𑁧𑁦. 𑀥𑀸𑀢𑀼𑀯𑀺𑀪𑀗𑁆𑀕𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁪𑁨. 𑀅𑀧𑀭𑀺𑀓𑁆𑀔𑀻𑀡𑀸𑀬𑀼𑀓𑀁 𑀧𑀼𑀓𑁆𑀓𑀼𑀲𑀸𑀢𑀺𑀓𑀼𑀮𑀧𑀼𑀢𑁆𑀢𑀁 𑀉𑀤𑁆𑀤𑀺𑀲𑁆𑀲 𑀕𑀫𑀦𑀦𑁆𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀢𑀼𑀭𑀺𑀢𑀕𑀫𑀦𑀘𑀸𑀭𑀺𑀓’’𑀦𑁆𑀢𑀺. 𑀫𑀫 𑀯𑀸𑀲𑀼𑀧𑀕𑀫𑀦𑁂𑀦 𑀢𑀯 𑀘𑀺𑀢𑁆𑀢𑀲𑁆𑀲 𑀅𑀨𑀸𑀲𑀼𑀓𑀁 𑀅𑀦𑀺𑀝𑁆𑀞𑀁 𑀲𑀘𑁂 𑀦𑀢𑁆𑀣𑀺. 𑀲𑁄𑀢𑀺 𑀧𑀼𑀩𑁆𑀩𑀼𑀧𑀕𑀢𑁄. 𑀤𑀺𑀦𑁆𑀦𑀁 𑀤𑀺𑀦𑁆𑀦𑀫𑁂𑀯 𑀯𑀝𑁆𑀝𑀢𑀻𑀢𑀺 𑀏𑀓𑀯𑀸𑀭𑀁 𑀤𑀺𑀦𑁆𑀦𑀁 𑀤𑀺𑀦𑁆𑀦𑀫𑁂𑀯 𑀬𑀼𑀢𑁆𑀢𑀁, 𑀦 𑀧𑀼𑀦 𑀤𑀸𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀓𑀢𑀁 𑀓𑀢𑀫𑁂𑀯𑀸𑀢𑀺 𑀲𑀗𑁆𑀕𑀳𑀢𑁆𑀣𑀁 𑀓𑀢𑀁 𑀅𑀦𑀼𑀘𑁆𑀙𑀯𑀺𑀓𑀓𑀫𑁆𑀫𑀁 𑀓𑀢𑀫𑁂𑀯, 𑀦 𑀢𑀁 𑀧𑀼𑀦 𑀯𑀺𑀧𑀭𑀺𑀯𑀢𑁆𑀢𑁂𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀧𑀼𑀓𑁆𑀓𑀼𑀲𑀸𑀢𑀺𑀫𑁆𑀳𑀺 𑀉𑀪𑀬𑀣𑀸𑀧𑀺 𑀓𑀼𑀮𑀧𑀼𑀢𑁆𑀢𑀪𑀸𑀯𑁄 𑀧𑀭𑀺𑀧𑀼𑀡𑁆𑀡𑁄 𑀏𑀯𑀸𑀢𑀺 𑀆𑀳 𑁋 ‘‘𑀚𑀸𑀢𑀺𑀓𑀼𑀮𑀧𑀼𑀢𑁆𑀢𑁄𑀧𑀺 𑀆𑀘𑀸𑀭𑀓𑀼𑀮𑀧𑀼𑀢𑁆𑀢𑁄𑀧𑀻’’𑀢𑀺. 𑀢𑀢𑁆𑀭𑀸𑀢𑀺 𑀢𑀲𑁆𑀫𑀺𑀁 𑀢𑀓𑁆𑀓𑀲𑀻𑀮𑀢𑁄 𑀆𑀕𑀫𑀦𑁂. 𑀅𑀗𑁆𑀓𑁂 𑀦𑀺𑀧𑀦𑁆𑀦𑀤𑀸𑀭𑀓𑀁 𑀯𑀺𑀬 𑀚𑀦𑀁 𑀢𑁄𑀲𑁂𑀢𑀺 𑀢𑀼𑀝𑁆𑀞𑀺𑀁 𑀧𑀸𑀧𑁂𑀢𑀺. 𑀭𑀢𑀦𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺 𑀧𑀩𑁆𑀩𑀢𑀲𑀫𑀼𑀤𑁆𑀤𑀸𑀤𑀺𑀲𑀦𑁆𑀦𑀺𑀲𑁆𑀲𑀺𑀢𑀢𑁆𑀢𑀸 𑀧𑀘𑁆𑀘𑀦𑁆𑀢𑀤𑁂𑀲𑀲𑁆𑀲. 𑀤𑀲𑁆𑀲𑀦𑀻𑀬𑀦𑁆𑀢𑀺 𑀤𑀲𑁆𑀲𑀦𑁂𑀦𑁂𑀯 𑀲𑀼𑀔𑀸𑀯𑀳𑀁. 𑀏𑀯𑀭𑀽𑀧𑀦𑁆𑀢𑀺 𑀤𑀲𑁆𑀲𑀦𑀻𑀬𑀁 𑀲𑀯𑀦𑀻𑀬𑀜𑁆𑀘.

𑀅𑀦𑀕𑁆𑀖𑀓𑀫𑁆𑀩𑀮𑁂 𑀫𑀳𑀕𑁆𑀖𑀓𑀫𑁆𑀩𑀮𑁂. 𑀲𑀸𑀭𑀓𑀭𑀡𑁆𑀟𑀓𑁂𑀢𑀺 𑀘𑀦𑁆𑀤𑀦𑀲𑀸𑀭𑀸𑀤𑀺𑀲𑀸𑀭𑀫𑀬𑀓𑀭𑀡𑁆𑀟𑀓𑁂. 𑀮𑀺𑀔𑀸𑀧𑁂𑀢𑁆𑀯𑀸 𑀉𑀓𑁆𑀓𑀺𑀭𑀸𑀧𑁂𑀢𑁆𑀯𑀸. 𑀮𑀸𑀔𑀸𑀬 𑀯𑀝𑁆𑀝𑀸𑀧𑁂𑀢𑁆𑀯𑀸𑀢𑀺 𑀫𑀼𑀔𑀁 𑀧𑀺𑀤𑀳𑀺𑀢𑁆𑀯𑀸 𑀮𑀸𑀔𑀸𑀧𑀭𑀺𑀓𑀫𑁆𑀫𑀁 𑀓𑀸𑀭𑁂𑀢𑁆𑀯𑀸.

𑀅𑀦𑁆𑀢𑁄 𑀤𑀼𑀲𑁆𑀲𑀪𑀡𑁆𑀟𑀺𑀓𑀁 𑀅𑀢𑁆𑀣𑀻𑀢𑀺 𑀅𑀜𑁆𑀜𑀸𑀲𑀺 𑀦𑀸𑀢𑀺𑀕𑀭𑀼𑀓𑀪𑀸𑀯𑀢𑁄. 𑀅𑀦𑀕𑁆𑀖𑀸 𑀅𑀳𑁂𑀲𑀼𑀦𑁆𑀢𑀺 𑀯𑀡𑁆𑀡𑀲𑀫𑁆𑀧𑀢𑁆𑀢𑀺𑀨𑀲𑁆𑀲𑀲𑀫𑁆𑀧𑀢𑁆𑀢𑀺𑀧𑀫𑀸𑀡𑀫𑀳𑀢𑁆𑀢𑀤𑀼𑀦𑁆𑀦𑀺𑀫𑁆𑀫𑀸𑀧𑀺𑀬𑀢𑀸𑀳𑀺 𑀫𑀳𑀕𑁆𑀖𑀸 𑀅𑀳𑁂𑀲𑀼𑀁, 𑀫𑀳𑀸𑀧𑀼𑀜𑁆𑀜𑁄 𑀭𑀸𑀚𑀸 𑀢𑀲𑁆𑀲 𑀅𑀢𑁆𑀣𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀬𑀤𑀺 𑀏𑀯𑀁, ‘‘𑀓𑀺𑀦𑁆𑀦𑀼 𑀔𑁄 𑀧𑁂𑀲𑁂𑀫𑀻’’𑀢𑀺 𑀓𑀲𑁆𑀫𑀸 𑀯𑀻𑀫𑀁𑀲𑀁 𑀆𑀧𑀚𑁆𑀚𑀻𑀢𑀺 𑀆𑀳 𑁋 ‘‘𑀅𑀧𑀺𑀘 𑀔𑁄 𑀧𑀦𑀸’’𑀢𑀺𑀆𑀤𑀺. 𑀲𑁄𑀢𑀺 𑀩𑀺𑀫𑁆𑀩𑀺𑀲𑀸𑀭𑁄 𑀭𑀸𑀚𑀸. 𑀯𑀺𑀘𑀺𑀦𑀺𑀢𑀼𑀁 𑀆𑀭𑀤𑁆𑀥𑁄 𑀭𑀢𑀦𑀲𑁆𑀲 𑀅𑀦𑁂𑀓𑀯𑀺𑀥𑀢𑁆𑀢𑀸 𑀉𑀢𑁆𑀢𑀭𑀼𑀢𑁆𑀢𑀭𑀺𑀜𑁆𑀘 𑀧𑀡𑀻𑀢𑀢𑀭𑀸𑀤𑀺𑀪𑀸𑀯𑀢𑁄. 𑀲𑀼𑀯𑀡𑁆𑀡𑀭𑀚𑀢𑀸𑀤𑀻𑀢𑀺 𑀲𑀼𑀯𑀡𑁆𑀡𑀭𑀚𑀢𑀧𑀯𑀸𑀴𑀫𑀡𑀺𑀫𑀼𑀢𑁆𑀢𑀸𑀯𑁂𑀴𑀼𑀭𑀺𑀬𑀸𑀤𑀺. 𑀇𑀦𑁆𑀤𑁆𑀭𑀺𑀬𑀩𑀤𑁆𑀥𑀦𑁆𑀢𑀺 𑀘𑀓𑁆𑀔𑀸𑀤𑀺𑀇𑀦𑁆𑀤𑁆𑀭𑀺𑀬𑀧𑀝𑀺𑀩𑀤𑁆𑀥𑀁. 𑀧𑀤𑁂𑀲𑀦𑁆𑀢𑀺 𑀕𑀼𑀡𑀯𑀲𑁂𑀦 𑀏𑀓𑀤𑁂𑀲𑀁 𑀦 𑀧𑀸𑀧𑀼𑀡𑀸𑀢𑀺.

𑀲𑀸𑀫𑀁 𑀲𑀘𑁆𑀘𑀸𑀦𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑀢𑀸𑀲𑀸𑀫𑀜𑁆𑀜𑁂𑀦, ‘‘𑀩𑀼𑀤𑁆𑀥𑀭𑀢𑀦𑀫𑁆𑀧𑀺 𑀤𑀼𑀯𑀺𑀥’’𑀦𑁆𑀢𑀺 𑀯𑀼𑀢𑁆𑀢𑀁. 𑀩𑀼𑀤𑁆𑀥𑀭𑀢𑀦𑀲𑀫𑀁 𑀭𑀢𑀦𑀁 𑀦𑀸𑀫 𑀦𑀢𑁆𑀣𑀺, 𑀬𑀲𑁆𑀫𑀸 𑀧𑀦 𑀇𑀫𑀲𑁆𑀫𑀺𑀁 𑀮𑁄𑀓𑁂 𑀧𑀭𑀲𑁆𑀫𑀺𑀁 𑀯𑀸 𑀧𑀦 𑀩𑀼𑀤𑁆𑀥𑁂𑀦 𑀲𑀤𑀺𑀲𑁄 𑀦 𑀯𑀺𑀚𑁆𑀚𑀢𑀻𑀢𑀺. 𑀧𑀞𑀫𑀩𑁄𑀥𑀺𑀬𑀁𑀬𑁂𑀯 𑀧𑀯𑀢𑁆𑀢𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀖𑁄𑀲𑁄𑀧𑀻’’𑀢𑀺𑀆𑀤𑀺.

𑀭𑀸𑀚𑀸 𑀢𑀼𑀝𑁆𑀞𑁄 𑀘𑀺𑀦𑁆𑀢𑁂𑀲𑀺, ‘‘𑀢𑀢𑁆𑀣 𑀅𑀯𑀺𑀚𑁆𑀚𑀫𑀸𑀦𑀁𑀬𑁂𑀯 𑀧𑁂𑀲𑁂𑀢𑀼𑀁 𑀮𑀤𑁆𑀥’’𑀦𑁆𑀢𑀺. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀧𑀭𑀺𑀧𑀼𑀡𑁆𑀡𑀁 𑀏𑀓𑀤𑀺𑀯𑀲𑀫𑁆𑀧𑀺 𑀢𑀲𑁆𑀫𑀺𑀁 𑀧𑀤𑁂𑀲𑁂 𑀩𑀼𑀤𑁆𑀥𑀸𑀦𑀁 𑀆𑀯𑀸𑀲𑀧𑀭𑀺𑀕𑁆𑀕𑀳𑁄 𑀦𑀢𑁆𑀣𑀺, 𑀢𑀲𑁆𑀫𑀸. 𑀧𑀼𑀩𑁆𑀩𑀤𑀺𑀲𑀸𑀫𑀼𑀔𑀦𑁆𑀢𑀺 𑀧𑀼𑀩𑁆𑀩𑀤𑀺𑀲𑀸𑀪𑀺𑀫𑀼𑀔𑀁 𑀲𑀻𑀳𑀧𑀜𑁆𑀚𑀭𑀁. 𑀢𑁂𑀦𑀲𑁆𑀲 𑀲𑀼𑀯𑀺𑀪𑀽𑀢𑀸𑀮𑁄𑀓𑀢𑀁 𑀤𑀲𑁆𑀲𑁂𑀢𑀺.

𑀏𑀯𑀁 𑀅𑀦𑀜𑁆𑀜𑀲𑀸𑀥𑀸𑀭𑀡𑀲𑁆𑀲 𑀪𑀕𑀯𑀢𑁄 𑀈𑀤𑀺𑀲𑁄 𑀲𑀫𑀼𑀤𑀸𑀕𑀫𑁄𑀢𑀺 𑀤𑀲𑁆𑀲𑁂𑀢𑀼𑀁, ‘‘𑀏𑀯𑀁 𑀤𑀲 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀏𑀯𑀁 𑀲𑀫𑁆𑀧𑀦𑁆𑀦𑀲𑀫𑀼𑀤𑀸𑀕𑀫𑀲𑁆𑀲 𑀢𑀤𑀦𑀼𑀭𑀽𑀧𑀸 𑀅𑀬𑀁 𑀨𑀮𑀲𑀫𑁆𑀧𑀤𑀸𑀢𑀺 𑀤𑀲𑁆𑀲𑁂𑀢𑀼𑀁, ‘‘𑀢𑀼𑀲𑀺𑀢𑀪𑀯𑀦𑀢𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀅𑀭𑀺𑀬𑀥𑀫𑁆𑀫𑁄 𑀦𑀸𑀫 𑀅𑀭𑀺𑀬𑀫𑀕𑁆𑀕𑀧𑁆𑀧𑀥𑀸𑀦𑁄, 𑀅𑀭𑀺𑀬𑀫𑀕𑁆𑀕𑁄 𑀘 𑀲𑀢𑁆𑀢𑀢𑀺𑀁𑀲𑀩𑁄𑀥𑀺𑀧𑀓𑁆𑀔𑀺𑀬𑀲𑀗𑁆𑀕𑀳𑁄, 𑀢𑁂 𑀘 𑀉𑀤𑁆𑀤𑁂𑀲𑀫𑀢𑁆𑀢𑁂𑀦𑁂𑀯 𑀕𑀳𑀺𑀢𑀸𑀢𑀺 𑀆𑀳 𑁋 ‘‘𑀲𑀢𑁆𑀢𑀢𑀺𑀁𑀲𑀩𑁄𑀥𑀺𑀧𑀓𑁆𑀔𑀺𑀬𑁂 𑀏𑀓𑀤𑁂𑀲𑁂𑀦 𑀮𑀺𑀔𑀺𑀢𑁆𑀯𑀸’’𑀢𑀺. 𑀘𑀽𑀴𑀲𑀻𑀮𑀸𑀤𑀻𑀦𑀺 𑀩𑁆𑀭𑀳𑁆𑀫𑀚𑀸𑀮𑁂 (𑀤𑀻. 𑀦𑀺. 𑁧.𑁮-𑁯) 𑀆𑀕𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀙𑀤𑁆𑀯𑀸𑀭𑀲𑀁𑀯𑀭𑀁 𑀲𑀢𑀺𑀲𑀫𑁆𑀧𑀚𑀜𑁆𑀜𑀦𑁆𑀢𑀺 𑀫𑀦𑀘𑁆𑀙𑀝𑁆𑀞𑀸𑀦𑀁 𑀤𑁆𑀯𑀸𑀭𑀸𑀦𑀁 𑀲𑀁𑀯𑀭𑀡𑀯𑀲𑁂𑀦 𑀲𑀢𑁆𑀢𑀝𑁆𑀞𑀸𑀦𑀺𑀓𑀁 𑀲𑀢𑀺𑀲𑀫𑁆𑀧𑀚𑀜𑁆𑀜𑀁. 𑀤𑁆𑀯𑀸𑀤𑀲𑀧𑁆𑀧𑀪𑁂𑀤𑀁 𑀘𑀻𑀯𑀭𑀸𑀤𑀺𑀘𑀢𑀼𑀧𑁆𑀧𑀘𑁆𑀘𑀬𑀲𑀦𑁆𑀢𑁄𑀲𑀁. 𑀅𑀭𑀜𑁆𑀜𑀭𑀼𑀓𑁆𑀔𑀫𑀽𑀮𑀸𑀤𑀻𑀦𑀜𑁆𑀘 𑀯𑀺𑀪𑀗𑁆𑀕𑀁 𑀪𑀸𑀯𑀦𑀸𑀦𑀼𑀓𑀽𑀮𑀁 𑀲𑁂𑀦𑀸𑀲𑀦𑀁. ‘‘𑀅𑀪𑀺𑀚𑁆𑀛𑀁 𑀮𑁄𑀓𑁂 𑀧𑀳𑀸𑀬𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀁 𑀦𑀻𑀯𑀭𑀡𑀧𑁆𑀧𑀳𑀸𑀦𑀁. 𑀧𑀭𑀺𑀓𑀫𑁆𑀫𑀦𑁆𑀢𑀺 𑀓𑀲𑀺𑀡𑀸𑀤𑀺𑀧𑀭𑀺𑀓𑀫𑁆𑀫𑀁. 𑀧𑀸𑀴𑀺𑀬𑀁 𑀆𑀕𑀢𑀦𑀬𑁂𑀦 𑀅𑀝𑁆𑀞𑀢𑀺𑀁𑀲 𑀓𑀫𑁆𑀫𑀝𑁆𑀞𑀸𑀦𑀸𑀦𑀺. 𑀯𑀺𑀲𑀼𑀤𑁆𑀥𑀺𑀧𑀝𑀺𑀧𑀸𑀝𑀺𑀬𑀸 𑀬𑀸𑀯 𑀆𑀲𑀯𑀓𑁆𑀔𑀬𑀸 𑀇𑀫𑀁 𑀧𑀝𑀺𑀧𑀢𑁆𑀢𑀺𑀁 𑀏𑀓𑀤𑁂𑀲𑁂𑀦 𑀮𑀺𑀔𑀺. 𑀲𑁄𑀴𑀲𑀯𑀺𑀥𑀦𑁆𑀢𑀺 𑀲𑁄𑀴𑀲𑀯𑀺𑀥𑀪𑀸𑀯𑀦𑀸𑀬 𑀧𑀬𑁄𑀕𑀁.

𑀓𑀺𑀮𑀜𑁆𑀚𑀫𑀬𑁂𑀢𑀺 𑀦𑀸𑀦𑀸𑀯𑀺𑀥𑀪𑀺𑀢𑁆𑀢𑀺𑀯𑀺𑀪𑀢𑁆𑀢𑁂 𑀲𑀡𑁆𑀳𑀲𑀼𑀔𑀼𑀫𑀭𑀢𑀦𑀧𑀭𑀺𑀲𑀺𑀩𑁆𑀩𑀺𑀢𑁂 𑀓𑀺𑀮𑀜𑁆𑀚𑀫𑀬𑀲𑀫𑀼𑀕𑁆𑀕𑁂. 𑀩𑀳𑀺 𑀯𑀢𑁆𑀣𑁂𑀦 𑀯𑁂𑀞𑁂𑀢𑁆𑀯𑀸𑀢𑀺 𑀧𑀞𑀫𑀁 𑀲𑀼𑀔𑀼𑀫𑀓𑀫𑁆𑀩𑀮𑁂𑀦 𑀯𑁂𑀞𑁂𑀢𑁆𑀯𑀸 𑀧𑀝𑀺𑀧𑀸𑀝𑀺𑀬𑀸 𑀢𑁂𑀢𑁆𑀢𑀺𑀁𑀲𑀸𑀬 𑀲𑀫𑀼𑀕𑁆𑀕𑁂𑀲𑀼 𑀧𑀓𑁆𑀔𑀺𑀧𑀺𑀢𑁆𑀯𑀸 𑀢𑀢𑁄 𑀩𑀳𑀺 𑀲𑀼𑀔𑀼𑀫𑀯𑀢𑁆𑀣𑁂𑀦 𑀯𑁂𑀞𑁂𑀢𑁆𑀯𑀸 𑀙𑀸𑀤𑁂𑀢𑁆𑀯𑀸. 𑀢𑀺𑀡𑀕𑀘𑁆𑀙𑀧𑀳𑀸𑀦𑀲𑀫𑁆𑀫𑀚𑁆𑀚𑀦𑀸𑀤𑀺𑀦𑀸 𑀲𑁄𑀥𑀺𑀢𑀫𑀢𑁆𑀢𑀓𑀫𑁂𑀯 𑀳𑁄𑀢𑀼, 𑀓𑀤𑀮𑀺𑀧𑀼𑀡𑁆𑀡𑀖𑀝𑀞𑀧𑀦𑀥𑀚𑀧𑀝𑀸𑀓𑀼𑀲𑁆𑀲𑀸𑀧𑀦𑀸𑀤𑀺𑀅𑀮𑀗𑁆𑀓𑀭𑀡𑁂𑀦 𑀫𑀸 𑀦𑀺𑀝𑁆𑀞𑀸𑀧𑁂𑀣𑀸𑀢𑀺 𑀅𑀢𑁆𑀣𑁄. 𑀭𑀸𑀚𑀸𑀦𑀼𑀪𑀸𑀯𑁂𑀦 𑀧𑀝𑀺𑀬𑀸𑀤𑁂𑀣𑀸𑀢𑀺 𑀫𑀫 𑀭𑀸𑀚𑀸𑀦𑀼𑀭𑀽𑀧𑀁 𑀲𑀚𑁆𑀚𑁂𑀣, 𑀅𑀮𑀗𑁆𑀓𑀭𑁄𑀣𑀸𑀢𑀺 𑀅𑀢𑁆𑀣𑁄. 𑀅𑀦𑁆𑀢𑀭𑀪𑁄𑀕𑀺𑀓𑀸𑀦𑀦𑁆𑀢𑀺 𑀅𑀦𑀼𑀬𑀼𑀢𑁆𑀢𑀭𑀸𑀚𑀫𑀳𑀸𑀫𑀢𑁆𑀢𑀸𑀦𑀁. 𑀚𑀯𑀦𑀤𑀽𑀢𑁂𑀢𑀺 𑀔𑀺𑀧𑁆𑀧𑀁 𑀕𑀘𑁆𑀙𑀦𑁆𑀢𑀓𑀤𑀽𑀢𑀧𑀼𑀭𑀺𑀲𑁂. 𑀢𑀸𑀴𑁂𑀳𑀺 𑀲𑀳 𑀅𑀯𑀘𑀭𑀦𑁆𑀢𑀻𑀢𑀺 𑀢𑀸𑀴𑀸𑀯𑀘𑀭𑀸.

𑀭𑀜𑁆𑀜𑀸 𑀧𑀡𑁆𑀡𑀸𑀓𑀸𑀭𑀁 𑀉𑀤𑁆𑀤𑀺𑀲𑁆𑀲 𑀓𑀢𑀧𑀽𑀚𑀸𑀲𑀓𑁆𑀓𑀸𑀭𑀲𑁆𑀲 𑀅𑀫𑀘𑁆𑀘𑀢𑁄 𑀲𑀼𑀢𑀢𑁆𑀢𑀸 𑀧𑀡𑁆𑀡𑀸𑀓𑀸𑀭𑀁 𑀉𑀘𑁆𑀘𑀝𑁆𑀞𑀸𑀦𑁂 𑀞𑀧𑁂𑀢𑁆𑀯𑀸 𑀲𑀬𑀁 𑀦𑀻𑀘𑀸𑀲𑀦𑁂 𑀦𑀺𑀲𑀺𑀦𑁆𑀦𑁄. 𑀦𑀸𑀬𑀁 𑀅𑀜𑁆𑀜𑀲𑁆𑀲 𑀭𑀢𑀦𑀲𑁆𑀲 𑀪𑀯𑀺𑀲𑁆𑀲𑀢𑀻𑀢𑀺 𑀅𑀬𑀁 𑀧𑀭𑀺𑀳𑀸𑀭𑁄 𑀅𑀜𑁆𑀜𑀲𑁆𑀲 𑀫𑀡𑀺𑀫𑀼𑀢𑁆𑀢𑀸𑀤𑀺𑀪𑁂𑀤𑀲𑁆𑀲 𑀭𑀢𑀦𑀲𑁆𑀲 𑀦 𑀪𑀯𑀺𑀲𑁆𑀲𑀢𑀺 𑀫𑀡𑀺𑀫𑀼𑀢𑁆𑀢𑀸𑀤𑀻𑀳𑀺 𑀅𑀪𑀺𑀲𑀗𑁆𑀔𑀢𑀢𑁆𑀢𑀸. 𑀩𑀮𑀯𑀲𑁄𑀫𑀦𑀲𑁆𑀲𑀁 𑀉𑀧𑁆𑀧𑀚𑁆𑀚𑀺 𑀘𑀺𑀭𑀢𑀦𑀓𑀸𑀮𑀁 𑀩𑀼𑀤𑁆𑀥𑀲𑀸𑀲𑀦𑁂 𑀪𑀸𑀯𑀺𑀢𑀪𑀸𑀯𑀦𑀢𑀸𑀬 𑀯𑀸𑀲𑀺𑀢𑀯𑀸𑀲𑀦𑀢𑀸𑀬 𑀖𑀝𑁂 𑀤𑀻𑀧𑁄 𑀯𑀺𑀬 𑀅𑀩𑁆𑀪𑀦𑁆𑀢𑀭𑁂 𑀏𑀯 𑀲𑀫𑀼𑀚𑁆𑀚𑀮𑀫𑀸𑀦𑀧𑀭𑀺𑀧𑀓𑁆𑀓𑀢𑀺𑀳𑁂𑀢𑀼𑀓𑀪𑀸𑀯𑀢𑁄.

𑀥𑀸𑀭𑁂𑀫𑀻𑀢𑀺 𑀇𑀘𑁆𑀙𑀸𑀫𑀺, 𑀕𑀡𑁆𑀳𑀸𑀫𑀻𑀢𑀺 𑀅𑀢𑁆𑀣𑁄. 𑀤𑁆𑀯𑁂𑀚𑁆𑀛𑀯𑀘𑀦𑀦𑁆𑀢𑀺 𑀤𑁆𑀯𑁂𑀴𑁆𑀳𑀓𑀪𑀸𑀯𑁄. 𑀅𑀦𑁆𑀢𑀭𑀁 𑀓𑀭𑁄𑀢𑀻𑀢𑀺 𑀤𑁆𑀯𑀺𑀦𑁆𑀦𑀁 𑀧𑀸𑀤𑀸𑀦𑀁 𑀅𑀦𑁆𑀢𑀭𑀁 𑀢𑀁 𑀮𑁂𑀔𑀁 𑀓𑀭𑁄𑀢𑀺, 𑀏𑀓𑁂𑀦 𑀧𑀸𑀤𑁂𑀦 𑀅𑀢𑀺𑀓𑁆𑀓𑀫𑀻𑀢𑀺 𑀅𑀢𑁆𑀣𑁄. 𑀢𑀲𑁆𑀲𑀸 𑀕𑀢𑀫𑀕𑁆𑀕𑁂𑀦𑀸𑀢𑀺 𑀢𑀸𑀬 𑀤𑁂𑀯𑀺𑀬𑀸 𑀯𑀺𑀯𑀝𑁆𑀝𑀫𑀸𑀦𑀸𑀬 𑀦𑀸𑀲𑀺𑀢𑀸𑀬 𑀕𑀢𑀫𑀕𑁆𑀕𑁂𑀦. 𑀢𑀁 𑀧𑀦 𑀮𑁂𑀔𑀦𑁆𑀢𑀺 𑀧𑀼𑀓𑁆𑀓𑀼𑀲𑀸𑀢𑀺𑀦𑀸 𑀓𑀢𑀮𑁂𑀔𑀁. 𑀧𑀡𑁆𑀡𑀘𑁆𑀙𑀢𑁆𑀢𑀓𑀦𑁆𑀢𑀺 𑀢𑀸𑀮𑀧𑀢𑁆𑀢𑀫𑀼𑀝𑁆𑀞𑀺𑀁.

𑀲𑀢𑁆𑀣𑀼𑀕𑀸𑀭𑀯𑁂𑀦𑀸𑀢𑀺 𑀲𑀢𑁆𑀣𑀭𑀺 𑀉𑀧𑁆𑀧𑀦𑁆𑀦𑀧𑀲𑀸𑀤𑀧𑁂𑀫𑀩𑀳𑀼𑀫𑀸𑀦𑀲𑀫𑁆𑀪𑀯𑁂𑀦. 𑀢𑀤𑀸 𑀲𑀢𑁆𑀣𑀸𑀭𑀁𑀬𑁂𑀯 𑀫𑀦𑀲𑀺 𑀓𑀢𑁆𑀯𑀸 𑀢𑀦𑁆𑀦𑀺𑀦𑁆𑀦𑀪𑀸𑀯𑁂𑀦 𑀕𑀘𑁆𑀙𑀦𑁆𑀢𑁄, ‘‘𑀧𑀼𑀘𑁆𑀙𑀺𑀲𑁆𑀲𑀸𑀫𑀻’’𑀢𑀺𑀧𑀺 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀸𑀤𑁂𑀲𑀺, ‘‘𑀏𑀢𑁆𑀣 𑀦𑀼 𑀔𑁄 𑀲𑀢𑁆𑀣𑀸 𑀯𑀲𑀢𑀻’’𑀢𑀺 𑀧𑀭𑀺𑀯𑀺𑀢𑀓𑁆𑀓𑀲𑁆𑀲𑁂𑀯 𑀅𑀪𑀸𑀯𑀢𑁄; 𑀭𑀸𑀚𑀕𑀳𑀁 𑀧𑀦 𑀧𑀢𑁆𑀯𑀸 𑀭𑀜𑁆𑀜𑁄 𑀧𑁂𑀲𑀺𑀢𑀲𑀸𑀲𑀦𑀯𑀲𑁂𑀦 𑀢𑀢𑁆𑀣 𑀘 𑀯𑀺𑀳𑀸𑀭𑀲𑁆𑀲 𑀩𑀳𑀼𑀪𑀸𑀯𑀢𑁄 𑀲𑀢𑁆𑀣𑀸 𑀓𑀳𑀁 𑀯𑀲𑀢𑀻𑀢𑀺 𑀧𑀼𑀘𑁆𑀙𑀺. 𑀲𑀢𑁆𑀣𑀼 𑀏𑀓𑀓𑀲𑁆𑀲𑁂𑀯 𑀦𑀺𑀓𑁆𑀔𑀫𑀦𑀁 𑀧𑀜𑁆𑀘𑀘𑀢𑁆𑀢𑀸𑀮𑀻𑀲 𑀬𑁄𑀚𑀦𑀸𑀦𑀺 𑀧𑀤𑀲𑀸 𑀕𑀫𑀦𑀜𑁆𑀘 𑀥𑀫𑁆𑀫𑀧𑀽𑀚𑀸𑀯𑀲𑁂𑀦 𑀓𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀥𑀫𑁆𑀫𑀧𑀽𑀚𑀸𑀬 𑀘 𑀩𑀼𑀤𑁆𑀥𑀸𑀦𑀁 𑀆𑀘𑀺𑀡𑁆𑀡𑀪𑀸𑀯𑁄 𑀳𑁂𑀝𑁆𑀞𑀸 𑀯𑀺𑀢𑁆𑀣𑀸𑀭𑀺𑀢𑁄𑀬𑁂𑀯. 𑀩𑀼𑀤𑁆𑀥𑀲𑁄𑀪𑀁 𑀧𑀦 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀅𑀜𑁆𑀜𑀸𑀢𑀓𑀯𑁂𑀲𑁂𑀦 𑀢𑀢𑁆𑀣 𑀕𑀫𑀦𑀁 𑀢𑀲𑁆𑀲 𑀓𑀼𑀮𑀧𑀼𑀢𑁆𑀢𑀲𑁆𑀲 𑀯𑀺𑀲𑁆𑀲𑀢𑁆𑀣𑀯𑀲𑁂𑀦 𑀫𑀕𑁆𑀕𑀤𑀭𑀣𑀧𑀝𑀺𑀧𑀲𑁆𑀲𑀫𑁆𑀪𑀦𑀢𑁆𑀣𑀁. 𑀅𑀧𑁆𑀧𑀝𑀺𑀧𑀲𑁆𑀲𑀤𑁆𑀥𑀫𑀕𑁆𑀕𑀤𑀭𑀣𑁄 𑀳𑀺 𑀥𑀫𑁆𑀫𑀤𑁂𑀲𑀦𑀸𑀬 𑀪𑀸𑀚𑀦𑀁 𑀦 𑀳𑁄𑀢𑀻𑀢𑀺. 𑀢𑀣𑀸𑀳𑀺 𑀯𑀓𑁆𑀔𑀢𑀺, ‘‘𑀦𑀦𑀼 𑀘 𑀪𑀕𑀯𑀸’’𑀢𑀺𑀆𑀤𑀺.

𑀉𑀭𑀼𑀤𑁆𑀥𑀦𑁆𑀢𑀺 𑀯𑀺𑀲𑀸𑀮𑀦𑁆𑀢𑀺 𑀓𑁂𑀘𑀺. 𑀅𑀢𑀺𑀭𑁂𑀓𑀢𑀺𑀬𑁄𑀚𑀦𑀲𑀢𑀦𑁆𑀢𑀺𑀆𑀤𑀺𑀦𑀸 𑀅𑀦𑁆𑀯𑀬𑀢𑁄 𑀩𑁆𑀬𑀢𑀺𑀭𑁂𑀓𑀢𑁄 𑀘 𑀫𑀘𑁆𑀙𑁂𑀭𑀯𑀺𑀦𑀬𑀦𑁂 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀑𑀯𑀸𑀤𑀤𑀸𑀦𑀁. 𑀅𑀘𑁆𑀘𑀦𑁆𑀢𑀲𑀼𑀔𑀼𑀫𑀸𑀮𑁄𑀢𑀺𑀆𑀤𑀺𑀦𑀸 𑀲𑀢𑁆𑀣𑀼 𑀥𑀫𑁆𑀫𑀕𑀸𑀭𑀯𑁂𑀦 𑀲𑀤𑁆𑀥𑀺𑀁 𑀓𑀼𑀮𑀧𑀼𑀢𑁆𑀢𑀲𑁆𑀲𑀧𑀺 𑀥𑀫𑁆𑀫𑀕𑀸𑀭𑀯𑀁 𑀲𑀁𑀲𑀦𑁆𑀤𑀢𑀺 𑀲𑀫𑁂𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀢𑁂𑀦 𑀪𑀕𑀯𑀢𑁄 𑀓𑀢𑀲𑁆𑀲 𑀧𑀘𑁆𑀘𑀼𑀕𑁆𑀕𑀫𑀦𑀲𑁆𑀲 𑀞𑀸𑀦𑀕𑀢𑀪𑀸𑀯𑀁 𑀯𑀺𑀪𑀸𑀯𑁂𑀦𑁆𑀢𑁄 𑀅𑀜𑁆𑀜𑁂𑀲𑀫𑁆𑀧𑀺 𑀪𑀩𑁆𑀩𑀭𑀽𑀧𑀸𑀦𑀁 𑀓𑀼𑀮𑀧𑀼𑀢𑁆𑀢𑀸𑀦𑀁 𑀬𑀣𑀸𑀭𑀳𑀁 𑀲𑀗𑁆𑀕𑀳𑁄 𑀓𑀸𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀢𑀺.

𑀩𑁆𑀭𑀳𑁆𑀫𑀮𑁄𑀓𑀧𑁆𑀧𑀫𑀸𑀡𑀦𑁆𑀢𑀺 𑀉𑀘𑁆𑀘𑀪𑀸𑀯𑁂𑀦. 𑀆𑀦𑀼𑀪𑀸𑀯𑁂𑀦𑀸𑀢𑀺 𑀇𑀤𑁆𑀥𑀸𑀦𑀼𑀪𑀸𑀯𑁂𑀦 𑀬𑀣𑀸 𑀲𑁄 𑀲𑁄𑀢𑀧𑀣𑀁 𑀦 𑀉𑀧𑀕𑀘𑁆𑀙𑀢𑀺, 𑀏𑀯𑀁 𑀯𑀽𑀧𑀲𑀫𑁂𑀢𑀼𑀁 𑀲𑀓𑁆𑀓𑁄𑀢𑀺. 𑀅𑀯𑀺𑀩𑁆𑀪𑀦𑁆𑀢𑀦𑁆𑀢𑀺 𑀯𑀺𑀩𑁆𑀪𑀫𑀭𑀳𑀺𑀢𑀁 𑀦𑀺𑀮𑁆𑀮𑁄𑀮𑀼𑀧𑁆𑀧𑀁. ‘‘𑀪𑀸𑀯𑀦𑀧𑀼𑀁𑀲𑀓𑀁 𑀧𑀦𑁂𑀢’’𑀦𑁆𑀢𑀺 𑀯𑀢𑁆𑀯𑀸 𑀢𑀲𑁆𑀲 𑀯𑀺𑀯𑀭𑀡𑀢𑁆𑀣𑀁, ‘‘𑀧𑀸𑀲𑀸𑀤𑀺𑀓𑁂𑀦 𑀇𑀭𑀺𑀬𑀸𑀧𑀣𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀇𑀢𑁆𑀣𑀫𑁆𑀪𑀽𑀢𑀮𑀓𑁆𑀔𑀡𑁂 𑀏𑀢𑀁 𑀓𑀭𑀡𑀯𑀘𑀦𑀁 𑀤𑀝𑁆𑀞𑀩𑁆𑀩𑀁. 𑀢𑁂𑀦𑀸𑀳 ‘‘𑀬𑀣𑀸 𑀇𑀭𑀺𑀬𑀢𑁄’’𑀢𑀺𑀆𑀤𑀺. 𑀅𑀫𑀦𑀸𑀧𑁄 𑀳𑁄𑀢𑀺 𑀧𑀲𑁆𑀲𑀦𑁆𑀢𑀸𑀦𑀁. 𑀲𑀻𑀳𑀲𑁂𑀬𑁆𑀬𑀸𑀬 𑀦𑀺𑀧𑀦𑁆𑀦𑀲𑁆𑀲𑀧𑀺 𑀳𑀺 𑀏𑀓𑀘𑁆𑀘𑁂 𑀲𑀭𑀻𑀭𑀸𑀯𑀬𑀯𑀸 𑀅𑀥𑁄𑀔𑀺𑀢𑁆𑀢𑀯𑀺𑀓𑁆𑀔𑀺𑀢𑁆𑀢𑀸 𑀯𑀺𑀬 𑀤𑀺𑀲𑁆𑀲𑀦𑁆𑀢𑀺. 𑀓𑀝𑀺𑀬𑀁 𑀤𑁆𑀯𑀺𑀦𑁆𑀦𑀁 𑀊𑀭𑀼𑀲𑀦𑁆𑀥𑀻𑀦𑀁 𑀤𑁆𑀯𑀺𑀦𑁆𑀦𑀜𑁆𑀘 𑀚𑀸𑀡𑀼𑀲𑀦𑁆𑀥𑀻𑀦𑀁 𑀯𑀲𑁂𑀦 𑀘𑀢𑀼𑀲𑀦𑁆𑀥𑀺𑀓𑀧𑀮𑁆𑀮𑀗𑁆𑀓𑀁. 𑀦 𑀧𑀢𑀺𑀝𑁆𑀞𑀸𑀢𑀻𑀢𑀺 𑀦𑀧𑁆𑀧𑀯𑀢𑁆𑀢𑀢𑀺, ‘‘𑀓𑀁𑀲𑀺 𑀢𑁆𑀯’’𑀦𑁆𑀢𑀺𑀆𑀤𑀺𑀦𑀸 𑀅𑀧𑀼𑀘𑁆𑀙𑀺𑀢𑁂 𑀓𑀣𑀸𑀧𑀯𑀢𑁆𑀢𑀺 𑀏𑀯 𑀦 𑀳𑁄𑀢𑀺. 𑀅𑀧𑁆𑀧𑀢𑀺𑀝𑁆𑀞𑀺𑀢𑀸𑀬 𑀓𑀣𑀸𑀬 𑀦 𑀲𑀜𑁆𑀚𑀸𑀬𑀢𑀻𑀢𑀺 𑀢𑀣𑀸 𑀧𑀦 𑀧𑀼𑀘𑁆𑀙𑀸𑀯𑀲𑁂𑀦 𑀓𑀣𑀸𑀬 𑀅𑀧𑁆𑀧𑀯𑀢𑁆𑀢𑀺𑀢𑀸𑀬 𑀉𑀧𑀭𑀺 𑀥𑀫𑁆𑀫𑀓𑀣𑀸 𑀦 𑀲𑀜𑁆𑀚𑀸𑀬𑀢𑀺 𑀦 𑀉𑀧𑁆𑀧𑀚𑁆𑀚𑀢𑀺. 𑀇𑀢𑀻𑀢𑀺 𑀢𑀲𑁆𑀫𑀸. 𑀓𑀣𑀸𑀧𑀢𑀺𑀝𑁆𑀞𑀸𑀧𑀦𑀢𑁆𑀣𑀁 𑀓𑀣𑀸𑀧𑀯𑀢𑁆𑀢𑀦𑀢𑁆𑀣𑀁 𑀓𑀣𑀸𑀲𑀫𑀼𑀝𑁆𑀞𑀸𑀧𑀦𑀢𑁆𑀣𑀁 𑀯𑀸 𑀧𑀼𑀘𑁆𑀙𑀺.

𑀲𑀪𑀸𑀯𑀫𑁂𑀯 𑀓𑀣𑁂𑀢𑀻𑀢𑀺 𑀅𑀢𑁆𑀢𑀦𑁄 𑀪𑀕𑀯𑀢𑁄 𑀅𑀤𑀺𑀝𑁆𑀞𑀧𑀼𑀩𑁆𑀩𑀢𑁆𑀢𑀸 ‘‘𑀅𑀤𑀺𑀝𑁆𑀞𑀧𑀼𑀩𑁆𑀩𑀓𑀁 𑀓𑀣𑀫𑀳𑀁 𑀚𑀸𑀦𑁂𑀬𑁆𑀬’’𑀦𑁆𑀢𑀺 𑀲𑀪𑀸𑀯𑀫𑁂𑀯 𑀓𑁂𑀯𑀮𑀁 𑀅𑀢𑁆𑀢𑀦𑁄 𑀅𑀚𑁆𑀛𑀸𑀲𑀬𑀫𑁂𑀯 𑀓𑀣𑁂𑀢𑀺; 𑀦 𑀧𑀦 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀲𑀼𑀧𑀸𑀓𑀝𑀁 𑀲𑀪𑀸𑀯𑀲𑀺𑀤𑁆𑀥𑀁 𑀩𑀼𑀤𑁆𑀥𑀭𑀽𑀧𑀓𑀸𑀬𑀲𑀪𑀸𑀯𑀁. 𑀅𑀣 𑀯𑀸 𑀲𑀪𑀸𑀯𑀫𑁂𑀯 𑀓𑀣𑁂𑀢𑀻𑀢𑀺 ‘‘𑀇𑀤𑀫𑁂𑀯’’𑀦𑁆𑀢𑀺 𑀚𑀸𑀦𑀦𑁆𑀢𑁄𑀧𑀺 𑀢𑀤𑀸 𑀪𑀕𑀯𑀢𑁄 𑀭𑀼𑀘𑀺𑀬𑀸 𑀢𑀣𑀸𑀧𑀯𑀢𑁆𑀢𑀫𑀸𑀦𑀁 𑀭𑀽𑀧𑀓𑀸𑀬𑀲𑀪𑀸𑀯𑀫𑁂𑀯 𑀓𑀣𑁂𑀢𑀺 𑀅𑀧𑁆𑀧𑀯𑀺𑀓𑁆𑀔𑀫𑁆𑀪𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑀸𑀳 𑁋 ‘‘𑀢𑀣𑀸 𑀳𑀺 𑀦’’𑀦𑁆𑀢𑀺𑀆𑀤𑀺, 𑀯𑀺𑀧𑀲𑁆𑀲𑀦𑀸𑀮𑀓𑁆𑀔𑀡𑀫𑁂𑀯 𑀧𑀝𑀺𑀧𑀤𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁩𑁪𑁩. ‘‘𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀁 𑀅𑀓𑀣𑁂𑀢𑁆𑀯𑀸’’𑀢𑀺 𑀯𑀢𑁆𑀯𑀸 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀸𑀬 𑀅𑀓𑀣𑀦𑁂 𑀓𑀸𑀭𑀡𑀁 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀜𑁆𑀘 𑀲𑀭𑀽𑀧𑀢𑁄 𑀤𑀲𑁆𑀲𑁂𑀢𑀼𑀁, ‘‘𑀬𑀲𑁆𑀲 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀧𑀭𑀺𑀲𑀼𑀤𑁆𑀥𑀸𑀬𑀧𑀺 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀸𑀬 𑀯𑀺𑀧𑀲𑁆𑀲𑀦𑀸 𑀢𑀣𑀸 𑀦 𑀓𑀺𑀘𑁆𑀘𑀓𑀸𑀭𑀻, 𑀧𑀕𑁂𑀯 𑀅𑀯𑀺𑀚𑁆𑀚𑀫𑀸𑀦𑀸𑀬𑀸𑀢𑀺, ‘‘𑀬𑀲𑁆𑀲 𑀳𑀺…𑀧𑁂… 𑀅𑀧𑀭𑀺𑀲𑀼𑀤𑁆𑀥𑀸 𑀳𑁄𑀢𑀺’’𑀘𑁆𑀘𑁂𑀯 𑀯𑀼𑀢𑁆𑀢𑀁. 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀸 𑀘 𑀦𑀸𑀫 𑀲𑀗𑁆𑀔𑁂𑀧𑀢𑁄 𑀧𑀦𑁆𑀦𑀭𑀲 𑀘𑀭𑀡𑀥𑀫𑁆𑀫𑀸𑀢𑀺 𑀆𑀳 𑁋 ‘‘𑀲𑀻𑀮𑀲𑀁𑀯𑀭𑀁…𑀧𑁂… 𑀇𑀫𑀁 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀁 𑀆𑀘𑀺𑀓𑁆𑀔𑀢𑀻’’𑀢𑀺. 𑀬𑀸𑀦𑀓𑀺𑀘𑁆𑀘𑀁 𑀲𑀸𑀥𑁂𑀢𑀺 𑀫𑀕𑁆𑀕𑀕𑀫𑀦𑁂𑀦 𑀅𑀓𑀺𑀮𑀦𑁆𑀢𑀪𑀸𑀯𑀲𑀸𑀥𑀦𑀢𑁆𑀢𑀸. 𑀘𑀺𑀭𑀓𑀸𑀮𑀁 𑀧𑀭𑀺𑀪𑀸𑀯𑀺𑀢𑀸𑀬 𑀧𑀭𑀺𑀧𑀓𑁆𑀓𑀕𑀢𑀸𑀬 𑀳𑁂𑀢𑀼𑀲𑀫𑁆𑀧𑀤𑀸𑀬 𑀉𑀧𑀝𑁆𑀞𑀸𑀧𑀺𑀢𑀁 𑀲𑀸𑀫𑀡𑁂𑀭𑀲𑀻𑀮𑀫𑁆𑀧𑀺 𑀧𑀭𑀺𑀧𑀼𑀡𑁆𑀡𑀁 𑀅𑀔𑀡𑁆𑀟𑀸𑀤𑀺𑀪𑀸𑀯𑀧𑁆𑀧𑀢𑁆𑀢𑀺𑀬𑀸, 𑀬𑀁 𑀧𑀼𑀩𑁆𑀩𑀳𑁂𑀢𑀼𑀢𑁆𑀢𑀸 ‘‘𑀲𑀻𑀮’’𑀦𑁆𑀢𑀺 𑀯𑀼𑀘𑁆𑀘𑀢𑀺.

𑀥𑀸𑀢𑀼𑀬𑁄 𑀧𑀭𑀫𑀢𑁆𑀣𑀢𑁄 𑀯𑀺𑀚𑁆𑀚𑀫𑀸𑀦𑀸, 𑀧𑀜𑁆𑀜𑀢𑁆𑀢𑀺𑀫𑀢𑁆𑀣𑁄 𑀧𑀼𑀭𑀺𑀲𑁄 𑀅𑀯𑀺𑀚𑁆𑀚𑀫𑀸𑀦𑁄. 𑀅𑀣 𑀓𑀲𑁆𑀫𑀸 𑀪𑀕𑀯𑀸 𑀅𑀭𑀳𑀢𑁆𑀢𑀲𑁆𑀲 𑀧𑀤𑀝𑁆𑀞𑀸𑀦𑀪𑀽𑀢𑀁 𑀯𑀺𑀧𑀲𑁆𑀲𑀦𑀁 𑀓𑀣𑁂𑀦𑁆𑀢𑁄 ‘‘𑀙𑀥𑀸𑀢𑀼𑀭𑁄’’𑀢𑀺 𑀅𑀯𑀺𑀚𑁆𑀚𑀫𑀸𑀦𑀧𑁆𑀧𑀥𑀸𑀦𑀁 𑀤𑁂𑀲𑀦𑀁 𑀆𑀭𑀪𑀻𑀢𑀺 𑀆𑀳 𑁋 ‘‘𑀪𑀕𑀯𑀸 𑀳𑀻’’𑀢𑀺𑀆𑀤𑀺. 𑀓𑀢𑁆𑀣𑀘𑀺 ‘‘𑀢𑁂𑀯𑀺𑀚𑁆𑀚𑁄 𑀙𑀴𑀪𑀺𑀜𑁆𑀜𑁄’’𑀢𑀺𑀆𑀤𑀻𑀲𑀼 𑀯𑀺𑀚𑁆𑀚𑀫𑀸𑀦𑁂𑀦 𑀅𑀯𑀺𑀚𑁆𑀚𑀫𑀸𑀦𑀁 𑀤𑀲𑁆𑀲𑁂𑀢𑀺. 𑀓𑀢𑁆𑀣𑀘𑀺 𑁋 ‘‘𑀇𑀢𑁆𑀣𑀺𑀭𑀽𑀧𑀁, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑀲𑁆𑀲 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀢𑀺𑀝𑁆𑀞𑀢𑀻’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁧.𑁧) 𑀅𑀯𑀺𑀚𑁆𑀚𑀫𑀸𑀦𑁂𑀦 𑀯𑀺𑀚𑁆𑀚𑀫𑀸𑀦𑀁 𑀤𑀲𑁆𑀲𑁂𑀢𑀺. 𑀓𑀢𑁆𑀣𑀘𑀺 ‘‘𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀲𑁄𑀢𑀯𑀺𑀜𑁆𑀜𑀸𑀡’’𑀦𑁆𑀢𑀺𑀆𑀤𑀻𑀲𑀼 (𑀯𑀺𑀪. 𑁧𑁨𑁧) 𑀯𑀺𑀚𑁆𑀚𑀫𑀸𑀦𑁂𑀦 𑀯𑀺𑀚𑁆𑀚𑀫𑀸𑀦𑀁 𑀤𑀲𑁆𑀲𑁂𑀢𑀺. 𑀓𑀢𑁆𑀣𑀘𑀺 𑁋 ‘‘𑀔𑀢𑁆𑀢𑀺𑀬𑀓𑀼𑀫𑀸𑀭𑁄 𑀩𑁆𑀭𑀸𑀳𑁆𑀫𑀡𑀓𑀜𑁆𑀜𑀸𑀬 𑀲𑀤𑁆𑀥𑀺𑀁 𑀲𑀁𑀯𑀸𑀲𑀁 𑀓𑀧𑁆𑀧𑁂𑀢𑀻’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁨𑁭𑁫) 𑀅𑀯𑀺𑀚𑁆𑀚𑀫𑀸𑀦𑁂𑀦 𑀅𑀯𑀺𑀚𑁆𑀚𑀫𑀸𑀦𑀁 𑀤𑀲𑁆𑀲𑁂𑀢𑀺. 𑀇𑀥 𑀧𑀦 𑀯𑀺𑀚𑁆𑀚𑀫𑀸𑀦𑁂𑀦 𑀅𑀯𑀺𑀚𑁆𑀚𑀫𑀸𑀦𑀁 𑀤𑀲𑁆𑀲𑁂𑀢𑀺. ‘‘𑀙𑀥𑀸𑀢𑀼𑀭𑁄’’𑀢𑀺 𑀳𑀺 𑀲𑀫𑀸𑀲𑀢𑁆𑀣𑁄 𑀅𑀯𑀺𑀚𑁆𑀚𑀫𑀸𑀦𑁄 𑀧𑀼𑀕𑁆𑀕𑀮𑀯𑀺𑀲𑀬𑀢𑁆𑀢𑀸, 𑀢𑀲𑁆𑀲 𑀧𑀤𑀲𑁆𑀲 𑀅𑀯𑀬𑀯𑀢𑁆𑀣𑁄 𑀧𑀦 𑀅𑀧𑁆𑀧𑀥𑀸𑀦𑀢𑁆𑀣𑁄 𑀯𑀺𑀚𑁆𑀚𑀫𑀸𑀦𑁄, 𑀲𑁄 𑀲𑀤𑁆𑀤𑀓𑁆𑀓𑀫𑁂𑀦 𑀅𑀧𑁆𑀧𑀥𑀸𑀦𑁄𑀧𑀺 𑀅𑀢𑁆𑀣𑀓𑁆𑀓𑀫𑁂𑀦 𑀧𑀥𑀸𑀦𑁄𑀢𑀺 𑀆𑀳 𑁋 ‘‘𑀯𑀺𑀚𑁆𑀚𑀫𑀸𑀦𑁂𑀦 𑀅𑀯𑀺𑀚𑁆𑀚𑀫𑀸𑀦𑀁 𑀤𑀲𑁆𑀲𑁂𑀦𑁆𑀢𑁄’’𑀢𑀺. 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀸𑀬𑁂𑀢𑁆𑀣 𑀤𑁂𑀲𑀦𑀸𑀬 𑀓𑀸𑀭𑀡𑀁 𑀤𑀲𑁆𑀲𑁂𑀢𑀼𑀁, ‘‘𑀲𑀘𑁂 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀉𑀧𑀝𑁆𑀞𑀸𑀧𑁂𑀬𑁆𑀬𑀸𑀢𑀺 𑁋 ‘‘𑀥𑀸𑀢𑀼𑀬𑁄’’𑀇𑀘𑁆𑀘𑁂𑀯 𑀓𑀼𑀮𑀧𑀼𑀢𑁆𑀢𑀲𑁆𑀲 𑀘𑀺𑀢𑁆𑀢𑀁 𑀦𑀺𑀯𑁂𑀲𑁂𑀬𑁆𑀬 𑀢𑀣𑀸 𑀲𑀜𑁆𑀚𑀸𑀦𑁂𑀬𑁆𑀬, 𑀏𑀯𑀁 𑀥𑀫𑁆𑀫𑀁 𑀤𑁂𑀲𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀲𑀦𑁆𑀤𑁂𑀳𑀁 𑀓𑀭𑁂𑀬𑁆𑀬𑀸𑀢𑀺 𑀅𑀲𑀢𑀺 𑀧𑀼𑀭𑀺𑀲𑁂 𑀓𑁄 𑀓𑀭𑁄𑀢𑀺? 𑀓𑁄 𑀧𑀝𑀺𑀲𑀁𑀯𑁂𑀤𑁂𑀢𑀺, 𑀥𑀸𑀢𑀼𑀬𑁄 𑀏𑀯𑀸𑀢𑀺 𑀓𑀺𑀁 𑀦𑀼 𑀔𑁄 𑀇𑀤𑀁, 𑀓𑀣𑀁 𑀦𑀼 𑀔𑁄 𑀇𑀤𑀦𑁆𑀢𑀺 𑀲𑀁𑀲𑀬𑀁 𑀉𑀧𑁆𑀧𑀸𑀤𑁂𑀬𑁆𑀬? 𑀲𑀫𑁆𑀫𑁄𑀳𑀁 𑀆𑀧𑀚𑁆𑀚𑁂𑀬𑁆𑀬𑀸𑀢𑀺 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑁂 𑀅𑀦𑁆𑀥𑀓𑀸𑀭𑁂 𑀯𑀢𑁆𑀢𑀫𑀸𑀦𑀁 𑀯𑀺𑀬 𑀤𑁂𑀲𑀺𑀬𑀫𑀸𑀦𑁂 𑀅𑀢𑁆𑀣𑁂 𑀲𑀫𑁆𑀫𑁄𑀳𑀁 𑀆𑀧𑀚𑁆𑀚𑁂𑀬𑁆𑀬. 𑀢𑀣𑀸𑀪𑀽𑀢𑁄 𑀘 𑀤𑁂𑀲𑀦𑀸𑀬 𑀅𑀪𑀸𑀚𑀦𑀪𑀽𑀢𑀢𑁆𑀢𑀸 𑀤𑁂𑀲𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀁 𑀦 𑀲𑀓𑁆𑀓𑀼𑀡𑁂𑀬𑁆𑀬. 𑀏𑀯𑀫𑀸𑀳𑀸𑀢𑀺 𑀏𑀯𑀁 ‘‘𑀙𑀥𑀸𑀢𑀼𑀭𑁄’’𑀢𑀺 𑀆𑀳.

𑀬𑀁 𑀢𑁆𑀯𑀁 𑀧𑀼𑀭𑀺𑀲𑁄𑀢𑀺 𑀲𑀜𑁆𑀚𑀸𑀦𑀸𑀲𑀻𑀢𑀺 𑀬𑀁 𑀭𑀽𑀧𑀸𑀭𑀽𑀧𑀥𑀫𑁆𑀫𑀲𑀫𑀽𑀳𑀁 𑀧𑀩𑀦𑁆𑀥𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀁 𑀅𑀥𑀺𑀝𑁆𑀞𑀸𑀦𑀯𑀺𑀲𑁂𑀲𑀯𑀺𑀲𑀺𑀝𑁆𑀞𑀁 𑁋 ‘‘𑀧𑀼𑀭𑀺𑀲𑁄 𑀲𑀢𑁆𑀢𑁄 𑀇𑀢𑁆𑀣𑀻’’𑀢𑀺𑀆𑀤𑀺𑀦𑀸 𑀢𑁆𑀯𑀁 𑀲𑀜𑁆𑀚𑀸𑀦𑀸𑀲𑀺, 𑀲𑁄 𑀙𑀥𑀸𑀢𑀼𑀭𑁄. 𑀲𑀦𑁆𑀢𑁂𑀲𑀼𑀧𑀺 𑀙𑀥𑀸𑀢𑀼𑀯𑀺𑀦𑀺𑀫𑀼𑀢𑁆𑀢𑁂𑀲𑀼 𑀥𑀸𑀢𑁆𑀯𑀦𑁆𑀢𑀭𑁂𑀲𑀼 𑀲𑀼𑀔𑀸𑀯𑀕𑁆𑀕𑀳𑀡𑀢𑁆𑀣𑀁 𑀢𑀣𑀸 𑀯𑀼𑀢𑁆𑀢𑀁 𑀢𑀕𑁆𑀕𑀳𑀡𑁂𑀦𑁂𑀯 𑀘 𑀢𑁂𑀲𑀁 𑀕𑀳𑁂𑀢𑀩𑁆𑀩𑀢𑁄, 𑀲𑁆𑀯𑀸𑀬𑀫𑀢𑁆𑀣𑁄 𑀳𑁂𑀝𑁆𑀞𑀸 𑀤𑀲𑁆𑀲𑀺𑀢𑁄 𑀏𑀯. 𑀲𑁂𑀲𑀧𑀤𑁂𑀲𑀽𑀢𑀺 ‘‘𑀙𑀨𑀲𑁆𑀲𑀸𑀬𑀢𑀦𑁄’’𑀢𑀺𑀆𑀤𑀺𑀧𑀤𑁂𑀲𑀼𑀧𑀺. 𑀘𑀢𑁆𑀢𑀸𑀭𑀺 𑀅𑀥𑀺𑀝𑁆𑀞𑀸𑀦𑀸𑀦𑀺 𑀘𑀢𑀲𑁆𑀲𑁄 𑀧𑀢𑀺𑀝𑁆𑀞𑀸 𑀏𑀢𑀲𑁆𑀲𑀸𑀢𑀺 𑀘𑀢𑀼𑀭𑀸𑀥𑀺𑀝𑁆𑀞𑀸𑀦𑁄, 𑀅𑀥𑀺𑀢𑀺𑀝𑁆𑀞𑀢𑀺 𑀧𑀢𑀺𑀝𑁆𑀞𑀳𑀢𑀺 𑀏𑀢𑁂𑀦𑀸𑀢𑀺 𑀅𑀥𑀺𑀝𑁆𑀞𑀸𑀦𑀁, 𑀬𑁂𑀲𑀼 𑀧𑀢𑀺𑀝𑁆𑀞𑀸𑀬 𑀉𑀢𑁆𑀢𑀫𑀢𑁆𑀣𑀁 𑀅𑀭𑀳𑀢𑁆𑀢𑀁 𑀅𑀥𑀺𑀕𑀘𑁆𑀙𑀢𑀺, 𑀢𑁂𑀲𑀁 𑀧𑀜𑁆𑀜𑀸𑀤𑀻𑀦𑀁 𑀏𑀢𑀁 𑀅𑀥𑀺𑀯𑀘𑀦𑀁. 𑀢𑁂𑀦𑀸𑀳 ‘‘𑀲𑁆𑀯𑀸𑀬𑀁 𑀪𑀺𑀓𑁆𑀔𑀽’’𑀢𑀺𑀆𑀤𑀺. 𑀏𑀢𑁆𑀢𑁄𑀢𑀺 𑀯𑀝𑁆𑀝𑀢𑁄. 𑀯𑀺𑀯𑀝𑁆𑀝𑀺𑀢𑁆𑀯𑀸𑀢𑀺 𑀯𑀺𑀦𑀺𑀯𑀝𑁆𑀝𑀺𑀢𑁆𑀯𑀸 𑀅𑀧𑀲𑀓𑁆𑀓𑀺𑀢𑁆𑀯𑀸. 𑀏𑀢𑁆𑀢𑁄𑀢𑀺 𑀯𑀸 𑀏𑀢𑁂𑀳𑀺 𑀙𑀥𑀸𑀢𑀼𑀆𑀤𑀻𑀳𑀺. 𑀏𑀢𑁆𑀣 𑀳𑀺 𑀦𑀺𑀯𑀺𑀝𑁆𑀞𑀲𑁆𑀲 𑀆𑀬𑀢𑁆𑀢𑀲𑁆𑀲 𑀉𑀢𑁆𑀢𑀫𑀸𑀬 𑀲𑀺𑀤𑁆𑀥𑀺𑀬𑀸 𑀅𑀲𑀫𑁆𑀪𑀯𑁄𑀢𑀺. 𑀧𑀢𑀺𑀝𑁆𑀞𑀺𑀢𑀦𑁆𑀢𑀺 𑀅𑀭𑀺𑀬𑀫𑀕𑁆𑀕𑀸𑀥𑀺𑀕𑀫𑀯𑀲𑁂𑀦 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀁. 𑀏𑀯𑀜𑁆𑀳𑀺 𑀲𑀩𑁆𑀩𑀲𑁄 𑀧𑀝𑀺𑀧𑀓𑁆𑀔𑀲𑀫𑀼𑀘𑁆𑀙𑀺𑀦𑁆𑀤𑀦𑁂𑀦 𑀢𑀢𑁆𑀣 𑀧𑀢𑀺𑀝𑁆𑀞𑀺𑀢𑁄 𑀳𑁄𑀢𑀺. 𑀫𑀜𑁆𑀜𑀲𑁆𑀲𑀯𑀸 𑀦𑀧𑁆𑀧𑀯𑀢𑁆𑀢𑀦𑁆𑀢𑀻𑀢𑀺 𑀙𑀳𑀺𑀧𑀺 𑀤𑁆𑀯𑀸𑀭𑁂𑀳𑀺 𑀧𑀯𑀢𑁆𑀢𑀫𑀸𑀦𑀲𑁄𑀢𑀸𑀬 𑀫𑀕𑁆𑀕𑁂𑀦 𑀯𑀺𑀲𑁄𑀲𑀺𑀢𑀸𑀬 𑀲𑀩𑁆𑀩𑀲𑁄 𑀯𑀺𑀕𑀢𑀸𑀬 𑀲𑀩𑁆𑀩𑀲𑁄 𑀯𑀺𑀘𑁆𑀙𑁂𑀤𑀧𑁆𑀧𑀢𑁆𑀢𑀺𑀬𑀸 𑀦 𑀲𑀦𑁆𑀤𑀦𑁆𑀢𑀺. 𑀢𑁂𑀦𑀸𑀳 ‘‘𑀦𑀧𑁆𑀧𑀯𑀢𑁆𑀢𑀦𑁆𑀢𑀻’’𑀢𑀺. 𑀬𑀲𑁆𑀫𑀸 𑀫𑀸𑀦𑁂 𑀲𑀩𑁆𑀩𑀲𑁄 𑀲𑀫𑀼𑀘𑁆𑀙𑀺𑀦𑁆𑀦𑁂 𑀅𑀲𑀫𑀼𑀘𑁆𑀙𑀺𑀦𑁆𑀦𑁄 𑀅𑀦𑀼𑀧𑀲𑀦𑁆𑀢𑁄 𑀓𑀺𑀮𑁂𑀲𑁄 𑀦𑀸𑀫 𑀦𑀢𑁆𑀣𑀺, 𑀢𑀲𑁆𑀫𑀸 𑀆𑀳 𑁋 ‘‘𑀫𑀼𑀦𑀺 𑀲𑀦𑁆𑀢𑁄𑀢𑀺 𑀯𑀼𑀘𑁆𑀘𑀢𑀻’’𑀢𑀺 𑀭𑀸𑀕𑀕𑁆𑀕𑀺𑀆𑀤𑀻𑀦𑀁 𑀦𑀺𑀩𑁆𑀩𑀸𑀦𑁂𑀦 𑀦𑀺𑀩𑁆𑀩𑀼𑀢𑁄.

𑀧𑀜𑁆𑀜𑀁 𑀦𑀧𑁆𑀧𑀫𑀚𑁆𑀚𑁂𑀬𑁆𑀬𑀸𑀢𑀺, ‘‘𑀤𑀺𑀯𑀲𑀁 𑀘𑀗𑁆𑀓𑀫𑁂𑀦 𑀦𑀺𑀲𑀚𑁆𑀚𑀸𑀬 𑀆𑀯𑀭𑀡𑀻𑀬𑁂𑀳𑀺 𑀥𑀫𑁆𑀫𑁂𑀳𑀺 𑀘𑀺𑀢𑁆𑀢𑀁 𑀧𑀭𑀺𑀲𑁄𑀥𑁂𑀢𑀻’’𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀸𑀬 (𑀫. 𑀦𑀺. 𑁧.𑁪𑁨𑁩; 𑁨.𑁨𑁪; 𑁩.𑁭𑁫; 𑀲𑀁. 𑀦𑀺. 𑁪.𑁧𑁨𑁦; 𑀅. 𑀦𑀺. 𑁩.𑁧𑁫; 𑀯𑀺𑀪. 𑁫𑁧𑁯; 𑀫𑀳𑀸𑀦𑀺. 𑁧𑁬𑁧) 𑀅𑀧𑁆𑀧𑀫𑀸𑀤𑀧𑁆𑀧𑀝𑀺𑀧𑀢𑁆𑀢𑀺𑀬𑀸 𑀲𑀫𑀸𑀥𑀺𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀁 𑀦𑀧𑁆𑀧𑀫𑀚𑁆𑀚𑁂𑀬𑁆𑀬. 𑀏𑀢𑁂𑀦 𑀧𑀼𑀩𑁆𑀩𑀪𑀸𑀕𑀺𑀬𑀁 𑀲𑀫𑀣𑀯𑀺𑀧𑀲𑁆𑀲𑀦𑀸𑀪𑀸𑀯𑀦𑀫𑀸𑀳. 𑀲𑀘𑁆𑀘𑀫𑀦𑀼𑀭𑀓𑁆𑀔𑁂𑀬𑁆𑀬𑀸𑀢𑀺 𑀲𑀘𑁆𑀘𑀸𑀦𑀼𑀭𑀓𑁆𑀔𑀦𑀸𑀧𑀤𑁂𑀲𑁂𑀦 𑀲𑀻𑀮𑀯𑀺𑀲𑁄𑀥𑀦𑀫𑀸𑀳; 𑀲𑀘𑁆𑀘𑁂 𑀞𑀺𑀢𑁄 𑀲𑀫𑀸𑀤𑀺𑀦𑁆𑀦𑀲𑀻𑀮𑀁 𑀅𑀯𑀺𑀓𑁄𑀧𑁂𑀢𑁆𑀯𑀸 𑀧𑀭𑀺𑀧𑀽𑀭𑁂𑀦𑁆𑀢𑁄 𑀲𑀫𑀸𑀥𑀺𑀲𑀁𑀯𑀢𑁆𑀢𑀦𑀺𑀬𑀢𑀁 𑀓𑀭𑁄𑀢𑀺. 𑀢𑁂𑀦𑀸𑀳 ‘‘𑀯𑀘𑀻𑀲𑀘𑁆𑀘𑀁 𑀭𑀓𑁆𑀔𑁂𑀬𑁆𑀬𑀸’’𑀢𑀺. 𑀓𑀺𑀮𑁂𑀲𑀧𑀭𑀺𑀘𑁆𑀘𑀸𑀕𑀁 𑀩𑁆𑀭𑀽𑀳𑁂𑀬𑁆𑀬𑀸𑀢𑀺 𑀢𑀤𑀗𑁆𑀕𑀸𑀤𑀺𑀯𑀲𑁂𑀦 𑀓𑀺𑀮𑁂𑀲𑀸𑀦𑀁 𑀧𑀭𑀺𑀘𑁆𑀘𑀚𑀦𑀯𑀺𑀥𑀺𑀁 𑀯𑀟𑁆𑀠𑁂𑀬𑁆𑀬. 𑀓𑀺𑀮𑁂𑀲𑀯𑀽𑀧𑀲𑀫𑀦𑀁 𑀲𑀺𑀓𑁆𑀔𑁂𑀬𑁆𑀬𑀸𑀢𑀺 𑀬𑀣𑀸 𑀢𑁂 𑀓𑀺𑀮𑁂𑀲𑀸 𑀢𑀤𑀗𑁆𑀕𑀸𑀤𑀺𑀯𑀲𑁂𑀦 𑀧𑀭𑀺𑀘𑁆𑀘𑀢𑁆𑀢𑀸 𑀬𑀣𑀸𑀲𑀫𑀼𑀤𑀸𑀘𑀸𑀭𑀧𑁆𑀧𑀯𑀢𑁆𑀢𑀺𑀬𑀸 𑀲𑀦𑁆𑀢𑀸𑀦𑁂 𑀧𑀭𑀺𑀴𑀸𑀳𑀁 𑀦 𑀚𑀦𑁂𑀦𑁆𑀢𑀺; 𑀏𑀯𑀁 𑀓𑀺𑀮𑁂𑀲𑀸𑀦𑀁 𑀯𑀽𑀧𑀲𑀫𑀦𑀯𑀺𑀥𑀺𑀁 𑀲𑀺𑀓𑁆𑀔𑁂𑀬𑁆𑀬 𑀧𑀜𑁆𑀜𑀸𑀥𑀺𑀝𑁆𑀞𑀸𑀦𑀸𑀤𑀻𑀦𑀦𑁆𑀢𑀺 𑀮𑁄𑀓𑀼𑀢𑁆𑀢𑀭𑀸𑀦𑀁 𑀧𑀜𑁆𑀜𑀸𑀥𑀺𑀝𑁆𑀞𑀸𑀦𑀸𑀤𑀻𑀦𑀁. 𑀅𑀥𑀺𑀕𑀫𑀢𑁆𑀣𑀸𑀬𑀸𑀢𑀺 𑀧𑀝𑀺𑀮𑀸𑀪𑀢𑁆𑀣𑀸𑀬.

𑁩𑁪𑁭. 𑀧𑀼𑀩𑁆𑀩𑁂 𑀯𑀼𑀢𑁆𑀢𑀸𑀦𑀦𑁆𑀢𑀺, ‘‘𑀘𑀢𑀼𑀭𑀸𑀥𑀺𑀝𑁆𑀞𑀸𑀦𑁄, 𑀬𑀢𑁆𑀣 𑀞𑀺𑀢𑀁 𑀫𑀜𑁆𑀜𑀲𑁆𑀲𑀯𑀸 𑀦𑀧𑁆𑀧𑀯𑀢𑁆𑀢𑀦𑁆𑀢𑀻’’𑀢𑀺 (𑀫. 𑀦𑀺. 𑁩.𑁩𑁪𑁩) 𑀏𑀯𑀁 𑀧𑀼𑀩𑁆𑀩𑁂 𑀯𑀼𑀢𑁆𑀢𑀸𑀦𑀁.

𑁩𑁪𑁮. 𑀯𑀢𑁆𑀢𑀩𑁆𑀩𑀁 𑀪𑀯𑁂𑀬𑁆𑀬𑀸𑀢𑀺 𑀦𑀺𑀤𑁆𑀤𑁂𑀲𑀯𑀲𑁂𑀦 𑀯𑀢𑁆𑀢𑀩𑁆𑀩𑀁 𑀪𑀯𑁂𑀬𑁆𑀬. 𑀆𑀤𑀻𑀳𑀻𑀢𑀺 𑀏𑀯𑀫𑀸𑀤𑀻𑀳𑀺. 𑀓𑀺𑀘𑁆𑀘𑀁 𑀦𑀢𑁆𑀣𑀺 𑀓𑀺𑀘𑁆𑀘𑀸𑀪𑀸𑀯𑀢𑁄. 𑀉𑀧𑁆𑀧𑀝𑀺𑀧𑀸𑀝𑀺𑀥𑀸𑀢𑀼𑀓𑀦𑁆𑀢𑀺 𑀅𑀬𑀣𑀸𑀦𑀼𑀧𑀼𑀩𑁆𑀩𑀺𑀓𑀁. 𑀬𑀣𑀸𑀥𑀫𑁆𑀫𑀯𑀲𑁂𑀦𑁂𑀯𑀸𑀢𑀺 𑀤𑁂𑀲𑁂𑀢𑀩𑁆𑀩𑀥𑀫𑁆𑀫𑀸𑀦𑀁 𑀬𑀣𑀸𑀲𑀪𑀸𑀯𑁂𑀦𑁂𑀯. 𑀲𑀧𑁆𑀧𑀸𑀬𑀁 𑀥𑀼𑀢𑀗𑁆𑀕𑀦𑁆𑀢𑀺 𑀅𑀢𑁆𑀢𑀦𑁄 𑀓𑀺𑀮𑁂𑀲𑀦𑀺𑀕𑁆𑀕𑀡𑁆𑀳𑀦𑀬𑁄𑀕𑁆𑀕𑀁 𑀥𑀼𑀢𑀗𑁆𑀕𑀁. 𑀘𑀺𑀢𑁆𑀢𑀭𑀼𑀘𑀺𑀢𑀦𑁆𑀢𑀺 𑀅𑀢𑁆𑀢𑀦𑁄 𑀘𑀺𑀢𑁆𑀢𑀧𑀓𑀢𑀺𑀬𑀸 𑀆𑀘𑀭𑀺𑀬𑁂𑀳𑀺 𑀯𑀺𑀭𑁄𑀘𑁂𑀢𑀩𑁆𑀩𑀁, 𑀘𑀭𑀺𑀬𑀸𑀦𑀼𑀓𑀽𑀮𑀦𑁆𑀢𑀺 𑀅𑀢𑁆𑀣𑁄. 𑀳𑀢𑁆𑀣𑀺𑀧𑀤𑁄𑀧𑀫𑀲𑀼𑀢𑁆𑀢𑀸𑀤𑀻𑀲𑀽𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀥𑀸𑀢𑀼𑀯𑀺𑀪𑀗𑁆𑀕𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺.

𑁩𑁫𑁪. 𑀅𑀬𑀫𑁆𑀧𑁂𑀢𑁆𑀣𑀸𑀢𑀺 𑀧𑀺-𑀲𑀤𑁆𑀤𑁄 𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄. 𑀢𑁂𑀦 ‘‘𑀅𑀣𑀸𑀧𑀭𑀁 𑀉𑀧𑁂𑀓𑁆𑀔𑀸𑀬𑁂𑀯 𑀅𑀯𑀲𑀺𑀲𑁆𑀲𑀢𑀻’’𑀢𑀺 𑀉𑀧𑀭𑀺𑀤𑁂𑀲𑀦𑀁 𑀲𑀫𑁆𑀧𑀺𑀡𑁆𑀟𑁂𑀢𑀺. 𑀲𑁄𑀧𑀺 𑀳𑀺 𑀧𑀸𑀝𑀺𑀬𑁂𑀓𑁆𑀓𑁄 𑀅𑀦𑀼𑀲𑀦𑁆𑀥𑀻𑀢𑀺. 𑀦𑀦𑀼 𑀘𑀸𑀬𑀁 𑀬𑀣𑀸𑀉𑀤𑁆𑀤𑀺𑀝𑁆𑀞𑀸𑀬 𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀦𑀺𑀤𑁆𑀤𑁂𑀲𑁄𑀧𑀺 𑀪𑀯𑀺𑀲𑁆𑀲𑀢𑀻𑀢𑀺 𑀬𑀣𑀸𑀦𑀼𑀲𑀦𑁆𑀥𑀺𑀦𑀬𑁄 𑀯𑀺𑀚𑁆𑀚𑀢𑀻𑀢𑀺? 𑀦, 𑀯𑀺𑀜𑁆𑀜𑀸𑀡𑀥𑀸𑀢𑀼𑀦𑀺𑀤𑁆𑀤𑁂𑀲𑀦𑀬𑁂𑀦 𑀤𑁂𑀲𑀦𑀸𑀬 𑀅𑀧𑁆𑀧𑀯𑀢𑁆𑀢𑀢𑁆𑀢𑀸 𑀢𑁂𑀦𑀸𑀳 ‘‘𑀳𑁂𑀝𑁆𑀞𑀢𑁄’’𑀢𑀺𑀆𑀤𑀺. 𑀬𑀁 𑀯𑀸 𑀧𑀦𑀸𑀢𑀺𑀆𑀤𑀺𑀦𑀸 𑀧𑀦 𑀤𑁂𑀲𑀦𑀸𑀬 𑀲𑀸𑀦𑀼𑀲𑀦𑁆𑀥𑀺𑀢𑀁 𑀯𑀺𑀪𑀸𑀯𑁂𑀢𑀺. 𑀦 𑀳𑀺 𑀩𑀼𑀤𑁆𑀥𑀸 𑀪𑀕𑀯𑀦𑁆𑀢𑁄 𑀅𑀦𑀦𑀼𑀲𑀦𑁆𑀥𑀺𑀓𑀁 𑀤𑁂𑀲𑀦𑀁 𑀤𑁂𑀲𑁂𑀦𑁆𑀢𑀺. 𑀆𑀕𑀫𑀦𑀻𑀬𑀯𑀺𑀧𑀲𑁆𑀲𑀦𑀸𑀯𑀲𑁂𑀦𑀸𑀢𑀺 𑀬𑀲𑁆𑀲𑀸 𑀧𑀼𑀩𑁆𑀩𑁂 𑀧𑀯𑀢𑁆𑀢𑀢𑁆𑀢𑀸 𑀆𑀕𑀫𑀦𑀻𑀬𑀝𑁆𑀞𑀸𑀦𑁂 𑀞𑀺𑀢𑀸 𑀯𑀺𑀧𑀲𑁆𑀲𑀦𑀸, 𑀢𑀲𑁆𑀲𑀸 𑀯𑀲𑁂𑀦. 𑀓𑀫𑁆𑀫𑀓𑀸𑀭𑀓𑀯𑀺𑀜𑁆𑀜𑀸𑀡𑀦𑁆𑀢𑀺 ‘‘𑀦𑁂𑀢𑀁 𑀫𑀫 𑀦𑁂𑀲𑁄𑀳𑀫𑀲𑁆𑀫𑀺, 𑀦 𑀫𑁂𑀲𑁄 𑀅𑀢𑁆𑀢𑀸’’𑀢𑀺 𑀏𑀯𑀁 𑀯𑀺𑀧𑀲𑁆𑀲𑀦𑀸𑀓𑀺𑀘𑁆𑀘𑀓𑀸𑀭𑀓𑀁 𑀯𑀺𑀧𑀲𑁆𑀲𑀦𑀸𑀲𑀳𑀺𑀢𑀁 𑀯𑀺𑀜𑁆𑀜𑀸𑀡𑀁. 𑀯𑀺𑀜𑁆𑀜𑀸𑀡𑀥𑀸𑀢𑀼𑀯𑀲𑁂𑀦𑀸𑀢𑀺 𑀬𑀣𑀸𑀉𑀤𑁆𑀤𑀺𑀝𑁆𑀞𑀸𑀬 𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀪𑀸𑀚𑀦𑀯𑀲𑁂𑀦. 𑀲𑀢𑁆𑀣𑀼 𑀓𑀣𑀦𑀢𑁆𑀣𑀸𑀬𑀸𑀢𑀺 𑀲𑀢𑁆𑀣𑀸𑀭𑀸 𑀉𑀤𑁆𑀤𑁂𑀲𑀫𑁂𑀯 𑀓𑀢𑁆𑀯𑀸 𑀞𑀧𑀺𑀢𑀢𑁆𑀢𑀸 𑀦𑀺𑀤𑁆𑀤𑁂𑀲𑀯𑀲𑁂𑀦 𑀓𑀣𑀦𑀢𑁆𑀣𑀸𑀬. 𑀅𑀓𑀣𑀺𑀢𑀪𑀸𑀯𑁄 𑀏𑀯 𑀳𑀺𑀲𑁆𑀲 𑀅𑀯𑀲𑀺𑀝𑁆𑀞𑀢𑀸 𑀓𑀣𑀦𑀢𑁆𑀣𑀸𑀬 𑀧𑀝𑀺𑀯𑀺𑀚𑁆𑀛𑀦𑀢𑁆𑀣𑀸𑀬 𑀘. 𑀧𑀝𑀺𑀧𑀓𑁆𑀔𑀯𑀺𑀕𑀫𑁂𑀦 𑀢𑀲𑁆𑀲 𑀘𑀺𑀢𑁆𑀢𑀲𑁆𑀲 𑀧𑀭𑀺𑀲𑀼𑀤𑁆𑀥𑀢𑀸𑀢𑀺 𑀆𑀳 ‘‘𑀦𑀺𑀭𑀼𑀧𑀓𑁆𑀓𑀺𑀮𑁂𑀲’’𑀦𑁆𑀢𑀺. 𑀉𑀧𑀓𑁆𑀓𑀺𑀮𑁂𑀲𑀸𑀦𑀁 𑀧𑀦 𑀧𑀳𑀻𑀦𑀪𑀸𑀯𑀢𑁄 𑀧𑀭𑀺𑀬𑁄𑀤𑀸𑀢𑀁. 𑀲𑀫𑀼𑀤𑀬𑀯𑀲𑁂𑀦 𑀉𑀤𑀬𑀤𑀲𑁆𑀲𑀦𑀢𑁆𑀣𑀜𑁆𑀘𑁂𑀯 𑀧𑀘𑁆𑀘𑀬𑀦𑀺𑀭𑁄𑀥𑀯𑀲𑁂𑀦 𑀅𑀢𑁆𑀣𑀗𑁆𑀕𑀫𑀤𑀲𑁆𑀲𑀦𑀢𑁆𑀣𑀜𑁆𑀘. 𑀓𑀸𑀭𑀡𑀪𑀸𑀯𑁂𑀦 𑀲𑀼𑀔𑀸𑀬 𑀯𑁂𑀤𑀦𑀸𑀬 𑀳𑀺𑀢𑀦𑁆𑀢𑀺 𑀲𑀼𑀔𑀯𑁂𑀤𑀦𑀺𑀬𑀁. 𑀢𑁂𑀦𑀸𑀳 ‘‘𑀲𑀼𑀔𑀯𑁂𑀤𑀦𑀸𑀬 𑀧𑀘𑁆𑀘𑀬𑀪𑀽𑀢’’𑀦𑁆𑀢𑀺.

𑁩𑁬𑁦. 𑀭𑀽𑀧𑀓𑀫𑁆𑀫𑀝𑁆𑀞𑀸𑀦𑀫𑁆𑀧𑀺 𑀘𑀢𑀼𑀥𑀸𑀢𑀼𑀯𑀯𑀢𑁆𑀣𑀸𑀦𑀯𑀲𑁂𑀦, 𑀅𑀭𑀽𑀧𑀓𑀫𑁆𑀫𑀝𑁆𑀞𑀸𑀦𑀫𑁆𑀧𑀺 𑀲𑀼𑀔𑀤𑀼𑀓𑁆𑀔𑀯𑁂𑀤𑀦𑀸𑀫𑀼𑀔𑁂𑀦 𑀧𑀕𑀼𑀡𑀁 𑀚𑀸𑀢𑀁.

𑀲𑀢𑁆𑀣𑀼 𑀓𑀣𑀦𑀢𑁆𑀣𑀁𑀬𑁂𑀯 𑀅𑀯𑀲𑀺𑀲𑁆𑀲𑀢𑀻𑀢𑀺, ‘‘𑀓𑀼𑀮𑀧𑀼𑀢𑁆𑀢𑀲𑁆𑀲 𑀧𑀝𑀺𑀯𑀺𑀚𑁆𑀛𑀦𑀢𑁆𑀣’’𑀦𑁆𑀢𑀺 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀦𑀺𑀲𑁂𑀥𑁂𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀲𑀫𑀢𑁆𑀣𑁂𑀢𑀼𑀁, ‘‘𑀇𑀫𑀲𑁆𑀫𑀺𑀁 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀓𑀼𑀮𑀧𑀼𑀢𑁆𑀢𑀲𑁆𑀲 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑁂𑀢𑀺 𑀓𑀼𑀮𑀧𑀼𑀢𑁆𑀢𑁂𑀦 𑀅𑀥𑀺𑀕𑀢𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑁂. 𑀢𑁂𑀦𑀸𑀳 𑁋 ‘‘𑀪𑀺𑀓𑁆𑀔𑀼 𑀧𑀕𑀼𑀡𑀁 𑀢𑀯 𑀇𑀤𑀁 𑀭𑀽𑀧𑀸𑀯𑀘𑀭𑀘𑀢𑀼𑀢𑁆𑀣𑀚𑁆𑀛𑀸𑀦’’𑀦𑁆𑀢𑀺. 𑀬𑀁 𑀓𑀺𑀜𑁆𑀘𑀺 𑀲𑀼𑀯𑀡𑁆𑀡𑀢𑀸𑀧𑀦𑀬𑁄𑀕𑁆𑀬𑀁 𑀅𑀗𑁆𑀕𑀸𑀭𑀪𑀸𑀚𑀦𑀁 𑀇𑀥 ‘‘𑀉𑀓𑁆𑀓𑀸’’𑀢𑀺 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀆𑀳 ‘‘𑀅𑀗𑁆𑀕𑀸𑀭𑀓𑀧𑀮𑁆𑀮’’𑀦𑁆𑀢𑀺. 𑀲𑀚𑁆𑀚𑁂𑀬𑁆𑀬𑀸𑀢𑀺 𑀬𑀣𑀸 𑀢𑀢𑁆𑀣 𑀧𑀓𑁆𑀔𑀺𑀢𑁆𑀢𑀲𑀼𑀯𑀡𑁆𑀡𑀜𑁆𑀘 𑀢𑀧𑁆𑀧𑀢𑀺, 𑀏𑀯𑀁 𑀧𑀝𑀺𑀬𑀸𑀤𑀺𑀬𑁂𑀬𑁆𑀬. 𑀦𑀻𑀳𑀝𑀤𑁄𑀲𑀦𑁆𑀢𑀺 𑀯𑀺𑀕𑀢𑀻𑀪𑀽𑀢𑀓𑀸𑀴𑀓𑀁. 𑀅𑀧𑀦𑀻𑀢𑀓𑀲𑀸𑀯𑀦𑁆𑀢𑀺 𑀅𑀧𑀕𑀢𑀲𑀼𑀔𑀼𑀫𑀓𑀸𑀴𑀓𑀁.

𑀅𑀭𑀺𑀬𑀫𑀕𑁆𑀕𑁂 𑀧𑀢𑀺𑀝𑁆𑀞𑀸𑀧𑁂𑀢𑀼𑀓𑀸𑀫𑁂𑀦 𑀦𑀸𑀫 𑀲𑀩𑁆𑀩𑀲𑁆𑀫𑀺𑀫𑁆𑀧𑀺 𑀮𑁄𑀓𑀺𑀬𑀥𑀫𑁆𑀫𑁂 𑀯𑀺𑀭𑀚𑁆𑀚𑀦𑀢𑁆𑀣𑀸𑀬 𑀥𑀫𑁆𑀫𑁄 𑀓𑀣𑁂𑀢𑀩𑁆𑀩𑁄𑀢𑀺 𑀅𑀥𑀺𑀧𑁆𑀧𑀸𑀬𑁂𑀦, ‘‘𑀓𑀲𑁆𑀫𑀸 𑀧𑀦𑀸’’𑀢𑀺𑀆𑀤𑀺𑀦𑀸 𑀘𑁄𑀤𑀦𑀸 𑀓𑀢𑀸. 𑀯𑀺𑀦𑁂𑀬𑁆𑀬𑀤𑀫𑀦𑀓𑀼𑀲𑀮𑁂𑀦 𑀪𑀕𑀯𑀢𑀸 𑀯𑁂𑀦𑁂𑀬𑁆𑀬𑀚𑁆𑀛𑀸𑀲𑀬𑀯𑀲𑁂𑀦 𑀢𑀸𑀯 𑀘𑀢𑀼𑀢𑁆𑀣𑀚𑁆𑀛𑀸𑀦𑀼𑀧𑁂𑀓𑁆𑀔𑀸𑀬 𑀯𑀡𑁆𑀡𑁄 𑀓𑀣𑀺𑀢𑁄𑀢𑀺 𑀢𑀲𑁆𑀲 𑀧𑀭𑀺𑀳𑀸𑀭𑀁 𑀯𑀤𑀦𑁆𑀢𑁄, ‘‘𑀓𑀼𑀮𑀧𑀼𑀢𑁆𑀢𑀲𑁆𑀲𑀸’’𑀢𑀺𑀆𑀤𑀺𑀫𑀸𑀳.

𑁩𑁬𑁧. 𑀢𑀤𑀦𑀼𑀥𑀫𑁆𑀫𑀦𑁆𑀢𑀺 𑀢𑀲𑁆𑀲 𑀅𑀭𑀽𑀧𑀸𑀯𑀘𑀭𑀲𑁆𑀲 𑀓𑀼𑀲𑀮𑀲𑁆𑀲 𑀅𑀦𑀼𑀭𑀽𑀧𑀥𑀫𑁆𑀫𑀁, 𑀬𑀸𑀬 𑀧𑀝𑀺𑀧𑀤𑀸𑀬 𑀢𑀲𑁆𑀲 𑀅𑀥𑀺𑀕𑀫𑁄 𑀳𑁄𑀢𑀺, 𑀢𑀲𑁆𑀲 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀦𑁆𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀭𑀽𑀧𑀸𑀯𑀘𑀭𑀚𑁆𑀛𑀸𑀦’’𑀦𑁆𑀢𑀺. 𑀢𑀕𑁆𑀕𑀳𑀡𑀸𑀢𑀺 𑀢𑀲𑁆𑀲 𑀕𑀳𑀡𑁂𑀦 𑀢𑀲𑁆𑀲𑀸 𑀧𑀝𑀺𑀧𑀢𑁆𑀢𑀺𑀬𑀸 𑀧𑀝𑀺𑀧𑀚𑁆𑀚𑀫𑀸𑀦𑁂𑀦. 𑀇𑀢𑁄 𑀉𑀢𑁆𑀢𑀭𑀺𑀦𑁆𑀢𑀺 ‘‘𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦’’𑀦𑁆𑀢𑀺𑀆𑀤𑀻𑀲𑀼.

𑁩𑁬𑁨. 𑀢𑀲𑁆𑀲𑁂𑀯𑀸𑀢𑀺 𑀅𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀲𑁆𑀲. 𑀏𑀢𑀁 𑀧𑀦 𑀲𑀯𑀺𑀧𑀸𑀓𑀁 𑀅𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀁 𑀲𑀫𑁂𑀘𑁆𑀘 𑀲𑀫𑁆𑀪𑀼𑀬𑁆𑀬 𑀧𑀘𑁆𑀘𑀬𑁂𑀳𑀺 𑀓𑀢𑀢𑁆𑀢𑀸 𑀲𑀗𑁆𑀔𑀢𑀁. 𑀧𑀓𑀧𑁆𑀧𑀺𑀢𑀦𑁆𑀢𑀺 𑀧𑀘𑁆𑀘𑀬𑀯𑀲𑁂𑀦 𑀲𑀯𑀺𑀳𑀺𑀢𑀁. 𑀆𑀬𑀽𑀳𑀺𑀢𑀦𑁆𑀢𑀺 𑀲𑀫𑁆𑀧𑀺𑀡𑁆𑀟𑀺𑀢𑀁. 𑀓𑀭𑁄𑀦𑁆𑀢𑁂𑀦 𑀓𑀭𑀻𑀬𑀢𑀻𑀢𑀺 𑀧𑀝𑀺𑀧𑀚𑁆𑀚𑀦𑀓𑁂𑀦 𑀧𑀝𑀺𑀧𑀚𑁆𑀚𑀻𑀬𑀢𑀺 𑀲𑀗𑁆𑀔𑀭𑀻𑀬𑀢𑀺. 𑀦𑀺𑀩𑁆𑀩𑀸𑀦𑀁 𑀯𑀺𑀬 𑀦 𑀦𑀺𑀘𑁆𑀘𑀁 𑀦 𑀲𑀲𑁆𑀲𑀢𑀁. 𑀅𑀣 𑀔𑁄 𑀔𑀡𑁂 𑀔𑀡𑁂 𑀪𑀺𑀚𑁆𑀚𑀦𑀲𑀪𑀸𑀯𑀢𑀸𑀬 𑀢𑀸𑀯𑀓𑀸𑀮𑀺𑀓𑀁. 𑀢𑀢𑁄 𑀏𑀯 𑀘𑀯𑀦𑀸𑀤𑀺𑀲𑀪𑀸𑀯𑀦𑁆𑀢𑀺 𑀲𑀩𑁆𑀩𑀫𑁂𑀢𑀁 𑀭𑀽𑀧𑀸𑀯𑀘𑀭𑀥𑀫𑁆𑀫𑁂𑀲𑀼 𑀆𑀤𑀻𑀦𑀯𑀯𑀺𑀪𑀸𑀯𑀦𑀁. 𑀤𑀼𑀓𑁆𑀔𑁂 𑀧𑀢𑀺𑀝𑁆𑀞𑀺𑀢𑀦𑁆𑀢𑀺 𑀲𑀗𑁆𑀔𑀸𑀭𑀤𑀼𑀓𑁆𑀔𑁂 𑀧𑀢𑀺𑀝𑁆𑀞𑀺𑀢𑀁. 𑀅𑀢𑀸𑀡𑀦𑁆𑀢𑀺 𑀘𑀯𑀦𑀲𑀪𑀸𑀯𑀸𑀤𑀺𑀢𑀸𑀬 𑀢𑀸𑀡𑀭𑀳𑀺𑀢𑀁. 𑀅𑀮𑁂𑀡𑀦𑁆𑀢𑀺 𑀢𑀢𑁄 𑀅𑀭𑀓𑁆𑀔𑀢𑁆𑀢𑀸 𑀮𑀻𑀬𑀦𑀝𑁆𑀞𑀸𑀦𑀭𑀳𑀺𑀢𑀁. 𑀅𑀲𑀭𑀡𑀦𑁆𑀢𑀺 𑀅𑀧𑁆𑀧𑀝𑀺𑀲𑀭𑀡𑀁. 𑀅𑀲𑀭𑀡𑀻𑀪𑀽𑀢𑀦𑁆𑀢𑀺 𑀲𑀩𑁆𑀩𑀓𑀸𑀮𑀫𑁆𑀧𑀺 𑀅𑀧𑁆𑀧𑀝𑀺𑀲𑀭𑀡𑀁.

𑀲𑀫𑀢𑁆𑀢𑀧𑀢𑁆𑀢𑀯𑀺𑀲𑁂 𑀔𑀦𑁆𑀥𑀸𑀤𑀻𑀲𑀼 𑀕𑀳𑀺𑀢𑁂 𑀤𑀼𑀢𑁆𑀢𑀺𑀓𑀺𑀘𑁆𑀙𑀸 𑀲𑀺𑀬𑀸𑀢𑀺, ‘‘𑀔𑀦𑁆𑀥𑀁 𑀯𑀸 𑀲𑀻𑀲𑀁 𑀯𑀸 𑀕𑀳𑁂𑀢𑀼𑀁 𑀅𑀤𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁. 𑀏𑀯𑀫𑁂𑀯𑀸𑀢𑀺 𑀏𑀢𑁆𑀣𑀸𑀬𑀁 𑀉𑀧𑀫𑀸𑀲𑀁𑀲𑀦𑁆𑀤𑀦𑀸 𑁋 𑀙𑁂𑀓𑁄 𑀪𑀺𑀲𑀓𑁆𑀓𑁄 𑀯𑀺𑀬 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄. 𑀯𑀺𑀲𑀯𑀺𑀓𑀸𑀭𑁄 𑀯𑀺𑀬 𑀓𑀺𑀮𑁂𑀲𑀤𑀼𑀓𑁆𑀔𑀸𑀦𑀼𑀩𑀦𑁆𑀥𑁄, 𑀪𑀺𑀲𑀓𑁆𑀓𑀲𑁆𑀲 𑀯𑀺𑀲𑀁 𑀞𑀸𑀦𑀢𑁄 𑀘𑀸𑀯𑁂𑀢𑁆𑀯𑀸 𑀉𑀧𑀭𑀺 𑀆𑀭𑁄𑀧𑀦𑀁 𑀯𑀺𑀬 𑀪𑀕𑀯𑀢𑁄 𑀤𑁂𑀲𑀦𑀸𑀦𑀼𑀪𑀸𑀯𑁂𑀦 𑀓𑀼𑀮𑀧𑀼𑀢𑁆𑀢𑀲𑁆𑀲 𑀓𑀸𑀫𑀪𑀯𑁂 𑀦𑀺𑀓𑀦𑁆𑀢𑀺𑀁 𑀧𑀭𑀺𑀬𑀸𑀤𑀸𑀬 𑀅𑀭𑀽𑀧𑀚𑁆𑀛𑀸𑀦𑁂 𑀪𑀯𑀦𑀁. 𑀪𑀺𑀲𑀓𑁆𑀓𑀲𑁆𑀲 𑀯𑀺𑀲𑀁 𑀑𑀢𑀸𑀭𑁂𑀢𑁆𑀯𑀸 𑀧𑀣𑀯𑀺𑀬𑀁 𑀧𑀸𑀢𑀦𑀁 𑀯𑀺𑀬 𑀓𑀼𑀮𑀧𑀼𑀢𑁆𑀢𑀲𑁆𑀲 𑀑𑀭𑀫𑁆𑀪𑀸𑀕𑀺𑀬𑀓𑀺𑀮𑁂𑀲𑀤𑀼𑀓𑁆𑀔𑀸𑀧𑀦𑀬𑀦𑀁.

𑀅𑀲𑀫𑁆𑀧𑀢𑁆𑀢𑀲𑁆𑀲𑀸𑀢𑀺 𑀅𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀁 𑀅𑀦𑀥𑀺𑀕𑀢𑀲𑁆𑀲. 𑀅𑀧𑁆𑀧𑀝𑀺𑀮𑀤𑁆𑀥𑀲𑁆𑀲𑁂𑀯𑀸𑀢𑀺 𑀢𑀲𑁆𑀲 𑀯𑁂𑀯𑀘𑀦𑀁. 𑀲𑀩𑁆𑀩𑀫𑁂𑀢𑀦𑁆𑀢𑀺 ‘‘𑀅𑀦𑀺𑀘𑁆𑀘𑀁 𑀅𑀥𑀼𑀯’’𑀦𑁆𑀢𑀺𑀆𑀤𑀺𑀦𑀸 𑀯𑀺𑀢𑁆𑀣𑀸𑀭𑀢𑁄 𑀯𑀼𑀢𑁆𑀢𑀁 𑀲𑀩𑁆𑀩𑀫𑁂𑀢𑀁 𑀆𑀤𑀻𑀦𑀯𑀁. 𑀏𑀓𑀧𑀤𑁂𑀦𑁂𑀯 ‘‘𑀲𑀗𑁆𑀔𑀢𑀫𑁂𑀢’’𑀦𑁆𑀢𑀺 𑀓𑀣𑁂𑀲𑀺 𑀲𑀗𑁆𑀔𑀢𑀧𑀤𑁂𑀦𑁂𑀯 𑀢𑀲𑁆𑀲 𑀅𑀢𑁆𑀣𑀲𑁆𑀲 𑀅𑀦𑀯𑀲𑁂𑀲𑀢𑁄 𑀧𑀭𑀺𑀬𑀸𑀤𑀺𑀦𑁆𑀦𑀢𑁆𑀢𑀸.

𑀦𑀸𑀬𑀽𑀳𑀢𑀻𑀢𑀺 𑀪𑀯𑀓𑀸𑀭𑀡𑀘𑁂𑀢𑀦𑀸𑀯𑀲𑁂𑀦 𑀩𑁆𑀬𑀸𑀧𑀸𑀭𑀁 𑀦 𑀲𑀫𑀽𑀳𑁂𑀢𑀺 𑀦 𑀲𑀫𑁆𑀧𑀺𑀡𑁆𑀟𑁂𑀢𑀺. 𑀢𑁂𑀦𑀸𑀳 𑁋 ‘‘𑀦 𑀭𑀸𑀲𑀺𑀁 𑀓𑀭𑁄𑀢𑀻’’𑀢𑀺. 𑀅𑀪𑀺𑀲𑀗𑁆𑀔𑀭𑀡𑀁 𑀦𑀸𑀫 𑀘𑁂𑀢𑀦𑀸𑀩𑁆𑀬𑀸𑀧𑀸𑀭𑁄𑀢𑀺 𑀆𑀳 𑁋 ‘‘𑀦 𑀅𑀪𑀺𑀲𑀜𑁆𑀘𑁂𑀢𑀬𑀢𑀻’’𑀢𑀺. 𑀢𑀁 𑀧𑀦 𑀨𑀮𑀼𑀧𑁆𑀧𑀸𑀤𑀦𑀲𑀫𑀢𑁆𑀣𑀢𑀸𑀬 𑀨𑀮𑁂𑀦 𑀓𑀧𑁆𑀧𑀦𑀦𑁆𑀢𑀺 𑀆𑀳 ‘‘𑀦 𑀓𑀧𑁆𑀧𑁂𑀢𑀻’’𑀢𑀺. 𑀲𑀘𑁂 𑀅𑀪𑀺𑀲𑀗𑁆𑀔𑀸𑀭𑀘𑁂𑀢𑀦𑀸 𑀉𑀴𑀸𑀭𑀸, 𑀨𑀮𑀫𑀳𑀢𑁆𑀢𑀲𑀗𑁆𑀔𑀸𑀢𑀸𑀬 𑀯𑀼𑀟𑁆𑀠𑀺𑀬𑀸 𑀳𑁄𑀢𑀺, 𑀅𑀦𑀼𑀴𑀸𑀭𑀸 𑀘 𑀅𑀯𑀼𑀟𑁆𑀠𑀺𑀬𑀸𑀢𑀺 𑀆𑀳 𑁋 ‘‘𑀯𑀼𑀟𑁆𑀠𑀺𑀬𑀸 𑀯𑀸 𑀧𑀭𑀺𑀳𑀸𑀦𑀺𑀬𑀸 𑀯𑀸’’𑀢𑀺. 𑀩𑀼𑀤𑁆𑀥𑀯𑀺𑀲𑀬𑁂 𑀞𑀢𑁆𑀯𑀸𑀢𑀺 𑀪𑀕𑀯𑀸 𑀅𑀢𑁆𑀢𑀦𑁄 𑀩𑀼𑀤𑁆𑀥𑀲𑀼𑀩𑀼𑀤𑁆𑀥𑀢𑀸𑀬 𑀲𑀻𑀳𑀲𑀫𑀸𑀦𑀯𑀼𑀢𑁆𑀢𑀺𑀢𑀸𑀬 𑀘 𑀤𑁂𑀲𑀦𑀁 𑀉𑀓𑁆𑀓𑀁𑀲𑀢𑁄 𑀲𑀸𑀯𑀓𑁂𑀳𑀺 𑀧𑀢𑁆𑀢𑀩𑁆𑀩𑀁 𑀯𑀺𑀲𑁂𑀲𑀁 𑀅𑀦𑀯𑀲𑁂𑀲𑁂𑀦𑁆𑀢𑁄 𑀢𑀣𑀸 𑀯𑀤𑀢𑀺, 𑀦 𑀲𑀸𑀯𑀓𑀯𑀺𑀲𑀬𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀅𑀢𑁆𑀢𑀦𑁄 𑀩𑀼𑀤𑁆𑀥𑀯𑀺𑀲𑀬𑀫𑁂𑀯 𑀤𑁂𑀲𑁂𑀦𑁆𑀢𑁄. 𑀢𑁂𑀦𑀸𑀳 𑁋 ‘‘𑀅𑀭𑀳𑀢𑁆𑀢𑀦𑀺𑀓𑀽𑀝𑀁 𑀕𑀡𑁆𑀳𑀻’’𑀢𑀺. 𑀬𑀤𑀺 𑀓𑀼𑀮𑀧𑀼𑀢𑁆𑀢𑁄 𑀅𑀢𑁆𑀢𑀦𑁄…𑀧𑁂… 𑀧𑀝𑀺𑀯𑀺𑀚𑁆𑀛𑀺, 𑀅𑀣 𑀓𑀲𑁆𑀫𑀸 𑀪𑀕𑀯𑀸 𑀤𑁂𑀲𑀦𑀸𑀬 𑀅𑀭𑀳𑀢𑁆𑀢𑀦𑀺𑀓𑀽𑀝𑀁 𑀕𑀡𑁆𑀳𑀻𑀢𑀺 𑀆𑀳 ‘‘𑀬𑀣𑀸 𑀦𑀸𑀫𑀸’’𑀢𑀺𑀆𑀤𑀺.

𑀇𑀢𑁄 𑀧𑀼𑀩𑁆𑀩𑁂𑀢𑀺 𑀇𑀢𑁄 𑀅𑀦𑀸𑀕𑀸𑀫𑀺𑀨𑀮𑀸𑀥𑀺𑀕𑀫𑀢𑁄 𑀉𑀢𑁆𑀢𑀭𑀺 𑀉𑀧𑀭𑀺. 𑀅𑀲𑁆𑀲𑀸𑀢𑀺 𑀓𑀼𑀮𑀧𑀼𑀢𑁆𑀢𑀲𑁆𑀲. 𑀓𑀣𑁂𑀦𑁆𑀢𑀲𑁆𑀲 𑀪𑀕𑀯𑀢𑁄 𑀥𑀫𑁆𑀫𑁂 𑀦𑁂𑀯 𑀓𑀗𑁆𑀔𑀸 𑀦 𑀯𑀺𑀫𑀢𑀺 𑀧𑀞𑀫𑀫𑀕𑁆𑀕𑁂𑀦𑁂𑀯 𑀓𑀗𑁆𑀔𑀸𑀬 𑀲𑀫𑀼𑀘𑁆𑀙𑀺𑀦𑁆𑀦𑀢𑁆𑀢𑀸. 𑀏𑀓𑀘𑁆𑀘𑁂𑀲𑀼 𑀞𑀸𑀦𑁂𑀲𑀽𑀢𑀺 𑀢𑀣𑀸 𑀯𑀺𑀦𑁂𑀬𑁆𑀬𑀞𑀸𑀦𑁂𑀲𑀼. 𑀢𑀣𑀸 𑀳𑀺 𑀅𑀬𑀫𑁆𑀧𑀺 𑀓𑀼𑀮𑀧𑀼𑀢𑁆𑀢𑁄 𑀅𑀦𑀸𑀕𑀸𑀫𑀺𑀨𑀮𑀁 𑀧𑀢𑁆𑀯𑀸 𑀪𑀕𑀯𑀦𑁆𑀢𑀁 𑀲𑀜𑁆𑀚𑀸𑀦𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀬𑀢𑁄 𑀅𑀦𑁂𑀦𑀸’’𑀢𑀺𑀆𑀤𑀺.

𑁩𑁬𑁩. 𑀅𑀦𑀚𑁆𑀛𑁄𑀲𑀺𑀢𑀸𑀢𑀺 𑀅𑀦𑀚𑁆𑀛𑁄𑀲𑀦𑀻𑀬𑀸𑀢𑀺 𑀅𑀬𑀫𑀢𑁆𑀣𑁄𑀢𑀺 𑀆𑀳 𑁋 ‘‘𑀕𑀺𑀮𑀺𑀢𑁆𑀯𑀸 𑀧𑀭𑀺𑀦𑀺𑀝𑁆𑀞𑀸𑀧𑁂𑀢𑁆𑀯𑀸 𑀕𑀳𑁂𑀢𑀼𑀁 𑀦 𑀬𑀼𑀢𑁆𑀢𑀸’’𑀢𑀺.

𑁩𑁬𑁪. 𑀭𑀸𑀕𑁄𑀯 𑀅𑀦𑀼𑀲𑀬𑁄 𑀭𑀸𑀕𑀸𑀦𑀼𑀲𑀬𑁄, 𑀲𑁄 𑀘 𑀧𑀘𑁆𑀘𑀬𑀲𑀫𑀯𑀸𑀬𑁂 𑀉𑀧𑁆𑀧𑀚𑁆𑀚𑀦𑀸𑀭𑀳𑁄𑀢𑀺 𑀯𑀢𑁆𑀢𑀩𑁆𑀩𑀢𑀁 𑀮𑀪𑀢𑀻𑀢𑀺 𑀯𑀼𑀢𑁆𑀢𑀁 𑁋 ‘‘𑀲𑀼𑀔𑀯𑁂𑀤𑀦𑀁 𑀆𑀭𑀩𑁆𑀪 𑀭𑀸𑀕𑀸𑀦𑀼𑀲𑀬𑁄 𑀉𑀧𑁆𑀧𑀚𑁆𑀚𑁂𑀬𑁆𑀬𑀸’’𑀢𑀺. 𑀦 𑀧𑀦 𑀢𑀲𑁆𑀲 𑀉𑀧𑁆𑀧𑀸𑀤𑀦𑀁 𑀅𑀢𑁆𑀣𑀺 𑀔𑀡𑀢𑁆𑀢𑀬𑀲𑀫𑀸𑀬𑁄𑀕𑀸𑀲𑀫𑁆𑀪𑀯𑀢𑁄. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀇𑀢𑀭𑀦𑁆𑀢𑀺 𑀅𑀤𑀼𑀓𑁆𑀔𑀫𑀲𑀼𑀔𑀯𑁂𑀤𑀦𑀁. 𑀯𑀺𑀲𑀁𑀬𑀼𑀢𑁆𑀢𑁄𑀢𑀺 𑀓𑁂𑀦𑀘𑀺 𑀲𑀜𑁆𑀜𑁄𑀚𑀦𑁂𑀦 𑀅𑀲𑀁𑀬𑀼𑀢𑁆𑀢𑀢𑀸𑀬 𑀏𑀯 𑀦𑀺𑀬𑀢𑀯𑀺𑀧𑁆𑀧𑀬𑀼𑀢𑁆𑀢𑁄. 𑀓𑀸𑀬𑀲𑁆𑀲 𑀓𑁄𑀝𑀺 𑀧𑀭𑀫𑁄 𑀅𑀦𑁆𑀢𑁄 𑀏𑀢𑀲𑁆𑀲𑀸𑀢𑀺 𑀓𑀸𑀬𑀓𑁄𑀝𑀺𑀓𑀁. 𑀤𑀼𑀢𑀺𑀬𑀧𑀤𑁂𑀢𑀺 ‘‘𑀚𑀻𑀯𑀺𑀢𑀧𑀭𑀺𑀬𑀦𑁆𑀢𑀺𑀓’’𑀦𑁆𑀢𑀺 𑀇𑀫𑀲𑁆𑀫𑀺𑀁 𑀧𑀤𑁂. 𑀯𑀺𑀲𑁂𑀯𑀦𑀲𑁆𑀲𑀸𑀢𑀺 𑀉𑀧𑀸𑀤𑀸𑀦𑀲𑁆𑀲. 𑀲𑀻𑀢𑀻𑀪𑀯𑀺𑀲𑁆𑀲𑀦𑁆𑀢𑀻𑀢𑀺 𑀧𑀤𑀲𑁆𑀲 ‘‘𑀦𑀺𑀭𑀼𑀚𑁆𑀛𑀺𑀲𑁆𑀲𑀦𑁆𑀢𑀻’’𑀢𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄, 𑀓𑀣𑀁 𑀧𑀦 𑀯𑁂𑀤𑀬𑀺𑀢𑀸𑀦𑀁 𑀤𑁆𑀯𑀸𑀤𑀲𑀲𑀼 𑀆𑀬𑀢𑀦𑁂𑀲𑀼 𑀦𑀺𑀭𑀼𑀚𑁆𑀛𑀦𑀁 𑀲𑀻𑀢𑀺𑀪𑀸𑀯𑀧𑁆𑀧𑀢𑁆𑀢𑀻𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 𑁋 ‘‘𑀓𑀺𑀮𑁂𑀲𑀸 𑀳𑀻’’𑀢𑀺𑀆𑀤𑀺. 𑀲𑀫𑀼𑀤𑀬𑀧𑀜𑁆𑀳𑁂𑀦𑀸𑀢𑀺 𑀫𑀳𑀸𑀲𑀢𑀺𑀧𑀝𑁆𑀞𑀸𑀦𑁂 (𑀤𑀻. 𑀦𑀺. 𑁨.𑁪𑁦𑁦; 𑀫. 𑀦𑀺. 𑁧.𑁧𑁩𑁩) 𑀲𑀫𑀼𑀤𑀬𑀲𑀘𑁆𑀘𑀦𑀺𑀭𑁄𑀥𑀧𑀜𑁆𑀳𑁂𑀦. 𑀦𑀦𑀼 𑀲𑀩𑁆𑀩𑀲𑁄 𑀓𑀺𑀮𑁂𑀲𑀧𑀭𑀺𑀴𑀸𑀳𑀯𑀺𑀕𑀫𑁂 𑀲𑀻𑀢𑀺𑀪𑀸𑀯𑁄 𑀦𑀸𑀫 𑀯𑁂𑀤𑀦𑀸𑀦𑀺𑀭𑁄𑀥𑀫𑀢𑁆𑀢𑁂𑀦 𑀅𑀥𑀺𑀧𑁆𑀧𑁂𑀢𑁄; 𑀢𑁂𑀦 𑀇𑀥 𑀯𑁂𑀤𑀬𑀺𑀢𑀸𑀦𑀺 𑀯𑀼𑀢𑁆𑀢𑀸𑀦𑀺, 𑀦 𑀓𑀺𑀮𑁂𑀲𑀸𑀢𑀺 𑀯𑁂𑀤𑀬𑀺𑀢𑀸𑀦𑀁 𑀅𑀘𑁆𑀘𑀦𑁆𑀢𑀦𑀺𑀭𑁄𑀥𑀲𑀗𑁆𑀔𑀸𑀢𑁄 𑀲𑀻𑀢𑀺𑀪𑀸𑀯𑁄𑀧𑀺 𑀓𑀺𑀮𑁂𑀲𑀲𑀫𑀼𑀘𑁆𑀙𑁂𑀤𑁂𑀦𑁂𑀯𑀸𑀢𑀺 𑀆𑀳 ‘‘𑀯𑁂𑀤𑀬𑀺𑀢𑀸𑀦𑀺𑀧𑀻’’𑀢𑀺𑀆𑀤𑀺.

𑁩𑁬𑁫. 𑀇𑀤𑀁 𑀑𑀧𑀫𑁆𑀫𑀲𑀁𑀲𑀦𑁆𑀤𑀦𑀦𑁆𑀢𑀺 𑀏𑀢𑁆𑀣 𑀲𑀜𑁆𑀜𑁄𑀚𑀦𑀸 𑀤𑀻𑀧𑀲𑀺𑀔𑀸 𑀯𑀺𑀬, 𑀅𑀥𑀺𑀝𑁆𑀞𑀸𑀦𑀓𑀧𑀮𑁆𑀮𑀺𑀓𑀸 𑀯𑀺𑀬 𑀯𑁂𑀤𑀦𑀸𑀬 𑀦𑀺𑀲𑁆𑀲𑀬𑀪𑀽𑀢𑀸 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸, 𑀢𑁂𑀮𑀁 𑀯𑀺𑀬 𑀓𑀺𑀮𑁂𑀲𑀸, 𑀯𑀝𑁆𑀝𑀺 𑀯𑀺𑀬 𑀓𑀫𑁆𑀫𑀯𑀝𑁆𑀝𑀁, 𑀉𑀧𑀳𑀭𑀡𑀓𑀧𑀼𑀭𑀺𑀲𑁄 𑀯𑀺𑀬 𑀯𑀝𑁆𑀝𑀕𑀸𑀫𑀻 𑀧𑀼𑀣𑀼𑀚𑁆𑀚𑀦𑁄, 𑀢𑀲𑁆𑀲 𑀲𑀻𑀲𑀘𑁆𑀙𑁂𑀤𑀓𑀧𑀼𑀭𑀺𑀲𑁄 𑀯𑀺𑀬 𑀅𑀭𑀳𑀢𑁆𑀢𑀫𑀕𑁆𑀕𑁄 𑀲𑀦𑁆𑀢𑀸𑀦𑀲𑁆𑀲 𑀲𑀫𑀼𑀘𑁆𑀙𑁂𑀤𑀓𑀭𑀡𑀢𑁄, 𑀅𑀦𑀸𑀳𑀸𑀭𑀸𑀬 𑀤𑀻𑀧𑀲𑀺𑀔𑀸𑀬 𑀦𑀺𑀩𑁆𑀩𑀸𑀬𑀦𑀁 𑀯𑀺𑀬 𑀓𑀫𑁆𑀫𑀓𑀺𑀮𑁂𑀲𑀸𑀦𑀁 𑀅𑀦𑀦𑁆𑀢𑀭𑀧𑀘𑁆𑀘𑀬𑀢𑁄 𑀅𑀦𑀸𑀳𑀸𑀭𑀸𑀬 𑀯𑁂𑀤𑀦𑀸𑀬 𑀅𑀦𑀼𑀧𑀸𑀤𑀺𑀲𑁂𑀲𑀯𑀲𑁂𑀦 𑀦𑀺𑀩𑁆𑀩𑀸𑀬𑀦𑀁.

𑀆𑀤𑀺𑀫𑁆𑀳𑀺 𑀲𑀫𑀸𑀥𑀺𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀳𑀻𑀢𑀺 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀸𑀪𑀽𑀢𑀸 𑀢𑀬𑀸 𑀧𑀕𑀼𑀡𑀲𑀫𑀸𑀥𑀺𑀢𑁄 𑀅𑀭𑀳𑀢𑁆𑀢𑀲𑁆𑀲 𑀧𑀤𑀝𑁆𑀞𑀸𑀦𑀪𑀽𑀢𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀢𑁄 𑀘. 𑀉𑀢𑁆𑀢𑀭𑀺𑀢𑀭𑀸𑀢𑀺 𑀯𑀺𑀲𑀺𑀝𑁆𑀞𑀢𑀭𑀸. 𑀏𑀯𑀁 𑀲𑀫𑀦𑁆𑀦𑀸𑀕𑀢𑁄𑀢𑀺 𑀏𑀢𑁆𑀣 𑀏𑀯𑀁-𑀲𑀤𑁆𑀤𑁄 𑀇𑀤𑀁𑀲𑀤𑁆𑀤𑀢𑁆𑀣𑀯𑀘𑀦𑁄𑀢𑀺 𑀆𑀳 𑁋 ‘‘𑀇𑀫𑀺𑀦𑀸 𑀉𑀢𑁆𑀢𑀫𑁂𑀦 𑀅𑀭𑀳𑀢𑁆𑀢𑀨𑀮𑀧𑀜𑁆𑀜𑀸𑀥𑀺𑀝𑁆𑀞𑀸𑀦𑁂𑀦𑀸’’𑀢𑀺. 𑀲𑀩𑁆𑀩𑀁 𑀯𑀝𑁆𑀝𑀤𑀼𑀓𑁆𑀔𑀁 𑀔𑁂𑀧𑁂𑀢𑀻𑀢𑀺 𑀲𑀩𑁆𑀩𑀤𑀼𑀓𑁆𑀔𑀓𑁆𑀔𑀬𑁄, 𑀅𑀕𑁆𑀕𑀫𑀕𑁆𑀕𑁄, 𑀢𑀁𑀧𑀭𑀺𑀬𑀸𑀧𑀦𑁆𑀦𑀢𑀸𑀬 𑀢𑀢𑁆𑀣 𑀜𑀸𑀡𑀦𑁆𑀢𑀺 𑀆𑀳 𑁋 ‘‘𑀲𑀩𑁆𑀩𑀤𑀼𑀓𑁆𑀔𑀓𑁆𑀔𑀬𑁂 𑀜𑀸𑀡𑀁 𑀦𑀸𑀫 𑀅𑀭𑀳𑀢𑁆𑀢𑀫𑀕𑁆𑀕𑁂 𑀜𑀸𑀡’’𑀦𑁆𑀢𑀺. 𑀅𑀭𑀳𑀢𑁆𑀢𑀨𑀮𑁂 𑀜𑀸𑀡𑀁 𑀅𑀥𑀺𑀧𑁆𑀧𑁂𑀢𑀁 𑀯𑀼𑀢𑁆𑀢𑀦𑀬𑁂𑀦 𑀲𑀩𑁆𑀩𑀤𑀼𑀓𑁆𑀔𑀓𑁆𑀔𑀬𑁂 𑀲𑀦𑁆𑀢𑁂 𑀢𑀦𑁆𑀦𑀺𑀫𑀺𑀢𑁆𑀢𑀁 𑀯𑀸 𑀉𑀧𑁆𑀧𑀦𑁆𑀦𑀜𑀸𑀡𑀦𑁆𑀢𑀺 𑀓𑀢𑁆𑀯𑀸. 𑀢𑀲𑁆𑀲𑀸𑀢𑀺, ‘‘𑀏𑀯𑀁 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀇𑀫𑀺𑀦𑀸 𑀧𑀭𑀫𑁂𑀦 𑀧𑀜𑁆𑀜𑀸𑀥𑀺𑀝𑁆𑀞𑀸𑀦𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀪𑀺𑀓𑁆𑀔𑀼𑀦𑁄.

𑁩𑁬𑁬. 𑀳𑀻𑀢𑀺 𑀬𑀲𑁆𑀫𑀸. 𑀯𑀺𑀫𑀼𑀢𑁆𑀢𑀻𑀢𑀺 𑀅𑀭𑀳𑀢𑁆𑀢𑀨𑀮𑀯𑀺𑀫𑀼𑀢𑁆𑀢𑀺, 𑀢𑀲𑁆𑀫𑀸 𑀲𑀩𑁆𑀩𑀤𑀼𑀓𑁆𑀔𑀓𑁆𑀔𑀬𑁂 𑀜𑀸𑀡𑀦𑁆𑀢𑀺 𑀅𑀭𑀳𑀢𑁆𑀢𑀨𑀮𑀜𑀸𑀡𑀁 𑀅𑀥𑀺𑀧𑁆𑀧𑁂𑀢𑀁. 𑀲𑀘𑁆𑀘𑀦𑁆𑀢𑀺 𑀧𑀭𑀫𑀢𑁆𑀣𑀲𑀘𑁆𑀘𑀁 𑀦𑀺𑀩𑁆𑀩𑀸𑀦𑀁, 𑀦 𑀫𑀕𑁆𑀕𑀲𑀘𑁆𑀘𑀁. 𑀓𑀸𑀫𑀁 𑀅𑀭𑀳𑀢𑁆𑀢𑀨𑀮𑀯𑀺𑀫𑀼𑀢𑁆𑀢𑀺 𑀧𑀝𑀺𑀧𑀓𑁆𑀔𑁂𑀳𑀺 𑀅𑀓𑁄𑀧𑀦𑀻𑀬𑀢𑀸𑀬 𑀅𑀓𑀼𑀧𑁆𑀧𑀸, ‘‘𑀲𑀘𑁆𑀘𑁂 𑀞𑀺𑀢𑀸’’𑀢𑀺 𑀧𑀦 𑀯𑀘𑀦𑀢𑁄, ‘‘𑀅𑀓𑀼𑀧𑁆𑀧𑀸𑀭𑀫𑁆𑀫𑀡𑀓𑀭𑀡𑁂𑀦 𑀅𑀓𑀼𑀧𑁆𑀧𑀸𑀢𑀺 𑀯𑀼𑀢𑁆𑀢𑀸’’𑀢𑀺 𑀆𑀳. 𑀯𑀺𑀢𑀣𑀦𑁆𑀢𑀺 𑀦𑀝𑁆𑀞𑀁, 𑀚𑀭𑀸𑀬 𑀫𑀭𑀡𑁂𑀦 𑀘 𑀯𑀺𑀧𑀭𑀺𑀡𑀸𑀫𑁂𑀢𑀩𑁆𑀩𑀢𑀸𑀬 𑀬𑀸𑀤𑀺𑀲𑀁 𑀉𑀧𑁆𑀧𑀸𑀤𑀸𑀯𑀢𑁆𑀣𑀸𑀬 𑀚𑀸𑀢𑀁, 𑀢𑀢𑁄 𑀅𑀜𑁆𑀜𑀸𑀤𑀺𑀲𑀦𑁆𑀢𑀺 𑀅𑀢𑁆𑀣𑁄. 𑀢𑀣𑀸 𑀳𑀺 𑀢𑀁 𑀚𑀭𑀸𑀫𑀭𑀡𑁂𑀳𑀺 𑀧𑀭𑀺𑀫𑀼𑀲𑀺𑀢𑀩𑁆𑀩𑀭𑀽𑀧𑀢𑀸𑀬 ‘‘𑀫𑀼𑀲𑀸’’𑀢𑀺 𑀯𑀼𑀢𑁆𑀢𑀁. 𑀢𑁂𑀦𑀸𑀳 𑁋 ‘‘𑀫𑁄𑀲𑀥𑀫𑁆𑀫𑀦𑁆𑀢𑀺 𑀦𑀲𑁆𑀲𑀦𑀲𑀪𑀸𑀯’’𑀦𑁆𑀢𑀺. 𑀢𑀁 𑀅𑀯𑀺𑀢𑀣𑀦𑁆𑀢𑀺 𑀢𑀁 𑀯𑀼𑀢𑁆𑀢𑀦𑀬𑁂𑀦 𑀅𑀯𑀺𑀢𑀣𑀁 𑀦𑀸𑀫, 𑀢𑀁 𑀲𑀪𑀸𑀯𑁄 𑀲𑀩𑁆𑀩𑀓𑀸𑀮𑀁 𑀢𑁂𑀦𑁂𑀯 𑀮𑀩𑁆𑀪𑀦𑀢𑁄. 𑀲𑀫𑀣𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀯𑀘𑀻𑀲𑀘𑁆𑀘𑀢𑁄𑀢𑀺 𑀲𑀫𑀣𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀬𑀁 𑀯𑀺𑀲𑀼𑀤𑁆𑀥𑀺𑀫𑀢𑁆𑀢𑀁 𑀯𑀘𑀻𑀲𑀘𑁆𑀘𑀁, 𑀢𑀢𑁄. 𑀤𑀼𑀓𑁆𑀔𑀲𑀘𑁆𑀘𑀲𑀫𑀼𑀤𑀬𑀲𑀘𑁆𑀘𑁂𑀳𑀺 𑀢𑀘𑁆𑀙𑀯𑀺𑀧𑀮𑁆𑀮𑀸𑀲𑀪𑀽𑀢𑀲𑀪𑀸𑀯𑁂𑀳𑀺. 𑀇𑀢𑀺 𑀦𑁂𑀲𑀁 𑀬𑀣𑀸𑀲𑀓𑀁 𑀲𑀪𑀸𑀯𑁂𑀦 𑀅𑀯𑀺𑀢𑀣𑀪𑀸𑀯𑁂 𑀅𑀫𑁄𑀲𑀥𑀫𑁆𑀫𑀢𑀸𑀬 𑀢𑁂𑀳𑀺𑀧𑀺 𑀅𑀯𑀺𑀢𑀣𑀪𑀸𑀯𑀸 𑀧𑀭𑀫𑀢𑁆𑀣𑀲𑀘𑁆𑀘𑀁 𑀦𑀺𑀩𑁆𑀩𑀸𑀦𑀫𑁂𑀯 𑀉𑀢𑁆𑀢𑀭𑀺𑀢𑀭𑀁. 𑀢𑀲𑁆𑀫𑀸𑀢𑀺 𑀦𑀺𑀩𑁆𑀩𑀸𑀦𑀲𑁆𑀲𑁂𑀯 𑀉𑀢𑁆𑀢𑀭𑀺𑀢𑀭𑀪𑀸𑀯𑀢𑁄.

𑁩𑁬𑁭. 𑀉𑀧𑀥𑀻𑀬𑀢𑀺 𑀏𑀢𑁆𑀣 𑀤𑀼𑀓𑁆𑀔𑀦𑁆𑀢𑀺 𑀉𑀧𑀥𑀻, 𑀔𑀦𑁆𑀥𑀸 𑀓𑀸𑀫𑀕𑀼𑀡𑀸 𑀘. 𑀉𑀧𑀤𑀳𑀦𑁆𑀢𑀺 𑀤𑀼𑀓𑁆𑀔𑀦𑁆𑀢𑀺 𑀉𑀧𑀥𑀻, 𑀓𑀺𑀮𑁂𑀲𑀸𑀪𑀺𑀲𑀗𑁆𑀔𑀸𑀭𑀸. 𑀧𑀭𑀺𑀧𑀽𑀭𑀸 𑀕𑀳𑀺𑀢𑀸 𑀧𑀭𑀸𑀫𑀝𑁆𑀞𑀸𑀢𑀺 𑀧𑀭𑀺𑀬𑀢𑁆𑀢𑀪𑀸𑀯𑁂𑀦 𑀢𑀡𑁆𑀳𑀸𑀬 𑀕𑀳𑀺𑀢𑀸 𑀤𑀺𑀝𑁆𑀞𑀺𑀬𑀸 𑀧𑀭𑀸𑀫𑀝𑁆𑀞𑀸. 𑀲𑀫𑀣𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀓𑀺𑀮𑁂𑀲𑀧𑀭𑀺𑀘𑁆𑀘𑀸𑀕𑀢𑁄𑀢𑀺 𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦 𑀢𑀤𑀗𑁆𑀕𑀧𑁆𑀧𑀳𑀸𑀦𑀯𑀲𑁂𑀦 𑀘 𑀓𑀺𑀮𑁂𑀲𑀸𑀦𑀁 𑀧𑀭𑀺𑀘𑁆𑀘𑀚𑀦𑀢𑁄. 𑀉𑀢𑁆𑀢𑀭𑀺𑀢𑀭𑁄 𑀯𑀺𑀲𑀺𑀝𑁆𑀞𑀢𑀭𑀲𑁆𑀲 𑀧𑀳𑀸𑀦𑀧𑁆𑀧𑀓𑀸𑀭𑀲𑁆𑀲 𑀅𑀪𑀸𑀯𑀢𑁄.

𑁩𑁬𑁮. 𑀆𑀖𑀸𑀢𑀓𑀭𑀡𑀯𑀲𑁂𑀦𑀸𑀢𑀺 𑀘𑁂𑀢𑀲𑀺𑀓𑀸𑀖𑀸𑀢𑀲𑁆𑀲 𑀉𑀧𑁆𑀧𑀚𑁆𑀚𑀦𑀯𑀲𑁂𑀦. 𑀩𑁆𑀬𑀸𑀧𑀚𑁆𑀚𑀦𑀯𑀲𑁂𑀦𑀸𑀢𑀺 𑀘𑀺𑀢𑁆𑀢𑀲𑁆𑀲 𑀯𑀺𑀧𑀢𑁆𑀢𑀺𑀪𑀸𑀯𑀯𑀲𑁂𑀦. 𑀲𑀫𑁆𑀧𑀤𑀼𑀲𑁆𑀲𑀦𑀯𑀲𑁂𑀦𑀸𑀢𑀺 𑀲𑀩𑁆𑀩𑀲𑁄 𑀤𑀼𑀲𑁆𑀲𑀦𑀯𑀲𑁂𑀦. 𑀢𑀻𑀳𑀺 𑀧𑀤𑁂𑀳𑀺 𑀬𑀤𑀺 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀓𑀺𑀮𑁂𑀲𑀸𑀦𑀁 𑀧𑀭𑀺𑀘𑁆𑀘𑀸𑀕𑁄 𑀘𑀸𑀕𑀸𑀥𑀺𑀝𑁆𑀞𑀸𑀦𑀁, 𑀅𑀭𑀳𑀢𑁆𑀢𑀫𑀕𑁆𑀕𑁂𑀦𑁂𑀯 𑀦𑁂𑀲𑀁 𑀯𑀽𑀧𑀲𑀫𑁄 𑀉𑀧𑀲𑀫𑀸𑀥𑀺𑀝𑁆𑀞𑀸𑀦𑀁 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀏𑀢𑁆𑀣 𑀯𑀺𑀲𑁂𑀲𑁂𑀦 𑀧𑀭𑀺𑀘𑁆𑀘𑀸𑀕𑁄 𑀲𑀫𑁆𑀧𑀚𑀳𑀦𑀁 𑀅𑀦𑀼𑀧𑁆𑀧𑀢𑁆𑀢𑀺𑀥𑀫𑁆𑀫𑀢𑀸𑀧𑀸𑀤𑀦𑀁 𑀘𑀸𑀕𑁄, 𑀢𑀣𑀸 𑀧𑀦 𑀧𑀭𑀺𑀘𑁆𑀘𑀸𑀕𑁂𑀦 𑀬𑁄 𑀲𑁄 𑀦𑁂𑀲𑀁 𑀢𑀤𑀸 𑀯𑀽𑀧𑀲𑀦𑁆𑀢𑀢𑀸𑀬 𑀅𑀪𑀸𑀯𑁄, 𑀅𑀬𑀁 𑀉𑀧𑀲𑀫𑁄𑀢𑀺 𑀅𑀬𑀫𑁂𑀢𑁂𑀲𑀁 𑀯𑀺𑀲𑁂𑀲𑁄.

𑁩𑁬𑁯. 𑀫𑀜𑁆𑀜𑀺𑀢𑀦𑁆𑀢𑀺 𑀫𑀜𑁆𑀜𑀦𑀸, ‘‘𑀏𑀢𑀁 𑀫𑀫𑀸’’𑀢𑀺𑀆𑀤𑀺𑀦𑀸 𑀓𑀧𑁆𑀧𑀦𑀸𑀢𑀺 𑀅𑀢𑁆𑀣𑁄. 𑀅𑀯𑀺𑀚𑁆𑀚𑀸𑀯𑀺𑀩𑀦𑁆𑀥𑀦𑀢𑀡𑁆𑀳𑀸𑀕𑀸𑀳𑀸𑀤𑀻𑀦𑀁 𑀲𑀸𑀥𑀸𑀭𑀡𑀪𑀸𑀯𑀢𑁄 𑀅𑀬𑀫𑀳𑀦𑁆𑀢𑀺 𑀏𑀢𑁆𑀣 𑀅𑀳𑀦𑁆𑀢𑀺 𑀤𑀺𑀝𑁆𑀞𑀺𑀫𑀜𑁆𑀜𑀦𑀸𑀤𑀲𑁆𑀲𑀦𑀁, 𑀲𑀸 𑀧𑀦 𑀤𑀺𑀝𑁆𑀞𑀺 𑀫𑀸𑀦𑀫𑀜𑁆𑀜𑀦𑀸𑀬 𑀅𑀢𑁆𑀢𑀦𑀺𑀬𑀕𑀸𑀳𑀯𑀲𑁂𑀦 𑀳𑁄𑀢𑀻𑀢𑀺 𑀲𑁆𑀯𑁂𑀯 ‘‘𑀅𑀬’’𑀦𑁆𑀢𑀺 𑀇𑀫𑀺𑀦𑀸 𑀕𑀳𑀺𑀢𑁄𑀢𑀺 𑀆𑀳 𑁋 ‘‘𑀅𑀬𑀫𑀳𑀦𑁆𑀢𑀺 𑀏𑀓𑀁 𑀢𑀡𑁆𑀳𑀸𑀫𑀜𑁆𑀜𑀺𑀢𑀫𑁂𑀯 𑀯𑀝𑁆𑀝𑀢𑀻’’𑀢𑀺. 𑀆𑀩𑀸𑀥𑀝𑁆𑀞𑁂𑀦𑀸𑀢𑀺 𑀧𑀝𑀺𑀧𑀻𑀴𑀦𑀝𑁆𑀞𑁂𑀦. 𑀫𑀜𑁆𑀜𑀦𑀸𑀯𑀲𑁂𑀦 𑀳𑀺 𑀲𑀢𑁆𑀢𑀸𑀦𑀁 𑀢𑀣𑀸 𑀳𑁄𑀢𑀺. 𑀅𑀦𑁆𑀢𑁄𑀤𑁄𑀲𑀝𑁆𑀞𑁂𑀦𑀸𑀢𑀺 𑀅𑀩𑁆𑀪𑀦𑁆𑀢𑀭𑀤𑀼𑀝𑁆𑀞𑀪𑀸𑀯𑁂𑀦. 𑀫𑀜𑁆𑀜𑀦𑀸𑀤𑀽𑀲𑀺𑀢𑀢𑁆𑀢𑀸 𑀳𑀺 𑀲𑀢𑁆𑀢𑀸𑀦𑀁 𑀅𑀢𑁆𑀢𑀪𑀸𑀯𑁄 𑀤𑀼𑀓𑁆𑀔𑀢𑀸𑀫𑀽𑀮𑀸𑀬𑀢𑁆𑀢𑁄, 𑀓𑀺𑀮𑁂𑀲𑀸𑀲𑀼𑀘𑀺𑀧𑀕𑁆𑀖𑀭𑀡𑀢𑁄 𑀉𑀧𑁆𑀧𑀸𑀤𑀦𑀺𑀭𑁄𑀥𑀪𑀗𑁆𑀕𑁂𑀳𑀺 𑀉𑀤𑁆𑀥𑀫𑀼𑀤𑁆𑀥𑀁 𑀧𑀓𑁆𑀓𑀧𑀪𑀺𑀦𑁆𑀦𑁄 𑀳𑁄𑀢𑀻𑀢𑀺 𑀨𑀮𑀽𑀧𑀘𑀸𑀭𑁂𑀦 ‘‘𑀫𑀜𑁆𑀜𑀺𑀢𑀁 𑀕𑀡𑁆𑀟𑁄’’𑀢𑀺 𑀯𑀼𑀢𑁆𑀢𑁄. 𑀅𑀦𑀼𑀧𑀯𑀺𑀝𑁆𑀞𑀝𑁆𑀞𑁂𑀦𑀸𑀢𑀺 𑀅𑀦𑀼𑀧𑀯𑀺𑀲𑀺𑀢𑁆𑀯𑀸 𑀳𑀤𑀬𑀫𑀸𑀳𑀘𑁆𑀘 𑀅𑀥𑀺𑀝𑁆𑀞𑀸𑀦𑁂𑀦. 𑀫𑀜𑁆𑀜𑀺𑀢𑀜𑁆𑀳𑀺 𑀧𑀻𑀴𑀸𑀚𑀦𑀦𑀢𑁄 𑀅𑀦𑁆𑀢𑁄𑀢𑀼𑀤𑀦𑀢𑁄 𑀤𑀼𑀭𑀼𑀤𑁆𑀥𑀭𑀡𑀢𑁄 𑀲𑀮𑁆𑀮𑀁. 𑀔𑀻𑀡𑀸𑀲𑀯𑀫𑀼𑀦𑀺 𑀲𑀩𑁆𑀩𑀲𑁄 𑀓𑀺𑀮𑁂𑀲𑀸𑀦𑀁 𑀲𑀦𑁆𑀢𑀢𑁆𑀢𑀸, 𑀢𑀢𑁄 𑀏𑀯 𑀧𑀭𑀺𑀴𑀸𑀳𑀸𑀦𑀁 𑀧𑀭𑀺𑀦𑀺𑀩𑁆𑀩𑀼𑀢𑀢𑁆𑀢𑀸 𑀯𑀽𑀧𑀲𑀦𑁆𑀢𑀢𑁆𑀢𑀸 𑀲𑀦𑁆𑀢𑁄 𑀉𑀧𑀲𑀦𑁆𑀢𑁄 𑀦𑀺𑀩𑁆𑀩𑀼𑀢𑁄𑀢𑀺 𑀯𑀼𑀘𑁆𑀘𑀢𑀺. 𑀬𑀢𑁆𑀣 𑀞𑀺𑀢𑀦𑁆𑀢𑀺 𑀬𑀲𑁆𑀫𑀺𑀁 𑀅𑀲𑁂𑀓𑁆𑀔𑀪𑀽𑀫𑀺𑀬𑀁 𑀞𑀺𑀢𑀁. 𑀬𑀤𑀺 𑀪𑀕𑀯𑀸 𑀅𑀢𑁆𑀢𑀦𑁄 𑀤𑁂𑀲𑀦𑀸𑀜𑀸𑀡𑀸𑀦𑀼𑀭𑀽𑀧𑀁 𑀤𑁂𑀲𑀦𑀁 𑀧𑀯𑀢𑁆𑀢𑀸𑀧𑁂𑀬𑁆𑀬, 𑀫𑀳𑀸𑀧𑀣𑀯𑀺𑀁 𑀧𑀢𑁆𑀣𑀭𑀦𑁆𑀢𑀲𑁆𑀲 𑀯𑀺𑀬, 𑀆𑀓𑀸𑀲𑀁 𑀧𑀲𑀸𑀭𑁂𑀦𑁆𑀢𑀲𑁆𑀲 𑀯𑀺𑀬, 𑀅𑀦𑀦𑁆𑀢𑀸𑀧𑀭𑀺𑀫𑁂𑀬𑁆𑀬𑀮𑁄𑀓𑀥𑀸𑀢𑀼𑀬𑁄 𑀧𑀝𑀺𑀘𑁆𑀘 𑀢𑁂𑀲𑀁 𑀞𑀺𑀢𑀸𑀓𑀸𑀭𑀁 𑀅𑀦𑀼𑀧𑁆𑀧𑀽𑀭𑀁 𑀯𑀺𑀘𑀺𑀦𑀦𑁆𑀢𑀲𑁆𑀲 𑀯𑀺𑀬 𑀤𑁂𑀲𑀦𑀸 𑀧𑀭𑀺𑀬𑁄𑀲𑀸𑀦𑀁 𑀦 𑀕𑀘𑁆𑀙𑁂𑀬𑁆𑀬. 𑀬𑀲𑁆𑀫𑀸 𑀧𑀦𑀲𑁆𑀲 𑀯𑀺𑀦𑁂𑀬𑁆𑀬𑀚𑁆𑀛𑀸𑀲𑀬𑀸𑀦𑀼𑀭𑀽𑀧𑀫𑁂𑀯 𑀤𑁂𑀲𑀦𑀸 𑀧𑀯𑀢𑁆𑀢𑀺, 𑀦 𑀢𑀢𑁄 𑀧𑀭𑀁 𑀅𑀡𑀼𑀫𑀢𑁆𑀢𑀫𑁆𑀧𑀺 𑀯𑀟𑁆𑀠𑀢𑀺. 𑀢𑀲𑁆𑀫𑀸 𑀯𑀼𑀢𑁆𑀢𑀁 𑁋 ‘‘𑀲𑀩𑁆𑀩𑀸𑀧𑀺 𑀥𑀫𑁆𑀫𑀤𑁂𑀲𑀦𑀸 𑀲𑀁𑀔𑀺𑀢𑁆𑀢𑀸𑀯, 𑀯𑀺𑀢𑁆𑀣𑀸𑀭𑀤𑁂𑀲𑀦𑀸 𑀦𑀸𑀫 𑀦𑀢𑁆𑀣𑀻’’𑀢𑀺. 𑀦𑀦𑀼 𑀲𑀢𑁆𑀢𑀧𑀓𑀭𑀡𑀤𑁂𑀲𑀦𑀸 𑀯𑀺𑀢𑁆𑀣𑀸𑀭𑀓𑀣𑀸𑀢𑀺? 𑀦 𑀲𑀸𑀧𑀺 𑀯𑀺𑀢𑁆𑀣𑀸𑀭𑀓𑀣𑀸𑀢𑀺 𑀆𑀳 𑁋 ‘‘𑀲𑀫𑀦𑁆𑀢𑀧𑀝𑁆𑀞𑀸𑀦𑀓𑀣𑀸𑀧𑀺 𑀲𑀁𑀔𑀺𑀢𑁆𑀢𑀸𑀬𑁂𑀯𑀸’’𑀢𑀺. 𑀲𑀦𑁆𑀦𑀺𑀧𑀢𑀺𑀢𑀤𑁂𑀯𑀧𑀭𑀺𑀲𑀸𑀬 𑀅𑀚𑁆𑀛𑀸𑀲𑀬𑀸𑀦𑀼𑀭𑀽𑀧𑀫𑁂𑀯 𑀳𑀺 𑀢𑀲𑁆𑀲𑀸𑀧𑀺 𑀧𑀯𑀢𑁆𑀢𑀺, 𑀦 𑀲𑀢𑁆𑀣𑀼𑀤𑁂𑀲𑀦𑀸𑀜𑀸𑀡𑀸𑀦𑀼𑀭𑀽𑀧𑀦𑁆𑀢𑀺. 𑀬𑀣𑀸𑀦𑀼𑀲𑀦𑁆𑀥𑀺𑀁 𑀧𑀸𑀧𑁂𑀲𑀺 𑀬𑀣𑀸𑀉𑀤𑁆𑀤𑀺𑀝𑁆𑀞𑁂 𑀅𑀦𑀼𑀧𑀼𑀩𑁆𑀩𑁂𑀦 𑀅𑀦𑀯𑀲𑁂𑀲𑀢𑁄 𑀯𑀺𑀪𑀚𑀦𑀯𑀲𑁂𑀦 𑀤𑁂𑀲𑀦𑀸𑀬 𑀦𑀺𑀝𑁆𑀞𑀸𑀧𑀺𑀢𑀢𑁆𑀢𑀸. 𑀯𑀺𑀧𑀜𑁆𑀘𑀺𑀢𑀜𑁆𑀜𑀽…𑀧𑁂… 𑀓𑀣𑁂𑀲𑀺 𑀦𑀸𑀢𑀺𑀲𑀗𑁆𑀔𑁂𑀧𑀯𑀺𑀢𑁆𑀣𑀸𑀭𑀯𑀲𑁂𑀦 𑀤𑁂𑀲𑀺𑀢𑀢𑁆𑀢𑀸.

𑁩𑁭𑁦. 𑀅𑀝𑁆𑀞𑀦𑁆𑀦𑀁 𑀧𑀭𑀺𑀓𑁆𑀔𑀸𑀭𑀸𑀦𑀦𑁆𑀢𑀺 𑀦𑀬𑀺𑀤𑀫𑀦𑀯𑀲𑁂𑀲𑀧𑀭𑀺𑀬𑀸𑀤𑀸𑀦𑀁, 𑀮𑀓𑁆𑀔𑀡𑀯𑀘𑀦𑀁 𑀧𑀦𑁂𑀢𑀁, 𑀅𑀜𑁆𑀜𑀢𑀭𑀲𑁆𑀲𑀸𑀢𑀺 𑀯𑀘𑀦𑀲𑁂𑀲𑁄. 𑀢𑀣𑀸 𑀳𑀺, ‘‘𑀫𑀬𑁆𑀳𑀁 𑀇𑀤𑁆𑀥𑀺𑀫𑀬𑀧𑀭𑀺𑀓𑁆𑀔𑀸𑀭𑀮𑀸𑀪𑀸𑀬 𑀧𑀘𑁆𑀘𑀬𑁄 𑀳𑁄𑀢𑀽’’𑀢𑀺 𑀧𑀢𑁆𑀣𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀁, 𑀧𑀢𑁆𑀢𑀁, 𑀘𑀻𑀯𑀭𑀫𑁂𑀯 𑀯𑀸 𑀤𑀺𑀦𑁆𑀦𑁂 𑀘𑀭𑀺𑀫𑀪𑀯𑁂 𑀇𑀤𑁆𑀥𑀺𑀫𑀬𑀧𑀭𑀺𑀓𑁆𑀔𑀸𑀭𑁄 𑀦𑀺𑀩𑁆𑀩𑀢𑁆𑀢𑀢𑀻𑀢𑀺 𑀯𑀤𑀦𑁆𑀢𑀺. 𑀅𑀤𑀺𑀦𑁆𑀦𑀢𑁆𑀢𑀸𑀢𑀺 𑀓𑁂𑀘𑀺𑀯𑀸𑀤𑁄, 𑀢𑁂𑀦𑀸𑀳 ‘‘𑀓𑀼𑀮𑀧𑀼𑀢𑁆𑀢𑁄’’𑀢𑀺𑀆𑀤𑀺. 𑀑𑀓𑀸𑀲𑀸𑀪𑀸𑀯𑀢𑁄𑀢𑀺 𑀉𑀧𑀲𑀫𑁆𑀧𑀤𑀸𑀮𑀓𑁆𑀔𑀡𑀲𑁆𑀲 𑀅𑀲𑀫𑁆𑀪𑀯𑀢𑁄. 𑀢𑁂𑀦𑀸𑀳 𑁋 ‘‘𑀓𑀼𑀮𑀧𑀼𑀢𑁆𑀢𑀲𑁆𑀲 𑀆𑀬𑀼𑀧𑀭𑀺𑀓𑁆𑀔𑀻𑀡’’𑀦𑁆𑀢𑀺. 𑀉𑀤𑀓𑀢𑀺𑀢𑁆𑀣…𑀧𑁂… 𑀆𑀭𑀤𑁆𑀥𑁄 𑀧𑀭𑀫𑀧𑁆𑀧𑀺𑀘𑁆𑀙𑀪𑀸𑀯𑀢𑁄.

𑀯𑀺𑀩𑁆𑀪𑀦𑁆𑀢𑀸𑀢𑀺 𑀪𑀦𑁆𑀢𑀘𑀺𑀢𑁆𑀢𑀸. 𑀲𑀺𑀗𑁆𑀕𑁂𑀦 𑀯𑀺𑀚𑁆𑀛𑀺𑀢𑁆𑀯𑀸 𑀖𑀸𑀢𑁂𑀲𑀺 𑀧𑀼𑀭𑀺𑀫𑀚𑀸𑀢𑀺𑀩𑀤𑁆𑀥𑀸𑀖𑀸𑀢𑀢𑀸𑀬𑀸𑀢𑀺 𑀯𑀤𑀦𑁆𑀢𑀺.

𑀫𑀸𑀦𑀼𑀲𑀁 𑀬𑁄𑀕𑀦𑁆𑀢𑀺 𑀫𑀦𑀼𑀲𑁆𑀲𑀢𑁆𑀢𑀪𑀸𑀯𑀁. 𑀅𑀢𑁆𑀢𑀪𑀸𑀯𑁄 𑀳𑀺 𑀬𑀼𑀚𑁆𑀚𑀢𑀺 𑀓𑀫𑁆𑀫𑀓𑀺𑀮𑁂𑀲𑁂𑀳𑀻𑀢𑀺 ‘‘𑀬𑁄𑀕𑁄’’𑀢𑀺 𑀯𑀼𑀘𑁆𑀘𑀢𑀺. 𑀉𑀧𑀘𑁆𑀘𑀕𑀼𑀦𑁆𑀢𑀺 𑀉𑀧𑀕𑀘𑁆𑀙𑀺𑀁𑀲𑀼. 𑀉𑀧𑀓𑁄𑀢𑀺𑀆𑀤𑀺 𑀢𑁂𑀲𑀁 𑀦𑀸𑀫𑀸𑀦𑀺.

𑀕𑀦𑁆𑀥𑀓𑀝𑁆𑀞𑁂𑀳𑀻𑀢𑀺 𑀘𑀦𑁆𑀤𑀦𑀸𑀕𑀭𑀼𑀲𑀴𑀮𑀤𑁂𑀯𑀤𑀸𑀭𑀼𑀆𑀤𑀻𑀳𑀺 𑀕𑀦𑁆𑀥𑀤𑀸𑀭𑀽𑀳𑀺. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀥𑀸𑀢𑀼𑀯𑀺𑀪𑀗𑁆𑀕𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.