𑀳𑀺𑀁𑀲𑀢𑀺 𑀯𑀺𑀩𑀸𑀥𑀢𑀻𑀢𑀺 𑀅𑀢𑁆𑀣𑁄, 𑀢𑀁 𑀔𑀻𑀡𑀯𑀸𑀤𑀁. 𑀲𑁆𑀯𑀸𑀬𑀁 𑀬𑀲𑁆𑀫𑀸 𑀓𑀺𑀮𑁂𑀲𑁂𑀳𑀺 𑀆𑀓𑀺𑀡𑁆𑀡𑁄 𑀲𑀁𑀓𑀺𑀮𑀺𑀝𑁆𑀞𑁄 𑀏𑀯 𑀘 𑀳𑁄𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 𑁋 ‘‘𑀆𑀓𑀺𑀡𑁆𑀡𑀁 𑀲𑀁𑀓𑀺𑀮𑀺𑀝𑁆𑀞𑀁 𑀯𑀸𑀘’’𑀦𑁆𑀢𑀺. 𑀢𑁂𑀦 𑀅𑀯𑀲𑀺𑀝𑁆𑀞𑀁 𑀢𑀺𑀯𑀺𑀥𑀫𑁆𑀧𑀺 𑀯𑀘𑀻𑀤𑀼𑀘𑁆𑀘𑀭𑀺𑀢𑀫𑀸𑀳. 𑀅𑀥𑀺𑀝𑁆𑀞𑀳𑀺𑀢𑁆𑀯𑀸𑀢𑀺, ‘‘𑀇𑀤𑀫𑁂𑀯 𑀲𑀘𑁆𑀘’’𑀦𑁆𑀢𑀺 𑀅𑀚𑁆𑀛𑁄𑀲𑀸𑀬. 𑀆𑀤𑀸𑀬𑀸𑀢𑀺 𑀧𑀕𑁆𑀕𑀬𑁆𑀳. 𑀯𑁄𑀳𑀭𑁂𑀬𑁆𑀬𑀸𑀢𑀺 𑀲𑀫𑀼𑀤𑀸𑀘𑀭𑁂𑀬𑁆𑀬. 𑀮𑁄𑀓𑀲𑀫𑀜𑁆𑀜𑀦𑁆𑀢𑀺 𑀮𑁄𑀓𑀲𑀗𑁆𑀓𑁂𑀢𑀁.

𑁩𑁨𑁪. 𑀆𑀭𑀫𑁆𑀫𑀡𑀢𑁄 𑀲𑀫𑁆𑀧𑀬𑁄𑀕𑀢𑁄 𑀓𑀸𑀫𑁂𑀳𑀺 𑀧𑀝𑀺𑀲𑀁𑀳𑀺𑀢𑀢𑁆𑀢𑀸 𑀓𑀸𑀫𑀧𑀝𑀺𑀲𑀦𑁆𑀥𑀺, 𑀓𑀸𑀫𑀲𑀼𑀔𑀁. 𑀢𑁂𑀦𑀸𑀳 ‘‘𑀓𑀸𑀫𑀽𑀧𑀲𑀁𑀳𑀺𑀢𑁂𑀦 𑀲𑀼𑀔𑁂𑀦𑀸’’𑀢𑀺. 𑀲𑀤𑀼𑀓𑁆𑀔𑁄𑀢𑀺 𑀯𑀺𑀧𑀸𑀓𑀤𑀼𑀓𑁆𑀔𑁂𑀦 𑀲𑀁𑀓𑀺𑀮𑁂𑀲𑀤𑀼𑀓𑁆𑀔𑁂𑀦 𑀲𑀤𑀼𑀓𑁆𑀔𑁄. 𑀢𑀣𑀸 𑀲𑀧𑀭𑀺𑀴𑀸𑀳𑁄𑀢𑀺 𑀯𑀺𑀧𑀸𑀓𑀧𑀭𑀺𑀴𑀸𑀳𑁂𑀦 𑀘𑁂𑀯 𑀓𑀺𑀮𑁂𑀲𑀧𑀭𑀺𑀴𑀸𑀳𑁂𑀦 𑀘 𑀲𑀧𑀭𑀺𑀴𑀸𑀳𑁄.

𑁩𑁨𑁬. 𑀯𑀝𑁆𑀝𑀢𑁄 𑀦𑀺𑀲𑁆𑀲𑀭𑀺𑀢𑀼𑀁 𑀅𑀤𑀢𑁆𑀯𑀸 𑀢𑀢𑁆𑀣𑁂𑀯 𑀲𑀻𑀤𑀸𑀧𑀦𑀢𑁄 𑀫𑀺𑀘𑁆𑀙𑀸𑀧𑀝𑀺𑀧𑀤𑀸𑀪𑀸𑀯𑁂𑀦 𑀲𑀢𑁆𑀢𑁂 𑀲𑀁𑀬𑁄𑀚𑁂𑀢𑀻𑀢𑀺 𑀲𑀁𑀬𑁄𑀚𑀦𑀁, 𑀯𑀺𑀲𑁂𑀲𑀢𑁄 𑀪𑀯𑀲𑀁𑀬𑁄𑀚𑀦𑀁 𑀢𑀡𑁆𑀳𑀸𑀢𑀺 𑀆𑀳 ‘‘𑀢𑀡𑁆𑀳𑀸𑀬𑁂𑀢𑀁 𑀦𑀸𑀫’’𑀦𑁆𑀢𑀺. 𑀦 𑀢𑀡𑁆𑀳𑀸𑀬𑁂𑀯 𑀫𑀸𑀦𑀸𑀤𑀬𑁄𑀧𑀺 𑀲𑀁𑀬𑁄𑀚𑀦𑀢𑁆𑀢𑀁 𑀲𑀸𑀥𑁂𑀦𑁆𑀢𑀺 𑀦𑀸𑀫 𑀲𑀩𑁆𑀩𑀲𑁄 𑀲𑀁𑀬𑁄𑀚𑀦𑀢𑁄 𑀲𑀼𑀝𑁆𑀞𑀼 𑀩𑀦𑁆𑀥𑀦𑀢𑁄. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑀸𑀦𑀁, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸𑀦𑀁 𑀢𑀡𑁆𑀳𑀸𑀲𑀁𑀬𑁄𑀚𑀦𑀸𑀦’’𑀦𑁆𑀢𑀺 (𑀲𑀁. 𑀦𑀺. 𑁨.𑁧𑁨𑁫-𑁧𑁨𑁬).

𑀇𑀫𑀁 𑀘𑀢𑀼𑀓𑁆𑀓𑀦𑁆𑀢𑀺, ‘‘𑀬𑁂 𑀓𑀸𑀫𑀧𑀝𑀺𑀲𑀦𑁆𑀥𑀺𑀲𑀼𑀔𑀺𑀦𑁄 𑀲𑁄𑀫𑀦𑀲𑁆𑀲𑀸𑀦𑀼𑀬𑁄𑀕𑀁 𑀅𑀦𑀼𑀬𑀼𑀢𑁆𑀢𑀸, 𑀬𑁂 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑀁 𑀅𑀦𑀼𑀬𑀼𑀢𑁆𑀢𑀸’’𑀢𑀺 𑀏𑀯𑀫𑀸𑀕𑀢𑀁 𑀇𑀫𑀁 𑀘𑀢𑀼𑀓𑁆𑀓𑀁 𑀦𑀺𑀲𑁆𑀲𑀸𑀬. ‘‘𑀏𑀢𑀤𑀕𑁆𑀕𑁂 𑀞𑀧𑀺𑀢𑁄’’𑀢𑀺, 𑀯𑀢𑁆𑀯𑀸 𑀢𑀁 𑀦𑀺𑀲𑁆𑀲𑀸𑀬 𑀞𑀧𑀺𑀢𑀪𑀸𑀯𑀁 𑀯𑀺𑀢𑁆𑀣𑀸𑀭𑀢𑁄 𑀤𑀲𑁆𑀲𑁂𑀢𑀼𑀁, ‘‘𑀪𑀕𑀯𑀢𑁄 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀉𑀲𑁆𑀲𑀸𑀤𑀦𑀸𑀅𑀧𑀲𑀸𑀤𑀦𑀸 𑀧𑀜𑁆𑀜𑀸𑀬𑀦𑁆𑀢𑀺 𑀢𑀣𑀸𑀕𑀢𑁂𑀦 𑀯𑀺𑀦𑁂𑀢𑀩𑁆𑀩𑀧𑀼𑀕𑁆𑀕𑀮𑀯𑀲𑁂𑀦 𑀥𑀫𑁆𑀫𑀤𑁂𑀲𑀦𑀸𑀬 𑀧𑀯𑀢𑁆𑀢𑁂𑀢𑀩𑁆𑀩𑀢𑁄. 𑀅𑀬𑀁 𑀧𑀼𑀕𑁆𑀕𑀮𑁄…𑀧𑁂… 𑀆𑀘𑀸𑀭𑀲𑀫𑁆𑀧𑀦𑁆𑀦𑁄𑀢𑀺 𑀯𑀸 𑀦𑀢𑁆𑀣𑀺 𑀧𑀭𑁂𑀲𑀁 𑀅𑀦𑀼𑀤𑁆𑀤𑁂𑀲𑀓𑀯𑀲𑁂𑀦 𑀥𑀫𑁆𑀫𑀤𑁂𑀲𑀦𑀸𑀬 𑀧𑀯𑀢𑁆𑀢𑀦𑀢𑁄.

𑁩𑁨𑁯. 𑀧𑀭𑀫𑁆𑀫𑀼𑀔𑀸 𑀅𑀯𑀡𑁆𑀡𑀦𑁆𑀢𑀺 𑀦𑀺𑀦𑁆𑀤𑀺𑀬𑀲𑁆𑀲 𑀤𑁄𑀲𑀲𑁆𑀲 𑀦𑀺𑀦𑁆𑀤𑀦𑀁. 𑀦 𑀳𑀺 𑀓𑀤𑀸𑀘𑀺 𑀦𑀺𑀦𑁆𑀤𑀺𑀬𑁄 𑀧𑀲𑀁𑀲𑀺𑀬𑁄 𑀳𑁄𑀢𑀺, 𑀢𑀁 𑀧𑀦 𑀓𑀸𑀮𑀁 𑀜𑀢𑁆𑀯𑀸𑀯 𑀓𑀣𑁂𑀢𑀩𑁆𑀩𑀦𑁆𑀢𑀺 𑀆𑀳, ‘‘𑀬𑀼𑀢𑁆𑀢𑀧𑀢𑁆𑀢𑀓𑀸𑀮𑀁 𑀜𑀢𑁆𑀯𑀸𑀯𑀸’’𑀢𑀺. 𑀔𑀻𑀡𑀯𑀸𑀤𑁂𑀧𑀺 𑀏𑀲𑁂𑀯 𑀦𑀬𑁄 𑀢𑀲𑁆𑀲 𑀭𑀳𑁄𑀯𑀸𑀤𑁂𑀦 𑀲𑀫𑀸𑀦𑀬𑁄𑀕𑀓𑁆𑀔𑀫𑀢𑁆𑀢𑀸.

𑁩𑁩𑁦. 𑀖𑀸𑀢𑀻𑀬𑀢𑀻𑀢𑀺 𑀯𑀥𑀻𑀬𑀢𑀺. 𑀲𑀤𑁆𑀤𑁄𑀧𑀺 𑀪𑀺𑀚𑁆𑀚𑀢𑀺 𑀦𑀲𑁆𑀲𑀢𑀺, 𑀪𑁂𑀤𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀕𑁂𑀮𑀜𑁆𑀜𑀧𑁆𑀧𑀢𑁆𑀢𑁄𑀢𑀺 𑀔𑁂𑀤𑀁 𑀧𑀭𑀺𑀲𑁆𑀲𑀫𑀁 𑀧𑀢𑁆𑀢𑁄. 𑀅𑀧𑀮𑀺𑀩𑀼𑀤𑁆𑀥𑀦𑁆𑀢𑀺 𑀤𑁄𑀲𑁂𑀳𑀺 𑀅𑀦𑀦𑀼𑀧𑀢𑀺𑀢𑀁.

𑁩𑁩𑁧. 𑀅𑀪𑀺𑀦𑀺𑀯𑀺𑀲𑁆𑀲 𑀯𑁄𑀳𑀭𑀢𑀻𑀢𑀺 𑀏𑀯𑀫𑁂𑀢𑀁, 𑀦 𑀇𑀢𑁄 𑀅𑀜𑁆𑀜𑀣𑀸𑀢𑀺 𑀢𑀁 𑀚𑀦𑀧𑀤𑀦𑀺𑀭𑀼𑀢𑁆𑀢𑀺𑀁 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸 𑀲𑀫𑀼𑀤𑀸𑀘𑀭𑀢𑀺. 𑀅𑀢𑀺𑀥𑀸𑀯𑀦𑀦𑁆𑀢𑀺 𑀲𑀫𑀜𑁆𑀜𑀁 𑀦𑀸𑀫𑁂𑀢𑀁 𑀮𑁄𑀓𑀲𑀗𑁆𑀓𑁂𑀢𑀲𑀺𑀤𑁆𑀥𑀸 𑀧𑀜𑁆𑀜𑀢𑁆𑀢𑀻𑀢𑀺 𑀧𑀜𑁆𑀜𑀢𑁆𑀢𑀺𑀫𑀢𑁆𑀢𑁂 𑀅𑀝𑁆𑀞𑀢𑁆𑀯𑀸 𑀧𑀭𑀫𑀢𑁆𑀣𑀢𑁄 𑀣𑀸𑀫𑀲𑀸 𑀧𑀭𑀸𑀫𑀲𑁆𑀲 𑀯𑁄𑀳𑀭𑀡𑀁.

𑁩𑁩𑁨. 𑀅𑀧𑀭𑀸𑀫𑀲𑀦𑁆𑀢𑁄𑀢𑀺 𑀅𑀦𑀪𑀺𑀦𑀺𑀯𑀺𑀲𑀦𑁆𑀢𑁄 𑀲𑀫𑀜𑁆𑀜𑀸𑀫𑀢𑁆𑀢𑀢𑁄𑀯 𑀯𑁄𑀳𑀭𑀢𑀺.

𑁩𑁩𑁩. 𑀫𑀭𑀺𑀬𑀸𑀤𑀪𑀸𑀚𑀦𑀻𑀬𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀲𑀫𑁆𑀫𑀸𑀧𑀝𑀺𑀧𑀤𑀸𑀬 𑀫𑀺𑀘𑁆𑀙𑀸𑀧𑀝𑀺𑀧𑀤𑀸𑀬 𑀘 𑀅𑀜𑁆𑀜𑀫𑀜𑁆𑀜𑀁 𑀲𑀗𑁆𑀓𑀭𑀪𑀸𑀯𑀯𑀺𑀪𑀸𑀚𑀦𑀁. 𑀭𑀡𑀦𑁆𑀢𑀺 𑀲𑀢𑁆𑀢𑀸 𑀏𑀢𑁂𑀳𑀺 𑀓𑀦𑁆𑀤𑀦𑁆𑀢𑀺 𑀅𑀓𑀦𑁆𑀤𑀦𑁆𑀢𑀸𑀧𑀺 𑀓𑀦𑁆𑀤𑀦𑀓𑀸𑀭𑀡𑀪𑀸𑀯𑀢𑁄𑀢𑀺 𑀭𑀡𑀸; 𑀭𑀸𑀕𑀤𑁄𑀲𑀫𑁄𑀳𑀸, 𑀤𑀲𑀧𑀺 𑀯𑀸 𑀓𑀺𑀮𑁂𑀲𑀸, 𑀲𑀩𑁆𑀩𑁂𑀧𑀺 𑀯𑀸 𑀏𑀓𑀦𑁆𑀢𑀸𑀓𑀼𑀲𑀮𑀸, 𑀢𑁂𑀳𑀺 𑀦𑀸𑀦𑀧𑁆𑀧𑀓𑀸𑀭𑀤𑀼𑀓𑁆𑀔𑀦𑀺𑀩𑁆𑀩𑀢𑁆𑀢𑀓𑁂𑀳𑀺 𑀅𑀪𑀺𑀪𑀽𑀢𑀸 𑀲𑀢𑁆𑀢𑀸 𑀓𑀦𑁆𑀤𑀦𑁆𑀢𑀺; 𑀲𑀳 𑀭𑀡𑁂𑀳𑀻𑀢𑀺 𑀲𑀭𑀡𑁄. 𑀭𑀡𑀲𑀤𑁆𑀤𑁄 𑀯𑀸 𑀭𑀸𑀕𑀸𑀤𑀺𑀭𑁂𑀡𑀽𑀲𑀼 𑀦𑀺𑀭𑀼𑀴𑁆𑀳𑁄. 𑀢𑁂𑀦𑀸𑀳 ‘‘𑀲𑀭𑀚𑁄 𑀲𑀓𑀺𑀮𑁂𑀲𑁄’’𑀢𑀺. 𑀧𑀸𑀴𑀺𑀬𑀁 𑀧𑀦 ‘‘𑀲𑀤𑀼𑀓𑁆𑀔𑁄 𑀏𑀲𑁄 𑀥𑀫𑁆𑀫𑁄’’𑀢𑀺𑀆𑀤𑀺𑀦𑀸 𑀆𑀕𑀢𑀢𑁆𑀢𑀸 𑀓𑀸𑀫𑀲𑀼𑀔𑀸𑀦𑀼𑀬𑁄𑀕𑀸𑀤𑀬𑁄𑀧𑀺 ‘‘𑀲𑀭𑀡𑁄’’𑀢𑀺 𑀯𑀼𑀢𑁆𑀢𑀸𑀢𑀺 𑀤𑀼𑀓𑁆𑀔𑀸𑀤𑀻𑀦𑀁 𑀭𑀡𑀪𑀸𑀯𑁄 𑀢𑀦𑁆𑀦𑀺𑀩𑁆𑀩𑀢𑁆𑀢𑀓𑀲𑀪𑀸𑀯𑀸𑀦𑀁 𑀅𑀓𑀼𑀲𑀮𑀸𑀦𑀁 𑀲𑀭𑀡𑀢𑀸 𑀘 𑀯𑁂𑀤𑀺𑀢𑀩𑁆𑀩𑀸. 𑀅𑀭𑀡𑁄𑀢𑀺𑀆𑀤𑀻𑀦𑀁 𑀧𑀤𑀸𑀦𑀁 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀯𑀢𑁆𑀣𑀼𑀁 𑀲𑁄𑀥𑁂𑀢𑀻𑀢𑀺 𑀦𑀺𑀭𑁄𑀥𑀲𑀫𑀸𑀧𑀚𑁆𑀚𑀦𑁂𑀦 𑀫𑀳𑀧𑁆𑀨𑀮𑀪𑀸𑀯𑀓𑀭𑀡𑁂𑀦 𑀤𑀓𑁆𑀔𑀺𑀡𑁂𑀬𑁆𑀬𑀯𑀢𑁆𑀣𑀼𑀪𑀽𑀢𑀁 𑀅𑀢𑁆𑀢𑀸𑀦𑀁 𑀯𑀺𑀲𑁄𑀥𑁂𑀢𑀺; 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀬𑀸 𑀯𑀢𑁆𑀣𑀼𑀯𑀺𑀲𑁄𑀥𑀦𑀁 𑀦𑀺𑀭𑁄𑀥𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀺𑀢𑀸𑀦𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑀸𑀤𑀻𑀦𑀁 𑀤𑀺𑀦𑁆𑀦𑀤𑀓𑁆𑀔𑀺𑀡𑀸𑀯𑀺𑀲𑀼𑀤𑁆𑀥𑀺𑀬𑀸 𑀤𑀻𑀧𑁂𑀢𑀩𑁆𑀩𑀁. 𑀢𑁂𑀦𑀸𑀳 ‘‘𑀢𑀣𑀸 𑀳𑀻’’𑀢𑀺𑀆𑀤𑀺. 𑀢𑀣𑁂𑀯𑀸𑀢𑀺 𑀇𑀫𑀺𑀦𑀸 ‘‘𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑁄’’𑀢𑀺𑀆𑀤𑀺𑀁 𑀉𑀧𑀲𑀁𑀳𑀭𑀢𑀺. 𑀫𑁂𑀢𑁆𑀢𑀸𑀪𑀸𑀯𑀦𑀸𑀬 𑀫𑀼𑀤𑀼𑀪𑀽𑀢𑀘𑀺𑀢𑁆𑀢𑀩𑀳𑀼𑀫𑀸𑀦𑀧𑀼𑀩𑁆𑀩𑀓𑀁 𑀤𑁂𑀦𑁆𑀢𑀻𑀢𑀺, ‘‘𑀲𑀼𑀪𑀽𑀢𑀺𑀢𑁆𑀣𑁂𑀭𑁄 𑀤𑀓𑁆𑀔𑀺𑀡𑀁 𑀯𑀺𑀲𑁄𑀥𑁂𑀢𑀻’’𑀢𑀺 𑀯𑀼𑀢𑁆𑀢𑀁. 𑀢𑁂𑀦 𑀤𑀸𑀬𑀓𑀢𑁄𑀧𑀺 𑀤𑀓𑁆𑀔𑀺𑀡𑀸𑀯𑀺𑀲𑀼𑀤𑁆𑀥𑀺𑀁 𑀤𑀲𑁆𑀲𑁂𑀢𑀺. 𑀯𑀢𑁆𑀣𑀼𑀲𑁄𑀥𑀦𑀁 𑀧𑀦 𑀧𑀝𑀺𑀪𑀸𑀕𑀢𑁄. 𑀏𑀯𑀁 𑀧𑀦 𑀓𑀸𑀢𑀼𑀁 𑀲𑀓𑁆𑀓𑀸𑀢𑀺 𑀲𑀸𑀯𑀓𑀸𑀦𑀫𑁆𑀧𑀺 𑀓𑀺𑀫𑁂𑀯𑀁 𑀮𑀳𑀼𑀯𑀼𑀝𑁆𑀞𑀸𑀦𑀸𑀥𑀺𑀝𑁆𑀞𑀸𑀦𑀁 𑀲𑀸𑀯𑀓𑁂𑀲𑀼 𑀘𑀺𑀡𑁆𑀡𑀯𑀲𑀻𑀪𑀸𑀯𑁄 𑀲𑀫𑁆𑀪𑀯𑀢𑀻𑀢𑀺 𑀧𑀼𑀘𑁆𑀙𑀢𑀺. 𑀇𑀢𑀭𑁄 𑀅𑀕𑁆𑀕𑀲𑀸𑀯𑀓𑀫𑀳𑀸𑀲𑀸𑀯𑀓𑁂𑀲𑀼 𑀓𑀺𑀁 𑀯𑀢𑁆𑀢𑀩𑁆𑀩𑀁, 𑀧𑀓𑀢𑀺𑀲𑀸𑀯𑀓𑁂𑀲𑀼𑀧𑀺 𑀯𑀲𑀺𑀧𑁆𑀧𑀢𑁆𑀢𑁂𑀲𑀼 𑀮𑀩𑁆𑀪𑀢𑀻𑀢𑀺 𑀢𑁂 𑀤𑀲𑁆𑀲𑁂𑀦𑁆𑀢𑁄, ‘‘𑀆𑀫 𑀲𑀓𑁆𑀓𑀸’’𑀢𑀺𑀆𑀤𑀺𑀫𑀸𑀳. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀅𑀭𑀡𑀯𑀺𑀪𑀗𑁆𑀕𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.