𑁮. 𑀉𑀤𑁆𑀤𑁂𑀲𑀯𑀺𑀪𑀗𑁆𑀕𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁧𑁩. 𑀤𑁂𑀲𑁂𑀢𑀩𑁆𑀩𑀲𑁆𑀲 𑀅𑀢𑁆𑀣𑀲𑁆𑀲 𑀉𑀤𑁆𑀤𑀺𑀲𑀦𑀁 𑀉𑀤𑁆𑀤𑁂𑀲𑁄, 𑀯𑀺𑀪𑀚𑀦𑀁 𑀯𑀺𑀪𑀗𑁆𑀕𑁄𑀢𑀺 𑀆𑀳 𑁋 ‘‘𑀫𑀸𑀢𑀺𑀓𑀜𑁆𑀘 𑀯𑀺𑀪𑀚𑀦𑀜𑁆𑀘𑀸’’𑀢𑀺 𑀢𑀼𑀮𑁂𑀬𑁆𑀬𑀸𑀢𑀺𑀆𑀤𑀻𑀦𑀺 𑀘𑀢𑁆𑀢𑀸𑀭𑀺𑀧𑀺 𑀧𑀤𑀸𑀦𑀺 𑀧𑀜𑁆𑀜𑀸𑀯𑁂𑀯𑀘𑀦𑀸𑀦𑀺. 𑀅𑀣 𑀯𑀸 𑀢𑀼𑀮𑁂𑀬𑁆𑀬𑀸𑀢𑀺 𑀢𑀼𑀮𑀦𑀪𑀽𑀢𑀸𑀬 𑀧𑀜𑁆𑀜𑀸𑀬 𑀢𑀲𑁆𑀲 𑀥𑀫𑁆𑀫𑀲𑁆𑀲 𑀧𑀕𑁆𑀕𑀳𑀸𑀤𑀺𑀯𑀺𑀥𑀺𑀦𑀸 𑀧𑀭𑀺𑀢𑀼𑀮𑁂𑀬𑁆𑀬. 𑀢𑀻𑀭𑁂𑀬𑁆𑀬𑀸𑀢𑀺 𑀢𑀻𑀭𑀡𑀪𑀽𑀢𑀸𑀬 𑀧𑀜𑁆𑀜𑀸𑀬 𑀢𑀢𑁆𑀣 𑀜𑀸𑀡𑀓𑀺𑀭𑀺𑀬𑀸𑀲𑀫𑀸𑀧𑀦𑀯𑀲𑁂𑀦 𑀢𑀻𑀭𑁂𑀬𑁆𑀬. 𑀧𑀭𑀺𑀕𑁆𑀕𑀡𑁆𑀳𑁂𑀬𑁆𑀬𑀸𑀢𑀺 𑀢𑀣𑀸𑀲𑀫𑀸𑀧𑀦𑁆𑀦𑁄 𑀆𑀦𑀺𑀲𑀁𑀲𑁂 𑀅𑀲𑁆𑀲𑀸𑀤𑀆𑀤𑀻𑀦𑀯𑁂 𑀘 𑀯𑀺𑀘𑀺𑀦𑁂𑀬𑁆𑀬. 𑀧𑀭𑀺𑀘𑁆𑀙𑀺𑀦𑁆𑀤𑁂𑀬𑁆𑀬𑀸𑀢𑀺 𑀧𑀭𑀺𑀘𑁆𑀙𑀺𑀦𑁆𑀤𑀪𑀽𑀢𑁂𑀦 𑀜𑀸𑀡𑁂𑀦 𑀅𑀢𑁆𑀣𑀁 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀚𑀸𑀦𑁂𑀬𑁆𑀬. 𑀆𑀭𑀫𑁆𑀫𑀡𑁂𑀲𑀽𑀢𑀺 𑀭𑀽𑀧𑀸𑀤𑀺𑀧𑀼𑀣𑀼𑀢𑁆𑀢𑀸𑀭𑀫𑁆𑀫𑀡𑁂𑀲𑀼. 𑀦𑀺𑀓𑀦𑁆𑀢𑀺𑀯𑀲𑁂𑀦𑀸𑀢𑀺 𑀦𑀺𑀓𑀸𑀫𑀦𑀯𑀲𑁂𑀦 𑀅𑀧𑁂𑀓𑁆𑀔𑀸𑀯𑀲𑁂𑀦. 𑀢𑀺𑀝𑁆𑀞𑀫𑀸𑀦𑀦𑁆𑀢𑀺 𑀧𑀯𑀢𑁆𑀢𑀫𑀸𑀦𑀁. 𑀕𑁄𑀘𑀭𑀚𑁆𑀛𑀢𑁆𑀢𑁂𑀢𑀺 𑀛𑀸𑀦𑀸𑀭𑀫𑁆𑀫𑀡𑀪𑀽𑀢𑁂. 𑀢𑀜𑁆𑀳𑀺 𑀪𑀸𑀯𑀦𑀸𑀘𑀺𑀢𑁆𑀢𑁂𑀦𑀸𑀪𑀺𑀪𑀼𑀬𑁆𑀬 𑀅𑀯𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀕𑀬𑁆𑀳𑀫𑀸𑀦𑀁 𑀅𑀚𑁆𑀛𑀢𑁆𑀢𑀁 𑀯𑀺𑀬 𑀳𑁄𑀢𑀻𑀢𑀺 ‘‘𑀕𑁄𑀘𑀭𑀚𑁆𑀛𑀢𑁆𑀢’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀪𑀸𑀯𑀦𑀁 𑀆𑀭𑀤𑁆𑀥𑀲𑁆𑀲 𑀪𑀺𑀓𑁆𑀔𑀼𑀦𑁄 𑀬𑀤𑀺 𑀪𑀸𑀯𑀦𑀸𑀭𑀫𑁆𑀫𑀡𑁂 𑀦𑀺𑀓𑀦𑁆𑀢𑀺 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀢𑀸𑀬 𑀦𑀺𑀓𑀦𑁆𑀢𑀺𑀬𑀸 𑀉𑀧𑀭𑀺 𑀪𑀸𑀯𑀦𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀘𑀺𑀢𑁆𑀢𑀲𑀁𑀓𑁄𑀘𑀯𑀲𑁂𑀦 𑀲𑀡𑁆𑀞𑀺𑀢𑀁 𑀦𑀸𑀫, 𑀢𑀤𑀪𑀸𑀯𑁂𑀦 𑀅𑀲𑀡𑁆𑀞𑀺𑀢𑀁 𑀦𑀸𑀫 𑀳𑁄𑀢𑀻𑀢𑀺, ‘‘𑀅𑀚𑁆𑀛𑀢𑁆𑀢𑀁 𑀅𑀲𑀡𑁆𑀞𑀺𑀢’’𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄, ‘‘𑀕𑁄𑀘𑀭𑀚𑁆𑀛𑀢𑁆𑀢𑁂 𑀦𑀺𑀓𑀦𑁆𑀢𑀺𑀯𑀲𑁂𑀦 𑀅𑀲𑀡𑁆𑀞𑀺𑀢’’𑀦𑁆𑀢𑀺 𑀆𑀳. 𑀢𑀣𑀸 𑀳𑀺 𑀯𑀓𑁆𑀔𑀢𑀺 𑁋 ‘‘𑀦𑀺𑀓𑀦𑁆𑀢𑀺𑀯𑀲𑁂𑀦 𑀳𑀺 𑀅𑀢𑀺𑀝𑁆𑀞𑀫𑀸𑀦𑀁 𑀳𑀸𑀦𑀪𑀸𑀕𑀺𑀬𑀁 𑀦 𑀳𑁄𑀢𑀺, 𑀯𑀺𑀲𑁂𑀲𑀪𑀸𑀕𑀺𑀬𑀫𑁂𑀯 𑀳𑁄𑀢𑀻’’𑀢𑀺. 𑀅𑀕𑁆𑀕𑀳𑁂𑀢𑁆𑀯𑀸𑀢𑀺 𑀭𑀽𑀧𑀸𑀤𑀻𑀲𑀼 𑀓𑀺𑀜𑁆𑀘𑀺 𑀢𑀡𑁆𑀳𑀸𑀤𑀺𑀕𑁆𑀕𑀸𑀳𑀯𑀲𑁂𑀦 𑀅𑀕𑁆𑀕𑀳𑁂𑀢𑁆𑀯𑀸. 𑀢𑀣𑀸 𑀅𑀕𑁆𑀕𑀳𑀡𑁂𑀦𑁂𑀯 𑀳𑀺 𑀢𑀡𑁆𑀳𑀸𑀧𑀭𑀺𑀢𑀸𑀲𑀸𑀤𑀺𑀯𑀲𑁂𑀦 𑀦 𑀧𑀭𑀺𑀢𑀲𑁆𑀲𑁂𑀬𑁆𑀬. 𑀅𑀯𑀲𑁂𑀲𑀲𑁆𑀲 𑀘 𑀤𑀼𑀓𑁆𑀔𑀲𑁆𑀲𑀸𑀢𑀺 𑀲𑁄𑀓𑀸𑀤𑀺𑀤𑀼𑀓𑁆𑀔𑀲𑁆𑀲. 𑀅𑀯𑀲𑁂𑀲𑀲𑁆𑀲 𑀘 𑀤𑀼𑀓𑁆𑀔𑀲𑁆𑀲𑀸𑀢𑀺 𑀯𑀸 𑀚𑀸𑀢𑀺𑀚𑀭𑀸𑀫𑀭𑀡𑀲𑀻𑀲𑁂𑀦 𑀯𑀺𑀧𑀸𑀓𑀤𑀼𑀓𑁆𑀔𑀲𑁆𑀲 𑀕𑀳𑀺𑀢𑀢𑁆𑀢𑀸 𑀓𑀺𑀮𑁂𑀲𑀤𑀼𑀓𑁆𑀔𑀲𑁆𑀲 𑀘𑁂𑀯 𑀲𑀁𑀲𑀸𑀭𑀤𑀼𑀓𑁆𑀔𑀲𑁆𑀲 𑀘𑀸𑀢𑀺 𑀅𑀢𑁆𑀣𑁄.

𑁩𑁧𑁬. 𑀭𑀽𑀧𑀫𑁂𑀯 𑀓𑀺𑀮𑁂𑀲𑀼𑀧𑁆𑀧𑀢𑁆𑀢𑀺𑀬𑀸 𑀓𑀸𑀭𑀡𑀪𑀸𑀯𑀢𑁄 𑀭𑀽𑀧𑀦𑀺𑀫𑀺𑀢𑁆𑀢𑀁. 𑀭𑀸𑀕𑀸𑀤𑀺𑀯𑀲𑁂𑀦 𑀢𑀁 𑀅𑀦𑀼𑀥𑀸𑀯𑀢𑀻𑀢𑀺 𑀭𑀽𑀧𑀦𑀺𑀫𑀺𑀢𑁆𑀢𑀸𑀦𑀼𑀲𑀸𑀭𑀻.

𑁩𑁧𑁮. 𑀦𑀺𑀓𑀦𑁆𑀢𑀺𑀯𑀲𑁂𑀦 𑀅𑀲𑀡𑁆𑀞𑀺𑀢𑀦𑁆𑀢𑀺 𑀅𑀧𑁂𑀓𑁆𑀔𑀸𑀯𑀲𑁂𑀦 𑀲𑀡𑁆𑀞𑀺𑀢𑀁 𑀦𑀺𑀓𑀦𑁆𑀢𑀺𑀁 𑀧𑀳𑀸𑀬 𑀧𑀯𑀢𑁆𑀢𑀫𑀸𑀦𑀁 𑀉𑀧𑀭𑀺 𑀯𑀺𑀲𑁂𑀲𑀸𑀯𑀳𑀢𑁄𑀢𑀺. 𑀢𑁂𑀦𑀸𑀳 ‘‘𑀦𑀺𑀓𑀦𑁆𑀢𑀺𑀯𑀲𑁂𑀦 𑀳𑀻’’𑀢𑀺𑀆𑀤𑀺.

𑁩𑁨𑁦. 𑀅𑀕𑁆𑀕𑀳𑁂𑀢𑁆𑀯𑀸 𑀅𑀧𑀭𑀺𑀢𑀲𑁆𑀲𑀦𑀸𑀢𑀺 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁂, ‘‘𑀏𑀢𑀁 𑀫𑀫𑀸’’𑀢𑀺𑀆𑀤𑀺𑀦𑀸 𑀢𑀡𑁆𑀳𑀸𑀤𑀺𑀕𑁆𑀕𑀸𑀳𑀯𑀲𑁂𑀦 𑀉𑀧𑀸𑀤𑀺𑀬𑀺𑀢𑁆𑀯𑀸 𑀢𑀡𑁆𑀳𑀸𑀧𑀭𑀺𑀢𑀸𑀲𑀸𑀤𑀺𑀯𑀲𑁂𑀦 𑀧𑀭𑀺𑀢𑀲𑁆𑀲𑀦𑀸, 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀅𑀕𑁆𑀕𑀳𑁂𑀢𑁆𑀯𑀸 𑀅𑀧𑀭𑀺𑀢𑀲𑁆𑀲𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀓𑀣𑀁 𑀧𑀦𑁂𑀲𑀸 𑀅𑀦𑀼𑀧𑀸𑀤𑀸𑀧𑀭𑀺𑀢𑀲𑁆𑀲𑀦𑀸 𑀳𑁄𑀢𑀻𑀢𑀺 𑀫𑀳𑀸𑀣𑁂𑀭𑀲𑁆𑀲 𑀅𑀥𑀺𑀧𑁆𑀧𑀸𑀬𑀁 𑀯𑀺𑀯𑀭𑀺𑀢𑀼𑀁 𑀘𑁄𑀤𑀦𑀁 𑀲𑀫𑀼𑀝𑁆𑀞𑀧𑁂𑀢𑀺? 𑀉𑀧𑀸𑀤𑀸𑀢𑀩𑁆𑀩𑀲𑁆𑀲 𑀅𑀪𑀸𑀯𑀢𑁄𑀢𑀺 𑀢𑀲𑁆𑀲 𑀅𑀦𑀼𑀧𑀸𑀤𑀸𑀧𑀭𑀺𑀢𑀲𑁆𑀲𑀦𑀸𑀪𑀸𑀯𑁂 𑀓𑀸𑀭𑀡𑀯𑀘𑀦𑀁. 𑀬𑀤𑀺 𑀳𑀻𑀢𑀺𑀆𑀤𑀺 𑀢𑀲𑁆𑀲 𑀲𑀫𑀢𑁆𑀣𑀦𑀁. 𑀉𑀧𑀸𑀤𑀸𑀧𑀭𑀺𑀢𑀲𑁆𑀲𑀦𑀸𑀯 𑀅𑀲𑁆𑀲 𑀢𑀣𑀸 𑀉𑀧𑀸𑀤𑀸𑀢𑀩𑁆𑀩𑀲𑁆𑀲 𑀢𑀣𑁂𑀯 𑀉𑀧𑀸𑀤𑀺𑀦𑁆𑀦𑀢𑁆𑀢𑀸. 𑀏𑀯𑀦𑁆𑀢𑀺 𑀦𑀺𑀘𑁆𑀘𑀸𑀤𑀺𑀆𑀓𑀸𑀭𑁂𑀦. 𑀉𑀧𑀸𑀤𑀺𑀦𑁆𑀦𑀸𑀧𑀻𑀢𑀺 𑀕𑀳𑀺𑀢𑀧𑀭𑀸𑀫𑀝𑁆𑀞𑀸𑀧𑀺. 𑀅𑀦𑀼𑀧𑀸𑀤𑀺𑀦𑁆𑀦𑀸𑀯 𑀳𑁄𑀦𑁆𑀢𑀺 𑀅𑀬𑁄𑀦𑀺𑀲𑁄 𑀕𑀳𑀺𑀢𑀢𑁆𑀢𑀸, 𑀯𑀺𑀜𑁆𑀜𑀽𑀲𑀼 𑀦𑀺𑀲𑁆𑀲𑀸𑀬 𑀚𑀸𑀦𑀺𑀢𑀩𑁆𑀩𑀢𑁆𑀢𑀸 𑀘. 𑀤𑀺𑀝𑁆𑀞𑀺𑀯𑀲𑁂𑀦𑀸𑀢𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸 𑀕𑀳𑀡𑀸𑀓𑀸𑀭𑀯𑀲𑁂𑀦, 𑀢𑀲𑁆𑀲 𑀧𑀦 𑀅𑀬𑀣𑀸𑀪𑀽𑀢𑀕𑀸𑀳𑀺𑀢𑀸𑀬 𑀧𑀭𑀫𑀢𑁆𑀣𑀢𑁄 𑀘 𑀅𑀪𑀸𑀯𑀢𑁄. 𑀅𑀢𑁆𑀣𑀢𑁄𑀢𑀺 𑀧𑀭𑀫𑀢𑁆𑀣𑀢𑁄. 𑀅𑀦𑀼𑀧𑀸𑀤𑀸𑀧𑀭𑀺𑀢𑀲𑁆𑀲𑀦𑀸𑀬𑁂𑀯 𑀦𑀸𑀫 𑀳𑁄𑀢𑀺 𑀉𑀧𑀸𑀤𑀸𑀢𑀩𑁆𑀩𑀸𑀓𑀸𑀭𑀲𑁆𑀲 𑀅𑀪𑀸𑀯𑁂𑀦 𑀢𑀁 𑀅𑀦𑀼𑀧𑀸𑀤𑀺𑀬𑀺𑀢𑁆𑀯𑀸 𑀏𑀯 𑀧𑀭𑀺𑀢𑀲𑁆𑀲𑀦𑀸𑀢𑀺 𑀓𑀢𑁆𑀯𑀸.

𑀧𑀭𑀺𑀯𑀢𑁆𑀢𑀢𑀻𑀢𑀺 𑀦 𑀢𑀤𑁂𑀯 𑀭𑀽𑀧𑀁 𑀅𑀜𑁆𑀜𑀣𑀸 𑀧𑀯𑀢𑁆𑀢𑀁 𑀧𑀭𑀺𑀯𑀢𑁆𑀢𑀢𑀺, 𑀅𑀣 𑀔𑁄 𑀧𑀓𑀢𑀺𑀚𑀳𑀦𑁂𑀦 𑀲𑀪𑀸𑀯𑀯𑀺𑀕𑀫𑁂𑀦 𑀦𑀲𑁆𑀲𑀢𑀺 𑀪𑀺𑀚𑁆𑀚𑀢𑀺. 𑀯𑀺𑀧𑀭𑀺𑀡𑀢𑀦𑁆𑀢𑀺 𑀅𑀜𑁆𑀜𑀣𑀢𑁆𑀢𑀁 𑀕𑀢𑀁 𑀯𑀺𑀦𑀝𑁆𑀞𑀁. 𑀓𑀫𑁆𑀫𑀯𑀺𑀜𑁆𑀜𑀸𑀡𑀦𑁆𑀢𑀺 𑀅𑀪𑀺𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀁. ‘‘𑀭𑀽𑀧𑀁 𑀅𑀢𑁆𑀢𑀸’’𑀢𑀺𑀆𑀤𑀺 𑀫𑀺𑀘𑁆𑀙𑀸𑀕𑀸𑀳𑀯𑀲𑁂𑀦 𑀯𑀺𑀜𑁆𑀜𑀸𑀡𑀲𑁆𑀲 𑀭𑀽𑀧𑀪𑁂𑀤𑁂𑀦 𑀯𑀼𑀢𑁆𑀢𑀲𑁆𑀲 𑀪𑁂𑀤𑀸𑀦𑀼𑀧𑀭𑀺𑀯𑀢𑁆𑀢𑀺 𑀳𑁄𑀢𑀺. 𑀯𑀺𑀧𑀭𑀺𑀡𑀸𑀫𑀁 𑀅𑀦𑀼𑀕𑀦𑁆𑀢𑁆𑀯𑀸 𑀯𑀺𑀧𑀭𑀺𑀯𑀢𑁆𑀢𑀦𑀢𑀁 𑀆𑀭𑀩𑁆𑀪 𑀧𑀯𑀢𑁆𑀢𑀁 𑀯𑀺𑀧𑀭𑀺𑀡𑀸𑀫𑀸𑀦𑀼𑀧𑀭𑀺𑀯𑀢𑁆𑀢𑀁; 𑀢𑀢𑁄 𑀲𑀫𑀼𑀧𑁆𑀧𑀦𑁆𑀦𑀸 𑀧𑀭𑀺𑀢𑀲𑁆𑀲𑀦𑀸 𑀯𑀺𑀧𑀭𑀺𑀡𑀸𑀫𑀸𑀦𑀼𑀧𑀭𑀺𑀯𑀢𑁆𑀢𑀚𑀸 𑀧𑀭𑀺𑀢𑀲𑁆𑀲𑀦𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 𑁋 ‘‘𑀯𑀺𑀧𑀭𑀺𑀡𑀸𑀫𑀲𑁆𑀲…𑀧𑁂… 𑀧𑀭𑀺𑀢𑀲𑁆𑀲𑀦𑀸’’𑀢𑀺. 𑀅𑀓𑀼𑀲𑀮𑀥𑀫𑁆𑀫𑀲𑀫𑀼𑀧𑁆𑀧𑀸𑀤𑀸 𑀘𑀸𑀢𑀺, ‘‘𑀬𑀁 𑀅𑀳𑀼 𑀯𑀢 𑀫𑁂, 𑀢𑀁 𑀯𑀢 𑀫𑁂 𑀦𑀢𑁆𑀣𑀻’’𑀢𑀺𑀆𑀤𑀺𑀦𑀸 𑀧𑀯𑀢𑁆𑀢𑀸 𑀅𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑀥𑀫𑁆𑀫𑀸. 𑀔𑁂𑀧𑁂𑀢𑁆𑀯𑀸𑀢𑀺 𑀧𑀯𑀢𑁆𑀢𑀺𑀢𑀼𑀁 𑀅𑀧𑁆𑀧𑀤𑀸𑀦𑀯𑀲𑁂𑀦 𑀅𑀦𑀼𑀧𑁆𑀧𑀢𑁆𑀢𑀺𑀦𑀺𑀫𑀺𑀢𑁆𑀢𑀢𑀸𑀬 𑀔𑁂𑀧𑁂𑀢𑁆𑀯𑀸. 𑀪𑀬𑀢𑀸𑀲𑁂𑀦𑀸𑀢𑀺 𑀪𑀸𑀬𑀦𑀯𑀲𑁂𑀦𑀧𑀺 𑀘𑀺𑀢𑁆𑀢𑀼𑀢𑁆𑀭𑀸𑀲𑁂𑀦. 𑀢𑀡𑁆𑀳𑀸𑀢𑀸𑀲𑁂𑀦𑀸𑀢𑀺 𑀢𑀲𑁆𑀲𑀦𑁂𑀦. 𑀲𑀯𑀺𑀖𑀸𑀢𑁄𑀢𑀺 𑀘𑀺𑀢𑁆𑀢𑀯𑀺𑀖𑀸𑀢𑀦𑀯𑀺𑀖𑀸𑀢𑁂𑀦 𑀲𑀯𑀺𑀖𑀸𑀢𑁄. 𑀢𑀢𑁄 𑀏𑀯 𑀘𑁂𑀢𑁄𑀤𑀼𑀓𑁆𑀔𑁂𑀦 𑀲𑀤𑀼𑀓𑁆𑀔𑁄. 𑀫𑀡𑀺𑀓𑀭𑀡𑁆𑀟𑀓𑀲𑀜𑁆𑀜𑀸𑀬𑀸𑀢𑀺 𑀭𑀺𑀢𑁆𑀢𑀓𑀭𑀡𑁆𑀟𑀁𑀬𑁂𑀯 𑀫𑀡𑀺𑀧𑀭𑀺𑀧𑀼𑀡𑁆𑀡𑀓𑀭𑀡𑁆𑀟𑁄𑀢𑀺 𑀉𑀧𑁆𑀧𑀦𑁆𑀦𑀲𑀜𑁆𑀜𑀸𑀬. 𑀅𑀕𑁆𑀕𑀳𑁂𑀢𑁆𑀯𑀸 𑀧𑀭𑀺𑀢𑀲𑁆𑀲𑀦𑀸𑀢𑀺 𑀕𑀳𑁂𑀢𑀩𑁆𑀩𑀲𑁆𑀲 𑀅𑀪𑀸𑀯𑁂𑀦 𑀕𑀳𑀡𑀫𑁆𑀧𑀺 𑀅𑀯𑀺𑀚𑁆𑀚𑀫𑀸𑀦𑀧𑀓𑁆𑀔𑀺𑀬𑀫𑁂𑀯𑀸𑀢𑀺 𑀅𑀕𑁆𑀕𑀳𑁂𑀢𑁆𑀯𑀸 𑀧𑀭𑀺𑀢𑀲𑁆𑀲𑀦𑀸 𑀦𑀸𑀫 𑀳𑁄𑀢𑀺.

𑁩𑁨𑁧. 𑀓𑀫𑁆𑀫𑀯𑀺𑀜𑁆𑀜𑀸𑀡𑀫𑁂𑀯 𑀦𑀢𑁆𑀣𑀺 𑀲𑀢𑀺 𑀓𑀫𑁆𑀫𑀯𑀺𑀜𑁆𑀜𑀸𑀡𑁂 𑀭𑀽𑀧𑀪𑁂𑀤𑀸𑀦𑀼𑀧𑀭𑀺𑀯𑀢𑁆𑀢𑀺 𑀲𑀺𑀬𑀸𑀢𑀺 𑀓𑀫𑁆𑀫𑀯𑀺𑀜𑁆𑀜𑀸𑀡𑀸𑀪𑀸𑀯𑀤𑀲𑁆𑀲𑀦𑀫𑀼𑀔𑁂𑀦 𑀔𑀻𑀡𑀸𑀲𑀯𑀲𑁆𑀲 𑀲𑀩𑁆𑀩𑀲𑁄 𑀓𑀺𑀮𑁂𑀲𑀸𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀉𑀤𑁆𑀤𑁂𑀲𑀯𑀺𑀪𑀗𑁆𑀕𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.